𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀁

𑀘𑁄𑀤𑀦𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸

𑁩𑁫𑁯. 𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀬𑀁 𑀘𑁄𑀤𑀦𑀸𑀢𑀺 𑀯𑀢𑁆𑀣𑀼𑀜𑁆𑀘 𑀆𑀧𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀘𑁄𑀤𑀦𑀸. 𑀲𑀸𑀭𑀡𑀸𑀢𑀺 𑀤𑁄𑀲𑀲𑀸𑀭𑀡𑀸. 𑀲𑀗𑁆𑀖𑁄 𑀓𑀺𑀫𑀢𑁆𑀣𑀸𑀬𑀸𑀢𑀺 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁄 𑀓𑀺𑀫𑀢𑁆𑀣𑀸𑀬. 𑀫𑀢𑀺𑀓𑀫𑁆𑀫𑀁 𑀧𑀦 𑀓𑀺𑀲𑁆𑀲 𑀓𑀸𑀭𑀡𑀸𑀢𑀺 𑀫𑀢𑀺𑀓𑀫𑁆𑀫𑀁 𑀯𑀼𑀘𑁆𑀘𑀢𑀺 𑀫𑀦𑁆𑀢𑀕𑁆𑀕𑀳𑀡𑀁; 𑀢𑀁 𑀓𑀺𑀲𑁆𑀲 𑀓𑀸𑀭𑀡𑀸𑀢𑀺 𑀅𑀢𑁆𑀣𑁄.

𑀘𑁄𑀤𑀦𑀸 𑀲𑀸𑀭𑀡𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀘𑁄𑀤𑀦𑀸, 𑀢𑁂𑀦 𑀘𑀼𑀤𑀺𑀢𑀓𑀧𑀼𑀕𑁆𑀕𑀮𑁂𑀦 𑀘𑁄𑀤𑀓𑀤𑁄𑀲𑀲𑀸𑀭𑀡𑀢𑁆𑀣𑀸𑀬. 𑀦𑀺𑀕𑁆𑀕𑀳𑀢𑁆𑀣𑀸𑀬 𑀲𑀸𑀭𑀡𑀸𑀢𑀺 𑀤𑁄𑀲𑀲𑀸𑀭𑀡𑀸 𑀧𑀦 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀕𑁆𑀕𑀳𑀢𑁆𑀣𑀸𑀬. 𑀲𑀗𑁆𑀖𑁄 𑀧𑀭𑀺𑀕𑁆𑀕𑀳𑀢𑁆𑀣𑀸𑀬𑀸𑀢𑀺 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁄 𑀲𑀗𑁆𑀖𑁄 𑀯𑀺𑀦𑀺𑀘𑁆𑀙𑀬𑀧𑀭𑀺𑀕𑁆𑀕𑀳𑀡𑀢𑁆𑀣𑀸𑀬; 𑀥𑀫𑁆𑀫𑀸𑀥𑀫𑁆𑀫𑀁 𑀢𑀼𑀮𑀦𑀢𑁆𑀣𑀸𑀬 𑀲𑀼𑀯𑀺𑀦𑀺𑀘𑁆𑀙𑀺𑀢𑀤𑀼𑀩𑁆𑀩𑀺𑀦𑀺𑀘𑁆𑀙𑀺𑀢𑀁 𑀚𑀸𑀦𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀫𑀢𑀺𑀓𑀫𑁆𑀫𑀁 𑀧𑀦 𑀧𑀸𑀝𑀺𑀬𑁂𑀓𑁆𑀓𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑀸𑀦𑀜𑁆𑀘 𑀯𑀺𑀦𑀬𑀥𑀭𑀢𑁆𑀣𑁂𑀭𑀸𑀦𑀜𑁆𑀘 𑀫𑀦𑁆𑀢𑀕𑁆𑀕𑀳𑀡𑀁 𑀧𑀸𑀝𑁂𑀓𑁆𑀓𑀁 𑀧𑀸𑀝𑁂𑀓𑁆𑀓𑀁 𑀯𑀺𑀦𑀺𑀘𑁆𑀙𑀬𑀲𑀦𑁆𑀦𑀺𑀝𑁆𑀞𑀸𑀧𑀦𑀢𑁆𑀣𑀁.

