(𑁩𑁦) 𑀲𑀻𑀳𑀳𑀦𑀼𑀮𑀓𑁆𑀔𑀡𑀁

𑁨𑁩𑁮. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀅𑀳𑁄𑀲𑀺 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻, 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀅𑀳𑁄𑀲𑀺 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀝𑀺𑀮𑀪𑀢𑀺, 𑀲𑀻𑀳𑀳𑀦𑀼 𑀳𑁄𑀢𑀺.

‘‘𑀲𑁄 𑀢𑁂𑀦 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀧𑁆𑀧𑀥𑀁𑀲𑀺𑀬𑁄 𑀳𑁄𑀢𑀺 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺… 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀧𑁆𑀧𑀥𑀁𑀲𑀺𑀬𑁄 𑀳𑁄𑀢𑀺 𑀅𑀩𑁆𑀪𑀦𑁆𑀢𑀭𑁂𑀳𑀺 𑀯𑀸 𑀩𑀸𑀳𑀺𑀭𑁂𑀳𑀺 𑀯𑀸 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀧𑀘𑁆𑀘𑀸𑀫𑀺𑀢𑁆𑀢𑁂𑀳𑀺, 𑀭𑀸𑀕𑁂𑀦 𑀯𑀸 𑀤𑁄𑀲𑁂𑀦 𑀯𑀸 𑀫𑁄𑀳𑁂𑀦 𑀯𑀸 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁩𑁯. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀦 𑀲𑀫𑁆𑀨𑀧𑁆𑀧𑀮𑀸𑀧𑀁 𑀦 𑀫𑀼𑀤𑁆𑀥𑀢𑀁 [𑀩𑀼𑀤𑁆𑀥𑀢𑀦𑁆𑀢𑀺 (𑀓.)],

𑀅𑀯𑀺𑀓𑀺𑀡𑁆𑀡𑀯𑀘𑀦𑀩𑁆𑀬𑀧𑁆𑀧𑀣𑁄 𑀅𑀳𑁄𑀲𑀺;

𑀅𑀳𑀺𑀢𑀫𑀧𑀺 𑀘 𑀅𑀧𑀦𑀼𑀤𑀺,

𑀳𑀺𑀢𑀫𑀧𑀺 𑀘 𑀩𑀳𑀼𑀚𑀦𑀲𑀼𑀔𑀜𑁆𑀘 𑀅𑀪𑀡𑀺.

‘‘𑀢𑀁 𑀓𑀢𑁆𑀯𑀸 𑀇𑀢𑁄 𑀘𑀼𑀢𑁄 𑀤𑀺𑀯𑀫𑀼𑀧𑀧𑀚𑁆𑀚𑀺,

𑀲𑀼𑀓𑀢𑀨𑀮𑀯𑀺𑀧𑀸𑀓𑀫𑀦𑀼𑀪𑁄𑀲𑀺;

𑀘𑀯𑀺𑀬 𑀧𑀼𑀦𑀭𑀺𑀥𑀸𑀕𑀢𑁄 𑀲𑀫𑀸𑀦𑁄,

𑀤𑁆𑀯𑀺𑀤𑀼𑀕𑀫𑀯𑀭𑀢𑀭𑀳𑀦𑀼𑀢𑁆𑀢𑀫𑀮𑀢𑁆𑀣.

‘‘𑀭𑀸𑀚𑀸 𑀳𑁄𑀢𑀺 𑀲𑀼𑀤𑀼𑀧𑁆𑀧𑀥𑀁𑀲𑀺𑀬𑁄,

𑀫𑀦𑀼𑀚𑀺𑀦𑁆𑀤𑁄 𑀫𑀦𑀼𑀚𑀸𑀥𑀺𑀧𑀢𑀺 𑀫𑀳𑀸𑀦𑀼𑀪𑀸𑀯𑁄;

𑀢𑀺𑀤𑀺𑀯𑀧𑀼𑀭𑀯𑀭𑀲𑀫𑁄 𑀪𑀯𑀢𑀺,

𑀲𑀼𑀭𑀯𑀭𑀢𑀭𑁄𑀭𑀺𑀯 𑀇𑀦𑁆𑀤𑁄.

‘‘𑀕𑀦𑁆𑀥𑀩𑁆𑀩𑀸𑀲𑀼𑀭𑀬𑀓𑁆𑀔𑀭𑀓𑁆𑀔𑀲𑁂𑀪𑀺 [𑀲𑀼𑀭𑀲𑀓𑁆𑀓𑀭𑀓𑁆𑀔𑀲𑁂𑀪𑀺 (𑀲𑁆𑀬𑀸.)],

𑀲𑀼𑀭𑁂𑀳𑀺 𑀦 𑀳𑀺 𑀪𑀯𑀢𑀺 𑀲𑀼𑀧𑁆𑀧𑀥𑀁𑀲𑀺𑀬𑁄;

𑀢𑀣𑀢𑁆𑀢𑁄 𑀬𑀤𑀺 𑀪𑀯𑀢𑀺 𑀢𑀣𑀸𑀯𑀺𑀥𑁄,

𑀇𑀥 𑀤𑀺𑀲𑀸 𑀘 𑀧𑀝𑀺𑀤𑀺𑀲𑀸 𑀘 𑀯𑀺𑀤𑀺𑀲𑀸 𑀘𑀸’’𑀢𑀺.