𑁩. 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫𑁨. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀅𑀦𑁆𑀢𑁂 𑀆𑀤𑀺𑀬𑀺𑀢𑁆𑀯𑀸𑀢𑀺 𑀲𑀦𑁆𑀣𑀢𑀲𑁆𑀲 𑀅𑀦𑁆𑀢𑁂 𑀅𑀦𑀼𑀯𑀸𑀢𑀁 𑀯𑀺𑀬 𑀤𑀲𑁆𑀲𑁂𑀢𑁆𑀯𑀸 𑀑𑀤𑀸𑀢𑀁 𑀅𑀮𑁆𑀮𑀺𑀬𑀸𑀧𑁂𑀢𑁆𑀯𑀸.

𑀤𑁆𑀯𑁂 𑀪𑀸𑀕𑀸𑀢𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸. 𑀆𑀤𑀸𑀢𑀩𑁆𑀩𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀕𑁄𑀘𑀭𑀺𑀬𑀸𑀦𑀦𑁆𑀢𑀺 𑀓𑀧𑀺𑀮𑀯𑀡𑁆𑀡𑀸𑀦𑀁. 𑀤𑁆𑀯𑁂 𑀢𑀼𑀮𑀸 𑀆𑀤𑀸𑀢𑀩𑁆𑀩𑀸𑀢𑀺 𑀘𑀢𑀽𑀳𑀺 𑀢𑀼𑀮𑀸𑀳𑀺 𑀓𑀸𑀭𑁂𑀢𑀼𑀓𑀸𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀧𑀦 𑀬𑀢𑁆𑀢𑀓𑁂𑀳𑀺 𑀏𑀴𑀓𑀮𑁄𑀫𑁂𑀳𑀺 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀓𑀸𑀴𑀓𑀸𑀦𑀁 𑀏𑀓𑁄 𑀑𑀤𑀸𑀢𑀸𑀦𑀁, 𑀏𑀓𑁄 𑀕𑁄𑀘𑀭𑀺𑀬𑀸𑀦𑀦𑁆𑀢𑀺 𑀇𑀤𑀫𑁂𑀯 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑁂𑀯. 𑀓𑁂𑀯𑀮𑀁 𑀇𑀤𑀁 𑀆𑀤𑀸𑀬 𑀅𑀦𑀸𑀤𑀸𑀬 𑀘 𑀓𑀭𑀡𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.