𑀫𑀸 𑀔𑁄 𑀧𑀝𑀺𑀖𑀦𑁆𑀢𑀺 𑀘𑀼𑀤𑀺𑀢𑀓𑁂 𑀯𑀸 𑀘𑁄𑀤𑀓𑁂 𑀯𑀸 𑀓𑁄𑀧𑀁 𑀫𑀸 𑀚𑀦𑀬𑀺. 𑀲𑀘𑁂 𑀅𑀦𑀼𑀯𑀺𑀚𑁆𑀚𑀓𑁄 𑀢𑀼𑀯𑀦𑁆𑀢𑀺 𑀲𑀘𑁂 𑀢𑁆𑀯𑀁 𑀲𑀗𑁆𑀖𑀫𑀚𑁆𑀛𑁂 𑀑𑀢𑀺𑀡𑁆𑀡𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀢𑀼𑀁 𑀦𑀺𑀲𑀺𑀦𑁆𑀦𑁄 𑀯𑀺𑀦𑀬𑀥𑀭𑁄.

𑀯𑀺𑀕𑁆𑀕𑀸𑀳𑀺𑀓𑀦𑁆𑀢𑀺 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁. 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀬𑀸 𑀅𑀦𑀢𑁆𑀣𑀁 𑀚𑀦𑀬𑀢𑀺, 𑀧𑀭𑀺𑀲𑀁 𑀔𑁄𑀪𑁂𑀢𑁆𑀯𑀸 𑀉𑀝𑁆𑀞𑀸𑀧𑁂𑀢𑀺, 𑀏𑀯𑀭𑀽𑀧𑀺𑀁 𑀓𑀣𑀁 𑀫𑀸 𑀅𑀪𑀡𑀺. 𑀲𑀼𑀢𑁆𑀢𑁂 𑀯𑀺𑀦𑀬𑁂 𑀯𑀸𑀢𑀺𑀆𑀤𑀻𑀲𑀼 𑀲𑀼𑀢𑁆𑀢𑀁 𑀦𑀸𑀫 𑀉𑀪𑀢𑁄𑀯𑀺𑀪𑀗𑁆𑀕𑁄. 𑀯𑀺𑀦𑀬𑁄 𑀦𑀸𑀫 𑀔𑀦𑁆𑀥𑀓𑁄. 𑀅𑀦𑀼𑀮𑁄𑀫𑁄 𑀦𑀸𑀫 𑀧𑀭𑀺𑀯𑀸𑀭𑁄. 𑀧𑀜𑁆𑀜𑀢𑁆𑀢𑀁 𑀦𑀸𑀫 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁. 𑀅𑀦𑀼𑀮𑁄𑀫𑀺𑀓𑀁 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸.

