𑁯. 𑀑𑀧𑀫𑁆𑀫𑀲𑀁𑀬𑀼𑀢𑁆𑀢𑀁

𑁧. 𑀓𑀽𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁩. 𑀑𑀧𑀫𑁆𑀫𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀓𑀽𑀝𑀁 𑀕𑀘𑁆𑀙𑀦𑁆𑀢𑀻𑀢𑀺 𑀓𑀽𑀝𑀗𑁆𑀕𑀫𑀸. 𑀓𑀽𑀝𑀁 𑀲𑀫𑁄𑀲𑀭𑀦𑁆𑀢𑀻𑀢𑀺 𑀓𑀽𑀝𑀲𑀫𑁄𑀲𑀭𑀡𑀸. 𑀓𑀽𑀝𑀲𑀫𑀼𑀕𑁆𑀖𑀸𑀢𑀸𑀢𑀺 𑀓𑀽𑀝𑀲𑁆𑀲 𑀲𑀫𑀼𑀕𑁆𑀖𑀸𑀢𑁂𑀦. 𑀅𑀯𑀺𑀚𑁆𑀚𑀸𑀲𑀫𑀼𑀕𑁆𑀖𑀸𑀢𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀸𑀬 𑀲𑀫𑀼𑀕𑁆𑀖𑀸𑀢𑁂𑀦. 𑀅𑀧𑁆𑀧𑀫𑀢𑁆𑀢𑀸𑀢𑀺 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂 𑀞𑀺𑀢𑀸 𑀳𑀼𑀢𑁆𑀯𑀸. 𑀧𑀞𑀫𑀁.

𑁨. 𑀦𑀔𑀲𑀺𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁪. 𑀤𑀼𑀢𑀺𑀬𑁂 𑀫𑀦𑀼𑀲𑁆𑀲𑁂𑀲𑀼 𑀧𑀘𑁆𑀘𑀸𑀚𑀸𑀬𑀦𑁆𑀢𑀻𑀢𑀺 𑀬𑁂 𑀫𑀦𑀼𑀲𑁆𑀲𑀮𑁄𑀓𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑁂𑀲𑀼 𑀚𑀸𑀬𑀦𑁆𑀢𑀺, 𑀢𑁂 𑀏𑀯𑀁 𑀅𑀧𑁆𑀧𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀢𑁆𑀭 𑀫𑀦𑀼𑀲𑁆𑀲𑁂𑀳𑀻𑀢𑀺 𑀬𑁂 𑀧𑀦 𑀫𑀦𑀼𑀲𑁆𑀲𑀮𑁄𑀓𑀢𑁄 𑀘𑀼𑀢𑀸 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀘𑁆𑀘𑀸𑀚𑀸𑀬𑀦𑁆𑀢𑀺, 𑀢𑁂 𑀫𑀳𑀸𑀧𑀣𑀯𑀺𑀬𑀁 𑀧𑀁𑀲𑀼 𑀯𑀺𑀬 𑀩𑀳𑀼𑀢𑀭𑀸. 𑀇𑀫𑀲𑁆𑀫𑀺𑀜𑁆𑀘 𑀲𑀼𑀢𑁆𑀢𑁂 𑀤𑁂𑀯𑀸𑀧𑀺 𑀫𑀦𑀼𑀲𑁆𑀲𑁂𑀳𑁂𑀯 𑀲𑀗𑁆𑀕𑀳𑀺𑀢𑀸. 𑀢𑀲𑁆𑀫𑀸 𑀬𑀣𑀸 𑀫𑀦𑀼𑀲𑁆𑀲𑁂𑀲𑀼 𑀚𑀸𑀬𑀦𑁆𑀢𑀸 𑀅𑀧𑁆𑀧𑀓𑀸, 𑀏𑀯𑀁 𑀤𑁂𑀯𑁂𑀲𑀼𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀢𑀺𑀬𑀁.

𑁩. 𑀓𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁫. 𑀢𑀢𑀺𑀬𑁂 𑀲𑀼𑀧𑁆𑀧𑀥𑀁𑀲𑀺𑀬𑀸𑀦𑀻𑀢𑀺 𑀲𑀼𑀯𑀺𑀳𑁂𑀞𑀺𑀬𑀸𑀦𑀺. 𑀓𑀼𑀫𑁆𑀪𑀢𑁆𑀣𑁂𑀦𑀓𑁂𑀳𑀻𑀢𑀺 𑀬𑁂 𑀧𑀭𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑀻𑀧𑀸𑀮𑁄𑀓𑁂𑀦 𑀑𑀮𑁄𑀓𑁂𑀢𑁆𑀯𑀸 𑀧𑀭𑀪𑀡𑁆𑀟𑀁 𑀳𑀭𑀺𑀢𑀼𑀓𑀸𑀫𑀸 𑀖𑀝𑁂 𑀤𑀻𑀧𑀁 𑀓𑀢𑁆𑀯𑀸 𑀧𑀯𑀺𑀲𑀦𑁆𑀢𑀺, 𑀢𑁂 𑀓𑀼𑀫𑁆𑀪𑀢𑁆𑀣𑁂𑀦𑀓𑀸 𑀦𑀸𑀫, 𑀢𑁂𑀳𑀺 𑀓𑀼𑀫𑁆𑀪𑀢𑁆𑀣𑁂𑀦𑀓𑁂𑀳𑀺. 𑀲𑀼𑀧𑁆𑀧𑀥𑀁𑀲𑀺𑀬𑁄 𑀳𑁄𑀢𑀺 𑀅𑀫𑀦𑀼𑀲𑁆𑀲𑁂𑀳𑀻𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀭𑀳𑀺𑀢𑀁 𑀧𑀁𑀲𑀼𑀧𑀺𑀲𑀸𑀘𑀓𑀸 𑀯𑀺𑀥𑀁𑀲𑀬𑀦𑁆𑀢𑀺, 𑀧𑀕𑁂𑀯 𑀉𑀴𑀸𑀭𑀸 𑀅𑀫𑀦𑀼𑀲𑁆𑀲𑀸. 𑀪𑀸𑀯𑀺𑀢𑀸𑀢𑀺 𑀯𑀟𑁆𑀠𑀺𑀢𑀸. 𑀩𑀳𑀼𑀮𑀻𑀓𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸. 𑀬𑀸𑀦𑀻𑀓𑀢𑀸𑀢𑀺 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸. 𑀯𑀢𑁆𑀣𑀼𑀓𑀢𑀸𑀢𑀺 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀼 𑀯𑀺𑀬 𑀓𑀢𑀸. 𑀅𑀦𑀼𑀝𑁆𑀞𑀺𑀢𑀸𑀢𑀺 𑀅𑀥𑀺𑀝𑁆𑀞𑀺𑀢𑀸. 𑀧𑀭𑀺𑀘𑀺𑀢𑀸𑀢𑀺 𑀲𑀫𑀦𑁆𑀢𑀢𑁄 𑀘𑀺𑀢𑀸 𑀲𑀼𑀯𑀟𑁆𑀠𑀺𑀢𑀸. 𑀲𑀼𑀲𑀫𑀸𑀭𑀤𑁆𑀥𑀸𑀢𑀺 𑀘𑀺𑀢𑁆𑀢𑁂𑀦 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸. 𑀢𑀢𑀺𑀬𑀁.

𑁪. 𑀑𑀓𑁆𑀔𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁬. 𑀘𑀢𑀼𑀢𑁆𑀣𑁂 𑀑𑀓𑁆𑀔𑀸𑀲𑀢𑀦𑁆𑀢𑀺 𑀫𑀳𑀸𑀫𑀼𑀔𑀉𑀓𑁆𑀔𑀮𑀻𑀦𑀁 𑀲𑀢𑀁. 𑀤𑀸𑀦𑀁 𑀤𑀤𑁂𑀬𑁆𑀬𑀸𑀢𑀺 𑀧𑀡𑀻𑀢𑀪𑁄𑀚𑀦𑀪𑀭𑀺𑀢𑀸𑀦𑀁 𑀫𑀳𑀸𑀉𑀓𑁆𑀔𑀮𑀻𑀦𑀁 𑀲𑀢𑀁 𑀤𑀸𑀦𑀁 𑀤𑀤𑁂𑀬𑁆𑀬. ‘‘𑀉𑀓𑁆𑀓𑀸𑀲𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀤𑀡𑁆𑀟𑀤𑀻𑀧𑀺𑀓𑀸𑀲𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀸𑀬 𑀧𑀦 𑀤𑀻𑀧𑀺𑀓𑀸𑀬 𑀬𑀢𑁆𑀢𑀓𑁂 𑀞𑀸𑀦𑁂 𑀆𑀮𑁄𑀓𑁄 𑀳𑁄𑀢𑀺, 𑀢𑀢𑁄 𑀲𑀢𑀕𑀼𑀡𑀁 𑀞𑀸𑀦𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀽𑀭𑁂𑀢𑁆𑀯𑀸 𑀤𑀸𑀦𑀁 𑀤𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀕𑀤𑁆𑀤𑀼𑀳𑀦𑀫𑀢𑁆𑀢𑀦𑁆𑀢𑀺 𑀕𑁄𑀤𑀼𑀳𑀦𑀫𑀢𑁆𑀢𑀁, 𑀕𑀸𑀯𑀺𑀬𑀸 𑀏𑀓𑀯𑀸𑀭𑀁 𑀅𑀕𑁆𑀕𑀣𑀦𑀸𑀓𑀟𑁆𑀠𑀦𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀕𑀦𑁆𑀥𑀊𑀳𑀦𑀫𑀢𑁆𑀢𑀁 𑀯𑀸, 𑀤𑁆𑀯𑀻𑀳𑀺 𑀅𑀗𑁆𑀕𑀼𑀮𑀻𑀳𑀺 𑀕𑀦𑁆𑀥𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀏𑀓𑀯𑀸𑀭𑀁 𑀖𑀸𑀬𑀦𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀓𑀫𑁆𑀧𑀺 𑀳𑀺 𑀓𑀸𑀮𑀁 𑀬𑁄 𑀧𑀦 𑀕𑀩𑁆𑀪𑀧𑀭𑀺𑀯𑁂𑀡𑀯𑀺𑀳𑀸𑀭𑀽𑀧𑀘𑀸𑀭 𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀘𑀓𑁆𑀓𑀯𑀸𑀴𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀯𑀸 𑀲𑀩𑁆𑀩𑀲𑀢𑁆𑀢𑁂𑀲𑀼 𑀳𑀺𑀢𑀨𑀭𑀡𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀇𑀤𑀁 𑀢𑀢𑁄 𑀏𑀓𑀤𑀺𑀯𑀲𑀁 𑀢𑀺𑀓𑁆𑀔𑀢𑁆𑀢𑀼𑀁 𑀤𑀺𑀦𑁆𑀦𑀤𑀸𑀦𑀢𑁄 𑀫𑀳𑀧𑁆𑀨𑀮𑀢𑀭𑀁. 𑀘𑀢𑀼𑀢𑁆𑀣𑀁.

