(𑁧𑁭-𑁧𑁯) 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑀸𑀤𑀺𑀢𑀺𑀮𑀓𑁆𑀔𑀡𑀁

𑁨𑁨𑁪. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀩𑀳𑀼𑀚𑀦𑀲𑁆𑀲 𑀅𑀢𑁆𑀣𑀓𑀸𑀫𑁄 𑀅𑀳𑁄𑀲𑀺 𑀳𑀺𑀢𑀓𑀸𑀫𑁄 𑀨𑀸𑀲𑀼𑀓𑀸𑀫𑁄 𑀬𑁄𑀕𑀓𑁆𑀔𑁂𑀫𑀓𑀸𑀫𑁄 𑁋 ‘𑀓𑀺𑀦𑁆𑀢𑀺𑀫𑁂 𑀲𑀤𑁆𑀥𑀸𑀬 𑀯𑀟𑁆𑀠𑁂𑀬𑁆𑀬𑀼𑀁, 𑀲𑀻𑀮𑁂𑀦 𑀯𑀟𑁆𑀠𑁂𑀬𑁆𑀬𑀼𑀁, 𑀲𑀼𑀢𑁂𑀦 𑀯𑀟𑁆𑀠𑁂𑀬𑁆𑀬𑀼𑀁 [𑀲𑀼𑀢𑁂𑀦 𑀯𑀟𑁆𑀠𑁂𑀬𑁆𑀬𑀼𑀁, 𑀩𑀼𑀤𑁆𑀥𑀺𑀬𑀸 𑀯𑀟𑁆𑀠𑁂𑀬𑁆𑀬𑀼𑀁 (𑀲𑁆𑀬𑀸.)], 𑀘𑀸𑀕𑁂𑀦 𑀯𑀟𑁆𑀠𑁂𑀬𑁆𑀬𑀼𑀁, 𑀥𑀫𑁆𑀫𑁂𑀦 𑀯𑀟𑁆𑀠𑁂𑀬𑁆𑀬𑀼𑀁, 𑀧𑀜𑁆𑀜𑀸𑀬 𑀯𑀟𑁆𑀠𑁂𑀬𑁆𑀬𑀼𑀁, 𑀥𑀦𑀥𑀜𑁆𑀜𑁂𑀦 𑀯𑀟𑁆𑀠𑁂𑀬𑁆𑀬𑀼𑀁, 𑀔𑁂𑀢𑁆𑀢𑀯𑀢𑁆𑀣𑀼𑀦𑀸 𑀯𑀟𑁆𑀠𑁂𑀬𑁆𑀬𑀼𑀁, 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑁂𑀳𑀺 𑀯𑀟𑁆𑀠𑁂𑀬𑁆𑀬𑀼𑀁, 𑀧𑀼𑀢𑁆𑀢𑀤𑀸𑀭𑁂𑀳𑀺 𑀯𑀟𑁆𑀠𑁂𑀬𑁆𑀬𑀼𑀁, 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂𑀳𑀺 𑀯𑀟𑁆𑀠𑁂𑀬𑁆𑀬𑀼𑀁, 𑀜𑀸𑀢𑀻𑀳𑀺 𑀯𑀟𑁆𑀠𑁂𑀬𑁆𑀬𑀼𑀁, 𑀫𑀺𑀢𑁆𑀢𑁂𑀳𑀺 𑀯𑀟𑁆𑀠𑁂𑀬𑁆𑀬𑀼𑀁, 𑀩𑀦𑁆𑀥𑀯𑁂𑀳𑀺 𑀯𑀟𑁆𑀠𑁂𑀬𑁆𑀬𑀼’𑀦𑁆𑀢𑀺. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀸𑀦𑀺 𑀢𑀻𑀡𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀮𑀪𑀢𑀺. 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄 𑀘 𑀳𑁄𑀢𑀺 𑀘𑀺𑀢𑀦𑁆𑀢𑀭𑀁𑀲𑁄 𑀘 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄 𑀘.

