𑁨. 𑀓𑁄𑀲𑀺𑀬𑀯𑀕𑁆𑀕𑁄

𑁧. 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁪𑁨. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀲𑀦𑁆𑀣𑀭𑀺𑀢𑁆𑀯𑀸 𑀓𑀢𑀁 𑀳𑁄𑀢𑀻𑀢𑀺 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀓𑁄𑀲𑀺𑀬𑀁𑀲𑀽𑀦𑀺 𑀉𑀧𑀭𑀽𑀧𑀭𑀺 𑀲𑀦𑁆𑀣𑀭𑀺𑀢𑁆𑀯𑀸 𑀓𑀜𑁆𑀚𑀺𑀓𑀸𑀤𑀻𑀳𑀺 𑀲𑀺𑀜𑁆𑀘𑀺𑀢𑁆𑀯𑀸 𑀓𑀢𑀁 𑀳𑁄𑀢𑀺. 𑀏𑀓𑁂𑀦𑀧𑀺 𑀓𑁄𑀲𑀺𑀬𑀁𑀲𑀼𑀦𑀸 𑀫𑀺𑀲𑁆𑀲𑀺𑀢𑁆𑀯𑀸𑀢𑀺 𑀢𑀺𑀝𑁆𑀞𑀢𑀼 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀫𑀺𑀲𑁆𑀲𑀺𑀢𑀁, 𑀲𑀘𑁂𑀧𑀺 𑀢𑀲𑁆𑀲 𑀓𑀭𑀡𑀝𑁆𑀞𑀸𑀦𑁂 𑀯𑀸𑀢𑁄 𑀏𑀓𑀁 𑀓𑁄𑀲𑀺𑀬𑀁𑀲𑀼𑀁 𑀆𑀦𑁂𑀢𑁆𑀯𑀸 𑀧𑀸𑀢𑁂𑀢𑀺, 𑀏𑀯𑀫𑁆𑀧𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀫𑁂𑀯 𑀳𑁄𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁,

𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀤𑁆𑀥𑀓𑀸𑀴𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁪𑁭. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀲𑀼𑀤𑁆𑀥𑀓𑀸𑀴𑀓𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀲𑀼𑀤𑁆𑀥𑀓𑀸𑀴𑀓𑀸𑀦𑀦𑁆𑀢𑀺 𑀲𑀼𑀤𑁆𑀥𑀸𑀦𑀁 𑀓𑀸𑀴𑀓𑀸𑀦𑀁, 𑀅𑀜𑁆𑀜𑁂𑀳𑀺 𑀅𑀫𑀺𑀲𑁆𑀲𑀺𑀢𑀓𑀸𑀴𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑁂𑀯𑀸𑀢𑀺.

𑀲𑀼𑀤𑁆𑀥𑀓𑀸𑀴𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫𑁨. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀅𑀦𑁆𑀢𑁂 𑀆𑀤𑀺𑀬𑀺𑀢𑁆𑀯𑀸𑀢𑀺 𑀲𑀦𑁆𑀣𑀢𑀲𑁆𑀲 𑀅𑀦𑁆𑀢𑁂 𑀅𑀦𑀼𑀯𑀸𑀢𑀁 𑀯𑀺𑀬 𑀤𑀲𑁆𑀲𑁂𑀢𑁆𑀯𑀸 𑀑𑀤𑀸𑀢𑀁 𑀅𑀮𑁆𑀮𑀺𑀬𑀸𑀧𑁂𑀢𑁆𑀯𑀸.

𑀤𑁆𑀯𑁂 𑀪𑀸𑀕𑀸𑀢𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸. 𑀆𑀤𑀸𑀢𑀩𑁆𑀩𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀕𑁄𑀘𑀭𑀺𑀬𑀸𑀦𑀦𑁆𑀢𑀺 𑀓𑀧𑀺𑀮𑀯𑀡𑁆𑀡𑀸𑀦𑀁. 𑀤𑁆𑀯𑁂 𑀢𑀼𑀮𑀸 𑀆𑀤𑀸𑀢𑀩𑁆𑀩𑀸𑀢𑀺 𑀘𑀢𑀽𑀳𑀺 𑀢𑀼𑀮𑀸𑀳𑀺 𑀓𑀸𑀭𑁂𑀢𑀼𑀓𑀸𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀧𑀦 𑀬𑀢𑁆𑀢𑀓𑁂𑀳𑀺 𑀏𑀴𑀓𑀮𑁄𑀫𑁂𑀳𑀺 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀓𑀸𑀴𑀓𑀸𑀦𑀁 𑀏𑀓𑁄 𑀑𑀤𑀸𑀢𑀸𑀦𑀁, 𑀏𑀓𑁄 𑀕𑁄𑀘𑀭𑀺𑀬𑀸𑀦𑀦𑁆𑀢𑀺 𑀇𑀤𑀫𑁂𑀯 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑁂𑀯. 𑀓𑁂𑀯𑀮𑀁 𑀇𑀤𑀁 𑀆𑀤𑀸𑀬 𑀅𑀦𑀸𑀤𑀸𑀬 𑀘 𑀓𑀭𑀡𑀢𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫𑁭. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀊𑀳𑀤𑀦𑁆𑀢𑀺𑀧𑀺 𑀉𑀫𑁆𑀫𑀺𑀳𑀦𑁆𑀢𑀺𑀧𑀻𑀢𑀺 𑀲𑀦𑁆𑀣𑀢𑀸𑀦𑀁 𑀉𑀧𑀭𑀺 𑀯𑀘𑁆𑀘𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀓𑀭𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑀺𑀦𑁆𑀦𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀣𑀢𑀲𑀫𑁆𑀫𑀼𑀢𑀻𑀢𑀺 𑀏𑀯𑀁 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁄 𑀪𑀺𑀓𑁆𑀔𑀼 𑀬𑀸𑀯 𑀭𑁄𑀕𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀢𑀸𑀯 𑀬𑀁 𑀬𑀁 𑀞𑀸𑀦𑀁 𑀕𑀘𑁆𑀙𑀢𑀺, 𑀢𑀢𑁆𑀣 𑀢𑀢𑁆𑀣 𑀲𑀦𑁆𑀣𑀢𑀁 𑀓𑀸𑀢𑀼𑀁 𑀮𑀪𑀢𑀺. 𑀲𑀘𑁂 𑀅𑀭𑁄𑀕𑁄 𑀳𑀼𑀢𑁆𑀯𑀸 𑀧𑀼𑀦 𑀫𑀽𑀮𑀩𑁆𑀬𑀸𑀥𑀺𑀦𑀸𑀯 𑀕𑀺𑀮𑀸𑀦𑁄 𑀳𑁄𑀢𑀺, 𑀲𑁄𑀬𑁂𑀯 𑀧𑀭𑀺𑀳𑀸𑀭𑁄, 𑀦𑀢𑁆𑀣𑀜𑁆𑀜𑀁 𑀲𑀫𑁆𑀫𑀼𑀢𑀺𑀓𑀺𑀘𑁆𑀘𑀦𑁆𑀢𑀺 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀆𑀳. 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦 ‘‘𑀲𑁄 𑀯𑀸 𑀩𑁆𑀬𑀸𑀥𑀺 𑀧𑀝𑀺𑀓𑀼𑀧𑁆𑀧𑀢𑀼, 𑀅𑀜𑁆𑀜𑁄 𑀯𑀸, ‘𑀲𑀓𑀺𑀁 𑀕𑀺𑀮𑀸𑀦𑁄’𑀢𑀺 𑀦𑀸𑀫𑀁 𑀮𑀤𑁆𑀥𑀁 𑀮𑀤𑁆𑀥𑀫𑁂𑀯, 𑀧𑀼𑀦 𑀲𑀫𑁆𑀫𑀼𑀢𑀺𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀆𑀳.

𑀑𑀭𑁂𑀦 𑀘𑁂 𑀙𑀦𑁆𑀦𑀁 𑀯𑀲𑁆𑀲𑀸𑀦𑀦𑁆𑀢𑀺 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀑𑀭𑀺𑀫𑀪𑀸𑀕𑁂, 𑀅𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀤𑀪𑀸𑀚𑀦𑁂 𑀧𑀦 𑀲𑀗𑁆𑀔𑁆𑀬𑀸𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀁 ‘‘𑀊𑀦𑀓𑀙𑀩𑁆𑀩𑀲𑁆𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀅𑀦𑀸𑀧𑀢𑁆𑀢𑀺 𑀙𑀩𑁆𑀩𑀲𑁆𑀲𑀸𑀦𑀺 𑀓𑀭𑁄𑀢𑀻𑀢𑀺 𑀬𑀤𑀸 𑀙𑀩𑁆𑀩𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀺, 𑀢𑀤𑀸 𑀲𑀦𑁆𑀣𑀢𑀁 𑀓𑀭𑁄𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 ‘‘𑀬𑀤𑀸 𑀅𑀢𑀺𑀭𑁂𑀓𑀙𑀩𑁆𑀩𑀲𑁆𑀲𑀸𑀦𑀺 𑀳𑁄𑀦𑁆𑀢𑀺, 𑀢𑀤𑀸 𑀓𑀭𑁄𑀢𑀻’’𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀲𑁄 𑀙𑀩𑁆𑀩𑀲𑁆𑀲𑀸𑀦𑀺 𑀓𑀭𑁄𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑁂𑀯𑀸𑀢𑀺.

𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀲𑀻𑀤𑀦𑀲𑀦𑁆𑀣𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁬𑁫. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀦𑀺𑀲𑀻𑀤𑀦𑀲𑀦𑁆𑀣𑀢𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀇𑀘𑁆𑀙𑀸𑀫𑀳𑀁 𑀪𑀺𑀓𑁆𑀔𑀯𑁂𑀢𑀺 𑀪𑀕𑀯𑀸 𑀓𑀺𑀭 𑀢𑀁 𑀢𑁂𑀫𑀸𑀲𑀁 𑀦 𑀓𑀺𑀜𑁆𑀘𑀺 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀁 𑀅𑀤𑁆𑀤𑀲, 𑀢𑀲𑁆𑀫𑀸 𑀏𑀯𑀫𑀸𑀳. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀦𑁆𑀢𑀺𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀸 𑀓𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀬𑀲𑁆𑀫𑀸 𑀧𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀺 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀦𑁂 𑀪𑀺𑀓𑁆𑀔𑀽 𑀅𑀥𑀫𑁆𑀫𑀺𑀓𑀁 𑀓𑀢𑀺𑀓𑀯𑀢𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑀁 𑀉𑀧𑀲𑁂𑀦𑁄 𑀪𑀺𑀦𑁆𑀤𑀺𑀲𑁆𑀲𑀢𑀺. 𑀅𑀳𑀁 𑀢𑀲𑁆𑀲 𑀧𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫𑀺, 𑀢𑀢𑁄 𑀫𑀁 𑀧𑀲𑁆𑀲𑀺𑀢𑀼𑀓𑀸𑀫𑀸 𑀩𑀳𑀽 𑀪𑀺𑀓𑁆𑀔𑀽 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀲𑁆𑀲𑀦𑁆𑀢𑀺, 𑀅𑀳𑀜𑁆𑀘 𑀢𑁂𑀳𑀺 𑀉𑀚𑁆𑀛𑀺𑀢𑀲𑀦𑁆𑀣𑀢𑀧𑀘𑁆𑀘𑀬𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀏𑀯𑀁 𑀩𑀳𑀽𑀦𑀺 𑀳𑀺 𑀏𑀢𑁆𑀣 𑀆𑀦𑀺𑀲𑀁𑀲𑀸𑀦𑀻𑀢𑀺.

𑀲𑀧𑀭𑀺𑀲𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀣𑁂𑀭𑁄 𑀓𑀺𑀭 ‘‘𑀦, 𑀪𑀺𑀓𑁆𑀔𑀯𑁂, 𑀊𑀦𑀤𑀲𑀯𑀲𑁆𑀲𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁭𑁫) 𑀇𑀫𑀲𑁆𑀫𑀺𑀁 𑀔𑀦𑁆𑀥𑀓𑀲𑀺𑀓𑁆𑀔𑀸𑀧𑀤𑁂 ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁 𑀫𑁄𑀖𑀧𑀼𑀭𑀺𑀲 𑀅𑀜𑁆𑀜𑁂𑀳𑀺 𑀑𑀯𑀤𑀺𑀬𑁄 𑀅𑀦𑀼𑀲𑀸𑀲𑀺𑀬𑁄 𑀅𑀜𑁆𑀜𑀁 𑀑𑀯𑀤𑀺𑀢𑀼𑀁 𑀅𑀦𑀼𑀲𑀸𑀲𑀺𑀢𑀼𑀁 𑀫𑀜𑁆𑀜𑀺𑀲𑁆𑀲𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀕𑀭𑀳𑀁 𑀮𑀪𑀺𑀢𑁆𑀯𑀸 ‘‘𑀲𑀢𑁆𑀣𑀸 𑀫𑀬𑁆𑀳𑀁 𑀧𑀭𑀺𑀲𑀁 𑀦𑀺𑀲𑁆𑀲𑀸𑀬 𑀕𑀭𑀳𑀁 𑀅𑀤𑀸𑀲𑀺, 𑀲𑁄 𑀤𑀸𑀦𑀸𑀳𑀁 𑀪𑀕𑀯𑀦𑁆𑀢𑀁 𑀢𑁂𑀦𑁂𑀯 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀻𑀓𑁂𑀦 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑁂𑀦 𑀫𑀼𑀔𑁂𑀦 𑀩𑁆𑀭𑀳𑁆𑀫𑀖𑁄𑀲𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀧𑀭𑀺𑀲𑀁𑀬𑁂𑀯 𑀦𑀺𑀲𑁆𑀲𑀸𑀬 𑀲𑀸𑀥𑀼𑀓𑀸𑀭𑀁 𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀼𑀳𑀤𑀬𑁄 𑀓𑀼𑀮𑀧𑀼𑀢𑁆𑀢𑁄 𑀅𑀢𑀺𑀭𑁂𑀓𑀬𑁄𑀚𑀦𑀲𑀢𑀁 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀲𑀁 𑀘𑀺𑀦𑀺𑀢𑁆𑀯𑀸 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀧𑀼𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀧𑀭𑀺𑀲𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺. 𑀦 𑀳𑀺 𑀲𑀓𑁆𑀓𑀸 𑀩𑀼𑀤𑁆𑀥𑀸𑀦𑀁 𑀅𑀜𑁆𑀜𑀣𑀸 𑀆𑀭𑀸𑀥𑁂𑀢𑀼𑀁 𑀅𑀜𑁆𑀜𑀢𑁆𑀭 𑀯𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸.

𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄𑀢𑀺 𑀯𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀲𑀼𑀤𑁆𑀥𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑁄 𑀲𑀻𑀳𑁄 𑀯𑀺𑀬 𑀓𑀜𑁆𑀘𑀦𑀧𑀩𑁆𑀩𑀢𑀲𑁆𑀲 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄. 𑀏𑀢𑀤𑀯𑁄𑀘𑀸𑀢𑀺 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀏𑀢𑀁 𑀅𑀯𑁄𑀘. 𑀫𑀦𑀸𑀧𑀸𑀦𑀺 𑀢𑁂 𑀪𑀺𑀓𑁆𑀔𑀼 𑀧𑀁𑀲𑀼𑀓𑀽𑀮𑀸𑀦𑀻𑀢𑀺 𑀪𑀺𑀓𑁆𑀔𑀼 𑀢𑀯 𑀇𑀫𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀫𑀦𑀸𑀧𑀸𑀦𑀺, 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀔𑀦𑁆𑀢𑀺𑀬𑀸 𑀕𑀳𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀦 𑀔𑁄 𑀫𑁂, 𑀪𑀦𑁆𑀢𑁂, 𑀫𑀦𑀸𑀧𑀸𑀦𑀻𑀢𑀺, 𑀪𑀦𑁆𑀢𑁂 𑀦 𑀫𑀬𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀕𑀳𑀺𑀢𑀸𑀦𑀺, 𑀕𑀮𑀕𑁆𑀕𑀸𑀳𑁂𑀦 𑀯𑀺𑀬 𑀫𑀢𑁆𑀣𑀓𑀢𑀸𑀴𑀦𑁂𑀦 𑀯𑀺𑀬 𑀘 𑀕𑀸𑀳𑀺𑀢𑁄𑀫𑁆𑀳𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀜𑁆𑀜𑀸𑀬𑀺𑀲𑁆𑀲𑀢𑀻𑀢𑀺 𑀧𑀜𑁆𑀜𑀸𑀢𑁄 𑀅𑀪𑀺𑀜𑁆𑀜𑀸𑀢𑁄 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀫𑀬𑀁 𑀅𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀸𑀢𑀺 𑀫𑀬𑀁 𑀲𑀸𑀯𑀓𑀸 𑀦𑀸𑀫 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀲𑁆𑀲𑀸𑀫, 𑀩𑀼𑀤𑁆𑀥𑀯𑀺𑀲𑀬𑁄 𑀳𑀺 𑀏𑀲𑁄 𑀬𑀤𑀺𑀤𑀁 ‘‘𑀧𑀸𑀘𑀺𑀢𑁆𑀢𑀺𑀬𑀁 𑀤𑀼𑀓𑁆𑀓𑀝’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀧𑀦𑀁 𑀧𑀜𑁆𑀜𑀢𑁆𑀢𑀲𑀫𑀼𑀘𑁆𑀙𑀺𑀦𑁆𑀤𑀦𑀁 𑀯𑀸. 𑀲𑀫𑀸𑀤𑀸𑀬𑀸𑀢𑀺 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀺𑀢𑁆𑀯𑀸, ‘‘𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀲𑁆𑀲𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀆𑀭𑀤𑁆𑀥𑀘𑀺𑀢𑁆𑀢𑁄 𑀧𑀼𑀦𑀧𑀺 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀲𑀸𑀥𑀼𑀓𑀸𑀭𑀫𑀤𑀸𑀲𑀺.

