𑀉𑀧𑀸𑀮𑀺𑀧𑀜𑁆𑀘𑀓𑀁

𑀅𑀦𑀺𑀲𑁆𑀲𑀺𑀢𑀯𑀕𑁆𑀕𑀯𑀡𑁆𑀡𑀦𑀸

𑁪𑁧𑁭. 𑀉𑀧𑀸𑀮𑀺𑀧𑀜𑁆𑀳𑁂𑀲𑀼 𑀓𑀢𑀺𑀳𑀺 𑀦𑀼 𑀔𑁄 𑀪𑀦𑁆𑀢𑁂𑀢𑀺 𑀧𑀼𑀘𑁆𑀙𑀸𑀬 𑀅𑀬𑀁 𑀲𑀫𑁆𑀩𑀦𑁆𑀥𑁄. 𑀣𑁂𑀭𑁄 𑀓𑀺𑀭 𑀭𑀳𑁄𑀕𑀢𑁄 𑀲𑀩𑁆𑀩𑀸𑀦𑀺 𑀇𑀫𑀸𑀦𑀺 𑀧𑀜𑁆𑀘𑀓𑀸𑀦𑀺 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀪𑀕𑀯𑀦𑁆𑀢𑀁 𑀤𑀸𑀦𑀺 𑀧𑀼𑀘𑁆𑀙𑀺𑀢𑁆𑀯𑀸 𑀇𑀫𑁂𑀲𑀁 𑀦𑀺𑀲𑁆𑀲𑀸𑀬 𑀯𑀲𑀦𑀓𑀸𑀤𑀻𑀦𑀁 𑀅𑀢𑁆𑀣𑀸𑀬 𑀢𑀦𑁆𑀢𑀺𑀁 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀢𑀺𑀳𑀺 𑀦𑀼 𑀔𑁄 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀢𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑁂 𑀉𑀧𑁄𑀲𑀣𑀁 𑀦 𑀚𑀸𑀦𑀸𑀢𑀻𑀢𑀺 𑀦𑀯𑀯𑀺𑀥𑀁 𑀉𑀧𑁄𑀲𑀣𑀁 𑀦 𑀚𑀸𑀦𑀸𑀢𑀺. 𑀉𑀧𑁄𑀲𑀣𑀓𑀫𑁆𑀫𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀥𑀫𑁆𑀫𑁂𑀦𑀯𑀕𑁆𑀕𑀸𑀤𑀺𑀪𑁂𑀤𑀁 𑀘𑀢𑀼𑀩𑁆𑀩𑀺𑀥𑀁 𑀉𑀧𑁄𑀲𑀣𑀓𑀫𑁆𑀫𑀁 𑀦 𑀚𑀸𑀦𑀸𑀢𑀺. 𑀧𑀸𑀢𑀺𑀫𑁄𑀓𑁆𑀔𑀁 𑀦 𑀚𑀸𑀦𑀸𑀢𑀻𑀢𑀺 𑀤𑁆𑀯𑁂 𑀫𑀸𑀢𑀺𑀓𑀸 𑀦 𑀚𑀸𑀦𑀸𑀢𑀺. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀦 𑀚𑀸𑀦𑀸𑀢𑀻𑀢𑀺 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘𑀯𑀺𑀥𑀁 𑀪𑀺𑀓𑁆𑀔𑀼𑀦𑀻𑀦𑀁 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀦𑀯𑀯𑀺𑀥𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀦 𑀚𑀸𑀦𑀸𑀢𑀺.

𑀧𑀯𑀸𑀭𑀡𑀁 𑀦 𑀚𑀸𑀦𑀸𑀢𑀻𑀢𑀺 𑀦𑀯𑀯𑀺𑀥𑀁 𑀧𑀯𑀸𑀭𑀡𑀁 𑀦 𑀚𑀸𑀦𑀸𑀢𑀺. 𑀧𑀯𑀸𑀭𑀡𑀸𑀓𑀫𑁆𑀫𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀥𑀫𑁆𑀫𑁂𑀦𑀯𑀕𑁆𑀕𑀸𑀤𑀺𑀪𑁂𑀤𑀁 𑀘𑀢𑀼𑀩𑁆𑀩𑀺𑀥𑀁 𑀧𑀯𑀸𑀭𑀡𑀸𑀓𑀫𑁆𑀫𑀁 𑀦 𑀚𑀸𑀦𑀸𑀢𑀺.

𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀁 𑀆𑀧𑀢𑁆𑀢𑀺𑀜𑁆𑀘 𑀅𑀦𑀸𑀧𑀢𑁆𑀢𑀺𑀜𑁆𑀘 𑀦 𑀚𑀸𑀦𑀸𑀢𑀺.

𑀆𑀧𑀦𑁆𑀦𑁄 𑀓𑀫𑁆𑀫𑀓𑀢𑁄𑀢𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀢𑀧𑁆𑀧𑀘𑁆𑀘𑀬𑀸𑀯 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀕𑁆𑀕𑀯𑀡𑁆𑀡𑀦𑀸

𑁪𑁨𑁦. 𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀦𑁆𑀢𑀺 𑀅𑀬𑀁 𑀬𑀲𑁆𑀫𑀸 𑀅𑀦𑀼𑀮𑁄𑀫𑀯𑀢𑁆𑀢𑁂 𑀦 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀦𑀸𑀲𑁆𑀲 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁; 𑀲𑀭𑀚𑁆𑀚𑀼𑀓𑁄𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁪𑁨𑁧. 𑀲𑀘𑁂 𑀉𑀧𑀸𑀮𑀺 𑀲𑀗𑁆𑀖𑁄 𑀲𑀫𑀕𑁆𑀕𑀓𑀭𑀡𑀻𑀬𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀢𑀻𑀢𑀺 𑀲𑀘𑁂 𑀲𑀫𑀕𑁆𑀕𑁂𑀳𑀺 𑀓𑀭𑀡𑀻𑀬𑀸𑀦𑀺 𑀉𑀧𑁄𑀲𑀣𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀢𑀺, 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀻𑀲𑀼 𑀳𑀺 𑀞𑀺𑀢𑀸𑀲𑀼 𑀉𑀧𑀢𑁆𑀣𑀫𑁆𑀪𑁄 𑀦 𑀤𑀸𑀢𑀩𑁆𑀩𑁄. 𑀲𑀘𑁂 𑀳𑀺 𑀲𑀗𑁆𑀖𑁄 𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑀁 𑀯𑀸 𑀓𑀢𑁆𑀯𑀸 𑀉𑀧𑁄𑀲𑀣𑀧𑀯𑀸𑀭𑀡𑀁 𑀓𑀭𑁄𑀢𑀺, 𑀏𑀯𑀭𑀽𑀧𑀁 𑀲𑀫𑀕𑁆𑀕𑀓𑀭𑀡𑀻𑀬𑀁 𑀦𑀸𑀫 𑀓𑀫𑁆𑀫𑀁 𑀳𑁄𑀢𑀺. 𑀢𑀢𑁆𑀭 𑀘𑁂𑀢𑀺 𑀲𑀘𑁂 𑀢𑀸𑀤𑀺𑀲𑁂 𑀓𑀫𑁆𑀫𑁂 𑀪𑀺𑀓𑁆𑀔𑀼𑀦𑁄 𑀦𑀓𑁆𑀔𑀫𑀢𑀺, 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀫𑁆𑀧𑀺 𑀓𑀢𑁆𑀯𑀸 𑀢𑀣𑀸𑀭𑀽𑀧𑀸 𑀲𑀸𑀫𑀕𑁆𑀕𑀻 𑀉𑀧𑁂𑀢𑀩𑁆𑀩𑀸, 𑀏𑀯𑀁 𑀯𑀺𑀮𑁄𑀫𑀕𑁆𑀕𑀸𑀳𑁄 𑀦 𑀕𑀡𑁆𑀳𑀺𑀢𑀩𑁆𑀩𑁄. 𑀬𑀢𑁆𑀭 𑀧𑀦 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼 𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀺, 𑀢𑀢𑁆𑀣 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺, 𑀧𑀝𑀺𑀩𑀸𑀳𑀺𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀁.

𑀉𑀲𑁆𑀲𑀺𑀢𑀫𑀦𑁆𑀢𑀻 𑀘𑀸𑀢𑀺 𑀮𑁄𑀪𑀤𑁄𑀲𑀫𑁄𑀳𑀫𑀸𑀦𑀼𑀲𑁆𑀲𑀦𑁆𑀦𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀓𑀡𑁆𑀳𑀯𑀸𑀘𑁄 𑀅𑀦𑀢𑁆𑀣𑀓𑀤𑀻𑀧𑀦𑁄. 𑀦𑀺𑀲𑁆𑀲𑀺𑀢𑀚𑀧𑁆𑀧𑀻𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀉𑀲𑁆𑀲𑀤𑀬𑀼𑀢𑁆𑀢𑀁 𑀪𑀸𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺; 𑀅𑀣 𑀔𑁄 ‘‘𑀫𑀬𑀸 𑀲𑀤𑁆𑀥𑀺𑀁 𑀭𑀸𑀚𑀸 𑀏𑀯𑀁 𑀓𑀣𑁂𑀲𑀺, 𑀅𑀲𑀼𑀓𑀫𑀳𑀸𑀫𑀢𑁆𑀢𑁄 𑀏𑀯𑀁 𑀓𑀣𑁂𑀲𑀺, 𑀅𑀲𑀼𑀓𑁄 𑀦𑀸𑀫 𑀫𑀬𑁆𑀳𑀁 𑀆𑀘𑀭𑀺𑀬𑁄 𑀯𑀸 𑀉𑀧𑀚𑁆𑀛𑀸𑀬𑁄 𑀯𑀸 𑀢𑁂𑀧𑀺𑀝𑀓𑁄 𑀫𑀬𑀸 𑀲𑀤𑁆𑀥𑀺𑀁 𑀏𑀯𑀁 𑀓𑀣𑁂𑀲𑀻’’𑀢𑀺 𑀏𑀯𑀁 𑀅𑀜𑁆𑀜𑀁 𑀦𑀺𑀲𑁆𑀲𑀸𑀬 𑀚𑀧𑁆𑀧𑀢𑀺. 𑀦 𑀘 𑀪𑀸𑀲𑀸𑀦𑀼𑀲𑀦𑁆𑀥𑀺𑀓𑀼𑀲𑀮𑁄𑀢𑀺 𑀓𑀣𑀸𑀦𑀼𑀲𑀦𑁆𑀥𑀺𑀯𑀘𑀦𑁂 𑀘 𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀦𑁆𑀥𑀺𑀯𑀘𑀦𑁂 𑀘 𑀅𑀓𑀼𑀲𑀮𑁄 𑀳𑁄𑀢𑀺. 𑀦 𑀬𑀣𑀸𑀥𑀫𑁆𑀫𑁂 𑀬𑀣𑀸𑀯𑀺𑀦𑀬𑁂𑀢𑀺 𑀦 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀆𑀧𑀢𑁆𑀢𑀺𑀁 𑀲𑀸𑀭𑁂𑀢𑁆𑀯𑀸 𑀘𑁄𑀤𑁂𑀢𑀸 𑀳𑁄𑀢𑀺.

