𑀘𑀽𑀴𑀲𑀗𑁆𑀕𑀸𑀫𑁄

𑀅𑀦𑀼𑀯𑀺𑀚𑁆𑀚𑀓𑀲𑁆𑀲 𑀧𑀝𑀺𑀧𑀢𑁆𑀢𑀺𑀯𑀡𑁆𑀡𑀦𑀸

𑁩𑁬𑁫. 𑀘𑀽𑀴𑀲𑀗𑁆𑀕𑀸𑀫𑁂 𑀲𑀗𑁆𑀕𑀸𑀫𑀸𑀯𑀘𑀭𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀲𑀗𑁆𑀕𑀸𑀫𑁄 𑀯𑀼𑀘𑁆𑀘𑀢𑀺 𑀅𑀥𑀺𑀓𑀭𑀡𑀯𑀺𑀦𑀺𑀘𑁆𑀙𑀬𑀢𑁆𑀣𑀸𑀬 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁄. 𑀢𑀢𑁆𑀭 𑀳𑀺 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸 𑀘𑁂𑀯 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸 𑀘 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼 𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀸 𑀲𑀫𑁄𑀲𑀭𑀦𑁆𑀢𑀺 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀯𑀺𑀬. 𑀬𑁄 𑀪𑀺𑀓𑁆𑀔𑀼 𑀢𑁂𑀲𑀁 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀮𑀤𑁆𑀥𑀺𑀁 𑀫𑀤𑁆𑀤𑀺𑀢𑁆𑀯𑀸 𑀲𑀓𑀯𑀸𑀤𑀤𑀻𑀧𑀦𑀢𑁆𑀣𑀸𑀬 𑀢𑀢𑁆𑀣 𑀅𑀯𑀘𑀭𑀢𑀺, 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀧𑀯𑀢𑁆𑀢𑁂𑀢𑀺, 𑀲𑁄 𑀲𑀗𑁆𑀕𑀸𑀫𑀸𑀯𑀘𑀭𑁄 𑀦𑀸𑀫 𑀬𑀲𑀢𑁆𑀣𑁂𑀭𑁄 𑀯𑀺𑀬. 𑀢𑁂𑀦 𑀲𑀗𑁆𑀕𑀸𑀫𑀸𑀯𑀘𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀦𑁆𑀢𑁂𑀦 𑀦𑀻𑀘𑀘𑀺𑀢𑁆𑀢𑁂𑀦 𑀲𑀗𑁆𑀖𑁄 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄. 𑀦𑀻𑀘𑀘𑀺𑀢𑁆𑀢𑁂𑀦𑀸𑀢𑀺 𑀫𑀸𑀦𑀤𑁆𑀥𑀚𑀁 𑀦𑀺𑀧𑀸𑀢𑁂𑀢𑁆𑀯𑀸 𑀦𑀺𑀳𑀢𑀫𑀸𑀦𑀘𑀺𑀢𑁆𑀢𑁂𑀦. 𑀭𑀚𑁄𑀳𑀭𑀡𑀲𑀫𑁂𑀦𑀸𑀢𑀺 𑀧𑀸𑀤𑀧𑀼𑀜𑁆𑀙𑀦𑀲𑀫𑁂𑀦; 𑀬𑀣𑀸 𑀭𑀚𑁄𑀳𑀭𑀡𑀲𑁆𑀲 𑀲𑀁𑀓𑀺𑀮𑀺𑀝𑁆𑀞𑁂 𑀯𑀸 𑀅𑀲𑀁𑀓𑀺𑀮𑀺𑀝𑁆𑀞𑁂 𑀯𑀸 𑀧𑀸𑀤𑁂 𑀧𑀼𑀜𑁆𑀙𑀺𑀬𑀫𑀸𑀦𑁂 𑀦𑁂𑀯 𑀭𑀸𑀕𑁄 𑀦 𑀤𑁄𑀲𑁄; 𑀏𑀯𑀁 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀭𑀚𑁆𑀚𑀦𑁆𑀢𑁂𑀦 𑀅𑀤𑀼𑀲𑁆𑀲𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀧𑀢𑀺𑀭𑀽𑀧𑁂 𑀆𑀲𑀦𑁂𑀢𑀺 𑀬𑀣𑀸𑀧𑀢𑀺𑀭𑀽𑀧𑀁 𑀆𑀲𑀦𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀧𑀼𑀡𑀦𑀝𑁆𑀞𑀸𑀦𑁂 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀺𑀝𑁆𑀞𑀺𑀁 𑀅𑀤𑀲𑁆𑀲𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀅𑀦𑀸𑀦𑀸𑀓𑀣𑀺𑀓𑁂𑀦𑀸𑀢𑀺 𑀦𑀸𑀦𑀸𑀯𑀺𑀥𑀁 𑀢𑀁 𑀢𑀁 𑀅𑀦𑀢𑁆𑀣𑀓𑀣𑀁 𑀅𑀓𑀣𑁂𑀦𑁆𑀢𑁂𑀦. 𑀅𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑁂𑀦𑀸𑀢𑀺 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑁆𑀧𑀺 𑀭𑀸𑀚𑀓𑀣𑀸𑀤𑀺𑀓𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀅𑀓𑀣𑁂𑀦𑁆𑀢𑁂𑀦. 𑀲𑀸𑀫𑀁 𑀯𑀸 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄𑀢𑀺 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀺𑀲𑁆𑀲𑀺𑀢𑀸 𑀯𑀸 𑀭𑀽𑀧𑀸𑀭𑀽𑀧𑀧𑀭𑀺𑀘𑁆𑀙𑁂𑀤𑀲𑀫𑀣𑀸𑀘𑀸𑀭𑀯𑀺𑀧𑀲𑁆𑀲𑀦𑀸𑀘𑀸𑀭𑀝𑁆𑀞𑀸𑀦𑀦𑀺𑀲𑀚𑁆𑀚𑀯𑀢𑁆𑀢𑀸𑀤𑀺𑀦𑀺𑀲𑁆𑀲𑀺𑀢𑀸 𑀯𑀸 𑀓𑀣𑀸 𑀥𑀫𑁆𑀫𑁄 𑀦𑀸𑀫. 