𑁭. 𑀩𑁆𑀭𑀸𑀳𑁆𑀫𑀡𑀲𑀁𑀬𑀼𑀢𑁆𑀢𑀁

𑁧. 𑀅𑀭𑀳𑀦𑁆𑀢𑀯𑀕𑁆𑀕𑁄

𑁧. 𑀥𑀦𑀜𑁆𑀚𑀸𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁭. 𑀩𑁆𑀭𑀸𑀳𑁆𑀫𑀡𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀥𑀦𑀜𑁆𑀚𑀸𑀦𑀻𑀢𑀺 𑀥𑀦𑀜𑁆𑀚𑀸𑀦𑀺𑀕𑁄𑀢𑁆𑀢𑀸. 𑀉𑀓𑁆𑀓𑀝𑁆𑀞𑀕𑁄𑀢𑁆𑀢𑀸 𑀓𑀺𑀭𑁂𑀲𑀸. 𑀲𑁂𑀲𑀩𑁆𑀭𑀸𑀳𑁆𑀫𑀡𑀸 𑀓𑀺𑀭 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀚𑀸𑀢𑀸, 𑀥𑀦𑀜𑁆𑀚𑀸𑀦𑀺𑀕𑁄𑀢𑁆𑀢𑀸 𑀫𑀢𑁆𑀣𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸𑀢𑀺 𑀢𑁂𑀲𑀁 𑀮𑀤𑁆𑀥𑀺. 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀓𑀲𑁆𑀫𑀸 𑀉𑀤𑀸𑀦𑁂𑀲𑀺? 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 ‘‘𑀩𑀼𑀤𑁆𑀥𑁄 𑀥𑀫𑁆𑀫𑁄 𑀲𑀗𑁆𑀖𑁄’’𑀢𑀺 𑀯𑀼𑀢𑁆𑀢𑁂 𑀓𑀡𑁆𑀡𑁂 𑀧𑀺𑀤𑀳𑀢𑀺, 𑀣𑀤𑁆𑀥𑁄 𑀔𑀤𑀺𑀭𑀔𑀸𑀡𑀼𑀲𑀤𑀺𑀲𑁄. 𑀩𑁆𑀭𑀸𑀳𑁆𑀫𑀡𑀻 𑀧𑀦 𑀲𑁄𑀢𑀸𑀧𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸. 𑀩𑁆𑀭𑀸𑀳𑁆𑀫𑀡𑁄 𑀤𑀸𑀦𑀁 𑀤𑁂𑀦𑁆𑀢𑁄 𑀧𑀜𑁆𑀘𑀲𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑁄𑀤𑀓𑀁 𑀧𑀸𑀬𑀸𑀲𑀁 𑀤𑁂𑀢𑀺, 𑀩𑁆𑀭𑀸𑀳𑁆𑀫𑀡𑀻 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀦𑀸𑀦𑀸𑀭𑀲𑀪𑁄𑀚𑀦𑀁. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀦𑀤𑀺𑀯𑀲𑁂 𑀩𑁆𑀭𑀸𑀳𑁆𑀫𑀡𑀻 𑀢𑀲𑁆𑀲 𑀯𑀲𑀯𑀢𑁆𑀢𑀺𑀢𑀸𑀬 𑀧𑀳𑀻𑀦𑀫𑀘𑁆𑀙𑁂𑀭𑀢𑀸𑀬 𑀘 𑀲𑀳𑀢𑁆𑀣𑀸 𑀧𑀭𑀺𑀯𑀺𑀲𑀢𑀺. 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀦 𑀤𑀸𑀦𑀤𑀺𑀯𑀲𑁂 𑀩𑁆𑀭𑀸𑀳𑁆𑀫𑀡𑁄 𑀧𑀸𑀢𑁄𑀯 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀺𑀬𑀸 𑀲𑀤𑁆𑀥𑀺𑀁 𑀅𑀲𑀫𑁆𑀫𑀦𑁆𑀢𑁂𑀢𑁆𑀯𑀸 𑀧𑀜𑁆𑀘𑀲𑀢𑁂 𑀩𑁆𑀭𑀸𑀳𑁆𑀫𑀡𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀆𑀳 𑁋 ‘‘𑀲𑁆𑀯𑁂 𑀪𑁄𑀢𑀺 𑀅𑀫𑁆𑀳𑀸𑀓𑀁 𑀖𑀭𑁂 𑀧𑀜𑁆𑀘𑀲𑀢𑀸 𑀩𑁆𑀭𑀸𑀳𑁆𑀫𑀡𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺. 𑀫𑀬𑀸 𑀓𑀺𑀁 𑀓𑀸𑀢𑀩𑁆𑀩𑀁 𑀩𑁆𑀭𑀸𑀳𑁆𑀫𑀡𑀸𑀢𑀺? 𑀢𑀬𑀸 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑀁 𑀦𑀢𑁆𑀣𑀺, 𑀲𑀩𑁆𑀩𑀁 𑀧𑀘𑀦𑀧𑀭𑀺𑀯𑁂𑀲𑀦𑀁 𑀅𑀜𑁆𑀜𑁂 𑀓𑀭𑀺𑀲𑁆𑀲𑀦𑁆𑀢𑀺. 𑀬𑀁 𑀧𑀦 𑀢𑁆𑀯𑀁 𑀞𑀺𑀢𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 𑀔𑀺𑀧𑀺𑀢𑁆𑀯𑀸𑀧𑀺 𑀉𑀓𑁆𑀓𑀸𑀲𑀺𑀢𑁆𑀯𑀸𑀧𑀺 ‘‘𑀦𑀫𑁄 𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀢𑀲𑁆𑀲 𑀫𑀼𑀡𑁆𑀟𑀓𑀲𑁆𑀲 𑀲𑀫𑀡𑀓𑀲𑁆𑀲 𑀦𑀫𑀓𑁆𑀓𑀸𑀭𑀁 𑀓𑀭𑁄𑀲𑀺, 𑀢𑀁 𑀲𑁆𑀯𑁂 𑀏𑀓𑀤𑀺𑀯𑀲𑀫𑀢𑁆𑀢𑀁 𑀫𑀸 𑀅𑀓𑀸𑀲𑀺. 𑀢𑀁 𑀳𑀺 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸 𑀅𑀦𑀢𑁆𑀢𑀫𑀦𑀸 𑀳𑁄𑀦𑁆𑀢𑀺, 𑀫𑀸 𑀫𑀁 𑀩𑁆𑀭𑀸𑀳𑁆𑀫𑀡𑁂𑀳𑀺 𑀪𑀺𑀦𑁆𑀤𑀲𑀻𑀢𑀺. 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀸 𑀪𑀺𑀚𑁆𑀚 𑀤𑁂𑀯𑁂𑀳𑀺 𑀯𑀸, 𑀅𑀳𑀁 𑀧𑀦 𑀲𑀢𑁆𑀣𑀸𑀭𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀦 𑀲𑀓𑁆𑀓𑁄𑀫𑀺 𑀅𑀦𑀫𑀲𑁆𑀲𑀫𑀸𑀦𑀸 𑀲𑀡𑁆𑀞𑀸𑀢𑀼𑀦𑁆𑀢𑀺. 𑀪𑁄𑀢𑀺 𑀓𑀼𑀮𑀲𑀢𑀺𑀓𑁂 𑀕𑀸𑀫𑁂 𑀕𑀸𑀫𑀤𑁆𑀯𑀸𑀭𑀫𑁆𑀧𑀺 𑀢𑀸𑀯 𑀧𑀺𑀤𑀳𑀺𑀢𑀼𑀁 𑀯𑀸𑀬𑀫𑀦𑁆𑀢𑀺, 𑀢𑁆𑀯𑀁 𑀤𑁆𑀯𑀻𑀳𑀗𑁆𑀕𑀼𑀮𑁂𑀳𑀺 𑀧𑀺𑀤𑀳𑀺𑀢𑀩𑁆𑀩𑀁 𑀫𑀼𑀔𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑁄𑀚𑀦𑀓𑀸𑀮𑀫𑀢𑁆𑀢𑀁 𑀧𑀺𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀲𑀻𑀢𑀺. 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀢𑁆𑀯𑀸𑀧𑀺 𑀲𑁄 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀲𑁆𑀲𑀻𑀲𑀓𑁂 𑀞𑀧𑀺𑀢𑀁 𑀫𑀡𑁆𑀟𑀮𑀕𑁆𑀕𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑁋 ‘‘𑀪𑁄𑀢𑀺 𑀲𑀘𑁂 𑀲𑁆𑀯𑁂 𑀩𑁆𑀭𑀸𑀳𑁆𑀫𑀡𑁂𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 𑀢𑀁 𑀫𑀼𑀡𑁆𑀟𑀲𑀫𑀡𑀓𑀁 𑀦𑀫𑀲𑁆𑀲𑀲𑀺, 𑀇𑀫𑀺𑀦𑀸 𑀢𑀁 𑀔𑀕𑁆𑀕𑁂𑀦 𑀧𑀸𑀤𑀢𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀫𑀢𑁆𑀣𑀓𑀸 𑀓𑀴𑀻𑀭𑀁 𑀯𑀺𑀬 𑀓𑁄𑀝𑁆𑀝𑁂𑀢𑁆𑀯𑀸 𑀭𑀸𑀲𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀇𑀫𑀺𑀦𑀸 𑀫𑀡𑁆𑀟𑀮𑀕𑁆𑀕𑁂𑀦, 𑀧𑀸𑀤𑀢𑁄 𑀬𑀸𑀯 𑀫𑀢𑁆𑀣𑀓𑀸;

𑀓𑀴𑀻𑀭𑀫𑀺𑀯 𑀙𑁂𑀚𑁆𑀚𑀸𑀫𑀺, 𑀬𑀤𑀺 𑀫𑀺𑀘𑁆𑀙𑀁 𑀦 𑀓𑀸𑀳𑀲𑀺.

‘‘𑀲𑀘𑁂 𑀩𑀼𑀤𑁆𑀥𑁄𑀢𑀺 𑀪𑀡𑀲𑀺, 𑀲𑀘𑁂 𑀥𑀫𑁆𑀫𑁄𑀢𑀺 𑀪𑀸𑀲𑀲𑀺;

𑀲𑀘𑁂 𑀲𑀗𑁆𑀖𑁄𑀢𑀺 𑀓𑀺𑀢𑁆𑀢𑁂𑀲𑀺, 𑀚𑀻𑀯𑀦𑁆𑀢𑀻 𑀫𑁂 𑀦𑀺𑀯𑁂𑀲𑀦𑁂’’𑀢𑀺.

𑀅𑀭𑀺𑀬𑀲𑀸𑀯𑀺𑀓𑀸 𑀧𑀦 𑀧𑀣𑀯𑀻 𑀯𑀺𑀬 𑀤𑀼𑀧𑁆𑀧𑀓𑀫𑁆𑀧𑀸, 𑀲𑀺𑀦𑁂𑀭𑀼 𑀯𑀺𑀬 𑀤𑀼𑀧𑁆𑀧𑀭𑀺𑀯𑀢𑁆𑀢𑀺𑀬𑀸. 𑀲𑀸 𑀢𑁂𑀦 𑀦𑀁 𑀏𑀯𑀫𑀸𑀳 𑁋

‘‘𑀲𑀘𑁂 𑀫𑁂 𑀅𑀗𑁆𑀕𑀫𑀗𑁆𑀕𑀸𑀦𑀺, 𑀓𑀸𑀫𑀁 𑀙𑁂𑀚𑁆𑀚𑀲𑀺 𑀩𑁆𑀭𑀸𑀳𑁆𑀫𑀡;

𑀦𑁂𑀯𑀸𑀳𑀁 𑀯𑀺𑀭𑀫𑀺𑀲𑁆𑀲𑀸𑀫𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀸𑀲𑀦𑀸.

‘‘𑀦𑀸𑀳𑀁 𑀑𑀓𑁆𑀓𑀸 𑀯𑀭𑀥𑀭𑀸, 𑀲𑀓𑁆𑀓𑀸 𑀭𑁄𑀥𑀬𑀺𑀢𑀼𑀁 𑀚𑀺𑀦𑀸;

𑀥𑀻𑀢𑀸𑀳𑀁 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀙𑀺𑀦𑁆𑀤 𑀯𑀸 𑀫𑀁 𑀯𑀥𑀲𑁆𑀲𑀼 𑀯𑀸’’𑀢𑀺.

𑀏𑀯𑀁 𑀥𑀦𑀜𑁆𑀚𑀸𑀦𑀺𑀕𑀚𑁆𑀚𑀺𑀢𑀁 𑀦𑀸𑀫 𑀕𑀚𑁆𑀚𑀦𑁆𑀢𑀻 𑀧𑀜𑁆𑀘 𑀕𑀸𑀣𑀸𑀲𑀢𑀸𑀦𑀺 𑀅𑀪𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀺𑀁 𑀧𑀭𑀸𑀫𑀲𑀺𑀢𑀼𑀁 𑀯𑀸 𑀧𑀳𑀭𑀺𑀢𑀼𑀁 𑀯𑀸 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀪𑁄𑀢𑀺 𑀬𑀁 𑀢𑁂 𑀭𑀼𑀘𑁆𑀘𑀢𑀺, 𑀢𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀯𑀸 𑀔𑀕𑁆𑀕𑀁 𑀲𑀬𑀦𑁂 𑀔𑀺𑀧𑀺. 𑀧𑀼𑀦𑀤𑀺𑀯𑀲𑁂 𑀕𑁂𑀳𑀁 𑀳𑀭𑀺𑀢𑀼𑀧𑀮𑀺𑀢𑁆𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀮𑀸𑀚𑀸𑀧𑀼𑀡𑁆𑀡𑀖𑀝𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀢𑀢𑁆𑀣 𑀢𑀢𑁆𑀣 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀲𑀢𑀸𑀦𑀁 𑀦𑀯𑀲𑀧𑁆𑀧𑀺𑀲𑀓𑁆𑀔𑀭𑀫𑀥𑀼𑀬𑀼𑀢𑁆𑀢𑀁 𑀅𑀧𑁆𑀧𑁄𑀤𑀓𑀧𑀸𑀬𑀸𑀲𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺.

𑀩𑁆𑀭𑀸𑀳𑁆𑀫𑀡𑀻𑀧𑀺 𑀧𑀸𑀢𑁄𑀯 𑀕𑀦𑁆𑀥𑁄𑀤𑀓𑁂𑀦 𑀲𑀬𑀁 𑀦𑁆𑀳𑀸𑀬𑀺𑀢𑁆𑀯𑀸 𑀲𑀳𑀲𑁆𑀲𑀕𑁆𑀖𑀦𑀓𑀁 𑀅𑀳𑀢𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀜𑁆𑀘𑀲𑀢𑀕𑁆𑀖𑀦𑀓𑀁 𑀏𑀓𑀁𑀲𑀁 𑀓𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀪𑀢𑁆𑀢𑀕𑁆𑀕𑁂 𑀩𑁆𑀭𑀸𑀳𑁆𑀫𑀡𑁂 𑀧𑀭𑀺𑀯𑀺𑀲𑀫𑀸𑀦𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀧𑀦𑁆𑀢𑀺𑀬𑀁 𑀦𑀺𑀲𑀺𑀦𑁆𑀦𑀲𑁆𑀲 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀢𑁆𑀢𑀁 𑀉𑀧𑀲𑀁𑀳𑀭𑀦𑁆𑀢𑀻 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑁂 𑀤𑀸𑀭𑀼𑀪𑀡𑁆𑀟𑁂 𑀧𑀓𑁆𑀔𑀮𑀺. 𑀧𑀓𑁆𑀔𑀮𑀦𑀖𑀝𑁆𑀝𑀦𑀸𑀬 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀲𑀩𑀮𑀁 𑀲𑀭𑀺. 𑀲𑀢𑀺𑀲𑀫𑁆𑀧𑀦𑁆𑀦𑀢𑀸𑀬 𑀧𑀦 𑀧𑀸𑀬𑀸𑀲𑀧𑀸𑀢𑀺𑀁 𑀅𑀙𑀟𑁆𑀟𑁂𑀢𑁆𑀯𑀸 𑀲𑀡𑀺𑀓𑀁 𑀑𑀢𑀸𑀭𑁂𑀢𑁆𑀯𑀸 𑀪𑀽𑀫𑀺𑀬𑀁 𑀲𑀡𑁆𑀞𑀧𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀲𑀢𑀸𑀦𑀁 𑀫𑀚𑁆𑀛𑁂 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀞𑀧𑁂𑀢𑁆𑀯𑀸 𑀬𑁂𑀦 𑀯𑁂𑀴𑀼𑀯𑀦𑀁, 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 𑀓𑁂𑀘𑀺 𑀪𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀪𑀼𑀜𑁆𑀚𑀫𑀸𑀦𑀸, 𑀓𑁂𑀘𑀺 𑀳𑀢𑁆𑀣𑁂 𑀑𑀢𑀸𑀭𑀺𑀢𑀫𑀢𑁆𑀢𑀸, 𑀓𑁂𑀲𑀜𑁆𑀘𑀺 𑀪𑁄𑀚𑀦𑀁 𑀧𑀼𑀭𑀢𑁄 𑀞𑀧𑀺𑀢𑀫𑀢𑁆𑀢𑀁 𑀳𑁄𑀢𑀺. 𑀢𑁂 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 𑀲𑀺𑀦𑁂𑀭𑀼𑀫𑀢𑁆𑀢𑁂𑀦 𑀫𑀼𑀕𑁆𑀕𑀭𑁂𑀦 𑀲𑀻𑀲𑁂 𑀧𑀳𑀝𑀸 𑀯𑀺𑀬 𑀓𑀡𑁆𑀡𑁂𑀲𑀼 𑀲𑀽𑀮𑁂𑀦 𑀯𑀺𑀤𑁆𑀥𑀸 𑀯𑀺𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀺𑀬𑀫𑀸𑀦𑀸 ‘‘𑀇𑀫𑀺𑀦𑀸 𑀅𑀜𑁆𑀜𑀮𑀤𑁆𑀥𑀺𑀓𑁂𑀦 𑀫𑀬𑀁 𑀖𑀭𑀁 𑀧𑀯𑁂𑀲𑀺𑀢𑀸’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀳𑀢𑁆𑀣𑁂 𑀧𑀺𑀡𑁆𑀟𑀁 𑀙𑀟𑁆𑀟𑁂𑀢𑁆𑀯𑀸 𑀫𑀼𑀔𑁂𑀦 𑀕𑀳𑀺𑀢𑀁 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀥𑀦𑀼𑀁 𑀤𑀺𑀲𑁆𑀯𑀸 𑀓𑀸𑀓𑀸 𑀯𑀺𑀬 𑀩𑁆𑀭𑀸𑀳𑁆𑀫𑀡𑀁 𑀅𑀓𑁆𑀓𑁄𑀲𑀫𑀸𑀦𑀸 𑀤𑀺𑀲𑀸𑀯𑀺𑀤𑀺𑀲𑀸 𑀧𑀓𑁆𑀓𑀫𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 𑀏𑀯𑀁 𑀪𑀺𑀚𑁆𑀚𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑁂 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀲𑀻𑀲𑀢𑁄 𑀧𑀝𑁆𑀞𑀸𑀬 𑀑𑀮𑁄𑀓𑁂𑀢𑁆𑀯𑀸, ‘‘𑀇𑀤𑀫𑁂𑀯 𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀫𑀬𑀁 𑀳𑀺𑀬𑁆𑀬𑁄 𑀧𑀝𑁆𑀞𑀸𑀬 𑀪𑁄𑀢𑀺𑀁 𑀬𑀸𑀘𑀦𑁆𑀢𑀸 𑀦 𑀮𑀪𑀺𑀫𑁆𑀳𑀸’’𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀩𑁆𑀭𑀸𑀳𑁆𑀫𑀡𑀺𑀁 𑀅𑀓𑁆𑀓𑁄𑀲𑀺𑀢𑁆𑀯𑀸, 𑀏𑀢𑀁 ‘‘𑀏𑀯𑀫𑁂𑀯𑀁 𑀧𑀦𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀉𑀧𑀲𑀗𑁆𑀓𑀫𑀻𑀢𑀺 ‘‘𑀲𑀫𑀡𑁄 𑀕𑁄𑀢𑀫𑁄 𑀕𑀸𑀫𑀦𑀺𑀕𑀫𑀭𑀝𑁆𑀞𑀧𑀽𑀚𑀺𑀢𑁄, 𑀦 𑀲𑀓𑁆𑀓𑀸 𑀕𑀦𑁆𑀢𑁆𑀯𑀸 𑀬𑀁 𑀯𑀸 𑀢𑀁 𑀯𑀸 𑀯𑀢𑁆𑀯𑀸 𑀲𑀦𑁆𑀢𑀚𑁆𑀚𑁂𑀢𑀼𑀁, 𑀏𑀓𑀫𑁂𑀯 𑀦𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑁄𑀯 ‘‘𑀓𑀺𑀁𑀲𑀼 𑀙𑁂𑀢𑁆𑀯𑀸’’𑀢𑀺 𑀕𑀸𑀣𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑁋 ‘‘𑀲𑀘𑁂 ‘𑀅𑀲𑀼𑀓𑀲𑁆𑀲 𑀦𑀸𑀫 𑀯𑀥𑀁 𑀭𑁄𑀘𑁂𑀫𑀻’𑀢𑀺 𑀯𑀓𑁆𑀔𑀢𑀺, 𑀅𑀣 𑀦𑀁 ‘𑀬𑁂 𑀢𑀼𑀬𑁆𑀳𑀁 𑀦 𑀭𑀼𑀘𑁆𑀘𑀦𑁆𑀢𑀺, 𑀢𑁂 𑀫𑀸𑀭𑁂𑀢𑀼𑀓𑀸𑀫𑁄𑀲𑀺, 𑀮𑁄𑀓𑀯𑀥𑀸𑀬 𑀉𑀧𑁆𑀧𑀦𑁆𑀦𑁄, 𑀓𑀺𑀁 𑀢𑀼𑀬𑁆𑀳𑀁 𑀲𑀫𑀡𑀪𑀸𑀯𑁂𑀦𑀸’𑀢𑀺? 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀺. 𑀲𑀘𑁂 ‘𑀦 𑀓𑀲𑁆𑀲𑀘𑀺 𑀯𑀥𑀁 𑀭𑁄𑀘𑁂𑀫𑀻’𑀢𑀺 𑀯𑀓𑁆𑀔𑀢𑀺, 𑀅𑀣 𑀦𑀁 ‘𑀢𑁆𑀯𑀁 𑀭𑀸𑀕𑀸𑀤𑀻𑀦𑀫𑁆𑀧𑀺 𑀯𑀥𑀁 𑀦 𑀇𑀘𑁆𑀙𑀲𑀺. 𑀓𑀲𑁆𑀫𑀸 𑀲𑀫𑀡𑁄 𑀳𑀼𑀢𑁆𑀯𑀸 𑀆𑀳𑀺𑀡𑁆𑀟𑀲𑀻’𑀢𑀺? 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻. 𑀇𑀢𑀺 𑀇𑀫𑀁 𑀉𑀪𑀢𑁄𑀓𑁄𑀝𑀺𑀓𑀁 𑀧𑀜𑁆𑀳𑀁 𑀲𑀫𑀡𑁄 𑀕𑁄𑀢𑀫𑁄 𑀦𑁂𑀯 𑀕𑀺𑀮𑀺𑀢𑀼𑀁 𑀦 𑀉𑀕𑁆𑀕𑀺𑀮𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀲𑀫𑁆𑀫𑁄𑀤𑀻𑀢𑀺 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀢𑀸𑀬 𑀓𑀼𑀤𑁆𑀥𑀪𑀸𑀯𑀁 𑀅𑀤𑀲𑁆𑀲𑁂𑀢𑁆𑀯𑀸 𑀫𑀥𑀼𑀭𑀓𑀣𑀁 𑀓𑀣𑁂𑀦𑁆𑀢𑁄 𑀲𑀫𑁆𑀫𑁄𑀤𑀺. 𑀧𑀜𑁆𑀳𑁄 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑁂 𑀓𑀣𑀺𑀢𑁄. 𑀲𑁂𑀲𑀫𑁆𑀧𑀺 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯𑀸𑀢𑀺. 𑀧𑀞𑀫𑀁.

𑁨. 𑀅𑀓𑁆𑀓𑁄𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁮. 𑀤𑀼𑀢𑀺𑀬𑁂 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀪𑀸𑀭𑀤𑁆𑀯𑀸𑀚𑁄𑀯 𑀲𑁄, 𑀧𑀜𑁆𑀘𑀫𑀢𑁆𑀢𑁂𑀳𑀺 𑀧𑀦 𑀕𑀸𑀣𑀸 𑀲𑀢𑁂𑀳𑀺 𑀢𑀣𑀸𑀕𑀢𑀁 𑀅𑀓𑁆𑀓𑁄𑀲𑀦𑁆𑀢𑁄 𑀆𑀕𑀢𑁄𑀢𑀺. ‘‘𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑁄’’𑀢𑀺 𑀢𑀲𑁆𑀲 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀦𑀸𑀫𑀁 𑀕𑀳𑀺𑀢𑀁. 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄𑀢𑀺 ‘‘𑀲𑀫𑀡𑁂𑀦 𑀕𑁄𑀢𑀫𑁂𑀦 𑀫𑀬𑁆𑀳𑀁 𑀚𑁂𑀝𑁆𑀞𑀓𑀪𑀸𑀢𑀭𑀁 𑀧𑀩𑁆𑀩𑀸𑀚𑁂𑀦𑁆𑀢𑁂𑀦 𑀚𑀸𑀦𑀺 𑀓𑀢𑀸, 𑀧𑀓𑁆𑀔𑁄 𑀪𑀺𑀦𑁆𑀦𑁄’’𑀢𑀺 𑀓𑁄𑀥𑁂𑀦 𑀓𑀼𑀧𑀺𑀢𑁄 𑀤𑁄𑀫𑀦𑀲𑁆𑀲𑁂𑀦 𑀘 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀓𑁆𑀓𑁄𑀲𑀢𑀻𑀢𑀺 ‘‘𑀘𑁄𑀭𑁄𑀲𑀺, 𑀩𑀸𑀮𑁄𑀲𑀺, 𑀫𑀽𑀴𑁆𑀳𑁄𑀲𑀺, 𑀣𑁂𑀦𑁄𑀲𑀺, 𑀑𑀝𑁆𑀞𑁄𑀲𑀺, 𑀫𑁂𑀡𑁆𑀟𑁄𑀲𑀺, 𑀕𑁄𑀡𑁄𑀲𑀺, 𑀕𑀤𑁆𑀭𑀪𑁄𑀲𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄𑀲𑀺, 𑀦𑁂𑀭𑀬𑀺𑀓𑁄𑀲𑀻’’𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀢𑀺. 𑀧𑀭𑀺𑀪𑀸𑀲𑀢𑀻𑀢𑀺 ‘‘𑀳𑁄𑀢𑀼 𑀫𑀼𑀡𑁆𑀟𑀓𑀲𑀫𑀡𑀓, ‘𑀅𑀤𑀡𑁆𑀟𑁄 𑀅𑀳’𑀦𑁆𑀢𑀺 𑀓𑀭𑁄𑀲𑀺, 𑀇𑀤𑀸𑀦𑀺 𑀢𑁂 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀤𑀡𑁆𑀟𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀧𑀭𑀺𑀪𑀸𑀲𑀢𑀺 𑀦𑀸𑀫.

𑀲𑀫𑁆𑀪𑀼𑀜𑁆𑀚𑀢𑀻𑀢𑀺 𑀏𑀓𑀢𑁄 𑀪𑀼𑀜𑁆𑀚𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀓𑀢𑀲𑁆𑀲 𑀧𑀝𑀺𑀓𑀸𑀭𑀁 𑀓𑀭𑁄𑀢𑀺. 𑀪𑀕𑀯𑀦𑁆𑀢𑀁 𑀔𑁄, 𑀕𑁄𑀢𑀫𑀦𑁆𑀢𑀺 𑀓𑀲𑁆𑀫𑀸 𑀏𑀯𑀫𑀸𑀳? ‘‘𑀢𑀯𑁂𑀯𑁂𑀢𑀁, 𑀩𑁆𑀭𑀸𑀳𑁆𑀫𑀡, 𑀢𑀯𑁂𑀯𑁂𑀢𑀁, 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀓𑀺𑀭𑀲𑁆𑀲 𑀲𑀼𑀢𑁆𑀯𑀸. ‘‘𑀇𑀲𑀬𑁄 𑀦𑀸𑀫 𑀓𑀼𑀧𑀺𑀢𑀸 𑀲𑀧𑀦𑀁 𑀤𑁂𑀦𑁆𑀢𑀺 𑀓𑀺𑀲𑀯𑀘𑁆𑀙𑀸𑀤𑀬𑁄 𑀯𑀺𑀬𑀸’’𑀢𑀺 𑀅𑀦𑀼𑀲𑁆𑀲𑀯𑀯𑀲𑁂𑀦 ‘‘𑀲𑀧𑀢𑀺 𑀫𑀁 𑀫𑀜𑁆𑀜𑁂 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀪𑀬𑀁 𑀉𑀧𑁆𑀧𑀚𑁆𑀚𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑀤𑀦𑁆𑀢𑀲𑁆𑀲𑀸𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀲𑁆𑀲. 𑀢𑀸𑀤𑀺𑀦𑁄𑀢𑀺 𑀢𑀸𑀤𑀺𑀮𑀓𑁆𑀔𑀡𑀁 𑀧𑀢𑁆𑀢𑀲𑁆𑀲. 𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁄𑀢𑀺 𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀢𑁂𑀦 𑀓𑁄𑀥𑁂𑀦 𑀧𑀸𑀧𑀁 𑀳𑁄𑀢𑀺. 𑀲𑀢𑁄 𑀉𑀧𑀲𑀫𑁆𑀫𑀢𑀻𑀢𑀺 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀅𑀥𑀺𑀯𑀸𑀲𑁂𑀢𑀺. 𑀉𑀪𑀺𑀦𑁆𑀦𑀁 𑀢𑀺𑀓𑀺𑀘𑁆𑀙𑀦𑁆𑀢𑀸𑀦𑀦𑁆𑀢𑀺 𑀉𑀪𑀺𑀦𑁆𑀦𑀁 𑀢𑀺𑀓𑀺𑀘𑁆𑀙𑀦𑁆𑀢𑀁. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀬𑁄 𑀧𑀼𑀕𑁆𑀕𑀮𑁄 𑀲𑀢𑁄 𑀉𑀧𑀲𑀫𑁆𑀫𑀢𑀺, 𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀺 𑀢𑀺𑀓𑀺𑀘𑁆𑀙𑀢𑀺 𑀲𑀸𑀥𑁂𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀚𑀦𑀸 𑀩𑀸𑀮𑁄𑀢𑀺 𑀫𑀜𑁆𑀜𑀦𑁆𑀢𑀺. 𑀓𑀻𑀤𑀺𑀲𑀸 𑀚𑀦𑀸? 𑀬𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸. 𑀥𑀫𑁆𑀫𑀲𑁆𑀲𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑀲𑁆𑀲 𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀯𑀸. 𑀅𑀓𑁄𑀯𑀺𑀤𑀸𑀢𑀺 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀅𑀓𑀼𑀲𑀮𑀸 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀸. 𑀤𑀼𑀢𑀺𑀬𑀁.

