𑀅𑀥𑀺𑀓𑀭𑀡𑀪𑁂𑀤𑀁

𑀉𑀓𑁆𑀓𑁄𑀝𑀦𑀪𑁂𑀤𑀸𑀤𑀺𑀯𑀡𑁆𑀡𑀦𑀸

𑁩𑁪𑁦. 𑀅𑀥𑀺𑀓𑀭𑀡𑀪𑁂𑀤𑁂 𑀇𑀫𑁂 𑀤𑀲 𑀉𑀓𑁆𑀓𑁄𑀝𑀸𑀢𑀺 𑀅𑀥𑀺𑀓𑀭𑀡𑀸𑀦𑀁 𑀉𑀓𑁆𑀓𑁄𑀝𑁂𑀢𑁆𑀯𑀸 𑀧𑀼𑀦 𑀅𑀥𑀺𑀓𑀭𑀡𑀉𑀓𑁆𑀓𑁄𑀝𑁂𑀦 𑀲𑀫𑀣𑀸𑀦𑀁 𑀉𑀓𑁆𑀓𑁄𑀝𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀓𑀢𑀺 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀤𑁆𑀯𑁂 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀻𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀜𑁆𑀘 𑀬𑁂𑀪𑀼𑀬𑁆𑀬𑀲𑀺𑀓𑀜𑁆𑀘 𑀇𑀫𑁂 𑀤𑁆𑀯𑁂 𑀉𑀓𑁆𑀓𑁄𑀝𑁂𑀢𑀺, 𑀧𑀝𑀺𑀲𑁂𑀥𑁂𑀢𑀺; 𑀧𑀝𑀺𑀓𑁆𑀓𑁄𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀘𑀢𑁆𑀢𑀸𑀭𑁄𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀁, 𑀲𑀢𑀺𑀯𑀺𑀦𑀬𑀁, 𑀅𑀫𑀽𑀴𑁆𑀳𑀯𑀺𑀦𑀬𑀁, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀺. 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀢𑀬𑁄𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀁, 𑀧𑀝𑀺𑀜𑁆𑀜𑀸𑀢𑀓𑀭𑀡𑀁, 𑀢𑀺𑀡𑀯𑀢𑁆𑀣𑀸𑀭𑀓𑀦𑁆𑀢𑀺 𑀇𑀫𑁂 𑀢𑀬𑁄 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀺. 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀏𑀓𑀦𑁆𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀁 𑀇𑀫𑀁 𑀏𑀓𑀁 𑀲𑀫𑀣𑀁 𑀉𑀓𑁆𑀓𑁄𑀝𑁂𑀢𑀺.

𑁩𑁪𑁧. 𑀓𑀢𑀺 𑀉𑀓𑁆𑀓𑁄𑀝𑀸𑀢𑀺𑀆𑀤𑀺𑀧𑀼𑀘𑁆𑀙𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑁂 𑀧𑀦 𑀤𑁆𑀯𑀸𑀤𑀲𑀲𑀼 𑀉𑀓𑁆𑀓𑁄𑀝𑁂𑀲𑀼 𑀅𑀓𑀢𑀁 𑀓𑀫𑁆𑀫𑀦𑁆𑀢𑀺𑀆𑀤𑀬𑁄 𑀢𑀸𑀯 𑀢𑀬𑁄 𑀉𑀓𑁆𑀓𑁄𑀝𑀸 𑀯𑀺𑀲𑁂𑀲𑀢𑁄 𑀤𑀼𑀢𑀺𑀬𑁂 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑁂 𑀮𑀩𑁆𑀪𑀦𑁆𑀢𑀺. 𑀅𑀦𑀺𑀳𑀢𑀁 𑀓𑀫𑁆𑀫𑀦𑁆𑀢𑀺𑀆𑀤𑀬𑁄 𑀢𑀬𑁄 𑀧𑀞𑀫𑁂 𑀯𑀺𑀯𑀸𑀤𑀸𑀥𑀺𑀓𑀭𑀡𑁂 𑀮𑀩𑁆𑀪𑀦𑁆𑀢𑀺. 𑀅𑀯𑀺𑀦𑀺𑀘𑁆𑀙𑀺𑀢𑀦𑁆𑀢𑀺𑀆𑀤𑀬𑁄 𑀢𑀬𑁄 𑀢𑀢𑀺𑀬𑁂 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀮𑀩𑁆𑀪𑀦𑁆𑀢𑀺. 𑀅𑀯𑀽𑀧𑀲𑀦𑁆𑀢𑀦𑁆𑀢𑀺𑀆𑀤𑀬𑁄 𑀢𑀬𑁄 𑀘𑀢𑀼𑀢𑁆𑀣𑁂 𑀓𑀺𑀘𑁆𑀘𑀸𑀥𑀺𑀓𑀭𑀡𑁂 𑀮𑀩𑁆𑀪𑀦𑁆𑀢𑀺; 𑀅𑀧𑀺𑀘 𑀤𑁆𑀯𑀸𑀤𑀲𑀸𑀧𑀺 𑀘 𑀏𑀓𑁂𑀓𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀮𑀩𑁆𑀪𑀦𑁆𑀢𑀺𑀬𑁂𑀯.

𑀢𑀢𑁆𑀣𑀚𑀸𑀢𑀓𑀁 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀻𑀢𑀺 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 ‘‘𑀫𑀬𑁆𑀳𑀁 𑀇𑀫𑀺𑀦𑀸 𑀧𑀢𑁆𑀢𑁄 𑀕𑀳𑀺𑀢𑁄, 𑀘𑀻𑀯𑀭𑀁 𑀕𑀳𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀁 𑀅𑀢𑁆𑀣𑀸𑀬 𑀅𑀥𑀺𑀓𑀭𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀘 𑀦𑀁 𑀯𑀺𑀳𑀸𑀭𑁂 𑀆𑀯𑀸𑀲𑀺𑀓𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀮𑀁 𑀆𑀯𑀼𑀲𑁄’’𑀢𑀺 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁂𑀦𑁂𑀯 𑀯𑀽𑀧𑀲𑀫𑁂𑀦𑁆𑀢𑀺, 𑀇𑀤𑀁 𑀢𑀢𑁆𑀣𑀚𑀸𑀢𑀓𑀁 𑀅𑀥𑀺𑀓𑀭𑀡𑀁 𑀦𑀸𑀫. 𑀬𑁂𑀦𑀸𑀧𑀺 𑀯𑀺𑀦𑀺𑀘𑁆𑀙𑀬𑁂𑀦 𑀲𑀫𑀺𑀢𑀁, 𑀲𑁄𑀧𑀺 𑀏𑀓𑁄 𑀲𑀫𑀣𑁄𑀬𑁂𑀯. 𑀇𑀫𑀁 𑀉𑀓𑁆𑀓𑁄𑀝𑁂𑀦𑁆𑀢𑀲𑁆𑀲𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀁.