𑁫. 𑀲𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁭. 𑀧𑀜𑁆𑀘𑀫𑁂 𑀧𑀝𑀺𑀮𑁂𑀡𑀺𑀲𑁆𑀲𑀸𑀫𑀻𑀢𑀺𑀆𑀤𑀻𑀲𑀼 𑀅𑀕𑁆𑀕𑁂 𑀧𑀳𑀭𑀺𑀢𑁆𑀯𑀸 𑀓𑀧𑁆𑀧𑀸𑀲𑀯𑀝𑁆𑀝𑀺𑀁 𑀯𑀺𑀬 𑀦𑀸𑀫𑁂𑀦𑁆𑀢𑁄 𑀦𑀺𑀬𑁆𑀬𑀸𑀲𑀯𑀝𑁆𑀝𑀺𑀁 𑀯𑀺𑀬 𑀘 𑀏𑀓𑀢𑁄 𑀓𑀢𑁆𑀯𑀸 𑀅𑀮𑁆𑀮𑀺𑀬𑀸𑀧𑁂𑀦𑁆𑀢𑁄 𑀧𑀝𑀺𑀮𑁂𑀡𑁂𑀢𑀺 𑀦𑀸𑀫. 𑀫𑀚𑁆𑀛𑁂 𑀧𑀳𑀭𑀺𑀢𑁆𑀯𑀸 𑀦𑀸𑀫𑁂𑀢𑁆𑀯𑀸 𑀥𑀸𑀭𑀸𑀬 𑀯𑀸 𑀧𑀳𑀭𑀺𑀢𑁆𑀯𑀸 𑀤𑁆𑀯𑁂𑀧𑀺 𑀥𑀸𑀭𑀸 𑀏𑀓𑀢𑁄 𑀅𑀮𑁆𑀮𑀺𑀬𑀸𑀧𑁂𑀦𑁆𑀢𑁄 𑀧𑀝𑀺𑀓𑁄𑀝𑁆𑀝𑁂𑀢𑀺 𑀦𑀸𑀫. 𑀓𑀧𑁆𑀧𑀸𑀲𑀯𑀝𑁆𑀝𑀦𑀓𑀭𑀡𑀻𑀬𑀁 𑀯𑀺𑀬 𑀧𑀯𑀢𑁆𑀢𑁂𑀦𑁆𑀢𑁄 𑀘𑀺𑀭𑀓𑀸𑀮𑀁 𑀲𑀁𑀯𑁂𑀮𑁆𑀮𑀺𑀢𑀓𑀺𑀮𑀜𑁆𑀚𑀁 𑀧𑀲𑀸𑀭𑁂𑀢𑁆𑀯𑀸 𑀧𑀼𑀦 𑀲𑀁𑀯𑁂𑀮𑁆𑀮𑁂𑀦𑁆𑀢𑁄 𑀯𑀺𑀬 𑀘 𑀧𑀝𑀺𑀯𑀝𑁆𑀝𑁂𑀢𑀺 𑀦𑀸𑀫. 𑀧𑀜𑁆𑀘𑀫𑀁.

𑁬. 𑀥𑀦𑀼𑀕𑁆𑀕𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁮. 𑀙𑀝𑁆𑀞𑁂 𑀤𑀴𑁆𑀳𑀥𑀫𑁆𑀫𑀸 𑀥𑀦𑀼𑀕𑁆𑀕𑀳𑀸𑀢𑀺 𑀤𑀴𑁆𑀳𑀥𑀦𑀼𑀦𑁄 𑀇𑀲𑁆𑀲𑀸𑀲𑀸. 𑀤𑀴𑁆𑀳𑀥𑀦𑀼 𑀦𑀸𑀫 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀯𑀼𑀘𑁆𑀘𑀢𑀺, 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀦𑀸𑀫 𑀬𑀲𑁆𑀲 𑀆𑀭𑁄𑀧𑀺𑀢𑀲𑁆𑀲 𑀚𑀺𑀬𑀸𑀩𑀤𑁆𑀥𑁄 𑀮𑁄𑀳𑀲𑀻𑀲𑀸𑀤𑀻𑀦𑀁 𑀪𑀸𑀭𑁄 𑀤𑀡𑁆𑀟𑁂 𑀕𑀳𑁂𑀢𑁆𑀯𑀸 𑀬𑀸𑀯 𑀓𑀡𑁆𑀟𑀧𑁆𑀧𑀫𑀸𑀡𑀸 𑀉𑀓𑁆𑀔𑀺𑀢𑁆𑀢𑀲𑁆𑀲 𑀧𑀣𑀯𑀺𑀢𑁄 𑀫𑀼𑀘𑁆𑀘𑀢𑀺. 𑀲𑀼𑀲𑀺𑀓𑁆𑀔𑀺𑀢𑀸𑀢𑀺 𑀤𑀲𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺 𑀆𑀘𑀭𑀺𑀬𑀓𑀼𑀮𑁂 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑀸. 𑀓𑀢𑀳𑀢𑁆𑀣𑀸𑀢𑀺 𑀬𑁄 𑀲𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀸𑀢𑀺, 𑀲𑁄 𑀓𑀢𑀳𑀢𑁆𑀣𑁄 𑀦 𑀳𑁄𑀢𑀺, 𑀇𑀫𑁂 𑀧𑀦 𑀓𑀢𑀳𑀢𑁆𑀣𑀸 𑀘𑀺𑀡𑁆𑀡𑀯𑀲𑀻𑀪𑀸𑀯𑀸. 𑀓𑀢𑀽𑀧𑀸𑀲𑀦𑀸𑀢𑀺 𑀭𑀸𑀚𑀓𑀼𑀮𑀸𑀤𑀻𑀲𑀼 𑀤𑀲𑁆𑀲𑀺𑀢𑀲𑀺𑀧𑁆𑀧𑀸.

𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀚𑀯𑁄𑀢𑀺 𑀏𑀯𑀭𑀽𑀧𑁄 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀦𑀸𑀫 𑀦 𑀪𑀽𑀢𑀧𑀼𑀩𑁆𑀩𑁄, 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀧𑀦 𑀚𑀯𑀦𑀳𑀁𑀲𑀓𑀸𑀮𑁄 𑀦𑀸𑀫 𑀆𑀲𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀘𑀢𑁆𑀢𑀸𑀭𑀺 𑀓𑀡𑁆𑀟𑀸𑀦𑀺 𑀆𑀳𑀭𑀺. 𑀢𑀤𑀸 𑀓𑀺𑀭𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀭𑁄 ‘‘𑀫𑀬𑀁, 𑀪𑀸𑀢𑀺𑀓, 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀲𑁆𑀲𑀸𑀫𑀸’’𑀢𑀺 𑀆𑀭𑁄𑀘𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄 𑀆𑀳 𑁋 ‘‘𑀲𑀽𑀭𑀺𑀬𑁄 𑀲𑀻𑀖𑀚𑀯𑁄, 𑀦 𑀲𑀓𑁆𑀔𑀺𑀲𑁆𑀲𑀣 𑀢𑀼𑀫𑁆𑀳𑁂 𑀢𑁂𑀦 𑀲𑀤𑁆𑀥𑀺𑀁 𑀚𑀯𑀺𑀢𑀼’’𑀦𑁆𑀢𑀺. 𑀢𑁂 𑀤𑀼𑀢𑀺𑀬𑀁 𑀢𑀢𑀺𑀬𑀫𑁆𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀏𑀓𑀤𑀺𑀯𑀲𑀁 ‘‘𑀕𑀘𑁆𑀙𑀸𑀫𑀸’’𑀢𑀺 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀁 𑀆𑀭𑀼𑀳𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 ‘‘𑀓𑀳𑀁 𑀫𑁂 𑀪𑀸𑀢𑀭𑁄’’𑀢𑀺? 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀺𑀢𑀼𑀁 𑀕𑀢𑀸’’𑀢𑀺 𑀯𑀼𑀢𑁆𑀢𑁂, ‘‘𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺 𑀢𑀧𑀲𑁆𑀲𑀺𑀦𑁄’’𑀢𑀺 𑀢𑁂 𑀅𑀦𑀼𑀓𑀫𑁆𑀧𑀫𑀸𑀦𑁄 𑀲𑀬𑀫𑁆𑀧𑀺 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺. 𑀅𑀣 𑀲𑀽𑀭𑀺𑀬𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀤𑁆𑀯𑁂𑀧𑀺 𑀪𑀸𑀢𑀭𑁄 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁𑀬𑁂𑀯 𑀆𑀓𑀸𑀲𑀁 𑀧𑀓𑁆𑀔𑀦𑁆𑀢𑀸, 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀧𑀓𑁆𑀔𑀦𑁆𑀢𑁄. 𑀢𑁂𑀲𑀼 𑀏𑀓𑀲𑁆𑀲 𑀅𑀧𑀢𑁆𑀢𑁂𑀬𑁂𑀯 𑀅𑀦𑁆𑀢𑀭𑀪𑀢𑁆𑀢𑀲𑀫𑀬𑁂 𑀧𑀓𑁆𑀔𑀦𑁆𑀢𑀭𑁂𑀲𑀼 𑀅𑀕𑁆𑀕𑀺 𑀉𑀝𑁆𑀞𑀳𑀺, 𑀲𑁄 𑀪𑀸𑀢𑀭𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀦 𑀲𑀓𑁆𑀓𑁄𑀫𑀻’’𑀢𑀺 𑀆𑀳. 𑀢𑀫𑁂𑀦𑀁 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀸 𑀪𑀸𑀬𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀓𑁆𑀔𑀧𑀜𑁆𑀚𑀭𑁂𑀦 𑀧𑀮𑀺𑀯𑁂𑀞𑁂𑀢𑁆𑀯𑀸 𑀤𑀭𑀣𑀁 𑀯𑀺𑀦𑁄𑀤𑁂𑀢𑁆𑀯𑀸 ‘‘𑀕𑀘𑁆𑀙𑀸’’𑀢𑀺 𑀧𑁂𑀲𑁂𑀲𑀺.

𑀤𑀼𑀢𑀺𑀬𑁄 𑀬𑀸𑀯 𑀅𑀦𑁆𑀢𑀭𑀪𑀢𑁆𑀢𑀸 𑀚𑀯𑀺𑀢𑁆𑀯𑀸 𑀧𑀓𑁆𑀔𑀦𑁆𑀢𑀭𑁂𑀲𑀼 𑀅𑀕𑁆𑀕𑀺𑀫𑁆𑀳𑀺 𑀉𑀝𑁆𑀞𑀳𑀺𑀢𑁂 𑀢𑀣𑁂𑀯𑀸𑀳. 𑀢𑀫𑁆𑀧𑀺 𑀲𑁄 𑀢𑀣𑁂𑀯 𑀓𑀢𑁆𑀯𑀸 ‘‘𑀕𑀘𑁆𑀙𑀸’’𑀢𑀺 𑀧𑁂𑀲𑁂𑀲𑀺. 𑀲𑀬𑀁 𑀧𑀦 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸 𑀚𑀯𑀺𑀢𑁆𑀯𑀸, ‘‘𑀏𑀢𑁂 𑀩𑀸𑀮𑀸𑀢𑀺 𑀫𑀬𑀸𑀧𑀺 𑀩𑀸𑀮𑁂𑀦 𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑁋 ‘‘𑀅𑀤𑀺𑀝𑁆𑀞𑀲𑀳𑀸𑀬𑀓𑀁 𑀩𑀸𑀭𑀸𑀡𑀲𑀺𑀭𑀸𑀚𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀩𑀸𑀭𑀸𑀡𑀲𑀺𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀦𑀕𑀭𑀫𑀢𑁆𑀣𑀓𑁂 𑀧𑀭𑀺𑀩𑁆𑀪𑀫𑀦𑁆𑀢𑁂 𑀤𑁆𑀯𑀸𑀤𑀲𑀬𑁄𑀚𑀦𑀁 𑀦𑀕𑀭𑀁 𑀧𑀢𑁆𑀢𑀓𑀝𑀸𑀳𑁂𑀦 𑀑𑀢𑁆𑀣𑀝𑀧𑀢𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀅𑀣 𑀧𑀭𑀺𑀩𑁆𑀪𑀫𑀦𑁆𑀢𑀲𑁆𑀲 𑀧𑀭𑀺𑀩𑁆𑀪𑀫𑀦𑁆𑀢𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀙𑀺𑀤𑁆𑀤𑀸𑀦𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀲𑀬𑀫𑁆𑀧𑀺 𑀅𑀦𑁂𑀓𑀳𑀁𑀲𑀲𑀳𑀲𑁆𑀲𑀲𑀤𑀺𑀲𑁄 𑀧𑀜𑁆𑀜𑀸𑀬𑀺. 𑀲𑁄 𑀯𑁂𑀕𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀭𑀸𑀚𑀕𑁂𑀳𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. 𑀭𑀸𑀚𑀸 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀆𑀕𑀢𑁄 𑀓𑀺𑀭 𑀫𑁂 𑀧𑀺𑀬𑀲𑀳𑀸𑀬𑁄 𑀚𑀯𑀦𑀳𑀁𑀲𑁄’’𑀢𑀺 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀭𑀢𑀦𑀧𑀻𑀞𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀭𑀢𑀦𑀧𑀻𑀞𑁂 𑀦𑀺𑀲𑀻𑀤𑀺.

