𑁧. 𑀧𑀞𑀫𑀯𑀕𑁆𑀕𑁄

𑁧. 𑀅𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁨. 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑁂 𑀬𑁆𑀯𑀸𑀬𑀁 𑀆𑀬𑀲𑁆𑀫𑀸 𑀘 𑀮𑀓𑁆𑀔𑀡𑁄𑀢𑀺 𑀮𑀓𑁆𑀔𑀡𑀢𑁆𑀣𑁂𑀭𑁄 𑀯𑀼𑀢𑁆𑀢𑁄, 𑀏𑀲 𑀚𑀝𑀺𑀮𑀲𑀳𑀲𑁆𑀲𑀩𑁆𑀪𑀦𑁆𑀢𑀭𑁂 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀬 𑀉𑀧𑀲𑀫𑁆𑀧𑀦𑁆𑀦𑁄 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀸𑀯𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀏𑀓𑁄 𑀫𑀳𑀸𑀲𑀸𑀯𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦𑁂𑀲 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁂𑀦 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁂𑀦 𑀩𑁆𑀭𑀳𑁆𑀫𑀲𑀫𑁂𑀦 𑀅𑀢𑁆𑀢𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀫𑀸 ‘‘𑀮𑀓𑁆𑀔𑀡𑁄’’𑀢𑀺 𑀲𑀗𑁆𑀔𑀁 𑀕𑀢𑁄. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀦 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀤𑀼𑀢𑀺𑀬𑁄 𑀅𑀕𑁆𑀕𑀲𑀸𑀯𑀓𑁄.

𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀫𑀦𑁆𑀤𑀳𑀲𑀺𑀢𑀁 𑀧𑀸𑀢𑀼𑀅𑀓𑀸𑀲𑀺, 𑀧𑀓𑀸𑀲𑀬𑀺 𑀤𑀲𑁆𑀲𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀧𑀦 𑀤𑀺𑀲𑁆𑀯𑀸 𑀣𑁂𑀭𑁄 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺? 𑀉𑀧𑀭𑀺 𑀧𑀸𑀴𑀺𑀬𑀁 𑀆𑀕𑀢𑀁 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀏𑀓𑀁 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀁 𑀲𑀢𑁆𑀢𑀁 𑀤𑀺𑀲𑁆𑀯𑀸. 𑀢𑀜𑁆𑀘 𑀔𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸, 𑀦 𑀧𑀲𑀸𑀤𑀘𑀓𑁆𑀔𑀼𑀦𑀸. 𑀧𑀲𑀸𑀤𑀘𑀓𑁆𑀔𑀼𑀲𑁆𑀲 𑀳𑀺 𑀏𑀢𑁂 𑀅𑀢𑁆𑀢𑀪𑀸𑀯𑀸 𑀦 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀏𑀯𑀭𑀽𑀧𑀁 𑀧𑀦 𑀅𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑁂 𑀓𑀢𑁆𑀢𑀩𑁆𑀩𑁂 𑀓𑀲𑁆𑀫𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺? 