𑀢𑀢𑁆𑀣𑀚𑀸𑀢𑀓𑀁 𑀯𑀽𑀧𑀲𑀦𑁆𑀢𑀦𑁆𑀢𑀺 𑀲𑀘𑁂 𑀧𑀦 𑀢𑀁 𑀅𑀥𑀺𑀓𑀭𑀡𑀁 𑀦𑁂𑀯𑀸𑀲𑀺𑀓𑀸 𑀯𑀽𑀧𑀲𑀫𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀣𑀜𑁆𑀜𑁄 𑀯𑀺𑀦𑀬𑀥𑀭𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀆𑀯𑀼𑀲𑁄 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀞𑀺𑀢𑀸’’𑀢𑀺 𑀧𑀼𑀘𑁆𑀙𑀢𑀺, 𑀢𑁂𑀳𑀺 𑀘 𑀢𑀲𑁆𑀫𑀺𑀁 𑀓𑀸𑀭𑀡𑁂 𑀓𑀣𑀺𑀢𑁂 𑀢𑀁 𑀅𑀥𑀺𑀓𑀭𑀡𑀁 𑀔𑀦𑁆𑀥𑀓𑀢𑁄 𑀘 𑀧𑀭𑀺𑀯𑀸𑀭𑀢𑁄 𑀘 𑀲𑀼𑀢𑁆𑀢𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀽𑀧𑀲𑀫𑁂𑀢𑀺, 𑀇𑀤𑀁 𑀢𑀢𑁆𑀣𑀚𑀸𑀢𑀓𑀁 𑀯𑀽𑀧𑀲𑀦𑁆𑀢𑀁 𑀦𑀸𑀫 𑀅𑀥𑀺𑀓𑀭𑀡𑀁. 𑀏𑀢𑀁 𑀉𑀓𑁆𑀓𑁄𑀝𑁂𑀦𑁆𑀢𑀲𑁆𑀲𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑀅𑀦𑁆𑀢𑀭𑀸𑀫𑀕𑁆𑀕𑁂𑀢𑀺 𑀢𑁂 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸 ‘‘𑀦 𑀫𑀬𑀁 𑀏𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁂 𑀢𑀺𑀝𑁆𑀞𑀸𑀫, 𑀦𑀸𑀬𑀁 𑀯𑀺𑀦𑀬𑁂 𑀓𑀼𑀲𑀮𑁄, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀯𑀺𑀦𑀬𑀥𑀭𑀸 𑀣𑁂𑀭𑀸 𑀯𑀲𑀦𑁆𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀸𑀫𑀸’’𑀢𑀺 𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀯𑀸 𑀲𑀜𑁆𑀜𑀸𑀧𑁂𑀦𑁆𑀢𑀺, 𑀅𑀜𑁆𑀜𑁂 𑀯𑀸 𑀢𑁂 𑀪𑀺𑀓𑁆𑀔𑀽 𑀦𑀺𑀚𑁆𑀛𑀸𑀧𑁂𑀦𑁆𑀢𑀺, 𑀇𑀤𑀫𑁆𑀧𑀺 𑀯𑀽𑀧𑀲𑀦𑁆𑀢𑀫𑁂𑀯 𑀳𑁄𑀢𑀺. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺 𑀬𑁄, 𑀢𑀲𑁆𑀲𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀽𑀧𑀲𑀦𑁆𑀢𑀦𑁆𑀢𑀺 𑀦 𑀳𑁂𑀯 𑀔𑁄 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀜𑀢𑁆𑀢𑀺𑀬𑀸 𑀯𑀸 𑀲𑀪𑀸𑀕𑀪𑀺𑀓𑁆𑀔𑀼𑀦𑀺𑀚𑁆𑀛𑀸𑀧𑀦𑁂𑀦 𑀯𑀸 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺; 𑀅𑀧𑀺𑀘 𑀔𑁄 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑁄 𑀏𑀓𑁄 𑀯𑀺𑀦𑀬𑀥𑀭𑁄 𑀤𑀺𑀲𑁆𑀯𑀸 ‘‘𑀓𑀢𑁆𑀣 𑀆𑀯𑀼𑀲𑁄 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁, 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀮𑀁, 𑀆𑀯𑀼𑀲𑁄, 𑀓𑀺𑀁 𑀢𑀢𑁆𑀣 𑀕𑀢𑁂𑀦𑀸’’𑀢𑀺 𑀢𑀢𑁆𑀣𑁂𑀯 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀺, 𑀇𑀤𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀽𑀧𑀲𑀦𑁆𑀢𑀁 𑀦𑀸𑀫. 𑀏𑀢𑀁 𑀉𑀓𑁆𑀓𑁄𑀝𑁂𑀦𑁆𑀢𑀲𑁆𑀲𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑀢𑀢𑁆𑀣 𑀕𑀢𑀦𑁆𑀢𑀺 𑀲𑀘𑁂 𑀧𑀦 ‘‘𑀅𑀮𑀁, 𑀆𑀯𑀼𑀲𑁄, 𑀓𑀺𑀁 𑀢𑀢𑁆𑀣 𑀕𑀢𑁂𑀦𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸𑀧𑀺 ‘‘𑀫𑀬𑀁 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀧𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀯𑀺𑀦𑀬𑀥𑀭𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑁂𑀯, 𑀕𑀦𑁆𑀢𑁆𑀯𑀸 𑀲𑀪𑀸𑀕𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀦𑁆𑀢𑀺. 𑀲𑀪𑀸𑀕𑀸 𑀪𑀺𑀓𑁆𑀔𑀽 ‘‘𑀅𑀮𑀁, 𑀆𑀯𑀼𑀲𑁄, 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀁 𑀦𑀸𑀫 𑀕𑀭𑀼𑀓’’𑀦𑁆𑀢𑀺 𑀢𑀢𑁆𑀣𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀲𑀜𑁆𑀜𑀸𑀧𑁂𑀦𑁆𑀢𑀺, 𑀇𑀤𑀫𑁆𑀧𑀺 𑀯𑀽𑀧𑀲𑀦𑁆𑀢𑀫𑁂𑀯 𑀳𑁄𑀢𑀺. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀢𑀢𑁆𑀣 𑀕𑀢𑀁 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺 𑀬𑁄, 𑀢𑀲𑁆𑀲𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑀢𑀢𑁆𑀣 𑀕𑀢𑀁 𑀯𑀽𑀧𑀲𑀦𑁆𑀢𑀦𑁆𑀢𑀺 𑀦 𑀳𑁂𑀯 𑀔𑁄 𑀧𑀦 𑀲𑀪𑀸𑀕𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀢𑁆𑀢𑀺𑀬𑀸 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺; 𑀅𑀧𑀺𑀘 𑀔𑁄 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀆𑀭𑁄𑀘𑀺𑀢𑀁 𑀲𑀗𑁆𑀖𑀫𑀚𑁆𑀛𑁂 𑀯𑀺𑀦𑀬𑀥𑀭𑀸 𑀯𑀽𑀧𑀲𑀫𑁂𑀦𑁆𑀢𑀺, 𑀇𑀤𑀁 𑀢𑀢𑁆𑀣 𑀕𑀢𑀁 𑀯𑀽𑀧𑀲𑀦𑁆𑀢𑀁 𑀦𑀸𑀫. 𑀏𑀢𑀁 𑀉𑀓𑁆𑀓𑁄𑀝𑁂𑀦𑁆𑀢𑀲𑁆𑀲𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑀲𑀢𑀺𑀯𑀺𑀦𑀬𑀦𑁆𑀢𑀺 𑀔𑀻𑀡𑀸𑀲𑀯𑀲𑁆𑀲 𑀤𑀺𑀦𑁆𑀦𑀁 𑀲𑀢𑀺𑀯𑀺𑀦𑀬𑀁 𑀉𑀓𑁆𑀓𑁄𑀝𑁂𑀢𑀺, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀉𑀫𑁆𑀫𑀢𑁆𑀢𑀓𑀲𑁆𑀲 𑀤𑀺𑀦𑁆𑀦𑁂 𑀅𑀫𑀽𑀴𑁆𑀳𑀯𑀺𑀦𑀬𑁂 𑀧𑀸𑀧𑀼𑀲𑁆𑀲𑀦𑁆𑀦𑀲𑁆𑀲 𑀤𑀺𑀦𑁆𑀦𑀸𑀬 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀢𑀺𑀡𑀯𑀢𑁆𑀣𑀸𑀭𑀓𑀁 𑀉𑀓𑁆𑀓𑁄𑀝𑁂𑀢𑀻𑀢𑀺 𑀲𑀗𑁆𑀖𑁂𑀦 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂𑀦 𑀯𑀽𑀧𑀲𑀫𑀺𑀢𑁂 𑀅𑀥𑀺𑀓𑀭𑀡𑁂 ‘‘𑀆𑀧𑀢𑁆𑀢𑀺 𑀦𑀸𑀫 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀤𑁂𑀲𑀺𑀬𑀫𑀸𑀦𑀸 𑀯𑀼𑀝𑁆𑀞𑀸𑀢𑀺, 𑀬𑀁 𑀧𑀦𑁂𑀢𑀁 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀦𑀸𑀫, 𑀏𑀢𑀁 𑀫𑀬𑁆𑀳𑀁 𑀦 𑀔𑀫𑀢𑀻’’𑀢𑀺 𑀏𑀯𑀁 𑀯𑀤𑀦𑁆𑀢𑁄𑀧𑀺 𑀢𑀺𑀡𑀯𑀢𑁆𑀣𑀸𑀭𑀓𑀁 𑀉𑀓𑁆𑀓𑁄𑀝𑁂𑀢𑀺 𑀦𑀸𑀫, 𑀢𑀲𑁆𑀲𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀻𑀢𑀺 𑀯𑀺𑀦𑀬𑀥𑀭𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀻𑀦𑀺 𑀤𑀻𑀧𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀺𑀦𑀺𑀘𑁆𑀙𑀺𑀢𑀁 𑀅𑀥𑀺𑀓𑀭𑀡𑀁 𑀤𑁆𑀯𑀸𑀤𑀲𑀲𑀼 𑀉𑀓𑁆𑀓𑁄𑀝𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀉𑀓𑁆𑀓𑁄𑀝𑁂𑀦𑁆𑀢𑁄 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺 𑀦𑀸𑀫. 𑀤𑁆𑀯𑀻𑀲𑀼 𑀧𑀦 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑁂𑀲𑀼 𑀏𑀓𑀲𑁆𑀫𑀺𑀁 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑀼𑀧𑁆𑀧𑀦𑁆𑀦𑀸𑀖𑀸𑀢𑁄, 𑀢𑀲𑁆𑀲 𑀧𑀭𑀸𑀚𑀬𑀁 𑀆𑀭𑁄𑀧𑀦𑀢𑁆𑀣𑀁 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀻𑀦𑀺 𑀤𑀻𑀧𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀺𑀦𑀺𑀘𑁆𑀙𑀺𑀢𑀁 𑀅𑀥𑀺𑀓𑀭𑀡𑀁 𑀤𑁆𑀯𑀸𑀤𑀲𑀲𑀼 𑀉𑀓𑁆𑀓𑁄𑀝𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀉𑀓𑁆𑀓𑁄𑀝𑁂𑀦𑁆𑀢𑁄 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺 𑀦𑀸𑀫. 𑀫𑀦𑁆𑀤𑁄 𑀧𑀦 𑀫𑁄𑀫𑀽𑀳𑁄 𑀫𑁄𑀫𑀽𑀳𑀢𑁆𑀢𑀸 𑀏𑀯 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀻𑀦𑀺 𑀤𑀻𑀧𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀓𑁆𑀓𑁄𑀝𑁂𑀦𑁆𑀢𑁄 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺 𑀦𑀸𑀫. 𑀲𑀘𑁂 𑀧𑀦 𑀤𑁆𑀯𑀻𑀲𑀼 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑁂𑀲𑀼 𑀏𑀓𑁄 𑀯𑀺𑀲𑀫𑀸𑀦𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀕𑀳𑀦𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀩𑀮𑀯𑀦𑁆𑀢𑁂 𑀘 𑀧𑀓𑁆𑀔𑀦𑁆𑀢𑀭𑀺𑀬𑁂 𑀅𑀪𑀺𑀜𑁆𑀜𑀸𑀢𑁂 𑀪𑀺𑀓𑁆𑀔𑀽 𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀕𑀳𑀦𑀦𑀺𑀲𑁆𑀲𑀺𑀢𑁄 𑀩𑀮𑀯𑀦𑀺𑀲𑁆𑀲𑀺𑀢𑁄 𑀘 𑀳𑁄𑀢𑀺, 𑀢𑀲𑁆𑀲 𑀪𑀬𑁂𑀦 ‘‘𑀅𑀬𑀁 𑀫𑁂 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀁 𑀯𑀸 𑀓𑀭𑁂𑀬𑁆𑀬𑀸’’𑀢𑀺 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀻𑀦𑀺 𑀤𑀻𑀧𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀓𑁆𑀓𑁄𑀝𑁂𑀦𑁆𑀢𑁄 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺 𑀦𑀸𑀫.

𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑁄𑀢𑀺 𑀏𑀓𑁄 𑀲𑀸𑀫𑀡𑁂𑀭𑁄 𑀩𑁆𑀬𑀢𑁆𑀢𑁄 𑀳𑁄𑀢𑀺 𑀩𑀳𑀼𑀲𑁆𑀲𑀼𑀢𑁄, 𑀲𑁄 𑀯𑀺𑀦𑀺𑀘𑁆𑀙𑀬𑁂 𑀧𑀭𑀸𑀚𑀬𑀁 𑀧𑀢𑁆𑀯𑀸 𑀫𑀗𑁆𑀓𑀼𑀪𑀽𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀧𑀼𑀘𑁆𑀙𑀢𑀺 ‘‘𑀓𑀲𑁆𑀫𑀸 𑀫𑀗𑁆𑀓𑀼𑀪𑀽𑀢𑀸𑀢𑁆𑀣𑀸’’𑀢𑀺? 𑀢𑁂 𑀢𑀲𑁆𑀲 𑀢𑀁 𑀅𑀥𑀺𑀓𑀭𑀡𑀁 𑀆𑀭𑁄𑀘𑁂𑀦𑁆𑀢𑀺. 𑀲𑁄 𑀢𑁂 𑀏𑀯𑀁 𑀯𑀤𑁂𑀢𑀺 ‘‘𑀳𑁄𑀢𑀼, 𑀪𑀦𑁆𑀢𑁂, 𑀫𑀁 𑀉𑀧𑀲𑀫𑁆𑀧𑀸𑀤𑁂𑀣, 𑀅𑀳𑀁 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀸𑀫𑀻’’𑀢𑀺. 𑀢𑁂 𑀢𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀲𑁄 𑀤𑀼𑀢𑀺𑀬𑀤𑀺𑀯𑀲𑁂 𑀪𑁂𑀭𑀺𑀁 𑀧𑀳𑀭𑀺𑀢𑁆𑀯𑀸 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑀺. 𑀢𑀢𑁄 𑀪𑀺𑀓𑁆𑀔𑀽𑀳𑀺 ‘‘𑀓𑁂𑀦 𑀲𑀗𑁆𑀖𑁄 𑀲𑀦𑁆𑀦𑀺𑀧𑀸𑀢𑀺𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑀸’’𑀢𑀺 𑀯𑀤𑀢𑀺. ‘‘𑀓𑀲𑁆𑀫𑀸 𑀲𑀦𑁆𑀦𑀺𑀧𑀸𑀢𑀺𑀢𑁄’’𑀢𑀺? ‘‘𑀳𑀺𑀬𑁆𑀬𑁄 𑀅𑀥𑀺𑀓𑀭𑀡𑀁 𑀤𑀼𑀩𑁆𑀩𑀺𑀦𑀺𑀘𑁆𑀙𑀺𑀢𑀁, 𑀢𑀫𑀳𑀁 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁆𑀯𑀁 𑀧𑀦 𑀳𑀺𑀬𑁆𑀬𑁄 𑀓𑀼𑀳𑀺𑀁 𑀕𑀢𑁄’’𑀢𑀺? ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀫𑁆𑀳𑀺, 𑀪𑀦𑁆𑀢𑁂, 𑀅𑀚𑁆𑀚 𑀧𑀦 𑀉𑀧𑀲𑀫𑁆𑀧𑀦𑁆𑀦𑁄𑀫𑁆𑀳𑀻’’𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 ‘‘𑀇𑀤𑀁 𑀆𑀯𑀼𑀲𑁄 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, ‘𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬’𑀦𑁆𑀢𑀺, 𑀕𑀘𑁆𑀙 𑀆𑀧𑀢𑁆𑀢𑀺𑀁 𑀤𑁂𑀲𑁂𑀳𑀻’’𑀢𑀺. 𑀆𑀕𑀦𑁆𑀢𑀼𑀓𑁂𑀧𑀺 𑀏𑀲𑁂𑀯 𑀦𑀬𑁄.

