𑀧𑀜𑁆𑀘𑀯𑀕𑁆𑀕𑁄

𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁪𑁮𑁨. 𑀓𑀫𑁆𑀫𑀯𑀕𑁆𑀕𑁂 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀦𑀸𑀦𑀸𑀓𑀭𑀡𑀁 𑀲𑀫𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀫𑁂𑀯. 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀬𑀁 𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑁄 𑀦𑀸𑀫 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀼𑀘𑁆𑀘𑀫𑀸𑀦𑁄 𑀧𑀸𑀓𑀝𑁄 𑀳𑁄𑀢𑀺, 𑀢𑀲𑁆𑀫𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬𑁂𑀯𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀯𑀤𑀺𑀲𑁆𑀲𑀸𑀫. 𑀘𑀢𑁆𑀢𑀸𑀭𑀻𑀢𑀺 𑀓𑀫𑁆𑀫𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀯𑀘𑀦𑀫𑁂𑀢𑀁. 𑀓𑀫𑁆𑀫𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀓𑀫𑁆𑀫𑀦𑀺𑀤𑀲𑁆𑀲𑀦𑀁. 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫 𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀜𑀢𑁆𑀢𑀺𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀏𑀓𑀸𑀬 𑀘 𑀅𑀦𑀼𑀲𑁆𑀲𑀸𑀯𑀦𑀸𑀬𑀸𑀢𑀺 𑀏𑀯𑀁 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀅𑀦𑀼𑀲𑁆𑀲𑀸𑀯𑀦𑀸𑀬 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀢𑀻𑀳𑀺 𑀘 𑀅𑀦𑀼𑀲𑁆𑀲𑀸𑀯𑀦𑀸𑀳𑀻𑀢𑀺 𑀏𑀯𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀳𑀺 𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀺 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁.

𑀢𑀢𑁆𑀣 𑀅𑀧𑀮𑁄𑀓𑀦𑀓𑀫𑁆𑀫𑀁 𑀅𑀧𑀮𑁄𑀓𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁, 𑀜𑀢𑁆𑀢𑀺𑀓𑀫𑁆𑀫𑀸𑀤𑀺𑀯𑀲𑁂𑀦 𑀦 𑀓𑀸𑀢𑀩𑁆𑀩𑀁. 𑀜𑀢𑁆𑀢𑀺𑀓𑀫𑁆𑀫𑀫𑁆𑀧𑀺 𑀏𑀓𑀁 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁, 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀺𑀯𑀲𑁂𑀦 𑀦 𑀓𑀸𑀢𑀩𑁆𑀩𑀁. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀧𑀦 𑀅𑀧𑀮𑁄𑀓𑁂𑀢𑁆𑀯𑀸 𑀓𑀸𑀢𑀩𑁆𑀩𑀫𑁆𑀧𑀺 𑀅𑀢𑁆𑀣𑀺, 𑀅𑀓𑀸𑀢𑀩𑁆𑀩𑀫𑁆𑀧𑀺 𑀅𑀢𑁆𑀣𑀺.

𑀢𑀢𑁆𑀣 𑀲𑀻𑀫𑀸𑀲𑀫𑁆𑀫𑀼𑀢𑀺, 𑀲𑀻𑀫𑀸𑀲𑀫𑀽𑀳𑀦𑀦𑀁, 𑀓𑀣𑀺𑀦𑀤𑀸𑀦𑀁, 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀸, 𑀯𑀺𑀳𑀸𑀭𑀯𑀢𑁆𑀣𑀼𑀤𑁂𑀲𑀦𑀸𑀢𑀺 𑀇𑀫𑀸𑀦𑀺 𑀙 𑀓𑀫𑁆𑀫𑀸𑀦𑀺 𑀕𑀭𑀼𑀓𑀸𑀦𑀺 𑀅𑀧𑀮𑁄𑀓𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀸𑀦𑀺. 𑀅𑀯𑀲𑁂𑀲𑀸 𑀢𑁂𑀭𑀲 𑀲𑀫𑁆𑀫𑀼𑀢𑀺𑀬𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀫𑀢𑀓𑀘𑀻𑀯𑀭𑀤𑀸𑀦𑀸𑀤𑀺𑀲𑀫𑁆𑀫𑀼𑀢𑀺𑀬𑁄 𑀘𑀸𑀢𑀺 𑀏𑀢𑀸𑀦𑀺 𑀮𑀳𑀼𑀓𑀓𑀫𑁆𑀫𑀸𑀦𑀺 𑀅𑀧𑀮𑁄𑀓𑁂𑀢𑁆𑀯𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀦𑁆𑀢𑀺, 𑀜𑀢𑁆𑀢𑀺𑀓𑀫𑁆𑀫-𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀲𑁂𑀦 𑀧𑀦 𑀦 𑀓𑀸𑀢𑀩𑁆𑀩𑀫𑁂𑀯. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀲𑁂𑀦 𑀓𑀬𑀺𑀭𑀫𑀸𑀦𑀁 𑀤𑀴𑁆𑀳𑀢𑀭𑀁 𑀳𑁄𑀢𑀺, 𑀢𑀲𑁆𑀫𑀸 𑀓𑀸𑀢𑀩𑁆𑀩𑀦𑁆𑀢𑀺 𑀏𑀓𑀘𑁆𑀘𑁂 𑀯𑀤𑀦𑁆𑀢𑀺. 𑀏𑀯𑀁 𑀧𑀦 𑀲𑀢𑀺 𑀓𑀫𑁆𑀫𑀲𑀗𑁆𑀓𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯. 𑀲𑀘𑁂 𑀧𑀦 𑀅𑀓𑁆𑀔𑀭𑀧𑀭𑀺𑀳𑀻𑀦𑀁 𑀯𑀸 𑀧𑀤𑀧𑀭𑀺𑀳𑀻𑀦𑀁 𑀯𑀸 𑀤𑀼𑀭𑀼𑀢𑁆𑀢𑀧𑀤𑀁 𑀯𑀸 𑀳𑁄𑀢𑀺, 𑀢𑀲𑁆𑀲 𑀲𑁄𑀥𑀦𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀁 𑀅𑀓𑀼𑀧𑁆𑀧𑀓𑀫𑁆𑀫𑀲𑁆𑀲 𑀤𑀴𑁆𑀳𑀻𑀓𑀫𑁆𑀫𑀁 𑀳𑁄𑀢𑀺, 𑀓𑀼𑀧𑁆𑀧𑀓𑀫𑁆𑀫𑁂 𑀓𑀫𑁆𑀫𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀜𑀢𑁆𑀢𑀺𑀜𑁆𑀘 𑀢𑀺𑀲𑁆𑀲𑁄 𑀘 𑀓𑀫𑁆𑀫𑀯𑀸𑀘𑀸𑀬𑁄 𑀲𑀸𑀯𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁, 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀺𑀯𑀲𑁂𑀦 𑀦 𑀓𑀸𑀢𑀩𑁆𑀩𑀁. 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀧𑀚𑁆𑀚𑀦𑁆𑀢𑀻𑀢𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁮𑁩. 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀅𑀲𑀫𑁆𑀫𑀼𑀔𑀸 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀅𑀢𑁆𑀣𑀺 𑀓𑀫𑁆𑀫𑀁 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁; 𑀅𑀢𑁆𑀣𑀺 𑀅𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁; 𑀢𑀢𑁆𑀣 𑀅𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀦𑀸𑀫 𑀤𑀽𑀢𑁂𑀦𑀼𑀧𑀲𑀫𑁆𑀧𑀤𑀸, 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀁, 𑀧𑀢𑁆𑀢𑀼𑀓𑁆𑀓𑀼𑀚𑁆𑀚𑀦𑀁, 𑀉𑀫𑁆𑀫𑀢𑁆𑀢𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀫𑁆𑀫𑀢𑁆𑀢𑀓𑀲𑀫𑁆𑀫𑀼𑀢𑀺, 𑀲𑁂𑀓𑁆𑀔𑀸𑀦𑀁 𑀓𑀼𑀮𑀸𑀦𑀁 𑀲𑁂𑀓𑁆𑀔𑀲𑀫𑁆𑀫𑀼𑀢𑀺, 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑁄, 𑀤𑁂𑀯𑀤𑀢𑁆𑀢𑀲𑁆𑀲 𑀧𑀓𑀸𑀲𑀦𑀻𑀬𑀓𑀫𑁆𑀫𑀁, 𑀅𑀧𑁆𑀧𑀲𑀸𑀤𑀦𑀻𑀬𑀁 𑀤𑀲𑁆𑀲𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀓𑀸𑀢𑀩𑁆𑀩𑀁 𑀅𑀯𑀦𑁆𑀤𑀦𑀻𑀬𑀓𑀫𑁆𑀫𑀦𑁆𑀢𑀺 𑀅𑀝𑁆𑀞𑀯𑀺𑀥𑀁 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀅𑀝𑁆𑀞𑀯𑀺𑀥𑀫𑁆𑀧𑀺 𑀓𑀫𑁆𑀫𑀁 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀲𑀼𑀓𑀢𑀁 𑀳𑁄𑀢𑀺 𑀅𑀓𑀼𑀧𑁆𑀧𑀁.

𑀲𑁂𑀲𑀸𑀦𑀺 𑀲𑀩𑁆𑀩𑀓𑀫𑁆𑀫𑀸𑀦𑀺 𑀲𑀫𑁆𑀫𑀼𑀔𑀸 𑀏𑀯 𑀓𑀸𑀢𑀩𑁆𑀩𑀸𑀦𑀺 𑁋 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸𑀢𑀺 𑀇𑀫𑀁 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑀁 𑀉𑀧𑀦𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀸𑀦𑀺. 𑀏𑀯𑀁 𑀓𑀢𑀸𑀦𑀺 𑀳𑀺 𑀲𑀼𑀓𑀢𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀅𑀓𑀢𑀸𑀦𑀺 𑀧𑀦𑁂𑀢𑀸𑀦𑀺 𑀇𑀫𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑀗𑁆𑀔𑀸𑀢𑀁 𑀯𑀢𑁆𑀣𑀼𑀁 𑀯𑀺𑀦𑀸 𑀓𑀢𑀢𑁆𑀢𑀸 𑀯𑀢𑁆𑀣𑀼𑀯𑀺𑀧𑀦𑁆𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀅𑀲𑀫𑁆𑀫𑀼𑀔𑀸 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫’’𑀦𑁆𑀢𑀺.

𑀧𑀝𑀺𑀧𑀼𑀘𑁆𑀙𑀸𑀓𑀭𑀡𑀻𑀬𑀸𑀤𑀻𑀲𑀼𑀧𑀺 𑀧𑀝𑀺𑀧𑀼𑀘𑁆𑀙𑀸𑀤𑀺𑀓𑀭𑀡𑀫𑁂𑀯 𑀯𑀢𑁆𑀣𑀼, 𑀢𑀁 𑀯𑀢𑁆𑀣𑀼𑀁 𑀯𑀺𑀦𑀸 𑀓𑀢𑀢𑁆𑀢𑀸 𑀢𑁂𑀲𑀫𑁆𑀧𑀺 𑀯𑀢𑁆𑀣𑀼𑀯𑀺𑀧𑀦𑁆𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀤𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑀫𑀢𑁆𑀢𑀁. 𑀧𑀝𑀺𑀧𑀼𑀘𑁆𑀙𑀸 𑀓𑀭𑀡𑀻𑀬𑀁 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀭𑁄𑀢𑀻𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀓𑀸𑀢𑀩𑁆𑀩𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀅𑀘𑁄𑀤𑁂𑀢𑁆𑀯𑀸 𑀅𑀲𑀸𑀭𑁂𑀢𑁆𑀯𑀸 𑀓𑀭𑁄𑀢𑀺. 𑀧𑀝𑀺𑀜𑁆𑀜𑀸𑀬 𑀓𑀭𑀡𑀻𑀬𑀁 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀭𑁄𑀢𑀻𑀢𑀺 𑀧𑀝𑀺𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸 𑀬𑀣𑀸𑀤𑀺𑀦𑁆𑀦𑀸𑀬 𑀧𑀝𑀺𑀜𑁆𑀜𑀸𑀬 𑀓𑀸𑀢𑀩𑁆𑀩𑀁 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀭𑁄𑀦𑁆𑀢𑀲𑁆𑀲 𑀯𑀺𑀧𑁆𑀧𑀮𑀧𑀦𑁆𑀢𑀲𑁆𑀲 𑀩𑀮𑀓𑁆𑀓𑀸𑀭𑁂𑀦 𑀓𑀭𑁄𑀢𑀺. 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲𑀸𑀢𑀺 𑀤𑀩𑁆𑀩𑀫𑀮𑁆𑀮𑀧𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑀲𑁆𑀲 𑀔𑀻𑀡𑀸𑀲𑀯𑀲𑁆𑀲. 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲𑀸𑀢𑀺 𑀕𑀕𑁆𑀕𑀪𑀺𑀓𑁆𑀔𑀼𑀲𑀤𑀺𑀲𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲. 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀸𑀭𑀳𑀲𑁆𑀲𑀸𑀢𑀺 𑀉𑀧𑀯𑀸𑀴𑀪𑀺𑀓𑁆𑀔𑀼𑀲𑀤𑀺𑀲𑀲𑁆𑀲 𑀉𑀲𑁆𑀲𑀦𑁆𑀦𑀧𑀸𑀧𑀲𑁆𑀲. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀁 𑀓𑀭𑁄𑀢𑀻𑀢𑀺 𑀅𑀦𑀼𑀧𑁄𑀲𑀣𑀤𑀺𑀯𑀲𑁂 𑀉𑀧𑁄𑀲𑀣𑀁 𑀓𑀭𑁄𑀢𑀺. 𑀉𑀧𑁄𑀲𑀣𑀤𑀺𑀯𑀲𑁄 𑀦𑀸𑀫 𑀞𑀧𑁂𑀢𑁆𑀯𑀸 𑀓𑀢𑁆𑀢𑀺𑀓𑀫𑀸𑀲𑀁 𑀅𑀯𑀲𑁂𑀲𑁂𑀲𑀼 𑀏𑀓𑀸𑀤𑀲𑀲𑀼 𑀫𑀸𑀲𑁂𑀲𑀼 𑀪𑀺𑀦𑁆𑀦𑀲𑁆𑀲 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀺𑀤𑀺𑀯𑀲𑁄 𑀘 𑀬𑀣𑀸𑀯𑀼𑀢𑁆𑀢𑀘𑀸𑀢𑀼𑀤𑁆𑀤𑀲𑀧𑀦𑁆𑀦𑀭𑀲𑀸 𑀘. 𑀏𑀢𑀁 𑀢𑀺𑀧𑁆𑀧𑀓𑀸𑀭𑀫𑁆𑀧𑀺 𑀉𑀧𑁄𑀲𑀣𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀁 𑀓𑀭𑁄𑀢𑀺 𑀦𑀸𑀫. 𑀬𑀢𑁆𑀭 𑀳𑀺 𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀁 𑀅𑀢𑁆𑀣𑀸𑀬 𑀅𑀧𑁆𑀧𑀫𑀢𑁆𑀢𑀓𑁂𑀦 𑀓𑀸𑀭𑀡𑁂𑀦 𑀯𑀺𑀯𑀤𑀦𑁆𑀢𑀸 𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀞𑀧𑁂𑀦𑁆𑀢𑀺, 𑀢𑀢𑁆𑀣 𑀢𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀢𑁂 ‘‘𑀲𑀫𑀕𑁆𑀕𑀸 𑀚𑀸𑀢𑀸𑀫𑁆𑀳𑀸’’𑀢𑀺 𑀅𑀦𑁆𑀢𑀭𑀸 𑀲𑀸𑀫𑀕𑁆𑀕𑀺𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀮𑀪𑀦𑁆𑀢𑀺, 𑀓𑀭𑁄𑀦𑁆𑀢𑁂𑀳𑀺 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀢𑁄 𑀦𑀸𑀫 𑀳𑁄𑀢𑀺.

𑀅𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀻𑀢𑀺 𑀅𑀧𑀯𑀸𑀭𑀡𑀸𑀤𑀺𑀯𑀲𑁂 𑀧𑀯𑀸𑀭𑁂𑀢𑀺; 𑀧𑀯𑀸𑀭𑀡𑀸𑀤𑀺𑀯𑀲𑁄 𑀦𑀸𑀫 𑀏𑀓𑀲𑁆𑀫𑀺𑀁 𑀓𑀢𑁆𑀢𑀺𑀓𑀫𑀸𑀲𑁂 𑀪𑀺𑀦𑁆𑀦𑀲𑁆𑀲 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀺𑀤𑀺𑀯𑀲𑁄 𑀘 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑁆𑀯𑀸 𑀞𑀧𑀺𑀢𑀤𑀺𑀯𑀲𑁄 𑀘 𑀤𑁆𑀯𑁂 𑀘 𑀧𑀼𑀡𑁆𑀡𑀫𑀸𑀲𑀺𑀬𑁄. 𑀏𑀯𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀧𑀯𑀸𑀭𑀡𑀸𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀧𑀯𑀸𑀭𑁂𑀦𑁆𑀢𑁄 𑀅𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀺 𑀦𑀸𑀫. 𑀇𑀥𑀸𑀧𑀺 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀯𑀺𑀯𑀸𑀤𑀲𑁆𑀲 𑀯𑀽𑀧𑀲𑀫𑁂 𑀲𑀸𑀫𑀕𑁆𑀕𑀺𑀧𑀯𑀸𑀭𑀡𑀁 𑀓𑀸𑀢𑀼𑀁 𑀦 𑀮𑀪𑀦𑁆𑀢𑀺, 𑀓𑀭𑁄𑀦𑁆𑀢𑁂𑀳𑀺 𑀅𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀸 𑀓𑀢𑀸 𑀳𑁄𑀢𑀺. 𑀅𑀧𑀺𑀘 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀯𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑀁 𑀯𑀸 𑀏𑀓𑀸𑀤𑀲𑀲𑀼 𑀯𑀸 𑀅𑀪𑀩𑁆𑀩𑀧𑀼𑀕𑁆𑀕𑀮𑁂𑀲𑀼 𑀅𑀜𑁆𑀜𑀢𑀭𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲𑀧𑀺 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺. 𑀏𑀯𑀁 𑀯𑀢𑁆𑀣𑀼𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁮𑁪. 𑀜𑀢𑁆𑀢𑀺𑀢𑁄 𑀯𑀺𑀧𑀢𑁆𑀢𑀺𑀬𑀁 𑀧𑀦 𑀯𑀢𑁆𑀣𑀼𑀁 𑀦 𑀧𑀭𑀸𑀫𑀲𑀢𑀻𑀢𑀺 𑀬𑀲𑁆𑀲 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀁 𑀦 𑀧𑀭𑀸𑀫𑀲𑀢𑀺, 𑀢𑀲𑁆𑀲 𑀦𑀸𑀫𑀁 𑀦 𑀕𑀡𑁆𑀳𑀸𑀢𑀺. ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀤𑀢𑀺; 𑀏𑀯𑀁 𑀯𑀢𑁆𑀣𑀼𑀁 𑀦 𑀧𑀭𑀸𑀫𑀲𑀢𑀺.

𑀲𑀗𑁆𑀖𑀁 𑀦 𑀧𑀭𑀸𑀫𑀲𑀢𑀻𑀢𑀺 𑀲𑀗𑁆𑀖𑀲𑁆𑀲 𑀦𑀸𑀫𑀁 𑀦 𑀕𑀡𑁆𑀳𑀸𑀢𑀺. ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 𑀯𑀤𑀢𑀺; 𑀏𑀯𑀁 𑀲𑀗𑁆𑀖𑀁 𑀦 𑀧𑀭𑀸𑀫𑀲𑀢𑀺.

𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀻𑀢𑀺 𑀬𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀉𑀧𑀚𑁆𑀛𑀸𑀬𑁄, 𑀢𑀁 𑀦 𑀧𑀭𑀸𑀫𑀲𑀢𑀺, 𑀢𑀲𑁆𑀲 𑀦𑀸𑀫𑀁 𑀦 𑀕𑀡𑁆𑀳𑀸𑀢𑀺. ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀤𑀢𑀺; 𑀏𑀯𑀁 𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀺.