𑀏𑀯𑀭𑀽𑀧𑁄 𑀥𑀫𑁆𑀫𑁄 𑀲𑀬𑀁 𑀯𑀸 𑀪𑀸𑀲𑀺𑀢𑀩𑁆𑀩𑁄, 𑀧𑀭𑁄 𑀯𑀸 𑀅𑀚𑁆𑀛𑁂𑀲𑀺𑀢𑀩𑁆𑀩𑁄. 𑀬𑁄 𑀪𑀺𑀓𑁆𑀔𑀼 𑀢𑀣𑀸𑀭𑀽𑀧𑀺𑀁 𑀓𑀣𑀁 𑀓𑀣𑁂𑀢𑀼𑀁 𑀧𑀳𑁄𑀢𑀺, 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀆𑀯𑀼𑀲𑁄 𑀲𑀗𑁆𑀖𑀫𑀚𑁆𑀛𑀫𑁆𑀳𑀺 𑀧𑀜𑁆𑀳𑁂 𑀉𑀧𑁆𑀧𑀦𑁆𑀦𑁂 𑀢𑁆𑀯𑀁 𑀓𑀣𑁂𑀬𑁆𑀬𑀸𑀲𑀻’’𑀢𑀺. 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀢𑀺𑀫𑀜𑁆𑀜𑀺𑀢𑀩𑁆𑀩𑁄𑀢𑀺 𑀅𑀭𑀺𑀬𑀸 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀸 𑀦 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀯𑀺𑀬 𑀦𑀺𑀲𑀻𑀤𑀦𑁆𑀢𑀺. 𑀅𑀜𑁆𑀜𑀢𑀭𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀦𑀺𑀲𑀻𑀤𑀦𑁆𑀢𑀺. 𑀇𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀯𑀲𑁂𑀦 𑀢𑀼𑀡𑁆𑀳𑀻𑀪𑀸𑀯𑁄 𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀫, 𑀲𑁄 𑀦𑀸𑀢𑀺𑀫𑀜𑁆𑀜𑀺𑀢𑀩𑁆𑀩𑁄, 𑀓𑀺𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑁂𑀦𑀸𑀢𑀺 𑀦𑀸𑀯𑀚𑀸𑀦𑀺𑀢𑀩𑁆𑀩𑁄; 𑀅𑀢𑁆𑀢𑀦𑁄 𑀧𑀢𑀺𑀭𑀽𑀧𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀦 𑀉𑀧𑀚𑁆𑀛𑀸𑀬𑁄 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 ‘‘𑀓𑁄 𑀦𑀸𑀫𑁄 𑀢𑀼𑀬𑁆𑀳𑀁 𑀉𑀧𑀚𑁆𑀛𑀸𑀬𑁄’’𑀢𑀺 𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀦 𑀚𑀸𑀢𑀻𑀢𑀺 ‘‘𑀔𑀢𑁆𑀢𑀺𑀬𑀚𑀸𑀢𑀺𑀬𑁄 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑁄’’𑀢𑀺 𑀏𑀯𑀁 𑀚𑀸𑀢𑀺 𑀦 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀦 𑀆𑀕𑀫𑁄𑀢𑀺 ‘‘𑀤𑀻𑀖𑀪𑀸𑀡𑀓𑁄𑀲𑀺 𑀢𑁆𑀯𑀁 𑀫𑀚𑁆𑀛𑀺𑀫𑀪𑀸𑀡𑀓𑁄’’𑀢𑀺 𑀏𑀯𑀁 𑀆𑀕𑀫𑁄 𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀓𑀼𑀮𑀧𑀤𑁂𑀲𑁄𑀢𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀭𑀲𑁆𑀲 𑀧𑁂𑀫𑀁 𑀯𑀸 𑀤𑁄𑀲𑁄 𑀯𑀸𑀢𑀺 𑀅𑀢𑁆𑀭 𑀧𑀼𑀕𑁆𑀕𑀮𑁂 𑀏𑀢𑁂𑀲𑀁 𑀓𑀸𑀭𑀡𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀧𑁂𑀫𑀁 𑀯𑀸 𑀪𑀯𑁂𑀬𑁆𑀬 𑀤𑁄𑀲𑁄 𑀯𑀸.

𑀦𑁄 𑀧𑀭𑀺𑀲𑀓𑀧𑁆𑀧𑀺𑀓𑁂𑀦𑀸𑀢𑀺 𑀧𑀭𑀺𑀲𑀓𑀧𑁆𑀧𑀓𑁂𑀦 𑀧𑀭𑀺𑀲𑀸𑀦𑀼𑀯𑀺𑀥𑀸𑀬𑀓𑁂𑀦 𑀦 𑀪𑀯𑀺𑀢𑀩𑁆𑀩𑀁; 𑀬𑀁 𑀧𑀭𑀺𑀲𑀸𑀬 𑀭𑀼𑀘𑁆𑀘𑀢𑀺, 𑀢𑀤𑁂𑀯 𑀘𑁂𑀢𑁂𑀢𑁆𑀯𑀸 𑀓𑀧𑁆𑀧𑁂𑀢𑁆𑀯𑀸 𑀦 𑀓𑀣𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀦 𑀳𑀢𑁆𑀣𑀫𑀼𑀤𑁆𑀤𑀸 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀓𑀣𑁂𑀢𑀩𑁆𑀩𑁂 𑀘 𑀅𑀓𑀣𑁂𑀢𑀩𑁆𑀩𑁂 𑀘 𑀲𑀜𑁆𑀜𑀸𑀚𑀦𑀦𑀢𑁆𑀣𑀁 𑀳𑀢𑁆𑀣𑀯𑀺𑀓𑀸𑀭𑁄 𑀦 𑀓𑀸𑀢𑀩𑁆𑀩𑁄.

