𑁩. 𑀧𑀢𑁆𑀢𑀯𑀕𑁆𑀕𑁄

𑁧. 𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁯𑁮. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀧𑀢𑁆𑀢𑀯𑀸𑀡𑀺𑀚𑁆𑀚𑀦𑁆𑀢𑀺 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀯𑀺𑀘𑀭𑀦𑁆𑀢𑀸 𑀧𑀢𑁆𑀢𑀯𑀸𑀡𑀺𑀚𑁆𑀚𑀁 𑀯𑀸 𑀓𑀭𑀺𑀲𑁆𑀲𑀦𑁆𑀢𑀺. 𑀆𑀫𑀢𑁆𑀢𑀺𑀓𑀸𑀧𑀡𑀁 𑀯𑀸𑀢𑀺 𑀅𑀫𑀢𑁆𑀢𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀪𑀸𑀚𑀦𑀸𑀦𑀺, 𑀢𑀸𑀦𑀺 𑀬𑁂𑀲𑀁 𑀪𑀡𑁆𑀟𑀁 𑀢𑁂 𑀆𑀫𑀢𑁆𑀢𑀺𑀓𑀸, 𑀢𑁂𑀲𑀁 𑀆𑀫𑀢𑁆𑀢𑀺𑀓𑀸𑀦𑀁 𑀆𑀧𑀡𑀁 𑀆𑀫𑀢𑁆𑀢𑀺𑀓𑀸𑀧𑀡𑀁, 𑀓𑀼𑀮𑀸𑀮𑀪𑀡𑁆𑀟𑀯𑀸𑀡𑀺𑀚𑀓𑀸𑀧𑀡𑀦𑁆𑀢𑀺 𑀅𑀢𑁆𑀣𑁄.

𑁬𑁦𑁨. 𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸𑀢𑀺 𑀢𑀻𑀡𑀺 𑀧𑀢𑁆𑀢𑀲𑁆𑀲 𑀧𑀫𑀸𑀡𑀸𑀦𑀺. 𑀅𑀟𑁆𑀠𑀸𑀴𑁆𑀳𑀓𑁄𑀤𑀦𑀁 𑀕𑀡𑁆𑀳𑀸𑀢𑀻𑀢𑀺 𑀫𑀕𑀥𑀦𑀸𑀴𑀺𑀬𑀸 𑀤𑁆𑀯𑀺𑀦𑁆𑀦𑀁 𑀢𑀡𑁆𑀟𑀼𑀮𑀦𑀸𑀴𑀻𑀦𑀁 𑀑𑀤𑀦𑀁 𑀕𑀡𑁆𑀳𑀸𑀢𑀺. 𑀫𑀕𑀥𑀦𑀸𑀴𑀺 𑀦𑀸𑀫 𑀅𑀟𑁆𑀠𑀢𑁂𑀭𑀲𑀧𑀮𑀸 𑀳𑁄𑀢𑀻𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀻𑀳𑀴𑀤𑀻𑀧𑁂 𑀧𑀓𑀢𑀺𑀦𑀸𑀴𑀺 𑀫𑀳𑀦𑁆𑀢𑀸, 𑀤𑀫𑀺𑀴𑀦𑀸𑀴𑀺 𑀔𑀼𑀤𑁆𑀤𑀓𑀸, 𑀫𑀕𑀥𑀦𑀸𑀴𑀺 𑀧𑀫𑀸𑀡𑀬𑀼𑀢𑁆𑀢𑀸, 𑀢𑀸𑀬 𑀫𑀕𑀥𑀦𑀸𑀴𑀺𑀬𑀸 𑀤𑀺𑀬𑀟𑁆𑀠𑀦𑀸𑀴𑀺 𑀏𑀓𑀸 𑀲𑀻𑀳𑀴𑀦𑀸𑀴𑀺 𑀳𑁄𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀘𑀢𑀼𑀪𑀸𑀕𑀁 𑀔𑀸𑀤𑀦𑀦𑁆𑀢𑀺 𑀑𑀤𑀦𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑀁 𑀔𑀸𑀤𑀦𑀁, 𑀢𑀁 𑀳𑀢𑁆𑀣𑀳𑀸𑀭𑀺𑀬𑀲𑁆𑀲 𑀫𑀼𑀕𑁆𑀕𑀲𑀽𑀧𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀤𑀼𑀧𑀺𑀬𑀁 𑀩𑁆𑀬𑀜𑁆𑀚𑀦𑀦𑁆𑀢𑀺 𑀢𑀲𑁆𑀲 𑀑𑀤𑀦𑀲𑁆𑀲 𑀅𑀦𑀼𑀭𑀽𑀧𑀁 𑀫𑀘𑁆𑀙𑀫𑀁𑀲𑀲𑀸𑀓𑀨𑀮𑀓𑀴𑀻𑀭𑀸𑀤𑀺𑀩𑁆𑀬𑀜𑁆𑀚𑀦𑀁.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀅𑀦𑀼𑀧𑀳𑀢𑀧𑀼𑀭𑀸𑀡𑀲𑀸𑀮𑀺𑀢𑀡𑁆𑀟𑀼𑀮𑀸𑀦𑀁 𑀲𑀼𑀓𑁄𑀝𑁆𑀝𑀺𑀢𑀧𑀭𑀺𑀲𑀼𑀤𑁆𑀥𑀸𑀦𑀁 𑀤𑁆𑀯𑁂 𑀫𑀕𑀥𑀦𑀸𑀴𑀺𑀬𑁄 𑀕𑀳𑁂𑀢𑁆𑀯𑀸 𑀢𑁂𑀳𑀺 𑀢𑀡𑁆𑀟𑀼𑀮𑁂𑀳𑀺 𑀅𑀦𑀼𑀢𑁆𑀢𑀡𑁆𑀟𑀼𑀮𑀁 𑀅𑀓𑀺𑀮𑀺𑀦𑁆𑀦𑀁 𑀅𑀧𑀺𑀡𑁆𑀟𑀺𑀢𑀁 𑀲𑀼𑀯𑀺𑀲𑀤𑀁 𑀓𑀼𑀦𑁆𑀤𑀫𑀓𑀼𑀴𑀭𑀸𑀲𑀺𑀲𑀤𑀺𑀲𑀁 𑀅𑀯𑀲𑁆𑀲𑀸𑀯𑀺𑀢𑁄𑀤𑀦𑀁 𑀧𑀘𑀺𑀢𑁆𑀯𑀸 𑀦𑀺𑀭𑀯𑀲𑁂𑀲𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀑𑀤𑀦𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑁄 𑀦𑀸𑀢𑀺𑀖𑀦𑁄 𑀦𑀸𑀢𑀺𑀢𑀦𑀼𑀓𑁄 𑀳𑀢𑁆𑀣𑀳𑀸𑀭𑀺𑀬𑁄 𑀲𑀩𑁆𑀩𑀲𑀫𑁆𑀪𑀸𑀭𑀲𑀗𑁆𑀔𑀢𑁄 𑀫𑀼𑀕𑁆𑀕𑀲𑀽𑀧𑁄 𑀧𑀓𑁆𑀔𑀺𑀧𑀺𑀢𑀩𑁆𑀩𑁄. 𑀢𑀢𑁄 𑀆𑀮𑁄𑀧𑀲𑁆𑀲 𑀆𑀮𑁄𑀧𑀲𑁆𑀲 𑀅𑀦𑀼𑀭𑀽𑀧𑀁 𑀬𑀸𑀯𑀘𑀭𑀺𑀫𑀸𑀮𑁄𑀧𑀧𑁆𑀧𑀳𑁄𑀦𑀓𑀁 𑀫𑀘𑁆𑀙𑀫𑀁𑀲𑀸𑀤𑀺𑀩𑁆𑀬𑀜𑁆𑀚𑀦𑀁 𑀧𑀓𑁆𑀔𑀺𑀧𑀺𑀢𑀩𑁆𑀩𑀁, 𑀲𑀧𑁆𑀧𑀺𑀢𑁂𑀮𑀢𑀓𑁆𑀓𑀭𑀲𑀓𑀜𑁆𑀚𑀺𑀓𑀸𑀤𑀻𑀦𑀺 𑀧𑀦 𑀕𑀡𑀦𑀽𑀧𑀕𑀸𑀦𑀺 𑀦 𑀳𑁄𑀦𑁆𑀢𑀺, 𑀢𑀸𑀦𑀺 𑀳𑀺 𑀑𑀤𑀦𑀕𑀢𑀺𑀓𑀸𑀦𑁂𑀯, 𑀦𑁂𑀯 𑀳𑀸𑀧𑁂𑀢𑀼𑀁 𑀦 𑀯𑀟𑁆𑀠𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀏𑀯𑀫𑁂𑀢𑀁 𑀲𑀩𑁆𑀩𑀫𑁆𑀧𑀺 𑀧𑀓𑁆𑀔𑀺𑀢𑁆𑀢𑀁 𑀲𑀘𑁂 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀸 𑀳𑁂𑀝𑁆𑀞𑀺𑀫𑀭𑀸𑀚𑀺𑀲𑀫𑀁 𑀢𑀺𑀝𑁆𑀞𑀢𑀺, 𑀲𑀼𑀢𑁆𑀢𑁂𑀦 𑀯𑀸 𑀳𑀻𑀭𑁂𑀦 𑀯𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀸 𑀳𑀻𑀭𑀲𑁆𑀲 𑀯𑀸 𑀳𑁂𑀝𑁆𑀞𑀺𑀫𑀦𑁆𑀢𑀁 𑀨𑀼𑀲𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀅𑀢𑀺𑀓𑁆𑀓𑀫𑁆𑀫 𑀣𑀽𑀧𑀻𑀓𑀢𑀁 𑀢𑀺𑀝𑁆𑀞𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑁄𑀫𑀓𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀅𑀦𑁆𑀢𑁄𑀕𑀢𑀫𑁂𑀯 𑀳𑁄𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀦𑀸𑀫 𑀧𑀢𑁆𑀢𑁄.

𑀦𑀸𑀴𑀺𑀓𑁄𑀤𑀦𑀦𑁆𑀢𑀺 𑀫𑀕𑀥𑀦𑀸𑀴𑀺𑀬𑀸 𑀏𑀓𑀸𑀬 𑀢𑀡𑁆𑀟𑀼𑀮𑀦𑀸𑀴𑀺𑀬𑀸 𑀑𑀤𑀦𑀁. 𑀧𑀢𑁆𑀣𑁄𑀤𑀦𑀦𑁆𑀢𑀺 𑀫𑀕𑀥𑀦𑀸𑀴𑀺𑀬𑀸 𑀉𑀧𑀟𑁆𑀠𑀦𑀸𑀴𑀺𑀓𑁄𑀤𑀦𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀦𑀸𑀫𑀫𑀢𑁆𑀢𑁂 𑀯𑀺𑀲𑁂𑀲𑁄 𑁋 𑀲𑀘𑁂 𑀦𑀸𑀴𑀺𑀓𑁄𑀤𑀦𑀸𑀤𑀺 𑀲𑀩𑁆𑀩𑀫𑁆𑀧𑀺 𑀧𑀓𑁆𑀔𑀺𑀢𑁆𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑁂𑀝𑁆𑀞𑀺𑀫𑀭𑀸𑀚𑀺𑀲𑀫𑀁 𑀢𑀺𑀝𑁆𑀞𑀢𑀺, 𑀅𑀬𑀁 𑀫𑀚𑁆𑀛𑀺𑀫𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀅𑀢𑀺𑀓𑁆𑀓𑀫𑁆𑀫 𑀣𑀽𑀧𑀻𑀓𑀢𑀁 𑀢𑀺𑀝𑁆𑀞𑀢𑀺, 𑀅𑀬𑀁 𑀫𑀚𑁆𑀛𑀺𑀫𑁄𑀫𑀓𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺 𑀅𑀦𑁆𑀢𑁄𑀕𑀢𑀫𑁂𑀯 𑀳𑁄𑀢𑀺, 𑀅𑀬𑀁 𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀧𑀢𑁆𑀣𑁄𑀤𑀦𑀸𑀤𑀺 𑀲𑀩𑁆𑀩𑀫𑁆𑀧𑀺 𑀧𑀓𑁆𑀔𑀺𑀢𑁆𑀢𑀁 𑀳𑁂𑀝𑁆𑀞𑀺𑀫𑀭𑀸𑀚𑀺𑀲𑀫𑀁 𑀢𑀺𑀝𑁆𑀞𑀢𑀺, 𑀅𑀬𑀁 𑀑𑀫𑀓𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀅𑀢𑀺𑀓𑁆𑀓𑀫𑁆𑀫 𑀣𑀽𑀧𑀻𑀓𑀢𑀁 𑀢𑀺𑀝𑁆𑀞𑀢𑀺, 𑀅𑀬𑀁 𑀑𑀫𑀓𑁄𑀫𑀓𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀦 𑀧𑀸𑀧𑀼𑀡𑀸𑀢𑀺 𑀅𑀦𑁆𑀢𑁄𑀕𑀢𑀫𑁂𑀯 𑀳𑁄𑀢𑀺, 𑀅𑀬𑀁 𑀑𑀫𑀓𑀼𑀓𑁆𑀓𑀝𑁆𑀞𑁄 𑀦𑀸𑀫 𑀧𑀢𑁆𑀢𑁄𑀢𑀺 𑀏𑀯𑀫𑁂𑀢𑁂 𑀦𑀯 𑀧𑀢𑁆𑀢𑀸. 𑀢𑁂𑀲𑀼 𑀤𑁆𑀯𑁂 𑀅𑀧𑀢𑁆𑀢𑀸 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀘 𑀑𑀫𑀓𑁄𑀫𑀓𑁄 𑀘. ‘‘𑀢𑀢𑁄 𑀉𑀓𑁆𑀓𑀝𑁆𑀞𑁄 𑀅𑀧𑀢𑁆𑀢𑁄 𑀑𑀫𑀓𑁄 𑀅𑀧𑀢𑁆𑀢𑁄’’𑀢𑀺 𑀇𑀤𑀜𑁆𑀳𑀺 𑀏𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀳𑀺 𑀏𑀢𑁆𑀣 𑀉𑀓𑁆𑀓𑀝𑁆𑀞𑀢𑁄 𑀉𑀓𑁆𑀓𑀝𑁆𑀞𑀢𑁆𑀢𑀸 ‘‘𑀢𑀢𑁄 𑀉𑀓𑁆𑀓𑀝𑁆𑀞𑁄 𑀅𑀧𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀑𑀫𑀓𑁄𑀫𑀓𑁄 𑀘 𑀑𑀫𑀓𑀢𑁄 𑀑𑀫𑀓𑀢𑁆𑀢𑀸 𑀢𑀢𑁄 𑀑𑀫𑀓𑁄 𑀅𑀧𑀢𑁆𑀢𑁄𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀏𑀢𑁂 𑀪𑀸𑀚𑀦𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸, 𑀦 𑀅𑀥𑀺𑀝𑁆𑀞𑀸𑀦𑀼𑀧𑀕𑀸, 𑀦 𑀯𑀺𑀓𑀧𑁆𑀧𑀦𑀼𑀧𑀕𑀸. 𑀇𑀢𑀭𑁂 𑀧𑀦 𑀲𑀢𑁆𑀢 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀯𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸, 𑀏𑀯𑀁 𑀅𑀓𑀢𑁆𑀯𑀸 𑀢𑀁 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀢𑀁 𑀲𑀢𑁆𑀢𑀯𑀺𑀥𑀫𑁆𑀧𑀺 𑀧𑀢𑁆𑀢𑀁 𑀤𑀲𑀸𑀳𑀧𑀭𑀫𑀁 𑀓𑀸𑀮𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑁬𑁦𑁭. 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀢𑁆𑀢𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀥𑁄𑀢𑁂 𑀤𑀼𑀓𑁆𑀓𑀝𑀁, 𑀔𑀜𑁆𑀚𑀓𑀁 𑀔𑀸𑀤𑀺𑀢𑁆𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀥𑁄𑀢𑁂 𑀤𑀼𑀓𑁆𑀓𑀝𑀦𑁆𑀢𑀺 𑀏𑀯𑀁 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁.

𑁬𑁦𑁮. 𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀧𑀫𑀸𑀡𑀬𑀼𑀢𑁆𑀢𑀲𑁆𑀲𑀧𑀺 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀼𑀧𑀕𑀢𑁆𑀢𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀅𑀬𑁄𑀧𑀢𑁆𑀢𑁄 𑀧𑀜𑁆𑀘𑀳𑀺 𑀧𑀸𑀓𑁂𑀳𑀺 𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀤𑁆𑀯𑀻𑀳𑀺 𑀧𑀸𑀓𑁂𑀳𑀺 𑀧𑀓𑁆𑀓𑁄 𑀅𑀥𑀺𑀝𑁆𑀞𑀸𑀦𑀼𑀧𑀕𑁄, 𑀉𑀪𑁄𑀧𑀺 𑀬𑀁 𑀫𑀽𑀮𑀁 𑀤𑀸𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀤𑀺𑀦𑁆𑀦𑁂𑀬𑁂𑀯. 𑀲𑀘𑁂 𑀏𑀓𑁄𑀧𑀺 𑀧𑀸𑀓𑁄 𑀊𑀦𑁄 𑀳𑁄𑀢𑀺, 𑀓𑀸𑀓𑀡𑀺𑀓𑀫𑀢𑁆𑀢𑀫𑁆𑀧𑀺 𑀯𑀸 𑀫𑀽𑀮𑀁 𑀅𑀤𑀺𑀦𑁆𑀦𑀁, 𑀦 𑀅𑀥𑀺𑀝𑁆𑀞𑀸𑀦𑀼𑀧𑀕𑁄. 𑀲𑀘𑁂𑀧𑀺 𑀧𑀢𑁆𑀢𑀲𑀸𑀫𑀺𑀓𑁄 𑀯𑀤𑀢𑀺 ‘‘𑀬𑀤𑀸 𑀢𑀼𑀫𑁆𑀳𑀸𑀓𑀁 𑀫𑀽𑀮𑀁 𑀪𑀯𑀺𑀲𑁆𑀲𑀢𑀺, 𑀢𑀤𑀸 𑀤𑀲𑁆𑀲𑀣, 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀦𑁂𑀯 𑀅𑀥𑀺𑀝𑁆𑀞𑀸𑀦𑀼𑀧𑀕𑁄 𑀳𑁄𑀢𑀺, 𑀧𑀸𑀓𑀲𑁆𑀲 𑀳𑀺 𑀊𑀦𑀢𑁆𑀢𑀸 𑀧𑀢𑁆𑀢𑀲𑀗𑁆𑀔𑀁 𑀦 𑀕𑀘𑁆𑀙𑀢𑀺, 𑀫𑀽𑀮𑀲𑁆𑀲 𑀲𑀓𑀮𑀲𑁆𑀲 𑀯𑀸 𑀏𑀓𑀤𑁂𑀲𑀲𑁆𑀲 𑀯𑀸 𑀅𑀤𑀺𑀦𑁆𑀦𑀢𑁆𑀢𑀸 𑀲𑀓𑀪𑀸𑀯𑀁 𑀦 𑀉𑀧𑁂𑀢𑀺, 𑀅𑀜𑁆𑀜𑀲𑁆𑀲𑁂𑀯 𑀲𑀦𑁆𑀢𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀸𑀓𑁂 𑀘 𑀫𑀽𑀮𑁂 𑀘 𑀦𑀺𑀝𑁆𑀞𑀺𑀢𑁂𑀬𑁂𑀯 𑀅𑀥𑀺𑀝𑁆𑀞𑀸𑀦𑀼𑀧𑀕𑁄 𑀳𑁄𑀢𑀺. 𑀬𑁄 𑀅𑀥𑀺𑀝𑁆𑀞𑀸𑀦𑀼𑀧𑀕𑁄, 𑀲𑁆𑀯𑁂𑀯 𑀯𑀺𑀓𑀧𑁆𑀧𑀦𑀼𑀧𑀕𑁄, 𑀲𑁄 𑀳𑀢𑁆𑀣𑀁 𑀆𑀕𑀢𑁄𑀧𑀺 𑀅𑀦𑀸𑀕𑀢𑁄𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑁄 𑀯𑀺𑀓𑀧𑁆𑀧𑁂𑀢𑀩𑁆𑀩𑁄 𑀯𑀸. 𑀬𑀤𑀺 𑀳𑀺 𑀧𑀢𑁆𑀢𑀓𑀸𑀭𑀓𑁄 𑀫𑀽𑀮𑀁 𑀮𑀪𑀺𑀢𑁆𑀯𑀸 𑀲𑀬𑀁 𑀯𑀸 𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀓𑀢𑁆𑀯𑀸 𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀧𑀘𑀺𑀢𑁆𑀯𑀸 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀪𑀺𑀓𑁆𑀔𑀼 𑀘 𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀤𑀺𑀯𑀲𑀢𑁄 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀦 𑀧𑀢𑁆𑀢𑀓𑀸𑀭𑀓𑁄 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀓𑀢𑁆𑀯𑀸 𑀧𑀘𑀺𑀢𑁆𑀯𑀸 𑀲𑀸𑀲𑀦𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀣𑁂𑀯 𑀓𑀭𑁄𑀢𑀺, 𑀢𑁂𑀦 𑀧𑁂𑀲𑀺𑀢𑀪𑀺𑀓𑁆𑀔𑀼 𑀧𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦 𑀆𑀭𑁄𑀘𑁂𑀢𑀺, 𑀅𑀜𑁆𑀜𑁄 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 ‘‘𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀧𑀢𑁆𑀢𑁄 𑀦𑀺𑀝𑁆𑀞𑀺𑀢𑁄’’𑀢𑀺 𑀆𑀭𑁄𑀘𑁂𑀢𑀺, 𑀏𑀢𑀲𑁆𑀲 𑀆𑀭𑁄𑀘𑀦𑀁 𑀦𑀧𑀫𑀸𑀡𑀁. 𑀬𑀤𑀸 𑀧𑀦 𑀢𑁂𑀦 𑀧𑁂𑀲𑀺𑀢𑁄𑀬𑁂𑀯 𑀆𑀭𑁄𑀘𑁂𑀢𑀺, 𑀢𑀲𑁆𑀲 𑀯𑀘𑀦𑀁 𑀲𑀼𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀢𑁆𑀢𑀓𑀸𑀭𑀓𑁄 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀓𑀢𑁆𑀯𑀸 𑀧𑀘𑀺𑀢𑁆𑀯𑀸 𑀓𑀲𑁆𑀲𑀘𑀺 𑀳𑀢𑁆𑀣𑁂 𑀧𑀳𑀺𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀣𑁂𑀯 𑀓𑀭𑁄𑀢𑀺, 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀕𑀢𑀪𑀺𑀓𑁆𑀔𑀼 𑀧𑀦 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑁂 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀦 𑀆𑀭𑁄𑀘𑁂𑀢𑀺, 𑀅𑀜𑁆𑀜𑁄 𑀓𑁄𑀘𑀺 𑀪𑀡𑀢𑀺 ‘‘𑀅𑀧𑀺, 𑀪𑀦𑁆𑀢𑁂, 𑀅𑀥𑀼𑀦𑀸 𑀆𑀪𑀢𑁄 𑀧𑀢𑁆𑀢𑁄 𑀲𑀼𑀦𑁆𑀤𑀭𑁄’’𑀢𑀺! ‘‘𑀓𑀼𑀳𑀺𑀁, 𑀆𑀯𑀼𑀲𑁄, 𑀧𑀢𑁆𑀢𑁄’’𑀢𑀺? ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀳𑀢𑁆𑀣𑁂 𑀧𑁂𑀲𑀺𑀢𑁄’’𑀢𑀺. 𑀏𑀢𑀲𑁆𑀲𑀧𑀺 𑀯𑀘𑀦𑀁 𑀦 𑀧𑀫𑀸𑀡𑀁. 𑀬𑀤𑀸 𑀧𑀦 𑀲𑁄 𑀪𑀺𑀓𑁆𑀔𑀼 𑀧𑀢𑁆𑀢𑀁 𑀤𑁂𑀢𑀺, 𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀲𑁆𑀫𑀸 𑀤𑀲𑀸𑀳𑀁 𑀅𑀦𑀢𑀺𑀓𑁆𑀓𑀸𑀫𑁂𑀢𑁆𑀯𑀸𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑁄 𑀯𑀺𑀓𑀧𑁆𑀧𑁂𑀢𑀩𑁆𑀩𑁄 𑀯𑀸.

𑀢𑀢𑁆𑀣 𑀤𑁆𑀯𑁂 𑀧𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀸 𑁋 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑀸𑀢𑀺, 𑀯𑀸𑀘𑀸𑀬 𑀯𑀸 𑀅𑀥𑀺𑀝𑁆𑀞𑀸𑀢𑀺. 𑀢𑁂𑀲𑀁 𑀯𑀲𑁂𑀦 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀘 ‘‘𑀇𑀫𑀁 𑀧𑀢𑁆𑀢𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀯𑀸 ‘‘𑀏𑀢𑀁 𑀧𑀢𑁆𑀢𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀯𑀸 𑀏𑀯𑀁 𑀲𑀫𑁆𑀫𑀼𑀔𑁂 𑀯𑀸 𑀧𑀭𑀫𑁆𑀫𑀼𑀔𑁂 𑀯𑀸 𑀞𑀺𑀢𑀁 𑀧𑀼𑀭𑀸𑀡𑀧𑀢𑁆𑀢𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀯𑀸 𑀤𑀢𑁆𑀯𑀸 𑀦𑀯𑀁 𑀧𑀢𑁆𑀢𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀁 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 ‘‘𑀇𑀫𑀁 𑀧𑀢𑁆𑀢𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀆𑀪𑁄𑀕𑀁 𑀓𑀢𑁆𑀯𑀸 𑀓𑀸𑀬𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁂𑀦 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑁄, 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸𑀘𑀸𑀬 𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑁄. 𑀢𑀢𑁆𑀭 𑀤𑀼𑀯𑀺𑀥𑀁 𑀅𑀥𑀺𑀝𑁆𑀞𑀸𑀦𑀁 𑁋 𑀲𑀘𑁂 𑀳𑀢𑁆𑀣𑀧𑀸𑀲𑁂 𑀳𑁄𑀢𑀺 ‘‘𑀇𑀫𑀁 𑀧𑀢𑁆𑀢𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀅𑀣 𑀅𑀦𑁆𑀢𑁄𑀕𑀩𑁆𑀪𑁂 𑀯𑀸 𑀉𑀧𑀭𑀺𑀧𑀸𑀲𑀸𑀤𑁂 𑀯𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀯𑀸 𑀳𑁄𑀢𑀺, 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀢𑀁 𑀧𑀢𑁆𑀢𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸.

𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀧𑀦 𑀏𑀓𑀓𑁂𑀦 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀅𑀬𑀫𑀸𑀦𑀺𑀲𑀁𑀲𑁄 𑁋 𑀲𑀘𑀲𑁆𑀲 ‘‘𑀅𑀥𑀺𑀝𑁆𑀞𑀺𑀢𑁄 𑀦𑀼 𑀔𑁄 𑀫𑁂, 𑀦𑁄’’𑀢𑀺 𑀯𑀺𑀫𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀭𑁄 𑀲𑀸𑀭𑁂𑀢𑁆𑀯𑀸 𑀯𑀺𑀫𑀢𑀺𑀁 𑀙𑀺𑀦𑁆𑀤𑀺𑀲𑁆𑀲𑀢𑀻𑀢𑀺. 𑀲𑀘𑁂 𑀓𑁄𑀘𑀺 𑀤𑀲 𑀧𑀢𑁆𑀢𑁂 𑀮𑀪𑀺𑀢𑁆𑀯𑀸 𑀲𑀩𑁆𑀩𑁂𑀯 𑀅𑀢𑁆𑀢𑀦𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦 𑀲𑀩𑁆𑀩𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. 𑀏𑀓𑀁 𑀧𑀢𑁆𑀢𑀁 𑀅𑀥𑀺𑀝𑁆𑀞𑀸𑀬 𑀧𑀼𑀦𑀤𑀺𑀯𑀲𑁂 𑀢𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀅𑀜𑁆𑀜𑁄 𑀅𑀥𑀺𑀝𑁆𑀞𑀸𑀢𑀩𑁆𑀩𑁄. 𑀏𑀢𑁂𑀦𑀼𑀧𑀸𑀬𑁂𑀦 𑀯𑀲𑁆𑀲𑀲𑀢𑀫𑁆𑀧𑀺 𑀧𑀭𑀺𑀳𑀭𑀺𑀢𑀼𑀁 𑀲𑀓𑁆𑀓𑀸.