𑀓𑀸𑀭𑀓𑁄𑀢𑀺 𑀏𑀓𑀁 𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀧𑀭𑀺𑀯𑁂𑀡𑀕𑀢𑀁 𑀧𑀭𑀸𑀚𑀺𑀢𑀸 𑀪𑀺𑀓𑁆𑀔𑀽 𑀯𑀤𑀦𑁆𑀢𑀺 ‘‘𑀓𑀺𑀲𑁆𑀲, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀏𑀯𑀁 𑀯𑀺𑀦𑀺𑀘𑁆𑀙𑀺𑀢𑀁 𑀅𑀥𑀺𑀓𑀭𑀡𑀁, 𑀦𑀦𑀼 𑀏𑀯𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩’’𑀦𑁆𑀢𑀺. 𑀲𑁄 ‘‘𑀓𑀲𑁆𑀫𑀸 𑀧𑀞𑀫𑀁𑀬𑁂𑀯 𑀏𑀯𑀁 𑀦 𑀯𑀤𑀺𑀢𑁆𑀣𑀸’’𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺. 𑀏𑀯𑀁 𑀬𑁄 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀢𑀲𑁆𑀲𑀸𑀧𑀺 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀙𑀦𑁆𑀤𑀤𑀸𑀬𑀓𑁄𑀢𑀺 𑀏𑀓𑁄 𑀅𑀥𑀺𑀓𑀭𑀡𑀯𑀺𑀦𑀺𑀘𑁆𑀙𑀬𑁂 𑀙𑀦𑁆𑀤𑀁 𑀤𑀢𑁆𑀯𑀸 𑀲𑀪𑀸𑀕𑁂 𑀪𑀺𑀓𑁆𑀔𑀽 𑀧𑀭𑀸𑀚𑀬𑀁 𑀧𑀢𑁆𑀯𑀸 𑀆𑀕𑀢𑁂 𑀫𑀗𑁆𑀓𑀼𑀪𑀽𑀢𑁂 𑀤𑀺𑀲𑁆𑀯𑀸 ‘‘𑀲𑁆𑀯𑁂 𑀤𑀸𑀦𑀺 𑀅𑀳𑀁 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀓𑀲𑁆𑀫𑀸 𑀲𑀦𑁆𑀦𑀺𑀧𑀸𑀢𑁂𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀳𑀺𑀬𑁆𑀬𑁄 𑀅𑀥𑀺𑀓𑀭𑀡𑀁 𑀤𑀼𑀩𑁆𑀩𑀺𑀦𑀺𑀘𑁆𑀙𑀺𑀢𑀁, 𑀢𑀫𑀳𑀁 𑀅𑀚𑁆𑀚 𑀯𑀺𑀦𑀺𑀘𑁆𑀙𑀺𑀦𑀺𑀲𑁆𑀲𑀸𑀫𑀻’’𑀢𑀺. ‘‘𑀳𑀺𑀬𑁆𑀬𑁄 𑀧𑀦 𑀢𑁆𑀯𑀁 𑀓𑀢𑁆𑀣 𑀕𑀢𑁄’’𑀢𑀺. ‘‘𑀙𑀦𑁆𑀤𑀁 𑀤𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀫𑁆𑀳𑀻’’𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 ‘‘𑀇𑀤𑀁 𑀆𑀯𑀼𑀲𑁄 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, ‘𑀙𑀦𑁆𑀤𑀤𑀸𑀬𑀓𑁄 𑀉𑀓𑁆𑀓𑁄𑀝𑁂𑀢𑀺, 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬’𑀦𑁆𑀢𑀺, 𑀕𑀘𑁆𑀙 𑀆𑀧𑀢𑁆𑀢𑀺𑀁 𑀤𑁂𑀲𑁂𑀳𑀻’’𑀢𑀺.