𑁩. 𑀅𑀲𑀼𑀭𑀺𑀦𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁯. 𑀢𑀢𑀺𑀬𑁂 𑀅𑀲𑀼𑀭𑀺𑀦𑁆𑀤𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑀲𑁆𑀲 𑀓𑀦𑀺𑀝𑁆𑀞𑁄. 𑀓𑀼𑀧𑀺𑀢𑁄𑀢𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀓𑀼𑀤𑁆𑀥𑁄. 𑀚𑀬𑀜𑁆𑀘𑁂𑀯𑀲𑁆𑀲 𑀢𑀁 𑀳𑁄𑀢𑀻𑀢𑀺 𑀅𑀲𑁆𑀲𑁂𑀯 𑀢𑀁 𑀚𑀬𑀁 𑀳𑁄𑀢𑀺, 𑀲𑁄 𑀚𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀢𑀫𑀲𑁆𑀲𑀸𑀢𑀺? 𑀬𑀸 𑀢𑀺𑀢𑀺𑀓𑁆𑀔𑀸 𑀯𑀺𑀚𑀸𑀦𑀢𑁄 𑀅𑀥𑀺𑀯𑀸𑀲𑀦𑀸𑀬 𑀕𑀼𑀡𑀁 𑀯𑀺𑀚𑀸𑀦𑀦𑁆𑀢𑀲𑁆𑀲 𑀢𑀺𑀢𑀺𑀓𑁆𑀔𑀸 𑀅𑀥𑀺𑀯𑀸𑀲𑀦𑀸, 𑀅𑀬𑀁 𑀢𑀲𑁆𑀲 𑀯𑀺𑀚𑀸𑀦𑀢𑁄𑀯 𑀚𑀬𑁄. 𑀩𑀸𑀮𑁄 𑀧𑀦 𑀨𑀭𑀼𑀲𑀁 𑀪𑀡𑀦𑁆𑀢𑁄 ‘‘𑀫𑀬𑁆𑀳𑀁 𑀚𑀬𑁄’’𑀢𑀺 𑀓𑁂𑀯𑀮𑀁 𑀚𑀬𑀁 𑀫𑀜𑁆𑀜𑀢𑀺. 𑀢𑀢𑀺𑀬𑀁.

𑁪. 𑀩𑀺𑀮𑀗𑁆𑀕𑀻𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁦. 𑀘𑀢𑀼𑀢𑁆𑀣𑁂 𑀩𑀺𑀮𑀗𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀪𑀸𑀭𑀤𑁆𑀯𑀸𑀚𑁄𑀯 𑀲𑁄, 𑀦𑀸𑀦𑀧𑁆𑀧𑀓𑀸𑀭𑀁 𑀧𑀦 𑀲𑀼𑀤𑁆𑀥𑀜𑁆𑀘 𑀲𑀫𑁆𑀪𑀸𑀭𑀬𑀼𑀢𑁆𑀢𑀜𑁆𑀘 𑀓𑀜𑁆𑀚𑀺𑀓𑀁 𑀓𑀸𑀭𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀸𑀧𑁂𑀦𑁆𑀢𑁄 𑀩𑀳𑀼𑀥𑀦𑀁 𑀲𑀗𑁆𑀔𑀭𑀻𑀢𑀺 ‘‘𑀩𑀺𑀮𑀗𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑁄’’𑀢𑀺 𑀢𑀲𑁆𑀲 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀦𑀸𑀫𑀁 𑀕𑀳𑀺𑀢𑀁. 𑀢𑀼𑀡𑁆𑀳𑀻𑀪𑀽𑀢𑁄𑀢𑀺 ‘‘𑀢𑀬𑁄 𑀫𑁂 𑀚𑁂𑀝𑁆𑀞𑀓𑀪𑀸𑀢𑀭𑁄 𑀇𑀫𑀺𑀦𑀸 𑀧𑀩𑁆𑀩𑀸𑀚𑀺𑀢𑀸’’𑀢𑀺 𑀅𑀢𑀺𑀯𑀺𑀬 𑀓𑀼𑀤𑁆𑀥𑁄 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀼𑀡𑁆𑀳𑀻𑀪𑀽𑀢𑁄 𑀅𑀝𑁆𑀞𑀸𑀲𑀺. 𑀕𑀸𑀣𑀸 𑀧𑀦 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑁂 𑀓𑀣𑀺𑀢𑀸𑀯. 𑀘𑀢𑀼𑀢𑁆𑀣𑀁.

𑁫. 𑀅𑀳𑀺𑀁𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁧. 𑀧𑀜𑁆𑀘𑀫𑁂 𑀅𑀳𑀺𑀁𑀲𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀪𑀸𑀭𑀤𑁆𑀯𑀸𑀚𑁄𑀯𑁂𑀲, 𑀅𑀳𑀺𑀁𑀲𑀓𑀧𑀜𑁆𑀳𑀁 𑀧𑀦 𑀧𑀼𑀘𑁆𑀙𑀺, 𑀢𑁂𑀦𑀲𑁆𑀲𑁂𑀢𑀁 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀦𑀸𑀫𑀁 𑀕𑀳𑀺𑀢𑀁. 𑀦𑀸𑀫𑁂𑀦 𑀯𑀸 𑀏𑀲 𑀅𑀳𑀺𑀁𑀲𑀓𑁄, 𑀕𑁄𑀢𑁆𑀢𑁂𑀦 𑀪𑀸𑀭𑀤𑁆𑀯𑀸𑀚𑁄. 𑀅𑀳𑀺𑀁𑀲𑀓𑀸𑀳𑀦𑁆𑀢𑀺 𑀅𑀳𑀺𑀁𑀲𑀓𑁄 𑀅𑀳𑀁, 𑀇𑀢𑀺 𑀫𑁂 𑀪𑀯𑀁 𑀕𑁄𑀢𑀫𑁄 𑀚𑀸𑀦𑀸𑀢𑀽𑀢𑀺 𑀆𑀳. 𑀢𑀣𑀸 𑀘𑀲𑁆𑀲𑀸𑀢𑀺 𑀢𑀣𑀸 𑀘𑁂 𑀅𑀲𑁆𑀲, 𑀪𑀯𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀦 𑀳𑀺𑀁𑀲𑀢𑀻𑀢𑀺 𑀦 𑀯𑀺𑀳𑁂𑀞𑁂𑀢𑀺 𑀦 𑀤𑀼𑀓𑁆𑀔𑀸𑀧𑁂𑀢𑀺. 𑀧𑀜𑁆𑀘𑀫𑀁.

𑁬. 𑀚𑀝𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁨. 𑀙𑀝𑁆𑀞𑁂 𑀚𑀝𑀸𑀪𑀸𑀭𑀤𑁆𑀯𑀸𑀚𑁄𑀢𑀺 𑀪𑀸𑀭𑀤𑁆𑀯𑀸𑀚𑁄𑀯𑁂𑀲, 𑀚𑀝𑀸𑀧𑀜𑁆𑀳𑀲𑁆𑀲 𑀧𑀦 𑀧𑀼𑀘𑁆𑀙𑀺𑀢𑀢𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀏𑀯𑀁 𑀯𑀼𑀢𑁆𑀢𑁄. 𑀲𑁂𑀲𑀁 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑁂 𑀓𑀣𑀺𑀢𑀫𑁂𑀯. 𑀙𑀝𑁆𑀞𑀁.

𑁭. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁩. 𑀲𑀢𑁆𑀢𑀫𑁂 𑀲𑀼𑀤𑁆𑀥𑀺𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀅𑀬𑀫𑁆𑀧𑀺 𑀪𑀸𑀭𑀤𑁆𑀯𑀸𑀚𑁄𑀯, 𑀲𑀼𑀤𑁆𑀥𑀺𑀓𑀧𑀜𑁆𑀳𑀲𑁆𑀲 𑀧𑀦 𑀧𑀼𑀘𑁆𑀙𑀺𑀢𑀢𑁆𑀢𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀏𑀯𑀁 𑀯𑀼𑀢𑁆𑀢𑁄. 𑀲𑀻𑀮𑀯𑀸𑀧𑀺 𑀢𑀧𑁄𑀓𑀭𑀦𑁆𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑁄𑀧𑀺 𑀢𑀧𑁄𑀓𑀫𑁆𑀫𑀁 𑀓𑀭𑁄𑀦𑁆𑀢𑁄. 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 𑀏𑀢𑁆𑀣 𑀯𑀺𑀚𑁆𑀚𑀸𑀢𑀺 𑀢𑀬𑁄 𑀯𑁂𑀤𑀸. 𑀘𑀭𑀡𑀦𑁆𑀢𑀺 𑀕𑁄𑀢𑁆𑀢𑀘𑀭𑀡𑀁. 𑀲𑁄 𑀲𑀼𑀚𑁆𑀛𑀢𑀺 𑀦 𑀅𑀜𑁆𑀜𑀸 𑀇𑀢𑀭𑀸 𑀧𑀚𑀸𑀢𑀺 𑀲𑁄 𑀢𑁂𑀯𑀺𑀚𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀲𑀼𑀚𑁆𑀛𑀢𑀺, 𑀅𑀬𑀁 𑀧𑀦 𑀅𑀜𑁆𑀜𑀸 𑀦𑀸𑀫𑀺𑀓𑀸 𑀧𑀚𑀸 𑀦 𑀲𑀼𑀚𑁆𑀛𑀢𑀻𑀢𑀺 𑀯𑀤𑀢𑀺. 𑀩𑀳𑀼𑀫𑁆𑀧𑀺 𑀧𑀮𑀧𑀁 𑀚𑀧𑁆𑀧𑀦𑁆𑀢𑀺 𑀩𑀳𑀼𑀫𑁆𑀧𑀺 𑀧𑀮𑀧𑀁 𑀚𑀧𑁆𑀧𑀦𑁆𑀢𑁄, ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑀼𑀚𑁆𑀛𑀢𑀻’’𑀢𑀺 𑀏𑀯𑀁 𑀯𑀘𑀦𑀲𑀳𑀲𑁆𑀲𑀫𑁆𑀧𑀺 𑀪𑀡𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀓𑀲𑀫𑁆𑀩𑀽𑀢𑀺 𑀅𑀦𑁆𑀢𑁄 𑀓𑀺𑀮𑁂𑀲𑀧𑀽𑀢𑀺𑀲𑀪𑀸𑀯𑁂𑀦 𑀧𑀽𑀢𑀺𑀓𑁄. 𑀲𑀁𑀓𑀺𑀮𑀺𑀝𑁆𑀞𑁄𑀢𑀺 𑀓𑀺𑀮𑀺𑀝𑁆𑀞𑁂𑀳𑀺 𑀓𑀸𑀬𑀓𑀫𑁆𑀫𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀢𑁆𑀢𑀫𑀁.

𑁮. 𑀅𑀕𑁆𑀕𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁪. 𑀅𑀝𑁆𑀞𑀫𑁂 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀅𑀬𑀫𑁆𑀧𑀺 𑀪𑀸𑀭𑀤𑁆𑀯𑀸𑀚𑁄𑀯, 𑀅𑀕𑁆𑀕𑀺 𑀧𑀭𑀺𑀘𑀭𑀡𑀯𑀲𑁂𑀦 𑀧𑀦𑀲𑁆𑀲 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀏𑀢𑀁 𑀦𑀸𑀫𑀁 𑀕𑀳𑀺𑀢𑀁. 𑀲𑀦𑁆𑀦𑀺𑀳𑀺𑀢𑁄 𑀳𑁄𑀢𑀻𑀢𑀺 𑀲𑀁𑀬𑁄𑀚𑀺𑀢𑁄 𑀳𑁄𑀢𑀺. 𑀅𑀝𑁆𑀞𑀸𑀲𑀻𑀢𑀺 𑀓𑀲𑁆𑀫𑀸 𑀢𑀢𑁆𑀣 𑀅𑀝𑁆𑀞𑀸𑀲𑀺? 𑀪𑀕𑀯𑀸 𑀓𑀺𑀭 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀇𑀫𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀏𑀯𑀭𑀽𑀧𑀁 𑀅𑀕𑁆𑀕𑀧𑀸𑀬𑀸𑀲𑀁 𑀕𑀳𑁂𑀢𑁆𑀯𑀸 ‘𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀪𑁄𑀚𑁂𑀫𑀻’𑀢𑀺 𑀅𑀕𑁆𑀕𑀺𑀫𑁆𑀳𑀺 𑀛𑀸𑀧𑁂𑀦𑁆𑀢𑁄 𑀅𑀨𑀮𑀁 𑀓𑀭𑁄𑀢𑀺 𑀅𑀧𑀸𑀬𑀫𑀕𑁆𑀕𑀁 𑀑𑀓𑁆𑀓𑀫𑀢𑀺, 𑀇𑀫𑀁 𑀮𑀤𑁆𑀥𑀺𑀁 𑀅𑀯𑀺𑀲𑁆𑀲𑀚𑁆𑀚𑀦𑁆𑀢𑁄 𑀅𑀧𑀸𑀬𑀧𑀽𑀭𑀓𑁄𑀯 𑀪𑀯𑀺𑀲𑁆𑀲𑀢𑀺, 𑀕𑀘𑁆𑀙𑀸𑀫𑀺𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀬, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀘𑁂𑀯 𑀘𑀢𑁆𑀢𑀸𑀭𑀺 𑀘 𑀨𑀮𑀸𑀦𑀺 𑀤𑁂𑀫𑀻’’𑀢𑀺, 𑀢𑀲𑁆𑀫𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀭𑀸𑀚𑀕𑀳𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀅𑀝𑁆𑀞𑀸𑀲𑀺.

𑀢𑀻𑀳𑀺 𑀯𑀺𑀚𑁆𑀚𑀸𑀳𑀻𑀢𑀺 𑀢𑀻𑀳𑀺 𑀯𑁂𑀤𑁂𑀳𑀺. 𑀚𑀸𑀢𑀺𑀫𑀸𑀢𑀺 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀧𑀭𑀺𑀲𑀼𑀤𑁆𑀥𑀸𑀬 𑀚𑀸𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀲𑀼𑀢𑀯𑀸 𑀩𑀳𑀽𑀢𑀺 𑀩𑀳𑀼 𑀦𑀸𑀦𑀧𑁆𑀧𑀓𑀸𑀭𑁂 𑀕𑀦𑁆𑀣𑁂 𑀲𑀼𑀢𑀯𑀸. 𑀲𑁄𑀫𑀁 𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀲𑁄 𑀢𑁂𑀯𑀺𑀚𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀇𑀫𑀁 𑀧𑀸𑀬𑀸𑀲𑀁 𑀪𑀼𑀜𑁆𑀚𑀺𑀢𑀼𑀁 𑀬𑀼𑀢𑁆𑀢𑁄, 𑀢𑀼𑀫𑁆𑀳𑀸𑀓𑀁 𑀧𑀦𑁂𑀲 𑀧𑀸𑀬𑀸𑀲𑁄 𑀅𑀬𑀼𑀢𑁆𑀢𑁄𑀢𑀺 𑀯𑀤𑀢𑀺.

𑀯𑁂𑀤𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀚𑀸𑀦𑀺 𑀧𑀝𑀺𑀯𑀺𑀚𑁆𑀛𑀺. 𑀲𑀕𑁆𑀕𑀸𑀧𑀸𑀬𑀦𑁆𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀲𑀕𑁆𑀕𑀫𑁆𑀧𑀺 𑀅𑀧𑀸𑀬𑀫𑁆𑀧𑀺 𑀧𑀲𑁆𑀲𑀢𑀺. 𑀚𑀸𑀢𑀺𑀓𑁆𑀔𑀬𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄𑀢𑀺 𑀚𑀸𑀦𑀺𑀢𑁆𑀯𑀸 𑀯𑁄𑀲𑀺𑀢𑀯𑁄𑀲𑀸𑀦𑁄. 𑀩𑁆𑀭𑀸𑀳𑁆𑀫𑀡𑁄 𑀪𑀯𑀦𑁆𑀢𑀺 𑀅𑀯𑀻𑀘𑀺𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀪𑁄𑀢𑀸 𑀕𑁄𑀢𑀫𑁂𑀦 𑀲𑀤𑀺𑀲𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄 𑀦𑀢𑁆𑀣𑀺, 𑀪𑀯𑀁𑀬𑁂𑀯 𑀩𑁆𑀭𑀸𑀳𑁆𑀫𑀡𑁄𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀽𑀭𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀬𑀸𑀲𑀁 𑀉𑀧𑀦𑀸𑀫𑁂𑀲𑀺. 𑀲𑀢𑁆𑀣𑀸 𑀉𑀧𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑁆𑀯𑀸 𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀕𑀸𑀣𑀸𑀪𑀺𑀕𑀻𑀢𑀁 𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀸𑀣𑀸𑀪𑀺𑀕𑀻𑀢𑀦𑁆𑀢𑀺 𑀕𑀸𑀣𑀸𑀳𑀺 𑀅𑀪𑀺𑀕𑀻𑀢𑀁. 𑀅𑀪𑁄𑀚𑀦𑁂𑀬𑁆𑀬𑀦𑁆𑀢𑀺 𑀅𑀪𑀼𑀜𑁆𑀚𑀺𑀢𑀩𑁆𑀩𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀫𑀬𑁆𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀞𑀺𑀢𑀲𑁆𑀲 𑀓𑀝𑀘𑁆𑀙𑀼𑀫𑀢𑁆𑀢𑀫𑁆𑀧𑀺 𑀤𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀇𑀤𑀸𑀦𑀺 𑀧𑀦 𑀫𑀬𑀸 𑀢𑀼𑀬𑁆𑀳𑀁 𑀓𑀺𑀮𑀜𑁆𑀚𑀫𑁆𑀳𑀺 𑀢𑀺𑀮𑁂 𑀯𑀺𑀢𑁆𑀣𑀸𑀭𑁂𑀦𑁆𑀢𑁂𑀦 𑀯𑀺𑀬 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀧𑀓𑀸𑀲𑀺𑀢𑀸, 𑀇𑀢𑀺 𑀕𑀸𑀬𑀦𑁂𑀦 𑀕𑀸𑀬𑀺𑀢𑁆𑀯𑀸 𑀮𑀤𑁆𑀥𑀁 𑀯𑀺𑀬 𑀇𑀤𑀁 𑀪𑁄𑀚𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀇𑀤𑀁 𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬𑀦𑁆𑀢𑀺. 𑀲𑀫𑁆𑀧𑀲𑁆𑀲𑀢𑀁, 𑀩𑁆𑀭𑀸𑀳𑁆𑀫𑀡, 𑀦𑁂𑀲 𑀥𑀫𑁆𑀫𑁄𑀢𑀺, 𑀩𑁆𑀭𑀸𑀳𑁆𑀫𑀡, 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀲𑀫𑁆𑀧𑀲𑁆𑀲𑀦𑁆𑀢𑀸𑀦𑀁 ‘‘𑀏𑀯𑀭𑀽𑀧𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀏𑀲 𑀥𑀫𑁆𑀫𑁄 𑀦 𑀳𑁄𑀢𑀺. 𑀲𑀼𑀥𑀸𑀪𑁄𑀚𑀦𑀫𑁆𑀧𑀺 𑀕𑀸𑀣𑀸𑀪𑀺𑀕𑀻𑀢𑀁 𑀧𑀦𑀼𑀤𑀦𑁆𑀢𑀺 𑀩𑀼𑀤𑁆𑀥𑀸, 𑀕𑀸𑀣𑀸𑀳𑀺 𑀕𑀸𑀬𑀺𑀢𑁆𑀯𑀸 𑀮𑀤𑁆𑀥𑀁 𑀩𑀼𑀤𑁆𑀥𑀸 𑀦𑀻𑀳𑀭𑀦𑁆𑀢𑀺𑀬𑁂𑀯. 𑀥𑀫𑁆𑀫𑁂 𑀲𑀢𑀺, 𑀩𑁆𑀭𑀸𑀳𑁆𑀫𑀡, 𑀯𑀼𑀢𑁆𑀢𑀺𑀭𑁂𑀲𑀸𑀢𑀺, 𑀩𑁆𑀭𑀸𑀳𑁆𑀫𑀡, 𑀥𑀫𑁆𑀫𑁂 𑀲𑀢𑀺 𑀥𑀫𑁆𑀫𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀬 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀸𑀦𑀁 𑀏𑀲𑀸 𑀯𑀼𑀢𑁆𑀢𑀺 𑀅𑀬𑀁 𑀆𑀚𑀻𑀯𑁄 𑁋 𑀏𑀯𑀭𑀽𑀧𑀁 𑀦𑀻𑀳𑀭𑀺𑀢𑁆𑀯𑀸 𑀥𑀫𑁆𑀫𑀮𑀤𑁆𑀥𑀫𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺.

𑀅𑀣 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 𑀅𑀳𑀁 𑀧𑀼𑀩𑁆𑀩𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀕𑀼𑀡𑁂 𑀯𑀸 𑀅𑀕𑀼𑀡𑁂 𑀯𑀸 𑀦 𑀚𑀸𑀦𑀸𑀫𑀺. 𑀇𑀤𑀸𑀦𑀺 𑀧𑀦𑀲𑁆𑀲𑀸𑀳𑀁 𑀕𑀼𑀡𑁂 𑀜𑀢𑁆𑀯𑀸 𑀫𑀫 𑀕𑁂𑀳𑁂 𑀅𑀲𑀻𑀢𑀺𑀓𑁄𑀝𑀺𑀫𑀢𑁆𑀢𑀁 𑀥𑀦𑀁 𑀲𑀸𑀲𑀦𑁂 𑀯𑀺𑀧𑁆𑀧𑀓𑀺𑀭𑀺𑀢𑀼𑀓𑀸𑀫𑁄 𑀚𑀸𑀢𑁄, 𑀅𑀬𑀜𑁆𑀘 ‘‘𑀫𑀬𑀸 𑀤𑀺𑀦𑁆𑀦𑀧𑀘𑁆𑀘𑀬𑀸 𑀅𑀓𑀧𑁆𑀧𑀺𑀬𑀸’’𑀢𑀺 𑀯𑀤𑀢𑀺. 𑀅𑀧𑁆𑀧𑀝𑀺𑀕𑁆𑀕𑀬𑁆𑀳𑁄 𑀅𑀳𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦𑀸𑀢𑀺. 𑀅𑀣 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀢𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁 𑀯𑀻𑀫𑀁𑀲𑀦𑁆𑀢𑁄, ‘‘𑀅𑀬𑀁 𑀲𑀩𑁆𑀩𑁂𑀧𑀺 𑀅𑀢𑁆𑀢𑀦𑀸 𑀤𑀺𑀦𑁆𑀦𑀧𑀘𑁆𑀘𑀬𑁂 ‘𑀅𑀓𑀧𑁆𑀧𑀺𑀬𑀸’𑀢𑀺 𑀲𑀮𑁆𑀮𑀓𑁆𑀔𑁂𑀢𑀺. 𑀬𑀁 𑀳𑀺 𑀪𑁄𑀚𑀦𑀁 𑀆𑀭𑀩𑁆𑀪 𑀓𑀣𑀸 𑀉𑀧𑁆𑀧𑀦𑁆𑀦𑀸, 𑀏𑀢𑀤𑁂𑀯 𑀦 𑀯𑀝𑁆𑀝𑀢𑀺, 𑀲𑁂𑀲𑀸 𑀦𑀺𑀤𑁆𑀤𑁄𑀲𑀸’’𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀤𑀸𑀦𑀤𑁆𑀯𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀅𑀜𑁆𑀜𑁂𑀦 𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀼𑀓𑁆𑀓𑀼𑀘𑁆𑀘𑀯𑀽𑀧𑀲𑀦𑁆𑀢𑀦𑁆𑀢𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀸𑀤𑀻𑀦𑀁 𑀯𑀲𑁂𑀦 𑀯𑀽𑀧𑀲𑀦𑁆𑀢𑀓𑀼𑀓𑁆𑀓𑀼𑀘𑁆𑀘𑀁. 𑀅𑀦𑁆𑀦𑁂𑀦 𑀧𑀸𑀦𑁂𑀦𑀸𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁. 𑀅𑀬𑀁 𑀧𑀦𑀢𑁆𑀣𑁄 𑁋 𑀅𑀜𑁆𑀜𑁂𑀳𑀺 𑀢𑀬𑀸 ‘‘𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫𑀻’’𑀢𑀺 𑀲𑀮𑁆𑀮𑀓𑁆𑀔𑀺𑀢𑁂𑀳𑀺 𑀘𑀻𑀯𑀭𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀲𑁆𑀲𑀼. 𑀔𑁂𑀢𑁆𑀢𑀁 𑀳𑀺 𑀢𑀁 𑀧𑀼𑀜𑁆𑀜𑀧𑁂𑀓𑁆𑀔𑀲𑁆𑀲 𑀳𑁄𑀢𑀻𑀢𑀺 𑀏𑀢𑀁 𑀢𑀣𑀸𑀕𑀢𑀲𑀸𑀲𑀦𑀁 𑀦𑀸𑀫 𑀧𑀼𑀜𑁆𑀜𑀧𑁂𑀓𑁆𑀔𑀲𑁆𑀲 𑀧𑀼𑀜𑁆𑀜𑀢𑁆𑀣𑀺𑀓𑀲𑁆𑀲 𑀢𑀼𑀬𑁆𑀳𑀁 𑀅𑀧𑁆𑀧𑁂𑀧𑀺 𑀩𑀻𑀚𑁂 𑀩𑀳𑀼𑀲𑀲𑁆𑀲𑀨𑀮𑀤𑀸𑀬𑀓𑀁 𑀲𑀼𑀔𑁂𑀢𑁆𑀢𑀁 𑀯𑀺𑀬 𑀧𑀝𑀺𑀬𑀢𑁆𑀢𑀁 𑀳𑁄𑀢𑀺. 𑀅𑀝𑁆𑀞𑀫𑀁.

𑁯. 𑀲𑀼𑀦𑁆𑀤𑀭𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁫. 𑀦𑀯𑀫𑁂 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀲𑀼𑀦𑁆𑀤𑀭𑀺𑀓𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀅𑀕𑁆𑀕𑀺𑀚𑀼𑀳𑀡𑁂𑀦 𑀏𑀯𑀁𑀮𑀤𑁆𑀥𑀦𑀸𑀫𑁄. 𑀲𑀼𑀦𑁆𑀤𑀭𑀺𑀓𑀸𑀬𑀸𑀢𑀺 𑀏𑀯𑀁𑀦𑀸𑀫𑀺𑀓𑀸𑀬 𑀦𑀤𑀺𑀬𑀸. 𑀅𑀕𑁆𑀕𑀺𑀁 𑀚𑀼𑀳𑀢𑀻𑀢𑀺 𑀆𑀳𑀼𑀢𑀺𑀁 𑀧𑀓𑁆𑀔𑀺𑀧𑀦𑁂𑀦 𑀚𑀸𑀮𑁂𑀢𑀺. 𑀅𑀕𑁆𑀕𑀺𑀳𑀼𑀢𑁆𑀢𑀁 𑀧𑀭𑀺𑀘𑀭𑀢𑀻𑀢𑀺 𑀅𑀕𑁆𑀬𑀸𑀬𑀢𑀦𑀁 𑀲𑀫𑁆𑀫𑀚𑁆𑀚𑀦𑀼𑀧𑀮𑁂𑀧𑀦𑀩𑀮𑀺𑀓𑀫𑁆𑀫𑀸𑀤𑀺𑀦𑀸 𑀧𑀬𑀺𑀭𑀼𑀧𑀸𑀲𑀢𑀺. 𑀓𑁄 𑀦𑀼 𑀔𑁄 𑀇𑀫𑀁 𑀳𑀩𑁆𑀬𑀲𑁂𑀲𑀁 𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀅𑀕𑁆𑀕𑀺𑀫𑁆𑀳𑀺 𑀳𑀼𑀢𑀸𑀯𑀲𑁂𑀲𑀁 𑀧𑀸𑀬𑀸𑀲𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀕𑁆𑀕𑀺𑀫𑁆𑀳𑀺 𑀢𑀸𑀯 𑀧𑀓𑁆𑀔𑀺𑀢𑁆𑀢𑀧𑀸𑀬𑀸𑀲𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀪𑀼𑀢𑁆𑀢𑁄, 𑀅𑀬𑀁 𑀧𑀦 𑀅𑀯𑀲𑁂𑀲𑁄 𑀅𑀢𑁆𑀣𑀺, 𑀢𑀁 𑀬𑀤𑀺 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀚𑀸𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀤𑁂𑀬𑁆𑀬𑀁, 𑀏𑀯𑀁 𑀫𑁂 𑀧𑀺𑀢𑀭𑀸 𑀲𑀳 𑀧𑀼𑀢𑁆𑀢𑁄𑀧𑀺 𑀲𑀦𑁆𑀢𑀧𑁆𑀧𑀺𑀢𑁄 𑀪𑀯𑁂𑀬𑁆𑀬, 𑀲𑀼𑀯𑀺𑀲𑁄𑀥𑀺𑀢𑁄 𑀘𑀲𑁆𑀲 𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀫𑀕𑁆𑀕𑁄’’𑀢𑀺. 𑀲𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀉𑀝𑁆𑀞𑀸𑀬𑀸𑀲𑀦𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀲𑀺, ‘‘𑀓𑁄 𑀦𑀼 𑀔𑁄 𑀇𑀫𑀁 𑀳𑀩𑁆𑀬𑀲𑁂𑀲𑀁 𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺?

𑀭𑀼𑀓𑁆𑀔𑀫𑀽𑀮𑁂𑀢𑀺 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀚𑁂𑀝𑁆𑀞𑀓𑀭𑀼𑀓𑁆𑀔𑀲𑁆𑀲 𑀫𑀽𑀮𑁂. 𑀲𑀲𑀻𑀲𑀁 𑀧𑀸𑀭𑀼𑀢𑀁 𑀦𑀺𑀲𑀺𑀦𑁆𑀦𑀦𑁆𑀢𑀺 𑀲𑀳 𑀲𑀻𑀲𑁂𑀦 𑀧𑀸𑀭𑀼𑀢𑀓𑀸𑀬𑀁 𑀦𑀺𑀲𑀺𑀦𑁆𑀦𑀁. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀢𑀢𑁆𑀣 𑀦𑀺𑀲𑀻𑀤𑀺? 𑀪𑀕𑀯𑀸 𑀓𑀺𑀭 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀇𑀫𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀏𑀯𑀭𑀽𑀧𑀁 𑀅𑀕𑁆𑀕𑀧𑀸𑀬𑀸𑀲𑀁 𑀕𑀳𑁂𑀢𑁆𑀯𑀸 ‘‘𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀪𑁄𑀚𑁂𑀫𑀻’’𑀢𑀺 𑀅𑀕𑁆𑀕𑀺𑀫𑁆𑀳𑀺 𑀛𑀸𑀧𑁂𑀦𑁆𑀢𑁄 𑀅𑀨𑀮𑀁 𑀓𑀭𑁄𑀢𑀺…𑀧𑁂… 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀘𑁂𑀯 𑀘𑀢𑁆𑀢𑀸𑀭𑀺 𑀘 𑀨𑀮𑀸𑀦𑀺 𑀤𑁂𑀫𑀻𑀢𑀺. 𑀢𑀲𑁆𑀫𑀸 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣 𑀓𑀲𑁆𑀫𑀸 𑀲𑀲𑀻𑀲𑀁 𑀧𑀸𑀭𑀼𑀧𑀻𑀢𑀺? 𑀳𑀺𑀫𑀧𑀸𑀢𑀲𑁆𑀲 𑀘 𑀲𑀻𑀢𑀯𑀸𑀢𑀲𑁆𑀲 𑀘 𑀧𑀝𑀺𑀩𑀸𑀳𑀡𑀢𑁆𑀣𑀁, 𑀧𑀝𑀺𑀩𑀮𑁄𑀯 𑀏𑀢𑀁 𑀢𑀣𑀸𑀕𑀢𑁄 𑀅𑀥𑀺𑀯𑀸𑀲𑁂𑀢𑀼𑀁. 𑀲𑀘𑁂 𑀧𑀦 𑀅𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀻𑀤𑁂𑀬𑁆𑀬, 𑀩𑁆𑀭𑀸𑀳𑁆𑀫𑀡𑁄 𑀤𑀽𑀭𑀢𑁄𑀯 𑀲𑀜𑁆𑀚𑀸𑀦𑀺𑀢𑁆𑀯𑀸 𑀦𑀺𑀯𑀢𑁆𑀢𑁂𑀬𑁆𑀬, 𑀏𑀯𑀁 𑀲𑀢𑀺 𑀓𑀣𑀸 𑀦𑀧𑁆𑀧𑀯𑀢𑁆𑀢𑁂𑀬𑁆𑀬. 𑀇𑀢𑀺 𑀪𑀕𑀯𑀸 𑁋 ‘‘𑀩𑁆𑀭𑀸𑀳𑁆𑀫𑀡𑁂 𑀆𑀕𑀢𑁂 𑀲𑀻𑀲𑀁 𑀯𑀺𑀯𑀭𑀺𑀲𑁆𑀲𑀸𑀫𑀺, 𑀅𑀣 𑀫𑀁 𑀲𑁄 𑀤𑀺𑀲𑁆𑀯𑀸 𑀓𑀣𑀁 𑀧𑀯𑀢𑁆𑀢𑁂𑀲𑁆𑀲𑀢𑀺, 𑀢𑀲𑁆𑀲𑀸𑀳𑀁 𑀓𑀣𑀸𑀦𑀼𑀲𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀓𑀣𑀸𑀧𑀯𑀢𑁆𑀢𑀦𑀢𑁆𑀣𑀁 𑀏𑀯𑀫𑀓𑀸𑀲𑀺.

