𑁩. 𑀑𑀯𑀸𑀤𑀯𑀕𑁆𑀕𑁄

𑁧. 𑀑𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁪𑁧-𑁧𑁪𑁪. 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀮𑀸𑀪𑀺𑀦𑁄 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀦 𑀢𑁂𑀲𑀁 𑀪𑀺𑀓𑁆𑀔𑀼𑀦𑀺𑀬𑁄 𑀤𑁂𑀦𑁆𑀢𑀺, 𑀦 𑀤𑀸𑀧𑁂𑀦𑁆𑀢𑀺, 𑀫𑀳𑀸𑀓𑀼𑀮𑁂𑀳𑀺 𑀧𑀩𑁆𑀩𑀚𑀺𑀢𑀸 𑀧𑀦 𑀓𑀼𑀮𑀥𑀻𑀢𑀭𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀸𑀦𑀁 𑀜𑀸𑀢𑀺𑀫𑀦𑀼𑀲𑁆𑀲𑀸𑀦𑀁 ‘‘𑀓𑀼𑀢𑁄 𑀅𑀬𑁆𑀬𑁂 𑀑𑀯𑀸𑀤𑀁 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀮𑀪𑀣𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀸𑀦𑀁 ‘‘𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀣𑁂𑀭𑁄 𑀑𑀯𑀤𑀢𑀻’’𑀢𑀺 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀓𑀣𑀸𑀦𑀼𑀲𑀸𑀭𑁂𑀦 𑀢𑁂𑀲𑀁 𑀲𑀻𑀮𑀲𑀼𑀢𑀸𑀘𑀸𑀭𑀚𑀸𑀢𑀺𑀕𑁄𑀢𑁆𑀢𑀸𑀤𑀺𑀪𑁂𑀤𑀁 𑀯𑀺𑀚𑁆𑀚𑀫𑀸𑀦𑀕𑀼𑀡𑀁 𑀓𑀣𑀬𑀦𑁆𑀢𑀺. 𑀏𑀯𑀭𑀽𑀧𑀸 𑀳𑀺 𑀯𑀺𑀚𑁆𑀚𑀫𑀸𑀦𑀕𑀼𑀡𑀸 𑀓𑀣𑁂𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀢𑀢𑁄 𑀧𑀲𑀦𑁆𑀦𑀘𑀺𑀢𑁆𑀢𑀸 𑀫𑀦𑀼𑀲𑁆𑀲𑀸 𑀣𑁂𑀭𑀸𑀦𑀁 𑀘𑀻𑀯𑀭𑀸𑀤𑀺𑀪𑁂𑀤𑀁 𑀫𑀳𑀦𑁆𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀅𑀪𑀺𑀳𑀭𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀮𑀸𑀪𑀺𑀦𑁄 𑀳𑁄𑀦𑁆𑀢𑀺 𑀘𑀻𑀯𑀭…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺.

𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀢𑁂𑀲𑀁 𑀓𑀺𑀭 𑀲𑀦𑁆𑀢𑀺𑀓𑁂 𑀢𑀸𑀲𑀼 𑀏𑀓𑀸 𑀪𑀺𑀓𑁆𑀔𑀼𑀦𑀻𑀧𑀺 𑀦 𑀆𑀕𑀘𑁆𑀙𑀢𑀺, 𑀮𑀸𑀪𑀢𑀡𑁆𑀳𑀸𑀬 𑀧𑀦 𑀆𑀓𑀟𑁆𑀠𑀺𑀬𑀫𑀸𑀦𑀳𑀤𑀬𑀸 𑀢𑀸𑀲𑀁 𑀉𑀧𑀲𑁆𑀲𑀬𑀁 𑀅𑀕𑀫𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺. 𑀢𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀘𑀮𑀘𑀺𑀢𑁆𑀢𑀢𑀸𑀬 𑀢𑁂𑀲𑀁 𑀯𑀘𑀦𑀁 𑀅𑀓𑀁𑀲𑀼𑀬𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄…𑀧𑁂… 𑀦𑀺𑀲𑀻𑀤𑀺𑀁𑀲𑀽’’𑀢𑀺. 𑀢𑀺𑀭𑀘𑁆𑀙𑀸𑀦𑀓𑀣𑀦𑁆𑀢𑀺 𑀲𑀕𑁆𑀕𑀫𑀕𑁆𑀕𑀕𑀫𑀦𑁂𑀧𑀺 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀭𑀸𑀚𑀓𑀣𑀸𑀤𑀺𑀫𑀦𑁂𑀓𑀯𑀺𑀥𑀁 𑀦𑀺𑀭𑀢𑁆𑀣𑀓𑀓𑀣𑀁. 𑀇𑀤𑁆𑀥𑁄𑀢𑀺 𑀲𑀫𑀺𑀤𑁆𑀥𑁄, 𑀲𑀳𑀺𑀢𑀢𑁆𑀣𑁄 𑀕𑀫𑁆𑀪𑀻𑀭𑁄 𑀩𑀳𑀼𑀭𑀲𑁄 𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑀁𑀬𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁪𑁫-𑁧𑁪𑁭. 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀢𑁂 𑀪𑀺𑀓𑁆𑀔𑀽 ‘‘𑀫𑀸 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑁆𑀣𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀅𑀤𑀺𑀝𑁆𑀞𑀲𑀘𑁆𑀘𑀢𑁆𑀢𑀸 𑀢𑀣𑀸𑀕𑀢𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀅𑀧𑀸𑀬𑀼𑀧𑀕𑀸 𑀪𑀯𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀦𑁂𑀲𑀁 𑀢𑀁 𑀅𑀧𑀸𑀬𑀼𑀧𑀕𑀢𑀁 𑀧𑀭𑀺𑀳𑀭𑀦𑁆𑀢𑁄 𑀪𑀕𑀯𑀸 𑀅𑀜𑁆𑀜𑁂𑀦𑁂𑀯 𑀉𑀧𑀸𑀬𑁂𑀦 𑀢𑁂 𑀪𑀺𑀓𑁆𑀔𑀼𑀦𑁄𑀯𑀸𑀤𑀢𑁄 𑀧𑀭𑀺𑀩𑀸𑀳𑀺𑀭𑁂 𑀓𑀢𑁆𑀢𑀼𑀓𑀸𑀫𑁄 𑀇𑀫𑀁 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀅𑀦𑀼𑀚𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀇𑀥 𑀧𑀭𑀺𑀩𑀸𑀳𑀺𑀭𑁂 𑀓𑀢𑁆𑀢𑀼𑀓𑀸𑀫𑀢𑀸𑀬 𑀅𑀦𑀼𑀚𑀸𑀦𑀺𑀢𑁆𑀯𑀸 𑀧𑀭𑀢𑁄 𑀓𑀭𑁄𑀦𑁆𑀢𑁄𑀯 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀫𑀸𑀦𑀺 𑀳𑀺 𑀅𑀝𑁆𑀞𑀗𑁆𑀕𑀸𑀦𑀺 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀦 𑀪𑀽𑀢𑀧𑀼𑀩𑁆𑀩𑀸𑀦𑀻𑀢𑀺.

𑀢𑀢𑁆𑀣 𑀲𑀻𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀯𑀸. 𑀇𑀤𑀸𑀦𑀺 𑀬𑀜𑁆𑀘 𑀢𑀁 𑀲𑀻𑀮𑀁, 𑀬𑀣𑀸 𑀘 𑀢𑀁 𑀢𑀲𑁆𑀲 𑀅𑀢𑁆𑀣𑀺 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑁄𑀯 𑀲𑀁𑀯𑀭𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀁𑀯𑀼𑀢𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄.

𑀯𑀺𑀳𑀭𑀢𑀻𑀢𑀺 𑀯𑀢𑁆𑀢𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀪𑀗𑁆𑀕𑁂 𑁋

‘‘𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀲𑀻𑀮𑀁 𑀧𑀢𑀺𑀝𑁆𑀞𑀸 𑀆𑀤𑀺 𑀘𑀭𑀡𑀁 𑀲𑀁𑀬𑀫𑁄 𑀲𑀁𑀯𑀭𑁄 𑀫𑁄𑀓𑁆𑀔𑀁 𑀧𑀫𑁄𑀓𑁆𑀔𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸; 𑀲𑀁𑀯𑀭𑁄𑀢𑀺 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄. 𑀲𑀁𑀯𑀼𑀢𑁄𑀢𑀺 𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 ‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’𑀢𑀺. 𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑀘𑀭𑀢𑀺 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 ‘𑀯𑀺𑀳𑀭𑀢𑀻’’’𑀢𑀺 (𑀯𑀺𑀪. 𑁫𑁧𑁧-𑁫𑁧𑁨).

𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀫𑀺𑀘𑁆𑀙𑀸𑀚𑀻𑀯𑀧𑀝𑀺𑀲𑁂𑀥𑀓𑁂𑀦 𑀦 𑀯𑁂𑀴𑀼𑀤𑀸𑀦𑀸𑀤𑀺𑀦𑀸 𑀆𑀘𑀸𑀭𑁂𑀦, 𑀯𑁂𑀲𑀺𑀬𑀸𑀤𑀺𑀅𑀕𑁄𑀘𑀭𑀁 𑀧𑀳𑀸𑀬 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀓𑀼𑀮𑀸𑀤𑀺𑀦𑀸 𑀘 𑀕𑁄𑀘𑀭𑁂𑀦 𑀲𑀫𑁆𑀧𑀦𑁆𑀦𑁄. 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀢𑀸𑀦𑀺 𑀯𑀚𑁆𑀚𑀸𑀦𑀺 𑀪𑀬𑀢𑁄 𑀤𑀲𑁆𑀲𑀦𑀲𑀻𑀮𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀪𑀸𑀯𑁂𑀦 𑀢𑀺𑀥𑀸 𑀞𑀺𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀸𑀬 𑀲𑀫𑁆𑀫𑀸 𑀆𑀤𑀸𑀬 𑀲𑀸𑀥𑀼𑀓𑀁 𑀕𑀳𑁂𑀢𑁆𑀯𑀸 𑀅𑀯𑀺𑀚𑀳𑀦𑁆𑀢𑁄 𑀲𑀺𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀬𑁄 𑀇𑀘𑁆𑀙𑀢𑀺, 𑀢𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 𑀕𑀳𑁂𑀢𑀩𑁆𑀩𑁄.

𑀩𑀳𑀼 𑀲𑀼𑀢𑀫𑀲𑁆𑀲𑀸𑀢𑀺 𑀩𑀳𑀼𑀲𑁆𑀲𑀼𑀢𑁄. 𑀲𑀼𑀢𑀁 𑀥𑀸𑀭𑁂𑀢𑀻𑀢𑀺 𑀲𑀼𑀢𑀥𑀭𑁄; 𑀬𑀤𑀲𑁆𑀲 𑀢𑀁 𑀩𑀳𑀼 𑀲𑀼𑀢𑀁 𑀦𑀸𑀫, 𑀢𑀁 𑀦 𑀲𑀼𑀢𑀫𑀢𑁆𑀢𑀫𑁂𑀯; 𑀅𑀣 𑀔𑁄 𑀦𑀁 𑀥𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀫𑀜𑁆𑀚𑀽𑀲𑀸𑀬𑀁 𑀯𑀺𑀬 𑀭𑀢𑀦𑀁 𑀲𑀼𑀢𑀁 𑀲𑀦𑁆𑀦𑀺𑀘𑀺𑀢𑀫𑀲𑁆𑀫𑀺𑀦𑁆𑀢𑀺 𑀲𑀼𑀢𑀲𑀦𑁆𑀦𑀺𑀘𑀬𑁄. 𑀏𑀢𑁂𑀦 𑀬𑀁 𑀲𑁄 𑀲𑀼𑀢𑀁 𑀥𑀸𑀭𑁂𑀢𑀺, 𑀢𑀲𑁆𑀲 𑀫𑀜𑁆𑀚𑀽𑀲𑀸𑀬 𑀕𑁄𑀧𑁂𑀢𑁆𑀯𑀸 𑀲𑀦𑁆𑀦𑀺𑀘𑀺𑀢𑀭𑀢𑀦𑀲𑁆𑀲𑁂𑀯 𑀘𑀺𑀭𑀓𑀸𑀮𑁂𑀦𑀸𑀧𑀺 𑀅𑀯𑀺𑀦𑀸𑀲𑀦𑀁 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀢𑀁 𑀲𑀼𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀢𑁂 𑀥𑀫𑁆𑀫𑀸’’𑀢𑀺𑀆𑀤𑀺𑀫𑀸𑀳, 𑀢𑀁 𑀯𑁂𑀭𑀜𑁆𑀚𑀓𑀡𑁆𑀟𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀤𑀁 𑀧𑀦𑁂𑀢𑁆𑀣 𑀦𑀺𑀕𑀫𑀦𑀁 𑁋 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑁄. 𑀥𑀸𑀢𑀸, 𑀢𑀲𑁆𑀫𑀸 𑀲𑀼𑀢𑀥𑀭𑁄. 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸; 𑀢𑀲𑁆𑀫𑀸 𑀲𑀼𑀢𑀲𑀦𑁆𑀦𑀺𑀘𑀬𑁄. 𑀢𑀢𑁆𑀣 𑀯𑀘𑀲𑀸 𑀧𑀭𑀺𑀘𑀺𑀢𑀸𑀢𑀺 𑀯𑀸𑀘𑀸𑀬 𑀧𑀕𑀼𑀡𑀸 𑀓𑀢𑀸. 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸, 𑀆𑀯𑀚𑁆𑀚𑀦𑁆𑀢𑀲𑁆𑀲 𑀤𑀻𑀧𑀲𑀳𑀲𑁆𑀲𑁂𑀦 𑀑𑀪𑀸𑀲𑀺𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀅𑀢𑁆𑀣𑀢𑁄 𑀘 𑀓𑀸𑀭𑀡𑀢𑁄 𑀘 𑀧𑀜𑁆𑀜𑀸𑀬 𑀲𑀼𑀝𑁆𑀞𑀼 𑀧𑀝𑀺𑀯𑀺𑀤𑁆𑀥𑀸 𑀲𑀼𑀧𑀘𑁆𑀘𑀓𑁆𑀔𑀓𑀢𑀸 𑀳𑁄𑀦𑁆𑀢𑀺.

𑀅𑀬𑀁 𑀧𑀦 𑀩𑀳𑀼𑀲𑁆𑀲𑀼𑀢𑁄 𑀦𑀸𑀫 𑀢𑀺𑀯𑀺𑀥𑁄 𑀳𑁄𑀢𑀺 𑁋 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑁄, 𑀧𑀭𑀺𑀲𑀼𑀧𑀝𑁆𑀞𑀸𑀧𑀓𑁄, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄𑀢𑀺. 𑀢𑀢𑁆𑀣 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑁂𑀦 𑀉𑀧𑀲𑀫𑁆𑀧𑀤𑀸𑀬 𑀧𑀜𑁆𑀘𑀯𑀲𑁆𑀲𑁂𑀦 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀤𑁆𑀯𑁂 𑀫𑀸𑀢𑀺𑀓𑀸 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸 𑀓𑀸𑀢𑀩𑁆𑀩𑀸 𑀧𑀓𑁆𑀔𑀤𑀺𑀯𑀲𑁂𑀲𑀼 𑀥𑀫𑁆𑀫𑀲𑀸𑀯𑀦𑀢𑁆𑀣𑀸𑀬 𑀲𑀼𑀢𑁆𑀢𑀦𑁆𑀢𑀢𑁄 𑀘𑀢𑁆𑀢𑀸𑀭𑁄 𑀪𑀸𑀡𑀯𑀸𑀭𑀸, 𑀲𑀫𑁆𑀧𑀢𑁆𑀢𑀸𑀦𑀁 𑀧𑀭𑀺𑀓𑀣𑀦𑀢𑁆𑀣𑀸𑀬 𑀅𑀦𑁆𑀥𑀓𑀯𑀺𑀦𑁆𑀤𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀅𑀫𑁆𑀩𑀝𑁆𑀞𑀲𑀤𑀺𑀲𑁄 𑀏𑀓𑁄 𑀓𑀣𑀸𑀫𑀕𑁆𑀕𑁄, 𑀲𑀗𑁆𑀖𑀪𑀢𑁆𑀢𑀫𑀗𑁆𑀕𑀮𑀸𑀫𑀗𑁆𑀕𑀮𑁂𑀲𑀼 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀢𑀺𑀲𑁆𑀲𑁄 𑀅𑀦𑀼𑀫𑁄𑀤𑀦𑀸, 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀺𑀚𑀸𑀦𑀦𑀢𑁆𑀣𑀁 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑁄, 𑀲𑀫𑀡𑀥𑀫𑁆𑀫𑀓𑀭𑀡𑀢𑁆𑀣𑀁 𑀲𑀫𑀸𑀥𑀺𑀯𑀲𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀸 𑀅𑀭𑀳𑀢𑁆𑀢𑀧𑀭𑀺𑀬𑁄𑀲𑀸𑀦𑀫𑁂𑀓𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀏𑀢𑁆𑀢𑀓𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀳𑀺 𑀅𑀬𑀁 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀘𑀸𑀢𑀼𑀤𑁆𑀤𑀺𑀲𑁄, 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑁂𑀦 𑀯𑀲𑀺𑀢𑀼𑀁 𑀮𑀪𑀢𑀺.

𑀧𑀭𑀺𑀲𑀼𑀧𑀝𑁆𑀞𑀸𑀧𑀓𑁂𑀦 𑀉𑀧𑀲𑀫𑁆𑀧𑀤𑀸𑀬 𑀤𑀲𑀯𑀲𑁆𑀲𑁂𑀦 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀧𑀭𑀺𑀲𑀁 𑀅𑀪𑀺𑀯𑀺𑀦𑀬𑁂 𑀯𑀺𑀦𑁂𑀢𑀼𑀁 𑀤𑁆𑀯𑁂 𑀯𑀺𑀪𑀗𑁆𑀕𑀸 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸 𑀓𑀸𑀢𑀩𑁆𑀩𑀸, 𑀅𑀲𑀓𑁆𑀓𑁄𑀦𑁆𑀢𑁂𑀦 𑀢𑀻𑀳𑀺 𑀚𑀦𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀯𑀢𑁆𑀢𑀦𑀓𑁆𑀔𑀫𑀸 𑀓𑀸𑀢𑀩𑁆𑀩𑀸, 𑀓𑀫𑁆𑀫𑀸𑀓𑀫𑁆𑀫𑀜𑁆𑀘 𑀔𑀦𑁆𑀥𑀓𑀯𑀢𑁆𑀢𑀜𑁆𑀘 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀧𑀭𑀺𑀲𑀸𑀬 𑀧𑀦 𑀅𑀪𑀺𑀥𑀫𑁆𑀫𑁂 𑀯𑀺𑀦𑀬𑀦𑀢𑁆𑀣𑀁 𑀲𑀘𑁂 𑀫𑀚𑁆𑀛𑀺𑀫𑀪𑀸𑀡𑀓𑁄 𑀳𑁄𑀢𑀺 𑀫𑀽𑀮𑀧𑀡𑁆𑀡𑀸𑀲𑀓𑁄 𑀉𑀕𑁆𑀕𑀳𑁂𑀢𑀩𑁆𑀩𑁄, 𑀤𑀻𑀖𑀪𑀸𑀡𑀓𑁂𑀦 𑀫𑀳𑀸𑀯𑀕𑁆𑀕𑁄, 𑀲𑀁𑀬𑀼𑀢𑁆𑀢𑀪𑀸𑀡𑀓𑁂𑀦 𑀳𑁂𑀝𑁆𑀞𑀺𑀫𑀸 𑀯𑀸 𑀢𑀬𑁄 𑀯𑀕𑁆𑀕𑀸 𑀫𑀳𑀸𑀯𑀕𑁆𑀕𑁄 𑀯𑀸, 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑁂𑀦 𑀳𑁂𑀝𑁆𑀞𑀸 𑀯𑀸 𑀉𑀧𑀭𑀺 𑀯𑀸 𑀉𑀧𑀟𑁆𑀠𑀦𑀺𑀓𑀸𑀬𑁄 𑀉𑀕𑁆𑀕𑀳𑁂𑀢𑀩𑁆𑀩𑁄, 𑀅𑀲𑀓𑁆𑀓𑁄𑀦𑁆𑀢𑁂𑀦 𑀢𑀺𑀓𑀦𑀺𑀧𑀸𑀢𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀉𑀕𑁆𑀕𑀳𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀏𑀓𑀁 𑀉𑀕𑁆𑀕𑀡𑁆𑀳𑀦𑁆𑀢𑁂𑀦 𑀘𑀢𑀼𑀓𑁆𑀓𑀦𑀺𑀧𑀸𑀢𑀁 𑀯𑀸 𑀧𑀜𑁆𑀘𑀓𑀦𑀺𑀧𑀸𑀢𑀁 𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀚𑀸𑀢𑀓𑀪𑀸𑀡𑀓𑁂𑀦 𑀲𑀸𑀝𑁆𑀞𑀓𑀣𑀁 𑀚𑀸𑀢𑀓𑀁 𑀉𑀕𑁆𑀕𑀳𑁂𑀢𑀩𑁆𑀩𑀁, 𑀢𑀢𑁄 𑀑𑀭𑀁 𑀦 𑀯𑀝𑁆𑀝𑀢𑀺. 𑀥𑀫𑁆𑀫𑀧𑀤𑀫𑁆𑀧𑀺 𑀲𑀳 𑀯𑀢𑁆𑀣𑀼𑀦𑀸 𑀉𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀢𑀢𑁄 𑀢𑀢𑁄 𑀲𑀫𑀼𑀘𑁆𑀘𑀬𑀁 𑀓𑀢𑁆𑀯𑀸 𑀫𑀽𑀮𑀧𑀡𑁆𑀡𑀸𑀲𑀓𑀫𑀢𑁆𑀢𑀁 𑀯𑀝𑁆𑀝𑀢𑀺, 𑀦 𑀯𑀝𑁆𑀝𑀢𑀻𑀢𑀺? ‘‘𑀦 𑀯𑀝𑁆𑀝𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀇𑀢𑀭𑀸𑀲𑀼 𑀯𑀺𑀘𑀸𑀭𑀡𑀸𑀬𑁂𑀯 𑀦𑀢𑁆𑀣𑀺. 𑀅𑀪𑀺𑀥𑀫𑁆𑀫𑁂 𑀓𑀺𑀜𑁆𑀘𑀺 𑀉𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀬𑀲𑁆𑀲 𑀧𑀦 𑀲𑀸𑀝𑁆𑀞𑀓𑀣𑀫𑁆𑀧𑀺 𑀯𑀺𑀦𑀬𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀜𑁆𑀘 𑀧𑀕𑀼𑀡𑀁, 𑀲𑀼𑀢𑁆𑀢𑀦𑁆𑀢𑁂 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀕𑀦𑁆𑀣𑁄 𑀦𑀢𑁆𑀣𑀺, 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁂𑀦 𑀧𑀦 𑀲𑀼𑀢𑁆𑀢𑀦𑁆𑀢𑀢𑁄 𑀯𑀺𑀦𑀬𑀢𑁄 𑀘 𑀯𑀼𑀢𑁆𑀢𑀧𑁆𑀧𑀫𑀸𑀡𑁄 𑀕𑀦𑁆𑀣𑁄 𑀉𑀕𑁆𑀕𑀳𑀺𑀢𑁄, 𑀅𑀬𑀁 𑀧𑀭𑀺𑀲𑀼𑀧𑀝𑁆𑀞𑀸𑀧𑀓𑁄 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀬𑁂𑀦𑀓𑀸𑀫𑀗𑁆𑀕𑀫𑁄, 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀢𑀼𑀁 𑀮𑀪𑀢𑀺.

𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁂𑀦 𑀧𑀦 𑀲𑀸𑀝𑁆𑀞𑀓𑀣𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑀩𑁆𑀩𑀸𑀦𑀺, 𑀅𑀲𑀓𑁆𑀓𑁄𑀦𑁆𑀢𑁂𑀦 𑀘𑀢𑀽𑀲𑀼 𑀦𑀺𑀓𑀸𑀬𑁂𑀲𑀼 𑀏𑀓𑀲𑁆𑀲 𑀅𑀝𑁆𑀞𑀓𑀣𑀸 𑀧𑀕𑀼𑀡𑀸 𑀓𑀸𑀢𑀩𑁆𑀩𑀸, 𑀏𑀓𑀦𑀺𑀓𑀸𑀬𑁂𑀦 𑀳𑀺 𑀲𑁂𑀲𑀦𑀺𑀓𑀸𑀬𑁂𑀲𑀼𑀧𑀺 𑀧𑀜𑁆𑀳𑀁 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀲𑀢𑁆𑀢𑀲𑀼 𑀧𑀓𑀭𑀡𑁂𑀲𑀼 𑀘𑀢𑀼𑀧𑁆𑀧𑀓𑀭𑀡𑀲𑁆𑀲 𑀅𑀝𑁆𑀞𑀓𑀣𑀸 𑀧𑀕𑀼𑀡𑀸 𑀓𑀸𑀢𑀩𑁆𑀩𑀸, 𑀢𑀢𑁆𑀣 𑀮𑀤𑁆𑀥𑀦𑀬𑁂𑀦 𑀳𑀺 𑀲𑁂𑀲𑀧𑀓𑀭𑀡𑁂𑀲𑀼 𑀧𑀜𑁆𑀳𑀁 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀯𑀺𑀦𑀬𑀧𑀺𑀝𑀓𑀁 𑀧𑀦 𑀦𑀸𑀦𑀢𑁆𑀣𑀁 𑀦𑀸𑀦𑀸𑀓𑀸𑀭𑀡𑀁, 𑀢𑀲𑁆𑀫𑀸 𑀢𑀁 𑀲𑀤𑁆𑀥𑀺𑀁 𑀅𑀝𑁆𑀞𑀓𑀣𑀸𑀬 𑀧𑀕𑀼𑀡𑀁 𑀓𑀸𑀢𑀩𑁆𑀩𑀫𑁂𑀯. 𑀏𑀢𑁆𑀢𑀸𑀯𑀢𑀸 𑀳𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀩𑀳𑀼𑀲𑁆𑀲𑀼𑀢𑁄 𑀦𑀸𑀫 𑀳𑁄𑀢𑀻𑀢𑀺.

𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲𑀸𑀢𑀺𑀆𑀤𑀺 𑀧𑀦 𑀬𑀲𑁆𑀫𑀸 𑀅𑀜𑁆𑀜𑀲𑁆𑀫𑀺𑀁 𑀲𑀓𑀮𑁂 𑀦𑀯𑀗𑁆𑀕𑁂𑀧𑀺 𑀩𑀸𑀳𑀼𑀲𑁆𑀲𑀘𑁆𑀘𑁂 𑀲𑀢𑀺 𑀲𑀸𑀝𑁆𑀞𑀓𑀣𑀁 𑀯𑀺𑀦𑀬𑀧𑀺𑀝𑀓𑀁 𑀯𑀺𑀦𑀸 𑀦 𑀯𑀝𑁆𑀝𑀢𑀺𑀬𑁂𑀯, 𑀢𑀲𑁆𑀫𑀸 𑀯𑀺𑀲𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑁂𑀦 𑀲𑀤𑁆𑀥𑀺𑀁. 𑀲𑁆𑀯𑀸𑀕𑀢𑀸𑀦𑀻𑀢𑀺 𑀲𑀼𑀝𑁆𑀞𑀼 𑀆𑀕𑀢𑀸𑀦𑀺. 𑀬𑀣𑀸 𑀆𑀕𑀢𑀸𑀦𑀺 𑀧𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀯𑀺𑀪𑀢𑁆𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀯𑀺𑀪𑀢𑁆𑀢𑀸𑀦𑀻𑀢𑀺 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀸𑀦𑀺 𑀧𑀤𑀧𑀘𑁆𑀘𑀸𑀪𑀝𑁆𑀞𑀲𑀗𑁆𑀓𑀭𑀤𑁄𑀲𑀯𑀺𑀭𑀳𑀺𑀢𑀸𑀦𑀺. 𑀲𑀼𑀧𑁆𑀧𑀯𑀢𑁆𑀢𑀻𑀦𑀻𑀢𑀺 𑀧𑀕𑀼𑀡𑀸𑀦𑀺 𑀯𑀸𑀘𑀼𑀕𑁆𑀕𑀢𑀸𑀦𑀺. 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄𑀢𑀺 𑀔𑀦𑁆𑀥𑀓𑀧𑀭𑀺𑀯𑀸𑀭𑀢𑁄 𑀆𑀳𑀭𑀺𑀢𑀩𑁆𑀩𑀲𑀼𑀢𑁆𑀢𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀦𑀺𑀘𑁆𑀙𑀺𑀢𑀸𑀦𑀺. 𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀢𑀺 𑀅𑀓𑁆𑀔𑀭𑀧𑀤𑀧𑀸𑀭𑀺𑀧𑀽𑀭𑀺𑀬𑀸 𑀘 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀯𑀺𑀧𑀭𑀻𑀢𑀓𑁆𑀔𑀭𑀸𑀦𑀺. 𑀏𑀢𑁂𑀦 𑀅𑀝𑁆𑀞𑀓𑀣𑀸 𑀤𑀻𑀧𑀺𑀢𑀸, 𑀅𑀝𑁆𑀞𑀓𑀣𑀸𑀢𑁄 𑀳𑀺 𑀏𑀲 𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀻𑀢𑀺.

𑀓𑀮𑁆𑀬𑀸𑀡𑀯𑀸𑀘𑁄𑀢𑀺 𑀲𑀺𑀣𑀺𑀮𑀥𑀦𑀺𑀢𑀸𑀤𑀻𑀦𑀁 𑀬𑀣𑀸𑀯𑀺𑀥𑀸𑀦𑀯𑀘𑀦𑁂𑀦 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸𑀬 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸. 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄𑀢𑀺 𑀫𑀥𑀼𑀭𑀲𑁆𑀲𑀭𑁄, 𑀫𑀸𑀢𑀼𑀕𑀸𑀫𑁄 𑀳𑀺 𑀲𑀭𑀲𑀫𑁆𑀧𑀢𑁆𑀢𑀺𑀭𑀢𑁄, 𑀢𑀲𑁆𑀫𑀸 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀫𑁆𑀧𑀺 𑀯𑀘𑀦𑀁 𑀲𑀭𑀲𑀫𑁆𑀧𑀢𑁆𑀢𑀺𑀭𑀳𑀺𑀢𑀁 𑀳𑀻𑀴𑁂𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄𑀢𑀺 𑀲𑀩𑁆𑀩𑀸𑀲𑀁 𑀧𑀺𑀬𑁄 𑀦𑀸𑀫 𑀤𑀼𑀮𑁆𑀮𑀪𑁄, 𑀩𑀳𑀼𑀢𑀭𑀸𑀦𑀁 𑀧𑀦 𑀧𑀡𑁆𑀟𑀺𑀢𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀻𑀮𑀸𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀧𑀺𑀬𑁄 𑀳𑁄𑀢𑀺 𑀫𑀦𑀯𑀟𑁆𑀠𑀦𑀓𑁄. 𑀧𑀝𑀺𑀩𑀮𑁄 𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼𑀦𑁆𑀢𑀺 𑀲𑀼𑀢𑁆𑀢𑀜𑁆𑀘 𑀓𑀸𑀭𑀡𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀯𑀝𑁆𑀝𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼𑀁 𑀢𑀸𑀤𑀺𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑀸𑀬𑀸𑀢𑀺 𑀓𑀸𑀲𑀸𑀬𑀯𑀢𑁆𑀣𑀦𑀺𑀯𑀢𑁆𑀣𑀸𑀬. 𑀕𑀭𑀼𑀥𑀫𑁆𑀫𑀦𑁆𑀢𑀺 𑀕𑀺𑀳𑀺𑀓𑀸𑀮𑁂 𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑀁 𑀯𑀸 𑀲𑀺𑀓𑁆𑀔𑀫𑀸𑀦𑀸𑀲𑀸𑀫𑀡𑁂𑀭𑀻𑀲𑀼 𑀫𑁂𑀣𑀼𑀦𑀥𑀫𑁆𑀫𑀁 𑀯𑀸 𑀅𑀦𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑁄 𑀳𑁄𑀢𑀺. 𑀫𑀸𑀢𑀼𑀕𑀸𑀫𑁄 𑀳𑀺 𑀧𑀼𑀩𑁆𑀩𑁂 𑀓𑀢𑀫𑀦𑀼𑀲𑁆𑀲𑀭𑀦𑁆𑀢𑁄 𑀲𑀁𑀯𑀭𑁂 𑀞𑀺𑀢𑀲𑁆𑀲𑀸𑀧𑀺 𑀥𑀫𑁆𑀫𑀤𑁂𑀲𑀦𑀸𑀬 𑀕𑀸𑀭𑀯𑀁 𑀦 𑀓𑀭𑁄𑀢𑀺. 𑀅𑀣 𑀯𑀸 𑀢𑀲𑁆𑀫𑀺𑀬𑁂𑀯 𑀅𑀲𑀤𑁆𑀥𑀫𑁆𑀫𑁂 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺. 𑀯𑀻𑀲𑀢𑀺𑀯𑀲𑁆𑀲𑁄 𑀯𑀸𑀢𑀺 𑀉𑀧𑀲𑀫𑁆𑀧𑀤𑀸𑀬 𑀯𑀻𑀲𑀢𑀺𑀯𑀲𑁆𑀲𑁄 𑀢𑀢𑁄 𑀅𑀢𑀺𑀭𑁂𑀓𑀯𑀲𑁆𑀲𑁄 𑀯𑀸. 𑀏𑀯𑀭𑀽𑀧𑁄 𑀳𑀺 𑀯𑀺𑀲𑀪𑀸𑀕𑁂𑀳𑀺 𑀯𑀢𑁆𑀣𑀽𑀳𑀺 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀕𑀘𑁆𑀙𑀦𑁆𑀢𑁄𑀧𑀺 𑀤𑀳𑀭𑁄 𑀯𑀺𑀬 𑀲𑀳𑀲𑀸 𑀲𑀻𑀮𑀯𑀺𑀦𑀸𑀲𑀁 𑀦 𑀧𑀸𑀧𑀼𑀡𑀸𑀢𑀺, 𑀅𑀢𑁆𑀢𑀦𑁄 𑀯𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀙𑀦𑁆𑀤𑀭𑀸𑀕𑀁 𑀯𑀺𑀦𑁂𑀢𑀼𑀁 𑀧𑀝𑀺𑀩𑀮𑁄 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀻𑀲𑀢𑀺𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀲𑁆𑀲𑁄 𑀯𑀸’’𑀢𑀺.

𑀏𑀢𑁆𑀣 𑀘 ‘‘𑀲𑀻𑀮𑀯𑀸’’𑀢𑀺𑀆𑀤𑀺 𑀏𑀓𑀫𑀗𑁆𑀕𑀁, ‘‘𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀻’’𑀢𑀺𑀆𑀤𑀺 𑀤𑀼𑀢𑀺𑀬𑀁, ‘‘𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲𑀸’’𑀢𑀺𑀆𑀤𑀺 𑀢𑀢𑀺𑀬𑀁, ‘‘𑀓𑀮𑁆𑀬𑀸𑀡𑀯𑀸𑀘𑁄 𑀳𑁄𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄’’𑀢𑀺 𑀘𑀢𑀼𑀢𑁆𑀣𑀁, ‘‘𑀬𑁂𑀪𑀼𑀬𑁆𑀬𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄’’𑀢𑀺 𑀧𑀜𑁆𑀘𑀫𑀁, ‘‘𑀧𑀝𑀺𑀩𑀮𑁄 𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼’’𑀦𑁆𑀢𑀺 𑀙𑀝𑁆𑀞𑀁, ‘‘𑀦 𑀔𑁄 𑀧𑀦𑁂𑀢’’𑀦𑁆𑀢𑀺𑀆𑀤𑀺 𑀲𑀢𑁆𑀢𑀫𑀁, ‘‘𑀯𑀻𑀲𑀢𑀺𑀯𑀲𑁆𑀲𑁄’’𑀢𑀺𑀆𑀤𑀺 𑀅𑀝𑁆𑀞𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁪𑁮. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀧𑀼𑀩𑁆𑀩𑁂 𑀯𑀢𑁆𑀣𑀼𑀲𑁆𑀫𑀺𑀁 𑀯𑀼𑀢𑁆𑀢𑁂𑀦𑁂𑀯. 𑀕𑀭𑀼𑀥𑀫𑁆𑀫𑁂𑀳𑀻𑀢𑀺 𑀕𑀭𑀼𑀓𑁂𑀳𑀺 𑀥𑀫𑁆𑀫𑁂𑀳𑀺, 𑀢𑁂 𑀳𑀺 𑀕𑀸𑀭𑀯𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀕𑀭𑀼𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬𑀸𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬, 𑀬𑁄 𑀕𑀭𑀼𑀥𑀫𑁆𑀫𑁂𑀦 𑀑𑀯𑀤𑀢𑀺, 𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀬𑀣𑀸𑀯𑀢𑁆𑀣𑀼𑀓𑀫𑁂𑀯.

𑁧𑁪𑁯. 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀢𑀺 𑀲𑀘𑁂 𑀧𑀸𑀢𑁄 𑀅𑀲𑀫𑁆𑀫𑀝𑁆𑀞𑀁 𑀲𑀫𑁆𑀫𑀝𑁆𑀞𑀫𑁆𑀧𑀺 𑀯𑀸 𑀧𑀼𑀦 𑀢𑀺𑀡𑀧𑀡𑁆𑀡𑀸𑀤𑀻𑀳𑀺 𑀉𑀓𑁆𑀮𑀸𑀧𑀁 𑀧𑀸𑀤𑀧𑁆𑀧𑀳𑀸𑀭𑁂𑀳𑀺 𑀘 𑀯𑀺𑀓𑀺𑀡𑁆𑀡𑀯𑀸𑀮𑀺𑀓𑀁 𑀚𑀸𑀢𑀁, 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀅𑀲𑀫𑁆𑀫𑀝𑁆𑀞𑀜𑁆𑀳𑀺 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑁆𑀬𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑁂 𑀤𑀳𑀭𑀪𑀺𑀓𑁆𑀔𑀽𑀧𑀺 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀁 𑀦 𑀬𑁄𑀚𑁂𑀢𑀺, 𑀥𑀫𑁆𑀫𑀁𑀬𑁂𑀯 𑀓𑀣𑁂𑀢𑀻’’𑀢𑀺 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀲𑁄𑀢𑀼𑀓𑀸𑀫𑀸 𑀯𑀺𑀬 𑀪𑀯𑁂𑀬𑁆𑀬𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸’’𑀢𑀺. 𑀅𑀦𑁆𑀢𑁄𑀕𑀸𑀫𑀢𑁄 𑀧𑀦 𑀪𑀺𑀓𑁆𑀔𑀼𑀦𑀺𑀬𑁄 𑀆𑀕𑀘𑁆𑀙𑀦𑁆𑀢𑀺𑀬𑁄 𑀧𑀺𑀧𑀸𑀲𑀺𑀢𑀸 𑀘 𑀓𑀺𑀮𑀦𑁆𑀢𑀸 𑀘 𑀳𑁄𑀦𑁆𑀢𑀺, 𑀢𑀸 𑀧𑀸𑀦𑀻𑀬𑀜𑁆𑀘 𑀳𑀢𑁆𑀣𑀧𑀸𑀤𑀫𑀼𑀔𑀲𑀻𑀢𑀮𑀓𑀭𑀡𑀜𑁆𑀘 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀢𑀲𑁆𑀫𑀺𑀜𑁆𑀘 𑀅𑀲𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀕𑀸𑀭𑀯𑀁 𑀚𑀦𑁂𑀢𑁆𑀯𑀸 𑀅𑀲𑁄𑀢𑀼𑀓𑀸𑀫𑀸𑀧𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺.

𑀆𑀲𑀦𑀦𑁆𑀢𑀺 𑀦𑀻𑀘𑀧𑀻𑀞𑀓𑀨𑀮𑀓𑀢𑀝𑁆𑀝𑀺𑀓𑀓𑀝𑀲𑀸𑀭𑀓𑀸𑀤𑀺𑀪𑁂𑀤𑀁 𑀅𑀦𑁆𑀢𑀫𑀲𑁄 𑀲𑀸𑀔𑀸𑀪𑀗𑁆𑀕𑀫𑁆𑀧𑀺 ‘‘𑀇𑀤𑀁 𑀢𑀸𑀲𑀁 𑀆𑀲𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸. 𑀥𑀫𑁆𑀫𑀤𑁂𑀲𑀦𑀸𑀧𑀢𑁆𑀢𑀺𑀫𑁄𑀘𑀦𑀢𑁆𑀣𑀁 𑀧𑀦 𑀤𑀼𑀢𑀺𑀬𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀼𑀢𑀺𑀬𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺. 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀦 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂, 𑀅𑀣 𑀔𑁄 𑀯𑀺𑀳𑀸𑀭𑀫𑀚𑁆𑀛𑁂 𑀉𑀧𑁄𑀲𑀣𑀸𑀕𑀸𑀭𑀲𑁆𑀲 𑀯𑀸 𑀪𑁄𑀚𑀦𑀲𑀸𑀮𑀸𑀬 𑀯𑀸 𑀤𑁆𑀯𑀸𑀭𑁂 𑀲𑀩𑁆𑀩𑁂𑀲𑀁 𑀑𑀲𑀭𑀡𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀫𑀕𑁆𑀕𑀸𑀢𑁆𑀣𑀸𑀢𑀺 𑀲𑀩𑁆𑀩𑀸 𑀆𑀕𑀢𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀯𑀢𑁆𑀢𑀦𑁆𑀢𑀻𑀢𑀺 𑀆𑀕𑀘𑁆𑀙𑀦𑁆𑀢𑀺; 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸𑀢𑀺 𑀅𑀢𑁆𑀣𑁄. 𑀦𑀺𑀬𑁆𑀬𑀸𑀤𑁂𑀢𑀩𑁆𑀩𑁄𑀢𑀺 𑀅𑀧𑁆𑀧𑁂𑀢𑀩𑁆𑀩𑁄. 𑀑𑀲𑀸𑀭𑁂𑀢𑀩𑁆𑀩𑁄𑀢𑀺 𑀧𑀸𑀴𑀺 𑀯𑀢𑁆𑀢𑀩𑁆𑀩𑀸. 𑀯𑀲𑁆𑀲𑀲𑀢𑀽𑀧𑀲𑀫𑁆𑀧𑀦𑁆𑀦𑀸𑀬𑀸𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀧𑀸𑀴𑀺𑀤𑀲𑁆𑀲𑀦𑀁.