𑀅𑀢𑁆𑀢𑀦𑁄 𑀘 𑀩𑀼𑀤𑁆𑀥𑀜𑀸𑀡𑀲𑁆𑀲 𑀘 𑀲𑀫𑁆𑀧𑀢𑁆𑀢𑀺𑀁 𑀲𑀫𑀦𑀼𑀲𑁆𑀲𑀭𑀡𑀢𑁄. 𑀢𑀜𑁆𑀳𑀺 𑀤𑀺𑀲𑁆𑀯𑀸 𑀣𑁂𑀭𑁄 ‘‘𑀅𑀤𑀺𑀝𑁆𑀞𑀲𑀘𑁆𑀘𑁂𑀦 𑀦𑀸𑀫 𑀧𑀼𑀕𑁆𑀕𑀮𑁂𑀦 𑀧𑀝𑀺𑀮𑀪𑀺𑀢𑀩𑁆𑀩𑀸 𑀏𑀯𑀭𑀽𑀧𑀸 𑀅𑀢𑁆𑀢𑀪𑀸𑀯𑀸 𑀫𑀼𑀢𑁆𑀢𑁄 𑀅𑀳𑀁, 𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂’’𑀢𑀺 𑀅𑀢𑁆𑀢𑀦𑁄 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑁋 ‘‘𑀅𑀳𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀲𑀫𑁆𑀧𑀢𑁆𑀢𑀺, ‘𑀬𑁄 𑀓𑀫𑁆𑀫𑀯𑀺𑀧𑀸𑀓𑁄, 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄’𑀢𑀺 𑀤𑁂𑀲𑁂𑀲𑀺, 𑀧𑀘𑁆𑀘𑀓𑁆𑀔𑀁 𑀯𑀢 𑀓𑀢𑁆𑀯𑀸 𑀩𑀼𑀤𑁆𑀥𑀸 𑀤𑁂𑀲𑁂𑀦𑁆𑀢𑀺, 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸 𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀥𑀸𑀢𑀽’’𑀢𑀺 𑀏𑀯𑀁 𑀩𑀼𑀤𑁆𑀥𑀜𑀸𑀡𑀲𑀫𑁆𑀧𑀢𑁆𑀢𑀺𑀜𑁆𑀘 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺.

𑀅𑀣 𑀮𑀓𑁆𑀔𑀡𑀢𑁆𑀣𑁂𑀭𑁄 𑀓𑀲𑁆𑀫𑀸 𑀦 𑀅𑀤𑁆𑀤𑀲, 𑀓𑀺𑀫𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀧𑀦 𑀆𑀯𑀚𑁆𑀚𑁂𑀦𑁆𑀢𑁄 𑀅𑀤𑁆𑀤𑀲, 𑀇𑀢𑀭𑁄 𑀧𑀦 𑀅𑀦𑀸𑀯𑀚𑁆𑀚𑀦𑁂𑀦 𑀦 𑀅𑀤𑁆𑀤𑀲. 𑀬𑀲𑁆𑀫𑀸 𑀧𑀦 𑀔𑀻𑀡𑀸𑀲𑀯𑀸 𑀦𑀸𑀫 𑀦 𑀅𑀓𑀸𑀭𑀡𑀸 𑀲𑀺𑀢𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀮𑀓𑁆𑀔𑀡𑀢𑁆𑀣𑁂𑀭𑁄 𑀧𑀼𑀘𑁆𑀙𑀺 𑀓𑁄 𑀦𑀼 𑀔𑁄, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬𑀸𑀢𑀺? 𑀣𑁂𑀭𑁄 𑀧𑀦 𑀬𑀲𑁆𑀫𑀸 𑀬𑁂𑀳𑀺 𑀅𑀬𑀁 𑀉𑀧𑀧𑀢𑁆𑀢𑀺 𑀲𑀸𑀫𑀁 𑀅𑀤𑀺𑀝𑁆𑀞𑀸, 𑀢𑁂 𑀤𑀼𑀲𑁆𑀲𑀤𑁆𑀥𑀸𑀧𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀦𑁆𑀢𑀁 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀩𑁆𑀬𑀸𑀓𑀸𑀢𑀼𑀓𑀸𑀫𑀢𑀸𑀬 𑀅𑀓𑀸𑀮𑁄 𑀔𑁄, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀼𑀝𑁆𑀞𑁄 𑀇𑀥𑀸𑀳𑀁, 𑀆𑀯𑀼𑀲𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑁆𑀬𑀸𑀓𑀸𑀲𑀺.

