𑀓𑀣𑀺𑀦𑀪𑁂𑀤𑀁

𑀓𑀣𑀺𑀦𑀅𑀢𑁆𑀣𑀢𑀸𑀤𑀺𑀯𑀡𑁆𑀡𑀦𑀸

𑁪𑁦𑁩. 𑀓𑀣𑀺𑀦𑁂 𑁋 𑀅𑀝𑁆𑀞 𑀫𑀸𑀢𑀺𑀓𑀸𑀢𑀺 𑀔𑀦𑁆𑀥𑀓𑁂 𑀯𑀼𑀢𑁆𑀢𑀸 𑀧𑀓𑁆𑀓𑀫𑀦𑀦𑁆𑀢𑀺𑀓𑀸𑀤𑀺𑀓𑀸 𑀅𑀝𑁆𑀞. 𑀧𑀮𑀺𑀩𑁄𑀥𑀸𑀦𑀺𑀲𑀁𑀲𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀏𑀯.

𑁪𑁦𑁪. 𑀧𑀬𑁄𑀕𑀲𑁆𑀲𑀸𑀢𑀺 𑀘𑀻𑀯𑀭𑀥𑁄𑀯𑀦𑀸𑀤𑀺𑀦𑁄 𑀲𑀢𑁆𑀢𑀯𑀺𑀥𑀲𑁆𑀲 𑀧𑀼𑀩𑁆𑀩𑀓𑀭𑀡𑀲𑁆𑀲𑀢𑁆𑀣𑀸𑀬 𑀬𑁄 𑀉𑀤𑀓𑀸𑀳𑀭𑀡𑀸𑀤𑀺𑀓𑁄 𑀧𑀬𑁄𑀕𑁄 𑀓𑀬𑀺𑀭𑀢𑀺, 𑀢𑀲𑁆𑀲 𑀧𑀬𑁄𑀕𑀲𑁆𑀲. 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀦𑀸𑀕𑀢𑀯𑀲𑁂𑀦 𑀅𑀦𑀦𑁆𑀢𑀭𑀸 𑀳𑀼𑀢𑁆𑀯𑀸 𑀓𑀢𑀫𑁂 𑀥𑀫𑁆𑀫𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁂𑀦𑀸𑀢𑀺 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦, 𑀅𑀦𑀦𑁆𑀢𑀭𑀧𑀘𑁆𑀘𑀬𑀫𑁂𑀯 𑀆𑀲𑀦𑁆𑀦𑀢𑀭𑀁 𑀓𑀢𑁆𑀯𑀸 𑀧𑀼𑀘𑁆𑀙𑀢𑀺. 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑀸𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀧𑀬𑁄𑀕𑀲𑁆𑀲 𑀦𑀺𑀲𑁆𑀲𑀬𑀁 𑀆𑀥𑀸𑀭𑀪𑀸𑀯𑀁 𑀉𑀧𑀕𑀢𑀸 𑀯𑀺𑀬 𑀳𑀼𑀢𑁆𑀯𑀸 𑀓𑀢𑀫𑁂 𑀥𑀫𑁆𑀫𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦𑀸𑀢𑀺 𑀉𑀧𑁂𑀢𑁂𑀦 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦; 𑀦𑀺𑀲𑁆𑀲𑀬𑀧𑀘𑁆𑀘𑀬𑀫𑁂𑀯 𑀉𑀧𑀕𑀢𑀢𑀭𑀁 𑀓𑀢𑁆𑀯𑀸 𑀧𑀼𑀘𑁆𑀙𑀢𑀺. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀇𑀫𑀺𑀦𑀸 𑀧𑀞𑀫𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀧𑀼𑀘𑁆𑀙𑀢𑀺. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀇𑀫𑀺𑀦𑀸 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀧𑀼𑀘𑁆𑀙𑀢𑀺. 