𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀧𑀭𑀺𑀯𑀸𑀭-𑀅𑀝𑁆𑀞𑀓𑀣𑀸

𑀲𑁄𑀴𑀲𑀫𑀳𑀸𑀯𑀸𑀭𑁄

𑀧𑀜𑁆𑀜𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑀯𑀺𑀲𑀼𑀤𑁆𑀥𑀧𑀭𑀺𑀯𑀸𑀭𑀲𑁆𑀲, 𑀧𑀭𑀺𑀯𑀸𑀭𑁄𑀢𑀺 𑀲𑀸𑀲𑀦𑁂;

𑀥𑀫𑁆𑀫𑀓𑁆𑀔𑀦𑁆𑀥𑀲𑀭𑀻𑀭𑀲𑁆𑀲, 𑀔𑀦𑁆𑀥𑀓𑀸𑀦𑀁 𑀅𑀦𑀦𑁆𑀢𑀭𑀸.

𑀲𑀗𑁆𑀕𑀳𑀁 𑀬𑁄 𑀲𑀫𑀸𑀭𑀼𑀴𑁆𑀳𑁄, 𑀢𑀲𑁆𑀲 𑀧𑀼𑀩𑁆𑀩𑀸𑀕𑀢𑀁 𑀦𑀬𑀁;

𑀳𑀺𑀢𑁆𑀯𑀸 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀺, 𑀅𑀦𑀼𑀢𑁆𑀢𑀸𑀦𑀢𑁆𑀣𑀯𑀡𑁆𑀡𑀦𑀁.

𑁧. 𑀢𑀢𑁆𑀣 𑀬𑀁 𑀢𑁂𑀦 𑀪𑀕𑀯𑀢𑀸…𑀧𑁂… 𑀧𑀜𑁆𑀜𑀢𑁆𑀢𑀦𑁆𑀢𑀺 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀢𑀸𑀯 𑀧𑀼𑀘𑁆𑀙𑀸𑀬 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁄 𑀲𑁄 𑀪𑀕𑀯𑀸 𑀲𑀸𑀲𑀦𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀢𑁆𑀣𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀲𑀤𑁆𑀥𑀫𑁆𑀫𑀕𑀸𑀭𑀯𑀩𑀳𑀼𑀫𑀸𑀦𑀯𑁂𑀕𑀲𑀫𑀼𑀲𑁆𑀲𑀺𑀢𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀸𑀘𑀺𑀢𑁄 𑀤𑀲 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀁 𑀧𑀜𑁆𑀜𑀧𑁂𑀲𑀺, 𑀢𑁂𑀦 𑀪𑀕𑀯𑀢𑀸 𑀢𑀲𑁆𑀲 𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀺𑀓𑀸𑀮𑀁 𑀚𑀸𑀦𑀢𑀸, 𑀢𑀲𑁆𑀲𑀸 𑀢𑀲𑁆𑀲𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀤𑀲 𑀅𑀢𑁆𑀣𑀯𑀲𑁂 𑀧𑀲𑁆𑀲𑀢𑀸; 𑀅𑀧𑀺𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀺 𑀚𑀸𑀦𑀢𑀸, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀸, 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀙𑀳𑀺 𑀯𑀸 𑀧𑀦 𑀅𑀪𑀺𑀜𑁆𑀜𑀸𑀳𑀺 𑀚𑀸𑀦𑀢𑀸, 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀸, 𑀲𑀩𑁆𑀩𑀥𑀫𑁆𑀫𑀚𑀸𑀦𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀚𑀸𑀦𑀢𑀸, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀯𑀺𑀲𑀬𑀸𑀢𑀻𑀢𑀸𑀦𑀺 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀸𑀦𑀺 𑀘𑀸𑀧𑀺 𑀭𑀽𑀧𑀸𑀦𑀺 𑀅𑀢𑀺𑀯𑀺𑀲𑀼𑀤𑁆𑀥𑁂𑀦 𑀫𑀁𑀲𑀘𑀓𑁆𑀔𑀼𑀦𑀸 𑀘 𑀧𑀲𑁆𑀲𑀢𑀸, 𑀅𑀢𑁆𑀢𑀳𑀺𑀢𑀲𑀸𑀥𑀺𑀓𑀸𑀬 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸𑀬 𑀧𑀝𑀺𑀯𑁂𑀥𑀧𑀜𑁆𑀜𑀸𑀬 𑀚𑀸𑀦𑀢𑀸, 𑀧𑀭𑀳𑀺𑀢𑀲𑀸𑀥𑀺𑀓𑀸𑀬 𑀓𑀭𑀼𑀡𑀸𑀧𑀤𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀸, 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 ‘‘𑀬𑀁 𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀓𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀁, 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀢𑁆𑀣𑀺 𑀢𑀢𑁆𑀣 𑀧𑀜𑁆𑀜𑀢𑁆𑀢𑀺…𑀧𑁂… 𑀓𑁂𑀦𑀸𑀪𑀢’’𑀦𑁆𑀢𑀺.

𑁨. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀧𑀦 ‘‘𑀬𑀁 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀞𑀫𑀁 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀇𑀤𑀁 𑀓𑁂𑀯𑀮𑀁 𑀧𑀼𑀘𑁆𑀙𑀸𑀬 𑀆𑀕𑀢𑀲𑁆𑀲 𑀆𑀤𑀺𑀧𑀤𑀲𑁆𑀲 𑀧𑀘𑁆𑀘𑀼𑀤𑁆𑀥𑀭𑀡𑀫𑀢𑁆𑀢𑀫𑁂𑀯, ‘‘𑀓𑀢𑁆𑀣 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑁂𑀲𑀸𑀮𑀺𑀬𑀸 𑀧𑀜𑁆𑀜𑀢𑁆𑀢𑀁; 𑀓𑀁 𑀆𑀭𑀩𑁆𑀪𑀸𑀢𑀺 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀆𑀭𑀩𑁆𑀪𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀦 𑀦𑀬𑁂𑀦 𑀧𑀼𑀦𑀧𑀺 𑀏𑀢𑁆𑀣 𑀏𑀓𑁂𑀓𑀁 𑀧𑀤𑀁 𑀧𑀼𑀘𑁆𑀙𑀺𑀢𑁆𑀯𑀸𑀯 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀏𑀓𑀸 𑀧𑀜𑁆𑀜𑀢𑁆𑀢𑀻𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 𑀅𑀬𑀁 𑀏𑀓𑀸 𑀧𑀜𑁆𑀜𑀢𑁆𑀢𑀺. 𑀤𑁆𑀯𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄𑀢𑀺 ‘‘𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀻’’𑀢𑀺 𑀘, ‘‘𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬𑀸’’𑀢𑀺 𑀘 𑀫𑀓𑁆𑀓𑀝𑀺𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀽𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸 𑁋 𑀇𑀫𑀸 𑀤𑁆𑀯𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄. 𑀏𑀢𑁆𑀢𑀸𑀯𑀢𑀸 ‘‘𑀅𑀢𑁆𑀣𑀺 𑀢𑀢𑁆𑀣 𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀇𑀫𑀺𑀲𑁆𑀲𑀸 𑀧𑀼𑀘𑁆𑀙𑀸𑀬 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀯𑀺𑀲𑁆𑀲𑀚𑁆𑀚𑀺𑀢𑀸 𑀳𑁄𑀦𑁆𑀢𑀺. 𑀢𑀢𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀧𑀦 ‘‘𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀢𑀲𑁆𑀫𑀺𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀳𑀺 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀦𑀸𑀫 𑀅𑀦𑀼𑀧𑁆𑀧𑀦𑁆𑀦𑁂 𑀤𑁄𑀲𑁂 𑀧𑀜𑁆𑀜𑀢𑁆𑀢𑀸; 𑀲𑀸 𑀅𑀝𑁆𑀞𑀕𑀭𑀼𑀥𑀫𑁆𑀫𑀯𑀲𑁂𑀦 𑀪𑀺𑀓𑁆𑀔𑀼𑀦𑀻𑀦𑀁𑀬𑁂𑀯 𑀆𑀕𑀢𑀸, 𑀅𑀜𑁆𑀜𑀢𑁆𑀭 𑀦𑀢𑁆𑀣𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀢𑀲𑁆𑀫𑀺𑀁 𑀦𑀢𑁆𑀣𑀻’’𑀢𑀺. 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀻𑀢𑀺 𑀫𑀚𑁆𑀛𑀺𑀫𑀤𑁂𑀲𑁂 𑀘𑁂𑀯 𑀧𑀘𑁆𑀘𑀦𑁆𑀢𑀺𑀫𑀚𑀦𑀧𑀤𑁂𑀲𑀼 𑀘 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺. 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 ‘‘𑀉𑀧𑀲𑀫𑁆𑀧𑀤𑀸, 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸, 𑀥𑀼𑀯𑀦𑀳𑀸𑀦𑀁, 𑀘𑀫𑁆𑀫𑀢𑁆𑀣𑀭𑀡’’𑀦𑁆𑀢𑀺 𑀇𑀫𑀸𑀦𑀺 𑀳𑀺 𑀘𑀢𑁆𑀢𑀸𑀭𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯 𑀧𑀜𑁆𑀜𑀢𑁆𑀢𑀺. 𑀏𑀢𑁆𑀣𑁂𑀯 𑀏𑀢𑁂𑀳𑀺 𑀆𑀧𑀢𑁆𑀢𑀺 𑀳𑁄𑀢𑀺, 𑀦 𑀧𑀘𑁆𑀘𑀦𑁆𑀢𑀺𑀫𑀚𑀦𑀧𑀤𑁂𑀲𑀼. 𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑁂𑀯 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺 𑀦𑀸𑀫.

𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀻𑀢𑀺 𑀪𑀺𑀓𑁆𑀔𑀽𑀦𑀜𑁆𑀘𑁂𑀯 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺; 𑀲𑀼𑀤𑁆𑀥𑀪𑀺𑀓𑁆𑀔𑀽𑀦𑀫𑁂𑀯 𑀳𑀺 𑀲𑀼𑀤𑁆𑀥𑀪𑀺𑀓𑁆𑀔𑀼𑀦𑀻𑀦𑀁 𑀯𑀸 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺 𑀦𑀸𑀫 𑀳𑁄𑀢𑀺. 𑀇𑀤𑀁 𑀧𑀦 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀙𑀦𑁆𑀤𑀲𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬, 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑁂𑀦𑀧𑀺 𑀧𑀸𑀭𑀸𑀚𑀺𑀓𑀸 𑀳𑁄𑀢𑀺 𑀅𑀲𑀁𑀯𑀸𑀲𑀸’’𑀢𑀺 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀧𑀜𑁆𑀜𑀢𑁆𑀢𑀁, 𑀯𑀺𑀦𑀻𑀢𑀓𑀣𑀸𑀫𑀢𑁆𑀢𑀫𑁂𑀯 𑀳𑀺 𑀢𑀸𑀲𑀁 𑀦𑀢𑁆𑀣𑀺, 𑀲𑀺𑀓𑁆𑀔𑀸𑀧𑀤𑀁 𑀧𑀦 𑀅𑀢𑁆𑀣𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀻’’𑀢𑀺. 𑀉𑀪𑀢𑁄𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯 𑀳𑀺 𑀏𑀢𑁆𑀣 𑀦𑀸𑀦𑀁, 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀲𑀸𑀥𑀸𑀭𑀡𑀢𑁆𑀢𑀸 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀉𑀪𑀺𑀦𑁆𑀦𑀫𑁆𑀧𑀺 𑀧𑀜𑁆𑀜𑀢𑁆𑀢𑀢𑁆𑀢𑀸 𑀉𑀪𑀢𑁄𑀧𑀜𑁆𑀜𑀢𑁆𑀢𑀻𑀢𑀺. 𑀅𑀢𑁆𑀣𑁂 𑀧𑀦 𑀪𑁂𑀤𑁄 𑀦𑀢𑁆𑀣𑀺.

𑀦𑀺𑀤𑀸𑀦𑁄𑀕𑀥𑀦𑁆𑀢𑀺 ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀺 𑀲𑁄 𑀆𑀯𑀺𑀓𑀭𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀲𑀩𑁆𑀩𑀸𑀧𑀢𑁆𑀢𑀻𑀦𑀁 𑀅𑀦𑀼𑀧𑀯𑀺𑀝𑁆𑀞𑀢𑁆𑀢𑀸 𑀦𑀺𑀤𑀸𑀦𑁄𑀕𑀥𑀁; 𑀦𑀺𑀤𑀸𑀦𑁂 𑀅𑀦𑀼𑀧𑀯𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂𑀦 𑀉𑀤𑁆𑀤𑁂𑀲𑁂𑀦𑀸𑀢𑀺 𑀦𑀺𑀤𑀸𑀦𑁄𑀕𑀥𑀁 𑀦𑀺𑀤𑀸𑀦𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀲𑀫𑀸𑀦𑀁 ‘‘𑀢𑀢𑁆𑀭𑀺𑀫𑁂 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀤𑀼𑀢𑀺𑀬𑁂𑀦𑁂𑀯 𑀉𑀤𑁆𑀤𑁂𑀲𑁂𑀦 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀢𑀺. 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀦𑁆𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀆𑀤𑀻𑀦𑀁. 𑀧𑀞𑀫𑀸 𑀳𑀺 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀲𑀻𑀮𑀯𑀺𑀧𑀢𑁆𑀢𑀺 𑀦𑀸𑀫, 𑀅𑀯𑀲𑁂𑀲𑀸 𑀧𑀜𑁆𑀘 𑀆𑀘𑀸𑀭𑀯𑀺𑀧𑀢𑁆𑀢𑀺 𑀦𑀸𑀫. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺 𑀘 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺 𑀦𑀸𑀫, 𑀆𑀚𑀻𑀯𑀳𑁂𑀢𑀼 𑀧𑀜𑁆𑀜𑀢𑁆𑀢𑀸𑀦𑀺 𑀙 𑀲𑀺𑀓𑁆𑀔𑀸𑀧𑀤𑀸𑀦𑀺 𑀆𑀚𑀻𑀯𑀯𑀺𑀧𑀢𑁆𑀢𑀺 𑀦𑀸𑀫. 𑀇𑀢𑀺 𑀇𑀫𑀸𑀲𑀁 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀇𑀤𑀁 𑀧𑀸𑀭𑀸𑀚𑀺𑀓𑀁 𑀲𑀻𑀮𑀯𑀺𑀧𑀢𑁆𑀢𑀺 𑀦𑀸𑀫 𑀳𑁄𑀢𑀺.

𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦𑀸𑀢𑀺 𑀤𑁆𑀯𑀗𑁆𑀕𑀺𑀓𑁂𑀦 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦. 𑀏𑀢𑁆𑀣 𑀳𑀺 𑀘𑀺𑀢𑁆𑀢𑀁 𑀅𑀗𑁆𑀕𑀁 𑀳𑁄𑀢𑀺, 𑀓𑀸𑀬𑁂𑀦 𑀧𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀻’’𑀢𑀺. 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀻𑀢𑀺 ‘‘𑀆𑀧𑀦𑁆𑀦𑁄𑀲𑀻’’𑀢𑀺 𑀲𑀫𑁆𑀫𑀼𑀔𑀸 𑀧𑀼𑀘𑁆𑀙𑀺𑀬𑀫𑀸𑀦𑁄 ‘‘𑀆𑀫 𑀆𑀧𑀦𑁆𑀦𑁄𑀫𑁆𑀳𑀻’’𑀢𑀺 𑀧𑀝𑀺𑀚𑀸𑀦𑀸𑀢𑀺, 𑀢𑀸𑀯𑀤𑁂𑀯 𑀪𑀡𑁆𑀟𑀦𑀓𑀮𑀳𑀯𑀺𑀕𑁆𑀕𑀳𑀸 𑀯𑀽𑀧𑀲𑀦𑁆𑀢𑀸 𑀳𑁄𑀦𑁆𑀢𑀺, 𑀲𑀓𑁆𑀓𑀸 𑀘 𑀳𑁄𑀢𑀺 𑀢𑀁 𑀧𑀼𑀕𑁆𑀕𑀮𑀁 𑀅𑀧𑀦𑁂𑀢𑁆𑀯𑀸 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀓𑀸𑀢𑀼𑀁. 𑀇𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺, 𑀦 𑀘 𑀢𑀧𑁆𑀧𑀘𑁆𑀘𑀬𑀸 𑀓𑁄𑀘𑀺 𑀉𑀧𑀤𑁆𑀤𑀯𑁄 𑀳𑁄𑀢𑀺. 𑀬𑀁 𑀧𑀦 𑀉𑀧𑀭𑀺 𑀧𑀜𑁆𑀜𑀢𑁆𑀢𑀺𑀯𑀕𑁆𑀕𑁂 ‘‘𑀦 𑀓𑀢𑀫𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑀫𑀣𑀁 𑀑𑀢𑀸𑀭𑁂𑀢𑁆𑀯𑀸 𑀅𑀦𑀸𑀧𑀢𑁆𑀢𑀺 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀧𑀜𑁆𑀜𑀢𑁆𑀢𑀺 𑀯𑀺𑀦𑀬𑁄𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀫𑀸𑀢𑀺𑀓𑀸 𑀧𑀜𑁆𑀜𑀢𑁆𑀢𑀺 𑀯𑀺𑀦𑀬𑁄𑀢𑀺 𑀅𑀢𑁆𑀣𑁄. 𑀯𑀺𑀪𑀢𑁆𑀢𑀻𑀢𑀺 𑀧𑀤𑀪𑀸𑀚𑀦𑀁 𑀯𑀼𑀘𑁆𑀘𑀢𑀺; 𑀯𑀺𑀪𑀢𑁆𑀢𑀻𑀢𑀺 𑀳𑀺 𑀯𑀺𑀪𑀗𑁆𑀕𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀅𑀲𑀁𑀯𑀭𑁄𑀢𑀺 𑀯𑀻𑀢𑀺𑀓𑁆𑀓𑀫𑁄. 𑀲𑀁𑀯𑀭𑁄𑀢𑀺 𑀅𑀯𑀻𑀢𑀺𑀓𑁆𑀓𑀫𑁄. 𑀬𑁂𑀲𑀁 𑀯𑀢𑁆𑀢𑀢𑀻𑀢𑀺 𑀬𑁂𑀲𑀁 𑀯𑀺𑀦𑀬𑀧𑀺𑀝𑀓𑀜𑁆𑀘 𑀅𑀝𑁆𑀞𑀓𑀣𑀸 𑀘 𑀲𑀩𑁆𑀩𑀸 𑀧𑀕𑀼𑀡𑀸𑀢𑀺 𑀅𑀢𑁆𑀣𑁄. 𑀢𑁂 𑀥𑀸𑀭𑁂𑀦𑁆𑀢𑀻𑀢𑀺 𑀢𑁂 𑀏𑀢𑀁 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀥𑀸𑀭𑁂𑀦𑁆𑀢𑀺; 𑀦 𑀳𑀺 𑀲𑀓𑁆𑀓𑀸 𑀲𑀩𑁆𑀩𑀁 𑀯𑀺𑀦𑀬𑀧𑀺𑀝𑀓𑀁 𑀅𑀚𑀸𑀦𑀦𑁆𑀢𑁂𑀦 𑀏𑀢𑀲𑁆𑀲 𑀅𑀢𑁆𑀣𑁄 𑀚𑀸𑀦𑀺𑀢𑀼𑀦𑁆𑀢𑀺. 𑀓𑁂𑀦𑀸𑀪𑀢𑀦𑁆𑀢𑀺 𑀇𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀸𑀴𑀺𑀯𑀲𑁂𑀦 𑀘 𑀅𑀢𑁆𑀣𑀯𑀲𑁂𑀦 𑀘 𑀬𑀸𑀯 𑀅𑀚𑁆𑀚𑀢𑀦𑀓𑀸𑀮𑀁 𑀓𑁂𑀦 𑀆𑀦𑀻𑀢𑀦𑁆𑀢𑀺. 𑀧𑀭𑀫𑁆𑀧𑀭𑀸𑀪𑀢𑀦𑁆𑀢𑀺 𑀧𑀭𑀫𑁆𑀧𑀭𑀸𑀬 𑀆𑀦𑀻𑀢𑀁.

𑁩. 𑀇𑀤𑀸𑀦𑀺 𑀬𑀸𑀬 𑀧𑀭𑀫𑁆𑀧𑀭𑀸𑀬 𑀆𑀦𑀻𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀸𑀮𑀺 𑀤𑀸𑀲𑀓𑁄 𑀘𑁂𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑁄𑀭𑀸𑀡𑀓𑁂𑀳𑀺 𑀫𑀳𑀸𑀣𑁂𑀭𑁂𑀳𑀺 𑀕𑀸𑀣𑀸𑀬𑁄 𑀞𑀧𑀺𑀢𑀸. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀦𑀺𑀤𑀸𑀦𑀯𑀡𑁆𑀡𑀦𑀸𑀬𑀫𑁂𑀯 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀦𑀬𑁂𑀦 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀲𑀼𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀫𑀳𑀸𑀯𑀺𑀪𑀗𑁆𑀕𑁂 𑀧𑀜𑁆𑀜𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀢𑀸𑀧𑀢𑁆𑀢𑀺𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁧𑁫𑁭. 𑀇𑀢𑁄 𑀧𑀭𑀁 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻’’𑀢𑀺 𑀆𑀤𑀺𑀧𑁆𑀧𑀪𑁂𑀤𑁄 𑀓𑀢𑀸𑀧𑀢𑁆𑀢𑀺𑀯𑀸𑀭𑁄, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀻’’𑀢𑀺 𑀆𑀤𑀺𑀧𑁆𑀧𑀪𑁂𑀤𑁄 𑀯𑀺𑀧𑀢𑁆𑀢𑀺𑀯𑀸𑀭𑁄, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁄 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀓𑀢𑀺𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸’’𑀢𑀺 𑀆𑀤𑀺𑀧𑁆𑀧𑀪𑁂𑀤𑁄 𑀲𑀗𑁆𑀕𑀳𑀯𑀸𑀭𑁄, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁄 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀢𑀺𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀳𑀦𑁆𑀢𑀻’’𑀢𑀺 𑀆𑀤𑀺𑀧𑁆𑀧𑀪𑁂𑀤𑁄 𑀲𑀫𑀼𑀝𑁆𑀞𑀸𑀦𑀯𑀸𑀭𑁄, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑀁 𑀅𑀥𑀺𑀓𑀭𑀡’’𑀦𑁆𑀢𑀺 𑀆𑀤𑀺𑀧𑁆𑀧𑀪𑁂𑀤𑁄 𑀅𑀥𑀺𑀓𑀭𑀡𑀯𑀸𑀭𑁄, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁄 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀻’’𑀢𑀺 𑀆𑀤𑀺𑀧𑁆𑀧𑀪𑁂𑀤𑁄 𑀲𑀫𑀣𑀯𑀸𑀭𑁄, 𑀢𑀤𑀦𑀦𑁆𑀢𑀭𑁄 𑀲𑀫𑀼𑀘𑁆𑀘𑀬𑀯𑀸𑀭𑁄 𑀘𑀸𑀢𑀺 𑀇𑀫𑁂 𑀲𑀢𑁆𑀢 𑀯𑀸𑀭𑀸 𑀉𑀢𑁆𑀢𑀸𑀦𑀢𑁆𑀣𑀸 𑀏𑀯.

𑁧𑁮𑁮. 𑀢𑀢𑁄 𑀧𑀭𑀁 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑀧𑀘𑁆𑀘𑀬𑀸 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀦 𑀧𑀘𑁆𑀘𑀬𑀯𑀲𑁂𑀦 𑀏𑀓𑁄 𑀧𑀜𑁆𑀜𑀢𑁆𑀢𑀺𑀯𑀸𑀭𑁄, 𑀢𑀲𑁆𑀲 𑀯𑀲𑁂𑀦 𑀧𑀼𑀭𑀺𑀫𑀲𑀤𑀺𑀲𑀸 𑀏𑀯 𑀓𑀢𑀸𑀧𑀢𑁆𑀢𑀺𑀯𑀸𑀭𑀸𑀤𑀬𑁄 𑀲𑀢𑁆𑀢 𑀯𑀸𑀭𑀸𑀢𑀺 𑀏𑀯𑀁 𑀅𑀧𑀭𑁂𑀧𑀺 𑀅𑀝𑁆𑀞 𑀯𑀸𑀭𑀸 𑀯𑀼𑀢𑁆𑀢𑀸, 𑀢𑁂𑀧𑀺 𑀉𑀢𑁆𑀢𑀸𑀦𑀢𑁆𑀣𑀸 𑀏𑀯. 𑀇𑀢𑀺 𑀇𑀫𑁂 𑀅𑀝𑁆𑀞, 𑀧𑀼𑀭𑀺𑀫𑀸 𑀅𑀝𑁆𑀞𑀸𑀢𑀺 𑀫𑀳𑀸𑀯𑀺𑀪𑀗𑁆𑀕𑁂 𑀲𑁄𑀴𑀲 𑀯𑀸𑀭𑀸 𑀤𑀲𑁆𑀲𑀺𑀢𑀸. 𑀢𑀢𑁄 𑀧𑀭𑀁 𑀢𑁂𑀦𑁂𑀯 𑀦𑀬𑁂𑀦 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂𑀧𑀺 𑀲𑁄𑀴𑀲 𑀯𑀸𑀭𑀸 𑀆𑀕𑀢𑀸𑀢𑀺 𑀏𑀯𑀫𑀺𑀫𑁂 𑀉𑀪𑀢𑁄𑀯𑀺𑀪𑀗𑁆𑀕𑁂 𑀤𑁆𑀯𑀢𑁆𑀢𑀺𑀁𑀲 𑀯𑀸𑀭𑀸 𑀧𑀸𑀴𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑁂𑀢𑁆𑀣 𑀓𑀺𑀜𑁆𑀘𑀺 𑀧𑀼𑀩𑁆𑀩𑁂 𑀅𑀯𑀺𑀦𑀺𑀘𑁆𑀙𑀺𑀢𑀁 𑀦𑀸𑀫 𑀅𑀢𑁆𑀣𑀺.

𑀫𑀳𑀸𑀯𑀺𑀪𑀗𑁆𑀕𑁂 𑀘 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀘

𑀲𑁄𑀴𑀲𑀫𑀳𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀲𑀻𑀲𑀯𑀡𑁆𑀡𑀦𑀸

𑁨𑁫𑁭. 𑀢𑀤𑀦𑀦𑁆𑀢𑀭𑀸𑀬 𑀧𑀦 𑀲𑀫𑀼𑀝𑁆𑀞𑀸𑀦𑀓𑀣𑀸𑀬 𑀅𑀦𑀢𑁆𑀢𑀸 𑀇𑀢𑀺 𑀦𑀺𑀘𑁆𑀙𑀬𑀸𑀢𑀺 𑀅𑀦𑀢𑁆𑀢𑀸 𑀇𑀢𑀺 𑀦𑀺𑀘𑁆𑀙𑀺𑀢𑀸. 𑀲𑀪𑀸𑀕𑀥𑀫𑁆𑀫𑀸𑀦𑀦𑁆𑀢𑀺 𑀅𑀦𑀺𑀘𑁆𑀘𑀸𑀓𑀸𑀭𑀸𑀤𑀻𑀳𑀺 𑀲𑀪𑀸𑀕𑀸𑀦𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁. 𑀦𑀸𑀫𑀫𑀢𑁆𑀢𑀁 𑀦 𑀦𑀸𑀬𑀢𑀻𑀢𑀺 𑀦𑀸𑀫𑀫𑀢𑁆𑀢𑀫𑁆𑀧𑀺 𑀦 𑀧𑀜𑁆𑀜𑀸𑀬𑀢𑀺. 𑀤𑀼𑀓𑁆𑀔𑀳𑀸𑀦𑀺𑀦𑁆𑀢𑀺 𑀤𑀼𑀓𑁆𑀔𑀖𑀸𑀢𑀦𑀁. 𑀔𑀦𑁆𑀥𑀓𑀸 𑀬𑀸 𑀘 𑀫𑀸𑀢𑀺𑀓𑀸𑀢𑀺 𑀔𑀦𑁆𑀥𑀓𑀸 𑀬𑀸 𑀘 𑀫𑀸𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀫𑀼𑀝𑁆𑀞𑀸𑀦𑀁 𑀦𑀺𑀬𑀢𑁄 𑀓𑀢𑀦𑁆𑀢𑀺 𑀲𑀫𑀼𑀝𑁆𑀞𑀸𑀦𑀁 𑀦𑀺𑀬𑀢𑁄𑀓𑀢𑀁 𑀦𑀺𑀬𑀢𑀓𑀢𑀁; 𑀦𑀺𑀬𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀪𑀽𑀢𑀸𑀭𑁄𑀘𑀦𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀅𑀦𑀦𑀼𑀜𑁆𑀜𑀸𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀲𑁆𑀲 𑀲𑀗𑁆𑀕𑀳𑁄 𑀧𑀘𑁆𑀘𑁂𑀢𑀩𑁆𑀩𑁄. 𑀏𑀢𑀸𑀦𑁂𑀯 𑀳𑀺 𑀢𑀻𑀡𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀦𑀺𑀬𑀢𑀲𑀫𑀼𑀝𑁆𑀞𑀸𑀦𑀸𑀦𑀺, 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀅𑀲𑀫𑁆𑀪𑀺𑀦𑁆𑀦𑀲𑀫𑀼𑀝𑁆𑀞𑀸𑀦𑀸𑀦𑀺.

𑀲𑀫𑁆𑀪𑁂𑀤𑀁 𑀦𑀺𑀤𑀸𑀦𑀜𑁆𑀘𑀜𑁆𑀜𑀦𑁆𑀢𑀺 𑀅𑀜𑁆𑀜𑀫𑁆𑀧𑀺 𑀲𑀫𑁆𑀪𑁂𑀤𑀜𑁆𑀘 𑀦𑀺𑀤𑀸𑀦𑀜𑁆𑀘. 𑀢𑀢𑁆𑀣 𑀲𑀫𑁆𑀪𑁂𑀤𑀯𑀘𑀦𑁂𑀦 𑀲𑀫𑀼𑀝𑁆𑀞𑀸𑀦𑀲𑀫𑁆𑀪𑁂𑀤𑀲𑁆𑀲 𑀕𑀳𑀡𑀁 𑀧𑀘𑁆𑀘𑁂𑀢𑀩𑁆𑀩𑀁, 𑀢𑀸𑀦𑀺 𑀳𑀺 𑀢𑀻𑀡𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀲𑀫𑁆𑀪𑀺𑀦𑁆𑀦𑀲𑀫𑀼𑀝𑁆𑀞𑀸𑀦𑀸𑀦𑀺. 𑀦𑀺𑀤𑀸𑀦𑀯𑀘𑀦𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀜𑀢𑁆𑀢𑀺𑀤𑁂𑀲𑀲𑀗𑁆𑀔𑀸𑀢𑀁 𑀦𑀺𑀤𑀸𑀦𑀁 𑀧𑀘𑁆𑀘𑁂𑀢𑀩𑁆𑀩𑀁. 𑀲𑀼𑀢𑁆𑀢𑁂 𑀤𑀺𑀲𑁆𑀲𑀦𑁆𑀢𑀺 𑀉𑀧𑀭𑀻𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀫𑀼𑀝𑁆𑀞𑀸𑀦𑀦𑀺𑀬𑀫𑁄 𑀲𑀫𑁆𑀪𑁂𑀤𑁄 𑀦𑀺𑀤𑀸𑀦𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀼𑀢𑁆𑀢𑀫𑁆𑀳𑀺 𑀏𑀯 𑀤𑀺𑀲𑁆𑀲𑀦𑁆𑀢𑀺; 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 ‘‘𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀢𑀺, 𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘𑀸’’𑀢𑀺𑀆𑀤𑀺𑀫𑁆𑀳𑀺 𑀢𑀸𑀯 𑀧𑀼𑀭𑀺𑀫𑀦𑀬𑁂 𑀲𑀫𑀼𑀝𑁆𑀞𑀸𑀦𑀦𑀺𑀬𑀫𑁄 𑀘 𑀲𑀫𑁆𑀪𑁂𑀤𑁄 𑀘 𑀤𑀺𑀲𑁆𑀲𑀦𑁆𑀢𑀺. 𑀇𑀢𑀭𑀁 𑀧𑀦 𑀦𑀺𑀤𑀸𑀦𑀁 𑀦𑀸𑀫 𑁋

‘‘𑀯𑁂𑀲𑀸𑀮𑀺𑀬𑀸 𑀭𑀸𑀚𑀕𑀳𑁂, 𑀲𑀸𑀯𑀢𑁆𑀣𑀺𑀬𑀸 𑀘 𑀆𑀴𑀯𑀻;

𑀓𑁄𑀲𑀫𑁆𑀩𑀺𑀬𑀸 𑀘 𑀲𑀓𑁆𑀓𑁂𑀲𑀼, 𑀪𑀕𑁆𑀕𑁂𑀲𑀼 𑀘𑁂𑀯 𑀧𑀜𑁆𑀜𑀢𑁆𑀢𑀸’’𑀢𑀺.

