𑁬. 𑀆𑀭𑀸𑀫𑀯𑀕𑁆𑀕𑁄

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁨𑁫. 𑀆𑀭𑀸𑀫𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸, 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀺𑀬𑀸𑀢𑀺 𑀏𑀢𑁆𑀣 𑀧𑀞𑀫𑀧𑀸𑀤𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀧𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁.

𑁧𑁦𑁨𑁭. 𑀲𑀻𑀲𑀸𑀦𑀼𑀮𑁄𑀓𑀺𑀓𑀸𑀢𑀺 𑀧𑀞𑀫𑀁 𑀧𑀯𑀺𑀲𑀦𑁆𑀢𑀻𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀻𑀲𑀁 𑀅𑀦𑀼𑀮𑁄𑀓𑁂𑀦𑁆𑀢𑀻 𑀧𑀯𑀺𑀲𑀢𑀺, 𑀅𑀦𑀸𑀧𑀢𑁆𑀢𑀺. 𑀬𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑁄𑀢𑀺 𑀬𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑁄 𑀧𑀞𑀫𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀚𑁆𑀛𑀸𑀬𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀢𑀢𑁆𑀣 𑀢𑀸𑀲𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀻𑀢𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀆𑀧𑀤𑀸𑀲𑀽𑀢𑀺 𑀓𑁂𑀦𑀘𑀺 𑀉𑀧𑀤𑁆𑀤𑀼𑀢𑀸 𑀳𑁄𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀞𑀫𑀲𑀺𑀓𑁆𑀔𑀸𑀧𑀤𑀁.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁨𑁮. 𑀤𑀼𑀢𑀺𑀬𑁂 𑁋 𑀆𑀬𑀲𑁆𑀫𑀸 𑀓𑀧𑁆𑀧𑀺𑀢𑀓𑁄𑀢𑀺 𑀅𑀬𑀁 𑀚𑀝𑀺𑀮𑀲𑀳𑀲𑁆𑀲𑀩𑁆𑀪𑀦𑁆𑀢𑀭𑁄 𑀣𑁂𑀭𑁄. 𑀲𑀁𑀳𑀭𑀻𑀢𑀺 𑀲𑀗𑁆𑀓𑀸𑀫𑁂𑀲𑀺. 𑀲𑀁𑀳𑀝𑁄𑀢𑀺 𑀲𑀗𑁆𑀓𑀸𑀫𑀺𑀢𑁄. 𑀓𑀸𑀲𑀸𑀯𑀝𑁄𑀢𑀺 𑀦𑁆𑀳𑀸𑀧𑀺𑀢𑀸 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳𑀁𑀲𑀼. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁩𑁬. 𑀢𑀢𑀺𑀬𑁂 𑁋 𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀸𑀬𑀸𑀢𑀺 𑀇𑀤𑀸𑀦𑀺𑀧𑀺 𑀢𑁆𑀯𑀁 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀲𑀸𑀲𑀦𑀺𑀧𑀓𑁆𑀔𑁂 𑀞𑀢𑁆𑀯𑀸 𑀯𑀤𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑁂𑀯𑀸𑀢𑀺.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁩𑁭. 𑀘𑀢𑀼𑀢𑁆𑀣𑁂 𑁋 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯. 𑀘𑀢𑀼𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀢𑁄 𑀓𑀸𑀬𑀯𑀸𑀘𑀢𑁄 𑀓𑀸𑀬𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀦𑀺𑀫𑀦𑁆𑀢𑀺𑀢𑀸𑀬 𑀅𑀦𑀸𑀧𑀼𑀘𑁆𑀙𑀸 𑀪𑀼𑀜𑁆𑀚𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀲𑀺𑀬𑀸 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀧𑀯𑀸𑀭𑀺𑀢𑀸𑀬 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑁆𑀯𑀸𑀧𑀺 𑀅𑀓𑀸𑀭𑁂𑀢𑁆𑀯𑀸𑀧𑀺 𑀪𑀼𑀜𑁆𑀚𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀲𑀺𑀬𑀸 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁪𑁩. 𑀧𑀜𑁆𑀘𑀫𑁂 𑁋 𑀓𑀼𑀮𑁂 𑀫𑀘𑁆𑀙𑀭𑁄 𑀓𑀼𑀮𑀫𑀘𑁆𑀙𑀭𑁄, 𑀓𑀼𑀮𑀫𑀘𑁆𑀙𑀭𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀓𑀼𑀮𑀫𑀘𑁆𑀙𑀭𑀺𑀦𑀻 𑀓𑀼𑀮𑀁 𑀯𑀸 𑀫𑀘𑁆𑀙𑀭𑀸𑀬𑀢𑀻𑀢𑀺 𑀓𑀼𑀮𑀫𑀘𑁆𑀙𑀭𑀺𑀦𑀻. 𑀓𑀼𑀮𑀲𑁆𑀲 𑀅𑀯𑀡𑁆𑀡𑀦𑁆𑀢𑀺 𑀢𑀁 𑀓𑀼𑀮𑀁 𑀅𑀲𑁆𑀲𑀤𑁆𑀥𑀁 𑀅𑀧𑁆𑀧𑀲𑀦𑁆𑀦𑀦𑁆𑀢𑀺. 𑀪𑀺𑀓𑁆𑀔𑀼𑀦𑀻𑀦𑀁 𑀅𑀯𑀡𑁆𑀡𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸𑀢𑀺.