𑀅𑀢𑁆𑀣𑀁 𑀅𑀦𑀼𑀯𑀺𑀥𑀺𑀬𑀦𑁆𑀢𑁂𑀦𑀸𑀢𑀺 𑀯𑀺𑀦𑀺𑀘𑁆𑀙𑀬𑀧𑀝𑀺𑀯𑁂𑀥𑀫𑁂𑀯 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 ‘‘𑀇𑀤𑀁 𑀲𑀼𑀢𑁆𑀢𑀁 𑀉𑀧𑀮𑀩𑁆𑀪𑀢𑀺, 𑀇𑀫𑀲𑁆𑀫𑀺𑀁 𑀯𑀺𑀦𑀺𑀘𑁆𑀙𑀬𑁂 𑀇𑀤𑀁 𑀯𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀧𑀭𑀺𑀢𑀼𑀮𑀬𑀦𑁆𑀢𑁂𑀦 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀦 𑀘 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀦 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀲𑀦𑁆𑀦𑀺𑀧𑀸𑀢𑀫𑀡𑁆𑀟𑀮𑁂 𑀯𑀺𑀘𑀭𑀺𑀢𑀩𑁆𑀩𑀁, 𑀯𑀺𑀦𑀬𑀥𑀭𑁂 𑀉𑀝𑁆𑀞𑀺𑀢𑁂 𑀲𑀩𑁆𑀩𑀸 𑀧𑀭𑀺𑀲𑀸 𑀉𑀝𑁆𑀞𑀳𑀢𑀺. 𑀦 𑀯𑀻𑀢𑀺𑀳𑀸𑀢𑀩𑁆𑀩𑀦𑁆𑀢𑀺 𑀦 𑀯𑀺𑀦𑀺𑀘𑁆𑀙𑀬𑁄 𑀳𑀸𑀧𑁂𑀢𑀩𑁆𑀩𑁄. 𑀦 𑀓𑀼𑀫𑁆𑀫𑀕𑁆𑀕𑁄 𑀲𑁂𑀯𑀺𑀢𑀩𑁆𑀩𑁄𑀢𑀺 𑀦 𑀆𑀧𑀢𑁆𑀢𑀺 𑀤𑀻𑀧𑁂𑀢𑀩𑁆𑀩𑀸. 𑀅𑀲𑀸𑀳𑀲𑀺𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀦 𑀲𑀳𑀲𑀸𑀓𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁; 𑀲𑀳𑀲𑀸 𑀤𑀼𑀭𑀼𑀢𑁆𑀢𑀯𑀘𑀦𑀁 𑀦 𑀓𑀣𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀯𑀘𑀦𑀓𑁆𑀔𑀫𑁂𑀦𑀸𑀢𑀺 𑀤𑀼𑀭𑀼𑀢𑁆𑀢𑀯𑀸𑀘𑀁 𑀔𑀫𑀦𑀲𑀻𑀮𑁂𑀦. 𑀳𑀺𑀢𑀧𑀭𑀺𑀲𑀓𑁆𑀓𑀺𑀦𑀸𑀢𑀺 𑀳𑀺𑀢𑁂𑀲𑀺𑀦𑀸 𑀳𑀺𑀢𑀕𑀯𑁂𑀲𑀺𑀦𑀸 𑀓𑀭𑀼𑀡𑀸 𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀘 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀅𑀬𑀁 𑀧𑀤𑀤𑁆𑀯𑀬𑁂𑀧𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀲𑀼𑀭𑀼𑀢𑁆𑀢𑁂𑀦𑀸𑀢𑀺 𑀦 𑀅𑀲𑀼𑀭𑀼𑀢𑁆𑀢𑁂𑀦. 𑀅𑀲𑀼𑀭𑀼𑀢𑁆𑀢𑀁 𑀯𑀼𑀘𑁆𑀘𑀢𑀺 𑀯𑀺𑀕𑁆𑀕𑀸𑀳𑀺𑀓𑀓𑀣𑀸𑀲𑀗𑁆𑀔𑀸𑀢𑀁 𑀅𑀲𑀼𑀦𑁆𑀤𑀭𑀯𑀘𑀦𑀁; 𑀢𑀁 𑀦 𑀓𑀣𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀸 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 ‘‘𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀯𑀽𑀧𑀲𑀫𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀦𑁄’’𑀢𑀺 𑀏𑀯𑀁 𑀅𑀢𑁆𑀢𑀸 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄; 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀭𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 ‘‘𑀮𑀚𑁆𑀚𑀺𑀬𑀸 𑀦𑀼 𑀔𑁄 𑀅𑀬𑀁 𑀧𑀭𑀺𑀲𑀸, 𑀲𑀓𑁆𑀓𑀸 𑀲𑀜𑁆𑀜𑀸𑀧𑁂𑀢𑀼𑀁 𑀉𑀤𑀸𑀳𑀼 𑀦𑁄’’𑀢𑀺 𑀏𑀯𑀁 𑀧𑀭𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄.