𑀏𑀯𑀁 𑀉𑀧𑀭𑀺 𑀤𑀺𑀲𑁆𑀲𑀢𑀺, 𑀧𑀭𑀢𑁄 𑀆𑀕𑀢𑁂 𑀲𑀼𑀢𑁆𑀢𑁂 𑀤𑀺𑀲𑁆𑀲𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀯𑀺𑀪𑀗𑁆𑀕𑁂 𑀤𑁆𑀯𑀻𑀲𑀽’’𑀢𑀺 𑀕𑀸𑀣𑀸𑀬 𑀅𑀬𑀫𑀢𑁆𑀣𑁄 𑁋 𑀬𑀁 𑀲𑀺𑀓𑁆𑀔𑀸𑀧𑀤𑀁 𑀤𑁆𑀯𑀻𑀲𑀼 𑀯𑀺𑀪𑀗𑁆𑀕𑁂𑀲𑀼 𑀧𑀜𑁆𑀜𑀢𑁆𑀢𑀁 𑀉𑀧𑁄𑀲𑀣𑀤𑀺𑀯𑀲𑁂 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀉𑀤𑁆𑀤𑀺𑀲𑀦𑁆𑀢𑀺, 𑀢𑀲𑁆𑀲 𑀬𑀣𑀸𑀜𑀸𑀬𑀁 𑀲𑀫𑀼𑀝𑁆𑀞𑀸𑀦𑀁 𑀧𑀯𑀓𑁆𑀔𑀸𑀫𑀺, 𑀢𑀁 𑀫𑁂 𑀲𑀼𑀡𑀸𑀣𑀸𑀢𑀺.

𑀲𑀜𑁆𑀘𑀭𑀺𑀢𑁆𑀢𑀸𑀦𑀼𑀪𑀸𑀲𑀦𑀜𑁆𑀘𑀸𑀢𑀺 𑀲𑀜𑁆𑀘𑀭𑀺𑀢𑁆𑀢𑀜𑁆𑀘 𑀲𑀫𑀦𑀼𑀪𑀸𑀲𑀦𑀜𑁆𑀘. 𑀅𑀢𑀺𑀭𑁂𑀓𑀜𑁆𑀘 𑀘𑀻𑀯𑀭𑀦𑁆𑀢𑀺 𑀅𑀢𑀺𑀭𑁂𑀓𑀘𑀻𑀯𑀭𑀁; 𑀓𑀣𑀺𑀦𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀫𑀸𑀦𑀺 𑀧𑀤𑀲𑁄𑀥𑀫𑁆𑀫𑁄𑀢𑀺 𑀏𑀴𑀓𑀮𑁄𑀫𑀸𑀦𑀺 𑀘 𑀧𑀤𑀲𑁄𑀥𑀫𑁆𑀫𑁄 𑀘. 𑀪𑀽𑀢𑀁 𑀲𑀁𑀯𑀺𑀥𑀸𑀦𑁂𑀦 𑀘𑀸𑀢𑀺 𑀪𑀽𑀢𑀸𑀭𑁄𑀘𑀦𑀜𑁆𑀘 𑀲𑀁𑀯𑀺𑀤𑀳𑀺𑀢𑁆𑀯𑀸 𑀅𑀤𑁆𑀥𑀸𑀦𑀧𑁆𑀧𑀝𑀺𑀧𑀚𑁆𑀚𑀦𑀜𑁆𑀘. 𑀣𑁂𑀬𑁆𑀬𑀤𑁂𑀲𑀦𑀸 𑀘𑁄𑀭𑀺𑀁 𑀘𑀸𑀢𑀺 𑀣𑁂𑀬𑁆𑀬𑀲𑀢𑁆𑀣𑁄 𑀘 𑀙𑀢𑁆𑀢𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀤𑁂𑀲𑀦𑀸 𑀘 𑀘𑁄𑀭𑀺𑀯𑀼𑀝𑁆𑀞𑀸𑀧𑀦𑀜𑁆𑀘. 𑀅𑀦𑀦𑀼𑀜𑁆𑀜𑀸𑀢𑀸𑀬 𑀢𑁂𑀭𑀲𑀸𑀢𑀺 𑀫𑀸𑀢𑀸𑀧𑀺𑀢𑀼𑀲𑀸𑀫𑀺𑀓𑁂𑀳𑀺 𑀅𑀦𑀦𑀼𑀜𑁆𑀜𑀸𑀢𑀸𑀬 𑀲𑀤𑁆𑀥𑀺𑀁 𑀇𑀫𑀸𑀦𑀺 𑀢𑁂𑀭𑀲 𑀲𑀫𑀼𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀺. 𑀲𑀤𑀺𑀲𑀸 𑀇𑀥 𑀤𑀺𑀲𑁆𑀲𑀭𑁂𑀢𑀺 𑀇𑀥 𑀉𑀪𑀢𑁄𑀯𑀺𑀪𑀗𑁆𑀕𑁂 𑀏𑀢𑁂𑀲𑀼 𑀢𑁂𑀭𑀲𑀲𑀼 𑀲𑀫𑀼𑀝𑁆𑀞𑀸𑀦𑀲𑀻𑀲𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀅𑀜𑁆𑀜𑀸𑀦𑀺𑀧𑀺 𑀲𑀤𑀺𑀲𑀸𑀦𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀤𑀺𑀲𑁆𑀲𑀦𑁆𑀢𑀺.

𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁫𑁮. 𑀇𑀤𑀸𑀦𑀺 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀫𑁂𑀣𑀼𑀦𑀁 𑀲𑀼𑀓𑁆𑀓𑀲𑀁𑀲𑀕𑁆𑀕𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑁂𑀣𑀼𑀦𑀦𑁆𑀢𑀺 𑀇𑀤𑀁 𑀢𑀸𑀯 𑀧𑀞𑀫𑀧𑀸𑀭𑀸𑀚𑀺𑀓𑀁 𑀦𑀸𑀫 𑀏𑀓𑀁 𑀲𑀫𑀼𑀝𑁆𑀞𑀸𑀦𑀲𑀻𑀲𑀁, 𑀲𑁂𑀲𑀸𑀦𑀺 𑀢𑁂𑀦 𑀲𑀤𑀺𑀲𑀸𑀦𑀺. 𑀢𑀢𑁆𑀣 𑀲𑀼𑀓𑁆𑀓𑀲𑀁𑀲𑀕𑁆𑀕𑁄𑀢𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀘𑁂𑀯 𑀓𑀸𑀬𑀲𑀁𑀲𑀕𑁆𑀕𑁄 𑀘. 𑀅𑀦𑀺𑀬𑀢𑀸 𑀧𑀞𑀫𑀺𑀓𑀸𑀢𑀺 𑀧𑀞𑀫𑀁 𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀁. 𑀧𑀼𑀩𑁆𑀩𑀽𑀧𑀧𑀭𑀺𑀧𑀸𑀘𑀺𑀢𑀸𑀢𑀺 ‘‘𑀚𑀸𑀦𑀁 𑀧𑀼𑀩𑁆𑀩𑀽𑀧𑀕𑀢𑀁 𑀪𑀺𑀓𑁆𑀔𑀼’’𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀜𑁆𑀘 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀧𑀺𑀡𑁆𑀟𑀧𑀸𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀭𑀳𑁄 𑀪𑀺𑀓𑁆𑀔𑀼𑀦𑀺𑀬𑀸 𑀲𑀳𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀭𑀳𑁄 𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀜𑁆𑀘.

𑀲𑀪𑁄𑀚𑀦𑁂 𑀭𑀳𑁄 𑀤𑁆𑀯𑁂 𑀘𑀸𑀢𑀺 𑀲𑀪𑁄𑀚𑀦𑁂 𑀓𑀼𑀮𑁂 𑀅𑀦𑀼𑀧𑀔𑀚𑁆𑀚𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀜𑁆𑀘 𑀤𑁆𑀯𑁂 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀸𑀦𑀺 𑀘. 𑀅𑀗𑁆𑀕𑀼𑀮𑀺 𑀉𑀤𑀓𑁂 𑀳𑀲𑀦𑁆𑀢𑀺 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀜𑁆𑀘 𑀉𑀤𑀓𑁂 𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀳𑀸𑀭𑁂 𑀉𑀕𑁆𑀕𑀺𑀭𑁂 𑀘𑁂𑀯𑀸𑀢𑀺 𑀧𑀳𑀸𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀜𑁆𑀘 𑀢𑀮𑀲𑀢𑁆𑀢𑀺𑀓𑀉𑀕𑁆𑀕𑀺𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑁂𑀧𑀜𑁆𑀜𑀸𑀲𑀸 𑀘 𑀲𑁂𑀔𑀺𑀬𑀸𑀢𑀺 𑀧𑀭𑀺𑀫𑀡𑁆𑀟𑀮𑀦𑀺𑀯𑀸𑀲𑀦𑀸𑀤𑀻𑀦𑀺 𑀔𑀼𑀤𑁆𑀤𑀓𑀯𑀡𑁆𑀡𑀦𑀸𑀯𑀲𑀸𑀦𑁂 𑀯𑀼𑀢𑁆𑀢𑀸𑀦𑀺 𑀢𑁂𑀧𑀜𑁆𑀜𑀸𑀲 𑀲𑁂𑀔𑀺𑀬𑀲𑀺𑀓𑁆𑀔𑀸𑀧𑀤𑀸𑀦𑀺 𑀘.

𑀅𑀥𑀓𑁆𑀔𑀕𑀸𑀫𑀸𑀯𑀲𑁆𑀲𑀼𑀢𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀥𑀓𑁆𑀔𑀓𑀲𑀺𑀓𑁆𑀔𑀸𑀧𑀤𑀜𑁆𑀘 𑀕𑀸𑀫𑀦𑁆𑀢𑀭𑀕𑀫𑀦𑀁 𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲 𑀳𑀢𑁆𑀣𑀢𑁄 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀜𑁆𑀘. 𑀢𑀮𑀫𑀝𑁆𑀞𑀜𑁆𑀘 𑀲𑀼𑀤𑁆𑀥𑀺𑀓𑀸𑀢𑀺 𑀢𑀮𑀖𑀸𑀢𑀓𑀁 𑀚𑀢𑀼𑀫𑀝𑁆𑀞𑀁 𑀉𑀤𑀓𑀲𑀼𑀤𑁆𑀥𑀺𑀓𑀸𑀤𑀺𑀬𑀦𑀜𑁆𑀘. 𑀯𑀲𑁆𑀲𑀁𑀯𑀼𑀝𑁆𑀞𑀸 𑀘 𑀑𑀯𑀸𑀤𑀦𑁆𑀢𑀺 𑀯𑀲𑁆𑀲𑀁𑀯𑀼𑀝𑁆𑀞𑀸 𑀙𑀧𑁆𑀧𑀜𑁆𑀘𑀬𑁄𑀚𑀦𑀸𑀦𑀺 𑀲𑀺𑀓𑁆𑀔𑀸𑀧𑀤𑀜𑁆𑀘 𑀑𑀯𑀸𑀤𑀸𑀬 𑀅𑀕𑀫𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀦𑀸𑀦𑀼𑀩𑀦𑁆𑀥𑁂 𑀧𑀯𑀢𑁆𑀢𑀺𑀦𑀺𑀦𑁆𑀢𑀺 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀯𑀼𑀝𑁆𑀞𑀸𑀧𑀺𑀢𑀁 𑀧𑀯𑀢𑁆𑀢𑀺𑀦𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑀸𑀦𑀼𑀩𑀦𑁆𑀥𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀁.

𑀇𑀫𑁂 𑀲𑀺𑀓𑁆𑀔𑀸𑀢𑀺 𑀇𑀫𑀸 𑀲𑀺𑀓𑁆𑀔𑀸𑀬𑁄; 𑀮𑀺𑀗𑁆𑀕𑀯𑀺𑀧𑀭𑀺𑀬𑀸𑀬𑁄 𑀓𑀢𑁄. 𑀓𑀸𑀬𑀫𑀸𑀦𑀲𑀺𑀓𑀸 𑀓𑀢𑀸𑀢𑀺 𑀓𑀸𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀓𑀢𑀸.

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁫𑁯. 𑀅𑀤𑀺𑀦𑁆𑀦𑀦𑁆𑀢𑀺 𑀇𑀤𑀁 𑀢𑀸𑀯 𑀅𑀤𑀺𑀦𑁆𑀦𑀸𑀤𑀸𑀦𑀦𑁆𑀢𑀺 𑀯𑀸 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀸 𑀏𑀓𑀁 𑀲𑀫𑀼𑀝𑁆𑀞𑀸𑀦𑀲𑀻𑀲𑀁, 𑀲𑁂𑀲𑀸𑀦𑀺 𑀢𑁂𑀦 𑀲𑀤𑀺𑀲𑀸𑀦𑀺. 𑀢𑀢𑁆𑀣 𑀯𑀺𑀕𑁆𑀕𑀳𑀼𑀢𑁆𑀢𑀭𑀻𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀸𑀦𑀺. 𑀤𑀼𑀝𑁆𑀞𑀼𑀮𑁆𑀮𑀸 𑀅𑀢𑁆𑀢𑀓𑀸𑀫𑀺𑀦𑀦𑁆𑀢𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀸𑀦𑀺. 𑀅𑀫𑀽𑀮𑀸 𑀅𑀜𑁆𑀜𑀪𑀸𑀕𑀺𑀬𑀸𑀢𑀺 𑀤𑁆𑀯𑁂 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀸𑀦𑀺. 𑀅𑀦𑀺𑀬𑀢𑀸 𑀤𑀼𑀢𑀺𑀬𑀺𑀓𑀸𑀢𑀺 𑀤𑀼𑀢𑀺𑀬𑀁 𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀁.

𑀅𑀘𑁆𑀙𑀺𑀦𑁆𑀤𑁂 𑀧𑀭𑀺𑀡𑀸𑀫𑀦𑁂𑀢𑀺 𑀲𑀸𑀫𑀁 𑀘𑀻𑀯𑀭𑀁 𑀤𑀢𑁆𑀯𑀸 𑀅𑀘𑁆𑀙𑀺𑀦𑁆𑀤𑀦𑀜𑁆𑀘 𑀲𑀗𑁆𑀖𑀺𑀓𑀮𑀸𑀪𑀲𑁆𑀲 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀜𑁆𑀘. 𑀫𑀼𑀲𑀸 𑀑𑀫𑀲𑀧𑁂𑀲𑀼𑀡𑀸𑀢𑀺 𑀫𑀼𑀲𑀸𑀯𑀸𑀤𑁄 𑀘 𑀑𑀫𑀲𑀯𑀸𑀤𑁄 𑀘 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑀜𑁆𑀘. 𑀤𑀼𑀝𑁆𑀞𑀼𑀮𑁆𑀮𑀸 𑀧𑀣𑀯𑀻𑀔𑀡𑁂𑀢𑀺 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀆𑀭𑁄𑀘𑀦𑀜𑁆𑀘 𑀧𑀣𑀯𑀻𑀔𑀡𑀜𑁆𑀘. 𑀪𑀽𑀢𑀁 𑀅𑀜𑁆𑀜𑀸𑀬 𑀉𑀚𑁆𑀛𑀸𑀧𑁂𑀢𑀺 𑀪𑀽𑀢𑀕𑀸𑀫𑀅𑀜𑁆𑀜𑀯𑀸𑀤𑀓𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀸𑀦𑀺.

𑀦𑀺𑀓𑁆𑀓𑀟𑁆𑀠𑀦𑀁 𑀲𑀺𑀜𑁆𑀘𑀦𑀜𑁆𑀘𑀸𑀢𑀺 𑀯𑀺𑀳𑀸𑀭𑀢𑁄 𑀦𑀺𑀓𑁆𑀓𑀟𑁆𑀠𑀦𑀜𑁆𑀘 𑀉𑀤𑀓𑁂𑀦 𑀢𑀺𑀡𑀸𑀤𑀺𑀲𑀺𑀜𑁆𑀘𑀦𑀜𑁆𑀘. 𑀆𑀫𑀺𑀲𑀳𑁂𑀢𑀼 𑀪𑀼𑀢𑁆𑀢𑀸𑀯𑀻𑀢𑀺 ‘‘𑀆𑀫𑀺𑀲𑀳𑁂𑀢𑀼 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀦𑁆𑀢𑀻’’𑀢𑀺 𑀲𑀺𑀓𑁆𑀔𑀸𑀧𑀤𑀜𑁆𑀘, 𑀪𑀼𑀢𑁆𑀢𑀸𑀯𑀺𑀁 𑀅𑀦𑀢𑀺𑀭𑀺𑀢𑁆𑀢𑁂𑀦 𑀔𑀸𑀤𑀦𑀻𑀬𑀸𑀤𑀺𑀦𑀸 𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀜𑁆𑀘. 𑀏𑀳𑀺 𑀅𑀦𑀸𑀤𑀭𑀺 𑀪𑀺𑀁𑀲𑀸𑀢𑀺 ‘‘𑀏𑀳𑀸𑀯𑀼𑀲𑁄 𑀕𑀸𑀫𑀁 𑀯𑀸’’𑀢𑀺 𑀲𑀺𑀓𑁆𑀔𑀸𑀧𑀤𑀜𑁆𑀘, 𑀅𑀦𑀸𑀤𑀭𑀺𑀬𑀜𑁆𑀘 𑀪𑀺𑀓𑁆𑀔𑀼𑀪𑀺𑀁𑀲𑀸𑀧𑀦𑀓𑀜𑁆𑀘. 𑀅𑀧𑀦𑀺𑀥𑁂 𑀘 𑀚𑀻𑀯𑀺𑀢𑀦𑁆𑀢𑀺 𑀧𑀢𑁆𑀢𑀸𑀤𑀻𑀦𑀁 𑀅𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀜𑁆𑀘, 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑀜𑁆𑀘.

𑀚𑀸𑀦𑀁 𑀲𑀧𑁆𑀧𑀸𑀡𑀓𑀁 𑀓𑀫𑁆𑀫𑀦𑁆𑀢𑀺 𑀚𑀸𑀦𑀁 𑀲𑀧𑁆𑀧𑀸𑀡𑀓𑀉𑀤𑀓𑀲𑀺𑀓𑁆𑀔𑀸𑀧𑀤𑀜𑁆𑀘 𑀧𑀼𑀦𑀓𑀫𑁆𑀫𑀸𑀬 𑀉𑀓𑁆𑀓𑁄𑀝𑀦𑀜𑁆𑀘. 𑀊𑀦𑀲𑀁𑀯𑀸𑀲𑀦𑀸𑀲𑀦𑀸𑀢𑀺 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀜𑁆𑀘 𑀉𑀓𑁆𑀔𑀺𑀢𑁆𑀢𑀓𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀲𑀺𑀓𑁆𑀔𑀸𑀧𑀤𑀜𑁆𑀘 𑀦𑀸𑀲𑀺𑀢𑀓𑀲𑀸𑀫𑀡𑁂𑀭𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀳𑀥𑀫𑁆𑀫𑀺𑀓𑀁 𑀯𑀺𑀮𑁂𑀔𑀸𑀢𑀺 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑀲𑀺𑀓𑁆𑀔𑀸𑀧𑀤𑀜𑁆𑀘, 𑀯𑀺𑀮𑁂𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀆𑀕𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀫𑁄𑀳𑁄 𑀅𑀫𑀽𑀮𑀓𑁂𑀦 𑀘𑀸𑀢𑀺 𑀫𑁄𑀳𑀦𑀓𑁂 𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀜𑁆𑀘, 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀼𑀤𑁆𑀥𑀁𑀲𑀦𑀲𑀺𑀓𑁆𑀔𑀸𑀧𑀤𑀜𑁆𑀘.

𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀺𑀓𑀁 𑀘𑀻𑀯𑀭𑀁 𑀤𑀢𑁆𑀯𑀸𑀢𑀺 𑀓𑀼𑀓𑁆𑀓𑀼𑀘𑁆𑀘𑀉𑀧𑀤𑀳𑀦𑀜𑁆𑀘, 𑀥𑀫𑁆𑀫𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀙𑀦𑁆𑀤𑀁 𑀤𑀢𑁆𑀯𑀸 𑀔𑀻𑀬𑀦𑀜𑁆𑀘, 𑀘𑀻𑀯𑀭𑀁 𑀤𑀢𑁆𑀯𑀸 𑀔𑀻𑀬𑀦𑀜𑁆𑀘. 𑀧𑀭𑀺𑀡𑀸𑀫𑁂𑀬𑁆𑀬 𑀧𑀼𑀕𑁆𑀕𑀮𑁂𑀢𑀺 𑀲𑀗𑁆𑀖𑀺𑀓𑀁 𑀮𑀸𑀪𑀁 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀸𑀫𑀦𑀲𑀺𑀓𑁆𑀔𑀸𑀧𑀤𑀁. 𑀓𑀺𑀁 𑀢𑁂 𑀅𑀓𑀸𑀮𑀁 𑀅𑀘𑁆𑀙𑀺𑀦𑁆𑀤𑁂𑀢𑀺 ‘‘𑀓𑀺𑀁 𑀢𑁂 𑀅𑀬𑁆𑀬𑁂 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀭𑀺𑀲𑁆𑀲𑀢𑀻’’𑀢𑀺 𑀆𑀕𑀢𑀲𑀺𑀓𑁆𑀔𑀸𑀧𑀤𑀜𑁆𑀘, ‘‘𑀅𑀓𑀸𑀮𑀘𑀻𑀯𑀭𑀁 𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀸𑀚𑀦𑀲𑀺𑀓𑁆𑀔𑀸𑀧𑀤𑀜𑁆𑀘, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀤𑀼𑀕𑁆𑀕𑀳𑀻 𑀦𑀺𑀭𑀬𑁂𑀦 𑀘𑀸𑀢𑀺 𑀤𑀼𑀕𑁆𑀕𑀳𑀺𑀢𑁂𑀦 𑀤𑀼𑀧𑁆𑀧𑀥𑀸𑀭𑀺𑀢𑁂𑀦 𑀧𑀭𑀁 𑀉𑀚𑁆𑀛𑀸𑀧𑀦𑀲𑀺𑀓𑁆𑀔𑀸𑀧𑀤𑀜𑁆𑀘, 𑀦𑀺𑀭𑀬𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀅𑀪𑀺𑀲𑀧𑀦𑀲𑀺𑀓𑁆𑀔𑀸𑀧𑀤𑀜𑁆𑀘.

𑀕𑀡𑀁 𑀯𑀺𑀪𑀗𑁆𑀕 𑀤𑀼𑀩𑁆𑀩𑀮𑀦𑁆𑀢𑀺 ‘‘𑀕𑀡𑀲𑁆𑀲 𑀘𑀻𑀯𑀭𑀮𑀸𑀪𑀁 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬𑀸’’𑀢𑀺 𑀘 ‘‘𑀥𑀫𑁆𑀫𑀺𑀓𑀁 𑀘𑀻𑀯𑀭𑀯𑀺𑀪𑀗𑁆𑀕𑀁 𑀧𑀝𑀺𑀩𑀸𑀳𑁂𑀬𑁆𑀬𑀸’’𑀢𑀺 𑀘 ‘‘𑀤𑀼𑀩𑁆𑀩𑀮𑀘𑀻𑀯𑀭𑀧𑀘𑁆𑀘𑀸𑀲𑀸𑀬 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑁂𑀬𑁆𑀬𑀸’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺. 𑀓𑀣𑀺𑀦𑀸 𑀨𑀸𑀲𑀼 𑀧𑀲𑁆𑀲𑀬𑀦𑁆𑀢𑀺 ‘‘𑀥𑀫𑁆𑀫𑀺𑀓𑀁 𑀓𑀣𑀺𑀦𑀼𑀤𑁆𑀥𑀸𑀭𑀁 𑀧𑀝𑀺𑀩𑀸𑀳𑁂𑀬𑁆𑀬, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀜𑁆𑀘𑀺𑀘𑁆𑀘 𑀅𑀨𑀸𑀲𑀼𑀁 𑀓𑀭𑁂𑀬𑁆𑀬, 𑀪𑀺𑀓𑁆𑀔𑀼𑀦𑀺𑀬𑀸 𑀉𑀧𑀲𑁆𑀲𑀬𑀁 𑀤𑀢𑁆𑀯𑀸 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀦𑀺𑀓𑁆𑀓𑀟𑁆𑀠𑁂𑀬𑁆𑀬 𑀯𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺. 𑀅𑀓𑁆𑀓𑁄𑀲𑀘𑀡𑁆𑀟𑀻 𑀫𑀘𑁆𑀙𑀭𑀻𑀢𑀺 ‘‘𑀪𑀺𑀓𑁆𑀔𑀼𑀁 𑀅𑀓𑁆𑀓𑁄𑀲𑁂𑀬𑁆𑀬 𑀯𑀸 𑀧𑀭𑀺𑀪𑀸𑀲𑁂𑀬𑁆𑀬 𑀯𑀸, 𑀘𑀡𑁆𑀟𑀺𑀓𑀢𑀸 𑀕𑀡𑀁 𑀧𑀭𑀺𑀪𑀸𑀲𑁂𑀬𑁆𑀬, 𑀓𑀼𑀮𑁂 𑀫𑀘𑁆𑀙𑀭𑀺𑀦𑀻 𑀅𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺. 𑀕𑀩𑁆𑀪𑀺𑀦𑀺𑀜𑁆𑀘 𑀧𑀸𑀬𑀦𑁆𑀢𑀺𑀬𑀸𑀢𑀺 ‘‘𑀕𑀩𑁆𑀪𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀬𑀦𑁆𑀢𑀺𑀁 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺.

𑀤𑁆𑀯𑁂𑀯𑀲𑁆𑀲𑀁 𑀲𑀺𑀓𑁆𑀔𑀸 𑀲𑀗𑁆𑀖𑁂𑀦𑀸𑀢𑀺 ‘‘𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺. 𑀢𑀬𑁄 𑀘𑁂𑀯 𑀕𑀺𑀳𑀻𑀕𑀢𑀸𑀢𑀺 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁, 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 ‘‘𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢’’𑀦𑁆𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺. 𑀓𑀼𑀫𑀸𑀭𑀺𑀪𑀽𑀢𑀸 𑀢𑀺𑀲𑁆𑀲𑁄𑀢𑀺 ‘‘𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀢𑀺𑀲𑁆𑀲𑁄. 𑀊𑀦𑀤𑁆𑀯𑀸𑀤𑀲𑀲𑀫𑁆𑀫𑀢𑀸𑀢𑀺 ‘‘𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀸 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁.

𑀅𑀮𑀁 𑀢𑀸𑀯 𑀲𑁄𑀓𑀸𑀯𑀸𑀲𑀦𑁆𑀢𑀺 ‘‘𑀅𑀮𑀁 𑀢𑀸𑀯 𑀢𑁂 𑀅𑀬𑁆𑀬𑁂 𑀯𑀼𑀝𑁆𑀞𑀸𑀧𑀺𑀢𑁂𑀦𑀸’’𑀢𑀺 𑀘, ‘‘𑀘𑀡𑁆𑀟𑀺𑀁 𑀲𑁄𑀓𑀸𑀯𑀸𑀲𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁. 𑀙𑀦𑁆𑀤𑀸 𑀅𑀦𑀼𑀯𑀲𑁆𑀲𑀸 𑀘 𑀤𑁆𑀯𑁂𑀢𑀺 ‘‘𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀲𑀫𑀼𑀝𑁆𑀞𑀸𑀦𑀸 𑀢𑀺𑀓𑀸 𑀓𑀢𑀸𑀢𑀺 𑀢𑀺𑀓𑀲𑀫𑀼𑀝𑁆𑀞𑀸𑀦𑀸 𑀓𑀢𑀸.

𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁬𑁦. 𑀲𑀜𑁆𑀘𑀭𑀻 𑀓𑀼𑀝𑀺 𑀯𑀺𑀳𑀸𑀭𑁄𑀢𑀺 𑀲𑀜𑁆𑀘𑀭𑀺𑀢𑁆𑀢𑀁 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀓𑀭𑀡𑀁 𑀫𑀳𑀮𑁆𑀮𑀓𑀯𑀺𑀳𑀸𑀭𑀓𑀭𑀡𑀜𑁆𑀘. 𑀥𑁄𑀯𑀦𑀜𑁆𑀘 𑀧𑀝𑀺𑀕𑁆𑀕𑀳𑁄𑀢𑀺 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀭𑀸𑀡𑀘𑀻𑀯𑀭𑀥𑁄𑀯𑀸𑀧𑀦𑀜𑁆𑀘 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀜𑁆𑀘. 𑀯𑀺𑀜𑁆𑀜𑀢𑁆𑀢𑀼𑀢𑁆𑀢𑀭𑀺 𑀅𑀪𑀺𑀳𑀝𑁆𑀞𑀼𑀦𑁆𑀢𑀺 𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀁 𑀘𑀻𑀯𑀭𑀯𑀺𑀜𑁆𑀜𑀸𑀧𑀦𑀁 𑀢𑀢𑀼𑀢𑁆𑀢𑀭𑀺𑀲𑀸𑀤𑀺𑀬𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀉𑀪𑀺𑀦𑁆𑀦𑀁 𑀤𑀽𑀢𑀓𑁂𑀦 𑀘𑀸𑀢𑀺 ‘‘𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀉𑀧𑀓𑁆𑀔𑀝𑀁 𑀳𑁄𑀢𑀻’’𑀢𑀺 𑀆𑀕𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘 𑀤𑀽𑀢𑁂𑀦 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀧𑀳𑀺𑀢𑀲𑀺𑀓𑁆𑀔𑀸𑀧𑀤𑀜𑁆𑀘.

𑀓𑁄𑀲𑀺𑀬𑀸 𑀲𑀼𑀤𑁆𑀥𑀤𑁆𑀯𑁂𑀪𑀸𑀕𑀸, 𑀙𑀩𑁆𑀩𑀲𑁆𑀲𑀸𑀦𑀺 𑀦𑀺𑀲𑀻𑀤𑀦𑀦𑁆𑀢𑀺 ‘‘𑀓𑁄𑀲𑀺𑀬𑀫𑀺𑀲𑁆𑀲𑀓𑀁 𑀲𑀦𑁆𑀣𑀢’’𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀭𑀺𑀜𑁆𑀘𑀦𑁆𑀢𑀺 𑀭𑀽𑀧𑀺𑀓𑀸 𑀘𑁂𑀯𑀸𑀢𑀺 𑀯𑀺𑀪𑀗𑁆𑀕𑁂 ‘‘𑀭𑀺𑀜𑁆𑀘𑀦𑁆𑀢𑀺 𑀉𑀤𑁆𑀤𑁂𑀲’’𑀦𑁆𑀢𑀺 𑀆𑀕𑀢𑀁 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀁 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀜𑁆𑀘. 𑀉𑀪𑁄 𑀦𑀸𑀦𑀧𑁆𑀧𑀓𑀸𑀭𑀓𑀸𑀢𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁.

𑀊𑀦𑀩𑀦𑁆𑀥𑀦𑀯𑀲𑁆𑀲𑀺𑀓𑀸𑀢𑀺 𑀊𑀦𑀧𑀜𑁆𑀘𑀩𑀦𑁆𑀥𑀦𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀼𑀢𑁆𑀢𑀁 𑀯𑀺𑀓𑀧𑁆𑀧𑀦𑁂𑀦 𑀘𑀸𑀢𑀺 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀘𑀻𑀯𑀭𑀯𑀸𑀬𑀸𑀧𑀦𑀜𑁆𑀘 𑀢𑀦𑁆𑀢𑀯𑀸𑀬𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀻𑀯𑀭𑁂 𑀯𑀺𑀓𑀧𑁆𑀧𑀸𑀧𑀚𑁆𑀚𑀦𑀜𑁆𑀘. 𑀤𑁆𑀯𑀸𑀭𑀤𑀸𑀦𑀲𑀺𑀩𑁆𑀩𑀸𑀦𑀺 𑀘𑀸𑀢𑀺 𑀬𑀸𑀯 𑀤𑁆𑀯𑀸𑀭𑀓𑁄𑀲𑀸 𑀅𑀕𑁆𑀕𑀴𑀝𑁆𑀞𑀧𑀦𑀸𑀬, ‘‘𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀤𑀤𑁂𑀬𑁆𑀬, 𑀘𑀻𑀯𑀭𑀁 𑀲𑀺𑀩𑁆𑀩𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀧𑀽𑀯𑀧𑀘𑁆𑀘𑀬𑀚𑁄𑀢𑀺 𑀘𑀸𑀢𑀺 𑀧𑀽𑀯𑁂𑀳𑀺 𑀯𑀸 𑀫𑀦𑁆𑀣𑁂𑀳𑀺 𑀯𑀸 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀁 𑀘𑀸𑀢𑀼𑀫𑀸𑀲𑀧𑀘𑁆𑀘𑀬𑀧𑁆𑀧𑀯𑀸𑀭𑀡𑀸𑀚𑁄𑀢𑀺𑀲𑀫𑀸𑀤𑀳𑀦𑀲𑀺𑀓𑁆𑀔𑀸𑀧𑀤𑀸𑀦𑀺 𑀘.

