𑀧𑀞𑀫𑀕𑀸𑀣𑀸𑀲𑀗𑁆𑀕𑀡𑀺𑀓𑀁

𑀲𑀢𑁆𑀢𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁩𑁫. 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸𑀢𑀺 𑀏𑀓𑀲𑁆𑀫𑀺𑀁 𑀅𑀁𑀲𑀓𑀽𑀝𑁂 𑀘𑀻𑀯𑀭𑀁 𑀓𑀢𑁆𑀯𑀸; 𑀲𑀸𑀥𑀼𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀕𑁆𑀕𑀡𑁆𑀳𑀺𑀢𑁆𑀯𑀸𑀦 𑀅𑀜𑁆𑀚𑀮𑀺𑀦𑁆𑀢𑀺 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀆𑀲𑀻𑀲𑀫𑀸𑀦𑀭𑀽𑀧𑁄 𑀯𑀸𑀢𑀺 𑀧𑀘𑁆𑀘𑀸𑀲𑀻𑀲𑀫𑀸𑀦𑀭𑀽𑀧𑁄 𑀯𑀺𑀬. 𑀓𑀺𑀲𑁆𑀲 𑀢𑁆𑀯𑀁 𑀇𑀥 𑀫𑀸𑀕𑀢𑁄𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀓𑀺𑀫𑀢𑁆𑀣𑀁 𑀧𑀢𑁆𑀣𑀬𑀫𑀸𑀦𑁄 𑀢𑁆𑀯𑀁 𑀇𑀥 𑀆𑀕𑀢𑁄. 𑀓𑁄 𑀏𑀯𑀫𑀸𑀳? 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀓𑀁 𑀏𑀯𑀫𑀸𑀳? 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁. 𑀇𑀢𑀺 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀤𑁆𑀯𑀻𑀲𑀼 𑀯𑀺𑀦𑀬𑁂𑀲𑀽’’𑀢𑀺 𑀇𑀫𑀁 𑀕𑀸𑀣𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 ‘‘𑀪𑀤𑁆𑀤𑀓𑁄 𑀢𑁂 𑀉𑀫𑁆𑀫𑀗𑁆𑀕𑁄’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀇𑀢𑀺 𑀇𑀫𑁂 𑀲𑀩𑁆𑀩𑀧𑀜𑁆𑀳𑁂 𑀩𑀼𑀤𑁆𑀥𑀓𑀸𑀮𑁂 𑀉𑀧𑀸𑀮𑀺𑀢𑁆𑀣𑁂𑀭𑁄 𑀧𑀼𑀘𑁆𑀙𑀺. 𑀪𑀕𑀯𑀸 𑀩𑁆𑀬𑀸𑀓𑀸𑀲𑀺. 𑀲𑀗𑁆𑀕𑀻𑀢𑀺𑀓𑀸𑀮𑁂 𑀧𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀧𑀼𑀘𑁆𑀙𑀺. 𑀉𑀧𑀸𑀮𑀺𑀢𑁆𑀣𑁂𑀭𑁄 𑀩𑁆𑀬𑀸𑀓𑀸𑀲𑀺.

𑀢𑀢𑁆𑀣 𑀪𑀤𑁆𑀤𑀓𑁄 𑀢𑁂 𑀉𑀫𑁆𑀫𑀗𑁆𑀕𑁄𑀢𑀺 𑀪𑀤𑁆𑀤𑀓𑀸 𑀢𑁂 𑀧𑀜𑁆𑀳𑀸; 𑀧𑀜𑁆𑀳𑀸 𑀳𑀺 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀢𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 ‘‘𑀉𑀫𑁆𑀫𑀗𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀕𑁆𑀖𑀸𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀲𑁆𑀫𑀸 𑀫𑀁 𑀧𑀼𑀘𑁆𑀙𑀲𑀺, 𑀢𑀲𑁆𑀫𑀸 𑀢𑁂 𑀅𑀳𑀫𑀓𑁆𑀔𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁂 𑀯𑀸, ‘‘𑀢𑀕𑁆𑀖𑀸’’𑀢𑀺 𑀳𑀺 𑀇𑀫𑀺𑀦𑀸 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀓𑁆𑀔𑀺𑀲𑁆𑀲𑀦𑁆𑀢𑀺 𑀆𑀳. ‘‘𑀲𑀫𑀸𑀤𑀳𑀺𑀢𑁆𑀯𑀸 𑀯𑀺𑀲𑀺𑀩𑁆𑀩𑁂𑀦𑁆𑀢𑀺, 𑀲𑀸𑀫𑀺𑀲𑁂𑀦, 𑀲𑀲𑀺𑀢𑁆𑀣𑀓’’𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺𑀬𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀕𑁆𑀕𑁂𑀲𑀼 𑀧𑀜𑁆𑀜𑀢𑁆𑀢𑀸𑀦𑀺.

𑀘𑀢𑀼𑀯𑀺𑀧𑀢𑁆𑀢𑀺𑀯𑀡𑁆𑀡𑀦𑀸

𑁩𑁩𑁬. 𑀬𑀁 𑀢𑀁 𑀧𑀼𑀘𑁆𑀙𑀺𑀫𑁆𑀳𑀸𑀢𑀺 𑀬𑀁 𑀢𑁆𑀯𑀁 𑀅𑀧𑀼𑀘𑁆𑀙𑀺𑀫𑁆𑀳𑀸. 𑀅𑀓𑀺𑀢𑁆𑀢𑀬𑀻𑀢𑀺 𑀅𑀪𑀸𑀲𑀺. 𑀦𑁄𑀢𑀺 𑀅𑀫𑁆𑀳𑀸𑀓𑀁. 𑀢𑀁 𑀢𑀁 𑀩𑁆𑀬𑀸𑀓𑀢𑀦𑁆𑀢𑀺 𑀬𑀁 𑀬𑀁 𑀧𑀼𑀝𑁆𑀞𑀁, 𑀢𑀁 𑀢𑀤𑁂𑀯 𑀩𑁆𑀬𑀸𑀓𑀢𑀁. 𑀅𑀦𑀜𑁆𑀜𑀣𑀸𑀢𑀺 𑀅𑀜𑁆𑀜𑀣𑀸 𑀅𑀓𑀢𑁆𑀯𑀸 𑀩𑁆𑀬𑀸𑀓𑀢𑀁.

