𑀲𑁂𑀤𑀫𑁄𑀘𑀦𑀕𑀸𑀣𑀸

(𑁧) 𑀅𑀯𑀺𑀧𑁆𑀧𑀯𑀸𑀲𑀧𑀜𑁆𑀳𑀸𑀯𑀡𑁆𑀡𑀦𑀸

𑁪𑁭𑁯. 𑀲𑁂𑀤𑀫𑁄𑀘𑀦𑀕𑀸𑀣𑀸𑀲𑀼 𑀅𑀲𑀁𑀯𑀸𑀲𑁄𑀢𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀺𑀦𑀸 𑀲𑀁𑀯𑀸𑀲𑁂𑀦 𑀅𑀲𑀁𑀯𑀸𑀲𑁄. 𑀲𑀫𑁆𑀪𑁄𑀕𑁄 𑀏𑀓𑀘𑁆𑀘𑁄 𑀢𑀳𑀺𑀁 𑀦 𑀮𑀩𑁆𑀪𑀢𑀻𑀢𑀺 𑀅𑀓𑀧𑁆𑀧𑀺𑀬𑀲𑀫𑁆𑀪𑁄𑀕𑁄 𑀦 𑀮𑀩𑁆𑀪𑀢𑀺, 𑀦𑀳𑀸𑀧𑀦𑀪𑁄𑀚𑀦𑀸𑀤𑀺𑀧𑀝𑀺𑀚𑀕𑁆𑀕𑀦𑀁 𑀧𑀦 𑀫𑀸𑀢𑀭𑀸𑀬𑁂𑀯 𑀓𑀸𑀢𑀼𑀁 𑀮𑀩𑁆𑀪𑀢𑀺. 𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀦𑀸𑀧𑀢𑁆𑀢𑀻𑀢𑀺 𑀲𑀳𑀕𑀸𑀭𑀲𑁂𑀬𑁆𑀬𑀸𑀬 𑀅𑀦𑀸𑀧𑀢𑁆𑀢𑀺. 𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸𑀢𑀺 𑀏𑀲𑀸 𑀧𑀜𑁆𑀳𑀸 𑀓𑀼𑀲𑀮𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀘𑀺𑀦𑁆𑀢𑀺𑀢𑀸. 𑀅𑀲𑁆𑀲𑀸 𑀯𑀺𑀲𑁆𑀲𑀚𑁆𑀚𑀦𑀁 𑀤𑀸𑀭𑀓𑀫𑀸𑀢𑀼𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀲𑀸 𑀳𑀺 𑀧𑀼𑀢𑁆𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀦𑁆𑀢𑀺.

𑀅𑀯𑀺𑀲𑁆𑀲𑀚𑁆𑀚𑀺𑀢𑀕𑀸𑀣𑀸 𑀕𑀭𑀼𑀪𑀡𑁆𑀟𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸, 𑀅𑀢𑁆𑀣𑁄 𑀧𑀦𑀲𑁆𑀲𑀸 𑀕𑀭𑀼𑀪𑀡𑁆𑀟𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑁄𑀬𑁂𑀯.

𑀤𑀲 𑀧𑀼𑀕𑁆𑀕𑀮𑁂 𑀦 𑀯𑀤𑀸𑀫𑀻𑀢𑀺 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑁂 𑀤𑀲 𑀧𑀼𑀕𑁆𑀕𑀮𑁂 𑀦 𑀯𑀤𑀸𑀫𑀺. 𑀏𑀓𑀸𑀤𑀲 𑀯𑀺𑀯𑀚𑁆𑀚𑀺𑀬𑀸𑀢𑀺 𑀬𑁂 𑀫𑀳𑀸𑀔𑀦𑁆𑀥𑀓𑁂 𑀏𑀓𑀸𑀤𑀲 𑀯𑀺𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀸 𑀯𑀼𑀢𑁆𑀢𑀸, 𑀢𑁂𑀧𑀺 𑀦 𑀯𑀤𑀸𑀫𑀺. 𑀅𑀬𑀁 𑀧𑀜𑁆𑀳𑀸 𑀦𑀕𑁆𑀕𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀓𑀣𑀁 𑀦𑀼 𑀲𑀺𑀓𑁆𑀔𑀸𑀬 𑀅𑀲𑀸𑀥𑀸𑀭𑀡𑁄𑀢𑀺 𑀧𑀜𑁆𑀳𑀸 𑀦𑀳𑀸𑀧𑀺𑀢𑀧𑀼𑀩𑁆𑀩𑀓𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀅𑀬𑀜𑁆𑀳𑀺 𑀔𑀼𑀭𑀪𑀡𑁆𑀟𑀁 𑀧𑀭𑀺𑀳𑀭𑀺𑀢𑀼𑀁 𑀦 𑀮𑀪𑀢𑀺, 𑀅𑀜𑁆𑀜𑁂 𑀮𑀪𑀦𑁆𑀢𑀺; 𑀢𑀲𑁆𑀫𑀸 𑀲𑀺𑀓𑁆𑀔𑀸𑀬 𑀅𑀲𑀸𑀥𑀸𑀭𑀡𑁄.