𑀉𑀧𑀲𑀗𑁆𑀓𑀫𑀻𑀢𑀺 𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀅𑀬𑀁 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄. 𑀇𑀫𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀇𑀫𑀁 𑀳𑀩𑁆𑀬𑀲𑁂𑀲𑀁 𑀤𑀲𑁆𑀲𑀸𑀫𑀻’’𑀢𑀺, 𑀩𑁆𑀭𑀸𑀳𑁆𑀫𑀡𑀲𑀜𑁆𑀜𑀻 𑀳𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀫𑀼𑀡𑁆𑀟𑁄 𑀅𑀬𑀁 𑀪𑀯𑀁, 𑀫𑀼𑀡𑁆𑀟𑀓𑁄 𑀅𑀬𑀁 𑀪𑀯𑀦𑁆𑀢𑀺 𑀲𑀻𑀲𑁂 𑀯𑀺𑀯𑀭𑀺𑀢𑀫𑀢𑁆𑀢𑁂 𑀦𑀻𑀘𑀓𑁂𑀲𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀼𑀡𑁆𑀟𑁄’’𑀢𑀺 𑀆𑀳. 𑀢𑀢𑁄 𑀲𑀼𑀝𑁆𑀞𑀼𑀢𑀭𑀁 𑀑𑀮𑁄𑀓𑁂𑀦𑁆𑀢𑁄 𑀧𑀯𑀢𑁆𑀢𑀫𑀢𑁆𑀢𑀫𑁆𑀧𑀺 𑀲𑀺𑀔𑀁 𑀅𑀤𑀺𑀲𑁆𑀯𑀸 𑀳𑀻𑀴𑁂𑀦𑁆𑀢𑁄 ‘‘𑀫𑀼𑀡𑁆𑀟𑀓𑁄’’𑀢𑀺 𑀆𑀳. 𑀢𑀢𑁄𑀯𑀸𑀢𑀺 𑀬𑀢𑁆𑀣 𑀞𑀺𑀢𑁄 𑀅𑀤𑁆𑀤𑀲, 𑀢𑀫𑁆𑀳𑀸𑀯 𑀧𑀤𑁂𑀲𑀸. 𑀫𑀼𑀡𑁆𑀟𑀸𑀧𑀺 𑀳𑀻𑀢𑀺 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀫𑀼𑀡𑁆𑀟𑀺𑀢𑀲𑀻𑀲𑀸𑀧𑀺 𑀳𑁄𑀦𑁆𑀢𑀺.

𑀫𑀸 𑀚𑀸𑀢𑀺𑀁 𑀧𑀼𑀘𑁆𑀙𑀸𑀢𑀺 𑀬𑀤𑀺 𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀢𑀁 𑀧𑀘𑁆𑀘𑀸𑀲𑀻𑀲𑀲𑀺, 𑀚𑀸𑀢𑀺𑀁 𑀫𑀸 𑀧𑀼𑀘𑁆𑀙. 𑀅𑀓𑀸𑀭𑀡𑀁 𑀳𑀺 𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀲𑁆𑀲 𑀚𑀸𑀢𑀺. 𑀘𑀭𑀡𑀜𑁆𑀘 𑀧𑀼𑀘𑁆𑀙𑀸𑀢𑀺 𑀅𑀧𑀺𑀘 𑀔𑁄 𑀲𑀻𑀮𑀸𑀤𑀺𑀕𑀼𑀡𑀪𑁂𑀤𑀁 𑀘𑀭𑀡𑀁 𑀧𑀼𑀘𑁆𑀙. 𑀏𑀢𑀁 𑀳𑀺 𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀲𑁆𑀲 𑀓𑀸𑀭𑀡𑀁. 𑀇𑀤𑀸𑀦𑀺𑀲𑁆𑀲 𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀓𑀝𑁆𑀞𑀸 𑀳𑀯𑁂 𑀚𑀸𑀬𑀢𑀺 𑀚𑀸𑀢𑀯𑁂𑀤𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀇𑀥 𑀓𑀝𑁆𑀞𑀸 𑀅𑀕𑁆𑀕𑀺 𑀚𑀸𑀬𑀢𑀺, 𑀦 𑀘 𑀲𑁄 𑀲𑀸𑀮𑀸𑀤𑀺𑀓𑀝𑁆𑀞𑀸 𑀚𑀸𑀢𑁄𑀯 𑀅𑀕𑁆𑀕𑀺𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀲𑀸𑀧𑀸𑀦-𑀤𑁄𑀡𑀺𑀆𑀤𑀺𑀓𑀝𑁆𑀞𑀸 𑀚𑀸𑀢𑁄 𑀦 𑀓𑀭𑁄𑀢𑀺, 𑀅𑀢𑁆𑀢𑀦𑁄 𑀧𑀦 𑀅𑀘𑁆𑀘𑀺𑀬𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀬𑀢𑁄 𑀯𑀸 𑀢𑀢𑁄 𑀯𑀸 𑀚𑀸𑀢𑁄 𑀓𑀭𑁄𑀢𑀺𑀬𑁂𑀯. 𑀏𑀯𑀁 𑀦 𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀤𑀻𑀲𑀼 𑀚𑀸𑀢𑁄𑀯 𑀤𑀓𑁆𑀔𑀺𑀡𑁂𑀬𑁆𑀬𑁄 𑀳𑁄𑀢𑀺, 𑀘𑀡𑁆𑀟𑀸𑀮𑀓𑀼𑀮𑀸𑀤𑀻𑀲𑀼 𑀚𑀸𑀢𑁄 𑀦 𑀳𑁄𑀢𑀺, 𑀅𑀧𑀺𑀘 𑀔𑁄 𑀦𑀻𑀘𑀓𑀼𑀮𑀺𑀦𑁄𑀧𑀺 𑀉𑀘𑁆𑀘𑀓𑀼𑀮𑀺𑀦𑁄𑀧𑀺 𑀔𑀻𑀡𑀸𑀲𑀯-𑀫𑀼𑀦𑀺 𑀥𑀺𑀢𑀺𑀫𑀸 𑀳𑀺𑀭𑀻𑀦𑀺𑀲𑁂𑀥𑁄 𑀆𑀚𑀸𑀦𑀻𑀬𑁄 𑀳𑁄𑀢𑀺. 𑀇𑀫𑀸𑀬 𑀥𑀺𑀢𑀺𑀳𑀺𑀭𑀺𑀧𑀫𑁄𑀓𑁆𑀔𑀸𑀬 𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀚𑀸𑀢𑀺𑀫𑀸 𑀉𑀢𑁆𑀢𑀫𑀤𑀓𑁆𑀔𑀺𑀡𑁂𑀬𑁆𑀬𑁄 𑀳𑁄𑀢𑀺. 𑀲𑁄 𑀳𑀺 𑀥𑀺𑀢𑀺𑀬𑀸 𑀕𑀼𑀡𑁂 𑀥𑀸𑀭𑁂𑀢𑀺, 𑀳𑀺𑀭𑀺𑀬𑀸 𑀤𑁄𑀲𑁂 𑀦𑀺𑀲𑁂𑀥𑁂𑀢𑀻𑀢𑀺. 𑀅𑀧𑀺𑀘𑁂𑀢𑁆𑀣 𑀫𑀼𑀦𑀻𑀢𑀺 𑀫𑁄𑀦𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀥𑀺𑀢𑀺𑀫𑀸𑀢𑀺 𑀯𑀻𑀭𑀺𑀬𑀯𑀸. 𑀆𑀚𑀸𑀦𑀻𑀬𑁄𑀢𑀺 𑀓𑀸𑀭𑀡𑀸𑀓𑀸𑀭𑀡𑀚𑀸𑀦𑀦𑀓𑁄. 𑀳𑀺𑀭𑀻𑀦𑀺𑀲𑁂𑀥𑁄𑀢𑀺 𑀳𑀺𑀭𑀺𑀬𑀸 𑀧𑀸𑀧𑀸𑀦𑀺 𑀦𑀺𑀲𑁂𑀥𑁂𑀢𑁆𑀯𑀸 𑀞𑀺𑀢𑁄.

𑀲𑀘𑁆𑀘𑁂𑀦 𑀤𑀦𑁆𑀢𑁄𑀢𑀺 𑀧𑀭𑀫𑀢𑁆𑀣𑀲𑀘𑁆𑀘𑁂𑀦 𑀤𑀦𑁆𑀢𑁄. 𑀤𑀫𑀲𑀸 𑀉𑀧𑁂𑀢𑁄𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀉𑀧𑁂𑀢𑁄. 𑀯𑁂𑀤𑀦𑁆𑀢𑀕𑀽𑀢𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀯𑁂𑀤𑀸𑀦𑀁 𑀅𑀦𑁆𑀢𑀁, 𑀘𑀢𑀽𑀳𑀺 𑀯𑀸 𑀫𑀕𑁆𑀕𑀯𑁂𑀤𑁂𑀳𑀺 𑀓𑀺𑀮𑁂𑀲𑀸𑀦𑀁 𑀅𑀦𑁆𑀢𑀁 𑀕𑀢𑁄. 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀼𑀢𑁆𑀣𑁄. 𑀬𑀜𑁆𑀜𑁄𑀧𑀦𑀻𑀢𑁄𑀢𑀺 𑀉𑀧𑀦𑀻𑀢𑀬𑀜𑁆𑀜𑁄 𑀧𑀝𑀺𑀬𑀸𑀤𑀺𑀢𑀬𑀜𑁆𑀜𑁄 𑀘. 𑀢𑀫𑀼𑀧𑀯𑁆𑀳𑀬𑁂𑀣𑀸𑀢𑀺 𑀬𑁂𑀦 𑀬𑀜𑁆𑀜𑁄 𑀧𑀝𑀺𑀬𑀸𑀤𑀺𑀢𑁄, 𑀲𑁄 𑀢𑀁 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑀁 𑀅𑀯𑁆𑀳𑀬𑁂𑀬𑁆𑀬. ‘‘𑀇𑀦𑁆𑀤𑀫𑀯𑁆𑀳𑀬𑀸𑀫, 𑀲𑁄𑀫𑀫𑀯𑁆𑀳𑀬𑀸𑀫, 𑀯𑀭𑀼𑀡𑀫𑀯𑁆𑀳𑀬𑀸𑀫, 𑀈𑀲𑀸𑀦𑀫𑀯𑁆𑀳𑀬𑀸𑀫, 𑀬𑀸𑀫𑀫𑀯𑁆𑀳𑀬𑀸𑀫𑀸’’𑀢𑀺 𑀇𑀤𑀁 𑀧𑀦 𑀅𑀯𑁆𑀳𑀸𑀦𑀁 𑀦𑀺𑀭𑀢𑁆𑀣𑀓𑀁. 𑀓𑀸𑀮𑁂𑀦𑀸𑀢𑀺 𑀅𑀯𑁆𑀳𑀬𑀦𑁆𑀢𑁄 𑀘 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺 𑀅𑀦𑁆𑀢𑁄𑀫𑀚𑁆𑀛𑀦𑁆𑀳𑀺𑀓𑀓𑀸𑀮𑁂𑀬𑁂𑀯 𑀢𑀁 𑀉𑀧𑀯𑁆𑀳𑀬𑁂𑀬𑁆𑀬. 𑀲𑁄 𑀚𑀼𑀳𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁂𑀢𑀺 𑀬𑁄 𑀏𑀯𑀁 𑀓𑀸𑀮𑁂 𑀔𑀻𑀡𑀸𑀲𑀯𑀁 𑀆𑀫𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀘𑀢𑀼𑀧𑀘𑁆𑀘𑀬𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀧𑁂𑀢𑀺, 𑀲𑁄 𑀤𑀓𑁆𑀔𑀺𑀡𑁂𑀬𑁆𑀬𑁂 𑀚𑀼𑀳𑀢𑀺 𑀦𑀸𑀫, 𑀦 𑀅𑀘𑁂𑀢𑀦𑁂 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀦𑁆𑀢𑁄.

𑀇𑀢𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀓𑀣𑀁 𑀲𑀼𑀡𑀦𑁆𑀢𑁄 𑀧𑀲𑀻𑀤𑀺𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀧𑀲𑀸𑀤𑀁 𑀆𑀯𑀺𑀓𑀭𑁄𑀦𑁆𑀢𑁄 𑀅𑀤𑁆𑀥𑀸 𑀲𑀼𑀬𑀺𑀝𑁆𑀞𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀅𑀤𑁆𑀥𑀸 𑀫𑀫 𑀬𑀺𑀤𑀁 𑀇𑀤𑀸𑀦𑀺 𑀲𑀼𑀬𑀺𑀝𑁆𑀞𑀜𑁆𑀘 𑀲𑀼𑀳𑀼𑀢𑀜𑁆𑀘 𑀪𑀯𑀺𑀲𑁆𑀲𑀢𑀺, 𑀧𑀼𑀩𑁆𑀩𑁂 𑀧𑀦 𑀅𑀕𑁆𑀕𑀺𑀫𑁆𑀳𑀺 𑀛𑀸𑀧𑀺𑀢𑀁 𑀦𑀺𑀭𑀢𑁆𑀣𑀓𑀁 𑀅𑀳𑁄𑀲𑀻𑀢𑀺. 𑀅𑀜𑁆𑀜𑁄 𑀚𑀦𑁄𑀢𑀺 ‘‘𑀅𑀳𑀁 𑀩𑁆𑀭𑀸𑀳𑁆𑀫𑀡𑁄, 𑀅𑀳𑀁 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀯𑀤𑀦𑁆𑀢𑁄 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑁄. 𑀳𑀩𑁆𑀬𑀲𑁂𑀲𑀦𑁆𑀢𑀺 𑀳𑀼𑀢𑀲𑁂𑀲𑀁. 𑀪𑀼𑀜𑁆𑀚𑀢𑀼 𑀪𑀯𑀦𑁆𑀢𑀺𑀆𑀤𑀺 𑀧𑀼𑀭𑀺𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀦 𑀔𑁆𑀯𑀸𑀳𑀦𑁆𑀢𑀺 𑀦 𑀔𑁄 𑀅𑀳𑀁. 𑀓𑀲𑁆𑀫𑀸 𑀧𑀦𑁂𑀯𑀫𑀸𑀳𑀸𑀢𑀺? 𑀢𑀲𑁆𑀫𑀺𑀁 𑀓𑀺𑀭 𑀪𑁄𑀚𑀦𑁂 𑀉𑀧𑀳𑀝𑀫𑀢𑁆𑀢𑁂𑀯 ‘‘𑀲𑀢𑁆𑀣𑀸 𑀪𑀼𑀜𑁆𑀚𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀤𑁆𑀯𑀻𑀲𑀼 𑀧𑀭𑀺𑀢𑁆𑀢𑀤𑀻𑀧𑀲𑀳𑀲𑁆𑀲𑁂𑀲𑀼 𑀤𑁂𑀯𑀢𑀸 𑀧𑀼𑀧𑁆𑀨𑀨𑀮𑀸𑀤𑀻𑀦𑀺 𑀘𑁂𑀯 𑀲𑀧𑁆𑀧𑀺𑀦𑀯𑀦𑀻𑀢𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀘 𑀆𑀤𑀸𑀬 𑀫𑀥𑀼𑀧𑀝𑀮𑀁 𑀧𑀻𑀴𑁂𑀢𑁆𑀯𑀸 𑀫𑀥𑀼𑀁 𑀕𑀡𑁆𑀳𑀦𑁆𑀢𑀺𑀬𑁄 𑀯𑀺𑀬 𑀤𑀺𑀩𑁆𑀩𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁄𑀚𑀫𑁂𑀯 𑀕𑀳𑁂𑀢𑁆𑀯𑀸 𑀧𑀓𑁆𑀔𑀺𑀧𑀺𑀁𑀲𑀼. 𑀢𑁂𑀦 𑀢𑀁 𑀲𑀼𑀔𑀼𑀫𑀢𑁆𑀢𑀁 𑀕𑀢𑀁, 𑀫𑀦𑀼𑀲𑁆𑀲𑀸𑀦𑀜𑁆𑀘 𑀑𑀴𑀸𑀭𑀺𑀓𑀁 𑀯𑀢𑁆𑀣𑀽𑀢𑀺 𑀢𑁂𑀲𑀁 𑀢𑀸𑀯 𑀑𑀴𑀸𑀭𑀺𑀓𑀯𑀢𑁆𑀣𑀼𑀢𑀸𑀬 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀦 𑀕𑀘𑁆𑀙𑀢𑀺. 𑀕𑁄𑀬𑀽𑀲𑁂 𑀧𑀦 𑀢𑀺𑀮𑀩𑀻𑀚𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀢𑁆𑀢𑀸 𑀑𑀴𑀸𑀭𑀺𑀓𑀫𑀺𑀲𑁆𑀲𑀓𑀁 𑀚𑀸𑀢𑀁, 𑀤𑁂𑀯𑀸𑀦𑀜𑁆𑀘 𑀲𑀼𑀔𑀼𑀫𑀁 𑀯𑀢𑁆𑀣𑀽𑀢𑀺 𑀢𑁂𑀲𑀁 𑀲𑀼𑀔𑀼𑀫𑀯𑀢𑁆𑀣𑀼𑀢𑀸𑀬 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀦 𑀕𑀘𑁆𑀙𑀢𑀺. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀲𑁆𑀲𑀸𑀧𑀺 𑀓𑀼𑀘𑁆𑀙𑀺𑀬𑀁 𑀦 𑀧𑀭𑀺𑀡𑀫𑀢𑀺. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀔𑀻𑀡𑀸𑀲𑀯𑀲𑁆𑀲 𑀧𑀦 𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀧𑀭𑀺𑀡𑀸𑀫𑁂𑀬𑁆𑀬. 𑀪𑀕𑀯𑀢𑁄 𑀧𑀦 𑀧𑀸𑀓𑀢𑀺𑀓𑁂𑀦𑁂𑀯 𑀓𑀫𑁆𑀫𑀚𑀢𑁂𑀚𑁂𑀦 𑀧𑀭𑀺𑀡𑀸𑀫𑁂𑀬𑁆𑀬.

𑀅𑀧𑁆𑀧𑀳𑀭𑀺𑀢𑁂𑀢𑀺 𑀅𑀳𑀭𑀺𑀢𑁂. 𑀲𑀘𑁂 𑀳𑀺 𑀳𑀭𑀺𑀢𑁂𑀲𑀼 𑀢𑀺𑀡𑁂𑀲𑀼 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀺𑀦𑀺𑀤𑁆𑀥𑀧𑀸𑀬𑀸𑀲𑁂𑀦 𑀢𑀺𑀡𑀸𑀦𑀺 𑀧𑀽𑀢𑀻𑀦𑀺 𑀪𑀯𑁂𑀬𑁆𑀬𑀼𑀁. 𑀩𑀼𑀤𑁆𑀥𑀸 𑀘 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀁 𑀦 𑀯𑀻𑀢𑀺𑀓𑁆𑀓𑀫𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀬𑀢𑁆𑀣 𑀧𑀦 𑀕𑀮𑀧𑁆𑀧𑀫𑀸𑀡𑀸𑀦𑀺 𑀫𑀳𑀸𑀢𑀺𑀡𑀸𑀦𑀺, 𑀢𑀸𑀤𑀺𑀲𑁂 𑀞𑀸𑀦𑁂 𑀧𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀧𑁆𑀧𑀸𑀡𑀓𑁂𑀢𑀺 𑀲𑀧𑁆𑀧𑀸𑀡𑀓𑀲𑁆𑀫𑀺𑀁 𑀳𑀺 𑀧𑀭𑀺𑀢𑁆𑀢𑀓𑁂 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁂 𑀧𑀸𑀡𑀓𑀸 𑀫𑀭𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀬𑀁 𑀧𑀦 𑀕𑀫𑁆𑀪𑀻𑀭𑀁 𑀫𑀳𑀸𑀉𑀤𑀓𑀁 𑀳𑁄𑀢𑀺, 𑀧𑀸𑀢𑀺𑀲𑀢𑁂𑀧𑀺 𑀧𑀸𑀢𑀺𑀲𑀳𑀲𑁆𑀲𑁂𑀧𑀺 𑀧𑀓𑁆𑀔𑀺𑀢𑁆𑀢𑁂 𑀦 𑀆𑀮𑀼𑀴𑀢𑀺, 𑀢𑀣𑀸𑀭𑀽𑀧𑁂 𑀉𑀤𑀓𑁂 𑀯𑀝𑁆𑀝𑀢𑀺. 𑀑𑀧𑀺𑀮𑀸𑀧𑁂𑀲𑀻𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀲𑀤𑁆𑀥𑀺𑀁𑀬𑁂𑀯 𑀦𑀺𑀫𑀼𑀚𑁆𑀚𑀸𑀧𑁂𑀲𑀺. 𑀘𑀺𑀘𑁆𑀘𑀺𑀝𑀸𑀬𑀢𑀺 𑀘𑀺𑀝𑀺𑀘𑀺𑀝𑀸𑀬𑀢𑀻𑀢𑀺 𑀏𑀯𑀭𑀽𑀧𑀁 𑀲𑀤𑁆𑀤𑀁 𑀓𑀭𑁄𑀢𑀺. 𑀓𑀺𑀁 𑀧𑀦𑁂𑀲 𑀧𑀸𑀬𑀸𑀲𑀲𑁆𑀲 𑀆𑀦𑀼𑀪𑀸𑀯𑁄, 𑀉𑀤𑀸𑀳𑀼 𑀢𑀣𑀸𑀕𑀢𑀲𑁆𑀲𑀸𑀢𑀺? 𑀢𑀣𑀸𑀕𑀢𑀲𑁆𑀲. 𑀅𑀬𑀁 𑀳𑀺 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀧𑀸𑀬𑀸𑀲𑀁 𑀑𑀧𑀺𑀮𑀸𑀧𑁂𑀢𑁆𑀯𑀸 𑀉𑀫𑁆𑀫𑀕𑁆𑀕𑀁 𑀆𑀭𑀼𑀬𑁆𑀳 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀦𑀸𑀕𑀦𑁆𑀢𑁆𑀯𑀸𑀯 𑀕𑀘𑁆𑀙𑁂𑀬𑁆𑀬, 𑀅𑀣 𑀪𑀕𑀯𑀸 𑁋 ‘‘𑀏𑀢𑁆𑀢𑀓𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀢𑀺. 𑀅𑀣𑀲𑁆𑀲𑀸𑀳𑀁 𑀥𑀫𑁆𑀫𑀤𑁂𑀲𑀦𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀸𑀲𑀦𑁂 𑀑𑀢𑀸𑀭𑁂𑀢𑁆𑀯𑀸 𑀅𑀫𑀢𑀧𑀸𑀦𑀁 𑀧𑀸𑀬𑁂𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀸𑀦𑀩𑀮𑁂𑀦 𑀏𑀯𑀫𑀓𑀸𑀲𑀺.

𑀤𑀸𑀭𑀼 𑀲𑀫𑀸𑀤𑀳𑀸𑀦𑁄𑀢𑀺 𑀤𑀸𑀭𑀼𑀁 𑀛𑀸𑀧𑀬𑀫𑀸𑀦𑁄. 𑀩𑀳𑀺𑀤𑁆𑀥𑀸 𑀳𑀺 𑀏𑀢𑀦𑁆𑀢𑀺 𑀏𑀢𑀁 𑀤𑀸𑀭𑀼𑀚𑁆𑀛𑀸𑀧𑀦𑀁 𑀦𑀸𑀫 𑀅𑀭𑀺𑀬𑀥𑀫𑁆𑀫𑀢𑁄 𑀩𑀳𑀺𑀤𑁆𑀥𑀸. 𑀬𑀤𑀺 𑀏𑀢𑁂𑀦 𑀲𑀼𑀤𑁆𑀥𑀺 𑀪𑀯𑁂𑀬𑁆𑀬, 𑀬𑁂 𑀤𑀯𑀟𑀸𑀳𑀓𑀸𑀤𑀬𑁄 𑀩𑀳𑀽𑀦𑀺 𑀤𑀸𑀭𑀽𑀦𑀺 𑀛𑀸𑀧𑁂𑀦𑁆𑀢𑀺, 𑀢𑁂 𑀧𑀞𑀫𑀢𑀭𑀁 𑀲𑀼𑀚𑁆𑀛𑁂𑀬𑁆𑀬𑀼𑀁. 𑀓𑀼𑀲𑀮𑀸𑀢𑀺 𑀔𑀦𑁆𑀥𑀸𑀤𑀻𑀲𑀼 𑀓𑀼𑀲𑀮𑀸. 𑀅𑀚𑁆𑀛𑀢𑁆𑀢𑀫𑁂𑀯𑀼𑀚𑁆𑀚𑀮𑀬𑀸𑀫𑀺 𑀚𑁄𑀢𑀺𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑁂 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀲𑁆𑀫𑀺𑀁𑀬𑁂𑀯 𑀜𑀸𑀡𑀚𑁄𑀢𑀺𑀁 𑀚𑀸𑀮𑁂𑀫𑀺. 𑀦𑀺𑀘𑁆𑀘𑀕𑁆𑀕𑀺𑀦𑀻𑀢𑀺 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀦𑀺𑀘𑁆𑀘𑀁 𑀧𑀚𑁆𑀚𑀮𑀺𑀢𑀕𑁆𑀕𑀺. 𑀦𑀺𑀘𑁆𑀘𑀲𑀫𑀸𑀳𑀺𑀢𑀢𑁆𑀢𑁄𑀢𑀺 𑀦𑀺𑀘𑁆𑀘𑀁 𑀲𑀫𑁆𑀫𑀸 𑀞𑀧𑀺𑀢𑀘𑀺𑀢𑁆𑀢𑁄. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀻𑀢𑀺 𑀩𑁄𑀥𑀺𑀫𑀡𑁆𑀟𑁂 𑀘𑀭𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀕𑀳𑁂𑀢𑁆𑀯𑀸 𑀏𑀯𑀁 𑀯𑀤𑀢𑀺.

𑀫𑀸𑀦𑁄 𑀳𑀺 𑀢𑁂, 𑀩𑁆𑀭𑀸𑀳𑁆𑀫𑀡, 𑀔𑀸𑀭𑀺𑀪𑀸𑀭𑁄𑀢𑀺 𑀬𑀣𑀸 𑀔𑀸𑀭𑀺𑀪𑀸𑀭𑁄 𑀔𑀦𑁆𑀥𑁂𑀦 𑀯𑀬𑁆𑀳𑀫𑀸𑀦𑁄 𑀉𑀧𑀭𑀺 𑀞𑀺𑀢𑁄𑀧𑀺 𑀅𑀓𑁆𑀓𑀦𑁆𑀢𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀧𑀣𑀯𑀺𑀬𑀸 𑀲𑀤𑁆𑀥𑀺𑀁 𑀨𑀼𑀲𑁂𑀢𑀺, 𑀏𑀯𑀫𑁂𑀯 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀸𑀤𑀻𑀦𑀺 𑀫𑀸𑀦𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀉𑀲𑁆𑀲𑀸𑀧𑀺𑀢𑁄 𑀫𑀸𑀦𑁄𑀧𑀺 𑀢𑀢𑁆𑀣 𑀢𑀢𑁆𑀣 𑀇𑀲𑁆𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀁𑀲𑀻𑀤𑀸𑀧𑁂𑀢𑀺. 𑀢𑁂𑀦𑀸𑀳 ‘‘𑀫𑀸𑀦𑁄 𑀳𑀺 𑀢𑁂, 𑀩𑁆𑀭𑀸𑀳𑁆𑀫𑀡, 𑀔𑀸𑀭𑀺𑀪𑀸𑀭𑁄’’𑀢𑀺. 𑀓𑁄𑀥𑁄 𑀥𑀽𑀫𑁄𑀢𑀺 𑀢𑀯 𑀜𑀸𑀡𑀕𑁆𑀕𑀺𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀝𑁆𑀞𑁂𑀦 𑀓𑁄𑀥𑁄 𑀥𑀼𑀫𑁄. 𑀢𑁂𑀦 𑀳𑀺 𑀢𑁂 𑀉𑀧𑀓𑁆𑀓𑀺𑀮𑀺𑀝𑁆𑀞𑁄 𑀜𑀸𑀡𑀕𑁆𑀕𑀺 𑀦 𑀯𑀺𑀭𑁄𑀘𑀢𑀺. 𑀪𑀲𑁆𑀫𑀦𑀺 𑀫𑁄𑀲𑀯𑀚𑁆𑀚𑀦𑁆𑀢𑀺 𑀦𑀺𑀭𑁄𑀚𑀝𑁆𑀞𑁂𑀦 𑀫𑀼𑀲𑀸𑀯𑀸𑀤𑁄 𑀙𑀸𑀭𑀺𑀓𑀸 𑀦𑀸𑀫. 𑀬𑀣𑀸 𑀳𑀺 𑀙𑀸𑀭𑀺𑀓𑀸𑀬 𑀧𑀝𑀺𑀘𑁆𑀙𑀦𑁆𑀦𑁄 𑀅𑀕𑁆𑀕𑀺 𑀦 𑀚𑁄𑀢𑁂𑀢𑀺, 𑀏𑀯𑀁 𑀢𑁂 𑀫𑀼𑀲𑀸𑀯𑀸𑀤𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀜𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀚𑀺𑀯𑁆𑀳𑀸 𑀲𑀼𑀚𑀸𑀢𑀺 𑀬𑀣𑀸 𑀢𑀼𑀬𑁆𑀳𑀁 𑀲𑀼𑀯𑀡𑁆𑀡𑀭𑀚𑀢𑀮𑁄𑀳𑀓𑀝𑁆𑀞𑀫𑀢𑁆𑀢𑀺𑀓𑀸𑀲𑀼 𑀅𑀜𑁆𑀜𑀢𑀭𑀫𑀬𑀸 𑀬𑀸𑀕𑀬𑀚𑀦𑀢𑁆𑀣𑀸𑀬 𑀲𑀼𑀚𑀸 𑀳𑁄𑀢𑀺, 𑀏𑀯𑀁 𑀫𑀬𑁆𑀳𑀁 𑀥𑀫𑁆𑀫𑀬𑀸𑀕𑀁 𑀬𑀚𑀦𑀢𑁆𑀣𑀸𑀬 𑀧𑀳𑀽𑀢𑀚𑀺𑀯𑁆𑀳𑀸 𑀲𑀼𑀚𑀸𑀢𑀺 𑀯𑀤𑀢𑀺. 𑀳𑀤𑀬𑀁 𑀚𑁄𑀢𑀺𑀝𑁆𑀞𑀸𑀦𑀦𑁆𑀢𑀺 𑀬𑀣𑀸 𑀢𑀼𑀬𑁆𑀳𑀁 𑀦𑀤𑀻𑀢𑀻𑀭𑁂 𑀚𑁄𑀢𑀺𑀝𑁆𑀞𑀸𑀦𑀁, 𑀏𑀯𑀁 𑀫𑀬𑁆𑀳𑀁 𑀥𑀫𑁆𑀫𑀬𑀸𑀕𑀲𑁆𑀲 𑀬𑀚𑀦𑀝𑁆𑀞𑀸𑀦𑀢𑁆𑀣𑁂𑀦 𑀲𑀢𑁆𑀢𑀸𑀦𑀁 𑀳𑀤𑀬𑀁 𑀚𑁄𑀢𑀺𑀝𑁆𑀞𑀸𑀦𑀁. 𑀅𑀢𑁆𑀢𑀸𑀢𑀺 𑀘𑀺𑀢𑁆𑀢𑀁.

