𑀘𑁄𑀤𑀦𑀸𑀓𑀡𑁆𑀟𑀁

𑀅𑀦𑀼𑀯𑀺𑀚𑁆𑀚𑀓𑀓𑀺𑀘𑁆𑀘𑀯𑀡𑁆𑀡𑀦𑀸

𑁩𑁬𑁦-𑁩𑁬𑁧. 𑀇𑀤𑀸𑀦𑀺 𑀏𑀯𑀁 𑀉𑀧𑁆𑀧𑀦𑁆𑀦𑀸𑀬 𑀘𑁄𑀤𑀦𑀸𑀬 𑀯𑀺𑀦𑀬𑀥𑀭𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀤𑀲𑁆𑀲𑁂𑀢𑀼𑀁 𑀅𑀦𑀼𑀯𑀺𑀚𑁆𑀚𑀓𑁂𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀤𑀺𑀝𑁆𑀞𑀁 𑀤𑀺𑀝𑁆𑀞𑁂𑀦𑀸𑀢𑀺 𑀕𑀸𑀣𑀸𑀬 𑀅𑀬𑀫𑀢𑁆𑀣𑁄 𑁋 𑀏𑀓𑁂𑀦𑁂𑀓𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀯𑀸 𑀧𑀯𑀺𑀲𑀦𑁆𑀢𑁄 𑀯𑀸 𑀤𑀺𑀝𑁆𑀞𑁄, 𑀲𑁄 𑀢𑀁 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀇𑀢𑀭𑁄 𑀢𑀲𑁆𑀲 𑀤𑀲𑁆𑀲𑀦𑀁 𑀅𑀦𑀼𑀚𑀸𑀦𑀸𑀢𑀺. 𑀢𑀁 𑀧𑀦 𑀤𑀲𑁆𑀲𑀦𑀁 𑀧𑀝𑀺𑀘𑁆𑀘 𑀧𑀸𑀭𑀸𑀚𑀺𑀓𑀁 𑀦 𑀉𑀧𑁂𑀢𑀺, 𑀦 𑀧𑀝𑀺𑀚𑀸𑀦𑀸𑀢𑀺. 𑀏𑀯𑀫𑁂𑀢𑁆𑀣 𑀬𑀁 𑀢𑁂𑀦 𑀤𑀺𑀝𑁆𑀞𑀁, 𑀢𑀁 𑀢𑀲𑁆𑀲 ‘‘𑀤𑀺𑀝𑁆𑀞𑁄 𑀫𑀬𑀸’’𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀯𑀘𑀦𑁂𑀦 𑀲𑀫𑁂𑀢𑀺. 𑀬𑀲𑁆𑀫𑀸 𑀧𑀦 𑀇𑀢𑀭𑁄 𑀢𑀁 𑀤𑀲𑁆𑀲𑀦𑀁 𑀧𑀝𑀺𑀘𑁆𑀘 𑀤𑁄𑀲𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀅𑀲𑀼𑀤𑁆𑀥𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺; 𑀅𑀫𑀽𑀮𑀓𑀧𑀭𑀺𑀲𑀗𑁆𑀓𑀺𑀢𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 ‘‘𑀲𑀼𑀤𑁆𑀥𑁄 𑀅𑀳’’𑀦𑁆𑀢𑀺 𑀧𑀝𑀺𑀜𑁆𑀜𑀸𑀬 𑀢𑁂𑀦 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑁂𑀲𑀕𑀸𑀣𑀸𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀦𑀼𑀯𑀺𑀚𑁆𑀚𑀓𑀓𑀺𑀘𑁆𑀘𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑁄𑀤𑀓𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸

𑁩𑁬𑁨-𑁩𑁬𑁩. 𑀘𑁄𑀤𑀦𑀸𑀬 𑀓𑁄 𑀆𑀤𑀻𑀢𑀺𑀆𑀤𑀺𑀧𑀼𑀘𑁆𑀙𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑁂 𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘𑀸𑀢𑀺 𑀲𑀘𑁆𑀘𑁂 𑀧𑀢𑀺𑀝𑁆𑀞𑀸𑀢𑀩𑁆𑀩𑀁 𑀅𑀓𑀼𑀧𑁆𑀧𑁂 𑀘. 𑀬𑀁 𑀓𑀢𑀁 𑀯𑀸 𑀦 𑀓𑀢𑀁 𑀯𑀸, 𑀢𑀤𑁂𑀯 𑀯𑀢𑁆𑀢𑀩𑁆𑀩𑀁, 𑀦 𑀘 𑀘𑁄𑀤𑀓𑁂 𑀯𑀸 𑀅𑀦𑀼𑀯𑀺𑀚𑁆𑀚𑀓𑁂 𑀯𑀸 𑀲𑀗𑁆𑀖𑁂 𑀯𑀸 𑀓𑁄𑀧𑁄 𑀉𑀧𑁆𑀧𑀸𑀤𑁂𑀢𑀩𑁆𑀩𑁄. 𑀑𑀢𑀺𑀡𑁆𑀡𑀸𑀦𑁄𑀢𑀺𑀡𑁆𑀡𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀑𑀢𑀺𑀡𑁆𑀡𑀜𑁆𑀘 𑀅𑀦𑁄𑀢𑀺𑀡𑁆𑀡𑀜𑁆𑀘 𑀯𑀘𑀦𑀁 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀚𑀸𑀦𑀦𑀯𑀺𑀥𑀺 𑁋 𑀏𑀢𑁆𑀢𑀓𑀸 𑀘𑁄𑀤𑀓𑀲𑁆𑀲 𑀧𑀼𑀩𑁆𑀩𑀓𑀣𑀸, 𑀏𑀢𑁆𑀢𑀓𑀸 𑀧𑀘𑁆𑀙𑀺𑀫𑀓𑀣𑀸, 𑀏𑀢𑁆𑀢𑀓𑀸 𑀘𑀼𑀤𑀺𑀢𑀓𑀲𑁆𑀲 𑀧𑀼𑀩𑁆𑀩𑀓𑀣𑀸, 𑀏𑀢𑁆𑀢𑀓𑀸 𑀧𑀘𑁆𑀙𑀺𑀫𑀓𑀣𑀸𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀘𑁄𑀤𑀓𑀲𑁆𑀲 𑀧𑀫𑀸𑀡𑀁 𑀕𑀡𑁆𑀳𑀺𑀢𑀩𑁆𑀩𑀁, 𑀘𑀼𑀤𑀺𑀢𑀓𑀲𑁆𑀲 𑀧𑀫𑀸𑀡𑀁 𑀕𑀡𑁆𑀳𑀺𑀢𑀩𑁆𑀩𑀁, 𑀅𑀦𑀼𑀯𑀺𑀚𑁆𑀚𑀓𑀲𑁆𑀲 𑀧𑀫𑀸𑀡𑀁 𑀕𑀡𑁆𑀳𑀺𑀢𑀩𑁆𑀩𑀁, 𑀅𑀦𑀼𑀯𑀺𑀚𑁆𑀚𑀓𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀅𑀳𑀸𑀧𑁂𑀦𑁆𑀢𑁄 ‘‘𑀆𑀯𑀼𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀉𑀚𑀼𑀁 𑀓𑀢𑁆𑀯𑀸 𑀆𑀳𑀭𑀸’’𑀢𑀺 𑀯𑀢𑁆𑀢𑀩𑁆𑀩𑁄, 𑀲𑀗𑁆𑀖𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀻𑀢𑀺 𑀏𑀢𑁆𑀣 𑀥𑀫𑁆𑀫𑁄𑀢𑀺 𑀪𑀽𑀢𑀁 𑀯𑀢𑁆𑀣𑀼. 𑀯𑀺𑀦𑀬𑁄𑀢𑀺 𑀘𑁄𑀤𑀦𑀸 𑀘𑁂𑀯 𑀲𑀸𑀭𑀡𑀸 𑀘. 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀤𑀸 𑀘𑁂𑀯 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀤𑀸 𑀘. 