𑀢𑀢𑁆𑀣 𑀲𑀸𑀫𑀻𑀘𑀺𑀓𑀫𑁆𑀫𑀦𑁆𑀢𑀺 𑀫𑀕𑁆𑀕𑀲𑀫𑁆𑀧𑀤𑀸𑀦𑀩𑀻𑀚𑀦𑀧𑀸𑀦𑀻𑀬𑀸𑀧𑀼𑀘𑁆𑀙𑀦𑀸𑀤𑀺𑀓𑀁 𑀅𑀦𑀼𑀘𑁆𑀙𑀯𑀺𑀓𑀯𑀢𑁆𑀢𑀁. 𑀏𑀢𑁆𑀣 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀲𑁆𑀲 𑀅𑀪𑀺𑀯𑀸𑀤𑀦𑀁 𑀦𑀸𑀫 𑀅𑀦𑁆𑀢𑁄𑀕𑀸𑀫𑁂 𑀯𑀸 𑀩𑀳𑀺𑀕𑀸𑀫𑁂 𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂 𑀯𑀸 𑀩𑀳𑀺𑀯𑀺𑀳𑀸𑀭𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀭𑀣𑀺𑀓𑀸𑀬 𑀯𑀸 𑀅𑀦𑁆𑀢𑀫𑀲𑁄 𑀭𑀸𑀚𑀼𑀲𑁆𑀲𑀸𑀭𑀡𑀸𑀬𑀧𑀺 𑀯𑀢𑁆𑀢𑀫𑀸𑀦𑀸𑀬 𑀤𑁂𑀯𑁂 𑀯𑀲𑁆𑀲𑀫𑀸𑀦𑁂 𑀲𑀓𑀤𑁆𑀤𑀫𑀸𑀬 𑀪𑀽𑀫𑀺𑀬𑀸 𑀙𑀢𑁆𑀢𑀧𑀢𑁆𑀢𑀳𑀢𑁆𑀣𑀸𑀬𑀧𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀳𑀺 𑀅𑀦𑀼𑀩𑀤𑁆𑀥𑀸𑀬𑀧𑀺 𑀓𑀸𑀢𑀩𑁆𑀩𑀫𑁂𑀯. 𑀏𑀓𑀸𑀩𑀤𑁆𑀥𑀸𑀬 𑀧𑀸𑀴𑀺𑀬𑀸 𑀪𑀺𑀓𑁆𑀔𑀸𑀘𑀸𑀭𑀁 𑀧𑀯𑀺𑀲𑀦𑁆𑀢𑁂 𑀤𑀺𑀲𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 ‘‘𑀯𑀦𑁆𑀤𑀸𑀫𑀺 𑀅𑀬𑁆𑀬𑀸’’𑀢𑀺 𑀯𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀅𑀦𑁆𑀢𑀭𑀦𑁆𑀢𑀭𑀸 𑀤𑁆𑀯𑀸𑀤𑀲𑀳𑀢𑁆𑀣𑁂 𑀫𑀼𑀜𑁆𑀘𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀦𑁆𑀤𑀺𑀢𑀩𑁆𑀩𑀸. 𑀫𑀳𑀸𑀲𑀦𑁆𑀦𑀺𑀧𑀸𑀢𑁂 𑀦𑀺𑀲𑀺𑀦𑁆𑀦𑁂 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀯𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀅𑀜𑁆𑀚𑀮𑀺𑀓𑀫𑁆𑀫𑁂𑀧𑀺. 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀲𑀺𑀦𑁆𑀦𑀸𑀬 𑀧𑀦 𑀧𑀘𑁆𑀘𑀼𑀝𑁆𑀞𑀸𑀦𑀁 𑀓𑀸𑀢𑀩𑁆𑀩𑀁, 𑀢𑀲𑁆𑀲 𑀢𑀲𑁆𑀲 𑀲𑀸𑀫𑀻𑀘𑀺𑀓𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑁂 𑀧𑀤𑁂𑀲𑁂 𑀘 𑀓𑀸𑀮𑁂 𑀘 𑀢𑀁 𑀢𑀁 𑀓𑀸𑀢𑀩𑁆𑀩𑀁.

𑀲𑀓𑁆𑀓𑀢𑁆𑀯𑀸𑀢𑀺 𑀬𑀣𑀸 𑀓𑀢𑁄 𑀲𑀼𑀓𑀢𑁄 𑀳𑁄𑀢𑀺, 𑀏𑀯𑀁 𑀓𑀢𑁆𑀯𑀸. 𑀕𑀭𑀼𑀁𑀓𑀢𑁆𑀯𑀸𑀢𑀺 𑀢𑀢𑁆𑀣 𑀕𑀸𑀭𑀯𑀁 𑀚𑀦𑁂𑀢𑁆𑀯𑀸. 𑀫𑀸𑀦𑁂𑀢𑁆𑀯𑀸𑀢𑀺 𑀫𑀦𑁂𑀦 𑀧𑀺𑀬𑀁 𑀓𑀢𑁆𑀯𑀸. 𑀧𑀽𑀚𑁂𑀢𑁆𑀯𑀸𑀢𑀺 𑀇𑀫𑁂𑀲𑀁𑀬𑁂𑀯 𑀢𑀺𑀡𑁆𑀡𑀁 𑀓𑀺𑀘𑁆𑀘𑀸𑀦𑀁 𑀓𑀭𑀡𑁂𑀦 𑀧𑀽𑀚𑁂𑀢𑁆𑀯𑀸. 𑀅𑀦𑀢𑀺𑀓𑁆𑀓𑀫𑀦𑀻𑀬𑁄𑀢𑀺 𑀦 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑁄.

𑀅𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂𑀢𑀺 𑀏𑀢𑁆𑀣 𑀲𑀘𑁂 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀢𑁄 𑀅𑀟𑁆𑀠𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀑𑀯𑀸𑀤𑀤𑀸𑀬𑀓𑀸 𑀪𑀺𑀓𑁆𑀔𑀽 𑀦 𑀯𑀲𑀦𑁆𑀢𑀺, 𑀅𑀬𑀁 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀦𑀸𑀫. 𑀏𑀢𑁆𑀣 𑀯𑀲𑁆𑀲𑀁 𑀦 𑀯𑀲𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀪𑀺𑀓𑁆𑀔𑀼𑀓𑁄 𑀦𑀸𑀫 𑀆𑀯𑀸𑀲𑁄 𑀦 𑀲𑀓𑁆𑀓𑀸 𑀳𑁄𑀢𑀺 𑀑𑀯𑀸𑀤𑀸𑀬 𑀯𑀸 𑀲𑀁𑀯𑀸𑀲𑀸𑀬 𑀯𑀸 𑀕𑀦𑁆𑀢𑀼’’𑀦𑁆𑀢𑀺 (𑀧𑀸𑀘𑀺. 𑁧𑁦𑁪𑁮). 𑀦 𑀘 𑀲𑀓𑁆𑀓𑀸 𑀢𑀢𑁄 𑀧𑀭𑀁 𑀧𑀘𑁆𑀙𑀸𑀪𑀢𑁆𑀢𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀆𑀕𑀦𑁆𑀢𑀼𑀁. 𑀲𑀘𑁂 𑀢𑀢𑁆𑀣 𑀯𑀲𑁆𑀲𑀁 𑀯𑀲𑀺𑀢𑀼𑀁 𑀅𑀦𑀺𑀘𑁆𑀙𑀫𑀸𑀦𑀸 𑀪𑀺𑀓𑁆𑀔𑀼𑀦𑀺𑀬𑁄 𑀜𑀸𑀢𑀓𑀸 𑀯𑀸 𑀉𑀧𑀝𑁆𑀞𑀸𑀓𑀸 𑀯𑀸 𑀏𑀯𑀁𑀯𑀤𑀦𑁆𑀢𑀺 𑁋 ‘‘𑀯𑀲𑀣, 𑀅𑀬𑁆𑀬𑁂, 𑀫𑀬𑀁 𑀪𑀺𑀓𑁆𑀔𑀽 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀯𑀼𑀢𑁆𑀢𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀓𑀸𑀫𑀸 𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 𑀲𑀸𑀔𑀸𑀫𑀡𑁆𑀟𑀧𑁂𑀧𑀺 𑀏𑀓𑀭𑀢𑁆𑀢𑀁 𑀯𑀼𑀢𑁆𑀣𑀸 𑀳𑁄𑀦𑁆𑀢𑀺; 𑀦 𑀦𑀺𑀫𑀦𑁆𑀢𑀺𑀢𑀸 𑀳𑀼𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑀸. 𑀏𑀢𑁆𑀢𑀸𑀯𑀢𑀸𑀧𑀺 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀳𑁄𑀢𑀺, 𑀏𑀢𑁆𑀣 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀉𑀧𑀕𑀘𑁆𑀙𑀦𑁆𑀢𑀻𑀳𑀺 𑀘 𑀧𑀓𑁆𑀔𑀲𑁆𑀲 𑀢𑁂𑀭𑀲𑀺𑀬𑀁𑀬𑁂𑀯 𑀪𑀺𑀓𑁆𑀔𑀽 𑀬𑀸𑀘𑀺𑀢𑀩𑁆𑀩𑀸 𑁋 ‘‘𑀫𑀬𑀁 𑀅𑀬𑁆𑀬𑀸 𑀢𑀼𑀫𑁆𑀳𑀸𑀓𑀁 𑀑𑀯𑀸𑀤𑁂𑀦 𑀯𑀲𑀺𑀲𑁆𑀲𑀸𑀫𑀸’’𑀢𑀺. 𑀬𑀢𑁄 𑀧𑀦 𑀉𑀚𑀼𑀦𑀸 𑀫𑀕𑁆𑀕𑁂𑀦 𑀅𑀟𑁆𑀠𑀬𑁄𑀚𑀦𑁂 𑀪𑀺𑀓𑁆𑀔𑀽𑀦𑀁 𑀯𑀲𑀦𑀝𑁆𑀞𑀸𑀦𑀁, 𑀢𑁂𑀦 𑀧𑀦 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀻𑀦𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀯𑀸 𑀳𑁄𑀢𑀺, 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀻𑀦𑀁 𑀅𑀢𑀺𑀭𑁂𑀓𑀟𑁆𑀠𑀬𑁄𑀚𑀦𑀁 𑀳𑁄𑀢𑀺, 𑀅𑀬𑀁 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺. 𑀲𑀘𑁂 𑀧𑀦 𑀢𑀢𑁄 𑀕𑀸𑀯𑀼𑀢𑀫𑀢𑁆𑀢𑁂 𑀅𑀜𑁆𑀜𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄 𑀔𑁂𑀫𑀝𑁆𑀞𑀸𑀦𑁂 𑀳𑁄𑀢𑀺, 𑀢𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀬𑀸𑀘𑀺𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀬𑀸𑀘𑀺𑀢𑀩𑁆𑀩𑀸 ‘‘𑀅𑀬𑁆𑀬𑀸 𑀅𑀫𑁆𑀳𑀸𑀓𑀁 𑀉𑀚𑀼𑀫𑀕𑁆𑀕𑁂 𑀅𑀦𑁆𑀢𑀭𑀸𑀬𑁄 𑀅𑀢𑁆𑀣𑀺, 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀅𑀢𑀺𑀭𑁂𑀓𑀟𑁆𑀠𑀬𑁄𑀚𑀦𑀁 𑀳𑁄𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀦 𑀅𑀫𑁆𑀳𑀸𑀓𑀁 𑀉𑀧𑀲𑁆𑀲𑀬𑀢𑁄 𑀕𑀸𑀯𑀼𑀢𑀫𑀢𑁆𑀢𑁂 𑀅𑀜𑁆𑀜𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄 𑀅𑀢𑁆𑀣𑀺, 𑀅𑀬𑁆𑀬𑀸𑀦𑀁 𑀲𑀦𑁆𑀢𑀺𑀓𑀸 𑀢𑀢𑁆𑀣 𑀆𑀕𑀢𑀑𑀯𑀸𑀤𑁂𑀦 𑀯𑀲𑀺𑀲𑁆𑀲𑀸𑀫𑀸’’𑀢𑀺. 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀢𑀢𑁄 𑀢𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀢𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀆𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀢𑀸 𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀉𑀧𑀲𑁆𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀲𑀘𑁂 𑀧𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀓𑀸𑀫𑀸 𑀪𑀺𑀓𑁆𑀔𑀽 𑀘𑀸𑀢𑀼𑀤𑁆𑀤𑀲𑁂 𑀯𑀺𑀳𑀸𑀭𑀁 𑀆𑀕𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀼𑀦𑀻𑀳𑀺 𑀘 ‘‘𑀇𑀥 𑀅𑀬𑁆𑀬𑀸 𑀯𑀲𑁆𑀲𑀁 𑀯𑀲𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺𑀢𑀸 ‘‘𑀆𑀫𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀸𑀳𑀺 ‘‘𑀢𑁂𑀦𑀳𑀺 𑀅𑀬𑁆𑀬𑀸 𑀫𑀬𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀑𑀯𑀸𑀤𑀁 𑀅𑀦𑀼𑀚𑀻𑀯𑀦𑁆𑀢𑀺𑀬𑁄 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑀸 𑀤𑀼𑀢𑀺𑀬𑀤𑀺𑀯𑀲𑁂 𑀕𑀸𑀫𑁂 𑀪𑀺𑀓𑁆𑀔𑀸𑀘𑀸𑀭𑀲𑀫𑁆𑀧𑀤𑀁 𑀅𑀧𑀲𑁆𑀲𑀦𑁆𑀢𑀸 ‘‘𑀦 𑀲𑀓𑁆𑀓𑀸 𑀇𑀥 𑀯𑀲𑀺𑀢𑀼’’𑀦𑁆𑀢𑀺 𑀧𑀓𑁆𑀓𑀫𑀦𑁆𑀢𑀺. 𑀅𑀣 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑁄𑀲𑀣𑀤𑀺𑀯𑀲𑁂 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀦 𑀧𑀲𑁆𑀲𑀦𑁆𑀢𑀺, 𑀏𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀬𑀢𑁆𑀣 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. ‘‘𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀆𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀸 𑀆𑀪𑁄𑀕𑀁 𑀓𑀢𑁆𑀯𑀸 𑀆𑀕𑀢𑀸𑀦𑀁 𑀲𑀦𑁆𑀢𑀺𑀓𑁂 𑀑𑀯𑀸𑀤𑁂𑀦 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀧𑀘𑁆𑀙𑀺𑀫𑀺𑀓𑀸𑀬𑀧𑀺 𑀦 𑀓𑁂𑀘𑀺 𑀆𑀕𑀘𑁆𑀙𑀦𑁆𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀭𑀸𑀚𑀪𑀬𑀁 𑀯𑀸 𑀘𑁄𑀭𑀪𑀬𑀁 𑀯𑀸 𑀤𑀼𑀩𑁆𑀪𑀺𑀓𑁆𑀔𑀁 𑀯𑀸 𑀳𑁄𑀢𑀺, 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑁂 𑀯𑀲𑀦𑁆𑀢𑀺𑀬𑀸 𑀆𑀧𑀢𑁆𑀢𑀺, 𑀯𑀲𑁆𑀲𑀘𑁆𑀙𑁂𑀤𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸𑀧𑀺 𑀆𑀧𑀢𑁆𑀢𑀺, 𑀲𑀸 𑀭𑀓𑁆𑀔𑀺𑀢𑀩𑁆𑀩𑀸. 𑀆𑀧𑀤𑀸𑀲𑀼 𑀳𑀺 𑀅𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂 𑀯𑀲𑀦𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀲𑀘𑁂 𑀆𑀕𑀦𑁆𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀢𑀸 𑀪𑀺𑀓𑁆𑀔𑀽 𑀧𑀼𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀧𑀓𑁆𑀓𑀫𑀦𑁆𑀢𑀺, 𑀯𑀲𑀺𑀢𑀩𑁆𑀩𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀧𑀓𑁆𑀓𑀦𑁆𑀢𑀸 𑀯𑀸 𑀳𑁄𑀦𑁆𑀢𑀺 𑀯𑀺𑀩𑁆𑀪𑀦𑁆𑀢𑀸 𑀯𑀸 𑀓𑀸𑀮𑀗𑁆𑀓𑀢𑀸 𑀯𑀸 𑀧𑀓𑁆𑀔𑀲𑀗𑁆𑀓𑀦𑁆𑀢𑀸 𑀯𑀸 𑀆𑀧𑀤𑀸𑀲𑀼 𑀉𑀫𑁆𑀫𑀢𑁆𑀢𑀺𑀓𑀸𑀬 𑀆𑀤𑀺𑀓𑀫𑁆𑀫𑀺𑀓𑀸𑀬𑀸’’𑀢𑀺. 𑀧𑀯𑀸𑀭𑁂𑀦𑁆𑀢𑀺𑀬𑀸 𑀧𑀦 𑀬𑀢𑁆𑀣 𑀪𑀺𑀓𑁆𑀔𑀽 𑀅𑀢𑁆𑀣𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁.

𑀅𑀦𑁆𑀯𑀤𑁆𑀥𑀫𑀸𑀲𑀦𑁆𑀢𑀺 𑀅𑀤𑁆𑀥𑀫𑀸𑀲𑁂 𑀅𑀤𑁆𑀥𑀫𑀸𑀲𑁂. 𑀤𑁆𑀯𑁂 𑀥𑀫𑁆𑀫𑀸 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀸𑀢𑀺 𑀤𑁆𑀯𑁂 𑀥𑀫𑁆𑀫𑀸 𑀇𑀘𑁆𑀙𑀺𑀢𑀩𑁆𑀩𑀸. 𑀉𑀧𑁄𑀲𑀣𑀧𑀼𑀘𑁆𑀙𑀓𑀦𑁆𑀢𑀺 𑀉𑀧𑁄𑀲𑀣𑀧𑀼𑀘𑁆𑀙𑀦𑀁, 𑀢𑀢𑁆𑀣 𑀧𑀦𑁆𑀦𑀭𑀲𑀺𑀓𑁂 𑀉𑀧𑁄𑀲𑀣𑁂 𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑀺𑀬𑀁 𑀘𑀸𑀢𑀼𑀤𑁆𑀤𑀲𑀺𑀓𑁂 𑀢𑁂𑀭𑀲𑀺𑀬𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑁄 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀧𑀓𑁆𑀔𑀲𑁆𑀲 𑀢𑁂𑀭𑀲𑀺𑀬𑀁𑀬𑁂𑀯 𑀕𑀦𑁆𑀢𑁆𑀯𑀸 ‘𑀅𑀬𑀁 𑀉𑀧𑁄𑀲𑀣𑁄 𑀘𑀸𑀢𑀼𑀤𑁆𑀤𑀲𑀺𑀓𑁄 𑀧𑀦𑁆𑀦𑀭𑀲𑀺𑀓𑁄’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑁄𑀲𑀣𑀤𑀺𑀯𑀲𑁂 𑀑𑀯𑀸𑀤𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁. 𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀦 𑀧𑀝𑁆𑀞𑀸𑀬 𑀥𑀫𑁆𑀫𑀲𑀯𑀦𑀢𑁆𑀣𑀸𑀬 𑀕𑀦𑁆𑀢𑀩𑁆𑀩𑀁. 𑀇𑀢𑀺 𑀪𑀕𑀯𑀸 𑀅𑀜𑁆𑀜𑀲𑁆𑀲 𑀓𑀫𑁆𑀫𑀲𑁆𑀲 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀕𑀫𑀦𑀫𑁂𑀯 𑀧𑀜𑁆𑀜𑀧𑁂𑀲𑀺. 𑀓𑀲𑁆𑀫𑀸? 𑀫𑀦𑁆𑀤𑀧𑀜𑁆𑀜𑀢𑁆𑀢𑀸 𑀫𑀸𑀢𑀼𑀕𑀸𑀫𑀲𑁆𑀲. 𑀫𑀦𑁆𑀤𑀧𑀜𑁆𑀜𑁄 𑀳𑀺 𑀫𑀸𑀢𑀼𑀕𑀸𑀫𑁄, 𑀢𑀲𑁆𑀫𑀸 𑀦𑀺𑀘𑁆𑀘𑀁 𑀥𑀫𑁆𑀫𑀲𑀯𑀦𑀁 𑀩𑀳𑀽𑀧𑀓𑀸𑀭𑀁. 𑀏𑀯𑀜𑁆𑀘 𑀲𑀢𑀺 ‘‘𑀬𑀁 𑀫𑀬𑀁 𑀚𑀸𑀦𑀸𑀫, 𑀢𑀫𑁂𑀯 𑀅𑀬𑁆𑀬𑀸 𑀚𑀸𑀦𑀦𑁆𑀢𑀻’’𑀢𑀺 𑀫𑀸𑀦𑀁 𑀅𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀬𑀺𑀭𑀽𑀧𑀸𑀲𑀫𑀸𑀦𑀸 𑀲𑀸𑀢𑁆𑀣𑀺𑀓𑀁 𑀧𑀩𑁆𑀩𑀚𑁆𑀚𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀏𑀯𑀫𑀓𑀸𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 ‘‘𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑀸𑀬𑁂𑀯 𑀦𑀺𑀭𑀦𑁆𑀢𑀭𑀁 𑀯𑀺𑀳𑀸𑀭𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀩𑁆𑀩𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀑𑀯𑀸𑀤𑀁 𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 ‘𑀚𑀸𑀬𑀸𑀬𑁄 𑀇𑀫𑀸 𑀇𑀫𑁂𑀲𑀁, 𑀚𑀸𑀭𑀺𑀬𑁄 𑀇𑀫𑀸 𑀇𑀫𑁂𑀲𑀁, 𑀇𑀤𑀸𑀦𑀺𑀫𑁂 𑀇𑀫𑀸𑀳𑀺 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀲𑁆𑀲𑀦𑁆𑀢𑀻’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 ‘𑀦, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑁂𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀑𑀯𑀸𑀤𑁄 𑀕𑀦𑁆𑀢𑀩𑁆𑀩𑁄, 𑀕𑀘𑁆𑀙𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀑𑀯𑀸𑀤𑀁 𑀕𑀦𑁆𑀢𑀼’𑀦𑁆𑀢𑀺. 𑀧𑀼𑀦𑀧𑀺 𑀢𑀣𑁂𑀯 𑀉𑀚𑁆𑀛𑀸𑀬𑀺𑀁𑀲𑀼. 𑀧𑀼𑀦 𑀪𑀕𑀯𑀸 ‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀢𑀺𑀲𑁆𑀲𑁄 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀸𑀤𑀁 𑀕𑀦𑁆𑀢𑀼’’’𑀦𑁆𑀢𑀺 𑀆𑀳.

