𑁭. 𑀲𑁂𑀔𑀺𑀬𑀓𑀡𑁆𑀟𑀁

𑁧. 𑀧𑀭𑀺𑀫𑀡𑁆𑀟𑀮𑀯𑀕𑁆𑀕𑀯𑀡𑁆𑀡𑀦𑀸

𑀬𑀸𑀦𑀺 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁂𑀦, 𑀲𑁂𑀔𑀺𑀬𑀸𑀦𑀻𑀢𑀺 𑀢𑀸𑀤𑀺𑀦𑀸;

𑀪𑀸𑀲𑀺𑀢𑀸𑀦𑀺 𑀅𑀬𑀁 𑀤𑀸𑀦𑀺, 𑀢𑁂𑀲𑀫𑁆𑀧𑀺 𑀯𑀡𑁆𑀡𑀦𑀸𑀓𑁆𑀓𑀫𑁄.

𑁫𑁭𑁬. 𑀢𑀢𑁆𑀣 𑀧𑀭𑀺𑀫𑀡𑁆𑀟𑀮𑀦𑁆𑀢𑀺 𑀲𑀫𑀦𑁆𑀢𑀢𑁄 𑀫𑀡𑁆𑀟𑀮𑀁. 𑀦𑀸𑀪𑀺𑀫𑀡𑁆𑀟𑀮𑀁 𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀉𑀤𑁆𑀥𑀁 𑀦𑀸𑀪𑀺𑀫𑀡𑁆𑀟𑀮𑀁 𑀅𑀥𑁄 𑀚𑀸𑀡𑀼𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀚𑀸𑀡𑀼𑀫𑀡𑁆𑀟𑀮𑀲𑁆𑀲 𑀳𑁂𑀝𑁆𑀞𑀸 𑀚𑀗𑁆𑀖𑀝𑁆𑀞𑀺𑀓𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀁 𑀦𑀺𑀯𑀸𑀲𑀦𑀁 𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀢𑀢𑁄 𑀧𑀭𑀁 𑀑𑀢𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀦𑀺𑀲𑀺𑀦𑁆𑀦𑀲𑁆𑀲 𑀚𑀸𑀡𑀼𑀫𑀡𑁆𑀟𑀮𑀢𑁄 𑀳𑁂𑀝𑁆𑀞𑀸 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁; 𑀏𑀯𑀁 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀧𑀦 𑀦𑀺𑀯𑀸𑀲𑀦𑀁 𑀧𑀫𑀸𑀡𑀺𑀓𑀁 𑀯𑀝𑁆𑀝𑀢𑀺. 𑀢𑀢𑁆𑀭𑀺𑀤𑀁 𑀧𑀫𑀸𑀡𑀁 𑁋 𑀤𑀻𑀖𑀢𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑀁, 𑀢𑀺𑀭𑀺𑀬𑀁 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀁. 𑀢𑀸𑀤𑀺𑀲𑀲𑁆𑀲 𑀧𑀦 𑀅𑀮𑀸𑀪𑁂 𑀢𑀺𑀭𑀺𑀬𑀁 𑀤𑁆𑀯𑀺𑀳𑀢𑁆𑀣𑀧𑀫𑀸𑀡𑀫𑁆𑀧𑀺 𑀯𑀝𑁆𑀝𑀢𑀺 𑀚𑀸𑀡𑀼𑀫𑀡𑁆𑀟𑀮𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁, 𑀦𑀸𑀪𑀺𑀫𑀡𑁆𑀟𑀮𑀁 𑀧𑀦 𑀘𑀻𑀯𑀭𑁂𑀦𑀸𑀧𑀺 𑀲𑀓𑁆𑀓𑀸 𑀧𑀝𑀺𑀘𑁆𑀙𑀸𑀤𑁂𑀢𑀼𑀦𑁆𑀢𑀺. 𑀢𑀢𑁆𑀣 𑀏𑀓𑀧𑀝𑁆𑀝𑀘𑀻𑀯𑀭𑀁 𑀏𑀯𑀁 𑀦𑀺𑀯𑀢𑁆𑀣𑀫𑁆𑀧𑀺 𑀦𑀺𑀯𑀢𑁆𑀣𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀤𑀼𑀧𑀝𑁆𑀝𑀁 𑀧𑀦 𑀢𑀺𑀝𑁆𑀞𑀢𑀺.

𑀑𑀮𑀫𑁆𑀩𑁂𑀦𑁆𑀢𑁄 𑀦𑀺𑀯𑀸𑀲𑁂𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑀲𑁆𑀲𑁂𑀯 𑀤𑀼𑀓𑁆𑀓𑀝𑀁, 𑀬𑁂 𑀧𑀦𑀜𑁆𑀜𑁂 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀕𑀺𑀳𑀺𑀦𑀺𑀯𑀢𑁆𑀣𑀁 𑀦𑀺𑀯𑀸𑀲𑁂𑀦𑁆𑀢𑀺 𑀳𑀢𑁆𑀣𑀺𑀲𑁄𑀡𑁆𑀟𑀓𑀁 𑀫𑀘𑁆𑀙𑀯𑀸𑀮𑀓𑀁 𑀘𑀢𑀼𑀓𑁆𑀓𑀡𑁆𑀡𑀓𑀁 𑀢𑀸𑀮𑀯𑀡𑁆𑀝𑀓𑀁 𑀲𑀢𑀯𑀮𑀺𑀓𑀁 𑀦𑀺𑀯𑀸𑀲𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁨𑁮𑁦) 𑀦𑀬𑁂𑀦 𑀔𑀦𑁆𑀥𑀓𑁂 𑀦𑀺𑀯𑀸𑀲𑀦𑀤𑁄𑀲𑀸 𑀯𑀼𑀢𑁆𑀢𑀸, 𑀢𑀣𑀸 𑀦𑀺𑀯𑀸𑀲𑁂𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀢𑁂 𑀲𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀦 𑀳𑁄𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀢𑀢𑁆𑀣𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑁂𑀲𑁆𑀲𑀸𑀫𑀻𑀢𑀺 𑀏𑀯𑀁 𑀅𑀲𑀜𑁆𑀘𑀺𑀘𑁆𑀘; 𑀅𑀣 𑀔𑁄 𑀧𑀭𑀺𑀫𑀡𑁆𑀟𑀮𑀁𑀬𑁂𑀯 𑀦𑀺𑀯𑀸𑀲𑁂𑀲𑁆𑀲𑀸𑀫𑀻𑀢𑀺 𑀯𑀺𑀭𑀚𑁆𑀛𑀺𑀢𑁆𑀯𑀸 𑀅𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀲𑁆𑀲𑀢𑀺𑀬𑀸𑀢𑀺 𑀅𑀜𑁆𑀜𑀯𑀺𑀳𑀺𑀢𑀲𑁆𑀲𑀸𑀧𑀺 𑀢𑀣𑀸 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀦𑀺𑀯𑀸𑀲𑀦𑀯𑀢𑁆𑀢𑀁 𑀅𑀚𑀸𑀦𑀦𑁆𑀢𑀲𑁆𑀲 𑀫𑁄𑀓𑁆𑀔𑁄 𑀦𑀢𑁆𑀣𑀺. 𑀦𑀺𑀯𑀸𑀲𑀦𑀯𑀢𑁆𑀢𑀜𑁆𑀳𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑀩𑁆𑀩𑀁, 𑀢𑀲𑁆𑀲 𑀅𑀦𑀼𑀕𑁆𑀕𑀳𑀡𑀫𑁂𑀯𑀲𑁆𑀲 𑀅𑀦𑀸𑀤𑀭𑀺𑀬𑀁. 𑀢𑀁 𑀧𑀦 𑀲𑀜𑁆𑀘𑀺𑀘𑁆𑀘 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀉𑀕𑁆𑀕𑀳𑀺𑀢𑀯𑀢𑁆𑀢𑁄𑀧𑀺 𑀬𑁄 𑀆𑀭𑀼𑀴𑁆𑀳𑀪𑀸𑀯𑀁 𑀯𑀸 𑀑𑀭𑀼𑀴𑁆𑀳𑀪𑀸𑀯𑀁 𑀯𑀸 𑀦 𑀚𑀸𑀦𑀸𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑀼𑀁 𑀅𑀚𑀸𑀦𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑁄 𑀧𑀦 𑀲𑀼𑀓𑁆𑀔𑀚𑀗𑁆𑀖𑁄 𑀯𑀸 𑀫𑀳𑀸𑀧𑀺𑀡𑁆𑀟𑀺𑀓𑀫𑀁𑀲𑁄 𑀯𑀸 𑀳𑁄𑀢𑀺, 𑀢𑀲𑁆𑀲 𑀲𑀸𑀭𑀼𑀧𑁆𑀧𑀢𑁆𑀣𑀸𑀬 𑀚𑀸𑀡𑀼𑀫𑀡𑁆𑀟𑀮𑀢𑁄 𑀅𑀝𑁆𑀞𑀗𑁆𑀕𑀼𑀮𑀸𑀥𑀺𑀓𑀫𑁆𑀧𑀺 𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺.

𑀕𑀺𑀮𑀸𑀦𑀲𑁆𑀲𑀸𑀢𑀺 𑀚𑀗𑁆𑀖𑀸𑀬 𑀯𑀸 𑀧𑀸𑀤𑁂 𑀯𑀸 𑀯𑀡𑁄 𑀳𑁄𑀢𑀺, 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀑𑀢𑀸𑀭𑁂𑀢𑁆𑀯𑀸 𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀆𑀧𑀤𑀸𑀲𑀽𑀢𑀺 𑀯𑀸𑀴𑀫𑀺𑀕𑀸 𑀯𑀸 𑀘𑁄𑀭𑀸 𑀯𑀸 𑀅𑀦𑀼𑀩𑀦𑁆𑀥𑀦𑁆𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺. 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 ‘‘𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀢𑀺𑀯𑁂𑀤𑀦’’𑀦𑁆𑀢𑀺 𑀆𑀳. 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦 ‘‘𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀮𑁄𑀓𑀯𑀚𑁆𑀚𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦’’𑀦𑁆𑀢𑀺 𑀆𑀳.

𑁫𑁭𑁭. 𑀧𑀭𑀺𑀫𑀡𑁆𑀟𑀮𑀁 𑀧𑀸𑀭𑀼𑀧𑀺𑀢𑀩𑁆𑀩𑀦𑁆𑀢𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀕𑀺𑀳𑀺𑀧𑀸𑀭𑀼𑀢𑀁 𑀧𑀸𑀭𑀼𑀧𑀦𑁆𑀢𑀻’’𑀢𑀺 (𑀘𑀽𑀴𑀯. 𑁨𑁮𑁦) 𑀏𑀯𑀁 𑀯𑀼𑀢𑁆𑀢𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀕𑀺𑀳𑀺𑀧𑀸𑀭𑀼𑀧𑀦𑀁 𑀅𑀧𑀸𑀭𑀼𑀧𑀺𑀢𑁆𑀯𑀸 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀪𑁄 𑀓𑀡𑁆𑀡𑁂 𑀲𑀫𑀁 𑀓𑀢𑁆𑀯𑀸 𑀧𑀸𑀭𑀼𑀧𑀦𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀧𑀸𑀭𑀼𑀧𑀺𑀢𑀩𑁆𑀩𑀁. 𑀇𑀫𑀸𑀦𑀺 𑀘 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀯𑀺𑀳𑀸𑀭𑁂𑀧𑀺 𑀅𑀦𑁆𑀢𑀭𑀖𑀭𑁂𑀧𑀺 𑀧𑀭𑀺𑀫𑀡𑁆𑀟𑀮𑀫𑁂𑀯 𑀦𑀺𑀯𑀸𑀲𑁂𑀢𑀩𑁆𑀩𑀜𑁆𑀘 𑀧𑀸𑀭𑀼𑀧𑀺𑀢𑀩𑁆𑀩𑀜𑁆𑀘𑀸𑀢𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺 𑀲𑀤𑁆𑀥𑀺𑀁 𑀣𑁂𑀭𑀯𑀸𑀤𑁂𑀦.