𑀥𑀫𑁆𑀫𑁄 𑀭𑀳𑀤𑁄𑀢𑀺 𑀬𑀣𑀸 𑀢𑁆𑀯𑀁 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀢𑁆𑀯𑀸 𑀥𑀽𑀫𑀙𑀸𑀭𑀺𑀓𑀲𑁂𑀤𑀓𑀺𑀮𑀺𑀝𑁆𑀞𑀲𑀭𑀻𑀭𑁄 𑀲𑀼𑀦𑁆𑀤𑀭𑀺𑀓𑀁 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀦𑁆𑀳𑀸𑀬𑀲𑀺, 𑀏𑀯𑀁 𑀫𑀬𑁆𑀳𑀁 𑀲𑀼𑀦𑁆𑀤𑀭𑀺𑀓𑀸𑀲𑀤𑀺𑀲𑁂𑀦 𑀩𑀸𑀳𑀺𑀭𑁂𑀦 𑀭𑀳𑀤𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀥𑀫𑁆𑀫𑁄 𑀧𑀦 𑀫𑀬𑁆𑀳𑀁 𑀭𑀳𑀤𑁄, 𑀢𑀢𑁆𑀭𑀸𑀳𑀁 𑀧𑀸𑀡𑀲𑀢𑀫𑁆𑀧𑀺 𑀧𑀸𑀡𑀲𑀳𑀲𑁆𑀲𑀫𑁆𑀧𑀺 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺𑀧𑀺 𑀏𑀓𑀧𑁆𑀧𑀳𑀸𑀭𑁂𑀦 𑀦𑁆𑀳𑀸𑀧𑁂𑀫𑀺. 𑀲𑀻𑀮𑀢𑀺𑀢𑁆𑀣𑁄𑀢𑀺 𑀢𑀲𑁆𑀲 𑀧𑀦 𑀫𑁂 𑀥𑀫𑁆𑀫𑀭𑀳𑀤𑀲𑁆𑀲 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀢𑀺𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀸𑀯𑀺𑀮𑁄𑀢𑀺 𑀬𑀣𑀸 𑀢𑀼𑀬𑁆𑀳𑀁 𑀲𑀼𑀦𑁆𑀤𑀭𑀺𑀓𑀸 𑀦𑀤𑀻 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀏𑀓𑀢𑁄 𑀦𑁆𑀳𑀸𑀬𑀦𑁆𑀢𑁂𑀳𑀺 𑀳𑁂𑀝𑁆𑀞𑀼𑀧𑀭𑀺𑀬𑀯𑀸𑀮𑀺𑀓𑀸 𑀆𑀮𑀼𑀴𑀸 𑀳𑁄𑀢𑀺, 𑀦 𑀏𑀯𑀁 𑀫𑀬𑁆𑀳𑀁 𑀭𑀳𑀤𑁄, 𑀅𑀦𑁂𑀓𑀲𑀢𑀲𑀳𑀲𑁆𑀲𑁂𑀲𑀼𑀧𑀺 𑀧𑀸𑀡𑁂𑀲𑀼 𑀑𑀢𑀭𑀺𑀢𑁆𑀯𑀸 𑀦𑁆𑀳𑀸𑀬𑀦𑁆𑀢𑁂𑀲𑀼 𑀲𑁄 𑀅𑀦𑀸𑀯𑀺𑀮𑁄 𑀯𑀺𑀧𑁆𑀧𑀲𑀦𑁆𑀦𑁄𑀯 𑀳𑁄𑀢𑀺. 𑀲𑀩𑁆𑀪𑀺 𑀲𑀢𑀁 𑀧𑀲𑀢𑁆𑀣𑁄𑀢𑀺 𑀧𑀡𑁆𑀟𑀺𑀢𑁂𑀳𑀺 𑀧𑀡𑁆𑀟𑀺𑀢𑀸𑀦𑀁 𑀧𑀲𑀝𑁆𑀞𑁄. 𑀉𑀢𑁆𑀢𑀫𑀢𑁆𑀣𑁂𑀦 𑀯𑀸 𑀲𑁄 𑀲𑀩𑁆𑀪𑀻𑀢𑀺 𑀯𑀼𑀘𑁆𑀘𑀢𑀺, 𑀧𑀡𑁆𑀟𑀺𑀢𑁂𑀳𑀺 𑀧𑀲𑀢𑁆𑀣𑀢𑁆𑀢𑀸 𑀲𑀢𑀁 𑀧𑀲𑀢𑁆𑀣𑁄. 𑀢𑀭𑀦𑁆𑀢𑀺 𑀧𑀸𑀭𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀸𑀭𑀁 𑀕𑀘𑁆𑀙𑀦𑁆𑀢𑀺.

𑀇𑀤𑀸𑀦𑀺 𑀅𑀭𑀺𑀬𑀫𑀕𑁆𑀕𑀭𑀳𑀤𑀲𑁆𑀲 𑀅𑀗𑁆𑀕𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀲𑀘𑁆𑀘𑀁 𑀥𑀫𑁆𑀫𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀘𑁆𑀘𑀦𑁆𑀢𑀺 𑀯𑀘𑀻𑀲𑀘𑁆𑀘𑀁. 𑀥𑀫𑁆𑀫𑁄𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄 𑀤𑀲𑁆𑀲𑁂𑀢𑀺. 𑀲𑀁𑀬𑀫𑁄𑀢𑀺 𑀇𑀫𑀺𑀦𑀸 𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀕𑀳𑀺𑀢𑀸. 𑀲𑀘𑁆𑀘𑀦𑁆𑀢𑀺 𑀯𑀸 𑀇𑀫𑀺𑀦𑀸 𑀫𑀕𑁆𑀕𑀲𑀘𑁆𑀘𑀁 𑀕𑀳𑀺𑀢𑀁. 𑀲𑀸 𑀅𑀢𑁆𑀣𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀕𑁆𑀕𑁄 𑀘𑁂𑀯 𑀳𑁂𑀢𑀼 𑀘𑀸’’𑀢𑀺 (𑀥. 𑀲. 𑁧𑁦𑁩𑁯). 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀦 𑀕𑀳𑀺𑀢𑀸𑀬 𑀢𑀕𑁆𑀕𑀢𑀺𑀓𑀢𑁆𑀢𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀕𑀳𑀺𑀢𑁄𑀯 𑀳𑁄𑀢𑀺. 𑀥𑀫𑁆𑀫𑁄𑀢𑀺 𑀇𑀫𑀺𑀦𑀸 𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄. 𑀲𑀁𑀬𑀫𑁄𑀢𑀺 𑀇𑀫𑀺𑀦𑀸 𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸. 𑀏𑀯𑀫𑁆𑀧𑀺 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀅𑀣 𑀯𑀸 𑀲𑀘𑁆𑀘𑀦𑁆𑀢𑀺 𑀧𑀭𑀫𑀢𑁆𑀣𑀲𑀘𑁆𑀘𑀁, 𑀢𑀁 𑀅𑀢𑁆𑀣𑀢𑁄 𑀦𑀺𑀩𑁆𑀩𑀸𑀦𑀁. 𑀥𑀫𑁆𑀫𑁄𑀢𑀺𑀧𑀤𑁂𑀦 𑀤𑀺𑀝𑁆𑀞𑀺 𑀲𑀗𑁆𑀓𑀧𑁆𑀧𑁄 𑀯𑀸𑀬𑀸𑀫𑁄 𑀲𑀢𑀺 𑀲𑀫𑀸𑀥𑀻𑀢𑀺 𑀧𑀜𑁆𑀘𑀗𑁆𑀕𑀸𑀦𑀺 𑀕𑀳𑀺𑀢𑀸𑀦𑀺. 𑀲𑀁𑀬𑀫𑁄𑀢𑀺 𑀯𑀸𑀘𑀸 𑀓𑀫𑁆𑀫𑀦𑁆𑀢𑁄 𑀆𑀚𑀻𑀯𑁄𑀢𑀺 𑀢𑀻𑀡𑀺. 𑀏𑀯𑀫𑁆𑀧𑀺 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀏𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫. 𑀫𑀚𑁆𑀛𑁂 𑀲𑀺𑀢𑀸𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑁂 𑀯𑀚𑁆𑀚𑁂𑀢𑁆𑀯𑀸 𑀫𑀚𑁆𑀛𑁂 𑀦𑀺𑀲𑁆𑀲𑀺𑀢𑀸. 𑀩𑁆𑀭𑀳𑁆𑀫𑀧𑀢𑁆𑀢𑀻𑀢𑀺 𑀲𑁂𑀝𑁆𑀞𑀧𑀢𑁆𑀢𑀺. 𑀲 𑀢𑀼𑀚𑁆𑀚𑀼𑀪𑀽𑀢𑁂𑀲𑀼 𑀦𑀫𑁄 𑀓𑀭𑁄𑀳𑀻𑀢𑀺 𑀏𑀢𑁆𑀣 𑀢-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀲 𑀢𑁆𑀯𑀁 𑀉𑀚𑀼𑀪𑀽𑀢𑁂𑀲𑀼 𑀔𑀻𑀡𑀸𑀲𑀯𑁂𑀲𑀼 𑀦𑀫𑁄 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄. 𑀢𑀫𑀳𑀁 𑀦𑀭𑀁 𑀥𑀫𑁆𑀫𑀲𑀸𑀭𑀻𑀢𑀺 𑀩𑁆𑀭𑀽𑀫𑀻𑀢𑀺 𑀬𑁄 𑀏𑀯𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀫𑀳𑀁 𑀧𑀼𑀕𑁆𑀕𑀮𑀁 ‘‘𑀥𑀫𑁆𑀫𑀲𑀸𑀭𑀻 𑀏𑀲𑁄 𑀥𑀫𑁆𑀫𑀲𑀸𑀭𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑁄’’𑀢𑀺 𑀘 ‘‘𑀓𑀼𑀲𑀮𑀥𑀫𑁆𑀫𑁂𑀳𑀺 𑀅𑀓𑀼𑀲𑀮𑀥𑀫𑁆𑀫𑁂 𑀲𑀸𑀭𑁂𑀢𑁆𑀯𑀸 𑀞𑀺𑀢𑁄’’𑀢𑀺 𑀯𑀸𑀢𑀺 𑀯𑀤𑀸𑀫𑀻𑀢𑀺. 𑀦𑀯𑀫𑀁.

𑁧𑁦. 𑀩𑀳𑀼𑀥𑀻𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁬. 𑀤𑀲𑀫𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂𑀢𑀺 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 ‘‘𑀕𑀘𑁆𑀙𑀸𑀫𑀺𑀲𑁆𑀲 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀺𑀳𑀭𑀢𑀺. 𑀦𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀓𑀲𑀺𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀸 𑀅𑀝𑀯𑀺𑀫𑀼𑀔𑀸 𑀘𑀭𑀫𑀸𑀦𑀸 𑀩𑁆𑀭𑀸𑀳𑁆𑀫𑀡𑁂 𑀪𑀼𑀜𑁆𑀚𑀺𑀢𑀼𑀁 𑀕𑀢𑁂 𑀧𑀮𑀸𑀢𑀸 𑀳𑁄𑀦𑁆𑀢𑀺. 𑀧𑀮𑁆𑀮𑀗𑁆𑀓𑀦𑁆𑀢𑀺 𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦𑀁. 𑀆𑀪𑀼𑀚𑀺𑀢𑁆𑀯𑀸𑀢𑀺 𑀩𑀦𑁆𑀥𑀺𑀢𑁆𑀯𑀸. 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸𑀢𑀺 𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸, 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑁂𑀢𑁆𑀯𑀸. 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀲𑀢𑀺𑀁 𑀞𑀧𑀬𑀺𑀢𑁆𑀯𑀸, 𑀫𑀼𑀔𑀲𑀫𑀻𑀧𑁂 𑀯𑀸 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁 𑁋 ‘‘𑀅𑀬𑀁 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺 𑀲𑀽𑀧𑀝𑁆𑀞𑀺𑀢𑀸 𑀦𑀸𑀲𑀺𑀓𑀕𑁆𑀕𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑁂 𑀯𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 (𑀯𑀺𑀪. 𑁫𑁩𑁭). 𑀅𑀣 𑀯𑀸 ‘‘𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄. 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄. 𑀲𑀢𑀻𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁄. 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁬𑁪) 𑀯𑀼𑀢𑁆𑀢𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑁄 𑁋 ‘‘𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀁 𑀲𑀢𑀺𑀁 𑀓𑀢𑁆𑀯𑀸’’𑀢𑀺. 𑀏𑀯𑀁 𑀦𑀺𑀲𑀻𑀤𑀦𑁆𑀢𑁄 𑀘 𑀧𑀦 𑀙𑀩𑁆𑀩𑀡𑁆𑀡𑀸 𑀖𑀦𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀉𑀧𑀲𑀗𑁆𑀓𑀫𑀻𑀢𑀺 𑀤𑁄𑀫𑀦𑀲𑁆𑀲𑀸𑀪𑀺𑀪𑀽𑀢𑁄 𑀆𑀳𑀺𑀡𑁆𑀟𑀦𑁆𑀢𑁄, ‘‘𑀲𑀼𑀔𑁂𑀦 𑀯𑀢𑀸𑀬𑀁 𑀲𑀫𑀡𑁄 𑀦𑀺𑀲𑀺𑀦𑁆𑀦𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺.

𑀅𑀚𑁆𑀚𑀲𑀝𑁆𑀞𑀺𑀁 𑀦 𑀤𑀺𑀲𑁆𑀲𑀦𑁆𑀢𑀻𑀢𑀺 𑀅𑀚𑁆𑀚 𑀙𑀤𑀺𑀯𑀲𑀫𑀢𑁆𑀢𑀓𑀸 𑀧𑀝𑁆𑀞𑀸𑀬 𑀦 𑀤𑀺𑀲𑁆𑀲𑀦𑁆𑀢𑀺. 𑀧𑀸𑀧𑀓𑀸𑀢𑀺 𑀮𑀸𑀫𑀓𑀸 𑀢𑀺𑀮𑀔𑀸𑀡𑀼𑀓𑀸. 𑀢𑁂𑀦 𑀓𑀺𑀭 𑀢𑀺𑀮𑀔𑁂𑀢𑁆𑀢𑁂 𑀯𑀧𑀺𑀢𑁂 𑀢𑀤𑀳𑁂𑀯 𑀤𑁂𑀯𑁄 𑀯𑀲𑁆𑀲𑀺𑀢𑁆𑀯𑀸 𑀢𑀺𑀮𑁂 𑀧𑀁𑀲𑀼𑀫𑁆𑀳𑀺 𑀑𑀲𑀻𑀤𑀸𑀧𑁂𑀲𑀺, 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀬𑁂𑀧𑀺 𑀯𑀟𑁆𑀠𑀺𑀁𑀲𑀼, 𑀢𑁂𑀲𑀁 𑀉𑀧𑀭𑀺 𑀧𑀸𑀡𑀓𑀸 𑀧𑀢𑀺𑀢𑁆𑀯𑀸 𑀧𑀡𑁆𑀡𑀸𑀦𑀺 𑀔𑀸𑀤𑀺𑀁𑀲𑀼, 𑀏𑀓𑀧𑀡𑁆𑀡𑀤𑀼𑀧𑀡𑁆𑀡𑀸 𑀔𑀸𑀡𑀼𑀓𑀸 𑀅𑀯𑀲𑀺𑀲𑁆𑀲𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 𑀔𑁂𑀢𑁆𑀢𑀁 𑀑𑀮𑁄𑀓𑁂𑀢𑀼𑀁 𑀕𑀢𑁄 𑀢𑁂 𑀤𑀺𑀲𑁆𑀯𑀸 𑁋 ‘‘𑀯𑀟𑁆𑀠𑀺𑀬𑀸 𑀫𑁂 𑀢𑀺𑀮𑀸 𑀕𑀳𑀺𑀢𑀸, 𑀢𑁂𑀧𑀺 𑀦𑀝𑁆𑀞𑀸’’𑀢𑀺 𑀤𑁄𑀫𑀦𑀲𑁆𑀲𑀚𑀸𑀢𑁄 𑀅𑀳𑁄𑀲𑀺, 𑀢𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳.

𑀉𑀲𑁆𑀲𑁄𑀴𑁆𑀳𑀺𑀓𑀸𑀬𑀸𑀢𑀺 𑀉𑀲𑁆𑀲𑀸𑀳𑁂𑀦 𑀓𑀡𑁆𑀡𑀦𑀗𑁆𑀕𑀼𑀝𑁆𑀞𑀸𑀤𑀻𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀸 𑀉𑀧𑁆𑀧𑀢𑀦𑁆𑀢𑀺. 𑀢𑀲𑁆𑀲 𑀓𑀺𑀭 𑀅𑀦𑀼𑀧𑀼𑀩𑁆𑀩𑁂𑀦 𑀪𑁄𑀕𑁂𑀲𑀼 𑀧𑀭𑀺𑀓𑁆𑀔𑀻𑀡𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑀲𑁆𑀲 𑀅𑀪𑀸𑀯𑁂𑀦 𑀢𑀼𑀘𑁆𑀙𑀓𑁄𑀝𑁆𑀞𑀸 𑀅𑀳𑁂𑀲𑀼𑀁. 𑀢𑀲𑁆𑀲 𑀇𑀢𑁄 𑀘𑀺𑀢𑁄 𑀘 𑀲𑀢𑁆𑀢𑀳𑀺 𑀖𑀭𑁂𑀳𑀺 𑀆𑀕𑀢𑀸 𑀫𑀽𑀲𑀺𑀓𑀸 𑀢𑁂 𑀢𑀼𑀘𑁆𑀙𑀓𑁄𑀝𑁆𑀞𑁂 𑀧𑀯𑀺𑀲𑀺𑀢𑁆𑀯𑀸 𑀉𑀬𑁆𑀬𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑀸 𑀯𑀺𑀬 𑀦𑀘𑁆𑀘𑀦𑁆𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳.

𑀉𑀧𑁆𑀧𑀸𑀝𑀓𑁂𑀳𑀺 𑀲𑀜𑁆𑀙𑀦𑁆𑀦𑁄𑀢𑀺 𑀉𑀧𑁆𑀧𑀸𑀝𑀓𑀧𑀸𑀡𑀓𑁂𑀳𑀺 𑀲𑀜𑁆𑀙𑀦𑁆𑀦𑁄. 𑀢𑀲𑁆𑀲 𑀓𑀺𑀭 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀬𑀦𑀢𑁆𑀣𑀸𑀬 𑀲𑀦𑁆𑀣𑀢𑀁 𑀢𑀺𑀡𑀧𑀡𑁆𑀡𑀲𑀦𑁆𑀣𑀸𑀭𑀁 𑀓𑁄𑀘𑀺 𑀅𑀦𑁆𑀢𑀭𑀦𑁆𑀢𑀭𑀸 𑀧𑀝𑀺𑀚𑀕𑁆𑀕𑀦𑁆𑀢𑁄 𑀦𑀢𑁆𑀣𑀺. 𑀲𑁄 𑀤𑀺𑀯𑀲𑀁 𑀅𑀭𑀜𑁆𑀜𑁂 𑀓𑀫𑁆𑀫𑀁 𑀓𑀢𑁆𑀯𑀸 𑀲𑀸𑀬𑀁 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀦𑀺𑀧𑀚𑁆𑀚𑀢𑀺. 𑀅𑀣𑀲𑁆𑀲 𑀉𑀧𑁆𑀧𑀸𑀝𑀓𑀧𑀸𑀡𑀓𑀸 𑀲𑀭𑀻𑀭𑀁 𑀏𑀓𑀘𑁆𑀙𑀦𑁆𑀦𑀁 𑀓𑀭𑁄𑀦𑁆𑀢𑀸 𑀔𑀸𑀤𑀦𑁆𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳.

𑀯𑀺𑀥𑀯𑀸𑀢𑀺 𑀫𑀢𑀧𑀢𑀺𑀓𑀸. 𑀬𑀸𑀯 𑀓𑀺𑀭 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀯𑀺𑀪𑀯𑀫𑀢𑁆𑀢𑀸 𑀅𑀳𑁄𑀲𑀺, 𑀢𑀸𑀯 𑀢𑀸 𑀯𑀺𑀥𑀯𑀸𑀧𑀺 𑀳𑀼𑀢𑁆𑀯𑀸 𑀧𑀢𑀺𑀓𑀼𑀮𑁂𑀲𑀼 𑀯𑀲𑀺𑀢𑀼𑀁 𑀮𑀪𑀺𑀁𑀲𑀼. 𑀬𑀤𑀸 𑀧𑀦 𑀲𑁄 𑀦𑀺𑀤𑁆𑀥𑀦𑁄 𑀚𑀸𑀢𑁄, 𑀢𑀤𑀸 𑀢𑀸 ‘‘𑀧𑀺𑀢𑀼𑀖𑀭𑀁 𑀕𑀘𑁆𑀙𑀣𑀸’’𑀢𑀺 𑀲𑀲𑁆𑀲𑀼𑀲𑀲𑀼𑀭𑀸𑀤𑀻𑀳𑀺 𑀦𑀺𑀓𑁆𑀓𑀟𑁆𑀠𑀺𑀢𑀸 𑀢𑀢𑁄 𑀢𑀲𑁆𑀲𑁂𑀯 𑀖𑀭𑀁 𑀆𑀕𑀦𑁆𑀢𑁆𑀯𑀸 𑀯𑀲𑀦𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑁄𑀚𑀦𑀓𑀸𑀮𑁂 ‘‘𑀕𑀘𑁆𑀙𑀣 𑀅𑀬𑁆𑀬𑀓𑁂𑀦 𑀲𑀤𑁆𑀥𑀺𑀁 𑀪𑀼𑀜𑁆𑀚𑀣𑀸’’𑀢𑀺 𑀧𑀼𑀢𑁆𑀢𑁂 𑀧𑁂𑀲𑁂𑀦𑁆𑀢𑀺, 𑀢𑁂𑀳𑀺 𑀧𑀸𑀢𑀺𑀬𑀁 𑀳𑀢𑁆𑀣𑁂𑀲𑀼 𑀑𑀢𑀸𑀭𑀺𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑁄 𑀳𑀢𑁆𑀣𑀲𑁆𑀲 𑀑𑀓𑀸𑀲𑀁 𑀦 𑀮𑀪𑀢𑀺. 𑀢𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳.

𑀧𑀺𑀗𑁆𑀕𑀮𑀸𑀢𑀺 𑀓𑀴𑀸𑀭𑀧𑀺𑀗𑁆𑀕𑀮𑀸. 𑀢𑀺𑀮𑀓𑀸𑀳𑀢𑀸𑀢𑀺 𑀓𑀸𑀴𑀲𑁂𑀢𑀸𑀤𑀺𑀯𑀡𑁆𑀡𑁂𑀳𑀺 𑀢𑀺𑀮𑀓𑁂𑀳𑀺 𑀆𑀳𑀢𑀕𑀢𑁆𑀢𑀸. 𑀲𑁄𑀢𑁆𑀢𑀁 𑀧𑀸𑀤𑁂𑀦 𑀩𑁄𑀥𑁂𑀢𑀻𑀢𑀺 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀁 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀧𑀩𑁄𑀥𑁂𑀢𑀺. 𑀅𑀬𑀁 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀫𑀽𑀲𑀺𑀓𑀲𑀤𑁆𑀤𑁂𑀦 𑀉𑀩𑁆𑀩𑀸𑀴𑁆𑀳𑁄 𑀉𑀧𑁆𑀧𑀸𑀝𑀓𑁂𑀳𑀺 𑀘 𑀔𑀚𑁆𑀚𑀫𑀸𑀦𑁄 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀤𑁆𑀤𑀁 𑀅𑀮𑀪𑀺𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀦𑀺𑀤𑁆𑀤𑀸𑀬𑀢𑀺. 𑀅𑀣 𑀦𑀁 𑀅𑀓𑁆𑀔𑀻𑀲𑀼 𑀦𑀺𑀫𑁆𑀫𑀺𑀮𑀺𑀢𑀫𑀢𑁆𑀢𑁂𑀲𑁆𑀯𑁂𑀯 𑁋 ‘‘𑀓𑀺𑀁 𑀓𑀭𑁄𑀲𑀺, 𑀩𑁆𑀭𑀸𑀳𑁆𑀫𑀡, 𑀧𑀘𑁆𑀙𑀸 𑀘 𑀧𑀼𑀩𑁆𑀩𑁂 𑀘 𑀕𑀳𑀺𑀢𑀲𑁆𑀲 𑀇𑀡𑀲𑁆𑀲? 𑀯𑀟𑁆𑀠𑀺 𑀫𑀢𑁆𑀣𑀓𑀁 𑀧𑀢𑁆𑀢𑀸, 𑀲𑀢𑁆𑀢 𑀥𑀻𑀢𑀭𑁄 𑀧𑁄𑀲𑁂𑀢𑀩𑁆𑀩𑀸. 𑀇𑀤𑀸𑀦𑀺 𑀇𑀡𑀸𑀬𑀺𑀓𑀸 𑀆𑀕𑀦𑁆𑀢𑁆𑀯𑀸 𑀕𑁂𑀳𑀁 𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺, 𑀕𑀘𑁆𑀙 𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀧𑀩𑁄𑀥𑁂𑀢𑀺. 𑀢𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳.

𑀇𑀡𑀸𑀬𑀺𑀓𑀸𑀢𑀺 𑀬𑁂𑀲𑀁 𑀅𑀦𑁂𑀦 𑀳𑀢𑁆𑀣𑀢𑁄 𑀇𑀡𑀁 𑀕𑀳𑀺𑀢𑀁. 𑀲𑁄 𑀓𑀺𑀭 𑀓𑀲𑁆𑀲𑀘𑀺 𑀳𑀢𑁆𑀣𑀢𑁄 𑀏𑀓𑀁 𑀓𑀳𑀸𑀧𑀡𑀁 𑀓𑀲𑁆𑀲𑀘𑀺 𑀤𑁆𑀯𑁂 𑀓𑀲𑁆𑀲𑀘𑀺 𑀤𑀲…𑀧𑁂… 𑀓𑀲𑁆𑀲𑀘𑀺 𑀲𑀢𑀦𑁆𑀢𑀺 𑀏𑀯𑀁 𑀩𑀳𑀽𑀦𑀁 𑀳𑀢𑁆𑀣𑀢𑁄 𑀇𑀡𑀁 𑀅𑀕𑁆𑀕𑀳𑁂𑀲𑀺. 𑀢𑁂 𑀤𑀺𑀯𑀸 𑀩𑁆𑀭𑀸𑀳𑁆𑀫𑀡𑀁 𑀅𑀧𑀲𑁆𑀲𑀦𑁆𑀢𑀸 ‘‘𑀕𑁂𑀳𑀢𑁄 𑀢𑀁 𑀦𑀺𑀓𑁆𑀔𑀦𑁆𑀢𑀫𑁂𑀯 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀩𑀮𑀯𑀧𑀘𑁆𑀘𑀽𑀲𑁂 𑀕𑀦𑁆𑀢𑁆𑀯𑀸 𑀘𑁄𑀤𑁂𑀦𑁆𑀢𑀺. 𑀢𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳.

𑀪𑀕𑀯𑀸 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀇𑀫𑀸𑀳𑀺 𑀲𑀢𑁆𑀢𑀳𑀺 𑀕𑀸𑀣𑀸𑀳𑀺 𑀤𑀼𑀓𑁆𑀔𑁂 𑀓𑀣𑀺𑀢𑁂 ‘‘𑀬𑀁 𑀬𑀁, 𑀩𑁆𑀭𑀸𑀳𑁆𑀫𑀡, 𑀢𑀬𑀸 𑀤𑀼𑀓𑁆𑀔𑀁 𑀓𑀣𑀺𑀢𑀁, 𑀲𑀩𑁆𑀩𑀫𑁂𑀢𑀁 𑀫𑀬𑁆𑀳𑀁 𑀦𑀢𑁆𑀣𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀝𑀺𑀕𑀸𑀣𑀸𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀸 𑀕𑀸𑀣𑀸 𑀲𑀼𑀢𑁆𑀯𑀸 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑁂 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀮𑀢𑁆𑀣𑀸𑀢𑀺 𑀮𑀪𑀺.

𑀢𑀜𑁆𑀘 𑀧𑀦 𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀆𑀤𑀸𑀬 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑁂𑀦 𑀣𑁂𑀭𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀓𑁄𑀲𑀮𑀭𑀜𑁆𑀜𑁄 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀭𑀸𑀚𑀸 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀯𑀦𑁆𑀤𑀺𑀢𑁆𑀯𑀸 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀣𑀸𑀕𑀢𑀁 𑀉𑀧𑀭𑀺𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀯𑀭𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀦𑁆𑀥𑁄𑀤𑀓𑁂𑀦 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀲𑀢𑀧𑀸𑀓𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀬𑀸𑀕𑀼𑀁 𑀆𑀳𑀭𑀸𑀧𑁂𑀢𑁆𑀯𑀸 𑀭𑀚𑀢𑀤𑀡𑁆𑀟𑀁 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀉𑀧𑀦𑀸𑀫𑁂𑀲𑀺. 𑀲𑀢𑁆𑀣𑀸 𑀧𑀢𑁆𑀢𑀁 𑀧𑀺𑀤𑀳𑀺. 𑀭𑀸𑀚𑀸 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸, ‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀤𑁄𑀲𑁄 𑀅𑀢𑁆𑀣𑀺, 𑀔𑀫𑀣𑀸’’𑀢𑀺 𑀆𑀳. 𑀦𑀢𑁆𑀣𑀺, 𑀫𑀳𑀸𑀭𑀸𑀚𑀸𑀢𑀺. 𑀅𑀣 𑀓𑀲𑁆𑀫𑀸 𑀬𑀸𑀕𑀼𑀁 𑀦 𑀕𑀡𑁆𑀳𑀣𑀸𑀢𑀺? 𑀧𑀮𑀺𑀩𑁄𑀥𑁄 𑀅𑀢𑁆𑀣𑀺, 𑀫𑀳𑀸𑀭𑀸𑀚𑀸𑀢𑀺. 𑀓𑀺𑀁 𑀧𑀦, 𑀪𑀦𑁆𑀢𑁂, 𑀬𑀸𑀕𑀼𑀁 𑀅𑀕𑀡𑁆𑀳𑀦𑁆𑀢𑁂𑀳𑁂𑀯 𑀮𑀪𑀺𑀢𑀩𑁆𑀩𑁄 𑀏𑀲 𑀧𑀮𑀺𑀩𑁄𑀥𑁄, 𑀧𑀝𑀺𑀩𑀮𑁄 𑀅𑀳𑀁 𑀧𑀮𑀺𑀩𑁄𑀥𑀁 𑀤𑀸𑀢𑀼𑀁, 𑀕𑀡𑁆𑀳𑀣, 𑀪𑀦𑁆𑀢𑁂𑀢𑀺. 𑀲𑀢𑁆𑀣𑀸 𑀅𑀕𑁆𑀕𑀳𑁂𑀲𑀺. 𑀫𑀳𑀮𑁆𑀮𑀓𑀢𑁆𑀣𑁂𑀭𑁄𑀧𑀺 𑀤𑀻𑀖𑀭𑀢𑁆𑀢𑀁 𑀙𑀸𑀢𑁄 𑀬𑀸𑀯𑀤𑀢𑁆𑀣𑀁 𑀬𑀸𑀕𑀼𑀁 𑀧𑀺𑀯𑀺. 𑀭𑀸𑀚𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀕𑀯𑀸 𑀢𑀼𑀫𑁆𑀳𑁂 𑀧𑀯𑁂𑀡𑀺𑀬𑀸 𑀆𑀕𑀢𑁂 𑀑𑀓𑁆𑀓𑀸𑀓𑀯𑀁𑀲𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀮𑁄𑀓𑁂 𑀅𑀕𑁆𑀕𑀢𑀁 𑀧𑀢𑁆𑀢𑁄, 𑀓𑁄 𑀦𑀸𑀫, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀮𑀺𑀩𑁄𑀥𑁄’’𑀢𑀺? 𑀫𑀳𑀸𑀭𑀸𑀚, 𑀏𑀢𑀲𑁆𑀲 𑀫𑀳𑀮𑁆𑀮𑀓𑀢𑁆𑀣𑁂𑀭𑀲𑁆𑀲 𑀧𑀮𑀺𑀩𑁄𑀥𑁄 𑀅𑀫𑁆𑀳𑀸𑀓𑀁 𑀧𑀮𑀺𑀩𑁄𑀥𑀲𑀤𑀺𑀲𑁄𑀯𑀸𑀢𑀺.

