𑁧. 𑀘𑀻𑀯𑀭𑀯𑀕𑁆𑀕𑁄

𑁧. 𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀥𑀫𑁆𑀫𑀸, 𑀬𑁂 𑀯𑀼𑀢𑁆𑀢𑀸 𑀲𑀫𑀺𑀢𑀸𑀯𑀺𑀦𑀸;

𑀢𑁂𑀲𑀁 𑀤𑀸𑀦𑀺 𑀓𑀭𑀺𑀲𑁆𑀲𑀸𑀫𑀺, 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀁.

𑁪𑁫𑁯. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀕𑁄𑀢𑀫𑀓𑁂 𑀘𑁂𑀢𑀺𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀢𑀺𑀘𑀻𑀯𑀭𑀦𑁆𑀢𑀺 𑀅𑀦𑁆𑀢𑀭𑀯𑀸𑀲𑀓𑁄 𑀉𑀢𑁆𑀢𑀭𑀸𑀲𑀗𑁆𑀕𑁄 𑀲𑀗𑁆𑀖𑀸𑀝𑀻𑀢𑀺 𑀇𑀤𑀁 𑀘𑀻𑀯𑀭𑀢𑁆𑀢𑀬𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀺. 𑀬𑀢𑁆𑀣 𑀧𑀦𑁂𑀢𑀁 𑀅𑀦𑀼𑀜𑁆𑀜𑀸𑀢𑀁, 𑀬𑀤𑀸 𑀘 𑀅𑀦𑀼𑀜𑁆𑀜𑀸𑀢𑀁, 𑀬𑁂𑀦 𑀘 𑀓𑀸𑀭𑀡𑁂𑀦 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀲𑀩𑁆𑀩𑀁 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 𑀚𑀻𑀯𑀓𑀯𑀢𑁆𑀣𑀼𑀲𑁆𑀫𑀺𑀁 (𑀫𑀳𑀸𑀯. 𑁩𑁨𑁬 𑀆𑀤𑀬𑁄) 𑀆𑀕𑀢𑀫𑁂𑀯. 𑀅𑀜𑁆𑀜𑁂𑀦𑁂𑀯 𑀢𑀺𑀘𑀻𑀯𑀭𑁂𑀦 𑀕𑀸𑀫𑀁 𑀧𑀯𑀺𑀲𑀦𑁆𑀢𑀻𑀢𑀺 𑀬𑁂𑀦 𑀯𑀺𑀳𑀸𑀭𑁂 𑀅𑀘𑁆𑀙𑀦𑁆𑀢𑀺 𑀦𑁆𑀳𑀸𑀦𑀜𑁆𑀘 𑀑𑀢𑀭𑀦𑁆𑀢𑀺, 𑀢𑀢𑁄 𑀅𑀜𑁆𑀜𑁂𑀦, 𑀏𑀯𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀦𑀯 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀺.

𑁪𑁬𑁦. 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸 𑀤𑁆𑀯𑀸𑀭𑀁 𑀤𑀤𑀫𑀸𑀦𑀁 𑀧𑀝𑀺𑀮𑀸𑀪𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀦𑁄 𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦.

𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀸𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀆𑀬𑀲𑁆𑀫𑀸 𑀓𑀺𑀭 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀏𑀯𑀭𑀽𑀧𑁄 𑀕𑀼𑀡𑀯𑀺𑀲𑀺𑀝𑁆𑀞𑁄 𑀧𑀼𑀕𑁆𑀕𑀮𑁄 𑀦𑀢𑁆𑀣𑀻𑀢𑀺 𑀕𑀼𑀡𑀩𑀳𑀼𑀫𑀸𑀦𑁂𑀦 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀅𑀢𑀺𑀫𑀫𑀸𑀬𑀢𑀺. 𑀲𑁄 𑀲𑀤𑀸𑀧𑀺 𑀫𑀦𑀸𑀧𑀁 𑀘𑀻𑀯𑀭𑀁 𑀮𑀪𑀺𑀢𑁆𑀯𑀸 𑀭𑀚𑀺𑀢𑁆𑀯𑀸 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸 𑀣𑁂𑀭𑀲𑁆𑀲𑁂𑀯 𑀤𑁂𑀢𑀺, 𑀧𑀼𑀭𑁂𑀪𑀢𑁆𑀢𑁂 𑀧𑀡𑀻𑀢𑀁 𑀬𑀸𑀕𑀼𑀔𑀚𑁆𑀚𑀓𑀁 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀯𑀸 𑀮𑀪𑀺𑀢𑁆𑀯𑀸𑀧𑀺 𑀣𑁂𑀭𑀲𑁆𑀲𑁂𑀯 𑀤𑁂𑀢𑀺, 𑀧𑀘𑁆𑀙𑀸𑀪𑀢𑁆𑀢𑁂 𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀮𑀪𑀺𑀢𑁆𑀯𑀸𑀧𑀺 𑀣𑁂𑀭𑀲𑁆𑀲𑁂𑀯 𑀤𑁂𑀢𑀺, 𑀉𑀧𑀝𑁆𑀞𑀸𑀓𑀓𑀼𑀮𑁂𑀳𑀺 𑀤𑀸𑀭𑀓𑁂 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸𑀧𑀺 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑁆𑀯𑀸 𑀲𑀬𑀁 𑀅𑀦𑀼𑀲𑀸𑀯𑀦𑀓𑀫𑁆𑀫𑀁 𑀓𑀭𑁄𑀢𑀺. 𑀆𑀬𑀲𑁆𑀫𑀸𑀧𑀺 𑀲𑀸𑀭𑀺𑀧𑀼𑀢𑁆𑀢𑁄 ‘‘𑀧𑀺𑀢𑀼 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀸𑀫 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀪𑀸𑀭𑁄, 𑀢𑀁 𑀫𑀬𑀸 𑀪𑀕𑀯𑀢𑁄 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁 𑀆𑀦𑀦𑁆𑀤𑁄 𑀓𑀭𑁄𑀢𑀺, 𑀅𑀳𑀁 𑀆𑀦𑀦𑁆𑀤𑀁 𑀦𑀺𑀲𑁆𑀲𑀸𑀬 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀯𑀺𑀳𑀭𑀺𑀢𑀼𑀁 𑀮𑀪𑀸𑀫𑀻’’𑀢𑀺 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀢𑀺𑀯𑀺𑀬 𑀫𑀫𑀸𑀬𑀢𑀺, 𑀲𑁄𑀧𑀺 𑀫𑀦𑀸𑀧𑀁 𑀘𑀻𑀯𑀭𑀁 𑀮𑀪𑀺𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲𑁂𑀯 𑀤𑁂𑀢𑀻𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀏𑀯𑀁 𑀕𑀼𑀡𑀩𑀳𑀼𑀫𑀸𑀦𑁂𑀦 𑀫𑀫𑀸𑀬𑀦𑁆𑀢𑁄 𑀢𑀤𑀸 𑀉𑀧𑁆𑀧𑀦𑁆𑀦𑀫𑁆𑀧𑀺 𑀢𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀸𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀦𑀯𑀫𑀁 𑀯𑀸 𑀪𑀕𑀯𑀸 𑀤𑀺𑀯𑀲𑀁 𑀤𑀲𑀫𑀁 𑀯𑀸𑀢𑀺 𑀏𑀢𑁆𑀣 𑀧𑀦 𑀲𑀘𑁂 𑀪𑀯𑁂𑀬𑁆𑀬 ‘‘𑀓𑀣𑀁 𑀣𑁂𑀭𑁄 𑀚𑀸𑀦𑀸𑀢𑀻’’𑀢𑀺? 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺 𑀚𑀸𑀦𑀸𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀓𑀺𑀭 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀓𑁆𑀓𑀫𑀢𑀺 ‘‘𑀅𑀳𑀁 𑀏𑀢𑁆𑀢𑀓𑁂𑀦 𑀦𑀸𑀫 𑀓𑀸𑀮𑁂𑀦 𑀆𑀕𑀘𑁆𑀙𑀺𑀲𑁆𑀲𑀸𑀫𑀺, 𑀏𑀢𑁆𑀣𑀦𑁆𑀢𑀭𑁂 𑀪𑀕𑀯𑀦𑁆𑀢𑀁 𑀫𑀸 𑀧𑀫𑀚𑁆𑀚𑀻’’𑀢𑀺. 𑀲𑀘𑁂 𑀲𑀫𑁆𑀫𑀼𑀔𑀸 𑀦 𑀆𑀧𑀼𑀘𑁆𑀙𑀢𑀺, 𑀪𑀺𑀓𑁆𑀔𑀽 𑀧𑁂𑀲𑁂𑀢𑁆𑀯𑀸𑀧𑀺 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀲𑀘𑁂 𑀅𑀜𑁆𑀜𑀢𑁆𑀣 𑀯𑀲𑁆𑀲𑀁 𑀯𑀲𑀢𑀺, 𑀬𑁂 𑀧𑀞𑀫𑀢𑀭𑀁 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀏𑀯𑀁 𑀧𑀳𑀺𑀡𑀢𑀺 ‘‘𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀘 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀣, 𑀆𑀦𑀦𑁆𑀤𑀲𑁆𑀲 𑀘 𑀆𑀭𑁄𑀕𑁆𑀬𑀁 𑀯𑀢𑁆𑀯𑀸 𑀫𑀁 ‘𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀆𑀕𑀫𑀺𑀲𑁆𑀲𑀢𑀻’𑀢𑀺 𑀯𑀤𑀣𑀸’’𑀢𑀺 𑀲𑀤𑀸 𑀘 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀤𑀺𑀯𑀲𑁂𑀬𑁂𑀯 𑀏𑀢𑀺. 𑀅𑀧𑀺𑀘𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀦𑀼𑀫𑀸𑀦𑁂𑀦𑀧𑀺 𑀚𑀸𑀦𑀸𑀢𑀺 ‘‘𑀏𑀢𑁆𑀢𑀓𑁂 𑀤𑀺𑀯𑀲𑁂 𑀪𑀕𑀯𑀢𑀸 𑀯𑀺𑀬𑁄𑀕𑀁 𑀲𑀳𑀦𑁆𑀢𑁄 𑀅𑀥𑀺𑀯𑀸𑀲𑁂𑀦𑁆𑀢𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀯𑀲𑀺, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀅𑀲𑀼𑀓𑀁 𑀦𑀸𑀫 𑀤𑀺𑀯𑀲𑀁 𑀦 𑀅𑀢𑀺𑀓𑁆𑀓𑀫𑀺𑀲𑁆𑀲𑀢𑀺 𑀅𑀤𑁆𑀥𑀸 𑀆𑀕𑀫𑀺𑀲𑁆𑀲𑀢𑀻’’𑀢𑀺. 𑀬𑁂𑀲𑀁 𑀬𑁂𑀲𑀜𑁆𑀳𑀺 𑀧𑀜𑁆𑀜𑀸 𑀫𑀳𑀢𑀻 𑀢𑁂𑀲𑀁 𑀢𑁂𑀲𑀁 𑀪𑀕𑀯𑀢𑀺 𑀧𑁂𑀫𑀜𑁆𑀘 𑀕𑀸𑀭𑀯𑁄 𑀘 𑀫𑀳𑀸 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦𑀸𑀧𑀺 𑀚𑀸𑀦𑀸𑀢𑀺. 𑀏𑀯𑀁 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺 𑀚𑀸𑀦𑀸𑀢𑀺. 𑀢𑁂𑀦𑀸𑀳 𑁋 ‘‘𑀦𑀯𑀫𑀁 𑀯𑀸 𑀪𑀕𑀯𑀸 𑀤𑀺𑀯𑀲𑀁 𑀤𑀲𑀫𑀁 𑀯𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀬𑀲𑁆𑀫𑀸 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀦 𑀮𑁄𑀓𑀯𑀚𑁆𑀚𑀁; 𑀢𑀲𑁆𑀫𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀯𑀼𑀢𑁆𑀢𑀲𑀤𑀺𑀲𑀫𑁂𑀯 𑀧𑀭𑀺𑀘𑁆𑀙𑁂𑀤𑀁 𑀓𑀭𑁄𑀦𑁆𑀢𑁄 ‘‘𑀅𑀣 𑀔𑁄 𑀪𑀕𑀯𑀸…𑀧𑁂… 𑀥𑀸𑀭𑁂𑀢𑀼’’𑀦𑁆𑀢𑀺. 𑀲𑀘𑁂 𑀧𑀦 𑀣𑁂𑀭𑁂𑀦 𑀅𑀤𑁆𑀥𑀫𑀸𑀲𑁄 𑀯𑀸 𑀫𑀸𑀲𑁄 𑀯𑀸 𑀉𑀤𑁆𑀤𑀺𑀝𑁆𑀞𑁄 𑀅𑀪𑀯𑀺𑀲𑁆𑀲, 𑀲𑁄𑀧𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄 𑀅𑀲𑁆𑀲.

𑁪𑁬𑁨-𑁩. 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀦𑁆𑀢𑀺 𑀬𑁂𑀦 𑀓𑁂𑀦𑀘𑀺 𑀦𑀺𑀝𑁆𑀞𑀸𑀦𑁂𑀦 𑀦𑀺𑀝𑁆𑀞𑀺𑀢𑁂 𑀘𑀻𑀯𑀭𑀲𑁆𑀫𑀺𑀁. 𑀬𑀲𑁆𑀫𑀸 𑀧𑀦 𑀢𑀁 𑀘𑀻𑀯𑀭𑀁 𑀓𑀭𑀡𑁂𑀦𑀧𑀺 𑀦𑀺𑀝𑁆𑀞𑀺𑀢𑀁 𑀳𑁄𑀢𑀺, 𑀦𑀲𑁆𑀲𑀦𑀸𑀤𑀻𑀳𑀺𑀧𑀺 𑀢𑀲𑁆𑀫𑀸𑀲𑁆𑀲 𑀧𑀤𑀪𑀸𑀚𑀦𑁂 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀓𑀢𑀁 𑀯𑀸 𑀳𑁄𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀢𑀦𑁆𑀢𑀺 𑀲𑀽𑀘𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂𑀦 𑀓𑀢𑀁, 𑀲𑀽𑀘𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀬𑀁𑀓𑀺𑀜𑁆𑀘𑀺 𑀲𑀽𑀘𑀺𑀬𑀸 𑀓𑀢𑁆𑀢𑀩𑁆𑀩𑀁 𑀧𑀸𑀲𑀧𑀝𑁆𑀝𑀕𑀡𑁆𑀞𑀺𑀓𑀧𑀝𑁆𑀝𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸 𑀲𑀽𑀘𑀺𑀬𑀸 𑀧𑀝𑀺𑀲𑀸𑀫𑀦𑀁. 𑀦𑀝𑁆𑀞𑀦𑁆𑀢𑀺 𑀘𑁄𑀭𑀸𑀤𑀻𑀳𑀺 𑀳𑀝𑀁, 𑀏𑀢𑀫𑁆𑀧𑀺 𑀳𑀺 𑀓𑀭𑀡𑀧𑀮𑀺𑀩𑁄𑀥𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸 𑀦𑀺𑀝𑁆𑀞𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀦𑀝𑁆𑀞𑀦𑁆𑀢𑀺 𑀉𑀧𑀘𑀺𑀓𑀸𑀤𑀻𑀳𑀺 𑀔𑀸𑀬𑀺𑀢𑀁. 𑀤𑀟𑁆𑀠𑀦𑁆𑀢𑀺 𑀅𑀕𑁆𑀕𑀺𑀦𑀸 𑀤𑀟𑁆𑀠𑀁. 𑀘𑀻𑀯𑀭𑀸𑀲𑀸 𑀯𑀸 𑀉𑀧𑀘𑁆𑀙𑀺𑀦𑁆𑀦𑀸𑀢𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀼𑀮𑁂 𑀘𑀻𑀯𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀬𑀸 𑀘𑀻𑀯𑀭𑀸𑀲𑀸 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀲𑀸 𑀯𑀸 𑀉𑀧𑀘𑁆𑀙𑀺𑀦𑁆𑀦𑀸, 𑀏𑀢𑁂𑀲𑀫𑁆𑀧𑀺 𑀳𑀺 𑀓𑀭𑀡𑀧𑀮𑀺𑀩𑁄𑀥𑀲𑁆𑀲𑁂𑀯 𑀦𑀺𑀝𑁆𑀞𑀺𑀢𑀢𑁆𑀢𑀸 𑀦𑀺𑀝𑁆𑀞𑀺𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂𑀢𑀺 𑀓𑀣𑀺𑀦𑁂 𑀘 𑀉𑀩𑁆𑀪𑀢𑀲𑁆𑀫𑀺𑀁. 𑀏𑀢𑁂𑀦 𑀤𑀼𑀢𑀺𑀬𑀲𑁆𑀲 𑀧𑀮𑀺𑀩𑁄𑀥𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀁 𑀧𑀦 𑀓𑀣𑀺𑀦𑀁 𑀬𑀲𑁆𑀫𑀸 𑀅𑀝𑁆𑀞𑀲𑀼 𑀯𑀸 𑀫𑀸𑀢𑀺𑀓𑀸𑀲𑀼 𑀏𑀓𑀸𑀬 𑀅𑀦𑁆𑀢𑀭𑀼𑀩𑁆𑀪𑀸𑀭𑁂𑀦 𑀯𑀸 𑀉𑀤𑁆𑀥𑀭𑀻𑀬𑀢𑀺, 𑀢𑁂𑀦𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀺𑀓𑀸 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬 𑁋 𑀧𑀓𑁆𑀓𑀫𑀦𑀦𑁆𑀢𑀺𑀓𑀸, 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸, 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸, 𑀦𑀸𑀲𑀦𑀦𑁆𑀢𑀺𑀓𑀸, 𑀲𑀯𑀦𑀦𑁆𑀢𑀺𑀓𑀸, 𑀆𑀲𑀸𑀯𑀘𑁆𑀙𑁂𑀤𑀺𑀓𑀸, 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑀸, 𑀲𑀳𑀼𑀩𑁆𑀪𑀸𑀭𑀸’’𑀢𑀺 𑀏𑀯𑀁 𑀅𑀝𑁆𑀞 𑀫𑀸𑀢𑀺𑀓𑀸𑀬𑁄 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 𑀆𑀕𑀢𑀸. 𑀅𑀦𑁆𑀢𑀭𑀼𑀩𑁆𑀪𑀸𑀭𑁄𑀧𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄; 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀓𑀣𑀺𑀦𑀁 𑀉𑀤𑁆𑀥𑀭𑁂𑀬𑁆𑀬, 𑀏𑀲𑀸 𑀜𑀢𑁆𑀢𑀺. 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄; 𑀲𑀗𑁆𑀖𑁄 𑀓𑀣𑀺𑀦𑀁 𑀉𑀤𑁆𑀥𑀭𑀢𑀺, 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺, 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑁄, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀉𑀩𑁆𑀪𑀢𑀁 𑀲𑀗𑁆𑀖𑁂𑀦 𑀓𑀣𑀺𑀦𑀁, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀧𑀸𑀘𑀺. 𑁯𑁨𑁬) 𑀏𑀯𑀁 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂 𑀆𑀕𑀢𑁄. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀆𑀕𑀢𑀝𑁆𑀞𑀸𑀦𑁂𑀬𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀇𑀥 𑀧𑀦 𑀯𑀼𑀘𑁆𑀘𑀫𑀸𑀦𑁂 𑀧𑀸𑀴𑀺 𑀆𑀳𑀭𑀺𑀢𑀩𑁆𑀩𑀸 𑀳𑁄𑀢𑀺, 𑀅𑀢𑁆𑀣𑁄𑀧𑀺 𑀯𑀢𑁆𑀢𑀩𑁆𑀩𑁄. 𑀯𑀼𑀢𑁆𑀢𑁄𑀧𑀺 𑀘 𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺, 𑀅𑀝𑁆𑀞𑀸𑀦𑁂 𑀯𑀼𑀢𑁆𑀢𑀢𑁆𑀢𑀸𑀬.

𑀤𑀲𑀸𑀳𑀧𑀭𑀫𑀦𑁆𑀢𑀺 𑀤𑀲 𑀅𑀳𑀸𑀦𑀺 𑀧𑀭𑀫𑁄 𑀧𑀭𑀺𑀘𑁆𑀙𑁂𑀤𑁄 𑀅𑀲𑁆𑀲𑀸𑀢𑀺 𑀤𑀲𑀸𑀳𑀧𑀭𑀫𑁄, 𑀢𑀁 𑀤𑀲𑀸𑀳𑀧𑀭𑀫𑀁 𑀓𑀸𑀮𑀁 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀤𑀪𑀸𑀚𑀦𑁂 𑀧𑀦 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀤𑀲𑀸𑀳𑀧𑀭𑀫𑀢𑀸 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀤𑀲𑀸𑀳𑀧𑀭𑀫’’𑀦𑁆𑀢𑀺 𑀏𑀢𑁆𑀣 𑀬𑀸 𑀤𑀲𑀸𑀳𑀧𑀭𑀫𑀢𑀸 𑀤𑀲𑀸𑀳𑀧𑀭𑀫𑀪𑀸𑀯𑁄, 𑀅𑀬𑀁 𑀏𑀢𑁆𑀢𑀓𑁄 𑀓𑀸𑀮𑁄 𑀬𑀸𑀯 𑀦𑀸𑀢𑀺𑀓𑁆𑀓𑀫𑀢𑀺 𑀢𑀸𑀯 𑀥𑀸𑀭𑁂𑀢𑀩𑁆𑀩𑀦𑁆𑀢𑀺.

𑀅𑀥𑀺𑀝𑁆𑀞𑀺𑀢𑀯𑀺𑀓𑀧𑁆𑀧𑀺𑀢𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀢𑀺𑀭𑁂𑀓𑀁 𑀘𑀻𑀯𑀭𑀦𑁆𑀢𑀺 𑀅𑀢𑀺𑀭𑁂𑀓𑀘𑀻𑀯𑀭𑀁. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁 ‘‘𑀅𑀦𑀥𑀺𑀝𑁆𑀞𑀺𑀢𑀁 𑀅𑀯𑀺𑀓𑀧𑁆𑀧𑀺𑀢’’𑀦𑁆𑀢𑀺.

𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀦𑁆𑀢𑀺 𑀔𑁄𑀫𑀁, 𑀓𑀧𑁆𑀧𑀸𑀲𑀺𑀓𑀁, 𑀓𑁄𑀲𑁂𑀬𑁆𑀬𑀁, 𑀓𑀫𑁆𑀩𑀮𑀁, 𑀲𑀸𑀡𑀁, 𑀪𑀗𑁆𑀕𑀦𑁆𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁. 𑀏𑀢𑁂𑀦 𑀘𑀻𑀯𑀭𑀲𑁆𑀲 𑀚𑀸𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀫𑀸𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀆𑀳. 𑀢𑀲𑁆𑀲 𑀧𑀫𑀸𑀡𑀁 𑀤𑀻𑀖𑀢𑁄 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄, 𑀢𑀺𑀭𑀺𑀬𑀁 𑀯𑀺𑀤𑀢𑁆𑀣𑀺. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀬𑀸𑀫𑁂𑀦 𑀅𑀝𑁆𑀞𑀗𑁆𑀕𑀼𑀮𑀁 𑀲𑀼𑀕𑀢𑀗𑁆𑀕𑀼𑀮𑁂𑀦 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀁 𑀧𑀘𑁆𑀙𑀺𑀫𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮).

𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀚𑀸𑀢𑀺𑀧𑁆𑀧𑀫𑀸𑀡𑀁 𑀘𑀻𑀯𑀭𑀁 𑀤𑀲𑀸𑀳𑀧𑀭𑀫𑀁 𑀓𑀸𑀮𑀁 𑀅𑀢𑀺𑀓𑁆𑀓𑀸𑀫𑀬𑀢𑁄, 𑀏𑀢𑁆𑀣𑀦𑁆𑀢𑀭𑁂 𑀬𑀣𑀸 𑀅𑀢𑀺𑀭𑁂𑀓𑀘𑀻𑀯𑀭𑀁 𑀦 𑀳𑁄𑀢𑀺 𑀢𑀣𑀸 𑀅𑀓𑀼𑀩𑁆𑀩𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀢𑀜𑁆𑀘 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀘𑀲𑁆𑀲 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀧𑀼𑀩𑁆𑀩𑀪𑀸𑀕𑁂 𑀓𑀢𑁆𑀢𑀩𑁆𑀩𑀲𑁆𑀲 𑀯𑀺𑀦𑀬𑀓𑀫𑁆𑀫𑀲𑁆𑀲𑁂𑀢𑀁 𑀦𑀸𑀫𑀁. 𑀦𑀺𑀲𑁆𑀲𑀕𑁆𑀕𑀺𑀬𑀫𑀲𑁆𑀲 𑀅𑀢𑁆𑀣𑀻𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀫𑀺𑀘𑁆𑀘𑁂𑀯. 𑀓𑀺𑀦𑁆𑀢𑀁? 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀲𑀦𑀺𑀲𑁆𑀲𑀕𑁆𑀕𑀺𑀬𑀯𑀺𑀦𑀬𑀓𑀫𑁆𑀫𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀧𑀤𑀪𑀸𑀚𑀦𑁂 𑀧𑀦 𑀧𑀞𑀫𑀁 𑀢𑀸𑀯 𑀅𑀢𑁆𑀣𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻’’𑀢𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 ‘‘𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀦 𑀬𑀲𑁆𑀲 𑀘 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀬𑀣𑀸 𑀘 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀖𑀲𑁆𑀲 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂𑀢𑀺 𑀏𑀢𑁆𑀣 𑀬𑀁 𑀤𑀺𑀯𑀲𑀁 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦𑀁 𑀢𑀲𑁆𑀲 𑀬𑁄 𑀅𑀭𑀼𑀡𑁄, 𑀲𑁄 𑀉𑀧𑁆𑀧𑀦𑁆𑀦𑀤𑀺𑀯𑀲𑀦𑀺𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑀏𑀦 𑀲𑀤𑁆𑀥𑀺𑀁 𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂𑀧𑀺 𑀩𑀳𑀽𑀦𑀺 𑀏𑀓𑀚𑁆𑀛𑀁 𑀩𑀦𑁆𑀥𑀺𑀢𑁆𑀯𑀸 𑀯𑀸 𑀯𑁂𑀞𑁂𑀢𑁆𑀯𑀸 𑀯𑀸 𑀞𑀧𑀺𑀢𑀸𑀦𑀺 𑀏𑀓𑀸𑀯 𑀆𑀧𑀢𑁆𑀢𑀺. 𑀅𑀩𑀤𑁆𑀥𑀸𑀯𑁂𑀞𑀺𑀢𑁂𑀲𑀼 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄.

𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸𑀢𑀺 𑀓𑀣𑀁 𑀤𑁂𑀲𑁂𑀢𑀩𑁆𑀩𑀸? 𑀬𑀣𑀸 𑀔𑀦𑁆𑀥𑀓𑁂 𑀯𑀼𑀢𑁆𑀢𑀁, 𑀓𑀣𑀜𑁆𑀘 𑀢𑀢𑁆𑀣 𑀯𑀼𑀢𑁆𑀢𑀁? 𑀏𑀯𑀁 𑀯𑀼𑀢𑁆𑀢𑀁 𑁋 ‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀢𑀁 𑀧𑀝𑀺𑀤𑁂𑀲𑁂𑀫𑀻’’’𑀢𑀺 (𑀘𑀽𑀴𑀯. 𑁨𑁩𑁯). 𑀇𑀥 𑀧𑀦 𑀲𑀘𑁂 𑀏𑀓𑀁 𑀘𑀻𑀯𑀭𑀁 𑀳𑁄𑀢𑀺 ‘‘𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀤𑁆𑀯𑁂, ‘‘𑀤𑁆𑀯𑁂’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀩𑀳𑀽𑀦𑀺 ‘‘𑀲𑀫𑁆𑀩𑀳𑀼𑀮𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀦𑀺𑀲𑁆𑀲𑀚𑁆𑀚𑀦𑁂𑀧𑀺 𑀲𑀘𑁂 𑀏𑀓𑀁 𑀬𑀣𑀸𑀧𑀸𑀴𑀺𑀫𑁂𑀯 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀤𑁆𑀯𑁂 𑀯𑀸 𑀩𑀳𑀽𑀦𑀺 𑀯𑀸, ‘‘𑀇𑀫𑀸𑀦𑀺 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀸𑀦𑀺 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺, 𑀇𑀫𑀸𑀦𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀸𑀴𑀺𑀁 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀅𑀜𑁆𑀜𑀣𑀸𑀧𑀺 𑀯𑀢𑁆𑀢𑀩𑁆𑀩𑀁.

𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁 𑁋 ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀲𑀭𑀢𑀺 𑀯𑀺𑀯𑀭𑀢𑀺 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺 𑀤𑁂𑀲𑁂𑀢𑀺, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬’𑀦𑁆𑀢𑀺.

𑀢𑁂𑀦 𑀯𑀢𑁆𑀢𑀩𑁆𑀩𑁄 ‘𑀧𑀲𑁆𑀲𑀲𑀻’𑀢𑀺? ‘𑀆𑀫, 𑀧𑀲𑁆𑀲𑀸𑀫𑀻’𑀢𑀺. 𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 (𑀘𑀽𑀴𑀯. 𑁨𑁩𑁯). 𑀤𑁆𑀯𑀻𑀲𑀼 𑀧𑀦 𑀲𑀫𑁆𑀩𑀳𑀼𑀮𑀸𑀲𑀼 𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀘𑀦𑀪𑁂𑀤𑁄 𑀜𑀸𑀢𑀩𑁆𑀩𑁄.

𑀘𑀻𑀯𑀭𑀤𑀸𑀦𑁂𑀧𑀺 ‘‘𑀲𑀗𑁆𑀖𑁄 𑀇𑀫𑀁 𑀘𑀻𑀯𑀭𑀁 𑀇𑀫𑀸𑀦𑀺 𑀘𑀻𑀯𑀭𑀸𑀦𑀻’’𑀢𑀺 𑀯𑀢𑁆𑀣𑀼𑀯𑀲𑁂𑀦 𑀯𑀘𑀦𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀡𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲 𑀘 𑀦𑀺𑀲𑁆𑀲𑀚𑁆𑀚𑀦𑁂𑀧𑀺 𑀏𑀲𑁂𑀯 𑀦𑀬𑁄.

𑀆𑀧𑀢𑁆𑀢𑀺𑀤𑁂𑀲𑀦𑀸𑀧𑀝𑀺𑀕𑁆𑀕𑀳𑀡𑁂𑀲𑀼 𑀧𑀦𑁂𑀢𑁆𑀣 𑀅𑀬𑀁 𑀧𑀸𑀴𑀺 𑁋 ‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀅𑀳𑀁, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀢𑀁 𑀧𑀝𑀺𑀤𑁂𑀲𑁂𑀫𑀻’𑀢𑀺. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀢𑁂 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸 𑁋

‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀲𑀭𑀢𑀺 𑀯𑀺𑀯𑀭𑀢𑀺 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺 𑀤𑁂𑀲𑁂𑀢𑀺. 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬’𑀦𑁆𑀢𑀺.

𑀢𑁂𑀦 𑀯𑀢𑁆𑀢𑀩𑁆𑀩𑁄 ‘𑀧𑀲𑁆𑀲𑀲𑀻’𑀢𑀺? ‘𑀆𑀫, 𑀧𑀲𑁆𑀲𑀸𑀫𑀻’𑀢𑀺. ‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’𑀢𑀺.