𑁫𑁭𑁮. 𑀓𑀸𑀬𑀁 𑀯𑀺𑀯𑀭𑀺𑀢𑁆𑀯𑀸𑀢𑀺 𑀚𑀢𑁆𑀢𑀼𑀫𑁆𑀧𑀺 𑀉𑀭𑀫𑁆𑀧𑀺 𑀯𑀺𑀯𑀭𑀺𑀢𑁆𑀯𑀸. 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀦𑀸𑀢𑀺 𑀦 𑀲𑀲𑀻𑀲𑀁 𑀧𑀸𑀭𑀼𑀢𑁂𑀦; 𑀅𑀣 𑀔𑁄 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀯𑀸𑀢𑀦𑁆𑀢𑁂𑀦 𑀕𑀻𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀉𑀪𑁄 𑀓𑀡𑁆𑀡𑁂 𑀲𑀫𑀁 𑀓𑀢𑁆𑀯𑀸 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀬𑀸𑀯 𑀫𑀡𑀺𑀩𑀦𑁆𑀥𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀕𑀮𑀯𑀸𑀝𑀓𑀢𑁄 𑀧𑀝𑁆𑀞𑀸𑀬 𑀲𑀻𑀲𑀁 𑀫𑀡𑀺𑀩𑀦𑁆𑀥𑀢𑁄 𑀧𑀝𑁆𑀞𑀸𑀬 𑀳𑀢𑁆𑀣𑁂 𑀧𑀺𑀡𑁆𑀟𑀺𑀓𑀫𑀁𑀲𑀢𑁄 𑀘 𑀧𑀝𑁆𑀞𑀸𑀬 𑀧𑀸𑀤𑁂 𑀯𑀺𑀯𑀭𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁.

𑁫𑁭𑁯. 𑀯𑀸𑀲𑀽𑀧𑀕𑀢𑀲𑁆𑀲𑀸𑀢𑀺 𑀯𑀸𑀲𑀢𑁆𑀣𑀸𑀬 𑀉𑀧𑀕𑀢𑀲𑁆𑀲 𑀭𑀢𑁆𑀢𑀺𑀪𑀸𑀕𑁂 𑀯𑀸 𑀤𑀺𑀯𑀲𑀪𑀸𑀕𑁂 𑀯𑀸 𑀓𑀸𑀬𑀁 𑀯𑀺𑀯𑀭𑀺𑀢𑁆𑀯𑀸𑀧𑀺 𑀦𑀺𑀲𑀻𑀤𑀢𑁄 𑀅𑀦𑀸𑀧𑀢𑁆𑀢𑀺.

𑁫𑁮𑁦. 𑀲𑀼𑀲𑀁𑀯𑀼𑀢𑁄𑀢𑀺 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀅𑀓𑀻𑀴𑀸𑀧𑁂𑀦𑁆𑀢𑁄; 𑀲𑀼𑀯𑀺𑀦𑀻𑀢𑁄𑀢𑀺 𑀅𑀢𑁆𑀣𑁄.

𑁫𑁮𑁨. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀳𑁂𑀝𑁆𑀞𑀸 𑀔𑀺𑀢𑁆𑀢𑀘𑀓𑁆𑀔𑀼 𑀳𑀼𑀢𑁆𑀯𑀸. 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑁄𑀢𑀺 𑀬𑀼𑀕𑀬𑀼𑀢𑁆𑀢𑀓𑁄 𑀳𑀺 𑀤𑀦𑁆𑀢𑁄 𑀆𑀚𑀸𑀦𑁂𑀬𑁆𑀬𑁄 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀢𑀺, 𑀧𑀼𑀭𑀢𑁄 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑀁 𑀪𑀽𑀫𑀺𑀪𑀸𑀕𑀁; 𑀇𑀫𑀺𑀦𑀸𑀧𑀺 𑀏𑀢𑁆𑀢𑀓𑀁 𑀧𑁂𑀓𑁆𑀔𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀢𑀳𑀁 𑀢𑀳𑀁 𑀑𑀮𑁄𑀓𑁂𑀦𑁆𑀢𑁄𑀢𑀺 𑀬𑁄 𑀢𑀁𑀢𑀁𑀤𑀺𑀲𑀸𑀪𑀸𑀕𑀁 𑀧𑀸𑀲𑀸𑀤𑀁 𑀓𑀽𑀝𑀸𑀕𑀸𑀭𑀁 𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀏𑀓𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀧𑀭𑀺𑀲𑁆𑀲𑀬𑀸𑀪𑀸𑀯𑀁 𑀑𑀮𑁄𑀓𑁂𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀲𑀻𑀤𑀦𑁆𑀢𑁂𑀦𑀸𑀧𑀺 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀦𑀸𑀯 𑀦𑀺𑀲𑀻𑀤𑀺𑀢𑀩𑁆𑀩𑀁.

𑁫𑁮𑁪. 𑀉𑀓𑁆𑀔𑀺𑀢𑁆𑀢𑀓𑀸𑀬𑀸𑀢𑀺 𑀉𑀓𑁆𑀔𑁂𑀧𑁂𑀦; 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁 𑀏𑀓𑀢𑁄 𑀯𑀸 𑀉𑀪𑀢𑁄 𑀯𑀸 𑀉𑀓𑁆𑀔𑀺𑀢𑁆𑀢𑀘𑀻𑀯𑀭𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀦 𑀏𑀯𑀁 𑀕𑀦𑁆𑀢𑀩𑁆𑀩𑀁. 𑀦𑀺𑀲𑀺𑀦𑁆𑀦𑀓𑀸𑀮𑁂 𑀧𑀦 𑀥𑀫𑀓𑀭𑀡𑀁 𑀦𑀻𑀳𑀭𑀦𑁆𑀢𑁂𑀦𑀸𑀧𑀺 𑀘𑀻𑀯𑀭𑀁 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸𑀯 𑀦𑀻𑀳𑀭𑀺𑀢𑀩𑁆𑀩𑀦𑁆𑀢𑀺.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀉𑀚𑁆𑀚𑀕𑁆𑀖𑀺𑀓𑀯𑀕𑁆𑀕𑀯𑀡𑁆𑀡𑀦𑀸

𑁫𑁮𑁬. 𑀉𑀚𑁆𑀚𑀕𑁆𑀖𑀺𑀓𑀸𑀬𑀸𑀢𑀺 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀓𑀭𑀡𑀯𑀘𑀦𑀁.

𑁫𑁮𑁮. 𑀅𑀧𑁆𑀧𑀲𑀤𑁆𑀤𑁄 𑀅𑀦𑁆𑀢𑀭𑀖𑀭𑁂𑀢𑀺 𑀏𑀢𑁆𑀣 𑀓𑀺𑀢𑁆𑀢𑀸𑀯𑀢𑀸 𑀅𑀧𑁆𑀧𑀲𑀤𑁆𑀤𑁄 𑀳𑁄𑀢𑀺? 𑀤𑁆𑀯𑀸𑀤𑀲𑀳𑀢𑁆𑀣𑁂 𑀕𑁂𑀳𑁂 𑀆𑀤𑀺𑀫𑁆𑀳𑀺 𑀲𑀗𑁆𑀖𑀢𑁆𑀣𑁂𑀭𑁄, 𑀫𑀚𑁆𑀛𑁂 𑀤𑀼𑀢𑀺𑀬𑀢𑁆𑀣𑁂𑀭𑁄, 𑀅𑀦𑁆𑀢𑁂 𑀢𑀢𑀺𑀬𑀢𑁆𑀣𑁂𑀭𑁄𑀢𑀺 𑀏𑀯𑀁 𑀦𑀺𑀲𑀺𑀦𑁆𑀦𑁂𑀲𑀼 𑀲𑀗𑁆𑀖𑀢𑁆𑀣𑁂𑀭𑁄 𑀤𑀼𑀢𑀺𑀬𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑀺, 𑀤𑀼𑀢𑀺𑀬𑀢𑁆𑀣𑁂𑀭𑁄 𑀢𑀲𑁆𑀲 𑀲𑀤𑁆𑀤𑀜𑁆𑀘𑁂𑀯 𑀲𑀼𑀡𑀸𑀢𑀺, 𑀓𑀣𑀜𑁆𑀘 𑀯𑀯𑀢𑁆𑀣𑀧𑁂𑀢𑀺. 𑀢𑀢𑀺𑀬𑀢𑁆𑀣𑁂𑀭𑁄 𑀧𑀦 𑀲𑀤𑁆𑀤𑀫𑁂𑀯 𑀲𑀼𑀡𑀸𑀢𑀺, 𑀓𑀣𑀁 𑀦 𑀯𑀯𑀢𑁆𑀣𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀅𑀧𑁆𑀧𑀲𑀤𑁆𑀤𑁄 𑀳𑁄𑀢𑀺. 𑀲𑀘𑁂 𑀧𑀦 𑀢𑀢𑀺𑀬𑀢𑁆𑀣𑁂𑀭𑁄 𑀓𑀣𑀁 𑀯𑀯𑀢𑁆𑀣𑀧𑁂𑀢𑀺, 𑀫𑀳𑀸𑀲𑀤𑁆𑀤𑁄 𑀦𑀸𑀫 𑀳𑁄𑀢𑀺.

𑁫𑁯𑁦. 𑀓𑀸𑀬𑀁 𑀧𑀕𑁆𑀕𑀳𑁂𑀢𑁆𑀯𑀸𑀢𑀺 𑀦𑀺𑀘𑁆𑀘𑀮𑀁 𑀓𑀢𑁆𑀯𑀸 𑀉𑀚𑀼𑀓𑁂𑀦 𑀓𑀸𑀬𑁂𑀦 𑀲𑀫𑁂𑀦 𑀇𑀭𑀺𑀬𑀸𑀧𑀣𑁂𑀦 𑀕𑀦𑁆𑀢𑀩𑁆𑀩𑀜𑁆𑀘𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀜𑁆𑀘.

𑁫𑁯𑁨. 𑀩𑀸𑀳𑀼𑀁 𑀧𑀕𑁆𑀕𑀳𑁂𑀢𑁆𑀯𑀸𑀢𑀺 𑀦𑀺𑀘𑁆𑀘𑀮𑀁 𑀓𑀢𑁆𑀯𑀸.

𑁫𑁯𑁪. 𑀲𑀻𑀲𑀁 𑀧𑀕𑁆𑀕𑀳𑁂𑀢𑁆𑀯𑀸𑀢𑀺 𑀦𑀺𑀘𑁆𑀘𑀮𑀁 𑀉𑀚𑀼𑀁 𑀞𑀧𑀬𑀺𑀢𑁆𑀯𑀸.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁩. 𑀔𑀫𑁆𑀪𑀓𑀢𑀯𑀕𑁆𑀕𑀯𑀡𑁆𑀡𑀦𑀸

𑁫𑁯𑁬-𑁮. 𑀔𑀫𑁆𑀪𑀓𑀢𑁄 𑀦𑀸𑀫 𑀓𑀝𑀺𑀬𑀁 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀓𑀢𑀔𑀫𑁆𑀪𑁄. 𑀑𑀕𑀼𑀡𑁆𑀞𑀺𑀢𑁄𑀢𑀺 𑀲𑀲𑀻𑀲𑀁 𑀧𑀸𑀭𑀼𑀢𑁄.

