𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀲𑀻𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁨. 𑀧𑀸𑀭𑀤𑀸𑀭𑀺𑀓𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀲𑀢𑁆𑀢𑁄 𑀧𑀭𑀲𑁆𑀲 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀲𑀲𑁆𑀲𑀸𑀫𑀺𑀓𑀁 𑀨𑀲𑁆𑀲𑀁 𑀨𑀼𑀲𑀦𑁆𑀢𑁄 𑀫𑀻𑀴𑁆𑀳𑀲𑀼𑀔𑁂𑀦 𑀓𑀸𑀫𑀲𑀼𑀔𑁂𑀦 𑀘𑀺𑀢𑁆𑀢𑀁 𑀭𑀫𑀬𑀺𑀢𑁆𑀯𑀸 𑀓𑀫𑁆𑀫𑀲𑀪𑀸𑀕𑀢𑀸𑀬 𑀕𑀽𑀣𑀨𑀲𑁆𑀲𑀁 𑀨𑀼𑀲𑀦𑁆𑀢𑁄 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑀼𑀁 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄. 𑀧𑀞𑀫𑀁.

𑁨. 𑀕𑀽𑀣𑀔𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁩. 𑀤𑀼𑀝𑁆𑀞𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀧𑀸𑀓𑀝𑀫𑁂𑀯. 𑀤𑀼𑀢𑀺𑀬𑀁.

𑁩. 𑀦𑀺𑀘𑁆𑀙𑀯𑀺𑀢𑁆𑀣𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁪. 𑀦𑀺𑀘𑁆𑀙𑀯𑀺𑀢𑁆𑀣𑀺𑀯𑀢𑁆𑀣𑀼𑀲𑁆𑀫𑀺𑀁 𑀬𑀲𑁆𑀫𑀸 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀢𑁆𑀢𑀦𑁄 𑀨𑀲𑁆𑀲𑁂 𑀅𑀦𑀺𑀲𑁆𑀲𑀭𑁄, 𑀲𑀸 𑀘 𑀢𑀁 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀓𑀁 𑀨𑀲𑁆𑀲𑀁 𑀣𑁂𑀦𑁂𑀢𑁆𑀯𑀸 𑀧𑀭𑁂𑀲𑀁 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀲𑀺, 𑀢𑀲𑁆𑀫𑀸 𑀓𑀫𑁆𑀫𑀲𑀪𑀸𑀕𑀢𑀸𑀬 𑀲𑀼𑀔𑀲𑀫𑁆𑀨𑀲𑁆𑀲𑀸 𑀯𑀝𑁆𑀝𑀺𑀢𑁆𑀯𑀸 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀁 𑀅𑀦𑀼𑀪𑀯𑀺𑀢𑀼𑀁 𑀦𑀺𑀘𑁆𑀙𑀯𑀺𑀢𑁆𑀣𑀻 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀸. 𑀢𑀢𑀺𑀬𑀁.

𑁪. 𑀫𑀗𑁆𑀕𑀼𑀮𑀺𑀢𑁆𑀣𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁫. 𑀫𑀗𑁆𑀕𑀼𑀮𑀺𑀢𑁆𑀣𑀺𑀯𑀢𑁆𑀣𑀼𑀲𑁆𑀫𑀺𑀁 𑀫𑀗𑁆𑀕𑀼𑀮𑀺𑀦𑁆𑀢𑀺 𑀯𑀺𑀭𑀽𑀧𑀁 𑀤𑀼𑀤𑁆𑀤𑀲𑀺𑀓𑀁 𑀩𑀻𑀪𑀘𑁆𑀙𑀁. 𑀲𑀸 𑀓𑀺𑀭 𑀬𑀓𑁆𑀔𑀤𑀸𑀲𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀏𑀯𑀁 𑀩𑀮𑀺𑀓𑀫𑁆𑀫𑁂 𑀓𑀢𑁂 𑀅𑀬𑀁 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀯𑀟𑁆𑀠𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀳𑀸𑀚𑀦𑀲𑁆𑀲 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀯𑀜𑁆𑀘𑀦𑀸𑀬 𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑀁 𑀤𑀼𑀤𑁆𑀤𑀺𑀝𑁆𑀞𑀺𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀧𑁂𑀲𑀺, 𑀢𑀲𑁆𑀫𑀸 𑀢𑀸𑀬 𑀓𑀫𑁆𑀫𑀲𑀪𑀸𑀕𑀢𑀸𑀬 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀁 𑀣𑁂𑀦𑀺𑀢𑀢𑁆𑀢𑀸 𑀤𑀼𑀕𑁆𑀕𑀦𑁆𑀥𑀸, 𑀤𑀼𑀤𑁆𑀤𑀲𑁆𑀲𑀦𑀲𑁆𑀲 𑀕𑀸𑀳𑀺𑀢𑀢𑁆𑀢𑀸 𑀤𑀼𑀤𑁆𑀤𑀲𑀺𑀓𑀸 𑀯𑀺𑀭𑀽𑀧𑀸 𑀩𑀻𑀪𑀘𑁆𑀙𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸. 𑀘𑀢𑀼𑀢𑁆𑀣𑀁.