𑀅𑀥𑀺𑀓𑀭𑀡𑀦𑀺𑀤𑀸𑀦𑀸𑀤𑀺𑀯𑀡𑁆𑀡𑀦𑀸

𑁩𑁪𑁨. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀦𑁆𑀢𑀺𑀆𑀤𑀻𑀲𑀼 𑀓𑀺𑀁 𑀦𑀺𑀤𑀸𑀦𑀫𑀲𑁆𑀲𑀸𑀢𑀺 𑀓𑀺𑀁𑀦𑀺𑀤𑀸𑀦𑀁. 𑀓𑁄 𑀲𑀫𑀼𑀤𑀬𑁄 𑀅𑀲𑁆𑀲𑀸𑀢𑀺 𑀓𑀺𑀁𑀲𑀫𑀼𑀤𑀬𑀁. 𑀓𑀸 𑀚𑀸𑀢𑀺 𑀅𑀲𑁆𑀲𑀸𑀢𑀺 𑀓𑀺𑀁𑀚𑀸𑀢𑀺𑀓𑀁. 𑀓𑁄 𑀧𑀪𑀯𑁄 𑀅𑀲𑁆𑀲𑀸𑀢𑀺 𑀓𑀺𑀁𑀧𑀪𑀯𑀁. 𑀓𑁄 𑀲𑀫𑁆𑀪𑀸𑀭𑁄 𑀅𑀲𑁆𑀲𑀸𑀢𑀺 𑀓𑀺𑀁𑀲𑀫𑁆𑀪𑀸𑀭𑀁. 𑀓𑀺𑀁 𑀲𑀫𑀼𑀝𑁆𑀞𑀸𑀦𑀁 𑀅𑀲𑁆𑀲𑀸𑀢𑀺 𑀓𑀺𑀁𑀲𑀫𑀼𑀝𑁆𑀞𑀸𑀦𑀁. 𑀲𑀩𑁆𑀩𑀸𑀦𑁂𑀢𑀸𑀦𑀺 𑀓𑀸𑀭𑀡𑀯𑁂𑀯𑀘𑀦𑀸𑀦𑀺𑀬𑁂𑀯.