𑀏𑀯𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀺𑀬𑀸 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀦𑁆𑀢𑀺? 𑀲𑀺𑀬𑀸. 𑀲𑀘𑁂 𑀳𑀺 𑀅𑀬𑀁 𑀧𑀢𑁆𑀢𑀁 𑀅𑀜𑁆𑀜𑀲𑁆𑀲 𑀯𑀸 𑀤𑁂𑀢𑀺, 𑀯𑀺𑀩𑁆𑀪𑀫𑀢𑀺 𑀯𑀸 𑀲𑀺𑀓𑁆𑀔𑀁 𑀯𑀸 𑀧𑀘𑁆𑀘𑀓𑁆𑀔𑀸𑀢𑀺, 𑀓𑀸𑀮𑀁 𑀯𑀸 𑀓𑀭𑁄𑀢𑀺, 𑀮𑀺𑀗𑁆𑀕𑀁 𑀯𑀸𑀲𑁆𑀲 𑀧𑀭𑀺𑀯𑀢𑁆𑀢𑀢𑀺, 𑀧𑀘𑁆𑀘𑀼𑀤𑁆𑀥𑀭𑀢𑀺 𑀯𑀸, 𑀧𑀢𑁆𑀢𑁂 𑀯𑀸 𑀙𑀺𑀤𑁆𑀤𑀁 𑀳𑁄𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀤𑀺𑀦𑁆𑀦𑀯𑀺𑀩𑁆𑀪𑀦𑁆𑀢𑀧𑀘𑁆𑀘𑀓𑁆𑀔𑀸, 𑀓𑀸𑀮𑀁𑀓𑀺𑀭𑀺𑀬𑀓𑀢𑁂𑀦 𑀘;

𑀮𑀺𑀗𑁆𑀕𑀧𑀘𑁆𑀘𑀼𑀤𑁆𑀥𑀭𑀸 𑀘𑁂𑀯, 𑀙𑀺𑀤𑁆𑀤𑁂𑀦 𑀪𑀯𑀢𑀺 𑀲𑀢𑁆𑀢𑀫’’𑀦𑁆𑀢𑀺.

𑀘𑁄𑀭𑀳𑀭𑀡𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀳𑀺𑀧𑀺 𑀯𑀺𑀚𑀳𑀢𑀺𑀬𑁂𑀯. 𑀓𑀺𑀢𑁆𑀢𑀓𑁂𑀦 𑀙𑀺𑀤𑁆𑀤𑁂𑀦 𑀅𑀥𑀺𑀝𑁆𑀞𑀸𑀦𑀁 𑀪𑀺𑀚𑁆𑀚𑀢𑀺? 𑀬𑁂𑀦 𑀓𑀗𑁆𑀕𑀼𑀲𑀺𑀢𑁆𑀣𑀁 𑀦𑀺𑀓𑁆𑀔𑀫𑀢𑀺 𑀘𑁂𑀯 𑀧𑀯𑀺𑀲𑀢𑀺 𑀘. 𑀇𑀤𑀜𑁆𑀳𑀺 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀮𑀸𑀫𑀓𑀥𑀜𑁆𑀜𑀲𑀺𑀢𑁆𑀣𑀁, 𑀢𑀲𑁆𑀫𑀺𑀁 𑀅𑀬𑀘𑀼𑀡𑁆𑀡𑁂𑀦 𑀯𑀸 𑀆𑀡𑀺𑀬𑀸 𑀯𑀸 𑀧𑀝𑀺𑀧𑀸𑀓𑀢𑀺𑀓𑁂 𑀓𑀢𑁂 𑀤𑀲𑀸𑀳𑀩𑁆𑀪𑀦𑁆𑀢𑀭𑁂 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑁄. 𑀅𑀬𑀁 𑀢𑀸𑀯 ‘‘𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀏𑀢𑁆𑀣 𑀅𑀥𑀺𑀝𑁆𑀞𑀸𑀦𑁂 𑀯𑀺𑀦𑀺𑀘𑁆𑀙𑀬𑁄.

𑀯𑀺𑀓𑀧𑁆𑀧𑀦𑁂 𑀧𑀦 𑀤𑁆𑀯𑁂 𑀯𑀺𑀓𑀧𑁆𑀧𑀦𑀸 𑁋 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀘 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀘. 𑀓𑀣𑀁 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀳𑁄𑀢𑀺? 𑀧𑀢𑁆𑀢𑀸𑀦𑀁 𑀏𑀓𑀩𑀳𑀼𑀪𑀸𑀯𑀁 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀜𑁆𑀘 𑀜𑀢𑁆𑀯𑀸 ‘‘𑀇𑀫𑀁 𑀧𑀢𑁆𑀢’’𑀦𑁆𑀢𑀺 𑀯𑀸 ‘‘𑀇𑀫𑁂 𑀧𑀢𑁆𑀢𑁂’’𑀢𑀺 𑀯𑀸 ‘‘𑀏𑀢𑀁 𑀧𑀢𑁆𑀢’’𑀦𑁆𑀢𑀺 𑀯𑀸 ‘‘𑀏𑀢𑁂 𑀧𑀢𑁆𑀢𑁂’’𑀢𑀺 𑀯𑀸 𑀯𑀢𑁆𑀯𑀸 ‘‘𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀬𑀫𑁂𑀓𑀸 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸. 𑀏𑀢𑁆𑀢𑀸𑀯𑀢𑀸 𑀦𑀺𑀥𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀸 𑀅𑀥𑀺𑀝𑁆𑀞𑀸𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺. ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑀏𑀯𑀁 𑀧𑀦 𑀯𑀼𑀢𑁆𑀢𑁂 𑀧𑀘𑁆𑀘𑀼𑀤𑁆𑀥𑀸𑀭𑁄 𑀦𑀸𑀫 𑀳𑁄𑀢𑀺, 𑀢𑀢𑁄𑀧𑀪𑀼𑀢𑀺 𑀧𑀭𑀺𑀪𑁄𑀕𑀸𑀤𑀬𑁄𑀧𑀺 𑀯𑀝𑁆𑀝𑀦𑁆𑀢𑀺.

𑀅𑀧𑀭𑁄 𑀦𑀬𑁄 𑁋 𑀢𑀣𑁂𑀯 𑀧𑀢𑁆𑀢𑀸𑀦𑀁 𑀏𑀓𑀩𑀳𑀼𑀪𑀸𑀯𑀁 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀜𑁆𑀘 𑀜𑀢𑁆𑀯𑀸 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 ‘‘𑀇𑀫𑀁 𑀧𑀢𑁆𑀢’’𑀦𑁆𑀢𑀺 𑀯𑀸 ‘‘𑀇𑀫𑁂 𑀧𑀢𑁆𑀢𑁂’’𑀢𑀺 𑀯𑀸 ‘‘𑀏𑀢𑀁 𑀧𑀢𑁆𑀢’’𑀦𑁆𑀢𑀺 𑀯𑀸 ‘‘𑀏𑀢𑁂 𑀧𑀢𑁆𑀢𑁂’’𑀢𑀺 𑀯𑀸 𑀯𑀢𑁆𑀯𑀸 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀅𑀜𑁆𑀜𑀢𑀭𑀲𑁆𑀲 𑀅𑀢𑁆𑀢𑀦𑀸 𑀅𑀪𑀺𑀭𑀼𑀘𑀺𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀸𑀫𑀁 𑀕𑀳𑁂𑀢𑁆𑀯𑀸 ‘‘𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀸 ‘‘𑀢𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀲𑁆𑀲 𑀢𑀺𑀲𑁆𑀲𑀸𑀬 𑀲𑀸𑀫𑀡𑁂𑀭𑀺𑀬𑀸 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁, 𑀅𑀬𑀁 𑀅𑀧𑀭𑀸𑀧𑀺 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸. 𑀏𑀢𑁆𑀢𑀸𑀯𑀢𑀸 𑀦𑀺𑀥𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀭𑀺𑀪𑁄𑀕𑀸𑀤𑀻𑀲𑀼 𑀧𑀦 𑀏𑀓𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 ‘‘𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀓𑀁…𑀧𑁂… 𑀢𑀺𑀲𑁆𑀲𑀸𑀬 𑀲𑀸𑀫𑀡𑁂𑀭𑀺𑀬𑀸 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀘𑁆𑀘𑀼𑀤𑁆𑀥𑀸𑀭𑁄 𑀦𑀸𑀫 𑀳𑁄𑀢𑀺. 𑀢𑀢𑁄𑀧𑀪𑀼𑀢𑀺 𑀧𑀭𑀺𑀪𑁄𑀕𑀸𑀤𑀬𑁄𑀧𑀺 𑀯𑀝𑁆𑀝𑀦𑁆𑀢𑀺.

𑀓𑀣𑀁 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀳𑁄𑀢𑀺? 𑀧𑀢𑁆𑀢𑀸𑀦𑀁 𑀢𑀣𑁂𑀯 𑀏𑀓𑀩𑀳𑀼𑀪𑀸𑀯𑀁 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀜𑁆𑀘 𑀜𑀢𑁆𑀯𑀸 ‘‘𑀇𑀫𑀁 𑀧𑀢𑁆𑀢’’𑀦𑁆𑀢𑀺 𑀯𑀸 ‘‘𑀇𑀫𑁂 𑀧𑀢𑁆𑀢𑁂’’𑀢𑀺 𑀯𑀸 ‘‘𑀏𑀢𑀁 𑀧𑀢𑁆𑀢’’𑀦𑁆𑀢𑀺 𑀯𑀸 ‘‘𑀏𑀢𑁂 𑀧𑀢𑁆𑀢𑁂’’𑀢𑀺 𑀯𑀸 𑀯𑀢𑁆𑀯𑀸 ‘‘𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑀦𑀢𑁆𑀣𑀸𑀬 𑀤𑀫𑁆𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑁂𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑁄 𑀢𑁂 𑀫𑀺𑀢𑁆𑀢𑁄 𑀯𑀸 𑀲𑀦𑁆𑀤𑀺𑀝𑁆𑀞𑁄 𑀯𑀸’’𑀢𑀺? 𑀢𑀢𑁄 𑀇𑀢𑀭𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 ‘‘𑀢𑀺𑀲𑁆𑀲𑁄 𑀪𑀺𑀓𑁆𑀔𑀽𑀢𑀺 𑀯𑀸…𑀧𑁂… 𑀢𑀺𑀲𑁆𑀲𑀸 𑀲𑀸𑀫𑀡𑁂𑀭𑀻’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁. 𑀧𑀼𑀦 𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀅𑀳𑀁 𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀫𑁆𑀫𑀻’’𑀢𑀺 𑀯𑀸…𑀧𑁂… ‘‘𑀢𑀺𑀲𑁆𑀲𑀸𑀬 𑀲𑀸𑀫𑀡𑁂𑀭𑀺𑀬𑀸 𑀤𑀫𑁆𑀫𑀻’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁, 𑀅𑀬𑀁 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸. 𑀏𑀢𑁆𑀢𑀸𑀯𑀢𑁆𑀢𑀸 𑀦𑀺𑀥𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀭𑀺𑀪𑁄𑀕𑀸𑀤𑀻𑀲𑀼 𑀧𑀦 𑀏𑀓𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀤𑀼𑀢𑀺𑀬𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀘𑁆𑀘𑀼𑀤𑁆𑀥𑀸𑀭𑁄 𑀦𑀸𑀫 𑀳𑁄𑀢𑀺. 𑀢𑀢𑁄𑀧𑀪𑀼𑀢𑀺 𑀧𑀭𑀺𑀪𑁄𑀕𑀸𑀤𑀬𑁄𑀧𑀺 𑀯𑀝𑁆𑀝𑀦𑁆𑀢𑀺.

𑀇𑀫𑀸𑀲𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀯𑀺𑀓𑀧𑁆𑀧𑀦𑀸𑀦𑀁 𑀦𑀸𑀦𑀸𑀓𑀭𑀡𑀁, 𑀅𑀯𑀲𑁂𑀲𑁄 𑀘 𑀯𑀘𑀦𑀓𑁆𑀓𑀫𑁄 𑀲𑀩𑁆𑀩𑁄 𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀻𑀢𑀺.

𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁦𑁯. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀦 𑀬𑀸𑀧𑁂𑀢𑀻𑀢𑀺 𑀲𑁄 𑀓𑀺𑀭 𑀬𑀤𑀺 𑀅𑀭𑀺𑀬𑀲𑀸𑀯𑀓𑁄 𑀦𑀸𑀪𑀯𑀺𑀲𑁆𑀲𑀸, 𑀅𑀜𑁆𑀜𑀣𑀢𑁆𑀢𑀫𑁆𑀧𑀺 𑀅𑀕𑀫𑀺𑀲𑁆𑀲𑀸, 𑀏𑀯𑀁 𑀢𑁂𑀳𑀺 𑀉𑀩𑁆𑀩𑀸𑀴𑁆𑀳𑁄, 𑀲𑁄𑀢𑀸𑀧𑀦𑁆𑀦𑀢𑁆𑀢𑀸 𑀧𑀦 𑀓𑁂𑀯𑀮𑀁 𑀲𑀭𑀻𑀭𑁂𑀦𑁂𑀯 𑀦 𑀬𑀸𑀧𑁂𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀢𑀦𑀸𑀧𑀺 𑀦 𑀬𑀸𑀧𑁂𑀢𑀺, 𑀧𑀼𑀢𑁆𑀢𑀤𑀸𑀭𑀸𑀧𑀺𑀲𑁆𑀲 𑀓𑀺𑀮𑀫𑀦𑁆𑀢𑀻’’𑀢𑀺.

𑁬𑁧𑁨-𑁩. 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦𑀸𑀢𑀺 𑀏𑀢𑁆𑀣 𑀊𑀦𑀸𑀦𑀺 𑀧𑀜𑁆𑀘 𑀩𑀦𑁆𑀥𑀦𑀸𑀦𑀺 𑀅𑀲𑁆𑀲𑀸𑀢𑀺 𑀊𑀦𑀧𑀜𑁆𑀘𑀩𑀦𑁆𑀥𑀦𑁄, 𑀦𑀸𑀲𑁆𑀲 𑀧𑀜𑁆𑀘 𑀩𑀦𑁆𑀥𑀦𑀸𑀦𑀺 𑀧𑀽𑀭𑁂𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀢𑁂𑀦 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦. 𑀇𑀢𑁆𑀣𑀫𑁆𑀪𑀽𑀢𑀲𑁆𑀲 𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀢𑀢𑁆𑀣 𑀬𑀲𑁆𑀫𑀸 𑀅𑀩𑀦𑁆𑀥𑀦𑀲𑁆𑀲𑀸𑀧𑀺 𑀧𑀜𑁆𑀘 𑀩𑀦𑁆𑀥𑀦𑀸𑀦𑀺 𑀦 𑀧𑀽𑀭𑁂𑀦𑁆𑀢𑀺, 𑀲𑀩𑁆𑀩𑀲𑁄 𑀦𑀢𑁆𑀣𑀺𑀢𑀸𑀬, 𑀢𑀲𑁆𑀫𑀸 𑀧𑀤𑀪𑀸𑀚𑀦𑁂 ‘‘𑀅𑀩𑀦𑁆𑀥𑀦𑁄 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀬𑀲𑁆𑀲 𑀧𑀜𑁆𑀘𑀩𑀦𑁆𑀥𑀦𑁄 𑀧𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑁄 𑀅𑀧𑀢𑁆𑀢𑁄, 𑀢𑀲𑁆𑀫𑀸 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀩𑀦𑁆𑀥𑀦𑀜𑁆𑀘 𑀦𑀸𑀫𑁂𑀢𑀁 𑀬𑀲𑁆𑀫𑀸 𑀩𑀦𑁆𑀥𑀦𑁄𑀓𑀸𑀲𑁂 𑀲𑀢𑀺 𑀳𑁄𑀢𑀺, 𑀅𑀲𑀢𑀺 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀩𑀦𑁆𑀥𑀦𑁄𑀓𑀸𑀲𑁄 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀤𑁆𑀯𑀗𑁆𑀕𑀼𑀮𑀸 𑀭𑀸𑀚𑀺 𑀦 𑀳𑁄𑀢𑀻𑀢𑀺 𑀫𑀼𑀔𑀯𑀝𑁆𑀝𑀺𑀢𑁄 𑀳𑁂𑀝𑁆𑀞𑀸 𑀤𑁆𑀯𑀗𑁆𑀕𑀼𑀮𑀧𑁆𑀧𑀫𑀸𑀡𑀸 𑀏𑀓𑀸𑀧𑀺 𑀭𑀸𑀚𑀺 𑀦 𑀳𑁄𑀢𑀺. 𑀬𑀲𑁆𑀲 𑀤𑁆𑀯𑀗𑁆𑀕𑀼𑀮𑀸 𑀭𑀸𑀚𑀺 𑀳𑁄𑀢𑀻𑀢𑀺 𑀬𑀲𑁆𑀲 𑀧𑀦 𑀢𑀸𑀤𑀺𑀲𑀸 𑀏𑀓𑀸 𑀭𑀸𑀚𑀺 𑀳𑁄𑀢𑀺, 𑀲𑁄 𑀢𑀲𑁆𑀲𑀸 𑀭𑀸𑀚𑀺𑀬𑀸 𑀳𑁂𑀝𑁆𑀞𑀺𑀫𑀧𑀭𑀺𑀬𑀦𑁆𑀢𑁂 𑀧𑀢𑁆𑀢𑀯𑁂𑀥𑀓𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀲𑀼𑀢𑁆𑀢𑀭𑀚𑁆𑀚𑀼𑀓-𑀫𑀓𑀘𑀺𑀭𑀚𑁆𑀚𑀼𑀓𑀸𑀤𑀻𑀳𑀺 𑀯𑀸 𑀢𑀺𑀧𑀼𑀲𑀼𑀢𑁆𑀢𑀓𑁂𑀦 𑀯𑀸 𑀩𑀦𑁆𑀥𑀺𑀢𑀩𑁆𑀩𑁄, 𑀢𑀁 𑀩𑀦𑁆𑀥𑀦𑀁 𑀆𑀫𑀺𑀲𑀲𑁆𑀲 𑀅𑀮𑀕𑁆𑀕𑀦𑀢𑁆𑀣𑀁 𑀢𑀺𑀧𑀼𑀧𑀝𑁆𑀝𑀓𑁂𑀦 𑀯𑀸 𑀓𑁂𑀦𑀘𑀺 𑀩𑀤𑁆𑀥𑀲𑀺𑀮𑁂𑀲𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁. 𑀲𑁄 𑀘 𑀧𑀢𑁆𑀢𑁄 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄, 𑀲𑀼𑀔𑀼𑀫𑀁 𑀯𑀸 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀩𑁆𑀩𑁄. 𑀲𑀼𑀤𑁆𑀥𑁂𑀳𑀺 𑀧𑀦 𑀫𑀥𑀼𑀲𑀺𑀢𑁆𑀣𑀓𑀮𑀸𑀔𑀸𑀲𑀚𑁆𑀚𑀼𑀮𑀲𑀸𑀤𑀻𑀳𑀺 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀨𑀸𑀡𑀺𑀢𑀁 𑀛𑀸𑀧𑁂𑀢𑁆𑀯𑀸 𑀧𑀸𑀲𑀸𑀡𑀘𑀼𑀡𑁆𑀡𑁂𑀦 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀼𑀔𑀯𑀝𑁆𑀝𑀺𑀲𑀫𑀻𑀧𑁂 𑀧𑀦 𑀧𑀢𑁆𑀢𑀯𑁂𑀥𑀓𑁂𑀦 𑀯𑀺𑀚𑁆𑀛𑀺𑀬𑀫𑀸𑀦𑁄 𑀓𑀧𑀸𑀮𑀲𑁆𑀲 𑀩𑀳𑀮𑀢𑁆𑀢𑀸 𑀪𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀳𑁂𑀝𑁆𑀞𑀸 𑀯𑀺𑀚𑁆𑀛𑀺𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀤𑁆𑀯𑁂 𑀭𑀸𑀚𑀺𑀬𑁄 𑀏𑀓𑀸𑀬𑁂𑀯 𑀯𑀸 𑀘𑀢𑀼𑀭𑀗𑁆𑀕𑀼𑀮𑀸, 𑀢𑀲𑁆𑀲 𑀤𑁆𑀯𑁂 𑀩𑀦𑁆𑀥𑀦𑀸𑀦𑀺 𑀤𑀸𑀢𑀩𑁆𑀩𑀸𑀦𑀺. 𑀬𑀲𑁆𑀲 𑀢𑀺𑀲𑁆𑀲𑁄 𑀏𑀓𑀸𑀬𑁂𑀯 𑀯𑀸 𑀙𑀴𑀗𑁆𑀕𑀼𑀮𑀸, 𑀢𑀲𑁆𑀲 𑀢𑀻𑀡𑀺. 𑀬𑀲𑁆𑀲 𑀘𑀢𑀲𑁆𑀲𑁄 𑀏𑀓𑀸𑀬𑁂𑀯 𑀯𑀸 𑀅𑀝𑁆𑀞𑀗𑁆𑀕𑀼𑀮𑀸, 𑀢𑀲𑁆𑀲 𑀘𑀢𑁆𑀢𑀸𑀭𑀺. 𑀬𑀲𑁆𑀲 𑀧𑀜𑁆𑀘 𑀏𑀓𑀸𑀬𑁂𑀯 𑀯𑀸 𑀤𑀲𑀗𑁆𑀕𑀼𑀮𑀸, 𑀲𑁄 𑀩𑀤𑁆𑀥𑁄𑀧𑀺 𑀅𑀩𑀤𑁆𑀥𑁄𑀧𑀺 𑀅𑀧𑀢𑁆𑀢𑁄𑀬𑁂𑀯, 𑀅𑀜𑁆𑀜𑁄 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄. 𑀏𑀲 𑀢𑀸𑀯 𑀫𑀢𑁆𑀢𑀺𑀓𑀸𑀧𑀢𑁆𑀢𑁂 𑀯𑀺𑀦𑀺𑀘𑁆𑀙𑀬𑁄.

𑀅𑀬𑁄𑀧𑀢𑁆𑀢𑁂 𑀧𑀦 𑀲𑀘𑁂𑀧𑀺 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸𑀦𑀺 𑀯𑀸 𑀙𑀺𑀤𑁆𑀤𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀘𑁂 𑀅𑀬𑀘𑀼𑀡𑁆𑀡𑁂𑀦 𑀯𑀸 𑀆𑀡𑀺𑀬𑀸 𑀯𑀸 𑀮𑁄𑀳𑀫𑀡𑁆𑀟𑀮𑀓𑁂𑀦 𑀯𑀸 𑀩𑀤𑁆𑀥𑀸𑀦𑀺 𑀫𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀲𑁆𑀯𑁂𑀯 𑀧𑀢𑁆𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄, 𑀦 𑀅𑀜𑁆𑀜𑁄 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄. 𑀅𑀣 𑀧𑀦 𑀏𑀓𑀫𑁆𑀧𑀺 𑀙𑀺𑀤𑁆𑀤𑀁 𑀫𑀳𑀦𑁆𑀢𑀁 𑀳𑁄𑀢𑀺, 𑀮𑁄𑀳𑀫𑀡𑁆𑀟𑀮𑀓𑁂𑀦 𑀩𑀤𑁆𑀥𑀫𑁆𑀧𑀺 𑀫𑀝𑁆𑀞𑀁 𑀦 𑀳𑁄𑀢𑀺, 𑀧𑀢𑁆𑀢𑁂 𑀆𑀫𑀺𑀲𑀁 𑀮𑀕𑁆𑀕𑀢𑀺, 𑀅𑀓𑀧𑁆𑀧𑀺𑀬𑁄 𑀳𑁄𑀢𑀺, 𑀅𑀬𑀁 𑀅𑀧𑀢𑁆𑀢𑁄. 𑀅𑀜𑁆𑀜𑁄 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄.

𑁬𑁧𑁫. 𑀣𑁂𑀭𑁄 𑀯𑀢𑁆𑀢𑀩𑁆𑀩𑁄𑀢𑀺 𑀧𑀢𑁆𑀢𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀬𑀁, 𑀪𑀦𑁆𑀢𑁂, 𑀧𑀢𑁆𑀢𑁄 𑀧𑀫𑀸𑀡𑀬𑀼𑀢𑁆𑀢𑁄 𑀲𑀼𑀦𑁆𑀤𑀭𑁄 𑀣𑁂𑀭𑀸𑀦𑀼𑀭𑀽𑀧𑁄, 𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀩𑁆𑀩𑁄. 𑀬𑁄 𑀦 𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀦𑀼𑀓𑀫𑁆𑀧𑀸𑀬 𑀦 𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀬𑁄 𑀧𑀦 𑀲𑀦𑁆𑀢𑀼𑀝𑁆𑀞𑀺𑀬𑀸 ‘‘𑀓𑀺𑀁 𑀫𑁂 𑀅𑀜𑁆𑀜𑁂𑀦 𑀧𑀢𑁆𑀢𑁂𑀦𑀸’’𑀢𑀺 𑀦 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀧𑀢𑁆𑀢𑀧𑀭𑀺𑀬𑀦𑁆𑀢𑁄𑀢𑀺 𑀏𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀬𑀦𑁆𑀢𑁂 𑀞𑀺𑀢𑀧𑀢𑁆𑀢𑁄.

𑀦 𑀅𑀤𑁂𑀲𑁂𑀢𑀺 𑀫𑀜𑁆𑀘𑀧𑀻𑀞𑀙𑀢𑁆𑀢𑀦𑀸𑀕𑀤𑀦𑁆𑀢𑀓𑀸𑀤𑀺𑀓𑁂 𑀅𑀤𑁂𑀲𑁂, 𑀦 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀬𑀢𑁆𑀣 𑀧𑀼𑀭𑀺𑀫𑀁 𑀲𑀼𑀦𑁆𑀤𑀭𑀁 𑀧𑀢𑁆𑀢𑀁 𑀞𑀧𑁂𑀢𑀺, 𑀢𑀢𑁆𑀣𑁂𑀯 𑀞𑀧𑁂𑀢𑀩𑁆𑀩𑁄. 𑀧𑀢𑁆𑀢𑀲𑁆𑀲 𑀳𑀺 𑀦𑀺𑀓𑁆𑀔𑀺𑀧𑀦𑀤𑁂𑀲𑁄 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀥𑀸𑀭𑀓’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀔𑀦𑁆𑀥𑀓𑁂 𑀯𑀼𑀢𑁆𑀢𑁄𑀬𑁂𑀯.

𑀦 𑀅𑀪𑁄𑀕𑁂𑀦𑀸𑀢𑀺 𑀬𑀸𑀕𑀼𑀭𑀦𑁆𑀥𑀦𑀭𑀚𑀦𑀧𑀘𑀦𑀸𑀤𑀺𑀦𑀸 𑀅𑀧𑀭𑀺𑀪𑁄𑀕𑁂𑀦 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀦 𑀩𑁆𑀬𑀸𑀥𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁂 𑀅𑀜𑁆𑀜𑀲𑁆𑀫𑀺𑀁 𑀪𑀸𑀚𑀦𑁂 𑀅𑀲𑀢𑀺 𑀫𑀢𑁆𑀢𑀺𑀓𑀸𑀬 𑀮𑀺𑀫𑁆𑀧𑁂𑀢𑁆𑀯𑀸 𑀬𑀸𑀕𑀼𑀁 𑀯𑀸 𑀧𑀘𑀺𑀢𑀼𑀁 𑀉𑀤𑀓𑀁 𑀯𑀸 𑀢𑀸𑀧𑁂𑀢𑀼𑀁 𑀯𑀝𑁆𑀝𑀢𑀺.

𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄𑀢𑀺 𑀅𑀜𑁆𑀜𑀲𑁆𑀲 𑀦 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀸 𑀅𑀜𑁆𑀜𑀁 𑀯𑀭𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀲𑀸𑀭𑀼𑀧𑁆𑀧𑁄, 𑀅𑀬𑀁 𑀣𑁂𑀭𑀲𑁆𑀲𑀸’’𑀢𑀺 𑀕𑀡𑁆𑀳𑀸𑀢𑀺, 𑀯𑀝𑁆𑀝𑀢𑀺. 𑀅𑀜𑁆𑀜𑁄 𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀤𑁂𑀢𑀺, 𑀯𑀝𑁆𑀝𑀢𑀺. ‘‘𑀫𑀬𑁆𑀳𑀫𑁂𑀯 𑀧𑀢𑁆𑀢𑀁 𑀆𑀳𑀭𑀸’’𑀢𑀺 𑀯𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀺.