𑀉𑀲𑁆𑀲𑀸𑀤𑁂𑀢𑀸 𑀳𑁄𑀢𑀻𑀢𑀺 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀫𑀳𑀸𑀢𑁂𑀧𑀺𑀝𑀓𑁄 𑀧𑀭𑀫𑀥𑀫𑁆𑀫𑀓𑀣𑀺𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑀘𑁆𑀘𑀁 𑀉𑀲𑁆𑀲𑀸𑀤𑁂𑀢𑀺. 𑀤𑀼𑀢𑀺𑀬𑀧𑀤𑁂 ‘‘𑀆𑀧𑀢𑁆𑀢𑀺𑀁 𑀓𑀺𑀁 𑀲𑁄 𑀦 𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀏𑀓𑀘𑁆𑀘𑀁 𑀅𑀧𑀲𑀸𑀤𑁂𑀢𑀺. 𑀅𑀥𑀫𑁆𑀫𑀁 𑀕𑀡𑁆𑀳𑀸𑀢𑀻𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀧𑀓𑁆𑀔𑀁 𑀕𑀡𑁆𑀳𑀸𑀢𑀺. 𑀥𑀫𑁆𑀫𑀁 𑀧𑀝𑀺𑀩𑀸𑀳𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀧𑀓𑁆𑀔𑀁 𑀧𑀝𑀺𑀩𑀸𑀳𑀢𑀺. 𑀲𑀫𑁆𑀨𑀜𑁆𑀘 𑀩𑀳𑀼𑀁 𑀪𑀸𑀲𑀢𑀻𑀢𑀺 𑀩𑀳𑀼𑀁 𑀦𑀺𑀭𑀢𑁆𑀣𑀓𑀓𑀣𑀁 𑀓𑀣𑁂𑀢𑀺.

𑀧𑀲𑀬𑁆𑀳 𑀧𑀯𑀢𑁆𑀢𑀸 𑀳𑁄𑀢𑀻𑀢𑀺 𑀅𑀦𑀚𑁆𑀛𑀺𑀝𑁆𑀞𑁄 𑀪𑀸𑀭𑁂 𑀅𑀦𑀸𑀭𑁄𑀧𑀺𑀢𑁂 𑀓𑁂𑀯𑀮𑀁 𑀫𑀸𑀦𑀁 𑀦𑀺𑀲𑁆𑀲𑀸𑀬 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀦𑀥𑀺𑀓𑀸𑀭𑁂 𑀓𑀣𑁂𑀢𑀸 𑀳𑁄𑀢𑀺. 𑀅𑀦𑁄𑀓𑀸𑀲𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸𑀢𑀺 𑀑𑀓𑀸𑀲𑀓𑀫𑁆𑀫𑀁 𑀅𑀓𑀸𑀭𑁂𑀢𑁆𑀯𑀸 𑀧𑀯𑀢𑁆𑀢𑀸 𑀳𑁄𑀢𑀺. 𑀦 𑀬𑀣𑀸𑀤𑀺𑀝𑁆𑀞𑀺𑀬𑀸 𑀩𑁆𑀬𑀸𑀓𑀢𑀸 𑀳𑁄𑀢𑀻𑀢𑀺 𑀬𑀲𑁆𑀲 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺 𑀢𑀁 𑀧𑀼𑀭𑀓𑁆𑀔𑀢𑁆𑀯𑀸 𑀦 𑀩𑁆𑀬𑀸𑀓𑀢𑀸; 𑀮𑀤𑁆𑀥𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀬𑀣𑀸𑀪𑀼𑀘𑁆𑀘𑀁 𑀅𑀥𑀫𑁆𑀫𑀸𑀤𑀻𑀲𑀼 𑀥𑀫𑁆𑀫𑀸𑀤𑀺𑀮𑀤𑁆𑀥𑀺𑀓𑁄 𑀳𑀼𑀢𑁆𑀯𑀸 𑀓𑀣𑁂𑀢𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀯𑁄𑀳𑀸𑀭𑀯𑀕𑁆𑀕𑀯𑀡𑁆𑀡𑀦𑀸

𑁪𑁨𑁪. 𑀆𑀧𑀢𑁆𑀢𑀺𑀬𑀸 𑀧𑀬𑁄𑀕𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀅𑀬𑀁 𑀆𑀧𑀢𑁆𑀢𑀺 𑀓𑀸𑀬𑀧𑁆𑀧𑀬𑁄𑀕𑀸, 𑀅𑀬𑀁 𑀯𑀘𑀻𑀧𑀬𑁄𑀕𑀸’’𑀢𑀺 𑀦 𑀚𑀸𑀦𑀸𑀢𑀺. 𑀆𑀧𑀢𑁆𑀢𑀺𑀬𑀸 𑀯𑀽𑀧𑀲𑀫𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀅𑀬𑀁 𑀆𑀧𑀢𑁆𑀢𑀺 𑀤𑁂𑀲𑀦𑀸𑀬 𑀯𑀽𑀧𑀲𑀫𑀢𑀺, 𑀅𑀬𑀁 𑀯𑀼𑀝𑁆𑀞𑀸𑀦𑁂𑀦, 𑀅𑀬𑀁 𑀦𑁂𑀯 𑀤𑁂𑀲𑀦𑀸𑀬 𑀦 𑀯𑀼𑀝𑁆𑀞𑀸𑀦𑁂𑀦𑀸’’𑀢𑀺 𑀦 𑀚𑀸𑀦𑀸𑀢𑀺. 𑀆𑀧𑀢𑁆𑀢𑀺𑀬𑀸 𑀦 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑁄 𑀳𑁄𑀢𑀻𑀢𑀺 ‘‘𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀬𑀁 𑀆𑀧𑀢𑁆𑀢𑀻’’𑀢𑀺 𑀦 𑀚𑀸𑀦𑀸𑀢𑀺, 𑀤𑁄𑀲𑀸𑀦𑀼𑀭𑀽𑀧𑀁 𑀆𑀧𑀢𑁆𑀢𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀅𑀥𑀺𑀓𑀭𑀡𑀲𑀫𑀼𑀝𑁆𑀞𑀸𑀦𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀇𑀤𑀁 𑀅𑀥𑀺𑀓𑀭𑀡𑀁 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀲𑀫𑀼𑀝𑁆𑀞𑀸𑀢𑀺, 𑀇𑀤𑀁 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄, 𑀇𑀤𑀁 𑀧𑀜𑁆𑀘 𑀯𑀸 𑀲𑀢𑁆𑀢 𑀯𑀸 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂, 𑀇𑀤𑀁 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀺𑀘𑁆𑀘𑀸𑀦𑀺 𑀦𑀺𑀲𑁆𑀲𑀸𑀬 𑀲𑀫𑀼𑀝𑁆𑀞𑀸𑀢𑀻’’𑀢𑀺 𑀦 𑀚𑀸𑀦𑀸𑀢𑀺. 𑀧𑀬𑁄𑀕𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀇𑀤𑀁 𑀅𑀥𑀺𑀓𑀭𑀡𑀁 𑀤𑁆𑀯𑀸𑀤𑀲𑀫𑀽𑀮𑀧𑁆𑀧𑀬𑁄𑀕𑀁, 𑀇𑀤𑀁 𑀘𑀼𑀤𑁆𑀤𑀲𑀫𑀽𑀮𑀧𑁆𑀧𑀬𑁄𑀕𑀁, 𑀇𑀤𑀁 𑀙𑀫𑀽𑀮𑀧𑀬𑁄𑀕𑀁, 𑀇𑀤𑀁 𑀏𑀓𑀫𑀽𑀮𑀧𑀬𑁄𑀕’’𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀅𑀥𑀺𑀓𑀭𑀡𑀸𑀦𑀜𑁆𑀳𑀺 𑀬𑀣𑀸𑀲𑀓𑀁𑀫𑀽𑀮𑀫𑁂𑀯 𑀧𑀬𑁄𑀕𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀯𑀽𑀧𑀲𑀫𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀇𑀤𑀁 𑀅𑀥𑀺𑀓𑀭𑀡𑀁 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀯𑀽𑀧𑀲𑀫𑀢𑀺, 𑀇𑀤𑀁 𑀢𑀻𑀳𑀺, 𑀇𑀤𑀁 𑀘𑀢𑀽𑀳𑀺, 𑀇𑀤𑀁 𑀏𑀓𑁂𑀦 𑀲𑀫𑀣𑁂𑀦 𑀯𑀽𑀧𑀲𑀫𑀢𑀻’’𑀢𑀺 𑀦 𑀚𑀸𑀦𑀸𑀢𑀺. 𑀦 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑁄 𑀳𑁄𑀢𑀻𑀢𑀺 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀲𑀫𑀣𑀁 𑀧𑀸𑀧𑁂𑀢𑀼𑀁 𑀦 𑀚𑀸𑀦𑀸𑀢𑀺.