𑁬𑁦𑁦. 𑀉𑀓𑁆𑀓𑀼𑀝𑀺𑀓𑀸𑀬𑀸𑀢𑀺 𑀏𑀢𑁆𑀣 𑀉𑀓𑁆𑀓𑀼𑀝𑀺𑀓𑀸 𑀯𑀼𑀘𑁆𑀘𑀢𑀺 𑀧𑀡𑁆𑀳𑀺𑀬𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀧𑀸𑀤𑁂𑀳𑀺 𑀯𑀸, 𑀅𑀕𑁆𑀕𑀧𑀸𑀤𑁂 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀡𑁆𑀳𑀻𑀳𑀺𑀬𑁂𑀯 𑀯𑀸 𑀪𑀽𑀫𑀺𑀁 𑀨𑀼𑀲𑀦𑁆𑀢𑀲𑁆𑀲 𑀕𑀫𑀦𑀁. 𑀓𑀭𑀡𑀯𑀘𑀦𑀁 𑀧𑀦𑁂𑀢𑁆𑀣 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯.

𑁬𑁦𑁧. 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸𑀬𑀸𑀢𑀺 𑀏𑀢𑁆𑀣 𑀆𑀬𑁄𑀕𑀧𑀮𑁆𑀮𑀢𑁆𑀣𑀺𑀓𑀸𑀧𑀺 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸 𑀏𑀯.

𑁬𑁦𑁨. 𑀲𑀓𑁆𑀓𑀘𑁆𑀘𑀦𑁆𑀢𑀺 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸.

𑁬𑁦𑁩. 𑀆𑀓𑀺𑀭𑀦𑁆𑀢𑁂𑀧𑀻𑀢𑀺 𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑁂𑀧𑀺. 𑀧𑀢𑁆𑀢𑀲𑀜𑁆𑀜𑀻𑀢𑀺 𑀧𑀢𑁆𑀢𑁂 𑀲𑀜𑁆𑀜𑀁 𑀓𑀢𑁆𑀯𑀸.

𑁬𑁦𑁪. 𑀲𑀫𑀲𑀽𑀧𑀓𑁄 𑀦𑀸𑀫 𑀬𑀢𑁆𑀣 𑀪𑀢𑁆𑀢𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑁄 𑀲𑀽𑀧𑁄 𑀳𑁄𑀢𑀺. 𑀫𑀼𑀕𑁆𑀕𑀲𑀽𑀧𑁄 𑀫𑀸𑀲𑀲𑀽𑀧𑁄𑀢𑀺 𑀏𑀢𑁆𑀣 𑀓𑀼𑀮𑀢𑁆𑀣𑀸𑀤𑀻𑀳𑀺 𑀓𑀢𑀲𑀽𑀧𑀸𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺𑀬𑁂𑀯𑀸𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀭𑀲𑀭𑀲𑁂𑀢𑀺 𑀏𑀢𑁆𑀣 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀲𑀽𑀧𑁂 𑀅𑀯𑀲𑁂𑀲𑀸𑀦𑀺 𑀑𑀮𑁄𑀡𑀻𑀲𑀸𑀓𑀲𑀽𑀧𑁂𑀬𑁆𑀬𑀫𑀘𑁆𑀙𑀭𑀲𑀫𑀁𑀲𑀭𑀲𑀸𑀤𑀻𑀦𑀺 𑀭𑀲𑀭𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀁 𑀭𑀲𑀭𑀲𑀁 𑀩𑀳𑀼𑀫𑁆𑀧𑀺 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑁬𑁦𑁫. 𑀲𑀫𑀢𑀺𑀢𑁆𑀢𑀺𑀓𑀦𑁆𑀢𑀺 𑀲𑀫𑀧𑀼𑀡𑁆𑀡𑀁 𑀲𑀫𑀪𑀭𑀺𑀢𑀁. 𑀣𑀽𑀧𑀻𑀓𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 𑀣𑀽𑀧𑀻𑀓𑀢𑁄 𑀦𑀸𑀫 𑀧𑀢𑁆𑀢𑀲𑁆𑀲 𑀅𑀦𑁆𑀢𑁄𑀫𑀼𑀔𑀯𑀝𑁆𑀝𑀺𑀮𑁂𑀔𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀢𑁄; 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑁄 𑀭𑀘𑀺𑀢𑁄 𑀧𑀽𑀭𑀺𑀢𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀓𑀢𑀁 𑀅𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀫𑀼𑀔𑀯𑀝𑁆𑀝𑀺𑀮𑁂𑀔𑀸𑀲𑀫𑀧𑁆𑀧𑀫𑀸𑀡𑁄 𑀕𑀳𑁂𑀢𑀩𑁆𑀩𑁄.

𑀢𑀢𑁆𑀣 𑀣𑀽𑀧𑀻𑀓𑀢𑀁 𑀦𑀸𑀫 ‘‘𑀧𑀜𑁆𑀘𑀳𑀺 𑀪𑁄𑀚𑀦𑁂𑀳𑀺 𑀓𑀢’’𑀦𑁆𑀢𑀺 𑀅𑀪𑀬𑀢𑁆𑀣𑁂𑀭𑁄 𑀆𑀳. 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀧𑀦 ‘‘𑀧𑀺𑀡𑁆𑀟𑀧𑀸𑀢𑁄 𑀦𑀸𑀫 𑀬𑀸𑀕𑀼𑀧𑀺 𑀪𑀢𑁆𑀢𑀫𑁆𑀧𑀺 𑀔𑀸𑀤𑀦𑀻𑀬𑀫𑁆𑀧𑀺 𑀘𑀼𑀡𑁆𑀡𑀧𑀺𑀡𑁆𑀟𑁄𑀧𑀺 𑀤𑀦𑁆𑀢𑀓𑀝𑁆𑀞𑀫𑁆𑀧𑀺 𑀤𑀲𑀺𑀓𑀲𑀼𑀢𑁆𑀢𑀫𑁆𑀧𑀻’’𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀯𑀢𑁆𑀯𑀸 𑀤𑀲𑀺𑀓𑀲𑀼𑀢𑁆𑀢𑀫𑁆𑀧𑀺 𑀣𑀽𑀧𑀻𑀓𑀢𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀳. 𑀢𑁂𑀲𑀁 𑀯𑀸𑀤𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀭𑁄𑀳𑀡𑀁 𑀕𑀦𑁆𑀢𑁆𑀯𑀸 𑀘𑀽𑀴𑀲𑀼𑀫𑀦𑀢𑁆𑀣𑁂𑀭𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂 𑀣𑀽𑀧𑀻𑀓𑀢𑀧𑀺𑀡𑁆𑀟𑀧𑀸𑀢𑁄 𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄’’𑀢𑀺? 𑀢𑁂𑀲𑀜𑁆𑀘 𑀣𑁂𑀭𑀸𑀦𑀁 𑀯𑀸𑀤𑀁 𑀆𑀭𑁄𑀘𑁂𑀲𑀼𑀁. 𑀣𑁂𑀭𑁄 𑀲𑀼𑀢𑁆𑀯𑀸 𑀆𑀳 𑁋 ‘‘𑀅𑀳𑁄, 𑀘𑀽𑀴𑀦𑀸𑀕𑁄 𑀲𑀸𑀲𑀦𑀢𑁄 𑀪𑀝𑁆𑀞𑁄, 𑀅𑀳𑀁 𑀏𑀢𑀲𑁆𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀯𑀺𑀦𑀬𑀁 𑀯𑀸𑀘𑁂𑀦𑁆𑀢𑁄 𑀦 𑀓𑀤𑀸𑀘𑀺 𑀏𑀯𑀁 𑀅𑀯𑀘𑀁, 𑀅𑀬𑀁 𑀓𑀼𑀢𑁄 𑀮𑀪𑀺𑀢𑁆𑀯𑀸 𑀏𑀯𑀁 𑀯𑀤𑀲𑀻’’𑀢𑀺. 𑀪𑀺𑀓𑁆𑀔𑀽 𑀣𑁂𑀭𑀁 𑀬𑀸𑀘𑀺𑀁𑀲𑀼 𑁋 ‘‘𑀓𑀣𑁂𑀣 𑀤𑀸𑀦𑀺, 𑀪𑀦𑁆𑀢𑁂, 𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄’’𑀢𑀺? ‘‘𑀬𑀸𑀯𑀓𑀸𑀮𑀺𑀓𑁂𑀦𑀸𑀯𑀼𑀲𑁄’’𑀢𑀺 𑀣𑁂𑀭𑁄 𑀆𑀳. 𑀢𑀲𑁆𑀫𑀸 𑀬𑀁𑀓𑀺𑀜𑁆𑀘𑀺 𑀬𑀸𑀕𑀼𑀪𑀢𑁆𑀢𑀁 𑀯𑀸 𑀨𑀮𑀸𑀨𑀮𑀁 𑀯𑀸 𑀆𑀫𑀺𑀲𑀚𑀸𑀢𑀺𑀓𑀁 𑀲𑀫𑀢𑀺𑀢𑁆𑀢𑀺𑀓𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀅𑀥𑀺𑀝𑁆𑀞𑀸𑀦𑀼𑀧𑀕𑁂𑀦 𑀧𑀢𑁆𑀢𑁂𑀦, 𑀇𑀢𑀭𑁂𑀦 𑀧𑀦 𑀣𑀽𑀧𑀻𑀓𑀢𑀫𑁆𑀧𑀺 𑀯𑀝𑁆𑀝𑀢𑀺. 𑀬𑀸𑀫𑀓𑀸𑀮𑀺𑀓𑀲𑀢𑁆𑀢𑀸𑀳𑀓𑀸𑀮𑀺𑀓𑀬𑀸𑀯𑀚𑀻𑀯𑀺𑀓𑀸𑀦𑀺 𑀧𑀦 𑀅𑀥𑀺𑀝𑁆𑀞𑀸𑀦𑀼𑀧𑀕𑀧𑀢𑁆𑀢𑁂𑀧𑀺 𑀣𑀽𑀧𑀻𑀓𑀢𑀸𑀦𑀺 𑀯𑀝𑁆𑀝𑀦𑁆𑀢𑀺. 𑀤𑁆𑀯𑀻𑀲𑀼 𑀧𑀢𑁆𑀢𑁂𑀲𑀼 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀽𑀭𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑁂𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀯𑀼𑀢𑁆𑀢𑀁. 𑀬𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀬𑀫𑀸𑀦𑀁 𑀧𑀽𑀯𑀉𑀘𑁆𑀙𑀼𑀔𑀡𑁆𑀟𑀨𑀮𑀸𑀨𑀮𑀸𑀤𑀺 𑀳𑁂𑀝𑁆𑀞𑀸 𑀑𑀭𑁄𑀳𑀢𑀺, 𑀢𑀁 𑀣𑀽𑀧𑀻𑀓𑀢𑀁 𑀦𑀸𑀫 𑀦 𑀳𑁄𑀢𑀺. 𑀧𑀽𑀯𑀯𑀝𑀁𑀲𑀓𑀁 𑀞𑀧𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑀺, 𑀣𑀽𑀧𑀻𑀓𑀢𑀫𑁂𑀯 𑀳𑁄𑀢𑀺. 𑀧𑀼𑀧𑁆𑀨𑀯𑀝𑀁𑀲𑀓𑀢𑀓𑁆𑀓𑁄𑀮𑀓𑀝𑀼𑀓𑀨𑀮𑀸𑀤𑀺𑀯𑀝𑀁𑀲𑀓𑁂 𑀧𑀦 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀁 𑀣𑀽𑀧𑀻𑀓𑀢𑀁 𑀦 𑀳𑁄𑀢𑀺. 𑀪𑀢𑁆𑀢𑀲𑁆𑀲 𑀉𑀧𑀭𑀺 𑀣𑀸𑀮𑀓𑀁 𑀯𑀸 𑀧𑀢𑁆𑀢𑀁 𑀯𑀸 𑀞𑀧𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀣𑀽𑀧𑀻𑀓𑀢𑀁 𑀦𑀸𑀫 𑀦 𑀳𑁄𑀢𑀺. 𑀓𑀼𑀭𑀼𑀦𑁆𑀤𑀺𑀬𑀫𑁆𑀧𑀺 𑀯𑀼𑀢𑁆𑀢𑀁 𑁋 ‘‘𑀣𑀸𑀮𑀓𑁂 𑀯𑀸 𑀧𑀡𑁆𑀡𑁂 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀧𑀢𑁆𑀢𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀧𑀸𑀝𑁂𑀓𑁆𑀓𑀪𑀸𑀚𑀦𑀁 𑀯𑀝𑁆𑀝𑀢𑀻’’𑀢𑀺.

