𑁨. 𑀪𑀽𑀢𑀕𑀸𑀫𑀯𑀕𑁆𑀕𑁄

𑁧. 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁯. 𑀲𑁂𑀦𑀸𑀲𑀦𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀅𑀦𑀸𑀤𑀺𑀬𑀦𑁆𑀢𑁄𑀢𑀺 𑀢𑀲𑁆𑀲𑀸 𑀯𑀘𑀦𑀁 𑀅𑀕𑀡𑁆𑀳𑀦𑁆𑀢𑁄. 𑀤𑀸𑀭𑀓𑀲𑁆𑀲 𑀩𑀸𑀳𑀼𑀁 𑀆𑀓𑁄𑀝𑁂𑀲𑀻𑀢𑀺 𑀉𑀓𑁆𑀔𑀺𑀢𑁆𑀢𑀁 𑀨𑀭𑀲𑀼𑀁 𑀦𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀦𑀼𑀲𑁆𑀲𑀸𑀦𑀁 𑀘𑀓𑁆𑀔𑀼𑀯𑀺𑀲𑀬𑀸𑀢𑀻𑀢𑁂 𑀫𑀳𑀸𑀭𑀸𑀚𑀲𑀦𑁆𑀢𑀺𑀓𑀸 𑀮𑀤𑁆𑀥𑁂 𑀭𑀼𑀓𑁆𑀔𑀝𑁆𑀞𑀓𑀤𑀺𑀩𑁆𑀩𑀯𑀺𑀫𑀸𑀦𑁂 𑀦𑀺𑀧𑀦𑁆𑀦𑀲𑁆𑀲 𑀤𑀸𑀭𑀓𑀲𑁆𑀲 𑀩𑀸𑀳𑀼𑀁 𑀣𑀦𑀫𑀽𑀮𑁂𑀬𑁂𑀯 𑀙𑀺𑀦𑁆𑀤𑀺. 𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀦𑁆𑀢𑀺𑀆𑀤𑀺𑀫𑁆𑀳𑀺 𑀅𑀬𑀁 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑁋 𑀳𑀺𑀫𑀯𑀦𑁆𑀢𑁂 𑀓𑀺𑀭 𑀧𑀓𑁆𑀔𑀤𑀺𑀯𑀲𑁂𑀲𑀼 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄 𑀳𑁄𑀢𑀺, 𑀢𑀢𑁆𑀣 𑀭𑀼𑀓𑁆𑀔𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀢𑁆𑀯𑀁 𑀭𑀼𑀓𑁆𑀔𑀥𑀫𑁆𑀫𑁂 𑀞𑀺𑀢𑀸 𑀦 𑀞𑀺𑀢𑀸’’𑀢𑀺? 𑀭𑀼𑀓𑁆𑀔𑀥𑀫𑁆𑀫𑁄 𑀦𑀸𑀫 𑀭𑀼𑀓𑁆𑀔𑁂 𑀙𑀺𑀚𑁆𑀚𑀫𑀸𑀦𑁂 𑀭𑀼𑀓𑁆𑀔𑀤𑁂𑀯𑀢𑀸𑀬 𑀫𑀦𑁄𑀧𑀤𑁄𑀲𑀲𑁆𑀲 𑀅𑀓𑀭𑀡𑀁. 𑀢𑀢𑁆𑀣 𑀬𑀸 𑀤𑁂𑀯𑀢𑀸 𑀭𑀼𑀓𑁆𑀔𑀥𑀫𑁆𑀫𑁂 𑀅𑀝𑁆𑀞𑀺𑀢𑀸 𑀳𑁄𑀢𑀺, 𑀲𑀸 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀁 𑀧𑀯𑀺𑀲𑀺𑀢𑀼𑀁 𑀦 𑀮𑀪𑀢𑀺. 𑀇𑀢𑀺 𑀲𑀸 𑀤𑁂𑀯𑀢𑀸 𑀇𑀫𑀜𑁆𑀘 𑀭𑀼𑀓𑁆𑀔𑀥𑀫𑁆𑀫𑁂 𑀅𑀝𑁆𑀞𑀸𑀦𑀧𑀘𑁆𑀘𑀬𑀁 𑀆𑀤𑀻𑀦𑀯𑀁 𑀅𑀤𑁆𑀤𑀲, 𑀪𑀕𑀯𑀢𑁄 𑀘 𑀲𑀫𑁆𑀫𑀼𑀔𑀸 𑀲𑀼𑀢𑀧𑀼𑀩𑁆𑀩𑀥𑀫𑁆𑀫𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀢𑀣𑀸𑀕𑀢𑀲𑁆𑀲 𑀙𑀤𑁆𑀤𑀦𑁆𑀢𑀸𑀤𑀺𑀓𑀸𑀮𑁂 𑀧𑀼𑀩𑁆𑀩𑀘𑀭𑀺𑀢𑀁 𑀅𑀦𑀼𑀲𑁆𑀲𑀭𑀺. 𑀢𑁂𑀦𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁…𑀧𑁂… 𑀯𑁄𑀭𑁄𑀧𑁂𑀬𑁆𑀬’’𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀬𑁆𑀬𑀦𑁆𑀢𑀺 𑀇𑀤𑀁 𑀧𑀦𑀲𑁆𑀲𑀸 ‘‘𑀅𑀬𑀁 𑀪𑀺𑀓𑁆𑀔𑀼 𑀲𑀧𑀺𑀢𑀺𑀓𑁄 𑀧𑀼𑀢𑁆𑀢𑁄, 𑀅𑀤𑁆𑀥𑀸 𑀪𑀕𑀯𑀸 𑀇𑀫𑀁 𑀇𑀫𑀲𑁆𑀲 𑀅𑀚𑁆𑀛𑀸𑀘𑀸𑀭𑀁 𑀲𑀼𑀢𑁆𑀯𑀸 𑀫𑀭𑀺𑀬𑀸𑀤𑀁 𑀩𑀦𑁆𑀥𑀺𑀲𑁆𑀲𑀢𑀺, 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀢𑀻’’𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀦𑁆𑀢𑀺𑀬𑀸 𑀅𑀳𑁄𑀲𑀺. 𑀲𑀘𑀚𑁆𑀚 𑀢𑁆𑀯𑀁 𑀤𑁂𑀯𑀢𑁂𑀢𑀺 𑀲𑀘𑁂 𑀅𑀚𑁆𑀚 𑀢𑁆𑀯𑀁 𑀤𑁂𑀯𑀢𑁂. 𑀧𑀲𑀯𑁂𑀬𑁆𑀬𑀸𑀲𑀻𑀢𑀺 𑀚𑀦𑁂𑀬𑁆𑀬𑀸𑀲𑀺 𑀉𑀧𑁆𑀧𑀸𑀤𑁂𑀬𑁆𑀬𑀸𑀲𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀪𑀕𑀯𑀸 𑀢𑀁 𑀤𑁂𑀯𑀢𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 𑁋

‘‘𑀬𑁄 𑀯𑁂 𑀉𑀧𑁆𑀧𑀢𑀺𑀢𑀁 𑀓𑁄𑀥𑀁, 𑀭𑀣𑀁 𑀪𑀦𑁆𑀢𑀁𑀯 𑀯𑀸𑀭𑀬𑁂;

𑀢𑀫𑀳𑀁 𑀲𑀸𑀭𑀣𑀺𑀁 𑀩𑁆𑀭𑀽𑀫𑀺, 𑀭𑀲𑁆𑀫𑀺𑀕𑁆𑀕𑀸𑀳𑁄 𑀇𑀢𑀭𑁄 𑀚𑀦𑁄’’𑀢𑀺. (𑀥. 𑀧. 𑁨𑁨𑁨);

𑀇𑀫𑀁 𑀕𑀸𑀣𑀫𑀪𑀸𑀲𑀺. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑀸 𑀤𑁂𑀯𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀧𑀼𑀦 𑀪𑀕𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑁋

‘‘𑀬𑁄 𑀉𑀧𑁆𑀧𑀢𑀺𑀢𑀁 𑀯𑀺𑀦𑁂𑀢𑀺 𑀓𑁄𑀥𑀁, 𑀯𑀺𑀲𑀝𑀁 𑀲𑀧𑁆𑀧𑀯𑀺𑀲𑀁𑀯 𑀑𑀲𑀥𑁂𑀳𑀺;

𑀲𑁄 𑀪𑀺𑀓𑁆𑀔𑀼 𑀚𑀳𑀸𑀢𑀺 𑀑𑀭𑀧𑀸𑀭𑀁, 𑀉𑀭𑀕𑁄 𑀚𑀺𑀡𑁆𑀡𑀫𑀺𑀯𑀢𑁆𑀢𑀘𑀁 𑀧𑀼𑀭𑀸𑀡’’𑀦𑁆𑀢𑀺. (𑀲𑀼. 𑀦𑀺. 𑁧);

𑀇𑀫𑀁 𑀕𑀸𑀣𑀫𑀪𑀸𑀲𑀺. 𑀢𑀢𑁆𑀭 𑀧𑀞𑀫𑀕𑀸𑀣𑀸 𑀥𑀫𑁆𑀫𑀧𑀤𑁂 𑀲𑀗𑁆𑀕𑀳𑀁 𑀆𑀭𑀼𑀴𑁆𑀳𑀸, 𑀤𑀼𑀢𑀺𑀬𑀸 𑀲𑀼𑀢𑁆𑀢𑀦𑀺𑀧𑀸𑀢𑁂, 𑀯𑀢𑁆𑀣𑀼 𑀧𑀦 𑀯𑀺𑀦𑀬𑁂𑀢𑀺. 𑀅𑀣 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀬𑁂𑀯 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀯𑀲𑀦𑀝𑁆𑀞𑀸𑀦𑀁 𑀆𑀯𑀚𑁆𑀚𑀦𑁆𑀢𑁄 𑀧𑀢𑀺𑀭𑀽𑀧𑀁 𑀞𑀸𑀦𑀁 𑀤𑀺𑀲𑁆𑀯𑀸 ‘‘𑀕𑀘𑁆𑀙, 𑀤𑁂𑀯𑀢𑁂, 𑀅𑀲𑀼𑀓𑀲𑁆𑀫𑀺𑀁 𑀑𑀓𑀸𑀲𑁂 𑀭𑀼𑀓𑁆𑀔𑁄 𑀯𑀺𑀯𑀺𑀢𑁆𑀢𑁄, 𑀢𑀲𑁆𑀫𑀺𑀁 𑀉𑀧𑀕𑀘𑁆𑀙𑀸’’𑀢𑀺 𑀆𑀳. 𑀲𑁄 𑀓𑀺𑀭 𑀭𑀼𑀓𑁆𑀔𑁄 𑀦 𑀆𑀴𑀯𑀺𑀭𑀝𑁆𑀞𑁂, 𑀚𑁂𑀢𑀯𑀦𑀲𑁆𑀲 𑀅𑀦𑁆𑀢𑁄𑀧𑀭𑀺𑀓𑁆𑀔𑁂𑀧𑁂, 𑀬𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀧𑀭𑀺𑀕𑁆𑀕𑀳𑁄 𑀅𑀳𑁄𑀲𑀺, 𑀲𑁄 𑀘𑀼𑀢𑁄; 𑀢𑀲𑁆𑀫𑀸 ‘‘𑀯𑀺𑀯𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀢𑀢𑁄 𑀧𑀝𑁆𑀞𑀸𑀬 𑀘 𑀧𑀦 𑀲𑀸 𑀤𑁂𑀯𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀮𑀤𑁆𑀥𑀧𑀭𑀺𑀳𑀸𑀭𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀬𑀺𑀓𑀸 𑀅𑀳𑁄𑀲𑀺. 𑀬𑀤𑀸 𑀤𑁂𑀯𑀢𑀸𑀲𑀫𑀸𑀕𑀫𑁄 𑀳𑁄𑀢𑀺, 𑀢𑀤𑀸 𑀫𑀳𑁂𑀲𑀓𑁆𑀔𑀤𑁂𑀯𑀢𑀸𑀲𑀼 𑀆𑀕𑀘𑁆𑀙𑀦𑁆𑀢𑀻𑀲𑀼 𑀅𑀜𑁆𑀜𑀸 𑀅𑀧𑁆𑀧𑁂𑀲𑀓𑁆𑀔𑀸 𑀤𑁂𑀯𑀢𑀸 𑀬𑀸𑀯 𑀫𑀳𑀸𑀲𑀫𑀼𑀤𑁆𑀤𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀸 𑀢𑀸𑀯 𑀧𑀝𑀺𑀓𑁆𑀓𑀫𑀦𑁆𑀢𑀺. 𑀅𑀬𑀁 𑀧𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸𑀯 𑀥𑀫𑁆𑀫𑀁 𑀲𑀼𑀡𑀸𑀢𑀺. 𑀬𑀫𑁆𑀧𑀺 𑀧𑀞𑀫𑀬𑀸𑀫𑁂 𑀪𑀺𑀓𑁆𑀔𑀽 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀫𑀚𑁆𑀛𑀺𑀫𑀬𑀸𑀫𑁂 𑀤𑁂𑀯𑀢𑀸, 𑀢𑀁 𑀲𑀩𑁆𑀩𑀁 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀡𑀸𑀢𑀺. 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸𑀦𑁄𑀧𑀺 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀢𑀁 𑀤𑁂𑀯𑀢𑀁 𑀤𑀺𑀲𑁆𑀯𑀸𑀯 𑀕𑀘𑁆𑀙𑀦𑁆𑀢𑀺.

𑁯𑁦. 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬𑀸𑀢𑀺 𑀏𑀢𑁆𑀣 𑀪𑀯𑀦𑁆𑀢𑀺 𑀅𑀳𑀼𑀯𑀼𑀜𑁆𑀘𑀸𑀢𑀺 𑀪𑀽𑀢𑀸; 𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀚𑀸𑀢𑀸 𑀯𑀟𑁆𑀠𑀺𑀢𑀸 𑀘𑀸𑀢𑀺 𑀅𑀢𑁆𑀣𑁄. 𑀕𑀸𑀫𑁄𑀢𑀺 𑀭𑀸𑀲𑀺; 𑀪𑀽𑀢𑀸𑀦𑀁 𑀕𑀸𑀫𑁄𑀢𑀺 𑀪𑀽𑀢𑀕𑀸𑀫𑁄; 𑀪𑀽𑀢𑀸 𑀏𑀯 𑀯𑀸 𑀕𑀸𑀫𑁄 𑀪𑀽𑀢𑀕𑀸𑀫𑁄; 𑀧𑀢𑀺𑀝𑁆𑀞𑀺𑀢𑀳𑀭𑀺𑀢𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀸𑀢𑀩𑁆𑀬𑀲𑁆𑀲 𑀪𑀸𑀯𑁄 𑀧𑀸𑀢𑀩𑁆𑀬𑀢𑀸; 𑀙𑁂𑀤𑀦𑀪𑁂𑀤𑀦𑀸𑀤𑀻𑀳𑀺 𑀬𑀣𑀸𑀭𑀼𑀘𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬; 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀳𑁂𑀢𑀼, 𑀪𑀽𑀢𑀕𑀸𑀫𑀲𑁆𑀲 𑀙𑁂𑀤𑀦𑀸𑀤𑀺𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄.

𑁯𑁧. 𑀇𑀤𑀸𑀦𑀺 𑀢𑀁 𑀪𑀽𑀢𑀕𑀸𑀫𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀪𑀽𑀢𑀕𑀸𑀫𑁄 𑀦𑀸𑀫 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀽𑀢𑀕𑀸𑀫𑁄 𑀦𑀸𑀫𑀸𑀢𑀺 𑀪𑀽𑀢𑀕𑀸𑀫𑀁 𑀉𑀤𑁆𑀥𑀭𑀺𑀢𑁆𑀯𑀸 𑀬𑀲𑁆𑀫𑀺𑀁 𑀲𑀢𑀺 𑀪𑀽𑀢𑀕𑀸𑀫𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀻’’𑀢𑀺 𑀆𑀳𑀸𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑁂 𑀚𑀸𑀬𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀦 𑀲𑀫𑁂𑀦𑁆𑀢𑀺. 𑀦 𑀳𑀺 𑀫𑀽𑀮𑀩𑀻𑀚𑀸𑀤𑀻𑀦𑀺 𑀫𑀽𑀮𑀸𑀤𑀻𑀲𑀼 𑀚𑀸𑀬𑀦𑁆𑀢𑀺, 𑀫𑀽𑀮𑀸𑀤𑀻𑀲𑀼 𑀚𑀸𑀬𑀫𑀸𑀦𑀸𑀦𑀺 𑀧𑀦 𑀢𑀸𑀦𑀺 𑀩𑀻𑀚𑀸𑀓𑀢𑀸𑀦𑀺, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀪𑀽𑀢𑀕𑀸𑀫𑁄 𑀦𑀸𑀫𑀸𑀢𑀺 𑀯𑀺𑀪𑀚𑀺𑀢𑀩𑁆𑀩𑀧𑀤𑀁. 𑀧𑀜𑁆𑀘𑀸𑀢𑀺 𑀢𑀲𑁆𑀲 𑀯𑀺𑀪𑀸𑀕𑀧𑀭𑀺𑀘𑁆𑀙𑁂𑀤𑁄. 𑀩𑀻𑀚𑀚𑀸𑀢𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀢𑀲𑁆𑀲𑀢𑁆𑀣𑁄 𑁋 𑀩𑀻𑀚𑁂𑀳𑀺 𑀚𑀸𑀢𑀸𑀦𑀺 𑀩𑀻𑀚𑀚𑀸𑀢𑀸𑀦𑀺; 𑀭𑀼𑀓𑁆𑀔𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀧𑀭𑁄 𑀦𑀬𑁄 𑁋 𑀩𑀻𑀚𑀸𑀦𑀺 𑀘 𑀢𑀸𑀦𑀺 𑀯𑀺𑀚𑀸𑀢𑀸𑀦𑀺 𑀘 𑀧𑀲𑀽𑀢𑀸𑀦𑀺 𑀦𑀺𑀩𑁆𑀩𑀢𑁆𑀢𑀧𑀡𑁆𑀡𑀫𑀽𑀮𑀸𑀦𑀻𑀢𑀺 𑀩𑀻𑀚𑀚𑀸𑀢𑀸𑀦𑀺. 𑀏𑀢𑁂𑀦 𑀅𑀮𑁆𑀮𑀯𑀸𑀮𑀺𑀓𑀸𑀤𑀻𑀲𑀼 𑀞𑀧𑀺𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀧𑀡𑁆𑀡𑀫𑀽𑀮𑀸𑀦𑀁 𑀲𑀺𑀗𑁆𑀕𑀺𑀯𑁂𑀭𑀸𑀤𑀻𑀦𑀁 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺.

𑀇𑀤𑀸𑀦𑀺 𑀬𑁂𑀳𑀺 𑀩𑀻𑀚𑁂𑀳𑀺 𑀚𑀸𑀢𑀢𑁆𑀢𑀸 𑀭𑀼𑀓𑁆𑀔𑀸𑀤𑀻𑀦𑀺 𑀩𑀻𑀚𑀚𑀸𑀢𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀽𑀮𑀩𑀻𑀚’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀲𑀁 𑀉𑀤𑁆𑀤𑁂𑀲𑁄 𑀧𑀸𑀓𑀝𑁄 𑀏𑀯. 𑀦𑀺𑀤𑁆𑀤𑁂𑀲𑁂 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑁂 𑀚𑀸𑀬𑀦𑁆𑀢𑀺 𑀫𑀽𑀮𑁂 𑀲𑀜𑁆𑀚𑀸𑀬𑀦𑁆𑀢𑀻𑀢𑀺 𑀏𑀢𑁆𑀣 𑀩𑀻𑀚𑀢𑁄 𑀦𑀺𑀩𑁆𑀩𑀢𑁆𑀢𑁂𑀦 𑀩𑀻𑀚𑀁 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀆𑀮𑀼𑀯𑀓𑀲𑁂𑀭𑀼𑀓𑀫𑀮𑀼𑀧𑁆𑀧𑀮𑀧𑀼𑀡𑁆𑀟𑀭𑀻𑀓𑀓𑀼𑀯𑀮𑀬𑀓𑀦𑁆𑀤𑀧𑀸𑀝𑀮𑀺𑀫𑀽𑀮𑀸𑀤𑀺𑀪𑁂𑀤𑁂 𑀫𑀽𑀮𑁂 𑀕𑀘𑁆𑀙𑀯𑀮𑁆𑀮𑀺𑀭𑀼𑀓𑁆𑀔𑀸𑀤𑀻𑀦𑀺 𑀚𑀸𑀬𑀦𑁆𑀢𑀺 𑀲𑀜𑁆𑀚𑀸𑀬𑀦𑁆𑀢𑀺, 𑀢𑀸𑀦𑀺 𑀬𑀫𑁆𑀳𑀺 𑀫𑀽𑀮𑁂 𑀚𑀸𑀬𑀦𑁆𑀢𑀺 𑀘𑁂𑀯 𑀲𑀜𑁆𑀚𑀸𑀬𑀦𑁆𑀢𑀺 𑀘 𑀢𑀜𑁆𑀘, 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀳𑀮𑀺𑀤𑁆𑀤𑀸𑀤𑀺 𑀘 𑀲𑀩𑁆𑀩𑀫𑁆𑀧𑀺 𑀏𑀢𑀁 𑀫𑀽𑀮𑀩𑀻𑀚𑀁 𑀦𑀸𑀫. 𑀏𑀲𑁂𑀯 𑀦𑀬𑁄 𑀔𑀦𑁆𑀥𑀩𑀻𑀚𑀸𑀤𑀻𑀲𑀼. 𑀬𑁂𑀯𑀸𑀧𑀦𑀓𑀔𑀦𑁆𑀥𑀩𑀻𑀚𑁂𑀲𑀼 𑀧𑀦𑁂𑀢𑁆𑀣 𑀅𑀫𑁆𑀩𑀸𑀝𑀓𑀇𑀦𑁆𑀤𑀲𑀸𑀮𑀦𑀼𑀳𑀻𑀧𑀸𑀴𑀺𑀪𑀤𑁆𑀤𑀓𑀡𑀺𑀓𑀸𑀭𑀸𑀤𑀻𑀦𑀺 𑀔𑀦𑁆𑀥𑀩𑀻𑀚𑀸𑀦𑀺, 𑀅𑀫𑀽𑀮𑀯𑀮𑁆𑀮𑀺 𑀘𑀢𑀼𑀭𑀲𑁆𑀲𑀯𑀮𑁆𑀮𑀺𑀓𑀡𑀯𑀻𑀭𑀸𑀤𑀻𑀦𑀺 𑀨𑀴𑀼𑀩𑀻𑀚𑀸𑀦𑀺 𑀫𑀓𑀘𑀺𑀲𑀼𑀫𑀦𑀚𑀬𑀲𑀼𑀫𑀦𑀸𑀤𑀻𑀦𑀺 𑀅𑀕𑁆𑀕𑀩𑀻𑀚𑀸𑀦𑀺, 𑀅𑀫𑁆𑀩𑀚𑀫𑁆𑀩𑀽𑀧𑀦𑀲𑀝𑁆𑀞𑀺𑀆𑀤𑀻𑀦𑀺 𑀩𑀻𑀚𑀩𑀻𑀚𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑁯𑁨. 𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀢𑀢𑁆𑀣 𑀲𑀜𑁆𑀜𑀸𑀯𑀲𑁂𑀦 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀪𑁂𑀤𑀁 𑀧𑀸𑀢𑀩𑁆𑀬𑀢𑀸𑀪𑁂𑀤𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀩𑀻𑀚𑁂 𑀩𑀻𑀚𑀲𑀜𑁆𑀜𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 ‘‘𑀲𑀸𑀮𑀻𑀦𑀁 𑀘𑁂𑀧𑀺 𑀑𑀤𑀦𑀁 𑀪𑀼𑀜𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁭𑁬) 𑀲𑀸𑀮𑀺𑀢𑀡𑁆𑀟𑀼𑀮𑀸𑀦𑀁 𑀑𑀤𑀦𑁄 ‘‘𑀲𑀸𑀮𑀻𑀦𑀁 𑀑𑀤𑀦𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀻𑀚𑀢𑁄 𑀲𑀫𑁆𑀪𑀽𑀢𑁄 𑀪𑀽𑀢𑀕𑀸𑀫𑁄 ‘‘𑀩𑀻𑀚’’𑀦𑁆𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦 ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁦) 𑀯𑀼𑀢𑁆𑀢𑀁 𑀪𑀽𑀢𑀕𑀸𑀫𑀧𑀭𑀺𑀫𑁄𑀘𑀦𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀩𑀻𑀚𑀁, 𑀢𑀁 𑀤𑀼𑀓𑁆𑀓𑀝𑀯𑀢𑁆𑀣𑀼. 𑀅𑀣 𑀯𑀸 𑀬𑀤𑁂𑀢𑀁 ‘‘𑀪𑀽𑀢𑀕𑀸𑀫𑁄 𑀦𑀸𑀫𑀸’’𑀢𑀺 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀲𑁆𑀲 𑀆𑀤𑀺𑀧𑀤𑀁, 𑀢𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀬𑀁 𑀩𑀻𑀚𑀁 𑀪𑀽𑀢𑀕𑀸𑀫𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀺𑀁 𑀩𑀻𑀚𑁂 𑀩𑀻𑀚𑀲𑀜𑁆𑀜𑀻 𑀲𑀢𑁆𑀣𑀓𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑀬𑀁 𑀯𑀸 𑀙𑀺𑀦𑁆𑀤𑀢𑀺 𑀅𑀜𑁆𑀜𑁂𑀦 𑀯𑀸 𑀙𑁂𑀤𑀸𑀧𑁂𑀢𑀺, 𑀧𑀸𑀲𑀸𑀡𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑀬𑀁 𑀯𑀸 𑀪𑀺𑀦𑁆𑀤𑀢𑀺 𑀅𑀜𑁆𑀜𑁂𑀦 𑀯𑀸 𑀪𑁂𑀤𑀸𑀧𑁂𑀢𑀺, 𑀅𑀕𑁆𑀕𑀺𑀁 𑀉𑀧𑀲𑀁𑀳𑀭𑀺𑀢𑁆𑀯𑀸 𑀲𑀬𑀁 𑀯𑀸 𑀧𑀘𑀢𑀺 𑀅𑀜𑁆𑀜𑁂𑀦 𑀯𑀸 𑀧𑀘𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀭𑀼𑀢𑀁 𑀧𑀦 𑀕𑀳𑁂𑀢𑁆𑀯𑀸 𑀪𑀽𑀢𑀕𑀸𑀫𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀩𑀻𑀚𑀲𑁆𑀲 𑀙𑀺𑀦𑁆𑀤𑀦𑀸𑀤𑀺𑀪𑁂𑀤𑀸𑀬 𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀯𑀢𑁆𑀢𑀩𑁆𑀩𑀁.