𑀓𑀫𑁆𑀫𑀁 𑀦 𑀚𑀸𑀦𑀸𑀢𑀻𑀢𑀺 𑀢𑀚𑁆𑀚𑀦𑀻𑀬𑀸𑀤𑀺 𑀲𑀢𑁆𑀢𑀯𑀺𑀥𑀁 𑀓𑀫𑁆𑀫𑀁 𑀦 𑀚𑀸𑀦𑀸𑀢𑀺. 𑀓𑀫𑁆𑀫𑀲𑁆𑀲 𑀓𑀭𑀡𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀇𑀤𑀁 𑀓𑀫𑁆𑀫𑀁 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀓𑀫𑁆𑀫𑀲𑁆𑀲 𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀇𑀤𑀁 𑀢𑀚𑁆𑀚𑀦𑀻𑀬𑀲𑁆𑀲 𑀯𑀢𑁆𑀣𑀼, 𑀇𑀤𑀁 𑀦𑀺𑀬𑀲𑁆𑀲𑀸𑀤𑀻𑀦’’𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀲𑀼 𑀓𑀫𑁆𑀫𑁂𑀲𑀼 𑀳𑁂𑀝𑁆𑀞𑀸 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀅𑀝𑁆𑀞𑀸𑀭𑀲𑀯𑀺𑀥𑀁 𑀢𑀺𑀯𑀺𑀥𑀲𑁆𑀲 𑀘 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀲𑁆𑀲 𑀢𑁂𑀘𑀢𑁆𑀢𑀸𑀮𑀻𑀲𑀯𑀺𑀥𑀁 𑀯𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀓𑀫𑁆𑀫𑀲𑁆𑀲 𑀯𑀽𑀧𑀲𑀫𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀬𑁄 𑀪𑀺𑀓𑁆𑀔𑀼 𑀯𑀢𑁆𑀢𑁂 𑀯𑀢𑁆𑀢𑀺𑀢𑁆𑀯𑀸 𑀬𑀸𑀘𑀢𑀺, 𑀢𑀲𑁆𑀲 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁, 𑀅𑀘𑁆𑀘𑀬𑁄 𑀤𑁂𑀲𑀸𑀧𑁂𑀢𑀩𑁆𑀩𑁄’’𑀢𑀺 𑀦 𑀚𑀸𑀦𑀸𑀢𑀺.

𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀻𑀢𑀺 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀺. 𑀦𑀺𑀤𑀸𑀦𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀧𑀜𑁆𑀜𑀢𑁆𑀢𑀁, 𑀇𑀤𑀁 𑀇𑀫𑀲𑁆𑀫𑀺’’𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀢𑀺𑀯𑀺𑀥𑀁 𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺. 𑀧𑀤𑀧𑀘𑁆𑀘𑀸𑀪𑀝𑁆𑀞𑀁 𑀦 𑀚𑀸𑀦𑀸𑀢𑀻𑀢𑀺 𑀲𑀫𑁆𑀫𑀼𑀔𑀸 𑀓𑀸𑀢𑀩𑁆𑀩𑀁 𑀧𑀤𑀁 𑀦 𑀚𑀸𑀦𑀸𑀢𑀺. ‘‘𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸 𑀩𑀼𑀤𑁆𑀥𑁄’’𑀢𑀺 𑀳𑁂𑀝𑁆𑀞𑀼𑀧𑀭𑀺𑀬𑀁 𑀓𑀢𑁆𑀯𑀸 𑀧𑀤𑀁 𑀬𑁄𑀚𑁂𑀢𑀺.

𑀅𑀓𑀼𑀲𑀮𑁄 𑀘 𑀳𑁄𑀢𑀺 𑀯𑀺𑀦𑀬𑁂𑀢𑀺 𑀯𑀺𑀦𑀬𑀧𑀸𑀴𑀺𑀬𑀜𑁆𑀘 𑀅𑀝𑁆𑀞𑀓𑀣𑀸𑀬𑀜𑁆𑀘 𑀅𑀓𑀼𑀲𑀮𑁄 𑀳𑁄𑀢𑀺.

𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻𑀢𑀺 𑀲𑀗𑁆𑀔𑁂𑀧𑀢𑁄 𑀳𑀺 𑀤𑀼𑀯𑀺𑀥𑀸 𑀜𑀢𑁆𑀢𑀺 𑁋 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀸 𑀘 𑀅𑀦𑀺𑀤𑁆𑀤𑀺𑀝𑁆𑀞𑀸 𑀘. 𑀢𑀢𑁆𑀣 𑀬𑀸 𑀏𑀯𑀁 𑀅𑀦𑀺𑀤𑁆𑀤𑀺𑀝𑁆𑀞𑀸, 𑀲𑀸 ‘‘𑀓𑀫𑁆𑀫𑀜𑀢𑁆𑀢𑀺’’ 𑀦𑀸𑀫 𑀳𑁄𑀢𑀺. 𑀬𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀲𑀸 ‘‘𑀓𑀫𑁆𑀫𑀧𑀸𑀤𑀜𑀢𑁆𑀢𑀺’’ 𑀦𑀸𑀫, 𑀢𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺. 𑀜𑀢𑁆𑀢𑀺𑀬𑀸 𑀓𑀭𑀡𑀁 𑀦 𑀚𑀸𑀦𑀸𑀢𑀻𑀢𑀺 𑀦𑀯𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀜𑀢𑁆𑀢𑀺𑀬𑀸 𑀓𑀭𑀡𑀁 𑀦 𑀚𑀸𑀦𑀸𑀢𑀺, 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀧𑀸𑀤𑀜𑀢𑁆𑀢𑀺𑀬𑀸. 𑀜𑀢𑁆𑀢𑀺𑀬𑀸 𑀅𑀦𑀼𑀲𑁆𑀲𑀸𑀯𑀦𑀦𑁆𑀢𑀺 ‘‘𑀇𑀫𑀺𑀲𑁆𑀲𑀸 𑀜𑀢𑁆𑀢𑀺𑀬𑀸 𑀏𑀓𑀸 𑀅𑀦𑀼𑀲𑁆𑀲𑀸𑀯𑀦𑀸, 𑀇𑀫𑀺𑀲𑁆𑀲𑀸 𑀢𑀺𑀲𑁆𑀲𑁄’’𑀢𑀺 𑀦 𑀚𑀸𑀦𑀸𑀢𑀺. 𑀜𑀢𑁆𑀢𑀺𑀬𑀸 𑀲𑀫𑀣𑀁 𑀦 𑀚𑀸𑀦𑀸𑀢𑀻𑀢𑀺 𑀬𑁆𑀯𑀸𑀬𑀁 𑀲𑀢𑀺𑀯𑀺𑀦𑀬𑁄, 𑀅𑀫𑀽𑀴𑁆𑀳𑀯𑀺𑀦𑀬𑁄, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸, 𑀢𑀺𑀡𑀯𑀢𑁆𑀣𑀸𑀭𑀓𑁄𑀢𑀺 𑀘𑀢𑀼𑀩𑁆𑀩𑀺𑀥𑁄 𑀲𑀫𑀣𑁄 𑀜𑀢𑁆𑀢𑀺𑀬𑀸 𑀯𑀺𑀦𑀸 𑀦 𑀳𑁄𑀢𑀺, 𑀢𑀁 𑀜𑀢𑁆𑀢𑀺𑀬𑀸 𑀲𑀫𑀣𑁄𑀢𑀺 𑀦 𑀚𑀸𑀦𑀸𑀢𑀺. 𑀜𑀢𑁆𑀢𑀺𑀬𑀸 𑀯𑀽𑀧𑀲𑀫𑀁 𑀦 𑀚𑀸𑀦𑀸𑀢𑀻𑀢𑀺 𑀬𑀁 𑀅𑀥𑀺𑀓𑀭𑀡𑀁 𑀇𑀫𑀺𑀦𑀸 𑀘𑀢𑀼𑀩𑁆𑀩𑀺𑀥𑁂𑀦 𑀜𑀢𑁆𑀢𑀺𑀲𑀫𑀣𑁂𑀦 𑀯𑀽𑀧𑀲𑀫𑀢𑀺, 𑀢𑀲𑁆𑀲 𑀢𑀁 𑀯𑀽𑀧𑀲𑀫𑀁 ‘‘𑀅𑀬𑀁 𑀜𑀢𑁆𑀢𑀺𑀬𑀸 𑀯𑀽𑀧𑀲𑀫𑁄 𑀓𑀢𑁄’’𑀢𑀺 𑀦 𑀚𑀸𑀦𑀸𑀢𑀺.

𑀲𑀼𑀢𑁆𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑀁 𑀦 𑀚𑀸𑀦𑀸𑀢𑀺. 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀦 𑀚𑀸𑀦𑀸𑀢𑀻𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂 𑀦 𑀚𑀸𑀦𑀸𑀢𑀺. 𑀯𑀺𑀦𑀬𑀁 𑀦 𑀚𑀸𑀦𑀸𑀢𑀻𑀢𑀺 𑀔𑀦𑁆𑀥𑀓𑀧𑀭𑀺𑀯𑀸𑀭𑀁 𑀦 𑀚𑀸𑀦𑀸𑀢𑀺. 𑀯𑀺𑀦𑀬𑀸𑀦𑀼𑀮𑁄𑀫𑀁 𑀦 𑀚𑀸𑀦𑀸𑀢𑀻𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂𑀬𑁂𑀯 𑀦 𑀚𑀸𑀦𑀸𑀢𑀺. 𑀦 𑀘 𑀞𑀸𑀦𑀸𑀞𑀸𑀦𑀓𑀼𑀲𑀮𑁄𑀢𑀺 𑀓𑀸𑀭𑀡𑀸𑀓𑀸𑀭𑀡𑀓𑀼𑀲𑀮𑁄 𑀦 𑀳𑁄𑀢𑀺.