𑀢𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀆𑀯𑀼𑀲𑁄, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀢𑀁 𑀧𑀝𑀺𑀤𑁂𑀲𑁂𑀫𑀻’𑀢𑀺. 𑀢𑁂𑀦 𑀯𑀢𑁆𑀢𑀩𑁆𑀩𑁄 ‘𑀧𑀲𑁆𑀲𑀲𑀻’𑀢𑀺, 𑀆𑀫 𑀧𑀲𑁆𑀲𑀸𑀫𑀻𑀢𑀺 𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 (𑀘𑀽𑀴𑀯. 𑁨𑁩𑁯). 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀧𑀢𑁆𑀢𑀺𑀬𑀸 𑀦𑀸𑀫𑀕𑁆𑀕𑀳𑀡𑀁 𑀯𑀘𑀦𑀪𑁂𑀤𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸 𑀘 𑀕𑀡𑀲𑁆𑀲 𑀦𑀺𑀲𑁆𑀲𑀚𑁆𑀚𑀦𑁂 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀦𑀺𑀲𑁆𑀲𑀚𑁆𑀚𑀦𑁂𑀧𑀺 𑀧𑀸𑀴𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀺 𑀳𑀺 𑀯𑀺𑀲𑁂𑀲𑁄 𑀪𑀯𑁂𑀬𑁆𑀬, 𑀬𑀣𑁂𑀯 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼𑀁, 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑁄. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀢𑁂 𑀪𑀺𑀓𑁆𑀔𑀽 𑀜𑀸𑀧𑁂𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 ‘‘𑀢𑀺𑀡𑁆𑀡𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼𑀁, 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑁄. 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁬𑁮) 𑀦𑀬𑁂𑀦 𑀯𑀺𑀲𑀼𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀯𑀼𑀢𑁆𑀢𑁄, 𑀏𑀯𑀫𑀺𑀥𑀸𑀧𑀺 𑀯𑀺𑀲𑀼𑀁 𑀧𑀸𑀴𑀺𑀁 𑀯𑀤𑁂𑀬𑁆𑀬, 𑀬𑀲𑁆𑀫𑀸 𑀧𑀦 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀯𑀢𑁆𑀯𑀸 𑀕𑀢𑁄𑀢𑀺, 𑀕𑀡𑀲𑁆𑀲 𑀯𑀼𑀢𑁆𑀢𑀸 𑀧𑀸𑀴𑀺𑀬𑁂𑀯𑁂𑀢𑁆𑀣 𑀧𑀸𑀴𑀺.

𑀆𑀧𑀢𑁆𑀢𑀺𑀧𑀝𑀺𑀕𑁆𑀕𑀳𑀡𑁂 𑀧𑀦 𑀅𑀬𑀁 𑀯𑀺𑀲𑁂𑀲𑁄, 𑀬𑀣𑀸 𑀕𑀡𑀲𑁆𑀲 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀆𑀧𑀢𑁆𑀢𑀺𑀬𑀸 𑀤𑁂𑀲𑀺𑀬𑀫𑀸𑀦𑀸𑀬 𑀆𑀧𑀢𑁆𑀢𑀺𑀧𑀝𑀺𑀕𑁆𑀕𑀸𑀳𑀓𑁄 𑀪𑀺𑀓𑁆𑀔𑀼 𑀜𑀢𑁆𑀢𑀺𑀁 𑀞𑀧𑁂𑀢𑀺, 𑀏𑀯𑀁 𑀅𑀝𑁆𑀞𑀧𑁂𑀢𑁆𑀯𑀸 𑀤𑁆𑀯𑀻𑀲𑀼 𑀅𑀜𑁆𑀜𑀢𑀭𑁂𑀦 𑀬𑀣𑀸 𑀏𑀓𑀧𑀼𑀕𑁆𑀕𑀮𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀏𑀯𑀁 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸. 𑀤𑁆𑀯𑀺𑀦𑁆𑀦𑀜𑁆𑀳𑀺 𑀜𑀢𑁆𑀢𑀺𑀝𑁆𑀞𑀧𑀦𑀸 𑀦𑀸𑀫 𑀦𑀢𑁆𑀣𑀺, 𑀬𑀤𑀺 𑀲𑀺𑀬𑀸 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀯𑀺𑀲𑀼𑀁 𑀦 𑀯𑀤𑁂𑀬𑁆𑀬.

𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀤𑀸𑀦𑁂𑀧𑀺 𑀬𑀣𑀸 ‘‘𑀇𑀫𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻’’𑀢𑀺 𑀏𑀓𑁄 𑀯𑀤𑀢𑀺, 𑀏𑀯𑀁 ‘‘𑀇𑀫𑀁 𑀫𑀬𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀤𑁂𑀫𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀇𑀢𑁄 𑀕𑀭𑀼𑀓𑀢𑀭𑀸𑀦𑀺 𑀳𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀸𑀦𑀺𑀧𑀺 ‘‘𑀅𑀧𑀮𑁄𑀓𑁂𑀢𑁆𑀯𑀸 𑀓𑀸𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺 𑀅𑀢𑁆𑀣𑀺, 𑀢𑁂𑀲𑀁 𑀏𑀢𑀁 𑀅𑀦𑀼𑀮𑁄𑀫𑀁 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 𑀧𑀦 𑀤𑀸𑀢𑀩𑁆𑀩𑀫𑁂𑀯 𑀅𑀤𑀸𑀢𑀼𑀁 𑀦 𑀮𑀩𑁆𑀪𑀢𑀺, 𑀯𑀺𑀦𑀬𑀓𑀫𑁆𑀫𑀫𑀢𑁆𑀢𑀜𑁆𑀳𑁂𑀢𑀁. 𑀦 𑀢𑀁 𑀢𑁂𑀦 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑀺𑀦𑁆𑀦𑀫𑁂𑀯 𑀳𑁄𑀢𑀻𑀢𑀺.

𑁪𑁬𑁮. 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀻𑀢𑀺 𑀤𑀲𑀸𑀳𑀁 𑀅𑀢𑀺𑀓𑁆𑀓𑀦𑁆𑀢𑁂 𑀘𑀻𑀯𑀭𑁂 ‘‘𑀅𑀢𑀺𑀓𑁆𑀓𑀦𑁆𑀢𑀁 𑀇𑀤’’𑀦𑁆𑀢𑀺 𑀏𑀯𑀁𑀲𑀜𑁆𑀜𑀻, 𑀤𑀲𑀸𑀳𑁂 𑀯𑀸 𑀅𑀢𑀺𑀓𑁆𑀓𑀦𑁆𑀢𑁂 ‘‘𑀅𑀢𑀺𑀓𑁆𑀓𑀦𑁆𑀢𑁄 𑀤𑀲𑀸𑀳𑁄’’𑀢𑀺 𑀏𑀯𑀁𑀲𑀜𑁆𑀜𑀻. 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀦 𑀇𑀥 𑀲𑀜𑁆𑀜𑀸 𑀭𑀓𑁆𑀔𑀢𑀺. 𑀬𑁄𑀧𑀺 𑀏𑀯𑀁𑀲𑀜𑁆𑀜𑀻, 𑀢𑀲𑁆𑀲𑀧𑀺 𑀢𑀁 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀘. 𑀲𑀦𑀺𑀲𑁆𑀲𑀕𑁆𑀕𑀺𑀬𑀯𑀺𑀦𑀬𑀓𑀫𑁆𑀫𑀁 𑀯𑀸 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀉𑀪𑁄𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑀸 𑀬𑀼𑀚𑁆𑀚𑀦𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀅𑀯𑀺𑀲𑁆𑀲𑀚𑁆𑀚𑀺𑀢𑁂 𑀯𑀺𑀲𑁆𑀲𑀚𑁆𑀚𑀺𑀢𑀲𑀜𑁆𑀜𑀻𑀢𑀺 𑀓𑀲𑁆𑀲𑀘𑀺 𑀅𑀤𑀺𑀦𑁆𑀦𑁂 𑀅𑀧𑀭𑀺𑀘𑁆𑀘𑀢𑁆𑀢𑁂 ‘‘𑀧𑀭𑀺𑀘𑁆𑀘𑀢𑁆𑀢𑀁 𑀫𑀬𑀸’’𑀢𑀺 𑀏𑀯𑀁𑀲𑀜𑁆𑀜𑀻.

𑀅𑀦𑀝𑁆𑀞𑁂 𑀦𑀝𑁆𑀞𑀲𑀜𑁆𑀜𑀻𑀢𑀺 𑀅𑀢𑁆𑀢𑀦𑁄 𑀘𑀻𑀯𑀭𑁂𑀦 𑀲𑀤𑁆𑀥𑀺𑀁 𑀩𑀳𑀽𑀦𑀺 𑀅𑀜𑁆𑀜𑁂𑀲𑀁 𑀘𑀻𑀯𑀭𑀸𑀦𑀺 𑀏𑀓𑀢𑁄 𑀞𑀧𑀺𑀢𑀸𑀦𑀺 𑀘𑁄𑀭𑀸 𑀳𑀭𑀦𑁆𑀢𑀺. 𑀢𑀢𑁆𑀭𑁂𑀲 𑀅𑀢𑁆𑀢𑀦𑁄 𑀘𑀻𑀯𑀭𑁂 𑀅𑀦𑀝𑁆𑀞𑁂 𑀦𑀝𑁆𑀞𑀲𑀜𑁆𑀜𑀻 𑀳𑁄𑀢𑀺. 𑀏𑀲 𑀦𑀬𑁄 𑀅𑀯𑀺𑀦𑀝𑁆𑀞𑀸𑀤𑀻𑀲𑀼𑀧𑀺.

𑀅𑀯𑀺𑀮𑀼𑀢𑁆𑀢𑁂𑀢𑀺 𑀏𑀢𑁆𑀣 𑀧𑀦 𑀕𑀩𑁆𑀪𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀲𑀬𑁆𑀳𑀸𑀯𑀳𑀸𑀭𑀯𑀲𑁂𑀦 𑀅𑀯𑀺𑀮𑀼𑀢𑁆𑀢𑁂𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀲𑀓𑀺𑀁 𑀦𑀺𑀯𑀢𑁆𑀣𑀁 𑀯𑀸 𑀲𑀓𑀺𑀁 𑀧𑀸𑀭𑀼𑀢𑀁 𑀯𑀸 𑀓𑀸𑀬𑀢𑁄 𑀅𑀫𑁄𑀘𑁂𑀢𑁆𑀯𑀸 𑀤𑀺𑀯𑀲𑀫𑁆𑀧𑀺 𑀯𑀺𑀘𑀭𑀢𑀺, 𑀏𑀓𑀸𑀯 𑀆𑀧𑀢𑁆𑀢𑀺. 𑀫𑁄𑀘𑁂𑀢𑁆𑀯𑀸 𑀫𑁄𑀘𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀺 𑀯𑀸 𑀧𑀸𑀭𑀼𑀧𑀢𑀺 𑀯𑀸 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀤𑀼𑀦𑁆𑀦𑀺𑀯𑀢𑁆𑀣𑀁 𑀯𑀸 𑀤𑀼𑀧𑁆𑀧𑀸𑀭𑀼𑀢𑀁 𑀯𑀸 𑀲𑀡𑁆𑀞𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑀲𑁆𑀲 𑀢𑀁 𑀧𑀭𑀺𑀪𑀼𑀜𑁆𑀚𑀢𑁄𑀧𑀺 𑀅𑀦𑀸𑀧𑀢𑁆𑀢𑀺, ‘‘𑀅𑀦𑀸𑀧𑀢𑁆𑀢𑀺 𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 (𑀧𑀸𑀭𑀸. 𑁫𑁭𑁦) 𑀆𑀤𑀺𑀯𑀘𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁. 𑀅𑀦𑀢𑀺𑀓𑁆𑀓𑀦𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀼𑀓𑁆𑀓𑀝𑀁 𑀧𑀭𑀺𑀪𑁄𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁪𑁬𑁯. ‘‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀏𑀢𑁆𑀣 𑀧𑀦 𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀯𑀺𑀓𑀧𑁆𑀧𑀦𑀼𑀧𑀕𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀬𑀸𑀦𑀺 𑀢𑀸𑀦𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸𑀦𑀺 ‘𑀢𑀺𑀘𑀻𑀯𑀭’𑀦𑁆𑀢𑀺 𑀯𑀸 ‘𑀯𑀲𑁆𑀲𑀺𑀓𑀲𑀸𑀝𑀺𑀓𑀸’𑀢𑀺 𑀯𑀸 ‘𑀦𑀺𑀲𑀻𑀤𑀦’𑀦𑁆𑀢𑀺 𑀯𑀸 ‘𑀧𑀘𑁆𑀘𑀢𑁆𑀣𑀭𑀡’𑀦𑁆𑀢𑀺 𑀯𑀸 ‘𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀻’𑀢𑀺 𑀯𑀸 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀓𑀦𑁆𑀢𑀺 𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑁆𑀢𑀺 𑀯𑀸 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀻𑀢𑀺 𑀦𑀼 𑀔𑁄 𑀉𑀤𑀸𑀳𑀼 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻’’𑀢𑀺, 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁; 𑀦𑀺𑀲𑀻𑀤𑀦𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀧𑀘𑁆𑀘𑀢𑁆𑀣𑀭𑀡𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀬𑀸𑀯𑀆𑀩𑀸𑀥𑀸 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁; 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁; 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮).

‘‘𑀢𑀢𑁆𑀣 𑀢𑀺𑀘𑀻𑀯𑀭𑀁’’ 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀭𑀚𑀺𑀢𑁆𑀯𑀸 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀢𑀲𑁆𑀲 𑀧𑀫𑀸𑀡𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀲𑀼𑀕𑀢𑀘𑀻𑀯𑀭𑀢𑁄 𑀊𑀦𑀓𑀁 𑀯𑀝𑁆𑀝𑀢𑀺, 𑀮𑀸𑀫𑀓𑀧𑀭𑀺𑀘𑁆𑀙𑁂𑀤𑁂𑀦 𑀲𑀗𑁆𑀖𑀸𑀝𑀺𑀬𑀸 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀘 𑀤𑀻𑀖𑀢𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑀁 𑀢𑀺𑀭𑀺𑀬𑀁 𑀫𑀼𑀝𑁆𑀞𑀺𑀢𑁆𑀢𑀺𑀓𑀁 𑀧𑀫𑀸𑀡𑀁 𑀯𑀝𑁆𑀝𑀢𑀺. 𑀅𑀦𑁆𑀢𑀭𑀯𑀸𑀲𑀓𑁄 𑀤𑀻𑀖𑀢𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑁄 𑀢𑀺𑀭𑀺𑀬𑀁 𑀤𑁆𑀯𑀺𑀳𑀢𑁆𑀣𑁄𑀧𑀺 𑀯𑀝𑁆𑀝𑀢𑀺. 𑀧𑀸𑀭𑀼𑀧𑀡𑁂𑀦𑀧𑀺 𑀳𑀺 𑀲𑀓𑁆𑀓𑀸 𑀦𑀸𑀪𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀦𑁆𑀢𑀺. 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀧𑀦 𑀅𑀢𑀺𑀭𑁂𑀓𑀁 𑀊𑀦𑀓𑀜𑁆𑀘 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁.

𑀢𑀢𑁆𑀣 𑀬𑀲𑁆𑀫𑀸 ‘‘𑀤𑁆𑀯𑁂 𑀘𑀻𑀯𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀸 𑁋 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑁂𑀢𑀺, 𑀯𑀸𑀘𑀸𑀬 𑀯𑀸 𑀅𑀥𑀺𑀝𑁆𑀞𑁂𑀢𑀻’’𑀢𑀺 (𑀧𑀭𑀺. 𑁩𑁨𑁨) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀼𑀭𑀸𑀡𑀲𑀗𑁆𑀖𑀸𑀝𑀺𑀁 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀦𑀯𑀁 𑀲𑀗𑁆𑀖𑀸𑀝𑀺𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀆𑀪𑁄𑀕𑀁 𑀓𑀢𑁆𑀯𑀸 𑀓𑀸𑀬𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁂𑀦 𑀓𑀸𑀬𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. 𑀇𑀤𑀁 𑀓𑀸𑀬𑁂𑀦 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦 𑀅𑀨𑀼𑀲𑀦𑁆𑀢𑀲𑁆𑀲 𑀦 𑀯𑀝𑁆𑀝𑀢𑀺. 𑀯𑀸𑀘𑀸𑀬 𑀅𑀥𑀺𑀝𑁆𑀞𑀸𑀦𑁂 𑀧𑀦 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸𑀘𑀸𑀬 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. 𑀢𑀢𑁆𑀭 𑀤𑀼𑀯𑀺𑀥𑀁 𑀅𑀥𑀺𑀝𑁆𑀞𑀸𑀦𑀁 𑁋 𑀲𑀘𑁂 𑀳𑀢𑁆𑀣𑀧𑀸𑀲𑁂 𑀳𑁄𑀢𑀺 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀅𑀣 𑀅𑀦𑁆𑀢𑁄𑀕𑀩𑁆𑀪𑁂 𑀯𑀸 𑀉𑀧𑀭𑀺𑀧𑀸𑀲𑀸𑀤𑁂 𑀯𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀯𑀸 𑀳𑁄𑀢𑀺 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀢𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀉𑀢𑁆𑀢𑀭𑀸𑀲𑀗𑁆𑀕𑁂 𑀅𑀦𑁆𑀢𑀭𑀯𑀸𑀲𑀓𑁂 𑀘. 𑀦𑀸𑀫𑀫𑀢𑁆𑀢𑀫𑁂𑀯 𑀳𑀺 𑀯𑀺𑀲𑁂𑀲𑁄. 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺 𑀲𑀗𑁆𑀖𑀸𑀝𑀺𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀅𑀦𑁆𑀢𑀭𑀯𑀸𑀲𑀓𑀦𑁆𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀦𑀸𑀫𑁂𑀦𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺. 𑀲𑀘𑁂 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀯𑀢𑁆𑀣𑁂𑀳𑀺 𑀲𑀗𑁆𑀖𑀸𑀝𑀺𑀆𑀤𑀻𑀦𑀺 𑀓𑀭𑁄𑀢𑀺, 𑀦𑀺𑀝𑁆𑀞𑀺𑀢𑁂 𑀭𑀚𑀦𑁂 𑀘 𑀓𑀧𑁆𑀧𑁂 𑀘 𑀇𑀫𑀁 ‘‘𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺. 𑀅𑀥𑀺𑀝𑁆𑀞𑀺𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀫𑀳𑀦𑁆𑀢𑀢𑀭𑀫𑁂𑀯 𑀤𑀼𑀢𑀺𑀬𑀧𑀝𑁆𑀝𑀁 𑀯𑀸 𑀔𑀡𑁆𑀟𑀁 𑀯𑀸 𑀲𑀁𑀲𑀺𑀩𑁆𑀩𑀦𑁆𑀢𑁂𑀦 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯. 𑀲𑀫𑁂 𑀯𑀸 𑀔𑀼𑀤𑁆𑀤𑀓𑁂 𑀯𑀸 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺.

𑀢𑀺𑀘𑀻𑀯𑀭𑀁 𑀧𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀺 𑀦 𑀯𑀝𑁆𑀝𑀢𑀻𑀢𑀺? 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀓𑀺𑀭𑀸𑀳 𑁋 ‘‘𑀢𑀺𑀘𑀻𑀯𑀭𑀁 𑀢𑀺𑀘𑀻𑀯𑀭𑀫𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑀁 𑀮𑀪𑁂𑀬𑁆𑀬 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀧𑀭𑀺𑀳𑀸𑀭𑁄 𑀦𑀺𑀭𑀢𑁆𑀣𑀓𑁄 𑀪𑀯𑁂𑀬𑁆𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀓𑀺𑀭 𑀅𑀯𑀲𑁂𑀲𑀸 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴𑀫𑁆𑀧𑀺 𑀪𑀕𑀯𑀢𑀸𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀝𑁆𑀝𑀢𑀻’’𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀦𑀸𑀫 𑀧𑀸𑀝𑁂𑀓𑁆𑀓𑀁 𑀦𑀺𑀥𑀸𑀦𑀫𑀼𑀔𑀫𑁂𑀢𑀦𑁆𑀢𑀺 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑁆𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑁂 𑀧𑀦 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑀲𑁆𑀲 𑀧𑀭𑀺𑀳𑀸𑀭𑁄 𑀯𑀼𑀢𑁆𑀢𑁄’’𑀢𑀺. 𑀉𑀪𑀢𑁄𑀯𑀺𑀪𑀗𑁆𑀕𑀪𑀸𑀡𑀓𑁄 𑀧𑀼𑀡𑁆𑀡𑀯𑀸𑀮𑀺𑀓𑀯𑀸𑀲𑀻 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄𑀧𑀺 𑀓𑀺𑀭 𑀆𑀳 𑁋 ‘‘𑀫𑀬𑀁 𑀧𑀼𑀩𑁆𑀩𑁂 𑀫𑀳𑀸𑀣𑁂𑀭𑀸𑀦𑀁 𑀅𑀲𑁆𑀲𑀼𑀫𑁆𑀳, 𑀅𑀭𑀜𑁆𑀜𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀭𑀼𑀓𑁆𑀔𑀲𑀼𑀲𑀺𑀭𑀸𑀤𑀻𑀲𑀼 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀧𑀥𑀸𑀦𑀁 𑀧𑀤𑀳𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺. 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀥𑀫𑁆𑀫𑀲𑀯𑀦𑀢𑁆𑀣𑀸𑀬 𑀕𑀢𑀸𑀦𑀜𑁆𑀘 𑀦𑁂𑀲𑀁 𑀲𑀽𑀭𑀺𑀬𑁂 𑀉𑀝𑁆𑀞𑀺𑀢𑁂 𑀲𑀸𑀫𑀡𑁂𑀭𑀸 𑀯𑀸 𑀤𑀳𑀭𑀪𑀺𑀓𑁆𑀔𑀽 𑀯𑀸 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀲𑀼𑀔𑀧𑀭𑀺𑀪𑁄𑀕𑀢𑁆𑀣𑀁 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀯𑀼𑀢𑁆𑀢𑀁 𑀧𑀼𑀩𑁆𑀩𑁂 𑀆𑀭𑀜𑁆𑀜𑀺𑀓𑀸 𑀪𑀺𑀓𑁆𑀔𑀽 𑀅𑀩𑀤𑁆𑀥𑀲𑀻𑀫𑀸𑀬𑀁 𑀤𑀼𑀧𑁆𑀧𑀭𑀺𑀳𑀸𑀭𑀦𑁆𑀢𑀺 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀫𑁂𑀯 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀁𑀲𑀽’’𑀢𑀺.

‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀸’’ 𑀅𑀦𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡𑀸 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀢𑁆𑀢𑀸𑀭𑁄 𑀯𑀲𑁆𑀲𑀺𑀓𑁂 𑀫𑀸𑀲𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀢𑀢𑁄 𑀧𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸. 𑀯𑀡𑁆𑀡𑀪𑁂𑀤𑀫𑀢𑁆𑀢𑀭𑀢𑁆𑀢𑀸𑀧𑀺 𑀘𑁂𑀲𑀸 𑀯𑀝𑁆𑀝𑀢𑀺. 𑀤𑁆𑀯𑁂 𑀧𑀦 𑀦 𑀯𑀝𑁆𑀝𑀦𑁆𑀢𑀺. ‘‘𑀦𑀺𑀲𑀻𑀤𑀦𑀁’’ 𑀯𑀼𑀢𑁆𑀢𑀦𑀬𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯, 𑀢𑀜𑁆𑀘 𑀔𑁄 𑀧𑀫𑀸𑀡𑀬𑀼𑀢𑁆𑀢𑀁 𑀏𑀓𑀫𑁂𑀯, 𑀤𑁆𑀯𑁂 𑀦 𑀯𑀝𑁆𑀝𑀦𑁆𑀢𑀺. ‘‘𑀧𑀘𑁆𑀘𑀢𑁆𑀣𑀭𑀡’’𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯, 𑀢𑀁 𑀧𑀦 𑀫𑀳𑀦𑁆𑀢𑀫𑁆𑀧𑀺 𑀯𑀝𑁆𑀝𑀢𑀺, 𑀏𑀓𑀫𑁆𑀧𑀺 𑀯𑀝𑁆𑀝𑀢𑀺, 𑀩𑀳𑀽𑀦𑀺𑀧𑀺 𑀯𑀝𑁆𑀝𑀦𑁆𑀢𑀺. 𑀦𑀻𑀮𑀫𑁆𑀧𑀺 𑀧𑀻𑀢𑀓𑀫𑁆𑀧𑀺 𑀲𑀤𑀲𑀫𑁆𑀧𑀺 𑀧𑀼𑀧𑁆𑀨𑀤𑀲𑀫𑁆𑀧𑀻𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑀁 𑀯𑀝𑁆𑀝𑀢𑀺. 𑀲𑀓𑀺𑀁 𑀅𑀥𑀺𑀝𑁆𑀞𑀺𑀢𑀁 𑀅𑀥𑀺𑀝𑁆𑀞𑀺𑀢𑀫𑁂𑀯 𑀳𑁄𑀢𑀺. ‘‘𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺’’ 𑀬𑀸𑀯 𑀆𑀩𑀸𑀥𑁄 𑀅𑀢𑁆𑀣𑀺, 𑀢𑀸𑀯 𑀧𑀫𑀸𑀡𑀺𑀓𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. 𑀆𑀩𑀸𑀥𑁂 𑀯𑀽𑀧𑀲𑀦𑁆𑀢𑁂 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸, 𑀏𑀓𑀸𑀯 𑀯𑀝𑁆𑀝𑀢𑀺. ‘‘𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁’’ 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯, 𑀬𑀸𑀯 𑀏𑀓𑀁 𑀥𑁄𑀯𑀺𑀬𑀢𑀺, 𑀢𑀸𑀯 𑀅𑀜𑁆𑀜𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀤𑁆𑀯𑁂 𑀯𑀝𑁆𑀝𑀦𑁆𑀢𑀺. 𑀅𑀧𑀭𑁂 𑀧𑀦 𑀣𑁂𑀭𑀸 ‘‘𑀦𑀺𑀥𑀸𑀦𑀫𑀼𑀔𑀫𑁂𑀢𑀁 𑀩𑀳𑀽𑀦𑀺𑀧𑀺 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀧𑀭𑀺𑀓𑁆𑀔𑀸𑀭𑀘𑁄𑀴𑁂 𑀕𑀡𑀦𑀸 𑀦𑀢𑁆𑀣𑀺, 𑀬𑀢𑁆𑀢𑀓𑀁 𑀇𑀘𑁆𑀙𑀢𑀺 𑀢𑀢𑁆𑀢𑀓𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯. 𑀣𑀯𑀺𑀓𑀸𑀧𑀺 𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑀁 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴𑀓’’𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯. 𑀩𑀳𑀽𑀦𑀺 𑀏𑀓𑀢𑁄 𑀓𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀦𑀺 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀪𑁂𑀲𑀚𑁆𑀚𑀦𑀯𑀓𑀫𑁆𑀫𑀫𑀸𑀢𑀸𑀧𑀺𑀢𑀼𑀆𑀤𑀻𑀦𑀁 𑀅𑀢𑁆𑀣𑀸𑀬 𑀞𑀧𑁂𑀦𑁆𑀢𑁂𑀦𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀜𑁆𑀘𑀪𑀺𑀲𑀺 𑀧𑀻𑀞𑀓𑀪𑀺𑀲𑀺 𑀩𑀺𑀫𑁆𑀩𑁄𑀳𑀦𑀁 𑀧𑀸𑀯𑀸𑀭𑁄 𑀓𑁄𑀚𑀯𑁄𑀢𑀺 𑀏𑀢𑁂𑀲𑀼 𑀧𑀦 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀣𑀸𑀬 𑀤𑀺𑀦𑁆𑀦𑀧𑀘𑁆𑀘𑀢𑁆𑀣𑀭𑀡𑁂 𑀘 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺𑀬𑁂𑀯.

𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀁 𑀧𑀦 𑀧𑀭𑀺𑀪𑀼𑀜𑁆𑀚𑀢𑁄 𑀓𑀣𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺? 𑀅𑀜𑁆𑀜𑀲𑁆𑀲 𑀤𑀸𑀦𑁂𑀦, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑁂𑀦, 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀦, 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦, 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦, 𑀓𑀸𑀮𑀁𑀓𑀺𑀭𑀺𑀬𑀸𑀬, 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂𑀦, 𑀧𑀘𑁆𑀘𑀼𑀤𑁆𑀥𑀭𑀡𑁂𑀦, 𑀙𑀺𑀤𑁆𑀤𑀪𑀸𑀯𑁂𑀦𑀸𑀢𑀺 𑀇𑀫𑁂𑀳𑀺 𑀦𑀯𑀳𑀺 𑀓𑀸𑀭𑀡𑁂𑀳𑀺 𑀯𑀺𑀚𑀳𑀢𑀺. 𑀢𑀢𑁆𑀣 𑀧𑀼𑀭𑀺𑀫𑁂𑀳𑀺 𑀅𑀝𑁆𑀞𑀳𑀺 𑀲𑀩𑁆𑀩𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀦𑁆𑀢𑀺, 𑀙𑀺𑀤𑁆𑀤𑀪𑀸𑀯𑁂𑀦 𑀧𑀦 𑀢𑀺𑀘𑀻𑀯𑀭𑀲𑁆𑀲𑁂𑀯 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀯𑀼𑀢𑁆𑀢𑀁, 𑀢𑀜𑁆𑀘 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁂𑀦 𑀙𑀺𑀤𑁆𑀤𑁂𑀦. 𑀢𑀢𑁆𑀣 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀁 𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀦𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀙𑀺𑀤𑁆𑀤𑀜𑁆𑀘 𑀯𑀺𑀦𑀺𑀩𑁆𑀩𑀺𑀤𑁆𑀥𑀙𑀺𑀤𑁆𑀤𑀫𑁂𑀯. 𑀙𑀺𑀤𑁆𑀤𑀲𑁆𑀲 𑀳𑀺 𑀅𑀩𑁆𑀪𑀦𑁆𑀢𑀭𑁂 𑀏𑀓𑀢𑀦𑁆𑀢𑀼 𑀘𑁂𑀧𑀺 𑀅𑀘𑁆𑀙𑀺𑀦𑁆𑀦𑁄 𑀳𑁄𑀢𑀺, 𑀭𑀓𑁆𑀔𑀢𑀺. 𑀢𑀢𑁆𑀣 𑀲𑀗𑁆𑀖𑀸𑀝𑀺𑀬𑀸 𑀘 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀘 𑀤𑀻𑀖𑀦𑁆𑀢𑀢𑁄 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀲𑁆𑀲 𑀢𑀺𑀭𑀺𑀬𑀦𑁆𑀢𑀢𑁄 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑀲𑁆𑀲 𑀧𑀤𑁂𑀲𑀲𑁆𑀲 𑀑𑀭𑀢𑁄 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀺, 𑀧𑀭𑀢𑁄 𑀦 𑀪𑀺𑀦𑁆𑀤𑀢𑀺. 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀧𑀦 𑀤𑀻𑀖𑀦𑁆𑀢𑀢𑁄 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀲𑁆𑀲𑁂𑀯 𑀢𑀺𑀭𑀺𑀬𑀦𑁆𑀢𑀢𑁄 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀲𑁆𑀲 𑀧𑀤𑁂𑀲𑀲𑁆𑀲 𑀑𑀭𑀢𑁄 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀺, 𑀧𑀭𑀢𑁄 𑀦 𑀪𑀺𑀦𑁆𑀤𑀢𑀺. 𑀢𑀲𑁆𑀫𑀸 𑀚𑀸𑀢𑁂 𑀙𑀺𑀤𑁆𑀤𑁂 𑀢𑀁 𑀘𑀻𑀯𑀭𑀁 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀲𑀽𑀘𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀧𑀫𑀸𑀡𑀘𑀻𑀯𑀭𑀲𑁆𑀲 𑀬𑀢𑁆𑀣 𑀓𑀢𑁆𑀣𑀘𑀺 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀺, 𑀫𑀳𑀦𑁆𑀢𑀲𑁆𑀲 𑀧𑀦 𑀧𑀫𑀸𑀡𑀢𑁄 𑀩𑀳𑀺 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀦𑁆𑀤𑀢𑀺, 𑀅𑀦𑁆𑀢𑁄𑀚𑀸𑀢𑀁 𑀪𑀺𑀦𑁆𑀤𑀢𑀻’’𑀢𑀺. 𑀓𑀭𑀯𑀻𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀆𑀳 𑁋 ‘‘𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀁 𑀦 𑀧𑀫𑀸𑀡𑀁, 𑀤𑁆𑀯𑁂 𑀘𑀻𑀯𑀭𑀸𑀦𑀺 𑀧𑀸𑀭𑀼𑀧𑀦𑁆𑀢𑀲𑁆𑀲 𑀯𑀸𑀫𑀳𑀢𑁆𑀣𑁂 𑀲𑀗𑁆𑀖𑀭𑀺𑀢𑁆𑀯𑀸 𑀞𑀧𑀺𑀢𑀝𑁆𑀞𑀸𑀦𑁂 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀦𑁆𑀤𑀢𑀺, 𑀑𑀭𑀪𑀸𑀕𑁂 𑀪𑀺𑀦𑁆𑀤𑀢𑀺. 𑀅𑀦𑁆𑀢𑀭𑀯𑀸𑀲𑀓𑀲𑁆𑀲𑀧𑀺 𑀑𑀯𑀝𑁆𑀝𑀺𑀓𑀁 𑀓𑀭𑁄𑀦𑁆𑀢𑁂𑀦 𑀲𑀗𑁆𑀖𑀭𑀺𑀢𑀝𑁆𑀞𑀸𑀦𑁂 𑀙𑀺𑀤𑁆𑀤𑀁 𑀦 𑀪𑀺𑀦𑁆𑀤𑀢𑀺, 𑀢𑀢𑁄 𑀑𑀭𑀁 𑀪𑀺𑀦𑁆𑀤𑀢𑀻’’𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 𑀢𑀺𑀘𑀻𑀯𑀭𑁂 𑀫𑀳𑀸𑀲𑀼𑀫𑀢𑁆𑀣𑁂𑀭𑀯𑀸𑀤𑀁 𑀧𑀫𑀸𑀡𑀁 𑀓𑀢𑁆𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀇𑀤𑀁 𑀯𑀼𑀢𑁆𑀢𑀁 ‘‘𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀅𑀥𑀺𑀝𑁆𑀞𑀸𑀦𑀁 𑀭𑀓𑁆𑀔𑀢𑀻’’𑀢𑀺. 𑀧𑀭𑀺𑀓𑁆𑀔𑀸𑀭𑀘𑁄𑀴𑁂 𑀤𑀻𑀖𑀲𑁄 𑀅𑀝𑁆𑀞𑀗𑁆𑀕𑀼𑀮𑁂 𑀲𑀼𑀕𑀢𑀗𑁆𑀕𑀼𑀮𑁂𑀦 𑀢𑀺𑀭𑀺𑀬𑀁 𑀘𑀢𑀼𑀭𑀗𑁆𑀕𑀼𑀮𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺. 𑀫𑀳𑀦𑁆𑀢𑁂 𑀘𑁄𑀴𑁂 𑀢𑀢𑁄 𑀧𑀭𑁂𑀦 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑁂𑀲𑀼 𑀅𑀥𑀺𑀝𑁆𑀞𑀸𑀢𑀩𑁆𑀩𑀓𑁂𑀲𑀼 𑀘𑀻𑀯𑀭𑁂𑀲𑀽’’𑀢𑀺.