𑀲𑀳𑀚𑀸𑀢𑀧𑀘𑁆𑀘𑀬𑁂𑀦𑀸𑀢𑀺 𑀇𑀫𑀺𑀦𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑀁 𑀧𑀼𑀘𑁆𑀙𑀢𑀺. 𑀧𑀼𑀩𑁆𑀩𑀓𑀭𑀡𑀲𑁆𑀲𑀸𑀢𑀺 𑀥𑁄𑀯𑀦𑀸𑀤𑀺𑀦𑁄 𑀧𑀼𑀩𑁆𑀩𑀓𑀭𑀡𑀲𑁆𑀲. 𑀧𑀘𑁆𑀘𑀼𑀤𑁆𑀥𑀸𑀭𑀲𑁆𑀲𑀸𑀢𑀺 𑀧𑀼𑀭𑀸𑀡𑀲𑀗𑁆𑀖𑀸𑀝𑀺𑀆𑀤𑀻𑀦𑀁 𑀧𑀘𑁆𑀘𑀼𑀤𑁆𑀥𑀭𑀡𑀲𑁆𑀲. 𑀅𑀥𑀺𑀝𑁆𑀞𑀸𑀦𑀲𑁆𑀲𑀸𑀢𑀺 𑀓𑀣𑀺𑀦𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀲𑁆𑀲. 𑀅𑀢𑁆𑀣𑀸𑀭𑀲𑁆𑀲𑀸𑀢𑀺 𑀓𑀣𑀺𑀦𑀢𑁆𑀣𑀸𑀭𑀲𑁆𑀲. 𑀫𑀸𑀢𑀺𑀓𑀸𑀦𑀜𑁆𑀘 𑀧𑀮𑀺𑀩𑁄𑀥𑀸𑀦𑀜𑁆𑀘𑀸𑀢𑀺 𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀜𑁆𑀘 𑀧𑀮𑀺𑀩𑁄𑀥𑀸𑀦𑀁. 𑀯𑀢𑁆𑀣𑀼𑀲𑁆𑀲𑀸𑀢𑀺 𑀲𑀗𑁆𑀖𑀸𑀝𑀺𑀆𑀤𑀺𑀦𑁄 𑀓𑀣𑀺𑀦𑀯𑀢𑁆𑀣𑀼𑀲𑁆𑀲; 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀯𑀁 𑀬𑀜𑁆𑀘 𑀮𑀩𑁆𑀪𑀢𑀺 𑀬𑀜𑁆𑀘 𑀦 𑀮𑀩𑁆𑀪𑀢𑀺, 𑀲𑀩𑁆𑀩𑀁 𑀧𑀼𑀘𑁆𑀙𑀺𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀬𑀲𑁆𑀲 𑀮𑀩𑁆𑀪𑀢𑀺, 𑀢𑀤𑁂𑀯 𑀤𑀲𑁆𑀲𑁂𑀦𑁆𑀢𑁄 𑀧𑀼𑀩𑁆𑀩𑀓𑀭𑀡𑀁 𑀧𑀬𑁄𑀕𑀲𑁆𑀲𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀲𑁆𑀲𑀚𑁆𑀚𑀦𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀁 𑀯𑀼𑀢𑁆𑀢𑀁 ‘‘𑀧𑀬𑁄𑀕𑀲𑁆𑀲 𑀓𑀢𑀫𑁂 𑀥𑀫𑁆𑀫𑀸’’𑀢𑀺𑀆𑀤𑀺, 𑀢𑀢𑁆𑀣 𑀯𑀼𑀘𑁆𑀘𑀢𑁂, 𑀧𑀼𑀩𑁆𑀩𑀓𑀭𑀡𑀁 𑀧𑀬𑁄𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀫𑀦𑀦𑁆𑀢𑀭𑀦𑀺𑀲𑁆𑀲𑀬𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀧𑀬𑁄𑀕𑀲𑁆𑀲 𑀳𑀺 𑀲𑀢𑁆𑀢𑀯𑀺𑀥𑀫𑁆𑀧𑀺 𑀧𑀼𑀩𑁆𑀩𑀓𑀭𑀡𑀁 𑀬𑀲𑁆𑀫𑀸 𑀢𑁂𑀦 𑀧𑀬𑁄𑀕𑁂𑀦 