𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀁

𑀘𑀢𑀼𑀲𑀘𑁆𑀘𑀯𑀺𑀤𑀽 𑀲𑀢𑁆𑀣𑀸, 𑀘𑀢𑀼𑀢𑁆𑀣𑀁 𑀬𑀁 𑀧𑀓𑀸𑀲𑀬𑀺;

𑀧𑀸𑀭𑀸𑀚𑀺𑀓𑀁 𑀢𑀲𑁆𑀲 𑀤𑀸𑀦𑀺, 𑀧𑀢𑁆𑀢𑁄 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄.

𑀬𑀲𑁆𑀫𑀸 𑀢𑀲𑁆𑀫𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀁, 𑀬𑀁 𑀧𑀼𑀩𑁆𑀩𑁂 𑀘 𑀧𑀓𑀸𑀲𑀺𑀢𑀁;

𑀢𑀁 𑀯𑀚𑁆𑀚𑀬𑀺𑀢𑁆𑀯𑀸 𑀅𑀲𑁆𑀲𑀸𑀧𑀺, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸 𑀅𑀬𑀁.

𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁯𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺…𑀧𑁂… 𑀕𑀺𑀳𑀻𑀦𑀁 𑀓𑀫𑁆𑀫𑀦𑁆𑀢𑀁 𑀅𑀥𑀺𑀝𑁆𑀞𑁂𑀫𑀸𑀢𑀺 𑀕𑀺𑀳𑀻𑀦𑀁 𑀔𑁂𑀢𑁆𑀢𑁂𑀲𑀼 𑀘𑁂𑀯 𑀆𑀭𑀸𑀫𑀸𑀤𑀻𑀲𑀼 𑀘 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀥𑀺𑀝𑁆𑀞𑀸𑀫; ‘‘𑀏𑀯𑀁 𑀓𑀸𑀢𑀩𑁆𑀩𑀁, 𑀏𑀯𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀆𑀘𑀺𑀓𑁆𑀔𑀸𑀫 𑀘𑁂𑀯 𑀅𑀦𑀼𑀲𑀸𑀲𑀸𑀫 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀽𑀢𑁂𑀬𑁆𑀬𑀦𑁆𑀢𑀺 𑀤𑀽𑀢𑀓𑀫𑁆𑀫𑀁. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑁂 𑀉𑀢𑁆𑀢𑀺𑀡𑁆𑀡𑀥𑀫𑁆𑀫𑀲𑁆𑀲; 𑀫𑀦𑀼𑀲𑁆𑀲𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑁆𑀭𑀳𑁆𑀫𑀢𑁆𑀢𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀯𑀸 𑀧𑀸𑀧𑀦𑀓𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀯𑀸 𑀲𑁂𑀝𑁆𑀞𑀧𑀼𑀭𑀺𑀲𑀸𑀦𑀁 𑀛𑀸𑀬𑀻𑀦𑀜𑁆𑀘 𑀅𑀭𑀺𑀬𑀸𑀦𑀜𑁆𑀘 𑀥𑀫𑁆𑀫𑀲𑁆𑀲. 𑀅𑀲𑀼𑀓𑁄 𑀪𑀺𑀓𑁆𑀔𑀽𑀢𑀺𑀆𑀤𑀻𑀲𑀼 𑀅𑀢𑁆𑀢𑀦𑀸 𑀏𑀯𑀁 𑀫𑀦𑁆𑀢𑀬𑀺𑀢𑁆𑀯𑀸 𑀧𑀘𑁆𑀙𑀸 𑀕𑀺𑀳𑀻𑀦𑀁 𑀪𑀸𑀲𑀦𑁆𑀢𑀸 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀦𑀸𑀫 𑀪𑀺𑀓𑁆𑀔𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀥𑀫𑁆𑀫𑀭𑀓𑁆𑀔𑀺𑀢𑁄 𑀤𑀼𑀢𑀺𑀬𑀲𑁆𑀲𑀸’’𑀢𑀺 𑀏𑀯𑀁 𑀦𑀸𑀫𑀯𑀲𑁂𑀦𑁂𑀯 𑀯𑀡𑁆𑀡𑀁 𑀪𑀸𑀲𑀺𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀏𑀲𑁄𑀬𑁂𑀯 𑀔𑁄 𑀆𑀯𑀼𑀲𑁄 𑀲𑁂𑀬𑁆𑀬𑁄𑀢𑀺 𑀓𑀫𑁆𑀫𑀦𑁆𑀢𑀸𑀥𑀺𑀝𑁆𑀞𑀸𑀦𑀁 𑀤𑀽𑀢𑁂𑀬𑁆𑀬𑀳𑀭𑀡𑀜𑁆𑀘 𑀩𑀳𑀼𑀲𑀧𑀢𑁆𑀢𑀁 𑀫𑀳𑀸𑀲𑀫𑀸𑀭𑀫𑁆𑀪𑀁 𑀦 𑀘 𑀲𑀫𑀡𑀲𑀸𑀭𑀼𑀧𑁆𑀧𑀁. 𑀢𑀢𑁄 𑀧𑀦 𑀉𑀪𑀬𑀢𑁄𑀧𑀺 𑀏𑀲𑁄 𑀏𑀯 𑀲𑁂𑀬𑁆𑀬𑁄 𑀧𑀸𑀲𑀁𑀲𑀢𑀭𑁄 𑀲𑀼𑀦𑁆𑀤𑀭𑀢𑀭𑁄 𑀬𑁄 𑀅𑀫𑁆𑀳𑀸𑀓𑀁 𑀕𑀺𑀳𑀻𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑁄 𑀪𑀸𑀲𑀺𑀢𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀇𑀭𑀺𑀬𑀸𑀧𑀣𑀁 𑀲𑀡𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀯𑀸 𑀘𑀗𑁆𑀓𑀫𑀦𑁆𑀢𑀁 𑀯𑀸 𑀧𑀼𑀘𑁆𑀙𑀦𑁆𑀢𑀸𑀦𑀁 𑀯𑀸 𑀅𑀧𑀼𑀘𑁆𑀙𑀦𑁆𑀢𑀸𑀦𑀁 𑀯𑀸 𑀕𑀺𑀳𑀻𑀦𑀁 ‘‘𑀅𑀬𑀁 𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀬𑁄 𑀅𑀫𑁆𑀳𑀸𑀓𑀁 𑀅𑀜𑁆𑀜𑁂𑀦 𑀅𑀜𑁆𑀜𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑁄 𑀪𑀸𑀲𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀏𑀲𑁄 𑀏𑀯 𑀲𑁂𑀬𑁆𑀬𑁄𑀢𑀺. 𑀅𑀦𑀸𑀕𑀢𑀲𑀫𑁆𑀩𑀦𑁆𑀥𑁂 𑀧𑀦 𑀅𑀲𑀢𑀺 𑀦 𑀏𑀢𑁂𑀳𑀺 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀪𑀸𑀲𑀺𑀢𑁄𑀯 𑀬𑀲𑁆𑀫𑀸 𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀦𑀸𑀕𑀢𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 ‘‘𑀬𑁄 𑀏𑀯𑀁 𑀪𑀸𑀲𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀲𑁄 𑀏𑀯 𑀲𑁂𑀬𑁆𑀬𑁄’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀮𑀓𑁆𑀔𑀡𑀁 𑀧𑀦 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑀁.

𑁧𑁯𑁪. 𑀯𑀡𑁆𑀡𑀯𑀸 𑀅𑀳𑁂𑀲𑀼𑀦𑁆𑀢𑀺 𑀅𑀜𑁆𑀜𑁄𑀬𑁂𑀯 𑀦𑁂𑀲𑀁 𑀅𑀪𑀺𑀦𑀯𑁄 𑀲𑀭𑀻𑀭𑀯𑀡𑁆𑀡𑁄 𑀉𑀧𑁆𑀧𑀚𑁆𑀚𑀺, 𑀢𑁂𑀦 𑀯𑀡𑁆𑀡𑁂𑀦 𑀯𑀡𑁆𑀡𑀯𑀦𑁆𑀢𑁄 𑀅𑀳𑁂𑀲𑀼𑀁. 𑀧𑀻𑀡𑀺𑀦𑁆𑀤𑁆𑀭𑀺𑀬𑀸𑀢𑀺 𑀧𑀜𑁆𑀘𑀳𑀺 𑀧𑀲𑀸𑀤𑁂𑀳𑀺 𑀅𑀪𑀺𑀦𑀺𑀯𑀺𑀝𑁆𑀞𑁄𑀓𑀸𑀲𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀫𑀺𑀮𑀸𑀢𑀪𑀸𑀯𑁂𑀦 𑀧𑀻𑀡𑀺𑀦𑁆𑀤𑁆𑀭𑀺𑀬𑀸. 𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑀸𑀢𑀺 𑀓𑀺𑀜𑁆𑀘𑀸𑀧𑀺 𑀅𑀯𑀺𑀲𑁂𑀲𑁂𑀦 𑀯𑀡𑁆𑀡𑀯𑀦𑁆𑀢𑁄 𑀲𑀭𑀻𑀭𑀯𑀡𑁆𑀡𑀢𑁄 𑀧𑀦 𑀦𑁂𑀲𑀁 𑀫𑀼𑀔𑀯𑀡𑁆𑀡𑁄 𑀅𑀥𑀺𑀓𑀢𑀭𑀁 𑀧𑀲𑀦𑁆𑀦𑁄; 𑀅𑀘𑁆𑀙𑁄 𑀅𑀦𑀸𑀯𑀺𑀮𑁄 𑀧𑀭𑀺𑀲𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀯𑀺𑀧𑁆𑀧𑀲𑀦𑁆𑀦𑀙𑀯𑀺𑀯𑀡𑁆𑀡𑀸𑀢𑀺 𑀬𑁂𑀦 𑀘 𑀢𑁂 𑀫𑀳𑀸𑀓𑀡𑀺𑀓𑀸𑀭𑀧𑀼𑀧𑁆𑀨𑀸𑀤𑀺𑀲𑀤𑀺𑀲𑁂𑀦 𑀯𑀡𑁆𑀡𑁂𑀦 𑀯𑀡𑁆𑀡𑀯𑀦𑁆𑀢𑁄, 𑀢𑀸𑀤𑀺𑀲𑁄 𑀅𑀜𑁆𑀜𑁂𑀲𑀫𑁆𑀧𑀺 𑀫𑀦𑀼𑀲𑁆𑀲𑀸𑀦𑀁 𑀯𑀡𑁆𑀡𑁄 𑀅𑀢𑁆𑀣𑀺. 𑀬𑀣𑀸 𑀧𑀦 𑀇𑀫𑁂𑀲𑀁; 𑀏𑀯𑀁 𑀦 𑀢𑁂𑀲𑀁 𑀙𑀯𑀺𑀯𑀡𑁆𑀡𑁄 𑀯𑀺𑀧𑁆𑀧𑀲𑀦𑁆𑀦𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀧𑁆𑀧𑀲𑀦𑁆𑀦𑀙𑀯𑀺𑀯𑀡𑁆𑀡𑀸’’𑀢𑀺. 𑀇𑀢𑀺𑀳 𑀢𑁂 𑀪𑀺𑀓𑁆𑀔𑀽 𑀦𑁂𑀯 𑀉𑀤𑁆𑀤𑁂𑀲𑀁 𑀦 𑀧𑀭𑀺𑀧𑀼𑀘𑁆𑀙𑀁 𑀦 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀸. 𑀅𑀣 𑀔𑁄 𑀓𑀼𑀳𑀓𑀢𑀸𑀬 𑀅𑀪𑀽𑀢𑀕𑀼𑀡𑀲𑀁𑀯𑀡𑁆𑀡𑀦𑀸𑀬 𑀮𑀤𑁆𑀥𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀬𑀣𑀸𑀲𑀼𑀔𑀁 𑀦𑀺𑀤𑁆𑀤𑀸𑀭𑀸𑀫𑀢𑀁 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀜𑁆𑀘 𑀅𑀦𑀼𑀬𑀼𑀜𑁆𑀚𑀦𑁆𑀢𑀸 𑀇𑀫𑀁 𑀲𑀭𑀻𑀭𑀲𑁄𑀪𑀁 𑀧𑀸𑀧𑀼𑀡𑀺𑀁𑀲𑀼, 𑀬𑀣𑀸 𑀢𑀁 𑀩𑀸𑀮𑀸 𑀪𑀦𑁆𑀢𑀫𑀺𑀕𑀧𑁆𑀧𑀝𑀺𑀪𑀸𑀕𑀸𑀢𑀺.

𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸𑀢𑀺 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀯𑀸𑀲𑀺𑀦𑁄. 𑀓𑀘𑁆𑀘𑀺 𑀪𑀺𑀓𑁆𑀔𑀯𑁂 𑀔𑀫𑀦𑀻𑀬𑀦𑁆𑀢𑀺 𑀪𑀺𑀓𑁆𑀔𑀯𑁂 𑀓𑀘𑁆𑀘𑀺 𑀢𑀼𑀫𑁆𑀳𑀸𑀓𑀁 𑀇𑀤𑀁 𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀁 𑀲𑀭𑀻𑀭𑀬𑀦𑁆𑀢𑀁 𑀔𑀫𑀦𑀻𑀬𑀁 𑀲𑀓𑁆𑀓𑀸 𑀔𑀫𑀺𑀢𑀼𑀁 𑀲𑀳𑀺𑀢𑀼𑀁 𑀧𑀭𑀺𑀳𑀭𑀺𑀢𑀼𑀁 𑀦 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀻𑀢𑀺. 𑀓𑀘𑁆𑀘𑀺 𑀬𑀸𑀧𑀦𑀻𑀬𑀦𑁆𑀢𑀺 𑀓𑀘𑁆𑀘𑀺 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀬𑀸𑀧𑁂𑀢𑀼𑀁 𑀕𑀫𑁂𑀢𑀼𑀁 𑀲𑀓𑁆𑀓𑀸, 𑀦 𑀓𑀺𑀜𑁆𑀘𑀺 𑀅𑀦𑁆𑀢𑀭𑀸𑀬𑀁 𑀤𑀲𑁆𑀲𑁂𑀢𑀻𑀢𑀺. 𑀓𑀼𑀘𑁆𑀙𑀺 𑀧𑀭𑀺𑀓𑀦𑁆𑀢𑁄𑀢𑀺 𑀓𑀼𑀘𑁆𑀙𑀺 𑀧𑀭𑀺𑀓𑀦𑁆𑀢𑀺𑀢𑁄 𑀯𑀭𑀁 𑀪𑀯𑁂𑀬𑁆𑀬; ‘‘𑀧𑀭𑀺𑀓𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄 𑀬𑀼𑀚𑁆𑀚𑀢𑀺. 𑀏𑀯𑀁 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑁂 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀢𑁂𑀳𑀺 𑀓𑀢𑀓𑀫𑁆𑀫𑀁 𑀘𑁄𑀭𑀓𑀫𑁆𑀫𑀁 𑀳𑁄𑀢𑀺, 𑀢𑀲𑁆𑀫𑀸 𑀆𑀬𑀢𑀺𑀁 𑀅𑀜𑁆𑀜𑁂𑀲𑀫𑁆𑀧𑀺 𑀏𑀯𑀭𑀽𑀧𑀲𑁆𑀲 𑀓𑀫𑁆𑀫𑀲𑁆𑀲 𑀅𑀓𑀭𑀡𑀢𑁆𑀣𑀁 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺.

𑁧𑁯𑁫. 𑀆𑀫𑀦𑁆𑀢𑁂𑀢𑁆𑀯𑀸 𑀘 𑀧𑀦 ‘‘𑀧𑀜𑁆𑀘𑀺𑀫𑁂 𑀪𑀺𑀓𑁆𑀔𑀯𑁂 𑀫𑀳𑀸𑀘𑁄𑀭𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸𑀢𑀺 𑀅𑀢𑁆𑀣𑀺 𑀘𑁂𑀯 𑀉𑀧𑀮𑀩𑁆𑀪𑀦𑁆𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂. 𑀏𑀯𑀁 𑀳𑁄𑀢𑀻𑀢𑀺 𑀏𑀯𑀁 𑀧𑀼𑀩𑁆𑀩𑀪𑀸𑀕𑁂 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺. 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀦𑁆𑀢𑀺 𑀏𑀢𑁆𑀣 𑀲𑀼𑀇𑀢𑀺 𑀦𑀺𑀧𑀸𑀢𑁄; 𑀓𑀼𑀤𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀲𑁄 𑀧𑀼𑀩𑁆𑀩𑀪𑀸𑀕𑁂 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀲𑀁 𑀯𑀟𑁆𑀠𑁂𑀦𑁆𑀢𑁄 𑀧𑀦𑁆𑀣𑀤𑀽𑀳𑀦𑀓𑀫𑁆𑀫𑀁 𑀧𑀘𑁆𑀘𑀦𑁆𑀢𑀺𑀫𑀕𑀸𑀫𑀯𑀺𑀮𑁄𑀧𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀓𑀢𑁆𑀯𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀧𑀭𑀺𑀲𑁄 𑀳𑀼𑀢𑁆𑀯𑀸 𑀕𑀸𑀫𑁂𑀧𑀺 𑀅𑀕𑀸𑀫𑁂, 𑀚𑀦𑀧𑀤𑁂𑀧𑀺 𑀅𑀚𑀦𑀧𑀤𑁂 𑀓𑀭𑁄𑀦𑁆𑀢𑁄 𑀳𑀦𑀦𑁆𑀢𑁄 𑀖𑀸𑀢𑁂𑀦𑁆𑀢𑁄 𑀙𑀺𑀦𑁆𑀤𑀦𑁆𑀢𑁄 𑀙𑁂𑀤𑀸𑀧𑁂𑀦𑁆𑀢𑁄 𑀧𑀘𑀦𑁆𑀢𑁄 𑀧𑀸𑀘𑁂𑀦𑁆𑀢𑁄.

𑀇𑀢𑀺 𑀩𑀸𑀳𑀺𑀭𑀓𑀫𑀳𑀸𑀘𑁄𑀭𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀦 𑀲𑀤𑀺𑀲𑁂 𑀲𑀸𑀲𑀦𑁂 𑀧𑀜𑁆𑀘 𑀫𑀳𑀸𑀘𑁄𑀭𑁂 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀫𑁂𑀯 𑀔𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀧𑀪𑀺𑀓𑁆𑀔𑀼𑀦𑁄𑀢𑀺 𑀅𑀜𑁆𑀜𑁂𑀲𑀼 𑀞𑀸𑀦𑁂𑀲𑀼 𑀫𑀽𑀮𑀘𑁆𑀙𑀺𑀦𑁆𑀦𑁄 𑀧𑀸𑀭𑀸𑀚𑀺𑀓𑀧𑁆𑀧𑀢𑁆𑀢𑁄 ‘‘𑀧𑀸𑀧𑀪𑀺𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑁄 𑀇𑀘𑁆𑀙𑀸𑀘𑀸𑀭𑁂 𑀞𑀺𑀢𑁄 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀫𑀤𑁆𑀤𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 ‘‘𑀧𑀸𑀧𑀪𑀺𑀓𑁆𑀔𑀽’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲𑀸𑀧𑀺 𑀩𑀸𑀳𑀺𑀭𑀓𑀘𑁄𑀭𑀲𑁆𑀲 𑀯𑀺𑀬 𑀧𑀼𑀩𑁆𑀩𑀪𑀸𑀕𑁂 𑀏𑀯𑀁 𑀳𑁄𑀢𑀺 𑁋 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. 𑀢𑀢𑁆𑀣 𑀲𑀓𑁆𑀓𑀢𑁄𑀢𑀺 𑀲𑀓𑁆𑀓𑀸𑀭𑀧𑁆𑀧𑀢𑁆𑀢𑁄. 𑀕𑀭𑀼𑀓𑀢𑁄𑀢𑀺 𑀕𑀭𑀼𑀓𑀸𑀭𑀧𑁆𑀧𑀢𑁆𑀢𑁄. 𑀫𑀸𑀦𑀺𑀢𑁄𑀢𑀺 𑀫𑀦𑀲𑀸 𑀧𑀺𑀬𑀸𑀬𑀺𑀢𑁄. 𑀧𑀽𑀚𑀺𑀢𑁄𑀢𑀺 𑀘𑀢𑀼𑀧𑀘𑁆𑀘𑀬𑀸𑀪𑀺𑀳𑀸𑀭𑀧𑀽𑀚𑀸𑀬 𑀧𑀽𑀚𑀺𑀢𑁄. 𑀅𑀧𑀘𑀺𑀢𑁄𑀢𑀺 𑀅𑀧𑀘𑀺𑀢𑀺𑀧𑁆𑀧𑀢𑁆𑀢𑁄. 𑀢𑀢𑁆𑀣 𑀬𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀲𑀓𑁆𑀓𑀭𑀺𑀢𑁆𑀯𑀸 𑀲𑀼𑀝𑁆𑀞𑀼 𑀅𑀪𑀺𑀲𑀗𑁆𑀔𑀢𑁂 𑀧𑀡𑀻𑀢𑀧𑀡𑀻𑀢𑁂 𑀓𑀢𑁆𑀯𑀸 𑀤𑁂𑀦𑁆𑀢𑀺, 𑀲𑁄 𑀲𑀓𑁆𑀓𑀢𑁄. 𑀬𑀲𑁆𑀫𑀺𑀁 𑀕𑀭𑀼𑀪𑀸𑀯𑀁 𑀧𑀘𑁆𑀘𑀼𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀲𑁄 𑀕𑀭𑀼𑀓𑀢𑁄. 𑀬𑀁 𑀫𑀦𑀲𑀸 𑀧𑀺𑀬𑀸𑀬𑀦𑁆𑀢𑀺, 𑀲𑁄 𑀫𑀸𑀦𑀺𑀢𑁄. 𑀬𑀲𑁆𑀲 𑀲𑀩𑁆𑀩𑀫𑁆𑀧𑁂𑀢𑀁 𑀓𑀭𑁄𑀦𑁆𑀢𑀺, 𑀲𑁄 𑀧𑀽𑀚𑀺𑀢𑁄. 𑀬𑀲𑁆𑀲 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀸𑀤𑀺𑀯𑀲𑁂𑀦 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀲𑁄 𑀅𑀧𑀘𑀺𑀢𑁄. 𑀇𑀫𑀲𑁆𑀲 𑀘 𑀧𑀦 𑀲𑀩𑁆𑀩𑀫𑁆𑀧𑀺 𑀇𑀫𑀁 𑀮𑁄𑀓𑀸𑀫𑀺𑀲𑀁 𑀧𑀢𑁆𑀣𑀬𑀫𑀸𑀦𑀲𑁆𑀲 𑀏𑀯𑀁 𑀳𑁄𑀢𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀲𑁄 𑀧𑀼𑀩𑁆𑀩𑀪𑀸𑀕𑁂 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀺𑀓𑁆𑀔𑀸𑀬 𑀅𑀢𑀺𑀩𑁆𑀩𑀕𑀸𑀭𑀯𑁂 𑀉𑀤𑁆𑀥𑀢𑁂 𑀉𑀦𑁆𑀦𑀴𑁂 𑀘𑀧𑀮𑁂 𑀫𑀼𑀔𑀭𑁂 𑀯𑀺𑀓𑀺𑀡𑁆𑀡𑀯𑀸𑀘𑁂 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑁂 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑀓𑁂 𑀮𑀸𑀪𑀕𑀭𑀼𑀓𑁂 𑀧𑀸𑀧𑀪𑀺𑀓𑁆𑀔𑀽 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀇𑀭𑀺𑀬𑀸𑀧𑀣𑀲𑀡𑁆𑀞𑀧𑀦𑀸𑀤𑀻𑀦𑀺 𑀓𑀼𑀳𑀓𑀯𑀢𑁆𑀢𑀸𑀦𑀺 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 ‘‘𑀅𑀬𑀁 𑀣𑁂𑀭𑁄 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀲𑁂𑀦𑀸𑀲𑀦𑁂 𑀯𑀲𑁆𑀲𑀁 𑀉𑀧𑀕𑀫𑁆𑀫 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑀬𑀫𑀸𑀦𑁄 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀦𑀺𑀕𑁆𑀕𑀢𑁄’’𑀢𑀺 𑀮𑁄𑀓𑀲𑀫𑁆𑀫𑀢𑀲𑁂𑀦𑀸𑀲𑀦𑀲𑀁𑀯𑀡𑁆𑀡𑀦𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 𑀮𑁄𑀓𑀁 𑀧𑀭𑀺𑀧𑀸𑀘𑁂𑀢𑀼𑀁 𑀧𑀝𑀺𑀩𑀮𑁂𑀳𑀺 𑀚𑀸𑀢𑀓𑀸𑀤𑀻𑀲𑀼 𑀓𑀢𑀧𑀭𑀺𑀘𑀬𑁂𑀳𑀺 𑀲𑀭𑀲𑀫𑁆𑀧𑀦𑁆𑀦𑁂𑀳𑀺 𑀧𑀸𑀧𑀪𑀺𑀓𑁆𑀔𑀽𑀳𑀺 𑀲𑀁𑀯𑀡𑁆𑀡𑀺𑀬𑀫𑀸𑀦𑀕𑀼𑀡𑁄 𑀳𑀼𑀢𑁆𑀯𑀸 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄…𑀧𑁂… 𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀬𑀁 𑀪𑀺𑀓𑁆𑀔𑀯𑁂 𑀧𑀞𑀫𑁄 𑀫𑀳𑀸𑀘𑁄𑀭𑁄𑀢𑀺 𑀅𑀬𑀁 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀘𑁄𑀭𑀓𑁄 𑀯𑀺𑀬 𑀦 𑀏𑀓𑀁 𑀓𑀼𑀮𑀁 𑀦 𑀤𑁆𑀯𑁂, 𑀅𑀣 𑀔𑁄 𑀫𑀳𑀸𑀚𑀦𑀁 𑀯𑀜𑁆𑀘𑁂𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑀕𑀳𑀡𑀢𑁄 ‘‘𑀧𑀞𑀫𑁄 𑀫𑀳𑀸𑀘𑁄𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑁂 𑀧𑀦 𑀲𑀼𑀢𑁆𑀢𑀦𑁆𑀢𑀺𑀓𑀸 𑀯𑀸 𑀆𑀪𑀺𑀥𑀫𑁆𑀫𑀺𑀓𑀸 𑀯𑀸 𑀯𑀺𑀦𑀬𑀥𑀭𑀸 𑀯𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀸𑀘𑀸𑀭𑁂 𑀅𑀲𑀫𑁆𑀧𑀚𑁆𑀚𑀫𑀸𑀦𑁂 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑀸 𑀅𑀝𑁆𑀞𑀓𑀣𑀁 𑀓𑀣𑁂𑀦𑁆𑀢𑀸 𑀅𑀦𑀼𑀫𑁄𑀤𑀦𑀸𑀬 𑀥𑀫𑁆𑀫𑀓𑀣𑀸𑀬 𑀇𑀭𑀺𑀬𑀸𑀧𑀣𑀲𑀫𑁆𑀧𑀢𑁆𑀢𑀺𑀬𑀸 𑀘 𑀮𑁄𑀓𑀁 𑀧𑀲𑀸𑀤𑁂𑀦𑁆𑀢𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑀲𑀓𑁆𑀓𑀢𑀸 𑀕𑀭𑀼𑀓𑀢𑀸 𑀫𑀸𑀦𑀺𑀢𑀸 𑀧𑀽𑀚𑀺𑀢𑀸 𑀅𑀧𑀘𑀺𑀢𑀸, 𑀢𑁂 ‘‘𑀢𑀦𑁆𑀢𑀺𑀧𑀯𑁂𑀡𑀺𑀖𑀝𑀦𑀓𑀸 𑀲𑀸𑀲𑀦𑀚𑁄𑀢𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀦𑁆𑀢𑀺 𑀢𑀣𑀸𑀕𑀢𑁂𑀦 𑀧𑀝𑀺𑀯𑀺𑀤𑁆𑀥𑀁 𑀧𑀘𑁆𑀘𑀓𑁆𑀔𑀓𑀢𑀁 𑀚𑀸𑀦𑀸𑀧𑀺𑀢𑀁 𑀯𑀸. 𑀅𑀢𑁆𑀢𑀦𑁄 𑀤𑀳𑀢𑀻𑀢𑀺 𑀧𑀭𑀺𑀲𑀫𑀚𑁆𑀛𑁂 𑀧𑀸𑀴𑀺𑀜𑁆𑀘 𑀅𑀝𑁆𑀞𑀓𑀣𑀜𑁆𑀘 𑀲𑀁𑀲𑀦𑁆𑀤𑀺𑀢𑁆𑀯𑀸 𑀫𑀥𑀼𑀭𑁂𑀦 𑀲𑀭𑁂𑀦 𑀧𑀲𑀸𑀤𑀦𑀻𑀬𑀁 𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀢𑁆𑀯𑀸 𑀥𑀫𑁆𑀫𑀓𑀣𑀸𑀯𑀲𑁂𑀦 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑁂𑀦 𑀯𑀺𑀜𑁆𑀜𑀽𑀚𑀦𑁂𑀦 ‘‘𑀅𑀳𑁄, 𑀪𑀦𑁆𑀢𑁂, 𑀧𑀸𑀴𑀺 𑀘 𑀅𑀝𑁆𑀞𑀓𑀣𑀸 𑀘 𑀲𑀼𑀧𑀭𑀺𑀲𑀼𑀤𑁆𑀥𑀸, 𑀓𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀓𑁄 𑀅𑀫𑁆𑀳𑀸𑀤𑀺𑀲𑁂 𑀉𑀕𑁆𑀕𑀳𑀸𑀧𑁂𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀆𑀘𑀭𑀺𑀬𑀁 𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀁 𑀲𑀬𑀫𑁆𑀪𑀼𑀜𑀸𑀡𑀸𑀥𑀺𑀕𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀯𑁂𑀤𑁂𑀢𑀺. 𑀅𑀬𑀁 𑀢𑀣𑀸𑀕𑀢𑁂𑀦 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀢𑁆𑀣𑁂𑀦𑀓𑁄 𑀤𑀼𑀢𑀺𑀬𑁄 𑀫𑀳𑀸𑀘𑁄𑀭𑁄.

𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑁆𑀢𑀺 𑀔𑀻𑀡𑀸𑀲𑀯𑀪𑀺𑀓𑁆𑀔𑀼𑀁. 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁 𑀲𑁂𑀝𑁆𑀞𑀘𑀭𑀺𑀬𑀁 𑀘𑀭𑀦𑁆𑀢𑀁; 𑀅𑀜𑁆𑀜𑀫𑁆𑀧𑀺 𑀯𑀸 𑀅𑀦𑀸𑀕𑀸𑀫𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀻𑀮𑀯𑀦𑁆𑀢𑀁 𑀧𑀼𑀣𑀼𑀚𑁆𑀚𑀦𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀯𑀢𑁆𑀣𑀼𑀓𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀁. 𑀅𑀫𑀽𑀮𑀓𑁂𑀦 𑀅𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀦𑀼𑀯𑀤𑀢𑀺 𑀘𑁄𑀤𑁂𑀢𑀺; 𑀅𑀬𑀁 𑀯𑀺𑀚𑁆𑀚𑀫𑀸𑀦𑀕𑀼𑀡𑀫𑀓𑁆𑀔𑀻 𑀅𑀭𑀺𑀬𑀕𑀼𑀡𑀢𑁆𑀣𑁂𑀦𑀓𑁄 𑀢𑀢𑀺𑀬𑁄 𑀫𑀳𑀸𑀘𑁄𑀭𑁄.