𑁫𑁬𑁬. 𑀅𑀦𑀼𑀜𑁆𑀜𑀸𑀢𑀸𑀯𑀼𑀲𑁄𑀢𑀺 𑀅𑀦𑀼𑀜𑁆𑀜𑀸𑀢𑀁, 𑀆𑀯𑀼𑀲𑁄. 𑀧𑀺𑀳𑁂𑀦𑁆𑀢𑀸𑀢𑀺 𑀧𑀺𑀳𑀬𑀦𑁆𑀢𑀸. 𑀲𑀦𑁆𑀣𑀢𑀸𑀦𑀺 𑀉𑀚𑁆𑀛𑀺𑀢𑁆𑀯𑀸𑀢𑀺 𑀲𑀦𑁆𑀣𑀢𑁂 𑀘𑀢𑀼𑀢𑁆𑀣𑀘𑀻𑀯𑀭𑀲𑀜𑁆𑀜𑀺𑀢𑀸𑀬 𑀲𑀩𑁆𑀩𑀲𑀦𑁆𑀣𑀢𑀸𑀦𑀺 𑀉𑀚𑁆𑀛𑀺𑀢𑁆𑀯𑀸. 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀪𑀕𑀯𑀸 𑀲𑀦𑁆𑀣𑀢𑀸𑀦𑀺 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 𑀤𑀺𑀲𑁆𑀯𑀸 ‘‘𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑁂 𑀓𑀸𑀭𑀡𑀁 𑀦𑀢𑁆𑀣𑀺, 𑀧𑀭𑀺𑀪𑁄𑀕𑀼𑀧𑀸𑀬𑀁 𑀦𑁂𑀲𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺.

𑁫𑁬𑁭. 𑀲𑀓𑀺𑀁 𑀦𑀺𑀯𑀢𑁆𑀣𑀫𑁆𑀧𑀺 𑀲𑀓𑀺𑀁 𑀧𑀸𑀭𑀼𑀢𑀫𑁆𑀧𑀻𑀢𑀺 𑀲𑀓𑀺𑀁 𑀦𑀺𑀲𑀺𑀦𑁆𑀦𑀜𑁆𑀘𑁂𑀯 𑀦𑀺𑀧𑀦𑁆𑀦𑀜𑁆𑀘. 𑀲𑀸𑀫𑀦𑁆𑀢𑀸𑀢𑀺 𑀏𑀓𑀧𑀲𑁆𑀲𑀢𑁄 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑀝𑁆𑀞𑀸𑀦𑀁 𑀬𑀣𑀸 𑀯𑀺𑀤𑀢𑁆𑀣𑀺𑀫𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀕𑀳𑁂𑀢𑀩𑁆𑀩𑀁, 𑀲𑀦𑁆𑀣𑀭𑀦𑁆𑀢𑁂𑀦 𑀧𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀏𑀓𑀤𑁂𑀲𑁂 𑀯𑀸 𑀲𑀦𑁆𑀣𑀭𑀺𑀢𑀩𑁆𑀩𑀁, 𑀯𑀺𑀚𑀝𑁂𑀢𑁆𑀯𑀸 𑀯𑀸 𑀫𑀺𑀲𑁆𑀲𑀓𑀁 𑀓𑀢𑁆𑀯𑀸 𑀲𑀦𑁆𑀣𑀭𑀺𑀢𑀩𑁆𑀩𑀁, 𑀏𑀯𑀁 𑀣𑀺𑀭𑀢𑀭𑀁 𑀳𑁄𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁆𑀢𑀸 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑀻𑀢𑀺.

𑀇𑀫𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀲𑀦𑁆𑀣𑀢𑁂𑀲𑀼 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺, 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂 𑀯𑀝𑁆𑀝𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺.

𑀦𑀺𑀲𑀻𑀤𑀦𑀲𑀦𑁆𑀣𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁭𑁧. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀉𑀧𑁆𑀧𑀡𑁆𑀟𑁂𑀲𑀼𑀦𑁆𑀢𑀺 ‘‘𑀓𑀺𑀢𑁆𑀢𑀓𑁂𑀦, 𑀪𑀦𑁆𑀢𑁂, 𑀓𑀻𑀢𑀸𑀦𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀅𑀯𑀳𑀲𑀺𑀁𑀲𑀼. 𑀞𑀺𑀢𑀓𑁄𑀯 𑀆𑀲𑀼𑀫𑁆𑀪𑀻𑀢𑀺 𑀬𑀣𑀸 𑀫𑀦𑀼𑀲𑁆𑀲𑀸 𑀅𑀭𑀜𑁆𑀜𑀢𑁄 𑀫𑀳𑀦𑁆𑀢𑀁 𑀤𑀸𑀭𑀼𑀪𑀸𑀭𑀁 𑀆𑀦𑁂𑀢𑁆𑀯𑀸 𑀓𑀺𑀮𑀦𑁆𑀢𑀸 𑀞𑀺𑀢𑀓𑀸𑀯 𑀧𑀸𑀢𑁂𑀦𑁆𑀢𑀺, 𑀏𑀯𑀁 𑀧𑀸𑀢𑁂𑀲𑀻𑀢𑀺 𑀅𑀢𑁆𑀣𑁄.

𑁫𑁭𑁨. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦, 𑀅𑀢𑁆𑀢𑀦𑀸 𑀳𑀭𑀺𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀳𑀺𑀢𑀺𑀬𑁄𑀚𑀦𑀁 𑀧𑀸𑀢𑁂𑀢𑀻𑀢𑀺 𑀢𑀺𑀬𑁄𑀚𑀦𑀢𑁄 𑀩𑀳𑀺 𑀧𑀸𑀢𑁂𑀢𑀺. 𑀅𑀦𑀦𑁆𑀢𑀭𑀸𑀬𑁂𑀦 𑀧𑀢𑀦𑀓𑁂 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀮𑁄𑀫𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀲𑀘𑁂 𑀩𑀳𑀺𑀢𑀺𑀬𑁄𑀚𑀦𑁂 𑀭𑀼𑀓𑁆𑀔𑁂 𑀯𑀸 𑀣𑀫𑁆𑀪𑁂 𑀯𑀸 𑀧𑀝𑀺𑀳𑀜𑁆𑀜𑀺𑀢𑁆𑀯𑀸 𑀧𑀼𑀦 𑀅𑀦𑁆𑀢𑁄 𑀧𑀢𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺. 𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑀞𑀢𑁆𑀯𑀸 𑀞𑀢𑁆𑀯𑀸 𑀯𑀝𑁆𑀝𑀫𑀸𑀦𑀸 𑀏𑀴𑀓𑀮𑁄𑀫𑀪𑀡𑁆𑀟𑀺𑀓𑀸 𑀧𑀼𑀦 𑀅𑀦𑁆𑀢𑁄 𑀧𑀯𑀺𑀲𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀅𑀦𑁆𑀢𑁄 𑀞𑀢𑁆𑀯𑀸 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀬𑀝𑁆𑀞𑀺𑀬𑀸 𑀯𑀸 𑀯𑀝𑁆𑀝𑁂𑀢𑀺 𑀞𑀢𑁆𑀯𑀸 𑀯𑀸 𑀅𑀞𑀢𑁆𑀯𑀸 𑀯𑀸 𑀯𑀝𑁆𑀝𑀫𑀸𑀦𑀸 𑀪𑀡𑁆𑀟𑀺𑀓𑀸 𑀕𑀘𑁆𑀙𑀢𑀼, 𑀆𑀧𑀢𑁆𑀢𑀺𑀬𑁂𑀯. ‘‘𑀅𑀜𑁆𑀜𑁄 𑀳𑀭𑀺𑀲𑁆𑀲𑀢𑀻’’𑀢𑀺 𑀞𑀧𑁂𑀢𑀺, 𑀢𑁂𑀦 𑀳𑀭𑀺𑀢𑁂𑀧𑀺 𑀆𑀧𑀢𑁆𑀢𑀺𑀬𑁂𑀯. 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀞𑀧𑀺𑀢𑀁 𑀯𑀸𑀢𑁄 𑀯𑀸 𑀅𑀜𑁆𑀜𑁄 𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀩𑀳𑀺 𑀧𑀸𑀢𑁂𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀲𑀉𑀲𑁆𑀲𑀸𑀳𑀢𑁆𑀢𑀸 𑀅𑀘𑀺𑀢𑁆𑀢𑀓𑀢𑁆𑀢𑀸 𑀘 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀓𑀼𑀭𑀼𑀦𑁆𑀤𑀺𑀬𑀸𑀤𑀻𑀲𑀼 𑀧𑀦 ‘‘𑀏𑀢𑁆𑀣 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸, 𑀲𑀸 𑀅𑀦𑀸𑀧𑀢𑁆𑀢𑀺 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺. 𑀉𑀪𑀢𑁄𑀪𑀡𑁆𑀟𑀺𑀓𑀁 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀏𑀓𑀁 𑀪𑀡𑁆𑀟𑀺𑀓𑀁 𑀅𑀦𑁆𑀢𑁄𑀲𑀻𑀫𑀸𑀬 𑀏𑀓𑀁 𑀩𑀳𑀺𑀲𑀻𑀫𑀸𑀬 𑀓𑀭𑁄𑀦𑁆𑀢𑁄 𑀞𑀧𑁂𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀏𑀓𑀸𑀩𑀤𑁆𑀥𑁂 𑀓𑀸𑀚𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀤𑀺 𑀧𑀦 𑀅𑀩𑀦𑁆𑀥𑀺𑀢𑁆𑀯𑀸 𑀓𑀸𑀚𑀓𑁄𑀝𑀺𑀬𑀁 𑀞𑀧𑀺𑀢𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀭𑀓𑁆𑀔𑀢𑀺. 𑀏𑀓𑀸𑀩𑀤𑁆𑀥𑁂𑀧𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀞𑀧𑀺𑀢𑁂 𑀆𑀧𑀢𑁆𑀢𑀺𑀬𑁂𑀯.

𑀅𑀜𑁆𑀜𑀲𑁆𑀲 𑀬𑀸𑀦𑁂 𑀯𑀸𑀢𑀺 𑀏𑀢𑁆𑀣 𑀕𑀘𑁆𑀙𑀦𑁆𑀢𑁂 𑀬𑀸𑀦𑁂 𑀯𑀸 𑀳𑀢𑁆𑀣𑀺𑀧𑀺𑀝𑁆𑀞𑀺𑀆𑀤𑀻𑀲𑀼 𑀯𑀸 𑀲𑀸𑀫𑀺𑀓𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀳𑀭𑀺𑀲𑁆𑀲𑀢𑀻𑀢𑀺 𑀞𑀧𑁂𑀢𑀺, 𑀢𑀲𑁆𑀫𑀺𑀁 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀦𑁆𑀢𑁂 𑀆𑀧𑀢𑁆𑀢𑀺. 𑀅𑀕𑀘𑁆𑀙𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀅𑀕𑀘𑁆𑀙𑀦𑁆𑀢𑁂 𑀬𑀸𑀦𑁂 𑀯𑀸 𑀳𑀢𑁆𑀣𑀺𑀧𑀺𑀝𑁆𑀞𑀺𑀬𑀸𑀤𑀻𑀲𑀼 𑀯𑀸 𑀞𑀧𑁂𑀢𑁆𑀯𑀸 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀸𑀭𑁂𑀢𑀺, 𑀳𑁂𑀝𑁆𑀞𑀸 𑀯𑀸 𑀕𑀘𑁆𑀙𑀦𑁆𑀢𑁄 𑀘𑁄𑀤𑁂𑀢𑀺, 𑀧𑀓𑁆𑀓𑁄𑀲𑀦𑁆𑀢𑁄 𑀯𑀸 𑀅𑀦𑀼𑀩𑀦𑁆𑀥𑀸𑀧𑁂𑀢𑀺, ‘‘𑀅𑀜𑁆𑀜𑀁 𑀳𑀭𑀸𑀧𑁂𑀢𑀻’’𑀢𑀺 𑀯𑀘𑀦𑀢𑁄 𑀅𑀦𑀸𑀧𑀢𑁆𑀢𑀺. 𑀓𑀼𑀭𑀼𑀦𑁆𑀤𑀺𑀬𑀸𑀤𑀻𑀲𑀼 𑀧𑀦 ‘‘𑀆𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 ‘‘𑀅𑀜𑁆𑀜𑀁 𑀳𑀭𑀸𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀦 𑀲𑀫𑁂𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑁂 𑀧𑀦 𑀲𑀼𑀗𑁆𑀓𑀖𑀸𑀢𑁂 𑀆𑀧𑀢𑁆𑀢𑀺 𑀳𑁄𑀢𑀺. 𑀬𑀸 𑀳𑀺 𑀢𑀢𑁆𑀣 𑀆𑀧𑀢𑁆𑀢𑀺, 𑀲𑀸 𑀇𑀥 𑀅𑀦𑀸𑀧𑀢𑁆𑀢𑀺. 𑀬𑀸 𑀇𑀥 𑀆𑀧𑀢𑁆𑀢𑀺, 𑀲𑀸 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀅𑀜𑁆𑀜𑀯𑀺𑀳𑀺𑀢𑁄 𑀯𑀸 𑀘𑁄𑀭𑀸𑀤𑀻𑀳𑀺 𑀯𑀸 𑀉𑀧𑀤𑁆𑀤𑀼𑀢𑁄 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀲𑀩𑁆𑀩𑀢𑁆𑀣 𑀮𑁄𑀫𑀕𑀡𑀦𑀸𑀬 𑀆𑀧𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁭𑁫. 𑀢𑀺𑀬𑁄𑀚𑀦𑀁 𑀯𑀸𑀲𑀸𑀥𑀺𑀧𑁆𑀧𑀸𑀬𑁄 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀁 𑀳𑀭𑀢𑀻𑀢𑀺 𑀬𑀢𑁆𑀣 𑀕𑀢𑁄, 𑀢𑀢𑁆𑀣 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀁 𑀯𑀸 𑀧𑀘𑁆𑀘𑀬𑀸𑀤𑀻𑀦𑀁 𑀯𑀸 𑀅𑀮𑀸𑀪𑁂𑀦 𑀢𑀢𑁄 𑀧𑀭𑀁 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀺, 𑀢𑀢𑁄𑀧𑀺 𑀅𑀜𑁆𑀜𑀢𑁆𑀣𑀸𑀢𑀺 𑀏𑀯𑀁 𑀬𑁄𑀚𑀦𑀲𑀢𑀫𑁆𑀧𑀺 𑀳𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀘𑁆𑀙𑀺𑀦𑁆𑀦𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀘𑁄𑀭𑀸 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀭𑀢𑁆𑀣𑀓𑀪𑀸𑀯𑀁 𑀜𑀢𑁆𑀯𑀸 𑀧𑀝𑀺𑀤𑁂𑀦𑁆𑀢𑀺, 𑀢𑀁 𑀳𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀯𑀺𑀦𑀬𑀓𑀫𑁆𑀫𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀓𑀢𑀪𑀡𑁆𑀟𑀦𑁆𑀢𑀺 𑀓𑀢𑀁𑀪𑀡𑁆𑀟𑀁 𑀓𑀫𑁆𑀩𑀮𑀓𑁄𑀚𑀯𑀲𑀦𑁆𑀣𑀢𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀅𑀦𑁆𑀢𑀫𑀲𑁄 𑀲𑀼𑀢𑁆𑀢𑀓𑁂𑀦 𑀩𑀤𑁆𑀥𑀫𑀢𑁆𑀢𑀫𑁆𑀧𑀺. 𑀬𑁄 𑀧𑀦 𑀢𑀦𑀼𑀓𑀧𑀢𑁆𑀢𑀢𑁆𑀣𑀯𑀺𑀓𑀦𑁆𑀢𑀭𑁂 𑀯𑀸 𑀆𑀬𑁄𑀕𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀸𑀤𑀻𑀦𑀁 𑀅𑀦𑁆𑀢𑀭𑁂𑀲𑀼 𑀯𑀸 𑀧𑀺𑀧𑁆𑀨𑀮𑀺𑀓𑀸𑀤𑀻𑀦𑀁 𑀫𑀮𑀭𑀓𑁆𑀔𑀡𑀢𑁆𑀣𑀁 𑀲𑀺𑀧𑀸𑀝𑀺𑀓𑀸𑀬 𑀯𑀸 𑀅𑀦𑁆𑀢𑀫𑀲𑁄 𑀯𑀸𑀢𑀸𑀩𑀸𑀥𑀺𑀓𑁄 𑀓𑀡𑁆𑀡𑀘𑁆𑀙𑀺𑀤𑁆𑀤𑁂𑀧𑀺 𑀮𑁄𑀫𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀲𑀼𑀢𑁆𑀢𑀓𑁂𑀦 𑀧𑀦 𑀩𑀦𑁆𑀥𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀁 𑀓𑀢𑀪𑀡𑁆𑀟𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀯𑁂𑀡𑀺𑀁 𑀓𑀢𑁆𑀯𑀸 𑀳𑀭𑀢𑀺, 𑀇𑀤𑀁 𑀦𑀺𑀥𑀸𑀦𑀫𑀼𑀔𑀁 𑀦𑀸𑀫, 𑀆𑀧𑀢𑁆𑀢𑀺𑀬𑁂𑀯𑀸𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑀦𑀸𑀫, 𑀓𑀸𑀬𑀢𑁄 𑀘 𑀓𑀸𑀬𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁭𑁬. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀭𑀺𑀜𑁆𑀘𑀦𑁆𑀢𑀻𑀢𑀺 𑀉𑀚𑁆𑀛𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀦𑀼𑀬𑀼𑀜𑁆𑀚𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀻𑀢𑀺.

𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀭𑀽𑀧𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁮𑁨. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀭𑀽𑀧𑀺𑀬𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀧𑀝𑀺𑀯𑀺𑀲𑁄𑀢𑀺 𑀓𑁄𑀝𑁆𑀞𑀸𑀲𑁄.

𑁫𑁮𑁩-𑁪. 𑀚𑀸𑀢𑀭𑀽𑀧𑀭𑀚𑀢𑀦𑁆𑀢𑀺 𑀏𑀢𑁆𑀣 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀲𑁆𑀲 𑀦𑀸𑀫𑀁. 𑀢𑀁 𑀧𑀦 𑀬𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀲𑀤𑀺𑀲𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀢𑁆𑀣𑀼𑀯𑀡𑁆𑀡𑁄 𑀯𑀼𑀘𑁆𑀘𑀢𑀻’’𑀢𑀺 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 ‘‘𑀬𑁄 𑀲𑀢𑁆𑀣𑀼𑀯𑀡𑁆𑀡𑁄 𑀮𑁄𑀳𑀯𑀺𑀲𑁂𑀲𑁄, 𑀇𑀤𑀁 𑀚𑀸𑀢𑀭𑀽𑀧𑀁 𑀦𑀸𑀫𑀸’’𑀢𑀺 𑀭𑀚𑀢𑀁 𑀧𑀦 ‘‘𑀲𑀗𑁆𑀔𑁄, 𑀲𑀺𑀮𑀸, 𑀧𑀯𑀸𑀮, 𑀭𑀚𑀢𑀁, 𑀚𑀸𑀢𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁫𑁦𑁬) 𑀭𑀽𑀧𑀺𑀬𑀁 𑀯𑀼𑀢𑁆𑀢𑀁. 𑀇𑀥 𑀧𑀦 𑀬𑀁 𑀓𑀺𑀜𑁆𑀘𑀺 𑀯𑁄𑀳𑀸𑀭𑀕𑀫𑀦𑀻𑀬𑀁 𑀓𑀳𑀸𑀧𑀡𑀸𑀤𑀺 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀓𑀳𑀸𑀧𑀡𑁄 𑀮𑁄𑀳𑀫𑀸𑀲𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀳𑀸𑀧𑀡𑁄𑀢𑀺 𑀲𑁄𑀯𑀡𑁆𑀡𑀫𑀬𑁄 𑀯𑀸 𑀭𑀽𑀧𑀺𑀬𑀫𑀬𑁄 𑀯𑀸 𑀧𑀸𑀓𑀢𑀺𑀓𑁄 𑀯𑀸. 𑀮𑁄𑀳𑀫𑀸𑀲𑀓𑁄𑀢𑀺 𑀢𑀫𑁆𑀩𑀮𑁄𑀳𑀸𑀤𑀻𑀳𑀺 𑀓𑀢𑀫𑀸𑀲𑀓𑁄. 𑀤𑀸𑀭𑀼𑀫𑀸𑀲𑀓𑁄𑀢𑀺 𑀲𑀸𑀭𑀤𑀸𑀭𑀼𑀦𑀸 𑀯𑀸 𑀯𑁂𑀴𑀼𑀧𑁂𑀲𑀺𑀓𑀸𑀬 𑀯𑀸 𑀅𑀦𑁆𑀢𑀫𑀲𑁄 𑀢𑀸𑀮𑀧𑀡𑁆𑀡𑁂𑀦𑀸𑀧𑀺 𑀭𑀽𑀧𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀫𑀸𑀲𑀓𑁄. 𑀚𑀢𑀼𑀫𑀸𑀲𑀓𑁄𑀢𑀺 𑀮𑀸𑀔𑀸𑀬 𑀯𑀸 𑀦𑀺𑀬𑁆𑀬𑀸𑀲𑁂𑀦 𑀯𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀫𑀸𑀲𑀓𑁄. ‘‘𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑁄 𑀬𑁄 𑀬𑀢𑁆𑀣 𑀬𑀢𑁆𑀣 𑀚𑀦𑀧𑀤𑁂 𑀬𑀤𑀸 𑀬𑀤𑀸 𑀯𑁄𑀳𑀸𑀭𑀁 𑀕𑀘𑁆𑀙𑀢𑀺, 𑀅𑀦𑁆𑀢𑀫𑀲𑁄 𑀅𑀝𑁆𑀞𑀺𑀫𑀬𑁄𑀧𑀺 𑀘𑀫𑁆𑀫𑀫𑀬𑁄𑀧𑀺 𑀭𑀼𑀓𑁆𑀔𑀨𑀮𑀩𑀻𑀚𑀫𑀬𑁄𑀧𑀺 𑀲𑀫𑀼𑀝𑁆𑀞𑀸𑀧𑀺𑀢𑀭𑀽𑀧𑁄𑀧𑀺 𑀅𑀲𑀫𑀼𑀝𑁆𑀞𑀸𑀧𑀺𑀢𑀭𑀽𑀧𑁄𑀧𑀺 𑀲𑀩𑁆𑀩𑁄 𑀲𑀗𑁆𑀕𑀳𑀺𑀢𑁄.

𑀇𑀘𑁆𑀘𑁂𑀢𑀁 𑀲𑀩𑁆𑀩𑀫𑁆𑀧𑀺 𑀭𑀚𑀢𑀁 𑀚𑀸𑀢𑀭𑀽𑀧𑀁 𑀚𑀸𑀢𑀭𑀽𑀧𑀫𑀸𑀲𑀓𑁄, 𑀯𑀼𑀢𑁆𑀢𑀧𑁆𑀧𑀪𑁂𑀤𑁄 𑀲𑀩𑁆𑀩𑁄𑀧𑀺 𑀭𑀚𑀢𑀫𑀸𑀲𑀓𑁄𑀢𑀺 𑀘𑀢𑀼𑀩𑁆𑀩𑀺𑀥𑀁 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼 𑀳𑁄𑀢𑀺. 𑀫𑀼𑀢𑁆𑀢𑀸, 𑀫𑀡𑀺, 𑀯𑁂𑀴𑀼𑀭𑀺𑀬𑁄, 𑀲𑀗𑁆𑀔𑁄, 𑀲𑀺𑀮𑀸, 𑀧𑀯𑀸𑀮, 𑀮𑁄𑀳𑀺𑀢𑀗𑁆𑀓𑁄, 𑀫𑀲𑀸𑀭𑀕𑀮𑁆𑀮𑀁, 𑀲𑀢𑁆𑀢 𑀥𑀜𑁆𑀜𑀸𑀦𑀺, 𑀤𑀸𑀲𑀺𑀤𑀸𑀲𑀔𑁂𑀢𑁆𑀢𑀯𑀢𑁆𑀣𑀼𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀸𑀤𑀬𑁄𑀢𑀺 𑀇𑀤𑀁 𑀤𑀼𑀓𑁆𑀓𑀝𑀯𑀢𑁆𑀣𑀼. 𑀲𑀼𑀢𑁆𑀢𑀁 𑀨𑀸𑀮𑁄 𑀧𑀝𑀓𑁄 𑀓𑀧𑁆𑀧𑀸𑀲𑁄 𑀅𑀦𑁂𑀓𑀧𑁆𑀧𑀓𑀸𑀭𑀁 𑀅𑀧𑀭𑀡𑁆𑀡𑀁 𑀲𑀧𑁆𑀧𑀺𑀦𑀯𑀦𑀻𑀢𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀪𑁂𑀲𑀚𑁆𑀚𑀜𑁆𑀘 𑀇𑀤𑀁 𑀓𑀧𑁆𑀧𑀺𑀬𑀯𑀢𑁆𑀣𑀼. 𑀢𑀢𑁆𑀣 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀅𑀢𑁆𑀢𑀦𑁄 𑀯𑀸 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀘𑁂𑀢𑀺𑀬𑀸𑀦𑀁 𑀯𑀸 𑀅𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀺, 𑀲𑁂𑀲𑀸𑀦𑀁 𑀅𑀢𑁆𑀣𑀸𑀬 𑀤𑀼𑀓𑁆𑀓𑀝𑀁. 𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀢𑁄 𑀤𑀼𑀓𑁆𑀓𑀝𑀫𑁂𑀯. 𑀓𑀧𑁆𑀧𑀺𑀬𑀯𑀢𑁆𑀣𑀼𑀫𑁆𑀳𑀺 𑀅𑀦𑀸𑀧𑀢𑁆𑀢𑀺. 𑀲𑀩𑁆𑀩𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑀢𑁆𑀣𑀸𑀬 𑀪𑀡𑁆𑀟𑀸𑀕𑀸𑀭𑀺𑀓𑀲𑀻𑀲𑁂𑀦 𑀲𑀫𑁆𑀧𑀝𑀺𑀘𑁆𑀙𑀢𑁄 𑀉𑀧𑀭𑀺 𑀭𑀢𑀦𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀯𑀲𑁂𑀦 𑀧𑀸𑀘𑀺𑀢𑁆𑀢𑀺𑀬𑀁.

𑀉𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀕𑀡𑁆𑀳𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀕𑀡𑁆𑀳𑀦𑁆𑀢𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀲𑀬𑀁 𑀕𑀡𑁆𑀳𑀸𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺.

𑀢𑀢𑁆𑀣 𑀚𑀸𑀢𑀭𑀽𑀧𑀭𑀚𑀢𑀪𑀡𑁆𑀟𑁂𑀲𑀼 𑀓𑀳𑀸𑀧𑀡𑀫𑀸𑀲𑀓𑁂𑀲𑀼 𑀘 𑀏𑀓𑀁 𑀕𑀡𑁆𑀳𑀢𑁄 𑀯𑀸 𑀕𑀡𑁆𑀳𑀸𑀧𑀬𑀢𑁄 𑀯𑀸 𑀏𑀓𑀸 𑀆𑀧𑀢𑁆𑀢𑀺. 𑀲𑀳𑀲𑁆𑀲𑀁 𑀘𑁂𑀧𑀺 𑀏𑀓𑀢𑁄 𑀕𑀡𑁆𑀳𑀸𑀢𑀺, 𑀕𑀡𑁆𑀳𑀸𑀧𑁂𑀢𑀺, 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 𑀲𑀺𑀣𑀺𑀮𑀩𑀤𑁆𑀥𑀸𑀬 𑀣𑀯𑀺𑀓𑀸𑀬 𑀲𑀺𑀣𑀺𑀮𑀧𑀽𑀭𑀺𑀢𑁂 𑀯𑀸 𑀪𑀸𑀚𑀦𑁂 𑀭𑀽𑀧𑀕𑀡𑀦𑀸𑀬 𑀆𑀧𑀢𑁆𑀢𑀺. 𑀖𑀦𑀩𑀤𑁆𑀥𑁂 𑀧𑀦 𑀖𑀦𑀧𑀽𑀭𑀺𑀢𑁂 𑀯𑀸 𑀏𑀓𑀸𑀯 𑀆𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁.

𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑁂 𑀧𑀦 ‘‘𑀇𑀤𑀁 𑀅𑀬𑁆𑀬𑀲𑁆𑀲 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑁂 𑀲𑀘𑁂𑀧𑀺 𑀘𑀺𑀢𑁆𑀢𑁂𑀦 𑀲𑀸𑀤𑀺𑀬𑀢𑀺, 𑀕𑀡𑁆𑀳𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 ‘‘𑀦𑀬𑀺𑀤𑀁 𑀓𑀧𑁆𑀧𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀦𑀸𑀧𑀢𑁆𑀢𑀺. 𑀓𑀸𑀬𑀯𑀸𑀘𑀸𑀳𑀺 𑀯𑀸 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀲𑀼𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀦𑀬𑀺𑀤𑀁 𑀅𑀫𑁆𑀳𑀸𑀓𑀁 𑀓𑀧𑁆𑀧𑀢𑀻’’𑀢𑀺 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀳𑀺 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀓𑁆𑀔𑀺𑀢𑁆𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀓𑀸𑀬𑀯𑀸𑀘𑀸𑀳𑀺 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀺𑀢𑁆𑀢𑁂𑀦 𑀅𑀥𑀺𑀯𑀸𑀲𑁂𑀢𑀺, 𑀓𑀸𑀬𑀯𑀸𑀘𑀸𑀳𑀺 𑀓𑀢𑁆𑀢𑀩𑁆𑀩𑀲𑁆𑀲 𑀧𑀝𑀺𑀓𑁆𑀔𑁂𑀧𑀲𑁆𑀲 𑀅𑀓𑀭𑀡𑀢𑁄 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀤𑁆𑀯𑀸𑀭𑁂 𑀘 𑀯𑀘𑀻𑀤𑁆𑀯𑀸𑀭𑁂 𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺.

𑀏𑀓𑁄 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀧𑀸𑀤𑀫𑀽𑀮𑁂 𑀞𑀧𑁂𑀢𑀺 ‘‘𑀢𑀼𑀬𑁆𑀳𑀺𑀤𑀁 𑀳𑁄𑀢𑀽’’𑀢𑀺, 𑀪𑀺𑀓𑁆𑀔𑀽 ‘‘𑀦𑀬𑀺𑀤𑀁 𑀓𑀧𑁆𑀧𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺, 𑀉𑀧𑀸𑀲𑀓𑁄 𑀧𑀭𑀺𑀘𑁆𑀘𑀢𑁆𑀢𑀁 𑀫𑀬𑀸 𑀢𑀼𑀫𑁆𑀳𑀸𑀓𑀦𑁆𑀢𑀺 𑀕𑀢𑁄, 𑀅𑀜𑁆𑀜𑁄 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀢𑀺 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀇𑀤’’𑀦𑁆𑀢𑀺? 𑀬𑀁 𑀢𑁂𑀦 𑀅𑀢𑁆𑀢𑀦𑀸 𑀘 𑀯𑀼𑀢𑁆𑀢𑀁, 𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑁄 𑀘𑁂 𑀯𑀤𑀢𑀺 𑁋 ‘‘𑀕𑁄𑀧𑀬𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂, 𑀕𑀼𑀢𑁆𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀣𑀸’’𑀢𑀺, 𑀲𑀢𑁆𑀢𑀪𑀽𑀫𑀺𑀓𑀫𑁆𑀧𑀺 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ‘‘𑀇𑀤𑀁 𑀕𑀼𑀢𑁆𑀢𑀝𑁆𑀞𑀸𑀦’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, ‘‘𑀇𑀥 𑀦𑀺𑀓𑁆𑀔𑀺𑀧𑀸𑀳𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀓𑀧𑁆𑀧𑀺𑀬𑀜𑁆𑀘 𑀅𑀓𑀧𑁆𑀧𑀺𑀬𑀜𑁆𑀘 𑀦𑀺𑀲𑁆𑀲𑀸𑀬 𑀞𑀺𑀢𑀁 𑀳𑁄𑀢𑀺. 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀭𑀓𑁆𑀔𑀦𑁆𑀢𑁂𑀦 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀓𑀺𑀜𑁆𑀘𑀺 𑀯𑀺𑀓𑁆𑀓𑀸𑀬𑀺𑀓𑀪𑀡𑁆𑀟𑀁 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀆𑀕𑀘𑁆𑀙𑀢𑀺, ‘‘𑀇𑀤𑀁 𑀕𑀳𑁂𑀲𑁆𑀲𑀣 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀉𑀧𑀸𑀲𑀓 𑀅𑀢𑁆𑀣𑀺 𑀅𑀫𑁆𑀳𑀸𑀓𑀁 𑀇𑀫𑀺𑀦𑀸 𑀅𑀢𑁆𑀣𑁄, 𑀯𑀢𑁆𑀣𑀼 𑀘 𑀏𑀯𑀭𑀽𑀧𑀁 𑀦𑀸𑀫 𑀲𑀁𑀯𑀺𑀚𑁆𑀚𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀲𑁄 𑀯𑀤𑀢𑀺, ‘‘𑀅𑀳𑀁 𑀓𑀧𑁆𑀧𑀺𑀬𑀓𑀸𑀭𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀤𑁂𑀣𑀸’’𑀢𑀺, 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀞𑀧𑀺𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, ‘‘𑀇𑀤𑀁 𑀕𑀡𑁆𑀳𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀏𑀯𑀫𑁆𑀧𑀺 𑀓𑀧𑁆𑀧𑀺𑀬𑀜𑁆𑀘 𑀅𑀓𑀧𑁆𑀧𑀺𑀬𑀜𑁆𑀘 𑀦𑀺𑀲𑁆𑀲𑀸𑀬 𑀞𑀺𑀢𑀫𑁂𑀯 𑀳𑁄𑀢𑀺, 𑀲𑁄 𑀘𑁂 𑀢𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑁂𑀢𑀺, 𑀯𑀝𑁆𑀝𑀢𑀺. 𑀲𑀘𑁂 𑀅𑀥𑀺𑀓𑀁 𑀕𑀡𑁆𑀳𑀸𑀢𑀺, ‘‘𑀦 𑀫𑀬𑀁 𑀢𑀯 𑀪𑀡𑁆𑀟𑀁 𑀕𑀡𑁆𑀳𑀸𑀫, ‘‘𑀦𑀺𑀓𑁆𑀔𑀫𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄.

𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀭𑀽𑀧𑀺𑀬𑀁 𑀦𑀸𑀫 𑀅𑀓𑀧𑁆𑀧𑀺𑀬𑀁, ‘‘𑀢𑀲𑁆𑀫𑀸 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸’’𑀢𑀺 𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑀁 𑀧𑀝𑀺𑀕𑁆𑀕𑀳𑀺𑀢𑀫𑀢𑁆𑀢𑀫𑁂𑀯 𑀦 𑀢𑁂𑀦 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀪𑀡𑁆𑀟𑀁 𑀘𑁂𑀢𑀸𑀧𑀺𑀢𑀁, 𑀢𑀲𑁆𑀫𑀸 𑀉𑀧𑀸𑀬𑁂𑀦 𑀧𑀭𑀺𑀪𑁄𑀕𑀤𑀲𑁆𑀲𑀦𑀢𑁆𑀣𑀁 ‘‘𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀧𑁆𑀧𑀺𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑀲𑀧𑁆𑀧𑀺 𑀯𑀸𑀢𑀺 ‘‘𑀧𑀩𑁆𑀩𑀚𑀺𑀢𑀸𑀦𑀁 𑀲𑀧𑁆𑀧𑀺 𑀯𑀸 𑀢𑁂𑀮𑀁 𑀯𑀸 𑀯𑀝𑁆𑀝𑀢𑀺 𑀉𑀧𑀸𑀲𑀓𑀸’’𑀢𑀺 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁.

𑀭𑀽𑀧𑀺𑀬𑀧𑀝𑀺𑀕𑁆𑀕𑀸𑀳𑀓𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀳𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑁂𑀳𑀺 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀭𑀽𑀧𑀺𑀬𑀧𑀝𑀺𑀕𑁆𑀕𑀸𑀳𑀓𑁂𑀦 𑀪𑀸𑀕𑁄 𑀦 𑀕𑀳𑁂𑀢𑀩𑁆𑀩𑁄. 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀸 𑀆𑀭𑀸𑀫𑀺𑀓𑀸𑀦𑀁 𑀯𑀸 𑀧𑀢𑁆𑀢𑀪𑀸𑀕𑀫𑁆𑀧𑀺 𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀦𑁆𑀢𑀫𑀲𑁄 𑀫𑀓𑁆𑀓𑀝𑀸𑀤𑀻𑀳𑀺 𑀢𑀢𑁄 𑀳𑀭𑀺𑀢𑁆𑀯𑀸 𑀅𑀭𑀜𑁆𑀜𑁂 𑀞𑀧𑀺𑀢𑀁 𑀯𑀸 𑀢𑁂𑀲𑀁 𑀳𑀢𑁆𑀣𑀢𑁄 𑀕𑀴𑀺𑀢𑀁 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀧𑀭𑀺𑀕𑁆𑀕𑀳𑀺𑀢𑀫𑁆𑀧𑀺 𑀧𑀁𑀲𑀼𑀓𑀽𑀮𑀫𑁆𑀧𑀺 𑀦 𑀯𑀝𑁆𑀝𑀢𑀺𑀬𑁂𑀯, 𑀢𑀢𑁄 𑀆𑀳𑀝𑁂𑀦 𑀨𑀸𑀡𑀺𑀢𑁂𑀦 𑀲𑁂𑀦𑀸𑀲𑀦𑀥𑀽𑀧𑀦𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀲𑀧𑁆𑀧𑀺𑀦𑀸 𑀯𑀸 𑀢𑁂𑀮𑁂𑀦 𑀯𑀸 𑀧𑀤𑀻𑀧𑀁 𑀓𑀢𑁆𑀯𑀸 𑀤𑀻𑀧𑀸𑀮𑁄𑀓𑁂 𑀦𑀺𑀧𑀚𑁆𑀚𑀺𑀢𑀼𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀫𑁆𑀧𑀺 𑀓𑀸𑀢𑀼𑀁, 𑀧𑁄𑀢𑁆𑀣𑀓𑀫𑁆𑀧𑀺 𑀯𑀸𑀘𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀮𑀫𑀥𑀼𑀨𑀸𑀡𑀺𑀢𑁂𑀳𑀺 𑀧𑀦 𑀲𑀭𑀻𑀭𑁂 𑀯𑀡𑀁 𑀫𑀓𑁆𑀔𑁂𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯. 𑀢𑁂𑀦 𑀯𑀢𑁆𑀣𑀼𑀦𑀸 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀯𑀸 𑀕𑀡𑁆𑀳𑀦𑁆𑀢𑀺, 𑀉𑀧𑁄𑀲𑀣𑀸𑀕𑀸𑀭𑀁 𑀯𑀸 𑀪𑁄𑀚𑀦𑀲𑀸𑀮𑀁 𑀯𑀸 𑀓𑀭𑁄𑀦𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀙𑀸𑀬𑀸𑀧𑀺 𑀕𑁂𑀳𑀧𑀭𑀺𑀘𑁆𑀙𑁂𑀤𑁂𑀦 𑀞𑀺𑀢𑀸 𑀦 𑀯𑀝𑁆𑀝𑀢𑀺, 𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀦𑁆𑀢𑀸 𑀆𑀕𑀦𑁆𑀢𑀼𑀓𑀢𑁆𑀢𑀸 𑀯𑀝𑁆𑀝𑀢𑀺. 𑀢𑀁 𑀯𑀢𑁆𑀣𑀼𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀢𑁂𑀦 𑀫𑀕𑁆𑀕𑁂𑀦𑀧𑀺 𑀲𑁂𑀢𑀼𑀦𑀸𑀧𑀺 𑀦𑀸𑀯𑀸𑀬𑀧𑀺 𑀉𑀴𑀼𑀫𑁆𑀧𑁂𑀦𑀧𑀺 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑁂𑀦 𑀯𑀢𑁆𑀣𑀼𑀦𑀸 𑀔𑀦𑀸𑀧𑀺𑀢𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀉𑀩𑁆𑀪𑀺𑀤𑁄𑀤𑀓𑀁 𑀧𑀸𑀢𑀼𑀁 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺. 𑀅𑀦𑁆𑀢𑁄 𑀉𑀤𑀓𑁂 𑀧𑀦 𑀅𑀲𑀢𑀺 𑀅𑀜𑁆𑀜𑀁 𑀆𑀕𑀦𑁆𑀢𑀼𑀓𑀁 𑀉𑀤𑀓𑀁 𑀯𑀸 𑀯𑀲𑁆𑀲𑁄𑀤𑀓𑀁 𑀯𑀸 𑀧𑀯𑀺𑀝𑁆𑀞𑀁 𑀯𑀝𑁆𑀝𑀢𑀺. 𑀓𑀻𑀢𑀸𑀬 𑀬𑁂𑀦 𑀉𑀤𑀓𑁂𑀦 𑀲𑀤𑁆𑀥𑀺𑀁 𑀓𑀻𑀢𑀸 𑀢𑀁 𑀆𑀕𑀦𑁆𑀢𑀼𑀓𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀢𑀁 𑀯𑀢𑁆𑀣𑀼𑀁 𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸 𑀲𑀗𑁆𑀖𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀢𑁂𑀧𑀺 𑀧𑀘𑁆𑀘𑀬𑀸 𑀢𑀲𑁆𑀲 𑀦 𑀯𑀝𑁆𑀝𑀦𑁆𑀢𑀺. 𑀆𑀭𑀸𑀫𑁄 𑀕𑀳𑀺𑀢𑁄 𑀳𑁄𑀢𑀺, 𑀲𑁄𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀤𑀺 𑀪𑀽𑀫𑀺𑀧𑀺 𑀩𑀻𑀚𑀫𑁆𑀧𑀺 𑀅𑀓𑀧𑁆𑀧𑀺𑀬𑀁 𑀦𑁂𑀯 𑀪𑀽𑀫𑀺𑀁 𑀦 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀪𑀽𑀫𑀺𑀁𑀬𑁂𑀯 𑀓𑀺𑀡𑀺𑀢𑁆𑀯𑀸 𑀅𑀜𑁆𑀜𑀸𑀦𑀺 𑀩𑀻𑀚𑀸𑀦𑀺 𑀭𑁄𑀧𑀺𑀢𑀸𑀦𑀺 𑀨𑀮𑀁 𑀯𑀝𑁆𑀝𑀢𑀺, 𑀅𑀣 𑀩𑀻𑀚𑀸𑀦𑀺 𑀓𑀺𑀡𑀺𑀢𑁆𑀯𑀸 𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀭𑁄𑀧𑀺𑀢𑀸𑀦𑀺, 𑀨𑀮𑀁 𑀦 𑀯𑀝𑁆𑀝𑀢𑀺, 𑀪𑀽𑀫𑀺𑀬𑀁 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀸 𑀯𑀝𑁆𑀝𑀢𑀺.

𑀲𑀘𑁂 𑀲𑁄 𑀙𑀟𑁆𑀟𑁂𑀢𑀻𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀔𑀺𑀧𑀢𑀺, 𑀅𑀣𑀸𑀧𑀺 𑀦 𑀙𑀟𑁆𑀟𑁂𑀢𑀺, 𑀲𑀬𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀦 𑀯𑀸𑀭𑁂𑀢𑀩𑁆𑀩𑁄. 𑀦𑁄 𑀘𑁂 𑀙𑀟𑁆𑀟𑁂𑀢𑀻𑀢𑀺 𑀅𑀣 𑀦𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀦 𑀙𑀟𑁆𑀟𑁂𑀢𑀺, 𑀓𑀺𑀁 𑀫𑀬𑁆𑀳𑀁 𑀇𑀫𑀺𑀦𑀸 𑀩𑁆𑀬𑀸𑀧𑀸𑀭𑁂𑀦𑀸𑀢𑀺 𑀬𑁂𑀦 𑀓𑀸𑀫𑀁 𑀧𑀓𑁆𑀓𑀫𑀢𑀺, 𑀢𑀢𑁄 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑁄 𑀭𑀽𑀧𑀺𑀬𑀙𑀟𑁆𑀟𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄.

𑀬𑁄 𑀦 𑀙𑀦𑁆𑀤𑀸𑀕𑀢𑀺𑀦𑁆𑀢𑀺𑀆𑀤𑀻𑀲𑀼 𑀮𑁄𑀪𑀯𑀲𑁂𑀦 𑀢𑀁 𑀯𑀢𑁆𑀣𑀼𑀁 𑀅𑀢𑁆𑀢𑀦𑁄 𑀯𑀸 𑀓𑀭𑁄𑀦𑁆𑀢𑁄 𑀅𑀢𑁆𑀢𑀸𑀦𑀁 𑀯𑀸 𑀉𑀓𑁆𑀓𑀁𑀲𑁂𑀦𑁆𑀢𑁄 𑀙𑀦𑁆𑀤𑀸𑀕𑀢𑀺𑀁 𑀦𑀸𑀫 𑀕𑀘𑁆𑀙𑀢𑀺. 𑀤𑁄𑀲𑀯𑀲𑁂𑀦 ‘‘𑀦𑁂𑀯𑀸𑀬𑀁 𑀫𑀸𑀢𑀺𑀓𑀁 𑀚𑀸𑀦𑀸𑀢𑀺, 𑀦 𑀯𑀺𑀦𑀬’’𑀦𑁆𑀢𑀺 𑀧𑀭𑀁 𑀅𑀧𑀲𑀸𑀤𑁂𑀦𑁆𑀢𑁄 𑀤𑁄𑀲𑀸𑀕𑀢𑀺𑀁 𑀦𑀸𑀫 𑀕𑀘𑁆𑀙𑀢𑀺. 𑀫𑁄𑀳𑀯𑀲𑁂𑀦 𑀫𑀼𑀝𑁆𑀞𑀧𑀫𑀼𑀝𑁆𑀞𑀲𑁆𑀲𑀢𑀺𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑁄 𑀫𑁄𑀳𑀸𑀕𑀢𑀺𑀁 𑀦𑀸𑀫 𑀕𑀘𑁆𑀙𑀢𑀺. 𑀭𑀽𑀧𑀺𑀬𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀪𑀬𑁂𑀦 𑀙𑀟𑁆𑀟𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀪𑀬𑀸𑀕𑀢𑀺𑀁 𑀦𑀸𑀫 𑀕𑀘𑁆𑀙𑀢𑀺. 𑀏𑀯𑀁 𑀅𑀓𑀭𑁄𑀦𑁆𑀢𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁫𑁮𑁫. 𑀅𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸𑀢𑀺 𑀦𑀺𑀫𑀺𑀢𑁆𑀢𑀁 𑀅𑀓𑀢𑁆𑀯𑀸, 𑀅𑀓𑁆𑀔𑀻𑀦𑀺 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀦𑀤𑀺𑀬𑀸 𑀯𑀸 𑀧𑀧𑀸𑀢𑁂 𑀯𑀸 𑀯𑀦𑀕𑀳𑀦𑁂 𑀯𑀸 𑀕𑀽𑀣𑀁 𑀯𑀺𑀬 𑀅𑀦𑀧𑁂𑀓𑁆𑀔𑁂𑀦 𑀧𑀢𑀺𑀢𑁄𑀓𑀸𑀲𑀁 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑁂𑀦 𑀧𑀸𑀢𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑁂𑀧𑀺 𑀭𑀽𑀧𑀺𑀬𑁂 𑀪𑀕𑀯𑀸 𑀧𑀭𑀺𑀬𑀸𑀬𑁂𑀦 𑀪𑀺𑀓𑁆𑀔𑀽𑀦𑀁 𑀧𑀭𑀺𑀪𑁄𑀕𑀁 𑀆𑀘𑀺𑀓𑁆𑀔𑀺. 𑀭𑀽𑀧𑀺𑀬𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀧𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀢𑀢𑁄 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀧𑀭𑀺𑀪𑁄𑀕𑁄 𑀦 𑀯𑀝𑁆𑀝𑀢𑀺. 𑀬𑀣𑀸 𑀘𑀸𑀬𑀁 𑀏𑀢𑀲𑁆𑀲 𑀦 𑀯𑀝𑁆𑀝𑀢𑀺, 𑀏𑀯𑀁 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀸𑀬 𑀯𑀸 𑀓𑀼𑀮𑀤𑀽𑀲𑀓𑀓𑀫𑁆𑀫𑁂𑀦 𑀯𑀸 𑀓𑀼𑀳𑀦𑀸𑀤𑀻𑀳𑀺 𑀯𑀸 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀸 𑀦𑁂𑀯 𑀢𑀲𑁆𑀲 𑀦 𑀅𑀜𑁆𑀜𑀲𑁆𑀲 𑀯𑀝𑁆𑀝𑀦𑁆𑀢𑀺, 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀦𑁆𑀦𑀸𑀧𑀺 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺.