𑀢𑀢𑁆𑀣 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀦𑁆𑀢𑀺 𑀲𑁂𑀢𑀁 𑀦𑀺𑀫𑁆𑀫𑀁𑀲𑀮𑁄𑀳𑀺𑀢𑀁 𑀅𑀝𑁆𑀞𑀺𑀲𑀗𑁆𑀖𑀸𑀢𑀁. 𑀕𑀺𑀚𑁆𑀛𑀸𑀧𑀺 𑀓𑀸𑀓𑀸𑀧𑀺 𑀓𑀼𑀮𑀮𑀸𑀧𑀻𑀢𑀺 𑀏𑀢𑁂𑀧𑀺 𑀬𑀓𑁆𑀔𑀕𑀺𑀚𑁆𑀛𑀸 𑀘𑁂𑀯 𑀬𑀓𑁆𑀔𑀓𑀸𑀓𑀸 𑀘 𑀬𑀓𑁆𑀔𑀓𑀼𑀮𑀮𑀸 𑀘 𑀧𑀘𑁆𑀘𑁂𑀢𑀩𑁆𑀩𑀸. 𑀧𑀸𑀓𑀢𑀺𑀓𑀸𑀦𑀁 𑀧𑀦 𑀕𑀺𑀚𑁆𑀛𑀸𑀤𑀻𑀦𑀁 𑀆𑀧𑀸𑀣𑀫𑁆𑀧𑀺 𑀏𑀢𑀁 𑀭𑀽𑀧𑀁 𑀦𑀸𑀕𑀘𑁆𑀙𑀢𑀺. 𑀅𑀦𑀼𑀧𑀢𑀺𑀢𑁆𑀯𑀸 𑀅𑀦𑀼𑀧𑀢𑀺𑀢𑁆𑀯𑀸𑀢𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀅𑀦𑀼𑀩𑀦𑁆𑀥𑀺𑀢𑁆𑀯𑀸. 𑀯𑀺𑀢𑀼𑀤𑁂𑀦𑁆𑀢𑀻𑀢𑀺 𑀅𑀲𑀺𑀥𑀸𑀭𑀽𑀧𑀫𑁂𑀳𑀺 𑀢𑀺𑀔𑀺𑀡𑁂𑀳𑀺 𑀮𑁄𑀳𑀢𑀼𑀡𑁆𑀟𑀓𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀘𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺. 𑀲𑀸 𑀲𑀼𑀤𑀁 𑀅𑀝𑁆𑀝𑀲𑁆𑀲𑀭𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀲𑀸 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸 𑀅𑀝𑁆𑀝𑀲𑁆𑀲𑀭𑀁 𑀆𑀢𑀼𑀭𑀲𑁆𑀲𑀭𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀼𑀪𑀯𑀦𑀢𑁆𑀣𑀁 𑀓𑀺𑀭 𑀬𑁄𑀚𑀦𑀧𑁆𑀧𑀫𑀸𑀡𑀸𑀧𑀺 𑀢𑀸𑀤𑀺𑀲𑀸 𑀅𑀢𑁆𑀢𑀪𑀸𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀧𑀲𑀸𑀤𑀼𑀲𑁆𑀲𑀤𑀸 𑀘 𑀳𑁄𑀦𑁆𑀢𑀺 𑀧𑀓𑁆𑀓𑀕𑀡𑁆𑀟𑀲𑀤𑀺𑀲𑀸. 𑀢𑀲𑁆𑀫𑀸 𑀲𑀸 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸 𑀩𑀮𑀯𑀯𑁂𑀤𑀦𑀸𑀢𑀼𑀭𑀸 𑀢𑀸𑀤𑀺𑀲𑀁 𑀲𑀤𑁆𑀤𑀫𑀓𑀸𑀲𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 ‘‘𑀯𑀝𑁆𑀝𑀕𑀸𑀫𑀺𑀲𑀢𑁆𑀢𑀸 𑀦𑀸𑀫 𑀏𑀯𑀭𑀽𑀧𑀸 𑀅𑀢𑁆𑀢𑀪𑀸𑀯𑀸 𑀦 𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀥𑀫𑁆𑀫𑀲𑀁𑀯𑁂𑀕𑀁 𑀤𑀲𑁆𑀲𑁂𑀦𑁆𑀢𑁄 𑀢𑀲𑁆𑀲 𑀫𑀬𑁆𑀳𑀁, 𑀆𑀯𑀼𑀲𑁄, 𑀏𑀢𑀤𑀳𑁄𑀲𑀺 𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄𑀢𑀺𑀆𑀤𑀺𑀫𑀸𑀳. 