𑀥𑀫𑁆𑀫𑀁 𑀦 𑀚𑀸𑀦𑀸𑀢𑀻𑀢𑀺 𑀞𑀧𑁂𑀢𑁆𑀯𑀸 𑀯𑀺𑀦𑀬𑀧𑀺𑀝𑀓𑀁 𑀅𑀯𑀲𑁂𑀲𑀁 𑀧𑀺𑀝𑀓𑀤𑁆𑀯𑀬𑀁 𑀦 𑀚𑀸𑀦𑀸𑀢𑀺. 𑀥𑀫𑁆𑀫𑀸𑀦𑀼𑀮𑁄𑀫𑀁 𑀦 𑀚𑀸𑀦𑀸𑀢𑀻𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂 𑀦 𑀚𑀸𑀦𑀸𑀢𑀺. 𑀯𑀺𑀦𑀬𑀁 𑀦 𑀚𑀸𑀦𑀸𑀢𑀻𑀢𑀺 𑀔𑀦𑁆𑀥𑀓𑀧𑀭𑀺𑀯𑀸𑀭𑀫𑁂𑀯 𑀦 𑀚𑀸𑀦𑀸𑀢𑀺. 𑀯𑀺𑀦𑀬𑀸𑀦𑀼𑀮𑁄𑀫𑀁 𑀦 𑀚𑀸𑀦𑀸𑀢𑀻𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂 𑀦 𑀚𑀸𑀦𑀸𑀢𑀺. 𑀉𑀪𑀢𑁄𑀯𑀺𑀪𑀗𑁆𑀕𑀸 𑀧𑀦𑁂𑀢𑁆𑀣 𑀅𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸𑀬𑀁 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁 𑁋 ‘‘𑀯𑀺𑀦𑀬𑀦𑁆𑀢𑀺 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀦 𑀚𑀸𑀦𑀸𑀢𑀻’’𑀢𑀺 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀘 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄 𑀳𑁄𑀢𑀻𑀢𑀺 𑀧𑀼𑀭𑁂𑀓𑀣𑀸𑀬 𑀘 𑀧𑀘𑁆𑀙𑀸𑀓𑀣𑀸𑀬 𑀘 𑀅𑀓𑀼𑀲𑀮𑁄 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀜𑁂𑀬𑁆𑀬𑀢𑁆𑀢𑀸 𑀧𑀼𑀩𑁆𑀩𑁂 𑀧𑀓𑀸𑀲𑀺𑀢𑀢𑁆𑀢𑀸 𑀘 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀦𑀺𑀲𑁆𑀲𑀺𑀢𑀯𑀕𑁆𑀕𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀕𑁆𑀕𑀯𑁄𑀳𑀸𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁪𑁨𑁫. 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀯𑀕𑁆𑀕𑁂 𑁋 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀸𑀢𑀺 𑀤𑀺𑀝𑁆𑀞𑀻𑀦𑀁 𑀆𑀯𑀺𑀓𑀫𑁆𑀫𑀸𑀦𑀺; 𑀮𑀤𑁆𑀥𑀺𑀧𑁆𑀧𑀓𑀸𑀲𑀦𑀸𑀦𑀺 𑀆𑀧𑀢𑁆𑀢𑀺𑀤𑁂𑀲𑀦𑀸𑀲𑀗𑁆𑀔𑀸𑀢𑀸𑀦𑀁 𑀯𑀺𑀦𑀬𑀓𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀦𑀸𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀺𑀁 𑀆𑀯𑀺 𑀓𑀭𑁄𑀢𑀻𑀢𑀺 𑀅𑀦𑀸𑀧𑀢𑁆𑀢𑀺𑀫𑁂𑀯 𑀆𑀧𑀢𑁆𑀢𑀻𑀢𑀺 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸𑀢𑀺 𑀕𑀭𑀼𑀓𑀸𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀺𑀁 𑀆𑀯𑀺𑀓𑀭𑁄𑀢𑀺; 𑀲𑀗𑁆𑀖𑀸𑀤𑀺𑀲𑁂𑀲𑀜𑁆𑀘 𑀧𑀸𑀭𑀸𑀚𑀺𑀓𑀜𑁆𑀘 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀤𑁂𑀲𑀺𑀢𑀸𑀬𑀸𑀢𑀺 𑀮𑀳𑀼𑀓𑀸𑀧𑀢𑁆𑀢𑀺𑀬𑀸𑀧𑀺 𑀤𑁂𑀲𑀺𑀢𑀸𑀬 𑀤𑀺𑀝𑁆𑀞𑀺𑀁 𑀆𑀯𑀺𑀓𑀭𑁄𑀢𑀺; 𑀤𑁂𑀲𑀺𑀢𑀁 𑀧𑀼𑀦 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄.

𑀘𑀢𑀽𑀳𑀺 𑀧𑀜𑁆𑀘𑀳𑀺 𑀤𑀺𑀝𑁆𑀞𑀺𑀦𑁆𑀢𑀺 𑀬𑀣𑀸 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀤𑀺𑀝𑁆𑀞𑀺 𑀆𑀯𑀺𑀓𑀢𑀸 𑀳𑁄𑀢𑀺, 𑀏𑀯𑀁 𑀆𑀯𑀺𑀓𑀭𑁄𑀢𑀺; 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀚𑀦𑀸 𑀏𑀓𑀢𑁄 𑀆𑀧𑀢𑁆𑀢𑀺𑀁 𑀤𑁂𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀦𑁄𑀫𑀸𑀦𑀲𑁂𑀦𑀸𑀢𑀺 𑀫𑀦𑀲𑀗𑁆𑀔𑀸𑀢𑁂𑀦 𑀫𑀸𑀦𑀲𑁂𑀦 𑀤𑀺𑀝𑁆𑀞𑀺𑀁 𑀆𑀯𑀺𑀓𑀭𑁄𑀢𑀺; 𑀯𑀘𑀻𑀪𑁂𑀤𑀁 𑀅𑀓𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄.

𑀦𑀸𑀦𑀸𑀲𑀁𑀯𑀸𑀲𑀓𑀲𑁆𑀲𑀸𑀢𑀺 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑀲𑁆𑀲 𑀯𑀸 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑀲𑁆𑀲 𑀯𑀸 𑀲𑀦𑁆𑀢𑀺𑀓𑁂 𑀤𑀺𑀝𑁆𑀞𑀺𑀁 𑀆𑀯𑀺𑀓𑀭𑁄𑀢𑀺; 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀲𑀻𑀫𑀸𑀬𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀲𑁆𑀲𑀸𑀧𑀺 𑀦𑀸𑀦𑀸𑀲𑀻𑀫𑀸𑀬 𑀞𑀺𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀯𑀺𑀓𑀭𑁄𑀢𑀺. 𑀫𑀸𑀴𑀓𑀲𑀻𑀫𑀸𑀬 𑀳𑀺 𑀞𑀺𑀢𑁂𑀦 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀺𑀢𑀲𑁆𑀲 𑀲𑀻𑀫𑀦𑁆𑀢𑀭𑀺𑀓𑀸𑀬 𑀯𑀸 𑀞𑀺𑀢𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀞𑀺𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀧𑀓𑀢𑀢𑁆𑀢𑀲𑁆𑀲𑀸𑀢𑀺 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀯𑀸, 𑀬𑀲𑁆𑀲 𑀯𑀸 𑀉𑀧𑁄𑀲𑀣𑀧𑀯𑀸𑀭𑀡𑀸 𑀞𑀧𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄.

𑁪𑁩𑁦. 𑀦𑀸𑀮𑀁 𑀑𑀓𑀸𑀲𑀓𑀫𑁆𑀫𑀁 𑀓𑀸𑀢𑀼𑀦𑁆𑀢𑀺 𑀦 𑀧𑀭𑀺𑀬𑀢𑁆𑀢𑀁 𑀓𑀸𑀢𑀼𑀁; 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀺 𑀅𑀧𑀓𑀢𑀢𑁆𑀢𑁄 𑀉𑀓𑁆𑀔𑀺𑀢𑁆𑀢𑀓𑁄 𑀘 𑀞𑀧𑀺𑀢𑀉𑀧𑁄𑀲𑀣𑀧𑀯𑀸𑀭𑀡𑁄 𑀘. 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄𑀢𑀺 𑀲𑀸𑀲𑀦𑀢𑁄 𑀘𑀸𑀯𑁂𑀢𑀼𑀓𑀸𑀫𑁄.