𑀕𑀭𑀼𑀪𑀡𑁆𑀟𑀸𑀦𑀺 𑀕𑀭𑀼𑀧𑀭𑀺𑀓𑁆𑀔𑀸𑀭𑀸𑀦𑀻𑀢𑀺 𑀬𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑁂 ‘‘𑀘𑀢𑀼𑀭𑁄 𑀚𑀦𑀸 𑀲𑀁𑀯𑀺𑀥𑀸𑀬 𑀕𑀭𑀼𑀪𑀡𑁆𑀟𑀁 𑀅𑀯𑀸𑀳𑀭𑀼’’𑀦𑁆𑀢𑀺 (𑀧𑀭𑀺. 𑁪𑁭𑁯) 𑀏𑀢𑁆𑀣 𑀧𑀜𑁆𑀘𑀫𑀸𑀲𑀓𑀕𑁆𑀖𑀦𑀓𑀁 ‘‘𑀕𑀭𑀼𑀪𑀡𑁆𑀟’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀦 𑀏𑀯𑀁. 𑀅𑀣 𑀔𑁄 ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑁆𑀲𑀚𑁆𑀚𑀺𑀬𑀸𑀦𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀺 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺𑀧𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀓𑀢𑀫𑀸𑀦𑀺 𑀧𑀜𑁆𑀘? 𑀆𑀭𑀸𑀫𑁄, 𑀆𑀭𑀸𑀫𑀯𑀢𑁆𑀣𑀼…𑀧𑁂… 𑀤𑀸𑀭𑀼𑀪𑀡𑁆𑀟𑀁, 𑀫𑀢𑁆𑀢𑀺𑀓𑀸𑀪𑀡𑁆𑀟’’𑀦𑁆𑀢𑀺 𑀯𑀘𑀦𑀢𑁄 𑀅𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀕𑀭𑀼𑀪𑀡𑁆𑀟𑀸𑀦𑀺. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀯𑁂𑀪𑀗𑁆𑀕𑀺𑀬𑀸𑀦𑀺 𑀦 𑀯𑀺𑀪𑀚𑀺𑀢𑀩𑁆𑀩𑀸𑀦𑀺 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀪𑀢𑁆𑀢𑀸𑀦𑀺𑀧𑀺 𑀅𑀯𑀺𑀪𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀬𑁄 𑀯𑀺𑀪𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀓𑀢𑀫𑀸𑀦𑀺 𑀧𑀜𑁆𑀘? 𑀆𑀭𑀸𑀫𑁄, 𑀆𑀭𑀸𑀫𑀯𑀢𑁆𑀣𑀼…𑀧𑁂… 𑀤𑀸𑀭𑀼𑀪𑀡𑁆𑀟𑀁, 𑀫𑀢𑁆𑀢𑀺𑀓𑀸𑀪𑀡𑁆𑀟’’𑀦𑁆𑀢𑀺 (𑀘𑀽𑀴𑀯. 𑁩𑁨𑁨) 𑀯𑀘𑀦𑀢𑁄 𑀅𑀯𑁂𑀪𑀗𑁆𑀕𑀺𑀬𑀢𑁆𑀢𑀸 𑀲𑀸𑀥𑀸𑀭𑀡𑀧𑀭𑀺𑀓𑁆𑀔𑀸𑀭𑀪𑀸𑀯𑁂𑀦 𑀕𑀭𑀼𑀧𑀭𑀺𑀓𑁆𑀔𑀸𑀭𑀸𑀦𑀺. 𑀆𑀭𑀸𑀫𑁄 𑀆𑀭𑀸𑀫𑀯𑀢𑁆𑀣𑀽𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀁 𑀲𑀩𑁆𑀩𑀁 ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑁆𑀲𑀚𑁆𑀚𑀺𑀬𑀸𑀦𑀻’’𑀢𑀺 𑀔𑀦𑁆𑀥𑀓𑁂 𑀆𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀫𑁂𑀯 𑀪𑀡𑀺𑀲𑁆𑀲𑀸𑀫. 𑀢𑁂𑀳𑀺 𑀕𑀺𑀳𑀻 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀢𑀸𑀦𑀺 𑀤𑀢𑁆𑀯𑀸 𑀤𑀢𑁆𑀯𑀸 𑀕𑀺𑀳𑀻𑀁 𑀲𑀗𑁆𑀕𑀡𑁆𑀳𑀸𑀢𑀺 𑀅𑀦𑀼𑀕𑁆𑀕𑀡𑁆𑀳𑀸𑀢𑀺. 𑀉𑀧𑀮𑀸𑀧𑁂𑀢𑀻𑀢𑀺 ‘‘𑀅𑀳𑁄 𑀅𑀫𑁆𑀳𑀸𑀓𑀁 𑀅𑀬𑁆𑀬𑁄’’𑀢𑀺 𑀏𑀯𑀁 𑀮𑀧𑀦𑀓𑁂 𑀅𑀦𑀼𑀩𑀦𑁆𑀥𑀦𑀓𑁂 𑀲𑀲𑁆𑀦𑁂𑀳𑁂 𑀓𑀭𑁄𑀢𑀺. 𑀅𑀬𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀬𑀜𑁆𑀘 𑀕𑀭𑀼𑀧𑀭𑀺𑀓𑁆𑀔𑀸𑀭𑀁 𑀢𑀣𑀸𑀪𑀸𑀯𑀢𑁄 𑀣𑁂𑀦𑁂𑀢𑁆𑀯𑀸 𑀕𑀺𑀳𑀺 𑀲𑀗𑁆𑀕𑀡𑁆𑀳𑀦𑀓𑁄 𑀘𑀢𑀼𑀢𑁆𑀣𑁄 𑀫𑀳𑀸𑀘𑁄𑀭𑁄. 𑀲𑁄 𑀘 𑀧𑀦𑀸𑀬𑀁 𑀇𑀫𑀁 𑀕𑀭𑀼𑀪𑀡𑁆𑀟𑀁 𑀓𑀼𑀮𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀓𑀼𑀮𑀤𑀽𑀲𑀓𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑁄 𑀘 𑀳𑁄𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀪𑀺𑀪𑀯𑀺𑀢𑁆𑀯𑀸 𑀇𑀲𑁆𑀲𑀭𑀯𑀢𑀸𑀬 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀺. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄𑀢𑀺.

𑀅𑀬𑀁 𑀅𑀕𑁆𑀕𑁄 𑀫𑀳𑀸𑀘𑁄𑀭𑁄𑀢𑀺 𑀅𑀬𑀁 𑀇𑀫𑁂𑀲𑀁 𑀘𑁄𑀭𑀸𑀦𑀁 𑀚𑁂𑀝𑁆𑀞𑀘𑁄𑀭𑁄; 𑀇𑀫𑀺𑀦𑀸 𑀲𑀤𑀺𑀲𑁄 𑀘𑁄𑀭𑁄 𑀦𑀸𑀫 𑀦𑀢𑁆𑀣𑀺, 𑀬𑁄 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑀸𑀢𑀻𑀢𑀁 𑀅𑀢𑀺𑀲𑀡𑁆𑀳𑀲𑀼𑀔𑀼𑀫𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀣𑁂𑀦𑁂𑀢𑀺. 𑀓𑀺𑀁 𑀧𑀦 𑀲𑀓𑁆𑀓𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺 𑀯𑀺𑀬 𑀯𑀜𑁆𑀘𑁂𑀢𑁆𑀯𑀸 𑀣𑁂𑀦𑁂𑀢𑁆𑀯𑀸 𑀕𑀳𑁂𑀢𑀼𑀦𑁆𑀢𑀺? 𑀦 𑀲𑀓𑁆𑀓𑀸, 𑀢𑁂𑀦𑁂𑀯𑀸𑀳 𑁋 ‘‘𑀬𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀻’’𑀢𑀺. 𑀅𑀬𑀜𑁆𑀳𑀺 𑀅𑀢𑁆𑀢𑀦𑀺 𑀅𑀲𑀦𑁆𑀢𑀁 𑀢𑀁 𑀥𑀫𑁆𑀫𑀁 𑀓𑁂𑀯𑀮𑀁 ‘‘𑀅𑀢𑁆𑀣𑀺 𑀫𑀬𑁆𑀳𑀁 𑀏𑀲𑁄’’𑀢𑀺 𑀉𑀮𑁆𑀮𑀧𑀢𑀺, 𑀦 𑀧𑀦 𑀲𑀓𑁆𑀓𑁄𑀢𑀺 𑀞𑀸𑀦𑀸 𑀘𑀸𑀯𑁂𑀢𑀼𑀁, 𑀅𑀢𑁆𑀢𑀦𑀺 𑀯𑀸 𑀲𑀁𑀯𑀺𑀚𑁆𑀚𑀫𑀸𑀦𑀁 𑀓𑀸𑀢𑀼𑀁. 𑀅𑀣 𑀓𑀲𑁆𑀫𑀸 𑀘𑁄𑀭𑁄𑀢𑀺 𑀯𑀼𑀢𑁆𑀢𑁄𑀢𑀺? 𑀬𑀲𑁆𑀫𑀸 𑀢𑀁 𑀉𑀮𑁆𑀮𑀧𑀺𑀢𑁆𑀯𑀸 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀸𑀬 𑀉𑀧𑁆𑀧𑀦𑁆𑀦𑁂 𑀧𑀘𑁆𑀘𑀬𑁂 𑀕𑀡𑁆𑀳𑀸𑀢𑀺. 𑀏𑀯𑀜𑁆𑀳𑀺 𑀕𑀡𑁆𑀳𑀢𑀸 𑀢𑁂 𑀧𑀘𑁆𑀘𑀬𑀸 𑀲𑀼𑀔𑀼𑀫𑁂𑀦 𑀉𑀧𑀸𑀬𑁂𑀦 𑀯𑀜𑁆𑀘𑁂𑀢𑁆𑀯𑀸 𑀣𑁂𑀦𑁂𑀢𑁆𑀯𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀣𑁂𑀬𑁆𑀬𑀸𑀬 𑀯𑁄 𑀪𑀺𑀓𑁆𑀔𑀯𑁂 𑀭𑀝𑁆𑀞𑀧𑀺𑀡𑁆𑀟𑁄 𑀪𑀼𑀢𑁆𑀢𑁄’’𑀢𑀺. 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀢𑁆𑀣𑁄 𑁋 𑀬𑀁 𑀅𑀯𑁄𑀘𑀼𑀫𑁆𑀳 𑁋 ‘‘𑀅𑀬𑀁 𑀅𑀕𑁆𑀕𑁄 𑀫𑀳𑀸𑀘𑁄𑀭𑁄, 𑀬𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀻’’𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀏𑀢𑀁 𑀅𑀯𑁄𑀘𑀼𑀫𑁆𑀳𑀸𑀢𑀺 𑀘𑁂. ‘‘𑀣𑁂𑀬𑁆𑀬𑀸𑀬 𑀯𑁄 𑀪𑀺𑀓𑁆𑀔𑀯𑁂 𑀭𑀝𑁆𑀞𑀧𑀺𑀡𑁆𑀟𑁄 𑀪𑀼𑀢𑁆𑀢𑁄’’𑀢𑀺 𑀪𑀺𑀓𑁆𑀔𑀯𑁂 𑀬𑀲𑁆𑀫𑀸 𑀲𑁄 𑀢𑁂𑀦 𑀭𑀝𑁆𑀞𑀧𑀺𑀡𑁆𑀟𑁄 𑀣𑁂𑀬𑁆𑀬𑀸𑀬 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀪𑀼𑀢𑁆𑀢𑁄 𑀳𑁄𑀢𑀺. 𑀏𑀢𑁆𑀣 𑀳𑀺 𑀯𑁄𑀓𑀸𑀭𑁄 ‘‘𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁫-𑁩𑁬) 𑀯𑀺𑀬 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. 𑀢𑀲𑁆𑀫𑀸 ‘‘𑀢𑀼𑀫𑁆𑀳𑁂𑀳𑀺 𑀪𑀼𑀢𑁆𑀢𑁄’’𑀢𑀺 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀦 𑀤𑀝𑁆𑀞𑀩𑁆𑀩𑁄.

𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀕𑀸𑀣𑀸𑀳𑀺 𑀯𑀺𑀪𑀽𑀢𑀢𑀭𑀁 𑀓𑀭𑁄𑀦𑁆𑀢𑁄 ‘‘𑀅𑀜𑁆𑀜𑀣𑀸 𑀲𑀦𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀣𑀸 𑀲𑀦𑁆𑀢𑀦𑁆𑀢𑀺 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀓𑁂𑀦 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀲𑀦𑁆𑀢𑀁. 𑀅𑀜𑁆𑀜𑀣𑀸 𑀬𑁄 𑀧𑀯𑁂𑀤𑀬𑁂𑀢𑀺 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀓𑁂𑀦 𑀅𑀜𑁆𑀜𑁂𑀦 𑀆𑀓𑀸𑀭𑁂𑀦 𑀬𑁄 𑀧𑀯𑁂𑀤𑁂𑀬𑁆𑀬. ‘‘𑀧𑀭𑀫𑀧𑀭𑀺𑀲𑀼𑀤𑁆𑀥𑁄 𑀅𑀳𑀁, 𑀅𑀢𑁆𑀣𑀺 𑀫𑁂 𑀅𑀩𑁆𑀪𑀦𑁆𑀢𑀭𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄’’𑀢𑀺 𑀏𑀯𑀁 𑀚𑀸𑀦𑀸𑀧𑁂𑀬𑁆𑀬. 𑀧𑀯𑁂𑀤𑁂𑀢𑁆𑀯𑀸 𑀘 𑀧𑀦 𑀢𑀸𑀬 𑀧𑀯𑁂𑀤𑀦𑀸𑀬 𑀉𑀧𑁆𑀧𑀦𑁆𑀦𑀁 𑀪𑁄𑀚𑀦𑀁 𑀅𑀭𑀳𑀸 𑀯𑀺𑀬 𑀪𑀼𑀜𑁆𑀚𑀢𑀺. 𑀦𑀺𑀓𑀘𑁆𑀘 𑀓𑀺𑀢𑀯𑀲𑁆𑀲𑁂𑀯 𑀪𑀼𑀢𑁆𑀢𑀁 𑀣𑁂𑀬𑁆𑀬𑁂𑀦 𑀢𑀲𑁆𑀲 𑀢𑀦𑁆𑀢𑀺 𑀦𑀺𑀓𑀘𑁆𑀘𑀸𑀢𑀺 𑀯𑀜𑁆𑀘𑁂𑀢𑁆𑀯𑀸 𑀅𑀜𑁆𑀜𑀣𑀸 𑀲𑀦𑁆𑀢𑀁 𑀅𑀜𑁆𑀜𑀣𑀸 𑀤𑀲𑁆𑀲𑁂𑀢𑁆𑀯𑀸. 𑀅𑀕𑀼𑀫𑁆𑀩𑀅𑀕𑀘𑁆𑀙𑀪𑀽𑀢𑀫𑁂𑀯 𑀲𑀸𑀔𑀸𑀧𑀮𑀸𑀲𑀧𑀮𑁆𑀮𑀯𑀸𑀤𑀺𑀘𑁆𑀙𑀸𑀤𑀦𑁂𑀦 𑀕𑀼𑀫𑁆𑀩𑀫𑀺𑀯 𑀕𑀘𑁆𑀙𑀫𑀺𑀯 𑀘 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸. 𑀓𑀺𑀢𑀯𑀲𑁆𑀲𑁂𑀯𑀸𑀢𑀺 𑀯𑀜𑁆𑀘𑀓𑀲𑁆𑀲 𑀓𑁂𑀭𑀸𑀝𑀺𑀓𑀲𑁆𑀲 𑀕𑀼𑀫𑁆𑀩𑀕𑀘𑁆𑀙𑀲𑀜𑁆𑀜𑀸𑀬 𑀅𑀭𑀜𑁆𑀜𑁂 𑀆𑀕𑀢𑀸𑀕𑀢𑁂 𑀲𑀓𑀼𑀡𑁂 𑀕𑀳𑁂𑀢𑁆𑀯𑀸 𑀚𑀻𑀯𑀺𑀢𑀓𑀧𑁆𑀧𑀓𑀲𑁆𑀲 𑀲𑀸𑀓𑀼𑀡𑀺𑀓𑀲𑁆𑀲𑁂𑀯. 𑀪𑀼𑀢𑁆𑀢𑀁 𑀣𑁂𑀬𑁆𑀬𑁂𑀦 𑀢𑀲𑁆𑀲 𑀢𑀦𑁆𑀢𑀺 𑀢𑀲𑁆𑀲𑀸𑀧𑀺 𑀅𑀦𑀭𑀳𑀦𑁆𑀢𑀲𑁆𑀲𑁂𑀯 𑀲𑀢𑁄 𑀅𑀭𑀳𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀮𑀤𑁆𑀥𑀪𑁄𑀚𑀦𑀁 𑀪𑀼𑀜𑁆𑀚𑀢𑁄; 𑀬𑀁 𑀢𑀁 𑀪𑀼𑀢𑁆𑀢𑀁 𑀢𑀁 𑀬𑀣𑀸 𑀲𑀸𑀓𑀼𑀡𑀺𑀓𑀓𑀺𑀢𑀯𑀲𑁆𑀲 𑀦𑀺𑀓𑀘𑁆𑀘 𑀯𑀜𑁆𑀘𑁂𑀢𑁆𑀯𑀸 𑀲𑀓𑀼𑀡𑀕𑁆𑀕𑀳𑀡𑀁, 𑀏𑀯𑀁 𑀫𑀦𑀼𑀲𑁆𑀲𑁂 𑀯𑀜𑁆𑀘𑁂𑀢𑁆𑀯𑀸 𑀮𑀤𑁆𑀥𑀲𑁆𑀲 𑀪𑁄𑀚𑀦𑀲𑁆𑀲 𑀪𑀼𑀢𑁆𑀢𑀢𑁆𑀢𑀸 𑀣𑁂𑀬𑁆𑀬𑁂𑀦 𑀪𑀼𑀢𑁆𑀢𑀁 𑀦𑀸𑀫 𑀳𑁄𑀢𑀺.

𑀇𑀫𑀁 𑀧𑀦 𑀅𑀢𑁆𑀣𑀯𑀲𑀁 𑀅𑀚𑀸𑀦𑀦𑁆𑀢𑀸 𑀬𑁂 𑀏𑀯𑀁 𑀪𑀼𑀜𑁆𑀚𑀦𑁆𑀢𑀺, 𑀓𑀸𑀲𑀸𑀯𑀓𑀡𑁆𑀞𑀸…𑀧𑁂… 𑀦𑀺𑀭𑀬𑀁 𑀢𑁂 𑀉𑀧𑀧𑀚𑁆𑀚𑀭𑁂 𑀓𑀸𑀲𑀸𑀯𑀓𑀡𑁆𑀞𑀸𑀢𑀺 𑀓𑀸𑀲𑀸𑀯𑁂𑀦 𑀯𑁂𑀞𑀺𑀢𑀓𑀡𑁆𑀞𑀸. 𑀏𑀢𑁆𑀢𑀓𑀫𑁂𑀯 𑀅𑀭𑀺𑀬𑀤𑁆𑀥𑀚𑀥𑀸𑀭𑀡𑀫𑀢𑁆𑀢𑀁, 𑀲𑁂𑀲𑀁 𑀲𑀸𑀫𑀜𑁆𑀜𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀪𑀯𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦𑀸𑀦𑀦𑁆𑀤 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀕𑁄𑀢𑁆𑀭𑀪𑀼𑀦𑁄 𑀓𑀸𑀲𑀸𑀯𑀓𑀡𑁆𑀞𑀸’’𑀢𑀺 (𑀫. 𑀦𑀺. 𑁩.𑁩𑁮𑁦) 𑀏𑀯𑀁 𑀯𑀼𑀢𑁆𑀢𑀤𑀼𑀲𑁆𑀲𑀻𑀮𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀧𑀸𑀧𑀥𑀫𑁆𑀫𑀸𑀢𑀺 𑀮𑀸𑀫𑀓𑀥𑀫𑁆𑀫𑀸. 𑀅𑀲𑀜𑁆𑀜𑀢𑀸𑀢𑀺 𑀓𑀸𑀬𑀸𑀤𑀻𑀳𑀺 𑀅𑀲𑀜𑁆𑀜𑀢𑀸. 𑀧𑀸𑀧𑀸𑀢𑀺 𑀮𑀸𑀫𑀓𑀧𑀼𑀕𑁆𑀕𑀮𑀸. 𑀧𑀸𑀧𑁂𑀳𑀺 𑀓𑀫𑁆𑀫𑁂𑀳𑀻𑀢𑀺 𑀢𑁂𑀳𑀺 𑀓𑀭𑀡𑀓𑀸𑀮𑁂 𑀆𑀤𑀻𑀦𑀯𑀁 𑀅𑀤𑀺𑀲𑁆𑀯𑀸 𑀓𑀢𑁂𑀳𑀺 𑀧𑀭𑀯𑀜𑁆𑀘𑀦𑀸𑀤𑀻𑀳𑀺 𑀧𑀸𑀧𑀓𑀫𑁆𑀫𑁂𑀳𑀺. 𑀦𑀺𑀭𑀬𑀁 𑀢𑁂 𑀉𑀧𑀧𑀚𑁆𑀚𑀭𑁂𑀢𑀺 𑀦𑀺𑀭𑀲𑁆𑀲𑀸𑀤𑀁 𑀤𑀼𑀕𑁆𑀕𑀢𑀺𑀁 𑀢𑁂 𑀉𑀧𑀧𑀚𑁆𑀚𑀦𑁆𑀢𑀺; 𑀢𑀲𑁆𑀫𑀸 𑀲𑁂𑀬𑁆𑀬𑁄 𑀅𑀬𑁄𑀕𑀼𑀴𑁄𑀢𑀺 𑀕𑀸𑀣𑀸. 𑀢𑀲𑁆𑀲𑀢𑁆𑀣𑁄 𑁋 𑀲𑀘𑀸𑀬𑀁 𑀤𑀼𑀲𑁆𑀲𑀻𑀮𑁄 𑀅𑀲𑀜𑁆𑀜𑀢𑁄 𑀇𑀘𑁆𑀙𑀸𑀘𑀸𑀭𑁂 𑀞𑀺𑀢𑁄 𑀓𑀼𑀳𑀦𑀸𑀬 𑀮𑁄𑀓𑀁 𑀯𑀜𑁆𑀘𑀓𑁄 𑀧𑀼𑀕𑁆𑀕𑀮𑁄 𑀢𑀢𑁆𑀢𑀁 𑀅𑀕𑁆𑀕𑀺𑀲𑀺𑀔𑀽𑀧𑀫𑀁 𑀅𑀬𑁄𑀕𑀼𑀴𑀁 𑀪𑀼𑀜𑁆𑀚𑁂𑀬𑁆𑀬 𑀅𑀚𑁆𑀛𑁄𑀳𑀭𑁂𑀬𑁆𑀬, 𑀢𑀲𑁆𑀲 𑀬𑀜𑁆𑀘𑁂𑀢𑀁 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑁂𑀬𑁆𑀬, 𑀬𑀜𑁆𑀘𑁂𑀢𑀁 𑀅𑀬𑁄𑀕𑀼𑀴𑀁, 𑀢𑁂𑀲𑀼 𑀤𑁆𑀯𑀻𑀲𑀼 𑀅𑀬𑁄𑀕𑀼𑀴𑁄𑀯 𑀪𑀼𑀢𑁆𑀢𑁄 𑀲𑁂𑀬𑁆𑀬𑁄 𑀲𑀼𑀦𑁆𑀤𑀭𑀢𑀭𑁄 𑀧𑀡𑀻𑀢𑀢𑀭𑁄 𑀘 𑀪𑀯𑁂𑀬𑁆𑀬, 𑀦 𑀳𑀺 𑀅𑀬𑁄𑀕𑀼𑀴𑀲𑁆𑀲 𑀪𑀼𑀢𑁆𑀢𑀢𑁆𑀢𑀸 𑀲𑀫𑁆𑀧𑀭𑀸𑀬𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦𑀸𑀧𑀺 𑀤𑀼𑀚𑁆𑀚𑀸𑀦𑀧𑀭𑀺𑀘𑁆𑀙𑁂𑀤𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀢𑀺. 𑀏𑀯𑀁 𑀧𑀝𑀺𑀮𑀤𑁆𑀥𑀲𑁆𑀲 𑀧𑀦 𑀢𑀲𑁆𑀲 𑀭𑀝𑁆𑀞𑀧𑀺𑀡𑁆𑀟𑀲𑁆𑀲 𑀪𑀼𑀢𑁆𑀢𑀢𑁆𑀢𑀸 𑀲𑀫𑁆𑀧𑀭𑀸𑀬𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺, 𑀅𑀬𑀜𑁆𑀳𑀺 𑀓𑁄𑀝𑀺𑀧𑁆𑀧𑀢𑁆𑀢𑁄 𑀫𑀺𑀘𑁆𑀙𑀸𑀚𑀻𑀯𑁄𑀢𑀺.

𑀏𑀯𑀁 𑀧𑀸𑀧𑀓𑀺𑀭𑀺𑀬𑀸𑀬 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻𑀦𑀁 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀣 𑀔𑁄 𑀪𑀕𑀯𑀸 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬 𑀤𑀼𑀧𑁆𑀧𑁄𑀲𑀢𑀸𑀬…𑀧𑁂… 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀘 𑀯𑀢𑁆𑀯𑀸 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑁄 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀦𑀪𑀺𑀚𑀸𑀦’’𑀦𑁆𑀢𑀺 𑀆𑀤𑀺𑀫𑀸𑀳.

𑀏𑀯𑀁 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑁂 𑀧𑀜𑁆𑀜𑀢𑁆𑀢𑁂 𑀅𑀧𑀭𑀫𑁆𑀧𑀺 𑀅𑀦𑀼𑀧𑁆𑀧𑀜𑁆𑀜𑀢𑁆𑀢𑀢𑁆𑀣𑀸𑀬 𑀅𑀥𑀺𑀫𑀸𑀦𑀯𑀢𑁆𑀣𑀼 𑀉𑀤𑀧𑀸𑀤𑀺. 𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁆𑀣𑀁 𑀏𑀢𑀁 𑀯𑀼𑀢𑁆𑀢𑀁 𑁋 ‘‘𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺.

𑀅𑀥𑀺𑀫𑀸𑀦𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁯𑁬. 𑀢𑀢𑁆𑀣 𑀅𑀤𑀺𑀝𑁆𑀞𑁂 𑀤𑀺𑀝𑁆𑀞𑀲𑀜𑁆𑀜𑀺𑀦𑁄𑀢𑀺 𑀅𑀭𑀳𑀢𑁆𑀢𑁂 𑀜𑀸𑀡𑀘𑀓𑁆𑀔𑀼𑀦𑀸 𑀅𑀤𑀺𑀝𑁆𑀞𑁂𑀬𑁂𑀯 ‘‘𑀤𑀺𑀝𑁆𑀞𑀁 𑀅𑀫𑁆𑀳𑁂𑀳𑀺 𑀅𑀭𑀳𑀢𑁆𑀢’’𑀦𑁆𑀢𑀺 𑀤𑀺𑀝𑁆𑀞𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸. 𑀏𑀲 𑀦𑀬𑁄 𑀅𑀧𑁆𑀧𑀢𑁆𑀢𑀸𑀤𑀻𑀲𑀼. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀧𑁆𑀧𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀅𑀧𑁆𑀧𑀢𑁆𑀢𑁂. 𑀅𑀦𑀥𑀺𑀕𑀢𑁂𑀢𑀺 𑀫𑀕𑁆𑀕𑀪𑀸𑀯𑀦𑀸𑀬 𑀅𑀦𑀥𑀺𑀕𑀢𑁂; 𑀅𑀧𑁆𑀧𑀝𑀺𑀮𑀤𑁆𑀥𑁂𑀢𑀺𑀧𑀺 𑀅𑀢𑁆𑀣𑁄. 𑀅𑀲𑀘𑁆𑀙𑀺𑀓𑀢𑁂𑀢𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑁂 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀯𑀸 𑀅𑀧𑁆𑀧𑀘𑁆𑀘𑀓𑁆𑀔𑀓𑀢𑁂. 𑀅𑀥𑀺𑀫𑀸𑀦𑁂𑀦𑀸𑀢𑀺 𑀅𑀥𑀺𑀕𑀢𑀫𑀸𑀦𑁂𑀦; ‘‘𑀅𑀥𑀺𑀕𑀢𑀸 𑀫𑀬’’𑀦𑁆𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀫𑀸𑀦𑁂𑀦𑀸𑀢𑀺 𑀅𑀢𑁆𑀣𑁄, 𑀅𑀥𑀺𑀓𑀫𑀸𑀦𑁂𑀦 𑀯𑀸 𑀣𑀤𑁆𑀥𑀫𑀸𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀁𑀲𑀽𑀢𑀺 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑀺𑀁𑀲𑀼; ‘‘𑀧𑀢𑁆𑀢𑀁 𑀆𑀯𑀼𑀲𑁄 𑀅𑀫𑁆𑀳𑁂𑀳𑀺 𑀅𑀭𑀳𑀢𑁆𑀢𑀁, 𑀓𑀢𑀁 𑀓𑀭𑀡𑀻𑀬’’𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀼𑀁. 𑀢𑁂𑀲𑀁 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀢𑁆𑀢𑀸 𑀓𑁂𑀯𑀮𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀸𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀣𑀸𑀭𑀽𑀧𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀭𑀸𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺; 𑀭𑀸𑀕𑀢𑁆𑀣𑀸𑀬 𑀦𑀫𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀇𑀢𑀭𑁂𑀲𑀼.