𑀢𑀢𑁄 𑀪𑀕𑀯𑀸 𑀣𑁂𑀭𑀲𑁆𑀲 𑀆𑀦𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀘𑀓𑁆𑀔𑀼𑀪𑀽𑀢𑀸 𑀯𑀢, 𑀪𑀺𑀓𑁆𑀔𑀯𑁂, 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀼 𑀪𑀽𑀢𑀁 𑀚𑀸𑀢𑀁 𑀉𑀧𑁆𑀧𑀦𑁆𑀦𑀁 𑀏𑀢𑁂𑀲𑀦𑁆𑀢𑀺 𑀘𑀓𑁆𑀔𑀼𑀪𑀽𑀢𑀸, 𑀪𑀽𑀢𑀘𑀓𑁆𑀔𑀼𑀓𑀸 𑀉𑀧𑁆𑀧𑀦𑁆𑀦𑀘𑀓𑁆𑀔𑀼𑀓𑀸 𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀏𑀢𑁆𑀣 𑀬𑀢𑁆𑀭𑀸𑀢𑀺 𑀓𑀸𑀭𑀡𑀯𑀘𑀦𑀁. 𑀢𑀢𑁆𑀭𑀸𑀬𑀁 𑀅𑀢𑁆𑀣𑀬𑁄𑀚𑀦𑀸 𑁋 𑀬𑀲𑁆𑀫𑀸 𑀦𑀸𑀫 𑀲𑀸𑀯𑀓𑁄𑀧𑀺 𑀏𑀯𑀭𑀽𑀧𑀁 𑀜𑀲𑁆𑀲𑀢𑀺 𑀯𑀸 𑀤𑀓𑁆𑀔𑀢𑀺 𑀯𑀸 𑀲𑀓𑁆𑀔𑀺𑀁 𑀯𑀸 𑀓𑀭𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀯𑁄𑀘𑀼𑀫𑁆𑀳 𑁋 ‘‘𑀘𑀓𑁆𑀔𑀼𑀪𑀽𑀢𑀸 𑀯𑀢, 𑀪𑀺𑀓𑁆𑀔𑀯𑁂, 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀜𑀸𑀡𑀪𑀽𑀢𑀸 𑀯𑀢, 𑀪𑀺𑀓𑁆𑀔𑀯𑁂, 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀻’’𑀢𑀺. 𑀧𑀼𑀩𑁆𑀩𑁂𑀯 𑀫𑁂 𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑁄 𑀤𑀺𑀝𑁆𑀞𑁄𑀢𑀺 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀝𑀺𑀯𑁂𑀥𑁂𑀦 𑀅𑀧𑁆𑀧𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑁆𑀧𑀫𑀸𑀡𑁂 𑀲𑀢𑁆𑀢𑀦𑀺𑀓𑀸𑀬𑁂 𑀪𑀯𑀕𑀢𑀺𑀬𑁄𑀦𑀺𑀞𑀺𑀢𑀺𑀦𑀺𑀯𑀸𑀲𑁂 𑀘 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑁂𑀦 𑀫𑀬𑀸 𑀧𑀼𑀩𑁆𑀩𑁂𑀯 𑀲𑁄 𑀲𑀢𑁆𑀢𑁄 𑀤𑀺𑀝𑁆𑀞𑁄𑀢𑀺 𑀯𑀤𑀢𑀺.