𑁪𑁩𑁨. 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸𑀢𑀺 𑀫𑀦𑁆𑀤𑀪𑀸𑀯𑁂𑀦 𑀫𑁄𑀫𑀽𑀳𑀪𑀸𑀯𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀧𑀺 𑀚𑀸𑀦𑀺𑀢𑀼𑀁 𑀅𑀲𑀫𑀢𑁆𑀣𑁄, 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀫𑁄𑀫𑀽𑀳𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄𑀬𑁂𑀯 𑀧𑀼𑀘𑁆𑀙𑀢𑀺 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬. 𑀧𑀸𑀧𑀺𑀘𑁆𑀙𑁄𑀢𑀺 ‘‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’’𑀢𑀺 𑀧𑀸𑀧𑀺𑀓𑀸𑀬 𑀇𑀘𑁆𑀙𑀸𑀬 𑀧𑀼𑀘𑁆𑀙𑀢𑀺. 𑀧𑀭𑀺𑀪𑀯𑀸𑀢𑀺 𑀧𑀭𑀺𑀪𑀯𑀁 𑀆𑀭𑁄𑀧𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀧𑀼𑀘𑁆𑀙𑀢𑀺. 𑀅𑀜𑁆𑀜𑀩𑁆𑀬𑀸𑀓𑀭𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀅𑀢𑁆𑀢𑀸𑀤𑀸𑀦𑀯𑀕𑁆𑀕𑁂 𑀘 𑀥𑀼𑀢𑀗𑁆𑀕𑀯𑀕𑁆𑀕𑁂 𑀘 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀼𑀲𑀸𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸

𑁪𑁪𑁪. 𑀫𑀼𑀲𑀸𑀯𑀸𑀤𑀯𑀕𑁆𑀕𑁂 𑁋 𑀧𑀸𑀭𑀸𑀚𑀺𑀓𑀁 𑀕𑀘𑁆𑀙𑀢𑀻𑀢𑀺 𑀧𑀸𑀭𑀸𑀚𑀺𑀓𑀕𑀸𑀫𑀻; 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀪𑀸𑀯𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀅𑀲𑀦𑁆𑀢𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀫𑀼𑀲𑀸𑀯𑀸𑀤𑁄 𑀧𑀸𑀭𑀸𑀚𑀺𑀓𑀕𑀸𑀫𑀻, 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀅𑀦𑀼𑀤𑁆𑀥𑀁𑀲𑀦𑀫𑀼𑀲𑀸𑀯𑀸𑀤𑁄 𑀲𑀗𑁆𑀖𑀸𑀤𑀺𑀲𑁂𑀲𑀕𑀸𑀫𑀻, ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀻’’𑀢𑀺𑀆𑀤𑀺𑀦𑀸 𑀧𑀭𑀺𑀬𑀸𑀬𑁂𑀦 𑀚𑀸𑀦𑀦𑁆𑀢𑀲𑁆𑀲 𑀯𑀼𑀢𑁆𑀢𑀫𑀼𑀲𑀸𑀯𑀸𑀤𑁄 𑀣𑀼𑀮𑁆𑀮𑀘𑁆𑀘𑀬𑀕𑀸𑀫𑀻, 𑀅𑀚𑀸𑀦𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀕𑀸𑀫𑀻, ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀆𑀕𑀢𑁄 𑀧𑀸𑀘𑀺𑀢𑁆𑀢𑀺𑀬𑀕𑀸𑀫𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀤𑀲𑁆𑀲𑀦𑁂𑀦𑀸𑀢𑀺 𑀯𑀺𑀦𑀬𑀥𑀭𑀲𑁆𑀲 𑀅𑀤𑀲𑁆𑀲𑀦𑁂𑀦. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂𑀲𑀼 𑀳𑀺 𑀓𑀼𑀓𑁆𑀓𑀼𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀯𑀺𑀦𑀬𑀥𑀭𑀁 𑀤𑀺𑀲𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀪𑀸𑀯𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀅𑀓𑀧𑁆𑀧𑀺𑀬𑀁 𑀧𑀳𑀸𑀬 𑀓𑀧𑁆𑀧𑀺𑀬𑀁 𑀓𑀭𑁂𑀬𑁆𑀬, 𑀢𑀁 𑀅𑀧𑀲𑁆𑀲𑀦𑁆𑀢𑁄 𑀧𑀦 𑀅𑀓𑀧𑁆𑀧𑀺𑀬𑀫𑁆𑀧𑀺 𑀓𑀧𑁆𑀧𑀺𑀬𑀦𑁆𑀢𑀺 𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺. 𑀏𑀯𑀁 𑀆𑀧𑀚𑁆𑀚𑀺𑀢𑀩𑁆𑀩𑀁 𑀆𑀧𑀢𑁆𑀢𑀺𑀁 𑀯𑀺𑀦𑀬𑀥𑀭𑀲𑁆𑀲 𑀤𑀲𑁆𑀲𑀦𑁂𑀦 𑀦𑀸𑀧𑀚𑁆𑀚𑀢𑀺, 𑀅𑀤𑀲𑁆𑀲𑀦𑁂𑀦𑁂𑀯 𑀆𑀧𑀚𑁆𑀚𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀤𑀲𑁆𑀲𑀦𑁂𑀦𑀸’’𑀢𑀺. 𑀅𑀲𑁆𑀲𑀯𑀦𑁂𑀦𑀸𑀢𑀺 𑀏𑀓𑀯𑀺𑀳𑀸𑀭𑁂𑀧𑀺 𑀯𑀲𑀦𑁆𑀢𑁄 𑀧𑀦 𑀯𑀺𑀦𑀬𑀥𑀭𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 𑀅𑀜𑁆𑀜𑁂𑀲𑀜𑁆𑀘 𑀯𑀼𑀘𑁆𑀘𑀫𑀸𑀦𑀁 𑀅𑀲𑀼𑀡𑀦𑁆𑀢𑁄 𑀆𑀧𑀚𑁆𑀚𑀢𑀺𑀬𑁂𑀯, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀲𑁆𑀲𑀯𑀦𑁂𑀦𑀸’’𑀢𑀺. 𑀧𑀲𑀼𑀢𑁆𑀢𑀓𑀢𑀸𑀢𑀺 𑀧𑀲𑀼𑀢𑁆𑀢𑀓𑀢𑀸𑀬. 𑀲𑀳𑀕𑀸𑀭𑀲𑁂𑀬𑁆𑀬𑀜𑁆𑀳𑀺 𑀧𑀲𑀼𑀢𑁆𑀢𑀓𑀪𑀸𑀯𑁂𑀦𑀧𑀺 𑀆𑀧𑀚𑁆𑀚𑀢𑀺. 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬 𑀆𑀧𑀚𑁆𑀚𑀦𑁆𑀢𑁄 𑀧𑀦 𑀢𑀣𑀸𑀲𑀜𑁆𑀜𑀻 𑀆𑀧𑀚𑁆𑀚𑀢𑀺. 𑀲𑀢𑀺𑀲𑀫𑁆𑀫𑁄𑀲𑀸 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀫𑀸𑀤𑀺𑀯𑀲𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀁 𑀆𑀧𑀚𑁆𑀚𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀫𑀼𑀲𑀸𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀦𑁄𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸

𑁪𑁫𑁦. 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑁂 𑁋 𑀅𑀮𑀸𑀪𑀸𑀬𑀸𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀮𑀸𑀪𑀢𑁆𑀣𑀸𑀬; 𑀬𑀣𑀸 𑀧𑀘𑁆𑀘𑀬𑁂 𑀦 𑀮𑀪𑀦𑁆𑀢𑀺, 𑀢𑀣𑀸 𑀧𑀭𑀺𑀲𑀓𑁆𑀓𑀢𑀺 𑀯𑀸𑀬𑀫𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀢𑁆𑀣𑀸𑀬𑀸𑀢𑀺 𑀅𑀦𑀢𑁆𑀣𑀁 𑀓𑀮𑀺𑀲𑀸𑀲𑀦𑀁 𑀆𑀭𑁄𑀧𑁂𑀦𑁆𑀢𑁄 𑀧𑀭𑀺𑀲𑀓𑁆𑀓𑀢𑀺. 𑀅𑀯𑀸𑀲𑀸𑀬𑀸𑀢𑀺 𑀅𑀯𑀸𑀲𑀢𑁆𑀣𑀸𑀬; 𑀬𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂 𑀯𑀲𑀦𑁆𑀢𑀺, 𑀢𑀢𑁄 𑀦𑀻𑀳𑀭𑀡𑀢𑁆𑀣𑀸𑀬. 𑀲𑀫𑁆𑀧𑀬𑁄𑀚𑁂𑀢𑀻𑀢𑀺 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑁂𑀯𑀦𑀢𑁆𑀣𑀸𑀬 𑀲𑀫𑁆𑀧𑀬𑁄𑀚𑁂𑀢𑀺.

𑁪𑁫𑁧. ‘‘𑀓𑀢𑀺𑀳𑀺 𑀦𑀼 𑀔𑁄 𑀪𑀦𑁆𑀢𑁂 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀲𑀢𑁆𑀢𑀦𑁆𑀦𑀁 𑀓𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀺.

𑁪𑁫𑁪. 𑀦 𑀲𑀸𑀓𑀘𑁆𑀙𑀸𑀢𑀩𑁆𑀩𑁄𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀺𑀪𑁂𑀤𑁄 𑀓𑀣𑀸𑀫𑀕𑁆𑀕𑁄 𑀦 𑀓𑀣𑁂𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀦 𑀯𑀺𑀲𑀁𑀯𑀸𑀤𑁂𑀢𑀺, 𑀢𑀣𑀸𑀭𑀽𑀧𑀲𑁆𑀲 𑀓𑀣𑀸𑀫𑀕𑁆𑀕𑀲𑁆𑀲 𑀲𑀸𑀫𑀻 𑀳𑀼𑀢𑁆𑀯𑀸 𑀓𑀣𑁂𑀢𑀺, 𑀦 𑀇𑀢𑀭𑁄; 𑀢𑀲𑁆𑀫𑀸 𑀧𑀞𑀫𑀧𑀜𑁆𑀘𑀓𑁂 ‘‘𑀦 𑀅𑀲𑁂𑀓𑁆𑀔𑁂𑀦𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀢𑀺𑀬𑀧𑀜𑁆𑀘𑀓𑁂 ‘‘𑀅𑀲𑁂𑀓𑁆𑀔𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀦 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄𑀢𑀺 𑀅𑀝𑁆𑀞𑀓𑀣𑀸𑀬 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀧𑀪𑁂𑀤𑀕𑀢𑀜𑀸𑀡𑀧𑁆𑀧𑀢𑁆𑀢𑁄 𑀦 𑀳𑁄𑀢𑀺. 𑀦 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄𑀢𑀺 𑀧𑀸𑀴𑀺𑀥𑀫𑁆𑀫𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀦 𑀳𑁄𑀢𑀺. 𑀦 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄𑀢𑀺 𑀯𑁄𑀳𑀸𑀭𑀦𑀺𑀭𑀼𑀢𑁆𑀢𑀺𑀬𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀦 𑀳𑁄𑀢𑀺. 𑀦 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄𑀢𑀺 𑀬𑀸𑀦𑀺 𑀢𑀸𑀦𑀺 𑀧𑀝𑀺𑀪𑀸𑀦𑀲𑀗𑁆𑀔𑀸𑀢𑀸𑀦𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀦𑀺 𑀜𑀸𑀡𑀸𑀦𑀺, 𑀢𑁂𑀲𑀼 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀦 𑀳𑁄𑀢𑀺. 𑀬𑀣𑀸𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀸𑀢𑀺 𑀘𑀢𑀼𑀦𑁆𑀦𑀁 𑀨𑀮𑀯𑀺𑀫𑀼𑀢𑁆𑀢𑀻𑀦𑀁 𑀯𑀲𑁂𑀦 𑀬𑀣𑀸𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀏𑀓𑀽𑀦𑀯𑀻𑀲𑀢𑀺𑀪𑁂𑀤𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀸 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀪𑀺𑀓𑁆𑀔𑀼𑀦𑁄𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀩𑁆𑀩𑀸𑀳𑀺𑀓𑀯𑀕𑁆𑀕𑀯𑀡𑁆𑀡𑀦𑀸