𑀘𑁄𑀤𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 ‘‘𑀥𑀫𑁆𑀫𑀘𑁄𑀤𑀓𑁄 𑀦𑀼 𑀔𑁄 𑀦𑁄’’𑀢𑀺 𑀏𑀯𑀁 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄. 𑀘𑀼𑀤𑀺𑀢𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 ‘‘𑀥𑀫𑁆𑀫𑀘𑀼𑀤𑀺𑀢𑀓𑁄 𑀦𑀼 𑀔𑁄 𑀦𑁄’’𑀢𑀺 𑀏𑀯𑀁 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄. 𑀅𑀥𑀫𑁆𑀫𑀘𑁄𑀤𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀢𑀲𑁆𑀲 𑀧𑀫𑀸𑀡𑀁 𑀚𑀸𑀦𑀺𑀢𑀩𑁆𑀩𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀁 𑀅𑀳𑀸𑀧𑁂𑀦𑁆𑀢𑁂𑀦𑀸𑀢𑀺 𑀘𑁄𑀤𑀓𑀘𑀼𑀤𑀺𑀢𑀓𑁂𑀳𑀺 𑀯𑀼𑀢𑁆𑀢𑀯𑀘𑀦𑀁 𑀅𑀳𑀸𑀧𑁂𑀦𑁆𑀢𑁂𑀦. 𑀅𑀯𑀼𑀢𑁆𑀢𑀁 𑀅𑀧𑀓𑀸𑀲𑁂𑀦𑁆𑀢𑁂𑀦𑀸𑀢𑀺 𑀅𑀦𑁄𑀲𑀝𑀁 𑀯𑀢𑁆𑀣𑀼𑀁 𑀅𑀧𑁆𑀧𑀓𑀸𑀲𑁂𑀦𑁆𑀢𑁂𑀦. 𑀫𑀦𑁆𑀤𑁄 𑀳𑀸𑀲𑁂𑀢𑀩𑁆𑀩𑁄𑀢𑀺 𑀫𑀦𑁆𑀤𑁄 𑀫𑁄𑀫𑀽𑀳𑁄 𑀧𑀕𑁆𑀕𑀡𑁆𑀳𑀺𑀢𑀩𑁆𑀩𑁄, ‘‘𑀦𑀦𑀼 𑀢𑁆𑀯𑀁 𑀓𑀼𑀮𑀧𑀼𑀢𑁆𑀢𑁄’’𑀢𑀺 𑀉𑀢𑁆𑀢𑁂𑀚𑁂𑀢𑁆𑀯𑀸 𑀅𑀦𑀼𑀬𑁄𑀕𑀯𑀢𑁆𑀢𑀁 𑀓𑀣𑀸𑀧𑁂𑀢𑁆𑀯𑀸 𑀢𑀲𑁆𑀲 𑀅𑀦𑀼𑀬𑁄𑀕𑁄 𑀕𑀡𑁆𑀳𑀺𑀢𑀩𑁆𑀩𑁄. 𑀪𑀻𑀭𑀽 𑀅𑀲𑁆𑀲𑀸𑀲𑁂𑀢𑀩𑁆𑀩𑁄𑀢𑀺 𑀬𑀲𑁆𑀲 𑀲𑀗𑁆𑀖𑀫𑀚𑁆𑀛𑀁 𑀯𑀸 𑀕𑀡𑀫𑀚𑁆𑀛𑀁 𑀯𑀸 𑀅𑀦𑁄𑀲𑀝𑀧𑀼𑀩𑁆𑀩𑀢𑁆𑀢𑀸 𑀲𑀸𑀭𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀤𑀺𑀲𑁄 ‘‘𑀫𑀸 𑀪𑀸𑀬𑀺, 𑀯𑀺𑀲𑁆𑀲𑀝𑁆𑀞𑁄 𑀓𑀣𑁂𑀳𑀺, 𑀫𑀬𑀁 𑀢𑁂 𑀉𑀧𑀢𑁆𑀣𑀫𑁆𑀪𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸𑀧𑀺 𑀅𑀦𑀼𑀬𑁄𑀕𑀯𑀢𑁆𑀢𑀁 𑀓𑀣𑀸𑀧𑁂𑀢𑀩𑁆𑀩𑁄. 𑀘𑀡𑁆𑀟𑁄 𑀦𑀺𑀲𑁂𑀥𑁂𑀢𑀩𑁆𑀩𑁄𑀢𑀺 𑀅𑀧𑀲𑀸𑀤𑁂𑀢𑀩𑁆𑀩𑁄 𑀢𑀚𑁆𑀚𑁂𑀢𑀩𑁆𑀩𑁄. 𑀅𑀲𑀼𑀘𑀺 𑀯𑀺𑀪𑀸𑀯𑁂𑀢𑀩𑁆𑀩𑁄𑀢𑀺 𑀅𑀮𑀚𑁆𑀚𑀺𑀁 𑀧𑀓𑀸𑀲𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀉𑀚𑀼𑀫𑀤𑁆𑀤𑀯𑁂𑀦𑀸𑀢𑀺 𑀬𑁄 𑀪𑀺𑀓𑁆𑀔𑀼 𑀉𑀚𑀼 𑀲𑀻𑀮𑀯𑀸 𑀓𑀸𑀬𑀯𑀗𑁆𑀓𑀸𑀤𑀺𑀭𑀳𑀺𑀢𑁄, 𑀲𑁄 𑀫𑀤𑁆𑀤𑀯𑁂𑀦𑁂𑀯 𑀉𑀧𑀘𑀭𑀺𑀢𑀩𑁆𑀩𑁄. 𑀥𑀫𑁆𑀫𑁂𑀲𑀼 𑀘 𑀧𑀼𑀕𑁆𑀕𑀮𑁂𑀲𑀼 𑀘𑀸𑀢𑀺 𑀏𑀢𑁆𑀣 𑀬𑁄 𑀥𑀫𑁆𑀫𑀕𑀭𑀼𑀓𑁄 𑀳𑁄𑀢𑀺 𑀦 𑀧𑀼𑀕𑁆𑀕𑀮𑀕𑀭𑀼𑀓𑁄, 𑀅𑀬𑀫𑁂𑀯 𑀥𑀫𑁆𑀫𑁂𑀲𑀼 𑀘 𑀧𑀼𑀕𑁆𑀕𑀮𑁂𑀲𑀼 𑀘 𑀫𑀚𑁆𑀛𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁬𑁬. 𑀲𑀼𑀢𑁆𑀢𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬𑀸𑀢𑀺𑀆𑀤𑀻𑀲𑀼 𑀢𑁂𑀦 𑀘 𑀧𑀦 𑀏𑀯𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑀫𑀦𑀸𑀧𑀕𑀭𑀼𑀪𑀸𑀯𑀦𑀻𑀬𑁂𑀦 𑀅𑀦𑀼𑀯𑀺𑀚𑁆𑀚𑀓𑁂𑀦 𑀲𑀫𑀼𑀤𑀸𑀳𑀝𑁂𑀲𑀼 𑀲𑀼𑀢𑁆𑀢𑀸𑀤𑀻𑀲𑀼 𑀲𑀼𑀢𑁆𑀢𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬; 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀻𑀦𑀁 𑀲𑀁𑀲𑀦𑁆𑀤𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀑𑀧𑀫𑁆𑀫𑀁 𑀦𑀺𑀤𑀲𑁆𑀲𑀦𑀢𑁆𑀣𑀸𑀬𑀸𑀢𑀺 𑀑𑀧𑀫𑁆𑀫𑀁 𑀅𑀢𑁆𑀣𑀤𑀲𑁆𑀲𑀦𑀢𑁆𑀣𑀸𑀬. 