𑀅𑀣𑀲𑁆𑀲 𑀭𑀸𑀚𑀸 𑀲𑀳𑀲𑁆𑀲𑀧𑀸𑀓𑁂𑀦 𑀢𑁂𑀮𑁂𑀦 𑀧𑀓𑁆𑀔𑀦𑁆𑀢𑀭𑀸𑀦𑀺 𑀫𑀓𑁆𑀔𑁂𑀢𑁆𑀯𑀸, 𑀫𑀥𑀼𑀮𑀸𑀚𑁂 𑀘𑁂𑀯 𑀫𑀥𑀼𑀭𑀧𑀸𑀦𑀓𑀜𑁆𑀘 𑀅𑀤𑀸𑀲𑀺. 𑀢𑀢𑁄 𑀦𑀁 𑀓𑀢𑀧𑀭𑀺𑀪𑁄𑀕𑀁 ‘‘𑀲𑀫𑁆𑀫, 𑀓𑀳𑀁 𑀅𑀕𑀫𑀸𑀲𑀻’’𑀢𑀺? 𑀧𑀼𑀘𑁆𑀙𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀅𑀣𑀸𑀳𑀁, 𑀫𑀳𑀸𑀭𑀸𑀚, 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸 𑀚𑀯𑀺𑀢𑁆𑀯𑀸 𑁋 ‘𑀦𑀢𑁆𑀣𑀺 𑀚𑀯𑀺𑀢𑁂𑀦 𑀅𑀢𑁆𑀣𑁄’𑀢𑀺 𑀦𑀺𑀯𑀢𑁆𑀢𑁄’’𑀢𑀺 𑀆𑀘𑀺𑀓𑁆𑀔𑀺. 𑀅𑀣 𑀭𑀸𑀚𑀸 𑀆𑀳 𑁋 ‘‘𑀅𑀳𑀁, 𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀲𑀽𑀭𑀺𑀬𑁂𑀦 𑀲𑀤𑁆𑀥𑀺𑀁 𑀚𑀯𑀦𑀯𑁂𑀕𑀁 𑀧𑀲𑁆𑀲𑀺𑀢𑀼𑀓𑀸𑀫𑁄’’𑀢𑀺. 𑀤𑀼𑀓𑁆𑀓𑀭𑀁, 𑀫𑀳𑀸𑀭𑀸𑀚, 𑀦 𑀲𑀓𑁆𑀓𑀸 𑀢𑀬𑀸 𑀧𑀲𑁆𑀲𑀺𑀢𑀼𑀦𑁆𑀢𑀺. 𑀢𑁂𑀦 𑀳𑀺, 𑀲𑀸𑀫𑀺, 𑀲𑀭𑀺𑀓𑁆𑀔𑀓𑀫𑀢𑁆𑀢𑀫𑁆𑀧𑀺 𑀤𑀲𑁆𑀲𑁂𑀳𑀻𑀢𑀺. 𑀆𑀫, 𑀫𑀳𑀸𑀭𑀸𑀚, 𑀥𑀦𑀼𑀕𑁆𑀕𑀳𑁂 𑀲𑀦𑁆𑀦𑀺𑀧𑀸𑀢𑁂𑀳𑀻𑀢𑀺. 𑀭𑀸𑀚𑀸 𑀲𑀦𑁆𑀦𑀺𑀧𑀸𑀢𑁂𑀲𑀺. 𑀳𑀁𑀲𑁄 𑀢𑀢𑁄 𑀘𑀢𑁆𑀢𑀸𑀭𑁄 𑀕𑀳𑁂𑀢𑁆𑀯𑀸 𑀦𑀕𑀭𑀫𑀚𑁆𑀛𑁂 𑀢𑁄𑀭𑀡𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀻𑀯𑀸𑀬 𑀖𑀡𑁆𑀟𑀁 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀢𑁄𑀭𑀡𑀲𑁆𑀲 𑀉𑀧𑀭𑀺 𑀦𑀺𑀲𑀻𑀤𑀺𑀢𑁆𑀯𑀸 𑁋 ‘‘𑀘𑀢𑁆𑀢𑀸𑀭𑁄 𑀚𑀦𑀸 𑀢𑁄𑀭𑀡𑀁 𑀦𑀺𑀲𑁆𑀲𑀸𑀬 𑀘𑀢𑀼𑀤𑀺𑀲𑀸𑀪𑀺𑀫𑀼𑀔𑀸 𑀏𑀓𑁂𑀓𑀁 𑀓𑀡𑁆𑀟𑀁 𑀔𑀺𑀧𑀦𑁆𑀢𑀽’’𑀢𑀺 𑀯𑀢𑁆𑀯𑀸, 𑀲𑀬𑀁 𑀧𑀞𑀫𑀓𑀡𑁆𑀟𑁂𑀦𑁂𑀯 𑀲𑀤𑁆𑀥𑀺𑀁 𑀉𑀧𑁆𑀧𑀢𑀺𑀢𑁆𑀯𑀸, 𑀢𑀁 𑀓𑀡𑁆𑀟𑀁 𑀅𑀕𑁆𑀕𑀳𑁂𑀢𑁆𑀯𑀸𑀯, 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑀁 𑀕𑀢𑀓𑀡𑁆𑀟𑀁 𑀥𑀦𑀼𑀢𑁄 𑀭𑀢𑀦𑀫𑀢𑁆𑀢𑀸𑀧𑀕𑀢𑀁 𑀕𑀡𑁆𑀳𑀺. 𑀤𑀼𑀢𑀺𑀬𑀁 𑀤𑁆𑀯𑀺𑀭𑀢𑀦𑀫𑀢𑁆𑀢𑀸𑀧𑀕𑀢𑀁, 𑀢𑀢𑀺𑀬𑀁 𑀢𑀺𑀭𑀢𑀦𑀫𑀢𑁆𑀢𑀸𑀧𑀕𑀢𑀁, 𑀘𑀢𑀼𑀢𑁆𑀣𑀁 𑀪𑀽𑀫𑀺𑀁 𑀅𑀧𑁆𑀧𑀢𑁆𑀢𑀫𑁂𑀯 𑀕𑀡𑁆𑀳𑀺. 𑀅𑀣 𑀦𑀁 𑀘𑀢𑁆𑀢𑀸𑀭𑀺 𑀓𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀢𑁄𑀭𑀡𑁂 𑀦𑀺𑀲𑀺𑀦𑁆𑀦𑀓𑀸𑀮𑁂𑀬𑁂𑀯 𑀅𑀤𑁆𑀤𑀲𑀁𑀲𑀼. 𑀲𑁄 𑀭𑀸𑀚𑀸𑀦𑀁 𑀆𑀳 𑁋 ‘‘𑀧𑀲𑁆𑀲, 𑀫𑀳𑀸𑀭𑀸𑀚, 𑀏𑀯𑀁𑀲𑀻𑀖𑁄 𑀅𑀫𑁆𑀳𑀸𑀓𑀁 𑀚𑀯𑁄’’𑀢𑀺. 𑀏𑀯𑀁 𑀩𑁄𑀥𑀺𑀲𑀢𑁆𑀢𑁂𑀦𑁂𑀯 𑀚𑀯𑀦𑀳𑀁𑀲𑀓𑀸𑀮𑁂 𑀢𑀸𑀦𑀺 𑀓𑀡𑁆𑀟𑀸𑀦𑀺 𑀆𑀳𑀭𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀼𑀭𑀢𑁄 𑀥𑀸𑀯𑀦𑁆𑀢𑀻𑀢𑀺 𑀅𑀕𑁆𑀕𑀢𑁄 𑀚𑀯𑀦𑁆𑀢𑀺. 𑀦 𑀧𑀦𑁂𑀢𑀸 𑀲𑀩𑁆𑀩𑀓𑀸𑀮𑀁 𑀧𑀼𑀭𑀢𑁄𑀯 𑀳𑁄𑀦𑁆𑀢𑀺, 𑀓𑀤𑀸𑀘𑀺 𑀧𑀼𑀭𑀢𑁄, 𑀓𑀤𑀸𑀘𑀺 𑀧𑀘𑁆𑀙𑀢𑁄 𑀳𑁄𑀦𑁆𑀢𑀺. 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑁂𑀲𑀼 𑀳𑀺 𑀉𑀬𑁆𑀬𑀸𑀦𑀸𑀦𑀺𑀧𑀺 𑀳𑁄𑀦𑁆𑀢𑀺 𑀧𑁄𑀓𑁆𑀔𑀭𑀡𑀺𑀬𑁄𑀧𑀺, 𑀢𑀸 𑀢𑀢𑁆𑀣 𑀦𑀳𑀸𑀬𑀦𑁆𑀢𑀺, 𑀉𑀤𑀓𑀓𑀻𑀴𑀁 𑀓𑀻𑀴𑀫𑀸𑀦𑀸 𑀧𑀘𑁆𑀙𑀢𑁄𑀧𑀺 𑀳𑁄𑀦𑁆𑀢𑀺, 𑀯𑁂𑀕𑁂𑀦 𑀧𑀦 𑀕𑀦𑁆𑀢𑁆𑀯𑀸 𑀧𑀼𑀦 𑀧𑀼𑀭𑀢𑁄𑀯 𑀥𑀸𑀯𑀦𑁆𑀢𑀺. 𑀆𑀬𑀼𑀲𑀗𑁆𑀔𑀸𑀭𑀸𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀢𑀢𑁄 𑀲𑀻𑀖𑀢𑀭𑀁 𑀔𑀻𑀬𑀢𑀺. 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀦 𑀪𑁂𑀤𑁄 𑀦 𑀲𑀓𑁆𑀓𑀸 𑀧𑀜𑁆𑀜𑀸𑀧𑁂𑀢𑀼𑀁. 𑀙𑀝𑁆𑀞𑀁.

𑁭. 𑀆𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁯. 𑀲𑀢𑁆𑀢𑀫𑁂 𑀤𑀲𑀸𑀭𑀳𑀸𑀦𑀦𑁆𑀢𑀺 𑀏𑀯𑀁𑀦𑀸𑀫𑀓𑀸𑀦𑀁 𑀔𑀢𑁆𑀢𑀺𑀬𑀸𑀦𑀁. 𑀢𑁂 𑀓𑀺𑀭 𑀲𑀢𑀢𑁄 𑀤𑀲𑀪𑀸𑀕𑀁 𑀕𑀡𑁆𑀳𑀺𑀁𑀲𑀼, 𑀢𑀲𑁆𑀫𑀸 ‘‘𑀤𑀲𑀸𑀭𑀳𑀸’’𑀢𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀆𑀦𑀓𑁄𑀢𑀺 𑀏𑀯𑀁𑀮𑀤𑁆𑀥𑀦𑀸𑀫𑁄 𑀫𑀼𑀤𑀺𑀗𑁆𑀕𑁄. 𑀳𑀺𑀫𑀯𑀦𑁆𑀢𑁂 𑀓𑀺𑀭 𑀫𑀳𑀸𑀓𑀼𑀴𑀻𑀭𑀤𑀳𑁄 𑀅𑀳𑁄𑀲𑀺. 𑀢𑀢𑁆𑀣 𑀫𑀳𑀦𑁆𑀢𑁄 𑀓𑀼𑀴𑀻𑀭𑁄 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑀁 𑀳𑀢𑁆𑀣𑀺𑀁 𑀔𑀸𑀤𑀢𑀺. 𑀅𑀣 𑀳𑀢𑁆𑀣𑀻 𑀉𑀧𑀤𑁆𑀤𑀼𑀢𑀸 𑀏𑀓𑀁 𑀓𑀭𑁂𑀡𑀼𑀁 𑀲𑀓𑁆𑀓𑀭𑀺𑀁𑀲𑀼 ‘‘𑀇𑀫𑀺𑀲𑁆𑀲𑀸 𑀧𑀼𑀢𑁆𑀢𑀁 𑀦𑀺𑀲𑁆𑀲𑀸𑀬 𑀅𑀫𑁆𑀳𑀸𑀓𑀁 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀸𑀧𑀺 𑀫𑀳𑁂𑀲𑀓𑁆𑀔𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑁂 𑀢𑀫𑁆𑀧𑀺 𑀲𑀓𑁆𑀓𑀭𑀺𑀁𑀲𑀼. 𑀲𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀫𑀸𑀢𑀭𑀁 𑀧𑀼𑀘𑁆𑀙𑀺, ‘‘𑀓𑀲𑁆𑀫𑀸 𑀫𑀁 𑀏𑀢𑁂 𑀲𑀓𑁆𑀓𑀭𑁄𑀦𑁆𑀢𑀻’’𑀢𑀺? 𑀲𑀸 𑀢𑀁 𑀧𑀯𑀢𑁆𑀢𑀺𑀫𑀸𑀘𑀺𑀓𑁆𑀔𑀺. 𑀲𑁄 ‘‘𑀓𑀺𑀁 𑀫𑀬𑁆𑀳𑀁 𑀓𑀼𑀴𑀻𑀭𑁄 𑀧𑀳𑁄𑀢𑀺? 𑀏𑀣 𑀕𑀘𑁆𑀙𑀸𑀫𑀸’’𑀢𑀺 𑀫𑀳𑀸𑀳𑀢𑁆𑀣𑀺𑀧𑀭𑀺𑀯𑀸𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀞𑀫𑀫𑁂𑀯 𑀑𑀢𑀭𑀺. 𑀓𑀼𑀴𑀻𑀭𑁄 𑀉𑀤𑀓𑀲𑀤𑁆𑀤𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀢𑀁 𑀅𑀕𑁆𑀕𑀳𑁂𑀲𑀺. 𑀫𑀳𑀦𑁆𑀢𑁄 𑀓𑀼𑀴𑀻𑀭𑀲𑁆𑀲 𑀅𑀴𑁄, 𑀲𑁄 𑀢𑀁 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀘𑀸𑀮𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀼𑀔𑁂 𑀲𑁄𑀡𑁆𑀟𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀭𑀯𑀺. 𑀳𑀢𑁆𑀣𑀺𑀦𑁄 ‘‘𑀬𑀁𑀦𑀺𑀲𑁆𑀲𑀸𑀬 𑀫𑀬𑀁 ‘𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’𑀢𑀺 𑀅𑀫𑀜𑁆𑀜𑀺𑀫𑁆𑀳𑀸, 𑀲𑁄 𑀧𑀞𑀫𑀢𑀭𑀁 𑀕𑀳𑀺𑀢𑁄’’𑀢𑀺 𑀢𑀢𑁄 𑀢𑀢𑁄 𑀧𑀮𑀸𑀬𑀺𑀁𑀲𑀼.

