𑁩. 𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑀁 (𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀯𑀡𑁆𑀡𑀦𑀸)

𑀧𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀥𑀫𑁆𑀫𑀸, 𑀪𑀺𑀓𑁆𑀔𑀼𑀦𑀻𑀦𑀁 𑀧𑀓𑀸𑀲𑀺𑀢𑀸;

𑀬𑁂 𑀢𑁂𑀲𑀁 𑀤𑀸𑀦𑀺 𑀪𑀯𑀢𑀺, 𑀅𑀬𑀁 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄.

𑁭𑁩𑁩. 𑀆𑀫𑀢𑁆𑀢𑀺𑀓𑀸𑀧𑀡𑀦𑁆𑀢𑀺 𑀅𑀫𑀢𑁆𑀢𑀸𑀦𑀺 𑀯𑀼𑀘𑁆𑀘𑀦𑁆𑀢𑀺 𑀪𑀸𑀚𑀦𑀸𑀦𑀺; 𑀢𑀸𑀦𑀺 𑀬𑁂 𑀯𑀺𑀓𑁆𑀓𑀺𑀡𑀦𑁆𑀢𑀺, 𑀢𑁂 𑀯𑀼𑀘𑁆𑀘𑀦𑁆𑀢𑀺 𑀆𑀫𑀢𑁆𑀢𑀺𑀓𑀸; 𑀢𑁂𑀲𑀁 𑀆𑀧𑀡𑁄 𑀆𑀫𑀢𑁆𑀢𑀺𑀓𑀸𑀧𑀡𑁄; 𑀢𑀁 𑀯𑀸 𑀧𑀲𑀸𑀭𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁭𑁩𑁪. 𑀧𑀢𑁆𑀢𑀲𑀦𑁆𑀦𑀺𑀘𑀬𑀁 𑀓𑀭𑁂𑀬𑁆𑀬𑀸𑀢𑀺 𑀧𑀢𑁆𑀢𑀲𑀦𑁆𑀦𑀺𑀥𑀺𑀁 𑀓𑀭𑁂𑀬𑁆𑀬; 𑀏𑀓𑀸𑀳𑀁 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀯𑀸 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀸 𑀧𑀢𑁆𑀢𑀁 𑀞𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀫𑀳𑀸𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀯 𑀳𑀺 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀤𑀲𑀸𑀳𑀁 𑀧𑀭𑀺𑀳𑀸𑀭𑁄, 𑀇𑀥 𑀏𑀓𑀸𑀳𑀫𑁆𑀧𑀺 𑀦𑀢𑁆𑀣𑀺. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑀇𑀤𑀫𑁆𑀧𑀺 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀅𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀞𑀫𑀲𑀺𑀓𑁆𑀔𑀸𑀧𑀤𑀁.

𑀤𑀼𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁩𑁮. 𑀤𑀼𑀢𑀺𑀬𑁂 𑁋 𑀤𑀼𑀘𑁆𑀘𑁄𑀴𑀸𑀢𑀺 𑀯𑀺𑀭𑀽𑀧𑀘𑁄𑀴𑀸; 𑀚𑀺𑀡𑁆𑀡𑀘𑁄𑀴𑀸𑀢𑀺 𑀅𑀢𑁆𑀣𑁄. 𑀅𑀧𑀬𑁆𑀬𑀸𑀳𑀻𑀢𑀺 𑀅𑀧𑀺 𑀅𑀬𑁆𑀬𑀸𑀳𑀺.