𑀕𑁄𑀖𑀸𑀢𑀓𑁄𑀢𑀺 𑀕𑀸𑀯𑁄 𑀯𑀥𑀺𑀢𑁆𑀯𑀸 𑀅𑀝𑁆𑀞𑀺𑀢𑁄 𑀫𑀁𑀲𑀁 𑀫𑁄𑀘𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑀦𑀓𑀲𑀢𑁆𑀢𑁄. 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸𑀢𑀺 𑀢𑀲𑁆𑀲 𑀦𑀸𑀦𑀸𑀘𑁂𑀢𑀦𑀸𑀳𑀺 𑀆𑀬𑀽𑀳𑀺𑀢𑀲𑁆𑀲 𑀅𑀧𑀭𑀸𑀧𑀭𑀺𑀬𑀓𑀫𑁆𑀫𑀲𑁆𑀲. 𑀢𑀢𑁆𑀭 𑀳𑀺 𑀬𑀸𑀬 𑀘𑁂𑀢𑀦𑀸𑀬 𑀦𑀭𑀓𑁂 𑀧𑀝𑀺𑀲𑀦𑁆𑀥𑀺 𑀚𑀦𑀺𑀢𑀸, 𑀢𑀲𑁆𑀲𑀸 𑀯𑀺𑀧𑀸𑀓𑁂 𑀧𑀭𑀺𑀓𑁆𑀔𑀻𑀡𑁂 𑀅𑀯𑀲𑁂𑀲𑀓𑀫𑁆𑀫𑀁 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀼𑀦 𑀧𑁂𑀢𑀸𑀤𑀻𑀲𑀼 𑀧𑀝𑀺𑀲𑀦𑁆𑀥𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀸 𑀧𑀝𑀺𑀲𑀦𑁆𑀥𑀺 𑀓𑀫𑁆𑀫𑀲𑀪𑀸𑀕𑀢𑀸𑀬 𑀆𑀭𑀫𑁆𑀫𑀡𑀲𑀪𑀸𑀕𑀢𑀸𑀬 𑀯𑀸 ‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀜𑁆𑀘 𑀲𑀢𑁆𑀢𑁄 𑀏𑀯𑀁 𑀉𑀧𑁆𑀧𑀦𑁆𑀦𑁄. 𑀢𑁂𑀦𑀸𑀳 𑁋 ‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸’’𑀢𑀺. 𑀢𑀲𑁆𑀲 𑀓𑀺𑀭 𑀦𑀭𑀓𑀸 𑀘𑀯𑀦𑀓𑀸𑀮𑁂 𑀦𑀺𑀫𑁆𑀫𑀁𑀲𑀓𑀢𑀸𑀦𑀁 𑀕𑀼𑀦𑁆𑀦𑀁 𑀅𑀝𑁆𑀞𑀺𑀭𑀸𑀲𑀺𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀲𑁄 𑀧𑀝𑀺𑀘𑁆𑀙𑀦𑁆𑀦𑀫𑁆𑀧𑀺 𑀢𑀁 𑀓𑀫𑁆𑀫𑀁 𑀯𑀺𑀜𑁆𑀜𑀽𑀦𑀁 𑀧𑀸𑀓𑀝𑀁 𑀯𑀺𑀬 𑀓𑀭𑁄𑀦𑁆𑀢𑁄 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀧𑁂𑀢𑁄 𑀚𑀸𑀢𑁄. 𑀧𑀞𑀫𑀁.

𑁨. 𑀧𑁂𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁩. 𑀫𑀁𑀲𑀧𑁂𑀲𑀺𑀯𑀢𑁆𑀣𑀼𑀲𑁆𑀫𑀺𑀁 𑀕𑁄𑀖𑀸𑀢𑀓𑁄𑀢𑀺 𑀕𑁄𑀫𑀁𑀲𑀧𑁂𑀲𑀺𑀬𑁄 𑀓𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀯𑀮𑁆𑀮𑀽𑀭𑀯𑀺𑀓𑁆𑀓𑀬𑁂𑀦 𑀅𑀦𑁂𑀓𑀸𑀦𑀺 𑀯𑀲𑁆𑀲𑀸𑀦𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺, 𑀢𑁂𑀦𑀲𑁆𑀲 𑀦𑀭𑀓𑀸 𑀘𑀯𑀦𑀓𑀸𑀮𑁂 𑀫𑀁𑀲𑀧𑁂𑀲𑀺𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀲𑁄 𑀫𑀁𑀲𑀧𑁂𑀲𑀺𑀧𑁂𑀢𑁄 𑀚𑀸𑀢𑁄. 𑀤𑀼𑀢𑀺𑀬𑀁.