𑀭𑀸𑀚𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀓𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀮𑀺𑀩𑁄𑀥𑁄’’𑀢𑀺 𑀧𑀼𑀘𑁆𑀙𑀺? 𑀇𑀡𑀧𑀮𑀺𑀩𑁄𑀥𑁄, 𑀫𑀳𑀸𑀭𑀸𑀚𑀸𑀢𑀺. 𑀓𑀺𑀢𑁆𑀢𑀓𑁄, 𑀪𑀦𑁆𑀢𑁂𑀢𑀺? 𑀕𑀡𑁂𑀳𑀺, 𑀫𑀳𑀸𑀭𑀸𑀚𑀸𑀢𑀺. 𑀭𑀜𑁆𑀜𑁄 ‘‘𑀏𑀓𑀁 𑀤𑁆𑀯𑁂 𑀲𑀢𑀁 𑀲𑀳𑀲𑁆𑀲’’𑀦𑁆𑀢𑀺 𑀕𑀡𑁂𑀦𑁆𑀢𑀲𑁆𑀲 𑀅𑀗𑁆𑀕𑀼𑀮𑀺𑀬𑁄 𑀦𑀧𑁆𑀧𑀳𑁄𑀦𑁆𑀢𑀺. 𑀅𑀣𑁂𑀓𑀁 𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀺𑀢𑁆𑀯𑀸, ‘‘𑀕𑀘𑁆𑀙, 𑀪𑀡𑁂, 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀳𑀺 ‘𑀲𑀩𑁆𑀩𑁂 𑀩𑀳𑀼𑀥𑀻𑀢𑀺𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀇𑀡𑀸𑀬𑀺𑀓𑀸 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀦𑁆𑀢𑀽’’𑀢𑀺. 𑀫𑀦𑀼𑀲𑁆𑀲𑀸 𑀪𑁂𑀭𑀺𑀁 𑀲𑀼𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀭𑀸𑀚𑀸 𑀢𑁂𑀲𑀁 𑀳𑀢𑁆𑀣𑀢𑁄 𑀧𑀡𑁆𑀡𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀅𑀦𑀽𑀦𑀁 𑀥𑀦𑀫𑀤𑀸𑀲𑀺. 𑀢𑀢𑁆𑀣 𑀲𑀼𑀯𑀡𑁆𑀡𑀫𑁂𑀯 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀅𑀳𑁄𑀲𑀺. 𑀧𑀼𑀦 𑀭𑀸𑀚𑀸 𑀧𑀼𑀘𑁆𑀙𑀺 𑁋 ‘‘𑀅𑀜𑁆𑀜𑁄𑀧𑀺 𑀅𑀢𑁆𑀣𑀺, 𑀪𑀦𑁆𑀢𑁂, 𑀧𑀮𑀺𑀩𑁄𑀥𑁄’’𑀢𑀺. 𑀇𑀡𑀁 𑀦𑀸𑀫, 𑀫𑀳𑀸𑀭𑀸𑀚, 𑀤𑀢𑁆𑀯𑀸 𑀫𑀼𑀘𑁆𑀘𑀺𑀢𑀼𑀁 𑀲𑀓𑁆𑀓𑀸, 𑀏𑀢𑀸 𑀧𑀦 𑀲𑀢𑁆𑀢 𑀤𑀸𑀭𑀺𑀓𑀸 𑀫𑀳𑀸𑀧𑀮𑀺𑀩𑁄𑀥𑀸 𑀫𑀬𑁆𑀳𑀦𑁆𑀢𑀺. 𑀭𑀸𑀚𑀸 𑀬𑀸𑀦𑀸𑀦𑀺 𑀧𑁂𑀲𑁂𑀢𑁆𑀯𑀸 𑀢𑀲𑁆𑀲 𑀥𑀻𑀢𑀭𑁄 𑀆𑀳𑀭𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀥𑀻𑀢𑀭𑁄 𑀓𑀢𑁆𑀯𑀸 𑀢𑀁 𑀢𑀁 𑀓𑀼𑀮𑀖𑀭𑀁 𑀧𑁂𑀲𑁂𑀢𑁆𑀯𑀸, ‘‘𑀅𑀜𑁆𑀜𑁄𑀧𑀺, 𑀪𑀦𑁆𑀢𑁂, 𑀅𑀢𑁆𑀣𑀺 𑀧𑀮𑀺𑀩𑁄𑀥𑁄’’𑀢𑀺 𑀧𑀼𑀘𑁆𑀙𑀺? 𑀩𑁆𑀭𑀸𑀳𑁆𑀫𑀡𑀻, 𑀫𑀳𑀸𑀭𑀸𑀚𑀸𑀢𑀺. 𑀭𑀸𑀚𑀸 𑀬𑀸𑀦𑀁 𑀧𑁂𑀲𑁂𑀢𑁆𑀯𑀸, 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀺𑀁 𑀆𑀳𑀭𑀸𑀧𑁂𑀢𑁆𑀯𑀸, 𑀅𑀬𑁆𑀬𑀺𑀓𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀼𑀦 𑀧𑀼𑀘𑁆𑀙𑀺 𑁋 ‘‘𑀅𑀜𑁆𑀜𑁄𑀧𑀺, 𑀪𑀦𑁆𑀢𑁂, 𑀅𑀢𑁆𑀣𑀺 𑀧𑀮𑀺𑀩𑁄𑀥𑁄’’𑀢𑀺? 𑀦𑀢𑁆𑀣𑀺, 𑀫𑀳𑀸𑀭𑀸𑀚𑀸𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸𑀧𑀺 𑀘𑀻𑀯𑀭𑀤𑀼𑀲𑁆𑀲𑀸𑀦𑀺 𑀤𑀸𑀧𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀫 𑀲𑀦𑁆𑀢𑀓𑀁 𑀢𑀼𑀫𑁆𑀳𑀸𑀓𑀁 𑀪𑀺𑀓𑁆𑀔𑀼𑀪𑀸𑀯𑀁 𑀚𑀸𑀦𑀸𑀣𑀸’’𑀢𑀺 𑀆𑀳. 𑀆𑀫, 𑀫𑀳𑀸𑀭𑀸𑀚𑀸𑀢𑀺. 𑀅𑀣 𑀦𑀁 𑀭𑀸𑀚𑀸 𑀆𑀳 𑁋 ‘‘𑀪𑀦𑁆𑀢𑁂, 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀸𑀤𑀬𑁄𑀧𑀺 𑀲𑀩𑁆𑀩𑁂 𑀧𑀘𑁆𑀘𑀬𑀸 𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀼𑀫𑁆𑀳𑁂 𑀢𑀣𑀸𑀕𑀢𑀲𑁆𑀲 𑀫𑀦𑀁 𑀕𑀳𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀣𑀸’’𑀢𑀺. 𑀣𑁂𑀭𑁄 𑀢𑀣𑁂𑀯 𑀅𑀧𑁆𑀧𑀫𑀢𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀆𑀲𑀯𑀓𑁆𑀔𑀬𑀁 𑀧𑀢𑁆𑀢𑁄𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀉𑀧𑀸𑀲𑀓𑀯𑀕𑁆𑀕𑁄

𑁧. 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁭. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀫𑀕𑀥𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀦𑁆𑀢𑀺 𑀭𑀸𑀚𑀕𑀳𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀲𑁆𑀲 𑀕𑀺𑀭𑀺𑀦𑁄 𑀤𑀓𑁆𑀔𑀺𑀡𑀪𑀸𑀕𑁂 𑀚𑀦𑀧𑀤𑁄 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀚𑀦𑀧𑀤𑁂, 𑀢𑀢𑁆𑀣 𑀯𑀺𑀳𑀸𑀭𑀲𑁆𑀲𑀸𑀧𑀺 𑀢𑀤𑁂𑀯 𑀦𑀸𑀫𑀁. 𑀏𑀓𑀦𑀸𑀴𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂𑀢𑀺 𑀏𑀓𑀦𑀸𑀴𑀸𑀢𑀺 𑀢𑀲𑁆𑀲 𑀕𑀸𑀫𑀲𑁆𑀲 𑀦𑀸𑀫𑀁. 𑀩𑁆𑀭𑀸𑀳𑁆𑀫𑀡𑀸 𑀧𑀦𑁂𑀢𑁆𑀣 𑀲𑀫𑁆𑀩𑀳𑀼𑀮𑀸 𑀧𑀝𑀺𑀯𑀲𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀪𑁄𑀕𑁄 𑀏𑀯 𑀯𑀸 𑀲𑁄. 𑀢𑀲𑁆𑀫𑀸 ‘‘𑀩𑁆𑀭𑀸𑀳𑁆𑀫𑀡𑀕𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑀁 𑀲𑀫𑀬𑀁 𑀪𑀕𑀯𑀸 𑀫𑀕𑀥𑀭𑀝𑁆𑀞𑁂 𑀏𑀓𑀦𑀸𑀴𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀤𑀓𑁆𑀔𑀺𑀡𑀕𑀺𑀭𑀺𑀫𑀳𑀸𑀯𑀺𑀳𑀸𑀭𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄 𑀯𑀺𑀳𑀭𑀢𑀺, 𑀢𑁂𑀦 𑀲𑀫𑀬𑁂𑀦. 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑁆𑀲𑀸𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑀲𑀺𑀁 𑀦𑀺𑀲𑁆𑀲𑀸𑀬 𑀚𑀻𑀯𑀢𑀺, 𑀪𑀸𑀭𑀤𑁆𑀯𑀸𑀚𑁄𑀢𑀺 𑀘𑀲𑁆𑀲 𑀕𑁄𑀢𑁆𑀢𑀁. 𑀧𑀜𑁆𑀘𑀫𑀢𑁆𑀢𑀸𑀦𑀻𑀢𑀺 𑀧𑀜𑁆𑀘 𑀧𑀫𑀸𑀡𑀸𑀦𑀺, 𑀅𑀦𑀽𑀦𑀸𑀦𑀺 𑀅𑀦𑀥𑀺𑀓𑀸𑀦𑀺 𑀧𑀜𑁆𑀘𑀦𑀗𑁆𑀕𑀮𑀲𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀬𑀼𑀢𑁆𑀢𑀸𑀦𑀻𑀢𑀺 𑀬𑁄𑀚𑀺𑀢𑀸𑀦𑀺, 𑀩𑀮𑀻𑀩𑀤𑁆𑀤𑀸𑀦𑀁 𑀔𑀦𑁆𑀥𑁂𑀲𑀼 𑀞𑀧𑁂𑀢𑁆𑀯𑀸 𑀬𑀼𑀕𑁂 𑀬𑁄𑀢𑁆𑀢𑁂𑀳𑀺 𑀬𑁄𑀚𑀺𑀢𑀸𑀦𑀻𑀢𑀺 𑀅𑀢𑁆𑀣𑁄.

𑀯𑀧𑁆𑀧𑀓𑀸𑀮𑁂𑀢𑀺 𑀯𑀧𑁆𑀧𑀦𑀓𑀸𑀮𑁂 𑀩𑀻𑀚𑀦𑀺𑀓𑁆𑀔𑁂𑀧𑀲𑀫𑀬𑁂. 𑀢𑀢𑁆𑀣 𑀤𑁆𑀯𑁂 𑀯𑀧𑁆𑀧𑀸𑀦𑀺 𑀓𑀮𑀮𑀯𑀧𑁆𑀧𑀜𑁆𑀘 𑀧𑀁𑀲𑀼𑀯𑀧𑁆𑀧𑀜𑁆𑀘. 𑀧𑀁𑀲𑀼𑀯𑀧𑁆𑀧𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁, 𑀢𑀜𑁆𑀘 𑀔𑁄 𑀧𑀞𑀫𑀤𑀺𑀯𑀲𑁂 𑀫𑀗𑁆𑀕𑀮𑀯𑀧𑁆𑀧𑀁. 𑀢𑀢𑁆𑀣𑀸𑀬𑀁 𑀉𑀧𑀓𑀭𑀡𑀲𑀫𑁆𑀧𑀤𑀸 𑁋 𑀢𑀻𑀡𑀺 𑀩𑀮𑀺𑀩𑀤𑁆𑀤𑀲𑀳𑀲𑁆𑀲𑀸𑀦𑀺 𑀉𑀧𑀝𑁆𑀞𑀸𑀧𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀲𑀼𑀯𑀡𑁆𑀡𑀫𑀬𑀸𑀦𑀺 𑀲𑀺𑀗𑁆𑀕𑀸𑀦𑀺 𑀧𑀝𑀺𑀫𑀼𑀓𑁆𑀓𑀸𑀦𑀺, 𑀭𑀚𑀢𑀫𑀬𑀸 𑀔𑀼𑀭𑀸, 𑀲𑀩𑁆𑀩𑁂 𑀲𑁂𑀢𑀫𑀸𑀮𑀸𑀳𑀺 𑀘𑁂𑀯 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀻𑀳𑀺 𑀘 𑀅𑀮𑀗𑁆𑀓𑀢𑀸 𑀧𑀭𑀺𑀧𑀼𑀡𑁆𑀡𑀧𑀜𑁆𑀘𑀗𑁆𑀕𑀸 𑀲𑀩𑁆𑀩𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸, 𑀏𑀓𑀘𑁆𑀘𑁂 𑀓𑀸𑀴𑀸 𑀅𑀜𑁆𑀚𑀦𑀯𑀡𑁆𑀡𑀸, 𑀏𑀓𑀘𑁆𑀘𑁂 𑀲𑁂𑀢𑀸 𑀨𑀮𑀺𑀓𑀯𑀡𑁆𑀡𑀸, 𑀏𑀓𑀘𑁆𑀘𑁂 𑀭𑀢𑁆𑀢𑀸 𑀧𑀯𑀸𑀴𑀯𑀡𑁆𑀡𑀸, 𑀏𑀓𑀘𑁆𑀘𑁂 𑀓𑀫𑁆𑀫𑀸𑀲𑀸 𑀫𑀲𑀸𑀭𑀕𑀮𑁆𑀮𑀯𑀡𑁆𑀡𑀸. 𑀏𑀯𑀁 𑀧𑀜𑁆𑀘𑀲𑀢𑀸 𑀓𑀲𑁆𑀲𑀓𑀸 𑀲𑀩𑁆𑀩𑁂 𑀅𑀳𑀢𑀲𑁂𑀢𑀯𑀢𑁆𑀣𑀸 𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀢𑀸 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑁂𑀲𑀼 𑀧𑀢𑀺𑀝𑁆𑀞𑀺𑀢𑀧𑀼𑀧𑁆𑀨𑀘𑀼𑀫𑁆𑀩𑀝𑀓𑀸 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀮𑀜𑁆𑀚𑀦𑀼𑀚𑁆𑀚𑀮𑀕𑀢𑁆𑀢𑀸 𑀤𑀲 𑀤𑀲 𑀦𑀗𑁆𑀕𑀮𑀸 𑀏𑀓𑁂𑀓𑀕𑀼𑀫𑁆𑀩𑀸 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀦𑀗𑁆𑀕𑀮𑀸𑀦𑀁 𑀲𑀻𑀲𑀜𑁆𑀘 𑀬𑀼𑀕𑀜𑁆𑀘 𑀧𑀢𑁄𑀤𑀸 𑀘 𑀲𑀼𑀯𑀡𑁆𑀡𑀔𑀘𑀺𑀢𑀸. 𑀧𑀞𑀫𑀦𑀗𑁆𑀕𑀮𑁂 𑀅𑀝𑁆𑀞 𑀩𑀮𑀻𑀩𑀤𑁆𑀤𑀸 𑀬𑀼𑀢𑁆𑀢𑀸, 𑀲𑁂𑀲𑁂𑀲𑀼 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄, 𑀅𑀯𑀲𑁂𑀲𑀸 𑀓𑀺𑀮𑀦𑁆𑀢𑀧𑀭𑀺𑀯𑀢𑁆𑀢𑀦𑀢𑁆𑀣𑀁 𑀆𑀦𑀻𑀢𑀸. 𑀏𑀓𑁂𑀓𑀕𑀼𑀫𑁆𑀩𑁂 𑀏𑀓𑁂𑀓𑀩𑀻𑀚𑀲𑀓𑀝𑀁 𑀏𑀓𑁂𑀓𑁄 𑀓𑀲𑀢𑀺, 𑀏𑀓𑁂𑀓𑁄 𑀯𑀧𑁆𑀧𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀧𑀦 𑀧𑀕𑁂𑀯 𑀫𑀲𑁆𑀲𑀼𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀲𑀼𑀕𑀦𑁆𑀥𑀕𑀦𑁆𑀥𑁂𑀳𑀺 𑀯𑀺𑀮𑀺𑀢𑁆𑀢𑁄 𑀧𑀜𑁆𑀘𑀲𑀢𑀕𑁆𑀖𑀦𑀓𑀁 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀳𑀲𑁆𑀲𑀕𑁆𑀖𑀦𑀓𑀁 𑀏𑀓𑀁𑀲𑀁 𑀓𑀭𑀺𑀢𑁆𑀯𑀸 𑀏𑀓𑁂𑀓𑀺𑀲𑁆𑀲𑀸 𑀅𑀗𑁆𑀕𑀼𑀮𑀺𑀬𑀸 𑀤𑁆𑀯𑁂 𑀤𑁆𑀯𑁂𑀢𑀺 𑀯𑀻𑀲𑀢𑀺 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸𑀬𑁄 𑀓𑀡𑁆𑀡𑁂𑀲𑀼 𑀲𑀻𑀳𑀓𑀼𑀡𑁆𑀟𑀮𑀸𑀦𑀺 𑀲𑀻𑀲𑁂 𑀩𑁆𑀭𑀳𑁆𑀫𑀯𑁂𑀞𑀦𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀲𑀼𑀯𑀡𑁆𑀡𑀫𑀸𑀮𑀁 𑀓𑀡𑁆𑀞𑁂 𑀓𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀕𑀡𑀧𑀭𑀺𑀯𑀼𑀢𑁄 𑀓𑀫𑁆𑀫𑀦𑁆𑀢𑀁 𑀯𑁄𑀲𑀸𑀲𑀢𑀺. 𑀅𑀣𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀅𑀦𑁂𑀓𑀲𑀢𑀪𑀸𑀚𑀦𑁂𑀲𑀼 𑀧𑀸𑀬𑀸𑀲𑀁 𑀧𑀘𑀸𑀧𑁂𑀢𑁆𑀯𑀸 𑀫𑀳𑀸𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸 𑀩𑁆𑀭𑀸𑀳𑁆𑀫𑀡𑀻𑀕𑀡𑀧𑀭𑀺𑀯𑀼𑀢𑀸 𑀓𑀫𑁆𑀫𑀦𑁆𑀢𑀁 𑀅𑀕𑀫𑀸𑀲𑀺. 𑀕𑁂𑀳𑀫𑁆𑀧𑀺𑀲𑁆𑀲 𑀳𑀭𑀺𑀢𑀼𑀧𑀮𑀺𑀢𑁆𑀢𑀁 𑀯𑀺𑀧𑁆𑀧𑀓𑀺𑀡𑁆𑀡𑀮𑀸𑀚𑀁 𑀧𑀼𑀡𑁆𑀡𑀖𑀝𑀓𑀤𑀮𑀺𑀥𑀚𑀧𑀝𑀸𑀓𑀸𑀳𑀺 𑀅𑀮𑀗𑁆𑀓𑀢𑀁 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀲𑀼𑀓𑀢𑀩𑀮𑀺𑀓𑀫𑁆𑀫𑀁, 𑀔𑁂𑀢𑁆𑀢𑀜𑁆𑀘 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀲𑀫𑀼𑀲𑁆𑀲𑀺𑀢𑀤𑁆𑀥𑀚𑀧𑀝𑀸𑀓𑀁 𑀅𑀳𑁄𑀲𑀺. 𑀧𑀭𑀺𑀚𑀦𑀓𑀫𑁆𑀫𑀓𑀸𑀭𑁂𑀳𑀺 𑀲𑀤𑁆𑀥𑀺𑀁 𑀑𑀲𑀝𑀧𑀭𑀺𑀲𑀸 𑀅𑀟𑁆𑀠𑀢𑁂𑀬𑁆𑀬𑀲𑀳𑀲𑁆𑀲𑀸 𑀅𑀳𑁄𑀲𑀺, 𑀲𑀩𑁆𑀩𑁂 𑀅𑀳𑀢𑀯𑀢𑁆𑀣𑀸, 𑀲𑀩𑁆𑀩𑁂𑀲𑀁 𑀧𑀸𑀬𑀸𑀲𑀪𑁄𑀚𑀦𑀫𑁂𑀯 𑀧𑀝𑀺𑀬𑀢𑁆𑀢𑀁.

𑀅𑀣 𑀩𑁆𑀭𑀸𑀳𑁆𑀫𑀡𑁄 𑀲𑀼𑀯𑀡𑁆𑀡𑀧𑀸𑀢𑀺𑀁 𑀥𑁄𑀯𑀸𑀧𑁂𑀢𑁆𑀯𑀸 𑀧𑀸𑀬𑀸𑀲𑀲𑁆𑀲 𑀧𑀽𑀭𑁂𑀢𑁆𑀯𑀸 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑁂𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀦𑀗𑁆𑀕𑀮𑀩𑀮𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑀻 𑀧𑀜𑁆𑀘𑀦𑁆𑀦𑀁 𑀓𑀲𑁆𑀲𑀓𑀲𑀢𑀸𑀦𑀁 𑀲𑀼𑀯𑀡𑁆𑀡𑀭𑀚𑀢𑀓𑀁𑀲𑀢𑀫𑁆𑀩𑀮𑁄𑀳𑀫𑀬𑀸𑀦𑀺 𑀪𑀸𑀚𑀦𑀸𑀦𑀺 𑀤𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀧𑀸𑀬𑀸𑀲𑁂𑀦 𑀧𑀭𑀺𑀯𑀺𑀲𑀦𑁆𑀢𑀻 𑀕𑀘𑁆𑀙𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀩𑀮𑀺𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀭𑀢𑁆𑀢𑀩𑀦𑁆𑀥𑀺𑀓𑀸𑀬𑁄 𑀉𑀧𑀸𑀳𑀦𑀸𑀬𑁄 𑀆𑀭𑁄𑀳𑀺𑀢𑁆𑀯𑀸 𑀭𑀢𑁆𑀢𑀲𑀼𑀯𑀡𑁆𑀡𑀤𑀡𑁆𑀟𑀓𑀁 𑀕𑀳𑁂𑀢𑁆𑀯𑀸, ‘‘𑀇𑀥 𑀧𑀸𑀬𑀸𑀲𑀁 𑀤𑁂𑀣, 𑀇𑀥 𑀲𑀧𑁆𑀧𑀺𑀁 𑀤𑁂𑀣, 𑀇𑀥 𑀲𑀓𑁆𑀔𑀭𑀁 𑀤𑁂𑀣𑀸’’𑀢𑀺 𑀯𑁄𑀲𑀸𑀲𑀫𑀸𑀦𑁄 𑀯𑀺𑀘𑀭𑀢𑀺. 𑀅𑀬𑀁 𑀢𑀸𑀯 𑀓𑀫𑁆𑀫𑀦𑁆𑀢𑁂 𑀧𑀯𑀢𑁆𑀢𑀺.

𑀯𑀺𑀳𑀸𑀭𑁂 𑀧𑀦 𑀬𑀢𑁆𑀣 𑀬𑀢𑁆𑀣 𑀩𑀼𑀤𑁆𑀥𑀸 𑀯𑀲𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀦𑁂𑀲𑀁 𑀤𑁂𑀯𑀲𑀺𑀓𑀁 𑀧𑀜𑁆𑀘 𑀓𑀺𑀘𑁆𑀘𑀸𑀦𑀺 𑀪𑀯𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀁 𑀧𑀼𑀭𑀺𑀫𑀬𑀸𑀫𑀓𑀺𑀘𑁆𑀘𑀁 𑀫𑀚𑁆𑀛𑀺𑀫𑀬𑀸𑀫𑀓𑀺𑀘𑁆𑀘𑀁 𑀧𑀘𑁆𑀙𑀺𑀫𑀬𑀸𑀫𑀓𑀺𑀘𑁆𑀘𑀦𑁆𑀢𑀺.

𑀢𑀢𑁆𑀭𑀺𑀤𑀁 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁 𑁋 𑀪𑀕𑀯𑀸 𑀳𑀺 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀉𑀧𑀝𑁆𑀞𑀸𑀓𑀸𑀦𑀼𑀕𑁆𑀕𑀳𑀢𑁆𑀣𑀁 𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀜𑁆𑀘 𑀫𑀼𑀔𑀥𑁄𑀯𑀦𑀸𑀤𑀺𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸, 𑀢𑀸𑀯 𑀯𑀺𑀯𑀺𑀢𑁆𑀢𑀸𑀲𑀦𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀫𑀸𑀤𑀸𑀬 𑀓𑀤𑀸𑀘𑀺 𑀏𑀓𑀓𑁄 𑀓𑀤𑀸𑀘𑀺 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺 𑀓𑀤𑀸𑀘𑀺 𑀧𑀓𑀢𑀺𑀬𑀸, 𑀓𑀤𑀸𑀘𑀺 𑀅𑀦𑁂𑀓𑁂𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀯𑀢𑁆𑀢𑀫𑀸𑀦𑁂𑀳𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑁄 𑀮𑁄𑀓𑀦𑀸𑀣𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀫𑀼𑀤𑀼𑀕𑀢𑀺𑀬𑁄 𑀯𑀸𑀢𑀸 𑀧𑀣𑀯𑀺𑀁 𑀲𑁄𑀥𑁂𑀦𑁆𑀢𑀺, 𑀯𑀮𑀸𑀳𑀓𑀸 𑀉𑀤𑀓𑀨𑀼𑀲𑀺𑀢𑀸𑀦𑀺 𑀫𑀼𑀜𑁆𑀘𑀦𑁆𑀢𑀸 𑀫𑀕𑁆𑀕𑁂 𑀭𑁂𑀡𑀼𑀁 𑀯𑀽𑀧𑀲𑀫𑁂𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀅𑀧𑀭𑁂 𑀯𑀸𑀢𑀸 𑀧𑀼𑀧𑁆𑀨𑀸𑀦𑀺 𑀉𑀧𑀳𑀭𑀺𑀢𑁆𑀯𑀸 𑀫𑀕𑁆𑀕𑁂 𑀑𑀓𑀺𑀭𑀦𑁆𑀢𑀺. 𑀉𑀦𑁆𑀦𑀢𑀸 𑀪𑀽𑀫𑀺𑀧𑁆𑀧𑀤𑁂𑀲𑀸 𑀑𑀦𑀫𑀦𑁆𑀢𑀺, 𑀑𑀦𑀢𑀸 𑀉𑀦𑁆𑀦𑀫𑀦𑁆𑀢𑀺. 𑀧𑀸𑀤𑀦𑀺𑀓𑁆𑀔𑁂𑀧𑀲𑀫𑀬𑁂 𑀲𑀫𑀸𑀯 𑀪𑀽𑀫𑀺 𑀳𑁄𑀢𑀺, 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 𑀧𑀤𑀼𑀫𑀧𑀼𑀧𑁆𑀨𑀸𑀦𑀺 𑀯𑀸 𑀧𑀸𑀤𑁂 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀇𑀦𑁆𑀤𑀔𑀻𑀮𑀲𑁆𑀲 𑀅𑀦𑁆𑀢𑁄 𑀞𑀧𑀺𑀢𑀫𑀢𑁆𑀢𑁂 𑀤𑀓𑁆𑀔𑀺𑀡𑀧𑀸𑀤𑁂 𑀲𑀭𑀻𑀭𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀲𑀲𑀺𑀜𑁆𑀘𑀦𑀸𑀦𑀺 𑀯𑀺𑀬 𑀘𑀺𑀢𑁆𑀭𑀧𑀝𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺 𑀯𑀺𑀬 𑀘 𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀓𑀭𑁄𑀦𑁆𑀢𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀸𑀯𑀦𑁆𑀢𑀺. 𑀳𑀢𑁆𑀣𑀺𑀅𑀲𑁆𑀲𑀯𑀺𑀳𑀗𑁆𑀕𑀸𑀤𑀬𑁄 𑀲𑀓𑀲𑀓𑀝𑁆𑀞𑀸𑀦𑁂𑀲𑀼 𑀞𑀺𑀢𑀸𑀬𑁂𑀯 𑀫𑀥𑀼𑀭𑁂𑀦𑀸𑀓𑀸𑀭𑁂𑀦 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀢𑀣𑀸 𑀪𑁂𑀭𑀺𑀯𑀻𑀡𑀸𑀤𑀻𑀦𑀺 𑀢𑀽𑀭𑀺𑀬𑀸𑀦𑀺 𑀫𑀦𑀼𑀲𑁆𑀲𑀸𑀦𑀜𑁆𑀘 𑀓𑀸𑀬𑀽𑀧𑀕𑀸𑀦𑀺 𑀆𑀪𑀭𑀡𑀸𑀦𑀺. 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀫𑀦𑀼𑀲𑁆𑀲𑀸 𑀚𑀸𑀦𑀦𑁆𑀢𑀺 ‘‘𑀅𑀚𑁆𑀚 𑀪𑀕𑀯𑀸 𑀇𑀥 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄’’𑀢𑀺. 𑀢𑁂 𑀲𑀼𑀦𑀺𑀯𑀢𑁆𑀣𑀸 𑀲𑀼𑀧𑀸𑀭𑀼𑀢𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀲𑀓𑁆𑀓𑀘𑁆𑀘𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀤𑀲 𑀪𑀺𑀓𑁆𑀔𑀽, 𑀅𑀫𑁆𑀳𑀸𑀓𑀁 𑀯𑀻𑀲𑀢𑀺, 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀼𑀲𑀢𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀪𑀕𑀯𑀢𑁄𑀧𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀺𑀡𑁆𑀟𑀧𑀸𑀢𑁂𑀦 𑀧𑀝𑀺𑀫𑀸𑀦𑁂𑀦𑁆𑀢𑀺.

𑀪𑀕𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀢𑁂𑀲𑀁 𑀲𑀦𑁆𑀢𑀸𑀦𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀬𑀣𑀸 𑀓𑁂𑀘𑀺 𑀲𑀭𑀡𑀕𑀫𑀦𑁂 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀓𑁂𑀘𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼, 𑀓𑁂𑀘𑀺 𑀲𑁄𑀢𑀸𑀧𑀢𑁆𑀢𑀺𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀨𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁, 𑀓𑁂𑀘𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂𑀢𑀺. 𑀏𑀯𑀁 𑀫𑀳𑀸𑀚𑀦𑀁 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀕𑀦𑁆𑀥𑀫𑀡𑁆𑀟𑀮𑀫𑀸𑀴𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀢𑀺 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑁄. 𑀢𑀢𑁄 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀉𑀧𑀝𑁆𑀞𑀸𑀓𑁄 𑀪𑀕𑀯𑀢𑁄 𑀦𑀺𑀯𑁂𑀤𑁂𑀢𑀺. 𑀅𑀣 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀢𑀺. 𑀇𑀤𑀁 𑀢𑀸𑀯 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀁.