𑀅𑀬𑀜𑁆𑀳𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑀓𑀣𑀸 𑁋 𑀪𑀽𑀢𑀕𑀸𑀫𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀪𑀽𑀢𑀕𑀸𑀫𑀧𑀭𑀺𑀫𑁄𑀘𑀺𑀢𑀁 𑀧𑀜𑁆𑀘𑀯𑀺𑀥𑀫𑁆𑀧𑀺 𑀩𑀻𑀚𑀕𑀸𑀫𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑁄 𑀦𑀸𑀫𑁂𑀲 𑀅𑀢𑁆𑀣𑀺 𑀉𑀤𑀓𑀝𑁆𑀞𑁄, 𑀅𑀢𑁆𑀣𑀺 𑀣𑀮𑀝𑁆𑀞𑁄. 𑀢𑀢𑁆𑀣 𑀉𑀤𑀓𑀝𑁆𑀞𑁄 𑀲𑀸𑀲𑀧𑀫𑀢𑁆𑀢𑀺𑀓𑀸 𑀢𑀺𑀮𑀩𑀻𑀚𑀓𑀸𑀤𑀺𑀪𑁂𑀤𑀸 𑀲𑀧𑀡𑁆𑀡𑀺𑀓𑀸 𑀅𑀧𑀡𑁆𑀡𑀺𑀓𑀸 𑀘 𑀲𑀩𑁆𑀩𑀸 𑀲𑁂𑀯𑀸𑀮𑀚𑀸𑀢𑀺 𑀅𑀦𑁆𑀢𑀫𑀲𑁄 𑀉𑀤𑀓𑀧𑀧𑁆𑀧𑀝𑀓𑀁 𑀉𑀧𑀸𑀤𑀸𑀬 ‘‘𑀪𑀽𑀢𑀕𑀸𑀫𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀉𑀤𑀓𑀧𑀧𑁆𑀧𑀝𑀓𑁄 𑀦𑀸𑀫 𑀉𑀧𑀭𑀺 𑀣𑀤𑁆𑀥𑁄 𑀨𑀭𑀼𑀲𑀯𑀡𑁆𑀡𑁄, 𑀳𑁂𑀝𑁆𑀞𑀸 𑀫𑀼𑀤𑀼 𑀦𑀻𑀮𑀯𑀡𑁆𑀡𑁄 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀲 𑀲𑁂𑀯𑀸𑀮𑀲𑁆𑀲 𑀫𑀽𑀮𑀁 𑀑𑀭𑀽𑀳𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀁, 𑀢𑀲𑁆𑀲 𑀧𑀣𑀯𑀻 𑀞𑀸𑀦𑀁. 𑀬𑁄 𑀉𑀤𑀓𑁂 𑀲𑀜𑁆𑀘𑀭𑀢𑀺, 𑀢𑀲𑁆𑀲 𑀉𑀤𑀓𑀁. 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸 𑀞𑀸𑀦𑀦𑁆𑀢𑀭𑀁 𑀲𑀗𑁆𑀓𑀸𑀫𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀉𑀤𑀓𑁂 𑀲𑀜𑁆𑀘𑀭𑀦𑁆𑀢𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲𑁂𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀳𑀢𑁆𑀣𑁂𑀳𑀺 𑀧𑀦 𑀇𑀢𑁄 𑀘𑀺𑀢𑁄 𑀘 𑀯𑀺𑀬𑀽𑀳𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀯𑀝𑁆𑀝𑀢𑀺, 𑀲𑀓𑀮𑀜𑁆𑀳𑀺 𑀉𑀤𑀓𑀁 𑀢𑀲𑁆𑀲 𑀞𑀸𑀦𑀁. 𑀢𑀲𑁆𑀫𑀸 𑀦 𑀲𑁄 𑀏𑀢𑁆𑀢𑀸𑀯𑀢𑀸 𑀞𑀸𑀦𑀦𑁆𑀢𑀭𑀁 𑀲𑀗𑁆𑀓𑀸𑀫𑀺𑀢𑁄 𑀳𑁄𑀢𑀺. 𑀉𑀤𑀓𑀢𑁄 𑀧𑀦 𑀉𑀤𑀓𑁂𑀦 𑀯𑀺𑀦𑀸 𑀲𑀜𑁆𑀘𑀺𑀘𑁆𑀘 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀉𑀤𑀓𑁂𑀦 𑀲𑀤𑁆𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀭𑀺𑀲𑁆𑀲𑀸𑀯𑀦𑀦𑁆𑀢𑀭𑁂𑀦 𑀦𑀺𑀓𑁆𑀔𑀫𑀢𑀺, 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸𑀯 𑀉𑀤𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀉𑀧𑁆𑀧𑀮𑀺𑀦𑀻𑀧𑀤𑀼𑀫𑀺𑀦𑀻𑀆𑀤𑀻𑀦𑀺 𑀚𑀮𑀚𑀯𑀮𑁆𑀮𑀺𑀢𑀺𑀡𑀸𑀦𑀺 𑀉𑀤𑀓𑀢𑁄 𑀉𑀤𑁆𑀥𑀭𑀦𑁆𑀢𑀲𑁆𑀲 𑀯𑀸 𑀢𑀢𑁆𑀣𑁂𑀯 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀭𑁂𑀳𑀺 𑀉𑀧𑁆𑀧𑀸𑀝𑀺𑀢𑀸𑀦𑀺 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀢𑀸𑀦𑀺 𑀳𑀺 𑀩𑀻𑀚𑀕𑀸𑀫𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀺𑀮𑀩𑀻𑀚𑀓𑀲𑀸𑀲𑀧𑀫𑀢𑁆𑀢𑀓𑀲𑁂𑀯𑀸𑀮𑁄𑀧𑀺 𑀉𑀤𑀓𑀢𑁄 𑀉𑀤𑁆𑀥𑀢𑁄 𑀅𑀫𑀺𑀮𑀸𑀢𑁄 𑀅𑀕𑁆𑀕𑀩𑀻𑀚𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 ‘‘𑀅𑀦𑀦𑁆𑀢𑀓𑀢𑀺𑀮𑀩𑀻𑀚𑀓𑀉𑀤𑀓𑀧𑀧𑁆𑀧𑀝𑀓𑀸𑀤𑀻𑀦𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀲𑀫𑁆𑀧𑀼𑀡𑁆𑀡𑀪𑀽𑀢𑀕𑀸𑀫𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀦 𑀲𑀫𑁂𑀢𑀺, 𑀪𑀽𑀢𑀕𑀸𑀫𑁂 𑀳𑀺 𑀧𑀸𑀘𑀺𑀢𑁆𑀢𑀺𑀬𑀁, 𑀩𑀻𑀚𑀕𑀸𑀫𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀅𑀲𑀫𑁆𑀧𑀼𑀡𑁆𑀡𑀪𑀽𑀢𑀕𑀸𑀫𑁄 𑀦𑀸𑀫 𑀢𑀢𑀺𑀬𑁄 𑀓𑁄𑀝𑁆𑀞𑀸𑀲𑁄 𑀦𑁂𑀯 𑀧𑀸𑀴𑀺𑀬𑀁 𑀦 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑁄. 𑀅𑀣 𑀏𑀢𑀁 𑀩𑀻𑀚𑀕𑀸𑀫𑀲𑀗𑁆𑀕𑀳𑀁 𑀕𑀘𑁆𑀙𑀺𑀲𑁆𑀲𑀢𑀻𑀢𑀺, 𑀢𑀫𑁆𑀧𑀺 𑀦 𑀬𑀼𑀢𑁆𑀢𑀁, 𑀅𑀪𑀽𑀢𑀕𑀸𑀫𑀫𑀽𑀮𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀩𑀻𑀚𑀕𑀸𑀫𑀲𑁆𑀲𑀸𑀢𑀺. 𑀅𑀧𑀺𑀘 ‘‘𑀕𑀭𑀼𑀓𑀮𑀳𑀼𑀓𑁂𑀲𑀼 𑀕𑀭𑀼𑀓𑁂 𑀞𑀸𑀢𑀩𑁆𑀩’’𑀦𑁆𑀢𑀺 𑀏𑀢𑀁 𑀯𑀺𑀦𑀬𑀮𑀓𑁆𑀔𑀡𑀁.

𑀣𑀮𑀝𑁆𑀞𑁂 𑁋 𑀙𑀺𑀦𑁆𑀦𑀭𑀼𑀓𑁆𑀔𑀸𑀦𑀁 𑀅𑀯𑀲𑀺𑀝𑁆𑀞𑁄 𑀳𑀭𑀺𑀢𑀔𑀸𑀡𑀼 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀓𑀓𑀼𑀥𑀓𑀭𑀜𑁆𑀚𑀧𑀺𑀬𑀗𑁆𑀕𑀼𑀧𑀦𑀲𑀸𑀤𑀻𑀦𑀁 𑀔𑀸𑀡𑀼 𑀉𑀤𑁆𑀥𑀁 𑀯𑀟𑁆𑀠𑀢𑀺, 𑀲𑁄 𑀪𑀽𑀢𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄. 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀦𑀁 𑀔𑀸𑀡𑀼 𑀉𑀤𑁆𑀥𑀁 𑀦 𑀯𑀟𑁆𑀠𑀢𑀺, 𑀲𑁄 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄. 𑀓𑀤𑀮𑀺𑀬𑀸 𑀧𑀦 𑀅𑀨𑀮𑀺𑀢𑀸𑀬 𑀔𑀸𑀡𑀼 𑀪𑀽𑀢𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄, 𑀨𑀮𑀺𑀢𑀸𑀬 𑀩𑀻𑀚𑀕𑀸𑀫𑁂𑀦. 𑀓𑀤𑀮𑀻 𑀧𑀦 𑀨𑀮𑀺𑀢𑀸 𑀬𑀸𑀯 𑀦𑀻𑀮𑀧𑀡𑁆𑀡𑀸, 𑀢𑀸𑀯 𑀪𑀽𑀢𑀕𑀸𑀫𑁂𑀦𑁂𑀯 𑀲𑀗𑁆𑀕𑀳𑀺𑀢𑀸, 𑀢𑀣𑀸 𑀨𑀮𑀺𑀢𑁄 𑀯𑁂𑀴𑀼. 𑀬𑀤𑀸 𑀧𑀦 𑀅𑀕𑁆𑀕𑀢𑁄 𑀧𑀝𑁆𑀞𑀸𑀬 𑀲𑀼𑀲𑁆𑀲𑀢𑀺, 𑀢𑀤𑀸 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀓𑀢𑀭𑀩𑀻𑀚𑀕𑀸𑀫𑁂𑀦? 𑀨𑀴𑀼𑀩𑀻𑀚𑀕𑀸𑀫𑁂𑀦. 𑀓𑀺𑀁 𑀢𑀢𑁄 𑀦𑀺𑀩𑁆𑀩𑀢𑁆𑀢𑀢𑀺? 𑀦 𑀓𑀺𑀜𑁆𑀘𑀺. 𑀬𑀤𑀺 𑀳𑀺 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀪𑀽𑀢𑀕𑀸𑀫𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬. 𑀇𑀦𑁆𑀤𑀲𑀸𑀮𑀸𑀤𑀺𑀭𑀼𑀓𑁆𑀔𑁂 𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀲𑀺𑀁 𑀓𑀭𑁄𑀦𑁆𑀢𑀺, 𑀓𑀺𑀜𑁆𑀘𑀸𑀧𑀺 𑀭𑀸𑀲𑀺𑀓𑀢𑀤𑀡𑁆𑀟𑀓𑁂𑀳𑀺 𑀭𑀢𑀦𑀧𑁆𑀧𑀫𑀸𑀡𑀸𑀧𑀺 𑀲𑀸𑀔𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀩𑀻𑀚𑀕𑀸𑀫𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀫𑀡𑁆𑀟𑀧𑀢𑁆𑀣𑀸𑀬 𑀯𑀸 𑀯𑀢𑀺𑀅𑀢𑁆𑀣𑀸𑀬 𑀯𑀸 𑀯𑀮𑁆𑀮𑀺𑀆𑀭𑁄𑀧𑀦𑀢𑁆𑀣𑀸𑀬 𑀯𑀸 𑀪𑀽𑀫𑀺𑀬𑀁 𑀦𑀺𑀔𑀡𑀦𑁆𑀢𑀺, 𑀫𑀽𑀮𑁂𑀲𑀼 𑀘𑁂𑀯 𑀧𑀡𑁆𑀡𑁂𑀲𑀼 𑀘 𑀦𑀺𑀕𑁆𑀕𑀢𑁂𑀲𑀼 𑀧𑀼𑀦 𑀪𑀽𑀢𑀕𑀸𑀫𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀫𑀽𑀮𑀫𑀢𑁆𑀢𑁂𑀲𑀼 𑀧𑀦 𑀧𑀡𑁆𑀡𑀫𑀢𑁆𑀢𑁂𑀲𑀼 𑀯𑀸 𑀦𑀺𑀕𑁆𑀕𑀢𑁂𑀲𑀼 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑀸 𑀏𑀯.

𑀬𑀸𑀦𑀺 𑀓𑀸𑀦𑀺𑀘𑀺 𑀩𑀻𑀚𑀸𑀦𑀺 𑀧𑀣𑀯𑀺𑀬𑀁 𑀯𑀸 𑀉𑀤𑀓𑁂𑀦 𑀲𑀺𑀜𑁆𑀘𑀺𑀢𑁆𑀯𑀸 𑀞𑀧𑀺𑀢𑀸𑀦𑀺, 𑀓𑀧𑀸𑀮𑀸𑀤𑀻𑀲𑀼 𑀯𑀸 𑀅𑀮𑁆𑀮𑀧𑀁𑀲𑀼𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀫𑀽𑀮𑀫𑀢𑁆𑀢𑁂 𑀧𑀡𑁆𑀡𑀫𑀢𑁆𑀢𑁂 𑀯𑀸 𑀦𑀺𑀕𑁆𑀕𑀢𑁂𑀧𑀺 𑀩𑀻𑀚𑀸𑀦𑀺𑀬𑁂𑀯. 𑀲𑀘𑁂𑀧𑀺 𑀫𑀽𑀮𑀸𑀦𑀺 𑀘 𑀉𑀧𑀭𑀺 𑀅𑀗𑁆𑀓𑀼𑀭𑁄 𑀘 𑀦𑀺𑀕𑁆𑀕𑀘𑁆𑀙𑀢𑀺, 𑀬𑀸𑀯 𑀅𑀗𑁆𑀓𑀼𑀭𑁄 𑀳𑀭𑀺𑀢𑁄 𑀦 𑀳𑁄𑀢𑀺, 𑀢𑀸𑀯 𑀩𑀻𑀚𑀸𑀦𑀺𑀬𑁂𑀯. 𑀫𑀼𑀕𑁆𑀕𑀸𑀤𑀻𑀦𑀁 𑀧𑀦 𑀧𑀡𑁆𑀡𑁂𑀲𑀼 𑀉𑀝𑁆𑀞𑀺𑀢𑁂𑀲𑀼 𑀯𑀻𑀳𑀺𑀆𑀤𑀻𑀦𑀁 𑀯𑀸 𑀅𑀗𑁆𑀓𑀼𑀭𑁂 𑀳𑀭𑀺𑀢𑁂 𑀦𑀻𑀮𑀧𑀡𑁆𑀡𑀯𑀡𑁆𑀡𑁂 𑀚𑀸𑀢𑁂 𑀪𑀽𑀢𑀕𑀸𑀫𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀸𑀮𑀝𑁆𑀞𑀻𑀦𑀁 𑀧𑀞𑀫𑀁 𑀲𑀽𑀓𑀭𑀤𑀸𑀞𑀸 𑀯𑀺𑀬 𑀫𑀽𑀮𑀁 𑀦𑀺𑀕𑁆𑀕𑀘𑁆𑀙𑀢𑀺. 𑀦𑀺𑀕𑁆𑀕𑀢𑁂𑀧𑀺 𑀬𑀸𑀯 𑀉𑀧𑀭𑀺 𑀧𑀢𑁆𑀢𑀯𑀝𑁆𑀝𑀺 𑀦 𑀦𑀺𑀕𑁆𑀕𑀘𑁆𑀙𑀢𑀺, 𑀢𑀸𑀯 𑀩𑀻𑀚𑀕𑀸𑀫𑁄𑀬𑁂𑀯. 𑀦𑀸𑀴𑀺𑀓𑁂𑀭𑀲𑁆𑀲 𑀢𑀘𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑀦𑁆𑀢𑀲𑀽𑀘𑀺 𑀯𑀺𑀬 𑀅𑀗𑁆𑀓𑀼𑀭𑁄 𑀦𑀺𑀕𑁆𑀕𑀘𑁆𑀙𑀢𑀺, 𑀬𑀸𑀯 𑀫𑀺𑀕𑀲𑀺𑀗𑁆𑀕𑀲𑀤𑀺𑀲𑀸 𑀦𑀻𑀮𑀧𑀢𑁆𑀢𑀯𑀝𑁆𑀝𑀺 𑀦 𑀳𑁄𑀢𑀺, 𑀢𑀸𑀯 𑀩𑀻𑀚𑀕𑀸𑀫𑁄𑀬𑁂𑀯. 𑀫𑀽𑀮𑁂 𑀅𑀦𑀺𑀕𑁆𑀕𑀢𑁂𑀧𑀺 𑀢𑀸𑀤𑀺𑀲𑀸𑀬 𑀧𑀢𑁆𑀢𑀯𑀝𑁆𑀝𑀺𑀬𑀸 𑀚𑀸𑀢𑀸𑀬 𑀅𑀫𑀽𑀮𑀓𑀪𑀽𑀢𑀕𑀸𑀫𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺.

𑀅𑀫𑁆𑀩𑀝𑁆𑀞𑀺𑀆𑀤𑀻𑀦𑀺 𑀯𑀻𑀳𑀺𑀆𑀤𑀻𑀳𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀸𑀦𑀺. 𑀯𑀦𑁆𑀤𑀸𑀓𑀸 𑀯𑀸 𑀅𑀜𑁆𑀜𑀸 𑀯𑀸 𑀬𑀸 𑀓𑀸𑀘𑀺 𑀭𑀼𑀓𑁆𑀔𑁂 𑀚𑀸𑀬𑀺𑀢𑁆𑀯𑀸 𑀭𑀼𑀓𑁆𑀔𑀁 𑀑𑀢𑁆𑀣𑀭𑀢𑀺, 𑀭𑀼𑀓𑁆𑀔𑁄𑀯 𑀢𑀲𑁆𑀲𑀸 𑀞𑀸𑀦𑀁, 𑀢𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀯𑀸 𑀢𑀢𑁄 𑀉𑀤𑁆𑀥𑀭𑀦𑁆𑀢𑀲𑁆𑀲 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀏𑀓𑀸 𑀅𑀫𑀽𑀮𑀺𑀓𑀸 𑀮𑀢𑀸 𑀳𑁄𑀢𑀺, 𑀅𑀗𑁆𑀕𑀼𑀮𑀺𑀯𑁂𑀞𑀓𑁄 𑀯𑀺𑀬 𑀯𑀦𑀧𑁆𑀧𑀕𑀼𑀫𑁆𑀩𑀤𑀡𑁆𑀟𑀓𑁂 𑀯𑁂𑀞𑁂𑀢𑀺, 𑀢𑀲𑁆𑀲𑀸𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄. 𑀕𑁂𑀳𑀫𑀼𑀔𑀧𑀸𑀓𑀸𑀭𑀯𑁂𑀤𑀺𑀓𑀸𑀘𑁂𑀢𑀺𑀬𑀸𑀤𑀻𑀲𑀼 𑀦𑀻𑀮𑀯𑀡𑁆𑀡𑁄 𑀲𑁂𑀯𑀸𑀮𑁄 𑀳𑁄𑀢𑀺, 𑀬𑀸𑀯 𑀤𑁆𑀯𑁂 𑀢𑀻𑀡𑀺 𑀧𑀢𑁆𑀢𑀸𑀦𑀺 𑀦 𑀲𑀜𑁆𑀚𑀸𑀬𑀦𑁆𑀢𑀺 𑀢𑀸𑀯 𑀅𑀕𑁆𑀕𑀩𑀻𑀚𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀧𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼. 𑀢𑀲𑁆𑀫𑀸 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀼𑀥𑀸𑀮𑁂𑀧𑀫𑁆𑀧𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀮𑀺𑀢𑁆𑀢𑀲𑁆𑀲 𑀉𑀧𑀭𑀺𑀲𑁆𑀦𑁂𑀳𑀮𑁂𑀧𑁄 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀦𑀺𑀤𑀸𑀖𑀲𑀫𑀬𑁂 𑀲𑀼𑀓𑁆𑀔𑀲𑁂𑀯𑀸𑀮𑁄 𑀢𑀺𑀝𑁆𑀞𑀢𑀺, 𑀢𑀁 𑀲𑀫𑁆𑀫𑀼𑀜𑁆𑀚𑀦𑀻𑀆𑀤𑀻𑀳𑀺 𑀖𑀁𑀲𑀺𑀢𑁆𑀯𑀸 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀸𑀦𑀻𑀬𑀖𑀝𑀸𑀤𑀻𑀦𑀁 𑀩𑀳𑀺 𑀲𑁂𑀯𑀸𑀮𑁄 𑀤𑀼𑀓𑁆𑀓𑀝𑀯𑀢𑁆𑀣𑀼, 𑀅𑀦𑁆𑀢𑁄 𑀅𑀩𑁆𑀩𑁄𑀳𑀸𑀭𑀺𑀓𑁄. 𑀤𑀦𑁆𑀢𑀓𑀝𑁆𑀞𑀧𑀽𑀯𑀸𑀤𑀻𑀲𑀼 𑀓𑀡𑁆𑀡𑀓𑀫𑁆𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀘𑁂 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑁬𑁬).

𑀧𑀸𑀲𑀸𑀡𑀚𑀸𑀢𑀺𑀧𑀸𑀲𑀸𑀡𑀤𑀤𑁆𑀤𑀼𑀲𑁂𑀯𑀸𑀮𑀲𑁂𑀮𑁂𑀬𑁆𑀬𑀓𑀸𑀤𑀻𑀦𑀺 𑀅𑀳𑀭𑀺𑀢𑀯𑀡𑁆𑀡𑀸𑀦𑀺 𑀅𑀧𑀢𑁆𑀢𑀓𑀸𑀦𑀺 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸𑀦𑀺. 𑀅𑀳𑀺𑀘𑁆𑀙𑀢𑁆𑀢𑀓𑀁 𑀬𑀸𑀯 𑀫𑀓𑀼𑀴𑀁 𑀳𑁄𑀢𑀺, 𑀢𑀸𑀯 𑀤𑀼𑀓𑁆𑀓𑀝𑀯𑀢𑁆𑀣𑀼. 𑀧𑀼𑀧𑁆𑀨𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀅𑀮𑁆𑀮𑀭𑀼𑀓𑁆𑀔𑀢𑁄 𑀧𑀦 𑀅𑀳𑀺𑀘𑁆𑀙𑀢𑁆𑀢𑀓𑀁 𑀕𑀡𑁆𑀳𑀦𑁆𑀢𑁄 𑀭𑀼𑀓𑁆𑀔𑀢𑁆𑀢𑀘𑀁 𑀯𑀺𑀓𑁄𑀧𑁂𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀁. 𑀭𑀼𑀓𑁆𑀔𑀧𑀧𑁆𑀧𑀝𑀺𑀓𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀬𑀸 𑀧𑀦 𑀇𑀦𑁆𑀤𑀲𑀸𑀮𑀓𑀓𑀼𑀥𑀸𑀤𑀻𑀦𑀁 𑀧𑀧𑁆𑀧𑀝𑀺𑀓𑀸 𑀭𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀁 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀦𑀺𑀬𑁆𑀬𑀸𑀲𑀫𑁆𑀧𑀺 𑀭𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀞𑀺𑀢𑀁 𑀲𑀼𑀓𑁆𑀔𑀭𑀼𑀓𑁆𑀔𑁂 𑀯𑀸 𑀮𑀕𑁆𑀕𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀮𑁆𑀮𑀭𑀼𑀓𑁆𑀔𑀢𑁄 𑀦 𑀯𑀝𑁆𑀝𑀢𑀺. 𑀮𑀸𑀔𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀭𑀼𑀓𑁆𑀔𑀁 𑀘𑀸𑀮𑁂𑀢𑁆𑀯𑀸 𑀧𑀡𑁆𑀟𑀼𑀧𑀮𑀸𑀲𑀁 𑀯𑀸 𑀧𑀭𑀺𑀡𑀢𑀓𑀡𑀺𑀓𑀸𑀭𑀸𑀤𑀺𑀧𑀼𑀧𑁆𑀨𑀁 𑀯𑀸 𑀧𑀸𑀢𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑁂𑀦 𑀫𑀼𑀤𑀼𑀓𑁂𑀲𑀼 𑀇𑀦𑁆𑀤𑀲𑀸𑀮𑀦𑀼𑀳𑀻𑀔𑀦𑁆𑀥𑀸𑀤𑀻𑀲𑀼 𑀯𑀸 𑀢𑀢𑁆𑀣𑀚𑀸𑀢𑀓𑀢𑀸𑀮𑀧𑀡𑁆𑀡𑀸𑀤𑀻𑀲𑀼 𑀯𑀸 𑀅𑀓𑁆𑀔𑀭𑀁 𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄.

𑀲𑀸𑀫𑀡𑁂𑀭𑀸𑀦𑀁 𑀧𑀼𑀧𑁆𑀨𑀁 𑀑𑀘𑀺𑀦𑀦𑁆𑀢𑀸𑀦𑀁 𑀲𑀸𑀔𑀁 𑀑𑀦𑀸𑀫𑁂𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀳𑀺 𑀧𑀦 𑀧𑀼𑀧𑁆𑀨𑁂𑀳𑀺 𑀧𑀸𑀦𑀻𑀬𑀁 𑀦 𑀯𑀸𑀲𑁂𑀢𑀩𑁆𑀩𑀁. 𑀧𑀸𑀦𑀻𑀬𑀯𑀸𑀲𑀢𑁆𑀣𑀺𑀓𑁂𑀦 𑀲𑀸𑀫𑀡𑁂𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀘𑀺𑀦𑀸𑀧𑁂𑀢𑀩𑁆𑀩𑀸𑀦𑀺. 𑀨𑀮𑀲𑀸𑀔𑀸𑀧𑀺 𑀅𑀢𑁆𑀢𑀦𑀸 𑀔𑀸𑀤𑀺𑀢𑀼𑀓𑀸𑀫𑁂𑀦 𑀦 𑀑𑀦𑀸𑀫𑁂𑀢𑀩𑁆𑀩𑀸. 𑀲𑀸𑀫𑀡𑁂𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀨𑀮𑀁 𑀕𑀸𑀳𑀸𑀧𑁂𑀢𑀩𑁆𑀩𑀁. 𑀬𑀁𑀓𑀺𑀜𑁆𑀘𑀺 𑀕𑀘𑁆𑀙𑀁 𑀯𑀸 𑀮𑀢𑀁 𑀯𑀸 𑀉𑀧𑁆𑀧𑀸𑀝𑁂𑀦𑁆𑀢𑁂𑀳𑀺 𑀲𑀸𑀫𑀡𑁂𑀭𑁂𑀳𑀺 𑀲𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀲𑀁 𑀧𑀦 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀅𑀦𑀸𑀓𑀟𑁆𑀠𑀦𑁆𑀢𑁂𑀦 𑀓𑀟𑁆𑀠𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁂𑀦 𑀯𑀺𑀬 𑀅𑀕𑁆𑀕𑁂 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀬𑁂𑀲𑀁 𑀭𑀼𑀓𑁆𑀔𑀸𑀦𑀁 𑀲𑀸𑀔𑀸 𑀭𑀼𑀳𑀢𑀺, 𑀢𑁂𑀲𑀁 𑀲𑀸𑀔𑀁 𑀫𑀓𑁆𑀔𑀺𑀓𑀸𑀩𑀻𑀚𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀓𑀧𑁆𑀧𑀺𑀬𑀁 𑀅𑀓𑀸𑀭𑀸𑀧𑁂𑀢𑁆𑀯𑀸 𑀕𑀳𑀺𑀢𑀁 𑀢𑀘𑁂 𑀯𑀸 𑀧𑀢𑁆𑀢𑁂 𑀯𑀸 𑀅𑀦𑁆𑀢𑀫𑀲𑁄 𑀦𑀔𑁂𑀦𑀧𑀺 𑀯𑀺𑀮𑀺𑀔𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀅𑀮𑁆𑀮𑀲𑀺𑀗𑁆𑀕𑀺𑀯𑁂𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀻𑀢𑀮𑁂 𑀧𑀤𑁂𑀲𑁂 𑀞𑀧𑀺𑀢𑀲𑁆𑀲 𑀫𑀽𑀮𑀁 𑀲𑀜𑁆𑀚𑀸𑀬𑀢𑀺, 𑀉𑀧𑀭𑀺𑀪𑀸𑀕𑁂 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀅𑀗𑁆𑀓𑀼𑀭𑁄 𑀚𑀸𑀬𑀢𑀺, 𑀳𑁂𑀝𑁆𑀞𑀸𑀪𑀸𑀕𑁂 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀽𑀮𑁂 𑀘 𑀦𑀻𑀮𑀗𑁆𑀓𑀼𑀭𑁂 𑀘 𑀚𑀸𑀢𑁂 𑀦 𑀯𑀝𑁆𑀝𑀢𑀺.