𑀅𑀢𑁆𑀣𑁄 𑀯𑀺𑀜𑁆𑀜𑀸𑀧𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄 𑀚𑀸𑀦𑀸𑀧𑀦𑀢𑁆𑀣𑀸𑀬. 𑀧𑀝𑀺𑀧𑀼𑀘𑁆𑀙𑀸 𑀞𑀧𑀦𑀢𑁆𑀣𑀸𑀬𑀸𑀢𑀺 𑀧𑀼𑀘𑁆𑀙𑀸 𑀧𑀼𑀕𑁆𑀕𑀮𑀲𑁆𑀲 𑀞𑀧𑀦𑀢𑁆𑀣𑀸𑀬. 𑀑𑀓𑀸𑀲𑀓𑀫𑁆𑀫𑀁 𑀘𑁄𑀤𑀦𑀢𑁆𑀣𑀸𑀬𑀸𑀢𑀺 𑀯𑀢𑁆𑀣𑀼𑀦𑀸 𑀯𑀸 𑀆𑀧𑀢𑁆𑀢𑀺𑀬𑀸 𑀯𑀸 𑀘𑁄𑀤𑀦𑀢𑁆𑀣𑀸𑀬. 𑀘𑁄𑀤𑀦𑀸 𑀲𑀸𑀭𑀡𑀢𑁆𑀣𑀸𑀬𑀸𑀢𑀺 𑀤𑁄𑀲𑀸𑀤𑁄𑀲𑀁 𑀲𑀭𑀸𑀧𑀦𑀢𑁆𑀣𑀸𑀬. 𑀲𑀸𑀭𑀡𑀸 𑀲𑀯𑀘𑀦𑀻𑀬𑀢𑁆𑀣𑀸𑀬𑀸𑀢𑀺 𑀤𑁄𑀲𑀸𑀤𑁄𑀲𑀲𑀸𑀭𑀡𑀸 𑀲𑀯𑀘𑀦𑀻𑀬𑀓𑀭𑀡𑀢𑁆𑀣𑀸𑀬. 𑀲𑀯𑀘𑀦𑀻𑀬𑀁 𑀧𑀮𑀺𑀩𑁄𑀥𑀢𑁆𑀣𑀸𑀬𑀸𑀢𑀺 𑀲𑀯𑀘𑀦𑀻𑀬𑀁 ‘‘𑀇𑀫𑀫𑁆𑀳𑀸 𑀆𑀯𑀸𑀲𑀸 𑀧𑀭𑀁 𑀫𑀸 𑀧𑀓𑁆𑀓𑀫𑀻’’𑀢𑀺 𑀏𑀯𑀁 𑀧𑀮𑀺𑀩𑁄𑀥𑀢𑁆𑀣𑀸𑀬. 𑀧𑀮𑀺𑀩𑁄𑀥𑁄 𑀯𑀺𑀦𑀺𑀘𑁆𑀙𑀬𑀢𑁆𑀣𑀸𑀬𑀸𑀢𑀺 𑀯𑀺𑀦𑀺𑀘𑁆𑀙𑀬𑀁 𑀧𑀸𑀧𑀦𑀢𑁆𑀣𑀸𑀬. 𑀯𑀺𑀦𑀺𑀘𑁆𑀙𑀬𑁄 𑀲𑀦𑁆𑀢𑀻𑀭𑀡𑀢𑁆𑀣𑀸𑀬𑀸𑀢𑀺 𑀤𑁄𑀲𑀸𑀤𑁄𑀲𑀁 𑀲𑀦𑁆𑀢𑀻𑀭𑀡𑀢𑁆𑀣𑀸𑀬 𑀢𑀼𑀮𑀦𑀢𑁆𑀣𑀸𑀬. 𑀲𑀦𑁆𑀢𑀻𑀭𑀡𑀁 𑀞𑀸𑀦𑀸𑀝𑁆𑀞𑀸𑀦𑀕𑀫𑀦𑀢𑁆𑀣𑀸𑀬𑀸𑀢𑀺 𑀆𑀧𑀢𑁆𑀢𑀺𑀅𑀦𑀸𑀧𑀢𑁆𑀢𑀺𑀕𑀭𑀼𑀓𑀮𑀳𑀼𑀓𑀸𑀧𑀢𑁆𑀢𑀺𑀚𑀸𑀦𑀦𑀢𑁆𑀣𑀸𑀬. 𑀲𑀗𑁆𑀖𑁄 𑀲𑀫𑁆𑀧𑀭𑀺𑀕𑁆𑀕𑀳𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑀸𑀬𑀸𑀢𑀺 𑀯𑀺𑀦𑀺𑀘𑁆𑀙𑀬𑀲𑀫𑁆𑀧𑀝𑀺𑀕𑁆𑀕𑀳𑀡𑀢𑁆𑀣𑀸𑀬 𑀘; 𑀲𑀼𑀯𑀺𑀦𑀺𑀘𑁆𑀙𑀺𑀢𑀤𑀼𑀩𑁆𑀩𑀺𑀦𑀺𑀘𑁆𑀙𑀺𑀢𑀪𑀸𑀯𑀚𑀸𑀦𑀦𑀢𑁆𑀣𑀸𑀬 𑀘𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑁂𑀓𑀝𑁆𑀞𑀸𑀬𑀺𑀦𑁄 𑀅𑀯𑀺𑀲𑀁𑀯𑀸𑀤𑀓𑀝𑁆𑀞𑀸𑀬𑀺𑀦𑁄𑀢𑀺 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀘 𑀅𑀯𑀺𑀲𑀁𑀯𑀸𑀤𑀓𑀝𑁆𑀞𑀸𑀦𑁂 𑀘 𑀞𑀺𑀢𑀸; 𑀦 𑀢𑁂 𑀅𑀧𑀲𑀸𑀤𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑁂 𑀫𑀦𑁆𑀤𑀸 𑀫𑀦𑁆𑀤𑀩𑀼𑀤𑁆𑀥𑀺𑀦𑁄 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀯𑀺𑀦𑀬𑁄 𑀦𑀸𑀫 𑀓𑀺𑀫𑀢𑁆𑀣𑀸𑀬𑀸’’𑀢𑀺 𑀢𑁂𑀲𑀁 𑀯𑀘𑀦𑁄𑀓𑀸𑀲𑀧𑀺𑀤𑀳𑀦𑀢𑁆𑀣𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬𑀸𑀢𑀺 𑀲𑀓𑀮𑀸𑀧𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺 𑀓𑀸𑀬𑀯𑀘𑀻𑀤𑁆𑀯𑀸𑀭𑀲𑀁𑀯𑀭𑀢𑁆𑀣𑀸𑀬. 