𑀢𑀜𑁆𑀘 𑀔𑁄 𑀏𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀦𑁆𑀢𑀺 𑀢𑀜𑁆𑀘 𑀔𑁄 𑀏𑀢𑀁 𑀢𑁂𑀲𑀁 𑀅𑀜𑁆𑀜𑀩𑁆𑀬𑀸𑀓𑀭𑀡𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 𑀆𑀧𑀢𑁆𑀢𑀺𑀧𑀜𑁆𑀜𑀸𑀧𑀦𑁂 𑀯𑁄𑀳𑀸𑀭𑀁 𑀦 𑀕𑀘𑁆𑀙𑀢𑀺; 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀓𑀲𑁆𑀲 𑀧𑀦𑀸𑀬𑀁 𑀅𑀥𑀺𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺, 𑀓𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀻𑀢𑀺? 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀸𑀯 𑀦𑀼𑀧𑁆𑀧𑀚𑁆𑀚𑀢𑀺 𑀲𑁄 𑀳𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀳𑀻𑀦𑀓𑀺𑀮𑁂𑀲𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀅𑀭𑀺𑀬𑀕𑀼𑀡𑀧𑀝𑀺𑀯𑁂𑀥𑁂 𑀦𑀺𑀓𑁆𑀓𑀗𑁆𑀔𑁄. 𑀢𑀲𑁆𑀫𑀸 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 ‘‘𑀅𑀳𑀁 𑀲𑀓𑀤𑀸𑀕𑀸𑀫𑀻’’𑀢𑀺𑀆𑀤𑀺𑀯𑀲𑁂𑀦 𑀅𑀥𑀺𑀫𑀸𑀦𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀤𑀼𑀲𑁆𑀲𑀻𑀮𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀺, 𑀲𑁄 𑀳𑀺 𑀅𑀭𑀺𑀬𑀕𑀼𑀡𑀸𑀥𑀺𑀕𑀫𑁂 𑀦𑀺𑀭𑀸𑀲𑁄𑀯. 𑀲𑀻𑀮𑀯𑀢𑁄𑀧𑀺 𑀧𑀭𑀺𑀘𑁆𑀘𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀦𑀺𑀤𑁆𑀤𑀸𑀭𑀸𑀫𑀢𑀸𑀤𑀺𑀫𑀦𑀼𑀬𑀼𑀢𑁆𑀢𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂 𑀅𑀧𑁆𑀧𑀫𑀢𑁆𑀢𑀲𑁆𑀲 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀯𑀺𑀢𑀺𑀡𑁆𑀡𑀓𑀗𑁆𑀔𑀲𑁆𑀲 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀲𑀼𑀤𑁆𑀥𑀲𑀫𑀣𑀮𑀸𑀪𑀺𑀁 𑀯𑀸 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀮𑀸𑀪𑀺𑀁 𑀯𑀸 𑀅𑀦𑁆𑀢𑀭𑀸 𑀞𑀧𑁂𑀢𑀺, 𑀲𑁄 𑀳𑀺 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀢𑀺𑀁𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀺𑀢𑁆𑀯𑀸 ‘‘𑀅𑀳𑀁 𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀸 ‘‘𑀲𑀓𑀤𑀸𑀕𑀸𑀫𑀻’’𑀢𑀺 𑀯𑀸 ‘‘𑀅𑀦𑀸𑀕𑀸𑀫𑀻’’𑀢𑀺 𑀯𑀸 𑀫𑀜𑁆𑀜𑀢𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀺𑀁 𑀧𑀦 𑀅𑀭𑀳𑀢𑁆𑀢𑁂𑀬𑁂𑀯 𑀞𑀧𑁂𑀢𑀺. 𑀢𑀲𑁆𑀲 𑀳𑀺 𑀲𑀫𑀸𑀥𑀺𑀩𑀮𑁂𑀦 𑀓𑀺𑀮𑁂𑀲𑀸 𑀯𑀺𑀓𑁆𑀔𑀫𑁆𑀪𑀺𑀢𑀸, 𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀲𑀗𑁆𑀔𑀸𑀭𑀸 𑀲𑀼𑀧𑀭𑀺𑀕𑁆𑀕𑀳𑀺𑀢𑀸, 𑀢𑀲𑁆𑀫𑀸 𑀲𑀝𑁆𑀞𑀺𑀫𑁆𑀧𑀺 𑀯𑀲𑁆𑀲𑀸𑀦𑀺 𑀅𑀲𑀻𑀢𑀺𑀫𑁆𑀧𑀺 𑀯𑀲𑁆𑀲𑀸𑀦𑀺 𑀯𑀲𑁆𑀲𑀲𑀢𑀫𑁆𑀧𑀺 𑀓𑀺𑀮𑁂𑀲𑀸 𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀔𑀻𑀡𑀸𑀲𑀯𑀲𑁆𑀲𑁂𑀯 𑀘𑀺𑀢𑁆𑀢𑀘𑀸𑀭𑁄 𑀳𑁄𑀢𑀺. 𑀲𑁄 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀅𑀦𑁆𑀢𑀭𑀸 𑀅𑀞𑀢𑁆𑀯𑀸𑀯 ‘‘𑀅𑀭𑀳𑀸 𑀅𑀳’’𑀦𑁆𑀢𑀺 𑀫𑀜𑁆𑀜𑀢𑀻𑀢𑀺.

𑀲𑀯𑀺𑀪𑀗𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁯𑁭. 𑀅𑀦𑀪𑀺𑀚𑀸𑀦𑀦𑁆𑀢𑀺 𑀦 𑀅𑀪𑀺𑀚𑀸𑀦𑀁. 𑀬𑀲𑁆𑀫𑀸 𑀧𑀦𑀸𑀬𑀁 𑀅𑀦𑀪𑀺𑀚𑀸𑀦𑀁 𑀲𑀫𑀼𑀤𑀸𑀘𑀭𑀢𑀺, 𑀲𑁆𑀯𑀲𑁆𑀲 𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀦𑁆𑀦𑁄 𑀜𑀸𑀡𑁂𑀦 𑀘 𑀅𑀲𑀘𑁆𑀙𑀺𑀓𑀢𑁄𑀢𑀺 𑀅𑀪𑀽𑀢𑁄 𑀳𑁄𑀢𑀺. 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀅𑀲𑀦𑁆𑀢𑀁 𑀅𑀪𑀽𑀢𑀁 𑀅𑀲𑀁𑀯𑀺𑀚𑁆𑀚𑀫𑀸𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀅𑀚𑀸𑀦𑀦𑁆𑀢𑁄 𑀅𑀧𑀲𑁆𑀲𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁.

𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀦𑁆𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀸𑀦𑀁 𑀛𑀸𑀬𑀻𑀦𑀜𑁆𑀘𑁂𑀯 𑀅𑀭𑀺𑀬𑀸𑀦𑀜𑁆𑀘 𑀥𑀫𑁆𑀫𑀁. 𑀅𑀢𑁆𑀢𑀼𑀧𑀦𑀸𑀬𑀺𑀓𑀦𑁆𑀢𑀺 𑀅𑀢𑁆𑀢𑀦𑀺 𑀢𑀁 𑀉𑀧𑀦𑁂𑀢𑀺, 𑀅𑀢𑁆𑀢𑀸𑀦𑀁 𑀯𑀸 𑀢𑀢𑁆𑀣 𑀉𑀧𑀦𑁂𑀢𑀻𑀢𑀺 𑀅𑀢𑁆𑀢𑀼𑀧𑀦𑀸𑀬𑀺𑀓𑁄, 𑀢𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀁; 𑀏𑀯𑀁 𑀓𑀢𑁆𑀯𑀸 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀤𑀪𑀸𑀚𑀦𑁂 𑀧𑀦 𑀬𑀲𑁆𑀫𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀦𑀸𑀫 𑀛𑀸𑀦𑀁 𑀯𑀺𑀫𑁄𑀓𑁆𑀔𑀁 𑀲𑀫𑀸𑀥𑀺 𑀲𑀫𑀸𑀧𑀢𑁆𑀢𑀺 𑀜𑀸𑀡𑀤𑀲𑁆𑀲𑀦𑀁…𑀧𑁂… 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻𑀢𑀺 𑀏𑀯𑀁 𑀛𑀸𑀦𑀸𑀤𑀬𑁄 𑀅𑀦𑁂𑀓𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀯𑀲𑁂𑀦 𑀅𑀢𑁆𑀢𑀼𑀧𑀦𑀸𑀬𑀺𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂 𑀯𑀸 𑀓𑀼𑀲𑀮𑁂 𑀥𑀫𑁆𑀫𑁂 𑀅𑀢𑁆𑀢𑀦𑀺 𑀉𑀧𑀦𑁂𑀢𑀻’’𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑀁 𑀅𑀓𑀸𑀲𑀺. 𑀢𑀢𑁆𑀣 ‘‘𑀏𑀢𑁂 𑀥𑀫𑁆𑀫𑀸 𑀫𑀬𑀺 𑀲𑀦𑁆𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀫𑀼𑀤𑀸𑀘𑀭𑀦𑁆𑀢𑁄 𑀅𑀢𑁆𑀢𑀦𑀺 𑀉𑀧𑀦𑁂𑀢𑀺. ‘‘𑀅𑀳𑀁 𑀏𑀢𑁂𑀲𑀼 𑀲𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀫𑀼𑀤𑀸𑀘𑀭𑀦𑁆𑀢𑁄 𑀅𑀢𑁆𑀢𑀸𑀦𑀁 𑀢𑁂𑀲𑀼 𑀉𑀧𑀦𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀏𑀢𑁆𑀣 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀧𑀜𑁆𑀜𑀸 𑀚𑀸𑀦𑀦𑀝𑁆𑀞𑁂𑀦 𑀜𑀸𑀡𑀁, 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀫𑀺𑀯 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀓𑀭𑀡𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀤𑀲𑁆𑀲𑀦𑀦𑁆𑀢𑀺 𑀜𑀸𑀡𑀤𑀲𑁆𑀲𑀦𑀁. 𑀅𑀭𑀺𑀬𑀁 𑀯𑀺𑀲𑀼𑀤𑁆𑀥𑀁 𑀉𑀢𑁆𑀢𑀫𑀁 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀁. 𑀅𑀮𑀁 𑀧𑀭𑀺𑀬𑀢𑁆𑀢𑀁 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀁 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀫𑁂𑀢𑁆𑀣, 𑀛𑀸𑀦𑀸𑀤𑀺𑀪𑁂𑀤𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀮𑀁 𑀯𑀸 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀫𑀲𑁆𑀲𑀸𑀢𑀺 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑁄, 𑀢𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀦𑁆𑀢𑀺 𑀏𑀯𑀁 𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑁂𑀦 𑀜𑀸𑀡𑀤𑀲𑁆𑀲𑀦𑁂𑀦 𑀲𑁄 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀤𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀜𑀸𑀡𑀦𑁆𑀢𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀤𑀲𑁆𑀲𑀦𑀦𑁆𑀢𑀺 𑀬𑀁 𑀜𑀸𑀡𑀁 𑀢𑀁 𑀤𑀲𑁆𑀲𑀦𑀁; 𑀬𑀁 𑀤𑀲𑁆𑀲𑀦𑀁 𑀢𑀁 𑀜𑀸𑀡’’𑀦𑁆𑀢𑀺 𑀯𑀺𑀚𑁆𑀚𑀸𑀲𑀻𑀲𑁂𑀦 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀸 𑀧𑀦𑁂𑀢𑁆𑀣 𑀲𑀩𑁆𑀩𑀸𑀧𑀺 𑀧𑀜𑁆𑀜𑀸 ‘‘𑀜𑀸𑀡’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀓𑀢𑁆𑀯𑀸 𑀆𑀭𑁄𑀘𑁂𑀬𑁆𑀬. 𑀇𑀢𑁆𑀣𑀺𑀬𑀸 𑀯𑀸𑀢𑀺𑀆𑀤𑀺 𑀧𑀦 𑀆𑀭𑁄𑀘𑁂𑀢𑀩𑁆𑀩𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀏𑀢𑁂𑀲𑀜𑁆𑀳𑀺 𑀆𑀭𑁄𑀘𑀺𑀢𑁂 𑀆𑀭𑁄𑀘𑀺𑀢𑀁 𑀳𑁄𑀢𑀺 𑀦 𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀸𑀦𑀁, 𑀦𑀸𑀧𑀺 𑀧𑁂𑀢𑀬𑀓𑁆𑀔𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀦𑁆𑀢𑀺. 𑀇𑀢𑀺 𑀚𑀸𑀦𑀸𑀫𑀺 𑀇𑀢𑀺 𑀧𑀲𑁆𑀲𑀸𑀫𑀻𑀢𑀺 𑀲𑀫𑀼𑀤𑀸𑀘𑀭𑀡𑀸𑀓𑀸𑀭𑀦𑀺𑀤𑀲𑁆𑀲𑀦𑀫𑁂𑀢𑀁. 𑀧𑀤𑀪𑀸𑀚𑀦𑁂 𑀧𑀦𑀲𑁆𑀲 ‘‘𑀚𑀸𑀦𑀸𑀫𑀳𑀁 𑀏𑀢𑁂 𑀥𑀫𑁆𑀫𑁂, 𑀧𑀲𑁆𑀲𑀸𑀫𑀳𑀁 𑀏𑀢𑁂 𑀥𑀫𑁆𑀫𑁂’’𑀢𑀺 𑀇𑀤𑀁 𑀢𑁂𑀲𑀼 𑀛𑀸𑀦𑀸𑀤𑀻𑀲𑀼 𑀥𑀫𑁆𑀫𑁂𑀲𑀼 𑀚𑀸𑀦𑀦𑀧𑀲𑁆𑀲𑀦𑀸𑀦𑀁 𑀧𑀯𑀢𑁆𑀢𑀺𑀤𑀻𑀧𑀦𑀁, ‘‘𑀅𑀢𑁆𑀣𑀺 𑀘 𑀫𑁂 𑀏𑀢𑁂 𑀥𑀫𑁆𑀫𑀸’’𑀢𑀺𑀆𑀤𑀺 𑀅𑀢𑁆𑀢𑀼𑀧𑀦𑀸𑀬𑀺𑀓𑀪𑀸𑀯𑀤𑀻𑀧𑀦𑀁.

𑁧𑁯𑁮. 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀆𑀧𑀢𑁆𑀢𑀺𑀧𑀝𑀺𑀚𑀸𑀦𑀦𑀲𑀫𑀬𑀤𑀲𑁆𑀲𑀦𑀫𑁂𑀢𑀁. 𑀅𑀬𑀁 𑀧𑀦 𑀆𑀭𑁄𑀘𑀺𑀢𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺. 𑀆𑀧𑀢𑁆𑀢𑀺𑀁 𑀧𑀦 𑀆𑀧𑀦𑁆𑀦𑁄 𑀬𑀲𑁆𑀫𑀸 𑀧𑀭𑁂𑀦 𑀘𑁄𑀤𑀺𑀢𑁄 𑀯𑀸 𑀅𑀘𑁄𑀤𑀺𑀢𑁄 𑀯𑀸 𑀧𑀝𑀺𑀚𑀸𑀦𑀸𑀢𑀺; 𑀢𑀲𑁆𑀫𑀸 ‘‘𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀯𑀸 𑀅𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁄 𑀯𑀸’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀫𑀦𑀼𑀕𑁆𑀕𑀸𑀳𑀺𑀬𑀫𑀸𑀦𑁂 𑀢𑀸𑀯 𑁋 𑀓𑀺𑀁 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀅𑀥𑀺𑀕𑀫𑀧𑀼𑀘𑁆𑀙𑀸; 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀻𑀲𑀼, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀲𑀼 𑀯𑀸 𑀓𑀺𑀁 𑀢𑀬𑀸 𑀅𑀥𑀺𑀕𑀢𑀦𑁆𑀢𑀺. 𑀓𑀺𑀦𑁆𑀢𑀺 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀉𑀧𑀸𑀬𑀧𑀼𑀘𑁆𑀙𑀸. 𑀅𑀬𑀜𑁆𑀳𑀺 𑀏𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀓𑀺𑀁 𑀢𑀬𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀥𑀼𑀭𑀁 𑀓𑀢𑁆𑀯𑀸 𑀅𑀥𑀺𑀕𑀢𑀁, 𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑁂𑀲𑀼 𑀅𑀜𑁆𑀜𑀢𑀭𑀁 𑀯𑀸? 𑀓𑀺𑀁 𑀯𑀸 𑀲𑀫𑀸𑀥𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸, 𑀉𑀤𑀸𑀳𑀼 𑀯𑀺𑀧𑀲𑁆𑀲𑀦𑀸𑀯𑀲𑁂𑀦? 𑀢𑀣𑀸 𑀓𑀺𑀁 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸, 𑀉𑀤𑀸𑀳𑀼 𑀅𑀭𑀽𑀧𑁂? 𑀓𑀺𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸, 𑀉𑀤𑀸𑀳𑀼 𑀩𑀳𑀺𑀤𑁆𑀥𑀸𑀢𑀺? 𑀓𑀤𑀸 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀓𑀸𑀮𑀧𑀼𑀘𑁆𑀙𑀸. 𑀧𑀼𑀩𑁆𑀩𑀡𑁆𑀳𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀲𑀼 𑀓𑀢𑀭𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺? 𑀓𑀢𑁆𑀣 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀑𑀓𑀸𑀲𑀧𑀼𑀘𑁆𑀙𑀸. 𑀓𑀢𑀭𑀲𑁆𑀫𑀺𑀁 𑀑𑀓𑀸𑀲𑁂, 𑀓𑀺𑀁 𑀭𑀢𑁆𑀢𑀺𑀝𑁆𑀞𑀸𑀦𑁂, 𑀤𑀺𑀯𑀸𑀝𑁆𑀞𑀸𑀦𑁂, 𑀭𑀼𑀓𑁆𑀔𑀫𑀽𑀮𑁂, 𑀫𑀡𑁆𑀟𑀧𑁂, 𑀓𑀢𑀭𑀲𑁆𑀫𑀺𑀁 𑀯𑀸 𑀯𑀺𑀳𑀸𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀫𑁂 𑀢𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸𑀢𑀺 𑀧𑀳𑀻𑀦𑀓𑀺𑀮𑁂𑀲𑀧𑀼𑀘𑁆𑀙𑀸. 𑀓𑀢𑀭𑀫𑀕𑁆𑀕𑀯𑀚𑁆𑀛𑀸 𑀢𑀯 𑀓𑀺𑀮𑁂𑀲𑀸 𑀧𑀳𑀻𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻𑀢𑀺 𑀧𑀝𑀺𑀮𑀤𑁆𑀥𑀥𑀫𑁆𑀫𑀧𑀼𑀘𑁆𑀙𑀸. 𑀧𑀞𑀫𑀫𑀕𑁆𑀕𑀸𑀤𑀻𑀲𑀼 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀢𑁆𑀯𑀁 𑀮𑀸𑀪𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀲𑁆𑀫𑀸 𑀇𑀤𑀸𑀦𑀺 𑀘𑁂𑀧𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀦 𑀲𑁄 𑀏𑀢𑁆𑀢𑀸𑀯𑀢𑀸𑀯 𑀲𑀓𑁆𑀓𑀸𑀢𑀩𑁆𑀩𑁄. 𑀇𑀫𑁂𑀲𑀼 𑀧𑀦 𑀙𑀲𑀼 𑀞𑀸𑀦𑁂𑀲𑀼 𑀲𑁄𑀥𑀦𑀢𑁆𑀣𑀁 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑀺𑀁 𑀢𑁂 𑀅𑀥𑀺𑀕𑀢𑀁, 𑀓𑀺𑀁 𑀛𑀸𑀦𑀁, 𑀉𑀤𑀸𑀳𑀼 𑀯𑀺𑀫𑁄𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀢𑀭’’𑀦𑁆𑀢𑀺? 𑀬𑁄 𑀳𑀺 𑀬𑁂𑀦 𑀅𑀥𑀺𑀕𑀢𑁄 𑀥𑀫𑁆𑀫𑁄, 𑀲𑁄 𑀢𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀇𑀤𑀁 𑀦𑀸𑀫 𑀫𑁂 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀺𑀦𑁆𑀢𑀺 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀲𑀼 𑀓𑀺𑀁 𑀥𑀼𑀭𑀁 𑀓𑀢𑁆𑀯𑀸 𑀅𑀝𑁆𑀞𑀢𑀺𑀁𑀲𑀸𑀬 𑀯𑀸 𑀆𑀭𑀫𑁆𑀫𑀡𑁂𑀲𑀼 𑀭𑀽𑀧𑀸𑀭𑀽𑀧𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀺𑀪𑁂𑀤𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀓𑁂𑀦 𑀫𑀼𑀔𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸’’𑀢𑀺 𑀬𑁄 𑀳𑀺 𑀬𑀲𑁆𑀲𑀸𑀪𑀺𑀦𑀺𑀯𑁂𑀲𑁄, 𑀲𑁄 𑀢𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀅𑀬𑀁 𑀦𑀸𑀫 𑀫𑁂 𑀅𑀪𑀺𑀦𑀺𑀯𑁂𑀲𑁄 𑀏𑀯𑀁 𑀫𑀬𑀸 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀤𑀸 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀧𑀼𑀩𑁆𑀩𑀡𑁆𑀳𑁂, 𑀉𑀤𑀸𑀳𑀼 𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀮𑁂’’𑀢𑀺 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀓𑀸𑀮𑁄 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀅𑀥𑀺𑀕𑀢𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑁆𑀣 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀤𑀺𑀯𑀸𑀝𑁆𑀞𑀸𑀦𑁂, 𑀉𑀤𑀸𑀳𑀼 𑀭𑀢𑁆𑀢𑀺𑀝𑁆𑀞𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀑𑀓𑀸𑀲𑁂’’𑀢𑀺 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑁄𑀓𑀸𑀲𑁄 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀫𑁂 𑀑𑀓𑀸𑀲𑁂 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑀫𑁂 𑀢𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀧𑀞𑀫𑀫𑀕𑁆𑀕𑀯𑀚𑁆𑀛𑀸, 𑀉𑀤𑀸𑀳𑀼 𑀤𑀼𑀢𑀺𑀬𑀸𑀤𑀺𑀫𑀕𑁆𑀕𑀯𑀚𑁆𑀛𑀸’’𑀢𑀺 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑁂𑀦 𑀧𑀳𑀻𑀦𑀓𑀺𑀮𑁂𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀲𑀘𑁂 ‘‘𑀇𑀫𑁂 𑀦𑀸𑀫 𑀫𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲, 𑀉𑀤𑀸𑀳𑀼 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲𑀸’’𑀢𑀺 𑀲𑀩𑁆𑀩𑁂𑀲𑀁 𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀥𑀫𑁆𑀫𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀲𑀘𑁂 ‘‘𑀇𑀫𑁂𑀲𑀁 𑀦𑀸𑀫𑀸𑀳𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺 𑀯𑀤𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺𑀲𑁆𑀲 𑀯𑀘𑀦𑀁 𑀦 𑀲𑀤𑁆𑀥𑀸𑀢𑀩𑁆𑀩𑀁, 𑀩𑀳𑀼𑀲𑁆𑀲𑀼𑀢𑀸 𑀳𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀓𑀼𑀲𑀮𑀸 𑀪𑀺𑀓𑁆𑀔𑀽 𑀇𑀫𑀸𑀦𑀺 𑀙 𑀞𑀸𑀦𑀸𑀦𑀺 𑀲𑁄𑀥𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺.

𑀇𑀫𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀆𑀕𑀫𑀦𑀧𑀝𑀺𑀧𑀤𑀸 𑀲𑁄𑀥𑁂𑀢𑀩𑁆𑀩𑀸. 𑀬𑀤𑀺 𑀆𑀕𑀫𑀦𑀧𑀝𑀺𑀧𑀤𑀸 𑀦 𑀲𑀼𑀚𑁆𑀛𑀢𑀺, ‘‘𑀇𑀫𑀸𑀬 𑀧𑀝𑀺𑀧𑀤𑀸𑀬 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀦𑀸𑀫 𑀦 𑀮𑀩𑁆𑀪𑀢𑀻’’𑀢𑀺 𑀅𑀧𑀦𑁂𑀢𑀩𑁆𑀩𑁄. 𑀬𑀤𑀺 𑀧𑀦𑀲𑁆𑀲 𑀆𑀕𑀫𑀦𑀧𑀝𑀺𑀧𑀤𑀸 𑀲𑀼𑀚𑁆𑀛𑀢𑀺, ‘‘𑀤𑀻𑀖𑀭𑀢𑁆𑀢𑀁 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀅𑀧𑁆𑀧𑀫𑀢𑁆𑀢𑁄 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀮𑀕𑁆𑀕𑁄 𑀆𑀓𑀸𑀲𑁂 𑀧𑀸𑀡𑀺𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀬𑀸𑀓𑀭𑀡𑀁 𑀧𑀝𑀺𑀧𑀤𑀸𑀬 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀗𑁆𑀕𑁄𑀤𑀓𑀁 𑀬𑀫𑀼𑀦𑁄𑀤𑀓𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺; 𑀏𑀯𑀫𑁂𑀯 𑀲𑀼𑀧𑀜𑁆𑀜𑀢𑁆𑀢𑀸 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘𑀸’’𑀢𑀺 (𑀤𑀻. 𑀦𑀺. 𑁨.𑁨𑁯𑁬) 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺.

𑀅𑀧𑀺𑀘 𑀔𑁄 𑀦 𑀏𑀢𑁆𑀢𑀓𑁂𑀦𑀸𑀧𑀺 𑀲𑀓𑁆𑀓𑀸𑀭𑁄 𑀓𑀸𑀢𑀩𑁆𑀩𑁄. 𑀓𑀲𑁆𑀫𑀸? 𑀏𑀓𑀘𑁆𑀘𑀲𑁆𑀲 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀲𑀢𑁄 𑀔𑀻𑀡𑀸𑀲𑀯𑀧𑀝𑀺𑀧𑀢𑁆𑀢𑀺𑀲𑀤𑀺𑀲𑀸 𑀧𑀝𑀺𑀧𑀤𑀸 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀪𑀺𑀓𑁆𑀔𑀼 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀉𑀢𑁆𑀢𑀸𑀲𑁂𑀢𑀩𑁆𑀩𑁄. 𑀔𑀻𑀡𑀸𑀲𑀯𑀲𑁆𑀲 𑀦𑀸𑀫 𑀅𑀲𑀦𑀺𑀬𑀸𑀧𑀺 𑀫𑀢𑁆𑀣𑀓𑁂 𑀧𑀢𑀫𑀸𑀦𑀸𑀬 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸 𑀦 𑀳𑁄𑀢𑀺. 𑀲𑀘𑀲𑁆𑀲 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸 𑀉𑀧𑁆𑀧𑀚𑁆𑀚𑀢𑀺, ‘‘𑀦 𑀢𑁆𑀯𑀁 𑀅𑀭𑀳𑀸’’𑀢𑀺 𑀅𑀧𑀦𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀳𑀼𑀢𑁆𑀯𑀸 𑀲𑀻𑀳𑁄 𑀯𑀺𑀬 𑀦𑀺𑀲𑀻𑀤𑀢𑀺, 𑀅𑀬𑀁 𑀪𑀺𑀓𑁆𑀔𑀼 𑀲𑀫𑁆𑀧𑀦𑁆𑀦𑀯𑁂𑀬𑁆𑀬𑀸𑀓𑀭𑀡𑁄 𑀲𑀫𑀦𑁆𑀢𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀧𑁂𑀲𑀺𑀢𑀁 𑀲𑀓𑁆𑀓𑀸𑀭𑀁 𑀅𑀭𑀳𑀢𑀻𑀢𑀺.

𑀧𑀸𑀧𑀺𑀘𑁆𑀙𑁄𑀢𑀺 𑀬𑀸 𑀲𑀸 ‘‘𑀇𑀥𑁂𑀓𑀘𑁆𑀘𑁄 𑀤𑀼𑀲𑁆𑀲𑀻𑀮𑁄𑀯 𑀲𑀫𑀸𑀦𑁄 𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀇𑀘𑁆𑀙𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁫𑁧) 𑀦𑀬𑁂𑀦 𑀯𑀼𑀢𑁆𑀢𑀸 𑀧𑀸𑀧𑀺𑀘𑁆𑀙𑀸 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀇𑀘𑁆𑀙𑀸𑀧𑀓𑀢𑁄𑀢𑀺 𑀢𑀸𑀬 𑀧𑀸𑀧𑀺𑀓𑀸𑀬 𑀇𑀘𑁆𑀙𑀸𑀬 𑀅𑀧𑀓𑀢𑁄 𑀅𑀪𑀺𑀪𑀽𑀢𑁄 𑀧𑀸𑀭𑀸𑀚𑀺𑀓𑁄 𑀳𑀼𑀢𑁆𑀯𑀸.

𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁄𑀢𑀺 𑀅𑀢𑁆𑀢𑀦𑁄 𑀯𑀺𑀲𑀼𑀤𑁆𑀥𑀺𑀁 𑀅𑀧𑁂𑀓𑁆𑀔𑀫𑀸𑀦𑁄 𑀇𑀘𑁆𑀙𑀫𑀸𑀦𑁄 𑀧𑀢𑁆𑀣𑀬𑀫𑀸𑀦𑁄. 𑀅𑀬𑀜𑁆𑀳𑀺 𑀬𑀲𑁆𑀫𑀸 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄, 𑀢𑀲𑁆𑀫𑀸 𑀪𑀺𑀓𑁆𑀔𑀼𑀪𑀸𑀯𑁂 𑀞𑀢𑁆𑀯𑀸 𑀅𑀪𑀩𑁆𑀩𑁄 𑀛𑀸𑀦𑀸𑀤𑀻𑀦𑀺 𑀅𑀥𑀺𑀕𑀦𑁆𑀢𑀼𑀁, 𑀪𑀺𑀓𑁆𑀔𑀼𑀪𑀸𑀯𑁄 𑀳𑀺𑀲𑁆𑀲 𑀲𑀕𑁆𑀕𑀦𑁆𑀢𑀭𑀸𑀬𑁄 𑀘𑁂𑀯 𑀳𑁄𑀢𑀺 𑀫𑀕𑁆𑀕𑀦𑁆𑀢𑀭𑀸𑀬𑁄 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀁 𑀦𑀺𑀭𑀬𑀸𑀬𑀼𑀧𑀓𑀟𑁆𑀠𑀢𑀻’’𑀢𑀺 (𑀥. 𑀧. 𑁩𑁧𑁧). 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋 ‘‘𑀲𑀺𑀣𑀺𑀮𑁄 𑀳𑀺 𑀧𑀭𑀺𑀩𑁆𑀩𑀸𑀚𑁄, 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚’’𑀦𑁆𑀢𑀺 (𑀥. 𑀧. 𑁩𑁧𑁩). 𑀇𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑁄 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀦 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀕𑀺𑀳𑀻 𑀯𑀸 𑀉𑀧𑀸𑀲𑀓𑁄 𑀯𑀸 𑀆𑀭𑀸𑀫𑀺𑀓𑁄 𑀯𑀸 𑀲𑀸𑀫𑀡𑁂𑀭𑁄 𑀯𑀸 𑀳𑀼𑀢𑁆𑀯𑀸 𑀤𑀸𑀦𑀲𑀭𑀡𑀲𑀻𑀮𑀲𑀁𑀯𑀭𑀸𑀤𑀻𑀳𑀺 𑀲𑀕𑁆𑀕𑀫𑀕𑁆𑀕𑀁 𑀯𑀸 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀻𑀳𑀺 𑀫𑁄𑀓𑁆𑀔𑀫𑀕𑁆𑀕𑀁 𑀯𑀸 𑀆𑀭𑀸𑀥𑁂𑀢𑀼𑀁 𑀪𑀩𑁆𑀩𑁄 𑀳𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀕𑀺𑀳𑀺𑀆𑀤𑀺𑀪𑀸𑀯𑁄 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀯𑀺𑀲𑀼𑀤𑁆𑀥𑀺𑀁 𑀅𑀧𑁂𑀓𑁆𑀔𑀦𑀢𑁄 ‘‘𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯 𑀘𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀕𑀺𑀳𑀻 𑀯𑀸 𑀳𑁄𑀢𑀼𑀓𑀸𑀫𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑀏𑀯𑀁 𑀪𑀡𑁂𑀬𑁆𑀬. 𑀓𑀣𑀁? ‘‘𑀅𑀚𑀸𑀦𑀫𑁂𑀯𑀁 𑀆𑀯𑀼𑀲𑁄 𑀅𑀯𑀘𑀁 𑀚𑀸𑀦𑀸𑀫𑀺, 𑀅𑀧𑀲𑁆𑀲𑀁 𑀧𑀲𑁆𑀲𑀸𑀫𑀻’’𑀢𑀺. 𑀧𑀤𑀪𑀸𑀚𑀦𑁂 𑀧𑀦 ‘‘𑀏𑀯𑀁 𑀯𑀤𑁂𑀬𑁆𑀬𑀸’’𑀢𑀺 𑀇𑀤𑀁 𑀧𑀤𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀯 𑀬𑀣𑀸 𑀯𑀤𑀦𑁆𑀢𑁄 ‘‘𑀅𑀚𑀸𑀦𑀫𑁂𑀯𑀁 𑀆𑀯𑀼𑀲𑁄 𑀅𑀯𑀘𑀁 𑀚𑀸𑀦𑀸𑀫𑀺, 𑀅𑀧𑀲𑁆𑀲𑀁 𑀧𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀳𑀁 𑀏𑀢𑁂 𑀥𑀫𑁆𑀫𑁂 𑀚𑀸𑀦𑀸𑀫𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀼𑀘𑁆𑀙𑀁 𑀫𑀼𑀲𑀸 𑀯𑀺𑀮𑀧𑀺𑀦𑁆𑀢𑀺 𑀅𑀳𑀁 𑀯𑀘𑀦𑀢𑁆𑀣𑀯𑀺𑀭𑀳𑀢𑁄 𑀢𑀼𑀘𑁆𑀙𑀁 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑀢𑁄 𑀫𑀼𑀲𑀸 𑀯𑀺𑀮𑀧𑀺𑀁, 𑀅𑀪𑀡𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀤𑀪𑀸𑀚𑀦𑁂 𑀧𑀦𑀲𑁆𑀲 𑀅𑀜𑁆𑀜𑁂𑀦 𑀧𑀤𑀩𑁆𑀬𑀜𑁆𑀚𑀦𑁂𑀦 𑀅𑀢𑁆𑀣𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀘𑁆𑀙𑀓𑀁 𑀫𑀬𑀸 𑀪𑀡𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀼𑀭𑀺𑀫𑁂 𑀉𑀧𑀸𑀤𑀸𑀬𑀸𑀢𑀺 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀧𑀸𑀭𑀸𑀚𑀺𑀓𑀸𑀦𑀺 𑀆𑀧𑀦𑁆𑀦𑁂 𑀧𑀼𑀕𑁆𑀕𑀮𑁂 𑀉𑀧𑀸𑀤𑀸𑀬. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀘 𑀧𑀸𑀓𑀝𑀫𑁂𑀯𑀸𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁯𑁯. 𑀏𑀯𑀁 𑀉𑀤𑁆𑀤𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀧𑀤𑀸𑀦𑀼𑀓𑁆𑀓𑀫𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀳𑁂𑀝𑁆𑀞𑀸 𑀧𑀤𑀪𑀸𑀚𑀦𑀻𑀬𑀫𑁆𑀳𑀺 ‘‘𑀛𑀸𑀦𑀁 𑀯𑀺𑀫𑁄𑀓𑁆𑀔𑀁 𑀲𑀫𑀸𑀥𑀺 𑀲𑀫𑀸𑀧𑀢𑁆𑀢𑀺 𑀜𑀸𑀡𑀤𑀲𑁆𑀲𑀦𑀁…𑀧𑁂… 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻’’𑀢𑀺 𑀏𑀯𑀁 𑀲𑀁𑀔𑀺𑀢𑁆𑀢𑁂𑀦𑁂𑀯 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀤𑀲𑁆𑀲𑀺𑀢𑁄, 𑀦 𑀯𑀺𑀢𑁆𑀣𑀸𑀭𑁂𑀦 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀢𑀦𑁆𑀢𑀺 𑀞𑀧𑀺𑀢𑀸. 𑀲𑀗𑁆𑀔𑁂𑀧𑀤𑀲𑁆𑀲𑀺𑀢𑁂 𑀘 𑀅𑀢𑁆𑀣𑁂 𑀦 𑀲𑀩𑁆𑀩𑁂 𑀲𑀩𑁆𑀩𑀸𑀓𑀸𑀭𑁂𑀦 𑀦𑀬𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀦𑀬𑀕𑁆𑀕𑀳𑀡𑀢𑁆𑀣𑀁 𑀧𑀼𑀦 𑀢𑀤𑁂𑀯 𑀧𑀤𑀪𑀸𑀚𑀦𑀁 𑀫𑀸𑀢𑀺𑀓𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 ‘‘𑀛𑀸𑀦𑀦𑁆𑀢𑀺 𑀧𑀞𑀫𑀁 𑀛𑀸𑀦𑀁, 𑀤𑀼𑀢𑀺𑀬𑀁 𑀛𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀫𑁂𑀢𑁆𑀢𑀸𑀛𑀸𑀦𑀸𑀤𑀻𑀦𑀺𑀧𑀺 𑀅𑀲𑀼𑀪𑀚𑁆𑀛𑀸𑀦𑀸𑀤𑀻𑀦𑀺𑀧𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀚𑁆𑀛𑀸𑀦𑀫𑁆𑀧𑀺 𑀮𑁄𑀓𑀺𑀬𑀚𑁆𑀛𑀸𑀦𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀫𑁂𑀯. 𑀢𑀲𑁆𑀫𑀸 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺𑀧𑀺…𑀧𑁂… 𑀘𑀢𑀼𑀢𑁆𑀣𑀁 𑀚𑁆𑀛𑀸𑀦𑀁, 𑀫𑁂𑀢𑁆𑀢𑀸𑀛𑀸𑀦𑀁, 𑀉𑀧𑁂𑀓𑁆𑀔𑀸𑀛𑀸𑀦𑀁 𑀅𑀲𑀼𑀪𑀚𑁆𑀛𑀸𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀚𑁆𑀛𑀸𑀦𑀁, 𑀮𑁄𑀓𑀺𑀬𑀚𑁆𑀛𑀸𑀦𑀁, 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀧𑀺 𑀪𑀡𑀦𑁆𑀢𑁄 𑀧𑀸𑀭𑀸𑀚𑀺𑀓𑁄𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀝𑁆𑀞𑀼 𑀫𑀼𑀢𑁆𑀢𑁄 𑀯𑀺𑀯𑀺𑀥𑁂𑀳𑀺 𑀯𑀸 𑀓𑀺𑀮𑁂𑀲𑁂𑀳𑀺 𑀫𑀼𑀢𑁆𑀢𑁄𑀢𑀺 𑀯𑀺𑀫𑁄𑀓𑁆𑀔𑁄. 𑀲𑁄 𑀧𑀦𑀸𑀬𑀁 𑀭𑀸𑀕𑀤𑁄𑀲𑀫𑁄𑀳𑁂𑀳𑀺 𑀲𑀼𑀜𑁆𑀜𑀢𑁆𑀢𑀸 𑀲𑀼𑀜𑁆𑀜𑀢𑁄. 𑀭𑀸𑀕𑀤𑁄𑀲𑀫𑁄𑀳𑀦𑀺𑀫𑀺𑀢𑁆𑀢𑁂𑀳𑀺 𑀅𑀦𑀺𑀫𑀺𑀢𑁆𑀢𑀢𑁆𑀢𑀸 𑀅𑀦𑀺𑀫𑀺𑀢𑁆𑀢𑁄. 𑀭𑀸𑀕𑀤𑁄𑀲𑀫𑁄𑀳𑀧𑀡𑀺𑀥𑀻𑀦𑀁 𑀅𑀪𑀸𑀯𑀢𑁄 𑀅𑀧𑁆𑀧𑀡𑀺𑀳𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀘𑀺𑀢𑁆𑀢𑀁 𑀲𑀫𑀁 𑀆𑀤𑀳𑀢𑀺 𑀆𑀭𑀫𑁆𑀫𑀡𑁂 𑀞𑀧𑁂𑀢𑀻𑀢𑀺 𑀲𑀫𑀸𑀥𑀺. 𑀅𑀭𑀺𑀬𑁂𑀳𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀲𑀫𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯. 𑀏𑀢𑁆𑀣 𑀘 𑀯𑀺𑀫𑁄𑀓𑁆𑀔𑀢𑁆𑀢𑀺𑀓𑁂𑀦 𑀘 𑀲𑀫𑀸𑀥𑀺𑀢𑁆𑀢𑀺𑀓𑁂𑀦 𑀘 𑀅𑀭𑀺𑀬𑀫𑀕𑁆𑀕𑁄𑀯 𑀯𑀼𑀢𑁆𑀢𑁄. 𑀲𑀫𑀸𑀧𑀢𑁆𑀢𑀺𑀢𑁆𑀢𑀺𑀓𑁂𑀦 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺. 𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀧𑀤𑀁 𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀇𑀫𑀲𑁆𑀲 𑀮𑀸𑀪𑀻𑀫𑁆𑀳𑀻’’𑀢𑀺 𑀪𑀡𑀦𑁆𑀢𑁄 𑀧𑀸𑀭𑀸𑀚𑀺𑀓𑁄𑀯 𑀳𑁄𑀢𑀺.

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼, 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀦𑁆𑀢𑀺. 𑀢𑀢𑁆𑀣 𑀏𑀓𑀺𑀲𑁆𑀲𑀸𑀧𑀺 𑀦𑀸𑀫𑀁 𑀕𑀳𑁂𑀢𑁆𑀯𑀸 ‘‘𑀅𑀳𑀁 𑀇𑀫𑀺𑀲𑁆𑀲𑀸 𑀯𑀺𑀚𑁆𑀚𑀸𑀬 𑀮𑀸𑀪𑀻𑀫𑁆𑀳𑀻’’𑀢𑀺 𑀪𑀡𑀦𑁆𑀢𑁄 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀺𑀚𑁆𑀚𑀸𑀦𑀁 𑀮𑀸𑀪𑀻𑀫𑁆𑀳𑀻’𑀢𑀺 𑀪𑀡𑀦𑁆𑀢𑁄𑀧𑀺 ‘𑀢𑀺𑀲𑁆𑀲𑀦𑁆𑀦𑀁 𑀯𑀺𑀚𑁆𑀚𑀸𑀦𑀁 𑀮𑀸𑀪𑀻𑀫𑁆𑀳𑀻’𑀢𑀺 𑀪𑀡𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀫𑀕𑁆𑀕𑀪𑀸𑀯𑀦𑀸𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀸 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀸𑀯 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸 𑀮𑁄𑀓𑀼𑀢𑁆𑀢𑀭𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀩𑀮𑀸𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀮𑀸𑀪𑀻𑀫𑁆𑀳𑀻𑀢𑀺 𑀯𑀤𑀢𑁄 𑀧𑀸𑀭𑀸𑀚𑀺𑀓𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 ‘‘𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀮𑀸𑀪𑀻𑀫𑁆𑀳𑀻’𑀢𑀺 𑀏𑀯𑀁 𑀏𑀓𑁂𑀓𑀓𑁄𑀝𑁆𑀞𑀸𑀲𑀯𑀲𑁂𑀦𑀸𑀧𑀺 ‘𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀻’𑀢𑀺 𑀏𑀯𑀁 𑀢𑀢𑁆𑀣 𑀏𑀓𑁂𑀓𑀥𑀫𑁆𑀫𑀯𑀲𑁂𑀦𑀸𑀧𑀺 𑀯𑀤𑀢𑁄 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁 𑀢𑀫𑁆𑀧𑀺 𑀲𑀫𑁂𑀢𑀺. 𑀓𑀲𑁆𑀫𑀸? 𑀫𑀕𑁆𑀕𑀓𑁆𑀔𑀡𑀼𑀧𑁆𑀧𑀦𑁆𑀦𑁂𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀧𑀺 𑀏𑀓𑁂𑀓𑀨𑀮𑀯𑀲𑁂𑀦 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀭𑀸𑀕𑀲𑁆𑀲 𑀧𑀳𑀸𑀦𑀦𑁆𑀢𑀺𑀆𑀤𑀺𑀢𑁆𑀢𑀺𑀓𑁂 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀯 𑀯𑀼𑀢𑁆𑀢𑀁. 𑀢𑀁 𑀧𑀦 𑀬𑀲𑁆𑀫𑀸 𑀫𑀕𑁆𑀕𑁂𑀦 𑀯𑀺𑀦𑀸 𑀦𑀢𑁆𑀣𑀺, 𑀢𑀢𑀺𑀬𑀫𑀕𑁆𑀕𑁂𑀦 𑀳𑀺 𑀓𑀸𑀫𑀭𑀸𑀕𑀤𑁄𑀲𑀸𑀦𑀁 𑀧𑀳𑀸𑀦𑀁, 𑀘𑀢𑀼𑀢𑁆𑀣𑁂𑀦 𑀫𑁄𑀳𑀲𑁆𑀲, 𑀢𑀲𑁆𑀫𑀸 ‘‘𑀭𑀸𑀕𑁄 𑀫𑁂 𑀧𑀳𑀻𑀦𑁄’’𑀢𑀺𑀆𑀤𑀻𑀦𑀺 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁.

𑀭𑀸𑀕𑀸 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀢𑀸𑀢𑀺𑀆𑀤𑀺𑀢𑁆𑀢𑀺𑀓𑁂 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀫𑁂𑀯 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀭𑀸𑀕𑀸 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀫𑁂𑀯.

𑀲𑀼𑀜𑁆𑀜𑀸𑀕𑀸𑀭𑀧𑀤𑀪𑀸𑀚𑀦𑁂 𑀧𑀦 𑀬𑀲𑁆𑀫𑀸 𑀛𑀸𑀦𑁂𑀦 𑀅𑀖𑀝𑁂𑀢𑁆𑀯𑀸 ‘‘𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀫𑀸𑀫𑀻’’𑀢𑀺 𑀯𑀘𑀦𑀫𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀁 𑀦𑀸𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 ‘‘𑀧𑀞𑀫𑁂𑀦 𑀛𑀸𑀦𑁂𑀦 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑁄 𑀛𑀸𑀦𑁂𑀦 𑀖𑀝𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀦𑀸𑀫 𑀛𑀸𑀦𑁂𑀦 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀫𑀸𑀫𑀻’’𑀢𑀺 𑀯𑀤𑀢𑀺, 𑀅𑀬𑀫𑁂𑀯 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀸 𑀘 ‘‘𑀜𑀸𑀡’’𑀦𑁆𑀢𑀺 𑀇𑀫𑀲𑁆𑀲 𑀧𑀤𑀪𑀸𑀚𑀦𑁂 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁪 𑀆𑀤𑀬𑁄) 𑀯𑀼𑀢𑁆𑀢𑀸𑀲𑀼 𑀅𑀝𑁆𑀞𑀲𑀼 𑀯𑀺𑀚𑁆𑀚𑀸𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑀦𑁄𑀫𑀬𑀺𑀤𑁆𑀥𑀺𑀇𑀤𑁆𑀥𑀺𑀯𑀺𑀥𑀤𑀺𑀩𑁆𑀩𑀲𑁄𑀢𑀘𑁂𑀢𑁄𑀧𑀭𑀺𑀬𑀜𑀸𑀡𑀪𑁂𑀤𑀸 𑀧𑀜𑁆𑀘 𑀯𑀺𑀚𑁆𑀚𑀸 𑀦 𑀆𑀕𑀢𑀸, 𑀢𑀸𑀲𑀼 𑀏𑀓𑀸 𑀯𑀺𑀧𑀲𑁆𑀲𑀦𑀸𑀯 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀦 𑀳𑁄𑀢𑀺, 𑀲𑁂𑀲𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀫𑀸 ‘‘𑀯𑀺𑀧𑀲𑁆𑀲𑀦𑀸𑀬 𑀮𑀸𑀪𑀻𑀫𑁆𑀳𑀻’’𑀢𑀺𑀧𑀺 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀮𑀸𑀪𑀻𑀫𑁆𑀳𑀻’’𑀢𑀺𑀧𑀺 𑀯𑀤𑀢𑁄 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀧𑀦 𑀪𑀡𑀢𑀺 𑁋 ‘‘𑀇𑀢𑀭𑀸𑀧𑀺 𑀘𑀢𑀲𑁆𑀲𑁄 𑀯𑀺𑀚𑁆𑀚𑀸 𑀜𑀸𑀡𑁂𑀦 𑀅𑀖𑀝𑀺𑀢𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀽 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 ‘𑀫𑀦𑁄𑀫𑀬𑀲𑁆𑀲 𑀮𑀸𑀪𑀻𑀫𑁆𑀳𑀺, 𑀇𑀤𑁆𑀥𑀺𑀯𑀺𑀥𑀲𑁆𑀲, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸, 𑀘𑁂𑀢𑁄𑀧𑀭𑀺𑀬𑀲𑁆𑀲 𑀮𑀸𑀪𑀻𑀫𑁆𑀳𑀻’𑀢𑀺 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀻’’𑀢𑀺. 𑀢𑀁 𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁 𑁋 ‘‘𑀆𑀘𑀭𑀺𑀬𑁄 𑀦 𑀆𑀪𑀺𑀥𑀫𑁆𑀫𑀺𑀓𑁄 𑀪𑀼𑀫𑁆𑀫𑀦𑁆𑀢𑀭𑀁 𑀦 𑀚𑀸𑀦𑀸𑀢𑀺, 𑀅𑀪𑀺𑀜𑁆𑀜𑀸 𑀦𑀸𑀫 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑁄𑀯 𑀫𑀳𑀕𑁆𑀕𑀢𑀥𑀫𑁆𑀫𑁄, 𑀛𑀸𑀦𑁂𑀦𑁂𑀯 𑀇𑀚𑁆𑀛𑀢𑀺. 𑀢𑀲𑁆𑀫𑀸 𑀫𑀦𑁄𑀫𑀬𑀲𑁆𑀲 𑀮𑀸𑀪𑀻𑀫𑁆𑀳𑀻’𑀢𑀺 𑀯𑀸 ‘𑀫𑀦𑁄𑀫𑀬𑀜𑀸𑀡𑀲𑁆𑀲 𑀮𑀸𑀪𑀻𑀫𑁆𑀳𑀻’𑀢𑀺 𑀯𑀸 𑀬𑀣𑀸 𑀯𑀸 𑀢𑀣𑀸 𑀯𑀸 𑀯𑀤𑀢𑀼 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀦𑀺𑀩𑁆𑀩𑀸𑀦𑀁 𑀧𑀸𑀴𑀺𑀬𑀸 𑀅𑀦𑀸𑀕𑀢𑀁, 𑀅𑀣 𑀔𑁄 ‘‘𑀦𑀺𑀩𑁆𑀩𑀸𑀦𑀁 𑀫𑁂 𑀧𑀢𑁆𑀢’’𑀦𑁆𑀢𑀺 𑀯𑀸 ‘‘𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀯𑀸 𑀯𑀤𑀢𑁄 𑀧𑀸𑀭𑀸𑀚𑀺𑀓𑀫𑁂𑀯. 𑀓𑀲𑁆𑀫𑀸? 𑀦𑀺𑀩𑁆𑀩𑀸𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀢𑁆𑀢𑀸. 𑀢𑀣𑀸 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀁 𑀧𑀝𑀺𑀯𑀺𑀤𑁆𑀥𑀸𑀦𑀺 𑀫𑀬𑀸’’𑀢𑀺 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀫𑁂𑀯. 𑀓𑀲𑁆𑀫𑀸? 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄𑀢𑀺 𑀳𑀺 𑀫𑀕𑁆𑀕𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀬𑀲𑁆𑀫𑀸 𑀧𑀦 ‘‘𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑀽𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑁆𑀭𑀺𑀬𑀢𑁄 𑀘𑀢𑀽𑀲𑀼 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀏𑀢𑁂𑀲𑀼 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀘𑀢𑀽𑀲𑀼 𑀨𑀮𑁂𑀲𑀼 𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁪𑁬) 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀬 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀸, ‘‘𑀦𑀺𑀭𑀼𑀢𑁆𑀢𑀺…𑀧𑁂… 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀸 ‘‘𑀮𑁄𑀓𑀺𑀬𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀸 𑀯𑀼𑀢𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. ‘‘𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 𑀦 𑀢𑀸𑀯 𑀲𑀻𑀲𑀁 𑀑𑀢𑀭𑀢𑀺. ‘‘𑀮𑁄𑀓𑀼𑀢𑁆𑀢𑀭𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀧𑀦 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄𑀫𑁆𑀳𑀻𑀢𑀺 𑀅𑀯𑀺𑀲𑁂𑀲𑁂𑀦𑀸𑀧𑀺 𑀯𑀤𑀢𑁄 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀺𑀬𑀫𑁆𑀧𑀺 ‘‘𑀦 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀢𑁆𑀢𑀸𑀯𑀢𑀸 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀏𑀢𑁆𑀢𑀸𑀯𑀢𑀸 𑀲𑀻𑀲𑀁 𑀦 𑀑𑀢𑀭𑀢𑀺, 𑀏𑀢𑁆𑀢𑀸𑀯𑀢𑀸 𑀦 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀺𑀘𑀸𑀭𑀺𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀅𑀜𑁆𑀜𑀁 𑀧𑀫𑀸𑀡𑀁 𑀓𑀸𑀢𑀼𑀦𑁆𑀢𑀺.

‘‘𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀯𑀸 ‘‘𑀮𑀸𑀪𑀻𑀫𑁆𑀳𑀸𑀳𑀁 𑀢𑀲𑁆𑀲𑀸’’𑀢𑀺 𑀯𑀸 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. 𑀓𑀲𑁆𑀫𑀸? 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀦𑁂𑀯 𑀮𑁄𑀓𑀺𑀬𑀢𑁆𑀢𑀸 𑀦 𑀮𑁄𑀓𑀼𑀢𑁆𑀢𑀭𑀢𑁆𑀢𑀸𑀢𑀺. 𑀲𑀘𑁂 𑀧𑀦𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀦𑀺𑀭𑁄𑀥𑀁 𑀦𑀸𑀫 𑀅𑀦𑀸𑀕𑀸𑀫𑀻 𑀯𑀸 𑀔𑀻𑀡𑀸𑀲𑀯𑁄 𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀢𑁂𑀲𑀁 𑀫𑀁 𑀅𑀜𑁆𑀜𑀢𑀭𑁄𑀢𑀺 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑁄𑀢𑀺, 𑀲𑁄 𑀘 𑀦𑀁 𑀢𑀣𑀸 𑀚𑀸𑀦𑀸𑀢𑀺, 𑀧𑀸𑀭𑀸𑀚𑀺𑀓𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

‘‘𑀅𑀢𑀻𑀢𑀪𑀯𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀲𑁄𑀢𑀸𑀧𑀦𑁆𑀦𑁄𑀫𑁆𑀳𑀻’’𑀢𑀺 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. 𑀅𑀢𑀻𑀢𑀓𑁆𑀔𑀦𑁆𑀥𑀸𑀦𑀜𑁆𑀳𑀺 𑀧𑀭𑀸𑀫𑀝𑁆𑀞𑀢𑁆𑀢𑀸 𑀲𑀻𑀲𑀁 𑀦 𑀑𑀢𑀭𑀢𑀻𑀢𑀺. 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀢𑀻𑀢𑁂 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀫𑁆𑀳𑀻’’𑀢𑀺 𑀯𑀤𑀢𑁄 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀓𑀼𑀧𑁆𑀧𑀥𑀫𑁆𑀫𑀢𑁆𑀢𑀸 𑀇𑀥 𑀧𑀦 ‘‘𑀅𑀢𑁆𑀣𑀺 𑀅𑀓𑀼𑀧𑁆𑀧𑀥𑀫𑁆𑀫𑀢𑁆𑀢𑀸𑀢𑀺 𑀓𑁂𑀘𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀢𑀢𑁆𑀣𑁂𑀯 ‘‘𑀅𑀢𑀻𑀢𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀓𑀣𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀓𑀣𑁂𑀦𑁆𑀢𑀲𑁆𑀲𑁂𑀯 𑀳𑁄𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀲𑀼𑀤𑁆𑀥𑀺𑀓𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁦𑁦. 𑀏𑀯𑀁 𑀛𑀸𑀦𑀸𑀤𑀻𑀦𑀺 𑀤𑀲 𑀫𑀸𑀢𑀺𑀓𑀸𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀦𑁆𑀢𑁄 𑀬𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀁 𑀪𑀡𑀢𑀺, 𑀢𑀲𑁆𑀲 𑀅𑀗𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲𑁂𑀯 𑀯𑀺𑀢𑁆𑀣𑀸𑀭𑀲𑁆𑀲 𑀯𑀲𑁂𑀦 𑀘𑀓𑁆𑀓𑀧𑁂𑀬𑁆𑀬𑀸𑀮𑀁 𑀩𑀦𑁆𑀥𑀦𑁆𑀢𑁄 𑀉𑀮𑁆𑀮𑀧𑀦𑀸𑀓𑀸𑀭𑀜𑁆𑀘 𑀆𑀧𑀢𑁆𑀢𑀺𑀪𑁂𑀤𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀢𑀻𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀤𑁆𑀥𑀺𑀓𑀯𑀸𑀭𑁄 𑀯𑀢𑁆𑀢𑀼𑀓𑀸𑀫𑀯𑀸𑀭𑁄 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀯𑀸𑀭𑁄𑀢𑀺 𑀢𑀬𑁄 𑀫𑀳𑀸𑀯𑀸𑀭𑀸. 𑀢𑁂𑀲𑀼 𑀲𑀼𑀤𑁆𑀥𑀺𑀓𑀯𑀸𑀭𑁂 𑀧𑀞𑀫𑀚𑁆𑀛𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀫𑁄𑀳𑀸 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀧𑀤𑀁, 𑀢𑀸𑀯 𑀏𑀓𑀫𑁂𑀓𑀲𑁆𑀫𑀺𑀁 𑀧𑀤𑁂 𑀲𑀫𑀸𑀧𑀚𑁆𑀚𑀺𑀁, 𑀲𑀫𑀸𑀧𑀚𑁆𑀚𑀸𑀫𑀺, 𑀲𑀫𑀸𑀧𑀦𑁆𑀦𑁄, 𑀮𑀸𑀪𑀻𑀫𑁆𑀳𑀺, 𑀯𑀲𑀻𑀫𑁆𑀳𑀺, 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀇𑀫𑁂𑀲𑀼 𑀙𑀲𑀼 𑀧𑀤𑁂𑀲𑀼 𑀏𑀓𑀫𑁂𑀓𑀁 𑀧𑀤𑀁 𑀢𑀻𑀳𑀸𑀓𑀸𑀭𑁂𑀳𑀺, 𑀘𑀢𑀽𑀳𑀺, 𑀧𑀜𑁆𑀘𑀳𑀺, 𑀙𑀳𑀺, 𑀲𑀢𑁆𑀢𑀳𑀸𑀓𑀸𑀭𑁂𑀳𑀻𑀢𑀺 𑀏𑀯𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀬𑁄𑀚𑁂𑀢𑁆𑀯𑀸 𑀲𑀼𑀤𑁆𑀥𑀺𑀓𑀦𑀬𑁄 𑀦𑀸𑀫 𑀯𑀼𑀢𑁆𑀢𑁄. 𑀢𑀢𑁄 𑀧𑀞𑀫𑀜𑁆𑀘 𑀛𑀸𑀦𑀁, 𑀤𑀼𑀢𑀺𑀬𑀜𑁆𑀘 𑀛𑀸𑀦𑀦𑁆𑀢𑀺 𑀏𑀯𑀁 𑀧𑀞𑀫𑀚𑁆𑀛𑀸𑀦𑁂𑀦 𑀲𑀤𑁆𑀥𑀺𑀁 𑀏𑀓𑀫𑁂𑀓𑀁 𑀧𑀤𑀁 𑀖𑀝𑁂𑀦𑁆𑀢𑁂𑀦 𑀲𑀩𑁆𑀩𑀧𑀤𑀸𑀦𑀺 𑀖𑀝𑁂𑀢𑁆𑀯𑀸 𑀢𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀦 𑀔𑀡𑁆𑀟𑀘𑀓𑁆𑀓𑀁 𑀦𑀸𑀫 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀧𑀼𑀦 𑀆𑀦𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀦 𑀬𑁄𑀚𑀺𑀢𑀁, 𑀢𑀲𑁆𑀫𑀸 ‘‘𑀔𑀡𑁆𑀟𑀘𑀓𑁆𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁, 𑀢𑀢𑀺𑀬𑀜𑁆𑀘 𑀛𑀸𑀦𑀦𑁆𑀢𑀺 𑀏𑀯𑀁 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀲𑀤𑁆𑀥𑀺𑀁 𑀏𑀓𑀫𑁂𑀓𑀁 𑀧𑀤𑀁 𑀖𑀝𑁂𑀢𑁆𑀯𑀸 𑀧𑀼𑀦 𑀆𑀦𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀢𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀦 𑀩𑀤𑁆𑀥𑀘𑀓𑁆𑀓𑀁 𑀦𑀸𑀫 𑀯𑀼𑀢𑁆𑀢𑀁. 𑀢𑀢𑁄 𑀬𑀣𑀸 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀲𑀤𑁆𑀥𑀺𑀁, 𑀏𑀯𑀁 𑀢𑀢𑀺𑀬𑀚𑁆𑀛𑀸𑀦𑀸𑀤𑀻𑀳𑀺𑀧𑀺 𑀲𑀤𑁆𑀥𑀺𑀁, 𑀏𑀓𑀫𑁂𑀓𑀁 𑀧𑀤𑀁 𑀖𑀝𑁂𑀢𑁆𑀯𑀸 𑀧𑀼𑀦 𑀆𑀦𑁂𑀢𑁆𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀢𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀦 𑀅𑀜𑁆𑀜𑀸𑀦𑀺𑀧𑀺 𑀏𑀓𑀽𑀦𑀢𑀺𑀁𑀲 𑀩𑀤𑁆𑀥𑀘𑀓𑁆𑀓𑀸𑀦𑀺 𑀯𑀢𑁆𑀯𑀸 𑀏𑀓𑀫𑀽𑀮𑀓𑀦𑀬𑁄 𑀦𑀺𑀝𑁆𑀞𑀸𑀧𑀺𑀢𑁄. 𑀧𑀸𑀞𑁄 𑀧𑀦 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑀺𑀢𑁄, 𑀲𑁄 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸 𑀘 𑀏𑀓𑀫𑀽𑀮𑀓𑁄, 𑀏𑀯𑀁 𑀤𑀼𑀫𑀽𑀮𑀓𑀸𑀤𑀬𑁄𑀧𑀺 𑀲𑀩𑁆𑀩𑀫𑀽𑀮𑀓𑀧𑀭𑀺𑀬𑁄𑀲𑀸𑀦𑀸 𑀘𑀢𑀼𑀦𑁆𑀦𑀁 𑀲𑀢𑀸𑀦𑀁 𑀉𑀧𑀭𑀺 𑀧𑀜𑁆𑀘𑀢𑀺𑀁𑀲 𑀦𑀬𑀸 𑀯𑀼𑀢𑁆𑀢𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑁆𑀯𑀺𑀫𑀽𑀮𑀓𑀸 𑀏𑀓𑀽𑀦𑀢𑀺𑀁𑀲, 𑀢𑀺𑀫𑀽𑀮𑀓𑀸 𑀅𑀝𑁆𑀞𑀯𑀻𑀲, 𑀘𑀢𑀼𑀫𑀽𑀮𑀓𑀸 𑀲𑀢𑁆𑀢𑀯𑀻𑀲; 𑀏𑀯𑀁 𑀧𑀜𑁆𑀘𑀫𑀽𑀮𑀓𑀸𑀤𑀬𑁄𑀧𑀺 𑀏𑀓𑁂𑀓𑀁 𑀊𑀦𑀁 𑀓𑀢𑁆𑀯𑀸 𑀬𑀸𑀯 𑀢𑀺𑀁𑀲𑀫𑀽𑀮𑀓𑀸, 𑀢𑀸𑀯 𑀯𑁂𑀤𑀺𑀢𑀩𑁆𑀩𑀸. 𑀧𑀸𑀞𑁂 𑀧𑀦 𑀢𑁂𑀲𑀁 𑀦𑀸𑀫𑀫𑁆𑀧𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 ‘‘𑀇𑀤𑀁 𑀲𑀩𑁆𑀩𑀫𑀽𑀮𑀓’’𑀦𑁆𑀢𑀺 𑀢𑀺𑀁𑀲𑀫𑀽𑀮𑀓𑀦𑀬𑁄 𑀏𑀓𑁄 𑀤𑀲𑁆𑀲𑀺𑀢𑁄. 𑀬𑀲𑁆𑀫𑀸 𑀘 𑀲𑀼𑀜𑁆𑀜𑀸𑀕𑀸𑀭𑀧𑀤𑀁 𑀛𑀸𑀦𑁂𑀦 𑀅𑀖𑀝𑀺𑀢𑀁 𑀲𑀻𑀲𑀁 𑀦 𑀑𑀢𑀭𑀢𑀺, 𑀢𑀲𑁆𑀫𑀸 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀫𑁄𑀳𑀸 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀧𑀤𑀧𑀭𑀺𑀬𑁄𑀲𑀸𑀦𑀸𑀬𑁂𑀯 𑀲𑀩𑁆𑀩𑀢𑁆𑀣 𑀬𑁄𑀚𑀦𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺 𑀧𑀝𑀺𑀧𑀸𑀝𑀺𑀬𑀸 𑀯𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀳𑀺 𑀖𑀝𑁂𑀢𑁆𑀯𑀸 𑀯𑀸 𑀅𑀖𑀝𑁂𑀢𑁆𑀯𑀸 𑀯𑀸 𑀲𑀫𑀸𑀧𑀚𑁆𑀚𑀺𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀮𑁆𑀮𑀧𑀢𑁄 𑀫𑁄𑀓𑁆𑀔𑁄 𑀦𑀢𑁆𑀣𑀺, 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺𑀬𑁂𑀯𑀸𑀢𑀺.

𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁂 𑀘 𑀧𑀦𑁂𑀢𑀲𑁆𑀫𑀺𑀁 𑀲𑀼𑀤𑁆𑀥𑀺𑀓𑀫𑀳𑀸𑀯𑀸𑀭𑁂 𑀅𑀬𑀁 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑁆𑀲 𑀅𑀗𑁆𑀕𑀪𑀽𑀢𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂𑀬𑁂𑀯 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺. 𑀪𑀡𑀦𑁆𑀢𑀲𑁆𑀲 𑀳𑁄𑀢𑀻𑀢𑀺 𑀪𑀡𑀫𑀸𑀦𑀲𑁆𑀲 𑀳𑁄𑀢𑀺. 𑀪𑀡𑀺𑀢𑀲𑁆𑀲 𑀳𑁄𑀢𑀻𑀢𑀺 𑀪𑀡𑀺𑀢𑁂 𑀅𑀲𑁆𑀲 𑀳𑁄𑀢𑀺, 𑀬𑀁 𑀯𑀢𑁆𑀢𑀩𑁆𑀩𑀁 𑀢𑀲𑁆𑀫𑀺𑀁 𑀯𑀼𑀢𑁆𑀢𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀪𑀡𑀺𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀯𑀢𑁄 𑀦𑀺𑀝𑁆𑀞𑀺𑀢𑀯𑀘𑀦𑀲𑁆𑀲 𑀳𑁄𑀢𑀻𑀢𑀺. 𑀬𑁄 𑀏𑀯𑀁 𑀧𑀼𑀩𑁆𑀩𑀪𑀸𑀕𑁂𑀧𑀺 𑀚𑀸𑀦𑀸𑀢𑀺, 𑀪𑀡𑀦𑁆𑀢𑁄𑀧𑀺 𑀚𑀸𑀦𑀸𑀢𑀺, 𑀧𑀘𑁆𑀙𑀸𑀧𑀺 𑀚𑀸𑀦𑀸𑀢𑀺, ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀲𑁄 ‘‘𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺 𑀪𑀡𑀦𑁆𑀢𑁄 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀓𑀺𑀜𑁆𑀘𑀸𑀧𑀺 𑀤𑀲𑁆𑀲𑀺𑀢𑁄, 𑀅𑀣 𑀔𑁄 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀧𑀼𑀘𑁆𑀙𑀸 𑀢𑀸𑀯 𑀳𑁄𑀢𑀺 ‘‘‘𑀫𑀼𑀲𑀸 𑀪𑀡𑀺𑀲𑁆𑀲’𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑁄 𑀅𑀢𑁆𑀣𑀺, ‘𑀫𑀼𑀲𑀸 𑀫𑀬𑀸 𑀪𑀡𑀺𑀢’𑀦𑁆𑀢𑀺 𑀧𑀘𑁆𑀙𑀸𑀪𑀸𑀕𑁄 𑀦𑀢𑁆𑀣𑀺, 𑀯𑀼𑀢𑁆𑀢𑀫𑀢𑁆𑀢𑀫𑁂𑀯 𑀳𑀺 𑀓𑁄𑀘𑀺 𑀧𑀫𑀼𑀲𑁆𑀲𑀢𑀺, 𑀓𑀺𑀁 𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺, 𑀦 𑀳𑁄𑀢𑀻’’𑀢𑀺? 𑀲𑀸 𑀏𑀯𑀁 𑀅𑀝𑁆𑀞𑀓𑀣𑀸𑀲𑀼 𑀯𑀺𑀲𑁆𑀲𑀚𑁆𑀚𑀺𑀢𑀸 𑁋 𑀧𑀼𑀩𑁆𑀩𑀪𑀸𑀕𑁂 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺 𑀘 𑀪𑀡𑀦𑁆𑀢𑀲𑁆𑀲 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀘 𑀚𑀸𑀦𑀢𑁄 𑀧𑀘𑁆𑀙𑀸𑀪𑀸𑀕𑁂 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀦 𑀲𑀓𑁆𑀓𑀸 𑀦 𑀪𑀯𑀺𑀢𑀼𑀁. 𑀲𑀘𑁂𑀧𑀺 𑀦 𑀳𑁄𑀢𑀺 𑀧𑀸𑀭𑀸𑀚𑀺𑀓𑀫𑁂𑀯. 𑀧𑀼𑀭𑀺𑀫𑀫𑁂𑀯 𑀳𑀺 𑀅𑀗𑁆𑀕𑀤𑁆𑀯𑀬𑀁 𑀧𑀫𑀸𑀡𑀁. 𑀬𑀲𑁆𑀲𑀸𑀧𑀺 𑀧𑀼𑀩𑁆𑀩𑀪𑀸𑀕𑁂 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺 𑀆𑀪𑁄𑀕𑁄 𑀦𑀢𑁆𑀣𑀺, 𑀪𑀡𑀦𑁆𑀢𑁄 𑀧𑀦 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀚𑀸𑀦𑀸𑀢𑀺, 𑀪𑀡𑀺𑀢𑁂𑀧𑀺 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀚𑀸𑀦𑀸𑀢𑀺, 𑀲𑁄 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄. 𑀧𑀼𑀩𑁆𑀩𑀪𑀸𑀕𑁄 𑀳𑀺 𑀧𑀫𑀸𑀡𑀢𑀭𑁄. 𑀢𑀲𑁆𑀫𑀺𑀁 𑀅𑀲𑀢𑀺 𑀤𑀯𑀸 𑀪𑀡𑀺𑀢𑀁 𑀯𑀸 𑀭𑀯𑀸 𑀪𑀡𑀺𑀢𑀁 𑀯𑀸 𑀳𑁄𑀢𑀻’’𑀢𑀺.

𑀏𑀢𑁆𑀣 𑀘 𑀢𑀁𑀜𑀸𑀡𑀢𑀸 𑀘 𑀜𑀸𑀡𑀲𑀫𑁄𑀥𑀸𑀦𑀜𑁆𑀘 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁. 𑀢𑀁𑀜𑀸𑀡𑀢𑀸 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸𑀢𑀺 𑀬𑁂𑀦 𑀘𑀺𑀢𑁆𑀢𑁂𑀦 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺 𑀚𑀸𑀦𑀸𑀢𑀺, 𑀢𑁂𑀦𑁂𑀯 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺 𑀘 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺 𑀘 𑀚𑀸𑀦𑀸𑀢𑀻𑀢𑀺 𑀏𑀯𑀁 𑀏𑀓𑀘𑀺𑀢𑁆𑀢𑁂𑀦𑁂𑀯 𑀢𑀻𑀲𑀼 𑀔𑀡𑁂𑀲𑀼 𑀚𑀸𑀦𑀸𑀢𑀻𑀢𑀺 𑀅𑀬𑀁 𑀢𑀁𑀜𑁆𑀜𑀡𑀢𑀸 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸, 𑀦 𑀳𑀺 𑀲𑀓𑁆𑀓𑀸 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀢𑀁 𑀘𑀺𑀢𑁆𑀢𑀁 𑀚𑀸𑀦𑀺𑀢𑀼𑀁 𑀬𑀣𑀸 𑀦 𑀲𑀓𑁆𑀓𑀸 𑀢𑁂𑀦𑁂𑀯 𑀅𑀲𑀺𑀦𑀸 𑀲𑁄 𑀅𑀲𑀺 𑀙𑀺𑀦𑁆𑀤𑀺𑀢𑀼𑀦𑁆𑀢𑀺. 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀧𑀦 𑀘𑀺𑀢𑁆𑀢𑀁 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀣𑀸 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀫𑀸𑀡𑀁 𑀧𑀼𑀩𑁆𑀩𑀪𑀸𑀕𑁄𑀯, 𑀢𑀲𑁆𑀫𑀺𑀁 𑀲𑀢𑀺 𑀦 𑀳𑁂𑀲𑁆𑀲𑀢𑀺;

𑀲𑁂𑀲𑀤𑁆𑀯𑀬𑀦𑁆𑀢𑀺 𑀦𑀢𑁆𑀣𑁂𑀢, 𑀫𑀺𑀢𑀺 𑀯𑀸𑀘𑀸 𑀢𑀺𑀯𑀗𑁆𑀕𑀺𑀓𑀸’’𑀢𑀺.

‘‘𑀜𑀸𑀡𑀲𑀫𑁄𑀥𑀸𑀦𑀁 𑀧𑀭𑀺𑀘𑁆𑀘𑀚𑀺𑀢𑀩𑁆𑀩’’𑀦𑁆𑀢𑀺 𑀏𑀢𑀸𑀦𑀺 𑀢𑀻𑀡𑀺 𑀘𑀺𑀢𑁆𑀢𑀸𑀦𑀺 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺. 𑀇𑀤𑀜𑁆𑀳𑀺 𑀘𑀺𑀢𑁆𑀢𑀁 𑀦𑀸𑀫 𑁋

𑀅𑀦𑀺𑀭𑀼𑀤𑁆𑀥𑀫𑁆𑀳𑀺 𑀧𑀞𑀫𑁂, 𑀦 𑀉𑀧𑁆𑀧𑀚𑁆𑀚𑀢𑀺 𑀧𑀘𑁆𑀙𑀺𑀫𑀁;

𑀦𑀺𑀭𑀦𑁆𑀢𑀭𑀼𑀧𑁆𑀧𑀚𑁆𑀚𑀦𑀢𑁄, 𑀏𑀓𑀁 𑀯𑀺𑀬 𑀧𑀓𑀸𑀲𑀢𑀺.

𑀇𑀢𑁄 𑀧𑀭𑀁 𑀧𑀦 𑀬𑁆𑀯𑀸𑀬𑀁 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀢𑀺, 𑀬𑀲𑁆𑀫𑀸 𑀲𑁄 ‘‘𑀦𑀢𑁆𑀣𑀺 𑀫𑁂 𑀧𑀞𑀫𑀁 𑀛𑀸𑀦’’𑀦𑁆𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀳𑀺 𑀅𑀢𑁆𑀣𑁂𑀯𑀸𑀬𑀁 𑀮𑀤𑁆𑀥𑀺. 𑀢𑀣𑀸 ‘‘𑀦𑀢𑁆𑀣𑀺 𑀫𑁂 𑀧𑀞𑀫𑀁 𑀛𑀸𑀦’’𑀦𑁆𑀢𑀺 𑀏𑀯𑀫𑀲𑁆𑀲 𑀔𑀫𑀢𑀺 𑀘𑁂𑀯 𑀭𑀼𑀘𑁆𑀘𑀢𑀺 𑀘. 𑀏𑀯𑀁𑀲𑀪𑀸𑀯𑀫𑁂𑀯 𑀘𑀲𑁆𑀲 𑀘𑀺𑀢𑁆𑀢𑀁 ‘‘𑀦𑀢𑁆𑀣𑀺 𑀫𑁂 𑀧𑀞𑀫𑀁 𑀛𑀸𑀦’’𑀦𑁆𑀢𑀺. 𑀬𑀤𑀸 𑀧𑀦 𑀫𑀼𑀲𑀸 𑀯𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀢𑀁 𑀤𑀺𑀝𑁆𑀞𑀺𑀁 𑀯𑀸 𑀤𑀺𑀝𑁆𑀞𑀺𑀬𑀸 𑀲𑀳 𑀔𑀦𑁆𑀢𑀺𑀁 𑀯𑀸 𑀤𑀺𑀝𑁆𑀞𑀺𑀔𑀦𑁆𑀢𑀻𑀳𑀺 𑀲𑀤𑁆𑀥𑀺𑀁 𑀭𑀼𑀘𑀺𑀁 𑀯𑀸, 𑀤𑀺𑀝𑁆𑀞𑀺𑀔𑀦𑁆𑀢𑀺𑀭𑀼𑀘𑀻𑀳𑀺 𑀲𑀤𑁆𑀥𑀺𑀁 𑀪𑀸𑀯𑀁 𑀯𑀸 𑀯𑀺𑀦𑀺𑀥𑀸𑀬 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀪𑀽𑀢𑀁 𑀓𑀢𑁆𑀯𑀸 𑀪𑀡𑀢𑀺, 𑀢𑀲𑁆𑀫𑀸 𑀢𑁂𑀲𑀫𑁆𑀧𑀺 𑀯𑀲𑁂𑀦 𑀅𑀗𑁆𑀕𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀽𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀯𑀸𑀭𑁂 𑀘 ‘‘𑀅𑀝𑁆𑀞𑀗𑁆𑀕𑀺𑀓𑁄 𑀫𑀼𑀲𑀸𑀯𑀸𑀤𑁄’’𑀢𑀺 (𑀧𑀝𑀺. 𑁩𑁨𑁮) 𑀯𑀼𑀢𑁆𑀢𑀢𑁆𑀢𑀸 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀸𑀬 𑀲𑀜𑁆𑀜𑀸𑀬 𑀲𑀤𑁆𑀥𑀺𑀁 𑀅𑀜𑁆𑀜𑁄𑀧𑀺 𑀇𑀥 ‘‘𑀅𑀝𑁆𑀞𑀳𑀸𑀓𑀸𑀭𑁂𑀳𑀻’’𑀢𑀺 𑀏𑀓𑁄 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄.

𑀏𑀢𑁆𑀣 𑀘 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀦𑁆𑀢𑀺 𑀩𑀮𑀯𑀥𑀫𑁆𑀫𑀯𑀺𑀦𑀺𑀥𑀸𑀦𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀦𑁆𑀢𑀺𑀆𑀤𑀻𑀦𑀺 𑀢𑀢𑁄 𑀤𑀼𑀩𑁆𑀩𑀮𑀤𑀼𑀩𑁆𑀩𑀮𑀸𑀦𑀁 𑀯𑀺𑀦𑀺𑀥𑀸𑀦𑀯𑀲𑁂𑀦. 𑀯𑀺𑀦𑀺𑀥𑀸𑀬 𑀲𑀜𑁆𑀜𑀦𑁆𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀲𑀩𑁆𑀩𑀤𑀼𑀩𑁆𑀩𑀮𑀥𑀫𑁆𑀫𑀯𑀺𑀦𑀺𑀥𑀸𑀦𑀁. 𑀲𑀜𑁆𑀜𑀸𑀫𑀢𑁆𑀢𑀫𑁆𑀧𑀺 𑀦𑀸𑀫 𑀅𑀯𑀺𑀦𑀺𑀥𑀸𑀬 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑀲𑁆𑀫𑀸 𑀧𑀦 ‘‘𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀅𑀦𑀸𑀕𑀢𑀯𑀘𑀦𑁂𑀦 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺𑀆𑀤𑀻𑀦𑀺 𑀅𑀢𑀻𑀢𑀯𑀢𑁆𑀢𑀫𑀸𑀦𑀧𑀤𑀸𑀦𑁂𑀯 𑀧𑀸𑀞𑁂 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁨𑁦𑁭. 𑀇𑀢𑁄 𑀧𑀭𑀁 𑀲𑀩𑁆𑀩𑀫𑁆𑀧𑀺 𑀇𑀫𑀲𑁆𑀫𑀺𑀁 𑀲𑀼𑀤𑁆𑀥𑀺𑀓𑀫𑀳𑀸𑀯𑀸𑀭𑁂 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀦 𑀳𑁂𑀢𑁆𑀣 𑀢𑀁 𑀅𑀢𑁆𑀣𑀺 𑁋 𑀬𑀁 𑀇𑀫𑀺𑀦𑀸 𑀯𑀺𑀦𑀺𑀘𑁆𑀙𑀬𑁂𑀦 𑀦 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀯𑀺𑀜𑁆𑀜𑀸𑀢𑀼𑀁, 𑀞𑀧𑁂𑀢𑁆𑀯𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀧𑀤𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀭𑀸𑀕𑁄 𑀫𑁂 𑀘𑀢𑁆𑀢𑁄 𑀯𑀦𑁆𑀢𑁄’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑀁. 𑀲𑁆𑀯𑀸𑀬𑀁 𑀯𑀼𑀘𑁆𑀘𑀢𑀺 𑁋 𑀏𑀢𑁆𑀣 𑀳𑀺 𑀘𑀢𑁆𑀢𑁄𑀢𑀺 𑀇𑀤𑀁 𑀲𑀓𑀪𑀸𑀯𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀦𑁆𑀢𑁄𑀢𑀺 𑀇𑀤𑀁 𑀧𑀼𑀦 𑀅𑀦𑀸𑀤𑀺𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦. 𑀫𑀼𑀢𑁆𑀢𑁄𑀢𑀺 𑀇𑀤𑀁 𑀲𑀦𑁆𑀢𑀢𑀺𑀢𑁄 𑀯𑀺𑀫𑁄𑀘𑀦𑀯𑀲𑁂𑀦. 𑀧𑀳𑀻𑀦𑁄𑀢𑀺 𑀇𑀤𑀁 𑀫𑀼𑀢𑁆𑀢𑀲𑁆𑀲𑀸𑀧𑀺 𑀓𑁆𑀯𑀘𑀺 𑀅𑀦𑀯𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦. 𑀧𑀝𑀺𑀦𑀺𑀲𑁆𑀲𑀝𑁆𑀞𑁄𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀆𑀤𑀺𑀦𑁆𑀦𑀧𑀼𑀩𑁆𑀩𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀤𑀲𑁆𑀲𑀦𑀯𑀲𑁂𑀦. 𑀉𑀓𑁆𑀔𑁂𑀝𑀺𑀢𑁄𑀢𑀺 𑀇𑀤𑀁 𑀅𑀭𑀺𑀬𑀫𑀕𑁆𑀕𑁂𑀦 𑀉𑀢𑁆𑀢𑀸𑀲𑀺𑀢𑀢𑁆𑀢𑀸 𑀧𑀼𑀦 𑀅𑀦𑀮𑁆𑀮𑀻𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦. 𑀲𑁆𑀯𑀸𑀬𑀫𑀢𑁆𑀣𑁄 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀲𑀫𑀼𑀓𑁆𑀔𑁂𑀝𑀺𑀢𑁄𑀢𑀺 𑀇𑀤𑀁 𑀲𑀼𑀝𑁆𑀞𑀼 𑀉𑀢𑁆𑀢𑀸𑀲𑁂𑀢𑁆𑀯𑀸 𑀅𑀡𑀼𑀲𑀳𑀕𑀢𑀲𑁆𑀲𑀸𑀧𑀺 𑀧𑀼𑀦 𑀅𑀦𑀮𑁆𑀮𑀻𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺.

𑀲𑀼𑀤𑁆𑀥𑀺𑀓𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑀢𑁆𑀢𑀼𑀓𑀸𑀫𑀯𑀸𑀭𑀓𑀣𑀸

𑁨𑁧𑁫. 𑀯𑀢𑁆𑀢𑀼𑀓𑀸𑀫𑀯𑀸𑀭𑁂𑀧𑀺 ‘‘𑀢𑀻𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀻𑀦𑀁 𑀅𑀢𑁆𑀣𑁄, 𑀯𑀸𑀭𑀧𑁂𑀬𑁆𑀬𑀸𑀮𑀧𑁆𑀧𑀪𑁂𑀤𑁄 𑀘 𑀲𑀩𑁆𑀩𑁄 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀳𑀺 𑀬𑀁 ‘‘𑀫𑀬𑀸 𑀯𑀺𑀭𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀁 𑀯𑀢𑁆𑀢𑀼𑀓𑀸𑀫𑁂𑀦 𑀅𑀜𑁆𑀜𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦𑀢𑁆𑀣𑀺 𑀫𑀬𑁆𑀳𑀁 𑀆𑀧𑀢𑁆𑀢𑀻’’𑀢𑀺 𑀏𑀯𑀁 𑀑𑀓𑀸𑀲𑀕𑀯𑁂𑀲𑀓𑀸𑀦𑀁 𑀧𑀸𑀧𑀧𑀼𑀕𑁆𑀕𑀮𑀸𑀦𑀁 𑀑𑀓𑀸𑀲𑀦𑀺𑀲𑁂𑀥𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀬𑀣𑁂𑀯 𑀳𑀺 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺 𑀯𑀢𑁆𑀢𑀼𑀓𑀸𑀫𑁄 ‘‘𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀻’’𑀢𑀺𑀆𑀤𑀻𑀲𑀼 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀧𑀤𑁂𑀲𑀼 𑀬𑀁 𑀯𑀸 𑀢𑀁 𑀯𑀸 𑀯𑀤𑀦𑁆𑀢𑁄𑀧𑀺 𑀔𑁂𑀢𑁆𑀢𑁂 𑀑𑀢𑀺𑀡𑁆𑀡𑀢𑁆𑀢𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄𑀯 𑀳𑁄𑀢𑀺; 𑀏𑀯𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀤𑁂𑀲𑀼 𑀬𑀁𑀓𑀺𑀜𑁆𑀘𑀺 𑀏𑀓𑀁 𑀯𑀢𑁆𑀢𑀼𑀓𑀸𑀫𑁄 𑀢𑀢𑁄 𑀅𑀜𑁆𑀜𑀁 𑀬𑀁 𑀯𑀸 𑀢𑀁 𑀯𑀸 𑀯𑀤𑀦𑁆𑀢𑁄𑀧𑀺 𑀔𑁂𑀢𑁆𑀢𑁂 𑀑𑀢𑀺𑀡𑁆𑀡𑀢𑁆𑀢𑀸 𑀧𑀸𑀭𑀸𑀚𑀺𑀓𑁄𑀯 𑀳𑁄𑀢𑀺. 𑀲𑀘𑁂 𑀬𑀲𑁆𑀲 𑀯𑀤𑀢𑀺, 𑀲𑁄 𑀢𑀫𑀢𑁆𑀣𑀁 𑀢𑀗𑁆𑀔𑀡𑀜𑁆𑀜𑁂𑀯 𑀚𑀸𑀦𑀸𑀢𑀺. 𑀚𑀸𑀦𑀦𑀮𑀓𑁆𑀔𑀡𑀜𑁆𑀘𑁂𑀢𑁆𑀣 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀁 𑀳𑀢𑁆𑀣𑀫𑀼𑀤𑁆𑀤𑀸𑀬 𑀲𑀻𑀲𑀁 𑀦 𑀑𑀢𑀭𑀢𑀺. 𑀇𑀤𑀁 𑀅𑀪𑀽𑀢𑀸𑀭𑁄𑀘𑀦𑀁 𑀳𑀢𑁆𑀣𑀫𑀼𑀤𑁆𑀤𑀸𑀬𑀧𑀺 𑀑𑀢𑀭𑀢𑀺. 𑀬𑁄 𑀳𑀺 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀳𑀺𑀧𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀘𑁄𑀧𑀦𑁂𑀳𑀺 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀯𑀺𑀜𑁆𑀜𑀢𑁆𑀢𑀺𑀧𑀣𑁂 𑀞𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄 𑀘 𑀢𑀫𑀢𑁆𑀣𑀁 𑀚𑀸𑀦𑀸𑀢𑀺, 𑀧𑀸𑀭𑀸𑀚𑀺𑀓𑁄𑀯 𑀳𑁄𑀢𑀺. 𑀅𑀣 𑀧𑀦 𑀬𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄 𑀦 𑀚𑀸𑀦𑀸𑀢𑀺 ‘‘𑀓𑀺 𑀅𑀬𑀁 𑀪𑀡𑀢𑀻’’𑀢𑀺, 𑀲𑀁𑀲𑀬𑀁 𑀯𑀸 𑀆𑀧𑀚𑁆𑀚𑀢𑀺, 𑀘𑀺𑀭𑀁 𑀯𑀻𑀫𑀁𑀲𑀺𑀢𑁆𑀯𑀸 𑀯𑀸 𑀧𑀘𑁆𑀙𑀸 𑀚𑀸𑀦𑀸𑀢𑀺, 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀇𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀯𑀁 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀯𑀼𑀢𑁆𑀢𑁂 𑀣𑀼𑀮𑁆𑀮𑀘𑁆𑀘𑀬𑀁 𑀳𑁄𑀢𑀺. 𑀬𑁄 𑀧𑀦 𑀛𑀸𑀦𑀸𑀤𑀻𑀦𑀺 𑀅𑀢𑁆𑀢𑀦𑁄 𑀅𑀥𑀺𑀕𑀫𑀯𑀲𑁂𑀦 𑀯𑀸 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀯𑀸 𑀦 𑀚𑀸𑀦𑀸𑀢𑀺, 𑀓𑁂𑀯𑀮𑀁 𑀛𑀸𑀦𑀦𑁆𑀢𑀺 𑀯𑀸 𑀯𑀺𑀫𑁄𑀓𑁆𑀔𑁄𑀢𑀺 𑀯𑀸 𑀯𑀘𑀦𑀫𑀢𑁆𑀢𑀫𑁂𑀯 𑀲𑀼𑀢𑀁 𑀳𑁄𑀢𑀺, 𑀲𑁄𑀧𑀺 𑀢𑁂𑀦 𑀯𑀼𑀢𑁆𑀢𑁂 ‘‘𑀛𑀸𑀦𑀁 𑀓𑀺𑀭 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀏𑀲 𑀯𑀤𑀢𑀻’’𑀢𑀺 𑀬𑀤𑀺 𑀏𑀢𑁆𑀢𑀓𑀫𑀢𑁆𑀢𑀫𑁆𑀧𑀺 𑀚𑀸𑀦𑀸𑀢𑀺, 𑀚𑀸𑀦𑀸𑀢𑀺𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀲𑁆𑀲 𑀯𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀫𑁂𑀯. 𑀲𑁂𑀲𑁄 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀩𑀳𑀽𑀦𑀁 𑀯𑀸 𑀦𑀺𑀬𑀫𑀺𑀢𑀸𑀦𑀺𑀬𑀫𑀺𑀢𑀯𑀲𑁂𑀦 𑀯𑀺𑀲𑁂𑀲𑁄 𑀲𑀩𑁆𑀩𑁄 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀯𑀢𑁆𑀢𑀼𑀓𑀸𑀫𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀯𑀸𑀭𑀓𑀣𑀸

𑁨𑁨𑁦. 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀯𑀸𑀭𑁂𑀧𑀺 𑁋 𑀲𑀩𑁆𑀩𑀁 𑀯𑀸𑀭𑀧𑁂𑀬𑁆𑀬𑀸𑀮𑀪𑁂𑀤𑀁 𑀧𑀼𑀩𑁆𑀩𑁂 𑀆𑀕𑀢𑀧𑀤𑀸𑀦𑀜𑁆𑀘 𑀅𑀢𑁆𑀣𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀢𑁆𑀯𑀸 𑀧𑀸𑀴𑀺𑀓𑁆𑀓𑀫𑁄 𑀢𑀸𑀯 𑀏𑀯𑀁 𑀚𑀸𑀦𑀺𑀢𑀩𑁆𑀩𑁄. 𑀏𑀢𑁆𑀣 𑀳𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀺, 𑀬𑁄 𑀢𑁂 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺, 𑀬𑁄 𑀢𑁂 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺, 𑀬𑁄 𑀢𑁂 𑀲𑁂𑀦𑀸𑀲𑀦𑀁 𑀧𑀭𑀺𑀪𑀼𑀜𑁆𑀚𑀺, 𑀬𑁄 𑀢𑁂 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀻’’𑀢𑀺 𑀇𑀫𑁂 𑀧𑀜𑁆𑀘 𑀧𑀘𑁆𑀘𑀢𑁆𑀢𑀯𑀘𑀦𑀯𑀸𑀭𑀸, ‘‘𑀬𑁂𑀦 𑀢𑁂 𑀯𑀺𑀳𑀸𑀭𑁄 𑀧𑀭𑀺𑀪𑀼𑀢𑁆𑀢𑁄’’𑀢𑀺𑀆𑀤𑀬𑁄 𑀧𑀜𑁆𑀘 𑀓𑀭𑀡𑀯𑀘𑀦𑀯𑀸𑀭𑀸, ‘‘𑀬𑀁 𑀢𑁆𑀯𑀁 𑀆𑀕𑀫𑁆𑀫 𑀯𑀺𑀳𑀸𑀭𑀁 𑀅𑀤𑀸𑀲𑀻’’𑀢𑀺𑀆𑀤𑀬𑁄 𑀧𑀜𑁆𑀘 𑀉𑀧𑀬𑁄𑀕𑀯𑀘𑀦𑀯𑀸𑀭𑀸 𑀯𑀼𑀢𑁆𑀢𑀸, 𑀢𑁂𑀲𑀁 𑀯𑀲𑁂𑀦 𑀇𑀥 𑀯𑀼𑀢𑁆𑀢𑁂𑀦 𑀲𑀼𑀜𑁆𑀜𑀸𑀕𑀸𑀭𑀧𑀤𑁂𑀦 𑀲𑀤𑁆𑀥𑀺𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀲𑀼 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼 𑀯𑀸𑀭𑀧𑁂𑀬𑁆𑀬𑀸𑀮𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀬𑁄 𑀢𑁂 𑀯𑀺𑀳𑀸𑀭𑁂, 𑀬𑁂𑀦 𑀢𑁂 𑀯𑀺𑀳𑀸𑀭𑁄, 𑀬𑀁 𑀢𑁆𑀯𑀁 𑀆𑀕𑀫𑁆𑀫 𑀯𑀺𑀳𑀸𑀭’’𑀦𑁆𑀢𑀺 𑀏𑀯𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀦 ‘‘𑀅𑀳’’𑀦𑁆𑀢𑀺 𑀘 𑀅𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀯𑀼𑀢𑁆𑀢𑁂𑀧𑀺 𑀇𑀥 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄.

