(𑁧𑁫-𑁧𑁬) 𑀧𑀭𑀺𑀫𑀡𑁆𑀟𑀮𑀅𑀦𑁄𑀦𑀫𑀚𑀡𑁆𑀡𑀼𑀧𑀭𑀺𑀫𑀲𑀦𑀮𑀓𑁆𑀔𑀡𑀸𑀦𑀺

𑁨𑁨𑁨. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀫𑀳𑀸𑀚𑀦𑀲𑀗𑁆𑀕𑀳𑀁 [𑀫𑀳𑀸𑀚𑀦𑀲𑀗𑁆𑀕𑀸𑀳𑀓𑀁 (𑀓.)] 𑀲𑀫𑁂𑀓𑁆𑀔𑀫𑀸𑀦𑁄 [𑀲𑀫𑀧𑁂𑀓𑁆𑀔𑀫𑀸𑀦𑁄 (𑀓.)] 𑀲𑀫𑀁 𑀚𑀸𑀦𑀸𑀢𑀺 𑀲𑀸𑀫𑀁 𑀚𑀸𑀦𑀸𑀢𑀺, 𑀧𑀼𑀭𑀺𑀲𑀁 𑀚𑀸𑀦𑀸𑀢𑀺 𑀧𑀼𑀭𑀺𑀲𑀯𑀺𑀲𑁂𑀲𑀁 𑀚𑀸𑀦𑀸𑀢𑀺 𑁋 ‘𑀅𑀬𑀫𑀺𑀤𑀫𑀭𑀳𑀢𑀺 𑀅𑀬𑀫𑀺𑀤𑀫𑀭𑀳𑀢𑀻’𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀼𑀭𑀺𑀲𑀯𑀺𑀲𑁂𑀲𑀓𑀭𑁄 𑀅𑀳𑁄𑀲𑀺. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀸𑀦𑀺 𑀤𑁆𑀯𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀮𑀪𑀢𑀺. 𑀦𑀺𑀕𑁆𑀭𑁄𑀥 𑀧𑀭𑀺𑀫𑀡𑁆𑀟𑀮𑁄 𑀘 𑀳𑁄𑀢𑀺, 𑀞𑀺𑀢𑀓𑁄𑀬𑁂𑀯 𑀘 𑀅𑀦𑁄𑀦𑀫𑀦𑁆𑀢𑁄 𑀉𑀪𑁄𑀳𑀺 𑀧𑀸𑀡𑀺𑀢𑀮𑁂𑀳𑀺 𑀚𑀡𑁆𑀡𑀼𑀓𑀸𑀦𑀺 𑀧𑀭𑀺𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺.

‘‘𑀲𑁄 𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀟𑁆𑀠𑁄 𑀳𑁄𑀢𑀺 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁄 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁄 𑀧𑀳𑀽𑀢𑀥𑀦𑀥𑀜𑁆𑀜𑁄 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺…𑀧𑁂… 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀟𑁆𑀠𑁄 𑀳𑁄𑀢𑀺 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄. 𑀢𑀲𑁆𑀲𑀺𑀫𑀸𑀦𑀺 𑀥𑀦𑀸𑀦𑀺 𑀳𑁄𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁, 𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁 𑀳𑀺𑀭𑀺𑀥𑀦𑀁 𑀑𑀢𑁆𑀢𑀧𑁆𑀧𑀥𑀦𑀁 𑀲𑀼𑀢𑀥𑀦𑀁 𑀘𑀸𑀕𑀥𑀦𑀁 𑀧𑀜𑁆𑀜𑀸𑀥𑀦𑀁. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁨𑁩. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀢𑀼𑀮𑀺𑀬 𑀧𑀝𑀺𑀯𑀺𑀘𑀬 𑀘𑀺𑀦𑁆𑀢𑀬𑀺𑀢𑁆𑀯𑀸,

𑀫𑀳𑀸𑀚𑀦𑀲𑀗𑁆𑀕𑀳𑀦𑀁 [𑀫𑀳𑀸𑀚𑀦𑀁 𑀲𑀗𑁆𑀕𑀸𑀳𑀓𑀁 (𑀓.)] 𑀲𑀫𑁂𑀓𑁆𑀔𑀫𑀸𑀦𑁄;

𑀅𑀬𑀫𑀺𑀤𑀫𑀭𑀳𑀢𑀺 𑀢𑀢𑁆𑀣 𑀢𑀢𑁆𑀣,

𑀧𑀼𑀭𑀺𑀲𑀯𑀺𑀲𑁂𑀲𑀓𑀭𑁄 𑀧𑀼𑀭𑁂 𑀅𑀳𑁄𑀲𑀺.

‘‘𑀫𑀳𑀺𑀜𑁆𑀘 𑀧𑀦 [𑀲𑀫𑀸 𑀘 𑀧𑀦 (𑀲𑁆𑀬𑀸.), 𑀲 𑀳𑀺 𑀘 𑀧𑀦 (𑀲𑀻. 𑀧𑀻.)] 𑀞𑀺𑀢𑁄 𑀅𑀦𑁄𑀦𑀫𑀦𑁆𑀢𑁄,

𑀨𑀼𑀲𑀢𑀺 𑀓𑀭𑁂𑀳𑀺 𑀉𑀪𑁄𑀳𑀺 𑀚𑀡𑁆𑀡𑀼𑀓𑀸𑀦𑀺;

𑀫𑀳𑀺𑀭𑀼𑀳𑀧𑀭𑀺𑀫𑀡𑁆𑀟𑀮𑁄 𑀅𑀳𑁄𑀲𑀺,

𑀲𑀼𑀘𑀭𑀺𑀢𑀓𑀫𑁆𑀫𑀯𑀺𑀧𑀸𑀓𑀲𑁂𑀲𑀓𑁂𑀦.

‘‘𑀩𑀳𑀼𑀯𑀺𑀯𑀺𑀥𑀦𑀺𑀫𑀺𑀢𑁆𑀢𑀮𑀓𑁆𑀔𑀡𑀜𑁆𑀜𑀽,

𑀅𑀢𑀺𑀦𑀺𑀧𑀼𑀡𑀸 𑀫𑀦𑀼𑀚𑀸 𑀩𑁆𑀬𑀸𑀓𑀭𑀺𑀁𑀲𑀼;

𑀩𑀳𑀼𑀯𑀺𑀯𑀺𑀥𑀸 𑀕𑀺𑀳𑀻𑀦𑀁 𑀅𑀭𑀳𑀸𑀦𑀺,

𑀧𑀝𑀺𑀮𑀪𑀢𑀺 𑀤𑀳𑀭𑁄 𑀲𑀼𑀲𑀼 𑀓𑀼𑀫𑀸𑀭𑁄.

‘‘𑀇𑀥 𑀘 𑀫𑀳𑀻𑀧𑀢𑀺𑀲𑁆𑀲 𑀓𑀸𑀫𑀪𑁄𑀕𑀻,

𑀕𑀺𑀳𑀺𑀧𑀢𑀺𑀭𑀽𑀧𑀓𑀸 𑀩𑀳𑀽 𑀪𑀯𑀦𑁆𑀢𑀺;

𑀬𑀤𑀺 𑀘 𑀚𑀳𑀢𑀺 𑀲𑀩𑁆𑀩𑀓𑀸𑀫𑀪𑁄𑀕𑀁,

𑀮𑀪𑀢𑀺 𑀅𑀦𑀼𑀢𑁆𑀢𑀭𑀁 𑀉𑀢𑁆𑀢𑀫𑀥𑀦𑀕𑁆𑀕’’𑀦𑁆𑀢𑀺.