𑀭𑀢𑀦𑀁 𑀲𑀽𑀘𑀺 𑀫𑀜𑁆𑀘𑁄 𑀘, 𑀢𑀽𑀮𑀁 𑀦𑀺𑀲𑀻𑀤𑀦𑀓𑀡𑁆𑀟𑀼 𑀘, 𑀯𑀲𑁆𑀲𑀺𑀓𑀸 𑀘 𑀲𑀼𑀕𑀢𑁂𑀦𑀸𑀢𑀺 𑀭𑀢𑀦𑀲𑀺𑀓𑁆𑀔𑀸𑀧𑀤𑀜𑁆𑀘𑁂𑀯 𑀲𑀽𑀘𑀺𑀖𑀭𑀲𑀺𑀓𑁆𑀔𑀸𑀧𑀤𑀸𑀤𑀻𑀦𑀺 𑀘 𑀲𑀢𑁆𑀢 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀯𑀺𑀜𑁆𑀜𑀢𑁆𑀢𑀺 𑀅𑀜𑁆𑀜𑀁 𑀘𑁂𑀢𑀸𑀧𑀦𑀸, 𑀤𑁆𑀯𑁂 𑀲𑀗𑁆𑀖𑀺𑀓𑀸 𑀫𑀳𑀸𑀚𑀦𑀺𑀓𑀸, 𑀤𑁆𑀯𑁂 𑀧𑀼𑀕𑁆𑀕𑀮𑀮𑀳𑀼𑀓𑀸 𑀕𑀭𑀽𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀬𑁆𑀬𑀸’’𑀢𑀺𑀆𑀤𑀻𑀦𑀺 𑀦𑀯 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀤𑁆𑀯𑁂 𑀯𑀺𑀖𑀸𑀲𑀸 𑀲𑀸𑀝𑀺𑀓𑀸 𑀘𑀸𑀢𑀺 ‘‘𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀲𑀗𑁆𑀓𑀸𑀭𑀁 𑀯𑀸 𑀯𑀺𑀖𑀸𑀲𑀁 𑀯𑀸 𑀢𑀺𑀭𑁄𑀓𑀼𑀝𑁆𑀝𑁂 𑀯𑀸 𑀢𑀺𑀭𑁄𑀧𑀸𑀓𑀸𑀭𑁂 𑀯𑀸 𑀙𑀟𑁆𑀟𑁂𑀬𑁆𑀬 𑀯𑀸 𑀙𑀟𑁆𑀟𑀸𑀧𑁂𑀬𑁆𑀬 𑀯𑀸, 𑀳𑀭𑀺𑀢𑁂 𑀙𑀟𑁆𑀟𑁂𑀬𑁆𑀬 𑀯𑀸 𑀙𑀟𑁆𑀟𑀸𑀧𑁂𑀬𑁆𑀬 𑀯𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀤𑁆𑀯𑁂 𑀯𑀺𑀖𑀸𑀲𑀲𑀺𑀓𑁆𑀔𑀸𑀧𑀤𑀸𑀦𑀺 𑀘 𑀉𑀤𑀓𑀲𑀸𑀝𑀺𑀓𑀸𑀲𑀺𑀓𑁆𑀔𑀸𑀧𑀤𑀜𑁆𑀘. 𑀲𑀫𑀡𑀘𑀻𑀯𑀭𑁂𑀦 𑀘𑀸𑀢𑀺 ‘‘𑀲𑀫𑀡𑀘𑀻𑀯𑀭𑀁 𑀤𑀤𑁂𑀬𑁆𑀬𑀸’’𑀢𑀺 𑀇𑀤𑀫𑁂𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑀫𑀦𑀼𑀪𑀸𑀲𑀦𑀸𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁬𑁧. 𑀪𑁂𑀤𑀸𑀦𑀼𑀯𑀢𑁆𑀢𑀤𑀼𑀩𑁆𑀩𑀘𑀤𑀽𑀲𑀤𑀼𑀝𑁆𑀞𑀼𑀮𑁆𑀮𑀤𑀺𑀝𑁆𑀞𑀺 𑀘𑀸𑀢𑀺 𑀲𑀗𑁆𑀖𑀪𑁂𑀤𑀸𑀦𑀼𑀯𑀢𑁆𑀢𑀓𑀤𑀼𑀩𑁆𑀩𑀘𑀓𑀼𑀮𑀤𑀽𑀲𑀓𑀤𑀼𑀝𑁆𑀞𑀼𑀮𑁆𑀮𑀧𑁆𑀧𑀝𑀺𑀘𑁆𑀙𑀸𑀤𑀦𑀤𑀺𑀝𑁆𑀞𑀺𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀲𑀺𑀓𑁆𑀔𑀸𑀧𑀤𑀸𑀦𑀺. 𑀙𑀦𑁆𑀤𑀁 𑀉𑀚𑁆𑀚𑀕𑁆𑀖𑀺𑀓𑀸 𑀤𑁆𑀯𑁂 𑀘𑀸𑀢𑀺 𑀙𑀦𑁆𑀤𑀁 𑀅𑀤𑀢𑁆𑀯𑀸 𑀕𑀫𑀦𑀲𑀺𑀓𑁆𑀔𑀸𑀧𑀤𑀁 𑀉𑀚𑁆𑀚𑀕𑁆𑀖𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀫𑀦𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘. 𑀤𑁆𑀯𑁂 𑀘 𑀲𑀤𑁆𑀤𑀸𑀢𑀺 ‘‘𑀅𑀧𑁆𑀧𑀲𑀤𑁆𑀤𑁄 𑀅𑀦𑁆𑀢𑀭𑀖𑀭𑁂 𑀕𑀫𑀺𑀲𑁆𑀲𑀸𑀫𑀺, 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘. 𑀦 𑀩𑁆𑀬𑀸𑀳𑀭𑁂𑀢𑀺 ‘‘𑀦 𑀲𑀓𑀩𑀴𑁂𑀦 𑀫𑀼𑀔𑁂𑀦 𑀩𑁆𑀬𑀸𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀓𑁆𑀔𑀸𑀧𑀤𑀁.

𑀙𑀫𑀸 𑀦𑀻𑀘𑀸𑀲𑀦𑁂 𑀞𑀸𑀦𑀁, 𑀧𑀘𑁆𑀙𑀢𑁄 𑀉𑀧𑁆𑀧𑀣𑁂𑀦 𑀘𑀸𑀢𑀺 𑀙𑀫𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸; 𑀞𑀺𑀢𑁂𑀦 𑀦𑀺𑀲𑀺𑀦𑁆𑀦𑀲𑁆𑀲, 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁂𑀦 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲, 𑀉𑀧𑁆𑀧𑀣𑁂𑀦 𑀕𑀘𑁆𑀙𑀦𑁆𑀢𑁂𑀦 𑀧𑀣𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀸𑀦𑀺. 𑀯𑀚𑁆𑀚𑀸𑀦𑀼𑀯𑀢𑁆𑀢𑀺𑀕𑀳𑀡𑀸𑀢𑀺 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀦, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓, 𑀳𑀢𑁆𑀣𑀕𑁆𑀕𑀳𑀡𑀸𑀤𑀺𑀲𑀗𑁆𑀔𑀸𑀢𑀸𑀦𑀺 𑀢𑀻𑀡𑀺 𑀧𑀸𑀭𑀸𑀚𑀺𑀓𑀸𑀦𑀺. 𑀑𑀲𑀸𑀭𑁂 𑀧𑀘𑁆𑀘𑀸𑀘𑀺𑀓𑁆𑀔𑀦𑀸𑀢𑀺 ‘‘𑀅𑀦𑀧𑀮𑁄𑀓𑁂𑀢𑁆𑀯𑀸 𑀓𑀸𑀭𑀓𑀲𑀗𑁆𑀖𑀁 𑀅𑀦𑀜𑁆𑀜𑀸𑀬 𑀕𑀡𑀲𑁆𑀲 𑀙𑀦𑁆𑀤𑀁 𑀑𑀲𑀸𑀭𑁂𑀬𑁆𑀬𑀸’’𑀢𑀺 𑀘 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁.

𑀓𑀺𑀲𑁆𑀫𑀺𑀁 𑀲𑀁𑀲𑀝𑁆𑀞𑀸 𑀤𑁆𑀯𑁂 𑀯𑀥𑀻𑀢𑀺 ‘‘𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂 𑀧𑀘𑁆𑀘𑀸𑀓𑀢𑀸’’𑀢𑀺 𑀘 ‘‘𑀪𑀺𑀓𑁆𑀔𑀼𑀦𑀺𑀬𑁄 𑀧𑀦𑁂𑀯 𑀲𑀁𑀲𑀝𑁆𑀞𑀸 𑀯𑀺𑀳𑀭𑀦𑁆𑀢𑀻’’𑀢𑀺 𑀘 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀯𑀁 𑀯𑀤𑁂𑀬𑁆𑀬 𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂 𑀢𑀼𑀫𑁆𑀳𑁂 𑀯𑀺𑀳𑀭𑀣𑀸’’𑀢𑀺 𑀘 ‘‘𑀅𑀢𑁆𑀢𑀸𑀦𑀁 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀭𑁄𑀤𑁂𑀬𑁆𑀬𑀸’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺. 𑀯𑀺𑀲𑀺𑀩𑁆𑀩𑁂 𑀤𑀼𑀓𑁆𑀔𑀺𑀢𑀸𑀬 𑀘𑀸𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀯𑀺𑀲𑀺𑀩𑁆𑀩𑁂𑀢𑁆𑀯𑀸 𑀯𑀸 𑀯𑀺𑀲𑀺𑀩𑁆𑀩𑀸𑀧𑁂𑀢𑁆𑀯𑀸 𑀯𑀸’’𑀢𑀺 𑀘 ‘‘𑀤𑀼𑀓𑁆𑀔𑀺𑀢𑀁 𑀲𑀳𑀚𑀻𑀯𑀺𑀦𑀺’’𑀦𑁆𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁. 𑀧𑀼𑀦 𑀲𑀁𑀲𑀝𑁆𑀞𑀸 𑀦 𑀯𑀽𑀧𑀲𑀫𑁂𑀢𑀺 ‘‘𑀲𑀁𑀲𑀝𑁆𑀞𑀸 𑀯𑀺𑀳𑀭𑁂𑀬𑁆𑀬 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸’’𑀢𑀺 𑀏𑀯𑀁 𑀧𑀼𑀦 𑀯𑀼𑀢𑁆𑀢𑀲𑀁𑀲𑀝𑁆𑀞𑀲𑀺𑀓𑁆𑀔𑀸𑀧𑀤𑀜𑁆𑀘 ‘‘𑀏𑀳𑀬𑁆𑀬𑁂, 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀳𑀻’’𑀢𑀺 𑀯𑀼𑀘𑁆𑀘𑀫𑀸𑀦𑀸, ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 ‘‘𑀲𑀸 𑀧𑀘𑁆𑀙𑀸 𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻 𑀦𑁂𑀯 𑀯𑀽𑀧𑀲𑀫𑁆𑀫𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀆𑀭𑀸𑀫𑀜𑁆𑀘 𑀧𑀯𑀸𑀭𑀡𑀸𑀢𑀺 ‘‘𑀚𑀸𑀦𑀁 𑀲𑀪𑀺𑀓𑁆𑀔𑀼𑀓𑀁 𑀆𑀭𑀸𑀫𑀁 𑀅𑀦𑀸𑀧𑀼𑀘𑁆𑀙𑀸 𑀧𑀯𑀺𑀲𑁂𑀬𑁆𑀬𑀸’’𑀢𑀺 𑀘 ‘‘𑀉𑀪𑀢𑁄𑀲𑀗𑁆𑀖𑁂 𑀢𑀻𑀳𑀺 𑀞𑀸𑀦𑁂𑀳𑀺 𑀦 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁.

𑀅𑀦𑁆𑀯𑀤𑁆𑀥𑀁 𑀲𑀳𑀚𑀻𑀯𑀺𑀦𑀺𑀁 𑀤𑁆𑀯𑁂𑀢𑀺 ‘‘𑀅𑀦𑁆𑀯𑀤𑁆𑀥𑀫𑀸𑀲𑀁 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀤𑁆𑀯𑁂 𑀥𑀫𑁆𑀫𑀸 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘, ‘‘𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑁂𑀯 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬, 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑁂𑀯 𑀯𑀽𑀧𑀓𑀸𑀲𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀜𑁆𑀘. 𑀘𑀻𑀯𑀭𑀁 𑀅𑀦𑀼𑀩𑀦𑁆𑀥𑀦𑀸𑀢𑀺 ‘‘𑀲𑀘𑁂 𑀫𑁂 𑀢𑁆𑀯𑀁, 𑀅𑀬𑁆𑀬𑁂, 𑀘𑀻𑀯𑀭𑀁 𑀤𑀲𑁆𑀲𑀲𑀺, 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘 ‘‘𑀲𑀘𑁂 𑀫𑀁 𑀢𑁆𑀯𑀁, 𑀅𑀬𑁆𑀬𑁂, 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀦𑀼𑀩𑀦𑁆𑀥𑀺𑀲𑁆𑀲𑀲𑀺, 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁬𑁨. 𑀉𑀩𑁆𑀪𑀢𑀁 𑀓𑀣𑀺𑀦𑀁 𑀢𑀻𑀡𑀻𑀢𑀺 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀯𑀼𑀢𑁆𑀢𑀸𑀦𑀺 𑀆𑀤𑀺𑀢𑁄𑀯 𑀢𑀻𑀡𑀺 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀧𑀞𑀫𑀁 𑀧𑀢𑁆𑀢𑀪𑁂𑀲𑀚𑁆𑀚𑀦𑁆𑀢𑀺 ‘‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀧𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁 𑀧𑀞𑀫𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘 ‘‘𑀧𑀝𑀺𑀲𑀸𑀬𑀦𑀻𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀻’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀘𑁆𑀘𑁂𑀓𑀜𑁆𑀘𑀸𑀧𑀺 𑀲𑀸𑀲𑀗𑁆𑀓𑀦𑁆𑀢𑀺 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀜𑁆𑀘 𑀢𑀤𑀦𑀦𑁆𑀢𑀭𑀫𑁂𑀯 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀧𑀓𑁆𑀓𑀫𑀦𑁆𑀢𑁂𑀦 𑀯𑀸 𑀤𑀼𑀯𑁂𑀢𑀺 ‘‘𑀢𑀁 𑀧𑀓𑁆𑀓𑀫𑀦𑁆𑀢𑁄 𑀦𑁂𑀯 𑀉𑀤𑁆𑀥𑀭𑁂𑀬𑁆𑀬𑀸’’𑀢𑀺 𑀪𑀽𑀢𑀕𑀸𑀫𑀯𑀕𑁆𑀕𑁂 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁.

𑀉𑀧𑀲𑁆𑀲𑀬𑀁 𑀧𑀭𑀫𑁆𑀧𑀭𑀸𑀢𑀺 ‘‘𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑁂𑀬𑁆𑀬𑀸’’𑀢𑀺 𑀘 ‘‘𑀧𑀭𑀫𑁆𑀧𑀭𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁. 𑀅𑀦𑀢𑀺𑀭𑀺𑀢𑁆𑀢𑀁 𑀦𑀺𑀫𑀦𑁆𑀢𑀦𑀸𑀢𑀺 ‘‘𑀅𑀦𑀢𑀺𑀭𑀺𑀢𑁆𑀢𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸’’𑀢𑀺 𑀘 ‘‘𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁. 𑀯𑀺𑀓𑀧𑁆𑀧𑀁 𑀭𑀜𑁆𑀜𑁄 𑀯𑀺𑀓𑀸𑀮𑁂𑀢𑀺 ‘‘𑀲𑀸𑀫𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑁆𑀯𑀸’’𑀢𑀺 𑀘 ‘‘𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀘 ‘‘𑀯𑀺𑀓𑀸𑀮𑁂 𑀕𑀸𑀫𑀁 𑀧𑀯𑀺𑀲𑁂𑀬𑁆𑀬𑀸’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀯𑁄𑀲𑀸𑀲𑀸𑀭𑀜𑁆𑀜𑀓𑁂𑀦 𑀘𑀸𑀢𑀺 ‘‘𑀯𑁄𑀲𑀸𑀲𑀫𑀸𑀦𑀭𑀽𑀧𑀸 𑀞𑀺𑀢𑀸’’𑀢𑀺 𑀘 ‘‘𑀢𑀣𑀸𑀭𑀽𑀧𑁂𑀲𑀼 𑀆𑀭𑀜𑁆𑀜𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀧𑀼𑀩𑁆𑀩𑁂 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁.

𑀉𑀲𑁆𑀲𑀬𑀸 𑀲𑀦𑁆𑀦𑀺𑀘𑀬𑀜𑁆𑀘𑀸𑀢𑀺 ‘‘𑀉𑀲𑁆𑀲𑀬𑀯𑀸𑀤𑀺𑀓𑀸’’𑀢𑀺 𑀘 ‘‘𑀧𑀢𑁆𑀢𑀲𑀦𑁆𑀦𑀺𑀘𑀬𑀁 𑀓𑀭𑁂𑀬𑁆𑀬𑀸’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁. 𑀧𑀼𑀭𑁂 𑀧𑀘𑁆𑀙𑀸 𑀯𑀺𑀓𑀸𑀮𑁂 𑀘𑀸𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺 𑀘, ‘‘𑀧𑀘𑁆𑀙𑀸𑀪𑀢𑁆𑀢𑀁 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺 𑀘, ‘‘𑀯𑀺𑀓𑀸𑀮𑁂 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀧𑀜𑁆𑀘𑀸𑀳𑀺𑀓𑀸 𑀲𑀗𑁆𑀓𑀫𑀦𑀻𑀢𑀺 ‘‘𑀧𑀜𑁆𑀘𑀸𑀳𑀺𑀓𑀸 𑀲𑀗𑁆𑀖𑀸𑀝𑀺𑀘𑀸𑀭𑀁 𑀅𑀢𑀺𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀘 ‘‘𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀁 𑀥𑀸𑀭𑁂𑀬𑁆𑀬𑀸’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁. 𑀤𑁆𑀯𑁂𑀧𑀺 𑀆𑀯𑀲𑀣𑁂𑀦 𑀘𑀸𑀢𑀺 ‘‘𑀆𑀯𑀲𑀣𑀘𑀻𑀯𑀭𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀯𑀲𑀣𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀘 𑀏𑀯𑀁 𑀆𑀯𑀲𑀣𑁂𑀦 𑀲𑀤𑁆𑀥𑀺𑀁 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺 𑀘 𑀤𑁆𑀯𑁂.

𑀧𑀲𑀸𑀔𑁂 𑀆𑀲𑀦𑁂 𑀘𑁂𑀯𑀸𑀢𑀺 ‘‘𑀧𑀲𑀸𑀔𑁂 𑀚𑀸𑀢𑀁 𑀕𑀡𑁆𑀟𑀁 𑀯𑀸’’𑀢𑀺 𑀘 ‘‘𑀪𑀺𑀓𑁆𑀔𑀼𑀲𑁆𑀲 𑀧𑀼𑀭𑀢𑁄 𑀅𑀦𑀸𑀧𑀼𑀘𑁆𑀙𑀸 𑀆𑀲𑀦𑁂 𑀦𑀺𑀲𑀻𑀤𑁂𑀬𑁆𑀬𑀸’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁬𑁩. 𑀏𑀴𑀓𑀮𑁄𑀫𑀸 𑀤𑁆𑀯𑁂 𑀲𑁂𑀬𑁆𑀬𑀸𑀢𑀺 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀜𑁆𑀘𑁂𑀯 𑀤𑁆𑀯𑁂 𑀘 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀸𑀦𑀺. 𑀆𑀳𑀘𑁆𑀘 𑀧𑀺𑀡𑁆𑀟𑀪𑁄𑀚𑀦𑀦𑁆𑀢𑀺 𑀆𑀳𑀘𑁆𑀘𑀧𑀸𑀤𑀓𑀲𑀺𑀓𑁆𑀔𑀸𑀧𑀤𑀜𑁆𑀘 𑀆𑀯𑀲𑀣𑀧𑀺𑀡𑁆𑀟𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀕𑀡𑀯𑀺𑀓𑀸𑀮𑀲𑀦𑁆𑀦𑀺𑀥𑀻𑀢𑀺 𑀕𑀡𑀪𑁄𑀚𑀦𑀯𑀺𑀓𑀸𑀮𑀪𑁄𑀚𑀦𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀤𑀦𑁆𑀢𑀧𑁄𑀦𑁂𑀦 𑀘𑁂𑀮𑀓𑀸𑀢𑀺 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀜𑁆𑀘 𑀅𑀘𑁂𑀮𑀓𑀲𑀺𑀓𑁆𑀔𑀸𑀧𑀤𑀜𑁆𑀘. 𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 𑀉𑀬𑁆𑀬𑁄𑀥𑀻𑀢𑀺 ‘‘𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬, 𑀲𑁂𑀦𑀸𑀬 𑀯𑀲𑁂𑀬𑁆𑀬, 𑀉𑀬𑁆𑀬𑁄𑀥𑀺𑀓𑀁 𑀯𑀸…𑀧𑁂… 𑀅𑀦𑀻𑀓𑀤𑀲𑁆𑀲𑀦𑀁 𑀯𑀸 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀲𑀼𑀭𑀸 𑀑𑀭𑁂𑀦 𑀦𑁆𑀳𑀸𑀬𑀦𑀸𑀢𑀺 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀜𑁆𑀘 𑀑𑀭𑁂𑀦𑀤𑁆𑀥𑀫𑀸𑀲𑀦𑀳𑀸𑀦𑀲𑀺𑀓𑁆𑀔𑀸𑀧𑀤𑀜𑁆𑀘. 𑀤𑀼𑀩𑁆𑀩𑀡𑁆𑀡𑁂 𑀤𑁆𑀯𑁂 𑀤𑁂𑀲𑀦𑀺𑀓𑀸𑀢𑀺 ‘‘𑀢𑀺𑀡𑁆𑀡𑀁 𑀤𑀼𑀩𑁆𑀩𑀡𑁆𑀡𑀓𑀭𑀡𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘 𑀯𑀼𑀢𑁆𑀢𑀸𑀯𑀲𑁂𑀲𑀧𑀸𑀝𑀺𑀤𑁂𑀲𑀦𑀻𑀬𑀤𑁆𑀯𑀬𑀜𑁆𑀘. 𑀮𑀲𑀼𑀡𑀼𑀧𑀢𑀺𑀝𑁆𑀞𑁂 𑀦𑀘𑁆𑀘𑀦𑀸𑀢𑀺 𑀮𑀲𑀼𑀡𑀲𑀺𑀓𑁆𑀔𑀸𑀧𑀤𑀁, ‘‘𑀪𑀺𑀓𑁆𑀔𑀼𑀲𑁆𑀲 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀦𑀻𑀬𑁂𑀦 𑀯𑀸 𑀯𑀺𑀥𑀽𑀧𑀦𑁂𑀦 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀁, ‘‘𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸 𑀯𑀸𑀤𑀺𑀢𑀁 𑀯𑀸 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀇𑀢𑁄 𑀧𑀭𑀁 𑀧𑀸𑀴𑀺𑀁 𑀯𑀺𑀭𑀚𑁆𑀛𑀺𑀢𑁆𑀯𑀸 𑀮𑀺𑀔𑀦𑁆𑀢𑀺. 𑀬𑀣𑀸 𑀧𑀦 𑀅𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫; 𑀏𑀯𑀫𑁂𑀢𑁆𑀣 𑀅𑀦𑀼𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀦𑁆𑀳𑀸𑀦𑀫𑀢𑁆𑀣𑀭𑀡𑀁 𑀲𑁂𑀬𑁆𑀬𑀸𑀢𑀺 ‘‘𑀦𑀕𑁆𑀕𑀸 𑀦𑀳𑀸𑀬𑁂𑀬𑁆𑀬, 𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀸 𑀢𑀼𑀯𑀝𑁆𑀝𑁂𑀬𑁆𑀬𑀼𑀁, 𑀏𑀓𑀫𑀜𑁆𑀘𑁂 𑀢𑀼𑀯𑀝𑁆𑀝𑁂𑀬𑁆𑀬𑀼’’𑀦𑁆𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀅𑀦𑁆𑀢𑁄𑀭𑀝𑁆𑀞𑁂 𑀢𑀣𑀸 𑀩𑀳𑀻𑀢𑀺 ‘‘𑀅𑀦𑁆𑀢𑁄𑀭𑀝𑁆𑀞𑁂 𑀲𑀸𑀲𑀗𑁆𑀓𑀲𑀫𑁆𑀫𑀢𑁂, 𑀢𑀺𑀭𑁄𑀭𑀝𑁆𑀞𑁂 𑀲𑀸𑀲𑀗𑁆𑀓𑀲𑀫𑁆𑀫𑀢𑁂’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁. 𑀅𑀦𑁆𑀢𑁄𑀯𑀲𑁆𑀲𑀁 𑀘𑀺𑀢𑁆𑀢𑀸𑀕𑀸𑀭𑀦𑁆𑀢𑀺 ‘‘𑀅𑀦𑁆𑀢𑁄𑀯𑀲𑁆𑀲𑀁 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬, 𑀭𑀸𑀚𑀸𑀕𑀸𑀭𑀁 𑀯𑀸 𑀘𑀺𑀢𑁆𑀢𑀸𑀕𑀸𑀭𑀁 𑀯𑀸…𑀧𑁂… 𑀧𑁄𑀓𑁆𑀔𑀭𑀡𑀺𑀁 𑀯𑀸 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀘 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁. 𑀆𑀲𑀦𑁆𑀤𑀺𑀁 𑀲𑀼𑀢𑁆𑀢𑀓𑀦𑁆𑀢𑀦𑀸𑀢𑀺 ‘‘𑀆𑀲𑀦𑁆𑀤𑀺𑀁 𑀯𑀸 𑀧𑀮𑁆𑀮𑀗𑁆𑀓𑀁 𑀯𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀲𑀼𑀢𑁆𑀢𑀁 𑀓𑀦𑁆𑀢𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁.

𑀯𑁂𑀬𑁆𑀬𑀸𑀯𑀘𑁆𑀘𑀁 𑀲𑀳𑀢𑁆𑀣𑀸 𑀘𑀸𑀢𑀺 ‘‘𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁂𑀬𑁆𑀬, 𑀅𑀕𑀸𑀭𑀺𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀯𑀸 𑀲𑀳𑀢𑁆𑀣𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑀤𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁. 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑁂𑀦 𑀘𑀸𑀢𑀺 ‘‘𑀅𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂 𑀯𑀲𑁆𑀲𑀁 𑀯𑀲𑁂𑀬𑁆𑀬𑀸’’𑀢𑀺 𑀇𑀤𑀫𑁂𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀙𑀢𑁆𑀢𑀁 𑀬𑀸𑀦𑀜𑁆𑀘 𑀲𑀗𑁆𑀖𑀸𑀡𑀺𑀦𑁆𑀢𑀺 ‘‘𑀙𑀢𑁆𑀢𑀼𑀧𑀸𑀳𑀦𑀁 𑀥𑀸𑀭𑁂𑀬𑁆𑀬, 𑀬𑀸𑀦𑁂𑀦 𑀬𑀸𑀬𑁂𑀬𑁆𑀬, 𑀲𑀗𑁆𑀖𑀸𑀡𑀺𑀁 𑀥𑀸𑀭𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀅𑀮𑀗𑁆𑀓𑀸𑀭𑀕𑀦𑁆𑀥𑀯𑀸𑀲𑀺𑀢𑀦𑁆𑀢𑀺 ‘‘𑀇𑀢𑁆𑀣𑀸𑀮𑀗𑁆𑀓𑀸𑀭𑀁 𑀥𑀸𑀭𑁂𑀬𑁆𑀬, 𑀕𑀦𑁆𑀥𑀘𑀼𑀡𑁆𑀡𑀓𑁂𑀦 𑀦𑀳𑀸𑀬𑁂𑀬𑁆𑀬, 𑀯𑀸𑀲𑀺𑀢𑀓𑁂𑀦 𑀧𑀺𑀜𑁆𑀜𑀸𑀓𑁂𑀦 𑀦𑀳𑀸𑀬𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀪𑀺𑀓𑁆𑀔𑀼𑀦𑀻𑀢𑀺𑀆𑀤𑀺𑀦𑀸 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀉𑀫𑁆𑀫𑀤𑁆𑀤𑀸𑀧𑁂𑀬𑁆𑀬𑀸’’𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀅𑀲𑀗𑁆𑀓𑀘𑁆𑀘𑀺𑀓𑀸 𑀆𑀧𑀢𑁆𑀢𑀻𑀢𑀺 ‘‘𑀅𑀲𑀗𑁆𑀓𑀘𑁆𑀘𑀺𑀓𑀸 𑀕𑀸𑀫𑀁 𑀧𑀯𑀺𑀲𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀆𑀧𑀢𑁆𑀢𑀺 𑀘. 𑀘𑀢𑁆𑀢𑀸𑀭𑀻𑀲𑀸 𑀘𑀢𑀼𑀢𑁆𑀢𑀭𑀻𑀢𑀺 𑀏𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀘𑀢𑀼𑀘𑀢𑁆𑀢𑀸𑀮𑀻𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺.

𑀓𑀸𑀬𑁂𑀦 𑀦 𑀯𑀸𑀘𑀸𑀘𑀺𑀢𑁆𑀢𑁂𑀦, 𑀓𑀸𑀬𑀘𑀺𑀢𑁆𑀢𑁂𑀦 𑀦 𑀯𑀸𑀘𑀢𑁄𑀢𑀺 𑀓𑀸𑀬𑁂𑀦 𑀘𑁂𑀯 𑀓𑀸𑀬𑀘𑀺𑀢𑁆𑀢𑁂𑀦 𑀘 𑀲𑀫𑀼𑀝𑁆𑀞𑀳𑀦𑁆𑀢𑀺; 𑀦 𑀯𑀸𑀘𑀸𑀘𑀺𑀢𑁆𑀢𑁂𑀦 𑀦 𑀯𑀸𑀘𑀢𑁄𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺𑀓𑀸 𑀲𑀩𑁆𑀩𑁂, 𑀲𑀫𑀸 𑀏𑀴𑀓𑀮𑁄𑀫𑀺𑀓𑀸𑀢𑀺 𑀇𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁬𑁪. 𑀧𑀤𑀜𑁆𑀜𑀢𑁆𑀭 𑀅𑀲𑀫𑁆𑀫𑀢𑀸𑀢𑀺 ‘‘𑀧𑀤𑀲𑁄 𑀥𑀫𑁆𑀫𑀁, 𑀫𑀸𑀢𑀼𑀕𑀸𑀫𑀲𑁆𑀲 𑀉𑀢𑁆𑀢𑀭𑀺𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀼𑀦𑀸 𑀧𑀼𑀭𑀺𑀲𑀯𑀺𑀕𑁆𑀕𑀳𑁂𑀦, 𑀅𑀲𑀫𑁆𑀫𑀢𑁄 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀢𑀣𑀸 𑀅𑀢𑁆𑀣𑀗𑁆𑀕𑀢𑁂𑀦 𑀘𑀸𑀢𑀺 ‘‘𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀑𑀯𑀤𑁂𑀬𑁆𑀬𑀸’’𑀢𑀺 𑀇𑀤𑀫𑁂𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸 𑀤𑁆𑀯𑁂𑀢𑀺 ‘‘𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀁 𑀧𑀭𑀺𑀬𑀸𑀧𑀼𑀡𑁂𑀬𑁆𑀬, 𑀯𑀸𑀘𑁂𑀬𑁆𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁. 𑀅𑀦𑁄𑀓𑀸𑀲𑁄 𑀘 𑀧𑀼𑀘𑁆𑀙𑀦𑀸𑀢𑀺 ‘‘𑀅𑀦𑁄𑀓𑀸𑀲𑀓𑀢𑀁 𑀪𑀺𑀓𑁆𑀔𑀼𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀸’’𑀢𑀺 𑀇𑀤𑀫𑁂𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀅𑀤𑁆𑀥𑀸𑀦𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁬𑁫. 𑀅𑀤𑁆𑀥𑀸𑀦𑀦𑀸𑀯𑀁 𑀧𑀡𑀻𑀢𑀦𑁆𑀢𑀺 ‘‘𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀏𑀓𑀁 𑀦𑀸𑀯𑀁 𑀅𑀪𑀺𑀭𑀼𑀳𑁂𑀬𑁆𑀬, 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀫𑀸𑀢𑀼𑀕𑀸𑀫𑁂𑀦 𑀲𑀁𑀳𑀭𑁂𑀢𑀺 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀕𑀫𑀦𑀜𑁆𑀘 ‘‘𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀥𑀜𑁆𑀜𑀁 𑀦𑀺𑀫𑀦𑁆𑀢𑀺𑀢𑀸 𑀘𑁂𑀯𑀸𑀢𑀺 ‘‘𑀥𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀯𑀸’’𑀢𑀺 𑀘 ‘‘𑀦𑀺𑀫𑀦𑁆𑀢𑀺𑀢𑀸 𑀯𑀸 𑀧𑀯𑀸𑀭𑀺𑀢𑀸 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑁂𑀬𑁆𑀬 𑀯𑀸 𑀪𑀼𑀜𑁆𑀚𑁂𑀬𑁆𑀬 𑀯𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀝𑁆𑀞 𑀘𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀯𑀼𑀢𑁆𑀢𑀸 𑀅𑀝𑁆𑀞 𑀧𑀸𑀝𑀺𑀤𑁂𑀲𑀦𑀻𑀬𑀸 𑀯𑀸.

𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁬𑁬. 𑀣𑁂𑀬𑁆𑀬𑀲𑀢𑁆𑀣𑀁 𑀉𑀧𑀲𑁆𑀲𑀼𑀢𑀻𑀢𑀺 𑀣𑁂𑀬𑁆𑀬𑀲𑀢𑁆𑀣𑁂𑀦 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀕𑀫𑀦𑀜𑁆𑀘 𑀉𑀧𑀲𑁆𑀲𑀼𑀢𑀺𑀢𑀺𑀝𑁆𑀞𑀦𑀜𑁆𑀘. 𑀲𑀽𑀧𑀯𑀺𑀜𑁆𑀜𑀸𑀧𑀦𑁂𑀦 𑀘𑀸𑀢𑀺 𑀇𑀤𑀁 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀭𑀢𑁆𑀢𑀺𑀙𑀦𑁆𑀦𑀜𑁆𑀘 𑀑𑀓𑀸𑀲𑀦𑁆𑀢𑀺 ‘‘𑀭𑀢𑁆𑀢𑀦𑁆𑀥𑀓𑀸𑀭𑁂 𑀅𑀧𑁆𑀧𑀤𑀻𑀧𑁂, 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂, 𑀅𑀚𑁆𑀛𑁄𑀓𑀸𑀲𑁂 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀬𑀁. 𑀩𑁆𑀬𑀽𑀳𑁂𑀦 𑀲𑀢𑁆𑀢𑀫𑀸𑀢𑀺 𑀇𑀤𑀁 𑀢𑀤𑀦𑀦𑁆𑀢𑀭𑀫𑁂𑀯 ‘‘𑀭𑀣𑀺𑀓𑀸𑀬 𑀯𑀸 𑀩𑁆𑀬𑀽𑀳𑁂 𑀯𑀸 𑀲𑀺𑀗𑁆𑀖𑀸𑀝𑀓𑁂 𑀯𑀸 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀆𑀕𑀢𑀲𑀺𑀓𑁆𑀔𑀸𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁬𑁭. 𑀥𑀫𑁆𑀫𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀸𑀦𑀺 𑀏𑀓𑀸𑀤𑀲 𑀉𑀢𑁆𑀢𑀸𑀦𑀸𑀦𑁂𑀯. 𑀏𑀯𑀁 𑀢𑀸𑀯 𑀲𑀫𑁆𑀪𑀺𑀦𑁆𑀦𑀲𑀫𑀼𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀬𑀢𑀲𑀫𑀼𑀝𑁆𑀞𑀸𑀦𑀁 𑀧𑀦 𑀢𑀺𑀯𑀺𑀥𑀁, 𑀢𑀁 𑀏𑀓𑁂𑀓𑀲𑁆𑀲𑁂𑀯 𑀲𑀺𑀓𑁆𑀔𑀸𑀧𑀤𑀲𑁆𑀲 𑀳𑁄𑀢𑀺, 𑀢𑀁 𑀯𑀺𑀲𑀼𑀁𑀬𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀪𑀽𑀢𑀁 𑀓𑀸𑀬𑁂𑀦 𑀚𑀸𑀬𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀉𑀢𑁆𑀢𑀸𑀦𑀫𑁂𑀯. 𑀦𑁂𑀢𑁆𑀢𑀺𑀥𑀫𑁆𑀫𑀸𑀦𑀼𑀮𑁄𑀫𑀺𑀓𑀦𑁆𑀢𑀺 𑀯𑀺𑀦𑀬𑀧𑀸𑀴𑀺𑀥𑀫𑁆𑀫𑀲𑁆𑀲 𑀅𑀦𑀼𑀮𑁄𑀫𑀦𑁆𑀢𑀺.

𑀲𑀫𑀼𑀝𑁆𑀞𑀸𑀦𑀲𑀻𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑀁

𑀓𑀢𑀺𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸

𑁨𑁭𑁧. 𑀇𑀤𑀸𑀦𑀺 𑀆𑀧𑀢𑁆𑀢𑀺𑀆𑀤𑀺𑀓𑁄𑀝𑁆𑀞𑀸𑀲𑁂𑀲𑀼 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 ‘‘𑀓𑀢𑀺 𑀆𑀧𑀢𑁆𑀢𑀺𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑀧𑁆𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀺𑀪𑀗𑁆𑀕𑁄 𑀯𑀼𑀢𑁆𑀢𑁄.

𑀢𑀢𑁆𑀣 𑀓𑀢𑀺 𑀆𑀧𑀢𑁆𑀢𑀺𑀬𑁄𑀢𑀺 𑀫𑀸𑀢𑀺𑀓𑀸𑀬 𑀘 𑀯𑀺𑀪𑀗𑁆𑀕𑁂 𑀘 𑀆𑀕𑀢𑀸𑀧𑀢𑁆𑀢𑀺𑀧𑀼𑀘𑁆𑀙𑀸. 𑀏𑀲 𑀦𑀬𑁄 𑀤𑀼𑀢𑀺𑀬𑀧𑀤𑁂𑀧𑀺. 𑀓𑁂𑀯𑀮𑀜𑁆𑀳𑁂𑀢𑁆𑀣 𑀆𑀧𑀢𑁆𑀢𑀺𑀬𑁄 𑀏𑀯 𑀭𑀸𑀲𑀺𑀯𑀲𑁂𑀦 𑀔𑀦𑁆𑀥𑀸𑀢𑀺 𑀯𑀼𑀢𑁆𑀢𑀸. 𑀯𑀺𑀦𑀻𑀢𑀯𑀢𑁆𑀣𑀽𑀦𑀻𑀢𑀺 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀯𑀺𑀦𑀬𑀧𑀼𑀘𑁆𑀙𑀸; ‘‘𑀯𑀺𑀦𑀻𑀢𑀁 𑀯𑀺𑀦𑀬𑁄 𑀯𑀽𑀧𑀲𑀫𑁄’’𑀢𑀺 𑀇𑀤𑀜𑁆𑀳𑀺 𑀅𑀢𑁆𑀣𑀢𑁄 𑀏𑀓𑀁, 𑀯𑀺𑀦𑀻𑀢𑀸𑀦𑀺𑀬𑁂𑀯 𑀯𑀺𑀦𑀻𑀢𑀯𑀢𑁆𑀣𑀽𑀦𑀻𑀢𑀺 𑀅𑀬𑀫𑁂𑀢𑁆𑀣 𑀧𑀤𑀢𑁆𑀣𑁄. 𑀇𑀤𑀸𑀦𑀺 𑀬𑁂𑀲𑀼 𑀲𑀢𑀺 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀺 𑀅𑀕𑀸𑀭𑀯𑀸’’𑀢𑀺 𑀧𑀼𑀘𑁆𑀙𑀸𑀤𑁆𑀯𑀬𑀁. 𑀯𑀺𑀦𑀻𑀢𑀯𑀢𑁆𑀣𑀽𑀦𑀻𑀢𑀺 𑀅𑀬𑀁 𑀧𑀦 𑀢𑁂𑀲𑀁 𑀅𑀕𑀸𑀭𑀯𑀸𑀦𑀁 𑀯𑀺𑀦𑀬𑀧𑀼𑀘𑁆𑀙𑀸. 𑀬𑀲𑁆𑀫𑀸 𑀧𑀦 𑀢𑀸 𑀆𑀧𑀢𑁆𑀢𑀺𑀬𑁄 𑀯𑀺𑀧𑀢𑁆𑀢𑀺𑀁 𑀆𑀧𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀓𑀢𑀺 𑀯𑀺𑀧𑀢𑁆𑀢𑀺𑀬𑁄’’𑀢𑀺 𑀅𑀬𑀁 𑀆𑀧𑀢𑁆𑀢𑀻𑀦𑀁 𑀯𑀺𑀧𑀢𑁆𑀢𑀺𑀪𑀸𑀯𑀧𑀼𑀘𑁆𑀙𑀸. 𑀓𑀢𑀺 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 𑀢𑀸𑀲𑀁𑀬𑁂𑀯 𑀆𑀧𑀢𑁆𑀢𑀻𑀦𑀁 𑀲𑀫𑀼𑀝𑁆𑀞𑀸𑀦𑀧𑀼𑀘𑁆𑀙𑀸. 𑀯𑀺𑀯𑀸𑀤𑀫𑀽𑀮𑀸𑀦𑀺 𑀅𑀦𑀼𑀯𑀸𑀤𑀫𑀽𑀮𑀸𑀦𑀻𑀢𑀺 𑀇𑀫𑀸 ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡’’𑀦𑁆𑀢𑀺 𑀆𑀕𑀢𑀸𑀦𑀁 𑀯𑀺𑀯𑀸𑀤𑀸𑀦𑀼𑀯𑀸𑀤𑀸𑀦𑀁 𑀫𑀽𑀮𑀧𑀼𑀘𑁆𑀙𑀸. 𑀲𑀸𑀭𑀡𑀻𑀬𑀸 𑀥𑀫𑁆𑀫𑀸𑀢𑀺 𑀯𑀺𑀯𑀸𑀤𑀸𑀦𑀼𑀯𑀸𑀤𑀫𑀽𑀮𑀸𑀦𑀁 𑀅𑀪𑀸𑀯𑀓𑀭𑀥𑀫𑁆𑀫𑀧𑀼𑀘𑁆𑀙𑀸. 𑀪𑁂𑀤𑀓𑀭𑀯𑀢𑁆𑀣𑀽𑀦𑀻𑀢𑀺 𑀅𑀬𑀁 ‘‘𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀁 𑀯𑀸 𑀅𑀥𑀺𑀓𑀭𑀡’’𑀦𑁆𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀪𑁂𑀤𑀓𑀭𑀡𑀧𑀼𑀘𑁆𑀙𑀸. 𑀅𑀥𑀺𑀓𑀭𑀡𑀸𑀦𑀻𑀢𑀺 𑀪𑁂𑀤𑀓𑀭𑀯𑀢𑁆𑀣𑀽𑀲𑀼 𑀲𑀢𑀺 𑀉𑀧𑁆𑀧𑀚𑁆𑀚𑀦𑀥𑀫𑁆𑀫𑀧𑀼𑀘𑁆𑀙𑀸. 𑀲𑀫𑀣𑀸𑀢𑀺 𑀢𑁂𑀲𑀁𑀬𑁂𑀯 𑀯𑀽𑀧𑀲𑀫𑀦𑀥𑀫𑁆𑀫𑀧𑀼𑀘𑁆𑀙𑀸. 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄𑀢𑀺 𑀫𑀸𑀢𑀺𑀓𑀸𑀬 𑀆𑀕𑀢𑀯𑀲𑁂𑀦 𑀯𑀼𑀢𑁆𑀢𑀸. 𑀲𑀢𑁆𑀢𑀸𑀢𑀺 𑀯𑀺𑀪𑀗𑁆𑀕𑁂 𑀆𑀕𑀢𑀯𑀲𑁂𑀦.

𑀆𑀭𑀓𑀸 𑀏𑀢𑁂𑀳𑀺 𑀭𑀫𑀢𑀻𑀢𑀺 𑀆𑀭𑀢𑀺; 𑀪𑀼𑀲𑀸 𑀯𑀸 𑀭𑀢𑀺 𑀆𑀭𑀢𑀺. 𑀯𑀺𑀦𑀸 𑀏𑀢𑁂𑀳𑀺 𑀭𑀫𑀢𑀻𑀢𑀺 𑀯𑀺𑀭𑀢𑀺. 𑀧𑀘𑁆𑀘𑁂𑀓𑀁 𑀧𑀘𑁆𑀘𑁂𑀓𑀁 𑀯𑀺𑀭𑀫𑀢𑀻𑀢𑀺 𑀧𑀝𑀺𑀯𑀺𑀭𑀢𑀺. 𑀯𑁂𑀭𑀁 𑀫𑀡𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑁂𑀭𑀫𑀡𑀻. 𑀦 𑀏𑀢𑀸𑀬 𑀏𑀢𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀓𑀭𑀻𑀬𑀦𑁆𑀢𑀻𑀢𑀺 𑀅𑀓𑀺𑀭𑀺𑀬𑀸. 𑀬𑀁 𑀏𑀢𑀸𑀬 𑀅𑀲𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀓𑀭𑀡𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀧𑀝𑀺𑀧𑀓𑁆𑀔𑀢𑁄 𑀅𑀓𑀭𑀡𑀁. 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀅𑀚𑁆𑀛𑀸𑀧𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀢𑁄 𑀅𑀦𑀚𑁆𑀛𑀸𑀧𑀢𑁆𑀢𑀺. 𑀯𑁂𑀮𑀦𑀢𑁄 𑀯𑁂𑀮𑀸; 𑀘𑀮𑀬𑀦𑀢𑁄 𑀯𑀺𑀦𑀸𑀲𑀦𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀬𑁆𑀬𑀸𑀦𑀁 𑀲𑀺𑀦𑁄𑀢𑀺 𑀩𑀦𑁆𑀥𑀢𑀺 𑀦𑀺𑀯𑀸𑀭𑁂𑀢𑀻𑀢𑀺 𑀲𑁂𑀢𑀼. 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁄 𑀲𑁂𑀢𑀼 𑀏𑀢𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀳𑀜𑁆𑀜𑀢𑀻𑀢𑀺 𑀲𑁂𑀢𑀼𑀖𑀸𑀢𑁄. 𑀲𑁂𑀲𑀯𑀺𑀦𑀻𑀢𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀩𑀼𑀤𑁆𑀥𑁂 𑀅𑀕𑀸𑀭𑀯𑀸𑀤𑀻𑀲𑀼 𑀬𑁄 𑀩𑀼𑀤𑁆𑀥𑁂 𑀥𑀭𑀫𑀸𑀦𑁂 𑀉𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀘𑁂𑀢𑀺𑀬𑀝𑁆𑀞𑀸𑀦𑀁 𑀩𑁄𑀥𑀺𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺, 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀦 𑀯𑀦𑁆𑀤𑀢𑀺, 𑀘𑁂𑀢𑀺𑀬𑀗𑁆𑀕𑀡𑁂 𑀲𑀙𑀢𑁆𑀢𑁄 𑀲𑀉𑀧𑀸𑀳𑀦𑁄 𑀘𑀭𑀢𑀺, 𑀦𑀢𑁆𑀣𑁂𑀢𑀲𑁆𑀲 𑀩𑀼𑀤𑁆𑀥𑁂 𑀕𑀸𑀭𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀧𑀦 𑀲𑀓𑁆𑀓𑁄𑀦𑁆𑀢𑁄𑀬𑁂𑀯 𑀥𑀫𑁆𑀫𑀲𑁆𑀲𑀯𑀦𑀁 𑀦 𑀕𑀘𑁆𑀙𑀢𑀺, 𑀲𑀭𑀪𑀜𑁆𑀜𑀁 𑀦 𑀪𑀡𑀢𑀺, 𑀥𑀫𑁆𑀫𑀓𑀣𑀁 𑀦 𑀓𑀣𑁂𑀢𑀺, 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀯𑀺𑀓𑁆𑀔𑀺𑀢𑁆𑀢𑁄 𑀯𑀸 𑀅𑀦𑀸𑀤𑀭𑁄 𑀯𑀸 𑀦𑀺𑀲𑀻𑀤𑀢𑀺, 𑀦𑀢𑁆𑀣𑁂𑀢𑀲𑁆𑀲 𑀥𑀫𑁆𑀫𑁂 𑀕𑀸𑀭𑀯𑁄. 𑀬𑁄 𑀣𑁂𑀭𑀦𑀯𑀫𑀚𑁆𑀛𑀺𑀫𑁂𑀲𑀼 𑀘𑀺𑀢𑁆𑀢𑀻𑀓𑀸𑀭𑀁 𑀦 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺, 𑀉𑀧𑁄𑀲𑀣𑀸𑀕𑀸𑀭𑀯𑀺𑀢𑀓𑁆𑀓𑀫𑀸𑀴𑀓𑀸𑀤𑀻𑀲𑀼 𑀓𑀸𑀬𑀧𑁆𑀧𑀸𑀕𑀩𑁆𑀪𑀺𑀬𑀁 𑀤𑀲𑁆𑀲𑁂𑀢𑀺, 𑀬𑀣𑀸𑀯𑀼𑀟𑁆𑀠𑀁 𑀦 𑀯𑀦𑁆𑀤𑀢𑀺, 𑀦𑀢𑁆𑀣𑁂𑀢𑀲𑁆𑀲 𑀲𑀗𑁆𑀖𑁂 𑀕𑀸𑀭𑀯𑁄. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀫𑀸𑀤𑀸𑀬 𑀅𑀲𑀺𑀓𑁆𑀔𑀫𑀸𑀦𑁄𑀬𑁂𑀯 𑀧𑀦 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀫𑀸𑀤𑁂 𑀘 𑀲𑀢𑀺𑀯𑀺𑀧𑁆𑀧𑀯𑀸𑀲𑁂 𑀢𑀺𑀝𑁆𑀞𑀫𑀸𑀦𑁄𑀬𑁂𑀯 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀅𑀩𑁆𑀭𑀽𑀳𑀬𑀫𑀸𑀦𑁄 𑀅𑀧𑁆𑀧𑀫𑀸𑀤𑁂 𑀅𑀕𑀸𑀭𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀆𑀫𑀺𑀲𑀧𑁆𑀧𑀝𑀺𑀲𑀦𑁆𑀣𑀸𑀭𑀁 𑀥𑀫𑁆𑀫𑀧𑁆𑀧𑀝𑀺𑀲𑀦𑁆𑀣𑀸𑀭𑀦𑁆𑀢𑀺 𑀇𑀫𑀁 𑀤𑀼𑀯𑀺𑀥𑀁 𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀭𑁄𑀦𑁆𑀢𑁄𑀬𑁂𑀯 𑀧𑀝𑀺𑀲𑀦𑁆𑀣𑀸𑀭𑁂 𑀅𑀕𑀸𑀭𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀕𑀸𑀭𑀯𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁭𑁨. 𑀯𑀺𑀯𑀸𑀤𑀫𑀽𑀮𑀦𑀺𑀤𑁆𑀤𑁂𑀲𑁂 ‘‘𑀲𑀢𑁆𑀣𑀭𑀺𑀧𑀺 𑀅𑀕𑀸𑀭𑀯𑁄’’𑀢𑀺𑀆𑀤𑀻𑀦𑀁 𑀩𑀼𑀤𑁆𑀥𑁂 𑀅𑀕𑀸𑀭𑀯𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑁆𑀧𑀢𑀺𑀲𑁆𑀲𑁄𑀢𑀺 𑀅𑀦𑀻𑀘𑀯𑀼𑀢𑁆𑀢𑀺; 𑀦 𑀲𑀢𑁆𑀣𑀸𑀭𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀯𑀸 𑀅𑀢𑁆𑀢𑀦𑁄 𑀧𑀓𑁆𑀔𑁂 𑀯𑀸; 𑀲𑀓𑀸𑀬 𑀧𑀭𑀺𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀩𑀳𑀺𑀤𑁆𑀥𑀸 𑀯𑀸𑀢𑀺 𑀧𑀭𑀲𑀦𑁆𑀢𑀸𑀦𑁂 𑀯𑀸 𑀧𑀭𑀧𑀓𑁆𑀔𑁂 𑀯𑀸. 𑀢𑀢𑁆𑀭 𑀢𑀼𑀫𑁆𑀳𑁂𑀢𑀺 𑀢𑀲𑁆𑀫𑀺𑀁 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑁂 𑀲𑀧𑀭𑀲𑀦𑁆𑀢𑀸𑀦𑁂 𑀯𑀸 𑀲𑀧𑀭𑀧𑀭𑀺𑀲𑀸𑀬 𑀯𑀸. 𑀧𑀳𑀸𑀦𑀸𑀬 𑀯𑀸𑀬𑀫𑁂𑀬𑁆𑀬𑀸𑀣𑀸𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀤𑀻𑀳𑀺 𑀦𑀬𑁂𑀳𑀺 𑀧𑀳𑀸𑀦𑀢𑁆𑀣𑀁 𑀯𑀸𑀬𑀫𑁂𑀬𑁆𑀬𑀸𑀣; 𑀫𑁂𑀢𑁆𑀢𑀸𑀪𑀸𑀯𑀦𑀸𑀤𑀺𑀦𑀬𑁂𑀦 𑀳𑀺 𑀢𑀁 𑀅𑀚𑁆𑀛𑀢𑁆𑀢𑀫𑁆𑀧𑀺 𑀩𑀳𑀺𑀤𑁆𑀥𑀸𑀧𑀺 𑀧𑀳𑀻𑀬𑀢𑀺. 𑀅𑀦𑀯𑀲𑁆𑀲𑀯𑀸𑀬𑀸𑀢𑀺 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑀸𑀬.

𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻𑀢𑀺 𑀲𑀓𑀫𑁂𑀯 𑀤𑀺𑀝𑁆𑀞𑀺𑀁 𑀧𑀭𑀸𑀫𑀲𑀢𑀺; 𑀬𑀁 𑀅𑀢𑁆𑀢𑀦𑀸 𑀤𑀺𑀝𑁆𑀞𑀺𑀕𑀢𑀁 𑀕𑀳𑀺𑀢𑀁, 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀕𑀡𑁆𑀳𑀸𑀢𑀺. 𑀆𑀥𑀸𑀦𑀕𑁆𑀕𑀸𑀳𑀻𑀢𑀺 𑀤𑀴𑁆𑀳𑀕𑁆𑀕𑀸𑀳𑀻.

𑁨𑁭𑁩. 𑀅𑀦𑀼𑀯𑀸𑀤𑀫𑀽𑀮𑀦𑀺𑀤𑁆𑀤𑁂𑀲𑁄 𑀓𑀺𑀜𑁆𑀘𑀸𑀧𑀺 𑀯𑀺𑀯𑀸𑀤𑀫𑀽𑀮𑀦𑀺𑀤𑁆𑀤𑁂𑀲𑁂𑀦𑁂𑀯 𑀲𑀫𑀸𑀦𑁄, 𑀅𑀣 𑀔𑁄 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀯𑀺𑀯𑀤𑀦𑁆𑀢𑀸𑀦𑀁 𑀓𑁄𑀥𑀽𑀧𑀦𑀸𑀳𑀸𑀤𑀬𑁄 𑀯𑀺𑀯𑀸𑀤𑀫𑀽𑀮𑀸𑀦𑀺. 𑀢𑀣𑀸 𑀯𑀺𑀯𑀤𑀦𑁆𑀢𑀸 𑀧𑀦 𑀲𑀻𑀮𑀯𑀺𑀧𑀢𑁆𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑀯𑀺𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 ‘‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀅𑀲𑀼𑀓𑀁 𑀦𑀸𑀫 𑀯𑀺𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺 𑀯𑀸, ‘‘𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄𑀲𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀸 𑀅𑀦𑀼𑀯𑀤𑀦𑁆𑀢𑀺. 𑀏𑀯𑀁 𑀅𑀦𑀼𑀯𑀤𑀦𑁆𑀢𑀸𑀦𑀁 𑀓𑁄𑀥𑀽𑀧𑀦𑀸𑀳𑀸𑀤𑀬𑁄 𑀅𑀦𑀼𑀯𑀸𑀤𑀫𑀽𑀮𑀸𑀦𑀻𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄.

𑁨𑁭𑁪. 𑀲𑀸𑀭𑀡𑀻𑀬𑀥𑀫𑁆𑀫𑀦𑀺𑀤𑁆𑀤𑁂𑀲𑁂 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀓𑀢𑀁 𑀓𑀸𑀬𑀓𑀫𑁆𑀫𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀆𑀯𑀺 𑀘𑁂𑀯 𑀭𑀳𑁄 𑀘𑀸𑀢𑀺 𑀲𑀫𑁆𑀫𑀼𑀔𑀸 𑀘 𑀧𑀭𑀫𑁆𑀫𑀼𑀔𑀸 𑀘. 𑀢𑀢𑁆𑀣 𑀦𑀯𑀓𑀸𑀦𑀁 𑀘𑀻𑀯𑀭𑀓𑀫𑁆𑀫𑀸𑀤𑀻𑀲𑀼 𑀲𑀳𑀸𑀬𑀪𑀸𑀯𑀕𑀫𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀣𑁂𑀭𑀸𑀦𑀁 𑀧𑀦 𑀧𑀸𑀤𑀥𑁄𑀯𑀦𑀩𑀻𑀚𑀦𑀯𑀸𑀢𑀤𑀸𑀦𑀸𑀤𑀺𑀪𑁂𑀤𑀫𑁆𑀧𑀺 𑀲𑀩𑁆𑀩𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀉𑀪𑀬𑁂𑀳𑀺𑀧𑀺 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀤𑀸𑀭𑀼𑀪𑀡𑁆𑀟𑀸𑀤𑀻𑀦𑀁 𑀢𑁂𑀲𑀼 𑀅𑀯𑀫𑀜𑁆𑀜𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑀸 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀯𑀺𑀬 𑀧𑀝𑀺𑀲𑀸𑀫𑀦𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀸𑀭𑀡𑀻𑀬𑁄𑀢𑀺 𑀅𑀬𑀁 𑀫𑁂𑀢𑁆𑀢𑀸𑀓𑀸𑀬𑀓𑀫𑁆𑀫𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀲𑀭𑀺𑀢𑀩𑁆𑀩𑁄 𑀲𑀢𑀺𑀚𑀦𑀓𑁄; 𑀬𑁄 𑀦𑀁 𑀓𑀭𑁄𑀢𑀺, 𑀢𑀁 𑀧𑀼𑀕𑁆𑀕𑀮𑀁; 𑀬𑁂𑀲𑀁 𑀓𑀢𑁄 𑀳𑁄𑀢𑀺, 𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑀸 ‘‘𑀅𑀳𑁄 𑀲𑀧𑁆𑀧𑀼𑀭𑀺𑀲𑁄’’𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀺𑀬𑀓𑀭𑀡𑁄𑀢𑀺 𑀢𑀁 𑀧𑀼𑀕𑁆𑀕𑀮𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑀁 𑀓𑀭𑁄𑀢𑀺. 𑀕𑀭𑀼𑀓𑀭𑀡𑁄𑀢𑀺 𑀢𑀁 𑀧𑀼𑀕𑁆𑀕𑀮𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀕𑀭𑀼𑀁 𑀓𑀭𑁄𑀢𑀺. 𑀲𑀗𑁆𑀕𑀳𑀸𑀬𑀸𑀢𑀺𑀆𑀤𑀻𑀲𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀗𑁆𑀕𑀳𑁂𑀢𑀩𑁆𑀩𑀪𑀸𑀯𑀸𑀬. 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀯𑀺𑀯𑀸𑀤𑀸𑀬 𑀲𑀫𑀕𑁆𑀕𑀪𑀸𑀯𑀸𑀬 𑀏𑀓𑀻𑀪𑀸𑀯𑀸𑀬 𑀘 𑀲𑀁𑀯𑀢𑁆𑀢𑀢𑀺.

𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀦𑁆𑀢𑀺𑀆𑀤𑀻𑀲𑀼 𑀤𑁂𑀯𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀏𑀯𑀁 𑀧𑀕𑁆𑀕𑀬𑁆𑀳 𑀯𑀘𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀯𑀺𑀳𑀸𑀭𑁂 𑀅𑀲𑀦𑁆𑀢𑁂 𑀧𑀦 𑀢𑀁 𑀧𑀝𑀺𑀧𑀼𑀘𑁆𑀙𑀦𑁆𑀢𑀲𑁆𑀲 ‘‘𑀓𑀼𑀳𑀺𑀁 𑀅𑀫𑁆𑀳𑀸𑀓𑀁 𑀤𑁂𑀯𑀢𑁆𑀣𑁂𑀭𑁄, 𑀓𑀼𑀳𑀺𑀁 𑀅𑀫𑁆𑀳𑀸𑀓𑀁 𑀢𑀺𑀲𑁆𑀲𑀢𑁆𑀣𑁂𑀭𑁄, 𑀓𑀤𑀸 𑀦𑀼 𑀔𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀫𑀫𑀸𑀬𑀦𑀯𑀘𑀦𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀸𑀦𑀺 𑀧𑀦 𑀦𑀬𑀦𑀸𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀧𑀲𑀦𑁆𑀦𑁂𑀦 𑀫𑀼𑀔𑁂𑀦 𑀑𑀮𑁄𑀓𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫. ‘‘𑀤𑁂𑀯𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀭𑁄𑀕𑁄 𑀳𑁄𑀢𑀼, 𑀅𑀧𑁆𑀧𑀸𑀩𑀸𑀥𑁄’’𑀢𑀺 𑀲𑀫𑀦𑁆𑀦𑀸𑀳𑀭𑀡𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻𑀢𑀺 𑀦𑁂𑀯 𑀆𑀫𑀺𑀲𑀁 𑀧𑀝𑀺𑀯𑀺𑀪𑀚𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀦 𑀧𑀼𑀕𑁆𑀕𑀮𑀁. 𑀬𑁄 𑀳𑀺 ‘‘𑀏𑀢𑁆𑀢𑀓𑀁 𑀧𑀭𑁂𑀲𑀁 𑀤𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀅𑀢𑁆𑀢𑀦𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀯𑀸 𑀅𑀲𑀼𑀓𑀲𑁆𑀲 𑀘 𑀅𑀲𑀼𑀓𑀲𑁆𑀲 𑀘 𑀤𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀅𑀢𑁆𑀢𑀦𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀪𑀚𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀅𑀬𑀁 𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀦𑀸𑀫. 𑀅𑀬𑀁 𑀧𑀦 𑀏𑀯𑀁 𑀅𑀓𑀢𑁆𑀯𑀸 𑀆𑀪𑀢𑀁 𑀧𑀺𑀡𑁆𑀟𑀧𑀸𑀢𑀁 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀤𑀢𑁆𑀯𑀸 𑀕𑀳𑀺𑀢𑀸𑀯𑀲𑁂𑀲𑀁 𑀪𑀼𑀜𑁆𑀚𑀢𑀺. ‘‘𑀲𑀻𑀮𑀯𑀦𑁆𑀢𑁂𑀳𑀻’’𑀢𑀺 𑀯𑀘𑀦𑀢𑁄 𑀤𑀼𑀲𑁆𑀲𑀻𑀮𑀲𑁆𑀲 𑀅𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁂𑀦 𑀧𑀦 𑀲𑀩𑁆𑀩𑁂𑀲𑀁 𑀤𑀸𑀢𑀩𑁆𑀩𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀕𑀺𑀮𑀸𑀦-𑀕𑀺𑀮𑀸𑀦𑀼𑀧𑀝𑁆𑀞𑀸𑀓-𑀆𑀕𑀦𑁆𑀢𑀼𑀓-𑀕𑀫𑀺𑀓𑀘𑀻𑀯𑀭𑀓𑀫𑁆𑀫𑀸𑀤𑀺𑀧𑀲𑀼𑀢𑀸𑀦𑀁 𑀯𑀺𑀘𑁂𑀬𑁆𑀬 𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀦 𑀳𑀺 𑀏𑀢𑁂 𑀯𑀺𑀘𑀺𑀦𑀺𑀢𑁆𑀯𑀸 𑀤𑁂𑀦𑁆𑀢𑁂𑀦 𑀧𑀼𑀕𑁆𑀕𑀮𑀯𑀺𑀪𑀸𑀕𑁄 𑀓𑀢𑁄 𑀳𑁄𑀢𑀺, 𑀈𑀤𑀺𑀲𑀸𑀦𑀜𑁆𑀳𑀺 𑀓𑀺𑀘𑁆𑀙𑀮𑀸𑀪𑀢𑁆𑀢𑀸 𑀯𑀺𑀲𑁂𑀲𑁄 𑀓𑀸𑀢𑀩𑁆𑀩𑁄𑀬𑁂𑀯𑀸𑀢𑀺 𑀅𑀬𑀁 𑀓𑀭𑁄𑀢𑀺.

