𑁧𑁦. 𑀪𑀺𑀓𑁆𑀔𑀼𑀲𑀁𑀬𑀼𑀢𑁆𑀢𑀁

𑁧. 𑀓𑁄𑀮𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁫. 𑀪𑀺𑀓𑁆𑀔𑀼𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂, 𑀆𑀯𑀼𑀲𑁄𑀢𑀺 𑀲𑀸𑀯𑀓𑀸𑀦𑀁 𑀆𑀮𑀸𑀧𑁄. 𑀩𑀼𑀤𑁆𑀥𑀸 𑀳𑀺 𑀪𑀕𑀯𑀦𑁆𑀢𑁄 𑀲𑀸𑀯𑀓𑁂 𑀆𑀮𑀧𑀦𑁆𑀢𑀸, ‘‘𑀪𑀺𑀓𑁆𑀔𑀯𑁂’’𑀢𑀺 𑀆𑀮𑀧𑀦𑁆𑀢𑀺, 𑀲𑀸𑀯𑀓𑀸 𑀧𑀦 ‘‘𑀩𑀼𑀤𑁆𑀥𑁂𑀳𑀺 𑀲𑀤𑀺𑀲𑀸 𑀫𑀸 𑀳𑁄𑀫𑀸’’𑀢𑀺, ‘‘𑀆𑀯𑀼𑀲𑁄’’𑀢𑀺 𑀧𑀞𑀫𑀁 𑀯𑀢𑁆𑀯𑀸 𑀧𑀘𑁆𑀙𑀸, ‘‘𑀪𑀺𑀓𑁆𑀔𑀯𑁂’’𑀢𑀺 𑀪𑀡𑀦𑁆𑀢𑀺. 𑀩𑀼𑀤𑁆𑀥𑁂𑀳𑀺 𑀘 𑀆𑀮𑀧𑀺𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄, ‘‘𑀪𑀦𑁆𑀢𑁂’’𑀢𑀺 𑀧𑀝𑀺𑀯𑀘𑀦𑀁 𑀤𑁂𑀢𑀺 𑀲𑀸𑀯𑀓𑁂𑀳𑀺, ‘‘𑀆𑀯𑀼𑀲𑁄’’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀬𑀲𑁆𑀫𑀸 𑀤𑀼𑀢𑀺𑀬𑀚𑁆𑀛𑀸𑀦𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀬𑁂𑀲𑀁 𑀦𑀺𑀭𑁄𑀥𑀸 𑀲𑀤𑁆𑀤𑀸𑀬𑀢𑀦𑀁 𑀅𑀧𑁆𑀧𑀯𑀢𑁆𑀢𑀺𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀬𑀤𑁂𑀢𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀦𑀸𑀫, 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀭𑀺𑀬𑀸𑀦𑀁 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺. 𑀅𑀬𑀫𑁂𑀢𑁆𑀣 𑀬𑁄𑀚𑀦𑀸. ‘‘𑀥𑀫𑁆𑀫𑀻 𑀯𑀸 𑀓𑀣𑀸 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 𑀏𑀢𑁆𑀣 𑀧𑀦 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁄𑀧𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺𑀧𑀺 𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑀸𑀦𑀺.

𑀯𑀺𑀢𑀓𑁆𑀓𑀲𑀳𑀕𑀢𑀸𑀢𑀺 𑀯𑀺𑀢𑀓𑁆𑀓𑀸𑀭𑀫𑁆𑀫𑀡𑀸. 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀢𑀺 𑀲𑀜𑁆𑀜𑀸 𑀘 𑀫𑀦𑀲𑀺𑀓𑀸𑀭𑁄 𑀘. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀣𑁂𑀭𑀲𑁆𑀲 𑀓𑀺𑀭 𑀤𑀼𑀢𑀺𑀬𑀚𑁆𑀛𑀸𑀦𑀁 𑀦 𑀧𑀕𑀼𑀡𑀁. 𑀅𑀣𑀲𑁆𑀲 𑀢𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀦 𑀲𑀦𑁆𑀢𑀢𑁄 𑀉𑀧𑀝𑁆𑀞𑀳𑀺𑀁𑀲𑀼. 𑀇𑀘𑁆𑀘𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀫𑁆𑀧𑀺 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀧𑀺 𑀳𑀸𑀦𑀪𑀸𑀕𑀺𑀬𑀸𑀯 𑀅𑀳𑁂𑀲𑀼𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀲𑀡𑁆𑀞𑀧𑁂𑀳𑀻𑀢𑀺 𑀲𑀫𑁆𑀫𑀸 𑀞𑀧𑁂𑀳𑀺. 𑀏𑀓𑁄𑀤𑀺𑀪𑀸𑀯𑀁 𑀓𑀭𑁄𑀳𑀻𑀢𑀺 𑀏𑀓𑀕𑁆𑀕𑀁 𑀓𑀭𑁄𑀳𑀺. 𑀲𑀫𑀸𑀤𑀳𑀸𑀢𑀺 𑀲𑀫𑁆𑀫𑀸 𑀆𑀤𑀳 𑀆𑀭𑁄𑀧𑁂𑀳𑀺. 𑀫𑀳𑀸𑀪𑀺𑀜𑁆𑀜𑀢𑀦𑁆𑀢𑀺 𑀙𑀴𑀪𑀺𑀜𑁆𑀜𑀢𑀁. 𑀲𑀢𑁆𑀣𑀸 𑀓𑀺𑀭 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀢𑁆𑀢 𑀤𑀺𑀯𑀲𑁂 𑀣𑁂𑀭𑀲𑁆𑀲 𑀳𑀸𑀦𑀪𑀸𑀕𑀺𑀬𑀁 𑀲𑀫𑀸𑀥𑀺𑀁 𑀯𑀟𑁆𑀠𑁂𑀢𑁆𑀯𑀸 𑀣𑁂𑀭𑀁 𑀙𑀴𑀪𑀺𑀜𑁆𑀜𑀢𑀁 𑀧𑀸𑀧𑁂𑀲𑀺. 𑀧𑀞𑀫𑀁.

𑁨. 𑀉𑀧𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁬. 𑀤𑀼𑀢𑀺𑀬𑁂 𑀅𑀢𑁆𑀣𑀺 𑀦𑀼 𑀔𑁄 𑀢𑀁 𑀓𑀺𑀜𑁆𑀘𑀺 𑀮𑁄𑀓𑀲𑁆𑀫𑀺𑀦𑁆𑀢𑀺 𑀇𑀤𑀁 𑀅𑀢𑀺𑀉𑀴𑀸𑀭𑀫𑁆𑀧𑀺 𑀲𑀢𑁆𑀢𑀁 𑀯𑀸 𑀲𑀗𑁆𑀔𑀸𑀭𑀁 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀢𑁆𑀣𑀼𑀧𑀺 𑀔𑁄𑀢𑀺 𑀇𑀤𑀁 𑀬𑀲𑁆𑀫𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀢𑁆𑀣𑀭𑀺 𑀅𑀥𑀺𑀫𑀢𑁆𑀢𑁄 𑀙𑀦𑁆𑀤𑁄 𑀘 𑀧𑁂𑀫𑀜𑁆𑀘, 𑀢𑀲𑁆𑀫𑀸 ‘‘𑀓𑀺𑀁 𑀦𑀼 𑀔𑁄 𑀇𑀫𑀲𑁆𑀲 𑀣𑁂𑀭𑀲𑁆𑀲 𑀲𑀢𑁆𑀣𑀼 𑀯𑀺𑀧𑀭𑀺𑀡𑀸𑀫𑁂𑀦𑀧𑀺 𑀲𑁄𑀓𑀸𑀤𑀬𑁄 𑀦𑀼𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀚𑀸𑀦𑀦𑀢𑁆𑀣𑀁 𑀧𑀼𑀘𑁆𑀙𑀢𑀺? 𑀤𑀻𑀖𑀭𑀢𑁆𑀢𑀦𑁆𑀢𑀺 𑀲𑀽𑀓𑀭𑀔𑀢𑀮𑁂𑀡𑀤𑁆𑀯𑀸𑀭𑁂 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀲𑀦𑁆𑀥𑀸𑀬𑀸𑀳. 𑀢𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀣𑁂𑀭𑀲𑁆𑀲 𑀇𑀫𑁂 𑀯𑀝𑁆𑀝𑀸𑀦𑀼𑀕𑀢𑀓𑀺𑀮𑁂𑀲𑀸 𑀲𑀫𑀽𑀳𑀢𑀸𑀢𑀺. 𑀤𑀼𑀢𑀺𑀬𑀁.

𑁩. 𑀖𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁭. 𑀢𑀢𑀺𑀬𑁂 𑀏𑀓𑀯𑀺𑀳𑀸𑀭𑁂𑀢𑀺 𑀏𑀓𑀲𑁆𑀫𑀺𑀁 𑀕𑀩𑁆𑀪𑁂. 𑀢𑀤𑀸 𑀓𑀺𑀭 𑀩𑀳𑀽 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀲𑁆𑀫𑀺𑀁 𑀧𑀭𑀺𑀯𑁂𑀡𑀕𑁆𑀕𑁂𑀦 𑀯𑀸 𑀯𑀺𑀳𑀸𑀭𑀕𑁆𑀕𑁂𑀦 𑀯𑀸 𑀲𑁂𑀦𑀸𑀲𑀦𑁂𑀲𑀼 𑀅𑀧𑀸𑀧𑀼𑀡𑀦𑁆𑀢𑁂𑀲𑀼 𑀤𑁆𑀯𑀺𑀦𑁆𑀦𑀁 𑀣𑁂𑀭𑀸𑀦𑀁 𑀏𑀓𑁄 𑀕𑀩𑁆𑀪𑁄 𑀲𑀫𑁆𑀧𑀢𑁆𑀢𑁄. 𑀢𑁂 𑀤𑀺𑀯𑀸 𑀧𑀸𑀝𑀺𑀬𑁂𑀓𑁆𑀓𑁂𑀲𑀼 𑀞𑀸𑀦𑁂𑀲𑀼 𑀦𑀺𑀲𑀻𑀤𑀦𑁆𑀢𑀺, 𑀭𑀢𑁆𑀢𑀺𑀁 𑀧𑀦 𑀦𑁂𑀲𑀁 𑀅𑀦𑁆𑀢𑀭𑁂 𑀘𑀻𑀯𑀭𑀲𑀸𑀡𑀺𑀁 𑀧𑀲𑀸𑀭𑁂𑀦𑁆𑀢𑀺. 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀧𑀢𑁆𑀢𑀝𑁆𑀞𑀸𑀦𑁂𑀬𑁂𑀯 𑀦𑀺𑀲𑀻𑀤𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀯𑀺𑀳𑀸𑀭𑁂’’𑀢𑀺. 𑀑𑀴𑀸𑀭𑀺𑀓𑁂𑀦𑀸𑀢𑀺 𑀇𑀤𑀁 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀺𑀩𑁆𑀩𑀘𑀓𑁆𑀔𑀼𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀯𑀺𑀳𑀸𑀭𑁂𑀦 𑀳𑀺 𑀲𑁄 𑀯𑀺𑀳𑀸𑀲𑀺, 𑀢𑁂𑀲𑀜𑁆𑀘 𑀭𑀽𑀧𑀸𑀬𑀢𑀦𑀲𑀤𑁆𑀤𑀸𑀬𑀢𑀦𑀲𑀗𑁆𑀔𑀸𑀢𑀁 𑀑𑀴𑀸𑀭𑀺𑀓𑀁 𑀆𑀭𑀫𑁆𑀫𑀡𑀁. 𑀇𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀭𑀽𑀧𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀤𑀺𑀩𑁆𑀩𑀸𑀬 𑀘 𑀲𑁄𑀢𑀥𑀸𑀢𑀼𑀬𑀸 𑀲𑀤𑁆𑀤𑀲𑁆𑀲 𑀲𑀼𑀢𑀢𑁆𑀢𑀸 𑀲𑁄 𑀯𑀺𑀳𑀸𑀭𑁄 𑀑𑀴𑀸𑀭𑀺𑀓𑁄 𑀦𑀸𑀫 𑀚𑀸𑀢𑁄. 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑀼𑀚𑁆𑀛𑀻𑀢𑀺 𑀪𑀕𑀯𑀢𑁄 𑀭𑀽𑀧𑀤𑀲𑁆𑀲𑀦𑀢𑁆𑀣𑀸𑀬 𑀯𑀺𑀲𑀼𑀤𑁆𑀥𑀁 𑀅𑀳𑁄𑀲𑀺. 𑀤𑀺𑀩𑁆𑀩𑀸 𑀘 𑀲𑁄𑀢𑀥𑀸𑀢𑀽𑀢𑀺 𑀲𑀸𑀧𑀺 𑀪𑀕𑀯𑀢𑁄 𑀲𑀤𑁆𑀤𑀲𑀼𑀡𑀦𑀢𑁆𑀣𑀁 𑀯𑀺𑀲𑀼𑀚𑁆𑀛𑀺. 𑀪𑀕𑀯𑀢𑁄𑀧𑀺 𑀣𑁂𑀭𑀲𑁆𑀲 𑀭𑀽𑀧𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀲𑀤𑁆𑀤𑀲𑀼𑀡𑀦𑀢𑁆𑀣𑀜𑁆𑀘 𑀢𑀤𑀼𑀪𑀬𑀁 𑀯𑀺𑀲𑀼𑀚𑁆𑀛𑀺. 𑀢𑀤𑀸 𑀓𑀺𑀭 𑀣𑁂𑀭𑁄 ‘‘𑀓𑀣𑀁 𑀦𑀼 𑀔𑁄 𑀏𑀢𑀭𑀳𑀺 𑀲𑀢𑁆𑀣𑀸 𑀯𑀺𑀳𑀭𑀢𑀻’’𑀢𑀺 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀲𑀢𑁆𑀣𑀸𑀭𑀁 𑀚𑁂𑀢𑀯𑀦𑁂 𑀯𑀺𑀳𑀸𑀭𑁂 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀤𑁆𑀤𑀁 𑀲𑀼𑀡𑀺. 𑀲𑀢𑁆𑀣𑀸𑀧𑀺 𑀢𑀣𑁂𑀯 𑀅𑀓𑀸𑀲𑀺. 𑀏𑀯𑀁 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀺𑀁𑀲𑀼 𑀘𑁂𑀯, 𑀲𑀤𑁆𑀤𑀜𑁆𑀘 𑀅𑀲𑁆𑀲𑁄𑀲𑀼𑀁.

𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑁄 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄. 𑀬𑀸𑀯𑀤𑁂𑀯 𑀉𑀧𑀦𑀺𑀓𑁆𑀔𑁂𑀧𑀦𑀫𑀢𑁆𑀢𑀸𑀬𑀸𑀢𑀺 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀸𑀭𑀲𑁆𑀲 𑀳𑀺𑀫𑀯𑀢𑁄 𑀲𑀦𑁆𑀢𑀺𑀓𑁂 𑀞𑀧𑀺𑀢𑀸 𑀲𑀸𑀲𑀧𑀫𑀢𑁆𑀢𑀸 𑀧𑀸𑀲𑀸𑀡𑀲𑀓𑁆𑀔𑀭𑀸 ‘‘𑀳𑀺𑀫𑀯𑀸 𑀦𑀼 𑀔𑁄 𑀫𑀳𑀸, 𑀅𑀬𑀁 𑀦𑀼 𑀔𑁄 𑀧𑀸𑀲𑀸𑀡𑀲𑀓𑁆𑀔𑀭𑀸’’𑀢𑀺 𑀏𑀯𑀁 𑀬𑀸𑀯 𑀉𑀧𑀦𑀺𑀓𑁆𑀔𑁂𑀧𑀦𑀫𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀸𑀬 𑀪𑀯𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄. 𑀓𑀧𑁆𑀧𑀦𑁆𑀢𑀺 𑀆𑀬𑀼𑀓𑀧𑁆𑀧𑀁. 𑀮𑁄𑀡𑀖𑀝𑀸𑀬𑀸𑀢𑀺 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀸 𑀆𑀥𑀸𑀭𑀓𑀁 𑀓𑀢𑁆𑀯𑀸 𑀫𑀼𑀔𑀯𑀝𑁆𑀝𑀺𑀬𑀸 𑀩𑁆𑀭𑀳𑁆𑀫𑀮𑁄𑀓𑀁 𑀆𑀳𑀘𑁆𑀘 𑀞𑀺𑀢𑀸𑀬 𑀮𑁄𑀡𑀘𑀸𑀝𑀺𑀬𑀸𑀢𑀺 𑀤𑀲𑁆𑀲𑁂𑀢𑀺.

𑀇𑀫𑁂 𑀧𑀦 𑀣𑁂𑀭𑀸 𑀉𑀧𑀫𑀁 𑀆𑀳𑀭𑀦𑁆𑀢𑀸 𑀲𑀭𑀺𑀓𑁆𑀔𑀓𑁂𑀦𑁂𑀯 𑀘 𑀯𑀺𑀚𑁆𑀚𑀫𑀸𑀦𑀕𑀼𑀡𑁂𑀦 𑀘 𑀆𑀳𑀭𑀺𑀁𑀲𑀼. 𑀓𑀣𑀁? 𑀅𑀬𑀜𑁆𑀳𑀺 𑀇𑀤𑁆𑀥𑀺 𑀦𑀸𑀫 𑀅𑀘𑁆𑀘𑀼𑀕𑁆𑀕𑀢𑀝𑁆𑀞𑁂𑀦 𑀘𑁂𑀯 𑀯𑀺𑀧𑀼𑀮𑀝𑁆𑀞𑁂𑀦 𑀘 𑀳𑀺𑀫𑀯𑀦𑁆𑀢𑀲𑀤𑀺𑀲𑀸, 𑀧𑀜𑁆𑀜𑀸 𑀘𑀢𑀼𑀪𑀽𑀫𑀓𑀥𑀫𑁆𑀫𑁂 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀝𑁆𑀞𑁂𑀦 𑀲𑀩𑁆𑀩𑀩𑁆𑀬𑀜𑁆𑀚𑀦𑁂𑀲𑀼 𑀅𑀦𑀼𑀧𑀯𑀺𑀝𑁆𑀞𑀮𑁄𑀡𑀭𑀲𑀲𑀤𑀺𑀲𑀸. 𑀏𑀯𑀁 𑀢𑀸𑀯 𑀲𑀭𑀺𑀓𑁆𑀔𑀓𑀝𑁆𑀞𑁂𑀦 𑀆𑀳𑀭𑀺𑀁𑀲𑀼. 𑀲𑀫𑀸𑀥𑀺𑀮𑀓𑁆𑀔𑀡𑀁 𑀧𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀯𑀺𑀪𑀽𑀢𑀁 𑀧𑀸𑀓𑀝𑀁. 𑀓𑀺𑀜𑁆𑀘𑀸𑀧𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀇𑀤𑁆𑀥𑀺 𑀦𑀸𑀫 𑀦𑀢𑁆𑀣𑀺, 𑀪𑀕𑀯𑀢𑀸 𑀧𑀦 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺 𑀅𑀬𑀫𑁂𑀯 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑀁 𑀧𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀪𑀽𑀢𑀁 𑀧𑀸𑀓𑀝𑀁. 𑀓𑀺𑀜𑁆𑀘𑀸𑀧𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲𑀸𑀧𑀺 𑀧𑀜𑁆𑀜𑀸 𑀅𑀢𑁆𑀣𑀺, 𑀪𑀕𑀯𑀢𑀸 𑀧𑀦 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺 (𑀅. 𑀦𑀺. 𑁧.𑁧𑁮𑁯) 𑀅𑀬𑀫𑁂𑀯 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀢𑀲𑁆𑀫𑀸 𑀬𑀣𑀸 𑀏𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀥𑀼𑀭𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀏𑀯𑀁 𑀯𑀺𑀚𑁆𑀚𑀫𑀸𑀦𑀕𑀼𑀡𑁂𑀦 𑀆𑀳𑀭𑀺𑀁𑀲𑀼. 𑀲𑀫𑀸𑀥𑀺𑀮𑀓𑁆𑀔𑀡𑀲𑁆𑀫𑀺𑀜𑁆𑀳𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄, 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀤𑁆𑀯𑀻𑀲𑀼𑀧𑀺 𑀏𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺. 𑀢𑀢𑀺𑀬𑀁.

𑁪. 𑀦𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁮. 𑀘𑀢𑀼𑀢𑁆𑀣𑁂 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀦𑀺𑀭𑀼𑀲𑁆𑀲𑀼𑀓𑁆𑀓𑁄. 𑀲𑀗𑁆𑀓𑀲𑀸𑀬𑀢𑀻𑀢𑀺 𑀯𑀺𑀳𑀭𑀢𑀺. 𑀯𑁂𑀬𑁆𑀬𑀸𑀯𑀘𑁆𑀘𑀦𑁆𑀢𑀺 𑀘𑀻𑀯𑀭𑁂 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁. 𑀆𑀪𑀺𑀘𑁂𑀢𑀲𑀺𑀓𑀸𑀦𑀦𑁆𑀢𑀺 𑀅𑀪𑀺𑀘𑀺𑀢𑁆𑀢𑀁 𑀉𑀢𑁆𑀢𑀫𑀘𑀺𑀢𑁆𑀢𑀁 𑀦𑀺𑀲𑁆𑀲𑀺𑀢𑀸𑀦𑀁. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸𑀬 𑀦𑀺𑀓𑀸𑀫𑀮𑀸𑀪𑀻. 𑀅𑀓𑀺𑀘𑁆𑀙𑀮𑀸𑀪𑀻𑀢𑀺 𑀛𑀸𑀦𑀧𑀸𑀭𑀺𑀧𑀦𑁆𑀣𑀺𑀓𑁂 𑀲𑀼𑀔𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸𑀬 𑀅𑀤𑀼𑀓𑁆𑀔𑀮𑀸𑀪𑀻. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀝𑁆𑀞𑀸𑀦𑀲𑀫𑀢𑁆𑀣𑀢𑀸𑀬 𑀯𑀺𑀧𑀼𑀮𑀮𑀸𑀪𑀻, 𑀧𑀕𑀼𑀡𑀚𑁆𑀛𑀸𑀦𑁄𑀢𑀺 𑀅𑀢𑁆𑀣𑁄. 𑀲𑀺𑀣𑀺𑀮𑀫𑀸𑀭𑀩𑁆𑀪𑀸𑀢𑀺 𑀲𑀺𑀣𑀺𑀮𑀯𑀻𑀭𑀺𑀬𑀁 𑀧𑀯𑀢𑁆𑀢𑁂𑀢𑁆𑀯𑀸. 𑀘𑀢𑀼𑀢𑁆𑀣𑀁.

𑁫. 𑀲𑀼𑀚𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁯. 𑀧𑀜𑁆𑀘𑀫𑁂 𑀅𑀪𑀺𑀭𑀽𑀧𑁄𑀢𑀺 𑀅𑀜𑁆𑀜𑀸𑀦𑀺 𑀭𑀽𑀧𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀭𑀽𑀧𑁄. 𑀤𑀲𑁆𑀲𑀦𑀻𑀬𑁄𑀢𑀺 𑀤𑀝𑁆𑀞𑀩𑁆𑀩𑀬𑀼𑀢𑁆𑀢𑁄. 𑀧𑀸𑀲𑀸𑀤𑀺𑀓𑁄𑀢𑀺 𑀤𑀲𑁆𑀲𑀦𑁂𑀦 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀼𑀁 𑀲𑀫𑀢𑁆𑀣𑁄. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀙𑀯𑀺𑀯𑀡𑁆𑀡𑀲𑀼𑀦𑁆𑀤𑀭𑀢𑀸𑀬. 𑀧𑀜𑁆𑀘𑀫𑀁.

𑁬. 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁦. 𑀙𑀝𑁆𑀞𑁂 𑀤𑀼𑀩𑁆𑀩𑀡𑁆𑀡𑀦𑁆𑀢𑀺 𑀯𑀺𑀭𑀽𑀧𑀲𑀭𑀻𑀭𑀯𑀡𑁆𑀡𑀁. 𑀑𑀓𑁄𑀝𑀺𑀫𑀓𑀦𑁆𑀢𑀺 𑀭𑀲𑁆𑀲𑀁. 𑀧𑀭𑀺𑀪𑀽𑀢𑀭𑀽𑀧𑀦𑁆𑀢𑀺 𑀧𑀫𑀸𑀡𑀯𑀲𑁂𑀦 𑀧𑀭𑀺𑀪𑀽𑀢𑀚𑀸𑀢𑀺𑀓𑀁. 𑀢𑀁 𑀓𑀺𑀭 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, ‘‘𑀆𑀯𑀼𑀲𑁄 𑀪𑀤𑁆𑀤𑀺𑀬, 𑀆𑀯𑀼𑀲𑁄, 𑀪𑀤𑁆𑀤𑀺𑀬𑀸’’𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀭𑀸𑀫𑀲𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀓𑀻𑀴𑀦𑁆𑀢𑀺 𑀆𑀓𑀟𑁆𑀠𑀦𑁆𑀢𑀺 𑀧𑀭𑀺𑀓𑀟𑁆𑀠𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀺𑀪𑀽𑀢𑀭𑀽𑀧’’𑀦𑁆𑀢𑀺. 𑀓𑀲𑁆𑀫𑀸 𑀧𑀦𑁂𑀲 𑀏𑀯𑀭𑀽𑀧𑁄 𑀚𑀸𑀢𑁄? 𑀅𑀬𑀁 𑀓𑀺𑀭 𑀅𑀢𑀻𑀢𑁂 𑀏𑀓𑁄 𑀫𑀳𑀸𑀭𑀸𑀚𑀸 𑀅𑀳𑁄𑀲𑀺, 𑀢𑀲𑁆𑀲 𑀫𑀳𑀮𑁆𑀮𑀓𑀸 𑀘 𑀫𑀳𑀮𑁆𑀮𑀓𑀺𑀢𑁆𑀣𑀺𑀬𑁄 𑀘 𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀲𑁄 𑀲𑀘𑁂 𑀫𑀳𑀮𑁆𑀮𑀓𑁂 𑀧𑀲𑁆𑀲𑀢𑀺, 𑀢𑁂𑀲𑀁 𑀘𑀽𑀴𑀁 𑀞𑀧𑀸𑀧𑁂𑀢𑁆𑀯𑀸 𑀓𑀘𑁆𑀙𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀬𑀣𑀸𑀭𑀼𑀘𑀺 𑀓𑀻𑀴𑀸𑀧𑁂𑀢𑀺. 𑀫𑀳𑀮𑁆𑀮𑀓𑀺𑀢𑁆𑀣𑀺𑀬𑁄𑀧𑀺 𑀤𑀺𑀲𑁆𑀯𑀸 𑀢𑀸𑀲𑀫𑁆𑀧𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀯𑀺𑀧𑁆𑀧𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸𑀭𑀼𑀘𑀺 𑀓𑀻𑀴𑀸𑀧𑁂𑀢𑀺. 𑀢𑁂𑀲𑀁 𑀧𑀼𑀢𑁆𑀢𑀥𑀻𑀢𑀸𑀤𑀻𑀦𑀁 𑀲𑀦𑁆𑀢𑀺𑀓𑁂 𑀫𑀳𑀸𑀲𑀸𑀭𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀧𑀸𑀧𑀓𑀺𑀭𑀺𑀬𑀸 𑀧𑀣𑀯𑀺𑀢𑁄 𑀧𑀝𑁆𑀞𑀸𑀬 𑀙𑀤𑁂𑀯𑀮𑁄𑀓𑁂 𑀏𑀓𑀓𑁄𑀮𑀸𑀳𑀮𑀁 𑀅𑀓𑀸𑀲𑀺.