𑀆𑀚𑀻𑀯𑀯𑀺𑀲𑀼𑀤𑁆𑀥𑀺𑀧𑀭𑀺𑀬𑁄𑀲𑀸𑀦𑀲𑁆𑀲 𑀲𑀻𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺; 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀧𑀺𑀘𑁂𑀢𑁆𑀣 𑀅𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀧𑀸𑀧𑀧𑀼𑀜𑁆𑀜𑀸𑀦𑀁 𑀓𑀢𑀸𑀓𑀢𑀯𑀲𑁂𑀦 𑀘𑀺𑀢𑁆𑀢𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀸𑀯𑁄. 𑀧𑀸𑀫𑀼𑀚𑁆𑀚𑀦𑁆𑀢𑀺 𑀤𑀼𑀩𑁆𑀩𑀮𑀸 𑀢𑀭𑀼𑀡𑀧𑀻𑀢𑀺. 𑀧𑀻𑀢𑀻𑀢𑀺 𑀩𑀮𑀯𑀸 𑀩𑀳𑀮𑀧𑀻𑀢𑀺. 𑀧𑀲𑁆𑀲𑀤𑁆𑀥𑀻𑀢𑀺 𑀓𑀸𑀬𑀘𑀺𑀢𑁆𑀢𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺. 𑀲𑀼𑀔𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁. 𑀢𑀜𑁆𑀳𑀺 𑀤𑀼𑀯𑀺𑀥𑀫𑁆𑀧𑀺 𑀲𑀫𑀸𑀥𑀺𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀫𑀸𑀥𑀻𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀢𑀭𑀼𑀡𑀯𑀺𑀧𑀲𑁆𑀲𑀦𑀸; 𑀉𑀤𑀬𑀩𑁆𑀩𑀬𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀳𑀺 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀺𑀩𑁆𑀩𑀺𑀤𑀸𑀢𑀺 𑀲𑀺𑀔𑀸𑀧𑀢𑁆𑀢𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀩𑀮𑀯𑀯𑀺𑀧𑀲𑁆𑀲𑀦𑀸. 𑀯𑀺𑀭𑀸𑀕𑁄𑀢𑀺 𑀅𑀭𑀺𑀬𑀫𑀕𑁆𑀕𑁄. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀁. 𑀘𑀢𑀼𑀩𑁆𑀩𑀺𑀥𑁄𑀧𑀺 𑀳𑀺 𑀅𑀭𑀺𑀬𑀫𑀕𑁆𑀕𑁄 𑀅𑀭𑀳𑀢𑁆𑀢𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑀁. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸𑀢𑀺 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀳𑀺 𑀢𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀦𑀼𑀧𑁆𑀧𑀢𑁆𑀢𑁂 𑀅𑀯𑀲𑁆𑀲𑀁 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀩𑁆𑀩𑀢𑁄𑀢𑀺. 𑀏𑀢𑀤𑀢𑁆𑀣𑀸 𑀓𑀣𑀸𑀢𑀺 𑀅𑀬𑀁 𑀯𑀺𑀦𑀬𑀓𑀣𑀸 𑀦𑀸𑀫 𑀏𑀢𑀤𑀢𑁆𑀣𑀸. 𑀫𑀦𑁆𑀢𑀦𑀸𑀢𑀺 𑀯𑀺𑀦𑀬𑀫𑀦𑁆𑀢𑀦𑀸 𑀏𑀯. 𑀉𑀧𑀦𑀺𑀲𑀸𑀢𑀺 𑀅𑀬𑀁 ‘‘𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬𑀸’’𑀢𑀺𑀆𑀤𑀺𑀓𑀸 𑀧𑀭𑀫𑁆𑀧𑀭𑀧𑀘𑁆𑀘𑀬𑀢𑀸𑀧𑀺 𑀏𑀢𑀤𑀢𑁆𑀣𑀸𑀬. 𑀲𑁄𑀢𑀸𑀯𑀥𑀸𑀦𑀦𑁆𑀢𑀺 𑀇𑀫𑀺𑀲𑁆𑀲𑀸 𑀧𑀭𑀫𑁆𑀧𑀭𑀧𑀘𑁆𑀘𑀬𑀓𑀣𑀸𑀬 𑀲𑁄𑀢𑀸𑀯𑀥𑀸𑀦𑀁. 𑀇𑀫𑀁 𑀓𑀣𑀁 𑀲𑀼𑀢𑁆𑀯𑀸 𑀬𑀁 𑀉𑀧𑁆𑀧𑀚𑁆𑀚𑀢𑀺 𑀜𑀸𑀡𑀁, 𑀢𑀫𑁆𑀧𑀺 𑀏𑀢𑀤𑀢𑁆𑀣𑀸𑀬. 𑀬𑀤𑀺𑀤𑀁 𑀅𑀦𑀼𑀧𑀸𑀤𑀸 𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄𑀢𑀺 𑀬𑁄 𑀅𑀬𑀁 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑁄 𑀯𑀺𑀫𑁄𑀓𑁆𑀔𑁄, 𑀲𑁄𑀧𑀺 𑀏𑀢𑀤𑀢𑁆𑀣𑀸𑀬; 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀏𑀯𑀸𑀢𑀺 𑀅𑀢𑁆𑀣𑁄.