𑀅𑀣 𑀪𑀕𑀯𑀸 𑀏𑀯𑀁 𑀓𑀢𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑁄 𑀕𑀦𑁆𑀥𑀓𑀼𑀝𑀺𑀬𑀸 𑀉𑀧𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀧𑀸𑀤𑀧𑀻𑀞𑁂 𑀞𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀯𑀤𑀢𑀺 𑁋 ‘‘𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣, 𑀤𑀼𑀮𑁆𑀮𑀪𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀮𑁄𑀓𑀲𑁆𑀫𑀺𑀁, 𑀤𑀼𑀮𑁆𑀮𑀪𑁄 𑀫𑀦𑀼𑀲𑁆𑀲𑀢𑁆𑀢𑀧𑀝𑀺𑀮𑀸𑀪𑁄, 𑀤𑀼𑀮𑁆𑀮𑀪𑀸 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺, 𑀤𑀼𑀮𑁆𑀮𑀪𑀸 𑀧𑀩𑁆𑀩𑀚𑁆𑀚𑀸, 𑀤𑀼𑀮𑁆𑀮𑀪𑀁 𑀲𑀤𑁆𑀥𑀫𑁆𑀫𑀲𑁆𑀲𑀯𑀦’’𑀦𑁆𑀢𑀺. 𑀢𑀢𑁆𑀣 𑀓𑁂𑀘𑀺 𑀪𑀕𑀯𑀦𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑁆𑀢𑀺. 𑀪𑀕𑀯𑀸 𑀢𑁂𑀲𑀁 𑀅𑀢𑁆𑀢𑀦𑁄 𑀘𑀭𑀺𑀬𑀸𑀦𑀼𑀭𑀽𑀧𑀁 𑀓𑀫𑁆𑀫𑀝𑁆𑀞𑀸𑀦𑀁 𑀤𑁂𑀢𑀺. 𑀢𑀢𑁄 𑀲𑀩𑁆𑀩𑁂𑀧𑀺 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀕𑀘𑁆𑀙𑀦𑁆𑀢𑀺, 𑀓𑁂𑀘𑀺 𑀅𑀭𑀜𑁆𑀜𑀁, 𑀓𑁂𑀘𑀺 𑀭𑀼𑀓𑁆𑀔𑀫𑀽𑀮𑀁, 𑀓𑁂𑀘𑀺 𑀧𑀩𑁆𑀩𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀁, 𑀓𑁂𑀘𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀁…𑀧𑁂… 𑀓𑁂𑀘𑀺 𑀯𑀲𑀯𑀢𑁆𑀢𑀺𑀪𑀯𑀦𑀦𑁆𑀢𑀺. 𑀢𑀢𑁄 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀘𑁂 𑀆𑀓𑀗𑁆𑀔𑀢𑀺, 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀼𑀳𑀼𑀢𑁆𑀢𑀁 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀅𑀣 𑀲𑀫𑀲𑁆𑀲𑀸𑀲𑀺𑀢𑀓𑀸𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀪𑀸𑀕𑁂 𑀮𑁄𑀓𑀁 𑀯𑁄𑀮𑁄𑀓𑁂𑀢𑀺. 𑀢𑀢𑀺𑀬𑀪𑀸𑀕𑁂 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀢𑀢𑁆𑀣 𑀫𑀳𑀸𑀚𑀦𑁄 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀢𑀺. 𑀢𑀢𑁄 𑀪𑀕𑀯𑀸 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦 𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀚𑁆𑀚 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀓𑀸𑀮𑀬𑀼𑀢𑁆𑀢𑀁 𑀲𑀫𑀬𑀬𑀼𑀢𑁆𑀢𑀁. 𑀅𑀣 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀭𑀺𑀲𑀁 𑀉𑀬𑁆𑀬𑁄𑀚𑁂𑀢𑀺, 𑀫𑀦𑀼𑀲𑁆𑀲𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀇𑀤𑀁 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀁.

𑀲𑁄 𑀏𑀯𑀁 𑀦𑀺𑀝𑁆𑀞𑀺𑀢𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑁄 𑀲𑀘𑁂 𑀕𑀢𑁆𑀢𑀸𑀦𑀺 𑀑𑀲𑀺𑀜𑁆𑀘𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀩𑀼𑀤𑁆𑀥𑀸𑀲𑀦𑀸 𑀯𑀼𑀝𑁆𑀞𑀸𑀬 𑀦𑁆𑀳𑀸𑀦𑀓𑁄𑀝𑁆𑀞𑀓𑀁 𑀧𑀯𑀺𑀲𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑁂𑀦 𑀧𑀝𑀺𑀬𑀸𑀤𑀺𑀢𑀉𑀤𑀓𑁂𑀦 𑀕𑀢𑁆𑀢𑀸𑀦𑀺 𑀉𑀢𑀼𑀁 𑀕𑀸𑀳𑀸𑀧𑁂𑀢𑀺. 𑀉𑀧𑀝𑁆𑀞𑀸𑀓𑁄𑀧𑀺 𑀩𑀼𑀤𑁆𑀥𑀸𑀲𑀦𑀁 𑀆𑀦𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀧𑀜𑁆𑀜𑀸𑀧𑁂𑀢𑀺. 𑀪𑀕𑀯𑀸 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀢𑁆𑀯𑀸 𑀢𑀢𑁆𑀣 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺 𑀏𑀓𑀓𑁄𑀯 𑀫𑀼𑀳𑀼𑀢𑁆𑀢𑀁 𑀧𑀝𑀺𑀲𑀮𑁆𑀮𑀻𑀦𑁄. 𑀅𑀣 𑀪𑀺𑀓𑁆𑀔𑀽 𑀢𑀢𑁄 𑀢𑀢𑁄 𑀆𑀕𑀫𑁆𑀫 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀏𑀓𑀘𑁆𑀘𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀓𑀫𑁆𑀫𑀝𑁆𑀞𑀸𑀦𑀁, 𑀏𑀓𑀘𑁆𑀘𑁂 𑀥𑀫𑁆𑀫𑀲𑁆𑀲𑀯𑀦𑀁 𑀬𑀸𑀘𑀦𑁆𑀢𑀺. 𑀪𑀕𑀯𑀸 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀧𑀼𑀭𑀺𑀫𑀬𑀸𑀫𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀇𑀤𑀁 𑀧𑀼𑀭𑀺𑀫𑀬𑀸𑀫𑀓𑀺𑀘𑁆𑀘𑀁.

𑀧𑀼𑀭𑀺𑀫𑀬𑀸𑀫𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀧𑀦 𑀪𑀺𑀓𑁆𑀔𑀽𑀲𑀼 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑁂𑀲𑀼 𑀲𑀓𑀮𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀤𑁂𑀯𑀢𑀸𑀬𑁄 𑀑𑀓𑀸𑀲𑀁 𑀮𑀪𑀫𑀸𑀦𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺 𑀬𑀣𑀸𑀪𑀺𑀲𑀗𑁆𑀔𑀢𑀁 𑀅𑀦𑁆𑀢𑀫𑀲𑁄 𑀘𑀢𑀼𑀭𑀓𑁆𑀔𑀭𑀫𑁆𑀧𑀺. 𑀪𑀕𑀯𑀸 𑀢𑀸𑀲𑀁 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀫𑀚𑁆𑀛𑀺𑀫𑀬𑀸𑀫𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀇𑀤𑀁 𑀫𑀚𑁆𑀛𑀺𑀫𑀬𑀸𑀫𑀓𑀺𑀘𑁆𑀘𑀁.

𑀧𑀘𑁆𑀙𑀺𑀫𑀬𑀸𑀫𑀁 𑀧𑀦 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀲𑀚𑁆𑀚𑀸𑀧𑀻𑀴𑀺𑀢𑀲𑁆𑀲 𑀲𑀭𑀻𑀭𑀲𑁆𑀲 𑀓𑀺𑀮𑀸𑀲𑀼𑀪𑀸𑀯𑀫𑁄𑀘𑀦𑀢𑁆𑀣𑀁 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀘𑀗𑁆𑀓𑀫𑁂𑀦 𑀯𑀻𑀢𑀺𑀦𑀸𑀫𑁂𑀢𑀺. 𑀤𑀼𑀢𑀺𑀬𑀓𑁄𑀝𑁆𑀞𑀸𑀲𑁂 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀧𑀘𑁆𑀘𑀼𑀝𑁆𑀞𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀤𑀸𑀦𑀲𑀻𑀮𑀸𑀤𑀺𑀯𑀲𑁂𑀦 𑀓𑀢𑀸𑀥𑀺𑀓𑀸𑀭𑀧𑀼𑀕𑁆𑀕𑀮𑀤𑀲𑁆𑀲𑀦𑀢𑁆𑀣𑀁 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀢𑀺. 𑀇𑀤𑀁 𑀧𑀘𑁆𑀙𑀺𑀫𑀬𑀸𑀫𑀓𑀺𑀘𑁆𑀘𑀁.

𑀢𑀤𑀸𑀧𑀺 𑀏𑀯𑀁 𑀑𑀮𑁄𑀓𑁂𑀦𑁆𑀢𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 𑁋 ‘‘𑀢𑀢𑁆𑀣 𑀫𑀬𑀺 𑀕𑀢𑁂 𑀓𑀣𑀸 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀓𑀣𑀸𑀯𑀲𑀸𑀦𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀏𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑀧𑀼𑀢𑁆𑀢𑀤𑀸𑀭𑁄 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀫𑀫 𑀲𑀸𑀲𑀦𑁂 𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀪𑀕𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀧𑀼𑀩𑁆𑀩𑀡𑁆𑀳𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀧𑀭𑀺𑀤𑀳𑀺𑀢𑁆𑀯𑀸. 𑀯𑀺𑀳𑀸𑀭𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀧𑀢𑁆𑀢𑀁 𑀳𑀢𑁆𑀣𑁂𑀳𑀺, 𑀘𑀻𑀯𑀭𑀁 𑀓𑀸𑀬𑁂𑀦 𑀆𑀤𑀺𑀬𑀺𑀢𑁆𑀯𑀸, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀕𑀯𑀢𑁄 𑀓𑀺𑀭 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼𑀓𑀸𑀫𑀲𑁆𑀲 𑀪𑀫𑀭𑁄 𑀯𑀺𑀬 𑀯𑀺𑀓𑀲𑀺𑀢𑀧𑀤𑀼𑀫𑀤𑁆𑀯𑀬𑀫𑀚𑁆𑀛𑀁, 𑀇𑀦𑁆𑀤𑀦𑀻𑀮𑀫𑀡𑀺𑀯𑀡𑁆𑀡𑀲𑁂𑀮𑀫𑀬𑀧𑀢𑁆𑀢𑁄 𑀳𑀢𑁆𑀣𑀤𑁆𑀯𑀬𑀫𑀚𑁆𑀛𑀁 𑀆𑀕𑀘𑁆𑀙𑀢𑀺. 𑀢𑀁 𑀏𑀯𑀫𑀸𑀕𑀢𑀁 𑀧𑀢𑁆𑀢𑀁 𑀳𑀢𑁆𑀣𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀘𑀻𑀯𑀭𑀜𑁆𑀘 𑀧𑀭𑀺𑀫𑀡𑁆𑀟𑀮𑀁 𑀧𑀸𑀭𑀼𑀢𑀁 𑀓𑀸𑀬𑁂𑀦 𑀥𑀸𑀭𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀬𑁂𑀦 𑀫𑀕𑁆𑀕𑁂𑀦 𑀓𑀫𑁆𑀫𑀦𑁆𑀢𑁄 𑀕𑀦𑁆𑀢𑀩𑁆𑀩𑁄, 𑀢𑁂𑀦 𑀏𑀓𑀓𑁄𑀯 𑀉𑀧𑀲𑀗𑁆𑀓𑀫𑀺. 𑀓𑀲𑁆𑀫𑀸 𑀧𑀦 𑀦𑀁 𑀪𑀺𑀓𑁆𑀔𑀽 𑀦𑀸𑀦𑀼𑀩𑀦𑁆𑀥𑀺𑀁𑀲𑀽𑀢𑀺? 𑀬𑀤𑀸 𑀳𑀺 𑀪𑀕𑀯𑀸 𑀏𑀓𑀓𑁄𑀯 𑀓𑀢𑁆𑀣𑀘𑀺 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀻𑀤𑀢𑀺. 𑀪𑀺𑀓𑁆𑀔𑀽 𑀢𑀸𑀬 𑀲𑀜𑁆𑀜𑀸𑀬 𑀚𑀸𑀦𑀦𑁆𑀢𑀺 ‘‘𑀅𑀚𑁆𑀚 𑀪𑀕𑀯𑀸 𑀏𑀓𑀓𑁄𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀓𑀸𑀫𑁄, 𑀅𑀤𑁆𑀥𑀸 𑀓𑀜𑁆𑀘𑀺 𑀏𑀯 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀁 𑀅𑀤𑁆𑀤𑀲𑀸’’𑀢𑀺. 𑀢𑁂 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀺. 𑀢𑀤𑀸 𑀘 𑀪𑀕𑀯𑀸 𑀏𑀯𑀫𑀓𑀸𑀲𑀺, 𑀢𑀲𑁆𑀫𑀸 𑀪𑀺𑀓𑁆𑀔𑀽 𑀦𑀸𑀦𑀼𑀩𑀦𑁆𑀥𑀺𑀁𑀲𑀽𑀢𑀺.

𑀧𑀭𑀺𑀯𑁂𑀲𑀦𑀸 𑀯𑀢𑁆𑀢𑀢𑀻𑀢𑀺 𑀢𑁂𑀲𑀁 𑀲𑀼𑀯𑀡𑁆𑀡𑀪𑀸𑀚𑀦𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀁 𑀧𑀜𑁆𑀘𑀲𑀢𑀸𑀦𑀁 𑀓𑀲𑁆𑀲𑀓𑀸𑀦𑀁 𑀧𑀭𑀺𑀯𑀺𑀲𑀦𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀺. 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀻𑀢𑀺 𑀬𑀢𑁆𑀣 𑀞𑀺𑀢𑀁 𑀩𑁆𑀭𑀸𑀳𑁆𑀫𑀡𑁄 𑀧𑀲𑁆𑀲𑀢𑀺, 𑀢𑀣𑀸𑀭𑀽𑀧𑁂 𑀤𑀲𑁆𑀲𑀦𑀽𑀧𑀘𑀸𑀭𑁂 𑀓𑀣𑀸𑀲𑀯𑀦𑀨𑀸𑀲𑀼𑀓𑁂 𑀉𑀘𑁆𑀘𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀞𑀢𑁆𑀯𑀸 𑀘 𑀭𑀚𑀢𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀪𑀁 𑀅𑀢𑀺𑀭𑁄𑀘𑀫𑀸𑀦𑀁 𑀲𑀫𑀦𑁆𑀢𑀢𑁄 𑀲𑀭𑀻𑀭𑀧𑁆𑀧𑀪𑀁 𑀫𑀼𑀜𑁆𑀘𑀺, 𑀬𑀸𑀬 𑀅𑀚𑁆𑀛𑁄𑀢𑁆𑀣𑀝𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀫𑁆𑀫𑀦𑁆𑀢𑀲𑀸𑀮𑀸𑀪𑀺𑀢𑁆𑀢𑀺𑀭𑀼𑀓𑁆𑀔𑀓𑀲𑀺𑀢𑀫𑀢𑁆𑀢𑀺𑀓𑀧𑀺𑀡𑁆𑀟𑀸𑀤𑀬𑁄 𑀲𑀼𑀯𑀡𑁆𑀡𑀫𑀬𑀸 𑀯𑀺𑀬 𑀅𑀳𑁂𑀲𑀼𑀁. 𑀅𑀣 𑀫𑀦𑀼𑀲𑁆𑀲𑀸 𑀪𑀼𑀜𑁆𑀚𑀦𑁆𑀢𑀸 𑀘 𑀓𑀲𑀦𑁆𑀢𑀸 𑀘 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀧𑀳𑀸𑀬 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑀭𑀺𑀯𑀸𑀭𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀲𑀭𑀻𑀭𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀯𑀺𑀪𑀽𑀲𑀺𑀢𑀁 𑀩𑀸𑀳𑀼𑀬𑀼𑀕𑀮𑀁 𑀚𑀗𑁆𑀕𑀫𑀁 𑀯𑀺𑀬 𑀧𑀤𑀼𑀫𑀲𑀭𑀁, 𑀭𑀲𑁆𑀫𑀺𑀚𑀸𑀮𑀲𑀫𑀼𑀚𑁆𑀚𑀮𑀺𑀢𑀢𑀸𑀭𑀸𑀕𑀡𑀫𑀺𑀯 𑀕𑀕𑀦𑀢𑀮𑀁, 𑀯𑀺𑀚𑁆𑀚𑀼𑀮𑀢𑀸𑀯𑀺𑀦𑀤𑁆𑀥𑀫𑀺𑀯 𑀘 𑀓𑀦𑀓𑀲𑀺𑀔𑀭𑀁 𑀲𑀺𑀭𑀺𑀬𑀸 𑀚𑀮𑀫𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀤𑀺𑀲𑁆𑀯𑀸 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀏𑀯𑀁 𑀢𑁂𑀳𑀺 𑀲𑀫𑁆𑀧𑀭𑀺𑀯𑀸𑀭𑀺𑀢𑀁 𑀅𑀤𑁆𑀤𑀲𑀸 𑀔𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀧𑀺𑀡𑁆𑀟𑀸𑀬 𑀞𑀺𑀢𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 𑀅𑀳𑀁 𑀔𑁄, 𑀲𑀫𑀡, 𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘𑀸𑀢𑀺.

𑀓𑀲𑁆𑀫𑀸 𑀧𑀦𑀸𑀬𑀁 𑀏𑀯𑀫𑀸𑀳, 𑀓𑀺𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁂 𑀧𑀲𑀸𑀤𑀦𑀻𑀬𑁂 𑀉𑀢𑁆𑀢𑀫𑀤𑀫𑀣𑀲𑀫𑀣𑀫𑀦𑀼𑀧𑁆𑀧𑀢𑁆𑀢𑁂𑀧𑀺 𑀢𑀣𑀸𑀕𑀢𑁂 𑀅𑀧𑁆𑀧𑀲𑀸𑀤𑁂𑀦, 𑀉𑀤𑀸𑀳𑀼 𑀅𑀟𑁆𑀠𑀢𑀺𑀬𑀸𑀦𑀁 𑀚𑀦𑀲𑀳𑀲𑁆𑀲𑀸𑀦𑀁 𑀧𑀸𑀬𑀸𑀲𑀁 𑀧𑀝𑀺𑀬𑀸𑀤𑁂𑀢𑁆𑀯𑀸𑀧𑀺 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀬 𑀫𑀘𑁆𑀙𑁂𑀭𑁂𑀦𑀸𑀢𑀺? 𑀉𑀪𑀬𑀣𑀸𑀧𑀺 𑀦𑁄, 𑀪𑀕𑀯𑀢𑁄 𑀧𑀦𑀲𑁆𑀲 𑀤𑀲𑁆𑀲𑀦𑁂𑀦 𑀅𑀢𑀺𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀓𑀫𑁆𑀫𑀦𑁆𑀢𑀁 𑀚𑀦𑀁 𑀤𑀺𑀲𑁆𑀯𑀸 ‘‘𑀓𑀫𑁆𑀫𑀪𑀗𑁆𑀕𑀁 𑀫𑁂 𑀓𑀸𑀢𑀼𑀁 𑀆𑀕𑀢𑁄’’𑀢𑀺 𑀅𑀦𑀢𑁆𑀢𑀫𑀦𑀢𑀸 𑀅𑀳𑁄𑀲𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀪𑀕𑀯𑀢𑁄 𑀘 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑁋 ‘‘𑀲𑀘𑀸𑀬𑀁 𑀓𑀫𑁆𑀫𑀦𑁆𑀢𑁂 𑀅𑀧𑁆𑀧𑀬𑁄𑀚𑀬𑀺𑀲𑁆𑀲, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀫𑀦𑀼𑀲𑁆𑀲𑀸𑀦𑀁 𑀲𑀻𑀲𑁂 𑀘𑀽𑀴𑀸𑀫𑀡𑀺 𑀯𑀺𑀬 𑀅𑀪𑀯𑀺𑀲𑁆𑀲, 𑀓𑁄 𑀦𑀸𑀫𑀲𑁆𑀲 𑀅𑀢𑁆𑀣𑁄 𑀦 𑀲𑀫𑁆𑀧𑀚𑁆𑀚𑀺𑀲𑁆𑀲𑀢𑀺, 𑀏𑀯𑀫𑁂𑀯𑀁 𑀅𑀮𑀲𑀢𑀸𑀬 𑀓𑀫𑁆𑀫𑀦𑁆𑀢𑁂 𑀅𑀧𑁆𑀧𑀬𑁄𑀚𑁂𑀢𑁆𑀯𑀸 𑀯𑀧𑁆𑀧𑀫𑀗𑁆𑀕𑀮𑀸𑀤𑀻𑀲𑀼 𑀧𑀺𑀡𑁆𑀟𑀸𑀬 𑀘𑀭𑀢𑀻’’𑀢𑀺𑀧𑀺𑀲𑁆𑀲 𑀅𑀦𑀢𑁆𑀢𑀫𑀦𑀢𑀸 𑀅𑀳𑁄𑀲𑀺. 𑀢𑁂𑀦𑀸𑀳 𑁋 ‘‘𑀅𑀳𑀁 𑀔𑁄, 𑀲𑀫𑀡, 𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘, 𑀓𑀲𑀺𑀢𑁆𑀯𑀸 𑀘 𑀯𑀧𑀺𑀢𑁆𑀯𑀸 𑀘 𑀪𑀼𑀜𑁆𑀚𑀸𑀫𑀻’’𑀢𑀺.

𑀅𑀬𑀁 𑀓𑀺𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀫𑀬𑁆𑀳𑀫𑁆𑀧𑀺 𑀢𑀸𑀯 𑀓𑀫𑁆𑀫𑀦𑁆𑀢𑀸 𑀦 𑀩𑁆𑀬𑀸𑀧𑀚𑁆𑀚𑀦𑁆𑀢𑀺, 𑀦 𑀘𑀫𑁆𑀳𑀺 𑀬𑀣𑀸 𑀢𑁆𑀯𑀁 𑀏𑀯𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄, 𑀢𑁆𑀯𑀫𑁆𑀧𑀺 𑀓𑀲𑀺𑀢𑁆𑀯𑀸 𑀘 𑀯𑀧𑀺𑀢𑁆𑀯𑀸 𑀘 𑀪𑀼𑀜𑁆𑀚𑀲𑁆𑀲𑀼, 𑀓𑁄 𑀢𑁂 𑀅𑀢𑁆𑀣𑁄 𑀦 𑀲𑀫𑁆𑀧𑀚𑁆𑀚𑁂𑀬𑁆𑀬 𑀏𑀯𑀁 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺. 𑀅𑀧𑀺𑀘𑀸𑀬𑀁 𑀅𑀲𑁆𑀲𑁄𑀲𑀺 𑁋 ‘‘𑀲𑀓𑁆𑀬𑀭𑀸𑀚𑀓𑀼𑀮𑁂 𑀓𑀺𑀭 𑀓𑀼𑀫𑀸𑀭𑁄 𑀉𑀧𑁆𑀧𑀦𑁆𑀦𑁄, 𑀲𑁄 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄’’𑀢𑀺. 𑀢𑀲𑁆𑀫𑀸 𑀇𑀤𑀸𑀦𑀺 ‘‘𑀅𑀬𑀁 𑀲𑁄’’𑀢𑀺 𑀜𑀢𑁆𑀯𑀸 ‘‘𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀳𑀸𑀬 𑀓𑀺𑀮𑀦𑁆𑀢𑁄𑀲𑀻’’𑀢𑀺 𑀉𑀧𑀸𑀭𑀫𑁆𑀪𑀁 𑀆𑀭𑁄𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀅𑀧𑀺𑀘 𑀢𑀺𑀓𑁆𑀔𑀧𑀜𑁆𑀜𑁄 𑀏𑀲 𑀩𑁆𑀭𑀸𑀳𑁆𑀫𑀡𑁄, 𑀦 𑀪𑀕𑀯𑀦𑁆𑀢𑀁 𑀅𑀧𑀲𑀸𑀤𑁂𑀦𑁆𑀢𑁄 𑀪𑀡𑀢𑀺, 𑀪𑀕𑀯𑀢𑁄 𑀧𑀦 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀪𑀸𑀯𑀬𑀫𑀸𑀦𑁄 𑀓𑀣𑀸𑀧𑀯𑀢𑁆𑀢𑀦𑀢𑁆𑀣𑀫𑁆𑀧𑀺 𑀏𑀯𑀫𑀸𑀳. 𑀅𑀣 𑀪𑀕𑀯𑀸 𑀯𑁂𑀦𑁂𑀬𑁆𑀬𑀯𑀲𑁂𑀦 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀓𑀲𑁆𑀲𑀓𑀯𑀧𑁆𑀧𑀓𑀪𑀸𑀯𑀁 𑀅𑀢𑁆𑀢𑀦𑁄 𑀤𑀲𑁆𑀲𑁂𑀦𑁆𑀢𑁄 𑀅𑀳𑀫𑁆𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑁄𑀢𑀺𑀆𑀤𑀺𑀫𑀸𑀳.

𑀅𑀣 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑀫𑀡𑁄’’ ‘𑀅𑀳𑀫𑁆𑀧𑀺 𑀓𑀲𑀸𑀫𑀺 𑀘 𑀯𑀧𑀸𑀫𑀺 𑀘𑀸’𑀢𑀺 𑀪𑀡𑀢𑀺. 𑀦 𑀘𑀲𑁆𑀲 𑀑𑀴𑀸𑀭𑀺𑀓𑀸𑀦𑀺 𑀬𑀼𑀕𑀦𑀗𑁆𑀕𑀮𑀸𑀤𑀻𑀦𑀺 𑀓𑀲𑀺𑀪𑀡𑁆𑀟𑀸𑀦𑀺 𑀧𑀲𑁆𑀲𑀸𑀫𑀺, 𑀓𑀺𑀁 𑀦𑀼 𑀔𑁄 𑀫𑀼𑀲𑀸 𑀪𑀡𑀢𑀻’’𑀢𑀺? 𑀪𑀕𑀯𑀦𑁆𑀢𑀁 𑀧𑀸𑀤𑀢𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀕𑁆𑀕𑀸 𑀑𑀮𑁄𑀓𑀬𑀫𑀸𑀦𑁄, 𑀅𑀗𑁆𑀕𑀯𑀺𑀚𑁆𑀚𑀸𑀬 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀫𑀲𑁆𑀲 𑀜𑀢𑁆𑀯𑀸, ‘‘𑀅𑀝𑁆𑀞𑀸𑀦𑀫𑁂𑀢𑀁 𑀬𑀁 𑀏𑀯𑀭𑀽𑀧𑁄 𑀫𑀼𑀲𑀸 𑀪𑀡𑁂𑀬𑁆𑀬𑀸’’𑀢𑀺 𑀲𑀜𑁆𑀚𑀸𑀢𑀩𑀳𑀼𑀫𑀸𑀦𑁄 𑀪𑀕𑀯𑀢𑀺 𑀲𑀫𑀡𑀯𑀸𑀤𑀁 𑀧𑀳𑀸𑀬 𑀕𑁄𑀢𑁆𑀢𑁂𑀦 𑀪𑀕𑀯𑀦𑁆𑀢𑀁 𑀲𑀫𑀼𑀤𑀸𑀘𑀭𑀫𑀸𑀦𑁄 𑀦 𑀔𑁄 𑀧𑀦 𑀫𑀬𑀁 𑀧𑀲𑁆𑀲𑀸𑀫 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑀢𑀸𑀬 𑀓𑀣𑀦𑀁 𑀦𑀸𑀫 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁄, 𑀢𑀲𑁆𑀫𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀲𑀤𑁆𑀥𑀸 𑀩𑀻𑀚𑀦𑁆𑀢𑀺𑀆𑀤𑀺𑀫𑀸𑀳.