𑀬𑁂 𑀤𑀼𑀝𑁆𑀞𑀼𑀮𑁆𑀮𑀸 𑀲𑀸 𑀲𑀻𑀮𑀯𑀺𑀧𑀢𑁆𑀢𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀻𑀮𑀯𑀺𑀧𑀢𑁆𑀢𑀺 𑀦𑀸𑀫 𑀧𑀜𑁆𑀳𑁂 𑀦𑀢𑁆𑀣𑀺, 𑀅𑀣 𑀔𑁄 𑀤𑀼𑀝𑁆𑀞𑀼𑀮𑁆𑀮𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀓𑀸𑀫𑀢𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀘𑀢𑀽𑀲𑀼 𑀳𑀺 𑀯𑀺𑀧𑀢𑁆𑀢𑀻𑀲𑀼 𑀤𑀼𑀝𑁆𑀞𑀼𑀮𑁆𑀮𑀁 𑀏𑀓𑀸𑀬 𑀯𑀺𑀧𑀢𑁆𑀢𑀺𑀬𑀸 𑀲𑀗𑁆𑀕𑀳𑀺𑀢𑀁, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀢𑀻𑀳𑀺 𑀯𑀺𑀧𑀢𑁆𑀢𑀻𑀳𑀺 𑀲𑀗𑁆𑀕𑀳𑀺𑀢𑀁. 𑀢𑀲𑁆𑀫𑀸 ‘‘𑀬𑁂 𑀤𑀼𑀝𑁆𑀞𑀼𑀮𑁆𑀮𑀸 𑀲𑀸 𑀲𑀻𑀮𑀯𑀺𑀧𑀢𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀭𑀸𑀚𑀺𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑁄 𑀲𑀻𑀮𑀯𑀺𑀧𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀆𑀳.

𑀇𑀤𑀸𑀦𑀺 𑀢𑀺𑀲𑁆𑀲𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀯𑀲𑁂𑀦 𑀅𑀤𑀼𑀝𑁆𑀞𑀼𑀮𑁆𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁄 𑀘𑀸𑀬𑀁, 𑀅𑀓𑁆𑀓𑁄𑀲𑀢𑀺 𑀳𑀲𑀸𑀥𑀺𑀧𑁆𑀧𑀸𑀬𑁄𑀢𑀺 𑀇𑀤𑀁 𑀤𑀼𑀩𑁆𑀪𑀸𑀲𑀺𑀢𑀲𑁆𑀲 𑀯𑀢𑁆𑀣𑀼𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀻𑀢𑀺 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀻’’𑀢𑀺 𑀯𑀤𑀦𑁆𑀢𑀸 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺.

𑀅𑀬𑀁 𑀲𑀸 𑀆𑀚𑀻𑀯𑀯𑀺𑀧𑀢𑁆𑀢𑀺𑀲𑀫𑁆𑀫𑀢𑀸𑀢𑀺 𑀅𑀬𑀁 𑀙𑀳𑀺 𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀸 𑀆𑀚𑀻𑀯𑀯𑀺𑀧𑀢𑁆𑀢𑀺 𑀦𑀸𑀫 𑀘𑀢𑀼𑀢𑁆𑀣𑀸 𑀯𑀺𑀧𑀢𑁆𑀢𑀺 𑀲𑀫𑁆𑀫𑀢𑀸𑀢𑀺 𑀏𑀢𑁆𑀢𑀸𑀯𑀢𑀸 ‘‘𑀅𑀤𑀼𑀝𑁆𑀞𑀼𑀮𑁆𑀮’’𑀦𑁆𑀢𑀺 𑀇𑀤𑀁 𑀯𑀺𑀲𑁆𑀲𑀚𑁆𑀚𑀺𑀢𑀁 𑀳𑁄𑀢𑀺.

𑀇𑀤𑀸𑀦𑀺 ‘‘𑀬𑁂 𑀘 𑀬𑀸𑀯𑀢𑀢𑀺𑀬𑀓𑀸’’𑀢𑀺 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀏𑀓𑀸𑀤𑀲𑀸’’𑀢𑀺𑀆𑀤𑀺𑀫𑀸𑀳.

𑀙𑁂𑀤𑀦𑀓𑀸𑀤𑀺𑀯𑀡𑁆𑀡𑀦𑀸

𑁩𑁩𑁭. 𑀬𑀲𑁆𑀫𑀸 𑀧𑀦 ‘‘𑀬𑁂 𑀘 𑀬𑀸𑀯𑀢𑀢𑀺𑀬𑀓𑀸’’𑀢𑀺 𑀅𑀬𑀁 𑀧𑀜𑁆𑀳𑁄 ‘‘𑀏𑀓𑀸𑀤𑀲 𑀬𑀸𑀯𑀢𑀢𑀺𑀬𑀓𑀸’’𑀢𑀺 𑀏𑀯𑀁 𑀲𑀗𑁆𑀔𑀸𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑁄, 𑀢𑀲𑁆𑀫𑀸 𑀲𑀗𑁆𑀔𑀸𑀦𑀼𑀲𑀦𑁆𑀥𑀺𑀯𑀲𑁂𑀦𑁂𑀯 ‘‘𑀓𑀢𑀺 𑀙𑁂𑀤𑀦𑀓𑀸𑀦𑀻’’𑀢𑀺𑀆𑀤𑀺𑀓𑁂 𑀅𑀜𑁆𑀜𑁂 𑀅𑀦𑁆𑀢𑀭𑀸𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀢𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀁 ‘‘𑀙 𑀙𑁂𑀤𑀦𑀓𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀏𑀓𑀁 𑀪𑁂𑀤𑀦𑀓𑀁, 𑀏𑀓𑀁 𑀉𑀤𑁆𑀤𑀸𑀮𑀦𑀓𑀁, 𑀲𑁄𑀤𑀲 𑀚𑀸𑀦𑀦𑁆𑀢𑀺 𑀧𑀜𑁆𑀜𑀢𑁆𑀢𑀸’’𑀢𑀺 𑀇𑀤𑀫𑁂𑀯 𑀅𑀧𑀼𑀩𑁆𑀩𑀁. 𑀲𑁂𑀲𑀁 𑀫𑀳𑀸𑀯𑀕𑁆𑀕𑁂 𑀯𑀺𑀪𑀢𑁆𑀢𑀫𑁂𑀯. 𑀬𑀁 𑀧𑀦𑁂𑀢𑀁 𑀅𑀧𑀼𑀩𑁆𑀩𑀁 𑀢𑀢𑁆𑀣 𑀏𑀓𑀁 𑀪𑁂𑀤𑀦𑀓𑀦𑁆𑀢𑀺 𑀲𑀽𑀘𑀺𑀖𑀭𑀁. 𑀏𑀓𑀁 𑀉𑀤𑁆𑀤𑀸𑀮𑀦𑀓𑀦𑁆𑀢𑀺 𑀢𑀽𑀮𑁄𑀦𑀤𑁆𑀥𑀫𑀜𑁆𑀘𑀧𑀻𑀞𑀁. 𑀲𑁄𑀤𑀲𑀸𑀢𑀺 𑀲𑁄𑀴𑀲. 𑀚𑀸𑀦𑀦𑁆𑀢𑀺 𑀧𑀜𑁆𑀜𑀢𑁆𑀢𑀸𑀢𑀺 ‘‘𑀚𑀸𑀦’’𑀦𑁆𑀢𑀺 𑀏𑀯𑀁 𑀯𑀢𑁆𑀯𑀸 𑀧𑀜𑁆𑀜𑀢𑁆𑀢𑀸, 𑀢𑁂 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 ‘‘𑀚𑀸𑀦𑀁 𑀲𑀗𑁆𑀖𑀺𑀓𑀁 𑀮𑀸𑀪𑀁 𑀧𑀭𑀺𑀡𑀢𑀁 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀬𑁆𑀬, 𑀚𑀸𑀦𑀁 𑀧𑀼𑀩𑁆𑀩𑀼𑀧𑀕𑀢𑀁 𑀪𑀺𑀓𑁆𑀔𑀼𑀁 𑀅𑀦𑀼𑀧𑀔𑀚𑁆𑀚 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬, 𑀚𑀸𑀦𑀁 𑀲𑀧𑁆𑀧𑀸𑀡𑀓𑀁 𑀉𑀤𑀓𑀁 𑀢𑀺𑀡𑀁 𑀯𑀸 𑀫𑀢𑁆𑀢𑀺𑀓𑀁 𑀯𑀸 𑀲𑀺𑀜𑁆𑀘𑁂𑀬𑁆𑀬 𑀯𑀸 𑀲𑀺𑀜𑁆𑀘𑀸𑀧𑁂𑀬𑁆𑀬 𑀯𑀸, 𑀚𑀸𑀦𑀁 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑁂𑀬𑁆𑀬, 𑀚𑀸𑀦𑀁 𑀆𑀲𑀸𑀤𑀦𑀸𑀧𑁂𑀓𑁆𑀔𑁄 𑀪𑀼𑀢𑁆𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀚𑀸𑀦𑀁 𑀲𑀧𑁆𑀧𑀸𑀡𑀓𑀁 𑀉𑀤𑀓𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀚𑀸𑀦𑀁 𑀬𑀣𑀸𑀥𑀫𑁆𑀫𑀁 𑀦𑀺𑀳𑀢𑀸𑀥𑀺𑀓𑀭𑀡𑀁, 𑀚𑀸𑀦𑀁 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀬𑁆𑀬, 𑀚𑀸𑀦𑀁 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀧𑀼𑀕𑁆𑀕𑀮𑀁 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀚𑀸𑀦𑀁 𑀣𑁂𑀬𑁆𑀬𑀲𑀢𑁆𑀣𑁂𑀦 𑀲𑀤𑁆𑀥𑀺𑀁, 𑀚𑀸𑀦𑀁 𑀢𑀣𑀸𑀯𑀸𑀤𑀺𑀦𑀸 𑀪𑀺𑀓𑁆𑀔𑀼𑀦𑀸 𑀅𑀓𑀢𑀸𑀦𑀼𑀥𑀫𑁆𑀫𑁂𑀦, 𑀚𑀸𑀦𑀁 𑀢𑀣𑀸𑀦𑀸𑀲𑀺𑀢𑀁 𑀲𑀫𑀡𑀼𑀤𑁆𑀤𑁂𑀲𑀁, 𑀚𑀸𑀦𑀁 𑀲𑀗𑁆𑀖𑀺𑀓𑀁 𑀮𑀸𑀪𑀁 𑀧𑀭𑀺𑀡𑀢𑀁 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀸𑀫𑁂𑀬𑁆𑀬, 𑀚𑀸𑀦𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑀁 𑀪𑀺𑀓𑁆𑀔𑀼𑀦𑀺𑀁 𑀦𑁂𑀯 𑀅𑀢𑁆𑀢𑀦𑀸 𑀧𑀝𑀺𑀘𑁄𑀤𑁂𑀬𑁆𑀬, 𑀚𑀸𑀦𑀁 𑀘𑁄𑀭𑀺𑀁 𑀯𑀚𑁆𑀛𑀁 𑀯𑀺𑀤𑀺𑀢𑀁 𑀅𑀦𑀧𑀮𑁄𑀓𑁂𑀢𑁆𑀯𑀸, 𑀚𑀸𑀦𑀁 𑀲𑀪𑀺𑀓𑁆𑀔𑀼𑀓𑀁 𑀆𑀭𑀸𑀫𑀁 𑀅𑀦𑀸𑀧𑀼𑀘𑁆𑀙𑀸 𑀧𑀯𑀺𑀲𑁂𑀬𑁆𑀬𑀸’’𑀢𑀺.