𑁫. 𑀑𑀓𑀺𑀮𑀺𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁬. 𑀑𑀓𑀺𑀮𑀺𑀦𑀻𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀓𑁆𑀓𑀁 𑀑𑀓𑀺𑀮𑀺𑀦𑀺𑀁 𑀑𑀓𑀺𑀭𑀺𑀦𑀺𑀦𑁆𑀢𑀺 𑀲𑀸 𑀓𑀺𑀭 𑀅𑀗𑁆𑀕𑀸𑀭𑀘𑀺𑀢𑀓𑁂 𑀦𑀺𑀧𑀦𑁆𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀸 𑀧𑀘𑁆𑀘𑀢𑀺, 𑀢𑀲𑁆𑀫𑀸 𑀉𑀧𑁆𑀧𑀓𑁆𑀓𑀸 𑀘𑁂𑀯 𑀳𑁄𑀢𑀺 𑀉𑀡𑁆𑀳𑁂𑀦 𑀅𑀕𑁆𑀕𑀺𑀦𑀸 𑀧𑀓𑁆𑀓𑀲𑀭𑀻𑀭𑀸, 𑀑𑀓𑀺𑀮𑀺𑀦𑀻 𑀘 𑀓𑀺𑀮𑀺𑀦𑁆𑀦𑀲𑀭𑀻𑀭𑀸, 𑀩𑀺𑀦𑁆𑀤𑀽𑀦𑀺𑀲𑁆𑀲𑀸 𑀲𑀭𑀻𑀭𑀢𑁄 𑀧𑀕𑁆𑀖𑀭𑀦𑁆𑀢𑀺, 𑀑𑀓𑀺𑀭𑀺𑀦𑀻 𑀘 𑀅𑀗𑁆𑀕𑀸𑀭𑀲𑀫𑁆𑀧𑀭𑀺𑀓𑀺𑀡𑁆𑀡𑀸. 𑀢𑀲𑁆𑀲𑀸 𑀳𑀺 𑀳𑁂𑀝𑁆𑀞𑀢𑁄𑀧𑀺 𑀓𑀺𑀁𑀲𑀼𑀓𑀧𑀼𑀧𑁆𑀨𑀯𑀡𑁆𑀡𑀸 𑀅𑀗𑁆𑀕𑀸𑀭𑀸, 𑀉𑀪𑀬𑀧𑀲𑁆𑀲𑁂𑀲𑀼𑀧𑀺, 𑀆𑀓𑀸𑀲𑀢𑁄𑀧𑀺𑀲𑁆𑀲𑀸 𑀉𑀧𑀭𑀺 𑀧𑀢𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀧𑁆𑀧𑀓𑁆𑀓𑀁 𑀑𑀓𑀺𑀮𑀺𑀦𑀺𑀁 𑀑𑀓𑀺𑀭𑀺𑀦𑀺’’𑀦𑁆𑀢𑀺. 𑀲𑀸 𑀇𑀲𑁆𑀲𑀸𑀧𑀓𑀢𑀸 𑀲𑀧𑀢𑁆𑀢𑀺𑀁 𑀅𑀗𑁆𑀕𑀸𑀭𑀓𑀝𑀸𑀳𑁂𑀦 𑀑𑀓𑀺𑀭𑀻𑀢𑀺 𑀢𑀲𑁆𑀲 𑀓𑀺𑀭 𑀭𑀜𑁆𑀜𑁄 𑀏𑀓𑀸 𑀦𑀸𑀝𑀓𑀺𑀦𑀻 𑀅𑀗𑁆𑀕𑀸𑀭𑀓𑀝𑀸𑀳𑀁 𑀲𑀫𑀻𑀧𑁂 𑀞𑀧𑁂𑀢𑁆𑀯𑀸 𑀕𑀢𑁆𑀢𑀢𑁄 𑀉𑀤𑀓𑀁 𑀧𑀼𑀜𑁆𑀙𑀢𑀺, 𑀧𑀸𑀡𑀺𑀦𑀸 𑀘 𑀲𑁂𑀤𑀁 𑀓𑀭𑁄𑀢𑀺. 𑀭𑀸𑀚𑀸𑀧𑀺 𑀢𑀸𑀬 𑀲𑀤𑁆𑀥𑀺𑀁 𑀓𑀣𑀜𑁆𑀘 𑀓𑀭𑁄𑀢𑀺, 𑀧𑀭𑀺𑀢𑀼𑀝𑁆𑀞𑀸𑀓𑀸𑀭𑀜𑁆𑀘 𑀤𑀲𑁆𑀲𑁂𑀢𑀺. 𑀅𑀕𑁆𑀕𑀫𑀳𑁂𑀲𑀻 𑀢𑀁 𑀅𑀲𑀳𑀫𑀸𑀦𑀸 𑀇𑀲𑁆𑀲𑀸𑀧𑀓𑀢𑀸 𑀳𑀼𑀢𑁆𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀭𑀜𑁆𑀜𑁄 𑀢𑀁 𑀅𑀗𑁆𑀕𑀸𑀭𑀓𑀝𑀸𑀳𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀉𑀧𑀭𑀺 𑀅𑀗𑁆𑀕𑀸𑀭𑁂 𑀑𑀓𑀺𑀭𑀺. 𑀲𑀸 𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀸𑀤𑀺𑀲𑀁𑀬𑁂𑀯 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑀯𑀺𑀢𑀼𑀁 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀧𑀜𑁆𑀘𑀫𑀁.