𑀢𑀁 𑀧𑀼𑀕𑁆𑀕𑀮𑀁 𑀓𑀢𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸𑀢𑀺 𑀅𑀬𑀁 𑀧𑀜𑁆𑀳𑀸 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀅𑀥𑁄𑀦𑀸𑀪𑀺𑀁 𑀯𑀺𑀯𑀚𑁆𑀚𑀺𑀬𑀸𑀢𑀺 𑀅𑀥𑁄𑀦𑀸𑀪𑀺𑀁 𑀯𑀺𑀯𑀚𑁆𑀚𑁂𑀢𑁆𑀯𑀸. 𑀅𑀬𑀁 𑀧𑀜𑁆𑀳𑀸 𑀬𑀁 𑀢𑀁 𑀅𑀲𑀻𑀲𑀓𑀁 𑀓𑀩𑀦𑁆𑀥𑀁, 𑀬𑀲𑁆𑀲 𑀉𑀭𑁂 𑀅𑀓𑁆𑀔𑀻𑀦𑀺 𑀘𑁂𑀯 𑀫𑀼𑀔𑀜𑁆𑀘 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀪𑀺𑀓𑁆𑀔𑀼 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀦𑁆𑀢𑀺 𑀅𑀬𑀁 𑀧𑀜𑁆𑀳𑀸 𑀢𑀺𑀡𑀘𑁆𑀙𑀸𑀤𑀦𑀁 𑀓𑀼𑀝𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀤𑀼𑀢𑀺𑀬𑀧𑀜𑁆𑀳𑀸 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀁 𑀓𑀼𑀝𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀆𑀧𑀚𑁆𑀚𑁂𑀬𑁆𑀬 𑀕𑀭𑀼𑀓𑀁 𑀙𑁂𑀚𑁆𑀚𑀯𑀢𑁆𑀣𑀼𑀦𑁆𑀢𑀺 𑀅𑀬𑀁 𑀧𑀜𑁆𑀳𑀸 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀁 𑀪𑀺𑀓𑁆𑀔𑀼𑀦𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀤𑀼𑀢𑀺𑀬𑀧𑀜𑁆𑀳𑀸 𑀧𑀡𑁆𑀟𑀓𑀸𑀤𑀬𑁄 𑀅𑀪𑀩𑁆𑀩𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀏𑀓𑀸𑀤𑀲𑀧𑀺 𑀳𑀺 𑀢𑁂 𑀕𑀺𑀳𑀺𑀪𑀸𑀯𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀧𑀢𑁆𑀢𑀸.

𑀯𑀸𑀘𑀸𑀢𑀺 𑀯𑀸𑀘𑀸𑀬 𑀅𑀦𑀸𑀮𑀧𑀦𑁆𑀢𑁄. 𑀕𑀺𑀭𑀁 𑀦𑁄 𑀘 𑀧𑀭𑁂 𑀪𑀡𑁂𑀬𑁆𑀬𑀸𑀢𑀺 ‘‘𑀇𑀢𑀺 𑀇𑀫𑁂 𑀲𑁄𑀲𑁆𑀲𑀦𑁆𑀢𑀻’’𑀢𑀺 𑀧𑀭𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 𑀲𑀤𑁆𑀤𑀫𑁆𑀧𑀺 𑀦 𑀦𑀺𑀘𑁆𑀙𑀸𑀭𑁂𑀬𑁆𑀬. 𑀅𑀬𑀁 𑀧𑀜𑁆𑀳𑀸 ‘‘𑀲𑀦𑁆𑀢𑀺𑀁 𑀆𑀧𑀢𑁆𑀢𑀺𑀁 𑀦𑀸𑀯𑀺𑀓𑀭𑁂𑀬𑁆𑀬, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑁆𑀲 𑀳𑁄𑀢𑀻’’𑀢𑀺 𑀇𑀫𑀁 𑀫𑀼𑀲𑀸𑀯𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀅𑀥𑀫𑁆𑀫𑀺𑀓𑀸𑀬 𑀧𑀝𑀺𑀜𑁆𑀜𑀸𑀬 𑀢𑀼𑀡𑁆𑀳𑀻𑀪𑀽𑀢𑀲𑁆𑀲 𑀦𑀺𑀲𑀺𑀦𑁆𑀦𑀲𑁆𑀲 𑀫𑀦𑁄𑀤𑁆𑀯𑀸𑀭𑁂 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀬𑀲𑁆𑀫𑀸 𑀧𑀦 𑀆𑀯𑀺𑀓𑀸𑀢𑀩𑁆𑀩𑀁 𑀦 𑀆𑀯𑀺𑀓𑀭𑁄𑀢𑀺, 𑀢𑁂𑀦𑀲𑁆𑀲 𑀯𑀘𑀻𑀤𑁆𑀯𑀸𑀭𑁂 𑀅𑀓𑀺𑀭𑀺𑀬𑀢𑁄 𑀅𑀬𑀁 𑀆𑀧𑀢𑁆𑀢𑀺 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀗𑁆𑀖𑀸𑀤𑀺𑀲𑁂𑀲𑀸 𑀘𑀢𑀼𑀭𑁄𑀢𑀺 𑀅𑀬𑀁 𑀧𑀜𑁆𑀳𑀸 𑀅𑀭𑀼𑀡𑀼𑀕𑁆𑀕𑁂 𑀕𑀸𑀫𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀁 𑀦𑀤𑀺𑀧𑀸𑀭𑀁 𑀑𑀓𑁆𑀓𑀦𑁆𑀢𑀪𑀺𑀓𑁆𑀔𑀼𑀦𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸, 𑀲𑀸 𑀳𑀺 𑀲𑀓𑀕𑀸𑀫𑀢𑁄 𑀧𑀘𑁆𑀘𑀽𑀲𑀲𑀫𑀬𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀓𑀸𑀮𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀤𑀺𑀧𑀸𑀭𑀁 𑀑𑀓𑁆𑀓𑀦𑁆𑀢𑀫𑀢𑁆𑀢𑀸𑀯 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑀕𑀸𑀫𑀦𑁆𑀢𑀭𑀦𑀤𑀺𑀧𑀸𑀭𑀕𑀡𑀫𑁆𑀳𑀸𑀑𑀳𑀻𑀬𑀦𑀮𑀓𑁆𑀔𑀡𑁂𑀦 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀘𑀢𑀼𑀭𑁄 𑀲𑀗𑁆𑀖𑀸𑀤𑀺𑀲𑁂𑀲𑁂 𑀆𑀧𑀚𑁆𑀚𑀢𑀺.