𑁪𑁫𑁫. 𑀉𑀩𑁆𑀩𑀸𑀳𑀺𑀓𑀯𑀕𑁆𑀕𑁂 𑁋 𑀦 𑀅𑀢𑁆𑀣𑀓𑀼𑀲𑀮𑁄𑀢𑀺 𑀦 𑀅𑀝𑁆𑀞𑀓𑀣𑀸𑀓𑀼𑀲𑀮𑁄; 𑀅𑀢𑁆𑀣𑀼𑀤𑁆𑀥𑀸𑀭𑁂 𑀙𑁂𑀓𑁄 𑀦 𑀳𑁄𑀢𑀺. 𑀦 𑀥𑀫𑁆𑀫𑀓𑀼𑀲𑀮𑁄𑀢𑀺 𑀆𑀘𑀭𑀺𑀬𑀫𑀼𑀔𑀢𑁄 𑀅𑀦𑀼𑀕𑁆𑀕𑀳𑀺𑀢𑀢𑁆𑀢𑀸 𑀧𑀸𑀴𑀺𑀬𑀁 𑀦 𑀓𑀼𑀲𑀮𑁄, 𑀦 𑀧𑀸𑀴𑀺𑀲𑀽𑀭𑁄. 𑀦 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁄𑀢𑀺 𑀪𑀸𑀲𑀦𑁆𑀢𑀭𑀯𑁄𑀳𑀸𑀭𑁂 𑀦 𑀓𑀼𑀲𑀮𑁄. 𑀦 𑀩𑁆𑀬𑀜𑁆𑀚𑀦𑀓𑀼𑀲𑀮𑁄𑀢𑀺 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀯𑀲𑁂𑀦 𑀧𑀭𑀺𑀫𑀡𑁆𑀟𑀮𑀩𑁆𑀬𑀜𑁆𑀚𑀦𑀸𑀭𑁄𑀧𑀦𑁂 𑀓𑀼𑀲𑀮𑁄 𑀦 𑀳𑁄𑀢𑀺; 𑀦 𑀅𑀓𑁆𑀔𑀭𑀧𑀭𑀺𑀘𑁆𑀙𑁂𑀤𑁂 𑀦𑀺𑀧𑀼𑀡𑁄𑀢𑀺 𑀅𑀢𑁆𑀣𑁄. 𑀦 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄𑀢𑀺 𑀅𑀢𑁆𑀣𑀧𑀼𑀩𑁆𑀩𑀸𑀧𑀭𑁂 𑀥𑀫𑁆𑀫𑀧𑀼𑀩𑁆𑀩𑀸𑀧𑀭𑁂 𑀦𑀺𑀭𑀼𑀢𑁆𑀢𑀺𑀧𑀼𑀩𑁆𑀩𑀸𑀧𑀭𑁂 𑀩𑁆𑀬𑀜𑁆𑀚𑀦𑀧𑀼𑀩𑁆𑀩𑀸𑀧𑀭𑁂 𑀧𑀼𑀭𑁂𑀓𑀣𑀸𑀧𑀘𑁆𑀙𑀸𑀓𑀣𑀸𑀲𑀼 𑀘 𑀦 𑀓𑀼𑀲𑀮𑁄 𑀳𑁄𑀢𑀺.

𑀓𑁄𑀥𑀦𑁄𑀢𑀺𑀆𑀤𑀻𑀦𑀺 𑀬𑀲𑁆𑀫𑀸 𑀓𑁄𑀥𑀸𑀤𑀻𑀳𑀺 𑀅𑀪𑀺𑀪𑀽𑀢𑁄 𑀓𑀸𑀭𑀡𑀸𑀓𑀸𑀭𑀡𑀁 𑀦 𑀚𑀸𑀦𑀸𑀢𑀺, 𑀯𑀺𑀦𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀸𑀦𑀺. 𑀧𑀲𑀸𑀭𑁂𑀢𑀸 𑀳𑁄𑀢𑀺 𑀦𑁄 𑀲𑀸𑀭𑁂𑀢𑀸𑀢𑀺 𑀫𑁄𑀳𑁂𑀢𑀸 𑀳𑁄𑀢𑀺, 𑀦 𑀲𑀢𑀺𑀉𑀧𑁆𑀧𑀸𑀤𑁂𑀢𑀸; 𑀘𑁄𑀤𑀓𑀘𑀼𑀤𑀺𑀢𑀓𑀸𑀦𑀁 𑀓𑀣𑀁 𑀫𑁄𑀳𑁂𑀢𑀺 𑀧𑀺𑀤𑀳𑀢𑀺 𑀦 𑀲𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀉𑀩𑁆𑀩𑀸𑀳𑀺𑀓𑀯𑀕𑁆𑀕𑁂 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀉𑀩𑁆𑀩𑀸𑀳𑀺𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀓𑀭𑀡𑀯𑀽𑀧𑀲𑀫𑀯𑀕𑁆𑀕𑀯𑀡𑁆𑀡𑀦𑀸

𑁪𑁫𑁭. 𑀅𑀥𑀺𑀓𑀭𑀡𑀯𑀽𑀧𑀲𑀫𑀯𑀕𑁆𑀕𑁂 𑁋 𑀧𑀼𑀕𑁆𑀕𑀮𑀕𑀭𑀼 𑀳𑁄𑀢𑀻𑀢𑀺 ‘‘𑀅𑀬𑀁 𑀫𑁂 𑀉𑀧𑀚𑁆𑀛𑀸𑀬𑁄, 𑀅𑀬𑀁 𑀫𑁂 𑀆𑀘𑀭𑀺𑀬𑁄’’𑀢𑀺𑀆𑀤𑀻𑀦𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀚𑀬𑀁 𑀆𑀓𑀗𑁆𑀔𑀫𑀸𑀦𑁄 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺 𑀤𑀻𑀧𑁂𑀢𑀺. 𑀲𑀗𑁆𑀖𑀕𑀭𑀼 𑀳𑁄𑀢𑀻𑀢𑀺 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀅𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁄 𑀲𑀗𑁆𑀖𑀕𑀭𑀼𑀓𑁄 𑀦𑀸𑀫 𑀳𑁄𑀢𑀺. 𑀘𑀻𑀯𑀭𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁄 𑀆𑀫𑀺𑀲𑀕𑀭𑀼𑀓𑁄 𑀦𑀸𑀫 𑀳𑁄𑀢𑀺, 𑀢𑀸𑀦𑀺 𑀅𑀕𑁆𑀕𑀳𑁂𑀢𑁆𑀯𑀸 𑀬𑀣𑀸𑀥𑀫𑁆𑀫𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁄 𑀲𑀤𑁆𑀥𑀫𑁆𑀫𑀕𑀭𑀼𑀓𑁄 𑀦𑀸𑀫 𑀳𑁄𑀢𑀺.

𑁪𑁫𑁮. 𑀧𑀜𑁆𑀘𑀳𑀼𑀧𑀸𑀮𑀺 𑀆𑀓𑀸𑀭𑁂𑀳𑀻𑀢𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺 𑁋 𑀓𑀫𑁆𑀫𑁂𑀦, 𑀉𑀤𑁆𑀤𑁂𑀲𑁂𑀦, 𑀯𑁄𑀳𑀭𑀦𑁆𑀢𑁄, 𑀅𑀦𑀼𑀲𑁆𑀲𑀸𑀯𑀦𑁂𑀦, 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺. 𑀏𑀢𑁆𑀣 𑀓𑀫𑁆𑀫𑁂𑀦𑀸𑀢𑀺 𑀅𑀧𑀮𑁄𑀓𑀦𑀸𑀤𑀻𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑁂𑀦 𑀓𑀫𑁆𑀫𑁂𑀦. 𑀉𑀤𑁆𑀤𑁂𑀲𑁂𑀦𑀸𑀢𑀺 𑀧𑀜𑁆𑀘𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀲𑀼 𑀅𑀜𑁆𑀜𑀢𑀭𑁂𑀦 𑀉𑀤𑁆𑀤𑁂𑀲𑁂𑀦. 𑀯𑁄𑀳𑀭𑀦𑁆𑀢𑁄𑀢𑀺 𑀓𑀣𑀬𑀦𑁆𑀢𑁄; 𑀢𑀸𑀳𑀺 𑀢𑀸𑀳𑀺 𑀉𑀧𑀧𑀢𑁆𑀢𑀻𑀳𑀺 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀻𑀦𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑁄. 𑀅𑀦𑀼𑀲𑁆𑀲𑀸𑀯𑀦𑁂𑀦𑀸𑀢𑀺 ‘‘𑀦𑀦𑀼 𑀢𑀼𑀫𑁆𑀳𑁂 𑀚𑀸𑀦𑀸𑀣 𑀫𑀬𑁆𑀳𑀁 𑀉𑀘𑁆𑀘𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀪𑀸𑀯𑀁 𑀩𑀳𑀼𑀲𑁆𑀲𑀼𑀢𑀪𑀸𑀯𑀜𑁆𑀘, 𑀫𑀸𑀤𑀺𑀲𑁄 𑀦𑀸𑀫 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼 𑀲𑀸𑀲𑀦𑀁 𑀕𑀸𑀳𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀼𑀁 𑀢𑀼𑀫𑁆𑀳𑀸𑀓𑀁 𑀬𑀼𑀢𑁆𑀢𑀁, 𑀓𑀺𑀁 𑀫𑀬𑁆𑀳𑀁 𑀅𑀯𑀻𑀘𑀺 𑀦𑀻𑀮𑀼𑀧𑁆𑀧𑀮𑀯𑀦𑀫𑀺𑀯 𑀲𑀻𑀢𑀮𑁄, 𑀓𑀺𑀫𑀳𑀁 𑀅𑀧𑀸𑀬𑀢𑁄 𑀦 𑀪𑀸𑀬𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀡𑁆𑀡𑀫𑀽𑀮𑁂 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑁂𑀦. 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺 𑀏𑀯𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑁂 𑀓𑀢𑁆𑀯𑀸 ‘‘𑀕𑀡𑁆𑀳𑀣 𑀇𑀫𑀁 𑀲𑀮𑀸𑀓’’𑀦𑁆𑀢𑀺 𑀲𑀮𑀸𑀓𑀕𑁆𑀕𑀸𑀳𑁂𑀦.