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀲𑁆𑀲 𑀧𑀼𑀩𑁆𑀩𑀓𑀭𑀡𑀲𑁆𑀲𑀢𑁆𑀣𑀸𑀬 𑀲𑁄 𑀧𑀬𑁄𑀕𑁄 𑀓𑀬𑀺𑀭𑀢𑀺, 𑀢𑀲𑁆𑀫𑀸 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀧𑀦𑁂𑀲 𑀉𑀤𑁆𑀤𑀺𑀝𑁆𑀞𑀥𑀫𑁆𑀫𑁂𑀲𑀼 𑀏𑀓𑀥𑀫𑁆𑀫𑀫𑁆𑀧𑀺 𑀦 𑀮𑀪𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀧𑀼𑀩𑁆𑀩𑀓𑀭𑀡𑀲𑁆𑀲 𑀲𑀬𑀁 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀬𑁄𑀕𑁂 𑀲𑀢𑀺 𑀧𑀼𑀩𑁆𑀩𑀓𑀭𑀡𑀲𑁆𑀲 𑀦𑀺𑀧𑁆𑀨𑀚𑁆𑀚𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀬𑁄𑀕𑁄 𑀧𑀼𑀩𑁆𑀩𑀓𑀭𑀡𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀁 𑀧𑀦 𑀮𑀪𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀩𑁆𑀩𑀓𑀭𑀡𑀁 𑀧𑀬𑁄𑀕𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀳𑀺 𑀧𑀼𑀩𑁆𑀩𑀓𑀭𑀡𑀲𑁆𑀲 𑀅𑀢𑁆𑀣𑀸𑀬 𑀲𑁄 𑀧𑀬𑁄𑀕𑁄 𑀓𑀬𑀺𑀭𑀢𑀺. 𑀲𑀳𑀚𑀸𑀢𑀧𑀘𑁆𑀘𑀬𑀁 𑀧𑀦 𑀫𑀸𑀢𑀺𑀓𑀸𑀧𑀮𑀺𑀩𑁄𑀥𑀸𑀦𑀺𑀲𑀁𑀲𑀲𑀗𑁆𑀔𑀸𑀢𑁂 𑀧𑀦𑁆𑀦𑀭𑀲 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀧𑀬𑁄𑀕𑀸𑀤𑀻𑀲𑀼 𑀏𑀓𑁄𑀧𑀺 𑀥𑀫𑁆𑀫𑁄 𑀦 𑀮𑀪𑀢𑀺, 𑀢𑁂 𑀏𑀯 𑀳𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀲𑀳 𑀓𑀣𑀺𑀦𑀢𑁆𑀣𑀸𑀭𑁂𑀦 𑀏𑀓𑀢𑁄 𑀦𑀺𑀧𑁆𑀨𑀚𑁆𑀚𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀦𑁆𑀦𑀭𑀲 𑀥𑀫𑁆𑀫𑀸 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀧𑀤𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀼𑀩𑁆𑀩𑀓𑀭𑀡𑀦𑀺𑀤𑀸𑀦𑀸𑀤𑀺𑀯𑀺𑀪𑀸𑀕𑀯𑀡𑁆𑀡𑀦𑀸