𑀯𑀺𑀯𑀸𑀤𑀦𑀺𑀤𑀸𑀦𑀦𑁆𑀢𑀺𑀆𑀤𑀻𑀲𑀼𑀧𑀺 𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀼𑀲𑀗𑁆𑀔𑀸𑀢𑁄 𑀯𑀺𑀯𑀸𑀤𑁄 𑀦𑀺𑀤𑀸𑀦𑀫𑁂𑀢𑀲𑁆𑀲𑀸𑀢𑀺 𑀯𑀺𑀯𑀸𑀤𑀦𑀺𑀤𑀸𑀦𑀁. 𑀯𑀺𑀯𑀸𑀤𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀯𑀺𑀯𑀸𑀤𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀅𑀦𑀼𑀯𑀸𑀤𑁄 𑀦𑀺𑀤𑀸𑀦𑀁 𑀅𑀲𑁆𑀲𑀸𑀢𑀺 𑀅𑀦𑀼𑀯𑀸𑀤𑀦𑀺𑀤𑀸𑀦𑀁. 𑀇𑀤𑀫𑁆𑀧𑀺 𑀅𑀦𑀼𑀯𑀸𑀤𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀅𑀦𑀼𑀯𑀸𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀆𑀧𑀢𑁆𑀢𑀺 𑀦𑀺𑀤𑀸𑀦𑀁 𑀅𑀲𑁆𑀲𑀸𑀢𑀺 𑀆𑀧𑀢𑁆𑀢𑀺𑀦𑀺𑀤𑀸𑀦𑀁. 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻𑀢𑀺 𑀏𑀯𑀁 𑀆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀆𑀧𑀢𑁆𑀢𑀺𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀘𑁆𑀘𑀬𑀁 𑀦𑀺𑀤𑀸𑀦𑀫𑀲𑁆𑀲𑀸𑀢𑀺 𑀓𑀺𑀘𑁆𑀘𑀬𑀦𑀺𑀤𑀸𑀦𑀁; 𑀘𑀢𑀼𑀩𑁆𑀩𑀺𑀥𑀁 𑀲𑀗𑁆𑀖𑀓𑀫𑁆𑀫𑀁 𑀓𑀸𑀭𑀡𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀤𑀻𑀦𑀁 𑀓𑀺𑀘𑁆𑀘𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀓𑀺𑀘𑁆𑀘𑀸𑀦𑀁 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀅𑀬𑀁 𑀘𑀢𑀼𑀦𑁆𑀦𑀫𑁆𑀧𑀺 𑀅𑀥𑀺𑀓𑀭𑀡𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀧𑀓𑁆𑀔𑁂 𑀏𑀓𑀧𑀤𑀬𑁄𑀚𑀦𑀸. 𑀏𑀢𑁂𑀦𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀤𑀼𑀢𑀺𑀬𑀧𑀼𑀘𑁆𑀙𑀸𑀬 𑀳𑁂𑀢𑀼𑀦𑀺𑀤𑀸𑀦𑀦𑁆𑀢𑀺𑀆𑀤𑀺𑀫𑁆𑀳𑀺 𑀯𑀺𑀲𑁆𑀲𑀚𑁆𑀚𑀦𑁂 𑀦𑀯𑀦𑁆𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀳𑁂𑀢𑀽𑀦𑀁 𑀯𑀲𑁂𑀦 𑀳𑁂𑀢𑀼𑀦𑀺𑀤𑀸𑀦𑀸𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑀺𑀬𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑁂 𑀩𑁆𑀬𑀜𑁆𑀚𑀦𑀫𑀢𑁆𑀢𑀁 𑀦𑀸𑀦𑀁. 𑀳𑁂𑀢𑀼𑀬𑁂𑀯 𑀳𑀺 𑀏𑀢𑁆𑀣 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑁄.

𑁩𑁪𑁩. 𑀫𑀽𑀮𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑁂 𑀤𑁆𑀯𑀸𑀤𑀲 𑀫𑀽𑀮𑀸𑀦𑀻𑀢𑀺 𑀓𑁄𑀥𑀉𑀧𑀦𑀸𑀳𑀬𑀼𑀕𑀴𑀓𑀸𑀤𑀻𑀦𑀺 𑀙 𑀯𑀺𑀯𑀸𑀤𑀸𑀫𑀽𑀮𑀸𑀦𑀺, 𑀮𑁄𑀪𑀤𑁄𑀲𑀫𑁄𑀳𑀸 𑀢𑀬𑁄, 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀸 𑀢𑀬𑁄𑀢𑀺 𑀇𑀫𑀸𑀦𑀺 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀸𑀦𑀺 𑀤𑁆𑀯𑀸𑀤𑀲 𑀫𑀽𑀮𑀸𑀦𑀺. 𑀘𑀼𑀤𑁆𑀤𑀲 𑀫𑀽𑀮𑀸𑀦𑀻𑀢𑀺 𑀢𑀸𑀦𑁂𑀯 𑀤𑁆𑀯𑀸𑀤𑀲 𑀓𑀸𑀬𑀯𑀸𑀘𑀸𑀳𑀺 𑀲𑀤𑁆𑀥𑀺𑀁 𑀘𑀼𑀤𑁆𑀤𑀲 𑀳𑁄𑀦𑁆𑀢𑀺. 𑀙 𑀫𑀽𑀮𑀸𑀦𑀻𑀢𑀺 𑀓𑀸𑀬𑀸𑀤𑀻𑀦𑀺 𑀙 𑀲𑀫𑀼𑀝𑁆𑀞𑀸𑀦𑀸𑀦𑀺.