𑀅𑀦𑀸𑀧𑀢𑁆𑀢𑀺𑀪𑁂𑀤𑀓𑀣𑀸

𑀏𑀯𑀁 𑀯𑀺𑀢𑁆𑀣𑀸𑀭𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀸𑀧𑀢𑁆𑀢𑀺 𑀅𑀥𑀺𑀫𑀸𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀥𑀺𑀫𑀸𑀦𑁂𑀦𑀸𑀢𑀺 𑀅𑀥𑀺𑀕𑀢𑀫𑀸𑀦𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸𑀢𑀺 𑀓𑁄𑀳𑀜𑁆𑀜𑁂 𑀇𑀘𑁆𑀙𑀸𑀘𑀸𑀭𑁂 𑀅𑀞𑀢𑁆𑀯𑀸 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀦𑁆𑀢𑀺𑀓𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀉𑀫𑁆𑀫𑀢𑁆𑀢𑀓𑀸𑀤𑀬𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀏𑀯. 𑀇𑀥 𑀧𑀦 𑀆𑀤𑀺𑀓𑀫𑁆𑀫𑀺𑀓𑀸 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸 𑀪𑀺𑀓𑁆𑀔𑀽. 𑀢𑁂𑀲𑀁 𑀅𑀦𑀸𑀧𑀢𑁆𑀢𑀻𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀳𑀢𑁆𑀣𑀫𑀼𑀤𑁆𑀤𑀸𑀬 𑀆𑀭𑁄𑀘𑁂𑀦𑁆𑀢𑀲𑁆𑀲 𑀓𑀸𑀬𑀘𑀺𑀢𑁆𑀢𑀢𑁄, 𑀯𑀘𑀻𑀪𑁂𑀤𑁂𑀦 𑀆𑀭𑁄𑀘𑁂𑀦𑁆𑀢𑀲𑁆𑀲 𑀯𑀸𑀘𑀸𑀘𑀺𑀢𑁆𑀢𑀢𑁄, 𑀉𑀪𑀬𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀁 𑀳𑀲𑀦𑁆𑀢𑁄𑀧𑀺 𑀳𑀺 𑀲𑁄𑀫𑀦𑀲𑁆𑀲𑀺𑀓𑁄 𑀉𑀮𑁆𑀮𑀧𑀢𑀺 𑀪𑀸𑀬𑀦𑁆𑀢𑁄𑀧𑀺 𑀫𑀚𑁆𑀛𑀢𑁆𑀢𑁄𑀧𑀻𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁨𑁩. 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑁋 𑀅𑀥𑀺𑀫𑀸𑀦𑀯𑀢𑁆𑀣𑀼 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀼𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀁 𑁋 𑀧𑀡𑀺𑀥𑀸𑀬𑀸𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸. 𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻𑀢𑀺 𑀏𑀯𑀁 𑀅𑀭𑀜𑁆𑀜𑁂 𑀯𑀲𑀦𑁆𑀢𑀁 𑀫𑀁 𑀚𑀦𑁄 𑀅𑀭𑀳𑀢𑁆𑀢𑁂 𑀯𑀸 𑀲𑁂𑀓𑁆𑀔𑀪𑀽𑀫𑀺𑀬𑀁 𑀯𑀸 𑀲𑀫𑁆𑀪𑀸𑀯𑁂𑀲𑁆𑀲𑀢𑀺, 𑀢𑀢𑁄 𑀮𑁄𑀓𑀲𑁆𑀲 𑀲𑀓𑁆𑀓𑀢𑁄 𑀪𑀯𑀺𑀲𑁆𑀲𑀸𑀫𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀧𑀡𑀺𑀥𑀸𑀬 ‘‘𑀅𑀭𑀜𑁆𑀜𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁. 𑀢𑀣𑀸 𑀅𑀭𑀜𑁆𑀜𑁂 𑀓𑀼𑀝𑀺𑀓𑀭𑀡𑀘𑀗𑁆𑀓𑀫𑀦𑀦𑀺𑀲𑀻𑀤𑀦𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀸𑀤𑀻𑀲𑀼 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀢𑀲𑁆𑀫𑀸 𑀏𑀯𑀁 𑀅𑀭𑀜𑁆𑀜𑁂 𑀦 𑀯𑀲𑀺𑀢𑀩𑁆𑀩𑀁. 𑀏𑀯𑀁 𑀯𑀲𑀦𑁆𑀢𑁄 𑀳𑀺 𑀲𑀫𑁆𑀪𑀸𑀯𑀦𑀁 𑀮𑀪𑀢𑀼 𑀯𑀸 𑀫𑀸 𑀯𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀬𑁄 𑀧𑀦 𑀲𑀫𑀸𑀤𑀺𑀦𑁆𑀦𑀥𑀼𑀢𑀗𑁆𑀕𑁄 ‘‘𑀥𑀼𑀢𑀗𑁆𑀕𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀕𑀸𑀫𑀦𑁆𑀢𑁂 𑀫𑁂 𑀯𑀲𑀢𑁄 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀺, 𑀅𑀭𑀜𑁆𑀜𑀁 𑀲𑀧𑁆𑀧𑀸𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸 ‘‘𑀅𑀤𑁆𑀥𑀸 𑀅𑀭𑀜𑁆𑀜𑁂 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀁 𑀅𑀜𑁆𑀜𑀢𑀭𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀦 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀅𑀭𑀜𑁆𑀜𑀯𑀸𑀲𑁄 𑀦𑀸𑀫 𑀪𑀕𑀯𑀢𑀸 𑀧𑀲𑀢𑁆𑀣𑁄, 𑀫𑀬𑀺 𑀘 𑀅𑀭𑀜𑁆𑀜𑁂 𑀯𑀲𑀦𑁆𑀢𑁂 𑀩𑀳𑀽 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀕𑀸𑀫𑀦𑁆𑀢𑀁 𑀳𑀺𑀢𑁆𑀯𑀸 𑀆𑀭𑀜𑁆𑀜𑀓𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀸 𑀏𑀯𑀁 𑀅𑀦𑀯𑀚𑁆𑀚𑀯𑀸𑀲𑀁 𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀦 𑀯𑀲𑀺𑀢𑀩𑁆𑀩𑀁.

𑀢𑀢𑀺𑀬𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀦𑀺 𑀲𑀡𑁆𑀞𑀧𑁂𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀓𑀺𑀘𑁆𑀘𑀢𑁄 𑀧𑀪𑀼𑀢𑀺 𑀬𑀸𑀯 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑀁 𑀢𑀸𑀯 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀲𑀫𑁆𑀪𑀸𑀯𑀦𑀁 𑀮𑀪𑀢𑀼 𑀯𑀸 𑀫𑀸 𑀯𑀸 𑀤𑀼𑀓𑁆𑀓𑀝𑀫𑁂𑀯. 𑀔𑀦𑁆𑀥𑀓𑀯𑀢𑁆𑀢𑀲𑁂𑀔𑀺𑀬𑀯𑀢𑁆𑀢𑀧𑀭𑀺𑀧𑀽𑀭𑀡𑀢𑁆𑀣𑀁 𑀧𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁆𑀣𑀁 𑀯𑀸 𑀧𑀸𑀲𑀸𑀤𑀺𑀓𑁂𑀳𑀺 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀸𑀤𑀻𑀳𑀺 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀅𑀦𑀼𑀧𑀯𑀚𑁆𑀚𑁄 𑀯𑀺𑀜𑁆𑀜𑀽𑀦𑀦𑁆𑀢𑀺.

𑀘𑀢𑀼𑀢𑁆𑀣𑀧𑀜𑁆𑀘𑀫𑀯𑀢𑁆𑀣𑀽𑀲𑀼 𑁋 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 ‘‘𑀅𑀳’’𑀦𑁆𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺. 𑀅𑀢𑁆𑀢𑀼𑀧𑀦𑀸𑀬𑀺𑀓𑀫𑁂𑀯 𑀳𑀺 𑀲𑀫𑀼𑀤𑀸𑀘𑀭𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁.

𑀧𑀡𑀺𑀥𑀸𑀬 𑀘𑀗𑁆𑀓𑀫𑀻𑀢𑀺𑀆𑀤𑀻𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯.

𑀲𑀁𑀬𑁄𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑁋 𑀲𑀁𑀬𑁄𑀚𑀦𑀸 𑀧𑀳𑀻𑀦𑀸𑀢𑀺𑀧𑀺 ‘‘𑀤𑀲 𑀲𑀁𑀬𑁄𑀚𑀦𑀸 𑀧𑀳𑀻𑀦𑀸’’𑀢𑀺𑀧𑀺 ‘‘𑀏𑀓𑀁 𑀲𑀁𑀬𑁄𑀚𑀦𑀁 𑀧𑀳𑀻𑀦’’𑀦𑁆𑀢𑀺𑀧𑀺 𑀯𑀤𑀢𑁄 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀯 𑀆𑀭𑁄𑀘𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀸𑀭𑀸𑀚𑀺𑀓𑀁.

𑁨𑁨𑁪. 𑀭𑀳𑁄𑀯𑀢𑁆𑀣𑀽𑀲𑀼 𑁋 𑀭𑀳𑁄 𑀉𑀮𑁆𑀮𑀧𑀢𑀻𑀢𑀺 ‘‘𑀭𑀳𑁄𑀕𑀢𑁄 𑀅𑀭𑀳𑀸 𑀅𑀳’’𑀦𑁆𑀢𑀺 𑀯𑀤𑀢𑀺, 𑀦 𑀫𑀦𑀲𑀸 𑀘𑀺𑀦𑁆𑀢𑀺𑀢𑀫𑁂𑀯 𑀓𑀭𑁄𑀢𑀺. 𑀢𑁂𑀦𑁂𑀢𑁆𑀣 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁.

𑀯𑀺𑀳𑀸𑀭𑀯𑀢𑁆𑀣𑀼 𑀉𑀧𑀝𑁆𑀞𑀸𑀦𑀯𑀢𑁆𑀣𑀼 𑀘 𑀯𑀼𑀢𑁆𑀢𑀦𑀬𑀫𑁂𑀯.

𑁨𑁨𑁫. 𑀦 𑀤𑀼𑀓𑁆𑀓𑀭𑀯𑀢𑁆𑀣𑀼𑀲𑁆𑀫𑀺𑀁 𑁋 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀬𑀁 𑀮𑀤𑁆𑀥𑀺 𑁋 ‘‘𑀅𑀭𑀺𑀬𑀧𑀼𑀕𑁆𑀕𑀮𑀸𑀯 𑀪𑀕𑀯𑀢𑁄 𑀲𑀸𑀯𑀓𑀸’’𑀢𑀺. 𑀢𑁂𑀦𑀸𑀳 𑁋 ‘‘𑀬𑁂 𑀔𑁄 𑀢𑁂 𑀪𑀕𑀯𑀢𑁄 𑀲𑀸𑀯𑀓𑀸 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼’’𑀦𑁆𑀢𑀺. 𑀬𑀲𑁆𑀫𑀸 𑀘𑀲𑁆𑀲 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 ‘‘𑀲𑀻𑀮𑀯𑀢𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁂𑀦 𑀦 𑀤𑀼𑀓𑁆𑀓𑀭𑀁 𑀅𑀜𑁆𑀜𑀁 𑀩𑁆𑀬𑀸𑀓𑀸𑀢𑀼𑀁, 𑀧𑀝𑀺𑀩𑀮𑁄 𑀲𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼’’𑀦𑁆𑀢𑀺. 𑀢𑀲𑁆𑀫𑀸 ‘‘𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁄 𑀅𑀳’’𑀦𑁆𑀢𑀺 𑀆𑀳.

𑀯𑀻𑀭𑀺𑀬𑀯𑀢𑁆𑀣𑀼𑀲𑁆𑀫𑀺𑀁 𑀆𑀭𑀸𑀥𑀦𑀻𑀬𑁄𑀢𑀺 𑀲𑀓𑁆𑀓𑀸 𑀆𑀭𑀸𑀥𑁂𑀢𑀼𑀁 𑀲𑀫𑁆𑀧𑀸𑀤𑁂𑀢𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀫𑀘𑁆𑀘𑀼𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀪𑀺𑀓𑁆𑀔𑀼 ‘‘𑀬𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀪𑀸𑀬𑁂𑀬𑁆𑀬. 𑀫𑀬𑁆𑀳𑀁 𑀧𑀦 𑀅𑀯𑀺𑀧𑁆𑀧𑀝𑀺𑀲𑀸𑀭𑀯𑀢𑁆𑀣𑀼𑀓𑀸𑀦𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀲𑀻𑀮𑀸𑀦𑀺, 𑀲𑁆𑀯𑀸𑀳𑀁 𑀓𑀺𑀁 𑀫𑀭𑀡𑀲𑁆𑀲 𑀪𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑀫𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘‘𑀦𑀸𑀳𑀁 𑀆𑀯𑀼𑀲𑁄 𑀫𑀘𑁆𑀘𑀼𑀦𑁄 𑀪𑀸𑀬𑀸𑀫𑀻’’𑀢𑀺 𑀆𑀳. 𑀢𑁂𑀦𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀯𑀺𑀧𑁆𑀧𑀝𑀺𑀲𑀸𑀭𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁄 𑀧𑀭𑀸𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀯𑀻𑀭𑀺𑀬𑀯𑀢𑁆𑀣𑀼𑀲𑀤𑀺𑀲𑀸𑀦𑁂𑀯.

𑀯𑁂𑀤𑀦𑀸𑀯𑀢𑁆𑀣𑀽𑀲𑀼𑀧𑀞𑀫𑀲𑁆𑀫𑀺𑀁 𑀢𑀸𑀯 𑀲𑁄 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀁 𑀞𑀢𑁆𑀯𑀸 ‘‘𑀦𑀸𑀯𑀼𑀲𑁄 𑀲𑀓𑁆𑀓𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀅𑀥𑀺𑀯𑀸𑀲𑁂𑀢𑀼’’𑀦𑁆𑀢𑀺 𑀆𑀳. 𑀢𑁂𑀦𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀤𑀼𑀢𑀺𑀬𑁂 𑀧𑀦 𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀅𑀓𑀢𑁆𑀯𑀸 ‘‘𑀦𑀸𑀯𑀼𑀲𑁄 𑀲𑀓𑁆𑀓𑀸 𑀧𑀼𑀣𑀼𑀚𑁆𑀚𑀦𑁂𑀦𑀸’’𑀢𑀺 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀁.

𑁨𑁨𑁬. 𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀽𑀲𑀼𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀦 𑀓𑁂𑀯𑀮𑀁 ‘‘𑀆𑀬𑀦𑁆𑀢𑀼 𑀪𑁄𑀦𑁆𑀢𑁄 𑀅𑀭𑀳𑀦𑁆𑀢𑁄’’𑀢𑀺 𑀆𑀳. 𑀬𑀁 𑀬𑀁 𑀧𑀦𑀲𑁆𑀲 𑀯𑀘𑀦𑀁 𑀫𑀼𑀔𑀢𑁄 𑀦𑀺𑀕𑁆𑀕𑀘𑁆𑀙𑀢𑀺, 𑀲𑀩𑁆𑀩𑀁 ‘‘𑀅𑀭𑀳𑀦𑁆𑀢𑀸𑀦𑀁 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀣, 𑀧𑀸𑀤𑁄𑀤𑀓𑀁 𑀤𑁂𑀣, 𑀅𑀭𑀳𑀦𑁆𑀢𑁄 𑀧𑀸𑀤𑁂 𑀥𑁄𑀯𑀦𑁆𑀢𑀽’’𑀢𑀺 𑀅𑀭𑀳𑀦𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀁𑀬𑁂𑀯. 𑀢𑀁 𑀧𑀦𑀲𑁆𑀲 𑀧𑀲𑀸𑀤𑀪𑀜𑁆𑀜𑀁 𑀲𑀤𑁆𑀥𑀸𑀘𑀭𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀲𑀤𑁆𑀥𑀸𑀩𑀮𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑀲𑁆𑀲 𑀯𑀘𑀦𑀁. 𑀢𑀲𑁆𑀫𑀸 𑀪𑀕𑀯𑀸 ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀲𑀸𑀤𑀪𑀜𑁆𑀜𑁂’’𑀢𑀺 𑀆𑀳. 𑀏𑀯𑀁 𑀯𑀼𑀘𑁆𑀘𑀫𑀸𑀦𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀦 𑀳𑀝𑁆𑀞𑀢𑀼𑀝𑁆𑀞𑁂𑀦𑁂𑀯 𑀧𑀘𑁆𑀘𑀬𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸, ‘‘𑀅𑀭𑀳𑀢𑁆𑀢𑀲𑀫𑁆𑀧𑀸𑀧𑀺𑀓𑀁 𑀧𑀝𑀺𑀧𑀤𑀁 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀬𑁄𑀕𑁄 𑀓𑀭𑀡𑀻𑀬𑁄𑀢𑀺.

𑀅𑀜𑁆𑀜𑀩𑁆𑀬𑀸𑀓𑀭𑀡𑀯𑀢𑁆𑀣𑀽𑀦𑀺𑀲𑀁𑀬𑁄𑀚𑀦𑀯𑀢𑁆𑀣𑀼𑀲𑀤𑀺𑀲𑀸𑀦𑁂𑀯. 𑀅𑀕𑀸𑀭𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀪𑀺𑀓𑁆𑀔𑀼 𑀕𑀺𑀳𑀺𑀪𑀸𑀯𑁂 𑀅𑀦𑀢𑁆𑀣𑀺𑀓𑀢𑀸𑀬 𑀅𑀦𑀧𑁂𑀓𑁆𑀔𑀢𑀸𑀬 ‘‘𑀅𑀪𑀩𑁆𑀩𑁄 𑀔𑁄 𑀆𑀯𑀼𑀲𑁄 𑀫𑀸𑀤𑀺𑀲𑁄’’𑀢𑀺 𑀆𑀳, 𑀦 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁂𑀦. 𑀢𑁂𑀦𑀲𑁆𑀲 𑀅𑀦𑀸𑀧𑀢𑁆𑀢𑀺.

𑁨𑁨𑁭. 𑀆𑀯𑀝𑀓𑀸𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀪𑀺𑀓𑁆𑀔𑀼 𑀯𑀢𑁆𑀣𑀼𑀓𑀸𑀫𑁂𑀲𑀼 𑀘 𑀓𑀺𑀮𑁂𑀲𑀓𑀸𑀫𑁂𑀲𑀼 𑀘 𑀮𑁄𑀓𑀺𑀬𑁂𑀦𑁂𑀯 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀦𑀺𑀭𑀧𑁂𑀓𑁆𑀔𑁄. 𑀢𑀲𑁆𑀫𑀸 ‘‘𑀆𑀯𑀝𑀸 𑀫𑁂 𑀆𑀯𑀼𑀲𑁄 𑀓𑀸𑀫𑀸’’𑀢𑀺 𑀆𑀳. 𑀢𑁂𑀦𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀏𑀢𑁆𑀣 𑀘 𑀆𑀯𑀝𑀸𑀢𑀺 𑀆𑀯𑀸𑀭𑀺𑀢𑀸 𑀦𑀺𑀯𑀸𑀭𑀺𑀢𑀸, 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀅𑀪𑀺𑀭𑀢𑀺𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀪𑀺𑀓𑁆𑀔𑀼 𑀲𑀸𑀲𑀦𑁂 𑀅𑀦𑀼𑀓𑁆𑀓𑀡𑁆𑀞𑀺𑀢𑀪𑀸𑀯𑁂𑀦 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀲𑀼 𑀘 𑀅𑀪𑀺𑀭𑀢𑀪𑀸𑀯𑁂𑀦 ‘‘𑀅𑀪𑀺𑀭𑀢𑁄 𑀅𑀳𑀁 𑀆𑀯𑀼𑀲𑁄 𑀧𑀭𑀫𑀸𑀬 𑀅𑀪𑀺𑀭𑀢𑀺𑀬𑀸’’𑀢𑀺 𑀆𑀳, 𑀦 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁂𑀦. 𑀢𑁂𑀦𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀧𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀬𑁄 𑀇𑀫𑀫𑁆𑀳𑀸 𑀆𑀯𑀸𑀲𑀸 𑀧𑀞𑀫𑀁 𑀧𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀏𑀯𑀁 𑀆𑀯𑀸𑀲𑀁 𑀯𑀸 𑀫𑀡𑁆𑀟𑀧𑀁 𑀯𑀸 𑀲𑀻𑀫𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀸𑀬 𑀓𑀢𑀺𑀓𑀸𑀬 𑀬𑁄 ‘‘𑀫𑀁 𑀅𑀭𑀳𑀸𑀢𑀺 𑀚𑀸𑀦𑀦𑁆𑀢𑀽’’𑀢𑀺 𑀢𑀫𑁆𑀳𑀸 𑀞𑀸𑀦𑀸 𑀧𑀞𑀫𑀁 𑀧𑀓𑁆𑀓𑀫𑀢𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀬𑁄 𑀧𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀸 𑀓𑀺𑀘𑁆𑀘𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀯𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀁 𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀦𑀁 𑀯𑀸 𑀅𑀢𑁆𑀣𑀸𑀬 𑀅𑀜𑁆𑀜𑁂𑀦 𑀯𑀸 𑀢𑀸𑀤𑀺𑀲𑁂𑀦 𑀓𑀭𑀡𑀻𑀬𑁂𑀦 𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂𑀧𑀺𑀲𑁆𑀲 𑀏𑀯𑀁 𑀕𑀢𑀲𑁆𑀲 𑀧𑀘𑁆𑀙𑀸 𑀇𑀘𑁆𑀙𑀸𑀘𑀸𑀭𑁄 𑀉𑀧𑁆𑀧𑀚𑁆𑀚𑀢𑀺 ‘‘𑀦 𑀤𑀸𑀦𑀸𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺 𑀏𑀯𑀁 𑀫𑀁 𑀅𑀭𑀳𑀸𑀢𑀺 𑀲𑀫𑁆𑀪𑀸𑀯𑁂𑀲𑁆𑀲𑀦𑁆𑀢𑀻’’𑀢𑀺 𑀅𑀦𑀸𑀧𑀢𑁆𑀢𑀺𑀬𑁂𑀯.

𑀬𑁄𑀧𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀲𑀚𑁆𑀛𑀸𑀬𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀅𑀜𑁆𑀜𑀯𑀺𑀳𑀺𑀢𑁄 𑀯𑀸 𑀳𑀼𑀢𑁆𑀯𑀸 𑀘𑁄𑀭𑀸𑀤𑀻𑀳𑀺 𑀯𑀸 𑀅𑀦𑀼𑀩𑀤𑁆𑀥𑁄 𑀫𑁂𑀖𑀁 𑀯𑀸 𑀉𑀝𑁆𑀞𑀺𑀢𑀁 𑀤𑀺𑀲𑁆𑀯𑀸 𑀅𑀦𑁄𑀯𑀲𑁆𑀲𑀓𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀢𑀺, 𑀅𑀦𑀸𑀧𑀢𑁆𑀢𑀺. 𑀬𑀸𑀦𑁂𑀦 𑀯𑀸 𑀇𑀤𑁆𑀥𑀺𑀬𑀸 𑀯𑀸 𑀕𑀘𑁆𑀙𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀦𑀸𑀧𑀚𑁆𑀚𑀢𑀺, 𑀧𑀤𑀕𑀫𑀦𑁂𑀦𑁂𑀯 𑀆𑀧𑀚𑁆𑀚𑀢𑀺. 𑀢𑀫𑁆𑀧𑀺 𑀬𑁂𑀳𑀺 𑀲𑀳 𑀓𑀢𑀺𑀓𑀸 𑀓𑀢𑀸, 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀧𑀼𑀩𑁆𑀩𑀁𑀅𑀘𑀭𑀺𑀫𑀁 𑀕𑀘𑁆𑀙𑀦𑁆𑀢𑁄 𑀦𑀸𑀧𑀚𑁆𑀚𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑀸 𑀳𑀺 𑀲𑀩𑁆𑀩𑁂𑀧𑀺 𑀅𑀜𑁆𑀜𑀫𑀜𑁆𑀜𑀁 𑀭𑀓𑁆𑀔𑀦𑁆𑀢𑀺. 𑀲𑀘𑁂𑀧𑀺 𑀫𑀡𑁆𑀟𑀧𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀓𑀺𑀜𑁆𑀘𑀺 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀬𑁄 𑀏𑀢𑁆𑀣 𑀦𑀺𑀲𑀻𑀤𑀢𑀺 𑀯𑀸 𑀘𑀗𑁆𑀓𑀫𑀢𑀺 𑀯𑀸, 𑀢𑀁 𑀅𑀭𑀳𑀸𑀢𑀺 𑀚𑀸𑀦𑀺𑀲𑁆𑀲𑀸𑀫’’ 𑀧𑀼𑀧𑁆𑀨𑀸𑀦𑀺 𑀯𑀸 𑀞𑀧𑁂𑀢𑁆𑀯𑀸 ‘‘𑀬𑁄 𑀇𑀫𑀸𑀦𑀺 𑀕𑀳𑁂𑀢𑁆𑀯𑀸 𑀧𑀽𑀚𑀁 𑀓𑀭𑀺𑀲𑁆𑀲𑀢𑀺, 𑀢𑀁 𑀅𑀭𑀳𑀸𑀢𑀺 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀺, 𑀢𑀢𑁆𑀭𑀸𑀧𑀺 𑀇𑀘𑁆𑀙𑀸𑀘𑀸𑀭𑀯𑀲𑁂𑀦 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯. 𑀲𑀘𑁂𑀧𑀺 𑀉𑀧𑀸𑀲𑀓𑁂𑀦 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀺𑀳𑀸𑀭𑁄 𑀯𑀸 𑀓𑀢𑁄 𑀳𑁄𑀢𑀺, 𑀘𑀻𑀯𑀭𑀸𑀤𑀻𑀦𑀺 𑀯𑀸 𑀞𑀧𑀺𑀢𑀸𑀦𑀺 𑀳𑁄𑀦𑁆𑀢𑀺, ‘‘𑀬𑁂 𑀅𑀭𑀳𑀦𑁆𑀢𑁄 𑀢𑁂 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑀼, 𑀘𑀻𑀯𑀭𑀸𑀤𑀻𑀦𑀺 𑀘 𑀕𑀡𑁆𑀳𑀦𑁆𑀢𑀽’’𑀢𑀺. 𑀢𑀢𑁆𑀭𑀸𑀧𑀺 𑀇𑀘𑁆𑀙𑀸𑀘𑀸𑀭𑀯𑀲𑁂𑀦 𑀯𑀲𑀦𑁆𑀢𑀲𑁆𑀲 𑀯𑀸 𑀘𑀻𑀯𑀭𑀸𑀤𑀻𑀦𑀺 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯. 𑀏𑀢𑀁 𑀧𑀦 𑀅𑀥𑀫𑁆𑀫𑀺𑀓𑀓𑀢𑀺𑀓𑀯𑀢𑁆𑀢𑀁, 𑀢𑀲𑁆𑀫𑀸 𑀦 𑀓𑀸𑀢𑀩𑁆𑀩𑀁, 𑀅𑀜𑁆𑀜𑀁 𑀯𑀸 𑀏𑀯𑀭𑀽𑀧𑀁 ‘‘𑀇𑀫𑀲𑁆𑀫𑀺𑀁 𑀢𑁂𑀫𑀸𑀲𑀩𑁆𑀪𑀦𑁆𑀢𑀭𑁂 𑀲𑀩𑁆𑀩𑁂𑀯 𑀆𑀭𑀜𑁆𑀜𑀓𑀸 𑀳𑁄𑀦𑁆𑀢𑀼, 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀸𑀤𑀺𑀅𑀯𑀲𑁂𑀲𑀥𑀼𑀢𑀗𑁆𑀕𑀥𑀭𑀸 𑀯𑀸 𑀅𑀣 𑀯𑀸 𑀲𑀩𑁆𑀩𑁂𑀯 𑀔𑀻𑀡𑀸𑀲𑀯𑀸 𑀳𑁄𑀦𑁆𑀢𑀽’’𑀢𑀺 𑀏𑀯𑀫𑀸𑀤𑀺. 𑀦𑀸𑀦𑀸𑀯𑁂𑀭𑀚𑁆𑀚𑀓𑀸 𑀳𑀺 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀢𑀢𑁆𑀣 𑀓𑁂𑀘𑀺 𑀤𑀼𑀩𑁆𑀩𑀮𑀸 𑀅𑀧𑁆𑀧𑀣𑀸𑀫𑀸 𑀏𑀯𑀭𑀽𑀧𑀁 𑀯𑀢𑁆𑀢𑀁 𑀅𑀦𑀼𑀧𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑀫𑁆𑀧𑀺 𑀯𑀢𑁆𑀢𑀁 𑀦 𑀓𑀸𑀢𑀩𑁆𑀩𑀁. ‘‘𑀇𑀫𑀁 𑀢𑁂𑀫𑀸𑀲𑀁 𑀲𑀩𑁆𑀩𑁂𑀳𑁂𑀯 𑀦 𑀉𑀤𑁆𑀤𑀺𑀲𑀺𑀢𑀩𑁆𑀩𑀁, 𑀦 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑀁, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀁, 𑀫𑀽𑀕𑀩𑁆𑀩𑀢𑀁 𑀕𑀡𑁆𑀳𑀺𑀢𑀩𑁆𑀩𑀁, 𑀩𑀳𑀺 𑀲𑀻𑀫𑀝𑁆𑀞𑀲𑁆𑀲𑀸𑀧𑀺 𑀲𑀗𑁆𑀖𑀮𑀸𑀪𑁄 𑀤𑀸𑀢𑀩𑁆𑀩𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀧𑀦 𑀦 𑀓𑀸𑀢𑀩𑁆𑀩𑀫𑁂𑀯.

𑁨𑁨𑁮. 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑁂 𑀬𑁆𑀯𑀸𑀬𑀁 𑀆𑀬𑀲𑁆𑀫𑀸 𑀘 𑀮𑀓𑁆𑀔𑀡𑁄𑀢𑀺 𑀮𑀓𑁆𑀔𑀡𑀢𑁆𑀣𑁂𑀭𑁄 𑀯𑀼𑀢𑁆𑀢𑁄, 𑀏𑀲 𑀚𑀝𑀺𑀮𑀲𑀳𑀲𑁆𑀲𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑁄 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀸𑀯𑀲𑀸𑀦𑁂 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀏𑀓𑁄 𑀫𑀳𑀸𑀲𑀸𑀯𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦𑁂𑀲 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁂𑀦 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁂𑀦 𑀩𑁆𑀭𑀳𑁆𑀫𑀲𑀫𑁂𑀦 𑀅𑀢𑁆𑀢𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀫𑀸 𑀮𑀓𑁆𑀔𑀡𑁄𑀢𑀺 𑀲𑀗𑁆𑀔𑀁 𑀕𑀢𑁄. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑀦 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀤𑀼𑀢𑀺𑀬𑁄 𑀅𑀕𑁆𑀕𑀲𑀸𑀯𑀓𑁄.

𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀫𑀦𑁆𑀤𑀳𑀲𑀺𑀢𑀁 𑀧𑀸𑀢𑀼𑀅𑀓𑀸𑀲𑀺, 𑀧𑀓𑀸𑀲𑀬𑀺 𑀤𑀲𑁆𑀲𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀧𑀦 𑀤𑀺𑀲𑁆𑀯𑀸 𑀣𑁂𑀭𑁄 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺? 𑀉𑀧𑀭𑀺 𑀧𑀸𑀴𑀺𑀬𑀁 𑀆𑀕𑀢𑀁 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀏𑀓𑀁 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀁 𑀲𑀢𑁆𑀢𑀁 𑀤𑀺𑀲𑁆𑀯𑀸, 𑀢𑀜𑁆𑀘 𑀔𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸, 𑀦 𑀧𑀲𑀸𑀤𑀘𑀓𑁆𑀔𑀼𑀦𑀸. 𑀧𑀲𑀸𑀤𑀘𑀓𑁆𑀔𑀼𑀲𑁆𑀲 𑀳𑀺 𑀏𑀢𑁂 𑀅𑀢𑁆𑀢𑀪𑀸𑀯𑀸 𑀦 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀏𑀯𑀭𑀽𑀧𑀁 𑀧𑀦 𑀅𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑁂 𑀓𑀸𑀢𑀩𑁆𑀩𑁂 𑀓𑀲𑁆𑀫𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺? 𑀅𑀢𑁆𑀢𑀦𑁄 𑀘 𑀩𑀼𑀤𑁆𑀥𑀜𑀸𑀡𑀲𑁆𑀲 𑀘 𑀲𑀫𑁆𑀧𑀢𑁆𑀢𑀺𑀲𑀫𑀦𑀼𑀲𑁆𑀲𑀭𑀡𑀢𑁄. 𑀢𑀜𑁆𑀳𑀺 𑀤𑀺𑀲𑁆𑀯𑀸 𑀣𑁂𑀭𑁄 ‘‘𑀅𑀤𑀺𑀝𑁆𑀞𑀲𑀘𑁆𑀘𑁂𑀦 𑀦𑀸𑀫 𑀧𑀼𑀕𑁆𑀕𑀮𑁂𑀦 𑀧𑀝𑀺𑀮𑀪𑀺𑀢𑀩𑁆𑀩𑀸 𑀏𑀯𑀭𑀽𑀧𑀸 𑀅𑀢𑁆𑀢𑀪𑀸𑀯𑀸 𑀫𑀼𑀢𑁆𑀢𑁄 𑀅𑀳𑀁, 𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂’’𑀢𑀺 𑀅𑀢𑁆𑀢𑀦𑁄 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀅𑀳𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀲𑀫𑁆𑀧𑀢𑁆𑀢𑀺, 𑀬𑁄 ‘𑀓𑀫𑁆𑀫𑀯𑀺𑀧𑀸𑀓𑁄, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑁄; 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄’𑀢𑀺 (𑀅. 𑀦𑀺. 𑁪.𑁭𑁭) 𑀤𑁂𑀲𑁂𑀲𑀺, 𑀧𑀘𑁆𑀘𑀓𑁆𑀔𑀁 𑀯𑀢 𑀓𑀢𑁆𑀯𑀸 𑀩𑀼𑀤𑁆𑀥𑀸 𑀤𑁂𑀲𑁂𑀦𑁆𑀢𑀺, 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸 𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀥𑀸𑀢𑀽’’𑀢𑀺 𑀏𑀯𑀁 𑀩𑀼𑀤𑁆𑀥𑀜𑀸𑀡𑀲𑀫𑁆𑀧𑀢𑁆𑀢𑀺𑀜𑁆𑀘 𑀲𑀭𑀺𑀢𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺. 𑀬𑀲𑁆𑀫𑀸 𑀧𑀦 𑀔𑀻𑀡𑀸𑀲𑀯𑀸 𑀦𑀸𑀫 𑀦 𑀅𑀓𑀸𑀭𑀡𑀸 𑀲𑀺𑀢𑀁 𑀧𑀸𑀢𑀼𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀮𑀓𑁆𑀔𑀡𑀢𑁆𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀓𑁄 𑀦𑀼 𑀔𑁄 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬𑀸’’𑀢𑀺. 𑀣𑁂𑀭𑁄 𑀧𑀦 𑀬𑀲𑁆𑀫𑀸 𑀬𑁂𑀳𑀺 𑀅𑀬𑀁 𑀉𑀧𑀧𑀢𑁆𑀢𑀺 𑀲𑀸𑀫𑀁 𑀅𑀤𑀺𑀝𑁆𑀞𑀸, 𑀢𑁂 𑀤𑀼𑀲𑁆𑀲𑀤𑁆𑀥𑀸𑀧𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀦𑁆𑀢𑀁 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀩𑁆𑀬𑀸𑀓𑀸𑀢𑀼𑀓𑀸𑀫𑀢𑀸𑀬 ‘‘𑀅𑀓𑀸𑀮𑁄 𑀔𑁄, 𑀆𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀼𑀝𑁆𑀞𑁄 ‘‘𑀇𑀥𑀸𑀳𑀁 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑁆𑀬𑀸𑀓𑀸𑀲𑀺.