𑀅𑀔𑀡𑁆𑀟𑀸𑀦𑀻𑀢𑀺𑀆𑀤𑀻𑀲𑀼 𑀬𑀲𑁆𑀲 𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀆𑀤𑀺𑀫𑁆𑀳𑀺 𑀯𑀸 𑀅𑀦𑁆𑀢𑁂 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀪𑀺𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀲 𑀲𑀻𑀮𑀁 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬 𑀔𑀡𑁆𑀟𑀁 𑀦𑀸𑀫. 𑀬𑀲𑁆𑀲 𑀧𑀦 𑀯𑁂𑀫𑀚𑁆𑀛𑁂 𑀪𑀺𑀦𑁆𑀦𑀁, 𑀢𑀲𑁆𑀲 𑀫𑀚𑁆𑀛𑁂 𑀙𑀺𑀤𑁆𑀤𑀲𑀸𑀝𑀓𑁄 𑀯𑀺𑀬 𑀙𑀺𑀤𑁆𑀤𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀝𑀺𑀧𑀸𑀝𑀺𑀬𑀸 𑀤𑁆𑀯𑁂 𑀢𑀻𑀡𑀺 𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀯𑀸 𑀓𑀼𑀘𑁆𑀙𑀺𑀬𑀁 𑀯𑀸 𑀉𑀝𑁆𑀞𑀺𑀢𑁂𑀦 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀓𑀸𑀴𑀭𑀢𑁆𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑀭𑀻𑀭𑀯𑀡𑁆𑀡𑀸 𑀕𑀸𑀯𑀻 𑀯𑀺𑀬 𑀲𑀩𑀮𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀲𑀪𑀸𑀕𑀯𑀡𑁆𑀡𑀩𑀺𑀦𑁆𑀤𑀼𑀯𑀺𑀘𑀺𑀢𑁆𑀭𑀸 𑀕𑀸𑀯𑀻 𑀯𑀺𑀬 𑀓𑀫𑁆𑀫𑀸𑀲𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀺𑀦𑁆𑀦𑀸𑀦𑀺 𑀲𑀻𑀮𑀸𑀦𑀺, 𑀢𑀲𑁆𑀲 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀦𑁂𑀢𑀸𑀦𑀺 𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄 𑀪𑀼𑀚𑀺𑀲𑁆𑀲𑀸𑀦𑀺. 𑀯𑀺𑀜𑁆𑀜𑀽𑀳𑀺 𑀧𑀲𑀢𑁆𑀣𑀢𑁆𑀢𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺. 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀧𑀭𑀸𑀫𑀝𑁆𑀞𑀢𑁆𑀢𑀸 𑀅𑀧𑀭𑀸𑀫𑀝𑁆𑀞𑀸𑀦𑀺. 𑀉𑀧𑀘𑀸𑀭𑀲𑀫𑀸𑀥𑀺𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀯𑀸 𑀲𑀁𑀯𑀢𑁆𑀢𑀬𑀦𑁆𑀢𑀻𑀢𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻𑀢𑀺 𑀢𑁂𑀲𑀼 𑀢𑁂𑀲𑀼 𑀤𑀺𑀲𑀸𑀪𑀸𑀕𑁂𑀲𑀼 𑀯𑀺𑀳𑀭𑀦𑁆𑀢𑁂𑀳𑀺 𑀓𑀮𑁆𑀬𑀸𑀡𑀲𑀻𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀫𑀸𑀦𑀪𑀸𑀯𑀽𑀧𑀕𑀢𑀲𑀻𑀮𑁄 𑀯𑀺𑀳𑀭𑀢𑀺.

𑀬𑀸𑀬𑀁 𑀤𑀺𑀝𑁆𑀞𑀻𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀭𑀺𑀬𑀸𑀢𑀺 𑀦𑀺𑀤𑁆𑀤𑁄𑀲𑀸. 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸. 𑀢𑀓𑁆𑀓𑀭𑀲𑁆𑀲𑀸𑀢𑀺 𑀬𑁄 𑀢𑀣𑀸𑀓𑀸𑀭𑀻 𑀳𑁄𑀢𑀺, 𑀢𑀲𑁆𑀲. 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀲𑀩𑁆𑀩𑀤𑀼𑀓𑁆𑀔𑀲𑁆𑀲 𑀔𑀬𑀢𑁆𑀣𑀁. 𑀲𑁂𑀲𑀁 𑀬𑀸𑀯 𑀲𑀫𑀣𑀪𑁂𑀤𑀧𑀭𑀺𑀬𑁄𑀲𑀸𑀦𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀓𑀢𑀺𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀦𑁆𑀥𑀓𑀧𑀼𑀘𑁆𑀙𑀸𑀯𑀸𑀭𑁄

𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸

𑁩𑁨𑁦. 𑀉𑀧𑀲𑀫𑁆𑀧𑀤𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑀉𑀧𑀲𑀫𑁆𑀧𑀤𑀓𑁆𑀔𑀦𑁆𑀥𑀓𑀁 𑀧𑀼𑀘𑁆𑀙𑀺𑀲𑁆𑀲𑀁. 𑀲𑀦𑀺𑀤𑀸𑀦𑀁 𑀲𑀦𑀺𑀤𑁆𑀤𑁂𑀲𑀦𑁆𑀢𑀺 𑀦𑀺𑀤𑀸𑀦𑁂𑀦 𑀘 𑀦𑀺𑀤𑁆𑀤𑁂𑀲𑁂𑀦 𑀘 𑀲𑀤𑁆𑀥𑀺𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀓𑀢𑀺 𑀆𑀧𑀢𑁆𑀢𑀺𑀬𑁄𑀢𑀺 𑀬𑀸𑀦𑀺 𑀢𑀢𑁆𑀣 𑀲𑀫𑀼𑀓𑁆𑀓𑀝𑁆𑀞𑀸𑀦𑀺 𑀉𑀢𑁆𑀢𑀫𑀸𑀦𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀁 𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀉𑀢𑁆𑀢𑀫𑀧𑀤𑀸𑀦𑀁 𑀲𑀗𑁆𑀔𑁂𑀧𑀢𑁄 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺. 𑀬𑁂𑀦 𑀬𑁂𑀦 𑀳𑀺 𑀧𑀤𑁂𑀦 𑀬𑀸 𑀬𑀸 𑀆𑀧𑀢𑁆𑀢𑀺 𑀧𑀜𑁆𑀜𑀢𑁆𑀢𑀸, 𑀲𑀸 𑀲𑀸 𑀢𑀲𑁆𑀲 𑀢𑀲𑁆𑀲 𑀧𑀤𑀲𑁆𑀲 𑀆𑀧𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀼𑀓𑁆𑀓𑀝𑁆𑀞𑀧𑀤𑀸𑀦𑀁 𑀓𑀢𑀺 𑀆𑀧𑀢𑁆𑀢𑀺𑀬𑁄’’𑀢𑀺. 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄𑀢𑀺 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀲𑁂𑀲𑁂𑀲𑀼 𑀲𑀩𑁆𑀩𑀧𑀤𑁂𑀲𑀼 𑀤𑀼𑀓𑁆𑀓𑀝𑀁.

𑀢𑀺𑀲𑁆𑀲𑁄𑀢𑀺 ‘‘𑀦𑀲𑁆𑀲𑀦𑁆𑀢𑁂𑀢𑁂 𑀯𑀺𑀦𑀲𑁆𑀲𑀦𑁆𑀢𑁂𑀢𑁂, 𑀓𑁄 𑀢𑁂𑀳𑀺 𑀅𑀢𑁆𑀣𑁄’’𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀸𑀦𑀁 𑀉𑀧𑁄𑀲𑀣𑀓𑀭𑀡𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀉𑀓𑁆𑀔𑀺𑀢𑁆𑀢𑀓𑁂𑀦 𑀲𑀤𑁆𑀥𑀺𑀁 𑀉𑀧𑁄𑀲𑀣𑀓𑀭𑀡𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀏𑀯𑀁 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄. 𑀏𑀓𑀸𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁂 𑀏𑀓𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁂𑀯.

𑀢𑀺𑀲𑁆𑀲𑁄𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀯𑀸𑀭𑀬𑀢𑁄 𑀣𑀼𑀮𑁆𑀮𑀘𑁆𑀘𑀬𑀁, 𑀉𑀓𑁆𑀔𑀺𑀢𑁆𑀢𑀓𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀏𑀯𑀁 𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑁂𑀧𑀺 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄.

𑀢𑀺𑀲𑁆𑀲𑁄𑀢𑀺 𑀯𑀘𑁆𑀙𑀢𑀭𑀺𑀁 𑀉𑀕𑁆𑀕𑀳𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀸𑀦𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀭𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀅𑀗𑁆𑀕𑀚𑀸𑀢𑀙𑀼𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀏𑀯𑀁 𑀘𑀫𑁆𑀫𑀲𑀁𑀬𑀼𑀢𑁆𑀢𑁂𑀧𑀺 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄. 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂𑀧𑀺 𑀲𑀫𑀦𑁆𑀢𑀸 𑀤𑁆𑀯𑀗𑁆𑀕𑀼𑀮𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀪𑁄𑀚𑁆𑀚𑀬𑀸𑀕𑀼𑀬𑀸 𑀧𑀸𑀘𑀺𑀢𑁆𑀢𑀺𑀬𑀁, 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀏𑀯𑀁 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄.

𑀓𑀣𑀺𑀦𑀁 𑀓𑁂𑀯𑀮𑀁 𑀧𑀜𑁆𑀜𑀢𑁆𑀢𑀺𑀫𑁂𑀯, 𑀦𑀢𑁆𑀣𑀺 𑀢𑀢𑁆𑀣 𑀆𑀧𑀢𑁆𑀢𑀺. 𑀘𑀻𑀯𑀭𑀲𑀁𑀬𑀼𑀢𑁆𑀢𑁂 𑀓𑀼𑀲𑀘𑀻𑀭𑀯𑀸𑀓𑀘𑀻𑀭𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀢𑀺𑀭𑁂𑀓𑀘𑀻𑀯𑀭𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄.

𑀘𑀫𑁆𑀧𑁂𑀬𑁆𑀬𑀓𑁂 𑀏𑀓𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁂𑀯. 𑀓𑁄𑀲𑀫𑁆𑀩𑀓-𑀓𑀫𑁆𑀫𑀓𑁆𑀔𑀦𑁆𑀥𑀓-𑀧𑀸𑀭𑀺𑀯𑀸𑀲𑀺𑀓𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂𑀲𑀼𑀧𑀺 𑀏𑀓𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁂𑀯.

𑀲𑀫𑀣𑀓𑁆𑀔𑀦𑁆𑀥𑀓𑁂 𑀙𑀦𑁆𑀤𑀤𑀸𑀬𑀓𑁄 𑀔𑀺𑀬𑁆𑀬𑀢𑀺, 𑀔𑀺𑀬𑁆𑀬𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀇𑀫𑀸 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄. 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁂 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀙𑀺𑀦𑁆𑀤𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁, 𑀭𑁄𑀫𑀝𑁆𑀞𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀕𑀭𑀼𑀪𑀡𑁆𑀟𑀯𑀺𑀲𑁆𑀲𑀚𑁆𑀚𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄.

𑀲𑀗𑁆𑀖𑀪𑁂𑀤𑁂𑀪𑁂𑀤𑀓𑀸𑀦𑀼𑀯𑀢𑁆𑀢𑀓𑀸𑀦𑀁 𑀣𑀼𑀮𑁆𑀮𑀘𑁆𑀘𑀬𑀁, 𑀕𑀡𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀇𑀫𑀸 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄. 𑀲𑀫𑀸𑀘𑀸𑀭𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑁂 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀏𑀓𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁂𑀯. 𑀲𑀸 𑀲𑀩𑁆𑀩𑀯𑀢𑁆𑀢𑁂𑀲𑀼 𑀅𑀦𑀸𑀤𑀭𑀺𑀬𑁂𑀦 𑀳𑁄𑀢𑀺. 𑀢𑀣𑀸 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑁂. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂 𑀅𑀧𑁆𑀧𑀯𑀸𑀭𑀡𑀸𑀬 𑀧𑀸𑀘𑀺𑀢𑁆𑀢𑀺𑀬𑀁, 𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑀦𑁆𑀢𑀺 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄. 𑀧𑀜𑁆𑀘𑀲𑀢𑀺𑀓𑀲𑀢𑁆𑀢𑀲𑀢𑀺𑀓𑁂𑀲𑀼 𑀓𑁂𑀯𑀮𑀁 𑀥𑀫𑁆𑀫𑁄 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑁄, 𑀦𑀢𑁆𑀣𑀺 𑀢𑀢𑁆𑀣 𑀆𑀧𑀢𑁆𑀢𑀻𑀢𑀺.

𑀔𑀦𑁆𑀥𑀓𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄

𑀏𑀓𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁧. 𑀆𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸 𑀚𑀸𑀦𑀺𑀢𑀩𑁆𑀩𑀸𑀢𑀺𑀆𑀤𑀺𑀫𑁆𑀳𑀺 𑀏𑀓𑀼𑀢𑁆𑀢𑀭𑀺𑀓𑀦𑀬𑁂 𑀆𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸 𑀦𑀸𑀫 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺. 𑀏𑀢𑁂𑀲𑀜𑁆𑀳𑀺 𑀯𑀲𑁂𑀦 𑀧𑀼𑀕𑁆𑀕𑀮𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀆𑀧𑀢𑁆𑀢𑀺𑀓𑀭𑀸’’𑀢𑀺 𑀯𑀼𑀢𑁆𑀢𑀸. 𑀅𑀦𑀸𑀧𑀢𑁆𑀢𑀺𑀓𑀭𑀸 𑀦𑀸𑀫 𑀲𑀢𑁆𑀢 𑀲𑀫𑀣𑀸. 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀘 𑀯𑀺𑀪𑀗𑁆𑀕𑁂 𑀘 𑀯𑀼𑀢𑁆𑀢𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀦𑀸𑀧𑀢𑁆𑀢𑀻𑀢𑀺 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀮𑀳𑀼𑀓𑀸𑀢𑀺 𑀮𑀳𑀼𑀓𑁂𑀦 𑀯𑀺𑀦𑀬𑀓𑀫𑁆𑀫𑁂𑀦 𑀯𑀺𑀲𑀼𑀚𑁆𑀛𑀦𑀢𑁄 𑀧𑀜𑁆𑀘𑀯𑀺𑀥𑀸 𑀆𑀧𑀢𑁆𑀢𑀺. 𑀕𑀭𑀼𑀓𑀸𑀢𑀺 𑀕𑀭𑀼𑀓𑁂𑀦 𑀯𑀺𑀦𑀬𑀓𑀫𑁆𑀫𑁂𑀦 𑀯𑀺𑀲𑀼𑀚𑁆𑀛𑀦𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺. 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀦𑀸𑀧𑀢𑁆𑀢𑀺𑀪𑀸𑀯𑀁 𑀉𑀧𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀘. 𑀲𑀸𑀯𑀲𑁂𑀲𑀸𑀢𑀺 𑀞𑀧𑁂𑀢𑁆𑀯𑀸 𑀧𑀸𑀭𑀸𑀚𑀺𑀓𑀁 𑀲𑁂𑀲𑀸. 𑀅𑀦𑀯𑀲𑁂𑀲𑀸𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀤𑀼𑀝𑁆𑀞𑀼𑀮𑁆𑀮𑀸; 𑀅𑀯𑀲𑁂𑀲𑀸 𑀅𑀤𑀼𑀝𑁆𑀞𑀼𑀮𑁆𑀮𑀸. 𑀲𑀧𑁆𑀧𑀝𑀺𑀓𑀫𑁆𑀫𑀤𑀼𑀓𑀁 𑀲𑀸𑀯𑀲𑁂𑀲𑀤𑀼𑀓𑀲𑀤𑀺𑀲𑀁. 𑀤𑁂𑀲𑀦𑀸𑀕𑀸𑀫𑀺𑀦𑀺𑀤𑀼𑀓𑀁 𑀮𑀳𑀼𑀓𑀤𑀼𑀓𑀲𑀗𑁆𑀕𑀳𑀺𑀢𑀁.

𑀅𑀦𑁆𑀢𑀭𑀸𑀬𑀺𑀓𑀸𑀢𑀺 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀬𑁄 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀸 𑀲𑀕𑁆𑀕𑀦𑁆𑀢𑀭𑀸𑀬𑀜𑁆𑀘𑁂𑀯 𑀫𑁄𑀓𑁆𑀔𑀦𑁆𑀢𑀭𑀸𑀬𑀜𑁆𑀘 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀅𑀚𑀸𑀦𑀦𑁆𑀢𑁂𑀦 𑀯𑀻𑀢𑀺𑀓𑁆𑀓𑀦𑁆𑀢𑀸 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀧𑀢𑁆𑀢𑀺 𑀦𑁂𑀯 𑀲𑀕𑁆𑀕𑀦𑁆𑀢𑀭𑀸𑀬𑀁 𑀦 𑀫𑁄𑀓𑁆𑀔𑀦𑁆𑀢𑀭𑀸𑀬𑀁 𑀓𑀭𑁄𑀢𑀻𑀢𑀺 𑀅𑀦𑀦𑁆𑀢𑀭𑀸𑀬𑀺𑀓𑀸. 𑀅𑀦𑁆𑀢𑀭𑀸𑀬𑀺𑀓𑀁 𑀆𑀧𑀦𑁆𑀦𑀲𑁆𑀲𑀸𑀧𑀺 𑀤𑁂𑀲𑀦𑀸𑀕𑀸𑀫𑀺𑀦𑀺𑀁 𑀤𑁂𑀲𑁂𑀢𑁆𑀯𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀢𑁄 𑀯𑀼𑀝𑁆𑀞𑀸𑀬 𑀲𑀼𑀤𑁆𑀥𑀺𑀧𑀢𑁆𑀢𑀲𑁆𑀲 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑀲𑁆𑀲 𑀘 𑀅𑀯𑀸𑀭𑀺𑀢𑁄 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑁄𑀢𑀺. 𑀲𑀸𑀯𑀚𑁆𑀚𑀧𑀜𑁆𑀜𑀢𑁆𑀢𑀻𑀢𑀺 𑀮𑁄𑀓𑀯𑀚𑁆𑀚𑀸. 𑀅𑀦𑀯𑀚𑁆𑀚𑀧𑀜𑁆𑀜𑀢𑁆𑀢𑀻𑀢𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸. 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀺𑀢𑀸 𑀦𑀸𑀫 𑀬𑀁 𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀯𑀺𑀬. 𑀅𑀓𑀺𑀭𑀺𑀬𑀢𑁄𑀢𑀺 𑀬𑀁 𑀅𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀘𑀻𑀯𑀭𑀅𑀦𑀥𑀺𑀝𑁆𑀞𑀸𑀦𑀸𑀧𑀢𑁆𑀢𑀺 𑀯𑀺𑀬. 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄𑀢𑀺 𑀬𑀁 𑀓𑀭𑁄𑀦𑁆𑀢𑁄 𑀘 𑀅𑀓𑀭𑁄𑀦𑁆𑀢𑁄 𑀘 𑀆𑀧𑀚𑁆𑀚𑀢𑀺, 𑀓𑀼𑀝𑀺𑀓𑀸𑀭𑀸𑀧𑀢𑁆𑀢𑀺 𑀯𑀺𑀬.

𑀧𑀼𑀩𑁆𑀩𑀸𑀧𑀢𑁆𑀢𑀻𑀢𑀺 𑀧𑀞𑀫𑀁 𑀆𑀧𑀦𑁆𑀦𑀸𑀧𑀢𑁆𑀢𑀺. 𑀅𑀧𑀭𑀸𑀧𑀢𑁆𑀢𑀻𑀢𑀺 𑀧𑀸𑀭𑀺𑀯𑀸𑀲𑀺𑀓𑀸𑀤𑀻𑀳𑀺 𑀧𑀘𑁆𑀙𑀸 𑀆𑀧𑀦𑁆𑀦𑀸𑀧𑀢𑁆𑀢𑀺. 𑀧𑀼𑀩𑁆𑀩𑀸𑀧𑀢𑁆𑀢𑀻𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀺 𑀦𑀸𑀫 𑀫𑀽𑀮𑀯𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀧𑀢𑁆𑀢𑀺. 𑀅𑀧𑀭𑀸𑀧𑀢𑁆𑀢𑀻𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀺 𑀦𑀸𑀫 𑀅𑀕𑁆𑀖𑀯𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀧𑀢𑁆𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀧𑀼𑀩𑁆𑀩𑀸𑀧𑀢𑁆𑀢𑀺 𑀦𑀸𑀫 𑀧𑀞𑀫𑀁 𑀆𑀧𑀦𑁆𑀦𑀸. 𑀅𑀧𑀭𑀸𑀧𑀢𑁆𑀢𑀺 𑀦𑀸𑀫 𑀫𑀸𑀦𑀢𑁆𑀢𑀸𑀭𑀳𑀓𑀸𑀮𑁂 𑀆𑀧𑀦𑁆𑀦𑀸. 𑀧𑀼𑀩𑁆𑀩𑀸𑀧𑀢𑁆𑀢𑀻𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀺 𑀦𑀸𑀫 𑀧𑀭𑀺𑀯𑀸𑀲𑁂 𑀆𑀧𑀦𑁆𑀦𑀸. 𑀅𑀧𑀭𑀸𑀧𑀢𑁆𑀢𑀻𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀺 𑀦𑀸𑀫 𑀫𑀸𑀦𑀢𑁆𑀢𑀘𑀸𑀭𑁂 𑀆𑀧𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁆𑀧𑀺 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀢𑀺.

𑀤𑁂𑀲𑀺𑀢𑀸 𑀕𑀡𑀦𑀽𑀧𑀕𑀸 𑀦𑀸𑀫 𑀬𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀼𑀦 𑀦 𑀆𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀤𑁂𑀲𑀺𑀢𑀸 𑀳𑁄𑀢𑀺. 𑀅𑀕𑀡𑀦𑀽𑀧𑀕𑀸 𑀦𑀸𑀫 𑀬𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀲𑀉𑀲𑁆𑀲𑀸𑀳𑁂𑀦𑁂𑀯 𑀘𑀺𑀢𑁆𑀢𑁂𑀦 𑀅𑀧𑀭𑀺𑀲𑀼𑀤𑁆𑀥𑁂𑀦 𑀤𑁂𑀲𑀺𑀢𑀸 𑀳𑁄𑀢𑀺. 𑀅𑀬𑀜𑁆𑀳𑀺 𑀤𑁂𑀲𑀺𑀢𑀸𑀧𑀺 𑀤𑁂𑀲𑀺𑀢𑀕𑀡𑀦𑀁 𑀦 𑀉𑀧𑁂𑀢𑀺. 𑀅𑀝𑁆𑀞𑀫𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀫𑁂𑀯 𑀳𑁄𑀢𑀺. 𑀧𑀜𑁆𑀜𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸𑀢𑀺𑀆𑀤𑀻𑀲𑀼 𑀦𑀯𑀲𑀼 𑀧𑀤𑁂𑀲𑀼 𑀧𑀞𑀫𑀧𑀸𑀭𑀸𑀚𑀺𑀓𑀧𑀼𑀘𑁆𑀙𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀣𑀼𑀮𑁆𑀮𑀯𑀚𑁆𑀚𑀸𑀢𑀺 𑀣𑀼𑀮𑁆𑀮𑀤𑁄𑀲𑁂 𑀧𑀜𑁆𑀜𑀢𑁆𑀢𑀸 𑀕𑀭𑀼𑀓𑀸𑀧𑀢𑁆𑀢𑀺. 𑀅𑀣𑀼𑀮𑁆𑀮𑀯𑀚𑁆𑀚𑀸𑀢𑀺 𑀮𑀳𑀼𑀓𑀸𑀧𑀢𑁆𑀢𑀺. 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀲𑀼𑀥𑀫𑁆𑀫𑀢𑁆𑀣𑁂𑀭𑀲𑁆𑀲 𑀆𑀧𑀢𑁆𑀢𑀺, 𑀬𑀸 𑀘 𑀥𑀫𑁆𑀫𑀺𑀓𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲 𑀅𑀲𑀘𑁆𑀘𑀸𑀧𑀦𑁂 𑀆𑀧𑀢𑁆𑀢𑀺, 𑀅𑀯𑀲𑁂𑀲𑀸 𑀦 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸. 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀧𑀢𑁆𑀢𑀺 𑀦𑀺𑀬𑀢𑀸, 𑀲𑁂𑀲𑀸 𑀅𑀦𑀺𑀬𑀢𑀸. 𑀆𑀤𑀺𑀓𑀭𑁄𑀢𑀺 𑀲𑀼𑀤𑀺𑀦𑁆𑀦𑀢𑁆𑀣𑁂𑀭𑀸𑀤𑀺 𑀆𑀤𑀺𑀓𑀫𑁆𑀫𑀺𑀓𑁄. 𑀅𑀦𑀸𑀤𑀺𑀓𑀭𑁄𑀢𑀺 𑀫𑀓𑁆𑀓𑀝𑀺𑀲𑀫𑀡𑀸𑀤𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀓𑀸𑀭𑀓𑁄. 𑀅𑀥𑀺𑀘𑁆𑀘𑀸𑀧𑀢𑁆𑀢𑀺𑀓𑁄 𑀦𑀸𑀫 𑀬𑁄 𑀓𑀤𑀸𑀘𑀺 𑀓𑀭𑀳𑀘𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑁄 𑀦𑀸𑀫 𑀬𑁄 𑀦𑀺𑀘𑁆𑀘𑀁 𑀆𑀧𑀚𑁆𑀚𑀢𑀺.

𑀘𑁄𑀤𑀓𑁄 𑀦𑀸𑀫 𑀬𑁄 𑀯𑀢𑁆𑀣𑀼𑀦𑀸 𑀯𑀸 𑀆𑀧𑀢𑁆𑀢𑀺𑀬𑀸 𑀯𑀸 𑀧𑀭𑀁 𑀘𑁄𑀤𑁂𑀢𑀺. 𑀬𑁄 𑀧𑀦 𑀏𑀯𑀁 𑀘𑁄𑀤𑀺𑀢𑁄 𑀅𑀬𑀁 𑀘𑀼𑀤𑀺𑀢𑀓𑁄 𑀦𑀸𑀫. 𑀧𑀜𑁆𑀘𑀤𑀲𑀲𑀼 𑀥𑀫𑁆𑀫𑁂𑀲𑀼 𑀅𑀧𑁆𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀅𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀦𑁆𑀢𑁄 𑀅𑀥𑀫𑁆𑀫𑀘𑁄𑀤𑀓𑁄 𑀦𑀸𑀫, 𑀢𑁂𑀦 𑀢𑀣𑀸 𑀘𑁄𑀤𑀺𑀢𑁄 𑀅𑀥𑀫𑁆𑀫𑀘𑀼𑀤𑀺𑀢𑀓𑁄 𑀦𑀸𑀫. 𑀯𑀺𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀘𑁄𑀤𑀓𑀘𑀼𑀤𑀺𑀢𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀳𑀺 𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀢𑁂𑀳𑀺 𑀯𑀸 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀺𑀬𑀢𑁄, 𑀯𑀺𑀧𑀭𑀻𑀢𑁄 𑀅𑀦𑀺𑀬𑀢𑁄.

𑀲𑀸𑀯𑀓𑀸 𑀪𑀩𑁆𑀩𑀸𑀧𑀢𑁆𑀢𑀺𑀓𑀸 𑀦𑀸𑀫, 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀅𑀪𑀩𑁆𑀩𑀸𑀧𑀢𑁆𑀢𑀺𑀓𑀸 𑀦𑀸𑀫. 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀉𑀓𑁆𑀔𑀺𑀢𑁆𑀢𑀓𑁄 𑀦𑀸𑀫, 𑀅𑀯𑀲𑁂𑀲𑀘𑀢𑀼𑀩𑁆𑀩𑀺𑀥𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑁄 𑀅𑀦𑀼𑀓𑁆𑀔𑀺𑀢𑁆𑀢𑀓𑁄 𑀦𑀸𑀫. 𑀅𑀬𑀜𑁆𑀳𑀺 𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀥𑀫𑁆𑀫𑀧𑀭𑀺𑀪𑁄𑀕𑀁 𑀯𑀸 𑀆𑀫𑀺𑀲𑀧𑀭𑀺𑀪𑁄𑀕𑀁 𑀯𑀸 𑀦 𑀓𑁄𑀧𑁂𑀢𑀺. ‘‘𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣, 𑀤𑀽𑀲𑀓𑁄 𑀦𑀸𑀲𑁂𑀢𑀩𑁆𑀩𑁄, 𑀓𑀡𑁆𑀝𑀓𑁄 𑀲𑀫𑀡𑀼𑀤𑁆𑀤𑁂𑀲𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀏𑀯𑀁 𑀮𑀺𑀗𑁆𑀕𑀤𑀡𑁆𑀟𑀓𑀫𑁆𑀫-𑀲𑀁𑀯𑀸𑀲𑀦𑀸𑀲𑀦𑀸𑀳𑀺 𑀦𑀸𑀲𑀺𑀢𑀩𑁆𑀩𑁄 𑀦𑀸𑀲𑀺𑀢𑀓𑁄 𑀦𑀸𑀫. 𑀲𑁂𑀲𑀸 𑀲𑀩𑁆𑀩𑁂 𑀅𑀦𑀸𑀲𑀺𑀢𑀓𑀸. 𑀬𑁂𑀦 𑀲𑀤𑁆𑀥𑀺𑀁 𑀉𑀧𑁄𑀲𑀣𑀸𑀤𑀺𑀓𑁄 𑀲𑀁𑀯𑀸𑀲𑁄 𑀅𑀢𑁆𑀣𑀺, 𑀅𑀬𑀁 𑀲𑀫𑀸𑀦𑀲𑀁𑀯𑀸𑀲𑀓𑁄, 𑀇𑀢𑀭𑁄 𑀦𑀸𑀦𑀸𑀲𑀁𑀯𑀸𑀲𑀓𑁄. 𑀲𑁄 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑁄 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁄𑀢𑀺 𑀤𑀼𑀯𑀺𑀥𑁄 𑀳𑁄𑀢𑀺. 𑀞𑀧𑀦𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 ‘‘𑀏𑀓𑀁 𑀪𑀺𑀓𑁆𑀔𑀯𑁂 𑀅𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀏𑀓𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁨. 𑀤𑀼𑀓𑁂𑀲𑀼 𑀲𑀘𑀺𑀢𑁆𑀢𑀓𑀸 𑀆𑀧𑀢𑁆𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸, 𑀅𑀘𑀺𑀢𑁆𑀢𑀓𑀸 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸. 𑀮𑀤𑁆𑀥𑀲𑀫𑀸𑀧𑀢𑁆𑀢𑀺𑀓𑀲𑁆𑀲 𑀆𑀧𑀢𑁆𑀢𑀺 𑀦𑀸𑀫 𑀪𑀽𑀢𑀸𑀭𑁄𑀘𑀦𑀸𑀧𑀢𑁆𑀢𑀺, 𑀅𑀮𑀤𑁆𑀥𑀲𑀫𑀸𑀧𑀢𑁆𑀢𑀺𑀓𑀲𑁆𑀲 𑀆𑀧𑀢𑁆𑀢𑀺 𑀦𑀸𑀫 𑀅𑀪𑀽𑀢𑀸𑀭𑁄𑀘𑀦𑀸𑀧𑀢𑁆𑀢𑀺. 𑀲𑀤𑁆𑀥𑀫𑁆𑀫𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 𑀧𑀤𑀲𑁄𑀥𑀫𑁆𑀫𑀸𑀤𑀺𑀓𑀸, 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀧𑀢𑁆𑀢𑀺. 𑀲𑀧𑀭𑀺𑀓𑁆𑀔𑀸𑀭𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑁄 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑁄𑀕𑁂, 𑀧𑀢𑁆𑀢𑀘𑀻𑀯𑀭𑀸𑀦𑀁 𑀦𑀺𑀤𑀳𑀦𑁂, 𑀓𑀺𑀮𑀺𑀝𑁆𑀞𑀘𑀻𑀯𑀭𑀸𑀦𑀁 𑀅𑀥𑁄𑀯𑀦𑁂, 𑀫𑀮𑀕𑁆𑀕𑀳𑀺𑀢𑀧𑀢𑁆𑀢𑀲𑁆𑀲 𑀅𑀧𑀘𑀦𑁂𑀢𑀺 𑀏𑀯𑀁 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑁂 𑀆𑀧𑀢𑁆𑀢𑀺. 𑀧𑀭𑀧𑀭𑀺𑀓𑁆𑀔𑀸𑀭𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 𑀲𑀗𑁆𑀖𑀺𑀓𑀫𑀜𑁆𑀘𑀧𑀻𑀞𑀸𑀤𑀻𑀦𑀁 𑀅𑀚𑁆𑀛𑁄𑀓𑀸𑀲𑁂 𑀲𑀦𑁆𑀣𑀭𑀡𑀅𑀦𑀸𑀧𑀼𑀘𑁆𑀙𑀸𑀕𑀫𑀦𑀸𑀤𑀻𑀲𑀼 𑀆𑀧𑀚𑁆𑀚𑀺𑀢𑀩𑁆𑀩𑀸 𑀆𑀧𑀢𑁆𑀢𑀺. 𑀲𑀧𑀼𑀕𑁆𑀕𑀮𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 ‘‘𑀫𑀼𑀤𑀼𑀧𑀺𑀝𑁆𑀞𑀺𑀓𑀲𑁆𑀲 𑀮𑀫𑁆𑀩𑀺𑀲𑁆𑀲 𑀊𑀭𑀼𑀦𑀸 𑀅𑀗𑁆𑀕𑀚𑀸𑀢𑀁 𑀧𑀻𑀴𑁂𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸𑀧𑀢𑁆𑀢𑀺. 𑀧𑀭𑀧𑀼𑀕𑁆𑀕𑀮𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 𑀫𑁂𑀣𑀼𑀦𑀥𑀫𑁆𑀫𑀓𑀸𑀬𑀲𑀁𑀲𑀕𑁆𑀕𑀧𑀳𑀸𑀭𑀤𑀸𑀦𑀸𑀤𑀻𑀲𑀼 𑀯𑀼𑀢𑁆𑀢𑀸𑀧𑀢𑁆𑀢𑀺, ‘‘𑀲𑀺𑀔𑀭𑀡𑀻𑀲𑀻’’𑀢𑀺 𑀲𑀘𑁆𑀘𑀁 𑀪𑀡𑀦𑁆𑀢𑁄 𑀕𑀭𑀼𑀓𑀁 𑀆𑀧𑀚𑁆𑀚𑀢𑀺, ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀫𑀼𑀲𑀸 𑀪𑀡𑀦𑁆𑀢𑁄 𑀮𑀳𑀼𑀓𑀁. 𑀅𑀪𑀽𑀢𑀸𑀭𑁄𑀘𑀦𑁂 𑀫𑀼𑀲𑀸 𑀪𑀡𑀦𑁆𑀢𑁄 𑀕𑀭𑀼𑀓𑀁. 𑀪𑀽𑀢𑀸𑀭𑁄𑀘𑀦𑁂 𑀲𑀘𑁆𑀘𑀁 𑀪𑀡𑀦𑁆𑀢𑁄 𑀮𑀳𑀼𑀓𑀁.