𑁧𑁦𑁪𑁫. 𑀲𑀦𑁆𑀢𑀁𑀬𑁂𑀯 𑀆𑀤𑀻𑀦𑀯𑀦𑁆𑀢𑀺 𑀓𑀼𑀮𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀯𑀸 𑀲𑀦𑁆𑀢𑀁 𑀅𑀕𑀼𑀡𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁪𑁮. 𑀙𑀝𑁆𑀞𑁂 𑁋 𑀑𑀯𑀸𑀤𑀸𑀬𑀸𑀢𑀺 𑀕𑀭𑀼𑀥𑀫𑁆𑀫𑀢𑁆𑀣𑀸𑀬. 𑀲𑀁𑀯𑀸𑀲𑀸𑀬𑀸𑀢𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀧𑀼𑀘𑁆𑀙𑀦𑀢𑁆𑀣𑀸𑀬. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄𑀬𑁂𑀯.

𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁.

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁫𑁩. 𑀲𑀢𑁆𑀢𑀫𑁂 𑁋 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦 𑀮𑀪𑀢𑀻𑀢𑀺 𑀪𑀺𑀓𑁆𑀔𑀼𑀦𑀺𑀁 𑀦 𑀮𑀪𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀲𑁆𑀲𑀸𑀧𑀺 𑀯𑀺𑀢𑁆𑀣𑀸𑀭𑁄 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁂 𑀯𑀼𑀢𑁆𑀢𑁄𑀬𑁂𑀯.

𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁 𑁋 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁.

𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁫𑁬. 𑀅𑀝𑁆𑀞𑀫𑁂 𑁋 𑀏𑀓𑀓𑀫𑁆𑀫𑀦𑁆𑀢𑀺𑀆𑀤𑀻𑀳𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀬𑁂𑀯 𑀯𑀼𑀢𑁆𑀢𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀲𑁆𑀲𑀸𑀧𑀺 𑀯𑀺𑀢𑁆𑀣𑀸𑀭𑁄 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁂 𑀯𑀼𑀢𑁆𑀢𑁄𑀬𑁂𑀯.

𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑁋 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁.

𑁯. 𑀦𑀯𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁫𑁮. 𑀦𑀯𑀫𑁂 𑁋 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀲𑁆𑀲𑀸𑀧𑀺 𑀯𑀺𑀢𑁆𑀣𑀸𑀭𑁄 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁂 𑀯𑀼𑀢𑁆𑀢𑁄𑀬𑁂𑀯.

𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑀼𑀝𑁆𑀞𑀸𑀦𑀁 𑁋 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁬𑁨. 𑀤𑀲𑀫𑁂 𑁋 𑀧𑀲𑀸𑀔𑁂𑀢𑀺 𑀅𑀥𑁄𑀓𑀸𑀬𑁂. 𑀅𑀥𑁄𑀓𑀸𑀬𑁄 𑀳𑀺 𑀬𑀲𑁆𑀫𑀸 𑀢𑀢𑁄 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸 𑀯𑀺𑀬 𑀉𑀪𑁄 𑀊𑀭𑀽 𑀧𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀸, 𑀢𑀲𑁆𑀫𑀸 𑀧𑀲𑀸𑀔𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁬𑁫. 𑀪𑀺𑀦𑁆𑀤𑀸𑀢𑀺𑀆𑀤𑀻𑀲𑀼 𑀲𑀘𑁂 ‘‘𑀪𑀺𑀦𑁆𑀤, 𑀨𑀸𑀮𑁂𑀳𑀻’’𑀢𑀺 𑀲𑀩𑁆𑀩𑀸𑀦𑀺 𑀆𑀡𑀸𑀧𑁂𑀢𑀺, 𑀲𑁄 𑀘 𑀢𑀣𑁂𑀯 𑀓𑀭𑁄𑀢𑀺, 𑀙 𑀆𑀡𑀢𑁆𑀢𑀺𑀤𑀼𑀓𑁆𑀓𑀝𑀸𑀦𑀺 𑀙 𑀘 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀆𑀧𑀚𑁆𑀚𑀢𑀺. 𑀅𑀣𑀸𑀧𑀺 𑀏𑀯𑀁 𑀆𑀡𑀸𑀧𑁂𑀢𑀺 𑁋 ‘‘𑀉𑀧𑀸𑀲𑀓, 𑀬𑀁𑀓𑀺𑀜𑁆𑀘𑀺 𑀏𑀢𑁆𑀣 𑀓𑀸𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀓𑀭𑁄𑀳𑀻’’𑀢𑀺, 𑀲𑁄 𑀘 𑀲𑀩𑁆𑀩𑀸𑀦𑀺𑀧𑀺 𑀪𑁂𑀤𑀦𑀸𑀤𑀻𑀦𑀺 𑀓𑀭𑁄𑀢𑀺; 𑀏𑀓𑀯𑀸𑀘𑀸𑀬 𑀙 𑀤𑀼𑀓𑁆𑀓𑀝𑀸𑀦𑀺 𑀙 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀤𑁆𑀯𑀸𑀤𑀲 𑀆𑀧𑀢𑁆𑀢𑀺𑀬𑁄. 𑀲𑀘𑁂 𑀧𑀦 𑀪𑁂𑀤𑀦𑀸𑀤𑀻𑀲𑀼𑀧𑀺 𑀏𑀓𑀁𑀬𑁂𑀯 𑀯𑀢𑁆𑀯𑀸 ‘‘𑀇𑀤𑀁 𑀓𑀭𑁄𑀳𑀻’’𑀢𑀺 𑀆𑀡𑀸𑀧𑁂𑀢𑀺, 𑀲𑁄 𑀘 𑀲𑀩𑁆𑀩𑀸𑀦𑀺 𑀓𑀭𑁄𑀢𑀺, 𑀬𑀁 𑀆𑀡𑀢𑁆𑀢𑀁, 𑀢𑀲𑁆𑀲𑁂𑀯 𑀓𑀭𑀡𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀲𑁂𑀲𑁂𑀲𑀼 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑀆𑀭𑀸𑀫𑀯𑀕𑁆𑀕𑁄 𑀙𑀝𑁆𑀞𑁄.