𑀲𑀺𑀬𑀸 𑀆𑀧𑀢𑁆𑀢𑀺𑀬𑁄 𑀦𑀸𑀦𑀸𑀢𑀺 𑀅𑀬𑀁 𑀧𑀜𑁆𑀳𑀸 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸 𑀤𑁆𑀯𑁂 𑀪𑀺𑀓𑁆𑀔𑀼𑀦𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀸𑀲𑀼 𑀳𑀺 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀳𑀢𑁆𑀣𑀢𑁄 𑀕𑀡𑁆𑀳𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀳𑀢𑁆𑀣𑀢𑁄 𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀘𑀢𑀼𑀭𑁄 𑀚𑀦𑀸 𑀲𑀁𑀯𑀺𑀥𑀸𑀬𑀸𑀢𑀺 𑀆𑀘𑀭𑀺𑀬𑁄 𑀘 𑀢𑀬𑁄 𑀘 𑀅𑀦𑁆𑀢𑁂𑀯𑀸𑀲𑀺𑀓𑀸 𑀙𑀫𑀸𑀲𑀓𑀁 𑀪𑀡𑁆𑀟𑀁 𑀅𑀯𑀳𑀭𑀺𑀁𑀲𑀼, 𑀆𑀘𑀭𑀺𑀬𑀲𑁆𑀲 𑀲𑀸𑀳𑀢𑁆𑀣𑀺𑀓𑀸 𑀢𑀬𑁄 𑀫𑀸𑀲𑀓𑀸, 𑀆𑀡𑀢𑁆𑀢𑀺𑀬𑀸𑀧𑀺 𑀢𑀬𑁄𑀯 𑀢𑀲𑁆𑀫𑀸 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀺, 𑀇𑀢𑀭𑁂𑀲𑀁 𑀲𑀸𑀳𑀢𑁆𑀣𑀺𑀓𑁄 𑀏𑀓𑁂𑀓𑁄, 𑀆𑀡𑀢𑁆𑀢𑀺𑀓𑀸 𑀧𑀜𑁆𑀘𑀸𑀢𑀺 𑀢𑀲𑁆𑀫𑀸 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀺𑀁𑀲𑀼. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑁂 𑀲𑀁𑀯𑀺𑀤𑀸𑀯𑀳𑀸𑀭𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄.

(𑁨) 𑀧𑀸𑀭𑀸𑀚𑀺𑀓𑀸𑀤𑀺𑀧𑀜𑁆𑀳𑀸𑀯𑀡𑁆𑀡𑀦𑀸

𑁪𑁮𑁦. 𑀙𑀺𑀤𑁆𑀤𑀁 𑀢𑀲𑁆𑀫𑀺𑀁 𑀖𑀭𑁂 𑀦𑀢𑁆𑀣𑀻𑀢𑀺 𑀅𑀬𑀁 𑀧𑀜𑁆𑀳𑀸 𑀤𑀼𑀲𑁆𑀲𑀓𑀼𑀝𑀺𑀆𑀤𑀻𑀦𑀺 𑀲𑀦𑁆𑀣𑀢𑀧𑁂𑀬𑁆𑀬𑀸𑀮𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀢𑁂𑀮𑀁 𑀫𑀥𑀼𑀁 𑀨𑀸𑀡𑀺𑀢𑀦𑁆𑀢𑀺 𑀕𑀸𑀣𑀸 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀦𑀺𑀲𑁆𑀲𑀕𑁆𑀕𑀺𑀬𑁂𑀦𑀸𑀢𑀺 𑀕𑀸𑀣𑀸 𑀧𑀭𑀺𑀡𑀸𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀬𑁄 𑀳𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀮𑀸𑀪𑀢𑁄 𑀏𑀓𑀁 𑀘𑀻𑀯𑀭𑀁 𑀅𑀢𑁆𑀢𑀦𑁄, 𑀏𑀓𑀁 𑀅𑀜𑁆𑀜𑀲𑁆𑀲𑀸𑀢𑀺 𑀤𑁆𑀯𑁂 𑀘𑀻𑀯𑀭𑀸𑀦𑀺 ‘‘𑀏𑀓𑀁 𑀫𑀬𑁆𑀳𑀁, 𑀏𑀓𑀁 𑀢𑀲𑁆𑀲 𑀤𑁂𑀳𑀻’’𑀢𑀺 𑀏𑀓𑀧𑀬𑀑𑀕𑁂𑀦 𑀧𑀭𑀺𑀡𑀸𑀫𑁂𑀢𑀺, 𑀲𑁄 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑁂𑀯 𑀲𑀼𑀤𑁆𑀥𑀺𑀓𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀏𑀓𑀢𑁄 𑀆𑀧𑀚𑁆𑀚𑀢𑀺.