𑀅𑀣𑀲𑁆𑀲 𑀫𑀸𑀢𑀸 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 ‘‘𑀫𑀬𑀁 𑀣𑀮𑀦𑀸𑀕𑀸, 𑀢𑀼𑀫𑁆𑀳𑁂 𑀉𑀤𑀓𑀦𑀸𑀕𑀸 𑀦𑀸𑀫, 𑀦𑀸𑀕𑁂𑀳𑀺 𑀦𑀸𑀕𑁄 𑀦 𑀯𑀺𑀳𑁂𑀞𑁂𑀢𑀩𑁆𑀩𑁄’’𑀢𑀺 𑀓𑀼𑀴𑀻𑀭𑀁 𑀧𑀺𑀬𑀯𑀘𑀦𑁂𑀦 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑁂 𑀓𑀼𑀴𑀻𑀭𑀸 𑀲𑀫𑀼𑀤𑁆𑀤𑀲𑁆𑀫𑀺𑀁, 𑀕𑀗𑁆𑀕𑀸𑀬 𑀬𑀫𑀼𑀦𑀸𑀬 𑀘;

𑀢𑁂𑀲𑀁 𑀢𑁆𑀯𑀁 𑀯𑀸𑀭𑀺𑀚𑁄 𑀲𑁂𑀝𑁆𑀞𑁄, 𑀫𑀼𑀜𑁆𑀘 𑀭𑁄𑀤𑀦𑁆𑀢𑀺𑀬𑀸 𑀧𑀚’’𑀦𑁆𑀢𑀺.

𑀫𑀸𑀢𑀼𑀕𑀸𑀫𑀲𑀤𑁆𑀤𑁄 𑀦𑀸𑀫 𑀧𑀼𑀭𑀺𑀲𑁂 𑀔𑁄𑀪𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀲𑁄 𑀕𑀳𑀡𑀁 𑀲𑀺𑀣𑀺𑀮𑀫𑀓𑀸𑀲𑀺. 𑀳𑀢𑁆𑀣𑀺𑀧𑁄𑀢𑁄 𑀯𑁂𑀕𑁂𑀦 𑀉𑀪𑁄 𑀧𑀸𑀤𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀧𑀺𑀝𑁆𑀞𑀺𑀬𑀁 𑀅𑀓𑁆𑀓𑀫𑀺. 𑀲𑀳 𑀅𑀓𑁆𑀓𑀫𑀦𑀸 𑀧𑀺𑀝𑁆𑀞𑀺 𑀫𑀢𑁆𑀢𑀺𑀓𑀪𑀸𑀚𑀦𑀁 𑀯𑀺𑀬 𑀪𑀺𑀚𑁆𑀚𑀺. 𑀅𑀣 𑀦𑀁 𑀤𑀦𑁆𑀢𑁂𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀣𑀮𑁂 𑀙𑀟𑁆𑀟𑁂𑀢𑁆𑀯𑀸 𑀢𑀼𑀝𑁆𑀞𑀭𑀯𑀁 𑀭𑀯𑀺. 𑀅𑀣 𑀦𑀁 𑀳𑀢𑁆𑀣𑀻 𑀇𑀢𑁄 𑀘𑀺𑀢𑁄 𑀘 𑀆𑀕𑀦𑁆𑀢𑁆𑀯𑀸 𑀫𑀤𑁆𑀤𑀺𑀁𑀲𑀼. 𑀢𑀲𑁆𑀲 𑀏𑀓𑁄 𑀅𑀴𑁄 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀧𑀢𑀺, 𑀢𑀁 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀕𑀳𑁂𑀢𑁆𑀯𑀸 𑀕𑀢𑁄.

𑀇𑀢𑀭𑁄 𑀧𑀦 𑀅𑀴𑁄 𑀯𑀸𑀢𑀸𑀢𑀧𑁂𑀦 𑀲𑀼𑀓𑁆𑀔𑀺𑀢𑁆𑀯𑀸 𑀧𑀓𑁆𑀓𑀮𑀸𑀔𑀸𑀭𑀲𑀯𑀡𑁆𑀡𑁄 𑀅𑀳𑁄𑀲𑀺, 𑀲𑁄 𑀤𑁂𑀯𑁂 𑀯𑀼𑀝𑁆𑀞𑁂 𑀉𑀤𑀓𑁄𑀖𑁂𑀦 𑀯𑀼𑀬𑁆𑀳𑀦𑁆𑀢𑁄 𑀤𑀲𑀪𑀸𑀢𑀺𑀓𑀸𑀦𑀁 𑀭𑀸𑀚𑀽𑀦𑀁 𑀉𑀧𑀭𑀺𑀲𑁄𑀢𑁂 𑀚𑀸𑀮𑀁 𑀧𑀲𑀸𑀭𑀸𑀧𑁂𑀢𑁆𑀯𑀸 𑀕𑀗𑁆𑀕𑀸𑀬 𑀓𑀻𑀴𑀦𑁆𑀢𑀸𑀦𑀁 𑀆𑀕𑀦𑁆𑀢𑁆𑀯𑀸 𑀚𑀸𑀮𑁂 𑀮𑀕𑁆𑀕𑀺. 𑀢𑁂 𑀓𑀻𑀴𑀸𑀧𑀭𑀺𑀬𑁄𑀲𑀸𑀦𑁂 𑀚𑀸𑀮𑀫𑁆𑀳𑀺 𑀉𑀓𑁆𑀔𑀺𑀧𑀺𑀬𑀫𑀸𑀦𑁂 𑀢𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 ‘‘𑀓𑀺𑀁 𑀏𑀢’’𑀦𑁆𑀢𑀺? ‘‘𑀓𑀼𑀴𑀻𑀭𑀅𑀴𑁄 𑀲𑀸𑀫𑀻’’𑀢𑀺. ‘‘𑀦 𑀲𑀓𑁆𑀓𑀸 𑀏𑀲 𑀆𑀪𑀭𑀡𑀢𑁆𑀣𑀸𑀬 𑀉𑀧𑀦𑁂𑀢𑀼𑀁, 𑀧𑀭𑀺𑀬𑁄𑀦𑀦𑁆𑀥𑀸𑀧𑁂𑀢𑁆𑀯𑀸 𑀪𑁂𑀭𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺? 𑀧𑀭𑀺𑀬𑁄𑀦𑀦𑁆𑀥𑀸𑀧𑁂𑀢𑁆𑀯𑀸 𑀧𑀳𑀭𑀺𑀁𑀲𑀼. 𑀲𑀤𑁆𑀤𑁄 𑀤𑁆𑀯𑀸𑀤𑀲𑀬𑁄𑀚𑀦𑀁 𑀦𑀕𑀭𑀁 𑀅𑀯𑀢𑁆𑀣𑀭𑀺. 𑀢𑀢𑁄 𑀆𑀳𑀁𑀲𑀼 𑁋 ‘‘𑀦 𑀲𑀓𑁆𑀓𑀸 𑀇𑀤𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀯𑀸𑀤𑁂𑀢𑀼𑀁, 𑀙𑀡𑀤𑀺𑀯𑀲𑀢𑁆𑀣𑀸𑀬 𑀫𑀗𑁆𑀕𑀮𑀪𑁂𑀭𑀻 𑀳𑁄𑀢𑀽’’𑀢𑀺 𑀫𑀗𑁆𑀕𑀮𑀪𑁂𑀭𑀺𑀁 𑀅𑀓𑀁𑀲𑀼. 𑀢𑀲𑁆𑀫𑀺𑀁 𑀯𑀸𑀤𑀺𑀢𑁂 𑀫𑀳𑀸𑀚𑀦𑁄 𑀅𑀦𑁆𑀳𑀸𑀬𑀺𑀢𑁆𑀯𑀸 𑀅𑀧𑀺𑀴𑀦𑁆𑀥𑀺𑀢𑁆𑀯𑀸 𑀳𑀢𑁆𑀣𑀺𑀬𑀸𑀦𑀸𑀤𑀻𑀦𑀺 𑀆𑀭𑀼𑀬𑁆𑀳 𑀲𑀻𑀖𑀁 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀇𑀢𑀺 𑀫𑀳𑀸𑀚𑀦𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀯𑀺𑀬 𑀆𑀦𑁂𑀢𑀻𑀢𑀺 𑀆𑀦𑀓𑁄 𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺.