𑀅𑀲𑀸𑀥𑀸𑀭𑀡𑀸𑀤𑀺𑀯𑀡𑁆𑀡𑀦𑀸

𑁩𑁩𑁮. 𑀇𑀤𑀸𑀦𑀺 ‘‘𑀲𑀸𑀥𑀸𑀭𑀡𑀁 𑀅𑀲𑀸𑀥𑀸𑀭𑀡’’𑀦𑁆𑀢𑀺 𑀇𑀫𑀁 𑀧𑀼𑀭𑀺𑀫𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀯𑀻𑀲𑀁 𑀤𑁆𑀯𑁂 𑀲𑀢𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑁂𑀲𑀼 𑀙 𑀲𑀗𑁆𑀖𑀸𑀤𑀺𑀲𑁂𑀲𑀸𑀢𑀺 𑀯𑀺𑀲𑁆𑀲𑀝𑁆𑀞𑀺, 𑀓𑀸𑀬𑀲𑀁𑀲𑀕𑁆𑀕𑁄, 𑀤𑀼𑀝𑁆𑀞𑀼𑀮𑁆𑀮𑀁, 𑀅𑀢𑁆𑀢𑀓𑀸𑀫, 𑀓𑀼𑀝𑀺, 𑀯𑀺𑀳𑀸𑀭𑁄𑀢𑀺. 𑀤𑁆𑀯𑁂 𑀅𑀦𑀺𑀬𑀢𑁂𑀳𑀺 𑀅𑀝𑁆𑀞𑀸𑀢𑀺 𑀤𑁆𑀯𑀻𑀳𑀺 𑀅𑀦𑀺𑀬𑀢𑁂𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞 𑀇𑀫𑁂.

𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀤𑁆𑀯𑀸𑀤𑀲𑀸𑀢𑀺 𑁋

𑀥𑁄𑀯𑀦𑀜𑁆𑀘 𑀧𑀝𑀺𑀕𑁆𑀕𑀳𑁄, 𑀓𑁄𑀲𑁂𑀬𑁆𑀬𑀲𑀼𑀤𑁆𑀥𑀤𑁆𑀯𑁂𑀪𑀸𑀕𑀸;

𑀙𑀩𑁆𑀩𑀲𑁆𑀲𑀸𑀦𑀺 𑀦𑀺𑀲𑀻𑀤𑀦𑀁, 𑀤𑁆𑀯𑁂 𑀮𑁄𑀫𑀸 𑀧𑀞𑀫𑁄 𑀧𑀢𑁆𑀢𑁄;

𑀯𑀲𑁆𑀲𑀺𑀓𑀸 𑀆𑀭𑀜𑁆𑀜𑀓𑁂𑀦 𑀘𑀸𑀢𑀺 𑁋 𑀇𑀫𑁂 𑀤𑁆𑀯𑀸𑀤𑀲.

𑀤𑁆𑀯𑁂𑀯𑀻𑀲𑀢𑀺 𑀔𑀼𑀤𑁆𑀤𑀓𑀸𑀢𑀺 𑁋

𑀲𑀓𑀮𑁄 𑀪𑀺𑀓𑁆𑀔𑀼𑀦𑀻𑀯𑀕𑁆𑀕𑁄, 𑀧𑀭𑀫𑁆𑀧𑀭𑀜𑁆𑀘 𑀪𑁄𑀚𑀦𑀁;

𑀅𑀦𑀢𑀺𑀭𑀺𑀢𑁆𑀢𑀁 𑀅𑀪𑀺𑀳𑀝𑀁, 𑀧𑀡𑀻𑀢𑀜𑁆𑀘 𑀅𑀘𑁂𑀮𑀓𑀁;

𑀊𑀦𑀁 𑀤𑀼𑀝𑁆𑀞𑀼𑀮𑁆𑀮𑀙𑀸𑀤𑀦𑀁.

𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀜𑁆𑀘, 𑀬𑀸 𑀘 𑀅𑀦𑀺𑀓𑁆𑀔𑀦𑁆𑀢𑀭𑀸𑀚𑀓𑁂;

𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸, 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀸.

𑀦𑀺𑀲𑀻𑀤𑀦𑁂 𑀘 𑀬𑀸 𑀲𑀺𑀓𑁆𑀔𑀸, 𑀯𑀲𑁆𑀲𑀺𑀓𑀸 𑀬𑀸 𑀘 𑀲𑀸𑀝𑀺𑀓𑀸;

𑀤𑁆𑀯𑀸𑀯𑀻𑀲𑀢𑀺 𑀇𑀫𑀸 𑀲𑀺𑀓𑁆𑀔𑀸, 𑀔𑀼𑀤𑁆𑀤𑀓𑁂𑀲𑀼 𑀧𑀓𑀸𑀲𑀺𑀢𑀸𑀢𑀺.

𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑁂𑀲𑀼𑀧𑀺 𑀲𑀗𑁆𑀖𑀫𑁆𑀳𑀸 𑀤𑀲 𑀦𑀺𑀲𑁆𑀲𑀭𑁂𑀢𑀺 ‘‘𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀻’’𑀢𑀺 𑀏𑀯𑀁 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀸, 𑀫𑀸𑀢𑀺𑀓𑀸𑀬𑀁 𑀧𑀦 ‘‘𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺 𑀏𑀯𑀁 𑀆𑀕𑀢𑀸 𑀤𑀲. 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀤𑁆𑀯𑀸𑀤𑀲𑀸𑀢𑀺 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀯𑀺𑀪𑀢𑁆𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑁂𑀯. 𑀔𑀼𑀤𑁆𑀤𑀓𑀸𑀧𑀺 𑀢𑀢𑁆𑀣 𑀯𑀺𑀪𑀢𑁆𑀢𑀔𑀼𑀤𑁆𑀤𑀓𑀸 𑀏𑀯. 𑀢𑀣𑀸 𑀘𑀢𑁆𑀢𑀸𑀭𑁄 𑀧𑀸𑀝𑀺𑀤𑁂𑀲𑀦𑀻𑀬𑀸, 𑀇𑀢𑀺 𑀲𑀢𑀜𑁆𑀘𑁂𑀯 𑀢𑀺𑀁𑀲𑀜𑁆𑀘 𑀲𑀺𑀓𑁆𑀔𑀸 𑀯𑀺𑀪𑀗𑁆𑀕𑁂 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸. 𑀲𑁂𑀲𑀁 𑀇𑀫𑀲𑁆𑀫𑀺𑀁 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀯𑀺𑀲𑁆𑀲𑀚𑁆𑀚𑀦𑁂 𑀉𑀢𑁆𑀢𑀸𑀦𑀫𑁂𑀯.

𑀇𑀤𑀸𑀦𑀺 𑀯𑀺𑀧𑀢𑁆𑀢𑀺𑀬𑁄 𑀘 ‘‘𑀬𑁂𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀻’’𑀢𑀺 𑀇𑀤𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀅𑀝𑁆𑀞𑁂𑀯 𑀧𑀸𑀭𑀸𑀚𑀺𑀓𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀼𑀭𑀸𑀲𑀤𑀸𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀲𑀧𑁆𑀧𑀝𑀺𑀪𑀬𑀢𑀁 𑀤𑀲𑁆𑀲𑁂𑀢𑀺. 𑀓𑀡𑁆𑀳𑀲𑀧𑁆𑀧𑀸𑀤𑀬𑁄 𑀯𑀺𑀬 𑀳𑀺 𑀏𑀢𑁂 𑀤𑀼𑀭𑀸𑀲𑀤𑀸 𑀤𑀼𑀭𑀽𑀧𑀕𑀫𑀦𑀸 𑀤𑀼𑀭𑀸𑀲𑀚𑁆𑀚𑀦𑀸, 𑀆𑀧𑀚𑁆𑀚𑀺𑀬𑀫𑀸𑀦𑀸 𑀫𑀽𑀮𑀘𑁆𑀙𑁂𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀸𑀮𑀯𑀢𑁆𑀣𑀼𑀲𑀫𑀽𑀧𑀫𑀸𑀢𑀺 𑀲𑀩𑁆𑀩𑀁 𑀢𑀸𑀮𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀸𑀮𑀲𑁆𑀲 𑀯𑀢𑁆𑀣𑀼𑀫𑀢𑁆𑀢𑀓𑀭𑀡𑁂𑀦 𑀲𑀫𑀽𑀧𑀫𑀸. 𑀬𑀣𑀸 𑀯𑀢𑁆𑀣𑀼𑀫𑀢𑁆𑀢𑀓𑀢𑁄 𑀢𑀸𑀮𑁄 𑀦 𑀧𑀼𑀦 𑀧𑀸𑀓𑀢𑀺𑀓𑁄 𑀳𑁄𑀢𑀺, 𑀏𑀯𑀁 𑀦 𑀧𑀼𑀦 𑀧𑀸𑀓𑀢𑀺𑀓𑀸 𑀳𑁄𑀦𑁆𑀢𑀺.

𑀏𑀯𑀁 𑀲𑀸𑀥𑀸𑀭𑀡𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀏𑀓𑁂𑀓𑀲𑁆𑀲 𑀯𑀼𑀢𑁆𑀢𑀁 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀧𑀡𑁆𑀟𑀼𑀧𑀮𑀸𑀲𑁄𑀢𑀺𑀆𑀤𑀺𑀫𑀸𑀳. 𑀅𑀯𑀺𑀭𑀼𑀴𑁆𑀳𑀻 𑀪𑀯𑀦𑁆𑀢𑀺 𑀢𑁂𑀢𑀺 𑀬𑀣𑀸 𑀏𑀢𑁂 𑀧𑀡𑁆𑀟𑀼𑀧𑀮𑀸𑀲𑀸𑀤𑀬𑁄 𑀧𑀼𑀦𑀳𑀭𑀺𑀢𑀸𑀤𑀺𑀪𑀸𑀯𑁂𑀦 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑀸 𑀳𑁄𑀦𑁆𑀢𑀺; 𑀏𑀯𑀁 𑀧𑀸𑀭𑀸𑀚𑀺𑀓𑀸𑀧𑀺 𑀧𑀼𑀦 𑀧𑀓𑀢𑀺𑀲𑀻𑀮𑀸𑀪𑀸𑀯𑁂𑀦 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 ‘‘𑀯𑀺𑀧𑀢𑁆𑀢𑀺𑀬𑁄 𑀘 𑀬𑁂𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀻’’𑀢𑀺 𑀏𑀢𑁆𑀣 𑀇𑀫𑀸 𑀢𑀸𑀯 𑀅𑀝𑁆𑀞 𑀧𑀸𑀭𑀸𑀚𑀺𑀓𑀯𑀺𑀧𑀢𑁆𑀢𑀺𑀬𑁄 𑀓𑁂𑀳𑀺𑀘𑀺 𑀲𑀫𑀣𑁂𑀳𑀺 𑀦 𑀲𑀫𑁆𑀫𑀦𑁆𑀢𑀻𑀢𑀺 𑀏𑀯𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀬𑀸 𑀧𑀦 𑀯𑀺𑀧𑀢𑁆𑀢𑀺𑀬𑁄 𑀲𑀫𑁆𑀫𑀦𑁆𑀢𑀺, 𑀢𑀸 𑀤𑀲𑁆𑀲𑁂𑀢𑀼𑀁 𑀢𑁂𑀯𑀻𑀲𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀻𑀳𑀺 𑀲𑀫𑀣𑁂𑀳𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀘𑀦𑀫𑁂𑀢𑀁. 𑀲𑀗𑁆𑀖𑀸𑀤𑀺𑀲𑁂𑀲𑀸 𑀳𑀺 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺, 𑀦 𑀢𑀺𑀡𑀯𑀢𑁆𑀣𑀸𑀭𑀓𑁂𑀦. 𑀲𑁂𑀲𑀸 𑀢𑀻𑀳𑀺𑀧𑀺 𑀲𑀫𑁆𑀫𑀦𑁆𑀢𑀺.