𑀇𑀥 𑀅𑀦𑀸𑀧𑀢𑁆𑀢𑀺𑀬𑀁 𑀕𑀺𑀮𑀸𑀦𑁄 𑀦 𑀆𑀕𑀢𑁄, 𑀢𑀲𑁆𑀫𑀸 𑀕𑀺𑀮𑀸𑀦𑀲𑁆𑀲𑀧𑀺 𑀣𑀽𑀧𑀻𑀓𑀢𑀁 𑀦 𑀯𑀝𑁆𑀝𑀢𑀺. 𑀲𑀩𑁆𑀩𑀢𑁆𑀣 𑀧𑀦 𑀧𑀝𑀺𑀕𑁆𑀕𑀳𑁂𑀢𑀼𑀫𑁂𑀯 𑀦 𑀯𑀝𑁆𑀝𑀢𑀺. 𑀧𑀝𑀺𑀕𑁆𑀕𑀳𑀺𑀢𑀁 𑀧𑀦 𑀲𑀼𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺.

𑀢𑀢𑀺𑀬𑁄 𑀯𑀕𑁆𑀕𑁄.

𑁪. 𑀲𑀓𑁆𑀓𑀘𑁆𑀘𑀯𑀕𑁆𑀕𑀯𑀡𑁆𑀡𑀦𑀸

𑁬𑁦𑁬. 𑀲𑀓𑁆𑀓𑀘𑁆𑀘𑀦𑁆𑀢𑀺 𑀏𑀢𑁆𑀣𑀸𑀧𑀺 𑀅𑀲𑀓𑁆𑀓𑀘𑁆𑀘𑀁 𑀧𑀝𑀺𑀕𑁆𑀕𑀳𑀡𑁂𑀬𑁂𑀯 𑀆𑀧𑀢𑁆𑀢𑀺, 𑀧𑀝𑀺𑀕𑁆𑀕𑀳𑀺𑀢𑀁 𑀧𑀦 𑀲𑀼𑀧𑀝𑀺𑀕𑁆𑀕𑀳𑀺𑀢𑀫𑁂𑀯. 𑀲𑀓𑁆𑀓𑀘𑁆𑀘𑀦𑁆𑀢𑀺 𑀘 𑀧𑀢𑁆𑀢𑀲𑀜𑁆𑀜𑀻𑀢𑀺 𑀘𑀸𑀢𑀺 𑀉𑀪𑀬𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁬𑁦𑁮. 𑀲𑀧𑀤𑀸𑀦𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀑𑀥𑀺𑀁 𑀅𑀓𑀢𑁆𑀯𑀸 𑀅𑀦𑀼𑀧𑀝𑀺𑀧𑀸𑀝𑀺𑀬𑀸. 𑀲𑀫𑀲𑀽𑀧𑀓𑁂 𑀯𑀢𑁆𑀢𑀩𑁆𑀩𑀁 𑀯𑀼𑀢𑁆𑀢𑀫𑁂𑀯.

𑁬𑁧𑁦. 𑀣𑀽𑀧𑀓𑀢𑁄𑀢𑀺 𑀫𑀢𑁆𑀣𑀓𑀢𑁄; 𑀯𑁂𑀫𑀚𑁆𑀛𑀢𑁄𑀢𑀺 𑀅𑀢𑁆𑀣𑁄.

𑁬𑁧𑁧. 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀤𑁂𑀦𑁆𑀢𑀻𑀢𑀺 𑀫𑀸𑀖𑀸𑀢𑀲𑀫𑀬𑀸𑀤𑀻𑀲𑀼 𑀧𑀝𑀺𑀘𑁆𑀙𑀦𑁆𑀦𑀁 𑀩𑁆𑀬𑀜𑁆𑀚𑀦𑀁 𑀓𑀢𑁆𑀯𑀸 𑀤𑁂𑀦𑁆𑀢𑀺. 𑀯𑀺𑀜𑁆𑀜𑀢𑁆𑀢𑀺𑀬𑀁 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑁬𑁧𑁪. 𑀉𑀚𑁆𑀛𑀸𑀦𑀲𑀜𑁆𑀜𑀻𑀲𑀺𑀓𑁆𑀔𑀸𑀧𑀤𑁂𑀧𑀺 𑀕𑀺𑀮𑀸𑀦𑁄 𑀦 𑀫𑀼𑀘𑁆𑀘𑀢𑀺.

𑁬𑁧𑁫. 𑀦𑀸𑀢𑀺𑀫𑀳𑀦𑁆𑀢𑁄 𑀓𑀩𑀴𑁄𑀢𑀺 𑀫𑀬𑀽𑀭𑀡𑁆𑀟𑀁 𑀅𑀢𑀺𑀫𑀳𑀦𑁆𑀢𑀁, 𑀓𑀼𑀓𑁆𑀓𑀼𑀝𑀡𑁆𑀟𑀁 𑀅𑀢𑀺𑀔𑀼𑀤𑁆𑀤𑀓𑀁, 𑀢𑁂𑀲𑀁 𑀯𑁂𑀫𑀚𑁆𑀛𑀧𑁆𑀧𑀫𑀸𑀡𑁄. 𑀔𑀚𑁆𑀚𑀓𑁂𑀢𑀺 𑀏𑀢𑁆𑀣 𑀫𑀽𑀮𑀔𑀸𑀤𑀦𑀻𑀬𑀸𑀤𑀺 𑀲𑀩𑁆𑀩𑀁 𑀕𑀳𑁂𑀢𑀩𑁆𑀩𑀁.

𑀘𑀢𑀼𑀢𑁆𑀣𑁄 𑀯𑀕𑁆𑀕𑁄.

𑁫. 𑀓𑀩𑀴𑀯𑀕𑁆𑀕𑀯𑀡𑁆𑀡𑀦𑀸

𑁬𑁧𑁭. 𑀅𑀦𑀸𑀳𑀝𑁂𑀢𑀺 𑀅𑀦𑀸𑀳𑀭𑀺𑀢𑁂; 𑀫𑀼𑀔𑀤𑁆𑀯𑀸𑀭𑀁 𑀅𑀲𑀫𑁆𑀧𑀸𑀧𑀺𑀢𑁂𑀢𑀺 𑀅𑀢𑁆𑀣𑁄.

𑁬𑁧𑁮. 𑀲𑀩𑁆𑀩𑀁 𑀳𑀢𑁆𑀣𑀦𑁆𑀢𑀺 𑀲𑀓𑀮𑀳𑀢𑁆𑀣𑀁.

𑁬𑁧𑁯. 𑀲𑀓𑀩𑀴𑁂𑀦𑀸𑀢𑀺 𑀏𑀢𑁆𑀣 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀳𑀭𑀻𑀢𑀓𑀁 𑀯𑀸 𑀮𑀝𑁆𑀞𑀺𑀫𑀥𑀼𑀓𑀁 𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀢𑀺. 𑀬𑀢𑁆𑀢𑀓𑁂𑀦 𑀯𑀘𑀦𑀁 𑀅𑀧𑀭𑀺𑀧𑀼𑀡𑁆𑀡𑀁 𑀦 𑀳𑁄𑀢𑀺, 𑀢𑀢𑁆𑀢𑀓𑁂 𑀫𑀼𑀔𑀫𑁆𑀳𑀺 𑀲𑀦𑁆𑀢𑁂 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑁬𑁨𑁦. 𑀧𑀺𑀡𑁆𑀟𑀼𑀓𑁆𑀔𑁂𑀧𑀓𑀦𑁆𑀢𑀺 𑀧𑀺𑀡𑁆𑀟𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸.

𑁬𑁨𑁧. 𑀓𑀩𑀴𑀸𑀯𑀘𑁆𑀙𑁂𑀤𑀓𑀦𑁆𑀢𑀺 𑀓𑀩𑀴𑀁 𑀅𑀯𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀯𑀘𑁆𑀙𑀺𑀦𑁆𑀤𑀺𑀢𑁆𑀯𑀸.

𑁬𑁨𑁨. 𑀅𑀯𑀕𑀡𑁆𑀟𑀓𑀸𑀭𑀓𑀦𑁆𑀢𑀺 𑀫𑀓𑁆𑀓𑀝𑁄 𑀯𑀺𑀬 𑀕𑀡𑁆𑀟𑁂 𑀓𑀢𑁆𑀯𑀸 𑀓𑀢𑁆𑀯𑀸.

𑁬𑁨𑁩. 𑀳𑀢𑁆𑀣𑀦𑀺𑀤𑁆𑀥𑀼𑀦𑀓𑀦𑁆𑀢𑀺 𑀳𑀢𑁆𑀣𑀁 𑀦𑀺𑀤𑁆𑀥𑀼𑀦𑀺𑀢𑁆𑀯𑀸 𑀦𑀺𑀤𑁆𑀥𑀼𑀦𑀺𑀢𑁆𑀯𑀸.

𑁬𑁨𑁪. 𑀲𑀺𑀢𑁆𑀣𑀸𑀯𑀓𑀸𑀭𑀓𑀦𑁆𑀢𑀺 𑀲𑀺𑀢𑁆𑀣𑀸𑀦𑀺 𑀅𑀯𑀓𑀺𑀭𑀺𑀢𑁆𑀯𑀸 𑀅𑀯𑀓𑀺𑀭𑀺𑀢𑁆𑀯𑀸.

𑁬𑁨𑁫. 𑀚𑀺𑀯𑁆𑀳𑀸𑀦𑀺𑀘𑁆𑀙𑀸𑀭𑀓𑀦𑁆𑀢𑀺 𑀚𑀺𑀯𑁆𑀳𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀦𑀺𑀘𑁆𑀙𑀸𑀭𑁂𑀢𑁆𑀯𑀸.

𑁬𑁨𑁬. 𑀘𑀧𑀼𑀘𑀧𑀼𑀓𑀸𑀭𑀓𑀦𑁆𑀢𑀺 𑀘𑀧𑀼 𑀘𑀧𑀽𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀢𑁆𑀯𑀸 𑀓𑀢𑁆𑀯𑀸.

𑀧𑀜𑁆𑀘𑀫𑁄 𑀯𑀕𑁆𑀕𑁄.