𑁭𑁪𑁦. 𑀆𑀤𑀺𑀲𑁆𑀲 𑀤𑀺𑀦𑁆𑀦𑀦𑁆𑀢𑀺 𑀲𑀫𑁆𑀧𑀢𑁆𑀢𑀸 𑀪𑀸𑀚𑁂𑀦𑁆𑀢𑀽𑀢𑀺 𑀯𑀢𑁆𑀯𑀸𑀧𑀺 𑀇𑀤𑀁 𑀕𑀡𑀲𑁆𑀲 𑀇𑀤𑀁 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻𑀢𑀺 𑀯𑀢𑁆𑀯𑀸 𑀯𑀸 𑀤𑀸𑀢𑀼𑀓𑀫𑁆𑀬𑀢𑀸𑀬 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀯𑀸 𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀏𑀢𑀁 𑀲𑀩𑁆𑀩𑀫𑁆𑀧𑀺 𑀅𑀓𑀸𑀮𑀘𑀻𑀯𑀭𑀁. 𑀅𑀬𑁆𑀬𑀸𑀬 𑀤𑀫𑁆𑀫𑀻𑀢𑀺 𑀏𑀯𑀁 𑀧𑀝𑀺𑀮𑀤𑁆𑀥𑀁 𑀧𑀦 𑀬𑀣𑀸𑀤𑀸𑀦𑁂𑀬𑁂𑀯 𑀉𑀧𑀦𑁂𑀢𑀩𑁆𑀩𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑀢𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁪𑁩-𑁫. 𑀢𑀢𑀺𑀬𑁂 𑁋 𑀳𑀦𑁆𑀤𑀸𑀢𑀺 𑀕𑀡𑁆𑀳. 𑀲𑀬𑀁 𑀅𑀘𑁆𑀙𑀺𑀦𑁆𑀤𑀢𑀻𑀢𑀺 𑀏𑀓𑀁 𑀤𑀢𑁆𑀯𑀸 𑀏𑀓𑀁 𑀅𑀘𑁆𑀙𑀺𑀦𑁆𑀤𑀦𑁆𑀢𑀺𑀬𑀸 𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀩𑀳𑀽𑀲𑀼 𑀩𑀳𑀽𑀦𑀺. 𑀲𑀘𑁂 𑀲𑀁𑀳𑀭𑀺𑀢𑁆𑀯𑀸 𑀞𑀧𑀺𑀢𑀸𑀦𑀺 𑀏𑀓𑀢𑁄 𑀅𑀘𑁆𑀙𑀺𑀦𑁆𑀤𑀢𑀺, 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁂𑀲𑀼 𑀧𑀦 𑀏𑀓𑀸𑀯 𑀆𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁.

𑀘𑀢𑀼𑀢𑁆𑀣𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁪𑁮. 𑀘𑀢𑀼𑀢𑁆𑀣𑁂 𑁋 𑀓𑀬𑁂𑀦𑀸𑀢𑀺 𑀫𑀽𑀮𑁂𑀦. 𑀦 𑀫𑁂 𑀆𑀯𑀼𑀲𑁄 𑀲𑀧𑁆𑀧𑀺𑀦𑀸 𑀅𑀢𑁆𑀣𑁄; 𑀢𑁂𑀮𑁂𑀦 𑀫𑁂 𑀅𑀢𑁆𑀣𑁄𑀢𑀺 𑀇𑀤𑀁 𑀓𑀺𑀭 𑀲𑀸 𑀆𑀳𑀝𑀲𑀧𑁆𑀧𑀺𑀁 𑀤𑀢𑁆𑀯𑀸 𑀢𑁂𑀮𑀫𑁆𑀧𑀺 𑀆𑀳𑀭𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀆𑀳. 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀚𑀸𑀦𑀸𑀧𑁂𑀢𑁆𑀯𑀸; 𑀇𑀤𑀁 𑀦𑀸𑀫 𑀆𑀳𑀭𑀸𑀢𑀺 𑀬𑀸𑀘𑀺𑀢𑁆𑀯𑀸 𑀯𑀸.

𑁭𑁫𑁨. 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀬𑀁 𑀧𑀞𑀫𑀁 𑀯𑀺𑀜𑁆𑀜𑀢𑁆𑀢𑀁 𑀢𑀁 𑀣𑁄𑀓𑀁 𑀦𑀧𑁆𑀧𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀦 𑀢𑀜𑁆𑀜𑁂𑀯 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀜𑁆𑀘 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀲𑀘𑁂 𑀧𑀞𑀫𑀁 𑀲𑀧𑁆𑀧𑀺𑀯𑀺𑀜𑁆𑀜𑀢𑁆𑀢𑀁, 𑀬𑀫𑀓𑀁 𑀧𑀘𑀺𑀢𑀩𑁆𑀩𑀦𑁆𑀢𑀺 𑀘 𑀯𑁂𑀚𑁆𑀚𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑁂𑀮𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀢𑁄 𑀢𑁂𑀮𑁂𑀦𑀸𑀧𑀺 𑀫𑁂 𑀅𑀢𑁆𑀣𑁄𑀢𑀺 𑀏𑀯𑀁 𑀅𑀜𑁆𑀜𑀜𑁆𑀘 𑀯𑀺𑀜𑁆𑀜𑀸𑀧𑁂𑀢𑀺. 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀘𑁂 𑀓𑀳𑀸𑀧𑀡𑀲𑁆𑀲 𑀲𑀧𑁆𑀧𑀺 𑀆𑀪𑀢𑀁 𑀳𑁄𑀢𑀺, 𑀇𑀫𑀺𑀦𑀸 𑀫𑀽𑀮𑁂𑀦 𑀤𑀺𑀕𑀼𑀡𑀁 𑀢𑁂𑀮𑀁 𑀮𑀩𑁆𑀪𑀢𑀺, 𑀢𑁂𑀦𑀸𑀧𑀺 𑀘 𑀇𑀤𑀁 𑀓𑀺𑀘𑁆𑀘𑀁 𑀦𑀺𑀧𑁆𑀨𑀚𑁆𑀚𑀢𑀺, 𑀢𑀲𑁆𑀫𑀸 𑀢𑁂𑀮𑀁 𑀆𑀳𑀭𑀸𑀢𑀺 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀢𑀻𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁.