𑀤𑁆𑀯𑁂 𑀉𑀧𑁄𑀲𑀣𑀸 𑀤𑁆𑀯𑁂 𑀧𑀯𑀸𑀭𑀡𑀸𑀢𑀺 𑀇𑀤𑀁 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀺𑀪𑀢𑁆𑀢𑀺𑀫𑀢𑁆𑀢𑀤𑀲𑁆𑀲𑀦𑁂𑀦𑁂𑀯 𑀘𑁂𑀢𑀁 𑀯𑀼𑀢𑁆𑀢𑀁, 𑀦 𑀲𑀫𑀣𑁂𑀳𑀺 𑀯𑀽𑀧𑀲𑀫𑀦𑀯𑀲𑁂𑀦. 𑀪𑀺𑀓𑁆𑀔𑀼𑀉𑀧𑁄𑀲𑀣𑁄, 𑀪𑀺𑀓𑁆𑀔𑀼𑀦𑀺𑀉𑀧𑁄𑀲𑀣𑁄, 𑀪𑀺𑀓𑁆𑀔𑀼𑀧𑀯𑀸𑀭𑀡𑀸, 𑀪𑀺𑀓𑁆𑀔𑀼𑀦𑀺𑀧𑀯𑀸𑀭𑀡𑀸𑀢𑀺 𑀇𑀫𑀸𑀧𑀺 𑀳𑀺 𑀘𑀢𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄; 𑀯𑀺𑀪𑀚𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀻𑀢𑀺 𑀅𑀥𑀫𑁆𑀫𑁂𑀦𑀯𑀕𑁆𑀕𑀸𑀤𑀻𑀦𑀺 𑀉𑀧𑁄𑀲𑀣𑀓𑀫𑁆𑀫𑀸𑀦𑀺. 𑀧𑀜𑁆𑀘𑁂𑀯 𑀉𑀤𑁆𑀤𑁂𑀲𑀸 𑀘𑀢𑀼𑀭𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀣𑀸𑀢𑀺 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘 𑀉𑀤𑁆𑀤𑁂𑀲𑀸 𑀪𑀺𑀓𑁆𑀔𑀼𑀦𑀻𑀦𑀁 𑀘𑀢𑀼𑀭𑁄 𑀪𑀯𑀦𑁆𑀢𑀺, 𑀅𑀜𑁆𑀜𑀣𑀸 𑀦 𑀪𑀯𑀦𑁆𑀢𑀺; 𑀇𑀫𑀸 𑀅𑀧𑀭𑀸𑀧𑀺 𑀯𑀺𑀪𑀢𑁆𑀢𑀺𑀬𑁄. 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀘 𑀪𑀯𑀦𑁆𑀢𑀺 𑀲𑀢𑁆𑀢, 𑀅𑀥𑀺𑀓𑀭𑀡𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀇𑀫𑀸 𑀧𑀦 𑀯𑀺𑀪𑀢𑁆𑀢𑀺𑀬𑁄 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺, 𑀢𑀲𑁆𑀫𑀸 𑀲𑀢𑁆𑀢𑀳𑀺 𑀲𑀫𑀣𑁂𑀳𑀻𑀢𑀺𑀆𑀤𑀺𑀫𑀸𑀳. 𑀅𑀣 𑀯𑀸 ‘‘𑀤𑁆𑀯𑁂 𑀉𑀧𑁄𑀲𑀣𑀸 𑀤𑁆𑀯𑁂 𑀧𑀯𑀸𑀭𑀡𑀸 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀧𑀜𑁆𑀘𑁂𑀯 𑀉𑀤𑁆𑀤𑁂𑀲𑀸 𑀘𑀢𑀼𑀭𑁄 𑀪𑀯𑀦𑁆𑀢𑀺, 𑀅𑀦𑀜𑁆𑀜𑀣𑀸’’𑀢𑀺 𑀇𑀫𑀸𑀧𑀺 𑀘𑀢𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄 𑀦𑀺𑀲𑁆𑀲𑀸𑀬 ‘‘𑀦𑀲𑁆𑀲𑀦𑁆𑀢𑁂𑀢𑁂 𑀯𑀺𑀦𑀲𑁆𑀲𑀦𑁆𑀢𑁂𑀢𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀦𑁆𑀢𑀺, 𑀢𑀸 𑀬𑀲𑁆𑀫𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑁂𑀯 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺, 𑀢𑀲𑁆𑀫𑀸 𑀢𑀁𑀫𑀽𑀮𑀓𑀸𑀦𑀁 𑀆𑀧𑀢𑁆𑀢𑀻𑀦𑀁 𑀲𑀫𑀣𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀢𑀸 𑀯𑀺𑀪𑀢𑁆𑀢𑀺𑀬𑁄 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀺𑀘𑁆𑀘𑀁 𑀏𑀓𑁂𑀦𑀸𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀏𑀓𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀺.

𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀡𑁆𑀡𑀦𑀸

𑁩𑁩𑁯. 𑀏𑀯𑀁 𑀧𑀼𑀘𑁆𑀙𑀸𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀘 𑀪𑀯𑀦𑁆𑀢𑀺 𑀲𑀢𑁆𑀢𑀸’’𑀢𑀺 𑀏𑀢𑁆𑀣 𑀲𑀗𑁆𑀕𑀳𑀺𑀢𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀧𑀘𑁆𑀘𑁂𑀓𑀁 𑀦𑀺𑀩𑁆𑀩𑀘𑀦𑀫𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀧𑀸𑀭𑀸𑀚𑀺𑀓𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀭𑀸𑀚𑀺𑀓𑀦𑁆𑀢𑀺 𑀕𑀸𑀣𑀸𑀬 𑀅𑀬𑀫𑀢𑁆𑀣𑁄 𑁋 𑀬𑀤𑀺𑀤𑀁 𑀧𑀼𑀕𑁆𑀕𑀮𑀸𑀧𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀧𑀸𑀭𑀸𑀚𑀺𑀓𑁂𑀲𑀼 𑀆𑀧𑀢𑁆𑀢𑀺𑀧𑀸𑀭𑀸𑀚𑀺𑀓𑀁 𑀦𑀸𑀫 𑀯𑀼𑀢𑁆𑀢𑀁, 𑀢𑀁 𑀆𑀧𑀚𑁆𑀚𑀦𑁆𑀢𑁄 𑀧𑀼𑀕𑁆𑀕𑀮𑁄 𑀬𑀲𑁆𑀫𑀸 𑀧𑀭𑀸𑀚𑀺𑀢𑁄 𑀧𑀭𑀸𑀚𑀬𑀫𑀸𑀧𑀦𑁆𑀦𑁄 𑀲𑀤𑁆𑀥𑀫𑁆𑀫𑀸 𑀘𑀼𑀢𑁄 𑀧𑀭𑀤𑁆𑀥𑁄 𑀪𑀝𑁆𑀞𑁄 𑀦𑀺𑀭𑀗𑁆𑀓𑀢𑁄 𑀘 𑀳𑁄𑀢𑀺, 𑀅𑀦𑀺𑀳𑀢𑁂 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀧𑀼𑀦 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸𑀤𑀺𑀪𑁂𑀤𑁄 𑀲𑀁𑀯𑀸𑀲𑁄 𑀦𑀢𑁆𑀣𑀺. 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀏𑀢𑀁 𑀆𑀧𑀢𑁆𑀢𑀺𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀲𑁆𑀫𑀸 𑀧𑀭𑀸𑀚𑀺𑀢𑁄 𑀳𑁄𑀢𑀺 𑀢𑁂𑀦, 𑀢𑀲𑁆𑀫𑀸 𑀏𑀢𑀁 𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀤𑀼𑀢𑀺𑀬𑀕𑀸𑀣𑀸𑀬𑀧𑀺 𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 𑀲𑀗𑁆𑀖𑁄𑀯 𑀤𑁂𑀢𑀺 𑀧𑀭𑀺𑀯𑀸𑀲𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀼𑀓𑀸𑀫𑀲𑁆𑀲 𑀬𑀁 𑀢𑀁 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀢𑀲𑁆𑀲 𑀆𑀤𑀺𑀫𑁆𑀳𑀺 𑀘𑁂𑀯 𑀧𑀭𑀺𑀯𑀸𑀲𑀤𑀸𑀦𑀢𑁆𑀣𑀸𑀬 𑀆𑀤𑀺𑀢𑁄 𑀲𑁂𑀲𑁂 𑀫𑀚𑁆𑀛𑁂 𑀫𑀸𑀦𑀢𑁆𑀢𑀤𑀸𑀦𑀢𑁆𑀣𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑁂𑀦 𑀯𑀸 𑀲𑀳 𑀫𑀸𑀦𑀢𑁆𑀢𑀤𑀸𑀦𑀢𑁆𑀣𑀸𑀬, 𑀅𑀯𑀲𑀸𑀦𑁂 𑀅𑀩𑁆𑀪𑀸𑀦𑀢𑁆𑀣𑀸𑀬 𑀘 𑀲𑀗𑁆𑀖𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀦 𑀳𑁂𑀢𑁆𑀣 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀯𑀺𑀦𑀸 𑀲𑀗𑁆𑀖𑁂𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀲𑀗𑁆𑀖𑁄, 𑀆𑀤𑀺𑀫𑁆𑀳𑀺 𑀘𑁂𑀯 𑀲𑁂𑀲𑁂 𑀘 𑀇𑀘𑁆𑀙𑀺𑀢𑀩𑁆𑀩𑁄 𑀅𑀲𑁆𑀲𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀢𑀢𑀺𑀬𑀕𑀸𑀣𑀸𑀬 𑀅𑀦𑀺𑀬𑀢𑁄 𑀦 𑀦𑀺𑀬𑀢𑁄𑀢𑀺 𑀬𑀲𑁆𑀫𑀸 𑀦 𑀦𑀺𑀬𑀢𑁄, 𑀢𑀲𑁆𑀫𑀸 𑀅𑀦𑀺𑀬𑀢𑁄 𑀅𑀬𑀫𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀓𑀺𑀁 𑀓𑀸𑀭𑀡𑀸 𑀦 𑀦𑀺𑀬𑀢𑁄𑀢𑀺? 𑀅𑀦𑁂𑀓𑀁𑀲𑀺𑀓𑀢𑀁 𑀧𑀤𑀁, 𑀬𑀲𑁆𑀫𑀸 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀦𑁂𑀓𑀁𑀲𑁂𑀦 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀣𑀁 𑀅𑀦𑁂𑀓𑀁𑀲𑁂𑀦? 𑀢𑀺𑀡𑁆𑀡𑀫𑀜𑁆𑀜𑀢𑀭𑀁 𑀞𑀸𑀦𑀁, 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀅𑀦𑀺𑀬𑀢𑁄’’𑀢𑀺 𑀧𑀯𑀼𑀘𑁆𑀘𑀢𑀺, 𑀲𑁄 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁄 𑀅𑀦𑀺𑀬𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀘 𑀢𑀺𑀡𑁆𑀡𑀁 𑀅𑀜𑁆𑀜𑀢𑀭𑀁 𑀞𑀸𑀦𑀁, 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑀁 𑀞𑀸𑀦𑀁 𑀬𑀢𑁆𑀣 𑀯𑀼𑀢𑁆𑀢𑀁, 𑀲𑁄𑀧𑀺 𑀅𑀦𑀺𑀬𑀢𑁄 𑀏𑀯.