𑀓𑀫𑁆𑀫𑀜𑁆𑀘 𑀢𑀁 𑀓𑀼𑀧𑁆𑀧𑁂𑀬𑁆𑀬 𑀯𑀕𑁆𑀕𑀧𑀘𑁆𑀘𑀬𑀸𑀢𑀺 𑀅𑀬𑀁 𑀧𑀜𑁆𑀳𑀸 𑀤𑁆𑀯𑀸𑀤𑀲𑀬𑁄𑀚𑀦𑀧𑀫𑀸𑀡𑁂𑀲𑀼 𑀩𑀸𑀭𑀸𑀡𑀲𑀺𑀆𑀤𑀻𑀲𑀼 𑀦𑀕𑀭𑁂𑀲𑀼 𑀕𑀸𑀫𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀧𑀤𑀯𑀻𑀢𑀺𑀳𑀸𑀭𑀫𑀢𑁆𑀢𑁂𑀦𑀸𑀢𑀺 𑀕𑀸𑀣𑀸 𑀲𑀜𑁆𑀘𑀭𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸, 𑀅𑀢𑁆𑀣𑁄𑀧𑀺 𑀘𑀲𑁆𑀲𑀸 𑀲𑀜𑁆𑀘𑀭𑀺𑀢𑁆𑀢𑀯𑀡𑁆𑀡𑀦𑀸𑀬𑀫𑁂𑀯 𑀯𑀼𑀢𑁆𑀢𑁄.

𑀲𑀩𑁆𑀩𑀸𑀦𑀺 𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀻𑀢𑀺 𑀅𑀬𑀁 𑀧𑀜𑁆𑀳𑀸 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀥𑁄𑀯𑀸𑀧𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀲𑀘𑁂 𑀳𑀺 𑀢𑀺𑀡𑁆𑀡𑀫𑁆𑀧𑀺 𑀘𑀻𑀯𑀭𑀸𑀦𑀁 𑀓𑀸𑀓𑀊𑀳𑀤𑀦𑀁 𑀯𑀸 𑀓𑀤𑁆𑀤𑀫𑀫𑀓𑁆𑀔𑀺𑀢𑀁 𑀯𑀸 𑀓𑀡𑁆𑀡𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻 𑀉𑀤𑀓𑁂𑀦 𑀥𑁄𑀯𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀓𑀸𑀬𑀕𑀢𑀸𑀦𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺.

𑀲𑀭𑀡𑀕𑀫𑀦𑀫𑁆𑀧𑀺 𑀦 𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀭𑀡𑀕𑀫𑀦𑀉𑀧𑀲𑀫𑁆𑀧𑀤𑀸𑀧𑀺 𑀦𑀢𑁆𑀣𑀺. 𑀅𑀬𑀁 𑀧𑀦 𑀧𑀜𑁆𑀳𑀸 𑀫𑀳𑀸𑀧𑀚𑀸𑀧𑀢𑀺𑀬𑀸 𑀉𑀧𑀲𑀫𑁆𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀳𑀦𑁂𑀬𑁆𑀬 𑀅𑀦𑀭𑀺𑀬𑀁 𑀫𑀦𑁆𑀤𑁄𑀢𑀺 𑀢𑀜𑁆𑀳𑀺 𑀇𑀢𑁆𑀣𑀺𑀁 𑀯𑀸 𑀧𑀼𑀭𑀺𑀲𑀁 𑀯𑀸 𑀅𑀦𑀭𑀺𑀬𑀁 𑀳𑀦𑁂𑀬𑁆𑀬. 𑀅𑀬𑀁 𑀧𑀜𑁆𑀳𑀸 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂𑀦 𑀇𑀢𑁆𑀣𑀺𑀪𑀽𑀢𑀁 𑀧𑀺𑀢𑀭𑀁 𑀧𑀼𑀭𑀺𑀲𑀪𑀽𑀢𑀜𑁆𑀘 𑀫𑀸𑀢𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀦 𑀢𑁂𑀦𑀸𑀦𑀦𑁆𑀢𑀭𑀁 𑀨𑀼𑀲𑁂𑀢𑀺 𑀅𑀬𑀁 𑀧𑀜𑁆𑀳𑀸 𑀫𑀺𑀕𑀲𑀺𑀗𑁆𑀕𑀢𑀸𑀧𑀲𑀲𑀻𑀳𑀓𑀼𑀫𑀸𑀭𑀸𑀤𑀻𑀦𑀁 𑀯𑀺𑀬 𑀢𑀺𑀭𑀘𑁆𑀙𑀸𑀦𑀫𑀸𑀢𑀸𑀧𑀺𑀢𑀭𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀅𑀘𑁄𑀤𑀬𑀺𑀢𑁆𑀯𑀸𑀢𑀺 𑀕𑀸𑀣𑀸 𑀤𑀽𑀢𑁂𑀦𑀼𑀧𑀲𑀫𑁆𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀘𑁄𑀤𑀬𑀺𑀢𑁆𑀯𑀸𑀢𑀺 𑀕𑀸𑀣𑀸 𑀧𑀡𑁆𑀟𑀓𑀸𑀤𑀻𑀦𑀁 𑀉𑀧𑀲𑀫𑁆𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀧𑀞𑀫𑀕𑀸𑀣𑀸 𑀅𑀝𑁆𑀞 𑀅𑀲𑀫𑁆𑀫𑀼𑀔𑀸𑀓𑀫𑁆𑀫𑀸𑀦𑀺, 𑀤𑀼𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀓𑀲𑁆𑀲 𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸’’𑀢𑀺 𑀆𑀕𑀢𑀁.