𑀜𑀢𑁆𑀢𑀺𑀁 𑀦 𑀧𑀭𑀸𑀫𑀲𑀢𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀜𑀢𑁆𑀢𑀺𑀁 𑀦 𑀧𑀭𑀸𑀫𑀲𑀢𑀺. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀓𑀫𑁆𑀫𑀯𑀸𑀘𑀸𑀬 𑀏𑀯 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀓𑀭𑁄𑀢𑀺. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂𑀧𑀺 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀓𑀫𑁆𑀫𑀯𑀸𑀘𑀸𑀬 𑀏𑀯 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀓𑀭𑁄𑀢𑀺; 𑀏𑀯𑀁 𑀜𑀢𑁆𑀢𑀺𑀁 𑀦 𑀧𑀭𑀸𑀫𑀲𑀢𑀺.

𑀧𑀘𑁆𑀙𑀸 𑀯𑀸 𑀜𑀢𑁆𑀢𑀺𑀁 𑀞𑀧𑁂𑀢𑀻𑀢𑀺 𑀧𑀞𑀫𑀁 𑀓𑀫𑁆𑀫𑀯𑀸𑀘𑀸𑀬 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀔𑀫𑀢𑀺 𑀲𑀗𑁆𑀖𑀲𑁆𑀲 𑀢𑀲𑁆𑀫𑀸 𑀢𑀼𑀡𑁆𑀳𑀻 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 𑀯𑀤𑀢𑀺; 𑀏𑀯𑀁 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺. 𑀇𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀜𑀢𑁆𑀢𑀺𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁮𑁫. 𑀅𑀦𑀼𑀲𑁆𑀲𑀸𑀯𑀦𑀢𑁄 𑀯𑀺𑀧𑀢𑁆𑀢𑀺𑀬𑀁 𑀧𑀦 𑀯𑀢𑁆𑀣𑀼𑀆𑀤𑀻𑀦𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀧𑀦 𑀦𑁂𑀲𑀁 𑀅𑀧𑀭𑀸𑀫𑀲𑀦𑀁 𑀳𑁄𑀢𑀺 𑁋 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄’’𑀢𑀺 𑀧𑀞𑀫𑀸𑀦𑀼𑀲𑁆𑀲𑀸𑀯𑀦𑁂 ‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺, 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺, 𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄’’𑀢𑀺 𑀤𑀼𑀢𑀺𑀬𑀢𑀢𑀺𑀬𑀸𑀦𑀼𑀲𑁆𑀲𑀸𑀯𑀦𑀸𑀲𑀼 𑀯𑀸 ‘‘𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲𑀸’’𑀢𑀺 𑀯𑀤𑀦𑁆𑀢𑁄 𑀯𑀢𑁆𑀣𑀼𑀁 𑀦 𑀧𑀭𑀸𑀫𑀲𑀢𑀺 𑀦𑀸𑀫. ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄’’𑀢𑀺 𑀯𑀤𑀦𑁆𑀢𑁄 𑀲𑀗𑁆𑀖𑀁 𑀦 𑀧𑀭𑀸𑀫𑀲𑀢𑀺 𑀦𑀸𑀫. ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀤𑀦𑁆𑀢𑁄 𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀺 𑀦𑀸𑀫.

𑀲𑀸𑀯𑀦𑀁 𑀳𑀸𑀧𑁂𑀢𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀓𑀫𑁆𑀫𑀯𑀸𑀘𑀸𑀬 𑀅𑀦𑀼𑀲𑁆𑀲𑀸𑀯𑀦𑀁 𑀦 𑀓𑀭𑁄𑀢𑀺, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀜𑀢𑁆𑀢𑀺𑀫𑁂𑀯 𑀞𑀧𑁂𑀢𑀺, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂 𑀘𑀢𑀼𑀓𑁆𑀔𑀢𑁆𑀢𑀼𑀁 𑀜𑀢𑁆𑀢𑀺𑀫𑁂𑀯 𑀞𑀧𑁂𑀢𑀺; 𑀏𑀯𑀁 𑀅𑀦𑀼𑀲𑁆𑀲𑀸𑀯𑀦𑀁 𑀳𑀸𑀧𑁂𑀢𑀺. 𑀬𑁄𑀧𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀏𑀓𑀁 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀏𑀓𑀁 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀦𑁆𑀢𑁄 𑀅𑀓𑁆𑀔𑀭𑀁 𑀯𑀸 𑀙𑀟𑁆𑀟𑁂𑀢𑀺, 𑀧𑀤𑀁 𑀯𑀸 𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀺, 𑀅𑀬𑀫𑁆𑀧𑀺 𑀅𑀦𑀼𑀲𑁆𑀲𑀸𑀯𑀦𑀁 𑀳𑀸𑀧𑁂𑀢𑀺𑀬𑁂𑀯. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂 𑀧𑀦 𑀏𑀓𑀁 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀲𑀓𑀺𑀫𑁂𑀯 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀓𑀫𑁆𑀫𑀯𑀸𑀘𑀸𑀬 𑀅𑀦𑀼𑀲𑁆𑀲𑀸𑀯𑀦𑀁 𑀓𑀭𑁄𑀦𑁆𑀢𑁄𑀧𑀺 𑀅𑀓𑁆𑀔𑀭𑀁 𑀯𑀸 𑀧𑀤𑀁 𑀯𑀸 𑀙𑀟𑁆𑀟𑁂𑀦𑁆𑀢𑁄𑀧𑀺 𑀤𑀼𑀭𑀼𑀢𑁆𑀢𑀁 𑀓𑀭𑁄𑀦𑁆𑀢𑁄𑀧𑀺 𑀅𑀦𑀼𑀲𑁆𑀲𑀸𑀯𑀦𑀁 𑀳𑀸𑀧𑁂𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀧𑀦 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀬𑁄 𑀳𑀺 𑀅𑀜𑁆𑀜𑀲𑁆𑀫𑀺𑀁 𑀅𑀓𑁆𑀔𑀭𑁂 𑀯𑀢𑁆𑀢𑀩𑁆𑀩𑁂 𑀅𑀜𑁆𑀜𑀁 𑀯𑀤𑀢𑀺, 𑀅𑀬𑀁 𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀺 𑀦𑀸𑀫. 𑀢𑀲𑁆𑀫𑀸 𑀓𑀫𑁆𑀫𑀯𑀸𑀘𑀁 𑀓𑀭𑁄𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀬𑁆𑀯𑀸𑀬𑀁 𑁋

‘‘𑀲𑀺𑀣𑀺𑀮𑀁 𑀥𑀦𑀺𑀢𑀜𑁆𑀘 𑀤𑀻𑀖𑀭𑀲𑁆𑀲𑀁, 𑀕𑀭𑀼𑀓𑀁 𑀮𑀳𑀼𑀓𑀜𑁆𑀘 𑀦𑀺𑀕𑁆𑀕𑀳𑀺𑀢𑀁;

𑀲𑀫𑁆𑀩𑀦𑁆𑀥𑀁 𑀯𑀯𑀢𑁆𑀣𑀺𑀢𑀁 𑀯𑀺𑀫𑀼𑀢𑁆𑀢𑀁, 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄’’𑀢𑀺.

𑀯𑀼𑀢𑁆𑀢𑁄, 𑀅𑀬𑀁 𑀲𑀼𑀝𑁆𑀞𑀼 𑀉𑀧𑀮𑀓𑁆𑀔𑁂𑀢𑀩𑁆𑀩𑁄. 𑀏𑀢𑁆𑀣 𑀳𑀺 ‘‘𑀲𑀺𑀣𑀺𑀮𑀁’’ 𑀦𑀸𑀫 𑀧𑀜𑁆𑀘𑀲𑀼 𑀯𑀕𑁆𑀕𑁂𑀲𑀼 𑀧𑀞𑀫𑀢𑀢𑀺𑀬𑀁. ‘‘𑀥𑀦𑀺𑀢𑀁’’ 𑀦𑀸𑀫 𑀢𑁂𑀲𑁆𑀯𑁂𑀯 𑀤𑀼𑀢𑀺𑀬𑀘𑀢𑀼𑀢𑁆𑀣𑀁. ‘‘𑀤𑀻𑀖’’𑀦𑁆𑀢𑀺 𑀤𑀻𑀖𑁂𑀦 𑀓𑀸𑀮𑁂𑀦 𑀯𑀢𑁆𑀢𑀩𑁆𑀩𑀁 𑀆𑀓𑀸𑀭𑀸𑀤𑀺. ‘‘𑀭𑀲𑁆𑀲’’𑀦𑁆𑀢𑀺 𑀢𑀢𑁄 𑀉𑀧𑀟𑁆𑀠𑀓𑀸𑀮𑁂𑀦 𑀯𑀢𑁆𑀢𑀩𑁆𑀩𑀁 𑀅𑀓𑀸𑀭𑀸𑀤𑀺. ‘‘𑀕𑀭𑀼𑀓’’𑀦𑁆𑀢𑀺 𑀤𑀻𑀖𑀫𑁂𑀯. 𑀬𑀁 𑀯𑀸 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀬𑀲𑁆𑀲 𑀦𑀓𑁆𑀔𑀫𑀢𑀻𑀢𑀺 𑀏𑀯𑀁 𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺. ‘‘𑀮𑀳𑀼𑀓’’𑀦𑁆𑀢𑀺 𑀭𑀲𑁆𑀲𑀫𑁂𑀯. 𑀬𑀁 𑀯𑀸 𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀣𑁂𑀭𑀲𑁆𑀲 𑀬𑀲𑁆𑀲 𑀦 𑀔𑀫𑀢𑀻𑀢𑀺 𑀏𑀯𑀁 𑀅𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺. ‘‘𑀦𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀬𑀁 𑀓𑀭𑀡𑀸𑀦𑀺 𑀦𑀺𑀕𑁆𑀕𑀳𑁂𑀢𑁆𑀯𑀸 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀯𑀺𑀯𑀝𑁂𑀦 𑀫𑀼𑀔𑁂𑀦 𑀲𑀸𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. ‘‘𑀲𑀫𑁆𑀩𑀦𑁆𑀥’’𑀦𑁆𑀢𑀺 𑀬𑀁 𑀧𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 ‘‘𑀢𑀼𑀡𑁆𑀳𑀺𑀲𑁆𑀲𑀸’’𑀢𑀺 𑀯𑀸 ‘‘𑀢𑀼𑀡𑁆𑀳𑀲𑁆𑀲𑀸’’𑀢𑀺 𑀯𑀸 𑀯𑀼𑀘𑁆𑀘𑀢𑀺. ‘‘𑀯𑀯𑀢𑁆𑀣𑀺𑀢’’𑀦𑁆𑀢𑀺 𑀬𑀁 𑀧𑀭𑀧𑀤𑁂𑀦 𑀅𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀢𑀼𑀡𑁆𑀳𑀻 𑀅𑀲𑁆𑀲𑀸’’𑀢𑀺 𑀯𑀸 ‘‘𑀢𑀼𑀡𑁆𑀳 𑀅𑀲𑁆𑀲𑀸’’𑀢𑀺 𑀯𑀸 𑀯𑀼𑀘𑁆𑀘𑀢𑀺. ‘‘𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀬𑀁 𑀓𑀭𑀡𑀸𑀦𑀺 𑀅𑀦𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀅𑀓𑀢𑁆𑀯𑀸 𑀯𑀼𑀘𑁆𑀘𑀢𑀺.

𑀢𑀢𑁆𑀣 ‘‘𑀲𑀼𑀡𑀸𑀢𑀼 𑀫𑁂’’𑀢𑀺 𑀯𑀢𑁆𑀢𑀩𑁆𑀩𑁂 𑀢-𑀓𑀸𑀭𑀲𑁆𑀲 𑀣-𑀓𑀸𑀭𑀁 𑀓𑀢𑁆𑀯𑀸 ‘‘𑀲𑀼𑀡𑀸𑀣𑀼 𑀫𑁂’’𑀢𑀺 𑀯𑀘𑀦𑀁 𑀲𑀺𑀣𑀺𑀮𑀲𑁆𑀲 𑀥𑀦𑀺𑀢𑀓𑀭𑀡𑀁 𑀦𑀸𑀫. 𑀢𑀣𑀸 ‘‘𑀧𑀢𑁆𑀢𑀓𑀮𑁆𑀮𑀁, 𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀢𑁆𑀣𑀓𑀮𑁆𑀮𑀁, 𑀏𑀲𑀸 𑀜𑀢𑁆𑀣𑀻’’𑀢𑀺𑀆𑀤𑀺𑀯𑀘𑀦𑀜𑁆𑀘. ‘‘𑀪𑀦𑁆𑀢𑁂 𑀲𑀗𑁆𑀖𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀪-𑀓𑀸𑀭 𑀖-𑀓𑀸𑀭𑀸𑀦𑀁 𑀩-𑀓𑀸𑀭 𑀕-𑀓𑀸𑀭𑁂 𑀓𑀢𑁆𑀯𑀸 ‘‘𑀩𑀦𑁆𑀢𑁂 𑀲𑀗𑁆𑀕𑁄’’𑀢𑀺 𑀯𑀘𑀦𑀁 𑀥𑀦𑀺𑀢𑀲𑁆𑀲 𑀲𑀺𑀣𑀺𑀮𑀓𑀭𑀡𑀁 𑀦𑀸𑀫. ‘‘𑀲𑀼𑀡𑀸𑀢𑀼 𑀫𑁂’’𑀢𑀺 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀯𑀢𑁆𑀢𑀩𑁆𑀩𑁂 𑀧𑀦 ‘‘𑀲𑀼𑀡𑀁𑀢𑀼 𑀫𑁂’’𑀢𑀺 𑀯𑀸 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀏𑀲𑀁 𑀜𑀢𑁆𑀢𑀻’’𑀢𑀺 𑀯𑀸 𑀅𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀘𑀦𑀁 𑀯𑀺𑀫𑀼𑀢𑁆𑀢𑀲𑁆𑀲 𑀦𑀺𑀕𑁆𑀕𑀳𑀺𑀢𑀯𑀘𑀦𑀁 𑀦𑀸𑀫. ‘‘𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺 𑀅𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑁂 ‘‘𑀧𑀢𑁆𑀢𑀓𑀮𑁆𑀮𑀸’’𑀢𑀺 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀅𑀦𑀼𑀦𑀸𑀲𑀺𑀓𑀁 𑀅𑀓𑀢𑁆𑀯𑀸 𑀯𑀘𑀦𑀁 𑀦𑀺𑀕𑁆𑀕𑀳𑀺𑀢𑀲𑁆𑀲 𑀯𑀺𑀫𑀼𑀢𑁆𑀢𑀯𑀘𑀦𑀁 𑀦𑀸𑀫.

𑀇𑀢𑀺 𑀲𑀺𑀣𑀺𑀮𑁂 𑀓𑀢𑁆𑀢𑀩𑁆𑀩𑁂 𑀥𑀦𑀺𑀢𑀁, 𑀥𑀦𑀺𑀢𑁂 𑀓𑀢𑁆𑀢𑀩𑁆𑀩𑁂 𑀲𑀺𑀣𑀺𑀮𑀁, 𑀯𑀺𑀫𑀼𑀢𑁆𑀢𑁂 𑀓𑀢𑁆𑀢𑀩𑁆𑀩𑁂 𑀦𑀺𑀕𑁆𑀕𑀳𑀺𑀢𑀁, 𑀦𑀺𑀕𑁆𑀕𑀳𑀺𑀢𑁂 𑀓𑀢𑁆𑀢𑀩𑁆𑀩𑁂 𑀯𑀺𑀫𑀼𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀩𑁆𑀬𑀜𑁆𑀚𑀦𑀸𑀦𑀺 𑀅𑀦𑁆𑀢𑁄𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀁 𑀤𑀽𑀲𑁂𑀦𑁆𑀢𑀺. 𑀏𑀯𑀁 𑀯𑀤𑀦𑁆𑀢𑁄 𑀳𑀺 𑀅𑀜𑁆𑀜𑀲𑁆𑀫𑀺𑀁 𑀅𑀓𑁆𑀔𑀭𑁂 𑀯𑀢𑁆𑀢𑀩𑁆𑀩𑁂 𑀅𑀜𑁆𑀜𑀁 𑀯𑀤𑀢𑀺, 𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀭𑁂𑀲𑀼 𑀧𑀦 𑀤𑀻𑀖𑀭𑀲𑁆𑀲𑀸𑀤𑀻𑀲𑀼 𑀙𑀲𑀼 𑀩𑁆𑀬𑀜𑁆𑀚𑀦𑁂𑀲𑀼 𑀤𑀻𑀖𑀝𑁆𑀞𑀸𑀦𑁂 𑀤𑀻𑀖𑀫𑁂𑀯, 𑀭𑀲𑁆𑀲𑀝𑁆𑀞𑀸𑀦𑁂 𑀘 𑀭𑀲𑁆𑀲𑀫𑁂𑀯𑀸𑀢𑀺 𑀏𑀯𑀁 𑀬𑀣𑀸𑀞𑀸𑀦𑁂 𑀢𑀁 𑀢𑀤𑁂𑀯 𑀅𑀓𑁆𑀔𑀭𑀁 𑀪𑀸𑀲𑀦𑁆𑀢𑁂𑀦 𑀅𑀦𑀼𑀓𑁆𑀓𑀫𑀸𑀕𑀢𑀁 𑀧𑀯𑁂𑀡𑀺𑀁 𑀅𑀯𑀺𑀦𑀸𑀲𑁂𑀦𑁆𑀢𑁂𑀦 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀲𑀘𑁂 𑀧𑀦 𑀏𑀯𑀁 𑀅𑀓𑀢𑁆𑀯𑀸 𑀤𑀻𑀖𑁂 𑀯𑀢𑁆𑀢𑀩𑁆𑀩𑁂 𑀭𑀲𑁆𑀲𑀁, 𑀭𑀲𑁆𑀲𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀤𑀻𑀖𑀁 𑀯𑀤𑀢𑀺; 𑀢𑀣𑀸 𑀕𑀭𑀼𑀓𑁂 𑀯𑀢𑁆𑀢𑀩𑁆𑀩𑁂 𑀮𑀳𑀼𑀓𑀁, 𑀮𑀳𑀼𑀓𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀕𑀭𑀼𑀓𑀁 𑀯𑀤𑀢𑀺; 𑀲𑀫𑁆𑀩𑀦𑁆𑀥𑁂 𑀯𑀸 𑀧𑀦 𑀯𑀢𑁆𑀢𑀩𑁆𑀩𑁂 𑀯𑀯𑀢𑁆𑀣𑀺𑀢𑀁, 𑀯𑀯𑀢𑁆𑀣𑀺𑀢𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀲𑀫𑁆𑀩𑀦𑁆𑀥𑀁 𑀯𑀤𑀢𑀺; 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀓𑀫𑁆𑀫𑀯𑀸𑀘𑀸 𑀦 𑀓𑀼𑀧𑁆𑀧𑀢𑀺. 𑀇𑀫𑀸𑀦𑀺 𑀳𑀺 𑀙 𑀩𑁆𑀬𑀜𑁆𑀚𑀦𑀸𑀦𑀺 𑀓𑀫𑁆𑀫𑀁 𑀦 𑀓𑁄𑀧𑁂𑀦𑁆𑀢𑀺.