𑁬𑁧𑁭. 𑀧𑀯𑀸𑀭𑀺𑀢𑀸𑀦𑀦𑁆𑀢𑀺 𑀏𑀢𑁆𑀣 𑀲𑀗𑁆𑀖𑀯𑀲𑁂𑀦 𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀧𑀜𑁆𑀘𑀩𑀦𑁆𑀥𑀦𑁂𑀦𑁂𑀯 𑀯𑀝𑁆𑀝𑀢𑀺. 𑀧𑀼𑀕𑁆𑀕𑀮𑀯𑀲𑁂𑀦 𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦𑀸𑀧𑀺 𑀯𑀝𑁆𑀝𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁧𑁮. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀅𑀢𑁆𑀣𑁄, 𑀪𑀦𑁆𑀢𑁂𑀢𑀺 𑀭𑀸𑀚𑀸 𑀪𑀺𑀓𑁆𑀔𑀽 𑀉𑀬𑁆𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁂 𑀣𑁂𑀭𑀲𑁆𑀲 𑀮𑁂𑀡𑀢𑁆𑀣𑀸𑀬 𑀧𑀩𑁆𑀪𑀸𑀭𑀁 𑀲𑁄𑀥𑁂𑀦𑁆𑀢𑁂 𑀤𑀺𑀲𑁆𑀯𑀸 𑀆𑀭𑀸𑀫𑀺𑀓𑀁 𑀤𑀸𑀢𑀼𑀓𑀸𑀫𑁄 𑀧𑀼𑀘𑁆𑀙𑀺.

𑁬𑁧𑁯-𑁨𑁧. 𑀧𑀸𑀝𑀺𑀬𑁂𑀓𑁆𑀓𑁄𑀢𑀺 𑀯𑀺𑀲𑀼𑀁 𑀏𑀓𑁄. 𑀫𑀸𑀮𑀸𑀓𑀺𑀢𑁂𑀢𑀺 𑀓𑀢𑀫𑀸𑀮𑁂 𑀫𑀸𑀮𑀸𑀥𑀭𑁂, 𑀓𑀼𑀲𑀼𑀫𑀫𑀸𑀮𑀸𑀧𑀝𑀺𑀫𑀡𑁆𑀟𑀺𑀢𑁂𑀢𑀺 𑀅𑀢𑁆𑀣𑁄. 𑀢𑀺𑀡𑀡𑁆𑀟𑀼𑀧𑀓𑀦𑁆𑀢𑀺 𑀢𑀺𑀡𑀘𑀼𑀫𑁆𑀩𑀝𑀓𑀁. 𑀧𑀝𑀺𑀫𑀼𑀜𑁆𑀘𑀻𑀢𑀺 𑀞𑀧𑁂𑀲𑀺. 𑀲𑀸 𑀅𑀳𑁄𑀲𑀺 𑀲𑀼𑀯𑀡𑁆𑀡𑀫𑀸𑀮𑀸𑀢𑀺 𑀤𑀸𑀭𑀺𑀓𑀸𑀬 𑀲𑀻𑀲𑁂 𑀞𑀧𑀺𑀢𑀫𑀢𑁆𑀢𑀸𑀬𑁂𑀯 𑀣𑁂𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀲𑀼𑀯𑀡𑁆𑀡𑀧𑀤𑀼𑀫𑀫𑀸𑀮𑀸 𑀅𑀳𑁄𑀲𑀺. 𑀢𑀜𑁆𑀳𑀺 𑀢𑀺𑀡𑀡𑁆𑀟𑀼𑀧𑀓𑀁 𑀲𑀻𑀲𑁂 𑀞𑀧𑀺𑀢𑀫𑀢𑁆𑀢𑀫𑁂𑀯 ‘‘𑀲𑀼𑀯𑀡𑁆𑀡𑀫𑀸𑀮𑀸 𑀳𑁄𑀢𑀽’’𑀢𑀺 𑀣𑁂𑀭𑁄 𑀅𑀥𑀺𑀝𑁆𑀞𑀸𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂…. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀤𑀼𑀢𑀺𑀬𑀤𑀺𑀯𑀲𑁂𑀬𑁂𑀯 𑀉𑀧𑀲𑀗𑁆𑀓𑀫𑀺.

𑀲𑀼𑀯𑀡𑁆𑀡𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀻𑀢𑀺 ‘‘𑀲𑁄𑀯𑀡𑁆𑀡𑀫𑀬𑁄 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀧𑀜𑁆𑀘𑀦𑁆𑀦𑀁 𑀪𑁂𑀲𑀚𑁆𑀚𑀸𑀦𑀦𑁆𑀢𑀺 𑀲𑀧𑁆𑀧𑀺𑀆𑀤𑀻𑀦𑀁. 𑀩𑀸𑀳𑀼𑀮𑀺𑀓𑀸𑀢𑀺 𑀧𑀘𑁆𑀘𑀬𑀩𑀸𑀳𑀼𑀮𑀺𑀓𑀢𑀸𑀬 𑀧𑀝𑀺𑀧𑀦𑁆𑀦𑀸. 𑀓𑁄𑀮𑀫𑁆𑀩𑁂𑀧𑀺 𑀖𑀝𑁂𑀧𑀻𑀢𑀺𑀏𑀢𑁆𑀣 𑀓𑁄𑀮𑀫𑁆𑀩𑀸 𑀦𑀸𑀫 𑀫𑀳𑀸𑀫𑀼𑀔𑀘𑀸𑀝𑀺𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀑𑀮𑀻𑀦𑀯𑀺𑀮𑀻𑀦𑀸𑀦𑀻𑀢𑀺 𑀳𑁂𑀝𑁆𑀞𑀸 𑀘 𑀉𑀪𑀢𑁄𑀧𑀲𑁆𑀲𑁂𑀲𑀼 𑀘 𑀕𑀴𑀺𑀢𑀸𑀦𑀺. 𑀑𑀓𑀺𑀡𑁆𑀡𑀯𑀺𑀓𑀺𑀡𑁆𑀡𑀸𑀢𑀺 𑀲𑀧𑁆𑀧𑀺𑀆𑀤𑀻𑀦𑀁 𑀕𑀦𑁆𑀥𑁂𑀦 𑀪𑀽𑀫𑀺𑀁 𑀔𑀦𑀦𑁆𑀢𑁂𑀳𑀺 𑀑𑀓𑀺𑀡𑁆𑀡𑀸, 𑀪𑀺𑀢𑁆𑀢𑀺𑀬𑁄 𑀔𑀦𑀦𑁆𑀢𑁂𑀳𑀺 𑀉𑀧𑀭𑀺 𑀲𑀜𑁆𑀘𑀭𑀦𑁆𑀢𑁂𑀳𑀺 𑀘 𑀯𑀺𑀓𑀺𑀡𑁆𑀡𑀸. 𑀅𑀦𑁆𑀢𑁄𑀓𑁄𑀝𑁆𑀞𑀸𑀕𑀸𑀭𑀺𑀓𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀲𑀁𑀯𑀺𑀳𑀺𑀢𑀓𑁄𑀝𑁆𑀞𑀸𑀕𑀸𑀭𑀸.

𑁬𑁨𑁨. 𑀧𑀝𑀺𑀲𑀸𑀬𑀦𑀻𑀬𑀸𑀦𑀻𑀢𑀺 𑀧𑀝𑀺𑀲𑀸𑀬𑀺𑀢𑀩𑁆𑀩𑀸𑀦𑀺, 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀪𑁂𑀲𑀚𑁆𑀚𑀸𑀦𑀻𑀢𑀺 𑀪𑁂𑀲𑀚𑁆𑀚𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀼 𑀯𑀸 𑀫𑀸 𑀯𑀸, 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀸𑀦𑀺. ‘‘𑀕𑁄𑀲𑀧𑁆𑀧𑀻’’𑀢𑀺𑀆𑀤𑀻𑀳𑀺 𑀮𑁄𑀓𑁂 𑀧𑀸𑀓𑀝𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀻’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑁂𑀲𑀫𑁆𑀧𑀺 𑀫𑀺𑀕𑀭𑁄𑀳𑀺𑀢𑀲𑀲𑀸𑀤𑀻𑀦𑀁 𑀲𑀧𑁆𑀧𑀺𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀬𑁂𑀲𑀜𑁆𑀳𑀺 𑀔𑀻𑀭𑀁 𑀅𑀢𑁆𑀣𑀺, 𑀲𑀧𑁆𑀧𑀺𑀧𑀺 𑀢𑁂𑀲𑀁 𑀅𑀢𑁆𑀣𑀺𑀬𑁂𑀯, 𑀢𑀁 𑀧𑀦 𑀲𑀼𑀮𑀪𑀁 𑀯𑀸 𑀳𑁄𑀢𑀼 𑀤𑀼𑀮𑁆𑀮𑀪𑀁 𑀯𑀸, 𑀅𑀲𑀫𑁆𑀫𑁄𑀳𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀯𑀁 𑀦𑀯𑀦𑀻𑀢𑀫𑁆𑀧𑀺.

𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸 𑀦𑀺𑀤𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺. 𑀓𑀣𑀁? 𑀧𑀸𑀴𑀺𑀬𑀸 𑀆𑀕𑀢𑀲𑀧𑁆𑀧𑀺𑀆𑀤𑀻𑀲𑀼 𑀲𑀧𑁆𑀧𑀺 𑀢𑀸𑀯 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀦𑀺𑀭𑀸𑀫𑀺𑀲𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀲𑀘𑁂 𑀏𑀓𑀪𑀸𑀚𑀦𑁂 𑀞𑀧𑀺𑀢𑀁, 𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀲𑀘𑁂 𑀩𑀳𑀽𑀲𑀼 𑀯𑀢𑁆𑀣𑀼𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀉𑀕𑁆𑀕𑀳𑀺𑀢𑀓𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀁 𑀅𑀚𑁆𑀛𑁄𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺; 𑀅𑀩𑁆𑀪𑀜𑁆𑀚𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺, 𑀅𑀦𑀚𑁆𑀛𑁄𑀳𑀭𑀡𑀻𑀬𑀢𑀁 𑀆𑀧𑀦𑁆𑀦𑀢𑁆𑀢𑀸. ‘‘𑀧𑀝𑀺𑀲𑀸𑀬𑀦𑀻𑀬𑀸𑀦𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀦𑀯𑀦𑀻𑀢𑁂𑀦 𑀲𑀧𑁆𑀧𑀺𑀁 𑀓𑀢𑁆𑀯𑀸 𑀤𑁂𑀢𑀺, 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀁 𑀯𑀝𑁆𑀝𑀢𑀺. 𑀲𑀘𑁂 𑀲𑀬𑀁 𑀓𑀭𑁄𑀢𑀺, 𑀲𑀢𑁆𑀢𑀸𑀳𑀫𑁆𑀧𑀺 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀦𑀯𑀦𑀻𑀢𑁂𑀦 𑀧𑀦 𑀬𑁂𑀦 𑀓𑁂𑀦𑀘𑀺 𑀓𑀢𑀲𑀧𑁆𑀧𑀺 𑀲𑀢𑁆𑀢𑀸𑀳𑀫𑁆𑀧𑀺 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀉𑀕𑁆𑀕𑀳𑀺𑀢𑀓𑁂𑀦 𑀓𑀢𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀼𑀤𑁆𑀥𑀲𑀧𑁆𑀧𑀺𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀔𑀻𑀭𑁂𑀦 𑀯𑀸 𑀤𑀥𑀺𑀦𑀸 𑀯𑀸 𑀓𑀢𑀲𑀧𑁆𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀁 𑀲𑀸𑀫𑀺𑀲𑀫𑁆𑀧𑀺 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀯𑀝𑁆𑀝𑀢𑀺. 𑀲𑀬𑀁𑀓𑀢𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀦𑀯𑀦𑀻𑀢𑀁 𑀢𑀸𑀧𑁂𑀦𑁆𑀢𑀲𑁆𑀲 𑀳𑀺 𑀲𑀸𑀫𑀁𑀧𑀸𑀓𑁄 𑀦 𑀳𑁄𑀢𑀺, 𑀲𑀸𑀫𑀁𑀧𑀓𑁆𑀓𑁂𑀦 𑀧𑀦 𑀢𑁂𑀦 𑀲𑀤𑁆𑀥𑀺𑀁 𑀆𑀫𑀺𑀲𑀁 𑀦 𑀯𑀝𑁆𑀝𑀢𑀺. 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀘 𑀦 𑀯𑀝𑁆𑀝𑀢𑀺𑀬𑁂𑀯. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺, 𑀲𑀯𑀢𑁆𑀣𑀼𑀓𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸, ‘‘𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑁂𑀳𑀺 𑀓𑀢𑀁 𑀧𑀦 𑀅𑀩𑁆𑀪𑀜𑁆𑀚𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁. 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀘 𑀉𑀕𑁆𑀕𑀳𑀺𑀢𑀓𑁂𑀳𑀺 𑀓𑀢𑀁 𑀉𑀪𑀬𑁂𑀲𑀫𑁆𑀧𑀺 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀅𑀦𑀸𑀧𑀢𑁆𑀢𑀺. 𑀏𑀲𑁂𑀯 𑀦𑀬𑁄 𑀅𑀓𑀧𑁆𑀧𑀺𑀬𑀫𑀁𑀲𑀲𑀧𑁆𑀧𑀺𑀫𑁆𑀳𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢𑀲𑀧𑁆𑀧𑀺𑀦𑀸 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀢𑀢𑁆𑀣 𑀇𑀫𑀺𑀦𑀸 𑀤𑀼𑀓𑁆𑀓𑀝𑀁. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀯𑀢𑁆𑀯𑀸 𑀫𑀦𑀼𑀲𑁆𑀲𑀲𑀧𑁆𑀧𑀺 𑀘 𑀦𑀯𑀦𑀻𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀤𑀼𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀧𑀭𑀢𑁄 𑀘𑀲𑁆𑀲 𑀯𑀺𑀦𑀺𑀘𑁆𑀙𑀬𑁄𑀧𑀺 𑀆𑀕𑀘𑁆𑀙𑀺𑀲𑁆𑀲𑀢𑀺.

𑀧𑀸𑀴𑀺𑀬𑀁 𑀆𑀕𑀢𑀁 𑀦𑀯𑀦𑀻𑀢𑀫𑁆𑀧𑀺 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀭𑀸𑀫𑀺𑀲𑀫𑁂𑀯. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀦𑀸𑀦𑀸𑀪𑀸𑀚𑀦𑁂𑀲𑀼 𑀞𑀧𑀺𑀢𑁂 𑀪𑀸𑀚𑀦𑀕𑀡𑀦𑀸𑀬 𑀏𑀓𑀪𑀸𑀚𑀦𑁂𑀧𑀺 𑀅𑀫𑀺𑀲𑁆𑀲𑁂𑀢𑁆𑀯𑀸 𑀧𑀺𑀡𑁆𑀟𑀧𑀺𑀡𑁆𑀟𑀯𑀲𑁂𑀦 𑀞𑀧𑀺𑀢𑁂 𑀧𑀺𑀡𑁆𑀟𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀲𑀧𑁆𑀧𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀧𑀦 𑀤𑀥𑀺𑀕𑀼𑀴𑀺𑀓𑀸𑀬𑁄𑀧𑀺 𑀢𑀓𑁆𑀓𑀩𑀺𑀦𑁆𑀤𑀽𑀦𑀺𑀧𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀥𑁄𑀢𑀁 𑀯𑀝𑁆𑀝𑀢𑀻𑀢𑀺 𑀉𑀧𑀟𑁆𑀠𑀢𑁆𑀣𑁂𑀭𑀸 𑀆𑀳𑀁𑀲𑀼. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 ‘‘𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀓𑁆𑀓𑀢𑁄 𑀉𑀤𑁆𑀥𑀝𑀫𑀢𑁆𑀢𑀫𑁂𑀯 𑀔𑀸𑀤𑀺𑀁𑀲𑀽’’𑀢𑀺 𑀆𑀳. 𑀢𑀲𑁆𑀫𑀸 𑀦𑀯𑀦𑀻𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀤𑀥𑀺𑀢𑀓𑁆𑀓𑀫𑀓𑁆𑀔𑀺𑀓𑀸𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀦𑀺 𑀅𑀧𑀦𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀧𑀘𑀺𑀢𑁆𑀯𑀸 𑀲𑀧𑁆𑀧𑀺𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁂𑀦 𑀅𑀥𑁄𑀢𑀫𑁆𑀧𑀺 𑀧𑀘𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀁 𑀢𑀢𑁆𑀣 𑀤𑀥𑀺𑀕𑀢𑀁 𑀯𑀸 𑀢𑀓𑁆𑀓𑀕𑀢𑀁 𑀯𑀸 𑀢𑀁 𑀔𑀬𑀁 𑀕𑀫𑀺𑀲𑁆𑀲𑀢𑀺, 𑀏𑀢𑁆𑀢𑀸𑀯𑀢𑀸 𑀳𑀺 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀆𑀫𑀺𑀲𑁂𑀦 𑀲𑀤𑁆𑀥𑀺𑀁 𑀧𑀓𑁆𑀓𑀢𑁆𑀢𑀸 𑀧𑀦 𑀢𑀲𑁆𑀫𑀺𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀓𑀸. 𑀇𑀤𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀦𑀯𑀦𑀻𑀢𑁂 𑀘 𑀧𑀼𑀭𑁂𑀪𑀢𑁆𑀢𑀁 𑀔𑀻𑀭𑀤𑀥𑀻𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀦𑀯𑀦𑀻𑀢𑁂 𑀘 𑀧𑀘𑁆𑀙𑀸𑀪𑀢𑁆𑀢𑀁 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀦𑀯𑀦𑀻𑀢𑁂 𑀘 𑀉𑀕𑁆𑀕𑀳𑀺𑀢𑁂𑀳𑀺 𑀓𑀢𑀦𑀯𑀯𑀻𑀢𑁂 𑀘 𑀅𑀓𑀧𑁆𑀧𑀺𑀬𑀫𑀁𑀲𑀦𑀯𑀦𑀻𑀢𑁂 𑀘 𑀲𑀩𑁆𑀩𑁄 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀧𑀭𑀺𑀪𑁄𑀕𑀸𑀧𑀭𑀺𑀪𑁄𑀕𑀦𑀬𑁄 𑀲𑀧𑁆𑀧𑀺𑀫𑁆𑀳𑀺 𑀯𑀼𑀢𑁆𑀢𑀓𑁆𑀓𑀫𑁂𑀦𑁂𑀯 𑀕𑀳𑁂𑀢𑀩𑁆𑀩𑁄.

𑀢𑁂𑀮𑀪𑀺𑀓𑁆𑀔𑀸𑀬 𑀧𑀯𑀺𑀝𑁆𑀞𑀸𑀦𑀁 𑀧𑀦 𑀪𑀺𑀓𑁆𑀔𑀽𑀦𑀁 𑀢𑀢𑁆𑀣𑁂𑀯 𑀲𑀧𑁆𑀧𑀺𑀫𑁆𑀧𑀺 𑀦𑀯𑀦𑀻𑀢𑀫𑁆𑀧𑀺 𑀧𑀓𑁆𑀓𑀢𑁂𑀮𑀫𑁆𑀧𑀺 𑀅𑀧𑀓𑁆𑀓𑀢𑁂𑀮𑀫𑁆𑀧𑀺 𑀆𑀓𑀺𑀭𑀦𑁆𑀢𑀺, 𑀢𑀢𑁆𑀣 𑀢𑀓𑁆𑀓𑀤𑀥𑀺𑀩𑀺𑀦𑁆𑀤𑀽𑀦𑀺𑀧𑀺 𑀪𑀢𑁆𑀢𑀲𑀺𑀢𑁆𑀣𑀸𑀦𑀺𑀧𑀺 𑀢𑀡𑁆𑀟𑀼𑀮𑀓𑀡𑀸𑀧𑀺 𑀫𑀓𑁆𑀔𑀺𑀓𑀸𑀤𑀬𑁄𑀧𑀺 𑀳𑁄𑀦𑁆𑀢𑀺. 𑀆𑀤𑀺𑀘𑁆𑀘𑀧𑀸𑀓𑀁 𑀓𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀕𑀳𑀺𑀢𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀳𑁄𑀢𑀺, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀪𑁂𑀲𑀚𑁆𑀚𑁂𑀳𑀺 𑀲𑀤𑁆𑀥𑀺𑀁 𑀧𑀘𑀺𑀢𑁆𑀯𑀸 𑀦𑀢𑁆𑀣𑀼𑀧𑀸𑀦𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀯𑀤𑁆𑀤𑀮𑀺𑀲𑀫𑀬𑁂 𑀮𑀚𑁆𑀚𑀺 𑀲𑀸𑀫𑀡𑁂𑀭𑁄 𑀬𑀣𑀸 𑀢𑀢𑁆𑀣 𑀧𑀢𑀺𑀢𑀢𑀡𑁆𑀟𑀼𑀮𑀓𑀡𑀸𑀤𑀬𑁄 𑀦 𑀧𑀘𑁆𑀘𑀦𑁆𑀢𑀺, 𑀏𑀯𑀁 𑀲𑀸𑀫𑀺𑀲𑀧𑀸𑀓𑀁 𑀫𑁄𑀘𑁂𑀦𑁆𑀢𑁄 𑀅𑀕𑁆𑀕𑀺𑀫𑁆𑀳𑀺 𑀯𑀺𑀮𑀻𑀬𑀸𑀧𑁂𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀼𑀦 𑀧𑀘𑀺𑀢𑁆𑀯𑀸 𑀤𑁂𑀢𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀺.

𑀢𑁂𑀮𑁂𑀲𑀼 𑀢𑀺𑀮𑀢𑁂𑀮𑀁 𑀢𑀸𑀯 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀭𑀸𑀫𑀺𑀲𑀫𑁂𑀯. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀧𑀦𑀲𑁆𑀲 𑀪𑀸𑀚𑀦𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀉𑀕𑁆𑀕𑀳𑀺𑀢𑀓𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀁 𑀅𑀚𑁆𑀛𑁄𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀻𑀲𑀫𑀓𑁆𑀔𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀧𑀼𑀭𑁂𑀪𑀢𑁆𑀢𑀁 𑀢𑀺𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀢𑁂𑀮𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀅𑀦𑀚𑁆𑀛𑁄𑀳𑀭𑀡𑀻𑀬𑀁 𑀳𑁄𑀢𑀺, 𑀲𑀻𑀲𑀫𑀓𑁆𑀔𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀢𑀺𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀢𑁂𑀮𑀁 𑀅𑀦𑀚𑁆𑀛𑁄𑀳𑀭𑀡𑀻𑀬𑀫𑁂𑀯, 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺, 𑀲𑀻𑀲𑀫𑀓𑁆𑀔𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁. 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀉𑀕𑁆𑀕𑀳𑀺𑀢𑀓𑀢𑀺𑀮𑁂𑀳𑀺 𑀓𑀢𑀢𑁂𑀮𑁂𑀧𑀺 𑀏𑀲𑁂𑀯 𑀦𑀬𑁄.

𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀓𑀢𑀺𑀮𑁂 𑀪𑀚𑁆𑀚𑀺𑀢𑁆𑀯𑀸 𑀯𑀸 𑀢𑀺𑀮𑀧𑀺𑀝𑁆𑀞𑀁 𑀯𑀸 𑀲𑁂𑀤𑁂𑀢𑁆𑀯𑀸 𑀉𑀡𑁆𑀳𑁄𑀤𑀓𑁂𑀦 𑀯𑀸 𑀢𑁂𑀫𑁂𑀢𑁆𑀯𑀸 𑀓𑀢𑀢𑁂𑀮𑀁 𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀢𑁆𑀢𑀦𑀸 𑀓𑀢𑀢𑁂𑀮𑀁 𑀧𑀦 𑀦𑀺𑀩𑁆𑀩𑀝𑁆𑀝𑀺𑀢𑀢𑁆𑀢𑀸 𑀧𑀼𑀭𑁂𑀪𑀢𑁆𑀢𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀲𑀸𑀫𑀁𑀧𑀓𑁆𑀓𑀢𑁆𑀢𑀸 𑀲𑀸𑀫𑀺𑀲𑀁 𑀦 𑀯𑀝𑁆𑀝𑀢𑀺, 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀧𑀦 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀉𑀪𑀬𑀫𑁆𑀧𑀺 𑀅𑀦𑀚𑁆𑀛𑁄𑀳𑀭𑀡𑀻𑀬𑀁, 𑀲𑀻𑀲𑀫𑀓𑁆𑀔𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀬𑀤𑀺 𑀧𑀦 𑀅𑀧𑁆𑀧𑀁 𑀉𑀡𑁆𑀳𑁄𑀤𑀓𑀁 𑀳𑁄𑀢𑀺 𑀅𑀩𑁆𑀪𑀼𑀓𑁆𑀓𑀺𑀭𑀡𑀫𑀢𑁆𑀢𑀁, 𑀅𑀩𑁆𑀩𑁄𑀳𑀸𑀭𑀺𑀓𑀁 𑀳𑁄𑀢𑀺, 𑀲𑀸𑀫𑀧𑀸𑀓𑀕𑀡𑀦𑀁 𑀦 𑀕𑀘𑁆𑀙𑀢𑀺. 𑀲𑀸𑀲𑀧𑀢𑁂𑀮𑀸𑀤𑀻𑀲𑀼𑀧𑀺 𑀅𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑁂𑀲𑀼 𑀅𑀯𑀢𑁆𑀣𑀼𑀓𑀢𑀺𑀮𑀢𑁂𑀮𑁂 𑀯𑀼𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀲𑀘𑁂 𑀧𑀦 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀸𑀦𑀁 𑀲𑀸𑀲𑀧𑀸𑀤𑀻𑀦𑀁 𑀘𑀼𑀡𑁆𑀡𑁂𑀳𑀺 𑀆𑀤𑀺𑀘𑁆𑀘𑀧𑀸𑀓𑁂𑀦 𑀲𑀓𑁆𑀓𑀸 𑀢𑁂𑀮𑀁 𑀓𑀸𑀢𑀼𑀁, 𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀭𑀸𑀫𑀺𑀲𑀫𑁂𑀯, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀬𑀲𑁆𑀫𑀸 𑀧𑀦 𑀲𑀸𑀲𑀧𑀫𑀥𑀼𑀓𑀘𑀼𑀡𑁆𑀡𑀸𑀤𑀻𑀦𑀺 𑀲𑁂𑀤𑁂𑀢𑁆𑀯𑀸 𑀏𑀭𑀡𑁆𑀟𑀓𑀝𑁆𑀞𑀻𑀦𑀺 𑀘 𑀪𑀚𑁆𑀚𑀺𑀢𑁆𑀯𑀸 𑀏𑀯 𑀢𑁂𑀮𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀢𑁂𑀮𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺. 𑀯𑀢𑁆𑀣𑀽𑀦𑀁 𑀬𑀸𑀯𑀚𑀻𑀯𑀺𑀓𑀢𑁆𑀢𑀸 𑀧𑀦 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀡𑁂 𑀤𑁄𑀲𑁄 𑀦𑀢𑁆𑀣𑀻𑀢𑀺. 𑀅𑀢𑁆𑀢𑀦𑀸 𑀓𑀢𑀁 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀉𑀕𑁆𑀕𑀳𑀺𑀢𑀓𑁂𑀳𑀺 𑀓𑀢𑀁 𑀅𑀦𑀚𑁆𑀛𑁄𑀳𑀭𑀡𑀻𑀬𑀁 𑀩𑀸𑀳𑀺𑀭𑀧𑀭𑀺𑀪𑁄𑀕𑁂 𑀯𑀝𑁆𑀝𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺.

