𑀫𑀳𑀸𑀲𑀗𑁆𑀕𑀸𑀫𑁄

𑀯𑁄𑀳𑀭𑀦𑁆𑀢𑁂𑀦 𑀚𑀸𑀦𑀺𑀢𑀩𑁆𑀩𑀸𑀤𑀺𑀯𑀡𑁆𑀡𑀦𑀸

𑁩𑁬𑁮-𑁩𑁭𑁪. 𑀫𑀳𑀸𑀲𑀗𑁆𑀕𑀸𑀫𑁂 𑁋 𑀯𑀢𑁆𑀣𑀼𑀢𑁄 𑀯𑀸 𑀯𑀢𑁆𑀣𑀼𑀁 𑀲𑀗𑁆𑀓𑀫𑀢𑀻𑀢𑀺 ‘‘𑀧𑀞𑀫𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀫𑀬𑀸 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀼𑀘𑁆𑀙𑀺𑀬𑀫𑀸𑀦𑁄 𑀦𑀺𑀖𑀁𑀲𑀺𑀬𑀫𑀸𑀦𑁄 ‘‘𑀦 𑀫𑀬𑀸 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼 𑀤𑀺𑀝𑁆𑀞𑀁, 𑀦 𑀲𑀼𑀢𑀁; 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸’’𑀢𑀺 𑀯𑀤𑀢𑀺. 𑀏𑀢𑁂𑀦𑁂𑀯 𑀦𑀬𑁂𑀦 𑀲𑁂𑀲𑀯𑀢𑁆𑀣𑀼𑀲𑀗𑁆𑀓𑀫𑀦𑀁, 𑀯𑀺𑀧𑀢𑁆𑀢𑀺𑀢𑁄 𑀯𑀺𑀧𑀢𑁆𑀢𑀺𑀲𑀗𑁆𑀓𑀫𑀦𑀁 𑀆𑀧𑀢𑁆𑀢𑀺𑀢𑁄 𑀆𑀧𑀢𑁆𑀢𑀺𑀲𑀗𑁆𑀓𑀫𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀧𑀦 ‘‘𑀦𑁂𑀯 𑀫𑀬𑀸 𑀤𑀺𑀝𑁆𑀞𑀁, 𑀦 𑀲𑀼𑀢’’𑀦𑁆𑀢𑀺 𑀯𑀢𑁆𑀯𑀸 𑀧𑀘𑁆𑀙𑀸 ‘‘𑀫𑀬𑀸𑀧𑁂𑀢𑀁 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸’’𑀢𑀺 𑀯𑀤𑀢𑀺, ‘‘𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸’’𑀢𑀺 𑀯𑀢𑁆𑀯𑀸 𑀧𑀘𑁆𑀙𑀸 ‘‘𑀦 𑀤𑀺𑀝𑁆𑀞𑀁 𑀯𑀸 𑀦 𑀲𑀼𑀢𑀁 𑀯𑀸’’𑀢𑀺 𑀯𑀤𑀢𑀺, 𑀅𑀬𑀁 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀧𑀝𑀺𑀚𑀸𑀦𑀺𑀢𑁆𑀯𑀸 𑀅𑀯𑀚𑀸𑀦𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀲𑁂𑀯 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀺 𑀦𑀸𑀫.

𑁩𑁭𑁫. 𑀯𑀡𑁆𑀡𑀸𑀯𑀡𑁆𑀡𑁄𑀢𑀺 𑀦𑀻𑀮𑀸𑀤𑀺𑀯𑀡𑁆𑀡𑀸𑀯𑀡𑁆𑀡𑀯𑀲𑁂𑀦 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀁 𑀯𑀼𑀢𑁆𑀢𑀁. 𑀯𑀘𑀦𑀫𑀦𑀼𑀧𑁆𑀧𑀤𑀸𑀦𑀦𑁆𑀢𑀺 𑀲𑀜𑁆𑀘𑀭𑀺𑀢𑁆𑀢𑀁 𑀯𑀼𑀢𑁆𑀢𑀁. 𑀓𑀸𑀬𑀲𑀁𑀲𑀕𑁆𑀕𑀸𑀤𑀺𑀢𑁆𑀢𑀬𑀁 𑀲𑀭𑀽𑀧𑁂𑀦𑁂𑀯 𑀯𑀼𑀢𑁆𑀢𑀁. 𑀇𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀧𑀼𑀩𑁆𑀩𑀧𑀬𑁄𑀕𑁄𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁩𑁭𑁬. 𑀘𑀢𑁆𑀢𑀸𑀭𑀺 𑀅𑀧𑀮𑁄𑀓𑀦𑀓𑀫𑁆𑀫𑀸𑀦𑀻𑀢𑀺 𑀅𑀥𑀫𑁆𑀫𑁂𑀦𑀯𑀕𑁆𑀕𑀸𑀤𑀻𑀦𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀘𑀢𑁆𑀢𑀸𑀭𑀺 𑀘𑀢𑀼𑀓𑁆𑀓𑀸𑀦𑀺 𑀲𑁄𑀴𑀲 𑀳𑁄𑀦𑁆𑀢𑀺.