𑀢𑀲𑁆𑀫𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀤𑁆𑀯𑁂 𑀢𑀺𑀲𑁆𑀲𑁄 𑀪𑀺𑀓𑁆𑀔𑀼𑀦𑀺𑀬𑁄 𑀬𑀸𑀘𑀺𑀢𑁆𑀯𑀸 𑀧𑁂𑀲𑁂𑀢𑀩𑁆𑀩𑀸 𑁋 ‘‘𑀏𑀣𑀬𑁆𑀬𑁂, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀁 𑀬𑀸𑀘𑀣, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀅𑀬𑁆𑀬𑀸…𑀧𑁂… 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺 (𑀘𑀽𑀴𑀯. 𑁪𑁧𑁩). 𑀢𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀆𑀭𑀸𑀫𑀁 𑀕𑀦𑁆𑀢𑀩𑁆𑀩𑀁. 𑀢𑀢𑁄 𑀑𑀯𑀸𑀤𑀧𑀝𑀺𑀕𑁆𑀕𑀸𑀳𑀓𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑁄 𑀪𑀺𑀓𑁆𑀔𑀼 𑀏𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄, 𑀅𑀬𑁆𑀬, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀤𑁂 𑀯𑀦𑁆𑀤𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀢𑀺, 𑀮𑀪𑀢𑀼 𑀓𑀺𑀭 𑀅𑀬𑁆𑀬 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀪𑀺𑀓𑁆𑀔𑀼 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀤𑁂 𑀯𑀦𑁆𑀤𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀢𑀺, 𑀮𑀪𑀢𑀼 𑀓𑀺𑀭 𑀪𑀦𑁆𑀢𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀯𑀢𑁆𑀢𑀩𑁆𑀩𑁄 ‘‘𑀅𑀢𑁆𑀣𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄’’𑀢𑀺. 𑀲𑀘𑁂 𑀳𑁄𑀢𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀯𑀢𑁆𑀢𑀩𑁆𑀩𑁄 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄, 𑀢𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀉𑀧𑀲𑀗𑁆𑀓𑀫𑀢𑀽’’𑀢𑀺.

𑀲𑀘𑁂 𑀦 𑀳𑁄𑀢𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑁄 𑀆𑀬𑀲𑁆𑀫𑀸 𑀉𑀲𑁆𑀲𑀳𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼’’𑀦𑁆𑀢𑀺. 𑀲𑀘𑁂 𑀓𑁄𑀘𑀺 𑀪𑀺𑀓𑁆𑀔𑀼 𑀉𑀲𑁆𑀲𑀳𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼𑀁, 𑀲𑁄 𑀘 𑀳𑁄𑀢𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄, 𑀢𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀉𑀧𑀲𑀗𑁆𑀓𑀫𑀢𑀽’’𑀢𑀺.

𑀲𑀘𑁂 𑀧𑀦 𑀓𑁄𑀘𑀺 𑀦 𑀉𑀲𑁆𑀲𑀳𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼𑀁, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀦𑀢𑁆𑀣𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄, 𑀧𑀸𑀲𑀸𑀤𑀺𑀓𑁂𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀲𑀫𑁆𑀧𑀸𑀤𑁂𑀢𑀽’’𑀢𑀺. 𑀏𑀢𑁆𑀢𑀸𑀯𑀢𑀸 𑀳𑀺 𑀲𑀓𑀮𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀸𑀲𑀦𑀫𑀸𑀭𑁄𑀘𑀺𑀢𑀁 𑀳𑁄𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀸𑀝𑀺𑀧𑀤𑁂 𑀪𑀺𑀓𑁆𑀔𑀼𑀦𑀻𑀦𑀁 𑀆𑀭𑁄𑀘𑁂𑀢𑀩𑁆𑀩𑀁. 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦𑀧𑀺 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀧𑁂𑀲𑁂𑀢𑀩𑁆𑀩𑀸 ‘‘𑀕𑀘𑁆𑀙𑀣𑀬𑁆𑀬𑁂, 𑀧𑀼𑀘𑁆𑀙𑀣 ‘𑀓𑀺𑀁 𑀅𑀬𑁆𑀬 𑀮𑀪𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’’𑀦𑁆𑀢𑀺. 𑀢𑀸𑀳𑀺 ‘‘𑀲𑀸𑀥𑀼 𑀅𑀬𑁆𑀬𑁂’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀢𑁆𑀢𑀩𑁆𑀩𑀁 𑁋 ‘‘𑀓𑀺𑀁 𑀅𑀬𑁆𑀬 𑀮𑀪𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺. 𑀢𑁂𑀦 𑀯𑀢𑁆𑀢𑀩𑁆𑀩𑀁 𑁋 ‘‘𑀦𑀢𑁆𑀣𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄, 𑀧𑀸𑀲𑀸𑀤𑀺𑀓𑁂𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀲𑀫𑁆𑀧𑀸𑀤𑁂𑀢𑀽’’𑀢𑀺. 𑀢𑀸𑀳𑀺 ‘‘𑀲𑀸𑀥𑀼 𑀅𑀬𑁆𑀬𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀏𑀓𑀢𑁄 𑀆𑀕𑀢𑀸𑀦𑀁 𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁, 𑀢𑀸𑀲𑀼 𑀧𑀦 𑀏𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀢𑁆𑀢𑀩𑁆𑀩𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀜𑁆𑀘, 𑀇𑀢𑀭𑀸 𑀢𑀲𑁆𑀲𑀸 𑀲𑀳𑀸𑀬𑀺𑀓𑀸.

𑀲𑀘𑁂 𑀧𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀯𑀸 𑀦 𑀧𑀽𑀭𑀢𑀺, 𑀉𑀪𑀬𑀢𑁄𑀧𑀺 𑀯𑀸 𑀕𑀡𑀫𑀢𑁆𑀢𑀫𑁂𑀯 𑀧𑀼𑀕𑁆𑀕𑀮𑀫𑀢𑁆𑀢𑀁 𑀯𑀸 𑀳𑁄𑀢𑀺, 𑀏𑀓𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀩𑀳𑀽𑀳𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂𑀳𑀺 𑀑𑀯𑀸𑀤𑀢𑁆𑀣𑀸𑀬 𑀧𑁂𑀲𑀺𑀢𑀸 𑀳𑁄𑀢𑀺, 𑀢𑀢𑁆𑀭𑀸𑀬𑀁 𑀯𑀘𑀦𑀓𑁆𑀓𑀫𑁄 𑁋 ‘‘𑀪𑀺𑀓𑁆𑀔𑀼𑀦𑀺𑀬𑁄 𑀅𑀬𑁆𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀤𑁂 𑀯𑀦𑁆𑀤𑀦𑁆𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀦𑁆𑀢𑀺, 𑀮𑀪𑀦𑁆𑀢𑀼 𑀓𑀺𑀭 𑀅𑀬𑁆𑀬 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺. ‘‘𑀅𑀳𑀁 𑀅𑀬𑁆𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀤𑁂 𑀯𑀦𑁆𑀤𑀸𑀫𑀺; 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀸𑀫𑀺, 𑀮𑀪𑀸𑀫𑀳𑀁 𑀅𑀬𑁆𑀬 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺.

‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀅𑀬𑁆𑀬 𑀅𑀬𑁆𑀬𑀸𑀦𑀁 𑀧𑀸𑀤𑁂 𑀯𑀦𑁆𑀤𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀢𑀺, 𑀮𑀪𑀢𑀼 𑀓𑀺𑀭 𑀅𑀬𑁆𑀬 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺. ‘‘𑀪𑀺𑀓𑁆𑀔𑀼𑀦𑀺𑀬𑁄 𑀅𑀬𑁆𑀬 𑀅𑀬𑁆𑀬𑀸𑀦𑀁 𑀧𑀸𑀤𑁂 𑀯𑀦𑁆𑀤𑀦𑁆𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀦𑁆𑀢𑀺, 𑀮𑀪𑀦𑁆𑀢𑀼 𑀓𑀺𑀭 𑀅𑀬𑁆𑀬 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺. ‘‘𑀅𑀳𑀁 𑀅𑀬𑁆𑀬 𑀅𑀬𑁆𑀬𑀸𑀦𑀁 𑀧𑀸𑀤𑁂 𑀯𑀦𑁆𑀤𑀸𑀫𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀸𑀫𑀺, 𑀮𑀪𑀸𑀫𑀳𑀁 𑀅𑀬𑁆𑀬 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺.

‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀅𑀬𑁆𑀬 𑀅𑀬𑁆𑀬𑀲𑁆𑀲 𑀧𑀸𑀤𑁂 𑀯𑀦𑁆𑀤𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀢𑀺, 𑀮𑀪𑀢𑀼 𑀓𑀺𑀭 𑀅𑀬𑁆𑀬 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺. ‘‘𑀪𑀺𑀓𑁆𑀔𑀼𑀦𑀺𑀬𑁄 𑀅𑀬𑁆𑀬 𑀅𑀬𑁆𑀬𑀲𑁆𑀲 𑀧𑀸𑀤𑁂 𑀯𑀦𑁆𑀤𑀦𑁆𑀢𑀺; 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀦𑁆𑀢𑀺, 𑀮𑀪𑀦𑁆𑀢𑀼 𑀓𑀺𑀭 𑀅𑀬𑁆𑀬 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺. ‘‘𑀅𑀳𑀁 𑀅𑀬𑁆𑀬 𑀅𑀬𑁆𑀬𑀲𑁆𑀲 𑀧𑀸𑀤𑁂 𑀯𑀦𑁆𑀤𑀸𑀫𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀸𑀫𑀺, 𑀮𑀪𑀸𑀫𑀳𑀁 𑀅𑀬𑁆𑀬 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺.

‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘 𑀅𑀬𑁆𑀬 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀻 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀬𑁆𑀬𑀸𑀦𑀁 𑀅𑀬𑁆𑀬𑀲𑁆𑀲 𑀧𑀸𑀤𑁂 𑀯𑀦𑁆𑀤𑀢𑀺 𑀯𑀦𑁆𑀤𑀦𑁆𑀢𑀺 𑀯𑀦𑁆𑀤𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀢𑀺 𑀬𑀸𑀘𑀦𑁆𑀢𑀺 𑀬𑀸𑀘𑀢𑀺, 𑀮𑀪𑀢𑀼 𑀓𑀺𑀭 𑀮𑀪𑀦𑁆𑀢𑀼 𑀓𑀺𑀭 𑀮𑀪𑀢𑀼 𑀓𑀺𑀭 𑀅𑀬𑁆𑀬 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀻 𑀘 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺.

𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀸 𑀉𑀧𑁄𑀲𑀣𑀓𑀸𑀮𑁂 𑀏𑀯𑀁 𑀯𑀢𑁆𑀢𑀩𑁆𑀩𑀁 𑁋 ‘‘𑀪𑀺𑀓𑁆𑀔𑀼𑀦𑀺𑀬𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀤𑁂 𑀯𑀦𑁆𑀤𑀦𑁆𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀦𑁆𑀢𑀺, 𑀮𑀪𑀦𑁆𑀢𑀼 𑀓𑀺𑀭 𑀪𑀦𑁆𑀢𑁂 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺. ‘‘𑀪𑀺𑀓𑁆𑀔𑀼𑀦𑀻 𑀪𑀦𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀤𑁂 𑀯𑀦𑁆𑀤𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀢𑀺, 𑀮𑀪𑀢𑀼 𑀓𑀺𑀭 𑀪𑀦𑁆𑀢𑁂 𑀪𑀺𑀓𑁆𑀔𑀼𑀦𑀻 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺.

‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀻 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀸𑀦𑀁 𑀧𑀸𑀤𑁂 𑀯𑀦𑁆𑀤𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀢𑀺, 𑀮𑀪𑀢𑀼 𑀓𑀺𑀭 𑀪𑀦𑁆𑀢𑁂 𑀪𑀺𑀓𑁆𑀔𑀼𑀦𑀻 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺.

‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀻 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀬𑀲𑁆𑀫𑀦𑁆𑀢𑀸𑀦𑀁 𑀧𑀸𑀤𑁂 𑀯𑀦𑁆𑀤𑀢𑀺 𑀯𑀦𑁆𑀤𑀦𑁆𑀢𑀺 𑀯𑀦𑁆𑀤𑀢𑀺, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘 𑀬𑀸𑀘𑀢𑀺 𑀬𑀸𑀘𑀦𑁆𑀢𑀺 𑀬𑀸𑀘𑀢𑀺, 𑀮𑀪𑀢𑀼 𑀓𑀺𑀭 𑀮𑀪𑀦𑁆𑀢𑀼 𑀓𑀺𑀭 𑀮𑀪𑀢𑀼 𑀓𑀺𑀭 𑀪𑀦𑁆𑀢𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀻 𑀘 𑀑𑀯𑀸𑀤𑀽𑀧𑀲𑀗𑁆𑀓𑀫𑀦’’𑀦𑁆𑀢𑀺.

𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦𑀸𑀧𑀺 𑀲𑀘𑁂 𑀲𑀫𑁆𑀫𑀢𑁄 𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀁 𑀪𑀺𑀓𑁆𑀔𑀼𑀦𑀺𑀬𑁄, 𑀢𑀁 𑀪𑀺𑀓𑁆𑀔𑀼𑀦𑀻, 𑀢𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀻 𑀘 𑀉𑀧𑀲𑀗𑁆𑀓𑀫𑀦𑁆𑀢𑀼 𑀉𑀧𑀲𑀗𑁆𑀓𑀫𑀢𑀼 𑀉𑀧𑀲𑀗𑁆𑀓𑀫𑀢𑀽𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀦𑀢𑁆𑀣𑀺, 𑀧𑀸𑀲𑀸𑀤𑀺𑀓𑁂𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀻 𑀘 𑀲𑀫𑁆𑀧𑀸𑀤𑁂𑀢𑀼 𑀲𑀫𑁆𑀧𑀸𑀤𑁂𑀦𑁆𑀢𑀼 𑀲𑀫𑁆𑀧𑀸𑀤𑁂𑀢𑀽𑀢𑀺 𑀯𑀢𑁆𑀢𑀩𑁆𑀩𑀁.

𑀑𑀯𑀸𑀤𑀧𑀝𑀺𑀕𑁆𑀕𑀸𑀳𑀓𑁂𑀦 𑀧𑀸𑀝𑀺𑀧𑀤𑁂 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀢𑀣𑁂𑀯 𑀯𑀢𑁆𑀢𑀩𑁆𑀩𑀁. 𑀑𑀯𑀸𑀤𑀁 𑀧𑀦 𑀩𑀸𑀮𑀕𑀺𑀮𑀸𑀦𑀕𑀫𑀺𑀓𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀲𑀘𑁂𑀧𑀺 𑀆𑀭𑀜𑁆𑀜𑀓𑁄 𑀳𑁄𑀢𑀺, 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑀼𑀁 𑀦 𑀮𑀪𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀩𑀸𑀮𑀁 𑀞𑀧𑁂𑀢𑁆𑀯𑀸 𑀕𑀺𑀮𑀸𑀦𑀁 𑀞𑀧𑁂𑀢𑁆𑀯𑀸 𑀕𑀫𑀺𑀓𑀁 𑀅𑀯𑀲𑁂𑀲𑁂𑀳𑀺 𑀑𑀯𑀸𑀤𑀁 𑀕𑀳𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁧𑁪).

𑀢𑀢𑁆𑀣 𑀬𑁄 𑀘𑀸𑀢𑀼𑀤𑁆𑀤𑀲𑀺𑀓𑀧𑀦𑁆𑀦𑀭𑀲𑀺𑀓𑁂𑀲𑀼 𑀯𑀸 𑀉𑀧𑁄𑀲𑀣𑁂𑀲𑀼 𑀧𑀸𑀝𑀺𑀧𑀤𑁂 𑀯𑀸 𑀕𑀦𑁆𑀢𑀼𑀓𑀸𑀫𑁄, 𑀲𑁄 𑀕𑀫𑀺𑀓𑁄 𑀤𑀼𑀢𑀺𑀬𑀧𑀓𑁆𑀔𑀤𑀺𑀯𑀲𑁂 𑀕𑀘𑁆𑀙𑀦𑁆𑀢𑁄𑀧𑀺 𑀅𑀕𑁆𑀕𑀳𑁂𑀢𑀼𑀁 𑀦 𑀮𑀪𑀢𑀺, ‘‘𑀦, 𑀪𑀺𑀓𑁆𑀔𑀯𑁂, 𑀑𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄, 𑀬𑁄 𑀦 𑀕𑀡𑁆𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁪𑁧𑁪) 𑀯𑀼𑀢𑁆𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺𑀬𑁂𑀯. 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀘 𑀉𑀧𑁄𑀲𑀣𑀕𑁆𑀕𑁂 𑀅𑀦𑀸𑀭𑁄𑀘𑁂𑀢𑀼𑀁 𑀯𑀸 𑀧𑀸𑀝𑀺𑀧𑀤𑁂 𑀪𑀺𑀓𑁆𑀔𑀼𑀦𑀻𑀦𑀁 𑀅𑀧𑀘𑁆𑀘𑀸𑀳𑀭𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦, 𑀪𑀺𑀓𑁆𑀔𑀯𑁂, 𑀑𑀯𑀸𑀤𑁄 𑀦 𑀆𑀭𑁄𑀘𑁂𑀢𑀩𑁆𑀩𑁄. 𑀬𑁄 𑀦 𑀆𑀭𑁄𑀘𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁪𑁧𑁫).

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀦, 𑀪𑀺𑀓𑁆𑀔𑀯𑁂, 𑀑𑀯𑀸𑀤𑁄 𑀦 𑀧𑀘𑁆𑀘𑀸𑀳𑀭𑀺𑀢𑀩𑁆𑀩𑁄. 𑀬𑁄 𑀦 𑀧𑀘𑁆𑀘𑀸𑀳𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁪𑁧𑁫).