𑀢𑁂𑀮𑀓𑀭𑀡𑀢𑁆𑀣𑀸𑀬 𑀲𑀸𑀲𑀧𑀫𑀥𑀼𑀓𑀏𑀭𑀡𑁆𑀟𑀓𑀝𑁆𑀞𑀻𑀦𑀺 𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀁 𑀢𑁂𑀮𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁. 𑀤𑀼𑀢𑀺𑀬𑀤𑀺𑀯𑀲𑁂 𑀓𑀢𑀁 𑀙𑀸𑀳𑀁 𑀯𑀝𑁆𑀝𑀢𑀺. 𑀢𑀢𑀺𑀬𑀤𑀺𑀯𑀲𑁂 𑀓𑀢𑀁 𑀧𑀜𑁆𑀘𑀸𑀳𑀁 𑀯𑀝𑁆𑀝𑀢𑀺. 𑀘𑀢𑀼𑀢𑁆𑀣-𑀧𑀜𑁆𑀘𑀫-𑀙𑀝𑁆𑀞𑀲𑀢𑁆𑀢𑀸𑀫𑀤𑀺𑀯𑀲𑁂 𑀓𑀢𑀁 𑀢𑀤𑀳𑁂𑀯 𑀯𑀝𑁆𑀝𑀢𑀺. 𑀲𑀘𑁂 𑀬𑀸𑀯 𑀅𑀭𑀼𑀡𑀲𑁆𑀲 𑀉𑀕𑁆𑀕𑀫𑀦𑀸 𑀢𑀺𑀝𑁆𑀞𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀓𑀢𑀁 𑀅𑀦𑀚𑁆𑀛𑁄𑀳𑀭𑀡𑀻𑀬𑀁. 𑀅𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀢𑀸 𑀧𑀦 𑀩𑀸𑀳𑀺𑀭𑀧𑀭𑀺𑀪𑁄𑀕𑁂 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀦 𑀓𑀭𑁄𑀢𑀺, 𑀢𑁂𑀮𑀢𑁆𑀣𑀸𑀬 𑀕𑀳𑀺𑀢𑀲𑀸𑀲𑀧𑀸𑀤𑀻𑀦𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑀦𑁂 𑀤𑀼𑀓𑁆𑀓𑀝𑀫𑁂𑀯. 𑀧𑀸𑀴𑀺𑀬𑀁 𑀧𑀦 𑀅𑀦𑀸𑀕𑀢𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 𑀦𑀸𑀴𑀺𑀓𑁂𑀭𑀦𑀺𑀫𑁆𑀩𑀓𑁄𑀲𑀫𑁆𑀩𑀓𑀓𑀭𑀫𑀦𑁆𑀤𑀅𑀢𑀲𑀻𑀆𑀤𑀻𑀦𑀁 𑀢𑁂𑀮𑀸𑀦𑀺 𑀅𑀢𑁆𑀣𑀺, 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀅𑀬𑀫𑁂𑀢𑁂𑀲𑀼 𑀯𑀺𑀲𑁂𑀲𑁄. 𑀲𑁂𑀲𑀁 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀼𑀁 𑀬𑀸𑀯𑀚𑀻𑀯𑀺𑀓𑀯𑀢𑁆𑀣𑀼𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀸𑀫𑀁𑀧𑀸𑀓𑀲𑀯𑀢𑁆𑀣𑀼𑀓𑀧𑀼𑀭𑁂𑀪𑀢𑁆𑀢𑀧𑀘𑁆𑀙𑀸𑀪𑀢𑁆𑀢𑀧𑀝𑀺𑀕𑁆𑀕𑀳𑀺𑀢𑀉𑀕𑁆𑀕𑀳𑀺𑀢𑀓𑀯𑀢𑁆𑀣𑀼𑀯𑀺𑀥𑀸𑀦𑀁 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁬𑁨𑁩. 𑀯𑀲𑀸𑀢𑁂𑀮𑀦𑁆𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀅𑀘𑁆𑀙𑀯𑀲𑀁, 𑀫𑀘𑁆𑀙𑀯𑀲𑀁, 𑀲𑀼𑀲𑀼𑀓𑀸𑀯𑀲𑀁, 𑀲𑀽𑀓𑀭𑀯𑀲𑀁, 𑀕𑀤𑁆𑀭𑀪𑀯𑀲’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀏𑀯𑀁 𑀅𑀦𑀼𑀜𑁆𑀜𑀸𑀢𑀯𑀲𑀸𑀦𑀁 𑀢𑁂𑀮𑀁. 𑀏𑀢𑁆𑀣 𑀘 ‘‘𑀅𑀘𑁆𑀙𑀯𑀲’’𑀦𑁆𑀢𑀺 𑀯𑀘𑀦𑁂𑀦 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀯𑀲𑀁 𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀫𑀁𑀲𑀸𑀦 𑀯𑀲𑀸 𑀅𑀦𑀼𑀜𑁆𑀜𑀸𑀢𑀸. 𑀫𑀘𑁆𑀙𑀕𑁆𑀕𑀳𑀡𑁂𑀦 𑀘 𑀲𑀼𑀲𑀼𑀓𑀸𑀧𑀺 𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀯𑀸𑀴𑀫𑀘𑁆𑀙𑀢𑁆𑀢𑀸 𑀧𑀦 𑀯𑀺𑀲𑀼𑀁 𑀯𑀼𑀢𑁆𑀢𑀁. 𑀫𑀘𑁆𑀙𑀸𑀤𑀺𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀲𑀩𑁆𑀩𑁂𑀲𑀫𑁆𑀧𑀺 𑀓𑀧𑁆𑀧𑀺𑀬𑀫𑀁𑀲𑀸𑀦𑀁 𑀯𑀲𑀸 𑀅𑀦𑀼𑀜𑁆𑀜𑀸𑀢𑀸. 𑀫𑀁𑀲𑁂𑀲𑀼 𑀳𑀺 𑀤𑀲𑀫𑀦𑀉𑀲𑁆𑀲-𑀳𑀢𑁆𑀣𑀺-𑀅𑀲𑁆𑀲-𑀲𑀼𑀦𑀔-𑀅𑀳𑀺-𑀲𑀻𑀳-𑀩𑁆𑀬𑀕𑁆𑀖-𑀤𑀻𑀧𑀺-𑀅𑀘𑁆𑀙-𑀢𑀭𑀘𑁆𑀙𑀸𑀦𑀁 𑀫𑀁𑀲𑀸𑀦𑀺 𑀅𑀓𑀧𑁆𑀧𑀺𑀬𑀸𑀦𑀺. 𑀯𑀲𑀸𑀲𑀼 𑀏𑀓𑀸 𑀫𑀦𑀼𑀲𑁆𑀲𑀯𑀲𑀸𑀯. 𑀔𑀻𑀭𑀸𑀤𑀻𑀲𑀼 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺.

𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀦𑀺𑀩𑁆𑀩𑀝𑁆𑀝𑀺𑀢𑀯𑀲𑀸𑀢𑁂𑀮𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀬𑀁 𑀧𑀦 𑀢𑀢𑁆𑀣 𑀲𑀼𑀔𑀼𑀫𑀭𑀚𑀲𑀤𑀺𑀲𑀁 𑀫𑀁𑀲𑀁 𑀯𑀸 𑀦𑁆𑀳𑀸𑀭𑀼 𑀯𑀸 𑀅𑀝𑁆𑀞𑀺 𑀯𑀸 𑀮𑁄𑀳𑀺𑀢𑀁 𑀯𑀸 𑀳𑁄𑀢𑀺, 𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀲𑀘𑁂 𑀧𑀦 𑀯𑀲𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀬𑀁 𑀓𑀭𑁄𑀢𑀺, 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑀜𑁆𑀳𑀺 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀓𑀸𑀮𑁂 𑀲𑀁𑀲𑀝𑁆𑀞𑀁 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨). 𑀢𑀢𑁆𑀭𑀸𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀁 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀦 𑀧𑀝𑀺𑀕𑁆𑀕𑀳𑀺𑀢𑀼𑀁 𑀯𑀸 𑀓𑀸𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺𑀬𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀯𑀺𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 𑀯𑀺𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀯𑀺𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦𑀁. 𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 𑀯𑀺𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀯𑀺𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀯𑀺𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀅𑀦𑀸𑀧𑀢𑁆𑀢𑀻’’𑀢𑀺.

𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀁 𑀧𑀦 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀲𑀧𑁆𑀧𑀺𑀦𑀯𑀦𑀻𑀢𑀯𑀲𑀸𑀦𑀺 𑀏𑀓𑀢𑁄 𑀧𑀘𑀺𑀢𑁆𑀯𑀸 𑀦𑀺𑀩𑁆𑀩𑀝𑁆𑀝𑀺𑀢𑀸𑀦𑀺 𑀯𑀝𑁆𑀝𑀦𑁆𑀢𑀺, 𑀦 𑀯𑀝𑁆𑀝𑀦𑁆𑀢𑀻’’𑀢𑀺? ‘‘𑀦 𑀯𑀝𑁆𑀝𑀦𑁆𑀢𑀺, 𑀆𑀯𑀼𑀲𑁄’’𑀢𑀺. 𑀣𑁂𑀭𑁄 𑀓𑀺𑀭𑁂𑀢𑁆𑀣 𑀧𑀓𑁆𑀓𑀢𑁂𑀮𑀓𑀲𑀝𑁂 𑀯𑀺𑀬 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀢𑀢𑁄 𑀦𑀁 𑀉𑀢𑁆𑀢𑀭𑀺 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀦𑀯𑀦𑀻𑀢𑁂 𑀤𑀥𑀺𑀕𑀼𑀴𑀺𑀓𑀸 𑀯𑀸 𑀢𑀓𑁆𑀓𑀩𑀺𑀦𑁆𑀤𑀼 𑀯𑀸 𑀳𑁄𑀢𑀺, 𑀏𑀢𑀁 𑀯𑀝𑁆𑀝𑀢𑀻’’𑀢𑀺? ‘‘𑀏𑀢𑀫𑁆𑀧𑀺, 𑀆𑀯𑀼𑀲𑁄, 𑀦 𑀯𑀝𑁆𑀝𑀢𑀻’’𑀢𑀺. 𑀢𑀢𑁄 𑀦𑀁 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀏𑀓𑀢𑁄 𑀧𑀘𑀺𑀢𑁆𑀯𑀸 𑀲𑀁𑀲𑀝𑁆𑀞𑀸𑀦𑀺 𑀢𑁂𑀚𑀯𑀦𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀭𑁄𑀕𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺? ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀣𑁂𑀭𑁄 𑀲𑀫𑁆𑀧𑀝𑀺𑀘𑁆𑀙𑀺.

𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀓𑀧𑁆𑀧𑀺𑀬𑀫𑀁𑀲𑀯𑀲𑀸 𑀲𑀸𑀫𑀺𑀲𑀧𑀭𑀺𑀪𑁄𑀕𑁂 𑀯𑀝𑁆𑀝𑀢𑀺, 𑀇𑀢𑀭𑀸 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂 𑀯𑀝𑁆𑀝𑀢𑀻’’𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦 ‘‘𑀇𑀤𑀁 𑀓𑀺’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦𑀦𑀼 𑀯𑀸𑀢𑀸𑀩𑀸𑀥𑀺𑀓𑀸 𑀪𑀺𑀓𑁆𑀔𑀽 𑀧𑀜𑁆𑀘𑀫𑀽𑀮𑀓𑀲𑀸𑀯𑀬𑀸𑀕𑀼𑀬𑀁 𑀅𑀘𑁆𑀙𑀲𑀽𑀓𑀭𑀢𑁂𑀮𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀬𑀸𑀕𑀼𑀁 𑀧𑀺𑀯𑀦𑁆𑀢𑀺, 𑀲𑀸 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀭𑁄𑀕𑀁 𑀦𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀯𑀢𑁆𑀯𑀸 ‘‘𑀯𑀝𑁆𑀝𑀢𑀻’’𑀢𑀺 𑀆𑀳.

𑀫𑀥𑀼 𑀦𑀸𑀫 𑀫𑀓𑁆𑀔𑀺𑀓𑀸𑀫𑀥𑀽𑀢𑀺 𑀫𑀥𑀼𑀓𑀭𑀻𑀳𑀺 𑀦𑀸𑀫 𑀫𑀥𑀼𑀫𑀓𑁆𑀔𑀺𑀓𑀸𑀳𑀺 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀳𑀺 𑀪𑀫𑀭𑀫𑀓𑁆𑀔𑀺𑀓𑀸𑀳𑀺 𑀘 𑀓𑀢𑀁 𑀫𑀥𑀼. 𑀢𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀧𑀭𑀺𑀪𑁄𑀕𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑀫𑁂𑀯 𑀯𑀝𑁆𑀝𑀢𑀺. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀲𑀘𑁂 𑀲𑀺𑀮𑁂𑀲𑀲𑀤𑀺𑀲𑀁 𑀫𑀳𑀸𑀫𑀥𑀼𑀁 𑀔𑀡𑁆𑀟𑀁 𑀔𑀡𑁆𑀟𑀁 𑀓𑀢𑁆𑀯𑀸 𑀞𑀧𑀺𑀢𑀁, 𑀇𑀢𑀭𑀁 𑀯𑀸 𑀦𑀸𑀦𑀸𑀪𑀸𑀚𑀦𑁂𑀲𑀼, 𑀯𑀢𑁆𑀣𑀼𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺. 𑀲𑀘𑁂 𑀏𑀓𑀫𑁂𑀯 𑀔𑀡𑁆𑀟𑀁, 𑀏𑀓𑀪𑀸𑀚𑀦𑁂 𑀯𑀸 𑀇𑀢𑀭𑀁 𑀏𑀓𑀫𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀉𑀕𑁆𑀕𑀳𑀺𑀢𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀅𑀭𑀼𑀫𑀓𑁆𑀔𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁. 𑀫𑀥𑀼𑀧𑀝𑀮𑀁 𑀯𑀸 𑀫𑀥𑀼𑀲𑀺𑀢𑁆𑀣𑀓𑀁 𑀯𑀸 𑀲𑀘𑁂 𑀫𑀥𑀼𑀦𑀸 𑀅𑀫𑀓𑁆𑀔𑀺𑀢𑀁 𑀧𑀭𑀺𑀲𑀼𑀤𑁆𑀥𑀁, 𑀬𑀸𑀯𑀚𑀻𑀯𑀺𑀓𑀁. 𑀫𑀥𑀼𑀫𑀓𑁆𑀔𑀺𑀢𑀁 𑀧𑀦 𑀫𑀥𑀼𑀕𑀢𑀺𑀓𑀫𑁂𑀯. 𑀘𑀻𑀭𑀺𑀓𑀸 𑀦𑀸𑀫 𑀲𑀧𑀓𑁆𑀔𑀸 𑀤𑀻𑀖𑀫𑀓𑁆𑀔𑀺𑀓𑀸, 𑀢𑀼𑀫𑁆𑀩𑀮𑀦𑀸𑀫𑀺𑀓𑀸 𑀘 𑀅𑀝𑁆𑀞𑀺𑀧𑀓𑁆𑀔𑀸 𑀓𑀸𑀴𑀫𑀳𑀸𑀪𑀫𑀭𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀆𑀲𑀬𑁂𑀲𑀼 𑀦𑀺𑀬𑁆𑀬𑀸𑀲𑀲𑀤𑀺𑀲𑀁 𑀫𑀥𑀼 𑀳𑁄𑀢𑀺, 𑀢𑀁 𑀬𑀸𑀯𑀚𑀻𑀯𑀺𑀓𑀁.

𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬 𑀅𑀧𑀓𑁆𑀓𑀸 𑀯𑀸 𑀅𑀯𑀢𑁆𑀣𑀼𑀓𑀧𑀓𑁆𑀓𑀸 𑀯𑀸 𑀲𑀩𑁆𑀩𑀸𑀧𑀺 𑀅𑀯𑀢𑁆𑀣𑀼𑀓𑀸 𑀉𑀘𑁆𑀙𑀼𑀯𑀺𑀓𑀢𑀺 𑀨𑀸𑀡𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀁 𑀨𑀸𑀡𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀯𑀢𑁆𑀣𑀼𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀩𑀳𑀽 𑀧𑀺𑀡𑁆𑀟𑀸 𑀘𑀼𑀡𑁆𑀡𑁂𑀢𑁆𑀯𑀸 𑀏𑀓𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺 𑀖𑀦𑀲𑀦𑁆𑀦𑀺𑀯𑁂𑀲𑀸, 𑀏𑀓𑀫𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀉𑀕𑁆𑀕𑀳𑀺𑀢𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀖𑀭𑀥𑀽𑀧𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁. 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑁂𑀦 𑀅𑀧𑀭𑀺𑀲𑁆𑀲𑀸𑀯𑀺𑀢𑀉𑀘𑁆𑀙𑀼𑀭𑀲𑁂𑀦 𑀓𑀢𑀨𑀸𑀡𑀺𑀢𑀁 𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀁, 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀬𑀁𑀓𑀢𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀅𑀦𑀚𑁆𑀛𑁄𑀳𑀭𑀡𑀻𑀬𑀁, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀅𑀧𑀭𑀺𑀲𑁆𑀲𑀸𑀯𑀺𑀢𑀧𑀝𑀺𑀕𑁆𑀕𑀳𑀺𑀢𑁂𑀦 𑀓𑀢𑀫𑁆𑀧𑀺 𑀅𑀦𑀚𑁆𑀛𑁄𑀳𑀭𑀡𑀻𑀬𑀫𑁂𑀯, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀏𑀲 𑀦𑀬𑁄 𑀉𑀘𑁆𑀙𑀼𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀨𑀸𑀡𑀺𑀢𑁂𑀧𑀺. 𑀧𑀼𑀭𑁂𑀪𑀢𑁆𑀢𑀁 𑀧𑀦 𑀧𑀭𑀺𑀲𑁆𑀲𑀸𑀯𑀺𑀢𑀧𑀝𑀺𑀕𑁆𑀕𑀳𑀺𑀢𑀓𑁂𑀦 𑀓𑀢𑀁 𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯. 𑀲𑀬𑀁𑀓𑀢𑀁 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀦𑀺𑀭𑀸𑀫𑀺𑀲𑀫𑁂𑀯. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀭𑀺𑀲𑁆𑀲𑀸𑀯𑀺𑀢𑀧𑀝𑀺𑀕𑁆𑀕𑀳𑀺𑀢𑁂𑀦 𑀓𑀢𑀁 𑀧𑀦 𑀦𑀺𑀭𑀸𑀫𑀺𑀲𑀫𑁂𑀯 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀺. 𑀉𑀕𑁆𑀕𑀳𑀺𑀢𑀓𑀓𑀢𑀁 𑀯𑀼𑀢𑁆𑀢𑀦𑀬𑀫𑁂𑀯. ‘‘𑀛𑀸𑀫𑀉𑀘𑁆𑀙𑀼𑀨𑀸𑀡𑀺𑀢𑀁 𑀯𑀸 𑀓𑁄𑀝𑁆𑀝𑀺𑀢𑀉𑀘𑁆𑀙𑀼𑀨𑀸𑀡𑀺𑀢𑀁 𑀯𑀸 𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀏𑀢𑀁 𑀲𑀯𑀢𑁆𑀣𑀼𑀓𑀧𑀓𑁆𑀓𑀁 𑀯𑀝𑁆𑀝𑀢𑀺, 𑀦𑁄 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 ‘‘𑀉𑀘𑁆𑀙𑀼𑀨𑀸𑀡𑀺𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀦𑁄𑀯𑀝𑁆𑀝𑀦𑀓𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁. 𑀲𑀻𑀢𑀼𑀤𑀓𑁂𑀦 𑀓𑀢𑀁 𑀫𑀥𑀼𑀓𑀧𑀼𑀧𑁆𑀨𑀨𑀸𑀡𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀁 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀯𑀢𑁆𑀣𑀼𑀕𑀡𑀦𑀸𑀬 𑀤𑀼𑀓𑁆𑀓𑀝𑀁. 𑀔𑀻𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀁 𑀫𑀥𑀼𑀓𑀨𑀸𑀡𑀺𑀢𑀁 𑀬𑀸𑀯𑀓𑀸𑀮𑀺𑀓𑀁. 𑀔𑀡𑁆𑀟𑀲𑀓𑁆𑀔𑀭𑀁 𑀧𑀦 𑀔𑀻𑀭𑀚𑀮𑁆𑀮𑀺𑀓𑀁 𑀅𑀧𑀦𑁂𑀢𑁆𑀯𑀸 𑀲𑁄𑀥𑁂𑀦𑁆𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀺. 𑀫𑀥𑀼𑀓𑀧𑀼𑀧𑁆𑀨𑀁 𑀧𑀦 𑀧𑀼𑀭𑁂𑀪𑀢𑁆𑀢𑀁 𑀅𑀮𑁆𑀮𑀁 𑀯𑀝𑁆𑀝𑀢𑀺, 𑀪𑀚𑁆𑀚𑀺𑀢𑀫𑁆𑀧𑀺 𑀯𑀝𑁆𑀝𑀢𑀺. 𑀪𑀚𑁆𑀚𑀺𑀢𑁆𑀯𑀸 𑀢𑀺𑀮𑀸𑀤𑀻𑀳𑀺 𑀫𑀺𑀲𑁆𑀲𑀁 𑀯𑀸 𑀅𑀫𑀺𑀲𑁆𑀲𑀁 𑀯𑀸 𑀓𑀢𑁆𑀯𑀸 𑀓𑁄𑀝𑁆𑀝𑀺𑀢𑀫𑁆𑀧𑀺 𑀯𑀝𑁆𑀝𑀢𑀺. 𑀬𑀤𑀺 𑀧𑀦 𑀢𑀁 𑀕𑀳𑁂𑀢𑁆𑀯𑀸 𑀫𑁂𑀭𑀬𑀢𑁆𑀣𑀸𑀬 𑀬𑁄𑀚𑁂𑀦𑁆𑀢𑀺, 𑀬𑁄𑀚𑀺𑀢𑀁 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀦 𑀯𑀝𑁆𑀝𑀢𑀺. 𑀓𑀤𑀮𑀻-𑀔𑀚𑁆𑀚𑀽𑀭𑀻-𑀅𑀫𑁆𑀩-𑀮𑀩𑀼𑀚-𑀧𑀦𑀲-𑀘𑀺𑀜𑁆𑀘𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀬𑀸𑀯𑀓𑀸𑀮𑀺𑀓𑀨𑀮𑀸𑀦𑀁 𑀨𑀸𑀡𑀺𑀢𑀁 𑀬𑀸𑀯𑀓𑀸𑀮𑀺𑀓𑀫𑁂𑀯. 𑀫𑀭𑀺𑀘𑀧𑀓𑁆𑀓𑁂𑀳𑀺 𑀨𑀸𑀡𑀺𑀢𑀁 𑀓𑀭𑁄𑀦𑁆𑀢𑀺, 𑀢𑀁 𑀬𑀸𑀯𑀚𑀻𑀯𑀺𑀓𑀁.

𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀲𑀘𑁂𑀧𑀺 𑀲𑀩𑁆𑀩𑀸𑀦𑀺𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓 𑀖𑀝𑁂 𑀅𑀯𑀺𑀦𑀺𑀩𑁆𑀪𑁄𑀕𑀸𑀦𑀺 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀏𑀓𑀫𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀯𑀺𑀦𑀺𑀪𑀼𑀢𑁆𑀢𑁂𑀲𑀼 𑀧𑀜𑁆𑀘 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺. 𑀲𑀢𑁆𑀢𑀸𑀳𑀁 𑀧𑀦 𑀅𑀦𑀢𑀺𑀓𑁆𑀓𑀸𑀫𑁂𑀢𑁆𑀯𑀸 𑀕𑀺𑀮𑀸𑀦𑁂𑀦𑀧𑀺 𑀅𑀕𑀺𑀮𑀸𑀦𑁂𑀦𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀢𑁆𑀢𑀯𑀺𑀥𑀜𑁆𑀳𑀺 𑀑𑀤𑀺𑀲𑁆𑀲𑀁 𑀦𑀸𑀫 𑁋 𑀩𑁆𑀬𑀸𑀥𑀺𑀑𑀤𑀺𑀲𑁆𑀲𑀁, 𑀧𑀼𑀕𑁆𑀕𑀮𑁄𑀤𑀺𑀲𑁆𑀲𑀁, 𑀓𑀸𑀮𑁄𑀤𑀺𑀲𑁆𑀲𑀁, 𑀲𑀫𑀬𑁄𑀤𑀺𑀲𑁆𑀲𑀁, 𑀤𑁂𑀲𑁄𑀤𑀺𑀲𑁆𑀲𑀁, 𑀯𑀲𑁄𑀤𑀺𑀲𑁆𑀲𑀁, 𑀪𑁂𑀲𑀚𑁆𑀚𑁄𑀤𑀺𑀲𑁆𑀲𑀦𑁆𑀢𑀺.

𑀢𑀢𑁆𑀣 𑀩𑁆𑀬𑀸𑀥𑀺𑀑𑀤𑀺𑀲𑁆𑀲𑀁 𑀦𑀸𑀫 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀫𑀦𑀼𑀲𑁆𑀲𑀺𑀓𑀸𑀩𑀸𑀥𑁂 𑀆𑀫𑀓𑀫𑀁𑀲𑀁 𑀆𑀫𑀓𑀮𑁄𑀳𑀺𑀢’’𑀦𑁆𑀢𑀺 (𑀫𑀳𑀸𑀯. 𑁨𑁬𑁪) 𑀏𑀯𑀁 𑀩𑁆𑀬𑀸𑀥𑀺𑀁 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀢𑁂𑀦𑁂𑀯 𑀆𑀩𑀸𑀥𑁂𑀦 𑀆𑀩𑀸𑀥𑀺𑀓𑀲𑁆𑀲 𑀯𑀝𑁆𑀝𑀢𑀺, 𑀦 𑀅𑀜𑁆𑀜𑀲𑁆𑀲. 𑀢𑀜𑁆𑀘 𑀔𑁄 𑀓𑀸𑀮𑁂𑀧𑀺 𑀯𑀺𑀓𑀸𑀮𑁂𑀧𑀺 𑀓𑀧𑁆𑀧𑀺𑀬𑀫𑁆𑀧𑀺 𑀅𑀓𑀧𑁆𑀧𑀺𑀬𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯.

𑀧𑀼𑀕𑁆𑀕𑀮𑁄𑀤𑀺𑀲𑁆𑀲𑀁 𑀦𑀸𑀫 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑁄𑀫𑀦𑁆𑀣𑀓𑀲𑁆𑀲 𑀭𑁄𑀫𑀦𑁆𑀣𑀦𑀁. 𑀦 𑀘, 𑀪𑀺𑀓𑁆𑀔𑀯𑁂, 𑀩𑀳𑀺𑀫𑀼𑀔𑀤𑁆𑀯𑀸𑀭𑀁 𑀦𑀻𑀳𑀭𑀺𑀢𑁆𑀯𑀸 𑀅𑀚𑁆𑀛𑁄𑀳𑀭𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁨𑁭𑁩) 𑀏𑀯𑀁 𑀧𑀼𑀕𑁆𑀕𑀮𑀁 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀢𑀲𑁆𑀲𑁂𑀯 𑀯𑀝𑁆𑀝𑀢𑀺, 𑀦 𑀅𑀜𑁆𑀜𑀲𑁆𑀲.

𑀓𑀸𑀮𑁄𑀤𑀺𑀲𑁆𑀲𑀁 𑀦𑀸𑀫 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀫𑀳𑀸𑀯𑀺𑀓𑀝𑀸𑀦𑀺 𑀤𑀸𑀢𑀼𑀁 𑁋 𑀕𑀽𑀣𑀁, 𑀫𑀼𑀢𑁆𑀢𑀁, 𑀙𑀸𑀭𑀺𑀓𑀁, 𑀫𑀢𑁆𑀢𑀺𑀓’’𑀦𑁆𑀢𑀺 (𑀫𑀳𑀸𑀯. 𑁨𑁬𑁮) 𑀏𑀯𑀁 𑀅𑀳𑀺𑀦𑀸 𑀤𑀝𑁆𑀞𑀓𑀸𑀮𑀁 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀫𑁆𑀧𑀺 𑀯𑀝𑁆𑀝𑀢𑀺, 𑀦 𑀅𑀜𑁆𑀜𑀲𑁆𑀫𑀺𑀁.

𑀲𑀫𑀬𑁄𑀤𑀺𑀲𑁆𑀲𑀁 𑀦𑀸𑀫 𑁋 ‘‘𑀕𑀡𑀪𑁄𑀚𑀦𑁂 𑀅𑀜𑁆𑀜𑀢𑁆𑀭 𑀲𑀫𑀬𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁨𑁧𑁭) 𑀦𑀬𑁂𑀦 𑀢𑀁 𑀢𑀁 𑀲𑀫𑀬𑀁 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀸 𑀅𑀦𑀸𑀧𑀢𑁆𑀢𑀺𑀬𑁄, 𑀢𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀅𑀦𑀸𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑀤𑀸.

𑀤𑁂𑀲𑁄𑀤𑀺𑀲𑁆𑀲𑀁 𑀦𑀸𑀫 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁂𑀲𑀼 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤’’𑀦𑁆𑀢𑀺 (𑀫𑀳𑀸𑀯. 𑁨𑁫𑁯) 𑀏𑀯𑀁 𑀧𑀘𑁆𑀘𑀦𑁆𑀢𑀤𑁂𑀲𑁂 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀸𑀦𑀺 𑀉𑀧𑀲𑀫𑁆𑀧𑀤𑀸𑀤𑀻𑀦𑀺, 𑀢𑀸𑀦𑀺 𑀢𑀢𑁆𑀣𑁂𑀯 𑀯𑀝𑁆𑀝𑀦𑁆𑀢𑀺, 𑀦 𑀫𑀚𑁆𑀛𑀺𑀫𑀤𑁂𑀲𑁂.