𑀢𑀢𑁆𑀣 𑀬𑀲𑁆𑀫𑀸 𑀲𑀩𑁆𑀩𑁂𑀲𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀓𑀘𑀻𑀯𑀭𑀸𑀦𑀁 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀢𑁄 𑀅𑀜𑁆𑀜𑀁 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺, 𑀬𑀜𑁆𑀳𑀺 𑀦𑀺𑀲𑀻𑀤𑀦-𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺-𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀦𑀁 𑀧𑀫𑀸𑀡𑀁 𑀯𑀼𑀢𑁆𑀢𑀁, 𑀢𑀁 𑀉𑀓𑁆𑀓𑀝𑁆𑀞𑀁, 𑀢𑀢𑁄 𑀉𑀢𑁆𑀢𑀭𑀺 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀦 𑀧𑀘𑁆𑀙𑀺𑀫𑀁 𑀢𑀢𑁄 𑀳𑁂𑀝𑁆𑀞𑀸 𑀅𑀧𑁆𑀧𑀝𑀺𑀲𑀺𑀤𑁆𑀥𑀢𑁆𑀢𑀸. 𑀢𑀺𑀘𑀻𑀯𑀭𑀲𑁆𑀲𑀸𑀧𑀺 𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡𑀢𑁄 𑀊𑀦𑀓𑀢𑁆𑀢𑀁 𑀉𑀓𑁆𑀓𑀝𑁆𑀞𑀧𑁆𑀧𑀫𑀸𑀡𑀫𑁂𑀯. 𑀧𑀘𑁆𑀙𑀺𑀫𑀁 𑀧𑀦 𑀯𑀺𑀲𑀼𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁 𑀦𑀢𑁆𑀣𑀺. 𑀫𑀼𑀔𑀧𑀼𑀜𑁆𑀙𑀦𑀧𑀘𑁆𑀘𑀢𑁆𑀣𑀭𑀡𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀦𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺𑀬𑁂𑀯. 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑁂𑀦 𑀧𑀦 𑀧𑀘𑁆𑀙𑀺𑀫𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀬𑀁 𑀢𑀸𑀯 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀅𑀥𑀺𑀝𑁆𑀞𑀸𑀦𑀁 𑀭𑀓𑁆𑀔𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀧𑀭𑀺𑀓𑁆𑀔𑀸𑀭𑀘𑁄𑀴𑀲𑁆𑀲𑁂𑀯 𑀲𑀼𑀕𑀢𑀗𑁆𑀕𑀼𑀮𑁂𑀦 𑀅𑀝𑁆𑀞𑀗𑁆𑀕𑀼𑀮𑀘𑀢𑀼𑀭𑀗𑁆𑀕𑀼𑀮𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑁂𑀲𑀁 𑀢𑀺𑀘𑀻𑀯𑀭𑀸𑀤𑀻𑀦𑀁 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀤𑀺𑀧𑀪𑁂𑀤𑀁 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀲𑀦𑁆𑀥𑀸𑀬 ‘‘𑀏𑀲 𑀦𑀬𑁄 𑀲𑀩𑁆𑀩𑁂𑀲𑀼 𑀅𑀥𑀺𑀝𑁆𑀞𑀸𑀢𑀩𑁆𑀩𑀓𑁂𑀲𑀼𑀘𑀻𑀯𑀭𑁂𑀲𑀽’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀲𑀫𑁂𑀢𑀺.

𑀓𑀭𑀯𑀻𑀓𑀢𑀺𑀲𑁆𑀲𑀢𑁆𑀣𑁂𑀭𑀯𑀸𑀤𑁂𑀧𑀺 𑀤𑀻𑀖𑀦𑁆𑀢𑀢𑁄𑀬𑁂𑀯 𑀙𑀺𑀤𑁆𑀤𑀁 𑀤𑀲𑁆𑀲𑀺𑀢𑀁, 𑀢𑀺𑀭𑀺𑀬𑀦𑁆𑀢𑀢𑁄 𑀦 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀲𑁄 𑀅𑀧𑀭𑀺𑀘𑁆𑀙𑀺𑀦𑁆𑀦𑁄. 𑀫𑀳𑀸𑀲𑀼𑀫𑀢𑁆𑀣𑁂𑀭𑀯𑀸𑀤𑁂 ‘‘𑀧𑀫𑀸𑀡𑀘𑀻𑀯𑀭𑀲𑁆𑀲 𑀬𑀢𑁆𑀣 𑀓𑀢𑁆𑀣𑀘𑀺 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀺, 𑀫𑀳𑀦𑁆𑀢𑀲𑁆𑀲 𑀧𑀦 𑀧𑀫𑀸𑀡𑀢𑁄 𑀩𑀳𑀺 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀧𑀦 𑀦 𑀯𑀼𑀢𑁆𑀢𑀁 𑁋 ‘‘𑀇𑀤𑀁 𑀦𑀸𑀫 𑀧𑀫𑀸𑀡𑀘𑀻𑀯𑀭𑀁 𑀇𑀢𑁄 𑀉𑀢𑁆𑀢𑀭𑀺 𑀫𑀳𑀦𑁆𑀢𑀁 𑀘𑀻𑀯𑀭’’𑀦𑁆𑀢𑀺. 𑀅𑀧𑀺𑀘𑁂𑀢𑁆𑀣 𑀢𑀺𑀘𑀻𑀯𑀭𑀸𑀤𑀻𑀦𑀁 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀤𑀺𑀪𑁂𑀤𑀁 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀣 𑀬𑀤𑀺 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀢𑁄 𑀩𑀳𑀺 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀦𑁆𑀤𑁂𑀬𑁆𑀬, 𑀉𑀓𑁆𑀓𑀝𑁆𑀞𑀧𑀢𑁆𑀢𑀲𑁆𑀲𑀸𑀧𑀺 𑀫𑀚𑁆𑀛𑀺𑀫𑀧𑀢𑁆𑀢𑀲𑁆𑀲 𑀯𑀸 𑀑𑀫𑀓𑀧𑁆𑀧𑀫𑀸𑀡𑀢𑁄 𑀩𑀳𑀺 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀦𑁆𑀤𑁂𑀬𑁆𑀬, 𑀦 𑀘 𑀦 𑀪𑀺𑀦𑁆𑀤𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀯𑀸𑀤𑁄 𑀅𑀧𑀭𑀺𑀘𑁆𑀙𑀺𑀦𑁆𑀦𑁄.

𑀬𑁄 𑀧𑀦𑀸𑀬𑀁 𑀲𑀩𑁆𑀩𑀧𑀞𑀫𑁄 𑀅𑀝𑁆𑀞𑀓𑀣𑀸𑀯𑀸𑀤𑁄, 𑀅𑀬𑀫𑁂𑀯𑁂𑀢𑁆𑀣 𑀧𑀫𑀸𑀡𑀁. 𑀓𑀲𑁆𑀫𑀸? 𑀧𑀭𑀺𑀘𑁆𑀙𑁂𑀤𑀲𑀩𑁆𑀪𑀸𑀯𑀢𑁄. 𑀢𑀺𑀘𑀻𑀯𑀭𑀲𑁆𑀲 𑀳𑀺 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀜𑁆𑀘 𑀙𑀺𑀤𑁆𑀤𑀧𑁆𑀧𑀫𑀸𑀡𑀜𑁆𑀘 𑀙𑀺𑀤𑁆𑀤𑀼𑀧𑁆𑀧𑀢𑁆𑀢𑀺𑀤𑁂𑀲𑀧𑁆𑀧𑀫𑀸𑀡𑀜𑁆𑀘 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼𑀬𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑁆𑀯𑁂𑀯 𑀯𑀸𑀤𑁄 𑀧𑀫𑀸𑀡𑀁. 𑀅𑀤𑁆𑀥𑀸 𑀳𑀺 𑀲𑁄 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀅𑀦𑀼𑀕𑀦𑁆𑀢𑁆𑀯𑀸 𑀯𑀼𑀢𑁆𑀢𑁄. 𑀇𑀢𑀭𑁂𑀲𑀼 𑀧𑀦 𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀺, 𑀦 𑀧𑀼𑀩𑁆𑀩𑀸𑀧𑀭𑀁 𑀲𑀫𑁂𑀢𑀻𑀢𑀺.

𑀬𑁄 𑀧𑀦 𑀤𑀼𑀩𑁆𑀩𑀮𑀝𑁆𑀞𑀸𑀦𑁂 𑀧𑀞𑀫𑀁 𑀅𑀕𑁆𑀕𑀴𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀤𑀼𑀩𑁆𑀩𑀮𑀝𑁆𑀞𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀦𑁂𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀚𑁆𑀚𑀢𑀺. 𑀫𑀡𑁆𑀟𑀮𑀧𑀭𑀺𑀯𑀢𑁆𑀢𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀤𑀼𑀧𑀝𑁆𑀝𑀲𑁆𑀲 𑀏𑀓𑀲𑁆𑀫𑀺𑀁 𑀧𑀝𑀮𑁂 𑀙𑀺𑀤𑁆𑀤𑁂 𑀯𑀸 𑀚𑀸𑀢𑁂 𑀕𑀴𑀺𑀢𑁂 𑀯𑀸 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀚𑁆𑀚𑀢𑀺, 𑀔𑀼𑀤𑁆𑀤𑀓𑀁 𑀘𑀻𑀯𑀭𑀁 𑀫𑀳𑀦𑁆𑀢𑀁 𑀓𑀭𑁄𑀢𑀺, 𑀫𑀳𑀦𑁆𑀢𑀁 𑀯𑀸 𑀔𑀼𑀤𑁆𑀤𑀓𑀁 𑀓𑀭𑁄𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀦 𑀪𑀺𑀚𑁆𑀚𑀢𑀺. 𑀉𑀪𑁄 𑀓𑁄𑀝𑀺𑀬𑁄 𑀫𑀚𑁆𑀛𑁂 𑀓𑀭𑁄𑀦𑁆𑀢𑁄 𑀲𑀘𑁂 𑀧𑀞𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀸 𑀖𑀝𑁂𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀪𑀺𑀚𑁆𑀚𑀢𑀺. 𑀅𑀣 𑀖𑀝𑁂𑀢𑁆𑀯𑀸 𑀙𑀺𑀦𑁆𑀤𑀢𑀺, 𑀦 𑀪𑀺𑀚𑁆𑀚𑀢𑀺, 𑀭𑀚𑀓𑁂𑀳𑀺 𑀥𑁄𑀯𑀸𑀧𑁂𑀢𑁆𑀯𑀸 𑀲𑁂𑀢𑀁 𑀓𑀸𑀭𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀅𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀦𑀫𑁂𑀯𑀸𑀢𑀺. 𑀅𑀬𑀁 𑀢𑀸𑀯 ‘‘𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀏𑀢𑁆𑀣 𑀅𑀥𑀺𑀝𑁆𑀞𑀸𑀦𑁂 𑀯𑀺𑀦𑀺𑀘𑁆𑀙𑀬𑁄.

𑀯𑀺𑀓𑀧𑁆𑀧𑀦𑁂 𑀧𑀦 𑀤𑁆𑀯𑁂 𑀯𑀺𑀓𑀧𑁆𑀧𑀦𑀸 𑁋 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀘 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀘. 𑀓𑀣𑀁 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀳𑁄𑀢𑀻𑀢𑀺? 𑀘𑀻𑀯𑀭𑀸𑀦𑀁 𑀏𑀓𑀩𑀳𑀼𑀪𑀸𑀯𑀁 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀜𑁆𑀘 𑀜𑀢𑁆𑀯𑀸 ‘‘‘𑀇𑀫𑀁 𑀘𑀻𑀯𑀭’𑀦𑁆𑀢𑀺 𑀯𑀸 ‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀻’𑀢𑀺 𑀯𑀸 ‘𑀏𑀢𑀁 𑀘𑀻𑀯𑀭’𑀦𑁆𑀢𑀺 𑀯𑀸 ‘𑀏𑀢𑀸𑀦𑀺 𑀘𑀻𑀯𑀭𑀸𑀦𑀻’’’𑀢𑀺 𑀯𑀸 ‘‘𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀬𑀫𑁂𑀓𑀸 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸. 𑀏𑀢𑁆𑀢𑀸𑀯𑀢𑀸 𑀦𑀺𑀥𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀦 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀸 𑀅𑀥𑀺𑀝𑁆𑀞𑀸𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺. ‘‘𑀫𑀬𑁆𑀳𑀁 𑀲𑀦𑁆𑀢𑀓𑀁, 𑀫𑀬𑁆𑀳𑀁 𑀲𑀦𑁆𑀢𑀓𑀸𑀦𑀺 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑀏𑀯𑀁 𑀧𑀦 𑀯𑀼𑀢𑁆𑀢𑁂 𑀧𑀘𑁆𑀘𑀼𑀤𑁆𑀥𑀸𑀭𑁄 𑀦𑀸𑀫 𑀳𑁄𑀢𑀺. 𑀢𑀢𑁄𑀧𑀪𑀼𑀢𑀺 𑀧𑀭𑀺𑀪𑁄𑀕𑀸𑀤𑀬𑁄𑀧𑀺 𑀯𑀝𑁆𑀝𑀦𑁆𑀢𑀺.

𑀅𑀧𑀭𑁄𑀧𑀺 𑀦𑀬𑁄 𑁋 𑀢𑀣𑁂𑀯 𑀘𑀻𑀯𑀭𑀸𑀦𑀁 𑀏𑀓𑀩𑀳𑀼𑀪𑀸𑀯𑀁 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀜𑁆𑀘 𑀜𑀢𑁆𑀯𑀸 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 ‘‘‘𑀇𑀫𑀁 𑀘𑀻𑀯𑀭’𑀦𑁆𑀢𑀺 𑀯𑀸 ‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀻’𑀢𑀺 𑀯𑀸 ‘𑀏𑀢𑀁 𑀘𑀻𑀯𑀭’𑀦𑁆𑀢𑀺 𑀯𑀸 ‘𑀏𑀢𑀸𑀦𑀺 𑀘𑀻𑀯𑀭𑀸𑀦𑀻’’’𑀢𑀺 𑀯𑀸 𑀯𑀢𑁆𑀯𑀸 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀅𑀜𑁆𑀜𑀢𑀭𑀲𑁆𑀲 𑀅𑀢𑁆𑀢𑀦𑀸 𑀅𑀪𑀺𑀭𑀼𑀘𑀺𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀸𑀫𑀁 𑀕𑀳𑁂𑀢𑁆𑀯𑀸 ‘‘‘𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀓𑀧𑁆𑀧𑁂𑀫𑀻’𑀢𑀺 𑀯𑀸 ‘𑀢𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸, 𑀲𑀺𑀓𑁆𑀔𑀫𑀸𑀦𑀸𑀬, 𑀢𑀺𑀲𑁆𑀲𑀲𑁆𑀲 𑀲𑀸𑀫𑀡𑁂𑀭𑀲𑁆𑀲, 𑀢𑀺𑀲𑁆𑀲𑀸𑀬 𑀲𑀸𑀫𑀡𑁂𑀭𑀺𑀬𑀸 𑀯𑀺𑀓𑀧𑁆𑀧𑁂𑀫𑀻’’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁, 𑀅𑀬𑀁 𑀅𑀧𑀭𑀸𑀧𑀺 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸. 𑀏𑀢𑁆𑀢𑀸𑀯𑀢𑀸 𑀦𑀺𑀥𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀭𑀺𑀪𑁄𑀕𑀸𑀤𑀻𑀲𑀼 𑀧𑀦 𑀏𑀓𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 ‘‘𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀓𑀁…𑀧𑁂… 𑀢𑀺𑀲𑁆𑀲𑀸𑀬 𑀲𑀸𑀫𑀡𑁂𑀭𑀺𑀬𑀸 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀘𑁆𑀘𑀼𑀤𑁆𑀥𑀸𑀭𑁄 𑀦𑀸𑀫 𑀳𑁄𑀢𑀺. 𑀢𑀢𑁄𑀧𑀪𑀼𑀢𑀺 𑀧𑀭𑀺𑀪𑁄𑀕𑀸𑀤𑀬𑁄𑀧𑀺 𑀯𑀝𑁆𑀝𑀦𑁆𑀢𑀺.

𑀓𑀣𑀁 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀳𑁄𑀢𑀻𑀢𑀺? 𑀘𑀻𑀯𑀭𑀸𑀦𑀁 𑀢𑀣𑁂𑀯 𑀏𑀓𑀩𑀳𑀼𑀪𑀸𑀯𑀁 𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀜𑁆𑀘 𑀜𑀢𑁆𑀯𑀸 ‘‘‘𑀇𑀫𑀁 𑀘𑀻𑀯𑀭’𑀦𑁆𑀢𑀺 𑀯𑀸 ‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀻’𑀢𑀺 𑀯𑀸 ‘𑀏𑀢𑀁 𑀘𑀻𑀯𑀭’𑀦𑁆𑀢𑀺 𑀯𑀸 ‘𑀏𑀢𑀸𑀦𑀺 𑀘𑀻𑀯𑀭𑀸𑀦𑀻’’’𑀢𑀺 𑀯𑀸 𑀯𑀢𑁆𑀯𑀸 ‘‘𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑀦𑀢𑁆𑀣𑀸𑀬 𑀤𑀫𑁆𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑁂𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑁄 𑀢𑁂 𑀫𑀺𑀢𑁆𑀢𑁄 𑀯𑀸 𑀲𑀦𑁆𑀤𑀺𑀝𑁆𑀞𑁄 𑀯𑀸’’𑀢𑀺? 𑀢𑀢𑁄 𑀇𑀢𑀭𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 ‘‘𑀢𑀺𑀲𑁆𑀲𑁄 𑀪𑀺𑀓𑁆𑀔𑀽𑀢𑀺 𑀯𑀸…𑀧𑁂… 𑀢𑀺𑀲𑁆𑀲𑀸 𑀲𑀸𑀫𑀡𑁂𑀭𑀻’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁. 𑀧𑀼𑀦 𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀅𑀳𑀁 𑀢𑀺𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀫𑁆𑀫𑀻𑀢𑀺 𑀯𑀸…𑀧𑁂… 𑀢𑀺𑀲𑁆𑀲𑀸𑀬 𑀲𑀸𑀫𑀡𑁂𑀭𑀺𑀬𑀸 𑀤𑀫𑁆𑀫𑀻’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁, 𑀅𑀬𑀁 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸. 𑀏𑀢𑁆𑀢𑀸𑀯𑀢𑀸 𑀦𑀺𑀥𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀭𑀺𑀪𑁄𑀕𑀸𑀤𑀻𑀲𑀼 𑀧𑀦 𑀏𑀓𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀤𑀼𑀢𑀺𑀬𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀯𑀺𑀲𑁆𑀲𑀚𑁆𑀚𑁂𑀳𑀺 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀘𑁆𑀘𑀼𑀤𑁆𑀥𑀸𑀭𑁄 𑀦𑀸𑀫 𑀳𑁄𑀢𑀺. 𑀢𑀢𑁄𑀧𑀪𑀼𑀢𑀺 𑀧𑀭𑀺𑀪𑁄𑀕𑀸𑀤𑀬𑁄𑀧𑀺 𑀯𑀝𑁆𑀝𑀦𑁆𑀢𑀺.

𑀤𑁆𑀯𑀺𑀦𑁆𑀦𑀁 𑀯𑀺𑀓𑀧𑁆𑀧𑀦𑀸𑀦𑀁 𑀓𑀺𑀁 𑀦𑀸𑀦𑀸𑀓𑀭𑀡𑀁? 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀬𑀁 𑀲𑀬𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀭𑁂𑀦 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑀺. 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀬 𑀧𑀭𑁂𑀦𑁂𑀯 𑀯𑀺𑀓𑀧𑁆𑀧𑀸𑀧𑁂𑀢𑁆𑀯𑀸 𑀧𑀭𑁂𑀦𑁂𑀯 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑀺, 𑀇𑀤𑀫𑁂𑀢𑁆𑀣 𑀦𑀸𑀦𑀸𑀓𑀭𑀡𑀁. 𑀲𑀘𑁂 𑀧𑀦 𑀬𑀲𑁆𑀲 𑀯𑀺𑀓𑀧𑁆𑀧𑁂𑀢𑀺, 𑀲𑁄 𑀧𑀜𑁆𑀜𑀢𑁆𑀢𑀺𑀓𑁄𑀯𑀺𑀤𑁄 𑀦 𑀳𑁄𑀢𑀺, 𑀦 𑀚𑀸𑀦𑀸𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑀼𑀁, 𑀢𑀁 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀩𑁆𑀬𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑀩𑁆𑀩𑀁. 𑀯𑀺𑀓𑀧𑁆𑀧𑀺𑀢𑀯𑀺𑀓𑀧𑁆𑀧𑀦𑀸 𑀦𑀸𑀫𑁂𑀲𑀸 𑀯𑀝𑁆𑀝𑀢𑀺. 𑀅𑀬𑀁 ‘‘𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂 𑀯𑀺𑀦𑀺𑀘𑁆𑀙𑀬𑁄.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀘 𑀇𑀤𑀁 ‘‘𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀯𑀘𑀦𑀁 𑀯𑀺𑀭𑀼𑀤𑁆𑀥𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀦 𑀘 𑀯𑀺𑀭𑀼𑀤𑁆𑀥𑀁 𑀢𑀣𑀸𑀕𑀢𑀸 𑀪𑀸𑀲𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀺𑀘𑀻𑀯𑀭𑀁 𑀢𑀺𑀘𑀻𑀯𑀭𑀲𑀗𑁆𑀔𑁂𑀧𑁂𑀦𑁂𑀯 𑀧𑀭𑀺𑀳𑀭𑀢𑁄 𑀅𑀥𑀺𑀝𑁆𑀞𑀸𑀢𑀼𑀫𑁂𑀯 𑀅𑀦𑀼𑀚𑀸𑀦𑀸𑀫𑀺, 𑀦 𑀯𑀺𑀓𑀧𑁆𑀧𑁂𑀢𑀼𑀁. 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀧𑀦 𑀘𑀸𑀢𑀼𑀫𑀸𑀲𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀫𑁂𑀯 𑀦 𑀅𑀥𑀺𑀝𑁆𑀞𑀸𑀢𑀼𑀁. 𑀏𑀯𑀜𑁆𑀘 𑀲𑀢𑀺 𑀬𑁄 𑀢𑀺𑀘𑀻𑀯𑀭𑁂 𑀏𑀓𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀧𑁆𑀧𑀯𑀸𑀲𑀲𑀼𑀔𑀢𑁆𑀣𑀁 𑀯𑀺𑀓𑀧𑁆𑀧𑀦𑀸𑀬 𑀑𑀓𑀸𑀲𑁄 𑀤𑀺𑀦𑁆𑀦𑁄 𑀳𑁄𑀢𑀺. 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀯𑀺𑀓𑀧𑁆𑀧𑀦𑀸𑀬 𑀅𑀧𑁆𑀧𑀝𑀺𑀲𑀺𑀤𑁆𑀥𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀜𑁆𑀜𑀲𑁆𑀲 𑀤𑁂𑀢𑀺. 𑀓𑀣𑀁 𑀧𑀦 𑀤𑀺𑀦𑁆𑀦𑀁 𑀳𑁄𑀢𑀺, 𑀓𑀣𑀁 𑀕𑀳𑀺𑀢𑀁? ‘‘𑀇𑀫𑀁 𑀢𑀼𑀬𑁆𑀳𑀁 𑀤𑁂𑀫𑀺 𑀤𑀤𑀸𑀫𑀺 𑀤𑀚𑁆𑀚𑀸𑀫𑀺 𑀑𑀡𑁄𑀚𑁂𑀫𑀺 𑀧𑀭𑀺𑀘𑁆𑀘𑀚𑀸𑀫𑀺 𑀦𑀺𑀲𑁆𑀲𑀚𑁆𑀚𑀸𑀫𑀺 𑀯𑀺𑀲𑁆𑀲𑀚𑁆𑀚𑀸𑀫𑀻𑀢𑀺 𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀺…𑀧𑁂… 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀯𑀸 𑀯𑀤𑀢𑀺, 𑀲𑀫𑁆𑀫𑀼𑀔𑀸𑀧𑀺 𑀧𑀭𑀫𑁆𑀫𑀼𑀔𑀸𑀧𑀺 𑀤𑀺𑀦𑁆𑀦𑀁𑀬𑁂𑀯 𑀳𑁄𑀢𑀺. ‘‘𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀯𑀤𑀢𑀺, 𑀲𑀼𑀤𑀺𑀦𑁆𑀦𑀁 𑀲𑀼𑀕𑁆𑀕𑀳𑀺𑀢𑀜𑁆𑀘. ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀺, 𑀢𑀯 𑀲𑀦𑁆𑀢𑀓𑀁 𑀳𑁄𑀢𑀼, 𑀢𑀯 𑀲𑀦𑁆𑀢𑀓𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀫 𑀲𑀦𑁆𑀢𑀓𑀁 𑀓𑀭𑁄𑀫𑀺, 𑀫𑀫 𑀲𑀦𑁆𑀢𑀓𑀁 𑀳𑁄𑀢𑀼, 𑀫𑀫 𑀲𑀦𑁆𑀢𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀤𑀼𑀤𑁆𑀤𑀺𑀦𑁆𑀦𑀁 𑀤𑀼𑀕𑁆𑀕𑀳𑀺𑀢𑀜𑁆𑀘. 𑀦𑁂𑀯 𑀤𑀸𑀢𑀸 𑀤𑀸𑀢𑀼𑀁 𑀚𑀸𑀦𑀸𑀢𑀺, 𑀦 𑀇𑀢𑀭𑁄 𑀕𑀳𑁂𑀢𑀼𑀁. 𑀲𑀘𑁂 𑀧𑀦 ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀪𑀦𑁆𑀢𑁂, 𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀁. 𑀲𑀘𑁂 𑀧𑀦 ‘‘𑀏𑀓𑁄 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺, 𑀇𑀢𑀭𑁄 ‘‘𑀦 𑀕𑀡𑁆𑀳𑀸𑀫𑀻’’𑀢𑀺 𑀧𑀼𑀦 𑀲𑁄 ‘‘𑀤𑀺𑀦𑁆𑀦𑀁 𑀫𑀬𑀸 𑀢𑀼𑀬𑁆𑀳𑀁, 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺, 𑀇𑀢𑀭𑁄𑀧𑀺 ‘‘𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀅𑀢𑁆𑀣𑁄’’𑀢𑀺 𑀯𑀤𑀢𑀺. 𑀢𑀢𑁄 𑀧𑀼𑀭𑀺𑀫𑁄𑀧𑀺 ‘‘𑀫𑀬𑀸 𑀤𑀺𑀦𑁆𑀦’’𑀦𑁆𑀢𑀺 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀘𑁆𑀙𑀺𑀫𑁄𑀧𑀺 ‘‘𑀫𑀬𑀸 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺. 𑀓𑀲𑁆𑀲 𑀆𑀧𑀢𑁆𑀢𑀻𑀢𑀺? 𑀦 𑀓𑀲𑁆𑀲𑀘𑀺 𑀆𑀧𑀢𑁆𑀢𑀺. 𑀬𑀲𑁆𑀲 𑀧𑀦 𑀭𑀼𑀘𑁆𑀘𑀢𑀺, 𑀢𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑀬𑁄 𑀧𑀦 𑀅𑀥𑀺𑀝𑁆𑀞𑀸𑀦𑁂 𑀯𑁂𑀫𑀢𑀺𑀓𑁄, 𑀢𑁂𑀦 𑀓𑀺𑀁 𑀓𑀸𑀢𑀩𑁆𑀩𑀁? 𑀯𑁂𑀫𑀢𑀺𑀓𑀪𑀸𑀯𑀁 𑀆𑀭𑁄𑀘𑁂𑀢𑁆𑀯𑀸 𑀲𑀘𑁂 𑀅𑀦𑀥𑀺𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀫𑁂 𑀓𑀧𑁆𑀧𑀺𑀬𑀁 𑀳𑁄𑀢𑀻𑀢𑀺 𑀯𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀦 𑀳𑀺 𑀏𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀓𑁂𑀘𑀺 𑀧𑀦 ‘‘𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀲𑁆𑀲𑀸𑀲𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀤𑀺𑀦𑁆𑀦𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀢𑀲𑁆𑀲𑁂𑀢𑀁 𑀯𑀺𑀦𑀬𑀓𑀫𑁆𑀫𑀁, 𑀦𑀸𑀧𑀺 𑀢𑀁 𑀏𑀢𑁆𑀢𑀓𑁂𑀦 𑀅𑀜𑁆𑀜𑀁 𑀯𑀢𑁆𑀣𑀼𑀁 𑀳𑁄𑀢𑀺.