𑀢𑀢𑁆𑀣 𑀆𑀭𑀜𑁆𑀜𑀓𑁂𑀦 𑀧𑀘𑁆𑀘𑀸𑀳𑀭𑀡𑀢𑁆𑀣𑀁 𑀲𑀗𑁆𑀓𑁂𑀢𑁄 𑀓𑀸𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀓𑁂𑀦 𑀪𑀺𑀓𑁆𑀔𑀼𑀦𑀸 𑀑𑀯𑀸𑀤𑀁 𑀕𑀳𑁂𑀢𑀼𑀁, 𑀲𑀗𑁆𑀓𑁂𑀢𑀜𑁆𑀘 𑀓𑀸𑀢𑀼𑀁, 𑀅𑀢𑁆𑀭 𑀧𑀝𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀆𑀭𑀜𑁆𑀜𑀓𑁄 𑀪𑀺𑀓𑁆𑀔𑀼 𑀲𑀘𑁂 𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑀦𑀕𑀸𑀫𑁂 𑀪𑀺𑀓𑁆𑀔𑀁 𑀮𑀪𑀢𑀺, 𑀢𑀢𑁆𑀣𑁂𑀯 𑀘𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑀺𑀲𑁆𑀯𑀸 𑀆𑀭𑁄𑀘𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀦𑁄 𑀘𑀲𑁆𑀲 𑀢𑀢𑁆𑀣 𑀪𑀺𑀓𑁆𑀔𑀸 𑀲𑀼𑀮𑀪𑀸 𑀳𑁄𑀢𑀺, 𑀲𑀸𑀫𑀦𑁆𑀢𑀕𑀸𑀫𑁂 𑀘𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀕𑀸𑀫𑀁 𑀆𑀕𑀫𑁆𑀫 𑀢𑀣𑁂𑀯 𑀓𑀸𑀢𑀩𑁆𑀩𑀁. 𑀲𑀘𑁂 𑀤𑀽𑀭𑀁 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀲𑀗𑁆𑀓𑁂𑀢𑁄 𑀓𑀸𑀢𑀩𑁆𑀩𑁄 𑁋 ‘‘𑀅𑀳𑀁 𑀅𑀫𑀼𑀓𑀁 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀕𑀸𑀫𑀤𑁆𑀯𑀸𑀭𑁂 𑀲𑀪𑀁 𑀯𑀸 𑀫𑀡𑁆𑀟𑀧𑀁 𑀯𑀸 𑀭𑀼𑀓𑁆𑀔𑀫𑀽𑀮𑀁 𑀯𑀸 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀺, 𑀢𑀢𑁆𑀣 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺. 𑀪𑀺𑀓𑁆𑀔𑀼𑀦𑀻𑀳𑀺 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁, 𑀅𑀕𑀦𑁆𑀢𑀼𑀁 𑀦 𑀮𑀩𑁆𑀪𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀗𑁆𑀓𑁂𑀢𑀁 𑀦 𑀕𑀦𑁆𑀢𑀩𑁆𑀩𑀁. 𑀬𑀸 𑀦 𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁪𑁧𑁫).

𑀉𑀪𑀢𑁄𑀲𑀗𑁆𑀖𑁂 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀦𑀻𑀳𑀺 𑀘𑀸𑀢𑀼𑀤𑁆𑀤𑀲𑁂 𑀅𑀢𑁆𑀢𑀦𑀸 𑀧𑀯𑀸𑀭𑁂𑀢𑁆𑀯𑀸 𑀉𑀧𑁄𑀲𑀣𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀚𑀢𑀦𑀸𑀬 𑀧𑀯𑀸𑀭𑁂𑀢𑁆𑀯𑀸 𑀅𑀧𑀭𑀚𑁆𑀚𑀼 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁨𑁭).

𑀪𑀺𑀓𑁆𑀔𑀼𑀦𑀺𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀩𑁆𑀩𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀧𑀯𑀸𑀭𑁂𑀦𑁆𑀢𑁄 𑀓𑁄𑀮𑀸𑀳𑀮𑀫𑀓𑀸𑀲𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀁 𑀪𑀺𑀓𑁆𑀔𑀼𑀦𑀺𑀁 𑀩𑁆𑀬𑀢𑁆𑀢𑀁 𑀧𑀝𑀺𑀩𑀮𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀧𑀞𑀫𑀁 𑀪𑀺𑀓𑁆𑀔𑀼𑀦𑀻 𑀬𑀸𑀘𑀺𑀢𑀩𑁆𑀩𑀸, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀦𑀺𑀁 𑀲𑀫𑁆𑀫𑀦𑁆𑀦𑁂𑀬𑁆𑀬 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑁂𑀢𑀼𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂 𑀲𑀗𑁆𑀖𑁄, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀦𑀺𑀁 𑀲𑀫𑁆𑀫𑀦𑁆𑀦𑁂𑀬𑁆𑀬 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑁂𑀢𑀼𑀁. 𑀬𑀲𑁆𑀲𑀸 𑀅𑀬𑁆𑀬𑀸𑀬 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀫𑁆𑀫𑀼𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑁂𑀢𑀼𑀁, 𑀲𑀸 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲𑀸 𑀦𑀓𑁆𑀔𑀫𑀢𑀺, 𑀲𑀸 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑁂𑀢𑀼𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀘𑀽𑀴𑀯. 𑁪𑁨𑁭).

𑀢𑀸𑀬 𑀲𑀫𑁆𑀫𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀆𑀤𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀅𑀬𑁆𑀬, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑁂𑀢𑀺 𑁋 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀯𑀤𑀢𑀬𑁆𑀬 𑀪𑀺𑀓𑁆𑀔𑀼𑀲𑀗𑁆𑀖𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀅𑀬𑁆𑀬, 𑀢𑀢𑀺𑀬𑀫𑁆𑀧𑀺 𑀅𑀬𑁆𑀬, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄…𑀧𑁂… 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺.

𑀲𑀘𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀦 𑀧𑀽𑀭𑀢𑀺, ‘‘𑀪𑀺𑀓𑁆𑀔𑀼𑀦𑀺𑀬𑁄 𑀅𑀬𑁆𑀬 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑁂𑀦𑁆𑀢𑀺 𑁋 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀢𑀬𑁆𑀬 𑀪𑀺𑀓𑁆𑀔𑀼𑀲𑀗𑁆𑀖𑁄 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑀺𑀬𑁄 𑀧𑀝𑀺𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀘, ‘‘𑀅𑀳𑀁 𑀅𑀬𑁆𑀬 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑁂𑀫𑀺 𑁋 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀢𑀼 𑀫𑀁 𑀅𑀬𑁆𑀬 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑀻 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁.

𑀲𑀘𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦 𑀧𑀽𑀭𑀢𑀺, ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀅𑀬𑁆𑀬𑀸 𑀅𑀬𑁆𑀬𑁂 𑀧𑀯𑀸𑀭𑁂𑀢𑀺 𑁋 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀦𑁆𑀢𑀬𑁆𑀬𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺 𑀘, ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀅𑀬𑁆𑀬 𑀅𑀬𑁆𑀬𑀁 𑀧𑀯𑀸𑀭𑁂𑀢𑀺 𑁋 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀢𑀬𑁆𑀬𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺 𑀘 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁.

𑀉𑀪𑀺𑀦𑁆𑀦𑀁 𑀅𑀧𑀸𑀭𑀺𑀧𑀽𑀭𑀺𑀬𑀸 ‘‘𑀪𑀺𑀓𑁆𑀔𑀼𑀦𑀺𑀬𑁄 𑀅𑀬𑁆𑀬𑀸 𑀅𑀬𑁆𑀬𑁂 𑀧𑀯𑀸𑀭𑁂𑀦𑁆𑀢𑀺 𑁋 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀦𑁆𑀢𑀬𑁆𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑀺𑀬𑁄 𑀧𑀝𑀺𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀘, ‘‘𑀪𑀺𑀓𑁆𑀔𑀼𑀦𑀺𑀬𑁄 𑀅𑀬𑁆𑀬 𑀅𑀬𑁆𑀬𑀁 𑀧𑀯𑀸𑀭𑁂𑀦𑁆𑀢𑀺 𑁋 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀢𑀬𑁆𑀬𑁄 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑀺𑀬𑁄 𑀧𑀝𑀺𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀘, ‘‘𑀅𑀳𑀁 𑀅𑀬𑁆𑀬𑀸 𑀅𑀬𑁆𑀬𑁂 𑀧𑀯𑀸𑀭𑁂𑀫𑀺 𑁋 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀦𑁆𑀢𑀼 𑀫𑀁 𑀅𑀬𑁆𑀬𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑀻 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘, ‘‘𑀅𑀳𑀁 𑀅𑀬𑁆𑀬 𑀅𑀬𑁆𑀬𑀁 𑀧𑀯𑀸𑀭𑁂𑀫𑀺 𑁋 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀭𑀺𑀲𑀗𑁆𑀓𑀸𑀬 𑀯𑀸, 𑀯𑀤𑀢𑀼 𑀫𑀁 𑀅𑀬𑁆𑀬𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀧𑀲𑁆𑀲𑀦𑁆𑀢𑀻 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁.

𑀫𑀸𑀦𑀢𑁆𑀢𑀘𑀭𑀡𑀜𑁆𑀘 𑀉𑀧𑀲𑀫𑁆𑀧𑀤𑀸𑀧𑀭𑀺𑀬𑁂𑀲𑀦𑀸 𑀘 𑀬𑀣𑀸𑀞𑀸𑀦𑁂𑀬𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀦 𑀪𑀺𑀓𑁆𑀔𑀼𑀦𑀺𑀬𑀸 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀤𑀲𑀳𑀺 𑀯𑀸 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀪𑀺𑀓𑁆𑀔𑀼 𑀦𑁂𑀯 𑀅𑀓𑁆𑀓𑁄𑀲𑀺𑀢𑀩𑁆𑀩𑁄, 𑀦 𑀧𑀭𑀺𑀪𑀸𑀲𑀺𑀢𑀩𑁆𑀩𑁄, 𑀦 𑀪𑀬𑁂𑀦 𑀢𑀚𑁆𑀚𑁂𑀢𑀩𑁆𑀩𑁄. 𑀑𑀯𑀝𑁄𑀢𑀺 𑀧𑀺𑀳𑀺𑀢𑁄 𑀯𑀸𑀭𑀺𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀯𑀘𑀦𑀬𑁂𑀯 𑀯𑀘𑀦𑀧𑀣𑁄. 𑀅𑀦𑁄𑀯𑀝𑁄𑀢𑀺 𑀅𑀧𑀺𑀳𑀺𑀢𑁄 𑀅𑀯𑀸𑀭𑀺𑀢𑁄 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑁄. 𑀢𑀲𑁆𑀫𑀸 𑀪𑀺𑀓𑁆𑀔𑀼𑀦𑀺𑀬𑀸 𑀆𑀥𑀺𑀧𑀘𑁆𑀘𑀝𑁆𑀞𑀸𑀦𑁂 𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀞𑀢𑁆𑀯𑀸 ‘‘𑀏𑀯𑀁 𑀅𑀪𑀺𑀓𑁆𑀓𑀫, 𑀏𑀯𑀁 𑀧𑀝𑀺𑀓𑁆𑀓𑀫, 𑀏𑀯𑀁 𑀦𑀺𑀯𑀸𑀲𑁂𑀳𑀺, 𑀏𑀯𑀁 𑀧𑀸𑀭𑀼𑀧𑀸𑀳𑀻’’𑀢𑀺 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀦𑁂𑀯 𑀪𑀺𑀓𑁆𑀔𑀼 𑀑𑀯𑀤𑀺𑀢𑀩𑁆𑀩𑁄, 𑀦 𑀅𑀦𑀼𑀲𑀸𑀲𑀺𑀢𑀩𑁆𑀩𑁄. 𑀤𑁄𑀲𑀁 𑀧𑀦 𑀤𑀺𑀲𑁆𑀯𑀸 ‘‘𑀧𑀼𑀩𑁆𑀩𑁂 𑀫𑀳𑀸𑀣𑁂𑀭𑀸 𑀦 𑀏𑀯𑀁 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀦 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀦 𑀦𑀺𑀯𑀸𑀲𑁂𑀦𑁆𑀢𑀺, 𑀦 𑀧𑀸𑀭𑀼𑀧𑀦𑁆𑀢𑀺, 𑀈𑀤𑀺𑀲𑀁 𑀓𑀸𑀲𑀸𑀯𑀫𑁆𑀧𑀺 𑀦 𑀥𑀸𑀭𑁂𑀦𑁆𑀢𑀺, 𑀦 𑀏𑀯𑀁 𑀅𑀓𑁆𑀔𑀻𑀦𑀺 𑀅𑀜𑁆𑀚𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀚𑁆𑀚𑀫𑀸𑀦𑀤𑁄𑀲𑀁 𑀤𑀲𑁆𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀽𑀳𑀺 𑀧𑀦 ‘‘𑀅𑀬𑀁 𑀯𑀼𑀟𑁆𑀠𑀲𑀫𑀡𑀻 𑀏𑀯𑀁 𑀦𑀺𑀯𑀸𑀲𑁂𑀢𑀺, 𑀏𑀯𑀁 𑀧𑀸𑀭𑀼𑀧𑀢𑀺, 𑀫𑀸 𑀏𑀯𑀁 𑀦𑀺𑀯𑀸𑀲𑁂𑀳𑀺, 𑀫𑀸 𑀏𑀯𑀁 𑀧𑀸𑀭𑀼𑀧𑀸𑀳𑀺, 𑀫𑀸 𑀢𑀺𑀮𑀓𑀫𑁆𑀫𑀧𑀡𑁆𑀡𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀳𑀻’’𑀢𑀺 𑀬𑀣𑀸𑀲𑀼𑀔𑀁 𑀪𑀺𑀓𑁆𑀔𑀼𑀦𑀺𑀁 𑀑𑀯𑀤𑀺𑀢𑀼𑀁 𑀅𑀦𑀼𑀲𑀸𑀲𑀺𑀢𑀼𑀁 𑀯𑀝𑁆𑀝𑀢𑀺.

𑀲𑀫𑀕𑁆𑀕𑀫𑁆𑀳𑀬𑁆𑀬𑀸𑀢𑀺 𑀪𑀡𑀦𑁆𑀢𑀦𑁆𑀢𑀺 ‘‘𑀲𑀫𑀕𑁆𑀕𑀸 𑀅𑀫𑁆𑀳 𑀅𑀬𑁆𑀬’’ 𑀇𑀢𑀺 𑀪𑀡𑀦𑁆𑀢𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁. 𑀅𑀜𑁆𑀜𑀁 𑀥𑀫𑁆𑀫𑀁 𑀪𑀡𑀢𑀻𑀢𑀺 𑀅𑀜𑁆𑀜𑀁 𑀲𑀼𑀢𑁆𑀢𑀦𑁆𑀢𑀁 𑀯𑀸 𑀅𑀪𑀺𑀥𑀫𑁆𑀫𑀁 𑀯𑀸. 𑀲𑀫𑀕𑁆𑀕𑀫𑁆𑀳𑀬𑁆𑀬𑀸𑀢𑀺 𑀯𑀘𑀦𑁂𑀦 𑀳𑀺 𑀑𑀯𑀸𑀤𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀢𑀲𑁆𑀫𑀸 𑀞𑀧𑁂𑀢𑁆𑀯𑀸 𑀑𑀯𑀸𑀤𑀁 𑀅𑀜𑁆𑀜𑀁 𑀥𑀫𑁆𑀫𑀁 𑀪𑀡𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀑𑀯𑀸𑀤𑀁 𑀅𑀦𑀺𑀬𑁆𑀬𑀸𑀤𑁂𑀢𑁆𑀯𑀸𑀢𑀺 𑀏𑀲𑁄 𑀪𑀕𑀺𑀦𑀺𑀬𑁄 𑀑𑀯𑀸𑀤𑁄𑀢𑀺 𑀅𑀯𑀢𑁆𑀯𑀸.

𑁧𑁫𑁦. 𑀅𑀥𑀫𑁆𑀫𑀓𑀫𑁆𑀫𑁂𑀢𑀺𑀆𑀤𑀻𑀲𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀓𑀫𑁆𑀫𑀁 𑀓𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀅𑀥𑀫𑁆𑀫𑀓𑀫𑁆𑀫𑁂 𑀤𑁆𑀯𑀺𑀦𑁆𑀦𑀁 𑀦𑀯𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞𑀸𑀭𑀲 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀥𑀫𑁆𑀫𑀓𑀫𑁆𑀫𑁂 𑀤𑀼𑀢𑀺𑀬𑀲𑁆𑀲 𑀦𑀯𑀓𑀲𑁆𑀲 𑀅𑀯𑀲𑀸𑀦𑀧𑀤𑁂 𑀅𑀦𑀸𑀧𑀢𑁆𑀢𑀺, 𑀲𑁂𑀲𑁂𑀲𑀼 𑀲𑀢𑁆𑀢𑀭𑀲 𑀤𑀼𑀓𑁆𑀓𑀝𑀸𑀦𑀺.

𑁧𑁫𑁨. 𑀉𑀤𑁆𑀤𑁂𑀲𑀁 𑀤𑁂𑀦𑁆𑀢𑁄𑀢𑀺 𑀅𑀝𑁆𑀞𑀦𑁆𑀦𑀁 𑀕𑀭𑀼𑀥𑀫𑁆𑀫𑀸𑀦𑀁 𑀧𑀸𑀴𑀺𑀁 𑀉𑀤𑁆𑀤𑀺𑀲𑀦𑁆𑀢𑁄. 𑀧𑀭𑀺𑀧𑀼𑀘𑁆𑀙𑀁 𑀤𑁂𑀦𑁆𑀢𑁄𑀢𑀺 𑀢𑀲𑁆𑀲𑀸𑀬𑁂𑀯 𑀧𑀕𑀼𑀡𑀸𑀬 𑀕𑀭𑀼𑀥𑀫𑁆𑀫𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀁 𑀓𑀣𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀑𑀲𑀸𑀭𑁂𑀳𑀺 𑀅𑀬𑁆𑀬𑀸𑀢𑀺 𑀯𑀼𑀘𑁆𑀘𑀫𑀸𑀦𑁄 𑀑𑀲𑀸𑀭𑁂𑀢𑀻𑀢𑀺 𑀏𑀯𑀁 𑀯𑀼𑀘𑁆𑀘𑀫𑀸𑀦𑁄 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑀸𑀴𑀺𑀁 𑀑𑀲𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀉𑀤𑁆𑀤𑁂𑀲𑀁 𑀤𑁂𑀦𑁆𑀢𑁄, 𑀧𑀭𑀺𑀧𑀼𑀘𑁆𑀙𑀁 𑀤𑁂𑀦𑁆𑀢𑁄, 𑀬𑁄 𑀘 𑀑𑀲𑀸𑀭𑁂𑀳𑀻𑀢𑀺 𑀯𑀼𑀘𑁆𑀘𑀫𑀸𑀦𑁄 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀪𑀡𑀢𑀺, 𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑁂𑀦 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑀁 𑀥𑀫𑁆𑀫𑀁 𑀪𑀡𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑁂𑀦 𑀅𑀦𑀸𑀧𑀢𑁆𑀢𑀺. 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀓𑀣𑁂𑀢𑀻𑀢𑀺 𑀪𑀺𑀓𑁆𑀔𑀼𑀦𑀻 𑀕𑀭𑀼𑀥𑀫𑁆𑀫𑀦𑀺𑀲𑁆𑀲𑀺𑀢𑀁 𑀯𑀸 𑀔𑀦𑁆𑀥𑀸𑀤𑀺𑀦𑀺𑀲𑁆𑀲𑀺𑀢𑀁 𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀢𑀁 𑀬𑁄 𑀪𑀺𑀓𑁆𑀔𑀼 𑀓𑀣𑁂𑀢𑀺, 𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀪𑀡𑀦𑁆𑀢𑀦𑁆𑀢𑀺 𑀘𑀢𑀼𑀧𑀭𑀺𑀲𑀢𑀺𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀼𑀡𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀪𑀺𑀓𑁆𑀔𑀼𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀺𑀬𑀸𑀢𑀺 𑀏𑀢𑀸𑀲𑀁 𑀤𑁂𑀲𑁂𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀁 𑁋 𑀯𑀸𑀘𑀢𑁄 𑀘 𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁 𑀢𑀺𑀯𑁂𑀤𑀦𑀦𑁆𑀢𑀺.

𑀑𑀯𑀸𑀤𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀁.