𑁬. 𑀲𑀼𑀭𑀼𑀲𑀼𑀭𑀼𑀯𑀕𑁆𑀕𑀯𑀡𑁆𑀡𑀦𑀸

𑁬𑁨𑁭. 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀦𑁆𑀢𑀺 𑀲𑀼𑀭𑀼𑀲𑀼𑀭𑀽𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀢𑁆𑀯𑀸 𑀓𑀢𑁆𑀯𑀸. 𑀤𑀯𑁄𑀢𑀺 𑀧𑀭𑀺𑀳𑀸𑀲𑀯𑀘𑀦𑀁; 𑀢𑀁 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 ‘‘𑀓𑀺𑀁 𑀩𑀼𑀤𑁆𑀥𑁄, 𑀲𑀺𑀮𑀓𑀩𑀼𑀤𑁆𑀥𑁄, 𑀧𑀝𑀺𑀩𑀼𑀤𑁆𑀥𑁄; 𑀓𑀺𑀁 𑀥𑀫𑁆𑀫𑁄, 𑀕𑁄𑀥𑀫𑁆𑀫𑁄, 𑀅𑀚𑀥𑀫𑁆𑀫𑁄; 𑀓𑀺𑀁 𑀲𑀗𑁆𑀖𑁄, 𑀫𑀺𑀕𑀲𑀗𑁆𑀖𑁄, 𑀧𑀲𑀼𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀻𑀡𑀺 𑀭𑀢𑀦𑀸𑀦𑀺 𑀆𑀭𑀩𑁆𑀪 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁬𑁨𑁮. 𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀦𑁆𑀢𑀺 𑀳𑀢𑁆𑀣𑀁 𑀦𑀺𑀮𑁆𑀮𑁂𑀳𑀺𑀢𑁆𑀯𑀸 𑀦𑀺𑀮𑁆𑀮𑁂𑀳𑀺𑀢𑁆𑀯𑀸. 𑀪𑀼𑀜𑁆𑀚𑀦𑁆𑀢𑁂𑀦 𑀳𑀺 𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀺 𑀦𑀺𑀮𑁆𑀮𑁂𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀖𑀦𑀬𑀸𑀕𑀼𑀨𑀸𑀡𑀺𑀢𑀧𑀸𑀬𑀸𑀲𑀸𑀤𑀺𑀓𑁂 𑀧𑀦 𑀅𑀗𑁆𑀕𑀼𑀮𑀻𑀳𑀺 𑀕𑀳𑁂𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑁄 𑀫𑀼𑀔𑁂 𑀧𑀯𑁂𑀲𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀢𑁆𑀢𑀦𑀺𑀮𑁆𑀮𑁂𑀳𑀓𑀑𑀝𑁆𑀞𑀦𑀺𑀮𑁆𑀮𑁂𑀳𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀏𑀓𑀗𑁆𑀕𑀼𑀮𑀺𑀬𑀸𑀧𑀺 𑀧𑀢𑁆𑀢𑁄 𑀦 𑀦𑀺𑀮𑁆𑀮𑁂𑀳𑀺𑀢𑀩𑁆𑀩𑁄, 𑀏𑀓𑀑𑀝𑁆𑀞𑁄𑀧𑀺 𑀚𑀺𑀯𑁆𑀳𑀸𑀬 𑀦 𑀦𑀺𑀮𑁆𑀮𑁂𑀳𑀺𑀢𑀩𑁆𑀩𑁄, 𑀑𑀝𑁆𑀞𑀫𑀁𑀲𑁂𑀳𑀺 𑀏𑀯 𑀧𑀦 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄 𑀧𑀯𑁂𑀲𑁂𑀢𑀼𑀁 𑀯𑀝𑁆𑀝𑀢𑀺.

𑁬𑁩𑁧. 𑀓𑁄𑀓𑀦𑀤𑁂𑀢𑀺 𑀏𑀯𑀁𑀦𑀸𑀫𑀓𑁂. 𑀓𑁄𑀓𑀦𑀤𑀦𑁆𑀢𑀺 𑀧𑀤𑀼𑀫𑀁 𑀯𑀼𑀘𑁆𑀘𑀢𑀺, 𑀲𑁄 𑀘 𑀧𑀸𑀲𑀸𑀤𑁄 𑀧𑀤𑀼𑀫𑀲𑀡𑁆𑀞𑀸𑀦𑁄, 𑀢𑁂𑀦𑀲𑁆𑀲 𑀓𑁄𑀓𑀦𑀤𑁄𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀦 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀦𑁆𑀢𑀺 𑀏𑀢𑀁 𑀧𑀝𑀺𑀓𑁆𑀓𑀽𑀮𑀯𑀲𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀸 𑀲𑀗𑁆𑀖𑀺𑀓𑀫𑁆𑀧𑀺 𑀧𑀼𑀕𑁆𑀕𑀮𑀺𑀓𑀫𑁆𑀧𑀺 𑀕𑀺𑀳𑀺𑀲𑀦𑁆𑀢𑀓𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀲𑀗𑁆𑀔𑀫𑁆𑀧𑀺 𑀲𑀭𑀸𑀯𑀫𑁆𑀧𑀺 𑀣𑀸𑀮𑀓𑀫𑁆𑀧𑀺 𑀦 𑀕𑀳𑁂𑀢𑀩𑁆𑀩𑀫𑁂𑀯, 𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀳𑀢𑁆𑀣𑀲𑁆𑀲 𑀏𑀓𑀤𑁂𑀲𑁄 𑀆𑀫𑀺𑀲𑀫𑀓𑁆𑀔𑀺𑀢𑁄 𑀦 𑀳𑁄𑀢𑀺, 𑀢𑁂𑀦 𑀧𑀤𑁂𑀲𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑁬𑁩𑁨. 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸𑀢𑀺 𑀲𑀺𑀢𑁆𑀣𑀸𑀦𑀺 𑀉𑀤𑀓𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀉𑀤𑀓𑀁 𑀙𑀟𑁆𑀟𑁂𑀢𑀺. 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸𑀢𑀺 𑀲𑀺𑀢𑁆𑀣𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀤𑀓𑀕𑀢𑀺𑀓𑀸𑀦𑀺 𑀓𑀢𑁆𑀯𑀸 𑀙𑀟𑁆𑀟𑁂𑀢𑀺. 𑀧𑀝𑀺𑀕𑁆𑀕𑀳𑁂 𑀯𑀸𑀢𑀺 𑀧𑀝𑀺𑀕𑁆𑀕𑀳𑁂𑀦 𑀧𑀝𑀺𑀘𑁆𑀙𑀦𑁆𑀢𑁄 𑀦𑀁 𑀧𑀝𑀺𑀕𑁆𑀕𑀳𑁂 𑀙𑀟𑁆𑀟𑁂𑀢𑀺. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀙𑀟𑁆𑀟𑁂𑀢𑀺; 𑀏𑀯𑀁 𑀙𑀟𑁆𑀟𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑁬𑁩𑁪. 𑀲𑁂𑀢𑀘𑁆𑀙𑀢𑁆𑀢𑀦𑁆𑀢𑀺 𑀯𑀢𑁆𑀣𑀧𑀮𑀺𑀕𑀼𑀡𑁆𑀞𑀺𑀢𑀁 𑀧𑀡𑁆𑀟𑀭𑀘𑁆𑀙𑀢𑁆𑀢𑀁. 𑀓𑀺𑀮𑀜𑁆𑀚𑀘𑁆𑀙𑀢𑁆𑀢𑀦𑁆𑀢𑀺 𑀯𑀺𑀮𑀻𑀯𑀘𑁆𑀙𑀢𑁆𑀢𑀁. 𑀧𑀡𑁆𑀡𑀘𑁆𑀙𑀢𑁆𑀢𑀦𑁆𑀢𑀺 𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀬𑁂𑀳𑀺 𑀓𑁂𑀳𑀺𑀘𑀺 𑀓𑀢𑀁. 𑀫𑀡𑁆𑀟𑀮𑀩𑀤𑁆𑀥𑀁 𑀲𑀮𑀸𑀓𑀩𑀤𑁆𑀥𑀦𑁆𑀢𑀺 𑀇𑀤𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀙𑀢𑁆𑀢𑀸𑀦𑀁 𑀧𑀜𑁆𑀚𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀸𑀦𑀺 𑀳𑀺 𑀫𑀡𑁆𑀟𑀮𑀩𑀤𑁆𑀥𑀸𑀦𑀺 𑀘𑁂𑀯 𑀳𑁄𑀦𑁆𑀢𑀺 𑀲𑀮𑀸𑀓𑀩𑀤𑁆𑀥𑀸𑀦𑀺 𑀘. 𑀬𑀫𑁆𑀧𑀺 𑀢𑀢𑁆𑀣𑀚𑀸𑀢𑀓𑀤𑀡𑁆𑀟𑀓𑁂𑀦 𑀓𑀢𑀁 𑀏𑀓𑀧𑀡𑁆𑀡𑀘𑁆𑀙𑀢𑁆𑀢𑀁 𑀳𑁄𑀢𑀺, 𑀢𑀫𑁆𑀧𑀺 𑀙𑀢𑁆𑀢𑀫𑁂𑀯. 𑀏𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀙𑀢𑁆𑀢𑀁 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀙𑀢𑁆𑀢𑀧𑀸𑀡𑀺. 𑀲𑁄 𑀢𑀁 𑀙𑀢𑁆𑀢𑀁 𑀥𑀸𑀭𑀬𑀫𑀸𑀦𑁄 𑀯𑀸 𑀅𑀁𑀲𑁂 𑀯𑀸 𑀓𑀢𑁆𑀯𑀸 𑀊𑀭𑀼𑀫𑁆𑀳𑀺 𑀯𑀸 𑀞𑀧𑁂𑀢𑁆𑀯𑀸 𑀬𑀸𑀯 𑀳𑀢𑁆𑀣𑁂𑀦 𑀦 𑀫𑀼𑀘𑁆𑀘𑀢𑀺, 𑀢𑀸𑀯𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑁂𑀲𑁂𑀦𑁆𑀢𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦𑀲𑁆𑀲 𑀅𑀜𑁆𑀜𑁄 𑀙𑀢𑁆𑀢𑀁 𑀥𑀸𑀭𑁂𑀢𑀺, 𑀙𑀢𑁆𑀢𑀧𑀸𑀤𑀼𑀓𑀸𑀬 𑀯𑀸 𑀞𑀺𑀢𑀁 𑀳𑁄𑀢𑀺, 𑀳𑀢𑁆𑀣𑀢𑁄 𑀅𑀧𑀕𑀢𑀫𑀢𑁆𑀢𑁂 𑀙𑀢𑁆𑀢𑀧𑀸𑀡𑀺 𑀦𑀸𑀫 𑀦 𑀳𑁄𑀢𑀺. 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀧𑀦𑁂𑀢𑁆𑀣 𑀧𑀤𑀲𑁄𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁬𑁩𑁫. 𑀤𑀡𑁆𑀟𑀧𑀸𑀡𑀺𑀲𑁆𑀲𑀸𑀢𑀺 𑀏𑀢𑁆𑀣 𑀤𑀡𑁆𑀟𑁄 𑀦𑀸𑀫 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑁄 𑀤𑀡𑁆𑀟𑀧𑀸𑀡𑀺𑀪𑀸𑀯𑁄 𑀧𑀦𑀲𑁆𑀲 𑀙𑀢𑁆𑀢𑀧𑀸𑀡𑀺𑀫𑁆𑀳𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁬𑁩𑁬. 𑀲𑀢𑁆𑀣𑀧𑀸𑀡𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄. 𑀅𑀲𑀺𑀁 𑀲𑀦𑁆𑀦𑀳𑀺𑀢𑁆𑀯𑀸 𑀞𑀺𑀢𑁄𑀧𑀺 𑀳𑀺 𑀲𑀢𑁆𑀣𑀧𑀸𑀡𑀺𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺.

𑁬𑁩𑁭. 𑀆𑀯𑀼𑀥𑀧𑀸𑀡𑀺𑀲𑁆𑀲𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁 𑁋 ‘‘𑀆𑀯𑀼𑀥𑀁 𑀦𑀸𑀫 𑀘𑀸𑀧𑁄 𑀓𑁄𑀤𑀡𑁆𑀟𑁄’’𑀢𑀺, 𑀅𑀣 𑀔𑁄 𑀲𑀩𑁆𑀩𑀸𑀧𑀺 𑀥𑀦𑀼𑀯𑀺𑀓𑀢𑀺 𑀲𑀤𑁆𑀥𑀺𑀁 𑀲𑀭𑀯𑀺𑀓𑀢𑀺𑀬𑀸 𑀆𑀯𑀼𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀲𑀤𑁆𑀥𑀺𑀁 𑀯𑀸 𑀲𑀭𑁂𑀦 𑀥𑀦𑀼𑀁 𑀕𑀳𑁂𑀢𑁆𑀯𑀸 𑀲𑀼𑀤𑁆𑀥𑀥𑀦𑀼𑀁 𑀯𑀸 𑀲𑀼𑀤𑁆𑀥𑀲𑀭𑀁 𑀯𑀸 𑀲𑀚𑀺𑀬𑀥𑀦𑀼𑀁 𑀯𑀸 𑀦𑀺𑀚𑁆𑀚𑀺𑀬𑀥𑀦𑀼𑀁 𑀯𑀸 𑀕𑀳𑁂𑀢𑁆𑀯𑀸 𑀞𑀺𑀢𑀲𑁆𑀲 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑁄 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑀲𑁆𑀲 𑀥𑀦𑀼𑀁 𑀓𑀡𑁆𑀞𑁂𑀧𑀺 𑀧𑀝𑀺𑀫𑀼𑀓𑁆𑀓𑀁 𑀳𑁄𑀢𑀺, 𑀬𑀸𑀯 𑀳𑀢𑁆𑀣𑁂𑀦 𑀦 𑀕𑀡𑁆𑀳𑀸𑀢𑀺, 𑀢𑀸𑀯 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯𑀸𑀢𑀺.

𑀙𑀝𑁆𑀞𑁄 𑀯𑀕𑁆𑀕𑁄.

𑁭. 𑀧𑀸𑀤𑀼𑀓𑀯𑀕𑁆𑀕𑀯𑀡𑁆𑀡𑀦𑀸

𑁬𑁩𑁮. 𑀅𑀓𑁆𑀓𑀦𑁆𑀢𑀲𑁆𑀲𑀸𑀢𑀺 𑀙𑀢𑁆𑀢𑀤𑀡𑁆𑀟𑀓𑁂 𑀅𑀗𑁆𑀕𑀼𑀮𑀦𑁆𑀢𑀭𑀁 𑀅𑀧𑁆𑀧𑀯𑁂𑀲𑁂𑀢𑁆𑀯𑀸 𑀓𑁂𑀯𑀮𑀁 𑀧𑀸𑀤𑀼𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀲𑁆𑀲. 𑀧𑀝𑀺𑀫𑀼𑀓𑁆𑀓𑀲𑁆𑀲𑀸𑀢𑀺 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑀲𑁆𑀲. 𑀉𑀧𑀸𑀳𑀦𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀑𑀫𑀼𑀓𑁆𑀓𑁄𑀢𑀺 𑀧𑀦𑁂𑀢𑁆𑀣 𑀧𑀡𑁆𑀳𑀺𑀓𑀩𑀤𑁆𑀥𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑁄 𑀯𑀼𑀘𑁆𑀘𑀢𑀺.

𑁬𑁪𑁦. 𑀬𑀸𑀦𑀕𑀢𑀲𑁆𑀲𑀸𑀢𑀺 𑀏𑀢𑁆𑀣 𑀲𑀘𑁂𑀧𑀺 𑀤𑁆𑀯𑀻𑀳𑀺 𑀚𑀦𑁂𑀳𑀺 𑀳𑀢𑁆𑀣𑀲𑀗𑁆𑀖𑀸𑀝𑁂𑀦 𑀕𑀳𑀺𑀢𑁄, 𑀲𑀸𑀝𑀓𑁂 𑀯𑀸 𑀞𑀧𑁂𑀢𑁆𑀯𑀸 𑀯𑀁𑀲𑁂𑀦 𑀯𑀬𑁆𑀳𑀢𑀺, 𑀅𑀬𑀼𑀢𑁆𑀢𑁂 𑀯𑀸 𑀯𑀬𑁆𑀳𑀸𑀤𑀺𑀓𑁂 𑀬𑀸𑀦𑁂, 𑀯𑀺𑀲𑀗𑁆𑀔𑀭𑀺𑀢𑁆𑀯𑀸 𑀯𑀸 𑀞𑀧𑀺𑀢𑁂 𑀘𑀓𑁆𑀓𑀫𑀢𑁆𑀢𑁂𑀧𑀺 𑀦𑀺𑀲𑀺𑀦𑁆𑀦𑁄 𑀬𑀸𑀦𑀕𑀢𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀲𑀘𑁂 𑀧𑀦 𑀤𑁆𑀯𑁂𑀧𑀺 𑀏𑀓𑀬𑀸𑀦𑁂 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀯𑀝𑁆𑀝𑀢𑀺. 𑀯𑀺𑀲𑀼𑀁 𑀦𑀺𑀲𑀺𑀦𑁆𑀦𑁂𑀲𑀼𑀧𑀺 𑀉𑀘𑁆𑀘𑁂 𑀬𑀸𑀦𑁂 𑀦𑀺𑀲𑀺𑀦𑁆𑀦𑁂𑀦 𑀦𑀻𑀘𑁂 𑀦𑀺𑀲𑀺𑀦𑁆𑀦𑀲𑁆𑀲 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺, 𑀲𑀫𑀧𑁆𑀧𑀫𑀸𑀡𑁂𑀧𑀺 𑀯𑀝𑁆𑀝𑀢𑀺. 𑀧𑀼𑀭𑀺𑀫𑁂 𑀬𑀸𑀦𑁂 𑀦𑀺𑀲𑀺𑀦𑁆𑀦𑁂𑀦 𑀧𑀘𑁆𑀙𑀺𑀫𑁂 𑀦𑀺𑀲𑀺𑀦𑁆𑀦𑀲𑁆𑀲 𑀯𑀝𑁆𑀝𑀢𑀺. 𑀧𑀘𑁆𑀙𑀺𑀫𑁂 𑀧𑀦 𑀉𑀘𑁆𑀘𑀢𑀭𑁂𑀧𑀺 𑀦𑀺𑀲𑀺𑀦𑁆𑀦𑁂𑀦 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑁬𑁪𑁧. 𑀲𑀬𑀦𑀕𑀢𑀲𑁆𑀲𑀸𑀢𑀺 𑀅𑀦𑁆𑀢𑀫𑀲𑁄 𑀓𑀝𑀲𑀸𑀭𑀓𑁂𑀧𑀺 𑀧𑀓𑀢𑀺𑀪𑀽𑀫𑀺𑀬𑀫𑁆𑀧𑀺 𑀦𑀺𑀧𑀦𑁆𑀦𑀲𑁆𑀲 𑀉𑀘𑁆𑀘𑁂𑀧𑀺 𑀫𑀜𑁆𑀘𑀧𑀻𑀞𑁂 𑀯𑀸 𑀪𑀽𑀫𑀺𑀧𑀤𑁂𑀲𑁂 𑀯𑀸 𑀞𑀺𑀢𑁂𑀦 𑀦𑀺𑀲𑀺𑀦𑁆𑀦𑁂𑀦 𑀯𑀸 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀬𑀦𑀕𑀢𑁂𑀦 𑀧𑀦 𑀲𑀬𑀦𑀕𑀢𑀲𑁆𑀲 𑀉𑀘𑁆𑀘𑀢𑀭𑁂 𑀯𑀸 𑀲𑀫𑀧𑁆𑀧𑀫𑀸𑀡𑁂 𑀯𑀸 𑀦𑀺𑀧𑀦𑁆𑀦𑁂𑀦 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀧𑀦𑁆𑀦𑁂𑀦 𑀘 𑀞𑀺𑀢𑀲𑁆𑀲 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺, 𑀦𑀺𑀲𑀺𑀦𑁆𑀦𑁂𑀦𑀸𑀧𑀺 𑀞𑀺𑀢𑀲𑁆𑀲 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀯𑀝𑁆𑀝𑀢𑀺. 𑀞𑀺𑀢𑁂𑀦 𑀞𑀺𑀢𑀲𑁆𑀲𑁂𑀯 𑀯𑀝𑁆𑀝𑀢𑀺.

𑁬𑁪𑁨. 𑀧𑀮𑁆𑀮𑀢𑁆𑀣𑀺𑀓𑀸𑀬𑀸𑀢𑀺 𑀆𑀬𑁄𑀕𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸 𑀳𑀢𑁆𑀣𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸 𑀬𑀸𑀬 𑀓𑀸𑀬𑀘𑀺 𑀧𑀮𑁆𑀮𑀢𑁆𑀣𑀺𑀓𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑁬𑁪𑁩. 𑀯𑁂𑀞𑀺𑀢𑀲𑀻𑀲𑀲𑁆𑀲𑀸𑀢𑀺 𑀤𑀼𑀲𑁆𑀲𑀯𑁂𑀞𑀦𑁂𑀦 𑀯𑀸 𑀫𑁄𑀴𑀺𑀆𑀤𑀻𑀳𑀺 𑀯𑀸 𑀬𑀣𑀸 𑀓𑁂𑀲𑀦𑁆𑀢𑁄 𑀦 𑀤𑀺𑀲𑁆𑀲𑀢𑀺; 𑀏𑀯𑀁 𑀯𑁂𑀞𑀺𑀢𑀲𑀻𑀲𑀲𑁆𑀲.

𑁬𑁪𑁪. 𑀑𑀕𑀼𑀡𑁆𑀞𑀺𑀢𑀲𑀻𑀲𑀲𑁆𑀲𑀸𑀢𑀺 𑀲𑀲𑀻𑀲𑀁 𑀧𑀸𑀭𑀼𑀢𑀲𑁆𑀲.

𑁬𑁪𑁫. 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂𑀦𑀸𑀢𑀺 𑀪𑀽𑀫𑀺𑀬𑀁 𑀦𑀺𑀲𑀺𑀦𑁆𑀦𑁂𑀦. 𑀆𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲𑀸𑀢𑀺 𑀅𑀦𑁆𑀢𑀫𑀲𑁄 𑀯𑀢𑁆𑀣𑀫𑁆𑀧𑀺 𑀢𑀺𑀡𑀸𑀦𑀺𑀧𑀺 𑀲𑀦𑁆𑀣𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲.

𑁬𑁪𑁭. 𑀙𑀧𑀓𑀲𑁆𑀲𑀸𑀢𑀺 𑀘𑀡𑁆𑀟𑀸𑀮𑀲𑁆𑀲. 𑀙𑀧𑀓𑀻𑀢𑀺 𑀘𑀡𑁆𑀟𑀸𑀮𑀻. 𑀦𑀺𑀮𑀻𑀦𑁄𑀢𑀺 𑀧𑀝𑀺𑀘𑁆𑀙𑀦𑁆𑀦𑁄 𑀳𑀼𑀢𑁆𑀯𑀸. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀳𑀺 𑀦𑀸𑀫. 𑀲𑀩𑁆𑀩𑀫𑀺𑀤𑀁 𑀘𑀭𑀺𑀫𑀁 𑀓𑀢𑀦𑁆𑀢𑀺 𑀢𑀢𑁆𑀣𑁂𑀯 𑀧𑀭𑀺𑀧𑀢𑀻𑀢𑀺 ‘‘𑀲𑀩𑁆𑀩𑁄 𑀅𑀬𑀁 𑀮𑁄𑀓𑁄 𑀲𑀗𑁆𑀓𑀭𑀁 𑀕𑀢𑁄 𑀦𑀺𑀫𑁆𑀫𑀭𑀺𑀬𑀸𑀤𑁄’’𑀢𑀺 𑀇𑀫𑀁 𑀯𑀘𑀦𑀁 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑁆𑀢𑀭𑀸 𑀭𑀼𑀓𑁆𑀔𑀢𑁄 𑀧𑀢𑀺𑀢𑁄. 𑀧𑀢𑀺𑀢𑁆𑀯𑀸 𑀘 𑀧𑀦 𑀉𑀪𑀺𑀦𑁆𑀦𑀫𑁆𑀧𑀺 𑀧𑀼𑀭𑀢𑁄 𑀞𑀢𑁆𑀯𑀸 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀉𑀪𑁄 𑀅𑀢𑁆𑀣𑀁 𑀦 𑀚𑀸𑀦𑀦𑁆𑀢𑀺…𑀧𑁂… 𑀅𑀲𑁆𑀫𑀸 𑀓𑀼𑀫𑁆𑀪𑀫𑀺𑀯𑀸𑀪𑀺𑀤𑀸’’𑀢𑀺.

