(𑁨𑁦) 𑀭𑀲𑀕𑁆𑀕𑀲𑀕𑁆𑀕𑀺𑀢𑀸𑀮𑀓𑁆𑀔𑀡𑀁

𑁨𑁨𑁬. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀢𑁆𑀢𑀸𑀦𑀁 𑀅𑀯𑀺𑀳𑁂𑀞𑀓𑀚𑀸𑀢𑀺𑀓𑁄 𑀅𑀳𑁄𑀲𑀺 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀝𑀺𑀮𑀪𑀢𑀺, 𑀭𑀲𑀕𑁆𑀕𑀲𑀕𑁆𑀕𑀻 𑀳𑁄𑀢𑀺, 𑀉𑀤𑁆𑀥𑀕𑁆𑀕𑀸𑀲𑁆𑀲 𑀭𑀲𑀳𑀭𑀡𑀻𑀬𑁄 𑀕𑀻𑀯𑀸𑀬 𑀚𑀸𑀢𑀸 𑀳𑁄𑀦𑁆𑀢𑀺 𑀲𑀫𑀸𑀪𑀺𑀯𑀸𑀳𑀺𑀦𑀺𑀬𑁄 [𑀲𑀫𑀯𑀸𑀳𑀭𑀲𑀳𑀭𑀡𑀺𑀬𑁄 (𑀲𑁆𑀬𑀸.)].

‘‘𑀲𑁄 𑀢𑁂𑀦 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺 𑀅𑀧𑁆𑀧𑀸𑀢𑀗𑁆𑀓𑁄, 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀦𑀸𑀢𑀺𑀲𑀻𑀢𑀸𑀬 𑀦𑀸𑀘𑁆𑀘𑀼𑀡𑁆𑀳𑀸𑀬. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺… 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺 𑀅𑀧𑁆𑀧𑀸𑀢𑀗𑁆𑀓𑁄 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀦𑀸𑀢𑀺𑀲𑀻𑀢𑀸𑀬 𑀦𑀸𑀘𑁆𑀘𑀼𑀡𑁆𑀳𑀸𑀬 𑀫𑀚𑁆𑀛𑀺𑀫𑀸𑀬 𑀧𑀥𑀸𑀦𑀓𑁆𑀔𑀫𑀸𑀬. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁨𑁭. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀦 𑀧𑀸𑀡𑀺𑀤𑀡𑁆𑀟𑁂𑀳𑀺 𑀧𑀦𑀸𑀣 𑀮𑁂𑀟𑁆𑀟𑀼𑀦𑀸,

𑀲𑀢𑁆𑀣𑁂𑀦 𑀯𑀸 𑀫𑀭𑀡𑀯𑀥𑁂𑀦 [𑀫𑀸𑀭𑀡𑀯𑀥𑁂𑀦 (𑀓.)] 𑀯𑀸 𑀧𑀦;

𑀉𑀩𑁆𑀩𑀸𑀥𑀦𑀸𑀬 𑀧𑀭𑀺𑀢𑀚𑁆𑀚𑀦𑀸𑀬 𑀯𑀸,

𑀦 𑀳𑁂𑀞𑀬𑀻 𑀚𑀦𑀢𑀫𑀳𑁂𑀞𑀓𑁄 𑀅𑀳𑀼.

‘‘𑀢𑁂𑀦𑁂𑀯 𑀲𑁄 𑀲𑀼𑀕𑀢𑀺𑀫𑀼𑀧𑁂𑀘𑁆𑀘 𑀫𑁄𑀤𑀢𑀺,

𑀲𑀼𑀔𑀧𑁆𑀨𑀮𑀁 𑀓𑀭𑀺𑀬 𑀲𑀼𑀔𑀸𑀦𑀺 𑀯𑀺𑀦𑁆𑀤𑀢𑀺;

𑀲𑀫𑁄𑀚𑀲𑀸 [𑀲𑀫𑁆𑀧𑀚𑁆𑀚𑀲𑀸 (𑀲𑀻. 𑀧𑀻.), 𑀧𑀸𑀫𑀼𑀜𑁆𑀚𑀲𑀸 (𑀲𑁆𑀬𑀸.), 𑀲𑀸𑀫𑀜𑁆𑀘 𑀲𑀸 (𑀓.)] 𑀭𑀲𑀳𑀭𑀡𑀻 𑀲𑀼𑀲𑀡𑁆𑀞𑀺𑀢𑀸,

𑀇𑀥𑀸𑀕𑀢𑁄 𑀮𑀪𑀢𑀺 𑀭𑀲𑀕𑁆𑀕𑀲𑀕𑁆𑀕𑀺𑀢𑀁.

‘‘𑀢𑁂𑀦𑀸𑀳𑀼 𑀦𑀁 𑀅𑀢𑀺𑀦𑀺𑀧𑀼𑀡𑀸 𑀯𑀺𑀘𑀓𑁆𑀔𑀡𑀸,

𑀅𑀬𑀁 𑀦𑀭𑁄 𑀲𑀼𑀔𑀩𑀳𑀼𑀮𑁄 𑀪𑀯𑀺𑀲𑁆𑀲𑀢𑀺;

𑀕𑀺𑀳𑀺𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀧𑀼𑀦 [𑀧𑀦 (𑀲𑁆𑀬𑀸.)],

𑀢𑀁 𑀮𑀓𑁆𑀔𑀡𑀁 𑀪𑀯𑀢𑀺 𑀢𑀤𑀢𑁆𑀣𑀚𑁄𑀢𑀓’’𑀦𑁆𑀢𑀺.