𑁨. 𑀅𑀢𑁆𑀣𑀗𑁆𑀕𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁫𑁩. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀧𑀭𑀺𑀬𑀸𑀬𑁂𑀦𑀸𑀢𑀺 𑀯𑀸𑀭𑁂𑀦, 𑀧𑀝𑀺𑀧𑀸𑀝𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀥𑀺𑀘𑁂𑀢𑀲𑁄𑀢𑀺 𑀅𑀥𑀺𑀘𑀺𑀢𑁆𑀢𑀯𑀢𑁄, 𑀲𑀩𑁆𑀩𑀘𑀺𑀢𑁆𑀢𑀸𑀦𑀁 𑀅𑀥𑀺𑀓𑁂𑀦 𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀚𑁆𑀚𑀢𑁄𑀢𑀺 𑀦𑀧𑁆𑀧𑀫𑀚𑁆𑀚𑀢𑁄, 𑀅𑀧𑁆𑀧𑀫𑀸𑀤𑁂𑀦 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀦𑀺𑀦𑁄𑀢𑀺 ‘‘𑀬𑁄 𑀫𑀼𑀦𑀸𑀢𑀺 𑀉𑀪𑁄 𑀮𑁄𑀓𑁂, 𑀫𑀼𑀦𑀺 𑀢𑁂𑀦 𑀧𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁨𑁬𑁯) 𑀏𑀯𑀁 𑀉𑀪𑀬𑀮𑁄𑀓𑀫𑀼𑀦𑀦𑁂𑀦 𑀯𑀸, 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀸 𑀔𑀻𑀡𑀸𑀲𑀯𑁄 𑀫𑀼𑀦𑀺 𑀦𑀸𑀫 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀫𑀼𑀦𑀺𑀦𑁄. 𑀫𑁄𑀦𑀧𑀣𑁂𑀲𑀼 𑀲𑀺𑀓𑁆𑀔𑀢𑁄𑀢𑀺 𑀅𑀭𑀳𑀢𑁆𑀢𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀫𑁄𑀦𑀲𑁆𑀲 𑀧𑀣𑁂𑀲𑀼 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀢𑀻𑀲𑀼 𑀯𑀸 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀢𑁄. 𑀇𑀤𑀜𑁆𑀘 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀏𑀯𑀁 𑀧𑀼𑀩𑁆𑀩𑀪𑀸𑀕𑁂 𑀲𑀺𑀓𑁆𑀔𑀢𑁄 𑀇𑀫𑀸𑀬 𑀲𑀺𑀓𑁆𑀔𑀸𑀬 𑀫𑀼𑀦𑀺𑀪𑀸𑀯𑀁 𑀧𑀢𑁆𑀢𑀲𑁆𑀲 𑀫𑀼𑀦𑀺𑀦𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁄𑀓𑀸 𑀦 𑀪𑀯𑀦𑁆𑀢𑀺 𑀢𑀸𑀤𑀺𑀦𑁄𑀢𑀺 𑀢𑀸𑀤𑀺𑀲𑀲𑁆𑀲 𑀔𑀻𑀡𑀸𑀲𑀯𑀫𑀼𑀦𑀺𑀦𑁄 𑀅𑀩𑁆𑀪𑀦𑁆𑀢𑀭𑁂 𑀇𑀝𑁆𑀞𑀯𑀺𑀬𑁄𑀕𑀸𑀤𑀺𑀯𑀢𑁆𑀣𑀼𑀓𑀸 𑀲𑁄𑀓𑀸 𑀦 𑀲𑀦𑁆𑀢𑀺. 𑀅𑀣 𑀯𑀸 𑀢𑀸𑀤𑀺𑀦𑁄𑀢𑀺 𑀢𑀸𑀤𑀺𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀫𑀼𑀦𑀺𑀦𑁄 𑀲𑁄𑀓𑀸 𑀦 𑀪𑀯𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀉𑀧𑀲𑀦𑁆𑀢𑀲𑁆𑀲𑀸𑀢𑀺 𑀭𑀸𑀕𑀸𑀤𑀻𑀦𑀁 𑀉𑀧𑀲𑀫𑁂𑀦 𑀉𑀧𑀲𑀦𑁆𑀢𑀲𑁆𑀲. 𑀲𑀤𑀸 𑀲𑀢𑀻𑀫𑀢𑁄𑀢𑀺 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑁆𑀢𑀸 𑀦𑀺𑀘𑁆𑀘𑀓𑀸𑀮𑀁 𑀲𑀢𑀺𑀬𑀸 𑀅𑀯𑀺𑀭𑀳𑀺𑀢𑀲𑁆𑀲. 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂𑀢𑀺 𑀅𑀦𑁆𑀢𑀮𑀺𑀓𑁆𑀔𑀲𑀗𑁆𑀔𑀸𑀢𑁂 𑀆𑀓𑀸𑀲𑁂, 𑀦 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑁂, 𑀦 𑀧𑀦 𑀭𑀽𑀧𑀧𑀭𑀺𑀘𑁆𑀙𑁂𑀤𑁂. 𑀘𑀗𑁆𑀓𑀫𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀻𑀢𑀺 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀇𑀫𑀸 𑀪𑀺𑀓𑁆𑀔𑀼𑀦𑀺𑀬𑁄 𑀫𑀁 ‘𑀏𑀢𑁆𑀢𑀓𑀫𑁂𑀯 𑀅𑀬𑀁 𑀚𑀸𑀦𑀸𑀢𑀻’𑀢𑀺 𑀅𑀯𑀫𑀜𑁆𑀜𑀦𑁆𑀢𑀺, 𑀳𑀦𑁆𑀤 𑀤𑀸𑀦𑀺 𑀏𑀢𑀸𑀲𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀫𑀻’’𑀢𑀺 𑀥𑀫𑁆𑀫𑀩𑀳𑀼𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀏𑀯𑀭𑀽𑀧𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀺 𑁋 ‘‘𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀘𑀗𑁆𑀓𑀫𑀢𑀺𑀧𑀺…𑀧𑁂… 𑀅𑀦𑁆𑀢𑀭𑀥𑀸𑀬𑀢𑀺𑀧𑀻’’𑀢𑀺. 𑀢𑀢𑁆𑀣 𑀅𑀦𑁆𑀢𑀭𑀥𑀸𑀬𑀢𑀺𑀧𑀻𑀢𑀺 𑀅𑀦𑁆𑀢𑀭𑀥𑀸𑀬𑀢𑀺𑀧𑀺 𑀅𑀤𑀲𑁆𑀲𑀦𑀫𑁆𑀧𑀺 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀢𑀜𑁆𑀘𑁂𑀯 𑀉𑀤𑀸𑀦𑀁 𑀪𑀡𑀢𑀺 𑀅𑀜𑁆𑀜𑀜𑁆𑀘 𑀩𑀳𑀼𑀁 𑀩𑀼𑀤𑁆𑀥𑀯𑀘𑀦𑀦𑁆𑀢𑀺 𑀣𑁂𑀭𑁄 𑀓𑀺𑀭 𑀅𑀢𑁆𑀢𑀦𑁄 𑀪𑀸𑀢𑀼𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑁋

‘‘𑀧𑀤𑀼𑀫𑀁 𑀬𑀣𑀸 𑀓𑁄𑀓𑀦𑀼𑀤𑀁 𑀲𑀼𑀕𑀦𑁆𑀥𑀁,

𑀧𑀸𑀢𑁄 𑀲𑀺𑀬𑀸 𑀨𑀼𑀮𑁆𑀮𑀫𑀯𑀻𑀢𑀕𑀦𑁆𑀥𑀁;

𑀅𑀗𑁆𑀕𑀻𑀭𑀲𑀁 𑀧𑀲𑁆𑀲 𑀯𑀺𑀭𑁄𑀘𑀫𑀸𑀦𑀁,

𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂’’𑀢𑀺. (𑀲𑀁. 𑀦𑀺. 𑁧.𑁧𑁨𑁩);

𑀇𑀫𑀁 𑀕𑀸𑀣𑀁 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀲𑀚𑁆𑀛𑀸𑀬𑀺. 𑀦 𑀘 𑀧𑀕𑀼𑀡𑀁 𑀓𑀢𑁆𑀢𑀼𑀫𑀲𑀓𑁆𑀔𑀺. 𑀢𑀢𑁄 𑀦𑀁 𑀣𑁂𑀭𑁄 ‘‘𑀅𑀪𑀩𑁆𑀩𑁄 𑀢𑁆𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂’’𑀢𑀺 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀺, 𑀲𑁄 𑀭𑁄𑀤𑀫𑀸𑀦𑁄 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀝𑁆𑀞𑀸𑀲𑀺. 𑀅𑀣 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀯𑀺𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀘𑀽𑀴𑀧𑀦𑁆𑀣𑀓, 𑀓𑀲𑁆𑀫𑀸 𑀭𑁄𑀤𑀲𑀻’’𑀢𑀺 𑀆𑀳. 𑀲𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣𑀲𑁆𑀲 𑀪𑀕𑀯𑀸 𑀲𑀼𑀤𑁆𑀥𑀁 𑀧𑀺𑀮𑁄𑀢𑀺𑀓𑀔𑀡𑁆𑀟𑀁 𑀤𑀢𑁆𑀯𑀸 ‘‘𑀇𑀤𑀁 ‘𑀭𑀚𑁄𑀳𑀭𑀡𑀁 𑀭𑀚𑁄𑀳𑀭𑀡’𑀦𑁆𑀢𑀺 𑀧𑀭𑀺𑀫𑀚𑁆𑀚𑀸𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀏𑀓𑀫𑀦𑁆𑀢𑀁 𑀧𑀭𑀺𑀫𑀚𑁆𑀚𑀺, 𑀧𑀭𑀺𑀫𑀚𑁆𑀚𑀺𑀢𑀝𑁆𑀞𑀸𑀦𑀁 𑀓𑀸𑀴𑀓𑀫𑀳𑁄𑀲𑀺. 𑀲𑁄 ‘‘𑀏𑀯𑀁 𑀧𑀭𑀺𑀲𑀼𑀤𑁆𑀥𑀫𑁆𑀧𑀺 𑀦𑀸𑀫 𑀯𑀢𑁆𑀣𑀁 𑀇𑀫𑀁 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀓𑀸𑀴𑀓𑀁 𑀚𑀸𑀢’’𑀦𑁆𑀢𑀺 𑀲𑀁𑀯𑁂𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺. 𑀅𑀣𑀲𑁆𑀲 𑀪𑀕𑀯𑀸 𑀆𑀭𑀤𑁆𑀥𑀯𑀻𑀭𑀺𑀬𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀥𑀺𑀘𑁂𑀢𑀲𑁄’’𑀢𑀺 𑀇𑀫𑀁 𑀑𑀪𑀸𑀲𑀕𑀸𑀣𑀁 𑀅𑀪𑀸𑀲𑀺. 𑀣𑁂𑀭𑁄 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀲𑁆𑀫𑀸 𑀣𑁂𑀭𑁄 𑀧𑀓𑀢𑀺𑀬𑀸𑀯 𑀇𑀫𑀁 𑀕𑀸𑀣𑀁 𑀫𑀫𑀸𑀬𑀢𑀺, 𑀲𑁄 𑀢𑀁 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀫𑀫𑀸𑀬𑀦𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀢𑀁𑀬𑁂𑀯 𑀪𑀡𑀢𑀺. 𑀅𑀜𑁆𑀜𑀜𑁆𑀘 𑀅𑀦𑁆𑀢𑀭𑀦𑁆𑀢𑀭𑀸 𑀆𑀳𑀭𑀺𑀢𑁆𑀯𑀸 𑀩𑀳𑀼𑀁 𑀩𑀼𑀤𑁆𑀥𑀯𑀘𑀦𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀜𑁆𑀘𑁂𑀯 𑀉𑀤𑀸𑀦𑀁 𑀪𑀡𑀢𑀺, 𑀅𑀜𑁆𑀜𑀜𑁆𑀘 𑀩𑀳𑀼𑀁 𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺.

𑁧𑁫𑁬. 𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸𑀬𑀸𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸𑀬, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀦 𑀉𑀧𑀲𑀫𑁆𑀧𑀦𑁆𑀦𑀁 𑀑𑀯𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀇𑀤𑀫𑁆𑀧𑀺 𑀘 𑀧𑀤𑀲𑁄𑀥𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑁂𑀯.

𑀅𑀢𑁆𑀣𑀗𑁆𑀕𑀢𑀲𑀺𑀓𑁆𑀔𑀸𑀧𑀤𑀁 𑀤𑀼𑀢𑀺𑀬𑀁.

𑁩. 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁬𑁨. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀑𑀯𑀤𑀢𑀺 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺𑀆𑀤𑀻𑀲𑀼 𑀅𑀝𑁆𑀞𑀳𑀺 𑀕𑀭𑀼𑀥𑀫𑁆𑀫𑁂𑀳𑀺 𑀑𑀯𑀤𑀦𑁆𑀢𑀲𑁆𑀲𑁂𑀯 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀜𑁆𑀜𑁂𑀦 𑀥𑀫𑁆𑀫𑁂𑀦 𑀤𑀼𑀓𑁆𑀓𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬𑀸𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸𑀬, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀑𑀯𑀤𑀢𑁄 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀇𑀢𑁄 𑀧𑀭𑀫𑁆𑀧𑀺 𑀬𑀢𑁆𑀣 𑀬𑀢𑁆𑀣 ‘‘𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸’’𑀢𑀺 𑀯𑀼𑀘𑁆𑀘𑀢𑀺, 𑀲𑀩𑁆𑀩𑀢𑁆𑀣 𑀅𑀬𑀫𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀢𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀺𑀓𑁆𑀔𑀸𑀧𑀤𑀁 𑀢𑀢𑀺𑀬𑀁.

𑀇𑀤𑀁 𑀧𑀦𑁂𑀢𑁆𑀣 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁 𑀧𑀓𑀺𑀡𑁆𑀡𑀓𑀁 𑁋 𑀅𑀲𑀫𑁆𑀫𑀢𑁄 𑀘𑁂 𑀪𑀺𑀓𑁆𑀔𑀼 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀝𑁆𑀞𑀳𑀺 𑀕𑀭𑀼𑀥𑀫𑁆𑀫𑁂𑀳𑀺 𑀑𑀯𑀤𑀢𑀺, 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀅𑀜𑁆𑀜𑁂𑀦 𑀥𑀫𑁆𑀫𑁂𑀦 𑀑𑀯𑀤𑀢𑁄 𑀤𑁆𑀯𑁂 𑀤𑀼𑀓𑁆𑀓𑀝𑀸𑀦𑀺, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀓𑀣𑀁? 𑀅𑀲𑀫𑁆𑀫𑀢𑀫𑀽𑀮𑀓𑀁 𑀤𑀼𑀓𑁆𑀓𑀝𑀁, 𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑁂𑀦 𑀥𑀫𑁆𑀫𑁂𑀦 𑀑𑀯𑀤𑀦𑀫𑀽𑀮𑀓𑀁 𑀤𑀼𑀓𑁆𑀓𑀝𑀁, 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀑𑀯𑀤𑀦𑀫𑀽𑀮𑀓𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺. 𑀲𑀫𑁆𑀫𑀢𑀲𑁆𑀲 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀝𑁆𑀞𑀳𑀺 𑀕𑀭𑀼𑀥𑀫𑁆𑀫𑁂𑀳𑀺 𑀑𑀯𑀤𑀦𑁆𑀢𑀲𑁆𑀲 𑀏𑀓𑀸 𑀅𑀦𑀸𑀧𑀢𑁆𑀢𑀺, 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀓𑀣𑀁? 𑀲𑀫𑁆𑀫𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺, 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀑𑀯𑀤𑀦𑀫𑀽𑀮𑀓𑀁 𑀏𑀓𑀁, 𑀕𑀦𑁆𑀢𑁆𑀯𑀸 𑀕𑀭𑀼𑀥𑀫𑁆𑀫𑁂𑀳𑀺 𑀑𑀯𑀤𑀦𑀫𑀽𑀮𑀓𑀁 𑀏𑀓𑀦𑁆𑀢𑀺 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀢𑀲𑁆𑀲𑁂𑀯 𑀅𑀜𑁆𑀜𑁂𑀦 𑀥𑀫𑁆𑀫𑁂𑀦 𑀑𑀯𑀤𑀢𑁄 𑀏𑀓𑀸 𑀅𑀦𑀸𑀧𑀢𑁆𑀢𑀺, 𑀏𑀓𑀁 𑀤𑀼𑀓𑁆𑀓𑀝𑀁, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀓𑀣𑀁? 𑀲𑀫𑁆𑀫𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺, 𑀕𑀦𑁆𑀢𑁆𑀯𑀸 𑀅𑀜𑁆𑀜𑁂𑀦 𑀥𑀫𑁆𑀫𑁂𑀦 𑀑𑀯𑀤𑀦𑀫𑀽𑀮𑀓𑀁 𑀤𑀼𑀓𑁆𑀓𑀝𑀁, 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀑𑀯𑀤𑀦𑀫𑀽𑀮𑀓𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺. 𑀤𑀺𑀯𑀸 𑀧𑀦 𑀕𑀦𑁆𑀢𑁆𑀯𑀸 𑀑𑀯𑀤𑀢𑁄 𑀲𑀫𑁆𑀫𑀢𑀲𑁆𑀲 𑀘 𑀅𑀲𑀫𑁆𑀫𑀢𑀲𑁆𑀲 𑀘 𑀭𑀢𑁆𑀢𑀺𑀁 𑀑𑀯𑀤𑀦𑀫𑀽𑀮𑀓𑀁 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑀅𑀧𑀦𑁂𑀢𑁆𑀯𑀸 𑀅𑀯𑀲𑁂𑀲𑀸 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀧𑀓𑀺𑀡𑁆𑀡𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁪. 𑀆𑀫𑀺𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁬𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂 𑁋 𑀦 𑀩𑀳𑀼𑀓𑀢𑀸𑀢𑀺 𑀦 𑀓𑀢𑀩𑀳𑀼𑀫𑀸𑀦𑀸, 𑀦 𑀥𑀫𑁆𑀫𑁂 𑀩𑀳𑀼𑀫𑀸𑀦𑀁 𑀓𑀢𑁆𑀯𑀸 𑀑𑀯𑀤𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀁 𑀅𑀯𑀡𑁆𑀡𑀁 𑀓𑀢𑁆𑀢𑀼𑀓𑀸𑀫𑁄’’𑀢𑀺𑀆𑀤𑀻𑀦𑀁 𑀉𑀚𑁆𑀛𑀸𑀧𑀦𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀦𑁆𑀢𑀺 𑀏𑀢𑁆𑀣 𑀅𑀲𑀫𑁆𑀫𑀢𑁄 𑀦𑀸𑀫 𑀲𑀫𑁆𑀫𑀢𑁂𑀦 𑀯𑀸 𑀲𑀗𑁆𑀖𑁂𑀦 𑀯𑀸 𑀪𑀸𑀭𑀁 𑀓𑀢𑁆𑀯𑀸 𑀞𑀧𑀺𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀲𑀫𑁆𑀫𑀢𑀁 𑀯𑀸 𑀅𑀲𑀫𑁆𑀫𑀢𑀁 𑀯𑀸𑀢𑀺 𑀏𑀢𑁆𑀣 𑀧𑀦 𑀪𑀺𑀓𑁆𑀔𑀼𑀓𑀸𑀮𑁂 𑀲𑀫𑁆𑀫𑀼𑀢𑀺𑀁 𑀮𑀪𑀺𑀢𑁆𑀯𑀸 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁄 𑀲𑀫𑁆𑀫𑀢𑁄, 𑀲𑀫𑁆𑀫𑀢𑁂𑀦 𑀯𑀸 𑀲𑀗𑁆𑀖𑁂𑀦 𑀯𑀸 𑀞𑀧𑀺𑀢𑁄 𑀩𑀳𑀼𑀲𑁆𑀲𑀼𑀢𑁄 𑀲𑀸𑀫𑀡𑁂𑀭𑁄 𑀅𑀲𑀫𑁆𑀫𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀆𑀫𑀺𑀲𑀲𑀺𑀓𑁆𑀔𑀸𑀧𑀤𑀁 𑀘𑀢𑀼𑀢𑁆𑀣𑀁.

𑁫. 𑀘𑀻𑀯𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁬𑁯. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑁂 𑁋 𑀯𑀺𑀲𑀺𑀔𑀸𑀬𑀸𑀢𑀺 𑀭𑀣𑀺𑀓𑀸𑀬. 𑀧𑀺𑀡𑁆𑀟𑀸𑀬 𑀘𑀭𑀢𑀻𑀢𑀺 𑀦𑀺𑀩𑀤𑁆𑀥𑀘𑀸𑀭𑀯𑀲𑁂𑀦 𑀅𑀪𑀺𑀡𑁆𑀳𑀁 𑀘𑀭𑀢𑀺. 𑀲𑀦𑁆𑀤𑀺𑀝𑁆𑀞𑀸𑀢𑀺 𑀲𑀦𑁆𑀤𑀺𑀝𑁆𑀞𑀫𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀲𑁂𑀲𑀫𑁂𑀢𑁆𑀣 𑀧𑀤𑀢𑁄 𑀉𑀢𑁆𑀢𑀸𑀦𑀢𑁆𑀣𑀁, 𑀯𑀺𑀦𑀺𑀘𑁆𑀙𑀬𑀢𑁄 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀺. 𑀢𑀢𑁆𑀭 𑀳𑀺 𑀪𑀺𑀓𑁆𑀔𑀼 𑀧𑀝𑀺𑀕𑁆𑀕𑀸𑀳𑀓𑁄, 𑀇𑀥 𑀪𑀺𑀓𑁆𑀔𑀼𑀦𑀻, 𑀅𑀬𑀁 𑀯𑀺𑀲𑁂𑀲𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀘𑀻𑀯𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀘𑀫𑀁.