𑀦𑀲𑁆𑀲𑀢𑀻𑀢𑀺𑀆𑀤𑀺 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀬𑁄 𑀦 𑀤𑀤𑁂𑀬𑁆𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀫𑀬𑁆𑀳𑀁 𑀤𑀺𑀦𑁆𑀦𑀁 𑀇𑀫𑀺𑀦𑀸’’𑀢𑀺 𑀇𑀫𑀸𑀬 𑀲𑀜𑁆𑀜𑀸𑀬 𑀦 𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀢𑀲𑁆𑀲 𑀲𑀦𑁆𑀢𑀓𑀪𑀸𑀯𑀁 𑀧𑀦 𑀜𑀢𑁆𑀯𑀸 𑀮𑁂𑀲𑁂𑀦 𑀅𑀘𑁆𑀙𑀺𑀦𑁆𑀤𑀦𑁆𑀢𑁄 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄𑀢𑀺.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀓𑀸𑀬𑀯𑀸𑀘𑀸𑀢𑁄 𑀘 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀅𑀦𑀥𑀺𑀝𑁆𑀞𑀸𑀦𑁂𑀦 𑀘 𑀅𑀯𑀺𑀓𑀧𑁆𑀧𑀦𑁂𑀦 𑀘 𑀆𑀧𑀚𑁆𑀚𑀦𑀢𑁄 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀬 𑀅𑀪𑀸𑀯𑁂𑀧𑀺 𑀦 𑀫𑀼𑀘𑁆𑀘𑀢𑀺, 𑀅𑀚𑀸𑀦𑀦𑁆𑀢𑁄𑀧𑀺 𑀆𑀧𑀚𑁆𑀚𑀢𑀻𑀢𑀺 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁭𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀲𑀦𑁆𑀢𑀭𑀼𑀢𑁆𑀢𑀭𑁂𑀦𑀸𑀢𑀺 𑀅𑀦𑁆𑀢𑀭𑀦𑁆𑀢𑀺 𑀅𑀦𑁆𑀢𑀭𑀯𑀸𑀲𑀓𑁄 𑀯𑀼𑀘𑁆𑀘𑀢𑀺, 𑀉𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑁄, 𑀲𑀳 𑀅𑀦𑁆𑀢𑀭𑁂𑀦 𑀉𑀢𑁆𑀢𑀭𑀁 𑀲𑀦𑁆𑀢𑀭𑀼𑀢𑁆𑀢𑀭𑀁, 𑀢𑁂𑀦 𑀲𑀦𑁆𑀢𑀭𑀼𑀢𑁆𑀢𑀭𑁂𑀦, 𑀲𑀳 𑀅𑀦𑁆𑀢𑀭𑀯𑀸𑀲𑀓𑁂𑀦 𑀉𑀢𑁆𑀢𑀭𑀸𑀲𑀗𑁆𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀡𑁆𑀡𑀓𑀺𑀢𑀸𑀦𑀻𑀢𑀺 𑀲𑁂𑀤𑁂𑀦 𑀨𑀼𑀝𑁆𑀞𑁄𑀓𑀸𑀲𑁂𑀲𑀼 𑀲𑀜𑁆𑀚𑀸𑀢𑀓𑀸𑀴𑀲𑁂𑀢𑀫𑀡𑁆𑀟𑀮𑀸𑀦𑀺. 𑀅𑀤𑁆𑀤𑀲 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄𑀢𑀺 𑀣𑁂𑀭𑁄 𑀓𑀺𑀭 𑀪𑀕𑀯𑀢𑀺 𑀤𑀺𑀯𑀸 𑀧𑀝𑀺𑀲𑀮𑁆𑀮𑀸𑀦𑀢𑁆𑀣𑀸𑀬 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂 𑀢𑀁 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀤𑀸𑀭𑀼𑀪𑀡𑁆𑀟𑀫𑀢𑁆𑀢𑀺𑀓𑀸𑀪𑀡𑁆𑀟𑀸𑀦𑀺 𑀧𑀝𑀺𑀲𑀸𑀫𑁂𑀦𑁆𑀢𑁄 𑀅𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀦𑁆𑀢𑁄 𑀕𑀺𑀮𑀸𑀦𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑁄 𑀅𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄’’𑀢𑀺.

𑁪𑁭𑁩. 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀤𑀸𑀢𑀼𑀦𑁆𑀢𑀺 𑀅𑀯𑀺𑀧𑁆𑀧𑀯𑀸𑀲𑁂 𑀲𑀫𑁆𑀫𑀼𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺, 𑀅𑀯𑀺𑀧𑁆𑀧𑀯𑀸𑀲𑀸𑀬 𑀯𑀸 𑀲𑀫𑁆𑀫𑀼𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺. 𑀓𑁄 𑀧𑀦𑁂𑀢𑁆𑀣 𑀆𑀦𑀺𑀲𑀁𑀲𑁄? 𑀬𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀢𑀺, 𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀺, 𑀆𑀧𑀢𑁆𑀢𑀺𑀜𑁆𑀘 𑀦𑀸𑀧𑀚𑁆𑀚𑀢𑀺. 𑀓𑀺𑀢𑁆𑀢𑀓𑀁 𑀓𑀸𑀮𑀁? 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 𑀆𑀳 𑁋 ‘‘𑀬𑀸𑀯 𑀭𑁄𑀕𑁄 𑀦 𑀯𑀽𑀧𑀲𑀫𑀢𑀺, 𑀯𑀽𑀧𑀲𑀦𑁆𑀢𑁂 𑀧𑀦 𑀭𑁄𑀕𑁂 𑀲𑀻𑀖𑀁 𑀘𑀻𑀯𑀭𑀝𑁆𑀞𑀸𑀦𑀁 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀆𑀳 𑁋 ‘‘𑀲𑀻𑀖𑀁 𑀆𑀕𑀘𑁆𑀙𑀢𑁄 𑀭𑁄𑀕𑁄 𑀧𑀝𑀺𑀓𑀼𑀧𑁆𑀧𑁂𑀬𑁆𑀬, 𑀢𑀲𑁆𑀫𑀸 𑀲𑀡𑀺𑀓𑀁 𑀆𑀕𑀦𑁆𑀢𑀩𑁆𑀩𑀁. 𑀬𑀢𑁄 𑀧𑀝𑁆𑀞𑀸𑀬 𑀳𑀺 𑀲𑀢𑁆𑀣𑀁 𑀯𑀸 𑀧𑀭𑀺𑀬𑁂𑀲𑀢𑀺, ‘𑀕𑀘𑁆𑀙𑀸𑀫𑀻’𑀢𑀺 𑀆𑀪𑁄𑀕𑀁 𑀯𑀸 𑀓𑀭𑁄𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀯𑀝𑁆𑀝𑀢𑀺. ‘𑀦 𑀤𑀸𑀦𑀺 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀏𑀯𑀁 𑀧𑀦 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀁, 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀞𑀲𑁆𑀲𑀢𑀻’’𑀢𑀺. 𑀲𑀘𑁂 𑀧𑀦𑀲𑁆𑀲 𑀭𑁄𑀕𑁄 𑀧𑀝𑀺𑀓𑀼𑀧𑁆𑀧𑀢𑀺, 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀢𑀸𑀯 𑀆𑀳 𑁋 ‘‘𑀲𑀘𑁂 𑀲𑁄𑀬𑁂𑀯 𑀭𑁄𑀕𑁄 𑀧𑀝𑀺𑀓𑀼𑀧𑁆𑀧𑀢𑀺, 𑀲𑀸 𑀏𑀯 𑀲𑀫𑁆𑀫𑀼𑀢𑀺, 𑀧𑀼𑀦 𑀲𑀫𑁆𑀫𑀼𑀢𑀺𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀅𑀣𑀜𑁆𑀜𑁄 𑀓𑀼𑀧𑁆𑀧𑀢𑀺, 𑀧𑀼𑀦 𑀤𑀸𑀢𑀩𑁆𑀩𑀸 𑀲𑀫𑁆𑀫𑀼𑀢𑀻’’𑀢𑀺. 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀆𑀳 𑁋 ‘‘𑀲𑁄 𑀯𑀸 𑀭𑁄𑀕𑁄 𑀳𑁄𑀢𑀼, 𑀅𑀜𑁆𑀜𑁄 𑀯𑀸 𑀧𑀼𑀦 𑀲𑀫𑁆𑀫𑀼𑀢𑀺𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺.

𑁪𑁭𑁫-𑁬. 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸𑀢𑀺 𑀇𑀥 𑀧𑀦 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀺𑀬 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀝𑁆𑀞𑀺𑀢𑁂 𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑁄𑀢𑀺 𑀏𑀯𑀁 𑀲𑀸𑀫𑀺𑀯𑀲𑁂𑀦 𑀓𑀭𑀡𑀯𑀘𑀦𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀭𑀡𑀯𑀲𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀇𑀤𑀁 𑀦𑀸𑀫 𑀓𑀸𑀢𑀩𑁆𑀩𑀦𑁆𑀢𑀺 𑀦𑀢𑁆𑀣𑀺. 𑀲𑀸𑀫𑀺𑀯𑀲𑁂𑀦 𑀧𑀦 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀲𑁆𑀫𑀺𑀁 𑀦𑀺𑀝𑁆𑀞𑀺𑀢𑁂 𑀓𑀣𑀺𑀦𑁂 𑀘 𑀉𑀩𑁆𑀪𑀢𑁂 𑀏𑀯𑀁 𑀙𑀺𑀦𑁆𑀦𑀧𑀮𑀺𑀩𑁄𑀥𑁄 𑀏𑀓𑀭𑀢𑁆𑀢𑀫𑁆𑀧𑀺 𑀘𑁂 𑀪𑀺𑀓𑁆𑀔𑀼 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑁂𑀬𑁆𑀬𑀸𑀢𑀺 𑀏𑀯𑀁 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑀢𑁆𑀣 𑀢𑀺𑀘𑀻𑀯𑀭𑁂𑀦𑀸𑀢𑀺 𑀅𑀥𑀺𑀝𑁆𑀞𑀺𑀢𑁂𑀲𑀼 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀬𑁂𑀦 𑀓𑁂𑀦𑀘𑀺. 𑀏𑀓𑁂𑀦 𑀯𑀺𑀧𑁆𑀧𑀯𑀼𑀢𑁆𑀣𑁄𑀧𑀺 𑀳𑀺 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀼𑀢𑁆𑀣𑁄 𑀳𑁄𑀢𑀺, 𑀧𑀝𑀺𑀲𑀺𑀤𑁆𑀥𑀧𑀭𑀺𑀬𑀸𑀧𑀦𑁆𑀦𑁂𑀦 𑀯𑀺𑀧𑁆𑀧𑀯𑀼𑀢𑁆𑀣𑀢𑁆𑀢𑀸. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀲𑀗𑁆𑀖𑀸𑀝𑀺𑀬𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀧𑁆𑀧𑀯𑀲𑁂𑀬𑁆𑀬𑀸𑀢𑀺 𑀯𑀺𑀧𑁆𑀧𑀬𑀼𑀢𑁆𑀢𑁄 𑀯𑀲𑁂𑀬𑁆𑀬.

𑁪𑁭𑁭-𑁮. 𑀕𑀸𑀫𑁄 𑀏𑀓𑀽𑀧𑀘𑀸𑀭𑁄𑀢𑀺𑀆𑀤𑀺 𑀅𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑀯𑀯𑀢𑁆𑀣𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀬𑀣𑀸𑀓𑁆𑀓𑀫𑁂𑀦 𑀢𑀸𑀦𑁂𑀯 𑀧𑀦𑁆𑀦𑀭𑀲 𑀫𑀸𑀢𑀺𑀓𑀸𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀓𑀓𑀼𑀮𑀲𑁆𑀲 𑀕𑀸𑀫𑁄𑀢𑀺 𑀏𑀓𑀲𑁆𑀲 𑀭𑀜𑁆𑀜𑁄 𑀯𑀸 𑀪𑁄𑀚𑀓𑀲𑁆𑀲 𑀯𑀸 𑀕𑀸𑀫𑁄. 𑀧𑀭𑀺𑀓𑁆𑀔𑀺𑀢𑁆𑀢𑁄𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀸𑀓𑀸𑀭𑁂𑀦 𑀯𑀸 𑀯𑀢𑀺𑀬𑀸 𑀯𑀸 𑀧𑀭𑀺𑀓𑁆𑀔𑀸𑀬 𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀏𑀢𑁆𑀢𑀸𑀯𑀢𑀸 𑀏𑀓𑀓𑀼𑀮𑀕𑀸𑀫𑀲𑁆𑀲 𑀏𑀓𑀽𑀧𑀘𑀸𑀭𑀢𑀸 𑀤𑀲𑁆𑀲𑀺𑀢𑀸. 𑀅𑀦𑁆𑀢𑁄𑀕𑀸𑀫𑁂 𑀯𑀢𑁆𑀣𑀩𑁆𑀩𑀦𑁆𑀢𑀺 𑀏𑀯𑀭𑀽𑀧𑁂 𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀸𑀫𑀩𑁆𑀪𑀦𑁆𑀢𑀭𑁂 𑀬𑀣𑀸𑀭𑀼𑀘𑀺𑀢𑁂 𑀞𑀸𑀦𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀧𑀭𑀺𑀓𑁆𑀔𑀺𑀢𑁆𑀢𑁄𑀢𑀺 𑀇𑀫𑀺𑀦𑀸 𑀢𑀲𑁆𑀲𑁂𑀯 𑀕𑀸𑀫𑀲𑁆𑀲 𑀦𑀸𑀦𑀽𑀧𑀘𑀸𑀭𑀢𑀸 𑀤𑀲𑁆𑀲𑀺𑀢𑀸. 𑀏𑀯𑀭𑀽𑀧𑁂 𑀕𑀸𑀫𑁂 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀢𑁆𑀣 𑀯𑀢𑁆𑀣𑀩𑁆𑀩𑀁. 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀦𑁆𑀢𑀺 𑀅𑀣 𑀯𑀸 𑀢𑀁 𑀖𑀭𑀁 𑀲𑀫𑀦𑁆𑀢𑀢𑁄 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁, 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀧𑁆𑀧𑀫𑀸𑀡𑀧𑁆𑀧𑀤𑁂𑀲𑀸 𑀉𑀤𑁆𑀥𑀁 𑀦 𑀯𑀺𑀚𑀳𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀩𑁆𑀪𑀦𑁆𑀢𑀭𑁂 𑀧𑀦 𑀯𑀢𑁆𑀣𑀼𑀁 𑀯𑀝𑁆𑀝𑀢𑀺. 𑀢𑀁 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀘𑁂𑀧𑀺 𑀇𑀤𑁆𑀥𑀺𑀫𑀸 𑀪𑀺𑀓𑁆𑀔𑀽 𑀆𑀓𑀸𑀲𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 𑀳𑁄𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀺𑀁 𑀖𑀭𑁂𑀢𑀺 𑀖𑀭𑀧𑀭𑀺𑀘𑁆𑀙𑁂𑀤𑁄 ‘‘𑀏𑀓𑀓𑀼𑀮𑀲𑁆𑀲 𑀦𑀺𑀯𑁂𑀲𑀦𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁮𑁦) 𑀮𑀓𑁆𑀔𑀡𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁪𑁭𑁯. 𑀦𑀸𑀦𑀸𑀓𑀼𑀮𑀲𑁆𑀲 𑀕𑀸𑀫𑁄𑀢𑀺 𑀦𑀸𑀦𑀸𑀭𑀸𑀚𑀽𑀦𑀁 𑀯𑀸 𑀪𑁄𑀚𑀓𑀸𑀦𑀁 𑀯𑀸 𑀕𑀸𑀫𑁄, 𑀯𑁂𑀲𑀸𑀮𑀺𑀓𑀼𑀲𑀺𑀦𑀸𑀭𑀸𑀤𑀺𑀲𑀤𑀺𑀲𑁄. 𑀧𑀭𑀺𑀓𑁆𑀔𑀺𑀢𑁆𑀢𑁄𑀢𑀺 𑀇𑀫𑀺𑀦𑀸 𑀦𑀸𑀦𑀸𑀓𑀼𑀮𑀕𑀸𑀫𑀲𑁆𑀲 𑀏𑀓𑀽𑀧𑀘𑀸𑀭𑀢𑀸 𑀤𑀲𑁆𑀲𑀺𑀢𑀸. 𑀲𑀪𑀸𑀬𑁂 𑀯𑀸 𑀤𑁆𑀯𑀸𑀭𑀫𑀽𑀮𑁂 𑀯𑀸𑀢𑀺 𑀏𑀢𑁆𑀣 𑀲𑀪𑀸𑀬𑀦𑁆𑀢𑀺 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑁂𑀦 𑀲𑀪𑀸 𑀯𑀼𑀢𑁆𑀢𑀸. 𑀤𑁆𑀯𑀸𑀭𑀫𑀽𑀮𑁂𑀢𑀺 𑀦𑀕𑀭𑀤𑁆𑀯𑀸𑀭𑀲𑁆𑀲 𑀲𑀫𑀻𑀧𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀯𑀭𑀽𑀧𑁂 𑀕𑀸𑀫𑁂 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀢𑁆𑀣 𑀯𑀸 𑀯𑀢𑁆𑀣𑀩𑁆𑀩𑀁. 𑀢𑀢𑁆𑀣 𑀲𑀤𑁆𑀤𑀲𑀗𑁆𑀖𑀝𑁆𑀝𑀦𑁂𑀦 𑀯𑀸 𑀚𑀦𑀲𑀫𑁆𑀩𑀸𑀥𑁂𑀦 𑀯𑀸 𑀯𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀲𑀪𑀸𑀬𑁂 𑀯𑀸 𑀯𑀢𑁆𑀣𑀩𑁆𑀩𑀁 𑀦𑀕𑀭𑀤𑁆𑀯𑀸𑀭𑀫𑀽𑀮𑁂 𑀯𑀸. 𑀢𑀢𑁆𑀭𑀧𑀺 𑀯𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀨𑀸𑀲𑀼𑀓𑀝𑁆𑀞𑀸𑀦𑁂 𑀯𑀲𑀺𑀢𑁆𑀯𑀸 𑀅𑀦𑁆𑀢𑁄𑀅𑀭𑀼𑀡𑁂 𑀆𑀕𑀫𑁆𑀫 𑀢𑁂𑀲𑀁𑀬𑁂𑀯 𑀲𑀪𑀸𑀬𑀤𑁆𑀯𑀸𑀭𑀫𑀽𑀮𑀸𑀦𑀁 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀖𑀭𑀲𑁆𑀲 𑀧𑀦 𑀘𑀻𑀯𑀭𑀲𑁆𑀲 𑀯𑀸 𑀳𑀢𑁆𑀣𑀧𑀸𑀲𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀲𑀪𑀸𑀬𑀁 𑀕𑀘𑁆𑀙𑀦𑁆𑀢𑁂𑀦 𑀳𑀢𑁆𑀣𑀧𑀸𑀲𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀲𑀘𑁂 𑀖𑀭𑁂 𑀅𑀝𑁆𑀞𑀧𑁂𑀢𑁆𑀯𑀸 𑀲𑀪𑀸𑀬𑁂 𑀞𑀧𑁂𑀲𑁆𑀲𑀸𑀫𑀻𑀢𑀺 𑀲𑀪𑀸𑀬𑀁 𑀕𑀘𑁆𑀙𑀢𑀺, 𑀢𑁂𑀦 𑀲𑀪𑀸𑀬𑀁 𑀕𑀘𑁆𑀙𑀦𑁆𑀢𑁂𑀦 𑀳𑀢𑁆𑀣𑀧𑀸𑀲𑁂𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀳𑀦𑁆𑀤𑀺𑀫𑀁 𑀘𑀻𑀯𑀭𑀁 𑀞𑀧𑁂𑀫𑀻’’𑀢𑀺 𑀏𑀯𑀁 𑀦𑀺𑀓𑁆𑀔𑁂𑀧𑀲𑀼𑀔𑁂 𑀳𑀢𑁆𑀣𑀧𑀸𑀲𑀕𑀢𑁂 𑀓𑀺𑀲𑁆𑀫𑀺𑀜𑁆𑀘𑀺 𑀆𑀧𑀡𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀪𑀸𑀬𑁂 𑀯𑀸 𑀯𑀢𑁆𑀣𑀩𑁆𑀩𑀁 𑀤𑁆𑀯𑀸𑀭𑀫𑀽𑀮𑁂 𑀯𑀸, 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀢𑀸𑀯 𑀆𑀳 𑁋 ‘‘𑀘𑀻𑀯𑀭𑀳𑀢𑁆𑀣𑀧𑀸𑀲𑁂 𑀯𑀲𑀺𑀢𑀩𑁆𑀩𑀁 𑀦𑀢𑁆𑀣𑀺, 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀻𑀣𑀺𑀳𑀢𑁆𑀣𑀧𑀸𑀲𑁂𑀧𑀺 𑀲𑀪𑀸𑀬𑀳𑀢𑁆𑀣𑀧𑀸𑀲𑁂𑀧𑀺 𑀤𑁆𑀯𑀸𑀭𑀳𑀢𑁆𑀣𑀧𑀸𑀲𑁂𑀧𑀺 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀦𑀕𑀭𑀲𑁆𑀲 𑀩𑀳𑀽𑀦𑀺𑀧𑀺 𑀤𑁆𑀯𑀸𑀭𑀸𑀦𑀺 𑀳𑁄𑀦𑁆𑀢𑀺 𑀩𑀳𑀽𑀦𑀺𑀧𑀺 𑀲𑀪𑀸𑀬𑀸𑀦𑀺, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀦 𑀯𑀝𑁆𑀝𑀢𑀺. 𑀬𑀲𑁆𑀲𑀸 𑀧𑀦 𑀯𑀻𑀣𑀺𑀬𑀸 𑀘𑀻𑀯𑀭𑀁 𑀞𑀧𑀺𑀢𑀁 𑀬𑀁 𑀢𑀲𑁆𑀲𑀸 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀲𑀪𑀸𑀬𑀜𑁆𑀘 𑀤𑁆𑀯𑀸𑀭𑀜𑁆𑀘 𑀢𑀲𑁆𑀲 𑀲𑀪𑀸𑀬𑀲𑁆𑀲 𑀘 𑀤𑁆𑀯𑀸𑀭𑀲𑁆𑀲 𑀘 𑀳𑀢𑁆𑀣𑀧𑀸𑀲𑀸 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀲𑀓𑁆𑀓𑀸 𑀘𑀻𑀯𑀭𑀲𑁆𑀲 𑀧𑀯𑀢𑁆𑀢𑀺 𑀚𑀸𑀦𑀺𑀢𑀼’’𑀦𑁆𑀢𑀺. 𑀲𑀪𑀸𑀬𑀁 𑀧𑀦 𑀕𑀘𑁆𑀙𑀦𑁆𑀢𑁂𑀦 𑀬𑀲𑁆𑀲 𑀆𑀧𑀡𑀺𑀓𑀲𑁆𑀲 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀁, 𑀲𑀘𑁂 𑀲𑁄 𑀢𑀁 𑀘𑀻𑀯𑀭𑀁 𑀅𑀢𑀺𑀳𑀭𑀺𑀢𑁆𑀯𑀸 𑀖𑀭𑁂 𑀦𑀺𑀓𑁆𑀔𑀺𑀧𑀢𑀺, 𑀯𑀻𑀣𑀺𑀳𑀢𑁆𑀣𑀧𑀸𑀲𑁄 𑀦 𑀭𑀓𑁆𑀔𑀢𑀺, 𑀖𑀭𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀢𑁆𑀣𑀩𑁆𑀩𑀁. 𑀲𑀘𑁂 𑀫𑀳𑀦𑁆𑀢𑀁 𑀖𑀭𑀁 𑀳𑁄𑀢𑀺, 𑀤𑁆𑀯𑁂 𑀯𑀻𑀣𑀺𑀬𑁄 𑀨𑀭𑀺𑀢𑁆𑀯𑀸 𑀞𑀺𑀢𑀁 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀳𑀢𑁆𑀣𑀧𑀸𑀲𑁂𑀬𑁂𑀯 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀪𑀸𑀬𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀦 𑀲𑀪𑀸𑀬𑁂 𑀯𑀸 𑀢𑀲𑁆𑀲 𑀲𑀫𑁆𑀫𑀼𑀔𑁂 𑀦𑀕𑀭𑀤𑁆𑀯𑀸𑀭𑀫𑀽𑀮𑁂 𑀯𑀸 𑀢𑁂𑀲𑀁𑀬𑁂𑀯 𑀳𑀢𑁆𑀣𑀧𑀸𑀲𑁂 𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁.

𑀅𑀧𑀭𑀺𑀓𑁆𑀔𑀺𑀢𑁆𑀢𑁄𑀢𑀺𑀇𑀫𑀺𑀦𑀸 𑀢𑀲𑁆𑀲𑁂𑀯 𑀕𑀸𑀫𑀲𑁆𑀲 𑀦𑀸𑀦𑀽𑀧𑀘𑀸𑀭𑀢𑀸 𑀤𑀲𑁆𑀲𑀺𑀢𑀸. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀏𑀓𑀽𑀧𑀘𑀸𑀭𑀢𑀸 𑀘 𑀦𑀸𑀦𑀽𑀧𑀘𑀸𑀭𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀴𑀺𑀬𑀁 𑀧𑀦 ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫𑀸’’𑀢𑀺 𑀏𑀯𑀁 𑀆𑀤𑀺𑀫𑁆𑀳𑀺 ‘‘𑀅𑀚𑁆𑀛𑁄𑀓𑀸𑀲𑁄 𑀏𑀓𑀽𑀧𑀘𑀸𑀭𑁄 𑀦𑀸𑀫𑀸’’𑀢𑀺 𑀏𑀯𑀁 𑀅𑀦𑁆𑀢𑁂 𑀘 𑀏𑀓𑀫𑁂𑀯 𑀫𑀸𑀢𑀺𑀓𑀸𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀤𑀪𑀸𑀚𑀦𑀁 𑀯𑀺𑀢𑁆𑀣𑀸𑀭𑀺𑀢𑀁. 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀧𑀤𑀲𑁆𑀲𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀢𑁆𑀣 𑀧𑀭𑀺𑀓𑁆𑀔𑁂𑀧𑀸𑀤𑀺𑀯𑀲𑁂𑀦 𑀏𑀓𑀽𑀧𑀘𑀸𑀭𑀢𑀸 𑀘 𑀦𑀸𑀦𑀽𑀧𑀘𑀸𑀭𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑁪𑁮𑁦-𑁧. 𑀦𑀺𑀯𑁂𑀲𑀦𑀸𑀤𑀻𑀲𑀼 𑀑𑀯𑀭𑀓𑀸𑀢𑀺 𑀕𑀩𑁆𑀪𑀸𑀦𑀁𑀬𑁂𑀯𑁂𑀢𑀁 𑀧𑀭𑀺𑀬𑀸𑀬𑀯𑀘𑀦𑀁. 𑀳𑀢𑁆𑀣𑀧𑀸𑀲𑀸 𑀯𑀸𑀢𑀺 𑀕𑀩𑁆𑀪𑀲𑁆𑀲 𑀳𑀢𑁆𑀣𑀧𑀸𑀲𑀸. 𑀤𑁆𑀯𑀸𑀭𑀫𑀽𑀮𑁂 𑀯𑀸𑀢𑀺 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑁂 𑀖𑀭𑀤𑁆𑀯𑀸𑀭𑀫𑀽𑀮𑁂. 𑀳𑀢𑁆𑀣𑀧𑀸𑀲𑀸 𑀯𑀸𑀢𑀺 𑀕𑀩𑁆𑀪𑀲𑁆𑀲 𑀯𑀸 𑀖𑀭𑀤𑁆𑀯𑀸𑀭𑀫𑀽𑀮𑀲𑁆𑀲 𑀯𑀸 𑀳𑀢𑁆𑀣𑀧𑀸𑀲𑀸.

𑁪𑁮𑁨-𑁭. 𑀉𑀤𑁄𑀲𑀺𑀢𑁄𑀢𑀺 𑀬𑀸𑀦𑀸𑀤𑀻𑀦𑀁 𑀪𑀡𑁆𑀟𑀸𑀦𑀁 𑀲𑀸𑀮𑀸. 𑀇𑀢𑁄 𑀧𑀝𑁆𑀞𑀸𑀬 𑀘 𑀦𑀺𑀯𑁂𑀲𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀝𑁄𑀢𑀺 𑀧𑀝𑀺𑀭𑀸𑀚𑀸𑀤𑀺𑀧𑀝𑀺𑀩𑀸𑀳𑀦𑀢𑁆𑀣𑀁 𑀇𑀝𑁆𑀞𑀓𑀸𑀳𑀺 𑀓𑀢𑁄 𑀩𑀳𑀮𑀪𑀺𑀢𑁆𑀢𑀺𑀓𑁄 𑀘𑀢𑀼𑀧𑀜𑁆𑀘𑀪𑀽𑀫𑀺𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀫𑀸𑀴𑁄𑀢𑀺 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀧𑀸𑀲𑀸𑀤𑁄𑀢𑀺 𑀤𑀻𑀖𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀦𑁆𑀢𑀺 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄.

𑁪𑁮𑁯. 𑀲𑀢𑁆𑀢𑀩𑁆𑀪𑀦𑁆𑀢𑀭𑀸𑀢𑀺𑀏𑀢𑁆𑀣 𑀏𑀓𑀁 𑀅𑀩𑁆𑀪𑀦𑁆𑀢𑀭𑀁 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀁 𑀳𑁄𑀢𑀺. 𑀲𑀘𑁂 𑀲𑀢𑁆𑀣𑁄 𑀕𑀘𑁆𑀙𑀦𑁆𑀢𑁄 𑀕𑀸𑀫𑀁 𑀯𑀸 𑀦𑀤𑀺𑀁 𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑁄 𑀳𑀼𑀢𑁆𑀯𑀸 𑀑𑀭𑀜𑁆𑀘 𑀧𑀸𑀭𑀜𑁆𑀘 𑀨𑀭𑀺𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺, 𑀲𑀢𑁆𑀣𑀧𑀭𑀺𑀳𑀸𑀭𑁄𑀯 𑀮𑀩𑁆𑀪𑀢𑀺. 𑀅𑀣 𑀕𑀸𑀫𑁂 𑀯𑀸 𑀦𑀤𑀺𑀬𑀸 𑀯𑀸 𑀧𑀭𑀺𑀬𑀸𑀧𑀦𑁆𑀦𑁄 𑀳𑁄𑀢𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑁄, 𑀕𑀸𑀫𑀧𑀭𑀺𑀳𑀸𑀭𑁄 𑀘𑁂𑀯 𑀦𑀤𑀻𑀧𑀭𑀺𑀳𑀸𑀭𑁄 𑀘 𑀮𑀩𑁆𑀪𑀢𑀺. 𑀲𑀘𑁂 𑀯𑀺𑀳𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀅𑀦𑁆𑀢𑁄𑀲𑀻𑀫𑀸𑀬 𑀘 𑀘𑀻𑀯𑀭𑀁 𑀳𑁄𑀢𑀺, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀩𑀳𑀺𑀲𑀻𑀫𑀸𑀬 𑀘𑀻𑀯𑀭𑀁 𑀳𑁄𑀢𑀺 𑀲𑀢𑁆𑀣𑀲𑀫𑀻𑀧𑁂𑀬𑁂𑀯 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀕𑀘𑁆𑀙𑀦𑁆𑀢𑁄 𑀲𑀓𑀝𑁂 𑀯𑀸 𑀪𑀕𑁆𑀕𑁂 𑀕𑁄𑀡𑁂 𑀯𑀸 𑀦𑀝𑁆𑀞𑁂 𑀅𑀦𑁆𑀢𑀭𑀸 𑀙𑀺𑀚𑁆𑀚𑀢𑀺, 𑀬𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀘𑀻𑀯𑀭𑀁 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁.

𑁪𑁯𑁦. 𑀏𑀓𑀓𑀼𑀮𑀲𑁆𑀲 𑀔𑁂𑀢𑁆𑀢𑁂 𑀳𑀢𑁆𑀣𑀧𑀸𑀲𑁄 𑀦𑀸𑀫 𑀘𑀻𑀯𑀭𑀳𑀢𑁆𑀣𑀧𑀸𑀲𑁄𑀬𑁂𑀯, 𑀦𑀸𑀦𑀸𑀓𑀼𑀮𑀲𑁆𑀲 𑀔𑁂𑀢𑁆𑀢𑁂 𑀳𑀢𑁆𑀣𑀧𑀸𑀲𑁄 𑀦𑀸𑀫 𑀔𑁂𑀢𑁆𑀢𑀤𑁆𑀯𑀸𑀭𑀲𑁆𑀲 𑀳𑀢𑁆𑀣𑀧𑀸𑀲𑁄. 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀘𑀻𑀯𑀭𑀲𑁆𑀲𑁂𑀯 𑀳𑀢𑁆𑀣𑀧𑀸𑀲𑁄.