𑁪𑁦𑁫. 𑀧𑀼𑀩𑁆𑀩𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀦𑁆𑀢𑀺𑀆𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀉𑀢𑁆𑀢𑀸𑀦𑀫𑁂𑀯.

𑁪𑁦𑁬-𑁭. ‘‘𑀧𑀬𑁄𑀕𑁄 𑀓𑀺𑀁𑀦𑀺𑀤𑀸𑀦𑁄’’𑀢𑀺𑀆𑀤𑀻𑀲𑀼 𑀧𑀼𑀘𑁆𑀙𑀸𑀤𑁆𑀯𑀬𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀳𑁂𑀢𑀼𑀦𑀺𑀤𑀸𑀦𑁄 𑀧𑀘𑁆𑀘𑀬𑀦𑀺𑀤𑀸𑀦𑁄𑀢𑀺 𑀏𑀢𑁆𑀣 𑀙 𑀘𑀻𑀯𑀭𑀸𑀦𑀺 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀼𑀩𑁆𑀩𑀧𑀬𑁄𑀕𑀸𑀤𑀻𑀦𑀜𑁆𑀳𑀺 𑀲𑀩𑁆𑀩𑁂𑀲𑀁 𑀢𑀸𑀦𑀺𑀬𑁂𑀯 𑀳𑁂𑀢𑀼, 𑀢𑀸𑀦𑀺 𑀧𑀘𑁆𑀘𑀬𑁄. 𑀦 𑀳𑀺 𑀙𑀩𑁆𑀩𑀺𑀥𑁂 𑀘𑀻𑀯𑀭𑁂 𑀅𑀲𑀢𑀺 𑀧𑀬𑁄𑀕𑁄 𑀅𑀢𑁆𑀣𑀺, 𑀦 𑀧𑀼𑀩𑁆𑀩𑀓𑀭𑀡𑀸𑀤𑀻𑀦𑀺, 𑀢𑀲𑁆𑀫𑀸 ‘‘𑀧𑀬𑁄𑀕𑁄 𑀳𑁂𑀢𑀼𑀦𑀺𑀤𑀸𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁦𑁮. 𑀲𑀗𑁆𑀕𑀳𑀯𑀸𑀭𑁂 𑁋 𑀯𑀘𑀻𑀪𑁂𑀤𑁂𑀦𑀸𑀢𑀺 ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸, 𑀇𑀫𑀺𑀦𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦, 𑀇𑀫𑀺𑀦𑀸 𑀅𑀦𑁆𑀢𑀭𑀯𑀸𑀲𑀓𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺 𑀏𑀢𑁂𑀦 𑀯𑀘𑀻𑀪𑁂𑀤𑁂𑀦. 𑀓𑀢𑀺𑀫𑀽𑀮𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑁋 𑀓𑀺𑀭𑀺𑀬𑀸 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀤𑁆𑀥𑀸𑀭𑁄 𑀘𑁂𑀯 𑀅𑀥𑀺𑀝𑁆𑀞𑀸𑀦𑀜𑁆𑀘.

𑁪𑁧𑁧. 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀳𑁄𑀢𑀻𑀢𑀺 𑀅𑀓𑀧𑁆𑀧𑀺𑀬𑀤𑀼𑀲𑁆𑀲𑀁 𑀳𑁄𑀢𑀺. 𑀓𑀸𑀮𑀯𑀺𑀧𑀦𑁆𑀦𑀁 𑀦𑀸𑀫 𑀅𑀚𑁆𑀚 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀁 𑀲𑁆𑀯𑁂 𑀲𑀗𑁆𑀖𑁄 𑀓𑀣𑀺𑀦𑀢𑁆𑀣𑀸𑀭𑀓𑀲𑁆𑀲 𑀤𑁂𑀢𑀺. 𑀓𑀭𑀡𑀯𑀺𑀧𑀦𑁆𑀦𑀁 𑀦𑀸𑀫 𑀢𑀤𑀳𑁂𑀯 𑀙𑀺𑀦𑁆𑀤𑀺𑀢𑁆𑀯𑀸 𑀅𑀓𑀢𑀁.