𑀙𑀺𑀦𑁆𑀤𑀢𑀺 𑀯𑀸 𑀙𑁂𑀤𑀸𑀧𑁂𑀢𑀺 𑀯𑀸𑀢𑀺 𑀅𑀦𑁆𑀢𑀫𑀲𑁄 𑀲𑀫𑁆𑀫𑀼𑀜𑁆𑀚𑀦𑁄𑀲𑀮𑀸𑀓𑀸𑀬𑀧𑀺 𑀢𑀺𑀡𑀸𑀦𑀺 𑀙𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀪𑀽𑀫𑀺𑀁 𑀲𑀫𑁆𑀫𑀚𑁆𑀚𑀦𑁆𑀢𑁄 𑀲𑀬𑀁 𑀯𑀸 𑀙𑀺𑀦𑁆𑀤𑀢𑀺, 𑀅𑀜𑁆𑀜𑁂𑀦 𑀯𑀸 𑀙𑁂𑀤𑀸𑀧𑁂𑀢𑀺. 𑀪𑀺𑀦𑁆𑀤𑀢𑀺 𑀯𑀸 𑀪𑁂𑀤𑀸𑀧𑁂𑀢𑀺 𑀯𑀸𑀢𑀺 𑀅𑀦𑁆𑀢𑀫𑀲𑁄 𑀘𑀗𑁆𑀓𑀫𑀦𑁆𑀢𑁄𑀧𑀺 𑀙𑀺𑀚𑁆𑀚𑀦𑀓𑀁 𑀙𑀺𑀚𑁆𑀚𑀢𑀼, 𑀪𑀺𑀚𑁆𑀚𑀦𑀓𑀁 𑀪𑀺𑀚𑁆𑀚𑀢𑀼, 𑀘𑀗𑁆𑀓𑀫𑀺𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀻𑀢𑀺 𑀲𑀜𑁆𑀘𑀺𑀘𑁆𑀘 𑀧𑀸𑀤𑁂𑀳𑀺 𑀅𑀓𑁆𑀓𑀫𑀦𑁆𑀢𑁄 𑀢𑀺𑀡𑀯𑀮𑁆𑀮𑀺𑀆𑀤𑀻𑀦𑀺 𑀲𑀬𑀁 𑀯𑀸 𑀪𑀺𑀦𑁆𑀤𑀢𑀺 𑀅𑀜𑁆𑀜𑁂𑀦 𑀯𑀸 𑀪𑁂𑀤𑀸𑀧𑁂𑀢𑀺. 𑀲𑀘𑁂𑀧𑀺 𑀳𑀺 𑀢𑀺𑀡𑀁 𑀯𑀸 𑀮𑀢𑀁 𑀯𑀸 𑀕𑀡𑁆𑀞𑀺𑀁 𑀓𑀭𑁄𑀦𑁆𑀢𑀲𑁆𑀲 𑀪𑀺𑀚𑁆𑀚𑀢𑀺, 𑀕𑀡𑁆𑀞𑀺𑀧𑀺 𑀦 𑀓𑀸𑀢𑀩𑁆𑀩𑁄. 𑀢𑀸𑀮𑀭𑀼𑀓𑁆𑀔𑀸𑀤𑀻𑀲𑀼 𑀧𑀦 𑀘𑁄𑀭𑀸𑀦𑀁 𑀅𑀦𑀸𑀭𑀼𑀳𑀦𑀢𑁆𑀣𑀸𑀬 𑀤𑀸𑀭𑀼𑀫𑀓𑁆𑀓𑀝𑀓𑀁 𑀆𑀓𑁄𑀝𑁂𑀦𑁆𑀢𑀺, 𑀓𑀡𑁆𑀝𑀓𑁂 𑀩𑀦𑁆𑀥𑀦𑁆𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀏𑀯𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀤𑀸𑀭𑀼𑀫𑀓𑁆𑀓𑀝𑀓𑁄 𑀭𑀼𑀓𑁆𑀔𑁂 𑀅𑀮𑁆𑀮𑀻𑀦𑀫𑀢𑁆𑀢𑁄𑀯 𑀳𑁄𑀢𑀺, 𑀭𑀼𑀓𑁆𑀔𑀁 𑀦 𑀧𑀻𑀴𑁂𑀢𑀺, 𑀯𑀝𑁆𑀝𑀢𑀺. ‘‘𑀭𑀼𑀓𑁆𑀔𑀁 𑀙𑀺𑀦𑁆𑀤, 𑀮𑀢𑀁 𑀙𑀺𑀦𑁆𑀤, 𑀓𑀦𑁆𑀤𑀁 𑀯𑀸 𑀫𑀽𑀮𑀁 𑀯𑀸 𑀉𑀧𑁆𑀧𑀸𑀝𑁂𑀳𑀻’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀅𑀦𑀺𑀬𑀸𑀫𑀺𑀢𑀢𑁆𑀢𑀸. 𑀦𑀺𑀬𑀸𑀫𑁂𑀢𑁆𑀯𑀸 𑀧𑀦 ‘‘𑀇𑀫𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀸’’𑀢𑀺𑀆𑀤𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀦𑀸𑀫𑀁 𑀕𑀳𑁂𑀢𑁆𑀯𑀸𑀧𑀺 ‘‘𑀅𑀫𑁆𑀩𑀭𑀼𑀓𑁆𑀔𑀁 𑀘𑀢𑀼𑀭𑀲𑁆𑀲𑀯𑀮𑁆𑀮𑀺𑀁 𑀆𑀮𑀼𑀯𑀓𑀦𑁆𑀤𑀁 𑀫𑀼𑀜𑁆𑀚𑀢𑀺𑀡𑀁 𑀅𑀲𑀼𑀓𑀭𑀼𑀓𑁆𑀔𑀘𑁆𑀙𑀮𑁆𑀮𑀺𑀁 𑀙𑀺𑀦𑁆𑀤 𑀪𑀺𑀦𑁆𑀤 𑀉𑀧𑁆𑀧𑀸𑀝𑁂𑀳𑀻’’𑀢𑀺𑀆𑀤𑀺𑀯𑀘𑀦𑀫𑁆𑀧𑀺 𑀅𑀦𑀺𑀬𑀸𑀫𑀺𑀢𑀫𑁂𑀯 𑀳𑁄𑀢𑀺. ‘‘𑀇𑀫𑀁 𑀅𑀫𑁆𑀩𑀭𑀼𑀓𑁆𑀔’’𑀦𑁆𑀢𑀺𑀆𑀤𑀺𑀯𑀘𑀦𑀫𑁂𑀯 𑀳𑀺 𑀦𑀺𑀬𑀸𑀫𑀺𑀢𑀁 𑀦𑀸𑀫, 𑀢𑀁 𑀦 𑀯𑀝𑁆𑀝𑀢𑀺.

𑀧𑀘𑀢𑀺 𑀯𑀸 𑀧𑀘𑀸𑀧𑁂𑀢𑀺 𑀯𑀸𑀢𑀺 𑀅𑀦𑁆𑀢𑀫𑀲𑁄 𑀧𑀢𑁆𑀢𑀫𑁆𑀧𑀺 𑀧𑀘𑀺𑀢𑀼𑀓𑀸𑀫𑁄 𑀢𑀺𑀡𑀸𑀤𑀻𑀦𑀁 𑀉𑀧𑀭𑀺 𑀲𑀜𑁆𑀘𑀺𑀘𑁆𑀘 𑀅𑀕𑁆𑀕𑀺𑀁 𑀓𑀭𑁄𑀦𑁆𑀢𑁄 𑀲𑀬𑀁 𑀯𑀸 𑀧𑀘𑀢𑀺, 𑀅𑀜𑁆𑀜𑁂𑀦 𑀯𑀸 𑀧𑀘𑀸𑀧𑁂𑀢𑀻𑀢𑀺 𑀲𑀩𑁆𑀩𑀁 𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀺𑀬𑀸𑀫𑁂𑀢𑁆𑀯𑀸 𑀧𑀦 ‘‘𑀫𑀼𑀕𑁆𑀕𑁂 𑀧𑀘, 𑀫𑀸𑀲𑁂 𑀧𑀘𑀸’’𑀢𑀺𑀆𑀤𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀇𑀫𑁂 𑀫𑀼𑀕𑁆𑀕𑁂 𑀧𑀘, 𑀇𑀫𑁂 𑀫𑀸𑀲𑁂 𑀧𑀘𑀸’’𑀢𑀺 𑀏𑀯𑀁 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺.

𑀅𑀦𑀸𑀧𑀢𑁆𑀢𑀺 𑀇𑀫𑀁 𑀚𑀸𑀦𑀸𑀢𑀺𑀆𑀤𑀻𑀲𑀼 ‘‘𑀇𑀫𑀁 𑀫𑀽𑀮𑀪𑁂𑀲𑀚𑁆𑀚𑀁 𑀚𑀸𑀦, 𑀇𑀫𑀁 𑀫𑀽𑀮𑀁 𑀯𑀸 𑀧𑀡𑁆𑀡𑀁 𑀯𑀸 𑀤𑁂𑀳𑀺, 𑀇𑀫𑀁 𑀭𑀼𑀓𑁆𑀔𑀁 𑀯𑀸 𑀮𑀢𑀁 𑀯𑀸 𑀆𑀳𑀭, 𑀇𑀫𑀺𑀦𑀸 𑀧𑀼𑀧𑁆𑀨𑁂𑀦 𑀯𑀸 𑀨𑀮𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀅𑀢𑁆𑀣𑁄, 𑀇𑀫𑀁 𑀭𑀼𑀓𑁆𑀔𑀁 𑀯𑀸 𑀮𑀢𑀁 𑀯𑀸 𑀨𑀮𑀁 𑀯𑀸 𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀪𑀽𑀢𑀕𑀸𑀫𑀧𑀭𑀺𑀫𑁄𑀘𑀦𑀁 𑀓𑀢𑀁 𑀳𑁄𑀢𑀺. 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦 𑀧𑀦 𑀩𑀻𑀚𑀕𑀸𑀫𑀧𑀭𑀺𑀫𑁄𑀘𑀦𑀢𑁆𑀣𑀁 𑀧𑀼𑀦 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑀩𑁆𑀩𑀁.

𑀓𑀧𑁆𑀧𑀺𑀬𑀓𑀭𑀡𑀜𑁆𑀘𑁂𑀢𑁆𑀣 𑀇𑀫𑀺𑀦𑀸 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀕𑁆𑀕𑀺𑀧𑀭𑀺𑀚𑀺𑀢𑀁 𑀲𑀢𑁆𑀣𑀧𑀭𑀺𑀚𑀺𑀢𑀁 𑀦𑀔𑀧𑀭𑀺𑀚𑀺𑀢𑀁 𑀅𑀩𑀻𑀚𑀁 𑀦𑀺𑀩𑁆𑀩𑀝𑁆𑀝𑀩𑀻𑀚𑀫𑁂𑀯 𑀧𑀜𑁆𑀘𑀫’’𑀦𑁆𑀢𑀺. 𑀢𑀢𑁆𑀣 ‘‘𑀅𑀕𑁆𑀕𑀺𑀧𑀭𑀺𑀚𑀺𑀢’’𑀦𑁆𑀢𑀺 𑀅𑀕𑁆𑀕𑀺𑀦𑀸 𑀧𑀭𑀺𑀚𑀺𑀢𑀁 𑀅𑀥𑀺𑀪𑀽𑀢𑀁 𑀤𑀟𑁆𑀠𑀁 𑀨𑀼𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀢𑁆𑀣𑀧𑀭𑀺𑀚𑀺𑀢’’𑀦𑁆𑀢𑀺 𑀲𑀢𑁆𑀣𑁂𑀦 𑀧𑀭𑀺𑀚𑀺𑀢𑀁 𑀅𑀥𑀺𑀪𑀽𑀢𑀁 𑀙𑀺𑀦𑁆𑀦𑀁 𑀯𑀺𑀤𑁆𑀥𑀁 𑀯𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀦𑀔𑀧𑀭𑀺𑀚𑀺𑀢𑁂. 𑀅𑀩𑀻𑀚𑀦𑀺𑀩𑁆𑀩𑀝𑁆𑀝𑀩𑀻𑀚𑀸𑀦𑀺 𑀲𑀬𑀫𑁂𑀯 𑀓𑀧𑁆𑀧𑀺𑀬𑀸𑀦𑀺. 𑀅𑀕𑁆𑀕𑀺𑀦𑀸 𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦 𑀓𑀝𑁆𑀞𑀕𑁆𑀕𑀺𑀕𑁄𑀫𑀬𑀕𑁆𑀕𑀺𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀦𑁆𑀢𑀫𑀲𑁄 𑀮𑁄𑀳𑀔𑀡𑁆𑀟𑁂𑀦𑀧𑀺 𑀆𑀤𑀺𑀢𑁆𑀢𑁂𑀦 𑀓𑀧𑁆𑀧𑀺𑀬𑀁 𑀓𑀸𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀏𑀓𑀤𑁂𑀲𑁂 𑀨𑀼𑀲𑀦𑁆𑀢𑁂𑀦 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀲𑀢𑁆𑀣𑁂𑀦 𑀓𑀭𑁄𑀦𑁆𑀢𑁂𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀮𑁄𑀳𑀫𑀬𑀲𑀢𑁆𑀣𑀲𑁆𑀲 𑀅𑀦𑁆𑀢𑀫𑀲𑁄 𑀲𑀽𑀘𑀺𑀦𑀔𑀘𑁆𑀙𑁂𑀤𑀦𑀸𑀦𑀫𑁆𑀧𑀺 𑀢𑀼𑀡𑁆𑀟𑁂𑀦 𑀯𑀸 𑀥𑀸𑀭𑀸𑀬 𑀯𑀸 𑀙𑁂𑀤𑀁 𑀯𑀸 𑀯𑁂𑀥𑀁 𑀯𑀸 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀦𑀔𑁂𑀦 𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦 𑀧𑀽𑀢𑀺𑀦𑀔𑁂𑀦 𑀦 𑀓𑀸𑀢𑀩𑁆𑀩𑀁. 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀫𑀓𑁆𑀓𑀝𑀸𑀤𑀻𑀦𑀁 𑀲𑀓𑀼𑀦𑁆𑀢𑀸𑀦𑀜𑁆𑀘 𑀦𑀔𑀸 𑀢𑀺𑀔𑀺𑀡𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀓𑀸𑀢𑀩𑁆𑀩𑀁. 𑀅𑀲𑁆𑀲𑀫𑀳𑀺𑀁𑀲𑀲𑀽𑀓𑀭𑀫𑀺𑀕𑀕𑁄𑀭𑀽𑀧𑀸𑀤𑀻𑀦𑀁 𑀔𑀼𑀭𑀸 𑀅𑀢𑀺𑀔𑀺𑀡𑀸, 𑀢𑁂𑀳𑀺 𑀦 𑀓𑀸𑀢𑀩𑁆𑀩𑀁, 𑀓𑀢𑀫𑁆𑀧𑀺 𑀅𑀓𑀢𑀁 𑀳𑁄𑀢𑀺. 𑀳𑀢𑁆𑀣𑀺𑀦𑀔𑀸 𑀧𑀦 𑀔𑀼𑀭𑀸 𑀦 𑀳𑁄𑀦𑁆𑀢𑀺, 𑀢𑁂𑀳𑀺 𑀯𑀝𑁆𑀝𑀢𑀺. 𑀬𑁂𑀳𑀺 𑀧𑀦 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑁂𑀳𑀺 𑀢𑀢𑁆𑀣𑀚𑀸𑀢𑀓𑁂𑀳𑀺𑀧𑀺 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀺𑀢𑀓𑁂𑀳𑀺𑀧𑀺 𑀙𑁂𑀤𑀁 𑀯𑀸 𑀯𑁂𑀥𑀁 𑀯𑀸 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩𑀁.

𑀢𑀢𑁆𑀣 𑀲𑀘𑁂𑀧𑀺 𑀩𑀻𑀚𑀸𑀦𑀁 𑀧𑀩𑁆𑀩𑀢𑀫𑀢𑁆𑀢𑁄 𑀭𑀸𑀲𑀺 𑀭𑀼𑀓𑁆𑀔𑀲𑀳𑀲𑁆𑀲𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀉𑀘𑁆𑀙𑀽𑀦𑀁 𑀯𑀸 𑀫𑀳𑀸𑀪𑀸𑀭𑁄 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁄 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀩𑀻𑀚𑁂 𑀯𑀸 𑀭𑀼𑀓𑁆𑀔𑀲𑀸𑀔𑀸𑀬 𑀯𑀸 𑀉𑀘𑁆𑀙𑀼𑀫𑁆𑀳𑀺 𑀯𑀸 𑀓𑀧𑁆𑀧𑀺𑀬𑁂 𑀓𑀢𑁂 𑀲𑀩𑁆𑀩𑀁 𑀓𑀢𑀁 𑀳𑁄𑀢𑀺. 𑀉𑀘𑁆𑀙𑀽 𑀘 𑀤𑀸𑀭𑀽𑀦𑀺 𑀘 𑀏𑀓𑀢𑁄 𑀩𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀉𑀘𑁆𑀙𑀼𑀁 𑀓𑀧𑁆𑀧𑀺𑀬𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀤𑀸𑀭𑀼𑀁 𑀯𑀺𑀚𑁆𑀛𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀲𑀘𑁂 𑀧𑀦 𑀬𑀸𑀬 𑀭𑀚𑁆𑀚𑀼𑀬𑀸 𑀯𑀸 𑀯𑀮𑁆𑀮𑀺𑀬𑀸 𑀯𑀸 𑀩𑀤𑁆𑀥𑀸𑀦𑀺, 𑀢𑀁 𑀯𑀺𑀚𑁆𑀛𑀢𑀺, 𑀦 𑀯𑀝𑁆𑀝𑀢𑀺. 𑀉𑀘𑁆𑀙𑀼𑀔𑀡𑁆𑀟𑀸𑀦𑀁 𑀧𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀆𑀳𑀭𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀔𑀡𑁆𑀟𑁂 𑀓𑀧𑁆𑀧𑀺𑀬𑁂 𑀓𑀢𑁂 𑀲𑀩𑁆𑀩𑀁 𑀓𑀢𑀫𑁂𑀯 𑀳𑁄𑀢𑀺. 𑀫𑀭𑀺𑀘𑀧𑀓𑁆𑀓𑀸𑀤𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀪𑀢𑁆𑀢𑀁 𑀆𑀳𑀭𑀦𑁆𑀢𑀺, ‘‘𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑀘𑁂𑀧𑀺 𑀪𑀢𑁆𑀢𑀲𑀺𑀢𑁆𑀣𑁂 𑀯𑀺𑀚𑁆𑀛𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀸𑀕𑀼𑀬𑀸 𑀧𑀓𑁆𑀔𑀺𑀢𑁆𑀢𑀸𑀦𑀺 𑀧𑀦 𑀏𑀓𑀸𑀩𑀤𑁆𑀥𑀸𑀦𑀺 𑀳𑀼𑀢𑁆𑀯𑀸 𑀦 𑀲𑀦𑁆𑀢𑀺𑀝𑁆𑀞𑀦𑁆𑀢𑀺, 𑀢𑀢𑁆𑀣 𑀏𑀓𑀫𑁂𑀓𑀁 𑀯𑀺𑀚𑁆𑀛𑀺𑀢𑁆𑀯𑀸 𑀓𑀧𑁆𑀧𑀺𑀬𑀁 𑀓𑀸𑀢𑀩𑁆𑀩𑀫𑁂𑀯. 𑀓𑀧𑀺𑀢𑁆𑀣𑀨𑀮𑀸𑀤𑀻𑀦𑀁 𑀅𑀦𑁆𑀢𑁄 𑀫𑀺𑀜𑁆𑀚𑀁 𑀓𑀝𑀸𑀳𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀜𑁆𑀘𑀭𑀢𑀺, 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀏𑀓𑀸𑀩𑀤𑁆𑀥𑀁 𑀳𑁄𑀢𑀺, 𑀓𑀝𑀸𑀳𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀧𑀸𑀲𑀸𑀡𑀭𑀼𑀓𑁆𑀔𑀸𑀤𑀻𑀦𑀺 𑀯𑀸 𑀧𑀯𑀝𑁆𑀝𑁂𑀦𑁆𑀢𑀲𑁆𑀲 𑀲𑀸𑀔𑀁 𑀯𑀸 𑀓𑀟𑁆𑀠𑀦𑁆𑀢𑀲𑁆𑀲 𑀓𑀢𑁆𑀢𑀭𑀤𑀡𑁆𑀟𑁂𑀦 𑀯𑀸 𑀪𑀽𑀫𑀺𑀁 𑀧𑀳𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀢𑀺𑀡𑀸𑀦𑀺 𑀙𑀺𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀢𑁂𑀦 𑀙𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀲𑀜𑁆𑀘𑀺𑀘𑁆𑀘 𑀅𑀘𑁆𑀙𑀺𑀦𑁆𑀦𑀢𑁆𑀢𑀸 𑀅𑀲𑀜𑁆𑀘𑀺𑀘𑁆𑀘 𑀙𑀺𑀦𑁆𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀇𑀢𑀺 𑀅𑀲𑀜𑁆𑀘𑀺𑀘𑁆𑀘 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀅𑀲𑀢𑀺𑀬𑀸𑀢𑀺 𑀅𑀜𑁆𑀜𑀯𑀺𑀳𑀺𑀢𑁄 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀓𑀣𑁂𑀦𑁆𑀢𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀯𑀸 𑀳𑀢𑁆𑀣𑁂𑀦 𑀯𑀸 𑀢𑀺𑀡𑀁 𑀯𑀸 𑀮𑀢𑀁 𑀯𑀸 𑀙𑀺𑀦𑁆𑀤𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀅𑀲𑀢𑀺𑀬𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣𑀩𑁆𑀪𑀦𑁆𑀢𑀭𑁂 𑀩𑀻𑀚𑀕𑀸𑀫𑁄𑀢𑀺 𑀯𑀸 𑀪𑀽𑀢𑀕𑀸𑀫𑁄𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀙𑀺𑀦𑁆𑀤𑀸𑀫𑀻𑀢𑀺𑀧𑀺 𑀦 𑀚𑀸𑀦𑀸𑀢𑀺, 𑀓𑁂𑀯𑀮𑀁 𑀯𑀢𑀺𑀬𑀸 𑀯𑀸 𑀧𑀮𑀸𑀮𑀧𑀼𑀜𑁆𑀚𑁂 𑀯𑀸 𑀦𑀺𑀔𑀸𑀤𑀦𑀁 𑀯𑀸 𑀔𑀡𑀺𑀢𑁆𑀢𑀺𑀁 𑀯𑀸 𑀓𑀼𑀤𑀸𑀮𑀁 𑀯𑀸 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀞𑀧𑁂𑀢𑀺, 𑀟𑀬𑁆𑀳𑀫𑀸𑀦𑀳𑀢𑁆𑀣𑁄 𑀯𑀸 𑀅𑀕𑁆𑀕𑀺𑀁 𑀧𑀸𑀢𑁂𑀢𑀺, 𑀢𑀢𑁆𑀭 𑀘𑁂 𑀢𑀺𑀡𑀸𑀦𑀺 𑀙𑀺𑀚𑁆𑀚𑀦𑁆𑀢𑀺 𑀯𑀸 𑀟𑀬𑁆𑀳𑀦𑁆𑀢𑀺 𑀯𑀸 𑀅𑀦𑀸𑀧𑀢𑁆𑀢𑀺. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 𑀧𑀦 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 ‘‘𑀲𑀘𑁂 𑀪𑀺𑀓𑁆𑀔𑀼 𑀭𑀼𑀓𑁆𑀔𑁂𑀦 𑀯𑀸 𑀅𑀚𑁆𑀛𑁄𑀢𑁆𑀣𑀝𑁄 𑀳𑁄𑀢𑀺, 𑀑𑀧𑀸𑀢𑁂 𑀯𑀸 𑀧𑀢𑀺𑀢𑁄 𑀲𑀓𑁆𑀓𑀸 𑀘 𑀳𑁄𑀢𑀺 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀪𑀽𑀫𑀺𑀁 𑀯𑀸 𑀔𑀡𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁, 𑀚𑀻𑀯𑀺𑀢𑀳𑁂𑀢𑀼𑀧𑀺 𑀅𑀢𑁆𑀢𑀦𑀸 𑀦 𑀓𑀸𑀢𑀩𑁆𑀩𑀁. 𑀅𑀜𑁆𑀜𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀪𑀽𑀫𑀺𑀁 𑀯𑀸 𑀔𑀡𑀺𑀢𑁆𑀯𑀸 𑀭𑀼𑀓𑁆𑀔𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀅𑀮𑁆𑀮𑀭𑀼𑀓𑁆𑀔𑀢𑁄 𑀯𑀸 𑀤𑀡𑁆𑀟𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀁 𑀭𑀼𑀓𑁆𑀔𑀁 𑀧𑀯𑀝𑁆𑀝𑁂𑀢𑁆𑀯𑀸 𑀦𑀺𑀓𑁆𑀔𑀸𑀫𑁂𑀢𑀼𑀁 𑀯𑀝𑁆𑀝𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀯𑀟𑀸𑀳𑁂 𑀟𑀬𑁆𑀳𑀫𑀸𑀦𑁂 𑀧𑀝𑀕𑁆𑀕𑀺𑀁 𑀤𑀸𑀢𑀼𑀁, 𑀧𑀭𑀺𑀢𑁆𑀢𑀁 𑀓𑀸𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁮𑁩) 𑀇𑀤𑀁 𑀧𑀦 𑀏𑀓𑀫𑁂𑀯 𑀲𑀼𑀢𑁆𑀢𑀁 𑀤𑀺𑀲𑁆𑀲𑀢𑀺. 𑀲𑀘𑁂 𑀏𑀢𑀲𑁆𑀲 𑀅𑀦𑀼𑀮𑁄𑀫𑀁 ‘‘𑀅𑀢𑁆𑀢𑀦𑁄 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑀲𑁆𑀲 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀦𑀸𑀦𑀸𑀓𑀭𑀡𑀁 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀭𑁄𑀦𑁆𑀢𑁄 𑀅𑀢𑁆𑀢𑀲𑀺𑀦𑁂𑀳𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑁂𑀯 𑀓𑀭𑁄𑀢𑀺, 𑀧𑀭𑁄 𑀧𑀦 𑀓𑀸𑀭𑀼𑀜𑁆𑀜𑁂𑀦, 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀻𑀢𑀺 𑀘𑁂. 𑀏𑀢𑀫𑁆𑀧𑀺 𑀅𑀓𑀸𑀭𑀡𑀁. 𑀓𑀼𑀲𑀮𑀘𑀺𑀢𑁆𑀢𑁂𑀦𑀸𑀧𑀺 𑀳𑀺 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀧𑀝𑀺𑀲𑁂𑀥𑁂𑀢𑀼𑀁. 𑀕𑀯𑁂𑀲𑀺𑀢𑀩𑁆𑀩𑀸 𑀏𑀢𑁆𑀣 𑀬𑀼𑀢𑁆𑀢𑀺. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀯𑀸 𑀲𑀤𑁆𑀥𑀸𑀬 𑀕𑀦𑁆𑀢𑀩𑁆𑀩𑀦𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺. 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀁.

𑁨. 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁪. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀅𑀦𑀸𑀘𑀸𑀭𑀁 𑀆𑀘𑀭𑀺𑀢𑁆𑀯𑀸𑀢𑀺 𑀅𑀓𑀸𑀢𑀩𑁆𑀩𑀁 𑀓𑀢𑁆𑀯𑀸; 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀻𑀢𑀺 𑀅𑀜𑁆𑀜𑁂𑀦 𑀯𑀘𑀦𑁂𑀦 𑀅𑀜𑁆𑀜𑀁 𑀯𑀘𑀦𑀁 𑀧𑀝𑀺𑀘𑀭𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺; 𑀇𑀤𑀸𑀦𑀺 𑀢𑀁 𑀧𑀝𑀺𑀘𑀭𑀡𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑁄 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀯𑀘𑀦𑀲𑀫𑁆𑀩𑀦𑁆𑀥𑁄 𑁋 𑀲𑁄 𑀓𑀺𑀭 𑀓𑀺𑀜𑁆𑀘𑀺 𑀯𑀻𑀢𑀺𑀓𑁆𑀓𑀫𑀁 𑀤𑀺𑀲𑁆𑀯𑀸 ‘‘𑀆𑀯𑀼𑀲𑁄, 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀲𑀗𑁆𑀖𑀫𑀚𑁆𑀛𑁂 𑀆𑀧𑀢𑁆𑀢𑀺𑀬𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 ‘‘𑀓𑁄 𑀆𑀧𑀦𑁆𑀦𑁄’’𑀢𑀺 𑀯𑀤𑀢𑀺. ‘‘𑀢𑀢𑁄 𑀢𑁆𑀯’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀓𑀺𑀁 𑀆𑀧𑀦𑁆𑀦𑁄’’𑀢𑀺 𑀯𑀤𑀢𑀺. 𑀅𑀣 ‘‘𑀧𑀸𑀘𑀺𑀢𑁆𑀢𑀺𑀬𑀁 𑀯𑀸 𑀤𑀼𑀓𑁆𑀓𑀝𑀁 𑀯𑀸’’𑀢𑀺 𑀯𑀼𑀢𑁆𑀢𑁂 𑀯𑀢𑁆𑀣𑀼𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀅𑀳𑀁 𑀓𑀺𑀲𑁆𑀫𑀺𑀁 𑀆𑀧𑀦𑁆𑀦𑁄’’𑀢𑀺 𑀯𑀤𑀢𑀺. 𑀢𑀢𑁄 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀓𑀣𑀁 𑀆𑀧𑀦𑁆𑀦𑁄, 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀧𑀦𑁆𑀦𑁄𑀫𑁆𑀳𑀻’’𑀢𑀺 𑀧𑀼𑀘𑁆𑀙𑀢𑀺. 𑀅𑀣 ‘‘𑀇𑀤𑀁 𑀦𑀸𑀫 𑀓𑀭𑁄𑀦𑁆𑀢𑁄 𑀆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 ‘‘𑀓𑀁 𑀪𑀡𑀣𑀸’’𑀢𑀺 𑀯𑀤𑀢𑀺. 𑀢𑀢𑁄 ‘‘𑀢𑀁 𑀪𑀡𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀪𑀡𑀣𑀸’’𑀢𑀺 𑀯𑀤𑀢𑀺.