𑀘𑀢𑁆𑀢𑀸𑀭𑁄 𑀳𑀺 𑀧𑀭𑀺𑀪𑁄𑀕𑀸 𑁋 𑀣𑁂𑀬𑁆𑀬𑀧𑀭𑀺𑀪𑁄𑀕𑁄, 𑀇𑀡𑀧𑀭𑀺𑀪𑁄𑀕𑁄, 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄, 𑀲𑀸𑀫𑀺𑀧𑀭𑀺𑀪𑁄𑀕𑁄𑀢𑀺. 𑀢𑀢𑁆𑀣 𑀲𑀗𑁆𑀖𑀫𑀚𑁆𑀛𑁂𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀤𑀼𑀲𑁆𑀲𑀻𑀮𑀲𑁆𑀲 𑀧𑀭𑀺𑀪𑁄𑀕𑁄 ‘‘𑀣𑁂𑀬𑁆𑀬𑀧𑀭𑀺𑀪𑁄𑀕𑁄’’ 𑀦𑀸𑀫. 𑀲𑀻𑀮𑀯𑀢𑁄 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 ‘‘𑀇𑀡𑀧𑀭𑀺𑀪𑁄𑀕𑁄’’ 𑀦𑀸𑀫. 𑀢𑀲𑁆𑀫𑀸 𑀘𑀻𑀯𑀭𑀁 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁, 𑀧𑀺𑀡𑁆𑀟𑀧𑀸𑀢𑁄 𑀆𑀮𑁄𑀧𑁂 𑀆𑀮𑁄𑀧𑁂. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀼𑀭𑁂𑀪𑀢𑁆𑀢𑀧𑀘𑁆𑀙𑀸𑀪𑀢𑁆𑀢𑀧𑀼𑀭𑀺𑀫𑀬𑀸𑀫𑀧𑀘𑁆𑀙𑀺𑀫𑀬𑀸𑀫𑁂𑀲𑀼. 𑀲𑀘𑀲𑁆𑀲 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀢𑁄𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀇𑀡𑀧𑀭𑀺𑀪𑁄𑀕𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀲𑁂𑀦𑀸𑀲𑀦𑀫𑁆𑀧𑀺 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁, 𑀪𑁂𑀲𑀚𑁆𑀚𑀲𑁆𑀲 𑀧𑀝𑀺𑀕𑁆𑀕𑀳𑀡𑁂𑀧𑀺 𑀧𑀭𑀺𑀪𑁄𑀕𑁂𑀧𑀺 𑀲𑀢𑀺𑀧𑀘𑁆𑀘𑀬𑀢𑀸 𑀯𑀝𑁆𑀝𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀝𑀺𑀕𑁆𑀕𑀳𑀡𑁂 𑀲𑀢𑀺𑀁 𑀓𑀢𑁆𑀯𑀸 𑀧𑀭𑀺𑀪𑁄𑀕𑁂 𑀅𑀓𑀭𑁄𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺, 𑀧𑀝𑀺𑀕𑁆𑀕𑀳𑀡𑁂 𑀧𑀦 𑀲𑀢𑀺𑀁 𑀅𑀓𑀢𑁆𑀯𑀸 𑀧𑀭𑀺𑀪𑁄𑀕𑁂 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀘𑀢𑀼𑀩𑁆𑀩𑀺𑀥𑀸 𑀳𑀺 𑀲𑀼𑀤𑁆𑀥𑀺 𑁋 𑀤𑁂𑀲𑀦𑀸𑀲𑀼𑀤𑁆𑀥𑀺, 𑀲𑀁𑀯𑀭𑀲𑀼𑀤𑁆𑀥𑀺, 𑀧𑀭𑀺𑀬𑁂𑀝𑁆𑀞𑀺𑀲𑀼𑀤𑁆𑀥𑀺, 𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀤𑁆𑀥𑀻𑀢𑀺. 𑀢𑀢𑁆𑀣 𑀤𑁂𑀲𑀦𑀸𑀲𑀼𑀤𑁆𑀥𑀺 𑀦𑀸𑀫 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁, 𑀢𑀜𑁆𑀳𑀺 𑀤𑁂𑀲𑀦𑀸𑀬 𑀲𑀼𑀚𑁆𑀛𑀦𑀢𑁄 ‘‘𑀤𑁂𑀲𑀦𑀸𑀲𑀼𑀤𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀁𑀯𑀭𑀲𑀼𑀤𑁆𑀥𑀺 𑀦𑀸𑀫 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁, 𑀢𑀜𑁆𑀳𑀺 𑀦 𑀧𑀼𑀦 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀸𑀥𑀺𑀝𑁆𑀞𑀸𑀦𑀲𑀁𑀯𑀭𑁂𑀦𑁂𑀯 𑀲𑀼𑀚𑁆𑀛𑀦𑀢𑁄 ‘‘𑀲𑀁𑀯𑀭𑀲𑀼𑀤𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀬𑁂𑀝𑁆𑀞𑀺𑀲𑀼𑀤𑁆𑀥𑀺 𑀦𑀸𑀫 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀢𑀜𑁆𑀳𑀺 𑀅𑀦𑁂𑀲𑀦𑀁 𑀧𑀳𑀸𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀘𑁆𑀘𑀬𑁂 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀭𑀺𑀬𑁂𑀲𑀦𑀸𑀬 𑀲𑀼𑀤𑁆𑀥𑀢𑁆𑀢𑀸 ‘‘𑀧𑀭𑀺𑀬𑁂𑀝𑁆𑀞𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀤𑁆𑀥𑀺 𑀦𑀸𑀫 𑀧𑀘𑁆𑀘𑀬𑀧𑀭𑀺𑀪𑁄𑀕𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁, 𑀢𑀜𑁆𑀳𑀺 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮) 𑀦𑀬𑁂𑀦 𑀯𑀼𑀢𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀼𑀚𑁆𑀛𑀦𑀢𑁄 ‘‘𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀤𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀝𑀺𑀕𑁆𑀕𑀳𑀡𑁂 𑀧𑀦 𑀲𑀢𑀺𑀁 𑀅𑀓𑀢𑁆𑀯𑀸 𑀧𑀭𑀺𑀪𑁄𑀕𑁂 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺.

𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀧𑀘𑁆𑀘𑀬𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄 𑀦𑀸𑀫, 𑀢𑁂 𑀳𑀺 𑀪𑀕𑀯𑀢𑁄 𑀧𑀼𑀢𑁆𑀢𑀸, 𑀢𑀲𑁆𑀫𑀸 𑀧𑀺𑀢𑀼𑀲𑀦𑁆𑀢𑀓𑀸𑀦𑀁 𑀧𑀘𑁆𑀘𑀬𑀸𑀦𑀁 𑀤𑀸𑀬𑀸𑀤𑀸 𑀳𑀼𑀢𑁆𑀯𑀸 𑀢𑁂 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀓𑀺𑀁 𑀧𑀦 𑀢𑁂 𑀪𑀕𑀯𑀢𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀕𑀺𑀳𑀻𑀦𑀁 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺? 𑀕𑀺𑀳𑀻𑀳𑀺 𑀤𑀺𑀦𑁆𑀦𑀸𑀧𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀪𑀕𑀯𑀢𑁄 𑀲𑀦𑁆𑀢𑀓𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀪𑀕𑀯𑀢𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 (𑀫. 𑀦𑀺. 𑁧.𑁨𑁯) 𑀯𑁂𑀤𑀺𑀢𑀩𑁆𑀩𑀁, 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀜𑁆𑀘𑁂𑀢𑁆𑀣 𑀲𑀸𑀥𑀓𑀁.

𑀔𑀻𑀡𑀸𑀲𑀯𑀸𑀦𑀁 𑀧𑀭𑀺𑀪𑁄𑀕𑁄 𑀲𑀸𑀫𑀺𑀧𑀭𑀺𑀪𑁄𑀕𑁄 𑀦𑀸𑀫, 𑀢𑁂 𑀳𑀺 𑀢𑀡𑁆𑀳𑀸𑀬 𑀤𑀸𑀲𑀩𑁆𑀬𑀁 𑀅𑀢𑀻𑀢𑀢𑁆𑀢𑀸 𑀲𑀸𑀫𑀺𑀦𑁄 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺. 𑀇𑀫𑁂𑀲𑀼 𑀧𑀭𑀺𑀪𑁄𑀕𑁂𑀲𑀼 𑀲𑀸𑀫𑀺𑀧𑀭𑀺𑀪𑁄𑀕𑁄 𑀘 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄 𑀘 𑀲𑀩𑁆𑀩𑁂𑀲𑀫𑁆𑀧𑀺 𑀯𑀝𑁆𑀝𑀢𑀺. 𑀇𑀡𑀧𑀭𑀺𑀪𑁄𑀕𑁄 𑀦 𑀯𑀝𑁆𑀝𑀢𑀺, 𑀣𑁂𑀬𑁆𑀬𑀧𑀭𑀺𑀪𑁄𑀕𑁂 𑀓𑀣𑀸𑀬𑁂𑀯 𑀦𑀢𑁆𑀣𑀺.

𑀅𑀧𑀭𑁂𑀧𑀺 𑀘𑀢𑁆𑀢𑀸𑀭𑁄 𑀧𑀭𑀺𑀪𑁄𑀕𑀸 𑁋 𑀮𑀚𑁆𑀚𑀺𑀧𑀭𑀺𑀪𑁄𑀕𑁄, 𑀅𑀮𑀚𑁆𑀚𑀺𑀧𑀭𑀺𑀪𑁄𑀕𑁄, 𑀥𑀫𑁆𑀫𑀺𑀬𑀧𑀭𑀺𑀪𑁄𑀕𑁄, 𑀅𑀥𑀫𑁆𑀫𑀺𑀬𑀧𑀭𑀺𑀪𑁄𑀕𑁄𑀢𑀺.

𑀢𑀢𑁆𑀣 𑀅𑀮𑀚𑁆𑀚𑀺𑀦𑁄 𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑁄 𑀯𑀝𑁆𑀝𑀢𑀺, 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄. 𑀮𑀚𑁆𑀚𑀺𑀦𑁄 𑀅𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀁 𑀬𑀸𑀯 𑀦 𑀚𑀸𑀦𑀸𑀢𑀺, 𑀢𑀸𑀯 𑀯𑀝𑁆𑀝𑀢𑀺. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀳𑀺 𑀅𑀮𑀚𑁆𑀚𑀻 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑀤𑀸𑀲𑁆𑀲 𑀅𑀮𑀚𑁆𑀚𑀻𑀪𑀸𑀯𑀁 𑀚𑀸𑀦𑀸𑀢𑀺 𑀢𑀤𑀸 𑀯𑀢𑁆𑀢𑀩𑁆𑀩𑁄 ‘‘𑀢𑀼𑀫𑁆𑀳𑁂 𑀓𑀸𑀬𑀤𑁆𑀯𑀸𑀭𑁂 𑀘 𑀯𑀘𑀻𑀤𑁆𑀯𑀸𑀭𑁂 𑀘 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀣, 𑀢𑀁 𑀅𑀧𑁆𑀧𑀢𑀺𑀭𑀽𑀧𑀁 𑀫𑀸 𑀏𑀯𑀫𑀓𑀢𑁆𑀣𑀸’’𑀢𑀺. 𑀲𑀘𑁂 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀭𑁄𑀢𑀺𑀬𑁂𑀯, 𑀬𑀤𑀺 𑀢𑁂𑀦 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑀁 𑀓𑀭𑁄𑀢𑀺, 𑀲𑁄𑀧𑀺 𑀅𑀮𑀚𑁆𑀚𑀻𑀬𑁂𑀯 𑀳𑁄𑀢𑀺. 𑀬𑁄𑀧𑀺 𑀅𑀢𑁆𑀢𑀦𑁄 𑀪𑀸𑀭𑀪𑀽𑀢𑁂𑀦 𑀅𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑀁 𑀓𑀭𑁄𑀢𑀺, 𑀲𑁄𑀧𑀺 𑀦𑀺𑀯𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀦 𑀑𑀭𑀫𑀢𑀺, 𑀅𑀬𑀫𑁆𑀧𑀺 𑀅𑀮𑀚𑁆𑀚𑀻𑀬𑁂𑀯 𑀳𑁄𑀢𑀺. 𑀏𑀯𑀁 𑀏𑀓𑁄 𑀅𑀮𑀚𑁆𑀚𑀻 𑀅𑀮𑀚𑁆𑀚𑀻𑀲𑀢𑀫𑁆𑀧𑀺 𑀓𑀭𑁄𑀢𑀺. 𑀅𑀮𑀚𑁆𑀚𑀺𑀦𑁄 𑀧𑀦 𑀅𑀮𑀚𑁆𑀚𑀺𑀦𑀸𑀯 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑁂 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀮𑀚𑁆𑀚𑀺𑀦𑁄 𑀮𑀚𑁆𑀚𑀺𑀦𑀸 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑁄 𑀤𑁆𑀯𑀺𑀦𑁆𑀦𑀁 𑀔𑀢𑁆𑀢𑀺𑀬𑀓𑀼𑀫𑀸𑀭𑀸𑀦𑀁 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀪𑁄𑀚𑀦𑀲𑀤𑀺𑀲𑁄𑀢𑀺.

𑀥𑀫𑁆𑀫𑀺𑀬𑀸𑀥𑀫𑁆𑀫𑀺𑀬𑀧𑀭𑀺𑀪𑁄𑀕𑁄 𑀧𑀘𑁆𑀘𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀘𑁂 𑀧𑀼𑀕𑁆𑀕𑀮𑁄𑀧𑀺 𑀅𑀮𑀚𑁆𑀚𑀻 𑀧𑀺𑀡𑁆𑀟𑀧𑀸𑀢𑁄𑀧𑀺 𑀅𑀥𑀫𑁆𑀫𑀺𑀬𑁄, 𑀉𑀪𑁄 𑀚𑁂𑀕𑀼𑀘𑁆𑀙𑀸. 𑀧𑀼𑀕𑁆𑀕𑀮𑁄 𑀅𑀮𑀚𑁆𑀚𑀻 𑀧𑀺𑀡𑁆𑀟𑀧𑀸𑀢𑁄 𑀥𑀫𑁆𑀫𑀺𑀬𑁄, 𑀧𑀼𑀕𑁆𑀕𑀮𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁄 𑀦 𑀕𑀳𑁂𑀢𑀩𑁆𑀩𑁄. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀤𑀼𑀲𑁆𑀲𑀻𑀮𑁄 𑀲𑀗𑁆𑀖𑀢𑁄 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀺 𑀮𑀪𑀺𑀢𑁆𑀯𑀸 𑀲𑀗𑁆𑀖𑀲𑁆𑀲𑁂𑀯 𑀤𑁂𑀢𑀺, 𑀏𑀢𑀸𑀦𑀺 𑀬𑀣𑀸𑀤𑀸𑀦𑀫𑁂𑀯 𑀕𑀢𑀢𑁆𑀢𑀸 𑀯𑀝𑁆𑀝𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀧𑀼𑀕𑁆𑀕𑀮𑁄 𑀮𑀚𑁆𑀚𑀻 𑀧𑀺𑀡𑁆𑀟𑀧𑀸𑀢𑁄 𑀅𑀥𑀫𑁆𑀫𑀺𑀬𑁄, 𑀧𑀺𑀡𑁆𑀟𑀧𑀸𑀢𑁄 𑀚𑁂𑀕𑀼𑀘𑁆𑀙𑁄 𑀦 𑀕𑀳𑁂𑀢𑀩𑁆𑀩𑁄. 𑀧𑀼𑀕𑁆𑀕𑀮𑁄 𑀮𑀚𑁆𑀚𑀻, 𑀧𑀺𑀡𑁆𑀟𑀧𑀸𑀢𑁄𑀧𑀺 𑀥𑀫𑁆𑀫𑀺𑀬𑁄, 𑀯𑀝𑁆𑀝𑀢𑀺.

𑀅𑀧𑀭𑁂 𑀤𑁆𑀯𑁂 𑀧𑀕𑁆𑀕𑀳𑀸; 𑀤𑁆𑀯𑁂 𑀘 𑀧𑀭𑀺𑀪𑁄𑀕𑀸 𑁋 𑀮𑀚𑁆𑀚𑀺𑀧𑀕𑁆𑀕𑀳𑁄, 𑀅𑀮𑀚𑁆𑀚𑀺𑀧𑀕𑁆𑀕𑀳𑁄; 𑀥𑀫𑁆𑀫𑀧𑀭𑀺𑀪𑁄𑀕𑁄 𑀆𑀫𑀺𑀲𑀧𑀭𑀺𑀪𑁄𑀕𑁄𑀢𑀺.

𑀢𑀢𑁆𑀣 𑀅𑀮𑀚𑁆𑀚𑀺𑀦𑁄 𑀮𑀚𑁆𑀚𑀺𑀁 𑀧𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀲𑁄 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀮𑀚𑁆𑀚𑀻 𑀅𑀮𑀚𑁆𑀚𑀺𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀅𑀦𑀼𑀫𑁄𑀤𑀦𑀸𑀬 𑀅𑀚𑁆𑀛𑁂𑀲𑀢𑀺, 𑀥𑀫𑁆𑀫𑀓𑀣𑀸𑀬 𑀅𑀚𑁆𑀛𑁂𑀲𑀢𑀺, 𑀓𑀼𑀮𑁂𑀲𑀼 𑀉𑀧𑀢𑁆𑀣𑀫𑁆𑀪𑁂𑀢𑀺. 𑀇𑀢𑀭𑁄𑀧𑀺 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀈𑀤𑀺𑀲𑁄 𑀘 𑀈𑀤𑀺𑀲𑁄 𑀘𑀸’’𑀢𑀺 𑀢𑀲𑁆𑀲 𑀧𑀭𑀺𑀲𑀢𑀺 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀬𑀁 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀢𑀺 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀥𑀫𑁆𑀫𑀧𑀭𑀺𑀪𑁄𑀕-𑀆𑀫𑀺𑀲𑀧𑀭𑀺𑀪𑁄𑀕𑁂𑀲𑀼 𑀧𑀦 𑀬𑀢𑁆𑀣 𑀆𑀫𑀺𑀲𑀧𑀭𑀺𑀪𑁄𑀕𑁄 𑀯𑀝𑁆𑀝𑀢𑀺, 𑀢𑀢𑁆𑀣 𑀥𑀫𑁆𑀫𑀧𑀭𑀺𑀪𑁄𑀕𑁄𑀧𑀺 𑀯𑀝𑁆𑀝𑀢𑀺. 𑀬𑁄 𑀧𑀦 𑀓𑁄𑀝𑀺𑀬𑀁 𑀞𑀺𑀢𑁄 𑀕𑀦𑁆𑀣𑁄 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀘𑁆𑀘𑀬𑁂𑀦 𑀦𑀲𑁆𑀲𑀺𑀲𑁆𑀲𑀢𑀺, 𑀢𑀁 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀉𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀫𑀳𑀸𑀪𑀬𑁂 𑀓𑀺𑀭 𑀏𑀓𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀫𑀳𑀸𑀦𑀺𑀤𑁆𑀤𑁂𑀲𑁄 𑀧𑀕𑀼𑀡𑁄 𑀅𑀳𑁄𑀲𑀺. 𑀅𑀣 𑀘𑀢𑀼𑀦𑀺𑀓𑀸𑀬𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀉𑀧𑀚𑁆𑀛𑀸𑀬𑁄 𑀫𑀳𑀸𑀢𑀺𑀧𑀺𑀝𑀓𑀢𑁆𑀣𑁂𑀭𑁄 𑀦𑀸𑀫 𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀆𑀳 𑁋 ‘‘𑀆𑀯𑀼𑀲𑁄 𑀫𑀳𑀸𑀭𑀓𑁆𑀔𑀺𑀢, 𑀏𑀢𑀲𑁆𑀲 𑀲𑀦𑁆𑀢𑀺𑀓𑁂 𑀫𑀳𑀸𑀦𑀺𑀤𑁆𑀤𑁂𑀲𑀁 𑀕𑀡𑁆𑀳𑀸𑀳𑀻’’𑀢𑀺. ‘‘𑀧𑀸𑀧𑁄 𑀓𑀺𑀭𑀸𑀬𑀁, 𑀪𑀦𑁆𑀢𑁂, 𑀦 𑀕𑀡𑁆𑀳𑀸𑀫𑀻’’𑀢𑀺. ‘‘𑀕𑀡𑁆𑀳𑀸𑀯𑀼𑀲𑁄, 𑀅𑀳𑀁 𑀢𑁂 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀧𑀝𑁆𑀞𑀧𑁂𑀢𑁆𑀯𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀦𑀺𑀭𑀦𑁆𑀢𑀭𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑁄 𑀑𑀲𑀸𑀦𑀤𑀺𑀯𑀲𑁂 𑀳𑁂𑀝𑁆𑀞𑀸𑀫𑀜𑁆𑀘𑁂 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 ‘‘𑀪𑀦𑁆𑀢𑁂, 𑀲𑀼𑀢𑀁𑀬𑁂𑀯 𑀫𑁂 𑀧𑀼𑀩𑁆𑀩𑁂, 𑀲𑀘𑀸𑀳𑀁 𑀏𑀯𑀁 𑀚𑀸𑀦𑁂𑀬𑁆𑀬𑀁, 𑀦 𑀈𑀤𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺 𑀆𑀳. 𑀢𑀲𑁆𑀲 𑀧𑀦 𑀲𑀦𑁆𑀢𑀺𑀓𑁂 𑀩𑀳𑀽 𑀫𑀳𑀸𑀣𑁂𑀭𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀳𑀸𑀦𑀺𑀤𑁆𑀤𑁂𑀲𑀁 𑀧𑀢𑀺𑀝𑁆𑀞𑀸𑀧𑁂𑀲𑀼𑀁.