𑀙𑀺𑀦𑁆𑀤𑀦𑁆𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀯𑀦𑀧𑁆𑀧𑀢𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁, 𑀢𑀺𑀡𑀮𑀢𑀸𑀤𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀗𑁆𑀕𑀚𑀸𑀢𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀓𑁂𑀲𑁂 𑀘 𑀦𑀔𑁂 𑀘 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀙𑀸𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀅𑀢𑁆𑀢𑀦𑁄 𑀆𑀧𑀢𑁆𑀢𑀺𑀁 𑀙𑀸𑀤𑁂𑀦𑁆𑀢𑀲𑁆𑀲 𑀅𑀜𑁆𑀜𑁂𑀲𑀁 𑀯𑀸 𑀆𑀧𑀢𑁆𑀢𑀺𑀁. 𑀙𑀸𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀕𑁂𑀳𑀸𑀤𑀻𑀦𑀺 𑀙𑀸𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀲𑀘𑁆𑀘𑀁 𑀪𑀡𑀦𑁆𑀢𑁄𑀢𑀺 𑀕𑀸𑀣𑀸𑀬 ‘‘𑀲𑀺𑀔𑀭𑀡𑀻𑀲𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻’’𑀢𑀺 𑀲𑀘𑁆𑀘𑀁 𑀪𑀡𑀦𑁆𑀢𑁄 𑀕𑀭𑀼𑀓𑀁 𑀆𑀧𑀚𑁆𑀚𑀢𑀺, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀦 𑀫𑀼𑀲𑀸 𑀪𑀸𑀲𑀢𑁄 𑀮𑀳𑀼𑀓𑀸𑀧𑀢𑁆𑀢𑀺 𑀳𑁄𑀢𑀺, 𑀅𑀪𑀽𑀢𑀸𑀭𑁄𑀘𑀦𑁂 𑀫𑀼𑀲𑀸 𑀪𑀡𑀦𑁆𑀢𑁄 𑀕𑀭𑀼𑀓𑀁 𑀆𑀧𑀚𑁆𑀚𑀢𑀺, 𑀪𑀽𑀢𑀸𑀭𑁄𑀘𑀦𑁂 𑀲𑀘𑁆𑀘𑀁 𑀪𑀸𑀲𑀢𑁄 𑀮𑀳𑀼𑀓𑀸𑀧𑀢𑁆𑀢𑀺 𑀳𑁄𑀢𑀻𑀢𑀺.

(𑁩) 𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀧𑀜𑁆𑀳𑀸𑀯𑀡𑁆𑀡𑀦𑀸

𑁪𑁮𑁧. 𑀅𑀥𑀺𑀝𑁆𑀞𑀺𑀢𑀦𑁆𑀢𑀺 𑀕𑀸𑀣𑀸 𑀦𑀺𑀲𑁆𑀲𑀕𑁆𑀕𑀺𑀬𑀘𑀻𑀯𑀭𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂𑀢𑀺 𑀕𑀸𑀣𑀸 𑀭𑁄𑀫𑀦𑁆𑀣𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀦 𑀭𑀢𑁆𑀢𑀘𑀺𑀢𑁆𑀢𑁄𑀢𑀺 𑀕𑀸𑀣𑀸𑀬 𑀅𑀬𑀫𑀢𑁆𑀣𑁄 𑁋 𑀭𑀢𑁆𑀢𑀘𑀺𑀢𑁆𑀢𑁄 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺. 𑀣𑁂𑀬𑁆𑀬𑀘𑀺𑀢𑁆𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀁, 𑀧𑀭𑀁 𑀫𑀭𑀡𑀸𑀬 𑀘𑁂𑀢𑁂𑀦𑁆𑀢𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀁, 𑀲𑀗𑁆𑀖𑀪𑁂𑀤𑀓𑁄 𑀧𑀦 𑀦 𑀭𑀢𑁆𑀢𑀘𑀺𑀢𑁆𑀢𑁄 𑀦 𑀘 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁄 𑀦 𑀘𑀸𑀧𑀺 𑀲𑁄 𑀧𑀭𑀁 𑀫𑀭𑀡𑀸𑀬 𑀘𑁂𑀢𑀬𑀺, 𑀲𑀮𑀸𑀓𑀁 𑀧𑀦𑀲𑁆𑀲 𑀤𑁂𑀦𑁆𑀢𑀲𑁆𑀲 𑀳𑁄𑀢𑀺 𑀙𑁂𑀚𑁆𑀚𑀁, 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺, 𑀲𑀮𑀸𑀓𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀪𑁂𑀤𑀓𑀸𑀦𑀼𑀯𑀢𑁆𑀢𑀓𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁.

