𑁧𑁨. 𑀔𑁄𑀫𑀤𑀼𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁮. 𑀤𑁆𑀯𑀸𑀤𑀲𑀫𑁂 𑀔𑁄𑀫𑀤𑀼𑀲𑁆𑀲𑀁 𑀦𑀸𑀫𑀸𑀢𑀺 𑀔𑁄𑀫𑀤𑀼𑀲𑁆𑀲𑀸𑀦𑀁 𑀉𑀲𑁆𑀲𑀦𑁆𑀦𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀁. 𑀲𑀪𑀸𑀬𑀦𑁆𑀢𑀺 𑀲𑀸𑀮𑀸𑀬𑀁. 𑀨𑀼𑀲𑀸𑀬𑀢𑀻𑀢𑀺 𑀨𑀼𑀲𑀺𑀢𑀸𑀦𑀺 𑀫𑀼𑀜𑁆𑀘𑀢𑀺 𑀯𑀲𑁆𑀲𑀢𑀺. 𑀲𑀢𑁆𑀣𑀸 𑀓𑀺𑀭 𑀢𑀁 𑀲𑀪𑀁 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄 𑁋 ‘‘𑀫𑀬𑀺 𑀏𑀯𑀫𑁂𑀯𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀅𑀨𑀸𑀲𑀼𑀓𑀥𑀸𑀢𑀼𑀓𑀁 𑀳𑁄𑀢𑀺, 𑀏𑀓𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀲𑀺. 𑀲𑀪𑀸𑀥𑀫𑁆𑀫𑀦𑁆𑀢𑀺 𑀲𑀼𑀔𑀦𑀺𑀲𑀺𑀦𑁆𑀦𑁂 𑀓𑀺𑀭 𑀅𑀲𑀜𑁆𑀘𑀸𑀮𑁂𑀢𑁆𑀯𑀸 𑀏𑀓𑀧𑀲𑁆𑀲𑁂𑀦 𑀧𑀯𑀺𑀲𑀦𑀁 𑀢𑁂𑀲𑀁 𑀲𑀪𑀸𑀥𑀫𑁆𑀫𑁄 𑀦𑀸𑀫, 𑀦 𑀫𑀳𑀸𑀚𑀦𑀁 𑀘𑀸𑀮𑁂𑀢𑁆𑀯𑀸 𑀉𑀚𑀼𑀓𑀫𑁂𑀯 𑀧𑀯𑀺𑀲𑀦𑀁. 𑀪𑀕𑀯𑀸 𑀘 𑀉𑀚𑀼𑀓𑀫𑁂𑀯 𑀆𑀕𑀘𑁆𑀙𑀢𑀺, 𑀢𑁂𑀦 𑀢𑁂 𑀓𑀼𑀧𑀺𑀢𑀸 𑀪𑀕𑀯𑀦𑁆𑀢𑀁 𑀳𑀻𑀴𑁂𑀦𑁆𑀢𑀸 ‘‘𑀓𑁂 𑀘 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸, 𑀓𑁂 𑀘 𑀲𑀪𑀸𑀥𑀫𑁆𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳𑀁𑀲𑀼. 𑀲𑀦𑁆𑀢𑁄𑀢𑀺 𑀧𑀡𑁆𑀟𑀺𑀢𑀸 𑀲𑀧𑁆𑀧𑀼𑀭𑀺𑀲𑀸. 𑀧𑀳𑀸𑀬𑀸𑀢𑀺 𑀏𑀢𑁂 𑀭𑀸𑀕𑀸𑀤𑀬𑁄 𑀚𑀳𑀺𑀢𑁆𑀯𑀸 𑀭𑀸𑀕𑀸𑀤𑀺𑀯𑀺𑀦𑀬𑀸𑀬 𑀥𑀫𑁆𑀫𑀁 𑀪𑀡𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀲𑀦𑁆𑀢𑁄 𑀦𑀸𑀫𑀸𑀢𑀺. 𑀤𑁆𑀯𑀸𑀤𑀲𑀫𑀁.

𑀉𑀧𑀸𑀲𑀓𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀩𑁆𑀭𑀸𑀳𑁆𑀫𑀡𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.