𑀧𑀜𑁆𑀘𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁫𑁩. 𑀧𑀜𑁆𑀘𑀫𑁂 𑁋 𑀦 𑀫𑁂 𑀲𑀺𑀓𑁆𑀔𑀫𑀸𑀦𑁂𑀢𑀺 𑀇𑀤𑀁 𑀓𑀺𑀭 𑀲𑀸 𑀓𑀼𑀮𑀥𑀻𑀢𑀸 ‘‘𑀅𑀬𑀁 𑀅𑀤𑁆𑀥𑀸 𑀏𑀯𑀁 𑀯𑀼𑀢𑁆𑀢𑀸 𑀇𑀤𑀁 𑀢𑁂𑀮𑀁 𑀞𑀧𑁂𑀢𑁆𑀯𑀸 𑀲𑀧𑁆𑀧𑀺𑀫𑁆𑀧𑀺 𑀫𑁂 𑀅𑀢𑁆𑀢𑀦𑁄 𑀓𑀼𑀮𑀖𑀭𑀸 𑀆𑀳𑀭𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀆𑀳. 𑀘𑁂𑀢𑀸𑀧𑁂𑀢𑁆𑀯𑀸𑀢𑀺 𑀚𑀸𑀦𑀸𑀧𑁂𑀢𑁆𑀯𑀸 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀘𑀢𑀼𑀢𑁆𑀣𑀲𑀤𑀺𑀲𑀫𑁂𑀯𑀸𑀢𑀺.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁.

𑀙𑀝𑁆𑀞𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁫𑁮. 𑀙𑀝𑁆𑀞𑁂 𑁋 𑀙𑀦𑁆𑀤𑀓𑀦𑁆𑀢𑀺 ‘‘𑀇𑀤𑀁 𑀦𑀸𑀫 𑀥𑀫𑁆𑀫𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫, 𑀬𑀁 𑀲𑀓𑁆𑀓𑁄𑀣; 𑀢𑀁 𑀤𑁂𑀣𑀸’’𑀢𑀺 𑀏𑀯𑀁 𑀧𑀭𑁂𑀲𑀁 𑀙𑀦𑁆𑀤𑀜𑁆𑀘 𑀭𑀼𑀘𑀺𑀜𑁆𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑀳𑀺𑀢𑀧𑀭𑀺𑀓𑁆𑀔𑀸𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀜𑁆𑀜𑀤𑀢𑁆𑀣𑀺𑀓𑁂𑀦𑀸𑀢𑀺 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀤𑀺𑀦𑁆𑀦𑁂𑀦. 𑀅𑀜𑁆𑀜𑀼𑀤𑁆𑀤𑀺𑀲𑀺𑀓𑁂𑀦𑀸𑀢𑀺 𑀅𑀜𑁆𑀜𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀺𑀦𑁆𑀦𑁂𑀦. 𑀲𑀗𑁆𑀖𑀺𑀓𑁂𑀦𑀸𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑁂𑀦.