‘‘𑀲𑀗𑁆𑀖𑀓𑀫𑁆𑀫𑀁 𑀯𑀕𑁆𑀕𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑁄𑀲𑀻𑀫𑀸𑀬 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀦𑁆𑀢𑁄 𑀪𑀽𑀫𑀺𑀕𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀲𑀘𑁂 𑀧𑀦 𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀺 𑀆𑀓𑀸𑀲𑁂 𑀢𑀺𑀝𑁆𑀞𑁂𑀬𑁆𑀬, 𑀦 𑀆𑀧𑀚𑁆𑀚𑁂𑀬𑁆𑀬, 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑁄 𑀯𑁂𑀳𑀸𑀲𑀕𑀢𑁄’’𑀢𑀺. 𑀯𑁂𑀳𑀸𑀲𑀓𑀼𑀝𑀺𑀬𑀸 𑀆𑀳𑀘𑁆𑀘𑀧𑀸𑀤𑀓𑀁 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀅𑀪𑀺𑀦𑀺𑀲𑀻𑀤𑀦𑁆𑀢𑁄 𑀯𑁂𑀳𑀸𑀲𑀕𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀲𑀘𑁂 𑀧𑀦 𑀢𑀁 𑀪𑀽𑀫𑀺𑀬𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑁂𑀬𑁆𑀬 𑀦 𑀆𑀧𑀚𑁆𑀚𑁂𑀬𑁆𑀬, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀦𑁄 𑀪𑀽𑀫𑀺𑀕𑀢𑁄’’𑀢𑀺. 𑀕𑀫𑀺𑀬𑁄 𑀕𑀫𑀺𑀬𑀯𑀢𑁆𑀢𑀁 𑀅𑀧𑀽𑀭𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫, 𑀦𑁄 𑀧𑀯𑀺𑀲𑀦𑁆𑀢𑁄. 𑀆𑀕𑀦𑁆𑀢𑀼𑀓𑁄 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀅𑀧𑀽𑀭𑁂𑀢𑁆𑀯𑀸 𑀲𑀙𑀢𑁆𑀢𑀼𑀧𑀸𑀳𑀦𑁄 𑀧𑀯𑀺𑀲𑀦𑁆𑀢𑁄 𑀧𑀯𑀺𑀲𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫, 𑀦𑁄 𑀦𑀺𑀓𑁆𑀔𑀫𑀦𑁆𑀢𑁄.

𑀆𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀅𑀢𑀺𑀕𑀫𑁆𑀪𑀻𑀭𑀁 𑀉𑀤𑀓𑀲𑀼𑀤𑁆𑀥𑀺𑀓𑀁 𑀆𑀤𑀺𑀬𑀫𑀸𑀦𑀸; 𑀤𑀼𑀩𑁆𑀩𑀡𑁆𑀡𑀓𑀭𑀡𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀦 𑀅𑀦𑀸𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀫𑀽𑀕𑀩𑁆𑀩𑀢𑀸𑀤𑀻𑀦𑀺 𑀢𑀺𑀢𑁆𑀣𑀺𑀬𑀯𑀢𑁆𑀢𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑁄 𑀲𑀫𑀸𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀧𑀸𑀭𑀺𑀯𑀸𑀲𑀺𑀓𑀸𑀤𑀬𑁄 𑀧𑀦 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑀸 𑀯𑀸 𑀅𑀢𑁆𑀢𑀦𑁄 𑀯𑀢𑁆𑀢𑀁 𑀅𑀲𑀫𑀸𑀤𑀺𑀬𑀦𑁆𑀢𑀸 𑀆𑀧𑀚𑁆𑀚𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀦 𑀲𑀫𑀸𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀻’’𑀢𑀺. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀲𑀺𑀩𑁆𑀩𑀦𑁆𑀢𑁄 𑀯𑁂𑀚𑁆𑀚𑀓𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀓𑀫𑁆𑀫𑀘𑀺𑀢𑁆𑀢𑀓𑀫𑁆𑀫𑀸𑀤𑀻𑀦𑀺 𑀯𑀸 𑀓𑀭𑁄𑀦𑁆𑀢𑁄 𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀉𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑁄 𑀅𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀤𑀤𑀫𑀸𑀦𑁄 𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀘𑀻𑀯𑀭𑀸𑀤𑀻𑀦𑀺 𑀅𑀤𑁂𑀦𑁆𑀢𑁄 𑀅𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀕𑀡𑁆𑀳𑀦𑁆𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. ‘‘𑀦 𑀪𑀺𑀓𑁆𑀔𑀯𑁂 𑀑𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄’’𑀢𑀺 𑀯𑀘𑀦𑀢𑁄 𑀑𑀯𑀸𑀤𑀁 𑀅𑀕𑀡𑁆𑀳𑀦𑁆𑀢𑁄 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫.

𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀭𑀺𑀪𑁄𑀕𑁂𑀦 𑀆𑀧𑀚𑁆𑀚𑀢𑀺 𑀦𑀸𑀫. 𑀧𑀜𑁆𑀘𑀸𑀳𑀺𑀓𑀁 𑀲𑀗𑁆𑀖𑀸𑀝𑀺𑀘𑀸𑀭𑀁 𑀅𑀢𑀺𑀓𑁆𑀓𑀸𑀫𑀬𑀫𑀸𑀦𑀸 𑀅𑀧𑀭𑀺𑀪𑁄𑀕𑁂𑀦 𑀆𑀧𑀚𑁆𑀚𑀢𑀺 𑀦𑀸𑀫. 𑀲𑀳𑀕𑀸𑀭𑀲𑁂𑀬𑁆𑀬𑀁 𑀭𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀦𑀸𑀫, 𑀦𑁄 𑀤𑀺𑀯𑀸, 𑀤𑁆𑀯𑀸𑀭𑀁 𑀅𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑁆𑀢𑁄 𑀤𑀺𑀯𑀸 𑀆𑀧𑀚𑁆𑀚𑀢𑀺, 𑀦𑁄 𑀭𑀢𑁆𑀢𑀺𑀁. 𑀏𑀓𑀭𑀢𑁆𑀢𑀙𑀸𑀭𑀢𑁆𑀢𑀲𑀢𑁆𑀢𑀸𑀳𑀤𑀲𑀸𑀳𑀫𑀸𑀲𑀸𑀢𑀺𑀓𑁆𑀓𑀫𑁂𑀲𑀼 𑀯𑀼𑀢𑁆𑀢𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀅𑀭𑀼𑀡𑀼𑀕𑁆𑀕𑁂 𑀆𑀧𑀚𑁆𑀚𑀢𑀺 𑀦𑀸𑀫, 𑀧𑀯𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀦 𑀅𑀭𑀼𑀡𑀼𑀕𑁆𑀕𑁂 𑀆𑀧𑀚𑁆𑀚𑀢𑀺 𑀦𑀸𑀫.

𑀪𑀽𑀢𑀕𑀸𑀫𑀜𑁆𑀘𑁂𑀯 𑀅𑀗𑁆𑀕𑀚𑀸𑀢𑀜𑁆𑀘 𑀙𑀺𑀦𑁆𑀤𑀦𑁆𑀢𑁄 𑀙𑀺𑀦𑁆𑀤𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫, 𑀓𑁂𑀲𑁂 𑀯𑀸 𑀦𑀔𑁂 𑀯𑀸 𑀦 𑀙𑀺𑀦𑁆𑀤𑀦𑁆𑀢𑁄 𑀦 𑀙𑀺𑀦𑁆𑀤𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀆𑀧𑀢𑁆𑀢𑀺𑀁 𑀙𑀸𑀤𑁂𑀦𑁆𑀢𑁄 𑀙𑀸𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫, ‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩𑀁, 𑀦𑀢𑁆𑀯𑁂𑀯 𑀦𑀕𑁆𑀕𑁂𑀦 𑀆𑀕𑀦𑁆𑀢𑀩𑁆𑀩𑀁, 𑀬𑁄 𑀆𑀕𑀘𑁆𑀙𑁂𑀬𑁆𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀫𑀁 𑀧𑀦 𑀆𑀧𑀢𑁆𑀢𑀺𑀁 𑀦 𑀙𑀸𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀓𑀼𑀲𑀘𑀻𑀭𑀸𑀤𑀻𑀦𑀺 𑀥𑀸𑀭𑁂𑀦𑁆𑀢𑁄 𑀥𑀸𑀭𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫, ‘‘𑀅𑀬𑀁 𑀢𑁂 𑀪𑀺𑀓𑁆𑀔𑀼 𑀧𑀢𑁆𑀢𑁄 𑀬𑀸𑀯 𑀪𑁂𑀤𑀦𑀸𑀬 𑀥𑀸𑀭𑁂𑀢𑀩𑁆𑀩𑁄’’𑀢𑀺 𑀇𑀫𑀁 𑀆𑀧𑀢𑁆𑀢𑀺𑀁 𑀦 𑀥𑀸𑀭𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫.

‘‘𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑀁 𑀓𑀭𑁄𑀢𑀻’’𑀢𑀺 𑀏𑀓𑀲𑀻𑀫𑀸𑀬𑀁 𑀤𑁆𑀯𑀻𑀲𑀼 𑀲𑀗𑁆𑀖𑁂𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀧𑀓𑁆𑀔𑀲𑁆𑀲 𑀮𑀤𑁆𑀥𑀺𑀁 𑀕𑀡𑁆𑀳𑀦𑁆𑀢𑁄 𑀬𑀲𑁆𑀫𑀺𑀁 𑀧𑀓𑁆𑀔𑁂 𑀦𑀺𑀲𑀺𑀦𑁆𑀦𑁄 𑀢𑁂𑀲𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑀁 𑀓𑀭𑁄𑀢𑀺 𑀦𑀸𑀫. 𑀬𑁂𑀲𑀁 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄 𑀢𑁂𑀲𑀁 𑀕𑀡𑀧𑀽𑀭𑀓𑁄 𑀳𑀼𑀢𑁆𑀯𑀸 𑀓𑀫𑁆𑀫𑀁 𑀓𑁄𑀧𑁂𑀢𑀺, 𑀇𑀢𑀭𑁂𑀲𑀁 𑀳𑀢𑁆𑀣𑀧𑀸𑀲𑀁 𑀅𑀦𑀸𑀕𑀢𑀢𑁆𑀢𑀸. 𑀲𑀫𑀸𑀦𑀲𑀁𑀯𑀸𑀲𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀲𑀜𑁆𑀳𑀺 𑀲𑁄 𑀮𑀤𑁆𑀥𑀺𑀁 𑀭𑁄𑀘𑁂𑀢𑀺, 𑀢𑁂𑀲𑀁 𑀲𑀫𑀸𑀦𑀲𑀁𑀯𑀸𑀲𑀓𑁄 𑀳𑁄𑀢𑀺, 𑀇𑀢𑀭𑁂𑀲𑀁 𑀦𑀸𑀦𑀸𑀲𑀁𑀯𑀸𑀲𑀓𑁄. 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀆𑀧𑀢𑁆𑀢𑀺𑀬𑁄, 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀸𑀢𑀺 𑀏𑀯𑀁 𑀤𑁆𑀯𑁂𑀬𑁂𑀯 𑀦𑀸𑀫𑀸𑀦𑀺 𑀳𑁄𑀦𑁆𑀢𑀻𑀢𑀺 𑀦𑀸𑀫𑀯𑀲𑁂𑀦 𑀤𑀼𑀓𑀁 𑀤𑀲𑁆𑀲𑀺𑀢𑀁. 𑀓𑀫𑁆𑀫𑁂𑀦 𑀯𑀸 𑀲𑀮𑀸𑀓𑀕𑁆𑀕𑀸𑀳𑁂𑀦 𑀯𑀸𑀢𑀺 𑀏𑀢𑁆𑀣 𑀉𑀤𑁆𑀤𑁂𑀲𑁄 𑀘𑁂𑀯 𑀓𑀫𑁆𑀫𑀜𑁆𑀘 𑀏𑀓𑀁, 𑀯𑁄𑀳𑀸𑀭𑁄 𑀘𑁂𑀯 𑀅𑀦𑀼𑀲𑁆𑀲𑀸𑀯𑀦𑀸 𑀘 𑀲𑀮𑀸𑀓𑀕𑁆𑀕𑀸𑀳𑁄 𑀘 𑀏𑀓𑀁, 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸 𑀧𑀼𑀩𑁆𑀩𑀪𑀸𑀕𑀸, 𑀓𑀫𑁆𑀫𑀜𑁆𑀘𑁂𑀯 𑀉𑀤𑁆𑀤𑁂𑀲𑁄 𑀘 𑀧𑀫𑀸𑀡𑀁.

𑀅𑀤𑁆𑀥𑀸𑀦𑀳𑀻𑀦𑁄 𑀦𑀸𑀫 𑀊𑀦𑀯𑀻𑀲𑀢𑀺𑀯𑀲𑁆𑀲𑁄. 𑀅𑀗𑁆𑀕𑀳𑀻𑀦𑁄 𑀦𑀸𑀫 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀺𑀪𑁂𑀤𑁄. 𑀯𑀢𑁆𑀣𑀼𑀯𑀺𑀧𑀦𑁆𑀦𑁄 𑀦𑀸𑀫 𑀧𑀡𑁆𑀟𑀓𑁄 𑀢𑀺𑀭𑀘𑁆𑀙𑀸𑀦𑀕𑀢𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀘. 𑀅𑀯𑀲𑁂𑀲𑀸 𑀣𑁂𑀬𑁆𑀬𑀲𑀁𑀯𑀸𑀲𑀓𑀸𑀤𑀬𑁄 𑀅𑀝𑁆𑀞 𑀅𑀪𑀩𑁆𑀩𑀧𑀼𑀕𑁆𑀕𑀮𑀸 𑀓𑀭𑀡𑀤𑀼𑀓𑁆𑀓𑀝𑀓𑀸 𑀦𑀸𑀫. 𑀤𑀼𑀓𑁆𑀓𑀝𑀓𑀺𑀭𑀺𑀬𑀸 𑀤𑀼𑀓𑁆𑀓𑀝𑀓𑀫𑁆𑀫𑀸, 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀓𑀢𑁂𑀦 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀅𑀪𑀩𑁆𑀩𑀝𑁆𑀞𑀸𑀦𑀁 𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀧𑀽𑀭𑁄 𑀦𑀸𑀫 𑀅𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑁄. 𑀦𑁄 𑀘 𑀬𑀸𑀘𑀢𑀺 𑀦𑀸𑀫 𑀉𑀧𑀲𑀫𑁆𑀧𑀤𑀁 𑀦 𑀬𑀸𑀘𑀢𑀺. 𑀅𑀮𑀚𑁆𑀚𑀺𑀲𑁆𑀲 𑀘 𑀩𑀸𑀮𑀲𑁆𑀲 𑀘𑀸𑀢𑀺 𑀅𑀮𑀚𑁆𑀚𑀻 𑀲𑀘𑁂𑀧𑀺 𑀢𑁂𑀧𑀺𑀝𑀓𑁄 𑀳𑁄𑀢𑀺, 𑀩𑀸𑀮𑁄 𑀘 𑀲𑀘𑁂𑀧𑀺 𑀲𑀝𑁆𑀞𑀺𑀯𑀲𑁆𑀲𑁄 𑀳𑁄𑀢𑀺, 𑀉𑀪𑁄𑀧𑀺 𑀦𑀺𑀲𑁆𑀲𑀸𑀬 𑀦 𑀯𑀢𑁆𑀣𑀩𑁆𑀩𑀁. 𑀩𑀸𑀮𑀲𑁆𑀲 𑀘 𑀮𑀚𑁆𑀚𑀺𑀲𑁆𑀲 𑀘𑀸𑀢𑀺 𑀏𑀢𑁆𑀣 𑀩𑀸𑀮𑀲𑁆𑀲 ‘‘𑀢𑁆𑀯𑀁 𑀦𑀺𑀲𑁆𑀲𑀬𑀁 𑀕𑀡𑁆𑀳𑀸’’𑀢𑀺 𑀆𑀡𑀸𑀬𑀧𑀺 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀮𑀚𑁆𑀚𑀺𑀲𑁆𑀲 𑀧𑀦 𑀬𑀸𑀘𑀦𑁆𑀢𑀲𑁆𑀲𑁂𑀯. 𑀲𑀸𑀢𑀺𑀲𑀸𑀭𑀦𑁆𑀢𑀺 𑀲𑀤𑁄𑀲𑀁; 𑀬𑀁 𑀅𑀚𑁆𑀛𑀸𑀘𑀭𑀦𑁆𑀢𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺.

𑀓𑀸𑀬𑁂𑀦 𑀧𑀝𑀺𑀓𑁆𑀓𑁄𑀲𑀦𑀸 𑀦𑀸𑀫 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀳𑀺 𑀧𑀝𑀺𑀓𑁆𑀓𑁄𑀲𑀦𑀸. 𑀓𑀸𑀬𑁂𑀦 𑀧𑀝𑀺𑀚𑀸𑀦𑀸𑀢𑀻𑀢𑀺 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀳𑀺 𑀧𑀝𑀺𑀚𑀸𑀦𑀸𑀢𑀺. 𑀉𑀧𑀖𑀸𑀢𑀺𑀓𑀸 𑀦𑀸𑀫 𑀉𑀧𑀖𑀸𑀢𑀸. 𑀲𑀺𑀓𑁆𑀔𑀽𑀧𑀖𑀸𑀢𑀺𑀓𑀸 𑀦𑀸𑀫 𑀲𑀺𑀓𑁆𑀔𑀽𑀧𑀖𑀸𑀢𑁄. 𑀪𑁄𑀕𑀽𑀧𑀖𑀸𑀢𑀺𑀓𑀸 𑀦𑀸𑀫 𑀧𑀭𑀺𑀪𑁄𑀕𑀽𑀧𑀖𑀸𑀢𑁄, 𑀢𑀢𑁆𑀣 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀅𑀲𑀺𑀓𑁆𑀔𑀢𑁄 𑀲𑀺𑀓𑁆𑀔𑀽𑀧𑀖𑀸𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀗𑁆𑀖𑀺𑀓𑀁 𑀯𑀸 𑀧𑀼𑀕𑁆𑀕𑀮𑀺𑀓𑀁 𑀯𑀸 𑀤𑀼𑀧𑁆𑀧𑀭𑀺𑀪𑁄𑀕𑀁 𑀪𑀼𑀜𑁆𑀚𑀢𑁄 𑀪𑁄𑀕𑀽𑀧𑀖𑀸𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑁆𑀯𑁂 𑀯𑁂𑀦𑀬𑀺𑀓𑀸𑀢𑀺 𑀤𑁆𑀯𑁂 𑀅𑀢𑁆𑀣𑀸 𑀯𑀺𑀦𑀬𑀲𑀺𑀤𑁆𑀥𑀸. 𑀧𑀜𑁆𑀜𑀢𑁆𑀢𑀁 𑀦𑀸𑀫 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀲𑁂𑀦 𑀧𑀜𑁆𑀜𑀢𑁆𑀢𑀁. 𑀧𑀜𑁆𑀜𑀢𑁆𑀢𑀸𑀦𑀼𑀮𑁄𑀫𑀁 𑀦𑀸𑀫 𑀘𑀢𑀽𑀲𑀼 𑀫𑀳𑀸𑀧𑀤𑁂𑀲𑁂𑀲𑀼 𑀤𑀝𑁆𑀞𑀩𑁆𑀩𑀁. 𑀲𑁂𑀢𑀼𑀖𑀸𑀢𑁄𑀢𑀺 𑀧𑀘𑁆𑀘𑀬𑀖𑀸𑀢𑁄; 𑀬𑁂𑀦 𑀘𑀺𑀢𑁆𑀢𑁂𑀦 𑀅𑀓𑀧𑁆𑀧𑀺𑀬𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲𑀸𑀧𑀺 𑀅𑀦𑀼𑀧𑁆𑀧𑀸𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀫𑀢𑁆𑀢𑀓𑀸𑀭𑀺𑀢𑀸𑀢𑀺 𑀫𑀢𑁆𑀢𑀸𑀬 𑀧𑀫𑀸𑀡𑁂𑀦 𑀓𑀭𑀡𑀁; 𑀧𑀫𑀸𑀡𑁂 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑁂𑀦 𑀆𑀧𑀚𑁆𑀚𑀢𑀻𑀢𑀺 𑀓𑀸𑀬𑀤𑁆𑀯𑀸𑀭𑀺𑀓𑀁 𑀓𑀸𑀬𑁂𑀦 𑀆𑀧𑀚𑁆𑀚𑀢𑀺; 𑀯𑀘𑀻𑀤𑁆𑀯𑀸𑀭𑀺𑀓𑀁 𑀯𑀸𑀘𑀸𑀬. 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀻𑀢𑀺 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂 𑀯𑀺𑀦𑀸𑀧𑀺 𑀤𑁂𑀲𑀦𑀸𑀬 𑀓𑀸𑀬𑁂𑀦𑁂𑀯 𑀯𑀼𑀝𑁆𑀞𑀸𑀢𑀺; 𑀤𑁂𑀲𑁂𑀢𑁆𑀯𑀸 𑀯𑀼𑀝𑁆𑀞𑀳𑀦𑁆𑀢𑁄 𑀧𑀦 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀅𑀩𑁆𑀪𑀦𑁆𑀢𑀭𑀧𑀭𑀺𑀪𑁄𑀕𑁄 𑀦𑀸𑀫 𑀅𑀚𑁆𑀛𑁄𑀳𑀭𑀡𑀧𑀭𑀺𑀪𑁄𑀕𑁄. 𑀩𑀸𑀳𑀺𑀭𑀧𑀭𑀺𑀪𑁄𑀕𑁄 𑀦𑀸𑀫 𑀲𑀻𑀲𑀫𑀓𑁆𑀔𑀦𑀸𑀤𑀺.

𑀅𑀦𑀸𑀕𑀢𑀁 𑀪𑀸𑀭𑀁 𑀯𑀳𑀢𑀻𑀢𑀺 𑀅𑀣𑁂𑀭𑁄𑀯 𑀲𑀫𑀸𑀦𑁄 𑀣𑁂𑀭𑁂𑀳𑀺 𑀯𑀳𑀺𑀢𑀩𑁆𑀩𑀁 𑀩𑀻𑀚𑀦𑀕𑀸𑀳𑀥𑀫𑁆𑀫𑀚𑁆𑀛𑁂𑀲𑀦𑀸𑀤𑀺𑀪𑀸𑀭𑀁 𑀯𑀳𑀢𑀺; 𑀢𑀁 𑀦𑀺𑀢𑁆𑀣𑀭𑀺𑀢𑀼𑀁 𑀯𑀻𑀭𑀺𑀬𑀁 𑀆𑀭𑀪𑀢𑀺. 𑀆𑀕𑀢𑀁 𑀪𑀸𑀭𑀁 𑀦 𑀯𑀳𑀢𑀻𑀢𑀺 𑀣𑁂𑀭𑁄 𑀣𑁂𑀭𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺, ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀥𑀫𑁆𑀫𑀁 𑀪𑀸𑀲𑀺𑀢𑀼𑀁, 𑀧𑀭𑀁 𑀯𑀸 𑀅𑀚𑁆𑀛𑁂𑀲𑀺𑀢𑀼𑀁, 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀣𑁂𑀭𑀸𑀥𑁂𑀬𑁆𑀬𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀧𑀭𑀺𑀳𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀻𑀢𑀺 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑁆𑀯𑀸 𑀓𑀭𑁄𑀢𑀺. 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀻𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑁆𑀯𑀸 𑀓𑀭𑁄𑀢𑀺. 𑀏𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀆𑀲𑀯𑀸 𑀯𑀟𑁆𑀠𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀦𑁆𑀢𑀭𑀤𑀼𑀓𑁂𑀧𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀤𑀼𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁩. 𑀢𑀺𑀓𑁂𑀲𑀼 𑀅𑀢𑁆𑀣𑀸𑀧𑀢𑁆𑀢𑀺 𑀢𑀺𑀝𑁆𑀞𑀦𑁆𑀢𑁂 𑀪𑀕𑀯𑀢𑀺 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑀺 𑀆𑀧𑀢𑁆𑀢𑀺, 𑀬𑀁 𑀢𑀺𑀝𑁆𑀞𑀦𑁆𑀢𑁂 𑀪𑀕𑀯𑀢𑀺 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀢𑀢𑁆𑀣 𑀮𑁄𑀳𑀺𑀢𑀼𑀧𑁆𑀧𑀸𑀤𑀸𑀧𑀢𑁆𑀢𑀺𑀁 𑀢𑀺𑀝𑁆𑀞𑀦𑁆𑀢𑁂 𑀆𑀧𑀚𑁆𑀚𑀢𑀺. ‘‘𑀏𑀢𑀭𑀳𑀺 𑀔𑁄 𑀧𑀦𑀸𑀦𑀦𑁆𑀤, 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀆𑀯𑀼𑀲𑁄𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀦 𑀯𑁄 𑀫𑀫𑀘𑁆𑀘𑀬𑁂𑀦 𑀏𑀯𑀁 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑀁, 𑀦𑀯𑀓𑁂𑀦, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑀸 𑀣𑁂𑀭𑁄 𑀪𑀺𑀓𑁆𑀔𑀽 ‘𑀪𑀦𑁆𑀢𑁂’𑀢𑀺 𑀯𑀸 ‘𑀆𑀬𑀲𑁆𑀫𑀸’𑀢𑀺 𑀯𑀸 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑁄’’𑀢𑀺 𑀯𑀘𑀦𑀢𑁄 𑀣𑁂𑀭𑀁 𑀆𑀯𑀼𑀲𑁄𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀆𑀧𑀚𑁆𑀚𑀢𑀺, 𑀦𑁄 𑀢𑀺𑀝𑁆𑀞𑀦𑁆𑀢𑁂. 𑀇𑀫𑀸 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀥𑀭𑀦𑁆𑀢𑁂𑀧𑀺 𑀪𑀕𑀯𑀢𑀺 𑀆𑀧𑀚𑁆𑀚𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁂𑀧𑀺.

𑀧𑀯𑀸𑀭𑁂𑀢𑁆𑀯𑀸 𑀅𑀦𑀢𑀺𑀭𑀺𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑁄 𑀆𑀧𑀢𑁆𑀢𑀺𑀁 𑀓𑀸𑀮𑁂 𑀆𑀧𑀚𑁆𑀚𑀢𑀺 𑀦𑁄 𑀯𑀺𑀓𑀸𑀮𑁂. 𑀯𑀺𑀓𑀸𑀮𑀪𑁄𑀚𑀦𑀸𑀧𑀢𑁆𑀢𑀺𑀁 𑀧𑀦 𑀯𑀺𑀓𑀸𑀮𑁂 𑀆𑀧𑀚𑁆𑀚𑀢𑀺 𑀦𑁄 𑀓𑀸𑀮𑁂. 𑀅𑀯𑀲𑁂𑀲𑀸 𑀓𑀸𑀮𑁂 𑀘𑁂𑀯 𑀆𑀧𑀚𑁆𑀚𑀢𑀺 𑀯𑀺𑀓𑀸𑀮𑁂 𑀘. 𑀲𑀳𑀕𑀸𑀭𑀲𑁂𑀬𑁆𑀬𑀁 𑀭𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀤𑁆𑀯𑀸𑀭𑀁 𑀅𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑀁 𑀤𑀺𑀯𑀸. 𑀲𑁂𑀲𑀸 𑀭𑀢𑁆𑀢𑀺𑀜𑁆𑀘𑁂𑀯 𑀤𑀺𑀯𑀸 𑀘. ‘‘𑀤𑀲𑀯𑀲𑁆𑀲𑁄𑀫𑁆𑀳𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄𑀫𑁆𑀳𑀻’’𑀢𑀺 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀤𑀲𑀯𑀲𑁆𑀲𑁄 𑀆𑀧𑀚𑁆𑀚𑀢𑀺 𑀦𑁄 𑀊𑀦𑀤𑀲𑀯𑀲𑁆𑀲𑁄. ‘‘𑀅𑀳𑀁 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄’’𑀢𑀺 𑀦𑀯𑁄 𑀯𑀸 𑀫𑀚𑁆𑀛𑀺𑀫𑁄 𑀯𑀸 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀊𑀦𑀤𑀲𑀯𑀲𑁆𑀲𑁄 𑀆𑀧𑀚𑁆𑀚𑀢𑀺 𑀦𑁄 𑀤𑀲𑀯𑀲𑁆𑀲𑁄. 𑀲𑁂𑀲𑀸 𑀤𑀲𑀯𑀲𑁆𑀲𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀊𑀦𑀤𑀲𑀯𑀲𑁆𑀲𑁄 𑀘. ‘‘𑀧𑀜𑁆𑀘𑀯𑀲𑁆𑀲𑁄𑀫𑁆𑀳𑀻’’𑀢𑀺 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀅𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀧𑀜𑁆𑀘𑀯𑀲𑁆𑀲𑁄 𑀆𑀧𑀚𑁆𑀚𑀢𑀺. ‘‘𑀅𑀳𑀁 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄’’𑀢𑀺 𑀦𑀯𑀓𑁄 𑀅𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀊𑀦𑀧𑀜𑁆𑀘𑀯𑀲𑁆𑀲𑁄 𑀆𑀧𑀚𑁆𑀚𑀢𑀺. 𑀲𑁂𑀲𑀁 𑀧𑀜𑁆𑀘𑀯𑀲𑁆𑀲𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀊𑀦𑀧𑀜𑁆𑀘𑀯𑀲𑁆𑀲𑁄 𑀘. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀧𑀤𑀲𑁄𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑁄, 𑀫𑀸𑀢𑀼𑀕𑀸𑀫𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀏𑀯𑀭𑀽𑀧𑀁 𑀆𑀧𑀢𑁆𑀢𑀺𑀁 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀧𑀸𑀭𑀸𑀚𑀺𑀓-𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺-𑀓𑀸𑀬𑀲𑀁𑀲𑀕𑁆𑀕-𑀤𑀼𑀝𑁆𑀞𑀼𑀮𑁆𑀮-𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬-𑀤𑀼𑀝𑁆𑀞𑀤𑁄𑀲-𑀲𑀗𑁆𑀖𑀪𑁂𑀤𑀧𑀳𑀸𑀭𑀤𑀸𑀦-𑀢𑀮𑀲𑀢𑁆𑀢𑀺𑀓𑀸𑀤𑀺𑀪𑁂𑀤𑀁 𑀅𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀲𑀜𑁆𑀘𑀺𑀘𑁆𑀘 𑀲𑀳𑀕𑀸𑀭𑀲𑁂𑀬𑁆𑀬𑀸𑀤𑀺𑀁 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀬𑀁 𑀅𑀭𑀳𑀸𑀯 𑀆𑀧𑀚𑁆𑀚𑀢𑀺, 𑀲𑀩𑁆𑀩𑀁 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄𑀯 𑀆𑀧𑀚𑁆𑀚𑀢𑀺, 𑀫𑁂𑀣𑀼𑀦𑀥𑀫𑁆𑀫𑀸𑀤𑀺𑀪𑁂𑀤𑀫𑀸𑀧𑀢𑁆𑀢𑀺𑀁 𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺, 𑀤𑀼𑀝𑁆𑀞𑀤𑁄𑀲𑀸𑀤𑀺𑀪𑁂𑀤𑀁 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑀗𑁆𑀕𑀻, 𑀬𑀁 𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺, 𑀢𑀁𑀬𑁂𑀯 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀆𑀧𑀚𑁆𑀚𑀦𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺.