𑀅𑀜𑁆𑀜𑀁 𑀆𑀡𑀺𑀁 𑀑𑀤𑀳𑀺𑀁𑀲𑀽𑀢𑀺 𑀅𑀜𑁆𑀜𑀁 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀁 𑀆𑀡𑀺𑀁 𑀖𑀝𑀬𑀺𑀁𑀲𑀼. 𑀆𑀡𑀺𑀲𑀗𑁆𑀖𑀸𑀝𑁄𑀯 𑀅𑀯𑀲𑀺𑀲𑁆𑀲𑀻𑀢𑀺 𑀲𑀼𑀯𑀡𑁆𑀡𑀸𑀤𑀺𑀫𑀬𑀸𑀦𑀁 𑀆𑀡𑀻𑀦𑀁 𑀲𑀗𑁆𑀖𑀸𑀝𑀫𑀢𑁆𑀢𑀫𑁂𑀯 𑀅𑀯𑀲𑁂𑀲𑀁 𑀅𑀳𑁄𑀲𑀺. 𑀅𑀣𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀧𑁆𑀧𑀫𑀸𑀡𑁄 𑀲𑀤𑁆𑀤𑁄 𑀅𑀦𑁆𑀢𑁄𑀲𑀸𑀮𑀸𑀬𑀫𑁆𑀧𑀺 𑀤𑀼𑀓𑁆𑀔𑁂𑀦 𑀲𑀼𑀬𑁆𑀬𑀺𑀢𑁆𑀣.

𑀕𑀫𑁆𑀪𑀻𑀭𑀸𑀢𑀺 𑀧𑀸𑀴𑀺𑀯𑀲𑁂𑀦 𑀕𑀫𑁆𑀪𑀻𑀭𑀸 𑀲𑀮𑁆𑀮𑀲𑀼𑀢𑁆𑀢𑀲𑀤𑀺𑀲𑀸. 𑀕𑀫𑁆𑀪𑀻𑀭𑀢𑁆𑀣𑀸𑀢𑀺 𑀅𑀢𑁆𑀣𑀯𑀲𑁂𑀦 𑀕𑀫𑁆𑀪𑀻𑀭𑀸 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀲𑀤𑀺𑀲𑀸 (𑀫. 𑀦𑀺. 𑁧.𑁪𑁪𑁯 𑀆𑀤𑀬𑁄). 𑀮𑁄𑀓𑀼𑀢𑁆𑀢𑀭𑀸𑀢𑀺 𑀮𑁄𑀓𑀼𑀢𑁆𑀢𑀭𑀅𑀢𑁆𑀣𑀤𑀻𑀧𑀓𑀸. 𑀲𑀼𑀜𑁆𑀜𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀲𑀢𑁆𑀢𑀲𑀼𑀜𑁆𑀜𑀢𑀥𑀫𑁆𑀫𑀫𑀢𑁆𑀢𑀫𑁂𑀯 𑀧𑀓𑀸𑀲𑀓𑀸 𑀲𑀁𑀔𑀺𑀢𑁆𑀢𑀲𑀁𑀬𑀼𑀢𑁆𑀢𑀲𑀤𑀺𑀲𑀸. 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀦𑁆𑀢𑀺 𑀉𑀕𑁆𑀕𑀳𑁂𑀢𑀩𑁆𑀩𑁂 𑀘 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑁂 𑀘. 𑀓𑀯𑀺𑀓𑀢𑀸𑀢𑀺 𑀓𑀯𑀻𑀳𑀺 𑀓𑀢𑀸. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀘𑀺𑀢𑁆𑀢𑀓𑁆𑀔𑀭𑀸𑀢𑀺 𑀯𑀺𑀘𑀺𑀢𑁆𑀭𑀅𑀓𑁆𑀔𑀭𑀸. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀩𑀸𑀳𑀺𑀭𑀓𑀸𑀢𑀺 𑀲𑀸𑀲𑀦𑀢𑁄 𑀩𑀳𑀺𑀪𑀽𑀢𑀸. 𑀲𑀸𑀯𑀓𑀪𑀸𑀲𑀺𑀢𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀲𑀸𑀯𑀓𑁂𑀳𑀺 𑀪𑀸𑀲𑀺𑀢𑀸. 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀻𑀢𑀺 𑀅𑀓𑁆𑀔𑀭𑀘𑀺𑀢𑁆𑀢𑀢𑀸𑀬 𑀘𑁂𑀯 𑀲𑀯𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 𑀲𑀸𑀫𑀡𑁂𑀭𑀤𑀳𑀭𑀪𑀺𑀓𑁆𑀔𑀼𑀫𑀸𑀢𑀼𑀕𑀸𑀫𑀫𑀳𑀸𑀕𑀳𑀧𑀢𑀺𑀓𑀸𑀤𑀬𑁄 ‘‘𑀏𑀲 𑀥𑀫𑁆𑀫𑀓𑀣𑀺𑀓𑁄’’𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑁄𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑀣𑀸𑀕𑀢𑀪𑀸𑀲𑀺𑀢𑀸 𑀲𑀼𑀢𑁆𑀢𑀦𑁆𑀢𑀸 𑀅𑀦𑀼𑀕𑁆𑀕𑀬𑁆𑀳𑀫𑀸𑀦𑀸 𑀅𑀦𑁆𑀢𑀭𑀥𑀸𑀬𑀦𑁆𑀢𑀺, 𑀢𑀲𑁆𑀫𑀸. 𑀲𑀢𑁆𑀢𑀫𑀁.