𑀲𑀫𑀼𑀝𑁆𑀞𑀸𑀦𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑁂 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀲𑀫𑀼𑀝𑁆𑀞𑀸𑀦𑀸𑀦𑀺, 𑀢𑀜𑁆𑀳𑀺 𑀏𑀢𑁂𑀲𑀼 𑀅𑀝𑁆𑀞𑀸𑀭𑀲𑀲𑀼 𑀪𑁂𑀤𑀓𑀭𑀯𑀢𑁆𑀣𑀽𑀲𑀼 𑀲𑀫𑀼𑀝𑁆𑀞𑀸𑀢𑀺, 𑀏𑀢𑁂𑀳𑀺 𑀯𑀸 𑀓𑀸𑀭𑀡𑀪𑀽𑀢𑁂𑀳𑀺 𑀲𑀫𑀼𑀝𑁆𑀞𑀸𑀢𑀺. 𑀢𑁂𑀦𑀲𑁆𑀲𑁂𑀢𑀸𑀦𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁩𑁪𑁪. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀻𑀢𑀺𑀆𑀤𑀺𑀪𑁂𑀤𑁂 𑀏𑀓𑁂𑀦 𑀅𑀥𑀺𑀓𑀭𑀡𑁂𑀦 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦𑀸𑀢𑀺 𑀇𑀤𑀁 𑀬𑁂𑀦 𑀅𑀥𑀺𑀓𑀭𑀡𑁂𑀦 𑀲𑀫𑁆𑀫𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀦 𑀧𑀦𑁂𑀢𑀸𑀦𑀺 𑀏𑀓𑀁𑀲𑀢𑁄 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦𑁂𑀯 𑀲𑀫𑁆𑀫𑀦𑁆𑀢𑀺. 𑀦 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑁂𑀦𑁆𑀢𑀲𑁆𑀲 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀦𑀸𑀫 𑀅𑀢𑁆𑀣𑀺.

𑀦 𑀓𑀢𑀫𑁂𑀦 𑀲𑀫𑀣𑁂𑀦𑀸𑀢𑀺 𑀲𑀸𑀯𑀲𑁂𑀲𑀸𑀧𑀢𑁆𑀢𑀺 𑀯𑀺𑀬 𑀦 𑀲𑀫𑁆𑀫𑀢𑀺. 𑀦 𑀳𑀺 𑀲𑀓𑁆𑀓𑀸 𑀲𑀸 𑀤𑁂𑀲𑁂𑀢𑀼𑀁, 𑀦 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀸𑀢𑀼𑀁.

𑁩𑁪𑁮. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀦𑁆𑀢𑀺𑀆𑀤𑀺 𑀦𑀬𑁄 𑀉𑀢𑁆𑀢𑀸𑀦𑁄𑀬𑁂𑀯.

𑁩𑁪𑁯. 𑀢𑀢𑁄 𑀧𑀭𑀁 𑀬𑀢𑁆𑀣 𑀲𑀢𑀺𑀯𑀺𑀦𑀬𑁄𑀢𑀺𑀆𑀤𑀺𑀓𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀙 𑀬𑀫𑀓𑀧𑀼𑀘𑁆𑀙𑀸 𑀯𑀼𑀢𑁆𑀢𑀸, 𑀢𑀸𑀲𑀁 𑀯𑀺𑀲𑁆𑀲𑀚𑁆𑀚𑀦𑁂𑀦𑁂𑀯 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄.

𑁩𑁫𑁧. 𑀲𑀁𑀲𑀝𑁆𑀞𑀸𑀤𑀺𑀧𑀼𑀘𑁆𑀙𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑁂 𑀲𑀁𑀲𑀝𑁆𑀞𑀸𑀢𑀺 𑀲𑀢𑀺𑀯𑀺𑀦𑀬𑀓𑀫𑁆𑀫𑀯𑀸𑀘𑀸𑀓𑁆𑀔𑀡𑀲𑁆𑀫𑀺𑀁𑀬𑁂𑀯 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀫𑀣𑀸𑀦𑀁 𑀲𑀺𑀤𑁆𑀥𑀢𑁆𑀢𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀲𑀢𑀺𑀯𑀺𑀦𑀬𑁄𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸, 𑀦𑁄 𑀯𑀺𑀲𑀁𑀲𑀝𑁆𑀞𑀸. 𑀬𑀲𑁆𑀫𑀸 𑀧𑀦 𑀓𑀤𑀮𑀺𑀓𑁆𑀔𑀦𑁆𑀥𑁂 𑀧𑀢𑁆𑀢𑀯𑀝𑁆𑀝𑀻𑀦𑀁 𑀯𑀺𑀬 𑀦 𑀲𑀓𑁆𑀓𑀸 𑀢𑁂𑀲𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀤𑀲𑁆𑀲𑁂𑀢𑀼𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀘 𑀮𑀩𑁆𑀪𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀲𑀢𑁆𑀢𑀲𑀫𑀣𑀦𑀺𑀤𑀸𑀦𑀯𑀡𑁆𑀡𑀦𑀸

𑁩𑁫𑁨. 𑀓𑀺𑀁𑀦𑀺𑀤𑀸𑀦𑁄𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀦𑀺𑀤𑀸𑀦𑀁 𑀦𑀺𑀤𑀸𑀦𑀫𑀲𑁆𑀲𑀸𑀢𑀺 𑀦𑀺𑀤𑀸𑀦𑀦𑀺𑀤𑀸𑀦𑁄. 𑀢𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸𑀢𑀺 𑀇𑀤𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀲 𑀦𑀺𑀤𑀸𑀦𑀁. 𑀲𑀢𑀺𑀯𑁂𑀧𑀼𑀮𑁆𑀮𑀧𑀢𑁆𑀢𑁄 𑀔𑀻𑀡𑀸𑀲𑀯𑁄 𑀮𑀤𑁆𑀥𑀼𑀧𑀯𑀸𑀤𑁄 𑀲𑀢𑀺𑀯𑀺𑀦𑀬𑀲𑁆𑀲 𑀦𑀺𑀤𑀸𑀦𑀁. 𑀉𑀫𑁆𑀫𑀢𑁆𑀢𑀓𑁄 𑀪𑀺𑀓𑁆𑀔𑀼 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀦𑀺𑀤𑀸𑀦𑀁. 𑀬𑁄 𑀘 𑀤𑁂𑀲𑁂𑀢𑀺, 𑀬𑀲𑁆𑀲 𑀘 𑀤𑁂𑀲𑁂𑀢𑀺, 𑀉𑀪𑀺𑀦𑁆𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁄 𑀧𑀝𑀺𑀜𑁆𑀜𑀸𑀢𑀓𑀭𑀡𑀲𑁆𑀲 𑀦𑀺𑀤𑀸𑀦𑀁. 𑀪𑀡𑁆𑀟𑀦𑀚𑀸𑀢𑀸𑀦𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀦𑀺𑀤𑀸𑀦𑀁. 𑀧𑀸𑀧𑀼𑀲𑁆𑀲𑀦𑁆𑀦𑁄 𑀧𑀼𑀕𑁆𑀕𑀮𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬 𑀦𑀺𑀤𑀸𑀦𑀁. 𑀪𑀡𑁆𑀟𑀦𑀚𑀸𑀢𑀸𑀦𑀁 𑀩𑀳𑀼 𑀅𑀲𑁆𑀲𑀸𑀫𑀡𑀓𑀅𑀚𑁆𑀛𑀸𑀘𑀸𑀭𑁄 𑀢𑀺𑀡𑀯𑀢𑁆𑀣𑀸𑀭𑀓𑀲𑁆𑀲 𑀦𑀺𑀤𑀸𑀦𑀁. 𑀳𑁂𑀢𑀼𑀧𑀘𑁆𑀘𑀬𑀯𑀸𑀭𑀸 𑀯𑀼𑀢𑁆𑀢𑀦𑀬𑀸 𑀏𑀯.