𑀅𑀣 𑀲𑀓𑁆𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀅𑀦𑁆𑀥𑀩𑀸𑀮𑁄 𑀫𑀳𑀸𑀚𑀦𑀁 𑀯𑀺𑀳𑁂𑀞𑁂𑀢𑀺, 𑀓𑀭𑀺𑀲𑁆𑀲𑀸𑀫𑀺𑀲𑁆𑀲 𑀦𑀺𑀕𑁆𑀕𑀳’’𑀦𑁆𑀢𑀺. 𑀲𑁄 𑀫𑀳𑀮𑁆𑀮𑀓𑀕𑀸𑀫𑀺𑀬𑀯𑀡𑁆𑀡𑀁 𑀓𑀢𑁆𑀯𑀸 𑀬𑀸𑀦𑀓𑁂 𑀏𑀓𑀁 𑀢𑀓𑁆𑀓𑀘𑀸𑀝𑀺𑀁 𑀆𑀭𑁄𑀧𑁂𑀢𑁆𑀯𑀸 𑀬𑀸𑀦𑀁 𑀧𑁂𑀲𑁂𑀦𑁆𑀢𑁄 𑀦𑀕𑀭𑀁 𑀧𑀯𑀺𑀲𑀢𑀺. 𑀭𑀸𑀚𑀸𑀧𑀺 𑀳𑀢𑁆𑀣𑀺𑀁 𑀆𑀭𑀼𑀬𑁆𑀳 𑀦𑀕𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑁋 ‘‘𑀅𑀬𑀁 𑀫𑀳𑀮𑁆𑀮𑀓𑁄 𑀢𑀓𑁆𑀓𑀬𑀸𑀦𑀓𑁂𑀦 𑀅𑀫𑁆𑀳𑀸𑀓𑀁 𑀅𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺, 𑀯𑀸𑀭𑁂𑀣 𑀯𑀸𑀭𑁂𑀣𑀸’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀔𑀦𑁆𑀤𑀦𑁆𑀢𑀸𑀧𑀺 𑀦 𑀧𑀲𑁆𑀲𑀦𑁆𑀢𑀺. 𑀲𑀓𑁆𑀓𑁄 𑀳𑀺 ‘‘𑀭𑀸𑀚𑀸𑀯 𑀫𑀁 𑀧𑀲𑁆𑀲𑀢𑀼, 𑀫𑀸 𑀅𑀜𑁆𑀜𑁂’’𑀢𑀺 𑀏𑀯𑀁 𑀅𑀥𑀺𑀝𑁆𑀞𑀳𑀺. 𑀅𑀣 𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 ‘‘𑀓𑀳𑀁, 𑀤𑁂𑀯, 𑀓𑀳𑀁 𑀤𑁂𑀯𑀸’’𑀢𑀺 𑀯𑀤𑀦𑁆𑀢𑁂𑀲𑀼 𑀏𑀯 𑀭𑀸𑀚𑀸 𑀲𑀳 𑀳𑀢𑁆𑀣𑀺𑀦𑀸 𑀯𑀘𑁆𑀙𑁄 𑀯𑀺𑀬 𑀥𑁂𑀦𑀼𑀬𑀸 𑀬𑀸𑀦𑀲𑁆𑀲 𑀳𑁂𑀝𑁆𑀞𑀸 𑀧𑀸𑀯𑀺𑀲𑀺. 𑀲𑀓𑁆𑀓𑁄 𑀢𑀓𑁆𑀓𑀘𑀸𑀝𑀺𑀁 𑀪𑀺𑀦𑁆𑀤𑀺.

𑀭𑀸𑀚𑀸 𑀲𑀻𑀲𑀢𑁄 𑀧𑀝𑁆𑀞𑀸𑀬 𑀢𑀓𑁆𑀓𑁂𑀦 𑀓𑀺𑀮𑀺𑀦𑁆𑀦𑀲𑀭𑀻𑀭𑁄 𑀅𑀳𑁄𑀲𑀺. 𑀲𑁄 𑀲𑀭𑀻𑀭𑀁 𑀉𑀩𑁆𑀩𑀝𑁆𑀝𑀸𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀢𑁆𑀯𑀸 𑀅𑀮𑀗𑁆𑀓𑀢𑀲𑀭𑀻𑀭𑁄 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 𑀧𑀼𑀦 𑀢𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑁄 𑀅𑀫𑁆𑀳𑁂𑀳𑀺 𑀤𑀺𑀝𑁆𑀞𑀫𑀳𑀮𑁆𑀮𑀓𑁄 𑀧𑀼𑀦 𑀤𑀺𑀲𑁆𑀲𑀢𑀺. 𑀯𑀸𑀭𑁂𑀣 𑀯𑀸𑀭𑁂𑀣 𑀦’’𑀦𑁆𑀢𑀺 𑀆𑀳. 𑀫𑀦𑀼𑀲𑁆𑀲𑀸 ‘‘𑀓𑀳𑀁, 𑀤𑁂𑀯, 𑀓𑀳𑀁, 𑀤𑁂𑀯𑀸’’𑀢𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀸𑀯𑀺𑀁𑀲𑀼. 𑀲𑁄 𑀧𑀞𑀫𑀯𑀺𑀧𑁆𑀧𑀓𑀸𑀭𑀫𑁂𑀯 𑀧𑀼𑀦 𑀧𑀸𑀧𑀼𑀡𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀕𑁄𑀡𑁂 𑀘 𑀬𑀸𑀦𑀜𑁆𑀘 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀆𑀳, ‘‘𑀅𑀦𑁆𑀥𑀩𑀸𑀮, 𑀢𑁆𑀯𑀁 𑀫𑀬𑀺 𑀢𑀓𑁆𑀓𑀯𑀸𑀡𑀺𑀚𑀓𑁄 𑀏𑀲𑁄’’𑀢𑀺 𑀲𑀜𑁆𑀜𑀁 𑀓𑀭𑁄𑀲𑀺, 𑀲𑀓𑁆𑀓𑁄𑀳𑀁 𑀤𑁂𑀯𑀭𑀸𑀚𑀸, ‘‘𑀢𑀯𑁂𑀢𑀁 𑀧𑀸𑀧𑀓𑀺𑀭𑀺𑀬𑀁 𑀦𑀺𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀢𑁄, ‘‘𑀫𑀸 𑀧𑀼𑀦 𑀏𑀯𑀭𑀽𑀧𑀁 𑀅𑀓𑀸𑀲𑀻’’𑀢𑀺 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀇𑀫𑀺𑀦𑀸 𑀓𑀫𑁆𑀫𑁂𑀦 𑀲𑁄 𑀤𑀼𑀩𑁆𑀩𑀡𑁆𑀡𑁄 𑀅𑀳𑁄𑀲𑀺.

𑀯𑀺𑀧𑀲𑁆𑀲𑀻𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀦𑁂𑀲 𑀘𑀺𑀢𑁆𑀢𑀧𑀢𑁆𑀢𑀓𑁄𑀓𑀺𑀮𑁄 𑀦𑀸𑀫 𑀳𑀼𑀢𑁆𑀯𑀸 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑀁 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀫𑀥𑀼𑀭𑀁 𑀅𑀫𑁆𑀩𑀨𑀮𑀁 𑀢𑀼𑀡𑁆𑀟𑁂𑀦 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑀁 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀭𑀺𑀢𑁆𑀢𑀓𑁄 𑀢𑀣𑀸𑀕𑀢𑀁 𑀧𑀲𑁆𑀲𑀸𑀫𑀺. 𑀅𑀚𑁆𑀚 𑀧𑀦 𑀫𑁂 𑀇𑀫𑀁 𑀅𑀫𑁆𑀩𑀧𑀓𑁆𑀓𑀁 𑀅𑀢𑁆𑀣𑀺, 𑀤𑀲𑀩𑀮𑀲𑁆𑀲 𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀑𑀢𑀭𑀺𑀢𑁆𑀯𑀸 𑀆𑀓𑀸𑀲𑁂 𑀘𑀭𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀉𑀧𑀝𑁆𑀞𑀸𑀓𑀁 𑀑𑀮𑁄𑀓𑁂𑀲𑀺. 𑀲𑁄 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼 𑀳𑀢𑁆𑀣𑁂 𑀞𑀧𑁂𑀲𑀺. 𑀓𑁄𑀓𑀺𑀮𑁄 𑀤𑀲𑀩𑀮𑀲𑁆𑀲 𑀧𑀢𑁆𑀢𑁂 𑀅𑀫𑁆𑀩𑀧𑀓𑁆𑀓𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀢𑁆𑀣𑀸 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀧𑀭𑀺𑀪𑀼𑀜𑁆𑀚𑀺. 𑀓𑁄𑀓𑀺𑀮𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀤𑀲𑀩𑀮𑀲𑁆𑀲 𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀮𑀸𑀯𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀢𑀸𑀳𑀁 𑀧𑀻𑀢𑀺𑀲𑀼𑀔𑁂𑀦𑁂𑀯 𑀯𑀻𑀢𑀺𑀦𑀸𑀫𑁂𑀲𑀺. 𑀇𑀫𑀺𑀦𑀸 𑀓𑀫𑁆𑀫𑁂𑀦 𑀲𑀭𑁄 𑀫𑀥𑀼𑀭𑁄 𑀅𑀳𑁄𑀲𑀺.

𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀦 𑀘𑁂𑀢𑀺𑀬𑁂 𑀆𑀭𑀤𑁆𑀥𑁂 ‘‘𑀓𑀺𑀁𑀧𑀫𑀸𑀡𑀁 𑀓𑀭𑁄𑀫? 𑀲𑀢𑁆𑀢𑀬𑁄𑀚𑀦𑀧𑁆𑀧𑀫𑀸𑀡𑀁. 𑀅𑀢𑀺𑀫𑀳𑀦𑁆𑀢𑀁 𑀏𑀢𑀁, 𑀙𑀬𑁄𑀚𑀦𑀧𑁆𑀧𑀫𑀸𑀡𑀁 𑀓𑀭𑁄𑀫. 𑀇𑀤𑀫𑁆𑀧𑀺 𑀅𑀢𑀺𑀫𑀳𑀦𑁆𑀢𑀁, 𑀧𑀜𑁆𑀘𑀬𑁄𑀚𑀦𑀁 𑀓𑀭𑁄𑀫, 𑀘𑀢𑀼𑀬𑁄𑀚𑀦𑀁, 𑀢𑀺𑀬𑁄𑀚𑀦𑀁, 𑀤𑁆𑀯𑀺𑀬𑁄𑀚𑀦’’𑀦𑁆𑀢𑀺. 𑀅𑀬𑀁 𑀢𑀤𑀸 𑀚𑁂𑀝𑁆𑀞𑀓𑀯𑀟𑁆𑀠𑀓𑀻 𑀳𑀼𑀢𑁆𑀯𑀸, ‘‘𑀏𑀯𑀁, 𑀪𑁄, 𑀅𑀦𑀸𑀕𑀢𑁂 𑀲𑀼𑀔𑀧𑀝𑀺𑀚𑀕𑁆𑀕𑀺𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀭𑀚𑁆𑀚𑀼𑀁 𑀆𑀤𑀸𑀬 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀕𑀸𑀯𑀼𑀢𑀫𑀢𑁆𑀢𑀓𑁂 𑀞𑀢𑁆𑀯𑀸, ‘‘𑀏𑀓𑁂𑀓𑀁 𑀫𑀼𑀔𑀁 𑀕𑀸𑀯𑀼𑀢𑀁 𑀳𑁄𑀢𑀼, 𑀘𑁂𑀢𑀺𑀬𑀁 𑀬𑁄𑀚𑀦𑀸𑀯𑀝𑁆𑀝𑀁 𑀬𑁄𑀚𑀦𑀼𑀩𑁆𑀩𑁂𑀥𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑁂 𑀢𑀲𑁆𑀲 𑀯𑀘𑀦𑁂 𑀅𑀝𑁆𑀞𑀁𑀲𑀼. 𑀘𑁂𑀢𑀺𑀬𑀁 𑀲𑀢𑁆𑀢𑀤𑀺𑀯𑀲𑀲𑀢𑁆𑀢𑀫𑀸𑀲𑀸𑀥𑀺𑀓𑁂𑀳𑀺 𑀲𑀢𑁆𑀢𑀳𑀺 𑀲𑀁𑀯𑀘𑁆𑀙𑀭𑁂𑀳𑀺 𑀦𑀺𑀝𑁆𑀞𑀺𑀢𑀁. 𑀇𑀢𑀺 𑀅𑀧𑁆𑀧𑀫𑀸𑀡𑀲𑁆𑀲 𑀩𑀼𑀤𑁆𑀥𑀲𑁆𑀲 𑀧𑀫𑀸𑀡𑀁 𑀅𑀓𑀸𑀲𑀻𑀢𑀺. 𑀢𑁂𑀦 𑀓𑀫𑁆𑀫𑁂𑀦 𑀑𑀓𑁄𑀝𑀺𑀫𑀓𑁄 𑀚𑀸𑀢𑁄.

𑀳𑀢𑁆𑀣𑀬𑁄 𑀧𑀲𑀤𑀸 𑀫𑀺𑀕𑀸𑀢𑀺 𑀳𑀢𑁆𑀣𑀺𑀦𑁄 𑀘 𑀧𑀲𑀤𑀫𑀺𑀕𑀸 𑀘. 𑀦𑀢𑁆𑀣𑀺 𑀓𑀸𑀬𑀲𑁆𑀫𑀺𑀁 𑀢𑀼𑀮𑁆𑀬𑀢𑀸𑀢𑀺 𑀓𑀸𑀬𑀲𑁆𑀫𑀺𑀁 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺, 𑀅𑀓𑀸𑀭𑀡𑀁 𑀓𑀸𑀬𑀧𑀫𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀙𑀝𑁆𑀞𑀁.

𑁭. 𑀯𑀺𑀲𑀸𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁧. 𑀲𑀢𑁆𑀢𑀫𑁂 𑀧𑁄𑀭𑀺𑀬𑀸 𑀯𑀸𑀘𑀸𑀬𑀸𑀢𑀺 𑀧𑀼𑀭𑀯𑀸𑀲𑀻𑀦𑀁 𑀦𑀕𑀭𑀫𑀦𑀼𑀲𑁆𑀲𑀸𑀦𑀁 𑀯𑀸𑀘𑀸𑀲𑀤𑀺𑀲𑀸𑀬 𑀅𑀧𑀭𑀺𑀳𑀻𑀦𑀓𑁆𑀔𑀭𑀧𑀤𑀸𑀬 𑀫𑀥𑀼𑀭𑀯𑀸𑀘𑀸𑀬. 𑀯𑀺𑀲𑁆𑀲𑀝𑁆𑀞𑀸𑀬𑀸𑀢𑀺 𑀅𑀲𑀦𑁆𑀤𑀺𑀤𑁆𑀥𑀸𑀬 𑀅𑀧𑀮𑀺𑀩𑀼𑀤𑁆𑀥𑀸𑀬, 𑀧𑀺𑀢𑁆𑀢𑀲𑁂𑀫𑁆𑀳𑁂𑀳𑀺 𑀅𑀦𑀼𑀧𑀳𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀦𑁂𑀮𑀕𑀮𑀸𑀬𑀸𑀢𑀺 𑀬𑀣𑀸 𑀤𑀦𑁆𑀥𑀫𑀦𑀼𑀲𑁆𑀲𑀸 𑀫𑀼𑀔𑁂𑀦 𑀔𑁂𑀴𑀁 𑀕𑀴𑀦𑁆𑀢𑁂𑀦 𑀯𑀸𑀘𑀁 𑀪𑀸𑀲𑀦𑁆𑀢𑀺, 𑀦 𑀏𑀯𑀭𑀽𑀧𑀸𑀬, 𑀅𑀣 𑀔𑁄 𑀦𑀺𑀤𑁆𑀤𑁄𑀲𑀸𑀬 𑀯𑀺𑀲𑀤𑀯𑀸𑀘𑀸𑀬. 𑀧𑀭𑀺𑀬𑀸𑀧𑀦𑁆𑀦𑀸𑀬𑀸𑀢𑀺 𑀘𑀢𑀼𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀸𑀬 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀫𑀼𑀜𑁆𑀘𑀺𑀢𑁆𑀯𑀸 𑀧𑀯𑀢𑁆𑀢𑀸𑀬. 𑀅𑀦𑀺𑀲𑁆𑀲𑀺𑀢𑀸𑀬𑀸𑀢𑀺 𑀯𑀝𑁆𑀝𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀅𑀓𑀣𑀺𑀢𑀸𑀬. 𑀥𑀫𑁆𑀫𑁄 𑀳𑀺 𑀇𑀲𑀺𑀦𑀁 𑀥𑀚𑁄𑀢𑀺 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀇𑀲𑀻𑀦𑀁 𑀥𑀚𑁄 𑀦𑀸𑀫𑀸𑀢𑀺. 𑀲𑀢𑁆𑀢𑀫𑀁.