𑀕𑀘𑁆𑀙𑁂𑀬𑁆𑀬 𑀅𑀟𑁆𑀠𑀬𑁄𑀚𑀦𑀦𑁆𑀢𑀺 𑀅𑀬𑀁 𑀧𑀜𑁆𑀳𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑀺𑀕𑁆𑀭𑁄𑀥𑀲𑀤𑀺𑀲𑀁 𑀏𑀓𑀓𑀼𑀮𑀲𑁆𑀲 𑀭𑀼𑀓𑁆𑀔𑀫𑀽𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀓𑀸𑀬𑀺𑀓𑀸𑀦𑀻𑀢𑀺 𑀅𑀬𑀁 𑀕𑀸𑀣𑀸 𑀲𑀫𑁆𑀩𑀳𑀼𑀮𑀸𑀦𑀁 𑀇𑀢𑁆𑀣𑀻𑀦𑀁 𑀓𑁂𑀲𑁂 𑀯𑀸 𑀅𑀗𑁆𑀕𑀼𑀮𑀺𑀬𑁄 𑀯𑀸 𑀏𑀓𑀢𑁄 𑀕𑀡𑁆𑀳𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀯𑀸𑀘𑀲𑀺𑀓𑀸𑀦𑀻𑀢𑀺 𑀅𑀬𑀁 𑀕𑀸𑀣𑀸 ‘‘𑀲𑀩𑁆𑀩𑀸 𑀢𑀼𑀫𑁆𑀳𑁂 𑀲𑀺𑀔𑀭𑀡𑀺𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀼𑀝𑁆𑀞𑀼𑀮𑁆𑀮𑀪𑀸𑀡𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀢𑀺𑀲𑁆𑀲𑀺𑀢𑁆𑀣𑀺𑀬𑁄 𑀫𑁂𑀣𑀼𑀦𑀁 𑀢𑀁 𑀦 𑀲𑁂𑀯𑁂𑀢𑀺 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄 𑀯𑀼𑀢𑁆𑀢𑀸, 𑀢𑀸𑀲𑀼𑀧𑀺 𑀬𑀁 𑀢𑀁 𑀫𑁂𑀣𑀼𑀦𑀁 𑀦𑀸𑀫, 𑀢𑀁 𑀦 𑀲𑁂𑀯𑀢𑀺. 𑀢𑀬𑁄 𑀧𑀼𑀭𑀺𑀲𑁂𑀢𑀺 𑀢𑀬𑁄 𑀧𑀼𑀭𑀺𑀲𑁂𑀧𑀺 𑀉𑀧𑀕𑀦𑁆𑀢𑁆𑀯𑀸 𑀫𑁂𑀣𑀼𑀦𑀁 𑀦 𑀲𑁂𑀯𑀢𑀺. 𑀢𑀬𑁄 𑀅𑀦𑀭𑀺𑀬𑀧𑀡𑁆𑀟𑀓𑁂𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀲𑀗𑁆𑀔𑀸𑀢𑁂 𑀢𑀬𑁄 𑀅𑀦𑀭𑀺𑀬𑁂 𑀢𑀬𑁄 𑀘 𑀧𑀡𑁆𑀟𑀓𑁂𑀢𑀺 𑀇𑀫𑁂𑀧𑀺 𑀙 𑀚𑀦𑁂 𑀉𑀧𑀕𑀦𑁆𑀢𑁆𑀯𑀸 𑀫𑁂𑀣𑀼𑀦𑀁 𑀦 𑀲𑁂𑀯𑀢𑀺. 𑀦 𑀘𑀸𑀘𑀭𑁂 𑀫𑁂𑀣𑀼𑀦𑀁 𑀩𑁆𑀬𑀜𑁆𑀚𑀦𑀲𑁆𑀫𑀺𑀦𑁆𑀢𑀺 𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀯𑀲𑁂𑀦𑀧𑀺 𑀫𑁂𑀣𑀼𑀦𑀁 𑀦𑀸𑀘𑀭𑀢𑀺. 𑀙𑁂𑀚𑁆𑀚𑀁 𑀲𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸𑀢𑀺 𑀲𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸 𑀧𑀸𑀭𑀸𑀚𑀺𑀓𑀦𑁆𑀢𑀺. 𑀅𑀬𑀁 𑀧𑀜𑁆𑀳𑀸 𑀅𑀝𑁆𑀞𑀯𑀢𑁆𑀣𑀼𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸, 𑀢𑀲𑁆𑀲𑀸 𑀳𑀺 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑀁 𑀓𑀸𑀬𑀲𑀁𑀲𑀕𑁆𑀕𑀁 𑀆𑀧𑀚𑁆𑀚𑀺𑀢𑀼𑀁 𑀯𑀸𑀬𑀫𑀦𑁆𑀢𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸 𑀙𑁂𑀚𑁆𑀚𑀁 𑀳𑁄𑀢𑀺.