𑀘𑀢𑀼𑀢𑁆𑀣𑀕𑀸𑀣𑀸𑀬 𑀅𑀘𑁆𑀘𑀬𑁄 𑀢𑁂𑀦 𑀲𑀫𑁄 𑀦𑀢𑁆𑀣𑀻𑀢𑀺 𑀤𑁂𑀲𑀦𑀸𑀕𑀸𑀫𑀺𑀦𑀻𑀲𑀼 𑀅𑀘𑁆𑀘𑀬𑁂𑀲𑀼 𑀢𑁂𑀦 𑀲𑀫𑁄 𑀣𑀽𑀮𑁄 𑀅𑀘𑁆𑀘𑀬𑁄 𑀦𑀢𑁆𑀣𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺; 𑀣𑀽𑀮𑀢𑁆𑀢𑀸 𑀅𑀘𑁆𑀘𑀬𑀲𑁆𑀲 𑀏𑀢𑀁 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀫𑀕𑀸𑀣𑀸𑀬 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀦 𑀤𑁂𑀲𑁂𑀢𑀺 𑀢𑁂𑀦𑁂𑀢𑀦𑁆𑀢𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀤𑁂𑀲𑁂𑀢𑀩𑁆𑀩𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀙𑀝𑁆𑀞𑀕𑀸𑀣𑀸𑀬 𑀧𑀸𑀢𑁂𑀢𑀺 𑀓𑀼𑀲𑀮𑀁 𑀥𑀫𑁆𑀫𑀦𑁆𑀢𑀺 𑀲𑀜𑁆𑀘𑀺𑀘𑁆𑀘 𑀆𑀧𑀚𑁆𑀚𑀦𑁆𑀢𑀲𑁆𑀲 𑀓𑀼𑀲𑀮𑀥𑀫𑁆𑀫𑀲𑀗𑁆𑀔𑀸𑀢𑀁 𑀓𑀼𑀲𑀮𑀘𑀺𑀢𑁆𑀢𑀁 𑀧𑀸𑀢𑁂𑀢𑀺, 𑀢𑀲𑁆𑀫𑀸 𑀧𑀸𑀢𑁂𑀢𑀺 𑀘𑀺𑀢𑁆𑀢𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀁. 𑀬𑀁 𑀧𑀦 𑀘𑀺𑀢𑁆𑀢𑀁 𑀧𑀸𑀢𑁂𑀢𑀺, 𑀢𑀁 𑀬𑀲𑁆𑀫𑀸 𑀅𑀭𑀺𑀬𑀫𑀕𑁆𑀕𑀁 𑀅𑀧𑀭𑀚𑁆𑀛𑀢𑀺, 𑀘𑀺𑀢𑁆𑀢𑀲𑀫𑁆𑀫𑁄𑀳𑀓𑀸𑀭𑀡𑀜𑁆𑀘 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀭𑀺𑀬𑀫𑀕𑁆𑀕𑀁 𑀅𑀧𑀭𑀚𑁆𑀛𑀢𑀺, 𑀘𑀺𑀢𑁆𑀢𑀲𑀫𑁆𑀫𑁄𑀳𑀦𑀝𑁆𑀞𑀸𑀦’’𑀦𑁆𑀢𑀺 𑀘 𑀯𑀼𑀢𑁆𑀢𑀁.

𑀧𑀸𑀝𑀺𑀤𑁂𑀲𑀦𑀻𑀬𑀕𑀸𑀣𑀸𑀲𑀼 ‘‘𑀕𑀸𑀭𑀬𑁆𑀳𑀁 𑀆𑀯𑀼𑀲𑁄 𑀥𑀫𑁆𑀫𑀁 𑀆𑀧𑀚𑁆𑀚𑀺’’𑀦𑁆𑀢𑀺 𑀯𑀼𑀢𑁆𑀢𑀕𑀸𑀭𑀬𑁆𑀳𑀪𑀸𑀯𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑀫𑁂𑀯 𑀪𑀺𑀓𑁆𑀔𑀼 𑀅𑀜𑁆𑀜𑀸𑀢𑀓𑁄 𑀲𑀦𑁆𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀤𑁂𑀲𑁂𑀢𑀩𑁆𑀩𑀢𑁄 𑀧𑀦 𑀲𑀸 𑀆𑀧𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀸𑀢𑀺 𑀯𑀼𑀘𑁆𑀘𑀢𑀺.