𑀬𑀁 𑀧𑀦 𑀲𑀼𑀢𑁆𑀢𑀦𑁆𑀢𑀺𑀓𑀢𑁆𑀣𑁂𑀭𑀸 ‘‘𑀤-𑀓𑀸𑀭𑁄 𑀢-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀢-𑀓𑀸𑀭𑁄 𑀤-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀘-𑀓𑀸𑀭𑁄 𑀚-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀚-𑀓𑀸𑀭𑁄 𑀘-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀬-𑀓𑀸𑀭𑁄 𑀓-𑀓𑀸𑀭𑀫𑀸𑀧𑀚𑁆𑀚𑀢𑀺, 𑀓-𑀓𑀸𑀭𑁄 𑀬-𑀓𑀸𑀭𑀫𑀸𑀧𑀚𑁆𑀚𑀢𑀺; 𑀢𑀲𑁆𑀫𑀸 𑀤-𑀓𑀸𑀭𑀸𑀤𑀻𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀢-𑀓𑀸𑀭𑀸𑀤𑀺𑀯𑀘𑀦𑀁 𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀓𑀫𑁆𑀫𑀯𑀸𑀘𑀁 𑀧𑀢𑁆𑀯𑀸 𑀦 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀯𑀺𑀦𑀬𑀥𑀭𑁂𑀦 𑀦𑁂𑀯 𑀤-𑀓𑀸𑀭𑁄 𑀢-𑀓𑀸𑀭𑁄 𑀓𑀸𑀢𑀩𑁆𑀩𑁄…𑀧𑁂… 𑀦 𑀓-𑀓𑀸𑀭𑁄 𑀬-𑀓𑀸𑀭𑁄. 𑀬𑀣𑀸𑀧𑀸𑀴𑀺𑀬𑀸 𑀦𑀺𑀭𑀼𑀢𑁆𑀢𑀺𑀁 𑀲𑁄𑀥𑁂𑀢𑁆𑀯𑀸 𑀤𑀲𑀯𑀺𑀥𑀸𑀬 𑀩𑁆𑀬𑀜𑁆𑀚𑀦𑀦𑀺𑀭𑀼𑀢𑁆𑀢𑀺𑀬𑀸 𑀯𑀼𑀢𑁆𑀢𑀤𑁄𑀲𑁂 𑀧𑀭𑀺𑀳𑀭𑀦𑁆𑀢𑁂𑀦 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀇𑀢𑀭𑀣𑀸 𑀳𑀺 𑀲𑀸𑀯𑀦𑀁 𑀳𑀸𑀧𑁂𑀢𑀺 𑀦𑀸𑀫.

𑀅𑀓𑀸𑀮𑁂 𑀯𑀸 𑀲𑀸𑀯𑁂𑀢𑀻𑀢𑀺 𑀲𑀸𑀯𑀦𑀸𑀬 𑀅𑀓𑀸𑀮𑁂 𑀅𑀦𑁄𑀓𑀸𑀲𑁂 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀧𑀞𑀫𑀁𑀬𑁂𑀯 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺. 𑀇𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑀼𑀲𑁆𑀲𑀸𑀯𑀦𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁮𑁬. 𑀲𑀻𑀫𑀢𑁄 𑀯𑀺𑀧𑀢𑁆𑀢𑀺𑀬𑀁 𑀧𑀦 𑀅𑀢𑀺𑀔𑀼𑀤𑁆𑀤𑀓𑀲𑀻𑀫𑀸 𑀦𑀸𑀫 𑀬𑀸 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀦 𑀕𑀡𑁆𑀳𑀸𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀬𑀢𑁆𑀣 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀸 𑀏𑀯𑀭𑀽𑀧𑀸 𑀲𑀻𑀫𑀸, 𑀅𑀬𑀁 𑀲𑀫𑁆𑀫𑀢𑀸𑀧𑀺 𑀅𑀲𑀫𑁆𑀫𑀢𑀸, 𑀕𑀸𑀫𑀔𑁂𑀢𑁆𑀢𑀲𑀤𑀺𑀲𑀸𑀯 𑀳𑁄𑀢𑀺, 𑀢𑀢𑁆𑀣 𑀓𑀢𑀁 𑀓𑀫𑁆𑀫𑀁 𑀓𑀼𑀧𑁆𑀧𑀢𑀺. 𑀏𑀲 𑀦𑀬𑁄 𑀲𑁂𑀲𑀲𑀻𑀫𑀸𑀲𑀼𑀧𑀺. 𑀏𑀢𑁆𑀣 𑀧𑀦 𑀅𑀢𑀺𑀫𑀳𑀢𑀻 𑀦𑀸𑀫 𑀬𑀸 𑀓𑁂𑀲𑀕𑁆𑀕𑀫𑀢𑁆𑀢𑁂𑀦𑀸𑀧𑀺 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑁆𑀯𑀸 𑀲𑀫𑁆𑀫𑀢𑀸 𑀳𑁄𑀢𑀺. 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀅𑀖𑀝𑀺𑀢𑀦𑀺𑀫𑀺𑀢𑁆𑀢𑀸 𑀯𑀼𑀘𑁆𑀘𑀢𑀺. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦𑁂𑀯 𑀤𑀓𑁆𑀔𑀺𑀡𑀸𑀬 𑀧𑀘𑁆𑀙𑀺𑀫𑀸𑀬 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀼𑀩𑁆𑀩𑀓𑀺𑀢𑁆𑀢𑀺𑀢𑀁 𑀦𑀺𑀫𑀺𑀢𑁆𑀢𑀁 𑀧𑀝𑀺𑀓𑀺𑀢𑁆𑀢𑁂𑀢𑁆𑀯𑀸𑀯 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺; 𑀏𑀯𑀁 𑀅𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀳𑁄𑀢𑀺. 𑀲𑀘𑁂 𑀧𑀦 𑀅𑀦𑀼𑀓𑁆𑀓𑀫𑁂𑀦 𑀆𑀳𑀭𑀺𑀢𑁆𑀯𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀞𑀧𑁂𑀢𑀺, 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀳𑁄𑀢𑀺. 𑀅𑀧𑀭𑀸𑀧𑀺 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀬𑀸 𑀅𑀦𑀺𑀫𑀺𑀢𑁆𑀢𑀼𑀧𑀕𑀁 𑀢𑀘𑀲𑀸𑀭𑀭𑀼𑀓𑁆𑀔𑀁 𑀯𑀸 𑀔𑀸𑀡𑀼𑀓𑀁 𑀯𑀸 𑀧𑀁𑀲𑀼𑀧𑀼𑀜𑁆𑀚𑀯𑀸𑀮𑀺𑀓𑀸𑀧𑀼𑀜𑁆𑀚𑀸𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀅𑀦𑁆𑀢𑀭𑀸 𑀏𑀓𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀫𑁆𑀫𑀢𑀸 𑀳𑁄𑀢𑀺. 𑀙𑀸𑀬𑀸𑀦𑀺𑀫𑀺𑀢𑁆𑀢𑀸 𑀦𑀸𑀫 𑀬𑀸 𑀧𑀩𑁆𑀩𑀢𑀘𑁆𑀙𑀸𑀬𑀸𑀤𑀻𑀦𑀁 𑀬𑀁𑀓𑀺𑀜𑁆𑀘𑀺 𑀙𑀸𑀬𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀫𑁆𑀫𑀢𑀸 𑀳𑁄𑀢𑀺. 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫 𑀬𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀺𑀫𑀺𑀢𑁆𑀢𑀸𑀦𑀺 𑀅𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸 𑀳𑁄𑀢𑀺.

𑀩𑀳𑀺𑀲𑀻𑀫𑁂 𑀞𑀺𑀢𑁄 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺 𑀦𑀸𑀫 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀸𑀦𑀁 𑀩𑀳𑀺 𑀞𑀺𑀢𑁄 𑀲𑀫𑁆𑀫𑀦𑁆𑀦𑀢𑀺. 𑀦𑀤𑀺𑀬𑀸 𑀲𑀫𑀼𑀤𑁆𑀤𑁂 𑀚𑀸𑀢𑀲𑁆𑀲𑀭𑁂 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀻𑀢𑀺 𑀏𑀢𑁂𑀲𑀼 𑀦𑀤𑀺𑀆𑀤𑀻𑀲𑀼 𑀬𑀁 𑀲𑀫𑁆𑀫𑀦𑁆𑀦𑀢𑀺, 𑀲𑀸 𑀏𑀯𑀁 𑀲𑀫𑁆𑀫𑀢𑀸𑀧𑀺 ‘‘𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸, 𑀲𑀩𑁆𑀩𑁄 𑀲𑀫𑀼𑀤𑁆𑀤𑁄 𑀅𑀲𑀻𑀫𑁄, 𑀲𑀩𑁆𑀩𑁄 𑀚𑀸𑀢𑀲𑁆𑀲𑀭𑁄 𑀅𑀲𑀻𑀫𑁄’’𑀢𑀺 (𑀫𑀳𑀸𑀯. 𑁧𑁪𑁭) 𑀯𑀘𑀦𑀢𑁄 𑀅𑀲𑀫𑁆𑀫𑀢𑀸𑀯 𑀳𑁄𑀢𑀺. 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀢𑀻𑀢𑀺 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀧𑀭𑁂𑀲𑀁 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀢𑀺. 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀧𑀭𑁂𑀲𑀁 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀢𑀢𑁆𑀣 𑀬𑀣𑀸 𑀲𑀫𑁆𑀪𑁂𑀤𑁄 𑀘 𑀅𑀚𑁆𑀛𑁄𑀢𑁆𑀣𑀭𑀡𑀜𑁆𑀘 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀫𑁂𑀯. 𑀇𑀢𑀺 𑀇𑀫𑀸 𑀏𑀓𑀸𑀤𑀲𑀧𑀺 𑀲𑀻𑀫𑀸 𑀅𑀲𑀻𑀫𑀸 𑀕𑀸𑀫𑀔𑁂𑀢𑁆𑀢𑀲𑀤𑀺𑀲𑀸 𑀏𑀯, 𑀢𑀸𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀓𑀢𑀁 𑀓𑀫𑁆𑀫𑀁 𑀓𑀼𑀧𑁆𑀧𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀫𑁂𑀳𑀺 𑀏𑀓𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀲𑀻𑀫𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀻’’𑀢𑀺.

𑁪𑁮𑁭-𑁪𑁮𑁮. 𑀧𑀭𑀺𑀲𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀬𑀁 𑀧𑀦 𑀓𑀺𑀜𑁆𑀘𑀺 𑀅𑀦𑀼𑀢𑁆𑀢𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀬𑀫𑁆𑀧𑀺 𑀢𑀢𑁆𑀣 𑀓𑀫𑁆𑀫𑀧𑁆𑀧𑀢𑁆𑀢𑀙𑀦𑁆𑀤𑀸𑀭𑀳𑀮𑀓𑁆𑀔𑀡𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀫𑁆𑀧𑀺 𑀧𑀭𑀢𑁄 ‘‘𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑁆𑀧𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀫𑁂𑀯. 𑀢𑀢𑁆𑀣 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑁆𑀧𑀢𑁆𑀢𑀸𑀢𑀺 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀘𑀢𑁆𑀢𑀸𑀭𑁄 𑀧𑀓𑀢𑀢𑁆𑀢𑀸 𑀅𑀦𑀼𑀓𑁆𑀔𑀺𑀢𑁆𑀢𑀸 𑀅𑀦𑀺𑀲𑁆𑀲𑀸𑀭𑀺𑀢𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀓𑀫𑁆𑀫𑀲𑁆𑀲 𑀅𑀭𑀳𑀸 𑀅𑀦𑀼𑀘𑁆𑀙𑀯𑀺𑀓𑀸 𑀲𑀸𑀫𑀺𑀦𑁄. 𑀦 𑀢𑁂𑀳𑀺 𑀯𑀺𑀦𑀸 𑀢𑀁 𑀓𑀫𑁆𑀫𑀁 𑀓𑀬𑀺𑀭𑀢𑀺, 𑀦 𑀢𑁂𑀲𑀁 𑀙𑀦𑁆𑀤𑁄 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺 𑀯𑀸 𑀏𑀢𑀺. 𑀅𑀯𑀲𑁂𑀲𑀸 𑀧𑀦 𑀲𑀘𑁂𑀧𑀺 𑀲𑀳𑀲𑁆𑀲𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀲𑀘𑁂 𑀲𑀫𑀸𑀦𑀲𑀁𑀯𑀸𑀲𑀓𑀸, 𑀲𑀩𑁆𑀩𑁂 𑀙𑀦𑁆𑀤𑀸𑀭𑀳𑀸𑀯 𑀳𑁄𑀦𑁆𑀢𑀺. 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀼 𑀯𑀸 𑀫𑀸 𑀯𑀸, 𑀓𑀫𑁆𑀫𑀁 𑀧𑀦 𑀢𑀺𑀝𑁆𑀞𑀢𑀺. 𑀬𑀲𑁆𑀲 𑀧𑀦 𑀲𑀗𑁆𑀖𑁄 𑀧𑀭𑀺𑀯𑀸𑀲𑀸𑀤𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀲𑁄 𑀦𑁂𑀯 𑀓𑀫𑁆𑀫𑀧𑁆𑀧𑀢𑁆𑀢𑁄, 𑀦𑀸𑀧𑀺 𑀙𑀦𑁆𑀤𑀸𑀭𑀳𑁄. 𑀅𑀧𑀺𑀘 𑀬𑀲𑁆𑀫𑀸 𑀢𑀁 𑀧𑀼𑀕𑁆𑀕𑀮𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀓𑀫𑁆𑀫𑀸𑀭𑀳𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀓𑀫𑁆𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁪𑁮𑁯. 𑀧𑀼𑀦 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀻𑀢𑀺𑀆𑀤𑀺𑀓𑁄 𑀦𑀬𑁄 𑀧𑀡𑁆𑀟𑀓𑀸𑀤𑀻𑀦𑀁 𑀅𑀯𑀢𑁆𑀣𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀅𑀧𑀮𑁄𑀓𑀦𑀓𑀫𑁆𑀫𑀓𑀣𑀸

𑁪𑁯𑁫-𑁪𑁯𑁬. 𑀇𑀤𑀸𑀦𑀺 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑀺 𑀞𑀸𑀦𑀸𑀦𑀺 𑀕𑀘𑁆𑀙𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀧𑀜𑁆𑀘 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺 𑁋 𑀑𑀲𑀸𑀭𑀡𑀁, 𑀦𑀺𑀲𑁆𑀲𑀸𑀭𑀡𑀁, 𑀪𑀡𑁆𑀟𑀼𑀓𑀫𑁆𑀫𑀁, 𑀩𑁆𑀭𑀳𑁆𑀫𑀤𑀡𑁆𑀟𑀁, 𑀓𑀫𑁆𑀫𑀮𑀓𑁆𑀔𑀡𑀜𑁆𑀜𑁂𑀯 𑀧𑀜𑁆𑀘𑀫’’𑀦𑁆𑀢𑀺 𑀏𑀢𑁆𑀣 ‘‘𑀑𑀲𑀸𑀭𑀡𑀁 𑀦𑀺𑀲𑁆𑀲𑀸𑀭𑀡’’𑀦𑁆𑀢𑀺 𑀧𑀤𑀲𑀺𑀮𑀺𑀝𑁆𑀞𑀢𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀞𑀫𑀁 𑀧𑀦 𑀦𑀺𑀲𑁆𑀲𑀸𑀭𑀡𑀸 𑀳𑁄𑀢𑀺, 𑀧𑀘𑁆𑀙𑀸 𑀑𑀲𑀸𑀭𑀡𑀸. 𑀢𑀢𑁆𑀣 𑀬𑀸 𑀓𑀡𑁆𑀝𑀓𑀲𑀸𑀫𑀡𑁂𑀭𑀲𑁆𑀲 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸, 𑀲𑀸 ‘‘𑀦𑀺𑀲𑁆𑀲𑀸𑀭𑀡𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀫𑀸 𑀏𑀢𑀭𑀳𑀺 𑀲𑀘𑁂𑀧𑀺 𑀲𑀸𑀫𑀡𑁂𑀭𑁄 𑀩𑀼𑀤𑁆𑀥𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀡𑀢𑀺, ‘‘𑀅𑀓𑀧𑁆𑀧𑀺𑀬𑀁 𑀓𑀧𑁆𑀧𑀺𑀬’’𑀦𑁆𑀢𑀺 𑀤𑀻𑀧𑁂𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄, 𑀲𑁄 𑀬𑀸𑀯𑀢𑀢𑀺𑀬𑀁 𑀦𑀺𑀯𑀸𑀭𑁂𑀢𑁆𑀯𑀸 𑀢𑀁 𑀮𑀤𑁆𑀥𑀺𑀁 𑀦𑀺𑀲𑁆𑀲𑀚𑁆𑀚𑀸𑀧𑁂𑀢𑀩𑁆𑀩𑁄. 𑀦𑁄 𑀘𑁂 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 ‘‘𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀦𑁄 𑀘𑁂 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀲𑁆𑀲𑀸𑀭𑁂𑀢𑀩𑁆𑀩𑁄. 𑀏𑀯𑀜𑁆𑀘 𑀧𑀦 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋

‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀸𑀫𑀺 𑁋 ‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀲𑀸𑀫𑀡𑁂𑀭𑁄 𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀲𑁆𑀲 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀯𑀸𑀤𑀻 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄, 𑀬𑀁 𑀅𑀜𑁆𑀜𑁂 𑀲𑀸𑀫𑀡𑁂𑀭𑀸 𑀮𑀪𑀦𑁆𑀢𑀺, 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀳𑀲𑁂𑀬𑁆𑀬𑀁, 𑀢𑀲𑁆𑀲 𑀅𑀮𑀸𑀪𑀸𑀬 𑀦𑀺𑀲𑁆𑀲𑀸𑀭𑀡𑀸 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’𑀢𑀺. 𑀤𑀼𑀢𑀺𑀬𑀫𑁆𑀧𑀺… 𑀢𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑀁 𑀧𑀼𑀘𑁆𑀙𑀸𑀫𑀺 𑁋 ‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀲𑀸𑀫𑀡𑁂𑀭𑁄 𑀩𑀼𑀤𑁆𑀥𑀲𑁆𑀲…𑀧𑁂… 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’𑀢𑀺 𑀘𑀭 𑀧𑀺𑀭𑁂 𑀯𑀺𑀦𑀲𑁆𑀲𑀸’’𑀢𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 ‘‘𑀅𑀳𑀁, 𑀪𑀦𑁆𑀢𑁂, 𑀩𑀸𑀮𑀢𑀸𑀬 𑀅𑀜𑁆𑀜𑀸𑀡𑀢𑀸𑀬 𑀅𑀮𑀓𑁆𑀔𑀺𑀓𑀢𑀸𑀬 𑀏𑀯𑀁 𑀅𑀓𑀸𑀲𑀺𑀁, 𑀲𑁆𑀯𑀸𑀳𑀁 𑀲𑀗𑁆𑀖𑀁 𑀔𑀫𑀸𑀧𑁂𑀫𑀻’’𑀢𑀺 𑀔𑀫𑀸𑀧𑁂𑀦𑁆𑀢𑁄 𑀬𑀸𑀯𑀢𑀢𑀺𑀬𑀁 𑀬𑀸𑀘𑀸𑀧𑁂𑀢𑁆𑀯𑀸 𑀅𑀧𑀮𑁄𑀓𑀦𑀓𑀫𑁆𑀫𑁂𑀦𑁂𑀯 𑀑𑀲𑀸𑀭𑁂𑀢𑀩𑁆𑀩𑁄. 𑀏𑀯𑀁 𑀧𑀦 𑀑𑀲𑀸𑀭𑁂𑀢𑀩𑁆𑀩𑁄, 𑀲𑀗𑁆𑀖𑀫𑀚𑁆𑀛𑁂 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀲𑀸𑀯𑁂𑀢𑀩𑁆𑀩𑀁 𑁋

‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀸𑀫𑀺 𑁋 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀲𑀸𑀫𑀡𑁂𑀭𑁄 𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀲𑁆𑀲 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀯𑀸𑀤𑀻 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄, 𑀬𑀁 𑀅𑀜𑁆𑀜𑁂 𑀲𑀸𑀫𑀡𑁂𑀭𑀸 𑀮𑀪𑀦𑁆𑀢𑀺, 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁, 𑀢𑀲𑁆𑀲 𑀅𑀮𑀸𑀪𑀸𑀬 𑀦𑀺𑀲𑁆𑀲𑀸𑀭𑀺𑀢𑁄, 𑀲𑁆𑀯𑀸𑀬𑀁 𑀇𑀤𑀸𑀦𑀺 𑀲𑁄𑀭𑀢𑁄 𑀦𑀺𑀯𑀸𑀢𑀯𑀼𑀢𑁆𑀢𑀺 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀦𑁆𑀢𑁄 𑀳𑀺𑀭𑁄𑀢𑁆𑀢𑀧𑁆𑀧𑁂 𑀧𑀢𑀺𑀝𑁆𑀞𑀺𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄 𑀅𑀘𑁆𑀘𑀬𑀁 𑀤𑁂𑀲𑁂𑀢𑀺, 𑀇𑀫𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀬𑀣𑀸 𑀧𑀼𑀭𑁂 𑀓𑀸𑀬𑀲𑀫𑁆𑀪𑁄𑀕𑀲𑀸𑀫𑀕𑁆𑀕𑀺𑀤𑀸𑀦𑀁 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺.

𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀅𑀧𑀮𑁄𑀓𑀦𑀓𑀫𑁆𑀫𑀁 𑀑𑀲𑀸𑀭𑀡𑀜𑁆𑀘 𑀦𑀺𑀲𑁆𑀲𑀸𑀭𑀡𑀜𑁆𑀘 𑀕𑀘𑁆𑀙𑀢𑀺. 𑀪𑀡𑁆𑀟𑀼𑀓𑀫𑁆𑀫𑀁 𑀫𑀳𑀸𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀩𑁆𑀭𑀳𑁆𑀫𑀤𑀡𑁆𑀟𑁄 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑁄𑀬𑁂𑀯. 𑀦 𑀓𑁂𑀯𑀮𑀁 𑀧𑀦𑁂𑀲 𑀙𑀦𑁆𑀦𑀲𑁆𑀲𑁂𑀯 𑀧𑀜𑁆𑀜𑀢𑁆𑀢𑁄, 𑀬𑁄 𑀅𑀜𑁆𑀜𑁄𑀧𑀺 𑀪𑀺𑀓𑁆𑀔𑀼 𑀫𑀼𑀔𑀭𑁄 𑀳𑁄𑀢𑀺, 𑀪𑀺𑀓𑁆𑀔𑀽 𑀤𑀼𑀭𑀼𑀢𑁆𑀢𑀯𑀘𑀦𑁂𑀳𑀺 𑀖𑀝𑁆𑀝𑁂𑀦𑁆𑀢𑁄 𑀔𑀼𑀁𑀲𑁂𑀦𑁆𑀢𑁄 𑀯𑀫𑁆𑀪𑁂𑀦𑁆𑀢𑁄 𑀯𑀺𑀳𑀭𑀢𑀺, 𑀢𑀲𑁆𑀲𑀧𑀺 𑀤𑀸𑀢𑀩𑁆𑀩𑁄. 𑀏𑀯𑀜𑁆𑀘 𑀧𑀦 𑀤𑀸𑀢𑀩𑁆𑀩𑁄, 𑀲𑀗𑁆𑀖𑀫𑀚𑁆𑀛𑁂 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀲𑀸𑀯𑁂𑀢𑀩𑁆𑀩𑀁 𑁋

‘‘𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀫𑀼𑀔𑀭𑁄, 𑀪𑀺𑀓𑁆𑀔𑀽 𑀤𑀼𑀭𑀼𑀢𑁆𑀢𑀯𑀘𑀦𑁂𑀳𑀺 𑀖𑀝𑁆𑀝𑁂𑀦𑁆𑀢𑁄 𑀯𑀺𑀳𑀭𑀢𑀺. 𑀲𑁄 𑀪𑀺𑀓𑁆𑀔𑀼 𑀬𑀁 𑀇𑀘𑁆𑀙𑁂𑀬𑁆𑀬, 𑀢𑀁 𑀯𑀤𑁂𑀬𑁆𑀬. 𑀪𑀺𑀓𑁆𑀔𑀽𑀳𑀺 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀦𑁂𑀯 𑀯𑀢𑁆𑀢𑀩𑁆𑀩𑁄, 𑀦 𑀑𑀯𑀤𑀺𑀢𑀩𑁆𑀩𑁄, 𑀦 𑀅𑀦𑀼𑀲𑀸𑀲𑀺𑀢𑀩𑁆𑀩𑁄. 𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀸𑀫𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑀲𑁆𑀲 𑀤𑀸𑀦𑀁, 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀧𑀼𑀘𑁆𑀙𑀸𑀫𑀺, 𑀢𑀢𑀺𑀬𑀫𑁆𑀧𑀺 𑀧𑀼𑀘𑁆𑀙𑀸𑀫𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑀲𑁆𑀲 𑀤𑀸𑀦𑀁, 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’’𑀢𑀺.

𑀢𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀫𑁆𑀫𑀸 𑀯𑀢𑁆𑀢𑀺𑀢𑁆𑀯𑀸 𑀔𑀫𑀸𑀧𑁂𑀦𑁆𑀢𑀲𑁆𑀲 𑀩𑁆𑀭𑀳𑁆𑀫𑀤𑀡𑁆𑀟𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑁄. 𑀏𑀯𑀜𑁆𑀘 𑀧𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑁄, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀫𑀚𑁆𑀛𑁂 𑀲𑀸𑀯𑁂𑀢𑀩𑁆𑀩𑀁 𑁋

‘‘𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀲𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑀁 𑀅𑀤𑀸𑀲𑀺, 𑀲𑁄 𑀪𑀺𑀓𑁆𑀔𑀼 𑀲𑁄𑀭𑀢𑁄 𑀦𑀺𑀯𑀸𑀢𑀯𑀼𑀢𑁆𑀢𑀺 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀦𑁆𑀢𑁄 𑀳𑀺𑀭𑁄𑀢𑁆𑀢𑀧𑁆𑀧𑁂 𑀧𑀢𑀺𑀝𑁆𑀞𑀺𑀢𑁄, 𑀧𑀝𑀺𑀲𑀗𑁆𑀔𑀸 𑀆𑀬𑀢𑀺𑀁 𑀲𑀁𑀯𑀭𑁂 𑀢𑀺𑀝𑁆𑀞𑀢𑀺, 𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀸𑀫𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺.

𑀏𑀯𑀁 𑀬𑀸𑀯𑀢𑀢𑀺𑀬𑀁 𑀯𑀢𑁆𑀯𑀸 𑀅𑀧𑀮𑁄𑀓𑀦𑀓𑀫𑁆𑀫𑁂𑀦𑁂𑀯 𑀩𑁆𑀭𑀳𑁆𑀫𑀤𑀡𑁆𑀟𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑁄𑀢𑀺.

𑀓𑀫𑁆𑀫𑀮𑀓𑁆𑀔𑀡𑀜𑁆𑀜𑁂𑀯 𑀧𑀜𑁆𑀘𑀫𑀦𑁆𑀢𑀺 𑀬𑀁 𑀢𑀁 𑀪𑀕𑀯𑀢𑀸 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀓𑀤𑁆𑀤𑀫𑁄𑀤𑀓𑁂𑀦 𑀑𑀲𑀺𑀜𑁆𑀘𑀦𑁆𑀢𑀺, ‘𑀅𑀧𑁆𑀧𑁂𑀯 𑀦𑀸𑀫 𑀅𑀫𑁆𑀳𑁂𑀲𑀼 𑀲𑀸𑀭𑀚𑁆𑀚𑁂𑀬𑁆𑀬𑀼’𑀦𑁆𑀢𑀺, 𑀓𑀸𑀬𑀁 𑀯𑀺𑀯𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀤𑀲𑁆𑀲𑁂𑀦𑁆𑀢𑀺, 𑀊𑀭𑀼𑀁 𑀯𑀺𑀯𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀤𑀲𑁆𑀲𑁂𑀦𑁆𑀢𑀺, 𑀅𑀗𑁆𑀕𑀚𑀸𑀢𑀁 𑀯𑀺𑀯𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀤𑀲𑁆𑀲𑁂𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀬𑁄 𑀑𑀪𑀸𑀲𑁂𑀦𑁆𑀢𑀺, 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀚𑁂𑀦𑁆𑀢𑀺, ‘𑀅𑀧𑁆𑀧𑁂𑀯 𑀦𑀸𑀫 𑀅𑀫𑁆𑀳𑁂𑀲𑀼 𑀲𑀸𑀭𑀚𑁆𑀚𑁂𑀬𑁆𑀬𑀼’𑀦𑁆𑀢𑀺. 𑀇𑀫𑁂𑀲𑀼 𑀯𑀢𑁆𑀣𑀽𑀲𑀼 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑀼𑀓𑁆𑀓𑀝𑀁 𑀧𑀜𑁆𑀜𑀧𑁂𑀢𑁆𑀯𑀸 ‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀡𑁆𑀟𑀓𑀫𑁆𑀫𑀁 𑀓𑀸𑀢𑀼’𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀤𑀳𑁄𑀲𑀺 𑁋 ‘𑀓𑀺𑀁 𑀦𑀼 𑀔𑁄 𑀤𑀡𑁆𑀟𑀓𑀫𑁆𑀫𑀁 𑀓𑀸𑀢𑀩𑁆𑀩’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 ‘𑀅𑀯𑀦𑁆𑀤𑀺𑀬𑁄 𑀲𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀓𑀸𑀢𑀩𑁆𑀩𑁄’’’𑀢𑀺 𑀏𑀯𑀁 𑀅𑀯𑀦𑁆𑀤𑀺𑀬𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀓𑀫𑁆𑀫𑀮𑀓𑁆𑀔𑀡𑀜𑁆𑀜𑁂𑀯 𑀧𑀜𑁆𑀘𑀫𑀁 𑀇𑀫𑀲𑁆𑀲 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀞𑀸𑀦𑀁 𑀳𑁄𑀢𑀺. 𑀢𑀲𑁆𑀲 𑀳𑀺 𑀓𑀫𑁆𑀫𑀜𑁆𑀜𑁂𑀯 𑀮𑀓𑁆𑀔𑀡𑀁, 𑀦 𑀑𑀲𑀸𑀭𑀡𑀸𑀤𑀻𑀦𑀺; 𑀢𑀲𑁆𑀫𑀸 ‘‘𑀓𑀫𑁆𑀫𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀓𑀭𑀡𑀁 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁. 𑀅𑀧𑀺𑀘 𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀲𑀤𑁆𑀥𑀺𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀇𑀥𑀸𑀧𑀺 𑀯𑀤𑀸𑀫, 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀸𑀯𑁂𑀢𑀩𑁆𑀩𑀁 𑁋

‘‘𑀅𑀬𑁆𑀬𑁂 𑀅𑀲𑀼𑀓𑁄 𑀦𑀸𑀫 𑀅𑀬𑁆𑀬𑁄 𑀪𑀺𑀓𑁆𑀔𑀼𑀦𑀻𑀦𑀁 𑀅𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑁂𑀢𑀺, 𑀏𑀢𑀲𑁆𑀲 𑀅𑀬𑁆𑀬𑀲𑁆𑀲 𑀅𑀯𑀦𑁆𑀤𑀺𑀬𑀓𑀭𑀡𑀁 𑀭𑀼𑀘𑁆𑀘𑀢𑀻𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀧𑀼𑀘𑁆𑀙𑀸𑀫𑀺, 𑀤𑀼𑀢𑀺𑀬𑀫𑁆𑀧𑀺… 𑀢𑀢𑀺𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀧𑀼𑀘𑁆𑀙𑀸𑀫𑀻’’𑀢𑀺.

𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑁆𑀯𑀸 𑀅𑀧𑀮𑁄𑀓𑀦𑀓𑀫𑁆𑀫𑁂𑀦 𑀅𑀯𑀦𑁆𑀤𑀺𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀁.

𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀻𑀳𑀺 𑀦 𑀯𑀦𑁆𑀤𑀺𑀢𑀩𑁆𑀩𑁄. 𑀲𑀘𑁂 𑀅𑀯𑀦𑁆𑀤𑀺𑀬𑀫𑀸𑀦𑁄 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀔𑀫𑀸𑀧𑁂𑀢𑀩𑁆𑀩𑀸. 𑀔𑀫𑀸𑀧𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀅𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑁂𑀬𑁂𑀯 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀪𑀦𑁆𑀢𑁂 𑀧𑀝𑀺𑀲𑀗𑁆𑀔𑀸 𑀆𑀬𑀢𑀺𑀁 𑀲𑀁𑀯𑀭𑁂 𑀢𑀺𑀝𑁆𑀞𑀸𑀫𑀺, 𑀦 𑀧𑀼𑀦 𑀅𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑁂𑀲𑁆𑀲𑀸𑀫𑀺, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀫𑀬𑁆𑀳𑀁 𑀔𑀫𑀢𑀽’’𑀢𑀺 𑀔𑀫𑀸𑀧𑁂𑀢𑀩𑁆𑀩𑀁. 𑀢𑁂𑀦 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑁆𑀯𑀸 𑀏𑀓𑀪𑀺𑀓𑁆𑀔𑀼𑀦𑀸 𑀯𑀸 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀆𑀬𑀢𑀺𑀁 𑀲𑀁𑀯𑀭𑁂 𑀞𑀺𑀢𑁄, 𑀇𑀫𑀺𑀦𑀸 𑀅𑀘𑁆𑀘𑀬𑀁 𑀤𑁂𑀲𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀔𑀫𑀸𑀧𑀺𑀢𑁄, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀇𑀫𑀁 𑀯𑀦𑁆𑀤𑀺𑀬𑀁 𑀓𑀭𑁄𑀢𑀽’’𑀢𑀺. 𑀲𑁄 𑀯𑀦𑁆𑀤𑀺𑀬𑁄 𑀓𑀸𑀢𑀩𑁆𑀩𑁄. 𑀏𑀯𑀜𑁆𑀘 𑀧𑀦 𑀓𑀸𑀢𑀩𑁆𑀩𑁄, 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀸𑀯𑁂𑀢𑀩𑁆𑀩𑀁 𑁋

‘‘𑀅𑀬𑀁 𑀅𑀬𑁆𑀬𑁂 𑀅𑀲𑀼𑀓𑁄 𑀦𑀸𑀫 𑀅𑀬𑁆𑀬𑁄 𑀪𑀺𑀓𑁆𑀔𑀼𑀦𑀻𑀦𑀁 𑀅𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑁂𑀢𑀻𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀅𑀯𑀦𑁆𑀤𑀺𑀬𑁄 𑀓𑀢𑁄, 𑀲𑁄 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀧𑀝𑀺𑀲𑀗𑁆𑀔𑀸 𑀆𑀬𑀢𑀺𑀁 𑀲𑀁𑀯𑀭𑁂 𑀞𑀺𑀢𑁄 𑀅𑀘𑁆𑀘𑀬𑀁 𑀤𑁂𑀲𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀔𑀫𑀸𑀧𑁂𑀲𑀺, 𑀢𑀲𑁆𑀲 𑀅𑀬𑁆𑀬𑀲𑁆𑀲 𑀯𑀦𑁆𑀤𑀺𑀬𑀓𑀭𑀡𑀁 𑀭𑀼𑀘𑁆𑀘𑀢𑀻𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀧𑀼𑀘𑁆𑀙𑀸𑀫𑀻’’𑀢𑀺 𑁋

𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁 𑀏𑀯𑀁 𑀅𑀧𑀮𑁄𑀓𑀦𑀓𑀫𑁆𑀫𑁂𑀦𑁂𑀯 𑀯𑀦𑁆𑀤𑀺𑀬𑁄 𑀓𑀸𑀢𑀩𑁆𑀩𑁄.

𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀓𑁄𑀧𑀺 𑀓𑀫𑁆𑀫𑀮𑀓𑁆𑀔𑀡𑀯𑀺𑀦𑀺𑀘𑁆𑀙𑀬𑁄. 𑀇𑀤𑀜𑁆𑀳𑀺 𑀓𑀫𑁆𑀫𑀮𑀓𑁆𑀔𑀡𑀁 𑀦𑀸𑀫 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀫𑀽𑀮𑀓𑀁 𑀧𑀜𑁆𑀜𑀢𑁆𑀢𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸𑀧𑀺 𑀧𑀦𑁂𑀢𑀁 𑀮𑀩𑁆𑀪𑀢𑀺𑀬𑁂𑀯. 𑀬𑀜𑁆𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀮𑀸𑀓𑀕𑁆𑀕𑀬𑀸𑀕𑀕𑁆𑀕𑀪𑀢𑁆𑀢𑀕𑁆𑀕𑀉𑀧𑁄𑀲𑀣𑀕𑁆𑀕𑁂𑀲𑀼 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀭𑁄𑀢𑀺, 𑀏𑀢𑀫𑁆𑀧𑀺 𑀓𑀫𑁆𑀫𑀮𑀓𑁆𑀔𑀡𑀫𑁂𑀯. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀚𑀺𑀡𑁆𑀡𑀘𑀻𑀯𑀭𑀦𑀝𑁆𑀞𑀘𑀻𑀯𑀭𑀸𑀦𑀜𑁆𑀳𑀺 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀬𑀸𑀯𑀢𑀢𑀺𑀬𑀁 𑀲𑀸𑀯𑁂𑀢𑁆𑀯𑀸 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁂𑀦 𑀧𑀦 𑀘𑀻𑀯𑀭𑀁 𑀓𑀭𑁄𑀦𑁆𑀢𑀲𑁆𑀲 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀦𑀺 𑀲𑀽𑀘𑀺𑀆𑀤𑀻𑀦𑀺 𑀅𑀦𑀧𑀮𑁄𑀓𑁂𑀢𑁆𑀯𑀸𑀧𑀺 𑀤𑀸𑀢𑀩𑁆𑀩𑀸𑀦𑀺. 𑀢𑁂𑀲𑀁 𑀤𑀸𑀦𑁂 𑀲𑁄𑀬𑁂𑀯 𑀇𑀲𑁆𑀲𑀭𑁄, 𑀢𑀢𑁄 𑀅𑀢𑀺𑀭𑁂𑀓𑀁 𑀤𑁂𑀦𑁆𑀢𑁂𑀦 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀢𑀢𑁄 𑀳𑀺 𑀅𑀢𑀺𑀭𑁂𑀓𑀤𑀸𑀦𑁂 𑀲𑀗𑁆𑀖𑁄 𑀲𑀸𑀫𑀻. 𑀕𑀺𑀮𑀸𑀦𑀪𑁂𑀲𑀚𑁆𑀚𑀫𑁆𑀧𑀺 𑀢𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀬𑀫𑁂𑀯 𑀤𑀸𑀢𑀩𑁆𑀩𑀁. 𑀅𑀢𑀺𑀭𑁂𑀓𑀁 𑀇𑀘𑁆𑀙𑀦𑁆𑀢𑀲𑁆𑀲 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀬𑁄𑀧𑀺 𑀘 𑀤𑀼𑀩𑁆𑀩𑀮𑁄 𑀯𑀸 𑀙𑀺𑀦𑁆𑀦𑀺𑀭𑀺𑀬𑀸𑀧𑀣𑁄 𑀯𑀸 𑀧𑀘𑁆𑀙𑀺𑀦𑁆𑀦𑀪𑀺𑀓𑁆𑀔𑀸𑀘𑀸𑀭𑀧𑀣𑁄 𑀯𑀸 𑀫𑀳𑀸𑀕𑀺𑀮𑀸𑀦𑁄, 𑀢𑀲𑁆𑀲 𑀫𑀳𑀸𑀯𑀸𑀲𑁂𑀲𑀼 𑀢𑀢𑁆𑀭𑀼𑀧𑁆𑀧𑀸𑀤𑀢𑁄 𑀤𑁂𑀯𑀲𑀺𑀓𑀁 𑀦𑀸𑀴𑀺 𑀯𑀸 𑀉𑀧𑀟𑁆𑀠𑀦𑀸𑀴𑀺 𑀯𑀸 𑀏𑀓𑀤𑀺𑀯𑀲𑀁𑀬𑁂𑀯 𑀯𑀸 𑀧𑀜𑁆𑀘 𑀯𑀸 𑀤𑀲 𑀯𑀸 𑀢𑀡𑁆𑀟𑀼𑀮𑀦𑀸𑀴𑀺𑀬𑁄 𑀤𑁂𑀦𑁆𑀢𑁂𑀦 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸𑀯 𑀤𑀸𑀢𑀩𑁆𑀩𑀸. 𑀧𑁂𑀲𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀢𑁆𑀭𑀼𑀧𑁆𑀧𑀸𑀤𑀢𑁄 𑀇𑀡𑀧𑀮𑀺𑀩𑁄𑀥𑀫𑁆𑀧𑀺 𑀩𑀳𑀼𑀲𑁆𑀲𑀼𑀢𑀲𑁆𑀲 𑀲𑀗𑁆𑀖𑀪𑀸𑀭𑀦𑀺𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀝𑁆𑀞𑀸𑀧𑀦𑀻𑀬𑀲𑁂𑀦𑀸𑀲𑀦𑀫𑁆𑀧𑀺 𑀲𑀗𑁆𑀖𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸𑀦𑀁 𑀓𑀧𑁆𑀧𑀺𑀬𑀓𑀸𑀭𑀓𑀸𑀤𑀻𑀦𑀁 𑀪𑀢𑁆𑀢𑀯𑁂𑀢𑀦𑀫𑁆𑀧𑀺 𑀅𑀧𑀮𑁄𑀓𑀦𑀓𑀫𑁆𑀫𑁂𑀦 𑀤𑀸𑀢𑀼𑀁 𑀯𑀝𑁆𑀝𑀢𑀺.