𑀅𑀧𑀺𑀘𑁂𑀢𑁆𑀣 𑀅𑀬𑀁 𑀧𑀸𑀴𑀺𑀫𑀼𑀢𑁆𑀢𑀓𑁄𑀧𑀺 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀯𑀺𑀥𑀺 𑁋 𑀪𑀺𑀓𑁆𑀔𑀽𑀳𑀺 ‘‘𑀢𑀯 𑀲𑀺𑀧𑀸𑀝𑀺𑀓𑀸𑀬 𑀓𑀳𑀸𑀧𑀡𑁄 𑀤𑀺𑀝𑁆𑀞𑁄, 𑀓𑀺𑀲𑁆𑀲𑁂𑀯𑀫𑀲𑀸𑀭𑀼𑀧𑁆𑀧𑀁 𑀓𑀭𑁄𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀲𑀼𑀤𑀺𑀝𑁆𑀞𑀁, 𑀪𑀦𑁆𑀢𑁂, 𑀦 𑀧𑀦𑁂𑀲𑁄 𑀓𑀳𑀸𑀧𑀡𑁄; 𑀢𑀺𑀧𑀼𑀫𑀡𑁆𑀟𑀮𑀁 𑀏𑀢’’𑀦𑁆𑀢𑀺 𑀪𑀡𑀦𑁆𑀢𑁄 𑀯𑀸 ‘‘𑀢𑁆𑀯𑀁 𑀲𑀼𑀭𑀁 𑀧𑀺𑀯𑀦𑁆𑀢𑁄 𑀤𑀺𑀝𑁆𑀞𑁄, 𑀓𑀺𑀲𑁆𑀲𑁂𑀯𑀁 𑀓𑀭𑁄𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀲𑀼𑀤𑀺𑀝𑁆𑀞𑁄, 𑀪𑀦𑁆𑀢𑁂, 𑀦 𑀧𑀦𑁂𑀲𑀸 𑀲𑀼𑀭𑀸, 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀫𑁆𑀧𑀸𑀤𑀺𑀢𑀁 𑀅𑀭𑀺𑀝𑁆𑀞’’𑀦𑁆𑀢𑀺 𑀪𑀡𑀦𑁆𑀢𑁄 𑀯𑀸 ‘‘𑀢𑁆𑀯𑀁 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑁄 𑀤𑀺𑀝𑁆𑀞𑁄, 𑀓𑀺𑀲𑁆𑀲𑁂𑀯𑀫𑀲𑀸𑀭𑀼𑀧𑁆𑀧𑀁 𑀓𑀭𑁄𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀬𑁂𑀦 𑀤𑀺𑀝𑁆𑀞𑀁 𑀲𑀼𑀤𑀺𑀝𑁆𑀞𑀁, 𑀯𑀺𑀜𑁆𑀜𑀽 𑀧𑀦𑁂𑀢𑁆𑀣 𑀤𑀼𑀢𑀺𑀬𑁄 𑀅𑀢𑁆𑀣𑀺, 𑀲𑁄 𑀓𑀺𑀲𑁆𑀲 𑀦 𑀤𑀺𑀝𑁆𑀞𑁄’’𑀢𑀺 𑀪𑀡𑀦𑁆𑀢𑁄 𑀯𑀸, ‘‘𑀈𑀤𑀺𑀲𑀁 𑀢𑀬𑀸 𑀓𑀺𑀜𑁆𑀘𑀺 𑀤𑀺𑀝𑁆𑀞’’𑀦𑁆𑀢𑀺 𑀧𑀼𑀝𑁆𑀞𑁄 ‘‘𑀦 𑀲𑀼𑀡𑀸𑀫𑀻’’𑀢𑀺 𑀲𑁄𑀢𑀫𑀼𑀧𑀦𑁂𑀦𑁆𑀢𑁄 𑀯𑀸, 𑀲𑁄𑀢𑀤𑁆𑀯𑀸𑀭𑁂 𑀧𑀼𑀘𑁆𑀙𑀦𑁆𑀢𑀸𑀦𑀁 𑀘𑀓𑁆𑀔𑀼𑀁 𑀉𑀧𑀦𑁂𑀦𑁆𑀢𑁄 𑀯𑀸, 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀯𑀸𑀤𑀓𑀁 𑀭𑁄𑀧𑁂𑀢𑀽𑀢𑀺 𑀅𑀜𑁆𑀜𑀯𑀸𑀤𑀓𑀁 𑀆𑀭𑁄𑀧𑁂𑀢𑀼; 𑀧𑀢𑀺𑀝𑁆𑀞𑀸𑀧𑁂𑀢𑀽𑀢𑀺 𑀅𑀢𑁆𑀣𑁄. 𑀯𑀺𑀳𑁂𑀲𑀓𑀁 𑀭𑁄𑀧𑁂𑀢𑀽𑀢𑀺 𑀏𑀢𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑁯𑁮. 𑀅𑀜𑁆𑀜𑀯𑀸𑀤𑀓𑁂 𑀯𑀺𑀳𑁂𑀲𑀓𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 𑀅𑀜𑁆𑀜𑀁 𑀯𑀤𑀢𑀻𑀢𑀺 𑀅𑀜𑁆𑀜𑀯𑀸𑀤𑀓𑀁; 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀯𑀺𑀳𑁂𑀲𑁂𑀢𑀻𑀢𑀺 𑀯𑀺𑀳𑁂𑀲𑀓𑀁; 𑀢𑀼𑀡𑁆𑀳𑀻𑀪𑀽𑀢𑀲𑁆𑀲𑁂𑀢𑀁 𑀦𑀸𑀫𑀁, 𑀢𑀲𑁆𑀫𑀺𑀁 𑀅𑀜𑁆𑀜𑀯𑀸𑀤𑀓𑁂 𑀯𑀺𑀳𑁂𑀲𑀓𑁂. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀢𑁆𑀣𑀼𑀤𑁆𑀯𑀬𑁂 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁 𑀯𑀼𑀢𑁆𑀢𑀁.

𑁧𑁦𑁦. 𑀅𑀭𑁄𑀧𑀺𑀢𑁂 𑀅𑀜𑁆𑀜𑀯𑀸𑀤𑀓𑁂𑀢𑀺 𑀓𑀫𑁆𑀫𑀯𑀸𑀘𑀸𑀬 𑀅𑀦𑀸𑀭𑁄𑀧𑀺𑀢𑁂 𑀅𑀜𑁆𑀜𑀯𑀸𑀤𑀓𑁂. 𑀅𑀭𑁄𑀧𑀺𑀢𑁂 𑀯𑀺𑀳𑁂𑀲𑀓𑁂𑀢𑀺 𑀏𑀢𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑁧𑁦𑁧. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻𑀢𑀺𑀆𑀤𑀻𑀲𑀼 𑀬𑀁 𑀢𑀁 𑀅𑀜𑁆𑀜𑀯𑀸𑀤𑀓𑀯𑀺𑀳𑁂𑀲𑀓𑀭𑁄𑀧𑀦𑀓𑀫𑁆𑀫𑀁 𑀓𑀢𑀁, 𑀢𑀜𑁆𑀘𑁂 𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺, 𑀲𑁄 𑀘 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻 𑀅𑀜𑁆𑀜𑀯𑀸𑀤𑀓𑀜𑁆𑀘 𑀯𑀺𑀳𑁂𑀲𑀓𑀜𑁆𑀘 𑀓𑀭𑁄𑀢𑀺, 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀅𑀜𑁆𑀜𑀯𑀸𑀤𑀓𑁂 𑀘 𑀯𑀺𑀳𑁂𑀲𑀓𑁂 𑀘 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁦𑁨. 𑀅𑀚𑀸𑀦𑀦𑁆𑀢𑁄 𑀧𑀼𑀘𑁆𑀙𑀢𑀻𑀢𑀺 𑀆𑀧𑀢𑁆𑀢𑀺𑀁 𑀯𑀸 𑀆𑀧𑀦𑁆𑀦𑀪𑀸𑀯𑀁 𑀅𑀚𑀸𑀦𑀦𑁆𑀢𑁄𑀬𑁂𑀯 ‘‘𑀓𑀺𑀁 𑀢𑀼𑀫𑁆𑀳𑁂 𑀪𑀡𑀣, 𑀅𑀳𑀁 𑀦 𑀚𑀸𑀦𑀸𑀫𑀻’’𑀢𑀺 𑀧𑀼𑀘𑁆𑀙𑀢𑀺. 𑀕𑀺𑀮𑀸𑀦𑁄 𑀯𑀸 𑀦 𑀓𑀣𑁂𑀢𑀻𑀢𑀺 𑀫𑀼𑀔𑁂 𑀢𑀸𑀤𑀺𑀲𑁄 𑀩𑁆𑀬𑀸𑀥𑀺 𑀳𑁄𑀢𑀺, 𑀬𑁂𑀦 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀯𑀸𑀢𑀺𑀆𑀤𑀻𑀲𑀼 𑀲𑀗𑁆𑀖𑀫𑀚𑁆𑀛𑁂 𑀓𑀣𑀺𑀢𑁂 𑀢𑀧𑁆𑀧𑀘𑁆𑀘𑀬𑀸 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀯𑀸 𑀓𑀮𑀳𑁄 𑀯𑀸 𑀯𑀺𑀯𑀸𑀤𑁄 𑀯𑀸 𑀪𑀯𑀺𑀲𑁆𑀲𑀢𑀺, 𑀲𑁄 𑀫𑀸 𑀅𑀳𑁄𑀲𑀻𑀢𑀺 𑀫𑀜𑁆𑀜𑀫𑀸𑀦𑁄 𑀦 𑀓𑀣𑁂𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀲𑀺𑀬𑀸 𑀓𑀺𑀭𑀺𑀬𑀁, 𑀲𑀺𑀬𑀸 𑀅𑀓𑀺𑀭𑀺𑀬𑀁, 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀦𑁆𑀢𑀲𑁆𑀲 𑀳𑀺 𑀓𑀺𑀭𑀺𑀬𑀁 𑀳𑁄𑀢𑀺, 𑀢𑀼𑀡𑁆𑀳𑀻𑀪𑀸𑀯𑁂𑀦 𑀯𑀺𑀳𑁂𑀲𑀦𑁆𑀢𑀲𑁆𑀲 𑀅𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀁 𑀤𑀼𑀢𑀺𑀬𑀁.

𑁩. 𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑁋 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀪𑀺𑀓𑁆𑀔𑀽 𑀉𑀚𑁆𑀛𑀸𑀧𑁂𑀦𑁆𑀢𑀻𑀢𑀺 ‘‘𑀙𑀦𑁆𑀤𑀸𑀬 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀯𑀚𑀸𑀦𑀸𑀧𑁂𑀦𑁆𑀢𑀺, 𑀅𑀯𑀜𑁆𑀜𑀸𑀬 𑀑𑀮𑁄𑀓𑀸𑀧𑁂𑀦𑁆𑀢𑀺, 𑀮𑀸𑀫𑀓𑀢𑁄 𑀯𑀸 𑀘𑀺𑀦𑁆𑀢𑀸𑀧𑁂𑀦𑁆𑀢𑀻’’𑀢𑀺 𑀅𑀢𑁆𑀣𑁄. 𑀮𑀓𑁆𑀔𑀡𑀁 𑀧𑀦𑁂𑀢𑁆𑀣 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀑𑀚𑁆𑀛𑀸𑀧𑁂𑀦𑁆𑀢𑀻𑀢𑀺𑀧𑀺 𑀧𑀸𑀞𑁄. 𑀅𑀬𑀫𑁂𑀯𑀢𑁆𑀣𑁄. 𑀙𑀦𑁆𑀤𑀸𑀬𑀸𑀢𑀺 𑀙𑀦𑁆𑀤𑁂𑀦 𑀧𑀓𑁆𑀔𑀧𑀸𑀢𑁂𑀦; 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸𑀦𑀁 𑀧𑀡𑀻𑀢𑀸𑀦𑀺 𑀧𑀜𑁆𑀜𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀔𑀺𑀬𑁆𑀬𑀦𑁆𑀢𑀻𑀢𑀺 ‘‘𑀙𑀦𑁆𑀤𑀸𑀬 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀧𑀓𑀸𑀲𑁂𑀦𑁆𑀢𑀺.

𑁧𑁦𑁫. 𑀉𑀚𑁆𑀛𑀸𑀧𑀦𑀓𑁂 𑀔𑀺𑀬𑁆𑀬𑀦𑀓𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 𑀬𑁂𑀦 𑀯𑀘𑀦𑁂𑀦 𑀉𑀚𑁆𑀛𑀸𑀧𑁂𑀦𑁆𑀢𑀺, 𑀢𑀁 𑀉𑀚𑁆𑀛𑀸𑀧𑀦𑀓𑀁. 𑀬𑁂𑀦 𑀘 𑀔𑀺𑀬𑁆𑀬𑀦𑁆𑀢𑀺 𑀢𑀁 𑀔𑀺𑀬𑁆𑀬𑀦𑀓𑀁. 𑀢𑀲𑁆𑀫𑀺𑀁 𑀉𑀚𑁆𑀛𑀸𑀧𑀦𑀓𑁂 𑀔𑀺𑀬𑁆𑀬𑀦𑀓𑁂. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑀢𑁆𑀣𑀼𑀤𑁆𑀯𑀬𑁂 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁 𑀯𑀼𑀢𑁆𑀢𑀁.

𑁧𑁦𑁬. 𑀉𑀚𑁆𑀛𑀸𑀧𑀦𑀓𑀁 𑀦𑀸𑀫 𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀁 𑀯𑀸…𑀧𑁂… 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀦𑀓𑀁 𑀯𑀸𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 ‘‘𑀫𑀗𑁆𑀓𑀼𑀓𑀢𑁆𑀢𑀼𑀓𑀸𑀫𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀯𑀡𑁆𑀡𑀁 𑀓𑀢𑁆𑀢𑀼𑀓𑀸𑀫𑁄 𑀅𑀬𑀲𑀁 𑀓𑀢𑁆𑀢𑀼𑀓𑀸𑀫𑁄𑀢𑀺 𑀇𑀫𑁂𑀲𑀁 𑀧𑀦 𑀯𑀲𑁂𑀦 𑀉𑀧𑀲𑀫𑁆𑀧𑀦𑁆𑀦𑀦𑁆𑀢𑀺𑀆𑀤𑀻𑀲𑀼 ‘‘𑀉𑀧𑀲𑀫𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀏𑀯𑀁 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀓𑀸𑀢𑀩𑁆𑀩𑁄. 𑀉𑀚𑁆𑀛𑀸𑀧𑁂𑀢𑀺 𑀯𑀸 𑀔𑀺𑀬𑁆𑀬𑀢𑀺 𑀯𑀸 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀸 ‘‘𑀔𑀺𑀬𑁆𑀬𑀦𑀓𑀁 𑀦𑀸𑀫𑀸’’𑀢𑀺 𑀏𑀯𑀁 𑀫𑀸𑀢𑀺𑀓𑀸𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸𑀧𑀺 ‘‘𑀉𑀚𑁆𑀛𑀸𑀧𑀦𑀓𑀁 𑀦𑀸𑀫𑀸’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀯𑀼𑀢𑁆𑀢𑀯𑀺𑀪𑀗𑁆𑀕𑁄𑀬𑁂𑀯 𑀯𑀢𑁆𑀢𑀩𑁆𑀩𑁄 𑀳𑁄𑀢𑀺, 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑁂 𑀯𑀺𑀬 𑀅𑀜𑁆𑀜𑁄 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀯𑀺𑀲𑀼𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀅𑀯𑀺𑀪𑀚𑀺𑀢𑁆𑀯𑀸 𑀦𑀺𑀕𑀫𑀦𑀫𑁂𑀯 𑀏𑀓𑀢𑁄 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻𑀢𑀺𑀆𑀤𑀻𑀲𑀼 𑀬𑀁 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀫𑁆𑀫𑀼𑀢𑀺𑀓𑀫𑁆𑀫𑀁 𑀓𑀢𑀁 𑀢𑀜𑁆𑀘𑁂 𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺, 𑀲𑁄 𑀘 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀻 𑀉𑀚𑁆𑀛𑀸𑀧𑀦𑀓𑀜𑁆𑀘 𑀔𑀺𑀬𑁆𑀬𑀦𑀓𑀜𑁆𑀘 𑀓𑀭𑁄𑀢𑀺, 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀉𑀚𑁆𑀛𑀸𑀧𑀦𑀓𑁂 𑀘 𑀔𑀺𑀬𑁆𑀬𑀦𑀓𑁂 𑀘 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀉𑀚𑁆𑀛𑀸𑀧𑁂𑀢𑀺 𑀯𑀸 𑀔𑀺𑀬𑁆𑀬𑀢𑀺 𑀯𑀸𑀢𑀺 𑀏𑀢𑁆𑀣 𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀅𑀜𑁆𑀜𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀉𑀚𑁆𑀛𑀸𑀧𑁂𑀢𑀺 𑀅𑀯𑀚𑀸𑀦𑀸𑀧𑁂𑀢𑀺, 𑀢𑀲𑁆𑀲 𑀯𑀸 𑀢𑀁 𑀲𑀦𑁆𑀢𑀺𑀓𑁂 𑀔𑀺𑀬𑁆𑀬𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀦𑁆𑀢𑀺 𑀓𑀫𑁆𑀫𑀯𑀸𑀘𑀸𑀬 𑀅𑀲𑀫𑁆𑀫𑀢𑀁 𑀓𑁂𑀯𑀮𑀁 ‘‘𑀢𑀯𑁂𑀲𑁄 𑀪𑀸𑀭𑁄’’𑀢𑀺 𑀲𑀗𑁆𑀖𑁂𑀦 𑀆𑀭𑁄𑀧𑀺𑀢𑀪𑀸𑀭𑀁 𑀪𑀺𑀓𑁆𑀔𑀽𑀦𑀁 𑀯𑀸 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬 𑀲𑀬𑀫𑁂𑀯 𑀢𑀁 𑀪𑀸𑀭𑀁 𑀯𑀳𑀦𑁆𑀢𑀁, 𑀬𑀢𑁆𑀭 𑀯𑀸 𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀢𑀢𑁆𑀭 𑀯𑀸 𑀢𑀸𑀤𑀺𑀲𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀯𑀸 𑀅𑀲𑀫𑁆𑀫𑀢𑀁 𑀯𑀸𑀢𑀺 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀢𑁂𑀭𑀲 𑀲𑀫𑁆𑀫𑀼𑀢𑀺𑀬𑁄 𑀤𑀸𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺. 𑀅𑀣 𑀔𑁄 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁄 𑀧𑀘𑁆𑀙𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀸𑀯𑁂 𑀞𑀺𑀢𑁄, 𑀢𑀁 𑀲𑀦𑁆𑀥𑀸𑀬 ‘‘𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀲 𑀧𑀦 𑀩𑁆𑀬𑀢𑁆𑀢𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀓𑁂𑀯𑀮𑀁 𑀲𑀗𑁆𑀖𑁂𑀦 𑀯𑀸 𑀲𑀫𑁆𑀫𑀢𑁂𑀦 𑀯𑀸 𑀪𑀺𑀓𑁆𑀔𑀼𑀦𑀸 ‘‘𑀢𑁆𑀯𑀁 𑀇𑀤𑀁 𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀪𑀸𑀭𑁄 𑀓𑀢𑁄, 𑀢𑀸𑀤𑀺𑀲𑀁 𑀲𑀦𑁆𑀥𑀸𑀬 ‘‘𑀅𑀲𑀫𑁆𑀫𑀢𑀁 𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀁 𑀢𑀢𑀺𑀬𑀁.

𑁪. 𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁮. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂 𑁋 𑀳𑁂𑀫𑀦𑁆𑀢𑀺𑀓𑁂 𑀓𑀸𑀮𑁂𑀢𑀺 𑀳𑁂𑀫𑀦𑁆𑀢𑀓𑀸𑀮𑁂 𑀳𑀺𑀫𑀧𑀸𑀢𑀲𑀫𑀬𑁂. 𑀓𑀸𑀬𑀁 𑀑𑀢𑀸𑀧𑁂𑀦𑁆𑀢𑀸𑀢𑀺 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀸 𑀩𑀸𑀮𑀸𑀢𑀧𑁂𑀦 𑀓𑀸𑀬𑀁 𑀑𑀢𑀸𑀧𑁂𑀦𑁆𑀢𑀸. 𑀓𑀸𑀮𑁂 𑀆𑀭𑁄𑀘𑀺𑀢𑁂𑀢𑀺 𑀬𑀸𑀕𑀼𑀪𑀢𑁆𑀢𑀸𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀓𑀸𑀮𑁂 𑀆𑀭𑁄𑀘𑀺𑀢𑁂. 𑀑𑀯𑀝𑁆𑀞𑀁 𑀳𑁄𑀢𑀻𑀢𑀺 𑀳𑀺𑀫𑀯𑀲𑁆𑀲𑁂𑀦 𑀑𑀯𑀝𑁆𑀞𑀁 𑀢𑀺𑀦𑁆𑀢𑀁 𑀳𑁄𑀢𑀺.

𑁧𑁧𑁦. 𑀅𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑁂𑀢𑀺 𑀯𑀲𑁆𑀲𑀺𑀓𑀯𑀲𑁆𑀲𑀸𑀦𑀫𑀸𑀲𑀸𑀢𑀺 𑀏𑀯𑀁 𑀅𑀧𑀜𑁆𑀜𑀢𑁆𑀢𑁂 𑀘𑀢𑁆𑀢𑀸𑀭𑁄 𑀳𑁂𑀫𑀦𑁆𑀢𑀺𑀓𑁂 𑀘𑀢𑁆𑀢𑀸𑀭𑁄 𑀘 𑀕𑀺𑀫𑁆𑀳𑀺𑀓𑁂 𑀅𑀝𑁆𑀞 𑀫𑀸𑀲𑁂𑀢𑀺 𑀅𑀢𑁆𑀣𑁄. 𑀫𑀡𑁆𑀟𑀧𑁂 𑀯𑀸𑀢𑀺 𑀲𑀸𑀔𑀸𑀫𑀡𑁆𑀟𑀧𑁂 𑀯𑀸 𑀧𑀤𑀭𑀫𑀡𑁆𑀟𑀧𑁂 𑀯𑀸. 𑀭𑀼𑀓𑁆𑀔𑀫𑀽𑀮𑁂 𑀯𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸. 𑀬𑀢𑁆𑀣 𑀓𑀸𑀓𑀸 𑀯𑀸 𑀓𑀼𑀮𑀮𑀸 𑀯𑀸 𑀦 𑀊𑀳𑀤𑀦𑁆𑀢𑀻𑀢𑀺 𑀬𑀢𑁆𑀣 𑀥𑀼𑀯𑀦𑀺𑀯𑀸𑀲𑁂𑀦 𑀓𑀼𑀮𑀸𑀯𑀓𑁂 𑀓𑀢𑁆𑀯𑀸 𑀯𑀲𑀫𑀸𑀦𑀸 𑀏𑀢𑁂 𑀓𑀸𑀓𑀓𑀼𑀮𑀮𑀸 𑀯𑀸 𑀅𑀜𑁆𑀜𑁂 𑀯𑀸 𑀲𑀓𑀼𑀦𑁆𑀢𑀸 𑀢𑀁 𑀲𑁂𑀦𑀸𑀲𑀦𑀁 𑀦 𑀊𑀳𑀤𑀦𑁆𑀢𑀺, 𑀢𑀸𑀤𑀺𑀲𑁂 𑀭𑀼𑀓𑁆𑀔𑀫𑀽𑀮𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺. 𑀢𑀲𑁆𑀫𑀸 𑀬𑀢𑁆𑀣 𑀕𑁄𑀘𑀭𑀧𑁆𑀧𑀲𑀼𑀢𑀸 𑀲𑀓𑀼𑀦𑁆𑀢𑀸 𑀯𑀺𑀲𑁆𑀲𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀲𑁆𑀫𑀺𑀁 𑀧𑀦 𑀥𑀼𑀯𑀦𑀺𑀯𑀸𑀲𑁂𑀦 𑀓𑀼𑀮𑀸𑀯𑀓𑁂 𑀓𑀢𑁆𑀯𑀸 𑀯𑀲𑀦𑁆𑀢𑀺, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀦 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. ‘‘𑀅𑀝𑁆𑀞 𑀫𑀸𑀲𑁂’’𑀢𑀺 𑀯𑀘𑀦𑀢𑁄 𑀬𑁂𑀲𑀼 𑀚𑀦𑀧𑀤𑁂𑀲𑀼 𑀯𑀲𑁆𑀲𑀓𑀸𑀮𑁂 𑀦 𑀯𑀲𑁆𑀲𑀢𑀺, 𑀢𑁂𑀲𑀼𑀧𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯. ‘‘𑀅𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑁂’’𑀢𑀺 𑀯𑀘𑀦𑀢𑁄 𑀬𑀢𑁆𑀣 𑀳𑁂𑀫𑀦𑁆𑀢𑁂 𑀤𑁂𑀯𑁄 𑀯𑀲𑁆𑀲𑀢𑀺, 𑀢𑀢𑁆𑀣 𑀳𑁂𑀫𑀦𑁆𑀢𑁂𑀧𑀺 𑀅𑀚𑁆𑀛𑁄𑀓𑀸𑀲𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀕𑀺𑀫𑁆𑀳𑁂 𑀧𑀦 𑀲𑀩𑁆𑀩𑀢𑁆𑀣 𑀯𑀺𑀕𑀢𑀯𑀮𑀸𑀳𑀓𑀁 𑀯𑀺𑀲𑀼𑀤𑁆𑀥𑀁 𑀦𑀪𑀁 𑀳𑁄𑀢𑀺, 𑀏𑀯𑀭𑀽𑀧𑁂 𑀓𑀸𑀮𑁂 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀅𑀚𑁆𑀛𑁄𑀓𑀸𑀲𑁂 𑀫𑀜𑁆𑀘𑀧𑀻𑀞𑀁 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺.

𑀅𑀩𑁆𑀪𑁄𑀓𑀸𑀲𑀺𑀓𑁂𑀦𑀸𑀧𑀺 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀢𑀲𑁆𑀲 𑀳𑀺 𑀲𑀘𑁂 𑀧𑀼𑀕𑁆𑀕𑀮𑀺𑀓𑀫𑀜𑁆𑀘𑀓𑁄 𑀅𑀢𑁆𑀣𑀺, 𑀢𑀢𑁆𑀣𑁂𑀯 𑀲𑀬𑀺𑀢𑀩𑁆𑀩𑀁. 𑀲𑀗𑁆𑀖𑀺𑀓𑀁 𑀕𑀡𑁆𑀳𑀦𑁆𑀢𑁂𑀦 𑀯𑁂𑀢𑁆𑀢𑁂𑀦 𑀯𑀸 𑀯𑀸𑀓𑁂𑀦 𑀯𑀸 𑀯𑀻𑀢𑀫𑀜𑁆𑀘𑀓𑁄 𑀕𑀳𑁂𑀢𑀩𑁆𑀩𑁄. 𑀢𑀲𑁆𑀫𑀺𑀁 𑀅𑀲𑀢𑀺 𑀧𑀼𑀭𑀸𑀡𑀫𑀜𑁆𑀘𑀓𑁄 𑀕𑀳𑁂𑀢𑀩𑁆𑀩𑁄. 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀦𑀯𑀯𑀸𑀬𑀺𑀫𑁄 𑀯𑀸 𑀑𑀦𑀤𑁆𑀥𑀓𑁄 𑀯𑀸 𑀕𑀳𑁂𑀢𑀩𑁆𑀩𑁄. 𑀕𑀳𑁂𑀢𑁆𑀯𑀸 𑀘 𑀧𑀦 ‘‘𑀅𑀳𑀁 𑀉𑀓𑁆𑀓𑀝𑁆𑀞𑀭𑀼𑀓𑁆𑀔𑀫𑀽𑀮𑀺𑀓𑁄 𑀉𑀓𑁆𑀓𑀝𑁆𑀞𑀅𑀩𑁆𑀪𑁄𑀓𑀸𑀲𑀺𑀓𑁄’’𑀢𑀺 𑀘𑀻𑀯𑀭𑀓𑀼𑀝𑀺𑀫𑁆𑀧𑀺 𑀅𑀓𑀢𑁆𑀯𑀸 𑀅𑀲𑀫𑀬𑁂 𑀅𑀚𑁆𑀛𑁄𑀓𑀸𑀲𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀘𑀢𑀼𑀕𑁆𑀕𑀼𑀡𑁂𑀦𑀧𑀺 𑀘𑀻𑀯𑀭𑁂𑀦 𑀓𑀢𑀓𑀼𑀝𑀺 𑀅𑀢𑁂𑀫𑁂𑀦𑁆𑀢𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀤𑀻𑀦𑀺 𑀪𑀯𑀦𑁆𑀢𑀺, 𑀪𑀺𑀓𑁆𑀔𑀼𑀦𑁄 𑀓𑀸𑀬𑀸𑀦𑀼𑀕𑀢𑀺𑀓𑀢𑁆𑀢𑀸 𑀯𑀝𑁆𑀝𑀢𑀺.