𑁪𑁯𑁧-𑁪. 𑀥𑀜𑁆𑀜𑀓𑀭𑀡𑀦𑁆𑀢𑀺 𑀔𑀮𑀁 𑀯𑀼𑀘𑁆𑀘𑀢𑀺. 𑀆𑀭𑀸𑀫𑁄𑀢𑀺 𑀧𑀼𑀧𑁆𑀨𑀸𑀭𑀸𑀫𑁄 𑀯𑀸 𑀨𑀮𑀸𑀭𑀸𑀫𑁄 𑀯𑀸. 𑀤𑁆𑀯𑀻𑀲𑀼𑀧𑀺 𑀔𑁂𑀢𑁆𑀢𑁂 𑀯𑀼𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄. 𑀯𑀺𑀳𑀸𑀭𑁄 𑀦𑀺𑀯𑁂𑀲𑀦𑀲𑀤𑀺𑀲𑁄. 𑀭𑀼𑀓𑁆𑀔𑀫𑀽𑀮𑁂 𑀅𑀦𑁆𑀢𑁄𑀙𑀸𑀬𑀸𑀬𑀦𑁆𑀢𑀺 𑀙𑀸𑀬𑀸𑀬 𑀨𑀼𑀝𑁆𑀞𑁄𑀓𑀸𑀲𑀲𑁆𑀲 𑀅𑀦𑁆𑀢𑁄 𑀏𑀯. 𑀯𑀺𑀭𑀴𑀲𑀸𑀔𑀲𑁆𑀲 𑀧𑀦 𑀭𑀼𑀓𑁆𑀔𑀲𑁆𑀲 𑀆𑀢𑀧𑁂𑀦 𑀨𑀼𑀝𑁆𑀞𑁄𑀓𑀸𑀲𑁂 𑀞𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀲𑁆𑀲 𑀲𑀸𑀔𑀸𑀘𑁆𑀙𑀸𑀬𑀸𑀬 𑀯𑀸 𑀔𑀦𑁆𑀥𑀘𑁆𑀙𑀸𑀬𑀸𑀬 𑀯𑀸 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀲𑀸𑀔𑀸𑀬 𑀯𑀸 𑀯𑀺𑀝𑀧𑁂 𑀯𑀸 𑀞𑀧𑁂𑀢𑀺, 𑀉𑀧𑀭𑀺 𑀅𑀜𑁆𑀜𑀲𑀸𑀔𑀸𑀘𑁆𑀙𑀸𑀬𑀸𑀬 𑀨𑀼𑀝𑁆𑀞𑁄𑀓𑀸𑀲𑁂𑀬𑁂𑀯 𑀞𑀧𑁂𑀢𑀩𑁆𑀩𑀁. 𑀔𑀼𑀚𑁆𑀚𑀭𑀼𑀓𑁆𑀔𑀲𑁆𑀲 𑀙𑀸𑀬𑀸 𑀤𑀽𑀭𑀁 𑀕𑀘𑁆𑀙𑀢𑀺, 𑀙𑀸𑀬𑀸𑀬 𑀕𑀢𑀝𑁆𑀞𑀸𑀦𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀇𑀥𑀸𑀧𑀺 𑀳𑀢𑁆𑀣𑀧𑀸𑀲𑁄 𑀘𑀻𑀯𑀭𑀳𑀢𑁆𑀣𑀧𑀸𑀲𑁄𑀬𑁂𑀯.

𑀅𑀕𑀸𑀫𑀓𑁂 𑀅𑀭𑀜𑁆𑀜𑁂𑀢𑀺 𑀅𑀕𑀸𑀫𑀓𑀁 𑀦𑀸𑀫 𑀅𑀭𑀜𑁆𑀜𑀁 𑀯𑀺𑀜𑁆𑀛𑀸𑀝𑀯𑀻𑀆𑀤𑀻𑀲𑀼 𑀯𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀯𑀸 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑁂 𑀤𑀻𑀧𑀓𑁂𑀲𑀼 𑀮𑀩𑁆𑀪𑀢𑀺. 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸𑀢𑀺 𑀫𑀚𑁆𑀛𑁂 𑀞𑀺𑀢𑀲𑁆𑀲 𑀲𑀫𑀢𑁆𑀢𑀸 𑀲𑀩𑁆𑀩𑀤𑀺𑀲𑀸𑀲𑀼 𑀲𑀢𑁆𑀢𑀩𑁆𑀪𑀦𑁆𑀢𑀭𑀸, 𑀯𑀺𑀦𑀺𑀩𑁆𑀩𑁂𑀥𑁂𑀦 𑀘𑀼𑀤𑁆𑀤𑀲 𑀳𑁄𑀦𑁆𑀢𑀺. 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀧𑀼𑀭𑀢𑁆𑀣𑀺𑀫𑀸𑀬 𑀯𑀸 𑀧𑀘𑁆𑀙𑀺𑀫𑀸𑀬 𑀯𑀸 𑀤𑀺𑀲𑀸𑀬 𑀧𑀭𑀺𑀬𑀦𑁆𑀢𑁂 𑀞𑀧𑀺𑀢𑀘𑀻𑀯𑀭𑀁 𑀭𑀓𑁆𑀔𑀢𑀺. 𑀲𑀘𑁂 𑀧𑀦 𑀅𑀭𑀼𑀡𑀼𑀕𑁆𑀕𑀫𑀦𑀲𑀫𑀬𑁂 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀕𑀘𑁆𑀙𑀢𑀺, 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀁. 𑀉𑀧𑁄𑀲𑀣𑀓𑀸𑀮𑁂 𑀧𑀦 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀼𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀲𑁄𑀥𑁂𑀢𑀩𑁆𑀩𑀸. 𑀬𑀢𑁆𑀢𑀓𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀯𑀟𑁆𑀠𑀢𑀺, 𑀲𑀻𑀫𑀸𑀧𑀺 𑀢𑀢𑁆𑀢𑀓𑀁 𑀯𑀟𑁆𑀠𑀢𑀺.

𑁪𑁯𑁫. 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 𑀲𑀘𑁂 𑀧𑀥𑀸𑀦𑀺𑀓𑁄 𑀪𑀺𑀓𑁆𑀔𑀼 𑀲𑀩𑁆𑀩𑀭𑀢𑁆𑀢𑀺𑀁 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀘𑀼𑀲𑀲𑀫𑀬𑁂 ‘‘𑀦𑁆𑀳𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀢𑀻𑀡𑀺𑀧𑀺 𑀘𑀻𑀯𑀭𑀸𑀦𑀺 𑀢𑀻𑀭𑁂 𑀞𑀧𑁂𑀢𑁆𑀯𑀸 𑀦𑀤𑀺𑀁 𑀑𑀢𑀭𑀢𑀺, 𑀦𑁆𑀳𑀸𑀬𑀦𑁆𑀢𑀲𑁆𑀲𑁂𑀯 𑀘𑀲𑁆𑀲 𑀅𑀭𑀼𑀡𑀁 𑀉𑀝𑁆𑀞𑀳𑀢𑀺, 𑀓𑀺𑀁 𑀓𑀸𑀢𑀩𑁆𑀩𑀁. 𑀲𑁄 𑀳𑀺 𑀬𑀤𑀺 𑀉𑀢𑁆𑀢𑀭𑀺𑀢𑁆𑀯𑀸 𑀘𑀻𑀯𑀭𑀁 𑀦𑀺𑀯𑀸𑀲𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀘𑀻𑀯𑀭𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀅𑀣 𑀦𑀕𑁆𑀕𑁄 𑀕𑀘𑁆𑀙𑀢𑀺, 𑀏𑀯𑀫𑁆𑀧𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺? 𑀦 𑀆𑀧𑀚𑁆𑀚𑀢𑀺. 𑀲𑁄 𑀳𑀺 𑀬𑀸𑀯 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀢𑀸𑀯 𑀢𑁂𑀲𑀁 𑀘𑀻𑀯𑀭𑀸𑀦𑀁 𑀅𑀧𑀭𑀺𑀪𑁄𑀕𑀸𑀭𑀳𑀢𑁆𑀢𑀸 𑀦𑀝𑁆𑀞𑀘𑀻𑀯𑀭𑀝𑁆𑀞𑀸𑀦𑁂 𑀞𑀺𑀢𑁄 𑀳𑁄𑀢𑀺. 𑀦𑀝𑁆𑀞𑀘𑀻𑀯𑀭𑀲𑁆𑀲 𑀘 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀤𑁆𑀯𑁂 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀤𑀽𑀭𑁂 𑀯𑀺𑀳𑀸𑀭𑁄 𑀳𑁄𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀦𑀼𑀲𑁆𑀲𑀸 𑀲𑀜𑁆𑀘𑀭𑀦𑁆𑀢𑀺. 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀏𑀓𑀁 𑀅𑀁𑀲𑀓𑀽𑀝𑁂 𑀞𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁂 𑀲𑀪𑀸𑀕𑀪𑀺𑀓𑁆𑀔𑀽 𑀦 𑀧𑀲𑁆𑀲𑀢𑀺, 𑀪𑀺𑀓𑁆𑀔𑀸𑀘𑀸𑀭𑀁 𑀕𑀢𑀸 𑀳𑁄𑀦𑁆𑀢𑀺, 𑀲𑀗𑁆𑀖𑀸𑀝𑀺𑀁 𑀩𑀳𑀺𑀕𑀸𑀫𑁂 𑀞𑀧𑁂𑀢𑁆𑀯𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀩𑀳𑀺𑀕𑀸𑀫𑁂 𑀘𑁄𑀭𑀪𑀬𑀁 𑀳𑁄𑀢𑀺, 𑀧𑀸𑀭𑀼𑀧𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀆𑀲𑀦𑀲𑀸𑀮𑀸 𑀲𑀫𑁆𑀩𑀸𑀥𑀸 𑀳𑁄𑀢𑀺 𑀚𑀦𑀸𑀓𑀺𑀡𑁆𑀡𑀸, 𑀦 𑀲𑀓𑁆𑀓𑀸 𑀏𑀓𑀫𑀦𑁆𑀢𑁂 𑀘𑀻𑀯𑀭𑀁 𑀅𑀧𑀦𑁂𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀼𑀁, 𑀏𑀓𑀁 𑀪𑀺𑀓𑁆𑀔𑀼𑀁 𑀆𑀤𑀸𑀬 𑀩𑀳𑀺𑀕𑀸𑀫𑀁 𑀕𑀦𑁆𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀘𑀻𑀯𑀭𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺.

𑀲𑀘𑁂 𑀪𑀺𑀓𑁆𑀔𑀽 𑀤𑀳𑀭𑀸𑀦𑀁 𑀳𑀢𑁆𑀣𑁂 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀲𑀬𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀳𑀢𑁆𑀣𑀧𑀸𑀲𑁂 𑀓𑀢𑁆𑀯𑀸𑀯 𑀲𑀬𑀺𑀢𑀩𑁆𑀩𑀁. 𑀲𑀘𑁂 𑀕𑀘𑁆𑀙𑀦𑁆𑀢𑀸𑀦𑀁𑀬𑁂𑀯 𑀅𑀲𑀫𑁆𑀧𑀢𑁆𑀢𑁂𑀲𑀼 𑀤𑀳𑀭𑁂𑀲𑀼 𑀅𑀭𑀼𑀡𑀁 𑀉𑀕𑁆𑀕𑀘𑁆𑀙𑀢𑀺, 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀦𑀺𑀲𑁆𑀲𑀬𑁄 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀤𑀳𑀭𑀸𑀦𑀫𑁆𑀧𑀺 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀸𑀦𑀁 𑀣𑁂𑀭𑁂𑀲𑀼 𑀅𑀲𑀫𑁆𑀧𑀢𑁆𑀢𑁂𑀲𑀼 𑀏𑀲𑁂𑀯 𑀦𑀬𑁄. 𑀫𑀕𑁆𑀕𑀁 𑀯𑀺𑀭𑀚𑁆𑀛𑀺𑀢𑁆𑀯𑀸 𑀅𑀭𑀜𑁆𑀜𑁂 𑀅𑀜𑁆𑀜𑀫𑀜𑁆𑀜𑀁 𑀅𑀧𑀲𑁆𑀲𑀦𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀤𑀳𑀭𑀸 ‘‘𑀫𑀬𑀁, 𑀪𑀦𑁆𑀢𑁂, 𑀫𑀼𑀳𑀼𑀢𑁆𑀢𑀁 𑀲𑀬𑀺𑀢𑁆𑀯𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀢𑀼𑀫𑁆𑀳𑁂 𑀲𑀫𑁆𑀧𑀸𑀧𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀲𑀬𑀦𑁆𑀢𑀺, 𑀘𑀻𑀯𑀭𑀜𑁆𑀘 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀦𑀺𑀲𑁆𑀲𑀬𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀤𑀳𑀭𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀣𑁂𑀭𑁂𑀲𑀼 𑀲𑀬𑀦𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑁂𑀥𑀸𑀧𑀣𑀁 𑀤𑀺𑀲𑁆𑀯𑀸 𑀣𑁂𑀭𑀸 ‘‘𑀅𑀬𑀁 𑀫𑀕𑁆𑀕𑁄’’ 𑀤𑀳𑀭𑀸 ‘‘𑀅𑀬𑀁 𑀫𑀕𑁆𑀕𑁄’’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀕𑀢𑀸, 𑀲𑀳 𑀅𑀭𑀼𑀡𑀼𑀕𑁆𑀕𑀫𑀦𑀸 𑀘𑀻𑀯𑀭𑀸𑀦𑀺 𑀘 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀤𑀳𑀭𑀸 𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫 ‘‘𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀸’’𑀢𑀺 𑀪𑁂𑀲𑀚𑁆𑀚𑀢𑁆𑀣𑀸𑀬 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺. 𑀅𑀲𑀫𑁆𑀧𑀢𑁆𑀢𑀸𑀦𑀁𑀬𑁂𑀯 𑀘 𑀢𑁂𑀲𑀁 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀘𑀻𑀯𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀧𑀦 𑀥𑁂𑀦𑀼𑀪𑀬𑁂𑀦 𑀯𑀸 𑀲𑀼𑀦𑀔𑀪𑀬𑁂𑀦 𑀯𑀸 ‘‘𑀫𑀼𑀳𑀼𑀢𑁆𑀢𑀁 𑀞𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀞𑀢𑁆𑀯𑀸 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀯𑀸 𑀕𑀘𑁆𑀙𑀦𑁆𑀢𑀺, 𑀅𑀦𑁆𑀢𑀭𑀸 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀘𑀻𑀯𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 ‘‘𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀅𑀦𑁆𑀢𑁄𑀲𑀻𑀫𑀸𑀬𑀁 𑀕𑀸𑀫𑀁 𑀧𑀯𑀺𑀝𑁆𑀞𑀸𑀦𑀁 𑀅𑀦𑁆𑀢𑀭𑀸 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀦𑁂𑀯 𑀘𑀻𑀯𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀧𑀦 ‘‘𑀯𑀺𑀪𑀸𑀬𑀢𑀼 𑀢𑀸𑀯𑀸’’𑀢𑀺 𑀦𑀺𑀲𑀻𑀤𑀦𑁆𑀢𑀺, 𑀅𑀭𑀼𑀡𑁂 𑀉𑀕𑁆𑀕𑀢𑁂𑀧𑀺 𑀦 𑀘𑀻𑀯𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀧𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀬𑁂𑀧𑀺 ‘‘𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑀁 𑀥𑀫𑁆𑀫𑀲𑀯𑀦𑀢𑁆𑀣𑀸𑀬 𑀲𑀉𑀲𑁆𑀲𑀸𑀳𑀸 𑀕𑀘𑁆𑀙𑀦𑁆𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀘 𑀦𑁂𑀲𑀁 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀘𑀻𑀯𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀥𑀫𑁆𑀫𑀕𑀸𑀭𑀯𑁂𑀦 ‘‘𑀬𑀸𑀯 𑀧𑀭𑀺𑀬𑁄𑀲𑀸𑀦𑀁 𑀲𑀼𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀻𑀤𑀦𑁆𑀢𑀺, 𑀲𑀳 𑀅𑀭𑀼𑀡𑀲𑁆𑀲𑀼𑀕𑁆𑀕𑀫𑀦𑀸 𑀘𑀻𑀯𑀭𑀸𑀦𑀺𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄𑀧𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀣𑁂𑀭𑁂𑀦 𑀤𑀳𑀭𑀁 𑀘𑀻𑀯𑀭𑀥𑁄𑀯𑀦𑀢𑁆𑀣𑀸𑀬 𑀕𑀸𑀫𑀓𑀁 𑀧𑁂𑀲𑁂𑀦𑁆𑀢𑁂𑀦 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸𑀯 𑀤𑀸𑀢𑀩𑁆𑀩𑀁. 𑀤𑀳𑀭𑀲𑁆𑀲𑀸𑀧𑀺 𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀅𑀲𑁆𑀲𑀢𑀺𑀬𑀸 𑀕𑀘𑁆𑀙𑀢𑀺, 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀤𑀳𑀭𑀲𑁆𑀲 𑀘𑀻𑀯𑀭𑀁 𑀯𑀺𑀲𑁆𑀲𑀸𑀲𑁂𑀦 𑀕𑀳𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀣𑁂𑀭𑁄 𑀦𑀲𑁆𑀲𑀭𑀢𑀺, 𑀤𑀳𑀭𑁄 𑀏𑀯 𑀲𑀭𑀢𑀺, 𑀤𑀳𑀭𑁂𑀦 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀘𑀻𑀯𑀭𑀁 𑀯𑀺𑀲𑁆𑀲𑀸𑀲𑁂𑀦 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀅𑀢𑁆𑀢𑀦𑁄𑀧𑀺 𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀏𑀯𑀁 𑀏𑀓𑀲𑁆𑀲 𑀲𑀢𑀺𑀬𑀸𑀧𑀺 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀳𑁄𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑁂 𑀅𑀦𑀥𑀺𑀝𑁆𑀞𑀸𑀦𑀁 𑀅𑀯𑀺𑀓𑀧𑁆𑀧𑀦𑀜𑁆𑀘 𑀅𑀓𑀺𑀭𑀺𑀬𑀁, 𑀇𑀥 𑀅𑀧𑀘𑁆𑀘𑀼𑀤𑁆𑀥𑀭𑀡𑀁 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁯𑁭. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀢𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀉𑀲𑁆𑀲𑀸𑀧𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀯𑀺𑀫𑀚𑁆𑀚𑀢𑀻𑀢𑀺 ‘‘𑀯𑀮𑀻𑀲𑀼 𑀦𑀝𑁆𑀞𑀸𑀲𑀼 𑀇𑀤𑀁 𑀫𑀳𑀦𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀉𑀤𑀓𑁂𑀦 𑀲𑀺𑀜𑁆𑀘𑀺𑀢𑁆𑀯𑀸 𑀧𑀸𑀤𑁂𑀳𑀺 𑀅𑀓𑁆𑀓𑀫𑀺𑀢𑁆𑀯𑀸 𑀳𑀢𑁆𑀣𑁂𑀳𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀖𑀁𑀲𑀢𑀺, 𑀢𑀁 𑀆𑀢𑀧𑁂 𑀲𑀼𑀓𑁆𑀔𑀁 𑀧𑀞𑀫𑀧𑁆𑀧𑀫𑀸𑀡𑀫𑁂𑀯 𑀳𑁄𑀢𑀺. 𑀲𑁄 𑀧𑀼𑀦𑀧𑀺 𑀢𑀣𑀸 𑀓𑀭𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀲𑁆𑀲𑀸𑀧𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀯𑀺𑀫𑀚𑁆𑀚𑀢𑀻’’𑀢𑀺. 𑀢𑀁 𑀏𑀯𑀁 𑀓𑀺𑀮𑀫𑀦𑁆𑀢𑀁 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀯𑀺𑀬 𑀢𑀢𑁆𑀣 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲 𑀔𑁄 𑀪𑀕𑀯𑀸’’𑀢𑀺𑀆𑀤𑀺.

𑁪𑁯𑁯-𑁫𑁦𑁦. 𑀏𑀓𑀸𑀤𑀲𑀫𑀸𑀲𑁂𑀢𑀺 𑀏𑀓𑀁 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑀁 𑀞𑀧𑁂𑀢𑁆𑀯𑀸 𑀲𑁂𑀲𑁂 𑀏𑀓𑀸𑀤𑀲𑀫𑀸𑀲𑁂. 𑀲𑀢𑁆𑀢𑀫𑀸𑀲𑁂𑀢𑀺 𑀓𑀢𑁆𑀢𑀺𑀓𑀫𑀸𑀲𑀁 𑀳𑁂𑀫𑀦𑁆𑀢𑀺𑀓𑁂 𑀘 𑀘𑀢𑁆𑀢𑀸𑀭𑁄𑀢𑀺 𑀧𑀜𑁆𑀘𑀫𑀸𑀲𑁂 𑀞𑀧𑁂𑀢𑁆𑀯𑀸 𑀲𑁂𑀲𑁂 𑀲𑀢𑁆𑀢𑀫𑀸𑀲𑁂. 𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀦𑁆𑀢𑀺 𑀲𑀗𑁆𑀖𑀲𑁆𑀲 𑀯𑀸 ‘‘𑀇𑀤𑀁 𑀅𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀺𑀦𑁆𑀦𑀁, 𑀏𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 ‘‘𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁.

𑀲𑀗𑁆𑀖𑀢𑁄 𑀯𑀸𑀢𑀺 𑀅𑀢𑁆𑀢𑀦𑁄 𑀧𑀢𑁆𑀢𑀪𑀸𑀕𑀯𑀲𑁂𑀦 𑀲𑀗𑁆𑀖𑀢𑁄 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀕𑀡𑀢𑁄 𑀯𑀸𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀺𑀓𑀕𑀡𑀲𑁆𑀲 𑀤𑁂𑀫, 𑀇𑀤𑀁 𑀆𑀪𑀺𑀥𑀫𑁆𑀫𑀺𑀓𑀕𑀡𑀲𑁆𑀲𑀸𑀢𑀺 𑀏𑀯𑀁 𑀕𑀡𑀲𑁆𑀲 𑀤𑁂𑀦𑁆𑀢𑀺. 𑀢𑀢𑁄 𑀅𑀢𑁆𑀢𑀦𑁄 𑀧𑀢𑁆𑀢𑀪𑀸𑀕𑀯𑀲𑁂𑀦 𑀕𑀡𑀢𑁄 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬.

𑀦𑁄 𑀘𑀲𑁆𑀲 𑀧𑀸𑀭𑀺𑀧𑀽𑀭𑀻𑀢𑀺 𑀦𑁄 𑀘𑁂 𑀧𑀸𑀭𑀺𑀧𑀽𑀭𑀻 𑀪𑀯𑁂𑀬𑁆𑀬, 𑀬𑀢𑁆𑀢𑀓𑁂𑀦 𑀓𑀬𑀺𑀭𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀘𑀻𑀯𑀭𑀁 𑀧𑀳𑁄𑀢𑀺, 𑀢𑀜𑁆𑀘𑁂 𑀘𑀻𑀯𑀭𑀁 𑀢𑀢𑁆𑀢𑀓𑀁 𑀦 𑀪𑀯𑁂𑀬𑁆𑀬, 𑀊𑀦𑀓𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀧𑀘𑁆𑀘𑀸𑀲𑀸 𑀳𑁄𑀢𑀺 𑀲𑀗𑁆𑀖𑀢𑁄 𑀯𑀸𑀢𑀺𑀆𑀤𑀻𑀲𑀼 𑀅𑀲𑀼𑀓𑀤𑀺𑀯𑀲𑀁 𑀦𑀸𑀫 𑀲𑀗𑁆𑀖𑁄 𑀘𑀻𑀯𑀭𑀸𑀦𑀺 𑀮𑀪𑀺𑀲𑁆𑀲𑀢𑀺, 𑀕𑀡𑁄 𑀮𑀪𑀺𑀲𑁆𑀲𑀢𑀺, 𑀢𑀢𑁄 𑀫𑁂 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀏𑀯𑀁 𑀲𑀗𑁆𑀖𑀢𑁄 𑀯𑀸 𑀕𑀡𑀢𑁄 𑀯𑀸 𑀧𑀘𑁆𑀘𑀸𑀲𑀸 𑀳𑁄𑀢𑀺. 𑀜𑀸𑀢𑀓𑁂𑀳𑀺 𑀫𑁂 𑀘𑀻𑀯𑀭𑀢𑁆𑀣𑀸𑀬 𑀧𑁂𑀲𑀺𑀢𑀁, 𑀫𑀺𑀢𑁆𑀢𑁂𑀳𑀺 𑀧𑁂𑀲𑀺𑀢𑀁, 𑀢𑁂 𑀆𑀕𑀢𑀸 𑀘𑀻𑀯𑀭𑁂 𑀤𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀜𑀸𑀢𑀺𑀢𑁄 𑀯𑀸 𑀫𑀺𑀢𑁆𑀢𑀢𑁄 𑀯𑀸 𑀧𑀘𑁆𑀘𑀸𑀲𑀸 𑀳𑁄𑀢𑀺. 𑀧𑀁𑀲𑀼𑀓𑀽𑀮𑀁 𑀯𑀸𑀢𑀺 𑀏𑀢𑁆𑀣 𑀧𑀦 𑀧𑀁𑀲𑀼𑀓𑀽𑀮𑀁 𑀯𑀸 𑀮𑀘𑁆𑀙𑀸𑀫𑀻𑀢𑀺 𑀏𑀯𑀁 𑀧𑀘𑁆𑀘𑀸𑀲𑀸 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀓𑀧𑁆𑀧𑀸𑀲𑀲𑀼𑀢𑁆𑀢𑀸𑀤𑀺𑀦𑀸 𑀥𑀦𑁂𑀦, 𑀅𑀲𑀼𑀓𑀤𑀺𑀯𑀲𑀁 𑀦𑀸𑀫 𑀮𑀘𑁆𑀙𑀸𑀫𑀻𑀢𑀺 𑀏𑀯𑀁 𑀯𑀸 𑀧𑀘𑁆𑀘𑀸𑀲𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀦𑀺𑀓𑁆𑀔𑀺𑀧𑁂𑀬𑁆𑀬 𑀲𑀢𑀺𑀬𑀸𑀧𑀺 𑀧𑀘𑁆𑀘𑀸𑀲𑀸𑀬𑀸𑀢𑀺 𑀫𑀸𑀲𑀧𑀭𑀫𑀢𑁄 𑀘𑁂 𑀉𑀢𑁆𑀢𑀭𑀺 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀦 𑀅𑀯𑀢𑁆𑀯𑀸 𑀬𑀲𑁆𑀫𑀸 𑀅𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀫𑀸𑀦𑁂 𑀧𑀘𑁆𑀘𑀸𑀲𑀸𑀘𑀻𑀯𑀭𑁂 𑀫𑀽𑀮𑀘𑀻𑀯𑀭𑀲𑁆𑀲 𑀉𑀧𑁆𑀧𑀦𑁆𑀦𑀤𑀺𑀯𑀲𑀢𑁄 𑀬𑀸𑀯 𑀯𑀻𑀲𑀢𑀺𑀫𑁄 𑀤𑀺𑀯𑀲𑁄 𑀢𑀸𑀯 𑀉𑀧𑁆𑀧𑀦𑁆𑀦𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀫𑀽𑀮𑀘𑀻𑀯𑀭𑀁 𑀅𑀢𑁆𑀢𑀦𑁄 𑀕𑀢𑀺𑀓𑀁 𑀓𑀭𑁄𑀢𑀺, 𑀢𑀢𑁄 𑀉𑀤𑁆𑀥𑀁 𑀫𑀽𑀮𑀘𑀻𑀯𑀭𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀅𑀢𑁆𑀢𑀦𑁄 𑀕𑀢𑀺𑀓𑀁 𑀓𑀭𑁄𑀢𑀺. 𑀢𑀲𑁆𑀫𑀸 𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀤𑀳𑀼𑀧𑁆𑀧𑀦𑁆𑀦𑁂 𑀫𑀽𑀮𑀘𑀻𑀯𑀭𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁, 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀯𑀺𑀲𑀪𑀸𑀕𑁂 𑀉𑀧𑁆𑀧𑀦𑁆𑀦𑁂 𑀫𑀽𑀮𑀘𑀻𑀯𑀭𑁂𑀢𑀺 𑀬𑀤𑀺 𑀫𑀽𑀮𑀘𑀻𑀯𑀭𑀁 𑀲𑀡𑁆𑀳𑀁, 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀣𑀽𑀮𑀁, 𑀦 𑀲𑀓𑁆𑀓𑀸 𑀬𑁄𑀚𑁂𑀢𑀼𑀁. 𑀭𑀢𑁆𑀢𑀺𑀬𑁄 𑀘 𑀲𑁂𑀲𑀸 𑀳𑁄𑀦𑁆𑀢𑀺, 𑀦 𑀢𑀸𑀯 𑀫𑀸𑀲𑁄 𑀧𑀽𑀭𑀢𑀺, 𑀦 𑀅𑀓𑀸𑀫𑀸 𑀦𑀺𑀕𑁆𑀕𑀳𑁂𑀦 𑀘𑀻𑀯𑀭𑀁 𑀓𑀸𑀭𑁂𑀢𑀩𑁆𑀩𑀁. 𑀅𑀜𑁆𑀜𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀮𑀪𑀺𑀢𑁆𑀯𑀸𑀬𑁂𑀯 𑀓𑀸𑀮𑀩𑁆𑀪𑀦𑁆𑀢𑀭𑁂 𑀓𑀸𑀭𑁂𑀢𑀩𑁆𑀩𑀁. 𑀧𑀘𑁆𑀘𑀸𑀲𑀸𑀘𑀻𑀯𑀭𑀫𑁆𑀧𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀅𑀣 𑀫𑀽𑀮𑀘𑀻𑀯𑀭𑀁 𑀣𑀽𑀮𑀁 𑀳𑁄𑀢𑀺, 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀲𑀡𑁆𑀳𑀁, 𑀫𑀽𑀮𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀸𑀲𑀸𑀘𑀻𑀯𑀭𑀫𑁂𑀯 𑀫𑀽𑀮𑀘𑀻𑀯𑀭𑀁 𑀓𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀢𑀁 𑀧𑀼𑀦 𑀫𑀸𑀲𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀏𑀢𑁂𑀦𑀼𑀧𑀸𑀬𑁂𑀦 𑀬𑀸𑀯 𑀇𑀘𑁆𑀙𑀢𑀺 𑀢𑀸𑀯 𑀅𑀜𑁆𑀜𑀫𑀜𑁆𑀜𑀁 𑀫𑀽𑀮𑀘𑀻𑀯𑀭𑀁 𑀓𑀢𑁆𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀓𑀣𑀺𑀦𑀲𑀤𑀺𑀲𑀸𑀦𑁂𑀯𑀸𑀢𑀺.