𑁫𑁮𑁬. 𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻𑀢𑀺 𑀏𑀢𑁆𑀣 𑀲𑀩𑁆𑀩𑀫𑁆𑀧𑀺 𑀚𑀸𑀢𑀭𑀽𑀧𑀭𑀚𑀢𑀁 𑀭𑀽𑀧𑀺𑀬𑀲𑀗𑁆𑀕𑀳𑀫𑁂𑀯 𑀕𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀭𑀽𑀧𑀺𑀬𑁂 𑀯𑁂𑀫𑀢𑀺𑀓𑁄𑀢𑀺 ‘‘𑀲𑀼𑀯𑀡𑁆𑀡𑀁 𑀦𑀼 𑀔𑁄, 𑀔𑀭𑀧𑀢𑁆𑀢𑀁 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀁𑀲𑀬𑀚𑀸𑀢𑁄.

𑀭𑀽𑀧𑀺𑀬𑁂 𑀅𑀭𑀽𑀧𑀺𑀬𑀲𑀜𑁆𑀜𑀻𑀢𑀺 𑀲𑀼𑀯𑀡𑁆𑀡𑀸𑀤𑀻𑀲𑀼 𑀔𑀭𑀧𑀢𑁆𑀢𑀸𑀤𑀺𑀲𑀜𑁆𑀜𑀻. 𑀅𑀧𑀺𑀘 𑀧𑀼𑀜𑁆𑀜𑀓𑀸𑀫𑀸 𑀭𑀸𑀚𑁄𑀭𑁄𑀥𑀸𑀤𑀬𑁄 𑀪𑀢𑁆𑀢𑀔𑀚𑁆𑀚𑀓𑀕𑀦𑁆𑀥𑀧𑀺𑀡𑁆𑀟𑀸𑀤𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀤𑁂𑀦𑁆𑀢𑀺, 𑀘𑁄𑀴𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀸𑀦𑀁 𑀤𑀲𑁆𑀲𑀦𑁆𑀢𑁂 𑀩𑀤𑁆𑀥𑀓𑀳𑀸𑀧𑀡𑀸𑀤𑀻𑀳𑀺𑀬𑁂𑀯 𑀲𑀤𑁆𑀥𑀺𑀁 𑀘𑁄𑀴𑀓𑀸𑀦𑀺 𑀤𑁂𑀦𑁆𑀢𑀺, 𑀪𑀺𑀓𑁆𑀔𑀽 𑀪𑀢𑁆𑀢𑀸𑀤𑀺𑀲𑀜𑁆𑀜𑀸𑀬 𑀯𑀸 𑀘𑁄𑀴𑀓𑀲𑀜𑁆𑀜𑀸𑀬 𑀯𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀏𑀯𑀫𑁆𑀧𑀺 𑀭𑀽𑀧𑀺𑀬𑁂 𑀅𑀭𑀽𑀧𑀺𑀬𑀲𑀜𑁆𑀜𑀻 𑀭𑀽𑀧𑀺𑀬𑀁 𑀕𑀡𑁆𑀳𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁂𑀦 𑀧𑀦 ‘‘𑀇𑀫𑀲𑁆𑀫𑀺𑀁 𑀕𑁂𑀳𑁂 𑀇𑀤𑀁 𑀮𑀤𑁆𑀥’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀬𑁂𑀦 𑀳𑀺 𑀅𑀲𑁆𑀲𑀢𑀺𑀬𑀸 𑀤𑀺𑀦𑁆𑀦𑀁 𑀳𑁄𑀢𑀺, 𑀲𑁄 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀼𑀦 𑀆𑀕𑀘𑁆𑀙𑀢𑀺, 𑀅𑀣𑀲𑁆𑀲 𑀯𑀢𑁆𑀢𑀩𑁆𑀩𑀁 𑁋 ‘‘𑀢𑀯 𑀘𑁄𑀴𑀓𑀁 𑀧𑀲𑁆𑀲𑀸𑀳𑀻’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀙𑀲𑀫𑀼𑀝𑁆𑀞𑀸𑀦𑀁, 𑀲𑀺𑀬𑀸 𑀓𑀺𑀭𑀺𑀬𑀁 𑀕𑀳𑀡𑁂𑀦 𑀆𑀧𑀚𑁆𑀚𑀦𑀢𑁄, 𑀲𑀺𑀬𑀸 𑀅𑀓𑀺𑀭𑀺𑀬𑀁 𑀧𑀝𑀺𑀓𑁆𑀔𑁂𑀧𑀲𑁆𑀲 𑀅𑀓𑀭𑀡𑀢𑁄 𑀭𑀽𑀧𑀺𑀬𑀅𑀜𑁆𑀜𑀯𑀸𑀤𑀓𑀉𑀧𑀲𑁆𑀲𑀼𑀢𑀺𑀲𑀺𑀓𑁆𑀔𑀸𑀧𑀤𑀸𑀦𑀺 𑀳𑀺 𑀢𑀻𑀡𑀺 𑀏𑀓𑀧𑀭𑀺𑀘𑁆𑀙𑁂𑀤𑀸𑀦𑀺, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀭𑀽𑀧𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁮𑁭. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀓𑀦𑁆𑀢𑀺 𑀓𑀢𑀸𑀓𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁. 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀦𑁆𑀢𑀺 𑀚𑀸𑀢𑀭𑀽𑀧𑀭𑀚𑀢𑀧𑀭𑀺𑀯𑀢𑁆𑀢𑀦𑀁. 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀧𑀝𑀺𑀕𑁆𑀕𑀳𑀡𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀺𑀢𑀧𑀭𑀺𑀯𑀢𑁆𑀢𑀦𑁂 𑀤𑁄𑀲𑀁 𑀅𑀧𑀲𑁆𑀲𑀦𑁆𑀢𑀸 𑀓𑀭𑁄𑀦𑁆𑀢𑀺.

𑁫𑁮𑁯. 𑀲𑀻𑀲𑀽𑀧𑀕𑀦𑁆𑀢𑀺𑀆𑀤𑀻𑀲𑀼 𑀲𑀻𑀲𑀁 𑀉𑀧𑀕𑀘𑁆𑀙𑀢𑀻𑀢𑀺 𑀲𑀻𑀲𑀽𑀧𑀕𑀁, 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀲𑀻𑀲𑀽𑀧𑀓’’𑀦𑁆𑀢𑀺 𑀮𑀺𑀔𑀺𑀢𑀁, 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀻𑀲𑀸𑀮𑀗𑁆𑀓𑀸𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀓𑀢𑁂𑀦 𑀓𑀢𑀦𑁆𑀢𑀺𑀆𑀤𑀻𑀲𑀼 𑀲𑀼𑀤𑁆𑀥𑁄 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁄𑀬𑁂𑀯.

𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻𑀢𑀺𑀆𑀤𑀺𑀫𑁆𑀳𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀯𑀢𑁆𑀣𑀽𑀲𑀼 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀫𑀽𑀮𑀕𑁆𑀕𑀳𑀡𑁂 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀧𑀭𑀸𑀧𑀭𑀧𑀭𑀺𑀯𑀢𑁆𑀢𑀦𑁂 𑀇𑀫𑀺𑀦𑀸 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀯𑀸 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀯𑀸 𑀘𑁂𑀢𑀸𑀧𑁂𑀦𑁆𑀢𑀲𑁆𑀲𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀳𑀺 𑀅𑀬𑀁 𑀅𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻 𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀢𑀻𑀢𑀺𑀆𑀤𑀺 𑀤𑀼𑀢𑀺𑀬𑁄 𑀢𑀺𑀓𑁄 𑀯𑀼𑀢𑁆𑀢𑁄, 𑀢𑀲𑁆𑀲𑀸𑀦𑀼𑀮𑁄𑀫𑀢𑁆𑀢𑀸 𑀅𑀯𑀼𑀢𑁆𑀢𑁄𑀧𑀺 𑀅𑀬𑀫𑀧𑀭𑁄𑀧𑀺 𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻 𑀅𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀢𑀻𑀢𑀺𑀆𑀤𑀺 𑀢𑀺𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀦𑁄 𑀯𑀸 𑀳𑀺 𑀅𑀭𑀽𑀧𑀺𑀬𑁂𑀦 𑀧𑀭𑀲𑁆𑀲 𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀬𑁆𑀬 𑀅𑀢𑁆𑀢𑀦𑁄 𑀯𑀸 𑀭𑀽𑀧𑀺𑀬𑁂𑀦 𑀧𑀭𑀲𑁆𑀲 𑀅𑀭𑀽𑀧𑀺𑀬𑀁, 𑀉𑀪𑀬𑀣𑀸𑀧𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁄 𑀓𑀢𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀁 𑀏𑀓𑀦𑁆𑀢𑁂𑀦 𑀭𑀽𑀧𑀺𑀬𑀧𑀓𑁆𑀔𑁂 𑀏𑀓𑁄𑀬𑁂𑀯 𑀢𑀺𑀓𑁄 𑀯𑀼𑀢𑁆𑀢𑁄𑀢𑀺.

𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀧𑀦 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀫𑀽𑀮𑀕𑁆𑀕𑀳𑀡𑁂 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀤𑀼𑀓𑁆𑀓𑀝𑀁, 𑀧𑀘𑁆𑀙𑀸 𑀧𑀭𑀺𑀯𑀢𑁆𑀢𑀦𑁂 𑀇𑀫𑀺𑀦𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀕𑀭𑀼𑀓𑀲𑁆𑀲 𑀘𑁂𑀢𑀸𑀧𑀺𑀢𑀢𑁆𑀢𑀸. 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑁂𑀯, 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀯𑀸 𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀫𑀽𑀮𑀕𑁆𑀕𑀳𑀡𑁂 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀤𑀼𑀓𑁆𑀓𑀝𑀁, 𑀧𑀘𑁆𑀙𑀸 𑀧𑀭𑀺𑀯𑀢𑁆𑀢𑀦𑁂𑀧𑀺 𑀇𑀫𑀺𑀦𑀸 𑀤𑀼𑀓𑁆𑀓𑀝𑀫𑁂𑀯. 𑀓𑀲𑁆𑀫𑀸? 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 𑀘𑁂𑀢𑀸𑀧𑀺𑀢𑀢𑁆𑀢𑀸. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀘𑁂 𑀓𑀬𑀯𑀺𑀓𑁆𑀓𑀬𑀁 𑀲𑀫𑀸𑀧𑀚𑁆𑀚𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀪𑀸𑀲𑀺𑀢𑀁, 𑀢𑀁 𑀤𑀼𑀩𑁆𑀪𑀸𑀲𑀺𑀢𑀁. 𑀓𑀲𑁆𑀫𑀸? 𑀦 𑀳𑀺 𑀤𑀸𑀦𑀕𑁆𑀕𑀳𑀡𑀢𑁄 𑀅𑀜𑁆𑀜𑁄 𑀓𑀬𑀯𑀺𑀓𑁆𑀓𑀬𑁄 𑀦𑀸𑀫 𑀅𑀢𑁆𑀣𑀺, 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀜𑁆𑀘 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 𑀓𑀧𑁆𑀧𑀺𑀬𑀯𑀢𑁆𑀣𑀼𑀧𑀭𑀺𑀯𑀢𑁆𑀢𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀜𑁆𑀘 𑀔𑁄 𑀅𑀜𑁆𑀜𑀢𑁆𑀭 𑀲𑀳𑀥𑀫𑁆𑀫𑀺𑀓𑁂𑀳𑀺. 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀭𑀽𑀧𑀺𑀬𑁂𑀦 𑀘 𑀭𑀽𑀧𑀺𑀬𑀸𑀭𑀽𑀧𑀺𑀬𑀘𑁂𑀢𑀸𑀧𑀦𑀁 𑀅𑀭𑀽𑀧𑀺𑀬𑁂𑀦 𑀘 𑀭𑀽𑀧𑀺𑀬𑀘𑁂𑀢𑀸𑀧𑀦𑀁. 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀧𑀦 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑁄 𑀘𑁂𑀢𑀸𑀧𑀦𑀁 𑀦𑁂𑀯 𑀇𑀥 𑀦 𑀢𑀢𑁆𑀣 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀦 𑀘𑁂𑀢𑁆𑀣 𑀅𑀦𑀸𑀧𑀢𑁆𑀢𑀺 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀢𑀲𑁆𑀫𑀸 𑀬𑀣𑁂𑀯 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑁄 𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀁, 𑀢𑀣𑁂𑀯 𑀢𑀲𑁆𑀲 𑀯𑀸 𑀢𑁂𑀦 𑀯𑀸 𑀘𑁂𑀢𑀸𑀧𑀦𑁂𑀧𑀺 𑀤𑀼𑀓𑁆𑀓𑀝𑀁 𑀬𑀼𑀢𑁆𑀢𑀦𑁆𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀜𑁆𑀜𑀽𑀳𑀺 𑀯𑀼𑀢𑁆𑀢𑀁.

𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 𑀧𑀦 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀫𑀽𑀮𑀕𑁆𑀕𑀳𑀡𑁂 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺, 𑀧𑀘𑁆𑀙𑀸 𑀧𑀭𑀺𑀯𑀢𑁆𑀢𑀦𑁂 𑀇𑀫𑀺𑀦𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀭𑀽𑀧𑀺𑀬𑁂 𑀅𑀭𑀽𑀧𑀺𑀬𑀲𑀜𑁆𑀜𑀻 𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀢𑁂𑀦𑁂𑀯 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀫𑀽𑀮𑀧𑀝𑀺𑀕𑁆𑀕𑀳𑀡𑁂 𑀢𑀣𑁂𑀯 𑀅𑀦𑀸𑀧𑀢𑁆𑀢𑀺, 𑀧𑀘𑁆𑀙𑀸 𑀧𑀭𑀺𑀯𑀢𑁆𑀢𑀦𑁂 𑀇𑀫𑀺𑀦𑀸 𑀤𑀼𑀓𑁆𑀓𑀝𑀁. 𑀓𑀲𑁆𑀫𑀸? 𑀅𑀓𑀧𑁆𑀧𑀺𑀬𑀲𑁆𑀲 𑀘𑁂𑀢𑀸𑀧𑀺𑀢𑀢𑁆𑀢𑀸. 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 𑀧𑀦 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀅𑀜𑁆𑀜𑀢𑁆𑀭 𑀲𑀳𑀥𑀫𑁆𑀫𑀺𑀓𑁂𑀳𑀺 𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀫𑀽𑀮𑀕𑁆𑀕𑀳𑀡𑁂 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺, 𑀧𑀘𑁆𑀙𑀸 𑀧𑀭𑀺𑀯𑀢𑁆𑀢𑀦𑁂 𑀉𑀧𑀭𑀺 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀓𑀬𑀯𑀺𑀓𑁆𑀓𑀬𑀁 𑀫𑁄𑀘𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀉𑀧𑀭𑀺𑀲𑀺𑀓𑁆𑀔𑀸𑀧𑀤𑁂𑀦𑀧𑀺 𑀅𑀦𑀸𑀧𑀢𑁆𑀢𑀺, 𑀯𑀟𑁆𑀠𑀺𑀁 𑀧𑀬𑁄𑀚𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑀇𑀫𑀲𑁆𑀲 𑀘 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑁆𑀲 𑀕𑀭𑀼𑀓𑀪𑀸𑀯𑀤𑀻𑀧𑀓𑀁 𑀇𑀤𑀁 𑀧𑀢𑁆𑀢𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀳𑀺 𑀭𑀽𑀧𑀺𑀬𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀦 𑀅𑀬𑀩𑀻𑀚𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀁 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀢𑁂𑀦 𑀮𑁄𑀳𑁂𑀦 𑀧𑀢𑁆𑀢𑀁 𑀓𑀸𑀭𑁂𑀢𑀺, 𑀅𑀬𑀁 𑀧𑀢𑁆𑀢𑁄 𑀫𑀳𑀸𑀅𑀓𑀧𑁆𑀧𑀺𑀬𑁄 𑀦𑀸𑀫, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀓𑀧𑁆𑀧𑀺𑀬𑁄 𑀓𑀸𑀢𑀼𑀁. 𑀲𑀘𑁂 𑀳𑀺 𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀣𑀸𑀮𑀓𑀁 𑀓𑀸𑀭𑁂𑀢𑀺, 𑀢𑀫𑁆𑀧𑀺 𑀅𑀓𑀧𑁆𑀧𑀺𑀬𑀁. 𑀯𑀸𑀲𑀺𑀁 𑀓𑀸𑀭𑁂𑀢𑀺, 𑀢𑀸𑀬 𑀙𑀺𑀦𑁆𑀦𑀁 𑀤𑀦𑁆𑀢𑀓𑀝𑁆𑀞𑀫𑁆𑀧𑀺 𑀅𑀓𑀧𑁆𑀧𑀺𑀬𑀁. 𑀩𑀴𑀺𑀲𑀁 𑀓𑀸𑀭𑁄𑀢𑀺, 𑀢𑁂𑀦 𑀫𑀸𑀭𑀺𑀢𑀸 𑀫𑀘𑁆𑀙𑀸𑀧𑀺 𑀅𑀓𑀧𑁆𑀧𑀺𑀬𑀸. 𑀯𑀸𑀲𑀺𑀨𑀮𑀁 𑀢𑀸𑀧𑁂𑀢𑁆𑀯𑀸 𑀉𑀤𑀓𑀁 𑀯𑀸 𑀔𑀻𑀭𑀁 𑀯𑀸 𑀉𑀡𑁆𑀳𑀸𑀧𑁂𑀢𑀺, 𑀢𑀫𑁆𑀧𑀺 𑀅𑀓𑀧𑁆𑀧𑀺𑀬𑀫𑁂𑀯.