𑁩𑁬𑁭. 𑀅𑀦𑀼𑀬𑁄𑀕𑀯𑀢𑁆𑀢𑀕𑀸𑀣𑀸𑀲𑀼 𑀧𑀞𑀫𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀏𑀯.

𑀯𑀢𑁆𑀣𑀼𑀁 𑀯𑀺𑀧𑀢𑁆𑀢𑀺𑀁 𑀆𑀧𑀢𑁆𑀢𑀺𑀁, 𑀦𑀺𑀤𑀸𑀦𑀁 𑀆𑀓𑀸𑀭𑀅𑀓𑁄𑀯𑀺𑀤𑁄 𑀧𑀼𑀩𑁆𑀩𑀸𑀧𑀭𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀯𑀢𑁆𑀣𑀼’’𑀦𑁆𑀢𑀺𑀆𑀤𑀻𑀦𑀺 ‘‘𑀦 𑀚𑀸𑀦𑀸𑀢𑀻’’𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. ‘‘𑀅𑀓𑁄𑀯𑀺𑀤𑁄’’𑀢𑀺 𑀧𑀤𑀲𑁆𑀲 ‘‘𑀲 𑀯𑁂 𑀢𑀸𑀤𑀺𑀲𑀓𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸 𑀅𑀬𑀫𑁂𑀢𑁆𑀣 𑀬𑁄𑀚𑀦𑀸 𑁋 𑀬𑁄 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀸𑀤𑀻𑀦𑀁 𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀺, 𑀘𑀢𑀼𑀩𑁆𑀩𑀺𑀥𑀁 𑀯𑀺𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀲𑀢𑁆𑀢𑀯𑀺𑀥𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, ‘‘𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀦𑀕𑀭𑁂 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀏𑀯𑀁 𑀦𑀺𑀤𑀸𑀦𑀁 𑀦 𑀚𑀸𑀦𑀸𑀢𑀺, ‘‘𑀇𑀤𑀁 𑀧𑀼𑀭𑀺𑀫𑀯𑀘𑀦𑀁 𑀇𑀤𑀁 𑀧𑀘𑁆𑀙𑀺𑀫𑀯𑀘𑀦’’𑀦𑁆𑀢𑀺 𑀧𑀼𑀩𑁆𑀩𑀸𑀧𑀭𑀁 𑀦 𑀚𑀸𑀦𑀸𑀢𑀺, ‘‘𑀇𑀤𑀁 𑀓𑀢𑀁 𑀇𑀤𑀁 𑀅𑀓𑀢’’𑀦𑁆𑀢𑀺 𑀓𑀢𑀸𑀓𑀢𑀁 𑀦 𑀚𑀸𑀦𑀸𑀢𑀺. 𑀲𑀫𑁂𑀦 𑀘𑀸𑀢𑀺 𑀢𑁂𑀦𑁂𑀯 𑀧𑀼𑀩𑁆𑀩𑀸𑀧𑀭𑀁 𑀅𑀚𑀸𑀦𑀦𑀲𑁆𑀲 𑀲𑀫𑁂𑀦 𑀅𑀜𑁆𑀜𑀸𑀡𑁂𑀦, ‘‘𑀓𑀢𑀸𑀓𑀢𑀁 𑀦 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺; 𑀏𑀯𑀁 𑀢𑀸𑀯 𑀦𑀚𑀸𑀦𑀸𑀢𑀺-𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦𑁂𑀢𑀁 ‘‘𑀆𑀓𑀸𑀭𑀅𑀓𑁄𑀯𑀺𑀤𑁄’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀆𑀓𑀸𑀭𑀅𑀓𑁄𑀯𑀺𑀤𑁄𑀢𑀺 𑀓𑀸𑀭𑀡𑀸𑀓𑀸𑀭𑀡𑁂 𑀅𑀓𑁄𑀯𑀺𑀤𑁄. 𑀇𑀢𑀺 𑀬𑁆𑀯𑀸𑀬𑀁 𑀯𑀢𑁆𑀣𑀼𑀆𑀤𑀻𑀦𑀺𑀧𑀺 𑀦 𑀚𑀸𑀦𑀸𑀢𑀺, 𑀆𑀓𑀸𑀭𑀲𑁆𑀲 𑀘 𑀅𑀓𑁄𑀯𑀺𑀤𑁄, 𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼 𑀅𑀧𑀝𑀺𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺.