𑀢𑀢𑁆𑀣 𑀉𑀪𑁄 𑀅𑀢𑁆𑀣𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀤𑁆𑀯𑁂𑀧𑀺 𑀚𑀦𑀸 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀦 𑀚𑀸𑀦𑀦𑁆𑀢𑀺. 𑀥𑀫𑁆𑀫𑀁 𑀦 𑀧𑀲𑁆𑀲𑀭𑁂𑀢𑀺 𑀧𑀸𑀴𑀺𑀁 𑀦 𑀧𑀲𑁆𑀲𑀦𑁆𑀢𑀺. 𑀓𑀢𑀫𑁂 𑀢𑁂 𑀉𑀪𑁄𑀢𑀺? ‘‘𑀬𑁄 𑀘𑀸𑀬𑀁 𑀫𑀦𑁆𑀢𑀁 𑀯𑀸𑀘𑁂𑀢𑀺, 𑀬𑁄 𑀘𑀸𑀥𑀫𑁆𑀫𑁂𑀦𑀥𑀻𑀬𑀢𑀻’’𑀢𑀺. 𑀏𑀯𑀁 𑀩𑁆𑀭𑀸𑀳𑁆𑀫𑀡𑀜𑁆𑀘 𑀭𑀸𑀚𑀸𑀦𑀜𑁆𑀘 𑀉𑀪𑁄𑀧𑀺 𑀅𑀥𑀫𑁆𑀫𑀺𑀓𑀪𑀸𑀯𑁂 𑀞𑀧𑁂𑀲𑀺.

𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 𑀲𑀸𑀮𑀻𑀦𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀚𑀸𑀦𑀸𑀫𑀳𑀁 𑀪𑁄 ‘‘𑀅𑀬𑀁 𑀅𑀥𑀫𑁆𑀫𑁄’’𑀢𑀺; 𑀅𑀧𑀺 𑀘 𑀔𑁄 𑀫𑀬𑀸 𑀤𑀻𑀖𑀭𑀢𑁆𑀢𑀁 𑀲𑀧𑀼𑀢𑁆𑀢𑀤𑀸𑀭𑀧𑀭𑀺𑀚𑀦𑁂𑀦 𑀭𑀜𑁆𑀜𑁄 𑀲𑀦𑁆𑀢𑀓𑁄 𑀲𑀸𑀮𑀻𑀦𑀁 𑀑𑀤𑀦𑁄 𑀪𑀼𑀢𑁆𑀢𑁄. 𑀲𑀼𑀘𑀺𑀫𑀁𑀲𑀽𑀧𑀲𑁂𑀘𑀦𑁄𑀢𑀺 𑀦𑀸𑀦𑀧𑁆𑀧𑀓𑀸𑀭𑀯𑀺𑀓𑀢𑀺𑀲𑀫𑁆𑀧𑀸𑀤𑀺𑀢𑀁 𑀲𑀼𑀘𑀺𑀫𑀁𑀲𑀽𑀧𑀲𑁂𑀘𑀦𑀁 𑀫𑀺𑀲𑁆𑀲𑀻𑀓𑀭𑀡𑀫𑀲𑁆𑀲𑀸𑀢𑀺 𑀲𑀼𑀘𑀺𑀫𑀁𑀲𑀽𑀧𑀲𑁂𑀘𑀦𑁄. 𑀢𑀲𑁆𑀫𑀸 𑀥𑀫𑁆𑀫𑁂 𑀦 𑀯𑀢𑁆𑀢𑀸𑀫𑀻𑀢𑀺 𑀬𑀲𑁆𑀫𑀸 𑀏𑀯𑀁 𑀫𑀬𑀸 𑀭𑀜𑁆𑀜𑁄 𑀑𑀤𑀦𑁄 𑀪𑀼𑀢𑁆𑀢𑁄, 𑀅𑀜𑁆𑀜𑁂 𑀘 𑀩𑀳𑀽 𑀮𑀸𑀪𑀸 𑀮𑀤𑁆𑀥𑀸, 𑀢𑀲𑁆𑀫𑀸 𑀥𑀫𑁆𑀫𑁂 𑀅𑀳𑀁 𑀦 𑀯𑀢𑁆𑀢𑀸𑀫𑀺 𑀉𑀤𑀭𑁂 𑀩𑀤𑁆𑀥𑁄 𑀳𑀼𑀢𑁆𑀯𑀸, 𑀦 𑀥𑀫𑁆𑀫𑀁 𑀅𑀚𑀸𑀦𑀦𑁆𑀢𑁄. 𑀅𑀬𑀜𑁆𑀳𑀺 𑀥𑀫𑁆𑀫𑁄 𑀅𑀭𑀺𑀬𑁂𑀳𑀺 𑀯𑀡𑁆𑀡𑀺𑀢𑁄 𑀧𑀲𑀢𑁆𑀣𑁄 𑀣𑁄𑀫𑀺𑀢𑁄𑀢𑀺 𑀚𑀸𑀦𑀸𑀫𑀺.

𑀅𑀣 𑀦𑀁 𑀙𑀧𑀓𑁄 ‘‘𑀥𑀺𑀭𑀢𑁆𑀣𑀽’’𑀢𑀺𑀆𑀤𑀺𑀦𑀸 𑀕𑀸𑀣𑀸𑀤𑁆𑀯𑀬𑁂𑀦 𑀅𑀚𑁆𑀛𑀪𑀸𑀲𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀢𑀬𑀸 𑀥𑀦𑀮𑀸𑀪𑁄 𑀘 𑀬𑀲𑀮𑀸𑀪𑁄 𑀘 𑀮𑀤𑁆𑀥𑁄, 𑀥𑀺𑀭𑀢𑁆𑀣𑀼 𑀢𑀁 𑀥𑀦𑀮𑀸𑀪𑀁 𑀬𑀲𑀮𑀸𑀪𑀜𑁆𑀘 𑀩𑁆𑀭𑀸𑀳𑁆𑀫𑀡. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀬𑀁 𑀢𑀬𑀸 𑀮𑀤𑁆𑀥𑁄 𑀮𑀸𑀪𑁄 𑀆𑀬𑀢𑀺𑀁 𑀅𑀧𑀸𑀬𑁂𑀲𑀼 𑀯𑀺𑀦𑀺𑀧𑀸𑀢𑀦𑀳𑁂𑀢𑀼𑀦𑀸 𑀲𑀫𑁆𑀧𑀢𑀺 𑀘 𑀅𑀥𑀫𑁆𑀫𑀘𑀭𑀡𑁂𑀦 𑀯𑀼𑀢𑁆𑀢𑀺 𑀦𑀸𑀫 𑀳𑁄𑀢𑀺. 𑀏𑀯𑀭𑀽𑀧𑀸 𑀬𑀸 𑀯𑀼𑀢𑁆𑀢𑀺 𑀆𑀬𑀢𑀺𑀁 𑀯𑀺𑀦𑀺𑀧𑀸𑀢𑁂𑀦 𑀇𑀥 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸 𑀦𑀺𑀧𑁆𑀧𑀚𑁆𑀚𑀢𑀺, 𑀓𑀺𑀁 𑀢𑀸𑀬 𑀯𑀼𑀢𑁆𑀢𑀺𑀬𑀸? 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀥𑀺𑀭𑀢𑁆𑀣𑀼 𑀢𑀁 𑀥𑀦𑀮𑀸𑀪𑀁, 𑀬𑀲𑀮𑀸𑀪𑀜𑁆𑀘 𑀩𑁆𑀭𑀸𑀳𑁆𑀫𑀡;

𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦, 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸’’𑀢𑀺.

𑀧𑀭𑀺𑀩𑁆𑀩𑀚 𑀫𑀳𑀸𑀩𑁆𑀭𑀳𑁆𑀫𑁂𑀢𑀺 𑀫𑀳𑀸𑀩𑁆𑀭𑀸𑀳𑁆𑀫𑀡 𑀇𑀢𑁄 𑀤𑀺𑀲𑀸 𑀲𑀻𑀖𑀁 𑀧𑀮𑀸𑀬𑀲𑁆𑀲𑀼. 𑀧𑀘𑀦𑁆𑀢𑀜𑁆𑀜𑁂𑀧𑀺 𑀧𑀸𑀡𑀺𑀦𑁄𑀢𑀺 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸 𑀧𑀘𑀦𑁆𑀢𑀺 𑀘𑁂𑀯 𑀪𑀼𑀜𑁆𑀚𑀦𑁆𑀢𑀺 𑀘; 𑀦 𑀓𑁂𑀯𑀮𑀁 𑀢𑁆𑀯𑀜𑁆𑀘𑁂𑀯 𑀭𑀸𑀚𑀸 𑀘. 𑀫𑀸 𑀢𑁆𑀯𑀁 𑀅𑀥𑀫𑁆𑀫𑁄 𑀆𑀘𑀭𑀺𑀢𑁄 𑀅𑀲𑁆𑀫𑀸 𑀓𑀼𑀫𑁆𑀪𑀫𑀺𑀯𑀸𑀪𑀺𑀤𑀸𑀢𑀺 𑀲𑀘𑁂 𑀳𑀺 𑀢𑁆𑀯𑀁 𑀇𑀢𑁄 𑀅𑀧𑀭𑀺𑀩𑁆𑀩𑀚𑀺𑀢𑁆𑀯𑀸 𑀇𑀫𑀁 𑀅𑀥𑀫𑁆𑀫𑀁 𑀆𑀘𑀭𑀺𑀲𑁆𑀲𑀲𑀺, 𑀢𑀢𑁄 𑀢𑁆𑀯𑀁 𑀲𑁄 𑀅𑀥𑀫𑁆𑀫𑁄 𑀏𑀯𑀁 𑀆𑀘𑀭𑀺𑀢𑁄 𑀬𑀣𑀸 𑀉𑀤𑀓𑀓𑀼𑀫𑁆𑀪𑀁 𑀧𑀸𑀲𑀸𑀡𑁄 𑀪𑀺𑀦𑁆𑀤𑁂𑀬𑁆𑀬; 𑀏𑀯𑀁 𑀪𑁂𑀘𑁆𑀙𑀢𑀺, 𑀢𑁂𑀦 𑀫𑀬𑀁 𑀢𑀁 𑀯𑀤𑀸𑀫 𑁋

‘‘𑀧𑀭𑀺𑀩𑁆𑀩𑀚 𑀫𑀳𑀸𑀩𑁆𑀭𑀳𑁆𑀫𑁂, 𑀧𑀘𑀦𑁆𑀢𑀜𑁆𑀜𑁂𑀧𑀺 𑀧𑀸𑀡𑀺𑀦𑁄;

𑀫𑀸 𑀢𑁆𑀯𑀁 𑀅𑀥𑀫𑁆𑀫𑁄 𑀆𑀘𑀭𑀺𑀢𑁄, 𑀅𑀲𑁆𑀫𑀸 𑀓𑀼𑀫𑁆𑀪𑀫𑀺𑀯𑀸𑀪𑀺𑀤𑀸’’𑀢𑀺.