𑀯𑀲𑁄𑀤𑀺𑀲𑁆𑀲𑀁 𑀦𑀸𑀫 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀻’’𑀢𑀺 (𑀫𑀳𑀸𑀯. 𑁨𑁬𑁨) 𑀏𑀯𑀁 𑀯𑀲𑀸𑀦𑀸𑀫𑁂𑀦 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀯𑀲𑀁 𑀲𑀩𑁆𑀩𑁂𑀲𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀲𑀸𑀦𑀁 𑀢𑁂𑀮𑀁 𑀢𑀁𑀢𑀤𑀢𑁆𑀣𑀺𑀓𑀸𑀦𑀁 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀪𑁂𑀲𑀚𑁆𑀚𑁄𑀤𑀺𑀲𑁆𑀲𑀁 𑀦𑀸𑀫 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀻’’𑀢𑀺 (𑀫𑀳𑀸𑀯. 𑁨𑁬𑁦-𑁨𑁬𑁧) 𑀏𑀯𑀁 𑀪𑁂𑀲𑀚𑁆𑀚𑀦𑀸𑀫𑁂𑀦 𑀅𑀦𑀼𑀜𑁆𑀜𑀸𑀢𑀸𑀦𑀺 𑀆𑀳𑀸𑀭𑀢𑁆𑀣𑀁 𑀨𑀭𑀺𑀢𑀼𑀁 𑀲𑀫𑀢𑁆𑀣𑀸𑀦𑀺 𑀲𑀧𑁆𑀧𑀺𑀦𑀯𑀦𑀻𑀢𑀢𑁂𑀮𑀫𑀥𑀼𑀨𑀸𑀡𑀺𑀢𑀦𑁆𑀢𑀺. 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀬𑀣𑀸𑀲𑀼𑀔𑀁 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑀺 𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀢𑁆𑀢𑀸𑀳𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺.

𑁬𑁨𑁪. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀘𑁂𑀧𑀺 𑀲𑀸𑀲𑀧𑀫𑀢𑁆𑀢𑀁 𑀳𑁄𑀢𑀺 𑀲𑀓𑀺𑀁 𑀯𑀸 𑀅𑀗𑁆𑀕𑀼𑀮𑀺𑀬𑀸 𑀕𑀳𑁂𑀢𑁆𑀯𑀸 𑀚𑀺𑀯𑁆𑀳𑀸𑀬 𑀲𑀸𑀬𑀦𑀫𑀢𑁆𑀢𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀫𑁂𑀯, 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀤𑁂𑀲𑁂𑀢𑀩𑁆𑀩𑀁.

𑀦 𑀓𑀸𑀬𑀺𑀓𑁂𑀦 𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀓𑀸𑀬𑁄 𑀯𑀸 𑀓𑀸𑀬𑁂 𑀅𑀭𑀼 𑀯𑀸 𑀦 𑀫𑀓𑁆𑀔𑁂𑀢𑀩𑁆𑀩𑀁. 𑀢𑁂𑀳𑀺 𑀫𑀓𑁆𑀔𑀺𑀢𑀸𑀦𑀺 𑀓𑀸𑀲𑀸𑀯𑀓𑀢𑁆𑀢𑀭𑀬𑀝𑁆𑀞𑀺𑀉𑀧𑀸𑀳𑀦𑀧𑀸𑀤𑀓𑀣𑀮𑀺𑀓𑀫𑀜𑁆𑀘𑀧𑀻𑀞𑀸𑀤𑀻𑀦𑀺𑀧𑀺 𑀅𑀧𑀭𑀺𑀪𑁄𑀕𑀸𑀦𑀺. ‘‘𑀤𑁆𑀯𑀸𑀭𑀯𑀸𑀢𑀧𑀸𑀦𑀓𑀯𑀸𑀝𑁂𑀲𑀼𑀧𑀺 𑀳𑀢𑁆𑀣𑁂𑀦 𑀕𑀳𑀡𑀝𑁆𑀞𑀸𑀦𑀁 𑀦 𑀫𑀓𑁆𑀔𑁂𑀢𑀩𑁆𑀩’’𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. ‘‘𑀓𑀲𑀸𑀯𑁂 𑀧𑀦 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀓𑀯𑀸𑀝𑀸𑀦𑀺 𑀫𑀓𑁆𑀔𑁂𑀢𑀩𑁆𑀩𑀸𑀦𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀲𑀢𑁆𑀢𑀸𑀳𑀁 𑀅𑀥𑀺𑀝𑁆𑀞𑁂𑀢𑀻𑀢𑀺 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀲𑀧𑁆𑀧𑀺𑀜𑁆𑀘 𑀢𑁂𑀮𑀜𑁆𑀘 𑀯𑀲𑀜𑁆𑀘 𑀫𑀼𑀤𑁆𑀥𑀦𑀺𑀢𑁂𑀮𑀁 𑀯𑀸 𑀅𑀩𑁆𑀪𑀜𑁆𑀚𑀦𑀁 𑀯𑀸 𑀫𑀥𑀼𑀁 𑀅𑀭𑀼𑀫𑀓𑁆𑀔𑀦𑀁 𑀨𑀸𑀡𑀺𑀢𑀁 𑀖𑀭𑀥𑀽𑀧𑀦𑀁 𑀅𑀥𑀺𑀝𑁆𑀞𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀅𑀥𑀺𑀝𑁆𑀞𑀺𑀢𑀢𑁂𑀮𑀁 𑀅𑀦𑀥𑀺𑀝𑁆𑀞𑀺𑀢𑀢𑁂𑀮𑀪𑀸𑀚𑀦𑁂 𑀆𑀓𑀺𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀪𑀸𑀚𑀦𑁂 𑀘𑁂 𑀲𑀼𑀔𑀼𑀫𑀁 𑀙𑀺𑀤𑁆𑀤𑀁 𑀧𑀯𑀺𑀝𑁆𑀞𑀁 𑀧𑀯𑀺𑀝𑁆𑀞𑀁 𑀢𑁂𑀮𑀁 𑀧𑀼𑀭𑀸𑀡𑀢𑁂𑀮𑁂𑀦 𑀅𑀚𑁆𑀛𑁄𑀢𑁆𑀣𑀭𑀻𑀬𑀢𑀺, 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀅𑀣 𑀫𑀳𑀸𑀫𑀼𑀔𑀁 𑀳𑁄𑀢𑀺, 𑀲𑀳𑀲𑀸𑀯 𑀩𑀳𑀼𑀢𑁂𑀮𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀸𑀡𑀢𑁂𑀮𑀁 𑀅𑀚𑁆𑀛𑁄𑀢𑁆𑀣𑀭𑀢𑀺, 𑀧𑀼𑀦 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀅𑀥𑀺𑀝𑁆𑀞𑀺𑀢𑀕𑀢𑀺𑀓𑀫𑁂𑀯 𑀳𑀺 𑀢𑀁 𑀳𑁄𑀢𑀺, 𑀏𑀢𑁂𑀦 𑀦𑀬𑁂𑀦 𑀅𑀥𑀺𑀝𑁆𑀞𑀺𑀢𑀢𑁂𑀮𑀪𑀸𑀚𑀦𑁂 𑀅𑀦𑀥𑀺𑀝𑁆𑀞𑀺𑀢𑀢𑁂𑀮𑀸𑀓𑀺𑀭𑀡𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁.

𑁬𑁨𑁫. 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀏𑀢𑁆𑀣 𑀲𑀘𑁂 𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀓𑀁 𑀏𑀓𑁂𑀦 𑀧𑀝𑀺𑀕𑁆𑀕𑀳𑀺𑀢𑀁 𑀅𑀯𑀺𑀪𑀢𑁆𑀢𑀁 𑀳𑁄𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀺. 𑀲𑀘𑁂 𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀲𑁄 𑀇𑀢𑀭𑀁 𑀪𑀡𑀢𑀺 𑁋 ‘‘𑀆𑀯𑀼𑀲𑁄, 𑀇𑀫𑀁 𑀢𑁂𑀮𑀁 𑀲𑀢𑁆𑀢𑀸𑀳𑀫𑀢𑁆𑀢𑀁 𑀧𑀭𑀺𑀪𑀼𑀜𑁆𑀚 𑀢𑁆𑀯’’𑀦𑁆𑀢𑀺. 𑀲𑁄 𑀘 𑀧𑀭𑀺𑀪𑁄𑀕𑀁 𑀦 𑀓𑀭𑁄𑀢𑀺, 𑀓𑀲𑁆𑀲 𑀆𑀧𑀢𑁆𑀢𑀺? 𑀦 𑀓𑀲𑁆𑀲𑀘𑀺𑀧𑀺 𑀆𑀧𑀢𑁆𑀢𑀺. 𑀓𑀲𑁆𑀫𑀸? 𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁 𑀢𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸, 𑀇𑀢𑀭𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸.

𑀯𑀺𑀦𑀲𑁆𑀲𑀢𑀻𑀢𑀺 𑀅𑀧𑀭𑀺𑀪𑁄𑀕𑀁 𑀳𑁄𑀢𑀺. 𑀘𑀢𑁆𑀢𑁂𑀦𑀸𑀢𑀺𑀆𑀤𑀻𑀲𑀼 𑀬𑁂𑀦 𑀘𑀺𑀢𑁆𑀢𑁂𑀦 𑀪𑁂𑀲𑀚𑁆𑀚𑀁 𑀘𑀢𑁆𑀢𑀜𑁆𑀘 𑀯𑀦𑁆𑀢𑀜𑁆𑀘 𑀫𑀼𑀢𑁆𑀢𑀜𑁆𑀘 𑀳𑁄𑀢𑀺, 𑀢𑀁 𑀘𑀺𑀢𑁆𑀢𑀁 𑀘𑀢𑁆𑀢𑀁 𑀯𑀦𑁆𑀢𑀁 𑀫𑀼𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀘𑀺𑀢𑁆𑀢𑁂𑀦 𑀧𑀼𑀕𑁆𑀕𑀮𑁄 𑀅𑀦𑀧𑁂𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑁆𑀢𑀺, 𑀏𑀯𑀁 𑀅𑀦𑀧𑁂𑀓𑁆𑀔𑁄 𑀲𑀸𑀫𑀡𑁂𑀭𑀲𑁆𑀲 𑀤𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁? ‘‘𑀏𑀯𑀁 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀤𑀢𑁆𑀯𑀸 𑀧𑀘𑁆𑀙𑀸 𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀦𑀬𑀺𑀤𑀁 𑀬𑀸𑀘𑀺𑀢𑀩𑁆𑀩𑀁, 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀤𑀺𑀦𑁆𑀦𑀲𑁆𑀲 𑀳𑀺 𑀧𑀼𑀦 𑀧𑀭𑀺𑀪𑁄𑀕𑁂 𑀆𑀧𑀢𑁆𑀢𑀺𑀬𑁂𑀯 𑀦𑀢𑁆𑀣𑀺. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑀲𑁆𑀲 𑀧𑀦 𑀧𑀭𑀺𑀪𑁄𑀕𑁂 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀫𑀺𑀤𑀁 𑀯𑀼𑀢𑁆𑀢’’𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀁 𑀤𑀺𑀦𑁆𑀦𑀁 𑀪𑁂𑀲𑀚𑁆𑀚𑀁 𑀲𑀘𑁂 𑀲𑀸𑀫𑀡𑁂𑀭𑁄 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀯𑀸 𑀅𑀦𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀢𑁆𑀣𑀼𑀓𑀫𑁆𑀫𑀢𑁆𑀣𑀁 𑀤𑀤𑁂𑀬𑁆𑀬, 𑀕𑀳𑁂𑀢𑁆𑀯𑀸 𑀦𑀢𑁆𑀣𑀼𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀩𑀸𑀮𑁄 𑀳𑁄𑀢𑀺, 𑀤𑀸𑀢𑀼𑀁 𑀦 𑀚𑀸𑀦𑀸𑀢𑀺, 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀅𑀢𑁆𑀣𑀺 𑀢𑁂, 𑀲𑀸𑀫𑀡𑁂𑀭, 𑀢𑁂𑀮’’𑀦𑁆𑀢𑀺 ‘‘𑀆𑀫, 𑀪𑀦𑁆𑀢𑁂, 𑀅𑀢𑁆𑀣𑀻’’𑀢𑀺. ‘‘𑀆𑀳𑀭, 𑀣𑁂𑀭𑀲𑁆𑀲 𑀪𑁂𑀲𑀚𑁆𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁, 𑀅𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁,

𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁨𑁬. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 𑀯𑀺𑀲𑀸𑀔𑀸𑀯𑀢𑁆𑀣𑀼𑀲𑁆𑀫𑀺𑀁 (𑀫𑀳𑀸𑀯. 𑁩𑁪𑁯 𑀆𑀤𑀬𑁄) 𑀅𑀦𑀼𑀜𑁆𑀜𑀸𑀢𑀸. 𑀧𑀝𑀺𑀓𑀘𑁆𑀘𑁂𑀯𑀸𑀢𑀺 𑀧𑀼𑀭𑁂𑀬𑁂𑀯.

𑁬𑁨𑁭. 𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀕𑀺𑀫𑁆𑀳𑀫𑀸𑀲𑀸𑀦𑀁 𑀏𑀓𑁄 𑀧𑀘𑁆𑀙𑀺𑀫𑀫𑀸𑀲𑁄 𑀲𑁂𑀲𑁄. 𑀓𑀢𑁆𑀯𑀸𑀢𑀺 𑀲𑀺𑀩𑁆𑀩𑀦𑀭𑀚𑀦𑀓𑀧𑁆𑀧𑀧𑀭𑀺𑀬𑁄𑀲𑀸𑀦𑁂𑀦 𑀦𑀺𑀝𑁆𑀞𑀧𑁂𑀢𑁆𑀯𑀸. 𑀓𑀭𑁄𑀦𑁆𑀢𑁂𑀦 𑀘 𑀏𑀓𑀫𑁂𑀯 𑀓𑀢𑁆𑀯𑀸 𑀲𑀫𑀬𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀤𑁆𑀯𑁂 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺.

𑀅𑀢𑀺𑀭𑁂𑀓𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂𑀢𑀺 𑀕𑀺𑀫𑁆𑀳𑀸𑀦𑀦𑀸𑀫𑀓𑁂 𑀅𑀢𑀺𑀭𑁂𑀓𑀫𑀸𑀲𑁂 𑀲𑁂𑀲𑁂.

𑀅𑀢𑀺𑀭𑁂𑀓𑀤𑁆𑀥𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀞𑀢𑁆𑀯𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀧𑀭𑀺𑀬𑁂𑀲𑀦𑀓𑁆𑀔𑁂𑀢𑁆𑀢𑀁 𑀓𑀭𑀡𑀓𑁆𑀔𑁂𑀢𑁆𑀢𑀁 𑀦𑀺𑀯𑀸𑀲𑀦𑀓𑁆𑀔𑁂𑀢𑁆𑀢𑀁 𑀅𑀥𑀺𑀝𑁆𑀞𑀸𑀦𑀓𑁆𑀔𑁂𑀢𑁆𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀔𑁂𑀢𑁆𑀢𑀁, 𑀓𑀼𑀘𑁆𑀙𑀺𑀲𑀫𑀬𑁄 𑀧𑀺𑀝𑁆𑀞𑀺𑀲𑀫𑀬𑁄𑀢𑀺 𑀤𑀼𑀯𑀺𑀥𑁄 𑀲𑀫𑀬𑁄, 𑀧𑀺𑀝𑁆𑀞𑀺𑀲𑀫𑀬𑀘𑀢𑀼𑀓𑁆𑀓𑀁 𑀓𑀼𑀘𑁆𑀙𑀺𑀲𑀫𑀬𑀘𑀢𑀼𑀓𑁆𑀓𑀦𑁆𑀢𑀺 𑀤𑁆𑀯𑁂 𑀘𑀢𑀼𑀓𑁆𑀓𑀸𑀦𑀺 𑀘 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀚𑁂𑀝𑁆𑀞𑀫𑀽𑀮𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀘𑁆𑀙𑀺𑀫𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀸𑀴𑀧𑀓𑁆𑀔𑀼𑀧𑁄𑀲𑀣𑀸, 𑀅𑀬𑀫𑁂𑀓𑁄 𑀅𑀤𑁆𑀥𑀫𑀸𑀲𑁄 𑀧𑀭𑀺𑀬𑁂𑀲𑀦𑀓𑁆𑀔𑁂𑀢𑁆𑀢𑀜𑁆𑀘𑁂𑀯 𑀓𑀭𑀡𑀓𑁆𑀔𑁂𑀢𑁆𑀢𑀜𑁆𑀘. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀦𑁆𑀢𑀭𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀅𑀮𑀤𑁆𑀥𑀁 𑀧𑀭𑀺𑀬𑁂𑀲𑀺𑀢𑀼𑀁 𑀮𑀤𑁆𑀥𑀁 𑀓𑀸𑀢𑀼𑀜𑁆𑀘 𑀯𑀝𑁆𑀝𑀢𑀺, 𑀦𑀺𑀯𑀸𑀲𑁂𑀢𑀼𑀁 𑀅𑀥𑀺𑀝𑁆𑀞𑀸𑀢𑀼𑀜𑁆𑀘 𑀦 𑀯𑀝𑁆𑀝𑀢𑀺. 𑀓𑀸𑀴𑀧𑀓𑁆𑀔𑀼𑀧𑁄𑀲𑀣𑀲𑁆𑀲 𑀧𑀘𑁆𑀙𑀺𑀫𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸, 𑀅𑀬𑀫𑁂𑀓𑁄 𑀅𑀤𑁆𑀥𑀫𑀸𑀲𑁄 𑀧𑀭𑀺𑀬𑁂𑀲𑀦𑀓𑀭𑀡𑀦𑀺𑀯𑀸𑀲𑀦𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀔𑁂𑀢𑁆𑀢𑀁. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀦𑁆𑀢𑀭𑁂 𑀧𑀭𑀺𑀬𑁂𑀲𑀺𑀢𑀼𑀁 𑀓𑀸𑀢𑀼𑀁 𑀦𑀺𑀯𑀸𑀲𑁂𑀢𑀼𑀜𑁆𑀘 𑀯𑀝𑁆𑀝𑀢𑀺, 𑀅𑀥𑀺𑀝𑁆𑀞𑀸𑀢𑀼𑀁𑀬𑁂𑀯 𑀦 𑀯𑀝𑁆𑀝𑀢𑀺. 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀘𑁆𑀙𑀺𑀫𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀧𑀭𑀺𑀬𑁂𑀲𑀦𑀓𑀭𑀡𑀦𑀺𑀯𑀸𑀲𑀦𑀸𑀥𑀺𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀔𑁂𑀢𑁆𑀢𑀁. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀦𑁆𑀢𑀭𑁂 𑀅𑀮𑀤𑁆𑀥𑀁 𑀧𑀭𑀺𑀬𑁂𑀲𑀺𑀢𑀼𑀁 𑀮𑀤𑁆𑀥𑀁 𑀓𑀸𑀢𑀼𑀁 𑀦𑀺𑀯𑀸𑀲𑁂𑀢𑀼𑀁 𑀅𑀥𑀺𑀝𑁆𑀞𑀸𑀢𑀼𑀜𑁆𑀘 𑀯𑀝𑁆𑀝𑀢𑀺. 𑀇𑀤𑀁 𑀢𑀸𑀯 𑀘𑀢𑀼𑀩𑁆𑀩𑀺𑀥𑀁 𑀔𑁂𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀦 𑀧𑀘𑁆𑀙𑀺𑀫𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀚𑁂𑀝𑁆𑀞𑀫𑀽𑀮𑀧𑀼𑀡𑁆𑀡𑀫𑀸, 𑀇𑀫𑁂 𑀲𑀢𑁆𑀢 𑀫𑀸𑀲𑀸 𑀧𑀺𑀝𑁆𑀞𑀺𑀲𑀫𑀬𑁄 𑀦𑀸𑀫. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀦𑁆𑀢𑀭𑁂 ‘‘𑀓𑀸𑀮𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀢𑀼𑀧𑁆𑀧𑀸𑀤𑀁 𑀓𑀢𑁆𑀯𑀸 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. ‘‘𑀤𑁂𑀣 𑀫𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀜𑁆𑀜𑀢𑁆𑀢𑀺𑀁 𑀓𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀢𑀼𑀧𑁆𑀧𑀸𑀤𑀁 𑀓𑀢𑁆𑀯𑀸 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀇𑀫𑀺𑀦𑀸𑀯 𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀯𑀺𑀜𑁆𑀜𑀢𑁆𑀢𑀺𑀁 𑀓𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 𑁋

‘‘𑀫𑀸𑀢𑀭𑀁 𑀘𑀻𑀯𑀭𑀁 𑀬𑀸𑀘𑁂, 𑀦𑁄 𑀘 𑀲𑀗𑁆𑀖𑁂 𑀧𑀭𑀺𑀡𑀢𑀁;

𑀓𑁂𑀦𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺, 𑀅𑀦𑀸𑀧𑀢𑁆𑀢𑀺 𑀘 𑀜𑀸𑀢𑀓𑁂;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁧);

𑀅𑀬𑀜𑁆𑀳𑀺 𑀧𑀜𑁆𑀳𑁄 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺. 𑀏𑀯𑀁 𑀧𑀺𑀝𑁆𑀞𑀺𑀲𑀫𑀬𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀚𑁂𑀝𑁆𑀞𑀫𑀽𑀮𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀦 𑀧𑀘𑁆𑀙𑀺𑀫𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸, 𑀇𑀫𑁂 𑀧𑀜𑁆𑀘 𑀫𑀸𑀲𑀸 𑀓𑀼𑀘𑁆𑀙𑀺𑀲𑀫𑀬𑁄 𑀦𑀸𑀫. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀦𑁆𑀢𑀭𑁂 𑀯𑀼𑀢𑁆𑀢𑀦𑀬𑁂𑀦 𑀲𑀢𑀼𑀧𑁆𑀧𑀸𑀤𑀁 𑀓𑀢𑁆𑀯𑀸 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀁. 𑀬𑁂 𑀫𑀦𑀼𑀲𑁆𑀲𑀸 𑀧𑀼𑀩𑁆𑀩𑁂𑀧𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀤𑁂𑀦𑁆𑀢𑀺, 𑀇𑀫𑁂 𑀧𑀦 𑀲𑀘𑁂𑀧𑀺 𑀅𑀢𑁆𑀢𑀦𑁄 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀸 𑀳𑁄𑀦𑁆𑀢𑀺, 𑀯𑀢𑁆𑀢𑀪𑁂𑀤𑁄 𑀦𑀢𑁆𑀣𑀺, 𑀢𑁂𑀲𑀼 𑀲𑀢𑀼𑀧𑁆𑀧𑀸𑀤𑀓𑀭𑀡𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀯𑀺𑀜𑁆𑀜𑀢𑀺𑀁 𑀓𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀇𑀤𑀁 𑀧𑀦 𑀧𑀓𑀢𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀤𑀸𑀬𑀓𑁂𑀲𑀼𑀧𑀺 𑀳𑁄𑀢𑀺𑀬𑁂𑀯. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀢𑀼𑀧𑁆𑀧𑀸𑀤𑀁 𑀓𑀢𑁆𑀯𑀸 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺. 𑀯𑀺𑀜𑁆𑀜𑀢𑁆𑀢𑀺𑀁 𑀓𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺. ‘‘𑀦 𑀯𑀢𑁆𑀢𑀩𑁆𑀩𑀸 𑀤𑁂𑀣 𑀫𑁂’’𑀢𑀺 𑀇𑀤𑀜𑁆𑀳𑀺 𑀧𑀭𑀺𑀬𑁂𑀲𑀦𑀓𑀸𑀮𑁂 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀁 𑀓𑀼𑀘𑁆𑀙𑀺𑀲𑀫𑀬𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀦𑀕𑁆𑀕𑁄 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 𑀉𑀤𑀓𑀨𑀼𑀲𑀺𑀢𑀕𑀡𑀦𑀸𑀬 𑀅𑀓𑀢𑁆𑀯𑀸 𑀦𑁆𑀳𑀸𑀦𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀲𑁄 𑀘 𑀔𑁄 𑀯𑀺𑀯𑀝𑀗𑁆𑀕𑀡𑁂 𑀆𑀓𑀸𑀲𑀢𑁄 𑀧𑀢𑀺𑀢𑀉𑀤𑀓𑁂𑀦𑁂𑀯 𑀦𑁆𑀳𑀸𑀬𑀦𑁆𑀢𑁄. 𑀦𑁆𑀳𑀸𑀦𑀓𑁄𑀝𑁆𑀞𑀓𑀯𑀸𑀧𑀺𑀆𑀤𑀻𑀲𑀼 𑀖𑀝𑁂𑀳𑀺 𑀆𑀲𑀺𑀢𑁆𑀢𑀉𑀤𑀓𑁂𑀦 𑀯𑀸 𑀦𑁆𑀳𑀸𑀬𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀯𑀲𑁆𑀲𑀁 𑀉𑀓𑁆𑀓𑀟𑁆𑀠𑀺𑀬𑀢𑀻𑀢𑀺 𑀏𑀢𑁆𑀣 𑀲𑀘𑁂 𑀓𑀢𑀧𑀭𑀺𑀬𑁂𑀲𑀺𑀢𑀸𑀬 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫 𑀫𑀸𑀲𑀁 𑀔𑁂𑀧𑁂𑀢𑁆𑀯𑀸 𑀧𑀼𑀦 𑀯𑀲𑁆𑀲𑀸𑀦𑀲𑁆𑀲 𑀧𑀞𑀫𑀫𑀸𑀲𑀁 𑀉𑀓𑁆𑀓𑀟𑁆𑀠𑀺𑀢𑁆𑀯𑀸 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑀫𑀸𑀲𑀫𑁂𑀯 𑀓𑀭𑁄𑀦𑁆𑀢𑀺, 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀥𑁄𑀯𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀅𑀦𑀥𑀺𑀝𑁆𑀞𑀺𑀢𑀸 𑀅𑀯𑀺𑀓𑀧𑁆𑀧𑀺𑀢𑀸 𑀤𑁆𑀯𑁂 𑀫𑀸𑀲𑁂 𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. 𑀲𑀘𑁂 𑀲𑀢𑀺𑀲𑀫𑁆𑀫𑁄𑀲𑁂𑀦 𑀯𑀸 𑀅𑀧𑁆𑀧𑀳𑁄𑀦𑀓𑀪𑀸𑀯𑁂𑀦 𑀯𑀸 𑀅𑀓𑀢𑀸 𑀳𑁄𑀢𑀺, 𑀢𑁂 𑀘 𑀤𑁆𑀯𑁂 𑀫𑀸𑀲𑁂 𑀯𑀲𑁆𑀲𑀸𑀦𑀲𑁆𑀲 𑀘 𑀘𑀸𑀢𑀼𑀫𑀸𑀲𑀦𑁆𑀢𑀺 𑀙 𑀫𑀸𑀲𑁂 𑀧𑀭𑀺𑀳𑀸𑀭𑀁 𑀮𑀪𑀢𑀺. 𑀲𑀘𑁂 𑀧𑀦 𑀓𑀢𑁆𑀢𑀺𑀓𑀫𑀸𑀲𑁂 𑀓𑀣𑀺𑀦𑀁 𑀅𑀢𑁆𑀣𑀭𑀻𑀬𑀢𑀺, 𑀅𑀧𑀭𑁂𑀧𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀮𑀪𑀢𑀺, 𑀏𑀯𑀁 𑀤𑀲 𑀫𑀸𑀲𑀸 𑀳𑁄𑀦𑁆𑀢𑀺. 𑀢𑀢𑁄 𑀧𑀭𑀫𑁆𑀧𑀺 𑀲𑀢𑀺𑀬𑀸 𑀧𑀘𑁆𑀘𑀸𑀲𑀸𑀬 𑀫𑀽𑀮𑀘𑀻𑀯𑀭𑀁 𑀓𑀢𑁆𑀯𑀸 𑀞𑀧𑁂𑀦𑁆𑀢𑀲𑁆𑀲 𑀏𑀓𑀫𑀸𑀲𑀦𑁆𑀢𑀺 𑀏𑀯𑀁 𑀏𑀓𑀸𑀤𑀲 𑀫𑀸𑀲𑁂 𑀧𑀭𑀺𑀳𑀸𑀭𑀁 𑀮𑀪𑀢𑀺. 𑀲𑀘𑁂 𑀧𑀦 𑀏𑀓𑀸𑀳𑀤𑁆𑀯𑀻𑀳𑀸𑀤𑀺𑀯𑀲𑁂𑀦 𑀬𑀸𑀯 𑀤𑀲𑀸𑀳𑀸𑀦𑀸𑀕𑀢𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀅𑀦𑁆𑀢𑁄𑀯𑀲𑁆𑀲𑁂 𑀯𑀸 𑀮𑀤𑁆𑀥𑀸 𑀘𑁂𑀯 𑀦𑀺𑀝𑁆𑀞𑀺𑀢𑀸 𑀘, 𑀓𑀤𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀢𑀺 𑀏𑀢𑀁 𑀅𑀝𑁆𑀞𑀓𑀣𑀸𑀲𑀼 𑀦 𑀯𑀺𑀘𑀸𑀭𑀺𑀢𑀁. 𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁄𑀤𑀲𑀸𑀳𑁂 𑀦𑀺𑀝𑁆𑀞𑀺𑀢𑀸 𑀧𑀦 𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀝𑁆𑀞𑀺𑀢𑀸 𑀢𑀤𑀳𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. 𑀤𑀲𑀸𑀳𑁂 𑀅𑀧𑁆𑀧𑀳𑁄𑀦𑁆𑀢𑁂 𑀘𑀻𑀯𑀭𑀓𑀸𑀮𑀁 𑀦𑀸𑀢𑀺𑀓𑁆𑀓𑀫𑁂𑀢𑀩𑁆𑀩𑀸𑀢𑀺 𑀅𑀬𑀁 𑀦𑁄 𑀅𑀢𑁆𑀢𑀦𑁄𑀫𑀢𑀺. 𑀓𑀲𑁆𑀫𑀸? ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀢𑁄 𑀧𑀼𑀩𑁆𑀩𑁂 𑀤𑀲𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. ‘‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁪𑁬𑁨) 𑀘 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀏𑀓𑀸𑀳𑀤𑁆𑀯𑀻𑀳𑀸𑀤𑀺𑀯𑀲𑁂𑀦 𑀬𑀸𑀯 𑀤𑀲𑀸𑀳𑀸𑀦𑀸𑀕𑀢𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀅𑀦𑁆𑀢𑁄𑀯𑀲𑁆𑀲𑁂 𑀯𑀸 𑀮𑀤𑁆𑀥𑀸 𑀘𑁂𑀯 𑀦𑀺𑀝𑁆𑀞𑀺𑀢𑀸 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑁆𑀢𑁄𑀤𑀲𑀸𑀳𑁂 𑀯𑀸 𑀢𑀤𑀳𑀼 𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀤𑀲𑀸𑀳𑁂 𑀅𑀧𑁆𑀧𑀳𑁄𑀦𑁆𑀢𑁂 𑀘𑀻𑀯𑀭𑀓𑀸𑀮𑀁 𑀦𑀸𑀢𑀺𑀓𑁆𑀓𑀫𑁂𑀢𑀩𑁆𑀩𑀸.