𑀢𑀢𑁆𑀣 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀦𑁆𑀢𑀺 𑀲𑁂𑀢𑀁 𑀦𑀺𑀫𑁆𑀫𑀁𑀲𑀮𑁄𑀳𑀺𑀢𑀁 𑀅𑀝𑁆𑀞𑀺𑀲𑀗𑁆𑀖𑀸𑀢𑀁. 𑀕𑀺𑀚𑁆𑀛𑀸𑀧𑀺 𑀓𑀸𑀓𑀸𑀧𑀺 𑀓𑀼𑀮𑀮𑀸𑀧𑀻𑀢𑀺 𑀏𑀢𑁂𑀧𑀺 𑀬𑀓𑁆𑀔𑀕𑀺𑀚𑁆𑀛𑀸 𑀘𑁂𑀯 𑀬𑀓𑁆𑀔𑀓𑀸𑀓𑀸 𑀘 𑀬𑀓𑁆𑀔𑀓𑀼𑀮𑀮𑀸 𑀘 𑀧𑀘𑁆𑀘𑁂𑀢𑀩𑁆𑀩𑀸. 𑀧𑀸𑀓𑀢𑀺𑀓𑀸𑀦𑀁 𑀧𑀦 𑀕𑀺𑀚𑁆𑀛𑀸𑀤𑀻𑀦𑀁 𑀆𑀧𑀸𑀣𑀫𑁆𑀧𑀺 𑀏𑀢𑀁 𑀭𑀽𑀧𑀁 𑀦𑀸𑀕𑀘𑁆𑀙𑀢𑀺. 𑀅𑀦𑀼𑀧𑀢𑀺𑀢𑁆𑀯𑀸 𑀅𑀦𑀼𑀧𑀢𑀺𑀢𑁆𑀯𑀸𑀢𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀅𑀦𑀼𑀩𑀦𑁆𑀥𑀺𑀢𑁆𑀯𑀸. 𑀯𑀺𑀢𑀼𑀟𑁂𑀦𑁆𑀢𑀻𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀯𑀺𑀢𑀼𑀤𑁂𑀦𑁆𑀢𑀻𑀢𑀺 𑀯𑀸 𑀧𑀸𑀞𑁄, 𑀅𑀲𑀺𑀥𑀸𑀭𑀽𑀧𑀫𑁂𑀳𑀺 𑀢𑀺𑀔𑀺𑀡𑁂𑀳𑀺 𑀮𑁄𑀳𑀢𑀼𑀡𑁆𑀟𑁂𑀳𑀺 𑀯𑀺𑀚𑁆𑀛𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀲𑀼𑀤𑀁 𑀅𑀝𑁆𑀝𑀲𑁆𑀲𑀭𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀲𑀸 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸 𑀅𑀝𑁆𑀝𑀲𑁆𑀲𑀭𑀁 𑀆𑀢𑀼𑀭𑀲𑁆𑀲𑀭𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀼𑀪𑀯𑀦𑀢𑁆𑀣𑀁 𑀓𑀺𑀭 𑀬𑁄𑀚𑀦𑀧𑁆𑀧𑀫𑀸𑀡𑀸𑀧𑀺 𑀢𑀸𑀤𑀺𑀲𑀸 𑀅𑀢𑁆𑀢𑀪𑀸𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀧𑀲𑀸𑀤𑀼𑀲𑁆𑀲𑀤𑀸 𑀘 𑀳𑁄𑀦𑁆𑀢𑀺 𑀧𑀓𑁆𑀓𑀕𑀡𑁆𑀟𑀲𑀤𑀺𑀲𑀸; 𑀢𑀲𑁆𑀫𑀸 𑀲𑀸 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸 𑀩𑀮𑀯𑀯𑁂𑀤𑀦𑀸𑀢𑀼𑀭𑀸 𑀢𑀸𑀤𑀺𑀲𑀁 𑀲𑀭𑀫𑀓𑀸𑀲𑀻𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 ‘‘𑀯𑀝𑁆𑀝𑀕𑀸𑀫𑀺𑀓𑀲𑀢𑁆𑀢𑀸 𑀦𑀸𑀫 𑀏𑀯𑀭𑀽𑀧𑀸 𑀅𑀢𑁆𑀢𑀪𑀸𑀯𑀸 𑀦 𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀥𑀫𑁆𑀫𑀲𑀁𑀯𑁂𑀕𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀲 𑀫𑀬𑁆𑀳𑀁 𑀆𑀯𑀼𑀲𑁄 𑀏𑀢𑀤𑀳𑁄𑀲𑀺; 𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄’’𑀢𑀺𑀆𑀤𑀺𑀫𑀸𑀳.

𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀦𑁆𑀢𑀻𑀢𑀺 𑀬𑁂𑀲𑀁 𑀲𑀸 𑀧𑁂𑀢𑀽𑀧𑀧𑀢𑁆𑀢𑀺 𑀅𑀧𑁆𑀧𑀘𑁆𑀘𑀓𑁆𑀔𑀸, 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺. 𑀪𑀕𑀯𑀸 𑀧𑀦 𑀣𑁂𑀭𑀲𑁆𑀲𑀸𑀦𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀘𑀓𑁆𑀔𑀼𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀼 𑀪𑀽𑀢𑀁 𑀚𑀸𑀢𑀁 𑀉𑀧𑁆𑀧𑀦𑁆𑀦𑀁 𑀢𑁂𑀲𑀦𑁆𑀢𑀺 𑀘𑀓𑁆𑀔𑀼𑀪𑀽𑀢𑀸; 𑀪𑀽𑀢𑀘𑀓𑁆𑀔𑀼𑀓𑀸 𑀉𑀧𑁆𑀧𑀦𑁆𑀦𑀘𑀓𑁆𑀔𑀼𑀓𑀸, 𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀢𑁆𑀯𑀸, 𑀯𑀺𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀏𑀢𑁆𑀣 𑀬𑀢𑁆𑀭𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀢𑀢𑁆𑀭𑀸𑀬𑀫𑀢𑁆𑀣𑀬𑁄𑀚𑀦𑀸; 𑀬𑀲𑁆𑀫𑀸 𑀦𑀸𑀫 𑀲𑀸𑀯𑀓𑁄𑀧𑀺 𑀏𑀯𑀭𑀽𑀧𑀁 𑀜𑀲𑁆𑀲𑀢𑀺 𑀯𑀸 𑀤𑀓𑁆𑀔𑀢𑀺 𑀯𑀸 𑀲𑀓𑁆𑀔𑀺𑀁 𑀯𑀸 𑀓𑀭𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀯𑁄𑀘𑀼𑀫𑁆𑀳 𑁋 ‘‘𑀘𑀓𑁆𑀔𑀼𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀜𑀸𑀡𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀻’’𑀢𑀺.

𑀧𑀼𑀩𑁆𑀩𑁂𑀯 𑀫𑁂 𑀲𑁄 𑀪𑀺𑀓𑁆𑀔𑀯𑁂 𑀲𑀢𑁆𑀢𑁄 𑀤𑀺𑀝𑁆𑀞𑁄𑀢𑀺 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑁆𑀧𑀝𑀺𑀯𑁂𑀥𑁂𑀦 𑀅𑀧𑁆𑀧𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑁆𑀧𑀫𑀸𑀡𑁂 𑀲𑀢𑁆𑀢𑀦𑀺𑀓𑀸𑀬𑁂 𑀪𑀯𑀕𑀢𑀺𑀬𑁄𑀦𑀺𑀞𑀺𑀢𑀺𑀦𑀺𑀯𑀸𑀲𑁂 𑀘 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑁂𑀦 𑀫𑀬𑀸 𑀧𑀼𑀩𑁆𑀩𑁂𑀯 𑀲𑁄 𑀲𑀢𑁆𑀢𑁄 𑀤𑀺𑀝𑁆𑀞𑁄𑀢𑀺 𑀯𑀤𑀢𑀺.

𑀕𑁄𑀖𑀸𑀢𑀓𑁄𑀢𑀺 𑀕𑀸𑀯𑁄 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀅𑀝𑁆𑀞𑀺𑀢𑁄 𑀫𑀁𑀲𑀁 𑀫𑁄𑀘𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀓𑀓𑀧𑁆𑀧𑀦𑀓𑀲𑀢𑁆𑀢𑁄. 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸𑀢𑀺 𑀢𑀲𑁆𑀲 𑀦𑀸𑀦𑀸𑀘𑁂𑀢𑀦𑀸𑀳𑀺 𑀆𑀬𑀽𑀳𑀺𑀢𑀲𑁆𑀲 𑀅𑀧𑀭𑀸𑀧𑀭𑀺𑀬𑀓𑀫𑁆𑀫𑀲𑁆𑀲. 𑀢𑀢𑁆𑀭 𑀳𑀺 𑀬𑀸𑀬 𑀘𑁂𑀢𑀦𑀸𑀬 𑀦𑀭𑀓𑁂 𑀧𑀝𑀺𑀲𑀦𑁆𑀥𑀺 𑀚𑀦𑀺𑀢𑀸, 𑀢𑀲𑁆𑀲𑀸 𑀯𑀺𑀧𑀸𑀓𑁂 𑀧𑀭𑀺𑀓𑁆𑀔𑀻𑀡𑁂 𑀅𑀯𑀲𑁂𑀲𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀼𑀦 𑀧𑁂𑀢𑀸𑀤𑀻𑀲𑀼 𑀧𑀝𑀺𑀲𑀦𑁆𑀥𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀸 𑀧𑀝𑀺𑀲𑀦𑁆𑀥𑀺 𑀓𑀫𑁆𑀫𑀲𑀪𑀸𑀕𑀢𑀸𑀬 𑀯𑀸 𑀆𑀭𑀫𑁆𑀫𑀡𑀲𑀪𑀸𑀕𑀢𑀸𑀬 𑀯𑀸 ‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀜𑁆𑀘 𑀲𑀢𑁆𑀢𑁄 𑀏𑀯𑀁 𑀉𑀧𑀧𑀦𑁆𑀦𑁄. 𑀢𑁂𑀦𑀸𑀳 𑁋 ‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸’’𑀢𑀺. 𑀢𑀲𑁆𑀲 𑀓𑀺𑀭 𑀦𑀭𑀓𑀸 𑀘𑀯𑀦𑀓𑀸𑀮𑁂 𑀦𑀺𑀫𑁆𑀫𑀁𑀲𑀓𑀢𑀸𑀦𑀁 𑀕𑀼𑀦𑁆𑀦𑀁 𑀅𑀝𑁆𑀞𑀺𑀭𑀸𑀲𑀺 𑀏𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀲𑁄 𑀧𑀝𑀺𑀘𑁆𑀙𑀦𑁆𑀦𑀫𑁆𑀧𑀺 𑀢𑀁 𑀓𑀫𑁆𑀫𑀁 𑀯𑀺𑀜𑁆𑀜𑀽𑀦𑀁 𑀧𑀸𑀓𑀝𑀁 𑀯𑀺𑀬 𑀓𑀭𑁄𑀦𑁆𑀢𑁄 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀧𑁂𑀢𑁄 𑀚𑀸𑀢𑁄.

𑁨𑁨𑁯. 𑀫𑀁𑀲𑀧𑁂𑀲𑀺𑀯𑀢𑁆𑀣𑀼𑀲𑁆𑀫𑀺𑀁 𑀕𑁄𑀖𑀸𑀢𑀓𑁄𑀢𑀺 𑀕𑁄𑀫𑀁𑀲𑀧𑁂𑀲𑀺𑀬𑁄 𑀓𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀯𑀮𑁆𑀮𑀽𑀭𑀯𑀺𑀓𑁆𑀓𑀬𑁂𑀦 𑀅𑀦𑁂𑀓𑀸𑀦𑀺 𑀯𑀲𑁆𑀲𑀸𑀦𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑁂𑀦𑀲𑁆𑀲 𑀦𑀭𑀓𑀸 𑀘𑀯𑀦𑀓𑀸𑀮𑁂 𑀫𑀁𑀲𑀧𑁂𑀲𑀺𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀲𑁄 𑀫𑀁𑀲𑀧𑁂𑀲𑀺𑀧𑁂𑀢𑁄 𑀚𑀸𑀢𑁄.

𑀫𑀁𑀲𑀧𑀺𑀡𑁆𑀟𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀲𑀸𑀓𑀼𑀡𑀺𑀓𑁄 𑀲𑀓𑀼𑀡𑁂 𑀕𑀳𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑀓𑀸𑀮𑁂 𑀦𑀺𑀧𑁆𑀧𑀓𑁆𑀔𑀘𑀫𑁆𑀫𑁂 𑀫𑀁𑀲𑀧𑀺𑀡𑁆𑀟𑀫𑀢𑁆𑀢𑁂 𑀓𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑁂𑀦𑀲𑁆𑀲 𑀦𑀭𑀓𑀸 𑀘𑀯𑀦𑀓𑀸𑀮𑁂 𑀫𑀁𑀲𑀧𑀺𑀡𑁆𑀟𑁄𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀲𑁄 𑀫𑀁𑀲𑀧𑀺𑀡𑁆𑀟𑀧𑁂𑀢𑁄 𑀚𑀸𑀢𑁄.

𑀦𑀺𑀘𑁆𑀙𑀯𑀺𑀯𑀢𑁆𑀣𑀼𑀲𑁆𑀫𑀺𑀁 𑀢𑀲𑁆𑀲 𑀑𑀭𑀩𑁆𑀪𑀺𑀓𑀲𑁆𑀲 𑀏𑀴𑀓𑁂 𑀯𑀥𑀺𑀢𑁆𑀯𑀸 𑀦𑀺𑀘𑁆𑀘𑀫𑁆𑀫𑁂 𑀓𑀢𑁆𑀯𑀸 𑀓𑀧𑁆𑀧𑀺𑀢𑀚𑀻𑀯𑀺𑀓𑀲𑁆𑀲 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀘𑁆𑀘𑀫𑁆𑀫𑀁 𑀏𑀴𑀓𑀲𑀭𑀻𑀭𑀁 𑀦𑀺𑀫𑀺𑀢𑁆𑀢𑀫𑀳𑁄𑀲𑀺. 𑀲𑁄 𑀦𑀺𑀘𑁆𑀙𑀯𑀺𑀧𑁂𑀢𑁄 𑀚𑀸𑀢𑁄.

𑀅𑀲𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀲𑀽𑀓𑀭𑀺𑀓𑁄 𑀤𑀻𑀖𑀭𑀢𑁆𑀢𑀁 𑀦𑀺𑀯𑀸𑀧𑀧𑀼𑀝𑁆𑀞𑁂 𑀲𑀽𑀓𑀭𑁂 𑀅𑀲𑀺𑀦𑀸 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀢𑁂𑀦𑀲𑁆𑀲 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀪𑀸𑀯𑁄𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀅𑀲𑀺𑀮𑁄𑀫𑀧𑁂𑀢𑁄 𑀚𑀸𑀢𑁄.

𑀲𑀢𑁆𑀢𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀫𑀸𑀕𑀯𑀺𑀓𑁄 𑀏𑀓𑀁 𑀫𑀺𑀕𑀜𑁆𑀘 𑀲𑀢𑁆𑀢𑀺𑀜𑁆𑀘 𑀕𑀳𑁂𑀢𑁆𑀯𑀸 𑀯𑀦𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀺𑀕𑀲𑁆𑀲 𑀲𑀫𑀻𑀧𑀁 𑀆𑀕𑀢𑀸𑀕𑀢𑁂 𑀫𑀺𑀕𑁂 𑀲𑀢𑁆𑀢𑀺𑀬𑀸 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀲𑀺, 𑀢𑀲𑁆𑀲 𑀲𑀢𑁆𑀢𑀺𑀬𑀸 𑀯𑀺𑀚𑁆𑀛𑀦𑀓𑀪𑀸𑀯𑁄𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀲𑀢𑁆𑀢𑀺𑀮𑁄𑀫𑀧𑁂𑀢𑁄 𑀚𑀸𑀢𑁄.

𑀉𑀲𑀼𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀭𑀡𑀺𑀓𑁄𑀢𑀺 𑀭𑀸𑀚𑀸𑀧𑀭𑀸𑀥𑀺𑀓𑁂 𑀅𑀦𑁂𑀓𑀸𑀳𑀺 𑀓𑀸𑀭𑀡𑀸𑀳𑀺 𑀧𑀻𑀴𑁂𑀢𑁆𑀯𑀸 𑀅𑀯𑀲𑀸𑀦𑁂 𑀓𑀡𑁆𑀟𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑀡𑀓𑀧𑀼𑀭𑀺𑀲𑁄. 𑀲𑁄 𑀓𑀺𑀭 𑀅𑀲𑀼𑀓𑀲𑁆𑀫𑀺𑀁 𑀧𑀤𑁂𑀲𑁂 𑀯𑀺𑀤𑁆𑀥𑁄 𑀫𑀭𑀢𑀻𑀢𑀺 𑀜𑀢𑁆𑀯𑀸𑀯 𑀯𑀺𑀚𑁆𑀛𑀢𑀺. 𑀢𑀲𑁆𑀲𑁂𑀯𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀦𑀭𑀓𑁂 𑀉𑀧𑁆𑀧𑀦𑁆𑀦𑀲𑁆𑀲 𑀢𑀢𑁄 𑀧𑀓𑁆𑀓𑀸𑀯𑀲𑁂𑀲𑁂𑀦 𑀇𑀥𑀽𑀧𑀧𑀢𑁆𑀢𑀺𑀓𑀸𑀮𑁂 𑀉𑀲𑀼𑀦𑀸 𑀯𑀺𑀚𑁆𑀛𑀦𑀪𑀸𑀯𑁄𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀉𑀲𑀼𑀮𑁄𑀫𑀧𑁂𑀢𑁄 𑀚𑀸𑀢𑁄.

𑀲𑀽𑀘𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀭𑀣𑀻𑀢𑀺 𑀅𑀲𑁆𑀲𑀤𑀫𑀓𑁄. 𑀕𑁄𑀤𑀫𑀓𑁄𑀢𑀺𑀧𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀢𑁄𑀤𑀲𑀽𑀘𑀺𑀬𑀸 𑀯𑀺𑀚𑁆𑀛𑀦𑀪𑀸𑀯𑁄𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀲𑀽𑀘𑀺𑀮𑁄𑀫𑀧𑁂𑀢𑁄 𑀚𑀸𑀢𑁄.

𑀤𑀼𑀢𑀺𑀬𑀲𑀽𑀘𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑀽𑀘𑀓𑁄𑀢𑀺 𑀧𑁂𑀲𑀼𑀜𑁆𑀜𑀓𑀸𑀭𑀓𑁄. 𑀲𑁄 𑀓𑀺𑀭 𑀫𑀦𑀼𑀲𑁆𑀲𑁂 𑀅𑀜𑁆𑀜𑀫𑀜𑁆𑀜𑀜𑁆𑀘 𑀪𑀺𑀦𑁆𑀤𑀺. 𑀭𑀸𑀚𑀓𑀼𑀮𑁂 𑀘 ‘‘𑀇𑀫𑀲𑁆𑀲 𑀇𑀫𑀁 𑀦𑀸𑀫 𑀅𑀢𑁆𑀣𑀺, 𑀇𑀫𑀺𑀦𑀸 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺 𑀲𑀽𑀘𑁂𑀢𑁆𑀯𑀸 𑀲𑀽𑀘𑁂𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀺. 𑀢𑀲𑁆𑀫𑀸 𑀬𑀣𑀸𑀦𑁂𑀦 𑀲𑀽𑀘𑁂𑀢𑁆𑀯𑀸 𑀫𑀦𑀼𑀲𑁆𑀲𑀸 𑀪𑀺𑀦𑁆𑀦𑀸, 𑀢𑀣𑀸 𑀲𑀽𑀘𑀻𑀳𑀺 𑀪𑁂𑀤𑀦𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀢𑀼𑀁 𑀓𑀫𑁆𑀫𑀫𑁂𑀯 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀽𑀘𑀺𑀮𑁄𑀫𑀧𑁂𑀢𑁄 𑀚𑀸𑀢𑁄.

𑀅𑀡𑁆𑀟𑀪𑀸𑀭𑀺𑀢𑀯𑀢𑁆𑀣𑀼𑀲𑁆𑀫𑀺𑀁 𑀕𑀸𑀫𑀓𑀽𑀝𑁄𑀢𑀺 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄. 𑀢𑀲𑁆𑀲 𑀓𑀫𑁆𑀫𑀲𑀪𑀸𑀕𑀢𑀸𑀬 𑀓𑀼𑀫𑁆𑀪𑀫𑀢𑁆𑀢𑀸 𑀫𑀳𑀸𑀖𑀝𑀧𑁆𑀧𑀫𑀸𑀡𑀸 𑀅𑀡𑁆𑀟𑀸 𑀅𑀳𑁂𑀲𑀼𑀁. 𑀲𑁄 𑀳𑀺 𑀬𑀲𑁆𑀫𑀸 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦 𑀞𑀸𑀦𑁂 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀓𑀽𑀝𑀯𑀺𑀦𑀺𑀘𑁆𑀙𑀬𑁂𑀦 𑀧𑀸𑀓𑀝𑀁 𑀤𑁄𑀲𑀁 𑀓𑀭𑁄𑀦𑁆𑀢𑁄 𑀲𑀸𑀫𑀺𑀓𑁂 𑀅𑀲𑁆𑀲𑀸𑀫𑀺𑀓𑁂 𑀅𑀓𑀸𑀲𑀺. 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀁 𑀅𑀗𑁆𑀕𑀁 𑀧𑀸𑀓𑀝𑀁 𑀦𑀺𑀩𑁆𑀩𑀢𑁆𑀢𑀁. 𑀬𑀲𑁆𑀫𑀸 𑀤𑀡𑁆𑀟𑀁 𑀧𑀝𑁆𑀞𑀧𑁂𑀦𑁆𑀢𑁄 𑀧𑀭𑁂𑀲𑀁 𑀅𑀲𑀬𑁆𑀳𑀁 𑀪𑀸𑀭𑀁 𑀆𑀭𑁄𑀧𑁂𑀲𑀺, 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀗𑁆𑀕𑀁 𑀅𑀲𑀬𑁆𑀳𑀪𑀸𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀁. 𑀬𑀲𑁆𑀫𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁂𑀦 𑀲𑀫𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀞𑀢𑁆𑀯𑀸 𑀯𑀺𑀲𑀫𑁄 𑀅𑀳𑁄𑀲𑀺, 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀗𑁆𑀕𑁂 𑀯𑀺𑀲𑀫𑀸 𑀦𑀺𑀲𑀚𑁆𑀚𑀸 𑀅𑀳𑁄𑀲𑀻𑀢𑀺.

𑀧𑀸𑀭𑀤𑀸𑀭𑀺𑀓𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀲𑀢𑁆𑀢𑁄 𑀧𑀭𑀲𑁆𑀲 𑀭𑀓𑁆𑀔𑀺𑀢𑀁 𑀕𑁄𑀧𑀺𑀢𑀁 𑀲𑀲𑁆𑀲𑀸𑀫𑀺𑀓𑀁 𑀨𑀲𑁆𑀲𑀁 𑀨𑀼𑀲𑀦𑁆𑀢𑁄 𑀫𑀻𑀴𑁆𑀳𑀲𑀼𑀔𑁂𑀦 𑀓𑀸𑀫𑀲𑀼𑀔𑁂𑀦 𑀘𑀺𑀢𑁆𑀢𑀁 𑀭𑀫𑀬𑀺𑀢𑁆𑀯𑀸 𑀓𑀫𑁆𑀫𑀲𑀪𑀸𑀕𑀢𑀸𑀬 𑀕𑀽𑀣𑀨𑀲𑁆𑀲𑀁 𑀨𑀼𑀲𑀦𑁆𑀢𑁄 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑀼𑀁 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄. 𑀤𑀼𑀝𑁆𑀞𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀧𑀸𑀓𑀝𑀫𑁂𑀯.

𑁨𑁩𑁦. 𑀦𑀺𑀘𑁆𑀙𑀯𑀺𑀢𑁆𑀣𑀺𑀯𑀢𑁆𑀣𑀼𑀲𑁆𑀫𑀺𑀁 𑀬𑀲𑁆𑀫𑀸 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀢𑁆𑀢𑀦𑁄 𑀨𑀲𑁆𑀲𑁂 𑀅𑀦𑀺𑀲𑁆𑀲𑀭𑁄, 𑀲𑀸 𑀘 𑀢𑀁 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀓𑀁 𑀨𑀲𑁆𑀲𑀁 𑀣𑁂𑀦𑁂𑀢𑁆𑀯𑀸 𑀧𑀭𑁂𑀲𑀁 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀲𑀺, 𑀢𑀲𑁆𑀫𑀸 𑀓𑀫𑁆𑀫𑀲𑀪𑀸𑀕𑀢𑀸𑀬 𑀲𑀼𑀔𑀲𑀫𑁆𑀨𑀲𑁆𑀲𑀸 𑀥𑀁𑀲𑀺𑀢𑁆𑀯𑀸 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀁 𑀅𑀦𑀼𑀪𑀯𑀺𑀢𑀼𑀁 𑀦𑀺𑀘𑁆𑀙𑀯𑀺𑀢𑁆𑀣𑀻 𑀳𑀼𑀢𑁆𑀯𑀸 𑀉𑀧𑀧𑀦𑁆𑀦𑀸.

𑀫𑀗𑁆𑀕𑀼𑀮𑀺𑀢𑁆𑀣𑀺𑀯𑀢𑁆𑀣𑀼𑀲𑁆𑀫𑀺𑀁 𑀫𑀗𑁆𑀕𑀼𑀮𑀺𑀦𑁆𑀢𑀺 𑀯𑀺𑀭𑀽𑀧𑀁 𑀤𑀼𑀤𑁆𑀤𑀲𑀺𑀓𑀁 𑀩𑀻𑀪𑀘𑁆𑀙𑀁, 𑀲𑀸 𑀓𑀺𑀭 𑀇𑀓𑁆𑀔𑀡𑀺𑀓𑀸𑀓𑀫𑁆𑀫𑀁 𑀬𑀓𑁆𑀔𑀤𑀸𑀲𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀏𑀯𑀁 𑀩𑀮𑀺𑀓𑀫𑁆𑀫𑁂 𑀓𑀢𑁂 𑀅𑀬𑀁 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀯𑀟𑁆𑀠𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀳𑀸𑀚𑀦𑀲𑁆𑀲 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀯𑀜𑁆𑀘𑀦𑀸𑀬 𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑀁 𑀤𑀼𑀤𑁆𑀤𑀺𑀝𑁆𑀞𑀺𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀧𑁂𑀲𑀺, 𑀢𑀲𑁆𑀫𑀸 𑀢𑀸𑀬 𑀓𑀫𑁆𑀫𑀲𑀪𑀸𑀕𑀢𑀸𑀬 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀁 𑀣𑁂𑀦𑀺𑀢𑀢𑁆𑀢𑀸 𑀤𑀼𑀕𑁆𑀕𑀦𑁆𑀥𑀸 𑀤𑀼𑀤𑁆𑀤𑀲𑁆𑀲𑀦𑀲𑁆𑀲 𑀕𑀸𑀳𑀺𑀢𑀢𑁆𑀢𑀸 𑀤𑀼𑀤𑁆𑀤𑀲𑀺𑀓𑀸 𑀯𑀺𑀭𑀽𑀧𑀸 𑀩𑀻𑀪𑀘𑁆𑀙𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸.

𑀑𑀓𑀺𑀮𑀺𑀦𑀺𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀓𑁆𑀓𑀁 𑀑𑀓𑀺𑀮𑀺𑀦𑀺𑀁 𑀑𑀓𑀺𑀭𑀺𑀦𑀺𑀦𑁆𑀢𑀺 𑀲𑀸 𑀓𑀺𑀭 𑀅𑀗𑁆𑀕𑀸𑀭𑀘𑀺𑀢𑀓𑁂 𑀦𑀺𑀧𑀦𑁆𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀸 𑀧𑀘𑁆𑀘𑀢𑀺, 𑀢𑀲𑁆𑀫𑀸 𑀉𑀧𑁆𑀧𑀓𑁆𑀓𑀸 𑀘𑁂𑀯 𑀳𑁄𑀢𑀺 𑀔𑀭𑁂𑀦 𑀅𑀕𑁆𑀕𑀺𑀦𑀸 𑀧𑀓𑁆𑀓𑀲𑀭𑀻𑀭𑀸; 𑀑𑀓𑀺𑀮𑀺𑀦𑀻 𑀘 𑀓𑀺𑀮𑀺𑀦𑁆𑀦𑀲𑀭𑀻𑀭𑀸 𑀩𑀺𑀦𑁆𑀤𑀼𑀩𑀺𑀦𑁆𑀤𑀽𑀦𑀺 𑀳𑀺𑀲𑁆𑀲𑀸 𑀲𑀭𑀻𑀭𑀢𑁄 𑀧𑀕𑁆𑀖𑀭𑀦𑁆𑀢𑀺. 𑀑𑀓𑀺𑀭𑀺𑀦𑀻 𑀘 𑀅𑀗𑁆𑀕𑀸𑀭𑀲𑀫𑁆𑀧𑀭𑀺𑀓𑀺𑀡𑁆𑀡𑀸, 𑀢𑀲𑁆𑀲𑀸 𑀳𑀺 𑀳𑁂𑀝𑁆𑀞𑀢𑁄𑀧𑀺 𑀓𑀺𑀁𑀲𑀼𑀓𑀧𑀼𑀧𑁆𑀨𑀯𑀡𑁆𑀡𑀸 𑀅𑀗𑁆𑀕𑀸𑀭𑀸, 𑀉𑀪𑀬𑀧𑀲𑁆𑀲𑁂𑀲𑀼𑀧𑀺, 𑀆𑀓𑀸𑀲𑀢𑁄𑀧𑀺𑀲𑁆𑀲𑀸 𑀉𑀧𑀭𑀺 𑀅𑀗𑁆𑀕𑀸𑀭𑀸 𑀧𑀢𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀧𑁆𑀧𑀓𑁆𑀓𑀁 𑀑𑀓𑀺𑀮𑀺𑀦𑀺𑀁 𑀑𑀓𑀺𑀭𑀺𑀦𑀺’’𑀦𑁆𑀢𑀺. 𑀲𑀸 𑀇𑀲𑁆𑀲𑀸𑀧𑀓𑀢𑀸 𑀲𑀧𑀢𑁆𑀢𑀺𑀁 𑀅𑀗𑁆𑀕𑀸𑀭𑀓𑀝𑀸𑀳𑁂𑀦 𑀑𑀓𑀺𑀭𑀻𑀢𑀺 𑀢𑀲𑁆𑀲𑀸 𑀓𑀺𑀭 𑀓𑀮𑀺𑀗𑁆𑀕𑀭𑀜𑁆𑀜𑁄 𑀏𑀓𑀸 𑀦𑀸𑀝𑀓𑀺𑀦𑀻 𑀅𑀗𑁆𑀕𑀸𑀭𑀓𑀝𑀸𑀳𑀁 𑀲𑀫𑀻𑀧𑁂 𑀞𑀧𑁂𑀢𑁆𑀯𑀸 𑀕𑀢𑁆𑀢𑀢𑁄 𑀉𑀤𑀓𑀜𑁆𑀘 𑀧𑀼𑀜𑁆𑀙𑀢𑀺, 𑀧𑀸𑀡𑀺𑀦𑀸 𑀘 𑀲𑁂𑀤𑀁 𑀓𑀭𑁄𑀢𑀺. 𑀭𑀸𑀚𑀸𑀧𑀺 𑀢𑀸𑀬 𑀲𑀤𑁆𑀥𑀺𑀁 𑀓𑀣𑀜𑁆𑀘 𑀓𑀭𑁄𑀢𑀺, 𑀧𑀭𑀺𑀢𑀼𑀝𑁆𑀞𑀸𑀓𑀸𑀭𑀜𑁆𑀘 𑀤𑀲𑁆𑀲𑁂𑀢𑀺. 𑀅𑀕𑁆𑀕𑀫𑀳𑁂𑀲𑀻 𑀢𑀁 𑀅𑀲𑀳𑀫𑀸𑀦𑀸 𑀇𑀲𑁆𑀲𑀸𑀧𑀓𑀢𑀸 𑀳𑀼𑀢𑁆𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀭𑀜𑁆𑀜𑁄 𑀢𑀁 𑀅𑀗𑁆𑀕𑀸𑀭𑀓𑀝𑀸𑀳𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀉𑀧𑀭𑀺 𑀅𑀗𑁆𑀕𑀸𑀭𑁂 𑀑𑀓𑀺𑀭𑀺. 𑀲𑀸 𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀸𑀤𑀺𑀲𑀁𑀬𑁂𑀯 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑀯𑀺𑀢𑀼𑀁 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸.