𑀅𑀦𑀼𑀬𑁄𑀕𑀯𑀢𑁆𑀢𑀁 𑀦𑀺𑀲𑀸𑀫𑀬𑀸𑀢𑀺 𑀅𑀦𑀼𑀬𑀼𑀜𑁆𑀚𑀦𑀯𑀢𑁆𑀢𑀁 𑀦𑀺𑀲𑀸𑀫𑁂𑀳𑀺. 𑀓𑀼𑀲𑀮𑁂𑀦 𑀩𑀼𑀤𑁆𑀥𑀺𑀫𑀢𑀸 𑀓𑀢𑀦𑁆𑀢𑀺 𑀙𑁂𑀓𑁂𑀦 𑀧𑀡𑁆𑀟𑀺𑀢𑁂𑀦 𑀜𑀸𑀡𑀧𑀸𑀭𑀫𑀺𑀧𑁆𑀧𑀢𑁆𑀢𑁂𑀦 𑀪𑀕𑀯𑀢𑀸 𑀦𑀻𑀳𑀭𑀺𑀢𑁆𑀯𑀸 𑀞𑀧𑀺𑀢𑀁. 𑀲𑀼𑀯𑀼𑀢𑁆𑀢𑀦𑁆𑀢𑀺 𑀲𑀼𑀧𑀜𑁆𑀜𑀸𑀧𑀺𑀢𑀁. 𑀲𑀺𑀓𑁆𑀔𑀸𑀧𑀤𑀸𑀦𑀼𑀮𑁄𑀫𑀺𑀓𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀦𑀼𑀮𑁄𑀫𑀁. 𑀅𑀬𑀁 𑀢𑀸𑀯 𑀧𑀤𑀢𑁆𑀣𑁄, 𑀅𑀬𑀁 𑀧𑀦𑁂𑀢𑁆𑀣 𑀲𑀸𑀥𑀺𑀧𑁆𑀧𑀸𑀬𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑁋 ‘‘𑀲𑀘𑁂 𑀢𑁆𑀯𑀁 𑀅𑀦𑀼𑀯𑀺𑀚𑁆𑀚𑀓𑁄, 𑀫𑀸 𑀲𑀳𑀲𑀸 𑀪𑀡𑀺, 𑀫𑀸 𑀅𑀦𑀢𑁆𑀣𑀲𑀁𑀳𑀺𑀢𑀁 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀪𑀡𑀺. 𑀬𑀁 𑀧𑀦 𑀓𑀼𑀲𑀮𑁂𑀦 𑀩𑀼𑀤𑁆𑀥𑀺𑀫𑀢𑀸 𑀮𑁄𑀓𑀦𑀸𑀣𑁂𑀦 𑀏𑀢𑁂𑀲𑀼 𑀲𑀼𑀢𑁆𑀢𑀸𑀤𑀻𑀲𑀼 𑀅𑀦𑀼𑀬𑁄𑀕𑀯𑀢𑁆𑀢𑀁 𑀓𑀣𑀁 𑀲𑀼𑀧𑀜𑁆𑀜𑀢𑁆𑀢𑀁 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀦𑀼𑀮𑁄𑀫𑀁, 𑀢𑀁 𑀦𑀺𑀲𑀸𑀫𑀬 𑀢𑀁 𑀉𑀧𑀥𑀸𑀭𑁂𑀳𑀻’’𑀢𑀺. 𑀕𑀢𑀺𑀁 𑀦 𑀦𑀸𑀲𑁂𑀦𑁆𑀢𑁄 𑀲𑀫𑁆𑀧𑀭𑀸𑀬𑀺𑀓𑀦𑁆𑀢𑀺 𑀅𑀢𑁆𑀢𑀦𑁄 𑀲𑀫𑁆𑀧𑀭𑀸𑀬𑁂 𑀲𑀼𑀕𑀢𑀺𑀦𑀺𑀩𑁆𑀩𑀢𑁆𑀢𑀺𑀁 𑀅𑀦𑀸𑀲𑁂𑀦𑁆𑀢𑁄 𑀅𑀦𑀼𑀬𑁄𑀕𑀯𑀢𑁆𑀢𑀁 𑀦𑀺𑀲𑀸𑀫𑀬. 𑀬𑁄 𑀳𑀺 𑀢𑀁 𑀅𑀦𑀺𑀲𑀸𑀫𑁂𑀢𑁆𑀯𑀸 𑀅𑀦𑀼𑀬𑀼𑀜𑁆𑀚𑀢𑀺, 𑀲𑁄 𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀢𑀦𑁄 𑀕𑀢𑀺𑀁 𑀦𑀸𑀲𑁂𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀅𑀦𑀸𑀲𑁂𑀦𑁆𑀢𑁄 𑀦𑀺𑀲𑀸𑀫𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀁 𑀅𑀦𑀼𑀬𑁄𑀕𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀳𑀺𑀢𑁂𑀲𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀺𑀢𑁂𑀲𑀻𑀢𑀺 𑀳𑀺𑀢𑀁 𑀏𑀲𑀦𑁆𑀢𑁄 𑀕𑀯𑁂𑀲𑀦𑁆𑀢𑁄; 𑀫𑁂𑀢𑁆𑀢𑀜𑁆𑀘 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀜𑁆𑀘 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂𑀦; 𑀅𑀚𑁆𑀛𑁂𑀲𑀺𑀢𑀓𑀸𑀮𑁂𑀬𑁂𑀯 𑀢𑀯 𑀪𑀸𑀭𑁂 𑀓𑀢𑁂 𑀅𑀦𑀼𑀬𑀼𑀜𑁆𑀚𑀸𑀢𑀺 𑀅𑀢𑁆𑀣𑁄.