𑁩. 𑀧𑀺𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁪. 𑀫𑀁𑀲𑀧𑀺𑀡𑁆𑀟𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀓𑀼𑀡𑀺𑀓𑁄𑀢𑀺 𑀲𑀓𑀼𑀡𑁂 𑀕𑀳𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑀓𑀸𑀮𑁂 𑀦𑀺𑀧𑁆𑀧𑀓𑁆𑀔𑀘𑀫𑁆𑀫𑁂 𑀫𑀁𑀲𑀧𑀺𑀡𑁆𑀟𑀫𑀢𑁆𑀢𑁂 𑀓𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺, 𑀢𑁂𑀦𑀲𑁆𑀲 𑀦𑀭𑀓𑀸 𑀘𑀯𑀦𑀓𑀸𑀮𑁂 𑀫𑀁𑀲𑀧𑀺𑀡𑁆𑀟𑁄𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀲𑁄 𑀫𑀁𑀲𑀧𑀺𑀡𑁆𑀟𑀧𑁂𑀢𑁄 𑀚𑀸𑀢𑁄. 𑀢𑀢𑀺𑀬𑀁.

𑁪. 𑀦𑀺𑀘𑁆𑀙𑀯𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁫. 𑀦𑀺𑀘𑁆𑀙𑀯𑀺𑀯𑀢𑁆𑀣𑀼𑀲𑁆𑀫𑀺𑀁 𑀢𑀲𑁆𑀲 𑀑𑀭𑀩𑁆𑀪𑀺𑀓𑀲𑁆𑀲 𑀏𑀴𑀓𑁂 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀦𑀺𑀘𑁆𑀘𑀫𑁆𑀫𑁂 𑀓𑀢𑁆𑀯𑀸 𑀓𑀧𑁆𑀧𑀺𑀢𑀚𑀻𑀯𑀺𑀓𑀲𑁆𑀲 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀘𑁆𑀘𑀫𑁆𑀫𑀁 𑀏𑀴𑀓𑀲𑀭𑀻𑀭𑀁 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀲𑁄 𑀦𑀺𑀘𑁆𑀙𑀯𑀺𑀧𑁂𑀢𑁄 𑀚𑀸𑀢𑁄. 𑀘𑀢𑀼𑀢𑁆𑀣𑀁.

𑁫. 𑀅𑀲𑀺𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁬. 𑀅𑀲𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀲𑀽𑀓𑀭𑀺𑀓𑁄 𑀤𑀻𑀖𑀭𑀢𑁆𑀢𑀁 𑀦𑀺𑀯𑀸𑀧𑀧𑀼𑀝𑁆𑀞𑁂 𑀲𑀽𑀓𑀭𑁂 𑀅𑀲𑀺𑀦𑀸 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺, 𑀢𑀲𑁆𑀲 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀪𑀸𑀯𑁄𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀅𑀲𑀺𑀮𑁄𑀫𑀧𑁂𑀢𑁄 𑀚𑀸𑀢𑁄. 𑀧𑀜𑁆𑀘𑀫𑀁.

𑁬. 𑀲𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁭. 𑀲𑀢𑁆𑀢𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀫𑀸𑀕𑀯𑀺𑀓𑁄 𑀏𑀓𑀁 𑀫𑀺𑀕𑀜𑁆𑀘 𑀲𑀢𑁆𑀢𑀺𑀜𑁆𑀘 𑀕𑀳𑁂𑀢𑁆𑀯𑀸 𑀯𑀦𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀺𑀕𑀲𑁆𑀲 𑀲𑀫𑀻𑀧𑀁 𑀆𑀕𑀢𑀸𑀕𑀢𑁂 𑀫𑀺𑀕𑁂 𑀲𑀢𑁆𑀢𑀺𑀬𑀸 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑁂𑀲𑀺, 𑀢𑀲𑁆𑀲 𑀲𑀢𑁆𑀢𑀺𑀬𑀸 𑀯𑀺𑀚𑁆𑀛𑀦𑀓𑀪𑀸𑀯𑁄𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀲𑀢𑁆𑀢𑀺𑀮𑁄𑀫𑀧𑁂𑀢𑁄 𑀚𑀸𑀢𑁄. 𑀙𑀝𑁆𑀞𑀁.