𑁬. 𑀅𑀲𑀻𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁭. 𑀘𑁄𑀭𑀖𑀸𑀢𑀯𑀢𑁆𑀣𑀼𑀲𑁆𑀫𑀺𑀁 𑀲𑁄 𑀭𑀜𑁆𑀜𑁄 𑀆𑀡𑀸𑀬 𑀤𑀻𑀖𑀭𑀢𑁆𑀢𑀁 𑀘𑁄𑀭𑀸𑀦𑀁 𑀲𑀻𑀲𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑁄 𑀅𑀲𑀻𑀲𑀓𑀁 𑀓𑀩𑀦𑁆𑀥𑀁 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀙𑀝𑁆𑀞𑀁.

𑁭-𑁧𑁧. 𑀧𑀸𑀧𑀪𑀺𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁮-𑁨𑁨𑁨. 𑀪𑀺𑀓𑁆𑀔𑀼𑀯𑀢𑁆𑀣𑀼𑀲𑁆𑀫𑀺𑀁 𑀧𑀸𑀧𑀪𑀺𑀓𑁆𑀔𑀽𑀢𑀺 𑀮𑀸𑀫𑀓𑀪𑀺𑀓𑁆𑀔𑀼. 𑀲𑁄 𑀓𑀺𑀭 𑀮𑁄𑀓𑀲𑁆𑀲 𑀲𑀤𑁆𑀥𑀸𑀤𑁂𑀬𑁆𑀬𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀳𑀺 𑀅𑀲𑀁𑀬𑀢𑁄 𑀪𑀺𑀦𑁆𑀦𑀸𑀚𑀻𑀯𑁄 𑀘𑀺𑀢𑁆𑀢𑀓𑁂𑀴𑀺𑀁 𑀓𑀻𑀴𑀦𑁆𑀢𑁄 𑀯𑀺𑀘𑀭𑀺. 𑀢𑀢𑁄 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀧𑁂𑀢𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑁄 𑀪𑀺𑀓𑁆𑀔𑀼𑀲𑀤𑀺𑀲𑁂𑀦𑁂𑀯 𑀅𑀢𑁆𑀢𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀺. 𑀪𑀺𑀓𑁆𑀔𑀼𑀦𑀻𑀲𑀺𑀓𑁆𑀔𑀫𑀸𑀦𑀸𑀲𑀸𑀫𑀡𑁂𑀭𑀲𑀸𑀫𑀡𑁂𑀭𑀻𑀯𑀢𑁆𑀣𑀽𑀲𑀼𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄. 𑀲𑀢𑁆𑀢𑀫𑀸𑀤𑀻𑀦𑀺.

𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.