𑀅𑀭𑀜𑁆𑀜𑁂 𑀧𑀡𑁆𑀡𑀓𑀼𑀝𑀻𑀲𑀼 𑀯𑀲𑀦𑁆𑀢𑀸𑀦𑀁 𑀲𑀻𑀮𑀲𑀫𑁆𑀧𑀤𑀸𑀬 𑀧𑀲𑀦𑁆𑀦𑀘𑀺𑀢𑁆𑀢𑀸 𑀫𑀦𑀼𑀲𑁆𑀲𑀸 𑀦𑀯𑀁 𑀫𑀜𑁆𑀘𑀧𑀻𑀞𑀁 𑀤𑁂𑀦𑁆𑀢𑀺 ‘‘𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀳𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀲𑀪𑀸𑀕𑀪𑀺𑀓𑁆𑀔𑀽𑀦𑀁 𑀧𑁂𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀲𑀪𑀸𑀕𑀸𑀦𑀁 𑀅𑀪𑀸𑀯𑁂 𑀅𑀦𑁄𑀯𑀲𑁆𑀲𑀓𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀅𑀦𑁄𑀯𑀲𑁆𑀲𑀓𑁂 𑀅𑀲𑀢𑀺 𑀭𑀼𑀓𑁆𑀔𑁂 𑀮𑀕𑁆𑀕𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀘𑁂𑀢𑀺𑀬𑀗𑁆𑀕𑀡𑁂 𑀲𑀫𑁆𑀫𑀚𑁆𑀚𑀦𑀺𑀁 𑀕𑀳𑁂𑀢𑁆𑀯𑀸 𑀪𑁄𑀚𑀦𑀲𑀸𑀮𑀗𑁆𑀕𑀡𑀁 𑀯𑀸 𑀉𑀧𑁄𑀲𑀣𑀸𑀕𑀸𑀭𑀗𑁆𑀕𑀡𑀁 𑀯𑀸 𑀧𑀭𑀺𑀯𑁂𑀡𑀤𑀺𑀯𑀸𑀝𑁆𑀞𑀸𑀦𑀅𑀕𑁆𑀕𑀺𑀲𑀸𑀮𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀧𑀼𑀦 𑀲𑀫𑁆𑀫𑀚𑁆𑀚𑀦𑀻𑀫𑀸𑀴𑀓𑁂𑀬𑁂𑀯 𑀞𑀧𑁂𑀢𑀩𑁆𑀩𑀸. 𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀳𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀲𑀫𑁆𑀫𑀚𑁆𑀚𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄.

𑀬𑁄 𑀧𑀦 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀁 𑀲𑀫𑁆𑀫𑀚𑁆𑀚𑀦𑁆𑀢𑁄𑀯 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀦 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀲𑀘𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀸𑀮𑀸 𑀅𑀢𑁆𑀣𑀺, 𑀢𑀢𑁆𑀣 𑀞𑀧𑁂𑀢𑀩𑁆𑀩𑀸. 𑀲𑀘𑁂 𑀦𑀢𑁆𑀣𑀺, 𑀯𑀮𑀸𑀳𑀓𑀸𑀦𑀁 𑀅𑀦𑀼𑀝𑁆𑀞𑀺𑀢𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀬𑀸𑀯𑀸𑀳𑀁 𑀕𑀸𑀫𑀢𑁄 𑀦𑀺𑀓𑁆𑀔𑀫𑀸𑀫𑀺, 𑀢𑀸𑀯 𑀦 𑀯𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑁆𑀢𑁂𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁂𑀦 𑀧𑀸𑀓𑀢𑀺𑀓𑀝𑁆𑀞𑀸𑀦𑁂 𑀞𑀧𑁂𑀢𑀩𑁆𑀩𑀸. 𑀲𑀘𑁂 𑀯𑀲𑁆𑀲𑀺𑀲𑁆𑀲𑀢𑀻𑀢𑀺 𑀚𑀸𑀦𑀦𑁆𑀢𑁄 𑀅𑀚𑁆𑀛𑁄𑀓𑀸𑀲𑁂 𑀞𑀧𑁂𑀢𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀫𑁆𑀫𑀚𑁆𑀚𑀦𑀢𑁆𑀣𑀸𑀬 𑀲𑀫𑁆𑀫𑀚𑁆𑀚𑀦𑀻 𑀦𑀺𑀓𑁆𑀔𑀺𑀢𑁆𑀢𑀸 𑀳𑁄𑀢𑀺, 𑀢𑀁 𑀢𑀁 𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀢𑀢𑁆𑀭 𑀢𑀢𑁆𑀭𑁂𑀯 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀆𑀲𑀦𑀲𑀸𑀮𑀁 𑀲𑀫𑁆𑀫𑀚𑁆𑀚𑀦𑁆𑀢𑁂𑀦 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁆𑀭𑀺𑀤𑀁 𑀯𑀢𑁆𑀢𑀁 𑁋 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀸 𑀯𑀸𑀮𑀺𑀓𑀸 𑀳𑀭𑀺𑀢𑀩𑁆𑀩𑀸. 𑀓𑀘𑀯𑀭𑀁 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀩𑀳𑀺 𑀙𑀟𑁆𑀟𑁂𑀢𑀩𑁆𑀩𑀁.

𑁧𑁧𑁧. 𑀫𑀲𑀸𑀭𑀓𑁄𑀢𑀺 𑀫𑀜𑁆𑀘𑀧𑀸𑀤𑁂 𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 𑀅𑀝𑀦𑀺𑀬𑁄 𑀧𑀯𑁂𑀲𑁂𑀢𑁆𑀯𑀸 𑀓𑀢𑁄. 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄𑀢𑀺 𑀅𑀝𑀦𑀻𑀳𑀺 𑀫𑀜𑁆𑀘𑀧𑀸𑀤𑁂 𑀟𑀁𑀲𑀸𑀧𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀲𑀗𑁆𑀔𑁂𑀧𑁂𑀦 𑀓𑀢𑁄. 𑀓𑀼𑀴𑀻𑀭𑀧𑀸𑀤𑀓𑁄𑀢𑀺 𑀅𑀲𑁆𑀲𑀫𑁂𑀡𑁆𑀟𑀓𑀸𑀤𑀻𑀦𑀁 𑀧𑀸𑀤𑀲𑀤𑀺𑀲𑁂𑀳𑀺 𑀧𑀸𑀤𑁂𑀳𑀺 𑀓𑀢𑁄. 𑀬𑁄 𑀯𑀸 𑀧𑀦 𑀓𑁄𑀘𑀺 𑀯𑀗𑁆𑀓𑀧𑀸𑀤𑀓𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀼𑀴𑀻𑀭𑀧𑀸𑀤𑀓𑁄. 𑀆𑀳𑀘𑁆𑀘𑀧𑀸𑀤𑀓𑁄𑀢𑀺 𑀅𑀬𑀁 𑀧𑀦 ‘‘𑀆𑀳𑀘𑁆𑀘𑀧𑀸𑀤𑀓𑁄 𑀦𑀸𑀫 𑀫𑀜𑁆𑀘𑁄 𑀅𑀗𑁆𑀕𑁂 𑀯𑀺𑀚𑁆𑀛𑀺𑀢𑁆𑀯𑀸 𑀓𑀢𑁄 𑀳𑁄𑀢𑀻’’𑀢𑀺 𑀏𑀯𑀁 𑀧𑀭𑀢𑁄 𑀧𑀸𑀴𑀺𑀬𑀁𑀬𑁂𑀯 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀅𑀝𑀦𑀺𑀬𑁄 𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 𑀧𑀸𑀤𑀲𑀺𑀔𑀁 𑀧𑀯𑁂𑀲𑁂𑀢𑁆𑀯𑀸 𑀉𑀧𑀭𑀺 𑀆𑀡𑀺𑀁 𑀤𑀢𑁆𑀯𑀸 𑀓𑀢𑀫𑀜𑁆𑀘𑁄 ‘‘𑀆𑀳𑀘𑁆𑀘𑀧𑀸𑀤𑀓𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀻𑀞𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑁆𑀢𑁄 𑀲𑀁𑀯𑁂𑀞𑁂𑀢𑁆𑀯𑀸 𑀩𑀤𑁆𑀥𑀁 𑀳𑁄𑀢𑀻𑀢𑀺 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀯𑀺𑀢𑁆𑀣𑀢𑀁 𑀫𑀚𑁆𑀛𑁂 𑀲𑀗𑁆𑀔𑀺𑀢𑁆𑀢𑀁 𑀧𑀡𑀯𑀲𑀡𑁆𑀞𑀸𑀦𑀁 𑀓𑀢𑁆𑀯𑀸 𑀩𑀤𑁆𑀥𑀁 𑀳𑁄𑀢𑀺, 𑀢𑀁 𑀓𑀺𑀭 𑀫𑀚𑁆𑀛𑁂 𑀲𑀻𑀳𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀓𑁆𑀔𑀺𑀢𑁆𑀢𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀅𑀓𑀧𑁆𑀧𑀺𑀬𑀘𑀫𑁆𑀫𑀁 𑀦𑀸𑀫𑁂𑀢𑁆𑀣 𑀦𑀢𑁆𑀣𑀺. 𑀲𑁂𑀦𑀸𑀲𑀦𑀜𑁆𑀳𑀺 𑀲𑁄𑀯𑀡𑁆𑀡𑀫𑀬𑀫𑁆𑀧𑀺 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀢𑀁 𑀫𑀳𑀕𑁆𑀖𑀁 𑀳𑁄𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀲𑀦𑁆𑀣𑀭𑀸𑀧𑁂𑀢𑀺 𑀢𑀲𑁆𑀲 𑀧𑀮𑀺𑀩𑁄𑀥𑁄𑀢𑀺 𑀬𑁂𑀦 𑀲𑀦𑁆𑀣𑀭𑀸𑀧𑀺𑀢𑀁, 𑀢𑀲𑁆𑀲 𑀧𑀮𑀺𑀩𑁄𑀥𑁄. 𑀮𑁂𑀟𑁆𑀟𑀼𑀧𑀸𑀢𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀣𑁂𑀭𑁄 𑀪𑁄𑀚𑀦𑀲𑀸𑀮𑀸𑀬𑀁 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀤𑀳𑀭𑀁 𑀆𑀡𑀸𑀧𑁂𑀢𑀺 ‘‘𑀕𑀘𑁆𑀙 𑀤𑀺𑀯𑀸𑀝𑁆𑀞𑀸𑀦𑁂 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀧𑁂𑀳𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄. 𑀣𑁂𑀭𑁄 𑀬𑀣𑀸𑀭𑀼𑀘𑀺𑀁 𑀯𑀺𑀘𑀭𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀣𑀯𑀺𑀓𑀁 𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀯𑀸 𑀞𑀧𑁂𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀣𑁂𑀭𑀲𑁆𑀲 𑀧𑀮𑀺𑀩𑁄𑀥𑁄. 𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀁 𑀕𑀘𑁆𑀙𑀦𑁆𑀢𑁄 𑀦𑁂𑀯 𑀉𑀤𑁆𑀥𑀭𑀢𑀺, 𑀦 𑀉𑀤𑁆𑀥𑀭𑀸𑀧𑁂𑀢𑀺, 𑀮𑁂𑀟𑁆𑀟𑀼𑀧𑀸𑀢𑀸𑀢𑀺𑀓𑁆𑀓𑀫𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀦 𑀣𑁂𑀭𑁄 𑀢𑀢𑁆𑀣 𑀣𑀯𑀺𑀓𑀁 𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀯𑀸 𑀅𑀝𑁆𑀞𑀧𑁂𑀢𑁆𑀯𑀸 𑀘𑀗𑁆𑀓𑀫𑀦𑁆𑀢𑁄𑀯 𑀤𑀳𑀭𑀁 ‘‘𑀕𑀘𑁆𑀙 𑀢𑁆𑀯’’𑀦𑁆𑀢𑀺 𑀪𑀡𑀢𑀺, 𑀢𑁂𑀦 ‘‘𑀇𑀤𑀁 𑀪𑀦𑁆𑀢𑁂 𑀫𑀜𑁆𑀘𑀧𑀻𑀞’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀣𑁂𑀭𑁄 𑀯𑀢𑁆𑀢𑀁 𑀚𑀸𑀦𑀸𑀢𑀺 ‘‘𑀢𑁆𑀯𑀁 𑀕𑀘𑁆𑀙, 𑀅𑀳𑀁 𑀧𑀸𑀓𑀢𑀺𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀩𑀸𑀮𑁄 𑀳𑁄𑀢𑀺 𑀅𑀦𑀼𑀕𑁆𑀕𑀳𑀺𑀢𑀯𑀢𑁆𑀢𑁄 ‘‘𑀕𑀘𑁆𑀙, 𑀫𑀸 𑀇𑀥 𑀢𑀺𑀝𑁆𑀞, 𑀦𑁂𑀯 𑀦𑀺𑀲𑀻𑀤𑀺𑀢𑀼𑀁 𑀦 𑀦𑀺𑀧𑀚𑁆𑀚𑀺𑀢𑀼𑀁 𑀤𑁂𑀫𑀻’’𑀢𑀺 𑀤𑀳𑀭𑀁 𑀢𑀚𑁆𑀚𑁂𑀢𑀺𑀬𑁂𑀯. 𑀤𑀳𑀭𑁂𑀦 ‘‘𑀪𑀦𑁆𑀢𑁂 𑀲𑀼𑀔𑀁 𑀲𑀬𑀣𑀸’’𑀢𑀺 𑀓𑀧𑁆𑀧𑀁 𑀮𑀪𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀕𑀢𑁂 𑀣𑁂𑀭𑀲𑁆𑀲𑁂𑀯 𑀧𑀮𑀺𑀩𑁄𑀥𑁄. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑀲𑁆𑀲 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀧𑀦 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀤𑀳𑀭𑁄 ‘‘𑀫𑀬𑁆𑀳𑀁 𑀪𑀦𑁆𑀢𑁂 𑀪𑀡𑁆𑀟𑀓𑀥𑁄𑀯𑀦𑀸𑀤𑀺 𑀓𑀺𑀜𑁆𑀘𑀺 𑀓𑀭𑀡𑀻𑀬𑀁 𑀅𑀢𑁆𑀣𑀻’’𑀢𑀺 𑀯𑀤𑀢𑀺, 𑀣𑁂𑀭𑁄 𑀘 𑀦𑀁 ‘‘𑀢𑁆𑀯𑀁 𑀧𑀜𑁆𑀜𑀧𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺 𑀯𑀢𑁆𑀯𑀸 𑀪𑁄𑀚𑀦𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀺, 𑀧𑀸𑀤𑀼𑀤𑁆𑀥𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺. 𑀲𑀘𑁂 𑀧𑀦 𑀣𑁂𑀭𑁄 𑀲𑀸𑀫𑀡𑁂𑀭𑀁 𑀆𑀡𑀸𑀧𑁂𑀢𑀺, 𑀲𑀸𑀫𑀡𑁂𑀭𑁂 𑀢𑀢𑁆𑀣 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀧𑀺 𑀪𑁄𑀚𑀦𑀲𑀸𑀮𑀢𑁄 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑁄 𑀧𑀸𑀤𑀼𑀤𑁆𑀥𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀧𑀼𑀦 𑀕𑀫𑀦𑀓𑀸𑀮𑁂 𑀮𑁂𑀟𑁆𑀟𑀼𑀧𑀸𑀢𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀆𑀡𑀸𑀧𑁂𑀦𑁆𑀢𑁄 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀻𑀤𑀸𑀢𑀺 𑀆𑀡𑀸𑀧𑁂𑀢𑀺, 𑀬𑀢𑁆𑀭𑀺𑀘𑁆𑀙𑀢𑀺 𑀢𑀢𑁆𑀭 𑀕𑀦𑁆𑀢𑁆𑀯𑀸 𑀆𑀕𑀦𑁆𑀢𑀼𑀁 𑀮𑀪𑀢𑀺. 𑀲𑀬𑀁 𑀧𑀦 𑀧𑀸𑀓𑀢𑀺𑀓𑀁 𑀅𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀸𑀢𑀺𑀓𑁆𑀓𑀫𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀦𑁆𑀢𑀭𑀲𑀦𑁆𑀦𑀺𑀧𑀸𑀢𑁂 𑀫𑀜𑁆𑀘𑀧𑀻𑀞𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀳𑀺 𑀕𑀫𑀦𑀓𑀸𑀮𑁂 𑀆𑀭𑀸𑀫𑀺𑀓𑀸𑀦𑀁 𑀇𑀫𑀁 𑀧𑀝𑀺𑀲𑀸𑀫𑁂𑀣𑀸𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺.

𑀫𑀳𑀸𑀥𑀫𑁆𑀫𑀲𑀯𑀦𑀁 𑀦𑀸𑀫 𑀳𑁄𑀢𑀺 𑀢𑀢𑁆𑀣 𑀉𑀧𑁄𑀲𑀣𑀸𑀕𑀸𑀭𑀢𑁄𑀧𑀺 𑀪𑁄𑀚𑀦𑀲𑀸𑀮𑀢𑁄𑀧𑀺 𑀆𑀳𑀭𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑀺. 𑀆𑀯𑀸𑀲𑀺𑀓𑀸𑀦𑀁𑀬𑁂𑀯 𑀧𑀮𑀺𑀩𑁄𑀥𑁄. 𑀲𑀘𑁂 𑀆𑀕𑀦𑁆𑀢𑀼𑀓𑀸 ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑀲𑁆𑀲 𑀇𑀤𑀁 𑀆𑀘𑀭𑀺𑀬𑀲𑁆𑀲𑀸’’𑀢𑀺 𑀕𑀡𑁆𑀳𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀢𑁂𑀲𑀁𑀬𑁂𑀯 𑀧𑀮𑀺𑀩𑁄𑀥𑁄. 𑀕𑀫𑀦𑀓𑀸𑀮𑁂 𑀧𑀸𑀓𑀢𑀺𑀓𑀁 𑀅𑀓𑀢𑁆𑀯𑀸 𑀮𑁂𑀟𑁆𑀟𑀼𑀧𑀸𑀢𑀁 𑀅𑀢𑀺𑀓𑁆𑀓𑀫𑀦𑁆𑀢𑀸𑀦𑀁 𑀆𑀧𑀢𑁆𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀼𑀦 𑀯𑀼𑀢𑁆𑀢𑀁 𑁋 ‘‘𑀬𑀸𑀯 𑀅𑀜𑁆𑀜𑁂 𑀦 𑀦𑀺𑀲𑀻𑀤𑀦𑁆𑀢𑀺, 𑀢𑀸𑀯 𑀬𑁂𑀳𑀺 𑀧𑀜𑁆𑀜𑀢𑁆𑀢𑀁, 𑀢𑁂𑀲𑀁 𑀪𑀸𑀭𑁄. 𑀅𑀜𑁆𑀜𑁂𑀲𑀼 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀦𑀺𑀲𑀺𑀦𑁆𑀦𑀓𑀸𑀦𑀁 𑀪𑀸𑀭𑁄. 𑀲𑀘𑁂 𑀢𑁂 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀯𑀸 𑀅𑀦𑀼𑀤𑁆𑀥𑀭𑀸𑀧𑁂𑀢𑁆𑀯𑀸 𑀯𑀸 𑀕𑀘𑁆𑀙𑀦𑁆𑀢𑀺, 𑀤𑀼𑀓𑁆𑀓𑀝𑀁. 𑀓𑀲𑁆𑀫𑀸? 𑀅𑀦𑀸𑀡𑀢𑁆𑀢𑀺𑀬𑀸 𑀧𑀜𑁆𑀜𑀧𑀺𑀢𑀢𑁆𑀢𑀸’’𑀢𑀺. 𑀥𑀫𑁆𑀫𑀸𑀲𑀦𑁂 𑀧𑀜𑁆𑀜𑀢𑁆𑀢𑁂 𑀬𑀸𑀯 𑀉𑀲𑁆𑀲𑀸𑀭𑀓𑁄 𑀯𑀸 𑀥𑀫𑁆𑀫𑀓𑀣𑀺𑀓𑁄 𑀯𑀸 𑀦𑀸𑀕𑀘𑁆𑀙𑀢𑀺, 𑀢𑀸𑀯 𑀧𑀜𑁆𑀜𑀸𑀧𑀓𑀸𑀦𑀁 𑀧𑀮𑀺𑀩𑁄𑀥𑁄, 𑀢𑀲𑁆𑀫𑀺𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀢𑀲𑁆𑀲 𑀧𑀮𑀺𑀩𑁄𑀥𑁄. 𑀲𑀓𑀮𑀁 𑀅𑀳𑁄𑀭𑀢𑁆𑀢𑀁 𑀥𑀫𑁆𑀫𑀲𑀯𑀦𑀁 𑀳𑁄𑀢𑀺, 𑀅𑀜𑁆𑀜𑁄 𑀉𑀲𑁆𑀲𑀸𑀭𑀓𑁄 𑀯𑀸 𑀥𑀫𑁆𑀫𑀓𑀣𑀺𑀓𑁄 𑀯𑀸 𑀉𑀝𑁆𑀞𑀳𑀢𑀺, 𑀅𑀜𑁆𑀜𑁄 𑀦𑀺𑀲𑀻𑀤𑀢𑀺, 𑀬𑁄 𑀬𑁄 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀢𑀲𑁆𑀲 𑀢𑀲𑁆𑀲 𑀪𑀸𑀭𑁄. 𑀉𑀝𑁆𑀞𑀳𑀦𑁆𑀢𑁂𑀦 𑀧𑀦 ‘‘𑀇𑀤𑀫𑀸𑀲𑀦𑀁 𑀢𑀼𑀫𑁆𑀳𑀸𑀓𑀁 𑀪𑀸𑀭𑁄’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂𑀧𑀺 𑀇𑀢𑀭𑀲𑁆𑀫𑀺𑀁 𑀅𑀦𑀸𑀕𑀢𑁂𑀬𑁂𑀯 𑀧𑀞𑀫𑀁 𑀦𑀺𑀲𑀺𑀦𑁆𑀦𑁄 𑀉𑀝𑁆𑀞𑀸𑀬 𑀕𑀘𑁆𑀙𑀢𑀺, 𑀢𑀲𑁆𑀫𑀺𑀜𑁆𑀘 𑀅𑀦𑁆𑀢𑁄𑀉𑀧𑀘𑀸𑀭𑀝𑁆𑀞𑁂𑀬𑁂𑀯 𑀇𑀢𑀭𑁄 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀉𑀝𑁆𑀞𑀸𑀬 𑀕𑀢𑁄 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀇𑀢𑀭𑀲𑁆𑀫𑀺𑀁 𑀅𑀦𑀸𑀕𑀢𑁂𑀬𑁂𑀯 𑀧𑀞𑀫𑀁 𑀦𑀺𑀲𑀺𑀦𑁆𑀦𑁄 𑀉𑀝𑁆𑀞𑀸𑀬𑀸𑀲𑀦𑀸 𑀮𑁂𑀟𑁆𑀟𑀼𑀧𑀸𑀢𑀁 𑀅𑀢𑀺𑀓𑁆𑀓𑀫𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀲𑀩𑁆𑀩𑀢𑁆𑀣 𑀘 ‘‘𑀮𑁂𑀟𑁆𑀟𑀼𑀧𑀸𑀢𑀸𑀢𑀺𑀓𑁆𑀓𑀫𑁂 𑀧𑀞𑀫𑀧𑀸𑀤𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀅𑀬𑀁 𑀦𑀬𑁄 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑁄.

𑁧𑁧𑁨. 𑀘𑀺𑀫𑀺𑀮𑀺𑀓𑀁 𑀯𑀸𑀢𑀺𑀆𑀤𑀻𑀲𑀼 𑀘𑀺𑀫𑀺𑀮𑀺𑀓𑀸 𑀦𑀸𑀫 𑀲𑀼𑀥𑀸𑀤𑀺𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀯𑀡𑁆𑀡𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀓𑀢𑀸 𑀳𑁄𑀢𑀺, 𑀢𑀁 𑀳𑁂𑀝𑁆𑀞𑀸 𑀧𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀓𑀝𑀲𑀸𑀭𑀓𑀁 𑀧𑀢𑁆𑀣𑀭𑀦𑁆𑀢𑀺. 𑀉𑀢𑁆𑀢𑀭𑀢𑁆𑀣𑀭𑀡𑀁 𑀦𑀸𑀫 𑀫𑀜𑁆𑀘𑀧𑀻𑀞𑀸𑀦𑀁 𑀉𑀧𑀭𑀺 𑀅𑀢𑁆𑀣𑀭𑀺𑀢𑀩𑁆𑀩𑀓𑀁 𑀧𑀘𑁆𑀘𑀢𑁆𑀣𑀭𑀡𑀁. 𑀪𑀽𑀫𑀢𑁆𑀣𑀭𑀡𑀁 𑀦𑀸𑀫 𑀪𑀽𑀫𑀺𑀬𑀁 𑀅𑀢𑁆𑀣𑀭𑀺𑀢𑀩𑁆𑀩𑀸 𑀓𑀝𑀲𑀸𑀭𑀓𑀸𑀤𑀺𑀯𑀺𑀓𑀢𑀺. 𑀢𑀝𑁆𑀝𑀺𑀓𑀁 𑀦𑀸𑀫 𑀢𑀸𑀮𑀧𑀡𑁆𑀡𑁂𑀳𑀺 𑀯𑀸 𑀯𑀸𑀓𑁂𑀳𑀺 𑀯𑀸 𑀓𑀢𑀢𑀝𑁆𑀝𑀺𑀓𑀸. 𑀘𑀫𑁆𑀫𑀔𑀡𑁆𑀟𑁄 𑀦𑀸𑀫 𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀢𑀭𑀘𑁆𑀙𑀘𑀫𑁆𑀫𑀸𑀤𑀻𑀲𑀼𑀧𑀺 𑀬𑀁𑀓𑀺𑀜𑁆𑀘𑀺 𑀘𑀫𑁆𑀫𑀁. 𑀅𑀝𑁆𑀞𑀓𑀣𑀸𑀲𑀼 𑀳𑀺 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁂 𑀧𑀝𑀺𑀓𑁆𑀔𑀺𑀢𑁆𑀢𑀘𑀫𑁆𑀫𑀁 𑀦𑀸𑀫 𑀦 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀻𑀳𑀘𑀫𑁆𑀫𑀸𑀤𑀻𑀦𑀁 𑀧𑀭𑀺𑀳𑀭𑀡𑁂𑀬𑁂𑀯 𑀧𑀝𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀤𑀧𑀼𑀜𑁆𑀙𑀦𑀻 𑀦𑀸𑀫 𑀭𑀚𑁆𑀚𑀼𑀓𑁂𑀳𑀺 𑀯𑀸 𑀧𑀺𑀮𑁄𑀢𑀺𑀓𑀸𑀳𑀺 𑀯𑀸 𑀧𑀸𑀤𑀧𑀼𑀜𑁆𑀙𑀦𑀢𑁆𑀣𑀁 𑀓𑀢𑀸. 𑀨𑀮𑀓𑀧𑀻𑀞𑀁 𑀦𑀸𑀫 𑀨𑀮𑀓𑀫𑀬𑀁 𑀧𑀻𑀞𑀁. 𑀅𑀣 𑀯𑀸 𑀨𑀮𑀓𑀜𑁆𑀘𑁂𑀯 𑀤𑀸𑀭𑀼𑀫𑀬𑀧𑀻𑀞𑀜𑁆𑀘; 𑀏𑀢𑁂𑀦 𑀲𑀩𑁆𑀩𑀫𑁆𑀧𑀺 𑀤𑀸𑀭𑀼𑀪𑀡𑁆𑀟𑀸𑀤𑀺 𑀲𑀗𑁆𑀕𑀳𑀺𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀯𑀺𑀢𑁆𑀣𑀸𑀭𑁂𑀦𑁂𑀯 𑀯𑀼𑀢𑁆𑀢𑀁 𑁋 ‘‘𑀆𑀥𑀸𑀭𑀓𑀁 𑀧𑀢𑁆𑀢𑀧𑀺𑀥𑀸𑀦𑀁 𑀧𑀸𑀤𑀓𑀣𑀮𑀺𑀓𑀁 𑀢𑀸𑀮𑀯𑀡𑁆𑀝𑀁 𑀩𑀻𑀚𑀦𑀻𑀧𑀢𑁆𑀢𑀓𑀁 𑀬𑀁𑀓𑀺𑀜𑁆𑀘𑀺 𑀤𑀸𑀭𑀼𑀪𑀡𑁆𑀟𑀁 𑀅𑀦𑁆𑀢𑀫𑀲𑁄 𑀧𑀸𑀦𑀻𑀬𑀉𑀴𑀼𑀗𑁆𑀓𑀁 𑀧𑀸𑀦𑀻𑀬𑀲𑀗𑁆𑀔𑀁 𑀅𑀚𑁆𑀛𑁄𑀓𑀸𑀲𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀏𑀲 𑀦𑀬𑁄 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑀤𑀲𑁆𑀲𑀺𑀢𑁄. 𑀅𑀚𑁆𑀛𑁄𑀓𑀸𑀲𑁂 𑀭𑀚𑀦𑀁 𑀧𑀘𑀺𑀢𑁆𑀯𑀸 𑀭𑀚𑀦𑀪𑀸𑀚𑀦𑀁 𑀭𑀚𑀦𑀉𑀴𑀼𑀗𑁆𑀓𑁄 𑀭𑀚𑀦𑀤𑁄𑀡𑀺𑀓𑀸𑀢𑀺 𑀲𑀩𑁆𑀩𑀁 𑀅𑀕𑁆𑀕𑀺𑀲𑀸𑀮𑀸𑀬 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀲𑀘𑁂 𑀅𑀕𑁆𑀕𑀺𑀲𑀸𑀮𑀸 𑀦𑀢𑁆𑀣𑀺, 𑀅𑀦𑁄𑀯𑀲𑁆𑀲𑀓𑁂 𑀧𑀩𑁆𑀪𑀸𑀭𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀬𑀢𑁆𑀣 𑀑𑀮𑁄𑀓𑁂𑀦𑁆𑀢𑀸 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺, 𑀢𑀸𑀤𑀺𑀲𑁂 𑀞𑀸𑀦𑁂 𑀞𑀧𑁂𑀢𑁆𑀯𑀸𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺.

𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀺𑀓𑁂𑀢𑀺 𑀬𑀲𑁆𑀫𑀺𑀁 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁄 𑀦 𑀭𑀼𑀳𑀢𑀺, 𑀢𑀲𑁆𑀲 𑀲𑀦𑁆𑀢𑀓𑁂 𑀤𑀼𑀓𑁆𑀓𑀝𑀁. 𑀬𑀲𑁆𑀫𑀺𑀁 𑀧𑀦 𑀯𑀺𑀲𑁆𑀲𑀸𑀲𑁄 𑀭𑀼𑀳𑀢𑀺, 𑀢𑀲𑁆𑀲 𑀲𑀦𑁆𑀢𑀓𑀁 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀫𑀺𑀯 𑀳𑁄𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀯𑀼𑀢𑁆𑀢𑀁.

𑁧𑁧𑁩. 𑀆𑀧𑀼𑀘𑁆𑀙𑀁 𑀕𑀘𑁆𑀙𑀢𑀻𑀢𑀺 𑀬𑁄 𑀪𑀺𑀓𑁆𑀔𑀼 𑀯𑀸 𑀲𑀸𑀫𑀡𑁂𑀭𑁄 𑀯𑀸 𑀆𑀭𑀸𑀫𑀺𑀓𑁄 𑀯𑀸 𑀮𑀚𑁆𑀚𑀻 𑀳𑁄𑀢𑀺, 𑀅𑀢𑁆𑀢𑀦𑁄 𑀧𑀮𑀺𑀩𑁄𑀥𑀁 𑀯𑀺𑀬 𑀫𑀜𑁆𑀜𑀢𑀺, 𑀬𑁄 𑀢𑀣𑀸𑀭𑀽𑀧𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀑𑀢𑀸𑀧𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀆𑀢𑀧𑁂 𑀑𑀢𑀸𑀧𑁂𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀉𑀤𑁆𑀥𑀭𑀺𑀲𑁆𑀲𑀸𑀫𑀻𑀢𑀺 𑀕𑀘𑁆𑀙𑀢𑀺; 𑀏𑀯𑀁 𑀕𑀘𑁆𑀙𑀢𑁄 𑀅𑀦𑀸𑀧𑀢𑁆𑀢𑀺. 𑀓𑁂𑀦𑀘𑀺 𑀧𑀮𑀺𑀩𑀼𑀤𑁆𑀥𑀁 𑀳𑁄𑀢𑀻𑀢𑀺 𑀲𑁂𑀦𑀸𑀲𑀦𑀁 𑀓𑁂𑀦𑀘𑀺 𑀉𑀧𑀤𑁆𑀤𑀼𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀘𑁂𑀧𑀺 𑀳𑀺 𑀯𑀼𑀟𑁆𑀠𑀢𑀭𑁄 𑀪𑀺𑀓𑁆𑀔𑀼 𑀉𑀝𑁆𑀞𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀲𑀘𑁂𑀧𑀺 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀓𑁄𑀘𑀺 𑀯𑀸 𑀇𑀲𑁆𑀲𑀭𑁄 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀲𑁂𑀦𑀸𑀲𑀦𑀁 𑀧𑀮𑀺𑀩𑀼𑀤𑁆𑀥𑀁 𑀳𑁄𑀢𑀺, 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀲𑀼 𑀯𑀸 𑀧𑀦 𑀢𑀁 𑀧𑀤𑁂𑀲𑀁 𑀆𑀕𑀦𑁆𑀢𑁆𑀯𑀸 𑀞𑀺𑀢𑁂𑀲𑀼𑀧𑀺 𑀲𑁂𑀦𑀸𑀲𑀦𑀁 𑀧𑀮𑀺𑀩𑀼𑀤𑁆𑀥𑀁 𑀳𑁄𑀢𑀺𑀬𑁂𑀯. 𑀏𑀯𑀁 𑀓𑁂𑀦𑀘𑀺 𑀧𑀮𑀺𑀩𑀼𑀤𑁆𑀥𑁂 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀧𑀺 𑀕𑀘𑁆𑀙𑀢𑁄 𑀅𑀦𑀸𑀧𑀢𑁆𑀢𑀺. 𑀆𑀧𑀤𑀸𑀲𑀽𑀢𑀺 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂𑀲𑀼. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀯𑀸𑀘𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀁 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁬. 𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑁂 𑁋 𑀪𑀺𑀲𑀻𑀢𑀺 𑀫𑀜𑁆𑀘𑀓𑀪𑀺𑀲𑀺 𑀯𑀸 𑀧𑀻𑀞𑀓𑀪𑀺𑀲𑀺 𑀯𑀸. 𑀘𑀺𑀫𑀺𑀮𑀺𑀓𑀸𑀤𑀻𑀦𑀺𑀧𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺𑀬𑁂𑀯. 𑀦𑀺𑀲𑀻𑀤𑀦𑀦𑁆𑀢𑀺 𑀲𑀤𑀲𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀧𑀸𑀯𑀸𑀭𑁄 𑀓𑁄𑀚𑀯𑁄𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀢𑀺𑀡𑀲𑀦𑁆𑀣𑀸𑀭𑁄𑀢𑀺 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀢𑀺𑀡𑀸𑀦𑀁 𑀲𑀦𑁆𑀣𑀸𑀭𑁄. 𑀏𑀲 𑀦𑀬𑁄 𑀧𑀡𑁆𑀡𑀲𑀦𑁆𑀣𑀸𑀭𑁂. 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀧𑀞𑀫𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀸𑀢𑀺𑀓𑁆𑀓𑀫𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑁄 𑀦𑀸𑀫 𑀲𑁂𑀦𑀸𑀲𑀦𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑀸.

𑀅𑀦𑀸𑀧𑀼𑀘𑁆𑀙𑀁 𑀯𑀸 𑀕𑀘𑁆𑀙𑁂𑀬𑁆𑀬𑀸𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀫𑁆𑀳𑀺 𑀲𑀢𑀺 𑀪𑀺𑀓𑁆𑀔𑀼 𑀆𑀧𑀼𑀘𑁆𑀙𑀺𑀢𑀩𑁆𑀩𑁄. 𑀢𑀲𑁆𑀫𑀺𑀁 𑀅𑀲𑀢𑀺 𑀲𑀸𑀫𑀡𑁂𑀭𑁄, 𑀢𑀲𑁆𑀫𑀺𑀁 𑀅𑀲𑀢𑀺 𑀆𑀭𑀸𑀫𑀺𑀓𑁄, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀬𑁂𑀦 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄 𑀲𑁄 𑀯𑀺𑀳𑀸𑀭𑀲𑀸𑀫𑀺𑀓𑁄, 𑀢𑀲𑁆𑀲 𑀯𑀸 𑀓𑀼𑀮𑁂 𑀬𑁄 𑀓𑁄𑀘𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑁄. 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀘𑀢𑀽𑀲𑀼 𑀧𑀸𑀲𑀸𑀡𑁂𑀲𑀼 𑀫𑀜𑁆𑀘𑀁 𑀞𑀧𑁂𑀢𑁆𑀯𑀸 𑀫𑀜𑁆𑀘𑁂 𑀅𑀯𑀲𑁂𑀲𑀫𑀜𑁆𑀘𑀧𑀻𑀞𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀉𑀧𑀭𑀺 𑀪𑀺𑀲𑀺𑀆𑀤𑀺𑀓𑀁 𑀤𑀲𑀯𑀺𑀥𑀫𑁆𑀧𑀺 𑀲𑁂𑀬𑁆𑀬𑀁 𑀭𑀸𑀲𑀺𑀁 𑀓𑀭𑀺𑀢𑁆𑀯𑀸 𑀤𑀸𑀭𑀼𑀪𑀡𑁆𑀟𑀁 𑀫𑀢𑁆𑀢𑀺𑀓𑀸𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀕𑀫𑀺𑀬𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀧𑀦 𑀲𑁂𑀦𑀸𑀲𑀦𑀁 𑀑𑀯𑀲𑁆𑀲𑀢𑀺, 𑀙𑀤𑀦𑀢𑁆𑀣𑀜𑁆𑀘 𑀢𑀺𑀡𑀁 𑀯𑀸 𑀇𑀝𑁆𑀞𑀓𑀸 𑀯𑀸 𑀆𑀦𑀻𑀢𑀸 𑀳𑁄𑀦𑁆𑀢𑀺, 𑀲𑀘𑁂 𑀉𑀲𑁆𑀲𑀳𑀢𑀺, 𑀙𑀸𑀤𑁂𑀢𑀩𑁆𑀩𑀁. 𑀦𑁄 𑀘𑁂 𑀲𑀓𑁆𑀓𑁄𑀢𑀺, 𑀬𑁄 𑀑𑀓𑀸𑀲𑁄 𑀅𑀦𑁄𑀯𑀲𑁆𑀲𑀓𑁄, 𑀢𑀢𑁆𑀣 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀲𑀩𑁆𑀩𑀫𑁆𑀧𑀺 𑀑𑀯𑀲𑁆𑀲𑀢𑀺, 𑀉𑀲𑁆𑀲𑀳𑀦𑁆𑀢𑁂𑀦 𑀅𑀦𑁆𑀢𑁄𑀕𑀸𑀫𑁂 𑀉𑀧𑀸𑀲𑀓𑀸𑀦𑀁 𑀖𑀭𑁂 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀢𑁂𑀧𑀺 ‘‘𑀲𑀗𑁆𑀖𑀺𑀓𑀁 𑀦𑀸𑀫 𑀪𑀦𑁆𑀢𑁂 𑀪𑀸𑀭𑀺𑀬𑀁, 𑀅𑀕𑁆𑀕𑀺𑀤𑀸𑀳𑀸𑀤𑀻𑀦𑀁 𑀪𑀸𑀬𑀸𑀫𑀸’’𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀅𑀚𑁆𑀛𑁄𑀓𑀸𑀲𑁂𑀧𑀺 𑀧𑀸𑀲𑀸𑀡𑀸𑀦𑀁 𑀉𑀧𑀭𑀺 𑀫𑀜𑁆𑀘𑀁 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀡𑁂𑀳𑀺 𑀘 𑀧𑀡𑁆𑀡𑁂𑀳𑀺 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀬𑀜𑁆𑀳𑀺 𑀢𑀢𑁆𑀣 𑀅𑀗𑁆𑀕𑀫𑀢𑁆𑀢𑀫𑁆𑀧𑀺 𑀅𑀯𑀲𑀺𑀲𑁆𑀲𑀢𑀺, 𑀢𑀁 𑀅𑀜𑁆𑀜𑁂𑀲𑀁 𑀢𑀢𑁆𑀣 𑀆𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑀓𑀸𑀭𑀁 𑀪𑀯𑀺𑀲𑁆𑀲𑀢𑀻𑀢𑀺.

𑁧𑁧𑁭. 𑀯𑀺𑀳𑀸𑀭𑀲𑁆𑀲 𑀉𑀧𑀘𑀸𑀭𑁂𑀢𑀺𑀆𑀤𑀻𑀲𑀼 𑀯𑀺𑀳𑀸𑀭𑀲𑁆𑀲𑀽𑀧𑀘𑀸𑀭𑁄 𑀦𑀸𑀫 𑀧𑀭𑀺𑀯𑁂𑀡𑀁. 𑀉𑀧𑀝𑁆𑀞𑀸𑀦𑀲𑀸𑀮𑀸𑀢𑀺 𑀧𑀭𑀺𑀯𑁂𑀡𑀪𑁄𑀚𑀦𑀲𑀸𑀮𑀸. 𑀫𑀡𑁆𑀟𑀧𑁄𑀢𑀺 𑀧𑀭𑀺𑀯𑁂𑀡𑀫𑀡𑁆𑀟𑀧𑁄. 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀧𑀭𑀺𑀯𑁂𑀡𑀭𑀼𑀓𑁆𑀔𑀫𑀽𑀮𑀁. 𑀅𑀬𑀁 𑀢𑀸𑀯 𑀦𑀬𑁄 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑁄, 𑀅𑀣 𑀔𑁄 𑀯𑀺𑀳𑀸𑀭𑁄𑀢𑀺 𑀅𑀦𑁆𑀢𑁄𑀕𑀩𑁆𑀪𑁄 𑀯𑀸 𑀅𑀜𑁆𑀜𑀁 𑀯𑀸 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀁 𑀕𑀼𑀢𑁆𑀢𑀲𑁂𑀦𑀸𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀳𑀸𑀭𑀲𑁆𑀲 𑀉𑀧𑀘𑀸𑀭𑁂𑀢𑀺 𑀢𑀲𑁆𑀲 𑀩𑀳𑀺 𑀆𑀲𑀦𑁆𑀦𑁂 𑀑𑀓𑀸𑀲𑁂. 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀯𑀸𑀢𑀺 𑀪𑁄𑀚𑀦𑀲𑀸𑀮𑀸𑀬𑀁 𑀯𑀸. 𑀫𑀡𑁆𑀟𑀧𑁂 𑀯𑀸𑀢𑀺 𑀅𑀧𑀭𑀺𑀘𑁆𑀙𑀦𑁆𑀦𑁂 𑀧𑀭𑀺𑀘𑁆𑀙𑀦𑁆𑀦𑁂 𑀯𑀸𑀧𑀺 𑀩𑀳𑀽𑀦𑀁 𑀲𑀦𑁆𑀦𑀺𑀧𑀸𑀢𑀫𑀡𑁆𑀟𑀧𑁂. 𑀭𑀼𑀓𑁆𑀔𑀫𑀽𑀮𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀜𑁆𑀳𑀺 𑀤𑀲𑀯𑀺𑀥𑀁 𑀲𑁂𑀬𑁆𑀬𑀁 𑀅𑀦𑁆𑀢𑁄𑀕𑀩𑁆𑀪𑀸𑀤𑀺𑀫𑁆𑀳𑀺 𑀕𑀼𑀢𑁆𑀢𑀝𑁆𑀞𑀸𑀦𑁂 𑀧𑀜𑁆𑀜𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀬𑀲𑁆𑀫𑀸 𑀲𑁂𑀬𑁆𑀬𑀸𑀧𑀺 𑀲𑁂𑀦𑀸𑀲𑀦𑀫𑁆𑀧𑀺 𑀉𑀧𑀘𑀺𑀓𑀸𑀳𑀺 𑀧𑀮𑀼𑀚𑁆𑀚𑀢𑀺, 𑀯𑀫𑁆𑀫𑀺𑀓𑀭𑀸𑀲𑀺𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀩𑀳𑀺 𑀧𑀦 𑀉𑀧𑀝𑁆𑀞𑀸𑀦𑀲𑀸𑀮𑀸𑀤𑀻𑀲𑀼 𑀧𑀜𑁆𑀜𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀲𑁂𑀬𑁆𑀬𑀸𑀫𑀢𑁆𑀢𑀫𑁂𑀯 𑀦𑀲𑁆𑀲𑁂𑀬𑁆𑀬, 𑀞𑀸𑀦𑀲𑁆𑀲 𑀅𑀕𑀼𑀢𑁆𑀢𑀢𑀸𑀬 𑀦 𑀲𑁂𑀦𑀸𑀲𑀦𑀁, 𑀢𑀲𑁆𑀫𑀸 𑀏𑀢𑁆𑀣 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀦 𑀲𑀓𑁆𑀓𑀸 𑀫𑀜𑁆𑀘𑀧𑀻𑀞𑀁 𑀲𑀳𑀲𑀸 𑀉𑀧𑀘𑀺𑀓𑀸𑀳𑀺 𑀔𑀸𑀬𑀺𑀢𑀼𑀁, 𑀢𑀲𑁆𑀫𑀸 𑀢𑀁 𑀯𑀺𑀳𑀸𑀭𑁂𑀧𑀺 𑀲𑀦𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀯𑀺𑀳𑀸𑀭𑀽𑀧𑀘𑀸𑀭𑁂 𑀧𑀦 𑀢𑀁 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸𑀧𑀺 𑀤𑀺𑀲𑁆𑀯𑀸 𑀧𑀝𑀺𑀲𑀸𑀫𑁂𑀲𑁆𑀲𑀦𑁆𑀢𑀺.

𑁧𑁧𑁮. 𑀉𑀤𑁆𑀥𑀭𑀺𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀏𑀢𑁆𑀣 𑀉𑀤𑁆𑀥𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀦 𑀫𑀜𑁆𑀘𑀧𑀻𑀞𑀓𑀯𑀸𑀝𑀁 𑀲𑀩𑁆𑀩𑀁 𑀅𑀧𑀦𑁂𑀢𑁆𑀯𑀸 𑀲𑀁𑀳𑀭𑀺𑀢𑁆𑀯𑀸 𑀘𑀻𑀯𑀭𑀯𑀁𑀲𑁂 𑀮𑀕𑁆𑀕𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀯𑀲𑀦𑀓𑀪𑀺𑀓𑁆𑀔𑀼𑀦𑀸𑀧𑀺 𑀧𑀼𑀦 𑀫𑀜𑁆𑀘𑀧𑀻𑀞𑀁 𑀯𑀸 𑀧𑀜𑁆𑀜𑀧𑁂𑀢𑁆𑀯𑀸 𑀲𑀬𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀦 𑀢𑀣𑁂𑀯 𑀓𑀸𑀢𑀩𑁆𑀩𑀁. 𑀅𑀦𑁆𑀢𑁄𑀓𑀼𑀝𑁆𑀝𑀢𑁄 𑀲𑁂𑀬𑁆𑀬𑀁 𑀩𑀳𑀺𑀓𑀼𑀝𑁆𑀝𑁂 𑀧𑀜𑁆𑀜𑀧𑁂𑀢𑁆𑀯𑀸 𑀯𑀲𑀦𑁆𑀢𑁂𑀦 𑀕𑀫𑀦𑀓𑀸𑀮𑁂 𑀕𑀳𑀺𑀢𑀝𑁆𑀞𑀸𑀦𑁂𑀬𑁂𑀯 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀉𑀧𑀭𑀺𑀧𑀸𑀲𑀸𑀤𑀢𑁄 𑀑𑀭𑁄𑀧𑁂𑀢𑁆𑀯𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀯𑀲𑀦𑁆𑀢𑀲𑁆𑀲𑀧𑀺 𑀏𑀲𑁂𑀯 𑀦𑀬𑁄. 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀧𑁂𑀢𑁆𑀯𑀸𑀧𑀺 𑀕𑀫𑀦𑀓𑀸𑀮𑁂 𑀧𑀼𑀦 𑀕𑀳𑀺𑀢𑀝𑁆𑀞𑀸𑀦𑁂𑀬𑁂𑀯 𑀞𑀧𑁂𑀢𑀩𑁆𑀩𑀁.

𑀆𑀧𑀼𑀘𑁆𑀙𑀁 𑀕𑀘𑁆𑀙𑀢𑀻𑀢𑀺 𑀏𑀢𑁆𑀣𑀸𑀬𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀸𑀦𑀸𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑁄 𑁋 𑀬𑀸 𑀢𑀸𑀯 𑀪𑀽𑀫𑀺𑀬𑀁 𑀤𑀻𑀖𑀲𑀸𑀮𑀸 𑀯𑀸 𑀧𑀡𑁆𑀡𑀲𑀸𑀮𑀸 𑀯𑀸 𑀳𑁄𑀢𑀺, 𑀬𑀁 𑀯𑀸 𑀭𑀼𑀓𑁆𑀔𑀢𑁆𑀣𑀫𑁆𑀪𑁂𑀲𑀼, 𑀓𑀢𑀕𑁂𑀳𑀁 𑀉𑀧𑀘𑀺𑀓𑀸𑀦𑀁 𑀉𑀝𑁆𑀞𑀸𑀦𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀢𑁄 𑀧𑀓𑁆𑀓𑀫𑀦𑁆𑀢𑁂𑀦 𑀢𑀸𑀯 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀢𑀲𑁆𑀫𑀺𑀜𑁆𑀳𑀺 𑀓𑀢𑀺𑀧𑀬𑀸𑀦𑀺 𑀤𑀺𑀯𑀲𑀸𑀦𑀺 𑀅𑀚𑀕𑁆𑀕𑀺𑀬𑀫𑀸𑀦𑁂 𑀯𑀫𑁆𑀫𑀺𑀓𑀸𑀯 𑀲𑀦𑁆𑀢𑀺𑀝𑁆𑀞𑀦𑁆𑀢𑀺. 𑀬𑀁 𑀧𑀦 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀯𑀸 𑀧𑀸𑀲𑀸𑀡𑀢𑁆𑀣𑀫𑁆𑀪𑁂𑀲𑀼 𑀯𑀸 𑀓𑀢𑀲𑁂𑀦𑀸𑀲𑀦𑀁 𑀲𑀺𑀮𑀼𑀘𑁆𑀘𑀬𑀮𑁂𑀡𑀁 𑀯𑀸 𑀲𑀼𑀥𑀸𑀮𑀺𑀢𑁆𑀢𑀲𑁂𑀦𑀸𑀲𑀦𑀁 𑀯𑀸 𑀬𑀢𑁆𑀣 𑀉𑀧𑀘𑀺𑀓𑀸𑀲𑀗𑁆𑀓𑀸 𑀦𑀢𑁆𑀣𑀺, 𑀢𑀢𑁄 𑀧𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀆𑀧𑀼𑀘𑁆𑀙𑀦𑀁 𑀧𑀦 𑀯𑀢𑁆𑀢𑀁. 𑀲𑀘𑁂 𑀢𑀸𑀤𑀺𑀲𑁂𑀧𑀺 𑀲𑁂𑀦𑀸𑀲𑀦𑁂 𑀏𑀓𑁂𑀦 𑀧𑀲𑁆𑀲𑁂𑀦 𑀉𑀧𑀘𑀺𑀓𑀸 𑀆𑀭𑁄𑀳𑀦𑁆𑀢𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁. 𑀬𑁄 𑀧𑀦 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀯𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀼𑀯𑀢𑁆𑀢𑀦𑁆𑀢𑁄 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀯𑀲𑀢𑀺, 𑀬𑀸𑀯 𑀲𑁄 𑀦 𑀕𑀡𑁆𑀳𑀸𑀢𑀺, 𑀢𑀸𑀯 𑀢𑀁 𑀲𑁂𑀦𑀸𑀲𑀦𑀁 𑀧𑀼𑀭𑀺𑀫𑀪𑀺𑀓𑁆𑀔𑀼𑀲𑁆𑀲𑁂𑀯 𑀧𑀮𑀺𑀩𑁄𑀥𑁄. 𑀬𑀤𑀸 𑀧𑀦 𑀲𑁄 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑁂𑀦 𑀯𑀲𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀆𑀕𑀦𑁆𑀢𑀼𑀓𑀲𑁆𑀲𑁂𑀯 𑀧𑀮𑀺𑀩𑁄𑀥𑁄. 𑀲𑀘𑁂 𑀉𑀪𑁄𑀧𑀺 𑀯𑀺𑀪𑀚𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀉𑀪𑀺𑀦𑁆𑀦𑀫𑁆𑀧𑀺 𑀧𑀮𑀺𑀩𑁄𑀥𑁄. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀲𑀘𑁂 𑀤𑁆𑀯𑁂 𑀢𑀬𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀜𑁆𑀜𑀧𑁂𑀦𑁆𑀢𑀺, 𑀕𑀫𑀦𑀓𑀸𑀮𑁂 𑀲𑀩𑁆𑀩𑁂𑀳𑀺𑀧𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑀁. 𑀢𑁂𑀲𑀼 𑀘𑁂 𑀧𑀞𑀫𑀁 𑀕𑀘𑁆𑀙𑀦𑁆𑀢𑁄 ‘𑀧𑀘𑁆𑀙𑀺𑀫𑁄 𑀚𑀕𑁆𑀕𑀺𑀲𑁆𑀲𑀢𑀻’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀘𑁆𑀙𑀢𑀺 𑀯𑀝𑁆𑀝𑀢𑀺. 𑀧𑀘𑁆𑀙𑀺𑀫𑀲𑁆𑀲 𑀆𑀪𑁄𑀕𑁂𑀦 𑀫𑀼𑀢𑁆𑀢𑀺 𑀦𑀢𑁆𑀣𑀺. 𑀩𑀳𑀽 𑀏𑀓𑀁 𑀧𑁂𑀲𑁂𑀢𑁆𑀯𑀸 𑀲𑀦𑁆𑀣𑀭𑀸𑀧𑁂𑀦𑁆𑀢𑀺, 𑀕𑀫𑀦𑀓𑀸𑀮𑁂 𑀲𑀩𑁆𑀩𑁂𑀳𑀺 𑀯𑀸 𑀆𑀧𑀼𑀘𑁆𑀙𑀺𑀢𑀩𑁆𑀩𑀁, 𑀏𑀓𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑀩𑁆𑀩𑀁. 𑀅𑀜𑁆𑀜𑀢𑁄 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀆𑀦𑁂𑀢𑁆𑀯𑀸 𑀅𑀜𑁆𑀜𑀢𑁆𑀭 𑀯𑀲𑀺𑀢𑁆𑀯𑀸𑀧𑀺 𑀕𑀫𑀦𑀓𑀸𑀮𑁂 𑀢𑀢𑁆𑀣𑁂𑀯 𑀦𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀅𑀜𑁆𑀜𑀸𑀯𑀸𑀲𑀢𑁄 𑀆𑀦𑁂𑀢𑁆𑀯𑀸 𑀯𑀲𑀫𑀸𑀦𑀲𑁆𑀲 𑀅𑀜𑁆𑀜𑁄 𑀯𑀼𑀟𑁆𑀠𑀢𑀭𑁄 𑀆𑀕𑀘𑁆𑀙𑀢𑀺, 𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑁄, ‘𑀫𑀬𑀸 𑀪𑀦𑁆𑀢𑁂 𑀅𑀜𑁆𑀜𑀸𑀯𑀸𑀲𑀢𑁄 𑀆𑀦𑀻𑀢𑀁, 𑀧𑀸𑀓𑀢𑀺𑀓𑀁 𑀓𑀭𑁂𑀬𑁆𑀬𑀸𑀣𑀸’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑁂𑀦 ‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀇𑀢𑀭𑀲𑁆𑀲 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀫𑀜𑁆𑀜𑀢𑁆𑀣 𑀳𑀭𑀺𑀢𑁆𑀯𑀸𑀧𑀺 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀝𑁆𑀞𑀁 𑀯𑀸 𑀚𑀺𑀡𑁆𑀡𑀁 𑀯𑀸 𑀘𑁄𑀭𑁂𑀳𑀺 𑀯𑀸 𑀳𑀝𑀁 𑀕𑀻𑀯𑀸 𑀦 𑀳𑁄𑀢𑀺, 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀦 𑀕𑀻𑀯𑀸 𑀳𑁄𑀢𑀺. 𑀅𑀜𑁆𑀜𑀲𑁆𑀲 𑀫𑀜𑁆𑀘𑀧𑀻𑀞𑀁 𑀧𑀦 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀝𑁆𑀞𑀁 𑀕𑀻𑀯𑀸𑀬𑁂𑀯’’.

𑀓𑁂𑀦𑀘𑀺 𑀧𑀮𑀺𑀩𑀼𑀤𑁆𑀥𑀁 𑀳𑁄𑀢𑀻𑀢𑀺 𑀯𑀼𑀟𑁆𑀠𑀢𑀭𑀪𑀺𑀓𑁆𑀔𑀽𑀇𑀲𑁆𑀲𑀭𑀺𑀬𑀬𑀓𑁆𑀔𑀲𑀻𑀳𑀯𑀸𑀴𑀫𑀺𑀕𑀓𑀡𑁆𑀳𑀲𑀧𑁆𑀧𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀲𑁂𑀦𑀸𑀲𑀦𑀁 𑀧𑀮𑀺𑀩𑀼𑀤𑁆𑀥𑀁 𑀳𑁄𑀢𑀺. 𑀲𑀸𑀧𑁂𑀓𑁆𑀔𑁄 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀞𑀺𑀢𑁄 𑀆𑀧𑀼𑀘𑁆𑀙𑀢𑀺, 𑀓𑁂𑀦𑀘𑀺 𑀧𑀮𑀺𑀩𑀼𑀤𑁆𑀥𑁄 𑀳𑁄𑀢𑀻𑀢𑀺 𑀅𑀚𑁆𑀚𑁂𑀯 𑀆𑀕𑀦𑁆𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀲𑀸𑀧𑁂𑀓𑁆𑀔𑁄 𑀦𑀤𑀻𑀧𑀸𑀭𑀁 𑀯𑀸 𑀕𑀸𑀫𑀦𑁆𑀢𑀭𑀁 𑀯𑀸 𑀕𑀦𑁆𑀢𑁆𑀯𑀸 𑀬𑀢𑁆𑀣𑀲𑁆𑀲 𑀕𑀫𑀦𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁆𑀣𑁂𑀯 𑀞𑀺𑀢𑁄 𑀓𑀜𑁆𑀘𑀺 𑀧𑁂𑀲𑁂𑀢𑁆𑀯𑀸 𑀆𑀧𑀼𑀘𑁆𑀙𑀢𑀺, 𑀦𑀤𑀻𑀧𑀽𑀭𑀭𑀸𑀚𑀘𑁄𑀭𑀸𑀤𑀻𑀲𑀼 𑀯𑀸 𑀓𑁂𑀦𑀘𑀺 𑀧𑀮𑀺𑀩𑀼𑀤𑁆𑀥𑁄 𑀳𑁄𑀢𑀺 𑀉𑀧𑀤𑁆𑀤𑀼𑀢𑁄, 𑀦 𑀲𑀓𑁆𑀓𑁄𑀢𑀺 𑀧𑀘𑁆𑀘𑀸𑀕𑀦𑁆𑀢𑀼𑀁, 𑀏𑀯𑀁𑀪𑀽𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀫𑁂𑀯 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀸𑀦𑀸𑀤𑀻𑀳𑀻𑀢𑀺.

𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀘𑀫𑀁.

𑁬. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁯. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑁂 𑁋 𑀧𑀮𑀺𑀩𑀼𑀦𑁆𑀥𑁂𑀦𑁆𑀢𑀻𑀢𑀺 𑀧𑀞𑀫𑀢𑀭𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀅𑀢𑀺𑀳𑀭𑀺𑀢𑁆𑀯𑀸 𑀭𑀼𑀫𑁆𑀪𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺 ‘‘𑀅𑀫𑁆𑀳𑀸𑀓𑀁 𑀆𑀯𑀼𑀲𑁄 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀲𑁆𑀲𑀕𑁆𑀕𑁂𑀦 𑀕𑀳𑁂𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀅𑀦𑀼𑀧𑀔𑀚𑁆𑀚 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑀻𑀢𑀺 ‘‘𑀢𑀼𑀫𑁆𑀳𑀸𑀓𑀁 𑀪𑀦𑁆𑀢𑁂 𑀫𑀜𑁆𑀘𑀝𑁆𑀞𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀦 𑀲𑀩𑁆𑀩𑁄 𑀯𑀺𑀳𑀸𑀭𑁄. 𑀅𑀫𑁆𑀳𑀸𑀓𑀁 𑀤𑀸𑀦𑀺 𑀇𑀤𑀁 𑀞𑀸𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺𑀧𑀺 𑀦𑀺𑀧𑀚𑁆𑀚𑀦𑁆𑀢𑀺𑀧𑀺 𑀲𑀚𑁆𑀛𑀸𑀬𑀫𑁆𑀧𑀺 𑀓𑀭𑁄𑀦𑁆𑀢𑀺.

𑁧𑁨𑁦. 𑀚𑀸𑀦𑀦𑁆𑀢𑀺 ‘‘𑀅𑀦𑀼𑀝𑁆𑀞𑀸𑀧𑀦𑀻𑀬𑁄 𑀅𑀬’’𑀦𑁆𑀢𑀺 𑀚𑀸𑀦𑀦𑁆𑀢𑁄; 𑀢𑁂𑀦𑁂𑀯𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀯𑀼𑀟𑁆𑀠𑁄𑀢𑀺 𑀚𑀸𑀦𑀸𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀼𑀟𑁆𑀠𑁄 𑀳𑀺 𑀅𑀢𑁆𑀢𑀦𑁄 𑀯𑀼𑀟𑁆𑀠𑀢𑀸𑀬 𑀅𑀦𑀼𑀝𑁆𑀞𑀸𑀧𑀦𑀻𑀬𑁄, 𑀕𑀺𑀮𑀸𑀦𑁄 𑀕𑀺𑀮𑀸𑀦𑀢𑀸𑀬, 𑀲𑀗𑁆𑀖𑁄 𑀧𑀦 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀸 𑀥𑀫𑁆𑀫𑀓𑀣𑀺𑀓𑀯𑀺𑀦𑀬𑀥𑀭𑀸𑀤𑀻𑀦𑀁 𑀯𑀸 𑀕𑀡𑀯𑀸𑀘𑀓𑀆𑀘𑀭𑀺𑀬𑀲𑁆𑀲 𑀯𑀸 𑀩𑀳𑀽𑀧𑀓𑀸𑀭𑀢𑀁 𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀤𑁂𑀢𑀺, 𑀢𑀲𑁆𑀫𑀸 𑀬𑀲𑁆𑀲 𑀲𑀗𑁆𑀖𑁂𑀦 𑀤𑀺𑀦𑁆𑀦𑁄, 𑀲𑁄𑀧𑀺 𑀅𑀦𑀼𑀝𑁆𑀞𑀸𑀧𑀦𑀻𑀬𑁄. 𑀓𑀸𑀫𑀜𑁆𑀘𑁂𑀢𑁆𑀣 𑀕𑀺𑀮𑀸𑀦𑀲𑁆𑀲𑀸𑀧𑀺 𑀲𑀗𑁆𑀖𑁄𑀬𑁂𑀯 𑀅𑀦𑀼𑀘𑁆𑀙𑀯𑀺𑀓𑀁 𑀲𑁂𑀦𑀸𑀲𑀦𑀁 𑀤𑁂𑀢𑀺, 𑀕𑀺𑀮𑀸𑀦𑁄 𑀧𑀦 ‘‘𑀅𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑁂𑀦 𑀅𑀤𑀺𑀦𑁆𑀦𑀲𑁂𑀦𑀸𑀲𑀦𑁄𑀧𑀺 𑀦 𑀧𑀻𑀴𑁂𑀢𑀩𑁆𑀩𑁄 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀯𑀺𑀲𑀼𑀁 𑀯𑀼𑀢𑁆𑀢𑁄.

𑁧𑁨𑁧. 𑀉𑀧𑀘𑀸𑀭𑁂𑀢𑀺 𑀏𑀢𑁆𑀣 𑀫𑀜𑁆𑀘𑀧𑀻𑀞𑀸𑀦𑀁 𑀢𑀸𑀯 𑀫𑀳𑀮𑁆𑀮𑀓𑁂 𑀯𑀺𑀳𑀸𑀭𑁂 𑀲𑀫𑀦𑁆𑀢𑀸 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄 𑀉𑀧𑀘𑀸𑀭𑁄, 𑀔𑀼𑀤𑁆𑀤𑀓𑁂 𑀬𑀢𑁄 𑀧𑀳𑁄𑀢𑀺 𑀢𑀢𑁄 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄, 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀯𑀺𑀲𑀦𑁆𑀢𑀲𑁆𑀲 𑀧𑀲𑁆𑀲𑀸𑀯𑀢𑁆𑀣𑀸𑀬 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀘 𑀬𑀸𑀯 𑀤𑁆𑀯𑀸𑀭𑁂 𑀦𑀺𑀓𑁆𑀔𑀺𑀢𑁆𑀢𑀧𑀸𑀤𑀥𑁄𑀯𑀦𑀧𑀸𑀲𑀸𑀡𑀢𑁄 𑀧𑀲𑁆𑀲𑀸𑀯𑀝𑁆𑀞𑀸𑀦𑀢𑁄 𑀘 𑀫𑀜𑁆𑀘𑀧𑀻𑀞𑀁, 𑀢𑀸𑀯 𑀤𑀺𑀬𑀟𑁆𑀠𑀳𑀢𑁆𑀣𑀯𑀺𑀢𑁆𑀣𑀸𑀭𑁄 𑀫𑀕𑁆𑀕𑁄 𑀉𑀧𑀘𑀸𑀭𑁄 𑀦𑀸𑀫. 𑀢𑀲𑁆𑀫𑀺𑀁 𑀫𑀜𑁆𑀘𑀲𑁆𑀲 𑀯𑀸 𑀧𑀻𑀞𑀲𑁆𑀲 𑀯𑀸 𑀉𑀧𑀘𑀸𑀭𑁂 𑀞𑀺𑀢𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄 𑀧𑀯𑀺𑀲𑀦𑁆𑀢𑀲𑁆𑀲 𑀯𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀯𑀸 𑀉𑀧𑀘𑀸𑀭𑁂 𑀬𑁄 𑀅𑀦𑀼𑀧𑀔𑀚𑁆𑀚 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀼𑀓𑀸𑀫𑁄 𑀲𑁂𑀬𑁆𑀬𑀁 𑀲𑀦𑁆𑀣𑀭𑀢𑀺 𑀯𑀸 𑀲𑀦𑁆𑀣𑀭𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀪𑀺𑀦𑀺𑀲𑀻𑀤𑀢𑀺 𑀯𑀸 𑀅𑀪𑀺𑀦𑀺𑀧𑀚𑁆𑀚𑀢𑀺 𑀯𑀸𑀢𑀺 𑀏𑀢𑁆𑀣 𑀅𑀪𑀺𑀦𑀺𑀲𑀻𑀤𑀦𑀫𑀢𑁆𑀢𑁂𑀦 𑀅𑀪𑀺𑀦𑀺𑀧𑀚𑁆𑀚𑀦𑀫𑀢𑁆𑀢𑁂𑀦𑁂𑀯 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀦 𑀤𑁆𑀯𑁂𑀧𑀺 𑀓𑀭𑁄𑀢𑀺, 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀦𑀺𑀲𑀻𑀤𑀢𑁄 𑀯𑀸 𑀦𑀺𑀧𑀚𑁆𑀚𑀢𑁄 𑀯𑀸 𑀧𑀬𑁄𑀕𑁂 𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁.

𑁧𑁨𑁨. 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸 𑀲𑁂𑀬𑁆𑀬𑀁 𑀲𑀦𑁆𑀣𑀭𑀢𑀺 𑀯𑀸 𑀲𑀦𑁆𑀣𑀭𑀸𑀧𑁂𑀢𑀺 𑀯𑀸𑀢𑀺 𑀇𑀫𑀲𑁆𑀫𑀺𑀁 𑀇𑀢𑁄 𑀧𑀭𑁂 𑀘 ‘‘𑀯𑀺𑀳𑀸𑀭𑀲𑁆𑀲 𑀉𑀧𑀘𑀸𑀭𑁂’’𑀢𑀺𑀆𑀤𑀺𑀓𑁂 𑀤𑀼𑀓𑁆𑀓𑀝𑀯𑀸𑀭𑁂𑀧𑀺 𑀬𑀣𑀸 𑀇𑀥 𑀅𑀪𑀺𑀦𑀺𑀲𑀻𑀤𑀦𑀫𑀢𑁆𑀢𑁂 𑀅𑀪𑀺𑀦𑀺𑀧𑀚𑁆𑀚𑀦𑀫𑀢𑁆𑀢𑁂 𑀉𑀪𑀬𑀓𑀭𑀡𑁂 𑀧𑀬𑁄𑀕𑀪𑁂𑀤𑁂 𑀘 𑀧𑀸𑀘𑀺𑀢𑁆𑀢𑀺𑀬𑀧𑁆𑀧𑀪𑁂𑀤𑁄 𑀯𑀼𑀢𑁆𑀢𑁄, 𑀏𑀯𑀁 𑀤𑀼𑀓𑁆𑀓𑀝𑀧𑁆𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀭𑀽𑀧𑁂𑀦 𑀳𑀺 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁂𑀦 𑀏𑀓𑀯𑀺𑀳𑀸𑀭𑁂 𑀯𑀸 𑀏𑀓𑀧𑀭𑀺𑀯𑁂𑀡𑁂 𑀯𑀸 𑀯𑀲𑀦𑁆𑀢𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣𑁂𑀯𑀲𑁆𑀲 𑀦𑀺𑀯𑀸𑀲𑁄 𑀯𑀸𑀭𑀺𑀢𑁄. 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀺𑀓𑁂𑀢𑀺 𑀇𑀥𑀸𑀧𑀺 𑀯𑀺𑀲𑁆𑀲𑀸𑀲𑀺𑀓𑀲𑁆𑀲 𑀧𑀼𑀕𑁆𑀕𑀮𑀺𑀓𑀁 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀲𑀤𑀺𑀲𑀫𑁂𑀯, 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺.

𑁧𑁨𑁩. 𑀆𑀧𑀤𑀸𑀲𑀽𑀢𑀺 𑀲𑀘𑁂 𑀩𑀳𑀺 𑀯𑀲𑀦𑁆𑀢𑀲𑁆𑀲 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀳𑁄𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀬𑁄 𑀧𑀯𑀺𑀲𑀢𑀺, 𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀁 𑀙𑀝𑁆𑀞𑀁.

𑁭. 𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁨𑁬. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑁂 𑁋 𑀏𑀓𑁂𑀦 𑀧𑀬𑁄𑀕𑁂𑀦 𑀩𑀳𑀼𑀓𑁂𑀧𑀺 𑀤𑁆𑀯𑀸𑀭𑁂 𑀅𑀢𑀺𑀓𑁆𑀓𑀸𑀫𑁂𑀢𑀻𑀢𑀺 𑀬𑁂 𑀘𑀢𑀼𑀪𑀽𑀫𑀓𑀧𑀜𑁆𑀘𑀪𑀽𑀫𑀓𑀸 𑀧𑀸𑀲𑀸𑀤𑀸 𑀙𑀲𑀢𑁆𑀢𑀓𑁄𑀝𑁆𑀞𑀓𑀸𑀦𑀺 𑀯𑀸 𑀘𑀢𑀼𑀲𑁆𑀲𑀸𑀮𑀸𑀦𑀺, 𑀢𑀸𑀤𑀺𑀲𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀳𑀢𑁆𑀣𑁂𑀲𑀼 𑀯𑀸 𑀕𑀻𑀯𑀸𑀬 𑀯𑀸 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸 𑀅𑀝𑁆𑀞𑀧𑁂𑀦𑁆𑀢𑁄 𑀏𑀓𑁂𑀦 𑀧𑀬𑁄𑀕𑁂𑀦 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀏𑀓𑀫𑁂𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀞𑀧𑁂𑀢𑁆𑀯𑀸 𑀞𑀧𑁂𑀢𑁆𑀯𑀸 𑀦𑀸𑀦𑀸𑀧𑀬𑁄𑀕𑁂𑀳𑀺 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀤𑁆𑀯𑀸𑀭𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀳𑀢𑁆𑀣𑁂𑀦 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀦𑀺𑀓𑁆𑀔𑀫𑀸’’𑀢𑀺 𑀯𑀢𑁆𑀯𑀸 𑀯𑀸𑀘𑀸𑀬 𑀦𑀺𑀓𑁆𑀓𑀟𑁆𑀠𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄.

𑀅𑀜𑁆𑀜𑀁 𑀆𑀡𑀸𑀧𑁂𑀢𑀻𑀢𑀺 𑀏𑀢𑁆𑀣 ‘‘𑀇𑀫𑀁 𑀦𑀺𑀓𑁆𑀓𑀟𑁆𑀠𑀸’’𑀢𑀺 𑀆𑀡𑀢𑁆𑀢𑀺𑀫𑀢𑁆𑀢𑁂 𑀤𑀼𑀓𑁆𑀓𑀝𑀁. 𑀲𑀘𑁂 𑀲𑁄 𑀲𑀓𑀺𑀁 𑀆𑀡𑀢𑁆𑀢𑁄 𑀩𑀳𑀼𑀓𑁂𑀧𑀺 𑀤𑁆𑀯𑀸𑀭𑁂 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀦 ‘‘𑀏𑀢𑁆𑀢𑀓𑀸𑀦𑀺 𑀤𑁆𑀯𑀸𑀭𑀸𑀦𑀺 𑀦𑀺𑀓𑁆𑀓𑀟𑁆𑀠𑀸𑀳𑀻’’𑀢𑀺 𑀯𑀸 ‘‘𑀬𑀸𑀯 𑀫𑀳𑀸𑀤𑁆𑀯𑀸𑀭𑀁 𑀢𑀸𑀯 𑀦𑀺𑀓𑁆𑀓𑀟𑁆𑀠𑀸𑀳𑀻’’𑀢𑀺 𑀯𑀸 𑀏𑀯𑀁 𑀦𑀺𑀬𑀸𑀫𑁂𑀢𑁆𑀯𑀸 𑀆𑀡𑀢𑁆𑀢𑁄 𑀳𑁄𑀢𑀺, 𑀤𑁆𑀯𑀸𑀭𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺.

𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀢𑀲𑁆𑀲 𑀲𑀦𑁆𑀢𑀓𑀁 𑀧𑀢𑁆𑀢𑀘𑀻𑀯𑀭𑀧𑀭𑀺𑀲𑁆𑀲𑀸𑀯𑀦𑀥𑀫𑀓𑀭𑀡𑀫𑀜𑁆𑀘𑀧𑀻𑀞𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀸𑀤𑀺𑀪𑁂𑀤𑀁, 𑀅𑀦𑁆𑀢𑀫𑀲𑁄 𑀭𑀚𑀦𑀙𑀮𑁆𑀮𑀺𑀫𑁆𑀧𑀺; 𑀬𑁄 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸; 𑀢𑀲𑁆𑀲 𑀯𑀢𑁆𑀣𑀼𑀕𑀡𑀦𑀸𑀬 𑀤𑀼𑀓𑁆𑀓𑀝𑀸𑀦𑀺. 𑀕𑀸𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁂𑀲𑀼 𑀧𑀦 𑀏𑀓𑀸𑀯 𑀆𑀧𑀢𑁆𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑁧𑁨𑁭. 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀺𑀓𑁂𑀢𑀺 𑀇𑀥𑀸𑀧𑀺 𑀯𑀺𑀲𑁆𑀲𑀸𑀲𑀺𑀓𑀧𑀼𑀕𑁆𑀕𑀮𑀺𑀓𑀁 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀲𑀤𑀺𑀲𑀫𑁂𑀯. 𑀬𑀣𑀸 𑀘 𑀇𑀥; 𑀏𑀯𑀁 𑀲𑀩𑁆𑀩𑀢𑁆𑀣. 𑀬𑀢𑁆𑀭 𑀧𑀦 𑀯𑀺𑀲𑁂𑀲𑁄 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀭 𑀯𑀓𑁆𑀔𑀸𑀫.

𑁧𑁨𑁮. 𑀅𑀮𑀚𑁆𑀚𑀺𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸𑀢𑀺𑀆𑀤𑀻𑀲𑀼 𑀪𑀡𑁆𑀟𑀦𑀓𑀸𑀭𑀓𑀓𑀮𑀳𑀓𑀸𑀭𑀓𑀫𑁂𑀯 𑀲𑀓𑀮𑀲𑀗𑁆𑀖𑀸𑀭𑀸𑀫𑀢𑁄 𑀦𑀺𑀓𑁆𑀓𑀟𑁆𑀠𑀺𑀢𑀼𑀁 𑀮𑀪𑀢𑀺, 𑀲𑁄 𑀳𑀺 𑀧𑀓𑁆𑀔𑀁 𑀮𑀪𑀺𑀢𑁆𑀯𑀸 𑀲𑀗𑁆𑀖𑀫𑁆𑀧𑀺 𑀪𑀺𑀦𑁆𑀤𑁂𑀬𑁆𑀬. 𑀅𑀮𑀚𑁆𑀚𑀻𑀆𑀤𑀬𑁄 𑀧𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄𑀬𑁂𑀯 𑀦𑀺𑀓𑁆𑀓𑀟𑁆𑀠𑀺𑀢𑀩𑁆𑀩𑀸, 𑀲𑀓𑀮𑀲𑀗𑁆𑀖𑀸𑀭𑀸𑀫𑀢𑁄 𑀦𑀺𑀓𑁆𑀓𑀟𑁆𑀠𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀉𑀫𑁆𑀫𑀢𑁆𑀢𑀓𑀲𑁆𑀲𑀸𑀢𑀺 𑀲𑀬𑀁 𑀉𑀫𑁆𑀫𑀢𑁆𑀢𑀓𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑀁 𑀲𑀢𑁆𑀢𑀫𑀁.

𑁮. 𑀯𑁂𑀳𑀸𑀲𑀓𑀼𑀝𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁨𑁯. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑁂 𑁋 𑀉𑀧𑀭𑀺𑀯𑁂𑀳𑀸𑀲𑀓𑀼𑀝𑀺𑀬𑀸𑀢𑀺 𑀉𑀧𑀭𑀺 𑀅𑀘𑁆𑀙𑀦𑁆𑀦𑀢𑀮𑀸𑀬 𑀤𑁆𑀯𑀺𑀪𑀽𑀫𑀺𑀓𑀓𑀼𑀝𑀺𑀬𑀸 𑀯𑀸 𑀢𑀺𑀪𑀽𑀫𑀺𑀓𑀸𑀤𑀺𑀓𑀼𑀝𑀺𑀬𑀸 𑀯𑀸. 𑀫𑀜𑁆𑀘𑀁 𑀲𑀳𑀲𑀸 𑀅𑀪𑀺𑀦𑀺𑀲𑀻𑀤𑀻𑀢𑀺 𑀫𑀜𑁆𑀘𑀁 𑀲𑀳𑀲𑀸 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁; 𑀫𑀜𑁆𑀘𑁂 𑀦𑀺𑀲𑀻𑀤𑀻𑀢𑀺 𑀅𑀢𑁆𑀣𑁄. 𑀅𑀪𑀻𑀢𑀺 𑀇𑀤𑀁 𑀧𑀦 𑀧𑀤𑀲𑁄𑀪𑀦𑀢𑁆𑀣𑀁 𑀉𑀧𑀲𑀕𑁆𑀕𑀫𑀢𑁆𑀢𑀫𑁂𑀯. 𑀦𑀺𑀧𑁆𑀧𑀢𑀺𑀢𑁆𑀯𑀸𑀢𑀺 𑀦𑀺𑀧𑀢𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀸. 𑀢𑀲𑁆𑀲 𑀳𑀺 𑀉𑀧𑀭𑀺 𑀆𑀡𑀻𑀧𑀺 𑀦 𑀤𑀺𑀦𑁆𑀦𑀸, 𑀢𑀲𑁆𑀫𑀸 𑀦𑀺𑀓𑁆𑀔𑀦𑁆𑀢𑁄. 𑀯𑀺𑀲𑁆𑀲𑀭𑀫𑀓𑀸𑀲𑀻𑀢𑀺 𑀯𑀺𑀭𑀽𑀧𑀁 𑀆𑀢𑀼𑀭𑀲𑁆𑀲𑀭𑀫𑀓𑀸𑀲𑀺.

𑁧𑁩𑁧. 𑀯𑁂𑀳𑀸𑀲𑀓𑀼𑀝𑀺 𑀦𑀸𑀫 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀲𑀻𑀲𑀖𑀝𑁆𑀝𑀸𑀢𑀺 𑀬𑀸 𑀧𑀫𑀸𑀡𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀩𑁆𑀩𑀳𑁂𑀝𑁆𑀞𑀺𑀫𑀸𑀳𑀺 𑀢𑀼𑀮𑀸𑀳𑀺 𑀲𑀻𑀲𑀁 𑀦 𑀖𑀝𑁆𑀝𑁂𑀢𑀺, 𑀏𑀢𑁂𑀦 𑀇𑀥 𑀅𑀥𑀺𑀧𑁆𑀧𑁂𑀢𑀸 𑀯𑁂𑀳𑀸𑀲𑀓𑀼𑀝𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀦 𑀯𑁂𑀳𑀸𑀲𑀓𑀼𑀝𑀺𑀮𑀓𑁆𑀔𑀡𑀁. 𑀬𑀸 𑀳𑀺 𑀓𑀸𑀘𑀺 𑀉𑀧𑀭𑀺 𑀅𑀘𑁆𑀙𑀺𑀦𑁆𑀦𑀢𑀮𑀸 𑀤𑁆𑀯𑀺𑀪𑀽𑀫𑀺𑀓𑀸 𑀓𑀼𑀝𑀺 𑀢𑀺𑀪𑀽𑀫𑀺𑀓𑀸𑀤𑀺𑀓𑀼𑀝𑀺 𑀯𑀸 ‘‘𑀯𑁂𑀳𑀸𑀲𑀓𑀼𑀝𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀅𑀲𑀻𑀲𑀖𑀝𑁆𑀝𑀸 𑀅𑀥𑀺𑀧𑁆𑀧𑁂𑀢𑀸. 𑀅𑀪𑀺𑀦𑀺𑀲𑀻𑀤𑀦𑀸𑀤𑀻𑀲𑀼 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀬𑁄𑀕𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁩𑁩. 𑀅𑀯𑁂𑀳𑀸𑀲𑀓𑀼𑀝𑀺𑀬𑀸𑀢𑀺 𑀪𑀽𑀫𑀺𑀬𑀁 𑀓𑀢𑀧𑀡𑁆𑀡𑀲𑀸𑀮𑀸𑀤𑀻𑀲𑀼 𑀅𑀦𑀸𑀧𑀢𑁆𑀢𑀺. 𑀦 𑀳𑀺 𑀲𑀓𑁆𑀓𑀸 𑀢𑀢𑁆𑀣 𑀧𑀭𑀲𑁆𑀲 𑀧𑀻𑀴𑀸 𑀓𑀸𑀢𑀼𑀁. 𑀲𑀻𑀲𑀖𑀝𑁆𑀝𑀸𑀬𑀸𑀢𑀺 𑀬𑀸𑀬𑀁 𑀲𑀻𑀲𑀖𑀝𑁆𑀝𑀸 𑀳𑁄𑀢𑀺, 𑀢𑀢𑁆𑀣𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀦 𑀳𑀺 𑀲𑀓𑁆𑀓𑀸 𑀢𑀢𑁆𑀣 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀅𑀦𑁄𑀡𑀢𑁂𑀦 𑀯𑀺𑀘𑀭𑀺𑀢𑀼𑀁, 𑀢𑀲𑁆𑀫𑀸 𑀅𑀲𑀜𑁆𑀘𑀭𑀡𑀝𑁆𑀞𑀸𑀦𑀢𑁆𑀢𑀸 𑀧𑀭𑀧𑀻𑀴𑀸 𑀦 𑀪𑀯𑀺𑀲𑁆𑀲𑀢𑀺. 𑀳𑁂𑀝𑁆𑀞𑀸 𑀅𑀧𑀭𑀺𑀪𑁄𑀕𑀁 𑀳𑁄𑀢𑀻𑀢𑀺 𑀬𑀲𑁆𑀲𑀸 𑀳𑁂𑀝𑁆𑀞𑀸 𑀤𑀩𑁆𑀩𑀲𑀫𑁆𑀪𑀸𑀭𑀸𑀤𑀻𑀦𑀁 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀅𑀧𑀭𑀺𑀪𑁄𑀕𑀁 𑀳𑁄𑀢𑀺, 𑀢𑀢𑁆𑀣𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀧𑀤𑀭𑀲𑀜𑁆𑀘𑀺𑀢𑀁 𑀳𑁄𑀢𑀻𑀢𑀺 𑀬𑀲𑁆𑀲𑀸 𑀉𑀧𑀭𑀺𑀫𑀢𑀮𑀁 𑀤𑀸𑀭𑀼𑀨𑀮𑀓𑁂𑀳𑀺 𑀯𑀸 𑀖𑀦𑀲𑀦𑁆𑀣𑀢𑀁 𑀳𑁄𑀢𑀺, 𑀲𑀼𑀥𑀸𑀤𑀺𑀧𑀭𑀺𑀓𑀫𑁆𑀫𑀓𑀢𑀁 𑀯𑀸 𑀢𑀢𑁆𑀣𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀧𑀝𑀸𑀡𑀺 𑀤𑀺𑀦𑁆𑀦𑀸 𑀳𑁄𑀢𑀻𑀢𑀺 𑀫𑀜𑁆𑀘𑀧𑀻𑀞𑀸𑀦𑀁 𑀧𑀸𑀤𑀲𑀺𑀔𑀸𑀲𑀼 𑀆𑀡𑀻 𑀤𑀺𑀦𑁆𑀦𑀸 𑀳𑁄𑀢𑀺, 𑀬𑀢𑁆𑀣 𑀦𑀺𑀲𑀻𑀤𑀦𑁆𑀢𑁂𑀧𑀺 𑀦 𑀦𑀺𑀧𑁆𑀧𑀢𑀦𑁆𑀢𑀺, 𑀢𑀸𑀤𑀺𑀲𑁂 𑀫𑀜𑁆𑀘𑀧𑀻𑀞𑁂 𑀦𑀺𑀲𑀻𑀤𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀢𑀲𑁆𑀫𑀺𑀁 𑀞𑀺𑀢𑁄𑀢𑀺 𑀆𑀳𑀘𑁆𑀘𑀧𑀸𑀤𑀓𑁂 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀞𑀺𑀢𑁄 𑀉𑀧𑀭𑀺 𑀦𑀸𑀕𑀤𑀦𑁆𑀢𑀓𑀸𑀤𑀻𑀲𑀼 𑀮𑀕𑁆𑀕𑀺𑀢𑀓𑀁 𑀘𑀻𑀯𑀭𑀁 𑀯𑀸 𑀓𑀺𑀜𑁆𑀘𑀺 𑀯𑀸 𑀕𑀡𑁆𑀳𑀸𑀢𑀺 𑀯𑀸, 𑀅𑀜𑁆𑀜𑀁 𑀯𑀸 𑀮𑀕𑁆𑀕𑁂𑀢𑀺, 𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀢𑁄 𑀘 𑀓𑀸𑀬𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀯𑁂𑀳𑀸𑀲𑀓𑀼𑀝𑀺𑀲𑀺𑀓𑁆𑀔𑀸𑀧𑀤𑀁 𑀅𑀝𑁆𑀞𑀫𑀁.

𑁯. 𑀫𑀳𑀮𑁆𑀮𑀓𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁩𑁫. 𑀦𑀯𑀫𑀲𑀺𑀓𑁆𑀔𑀸𑀧𑀤𑁂 𑁋 𑀬𑀸𑀯 𑀤𑁆𑀯𑀸𑀭𑀓𑁄𑀲𑀸𑀢𑀺 𑀏𑀢𑁆𑀣 𑀤𑁆𑀯𑀸𑀭𑀓𑁄𑀲𑁄 𑀦𑀸𑀫 𑀧𑀺𑀝𑁆𑀞𑀲𑀗𑁆𑀖𑀸𑀝𑀲𑁆𑀲 𑀲𑀫𑀦𑁆𑀢𑀸 𑀓𑀯𑀸𑀝𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑁄 𑀑𑀓𑀸𑀲𑁄. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀤𑁆𑀯𑀸𑀭𑀩𑀸𑀳𑀢𑁄 𑀧𑀝𑁆𑀞𑀸𑀬 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀤𑁆𑀯𑀸𑀭𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀓𑀯𑀸𑀝𑀧𑁆𑀧𑀫𑀸𑀡’’𑀦𑁆𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀓𑀯𑀸𑀝𑀁 𑀦𑀸𑀫 𑀤𑀺𑀬𑀟𑁆𑀠𑀳𑀢𑁆𑀣𑀫𑁆𑀧𑀺 𑀳𑁄𑀢𑀺 𑀤𑁆𑀯𑀺𑀳𑀢𑁆𑀣𑀫𑁆𑀧𑀺 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀼𑀢𑁆𑀢𑀁. 𑀢𑀤𑁂𑀯 𑀳𑀺 𑀲𑀦𑁆𑀥𑀸𑀬 𑀪𑀕𑀯𑀢𑀸𑀧𑀺 ‘‘𑀧𑀺𑀝𑁆𑀞𑀲𑀗𑁆𑀖𑀸𑀝𑀲𑁆𑀲 𑀲𑀫𑀦𑁆𑀢𑀸 𑀳𑀢𑁆𑀣𑀧𑀸𑀲𑀸’’𑀢𑀺 𑀅𑀬𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀅𑀕𑁆𑀕𑀴𑀝𑁆𑀞𑀧𑀦𑀸𑀬𑀸𑀢𑀺 𑀲𑀓𑀯𑀸𑀝𑀓𑀤𑁆𑀯𑀸𑀭𑀩𑀦𑁆𑀥𑀝𑁆𑀞𑀧𑀦𑀸𑀬; 𑀲𑀓𑀯𑀸𑀝𑀓𑀲𑁆𑀲 𑀤𑁆𑀯𑀸𑀭𑀩𑀦𑁆𑀥𑀲𑁆𑀲 𑀦𑀺𑀘𑁆𑀘𑀮𑀪𑀸𑀯𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀤𑁆𑀯𑀸𑀭𑀝𑁆𑀞𑀧𑀦𑀸𑀬𑀸𑀢𑀺 𑀇𑀤𑀫𑁆𑀧𑀺 𑀳𑀺 𑀧𑀤𑀪𑀸𑀚𑀦𑀁 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀓𑀯𑀸𑀝𑀜𑁆𑀳𑀺 𑀮𑀳𑀼𑀧𑀭𑀺𑀯𑀝𑁆𑀝𑀓𑀁 𑀯𑀺𑀯𑀭𑀡𑀓𑀸𑀮𑁂 𑀪𑀺𑀢𑁆𑀢𑀺𑀁 𑀆𑀳𑀦𑀢𑀺, 𑀧𑀺𑀤𑀳𑀦𑀓𑀸𑀮𑁂 𑀤𑁆𑀯𑀸𑀭𑀩𑀦𑁆𑀥𑀁. 𑀢𑁂𑀦 𑀆𑀳𑀦𑀦𑁂𑀦 𑀪𑀺𑀢𑁆𑀢𑀺 𑀓𑀫𑁆𑀧𑀢𑀺, 𑀢𑀢𑁄 𑀫𑀢𑁆𑀢𑀺𑀓𑀸 𑀘𑀮𑀢𑀺, 𑀘𑀮𑀺𑀢𑁆𑀯𑀸 𑀲𑀺𑀣𑀺𑀮𑀸 𑀯𑀸 𑀳𑁄𑀢𑀺 𑀧𑀢𑀢𑀺 𑀯𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀸𑀯 𑀤𑁆𑀯𑀸𑀭𑀓𑁄𑀲𑀸 𑀅𑀕𑁆𑀕𑀴𑀝𑁆𑀞𑀧𑀦𑀸𑀬𑀸’’𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀇𑀤𑀁 𑀦𑀸𑀫 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀦𑁂𑀯 𑀫𑀸𑀢𑀺𑀓𑀸𑀬𑀁 𑀦 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀧𑀦 ‘‘𑀧𑀼𑀦𑀧𑁆𑀧𑀼𑀦𑀁 𑀙𑀸𑀤𑀸𑀧𑁂𑀲𑀺 𑀧𑀼𑀦𑀧𑁆𑀧𑀼𑀦𑀁 𑀮𑁂𑀧𑀸𑀧𑁂𑀲𑀻’’𑀢𑀺 𑀅𑀥𑀺𑀓𑀸𑀭𑀢𑁄 𑀬𑀸𑀯 𑀤𑁆𑀯𑀸𑀭𑀓𑁄𑀲𑀸 𑀅𑀕𑁆𑀕𑀴𑀝𑁆𑀞𑀧𑀦𑀸𑀬 𑀧𑀼𑀦𑀧𑁆𑀧𑀼𑀦𑀁 𑀮𑀺𑀫𑁆𑀧𑀺𑀢𑀩𑁆𑀩𑁄 𑀯𑀸 𑀮𑁂𑀧𑀸𑀧𑁂𑀢𑀩𑁆𑀩𑁄 𑀯𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑀁 𑀧𑀦 𑀧𑀤𑀪𑀸𑀚𑀦𑁂 ‘‘𑀧𑀺𑀝𑁆𑀞𑀲𑀗𑁆𑀖𑀸𑀝𑀲𑁆𑀲 𑀲𑀫𑀦𑁆𑀢𑀸 𑀳𑀢𑁆𑀣𑀧𑀸𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀲 𑀯𑁂𑀫𑀚𑁆𑀛𑁂 𑀤𑁆𑀯𑀸𑀭𑀁 𑀳𑁄𑀢𑀺, 𑀉𑀧𑀭𑀺𑀪𑀸𑀕𑁂 𑀉𑀘𑁆𑀘𑀸 𑀪𑀺𑀢𑁆𑀢𑀺, 𑀢𑀲𑁆𑀲 𑀢𑀻𑀲𑀼 𑀤𑀺𑀲𑀸𑀲𑀼 𑀲𑀫𑀦𑁆𑀢𑀸 𑀳𑀢𑁆𑀣𑀧𑀸𑀲𑀸 𑀉𑀧𑀘𑀸𑀭𑁄 𑀳𑁄𑀢𑀺, 𑀔𑀼𑀤𑁆𑀤𑀓𑀲𑁆𑀲 𑀯𑀺𑀳𑀸𑀭𑀲𑁆𑀲 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀉𑀧𑀘𑀸𑀭𑁄 𑀳𑁄𑀢𑀺. 𑀢𑀢𑁆𑀭𑀸𑀧𑀺 𑀬𑀁 𑀪𑀺𑀢𑁆𑀢𑀺𑀁 𑀯𑀺𑀯𑀭𑀺𑀬𑀫𑀸𑀦𑀁 𑀓𑀯𑀸𑀝𑀁 𑀆𑀳𑀦𑀢𑀺, 𑀲𑀸 𑀅𑀧𑀭𑀺𑀧𑀽𑀭𑀉𑀧𑀘𑀸𑀭𑀸𑀧𑀺 𑀳𑁄𑀢𑀺. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀧𑀦 𑀢𑀻𑀲𑀼 𑀤𑀺𑀲𑀸𑀲𑀼 𑀲𑀫𑀦𑁆𑀢𑀸 𑀳𑀢𑁆𑀣𑀧𑀸𑀲𑀸 𑀤𑁆𑀯𑀸𑀭𑀲𑁆𑀲 𑀦𑀺𑀘𑁆𑀘𑀮𑀪𑀸𑀯𑀢𑁆𑀣𑀸𑀬 𑀮𑁂𑀧𑁄 𑀅𑀦𑀼𑀜𑁆𑀜𑀸𑀢𑁄. 𑀲𑀘𑁂 𑀧𑀦𑀲𑁆𑀲 𑀤𑁆𑀯𑀸𑀭𑀲𑁆𑀲 𑀅𑀥𑁄𑀪𑀸𑀕𑁂𑀧𑀺 𑀮𑁂𑀧𑁄𑀓𑀸𑀲𑁄 𑀅𑀢𑁆𑀣𑀺, 𑀢𑀫𑁆𑀧𑀺 𑀮𑀺𑀫𑁆𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀆𑀮𑁄𑀓𑀲𑀦𑁆𑀥𑀺𑀧𑀭𑀺𑀓𑀫𑁆𑀫𑀸𑀬𑀸𑀢𑀺 𑀏𑀢𑁆𑀣 𑀆𑀮𑁄𑀓𑀲𑀦𑁆𑀥𑀻𑀢𑀺 𑀯𑀸𑀢𑀧𑀸𑀦𑀓𑀯𑀸𑀝𑀓𑀸 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀧𑀺 𑀯𑀺𑀯𑀭𑀡𑀓𑀸𑀮𑁂 𑀯𑀺𑀤𑀢𑁆𑀣𑀺𑀫𑀢𑁆𑀢𑀫𑁆𑀧𑀺 𑀅𑀢𑀺𑀭𑁂𑀓𑀫𑁆𑀧𑀺 𑀪𑀺𑀢𑁆𑀢𑀺𑀧𑁆𑀧𑀤𑁂𑀲𑀁 𑀧𑀳𑀭𑀦𑁆𑀢𑀺. 𑀉𑀧𑀘𑀸𑀭𑁄 𑀧𑀦𑁂𑀢𑁆𑀣 𑀲𑀩𑁆𑀩𑀤𑀺𑀲𑀸𑀲𑀼 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀤𑀺𑀲𑀸𑀲𑀼 𑀓𑀯𑀸𑀝𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑁄 𑀑𑀓𑀸𑀲𑁄 𑀆𑀮𑁄𑀓𑀲𑀦𑁆𑀥𑀺𑀧𑀭𑀺𑀓𑀫𑁆𑀫𑀢𑁆𑀣𑀸𑀬 𑀮𑀺𑀫𑁆𑀧𑀺𑀢𑀩𑁆𑀩𑁄 𑀯𑀸 𑀮𑁂𑀧𑀸𑀧𑁂𑀢𑀩𑁆𑀩𑁄 𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀲𑁂𑀢𑀯𑀡𑁆𑀡𑀦𑁆𑀢𑀺𑀆𑀤𑀺𑀓𑀁 𑀦 𑀫𑀸𑀢𑀺𑀓𑀸𑀬 𑀧𑀤𑀪𑀸𑀚𑀦𑀁. 𑀇𑀫𑀺𑀦𑀸 𑀳𑀺 𑀯𑀺𑀳𑀸𑀭𑀲𑁆𑀲 𑀪𑀸𑀭𑀺𑀓𑀢𑁆𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀤𑀪𑀸𑀚𑀦𑁂𑀬𑁂𑀯 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀲𑀩𑁆𑀩𑀫𑁂𑀢𑀁 𑀬𑀣𑀸𑀲𑀼𑀔𑀁 𑀓𑀢𑁆𑀢𑀩𑁆𑀩𑀁.

𑀏𑀯𑀁 𑀮𑁂𑀧𑀓𑀫𑁆𑀫𑁂 𑀬𑀁 𑀓𑀢𑁆𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀙𑀤𑀦𑁂 𑀓𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑀢𑁆𑀢𑀺𑀘𑁆𑀙𑀤𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑁆𑀯𑀢𑁆𑀢𑀺𑀘𑁆𑀙𑀤𑀦𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀺 𑀙𑀤𑀦𑀲𑁆𑀲 𑀤𑁆𑀯𑀢𑁆𑀢𑀺𑀧𑀭𑀺𑀬𑀸𑀬𑀁; 𑀧𑀭𑀺𑀬𑀸𑀬𑁄 𑀯𑀼𑀘𑁆𑀘𑀢𑀺 𑀧𑀭𑀺𑀓𑁆𑀔𑁂𑀧𑁄, 𑀧𑀭𑀺𑀓𑁆𑀔𑁂𑀧𑀤𑁆𑀯𑀬𑀁 𑀯𑀸 𑀧𑀭𑀺𑀓𑁆𑀔𑁂𑀧𑀢𑁆𑀢𑀬𑀁 𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀳𑀭𑀺𑀢𑁂 𑀞𑀺𑀢𑁂𑀦𑀸𑀢𑀺 𑀅𑀳𑀭𑀺𑀢𑁂 𑀞𑀺𑀢𑁂𑀦. 𑀳𑀭𑀺𑀢𑀦𑁆𑀢𑀺 𑀘𑁂𑀢𑁆𑀣 𑀲𑀢𑁆𑀢𑀥𑀜𑁆𑀜𑀪𑁂𑀤𑀁 𑀧𑀼𑀩𑁆𑀩𑀡𑁆𑀡𑀁 𑀫𑀼𑀕𑁆𑀕𑀫𑀸𑀲𑀢𑀺𑀮𑀓𑀼𑀮𑀢𑁆𑀣𑀅𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀸𑀤𑀺𑀪𑁂𑀤𑀜𑁆𑀘 𑀅𑀧𑀭𑀡𑁆𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀳𑀭𑀺𑀢𑀁 𑀦𑀸𑀫 𑀧𑀼𑀩𑁆𑀩𑀡𑁆𑀡𑀁 𑀅𑀧𑀭𑀡𑁆𑀡’’𑀦𑁆𑀢𑀺.

𑀲𑀘𑁂 𑀳𑀭𑀺𑀢𑁂 𑀞𑀺𑀢𑁄 𑀅𑀥𑀺𑀝𑁆𑀞𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 𑀧𑀦 𑀬𑀲𑁆𑀫𑀺𑀫𑁆𑀧𑀺 𑀔𑁂𑀢𑁆𑀢𑁂 𑀯𑀼𑀢𑁆𑀢𑀁 𑀩𑀻𑀚𑀁 𑀦 𑀢𑀸𑀯 𑀲𑀫𑁆𑀧𑀚𑁆𑀚𑀢𑀺, 𑀯𑀲𑁆𑀲𑁂 𑀯𑀸 𑀧𑀦 𑀧𑀢𑀺𑀢𑁂 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀫𑁆𑀧𑀺 𑀳𑀭𑀺𑀢𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑁂 𑀔𑁂𑀢𑁆𑀢𑁂𑀧𑀺 𑀞𑀺𑀢𑁂𑀦 𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀅𑀳𑀭𑀺𑀢𑁂𑀬𑁂𑀯 𑀞𑀺𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀢𑀢𑁆𑀭𑀸𑀧𑀺 𑀅𑀬𑀁 𑀧𑀭𑀺𑀘𑁆𑀙𑁂𑀤𑁄, 𑀧𑀺𑀝𑁆𑀞𑀺𑀯𑀁𑀲𑀲𑁆𑀲 𑀯𑀸 𑀓𑀽𑀝𑀸𑀕𑀸𑀭𑀓𑀡𑁆𑀡𑀺𑀓𑀸𑀬 𑀯𑀸 𑀉𑀧𑀭𑀺 𑀣𑀼𑀧𑀺𑀓𑀸𑀬 𑀯𑀸 𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑁄 𑀙𑀤𑀦𑀫𑀼𑀔𑀯𑀝𑁆𑀝𑀺𑀅𑀦𑁆𑀢𑁂𑀦 𑀑𑀮𑁄𑀓𑁂𑀦𑁆𑀢𑁄 𑀬𑀲𑁆𑀫𑀺𑀁 𑀪𑀽𑀫𑀺𑀪𑀸𑀕𑁂 𑀞𑀺𑀢𑀁 𑀧𑀲𑁆𑀲𑀢𑀺, 𑀬𑀲𑁆𑀫𑀺𑀜𑁆𑀘 𑀪𑀽𑀫𑀺𑀪𑀸𑀕𑁂 𑀞𑀺𑀢𑁄, 𑀢𑀁 𑀉𑀧𑀭𑀺 𑀦𑀺𑀲𑀺𑀦𑁆𑀦𑀓𑀁 𑀧𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀢𑀲𑁆𑀲 𑀅𑀦𑁆𑀢𑁄 𑀅𑀳𑀭𑀺𑀢𑁂𑀧𑀺 𑀞𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀮𑀩𑁆𑀪𑀢𑀺. 𑀓𑀲𑁆𑀫𑀸? 𑀯𑀺𑀳𑀸𑀭𑀲𑁆𑀲 𑀳𑀺 𑀧𑀢𑀦𑁆𑀢𑀲𑁆𑀲 𑀅𑀬𑀁 𑀧𑀢𑀦𑁄𑀓𑀸𑀲𑁄𑀢𑀺.

𑁧𑁩𑁬. 𑀫𑀕𑁆𑀕𑁂𑀦 𑀙𑀸𑀤𑁂𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀫𑀕𑁆𑀕𑁂𑀦 𑀙𑀸𑀤𑀦𑀁 𑀦𑀸𑀫 𑀅𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀚𑀼𑀓𑀫𑁂𑀯 𑀙𑀸𑀤𑀦𑀁; 𑀢𑀁 𑀇𑀝𑁆𑀞𑀓𑀲𑀺𑀮𑀸𑀲𑀼𑀥𑀸𑀳𑀺 𑀮𑀩𑁆𑀪𑀢𑀺. 𑀤𑁆𑀯𑁂 𑀫𑀕𑁆𑀕𑁂 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀤𑁆𑀯𑁂 𑀫𑀕𑁆𑀕𑀸 𑀲𑀘𑁂 𑀤𑀼𑀘𑁆𑀙𑀦𑁆𑀦𑀸 𑀳𑁄𑀦𑁆𑀢𑀺, 𑀅𑀧𑀦𑁂𑀢𑁆𑀯𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀙𑀸𑀤𑁂𑀢𑀼𑀁 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀬𑀣𑀸 𑀇𑀘𑁆𑀙𑀢𑀺; 𑀢𑀣𑀸 𑀤𑁆𑀯𑁂 𑀫𑀕𑁆𑀕𑁂 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀢𑀺𑀬𑀁𑀫𑀕𑁆𑀕𑀁 ‘‘𑀇𑀤𑀸𑀦𑀺 𑀏𑀯𑀁 𑀙𑀸𑀤𑁂𑀳𑀻’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀧𑀭𑀺𑀓𑁆𑀔𑁂𑀧𑁂𑀦. 𑀏𑀯𑀁𑀙𑀤𑀦𑀁 𑀧𑀦 𑀢𑀺𑀡𑀧𑀡𑁆𑀡𑁂𑀳𑀺 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀇𑀥𑀸𑀧𑀺 𑀬𑀣𑀸 𑀇𑀘𑁆𑀙𑀢𑀺 𑀢𑀣𑀸 𑀤𑁆𑀯𑁂 𑀧𑀭𑀺𑀬𑀸𑀬𑁂 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀢𑀺𑀬𑀁 𑀧𑀭𑀺𑀬𑀸𑀬𑀁 ‘‘𑀇𑀤𑀸𑀦𑀺 𑀏𑀯𑀁 𑀙𑀸𑀤𑁂𑀳𑀻’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀲𑀘𑁂 𑀦 𑀧𑀓𑁆𑀓𑀫𑀢𑀺, 𑀢𑀼𑀡𑁆𑀳𑀻𑀪𑀽𑀢𑁂𑀦 𑀞𑀸𑀢𑀩𑁆𑀩𑀁. 𑀲𑀩𑁆𑀩𑀫𑁆𑀧𑀺 𑀘𑁂𑀢𑀁 𑀙𑀤𑀦𑀁 𑀙𑀤𑀦𑀽𑀧𑀭𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀧𑀭𑀽𑀧𑀭𑀺𑀘𑁆𑀙𑀦𑁆𑀦𑁄 𑀳𑀺 𑀯𑀺𑀳𑀸𑀭𑁄 𑀘𑀺𑀭𑀁 𑀅𑀦𑁄𑀯𑀲𑁆𑀲𑀓𑁄 𑀳𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀁 𑀙𑀸𑀤𑁂𑀦𑁆𑀢𑀺. 𑀢𑀢𑁄 𑀘𑁂 𑀉𑀢𑁆𑀢𑀭𑀺𑀦𑁆𑀢𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀸 𑀧𑀭𑀺𑀬𑀸𑀬𑀸𑀦𑀁 𑀯𑀸 𑀉𑀧𑀭𑀺 𑀘𑀢𑀼𑀢𑁆𑀣𑁂 𑀫𑀕𑁆𑀕𑁂 𑀯𑀸 𑀧𑀭𑀺𑀬𑀸𑀬𑁂 𑀯𑀸.

𑁧𑁩𑁭. 𑀓𑀭𑀴𑁂 𑀓𑀭𑀴𑁂𑀢𑀺 𑀢𑀺𑀡𑀫𑀼𑀝𑁆𑀞𑀺𑀬𑀁 𑀢𑀺𑀡𑀫𑀼𑀝𑁆𑀞𑀺𑀬𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀙𑀲𑀫𑀼𑀝𑁆𑀞𑀸𑀦𑀁 𑁋 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀫𑀳𑀮𑁆𑀮𑀓𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀁 𑀦𑀯𑀫𑀁.

𑁧𑁦. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁪𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑁂 𑁋 𑀚𑀸𑀦𑀁 𑀲𑀧𑁆𑀧𑀸𑀡𑀓𑀦𑁆𑀢𑀺 𑀲𑀧𑁆𑀧𑀸𑀡𑀓𑀁 𑀏𑀢𑀦𑁆𑀢𑀺 𑀬𑀣𑀸 𑀢𑀣𑀸 𑀯𑀸 𑀚𑀸𑀦𑀦𑁆𑀢𑁄. 𑀲𑀺𑀜𑁆𑀘𑁂𑀬𑁆𑀬 𑀯𑀸 𑀲𑀺𑀜𑁆𑀘𑀸𑀧𑁂𑀬𑁆𑀬 𑀯𑀸𑀢𑀺 𑀢𑁂𑀦 𑀉𑀤𑀓𑁂𑀦 𑀲𑀬𑀁 𑀯𑀸 𑀲𑀺𑀜𑁆𑀘𑁂𑀬𑁆𑀬, 𑀅𑀜𑁆𑀜𑀁 𑀯𑀸 𑀆𑀡𑀸𑀧𑁂𑀢𑁆𑀯𑀸 𑀲𑀺𑀜𑁆𑀘𑀸𑀧𑁂𑀬𑁆𑀬. 𑀧𑀸𑀴𑀺𑀬𑀁 𑀧𑀦 ‘‘𑀲𑀺𑀜𑁆𑀘𑁂𑀬𑁆𑀬𑀸𑀢𑀺 𑀲𑀬𑀁 𑀲𑀺𑀜𑁆𑀘𑀢𑀻’’𑀢𑀺 𑀈𑀤𑀺𑀲𑀸𑀦𑀁 𑀯𑀘𑀦𑀸𑀦𑀁 𑀅𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀥𑀸𑀭𑀁 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀺𑀜𑁆𑀘𑀦𑁆𑀢𑀲𑁆𑀲 𑀏𑀓𑀲𑁆𑀫𑀺𑀁 𑀉𑀤𑀓𑀖𑀝𑁂 𑀏𑀓𑀸𑀯 𑀆𑀧𑀢𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀪𑀸𑀚𑀦𑁂𑀲𑀼. 𑀥𑀸𑀭𑀁 𑀯𑀺𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀦 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺. 𑀫𑀸𑀢𑀺𑀓𑀁 𑀲𑀫𑁆𑀫𑀼𑀔𑀁 𑀓𑀭𑁄𑀢𑀺, 𑀤𑀺𑀯𑀲𑀫𑁆𑀧𑀺 𑀲𑀦𑁆𑀤𑀢𑀼, 𑀏𑀓𑀸𑀯 𑀆𑀧𑀢𑁆𑀢𑀺. 𑀲𑀘𑁂 𑀢𑀢𑁆𑀣 𑀢𑀢𑁆𑀣 𑀩𑀦𑁆𑀥𑀺𑀢𑁆𑀯𑀸 𑀅𑀜𑁆𑀜𑀢𑁄 𑀅𑀜𑁆𑀜𑀢𑁄 𑀦𑁂𑀢𑀺, 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺. 𑀲𑀓𑀝𑀪𑀸𑀭𑀫𑀢𑁆𑀢𑀜𑁆𑀘𑁂𑀧𑀺 𑀢𑀺𑀡𑀁 𑀏𑀓𑀧𑀬𑁄𑀕𑁂𑀦 𑀉𑀤𑀓𑁂 𑀧𑀓𑁆𑀔𑀺𑀧𑀢𑀺, 𑀏𑀓𑀸𑀯 𑀆𑀧𑀢𑁆𑀢𑀺. 𑀏𑀓𑁂𑀓𑀁 𑀢𑀺𑀡𑀁 𑀯𑀸 𑀧𑀡𑁆𑀡𑀁 𑀯𑀸 𑀧𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀆𑀧𑀢𑁆𑀢𑀺. 𑀫𑀢𑁆𑀢𑀺𑀓𑀸𑀬𑀧𑀺 𑀅𑀜𑁆𑀜𑁂𑀲𑀼𑀧𑀺 𑀓𑀝𑁆𑀞𑀕𑁄𑀫𑀬𑀸𑀤𑀻𑀲𑀼 𑀏𑀲𑁂𑀯 𑀦𑀬𑁄. 𑀇𑀤𑀁 𑀧𑀦 𑀫𑀳𑀸𑀉𑀤𑀓𑀁 𑀲𑀦𑁆𑀥𑀸𑀬 𑀦 𑀯𑀼𑀢𑁆𑀢𑀁, 𑀬𑀁 𑀢𑀺𑀡𑁂 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀧𑀓𑁆𑀔𑀺𑀢𑁆𑀢𑀸𑀬 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀆𑀯𑀺𑀮𑀁 𑀯𑀸 𑀳𑁄𑀢𑀺, 𑀬𑀢𑁆𑀣 𑀧𑀸𑀡𑀓𑀸 𑀫𑀭𑀦𑁆𑀢𑀺, 𑀢𑀸𑀤𑀺𑀲𑀁 𑀉𑀤𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀲𑀫𑀼𑀝𑁆𑀞𑀸𑀦𑀁 𑁋 𑀓𑀸𑀬𑀘𑀺𑀢𑁆𑀢𑀢𑁄 𑀯𑀸𑀘𑀸𑀘𑀺𑀢𑁆𑀢𑀢𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀸𑀢𑀺, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁 𑀢𑀺𑀯𑁂𑀤𑀦𑀦𑁆𑀢𑀺.

𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀁 𑀤𑀲𑀫𑀁.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀲𑁂𑀦𑀸𑀲𑀦𑀯𑀕𑁆𑀕𑁄 𑀤𑀼𑀢𑀺𑀬𑁄.