𑀢𑀬𑁄 𑀧𑀝𑀺𑀓𑁆𑀔𑁂𑀧𑀸𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀢𑀬𑁄 𑀧𑀝𑀺𑀓𑁆𑀔𑁂𑀧𑀸. 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀫𑀳𑀺𑀘𑁆𑀙𑀢𑀸 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀓𑀺𑀮𑁂𑀲𑀲𑀮𑁆𑀮𑁂𑀔𑀦𑀧𑀝𑀺𑀧𑀢𑁆𑀢𑀺𑀬𑀸 𑀅𑀕𑁄𑀧𑀸𑀬𑀦𑀸, 𑀇𑀫𑁂 𑀳𑀺 𑀢𑀬𑁄 𑀥𑀫𑁆𑀫𑀸 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀅𑀧𑁆𑀧𑀺𑀘𑁆𑀙𑀢𑀸𑀤𑀬𑁄 𑀧𑀦 𑀢𑀬𑁄 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀬𑁄 𑀅𑀦𑀼𑀜𑁆𑀜𑀸𑀢𑀸’’𑀢𑀺.

‘‘𑀤𑀲𑀯𑀲𑁆𑀲𑁄𑀫𑁆𑀳𑀻’’𑀢𑀺 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 ‘‘𑀧𑀜𑁆𑀘𑀯𑀲𑁆𑀲𑁄𑀫𑁆𑀳𑀻’’𑀢𑀺 𑀦𑀺𑀲𑁆𑀲𑀬𑀁 𑀅𑀕𑀡𑁆𑀳𑀦𑁆𑀢𑁄 𑀩𑀸𑀮𑁄 𑀆𑀧𑀚𑁆𑀚𑀢𑀺 𑀦𑁄 𑀧𑀡𑁆𑀟𑀺𑀢𑁄, 𑀊𑀦𑀤𑀲𑀯𑀲𑁆𑀲𑁄 ‘‘𑀩𑁆𑀬𑀢𑁆𑀢𑁄𑀫𑁆𑀳𑀻’’𑀢𑀺 𑀩𑀳𑀼𑀲𑁆𑀲𑀼𑀢𑀢𑁆𑀢𑀸 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀊𑀦𑀧𑀜𑁆𑀘𑀯𑀲𑁆𑀲𑁄 𑀘 𑀦𑀺𑀲𑁆𑀲𑀬𑀁 𑀅𑀕𑀡𑁆𑀳𑀦𑁆𑀢𑁄 𑀧𑀡𑁆𑀟𑀺𑀢𑁄 𑀆𑀧𑀚𑁆𑀚𑀢𑀺 𑀦𑁄 𑀩𑀸𑀮𑁄; 𑀅𑀯𑀲𑁂𑀲𑀁 𑀧𑀡𑁆𑀟𑀺𑀢𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀩𑀸𑀮𑁄 𑀘. 𑀯𑀲𑁆𑀲𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀓𑀸𑀴𑁂 𑀆𑀧𑀚𑁆𑀚𑀢𑀺 𑀦𑁄 𑀚𑀼𑀡𑁆𑀳𑁂; 𑀫𑀳𑀸𑀧𑀯𑀸𑀭𑀡𑀸𑀬 𑀅𑀧𑁆𑀧𑀯𑀸𑀭𑁂𑀦𑁆𑀢𑁄 𑀚𑀼𑀡𑁆𑀳𑁂 𑀆𑀧𑀚𑁆𑀚𑀢𑀺 𑀦𑁄 𑀓𑀸𑀴𑁂; 𑀅𑀯𑀲𑁂𑀲𑀁 𑀓𑀸𑀴𑁂 𑀘𑁂𑀯 𑀆𑀧𑀚𑁆𑀚𑀢𑀺 𑀚𑀼𑀡𑁆𑀳𑁂 𑀘. 𑀯𑀲𑁆𑀲𑀽𑀧𑀕𑀫𑀦𑀁 𑀓𑀸𑀴𑁂 𑀓𑀧𑁆𑀧𑀢𑀺 𑀦𑁄 𑀚𑀼𑀡𑁆𑀳𑁂; 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀸 𑀚𑀼𑀡𑁆𑀳𑁂 𑀓𑀧𑁆𑀧𑀢𑀺 𑀦𑁄 𑀓𑀸𑀴𑁂; 𑀲𑁂𑀲𑀁 𑀅𑀦𑀼𑀜𑁆𑀜𑀸𑀢𑀓𑀁 𑀓𑀸𑀴𑁂 𑀘𑁂𑀯 𑀓𑀧𑁆𑀧𑀢𑀺 𑀚𑀼𑀡𑁆𑀳𑁂 𑀘.

𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀘𑁆𑀙𑀺𑀫𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀯𑀺𑀓𑀧𑁆𑀧𑁂𑀢𑁆𑀯𑀸 𑀞𑀧𑀺𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀦𑁆𑀢𑁄 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀁. ‘‘𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀢𑀺𑀭𑁂𑀓𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀧𑀭𑀺𑀬𑁂𑀲𑀦𑁆𑀢𑁄 𑀅𑀢𑀺𑀭𑁂𑀓𑀟𑁆𑀠𑀫𑀸𑀲𑁂 𑀲𑁂𑀲𑁂 𑀓𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑁄 𑀘 𑀕𑀺𑀫𑁆𑀳𑁂 𑀆𑀧𑀚𑁆𑀚𑀢𑀺 𑀦𑀸𑀫. 𑀲𑀢𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀕𑁆𑀕𑁄 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑁄 𑀯𑀲𑁆𑀲𑁂 𑀆𑀧𑀚𑁆𑀚𑀢𑀺 𑀦𑀸𑀫. 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀯𑀸 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀁 𑀯𑀸 𑀓𑀭𑁄𑀦𑁆𑀢𑁄 𑀲𑀗𑁆𑀖𑁄 𑀆𑀧𑀚𑁆𑀚𑀢𑀺. 𑀲𑀼𑀢𑁆𑀢𑀼𑀤𑁆𑀤𑁂𑀲𑀜𑁆𑀘 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀜𑁆𑀘 𑀓𑀭𑁄𑀦𑁆𑀢𑁄 𑀕𑀡𑁄 𑀆𑀧𑀚𑁆𑀚𑀢𑀺. 𑀏𑀓𑀓𑁄 𑀲𑀼𑀢𑁆𑀢𑀼𑀤𑁆𑀤𑁂𑀲𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀜𑁆𑀘 𑀓𑀭𑁄𑀦𑁆𑀢𑁄 𑀧𑀼𑀕𑁆𑀕𑀮𑁄 𑀆𑀧𑀚𑁆𑀚𑀢𑀺. 𑀧𑀯𑀸𑀭𑀡𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀲𑀗𑁆𑀖𑀼𑀧𑁄𑀲𑀣𑁄 𑀘 𑀲𑀗𑁆𑀖𑀧𑀯𑀸𑀭𑀡𑀸 𑀘 𑀲𑀗𑁆𑀖𑀲𑁆𑀲𑁂𑀯 𑀓𑀧𑁆𑀧𑀢𑀺. 𑀕𑀡𑀼𑀧𑁄𑀲𑀣𑁄 𑀘 𑀕𑀡𑀧𑀯𑀸𑀭𑀡𑀸 𑀘 𑀕𑀡𑀲𑁆𑀲𑁂𑀯 𑀓𑀧𑁆𑀧𑀢𑀺. 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑁄 𑀘 𑀅𑀥𑀺𑀝𑁆𑀞𑀸𑀦𑀧𑀯𑀸𑀭𑀡𑀸 𑀘 𑀧𑀼𑀕𑁆𑀕𑀮𑀲𑁆𑀲𑁂𑀯 𑀓𑀧𑁆𑀧𑀢𑀺. ‘‘𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄𑀫𑁆𑀳𑀻’’𑀢𑀺𑀆𑀤𑀻𑀦𑀺 𑀪𑀡𑀦𑁆𑀢𑁄 𑀯𑀢𑁆𑀣𑀼𑀁 𑀙𑀸𑀤𑁂𑀢𑀺 𑀦 𑀆𑀧𑀢𑁆𑀢𑀺𑀁, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺’’𑀦𑁆𑀢𑀺𑀆𑀤𑀻𑀦𑀺 𑀪𑀡𑀦𑁆𑀢𑁄 𑀆𑀧𑀢𑁆𑀢𑀺𑀁 𑀙𑀸𑀤𑁂𑀢𑀺 𑀦𑁄 𑀯𑀢𑁆𑀣𑀼𑀁, 𑀬𑁄 𑀦𑁂𑀯 𑀯𑀢𑁆𑀣𑀼𑀁 𑀦 𑀆𑀧𑀢𑁆𑀢𑀺𑀁 𑀆𑀭𑁄𑀘𑁂𑀢𑀺, 𑀅𑀬𑀁 𑀯𑀢𑁆𑀣𑀼𑀜𑁆𑀘𑁂𑀯 𑀙𑀸𑀤𑁂𑀢𑀺 𑀆𑀧𑀢𑁆𑀢𑀺𑀜𑁆𑀘.

𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀧𑀝𑀺𑀘𑁆𑀙𑀸𑀤𑀺. 𑀚𑀦𑁆𑀢𑀸𑀖𑀭𑀫𑁂𑀯 𑀧𑀝𑀺𑀘𑁆𑀙𑀸𑀤𑀺 𑀚𑀦𑁆𑀢𑀸𑀖𑀭𑀧𑀝𑀺𑀘𑁆𑀙𑀸𑀤𑀺. 𑀇𑀢𑀭𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀅𑀦𑁆𑀢𑁄𑀚𑀦𑁆𑀢𑀸𑀖𑀭𑁂 𑀞𑀺𑀢𑁂𑀦 𑀧𑀭𑀺𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀉𑀤𑀓𑁂 𑀑𑀢𑀺𑀡𑁆𑀡𑁂𑀦𑀸𑀧𑀺 𑀏𑀢𑀤𑁂𑀯 𑀯𑀝𑁆𑀝𑀢𑀺. 𑀉𑀪𑀬𑀢𑁆𑀣 𑀔𑀸𑀤𑀺𑀢𑀼𑀁 𑀪𑀼𑀜𑁆𑀚𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺. 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺 𑀲𑀩𑁆𑀩𑀓𑀧𑁆𑀧𑀺𑀬𑀢𑀸𑀬 𑀧𑀝𑀺𑀘𑁆𑀙𑀦𑁆𑀦𑁂𑀦 𑀲𑀩𑁆𑀩𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀯𑀳𑀦𑁆𑀢𑀻𑀢𑀺 𑀬𑀦𑁆𑀢𑀺 𑀦𑀺𑀬𑁆𑀬𑀦𑁆𑀢𑀺; 𑀦𑀺𑀦𑁆𑀤𑀁 𑀯𑀸 𑀧𑀝𑀺𑀓𑁆𑀓𑁄𑀲𑀁 𑀯𑀸 𑀦 𑀮𑀪𑀦𑁆𑀢𑀺. 𑀘𑀦𑁆𑀤𑀫𑀡𑁆𑀟𑀮𑀁 𑀅𑀩𑁆𑀪𑀸𑀫𑀳𑀺𑀓𑀸𑀥𑀽𑀫𑀭𑀚𑀭𑀸𑀳𑀼𑀯𑀺𑀫𑀼𑀢𑁆𑀢𑀁 𑀯𑀺𑀯𑀝𑀁𑀬𑁂𑀯 𑀯𑀺𑀭𑁄𑀘𑀢𑀺, 𑀦 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀁. 𑀢𑀣𑀸 𑀲𑀽𑀭𑀺𑀬𑀫𑀡𑁆𑀟𑀮𑀁, 𑀥𑀫𑁆𑀫𑀯𑀺𑀦𑀬𑁄𑀧𑀺 𑀯𑀺𑀯𑀭𑀺𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑀺𑀬𑀫𑀸𑀦𑁄𑀯 𑀯𑀺𑀭𑁄𑀘𑀢𑀺 𑀦𑁄 𑀧𑀝𑀺𑀘𑁆𑀙𑀦𑁆𑀦𑁄.

𑀅𑀜𑁆𑀜𑁂𑀦 𑀪𑁂𑀲𑀚𑁆𑀚𑁂𑀦 𑀓𑀭𑀡𑀻𑀬𑁂𑀦 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀕𑀺𑀮𑀸𑀦𑁄 𑀆𑀧𑀚𑁆𑀚𑀢𑀺, 𑀦 𑀪𑁂𑀲𑀚𑁆𑀚𑁂𑀦 𑀓𑀭𑀡𑀻𑀬𑁂𑀦 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀅𑀕𑀺𑀮𑀸𑀦𑁄 𑀆𑀧𑀚𑁆𑀚𑀢𑀺, 𑀅𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀕𑀺𑀮𑀸𑀦𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀅𑀕𑀺𑀮𑀸𑀦𑁄 𑀘.

𑀅𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑁄 𑀩𑀳𑀻𑀢𑀺 𑀅𑀦𑀼𑀧𑀔𑀚𑁆𑀚 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑁄 𑀅𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑁄 𑀩𑀳𑀺, 𑀩𑀳𑀺 𑀆𑀧𑀚𑁆𑀚𑀢𑀺 𑀦𑁄 𑀅𑀦𑁆𑀢𑁄𑀢𑀺 𑀲𑀗𑁆𑀖𑀺𑀓𑀁 𑀫𑀜𑁆𑀘𑀸𑀤𑀺𑀁 𑀅𑀚𑁆𑀛𑁄𑀓𑀸𑀲𑁂 𑀲𑀦𑁆𑀣𑀭𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑁄 𑀩𑀳𑀺 𑀆𑀧𑀚𑁆𑀚𑀢𑀺 𑀦𑁄 𑀅𑀦𑁆𑀢𑁄, 𑀅𑀯𑀲𑁂𑀲𑀁 𑀧𑀦 𑀅𑀦𑁆𑀢𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀩𑀳𑀺 𑀘. 𑀅𑀦𑁆𑀢𑁄𑀲𑀻𑀫𑀸𑀬𑀸𑀢𑀺 𑀆𑀕𑀦𑁆𑀢𑀼𑀓𑁄 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀅𑀤𑀲𑁆𑀲𑁂𑀢𑁆𑀯𑀸 𑀲𑀙𑀢𑁆𑀢𑀼𑀧𑀸𑀳𑀦𑁄 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀁 𑀑𑀓𑁆𑀓𑀦𑁆𑀢𑀫𑀢𑁆𑀢𑁄𑀯 𑀆𑀧𑀚𑁆𑀚𑀢𑀺. 𑀩𑀳𑀺𑀲𑀻𑀫𑀸𑀬𑀸𑀢𑀺 𑀕𑀫𑀺𑀓𑁄 𑀤𑀸𑀭𑀼𑀪𑀡𑁆𑀟𑀧𑀝𑀺𑀲𑀸𑀫𑀦𑀸𑀤𑀺𑀕𑀫𑀺𑀓𑀯𑀢𑁆𑀢𑀁 𑀅𑀧𑀽𑀭𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁄𑀯 𑀆𑀧𑀚𑁆𑀚𑀢𑀺. 𑀅𑀯𑀲𑁂𑀲𑀁 𑀅𑀦𑁆𑀢𑁄𑀲𑀻𑀫𑀸𑀬 𑀘𑁂𑀯 𑀆𑀧𑀚𑁆𑀚𑀢𑀺 𑀩𑀳𑀺𑀲𑀻𑀫𑀸𑀬 𑀘. 𑀲𑀢𑀺 𑀯𑀼𑀟𑁆𑀠𑀢𑀭𑁂 𑀅𑀦𑀚𑁆𑀛𑀺𑀝𑁆𑀞𑁄 𑀥𑀫𑁆𑀫𑀁 𑀪𑀸𑀲𑀦𑁆𑀢𑁄 𑀲𑀗𑁆𑀖𑀫𑀚𑁆𑀛𑁂 𑀆𑀧𑀚𑁆𑀚𑀢𑀺 𑀦𑀸𑀫. 𑀕𑀡𑀫𑀚𑁆𑀛𑁂𑀧𑀺 𑀧𑀼𑀕𑁆𑀕𑀮𑀲𑀦𑁆𑀢𑀺𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀻𑀢𑀺 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂𑀦 𑀯𑀼𑀝𑁆𑀞𑀸𑀢𑀺. 𑀓𑀸𑀬𑀁 𑀅𑀘𑀸𑀮𑁂𑀢𑁆𑀯𑀸 𑀯𑀸𑀘𑀸𑀬 𑀤𑁂𑀲𑁂𑀦𑁆𑀢𑀲𑁆𑀲 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀯𑀘𑀻𑀲𑀫𑁆𑀧𑀬𑀼𑀢𑁆𑀢𑀁 𑀓𑀸𑀬𑀓𑀺𑀭𑀺𑀬𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀲𑁆𑀲 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀲𑀗𑁆𑀖𑀫𑀚𑁆𑀛𑁂 𑀤𑁂𑀲𑀦𑀸𑀕𑀸𑀫𑀺𑀦𑀻𑀧𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀧𑀺 𑀯𑀼𑀝𑁆𑀞𑀸𑀢𑀺. 𑀕𑀡𑀧𑀼𑀕𑁆𑀕𑀮𑀫𑀚𑁆𑀛𑁂 𑀧𑀦 𑀤𑁂𑀲𑀦𑀸𑀕𑀸𑀫𑀺𑀦𑀻𑀬𑁂𑀯 𑀯𑀼𑀝𑁆𑀞𑀸𑀢𑀺.

𑀆𑀕𑀸𑀴𑁆𑀳𑀸𑀬 𑀘𑁂𑀢𑁂𑀬𑁆𑀬𑀸𑀢𑀺 𑀆𑀕𑀸𑀴𑁆𑀳𑀸𑀬 𑀤𑀴𑁆𑀳𑀪𑀸𑀯𑀸𑀬 𑀘𑁂𑀢𑁂𑀬𑁆𑀬; 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀺𑀓𑀢𑀲𑁆𑀲 𑀯𑀢𑁆𑀢𑀁 𑀦 𑀧𑀽𑀭𑀬𑀢𑁄 𑀇𑀘𑁆𑀙𑀫𑀸𑀦𑁄 𑀲𑀗𑁆𑀖𑁄 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀮𑀚𑁆𑀚𑀻 𑀘 𑀳𑁄𑀢𑀺 𑀩𑀸𑀮𑁄 𑀘 𑀅𑀧𑀓𑀢𑀢𑁆𑀢𑁄 𑀘𑀸𑀢𑀺 𑀏𑀢𑁆𑀣 𑀩𑀸𑀮𑁄 ‘‘𑀅𑀬𑀁 𑀥𑀫𑁆𑀫𑀸𑀥𑀫𑁆𑀫𑀁 𑀦 𑀚𑀸𑀦𑀸𑀢𑀺’’ 𑀅𑀧𑀓𑀢𑀢𑁆𑀢𑁄 𑀯𑀸 ‘‘𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻’’𑀢𑀺 𑀦 𑀏𑀢𑁆𑀢𑀸𑀯𑀢𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁; 𑀩𑀸𑀮𑀪𑀸𑀯𑀫𑀽𑀮𑀓𑀁 𑀧𑀦 𑀅𑀧𑀓𑀢𑀢𑁆𑀢𑀪𑀸𑀯𑀫𑀽𑀮𑀓𑀜𑁆𑀘 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀲𑁆𑀲 𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀦𑀸𑀫 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀆𑀧𑀦𑁆𑀦𑁄; 𑀆𑀘𑀸𑀭𑀯𑀺𑀧𑀦𑁆𑀦𑁄 𑀦𑀸𑀫 𑀧𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀆𑀧𑀦𑁆𑀦𑁄; 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀦𑀸𑀫 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀲𑀁 𑀆𑀧𑀢𑁆𑀢𑀺𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀅𑀧𑁆𑀧𑀝𑀺𑀓𑀭𑁄𑀦𑁆𑀢𑀸𑀦𑀁 𑀤𑀺𑀝𑁆𑀞𑀺𑀜𑁆𑀘 𑀅𑀦𑀺𑀲𑁆𑀲𑀚𑁆𑀚𑀦𑁆𑀢𑀸𑀦𑀁𑀬𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁.

𑀓𑀸𑀬𑀺𑀓𑁄 𑀤𑀯𑁄 𑀦𑀸𑀫 𑀧𑀸𑀲𑀓𑀸𑀤𑀻𑀳𑀺 𑀚𑀽𑀢𑀓𑀻𑀴𑀦𑀸𑀤𑀺𑀪𑁂𑀤𑁄 𑀅𑀦𑀸𑀘𑀸𑀭𑁄; 𑀯𑀸𑀘𑀲𑀺𑀓𑁄 𑀤𑀯𑁄 𑀦𑀸𑀫 𑀫𑀼𑀔𑀸𑀮𑀫𑁆𑀩𑀭𑀓𑀭𑀡𑀸𑀤𑀺𑀪𑁂𑀤𑁄 𑀅𑀦𑀸𑀘𑀸𑀭𑁄; 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀦𑀸𑀫 𑀦𑀘𑁆𑀘𑀦𑀕𑀸𑀬𑀦𑀸𑀤𑀺𑀪𑁂𑀤𑁄 𑀤𑁆𑀯𑀻𑀳𑀺𑀧𑀺 𑀤𑁆𑀯𑀸𑀭𑁂𑀳𑀺 𑀅𑀦𑀸𑀘𑀸𑀭𑁄. 𑀓𑀸𑀬𑀺𑀓𑁄 𑀅𑀦𑀸𑀘𑀸𑀭𑁄 𑀦𑀸𑀫 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄; 𑀯𑀸𑀘𑀲𑀺𑀓𑁄 𑀅𑀦𑀸𑀘𑀸𑀭𑁄 𑀦𑀸𑀫 𑀯𑀘𑀻𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄; 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀦𑀸𑀫 𑀤𑁆𑀯𑀸𑀭𑀤𑁆𑀯𑀬𑁂𑀧𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄. 𑀓𑀸𑀬𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦𑀸𑀢𑀺 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀲𑀺𑀓𑁆𑀔𑀦𑁂𑀦, 𑀬𑁄 𑀳𑀺 𑀢𑀁 𑀦 𑀲𑀺𑀓𑁆𑀔𑀢𑀺, 𑀲𑁄 𑀦𑀁 𑀉𑀧𑀖𑀸𑀢𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀢𑀁 𑀅𑀲𑀺𑀓𑁆𑀔𑀦𑀁 ‘‘𑀓𑀸𑀬𑀺𑀓𑀁 𑀉𑀧𑀖𑀸𑀢𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦𑀸𑀢𑀺 𑀚𑀗𑁆𑀖𑀧𑁂𑀲𑀦𑀺𑀓𑀸𑀤𑀺𑀦𑀸 𑀯𑀸 𑀕𑀡𑁆𑀟𑀨𑀸𑀮𑀦𑀸𑀤𑀺𑀦𑀸 𑀯𑀸 𑀯𑁂𑀚𑁆𑀚𑀓𑀫𑁆𑀫𑁂𑀦; 𑀯𑀸𑀘𑀲𑀺𑀓𑁂𑀦𑀸𑀢𑀺 𑀲𑀸𑀲𑀦𑀉𑀕𑁆𑀕𑀳𑀡𑀆𑀭𑁄𑀘𑀦𑀸𑀤𑀺𑀦𑀸; 𑀢𑀢𑀺𑀬𑀧𑀤𑀁 𑀉𑀪𑀬𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀼𑀢𑁆𑀢𑀁.

𑀅𑀮𑀁 𑀪𑀺𑀓𑁆𑀔𑀼 𑀫𑀸 𑀪𑀡𑁆𑀟𑀦𑀦𑁆𑀢𑀺 𑀅𑀮𑀁 𑀪𑀺𑀓𑁆𑀔𑀼 𑀫𑀸 𑀪𑀡𑁆𑀟𑀦𑀁 𑀓𑀭𑀺, 𑀫𑀸 𑀓𑀮𑀳𑀁, 𑀫𑀸 𑀯𑀺𑀯𑀸𑀤𑀁 𑀓𑀭𑀻𑀢𑀺 𑀅𑀢𑁆𑀣𑁄. 𑀦 𑀯𑁄𑀳𑀭𑀺𑀢𑀩𑁆𑀩𑀦𑁆𑀢𑀺 𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁; 𑀯𑀤𑀢𑁄𑀧𑀺 𑀳𑀺 𑀢𑀸𑀤𑀺𑀲𑀲𑁆𑀲 𑀯𑀘𑀦𑀁 𑀦 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀦 𑀓𑀺𑀲𑁆𑀫𑀺𑀜𑁆𑀘𑀺 𑀧𑀘𑁆𑀘𑁂𑀓𑀝𑁆𑀞𑀸𑀦𑁂𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀩𑀻𑀚𑀦𑀕𑁆𑀕𑀸𑀳𑀸𑀤𑀺𑀓𑁂 𑀏𑀓𑀲𑁆𑀫𑀺𑀫𑁆𑀧𑀺 𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀦 𑀞𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀑𑀓𑀸𑀲𑀓𑀫𑁆𑀫𑀁 𑀓𑀸𑀭𑁂𑀦𑁆𑀢𑀲𑁆𑀲𑀸𑀢𑀺 ‘‘𑀓𑀭𑁄𑀢𑀼 𑀆𑀬𑀲𑁆𑀫𑀸 𑀑𑀓𑀸𑀲𑀁, 𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄’’𑀢𑀺 𑀏𑀯𑀁 𑀑𑀓𑀸𑀲𑀁 𑀓𑀸𑀭𑁂𑀦𑁆𑀢𑀲𑁆𑀲. 𑀦𑀸𑀮𑀁 𑀑𑀓𑀸𑀲𑀓𑀫𑁆𑀫𑀁 𑀓𑀸𑀢𑀼𑀦𑁆𑀢𑀺 ‘‘𑀓𑀺𑀁 𑀢𑁆𑀯𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀑𑀓𑀸𑀲𑁄 𑀦 𑀓𑀸𑀢𑀩𑁆𑀩𑁄. 𑀲𑀯𑀘𑀦𑀻𑀬𑀁 𑀦𑀸𑀤𑀸𑀢𑀩𑁆𑀩𑀦𑁆𑀢𑀺 𑀯𑀘𑀦𑀁 𑀦 𑀆𑀤𑀸𑀢𑀩𑁆𑀩𑀁, 𑀯𑀘𑀦𑀫𑁆𑀧𑀺 𑀦 𑀲𑁄𑀢𑀩𑁆𑀩𑀁; 𑀬𑀢𑁆𑀣 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀦 𑀢𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀦𑀬𑁄𑀢𑀺 𑀬𑀁 𑀲𑁄 𑀚𑀸𑀦𑀸𑀢𑀺, 𑀲𑁄 𑀢𑀲𑁆𑀲 𑀯𑀺𑀦𑀬𑁄 𑀦𑀸𑀫 𑀳𑁄𑀢𑀺; 𑀲𑁄 𑀦 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀬𑁄𑀕𑁄 𑀦 𑀤𑀸𑀢𑀩𑁆𑀩𑁄𑀢𑀺 ‘‘𑀇𑀤𑀁 𑀓𑀧𑁆𑀧𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑀲𑁆𑀲 𑀧𑀼𑀘𑁆𑀙𑀸𑀬 𑀑𑀓𑀸𑀲𑁄 𑀦 𑀤𑀸𑀢𑀩𑁆𑀩𑁄, ‘‘𑀅𑀜𑁆𑀜𑀁 𑀧𑀼𑀘𑁆𑀙𑀸’’𑀢𑀺 𑀯𑀢𑁆𑀢𑀩𑁆𑀩𑁄. 𑀇𑀢𑀺 𑀲𑁄 𑀦𑁂𑀯 𑀧𑀼𑀘𑁆𑀙𑀺𑀢𑀩𑁆𑀩𑁄 𑀦𑀸𑀲𑁆𑀲 𑀧𑀼𑀘𑁆𑀙𑀸 𑀲𑁄𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀯𑀺𑀦𑀬𑁄 𑀦 𑀲𑀸𑀓𑀘𑁆𑀙𑀸𑀢𑀩𑁆𑀩𑁄𑀢𑀺 𑀯𑀺𑀦𑀬𑀧𑀜𑁆𑀳𑁄 𑀦 𑀲𑀸𑀓𑀘𑁆𑀙𑀺𑀢𑀩𑁆𑀩𑁄, 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀓𑀣𑀸 𑀦 𑀲𑀁𑀲𑀦𑁆𑀤𑁂𑀢𑀩𑁆𑀩𑀸.