𑁮. 𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁨. 𑀅𑀝𑁆𑀞𑀫𑁂 𑀆𑀓𑁄𑀝𑀺𑀢𑀧𑀘𑁆𑀘𑀸𑀓𑁄𑀝𑀺𑀢𑀸𑀦𑀻𑀢𑀺 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂 𑀧𑀸𑀡𑀺𑀦𑀸 𑀯𑀸 𑀫𑀼𑀕𑁆𑀕𑀭𑁂𑀦 𑀯𑀸 𑀆𑀓𑁄𑀝𑀦𑁂𑀦 𑀆𑀓𑁄𑀝𑀺𑀢𑀸𑀦𑀺, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀆𑀓𑁄𑀝𑀦𑁂𑀦 𑀧𑀘𑁆𑀘𑀸𑀓𑁄𑀝𑀺𑀢𑀸𑀦𑀺. 𑀅𑀜𑁆𑀚𑁂𑀢𑁆𑀯𑀸𑀢𑀺 𑀅𑀜𑁆𑀚𑀦𑁂𑀦 𑀧𑀽𑀭𑁂𑀢𑁆𑀯𑀸. 𑀅𑀘𑁆𑀙𑀁 𑀧𑀢𑁆𑀢𑀦𑁆𑀢𑀺 𑀯𑀺𑀧𑁆𑀧𑀲𑀦𑁆𑀦𑀯𑀡𑁆𑀡𑀁 𑀫𑀢𑁆𑀢𑀺𑀓𑀸𑀧𑀢𑁆𑀢𑀁. 𑀓𑀲𑁆𑀫𑀸 𑀧𑀦 𑀣𑁂𑀭𑁄 𑀏𑀯𑀫𑀓𑀸𑀲𑀻𑀢𑀺? 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀚𑀸𑀦𑀦𑀢𑁆𑀣𑀁. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀲𑀘𑁂 𑀲𑀢𑁆𑀣𑀸 ‘𑀲𑁄𑀪𑀢𑀺 𑀯𑀢 𑀫𑁂 𑀅𑀬𑀁 𑀓𑀦𑀺𑀝𑁆𑀞𑀪𑀸𑀢𑀺𑀓𑁄’𑀢𑀺 𑀯𑀓𑁆𑀔𑀢𑀺, 𑀬𑀸𑀯𑀚𑀻𑀯𑀁 𑀇𑀫𑀺𑀦𑀸 𑀯𑀸𑀓𑀸𑀭𑁂𑀦 𑀘𑀭𑀺𑀲𑁆𑀲𑀸𑀫𑀺. 𑀲𑀘𑁂 𑀏𑀢𑁆𑀣 𑀤𑁄𑀲𑀁 𑀤𑀲𑁆𑀲𑀢𑀺, 𑀇𑀫𑀁 𑀆𑀓𑀸𑀭𑀁 𑀧𑀳𑀸𑀬 𑀲𑀗𑁆𑀓𑀸𑀭𑀘𑁄𑀴𑀁 𑀕𑀳𑁂𑀢𑁆𑀯𑀸 𑀘𑀻𑀯𑀭𑀁 𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑁄 𑀧𑀭𑀺𑀬𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁄 𑀘𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀲𑁆𑀲𑀲𑀻𑀢𑀺 𑀪𑀯𑀺𑀲𑁆𑀲𑀲𑀺.

𑀅𑀜𑁆𑀜𑀸𑀢𑀼𑀜𑁆𑀙𑁂𑀦𑀸𑀢𑀺 𑀅𑀪𑀺𑀮𑀓𑁆𑀔𑀺𑀢𑁂𑀲𑀼 𑀇𑀲𑁆𑀲𑀭𑀚𑀦𑀕𑁂𑀳𑁂𑀲𑀼 𑀓𑀝𑀼𑀓𑀪𑀡𑁆𑀟𑀲𑀫𑁆𑀪𑀸𑀭𑀁 𑀲𑀼𑀕𑀦𑁆𑀥𑀁 𑀪𑁄𑀚𑀦𑀁 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀉𑀜𑁆𑀙𑁄 𑀜𑀸𑀢𑀼𑀜𑁆𑀙𑁄 𑀦𑀸𑀫. 𑀖𑀭𑀧𑀝𑀺𑀧𑀸𑀝𑀺𑀬𑀸 𑀧𑀦 𑀤𑁆𑀯𑀸𑀭𑁂 𑀞𑀺𑀢𑁂𑀦 𑀮𑀤𑁆𑀥𑀁 𑀫𑀺𑀲𑁆𑀲𑀓𑀪𑁄𑀚𑀦𑀁 𑀅𑀜𑁆𑀜𑀸𑀢𑀼𑀜𑁆𑀙𑁄 𑀦𑀸𑀫. 𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑁄. 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀦𑀺𑀭𑀧𑁂𑀓𑁆𑀔𑀁. 𑀆𑀭𑀜𑁆𑀜𑀺𑀓𑁄 𑀘𑀸𑀢𑀺𑀆𑀤𑀺 𑀲𑀩𑁆𑀩𑀁 𑀲𑀫𑀸𑀤𑀸𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀓𑀸𑀫𑁂𑀲𑀼 𑀘 𑀅𑀦𑀧𑁂𑀓𑁆𑀔𑁄𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀤𑁂𑀯𑀮𑁄𑀓𑁂 𑀅𑀘𑁆𑀙𑀭𑀸𑀬𑁄 𑀤𑀲𑁆𑀲𑁂𑀢𑁆𑀯𑀸 𑀆𑀕𑀢𑁂𑀦 𑀅𑀧𑀭𑀪𑀸𑀕𑁂 𑀓𑀣𑀺𑀢𑀁. 𑀇𑀫𑀲𑁆𑀲 𑀓𑀣𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀣𑁂𑀭𑁄 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀬 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀚𑀸𑀢𑁄. 𑀅𑀝𑁆𑀞𑀫𑀁.

𑁯. 𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁩. 𑀦𑀯𑀫𑁂 𑀤𑀼𑀫𑁆𑀫𑀦𑁄𑀢𑀺 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑁄. 𑀓𑀲𑁆𑀫𑀸 𑀧𑀦𑀸𑀬𑀁 𑀏𑀯𑀁 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀚𑀸𑀢𑁄𑀢𑀺? 𑀔𑀢𑁆𑀢𑀺𑀬𑀧𑀩𑁆𑀩𑀚𑀺𑀢𑁄 𑀳𑁂𑀲, 𑀢𑁂𑀦 𑀦𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀤𑀼𑀧𑀝𑁆𑀝𑀲𑀸𑀝𑀓𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀯𑀭𑀘𑀻𑀯𑀭𑀁 𑀧𑀸𑀭𑀼𑀧𑁂𑀢𑁆𑀯𑀸 𑀅𑀓𑁆𑀔𑀻𑀦𑀺 𑀅𑀜𑁆𑀚𑁂𑀢𑁆𑀯𑀸 𑀫𑀦𑁄𑀲𑀺𑀮𑀸𑀢𑁂𑀮𑁂𑀦 𑀲𑀻𑀲𑀁 𑀫𑀓𑁆𑀔𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀽𑀲𑀼 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀁 𑀕𑀢𑁂𑀲𑀼 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀅𑀚𑀸𑀦𑀦𑁆𑀢𑁄 𑀪𑁄𑀚𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀫𑀳𑀸𑀧𑀻𑀞𑀁 𑀆𑀭𑀼𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀤𑀺𑀲𑀸𑀯𑀘𑀭𑀸 𑀆𑀕𑀦𑁆𑀢𑀼𑀓𑀸 𑀧𑀁𑀲𑀼𑀓𑀽𑀮𑀺𑀓𑀸 𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸, ‘‘𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀭𑀚𑁄𑀓𑀺𑀡𑁆𑀡𑁂𑀳𑀺 𑀕𑀢𑁆𑀢𑁂𑀳𑀺 𑀦 𑀲𑀓𑁆𑀓𑀸 𑀤𑀲𑀩𑀮𑀁 𑀧𑀲𑁆𑀲𑀺𑀢𑀼𑀁. 𑀪𑀡𑁆𑀟𑀓𑀁 𑀢𑀸𑀯 𑀞𑀧𑁂𑀲𑁆𑀲𑀸𑀫𑀸’’𑀢𑀺 𑀪𑁄𑀚𑀦𑀲𑀸𑀮𑀁 𑀅𑀕𑀫𑀁𑀲𑀼. 𑀲𑁄 𑀢𑁂𑀲𑀼 𑀫𑀳𑀸𑀣𑁂𑀭𑁂𑀲𑀼 𑀆𑀕𑀘𑁆𑀙𑀦𑁆𑀢𑁂𑀲𑀼 𑀦𑀺𑀘𑁆𑀘𑀮𑁄 𑀦𑀺𑀲𑀻𑀤𑀺𑀬𑁂𑀯. 𑀅𑀜𑁆𑀜𑁂 𑀪𑀺𑀓𑁆𑀔𑀽 ‘‘𑀧𑀸𑀤𑀯𑀢𑁆𑀢𑀁 𑀓𑀭𑁄𑀫, 𑀢𑀸𑀮𑀯𑀡𑁆𑀝𑁂𑀦 𑀩𑀻𑀚𑀸𑀫𑀸’’𑀢𑀺 𑀆𑀧𑀼𑀘𑁆𑀙𑀦𑁆𑀢𑀺. 𑀅𑀬𑀁 𑀧𑀦 𑀦𑀺𑀲𑀺𑀦𑁆𑀦𑀓𑁄𑀯 ‘‘𑀓𑀢𑀺𑀯𑀲𑁆𑀲𑀢𑁆𑀣𑀸’’𑀢𑀺? 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀫𑀬𑀁 𑀅𑀯𑀲𑁆𑀲𑀺𑀓𑀸. 𑀢𑀼𑀫𑁆𑀳𑁂 𑀧𑀦 𑀓𑀢𑀺𑀯𑀲𑁆𑀲𑀢𑁆𑀣𑀸’’𑀢𑀺? 𑀯𑀼𑀢𑁆𑀢𑁂, ‘‘𑀫𑀬𑀁 𑀅𑀚𑁆𑀚 𑀧𑀩𑁆𑀩𑀚𑀺𑀢𑀸’’𑀢𑀺 𑀆𑀳. 𑀅𑀣 𑀦𑀁 𑀪𑀺𑀓𑁆𑀔𑀽, ‘‘𑀆𑀯𑀼𑀲𑁄, 𑀅𑀥𑀼𑀦𑀸 𑀙𑀺𑀦𑁆𑀦𑀘𑀽𑀴𑁄𑀲𑀺, 𑀅𑀚𑁆𑀚𑀸𑀧𑀺 𑀢𑁂 𑀲𑀻𑀲𑀫𑀽𑀮𑁂 𑀊𑀓𑀸𑀕𑀦𑁆𑀥𑁄 𑀯𑀸𑀬𑀢𑀺𑀬𑁂𑀯, 𑀢𑁆𑀯𑀁 𑀦𑀸𑀫 𑀏𑀢𑁆𑀢𑀓𑁂𑀲𑀼 𑀯𑀼𑀟𑁆𑀠𑀢𑀭𑁂𑀲𑀼 𑀯𑀢𑁆𑀢𑀁 𑀆𑀧𑀼𑀘𑁆𑀙𑀦𑁆𑀢𑁂𑀲𑀼 𑀦𑀺𑀲𑁆𑀲𑀤𑁆𑀤𑁄 𑀦𑀺𑀘𑁆𑀘𑀮𑁄 𑀦𑀺𑀲𑀺𑀦𑁆𑀦𑁄, 𑀅𑀧𑀘𑀺𑀢𑀺𑀫𑀢𑁆𑀢𑀫𑁆𑀧𑀺 𑀢𑁂 𑀦𑀢𑁆𑀣𑀺, 𑀓𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄𑀲𑀻’’𑀢𑀺? 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑀁 𑀯𑀸𑀘𑀸𑀲𑀢𑁆𑀢𑀻𑀳𑀺 𑀧𑀳𑀭𑀦𑁆𑀢𑀸 ‘‘𑀓𑀺𑀁 𑀢𑁆𑀯𑀁 𑀇𑀡𑀝𑁆𑀝𑁄 𑀯𑀸 𑀪𑀬𑀝𑁆𑀝𑁄 𑀯𑀸 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀩𑁆𑀩𑀚𑀺𑀢𑁄’’𑀢𑀺? 𑀆𑀳𑀁𑀲𑀼. 𑀲𑁄 𑀏𑀓𑀫𑁆𑀧𑀺 𑀣𑁂𑀭𑀁 𑀑𑀮𑁄𑀓𑁂𑀲𑀺, 𑀢𑁂𑀦 ‘‘𑀓𑀺𑀁 𑀫𑀁 𑀑𑀮𑁄𑀓𑁂𑀲𑀺 𑀫𑀳𑀮𑁆𑀮𑀓𑀸’’𑀢𑀺? 𑀯𑀼𑀢𑁆𑀢𑁂 𑀅𑀜𑁆𑀜𑀁 𑀑𑀮𑁄𑀓𑁂𑀲𑀺, 𑀢𑁂𑀦𑀧𑀺 𑀢𑀣𑁂𑀯 𑀯𑀼𑀢𑁆𑀢𑁂 𑀅𑀣𑀲𑁆𑀲 ‘‘𑀇𑀫𑁂 𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀸𑀘𑀸𑀲𑀢𑁆𑀢𑀻𑀳𑀺 𑀯𑀺𑀚𑁆𑀛𑀦𑁆𑀢𑀻’’𑀢𑀺 𑀔𑀢𑁆𑀢𑀺𑀬𑀫𑀸𑀦𑁄 𑀉𑀧𑁆𑀧𑀚𑁆𑀚𑀺. 𑀅𑀓𑁆𑀔𑀻𑀲𑀼 𑀫𑀡𑀺𑀯𑀡𑁆𑀡𑀸𑀦𑀺 𑀅𑀲𑁆𑀲𑀽𑀦𑀺 𑀲𑀜𑁆𑀘𑀭𑀺𑀁𑀲𑀼. 𑀢𑀢𑁄 𑀦𑁂 𑀆𑀳 𑁋 ‘‘𑀓𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑀢𑁆𑀣𑀸’’𑀢𑀺. 𑀢𑁂 ‘‘𑀓𑀺𑀁 𑀧𑀦 𑀢𑁆𑀯𑀁 ‘𑀫𑀬𑁆𑀳𑀁 𑀲𑀦𑁆𑀢𑀺𑀓𑀁 𑀆𑀕𑀢𑀸’𑀢𑀺? 𑀅𑀫𑁆𑀳𑁂 𑀫𑀜𑁆𑀜𑀲𑀺 𑀕𑀺𑀳𑀺𑀩𑁆𑀬𑀜𑁆𑀚𑀦𑀪𑀝𑁆𑀞𑀓𑀸’’𑀢𑀺 𑀯𑀢𑁆𑀯𑀸, ‘‘𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀢𑀫𑁆𑀳𑀸’’𑀢𑀺 𑀆𑀳𑀁𑀲𑀼. 𑀲𑁄 ‘‘𑀫𑀬𑁆𑀳𑀁 𑀪𑀸𑀢𑀼 𑀲𑀦𑁆𑀢𑀺𑀓𑁂 𑀆𑀕𑀢𑀸 𑀢𑀼𑀫𑁆𑀳𑁂, 𑀬𑀤𑀺 𑀏𑀯𑀁 𑀇𑀤𑀸𑀦𑀺 𑀯𑁄 𑀆𑀕𑀢𑀫𑀕𑁆𑀕𑁂𑀦𑁂𑀯 𑀕𑀫𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀺 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀕𑀢𑁂 𑀲𑀢𑁆𑀣𑀸 𑀏𑀢𑁂 𑀦 𑀦𑀻𑀳𑀭𑀸𑀧𑁂𑀲𑁆𑀲𑀢𑀻’’𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀫𑀸𑀦𑁄 𑀅𑀕𑀫𑀸𑀲𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀏𑀲 𑀏𑀯𑀁 𑀚𑀸𑀢𑁄𑀢𑀺.