𑀏𑀢𑁆𑀣 𑀘 𑀓𑀫𑁆𑀫𑀫𑁂𑀯 𑀉𑀤𑁆𑀤𑁂𑀲𑁄 𑀯𑀸 𑀧𑀫𑀸𑀡𑀁, 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸 𑀧𑀦 𑀧𑀼𑀩𑁆𑀩𑀪𑀸𑀕𑀸. 𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀤𑀻𑀧𑀦𑀯𑀲𑁂𑀦 𑀳𑀺 𑀯𑁄𑀳𑀭𑀦𑁆𑀢𑁂 𑀢𑀢𑁆𑀣 𑀭𑀼𑀘𑀺𑀚𑀦𑀦𑀢𑁆𑀣𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀲𑀮𑀸𑀓𑀸𑀬 𑀕𑀸𑀳𑀺𑀢𑀸𑀬𑀧𑀺 𑀅𑀪𑀺𑀦𑁆𑀦𑁄𑀯 𑀳𑁄𑀢𑀺 𑀲𑀗𑁆𑀖𑁄. 𑀬𑀤𑀸 𑀧𑀦 𑀏𑀯𑀁 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑁂 𑀯𑀸 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀆𑀯𑁂𑀡𑀺𑀓𑀁 𑀓𑀫𑁆𑀫𑀁 𑀯𑀸 𑀉𑀤𑁆𑀤𑁂𑀲𑀁 𑀯𑀸 𑀓𑀭𑁄𑀢𑀺, 𑀢𑀤𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀇𑀢𑀺 𑀬𑀁 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 𑀅𑀯𑁄𑀘𑀼𑀫𑁆𑀳𑀸 ‘‘𑀏𑀯𑀁 𑀅𑀝𑁆𑀞𑀸𑀭𑀲𑀲𑀼 𑀯𑀢𑁆𑀣𑀽𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀯𑀢𑁆𑀣𑀼𑀁 𑀤𑀻𑀧𑁂𑀢𑁆𑀯𑀸 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 ‘𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀯𑀺𑀲𑀼𑀁 𑀲𑀗𑁆𑀖𑀓𑀫𑁆𑀫𑁂 𑀓𑀢𑁂 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀺. 𑀧𑀭𑀺𑀯𑀸𑀭𑁂 𑀧𑀦 ‘𑀧𑀜𑁆𑀘𑀳𑀺, 𑀉𑀧𑀸𑀮𑀺, 𑀆𑀓𑀸𑀭𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀻’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀇𑀫𑀺𑀦𑀸 𑀇𑀥 𑀯𑀼𑀢𑁆𑀢𑁂𑀦 𑀲𑀗𑁆𑀖𑀪𑁂𑀤𑀮𑀓𑁆𑀔𑀡𑁂𑀦 𑀅𑀢𑁆𑀣𑀢𑁄 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺. 𑀢𑀁 𑀧𑀦𑀲𑁆𑀲 𑀦𑀸𑀦𑀸𑀓𑀭𑀡𑀸𑀪𑀸𑀯𑀁 𑀢𑀢𑁆𑀣𑁂𑀯 𑀧𑀓𑀸𑀲𑀬𑀺𑀲𑁆𑀲𑀸𑀫𑀸’’𑀢𑀺, 𑀲𑁆𑀯𑀸𑀬𑀁 𑀧𑀓𑀸𑀲𑀺𑀢𑁄 𑀳𑁄𑀢𑀺.

𑀧𑀜𑁆𑀜𑀢𑁆𑀢𑁂𑀢𑀦𑁆𑀢𑀺 𑀧𑀜𑁆𑀜𑀢𑁆𑀢𑀁 𑀏𑀢𑀁. 𑀓𑁆𑀯 𑀧𑀜𑁆𑀜𑀢𑁆𑀢𑀁? 𑀯𑀢𑁆𑀢𑀓𑁆𑀔𑀦𑁆𑀥𑀓𑁂. 𑀢𑀢𑁆𑀭 𑀳𑀺 𑀘𑀼𑀤𑁆𑀤𑀲 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺. 𑀢𑁂𑀦𑀸𑀳 𑁋 ‘‘𑀧𑀜𑁆𑀜𑀢𑁆𑀢𑁂𑀢𑀁, 𑀉𑀧𑀸𑀮𑀺, 𑀫𑀬𑀸 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀦𑁆𑀢𑀼𑀓𑀯𑀢𑁆𑀢’’𑀦𑁆𑀢𑀺𑀆𑀤𑀺. 𑀏𑀯𑀫𑁆𑀧𑀺 𑀔𑁄 𑀉𑀧𑀸𑀮𑀺 𑀲𑀗𑁆𑀖𑀭𑀸𑀚𑀺 𑀳𑁄𑀢𑀺, 𑀦𑁄 𑀘 𑀲𑀗𑁆𑀖𑀪𑁂𑀤𑁄𑀢𑀺 𑀏𑀢𑁆𑀢𑀸𑀯𑀢𑀸 𑀳𑀺 𑀲𑀗𑁆𑀖𑀭𑀸𑀚𑀺𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀢𑀸𑀯 𑀲𑀗𑁆𑀖𑀪𑁂𑀤𑁄; 𑀅𑀦𑀼𑀧𑀼𑀩𑁆𑀩𑁂𑀦 𑀧𑀦 𑀅𑀬𑀁 𑀲𑀗𑁆𑀖𑀭𑀸𑀚𑀺 𑀯𑀟𑁆𑀠𑀫𑀸𑀦𑀸 𑀲𑀗𑁆𑀖𑀪𑁂𑀤𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀭𑀢𑁆𑀢𑀦𑁆𑀢𑀺 𑀭𑀢𑁆𑀢𑀺𑀧𑀭𑀺𑀫𑀸𑀡𑀸𑀦𑀼𑀭𑀽𑀧𑀁; 𑀬𑀣𑀸𑀣𑁂𑀭𑀦𑁆𑀢𑀺 𑀅𑀢𑁆𑀣𑁄. 𑀆𑀯𑁂𑀦𑀺𑀪𑀸𑀯𑀁 𑀓𑀭𑀺𑀢𑁆𑀯𑀸𑀢𑀺 𑀯𑀺𑀲𑀼𑀁 𑀯𑀯𑀢𑁆𑀣𑀸𑀦𑀁 𑀓𑀭𑀺𑀢𑁆𑀯𑀸. 𑀓𑀫𑁆𑀫𑀸𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀻𑀢𑀺 𑀅𑀧𑀭𑀸𑀧𑀭𑀁 𑀲𑀗𑁆𑀖𑀓𑀫𑁆𑀫𑀁 𑀉𑀧𑀸𑀤𑀸𑀬 𑀔𑀼𑀤𑁆𑀤𑀓𑀸𑀦𑀺 𑀘𑁂𑀯 𑀫𑀳𑀦𑁆𑀢𑀸𑀦𑀺 𑀘 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣𑀸𑀧𑀺 𑀅𑀥𑀺𑀓𑀭𑀡𑀯𑀽𑀧𑀲𑀫𑀯𑀕𑁆𑀕𑁂 𑀉𑀢𑁆𑀢𑀸𑀦𑀫𑁂𑀯.