𑀓𑀸 𑀧𑀦𑁂𑀢𑁆𑀣 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑀢𑀸? 𑀦𑀦𑀼 𑀩𑁆𑀭𑀸𑀳𑁆𑀫𑀡𑁂𑀦 𑀪𑀕𑀯𑀸 𑀦𑀗𑁆𑀕𑀮𑀸𑀤𑀺𑀓𑀲𑀺𑀲𑀫𑁆𑀪𑀸𑀭𑀲𑀫𑀸𑀬𑁄𑀕𑀁 𑀧𑀼𑀝𑁆𑀞𑁄 𑀅𑀧𑀼𑀘𑁆𑀙𑀺𑀢𑀲𑁆𑀲 𑀩𑀻𑀚𑀲𑁆𑀲 𑀲𑀪𑀸𑀕𑀢𑀸𑀬 𑀆𑀳 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺, 𑀏𑀯𑀜𑁆𑀘 𑀲𑀢𑀺 𑀓𑀣𑀸𑀧𑀺 𑀅𑀦𑀦𑀼𑀲𑀦𑁆𑀥𑀺𑀓𑀸 𑀳𑁄𑀢𑀺? 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀅𑀦𑀦𑀼𑀲𑀦𑁆𑀥𑀺𑀓𑀓𑀣𑀸 𑀦𑀸𑀫 𑀅𑀢𑁆𑀣𑀺, 𑀦𑀧𑀺 𑀧𑀼𑀩𑁆𑀩𑀥𑀫𑁆𑀫𑀲𑁆𑀲 𑀅𑀲𑀪𑀸𑀕𑀢𑀸𑀬 𑀓𑀣𑁂𑀦𑁆𑀢𑀺. 𑀏𑀯𑀁 𑀧𑀦𑁂𑀢𑁆𑀣 𑀅𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀩𑁆𑀭𑀸𑀳𑁆𑀫𑀡𑁂𑀦 𑀳𑀺 𑀪𑀕𑀯𑀸 𑀬𑀼𑀕𑀦𑀗𑁆𑀕𑀮𑀸𑀤𑀺𑀓𑀲𑀺𑀲𑀫𑁆𑀪𑀸𑀭𑀯𑀲𑁂𑀦 𑀓𑀲𑀺𑀁 𑀧𑀼𑀘𑁆𑀙𑀺𑀢𑁄. 𑀲𑁄 𑀢𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 ‘‘𑀇𑀤𑀁 𑀅𑀧𑀼𑀘𑁆𑀙𑀺𑀢’’𑀦𑁆𑀢𑀺 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀲𑀫𑀽𑀮𑀁 𑀲𑀉𑀧𑀓𑀸𑀭𑀁 𑀲𑀲𑀫𑁆𑀪𑀸𑀭𑀁 𑀲𑀨𑀮𑀁 𑀓𑀲𑀺𑀁 𑀧𑀜𑁆𑀜𑀸𑀧𑁂𑀢𑀼𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀻𑀚𑀁 𑀓𑀲𑀺𑀬𑀸 𑀫𑀽𑀮𑀁, 𑀢𑀲𑁆𑀫𑀺𑀁 𑀲𑀢𑀺 𑀓𑀢𑁆𑀢𑀩𑁆𑀩𑀢𑁄, 𑀅𑀲𑀢𑀺 𑀅𑀓𑀢𑁆𑀢𑀩𑁆𑀩𑀢𑁄, 𑀢𑀧𑁆𑀧𑀫𑀸𑀡𑁂𑀦 𑀘 𑀓𑀢𑁆𑀢𑀩𑁆𑀩𑀢𑁄. 𑀩𑀻𑀚𑁂 𑀳𑀺 𑀲𑀢𑀺 𑀓𑀲𑀺𑀁 𑀓𑀭𑁄𑀦𑁆𑀢𑀺, 𑀦 𑀅𑀲𑀢𑀺. 𑀩𑀻𑀚𑀧𑁆𑀧𑀫𑀸𑀡𑁂𑀦 𑀘 𑀓𑀼𑀲𑀮𑀸 𑀓𑀲𑁆𑀲𑀓𑀸 𑀔𑁂𑀢𑁆𑀢𑀁 𑀓𑀲𑀦𑁆𑀢𑀺, 𑀦 𑀊𑀦𑀁 ‘‘𑀫𑀸 𑀦𑁄 𑀲𑀲𑁆𑀲𑀁 𑀧𑀭𑀺𑀳𑀸𑀬𑀻’’𑀢𑀺, 𑀦 𑀅𑀥𑀺𑀓𑀁 ‘‘𑀫𑀸 𑀦𑁄 𑀫𑁄𑀖𑁄 𑀯𑀸𑀬𑀸𑀫𑁄 𑀅𑀳𑁄𑀲𑀻’’𑀢𑀺. 𑀬𑀲𑁆𑀫𑀸 𑀘 𑀩𑀻𑀚𑀫𑁂𑀯 𑀫𑀽𑀮𑀁, 𑀢𑀲𑁆𑀫𑀸 𑀪𑀕𑀯𑀸 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀓𑀲𑀺𑀲𑀫𑁆𑀪𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀲𑀺𑀬𑀸 𑀧𑀼𑀩𑁆𑀩𑀥𑀫𑁆𑀫𑀲𑁆𑀲 𑀩𑀻𑀚𑀲𑁆𑀲 𑀲𑀪𑀸𑀕𑀢𑀸𑀬 𑀅𑀢𑁆𑀢𑀦𑁄 𑀓𑀲𑀺𑀬𑀸 𑀧𑀼𑀩𑁆𑀩𑀥𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑀢𑀸𑀧𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀘𑁆𑀙𑀺𑀢𑀁𑀬𑁂𑀯 𑀯𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑀁 𑀧𑀘𑁆𑀙𑀸 𑀓𑀺𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀢𑀲𑁆𑀲 𑀉𑀧𑀓𑀸𑀭𑀪𑀸𑀯𑀢𑁄 𑀘 𑀥𑀫𑁆𑀫𑀲𑀫𑁆𑀩𑀦𑁆𑀥𑀲𑀫𑀢𑁆𑀣𑀪𑀸𑀯𑀢𑁄 𑀘. 𑀅𑀬𑀁 𑀳𑀺 𑀩𑁆𑀭𑀸𑀳𑁆𑀫𑀡𑁄 𑀧𑀜𑁆𑀜𑀯𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑁂 𑀧𑀦 𑀚𑀸𑀢𑀢𑁆𑀢𑀸 𑀲𑀤𑁆𑀥𑀸𑀭𑀳𑀺𑀢𑁄, 𑀲𑀤𑁆𑀥𑀸𑀭𑀳𑀺𑀢𑁄 𑀘 𑀧𑀜𑁆𑀜𑀯𑀸 𑀧𑀭𑁂𑀲𑀁 𑀲𑀤𑁆𑀥𑀸𑀬 𑀅𑀢𑁆𑀢𑀦𑁄 𑀅𑀯𑀺𑀲𑀬𑁂 𑀅𑀧𑀝𑀺𑀧𑀚𑁆𑀚𑀫𑀸𑀦𑁄 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀧𑀭𑀸𑀫𑀝𑁆𑀞𑀸𑀧𑀺 𑀘𑀲𑁆𑀲 𑀤𑀼𑀩𑁆𑀩𑀮𑀸 𑀲𑀤𑁆𑀥𑀸 𑀩𑀮𑀯𑀢𑀺𑀬𑀸 𑀧𑀜𑁆𑀜𑀸𑀬 𑀲𑀳𑀲𑀸 𑀯𑀢𑁆𑀢𑀫𑀸𑀦𑀸 𑀅𑀢𑁆𑀣𑀲𑀺𑀤𑁆𑀥𑀺𑀁 𑀦 𑀓𑀭𑁄𑀢𑀺 𑀳𑀢𑁆𑀣𑀺𑀦𑀸 𑀲𑀤𑁆𑀥𑀺𑀁 𑀏𑀓𑀥𑀼𑀭𑁂 𑀬𑀼𑀢𑁆𑀢𑁄 𑀕𑁄𑀡𑁄 𑀯𑀺𑀬. 𑀇𑀢𑀺𑀲𑁆𑀲 𑀲𑀤𑁆𑀥𑀸 𑀉𑀧𑀓𑀸𑀭𑀺𑀓𑀸𑀢𑀺 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁂𑀦 𑀧𑀘𑁆𑀙𑀸𑀧𑀺 𑀯𑀢𑁆𑀢𑀩𑁆𑀩𑁄 𑀅𑀬𑀫𑀢𑁆𑀣𑁄 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄. 𑀩𑀻𑀚𑀲𑁆𑀲 𑀘 𑀉𑀧𑀓𑀸𑀭𑀺𑀓𑀸 𑀯𑀼𑀝𑁆𑀞𑀺, 𑀲𑀸 𑀢𑀤𑀦𑀦𑁆𑀢𑀭𑀁𑀬𑁂𑀯 𑀯𑀼𑀘𑁆𑀘𑀫𑀸𑀦𑀸 𑀲𑀫𑀢𑁆𑀣𑀸 𑀳𑁄𑀢𑀺. 𑀏𑀯𑀁 𑀥𑀫𑁆𑀫𑀲𑀫𑁆𑀩𑀦𑁆𑀥𑀲𑀫𑀢𑁆𑀣𑀪𑀸𑀯𑀢𑁄 𑀧𑀘𑁆𑀙𑀸𑀧𑀺 𑀯𑀢𑁆𑀢𑀩𑁆𑀩𑁄 𑀅𑀬𑀫𑀢𑁆𑀣𑁄, 𑀅𑀜𑁆𑀜𑁄 𑀘 𑀏𑀯𑀭𑀽𑀧𑁄 𑀈𑀲𑀸𑀬𑁄𑀢𑁆𑀢𑀸𑀤𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀫𑁆𑀧𑀲𑀸𑀤𑀮𑀓𑁆𑀔𑀡𑀸 𑀲𑀤𑁆𑀥𑀸, 𑀑𑀓𑀧𑁆𑀧𑀦𑀮𑀓𑁆𑀔𑀡𑀸 𑀯𑀸. 𑀩𑀻𑀚𑀦𑁆𑀢𑀺 𑀧𑀜𑁆𑀘𑀯𑀺𑀥𑀁 𑀩𑀻𑀚𑀁 𑀫𑀽𑀮𑀩𑀻𑀚𑀁 𑀔𑀦𑁆𑀥𑀩𑀻𑀚𑀁 𑀨𑀮𑀼𑀩𑀻𑀚𑀁 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀫𑁂𑀯 𑀧𑀜𑁆𑀘𑀫𑀦𑁆𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀭𑀼𑀳𑀡𑀝𑁆𑀞𑁂𑀦 𑀩𑀻𑀚𑀦𑁆𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀢𑀢𑁆𑀣 𑀬𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀲𑀺𑀬𑀸 𑀫𑀽𑀮𑀪𑀽𑀢𑀁 𑀩𑀻𑀚𑀁 𑀤𑁆𑀯𑁂 𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀳𑁂𑀝𑁆𑀞𑀸 𑀫𑀽𑀮𑁂𑀦 𑀧𑀢𑀺𑀝𑁆𑀞𑀸𑀢𑀺, 𑀉𑀧𑀭𑀺 𑀅𑀗𑁆𑀓𑀼𑀭𑀁 𑀉𑀝𑁆𑀞𑀸𑀧𑁂𑀢𑀺, 𑀏𑀯𑀁 𑀪𑀕𑀯𑀢𑁄 𑀓𑀲𑀺𑀬𑀸 𑀫𑀽𑀮𑀪𑀽𑀢𑀸 𑀲𑀤𑁆𑀥𑀸 𑀳𑁂𑀝𑁆𑀞𑀸 𑀲𑀻𑀮𑀫𑀽𑀮𑁂𑀦 𑀧𑀢𑀺𑀝𑁆𑀞𑀸𑀢𑀺, 𑀉𑀧𑀭𑀺 𑀲𑀫𑀣𑀯𑀺𑀧𑀲𑁆𑀲𑀦𑀗𑁆𑀓𑀼𑀭𑀁 𑀉𑀝𑁆𑀞𑀸𑀧𑁂𑀢𑀺. 𑀬𑀣𑀸 𑀘 𑀢𑀁 𑀫𑀽𑀮𑁂𑀦 𑀧𑀣𑀯𑀺𑀭𑀲𑀁 𑀆𑀧𑁄𑀭𑀲𑀁 𑀕𑀳𑁂𑀢𑁆𑀯𑀸 𑀦𑀸𑀴𑁂𑀦 𑀥𑀜𑁆𑀜𑀧𑀭𑀺𑀧𑀸𑀓𑀕𑀳𑀡𑀢𑁆𑀣𑀁 𑀯𑀟𑁆𑀠𑀢𑀺, 𑀏𑀯𑀫𑀬𑀁 𑀲𑀻𑀮𑀫𑀽𑀮𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀭𑀲𑀁 𑀕𑀳𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀦𑀸𑀴𑁂𑀦 𑀅𑀭𑀺𑀬𑀨𑀮𑀥𑀜𑁆𑀜𑀧𑀭𑀺𑀧𑀸𑀓𑀕𑀳𑀡𑀢𑁆𑀣𑀁 𑀯𑀟𑁆𑀠𑀢𑀺. 𑀬𑀣𑀸 𑀘 𑀢𑀁 𑀲𑀼𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀫𑀽𑀮𑀗𑁆𑀓𑀼𑀭𑀧𑀡𑁆𑀡𑀦𑀸𑀴𑀓𑀡𑁆𑀟𑀧𑀲𑀯𑁂𑀳𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀢𑁆𑀯𑀸 𑀔𑀻𑀭𑀁 𑀚𑀦𑁂𑀢𑁆𑀯𑀸 𑀅𑀦𑁂𑀓𑀲𑀸𑀮𑀺𑀨𑀮𑀪𑀭𑀺𑀢𑀁 𑀲𑀸𑀮𑀺𑀲𑀻𑀲𑀁 𑀦𑀺𑀧𑁆𑀨𑀸𑀤𑁂𑀢𑀺, 𑀏𑀯𑀫𑁂𑀲𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀙𑀳𑀺 𑀯𑀺𑀲𑀼𑀤𑁆𑀥𑀻𑀳𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀢𑁆𑀯𑀸 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀔𑀻𑀭𑀁 𑀚𑀦𑁂𑀢𑁆𑀯𑀸 𑀅𑀦𑁂𑀓𑀧𑀝𑀺𑀲𑀫𑁆𑀪𑀺𑀤𑀸𑀪𑀺𑀜𑁆𑀜𑀸𑀪𑀭𑀺𑀢𑀁 𑀅𑀭𑀳𑀢𑁆𑀢𑀨𑀮𑀁 𑀦𑀺𑀧𑁆𑀨𑀸𑀤𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺.

𑀓𑀲𑁆𑀫𑀸 𑀧𑀦 𑀅𑀜𑁆𑀜𑁂𑀲𑀼 𑀧𑀭𑁄𑀧𑀜𑁆𑀜𑀸𑀲𑀸𑀬 𑀓𑀼𑀲𑀮𑀥𑀫𑁆𑀫𑁂𑀲𑀼 𑀏𑀓𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀲𑀤𑁆𑀥𑀸𑀯 ‘‘𑀩𑀻𑀚’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀘𑁂? 𑀩𑀻𑀚𑀓𑀺𑀘𑁆𑀘𑀓𑀭𑀡𑀢𑁄. 𑀬𑀣𑀸 𑀳𑀺 𑀢𑁂𑀲𑀼 𑀯𑀺𑀜𑁆𑀜𑀸𑀡𑀁𑀬𑁂𑀯 𑀯𑀺𑀚𑀸𑀦𑀦𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀏𑀯𑀁 𑀲𑀤𑁆𑀥𑀸 𑀩𑀻𑀚𑀓𑀺𑀘𑁆𑀘𑀁. 𑀲𑀸 𑀘 𑀲𑀩𑁆𑀩𑀓𑀼𑀲𑀮𑀸𑀦𑀁 𑀫𑀽𑀮𑀪𑀽𑀢𑀸. 𑀬𑀣𑀸𑀳 𑁋 ‘‘𑀲𑀤𑁆𑀥𑀸𑀚𑀸𑀢𑁄 𑀉𑀧𑀲𑀗𑁆𑀓𑀫𑀢𑀺, 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀢𑀺…𑀧𑁂… 𑀧𑀜𑁆𑀜𑀸𑀬 𑀘 𑀦𑀁 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁨.𑁧𑁮𑁩).

𑀅𑀓𑀼𑀲𑀮𑀥𑀫𑁆𑀫𑁂 𑀘𑁂𑀯 𑀓𑀸𑀬𑀜𑁆𑀘 𑀢𑀧𑀢𑀻𑀢𑀺 𑀢𑀧𑁄. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀻𑀭𑀺𑀬𑀥𑀼𑀢𑀗𑁆𑀕𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁, 𑀇𑀥 𑀧𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀅𑀥𑀺𑀧𑁆𑀧𑁂𑀢𑁄. 𑀯𑀼𑀝𑁆𑀞𑀻𑀢𑀺 𑀯𑀲𑁆𑀲𑀯𑀼𑀝𑁆𑀞𑀺 𑀯𑀸𑀢𑀯𑀼𑀝𑁆𑀞𑀻𑀢𑀺𑀆𑀤𑀺 𑀅𑀦𑁂𑀓𑀯𑀺𑀥𑀸, 𑀇𑀥 𑀯𑀲𑁆𑀲𑀯𑀼𑀝𑁆𑀞𑀺 𑀅𑀥𑀺𑀧𑁆𑀧𑁂𑀢𑀸. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀲𑁆𑀲𑀯𑀼𑀝𑁆𑀞𑀺𑀲𑀫𑀦𑀼𑀕𑁆𑀕𑀳𑀺𑀢𑀁 𑀩𑀻𑀚𑀁 𑀩𑀻𑀚𑀫𑀽𑀮𑀓𑀜𑁆𑀘 𑀲𑀲𑁆𑀲𑀁 𑀯𑀺𑀭𑀼𑀳𑀢𑀺 𑀦 𑀫𑀺𑀮𑀸𑀬𑀢𑀺 𑀦𑀺𑀧𑁆𑀨𑀢𑁆𑀢𑀺𑀁 𑀕𑀘𑁆𑀙𑀢𑀺, 𑀏𑀯𑀁 𑀪𑀕𑀯𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀫𑀦𑀼𑀕𑁆𑀕𑀳𑀺𑀢𑀸 𑀲𑀤𑁆𑀥𑀸, 𑀲𑀤𑁆𑀥𑀸𑀫𑀽𑀮𑀸 𑀘 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸 𑀯𑀺𑀭𑀼𑀳𑀦𑁆𑀢𑀺, 𑀦 𑀫𑀺𑀮𑀸𑀬𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀧𑁄 𑀯𑀼𑀝𑁆𑀞𑀻’’𑀢𑀺.

𑀧𑀜𑁆𑀜𑀸 𑀫𑁂𑀢𑀺 𑀏𑀢𑁆𑀣 𑀯𑀼𑀢𑁆𑀢𑁄 𑀫𑁂-𑀲𑀤𑁆𑀤𑁄 𑀧𑀼𑀭𑀺𑀫𑀧𑀤𑁂𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑁄 ‘‘𑀲𑀤𑁆𑀥𑀸 𑀫𑁂 𑀩𑀻𑀚𑀁, 𑀢𑀧𑁄 𑀫𑁂 𑀯𑀼𑀝𑁆𑀞𑀻’’𑀢𑀺 𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀬𑀣𑀸, 𑀩𑁆𑀭𑀸𑀳𑁆𑀫𑀡, 𑀢𑀬𑀸 𑀯𑀧𑀺𑀢𑁂 𑀔𑁂𑀢𑁆𑀢𑁂 𑀲𑀘𑁂 𑀯𑀼𑀝𑁆𑀞𑀺 𑀅𑀢𑁆𑀣𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀅𑀢𑁆𑀣𑀺, 𑀉𑀤𑀓𑀫𑁆𑀧𑀺 𑀢𑀸𑀯 𑀤𑀸𑀢𑀩𑁆𑀩𑀁 𑀳𑁄𑀢𑀺. 𑀢𑀣𑀸 𑀫𑀬𑀸 𑀳𑀺𑀭𑀺𑀈𑀲𑁂 𑀧𑀜𑁆𑀜𑀸𑀬𑀼𑀕𑀦𑀗𑁆𑀕𑀮𑁂 𑀫𑀦𑁄𑀬𑁄𑀢𑁆𑀢𑁂𑀦 𑀏𑀓𑀸𑀩𑀤𑁆𑀥𑁂 𑀓𑀢𑁂 𑀯𑀻𑀭𑀺𑀬𑀩𑀮𑀻𑀩𑀤𑁆𑀤𑁂 𑀬𑁄𑀚𑁂𑀢𑁆𑀯𑀸 𑀲𑀢𑀺𑀧𑀸𑀘𑀦𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀔𑁂𑀢𑁆𑀢𑀫𑁆𑀳𑀺 𑀲𑀤𑁆𑀥𑀸𑀩𑀻𑀚𑁂 𑀯𑀧𑀺𑀢𑁂 𑀯𑀼𑀝𑁆𑀞𑀺𑀬𑀸 𑀅𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺, 𑀅𑀬𑀁 𑀧𑀦 𑀫𑁂 𑀦𑀺𑀘𑁆𑀘𑀓𑀸𑀮𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀢𑀧𑁄 𑀯𑀼𑀝𑁆𑀞𑀻𑀢𑀺.

𑀧𑀜𑁆𑀜𑀸𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑀢𑁄 𑀅𑀦𑁂𑀓𑀯𑀺𑀥𑀸. 𑀇𑀥 𑀧𑀦 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸. 𑀬𑀼𑀕𑀦𑀗𑁆𑀕𑀮𑀦𑁆𑀢𑀺 𑀬𑀼𑀕𑀜𑁆𑀘 𑀦𑀗𑁆𑀕𑀮𑀜𑁆𑀘 𑀬𑀼𑀕𑀦𑀗𑁆𑀕𑀮𑀁. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑀼𑀕𑀦𑀗𑁆𑀕𑀮𑀁, 𑀏𑀯𑀁 𑀪𑀕𑀯𑀢𑁄 𑀤𑀼𑀯𑀺𑀥𑀸𑀧𑀺 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸 𑀘. 𑀢𑀢𑁆𑀣 𑀬𑀣𑀸 𑀬𑀼𑀕𑀁 𑀈𑀲𑀸𑀬 𑀉𑀧𑀦𑀺𑀲𑁆𑀲𑀬𑀁 𑀳𑁄𑀢𑀺, 𑀧𑀼𑀭𑀢𑁄 𑀘 𑀈𑀲𑀸𑀩𑀤𑁆𑀥𑀁 𑀳𑁄𑀢𑀺, 𑀬𑁄𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀁 𑀳𑁄𑀢𑀺, 𑀩𑀮𑀻𑀩𑀤𑁆𑀤𑀸𑀦𑀁 𑀏𑀓𑀢𑁄 𑀕𑀫𑀦𑀁 𑀥𑀸𑀭𑁂𑀢𑀺, 𑀏𑀯𑀁 𑀧𑀜𑁆𑀜𑀸 𑀳𑀺𑀭𑀺𑀧𑁆𑀧𑀫𑀼𑀔𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀸 𑀳𑁄𑀢𑀺. 𑀬𑀣𑀸𑀳 𑁋 ‘‘𑀧𑀜𑁆𑀜𑀼𑀢𑁆𑀢𑀭𑀸 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 (𑀅. 𑀦𑀺. 𑁮.𑁮𑁩; 𑁧𑁦.𑁫𑁮) 𑀘, ‘‘𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦’’𑀦𑁆𑀢𑀺 (𑀚𑀸. 𑁨.𑁧𑁭.𑁮𑁧) 𑀘. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀧𑀼𑀭𑀢𑁄 𑀘 𑀳𑁄𑀢𑀺. 𑀬𑀣𑀸𑀳 𑁋 ‘‘𑀲𑀻𑀮𑀁 𑀲𑀺𑀭𑀻 𑀘𑀸𑀧𑀺 𑀲𑀢𑀜𑁆𑀘 𑀥𑀫𑁆𑀫𑁄, 𑀅𑀦𑁆𑀯𑀸𑀬𑀺𑀓𑀸 𑀧𑀜𑁆𑀜𑀯𑀢𑁄 𑀪𑀯𑀦𑁆𑀢𑀻’’𑀢𑀺 𑀳𑀺𑀭𑀺𑀯𑀺𑀧𑁆𑀧𑀬𑁄𑀕𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀧𑀦 𑀈𑀲𑀸𑀩𑀤𑁆𑀥𑁄 𑀳𑁄𑀢𑀺. 𑀫𑀦𑁄𑀲𑀗𑁆𑀔𑀸𑀢𑀲𑁆𑀲 𑀲𑀫𑀸𑀥𑀺𑀬𑁄𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁄 𑀬𑁄𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀅𑀘𑁆𑀘𑀸𑀭𑀤𑁆𑀥𑀸𑀢𑀺𑀮𑀻𑀦𑀪𑀸𑀯𑀧𑀝𑀺𑀲𑁂𑀥𑀦𑀢𑁄 𑀯𑀻𑀭𑀺𑀬𑀩𑀮𑀻𑀩𑀤𑁆𑀤𑀸𑀦𑀁 𑀏𑀓𑀢𑁄 𑀕𑀫𑀦𑀁 𑀥𑀸𑀭𑁂𑀢𑀺, 𑀬𑀣𑀸 𑀘 𑀦𑀗𑁆𑀕𑀮𑀁 𑀨𑀸𑀮𑀬𑀼𑀢𑁆𑀢𑀁 𑀓𑀲𑀦𑀓𑀸𑀮𑁂 𑀧𑀣𑀯𑀺𑀖𑀦𑀁 𑀪𑀺𑀦𑁆𑀤𑀢𑀺, 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀧𑀤𑀸𑀮𑁂𑀢𑀺, 𑀏𑀯𑀁 𑀲𑀢𑀺𑀬𑀼𑀢𑁆𑀢𑀸 𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀓𑀸𑀮𑁂 𑀥𑀫𑁆𑀫𑀸𑀦𑀁 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀁 𑀪𑀺𑀦𑁆𑀤𑀢𑀺, 𑀲𑀩𑁆𑀩𑀓𑀺𑀮𑁂𑀲𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀧𑀤𑀸𑀮𑁂𑀢𑀺. 𑀲𑀸 𑀘 𑀔𑁄 𑀮𑁄𑀓𑀼𑀢𑁆𑀢𑀭𑀸𑀯, 𑀇𑀢𑀭𑀸 𑀧𑀦 𑀮𑁄𑀓𑀺𑀓𑀸𑀧𑀺 𑀲𑀺𑀬𑀸. 𑀢𑁂𑀦𑀸𑀳 ‘‘𑀧𑀜𑁆𑀜𑀸 𑀫𑁂 𑀬𑀼𑀕𑀦𑀗𑁆𑀕𑀮’’𑀦𑁆𑀢𑀺.

𑀳𑀺𑀭𑀻𑀬𑀢𑀺 𑀧𑀸𑀧𑀓𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀳𑀺𑀭𑀻. 𑀢𑀕𑁆𑀕𑀳𑀡𑁂𑀦 𑀢𑀸𑀬 𑀅𑀯𑀺𑀧𑁆𑀧𑀬𑀼𑀢𑁆𑀢𑀁 𑀑𑀢𑁆𑀢𑀧𑁆𑀧𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀈𑀲𑀸𑀢𑀺 𑀬𑀼𑀕𑀦𑀗𑁆𑀕𑀮𑀲𑀦𑁆𑀥𑀸𑀭𑀺𑀓𑀸 𑀭𑀼𑀓𑁆𑀔𑀮𑀝𑁆𑀞𑀺. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀈𑀲𑀸 𑀬𑀼𑀕𑀦𑀗𑁆𑀕𑀮𑀁 𑀥𑀸𑀭𑁂𑀢𑀺, 𑀏𑀯𑀁 𑀪𑀕𑀯𑀢𑁄𑀧𑀺 𑀳𑀺𑀭𑀻 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀬𑀼𑀕𑀦𑀗𑁆𑀕𑀮𑀁 𑀥𑀸𑀭𑁂𑀢𑀺 𑀳𑀺𑀭𑀺𑀅𑀪𑀸𑀯𑁂 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄. 𑀬𑀣𑀸 𑀘 𑀈𑀲𑀸𑀧𑀝𑀺𑀩𑀤𑁆𑀥𑀬𑀼𑀕𑀦𑀗𑁆𑀕𑀮𑀁 𑀓𑀺𑀘𑁆𑀘𑀓𑀭𑀁 𑀳𑁄𑀢𑀺 𑀅𑀘𑀮𑀁 𑀅𑀲𑀺𑀣𑀺𑀮𑀁, 𑀏𑀯𑀁 𑀳𑀺𑀭𑀺𑀧𑀝𑀺𑀩𑀤𑁆𑀥𑀸 𑀘 𑀧𑀜𑁆𑀜𑀸 𑀓𑀺𑀘𑁆𑀘𑀓𑀸𑀭𑀻 𑀳𑁄𑀢𑀺 𑀅𑀘𑀮𑀸 𑀅𑀲𑀺𑀣𑀺𑀮𑀸 𑀅𑀩𑁆𑀩𑁄𑀓𑀺𑀡𑁆𑀡𑀸 𑀅𑀳𑀺𑀭𑀺𑀓𑁂𑀦. 𑀢𑁂𑀦𑀸𑀳 ‘‘𑀳𑀺𑀭𑀻 𑀈𑀲𑀸’’𑀢𑀺. 𑀫𑀼𑀦𑀸𑀢𑀻𑀢𑀺 𑀫𑀦𑁄, 𑀘𑀺𑀢𑁆𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀇𑀥 𑀧𑀦 𑀫𑀦𑁄𑀲𑀻𑀲𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀬𑁄𑀢𑁆𑀢𑀦𑁆𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀁. 𑀢𑀁 𑀢𑀺𑀯𑀺𑀥𑀁 𑀈𑀲𑀸𑀬 𑀲𑀳 𑀬𑀼𑀕𑀲𑁆𑀲 𑀩𑀦𑁆𑀥𑀦𑀁, 𑀬𑀼𑀕𑁂𑀦 𑀲𑀳 𑀩𑀮𑀻𑀩𑀤𑁆𑀤𑀸𑀦𑀁 𑀩𑀦𑁆𑀥𑀦𑀁, 𑀲𑀸𑀭𑀣𑀺𑀦𑀸 𑀲𑀳 𑀩𑀮𑀻𑀩𑀤𑁆𑀤𑀸𑀦𑀁 𑀏𑀓𑀸𑀩𑀦𑁆𑀥𑀦𑀦𑁆𑀢𑀺. 𑀢𑀢𑁆𑀣 𑀬𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑁄𑀢𑁆𑀢𑀁 𑀈𑀲𑀸𑀬𑀼𑀕𑀩𑀮𑀻𑀩𑀤𑁆𑀤𑁂 𑀏𑀓𑀸𑀩𑀤𑁆𑀥𑁂 𑀓𑀢𑁆𑀯𑀸 𑀲𑀓𑀓𑀺𑀘𑁆𑀘𑁂 𑀧𑀝𑀺𑀧𑀸𑀤𑁂𑀢𑀺, 𑀏𑀯𑀁 𑀪𑀕𑀯𑀢𑁄 𑀲𑀫𑀸𑀥𑀺 𑀲𑀩𑁆𑀩𑁂𑀯 𑀢𑁂 𑀳𑀺𑀭𑀺𑀧𑀜𑁆𑀜𑀸𑀯𑀻𑀭𑀺𑀬𑀥𑀫𑁆𑀫𑁂 𑀏𑀓𑀸𑀭𑀫𑁆𑀫𑀡𑁂 𑀅𑀯𑀺𑀓𑁆𑀔𑁂𑀧𑀲𑀪𑀸𑀯𑁂𑀦 𑀩𑀦𑁆𑀥𑀺𑀢𑁆𑀯𑀸 𑀲𑀓𑀓𑀺𑀘𑁆𑀘𑁂 𑀧𑀝𑀺𑀧𑀸𑀤𑁂𑀢𑀺. 𑀢𑁂𑀦𑀸𑀳 ‘‘𑀫𑀦𑁄 𑀬𑁄𑀢𑁆𑀢’’𑀦𑁆𑀢𑀺.

𑀘𑀺𑀭𑀓𑀢𑀸𑀤𑀺𑀫𑀢𑁆𑀣𑀁 𑀲𑀭𑀢𑀻𑀢𑀺 𑀲𑀢𑀺. 𑀨𑀸𑀮𑁂𑀢𑀻𑀢𑀺 𑀨𑀸𑀮𑁄. 𑀧𑀸𑀚𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀸𑀚𑀦𑀁. 𑀢𑀁 𑀇𑀥 ‘‘𑀧𑀸𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀢𑁄𑀤𑀲𑁆𑀲𑁂𑀢𑀁 𑀦𑀸𑀫𑀁. 𑀨𑀸𑀮𑁄 𑀘 𑀧𑀸𑀘𑀦𑀜𑁆𑀘 𑀨𑀸𑀮𑀧𑀸𑀘𑀦𑀁. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀨𑀸𑀮𑀧𑀸𑀘𑀦𑀁, 𑀏𑀯𑀁 𑀪𑀕𑀯𑀢𑁄 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀘 𑀲𑀢𑀺. 𑀢𑀢𑁆𑀣 𑀬𑀣𑀸 𑀨𑀸𑀮𑁄 𑀦𑀗𑁆𑀕𑀮𑀁 𑀅𑀦𑀼𑀭𑀓𑁆𑀔𑀢𑀺, 𑀧𑀼𑀭𑀢𑁄 𑀘𑀲𑁆𑀲 𑀕𑀘𑁆𑀙𑀢𑀺, 𑀏𑀯𑀁 𑀲𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀫𑀸𑀦𑀸 𑀆𑀭𑀫𑁆𑀫𑀡𑁂 𑀯𑀸 𑀉𑀧𑀝𑁆𑀞𑀸𑀧𑀬𑀫𑀸𑀦𑀸 𑀧𑀜𑁆𑀜𑀸𑀦𑀗𑁆𑀕𑀮𑀁 𑀭𑀓𑁆𑀔𑀢𑀺. 𑀢𑁂𑀦𑁂𑀯𑁂𑀲𑀸 ‘‘𑀲𑀢𑀸𑀭𑀓𑁆𑀔𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧𑁦.𑁨𑁦) 𑀯𑀺𑀬 𑀆𑀭𑀓𑁆𑀔𑀸𑀢𑀺 𑀯𑀼𑀢𑁆𑀢𑀸. 𑀅𑀧𑁆𑀧𑀫𑀼𑀲𑁆𑀲𑀦𑀯𑀲𑁂𑀦 𑀘𑀲𑁆𑀲𑀸 𑀧𑀼𑀭𑀢𑁄 𑀳𑁄𑀢𑀺. 𑀲𑀢𑀺𑀧𑀭𑀺𑀘𑀺𑀢𑁂 𑀳𑀺 𑀥𑀫𑁆𑀫𑁂 𑀧𑀜𑁆𑀜𑀸 𑀧𑀚𑀸𑀦𑀸𑀢𑀺, 𑀦𑁄 𑀧𑀫𑀼𑀝𑁆𑀞𑁂. 𑀬𑀣𑀸 𑀘 𑀧𑀸𑀘𑀦𑀁 𑀩𑀮𑀻𑀩𑀤𑁆𑀤𑀸𑀦𑀁 𑀯𑀺𑀚𑁆𑀛𑀦𑀪𑀬𑀁 𑀤𑀲𑁆𑀲𑁂𑀦𑁆𑀢𑀁 𑀲𑀁𑀲𑀻𑀤𑀺𑀢𑀼𑀁 𑀦 𑀤𑁂𑀢𑀺, 𑀉𑀧𑁆𑀧𑀣𑀕𑀫𑀦𑀁 𑀯𑀸𑀭𑁂𑀢𑀺, 𑀏𑀯𑀁 𑀲𑀢𑀺 𑀯𑀻𑀭𑀺𑀬𑀩𑀮𑀻𑀩𑀤𑁆𑀤𑀸𑀦𑀁 𑀅𑀧𑀸𑀬𑀪𑀬𑀁 𑀤𑀲𑁆𑀲𑁂𑀦𑁆𑀢𑀻 𑀓𑁄𑀲𑀚𑁆𑀚𑀲𑀁𑀲𑀻𑀤𑀦𑀁 𑀦 𑀤𑁂𑀢𑀺, 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑁂 𑀅𑀕𑁄𑀘𑀭𑁂 𑀘𑀸𑀭𑀁 𑀦𑀺𑀯𑀸𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀦𑁆𑀢𑀻 𑀉𑀧𑁆𑀧𑀣𑀕𑀫𑀦𑀁 𑀯𑀸𑀭𑁂𑀢𑀺. 𑀢𑁂𑀦𑀸𑀳 ‘‘𑀲𑀢𑀺 𑀫𑁂 𑀨𑀸𑀮𑀧𑀸𑀘𑀦’’𑀦𑁆𑀢𑀺.