𑀯𑀸𑀘𑀸𑀲𑀦𑁆𑀦𑀺𑀢𑁄𑀤𑀓𑁂𑀦𑀸𑀢𑀺 𑀯𑀘𑀦𑀧𑀢𑁄𑀤𑁂𑀦. 𑀲𑀜𑁆𑀚𑀫𑁆𑀪𑀭𑀺𑀫𑀓𑀁𑀲𑀽𑀢𑀺 𑀲𑀜𑁆𑀚𑀫𑁆𑀪𑀭𑀺𑀢𑀁 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀓𑀁𑀲𑀼, 𑀉𑀧𑀭𑀺 𑀯𑀺𑀚𑁆𑀛𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀢𑁆𑀢𑀸𑀢𑀺 𑀧𑀭𑁂 𑀬𑀤𑀺𑀘𑁆𑀙𑀓𑀁 𑀯𑀤𑀢𑀺𑀬𑁂𑀯. 𑀦𑁄 𑀘 𑀯𑀘𑀦𑀓𑁆𑀔𑀫𑁄𑀢𑀺 𑀧𑀭𑁂𑀲𑀁 𑀯𑀘𑀦𑀁 𑀔𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀤𑀸𑀦𑀺 𑀢𑀸𑀯 𑀢𑁆𑀯𑀁 𑀇𑀫𑀺𑀦𑀸 𑀓𑁄𑀧𑁂𑀦 𑀇𑀫𑀺𑀦𑀸 𑀯𑀼𑀢𑁆𑀢𑀯𑀸𑀘𑀸𑀲𑀦𑁆𑀦𑀺𑀢𑁄𑀤𑀓𑁂𑀦 𑀯𑀺𑀤𑁆𑀥𑁄. 𑀅𑀢𑀻𑀢𑁂 𑀧𑀦 𑀭𑀝𑁆𑀞𑀢𑁄 𑀘 𑀧𑀩𑁆𑀩𑀸𑀚𑀺𑀢𑁄𑀢𑀺. 𑀏𑀯𑀁 𑀯𑀼𑀢𑁆𑀢𑁂, ‘‘𑀓𑀢𑀭𑀲𑁆𑀫𑀺𑀁 𑀓𑀸𑀮𑁂 𑀪𑀕𑀯𑀸’’𑀢𑀺? 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁𑀲𑀼.

𑀲𑀢𑁆𑀣𑀸 𑀆𑀳 𑁋 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑀸𑀭𑀸𑀡𑀲𑀺𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀅𑀣𑁂𑀓𑁄 𑀚𑀸𑀢𑀺𑀫𑀸, 𑀏𑀓𑁄 𑀫𑀸𑀢𑀗𑁆𑀕𑁄𑀢𑀺 𑀤𑁆𑀯𑁂 𑀇𑀲𑀬𑁄 𑀩𑀸𑀭𑀸𑀡𑀲𑀺𑀁 𑀅𑀕𑀫𑀁𑀲𑀼. 𑀢𑁂𑀲𑀼 𑀚𑀸𑀢𑀺𑀫𑀸 𑀧𑀼𑀭𑁂𑀢𑀭𑀁 𑀕𑀦𑁆𑀢𑁆𑀯𑀸 𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬𑀁 𑀦𑀺𑀲𑀻𑀤𑀺. 𑀫𑀸𑀢𑀗𑁆𑀕𑁄 𑀢𑀸𑀧𑀲𑁄 𑀧𑀘𑁆𑀙𑀸 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀑𑀓𑀸𑀲𑀁 𑀬𑀸𑀘𑀺 𑀓𑀼𑀫𑁆𑀪𑀓𑀸𑀭𑁄 ‘‘𑀅𑀢𑁆𑀣𑁂𑀢𑁆𑀣 𑀧𑀞𑀫𑀢𑀭𑀁 𑀧𑀯𑀺𑀝𑁆𑀞𑁄 𑀧𑀩𑁆𑀩𑀚𑀺𑀢𑁄, 𑀢𑀁 𑀧𑀼𑀘𑁆𑀙𑀸’’𑀢𑀺 𑀆𑀳. 𑀲𑁄 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀕𑀳𑁂𑀢𑁆𑀯𑀸 𑀲𑀸𑀮𑀸𑀬 𑀤𑁆𑀯𑀸𑀭𑀫𑀽𑀮𑁂 𑀞𑀢𑁆𑀯𑀸, ‘‘𑀅𑀫𑁆𑀳𑀸𑀓𑀫𑁆𑀧𑀺 𑀆𑀘𑀭𑀺𑀬 𑀏𑀓𑀭𑀢𑁆𑀢𑀺𑀯𑀸𑀲𑀸𑀬 𑀑𑀓𑀸𑀲𑀁 𑀤𑁂𑀣𑀸’’𑀢𑀺 𑀆𑀳. ‘‘𑀧𑀯𑀺𑀲, 𑀪𑁄’’𑀢𑀺. 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁, ‘‘𑀪𑁄, 𑀓𑀺𑀁 𑀕𑁄𑀢𑁆𑀢𑁄𑀲𑀻’’𑀢𑀺? 𑀧𑀼𑀘𑁆𑀙𑀺. ‘‘𑀘𑀡𑁆𑀟𑀸𑀮𑀕𑁄𑀢𑁆𑀢𑁄𑀫𑁆𑀳𑀻’’𑀢𑀺. ‘‘𑀦 𑀲𑀓𑁆𑀓𑀸 𑀢𑀬𑀸 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑀼𑀁, 𑀏𑀓𑀫𑀦𑁆𑀢𑀁 𑀕𑀘𑁆𑀙𑀸’’𑀢𑀺. 𑀲𑁄 𑀘 𑀢𑀢𑁆𑀣𑁂𑀯 𑀢𑀺𑀡𑀲𑀦𑁆𑀣𑀸𑀭𑀓𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺, 𑀚𑀸𑀢𑀺𑀫𑀸 𑀤𑁆𑀯𑀸𑀭𑀁 𑀦𑀺𑀲𑁆𑀲𑀸𑀬 𑀦𑀺𑀧𑀚𑁆𑀚𑀺. 𑀇𑀢𑀭𑁄 𑀧𑀲𑁆𑀲𑀸𑀯𑀢𑁆𑀣𑀸𑀬 𑀦𑀺𑀓𑁆𑀔𑀫𑀦𑁆𑀢𑁄 𑀢𑀁 𑀉𑀭𑀲𑁆𑀫𑀺𑀁 𑀅𑀓𑁆𑀓𑀫𑀺. ‘‘𑀓𑁄 𑀏𑀲𑁄’’𑀢𑀺 𑀘 𑀯𑀼𑀢𑁆𑀢𑁂? ‘‘𑀅𑀳𑀁 𑀆𑀘𑀭𑀺𑀬𑀸’’𑀢𑀺 𑀆𑀳. ‘‘𑀭𑁂 𑀘𑀡𑁆𑀟𑀸𑀮, 𑀓𑀺𑀁 𑀅𑀜𑁆𑀜𑀢𑁄 𑀫𑀕𑁆𑀕𑀁 𑀦 𑀧𑀲𑁆𑀲𑀲𑀺? 𑀅𑀣 𑀫𑁂 𑀆𑀕𑀦𑁆𑀢𑁆𑀯𑀸 𑀅𑀓𑁆𑀓𑀫𑀲𑀻’’𑀢𑀺. ‘‘𑀆𑀘𑀭𑀺𑀬, 𑀅𑀤𑀺𑀲𑁆𑀯𑀸 𑀫𑁂 𑀅𑀓𑁆𑀓𑀦𑁆𑀢𑁄𑀲𑀺, 𑀔𑀫 𑀫𑀬𑁆𑀳’’𑀦𑁆𑀢𑀺. 𑀲𑁄 𑀫𑀳𑀸𑀧𑀼𑀭𑀺𑀲𑁂 𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄𑀧𑀺 𑀇𑀢𑁄𑀯 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀫𑀳𑀸𑀧𑀼𑀭𑀺𑀲𑁄𑀧𑀺 ‘‘𑀆𑀘𑀭𑀺𑀬𑁄 𑀇𑀢𑁄 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄, 𑀧𑀸𑀤𑀲𑀫𑀻𑀧𑁂𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀯𑀺𑀲𑀦𑁆𑀢𑁄 𑀧𑀼𑀦 𑀉𑀭𑀲𑁆𑀫𑀺𑀁𑀬𑁂𑀯 𑀅𑀓𑁆𑀓𑀫𑀺. ‘‘𑀓𑁄 𑀏𑀲𑁄’’𑀢𑀺 𑀘 𑀯𑀼𑀢𑁆𑀢𑁂? ‘‘𑀅𑀳𑀁 𑀆𑀘𑀭𑀺𑀬𑀸’’𑀢𑀺 𑀆𑀳. ‘‘𑀧𑀞𑀫𑀁 𑀢𑀸𑀯 𑀢𑁂 𑀅𑀚𑀸𑀦𑀦𑁆𑀢𑁂𑀦 𑀓𑀢𑀁, 𑀇𑀤𑀸𑀦𑀺 𑀫𑀁 𑀖𑀝𑁂𑀦𑁆𑀢𑁄𑀯 𑀅𑀓𑀸𑀲𑀺, 𑀲𑀽𑀭𑀺𑀬𑁂 𑀢𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀢𑀽’’𑀢𑀺 𑀲𑀧𑀺. 𑀫𑀳𑀸𑀧𑀼𑀭𑀺𑀲𑁄 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀧𑀼𑀭𑁂𑀅𑀭𑀼𑀡𑁂𑀬𑁂𑀯 𑀲𑀽𑀭𑀺𑀬𑀁 𑀕𑀡𑁆𑀳𑀺, 𑀦𑀸𑀲𑁆𑀲 𑀉𑀕𑁆𑀕𑀦𑁆𑀢𑀼𑀁 𑀅𑀤𑀸𑀲𑀺. 𑀫𑀦𑀼𑀲𑁆𑀲𑀸 𑀘 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀘 𑀧𑀩𑀼𑀚𑁆𑀛𑀺𑀁𑀲𑀼.

𑀫𑀦𑀼𑀲𑁆𑀲𑀸 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸, ‘‘𑀤𑁂𑀯, 𑀲𑀓𑀮𑀦𑀕𑀭𑁂 𑀅𑀧𑁆𑀧𑀩𑀼𑀤𑁆𑀥𑁄 𑀦𑀸𑀫 𑀦𑀢𑁆𑀣𑀺, 𑀦 𑀘 𑀅𑀭𑀼𑀡𑀼𑀕𑁆𑀕𑀁 𑀧𑀜𑁆𑀜𑀸𑀬𑀢𑀺, 𑀓𑀺𑀦𑁆𑀦𑀼 𑀔𑁄 𑀏𑀢’’𑀦𑁆𑀢𑀺? 𑀢𑁂𑀦 𑀳𑀺 𑀦𑀕𑀭𑀁 𑀧𑀭𑀺𑀯𑀻𑀫𑀁𑀲𑀣𑀸𑀢𑀺. 𑀢𑁂 𑀧𑀭𑀺𑀯𑀻𑀫𑀁𑀲𑀦𑁆𑀢𑀸 𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬𑀁 𑀤𑁆𑀯𑁂 𑀢𑀸𑀧𑀲𑁂 𑀤𑀺𑀲𑁆𑀯𑀸, ‘‘𑀇𑀫𑁂𑀲𑀁 𑀏𑀢𑀁 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀜𑁆𑀜𑀸 𑀘 ‘‘𑀧𑀼𑀘𑁆𑀙𑀣 𑀦𑁂’’𑀢𑀺 𑀯𑀼𑀢𑁆𑀢𑀸 𑀆𑀕𑀦𑁆𑀢𑁆𑀯𑀸 𑀚𑀸𑀢𑀺𑀫𑀦𑁆𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀢𑀼𑀫𑁆𑀳𑁂𑀳𑀺 𑀅𑀦𑁆𑀥𑀓𑀸𑀭𑀁 𑀓𑀢’’𑀦𑁆𑀢𑀺. ‘‘𑀦 𑀫𑀬𑀸 𑀓𑀢𑀁, 𑀏𑀲 𑀧𑀦 𑀓𑀽𑀝𑀚𑀝𑀺𑀮𑁄 𑀙𑀯𑁄 𑀅𑀦𑀦𑁆𑀢𑀫𑀸𑀬𑁄, 𑀢𑀁 𑀧𑀼𑀘𑁆𑀙𑀣𑀸’’𑀢𑀺. 𑀢𑁂 𑀆𑀕𑀦𑁆𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀢𑀼𑀫𑁆𑀳𑁂𑀳𑀺, 𑀪𑀦𑁆𑀢𑁂, 𑀅𑀦𑁆𑀥𑀓𑀸𑀭𑀁 𑀓𑀢’’𑀦𑁆𑀢𑀺. ‘‘𑀆𑀫 𑀅𑀬𑀁 𑀆𑀘𑀭𑀺𑀬𑁄 𑀫𑀁 𑀅𑀪𑀺𑀲𑀧𑀺, 𑀢𑀲𑁆𑀫𑀸 𑀫𑀬𑀸 𑀓𑀢’’𑀦𑁆𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸𑀧𑀺 𑀆𑀕𑀦𑁆𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 ‘‘𑀢𑀼𑀫𑁆𑀳𑁂𑀳𑀺 𑀓𑀢𑀁, 𑀪𑀦𑁆𑀢𑁂’’𑀢𑀺? 𑀧𑀼𑀘𑁆𑀙𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀲𑁆𑀫𑀸 𑀪𑀦𑁆𑀢𑁂’’𑀢𑀺? ‘‘𑀇𑀫𑀺𑀦𑀸 𑀅𑀪𑀺𑀲𑀧𑀺𑀢𑁄𑀫𑁆𑀳𑀺, 𑀲𑀘𑁂 𑀫𑀁 𑀏𑀲𑁄 𑀔𑀫𑀸𑀧𑁂𑀲𑁆𑀲𑀢𑀺, 𑀲𑀽𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺. 𑀭𑀸𑀚𑀸 ‘‘𑀔𑀫𑀸𑀧𑁂𑀣, 𑀪𑀦𑁆𑀢𑁂, 𑀏𑀢’’𑀦𑁆𑀢𑀺 𑀆𑀳. 𑀇𑀢𑀭𑁄 ‘‘𑀫𑀸𑀤𑀺𑀲𑁄 𑀚𑀸𑀢𑀺𑀫𑀸 𑀓𑀺𑀁 𑀏𑀯𑀭𑀽𑀧𑀁 𑀘𑀡𑁆𑀟𑀸𑀮𑀁 𑀔𑀫𑀸𑀧𑁂𑀲𑁆𑀲𑀢𑀺? 𑀦 𑀔𑀫𑀸𑀧𑁂𑀫𑀻’’𑀢𑀺.