𑀤𑀼𑀓𑁆𑀓𑀝𑀕𑀸𑀣𑀸𑀬 𑀅𑀧𑀭𑀤𑁆𑀥𑀁 𑀯𑀺𑀭𑀤𑁆𑀥𑀜𑁆𑀘 𑀔𑀮𑀺𑀢𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 ‘‘𑀬𑀜𑁆𑀘 𑀤𑀼𑀓𑁆𑀓𑀝’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀓𑀝𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀬𑀜𑁆𑀳𑀺 𑀤𑀼𑀝𑁆𑀞𑀼 𑀓𑀢𑀁 𑀯𑀺𑀭𑀽𑀧𑀁 𑀯𑀸 𑀓𑀢𑀁, 𑀢𑀁 𑀤𑀼𑀓𑁆𑀓𑀝𑀁. 𑀢𑀁 𑀧𑀦𑁂𑀢𑀁 𑀬𑀣𑀸 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀁; 𑀏𑀯𑀁 𑀅𑀓𑀢𑀢𑁆𑀢𑀸 𑀅𑀧𑀭𑀤𑁆𑀥𑀁, 𑀓𑀼𑀲𑀮𑀁 𑀯𑀺𑀭𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀯𑀺𑀭𑀤𑁆𑀥𑀁, 𑀅𑀭𑀺𑀬𑀯𑀢𑁆𑀢𑀧𑀝𑀺𑀧𑀤𑀁 𑀅𑀦𑀸𑀭𑀼𑀴𑁆𑀳𑀢𑁆𑀢𑀸 𑀔𑀮𑀺𑀢𑀁. 𑀬𑀁 𑀫𑀦𑀼𑀲𑁆𑀲𑁄 𑀓𑀭𑁂𑀢𑀺 𑀇𑀤𑀁 𑀧𑀦𑀲𑁆𑀲 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀳𑀺 𑀬𑀁 𑀮𑁄𑀓𑁂 𑀫𑀦𑀼𑀲𑁆𑀲𑁄 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄 𑀧𑀸𑀧𑀁 𑀓𑀭𑁄𑀢𑀺, 𑀢𑀁 𑀤𑀼𑀓𑁆𑀓𑀝𑀦𑁆𑀢𑀺 𑀧𑀯𑁂𑀤𑁂𑀦𑁆𑀢𑀺; 𑀏𑀯𑀫𑀺𑀤𑀫𑁆𑀧𑀺 𑀩𑀼𑀤𑁆𑀥𑀧𑁆𑀧𑀝𑀺𑀓𑀼𑀝𑁆𑀞𑁂𑀦 𑀮𑀸𑀫𑀓𑀪𑀸𑀯𑁂𑀦 𑀧𑀸𑀧𑀁, 𑀢𑀲𑁆𑀫𑀸 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀩𑁆𑀪𑀸𑀲𑀺𑀢𑀕𑀸𑀣𑀸𑀬 𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀭𑀸𑀪𑀝𑁆𑀞𑀦𑁆𑀢𑀺 𑀤𑀼𑀝𑁆𑀞𑀼 𑀆𑀪𑀝𑁆𑀞𑀁 𑀪𑀸𑀲𑀺𑀢𑀁 𑀮𑀧𑀺𑀢𑀦𑁆𑀢𑀺 𑀤𑀼𑀭𑀸𑀪𑀝𑁆𑀞𑀁. 𑀬𑀁 𑀤𑀼𑀭𑀸𑀪𑀝𑁆𑀞𑀁, 𑀢𑀁 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀲𑀁𑀓𑀺𑀮𑀺𑀝𑁆𑀞𑀜𑁆𑀘 𑀬𑀁 𑀧𑀤𑀁, 𑀲𑀁𑀓𑀺𑀮𑀺𑀝𑁆𑀞𑀁 𑀬𑀲𑁆𑀫𑀸 𑀢𑀁 𑀧𑀤𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀬𑀜𑁆𑀘 𑀯𑀺𑀜𑁆𑀜𑀽 𑀕𑀭𑀳𑀦𑁆𑀢𑀺, 𑀬𑀲𑁆𑀫𑀸 𑀘 𑀦𑀁 𑀯𑀺𑀜𑁆𑀜𑀽 𑀕𑀭𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑁂𑀦 𑀲𑀁𑀓𑀺𑀮𑀺𑀝𑁆𑀞𑀪𑀸𑀯𑁂𑀦 𑀘 𑀯𑀺𑀜𑁆𑀜𑀼𑀕𑀭𑀳𑀦𑁂𑀦𑀸𑀧𑀺 𑀘 𑀏𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺; ‘‘𑀤𑀼𑀩𑁆𑀪𑀸𑀲𑀺𑀢’’𑀦𑁆𑀢𑀺 𑀏𑀯𑀁 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀲𑁂𑀔𑀺𑀬𑀕𑀸𑀣𑀸𑀬 ‘‘𑀆𑀤𑀺 𑀘𑁂𑀢𑀁 𑀘𑀭𑀡𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑁂𑀔𑀲𑁆𑀲 𑀲𑀦𑁆𑀢𑀓𑀪𑀸𑀯𑀁 𑀤𑀻𑀧𑁂𑀢𑀺. 𑀢𑀲𑁆𑀫𑀸 𑀲𑁂𑀔𑀲𑁆𑀲 𑀇𑀤𑀁 𑀲𑁂𑀔𑀺𑀬𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄. 𑀇𑀤𑀁 ‘‘𑀕𑀭𑀼𑀓𑀮𑀳𑀼𑀓𑀜𑁆𑀘𑀸𑀧𑀻’’𑀢𑀺𑀆𑀤𑀺𑀧𑀜𑁆𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑀲𑁆𑀲 ‘‘𑀳𑀦𑁆𑀤 𑀯𑀸𑀓𑁆𑀬𑀁 𑀲𑀼𑀡𑁄𑀫 𑀢𑁂’’𑀢𑀺 𑀇𑀫𑀺𑀦𑀸 𑀧𑀦 𑀆𑀬𑀸𑀘𑀦𑀯𑀘𑀦𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺𑀆𑀤𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀕𑁂𑀳𑀁 𑀢𑀸𑀯 𑀢𑀺𑀡𑀸𑀤𑀻𑀳𑀺 𑀅𑀘𑁆𑀙𑀦𑁆𑀦𑀁 𑀅𑀢𑀺𑀯𑀲𑁆𑀲𑀢𑀺. 𑀇𑀤𑀁 𑀧𑀦 𑀆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀕𑁂𑀳𑀁 𑀙𑀦𑁆𑀦𑀁 𑀅𑀢𑀺𑀯𑀲𑁆𑀲𑀢𑀺; 𑀫𑀽𑀮𑀸𑀧𑀢𑁆𑀢𑀺𑀜𑁆𑀳𑀺 𑀙𑀸𑀤𑁂𑀦𑁆𑀢𑁄 𑀅𑀜𑁆𑀜𑀁 𑀦𑀯𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀕𑁂𑀳𑀁 𑀢𑀸𑀯 𑀅𑀯𑀺𑀯𑀝𑀁 𑀲𑀼𑀘𑁆𑀙𑀦𑁆𑀦𑀁 𑀦𑀸𑀢𑀺𑀯𑀲𑁆𑀲𑀢𑀺. 𑀇𑀤𑀁 𑀧𑀦 𑀆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀕𑁂𑀳𑀁 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺; 𑀫𑀽𑀮𑀸𑀧𑀢𑁆𑀢𑀺𑀜𑁆𑀳𑀺 𑀯𑀺𑀯𑀭𑀦𑁆𑀢𑁄 𑀤𑁂𑀲𑀦𑀸𑀕𑀸𑀫𑀺𑀦𑀺𑀁 𑀤𑁂𑀲𑁂𑀢𑁆𑀯𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀆𑀬𑀢𑀺𑀁 𑀲𑀁𑀯𑀭𑀦𑁆𑀢𑁄 𑀅𑀜𑁆𑀜𑀁 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀣𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀤𑁂𑀲𑀦𑀸𑀕𑀸𑀫𑀺𑀦𑀺𑀁 𑀤𑁂𑀲𑁂𑀦𑁆𑀢𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀢𑁄 𑀘 𑀯𑀼𑀝𑁆𑀞𑀳𑀦𑁆𑀢𑁄 𑀙𑀦𑁆𑀦𑀁 𑀯𑀺𑀯𑀭𑁂𑀣. 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀏𑀯𑀜𑁆𑀘𑁂𑀢𑀁 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀕𑀢𑀺 𑀫𑀺𑀕𑀸𑀦𑀁 𑀧𑀯𑀦𑀦𑁆𑀢𑀺 𑀅𑀚𑁆𑀛𑁄𑀓𑀸𑀲𑁂 𑀩𑁆𑀬𑀕𑁆𑀖𑀸𑀤𑀻𑀳𑀺 𑀧𑀭𑀺𑀧𑀸𑀢𑀺𑀬𑀫𑀸𑀦𑀸𑀦𑀁 𑀫𑀺𑀕𑀸𑀦𑀁 𑀧𑀯𑀦𑀁 𑀭𑀼𑀓𑁆𑀔𑀸𑀤𑀺𑀕𑀳𑀦𑀁 𑀅𑀭𑀜𑁆𑀜𑀁 𑀕𑀢𑀺 𑀧𑀝𑀺𑀲𑀭𑀡𑀁 𑀳𑁄𑀢𑀺, 𑀢𑀁 𑀧𑀢𑁆𑀯𑀸 𑀢𑁂 𑀅𑀲𑁆𑀲𑀸𑀲𑀦𑁆𑀢𑀺. 𑀏𑀢𑁂𑀦𑁂𑀯 𑀦𑀬𑁂𑀦 𑀆𑀓𑀸𑀲𑁄 𑀧𑀓𑁆𑀔𑀻𑀦𑀁 𑀕𑀢𑀺. 𑀅𑀯𑀲𑁆𑀲𑀁 𑀉𑀧𑀕𑀫𑀦𑀝𑁆𑀞𑁂𑀦 𑀧𑀦 𑀯𑀺𑀪𑀯𑁄 𑀕𑀢𑀺 𑀥𑀫𑁆𑀫𑀸𑀦𑀁, 𑀲𑀩𑁆𑀩𑁂𑀲𑀫𑁆𑀧𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀯𑀺𑀦𑀸𑀲𑁄𑀯 𑀢𑁂𑀲𑀁 𑀕𑀢𑀺. 𑀦 𑀳𑀺 𑀢𑁂 𑀯𑀺𑀦𑀸𑀲𑀁 𑀅𑀕𑀘𑁆𑀙𑀦𑁆𑀢𑀸 𑀞𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀲𑀼𑀘𑀺𑀭𑀫𑁆𑀧𑀺 𑀞𑀢𑁆𑀯𑀸 𑀧𑀦 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀺, 𑀔𑀻𑀡𑀸𑀲𑀯𑀲𑁆𑀲 𑀅𑀭𑀳𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 𑀏𑀓𑀁𑀲𑁂𑀦 𑀕𑀢𑀻𑀢𑀺 𑀅𑀢𑁆𑀣𑁄.

𑀧𑀞𑀫𑀕𑀸𑀣𑀸𑀲𑀗𑁆𑀕𑀡𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.