𑁮. 𑀓𑀮𑀺𑀗𑁆𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁦. 𑀅𑀝𑁆𑀞𑀫𑁂 𑀓𑀮𑀺𑀗𑁆𑀕𑀭𑀽𑀧𑀥𑀸𑀦𑀸𑀢𑀺 𑀓𑀮𑀺𑀗𑁆𑀕𑀭𑀖𑀝𑀺𑀓𑀁 𑀲𑀻𑀲𑀽𑀧𑀥𑀸𑀦𑀜𑁆𑀘𑁂𑀯 𑀧𑀸𑀤𑀽𑀧𑀥𑀸𑀦𑀜𑁆𑀘 𑀓𑀢𑁆𑀯𑀸. 𑀅𑀧𑁆𑀧𑀫𑀢𑁆𑀢𑀸𑀢𑀺 𑀲𑀺𑀧𑁆𑀧𑀼𑀕𑁆𑀕𑀳𑀡𑁂 𑀅𑀧𑁆𑀧𑀫𑀢𑁆𑀢𑀸. 𑀆𑀢𑀸𑀧𑀺𑀦𑁄𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀢𑀸𑀧𑁂𑀦 𑀬𑀼𑀢𑁆𑀢𑀸. 𑀉𑀧𑀸𑀲𑀦𑀲𑁆𑀫𑀺𑀦𑁆𑀢𑀺 𑀲𑀺𑀧𑁆𑀧𑀸𑀦𑀁 𑀅𑀪𑀺𑀬𑁄𑀕𑁂 𑀆𑀘𑀭𑀺𑀬𑀸𑀦𑀜𑁆𑀘 𑀧𑀬𑀺𑀭𑀼𑀧𑀸𑀲𑀦𑁂. 𑀢𑁂 𑀓𑀺𑀭 𑀢𑀤𑀸 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀲𑀺𑀧𑁆𑀧𑀲𑀸𑀮𑀁 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀚𑁆𑀛𑀸𑀬𑀸𑀤𑀻𑀳𑀺 𑀅𑀪𑀺𑀬𑁄𑀕𑀁 𑀓𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼𑀧𑀸𑀦𑀸𑀬 𑀕𑀘𑁆𑀙𑀦𑁆𑀢𑀺. 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀧𑀼𑀦 𑀲𑀺𑀧𑁆𑀧𑀲𑀸𑀮𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀕𑀡𑁆𑀳𑀺𑀢𑁆𑀯𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀸 𑀧𑀸𑀢𑀭𑀸𑀲𑀸𑀬 𑀕𑀘𑁆𑀙𑀦𑁆𑀢𑀺. 𑀓𑀢𑀧𑀸𑀢𑀭𑀸𑀲𑀸 𑀲𑀫𑀸𑀦𑀸 ‘‘𑀫𑀸 𑀧𑀫𑀸𑀤𑁂𑀦 𑀘𑀺𑀭𑀁 𑀦𑀺𑀤𑁆𑀤𑁄𑀓𑁆𑀓𑀫𑀦𑀁 𑀅𑀳𑁄𑀲𑀻’’𑀢𑀺 𑀔𑀤𑀺𑀭𑀖𑀝𑀺𑀓𑀸𑀲𑀼 𑀲𑀻𑀲𑁂 𑀘 𑀧𑀸𑀤𑁂 𑀘 𑀉𑀧𑀤𑀳𑀺𑀢𑁆𑀯𑀸 𑀣𑁄𑀓𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀲𑀺𑀧𑁆𑀧𑀲𑀸𑀮𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀕𑀳𑁂𑀢𑁆𑀯𑀸 𑀲𑀚𑁆𑀛𑀸𑀬𑀦𑁆𑀢𑀺. 𑀲𑀸𑀬𑀁 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑀸 𑀘 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀼𑀢𑁆𑀢𑀲𑀸𑀬𑀫𑀸𑀲𑀸 𑀧𑀞𑀫𑀬𑀸𑀫𑀁 𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀲𑀬𑀦𑀓𑀸𑀮𑁂 𑀢𑀣𑁂𑀯 𑀓𑀮𑀺𑀗𑁆𑀕𑀭𑀁 𑀉𑀧𑀥𑀸𑀦𑀁 𑀓𑀢𑁆𑀯𑀸 𑀲𑀬𑀦𑁆𑀢𑀺. 𑀏𑀯𑀁 𑀢𑁂 𑀅𑀓𑁆𑀔𑀡𑀯𑁂𑀥𑀺𑀦𑁄 𑀯𑀸𑀮𑀯𑁂𑀥𑀺𑀦𑁄 𑀘 𑀅𑀳𑁂𑀲𑀼𑀁. 𑀇𑀤𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀑𑀢𑀸𑀭𑀦𑁆𑀢𑀺 𑀯𑀺𑀯𑀭𑀁. 𑀆𑀭𑀫𑁆𑀫𑀡𑀦𑁆𑀢𑀺 𑀧𑀘𑁆𑀘𑀬𑀁. 𑀧𑀥𑀸𑀦𑀲𑁆𑀫𑀺𑀦𑁆𑀢𑀺 𑀧𑀥𑀸𑀦𑀪𑀽𑀫𑀺𑀬𑀁 𑀯𑀻𑀭𑀺𑀬𑀁 𑀓𑀼𑀭𑀼𑀫𑀸𑀦𑀸. 𑀧𑀞𑀫𑀩𑁄𑀥𑀺𑀬𑀁 𑀓𑀺𑀭 𑀪𑀺𑀓𑁆𑀔𑀽 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸𑀯 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑀺. 𑀢𑁂𑀲𑀁 𑀫𑀦𑀲𑀺𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀲𑀽𑀭𑀺𑀬𑁄 𑀅𑀢𑁆𑀣𑀁 𑀕𑀘𑁆𑀙𑀢𑀺. 𑀢𑁂 𑀦𑁆𑀳𑀸𑀬𑀺𑀢𑁆𑀯𑀸 𑀧𑀼𑀦 𑀘𑀗𑁆𑀓𑀫𑀁 𑀑𑀢𑀭𑀺𑀢𑁆𑀯𑀸 𑀧𑀞𑀫𑀬𑀸𑀫𑀁 𑀘𑀗𑁆𑀓𑀫𑀦𑁆𑀢𑀺. 𑀢𑀢𑁄 ‘‘𑀫𑀸 𑀘𑀺𑀭𑀁 𑀦𑀺𑀤𑁆𑀤𑀸𑀬𑀺𑀫𑁆𑀳𑀸’’𑀢𑀺 𑀲𑀭𑀻𑀭𑀤𑀭𑀣𑀯𑀺𑀦𑁄𑀤𑀦𑀢𑁆𑀣𑀁 𑀦𑀺𑀧𑀚𑁆𑀚𑀦𑁆𑀢𑀸 𑀓𑀝𑁆𑀞𑀔𑀡𑁆𑀟𑀁 𑀉𑀧𑀤𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀺, 𑀢𑁂 𑀧𑀼𑀦 𑀧𑀘𑁆𑀙𑀺𑀫𑀬𑀸𑀫𑁂 𑀯𑀼𑀝𑁆𑀞𑀸𑀬 𑀘𑀗𑁆𑀓𑀫𑀁 𑀑𑀢𑀭𑀦𑁆𑀢𑀺. 𑀢𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁. 𑀅𑀬𑀫𑁆𑀧𑀺 𑀤𑀻𑀧𑁄 𑀢𑀺𑀡𑁆𑀡𑀁 𑀭𑀸𑀚𑀽𑀦𑀁 𑀓𑀸𑀮𑁂 𑀏𑀓𑀖𑀡𑁆𑀟𑀺𑀦𑀺𑀕𑁆𑀖𑁄𑀲𑁄 𑀏𑀓𑀧𑀥𑀸𑀦𑀪𑀽𑀫𑀺 𑀅𑀳𑁄𑀲𑀺. 𑀦𑀸𑀦𑀸𑀫𑀼𑀔𑁂 𑀧𑀳𑀝𑀖𑀡𑁆𑀟𑀺 𑀧𑀺𑀮𑀺𑀘𑁆𑀙𑀺𑀓𑁄𑀴𑀺𑀬𑀁 𑀑𑀲𑀭𑀢𑀺, 𑀓𑀮𑁆𑀬𑀸𑀡𑀺𑀬𑀁 𑀧𑀳𑀝𑀖𑀡𑁆𑀟𑀺 𑀦𑀸𑀕𑀤𑀻𑀧𑁂 𑀑𑀲𑀭𑀢𑀺. ‘‘𑀅𑀬𑀁 𑀪𑀺𑀓𑁆𑀔𑀼 𑀧𑀼𑀣𑀼𑀚𑁆𑀚𑀦𑁄, 𑀅𑀬𑀁 𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀅𑀗𑁆𑀕𑀼𑀮𑀺𑀁 𑀧𑀲𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑁄 𑀅𑀳𑁄𑀲𑀺. 𑀏𑀓𑀤𑀺𑀯𑀲𑀁 𑀲𑀩𑁆𑀩𑁂 𑀅𑀭𑀳𑀦𑁆𑀢𑁄𑀯 𑀅𑀳𑁂𑀲𑀼𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀓𑀮𑀺𑀗𑁆𑀕𑀭𑀽𑀧𑀥𑀸𑀦𑀸𑀦𑀁 𑀫𑀸𑀭𑁄 𑀆𑀭𑀫𑁆𑀫𑀡𑀁 𑀦 𑀮𑀪𑀢𑀺, 𑀢𑀲𑁆𑀫𑀸. 𑀅𑀝𑁆𑀞𑀫𑀁.

𑁯. 𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁧. 𑀦𑀯𑀫𑁂 𑀅𑀢𑀺𑀯𑁂𑀮𑀦𑁆𑀢𑀺 𑀅𑀢𑀺𑀓𑁆𑀓𑀦𑁆𑀢𑀯𑁂𑀮𑀁 𑀓𑀸𑀮𑀁 𑀅𑀢𑀺𑀓𑁆𑀓𑀦𑁆𑀢𑀧𑁆𑀧𑀫𑀸𑀡𑀁 𑀓𑀸𑀮𑀁. 𑀓𑀺𑀫𑀗𑁆𑀕𑀁 𑀧𑀦𑀸𑀳𑀦𑁆𑀢𑀺 𑀅𑀳𑀁 𑀧𑀦 𑀓𑀺𑀁𑀓𑀸𑀭𑀡𑀸 𑀦 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀺? 𑀪𑀺𑀲𑀫𑀼𑀴𑀸𑀮𑀦𑁆𑀢𑀺 𑀪𑀺𑀲𑀜𑁆𑀘𑁂𑀯 𑀫𑀼𑀴𑀸𑀮𑀜𑁆𑀘. 𑀅𑀩𑁆𑀩𑀼𑀳𑁂𑀢𑁆𑀯𑀸𑀢𑀺 𑀉𑀤𑁆𑀥𑀭𑀺𑀢𑁆𑀯𑀸. 𑀪𑀺𑀗𑁆𑀓𑀘𑁆𑀙𑀸𑀧𑀸𑀢𑀺 𑀳𑀢𑁆𑀣𑀺𑀧𑁄𑀢𑀓𑀸. 𑀢𑁂 𑀓𑀺𑀭 𑀅𑀪𑀺𑀡𑁆𑀳𑀁 𑀪𑀺𑀗𑁆𑀓𑀸𑀭𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀪𑀺𑀗𑁆𑀓𑀘𑁆𑀙𑀸𑀧𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀧𑀲𑀦𑁆𑀦𑁂𑀳𑀺 𑀓𑀢𑁆𑀢𑀩𑁆𑀩𑀸𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺. 𑀥𑀫𑁆𑀫𑀁 𑀪𑀸𑀲𑀦𑁆𑀢𑀻𑀢𑀺 𑀏𑀓𑀁 𑀤𑁆𑀯𑁂 𑀚𑀸𑀢𑀓𑀸𑀦𑀺 𑀯𑀸 𑀲𑀼𑀢𑁆𑀢𑀦𑁆𑀢𑁂 𑀯𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀲𑀫𑁆𑀪𑀺𑀦𑁆𑀦𑁂𑀦 𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀢𑁂𑀲𑀁 𑀢𑀸𑀬 𑀤𑁂𑀲𑀦𑀸𑀬 𑀧𑀲𑀦𑁆𑀦𑀸 𑀕𑀺𑀳𑀻 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺. 𑀦𑁂𑀯 𑀯𑀡𑁆𑀡𑀸𑀬 𑀳𑁄𑀢𑀺 𑀦 𑀩𑀮𑀸𑀬𑀸𑀢𑀺 𑀦𑁂𑀯 𑀕𑀼𑀡𑀯𑀡𑁆𑀡𑀸𑀬, 𑀦 𑀜𑀸𑀡𑀩𑀮𑀸𑀬 𑀳𑁄𑀢𑀺, 𑀕𑀼𑀡𑀯𑀡𑁆𑀡𑁂 𑀧𑀦 𑀧𑀭𑀺𑀳𑀸𑀬𑀦𑁆𑀢𑁂 𑀲𑀭𑀻𑀭𑀯𑀡𑁆𑀡𑁄𑀧𑀺 𑀲𑀭𑀻𑀭𑀩𑀮𑀫𑁆𑀧𑀺 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 𑀲𑀭𑀻𑀭𑀲𑁆𑀲 𑀦𑁂𑀯 𑀯𑀡𑁆𑀡𑀸𑀬 𑀦 𑀩𑀮𑀸𑀬 𑀳𑁄𑀢𑀺. 𑀦𑀯𑀫𑀁.