𑀢𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁦𑁩-𑁫. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸𑀢𑀺 𑀧𑀺𑀢𑀼𑀧𑀺𑀢𑀸 𑀧𑀺𑀢𑀸𑀫𑀳𑁄, 𑀧𑀺𑀢𑀸𑀫𑀳𑀲𑁆𑀲 𑀬𑀼𑀕𑀁 𑀧𑀺𑀢𑀸𑀫𑀳𑀬𑀼𑀕𑀁. 𑀬𑀼𑀕𑀦𑁆𑀢𑀺 𑀆𑀬𑀼𑀧𑁆𑀧𑀫𑀸𑀡𑀁 𑀯𑀼𑀘𑁆𑀘𑀢𑀺. 𑀅𑀪𑀺𑀮𑀸𑀧 𑀫𑀢𑁆𑀢𑀫𑁂𑀯 𑀘𑁂𑀢𑀁. 𑀅𑀢𑁆𑀣𑀢𑁄 𑀧𑀦 𑀧𑀺𑀢𑀸𑀫𑀳𑁄𑀬𑁂𑀯 𑀧𑀺𑀢𑀸𑀫𑀳𑀬𑀼𑀕𑀁. 𑀢𑀢𑁄 𑀉𑀤𑁆𑀥𑀁 𑀲𑀩𑁆𑀩𑁂𑀧𑀺 𑀧𑀼𑀩𑁆𑀩𑀧𑀼𑀭𑀺𑀲𑀸 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸. 𑀏𑀯𑀁 𑀬𑀸𑀯 𑀲𑀢𑁆𑀢𑀫𑁄 𑀧𑀼𑀭𑀺𑀲𑁄 𑀢𑀸𑀯 𑀬𑀸 𑀅𑀲𑀫𑁆𑀩𑀤𑁆𑀥𑀸 𑀲𑀸 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀲𑀫𑁆𑀩𑀤𑁆𑀥𑀸𑀢𑀺 𑀯𑀼𑀘𑁆𑀘𑀢𑀺. 𑀤𑁂𑀲𑀦𑀸𑀫𑀼𑀔𑀫𑁂𑀯 𑀘𑁂𑀢𑀁. ‘‘𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸’’𑀢𑀺𑀯𑀘𑀦𑀢𑁄 𑀧𑀦 𑀧𑀺𑀢𑀸𑀫𑀳𑀬𑀼𑀕𑀫𑁆𑀧𑀺 𑀧𑀺𑀢𑀸𑀫𑀳𑀺𑀬𑀼𑀕𑀫𑁆𑀧𑀺 𑀫𑀸𑀢𑀸𑀫𑀳𑀬𑀼𑀕𑀫𑁆𑀧𑀺 𑀫𑀸𑀢𑀸𑀫𑀳𑀺𑀬𑀼𑀕𑀫𑁆𑀧𑀺 𑀢𑁂𑀲𑀁 𑀪𑀸𑀢𑀼𑀪𑀕𑀺𑀦𑀻𑀪𑀸𑀕𑀺𑀦𑁂𑀬𑁆𑀬𑀧𑀼𑀢𑁆𑀢𑀧𑀧𑀼𑀢𑁆𑀢𑀸𑀤𑀬𑁄𑀧𑀺 𑀲𑀩𑁆𑀩𑁂 𑀇𑀥 𑀲𑀗𑁆𑀕𑀳𑀺𑀢𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀯𑀺𑀢𑁆𑀣𑀸𑀭𑀦𑀬𑁄 𑁋 𑀧𑀺𑀢𑀸 𑀧𑀺𑀢𑀼𑀧𑀺𑀢𑀸 𑀢𑀲𑁆𑀲 𑀧𑀺𑀢𑀸 𑀢𑀲𑁆𑀲𑀸𑀧𑀺 𑀧𑀺𑀢𑀸𑀢𑀺 𑀏𑀯𑀁 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀧𑀺𑀢𑀸 𑀧𑀺𑀢𑀼𑀫𑀸𑀢𑀸 𑀢𑀲𑁆𑀲𑀸 𑀧𑀺𑀢𑀸 𑀘 𑀫𑀸𑀢𑀸 𑀘 𑀪𑀸𑀢𑀸 𑀘 𑀪𑀕𑀺𑀦𑀻 𑀘 𑀧𑀼𑀢𑁆𑀢𑀸 𑀘 𑀥𑀻𑀢𑀭𑁄 𑀘𑀸𑀢𑀺 𑀏𑀯𑀫𑁆𑀧𑀺 𑀉𑀤𑁆𑀥𑀜𑁆𑀘 𑀅𑀥𑁄 𑀘 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀧𑀺𑀢𑀸 𑀧𑀺𑀢𑀼𑀪𑀸𑀢𑀸 𑀧𑀺𑀢𑀼𑀪𑀕𑀺𑀦𑀻 𑀧𑀺𑀢𑀼𑀧𑀼𑀢𑁆𑀢𑀸 𑀧𑀺𑀢𑀼𑀥𑀻𑀢𑀭𑁄 𑀢𑁂𑀲𑀫𑁆𑀧𑀺 𑀧𑀼𑀢𑁆𑀢𑀥𑀻𑀢𑀼𑀧𑀭𑀫𑁆𑀧𑀭𑀸𑀢𑀺 𑀏𑀯𑀫𑁆𑀧𑀺 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀫𑀸𑀢𑀸 𑀫𑀸𑀢𑀼𑀫𑀸𑀢𑀸 𑀢𑀲𑁆𑀲𑀸 𑀫𑀸𑀢𑀸 𑀢𑀲𑁆𑀲𑀸𑀧𑀺 𑀫𑀸𑀢𑀸𑀢𑀺 𑀏𑀯𑀫𑁆𑀧𑀺 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀫𑀸𑀢𑀸 𑀫𑀸𑀢𑀼𑀧𑀺𑀢𑀸 𑀢𑀲𑁆𑀲 𑀫𑀸𑀢𑀸 𑀘 𑀧𑀺𑀢𑀸 𑀘 𑀪𑀸𑀢𑀸 𑀘 𑀪𑀕𑀺𑀦𑀻 𑀘 𑀧𑀼𑀢𑁆𑀢𑀸 𑀘 𑀥𑀻𑀢𑀭𑁄 𑀘𑀸𑀢𑀺, 𑀏𑀯𑀫𑁆𑀧𑀺 𑀉𑀤𑁆𑀥𑀜𑁆𑀘 𑀅𑀥𑁄 𑀘 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀫𑀸𑀢𑀸 𑀫𑀸𑀢𑀼𑀪𑀸𑀢𑀸 𑀫𑀸𑀢𑀼𑀪𑀕𑀺𑀦𑀻 𑀫𑀸𑀢𑀼𑀧𑀼𑀢𑁆𑀢𑀸 𑀫𑀸𑀢𑀼𑀥𑀻𑀢𑀭𑁄 𑀢𑁂𑀲𑀫𑁆𑀧𑀺 𑀧𑀼𑀢𑁆𑀢𑀥𑀻𑀢𑀼𑀧𑀭𑀫𑁆𑀧𑀭𑀸𑀢𑀺 𑀏𑀯𑀫𑁆𑀧𑀺 𑀬𑀸𑀯 𑀲𑀢𑁆𑀢𑀫𑀸 𑀬𑀼𑀕𑀸, 𑀦𑁂𑀯 𑀫𑀸𑀢𑀼𑀲𑀫𑁆𑀩𑀦𑁆𑀥𑁂𑀦 𑀦 𑀧𑀺𑀢𑀼𑀲𑀫𑁆𑀩𑀦𑁆𑀥𑁂𑀦 𑀲𑀫𑁆𑀩𑀤𑁆𑀥𑀸, 𑀅𑀬𑀁 𑀅𑀜𑁆𑀜𑀸𑀢𑀺𑀓𑀸 𑀦𑀸𑀫.

𑀉𑀪𑀢𑁄 𑀲𑀗𑁆𑀖𑁂𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀅𑀝𑁆𑀞𑀯𑀸𑀘𑀺𑀓𑀯𑀺𑀦𑀬𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑀸.

𑀲𑀓𑀺𑀁 𑀦𑀺𑀯𑀢𑁆𑀣𑀫𑁆𑀧𑀺 𑀲𑀓𑀺𑀁 𑀧𑀸𑀭𑀼𑀢𑀫𑁆𑀧𑀻𑀢𑀺 𑀭𑀚𑀺𑀢𑁆𑀯𑀸 𑀓𑀧𑁆𑀧𑀁 𑀓𑀢𑁆𑀯𑀸 𑀏𑀓𑀯𑀸𑀭𑀫𑁆𑀧𑀺 𑀦𑀺𑀯𑀢𑁆𑀣𑀁 𑀯𑀸 𑀧𑀸𑀭𑀼𑀢𑀁 𑀯𑀸. 𑀅𑀦𑁆𑀢𑀫𑀲𑁄 𑀧𑀭𑀺𑀪𑁄𑀕𑀲𑀻𑀲𑁂𑀦 𑀅𑀁𑀲𑁂 𑀯𑀸 𑀫𑀢𑁆𑀣𑀓𑁂 𑀯𑀸 𑀓𑀢𑁆𑀯𑀸 𑀫𑀕𑁆𑀕𑀁 𑀕𑀢𑁄 𑀳𑁄𑀢𑀺, 𑀉𑀲𑁆𑀲𑀻𑀲𑀓𑀁 𑀯𑀸 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀢𑀫𑁆𑀧𑀺 𑀧𑀼𑀭𑀸𑀡𑀘𑀻𑀯𑀭𑀫𑁂𑀯. 𑀲𑀘𑁂 𑀧𑀦 𑀧𑀘𑁆𑀘𑀢𑁆𑀣𑀭𑀡𑀲𑁆𑀲 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀳𑀢𑁆𑀣𑁂𑀳𑀺 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑁂 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀲𑀻𑀲𑁂𑀦 𑀅𑀨𑀼𑀲𑀦𑁆𑀢𑁄 𑀕𑀘𑁆𑀙𑀢𑀺, 𑀅𑀬𑀁 𑀧𑀭𑀺𑀪𑁄𑀕𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁.

𑀥𑁄𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀏𑀢𑁆𑀣 𑀏𑀯𑀁 𑀆𑀡𑀢𑁆𑀢𑀸 𑀪𑀺𑀓𑁆𑀔𑀼𑀦𑀻 𑀥𑁄𑀯𑀦𑀢𑁆𑀣𑀸𑀬 𑀉𑀤𑁆𑀥𑀦𑀁 𑀲𑀚𑁆𑀚𑁂𑀢𑀺, 𑀤𑀸𑀭𑀽𑀦𑀺 𑀲𑀁𑀳𑀭𑀢𑀺, 𑀅𑀕𑁆𑀕𑀺𑀁 𑀓𑀭𑁄𑀢𑀺, 𑀉𑀤𑀓𑀁 𑀆𑀳𑀭𑀢𑀺 𑀬𑀸𑀯 𑀦𑀁 𑀥𑁄𑀯𑀺𑀢𑁆𑀯𑀸 𑀉𑀓𑁆𑀔𑀺𑀧𑀢𑀺, 𑀢𑀸𑀯 𑀪𑀺𑀓𑁆𑀔𑀼𑀦𑀺𑀬𑀸 𑀧𑀬𑁄𑀕𑁂 𑀧𑀬𑁄𑀕𑁂 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀁. 𑀥𑁄𑀯𑀺𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀲𑀘𑁂 𑀤𑀼𑀤𑁆𑀥𑁄𑀢𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀧𑀼𑀦 𑀲𑀺𑀜𑁆𑀘𑀢𑀺 𑀯𑀸 𑀥𑁄𑀯𑀢𑀺 𑀯𑀸 𑀬𑀸𑀯 𑀦𑀺𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺 𑀢𑀸𑀯 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀏𑀲 𑀦𑀬𑁄 𑀭𑀚𑀦𑀸𑀓𑁄𑀝𑀦𑁂𑀲𑀼. 𑀭𑀚𑀦𑀤𑁄𑀡𑀺𑀬𑀜𑁆𑀳𑀺 𑀭𑀚𑀦𑀁 𑀆𑀓𑀺𑀭𑀺𑀢𑁆𑀯𑀸 𑀬𑀸𑀯 𑀲𑀓𑀺𑀁 𑀘𑀻𑀯𑀭𑀁 𑀭𑀚𑀢𑀺, 𑀢𑀢𑁄 𑀧𑀼𑀩𑁆𑀩𑁂 𑀬𑀁𑀓𑀺𑀜𑁆𑀘𑀺 𑀭𑀚𑀦𑀢𑁆𑀣𑀸𑀬 𑀓𑀭𑁄𑀢𑀺, 𑀧𑀘𑁆𑀙𑀸 𑀯𑀸 𑀧𑀝𑀺𑀭𑀚𑀢𑀺, 𑀲𑀩𑁆𑀩𑀢𑁆𑀣 𑀧𑀬𑁄𑀕𑁂 𑀧𑀬𑁄𑀕𑁂 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀁. 𑀏𑀯𑀁 𑀆𑀓𑁄𑀝𑀦𑁂𑀧𑀺 𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁦𑁬. 𑀅𑀜𑁆𑀜𑀸𑀢𑀺𑀓𑀸𑀬 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀻 𑀧𑀼𑀭𑀸𑀡𑀘𑀻𑀯𑀭𑀁 𑀥𑁄𑀯𑀸𑀧𑁂𑀢𑀻𑀢𑀺 𑀦𑁄 𑀘𑁂𑀧𑀺 ‘‘𑀇𑀫𑀁 𑀥𑁄𑀯𑀸’’𑀢𑀺 𑀯𑀤𑀢𑀺, 𑀅𑀣 𑀔𑁄 𑀥𑁄𑀯𑀦𑀢𑁆𑀣𑀸𑀬 𑀓𑀸𑀬𑀯𑀺𑀓𑀸𑀭𑀁 𑀓𑀢𑁆𑀯𑀸 𑀳𑀢𑁆𑀣𑁂𑀦 𑀯𑀸 𑀳𑀢𑁆𑀣𑁂 𑀤𑁂𑀢𑀺, 𑀧𑀸𑀤𑀫𑀽𑀮𑁂 𑀯𑀸 𑀞𑀧𑁂𑀢𑀺, 𑀉𑀧𑀭𑀺 𑀯𑀸 𑀔𑀺𑀧𑀢𑀺, 𑀲𑀺𑀓𑁆𑀔𑀫𑀸𑀦𑀸𑀲𑀸𑀫𑀡𑁂𑀭𑀻𑀲𑀸𑀫𑀡𑁂𑀭𑀉𑀧𑀸𑀲𑀓𑀢𑀺𑀢𑁆𑀣𑀺𑀬𑀸𑀤𑀻𑀦𑀁 𑀯𑀸 𑀳𑀢𑁆𑀣𑁂 𑀧𑁂𑀲𑁂𑀢𑀺, 𑀦𑀤𑀻𑀢𑀺𑀢𑁆𑀣𑁂 𑀥𑁄𑀯𑀦𑁆𑀢𑀺𑀬𑀸 𑀉𑀧𑀘𑀸𑀭𑁂 𑀯𑀸 𑀔𑀺𑀧𑀢𑀺, 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂 𑀑𑀓𑀸𑀲𑁂 𑀞𑀢𑁆𑀯𑀸, 𑀥𑁄𑀯𑀸𑀧𑀺𑀢𑀁𑀬𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀑𑀭𑀢𑁄 𑀞𑀧𑁂𑀢𑀺 𑀲𑀸 𑀘𑁂 𑀥𑁄𑀯𑀺𑀢𑁆𑀯𑀸 𑀆𑀦𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀺𑀓𑁆𑀔𑀫𑀸𑀦𑀸𑀬 𑀯𑀸 𑀲𑀸𑀫𑀡𑁂𑀭𑀺𑀬𑀸 𑀯𑀸 𑀉𑀧𑀸𑀲𑀺𑀓𑀸𑀬 𑀯𑀸 𑀳𑀢𑁆𑀣𑁂 𑀥𑁄𑀯𑀦𑀢𑁆𑀣𑀸𑀬 𑀤𑁂𑀢𑀺, 𑀲𑀸 𑀘𑁂 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀥𑁄𑀯𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀉𑀧𑀸𑀲𑀓𑀲𑁆𑀲 𑀳𑀢𑁆𑀣𑁂 𑀤𑁂𑀢𑀺, 𑀲𑁄 𑀘𑁂 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀥𑁄𑀯𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀲𑀸𑀫𑀡𑁂𑀭𑀲𑁆𑀲 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀳𑀢𑁆𑀣𑁂 𑀤𑀺𑀦𑁆𑀦𑁂𑀧𑀺 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂 𑀏𑀲𑁂𑀯 𑀦𑀬𑁄.

𑀥𑁄𑀯𑀸𑀧𑁂𑀢𑀺 𑀭𑀚𑀸𑀧𑁂𑀢𑀻𑀢𑀺𑀆𑀤𑀻𑀲𑀼 𑀏𑀓𑁂𑀦 𑀯𑀢𑁆𑀣𑀼𑀦𑀸 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀤𑀼𑀢𑀺𑀬𑁂𑀦 𑀤𑀼𑀓𑁆𑀓𑀝𑀁. 𑀢𑀻𑀡𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀏𑀓𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀲𑁂𑀲𑁂𑀳𑀺 𑀤𑁆𑀯𑁂 𑀤𑀼𑀓𑁆𑀓𑀝𑀸𑀦𑀺. 𑀬𑀲𑁆𑀫𑀸 𑀧𑀦𑁂𑀢𑀸𑀦𑀺 𑀥𑁄𑀯𑀦𑀸𑀤𑀻𑀦𑀺 𑀧𑀝𑀺𑀧𑀸𑀝𑀺𑀬𑀸 𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀸 𑀓𑀸𑀭𑁂𑀦𑁆𑀢𑀲𑁆𑀲 𑀫𑁄𑀓𑁆𑀔𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀏𑀢𑁆𑀣 𑀢𑀻𑀡𑀺 𑀘𑀢𑀼𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀲𑀘𑁂𑀧𑀺 𑀳𑀺 ‘‘𑀇𑀫𑀁 𑀘𑀻𑀯𑀭𑀁 𑀭𑀚𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑀸 𑀪𑀺𑀓𑁆𑀔𑀼𑀦𑀻 𑀧𑀞𑀫𑀁 𑀥𑁄𑀯𑀺𑀢𑁆𑀯𑀸 𑀧𑀘𑁆𑀙𑀸 𑀭𑀚𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀤𑀼𑀓𑁆𑀓𑀝𑀫𑁂𑀯. 𑀏𑀯𑀁 𑀲𑀩𑁆𑀩𑁂𑀲𑀼 𑀯𑀺𑀧𑀭𑀻𑀢𑀯𑀘𑀦𑁂𑀲𑀼 𑀦𑀬𑁄 𑀦𑁂𑀢𑀩𑁆𑀩𑁄. 𑀲𑀘𑁂 𑀧𑀦 ‘‘𑀥𑁄𑀯𑀺𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀯𑀼𑀢𑁆𑀢𑀸 𑀥𑁄𑀯𑀢𑀺 𑀘𑁂𑀯 𑀭𑀚𑀢𑀺 𑀘, 𑀥𑁄𑀯𑀸𑀧𑀦𑀧𑀘𑁆𑀘𑀬𑀸 𑀏𑀯 𑀆𑀧𑀢𑁆𑀢𑀺, 𑀭𑀚𑀦𑁂 𑀅𑀦𑀸𑀧𑀢𑁆𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀸𑀥𑀺𑀓𑀓𑀭𑀡𑁂 ‘‘𑀅𑀯𑀼𑀢𑁆𑀢𑀸 𑀥𑁄𑀯𑀢𑀻’’𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀅𑀦𑀸𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀇𑀫𑀲𑁆𑀫𑀺𑀁 𑀘𑀻𑀯𑀭𑁂 𑀬𑀁 𑀓𑀸𑀢𑀩𑁆𑀩𑀁, 𑀲𑀩𑁆𑀩𑀁 𑀢𑀁 𑀢𑀼𑀬𑁆𑀳𑀁 𑀪𑀸𑀭𑁄’’𑀢𑀺 𑀯𑀤𑀦𑁆𑀢𑁄 𑀧𑀦 𑀏𑀓𑀯𑀸𑀘𑀸𑀬 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻𑀢𑀺.

𑀅𑀜𑁆𑀜𑀸𑀢𑀺𑀓𑀸𑀬 𑀯𑁂𑀫𑀢𑀺𑀓𑁄 𑀅𑀜𑁆𑀜𑀸𑀢𑀺𑀓𑀸𑀬 𑀜𑀸𑀢𑀺𑀓𑀲𑀜𑁆𑀜𑀻𑀢𑀺 𑀇𑀫𑀸𑀦𑀺𑀧𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀁𑀬𑁂𑀯 𑀢𑀺𑀡𑁆𑀡𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸𑀬𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀥𑁄𑀯𑀸𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀬𑀣𑀸𑀯𑀢𑁆𑀣𑀼𑀓𑀫𑁂𑀯, 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀸𑀦𑀺𑀬𑁄.

𑁫𑁦𑁭. 𑀅𑀯𑀼𑀢𑁆𑀢𑀸 𑀥𑁄𑀯𑀢𑀻𑀢𑀺 𑀉𑀤𑁆𑀤𑁂𑀲𑀸𑀬 𑀯𑀸 𑀑𑀯𑀸𑀤𑀸𑀬 𑀯𑀸 𑀆𑀕𑀢𑀸 𑀓𑀺𑀮𑀺𑀦𑁆𑀦𑀁 𑀘𑀻𑀯𑀭𑀁 𑀤𑀺𑀲𑁆𑀯𑀸 𑀞𑀧𑀺𑀢𑀝𑁆𑀞𑀸𑀦𑀢𑁄 𑀕𑀳𑁂𑀢𑁆𑀯𑀸 𑀯𑀸 ‘‘𑀤𑁂𑀣, 𑀅𑀬𑁆𑀬, 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀳𑀭𑀸𑀧𑁂𑀢𑁆𑀯𑀸 𑀯𑀸 𑀥𑁄𑀯𑀢𑀺 𑀘𑁂𑀯 𑀭𑀚𑀢𑀺 𑀘 𑀆𑀓𑁄𑀝𑁂𑀢𑀺 𑀘, 𑀅𑀬𑀁 𑀅𑀯𑀼𑀢𑁆𑀢𑀸 𑀥𑁄𑀯𑀢𑀺 𑀦𑀸𑀫. 𑀬𑀸𑀧𑀺 ‘‘𑀇𑀫𑀁 𑀘𑀻𑀯𑀭𑀁 𑀥𑁄𑀯𑀸’’𑀢𑀺 𑀤𑀳𑀭𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 𑀆𑀡𑀸𑀧𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀼𑀢𑁆𑀯𑀸 ‘‘𑀆𑀳𑀭𑀣𑀬𑁆𑀬 𑀅𑀳𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀥𑁄𑀯𑀢𑀺, 𑀢𑀸𑀯𑀓𑀸𑀮𑀺𑀓𑀁 𑀯𑀸 𑀕𑀳𑁂𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀭𑀚𑀺𑀢𑁆𑀯𑀸 𑀤𑁂𑀢𑀺, 𑀅𑀬𑀫𑁆𑀧𑀺 𑀅𑀯𑀼𑀢𑁆𑀢𑀸 𑀥𑁄𑀯𑀢𑀺 𑀦𑀸𑀫.

𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀉𑀧𑀸𑀳𑀦𑀢𑁆𑀣𑀯𑀺𑀓𑀧𑀢𑁆𑀢𑀢𑁆𑀣𑀯𑀺𑀓𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀫𑀜𑁆𑀘𑀧𑀻𑀞𑀪𑀺𑀲𑀺𑀢𑀝𑁆𑀝𑀺𑀓𑀸𑀤𑀺𑀁 𑀬𑀁𑀓𑀺𑀜𑁆𑀘𑀺 𑀥𑁄𑀯𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀧𑀦 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁦𑁮. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀢𑀺 𑀧𑀺𑀡𑁆𑀟𑀧𑀸𑀢𑀢𑁄 𑀧𑀝𑀺𑀓𑁆𑀓𑀦𑁆𑀢𑀸. 𑀬𑁂𑀦 𑀅𑀦𑁆𑀥𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀬𑁂𑀦 𑀅𑀦𑁆𑀥𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀓𑀢𑀓𑀫𑁆𑀫𑀸𑀢𑀺 𑀓𑀢𑀘𑁄𑀭𑀺𑀓𑀓𑀫𑁆𑀫𑀸, 𑀲𑀦𑁆𑀥𑀺𑀘𑁆𑀙𑁂𑀤𑀦𑀸𑀤𑀻𑀳𑀺 𑀧𑀭𑀪𑀡𑁆𑀟𑀁 𑀳𑀭𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑁄𑀭𑀕𑀸𑀫𑀡𑀺𑀓𑁄𑀢𑀺 𑀘𑁄𑀭𑀚𑁂𑀝𑁆𑀞𑀓𑁄. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀣𑁂𑀭𑀺𑀁 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀘𑁄𑀭𑀸𑀦𑀁 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀤𑀺𑀲𑁆𑀯𑀸 ‘‘𑀇𑀢𑁄 𑀫𑀸 𑀕𑀘𑁆𑀙𑀣, 𑀲𑀩𑁆𑀩𑁂 𑀇𑀢𑁄 𑀏𑀣𑀸’’𑀢𑀺 𑀢𑁂 𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀅𑀕𑀫𑀸𑀲𑀺. 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀣𑁂𑀭𑀻 𑀓𑀺𑀭 𑀧𑀭𑀺𑀘𑁆𑀙𑀺𑀦𑁆𑀦𑀯𑁂𑀮𑀸𑀬𑀁𑀬𑁂𑀯 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺. 𑀲𑁄𑀧𑀺 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀏𑀯𑀁 𑀅𑀯𑀘, 𑀢𑀲𑁆𑀫𑀸 𑀲𑀸 𑀅𑀲𑁆𑀲𑁄𑀲𑀺, 𑀲𑀼𑀢𑁆𑀯𑀸 𑀘 ‘‘𑀦𑀢𑁆𑀣𑀺 𑀤𑀸𑀦𑀺 𑀅𑀜𑁆𑀜𑁄 𑀏𑀢𑁆𑀣 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀅𑀜𑁆𑀜𑀢𑁆𑀭 𑀫𑀬𑀸’’𑀢𑀺 𑀢𑀁 𑀫𑀁𑀲𑀁 𑀅𑀕𑁆𑀕𑀳𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀉𑀧𑁆𑀧𑀮𑀯𑀡𑁆𑀡𑀸 𑀪𑀺𑀓𑁆𑀔𑀼𑀦𑀻’’𑀢𑀺𑀆𑀤𑀺.

𑀑𑀳𑀺𑀬𑁆𑀬𑀓𑁄𑀢𑀺 𑀅𑀯𑀳𑀻𑀬𑀓𑁄 𑀅𑀯𑀲𑁂𑀲𑁄, 𑀯𑀺𑀳𑀸𑀭𑀯𑀸𑀭𑀁 𑀧𑀢𑁆𑀯𑀸 𑀏𑀓𑁄𑀯 𑀯𑀺𑀳𑀸𑀭𑁂 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀘𑁂 𑀫𑁂 𑀢𑁆𑀯𑀁 𑀅𑀦𑁆𑀢𑀭𑀯𑀸𑀲𑀓𑀁 𑀤𑀤𑁂𑀬𑁆𑀬𑀸𑀲𑀻𑀢𑀺 𑀓𑀲𑁆𑀫𑀸 𑀆𑀳? 𑀲𑀡𑁆𑀳𑀁 𑀖𑀦𑀫𑀝𑁆𑀞𑀁 𑀅𑀦𑁆𑀢𑀭𑀯𑀸𑀲𑀓𑀁 𑀤𑀺𑀲𑁆𑀯𑀸 𑀮𑁄𑀪𑁂𑀦, 𑀅𑀧𑀺𑀘 𑀅𑀧𑁆𑀧𑀓𑁄 𑀢𑀲𑁆𑀲𑀸 𑀅𑀦𑁆𑀢𑀭𑀯𑀸𑀲𑀓𑁂 𑀮𑁄𑀪𑁄, 𑀣𑁂𑀭𑀺𑀬𑀸 𑀧𑀦 𑀲𑀺𑀔𑀸𑀧𑁆𑀧𑀢𑁆𑀢𑀸 𑀓𑁄𑀝𑁆𑀞𑀸𑀲𑀲𑀫𑁆𑀧𑀢𑁆𑀢𑀺 𑀢𑁂𑀦𑀲𑁆𑀲𑀸 𑀲𑀭𑀻𑀭𑀧𑀸𑀭𑀺𑀧𑀽𑀭𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀯𑀺𑀲𑀫𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀏𑀯𑀫𑀸𑀳. 𑀅𑀦𑁆𑀢𑀺𑀫𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀘𑀻𑀯𑀭𑀸𑀦𑀁 𑀲𑀩𑁆𑀩𑀧𑀭𑀺𑀬𑀦𑁆𑀢𑀁 𑀳𑀼𑀢𑁆𑀯𑀸 𑀅𑀦𑁆𑀢𑀺𑀫𑀁, 𑀅𑀦𑁆𑀢𑀺𑀫𑀦𑁆𑀢𑀺 𑀧𑀘𑁆𑀙𑀺𑀫𑀁. 𑀅𑀜𑁆𑀜𑀁 𑀮𑁂𑀲𑁂𑀦𑀸𑀧𑀺 𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀸 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀸 𑀞𑀧𑀺𑀢𑀁 𑀘𑀻𑀯𑀭𑀁 𑀦𑀢𑁆𑀣𑀻𑀢𑀺 𑀏𑀯𑀁 𑀬𑀣𑀸𑀅𑀦𑀼𑀜𑁆𑀜𑀸𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀘𑀻𑀯𑀭𑀸𑀦𑀁 𑀥𑀸𑀭𑀡𑀯𑀲𑁂𑀦𑁂𑀯 𑀆𑀳, 𑀦 𑀮𑁄𑀪𑁂𑀦, 𑀦 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀮𑁄𑀪𑁄 𑀅𑀢𑁆𑀣𑀺. 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑀸𑀢𑀺 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀕𑀸𑀴𑁆𑀳𑀁 𑀧𑀻𑀴𑀬𑀫𑀸𑀦𑀸.

𑀅𑀦𑁆𑀢𑀭𑀯𑀸𑀲𑀓𑀁 𑀤𑀢𑁆𑀯𑀸 𑀉𑀧𑀲𑁆𑀲𑀬𑀁 𑀅𑀕𑀫𑀸𑀲𑀻𑀢𑀺 𑀲𑀗𑁆𑀓𑀘𑁆𑀘𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀬𑀣𑀸 𑀢𑀲𑁆𑀲 𑀫𑀦𑁄𑀭𑀣𑁄 𑀦 𑀧𑀽𑀭𑀢𑀺, 𑀏𑀯𑀁 𑀳𑀢𑁆𑀣𑀢𑀮𑁂𑀬𑁂𑀯 𑀤𑀲𑁆𑀲𑁂𑀢𑁆𑀯𑀸 𑀅𑀕𑀫𑀸𑀲𑀺.

𑁫𑁧𑁦. 𑀓𑀲𑁆𑀫𑀸 𑀧𑀸𑀭𑀺𑀯𑀢𑁆𑀢𑀓𑀘𑀻𑀯𑀭𑀁 𑀅𑀧𑁆𑀧𑀝𑀺𑀕𑀡𑁆𑀳𑀦𑁆𑀢𑁂 𑀉𑀚𑁆𑀛𑀸𑀬𑀺𑀁𑀲𑀼? ‘‘𑀲𑀘𑁂 𑀏𑀢𑁆𑀢𑀓𑁄𑀧𑀺 𑀅𑀫𑁆𑀳𑁂𑀲𑀼 𑀅𑀬𑁆𑀬𑀸𑀦𑀁 𑀯𑀺𑀲𑁆𑀲𑀸𑀲𑁄 𑀦𑀢𑁆𑀣𑀺, 𑀓𑀣𑀁 𑀫𑀬𑀁 𑀬𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀯𑀺𑀳𑀢𑁆𑀣𑀢𑀸𑀬 𑀲𑀫𑀪𑀺𑀢𑀼𑀦𑁆𑀦𑀢𑁆𑀢𑀸.

𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀦𑁆𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀲𑀫𑀲𑀤𑁆𑀥𑀸𑀦𑀁 𑀲𑀫𑀲𑀻𑀮𑀸𑀦𑀁 𑀲𑀫𑀤𑀺𑀝𑁆𑀞𑀻𑀦𑀁 𑀧𑀸𑀭𑀺𑀯𑀢𑁆𑀢𑀓𑀁 𑀕𑀳𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄.