𑀲𑀳𑀲𑀸 𑀯𑁄𑀳𑀸𑀭𑀁 𑀫𑀸 𑀧𑀥𑀸𑀭𑁂𑀲𑀻𑀢𑀺 𑀬𑁄 𑀏𑀢𑁂𑀲𑀁 𑀲𑀳𑀲𑀸 𑀯𑁄𑀳𑀸𑀭𑁄 𑀳𑁄𑀢𑀺, 𑀲𑀳𑀲𑀸 𑀪𑀸𑀲𑀺𑀢𑀁, 𑀢𑀁 𑀫𑀸 𑀧𑀥𑀸𑀭𑁂𑀲𑀺, 𑀫𑀸 𑀕𑀡𑁆𑀳𑀺𑀢𑁆𑀣.

𑀧𑀝𑀺𑀜𑁆𑀜𑀸𑀦𑀼𑀲𑀦𑁆𑀥𑀺𑀢𑁂𑀦 𑀓𑀸𑀭𑀬𑁂𑀢𑀺 𑀏𑀢𑁆𑀣 𑀅𑀦𑀼𑀲𑀦𑁆𑀥𑀺𑀢𑀦𑁆𑀢𑀺 𑀓𑀣𑀸𑀦𑀼𑀲𑀦𑁆𑀥𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀧𑀝𑀺𑀜𑁆𑀜𑀸𑀦𑀼𑀲𑀦𑁆𑀥𑀺𑀦𑀸 𑀓𑀸𑀭𑀬𑁂; 𑀓𑀣𑀸𑀦𑀼𑀲𑀦𑁆𑀥𑀺𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀝𑀺𑀜𑁆𑀜𑀸𑀬 𑀓𑀸𑀭𑀬𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀝𑀺𑀜𑁆𑀜𑀸𑀬 𑀘 𑀅𑀦𑀼𑀲𑀦𑁆𑀥𑀺𑀢𑁂𑀦 𑀘 𑀓𑀸𑀭𑀬𑁂, 𑀮𑀚𑁆𑀚𑀺𑀁 𑀧𑀝𑀺𑀜𑁆𑀜𑀸𑀬 𑀓𑀸𑀭𑀬𑁂; 𑀅𑀮𑀚𑁆𑀚𑀺𑀁 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀏𑀯 𑀧𑀝𑀺𑀜𑁆𑀜𑀸 𑀮𑀚𑁆𑀚𑀻𑀲𑀽𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀢𑁂𑀦 𑀓𑀸𑀭𑀬𑁂𑀢𑀺 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀦𑀸 𑀓𑀸𑀭𑀬𑁂, 𑀬𑀸 𑀅𑀲𑁆𑀲 𑀯𑀢𑁆𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀜𑁆𑀜𑀸 𑀲𑀦𑁆𑀥𑀺𑀬𑀢𑀺, 𑀢𑀸𑀬 𑀧𑀝𑀺𑀜𑁆𑀜𑀸𑀬 𑀓𑀸𑀭𑀬𑁂𑀢𑀺 𑀅𑀢𑁆𑀣𑁄.