𑀅𑀕𑀢𑀺𑀅𑀕𑀦𑁆𑀢𑀩𑁆𑀩𑀯𑀡𑁆𑀡𑀦𑀸

𑁩𑁭𑁯. 𑀩𑀳𑀼𑀚𑀦𑀅𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀯𑀺𑀦𑀬𑀥𑀭𑁂𑀦 𑀳𑀺 𑀏𑀯𑀁 𑀙𑀦𑁆𑀤𑀸𑀤𑀺𑀕𑀢𑀺𑀬𑀸 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀢𑁂 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀗𑁆𑀖𑁄 𑀤𑁆𑀯𑀺𑀥𑀸 𑀪𑀺𑀚𑁆𑀚𑀢𑀺. 𑀑𑀯𑀸𑀤𑀽𑀧𑀚𑀻𑀯𑀺𑀦𑀺𑀬𑁄 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀤𑁆𑀯𑁂 𑀪𑀸𑀕𑀸 𑀳𑁄𑀦𑁆𑀢𑀺. 𑀉𑀧𑀸𑀲𑀓𑀸𑀧𑀺 𑀉𑀧𑀸𑀲𑀺𑀓𑀸𑀬𑁄𑀧𑀺 𑀤𑀸𑀭𑀓𑀸𑀧𑀺 𑀤𑀸𑀭𑀺𑀓𑀸𑀬𑁄𑀧𑀺 𑀢𑁂𑀲𑀁 𑀆𑀭𑀓𑁆𑀔𑀤𑁂𑀯𑀢𑀸𑀧𑀺 𑀢𑀣𑁂𑀯 𑀤𑁆𑀯𑀺𑀥𑀸 𑀪𑀺𑀚𑁆𑀚𑀦𑁆𑀢𑀺. 𑀢𑀢𑁄 𑀪𑀼𑀫𑁆𑀫𑀤𑁂𑀯𑀢𑀸 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀸𑀦𑁄 𑀤𑁆𑀯𑀺𑀥𑀸𑀯 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀩𑀳𑀼𑀚𑀦𑀅𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺.

𑁩𑁮𑁨. 𑀯𑀺𑀲𑀫𑀦𑀺𑀲𑁆𑀲𑀺𑀢𑁄𑀢𑀺 𑀯𑀺𑀲𑀫𑀸𑀦𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀦𑀺𑀲𑁆𑀲𑀺𑀢𑁄. 𑀕𑀳𑀦𑀦𑀺𑀲𑁆𑀲𑀺𑀢𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀁 𑀕𑀳𑀦𑀁 𑀦𑀺𑀲𑁆𑀲𑀺𑀢𑁄. 𑀩𑀮𑀯𑀦𑀺𑀲𑁆𑀲𑀺𑀢𑁄𑀢𑀺 𑀩𑀮𑀯𑀦𑁆𑀢𑁂 𑀅𑀪𑀺𑀜𑁆𑀜𑀸𑀢𑁂 𑀪𑀺𑀓𑁆𑀔𑀽 𑀦𑀺𑀲𑁆𑀲𑀺𑀢𑁄.

𑁩𑁯𑁩. 𑀢𑀲𑁆𑀲 𑀅𑀯𑀚𑀸𑀦𑀦𑁆𑀢𑁄𑀢𑀺 𑀢𑀲𑁆𑀲 𑀯𑀘𑀦𑀁 𑀅𑀯𑀚𑀸𑀦𑀦𑁆𑀢𑁄. 𑀉𑀧𑀬𑁄𑀕𑀢𑁆𑀣𑁂 𑀯𑀸 𑀲𑀸𑀫𑀺𑀯𑀘𑀦𑀁, 𑀢𑀁 𑀅𑀯𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄.

𑁩𑁯𑁪. 𑀬𑀁 𑀅𑀢𑁆𑀣𑀸𑀬𑀸𑀢𑀺 𑀬𑀤𑀢𑁆𑀣𑀸𑀬. 𑀢𑀁 𑀅𑀢𑁆𑀣𑀦𑁆𑀢𑀺 𑀲𑁄 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀫𑀳𑀸𑀲𑀗𑁆𑀕𑀸𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.