𑁬. 𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁭𑁫. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑁂 𑁋 𑀉𑀤𑀸𑀬𑀻𑀢𑀺 𑀮𑀸𑀴𑀼𑀤𑀸𑀬𑀻. 𑀧𑀝𑁆𑀞𑁄𑀢𑀺 𑀧𑀝𑀺𑀩𑀮𑁄, 𑀦𑀺𑀧𑀼𑀡𑁄 𑀘𑁂𑀯 𑀲𑀫𑀢𑁆𑀣𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀢𑀭𑀸 𑀪𑀺𑀓𑁆𑀔𑀼𑀦𑀻𑀢𑀺 𑀢𑀲𑁆𑀲𑁂𑀯 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸. 𑀧𑀝𑀺𑀪𑀸𑀦𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑁂𑀦 𑀓𑀢𑀘𑀺𑀢𑁆𑀢𑀁, 𑀲𑁄 𑀓𑀺𑀭 𑀘𑀻𑀯𑀭𑀁 𑀭𑀚𑀺𑀢𑁆𑀯𑀸 𑀢𑀲𑁆𑀲 𑀫𑀚𑁆𑀛𑁂 𑀦𑀸𑀦𑀸𑀯𑀡𑁆𑀡𑁂𑀳𑀺 𑀯𑀺𑀧𑁆𑀧𑀓𑀢𑀫𑁂𑀣𑀼𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀫𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀫𑀚𑁆𑀛𑁂 𑀧𑀝𑀺𑀪𑀸𑀦𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺. 𑀬𑀣𑀸𑀲𑀁𑀳𑀝𑀦𑁆𑀢𑀺 𑀬𑀣𑀸𑀲𑀁𑀳𑀭𑀺𑀢𑀫𑁂𑀯.

𑁧𑁭𑁬. 𑀘𑀻𑀯𑀭𑀦𑁆𑀢𑀺 𑀬𑀁 𑀦𑀺𑀯𑀸𑀲𑀺𑀢𑀼𑀁 𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀸 𑀲𑀓𑁆𑀓𑀸 𑀳𑁄𑀢𑀺, 𑀏𑀯𑀜𑁆𑀳𑀺 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀯𑀼𑀢𑁆𑀢𑀁. 𑀲𑀬𑀁 𑀲𑀺𑀩𑁆𑀩𑀢𑀻𑀢𑀺 𑀏𑀢𑁆𑀣 𑀲𑀺𑀩𑁆𑀩𑀺𑀲𑁆𑀲𑀸𑀫𑀻𑀢𑀺 𑀯𑀺𑀘𑀸𑀭𑁂𑀦𑁆𑀢𑀲𑁆𑀲𑀸𑀧𑀺 𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀁, 𑀲𑀺𑀩𑁆𑀩𑀦𑁆𑀢𑀲𑁆𑀲 𑀧𑀦 𑀧𑀸𑀘𑀺𑀢𑁆𑀢𑀺𑀬𑀁. 𑀆𑀭𑀸𑀧𑀣𑁂 𑀆𑀭𑀸𑀧𑀣𑁂𑀢𑀺 𑀲𑀽𑀘𑀺𑀁 𑀧𑀯𑁂𑀲𑁂𑀢𑁆𑀯𑀸 𑀧𑀯𑁂𑀲𑁂𑀢𑁆𑀯𑀸 𑀦𑀻𑀳𑀭𑀡𑁂. 𑀲𑀘𑁂 𑀧𑀦 𑀲𑀓𑀮𑀲𑀽𑀘𑀺𑀁 𑀅𑀦𑀻𑀳𑀭𑀦𑁆𑀢𑁄 𑀤𑀻𑀖𑀲𑀼𑀢𑁆𑀢𑀧𑁆𑀧𑀯𑁂𑀲𑀦𑀢𑁆𑀣𑀁 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀯𑀺𑀚𑁆𑀛𑀺𑀢𑁆𑀯𑀸 𑀦𑀻𑀳𑀭𑀢𑀺, 𑀏𑀓𑀫𑁂𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀓𑀺𑀁 𑀆𑀡𑀢𑁆𑀢𑁄𑀢𑀺 𑀲𑀓𑀺𑀁 ‘‘𑀘𑀻𑀯𑀭𑀁 𑀲𑀺𑀩𑁆𑀩𑀸’’𑀢𑀺 𑀯𑀼𑀢𑁆𑀢𑁄. 𑀩𑀳𑀼𑀓𑀫𑁆𑀧𑀺 𑀲𑀺𑀩𑁆𑀩𑀢𑀻𑀢𑀺 𑀲𑀘𑁂𑀧𑀺 𑀲𑀩𑁆𑀩𑀁 𑀲𑀽𑀘𑀺𑀓𑀫𑁆𑀫𑀁 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸 𑀘𑀻𑀯𑀭𑀁 𑀦𑀺𑀝𑁆𑀞𑀸𑀧𑁂𑀢𑀺, 𑀏𑀓𑀫𑁂𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀣 𑀧𑀦 ‘‘𑀇𑀫𑀲𑁆𑀫𑀺𑀁 𑀘𑀻𑀯𑀭𑁂 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀢𑀯 𑀪𑀸𑀭𑁄’’𑀢𑀺 𑀯𑀼𑀢𑁆𑀢𑁄 𑀓𑀭𑁄𑀢𑀺, 𑀆𑀡𑀢𑁆𑀢𑀲𑁆𑀲 𑀆𑀭𑀸𑀧𑀣𑁂 𑀆𑀭𑀸𑀧𑀣𑁂 𑀏𑀓𑀫𑁂𑀓𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀆𑀡𑀸𑀧𑀓𑀲𑁆𑀲 𑀏𑀓𑀯𑀸𑀘𑀸𑀬 𑀲𑀫𑁆𑀩𑀳𑀼𑀮𑀸𑀦𑀺𑀧𑀺. 𑀧𑀼𑀦𑀧𑁆𑀧𑀼𑀦𑀁 𑀆𑀡𑀢𑁆𑀢𑀺𑀬𑀁 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀬𑁂𑀧𑀺 𑀲𑀘𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀅𑀢𑁆𑀢𑀦𑁄 𑀜𑀸𑀢𑀺𑀓𑀸𑀦𑀁 𑀘𑀻𑀯𑀭𑀁 𑀲𑀺𑀩𑁆𑀩𑀦𑁆𑀢𑁂𑀲𑀼 𑀢𑁂𑀲𑀁 𑀦𑀺𑀲𑁆𑀲𑀺𑀢𑀓𑀸 ‘‘𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀁 𑀯𑀸 𑀓𑀣𑀺𑀦𑀯𑀢𑁆𑀢𑀁 𑀯𑀸 𑀓𑀭𑁄𑀫𑀸’’𑀢𑀺 𑀲𑀺𑀩𑁆𑀩𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀆𑀭𑀸𑀧𑀣𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀅𑀢𑁆𑀢𑀦𑁄 𑀜𑀸𑀢𑀺𑀓𑀸𑀦𑀁 𑀘𑀻𑀯𑀭𑀁 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀲𑀺𑀩𑁆𑀩𑀸𑀧𑁂𑀦𑁆𑀢𑀺, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀤𑀼𑀓𑁆𑀓𑀝𑀁, 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀦𑁆𑀢𑁂𑀯𑀸𑀲𑀺𑀓𑀸 𑀅𑀢𑁆𑀢𑀦𑁄 𑀜𑀸𑀢𑀺𑀓𑀸𑀦𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀲𑀺𑀩𑁆𑀩𑀸𑀧𑁂𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀫𑁆𑀧𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀫𑁆𑀧𑀺 𑀜𑀸𑀢𑀺𑀓𑀸𑀬 𑀘𑀻𑀯𑀭𑀁 𑀳𑁄𑀢𑀺, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀧𑀦 𑀅𑀦𑁆𑀢𑁂𑀯𑀸𑀲𑀺𑀓𑁂 𑀯𑀜𑁆𑀘𑁂𑀢𑁆𑀯𑀸 𑀲𑀺𑀩𑁆𑀩𑀸𑀧𑁂𑀦𑁆𑀢𑀺, 𑀉𑀪𑀺𑀦𑁆𑀦𑀫𑁆𑀧𑀺 𑀤𑀼𑀓𑁆𑀓𑀝𑀁. 𑀓𑀲𑁆𑀫𑀸? 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀸𑀬 𑀲𑀺𑀩𑁆𑀩𑀺𑀢𑀢𑁆𑀢𑀸, 𑀇𑀢𑀭𑁂𑀲𑀁 𑀅𑀓𑀧𑁆𑀧𑀺𑀬𑁂 𑀦𑀺𑀬𑁄𑀚𑀺𑀢𑀢𑁆𑀢𑀸. 𑀢𑀲𑁆𑀫𑀸 ‘‘𑀇𑀤𑀁 𑀢𑁂 𑀫𑀸𑀢𑀼 𑀘𑀻𑀯𑀭𑀁, 𑀇𑀤𑀁 𑀪𑀕𑀺𑀦𑀺𑀬𑀸’’𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀲𑀺𑀩𑁆𑀩𑀸𑀧𑁂𑀢𑀩𑁆𑀩𑀁.

𑁧𑁭𑁯. 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀉𑀧𑀸𑀳𑀦𑀢𑁆𑀣𑀯𑀺𑀓𑀸𑀤𑀺𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀁 𑀙𑀝𑁆𑀞𑀁.

𑁭. 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁮𑁧. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑁂 𑁋 𑀧𑀘𑁆𑀙𑀸 𑀕𑀘𑁆𑀙𑀦𑁆𑀢𑀻𑀦𑀁 𑀘𑁄𑀭𑀸 𑀅𑀘𑁆𑀙𑀺𑀦𑁆𑀤𑀺𑀁𑀲𑀽𑀢𑀺 𑀧𑀘𑁆𑀙𑀸 𑀕𑀘𑁆𑀙𑀦𑁆𑀢𑀻𑀦𑀁 𑀧𑀢𑁆𑀢𑀘𑀻𑀯𑀭𑀁 𑀘𑁄𑀭𑀸 𑀳𑀭𑀺𑀁𑀲𑀼. 𑀤𑀽𑀲𑁂𑀲𑀼𑀦𑁆𑀢𑀺 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀘𑁄𑀭𑀸 𑀤𑀽𑀲𑀬𑀺𑀁𑀲𑀼, 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑀬𑀺𑀁𑀲𑀽𑀢𑀺 𑀅𑀢𑁆𑀣𑁄.

𑁧𑁮𑁨-𑁩. 𑀲𑀁𑀯𑀺𑀥𑀸𑀬𑀸𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸, 𑀕𑀫𑀦𑀓𑀸𑀮𑁂 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀤𑁂𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀕𑀸𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀼𑀓𑁆𑀓𑀼𑀝𑁄 𑀧𑀤𑀲𑀸𑀯 𑀅𑀜𑁆𑀜𑀁 𑀕𑀸𑀫𑀁 𑀕𑀘𑁆𑀙𑀢𑀺, 𑀅𑀬𑀁 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀲𑀫𑁆𑀧𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑁆𑀧𑀸𑀤𑁄. 𑀓𑁂 𑀲𑀫𑁆𑀧𑀤𑀦𑁆𑀢𑀺? 𑀓𑀼𑀓𑁆𑀓𑀼𑀝𑀸. 𑀓𑀼𑀓𑁆𑀓𑀼𑀝𑀸𑀦𑀁 𑀲𑀫𑁆𑀧𑀸𑀤𑁄 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀤𑁄. 𑀅𑀣 𑀯𑀸 𑀲𑀫𑁆𑀧𑀸𑀤𑁄𑀢𑀺 𑀕𑀫𑀦𑀁, 𑀓𑀼𑀓𑁆𑀓𑀼𑀝𑀸𑀦𑀁 𑀲𑀫𑁆𑀧𑀸𑀤𑁄 𑀏𑀢𑁆𑀣 𑀅𑀢𑁆𑀣𑀻𑀢𑀺𑀧𑀺 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀤𑁄. 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀢𑁂 𑀇𑀢𑀺𑀧𑀺 𑀧𑀸𑀞𑁄, 𑀢𑀢𑁆𑀣 𑀬𑀲𑁆𑀲 𑀕𑀸𑀫𑀲𑁆𑀲 𑀕𑁂𑀳𑀘𑁆𑀙𑀤𑀦𑀧𑀺𑀝𑁆𑀞𑀺𑀢𑁄 𑀓𑀼𑀓𑁆𑀓𑀼𑀝𑁄 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀕𑁂𑀳𑀘𑁆𑀙𑀤𑀦𑀧𑀺𑀝𑁆𑀞𑀺𑀬𑀁 𑀧𑀢𑀢𑀺, 𑀅𑀬𑀁 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑀺𑀥𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀧𑀺 𑀘𑁂𑀲 𑀕𑀸𑀫𑁄 𑀅𑀘𑁆𑀘𑀸𑀲𑀦𑁆𑀦𑁄 𑀳𑁄𑀢𑀺, 𑀉𑀧𑀘𑀸𑀭𑁄 𑀦 𑀮𑀩𑁆𑀪𑀢𑀺. 𑀬𑀲𑁆𑀫𑀺𑀁 𑀧𑀦 𑀕𑀸𑀫𑁂 𑀧𑀘𑁆𑀘𑀽𑀲𑁂 𑀯𑀲𑁆𑀲𑀦𑁆𑀢𑀲𑁆𑀲 𑀓𑀼𑀓𑁆𑀓𑀼𑀝𑀲𑁆𑀲 𑀲𑀤𑁆𑀤𑁄 𑀅𑀦𑀦𑁆𑀢𑀭𑁂 𑀕𑀸𑀫𑁂 𑀲𑀼𑀬𑁆𑀬𑀢𑀺, 𑀢𑀸𑀤𑀺𑀲𑁂𑀳𑀺 𑀕𑀸𑀫𑁂𑀳𑀺 𑀲𑀫𑁆𑀧𑀼𑀡𑁆𑀡𑀭𑀝𑁆𑀞𑁂 𑀕𑀸𑀫𑀦𑁆𑀢𑀭𑁂 𑀕𑀸𑀫𑀦𑁆𑀢𑀭𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁, ‘‘𑀕𑀸𑀫𑀦𑁆𑀢𑀭𑁂 𑀕𑀸𑀫𑀦𑁆𑀢𑀭𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀧𑀦 𑀲𑀘𑁂𑀧𑀺 𑀭𑀢𑀦𑀫𑀢𑁆𑀢𑀦𑁆𑀢𑀭𑁄 𑀕𑀸𑀫𑁄 𑀳𑁄𑀢𑀺, 𑀬𑁄 𑀢𑀲𑁆𑀲 𑀫𑀦𑀼𑀲𑁆𑀲𑁂𑀳𑀺 𑀞𑀧𑀺𑀢𑀉𑀧𑀘𑀸𑀭𑁄, 𑀢𑀁 𑀑𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯.

𑀢𑀢𑁆𑀭𑀸𑀬𑀁 𑀆𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄 𑁋 𑀲𑀁𑀯𑀺𑀥𑀸𑀦𑀓𑀸𑀮𑁂 𑀳𑀺 𑀲𑀘𑁂 𑀉𑀪𑁄𑀧𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂 𑀯𑀸 𑀅𑀦𑁆𑀢𑀭𑀸𑀭𑀸𑀫𑁂 𑀯𑀸 𑀆𑀲𑀦𑀲𑀸𑀮𑀸𑀬 𑀯𑀸 𑀢𑀺𑀢𑁆𑀣𑀺𑀬𑀲𑁂𑀬𑁆𑀬𑀸𑀬 𑀯𑀸 𑀞𑀢𑁆𑀯𑀸 𑀲𑀁𑀯𑀺𑀤𑀳𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺 𑀓𑀧𑁆𑀧𑀺𑀬𑀪𑀽𑀫𑀺 𑀓𑀺𑀭𑀸𑀬𑀁. 𑀢𑀲𑁆𑀫𑀸 𑀏𑀢𑁆𑀣 𑀲𑀁𑀯𑀺𑀤𑀳𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀦 𑀯𑀤𑀦𑁆𑀢𑀺, 𑀕𑀘𑁆𑀙𑀦𑁆𑀢𑀲𑁆𑀲 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. 𑀲𑀘𑁂 𑀧𑀦 𑀅𑀦𑁆𑀢𑁄𑀕𑀸𑀫𑁂 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀤𑁆𑀯𑀸𑀭𑁂 𑀭𑀣𑀺𑀓𑀸𑀬 𑀅𑀜𑁆𑀜𑁂𑀲𑀼 𑀯𑀸 𑀘𑀢𑀼𑀓𑁆𑀓𑀲𑀺𑀗𑁆𑀖𑀸𑀝𑀓𑀳𑀢𑁆𑀣𑀺𑀲𑀸𑀮𑀸𑀤𑀻𑀲𑀼 𑀲𑀁𑀯𑀺𑀤𑀳𑀦𑁆𑀢𑀺, 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀏𑀯𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑀺, 𑀦𑀺𑀓𑁆𑀔𑀫𑀦𑁂 𑀅𑀦𑀸𑀧𑀢𑁆𑀢𑀺, 𑀅𑀦𑀦𑁆𑀢𑀭𑀕𑀸𑀫𑀲𑁆𑀲 𑀉𑀧𑀘𑀸𑀭𑁄𑀓𑁆𑀓𑀫𑀦𑁂 𑀧𑀦 𑀪𑀺𑀓𑁆𑀔𑀼𑀦𑁄 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁆𑀭𑀸𑀧𑀺 ‘‘𑀧𑀞𑀫𑀧𑀸𑀤𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀧𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀦 𑀬𑀸𑀯 𑀅𑀦𑀦𑁆𑀢𑀭𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀦 𑀑𑀓𑁆𑀓𑀫𑀦𑁆𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀲𑀁𑀯𑀺𑀤𑀳𑀺𑀢𑁂𑀧𑀺 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁, 𑀅𑀦𑀦𑁆𑀢𑀭𑀕𑀸𑀫𑀲𑁆𑀲 𑀉𑀧𑀘𑀸𑀭𑁄𑀓𑁆𑀓𑀫𑀦𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀧𑀢𑁆𑀢𑀺. 𑀲𑀘𑁂 𑀤𑀽𑀭𑀁 𑀕𑀦𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀕𑀸𑀫𑀽𑀧𑀘𑀸𑀭𑀕𑀡𑀦𑀸𑀬 𑀑𑀓𑁆𑀓𑀫𑀦𑁂 𑀑𑀓𑁆𑀓𑀫𑀦𑁂 𑀆𑀧𑀢𑁆𑀢𑀺, 𑀢𑀲𑁆𑀲 𑀢𑀲𑁆𑀲 𑀧𑀦 𑀕𑀸𑀫𑀲𑁆𑀲 𑀅𑀢𑀺𑀓𑁆𑀓𑀫𑀦𑁂 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦 𑀪𑀺𑀓𑁆𑀔𑀼𑀦𑀻 ‘‘𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀲𑁆𑀲𑀬𑀢𑁄 𑀦𑀺𑀓𑁆𑀔𑀫𑀢𑀺, 𑀪𑀺𑀓𑁆𑀔𑀼𑀧𑀺 𑀢𑀫𑁂𑀯 𑀕𑀸𑀫𑀁 𑀲𑀦𑁆𑀥𑀸𑀬 ‘‘𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀢𑀺. 𑀅𑀣 𑀤𑁆𑀯𑁂𑀧𑀺 𑀕𑀸𑀫𑀤𑁆𑀯𑀸𑀭𑁂 𑀲𑀫𑀸𑀕𑀦𑁆𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀓𑀼𑀳𑀺𑀁 𑀕𑀘𑁆𑀙𑀣, 𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀢𑀼𑀫𑁆𑀳𑁂 𑀓𑀼𑀳𑀺𑀦𑁆𑀢𑀺, 𑀫𑀬𑀫𑁆𑀧𑀺 𑀢𑀢𑁆𑀣𑁂𑀯𑀸’’𑀢𑀺 𑀯𑀢𑁆𑀯𑀸 ‘‘𑀏𑀳𑀺 𑀤𑀸𑀦𑀺, 𑀕𑀘𑁆𑀙𑀸𑀫𑀸’’𑀢𑀺 𑀲𑀁𑀯𑀺𑀥𑀸𑀬 𑀕𑀘𑁆𑀙𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺. 𑀓𑀲𑁆𑀫𑀸? 𑀧𑀼𑀩𑁆𑀩𑀫𑁂𑀯 𑀕𑀫𑀺𑀲𑁆𑀲𑀸𑀫𑀸𑀢𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀢𑀁 𑀦𑁂𑀯 𑀧𑀸𑀴𑀺𑀬𑀸 𑀦 𑀲𑁂𑀲𑀅𑀝𑁆𑀞𑀓𑀣𑀸𑀬 𑀲𑀫𑁂𑀢𑀺.

𑀅𑀤𑁆𑀥𑀬𑁄𑀚𑀦𑁂 𑀅𑀤𑁆𑀥𑀬𑁄𑀚𑀦𑁂𑀢𑀺 𑀏𑀓𑀫𑁂𑀓𑀁 𑀅𑀤𑁆𑀥𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀇𑀤𑀸𑀦𑀺 𑀅𑀢𑀺𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀧𑀞𑀫𑀧𑀸𑀤𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀧𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀦𑀬𑁂 𑀅𑀢𑀺𑀓𑁆𑀓𑀫𑀦𑁂 𑀆𑀧𑀢𑁆𑀢𑀺, 𑀑𑀓𑁆𑀓𑀫𑀦𑁂 𑀅𑀦𑀸𑀧𑀢𑁆𑀢𑀺.