𑀘𑁄𑀭𑀖𑀸𑀢𑀓𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀭𑀜𑁆𑀜𑁄 𑀆𑀡𑀸𑀬 𑀤𑀻𑀖𑀭𑀢𑁆𑀢𑀁 𑀘𑁄𑀭𑀸𑀦𑀁 𑀲𑀻𑀲𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑁄 𑀅𑀲𑀻𑀲𑀓𑀁 𑀓𑀩𑀦𑁆𑀥𑀁 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀪𑀺𑀓𑁆𑀔𑀼𑀯𑀢𑁆𑀣𑀼𑀲𑁆𑀫𑀺𑀁 𑀧𑀸𑀧𑀪𑀺𑀓𑁆𑀔𑀽𑀢𑀺 𑀮𑀸𑀫𑀓𑀪𑀺𑀓𑁆𑀔𑀼. 𑀲𑁄 𑀓𑀺𑀭 𑀮𑁄𑀓𑀲𑁆𑀲 𑀲𑀤𑁆𑀥𑀸𑀤𑁂𑀬𑁆𑀬𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀳𑀺 𑀅𑀲𑀁 𑀬𑀢𑁄 𑀪𑀺𑀦𑁆𑀦𑀸𑀚𑀻𑀯𑁄 𑀘𑀺𑀢𑁆𑀢𑀓𑁂𑀴𑀺𑀁 𑀓𑀻𑀴𑀦𑁆𑀢𑁄 𑀯𑀺𑀘𑀭𑀺. 𑀢𑀢𑁄 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑁄 𑀪𑀺𑀓𑁆𑀔𑀼𑀲𑀤𑀺𑀲𑁂𑀦𑁂𑀯 𑀅𑀢𑁆𑀢𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀺. 𑀪𑀺𑀓𑁆𑀔𑀼𑀦𑀻-𑀲𑀺𑀓𑁆𑀔𑀫𑀸𑀦𑀸-𑀲𑀸𑀫𑀡𑁂𑀭-𑀲𑀸𑀫𑀡𑁂𑀭𑀻𑀯𑀢𑁆𑀣𑀽𑀲𑀼𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑁨𑁩𑁧. 𑀢𑀧𑁄𑀤𑀸𑀯𑀢𑁆𑀣𑀼𑀲𑁆𑀫𑀺𑀁 𑀅𑀘𑁆𑀙𑁄𑀤𑀓𑁄𑀢𑀺 𑀧𑀲𑀦𑁆𑀦𑁄𑀤𑀓𑁄. 𑀲𑀻𑀢𑁄𑀤𑀓𑁄𑀢𑀺 𑀲𑀻𑀢𑀮𑀉𑀤𑀓𑁄. 𑀲𑀸𑀢𑁄𑀤𑀓𑁄𑀢𑀺 𑀫𑀥𑀼𑀭𑁄𑀤𑀓𑁄. 𑀲𑁂𑀢𑀓𑁄𑀢𑀺 𑀧𑀭𑀺𑀲𑀼𑀤𑁆𑀥𑁄 𑀦𑀺𑀲𑁆𑀲𑁂𑀯𑀸𑀮𑀧𑀡𑀓𑀓𑀤𑁆𑀤𑀫𑁄. 𑀲𑀼𑀧𑁆𑀧𑀢𑀺𑀢𑁆𑀣𑁄𑀢𑀺 𑀲𑀼𑀦𑁆𑀤𑀭𑁂𑀳𑀺 𑀢𑀺𑀢𑁆𑀣𑁂𑀳𑀺 𑀉𑀧𑀧𑀦𑁆𑀦𑁄. 𑀭𑀫𑀡𑀻𑀬𑁄𑀢𑀺 𑀭𑀢𑀺𑀚𑀦𑀓𑁄. 𑀘𑀓𑁆𑀓𑀫𑀢𑁆𑀢𑀸𑀦𑀻𑀢𑀺 𑀭𑀣𑀘𑀓𑁆𑀓𑀧𑁆𑀧𑀫𑀸𑀡𑀸𑀦𑀺. 𑀓𑀼𑀣𑀺𑀢𑀸 𑀲𑀦𑁆𑀤𑀢𑀻𑀢𑀺 𑀢𑀢𑁆𑀭𑀸 𑀲𑀦𑁆𑀢𑀢𑁆𑀢𑀸 𑀳𑀼𑀢𑁆𑀯𑀸 𑀲𑀦𑁆𑀤𑀢𑀺. 𑀬𑀢𑀸𑀬𑀁 𑀪𑀺𑀓𑁆𑀔𑀯𑁂𑀢𑀺 𑀬𑀢𑁄 𑀅𑀬𑀁 𑀪𑀺𑀓𑁆𑀔𑀯𑁂. 𑀲𑁄 𑀤𑀳𑁄𑀢𑀺 𑀲𑁄 𑀭𑀳𑀤𑁄. 𑀓𑀼𑀢𑁄 𑀧𑀦𑀸𑀬𑀁 𑀲𑀦𑁆𑀤𑀢𑀻𑀢𑀺? 𑀯𑁂𑀪𑀸𑀭𑀧𑀩𑁆𑀩𑀢𑀲𑁆𑀲 𑀓𑀺𑀭 𑀳𑁂𑀝𑁆𑀞𑀸 𑀪𑀼𑀫𑁆𑀫𑀝𑁆𑀞𑀓𑀦𑀸𑀕𑀸𑀦𑀁 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀁 𑀦𑀸𑀕𑀪𑀯𑀦𑀁 𑀤𑁂𑀯𑀮𑁄𑀓𑀲𑀤𑀺𑀲𑀁 𑀫𑀡𑀺𑀫𑀬𑁂𑀦 𑀢𑀮𑁂𑀦 𑀆𑀭𑀸𑀫𑀼𑀬𑁆𑀬𑀸𑀦𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁; 𑀢𑀢𑁆𑀣 𑀦𑀸𑀕𑀸𑀦𑀁 𑀓𑀻𑀴𑀦𑀝𑁆𑀞𑀸𑀦𑁂 𑀲𑁄 𑀉𑀤𑀓𑀤𑀳𑁄, 𑀢𑀢𑁄 𑀅𑀬𑀁 𑀢𑀧𑁄𑀤𑀸 𑀲𑀦𑁆𑀤𑀢𑀺. 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑀺𑀓𑀸𑀬 𑀆𑀕𑀘𑁆𑀙𑀢𑀻𑀢𑀺 𑀭𑀸𑀚𑀕𑀳𑀦𑀕𑀭𑀁 𑀓𑀺𑀭 𑀆𑀯𑀺𑀜𑁆𑀚𑁂𑀢𑁆𑀯𑀸 𑀫𑀳𑀸𑀧𑁂𑀢𑀮𑁄𑀓𑁄, 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀫𑀳𑀸𑀮𑁄𑀳𑀓𑀼𑀫𑁆𑀪𑀺𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑁂𑀦 𑀅𑀬𑀁 𑀢𑀧𑁄𑀤𑀸 𑀆𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀓𑀼𑀣𑀺𑀢𑀸 𑀲𑀦𑁆𑀤𑀢𑀻𑀢𑀺.

𑀬𑀼𑀤𑁆𑀥𑀯𑀢𑁆𑀣𑀼𑀲𑁆𑀫𑀺𑀁 𑀦𑀦𑁆𑀤𑀻 𑀘𑀭𑀢𑀻𑀢𑀺 𑀯𑀺𑀚𑀬𑀪𑁂𑀭𑀻 𑀆𑀳𑀺𑀡𑁆𑀟𑀢𑀺. 𑀭𑀸𑀚𑀸 𑀆𑀯𑀼𑀲𑁄 𑀮𑀺𑀘𑁆𑀙𑀯𑀻𑀳𑀻𑀢𑀺 𑀣𑁂𑀭𑁄 𑀓𑀺𑀭 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑁂 𑀘 𑀭𑀢𑁆𑀢𑀺𑀝𑁆𑀞𑀸𑀦𑁂 𑀘 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀮𑀺𑀘𑁆𑀙𑀯𑀬𑁄 𑀓𑀢𑀳𑀢𑁆𑀣𑀸 𑀓𑀢𑀽𑀧𑀸𑀲𑀦𑀸, 𑀭𑀸𑀚𑀸 𑀘 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀳𑀸𑀭𑀁 𑀤𑁂𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀸𑀚𑀸𑀦𑀁 𑀧𑀭𑀸𑀚𑀺𑀢𑀁 𑀧𑀮𑀸𑀬𑀫𑀸𑀦𑀁 𑀅𑀤𑁆𑀤𑀲. 𑀢𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀭𑀸𑀚𑀸 𑀆𑀯𑀼𑀲𑁄 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀓𑁄 𑀮𑀺𑀘𑁆𑀙𑀯𑀻𑀳𑀺 𑀧𑀪𑀕𑁆𑀕𑁄’’𑀢𑀺 𑀆𑀳. 𑀲𑀘𑁆𑀘𑀁, 𑀪𑀺𑀓𑁆𑀔𑀯𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀳𑀸𑀢𑀺 𑀧𑀭𑀸𑀚𑀺𑀓𑀓𑀸𑀮𑁂 𑀆𑀯𑀚𑁆𑀚𑀺𑀢𑁆𑀯𑀸 𑀬𑀁 𑀤𑀺𑀝𑁆𑀞𑀁 𑀢𑀁 𑀪𑀡𑀦𑁆𑀢𑁄 𑀲𑀘𑁆𑀘𑀁 𑀆𑀳.

𑁨𑁩𑁨. 𑀦𑀸𑀕𑁄𑀕𑀸𑀳𑀯𑀢𑁆𑀣𑀼𑀲𑁆𑀫𑀺𑀁 𑀲𑀧𑁆𑀧𑀺𑀦𑀺𑀓𑀸𑀬𑀸𑀢𑀺 𑀏𑀯𑀁𑀦𑀸𑀫𑀺𑀓𑀸𑀬. 𑀆𑀦𑁂𑀜𑁆𑀚𑀁 𑀲𑀫𑀸𑀥𑀺𑀦𑁆𑀢𑀺 𑀅𑀦𑁂𑀚𑀁 𑀅𑀘𑀮𑀁 𑀓𑀸𑀬𑀯𑀸𑀘𑀸𑀯𑀺𑀧𑁆𑀨𑀦𑁆𑀤𑀯𑀺𑀭𑀳𑀺𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀁. 𑀦𑀸𑀕𑀸𑀦𑀦𑁆𑀢𑀺 𑀳𑀢𑁆𑀣𑀻𑀦𑀁. 𑀑𑀕𑀬𑁆𑀳 𑀉𑀢𑁆𑀢𑀭𑀦𑁆𑀢𑀸𑀦𑀦𑁆𑀢𑀺 𑀑𑀕𑀬𑁆𑀳 𑀑𑀕𑀸𑀳𑁂𑀢𑁆𑀯𑀸 𑀧𑀼𑀦 𑀉𑀢𑁆𑀢𑀭𑀦𑁆𑀢𑀸𑀦𑀁. 𑀢𑁂 𑀓𑀺𑀭 𑀕𑀫𑁆𑀪𑀻𑀭𑀁 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀢𑀢𑁆𑀣 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀲𑁄𑀡𑁆𑀟𑀸𑀬 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀮𑁄𑀮𑁂𑀦𑁆𑀢𑀸 𑀉𑀢𑁆𑀢𑀭𑀦𑁆𑀢𑀺, 𑀢𑁂𑀲𑀁 𑀏𑀯𑀁 𑀑𑀕𑀬𑁆𑀳 𑀉𑀢𑁆𑀢𑀭𑀦𑁆𑀢𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁄𑀜𑁆𑀘𑀁 𑀓𑀭𑁄𑀦𑁆𑀢𑀸𑀦𑀦𑁆𑀢𑀺 𑀦𑀤𑀻𑀢𑀻𑀭𑁂 𑀞𑀢𑁆𑀯𑀸 𑀲𑁄𑀡𑁆𑀟𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑁄𑀜𑁆𑀘𑀦𑀸𑀤𑀁 𑀓𑀭𑁄𑀦𑁆𑀢𑀸𑀦𑀁. 𑀲𑀤𑁆𑀤𑀁 𑀅𑀲𑁆𑀲𑁄𑀲𑀺𑀦𑁆𑀢𑀺 𑀢𑀁 𑀓𑁄𑀜𑁆𑀘𑀦𑀸𑀤𑀲𑀤𑁆𑀤𑀁 𑀅𑀲𑁆𑀲𑁄𑀲𑀺𑀁. 𑀅𑀢𑁆𑀣𑁂𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺 𑀲𑁄 𑀘 𑀔𑁄 𑀅𑀧𑀭𑀺𑀲𑀼𑀤𑁆𑀥𑁄𑀢𑀺 𑀅𑀢𑁆𑀣𑀺 𑀏𑀲𑁄 𑀲𑀫𑀸𑀥𑀺 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲, 𑀲𑁄 𑀘 𑀔𑁄 𑀧𑀭𑀺𑀲𑀼𑀤𑁆𑀥𑁄 𑀦 𑀳𑁄𑀢𑀺. 𑀣𑁂𑀭𑁄 𑀓𑀺𑀭 𑀧𑀩𑁆𑀩𑀚𑀺𑀢𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀤𑀳𑀼𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑀸𑀘𑀺𑀡𑁆𑀡𑀯𑀲𑀻𑀪𑀸𑀯𑁄 𑀲𑀫𑀸𑀥𑀺𑀧𑀭𑀺𑀧𑀦𑁆𑀣𑀓𑁂 𑀥𑀫𑁆𑀫𑁂 𑀦 𑀲𑀼𑀝𑁆𑀞𑀼 𑀧𑀭𑀺𑀲𑁄𑀥𑁂𑀢𑁆𑀯𑀸 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀸𑀥𑀺𑀝𑁆𑀞𑀸𑀦𑀯𑀼𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀁 𑀲𑀜𑁆𑀜𑀸𑀫𑀢𑁆𑀢𑀓𑀫𑁂𑀯 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄, 𑀛𑀸𑀦𑀗𑁆𑀕𑁂𑀳𑀺 𑀯𑀼𑀝𑁆𑀞𑀸𑀬 𑀦𑀸𑀕𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀅𑀲𑁆𑀲𑁄𑀲𑀺’’𑀦𑁆𑀢𑀺 𑀏𑀯𑀁𑀲𑀜𑁆𑀜𑀻 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀣𑁂𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺; 𑀲𑁄 𑀘 𑀔𑁄 𑀅𑀧𑀭𑀺𑀲𑀼𑀤𑁆𑀥𑁄’’𑀢𑀺.

𑀲𑁄𑀪𑀺𑀢𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑀁, 𑀆𑀯𑀼𑀲𑁄, 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀺 𑀅𑀦𑀼𑀲𑁆𑀲𑀭𑀸𑀫𑀻𑀢𑀺 𑀏𑀓𑀸𑀯𑀚𑁆𑀚𑀦𑁂𑀦 𑀅𑀦𑀼𑀲𑁆𑀲𑀭𑀸𑀫𑀻𑀢𑀺 𑀆𑀳. 𑀇𑀢𑀭𑀣𑀸 𑀳𑀺 𑀅𑀦𑀘𑁆𑀙𑀭𑀺𑀬𑀁 𑀅𑀭𑀺𑀬𑀲𑀸𑀯𑀓𑀸𑀦𑀁 𑀧𑀝𑀺𑀧𑀸𑀝𑀺𑀬𑀸 𑀦𑀸𑀦𑀸𑀯𑀚𑁆𑀚𑀦𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀢𑀻𑀢𑁂 𑀦𑀺𑀯𑀸𑀲𑀲𑁆𑀲 𑀅𑀦𑀼𑀲𑁆𑀲𑀭𑀡𑀦𑁆𑀢𑀺 𑀦 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀧𑀦𑁂𑀲 ‘‘𑀏𑀓𑀸𑀯𑀚𑁆𑀚𑀦𑁂𑀦 𑀅𑀦𑀼𑀲𑁆𑀲𑀭𑀸𑀫𑀻’’𑀢𑀺 𑀆𑀳, 𑀢𑀲𑁆𑀫𑀸 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼. 𑀅𑀢𑁆𑀣𑁂𑀲𑀸, 𑀪𑀺𑀓𑁆𑀔𑀯𑁂, 𑀲𑁄𑀪𑀺𑀢𑀲𑁆𑀲, 𑀲𑀸 𑀘 𑀔𑁄 𑀏𑀓𑀸𑀬𑁂𑀯 𑀚𑀸𑀢𑀻𑀢𑀺 𑀬𑀁 𑀲𑁄𑀪𑀺𑀢𑁄 𑀚𑀸𑀢𑀺𑀁 𑀅𑀦𑀼𑀲𑁆𑀲𑀭𑀸𑀫𑀻𑀢𑀺 𑀆𑀳, 𑀅𑀢𑁆𑀣𑁂𑀲𑀸 𑀚𑀸𑀢𑀺 𑀲𑁄𑀪𑀺𑀢𑀲𑁆𑀲, 𑀲𑀸 𑀘 𑀔𑁄 𑀏𑀓𑀸𑀬𑁂𑀯 𑀅𑀦𑀦𑁆𑀢𑀭𑀸 𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀲𑁆𑀲𑀭𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀣𑀁 𑀧𑀦𑀸𑀬𑀁 𑀏𑀢𑀁 𑀅𑀦𑀼𑀲𑁆𑀲𑀭𑀻𑀢𑀺? 𑀅𑀬𑀁 𑀓𑀺𑀭 𑀧𑀜𑁆𑀘𑀦𑁆𑀦𑀁 𑀓𑀧𑁆𑀧𑀲𑀢𑀸𑀦𑀁 𑀉𑀧𑀭𑀺 𑀢𑀺𑀢𑁆𑀣𑀸𑀬𑀢𑀦𑁂

𑀧𑀩𑁆𑀩𑀚𑀺𑀢𑁆𑀯𑀸 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀅𑀲𑀜𑁆𑀜𑀪𑀯𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀅𑀯𑀲𑀸𑀦𑁂 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀸𑀓𑀸𑀲𑀺. 𑀲𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀫𑀸𑀦𑁄 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀝𑀺𑀲𑀦𑁆𑀥𑀺𑀁 𑀤𑀺𑀲𑁆𑀯𑀸 𑀢𑀢𑁄 𑀧𑀭𑀁 𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀘𑀼𑀢𑀺𑀫𑁂𑀯 𑀅𑀤𑁆𑀤𑀲. 𑀅𑀣 𑀉𑀪𑀺𑀦𑁆𑀦𑀫𑀦𑁆𑀢𑀭𑀸 𑀅𑀘𑀺𑀢𑁆𑀢𑀓𑀁 𑀅𑀢𑁆𑀢𑀪𑀸𑀯𑀁 𑀅𑀦𑀼𑀲𑁆𑀲𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀬𑀢𑁄 𑀲𑀮𑁆𑀮𑀓𑁆𑀔𑁂𑀲𑀺 𑁋 ‘‘𑀅𑀤𑁆𑀥𑀸𑀅𑀳𑀁 𑀅𑀲𑀜𑁆𑀜𑀪𑀯𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀏𑀯𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 𑀧𑀦𑀸𑀦𑁂𑀦 𑀤𑀼𑀓𑁆𑀓𑀭𑀁 𑀓𑀢𑀁, 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺 𑀧𑀝𑀺𑀯𑀺𑀤𑁆𑀥𑀸, 𑀆𑀓𑀸𑀲𑁂 𑀧𑀤𑀁 𑀤𑀲𑁆𑀲𑀺𑀢𑀁. 𑀢𑀲𑁆𑀫𑀸 𑀦𑀁 𑀪𑀕𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀯𑀢𑁆𑀣𑀼𑀲𑁆𑀫𑀺𑀁 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀬𑀤𑀺𑀤𑀁 𑀲𑁄𑀪𑀺𑀢𑁄’’𑀢𑀺 (𑀅. 𑀦𑀺. 𑁧.𑁨𑁧𑁯, 𑁨𑁨𑁭).

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀯𑀡𑁆𑀡𑀦𑀸

𑁨𑁩𑁩. 𑀉𑀤𑁆𑀤𑀺𑀝𑁆𑀞𑀸 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸𑀢𑀺 𑀇𑀤𑀁 𑀇𑀥 𑀉𑀤𑁆𑀤𑀺𑀝𑁆𑀞𑀧𑀸𑀭𑀸𑀚𑀺𑀓𑀧𑀭𑀺𑀤𑀻𑀧𑀦𑀫𑁂𑀯. 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀦 𑀲𑀩𑁆𑀩𑀸𑀦𑁂𑀯 𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀘𑀢𑀼𑀯𑀻𑀲𑀢𑀺? 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 𑀢𑀸𑀯 𑀪𑀺𑀓𑁆𑀔𑀽𑀦𑀁 𑀘𑀢𑁆𑀢𑀸𑀭𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀅𑀲𑀸𑀥𑀸𑀭𑀡𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀅𑀝𑁆𑀞. 𑀏𑀓𑀸𑀤𑀲 𑀅𑀪𑀩𑁆𑀩𑀧𑀼𑀕𑁆𑀕𑀮𑀸, 𑀢𑁂𑀲𑀼 𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸, 𑀢𑀬𑁄 𑀯𑀢𑁆𑀣𑀼𑀯𑀺𑀧𑀦𑁆𑀦𑀸 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸, 𑀢𑁂𑀲𑀁 𑀲𑀕𑁆𑀕𑁄 𑀅𑀯𑀸𑀭𑀺𑀢𑁄 𑀫𑀕𑁆𑀕𑁄 𑀧𑀦 𑀯𑀸𑀭𑀺𑀢𑁄, 𑀅𑀪𑀩𑁆𑀩𑀸 𑀳𑀺 𑀢𑁂 𑀫𑀕𑁆𑀕𑀧𑁆𑀧𑀝𑀺𑀮𑀸𑀪𑀸𑀬 𑀯𑀢𑁆𑀣𑀼𑀯𑀺𑀧𑀦𑁆𑀦𑀢𑁆𑀢𑀸𑀢𑀺. 𑀧𑀩𑁆𑀩𑀚𑁆𑀚𑀸𑀧𑀺 𑀦𑁂𑀲𑀁 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀧𑀺 𑀧𑀸𑀭𑀸𑀚𑀺𑀓𑀸. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀫𑀸𑀢𑀼𑀖𑀸𑀢𑀓𑁄, 𑀧𑀺𑀢𑀼𑀖𑀸𑀢𑀓𑁄, 𑀅𑀭𑀳𑀦𑁆𑀢𑀖𑀸𑀢𑀓𑁄, 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀲𑀗𑁆𑀖𑀪𑁂𑀤𑀓𑁄𑀢𑀺 𑀇𑀫𑁂 𑀅𑀝𑁆𑀞 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀬 𑀯𑀺𑀧𑀦𑁆𑀦𑀢𑁆𑀢𑀸 𑀅𑀪𑀩𑁆𑀩𑀝𑁆𑀞𑀸𑀦𑀁 𑀧𑀢𑁆𑀢𑀸𑀢𑀺 𑀧𑀸𑀭𑀸𑀚𑀺𑀓𑀸𑀯. 𑀢𑁂𑀲𑀼 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀲𑀕𑁆𑀕𑁄 𑀅𑀯𑀸𑀭𑀺𑀢𑁄 𑀫𑀕𑁆𑀕𑁄 𑀧𑀦 𑀯𑀸𑀭𑀺𑀢𑁄𑀯. 𑀇𑀢𑀭𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀪𑀬𑀫𑁆𑀧𑀺 𑀯𑀸𑀭𑀺𑀢𑀁. 𑀢𑁂 𑀳𑀺 𑀅𑀦𑀦𑁆𑀢𑀭𑀪𑀯𑁂 𑀦𑀭𑀓𑁂 𑀦𑀺𑀩𑁆𑀩𑀢𑁆𑀢𑀦𑀓𑀲𑀢𑁆𑀢𑀸. 𑀇𑀢𑀺 𑀇𑀫𑁂 𑀘 𑀏𑀓𑀸𑀤𑀲, 𑀧𑀼𑀭𑀺𑀫𑀸 𑀘 𑀅𑀝𑁆𑀞𑀸𑀢𑀺 𑀏𑀓𑀽𑀦𑀯𑀻𑀲𑀢𑀺. 𑀢𑁂 𑀕𑀺𑀳𑀺𑀮𑀺𑀗𑁆𑀕𑁂 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀺𑀳𑀺𑀦𑀺𑀯𑀸𑀲𑀦𑀦𑀺𑀯𑀢𑁆𑀣𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀯𑀻𑀲𑀢𑀺. 𑀲𑀸 𑀳𑀺 𑀅𑀚𑁆𑀛𑀸𑀘𑀸𑀭𑀯𑀻𑀢𑀺𑀓𑁆𑀓𑀫𑀁 𑀅𑀓𑀢𑁆𑀯𑀸𑀧𑀺 𑀏𑀢𑁆𑀢𑀸𑀯𑀢𑀸𑀯 𑀅𑀲𑁆𑀲𑀫𑀡𑀻𑀢𑀺 𑀇𑀫𑀸𑀦𑀺 𑀢𑀸𑀯 𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸𑀦𑀺.

𑀅𑀧𑀭𑀸𑀦𑀺𑀧𑀺 𑁋 𑀮𑀫𑁆𑀩𑀻, 𑀫𑀼𑀤𑀼𑀧𑀺𑀝𑁆𑀞𑀺𑀓𑁄, 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀸𑀢𑀺, 𑀧𑀭𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀪𑀺𑀦𑀺𑀲𑀻𑀤𑀢𑀻𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑀺 𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀏𑀢𑀸𑀦𑀺 𑀳𑀺 𑀬𑀲𑁆𑀫𑀸 𑀉𑀪𑀺𑀦𑁆𑀦𑀁 𑀭𑀸𑀕𑀯𑀲𑁂𑀦 𑀲𑀤𑀺𑀲𑀪𑀸𑀯𑀽𑀧𑀕𑀢𑀸𑀦𑀁 𑀥𑀫𑁆𑀫𑁄 ‘‘𑀫𑁂𑀣𑀼𑀦𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀏𑀢𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑀁 𑀅𑀧𑁆𑀧𑀝𑀺𑀲𑁂𑀯𑀺𑀢𑁆𑀯𑀸𑀬𑁂𑀯 𑀓𑁂𑀯𑀮𑀁 𑀫𑀕𑁆𑀕𑁂𑀦 𑀫𑀕𑁆𑀕𑀧𑁆𑀧𑀯𑁂𑀲𑀦𑀯𑀲𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀲𑁆𑀲 𑀅𑀦𑀼𑀮𑁄𑀫𑁂𑀦𑁆𑀢𑀻𑀢𑀺 𑀅𑀦𑀼𑀮𑁄𑀫𑀧𑀸𑀭𑀸𑀚𑀺𑀓𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀢𑀺 𑀇𑀫𑀸𑀦𑀺 𑀘 𑀘𑀢𑁆𑀢𑀸𑀭𑀺 𑀧𑀼𑀭𑀺𑀫𑀸𑀦𑀺 𑀘 𑀯𑀻𑀲𑀢𑀻𑀢𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀩𑁆𑀩𑀸𑀦𑁂𑀯 𑀘𑀢𑀼𑀯𑀻𑀲𑀢𑀺 𑀧𑀸𑀭𑀸𑀚𑀺𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀦 𑀮𑀪𑀢𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀦𑁆𑀢𑀺 𑀉𑀧𑁄𑀲𑀣-𑀧𑀯𑀸𑀭𑀡-𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲-𑀲𑀗𑁆𑀖𑀓𑀫𑁆𑀫𑀧𑁆𑀧𑀪𑁂𑀤𑀁 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀦 𑀮𑀪𑀢𑀺. 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀕𑀺𑀳𑀺𑀓𑀸𑀮𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀘 𑀧𑀘𑁆𑀙𑀸 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄𑀧𑀺 𑀢𑀣𑁂𑀯 𑀅𑀲𑀁𑀯𑀸𑀲𑁄 𑀳𑁄𑀢𑀺. 𑀦𑀢𑁆𑀣𑀺 𑀢𑀲𑁆𑀲 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀧𑀯𑀸𑀭𑀡𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀲𑀗𑁆𑀖𑀓𑀫𑁆𑀫𑀧𑁆𑀧𑀪𑁂𑀤𑁄 𑀲𑀁𑀯𑀸𑀲𑁄𑀢𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀦 𑀮𑀪𑀢𑀺. 𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂 𑀧𑀼𑀘𑁆𑀙𑀸𑀫𑀻𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼 𑀆𑀬𑀲𑁆𑀫𑀦𑁆𑀢𑁂 ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸’’𑀢𑀺 𑀧𑀼𑀘𑁆𑀙𑀸𑀫𑀺. 𑀓𑀘𑁆𑀘𑀺𑀢𑁆𑀣𑀸𑀢𑀺 𑀓𑀘𑁆𑀘𑀺 𑀏𑀢𑁆𑀣; 𑀏𑀢𑁂𑀲𑀼 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼 𑀓𑀘𑁆𑀘𑀺 𑀧𑀭𑀺𑀲𑀼𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸𑀢𑀺 𑀓𑀘𑁆𑀘𑀺 𑀧𑀭𑀺𑀲𑀼𑀤𑁆𑀥𑀸 𑀅𑀢𑁆𑀣, 𑀪𑀯𑀣𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.