‘‘𑀲𑁄 𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀧𑀭𑀺𑀳𑀸𑀦𑀥𑀫𑁆𑀫𑁄 𑀳𑁄𑀢𑀺, 𑀦 𑀧𑀭𑀺𑀳𑀸𑀬𑀢𑀺 𑀥𑀦𑀥𑀜𑁆𑀜𑁂𑀦 𑀔𑁂𑀢𑁆𑀢𑀯𑀢𑁆𑀣𑀼𑀦𑀸 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑁂𑀳𑀺 𑀧𑀼𑀢𑁆𑀢𑀤𑀸𑀭𑁂𑀳𑀺 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂𑀳𑀺 𑀜𑀸𑀢𑀻𑀳𑀺 𑀫𑀺𑀢𑁆𑀢𑁂𑀳𑀺 𑀩𑀦𑁆𑀥𑀯𑁂𑀳𑀺, 𑀦 𑀧𑀭𑀺𑀳𑀸𑀬𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺… 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀧𑀭𑀺𑀳𑀸𑀦𑀥𑀫𑁆𑀫𑁄 𑀳𑁄𑀢𑀺, 𑀦 𑀧𑀭𑀺𑀳𑀸𑀬𑀢𑀺 𑀲𑀤𑁆𑀥𑀸𑀬 𑀲𑀻𑀮𑁂𑀦 𑀲𑀼𑀢𑁂𑀦 𑀘𑀸𑀕𑁂𑀦 𑀧𑀜𑁆𑀜𑀸𑀬, 𑀦 𑀧𑀭𑀺𑀳𑀸𑀬𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁨𑁫. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀤𑁆𑀥𑀸𑀬 𑀲𑀻𑀮𑁂𑀦 𑀲𑀼𑀢𑁂𑀦 𑀩𑀼𑀤𑁆𑀥𑀺𑀬𑀸,

𑀘𑀸𑀕𑁂𑀦 𑀥𑀫𑁆𑀫𑁂𑀦 𑀩𑀳𑀽𑀳𑀺 𑀲𑀸𑀥𑀼𑀳𑀺;

𑀥𑀦𑁂𑀦 𑀥𑀜𑁆𑀜𑁂𑀦 𑀘 𑀔𑁂𑀢𑁆𑀢𑀯𑀢𑁆𑀣𑀼𑀦𑀸,

𑀧𑀼𑀢𑁆𑀢𑁂𑀳𑀺 𑀤𑀸𑀭𑁂𑀳𑀺 𑀘𑀢𑀼𑀧𑁆𑀧𑀤𑁂𑀳𑀺 𑀘.

‘‘𑀜𑀸𑀢𑀻𑀳𑀺 𑀫𑀺𑀢𑁆𑀢𑁂𑀳𑀺 𑀘 𑀩𑀦𑁆𑀥𑀯𑁂𑀳𑀺 𑀘,

𑀩𑀮𑁂𑀦 𑀯𑀡𑁆𑀡𑁂𑀦 𑀲𑀼𑀔𑁂𑀦 𑀘𑀽𑀪𑀬𑀁;

𑀓𑀣𑀁 𑀦 𑀳𑀸𑀬𑁂𑀬𑁆𑀬𑀼𑀁 𑀧𑀭𑁂𑀢𑀺 𑀇𑀘𑁆𑀙𑀢𑀺,

𑀅𑀢𑁆𑀣𑀲𑁆𑀲 𑀫𑀺𑀤𑁆𑀥𑀻 𑀘 [𑀇𑀤𑀁 𑀲𑀫𑀺𑀤𑁆𑀥𑀜𑁆𑀘 (𑀓.), 𑀅𑀤𑁆𑀥𑀁 𑀲𑀫𑀺𑀤𑁆𑀥𑀜𑁆𑀘 (𑀲𑁆𑀬𑀸.)] 𑀧𑀦𑀸𑀪𑀺𑀓𑀗𑁆𑀔𑀢𑀺.

‘‘𑀲 𑀲𑀻𑀳𑀧𑀼𑀩𑁆𑀩𑀤𑁆𑀥𑀲𑀼𑀲𑀡𑁆𑀞𑀺𑀢𑁄 𑀅𑀳𑀼,

𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄 𑀘 𑀘𑀺𑀢𑀦𑁆𑀢𑀭𑀁𑀲𑁄;

𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑁂𑀦 𑀓𑀢𑁂𑀦 𑀓𑀫𑁆𑀫𑀼𑀦𑀸,

𑀅𑀳𑀸𑀦𑀺𑀬𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀫𑀲𑁆𑀲 𑀢𑀁.

‘‘𑀕𑀺𑀳𑀻𑀧𑀺 𑀥𑀜𑁆𑀜𑁂𑀦 𑀥𑀦𑁂𑀦 𑀯𑀟𑁆𑀠𑀢𑀺,

𑀧𑀼𑀢𑁆𑀢𑁂𑀳𑀺 𑀤𑀸𑀭𑁂𑀳𑀺 𑀘𑀢𑀼𑀧𑁆𑀧𑀤𑁂𑀳𑀺 𑀘;

𑀅𑀓𑀺𑀜𑁆𑀘𑀦𑁄 𑀧𑀩𑁆𑀩𑀚𑀺𑀢𑁄 𑀅𑀦𑀼𑀢𑁆𑀢𑀭𑀁,

𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀅𑀲𑀳𑀸𑀦𑀥𑀫𑁆𑀫𑀢’’𑀦𑁆𑀢𑀺 [𑀲𑀫𑁆𑀩𑁄𑀥𑀺𑀫𑀳𑀸𑀦𑀥𑀫𑁆𑀫𑀢𑀦𑁆𑀢𑀺 (𑀲𑁆𑀬𑀸. 𑀓.) 𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸].