𑁧𑁦. 𑀓𑀼𑀫𑁆𑀪𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁧. 𑀅𑀡𑁆𑀟𑀪𑀸𑀭𑀺𑀯𑀢𑁆𑀣𑀼𑀲𑁆𑀫𑀺𑀁 𑀕𑀸𑀫𑀓𑀽𑀝𑀓𑁄𑀢𑀺 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄. 𑀢𑀲𑁆𑀲 𑀓𑀫𑁆𑀫𑀲𑀪𑀸𑀕𑀢𑀸𑀬 𑀓𑀼𑀫𑁆𑀪𑀫𑀢𑁆𑀢𑀸 𑀫𑀳𑀸𑀖𑀝𑀧𑁆𑀧𑀫𑀸𑀡𑀸 𑀅𑀡𑁆𑀟𑀸 𑀅𑀳𑁂𑀲𑀼𑀁. 𑀲𑁄 𑀳𑀺 𑀬𑀲𑁆𑀫𑀸 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀞𑀸𑀦𑁂 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀓𑀽𑀝𑀯𑀺𑀦𑀺𑀘𑁆𑀙𑀬𑁂𑀦 𑀧𑀸𑀓𑀝𑀁 𑀤𑁄𑀲𑀁 𑀓𑀭𑁄𑀦𑁆𑀢𑁄 𑀲𑀸𑀫𑀺𑀓𑁂 𑀅𑀲𑁆𑀲𑀸𑀫𑀺𑀓𑁂 𑀅𑀓𑀸𑀲𑀺, 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀁 𑀅𑀗𑁆𑀕𑀁 𑀧𑀸𑀓𑀝𑀁 𑀦𑀺𑀩𑁆𑀩𑀢𑁆𑀢𑀁. 𑀬𑀲𑁆𑀫𑀸 𑀤𑀡𑁆𑀟𑀁 𑀧𑀝𑁆𑀞𑀧𑁂𑀦𑁆𑀢𑁄 𑀧𑀭𑁂𑀲𑀁 𑀅𑀲𑀬𑁆𑀳𑀁 𑀪𑀸𑀭𑀁 𑀆𑀭𑁄𑀧𑁂𑀲𑀺, 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀁 𑀅𑀗𑁆𑀕𑀁 𑀅𑀲𑀬𑁆𑀳𑀪𑀸𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀁. 𑀬𑀲𑁆𑀫𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁂𑀦 𑀲𑀫𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀞𑀢𑁆𑀯𑀸 𑀯𑀺𑀲𑀫𑁄 𑀅𑀳𑁄𑀲𑀺, 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀗𑁆𑀕𑁂 𑀯𑀺𑀲𑀫𑀸 𑀦𑀺𑀲𑀚𑁆𑀚𑀸𑀯 𑀅𑀳𑁄𑀲𑀻𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.