𑀢𑀢𑁆𑀣 𑀲𑀺𑀬𑀸 ‘‘𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼’’𑀦𑁆𑀢𑀺 𑀯𑀘𑀦𑀢𑁄 ‘‘𑀘𑀸𑀢𑀼𑀫𑀸𑀲𑀩𑁆𑀪𑀦𑁆𑀢𑀭𑁂 𑀬𑀤𑀸 𑀯𑀸 𑀢𑀤𑀸 𑀯𑀸 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀬𑀤𑀺 𑀏𑀯𑀁, ‘‘𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀬𑀸𑀯 𑀆𑀩𑀸𑀥𑀸 𑀅𑀥𑀺𑀝𑁆𑀞𑀸𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁 𑀲𑀸𑀧𑀺, 𑀘 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀸 𑀲𑀺𑀬𑀸. 𑀏𑀯𑀜𑁆𑀘 𑀲𑀢𑀺 ‘‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀯𑀺𑀭𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀅𑀜𑁆𑀜𑀁 𑀯𑀸 𑀅𑀘𑀮𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀙𑀟𑁆𑀟𑁂𑀢𑀩𑁆𑀩𑀁. 𑀅𑀧𑀺𑀘 𑀓𑀼𑀭𑀼𑀦𑁆𑀤𑀺𑀬𑀫𑁆𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀯𑀲𑀸𑀦𑁂 𑀯𑀼𑀢𑁆𑀢𑀁 𑁋 ‘‘𑀓𑀤𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸? 𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁄𑀤𑀲𑀸𑀳𑁂 𑀦𑀺𑀝𑁆𑀞𑀺𑀢𑀸 𑀧𑀦 𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. 𑀬𑀤𑀺 𑀦𑀧𑁆𑀧𑀳𑁄𑀢𑀺 𑀬𑀸𑀯 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀧𑀭𑀺𑀳𑀸𑀭𑀁 𑀮𑀪𑀢𑀻’’𑀢𑀺.

𑁬𑁩𑁦. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲𑀸𑀢𑀺 𑀏𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀦𑀕𑁆𑀕𑀸𑀦𑀁 𑀓𑀸𑀬𑁄𑀯𑀲𑁆𑀲𑀸𑀧𑀦𑁂 𑀅𑀦𑀸𑀧𑀢𑁆𑀢𑀺. 𑀏𑀢𑁆𑀣 𑀘 𑀫𑀳𑀕𑁆𑀖𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀦𑁆𑀳𑀸𑀬𑀦𑁆𑀢𑀲𑁆𑀲 𑀘𑁄𑀭𑀼𑀧𑀤𑁆𑀤𑀯𑁄 𑀆𑀧𑀤𑀸 𑀦𑀸𑀫. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁩𑁧. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀬𑀫𑁆𑀧𑀺 𑀢𑁆𑀬𑀸𑀳𑀦𑁆𑀢𑀺 𑀬𑀫𑁆𑀧𑀺 𑀢𑁂 𑀅𑀳𑀁. 𑀲𑁄 𑀓𑀺𑀭 ‘‘𑀫𑀫 𑀧𑀢𑁆𑀢𑀘𑀻𑀯𑀭𑀉𑀧𑀸𑀳𑀦𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀯𑀳𑀦𑁆𑀢𑁄 𑀫𑀬𑀸 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀅𑀤𑀸𑀲𑀺. 𑀢𑁂𑀦𑁂𑀯𑀫𑀸𑀳. 𑀅𑀘𑁆𑀙𑀺𑀦𑁆𑀤𑀻𑀢𑀺 𑀩𑀮𑀓𑁆𑀓𑀸𑀭𑁂𑀦 𑀅𑀕𑁆𑀕𑀳𑁂𑀲𑀺, 𑀲𑀓𑀲𑀜𑁆𑀜𑀸𑀬 𑀕𑀳𑀺𑀢𑀢𑁆𑀢𑀸 𑀧𑀦𑀲𑁆𑀲 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀓𑀺𑀮𑀫𑁂𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 𑀆𑀧𑀢𑁆𑀢𑀺 𑀧𑀜𑁆𑀜𑀢𑁆𑀢𑀸.

𑁬𑁩𑁩. 𑀲𑀬𑀁 𑀅𑀘𑁆𑀙𑀺𑀦𑁆𑀤𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀓𑀁 𑀘𑀻𑀯𑀭𑀁 𑀏𑀓𑀸𑀩𑀤𑁆𑀥𑀸𑀦𑀺 𑀘 𑀩𑀳𑀽𑀦𑀺 𑀅𑀘𑁆𑀙𑀺𑀦𑁆𑀤𑀢𑁄 𑀏𑀓𑀸 𑀆𑀧𑀢𑁆𑀢𑀺. 𑀏𑀓𑀢𑁄 𑀅𑀩𑀤𑁆𑀥𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀺𑀢𑀸𑀦𑀺 𑀘 𑀩𑀳𑀽𑀦𑀺 𑀅𑀘𑁆𑀙𑀺𑀦𑁆𑀤𑀢𑁄 ‘‘𑀲𑀗𑁆𑀖𑀸𑀝𑀺𑀁 𑀆𑀳𑀭, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀆𑀳𑀭𑀸’’𑀢𑀺 𑀏𑀯𑀁 𑀆𑀳𑀭𑀸𑀧𑀬𑀢𑁄 𑀘 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. ‘‘𑀫𑀬𑀸 𑀤𑀺𑀦𑁆𑀦𑀸𑀦𑀺 𑀲𑀩𑁆𑀩𑀸𑀦𑀺 𑀆𑀳𑀭𑀸’’𑀢𑀺 𑀯𑀤𑀢𑁄𑀧𑀺 𑀏𑀓𑀯𑀘𑀦𑁂𑀦𑁂𑀯 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄.

𑀅𑀜𑁆𑀜𑀁 𑀆𑀡𑀸𑀧𑁂𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 ‘‘𑀘𑀻𑀯𑀭𑀁 𑀕𑀡𑁆𑀳𑀸’’𑀢𑀺 𑀆𑀡𑀸𑀧𑁂𑀢𑀺, 𑀏𑀓𑀁 𑀤𑀼𑀓𑁆𑀓𑀝𑀁. 𑀆𑀡𑀢𑁆𑀢𑁄 𑀩𑀳𑀽𑀦𑀺 𑀕𑀡𑁆𑀳𑀸𑀢𑀺, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 ‘‘𑀲𑀗𑁆𑀖𑀸𑀝𑀺𑀁 𑀕𑀡𑁆𑀳, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀕𑀡𑁆𑀳𑀸’’𑀢𑀺 𑀯𑀤𑀢𑁄 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀁. ‘‘𑀫𑀬𑀸 𑀤𑀺𑀦𑁆𑀦𑀸𑀦𑀺 𑀲𑀩𑁆𑀩𑀸𑀦𑀺 𑀕𑀡𑁆𑀳𑀸’’𑀢𑀺 𑀯𑀤𑀢𑁄 𑀏𑀓𑀯𑀸𑀘𑀸𑀬 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄.

𑁬𑁩𑁪. 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀅𑀦𑁆𑀢𑀫𑀲𑁄 𑀲𑀽𑀘𑀺𑀫𑁆𑀧𑀺. 𑀯𑁂𑀞𑁂𑀢𑁆𑀯𑀸 𑀞𑀧𑀺𑀢𑀲𑀽𑀘𑀻𑀲𑀼𑀧𑀺 𑀯𑀢𑁆𑀣𑀼𑀕𑀡𑀦𑀸𑀬 𑀤𑀼𑀓𑁆𑀓𑀝𑀸𑀦𑀺. 𑀲𑀺𑀣𑀺𑀮𑀯𑁂𑀞𑀺𑀢𑀸𑀲𑀼 𑀏𑀯𑀁. 𑀕𑀸𑀴𑁆𑀳𑀁 𑀓𑀢𑁆𑀯𑀸 𑀩𑀤𑁆𑀥𑀸𑀲𑀼 𑀧𑀦 𑀏𑀓𑀫𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀲𑀽𑀘𑀺𑀖𑀭𑁂 𑀧𑀓𑁆𑀔𑀺𑀢𑁆𑀢𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀺𑀣𑀺𑀮𑀩𑀤𑁆𑀥 𑀕𑀸𑀴𑁆𑀳𑀩𑀤𑁆𑀥𑁂𑀲𑀼 𑀢𑀺𑀓𑀝𑀼𑀓𑀸𑀤𑀻𑀲𑀼 𑀪𑁂𑀲𑀚𑁆𑀚𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁬𑁩𑁫. 𑀲𑁄 𑀯𑀸 𑀤𑁂𑀢𑀻𑀢𑀺 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁𑀬𑁂𑀯 𑀇𑀤𑀁 𑀲𑀸𑀭𑀼𑀧𑁆𑀧’’𑀦𑁆𑀢𑀺 𑀏𑀯𑀁 𑀯𑀸 𑀤𑁂𑀢𑀺, 𑀅𑀣 𑀯𑀸 𑀧𑀦 ‘‘𑀆𑀯𑀼𑀲𑁄, 𑀫𑀬𑀁 𑀢𑀼𑀬𑁆𑀳𑀁 ‘𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀭𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀺𑀲𑁆𑀲𑀢𑀺, 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀲𑁆𑀲𑀢𑀻’𑀢𑀺 𑀘𑀻𑀯𑀭𑀁 𑀅𑀤𑀫𑁆𑀳, 𑀲𑁄 𑀤𑀸𑀦𑀺 𑀢𑁆𑀯𑀁 𑀦 𑀯𑀢𑁆𑀢𑀁 𑀓𑀭𑁄𑀲𑀺, 𑀦 𑀉𑀧𑀚𑁆𑀛𑀁 𑀕𑀡𑁆𑀳𑀸𑀲𑀺, 𑀦 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀲𑀻’’𑀢𑀺 𑀏𑀯𑀫𑀸𑀤𑀻𑀦𑀺 𑀯𑀼𑀢𑁆𑀢𑁄 ‘‘𑀪𑀦𑁆𑀢𑁂, 𑀘𑀻𑀯𑀭𑀢𑁆𑀣𑀸𑀬 𑀫𑀜𑁆𑀜𑁂 𑀪𑀡𑀣, 𑀇𑀤𑀁 𑀯𑁄 𑀘𑀻𑀯𑀭’’𑀦𑁆𑀢𑀺 𑀤𑁂𑀢𑀺, 𑀏𑀯𑀫𑁆𑀧𑀺 𑀲𑁄 𑀯𑀸 𑀤𑁂𑀢𑀺. 𑀤𑀺𑀲𑀸𑀧𑀓𑁆𑀓𑀦𑁆𑀢𑀁 𑀯𑀸 𑀧𑀦 𑀤𑀳𑀭𑀁 ‘‘𑀦𑀺𑀯𑀢𑁆𑀢𑁂𑀣 𑀦’’𑀦𑁆𑀢𑀺 𑀪𑀡𑀢𑀺, 𑀲𑁄 𑀦 𑀦𑀺𑀯𑀢𑁆𑀢𑀢𑀺. 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀭𑀼𑀦𑁆𑀥𑀣𑀸𑀢𑀺, 𑀏𑀯𑀁 𑀘𑁂 𑀦𑀺𑀯𑀢𑁆𑀢𑀢𑀺, 𑀲𑀸𑀥𑀼. 𑀲𑀘𑁂 ‘‘𑀧𑀢𑁆𑀢𑀘𑀻𑀯𑀭𑀢𑁆𑀣𑀸𑀬 𑀫𑀜𑁆𑀜𑁂 𑀢𑀼𑀫𑁆𑀳𑁂 𑀪𑀡𑀣, 𑀕𑀡𑁆𑀳𑀣 𑀦’’𑀦𑁆𑀢𑀺 𑀤𑁂𑀢𑀺. 𑀏𑀯𑀫𑁆𑀧𑀺 𑀲𑁄 𑀯𑀸 𑀤𑁂𑀢𑀺, 𑀯𑀺𑀩𑁆𑀪𑀦𑁆𑀢𑀁 𑀯𑀸 𑀤𑀺𑀲𑁆𑀯𑀸 ‘‘𑀫𑀬𑀁 𑀢𑀼𑀬𑁆𑀳𑀁 ‘𑀯𑀢𑁆𑀢𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀧𑀢𑁆𑀢𑀘𑀻𑀯𑀭𑀁 𑀅𑀤𑀫𑁆𑀳, 𑀲𑁄 𑀤𑀸𑀦𑀺 𑀢𑁆𑀯𑀁 𑀯𑀺𑀩𑁆𑀪𑀫𑀺𑀢𑁆𑀯𑀸 𑀘𑀭𑀲𑀻’’𑀢𑀺 𑀯𑀤𑀢𑀺. 𑀇𑀢𑀭𑁄 ‘‘𑀕𑀡𑁆𑀳𑀣 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀤𑁂𑀢𑀺, 𑀏𑀯𑀫𑁆𑀧𑀺 𑀲𑁄 𑀯𑀸 𑀤𑁂𑀢𑀺. ‘‘𑀫𑀫 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀦𑁆𑀢𑀲𑁆𑀲𑁂𑀯 𑀤𑁂𑀫𑀺, 𑀅𑀜𑁆𑀜𑀢𑁆𑀣 𑀕𑀡𑁆𑀳𑀦𑁆𑀢𑀲𑁆𑀲 𑀦 𑀤𑁂𑀫𑀺. 𑀯𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀤𑁂𑀫𑀺, 𑀅𑀓𑀭𑁄𑀦𑁆𑀢𑀲𑁆𑀲 𑀦 𑀤𑁂𑀫𑀺, 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀲𑁆𑀲𑁂𑀯 𑀤𑁂𑀫𑀺, 𑀅𑀧𑀭𑀺𑀬𑀸𑀧𑀼𑀡𑀦𑁆𑀢𑀲𑁆𑀲 𑀦 𑀤𑁂𑀫𑀺, 𑀅𑀯𑀺𑀩𑁆𑀪𑀫𑀦𑁆𑀢𑀲𑁆𑀲𑁂𑀯 𑀤𑁂𑀫𑀺, 𑀯𑀺𑀩𑁆𑀪𑀫𑀦𑁆𑀢𑀲𑁆𑀲 𑀦 𑀤𑁂𑀫𑀻’’𑀢𑀺 𑀏𑀯𑀁 𑀧𑀦 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑀤𑀢𑁄 𑀤𑀼𑀓𑁆𑀓𑀝𑀁. 𑀆𑀳𑀭𑀸𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺. 𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁩𑁬. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀔𑁄𑀫𑀦𑁆𑀢𑀺 𑀔𑁄𑀫𑀯𑀸𑀓𑁂𑀳𑀺 𑀓𑀢𑀲𑀼𑀢𑁆𑀢𑀁. 𑀓𑀧𑁆𑀧𑀸𑀲𑀺𑀓𑀦𑁆𑀢𑀺 𑀓𑀧𑁆𑀧𑀸𑀲𑀢𑁄 𑀦𑀺𑀩𑁆𑀩𑀢𑁆𑀢𑀁. 𑀓𑁄𑀲𑁂𑀬𑁆𑀬𑀦𑁆𑀢𑀺 𑀓𑁄𑀲𑀺𑀬𑀁𑀲𑀽𑀳𑀺 𑀓𑀦𑁆𑀢𑀺𑀢𑁆𑀯𑀸 𑀓𑀢𑀲𑀼𑀢𑁆𑀢𑀁. 𑀓𑀫𑁆𑀩𑀮𑀦𑁆𑀢𑀺 𑀏𑀴𑀓𑀮𑁄𑀫𑀲𑀼𑀢𑁆𑀢𑀁. 𑀲𑀸𑀡𑀦𑁆𑀢𑀺 𑀲𑀸𑀡𑀯𑀸𑀓𑀲𑀼𑀢𑁆𑀢𑀁. 𑀪𑀗𑁆𑀕𑀦𑁆𑀢𑀺 𑀧𑀸𑀝𑁂𑀓𑁆𑀓𑀁 𑀯𑀸𑀓𑀲𑀼𑀢𑁆𑀢𑀫𑁂𑀯𑀸𑀢𑀺 𑀏𑀓𑁂. 𑀏𑀢𑁂𑀳𑀺 𑀧𑀜𑁆𑀘𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀲𑀼𑀢𑁆𑀢𑀁 𑀧𑀦 ‘‘𑀪𑀗𑁆𑀕’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀸𑀬𑀸𑀧𑁂𑀢𑀺 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀦𑁆𑀢𑀺 𑀲𑀘𑁂 𑀢𑀦𑁆𑀢𑀯𑀸𑀬𑀲𑁆𑀲 𑀢𑀼𑀭𑀺𑀯𑁂𑀫𑀸𑀤𑀻𑀦𑀺 𑀦𑀢𑁆𑀣𑀺, 𑀢𑀸𑀦𑀺 ‘‘𑀅𑀭𑀜𑁆𑀜𑀢𑁄 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀸𑀲𑀺𑀁 𑀯𑀸 𑀨𑀭𑀲𑀼𑀁 𑀯𑀸 𑀦𑀺𑀲𑁂𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀬𑀁 𑀬𑀁 𑀉𑀧𑀓𑀭𑀡𑀢𑁆𑀣𑀸𑀬 𑀯𑀸 𑀘𑀻𑀯𑀭𑀯𑀸𑀬𑀦𑀢𑁆𑀣𑀸𑀬 𑀯𑀸 𑀓𑀭𑁄𑀢𑀺, 𑀲𑀩𑁆𑀩𑀢𑁆𑀣 𑀢𑀦𑁆𑀢𑀯𑀸𑀬𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀁. 𑀤𑀻𑀖𑀢𑁄 𑀯𑀺𑀤𑀢𑁆𑀣𑀺𑀫𑀢𑁆𑀢𑁂 𑀢𑀺𑀭𑀺𑀬𑀜𑁆𑀘 𑀳𑀢𑁆𑀣𑀫𑀢𑁆𑀢𑁂 𑀯𑀻𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀬𑀸𑀯 𑀧𑀭𑀺𑀬𑁄𑀲𑀸𑀦𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀨𑀮𑀓𑁂 𑀨𑀮𑀓𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀇𑀤𑀫𑁂𑀯 𑀧𑀫𑀸𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀜𑁆𑀳𑀺 𑀘𑀻𑀯𑀭𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺.

𑀅𑀧𑀺𑀘𑁂𑀢𑁆𑀣 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀲𑀼𑀢𑁆𑀢𑀁 𑀢𑀸𑀯 𑀲𑀸𑀫𑀁 𑀯𑀺𑀜𑁆𑀜𑀸𑀧𑀺𑀢𑀁 𑀅𑀓𑀧𑁆𑀧𑀺𑀬𑀁, 𑀲𑁂𑀲𑀁 𑀜𑀸𑀢𑀓𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀓𑀧𑁆𑀧𑀺𑀬𑀁. 𑀢𑀦𑁆𑀢𑀯𑀸𑀬𑁄𑀧𑀺 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁄 𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑁄 𑀅𑀓𑀧𑁆𑀧𑀺𑀬𑁄, 𑀲𑁂𑀲𑁄 𑀓𑀧𑁆𑀧𑀺𑀬𑁄. 𑀢𑀢𑁆𑀣 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀁 𑀅𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀢𑁂𑀦𑁂𑀯 𑀧𑀦 𑀓𑀧𑁆𑀧𑀺𑀬𑀲𑀼𑀢𑁆𑀢𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀬𑀣𑀸 𑀧𑀼𑀩𑁆𑀩𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀏𑀯𑀁 𑀤𑀼𑀓𑁆𑀓𑀝𑀁. 𑀢𑁂𑀦𑁂𑀯 𑀓𑀧𑁆𑀧𑀺𑀬𑀁 𑀅𑀓𑀧𑁆𑀧𑀺𑀬𑀜𑁆𑀘 𑀲𑀼𑀢𑁆𑀢𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀬𑀤𑀺 𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑁂𑀦 𑀏𑀓𑁄 𑀧𑀭𑀺𑀘𑁆𑀙𑁂𑀤𑁄 𑀲𑀼𑀤𑁆𑀥𑀓𑀧𑁆𑀧𑀺𑀬𑀲𑀼𑀢𑁆𑀢𑀫𑀬𑁄, 𑀏𑀓𑁄 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀫𑀬𑁄𑀢𑀺 𑀏𑀯𑀁 𑀓𑁂𑀤𑀸𑀭𑀩𑀤𑁆𑀥𑀁 𑀯𑀺𑀬 𑀘𑀻𑀯𑀭𑀁 𑀳𑁄𑀢𑀺, 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀫𑀬𑁂 𑀧𑀭𑀺𑀘𑁆𑀙𑁂𑀤𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀇𑀢𑀭𑀲𑁆𑀫𑀺𑀁 𑀢𑀣𑁂𑀯 𑀤𑀼𑀓𑁆𑀓𑀝𑀁. 𑀬𑀤𑀺 𑀢𑀢𑁄 𑀊𑀦𑀧𑀭𑀺𑀘𑁆𑀙𑁂𑀤𑀸 𑀳𑁄𑀦𑁆𑀢𑀺, 𑀅𑀦𑁆𑀢𑀫𑀲𑁄 𑀅𑀘𑁆𑀙𑀺𑀫𑀡𑁆𑀟𑀮𑀧𑁆𑀧𑀫𑀸𑀡𑀸𑀧𑀺, 𑀲𑀩𑁆𑀩𑀧𑀭𑀺𑀘𑁆𑀙𑁂𑀤𑁂𑀲𑀼 𑀧𑀭𑀺𑀘𑁆𑀙𑁂𑀤𑀕𑀡𑀦𑀸𑀬 𑀤𑀼𑀓𑁆𑀓𑀝𑀁. 𑀅𑀣 𑀏𑀓𑀦𑁆𑀢𑀭𑀺𑀓𑁂𑀦 𑀯𑀸 𑀲𑀼𑀢𑁆𑀢𑁂𑀦 𑀤𑀻𑀖𑀢𑁄 𑀯𑀸 𑀓𑀧𑁆𑀧𑀺𑀬𑀁 𑀢𑀺𑀭𑀺𑀬𑀁 𑀅𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀯𑀻𑀢𑀁 𑀳𑁄𑀢𑀺, 𑀨𑀮𑀓𑁂 𑀨𑀮𑀓𑁂 𑀤𑀼𑀓𑁆𑀓𑀝𑀁. 𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦𑀧𑀺 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀬𑀣𑀸 𑀧𑀼𑀩𑁆𑀩𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀏𑀯𑀁 𑀤𑀼𑀓𑁆𑀓𑀝𑀁. 𑀢𑁂𑀦𑁂𑀯 𑀓𑀧𑁆𑀧𑀺𑀬𑀜𑁆𑀘 𑀅𑀓𑀧𑁆𑀧𑀺𑀬𑀜𑁆𑀘 𑀲𑀼𑀢𑁆𑀢𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀲𑀘𑁂 𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑀸 𑀊𑀦𑀓𑀸 𑀯𑀸 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀧𑀭𑀺𑀘𑁆𑀙𑁂𑀤𑀕𑀡𑀦𑀸𑀬 𑀤𑀼𑀓𑁆𑀓𑀝𑀁. 𑀓𑀧𑁆𑀧𑀺𑀬𑀲𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁂𑀲𑀼 𑀅𑀦𑀸𑀧𑀢𑁆𑀢𑀺. 𑀅𑀣 𑀏𑀓𑀦𑁆𑀢𑀭𑀺𑀓𑁂𑀦 𑀯𑀸 𑀲𑀼𑀢𑁆𑀢𑁂𑀦 𑀤𑀻𑀖𑀢𑁄 𑀯𑀸 𑀓𑀧𑁆𑀧𑀺𑀬𑀁 𑀢𑀺𑀭𑀺𑀬𑀁 𑀅𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀯𑀻𑀢𑀁 𑀳𑁄𑀢𑀺, 𑀨𑀮𑀓𑁂 𑀨𑀮𑀓𑁂 𑀤𑀼𑀓𑁆𑀓𑀝𑀁.

𑀬𑀤𑀺 𑀧𑀦 𑀤𑁆𑀯𑁂 𑀢𑀦𑁆𑀢𑀯𑀸𑀬𑀸 𑀳𑁄𑀦𑁆𑀢𑀺, 𑀏𑀓𑁄 𑀓𑀧𑁆𑀧𑀺𑀬𑁄 𑀏𑀓𑁄 𑀅𑀓𑀧𑁆𑀧𑀺𑀬𑁄, 𑀲𑀼𑀢𑁆𑀢𑀜𑁆𑀘 𑀅𑀓𑀧𑁆𑀧𑀺𑀬𑀁, 𑀢𑁂 𑀘𑁂 𑀯𑀸𑀭𑁂𑀦 𑀯𑀺𑀦𑀦𑁆𑀢𑀺, 𑀅𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 𑀯𑀻𑀢𑁂 𑀨𑀮𑀓𑁂 𑀨𑀮𑀓𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀊𑀦𑀢𑀭𑁂 𑀤𑀼𑀓𑁆𑀓𑀝𑀁. 𑀇𑀢𑀭𑁂𑀦 𑀯𑀻𑀢𑁂 𑀉𑀪𑀬𑀢𑁆𑀣 𑀤𑀼𑀓𑁆𑀓𑀝𑀁. 𑀲𑀘𑁂 𑀤𑁆𑀯𑁂𑀧𑀺 𑀯𑁂𑀫𑀁 𑀕𑀳𑁂𑀢𑁆𑀯𑀸 𑀏𑀓𑀢𑁄 𑀯𑀺𑀦𑀦𑁆𑀢𑀺, 𑀨𑀮𑀓𑁂 𑀨𑀮𑀓𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀣 𑀲𑀼𑀢𑁆𑀢𑀁 𑀓𑀧𑁆𑀧𑀺𑀬𑀁, 𑀘𑀻𑀯𑀭𑀜𑁆𑀘 𑀓𑁂𑀤𑀸𑀭𑀩𑀤𑁆𑀥𑀸𑀤𑀻𑀳𑀺 𑀲𑀧𑀭𑀺𑀘𑁆𑀙𑁂𑀤𑀁, 𑀅𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 𑀯𑀻𑀢𑁂 𑀧𑀭𑀺𑀘𑁆𑀙𑁂𑀤𑁂 𑀧𑀭𑀺𑀘𑁆𑀙𑁂𑀤𑁂 𑀤𑀼𑀓𑁆𑀓𑀝𑀁, 𑀇𑀢𑀭𑁂𑀦 𑀯𑀻𑀢𑁂 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀤𑁆𑀯𑁂𑀧𑀺 𑀯𑁂𑀫𑀁 𑀕𑀳𑁂𑀢𑁆𑀯𑀸 𑀏𑀓𑀢𑁄 𑀯𑀺𑀦𑀦𑁆𑀢𑀺, 𑀨𑀮𑀓𑁂 𑀨𑀮𑀓𑁂 𑀤𑀼𑀓𑁆𑀓𑀝𑀁. 𑀅𑀣 𑀲𑀼𑀢𑁆𑀢𑀫𑁆𑀧𑀺 𑀓𑀧𑁆𑀧𑀺𑀬𑀜𑁆𑀘 𑀅𑀓𑀧𑁆𑀧𑀺𑀬𑀜𑁆𑀘, 𑀢𑁂 𑀘𑁂 𑀯𑀸𑀭𑁂𑀦 𑀯𑀺𑀦𑀦𑁆𑀢𑀺, 𑀅𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀫𑀬𑁂𑀲𑀼 𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑁂𑀲𑀼 𑀧𑀭𑀺𑀘𑁆𑀙𑁂𑀤𑁂𑀲𑀼 𑀯𑀻𑀢𑁂𑀲𑀼 𑀧𑀭𑀺𑀘𑁆𑀙𑁂𑀤𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀊𑀦𑀓𑀢𑀭𑁂𑀲𑀼 𑀓𑀧𑁆𑀧𑀺𑀬𑀲𑀼𑀢𑁆𑀢𑀫𑀬𑁂𑀲𑀼 𑀘 𑀤𑀼𑀓𑁆𑀓𑀝𑀁. 𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀫𑀬𑁂𑀲𑀼 𑀧𑀫𑀸𑀡𑀬𑀼𑀢𑁆𑀢𑁂𑀲𑀼 𑀯𑀸 𑀊𑀦𑀓𑁂𑀲𑀼 𑀯𑀸 𑀤𑀼𑀓𑁆𑀓𑀝𑀫𑁂𑀯. 𑀓𑀧𑁆𑀧𑀺𑀬𑀲𑀼𑀢𑁆𑀢𑀫𑀬𑁂𑀲𑀼 𑀅𑀦𑀸𑀧𑀢𑁆𑀢𑀺.