𑁧𑁮𑁪. 𑀪𑀺𑀓𑁆𑀔𑀼 𑀲𑀁𑀯𑀺𑀤𑀳𑀢𑀻𑀢𑀺 𑀦𑀕𑀭𑀤𑁆𑀯𑀸𑀭𑁂 𑀯𑀸 𑀭𑀣𑀺𑀓𑀸𑀬 𑀯𑀸 𑀪𑀺𑀓𑁆𑀔𑀼𑀦𑀺𑀁 𑀤𑀺𑀲𑁆𑀯𑀸 ‘‘𑀅𑀲𑀼𑀓𑀁 𑀕𑀸𑀫𑀁 𑀦𑀸𑀫 𑀕𑀢𑀧𑀼𑀩𑁆𑀩𑀢𑁆𑀣𑀸’’𑀢𑀺 𑀯𑀤𑀢𑀺, ‘‘𑀦𑀸𑀫𑁆𑀳𑀺 𑀅𑀬𑁆𑀬 𑀕𑀢𑀧𑀼𑀩𑁆𑀩𑀸’’𑀢𑀺 ‘‘𑀏𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀯𑀸 ‘‘𑀲𑁆𑀯𑁂 𑀅𑀳𑀁 𑀕𑀫𑀺𑀲𑁆𑀲𑀸𑀫𑀺, 𑀢𑁆𑀯𑀫𑁆𑀧𑀺 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀸 𑀯𑀤𑀢𑀺. 𑀪𑀺𑀓𑁆𑀔𑀼𑀦𑀻 𑀲𑀁𑀯𑀺𑀤𑀳𑀢𑀻𑀢𑀺 𑀕𑀸𑀫𑀦𑁆𑀢𑀭𑁂 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀁 𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 ‘‘𑀅𑀬𑁆𑀬 𑀓𑀼𑀳𑀺𑀁 𑀕𑀘𑁆𑀙𑀣𑀸’’𑀢𑀺 𑀯𑀤𑀢𑀺. ‘‘𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣’’𑀦𑁆𑀢𑀺. ‘‘𑀅𑀳𑀫𑁆𑀧𑀺 𑀅𑀬𑁆𑀬 𑀆𑀕𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀪𑀺𑀓𑁆𑀔𑀼𑀦𑀻𑀬𑁂𑀯 𑀲𑀁𑀯𑀺𑀤𑀳𑀢𑀺, 𑀦 𑀪𑀺𑀓𑁆𑀔𑀼.

𑁧𑁮𑁫. 𑀯𑀺𑀲𑀗𑁆𑀓𑁂𑀢𑁂𑀦𑀸𑀢𑀺 𑀏𑀢𑁆𑀣 ‘‘𑀧𑀼𑀭𑁂𑀪𑀢𑁆𑀢𑀁 𑀕𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀕𑀘𑁆𑀙𑀦𑁆𑀢𑀺, ‘‘𑀅𑀚𑁆𑀚 𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀲𑁆𑀯𑁂 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀓𑀸𑀮𑀯𑀺𑀲𑀗𑁆𑀓𑁂𑀢𑁂𑀬𑁂𑀯 𑀅𑀦𑀸𑀧𑀢𑁆𑀢𑀺, 𑀤𑁆𑀯𑀸𑀭𑀯𑀺𑀲𑀗𑁆𑀓𑁂𑀢𑁂 𑀧𑀦 𑀫𑀕𑁆𑀕𑀯𑀺𑀲𑀗𑁆𑀓𑁂𑀢𑁂 𑀯𑀸 𑀲𑀢𑀺𑀧𑀺 𑀆𑀧𑀢𑁆𑀢𑀺𑀬𑁂𑀯. 𑀆𑀧𑀤𑀸𑀲𑀽𑀢𑀺 𑀭𑀝𑁆𑀞𑀪𑁂𑀤𑁂 𑀘𑀓𑁆𑀓𑀲𑀫𑀸𑀭𑀼𑀴𑁆𑀳𑀸 𑀚𑀦𑀧𑀤𑀸 𑀧𑀭𑀺𑀬𑀸𑀬𑀦𑁆𑀢𑀺 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀘𑀢𑀼𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀢𑁄 𑀓𑀸𑀬𑀯𑀸𑀘𑀢𑁄 𑀓𑀸𑀬𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀁 𑀲𑀢𑁆𑀢𑀫𑀁.

𑁮. 𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁮𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀲𑀁𑀯𑀺𑀥𑀸𑀬𑀸𑀢𑀺 𑀮𑁄𑀓𑀲𑁆𑀲𑀸𑀤𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀓𑀻𑀴𑀸𑀧𑀼𑀭𑁂𑀓𑁆𑀔𑀸𑀭𑀸 𑀲𑀁𑀯𑀺𑀤𑀳𑀺𑀢𑁆𑀯𑀸. 𑀉𑀤𑁆𑀥𑀁𑀕𑀸𑀫𑀺𑀦𑀺𑀦𑁆𑀢𑀺 𑀉𑀤𑁆𑀥𑀁 𑀦𑀤𑀺𑀬𑀸 𑀧𑀝𑀺𑀲𑁄𑀢𑀁 𑀕𑀘𑁆𑀙𑀦𑁆𑀢𑀺𑀁. 𑀬𑀲𑁆𑀫𑀸 𑀧𑀦 𑀬𑁄 𑀉𑀤𑁆𑀥𑀁 𑀚𑀯𑀦𑀢𑁄 𑀉𑀚𑁆𑀚𑀯𑀦𑀺𑀓𑀸𑀬 𑀦𑀸𑀯𑀸𑀬 𑀓𑀻𑀴𑀢𑀺, 𑀲𑁄 ‘‘𑀉𑀤𑁆𑀥𑀁𑀕𑀸𑀫𑀺𑀦𑀺𑀁 𑀅𑀪𑀺𑀭𑀼𑀳𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀉𑀚𑁆𑀚𑀯𑀦𑀺𑀓𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀥𑁄𑀕𑀸𑀫𑀺𑀦𑀺𑀦𑁆𑀢𑀺 𑀅𑀥𑁄 𑀅𑀦𑀼𑀲𑁄𑀢𑀁 𑀕𑀘𑁆𑀙𑀦𑁆𑀢𑀺𑀁. 𑀬𑀲𑁆𑀫𑀸 𑀧𑀦 𑀬𑁄 𑀅𑀥𑁄 𑀚𑀯𑀦𑀢𑁄 𑀑𑀚𑀯𑀦𑀺𑀓𑀸𑀬 𑀦𑀸𑀯𑀸𑀬 𑀓𑀻𑀴𑀢𑀺, 𑀲𑁄 ‘‘𑀅𑀥𑁄𑀕𑀸𑀫𑀺𑀦𑀺𑀁 𑀅𑀪𑀺𑀭𑀼𑀳𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀲𑁆𑀲𑀸𑀧𑀺 𑀧𑀤𑀪𑀸𑀚𑀦𑁂 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀑𑀚𑀯𑀦𑀺𑀓𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀢𑀺𑀢𑁆𑀣𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀁 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀳𑀭𑀦𑁆𑀢𑀺, 𑀏𑀢𑁆𑀣 𑀅𑀦𑀸𑀧𑀢𑁆𑀢𑀺. 𑀢𑀺𑀭𑀺𑀬𑀁 𑀢𑀭𑀡𑀸𑀬𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁.

𑁧𑁮𑁯. 𑀕𑀸𑀫𑀦𑁆𑀢𑀭𑁂 𑀕𑀸𑀫𑀦𑁆𑀢𑀭𑁂𑀢𑀺 𑀏𑀢𑁆𑀣 𑀬𑀲𑁆𑀲𑀸 𑀦𑀤𑀺𑀬𑀸 𑀏𑀓𑀁 𑀢𑀻𑀭𑀁 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀤𑀕𑀸𑀫𑁂𑀳𑀺 𑀦𑀺𑀭𑀦𑁆𑀢𑀭𑀁, 𑀏𑀓𑀁 𑀅𑀕𑀸𑀫𑀓𑀁 𑀅𑀭𑀜𑁆𑀜𑀁, 𑀢𑀲𑁆𑀲𑀸 𑀲𑀕𑀸𑀫𑀓𑀢𑀻𑀭𑀧𑀲𑁆𑀲𑁂𑀦 𑀕𑀫𑀦𑀓𑀸𑀮𑁂 𑀕𑀸𑀫𑀦𑁆𑀢𑀭𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀅𑀕𑀸𑀫𑀓𑀢𑀻𑀭𑀧𑀲𑁆𑀲𑁂𑀦 𑀕𑀫𑀦𑀓𑀸𑀮𑁂 𑀅𑀤𑁆𑀥𑀬𑁄𑀚𑀦𑀕𑀡𑀦𑀸𑀬. 𑀬𑀸 𑀧𑀦 𑀬𑁄𑀚𑀦𑀯𑀺𑀢𑁆𑀣𑀢𑀸 𑀳𑁄𑀢𑀺, 𑀢𑀲𑁆𑀲𑀸 𑀫𑀚𑁆𑀛𑁂𑀦 𑀕𑀫𑀦𑁂𑀧𑀺 𑀅𑀤𑁆𑀥𑀬𑁄𑀚𑀦𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀦𑀸𑀧𑀢𑁆𑀢𑀺 𑀢𑀺𑀭𑀺𑀬𑀁 𑀢𑀭𑀡𑀸𑀬𑀸𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀦𑀤𑀺𑀬𑀸, 𑀬𑁄𑀧𑀺 𑀫𑀳𑀸𑀢𑀺𑀢𑁆𑀣𑀧𑀝𑁆𑀝𑀦𑀢𑁄 𑀢𑀸𑀫𑀮𑀺𑀢𑁆𑀢𑀺𑀁 𑀯𑀸 𑀲𑀼𑀯𑀡𑁆𑀡𑀪𑀽𑀫𑀺𑀁 𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀳𑀺 𑀦𑀤𑀺𑀬𑀁𑀬𑁂𑀯 𑀆𑀧𑀢𑁆𑀢𑀺 𑀯𑀺𑀘𑀸𑀭𑀺𑀢𑀸, 𑀦 𑀲𑀫𑀼𑀤𑁆𑀤𑁂.

𑁧𑁯𑁧. 𑀯𑀺𑀲𑀗𑁆𑀓𑁂𑀢𑁂𑀦𑀸𑀢𑀺 𑀇𑀥𑀸𑀧𑀺 𑀓𑀸𑀮𑀯𑀺𑀲𑀗𑁆𑀓𑁂𑀢𑁂𑀦𑁂𑀯 𑀅𑀦𑀸𑀧𑀢𑁆𑀢𑀺, 𑀢𑀺𑀢𑁆𑀣𑀯𑀺𑀲𑀗𑁆𑀓𑁂𑀢𑁂𑀦 𑀧𑀦 𑀦𑀸𑀯𑀸𑀯𑀺𑀲𑀗𑁆𑀓𑁂𑀢𑁂𑀦 𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀲𑁂𑀲𑀁 𑀧𑀞𑀫𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀫𑁂𑀯 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀻𑀢𑀺.

𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀁 𑀅𑀝𑁆𑀞𑀫𑀁.

𑁯. 𑀧𑀭𑀺𑀧𑀸𑀘𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁯𑁨. 𑀦𑀯𑀫𑀲𑀺𑀓𑁆𑀔𑀸𑀧𑀤𑁂 𑁋 𑀫𑀳𑀸𑀦𑀸𑀕𑁂 𑀢𑀺𑀝𑁆𑀞𑀫𑀸𑀦𑁂𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀫𑀳𑀸𑀦𑀸𑀕𑁂𑀲𑀼 𑀢𑀺𑀝𑁆𑀞𑀫𑀸𑀦𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀫𑀳𑀸𑀦𑀸𑀕𑁂 𑀢𑀺𑀝𑁆𑀞𑀫𑀸𑀦𑁂 ‘‘𑀅𑀤𑀺𑀲𑁆𑀯𑀸’’𑀢𑀺 𑀅𑀬𑀫𑁂𑀢𑁆𑀣 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀇𑀢𑀭𑀣𑀸 𑀳𑀺 𑀅𑀢𑁆𑀣𑁄 𑀦 𑀬𑀼𑀚𑁆𑀚𑀢𑀺. 𑀅𑀦𑁆𑀢𑀭𑀸𑀓𑀣𑀸𑀢𑀺 𑀅𑀯𑀲𑀸𑀦𑀁 𑀅𑀧𑁆𑀧𑀢𑁆𑀯𑀸 𑀆𑀭𑀫𑁆𑀪𑀲𑁆𑀲 𑀘 𑀅𑀯𑀲𑀸𑀦𑀲𑁆𑀲 𑀘 𑀯𑁂𑀫𑀚𑁆𑀛𑀝𑁆𑀞𑀸𑀦𑀁 𑀧𑀢𑁆𑀢𑀓𑀣𑀸. 𑀯𑀺𑀧𑁆𑀧𑀓𑀢𑀸𑀢𑀺 𑀓𑀬𑀺𑀭𑀫𑀸𑀦𑀸 𑀳𑁄𑀢𑀺. 𑀲𑀘𑁆𑀘𑀁 𑀫𑀳𑀸𑀦𑀸𑀕𑀸 𑀔𑁄 𑀢𑀬𑀸 𑀕𑀳𑀧𑀢𑀻𑀢𑀺 𑀅𑀤𑁆𑀥𑀘𑁆𑀙𑀺𑀓𑁂𑀦 𑀑𑀮𑁄𑀓𑀬𑀫𑀸𑀦𑀸 𑀣𑁂𑀭𑁂 𑀧𑀯𑀺𑀲𑀦𑁆𑀢𑁂 𑀤𑀺𑀲𑁆𑀯𑀸 𑀢𑁂𑀳𑀺 𑀲𑀼𑀢𑀪𑀸𑀯𑀁 𑀜𑀢𑁆𑀯𑀸 𑀏𑀯𑀫𑀸𑀳.

𑁧𑁯𑁪. 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀧𑀭𑀺𑀧𑀸𑀘𑀺𑀢𑀁, 𑀕𑀼𑀡𑀧𑁆𑀧𑀓𑀸𑀲𑀦𑁂𑀦 𑀦𑀺𑀧𑁆𑀨𑀸𑀤𑀺𑀢𑀁; 𑀮𑀤𑁆𑀥𑀩𑁆𑀩𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀤𑀪𑀸𑀚𑀦𑁂 𑀧𑀦𑀲𑁆𑀲 𑀪𑀺𑀓𑁆𑀔𑀼𑀦𑀺𑀜𑁆𑀘 𑀢𑀲𑁆𑀲𑀸 𑀧𑀭𑀺𑀧𑀸𑀘𑀦𑀸𑀓𑀸𑀭𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀼𑀦𑀻 𑀦𑀸𑀫 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸, 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫 𑀧𑀼𑀩𑁆𑀩𑁂 𑀅𑀤𑀸𑀢𑀼𑀓𑀸𑀫𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀕𑀺𑀳𑀺𑀲𑀫𑀸𑀭𑀫𑁆𑀪𑀸𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂𑀢𑀺 𑀧𑀞𑀫𑀁. 𑀲𑀫𑀸𑀭𑀫𑁆𑀪𑁄𑀢𑀺 𑀲𑀫𑀸𑀭𑀤𑁆𑀥𑀁 𑀯𑀼𑀘𑁆𑀘𑀢𑀺, 𑀧𑀝𑀺𑀬𑀸𑀤𑀺𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀕𑀺𑀳𑀻𑀦𑀁 𑀲𑀫𑀸𑀭𑀫𑁆𑀪𑁄 𑀕𑀺𑀳𑀺𑀲𑀫𑀸𑀭𑀫𑁆𑀪𑁄. 𑀪𑀺𑀓𑁆𑀔𑀼𑀦𑀺𑀬𑀸 𑀧𑀭𑀺𑀧𑀸𑀘𑀦𑀢𑁄 𑀧𑀞𑀫𑀫𑁂𑀯 𑀬𑀁 𑀕𑀺𑀳𑀻𑀦𑀁 𑀧𑀝𑀺𑀬𑀸𑀤𑀺𑀢𑀁 𑀪𑀢𑁆𑀢𑀁, 𑀢𑀢𑁄 𑀅𑀜𑁆𑀜𑀢𑁆𑀭 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀢𑀁 𑀧𑀦 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀤𑀪𑀸𑀚𑀦𑁂 𑀧𑀦 𑀬𑀲𑁆𑀫𑀸 𑀜𑀸𑀢𑀓𑀧𑀯𑀸𑀭𑀺𑀢𑁂𑀳𑀺 𑀪𑀺𑀓𑁆𑀔𑀼𑀲𑁆𑀲𑀢𑁆𑀣𑀸𑀬 𑀅𑀲𑀫𑀸𑀭𑀤𑁆𑀥𑁄𑀧𑀺 𑀧𑀺𑀡𑁆𑀟𑀧𑀸𑀢𑁄 𑀅𑀢𑁆𑀣𑀢𑁄 𑀲𑀫𑀸𑀭𑀤𑁆𑀥𑁄𑀯 𑀳𑁄𑀢𑀺, 𑀬𑀣𑀸𑀲𑀼𑀔𑀁 𑀆𑀳𑀭𑀸𑀧𑁂𑀢𑀩𑁆𑀩𑀢𑁄, 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀕𑀺𑀳𑀺𑀲𑀫𑀸𑀭𑀫𑁆𑀪𑁄 𑀦𑀸𑀫 𑀜𑀸𑀢𑀓𑀸 𑀯𑀸 𑀳𑁄𑀦𑁆𑀢𑀺 𑀧𑀯𑀸𑀭𑀺𑀢𑀸 𑀯𑀸’’𑀢𑀺 𑀯𑀼𑀢𑁆𑀢𑀁.

𑁧𑁯𑁫. 𑀧𑀓𑀢𑀺𑀧𑀝𑀺𑀬𑀢𑁆𑀢𑀦𑁆𑀢𑀺 𑀧𑀓𑀢𑀺𑀬𑀸 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀅𑀢𑁆𑀣𑀸𑀬 𑀧𑀝𑀺𑀬𑀸𑀤𑀺𑀢𑀁 𑀳𑁄𑀢𑀺 ‘‘𑀣𑁂𑀭𑀲𑁆𑀲 𑀤𑀲𑁆𑀲𑀸𑀫𑀸’’𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀢𑀲𑁆𑀲 𑀅𑀜𑁆𑀜𑀲𑁆𑀲𑀸’’𑀢𑀺 𑀅𑀯𑀢𑁆𑀯𑀸 ‘‘𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀸𑀫𑀸𑀢𑀺 𑀧𑀝𑀺𑀬𑀢𑁆𑀢𑀁 𑀳𑁄𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁.

𑁧𑁯𑁭. 𑀧𑀜𑁆𑀘 𑀪𑁄𑀚𑀦𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀻𑀢𑀺 𑀬𑀸𑀕𑀼𑀔𑀚𑁆𑀚𑀓𑀨𑀮𑀸𑀨𑀮𑁂 𑀲𑀩𑁆𑀩𑀢𑁆𑀣 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀭𑀺𑀧𑀸𑀘𑀺𑀢𑀲𑀺𑀓𑁆𑀔𑀸𑀧𑀤𑀁 𑀦𑀯𑀫𑀁.

𑁧𑁦. 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁯𑁮. 𑀤𑀲𑀫𑀲𑀺𑀓𑁆𑀔𑀸𑀧𑀤𑁂 𑁋 𑀲𑀩𑁆𑀩𑁄 𑀧𑀸𑀴𑀺𑀅𑀢𑁆𑀣𑁄 𑀘 𑀯𑀺𑀦𑀺𑀘𑁆𑀙𑀬𑁄 𑀘 𑀤𑀼𑀢𑀺𑀬𑀅𑀦𑀺𑀬𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀜𑁆𑀳𑀺 𑀲𑀺𑀓𑁆𑀔𑀸𑀧𑀤𑀁 𑀤𑀼𑀢𑀺𑀬𑀸𑀦𑀺𑀬𑀢𑁂𑀦 𑀘 𑀉𑀧𑀭𑀺 𑀉𑀧𑀦𑀦𑁆𑀥𑀲𑁆𑀲 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂𑀦 𑀘 𑀲𑀤𑁆𑀥𑀺𑀁 𑀏𑀓𑀧𑀭𑀺𑀘𑁆𑀙𑁂𑀤𑀁, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀦 𑀯𑀺𑀲𑀼𑀁 𑀧𑀜𑁆𑀜𑀢𑁆𑀢𑀦𑁆𑀢𑀺.

𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀁 𑀤𑀲𑀫𑀁.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑁄 𑀢𑀢𑀺𑀬𑁄.