𑀉𑀘𑁆𑀘𑁂 𑀆𑀲𑀦𑁂𑀢𑀺 𑀅𑀦𑁆𑀢𑀫𑀲𑁄 𑀪𑀽𑀫𑀺𑀧𑁆𑀧𑀤𑁂𑀲𑁂𑀧𑀺 𑀉𑀦𑁆𑀦𑀢𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑁬𑁪𑁮. 𑀦 𑀞𑀺𑀢𑁄 𑀦𑀺𑀲𑀺𑀦𑁆𑀦𑀲𑁆𑀲𑀸𑀢𑀺 𑀲𑀘𑁂𑀧𑀺 𑀣𑁂𑀭𑀼𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀞𑀺𑀢𑀁 𑀤𑀳𑀭𑀪𑀺𑀓𑁆𑀔𑀼𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀫𑀳𑀸𑀣𑁂𑀭𑁄 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀦 𑀓𑀣𑁂𑀢𑀩𑁆𑀩𑀁. 𑀕𑀸𑀭𑀯𑁂𑀦 𑀧𑀦 𑀣𑁂𑀭𑀁 𑀉𑀝𑁆𑀞𑀳𑀺𑀢𑁆𑀯𑀸 𑀧𑀼𑀘𑁆𑀙𑀣𑀸𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀧𑀲𑁆𑀲𑁂 𑀞𑀺𑀢𑀪𑀺𑀓𑁆𑀔𑀼𑀲𑁆𑀲 𑀓𑀣𑁂𑀫𑀻𑀢𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑁬𑁪𑁯. 𑀦 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁂𑀦𑀸𑀢𑀺 𑀏𑀢𑁆𑀣 𑀲𑀘𑁂 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀦 𑀓𑀣𑁂𑀢𑀩𑁆𑀩𑀁. 𑀧𑀘𑁆𑀙𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀣𑁂𑀫𑀻𑀢𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀤𑁆𑀥𑀺𑀁 𑀉𑀕𑁆𑀕𑀳𑀺𑀢𑀥𑀫𑁆𑀫𑀁 𑀧𑀦 𑀲𑀚𑁆𑀛𑀸𑀬𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀫𑀥𑀼𑀭𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑁬𑁫𑁦. 𑀦 𑀉𑀧𑁆𑀧𑀣𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀲𑀘𑁂 𑀤𑁆𑀯𑁂𑀧𑀺 𑀲𑀓𑀝𑀧𑀣𑁂 𑀏𑀓𑁂𑀓𑀘𑀓𑁆𑀓𑀧𑀣𑁂𑀦 𑀯𑀸 𑀉𑀧𑁆𑀧𑀣𑁂𑀦 𑀯𑀸 𑀲𑀫𑀥𑀼𑀭𑀁 𑀕𑀘𑁆𑀙𑀦𑁆𑀢𑀺, 𑀯𑀝𑁆𑀝𑀢𑀺.

𑁬𑁫𑁧. 𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀲𑀳𑀲𑀸 𑀉𑀘𑁆𑀘𑀸𑀭𑁄 𑀯𑀸 𑀧𑀲𑁆𑀲𑀸𑀯𑁄 𑀯𑀸 𑀦𑀺𑀓𑁆𑀔𑀫𑀢𑀺, 𑀅𑀲𑀜𑁆𑀘𑀺𑀘𑁆𑀘 𑀓𑀢𑁄 𑀦𑀸𑀫 𑀅𑀦𑀸𑀧𑀢𑁆𑀢𑀺.

𑁬𑁫𑁨. 𑀦 𑀳𑀭𑀺𑀢𑁂𑀢𑀺 𑀏𑀢𑁆𑀣 𑀬𑀫𑁆𑀧𑀺 𑀚𑀻𑀯𑀭𑀼𑀓𑁆𑀔𑀲𑁆𑀲 𑀫𑀽𑀮𑀁 𑀧𑀣𑀯𑀺𑀬𑀁 𑀤𑀺𑀲𑁆𑀲𑀫𑀸𑀦𑀁 𑀕𑀘𑁆𑀙𑀢𑀺, 𑀲𑀸𑀔𑀸 𑀯𑀸 𑀪𑀽𑀫𑀺𑀮𑀕𑁆𑀕𑀸 𑀕𑀘𑁆𑀙𑀢𑀺, 𑀲𑀩𑁆𑀩𑀁 𑀳𑀭𑀺𑀢𑀲𑀗𑁆𑀔𑀸𑀢𑀫𑁂𑀯. 𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀧𑁆𑀧𑀳𑀭𑀺𑀢𑀝𑁆𑀞𑀸𑀦𑁂 𑀧𑀸𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀧𑁆𑀧𑀳𑀭𑀺𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀲𑀳𑀲𑀸 𑀦𑀺𑀓𑁆𑀔𑀫𑀢𑀺, 𑀕𑀺𑀮𑀸𑀦𑀝𑁆𑀞𑀸𑀦𑁂 𑀞𑀺𑀢𑁄 𑀳𑁄𑀢𑀺, 𑀯𑀝𑁆𑀝𑀢𑀺. 𑀅𑀧𑁆𑀧𑀳𑀭𑀺𑀢𑁂 𑀓𑀢𑁄𑀢𑀺 𑀅𑀧𑁆𑀧𑀳𑀭𑀺𑀢𑀁 𑀅𑀮𑀪𑀦𑁆𑀢𑁂𑀦 𑀢𑀺𑀡𑀡𑁆𑀟𑀼𑀧𑀓𑀁 𑀯𑀸 𑀧𑀮𑀸𑀮𑀡𑁆𑀟𑀼𑀧𑀓𑀁 𑀯𑀸 𑀞𑀧𑁂𑀢𑁆𑀯𑀸 𑀓𑀢𑁄𑀧𑀺 𑀧𑀘𑁆𑀙𑀸 𑀳𑀭𑀺𑀢𑀁 𑀑𑀢𑁆𑀣𑀭𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀔𑁂𑀴𑁂𑀦 𑀘𑁂𑀢𑁆𑀣 𑀲𑀺𑀗𑁆𑀖𑀸𑀡𑀺𑀓𑀸𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑁬𑁫𑁩. 𑀦 𑀉𑀤𑀓𑁂𑀢𑀺 𑀏𑀢𑀁 𑀧𑀭𑀺𑀪𑁄𑀕𑀉𑀤𑀓𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀘𑁆𑀘𑀓𑀼𑀝𑀺𑀲𑀫𑀼𑀤𑁆𑀤𑀸𑀤𑀺𑀉𑀤𑀓𑁂𑀲𑀼 𑀧𑀦 𑀅𑀧𑀭𑀺𑀪𑁄𑀕𑁂𑀲𑀼 𑀅𑀦𑀸𑀧𑀢𑁆𑀢𑀺. 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀲𑀫𑀦𑁆𑀢𑀢𑁄 𑀉𑀤𑀓𑁄𑀖𑁄 𑀳𑁄𑀢𑀺, 𑀅𑀦𑀼𑀤𑀓𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀦𑀺𑀓𑁆𑀔𑀫𑀢𑀺, 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁 𑁋 ‘‘𑀏𑀢𑀸𑀤𑀺𑀲𑁂 𑀓𑀸𑀮𑁂 𑀅𑀦𑀼𑀤𑀓𑀝𑁆𑀞𑀸𑀦𑀁 𑀅𑀮𑀪𑀦𑁆𑀢𑁂𑀦 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁂𑀲𑀁 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀢𑁆𑀢𑀫𑁄 𑀯𑀕𑁆𑀕𑁄.

𑀲𑀫𑀼𑀝𑁆𑀞𑀸𑀦𑀸𑀤𑀺𑀤𑀻𑀧𑀦𑀢𑁆𑀣𑀸𑀬 𑀧𑀦𑁂𑀢𑁆𑀣 𑀇𑀤𑀁 𑀧𑀓𑀺𑀡𑁆𑀡𑀓𑀁 𑁋 𑀉𑀚𑁆𑀚𑀕𑁆𑀖𑀺𑀓𑀉𑀘𑁆𑀘𑀸𑀲𑀤𑁆𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺, 𑀲𑀓𑀩𑀴𑁂𑀦 𑀫𑀼𑀔𑁂𑀦 𑀩𑁆𑀬𑀸𑀳𑀭𑀡𑀁 𑀏𑀓𑀁, 𑀙𑀫𑀸𑀦𑀻𑀘𑀸𑀲𑀦𑀞𑀸𑀦𑀧𑀘𑁆𑀙𑀢𑁄𑀕𑀫𑀦𑀉𑀧𑁆𑀧𑀣𑀕𑀫𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀧𑀜𑁆𑀘𑀸𑀢𑀺 𑀇𑀫𑀸𑀦𑀺 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀦𑀼𑀪𑀸𑀲𑀦𑀲𑀫𑀼𑀝𑁆𑀞𑀸𑀦𑀸𑀦𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀓𑀺𑀭𑀺𑀬𑀸𑀦𑀺, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸𑀦𑀺, 𑀲𑀘𑀺𑀢𑁆𑀢𑀓𑀸𑀦𑀺, 𑀮𑁄𑀓𑀯𑀚𑁆𑀚𑀸𑀦𑀺, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀸𑀦𑀺, 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀤𑀼𑀓𑁆𑀔𑀯𑁂𑀤𑀦𑀸𑀦𑀻𑀢𑀺.

𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀙𑀢𑁆𑀢𑀧𑀸𑀡𑀺𑀤𑀡𑁆𑀟𑀧𑀸𑀡𑀺𑀲𑀢𑁆𑀣𑀧𑀸𑀡𑀺𑀆𑀯𑀼𑀥𑀧𑀸𑀡𑀺𑀧𑀸𑀤𑀼𑀓𑀉𑀧𑀸𑀳𑀦𑀬𑀸𑀦𑀲𑀬𑀦𑀧𑀮𑁆𑀮𑀢𑁆𑀣𑀺𑀓𑀯𑁂𑀞𑀺𑀢𑀑𑀕𑀼𑀡𑁆𑀞𑀺𑀢𑀦𑀸𑀫𑀓𑀸𑀦𑀺 𑀏𑀓𑀸𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀥𑀫𑁆𑀫𑀤𑁂𑀲𑀦𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀸𑀘𑀸𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀳𑀦𑁆𑀢𑀺, 𑀓𑀺𑀭𑀺𑀬𑀸𑀓𑀺𑀭𑀺𑀬𑀸𑀦𑀺, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸𑀦𑀺, 𑀲𑀘𑀺𑀢𑁆𑀢𑀓𑀸𑀦𑀺, 𑀮𑁄𑀓𑀯𑀚𑁆𑀚𑀸𑀦𑀺, 𑀯𑀘𑀻𑀓𑀫𑁆𑀫𑀸𑀦𑀺, 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀤𑀼𑀓𑁆𑀔𑀯𑁂𑀤𑀦𑀸𑀦𑀻𑀢𑀺.

𑀅𑀯𑀲𑁂𑀲𑀸𑀦𑀺 𑀢𑁂𑀧𑀡𑁆𑀡𑀸𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺.

𑀲𑀩𑁆𑀩𑀲𑁂𑀔𑀺𑀬𑁂𑀲𑀼 𑀆𑀩𑀸𑀥𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺, 𑀣𑀽𑀧𑀻𑀓𑀢𑀧𑀺𑀡𑁆𑀟𑀧𑀸𑀢𑁂 𑀲𑀽𑀧𑀩𑁆𑀬𑀜𑁆𑀚𑀦𑁂𑀦 𑀧𑀝𑀺𑀘𑁆𑀙𑀸𑀤𑀦𑁂 𑀉𑀚𑁆𑀛𑀸𑀦𑀲𑀜𑁆𑀜𑀺𑀫𑁆𑀳𑀻𑀢𑀺 𑀢𑀻𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀕𑀺𑀮𑀸𑀦𑁄 𑀦𑀢𑁆𑀣𑀻𑀢𑀺.

𑀲𑁂𑀔𑀺𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀔𑀺𑀬𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.