𑀘𑀢𑀼𑀧𑀘𑁆𑀘𑀬𑀯𑀲𑁂𑀦 𑀤𑀺𑀦𑁆𑀦𑀢𑀢𑁆𑀭𑀼𑀧𑁆𑀧𑀸𑀤𑀢𑁄 𑀲𑀗𑁆𑀖𑀺𑀓𑀁 𑀆𑀯𑀸𑀲𑀁 𑀚𑀕𑁆𑀕𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀅𑀬𑀁 𑀪𑀺𑀓𑁆𑀔𑀼 𑀇𑀲𑁆𑀲𑀭𑀯𑀢𑀸𑀬 𑀯𑀺𑀘𑀸𑀭𑁂𑀢𑀻’’𑀢𑀺 𑀓𑀣𑀸𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀁 𑀧𑀦 𑀲𑀮𑀸𑀓𑀕𑁆𑀕𑀸𑀤𑀻𑀲𑀼 𑀯𑀸 𑀅𑀦𑁆𑀢𑀭𑀲𑀦𑁆𑀦𑀺𑀧𑀸𑀢𑁂 𑀯𑀸 𑀲𑀗𑁆𑀖𑀁 𑀧𑀼𑀘𑁆𑀙𑀺𑀢𑁆𑀯𑀸𑀯 𑀚𑀕𑁆𑀕𑀸𑀧𑁂𑀢𑀩𑁆𑀩𑁄. 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀑𑀤𑀺𑀲𑁆𑀲𑀤𑀺𑀦𑁆𑀦𑀢𑀢𑁆𑀭𑀼𑀧𑁆𑀧𑀸𑀤𑀢𑁄𑀧𑀺 𑀅𑀧𑀮𑁄𑀓𑁂𑀢𑁆𑀯𑀸 𑀆𑀯𑀸𑀲𑁄 𑀚𑀕𑁆𑀕𑀸𑀧𑁂𑀢𑀩𑁆𑀩𑁄. 𑀅𑀦𑀧𑀮𑁄𑀓𑁂𑀢𑁆𑀯𑀸𑀧𑀺 𑀯𑀝𑁆𑀝𑀢𑀺. ‘‘𑀲𑀽𑀭𑁄 𑀯𑀢𑀸𑀬𑀁 𑀪𑀺𑀓𑁆𑀔𑀼 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀤𑀺𑀦𑁆𑀦𑀢𑁄 𑀆𑀯𑀸𑀲𑀁 𑀚𑀕𑁆𑀕𑀸𑀧𑁂𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀓𑀣𑀸𑀧𑀘𑁆𑀙𑁂𑀤𑀦𑀢𑁆𑀣𑀁 𑀧𑀦 𑀅𑀧𑀮𑁄𑀓𑀦𑀓𑀫𑁆𑀫𑀫𑁂𑀯 𑀓𑀢𑁆𑀯𑀸 𑀚𑀕𑁆𑀕𑀸𑀧𑁂𑀢𑀩𑁆𑀩𑁄.

𑀘𑁂𑀢𑀺𑀬𑁂 𑀙𑀢𑁆𑀢𑀁 𑀯𑀸 𑀯𑁂𑀤𑀺𑀓𑀁 𑀯𑀸 𑀩𑁄𑀥𑀺𑀖𑀭𑀁 𑀯𑀸 𑀆𑀲𑀦𑀖𑀭𑀁 𑀯𑀸 𑀅𑀓𑀢𑀁 𑀯𑀸 𑀓𑀭𑁄𑀦𑁆𑀢𑁂𑀦 𑀚𑀺𑀡𑁆𑀡𑀁 𑀯𑀸 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑁂𑀦 𑀲𑀼𑀥𑀸𑀓𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑁂𑀦 𑀫𑀦𑀼𑀲𑁆𑀲𑁂 𑀲𑀫𑀸𑀤𑀧𑁂𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀓𑀸𑀭𑀓𑁄 𑀦𑀢𑁆𑀣𑀺, 𑀘𑁂𑀢𑀺𑀬𑀲𑁆𑀲 𑀉𑀧𑀦𑀺𑀓𑁆𑀔𑁂𑀧𑀢𑁄 𑀓𑀸𑀭𑁂𑀢𑀩𑁆𑀩𑀁. 𑀉𑀧𑀦𑀺𑀓𑁆𑀔𑁂𑀧𑁂𑀧𑀺 𑀅𑀲𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁆𑀭𑀼𑀧𑁆𑀧𑀸𑀤𑀢𑁄 𑀓𑀸𑀭𑁂𑀢𑀩𑁆𑀩𑀁, 𑀲𑀗𑁆𑀖𑀺𑀓𑁂𑀦𑀧𑀺. 𑀲𑀗𑁆𑀖𑀺𑀓𑁂𑀦 𑀳𑀺 𑀅𑀧𑀮𑁄𑀓𑁂𑀢𑁆𑀯𑀸 𑀘𑁂𑀢𑀺𑀬𑀓𑀺𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀘𑁂𑀢𑀺𑀬𑀲𑁆𑀲 𑀲𑀦𑁆𑀢𑀓𑁂𑀦 𑀅𑀧𑀮𑁄𑀓𑁂𑀢𑁆𑀯𑀸𑀧𑀺 𑀲𑀗𑁆𑀖𑀺𑀓𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀸𑀯𑀓𑀸𑀮𑀺𑀓𑀁 𑀧𑀦 𑀕𑀳𑁂𑀢𑁆𑀯𑀸 𑀧𑀸𑀓𑀢𑀺𑀓𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀘𑁂𑀢𑀺𑀬𑁂 𑀲𑀼𑀥𑀸𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑁂𑀳𑀺 𑀧𑀦 𑀪𑀺𑀓𑁆𑀔𑀸𑀘𑀸𑀭𑀢𑁄 𑀯𑀸 𑀲𑀗𑁆𑀖𑀢𑁄 𑀯𑀸 𑀬𑀸𑀧𑀦𑀫𑀢𑁆𑀢𑀁 𑀅𑀮𑀪𑀦𑁆𑀢𑁂𑀳𑀺 𑀘𑁂𑀢𑀺𑀬𑀲𑀦𑁆𑀢𑀓𑀢𑁄 𑀬𑀸𑀧𑀦𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀳𑀺 𑀯𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, ‘‘𑀯𑀢𑁆𑀢𑀁 𑀓𑀭𑁄𑀫𑀸’’𑀢𑀺 𑀫𑀘𑁆𑀙𑀫𑀁𑀲𑀸𑀤𑀻𑀳𑀺 𑀲𑀗𑁆𑀖𑀪𑀢𑁆𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑁂 𑀯𑀺𑀳𑀸𑀭𑁂 𑀭𑁄𑀧𑀺𑀢𑀸 𑀨𑀮𑀭𑀼𑀓𑁆𑀔𑀸 𑀲𑀗𑁆𑀖𑁂𑀦 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀚𑀕𑁆𑀕𑀦𑀓𑀫𑁆𑀫𑀁 𑀮𑀪𑀦𑁆𑀢𑀺, 𑀬𑁂𑀲𑀁 𑀨𑀮𑀸𑀦𑀺 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀢𑁂𑀲𑀼 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁. 𑀬𑁂 𑀧𑀦 𑀅𑀧𑀭𑀺𑀕𑁆𑀕𑀳𑀺𑀢𑀸, 𑀢𑁂𑀲𑀼 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀢𑀁 𑀧𑀦 𑀲𑀮𑀸𑀓𑀕𑁆𑀕𑀬𑀸𑀕𑀕𑁆𑀕𑀪𑀢𑁆𑀢𑀕𑁆𑀕𑀅𑀦𑁆𑀢𑀭𑀲𑀦𑁆𑀦𑀺𑀧𑀸𑀢𑁂𑀲𑀼𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀉𑀧𑁄𑀲𑀣𑀕𑁆𑀕𑁂 𑀧𑀦 𑀯𑀝𑁆𑀝𑀢𑀺𑀬𑁂𑀯. 𑀢𑀢𑁆𑀣 𑀳𑀺 𑀅𑀦𑀸𑀕𑀢𑀸𑀦𑀫𑁆𑀧𑀺 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀆𑀳𑀭𑀺𑀬𑀢𑀺, 𑀢𑀲𑁆𑀫𑀸 𑀢𑀁 𑀲𑀼𑀯𑀺𑀲𑁄𑀥𑀺𑀢𑀁 𑀳𑁄𑀢𑀺.

𑀏𑀯𑀜𑁆𑀘 𑀧𑀦 𑀓𑀸𑀢𑀩𑁆𑀩𑀁, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀲𑀸𑀯𑁂𑀢𑀩𑁆𑀩𑀁 𑁋

‘‘𑀪𑀦𑁆𑀢𑁂, 𑀬𑀁 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀦𑁆𑀢𑁄𑀲𑀻𑀫𑀸𑀬 𑀲𑀗𑁆𑀖𑀲𑀦𑁆𑀢𑀓𑀁 𑀫𑀽𑀮𑀢𑀘𑀧𑀢𑁆𑀢𑀅𑀗𑁆𑀓𑀼𑀭𑀧𑀼𑀧𑁆𑀨𑀨𑀮𑀔𑀸𑀤𑀦𑀻𑀬𑀸𑀤𑀺 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀆𑀕𑀢𑀸𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀭𑀼𑀘𑁆𑀘𑀢𑀻𑀢𑀺 𑀲𑀗𑁆𑀖𑀁 𑀧𑀼𑀘𑁆𑀙𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀼𑀘𑁆𑀙𑀺𑀢𑀩𑁆𑀩𑀁.

𑀘𑀢𑀽𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀽𑀳𑀺 𑀓𑀢𑀁 𑀲𑀼𑀓𑀢𑀫𑁂𑀯. 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀤𑁆𑀯𑁂 𑀢𑀬𑁄 𑀚𑀦𑀸 𑀯𑀲𑀦𑁆𑀢𑀺, 𑀢𑁂𑀳𑀺 𑀦𑀺𑀲𑀻𑀤𑀺𑀢𑁆𑀯𑀸 𑀓𑀢𑀫𑁆𑀧𑀺 𑀲𑀗𑁆𑀖𑁂𑀦 𑀓𑀢𑀲𑀤𑀺𑀲𑀫𑁂𑀯. 𑀬𑀲𑁆𑀫𑀺𑀁 𑀧𑀦 𑀯𑀺𑀳𑀸𑀭𑁂 𑀏𑀓𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑁄𑀲𑀣𑀤𑀺𑀯𑀲𑁂 𑀧𑀼𑀩𑁆𑀩𑀓𑀭𑀡𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀓𑀢𑀫𑁆𑀧𑀺 𑀓𑀢𑀺𑀓𑀯𑀢𑁆𑀢𑀁 𑀲𑀗𑁆𑀖𑁂𑀦 𑀓𑀢𑀲𑀤𑀺𑀲𑀫𑁂𑀯 𑀳𑁄𑀢𑀺.

𑀓𑀭𑁄𑀦𑁆𑀢𑁂𑀦 𑀧𑀦 𑀨𑀮𑀯𑀸𑀭𑁂𑀦 𑀓𑀸𑀢𑀼𑀫𑁆𑀧𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀙 𑀫𑀸𑀲𑁂 𑀏𑀓𑀲𑀁𑀯𑀘𑁆𑀙𑀭𑀦𑁆𑀢𑀺 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀧𑀺 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀺𑀘𑁆𑀙𑀺𑀦𑁆𑀦𑁂 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀦 𑀓𑀸𑀢𑀩𑁆𑀩𑀁. 𑀅𑀧𑀭𑀺𑀘𑁆𑀙𑀺𑀦𑁆𑀦𑁂 𑀬𑀸𑀯 𑀭𑀼𑀓𑁆𑀔𑀸 𑀥𑀭𑀦𑁆𑀢𑀺 𑀢𑀸𑀯 𑀯𑀝𑁆𑀝𑀢𑀺𑀬𑁂𑀯. 𑀬𑁂𑀧𑀺 𑀢𑁂𑀲𑀁 𑀭𑀼𑀓𑁆𑀔𑀸𑀦𑀁 𑀩𑀻𑀚𑁂𑀳𑀺 𑀅𑀜𑁆𑀜𑁂 𑀭𑀼𑀓𑁆𑀔𑀸 𑀭𑁄𑀧𑀺𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀲𑀸 𑀏𑀯 𑀓𑀢𑀺𑀓𑀸.

𑀲𑀘𑁂 𑀧𑀦 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀭𑁄𑀧𑀺𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀬𑀢𑁆𑀣 𑀭𑁄𑀧𑀺𑀢𑀸, 𑀢𑀲𑁆𑀫𑀺𑀁𑀬𑁂𑀯 𑀯𑀺𑀳𑀸𑀭𑁂 𑀲𑀗𑁆𑀖𑁄 𑀲𑀸𑀫𑀻. 𑀬𑁂𑀧𑀺 𑀅𑀜𑁆𑀜𑀢𑁄 𑀩𑀻𑀚𑀸𑀦𑀺 𑀆𑀳𑀭𑀺𑀢𑁆𑀯𑀸 𑀧𑀼𑀭𑀺𑀫𑀯𑀺𑀳𑀸𑀭𑁂 𑀧𑀘𑁆𑀙𑀸 𑀭𑁄𑀧𑀺𑀢𑀸, 𑀢𑁂𑀲𑀼 𑀅𑀜𑁆𑀜𑀸 𑀓𑀢𑀺𑀓𑀸 𑀓𑀸𑀢𑀩𑁆𑀩𑀸. 𑀓𑀢𑀺𑀓𑀸𑀬 𑀓𑀢𑀸𑀬 𑀧𑀼𑀕𑁆𑀕𑀮𑀺𑀓𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺, 𑀬𑀣𑀸𑀲𑀼𑀔𑀁 𑀨𑀮𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑁂𑀢𑁆𑀣 𑀢𑀁 𑀢𑀁 𑀑𑀓𑀸𑀲𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀯𑁂𑀡𑀸𑀦𑀺 𑀓𑀢𑁆𑀯𑀸 𑀚𑀕𑁆𑀕𑀦𑁆𑀢𑀺, 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀼𑀕𑁆𑀕𑀮𑀺𑀓𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺. 𑀅𑀜𑁆𑀜𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀮𑀪𑀦𑁆𑀢𑀺, 𑀢𑁂𑀳𑀺 𑀧𑀦 𑀲𑀗𑁆𑀖𑀲𑁆𑀲 𑀤𑀲𑀪𑀸𑀕𑀁 𑀤𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺. 𑀬𑁄𑀧𑀺 𑀫𑀚𑁆𑀛𑁂𑀯𑀺𑀳𑀸𑀭𑁂 𑀭𑀼𑀓𑁆𑀔𑀁 𑀲𑀸𑀔𑀸𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀓𑁆𑀔𑀢𑀺, 𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄.

𑀧𑁄𑀭𑀸𑀡𑀯𑀺𑀳𑀸𑀭𑀁 𑀕𑀢𑀲𑁆𑀲 𑀲𑀫𑁆𑀪𑀸𑀯𑀦𑀻𑀬𑀪𑀺𑀓𑁆𑀔𑀼𑀦𑁄 ‘‘𑀣𑁂𑀭𑁄 𑀆𑀕𑀢𑁄’’𑀢𑀺 𑀨𑀮𑀸𑀨𑀮𑀁 𑀆𑀳𑀭𑀦𑁆𑀢𑀺, 𑀲𑀘𑁂 𑀢𑀢𑁆𑀣 𑀫𑀽𑀮𑁂 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀥𑀭𑁄 𑀩𑀳𑀼𑀲𑁆𑀲𑀼𑀢𑀪𑀺𑀓𑁆𑀔𑀼 𑀯𑀺𑀳𑀸𑀲𑀺, ‘‘𑀅𑀤𑁆𑀥𑀸 𑀏𑀢𑁆𑀣 𑀤𑀻𑀖𑀸 𑀓𑀢𑀺𑀓𑀸 𑀓𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀓𑀼𑀓𑁆𑀓𑀼𑀘𑁆𑀘𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀯𑀺𑀳𑀸𑀭𑁂 𑀨𑀮𑀸𑀨𑀮𑀁 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺, 𑀥𑀼𑀢𑀗𑁆𑀕𑀁 𑀦 𑀓𑁄𑀧𑁂𑀢𑀺. 𑀲𑀸𑀫𑀡𑁂𑀭𑀸 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀩𑀳𑀽𑀦𑀺 𑀨𑀮𑀸𑀦𑀺 𑀤𑁂𑀦𑁆𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀅𑀮𑀪𑀦𑁆𑀢𑀸 𑀔𑀺𑀬𑁆𑀬𑀦𑁆𑀢𑀺, 𑀔𑀺𑀬𑁆𑀬𑀦𑀫𑀢𑁆𑀢𑀫𑁂𑀯 𑀘𑁂𑀢𑀁 𑀳𑁄𑀢𑀺.

𑀲𑀘𑁂 𑀧𑀦 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺, 𑀏𑀓𑀁 𑀧𑀦𑀲𑀭𑀼𑀓𑁆𑀔𑀁 𑀦𑀺𑀲𑁆𑀲𑀸𑀬 𑀲𑀝𑁆𑀞𑀺𑀧𑀺 𑀚𑀦𑀸 𑀚𑀻𑀯𑀦𑁆𑀢𑀺, 𑀢𑀸𑀤𑀺𑀲𑁂 𑀓𑀸𑀮𑁂 𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑀓𑀭𑀡𑀢𑁆𑀣𑀸𑀬 𑀪𑀸𑀚𑁂𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀁, 𑀅𑀬𑀁 𑀲𑀸𑀫𑀻𑀘𑀺. 𑀬𑀸𑀯 𑀧𑀦 𑀓𑀢𑀺𑀓𑀯𑀢𑁆𑀢𑀁 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀢𑀸𑀯 𑀢𑁂𑀳𑀺 𑀔𑀸𑀬𑀺𑀢𑀁 𑀲𑀼𑀔𑀸𑀬𑀺𑀢𑀫𑁂𑀯. 𑀓𑀤𑀸 𑀧𑀦 𑀓𑀢𑀺𑀓𑀯𑀢𑁆𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺? 𑀬𑀤𑀸 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑁆𑀢𑀽’’𑀢𑀺 𑀲𑀸𑀯𑁂𑀢𑀺. 𑀏𑀓𑀪𑀺𑀓𑁆𑀔𑀼𑀓𑁂 𑀧𑀦 𑀯𑀺𑀳𑀸𑀭𑁂 𑀏𑀓𑁂𑀦 𑀲𑀸𑀯𑀺𑀢𑁂𑀧𑀺 𑀧𑀼𑀭𑀺𑀫𑀓𑀢𑀺𑀓𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺𑀬𑁂𑀯. 𑀲𑀘𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀬 𑀓𑀢𑀺𑀓𑀸𑀬 𑀲𑀸𑀫𑀡𑁂𑀭𑀸 𑀦𑁂𑀯 𑀭𑀼𑀓𑁆𑀔𑀢𑁄 𑀧𑀸𑀢𑁂𑀦𑁆𑀢𑀺, 𑀦 𑀪𑀽𑀫𑀺𑀢𑁄 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀤𑁂𑀦𑁆𑀢𑀺, 𑀧𑀢𑀺𑀢𑀨𑀮𑀸𑀦𑀺 𑀧𑀸𑀤𑁂𑀳𑀺 𑀧𑀳𑀭𑀦𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀢𑁂𑀲𑀁 𑀤𑀲𑀪𑀸𑀕𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀧𑀟𑁆𑀠𑀨𑀮𑀪𑀸𑀕𑁂𑀦 𑀨𑀸𑀢𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀅𑀤𑁆𑀥𑀸 𑀨𑀸𑀢𑀺𑀓𑀫𑁆𑀫𑀮𑁄𑀪𑁂𑀦 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑀦𑁆𑀢𑀺. 𑀧𑀼𑀦 𑀲𑀼𑀪𑀺𑀓𑁆𑀔𑁂 𑀚𑀸𑀢𑁂 𑀓𑀧𑁆𑀧𑀺𑀬𑀓𑀸𑀭𑀓𑁂𑀲𑀼 𑀆𑀕𑀦𑁆𑀢𑁆𑀯𑀸 𑀲𑀸𑀔𑀸𑀧𑀭𑀺𑀯𑀸𑀭𑀸𑀤𑀻𑀦𑀺 𑀓𑀢𑁆𑀯𑀸 𑀭𑀼𑀓𑁆𑀔𑁂 𑀭𑀓𑁆𑀔𑀦𑁆𑀢𑁂𑀲𑀼 𑀲𑀸𑀫𑀡𑁂𑀭𑀸𑀦𑀁 𑀨𑀸𑀢𑀺𑀓𑀫𑁆𑀫𑀁 𑀦 𑀤𑀸𑀢𑀩𑁆𑀩𑀁, 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