𑀓𑀫𑁆𑀫𑀜𑁆𑀘 𑀅𑀥𑀺𑀓𑀭𑀡𑀜𑁆𑀘𑀸𑀢𑀺 𑀇𑀫𑁂𑀲𑀫𑁆𑀧𑀺 𑀧𑀤𑀸𑀦𑀁 ‘‘𑀦 𑀚𑀸𑀦𑀸𑀢𑀻’’𑀢𑀺 𑀧𑀤𑁂𑀦𑁂𑀯 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀢𑀣𑁂𑀯 𑀇𑀢𑀺 𑀬𑁆𑀯𑀸𑀬𑀁 𑀓𑀫𑁆𑀫𑀜𑁆𑀘 𑀦 𑀚𑀸𑀦𑀸𑀢𑀺, 𑀅𑀥𑀺𑀓𑀭𑀡𑀜𑁆𑀘 𑀦 𑀚𑀸𑀦𑀸𑀢𑀺, 𑀲𑀢𑁆𑀢𑀧𑁆𑀧𑀓𑀸𑀭𑁂 𑀲𑀫𑀣𑁂 𑀘𑀸𑀧𑀺 𑀅𑀓𑁄𑀯𑀺𑀤𑁄, 𑀭𑀸𑀕𑀸𑀤𑀻𑀳𑀺 𑀧𑀦 𑀭𑀢𑁆𑀢𑁄 𑀤𑀼𑀝𑁆𑀞𑁄 𑀘 𑀫𑀽𑀴𑁆𑀳𑁄 𑀘, 𑀪𑀬𑁂𑀦 𑀪𑀬𑀸 𑀕𑀘𑁆𑀙𑀢𑀺, 𑀲𑀫𑁆𑀫𑁄𑀳𑁂𑀦 𑀫𑁄𑀳𑀸 𑀕𑀘𑁆𑀙𑀢𑀺, 𑀭𑀢𑁆𑀢𑀢𑁆𑀢𑀸 𑀧𑀦 𑀤𑀼𑀝𑁆𑀞𑀢𑁆𑀢𑀸 𑀘 𑀙𑀦𑁆𑀤𑀸 𑀤𑁄𑀲𑀸 𑀘 𑀕𑀘𑁆𑀙𑀢𑀺, 𑀧𑀭𑀁 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀦 𑀘 𑀲𑀜𑁆𑀜𑀢𑁆𑀢𑀺𑀓𑀼𑀲𑀮𑁄, 𑀓𑀸𑀭𑀡𑀸𑀓𑀸𑀭𑀡𑀤𑀲𑁆𑀲𑀦𑁂 𑀅𑀲𑀫𑀢𑁆𑀣𑀢𑀸𑀬 𑀦𑀺𑀚𑁆𑀛𑀢𑁆𑀢𑀺𑀬𑀸 𑀘 𑀅𑀓𑁄𑀯𑀺𑀤𑁄 𑀅𑀢𑁆𑀢𑀦𑁄 𑀲𑀤𑀺𑀲𑀸𑀬 𑀧𑀭𑀺𑀲𑀸𑀬 𑀮𑀤𑁆𑀥𑀢𑁆𑀢𑀸 𑀮𑀤𑁆𑀥𑀧𑀓𑁆𑀔𑁄, 𑀳𑀺𑀭𑀺𑀬𑀸 𑀧𑀭𑀺𑀩𑀸𑀳𑀺𑀭𑀢𑁆𑀢𑀸 𑀅𑀳𑀺𑀭𑀺𑀓𑁄, 𑀓𑀸𑀴𑀓𑁂𑀳𑀺 𑀓𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀓𑀡𑁆𑀳𑀓𑀫𑁆𑀫𑁄, 𑀥𑀫𑁆𑀫𑀸𑀤𑀭𑀺𑀬𑀧𑀼𑀕𑁆𑀕𑀮𑀸𑀤𑀭𑀺𑀬𑀸𑀦𑀁 𑀅𑀪𑀸𑀯𑀢𑁄 𑀅𑀦𑀸𑀤𑀭𑁄, 𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼 𑀅𑀧𑀝𑀺𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺, 𑀦 𑀧𑀝𑀺𑀓𑁆𑀔𑀺𑀢𑀩𑁆𑀩𑁄 𑀦 𑀑𑀮𑁄𑀓𑁂𑀢𑀩𑁆𑀩𑁄, 𑀦 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀞𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀓𑀧𑀓𑁆𑀔𑀕𑀸𑀣𑀸𑀦𑀫𑁆𑀧𑀺 𑀬𑁄𑀚𑀦𑀸𑀦𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀘𑀽𑀴𑀲𑀗𑁆𑀕𑀸𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.