𑀲𑀗𑁆𑀖𑀪𑁂𑀤𑀓𑀯𑀕𑁆𑀕𑀤𑁆𑀯𑀬𑀯𑀡𑁆𑀡𑀦𑀸

𑁪𑁫𑁯. 𑀲𑀗𑁆𑀖𑀪𑁂𑀤𑀯𑀕𑁆𑀕𑀤𑁆𑀯𑀬𑁂 𑁋 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁 𑀓𑀫𑁆𑀫𑁂𑀦𑀸𑀢𑀺 𑀢𑁂𑀲𑀼 𑀅𑀥𑀫𑁆𑀫𑀸𑀤𑀻𑀲𑀼 𑀅𑀥𑀫𑁆𑀫𑀸𑀤𑀬𑁄 𑀏𑀢𑁂𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑁄𑀯 𑀳𑀼𑀢𑁆𑀯𑀸 𑀢𑀁 𑀤𑀺𑀝𑁆𑀞𑀺𑀁 𑀯𑀺𑀦𑀺𑀥𑀸𑀬 𑀢𑁂 𑀥𑀫𑁆𑀫𑀸𑀤𑀺𑀯𑀲𑁂𑀦 𑀤𑀻𑀧𑁂𑀢𑁆𑀯𑀸 𑀯𑀺𑀲𑀼𑀁 𑀓𑀫𑁆𑀫𑀁 𑀓𑀭𑁄𑀢𑀺. 𑀇𑀢𑀺 𑀬𑀁 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑁂𑀦 𑀏𑀯𑀁 𑀓𑀢𑁂𑀦 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁 𑀓𑀫𑁆𑀫𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, ‘‘𑀇𑀫𑁂𑀳𑀺 𑀔𑁄 𑀉𑀧𑀸𑀮𑀺 𑀧𑀜𑁆𑀘𑀳𑀗𑁆𑀕𑁂𑀳𑀻’’𑀢𑀺 𑀅𑀬𑀫𑁂𑀓𑀲𑁆𑀫𑀺𑀁 𑀧𑀜𑁆𑀘𑀓𑁂 𑀅𑀢𑁆𑀣𑀬𑁄𑀚𑀦𑀸. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀧𑀜𑁆𑀘𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀣𑀸𑀧𑀺 𑀘 𑀯𑁄𑀳𑀸𑀭𑀸𑀤𑀺 𑀅𑀗𑁆𑀕𑀢𑁆𑀢𑀬𑀁 𑀧𑀼𑀩𑁆𑀩𑀪𑀸𑀕𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀓𑀫𑁆𑀫𑀼𑀤𑁆𑀤𑁂𑀲𑀯𑀲𑁂𑀦 𑀧𑀦 𑀅𑀢𑁂𑀓𑀺𑀘𑁆𑀙𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀦 𑀳𑁂𑀢𑁆𑀣 𑀓𑀺𑀜𑁆𑀘𑀺 𑀅𑀢𑁆𑀣𑀺 𑀬𑀁 𑀧𑀼𑀩𑁆𑀩𑁂 𑀅𑀯𑀼𑀢𑁆𑀢𑀦𑀬𑀁.

𑀆𑀯𑀸𑀲𑀺𑀓𑀯𑀕𑁆𑀕𑀯𑀡𑁆𑀡𑀦𑀸

𑁪𑁬𑁧. 𑀆𑀯𑀸𑀲𑀺𑀓𑀯𑀕𑁆𑀕𑁂 𑁋 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀬𑀣𑀸 𑀆𑀳𑀭𑀺𑀢𑁆𑀯𑀸 𑀞𑀧𑀺𑀢𑁄.

𑁪𑁬𑁨. 𑀯𑀺𑀦𑀬𑀩𑁆𑀬𑀸𑀓𑀭𑀡𑀸𑀢𑀺 𑀯𑀺𑀦𑀬𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀦𑀸. 𑀧𑀭𑀺𑀡𑀸𑀫𑁂𑀢𑀻𑀢𑀺 𑀦𑀺𑀬𑀸𑀫𑁂𑀢𑀺 𑀤𑀻𑀧𑁂𑀢𑀺 𑀓𑀣𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀓𑀣𑀺𑀦𑀢𑁆𑀣𑀸𑀭𑀯𑀕𑁆𑀕𑀯𑀡𑁆𑀡𑀦𑀸

𑁪𑁬𑁭. 𑀓𑀣𑀺𑀦𑀢𑁆𑀣𑀸𑀭𑀯𑀕𑁆𑀕𑁂 𑁋 𑀑𑀢𑀫𑀲𑀺𑀓𑁄𑀢𑀺 𑀅𑀦𑁆𑀥𑀓𑀸𑀭𑀕𑀢𑁄; 𑀢𑀜𑁆𑀳𑀺 𑀯𑀦𑁆𑀤𑀦𑁆𑀢𑀲𑁆𑀲 𑀫𑀜𑁆𑀘𑀧𑀸𑀤𑀸𑀤𑀻𑀲𑀼𑀧𑀺 𑀦𑀮𑀸𑀝𑀁 𑀧𑀝𑀺𑀳𑀜𑁆𑀜𑁂𑀬𑁆𑀬. 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑁄𑀢𑀺 𑀓𑀺𑀘𑁆𑀘𑀬𑀧𑀲𑀼𑀢𑀢𑁆𑀢𑀸 𑀯𑀦𑁆𑀤𑀦𑀁 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑁄. 𑀲𑀼𑀢𑁆𑀢𑁄𑀢𑀺 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁄. 𑀏𑀓𑀸𑀯𑀢𑁆𑀢𑁄𑀢𑀺 𑀏𑀓𑀢𑁄 𑀆𑀯𑀢𑁆𑀢𑁄 𑀲𑀧𑀢𑁆𑀢𑀧𑀓𑁆𑀔𑁂 𑀞𑀺𑀢𑁄 𑀯𑁂𑀭𑀻 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁄 𑀯𑀼𑀘𑁆𑀘𑀢𑀺; 𑀅𑀬𑀁 𑀅𑀯𑀦𑁆𑀤𑀺𑀬𑁄. 𑀅𑀬𑀜𑁆𑀳𑀺 𑀯𑀦𑁆𑀤𑀺𑀬𑀫𑀸𑀦𑁄 𑀧𑀸𑀤𑁂𑀦𑀧𑀺 𑀧𑀳𑀭𑁂𑀬𑁆𑀬. 𑀅𑀜𑁆𑀜𑀯𑀺𑀳𑀺𑀢𑁄𑀢𑀺 𑀅𑀜𑁆𑀜𑀁 𑀘𑀺𑀦𑁆𑀢𑀬𑀫𑀸𑀦𑁄.

𑀔𑀸𑀤𑀦𑁆𑀢𑁄𑀢𑀺 𑀧𑀺𑀝𑁆𑀞𑀔𑀚𑁆𑀚𑀓𑀸𑀤𑀻𑀦𑀺 𑀔𑀸𑀤𑀦𑁆𑀢𑁄. 𑀉𑀘𑁆𑀘𑀸𑀭𑀜𑁆𑀘 𑀧𑀲𑁆𑀲𑀸𑀯𑀜𑁆𑀘 𑀓𑀭𑁄𑀦𑁆𑀢𑁄 𑀅𑀦𑁄𑀓𑀸𑀲𑀕𑀢𑀢𑁆𑀢𑀸 𑀅𑀯𑀦𑁆𑀤𑀺𑀬𑁄. 𑀉𑀓𑁆𑀔𑀺𑀢𑁆𑀢𑀓𑁄𑀢𑀺 𑀢𑀺𑀯𑀺𑀥𑁂𑀦𑀧𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑀓𑁄 𑀅𑀯𑀦𑁆𑀤𑀺𑀬𑁄. 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑀸 𑀧𑀦 𑀘𑀢𑁆𑀢𑀸𑀭𑁄 𑀯𑀦𑁆𑀤𑀺𑀢𑀩𑁆𑀩𑀸. 𑀉𑀧𑁄𑀲𑀣𑀧𑀯𑀸𑀭𑀡𑀸𑀧𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀮𑀩𑁆𑀪𑀦𑁆𑀢𑀺. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀘 𑀯𑀼𑀢𑁆𑀢𑁂𑀲𑀼 𑀅𑀯𑀦𑁆𑀤𑀺𑀬𑁂𑀲𑀼 𑀦𑀕𑁆𑀕𑀜𑁆𑀘 𑀉𑀓𑁆𑀔𑀺𑀢𑁆𑀢𑀓𑀜𑁆𑀘 𑀯𑀦𑁆𑀤𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺. 𑀇𑀢𑀭𑁂𑀲𑀁 𑀧𑀦 𑀅𑀲𑀸𑀭𑀼𑀧𑁆𑀧𑀝𑁆𑀞𑁂𑀦 𑀘 𑀅𑀦𑁆𑀢𑀭𑀸 𑀯𑀼𑀢𑁆𑀢𑀓𑀸𑀭𑀡𑁂𑀦 𑀘 𑀯𑀦𑁆𑀤𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀇𑀢𑁄 𑀧𑀭𑀁 𑀧𑀘𑁆𑀙𑀸𑀉𑀧𑀲𑀫𑁆𑀧𑀦𑁆𑀦𑀸𑀤𑀬𑁄 𑀤𑀲𑀧𑀺 𑀆𑀧𑀢𑁆𑀢𑀺𑀯𑀢𑁆𑀣𑀼𑀪𑀸𑀯𑁂𑀦𑁂𑀯 𑀅𑀯𑀦𑁆𑀤𑀺𑀬𑀸. 𑀢𑁂 𑀯𑀦𑁆𑀤𑀦𑁆𑀢𑀲𑁆𑀲 𑀳𑀺 𑀦𑀺𑀬𑀫𑁂𑀦𑁂𑀯 𑀆𑀧𑀢𑁆𑀢𑀺. 𑀇𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀧𑀜𑁆𑀘𑀓𑁂𑀲𑀼 𑀢𑁂𑀭𑀲 𑀚𑀦𑁂 𑀯𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀤𑁆𑀯𑀸𑀤𑀲𑀦𑁆𑀦𑀁 𑀯𑀦𑁆𑀤𑀦𑀸𑀬 𑀆𑀧𑀢𑁆𑀢𑀺.

𑁪𑁬𑁮. 𑀆𑀘𑀭𑀺𑀬𑁄 𑀯𑀦𑁆𑀤𑀺𑀬𑁄𑀢𑀺 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑁄 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑁄 𑀦𑀺𑀲𑁆𑀲𑀬𑀸𑀘𑀭𑀺𑀬𑁄 𑀉𑀤𑁆𑀤𑁂𑀲𑀸𑀘𑀭𑀺𑀬𑁄 𑀑𑀯𑀸𑀤𑀸𑀘𑀭𑀺𑀬𑁄𑀢𑀺 𑀅𑀬𑀁 𑀧𑀜𑁆𑀘𑀯𑀺𑀥𑁄𑀧𑀺 𑀆𑀘𑀭𑀺𑀬𑁄 𑀯𑀦𑁆𑀤𑀺𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀓𑀣𑀺𑀦𑀢𑁆𑀣𑀸𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀉𑀧𑀸𑀮𑀺𑀧𑀜𑁆𑀘𑀓𑀯𑀡𑁆𑀡𑀦𑀸.