𑀅𑀣 𑀦𑀁 𑀫𑀦𑀼𑀲𑁆𑀲𑀸 ‘‘𑀦 𑀓𑀺𑀁 𑀢𑁆𑀯𑀁 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀔𑀫𑀸𑀧𑁂𑀲𑁆𑀲𑀲𑀻’’𑀢𑀺? 𑀯𑀢𑁆𑀯𑀸 𑀳𑀢𑁆𑀣𑁂𑀲𑀼 𑀘 𑀧𑀸𑀤𑁂𑀲𑀼 𑀘 𑀕𑀳𑁂𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ‘‘𑀔𑀫𑀸𑀧𑁂𑀳𑀻’’𑀢𑀺 𑀆𑀳𑀁𑀲𑀼. 𑀲𑁄 𑀦𑀺𑀲𑁆𑀲𑀤𑁆𑀤𑁄 𑀦𑀺𑀧𑀚𑁆𑀚𑀺. 𑀧𑀼𑀦𑀧𑀺 𑀦𑀁 ‘‘𑀔𑀫𑀸𑀧𑁂𑀳𑀻’’𑀢𑀺 𑀆𑀳𑀁𑀲𑀼. 𑀢𑀢𑁄 ‘‘𑀔𑀫 𑀫𑀬𑁆𑀳𑀁, 𑀆𑀘𑀭𑀺𑀬𑀸’’𑀢𑀺 𑀆𑀳. 𑀫𑀳𑀸𑀧𑀼𑀭𑀺𑀲𑁄 ‘‘𑀅𑀳𑀁 𑀢𑀸𑀯 𑀢𑀼𑀬𑁆𑀳𑀁 𑀔𑀫𑀺𑀢𑁆𑀯𑀸 𑀲𑀽𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀺, 𑀲𑀽𑀭𑀺𑀬𑁂 𑀧𑀦 𑀉𑀕𑁆𑀕𑀢𑁂 𑀢𑀯 𑀲𑀻𑀲𑀁 𑀲𑀢𑁆𑀢𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸, ‘‘𑀇𑀫𑀲𑁆𑀲 𑀲𑀻𑀲𑀧𑁆𑀧𑀫𑀸𑀡𑀁 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀏𑀢𑀁 𑀦𑀤𑀺𑀬𑀸 𑀕𑀮𑀧𑁆𑀧𑀫𑀸𑀡𑁂 𑀉𑀤𑀓𑁂 𑀞𑀧𑁂𑀣𑀸’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 𑀢𑀣𑀸 𑀅𑀓𑀁𑀲𑀼. 𑀏𑀢𑁆𑀢𑀸𑀯𑀢𑀸 𑀲𑀭𑀝𑁆𑀞𑀓𑀁 𑀭𑀸𑀚𑀩𑀮𑀁 𑀲𑀦𑁆𑀦𑀺𑀧𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀲𑀽𑀭𑀺𑀬𑀁 𑀫𑀼𑀜𑁆𑀘𑀺. 𑀲𑀽𑀭𑀺𑀬𑀭𑀲𑁆𑀫𑀺 𑀆𑀕𑀦𑁆𑀢𑁆𑀯𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀧𑀳𑀭𑀺. 𑀲𑁄 𑀲𑀢𑁆𑀢𑀥𑀸 𑀪𑀺𑀚𑁆𑀚𑀺. 𑀢𑀸𑀯𑀤𑁂𑀯 𑀲𑁄 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀏𑀓𑁂𑀦 𑀢𑀺𑀢𑁆𑀣𑁂𑀦 𑀉𑀢𑁆𑀢𑀭𑀺𑀢𑁆𑀯𑀸 𑀧𑀮𑀸𑀬𑀺. 𑀲𑀢𑁆𑀣𑀸 𑀇𑀫𑀁 𑀯𑀢𑁆𑀣𑀼𑀁 𑀆𑀳𑀭𑀺𑀢𑁆𑀯𑀸, ‘‘𑀇𑀤𑀸𑀦𑀺 𑀢𑀸𑀯 𑀢𑁆𑀯𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀧𑀭𑀺𑀪𑀸𑀲𑀁 𑀮𑀪𑀲𑀺, 𑀧𑀼𑀩𑁆𑀩𑁂𑀧𑀺 𑀇𑀫𑀁 𑀓𑁄𑀥𑀁 𑀦𑀺𑀲𑁆𑀲𑀸𑀬 𑀭𑀝𑁆𑀞𑀢𑁄 𑀧𑀩𑁆𑀩𑀸𑀚𑀺𑀢𑁄’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀅𑀣 𑀦𑀁 𑀑𑀯𑀤𑀦𑁆𑀢𑁄 𑀦 𑀔𑁄 𑀢𑁂 𑀢𑀁 𑀢𑀺𑀲𑁆𑀲 𑀧𑀢𑀺𑀭𑀽𑀧𑀦𑁆𑀢𑀺𑀆𑀤𑀺𑀫𑀸𑀳. 𑀦𑀯𑀫𑀁.

𑁧𑁦. 𑀣𑁂𑀭𑀦𑀸𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁪. 𑀤𑀲𑀫𑁂 𑀯𑀡𑁆𑀡𑀯𑀸𑀤𑀻𑀢𑀺 𑀆𑀦𑀺𑀲𑀁𑀲𑀯𑀸𑀤𑀻. 𑀬𑀁 𑀅𑀢𑀻𑀢𑀁 𑀢𑀁 𑀧𑀳𑀻𑀦𑀦𑁆𑀢𑀺 𑀅𑀢𑀻𑀢𑁂 𑀔𑀦𑁆𑀥𑀧𑀜𑁆𑀘𑀓𑁂 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀢𑀁 𑀧𑀳𑀻𑀦𑀁 𑀦𑀸𑀫 𑀳𑁄𑀢𑀺. 𑀅𑀦𑀸𑀕𑀢𑀦𑁆𑀢𑀺 𑀅𑀦𑀸𑀕𑀢𑀫𑁆𑀧𑀺 𑀔𑀦𑁆𑀥𑀧𑀜𑁆𑀘𑀓𑀁 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀦 𑀧𑀝𑀺𑀦𑀺𑀲𑁆𑀲𑀝𑁆𑀞𑀁 𑀦𑀸𑀫 𑀳𑁄𑀢𑀺. 𑀲𑀩𑁆𑀩𑀸𑀪𑀺𑀪𑀼𑀦𑁆𑀢𑀺 𑀲𑀩𑁆𑀩𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀘 𑀢𑀬𑁄 𑀪𑀯𑁂 𑀘 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑀁. 𑀲𑀩𑁆𑀩𑀯𑀺𑀤𑀼𑀦𑁆𑀢𑀺 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀩𑁆𑀩𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀞𑀺𑀢𑀁. 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀢𑁂𑀲𑁆𑀯𑁂𑀯 𑀥𑀫𑁆𑀫𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀮𑁂𑀧𑁂𑀳𑀺 𑀅𑀦𑀼𑀧𑀮𑀺𑀢𑁆𑀢𑀁. 𑀲𑀩𑁆𑀩𑀜𑁆𑀚𑀳𑀦𑁆𑀢𑀺 𑀢𑀤𑁂𑀯 𑀲𑀩𑁆𑀩𑀁 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀚𑀳𑀺𑀢𑁆𑀯𑀸 𑀞𑀺𑀢𑀁. 𑀢𑀡𑁆𑀳𑀓𑁆𑀔𑀬𑁂 𑀯𑀺𑀫𑀼𑀢𑁆𑀢𑀦𑁆𑀢𑀺 𑀢𑀡𑁆𑀳𑀓𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀢𑀤𑀸𑀭𑀫𑁆𑀫𑀡𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀁. 𑀤𑀲𑀫𑀁.

𑁧𑁧. 𑀫𑀳𑀸𑀓𑀧𑁆𑀧𑀺𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁫. 𑀏𑀓𑀸𑀤𑀲𑀫𑁂 𑀫𑀳𑀸𑀓𑀧𑁆𑀧𑀺𑀦𑁄𑀢𑀺 𑀏𑀯𑀁𑀦𑀸𑀫𑀓𑁄 𑀅𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀦𑀁 𑀅𑀩𑁆𑀪𑀦𑁆𑀢𑀭𑁄 𑀫𑀳𑀸𑀣𑁂𑀭𑁄. 𑀲𑁄 𑀓𑀺𑀭 𑀕𑀺𑀳𑀺𑀓𑀸𑀮𑁂 𑀓𑀼𑀓𑁆𑀓𑀼𑀝𑀯𑀢𑀻𑀦𑀕𑀭𑁂 𑀢𑀺𑀬𑁄𑀚𑀦𑀲𑀢𑀺𑀓𑀁 𑀭𑀚𑁆𑀚𑀁 𑀅𑀓𑀸𑀲𑀺. 𑀧𑀘𑁆𑀙𑀺𑀫𑀪𑀯𑀺𑀓𑀢𑁆𑀢𑀸 𑀧𑀦 𑀢𑀣𑀸𑀭𑀽𑀧𑀁 𑀲𑀸𑀲𑀦𑀁 𑀲𑁄𑀢𑀼𑀁 𑀑𑀳𑀺𑀢𑀲𑁄𑀢𑁄 𑀯𑀺𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀅𑀫𑀘𑁆𑀘𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀉𑀬𑁆𑀬𑀸𑀦𑀓𑀻𑀴𑀺𑀓𑀁 𑀅𑀕𑀫𑀸𑀲𑀺. 𑀢𑀤𑀸 𑀘 𑀫𑀚𑁆𑀛𑀺𑀫𑀤𑁂𑀲𑀢𑁄 𑀚𑀗𑁆𑀖𑀯𑀸𑀡𑀺𑀚𑀸 𑀢𑀁 𑀦𑀕𑀭𑀁 𑀕𑀦𑁆𑀢𑁆𑀯𑀸, 𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸, ‘‘𑀭𑀸𑀚𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀧𑀡𑁆𑀡𑀸𑀓𑀸𑀭𑀳𑀢𑁆𑀣𑀸 𑀭𑀸𑀚𑀓𑀼𑀮𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸, ‘‘𑀭𑀸𑀚𑀸 𑀉𑀬𑁆𑀬𑀸𑀦𑀁 𑀕𑀢𑁄’’𑀢𑀺 𑀲𑀼𑀢𑁆𑀯𑀸, 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸, 𑀤𑁆𑀯𑀸𑀭𑁂 𑀞𑀺𑀢𑀸, 𑀧𑀝𑀺𑀳𑀸𑀭𑀲𑁆𑀲 𑀆𑀭𑁄𑀘𑀬𑀺𑀁𑀲𑀼. 𑀅𑀣 𑀭𑀜𑁆𑀜𑁄 𑀦𑀺𑀯𑁂𑀤𑀺𑀢𑁂 𑀭𑀸𑀚𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀺𑀬𑁆𑀬𑀸𑀢𑀺𑀢𑀧𑀡𑁆𑀡𑀸𑀓𑀸𑀭𑁂 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁂, ‘‘𑀢𑀸𑀢𑀸, 𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺? 𑀧𑀼𑀘𑁆𑀙𑀺. ‘‘𑀲𑀸𑀯𑀢𑁆𑀣𑀺𑀢𑁄 𑀤𑁂𑀯𑀸’’𑀢𑀺. ‘‘𑀓𑀘𑁆𑀘𑀺 𑀯𑁄 𑀭𑀝𑁆𑀞𑀁 𑀲𑀼𑀪𑀺𑀓𑁆𑀔𑀁, 𑀥𑀫𑁆𑀫𑀺𑀓𑁄 𑀭𑀸𑀚𑀸’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀅𑀢𑁆𑀣𑀺 𑀧𑀦 𑀢𑀼𑀫𑁆𑀳𑀸𑀓𑀁 𑀤𑁂𑀲𑁂 𑀓𑀺𑀜𑁆𑀘𑀺 𑀲𑀸𑀲𑀦’’𑀦𑁆𑀢𑀺? ‘‘𑀅𑀢𑁆𑀣𑀺, 𑀤𑁂𑀯, 𑀦 𑀧𑀦 𑀲𑀓𑁆𑀓𑀸 𑀉𑀘𑁆𑀙𑀺𑀝𑁆𑀞𑀫𑀼𑀔𑁂𑀳𑀺 𑀓𑀣𑁂𑀢𑀼’’𑀦𑁆𑀢𑀺. 𑀭𑀸𑀚𑀸 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑁂𑀦 𑀉𑀤𑀓𑀁 𑀤𑀸𑀧𑁂𑀲𑀺. 𑀢𑁂 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀤𑀲𑀩𑀮𑀸𑀪𑀺𑀫𑀼𑀔𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸, ‘‘𑀤𑁂𑀯, 𑀅𑀫𑁆𑀳𑀸𑀓𑀁 𑀤𑁂𑀲𑁂 𑀩𑀼𑀤𑁆𑀥𑀭𑀢𑀦𑀁 𑀦𑀸𑀫 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀆𑀳𑀁𑀲𑀼. 𑀭𑀜𑁆𑀜𑁄 ‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑁂 𑀲𑀼𑀢𑀫𑀢𑁆𑀢𑁂 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀢𑀢𑁄 ‘‘𑀩𑀼𑀤𑁆𑀥𑁄𑀢𑀺, 𑀢𑀸𑀢𑀸, 𑀯𑀤𑀣𑀸’’𑀢𑀺? 𑀆𑀳. ‘‘𑀩𑀼𑀤𑁆𑀥𑁄𑀢𑀺 𑀤𑁂𑀯 𑀯𑀤𑀸𑀫𑀸’’𑀢𑀺. 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀤𑀸𑀧𑁂𑀢𑁆𑀯𑀸, ‘‘𑀩𑀼𑀤𑁆𑀥𑁄𑀢𑀺 𑀧𑀤𑀁 𑀅𑀧𑀭𑀺𑀫𑀸𑀡𑀁, 𑀦𑀸𑀲𑁆𑀲 𑀲𑀓𑁆𑀓𑀸 𑀧𑀭𑀺𑀫𑀸𑀡𑀁 𑀓𑀸𑀢𑀼’’𑀦𑁆𑀢𑀺 𑀢𑀲𑁆𑀫𑀺𑀁𑀬𑁂𑀯 𑀧𑀲𑀦𑁆𑀦𑁄 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑀼𑀦 ‘‘𑀅𑀜𑁆𑀜𑀁 𑀓𑀺𑀁 𑀲𑀸𑀲𑀦’’𑀦𑁆𑀢𑀺? 𑀧𑀼𑀘𑁆𑀙𑀺. ‘‘𑀤𑁂𑀯 𑀥𑀫𑁆𑀫𑀭𑀢𑀦𑀁 𑀦𑀸𑀫 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀢𑀣𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀅𑀧𑀭𑀫𑁆𑀧𑀺 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑀼𑀦 ‘‘𑀅𑀜𑁆𑀜𑀁 𑀓𑀺𑀁 𑀲𑀸𑀲𑀦’’𑀦𑁆𑀢𑀺? 𑀧𑀼𑀘𑁆𑀙𑀺. ‘‘𑀲𑀗𑁆𑀖𑀭𑀢𑀦𑀁 𑀤𑁂𑀯 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀢𑀣𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀅𑀧𑀭𑀫𑁆𑀧𑀺 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀤𑀺𑀦𑁆𑀦𑀪𑀸𑀯𑀁 𑀧𑀡𑁆𑀡𑁂 𑀮𑀺𑀔𑀺𑀢𑁆𑀯𑀸, ‘‘𑀢𑀸𑀢𑀸, 𑀤𑁂𑀯𑀺𑀬𑀸 𑀲𑀦𑁆𑀢𑀺𑀓𑀁 𑀕𑀘𑁆𑀙𑀣𑀸’’𑀢𑀺 𑀧𑁂𑀲𑁂𑀲𑀺. 𑀢𑁂𑀲𑀼 𑀕𑀢𑁂𑀲𑀼 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺, ‘‘𑀢𑀸𑀢𑀸, 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀤𑁂𑀯 𑀢𑀼𑀫𑁆𑀳𑁂 𑀓𑀺𑀁 𑀓𑀢𑁆𑀢𑀼𑀓𑀸𑀫𑀸’’𑀢𑀺? ‘‘𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀫𑀬𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀖𑀭𑀁 𑀯𑀸 𑀓𑀼𑀝𑀼𑀫𑁆𑀩𑀁 𑀯𑀸 𑀅𑀦𑀧𑀮𑁄𑀓𑁂𑀢𑁆𑀯𑀸 𑀬𑁂 𑀅𑀲𑁆𑀲𑁂 𑀆𑀭𑀼𑀬𑁆𑀳 𑀕𑀢𑀸, 𑀢𑁂𑀳𑁂𑀯 𑀦𑀺𑀓𑁆𑀔𑀫𑀺𑀁𑀲𑀼.