𑀬𑁄 𑀧𑀦 𑀭𑀽𑀧𑀺𑀬𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀦 𑀧𑀢𑁆𑀢𑀁 𑀓𑀺𑀡𑀸𑀢𑀺, 𑀅𑀬𑀫𑁆𑀧𑀺 𑀧𑀢𑁆𑀢𑁄 𑀅𑀓𑀧𑁆𑀧𑀺𑀬𑁄. ‘‘𑀧𑀜𑁆𑀘𑀦𑁆𑀦𑀫𑁆𑀧𑀺 𑀲𑀳𑀥𑀫𑁆𑀫𑀺𑀓𑀸𑀦𑀁 𑀦 𑀓𑀧𑁆𑀧𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀲𑀓𑁆𑀓𑀸 𑀧𑀦 𑀓𑀧𑁆𑀧𑀺𑀬𑁄 𑀓𑀸𑀢𑀼𑀁, 𑀲𑁄 𑀳𑀺 𑀫𑀽𑀮𑁂 𑀫𑀽𑀮𑀲𑀸𑀫𑀺𑀓𑀸𑀦𑀁 𑀧𑀢𑁆𑀢𑁂 𑀘 𑀧𑀢𑁆𑀢𑀲𑀸𑀫𑀺𑀓𑀸𑀦𑀁 𑀤𑀺𑀦𑁆𑀦𑁂 𑀓𑀧𑁆𑀧𑀺𑀬𑁄 𑀳𑁄𑀢𑀺. 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑀢𑁆𑀯𑀸 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀬𑁄𑀧𑀺 𑀭𑀽𑀧𑀺𑀬𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀓𑀸𑀭𑀓𑁂𑀦 𑀲𑀤𑁆𑀥𑀺𑀁 𑀓𑀫𑁆𑀫𑀸𑀭𑀓𑀼𑀮𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀭𑀼𑀘𑁆𑀘𑀢𑀻’’𑀢𑀺 𑀯𑀤𑀢𑀺. 𑀓𑀧𑁆𑀧𑀺𑀬𑀓𑀸𑀭𑀓𑁄 𑀘 𑀢𑀁 𑀭𑀽𑀧𑀺𑀬𑀁 𑀤𑀢𑁆𑀯𑀸 𑀓𑀫𑁆𑀫𑀸𑀭𑀁 𑀲𑀜𑁆𑀜𑀸𑀧𑁂𑀢𑀺, 𑀅𑀬𑀫𑁆𑀧𑀺 𑀧𑀢𑁆𑀢𑁄 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀕𑀳𑀺𑀢𑁄𑀧𑀺 𑀤𑀼𑀢𑀺𑀬𑀧𑀢𑁆𑀢𑀲𑀤𑀺𑀲𑁄𑀬𑁂𑀯, 𑀫𑀽𑀮𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀅𑀓𑀧𑁆𑀧𑀺𑀬𑁄. 𑀓𑀲𑁆𑀫𑀸 𑀲𑁂𑀲𑀸𑀦𑀁 𑀦 𑀓𑀧𑁆𑀧𑀢𑀻𑀢𑀺? 𑀫𑀽𑀮𑀲𑁆𑀲 𑀅𑀦𑀺𑀲𑁆𑀲𑀝𑁆𑀞𑀢𑁆𑀢𑀸.

𑀬𑁄 𑀧𑀦 𑀭𑀽𑀧𑀺𑀬𑀁 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀣𑁂𑀭𑀲𑁆𑀲 𑀧𑀢𑁆𑀢𑀁 𑀓𑀺𑀡𑀺𑀢𑁆𑀯𑀸 𑀤𑁂𑀳𑀻’’𑀢𑀺 𑀧𑀳𑀺𑀢𑀓𑀧𑁆𑀧𑀺𑀬𑀓𑀸𑀭𑀓𑁂𑀦 𑀲𑀤𑁆𑀥𑀺𑀁 𑀓𑀫𑁆𑀫𑀸𑀭𑀓𑀼𑀮𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑁂 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀇𑀫𑀁 𑀤𑁂𑀳𑀻’’𑀢𑀺 𑀓𑀳𑀸𑀧𑀡𑁂 𑀤𑀸𑀧𑁂𑀢𑁆𑀯𑀸 𑀕𑀳𑀺𑀢𑁄, 𑀅𑀬𑀁 𑀧𑀢𑁆𑀢𑁄 𑀏𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀦 𑀯𑀝𑁆𑀝𑀢𑀺 𑀤𑀼𑀩𑁆𑀩𑀺𑀘𑀸𑀭𑀺𑀢𑀢𑁆𑀢𑀸, 𑀅𑀜𑁆𑀜𑁂𑀲𑀁 𑀧𑀦 𑀯𑀝𑁆𑀝𑀢𑀺, 𑀫𑀽𑀮𑀲𑁆𑀲 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸.

𑀫𑀳𑀸𑀲𑀼𑀫𑀢𑁆𑀣𑁂𑀭𑀲𑁆𑀲 𑀓𑀺𑀭 𑀉𑀧𑀚𑁆𑀛𑀸𑀬𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀅𑀢𑁆𑀢𑀦𑁄 𑀏𑀯𑀭𑀽𑀧𑀁 𑀧𑀢𑁆𑀢𑀁 𑀲𑀧𑁆𑀧𑀺𑀲𑁆𑀲 𑀧𑀽𑀭𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀺. 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀲𑁆𑀲𑀧𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀏𑀯𑀭𑀽𑀧𑁄 𑀧𑀢𑁆𑀢𑁄 𑀅𑀳𑁄𑀲𑀺. 𑀢𑀁 𑀣𑁂𑀭𑁄𑀧𑀺 𑀲𑀧𑁆𑀧𑀺𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀧𑁂𑀲𑀻𑀢𑀺. 𑀇𑀤𑀁 𑀅𑀓𑀧𑁆𑀧𑀺𑀬𑀧𑀢𑁆𑀢𑀘𑀢𑀼𑀓𑁆𑀓𑀁.

𑀲𑀘𑁂 𑀧𑀦 𑀭𑀽𑀧𑀺𑀬𑀁 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀣𑁂𑀭𑀲𑁆𑀲 𑀧𑀢𑁆𑀢𑀁 𑀓𑀺𑀡𑀺𑀢𑁆𑀯𑀸 𑀤𑁂𑀳𑀻’’𑀢𑀺 𑀧𑀳𑀺𑀢𑀓𑀧𑁆𑀧𑀺𑀬𑀓𑀸𑀭𑀓𑁂𑀦 𑀲𑀤𑁆𑀥𑀺𑀁 𑀓𑀫𑁆𑀫𑀸𑀭𑀓𑀼𑀮𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀭𑀼𑀘𑁆𑀘𑀢𑀻’’𑀢𑀺 𑀯𑀸 ‘‘𑀇𑀫𑀸𑀳𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀯𑀸 𑀯𑀤𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀘 𑀢𑀁 𑀭𑀽𑀧𑀺𑀬𑀁 𑀤𑀢𑁆𑀯𑀸 𑀓𑀫𑁆𑀫𑀸𑀭𑀁 𑀲𑀜𑁆𑀜𑀸𑀧𑁂𑀢𑀺, 𑀅𑀬𑀁 𑀧𑀢𑁆𑀢𑁄 𑀲𑀩𑁆𑀩𑀓𑀧𑁆𑀧𑀺𑀬𑁄 𑀩𑀼𑀤𑁆𑀥𑀸𑀦𑀫𑁆𑀧𑀺 𑀧𑀭𑀺𑀪𑁄𑀕𑀸𑀭𑀳𑁄𑀢𑀺.

𑁫𑁯𑁧. 𑀅𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻𑀢𑀺 𑀔𑀭𑀧𑀢𑁆𑀢𑀸𑀤𑀻𑀲𑀼 𑀲𑀼𑀯𑀡𑁆𑀡𑀸𑀤𑀺𑀲𑀜𑁆𑀜𑀻. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀲𑀘𑁂 𑀢𑁂𑀦 𑀅𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀳𑁄𑀢𑀺. 𑀏𑀲 𑀦𑀬𑁄 𑀯𑁂𑀫𑀢𑀺𑀓𑁂. 𑀅𑀭𑀽𑀧𑀺𑀬𑀲𑀜𑁆𑀜𑀺𑀲𑁆𑀲 𑀧𑀦 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀤𑁆𑀥𑀺 ‘‘𑀇𑀤𑀁 𑀕𑀳𑁂𑀢𑁆𑀯𑀸 𑀇𑀤𑀁 𑀤𑁂𑀣𑀸’’𑀢𑀺 𑀓𑀬𑀯𑀺𑀓𑁆𑀓𑀬𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁯𑁩. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀓𑀢𑀺 𑀳𑀺𑀧𑀺 𑀢𑁆𑀬𑀸𑀬𑀦𑁆𑀢𑀺 𑀓𑀢𑀺 𑀢𑁂 𑀅𑀬𑀁, 𑀳𑀺𑀓𑀸𑀭𑁄 𑀧𑀦𑁂𑀢𑁆𑀣 𑀧𑀤𑀧𑀽𑀭𑀡𑁄, 𑀧𑀺𑀓𑀸𑀭𑁄 𑀕𑀭𑀳𑀸𑀬𑀁, 𑀅𑀬𑀁 𑀤𑀼𑀩𑁆𑀩𑀮𑀲𑀗𑁆𑀖𑀸𑀝𑀺 𑀢𑀯 𑀓𑀢𑀺 𑀤𑀺𑀯𑀲𑀸𑀦𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀢𑀺𑀳𑀫𑁆𑀧𑀺 𑀢𑁆𑀬𑀸𑀬𑀦𑁆𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀓𑀢𑀺𑀳𑀦𑁆𑀢𑀺 𑀓𑀢𑀺 𑀅𑀳𑀸𑀦𑀺, 𑀓𑀢𑀺 𑀤𑀺𑀯𑀲𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑀢𑀺𑀳𑀺𑀧𑀺 𑀫𑁆𑀬𑀸𑀬𑀦𑁆𑀢𑀺 𑀇𑀤𑀫𑁆𑀧𑀺 𑀏𑀢𑁂𑀦𑁂𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀕𑀺𑀳𑀻𑀧𑀺 𑀦𑀁 𑀕𑀺𑀳𑀺𑀲𑁆𑀲𑀸𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀸𑀫𑀢𑁆𑀣𑁂 𑀦𑀺𑀧𑀸𑀢𑁄, 𑀕𑀺𑀳𑀻 𑀦𑀸𑀫 𑀕𑀺𑀳𑀺𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁫𑁯𑁪. 𑀦𑀸𑀦𑀧𑁆𑀧𑀓𑀸𑀭𑀓𑀦𑁆𑀢𑀺 𑀘𑀻𑀯𑀭𑀸𑀤𑀻𑀦𑀁 𑀓𑀧𑁆𑀧𑀺𑀬𑀪𑀡𑁆𑀟𑀸𑀦𑀁 𑀯𑀲𑁂𑀦 𑀅𑀦𑁂𑀓𑀯𑀺𑀥𑀁. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 𑀘𑀻𑀯𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀤𑀲𑀺𑀓𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑀁 𑀓𑀧𑁆𑀧𑀺𑀬𑀪𑀡𑁆𑀟𑀫𑁂𑀯 𑀤𑀲𑁆𑀲𑀺𑀢𑀁. 𑀅𑀓𑀧𑁆𑀧𑀺𑀬𑀪𑀡𑁆𑀟𑀧𑀭𑀺𑀯𑀢𑁆𑀢𑀦𑀜𑁆𑀳𑀺 𑀓𑀬𑀯𑀺𑀓𑁆𑀓𑀬𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺. 𑀓𑀬𑀯𑀺𑀓𑁆𑀓𑀬𑀦𑁆𑀢𑀺 𑀓𑀬𑀜𑁆𑀘𑁂𑀯 𑀯𑀺𑀓𑁆𑀓𑀬𑀜𑁆𑀘. ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺𑀆𑀤𑀺𑀦𑀸 𑀳𑀺 𑀦𑀬𑁂𑀦 𑀧𑀭𑀲𑁆𑀲 𑀓𑀧𑁆𑀧𑀺𑀬𑀪𑀡𑁆𑀟𑀁 𑀕𑀡𑁆𑀳𑀦𑁆𑀢𑁄 𑀓𑀬𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑁂𑀦𑁆𑀢𑁄 𑀯𑀺𑀓𑁆𑀓𑀬𑀁.

𑁫𑁯𑁫. 𑀅𑀚𑁆𑀛𑀸𑀘𑀭𑀢𑀻𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀘𑀭𑀢𑀺, 𑀯𑀻𑀢𑀺𑀓𑁆𑀓𑀫𑀯𑀸𑀘𑀁 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀬𑀢𑁄 𑀓𑀬𑀺𑀢𑀜𑁆𑀘 𑀳𑁄𑀢𑀺 𑀯𑀺𑀓𑁆𑀓𑀬𑀺𑀢𑀜𑁆𑀘𑀸𑀢𑀺 𑀬𑀤𑀸 𑀓𑀬𑀺𑀢𑀜𑁆𑀘 𑀳𑁄𑀢𑀺 𑀧𑀭𑀪𑀡𑁆𑀟𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀓𑀭𑁄𑀦𑁆𑀢𑁂𑀦, 𑀯𑀺𑀓𑁆𑀓𑀻𑀢𑀜𑁆𑀘 𑀅𑀢𑁆𑀢𑀦𑁄 𑀪𑀡𑁆𑀟𑀁 𑀧𑀭𑀳𑀢𑁆𑀣𑀕𑀢𑀁 𑀓𑀭𑁄𑀦𑁆𑀢𑁂𑀦. ‘‘𑀇𑀫𑀺𑀦𑀸 𑀇𑀫’’𑀦𑁆𑀢𑀺𑀆𑀤𑀺𑀯𑀘𑀦𑀸𑀦𑀼𑀭𑀽𑀧𑀢𑁄 𑀧𑀦 𑀧𑀸𑀞𑁂 𑀧𑀞𑀫𑀁 𑀅𑀢𑁆𑀢𑀦𑁄 𑀪𑀡𑁆𑀟𑀁 𑀤𑀲𑁆𑀲𑀺𑀢𑀁.

𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀧𑀭𑀲𑁆𑀲 𑀳𑀢𑁆𑀣𑀢𑁄 𑀓𑀬𑀯𑀲𑁂𑀦 𑀕𑀳𑀺𑀢𑀓𑀧𑁆𑀧𑀺𑀬𑀪𑀡𑁆𑀟𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀓𑀬𑀯𑀺𑀓𑁆𑀓𑀬𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀅𑀯𑀲𑁂𑀲𑁂𑀳𑀺 𑀕𑀺𑀳𑀺𑀧𑀩𑁆𑀩𑀚𑀺𑀢𑁂𑀳𑀺 𑀅𑀦𑁆𑀢𑀫𑀲𑁄 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀲𑀤𑁆𑀥𑀺𑀁 𑀦 𑀯𑀝𑁆𑀝𑀢𑀺.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀯𑀢𑁆𑀣𑁂𑀦 𑀯𑀸 𑀯𑀢𑁆𑀣𑀁 𑀳𑁄𑀢𑀼 𑀪𑀢𑁆𑀢𑁂𑀦 𑀯𑀸 𑀪𑀢𑁆𑀢𑀁, 𑀬𑀁 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀁 ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺 𑀯𑀤𑀢𑀺, 𑀤𑀼𑀓𑁆𑀓𑀝𑀁. 𑀏𑀯𑀁 𑀯𑀢𑁆𑀯𑀸 𑀫𑀸𑀢𑀼𑀬𑀸𑀧𑀺 𑀅𑀢𑁆𑀢𑀦𑁄 𑀪𑀡𑁆𑀟𑀁 𑀤𑁂𑀢𑀺, 𑀤𑀼𑀓𑁆𑀓𑀝𑀁. ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀯𑀸 ‘‘𑀇𑀫𑀁 𑀤𑁂𑀳𑀺, 𑀇𑀫𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀯𑀸 𑀫𑀸𑀢𑀼𑀬𑀸𑀧𑀺 𑀪𑀡𑁆𑀟𑀁 𑀅𑀢𑁆𑀢𑀦𑀸 𑀕𑀡𑁆𑀳𑀸𑀢𑀺, 𑀤𑀼𑀓𑁆𑀓𑀝𑀁. 𑀅𑀢𑁆𑀢𑀦𑁄 𑀪𑀡𑁆𑀟𑁂 𑀧𑀭𑀳𑀢𑁆𑀣𑀁 𑀧𑀭𑀪𑀡𑁆𑀟𑁂 𑀘 𑀅𑀢𑁆𑀢𑀦𑁄 𑀳𑀢𑁆𑀣𑀁 𑀲𑀫𑁆𑀧𑀢𑁆𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀫𑀸𑀢𑀭𑀁 𑀧𑀦 𑀧𑀺𑀢𑀭𑀁 𑀯𑀸 ‘‘𑀇𑀫𑀁 𑀤𑁂𑀳𑀻’’𑀢𑀺 𑀯𑀤𑀢𑁄 𑀯𑀺𑀜𑁆𑀜𑀢𑁆𑀢𑀺 𑀦 𑀳𑁄𑀢𑀺. ‘‘𑀇𑀫𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑁄 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁 𑀦 𑀳𑁄𑀢𑀺. 𑀅𑀜𑁆𑀜𑀸𑀢𑀓𑀁 ‘‘𑀇𑀫𑀁 𑀤𑁂𑀳𑀻’’𑀢𑀺 𑀯𑀤𑀢𑁄 𑀯𑀺𑀜𑁆𑀜𑀢𑁆𑀢𑀺 𑀳𑁄𑀢𑀺. ‘‘𑀇𑀫𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑁄 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁 𑀳𑁄𑀢𑀺. ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺 𑀓𑀬𑀯𑀺𑀓𑁆𑀓𑀬𑀁 𑀆𑀧𑀚𑁆𑀚𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀢𑀲𑁆𑀫𑀸 𑀓𑀧𑁆𑀧𑀺𑀬𑀪𑀡𑁆𑀟𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁂𑀦 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀲𑀤𑁆𑀥𑀺𑀁 𑀓𑀬𑀯𑀺𑀓𑁆𑀓𑀬𑀁 𑀅𑀜𑁆𑀜𑀸𑀢𑀓𑁂𑀳𑀺 𑀲𑀤𑁆𑀥𑀺𑀁 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀫𑁄𑀘𑁂𑀦𑁆𑀢𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀧𑀭𑀺𑀯𑀢𑁆𑀢𑀦𑀯𑀺𑀥𑀺 𑁋 𑀪𑀺𑀓𑁆𑀔𑀼𑀲𑁆𑀲 𑀧𑀸𑀣𑁂𑀬𑁆𑀬𑀢𑀡𑁆𑀟𑀼𑀮𑀸 𑀳𑁄𑀦𑁆𑀢𑀺, 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀢𑁆𑀢𑀳𑀢𑁆𑀣𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀢𑀡𑁆𑀟𑀼𑀮𑀸 𑀅𑀢𑁆𑀣𑀺, 𑀦 𑀘 𑀦𑁄 𑀇𑀫𑁂𑀳𑀺 𑀅𑀢𑁆𑀣𑁄, 𑀪𑀢𑁆𑀢𑁂𑀦 𑀧𑀦 𑀅𑀢𑁆𑀣𑁄’’𑀢𑀺 𑀯𑀤𑀢𑀺. 𑀧𑀼𑀭𑀺𑀲𑁄 𑀢𑀡𑁆𑀟𑀼𑀮𑁂 𑀕𑀳𑁂𑀢𑁆𑀯𑀸 𑀪𑀢𑁆𑀢𑀁 𑀤𑁂𑀢𑀺, 𑀯𑀝𑁆𑀝𑀢𑀺. 𑀢𑀺𑀲𑁆𑀲𑁄𑀧𑀺 𑀆𑀧𑀢𑁆𑀢𑀺𑀬𑁄 𑀦 𑀳𑁄𑀦𑁆𑀢𑀺. 𑀅𑀦𑁆𑀢𑀫𑀲𑁄 𑀦𑀺𑀫𑀺𑀢𑁆𑀢𑀓𑀫𑁆𑀫𑀫𑀢𑁆𑀢𑀫𑁆𑀧𑀺 𑀦 𑀳𑁄𑀢𑀺. 𑀓𑀲𑁆𑀫𑀸? 𑀫𑀽𑀮𑀲𑁆𑀲 𑀅𑀢𑁆𑀣𑀺𑀢𑀸𑀬. 𑀧𑀭𑀢𑁄 𑀘 𑀯𑀼𑀢𑁆𑀢𑀫𑁂𑀯 ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀅𑀢𑁆𑀣𑀺, 𑀅𑀫𑁆𑀳𑀸𑀓𑀜𑁆𑀘 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀅𑀢𑁆𑀣𑁄𑀢𑀺 𑀪𑀡𑀢𑀻’’𑀢𑀺. 𑀬𑁄 𑀧𑀦 𑀏𑀯𑀁 𑀅𑀓𑀢𑁆𑀯𑀸 ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺 𑀧𑀭𑀺𑀯𑀢𑁆𑀢𑁂𑀢𑀺; 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. 𑀯𑀺𑀖𑀸𑀲𑀸𑀤𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀑𑀤𑀦𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀭𑀚𑀦𑀁 𑀯𑀸 𑀤𑀸𑀭𑀽𑀦𑀺 𑀯𑀸 𑀆𑀳𑀭𑀸’’𑀢𑀺 𑀯𑀤𑀢𑀺, 𑀭𑀚𑀦𑀙𑀮𑁆𑀮𑀺𑀕𑀡𑀦𑀸𑀬 𑀤𑀸𑀭𑀼𑀕𑀡𑀦𑀸𑀬 𑀘 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺. ‘‘𑀇𑀫𑀁 𑀑𑀤𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀇𑀤𑀁 𑀦𑀸𑀫 𑀓𑀭𑁄𑀣𑀸’’𑀢𑀺 𑀤𑀦𑁆𑀢𑀓𑀸𑀭𑀸𑀤𑀻𑀳𑀺 𑀲𑀺𑀧𑁆𑀧𑀺𑀓𑁂𑀳𑀺 𑀥𑀫𑀓𑀭𑀡𑀸𑀤𑀻𑀲𑀼 𑀢𑀁 𑀢𑀁 𑀧𑀭𑀺𑀓𑁆𑀔𑀸𑀭𑀁 𑀓𑀸𑀭𑁂𑀢𑀺, 𑀭𑀚𑀓𑁂𑀳𑀺 𑀯𑀸 𑀯𑀢𑁆𑀣𑀁 𑀥𑁄𑀯𑀸𑀧𑁂𑀢𑀺; 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. 𑀦𑁆𑀳𑀸𑀧𑀺𑀢𑁂𑀦 𑀓𑁂𑀲𑁂 𑀙𑀺𑀦𑁆𑀤𑀸𑀧𑁂𑀢𑀺, 𑀓𑀫𑁆𑀫𑀓𑀸𑀭𑁂𑀳𑀺 𑀦𑀯𑀓𑀫𑁆𑀫𑀁 𑀓𑀸𑀭𑁂𑀢𑀺; 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. 𑀲𑀘𑁂 𑀧𑀦 ‘‘𑀇𑀤𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀇𑀤𑀁 𑀓𑀭𑁄𑀣𑀸’’𑀢𑀺 𑀦 𑀯𑀤𑀢𑀺 ‘‘𑀇𑀤𑀁 𑀪𑀢𑁆𑀢𑀁 𑀪𑀼𑀜𑁆𑀚 𑀪𑀼𑀢𑁆𑀢𑁄𑀲𑀺 𑀪𑀼𑀜𑁆𑀚𑀺𑀲𑁆𑀲𑀲𑀺, 𑀇𑀤𑀁 𑀦𑀸𑀫 𑀓𑀭𑁄𑀳𑀻’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀯𑀢𑁆𑀣𑀥𑁄𑀯𑀦𑁂 𑀯𑀸 𑀓𑁂𑀲𑀘𑁆𑀙𑁂𑀤𑀦𑁂 𑀯𑀸 𑀪𑀽𑀫𑀺𑀲𑁄𑀥𑀦𑀸𑀤𑀺𑀦𑀯𑀓𑀫𑁆𑀫𑁂 𑀯𑀸 𑀧𑀭𑀪𑀡𑁆𑀟𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀏𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁, 𑀢𑀲𑁆𑀫𑀸 𑀬𑀣𑀸 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀫𑁆𑀳𑀺 𑀧𑀭𑀺𑀪𑀼𑀢𑁆𑀢𑁂 𑀯𑀸 𑀦𑀝𑁆𑀞𑁂 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀺, 𑀏𑀯𑀫𑀺𑀥𑀸𑀧𑀺 𑀤𑁂𑀲𑁂𑀢𑀩𑁆𑀩𑀁.

𑁫𑁯𑁬. 𑀓𑀬𑀯𑀺𑀓𑁆𑀓𑀬𑁂 𑀓𑀬𑀯𑀺𑀓𑁆𑀓𑀬𑀲𑀜𑁆𑀜𑀻𑀢𑀺𑀆𑀤𑀺𑀫𑁆𑀳𑀺 𑀬𑁄 𑀓𑀬𑀯𑀺𑀓𑁆𑀓𑀬𑀁 𑀲𑀫𑀸𑀧𑀚𑁆𑀚𑀢𑀺, 𑀲𑁄 𑀢𑀲𑁆𑀫𑀺𑀁 𑀓𑀬𑀯𑀺𑀓𑁆𑀓𑀬𑀲𑀜𑁆𑀜𑀻 𑀯𑀸 𑀪𑀯𑀢𑀼 𑀯𑁂𑀫𑀢𑀺𑀓𑁄 𑀯𑀸, 𑀦 𑀓𑀬𑀯𑀺𑀓𑁆𑀓𑀬𑀲𑀜𑁆𑀜𑀻 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀘𑀽𑀴𑀢𑁆𑀢𑀺𑀓𑁂 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁫𑁯𑁭. 𑀅𑀕𑁆𑀖𑀁 𑀧𑀼𑀘𑁆𑀙𑀢𑀻𑀢𑀺 ‘‘𑀅𑀬𑀁 𑀢𑀯 𑀧𑀢𑁆𑀢𑁄 𑀓𑀺𑀁 𑀅𑀕𑁆𑀖𑀢𑀻’’𑀢𑀺 𑀧𑀼𑀘𑁆𑀙𑀢𑀺. ‘‘𑀇𑀤𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀲𑀘𑁂 𑀢𑀲𑁆𑀲 𑀓𑀧𑁆𑀧𑀺𑀬𑀪𑀡𑁆𑀟𑀁 𑀫𑀳𑀕𑁆𑀖𑀁 𑀳𑁄𑀢𑀺, 𑀏𑀯𑀜𑁆𑀘 𑀦𑀁 𑀧𑀝𑀺𑀯𑀤𑀢𑀺 ‘‘𑀉𑀧𑀸𑀲𑀓, 𑀫𑀫 𑀇𑀤𑀁 𑀯𑀢𑁆𑀣𑀼 𑀫𑀳𑀕𑁆𑀖𑀁, 𑀢𑀯 𑀧𑀢𑁆𑀢𑀁 𑀅𑀜𑁆𑀜𑀲𑁆𑀲 𑀤𑁂𑀳𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 ‘‘𑀅𑀜𑁆𑀜𑀁 𑀣𑀸𑀮𑀓𑀫𑁆𑀧𑀺 𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺, ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑁂 𑀧𑀢𑀢𑀺. 𑀲𑀘𑁂 𑀲𑁄 𑀧𑀢𑁆𑀢𑁄 𑀫𑀳𑀕𑁆𑀖𑁄, 𑀪𑀺𑀓𑁆𑀔𑀼𑀦𑁄 𑀯𑀢𑁆𑀣𑀼 𑀅𑀧𑁆𑀧𑀕𑁆𑀖𑀁, 𑀧𑀢𑁆𑀢𑀲𑀸𑀫𑀺𑀓𑁄 𑀘𑀲𑁆𑀲 𑀅𑀧𑁆𑀧𑀕𑁆𑀖𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀧𑀢𑁆𑀢𑁄 𑀦 𑀕𑀳𑁂𑀢𑀩𑁆𑀩𑁄, ‘‘𑀫𑀫 𑀯𑀢𑁆𑀣𑀼 𑀅𑀧𑁆𑀧𑀕𑁆𑀖’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀫𑀳𑀕𑁆𑀖𑀪𑀸𑀯𑀁 𑀜𑀢𑁆𑀯𑀸 𑀯𑀜𑁆𑀘𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀳𑀺 𑀕𑀳𑀺𑀢𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀲𑀘𑁂 𑀧𑀢𑁆𑀢𑀲𑀸𑀫𑀺𑀓𑁄 ‘‘𑀳𑁄𑀢𑀼, 𑀪𑀦𑁆𑀢𑁂, 𑀲𑁂𑀲𑀁 𑀫𑀫 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑁂𑀢𑀺, 𑀯𑀝𑁆𑀝𑀢𑀺.

𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀆𑀘𑀺𑀓𑁆𑀔𑀢𑀻𑀢𑀺 𑀬𑀲𑁆𑀲 𑀳𑀢𑁆𑀣𑀢𑁄 𑀪𑀡𑁆𑀟𑀁 𑀕𑀡𑁆𑀳𑀸𑀢𑀺, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀅𑀦𑁆𑀢𑀫𑀲𑁄 𑀢𑀲𑁆𑀲 𑀧𑀼𑀢𑁆𑀢𑀪𑀸𑀢𑀺𑀓𑀫𑁆𑀧𑀺 𑀓𑀧𑁆𑀧𑀺𑀬𑀓𑀸𑀭𑀓𑀁 𑀓𑀢𑁆𑀯𑀸 ‘‘𑀇𑀫𑀺𑀦𑀸 𑀇𑀫𑀁 𑀦𑀸𑀫 𑀕𑀳𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀆𑀘𑀺𑀓𑁆𑀔𑀢𑀺. 𑀲𑁄 𑀘𑁂 𑀙𑁂𑀓𑁄 𑀳𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀅𑀧𑀦𑁂𑀢𑁆𑀯𑀸 𑀯𑀺𑀯𑀤𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀼𑀡𑁆𑀳𑀻𑀪𑀽𑀢𑁂𑀦 𑀞𑀸𑀢𑀩𑁆𑀩𑀁. 𑀦𑁄 𑀘𑁂 𑀙𑁂𑀓𑁄 𑀳𑁄𑀢𑀺, 𑀦 𑀚𑀸𑀦𑀸𑀢𑀺 𑀕𑀳𑁂𑀢𑀼𑀁, 𑀯𑀸𑀡𑀺𑀚𑀓𑁄 𑀢𑀁 𑀯𑀜𑁆𑀘𑁂𑀢𑀺, ‘‘𑀫𑀸 𑀕𑀡𑁆𑀳𑀸’’𑀢𑀺 𑀯𑀢𑁆𑀢𑀩𑁆𑀩𑁄.

𑀇𑀤𑀁 𑀅𑀫𑁆𑀳𑀸𑀓𑀦𑁆𑀢𑀺𑀆𑀤𑀺𑀫𑁆𑀳𑀺 ‘‘𑀇𑀤𑀁 𑀧𑀝𑀺𑀕𑁆𑀕𑀳𑀺𑀢𑀁 𑀢𑁂𑀮𑀁 𑀯𑀸 𑀲𑀧𑁆𑀧𑀺 𑀯𑀸 𑀅𑀫𑁆𑀳𑀸𑀓𑀁 𑀅𑀢𑁆𑀣𑀺, 𑀅𑀫𑁆𑀳𑀸𑀓𑀜𑁆𑀘 𑀅𑀜𑁆𑀜𑁂𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑁂𑀦 𑀅𑀢𑁆𑀣𑁄’’𑀢𑀺 𑀪𑀡𑀢𑀺. 𑀲𑀘𑁂 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀤𑁂𑀢𑀺, 𑀧𑀞𑀫𑀁 𑀅𑀢𑁆𑀢𑀦𑁄 𑀢𑁂𑀮𑀁 𑀦 𑀫𑀺𑀦𑀸𑀧𑁂𑀢𑀩𑁆𑀩𑀁. 𑀓𑀲𑁆𑀫𑀸? 𑀦𑀸𑀴𑀺𑀬𑀜𑁆𑀳𑀺 𑀅𑀯𑀲𑀺𑀝𑁆𑀞𑀢𑁂𑀮𑀁 𑀳𑁄𑀢𑀺, 𑀢𑀁 𑀧𑀘𑁆𑀙𑀸 𑀫𑀺𑀦𑀦𑁆𑀢𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀤𑀽𑀲𑁂𑀬𑁆𑀬𑀸𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀓𑁄𑀲𑀺𑀬𑀯𑀕𑁆𑀕𑁄 𑀤𑀼𑀢𑀺𑀬𑁄.