𑀅𑀣 𑀏𑀓𑀦𑁆𑀢𑀭𑀺𑀓𑁂𑀦 𑀯𑀸 𑀲𑀼𑀢𑁆𑀢𑁂𑀦 𑀤𑀻𑀖𑀢𑁄 𑀯𑀸 𑀅𑀓𑀧𑁆𑀧𑀺𑀬𑀁 𑀢𑀺𑀭𑀺𑀬𑀁 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀯𑀺𑀦𑀦𑁆𑀢𑀺, 𑀉𑀪𑁄𑀧𑀺 𑀯𑀸 𑀢𑁂 𑀯𑁂𑀫𑀁 𑀕𑀳𑁂𑀢𑁆𑀯𑀸 𑀏𑀓𑀢𑁄 𑀯𑀺𑀦𑀦𑁆𑀢𑀺, 𑀅𑀧𑀭𑀺𑀘𑁆𑀙𑁂𑀤𑁂 𑀘𑀻𑀯𑀭𑁂 𑀨𑀮𑀓𑁂 𑀨𑀮𑀓𑁂 𑀤𑀼𑀓𑁆𑀓𑀝𑀁, 𑀲𑀧𑀭𑀺𑀘𑁆𑀙𑁂𑀤𑁂 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀤𑀼𑀓𑁆𑀓𑀝𑀸𑀦𑀻𑀢𑀺. 𑀅𑀬𑀁 𑀧𑀦 𑀅𑀢𑁆𑀣𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀅𑀧𑀸𑀓𑀝𑁄, 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀸𑀓𑀝𑁄. 𑀇𑀥 𑀲𑀩𑁆𑀩𑀸𑀓𑀸𑀭𑁂𑀦𑁂𑀯 𑀧𑀸𑀓𑀝𑁄.

𑀲𑀘𑁂 𑀲𑀼𑀢𑁆𑀢𑀫𑁆𑀧𑀺 𑀓𑀧𑁆𑀧𑀺𑀬𑀁, 𑀢𑀦𑁆𑀢𑀯𑀸𑀬𑁄𑀧𑀺 𑀓𑀧𑁆𑀧𑀺𑀬𑁄 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁄 𑀯𑀸 𑀫𑀽𑀮𑁂𑀦 𑀯𑀸 𑀧𑀬𑁄𑀚𑀺𑀢𑁄, 𑀯𑀸𑀬𑀸𑀧𑀦𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺. 𑀤𑀲𑀸𑀳𑀸𑀢𑀺𑀓𑁆𑀓𑀫𑀦𑀧𑀘𑁆𑀘𑀬𑀸 𑀧𑀦 𑀆𑀧𑀢𑁆𑀢𑀺𑀁 𑀭𑀓𑁆𑀔𑀦𑁆𑀢𑁂𑀦 𑀯𑀺𑀓𑀧𑁆𑀧𑀦𑀼𑀧𑀕𑀧𑁆𑀧𑀫𑀸𑀡𑀫𑀢𑁆𑀢𑁂 𑀯𑀻𑀢𑁂 𑀢𑀦𑁆𑀢𑁂 𑀞𑀺𑀢𑀁𑀬𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀤𑀲𑀸𑀳𑀸𑀢𑀺𑀓𑁆𑀓𑀫𑁂𑀦 𑀦𑀺𑀝𑁆𑀞𑀸𑀧𑀺𑀬𑀫𑀸𑀦𑀜𑁆𑀳𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀪𑀯𑁂𑀬𑁆𑀬𑀸𑀢𑀺. 𑀜𑀸𑀢𑀓𑀸𑀤𑀻𑀳𑀺 𑀢𑀦𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀇𑀤𑀁 𑀘𑀻𑀯𑀭𑀁 𑀕𑀡𑁆𑀳𑁂𑀬𑁆𑀬𑀸𑀣𑀸’’𑀢𑀺 𑀦𑀺𑀬𑁆𑀬𑀸𑀢𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀘𑁂 𑀢𑀦𑁆𑀢𑀯𑀸𑀬𑁄 𑀏𑀯𑀁 𑀧𑀬𑁄𑀚𑀺𑀢𑁄 𑀯𑀸 𑀲𑀬𑀁 𑀤𑀸𑀢𑀼𑀓𑀸𑀫𑁄 𑀯𑀸 𑀳𑀼𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑀁 𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀯𑀸𑀬𑀺𑀢𑁆𑀯𑀸 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀪𑀺𑀓𑁆𑀔𑀼 𑀘 𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀤𑀺𑀯𑀲𑀢𑁄 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀘𑁂 𑀧𑀦 𑀢𑀦𑁆𑀢𑀯𑀸𑀬𑁄 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑀁 𑀯𑀸𑀬𑀺𑀢𑁆𑀯𑀸 𑀲𑀸𑀲𑀦𑀁 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀣𑁂𑀯 𑀓𑀭𑁄𑀢𑀺, 𑀢𑁂𑀦 𑀧𑁂𑀲𑀺𑀢𑀪𑀺𑀓𑁆𑀔𑀼 𑀧𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦 𑀆𑀭𑁄𑀘𑁂𑀢𑀺, 𑀅𑀜𑁆𑀜𑁄 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 ‘‘𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀘𑀻𑀯𑀭𑀁 𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀆𑀭𑁄𑀘𑁂𑀢𑀺, 𑀏𑀢𑀲𑁆𑀲 𑀆𑀭𑁄𑀘𑀦𑀁 𑀦 𑀧𑀫𑀸𑀡𑀁. 𑀬𑀤𑀸 𑀧𑀦 𑀢𑁂𑀦 𑀧𑁂𑀲𑀺𑀢𑁄𑀬𑁂𑀯 𑀆𑀭𑁄𑀘𑁂𑀢𑀺, 𑀢𑀲𑁆𑀲 𑀯𑀘𑀦𑀁 𑀲𑀼𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀘𑁂 𑀢𑀦𑁆𑀢𑀯𑀸𑀬𑁄 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑀁 𑀯𑀸𑀬𑀺𑀢𑁆𑀯𑀸 𑀓𑀲𑁆𑀲𑀘𑀺 𑀳𑀢𑁆𑀣𑁂 𑀧𑀳𑀺𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑀣𑁂𑀯 𑀓𑀭𑁄𑀢𑀺, 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀕𑀢𑀪𑀺𑀓𑁆𑀔𑀼 𑀧𑀦 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑁂 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀦 𑀆𑀭𑁄𑀘𑁂𑀢𑀺, 𑀅𑀜𑁆𑀜𑁄 𑀓𑁄𑀘𑀺 𑀪𑀡𑀢𑀺 ‘‘𑀅𑀧𑀺, 𑀪𑀦𑁆𑀢𑁂, 𑀅𑀥𑀼𑀦𑀸 𑀆𑀪𑀢𑀁 𑀘𑀻𑀯𑀭𑀁 𑀲𑀼𑀦𑁆𑀤𑀭’’𑀦𑁆𑀢𑀺? ‘‘𑀓𑀼𑀳𑀺𑀁, 𑀆𑀯𑀼𑀲𑁄, 𑀘𑀻𑀯𑀭’’𑀦𑁆𑀢𑀺? ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀳𑀢𑁆𑀣𑁂 𑀧𑁂𑀲𑀺𑀢’’𑀦𑁆𑀢𑀺. 𑀏𑀢𑀲𑁆𑀲𑀧𑀺 𑀯𑀘𑀦𑀁 𑀦 𑀧𑀫𑀸𑀡𑀁. 𑀬𑀤𑀸 𑀧𑀦 𑀲𑁄 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀤𑁂𑀢𑀺, 𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀦 𑀯𑀸𑀬𑀸𑀧𑀦𑀫𑀽𑀮𑀁 𑀅𑀤𑀺𑀦𑁆𑀦𑀁 𑀳𑁄𑀢𑀺, 𑀬𑀸𑀯 𑀓𑀸𑀓𑀡𑀺𑀓𑀫𑀢𑁆𑀢𑀫𑁆𑀧𑀺 𑀅𑀯𑀲𑀺𑀝𑁆𑀞𑀁, 𑀢𑀸𑀯 𑀭𑀓𑁆𑀔𑀢𑀺.

𑁬𑁪𑁦. 𑀅𑀦𑀸𑀧𑀢𑁆𑀢𑀺 𑀘𑀻𑀯𑀭𑀁 𑀲𑀺𑀩𑁆𑀩𑁂𑀢𑀼𑀦𑁆𑀢𑀺 𑀘𑀻𑀯𑀭𑀲𑀺𑀩𑁆𑀩𑀦𑀢𑁆𑀣𑀸𑀬 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀬𑁄𑀕𑁂𑀢𑀺𑀆𑀤𑀻𑀲𑀼𑀧𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀆𑀬𑁄𑀕𑀸𑀤𑀺𑀦𑀺𑀫𑀺𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀳𑀸𑀧𑁂𑀲𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁪𑁧. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀫𑀳𑀸𑀧𑁂𑀲𑀓𑀸𑀭𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀲𑀼𑀢𑁆𑀢𑀁 𑀥𑀸𑀭𑀬𑀺𑀢𑁆𑀯𑀸𑀢𑀺 𑀲𑀼𑀢𑁆𑀢𑀁 𑀢𑀼𑀮𑁂𑀢𑁆𑀯𑀸 𑀧𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀅𑀧𑁆𑀧𑀺𑀢𑀦𑁆𑀢𑀺 𑀖𑀦𑀁. 𑀲𑀼𑀯𑀻𑀢𑀦𑁆𑀢𑀺 𑀲𑀼𑀝𑁆𑀞𑀼 𑀯𑀻𑀢𑀁, 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀲𑀫𑀁 𑀓𑀢𑁆𑀯𑀸 𑀯𑀻𑀢𑀁. 𑀲𑀼𑀧𑁆𑀧𑀯𑀸𑀬𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀧𑀯𑀸𑀬𑀺𑀢𑀁 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀲𑀫𑀁 𑀓𑀢𑁆𑀯𑀸 𑀢𑀦𑁆𑀢𑁂 𑀧𑀲𑀸𑀭𑀺𑀢𑀁. 𑀲𑀼𑀯𑀺𑀮𑁂𑀔𑀺𑀢𑀦𑁆𑀢𑀺 𑀮𑁂𑀔𑀦𑀺𑀬𑀸 𑀲𑀼𑀝𑁆𑀞𑀼 𑀯𑀺𑀮𑀺𑀔𑀺𑀢𑀁. 𑀲𑀼𑀯𑀺𑀢𑀘𑁆𑀙𑀺𑀢𑀦𑁆𑀢𑀺 𑀓𑁄𑀘𑁆𑀙𑁂𑀦 𑀲𑀼𑀝𑁆𑀞𑀼 𑀯𑀺𑀢𑀘𑁆𑀙𑀺𑀢𑀁, 𑀲𑀼𑀦𑀺𑀤𑁆𑀥𑁄𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀩𑀤𑁆𑀥𑀦𑁆𑀢𑀺 𑀯𑁂𑀓𑀮𑁆𑀮𑀁. 𑀢𑀦𑁆𑀢𑁂𑀢𑀺 𑀢𑀦𑁆𑀢𑁂 𑀤𑀻𑀖𑀢𑁄 𑀧𑀲𑀸𑀭𑀡𑁂𑀬𑁂𑀯 𑀉𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁬𑁪𑁨. 𑀢𑀢𑁆𑀭 𑀘𑁂 𑀲𑁄 𑀪𑀺𑀓𑁆𑀔𑀽𑀢𑀺 𑀬𑀢𑁆𑀭 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀢𑁂 𑀢𑀦𑁆𑀢𑀯𑀸𑀬𑀸 𑀢𑀢𑁆𑀭. 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀺𑀲𑀺𑀝𑁆𑀞𑀁 𑀓𑀧𑁆𑀧𑀁 𑀅𑀥𑀺𑀓𑀯𑀺𑀥𑀸𑀦𑀁 𑀆𑀧𑀚𑁆𑀚𑁂𑀬𑁆𑀬. 𑀧𑀸𑀴𑀺𑀬𑀁 𑀧𑀦 𑀬𑁂𑀦𑀸𑀓𑀸𑀭𑁂𑀦 𑀯𑀺𑀓𑀧𑁆𑀧𑀁 𑀆𑀧𑀦𑁆𑀦𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 𑀔𑁄, 𑀆𑀯𑀼𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀥𑀫𑁆𑀫𑀫𑁆𑀧𑀺 𑀪𑀡𑀢𑀻𑀢𑀺 𑀥𑀫𑁆𑀫𑀓𑀣𑀫𑁆𑀧𑀺 𑀓𑀣𑁂𑀢𑀺, ‘‘𑀢𑀲𑁆𑀲 𑀯𑀘𑀦𑁂𑀦 𑀆𑀬𑀢𑀁 𑀯𑀸 𑀯𑀺𑀢𑁆𑀣𑀢𑀁 𑀯𑀸 𑀅𑀧𑁆𑀧𑀺𑀢𑀁 𑀯𑀸’’𑀢𑀺 𑀲𑀼𑀢𑁆𑀢𑀯𑀟𑁆𑀠𑀦𑀆𑀓𑀸𑀭𑀫𑁂𑀯 𑀤𑀲𑁆𑀲𑁂𑀢𑀺.

𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄𑀢𑀺 𑀘𑀻𑀯𑀭𑀲𑀸𑀫𑀺𑀓𑁂𑀳𑀺 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄 𑀳𑀼𑀢𑁆𑀯𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁,

𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀫𑀳𑀸𑀧𑁂𑀲𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁪𑁬-𑁯. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀤𑀲𑀸𑀳𑀸𑀦𑀸𑀕𑀢𑀦𑁆𑀢𑀺 𑀤𑀲 𑀅𑀳𑀸𑀦𑀺 𑀤𑀲𑀸𑀳𑀁, 𑀢𑁂𑀦 𑀤𑀲𑀸𑀳𑁂𑀦 𑀅𑀦𑀸𑀕𑀢𑀸 𑀤𑀲𑀸𑀳𑀸𑀦𑀸𑀕𑀢𑀸, 𑀤𑀲𑀸𑀳𑁂𑀦 𑀅𑀲𑀫𑁆𑀧𑀢𑁆𑀢𑀸𑀢𑀺 𑀅𑀢𑁆𑀣𑁄, 𑀢𑀁 𑀤𑀲𑀸𑀳𑀸𑀦𑀸𑀕𑀢𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀤𑀲𑀸𑀳𑀸𑀦𑀸𑀕𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀧𑀯𑀸𑀭𑀡𑀸𑀬𑀸𑀢𑀺 𑀇𑀤𑀁 𑀧𑀦 𑀬𑀸 𑀲𑀸 𑀤𑀲𑀸𑀳𑀸𑀦𑀸𑀕𑀢𑀸𑀢𑀺 𑀯𑀼𑀢𑁆𑀢𑀸, 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 𑀅𑀲𑀫𑁆𑀫𑁄𑀳𑀢𑁆𑀣𑀁 𑀅𑀦𑀼𑀧𑀬𑁄𑀕𑀯𑀘𑀦𑀁.

𑀓𑀢𑁆𑀢𑀺𑀓𑀢𑁂𑀫𑀸𑀲𑀺𑀓𑀧𑀼𑀡𑁆𑀡𑀫𑀦𑁆𑀢𑀺 𑀧𑀞𑀫𑀓𑀢𑁆𑀢𑀺𑀓𑀢𑁂𑀫𑀸𑀲𑀺𑀓𑀧𑀼𑀡𑁆𑀡𑀫𑀁. 𑀇𑀥𑀸𑀧𑀺 𑀧𑀞𑀫𑀧𑀤𑀲𑁆𑀲 𑀅𑀦𑀼𑀧𑀬𑁄𑀕𑀢𑁆𑀢𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘‘𑀬𑀢𑁄 𑀧𑀝𑁆𑀞𑀸𑀬 𑀧𑀞𑀫𑀫𑀳𑀸𑀧𑀯𑀸𑀭𑀡𑀸 𑀤𑀲𑀸𑀳𑀸𑀦𑀸𑀕𑀢𑀸’𑀢𑀺 𑀯𑀼𑀘𑁆𑀘𑀢𑀺, 𑀲𑀘𑁂𑀧𑀺 𑀢𑀸𑀦𑀺 𑀤𑀺𑀯𑀲𑀸𑀦𑀺 𑀅𑀘𑁆𑀘𑀦𑁆𑀢𑀫𑁂𑀯 𑀪𑀺𑀓𑁆𑀔𑀼𑀦𑁄 𑀅𑀘𑁆𑀘𑁂𑀓𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, ‘𑀅𑀘𑁆𑀘𑁂𑀓𑀁 𑀇𑀤’𑀦𑁆𑀢𑀺 𑀚𑀸𑀦𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀩𑁆𑀩𑀫𑁆𑀧𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺. 𑀢𑁂𑀦 𑀧𑀯𑀸𑀭𑀡𑀸𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀧𑀜𑁆𑀘𑀫𑀺𑀢𑁄 𑀧𑀞𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀘𑀻𑀯𑀭𑀲𑁆𑀲 𑀦𑀺𑀥𑀸𑀦𑀓𑀸𑀮𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀓𑀸𑀫𑀜𑁆𑀘𑁂𑀲 ‘‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑁄, 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀦 𑀅𑀧𑀼𑀩𑁆𑀩𑀁 𑀯𑀺𑀬 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀞𑀧𑀺𑀢𑀁.

𑀅𑀘𑁆𑀘𑁂𑀓𑀘𑀻𑀯𑀭𑀦𑁆𑀢𑀺 𑀅𑀘𑁆𑀘𑀸𑀬𑀺𑀓𑀘𑀻𑀯𑀭𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀧𑀦 𑀅𑀘𑁆𑀘𑀸𑀬𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀦𑀸𑀬 𑀯𑀸 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀤𑁆𑀥𑀸𑀢𑀺 𑀇𑀫𑀺𑀦𑀸 𑀲𑀤𑁆𑀥𑀸𑀫𑀢𑁆𑀢𑀓𑀫𑁂𑀯 𑀤𑀲𑁆𑀲𑀺𑀢𑀁. 𑀧𑀲𑀸𑀤𑁄𑀢𑀺 𑀇𑀫𑀺𑀦𑀸 𑀲𑀼𑀧𑁆𑀧𑀲𑀦𑁆𑀦𑀸 𑀩𑀮𑀯𑀲𑀤𑁆𑀥𑀸. 𑀏𑀢𑀁 𑀅𑀘𑁆𑀘𑁂𑀓𑀘𑀻𑀯𑀭𑀁 𑀦𑀸𑀫𑀸𑀢𑀺 𑀏𑀢𑀁 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀤𑀸𑀢𑀼𑀓𑀸𑀫𑁂𑀦 𑀤𑀽𑀢𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀯𑀸 𑀆𑀕𑀦𑁆𑀢𑁆𑀯𑀸 ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀆𑀭𑁄𑀘𑀺𑀢𑀁 𑀘𑀻𑀯𑀭𑀁 𑀅𑀘𑁆𑀘𑁂𑀓𑀘𑀻𑀯𑀭𑀁 𑀦𑀸𑀫 𑀳𑁄𑀢𑀻. 𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀧𑀦 𑀉𑀧𑁆𑀧𑀦𑁆𑀦𑀁 𑀅𑀦𑀘𑁆𑀘𑁂𑀓𑀘𑀻𑀯𑀭𑀫𑁆𑀧𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀞𑀧𑀺𑀢𑀘𑀻𑀯𑀭𑀫𑁆𑀧𑀺 𑀏𑀢𑀁 𑀧𑀭𑀺𑀳𑀸𑀭𑀁 𑀮𑀪𑀢𑀺𑀬𑁂𑀯.

𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀓𑀲𑁆𑀫𑀸 𑀏𑀢𑀁 𑀯𑀼𑀢𑁆𑀢𑀁? 𑀬𑀤𑀺 𑀳𑀺 𑀢𑀁 𑀧𑀼𑀭𑁂 𑀧𑀯𑀸𑀭𑀡𑀸𑀬 𑀯𑀺𑀪𑀚𑀦𑁆𑀢𑀺. 𑀬𑁂𑀦 𑀕𑀳𑀺𑀢𑀁, 𑀢𑁂𑀦 𑀙𑀺𑀦𑁆𑀦𑀯𑀲𑁆𑀲𑁂𑀦 𑀦 𑀪𑀯𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀳𑁄𑀢𑀺, 𑀢𑀁 𑀘𑀻𑀯𑀭𑀁 𑀲𑀗𑁆𑀖𑀺𑀓𑀫𑁂𑀯 𑀳𑁄𑀢𑀺. 𑀢𑀢𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀼𑀔𑀁 𑀤𑀸𑀢𑀼𑀁 𑀪𑀯𑀺𑀲𑁆𑀲𑀢𑀻𑀢𑀺.

𑁬𑁫𑁦. 𑀅𑀘𑁆𑀘𑁂𑀓𑀘𑀻𑀯𑀭𑁂 𑀅𑀘𑁆𑀘𑁂𑀓𑀘𑀻𑀯𑀭𑀲𑀜𑁆𑀜𑀻𑀢𑀺 𑀏𑀯𑀫𑀸𑀤𑀺 𑀯𑀺𑀪𑀚𑀺𑀢𑁆𑀯𑀸 𑀕𑀳𑀺𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀅𑀯𑀺𑀪𑀢𑁆𑀢𑀁 𑀳𑁄𑀢𑀺, 𑀲𑀗𑁆𑀖𑀲𑁆𑀲 𑀯𑀸 𑀪𑀡𑁆𑀟𑀸𑀕𑀸𑀭𑁂, 𑀘𑀻𑀯𑀭𑀲𑀫𑀬𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀇𑀢𑀺 𑀅𑀢𑀺𑀭𑁂𑀓𑀘𑀻𑀯𑀭𑀲𑁆𑀲 𑀤𑀲𑀸𑀳𑀁 𑀧𑀭𑀺𑀳𑀸𑀭𑁄. 𑀅𑀓𑀢𑀲𑁆𑀲 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀲𑁆𑀲 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀧𑀜𑁆𑀘 𑀫𑀸𑀲𑀸, 𑀯𑀲𑁆𑀲𑁂 𑀉𑀓𑁆𑀓𑀟𑁆𑀠𑀺𑀢𑁂 𑀙 𑀫𑀸𑀲𑀸, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀅𑀧𑀭𑁂 𑀘𑀢𑁆𑀢𑀸𑀭𑁄 𑀫𑀸𑀲𑀸. 𑀳𑁂𑀫𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑁂 𑀤𑀺𑀯𑀲𑁂 𑀫𑀽𑀮𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀅𑀧𑀭𑁄𑀧𑀺 𑀏𑀓𑁄 𑀫𑀸𑀲𑁄𑀢𑀺 𑀏𑀓𑀸𑀤𑀲 𑀫𑀸𑀲𑀸 𑀧𑀭𑀺𑀳𑀸𑀭𑁄. 𑀲𑀢𑀺𑀬𑀸 𑀧𑀘𑁆𑀘𑀸𑀲𑀸𑀬 𑀫𑀽𑀮𑀘𑀻𑀯𑀭𑀲𑁆𑀲 𑀏𑀓𑁄 𑀫𑀸𑀲𑁄, 𑀅𑀘𑁆𑀘𑁂𑀓𑀘𑀻𑀯𑀭𑀲𑁆𑀲 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑀸 𑀧𑀜𑁆𑀘 𑀫𑀸𑀲𑀸, 𑀢𑀢𑁄 𑀧𑀭𑀁 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀘𑁆𑀘𑁂𑀓𑀘𑀻𑀯𑀭𑁂𑀢𑀺 𑀅𑀘𑁆𑀘𑁂𑀓𑀘𑀻𑀯𑀭𑀲𑀤𑀺𑀲𑁂 𑀅𑀜𑁆𑀜𑀲𑁆𑀫𑀺𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀅𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁫𑁨. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀯𑀼𑀢𑁆𑀣𑀯𑀲𑁆𑀲𑀸 𑀆𑀭𑀜𑁆𑀜𑀓𑁂𑀲𑀽𑀢𑀺 𑀢𑁂 𑀧𑀼𑀩𑁆𑀩𑁂𑀧𑀺 𑀅𑀭𑀜𑁆𑀜𑁂𑀬𑁂𑀯 𑀯𑀺𑀳𑀭𑀺𑀁𑀲𑀼. 𑀤𑀼𑀩𑁆𑀩𑀮𑀘𑀻𑀯𑀭𑀢𑁆𑀢𑀸 𑀧𑀦 𑀧𑀘𑁆𑀘𑀬𑀯𑀲𑁂𑀦 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀦𑀺𑀝𑁆𑀞𑀺𑀢𑀘𑀻𑀯𑀭𑀸 𑀳𑀼𑀢𑁆𑀯𑀸 ‘‘𑀇𑀤𑀸𑀦𑀺 𑀦𑀺𑀧𑁆𑀧𑀮𑀺𑀩𑁄𑀥𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀭𑀜𑁆𑀜𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀦𑁆𑀢𑀺. 𑀓𑀢𑁆𑀢𑀺𑀓𑀘𑁄𑀭𑀓𑀸𑀢𑀺 𑀓𑀢𑁆𑀢𑀺𑀓𑀫𑀸𑀲𑁂 𑀘𑁄𑀭𑀸. 𑀧𑀭𑀺𑀧𑀸𑀢𑁂𑀦𑁆𑀢𑀻𑀢𑀺 𑀉𑀧𑀤𑁆𑀤𑀯𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀆𑀥𑀸𑀯𑀺𑀢𑁆𑀯𑀸 𑀉𑀢𑁆𑀢𑀸𑀲𑁂𑀦𑁆𑀢𑀺 𑀧𑀮𑀸𑀧𑁂𑀦𑁆𑀢𑀺. 𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀅𑀦𑁆𑀢𑁄𑀕𑀸𑀫𑁂 𑀦𑀺𑀓𑁆𑀔𑀺𑀧𑀺𑀢𑀼𑀁. 𑀪𑀕𑀯𑀸 𑀬𑀲𑁆𑀫𑀸 𑀧𑀘𑁆𑀘𑀬𑀸 𑀦𑀸𑀫 𑀥𑀫𑁆𑀫𑁂𑀦 𑀲𑀫𑁂𑀦 𑀤𑀼𑀮𑁆𑀮𑀪𑀸, 𑀲𑀮𑁆𑀮𑁂𑀔𑀯𑀸 𑀳𑀺 𑀪𑀺𑀓𑁆𑀔𑀼 𑀫𑀸𑀢𑀭𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀘𑀻𑀯𑀭𑀕𑀼𑀢𑁆𑀢𑀢𑁆𑀣𑀁 𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀅𑀦𑀼𑀚𑀸𑀦𑀸𑀢𑀺. 𑀪𑀺𑀓𑁆𑀔𑀽𑀦𑀁 𑀧𑀦 𑀅𑀦𑀼𑀭𑀽𑀧𑀢𑁆𑀢𑀸 𑀅𑀭𑀜𑁆𑀜𑀯𑀸𑀲𑀁 𑀦 𑀧𑀝𑀺𑀓𑁆𑀔𑀺𑀧𑀺.