‘‘𑀯𑀺𑀳𑀸𑀭𑁂 𑀨𑀮𑀸𑀨𑀮𑀁 𑀅𑀢𑁆𑀣𑀻’’𑀢𑀺 𑀲𑀸𑀫𑀦𑁆𑀢𑀕𑀸𑀫𑁂𑀳𑀺 𑀫𑀦𑀼𑀲𑁆𑀲𑀸 𑀕𑀺𑀮𑀸𑀦𑀸𑀦𑀁 𑀯𑀸 𑀕𑀩𑁆𑀪𑀺𑀦𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀆𑀕𑀦𑁆𑀢𑁆𑀯𑀸 ‘‘𑀏𑀓𑀁 𑀦𑀸𑀴𑀺𑀓𑁂𑀭𑀁 𑀤𑁂𑀣, 𑀅𑀫𑁆𑀩𑀁 𑀤𑁂𑀣, 𑀮𑀩𑀼𑀚𑀁 𑀤𑁂𑀣𑀸’’𑀢𑀺 𑀬𑀸𑀘𑀦𑁆𑀢𑀺, 𑀤𑀸𑀢𑀩𑁆𑀩𑀁 𑀦 𑀤𑀸𑀢𑀩𑁆𑀩𑀦𑁆𑀢𑀺? 𑀤𑀸𑀢𑀩𑁆𑀩𑀁. 𑀅𑀤𑀻𑀬𑀫𑀸𑀦𑁂 𑀳𑀺 𑀢𑁂 𑀤𑁄𑀫𑀦𑀲𑁆𑀲𑀺𑀓𑀸 𑀳𑁄𑀦𑁆𑀢𑀺, 𑀤𑁂𑀦𑁆𑀢𑁂𑀦 𑀧𑀦 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀬𑀸𑀯𑀢𑀢𑀺𑀬𑀁 𑀲𑀸𑀯𑁂𑀢𑁆𑀯𑀸 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸𑀯 𑀤𑀸𑀢𑀩𑁆𑀩𑀁, 𑀓𑀢𑀺𑀓𑀯𑀢𑁆𑀢𑀁 𑀯𑀸 𑀓𑀢𑁆𑀯𑀸 𑀞𑀧𑁂𑀢𑀩𑁆𑀩𑀁, 𑀏𑀯𑀜𑁆𑀘 𑀧𑀦 𑀓𑀸𑀢𑀩𑁆𑀩𑀁, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀲𑀸𑀯𑁂𑀢𑀩𑁆𑀩𑀁 𑁋

‘‘𑀲𑀸𑀫𑀦𑁆𑀢𑀕𑀸𑀫𑁂𑀳𑀺 𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀕𑀺𑀮𑀸𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀨𑀮𑀸𑀨𑀮𑀁 𑀬𑀸𑀘𑀦𑁆𑀢𑀺, 𑀤𑁆𑀯𑁂 𑀦𑀸𑀴𑀺𑀓𑁂𑀭𑀸𑀦𑀺, 𑀤𑁆𑀯𑁂 𑀢𑀸𑀮𑀨𑀮𑀸𑀦𑀺, 𑀤𑁆𑀯𑁂 𑀧𑀦𑀲𑀸𑀦𑀺, 𑀧𑀜𑁆𑀘 𑀅𑀫𑁆𑀩𑀸𑀦𑀺, 𑀧𑀜𑁆𑀘 𑀓𑀤𑀮𑀺𑀨𑀮𑀸𑀦𑀺 𑀕𑀡𑁆𑀳𑀦𑁆𑀢𑀸𑀦𑀁 𑀅𑀦𑀺𑀯𑀸𑀭𑀡𑀁, 𑀅𑀲𑀼𑀓𑀭𑀼𑀓𑁆𑀔𑀢𑁄 𑀘 𑀅𑀲𑀼𑀓𑀭𑀼𑀓𑁆𑀔𑀢𑁄 𑀘 𑀨𑀮𑀁 𑀕𑀡𑁆𑀳𑀦𑁆𑀢𑀸𑀦𑀁 𑀅𑀦𑀺𑀯𑀸𑀭𑀡𑀁 𑀭𑀼𑀘𑁆𑀘𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁.

𑀢𑀢𑁄 𑀧𑀝𑁆𑀞𑀸𑀬 𑀕𑀺𑀮𑀸𑀦𑀸𑀤𑀻𑀦𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀬𑀸𑀘𑀦𑁆𑀢𑀸 ‘‘𑀕𑀡𑁆𑀳𑀣𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀯𑀢𑁆𑀢𑀁 𑀧𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘‘𑀦𑀸𑀴𑀺𑀓𑁂𑀭𑀸𑀤𑀻𑀦𑀺 𑀇𑀫𑀺𑀦𑀸 𑀦𑀸𑀫 𑀧𑀭𑀺𑀘𑁆𑀙𑁂𑀤𑁂𑀦 𑀕𑀡𑁆𑀳𑀦𑁆𑀢𑀸𑀦𑀁 𑀅𑀲𑀼𑀓𑀭𑀼𑀓𑁆𑀔𑀢𑁄 𑀘 𑀅𑀲𑀼𑀓𑀭𑀼𑀓𑁆𑀔𑀢𑁄 𑀘 𑀨𑀮𑀁 𑀕𑀡𑁆𑀳𑀦𑁆𑀢𑀸𑀦𑀁 𑀅𑀦𑀺𑀯𑀸𑀭𑀡𑀁 𑀓𑀢’’𑀦𑁆𑀢𑀺. 𑀅𑀦𑀼𑀯𑀺𑀘𑀭𑀺𑀢𑁆𑀯𑀸 𑀧𑀦 ‘‘𑀅𑀬𑀁 𑀫𑀥𑀼𑀭𑀨𑀮𑁄 𑀅𑀫𑁆𑀩𑁄, 𑀇𑀢𑁄 𑀕𑀡𑁆𑀳𑀣𑀸’’𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀸. 𑀨𑀮𑀪𑀸𑀚𑀦𑀓𑀸𑀮𑁂 𑀧𑀦 𑀆𑀕𑀢𑀸𑀦𑀁 𑀲𑀫𑁆𑀫𑀢𑁂𑀦 𑀉𑀧𑀟𑁆𑀠𑀪𑀸𑀕𑁄 𑀤𑀸𑀢𑀩𑁆𑀩𑁄, 𑀅𑀲𑀫𑁆𑀫𑀢𑁂𑀦 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁.

𑀔𑀻𑀡𑀧𑀭𑀺𑀩𑁆𑀩𑀬𑁄 𑀯𑀸 𑀫𑀕𑁆𑀕𑀕𑀫𑀺𑀬𑀲𑀢𑁆𑀣𑀯𑀸𑀳𑁄 𑀯𑀸 𑀅𑀜𑁆𑀜𑁄 𑀯𑀸 𑀇𑀲𑁆𑀲𑀭𑁄 𑀆𑀕𑀦𑁆𑀢𑁆𑀯𑀸 𑀬𑀸𑀘𑀢𑀺, 𑀅𑀧𑀮𑁄𑀓𑁂𑀢𑁆𑀯𑀸𑀯 𑀤𑀸𑀢𑀩𑁆𑀩𑀁. 𑀩𑀮𑀓𑁆𑀓𑀸𑀭𑁂𑀦 𑀕𑀳𑁂𑀢𑁆𑀯𑀸 𑀔𑀸𑀤𑀦𑁆𑀢𑁄 𑀦 𑀯𑀸𑀭𑁂𑀢𑀩𑁆𑀩𑁄. 𑀓𑀼𑀤𑁆𑀥𑁄 𑀳𑀺 𑀲𑁄 𑀭𑀼𑀓𑁆𑀔𑁂𑀧𑀺 𑀙𑀺𑀦𑁆𑀤𑁂𑀬𑁆𑀬, 𑀅𑀜𑁆𑀜𑀫𑁆𑀧𑀺 𑀅𑀦𑀢𑁆𑀣𑀁 𑀓𑀭𑁂𑀬𑁆𑀬. 𑀧𑀼𑀕𑁆𑀕𑀮𑀺𑀓𑀧𑀭𑀺𑀯𑁂𑀡𑀁 𑀆𑀕𑀦𑁆𑀢𑁆𑀯𑀸 𑀕𑀺𑀮𑀸𑀦𑀲𑁆𑀲 𑀕𑀸𑀫𑁂𑀦 𑀬𑀸𑀘𑀦𑁆𑀢𑁄 ‘‘𑀅𑀫𑁆𑀳𑁂𑀳𑀺 𑀙𑀸𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀭𑁄𑀧𑀺𑀢𑀁, 𑀲𑀘𑁂 𑀅𑀢𑁆𑀣𑀺, 𑀢𑀼𑀫𑁆𑀳𑁂 𑀚𑀸𑀦𑀸𑀣𑀸’’𑀢𑀺 𑀯𑀢𑁆𑀢𑀩𑁆𑀩𑁄. 𑀬𑀤𑀺 𑀧𑀦 𑀨𑀮𑀪𑀭𑀺𑀢𑀸𑀯 𑀭𑀼𑀓𑁆𑀔𑀸 𑀳𑁄𑀦𑁆𑀢𑀺, 𑀓𑀡𑁆𑀝𑀓𑁂 𑀩𑀦𑁆𑀥𑀺𑀢𑁆𑀯𑀸 𑀨𑀮𑀯𑀸𑀭𑁂𑀦 𑀔𑀸𑀤𑀦𑁆𑀢𑀺, 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀳𑀼𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀩𑀮𑀓𑁆𑀓𑀸𑀭𑁂𑀦 𑀕𑀡𑁆𑀳𑀦𑁆𑀢𑁄 𑀦 𑀯𑀸𑀭𑁂𑀢𑀩𑁆𑀩𑁄, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯𑁂𑀢𑁆𑀣 𑀓𑀸𑀭𑀡𑀁.

𑀲𑀗𑁆𑀖𑀲𑁆𑀲 𑀨𑀮𑀸𑀭𑀸𑀫𑁄 𑀳𑁄𑀢𑀺, 𑀧𑀝𑀺𑀚𑀕𑁆𑀕𑀦𑀁 𑀦 𑀮𑀪𑀢𑀺, 𑀲𑀘𑁂 𑀢𑀁 𑀓𑁄𑀘𑀺 𑀯𑀢𑁆𑀢𑀲𑀻𑀲𑁂𑀦 𑀚𑀕𑁆𑀕𑀢𑀺, 𑀲𑀗𑁆𑀖𑀲𑁆𑀲𑁂𑀯 𑀳𑁄𑀢𑀺. 𑀅𑀣𑀸𑀧𑀺 𑀓𑀲𑁆𑀲𑀘𑀺 𑀧𑀝𑀺𑀩𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 ‘‘𑀇𑀫𑀁 𑀲𑀧𑁆𑀧𑀼𑀭𑀺𑀲 𑀚𑀕𑁆𑀕𑀺𑀢𑁆𑀯𑀸 𑀤𑁂𑀳𑀻’’𑀢𑀺 𑀲𑀗𑁆𑀖𑁄 𑀪𑀸𑀭𑀁 𑀓𑀭𑁄𑀢𑀺, 𑀲𑁄 𑀘𑁂 𑀯𑀢𑁆𑀢𑀲𑀻𑀲𑁂𑀦 𑀚𑀕𑁆𑀕𑀢𑀺, 𑀏𑀯𑀫𑁆𑀧𑀺 𑀲𑀗𑁆𑀖𑀲𑁆𑀲𑁂𑀯 𑀳𑁄𑀢𑀺. 𑀨𑀸𑀢𑀺𑀓𑀫𑁆𑀫𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀲𑁆𑀲 𑀧𑀦 𑀢𑀢𑀺𑀬𑀪𑀸𑀕𑁂𑀦 𑀯𑀸 𑀉𑀧𑀟𑁆𑀠𑀪𑀸𑀕𑁂𑀦 𑀯𑀸 𑀨𑀸𑀢𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. ‘‘𑀪𑀸𑀭𑀺𑀬𑀁 𑀓𑀫𑁆𑀫’’𑀦𑁆𑀢𑀺 𑀯𑀢𑁆𑀯𑀸 𑀏𑀢𑁆𑀢𑀓𑁂𑀦 𑀅𑀦𑀺𑀘𑁆𑀙𑀦𑁆𑀢𑁄 𑀧𑀦 𑀲𑀩𑁆𑀩𑀁 𑀢𑀯𑁂𑀯 𑀲𑀦𑁆𑀢𑀓𑀁 𑀓𑀢𑁆𑀯𑀸 ‘‘𑀫𑀽𑀮𑀪𑀸𑀕𑀁 𑀤𑀲𑀪𑀸𑀕𑀫𑀢𑁆𑀢𑀁 𑀤𑀢𑁆𑀯𑀸 𑀚𑀕𑁆𑀕𑀸𑀳𑀻’’𑀢𑀺𑀧𑀺 𑀯𑀢𑁆𑀢𑀩𑁆𑀩𑁄. 𑀕𑀭𑀼𑀪𑀡𑁆𑀟𑀢𑁆𑀢𑀸 𑀧𑀦 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀦 𑀤𑀸𑀢𑀩𑁆𑀩𑀁. 𑀲𑁄 𑀫𑀽𑀮𑀪𑀸𑀕𑀁 𑀤𑀢𑁆𑀯𑀸 𑀔𑀸𑀤𑀦𑁆𑀢𑁄 𑀅𑀓𑀢𑀸𑀯𑀸𑀲𑀁 𑀯𑀸 𑀓𑀢𑁆𑀯𑀸 𑀓𑀢𑀸𑀯𑀸𑀲𑀁 𑀯𑀸 𑀚𑀕𑁆𑀕𑀺𑀢𑁆𑀯𑀸 𑀦𑀺𑀲𑁆𑀲𑀺𑀢𑀓𑀸𑀦𑀁 𑀆𑀭𑀸𑀫𑀁 𑀦𑀺𑀬𑁆𑀬𑀸𑀤𑁂𑀢𑀺, 𑀢𑁂𑀳𑀺𑀧𑀺 𑀫𑀽𑀮𑀪𑀸𑀕𑁄 𑀤𑀸𑀢𑀩𑁆𑀩𑁄𑀯. 𑀬𑀤𑀸 𑀧𑀦 𑀪𑀺𑀓𑁆𑀔𑀽 𑀲𑀬𑀁 𑀚𑀕𑁆𑀕𑀺𑀢𑀼𑀁 𑀧𑀳𑁄𑀦𑁆𑀢𑀺, 𑀅𑀣 𑀢𑁂𑀲𑀁 𑀚𑀕𑁆𑀕𑀺𑀢𑀼𑀜𑁆𑀘 𑀦 𑀤𑀸𑀢𑀩𑁆𑀩𑀁, 𑀚𑀕𑁆𑀕𑀺𑀢𑀓𑀸𑀮𑁂 𑀘 𑀦 𑀯𑀸𑀭𑁂𑀢𑀩𑁆𑀩𑀸, 𑀚𑀕𑁆𑀕𑀦𑀓𑀸𑀮𑁂𑀬𑁂𑀯 𑀯𑀸𑀭𑁂𑀢𑀩𑁆𑀩𑀸. ‘‘𑀩𑀳𑀼𑀁 𑀢𑀼𑀫𑁆𑀳𑁂𑀳𑀺 𑀔𑀸𑀬𑀺𑀢𑀁, 𑀇𑀤𑀸𑀦𑀺 𑀫𑀸 𑀚𑀕𑁆𑀕𑀺𑀢𑁆𑀣, 𑀪𑀺𑀓𑁆𑀔𑀼𑀲𑀗𑁆𑀖𑁄𑀬𑁂𑀯 𑀚𑀕𑁆𑀕𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑀲𑀘𑁂 𑀧𑀦 𑀦𑁂𑀯 𑀯𑀢𑁆𑀢𑀲𑀻𑀲𑁂𑀦 𑀚𑀕𑁆𑀕𑀦𑁆𑀢𑁄 𑀅𑀢𑁆𑀣𑀺, 𑀦 𑀨𑀸𑀢𑀺𑀓𑀫𑁆𑀫𑁂𑀦, 𑀦 𑀲𑀗𑁆𑀖𑁄 𑀚𑀕𑁆𑀕𑀺𑀢𑀼𑀁 𑀧𑀳𑁄𑀢𑀺, 𑀏𑀓𑁄 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯 𑀚𑀕𑁆𑀕𑀺𑀢𑁆𑀯𑀸 𑀨𑀸𑀢𑀺𑀓𑀫𑁆𑀫𑀁 𑀯𑀟𑁆𑀠𑁂𑀢𑁆𑀯𑀸 𑀧𑀘𑁆𑀘𑀸𑀲𑀻𑀲𑀢𑀺, 𑀅𑀧𑀮𑁄𑀓𑀦𑀓𑀫𑁆𑀫𑁂𑀦 𑀨𑀸𑀢𑀺𑀓𑀫𑁆𑀫𑀁 𑀯𑀟𑁆𑀠𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀇𑀢𑀺 𑀇𑀫𑀁 𑀲𑀩𑁆𑀩𑀫𑁆𑀧𑀺 𑀓𑀫𑁆𑀫𑀮𑀓𑁆𑀔𑀡𑀫𑁂𑀯 𑀳𑁄𑀢𑀺. 𑀅𑀧𑀮𑁄𑀓𑀦𑀓𑀫𑁆𑀫𑀁 𑀇𑀫𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺.

𑀜𑀢𑁆𑀢𑀺𑀓𑀫𑁆𑀫𑀝𑁆𑀞𑀸𑀦𑀪𑁂𑀤𑁂 𑀧𑀦 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀅𑀦𑀼𑀲𑀺𑀝𑁆𑀞𑁄 𑀲𑁄 𑀫𑀬𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀆𑀕𑀘𑁆𑀙𑁂𑀬𑁆𑀬𑀸𑀢𑀺, 𑀆𑀕𑀘𑁆𑀙𑀸𑀳𑀻𑀢𑀺 𑀯𑀢𑁆𑀢𑀩𑁆𑀩𑁄’’𑀢𑀺 𑀏𑀯𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀑𑀲𑀸𑀭𑀡𑀸 𑀑𑀲𑀸𑀭𑀡𑀸 𑀦𑀸𑀫.

‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀥𑀫𑁆𑀫𑀓𑀣𑀺𑀓𑁄 𑀇𑀫𑀲𑁆𑀲 𑀦𑁂𑀯 𑀲𑀼𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀦𑁄 𑀲𑀼𑀢𑁆𑀢𑀯𑀺𑀪𑀗𑁆𑀕𑁄, 𑀲𑁄 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀧𑀝𑀺𑀩𑀸𑀳𑀢𑀺. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬𑀸𑀫𑀸’’𑀢𑀺 𑀏𑀯𑀁 𑀉𑀩𑁆𑀩𑀸𑀳𑀺𑀓𑀸𑀯𑀺𑀦𑀺𑀘𑁆𑀙𑀬𑁂 𑀥𑀫𑁆𑀫𑀓𑀣𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀸𑀭𑀡𑀸 𑀦𑀺𑀲𑁆𑀲𑀸𑀭𑀡𑀸 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸’’𑀢𑀺 𑀏𑀯𑀁 𑀉𑀧𑁄𑀲𑀣𑀓𑀫𑁆𑀫𑀯𑀲𑁂𑀦 𑀞𑀧𑀺𑀢𑀸 𑀜𑀢𑁆𑀢𑀺 𑀉𑀧𑁄𑀲𑀣𑁄 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀚𑁆𑀚 𑀧𑀯𑀸𑀭𑀡𑀸 𑀧𑀦𑁆𑀦𑀭𑀲𑀻. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀏𑀯𑀁 𑀧𑀯𑀸𑀭𑀡𑀸𑀓𑀫𑁆𑀫𑀯𑀲𑁂𑀦 𑀞𑀧𑀺𑀢𑀸 𑀜𑀢𑁆𑀢𑀺 𑀧𑀯𑀸𑀭𑀡𑀸 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑀼𑀲𑀸𑀲𑁂𑀬𑁆𑀬’’𑀦𑁆𑀢𑀺. ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑀼𑀲𑀸𑀲𑁂𑀬𑁆𑀬𑀸’’𑀢𑀺. ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑁆𑀢𑀭𑀸𑀬𑀺𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀅𑀦𑁆𑀢𑀭𑀸𑀬𑀺𑀓𑁂 𑀥𑀫𑁆𑀫𑁂 𑀧𑀼𑀘𑁆𑀙𑁂𑀬𑁆𑀬𑀸’’𑀢𑀺. ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬𑀸’’𑀢𑀺. ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺. ‘‘𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸’’𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀯𑀸 𑀧𑀭𑀁 𑀯𑀸 𑀲𑀫𑁆𑀫𑀦𑁆𑀦𑀺𑀢𑀼𑀁 𑀞𑀧𑀺𑀢𑀸 𑀜𑀢𑁆𑀢𑀺 𑀲𑀫𑁆𑀫𑀼𑀢𑀺 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀝𑁆𑀞𑀁. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀸’’𑀢𑀺. ‘‘𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀆𑀬𑀲𑁆𑀫𑀦𑁆𑀢𑀸 𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀧𑀢𑁆𑀢𑀸𑀤𑀻𑀦𑀁 𑀤𑀸𑀦𑀁 𑀤𑀸𑀦𑀁 𑀦𑀸𑀫.

‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀲𑀭𑀢𑀺, 𑀯𑀺𑀯𑀭𑀢𑀺, 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺, 𑀤𑁂𑀲𑁂𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀦𑁆𑀢𑀺. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺. 𑀢𑁂𑀦 𑀯𑀢𑁆𑀢𑀩𑁆𑀩𑁄 ‘‘𑀧𑀲𑁆𑀲𑀲𑀻’’𑀢𑀺. ‘‘𑀆𑀫 𑀧𑀲𑁆𑀲𑀸𑀫𑀻’’𑀢𑀺. 𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻𑀢𑀺 𑀏𑀯𑀁 𑀆𑀧𑀢𑁆𑀢𑀺𑀧𑀝𑀺𑀕𑁆𑀕𑀳𑁄 𑀧𑀝𑀺𑀕𑁆𑀕𑀳𑁄 𑀦𑀸𑀫.

‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑀸 𑀆𑀯𑀸𑀲𑀺𑀓𑀸. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀫, 𑀆𑀕𑀫𑁂 𑀓𑀸𑀴𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑀁 𑀓𑀸𑀴𑀁 𑀅𑀦𑀼𑀯𑀲𑁂𑀬𑁆𑀬𑀼𑀁, 𑀆𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀩𑁆𑀬𑀢𑁆𑀢𑁂𑀦 𑀧𑀝𑀺𑀩𑀮𑁂𑀦 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸 𑁋 ‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑀸 𑀆𑀯𑀸𑀲𑀺𑀓𑀸. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀫, 𑀆𑀕𑀫𑁂 𑀚𑀼𑀡𑁆𑀳𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 𑀏𑀯𑀁 𑀓𑀢𑀸 𑀧𑀯𑀸𑀭𑀡𑀸𑀧𑀘𑁆𑀘𑀼𑀓𑁆𑀓𑀟𑁆𑀠𑀦𑀸 𑀧𑀘𑁆𑀘𑀼𑀓𑁆𑀓𑀟𑁆𑀠𑀦𑀸 𑀦𑀸𑀫.

𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁, 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀺𑀡𑁆𑀡𑀁 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀁. 𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀅𑀥𑀺𑀓𑀭𑀡𑀁 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀯𑀽𑀧𑀲𑀫𑁂𑀬𑁆𑀬 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁, 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑀝𑀺𑀲𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂𑀦 𑀓𑀢𑁆𑀯𑀸 𑀲𑀩𑁆𑀩𑀧𑀞𑀫𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀜𑀢𑁆𑀢𑀺 𑀓𑀫𑁆𑀫𑀮𑀓𑁆𑀔𑀡𑀁 𑀦𑀸𑀫.

𑀢𑀣𑀸 𑀢𑀢𑁄 𑀧𑀭𑀸 𑀏𑀓𑁂𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑁂𑀓𑀁 𑀓𑀢𑁆𑀯𑀸 𑀤𑁆𑀯𑁂 𑀜𑀢𑁆𑀢𑀺𑀬𑁄 𑀇𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀑𑀲𑀸𑀭𑀡𑀁 𑀦𑀺𑀲𑁆𑀲𑀸𑀭𑀡𑀁…𑀧𑁂… 𑀓𑀫𑁆𑀫𑀮𑀓𑁆𑀔𑀡𑀜𑁆𑀜𑁂𑀯 𑀦𑀯𑀫𑀦𑁆𑀢𑀺 𑀜𑀢𑁆𑀢𑀺𑀓𑀫𑁆𑀫𑀁 𑀇𑀫𑀸𑀦𑀺 𑀦𑀯 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺.

𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀝𑁆𑀞𑀸𑀦𑀪𑁂𑀤𑁂 𑀧𑀦 𑀯𑀟𑁆𑀠𑀲𑁆𑀲 𑀮𑀺𑀘𑁆𑀙𑀯𑀺𑀦𑁄 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀯𑀲𑁂𑀦 𑀔𑀦𑁆𑀥𑀓𑁂 𑀯𑀼𑀢𑁆𑀢𑀸 𑀦𑀺𑀲𑁆𑀲𑀸𑀭𑀡𑀸. 𑀢𑀲𑁆𑀲𑁂𑀯 𑀧𑀢𑁆𑀢𑀼𑀓𑁆𑀓𑀼𑀚𑁆𑀚𑀦𑀯𑀲𑁂𑀦 𑀯𑀼𑀢𑁆𑀢𑀸 𑀑𑀲𑀸𑀭𑀡𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀲𑀻𑀫𑀸𑀲𑀫𑁆𑀫𑀼𑀢𑀺 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺, 𑀲𑀦𑁆𑀣𑀢𑀲𑀫𑁆𑀫𑀼𑀢𑀺, 𑀪𑀢𑁆𑀢𑀼𑀤𑁆𑀤𑁂𑀲𑀓-𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓-𑀪𑀡𑁆𑀟𑀸𑀕𑀸𑀭𑀺𑀓-𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓-𑀘𑀻𑀯𑀭𑀪𑀸𑀚𑀓-𑀬𑀸𑀕𑀼𑀪𑀸𑀚𑀓𑀨𑀮𑀪𑀸𑀚𑀓-𑀔𑀚𑁆𑀚𑀪𑀸𑀚𑀓-𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓-𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓-𑀧𑀢𑁆𑀢𑀕𑁆𑀕𑀸𑀳𑀸𑀧𑀓-𑀆𑀭𑀸𑀫𑀺𑀓𑀧𑁂𑀲𑀓𑀲𑀸𑀫𑀡𑁂𑀭𑀧𑁂𑀲𑀓𑀲𑀫𑁆𑀫𑀼𑀢𑀻𑀢𑀺 𑀏𑀢𑀸𑀲𑀁 𑀲𑀫𑁆𑀫𑀼𑀢𑀻𑀦𑀁 𑀯𑀲𑁂𑀦 𑀲𑀫𑁆𑀫𑀼𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀺𑀦𑀘𑀻𑀯𑀭𑀤𑀸𑀦𑀫𑀢𑀓𑀘𑀻𑀯𑀭𑀤𑀸𑀦𑀯𑀲𑁂𑀦 𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀺𑀦𑀼𑀤𑁆𑀥𑀸𑀭𑀯𑀲𑁂𑀦 𑀉𑀤𑁆𑀥𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀼𑀝𑀺𑀯𑀢𑁆𑀣𑀼𑀯𑀺𑀳𑀸𑀭𑀯𑀢𑁆𑀣𑀼𑀤𑁂𑀲𑀦𑀸𑀯𑀲𑁂𑀦 𑀤𑁂𑀲𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀧𑀦 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀜𑀢𑁆𑀢𑀺𑀜𑁆𑀘 𑀏𑀓𑁂𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑁂𑀓𑀁 𑀜𑀢𑁆𑀢𑀺𑀜𑁆𑀘𑀸𑀢𑀺 𑀢𑀺𑀲𑁆𑀲𑁄 𑀜𑀢𑁆𑀢𑀺𑀬𑁄 𑀞𑀧𑁂𑀢𑁆𑀯𑀸 𑀧𑀼𑀦 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑀸, 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑀸𑀢𑀺 𑀤𑁆𑀯𑁂 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸 𑀯𑀼𑀢𑁆𑀢𑀸, 𑀢𑀸𑀲𑀁 𑀯𑀲𑁂𑀦 𑀓𑀫𑁆𑀫𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀇𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺.

𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀝𑁆𑀞𑀸𑀦𑀪𑁂𑀤𑁂 𑀧𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀓𑀫𑁆𑀫𑀸𑀦𑀁 𑀯𑀲𑁂𑀦 𑀦𑀺𑀲𑁆𑀲𑀸𑀭𑀡𑀸, 𑀢𑁂𑀲𑀁𑀬𑁂𑀯 𑀘 𑀓𑀫𑁆𑀫𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀑𑀲𑀸𑀭𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀯𑀲𑁂𑀦 𑀲𑀫𑁆𑀫𑀼𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀯𑀸𑀲𑀤𑀸𑀦𑀫𑀸𑀦𑀢𑁆𑀢𑀤𑀸𑀦𑀯𑀲𑁂𑀦 𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀓𑀫𑁆𑀫𑀯𑀲𑁂𑀦 𑀦𑀺𑀕𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 𑀅𑀝𑁆𑀞, 𑀬𑀸𑀯𑀢𑀢𑀺𑀬𑀓𑀸 𑀅𑀭𑀺𑀝𑁆𑀞𑁄 𑀘𑀡𑁆𑀟𑀓𑀸𑀴𑀻 𑀘 𑀇𑀫𑁂 𑀢𑁂 𑀬𑀸𑀯𑀢𑀢𑀺𑀬𑀓𑀸’’𑀢𑀺 𑀇𑀫𑀸𑀲𑀁 𑀏𑀓𑀸𑀤𑀲𑀦𑁆𑀦𑀁 𑀲𑀫𑀦𑀼𑀪𑀸𑀲𑀦𑀸𑀦𑀁 𑀯𑀲𑁂𑀦 𑀲𑀫𑀦𑀼𑀪𑀸𑀲𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀅𑀩𑁆𑀪𑀸𑀦𑀓𑀫𑁆𑀫𑀯𑀲𑁂𑀦 𑀧𑀦 𑀓𑀫𑁆𑀫𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀇𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺.

𑁪𑁯𑁭. 𑀇𑀢𑀺 𑀓𑀫𑁆𑀫𑀸𑀦𑀺 𑀘 𑀓𑀫𑁆𑀫𑀯𑀺𑀧𑀢𑁆𑀢𑀺𑀜𑁆𑀘 𑀯𑀺𑀧𑀢𑁆𑀢𑀺𑀯𑀺𑀭𑀳𑀺𑀢𑀸𑀦𑀁 𑀓𑀫𑁆𑀫𑀸𑀦𑀁 𑀞𑀸𑀦𑀧𑀪𑁂𑀤𑀕𑀫𑀦𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀓𑀸𑀭𑀓𑀲𑁆𑀲 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 ‘‘𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀧𑀭𑀺𑀲𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀢𑁆𑀣𑀯𑀲𑀯𑀕𑁆𑀕𑀸𑀤𑀺𑀯𑀡𑁆𑀡𑀦𑀸

𑁪𑁯𑁮. 𑀇𑀤𑀸𑀦𑀺 𑀬𑀸𑀦𑀺 𑀢𑀸𑀦𑀺 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀯𑀢𑁆𑀣𑀼𑀪𑀽𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑁂𑀲𑀁 𑀧𑀜𑁆𑀜𑀢𑁆𑀢𑀺𑀬𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀯𑁂𑀭𑀸𑀦𑀁 𑀲𑀁𑀯𑀭𑀸𑀬𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀯𑁂𑀭𑀸𑀦𑀁 𑀲𑀁𑀯𑀭𑀢𑁆𑀣𑀸𑀬 𑀧𑀺𑀤𑀳𑀦𑀢𑁆𑀣𑀸𑀬. 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀯𑁂𑀭𑀸𑀦𑀁 𑀧𑀝𑀺𑀖𑀸𑀢𑀸𑀬𑀸𑀢𑀺 𑀯𑀺𑀧𑀸𑀓𑀤𑀼𑀓𑁆𑀔𑀲𑀗𑁆𑀔𑀸𑀢𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀯𑁂𑀭𑀸𑀦𑀁 𑀧𑀝𑀺𑀖𑀸𑀢𑀢𑁆𑀣𑀸𑀬, 𑀲𑀫𑀼𑀘𑁆𑀙𑁂𑀤𑀦𑀢𑁆𑀣𑀸𑀬 𑀅𑀦𑀼𑀧𑁆𑀧𑀚𑁆𑀚𑀦𑀢𑁆𑀣𑀸𑀬. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀯𑀚𑁆𑀚𑀸𑀦𑀁 𑀲𑀁𑀯𑀭𑀸𑀬𑀸𑀢𑀺 𑀢𑁂𑀲𑀁𑀬𑁂𑀯 𑀧𑀜𑁆𑀘𑀦𑁆𑀦𑀁 𑀯𑁂𑀭𑀸𑀦𑀁 𑀲𑀁𑀯𑀭𑀢𑁆𑀣𑀸𑀬. 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀯𑀚𑁆𑀚𑀸𑀦𑀦𑁆𑀢𑀺 𑀢𑁂𑀲𑀁𑀬𑁂𑀯 𑀯𑀺𑀧𑀸𑀓𑀤𑀼𑀓𑁆𑀔𑀸𑀦𑀁. 𑀯𑀺𑀧𑀸𑀓𑀤𑀼𑀓𑁆𑀔𑀸𑀦𑁂𑀯 𑀳𑀺 𑀇𑀥 𑀯𑀚𑁆𑀚𑀦𑀻𑀬𑀪𑀸𑀯𑀢𑁄 𑀯𑀚𑁆𑀚𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀪𑀬𑀸𑀦𑀦𑁆𑀢𑀺 𑀕𑀭𑀳𑀸 𑀉𑀧𑀯𑀸𑀤𑁄 𑀢𑀚𑁆𑀚𑀦𑀻𑀬𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀦𑀁 𑀞𑀧𑀦𑀁 𑀅𑀓𑀺𑀢𑁆𑀢𑀺𑀧𑀓𑀸𑀲𑀦𑀻𑀬𑀓𑀫𑁆𑀫𑀦𑁆𑀢𑀺 𑀏𑀢𑀸𑀦𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀪𑀬𑀸𑀦𑀺 𑀦𑀸𑀫, 𑀏𑀢𑁂𑀲𑀁 𑀲𑀁𑀯𑀭𑀢𑁆𑀣𑀸𑀬. 𑀲𑀫𑁆𑀧𑀭𑀸𑀬𑀺𑀓𑀪𑀬𑀸𑀦𑀺 𑀧𑀦 𑀯𑀺𑀧𑀸𑀓𑀤𑀼𑀓𑁆𑀔𑀸𑀦𑀺𑀬𑁂𑀯, 𑀢𑁂𑀲𑀁 𑀧𑀝𑀺𑀖𑀸𑀢𑀢𑁆𑀣𑀸𑀬. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀅𑀓𑀼𑀲𑀮𑀸𑀦𑀦𑁆𑀢𑀺 𑀧𑀜𑁆𑀘𑀯𑁂𑀭𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀧𑁆𑀧𑀪𑁂𑀤𑀸𑀦𑀁 𑀅𑀓𑀼𑀲𑀮𑀸𑀦𑀁 𑀲𑀁𑀯𑀭𑀢𑁆𑀣𑀸𑀬. 𑀯𑀺𑀧𑀸𑀓𑀤𑀼𑀓𑁆𑀔𑀸𑀦𑁂𑀯 𑀧𑀦 𑀅𑀓𑁆𑀔𑀫𑀝𑁆𑀞𑁂𑀦 𑀲𑀫𑁆𑀧𑀭𑀸𑀬𑀺𑀓𑀅𑀓𑀼𑀲𑀮𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀁 𑀧𑀝𑀺𑀖𑀸𑀢𑀢𑁆𑀣𑀸𑀬. 𑀕𑀺𑀳𑀻𑀦𑀁 𑀅𑀦𑀼𑀓𑀫𑁆𑀧𑀸𑀬𑀸𑀢𑀺 𑀅𑀕𑀸𑀭𑀺𑀓𑀸𑀦𑀁 𑀲𑀤𑁆𑀥𑀸𑀭𑀓𑁆𑀔𑀡𑀯𑀲𑁂𑀦 𑀅𑀦𑀼𑀓𑀫𑁆𑀧𑀦𑀢𑁆𑀣𑀸𑀬. 𑀧𑀸𑀧𑀺𑀘𑁆𑀙𑀸𑀦𑀁 𑀧𑀓𑁆𑀔𑀼𑀧𑀘𑁆𑀙𑁂𑀤𑀸𑀬𑀸𑀢𑀺 𑀧𑀸𑀧𑀺𑀘𑁆𑀙𑀧𑀼𑀕𑁆𑀕𑀮𑀸𑀦𑀁 𑀕𑀡𑀩𑀦𑁆𑀥𑀪𑁂𑀤𑀦𑀢𑁆𑀣𑀸𑀬 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀬𑀜𑁆𑀳𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀫𑁂𑀯 𑀯𑀼𑀢𑁆𑀢𑀦𑁆𑀢𑀺.