𑀲𑀜𑁆𑀘𑀺𑀘𑁆𑀘𑀸𑀢𑀺 𑀚𑀸𑀦𑀦𑁆𑀢𑁄 𑀆𑀧𑀚𑁆𑀚𑀢𑀺. 𑀧𑀭𑀺𑀕𑀽𑀳𑀢𑀻𑀢𑀺 𑀦𑀺𑀕𑀽𑀳𑀢𑀺 𑀦 𑀤𑁂𑀲𑁂𑀢𑀺 𑀦 𑀯𑀼𑀝𑁆𑀞𑀸𑀢𑀺.

𑀲𑀸 𑀅𑀳𑀫𑁆𑀧𑀺 𑀚𑀸𑀦𑀸𑀫𑀻𑀢𑀺 𑀬𑀁 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀢𑀁 𑀲𑀘𑁆𑀘𑀁, 𑀅𑀳𑀫𑁆𑀧𑀺 𑀦𑀁 𑀏𑀯𑀫𑁂𑀯 𑀚𑀸𑀦𑀸𑀫𑀺. 𑀅𑀜𑁆𑀜𑀜𑁆𑀘 𑀢𑀸𑀳𑀦𑁆𑀢𑀺 𑀅𑀜𑁆𑀜𑀜𑁆𑀘 𑀢𑀁 𑀅𑀳𑀁 𑀧𑀼𑀘𑁆𑀙𑀸𑀫𑀺.

𑀧𑀼𑀩𑁆𑀩𑀸𑀧𑀭𑀁 𑀦 𑀚𑀸𑀦𑀸𑀢𑀻𑀢𑀺 𑀧𑀼𑀭𑁂𑀓𑀣𑀺𑀢𑀜𑁆𑀘 𑀧𑀘𑁆𑀙𑀸𑀓𑀣𑀺𑀢𑀜𑁆𑀘 𑀦 𑀚𑀸𑀦𑀸𑀢𑀺. 𑀅𑀓𑁄𑀯𑀺𑀤𑁄𑀢𑀺 𑀢𑀲𑁆𑀫𑀺𑀁 𑀧𑀼𑀩𑁆𑀩𑀸𑀧𑀭𑁂 𑀅𑀓𑀼𑀲𑀮𑁄. 𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀁 𑀦 𑀚𑀸𑀦𑀸𑀢𑀻𑀢𑀺 𑀓𑀣𑀸𑀦𑀼𑀲𑀦𑁆𑀥𑀺𑀯𑀘𑀦𑀁 𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀦𑁆𑀥𑀺𑀯𑀘𑀦𑀜𑁆𑀘 𑀦 𑀚𑀸𑀦𑀸𑀢𑀺.

𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀘𑁄𑀤𑁂𑀢𑀻𑀢𑀺 𑀤𑁆𑀯𑀻𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀘𑁄𑀤𑁂𑀢𑀺. 𑀆𑀘𑀸𑀭𑀤𑀺𑀝𑁆𑀞𑀺𑀬𑀸𑀢𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀘𑁂𑀯 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀘. 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑁄 𑀧𑀜𑁆𑀘𑀳𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀘𑁄𑀤𑁂𑀢𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀘𑁂𑀯 𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺𑀬𑀸 𑀘 𑀘𑁄𑀤𑁂𑀢𑀺. 𑀆𑀚𑀻𑀯𑁂𑀦𑀧𑀺 𑀘𑁄𑀤𑁂𑀢𑀻𑀢𑀺 𑀆𑀚𑀻𑀯𑀳𑁂𑀢𑀼𑀧𑀜𑁆𑀜𑀢𑁆𑀢𑁂𑀳𑀺 𑀙𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺 𑀘𑁄𑀤𑁂𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.