𑁭𑁬𑁨. 𑀲𑁂𑀲𑀓𑀁 𑀉𑀧𑀦𑁂𑀢𑀻𑀢𑀺 𑀬𑀤𑀢𑁆𑀣𑀸𑀬 𑀤𑀺𑀦𑁆𑀦𑁄, 𑀢𑀁 𑀘𑁂𑀢𑀸𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀉𑀧𑀦𑁂𑀢𑀺. 𑀲𑀸𑀫𑀺𑀓𑁂 𑀅𑀧𑀮𑁄𑀓𑁂𑀢𑁆𑀯𑀸𑀢𑀺 ‘‘𑀢𑀼𑀫𑁆𑀳𑁂𑀳𑀺 𑀘𑀻𑀯𑀭𑀢𑁆𑀣𑀸𑀬 𑀤𑀺𑀦𑁆𑀦𑁄, 𑀅𑀫𑁆𑀳𑀸𑀓𑀜𑁆𑀘 𑀘𑀻𑀯𑀭𑀁 𑀅𑀢𑁆𑀣𑀺, 𑀢𑁂𑀮𑀸𑀤𑀻𑀳𑀺 𑀧𑀦 𑀅𑀢𑁆𑀣𑁄’’𑀢𑀺 𑀏𑀯𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀉𑀧𑀦𑁂𑀢𑀺. 𑀆𑀧𑀤𑀸𑀲𑀽𑀢𑀺 𑀢𑀣𑀸𑀭𑀽𑀧𑁂𑀲𑀼 𑀉𑀧𑀤𑁆𑀤𑀯𑁂𑀲𑀼; 𑀪𑀺𑀓𑁆𑀔𑀼𑀦𑀺𑀬𑁄 𑀯𑀺𑀳𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀬𑀁 𑀯𑀸 𑀢𑀁 𑀯𑀸 𑀘𑁂𑀢𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁.

𑀲𑀢𑁆𑀢𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁬𑁪. 𑀲𑀢𑁆𑀢𑀫𑁂 𑁋 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀲𑀬𑀁 𑀬𑀸𑀘𑀺𑀢𑀓𑁂𑀦. 𑀏𑀢𑀤𑁂𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁. 𑀲𑁂𑀲𑀁 𑀙𑀝𑁆𑀞𑀲𑀤𑀺𑀲𑀫𑁂𑀯𑀸𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁.

𑀅𑀝𑁆𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁬𑁯. 𑀅𑀝𑁆𑀞𑀫𑁂 𑁋 𑀫𑀳𑀸𑀚𑀦𑀺𑀓𑁂𑀦𑀸𑀢𑀺 𑀕𑀡𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑁂𑀦. 𑀏𑀢𑀤𑁂𑀯𑁂𑀢𑁆𑀣 𑀦𑀸𑀦𑀸𑀓𑀭𑀡𑀁.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁.

𑀦𑀯𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁭𑁪. 𑀦𑀯𑀫𑀲𑀺𑀓𑁆𑀔𑀸𑀧𑀤𑁂 𑁋 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀇𑀤𑀁 𑀧𑀤𑀁 𑀇𑀢𑁄 𑀅𑀥𑀺𑀓𑀢𑀭𑀁.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁.

𑀤𑀲𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁭𑁮. 𑀤𑀲𑀫𑁂 𑁋 𑀧𑀭𑀺𑀯𑁂𑀡𑀁 𑀉𑀦𑁆𑀤𑁆𑀭𑀺𑀬𑀢𑀻𑀢𑀺 𑀧𑀭𑀺𑀯𑁂𑀡𑀁 𑀯𑀺𑀦𑀲𑁆𑀲𑀢𑀺; 𑀧𑀭𑀺𑀧𑀢𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀧𑀤𑀁 𑀧𑀼𑀕𑁆𑀕𑀮𑀺𑀓𑁂𑀦 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀇𑀤𑀜𑁆𑀘 𑀏𑀢𑁆𑀢𑀓𑀫𑁂𑀯 𑀦𑀸𑀦𑀸𑀓𑀭𑀡𑀁. 𑀲𑁂𑀲𑀁 𑀧𑀼𑀩𑁆𑀩𑀲𑀤𑀺𑀲𑀫𑁂𑀯𑀸𑀢𑀺.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑀏𑀓𑀸𑀤𑀲𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁮𑁪. 𑀏𑀓𑀸𑀤𑀲𑀫𑁂 𑁋 𑀕𑀭𑀼𑀧𑀸𑀯𑀼𑀭𑀡𑀦𑁆𑀢𑀺 𑀲𑀻𑀢𑀓𑀸𑀮𑁂 𑀧𑀸𑀯𑀼𑀭𑀡𑀁. 𑀘𑀢𑀼𑀓𑁆𑀓𑀁𑀲𑀧𑀭𑀫𑀦𑁆𑀢𑀺 𑀏𑀢𑁆𑀣 𑀓𑀁𑀲𑁄 𑀦𑀸𑀫 𑀘𑀢𑀼𑀓𑁆𑀓𑀳𑀸𑀧𑀡𑀺𑀓𑁄 𑀳𑁄𑀢𑀺; 𑀢𑀲𑁆𑀫𑀸 𑀧𑀤𑀪𑀸𑀚𑀦𑁂 ‘‘𑀲𑁄𑀴𑀲𑀓𑀳𑀸𑀧𑀡𑀕𑁆𑀖𑀦𑀓’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀓𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑀤𑁆𑀯𑀸𑀤𑀲𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁮𑁯. 𑀤𑁆𑀯𑀸𑀤𑀲𑀫𑁂 𑁋 𑀮𑀳𑀼𑀧𑀸𑀯𑀼𑀭𑀡𑀦𑁆𑀢𑀺 𑀉𑀡𑁆𑀳𑀓𑀸𑀮𑁂 𑀧𑀸𑀯𑀼𑀭𑀡𑀁. 𑀲𑁂𑀲𑀁 𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑁂𑀧𑀺 𑀉𑀢𑁆𑀢𑀸𑀦𑀫𑁂𑀯.

𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀤𑁆𑀯𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀁.

𑀉𑀤𑁆𑀤𑀺𑀝𑁆𑀞𑀸 𑀔𑁄 𑀅𑀬𑁆𑀬𑀸𑀬𑁄 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀫𑀳𑀸𑀯𑀺𑀪𑀗𑁆𑀕𑁂 𑀘𑀻𑀯𑀭𑀯𑀕𑁆𑀕𑀢𑁄 𑀥𑁄𑀯𑀦𑀜𑁆𑀘 𑀧𑀝𑀺𑀕𑁆𑀕𑀳𑀡𑀜𑁆𑀘𑀸𑀢𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀧𑀦𑁂𑀢𑁆𑀯𑀸 𑀅𑀓𑀸𑀮𑀘𑀻𑀯𑀭𑀁 𑀓𑀸𑀮𑀘𑀻𑀯𑀭𑀦𑁆𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀸𑀚𑀺𑀢𑀲𑀺𑀓𑁆𑀔𑀸𑀧𑀤𑁂𑀦 𑀘 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁂𑀦 𑀘 𑀧𑀞𑀫𑀯𑀕𑁆𑀕𑁄 𑀧𑀽𑀭𑁂𑀢𑀩𑁆𑀩𑁄. 𑀧𑀼𑀦 𑀏𑀴𑀓𑀮𑁄𑀫𑀯𑀕𑁆𑀕𑀲𑁆𑀲 𑀆𑀤𑀺𑀢𑁄 𑀲𑀢𑁆𑀢 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀧𑀦𑁂𑀢𑁆𑀯𑀸 𑀲𑀢𑁆𑀢 𑀅𑀜𑁆𑀜𑀤𑀢𑁆𑀣𑀺𑀓𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀢𑀺𑀬𑀯𑀕𑁆𑀕𑁄 𑀧𑀽𑀭𑁂𑀢𑀩𑁆𑀩𑁄. 𑀢𑀢𑀺𑀬𑀯𑀕𑁆𑀕𑀢𑁄 𑀧𑀞𑀫𑀧𑀢𑁆𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀆𑀭𑀜𑁆𑀜𑀓𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀅𑀧𑀦𑁂𑀢𑁆𑀯𑀸 𑀧𑀢𑁆𑀢𑀲𑀦𑁆𑀦𑀺𑀘𑀬𑀕𑀭𑀼𑀧𑀸𑀯𑀼𑀭𑀡𑀮𑀳𑀼𑀧𑀸𑀯𑀼𑀭𑀡𑀲𑀺𑀓𑁆𑀔𑀸𑀧𑀤𑁂𑀳𑀺 𑀢𑀢𑀺𑀬𑀯𑀕𑁆𑀕𑁄 𑀧𑀽𑀭𑁂𑀢𑀩𑁆𑀩𑁄. 𑀇𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀤𑁆𑀯𑀸𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀏𑀓𑀢𑁄𑀧𑀜𑁆𑀜𑀢𑁆𑀢𑀸𑀦𑀺, 𑀅𑀝𑁆𑀞𑀸𑀭𑀲 𑀉𑀪𑀢𑁄𑀧𑀜𑁆𑀜𑀢𑁆𑀢𑀸𑀦𑀻𑀢𑀺 𑀏𑀯𑀁 𑀲𑀩𑁆𑀩𑁂𑀧𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀫𑀕𑁆𑀕𑁂𑀦 ‘‘𑀉𑀤𑁆𑀤𑀺𑀝𑁆𑀞𑀸 𑀔𑁄 𑀅𑀬𑁆𑀬𑀸𑀬𑁄 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸 𑀥𑀫𑁆𑀫𑀸’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂

𑀢𑀺𑀁𑀲𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.