𑁫𑁧𑁨. 𑀧𑀬𑁄𑀕𑁂 𑀤𑀼𑀓𑁆𑀓𑀝𑀦𑁆𑀢𑀺 𑀕𑀳𑀡𑀢𑁆𑀣𑀸𑀬 𑀳𑀢𑁆𑀣𑀧𑁆𑀧𑀲𑀸𑀭𑀡𑀸𑀤𑀻𑀲𑀼 𑀤𑀼𑀓𑁆𑀓𑀝𑀁. 𑀧𑀝𑀺𑀮𑀸𑀪𑁂𑀦𑀸𑀢𑀺 𑀧𑀝𑀺𑀕𑁆𑀕𑀳𑀡𑁂𑀦. 𑀢𑀢𑁆𑀣 𑀘 𑀳𑀢𑁆𑀣𑁂𑀦 𑀯𑀸 𑀳𑀢𑁆𑀣𑁂 𑀤𑁂𑀢𑀼, 𑀧𑀸𑀤𑀫𑀽𑀮𑁂 𑀯𑀸 𑀞𑀧𑁂𑀢𑀼, 𑀉𑀧𑀭𑀺 𑀯𑀸 𑀔𑀺𑀧𑀢𑀼, 𑀲𑁄 𑀘𑁂 𑀲𑀸𑀤𑀺𑀬𑀢𑀺, 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀲𑀺𑀓𑁆𑀔𑀫𑀸𑀦𑀸𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀻𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀤𑀻𑀦𑀁 𑀳𑀢𑁆𑀣𑁂 𑀧𑁂𑀲𑀺𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀲𑁆𑀲 𑀘𑀢𑀲𑁆𑀲𑁄𑀧𑀺 𑀧𑀭𑀺𑀲𑀸 𑀘𑀻𑀯𑀭𑀸𑀦𑀺 𑀘 𑀦𑀸𑀦𑀸𑀯𑀺𑀭𑀸𑀕𑀯𑀢𑁆𑀣𑀸𑀦𑀺 𑀘 𑀆𑀦𑁂𑀢𑁆𑀯𑀸 𑀧𑀸𑀤𑀫𑀽𑀮𑁂 𑀞𑀧𑁂𑀦𑁆𑀢𑀺, 𑀉𑀧𑀘𑀸𑀭𑁂 𑀯𑀸 𑀞𑀢𑁆𑀯𑀸 𑀉𑀧𑀘𑀸𑀭𑀁 𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀔𑀺𑀧𑀦𑁆𑀢𑀺, 𑀬𑀁 𑀢𑀢𑁆𑀣 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀓𑀁, 𑀢𑀁 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸 𑀕𑀡𑁆𑀳𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀅𑀣 𑀧𑀦 𑀭𑀢𑁆𑀢𑀺𑀪𑀸𑀕𑁂 𑀔𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, ‘‘𑀇𑀤𑀁 𑀪𑀺𑀓𑁆𑀔𑀼𑀦𑀺𑀬𑀸, 𑀇𑀤𑀁 𑀅𑀜𑁆𑀜𑁂𑀲’’𑀦𑁆𑀢𑀺 𑀜𑀸𑀢𑀼𑀁 𑀦 𑀲𑀓𑁆𑀓𑀸, 𑀧𑀸𑀭𑀺𑀯𑀢𑁆𑀢𑀓𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 𑀯𑀼𑀢𑁆𑀢𑀁, 𑀢𑀁 𑀅𑀘𑀺𑀢𑁆𑀢𑀓𑀪𑀸𑀯𑁂𑀦 𑀦 𑀲𑀫𑁂𑀢𑀺. 𑀲𑀘𑁂 𑀪𑀺𑀓𑁆𑀔𑀼𑀦𑀻 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀢𑀺, 𑀧𑀸𑀭𑀺𑀯𑀢𑁆𑀢𑀓𑀫𑁂𑀯 𑀓𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀲𑀼 𑀞𑀧𑁂𑀢𑀺, ‘‘𑀧𑀁𑀲𑀼𑀓𑀽𑀮𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀁𑀲𑀼𑀓𑀽𑀮𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑁫𑁧𑁩. 𑀅𑀜𑁆𑀜𑀸𑀢𑀺𑀓𑀸𑀬 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀻𑀢𑀺 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁. 𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸𑀬𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀳𑀢𑁆𑀣𑀢𑁄 𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑁫𑁧𑁪. 𑀧𑀭𑀺𑀢𑁆𑀢𑁂𑀦 𑀯𑀸 𑀯𑀺𑀧𑀼𑀮𑀦𑁆𑀢𑀺 𑀅𑀧𑁆𑀧𑀕𑁆𑀖𑀘𑀻𑀯𑀭𑁂𑀦 𑀯𑀸 𑀉𑀧𑀸𑀳𑀦𑀢𑁆𑀣𑀯𑀺𑀓𑀧𑀢𑁆𑀢𑀢𑁆𑀣𑀯𑀺𑀓𑀅𑀁𑀲𑀩𑀤𑁆𑀥𑀓𑀓𑀸𑀬𑀩𑀦𑁆𑀥𑀦𑀸𑀤𑀺𑀦𑀸 𑀯𑀸 𑀫𑀳𑀕𑁆𑀖𑀁 𑀘𑁂𑀢𑀸𑀧𑁂𑀢𑁆𑀯𑀸 𑀲𑀘𑁂𑀧𑀺 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀅𑀦𑁆𑀢𑀫𑀲𑁄 𑀳𑀭𑀻𑀢𑀓𑀻𑀔𑀡𑁆𑀟𑁂𑀦𑀸𑀧𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀼𑀮𑁂𑀦 𑀯𑀸 𑀧𑀭𑀺𑀢𑁆𑀢𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀘𑀻𑀯𑀭𑀧𑁆𑀧𑀫𑀸𑀡𑀁 𑀧𑀦 𑀧𑀝𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀬𑀁 𑀦𑁂𑀯 𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀦 𑀯𑀺𑀓𑀧𑁆𑀧𑀦𑀼𑀧𑀕𑀁 𑀢𑀁 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀫𑀜𑁆𑀘𑀧𑁆𑀧𑀫𑀸𑀡𑀸 𑀪𑀺𑀲𑀺𑀘𑁆𑀙𑀯𑀺 𑀳𑁄𑀢𑀺, 𑀯𑀝𑁆𑀝𑀢𑀺𑀬𑁂𑀯; 𑀓𑁄 𑀧𑀦 𑀯𑀸𑀤𑁄 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀻𑀲𑀼. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁧𑁫. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄𑀢𑀺 𑀅𑀲𑀻𑀢𑀺𑀲𑀳𑀲𑁆𑀲𑀫𑀢𑁆𑀢𑀸𑀦𑀁 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀢𑀺𑀓𑀺𑀝𑁆𑀞𑁄 𑀮𑁄𑀮𑀚𑀸𑀢𑀺𑀓𑁄. 𑀧𑀝𑁆𑀝𑁄𑀢𑀺 𑀙𑁂𑀓𑁄 𑀲𑀫𑀢𑁆𑀣𑁄 𑀧𑀝𑀺𑀩𑀮𑁄 𑀲𑀭𑀲𑀫𑁆𑀧𑀦𑁆𑀦𑁄 𑀓𑀡𑁆𑀞𑀫𑀸𑀥𑀼𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀓𑀺𑀲𑁆𑀫𑀺𑀁 𑀯𑀺𑀬𑀸𑀢𑀺 𑀓𑀺𑀁𑀲𑀼 𑀯𑀺𑀬 𑀓𑀺𑀮𑁂𑀲𑁄 𑀯𑀺𑀬, 𑀳𑀺𑀭𑁄𑀢𑁆𑀢𑀧𑁆𑀧𑀯𑀲𑁂𑀦 𑀓𑀫𑁆𑀧𑀦𑀁 𑀯𑀺𑀬 𑀲𑀗𑁆𑀓𑀫𑁆𑀧𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀤𑁆𑀥𑀸𑀦𑀫𑀕𑁆𑀕𑀦𑁆𑀢𑀺 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑀁 𑀤𑀻𑀖𑀫𑀕𑁆𑀕𑀁, 𑀦 𑀦𑀕𑀭𑀯𑀻𑀣𑀺𑀫𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀢𑁂 𑀪𑀺𑀓𑁆𑀔𑀽 𑀅𑀘𑁆𑀙𑀺𑀦𑁆𑀤𑀺𑀁𑀲𑀽𑀢𑀺 𑀫𑀼𑀲𑀺𑀁𑀲𑀼, 𑀧𑀢𑁆𑀢𑀘𑀻𑀯𑀭𑀸𑀦𑀺 𑀦𑁂𑀲𑀁 𑀳𑀭𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀅𑀦𑀼𑀬𑀼𑀜𑁆𑀚𑀸𑀳𑀻𑀢𑀺 𑀪𑀺𑀓𑁆𑀔𑀼𑀪𑀸𑀯𑀚𑀸𑀦𑀦𑀢𑁆𑀣𑀸𑀬 𑀧𑀼𑀘𑁆𑀙. 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸𑀢𑀺 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀧𑀢𑁆𑀢𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀸𑀤𑀻𑀦𑀺 𑀧𑀼𑀘𑁆𑀙𑀺𑀬𑀫𑀸𑀦𑀸. 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀬𑁄 ‘‘𑀲𑀸𑀓𑁂𑀢𑀸 𑀲𑀸𑀯𑀢𑁆𑀣𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄, 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑁫𑁧𑁭. 𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀁 𑀯𑀸𑀢𑀺𑀆𑀤𑀻𑀲𑀼 𑀬𑀁 𑀧𑀭𑀢𑁄 ‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀏𑀯𑀁 𑀅𑀦𑀼𑀧𑀼𑀩𑁆𑀩𑀓𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀘𑁂 𑀘𑁄𑀭𑁂 𑀧𑀲𑁆𑀲𑀺𑀢𑁆𑀯𑀸 𑀤𑀳𑀭𑀸 𑀧𑀢𑁆𑀢𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀧𑀮𑀸𑀢𑀸, 𑀘𑁄𑀭𑀸 𑀣𑁂𑀭𑀸𑀦𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀫𑀢𑁆𑀢𑀁𑀬𑁂𑀯 𑀳𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀣𑁂𑀭𑁂𑀳𑀺 𑀦𑁂𑀯 𑀢𑀸𑀯 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁, 𑀦 𑀲𑀸𑀔𑀸𑀧𑀮𑀸𑀲𑀁 𑀪𑀜𑁆𑀚𑀺𑀢𑀩𑁆𑀩𑀁. 𑀅𑀣 𑀤𑀳𑀭𑀸 𑀲𑀩𑁆𑀩𑀁 𑀪𑀡𑁆𑀟𑀓𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀢𑀸, 𑀘𑁄𑀭𑀸 𑀣𑁂𑀭𑀸𑀦𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀢𑀜𑁆𑀘 𑀪𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀤𑀳𑀭𑁂𑀳𑀺 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀦𑀺 𑀦 𑀢𑀸𑀯 𑀣𑁂𑀭𑀸𑀦𑀁 𑀤𑀸𑀢𑀩𑁆𑀩𑀸𑀦𑀺, 𑀦 𑀳𑀺 𑀅𑀦𑀘𑁆𑀙𑀺𑀦𑁆𑀦𑀘𑀻𑀯𑀭𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀸𑀔𑀸𑀧𑀮𑀸𑀲𑀁 𑀪𑀜𑁆𑀚𑀺𑀢𑀼𑀁 𑀮𑀪𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀦𑀁 𑀧𑀦 𑀅𑀢𑁆𑀣𑀸𑀬 𑀮𑀪𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀯 𑀅𑀢𑁆𑀢𑀦𑁄𑀧𑀺 𑀧𑀭𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀮𑀪𑀦𑁆𑀢𑀺. 𑀢𑀲𑁆𑀫𑀸 𑀣𑁂𑀭𑁂𑀳𑀺 𑀯𑀸 𑀲𑀸𑀔𑀸𑀧𑀮𑀸𑀲𑀁 𑀪𑀜𑁆𑀚𑀺𑀢𑁆𑀯𑀸 𑀯𑀸𑀓𑀸𑀤𑀻𑀳𑀺 𑀕𑀦𑁆𑀣𑁂𑀢𑁆𑀯𑀸 𑀤𑀳𑀭𑀸𑀦𑀁 𑀤𑀸𑀢𑀩𑁆𑀩𑀁, 𑀤𑀳𑀭𑁂𑀳𑀺 𑀯𑀸 𑀣𑁂𑀭𑀸𑀦𑀁 𑀅𑀢𑁆𑀣𑀸𑀬 𑀪𑀜𑁆𑀚𑀺𑀢𑁆𑀯𑀸 𑀕𑀦𑁆𑀣𑁂𑀢𑁆𑀯𑀸 𑀢𑁂𑀲𑀁 𑀳𑀢𑁆𑀣𑁂 𑀤𑀢𑁆𑀯𑀸 𑀯𑀸 𑀅𑀤𑀢𑁆𑀯𑀸 𑀯𑀸 𑀅𑀢𑁆𑀢𑀦𑀸 𑀦𑀺𑀯𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀦𑀺 𑀣𑁂𑀭𑀸𑀦𑀁 𑀤𑀸𑀢𑀩𑁆𑀩𑀸𑀦𑀺, 𑀦𑁂𑀯 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀺, 𑀦 𑀢𑁂𑀲𑀁 𑀥𑀸𑀭𑀡𑁂 𑀤𑀼𑀓𑁆𑀓𑀝𑀁.

𑀲𑀘𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀭𑀚𑀓𑀢𑁆𑀣𑀭𑀡𑀁 𑀯𑀸 𑀳𑁄𑀢𑀺, 𑀅𑀜𑁆𑀜𑁂 𑀯𑀸 𑀢𑀸𑀤𑀺𑀲𑁂 𑀫𑀦𑀼𑀲𑁆𑀲𑁂 𑀧𑀲𑁆𑀲𑀦𑁆𑀢𑀺, 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁. 𑀬𑀸𑀦𑀺 𑀘 𑀦𑁂𑀲𑀁 𑀢𑁂 𑀯𑀸 𑀯𑀺𑀜𑁆𑀜𑀢𑁆𑀢𑀫𑀦𑀼𑀲𑁆𑀲𑀸 𑀅𑀜𑁆𑀜𑁂 𑀯𑀸 𑀲𑀸𑀔𑀸𑀧𑀮𑀸𑀲𑀦𑀺𑀯𑀸𑀲𑀦𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀉𑀲𑁆𑀲𑀸𑀳𑀚𑀸𑀢𑀸 𑀯𑀢𑁆𑀣𑀸𑀦𑀺 𑀤𑁂𑀦𑁆𑀢𑀺, 𑀢𑀸𑀦𑀺 𑀲𑀤𑀲𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀅𑀤𑀲𑀸𑀦𑀺 𑀯𑀸 𑀦𑀻𑀮𑀸𑀤𑀺𑀦𑀸𑀦𑀸𑀯𑀡𑁆𑀡𑀸𑀦𑀺 𑀯𑀸 𑀓𑀧𑁆𑀧𑀺𑀬𑀸𑀦𑀺𑀧𑀺 𑀅𑀓𑀧𑁆𑀧𑀺𑀬𑀸𑀦𑀺𑀧𑀺 𑀲𑀩𑁆𑀩𑀸𑀦𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀢𑁂𑀲𑀁 𑀦𑀺𑀯𑀸𑀲𑁂𑀢𑀼𑀜𑁆𑀘 𑀧𑀸𑀭𑀼𑀧𑀺𑀢𑀼𑀜𑁆𑀘 𑀯𑀝𑁆𑀝𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺𑀳𑁂𑀢𑀁 𑀧𑀭𑀺𑀯𑀸𑀭𑁂 𑁋

‘‘𑀅𑀓𑀧𑁆𑀧𑀓𑀢𑀁 𑀦𑀸𑀧𑀺 𑀭𑀚𑀦𑀸𑀬 𑀭𑀢𑁆𑀢𑀁;

𑀢𑁂𑀦 𑀦𑀺𑀯𑀢𑁆𑀣𑁄 𑀬𑁂𑀦 𑀓𑀸𑀫𑀁 𑀯𑀚𑁂𑀬𑁆𑀬;

𑀦 𑀘𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺;

𑀲𑁄 𑀘 𑀥𑀫𑁆𑀫𑁄 𑀲𑀼𑀕𑀢𑁂𑀦 𑀤𑁂𑀲𑀺𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁧);

𑀅𑀬𑀜𑁆𑀳𑀺 𑀧𑀜𑁆𑀳𑁄 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀓𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀅𑀣 𑀧𑀦 𑀢𑀺𑀢𑁆𑀣𑀺𑀬𑁂𑀳𑀺 𑀲𑀳𑀕𑀘𑁆𑀙𑀦𑁆𑀢𑀺, 𑀢𑁂 𑀘 𑀦𑁂𑀲𑀁 𑀓𑀼𑀲𑀘𑀻𑀭𑀯𑀸𑀓𑀘𑀻𑀭𑀨𑀮𑀓𑀘𑀻𑀭𑀸𑀦𑀺 𑀤𑁂𑀦𑁆𑀢𑀺, 𑀢𑀸𑀦𑀺𑀧𑀺 𑀮𑀤𑁆𑀥𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀦𑁆𑀢𑀺, 𑀦𑀺𑀯𑀸𑀲𑁂𑀢𑁆𑀯𑀸𑀧𑀺 𑀮𑀤𑁆𑀥𑀺 𑀦 𑀕𑀳𑁂𑀢𑀩𑁆𑀩𑀸.

𑀇𑀤𑀸𑀦𑀺 ‘‘𑀬𑀁 𑀆𑀯𑀸𑀲𑀁 𑀧𑀞𑀫𑀁 𑀉𑀧𑀕𑀘𑁆𑀙𑀢𑀺, 𑀲𑀘𑁂 𑀢𑀢𑁆𑀣 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑀘𑀻𑀯𑀭𑀁 𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀳𑀸𑀭𑀘𑀻𑀯𑀭𑀁 𑀦𑀸𑀫 𑀫𑀦𑀼𑀲𑁆𑀲𑀸 𑀆𑀯𑀸𑀲𑀁 𑀓𑀸𑀭𑁂𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄𑀧𑀺 𑀧𑀘𑁆𑀘𑀬𑀸 𑀅𑀫𑁆𑀳𑀸𑀓𑀁𑀬𑁂𑀯 𑀲𑀦𑁆𑀢𑀓𑀸 𑀧𑀭𑀺𑀪𑁄𑀕𑀁 𑀕𑀘𑁆𑀙𑀦𑁆𑀢𑀽’’𑀢𑀺 𑀢𑀺𑀘𑀻𑀯𑀭𑀁 𑀲𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑀸 𑀓𑀸𑀭𑀸𑀧𑀺𑀢𑁂 𑀆𑀯𑀸𑀲𑁂 𑀞𑀧𑁂𑀦𑁆𑀢𑀺, 𑀏𑀢𑀁 𑀯𑀺𑀳𑀸𑀭𑀘𑀻𑀯𑀭𑀁 𑀦𑀸𑀫. 𑀉𑀢𑁆𑀢𑀭𑀢𑁆𑀣𑀭𑀡𑀦𑁆𑀢𑀺 𑀫𑀜𑁆𑀘𑀓𑀲𑁆𑀲 𑀉𑀧𑀭𑀺 𑀅𑀢𑁆𑀣𑀭𑀡𑀓𑀁 𑀯𑀼𑀘𑁆𑀘𑀢𑀺. 𑀪𑀼𑀫𑀢𑁆𑀣𑀭𑀡𑀦𑁆𑀢𑀺 𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀭𑀓𑁆𑀔𑀡𑀢𑁆𑀣𑀁 𑀘𑀺𑀫𑀺𑀮𑀺𑀓𑀸𑀳𑀺 𑀓𑀢𑀅𑀢𑁆𑀣𑀭𑀡𑀁 𑀢𑀲𑁆𑀲 𑀉𑀧𑀭𑀺 𑀢𑀝𑁆𑀝𑀺𑀓𑀁 𑀧𑀢𑁆𑀣𑀭𑀺𑀢𑁆𑀯𑀸 𑀘𑀗𑁆𑀓𑀫𑀦𑁆𑀢𑀺. 𑀪𑀺𑀲𑀺𑀘𑁆𑀙𑀯𑀻𑀢𑀺 𑀫𑀜𑁆𑀘𑀪𑀺𑀲𑀺𑀬𑀸 𑀯𑀸 𑀧𑀻𑀞𑀪𑀺𑀲𑀺𑀬𑀸 𑀯𑀸 𑀙𑀯𑀺, 𑀲𑀘𑁂 𑀧𑀽𑀭𑀺𑀢𑀸 𑀳𑁄𑀢𑀺 𑀯𑀺𑀥𑀼𑀦𑀺𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀫𑁂𑀢𑁂𑀲𑀼 𑀯𑀺𑀳𑀸𑀭𑀘𑀻𑀯𑀭𑀸𑀤𑀻𑀲𑀼 𑀬𑀁 𑀢𑀢𑁆𑀣 𑀆𑀯𑀸𑀲𑁂 𑀳𑁄𑀢𑀺, 𑀢𑀁 𑀅𑀦𑀸𑀧𑀼𑀘𑁆𑀙𑀸𑀧𑀺 𑀕𑀳𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀸 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀮𑀩𑁆𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀮𑀪𑀺𑀢𑁆𑀯𑀸 𑀑𑀤𑀳𑀺𑀲𑁆𑀲𑀸𑀫𑀺 𑀧𑀼𑀦 𑀞𑀧𑁂𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀦 𑀫𑀽𑀮𑀘𑁆𑀙𑁂𑀚𑁆𑀚𑀸𑀬. 𑀮𑀪𑀺𑀢𑁆𑀯𑀸 𑀘 𑀧𑀦 𑀜𑀸𑀢𑀺𑀢𑁄 𑀯𑀸 𑀉𑀧𑀝𑁆𑀞𑀸𑀓𑀢𑁄 𑀯𑀸 𑀅𑀜𑁆𑀜𑀢𑁄 𑀯𑀸 𑀓𑀼𑀢𑁄𑀘𑀺 𑀧𑀸𑀓𑀢𑀺𑀓𑀫𑁂𑀯 𑀓𑀸𑀢𑀩𑁆𑀩𑀁. 𑀯𑀺𑀤𑁂𑀲𑀕𑀢𑁂𑀦 𑀏𑀓𑀲𑁆𑀫𑀺𑀁 𑀲𑀗𑁆𑀖𑀺𑀓𑁂 𑀆𑀯𑀸𑀲𑁂 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑀁. 𑀲𑀘𑀲𑁆𑀲 𑀧𑀭𑀺𑀪𑁄𑀕𑁂𑀦𑁂𑀯 𑀢𑀁 𑀚𑀻𑀭𑀢𑀺 𑀯𑀸 𑀦𑀲𑁆𑀲𑀢𑀺 𑀯𑀸 𑀕𑀻𑀯𑀸 𑀦 𑀳𑁄𑀢𑀺. 𑀲𑀘𑁂 𑀧𑀦 𑀏𑀢𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀕𑀺𑀳𑀺𑀯𑀢𑁆𑀣𑀸𑀤𑀻𑀦𑀁 𑀪𑀺𑀲𑀺𑀘𑁆𑀙𑀯𑀺𑀧𑀭𑀺𑀬𑀦𑁆𑀢𑀸𑀦𑀁 𑀓𑀺𑀜𑁆𑀘𑀺 𑀦 𑀮𑀩𑁆𑀪𑀢𑀺, 𑀢𑁂𑀦 𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩𑀦𑁆𑀢𑀺.

𑁫𑁧𑁯. 𑀬𑁂𑀳𑀺 𑀓𑁂𑀳𑀺𑀘𑀺 𑀯𑀸 𑀅𑀘𑁆𑀙𑀺𑀦𑁆𑀦𑀦𑁆𑀢𑀺 𑀏𑀢𑁆𑀣 𑀬𑀫𑁆𑀧𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀅𑀜𑁆𑀜𑁂 ‘‘𑀆𑀳𑀭𑀣, 𑀆𑀯𑀼𑀲𑁄, 𑀘𑀻𑀯𑀭’’𑀦𑁆𑀢𑀺 𑀬𑀸𑀘𑀺𑀢𑁆𑀯𑀸 𑀯𑀸 𑀯𑀺𑀲𑁆𑀲𑀸𑀲𑁂𑀦 𑀯𑀸 𑀕𑀡𑁆𑀳𑀦𑁆𑀢𑀺, 𑀢𑀫𑁆𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺.

𑀧𑀭𑀺𑀪𑁄𑀕𑀚𑀺𑀡𑁆𑀡𑀁 𑀯𑀸𑀢𑀺 𑀏𑀢𑁆𑀣 𑀘 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀦𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀦𑀁 𑀅𑀢𑁆𑀢𑀦𑀸 𑀢𑀺𑀡𑀧𑀡𑁆𑀡𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀤𑀺𑀦𑁆𑀦𑀘𑀻𑀯𑀭𑀫𑁆𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀏𑀯𑀜𑁆𑀳𑀺 𑀢𑁂 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀝𑁆𑀞𑀸𑀦𑁂 𑀦𑀝𑁆𑀞𑀘𑀻𑀯𑀭𑀝𑁆𑀞𑀸𑀦𑁂 𑀘 𑀞𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂𑀦 𑀦𑁂𑀲𑀁 𑀯𑀺𑀜𑁆𑀜𑀢𑁆𑀢𑀺𑀬𑀁 𑀅𑀓𑀧𑁆𑀧𑀺𑀬𑀘𑀻𑀯𑀭𑀧𑀭𑀺𑀪𑁄𑀕𑁂 𑀘 𑀅𑀦𑀸𑀧𑀢𑁆𑀢𑀺 𑀅𑀦𑀼𑀭𑀽𑀧𑀸 𑀪𑀯𑀺𑀲𑁆𑀲𑀢𑀺.

𑁫𑁨𑁧. 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀏𑀢𑁂𑀲𑀁 𑀲𑀦𑁆𑀢𑀓𑀁 𑀤𑁂𑀣𑀸’’𑀢𑀺 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀬𑀸𑀘𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀜𑀸𑀢𑀓𑀧𑀯𑀸𑀭𑀺𑀢𑀸𑀦𑀁 𑀆𑀧𑀢𑁆𑀢𑀺 𑀯𑀸 𑀅𑀦𑀸𑀧𑀢𑁆𑀢𑀺 𑀯𑀸 𑀳𑁄𑀢𑀺. 𑀅𑀢𑁆𑀢𑀦𑁄 𑀥𑀦𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀪𑀡𑁆𑀟𑁂𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦𑁂𑀯 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀧𑀭𑀺𑀯𑀢𑁆𑀢𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀯𑀸𑀭𑀺𑀢𑀸𑀦𑀦𑁆𑀢𑀺 𑀏𑀢𑁆𑀣 𑀘 𑀲𑀗𑁆𑀖𑀯𑀲𑁂𑀦 𑀧𑀯𑀸𑀭𑀺𑀢𑁂𑀲𑀼 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀺. 𑀧𑀼𑀕𑁆𑀕𑀮𑀺𑀓𑀧𑀯𑀸𑀭𑀡𑀸𑀬 𑀬𑀁 𑀬𑀁 𑀧𑀯𑀸𑀭𑁂𑀢𑀺, 𑀢𑀁 𑀢𑀁𑀬𑁂𑀯 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁. 𑀬𑁄 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀯𑀸𑀭𑁂𑀢𑁆𑀯𑀸 𑀲𑀬𑀫𑁂𑀯 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀸𑀮𑀸𑀦𑀼𑀓𑀸𑀮𑀁 𑀘𑀻𑀯𑀭𑀸𑀦𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀻𑀢𑀺 𑀏𑀯𑀁 𑀬𑁂𑀦 𑀬𑁂𑀦𑀢𑁆𑀣𑁄 𑀢𑀁 𑀢𑀁 𑀤𑁂𑀢𑀺, 𑀢𑀲𑁆𑀲 𑀯𑀺𑀜𑁆𑀜𑀸𑀧𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀬𑁄 𑀧𑀦 𑀧𑀯𑀸𑀭𑁂𑀢𑁆𑀯𑀸 𑀩𑀸𑀮𑀢𑀸𑀬 𑀯𑀸 𑀲𑀢𑀺𑀲𑀫𑁆𑀫𑁄𑀲𑁂𑀦 𑀯𑀸 𑀦 𑀤𑁂𑀢𑀺, 𑀲𑁄 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄. 𑀬𑁄 ‘‘𑀫𑀬𑁆𑀳𑀁 𑀕𑁂𑀳𑀁 𑀧𑀯𑀸𑀭𑁂𑀫𑀻’’𑀢𑀺 𑀯𑀤𑀢𑀺, 𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀬𑀣𑀸𑀲𑀼𑀔𑀁 𑀦𑀺𑀲𑀻𑀤𑀺𑀢𑀩𑁆𑀩𑀁 𑀦𑀺𑀧𑀚𑁆𑀚𑀺𑀢𑀩𑁆𑀩𑀁, 𑀦 𑀓𑀺𑀜𑁆𑀘𑀺 𑀕𑀳𑁂𑀢𑀩𑁆𑀩𑀁. 𑀬𑁄 𑀧𑀦 ‘‘𑀬𑀁 𑀫𑀬𑁆𑀳𑀁 𑀕𑁂𑀳𑁂 𑀅𑀢𑁆𑀣𑀺, 𑀢𑀁 𑀧𑀯𑀸𑀭𑁂𑀫𑀻’’𑀢𑀺 𑀯𑀤𑀢𑀺. 𑀬𑀁 𑀢𑀢𑁆𑀣 𑀓𑀧𑁆𑀧𑀺𑀬𑀁, 𑀢𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁, 𑀕𑁂𑀳𑁂 𑀧𑀦 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀸 𑀦 𑀮𑀩𑁆𑀪𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁.

𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀜𑀸𑀢𑀓𑀧𑀯𑀸𑀭𑀺𑀢𑁂 𑀦 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬, 𑀅𑀣 𑀔𑁄 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀬𑀫𑁂𑀓𑁄 𑀅𑀢𑁆𑀣𑁄. 𑀅𑀬𑀁 𑀧𑀦 𑀤𑀼𑀢𑀺𑀬𑁄 𑀅𑀜𑁆𑀜𑀲𑁆𑀲𑀸𑀢𑀺 𑀬𑁂 𑀅𑀜𑁆𑀜𑀲𑁆𑀲 𑀜𑀸𑀢𑀓𑀧𑀯𑀸𑀭𑀺𑀢𑀸, 𑀢𑁂 𑀢𑀲𑁆𑀲𑁂𑀯 ‘‘𑀅𑀜𑁆𑀜𑀲𑁆𑀲𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑀲𑁆𑀲 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲 𑀯𑀸 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀫𑁆𑀧𑀺 𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁨𑁨-𑁪. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀅𑀪𑀺𑀳𑀝𑁆𑀞𑀼𑀦𑁆𑀢𑀺 𑀅𑀪𑀻𑀢𑀺 𑀉𑀧𑀲𑀕𑁆𑀕𑁄, 𑀳𑀭𑀺𑀢𑀼𑀦𑁆𑀢𑀺 𑀅𑀢𑁆𑀣𑁄, 𑀕𑀡𑁆𑀳𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀯𑀸𑀭𑁂𑀬𑁆𑀬𑀸𑀢𑀺 𑀇𑀘𑁆𑀙𑀸𑀧𑁂𑀬𑁆𑀬, 𑀇𑀘𑁆𑀙𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀯𑀤𑁂𑀬𑁆𑀬 𑀦𑀺𑀫𑀦𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀦𑁆𑀢𑁂𑀦 𑀧𑀦 𑀬𑀣𑀸 𑀯𑀢𑁆𑀢𑀩𑁆𑀩𑀁, 𑀢𑀁 𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀯𑀢𑀓𑀁 𑀇𑀘𑁆𑀙𑀲𑀺 𑀢𑀸𑀯𑀢𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀅𑀣 𑀯𑀸 𑀬𑀣𑀸 ‘‘𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄’’𑀢𑀺 (𑀲𑀼. 𑀦𑀺. 𑁪𑁨𑁬, 𑁧𑁧𑁦𑁪; 𑀘𑀽𑀴𑀦𑀺. 𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬𑁭) 𑀏𑀢𑁆𑀣 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄, 𑀏𑀯𑀫𑀺𑀥𑀸𑀧𑀺 ‘‘𑀅𑀪𑀺𑀅𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀅𑀪𑀺𑀳𑀭𑀺𑀢𑁆𑀯𑀸 𑀧𑀯𑀸𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀸𑀬𑀸𑀪𑀺𑀳𑀸𑀭𑁄 𑀯𑀸𑀘𑀸𑀪𑀺𑀳𑀸𑀭𑁄𑀢𑀺 𑀤𑀼𑀯𑀺𑀥𑁄 𑀅𑀪𑀺𑀳𑀸𑀭𑁄, 𑀓𑀸𑀬𑁂𑀦 𑀯𑀸 𑀳𑀺 𑀯𑀢𑁆𑀣𑀸𑀦𑀺 𑀅𑀪𑀺𑀳𑀭𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀬𑀢𑁆𑀢𑀓𑀁 𑀇𑀘𑁆𑀙𑀲𑀺 𑀢𑀢𑁆𑀢𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀦𑁆𑀢𑁄 𑀧𑀯𑀸𑀭𑁂𑀬𑁆𑀬, 𑀯𑀸𑀘𑀸𑀬 𑀯𑀸 ‘‘𑀅𑀫𑁆𑀳𑀸𑀓𑀁 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀁 𑀧𑀭𑀺𑀧𑀼𑀡𑁆𑀡𑀁, 𑀬𑀢𑁆𑀢𑀓𑀁 𑀇𑀘𑁆𑀙𑀲𑀺 𑀢𑀢𑁆𑀢𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀦𑁆𑀢𑁄 𑀧𑀯𑀸𑀭𑁂𑀬𑁆𑀬, 𑀢𑀤𑀼𑀪𑀬𑀫𑁆𑀧𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁.

𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀦𑁆𑀢𑀺 𑀲𑀅𑀦𑁆𑀢𑀭𑀁 𑀉𑀢𑁆𑀢𑀭𑀁 𑀧𑀭𑀫𑀁 𑀅𑀲𑁆𑀲 𑀘𑀻𑀯𑀭𑀲𑁆𑀲𑀸𑀢𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁, 𑀦𑀺𑀯𑀸𑀲𑀦𑁂𑀦 𑀲𑀤𑁆𑀥𑀺𑀁 𑀧𑀸𑀭𑀼𑀧𑀦𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀅𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩𑀦𑁆𑀢𑀺 𑀢𑀢𑁄 𑀅𑀪𑀺𑀳𑀝𑀘𑀻𑀯𑀭𑀢𑁄 𑀏𑀢𑁆𑀢𑀓𑀁 𑀘𑀻𑀯𑀭𑀁 𑀕𑀳𑁂𑀢𑀩𑁆𑀩𑀁, 𑀦 𑀇𑀢𑁄 𑀧𑀭𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀅𑀘𑁆𑀙𑀺𑀦𑁆𑀦𑀲𑀩𑁆𑀩𑀘𑀻𑀯𑀭𑁂𑀦 𑀢𑀺𑀘𑀻𑀯𑀭𑀺𑀓𑁂𑀦𑁂𑀯 𑀪𑀺𑀓𑁆𑀔𑀼𑀦𑀸 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀅𑀜𑁆𑀜𑁂𑀦 𑀅𑀜𑁆𑀜𑀣𑀸𑀧𑀺, 𑀢𑀲𑁆𑀫𑀸 𑀢𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀢𑀻𑀡𑀺 𑀦𑀝𑁆𑀞𑀸𑀦𑀺 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀬𑀲𑁆𑀲 𑀢𑀻𑀡𑀺 𑀦𑀝𑁆𑀞𑀸𑀦𑀺, 𑀢𑁂𑀦 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀜𑁆𑀜𑀁 𑀲𑀪𑀸𑀕𑀝𑁆𑀞𑀸𑀦𑀢𑁄 𑀧𑀭𑀺𑀬𑁂𑀲𑀺𑀲𑁆𑀲𑀢𑀺. 𑀬𑀲𑁆𑀲 𑀤𑁆𑀯𑁂 𑀦𑀝𑁆𑀞𑀸𑀦𑀺, 𑀢𑁂𑀦 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁. 𑀲𑀘𑁂 𑀧𑀓𑀢𑀺𑀬𑀸𑀯 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀘𑀭𑀢𑀺, 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀏𑀯𑀁 𑀏𑀓𑀁 𑀲𑀸𑀤𑀺𑀬𑀦𑁆𑀢𑁂𑀦𑁂𑀯 𑀲𑀫𑁄 𑀪𑀯𑀺𑀲𑁆𑀲𑀢𑀺. 𑀬𑀲𑁆𑀲 𑀢𑀻𑀲𑀼 𑀏𑀓𑀁 𑀦𑀝𑁆𑀞𑀁, 𑀦 𑀲𑀸𑀤𑀺𑀢𑀩𑁆𑀩𑀁. 𑀬𑀲𑁆𑀲 𑀧𑀦 𑀤𑁆𑀯𑀻𑀲𑀼 𑀏𑀓𑀁 𑀦𑀝𑁆𑀞𑀁, 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁. 𑀬𑀲𑁆𑀲 𑀏𑀓𑀁𑀬𑁂𑀯 𑀳𑁄𑀢𑀺, 𑀢𑀜𑁆𑀘 𑀦𑀝𑁆𑀞𑀁, 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦 𑀧𑀜𑁆𑀘𑀲𑀼𑀧𑀺 𑀦𑀝𑁆𑀞𑁂𑀲𑀼 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀘𑀢𑀽𑀲𑀼 𑀦𑀝𑁆𑀞𑁂𑀲𑀼 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁, 𑀢𑀻𑀲𑀼 𑀦𑀝𑁆𑀞𑁂𑀲𑀼 𑀓𑀺𑀜𑁆𑀘𑀺 𑀦 𑀲𑀸𑀤𑀺𑀢𑀩𑁆𑀩𑀁, 𑀓𑁄 𑀧𑀦 𑀯𑀸𑀤𑁄 𑀤𑁆𑀯𑀻𑀲𑀼 𑀯𑀸 𑀏𑀓𑀲𑁆𑀫𑀺𑀁 𑀯𑀸. 𑀬𑁂𑀦 𑀓𑁂𑀦𑀘𑀺 𑀳𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑀸𑀬 𑀞𑀸𑀢𑀩𑁆𑀩𑀁, 𑀢𑀢𑁄 𑀉𑀢𑁆𑀢𑀭𑀺 𑀦 𑀮𑀩𑁆𑀪𑀢𑀻𑀢𑀺 𑀇𑀤𑀫𑁂𑀢𑁆𑀣 𑀮𑀓𑁆𑀔𑀡𑀁.

𑁫𑁨𑁬. 𑀲𑁂𑀲𑀓𑀁 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀤𑁆𑀯𑁂 𑀘𑀻𑀯𑀭𑀸𑀦𑀺 𑀓𑀢𑁆𑀯𑀸 𑀲𑁂𑀲𑀁 𑀧𑀼𑀦 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀦 𑀅𑀘𑁆𑀙𑀺𑀦𑁆𑀦𑀓𑀸𑀭𑀡𑀸𑀢𑀺 𑀩𑀸𑀳𑀼𑀲𑀘𑁆𑀘𑀸𑀤𑀺𑀕𑀼𑀡𑀯𑀲𑁂𑀦 𑀤𑁂𑀦𑁆𑀢𑀺. 𑀜𑀸𑀢𑀓𑀸𑀦𑀦𑁆𑀢𑀺𑀆𑀤𑀻𑀲𑀼 𑀜𑀸𑀢𑀓𑀸𑀦𑀁 𑀤𑁂𑀦𑁆𑀢𑀸𑀦𑀁 𑀲𑀸𑀤𑀺𑀬𑀦𑁆𑀢𑀲𑁆𑀲 𑀧𑀯𑀸𑀭𑀺𑀢𑀸𑀦𑀁 𑀤𑁂𑀦𑁆𑀢𑀸𑀦𑀁 𑀲𑀸𑀤𑀺𑀬𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀥𑀦𑁂𑀦 𑀲𑀸𑀤𑀺𑀬𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀧𑀓𑀢𑀺𑀬𑀸 𑀩𑀳𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀅𑀘𑁆𑀙𑀺𑀦𑁆𑀦𑀓𑀸𑀭𑀡𑀸 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺. 𑀬𑀲𑁆𑀫𑀸 𑀧𑀦𑀺𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀇𑀥 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀦 𑀯𑀼𑀢𑁆𑀢𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀫𑁆𑀧𑀺 𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀞𑀫𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁨𑁭. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀅𑀢𑁆𑀣𑀸𑀯𑀼𑀲𑁄 𑀫𑀁 𑀲𑁄 𑀉𑀧𑀝𑁆𑀞𑀸𑀓𑁄𑀢𑀺 𑀆𑀯𑀼𑀲𑁄, 𑀬𑀁 𑀢𑁆𑀯𑀁 𑀪𑀡𑀲𑀺, 𑀅𑀢𑁆𑀣𑀺 𑀏𑀯𑀭𑀽𑀧𑁄 𑀲𑁄 𑀫𑀫 𑀉𑀧𑀝𑁆𑀞𑀸𑀓𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀧𑀺 𑀫𑁂𑀬𑁆𑀬 𑀏𑀯𑀁 𑀳𑁄𑀢𑀻𑀢𑀺 𑀅𑀧𑀺 𑀫𑁂 𑀅𑀬𑁆𑀬 𑀏𑀯𑀁 𑀳𑁄𑀢𑀺, 𑀅𑀧𑀺 𑀫𑀬𑁆𑀬𑀸 𑀏𑀯𑀦𑁆𑀢𑀺𑀧𑀺 𑀧𑀸𑀞𑁄.

𑁫𑁨𑁮-𑁯. 𑀪𑀺𑀓𑁆𑀔𑀼𑀁 𑀧𑀦𑁂𑀯 𑀉𑀤𑁆𑀤𑀺𑀲𑁆𑀲𑀸𑀢𑀺 𑀏𑀢𑁆𑀣 𑀉𑀤𑁆𑀤𑀺𑀲𑁆𑀲𑀸𑀢𑀺 𑀅𑀧𑀤𑀺𑀲𑁆𑀲 𑀆𑀭𑀩𑁆𑀪. 𑀬𑀲𑁆𑀫𑀸 𑀧𑀦 𑀬𑀁 𑀉𑀤𑁆𑀤𑀺𑀲𑁆𑀲 𑀉𑀧𑀓𑁆𑀔𑀝𑀁 𑀳𑁄𑀢𑀺, 𑀢𑀁 𑀢𑀲𑁆𑀲𑀢𑁆𑀣𑀸𑀬 𑀉𑀧𑀓𑁆𑀔𑀝𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀪𑀺𑀓𑁆𑀔𑀼𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑀪𑀺𑀓𑁆𑀔𑀼𑀁 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸𑀢𑀺 𑀪𑀺𑀓𑁆𑀔𑀼𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸, 𑀬𑀜𑁆𑀳𑀺 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲 𑀉𑀧𑀓𑁆𑀔𑀝𑀁, 𑀢𑀁 𑀦𑀺𑀬𑀫𑁂𑀦𑁂𑀯 𑀪𑀺𑀓𑁆𑀔𑀼𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀉𑀧𑀓𑁆𑀔𑀝𑀁 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀪𑀺𑀓𑁆𑀔𑀼𑀁 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸’’𑀢𑀺. 𑀧𑀘𑁆𑀘𑀬𑁄𑀧𑀺 𑀳𑀺 ‘‘𑀮𑀪𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁪𑁩) 𑀆𑀭𑀫𑁆𑀫𑀡𑀦𑁆𑀢𑀺 𑀆𑀕𑀢𑁄. 𑀇𑀤𑀸𑀦𑀺 ‘‘𑀉𑀤𑁆𑀤𑀺𑀲𑁆𑀲𑀸’’𑀢𑀺 𑀏𑀢𑁆𑀣 𑀬𑁄 𑀓𑀢𑁆𑀢𑀸, 𑀢𑀲𑁆𑀲 𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀪𑀺𑀓𑁆𑀔𑀼𑀁 𑀅𑀘𑁆𑀙𑀸𑀤𑁂𑀢𑀼𑀓𑀸𑀫𑁄’’𑀢𑀺 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀁 𑀅𑀘𑁆𑀙𑀸𑀤𑁂𑀢𑀼𑀓𑀸𑀫𑁂𑀦 𑀳𑀺 𑀢𑁂𑀦 𑀢𑀁 𑀉𑀤𑁆𑀤𑀺𑀲𑁆𑀲 𑀉𑀧𑀓𑁆𑀔𑀝𑀁, 𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦. 𑀇𑀢𑀺 𑀲𑁄 𑀅𑀘𑁆𑀙𑀸𑀤𑁂𑀢𑀼𑀓𑀸𑀫𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀪𑀺𑀓𑁆𑀔𑀼𑀁 𑀅𑀘𑁆𑀙𑀸𑀤𑁂𑀢𑀼𑀓𑀸𑀫𑁄’’𑀢𑀺.

𑀅𑀜𑁆𑀜𑀸𑀢𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀯𑀸𑀢𑀺 𑀅𑀜𑁆𑀜𑀸𑀢𑀓𑁂𑀦 𑀕𑀳𑀧𑀢𑀺𑀦𑀸 𑀯𑀸𑀢𑀺 𑀅𑀢𑁆𑀣𑁄. 𑀓𑀭𑀡𑀢𑁆𑀣𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀧𑀤𑀪𑀸𑀚𑀦𑁂 𑀧𑀦 𑀩𑁆𑀬𑀜𑁆𑀚𑀦𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀸𑀢𑀓𑁄 𑀦𑀸𑀫…𑀧𑁂… 𑀕𑀳𑀧𑀢𑀺 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀦𑁆𑀢𑀺 𑀘𑀻𑀯𑀭𑀫𑀽𑀮𑀁, 𑀢𑀁 𑀧𑀦 𑀬𑀲𑁆𑀫𑀸 𑀳𑀺𑀭𑀜𑁆𑀜𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀤𑀪𑀸𑀚𑀦𑁂 ‘‘𑀳𑀺𑀭𑀜𑁆𑀜𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀓𑁆𑀔𑀝𑀁 𑀳𑁄𑀢𑀻𑀢𑀺 𑀲𑀚𑁆𑀚𑀺𑀢𑀁 𑀳𑁄𑀢𑀺, 𑀲𑀁𑀳𑀭𑀺𑀢𑁆𑀯𑀸 𑀞𑀧𑀺𑀢𑀁, 𑀬𑀲𑁆𑀫𑀸 𑀧𑀦 ‘‘𑀳𑀺𑀭𑀜𑁆𑀜𑀁 𑀯𑀸’’𑀢𑀺𑀆𑀤𑀺𑀦𑀸 𑀯𑀘𑀦𑁂𑀦𑀲𑁆𑀲 𑀉𑀧𑀓𑁆𑀔𑀝𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀉𑀧𑀓𑁆𑀔𑀝𑀁 𑀦𑀸𑀫𑀸’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀲𑀼𑀁 𑀧𑀤𑀪𑀸𑀚𑀦𑀁 𑀦 𑀯𑀼𑀢𑁆𑀢𑀁. 𑀇𑀫𑀺𑀦𑀸𑀢𑀺 𑀉𑀧𑀓𑁆𑀔𑀝𑀁 𑀲𑀦𑁆𑀥𑀸𑀬𑀸𑀳, 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀧𑀘𑁆𑀘𑀼𑀧𑀝𑁆𑀞𑀺𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀜𑁆𑀳𑀺 𑀉𑀧𑀓𑁆𑀔𑀝𑀁 𑀲𑀁𑀳𑀭𑀺𑀢𑁆𑀯𑀸 𑀞𑀧𑀺𑀢𑀁, 𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀻𑀢𑀺. 𑀅𑀘𑁆𑀙𑀸𑀤𑁂𑀲𑁆𑀲𑀸𑀫𑀻𑀢𑀺 𑀯𑁄𑀳𑀸𑀭𑀯𑀘𑀦𑀫𑁂𑀢𑀁 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀸𑀫𑀻’’𑀢𑀺 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂𑀧𑀺 ‘‘𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀭 𑀘𑁂 𑀲𑁄 𑀪𑀺𑀓𑁆𑀔𑀽𑀢𑀺 𑀬𑀢𑁆𑀭 𑀲𑁄 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀸𑀦𑀻 𑀯𑀸 𑀢𑀢𑁆𑀭 𑀲𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀻𑀯𑀭𑁂 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬 𑀘𑁂𑀢𑀺 𑀅𑀬𑀫𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀇𑀫𑀲𑁆𑀲 𑀕𑀦𑁆𑀢𑁆𑀯𑀸𑀢𑀺 𑀇𑀫𑀺𑀦𑀸𑀯 𑀅𑀢𑁆𑀣𑁂 𑀲𑀺𑀤𑁆𑀥𑁂 𑀧𑀘𑀼𑀭𑀯𑁄𑀳𑀸𑀭𑀯𑀲𑁂𑀦 ‘‘𑀖𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀢𑁆𑀭 𑀧𑀦 𑀲𑁄 𑀤𑀸𑀬𑀓𑁄 𑀢𑀢𑁆𑀭 𑀕𑀦𑁆𑀢𑁆𑀯𑀸𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄, 𑀢𑀲𑁆𑀫𑀸 𑀧𑀼𑀦𑀧𑀺 𑀯𑀼𑀢𑁆𑀢𑀁 ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺. 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀺𑀲𑀺𑀝𑁆𑀞𑀓𑀧𑁆𑀧𑀁 𑀅𑀥𑀺𑀓𑀯𑀺𑀥𑀸𑀦𑀁 𑀆𑀧𑀚𑁆𑀚𑁂𑀬𑁆𑀬, 𑀧𑀤𑀪𑀸𑀚𑀦𑁂 𑀧𑀦 𑀬𑁂𑀦𑀸𑀓𑀸𑀭𑁂𑀦 𑀯𑀺𑀓𑀧𑁆𑀧𑀁 𑀆𑀧𑀦𑁆𑀦𑁄 𑀳𑁄𑀢𑀺 𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀆𑀬𑀢𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸𑀥𑀽𑀢𑀺 𑀆𑀬𑀸𑀘𑀦𑁂 𑀦𑀺𑀧𑀸𑀢𑁄. 𑀯𑀢𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑁂. 𑀫𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀭𑀁 𑀆𑀮𑀧𑀢𑀺 𑀆𑀫𑀦𑁆𑀢𑁂𑀢𑀺. 𑀬𑀲𑁆𑀫𑀸 𑀧𑀦𑀺𑀤𑀁 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯, 𑀉𑀢𑁆𑀢𑀸𑀦𑀢𑁆𑀣𑀫𑁂𑀯, 𑀢𑀲𑁆𑀫𑀸𑀲𑁆𑀲 𑀧𑀤𑀪𑀸𑀚𑀦𑁂 𑀅𑀢𑁆𑀣𑁄 𑀦 𑀯𑀼𑀢𑁆𑀢𑁄. 𑀓𑀮𑁆𑀬𑀸𑀡𑀓𑀫𑁆𑀬𑀢𑀁 𑀉𑀧𑀸𑀤𑀸𑀬𑀸𑀢𑀺 𑀲𑀼𑀦𑁆𑀤𑀭𑀓𑀸𑀫𑀢𑀁 𑀯𑀺𑀲𑀺𑀝𑁆𑀞𑀓𑀸𑀫𑀢𑀁 𑀘𑀺𑀢𑁆𑀢𑁂𑀦 𑀕𑀳𑁂𑀢𑁆𑀯𑀸, 𑀢𑀲𑁆𑀲 ‘‘𑀆𑀧𑀚𑁆𑀚𑁂𑀬𑁆𑀬 𑀘𑁂’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀧𑀦 𑀬𑁄 𑀓𑀮𑁆𑀬𑀸𑀡𑀓𑀫𑁆𑀬𑀢𑀁 𑀉𑀧𑀸𑀤𑀸𑀬 𑀆𑀧𑀚𑁆𑀚𑀢𑀺, 𑀲𑁄 𑀲𑀸𑀥𑀢𑁆𑀣𑀺𑀓𑁄 𑀫𑀳𑀕𑁆𑀖𑀢𑁆𑀣𑀺𑀓𑁄 𑀳𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀧𑀤𑀪𑀸𑀚𑀦𑁂 𑀩𑁆𑀬𑀜𑁆𑀚𑀦𑀁 𑀧𑀳𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 𑀢𑀤𑁂𑀯 𑀯𑀘𑀦𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀦 𑀇𑀫𑀲𑁆𑀲 𑀆𑀧𑀚𑁆𑀚𑀦𑀫𑀢𑁆𑀢𑁂𑀦𑁂𑀯 𑀆𑀧𑀢𑁆𑀢𑀺 𑀲𑀻𑀲𑀁 𑀏𑀢𑀺, 𑀢𑀲𑁆𑀫𑀸 ‘‘𑀢𑀲𑁆𑀲 𑀯𑀘𑀦𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁫𑁩𑁧. 𑀅𑀦𑀸𑀧𑀢𑁆𑀢𑀺 𑀜𑀸𑀢𑀓𑀸𑀦𑀦𑁆𑀢𑀺𑀆𑀤𑀻𑀲𑀼 𑀜𑀸𑀢𑀓𑀸𑀦𑀁 𑀘𑀻𑀯𑀭𑁂 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑀳𑀕𑁆𑀖𑀁 𑀘𑁂𑀢𑀸𑀧𑁂𑀢𑀼𑀓𑀸𑀫𑀲𑁆𑀲 𑀅𑀧𑁆𑀧𑀕𑁆𑀖𑀁 𑀘𑁂𑀢𑀸𑀧𑁂𑀢𑀻𑀢𑀺 𑀕𑀳𑀧𑀢𑀺𑀲𑁆𑀲 𑀯𑀻𑀲𑀢𑀺𑀅𑀕𑁆𑀖𑀦𑀓𑀁 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑀼𑀓𑀸𑀫𑀲𑁆𑀲 ‘‘𑀅𑀮𑀁 𑀫𑀬𑁆𑀳𑀁 𑀏𑀢𑁂𑀦, 𑀤𑀲𑀕𑁆𑀖𑀦𑀓𑀁 𑀯𑀸 𑀅𑀝𑁆𑀞𑀕𑁆𑀖𑀦𑀓𑀁 𑀯𑀸 𑀤𑁂𑀳𑀻’’𑀢𑀺 𑀯𑀤𑀢𑀺 𑀅𑀦𑀸𑀧𑀢𑁆𑀢𑀺. 𑀅𑀧𑁆𑀧𑀕𑁆𑀖𑀦𑁆𑀢𑀺 𑀇𑀤𑀜𑁆𑀘 𑀅𑀢𑀺𑀭𑁂𑀓𑀦𑀺𑀯𑀸𑀭𑀡𑀢𑁆𑀣𑀫𑁂𑀯 𑀯𑀼𑀢𑁆𑀢𑀁, 𑀲𑀫𑀓𑁂𑀧𑀺 𑀧𑀦 𑀅𑀦𑀸𑀧𑀢𑁆𑀢𑀺, 𑀢𑀜𑁆𑀘 𑀔𑁄 𑀅𑀕𑁆𑀖𑀯𑀲𑁂𑀦𑁂𑀯 𑀦 𑀧𑀫𑀸𑀡𑀯𑀲𑁂𑀦, 𑀅𑀕𑁆𑀖𑀯𑀟𑁆𑀠𑀦𑀓𑀜𑁆𑀳𑀺 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁. 𑀢𑀲𑁆𑀫𑀸 𑀬𑁄 𑀯𑀻𑀲𑀢𑀺𑀅𑀕𑁆𑀖𑀦𑀓𑀁 𑀅𑀦𑁆𑀢𑀭𑀯𑀸𑀲𑀓𑀁 𑀘𑁂𑀢𑀸𑀧𑁂𑀢𑀼𑀓𑀸𑀫𑁄, ‘‘𑀢𑀁 𑀏𑀢𑁆𑀢𑀓𑀫𑁂𑀯 𑀫𑁂 𑀅𑀕𑁆𑀖𑀦𑀓𑀁 𑀘𑀻𑀯𑀭𑀁 𑀤𑁂𑀳𑀻’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺𑀧𑀺 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑁂𑀯𑀸𑀢𑀺.

𑀧𑀞𑀫𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁩𑁨. 𑀤𑀼𑀢𑀺𑀬𑀉𑀧𑀓𑁆𑀔𑀝𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀜𑁆𑀳𑀺 𑀇𑀫𑀲𑁆𑀲 𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀤𑀺𑀲𑀁. 𑀓𑁂𑀯𑀮𑀁 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀏𑀓𑀲𑁆𑀲 𑀧𑀻𑀴𑀸 𑀓𑀢𑀸, 𑀤𑀼𑀢𑀺𑀬𑁂 𑀤𑁆𑀯𑀺𑀦𑁆𑀦𑀁, 𑀅𑀬𑀫𑁂𑀯𑁂𑀢𑁆𑀣 𑀯𑀺𑀲𑁂𑀲𑁄. 𑀲𑁂𑀲𑀁 𑀲𑀩𑁆𑀩𑀁 𑀧𑀞𑀫𑀲𑀤𑀺𑀲𑀫𑁂𑀯. 𑀬𑀣𑀸 𑀘 𑀤𑁆𑀯𑀺𑀦𑁆𑀦𑀁, 𑀏𑀯𑀁 𑀩𑀳𑀽𑀦𑀁 𑀧𑀻𑀴𑀁 𑀓𑀢𑁆𑀯𑀸 𑀕𑀡𑁆𑀳𑀢𑁄𑀧𑀺 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁩𑁭. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀭𑀸𑀚𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀉𑀧𑀸𑀲𑀓𑀁 𑀲𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀚𑀸𑀦𑀸𑀧𑁂𑀢𑁆𑀯𑀸, ‘‘𑀇𑀫𑀺𑀦𑀸 𑀫𑀽𑀮𑁂𑀦 𑀘𑀻𑀯𑀭𑀁 𑀓𑀺𑀡𑀺𑀢𑁆𑀯𑀸 𑀣𑁂𑀭𑀲𑁆𑀲 𑀤𑁂𑀳𑀻’’𑀢𑀺 𑀏𑀯𑀁 𑀯𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀜𑀸𑀲𑀩𑀦𑁆𑀥𑁄𑀢𑀺 𑀧𑀜𑁆𑀜𑀸𑀲𑀓𑀳𑀸𑀧𑀡𑀤𑀡𑁆𑀟𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀜𑀸𑀲𑀁 𑀩𑀤𑁆𑀥𑁄𑀢𑀺𑀧𑀺 𑀧𑀸𑀞𑁄, 𑀧𑀜𑁆𑀜𑀸𑀲𑀁 𑀚𑀺𑀢𑁄 𑀧𑀜𑁆𑀜𑀸𑀲𑀁 𑀤𑀸𑀧𑁂𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀳𑀻𑀢𑀺 𑀪𑀦𑁆𑀢𑁂, 𑀅𑀚𑁆𑀚 𑀏𑀓𑀤𑀺𑀯𑀲𑀁 𑀅𑀫𑁆𑀳𑀸𑀓𑀁 𑀢𑀺𑀝𑁆𑀞, 𑀅𑀥𑀺𑀯𑀸𑀲𑁂𑀳𑀻𑀢𑀺 𑀅𑀢𑁆𑀣𑁄. 𑀧𑀭𑀸𑀫𑀲𑀻𑀢𑀺 𑀕𑀡𑁆𑀳𑀺. 𑀚𑀻𑀦𑁄𑀲𑀻𑀢𑀺 𑀚𑀺𑀢𑁄𑀲𑀺.

𑁫𑁩𑁮-𑁯. 𑀭𑀸𑀚𑀪𑁄𑀕𑁆𑀕𑁄𑀢𑀺 𑀭𑀸𑀚𑀢𑁄 𑀪𑁄𑀕𑁆𑀕𑀁 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀲𑁆𑀲𑀢𑁆𑀣𑀻𑀢𑀺 𑀭𑀸𑀚𑀪𑁄𑀕𑁆𑀕𑁄, 𑀭𑀸𑀚𑀪𑁄𑀕𑁄𑀢𑀺𑀧𑀺 𑀧𑀸𑀞𑁄, 𑀭𑀸𑀚𑀢𑁄 𑀪𑁄𑀕𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀧𑀳𑀺𑀡𑁂𑀬𑁆𑀬𑀸𑀢𑀺 𑀧𑁂𑀲𑁂𑀬𑁆𑀬, 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀧𑀦𑀲𑁆𑀲 𑀧𑀤𑀪𑀸𑀚𑀦𑀁 𑀦 𑀯𑀼𑀢𑁆𑀢𑀁. 𑀬𑀣𑀸 𑀘 𑀏𑀢𑀲𑁆𑀲, 𑀏𑀯𑀁 ‘‘𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼’’𑀦𑁆𑀢𑀺𑀆𑀤𑀻𑀦𑀫𑁆𑀧𑀺 𑀧𑀤𑀸𑀦𑀁 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸𑀬𑁂𑀯 𑀧𑀤𑀪𑀸𑀚𑀦𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀪𑀢𑀦𑁆𑀢𑀺 𑀆𑀦𑀻𑀢𑀁. 𑀓𑀸𑀮𑁂𑀦𑀓𑀧𑁆𑀧𑀺𑀬𑀦𑁆𑀢𑀺 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂𑀦, 𑀬𑀤𑀸 𑀦𑁄 𑀅𑀢𑁆𑀣𑁄 𑀳𑁄𑀢𑀺, 𑀢𑀤𑀸 𑀓𑀧𑁆𑀧𑀺𑀬𑀁 𑀘𑀻𑀯𑀭𑀁 𑀕𑀡𑁆𑀳𑀸𑀫𑀸𑀢𑀺 𑀅𑀢𑁆𑀣𑁄.

𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄𑀢𑀺 𑀓𑀺𑀘𑁆𑀘𑀓𑀭𑁄, 𑀓𑀧𑁆𑀧𑀺𑀬𑀓𑀸𑀭𑀓𑁄𑀢𑀺 𑀅𑀢𑁆𑀣𑁄. 𑀲𑀜𑁆𑀜𑀢𑁆𑀢𑁄 𑀲𑁄 𑀫𑀬𑀸𑀢𑀺 𑀆𑀡𑀢𑁆𑀢𑁄 𑀲𑁄 𑀫𑀬𑀸, 𑀬𑀣𑀸 𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑁂𑀦 𑀅𑀢𑁆𑀣𑁂 𑀲𑀢𑀺 𑀘𑀻𑀯𑀭𑀁 𑀤𑀲𑁆𑀲𑀢𑀺, 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀣𑁄 𑀫𑁂 𑀆𑀯𑀼𑀲𑁄 𑀘𑀻𑀯𑀭𑁂𑀦𑀸𑀢𑀺 𑀘𑁄𑀤𑀦𑀸𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀫𑁂𑀢𑀁, 𑀇𑀤𑀜𑁆𑀳𑀺 𑀯𑀘𑀦𑀁 𑀯𑀢𑁆𑀢𑀩𑁆𑀩𑀁, 𑀅𑀲𑁆𑀲 𑀯𑀸 𑀅𑀢𑁆𑀣𑁄 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬; 𑀇𑀤𑀁 𑀘𑁄𑀤𑀦𑀸𑀮𑀓𑁆𑀔𑀡𑀁. ‘‘𑀤𑁂𑀳𑀺 𑀫𑁂 𑀘𑀻𑀯𑀭’’𑀦𑁆𑀢𑀺𑀆𑀤𑀻𑀦𑀺 𑀧𑀦 𑀦𑀯𑀢𑁆𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺, 𑀏𑀢𑀸𑀦𑀺 𑀳𑀺 𑀯𑀘𑀦𑀸𑀦𑀺 𑀏𑀢𑁂𑀲𑀁 𑀯𑀸 𑀅𑀢𑁆𑀣𑁄 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀦 𑀯𑀢𑁆𑀢𑀩𑁆𑀩𑁄.

𑀤𑀼𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑁄 𑀢𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑁄𑀢𑀺 ‘‘𑀅𑀢𑁆𑀣𑁄 𑀫𑁂 𑀆𑀯𑀼𑀲𑁄 𑀘𑀻𑀯𑀭𑁂𑀦𑀸’’𑀢𑀺 𑀇𑀤𑀫𑁂𑀯 𑀬𑀸𑀯𑀢𑀢𑀺𑀬𑀁 𑀯𑀢𑁆𑀢𑀩𑁆𑀩𑁄𑀢𑀺. 𑀏𑀯𑀁 ‘‘𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑀩𑁆𑀩𑁄 𑀲𑀸𑀭𑁂𑀢𑀩𑁆𑀩𑁄’’𑀢𑀺 𑀏𑀢𑁆𑀣 𑀉𑀤𑁆𑀤𑀺𑀝𑁆𑀞𑀘𑁄𑀤𑀦𑀸𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀬𑀫𑀸𑀦𑁄 𑀲𑀸𑀭𑀬𑀫𑀸𑀦𑁄 𑀢𑀁 𑀘𑀻𑀯𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬, 𑀇𑀘𑁆𑀘𑁂𑀢𑀁 𑀓𑀼𑀲𑀮’’𑀦𑁆𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁂 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮’’𑀦𑁆𑀢𑀺 𑀆𑀳. 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀘𑁄𑀤𑁂𑀦𑁆𑀢𑁄 𑀢𑀁 𑀘𑀻𑀯𑀭𑀁 𑀬𑀤𑀺 𑀦𑀺𑀧𑁆𑀨𑀸𑀤𑁂𑀢𑀺, 𑀲𑀓𑁆𑀓𑁄𑀢𑀺 𑀅𑀢𑁆𑀢𑀦𑁄 𑀧𑀝𑀺𑀮𑀸𑀪𑀯𑀲𑁂𑀦 𑀦𑀺𑀧𑁆𑀨𑀸𑀤𑁂𑀢𑀼𑀁, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁 𑀲𑀸𑀥𑀼 𑀲𑀼𑀝𑁆𑀞𑀼 𑀲𑀼𑀦𑁆𑀤𑀭𑀁.