𑀯𑀸𑀡𑀺𑀚𑀸 𑀅𑀦𑁄𑀚𑀸𑀤𑁂𑀯𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀡𑁆𑀡𑀁 𑀤𑀲𑁆𑀲𑁂𑀲𑀼𑀁. 𑀲𑀸 𑀯𑀸𑀘𑁂𑀢𑁆𑀯𑀸 ‘‘𑀭𑀜𑁆𑀜𑀸 𑀢𑀼𑀫𑁆𑀳𑀸𑀓𑀁 𑀩𑀳𑀽 𑀓𑀳𑀸𑀧𑀡𑀸 𑀤𑀺𑀦𑁆𑀦𑀸, 𑀓𑀺𑀁 𑀢𑀼𑀫𑁆𑀳𑁂𑀳𑀺 𑀓𑀢𑀁, 𑀢𑀸𑀢𑀸’’𑀢𑀺? 𑀧𑀼𑀘𑁆𑀙𑀺. ‘‘𑀧𑀺𑀬𑀲𑀸𑀲𑀦𑀁 𑀤𑁂𑀯𑀺 𑀆𑀦𑀻𑀢’’𑀦𑁆𑀢𑀺. ‘‘𑀅𑀫𑁆𑀳𑁂𑀧𑀺 𑀲𑀓𑁆𑀓𑀸, 𑀢𑀸𑀢𑀸, 𑀲𑀼𑀡𑀸𑀧𑁂𑀢𑀼’’𑀦𑁆𑀢𑀺. ‘‘𑀲𑀓𑁆𑀓𑀸 𑀤𑁂𑀯𑀺, 𑀉𑀘𑁆𑀙𑀺𑀝𑁆𑀞𑀫𑀼𑀔𑁂𑀳𑀺 𑀧𑀦 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸’’𑀢𑀺. 𑀲𑀸 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑁂𑀦 𑀉𑀤𑀓𑀁 𑀤𑀸𑀧𑁂𑀲𑀺. 𑀢𑁂 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀺𑀢𑀦𑀬𑁂𑀦𑁂𑀯 𑀆𑀭𑁄𑀘𑁂𑀲𑀼𑀁. 𑀲𑀸𑀧𑀺 𑀲𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀧𑀸𑀫𑁄𑀚𑁆𑀚𑀸 𑀢𑁂𑀦𑁂𑀯 𑀦𑀬𑁂𑀦 𑀏𑀓𑁂𑀓𑀲𑁆𑀫𑀺𑀁 𑀧𑀤𑁂 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀝𑀺𑀜𑁆𑀜𑀸𑀕𑀡𑀦𑀸𑀬 𑀢𑀻𑀡𑀺 𑀢𑀻𑀡𑀺 𑀓𑀢𑁆𑀯𑀸 𑀦𑀯𑀲𑀢𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀯𑀸𑀡𑀺𑀚𑀸 𑀲𑀩𑁆𑀩𑀸𑀦𑀺𑀧𑀺 𑀤𑁆𑀯𑀸𑀤𑀲𑀲𑀢𑀲𑀳𑀲𑁆𑀲𑀸𑀦𑀺 𑀮𑀪𑀺𑀁𑀲𑀼. 𑀅𑀣 𑀦𑁂 ‘‘𑀭𑀸𑀚𑀸 𑀓𑀳𑀁, 𑀢𑀸𑀢𑀸’’𑀢𑀺, 𑀧𑀼𑀘𑁆𑀙𑀺. ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀦𑀺𑀓𑁆𑀔𑀦𑁆𑀢𑁄 𑀤𑁂𑀯𑀻’’𑀢𑀺. ‘‘𑀢𑁂𑀦 𑀳𑀺, 𑀢𑀸𑀢𑀸, 𑀢𑀼𑀫𑁆𑀳𑁂 𑀕𑀘𑁆𑀙𑀣𑀸’’𑀢𑀺 𑀢𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀕𑀢𑀸𑀦𑀁 𑀅𑀫𑀘𑁆𑀘𑀸𑀦𑀁 𑀫𑀸𑀢𑀼𑀕𑀸𑀫𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀲𑀸𑀫𑀺𑀓𑀸𑀦𑀁 𑀕𑀢𑀝𑁆𑀞𑀸𑀦𑀁 𑀚𑀸𑀦𑀸𑀣 𑀅𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀚𑀸𑀦𑀸𑀫 𑀅𑀬𑁆𑀬𑁂, 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑀓𑀻𑀴𑀺𑀓𑀁 𑀕𑀢𑀸’’𑀢𑀺. 𑀆𑀫 𑀕𑀢𑀸, 𑀢𑀢𑁆𑀣 𑀧𑀦 𑀕𑀦𑁆𑀢𑁆𑀯𑀸, ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄, 𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄, 𑀲𑀗𑁆𑀖𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸, ‘‘𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀕𑀢𑀸. ‘‘𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀢𑀼𑀫𑁆𑀳𑁂 𑀧𑀦 𑀅𑀬𑁆𑀬𑁂 𑀓𑀺𑀁 𑀓𑀢𑁆𑀢𑀼𑀓𑀸𑀫𑀸’’𑀢𑀺? ‘‘𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀦 𑀢𑁂𑀳𑀺 𑀯𑀦𑁆𑀢𑀯𑀫𑀦𑀁 𑀚𑀺𑀯𑁆𑀳𑀕𑁆𑀕𑁂 𑀞𑀧𑁂𑀬𑁆𑀬’’𑀦𑁆𑀢𑀺. ‘‘𑀬𑀤𑀺 𑀏𑀯𑀁, 𑀫𑀬𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑀸 𑀭𑀣𑁂 𑀬𑁄𑀚𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼.

𑀭𑀸𑀚𑀸𑀧𑀺 𑀅𑀫𑀘𑁆𑀘𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀕𑀗𑁆𑀕𑀸𑀬 𑀢𑀻𑀭𑀁 𑀧𑀸𑀧𑀼𑀡𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀕𑀗𑁆𑀕𑀸 𑀧𑀽𑀭𑀸 𑀳𑁄𑀢𑀺. 𑀅𑀣 𑀦𑀁 𑀤𑀺𑀲𑁆𑀯𑀸, ‘‘𑀅𑀬𑀁 𑀕𑀗𑁆𑀕𑀸 𑀧𑀽𑀭𑀸 𑀘𑀡𑁆𑀟𑀫𑀘𑁆𑀙𑀸𑀓𑀺𑀡𑁆𑀡𑀸, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀆𑀕𑀢𑀸 𑀤𑀸𑀲𑀸 𑀯𑀸 𑀫𑀦𑀼𑀲𑁆𑀲𑀸 𑀯𑀸 𑀦𑀢𑁆𑀣𑀺, 𑀬𑁂 𑀦𑁄 𑀦𑀸𑀯𑀁 𑀯𑀸 𑀉𑀴𑀼𑀫𑁆𑀧𑀁 𑀯𑀸 𑀓𑀢𑁆𑀯𑀸 𑀤𑀤𑁂𑀬𑁆𑀬𑀼𑀁, 𑀏𑀢𑀲𑁆𑀲 𑀧𑀦 𑀲𑀢𑁆𑀣𑀼 𑀕𑀼𑀡𑀸 𑀦𑀸𑀫 𑀳𑁂𑀝𑁆𑀞𑀸 𑀅𑀯𑀻𑀘𑀺𑀢𑁄 𑀉𑀧𑀭𑀺 𑀬𑀸𑀯 𑀪𑀯𑀕𑁆𑀕𑀸 𑀧𑀢𑁆𑀣𑀝𑀸, 𑀲𑀘𑁂 𑀏𑀲 𑀲𑀢𑁆𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀇𑀫𑁂𑀲𑀁 𑀅𑀲𑁆𑀲𑀸𑀦𑀁 𑀔𑀼𑀭𑀧𑀺𑀝𑁆𑀞𑀸𑀦𑀺 𑀫𑀸 𑀢𑁂𑀫𑁂𑀦𑁆𑀢𑀽’’𑀢𑀺 𑀉𑀤𑀓𑀧𑀺𑀝𑁆𑀞𑁂𑀦 𑀅𑀲𑁆𑀲𑁂 𑀧𑀓𑁆𑀔𑀦𑁆𑀤𑀸𑀧𑁂𑀲𑀼𑀁. 𑀏𑀓𑀅𑀲𑁆𑀲𑀲𑁆𑀲𑀸𑀧𑀺 𑀔𑀼𑀭𑀧𑀺𑀝𑁆𑀞𑀫𑀢𑁆𑀢𑀁 𑀦 𑀢𑁂𑀫𑀺, 𑀭𑀸𑀚𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀸 𑀯𑀺𑀬 𑀧𑀭𑀢𑀻𑀭𑀁 𑀧𑀢𑁆𑀯𑀸 𑀧𑀼𑀭𑀢𑁄 𑀅𑀜𑁆𑀜𑀁 𑀫𑀳𑀸𑀦𑀤𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀢𑁆𑀣 𑀅𑀜𑁆𑀜𑀸 𑀲𑀘𑁆𑀘𑀓𑀺𑀭𑀺𑀬𑀸 𑀦𑀢𑁆𑀣𑀺, 𑀢𑀸𑀬 𑀏𑀯 𑀲𑀘𑁆𑀘𑀓𑀺𑀭𑀺𑀬𑀸𑀬 𑀢𑀫𑁆𑀧𑀺 𑀅𑀟𑁆𑀠𑀬𑁄𑀚𑀦𑀯𑀺𑀢𑁆𑀣𑀸𑀭𑀁 𑀦𑀤𑀺𑀁 𑀅𑀢𑀺𑀓𑁆𑀓𑀫𑀺𑀁𑀲𑀼. 𑀅𑀣 𑀢𑀢𑀺𑀬𑀁 𑀘𑀦𑁆𑀤𑀪𑀸𑀕𑀁 𑀦𑀸𑀫 𑀫𑀳𑀸𑀦𑀤𑀺𑀁 𑀧𑀢𑁆𑀯𑀸 𑀢𑀫𑁆𑀧𑀺 𑀢𑀸𑀬 𑀏𑀯 𑀲𑀘𑁆𑀘𑀓𑀺𑀭𑀺𑀬𑀸𑀬 𑀅𑀢𑀺𑀓𑁆𑀓𑀫𑀺𑀁𑀲𑀼.