𑀇𑀤𑀫𑀧𑁆𑀧𑀳𑀸𑀬𑀸𑀢𑀺 𑀏𑀢𑀁 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑀸𑀢𑀸𑀤𑀺𑀓𑀁 𑀮𑀤𑁆𑀥𑀺𑀁 𑀅𑀯𑀺𑀚𑀳𑀺𑀢𑁆𑀯𑀸. 𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑁆𑀢𑀺 𑀔𑀻𑀡𑀸𑀲𑀯𑀁 𑀪𑀺𑀓𑁆𑀔𑀼𑀁. ‘‘𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀢𑀻’’𑀢𑀺 𑀧𑀸𑀢𑀩𑁆𑀬𑀪𑀸𑀯𑀁 𑀧𑀝𑀺𑀲𑁂𑀯𑀦𑀁 𑀆𑀧𑀚𑁆𑀚𑀢𑀺. ‘‘𑀇𑀤𑀫𑀧𑁆𑀧𑀳𑀸𑀬𑀸’’𑀢𑀺 𑀯𑀘𑀦𑀢𑁄 𑀧𑀦 𑀢𑀁 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑀸𑀢𑀁 𑀧𑀳𑀸𑀬 𑀔𑀻𑀡𑀸𑀲𑀯𑀁 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢𑀁, 𑀔𑀫𑀣 𑀫𑁂’’𑀢𑀺 𑀔𑀫𑀸𑀧𑁂𑀢𑁆𑀯𑀸 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’’𑀢𑀺 𑀮𑀤𑁆𑀥𑀺𑀁 𑀯𑀺𑀚𑀳𑀺𑀢𑁆𑀯𑀸 𑀕𑀢𑀺𑀯𑀺𑀲𑁄𑀥𑀦𑀁 𑀓𑀭𑁂𑀬𑁆𑀬. 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀅𑀓𑀼𑀲𑀮𑀸𑀦𑀺 𑀘𑁂𑀯 𑀫𑀽𑀮𑀸𑀦𑀺 𑀘, 𑀅𑀓𑀼𑀲𑀮𑀸𑀦𑀁 𑀯𑀸 𑀫𑀽𑀮𑀸𑀦𑀺 𑀅𑀓𑀼𑀲𑀮𑀫𑀽𑀮𑀸𑀦𑀺. 𑀓𑀼𑀲𑀮𑀫𑀽𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀼𑀝𑁆𑀞𑀼 𑀘𑀭𑀺𑀢𑀸𑀦𑀺 𑀯𑀺𑀭𑀽𑀧𑀸𑀦𑀺 𑀯𑀸 𑀘𑀭𑀺𑀢𑀸𑀦𑀺 𑀤𑀼𑀘𑁆𑀘𑀭𑀺𑀢𑀸𑀦𑀺. 𑀲𑀼𑀝𑁆𑀞𑀼 𑀘𑀭𑀺𑀢𑀸𑀦𑀺 𑀲𑀼𑀦𑁆𑀤𑀭𑀸𑀦𑀺 𑀯𑀸 𑀘𑀭𑀺𑀢𑀸𑀦𑀺 𑀲𑀼𑀘𑀭𑀺𑀢𑀸𑀦𑀺. 𑀓𑀸𑀬𑁂𑀦 𑀓𑀭𑀡𑀪𑀽𑀢𑁂𑀦 𑀓𑀢𑀁 𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀓𑁆𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁪. 𑀘𑀢𑀼𑀓𑁆𑀓𑁂𑀲𑀼 𑀲𑀓𑀯𑀸𑀘𑀸𑀬 𑀆𑀧𑀚𑁆𑀚𑀢𑀺 𑀧𑀭𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀻𑀢𑀺 𑀯𑀘𑀻𑀤𑁆𑀯𑀸𑀭𑀺𑀓𑀁 𑀧𑀤𑀲𑁄𑀥𑀫𑁆𑀫𑀸𑀤𑀺𑀪𑁂𑀤𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑀝𑁆𑀞𑀸𑀦𑀁 𑀕𑀢𑁄 𑀧𑀭𑀲𑁆𑀲 𑀓𑀫𑁆𑀫𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀧𑀭𑀯𑀸𑀘𑀸𑀬 𑀆𑀧𑀚𑁆𑀚𑀢𑀺 𑀲𑀓𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀻𑀢𑀺 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀧𑀭𑀲𑁆𑀲 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑁂𑀦𑁆𑀢𑁄 𑀲𑀓𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀲𑀓𑀯𑀸𑀘𑀸𑀬 𑀆𑀧𑀚𑁆𑀚𑀢𑀺 𑀲𑀓𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀻𑀢𑀺 𑀯𑀘𑀻𑀤𑁆𑀯𑀸𑀭𑀺𑀓𑀁 𑀧𑀤𑀲𑁄𑀥𑀫𑁆𑀫𑀸𑀤𑀺𑀪𑁂𑀤𑀁 𑀆𑀧𑀢𑁆𑀢𑀺𑀁 𑀲𑀓𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀤𑁂𑀲𑁂𑀢𑁆𑀯𑀸 𑀯𑀼𑀝𑁆𑀞𑀳𑀦𑁆𑀢𑁄𑀧𑀺 𑀲𑀓𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀧𑀭𑀯𑀸𑀘𑀸𑀬 𑀆𑀧𑀚𑁆𑀚𑀢𑀺 𑀧𑀭𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀻𑀢𑀺 𑀬𑀸𑀯𑀢𑀢𑀺𑀬𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀭𑀲𑁆𑀲 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀯𑀼𑀝𑁆𑀞𑀳𑀦𑁆𑀢𑁄𑀧𑀺 𑀧𑀭𑀲𑁆𑀲 𑀧𑀭𑀺𑀯𑀸𑀲𑀓𑀫𑁆𑀫𑀯𑀸𑀘𑀸𑀤𑀻𑀳𑀺 𑀯𑀼𑀝𑁆𑀞𑀸𑀢𑀺. 𑀢𑀢𑁄 𑀧𑀭𑁂𑀲𑀼 𑀓𑀸𑀬𑀤𑁆𑀯𑀸𑀭𑀺𑀓𑀁 𑀓𑀸𑀬𑁂𑀦 𑀆𑀧𑀚𑁆𑀚𑀢𑀺, 𑀤𑁂𑀲𑁂𑀦𑁆𑀢𑁄 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀯𑀘𑀻𑀤𑁆𑀯𑀸𑀭𑀺𑀓𑀁 𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀢𑀺𑀡𑀯𑀢𑁆𑀣𑀸𑀭𑀓𑁂 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀺. 𑀓𑀸𑀬𑀤𑁆𑀯𑀸𑀭𑀺𑀓𑀁 𑀓𑀸𑀬𑁂𑀦𑀆𑀧𑀚𑁆𑀚𑀢𑀺, 𑀢𑀫𑁂𑀯 𑀢𑀺𑀡𑀯𑀢𑁆𑀣𑀸𑀭𑀓𑁂 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀺. 𑀯𑀘𑀻𑀤𑁆𑀯𑀸𑀭𑀺𑀓𑀁 𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀢𑀫𑁂𑀯 𑀤𑁂𑀲𑁂𑀦𑁆𑀢𑁄 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀲𑀗𑁆𑀖𑀺𑀓𑀫𑀜𑁆𑀘𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀭𑀡𑁂𑀦 𑀅𑀦𑀢𑁆𑀣𑀭𑀢𑁄 𑀓𑀸𑀬𑀲𑀫𑁆𑀨𑀼𑀲𑀦𑁂 𑀮𑁄𑀫𑀕𑀡𑀦𑀸𑀬 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀁 𑀲𑀳𑀕𑀸𑀭𑀲𑁂𑀬𑁆𑀬𑀸𑀧𑀢𑁆𑀢𑀺𑀜𑁆𑀘 𑀧𑀲𑀼𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀧𑀩𑀼𑀚𑁆𑀛𑀺𑀢𑁆𑀯𑀸 𑀧𑀦 𑀆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀤𑁂𑀲𑁂𑀦𑁆𑀢𑁄 𑀧𑀝𑀺𑀩𑀼𑀤𑁆𑀥𑁄 𑀯𑀼𑀝𑁆𑀞𑀸𑀢𑀺. 𑀚𑀕𑁆𑀕𑀦𑁆𑀢𑁄 𑀆𑀧𑀚𑁆𑀚𑀺𑀢𑁆𑀯𑀸 𑀧𑀦 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑀝𑁆𑀞𑀸𑀦𑁂 𑀲𑀬𑀦𑁆𑀢𑁄 𑀧𑀝𑀺𑀩𑀼𑀤𑁆𑀥𑁄 𑀆𑀧𑀚𑁆𑀚𑀢𑀺 𑀧𑀲𑀼𑀢𑁆𑀢𑁄 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀧𑀘𑁆𑀙𑀺𑀫𑀧𑀤𑀤𑁆𑀯𑀬𑀫𑁆𑀧𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀘𑀺𑀢𑁆𑀢𑀓𑀸𑀧𑀢𑁆𑀢𑀺𑀁 𑀅𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀧𑀘𑁆𑀙𑀸 𑀤𑁂𑀲𑁂𑀦𑁆𑀢𑁄 𑀲𑀘𑀺𑀢𑁆𑀢𑀓𑁄 𑀯𑀼𑀝𑁆𑀞𑀸𑀢𑀺. 𑀲𑀘𑀺𑀢𑁆𑀢𑀓𑀸𑀧𑀢𑁆𑀢𑀺𑀁 𑀲𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀢𑀺𑀡𑀯𑀢𑁆𑀣𑀸𑀭𑀓𑀝𑁆𑀞𑀸𑀦𑁂 𑀲𑀬𑀦𑁆𑀢𑁄 𑀅𑀘𑀺𑀢𑁆𑀢𑀓𑁄 𑀯𑀼𑀝𑁆𑀞𑀸𑀢𑀺. 𑀲𑁂𑀲𑀧𑀤𑀤𑁆𑀯𑀬𑀫𑁆𑀧𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑀺, 𑀅𑀬𑀁 𑀤𑁂𑀲𑀦𑀸𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑁄 𑀧𑀸𑀘𑀺𑀢𑁆𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀤𑁂𑀲𑁂𑀢𑀺, 𑀢𑀜𑁆𑀘 𑀤𑁂𑀲𑁂𑀦𑁆𑀢𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀢𑀁 𑀧𑀦 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑁄 𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀢𑁄 𑀯𑀼𑀝𑁆𑀞𑀸𑀢𑀺. 𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀢𑁄 𑀘 𑀯𑀼𑀝𑁆𑀞𑀳𑀦𑁆𑀢𑁄 𑀢𑀁 𑀆𑀧𑀚𑁆𑀚𑀢𑀺. 𑀇𑀢𑀺 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀓𑀫𑁂𑀯 𑀧𑀬𑁄𑀕𑀁 𑀲𑀦𑁆𑀥𑀸𑀬 ‘‘𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀤𑁂𑀲𑁂𑀢𑀻’’𑀢𑀺 𑀇𑀤𑀁 𑀘𑀢𑀼𑀓𑁆𑀓𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀫𑁆𑀫𑀘𑀢𑀼𑀓𑁆𑀓𑁂 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀧𑀢𑁆𑀢𑀺𑀁 𑀓𑀫𑁆𑀫𑁂𑀦 𑀆𑀧𑀚𑁆𑀚𑀢𑀺, 𑀤𑁂𑀲𑁂𑀦𑁆𑀢𑁄 𑀅𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀢𑀺. 𑀯𑀺𑀲𑁆𑀲𑀝𑁆𑀞𑀺𑀆𑀤𑀺𑀓𑀁 𑀅𑀓𑀫𑁆𑀫𑁂𑀦 𑀆𑀧𑀚𑁆𑀚𑀢𑀺, 𑀧𑀭𑀺𑀯𑀸𑀲𑀸𑀤𑀺𑀦𑀸 𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀢𑀺. 𑀲𑀫𑀦𑀼𑀪𑀸𑀲𑀦𑀁 𑀓𑀫𑁆𑀫𑁂𑀦𑁂𑀯 𑀆𑀧𑀚𑁆𑀚𑀢𑀺, 𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀢𑀺. 𑀲𑁂𑀲𑀁 𑀅𑀓𑀫𑁆𑀫𑁂𑀦 𑀆𑀧𑀚𑁆𑀚𑀢𑀺,𑀅𑀓𑀫𑁆𑀫𑁂𑀦𑀯𑀼𑀝𑁆𑀞𑀸𑀢𑀺.

𑀧𑀭𑀺𑀓𑁆𑀔𑀸𑀭𑀘𑀢𑀼𑀓𑁆𑀓𑁂 𑀧𑀞𑀫𑁄 𑀲𑀓𑀧𑀭𑀺𑀓𑁆𑀔𑀸𑀭𑁄, 𑀤𑀼𑀢𑀺𑀬𑁄 𑀲𑀗𑁆𑀖𑀺𑀓𑁄𑀯 𑀢𑀢𑀺𑀬𑁄 𑀘𑁂𑀢𑀺𑀬𑀲𑀦𑁆𑀢𑀓𑁄, 𑀘𑀢𑀼𑀢𑁆𑀣𑁄 𑀕𑀺𑀳𑀺𑀧𑀭𑀺𑀓𑁆𑀔𑀸𑀭𑁄. 𑀲𑀘𑁂 𑀧𑀦 𑀲𑁄 𑀧𑀢𑁆𑀢𑀘𑀻𑀯𑀭𑀦𑀯𑀓𑀫𑁆𑀫𑀪𑁂𑀲𑀚𑁆𑀚𑀸𑀦𑀁 𑀅𑀢𑁆𑀣𑀸𑀬 𑀆𑀳𑀝𑁄 𑀳𑁄𑀢𑀺, 𑀅𑀯𑀸𑀧𑀼𑀭𑀡𑀁 𑀤𑀸𑀢𑀼𑀁 𑀅𑀦𑁆𑀢𑁄 𑀞𑀧𑀸𑀧𑁂𑀢𑀼𑀜𑁆𑀘 𑀯𑀝𑁆𑀝𑀢𑀺.

𑀲𑀫𑁆𑀫𑀼𑀔𑀸𑀘𑀢𑀼𑀓𑁆𑀓𑁂 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀧𑀢𑁆𑀢𑀺𑀁 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀆𑀧𑀚𑁆𑀚𑀢𑀺, 𑀯𑀼𑀝𑁆𑀞𑀸𑀦𑀓𑀸𑀮𑁂 𑀧𑀦 𑀲𑀗𑁆𑀖𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀧𑀭𑀫𑁆𑀫𑀼𑀔𑀸 𑀯𑀼𑀝𑁆𑀞𑀸𑀢𑀺. 𑀯𑀺𑀲𑁆𑀲𑀝𑁆𑀞𑀺𑀆𑀤𑀺𑀓𑀁 𑀧𑀭𑀫𑁆𑀫𑀼𑀔𑀸 𑀆𑀧𑀚𑁆𑀚𑀢𑀺, 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀯𑀼𑀝𑁆𑀞𑀸𑀢𑀺. 𑀲𑀫𑀦𑀼𑀪𑀸𑀲𑀦𑀁 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀏𑀯 𑀆𑀧𑀚𑁆𑀚𑀢𑀺, 𑀲𑀫𑁆𑀫𑀼𑀔𑀸 𑀯𑀼𑀝𑁆𑀞𑀸𑀢𑀺. 𑀲𑁂𑀲𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀸𑀤𑀺𑀪𑁂𑀤𑀁 𑀧𑀭𑀫𑁆𑀫𑀼𑀔𑀸𑀯 𑀆𑀧𑀚𑁆𑀚𑀢𑀺, 𑀧𑀭𑀫𑁆𑀫𑀼𑀔𑀸𑀯 𑀯𑀼𑀝𑁆𑀞𑀸𑀢𑀺. 𑀅𑀚𑀸𑀦𑀦𑁆𑀢𑀘𑀢𑀼𑀓𑁆𑀓𑀁 𑀅𑀘𑀺𑀢𑁆𑀢𑀓𑀘𑀢𑀼𑀓𑁆𑀓𑀲𑀤𑀺𑀲𑀁.

𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦𑀸𑀢𑀺 𑀲𑀬𑀺𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀚𑀸𑀢𑁂 𑀲𑀳𑀕𑀸𑀭𑀲𑁂𑀬𑁆𑀬𑀸𑀧𑀢𑁆𑀢𑀺 𑀳𑁄𑀢𑀺 𑀇𑀤𑀫𑁂𑀯 𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀉𑀪𑀺𑀦𑁆𑀦𑀫𑁆𑀧𑀺 𑀧𑀦 𑀅𑀲𑀸𑀥𑀸𑀭𑀡𑀸𑀧𑀢𑁆𑀢𑀺 𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀯𑀼𑀝𑁆𑀞𑀸𑀢𑀺. 𑀲𑀳𑀧𑀝𑀺𑀮𑀸𑀪𑀘𑀢𑀼𑀓𑁆𑀓𑁂 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀲𑁄 𑀲𑀳 𑀮𑀺𑀗𑁆𑀕𑀧𑀝𑀺𑀮𑀸𑀪𑁂𑀦 𑀧𑀞𑀫𑀁 𑀉𑀧𑁆𑀧𑀦𑁆𑀦𑀯𑀲𑁂𑀦 𑀲𑁂𑀝𑁆𑀞𑀪𑀸𑀯𑁂𑀦 𑀘 𑀧𑀼𑀭𑀺𑀫𑀁 𑀧𑀼𑀭𑀺𑀲𑀮𑀺𑀗𑁆𑀕𑀁 𑀚𑀳𑀢𑀺, 𑀧𑀘𑁆𑀙𑀺𑀫𑁂 𑀇𑀢𑁆𑀣𑀺𑀮𑀺𑀗𑁆𑀕𑁂 𑀧𑀢𑀺𑀝𑁆𑀞𑀸𑀢𑀺, 𑀧𑀼𑀭𑀺𑀲𑀓𑀼𑀢𑁆𑀢𑀧𑀼𑀭𑀺𑀲𑀸𑀓𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀪𑀺𑀓𑁆𑀔𑀽𑀢𑀺 𑀯𑀸 𑀧𑀼𑀭𑀺𑀲𑁄𑀢𑀺 𑀯𑀸 𑀏𑀯𑀁 𑀧𑀯𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀬𑁄 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀬𑀸𑀦𑀺 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀙𑀘𑀢𑁆𑀢𑀸𑀮𑀻𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀢𑁂𑀳𑀺 𑀅𑀦𑀸𑀧𑀢𑁆𑀢𑀺𑀬𑁂𑀯 𑀳𑁄𑀢𑀺. 𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀧𑀦 𑀬𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀲𑀸 𑀧𑀘𑁆𑀙𑀸𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀳𑀻𑀦𑀪𑀸𑀯𑁂𑀦 𑀯𑀸 𑀧𑀘𑁆𑀙𑀺𑀫𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀁 𑀚𑀳𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀼𑀭𑀺𑀫𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑁂 𑀧𑀼𑀭𑀺𑀲𑀮𑀺𑀗𑁆𑀕𑁂 𑀧𑀢𑀺𑀝𑁆𑀞𑀸𑀢𑀺. 𑀯𑀼𑀢𑁆𑀢𑀯𑀺𑀧𑀭𑀻𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀪𑀺𑀓𑁆𑀔𑀼𑀦𑀻𑀢𑀺 𑀯𑀸 𑀇𑀢𑁆𑀣𑀻𑀢𑀺 𑀯𑀸 𑀏𑀯𑀁 𑀧𑀯𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀬𑁄𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀬𑀸𑀦𑀺 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀲𑀢𑀁 𑀢𑀺𑀁𑀲𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑁂𑀳𑀺 𑀅𑀦𑀸𑀧𑀢𑁆𑀢𑀺𑀬𑁂𑀯 𑀳𑁄𑀢𑀺.

𑀘𑀢𑁆𑀢𑀸𑀭𑁄 𑀲𑀸𑀫𑀼𑀓𑁆𑀓𑀁𑀲𑀸𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸, 𑀢𑁂 𑀳𑀺 𑀪𑀕𑀯𑀢𑀸 𑀅𑀦𑀼𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀫𑁆𑀳𑀺 𑀲𑀬𑀁 𑀉𑀓𑁆𑀓𑀁𑀲𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 ‘‘𑀲𑀸𑀫𑀼𑀓𑁆𑀓𑀁𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀭𑀺𑀪𑁄𑀕𑀸𑀢𑀺 𑀅𑀚𑁆𑀛𑁄𑀳𑀭𑀡𑀻𑀬𑀧𑀭𑀺𑀪𑁄𑀕𑀸, 𑀉𑀤𑀓𑀁 𑀧𑀦 𑀅𑀓𑀸𑀮𑀺𑀓𑀢𑁆𑀢𑀸 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀯𑀝𑁆𑀝𑀢𑀺. 𑀬𑀸𑀯𑀓𑀸𑀮𑀺𑀓𑀸𑀤𑀻𑀦𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀸𑀦𑀺 𑀅𑀚𑁆𑀛𑁄𑀳𑀭𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺. 𑀘𑀢𑁆𑀢𑀸𑀭𑀺 𑀫𑀳𑀸𑀯𑀺𑀓𑀝𑀸𑀦𑀺 𑀓𑀸𑀮𑁄𑀤𑀺𑀲𑁆𑀲𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑁂 𑀓𑀸𑀮𑁂 𑀯𑀝𑁆𑀝𑀦𑁆𑀢𑀺. 𑀉𑀧𑀸𑀲𑀓𑁄 𑀲𑀻𑀮𑀯𑀸𑀢𑀺 𑀧𑀜𑁆𑀘 𑀯𑀸 𑀤𑀲 𑀯𑀸 𑀲𑀻𑀮𑀸𑀦𑀺 𑀕𑁄𑀧𑀬𑀫𑀸𑀦𑁄.

𑀆𑀕𑀦𑁆𑀢𑀼𑀓𑀸𑀤𑀺𑀘𑀢𑀼𑀓𑁆𑀓𑁂 𑀲𑀙𑀢𑁆𑀢𑀼𑀧𑀸𑀳𑀦𑁄 𑀲𑀲𑀻𑀲𑀁 𑀧𑀸𑀭𑀼𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑁄 𑀢𑀢𑁆𑀣 𑀯𑀺𑀘𑀭𑀦𑁆𑀢𑁄 𑀘 𑀆𑀕𑀦𑁆𑀢𑀼𑀓𑁄𑀯 𑀆𑀧𑀚𑁆𑀚𑀢𑀺, 𑀦𑁄 𑀆𑀯𑀸𑀲𑀺𑀓𑁄. 𑀆𑀯𑀸𑀲𑀺𑀓𑀯𑀢𑁆𑀢𑀁 𑀅𑀓𑀭𑁄𑀦𑁆𑀢𑁄 𑀧𑀦 𑀆𑀯𑀸𑀲𑀺𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀆𑀕𑀦𑁆𑀢𑀼𑀓𑁄. 𑀲𑁂𑀲𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑀺𑀓𑀁 𑀆𑀧𑀢𑁆𑀢𑀺𑀁 𑀉𑀪𑁄𑀧𑀺 𑀆𑀧𑀚𑁆𑀚𑀦𑁆𑀢𑀺, 𑀅𑀲𑀸𑀥𑀸𑀭𑀡𑀁 𑀆𑀧𑀢𑁆𑀢𑀺𑀁 𑀦𑁂𑀯 𑀆𑀕𑀦𑁆𑀢𑀼𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀆𑀯𑀸𑀲𑀺𑀓𑁄. 𑀕𑀫𑀺𑀬𑀘𑀢𑀼𑀓𑁆𑀓𑁂𑀧𑀺 𑀕𑀫𑀺𑀬𑀯𑀢𑁆𑀢𑀁 𑀅𑀧𑀽𑀭𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀕𑀫𑀺𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀆𑀯𑀸𑀲𑀺𑀓𑁄. 𑀆𑀯𑀸𑀲𑀺𑀓𑀯𑀢𑁆𑀢𑀁 𑀅𑀓𑀭𑁄𑀦𑁆𑀢𑁄 𑀧𑀦 𑀆𑀯𑀸𑀲𑀺𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀕𑀫𑀺𑀓𑁄. 𑀲𑁂𑀲𑀁 𑀉𑀪𑁄𑀧𑀺 𑀆𑀧𑀚𑁆𑀚𑀦𑁆𑀢𑀺, 𑀅𑀲𑀸𑀥𑀸𑀭𑀡𑀁 𑀉𑀪𑁄𑀧𑀺 𑀦𑀸𑀧𑀚𑁆𑀚𑀦𑁆𑀢𑀺. 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸𑀤𑀺𑀘𑀢𑀼𑀓𑁆𑀓𑁂 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸𑀯 𑀳𑁄𑀢𑀺,𑀦𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸. 𑀲𑀩𑁆𑀩𑀸𑀧𑀺 𑀳𑀺 𑀲𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁂𑀯. 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀺𑀓𑁆𑀔𑀼𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀓𑀸𑀬𑀲𑀁𑀲𑀕𑁆𑀕𑁂 𑀪𑀺𑀓𑁆𑀔𑀼𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀯𑀁 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸𑀯 𑀳𑁄𑀢𑀺, 𑀦 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸, 𑀉𑀪𑀺𑀦𑁆𑀦𑀫𑁆𑀧𑀺 𑀳𑀺 𑀓𑀸𑀬𑀲𑀁𑀲𑀕𑁆𑀕𑁄𑀯 𑀯𑀢𑁆𑀣𑀼. 𑀢𑀣𑀸 ‘‘𑀮𑀲𑀼𑀡𑀓𑁆𑀔𑀸𑀤𑀦𑁂 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁, 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸𑀧𑁂𑀢𑁆𑀣 𑀦𑀬𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀢𑁂𑀭𑀲𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀺 𑀲𑀤𑁆𑀥𑀺𑀁 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸 𑀘𑁂𑀯 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸 𑀘. 𑀏𑀯𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀻𑀦𑀁 𑀅𑀦𑀺𑀬𑀢𑀸𑀤𑀻𑀳𑀺. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀏𑀓𑀢𑁄 𑀆𑀧𑀚𑁆𑀚𑀦𑁆𑀢𑀸𑀦𑀁 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀦𑁂𑀯 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸 𑀦𑁄 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸. 𑀯𑀺𑀲𑀼𑀁 𑀆𑀧𑀚𑁆𑀚𑀦𑁆𑀢𑁂𑀲𑀼𑀧𑀺 𑀲𑁂𑀲𑀸 𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀦𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀢𑁆𑀣𑀼𑀲𑀪𑀸𑀕𑀸𑀤𑀺𑀘𑀢𑀼𑀓𑁆𑀓𑁂 𑀪𑀺𑀓𑁆𑀔𑀼𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀓𑀸𑀬𑀲𑀁𑀲𑀕𑁆𑀕𑁂 𑀯𑀢𑁆𑀣𑀼𑀲𑀪𑀸𑀕𑀢𑀸, 𑀦𑁄 𑀆𑀧𑀢𑁆𑀢𑀺𑀲𑀪𑀸𑀕𑀢𑀸, 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼 𑀆𑀧𑀢𑁆𑀢𑀺𑀲𑀪𑀸𑀕𑀢𑀸, 𑀦𑁄 𑀯𑀢𑁆𑀣𑀼𑀲𑀪𑀸𑀕𑀢𑀸. 𑀏𑀲 𑀦𑀬𑁄 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀻𑀲𑀼. 𑀪𑀺𑀓𑁆𑀔𑀼𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼 𑀯𑀢𑁆𑀣𑀼𑀲𑀪𑀸𑀕𑀢𑀸 𑀘𑁂𑀯 𑀆𑀧𑀢𑁆𑀢𑀺𑀲𑀪𑀸𑀕𑀢𑀸 𑀘. 𑀏𑀲 𑀦𑀬𑁄 𑀲𑀩𑁆𑀩𑀸𑀲𑀼 𑀲𑀸𑀥𑀸𑀭𑀡𑀸𑀧𑀢𑁆𑀢𑀻𑀲𑀼. 𑀅𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀬𑀁 𑀦𑁂𑀯 𑀯𑀢𑁆𑀣𑀼𑀲𑀪𑀸𑀕𑀢𑀸 𑀦𑁄 𑀆𑀧𑀢𑁆𑀢𑀺𑀲𑀪𑀸𑀕𑀢𑀸. 𑀬𑁄 𑀳𑀺 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀧𑀞𑀫𑁄 𑀧𑀜𑁆𑀳𑁄, 𑀲𑁄 𑀇𑀥 𑀤𑀼𑀢𑀺𑀬𑁄; 𑀬𑁄 𑀘 𑀢𑀢𑁆𑀣 𑀤𑀼𑀢𑀺𑀬𑁄, 𑀲𑁄 𑀇𑀥 𑀧𑀞𑀫𑁄. 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺.

𑀉𑀧𑀚𑁆𑀛𑀸𑀬𑀘𑀢𑀼𑀓𑁆𑀓𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀉𑀧𑀚𑁆𑀛𑀸𑀬𑁂𑀦 𑀓𑀢𑁆𑀢𑀩𑁆𑀩𑀯𑀢𑁆𑀢𑀲𑁆𑀲 𑀅𑀓𑀭𑀡𑁂 𑀆𑀧𑀢𑁆𑀢𑀺𑀁 𑀉𑀧𑀚𑁆𑀛𑀸𑀬𑁄 𑀆𑀧𑀚𑁆𑀚𑀢𑀺, 𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀉𑀧𑀚𑁆𑀛𑀸𑀬𑀲𑁆𑀲 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀅𑀓𑀭𑁄𑀦𑁆𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀉𑀧𑀚𑁆𑀛𑀸𑀬𑁄; 𑀲𑁂𑀲𑀁 𑀉𑀪𑁄𑀧𑀺 𑀆𑀧𑀚𑁆𑀚𑀦𑁆𑀢𑀺, 𑀅𑀲𑀸𑀥𑀸𑀭𑀡𑀁 𑀉𑀪𑁄𑀧𑀺 𑀦𑀸𑀧𑀚𑁆𑀚𑀦𑁆𑀢𑀺. 𑀆𑀘𑀭𑀺𑀬𑀘𑀢𑀼𑀓𑁆𑀓𑁂𑀧𑀺 𑀏𑀲𑁂𑀯 𑀦𑀬𑁄.

𑀆𑀤𑀺𑀬𑀦𑁆𑀢𑀘𑀢𑀼𑀓𑁆𑀓𑁂 𑀧𑀸𑀤𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀁 𑀯𑀸 𑀲𑀳𑀢𑁆𑀣𑀸 𑀆𑀤𑀺𑀬𑀦𑁆𑀢𑁄 𑀕𑀭𑀼𑀓𑀁 𑀆𑀧𑀚𑁆𑀚𑀢𑀺, 𑀊𑀦𑀓𑀧𑀸𑀤𑀁 𑀕𑀡𑁆𑀳𑀸𑀳𑀻𑀢𑀺 𑀆𑀡𑀢𑁆𑀢𑀺𑀬𑀸 𑀅𑀜𑁆𑀜𑀁 𑀧𑀬𑁄𑀚𑁂𑀦𑁆𑀢𑁄 𑀮𑀳𑀼𑀓𑀁 𑀆𑀧𑀚𑁆𑀚𑀢𑀺. 𑀏𑀢𑁂𑀦 𑀦𑀬𑁂𑀦 𑀲𑁂𑀲𑀧𑀤𑀢𑁆𑀢𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀪𑀺𑀯𑀸𑀤𑀦𑀸𑀭𑀳𑀘𑀢𑀼𑀓𑁆𑀓𑁂 𑀪𑀺𑀓𑁆𑀔𑀼𑀦𑀻𑀦𑀁 𑀢𑀸𑀯 𑀪𑀢𑁆𑀢𑀕𑁆𑀕𑁂 𑀦𑀯𑀫𑀪𑀺𑀓𑁆𑀔𑀼𑀦𑀺𑀢𑁄 𑀧𑀝𑁆𑀞𑀸𑀬 𑀉𑀧𑀚𑁆𑀛𑀸𑀬𑀸𑀧𑀺 𑀅𑀪𑀺𑀯𑀸𑀤𑀦𑀸𑀭𑀳𑀸 𑀦𑁄 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑀸. 𑀅𑀯𑀺𑀲𑁂𑀲𑁂𑀦 𑀘 𑀯𑀺𑀧𑁆𑀧𑀓𑀢𑀪𑁄𑀚𑀦𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀬𑁄 𑀓𑁄𑀘𑀺 𑀯𑀼𑀟𑁆𑀠𑀢𑀭𑁄. 𑀲𑀝𑁆𑀞𑀺𑀯𑀲𑁆𑀲𑀲𑁆𑀲𑀸𑀧𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀲𑀫𑀻𑀧𑀕𑀢𑁄 𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑁄𑀧𑀺 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑁄 𑀦𑁄 𑀅𑀪𑀺𑀯𑀸𑀤𑀦𑀸𑀭𑀳𑁄. 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀞𑀸𑀦𑁂𑀲𑀼 𑀯𑀼𑀟𑁆𑀠𑁄 𑀦𑀯𑀓𑀲𑁆𑀲 𑀅𑀪𑀺𑀯𑀸𑀤𑀦𑀸𑀭𑀳𑁄 𑀘𑁂𑀯 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑁄 𑀘. 𑀦𑀯𑀓𑁄 𑀧𑀦 𑀯𑀼𑀟𑁆𑀠𑀲𑁆𑀲 𑀦𑁂𑀯 𑀅𑀪𑀺𑀯𑀸𑀤𑀦𑀸𑀭𑀳𑁄 𑀦 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑁄. 𑀆𑀲𑀦𑀸𑀭𑀳𑀘𑀢𑀼𑀓𑁆𑀓𑀲𑁆𑀲 𑀧𑀞𑀫𑀧𑀤𑀁 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀤𑀼𑀢𑀺𑀬𑀧𑀤𑁂𑀦, 𑀤𑀼𑀢𑀺𑀬𑀧𑀤𑀜𑁆𑀘 𑀧𑀞𑀫𑀧𑀤𑁂𑀦 𑀅𑀢𑁆𑀣𑀢𑁄 𑀲𑀤𑀺𑀲𑀁.

𑀓𑀸𑀮𑀘𑀢𑀼𑀓𑁆𑀓𑁂 𑀧𑀯𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀓𑀸𑀮𑁂 𑀆𑀧𑀚𑁆𑀚𑀢𑀺 𑀦𑁄 𑀯𑀺𑀓𑀸𑀮𑁂, 𑀯𑀺𑀓𑀸𑀮𑀪𑁄𑀚𑀦𑀸𑀧𑀢𑁆𑀢𑀺𑀁 𑀯𑀺𑀓𑀸𑀮𑁂 𑀆𑀧𑀚𑁆𑀚𑀢𑀺 𑀦𑁄 𑀓𑀸𑀮𑁂, 𑀲𑁂𑀲𑀁 𑀓𑀸𑀮𑁂 𑀘𑁂𑀯 𑀆𑀧𑀚𑁆𑀚𑀢𑀺 𑀯𑀺𑀓𑀸𑀮𑁂 𑀘, 𑀅𑀲𑀸𑀥𑀸𑀭𑀡𑀁 𑀦𑁂𑀯 𑀓𑀸𑀮𑁂 𑀦𑁄 𑀯𑀺𑀓𑀸𑀮𑁂. 𑀧𑀝𑀺𑀕𑁆𑀕𑀳𑀺𑀢𑀘𑀢𑀼𑀓𑁆𑀓𑁂 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀸𑀫𑀺𑀲𑀁 𑀓𑀸𑀮𑁂 𑀓𑀧𑁆𑀧𑀢𑀺 𑀦𑁄 𑀯𑀺𑀓𑀸𑀮𑁂. 𑀧𑀸𑀦𑀓𑀁 𑀯𑀺𑀓𑀸𑀮𑁂 𑀓𑀧𑁆𑀧𑀢𑀺, 𑀧𑀼𑀦𑀤𑀺𑀯𑀲𑀫𑁆𑀳𑀺 𑀦𑁄 𑀓𑀸𑀮𑁂. 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁 𑀓𑀸𑀮𑁂 𑀘𑁂𑀯 𑀓𑀧𑁆𑀧𑀢𑀺 𑀯𑀺𑀓𑀸𑀮𑁂 𑀘. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀸𑀮𑀸𑀢𑀻𑀢𑀁 𑀬𑀸𑀯𑀓𑀸𑀮𑀺𑀓𑀸𑀤𑀺𑀢𑁆𑀢𑀬𑀁 𑀅𑀓𑀧𑁆𑀧𑀺𑀬𑀫𑀁𑀲𑀁 𑀉𑀕𑁆𑀕𑀳𑀺𑀢𑀓𑀫𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀜𑁆𑀘 𑀦𑁂𑀯 𑀓𑀸𑀮𑁂 𑀓𑀧𑁆𑀧𑀢𑀺 𑀦𑁄 𑀯𑀺𑀓𑀸𑀮𑁂.