𑀫𑀸𑀢𑀭𑀁 𑀘𑀻𑀯𑀭𑀦𑁆𑀢𑀺 𑀅𑀬𑀁 𑀕𑀸𑀣𑀸 𑀧𑀺𑀝𑁆𑀞𑀺𑀲𑀫𑀬𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀢𑁆𑀣𑀁 𑀲𑀢𑀼𑀧𑁆𑀧𑀸𑀤𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀯𑀺𑀦𑀺𑀘𑁆𑀙𑀬𑁄 𑀧𑀦𑀲𑁆𑀲𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸𑀬𑀫𑁂𑀯 𑀯𑀼𑀢𑁆𑀢𑁄.

𑀓𑀼𑀤𑁆𑀥𑁄 𑀆𑀭𑀸𑀥𑀓𑁄 𑀳𑁄𑀢𑀻𑀢𑀺 𑀕𑀸𑀣𑀸 𑀢𑀺𑀢𑁆𑀣𑀺𑀬𑀯𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀺𑀢𑁆𑀣𑀺𑀬𑁄 𑀳𑀺 𑀯𑀢𑁆𑀢𑀁 𑀧𑀽𑀭𑀬𑀫𑀸𑀦𑁄 𑀢𑀺𑀢𑁆𑀣𑀺𑀬𑀸𑀦𑀁 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀓𑀼𑀤𑁆𑀥𑁄 𑀆𑀭𑀸𑀥𑀓𑁄 𑀳𑁄𑀢𑀺, 𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀓𑀼𑀤𑁆𑀥𑁄 𑀕𑀸𑀭𑀬𑁆𑀳𑁄 𑀳𑁄𑀢𑀻𑀢𑀺 𑀢𑀢𑁆𑀣𑁂𑀯𑀲𑁆𑀲𑀸 𑀯𑀺𑀢𑁆𑀣𑀸𑀭𑁄 𑀯𑀼𑀢𑁆𑀢𑁄. 𑀤𑀼𑀢𑀺𑀬𑀕𑀸𑀣𑀸𑀧𑀺 𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀲𑀗𑁆𑀖𑀸𑀤𑀺𑀲𑁂𑀲𑀦𑁆𑀢𑀺𑀆𑀤𑀺 𑀕𑀸𑀣𑀸 𑀬𑀸 𑀪𑀺𑀓𑁆𑀔𑀼𑀦𑀻 𑀅𑀯𑀲𑁆𑀲𑀼𑀢𑀸𑀯 𑀅𑀯𑀲𑁆𑀲𑀼𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀢𑁄 𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀫𑀁𑀲𑀮𑀲𑀼𑀡𑀧𑀡𑀻𑀢𑀪𑁄𑀚𑀦𑀲𑁂𑀲𑀅𑀓𑀧𑁆𑀧𑀺𑀬𑀫𑀁𑀲𑁂𑀳𑀺 𑀲𑀤𑁆𑀥𑀺𑀁 𑀑𑀫𑀤𑁆𑀤𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀏𑀓𑁄 𑀉𑀧𑀲𑀫𑁆𑀧𑀦𑁆𑀦𑁄 𑀏𑀓𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀢𑀺 𑀕𑀸𑀣𑀸 𑀆𑀓𑀸𑀲𑀕𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀲𑀘𑁂 𑀳𑀺 𑀤𑁆𑀯𑀻𑀲𑀼 𑀲𑀸𑀫𑀡𑁂𑀭𑁂𑀲𑀼 𑀏𑀓𑁄 𑀇𑀤𑁆𑀥𑀺𑀬𑀸 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀧𑀣𑀯𑀺𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀲𑀗𑁆𑀖𑁂𑀦𑀸𑀧𑀺 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀽𑀫𑀺𑀕𑀢𑀲𑁆𑀲 𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁. 𑀲𑀘𑁂 𑀓𑀭𑁄𑀢𑀺, 𑀓𑀼𑀧𑁆𑀧𑀢𑀺.

𑀅𑀓𑀧𑁆𑀧𑀓𑀢𑀦𑁆𑀢𑀺 𑀕𑀸𑀣𑀸 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀓𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀲𑁆𑀫𑀺𑀁𑀬𑁂𑀯 𑀘𑀲𑁆𑀲𑀸 𑀲𑀺𑀓𑁆𑀔𑀸𑀧𑀤𑁂 𑀯𑀺𑀢𑁆𑀣𑀸𑀭𑁂𑀦 𑀯𑀺𑀦𑀺𑀘𑁆𑀙𑀬𑁄𑀧𑀺 𑀯𑀼𑀢𑁆𑀢𑁄.