𑁭. 𑀉𑀲𑀼𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁮. 𑀉𑀲𑀼𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀭𑀡𑀺𑀓𑁄𑀢𑀺 𑀭𑀸𑀚𑀸𑀧𑀭𑀸𑀥𑀺𑀓𑁂 𑀅𑀦𑁂𑀓𑀸𑀳𑀺 𑀓𑀸𑀭𑀡𑀸𑀳𑀺 𑀧𑀻𑀴𑁂𑀢𑁆𑀯𑀸 𑀅𑀯𑀲𑀸𑀦𑁂 𑀓𑀡𑁆𑀟𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀫𑀸𑀭𑀡𑀓𑀧𑀼𑀭𑀺𑀲𑁄. 𑀲𑁄 𑀓𑀺𑀭 ‘‘𑀅𑀫𑀼𑀓𑀲𑁆𑀫𑀺𑀁 𑀧𑀤𑁂𑀲𑁂 𑀯𑀺𑀤𑁆𑀥𑁄 𑀫𑀭𑀢𑀻’’𑀢𑀺 𑀜𑀢𑁆𑀯𑀸𑀯 𑀯𑀺𑀚𑁆𑀛𑀢𑀺. 𑀢𑀲𑁆𑀲𑁂𑀯𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀦𑀭𑀓𑁂 𑀉𑀧𑁆𑀧𑀦𑁆𑀦𑀲𑁆𑀲 𑀢𑀢𑁄 𑀧𑀓𑁆𑀓𑀸𑀯𑀲𑁂𑀲𑁂𑀦 𑀇𑀥𑀽𑀧𑀧𑀢𑁆𑀢𑀺𑀓𑀸𑀮𑁂 𑀉𑀲𑀼𑀦𑀸 𑀯𑀺𑀚𑁆𑀛𑀦𑀪𑀸𑀯𑁄𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀉𑀲𑀼𑀮𑁄𑀫𑀧𑁂𑀢𑁄 𑀚𑀸𑀢𑁄. 𑀲𑀢𑁆𑀢𑀫𑀁.

𑁮. 𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁯. 𑀲𑀽𑀘𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑀽𑀢𑁄𑀢𑀺 𑀅𑀲𑁆𑀲𑀤𑀫𑀓𑁄. 𑀕𑁄𑀤𑀫𑀓𑁄𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀢𑀲𑁆𑀲 𑀧𑀢𑁄𑀤𑀲𑀽𑀘𑀺𑀬𑀸 𑀯𑀺𑀚𑁆𑀛𑀦𑀪𑀸𑀯𑁄𑀬𑁂𑀯 𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀲𑀽𑀘𑀺𑀮𑁄𑀫𑀧𑁂𑀢𑁄 𑀚𑀸𑀢𑁄. 𑀅𑀝𑁆𑀞𑀫𑀁.