𑀏𑀢𑁂𑀦 𑀳𑀺 𑀥𑀫𑁆𑀫𑁂𑀦 𑀘 𑀯𑀺𑀦𑀬𑁂𑀦 𑀘 𑀲𑀢𑁆𑀣𑀼𑀲𑀸𑀲𑀦𑁂𑀦 𑀘 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑀢𑀺, 𑀢𑀲𑁆𑀫𑀸 𑀅𑀦𑀼𑀯𑀺𑀚𑁆𑀚𑀓𑁂𑀦 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀲𑀸𑀭𑁂𑀢𑁆𑀯𑀸 𑀜𑀢𑁆𑀢𑀺𑀲𑀫𑁆𑀧𑀤𑀸𑀬 𑀘𑁂𑀯 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀤𑀸𑀬 𑀘 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁, 𑀅𑀦𑀼𑀯𑀺𑀚𑁆𑀚𑀓𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁩𑁬𑁪. 𑀉𑀧𑁄𑀲𑀣𑁄 𑀓𑀺𑀫𑀢𑁆𑀣𑀸𑀬𑀸𑀢𑀺𑀆𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀫𑁆𑀧𑀺 𑀉𑀢𑁆𑀢𑀸𑀦𑀫𑁂𑀯. 𑀅𑀯𑀲𑀸𑀦𑀕𑀸𑀣𑀸𑀲𑀼 𑀣𑁂𑀭𑁂 𑀘 𑀧𑀭𑀺𑀪𑀸𑀲𑀢𑀻𑀢𑀺 𑀅𑀯𑀫𑀜𑁆𑀜𑀁 𑀓𑀭𑁄𑀦𑁆𑀢𑁄 ‘‘𑀓𑀺𑀁 𑀇𑀫𑁂 𑀚𑀸𑀦𑀦𑁆𑀢𑀻’’𑀢𑀺 𑀧𑀭𑀺𑀪𑀸𑀲𑀢𑀺. 𑀔𑀢𑁄 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀢𑀸𑀬 𑀙𑀦𑁆𑀤𑀸𑀤𑀺𑀕𑀸𑀫𑀺𑀢𑀸𑀬 𑀢𑁂𑀦 𑀘 𑀧𑀭𑀺𑀪𑀸𑀲𑀦𑁂𑀦 𑀅𑀢𑁆𑀢𑀦𑀸 𑀅𑀢𑁆𑀢𑀦𑁄 𑀔𑀢𑀢𑁆𑀢𑀸 𑀔𑀢𑁄. 𑀲𑀤𑁆𑀥𑀸𑀤𑀻𑀦𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀁 𑀉𑀧𑀳𑀢𑀢𑁆𑀢𑀸 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑁄. 𑀦𑀺𑀭𑀬𑀁 𑀕𑀘𑁆𑀙𑀢𑀺 𑀤𑀼𑀫𑁆𑀫𑁂𑀥𑁄, 𑀦 𑀘 𑀲𑀺𑀓𑁆𑀔𑀸𑀬 𑀕𑀸𑀭𑀯𑁄𑀢𑀺 𑀲𑁄 𑀔𑀢𑁄 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑁄 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄 𑀤𑀼𑀫𑁆𑀫𑁂𑀥𑁄 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀅𑀲𑀺𑀓𑁆𑀔𑀦𑀢𑁄 𑀦 𑀘 𑀲𑀺𑀓𑁆𑀔𑀸𑀬 𑀕𑀸𑀭𑀯𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀫𑁂𑀯 𑀉𑀧𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀦 𑀘 𑀆𑀫𑀺𑀲𑀁 𑀦𑀺𑀲𑁆𑀲𑀸𑀬…𑀧𑁂… 𑀬𑀣𑀸 𑀥𑀫𑁆𑀫𑁄 𑀢𑀣𑀸 𑀓𑀭𑁂𑀢𑀺. 