𑀦 𑀤𑁂𑀢𑀺 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀦𑀸𑀧𑀺 𑀉𑀬𑁆𑀬𑁄𑀚𑀺𑀓𑀸 𑀤𑁂𑀢𑀺, 𑀦 𑀉𑀬𑁆𑀬𑁄𑀚𑀺𑀢𑀸 𑀢𑀲𑁆𑀲𑀸 𑀳𑀢𑁆𑀣𑀢𑁄 𑀕𑀡𑁆𑀳𑀸𑀢𑀺. 𑀧𑀝𑀺𑀕𑁆𑀕𑀳𑁄 𑀢𑁂𑀦 𑀦 𑀯𑀺𑀚𑁆𑀚𑀢𑀻𑀢𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀉𑀬𑁆𑀬𑁄𑀚𑀺𑀓𑀸𑀬 𑀳𑀢𑁆𑀣𑀢𑁄 𑀉𑀬𑁆𑀬𑁄𑀚𑀺𑀢𑀸𑀬 𑀧𑀝𑀺𑀕𑁆𑀕𑀳𑁄 𑀦 𑀯𑀺𑀚𑁆𑀚𑀢𑀺. 𑀆𑀧𑀚𑁆𑀚𑀢𑀺 𑀕𑀭𑀼𑀓𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀯𑀲𑁆𑀲𑀼𑀢𑀲𑁆𑀲 𑀳𑀢𑁆𑀣𑀢𑁄 𑀧𑀺𑀡𑁆𑀟𑀧𑀸𑀢𑀕𑁆𑀕𑀳𑀡𑁂 𑀉𑀬𑁆𑀬𑁄𑀚𑁂𑀦𑁆𑀢𑀻 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀢𑀜𑁆𑀘 𑀧𑀭𑀺𑀪𑁄𑀕𑀧𑀘𑁆𑀘𑀬𑀸𑀢𑀺 𑀢𑀜𑁆𑀘 𑀧𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀫𑀸𑀦𑀸 𑀢𑀲𑁆𑀲𑀸 𑀉𑀬𑁆𑀬𑁄𑀚𑀺𑀢𑀸𑀬 𑀧𑀭𑀺𑀪𑁄𑀕𑀧𑀘𑁆𑀘𑀬𑀸 𑀆𑀧𑀚𑁆𑀚𑀢𑀺. 𑀢𑀲𑁆𑀲𑀸 𑀳𑀺 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀉𑀬𑁆𑀬𑁄𑀚𑀺𑀓𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄 𑀳𑁄𑀢𑀻𑀢𑀺. 𑀤𑀼𑀢𑀺𑀬𑀕𑀸𑀣𑀸 𑀢𑀲𑁆𑀲𑀸𑀬𑁂𑀯 𑀉𑀤𑀓𑀤𑀦𑁆𑀢𑀧𑁄𑀦𑀕𑁆𑀕𑀳𑀡𑁂 𑀉𑀬𑁆𑀬𑁄𑀚𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸.

𑀦 𑀪𑀺𑀓𑁆𑀔𑀼𑀦𑀻 𑀦𑁄 𑀘 𑀨𑀼𑀲𑁂𑀬𑁆𑀬 𑀯𑀚𑁆𑀚𑀦𑁆𑀢𑀺 𑀲𑀢𑁆𑀢𑀭𑀲𑀓𑁂𑀲𑀼 𑀳𑀺 𑀅𑀜𑁆𑀜𑀢𑀭𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀦𑀸𑀤𑀭𑀺𑀬𑁂𑀦 𑀙𑀸𑀤𑀬𑀫𑀸𑀦𑀸𑀧𑀺 𑀪𑀺𑀓𑁆𑀔𑀼𑀦𑀻 𑀙𑀸𑀤𑀦𑀧𑀘𑁆𑀘𑀬𑀸 𑀯𑀚𑁆𑀚𑀁 𑀦 𑀨𑀼𑀲𑀢𑀺, 𑀅𑀜𑁆𑀜𑀁 𑀦𑀯𑀁 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀺, 𑀧𑀝𑀺𑀘𑁆𑀙𑀦𑁆𑀦𑀸𑀬 𑀯𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀯𑀸 𑀆𑀧𑀢𑁆𑀢𑀺𑀬𑀸 𑀧𑀓𑁆𑀔𑀫𑀸𑀦𑀢𑁆𑀢𑀫𑁂𑀯 𑀮𑀪𑀢𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼𑀦𑀻𑀧𑀺 𑀦 𑀳𑁄𑀢𑀺, 𑀲𑀸𑀯𑀲𑁂𑀲𑀜𑁆𑀘 𑀕𑀭𑀼𑀓𑀁 𑀆𑀧𑀚𑁆𑀚𑀺𑀢𑁆𑀯𑀸 𑀙𑀸𑀤𑁂𑀢𑁆𑀯𑀸 𑀯𑀚𑁆𑀚𑀁 𑀦 𑀨𑀼𑀲𑀢𑀺. 𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸𑀢𑀺 𑀅𑀬𑀁 𑀓𑀺𑀭 𑀧𑀜𑁆𑀳𑀸 𑀉𑀓𑁆𑀔𑀺𑀢𑁆𑀢𑀓𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀯𑀺𑀦𑀬𑀓𑀫𑁆𑀫𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁄 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀺𑀢𑁆𑀯𑀸 𑀙𑀸𑀤𑁂𑀦𑁆𑀢𑁄 𑀯𑀚𑁆𑀚𑀁 𑀦 𑀨𑀼𑀲𑀢𑀻𑀢𑀺.

𑀲𑁂𑀤𑀫𑁄𑀘𑀦𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.