𑁧𑁦. 𑀩𑀺𑀴𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁨. 𑀤𑀲𑀫𑁂 𑀲𑀦𑁆𑀥𑀺𑀲𑀫𑀮𑀲𑀁𑀓𑀝𑀻𑀭𑁂𑀢𑀺 𑀏𑀢𑁆𑀣 𑀲𑀦𑁆𑀥𑀻𑀢𑀺 𑀪𑀺𑀦𑁆𑀦𑀖𑀭𑀸𑀦𑀁 𑀲𑀦𑁆𑀥𑀺, 𑀲𑀫𑀮𑁄𑀢𑀺 𑀕𑀸𑀫𑀢𑁄 𑀕𑀽𑀣𑀦𑀺𑀓𑁆𑀔𑀫𑀦𑀫𑀕𑁆𑀕𑁄, 𑀲𑀁𑀓𑀝𑀻𑀭𑀦𑁆𑀢𑀺 𑀲𑀗𑁆𑀓𑀸𑀭𑀝𑁆𑀞𑀸𑀦𑀁. 𑀫𑀼𑀤𑀼𑀫𑀽𑀲𑀺𑀦𑁆𑀢𑀺 𑀫𑀼𑀤𑀼𑀓𑀁 𑀫𑀽𑀲𑀺𑀓𑀁. 𑀯𑀼𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀻𑀢𑀺 𑀤𑁂𑀲𑀦𑀸 𑀧𑀜𑁆𑀜𑀸𑀬𑀢𑀺. 𑀤𑀲𑀫𑀁.

𑁧𑁧. 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁩. 𑀏𑀓𑀸𑀤𑀲𑀫𑁂 𑀬𑁂𑀦 𑀬𑁂𑀦 𑀇𑀘𑁆𑀙𑀢𑀻𑀢𑀺 𑀲𑁄 𑀚𑀭𑀲𑀺𑀗𑁆𑀕𑀸𑀮𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑁂 𑀇𑀭𑀺𑀬𑀸𑀧𑀣𑀓𑀧𑁆𑀧𑀦𑁂𑀦 𑀲𑀻𑀢𑀯𑀸𑀢𑀽𑀧𑀯𑀸𑀬𑀦𑁂𑀦 𑀘 𑀅𑀦𑁆𑀢𑀭𑀦𑁆𑀢𑀭𑀸 𑀘𑀺𑀢𑁆𑀢𑀲𑁆𑀲𑀸𑀤𑀫𑁆𑀧𑀺 𑀮𑀪𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀓𑁆𑀬𑀧𑀼𑀢𑁆𑀢𑀺𑀬𑀧𑀝𑀺𑀜𑁆𑀜𑁄𑀢𑀺 𑀇𑀤𑀁 𑀤𑁂𑀯𑀤𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀏𑀢𑁆𑀢𑀓𑀫𑁆𑀧𑀺 𑀘𑀺𑀢𑁆𑀢𑀲𑁆𑀲𑀸𑀤𑀁 𑀅𑀦𑀸𑀕𑀢𑁂 𑀅𑀢𑁆𑀢𑀪𑀸𑀯𑁂 𑀦 𑀮𑀪𑀺𑀲𑁆𑀲𑀢𑀻𑀢𑀺. 𑀏𑀓𑀸𑀤𑀲𑀫𑀁.

𑁧𑁨. 𑀤𑀼𑀢𑀺𑀬𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁪. 𑀤𑁆𑀯𑀸𑀤𑀲𑀫𑁂 𑀓𑀢𑀜𑁆𑀜𑀼𑀢𑀸𑀢𑀺 𑀓𑀢𑀚𑀸𑀦𑀦𑀁. 𑀓𑀢𑀯𑁂𑀤𑀺𑀢𑀸𑀢𑀺 𑀓𑀢𑀯𑀺𑀲𑁂𑀲𑀚𑀸𑀦𑀦𑀁. 𑀢𑀢𑁆𑀭𑀺𑀤𑀁 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀓𑀢𑀜𑁆𑀜𑀼𑀢𑀸𑀬 𑀯𑀢𑁆𑀣𑀼 𑁋 𑀲𑀢𑁆𑀢 𑀓𑀺𑀭 𑀪𑀸𑀢𑀭𑁄 𑀔𑁂𑀢𑁆𑀢𑀁 𑀓𑀲𑀦𑁆𑀢𑀺. 𑀢𑁂𑀲𑀁 𑀲𑀩𑁆𑀩𑀓𑀦𑀺𑀝𑁆𑀞𑁄 𑀔𑁂𑀢𑁆𑀢𑀧𑀭𑀺𑀬𑀦𑁆𑀢𑁂 𑀞𑀢𑁆𑀯𑀸 𑀕𑀸𑀯𑁄 𑀭𑀓𑁆𑀔𑀢𑀺. 𑀅𑀣𑁂𑀓𑀁 𑀚𑀭𑀲𑀺𑀗𑁆𑀕𑀸𑀮𑀁 𑀅𑀚𑀕𑀭𑁄 𑀕𑀡𑁆𑀳𑀺, 𑀲𑁄 𑀢𑀁 𑀤𑀺𑀲𑁆𑀯𑀸 𑀬𑀝𑁆𑀞𑀺𑀬𑀸 𑀧𑁄𑀣𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀅𑀚𑀕𑀭𑁄 𑀲𑀺𑀗𑁆𑀕𑀸𑀮𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀫𑁂𑀯 𑀕𑀡𑁆𑀳𑀺. 𑀲𑀺𑀗𑁆𑀕𑀸𑀮𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀇𑀫𑀺𑀦𑀸 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁, 𑀅𑀳𑀫𑁆𑀧𑀺 𑀇𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀬𑀸𑀕𑀼𑀖𑀝𑀲𑁆𑀲 𑀉𑀧𑀭𑀺 𑀞𑀧𑀺𑀢𑀁 𑀯𑀸𑀲𑀺𑀁 𑀫𑀼𑀔𑁂𑀦 𑀟𑀁𑀲𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀇𑀢𑀭𑁂 𑀪𑀸𑀢𑀭𑁄 𑀤𑀺𑀲𑁆𑀯𑀸, ‘‘𑀲𑀺𑀗𑁆𑀕𑀸𑀮𑁄 𑀯𑀸𑀲𑀺𑀁 𑀳𑀭𑀢𑀻’’𑀢𑀺 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀲𑁄 𑀢𑁂𑀳𑀺 𑀤𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀯𑀸𑀲𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺. 𑀇𑀢𑀭𑁂 𑀆𑀕𑀦𑁆𑀢𑁆𑀯𑀸 𑀓𑀦𑀺𑀝𑁆𑀞𑀁 𑀅𑀚𑀕𑀭𑁂𑀦 𑀕𑀳𑀺𑀢𑀁 𑀤𑀺𑀲𑁆𑀯𑀸 𑀯𑀸𑀲𑀺𑀬𑀸 𑀅𑀚𑀕𑀭𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀏𑀯𑀁 𑀚𑀭𑀲𑀺𑀗𑁆𑀕𑀸𑀮𑁂 𑀲𑀺𑀬𑀸 𑀬𑀸 𑀓𑀸𑀘𑀺 𑀓𑀢𑀜𑁆𑀜𑀼𑀢𑀸 𑀓𑀢𑀯𑁂𑀤𑀺𑀢𑀸. 𑀲𑀓𑁆𑀬𑀧𑀼𑀢𑁆𑀢𑀺𑀬𑀧𑀝𑀺𑀜𑁆𑀜𑁂𑀢𑀺 𑀇𑀤𑀫𑁆𑀧𑀺 𑀤𑁂𑀯𑀤𑀢𑁆𑀢𑀲𑁆𑀲 𑀆𑀘𑀸𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀤𑁆𑀯𑀸𑀤𑀲𑀫𑀁.

𑀑𑀧𑀫𑁆𑀫𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.