𑀢𑀲𑁆𑀲𑀢𑁆𑀣𑁄 𑀦 𑀘 𑀆𑀫𑀺𑀲𑀁 𑀦𑀺𑀲𑁆𑀲𑀸𑀬 𑀓𑀭𑁂, 𑀘𑀼𑀤𑀺𑀢𑀓𑀘𑁄𑀤𑀓𑁂𑀲𑀼 𑀳𑀺 𑀅𑀜𑁆𑀜𑀢𑀭𑁂𑀦 𑀤𑀺𑀦𑁆𑀦𑀁 𑀘𑀻𑀯𑀭𑀸𑀤𑀺𑀆𑀫𑀺𑀲𑀁 𑀕𑀡𑁆𑀳𑀦𑁆𑀢𑁄 𑀆𑀫𑀺𑀲𑀁 𑀦𑀺𑀲𑁆𑀲𑀸𑀬 𑀓𑀭𑁄𑀢𑀺, 𑀏𑀯𑀁 𑀦 𑀓𑀭𑁂𑀬𑁆𑀬. 𑀦 𑀘 𑀦𑀺𑀲𑁆𑀲𑀸𑀬 𑀧𑀼𑀕𑁆𑀕𑀮𑀦𑁆𑀢𑀺 ‘‘𑀅𑀬𑀁 𑀫𑁂 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀙𑀦𑁆𑀤𑀸𑀤𑀻𑀳𑀺 𑀕𑀘𑁆𑀙𑀦𑁆𑀢𑁄 𑀧𑀼𑀕𑁆𑀕𑀮𑀁 𑀦𑀺𑀲𑁆𑀲𑀸𑀬 𑀓𑀭𑁄𑀢𑀺, 𑀏𑀯𑀁 𑀦 𑀓𑀭𑁂𑀬𑁆𑀬. 𑀅𑀣 𑀔𑁄 𑀉𑀪𑁄𑀧𑁂𑀢𑁂 𑀯𑀺𑀯𑀚𑁆𑀚𑁂𑀢𑁆𑀯𑀸 𑀬𑀣𑀸 𑀥𑀫𑁆𑀫𑁄 𑀞𑀺𑀢𑁄, 𑀢𑀣𑁂𑀯 𑀓𑀭𑁂𑀬𑁆𑀬𑀸𑀢𑀺.

𑀉𑀧𑀓𑀡𑁆𑀡𑀓𑀁 𑀚𑀧𑁆𑀧𑀢𑀻𑀢𑀺 ‘‘𑀏𑀯𑀁 𑀓𑀣𑁂𑀳𑀺, 𑀫𑀸 𑀏𑀯𑀁 𑀓𑀣𑀬𑀺𑀢𑁆𑀣𑀸’’𑀢𑀺 𑀓𑀡𑁆𑀡𑀫𑀽𑀮𑁂 𑀫𑀦𑁆𑀢𑁂𑀢𑀺. 𑀚𑀺𑀫𑁆𑀳𑀁 𑀧𑁂𑀓𑁆𑀔𑀢𑀻𑀢𑀺 𑀤𑁄𑀲𑀫𑁂𑀯 𑀕𑀯𑁂𑀲𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑀁 𑀳𑀸𑀧𑁂𑀢𑀺. 𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀲𑁂𑀯𑀢𑀻𑀢𑀺 𑀆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺.

𑀅𑀓𑀸𑀮𑁂𑀦 𑀘 𑀘𑁄𑀤𑁂𑀢𑀻𑀢𑀺 𑀅𑀦𑁄𑀓𑀸𑀲𑁂 𑀅𑀦𑀚𑁆𑀛𑀺𑀝𑁆𑀞𑁄𑀯 𑀘𑁄𑀤𑁂𑀢𑀺. 𑀧𑀼𑀩𑁆𑀩𑀸𑀧𑀭𑀁 𑀦 𑀚𑀸𑀦𑀸𑀢𑀻𑀢𑀺 𑀧𑀼𑀭𑀺𑀫𑀓𑀣𑀜𑁆𑀘 𑀧𑀘𑁆𑀙𑀺𑀫𑀓𑀣𑀜𑁆𑀘 𑀦 𑀚𑀸𑀦𑀸𑀢𑀺.

𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀁 𑀦 𑀚𑀸𑀦𑀸𑀢𑀻𑀢𑀺 𑀓𑀣𑀸𑀦𑀼𑀲𑀦𑁆𑀥𑀺𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀯𑀘𑀦𑀁 𑀦 𑀚𑀸𑀦𑀸𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀘𑁄𑀤𑀦𑀸𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.