𑀲𑀢𑁆𑀣𑀸𑀧𑀺 𑀢𑀁𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀚𑁆𑀚 𑀫𑀳𑀸𑀓𑀧𑁆𑀧𑀺𑀦𑁄 𑀢𑀺𑀬𑁄𑀚𑀦𑀲𑀢𑀺𑀓𑀁 𑀭𑀚𑁆𑀚𑀁 𑀧𑀳𑀸𑀬 𑀅𑀫𑀘𑁆𑀘𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼𑀁 𑀆𑀕𑀘𑁆𑀙𑀢𑀻’’𑀢𑀺 𑀤𑀺𑀲𑁆𑀯𑀸, ‘‘𑀫𑀬𑀸 𑀢𑁂𑀲𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀸𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸, 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀢𑁂𑀲𑀁 𑀉𑀢𑁆𑀢𑀭𑀡𑀢𑀺𑀢𑁆𑀣𑀲𑁆𑀲 𑀅𑀪𑀺𑀫𑀼𑀔𑁂 𑀞𑀸𑀦𑁂 𑀫𑀳𑀸𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀢𑀢𑁆𑀣 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀢𑁂𑀦 𑀢𑀺𑀢𑁆𑀣𑁂𑀦 𑀉𑀢𑁆𑀢𑀭𑀦𑁆𑀢𑀸 𑀘 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀸𑀯𑀦𑁆𑀢𑀺𑀬𑁄 𑀑𑀮𑁄𑀓𑁂𑀦𑁆𑀢𑀸 𑀤𑀲𑀩𑀮𑀲𑁆𑀲 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀁 𑀫𑀼𑀔𑀁 𑀤𑀺𑀲𑁆𑀯𑀸, ‘‘𑀬𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀫𑀬𑀁 𑀧𑀩𑁆𑀩𑀚𑀺𑀢𑀸, 𑀅𑀤𑁆𑀥𑀸 𑀲𑁄 𑀏𑀲𑁄’’𑀢𑀺 𑀤𑀲𑁆𑀲𑀦𑁂𑀦𑁂𑀯 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀦𑀢𑀸 𑀯𑀦𑁆𑀤𑀫𑀸𑀦𑀸 𑀆𑀕𑀫𑁆𑀫 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀁𑀲𑀼. 𑀭𑀸𑀚𑀸 𑀕𑁄𑀧𑁆𑀨𑀓𑁂𑀲𑀼 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀅𑀫𑀘𑁆𑀘𑀲𑀳𑀲𑁆𑀲𑁂𑀦. 𑀲𑀢𑁆𑀣𑀸 𑀢𑁂𑀲𑀁 𑀥𑀫𑁆𑀫𑀁 𑀓𑀣𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂 𑀇𑀫𑁂 𑀘𑀻𑀯𑀭𑀤𑀸𑀦𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀅𑀢𑁆𑀢𑀦𑁄 𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸𑀯 𑀆𑀕𑀢𑀸’’𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀁 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸, ‘‘𑀏𑀣 𑀪𑀺𑀓𑁆𑀔𑀯𑁄 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 𑀆𑀳. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀅𑀳𑁄𑀲𑀺, 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼.

𑀅𑀦𑁄𑀚𑀸𑀧𑀺 𑀤𑁂𑀯𑀻 𑀭𑀣𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀕𑀗𑁆𑀕𑀸𑀢𑀻𑀭𑀁 𑀧𑀢𑁆𑀯𑀸 𑀭𑀜𑁆𑀜𑁄 𑀅𑀢𑁆𑀣𑀸𑀬 𑀆𑀪𑀢𑀁 𑀦𑀸𑀯𑀁 𑀯𑀸 𑀉𑀴𑀼𑀫𑁆𑀧𑀁 𑀯𑀸 𑀅𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀩𑁆𑀬𑀢𑁆𑀢𑀢𑀸𑀬 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀸𑀚𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀲𑁄 𑀧𑀦 𑀲𑀢𑁆𑀣𑀸 𑀦 𑀓𑁂𑀯𑀮𑀁 𑀢𑁂𑀲𑀁𑀬𑁂𑀯 𑀅𑀢𑁆𑀣𑀸𑀬 𑀦𑀺𑀩𑁆𑀩𑀢𑁆𑀢𑁄, 𑀲𑀘𑁂 𑀲𑁄 𑀲𑀢𑁆𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀫𑁆𑀳𑀸𑀓𑀁 𑀭𑀣𑀸 𑀫𑀸 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀁𑀲𑀽’’𑀢𑀺 𑀉𑀤𑀓𑀧𑀺𑀝𑁆𑀞𑁂 𑀭𑀣𑁂 𑀧𑀓𑁆𑀔𑀦𑁆𑀤𑀸𑀧𑁂𑀲𑀺. 𑀭𑀣𑀸𑀦𑀁 𑀦𑁂𑀫𑀺𑀯𑀝𑁆𑀝𑀺𑀫𑀢𑁆𑀢𑀫𑁆𑀧𑀺 𑀦 𑀢𑁂𑀫𑀺. 𑀤𑀼𑀢𑀺𑀬𑀢𑀢𑀺𑀬𑀦𑀤𑀻𑀧𑀺 𑀢𑁂𑀦𑁂𑀯 𑀲𑀘𑁆𑀘𑀓𑀸𑀭𑁂𑀦 𑀉𑀢𑁆𑀢𑀭𑀫𑀸𑀦𑀸𑀬𑁂𑀯 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀲𑀢𑁆𑀣𑀸𑀭𑀁 𑀅𑀤𑁆𑀤𑀲. 𑀲𑀢𑁆𑀣𑀸 ‘‘𑀇𑀫𑀸𑀲𑀁 𑀅𑀢𑁆𑀢𑀦𑁄 𑀲𑀸𑀫𑀺𑀓𑁂 𑀧𑀲𑁆𑀲𑀦𑁆𑀢𑀻𑀦𑀁 𑀙𑀦𑁆𑀤𑀭𑀸𑀕𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀁 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬, 𑀲𑁄 𑀏𑀯𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀬𑀣𑀸 𑀅𑀜𑁆𑀜𑀫𑀜𑁆𑀜𑁂 𑀦 𑀧𑀲𑁆𑀲𑀦𑁆𑀢𑀺, 𑀢𑀣𑀸 𑀅𑀓𑀸𑀲𑀺. 𑀢𑀸 𑀲𑀩𑁆𑀩𑀸𑀧𑀺 𑀢𑀺𑀢𑁆𑀣𑀢𑁄 𑀉𑀢𑁆𑀢𑀭𑀺𑀢𑁆𑀯𑀸 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑀸𑀲𑀁 𑀥𑀫𑁆𑀫𑀁 𑀓𑀣𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀅𑀜𑁆𑀜𑀫𑀜𑁆𑀜𑁂 𑀧𑀲𑁆𑀲𑀺𑀁𑀲𑀼. 𑀲𑀢𑁆𑀣𑀸 ‘‘𑀉𑀧𑁆𑀧𑀮𑀯𑀡𑁆𑀡𑀸 𑀆𑀕𑀘𑁆𑀙𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀣𑁂𑀭𑀻 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀆𑀤𑀸𑀬 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀲𑁆𑀲𑀬𑀁 𑀕𑀢𑀸. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀇𑀫𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀫𑀳𑀸𑀓𑀧𑁆𑀧𑀺𑀦𑁄𑀢𑀺 𑀏𑀯𑀁 𑀦𑀸𑀫𑀓𑁄 𑀅𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀦𑀁 𑀅𑀩𑁆𑀪𑀦𑁆𑀢𑀭𑁄 𑀫𑀳𑀸𑀣𑁂𑀭𑁄’’𑀢𑀺.

𑀚𑀦𑁂𑀢𑀲𑁆𑀫𑀺𑀦𑁆𑀢𑀺 𑀚𑀦𑀺𑀢𑁂 𑀧𑀚𑀸𑀬𑀸𑀢𑀺 𑀅𑀢𑁆𑀣𑁄. 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄𑀢𑀺 𑀬𑁂 ‘‘𑀫𑀬𑀁 𑀯𑀸𑀲𑁂𑀝𑁆𑀞𑀸 𑀕𑁄𑀢𑀫𑀸’’𑀢𑀺 𑀕𑁄𑀢𑁆𑀢𑀁 𑀧𑀝𑀺𑀲𑀭𑀦𑁆𑀢𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀢𑁂𑀲𑀁 𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 𑀅𑀝𑁆𑀞𑀳𑀺 𑀯𑀺𑀚𑁆𑀚𑀸𑀳𑀺 𑀘𑁂𑀯 𑀧𑀦𑁆𑀦𑀭𑀲𑀥𑀫𑁆𑀫𑀪𑁂𑀤𑁂𑀦 𑀘𑀭𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀢𑀧𑀢𑀻𑀢𑀺 𑀯𑀺𑀭𑁄𑀘𑀢𑀺. 𑀛𑀸𑀬𑀻 𑀢𑀧𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄 𑀤𑀼𑀯𑀺𑀥𑁂𑀦 𑀛𑀸𑀦𑁂𑀦 𑀛𑀸𑀬𑀫𑀸𑀦𑁄 𑀢𑀧𑀢𑀺 𑀯𑀺𑀭𑁄𑀘𑀢𑀺. 𑀢𑀲𑁆𑀫𑀺𑀁 𑀧𑀦 𑀔𑀡𑁂 𑀓𑀸𑀮𑀼𑀤𑀸𑀬𑀺𑀢𑁆𑀣𑁂𑀭𑁄 𑀤𑀼𑀯𑀺𑀥𑁂𑀦 𑀛𑀸𑀦𑁂𑀦 𑀛𑀸𑀬𑀫𑀸𑀦𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀩𑀼𑀤𑁆𑀥𑁄 𑀢𑀧𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀯𑀺𑀭𑁄𑀘𑀢𑀺. 𑀲𑀩𑁆𑀩𑀫𑀗𑁆𑀕𑀮𑀕𑀸𑀣𑀸 𑀓𑀺𑀭𑁂𑀲𑀸. 𑀪𑀸𑀢𑀺𑀓𑀭𑀸𑀚𑀸 𑀓𑀺𑀭 𑀏𑀓𑀁 𑀧𑀽𑀚𑀁 𑀓𑀸𑀭𑁂𑀢𑁆𑀯𑀸 𑀆𑀘𑀭𑀺𑀬𑀓𑀁 𑀆𑀳 𑁋 ‘‘𑀢𑀻𑀳𑀺 𑀭𑀢𑀦𑁂𑀳𑀺 𑀅𑀫𑀼𑀢𑁆𑀢𑀁 𑀏𑀓𑀁 𑀚𑀬𑀫𑀗𑁆𑀕𑀮𑀁 𑀯𑀤𑀣𑀸’’𑀢𑀺. 𑀲𑁄 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀇𑀫𑀁 𑀕𑀸𑀣𑀁 𑀯𑀤𑀦𑁆𑀢𑁄 ‘‘𑀤𑀺𑀯𑀸 𑀢𑀧𑀢𑀺 𑀆𑀤𑀺𑀘𑁆𑀘𑁄’’𑀢𑀺 𑀯𑀢𑁆𑀯𑀸 𑀅𑀢𑁆𑀣𑀗𑁆𑀕𑀫𑁂𑀦𑁆𑀢𑀲𑁆𑀲 𑀲𑀽𑀭𑀺𑀬𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺. ‘‘𑀭𑀢𑁆𑀢𑀺𑀫𑀸𑀪𑀸𑀢𑀺 𑀘𑀦𑁆𑀤𑀺𑀫𑀸’’𑀢𑀺, 𑀉𑀝𑁆𑀞𑀳𑀦𑁆𑀢𑀲𑁆𑀲 𑀘𑀦𑁆𑀤𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺. ‘‘𑀲𑀦𑁆𑀦𑀤𑁆𑀥𑁄 𑀔𑀢𑁆𑀢𑀺𑀬𑁄 𑀢𑀧𑀢𑀻’’𑀢𑀺 𑀭𑀜𑁆𑀜𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺. ‘‘𑀛𑀸𑀬𑀻 𑀢𑀧𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺. ‘‘𑀩𑀼𑀤𑁆𑀥𑁄 𑀢𑀧𑀢𑀺 𑀢𑁂𑀚𑀲𑀸’’𑀢𑀺 𑀯𑀢𑁆𑀯𑀸 𑀧𑀦 𑀫𑀳𑀸𑀘𑁂𑀢𑀺𑀬𑀲𑁆𑀲 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺. 𑀅𑀣 𑀦𑀁 𑀭𑀸𑀚𑀸 ‘‘𑀫𑀸 𑀳𑀢𑁆𑀣𑀁 𑀑𑀢𑀸𑀭𑁂𑀳𑀻’’𑀢𑀺 𑀉𑀓𑁆𑀔𑀺𑀢𑁆𑀢𑀲𑁆𑀫𑀺𑀁𑀬𑁂𑀯 𑀳𑀢𑁆𑀣𑁂 𑀲𑀳𑀲𑁆𑀲𑀁 𑀞𑀧𑁂𑀲𑀺. 𑀏𑀓𑀸𑀤𑀲𑀫𑀁.

𑁧𑁨. 𑀲𑀳𑀸𑀬𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁬. 𑀤𑁆𑀯𑀸𑀤𑀲𑀫𑁂 𑀘𑀺𑀭𑀭𑀢𑁆𑀢𑀁𑀲𑀫𑁂𑀢𑀺𑀓𑀸𑀢𑀺 𑀤𑀻𑀖𑀭𑀢𑁆𑀢𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑀫𑁂𑀢𑁆𑀯𑀸 𑀞𑀺𑀢𑀮𑀤𑁆𑀥𑀺𑀦𑁄. 𑀢𑁂 𑀓𑀺𑀭 𑀧𑀜𑁆𑀘𑀚𑀸𑀢𑀺𑀲𑀢𑀸𑀦𑀺 𑀏𑀓𑀢𑁄𑀯 𑀯𑀺𑀘𑀭𑀺𑀁𑀲𑀼. 𑀲𑀫𑁂𑀢𑀺 𑀦𑁂𑀲𑀁 𑀲𑀤𑁆𑀥𑀫𑁆𑀫𑁄𑀢𑀺 𑀇𑀤𑀸𑀦𑀺 𑀇𑀫𑁂𑀲𑀁 𑀅𑀬𑀁 𑀲𑀸𑀲𑀦𑀥𑀫𑁆𑀫𑁄 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺. 𑀥𑀫𑁆𑀫𑁂 𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁂𑀢𑀺 𑀩𑀼𑀤𑁆𑀥𑁂𑀦 𑀧𑀯𑁂𑀤𑀺𑀢𑁂 𑀥𑀫𑁆𑀫𑁂 𑀏𑀢𑁂𑀲𑀁 𑀲𑀸𑀲𑀦𑀥𑀫𑁆𑀫𑁄 𑀲𑁄𑀪𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀯𑀺𑀦𑀻𑀢𑀸 𑀓𑀧𑁆𑀧𑀺𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑁂𑀦 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑁂 𑀲𑀼𑀝𑁆𑀞𑀼 𑀯𑀺𑀦𑀻𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀤𑁆𑀯𑀸𑀤𑀲𑀫𑀁.

𑀪𑀺𑀓𑁆𑀔𑀼𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀦𑀺𑀤𑀸𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.