𑁩𑁫𑁩. 𑀫𑀽𑀮𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀫𑀼𑀝𑁆𑀞𑀸𑀦𑀧𑀼𑀘𑁆𑀙𑀸𑀬 𑀓𑀺𑀜𑁆𑀘𑀸𑀧𑀺 ‘‘𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀫𑁂 𑀙𑀢𑁆𑀢𑀺𑀁𑀲 𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀯𑀼𑀢𑁆𑀢𑀁, 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀲 𑀧𑀦 𑀓𑀫𑁆𑀫𑀲𑀗𑁆𑀕𑀳𑀸𑀪𑀸𑀯𑁂𑀦 𑀲𑀫𑀼𑀝𑁆𑀞𑀸𑀦𑀸𑀪𑀸𑀯𑀢𑁄 𑀙𑀦𑁆𑀦𑀁𑀬𑁂𑀯 𑀲𑀫𑀣𑀸𑀦𑀁 𑀙 𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀢𑀢𑁆𑀣 𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸𑀢𑀺 𑀜𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀭𑀡𑀦𑁆𑀢𑀺 𑀢𑀲𑁆𑀲𑀸𑀬𑁂𑀯 𑀜𑀢𑁆𑀢𑀺𑀬𑀸 𑀞𑀧𑁂𑀢𑀩𑁆𑀩𑀓𑀸𑀮𑁂 𑀞𑀧𑀦𑀁. 𑀉𑀧𑀕𑀫𑀦𑀦𑁆𑀢𑀺 𑀲𑀬𑀁 𑀉𑀧𑀕𑀫𑀦𑀁; 𑀅𑀢𑁆𑀢𑀦𑀸𑀬𑁂𑀯 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀼𑀧𑀕𑀫𑀦𑀦𑁆𑀢𑀺 𑀅𑀚𑁆𑀛𑁂𑀲𑀦𑀼𑀧𑀕𑀫𑀦𑀁; 𑀅𑀜𑁆𑀜𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀺𑀓𑀁 ‘‘𑀇𑀤𑀁 𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀅𑀚𑁆𑀛𑁂𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀯𑀸𑀲𑀦𑀸𑀢𑀺 ‘‘𑀭𑀼𑀘𑁆𑀘𑀢𑀺 𑀫𑁂 𑀏𑀢𑀁, 𑀓𑀭𑁄𑀢𑀼 𑀲𑀗𑁆𑀖𑁄’’𑀢𑀺 𑀏𑀯𑀁 𑀅𑀥𑀺𑀯𑀸𑀲𑀦𑀸; 𑀙𑀦𑁆𑀤𑀤𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀸𑀢𑀺 ‘‘𑀦 𑀫𑁂𑀢𑀁 𑀔𑀫𑀢𑀺, 𑀫𑀸 𑀏𑀯𑀁 𑀓𑀭𑁄𑀣𑀸’’𑀢𑀺 𑀅𑀧𑁆𑀧𑀝𑀺𑀲𑁂𑀥𑀦𑀸. 𑀇𑀢𑀺 𑀙𑀦𑁆𑀦𑀁 𑀙𑀓𑁆𑀓𑀸𑀦𑀁 𑀯𑀲𑁂𑀦 𑀙𑀢𑁆𑀢𑀺𑀁𑀲 𑀲𑀫𑀼𑀝𑁆𑀞𑀸𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀢𑁆𑀢𑀲𑀫𑀣𑀦𑀸𑀦𑀸𑀢𑁆𑀣𑀸𑀤𑀺𑀯𑀡𑁆𑀡𑀦𑀸

𑁩𑁫𑁪. 𑀦𑀸𑀦𑀸𑀢𑁆𑀣𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀉𑀢𑁆𑀢𑀸𑀦𑀫𑁂𑀯. 𑀅𑀥𑀺𑀓𑀭𑀡𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀅𑀬𑀁 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀦𑁆𑀢𑀺 𑀅𑀬𑀁 𑀫𑀸𑀢𑀸𑀧𑀼𑀢𑁆𑀢𑀸𑀤𑀻𑀦𑀁 𑀯𑀺𑀯𑀸𑀤𑁄 𑀯𑀺𑀭𑀼𑀤𑁆𑀥𑀯𑀸𑀤𑀢𑁆𑀢𑀸 𑀯𑀺𑀯𑀸𑀤𑁄 𑀦𑀸𑀫 𑀳𑁄𑀢𑀺, 𑀲𑀫𑀣𑁂𑀳𑀺 𑀧𑀦 𑀅𑀥𑀺𑀓𑀭𑀡𑀻𑀬𑀢𑀸𑀬 𑀅𑀪𑀸𑀯𑀢𑁄 𑀅𑀥𑀺𑀓𑀭𑀡𑀁 𑀦 𑀳𑁄𑀢𑀺. 𑀅𑀦𑀼𑀯𑀸𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀥𑀺𑀓𑀭𑀡𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.