𑁬𑁫𑁩. 𑀉𑀧𑀯𑀲𑁆𑀲𑀁 𑀔𑁄 𑀧𑀦𑀸𑀢𑀺 𑀏𑀢𑁆𑀣 𑀉𑀧𑀯𑀲𑁆𑀲𑀦𑁆𑀢𑀺 𑀉𑀧𑀯𑀲𑁆𑀲; 𑀉𑀧𑀯𑀲𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀫𑁆𑀧𑀚𑁆𑀚𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀳𑀺 𑀏𑀢𑁆𑀣 𑀅𑀦𑀼𑀦𑀸𑀲𑀺𑀓𑁄 𑀤𑀝𑁆𑀞𑀩𑁆𑀩𑁄. 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀯𑀲𑀺𑀢𑁆𑀯𑀸 𑀘𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀲 𑀘 𑀧𑀤𑀲𑁆𑀲 ‘‘𑀢𑀣𑀸𑀭𑀽𑀧𑁂𑀲𑀼 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀯𑀲𑀺𑀢𑁆𑀯𑀸 𑀘 𑀢𑀢𑁄 𑀧𑀭𑀁 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀧𑀭𑀺𑀬𑁄𑀲𑀸𑀦𑀓𑀸𑀮𑀁 𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀆𑀭𑀜𑁆𑀜𑀓𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀲𑀸𑀲𑀗𑁆𑀓𑀲𑀫𑁆𑀫𑀢𑀸𑀦𑀺 𑀲𑀧𑁆𑀧𑀝𑀺𑀪𑀬𑀸𑀦𑀺; 𑀢𑀣𑀸𑀭𑀽𑀧𑁂𑀲𑀼 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀦𑁆𑀢𑁄 𑀆𑀓𑀗𑁆𑀔𑀫𑀸𑀦𑁄 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁 𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺. 𑀬𑀲𑁆𑀫𑀸 𑀧𑀦 𑀬𑁄 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀬𑀸𑀯 𑀧𑀞𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀁 𑀯𑀲𑀢𑀺, 𑀲𑁄 𑀯𑀼𑀝𑁆𑀞𑀯𑀲𑁆𑀲𑀸𑀦𑀁 𑀅𑀩𑁆𑀪𑀦𑁆𑀢𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀇𑀤𑀁 𑀅𑀢𑀺𑀕𑀳𑀦𑀁 𑀩𑁆𑀬𑀜𑁆𑀚𑀦𑀯𑀺𑀘𑀸𑀭𑀡𑀁 𑀅𑀓𑀢𑁆𑀯𑀸 𑀧𑀤𑀪𑀸𑀚𑀦𑁂 𑀓𑁂𑀯𑀮𑀁 𑀘𑀻𑀯𑀭𑀦𑀺𑀓𑁆𑀔𑁂𑀧𑀸𑀭𑀳𑀁 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀝𑁆𑀞𑀯𑀲𑁆𑀲𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀧𑀺 ‘‘𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀢𑁆𑀣𑁄 ‘‘𑀯𑀼𑀝𑁆𑀞𑀯𑀲𑁆𑀲𑀸𑀦𑀁 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀦𑁆𑀢𑁄’’𑀢𑀺 𑀏𑀯𑀭𑀽𑀧𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀩𑁆𑀪𑀦𑁆𑀢𑀭𑁂 𑀬𑁄 𑀓𑁄𑀘𑀺 𑀪𑀺𑀓𑁆𑀔𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀭𑀜𑁆𑀜𑀮𑀓𑁆𑀔𑀡𑀁 𑀅𑀤𑀺𑀦𑁆𑀦𑀸𑀤𑀸𑀦𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀘𑁂 𑀯𑀺𑀳𑀸𑀭𑁄 𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑀢𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀸 𑀫𑀺𑀦𑀺𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀬𑀁 𑀲𑀩𑁆𑀩𑀧𑀞𑀫𑀁 𑀲𑁂𑀦𑀸𑀲𑀦𑀁 𑀯𑀸 𑀪𑀢𑁆𑀢𑀲𑀸𑀮𑀸 𑀯𑀸 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀯𑀸 𑀩𑁄𑀥𑀺𑀯𑀸 𑀘𑁂𑀢𑀺𑀬𑀁 𑀯𑀸 𑀤𑀽𑀭𑁂 𑀘𑁂𑀧𑀺 𑀲𑁂𑀦𑀸𑀲𑀦𑀢𑁄 𑀳𑁄𑀢𑀺, 𑀢𑀁 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀫𑀺𑀦𑀺𑀢𑀩𑁆𑀩𑀁. 𑀲𑀘𑁂𑀧𑀺 𑀆𑀲𑀦𑁆𑀦𑁂 𑀕𑀸𑀫𑁄 𑀳𑁄𑀢𑀺, 𑀯𑀺𑀳𑀸𑀭𑁂 𑀞𑀺𑀢𑁂𑀳𑀺 𑀖𑀭𑀫𑀸𑀦𑀼𑀲𑀓𑀸𑀦𑀁 𑀲𑀤𑁆𑀤𑁄 𑀲𑀽𑀬𑀢𑀺, 𑀧𑀩𑁆𑀩𑀢𑀦𑀤𑀻𑀆𑀤𑀻𑀳𑀺 𑀧𑀦 𑀅𑀦𑁆𑀢𑀭𑀺𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀉𑀚𑀼𑀁 𑀕𑀦𑁆𑀢𑀼𑀁, 𑀬𑁄 𑀘𑀲𑁆𑀲 𑀧𑀓𑀢𑀺𑀫𑀕𑁆𑀕𑁄 𑀳𑁄𑀢𑀺, 𑀲𑀘𑁂𑀧𑀺 𑀦𑀸𑀯𑀸𑀬 𑀲𑀜𑁆𑀘𑀭𑀺𑀢𑀩𑁆𑀩𑁄, 𑀢𑁂𑀦 𑀫𑀕𑁆𑀕𑁂𑀦 𑀕𑀸𑀫𑀢𑁄 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀕𑀳𑁂𑀢𑀩𑁆𑀩𑀁. 𑀬𑁄 𑀆𑀲𑀦𑁆𑀦𑀕𑀸𑀫𑀲𑁆𑀲 𑀅𑀗𑁆𑀕𑀲𑀫𑁆𑀧𑀸𑀤𑀦𑀢𑁆𑀣𑀁 𑀢𑀢𑁄 𑀢𑀢𑁄 𑀫𑀕𑁆𑀕𑀁 𑀧𑀺𑀤𑀳𑀢𑀺, 𑀅𑀬𑀁 ‘‘𑀥𑀼𑀢𑀗𑁆𑀕𑀘𑁄𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀸𑀲𑀗𑁆𑀓𑀲𑀫𑁆𑀫𑀢𑀸𑀦𑀻𑀢𑀺 ‘‘𑀲𑀸𑀲𑀗𑁆𑀓𑀸𑀦𑀻’’𑀢𑀺 𑀲𑀫𑁆𑀫𑀢𑀸𑀦𑀺; 𑀏𑀯𑀁 𑀲𑀜𑁆𑀜𑀸𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀤𑀪𑀸𑀚𑀦𑁂 𑀧𑀦 𑀬𑁂𑀦 𑀓𑀸𑀭𑀡𑁂𑀦 𑀢𑀸𑀦𑀺 𑀲𑀸𑀲𑀗𑁆𑀓𑀲𑀫𑁆𑀫𑀢𑀸𑀦𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀸𑀫𑁂 𑀆𑀭𑀸𑀫𑀽𑀧𑀘𑀸𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀳 𑀧𑀝𑀺𑀪𑀬𑁂𑀦 𑀲𑀧𑁆𑀧𑀝𑀺𑀪𑀬𑀸𑀦𑀺, 𑀲𑀦𑁆𑀦𑀺𑀳𑀺𑀢𑀩𑀮𑀯𑀪𑀬𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀤𑀪𑀸𑀚𑀦𑁂 𑀧𑀦 𑀬𑁂𑀦 𑀓𑀸𑀭𑀡𑁂𑀦 𑀢𑀸𑀦𑀺 𑀲𑀧𑁆𑀧𑀝𑀺𑀪𑀬𑀸𑀦𑀺; 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀭𑀸𑀫𑁂 𑀆𑀭𑀸𑀫𑀽𑀧𑀘𑀸𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀫𑀦𑁆𑀢𑀸 𑀕𑁄𑀘𑀭𑀕𑀸𑀫𑁂 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀆𑀭𑀜𑁆𑀜𑀓𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀲𑀫𑀦𑁆𑀢𑀸 𑀲𑀩𑁆𑀩𑀤𑀺𑀲𑀸𑀪𑀸𑀕𑁂𑀲𑀼 𑀅𑀢𑁆𑀢𑀦𑀸 𑀅𑀪𑀺𑀭𑀼𑀘𑀺𑀢𑁂 𑀕𑁄𑀘𑀭𑀕𑀸𑀫𑁂 𑀲𑀢𑀺𑀬𑀸 𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀦𑀺𑀓𑁆𑀔𑀺𑀧𑁂𑀬𑁆𑀬.

𑀢𑀢𑁆𑀭𑀸𑀬𑀁 𑀅𑀗𑁆𑀕𑀲𑀫𑁆𑀧𑀢𑁆𑀢𑀺 𑁋 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀦𑁆𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑁄 𑀳𑁄𑀢𑀺, 𑀇𑀤𑀫𑁂𑀓𑀁 𑀅𑀗𑁆𑀕𑀁. 𑀲𑀘𑁂 𑀧𑀘𑁆𑀙𑀺𑀫𑀺𑀓𑀸𑀬 𑀯𑀸 𑀉𑀧𑀕𑀢𑁄 𑀳𑁄𑀢𑀺 𑀙𑀺𑀦𑁆𑀦𑀯𑀲𑁆𑀲𑁄 𑀯𑀸, 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀮𑀪𑀢𑀺. 𑀓𑀢𑁆𑀢𑀺𑀓𑀫𑀸𑀲𑁄𑀬𑁂𑀯 𑀳𑁄𑀢𑀺, 𑀇𑀤𑀁 𑀤𑀼𑀢𑀺𑀬𑀁 𑀅𑀗𑁆𑀕𑀁. 𑀓𑀢𑁆𑀢𑀺𑀓𑀫𑀸𑀲𑀢𑁄 𑀧𑀭𑀁 𑀦 𑀮𑀪𑀢𑀺, 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫𑀫𑁂𑀯 𑀧𑀫𑀸𑀡𑀬𑀼𑀢𑁆𑀢𑀁 𑀲𑁂𑀦𑀸𑀲𑀦𑀁 𑀳𑁄𑀢𑀺, 𑀇𑀤𑀁 𑀢𑀢𑀺𑀬𑀁 𑀅𑀗𑁆𑀕𑀁. 𑀊𑀦𑀧𑁆𑀧𑀫𑀸𑀡𑁂 𑀯𑀸 𑀕𑀸𑀯𑀼𑀢𑀢𑁄 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑁂 𑀯𑀸 𑀦 𑀮𑀪𑀢𑀺, 𑀬𑀢𑁆𑀭 𑀳𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀼𑀦 𑀯𑀺𑀳𑀸𑀭𑀁 𑀪𑀢𑁆𑀢𑀯𑁂𑀮𑀸𑀬𑀁 𑀲𑀓𑁆𑀓𑀸 𑀆𑀕𑀦𑁆𑀢𑀼𑀁, 𑀢𑀤𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀦𑀺𑀫𑀦𑁆𑀢𑀺𑀢𑁄 𑀧𑀦 𑀅𑀤𑁆𑀥𑀬𑁄𑀚𑀦𑀫𑁆𑀧𑀺 𑀬𑁄𑀚𑀦𑀫𑁆𑀧𑀺 𑀕𑀦𑁆𑀢𑁆𑀯𑀸 𑀯𑀲𑀺𑀢𑀼𑀁 𑀧𑀘𑁆𑀘𑁂𑀢𑀺, 𑀇𑀤𑀫𑀧𑁆𑀧𑀫𑀸𑀡𑀁. 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀫𑁂𑀯 𑀳𑁄𑀢𑀺, 𑀇𑀤𑀁 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁. 𑀅𑀦𑀸𑀲𑀗𑁆𑀓𑀅𑀧𑁆𑀧𑀝𑀺𑀪𑀬𑁂 𑀳𑀺 𑀅𑀗𑁆𑀕𑀬𑀼𑀢𑁆𑀢𑁂𑀧𑀺 𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀮𑀪𑀢𑀻𑀢𑀺.

𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀢𑀺 𑀬𑀸 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀓𑁄𑀲𑀫𑁆𑀩𑀓𑀲𑀫𑁆𑀫𑀼𑀢𑀺 (𑀧𑀸𑀭𑀸. 𑁪𑁭𑁫) 𑀅𑀦𑀼𑀜𑁆𑀜𑀸𑀢𑀸 𑀢𑀲𑁆𑀲𑀸 𑀲𑀫𑁆𑀫𑀼𑀢𑀺𑀬𑀸 𑀅𑀜𑁆𑀜𑀢𑁆𑀭; 𑀲𑀘𑁂 𑀲𑀸 𑀮𑀤𑁆𑀥𑀸 𑀳𑁄𑀢𑀺, 𑀙𑀸𑀭𑀢𑁆𑀢𑀸𑀢𑀺𑀭𑁂𑀓𑀫𑁆𑀧𑀺 𑀯𑀺𑀧𑁆𑀧𑀯𑀲𑀺𑀢𑀼𑀁 𑀯𑀝𑁆𑀝𑀢𑀺.

𑀧𑀼𑀦 𑀕𑀸𑀫𑀲𑀻𑀫𑀁 𑀑𑀓𑁆𑀓𑀫𑀺𑀢𑁆𑀯𑀸𑀢𑀺 𑀲𑀘𑁂 𑀕𑁄𑀘𑀭𑀕𑀸𑀫𑀢𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑁂𑀦𑀸𑀲𑀦𑀁; 𑀅𑀬𑀜𑁆𑀘 𑀧𑀘𑁆𑀙𑀺𑀫𑀤𑀺𑀲𑀁 𑀕𑀢𑁄 𑀳𑁄𑀢𑀺, 𑀲𑁂𑀦𑀸𑀲𑀦𑀁 𑀆𑀕𑀦𑁆𑀢𑁆𑀯𑀸 𑀲𑀢𑁆𑀢𑀫𑀁 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀕𑀸𑀫𑀲𑀻𑀫𑀫𑁆𑀧𑀺 𑀑𑀓𑁆𑀓𑀫𑀺𑀢𑁆𑀯𑀸 𑀲𑀪𑀸𑀬𑀁 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀸 𑀯𑀲𑀺𑀢𑁆𑀯𑀸 𑀘𑀻𑀯𑀭𑀧𑁆𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀧𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀢𑀢𑁆𑀣𑁂𑀯 𑀞𑀺𑀢𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀁, 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀞𑀲𑁆𑀲𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀅𑀓𑀺𑀭𑀺𑀬𑀸, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁫𑁭. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀧𑀽𑀕𑀲𑁆𑀲𑀸𑀢𑀺 𑀲𑀫𑀽𑀳𑀲𑁆𑀲; 𑀥𑀫𑁆𑀫𑀕𑀡𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀬𑀢𑁆𑀢𑀦𑁆𑀢𑀺 𑀧𑀝𑀺𑀬𑀸𑀤𑀺𑀢𑀁. 𑀩𑀳𑀽 𑀲𑀗𑁆𑀖𑀲𑁆𑀲 𑀪𑀢𑁆𑀢𑀸𑀢𑀺 𑀲𑀗𑁆𑀖𑀲𑁆𑀲 𑀩𑀳𑀽𑀦𑀺 𑀪𑀢𑁆𑀢𑀸𑀦𑀺 𑀅𑀦𑁂𑀓𑀸𑀦𑀺 𑀮𑀸𑀪𑀫𑀼𑀔𑀸𑀦𑀺; 𑀦 𑀲𑀗𑁆𑀖𑀲𑁆𑀲 𑀓𑁂𑀦𑀘𑀺 𑀧𑀭𑀺𑀳𑀸𑀦𑀻𑀢𑀺 𑀤𑀻𑀧𑁂𑀦𑁆𑀢𑀺. 𑀑𑀡𑁄𑀚𑁂𑀣𑀸𑀢𑀺 𑀤𑁂𑀣. 𑀓𑀺𑀁 𑀧𑀦𑁂𑀯𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀓𑀲𑁆𑀫𑀸 𑀦 𑀯𑀝𑁆𑀝𑀢𑀺? 𑀅𑀬𑀜𑁆𑀳𑀺 𑀅𑀪𑀺𑀳𑀝𑀪𑀺𑀓𑁆𑀔𑀸 𑀅𑀪𑀺𑀳𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀧𑀝𑀺𑀬𑀢𑁆𑀢𑀸 𑀅𑀪𑀺𑀳𑀝𑀧𑀝𑀺𑀬𑀢𑁆𑀢𑁂 𑀘 𑀉𑀤𑁆𑀤𑀺𑀲𑁆𑀲 𑀞𑀧𑀺𑀢𑀪𑀸𑀕𑁂 𑀘 𑀧𑀬𑀼𑀢𑁆𑀢𑀯𑀸𑀘𑀸 𑀦𑀸𑀫 𑀦𑀢𑁆𑀣𑀺.

𑁬𑁫𑁮. 𑀲𑀗𑁆𑀖𑀺𑀓𑀦𑁆𑀢𑀺 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁. 𑀲𑁄 𑀳𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀢𑁆𑀢𑀸 𑀳𑀢𑁆𑀣𑀁 𑀅𑀦𑀸𑀭𑀽𑀴𑁆𑀳𑁄𑀧𑀺 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑁄 𑀳𑁄𑀢𑀺, 𑀧𑀤𑀪𑀸𑀚𑀦𑁂 𑀧𑀦 ‘‘𑀲𑀗𑁆𑀖𑀺𑀓𑀁 𑀦𑀸𑀫 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀳𑁄𑀢𑀺 𑀧𑀭𑀺𑀘𑁆𑀘𑀢𑁆𑀢’’𑀦𑁆𑀢𑀺 𑀏𑀯𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀯 𑀲𑀗𑁆𑀖𑀺𑀓𑀁 𑀤𑀲𑁆𑀲𑀺𑀢𑀁. 𑀮𑀸𑀪𑀦𑁆𑀢𑀺 𑀧𑀝𑀺𑀮𑀪𑀺𑀢𑀩𑁆𑀩𑀯𑀢𑁆𑀣𑀼𑀁 𑀆𑀳. 𑀢𑁂𑀦𑁂𑀯𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀘𑀻𑀯𑀭𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀡𑀢𑀦𑁆𑀢𑀺 𑀲𑀗𑁆𑀖𑀲𑁆𑀲 𑀦𑀺𑀦𑁆𑀦𑀁 𑀲𑀗𑁆𑀖𑀲𑁆𑀲 𑀧𑁄𑀡𑀁 𑀲𑀗𑁆𑀖𑀲𑁆𑀲 𑀧𑀩𑁆𑀪𑀸𑀭𑀁 𑀳𑀼𑀢𑁆𑀯𑀸 𑀞𑀺𑀢𑀁. 𑀬𑁂𑀦 𑀧𑀦 𑀓𑀸𑀭𑀡𑁂𑀦 𑀲𑁄 𑀧𑀭𑀺𑀡𑀢𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀲𑁆𑀲𑀸𑀫 𑀓𑀭𑀺𑀲𑁆𑀲𑀸𑀫𑀸𑀢𑀺 𑀯𑀸𑀘𑀸 𑀪𑀺𑀦𑁆𑀦𑀸 𑀳𑁄𑀢𑀻’’𑀢𑀺 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁.

𑁬𑁫𑁯. 𑀧𑀬𑁄𑀕𑁂 𑀤𑀼𑀓𑁆𑀓𑀝𑀦𑁆𑀢𑀺 𑀧𑀭𑀺𑀡𑀢𑀮𑀸𑀪𑀲𑁆𑀲 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀢𑀲𑁆𑀫𑀺𑀁 𑀳𑀢𑁆𑀣𑀁 𑀆𑀭𑀽𑀴𑁆𑀳𑁂 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀲𑀘𑁂 𑀧𑀦 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀳𑁄𑀢𑀺, 𑀢𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀗𑁆𑀖𑀲𑁆𑀲𑁂𑀯 𑀤𑀸𑀢𑀩𑁆𑀩𑀁. 𑀬𑁄𑀧𑀺 𑀆𑀭𑀸𑀫𑀺𑀓𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀔𑀸𑀤𑀢𑀺, 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄. 𑀧𑀭𑀺𑀡𑀢𑀁 𑀧𑀦 𑀲𑀳𑀥𑀫𑁆𑀫𑀺𑀓𑀸𑀦𑀁 𑀯𑀸 𑀕𑀺𑀳𑀻𑀦𑀁 𑀯𑀸 𑀅𑀦𑁆𑀢𑀫𑀲𑁄 𑀫𑀸𑀢𑀼𑀲𑀦𑁆𑀢𑀓𑀫𑁆𑀧𑀺 ‘‘𑀇𑀤𑀁 𑀫𑀬𑁆𑀳𑀁 𑀤𑁂𑀳𑀻’’𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀪𑀸𑀯𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’’𑀢𑀺 𑀏𑀯𑀁 𑀅𑀜𑁆𑀜𑀲𑁆𑀲 𑀧𑀭𑀺𑀡𑀸𑀫𑁂𑀦𑁆𑀢𑀲𑁆𑀲 𑀲𑀼𑀤𑁆𑀥𑀺𑀓𑀧𑀸𑀘𑀺𑀢𑁆𑀢𑀺𑀬𑀁. 𑀏𑀓𑀁 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀅𑀢𑁆𑀢𑀦𑁄, 𑀏𑀓𑀁 𑀅𑀜𑁆𑀜𑀲𑁆𑀲 𑀧𑀭𑀺𑀡𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀜𑁆𑀘𑁂𑀯 𑀲𑀼𑀤𑁆𑀥𑀺𑀓𑀧𑀸𑀘𑀺𑀢𑁆𑀢𑀺𑀬𑀜𑁆𑀘. 𑀏𑀲𑁂𑀯 𑀦𑀬𑁄 𑀩𑀳𑀽𑀲𑀼. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀆𑀧𑀢𑁆𑀢𑀺𑀁, 𑀲𑀼𑀤𑁆𑀥𑀺𑀓𑁂𑀦 𑀧𑀸𑀘𑀺𑀢𑁆𑀢𑀺𑀬𑀁;

𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁦);

𑀅𑀬𑀜𑁆𑀳𑀺 𑀧𑀭𑀺𑀡𑀸𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀬𑁄𑀧𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀫𑀬𑁂 𑀫𑀸𑀢𑀼𑀖𑀭𑁂𑀧𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀭𑀲𑁆𑀲 𑀧𑀭𑀺𑀡𑀸𑀫𑁂𑀢𑀺, 𑀲𑀼𑀤𑁆𑀥𑀺𑀓𑀧𑀸𑀘𑀺𑀢𑁆𑀢𑀺𑀬𑀁. 𑀫𑀦𑀼𑀲𑁆𑀲𑀸 ‘‘𑀲𑀗𑁆𑀖𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀺 𑀆𑀳𑀭𑀦𑁆𑀢𑀺, 𑀕𑀺𑀮𑀸𑀦𑁄 𑀘𑁂𑀧𑀺 𑀪𑀺𑀓𑁆𑀔𑀼 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀪𑀸𑀯𑀁 𑀜𑀢𑁆𑀯𑀸 𑀓𑀺𑀜𑁆𑀘𑀺 𑀬𑀸𑀘𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀲𑀘𑁂 𑀧𑀦 𑀲𑁄 ‘‘𑀢𑀼𑀫𑁆𑀳𑀸𑀓𑀁 𑀲𑀧𑁆𑀧𑀺𑀆𑀤𑀻𑀦𑀺 𑀆𑀪𑀝𑀸𑀦𑀺 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀫𑁆𑀧𑀺 𑀤𑁂𑀣𑀸’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺. 𑀅𑀣𑀸𑀧𑀺 𑀦𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀁 𑀉𑀧𑀸𑀲𑀓𑀸 𑀯𑀤𑀦𑁆𑀢𑀺 𑁋 ‘‘𑀲𑀗𑁆𑀖𑁄𑀧𑀺 𑀅𑀫𑁆𑀳𑁂𑀳𑀺 𑀤𑀺𑀦𑁆𑀦𑀫𑁂𑀯 𑀮𑀪𑀢𑀺; 𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺.

𑁬𑁬𑁦. 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀲𑀗𑁆𑀖𑀲𑁆𑀲𑀸𑀢𑀺 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀫𑀳𑀸𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲 𑀤𑁂𑀣𑀸’’𑀢𑀺 𑀧𑀭𑀺𑀡𑀸𑀫𑁂𑀢𑀺.

𑀘𑁂𑀢𑀺𑀬𑀲𑁆𑀲 𑀯𑀸𑀢𑀺 ‘‘𑀓𑀺𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁂𑀦, 𑀘𑁂𑀢𑀺𑀬𑀲𑁆𑀲𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀏𑀯𑀁 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺.

𑀘𑁂𑀢𑀺𑀬𑀲𑁆𑀲 𑀧𑀭𑀺𑀡𑀢𑀦𑁆𑀢𑀺 𑀏𑀢𑁆𑀣 𑀦𑀺𑀬𑀫𑁂𑀢𑁆𑀯𑀸 𑀅𑀜𑁆𑀜𑀘𑁂𑀢𑀺𑀬𑀲𑁆𑀲𑀢𑁆𑀣𑀸𑀬 𑀭𑁄𑀧𑀺𑀢𑀫𑀸𑀮𑀸𑀯𑀘𑁆𑀙𑀢𑁄 𑀅𑀜𑁆𑀜𑀘𑁂𑀢𑀺𑀬𑀫𑁆𑀳𑀺 𑀧𑀼𑀧𑁆𑀨𑀫𑁆𑀧𑀺 𑀆𑀭𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀓𑀲𑁆𑀲 𑀘𑁂𑀢𑀺𑀬𑀲𑁆𑀲 𑀧𑀦 𑀙𑀢𑁆𑀢𑀁 𑀯𑀸 𑀧𑀝𑀸𑀓𑀁 𑀯𑀸 𑀆𑀭𑁄𑀧𑁂𑀢𑁆𑀯𑀸 𑀞𑀺𑀢𑀁 𑀤𑀺𑀲𑁆𑀯𑀸 𑀲𑁂𑀲𑀁 𑀅𑀜𑁆𑀜𑀲𑁆𑀲 𑀘𑁂𑀢𑀺𑀬𑀲𑁆𑀲 𑀤𑀸𑀧𑁂𑀢𑀼𑀁 𑀯𑀝𑁆𑀝𑀢𑀺.

𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀢𑀦𑁆𑀢𑀺 𑀅𑀦𑁆𑀢𑀫𑀲𑁄 𑀲𑀼𑀦𑀔𑀲𑁆𑀲𑀸𑀧𑀺 𑀧𑀭𑀺𑀡𑀢𑀁 ‘‘𑀇𑀫𑀲𑁆𑀲 𑀲𑀼𑀦𑀔𑀲𑁆𑀲 𑀫𑀸 𑀤𑁂𑀳𑀺, 𑀏𑀢𑀲𑁆𑀲 𑀤𑁂𑀳𑀻’’𑀢𑀺 𑀏𑀯𑀁 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀸𑀫𑁂𑀢𑀺, 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀤𑀸𑀬𑀓𑀸 ‘‘𑀫𑀬𑀁 𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀤𑀸𑀢𑀼𑀓𑀸𑀫𑀸, 𑀘𑁂𑀢𑀺𑀬𑀲𑁆𑀲 𑀧𑀽𑀚𑀁 𑀓𑀸𑀢𑀼𑀓𑀸𑀫𑀸, 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀓𑁆𑀔𑀸𑀭𑀁 𑀤𑀸𑀢𑀼𑀓𑀸𑀫𑀸, 𑀢𑀼𑀫𑁆𑀳𑀸𑀓𑀁 𑀭𑀼𑀘𑀺𑀬𑀸 𑀤𑀲𑁆𑀲𑀸𑀫; 𑀪𑀡𑀣, 𑀓𑀢𑁆𑀣 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀬𑀢𑁆𑀣 𑀇𑀘𑁆𑀙𑀣, 𑀢𑀢𑁆𑀣 𑀤𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀸. 𑀲𑀘𑁂 𑀧𑀦 𑀓𑁂𑀯𑀮𑀁 ‘‘𑀓𑀢𑁆𑀣 𑀤𑁂𑀫𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀺, 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦𑁂𑀯 𑀯𑀢𑁆𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