𑀲𑀺𑀓𑁆𑀔𑀸𑀧𑀤𑁂𑀲𑀼 𑀅𑀢𑁆𑀣𑀯𑀲𑁂𑀦 𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁯𑁯. 𑀧𑀸𑀢𑀺𑀫𑁄𑀓𑁆𑀔𑀸𑀤𑀻𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄𑀢𑀺 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘𑀯𑀺𑀥𑁄 𑀪𑀺𑀓𑁆𑀔𑀼𑀦𑀻𑀦𑀁 𑀘𑀢𑀼𑀩𑁆𑀩𑀺𑀥𑁄. 𑀧𑀭𑀺𑀯𑀸𑀲𑀤𑀸𑀦𑀸𑀤𑀻𑀲𑀼 𑀑𑀲𑀸𑀭𑀡𑀻𑀬𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀅𑀝𑁆𑀞𑀸𑀭𑀲𑀲𑀼 𑀯𑀸 𑀢𑁂𑀘𑀢𑁆𑀢𑀸𑀮𑀻𑀲𑀸𑀬 𑀯𑀸 𑀯𑀢𑁆𑀢𑁂𑀲𑀼 𑀯𑀢𑁆𑀢𑀫𑀸𑀦𑀲𑁆𑀲 𑀑𑀲𑀸𑀭𑀡𑀻𑀬𑀁 𑀧𑀜𑁆𑀜𑀢𑁆𑀢𑀁. 𑀬𑁂𑀦 𑀓𑀫𑁆𑀫𑁂𑀦 𑀑𑀲𑀸𑀭𑀻𑀬𑀢𑀺, 𑀢𑀁 𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀸𑀭𑀡𑀻𑀬𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀪𑀡𑁆𑀟𑀦𑀓𑀸𑀭𑀓𑀸𑀤𑀬𑁄 𑀬𑁂𑀦 𑀓𑀫𑁆𑀫𑁂𑀦 𑀦𑀺𑀲𑁆𑀲𑀸𑀭𑀻𑀬𑀦𑁆𑀢𑀺, 𑀢𑀁 𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁫𑁦𑁦. 𑀅𑀧𑀜𑁆𑀜𑀢𑁆𑀢𑁂𑀢𑀺𑀆𑀤𑀻𑀲𑀼 𑀅𑀧𑀜𑁆𑀜𑀢𑁆𑀢𑁂 𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀓𑀓𑀼𑀲𑀦𑁆𑀥𑀜𑁆𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀓𑁄𑀡𑀸𑀕𑀫𑀦𑀜𑁆𑀘 𑀓𑀲𑁆𑀲𑀧𑀜𑁆𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀞𑀧𑁂𑀢𑁆𑀯𑀸 𑀅𑀦𑁆𑀢𑀭𑀸 𑀓𑁂𑀦𑀘𑀺 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀧𑀜𑁆𑀜𑀢𑁆𑀢𑀁 𑀦𑀸𑀫. 𑀫𑀓𑁆𑀓𑀝𑀺𑀯𑀢𑁆𑀣𑀼𑀆𑀤𑀺𑀯𑀺𑀦𑀻𑀢𑀓𑀣𑀸 𑀲𑀺𑀓𑁆𑀔𑀸𑀧𑀤𑁂 𑀧𑀜𑁆𑀜𑀢𑁆𑀢𑁂 𑀅𑀦𑀼𑀧𑀜𑁆𑀜𑀢𑁆𑀢𑀁 𑀦𑀸𑀫. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀆𑀦𑀺𑀲𑀁𑀲𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁦𑁧. 𑀇𑀤𑀸𑀦𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀏𑀓𑁂𑀓𑁂𑀦 𑀆𑀓𑀸𑀭𑁂𑀦 𑀦𑀯𑀥𑀸 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀯 𑀲𑀗𑁆𑀕𑀳𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀢𑁆𑀣𑀼𑀲𑀗𑁆𑀕𑀳𑁄𑀢𑀺 𑀯𑀢𑁆𑀣𑀼𑀦𑀸 𑀲𑀗𑁆𑀕𑀳𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀧𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑁋 𑀬𑀲𑁆𑀫𑀸 𑀳𑀺 𑀏𑀓𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀅𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺 𑀯𑀢𑁆𑀣𑀼𑀦𑀸 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀏𑀯𑀁 𑀢𑀸𑀯 𑀯𑀢𑁆𑀣𑀼𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀲𑀗𑁆𑀕𑀳𑀺𑀢𑀸, 𑀧𑀜𑁆𑀘𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸, 𑀙 𑀲𑀺𑀓𑁆𑀔𑀸𑀧𑀤𑀸𑀦𑀺 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀲𑀗𑁆𑀕𑀳𑀺𑀢𑀸𑀦𑀺, 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺𑀧𑀺 𑀯𑀺𑀧𑀢𑁆𑀢𑀺𑀬𑀸 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀏𑀯𑀁 𑀯𑀺𑀧𑀢𑁆𑀢𑀺𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀲𑀢𑁆𑀢𑀳𑀸𑀧𑀢𑁆𑀢𑀻𑀳𑀺 𑀫𑀼𑀢𑁆𑀢𑀁 𑀏𑀓𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺 𑀆𑀧𑀢𑁆𑀢𑀺𑀬𑀸 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀏𑀯𑀁 𑀆𑀧𑀢𑁆𑀢𑀺𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑀸𑀦𑀺 𑀘 𑀲𑀢𑁆𑀢𑀲𑀼 𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀸𑀦𑀻𑀢𑀺 𑀦𑀺𑀤𑀸𑀦𑁂𑀦 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀏𑀯𑀁 𑀦𑀺𑀤𑀸𑀦𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀏𑀓𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀅𑀚𑁆𑀛𑀸𑀘𑀸𑀭𑀺𑀓𑀧𑀼𑀕𑁆𑀕𑀮𑁂 𑀅𑀲𑀢𑀺 𑀧𑀜𑁆𑀜𑀢𑁆𑀢𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺 𑀧𑀼𑀕𑁆𑀕𑀮𑁂𑀦 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀏𑀯𑀁 𑀧𑀼𑀕𑁆𑀕𑀮𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑀸𑀦𑀺 𑀧𑀦 𑀧𑀜𑁆𑀘𑀳𑀺 𑀘𑁂𑀯 𑀲𑀢𑁆𑀢𑀳𑀺 𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀦 𑀯𑀺𑀦𑀸 𑀙𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀻𑀢𑀺 𑀲𑀫𑀼𑀝𑁆𑀞𑀸𑀦𑁂𑀦 𑀲𑀗𑁆𑀕𑀳𑀺𑀢𑀸𑀦𑀺. 𑀲𑀩𑁆𑀩𑀸𑀦𑀺 𑀘 𑀘𑀢𑀽𑀲𑀼 𑀅𑀥𑀺𑀓𑀭𑀡𑁂𑀲𑀼 𑀆𑀧𑀢𑁆𑀢𑀸𑀥𑀺𑀓𑀭𑀡𑁂𑀦 𑀲𑀗𑁆𑀕𑀳𑀺𑀢𑀸𑀦𑀺. 𑀲𑀩𑁆𑀩𑀸𑀦𑀺 𑀲𑀢𑁆𑀢𑀳𑀺 𑀲𑀫𑀣𑁂𑀳𑀺 𑀲𑀫𑀣𑀁 𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑀣𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀏𑀯𑀫𑁂𑀢𑁆𑀣 𑀔𑀦𑁆𑀥𑀲𑀫𑀼𑀝𑁆𑀞𑀸𑀦𑀅𑀥𑀺𑀓𑀭𑀡𑀲𑀫𑀣𑀲𑀗𑁆𑀕𑀳𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀦𑀯𑀲𑀗𑁆𑀕𑀳𑀺𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀧𑀭𑀺𑀯𑀸𑀭𑀲𑁆𑀲 𑀅𑀦𑀼𑀢𑁆𑀢𑀸𑀦𑀢𑁆𑀣𑀧𑀤𑀯𑀡𑁆𑀡𑀦𑀸𑀢𑀺.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑀉𑀪𑀢𑁄 𑀯𑀺𑀪𑀗𑁆𑀕𑀔𑀦𑁆𑀥𑀓-𑀧𑀭𑀺𑀯𑀸𑀭𑀯𑀺𑀪𑀢𑁆𑀢𑀺𑀤𑁂𑀲𑀦𑀁 𑀦𑀸𑀣𑁄;

𑀯𑀺𑀦𑀬𑀧𑀺𑀝𑀓𑀁 𑀯𑀺𑀦𑁂𑀦𑁆𑀢𑁄, 𑀯𑁂𑀦𑁂𑀬𑁆𑀬𑀁 𑀬𑀁 𑀚𑀺𑀦𑁄 𑀆𑀳.

𑀲𑀫𑀥𑀺𑀓𑀲𑀢𑁆𑀢𑀯𑀻𑀲𑀢𑀺-𑀲𑀳𑀲𑁆𑀲𑀫𑀢𑁆𑀢𑁂𑀦 𑀢𑀲𑁆𑀲 𑀕𑀦𑁆𑀣𑁂𑀦;

𑀲𑀁𑀯𑀡𑁆𑀡𑀦𑀸 𑀲𑀫𑀢𑁆𑀢𑀸, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫.

𑀢𑀢𑁆𑀭𑀺𑀤𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀲𑁆𑀫𑀺𑀁 𑁋

𑀆𑀘𑀭𑀺𑀬𑀧𑀭𑀫𑁆𑀧𑀭𑀢𑁄, 𑀦𑀺𑀤𑀸𑀦𑀯𑀢𑁆𑀣𑀼𑀧𑁆𑀧𑀪𑁂𑀤𑀤𑀻𑀧𑀦𑀢𑁄;

𑀧𑀭𑀲𑀫𑀬𑀯𑀺𑀯𑀚𑁆𑀚𑀦𑀢𑁄, 𑀲𑀓𑀲𑀫𑀬𑀯𑀺𑀲𑀼𑀤𑁆𑀥𑀺𑀢𑁄 𑀘𑁂𑀯.

𑀩𑁆𑀬𑀜𑁆𑀚𑀦𑀧𑀭𑀺𑀲𑁄𑀥𑀦𑀢𑁄, 𑀧𑀤𑀢𑁆𑀣𑀢𑁄 𑀧𑀸𑀴𑀺𑀬𑁄𑀚𑀦𑀓𑁆𑀓𑀫𑀢𑁄;

𑀲𑀺𑀓𑁆𑀔𑀸𑀧𑀤𑀦𑀺𑀘𑁆𑀙𑀬𑀢𑁄, 𑀯𑀺𑀪𑀗𑁆𑀕𑀦𑀬𑀪𑁂𑀤𑀤𑀲𑁆𑀲𑀦𑀢𑁄.

𑀲𑀫𑁆𑀧𑀲𑁆𑀲𑀢𑀁 𑀦 𑀤𑀺𑀲𑁆𑀲𑀢𑀺, 𑀓𑀺𑀜𑁆𑀘𑀺 𑀅𑀧𑀸𑀲𑀸𑀤𑀺𑀓𑀁 𑀬𑀢𑁄 𑀏𑀢𑁆𑀣;

𑀯𑀺𑀜𑁆𑀜𑀽𑀦𑀫𑀬𑀁 𑀢𑀲𑁆𑀫𑀸, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀢𑁆𑀯𑁂𑀯.

𑀲𑀁𑀯𑀡𑁆𑀡𑀦𑀸 𑀧𑀯𑀢𑁆𑀢𑀸, 𑀯𑀺𑀦𑀬𑀲𑁆𑀲 𑀯𑀺𑀦𑁂𑀬𑁆𑀬𑀤𑀫𑀦𑀓𑀼𑀲𑀮𑁂𑀦;

𑀯𑀼𑀢𑁆𑀢𑀲𑁆𑀲 𑀮𑁄𑀓𑀦𑀸𑀣𑁂𑀦, 𑀮𑁄𑀓𑀫𑀦𑀼𑀓𑀫𑁆𑀧𑀫𑀸𑀦𑁂𑀦𑀸𑀢𑀺.

𑀫𑀳𑀸𑀅𑀝𑁆𑀞𑀓𑀣𑀜𑁆𑀘𑁂𑀯, 𑀫𑀳𑀸𑀧𑀘𑁆𑀘𑀭𑀺𑀫𑁂𑀯𑀘;

𑀓𑀼𑀭𑀼𑀦𑁆𑀤𑀺𑀜𑁆𑀘𑀸𑀢𑀺 𑀢𑀺𑀲𑁆𑀲𑁄𑀧𑀺, 𑀲𑀻𑀳𑀴𑀝𑁆𑀞𑀓𑀣𑀸 𑀇𑀫𑀸.

𑀩𑀼𑀤𑁆𑀥𑀫𑀺𑀢𑁆𑀢𑁄𑀢𑀺 𑀦𑀸𑀫𑁂𑀦, 𑀯𑀺𑀲𑁆𑀲𑀼𑀢𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀯𑀺𑀦𑀬𑀜𑁆𑀜𑀼𑀲𑁆𑀲 𑀥𑀻𑀭𑀲𑁆𑀲, 𑀲𑀼𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂.

𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑁂, 𑀪𑀽𑀫𑀺𑀪𑀸𑀕𑁂 𑀧𑀢𑀺𑀝𑁆𑀞𑀺𑀢𑁄;

𑀫𑀳𑀸𑀯𑀺𑀳𑀸𑀭𑁄 𑀬𑁄 𑀲𑀢𑁆𑀣𑀼, 𑀫𑀳𑀸𑀩𑁄𑀥𑀺𑀯𑀺𑀪𑀽𑀲𑀺𑀢𑁄.

𑀬𑀁 𑀢𑀲𑁆𑀲 𑀤𑀓𑁆𑀔𑀺𑀡𑁂 𑀪𑀸𑀕𑁂, 𑀧𑀥𑀸𑀦𑀖𑀭𑀫𑀼𑀢𑁆𑀢𑀫𑀁;

𑀲𑀼𑀘𑀺𑀘𑀸𑀭𑀺𑀢𑁆𑀢𑀲𑀻𑀮𑁂𑀦, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑁂𑀯𑀺𑀢𑀁.

𑀉𑀴𑀸𑀭𑀓𑀼𑀮𑀲𑀫𑁆𑀪𑀽𑀢𑁄, 𑀲𑀗𑁆𑀖𑀼𑀧𑀝𑁆𑀞𑀸𑀬𑀓𑁄 𑀲𑀤𑀸;

𑀅𑀦𑀸𑀓𑀼𑀮𑀸𑀬 𑀲𑀤𑁆𑀥𑀸𑀬, 𑀧𑀲𑀦𑁆𑀦𑁄 𑀭𑀢𑀦𑀢𑁆𑀢𑀬𑁂.

𑀫𑀳𑀸𑀦𑀺𑀕𑀫𑀲𑀸𑀫𑀻𑀢𑀺, 𑀯𑀺𑀲𑁆𑀲𑀼𑀢𑁄 𑀢𑀢𑁆𑀣 𑀓𑀸𑀭𑀬𑀺;

𑀘𑀸𑀭𑀼𑀧𑀸𑀓𑀸𑀭𑀲𑀜𑁆𑀘𑀺𑀢𑀁, 𑀬𑀁 𑀧𑀸𑀲𑀸𑀤𑀁 𑀫𑀦𑁄𑀭𑀫𑀁.

𑀲𑀻𑀢𑀘𑁆𑀙𑀸𑀬𑀢𑀭𑀽𑀧𑁂𑀢𑀁, 𑀲𑀫𑁆𑀧𑀦𑁆𑀦𑀲𑀮𑀺𑀮𑀸𑀲𑀬𑀁;

𑀯𑀲𑀢𑀸 𑀢𑀢𑁆𑀭 𑀧𑀸𑀲𑀸𑀤𑁂, 𑀫𑀳𑀸𑀦𑀺𑀕𑀫𑀲𑀸𑀫𑀺𑀦𑁄.

𑀲𑀼𑀘𑀺𑀲𑀻𑀮𑀲𑀫𑀸𑀘𑀸𑀭𑀁, 𑀣𑁂𑀭𑀁 𑀩𑀼𑀤𑁆𑀥𑀲𑀺𑀭𑀺𑀯𑁆𑀳𑀬𑀁;

𑀬𑀸 𑀉𑀤𑁆𑀤𑀺𑀲𑀺𑀢𑁆𑀯𑀸 𑀆𑀭𑀤𑁆𑀥𑀸, 𑀇𑀤𑁆𑀥𑀸 𑀯𑀺𑀦𑀬𑀯𑀡𑁆𑀡𑀦𑀸.

𑀧𑀸𑀮𑀬𑀦𑁆𑀢𑀲𑁆𑀲 𑀲𑀓𑀮𑀁, 𑀮𑀗𑁆𑀓𑀸𑀤𑀻𑀧𑀁 𑀦𑀺𑀭𑀩𑁆𑀩𑀼𑀤𑀁;

𑀭𑀜𑁆𑀜𑁄 𑀲𑀺𑀭𑀺𑀦𑀺𑀯𑀸𑀲𑀲𑁆𑀲, 𑀲𑀺𑀭𑀺𑀧𑀸𑀮𑀬𑀲𑀲𑁆𑀲𑀺𑀦𑁄.

𑀲𑀫𑀯𑀻𑀲𑀢𑀺𑀫𑁂 𑀔𑁂𑀫𑁂, 𑀚𑀬𑀲𑀁𑀯𑀘𑁆𑀙𑀭𑁂 𑀅𑀬𑀁;

𑀆𑀭𑀤𑁆𑀥𑀸 𑀏𑀓𑀯𑀻𑀲𑀫𑁆𑀳𑀺, 𑀲𑀫𑁆𑀧𑀢𑁆𑀢𑁂 𑀧𑀭𑀺𑀦𑀺𑀝𑁆𑀞𑀺𑀢𑀸.

𑀉𑀧𑀤𑁆𑀤𑀯𑀸 𑀓𑀼𑀮𑁂 𑀮𑁄𑀓𑁂, 𑀦𑀺𑀭𑀼𑀧𑀤𑁆𑀤𑀯𑀢𑁄 𑀅𑀬𑀁;

𑀏𑀓𑀲𑀁𑀯𑀘𑁆𑀙𑀭𑁂𑀦𑁂𑀯, 𑀬𑀣𑀸 𑀦𑀺𑀝𑁆𑀞𑀁 𑀉𑀧𑀸𑀕𑀢𑀸.

𑀏𑀯𑀁 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲, 𑀦𑀺𑀝𑁆𑀞𑀁 𑀥𑀫𑁆𑀫𑀽𑀧𑀲𑀁𑀳𑀺𑀢𑀸;

𑀲𑀻𑀖𑀁 𑀕𑀘𑁆𑀙𑀦𑁆𑀢𑀼 𑀆𑀭𑀫𑁆𑀪𑀸, 𑀲𑀩𑁆𑀩𑁂𑀧𑀺 𑀦𑀺𑀭𑀼𑀧𑀤𑁆𑀤𑀯𑀸.

𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀥𑀫𑁆𑀫𑀲𑁆𑀲, 𑀓𑀭𑁄𑀦𑁆𑀢𑁂𑀦 𑀫𑀬𑀸 𑀇𑀫𑀁;

𑀲𑀤𑁆𑀥𑀫𑁆𑀫𑀩𑀳𑀼𑀫𑀸𑀦𑁂𑀦, 𑀬𑀜𑁆𑀘 𑀧𑀼𑀜𑁆𑀜𑀁 𑀲𑀫𑀸𑀘𑀺𑀢𑀁.

𑀲𑀩𑁆𑀩𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀢𑀲𑁆𑀲 𑀲𑀩𑁆𑀩𑁂𑀧𑀺 𑀧𑀸𑀡𑀺𑀦𑁄;

𑀪𑀯𑀦𑁆𑀢𑀼 𑀥𑀫𑁆𑀫𑀭𑀸𑀚𑀲𑁆𑀲, 𑀲𑀤𑁆𑀥𑀫𑁆𑀫𑀭𑀲𑀲𑁂𑀯𑀺𑀦𑁄.

𑀘𑀺𑀭𑀁 𑀢𑀺𑀝𑁆𑀞𑀢𑀼 𑀲𑀤𑁆𑀥𑀫𑁆𑀫𑁄, 𑀓𑀸𑀮𑁂 𑀯𑀲𑁆𑀲𑀁 𑀘𑀺𑀭𑀁 𑀧𑀚𑀁;

𑀢𑀧𑁆𑀧𑁂𑀢𑀼 𑀤𑁂𑀯𑁄 𑀥𑀫𑁆𑀫𑁂𑀦, 𑀭𑀸𑀚𑀸 𑀭𑀓𑁆𑀔𑀢𑀼 𑀫𑁂𑀤𑀺𑀦𑀺𑀦𑁆𑀢𑀺.

𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑁆𑀜𑀸𑀡𑀧𑁆𑀧𑀪𑀸𑀯𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀮𑀸𑀯𑀡𑁆𑀡𑀬𑀼𑀢𑁆𑀢𑁂𑀦 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀺𑀦𑀸 𑀯𑀸𑀤𑀺𑀯𑀭𑁂𑀦 𑀫𑀳𑀸𑀓𑀯𑀺𑀦𑀸 𑀧𑀪𑀺𑀦𑁆𑀦𑀧𑀅𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑁂 𑀙𑀴𑀪𑀺𑀜𑁆𑀜𑀸𑀤𑀺𑀧𑀪𑁂𑀤𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀻𑀦𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁 𑀣𑁂𑀭𑀸𑀦𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸 𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸 𑀅𑀬𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫 𑀯𑀺𑀦𑀬𑀲𑀁𑀯𑀡𑁆𑀡𑀦𑀸 𑁋

𑀢𑀸𑀯 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀺𑀦𑀁;

𑀤𑀲𑁆𑀲𑁂𑀦𑁆𑀢𑀻 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀦𑀬𑀁 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸.

𑀬𑀸𑀯 𑀩𑀼𑀤𑁆𑀥𑁄𑀢𑀺 𑀦𑀸𑀫𑀫𑁆𑀧𑀺, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀮𑁄𑀓𑀫𑁆𑀳𑀺 𑀮𑁄𑀓𑀚𑁂𑀝𑁆𑀞𑀲𑁆𑀲, 𑀧𑀯𑀢𑁆𑀢𑀢𑀺 𑀫𑀳𑁂𑀲𑀺𑀦𑁄𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫

𑀯𑀺𑀦𑀬-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.