𑀓𑀣𑀺𑀦𑀸𑀤𑀺𑀚𑀸𑀦𑀺𑀢𑀩𑁆𑀩𑀯𑀺𑀪𑀸𑀕𑀯𑀡𑁆𑀡𑀦𑀸

𑁪𑁧𑁨. 𑀓𑀣𑀺𑀦𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺𑀆𑀤𑀺𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑁂 𑁋 𑀢𑁂𑀲𑀜𑁆𑀜𑁂𑀯 𑀥𑀫𑁆𑀫𑀸𑀦𑀦𑁆𑀢𑀺 𑀬𑁂𑀲𑀼 𑀭𑀽𑀧𑀸𑀤𑀺𑀥𑀫𑁆𑀫𑁂𑀲𑀼 𑀲𑀢𑀺 𑀓𑀣𑀺𑀦𑀁 𑀦𑀸𑀫 𑀳𑁄𑀢𑀺, 𑀢𑁂𑀲𑀁 𑀲𑀫𑁄𑀥𑀸𑀦𑀁 𑀫𑀺𑀲𑁆𑀲𑀻𑀪𑀸𑀯𑁄. 𑀦𑀸𑀫𑀁 𑀦𑀸𑀫𑀓𑀫𑁆𑀫𑀦𑁆𑀢𑀺𑀆𑀤𑀺𑀦𑀸 𑀧𑀦 ‘‘𑀓𑀣𑀺𑀦’’𑀦𑁆𑀢𑀺 𑀇𑀤𑀁 𑀩𑀳𑀽𑀲𑀼 𑀥𑀫𑁆𑀫𑁂𑀲𑀼 𑀦𑀸𑀫𑀫𑀢𑁆𑀢𑀁, 𑀦 𑀧𑀭𑀫𑀢𑁆𑀣𑀢𑁄 𑀏𑀓𑁄 𑀥𑀫𑁆𑀫𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀘𑀢𑀼𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀻𑀢𑀺 ‘‘𑀦 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑁂𑀦𑀸’’𑀢𑀺𑀆𑀤𑀻𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀓𑀸𑀭𑀡𑁂𑀳𑀺. 𑀲𑀢𑁆𑀢𑀭𑀲𑀳𑀺 𑀆𑀓𑀸𑀭𑁂𑀳𑀻𑀢𑀺 ‘‘𑀅𑀳𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦’’𑀦𑁆𑀢𑀺𑀆𑀤𑀻𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀓𑀸𑀭𑀡𑁂𑀳𑀺. 𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀩𑁆𑀩𑀁 𑀓𑀣𑀺𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁.

𑁪𑁧𑁬. 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀺𑀭𑀼𑀚𑁆𑀛𑀫𑀸𑀦𑀸𑀧𑀺 𑀏𑀓𑀢𑁄 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀓𑀼𑀧𑁆𑀧𑀸𑀤𑀸 𑀦𑀸𑀦𑀸𑀦𑀺𑀭𑁄𑀥𑀸𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀸𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀲𑀩𑁆𑀩𑁂𑀧𑀺 𑀅𑀢𑁆𑀣𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀢𑁆𑀣𑀸𑀭𑁂 𑀳𑀺 𑀲𑀢𑀺 𑀉𑀤𑁆𑀥𑀸𑀭𑁄 𑀦𑀸𑀫. 𑀦𑀺𑀭𑀼𑀚𑁆𑀛𑀫𑀸𑀦𑀸 𑀧𑀦𑁂𑀢𑁆𑀣 𑀧𑀼𑀭𑀺𑀫𑀸 𑀤𑁆𑀯𑁂 𑀅𑀢𑁆𑀣𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀉𑀤𑁆𑀥𑀸𑀭𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺. 𑀅𑀢𑁆𑀣𑀸𑀭𑀲𑁆𑀲 𑀳𑀺 𑀦𑀺𑀭𑁄𑀥𑁄 𑀏𑀢𑁂𑀲𑀜𑁆𑀘 𑀉𑀤𑁆𑀥𑀸𑀭𑀪𑀸𑀯𑁄 𑀏𑀓𑀓𑁆𑀔𑀡𑁂 𑀳𑁄𑀢𑀺, 𑀇𑀢𑀭𑁂 𑀦𑀸𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑁂𑀲𑀼 𑀉𑀤𑁆𑀥𑀸𑀭𑀪𑀸𑀯𑀁 𑀧𑀢𑁆𑀢𑁂𑀲𑀼𑀧𑀺 𑀅𑀢𑁆𑀣𑀸𑀭𑁄 𑀢𑀺𑀝𑁆𑀞𑀢𑀺𑀬𑁂𑀯. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀓𑀣𑀺𑀦𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀜𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.