𑁯. 𑀤𑀼𑀢𑀺𑀬𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁦. 𑀤𑀼𑀢𑀺𑀬𑁂 𑀲𑀽𑀘𑀺𑀮𑁄𑀫𑀯𑀢𑁆𑀣𑀼𑀲𑁆𑀫𑀺𑀁 𑀲𑀽𑀘𑀓𑁄𑀢𑀺 𑀧𑁂𑀲𑀼𑀜𑁆𑀜𑀓𑀸𑀭𑀓𑁄. 𑀲𑁄 𑀓𑀺𑀭 𑀫𑀦𑀼𑀲𑁆𑀲𑁂 𑀅𑀜𑁆𑀜𑀫𑀜𑁆𑀜𑀜𑁆𑀘 𑀪𑀺𑀦𑁆𑀤𑀺, 𑀭𑀸𑀚𑀓𑀼𑀮𑁂 𑀘 ‘‘𑀇𑀫𑀲𑁆𑀲 𑀇𑀫𑀁 𑀦𑀸𑀫 𑀅𑀢𑁆𑀣𑀺, 𑀇𑀫𑀺𑀦𑀸 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺 𑀲𑀽𑀘𑁂𑀢𑁆𑀯𑀸 𑀲𑀽𑀘𑁂𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀲𑀺. 𑀢𑀲𑁆𑀫𑀸 𑀬𑀣𑀸 𑀢𑁂𑀦 𑀲𑀽𑀘𑁂𑀢𑁆𑀯𑀸 𑀫𑀦𑀼𑀲𑁆𑀲𑀸 𑀪𑀺𑀦𑁆𑀦𑀸, 𑀢𑀣𑀸 𑀲𑀽𑀘𑀻𑀳𑀺 𑀪𑁂𑀤𑀦𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑁄𑀢𑀼𑀁 𑀓𑀫𑁆𑀫𑀫𑁂𑀯 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀽𑀘𑀺𑀮𑁄𑀫𑀧𑁂𑀢𑁄 𑀚𑀸𑀢𑁄. 𑀦𑀯𑀫𑀁.

𑁧𑁦. 𑀓𑀼𑀫𑁆𑀪𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁧. 𑀅𑀡𑁆𑀟𑀪𑀸𑀭𑀺𑀯𑀢𑁆𑀣𑀼𑀲𑁆𑀫𑀺𑀁 𑀕𑀸𑀫𑀓𑀽𑀝𑀓𑁄𑀢𑀺 𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄. 𑀢𑀲𑁆𑀲 𑀓𑀫𑁆𑀫𑀲𑀪𑀸𑀕𑀢𑀸𑀬 𑀓𑀼𑀫𑁆𑀪𑀫𑀢𑁆𑀢𑀸 𑀫𑀳𑀸𑀖𑀝𑀧𑁆𑀧𑀫𑀸𑀡𑀸 𑀅𑀡𑁆𑀟𑀸 𑀅𑀳𑁂𑀲𑀼𑀁. 𑀲𑁄 𑀳𑀺 𑀬𑀲𑁆𑀫𑀸 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀞𑀸𑀦𑁂 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀓𑀽𑀝𑀯𑀺𑀦𑀺𑀘𑁆𑀙𑀬𑁂𑀦 𑀧𑀸𑀓𑀝𑀁 𑀤𑁄𑀲𑀁 𑀓𑀭𑁄𑀦𑁆𑀢𑁄 𑀲𑀸𑀫𑀺𑀓𑁂 𑀅𑀲𑁆𑀲𑀸𑀫𑀺𑀓𑁂 𑀅𑀓𑀸𑀲𑀺, 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀁 𑀅𑀗𑁆𑀕𑀁 𑀧𑀸𑀓𑀝𑀁 𑀦𑀺𑀩𑁆𑀩𑀢𑁆𑀢𑀁. 𑀬𑀲𑁆𑀫𑀸 𑀤𑀡𑁆𑀟𑀁 𑀧𑀝𑁆𑀞𑀧𑁂𑀦𑁆𑀢𑁄 𑀧𑀭𑁂𑀲𑀁 𑀅𑀲𑀬𑁆𑀳𑀁 𑀪𑀸𑀭𑀁 𑀆𑀭𑁄𑀧𑁂𑀲𑀺, 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀁 𑀅𑀗𑁆𑀕𑀁 𑀅𑀲𑀬𑁆𑀳𑀪𑀸𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀁. 𑀬𑀲𑁆𑀫𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑁂𑀦 𑀲𑀫𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀞𑀢𑁆𑀯𑀸 𑀯𑀺𑀲𑀫𑁄 𑀅𑀳𑁄𑀲𑀺, 𑀢𑀲𑁆𑀫𑀸𑀲𑁆𑀲 𑀭𑀳𑀲𑁆𑀲𑀗𑁆𑀕𑁂 𑀯𑀺𑀲𑀫𑀸 𑀦𑀺𑀲𑀚𑁆𑀚𑀸𑀯 𑀅𑀳𑁄𑀲𑀻𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.