𑀓𑀸𑀬𑀕𑀼𑀢𑁆𑀢𑁄𑀢𑀺 𑀢𑀺𑀯𑀺𑀥𑁂𑀦 𑀓𑀸𑀬𑀲𑀼𑀘𑀭𑀺𑀢𑁂𑀦 𑀕𑀼𑀢𑁆𑀢𑁄. 𑀯𑀘𑀻𑀕𑀼𑀢𑁆𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑁂𑀦 𑀯𑀘𑀻𑀲𑀼𑀘𑀭𑀺𑀢𑁂𑀦 𑀕𑀼𑀢𑁆𑀢𑁄. 𑀏𑀢𑁆𑀢𑀸𑀯𑀢𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀯𑀼𑀢𑁆𑀢𑀁. 𑀆𑀳𑀸𑀭𑁂 𑀉𑀤𑀭𑁂 𑀬𑀢𑁄𑀢𑀺 𑀏𑀢𑁆𑀣 𑀆𑀳𑀸𑀭𑀫𑀼𑀔𑁂𑀦 𑀲𑀩𑁆𑀩𑀧𑀘𑁆𑀘𑀬𑀸𑀦𑀁 𑀕𑀳𑀺𑀢𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑁂𑀧𑀺 𑀧𑀘𑁆𑀘𑀬𑁂 𑀬𑀢𑁄 𑀲𑀁𑀬𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀯𑀼𑀢𑁆𑀢𑀁. 𑀉𑀤𑀭𑁂 𑀬𑀢𑁄𑀢𑀺 𑀉𑀤𑀭𑁂 𑀬𑀢𑁄 𑀲𑀁𑀬𑀢𑁄 𑀫𑀺𑀢𑀪𑁄𑀚𑀻, 𑀆𑀳𑀸𑀭𑁂 𑀫𑀢𑁆𑀢𑀜𑁆𑀜𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀫𑀼𑀔𑁂𑀦 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀻𑀮𑀁 𑀯𑀼𑀢𑁆𑀢𑀁. 𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀬𑀣𑀸 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀩𑀻𑀚𑀁 𑀯𑀧𑀺𑀢𑁆𑀯𑀸 𑀲𑀲𑁆𑀲𑀧𑀭𑀺𑀧𑀸𑀮𑀦𑀢𑁆𑀣𑀁 𑀓𑀡𑁆𑀝𑀓𑀯𑀢𑀺𑀁 𑀯𑀸 𑀭𑀼𑀓𑁆𑀔𑀯𑀢𑀺𑀁 𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀁 𑀯𑀸 𑀓𑀭𑁄𑀲𑀺, 𑀢𑁂𑀦 𑀢𑁂 𑀕𑁄𑀫𑀳𑀺𑀁𑀲𑀫𑀺𑀕𑀕𑀡𑀸 𑀧𑀯𑁂𑀲𑀁 𑀅𑀮𑀪𑀦𑁆𑀢𑀸 𑀲𑀲𑁆𑀲𑀁 𑀦 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀏𑀯𑀫𑀳𑀫𑁆𑀧𑀺 𑀢𑀁 𑀲𑀤𑁆𑀥𑀸𑀩𑀻𑀚𑀁 𑀯𑀧𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀓𑀼𑀲𑀮𑀲𑀲𑁆𑀲𑀧𑀭𑀺𑀧𑀸𑀮𑀦𑀢𑁆𑀣𑀁 𑀓𑀸𑀬𑀯𑀘𑀻𑀆𑀳𑀸𑀭𑀕𑀼𑀢𑁆𑀢𑀺𑀫𑀬𑀁 𑀢𑀺𑀯𑀺𑀥𑀁 𑀧𑀭𑀺𑀓𑁆𑀔𑁂𑀧𑀁 𑀓𑀭𑁄𑀫𑀺, 𑀢𑁂𑀦 𑀫𑁂 𑀭𑀸𑀕𑀸𑀤𑀺𑀅𑀓𑀼𑀲𑀮𑀥𑀫𑁆𑀫𑀕𑁄𑀫𑀳𑀺𑀁𑀲𑀫𑀺𑀕𑀕𑀡𑀸 𑀧𑀯𑁂𑀲𑀁 𑀅𑀮𑀪𑀦𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑀓𑀁 𑀓𑀼𑀲𑀮𑀲𑀲𑁆𑀲𑀁 𑀦 𑀯𑀺𑀮𑀼𑀫𑁆𑀧𑀦𑁆𑀢𑀻𑀢𑀺.

𑀲𑀘𑁆𑀘𑀁 𑀓𑀭𑁄𑀫𑀺 𑀦𑀺𑀤𑁆𑀤𑀸𑀦𑀦𑁆𑀢𑀺 𑀏𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀅𑀯𑀺𑀲𑀁𑀯𑀸𑀤𑀦𑀁 𑀲𑀘𑁆𑀘𑀁. 𑀦𑀺𑀤𑁆𑀤𑀸𑀦𑀦𑁆𑀢𑀺 𑀙𑁂𑀤𑀦𑀁 𑀮𑀼𑀦𑀦𑀁 𑀉𑀧𑁆𑀧𑀸𑀝𑀦𑀁. 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀳𑁂𑀢𑁆𑀣 𑀅𑀢𑁆𑀣𑁄 ‘‘𑀲𑀘𑁆𑀘𑁂𑀦 𑀓𑀭𑁄𑀫𑀺 𑀦𑀺𑀤𑁆𑀤𑀸𑀦’’𑀦𑁆𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀬𑀣𑀸 𑀢𑁆𑀯𑀁 𑀩𑀸𑀳𑀺𑀭𑀁 𑀓𑀲𑀺𑀁 𑀓𑀢𑁆𑀯𑀸 𑀲𑀲𑁆𑀲𑀤𑀽𑀲𑀓𑀸𑀦𑀁 𑀢𑀺𑀡𑀸𑀦𑀁 𑀳𑀢𑁆𑀣𑁂𑀦 𑀯𑀸 𑀅𑀲𑀺𑀢𑁂𑀦 𑀯𑀸 𑀦𑀺𑀤𑁆𑀤𑀸𑀦𑀁 𑀓𑀭𑁄𑀲𑀺, 𑀏𑀯𑀁 𑀅𑀳𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀁 𑀓𑀲𑀺𑀁 𑀓𑀢𑁆𑀯𑀸 𑀓𑀼𑀲𑀮𑀲𑀲𑁆𑀲𑀤𑀽𑀲𑀓𑀸𑀦𑀁 𑀯𑀺𑀲𑀁𑀯𑀸𑀤𑀦𑀢𑀺𑀡𑀸𑀦𑀁 𑀲𑀘𑁆𑀘𑁂𑀦 𑀦𑀺𑀤𑁆𑀤𑀸𑀦𑀁 𑀓𑀭𑁄𑀫𑀻’’𑀢𑀺. 𑀬𑀣𑀸𑀪𑀽𑀢𑀜𑀸𑀡𑀁 𑀯𑀸 𑀏𑀢𑁆𑀣 𑀲𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀅𑀢𑁆𑀢𑀲𑀜𑁆𑀜𑀸𑀤𑀻𑀦𑀁 𑀢𑀺𑀡𑀸𑀦𑀁 𑀦𑀺𑀤𑁆𑀤𑀸𑀦𑀁 𑀓𑀭𑁄𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀦𑀺𑀤𑁆𑀤𑀸𑀦𑀦𑁆𑀢𑀺 𑀙𑁂𑀤𑀓𑀁 𑀮𑀸𑀯𑀓𑀁 𑀉𑀧𑁆𑀧𑀸𑀝𑀓𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀢𑁆𑀯𑀁 𑀤𑀸𑀲𑀁 𑀯𑀸 𑀓𑀫𑁆𑀫𑀓𑀭𑀁 𑀯𑀸 𑀦𑀺𑀤𑁆𑀤𑀸𑀦𑀁 𑀓𑀭𑁄𑀲𑀺, ‘‘𑀦𑀺𑀤𑁆𑀤𑁂𑀳𑀺 𑀢𑀺𑀡𑀸𑀦𑀻’’𑀢𑀺 𑀢𑀺𑀡𑀸𑀦𑀁 𑀙𑁂𑀤𑀓𑀁 𑀮𑀸𑀯𑀓𑀁 𑀉𑀧𑁆𑀧𑀸𑀝𑀓𑀁 𑀓𑀭𑁄𑀲𑀺, 𑀏𑀯𑀫𑀳𑀁 𑀲𑀘𑁆𑀘𑀁 𑀓𑀭𑁄𑀫𑀻𑀢𑀺 𑀤𑀲𑁆𑀲𑁂𑀢𑀺, 𑀅𑀣 𑀯𑀸 𑀲𑀘𑁆𑀘𑀦𑁆𑀢𑀺 𑀤𑀺𑀝𑁆𑀞𑀺𑀲𑀘𑁆𑀘𑀁. 𑀢𑀫𑀳𑀁 𑀦𑀺𑀤𑁆𑀤𑀸𑀦𑀁 𑀓𑀭𑁄𑀫𑀺, 𑀙𑀺𑀦𑁆𑀤𑀺𑀢𑀩𑁆𑀩𑀁 𑀮𑀼𑀦𑀺𑀢𑀩𑁆𑀩𑀁 𑀉𑀧𑁆𑀧𑀸𑀝𑁂𑀢𑀩𑁆𑀩𑀁 𑀓𑀭𑁄𑀫𑀻𑀢𑀺. 𑀇𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀯𑀺𑀓𑀧𑁆𑀧𑁂𑀲𑀼 𑀉𑀧𑀬𑁄𑀕𑁂𑀦𑁂𑀯𑀢𑁆𑀣𑁄 𑀬𑀼𑀚𑁆𑀚𑀢𑀺.

𑀲𑁄𑀭𑀘𑁆𑀘𑀁 𑀫𑁂 𑀧𑀫𑁄𑀘𑀦𑀦𑁆𑀢𑀺 𑀏𑀢𑁆𑀣 𑀬𑀁 𑀢𑀁 ‘‘𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀲𑀻𑀮𑀫𑁂𑀯 ‘‘𑀲𑁄𑀭𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀢𑀁 𑀅𑀥𑀺𑀧𑁆𑀧𑁂𑀢𑀁. ‘‘𑀓𑀸𑀬𑀕𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀳𑀺 𑀢𑀁 𑀯𑀼𑀢𑁆𑀢𑀫𑁂𑀯. 𑀅𑀭𑀳𑀢𑁆𑀢𑀨𑀮𑀁 𑀧𑀦 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀳𑀺 𑀲𑀼𑀦𑁆𑀤𑀭𑁂 𑀦𑀺𑀩𑁆𑀩𑀸𑀦𑁂 𑀭𑀢𑀢𑁆𑀢𑀸 ‘‘𑀲𑁄𑀭𑀘𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀫𑁄𑀘𑀦𑀦𑁆𑀢𑀺 𑀬𑁄𑀕𑀯𑀺𑀲𑁆𑀲𑀚𑁆𑀚𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀢𑀯 𑀧𑀫𑁄𑀘𑀦𑀁 𑀧𑀼𑀦𑀧𑀺 𑀲𑀸𑀬𑀦𑁆𑀳𑁂 𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀯𑀸 𑀅𑀦𑀸𑀕𑀢𑀲𑀁𑀯𑀘𑁆𑀙𑀭𑁂 𑀯𑀸 𑀬𑁄𑀚𑁂𑀢𑀩𑁆𑀩𑀢𑁄 𑀅𑀧𑁆𑀧𑀫𑁄𑀘𑀦𑀫𑁂𑀯 𑀳𑁄𑀢𑀺, 𑀦 𑀫𑀫 𑀏𑀯𑀁. 𑀦 𑀳𑀺 𑀫𑀫 𑀅𑀦𑁆𑀢𑀭𑀸 𑀫𑁄𑀘𑀦𑀁 𑀦𑀸𑀫 𑀅𑀢𑁆𑀣𑀺. 𑀅𑀳𑀁 𑀳𑀺 𑀤𑀻𑀧𑀗𑁆𑀓𑀭𑀤𑀲𑀩𑀮𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀜𑁆𑀜𑀸𑀦𑀗𑁆𑀕𑀮𑁂 𑀯𑀻𑀭𑀺𑀬𑀩𑀮𑀻𑀩𑀤𑁆𑀤𑁂 𑀬𑁄𑀚𑁂𑀢𑁆𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀫𑀳𑀸𑀓𑀲𑀺𑀁 𑀓𑀲𑀦𑁆𑀢𑁄 𑀢𑀸𑀯 𑀦 𑀫𑀼𑀜𑁆𑀘𑀺𑀁, 𑀬𑀸𑀯 𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀁. 𑀬𑀤𑀸 𑀘 𑀫𑁂 𑀲𑀩𑁆𑀩𑀁 𑀢𑀁 𑀓𑀸𑀮𑀁 𑀔𑁂𑀧𑁂𑀢𑁆𑀯𑀸 𑀩𑁄𑀥𑀺𑀫𑀽𑀮𑁂 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀲𑀩𑁆𑀩𑀕𑀼𑀡𑀧𑀭𑀺𑀯𑀸𑀭𑀁 𑀅𑀭𑀳𑀢𑁆𑀢𑀨𑀮𑀁 𑀉𑀤𑀧𑀸𑀤𑀺, 𑀢𑀤𑀸 𑀫𑀬𑀸 𑀢𑀁 𑀲𑀩𑁆𑀩𑀼𑀲𑁆𑀲𑀼𑀓𑁆𑀓𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀧𑀫𑀼𑀢𑁆𑀢𑀁, 𑀦 𑀤𑀸𑀦𑀺 𑀧𑀼𑀦 𑀬𑁄𑀚𑁂𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀲𑁄𑀭𑀘𑁆𑀘𑀁 𑀫𑁂 𑀧𑀫𑁄𑀘𑀦’’𑀦𑁆𑀢𑀺.

𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀦𑁆𑀢𑀺 𑀏𑀢𑁆𑀣 𑀯𑀻𑀭𑀺𑀬𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄. 𑀥𑀼𑀭𑀥𑁄𑀭𑀬𑁆𑀳𑀦𑁆𑀢𑀺 𑀥𑀼𑀭𑀸𑀬𑀁 𑀥𑁄𑀭𑀬𑁆𑀳𑀁, 𑀥𑀼𑀭𑀸𑀯𑀳𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀼𑀭𑀸𑀬𑀁 𑀥𑁄𑀭𑀬𑁆𑀳𑀸𑀓𑀟𑁆𑀠𑀺𑀢𑀁 𑀦𑀗𑁆𑀕𑀮𑀁 𑀪𑀽𑀫𑀺𑀖𑀦𑀁 𑀪𑀺𑀦𑁆𑀤𑀢𑀺, 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀘 𑀧𑀤𑀸𑀮𑁂𑀢𑀺, 𑀏𑀯𑀁 𑀪𑀕𑀯𑀢𑁄 𑀯𑀻𑀭𑀺𑀬𑀸𑀓𑀟𑁆𑀠𑀺𑀢𑀁 𑀧𑀜𑁆𑀜𑀸𑀦𑀗𑁆𑀕𑀮𑀁 𑀬𑀣𑀸 𑀯𑀼𑀢𑁆𑀢𑀁 𑀖𑀦𑀁 𑀪𑀺𑀦𑁆𑀤𑀢𑀺, 𑀓𑀺𑀮𑁂𑀲𑀲𑀦𑁆𑀢𑀸𑀦𑀓𑀸𑀦𑀺 𑀘 𑀧𑀤𑀸𑀮𑁂𑀢𑀺. 𑀢𑁂𑀦𑀸𑀳 ‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳’’𑀦𑁆𑀢𑀺. 𑀅𑀣 𑀯𑀸 𑀧𑀼𑀭𑀺𑀫𑀥𑀼𑀭𑀸𑀯𑀳𑀢𑁆𑀢𑀸 𑀥𑀼𑀭𑀸, 𑀫𑀽𑀮𑀥𑀼𑀭𑀸𑀯𑀳𑀢𑁆𑀢𑀸 𑀥𑁄𑀭𑀬𑁆𑀳𑀸, 𑀥𑀼𑀭𑀸 𑀘 𑀥𑁄𑀭𑀬𑁆𑀳𑀸 𑀘 𑀥𑀼𑀭𑀥𑁄𑀭𑀬𑁆𑀳𑀸. 𑀇𑀢𑀺 𑀬𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀦𑀗𑁆𑀕𑀮𑁂 𑀘𑀢𑀼𑀩𑀮𑀻𑀩𑀤𑁆𑀤𑀧𑀪𑁂𑀤𑀁 𑀥𑀼𑀭𑀥𑁄𑀭𑀬𑁆𑀳𑀁 𑀯𑀳𑀦𑁆𑀢𑀁 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀁 𑀢𑀺𑀡𑀫𑀽𑀮𑀖𑀸𑀢𑀜𑁆𑀘𑁂𑀯 𑀲𑀲𑁆𑀲𑀲𑀫𑁆𑀧𑀢𑁆𑀢𑀺𑀜𑁆𑀘 𑀲𑀸𑀥𑁂𑀢𑀺, 𑀏𑀯𑀁 𑀪𑀕𑀯𑀢𑁄 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀪𑁂𑀤𑀁 𑀥𑀼𑀭𑀥𑁄𑀭𑀬𑁆𑀳𑀁 𑀯𑀳𑀦𑁆𑀢𑀁 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀁 𑀅𑀓𑀼𑀲𑀮𑀖𑀸𑀢𑀜𑁆𑀘𑁂𑀯 𑀓𑀼𑀲𑀮𑀲𑀫𑁆𑀧𑀢𑁆𑀢𑀺𑀜𑁆𑀘 𑀲𑀸𑀥𑁂𑀢𑀺. 𑀢𑁂𑀦𑀸𑀳 ‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳’’𑀦𑁆𑀢𑀺.

𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀦𑁆𑀢𑀺 𑀏𑀢𑁆𑀣 𑀬𑁄𑀕𑁂𑀳𑀺 𑀔𑁂𑀫𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀬𑁄𑀕𑀓𑁆𑀔𑁂𑀫𑀁 𑀦𑀸𑀫, 𑀢𑀁 𑀅𑀥𑀺𑀓𑀺𑀘𑁆𑀘 𑀯𑀸𑀳𑀻𑀬𑀢𑀺, 𑀅𑀪𑀺𑀫𑀼𑀔𑀁 𑀯𑀸 𑀯𑀸𑀳𑀻𑀬𑀢𑀻𑀢𑀺 𑀅𑀥𑀺𑀯𑀸𑀳𑀦𑀁, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀯𑀸𑀳𑀦𑀁 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀢𑀯 𑀥𑀼𑀭𑀥𑁄𑀭𑀬𑁆𑀳𑀁 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀅𑀜𑁆𑀜𑀢𑀭𑀤𑀺𑀲𑀸𑀪𑀺𑀫𑀼𑀔𑀁 𑀯𑀸𑀳𑀻𑀬𑀢𑀺, 𑀢𑀣𑀸 𑀫𑀫 𑀥𑀼𑀭𑀥𑁄𑀭𑀬𑁆𑀳𑀁 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀁 𑀯𑀸𑀳𑀻𑀬𑀢𑀻𑀢𑀺. 𑀏𑀯𑀁 𑀯𑀸𑀳𑀻𑀬𑀫𑀸𑀦𑀁𑀯 𑀕𑀘𑁆𑀙𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑀁. 𑀬𑀣𑀸 𑀢𑀯 𑀦𑀗𑁆𑀕𑀮𑀁 𑀯𑀳𑀦𑁆𑀢𑀁 𑀥𑀼𑀭𑀥𑁄𑀭𑀬𑁆𑀳𑀁 𑀔𑁂𑀢𑁆𑀢𑀓𑁄𑀝𑀺𑀁 𑀧𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀅𑀦𑀺𑀯𑀢𑁆𑀢𑀦𑁆𑀢𑀁 𑀤𑀻𑀧𑀗𑁆𑀓𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀘𑁆𑀙𑀢𑁂𑀯. 𑀬𑀲𑁆𑀫𑀸 𑀯𑀸 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑀸 𑀓𑀺𑀮𑁂𑀲𑀸 𑀦 𑀧𑀼𑀦𑀧𑁆𑀧𑀼𑀦𑀁 𑀧𑀳𑀸𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀬𑀣𑀸 𑀢𑀯 𑀦𑀗𑁆𑀕𑀮𑁂𑀦 𑀙𑀺𑀦𑁆𑀦𑀸𑀦𑀺 𑀢𑀺𑀡𑀸𑀦𑀺 𑀧𑀼𑀦 𑀅𑀧𑀭𑀲𑁆𑀫𑀺𑀁 𑀲𑀫𑀬𑁂 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸𑀧𑀺 𑀏𑀯𑀁 𑀧𑀞𑀫𑀫𑀕𑁆𑀕𑀯𑀲𑁂𑀦 𑀤𑀺𑀝𑁆𑀞𑁂𑀓𑀝𑁆𑀞𑁂 𑀓𑀺𑀮𑁂𑀲𑁂, 𑀤𑀼𑀢𑀺𑀬𑀯𑀲𑁂𑀦 𑀑𑀴𑀸𑀭𑀺𑀓𑁂, 𑀢𑀢𑀺𑀬𑀯𑀲𑁂𑀦 𑀅𑀡𑀼𑀲𑀳𑀕𑀢𑁂, 𑀘𑀢𑀼𑀢𑁆𑀣𑀯𑀲𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑀁 𑀕𑀘𑁆𑀙𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑀁. 𑀅𑀣 𑀯𑀸 𑀕𑀘𑁆𑀙𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑀺 𑀦𑀺𑀯𑀢𑁆𑀢𑀦𑀭𑀳𑀺𑀢𑀁 𑀳𑀼𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀢𑀁 𑀥𑀼𑀭𑀥𑁄𑀭𑀬𑁆𑀳𑀁. 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀕𑀘𑁆𑀙𑀦𑁆𑀢𑀜𑁆𑀘 𑀬𑀣𑀸 𑀢𑀯 𑀥𑀼𑀭𑀥𑁄𑀭𑀬𑁆𑀳𑀁 𑀦 𑀢𑀁 𑀞𑀸𑀦𑀁 𑀕𑀘𑁆𑀙𑀢𑀺, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀓𑀲𑁆𑀲𑀓𑁄 𑀅𑀲𑁄𑀓𑁄 𑀯𑀺𑀭𑀚𑁄 𑀳𑀼𑀢𑁆𑀯𑀸 𑀦 𑀲𑁄𑀘𑀢𑀺. 𑀏𑀢𑀁 𑀧𑀦 𑀢𑀁 𑀞𑀸𑀦𑀁 𑀕𑀘𑁆𑀙𑀢𑀺 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀢𑀺. 𑀬𑀢𑁆𑀣 𑀲𑀢𑀺𑀧𑀸𑀘𑀦𑁂𑀦 𑀏𑀢𑀁 𑀯𑀻𑀭𑀺𑀬𑀥𑀼𑀭𑀥𑁄𑀭𑀬𑁆𑀳𑀁 𑀘𑁄𑀤𑁂𑀦𑁆𑀢𑁄 𑀕𑀦𑁆𑀢𑁆𑀯𑀸 𑀫𑀸𑀤𑀺𑀲𑁄 𑀓𑀲𑁆𑀲𑀓𑁄 𑀅𑀲𑁄𑀓𑁄 𑀯𑀺𑀭𑀚𑁄 𑀳𑀼𑀢𑁆𑀯𑀸 𑀦 𑀲𑁄𑀘𑀢𑀺, 𑀢𑀁 𑀲𑀩𑁆𑀩𑀲𑁄𑀓𑀲𑀮𑁆𑀮𑀲𑀫𑀼𑀕𑁆𑀖𑀸𑀢𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀅𑀲𑀗𑁆𑀔𑀢𑀁 𑀞𑀸𑀦𑀁 𑀕𑀘𑁆𑀙𑀢𑀻𑀢𑀺.

𑀇𑀤𑀸𑀦𑀺 𑀦𑀺𑀕𑀫𑀦𑀁 𑀓𑀭𑁄𑀦𑁆𑀢𑁄 𑀏𑀯𑀫𑁂𑀲𑀸 𑀓𑀲𑀻𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀲𑁆𑀲, 𑀩𑁆𑀭𑀸𑀳𑁆𑀫𑀡, 𑀏𑀲𑀸 𑀲𑀤𑁆𑀥𑀸𑀩𑀻𑀚𑀸 𑀢𑀧𑁄𑀯𑀼𑀝𑁆𑀞𑀺𑀬𑀸 𑀅𑀦𑀼𑀕𑁆𑀕𑀳𑀺𑀢𑀸 𑀓𑀲𑀻 𑀧𑀜𑁆𑀜𑀸𑀫𑀬𑀁 𑀬𑀼𑀕𑀦𑀗𑁆𑀕𑀮𑀁 𑀳𑀺𑀭𑀺𑀫𑀬𑀜𑁆𑀘 𑀈𑀲𑀁 𑀫𑀦𑁄𑀫𑀬𑁂𑀦 𑀬𑁄𑀢𑁆𑀢𑁂𑀦 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀧𑀜𑁆𑀜𑀸𑀦𑀗𑁆𑀕𑀮𑁂𑀦 𑀲𑀢𑀺𑀨𑀸𑀮𑀁 𑀆𑀓𑁄𑀝𑁂𑀢𑁆𑀯𑀸 𑀲𑀢𑀺𑀧𑀸𑀘𑀦𑀁 𑀕𑀳𑁂𑀢𑁆𑀯𑀸 𑀓𑀸𑀬𑀯𑀘𑀻𑀆𑀳𑀸𑀭𑀕𑀼𑀢𑁆𑀢𑀺𑀬𑀸 𑀕𑁄𑀧𑁂𑀢𑁆𑀯𑀸 𑀲𑀘𑁆𑀘𑀁 𑀦𑀺𑀤𑁆𑀤𑀸𑀦𑀁 𑀓𑀢𑁆𑀯𑀸 𑀲𑁄𑀭𑀘𑁆𑀘𑀧𑀫𑁄𑀘𑀦𑀁 𑀯𑀻𑀭𑀺𑀬𑀥𑀼𑀭𑀥𑁄𑀭𑀬𑁆𑀳𑀁 𑀬𑁄𑀕𑀓𑁆𑀔𑁂𑀫𑀸𑀪𑀺𑀫𑀼𑀔𑀁 𑀅𑀦𑀺𑀯𑀢𑁆𑀢𑀦𑁆𑀢𑀁 𑀯𑀸𑀳𑀦𑁆𑀢𑁂𑀦 𑀓𑀝𑁆𑀞𑀸 𑀓𑀲𑀻 𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑀁 𑀘𑀢𑀼𑀩𑁆𑀩𑀺𑀥𑀁 𑀲𑀸𑀫𑀜𑁆𑀜𑀨𑀮𑀁 𑀧𑀸𑀧𑀺𑀢𑀸, 𑀲𑀸 𑀳𑁄𑀢𑀺 𑀅𑀫𑀢𑀧𑁆𑀨𑀮𑀸, 𑀲𑀸 𑀏𑀲𑀸 𑀓𑀲𑀻 𑀅𑀫𑀢𑀧𑁆𑀨𑀮𑀸 𑀳𑁄𑀢𑀺. 𑀅𑀫𑀢𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀦𑀺𑀩𑁆𑀩𑀸𑀦𑀸𑀦𑀺𑀲𑀁𑀲𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀔𑁄 𑀧𑀦𑁂𑀲𑀸 𑀓𑀲𑀻 𑀦 𑀫𑀫𑁂𑀯𑁂𑀓𑀲𑁆𑀲 𑀅𑀫𑀢𑀧𑁆𑀨𑀮𑀸 𑀳𑁄𑀢𑀺, 𑀅𑀣 𑀔𑁄 𑀬𑁄 𑀓𑁄𑀘𑀺 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀏𑀢𑀁 𑀓𑀲𑀺𑀁 𑀓𑀲𑀢𑀺, 𑀲𑁄 𑀲𑀩𑁆𑀩𑁄𑀧𑀺 𑀏𑀢𑀁 𑀓𑀲𑀺𑀢𑁆𑀯𑀸𑀦 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻𑀢𑀺.

𑀏𑀯𑀁 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 𑀕𑀫𑁆𑀪𑀻𑀭𑀢𑁆𑀣𑀁 𑀤𑁂𑀲𑀦𑀁 𑀲𑀼𑀢𑁆𑀯𑀸 𑁋 ‘‘𑀫𑀫 𑀓𑀲𑀺𑀨𑀮𑀁 𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀦𑀧𑀺 𑀤𑀺𑀯𑀲𑁂𑀬𑁂𑀯 𑀙𑀸𑀢𑁄 𑀳𑁄𑀢𑀺, 𑀇𑀫𑀲𑁆𑀲 𑀧𑀦 𑀓𑀲𑀻 𑀅𑀫𑀢𑀧𑁆𑀨𑀮𑀸, 𑀢𑀲𑁆𑀲 𑀨𑀮𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 𑀜𑀢𑁆𑀯𑀸 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑁄 𑀪𑀼𑀜𑁆𑀚𑀢𑀼 𑀪𑀯𑀁 𑀕𑁄𑀢𑀫𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀢𑀢𑁄 𑀧𑀭𑀜𑁆𑀘 𑀯𑀼𑀢𑁆𑀢𑀢𑁆𑀣𑀫𑁂𑀯𑀸𑀢𑀺. 𑀧𑀞𑀫𑀁.

𑁨. 𑀉𑀤𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁮. 𑀤𑀼𑀢𑀺𑀬𑁂 𑀑𑀤𑀦𑁂𑀦 𑀧𑀽𑀭𑁂𑀲𑀻𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀫𑁆𑀧𑀸𑀤𑀺𑀢𑁂𑀦 𑀲𑀽𑀧𑀩𑁆𑀬𑀜𑁆𑀚𑀦𑁂𑀦 𑀑𑀤𑀦𑁂𑀦 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀪𑀕𑀯𑀸 𑀓𑀺𑀭 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄𑀯 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸, 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸, 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸, 𑀤𑁆𑀯𑀸𑀭𑀁 𑀧𑀺𑀥𑀸𑀬, 𑀦𑀺𑀲𑀺𑀦𑁆𑀦𑁄 𑀢𑀲𑁆𑀲 𑀪𑁄𑀚𑀦𑀁 𑀉𑀧𑀲𑀁𑀳𑀭𑀺𑀬𑀫𑀸𑀦𑀁 𑀤𑀺𑀲𑁆𑀯𑀸, 𑀏𑀓𑀓𑁄𑀯 𑀧𑀢𑁆𑀢𑀁 𑀅𑀁𑀲𑀓𑀽𑀝𑁂 𑀮𑀕𑁆𑀕𑁂𑀢𑁆𑀯𑀸, 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫, 𑀦𑀕𑀭𑀤𑁆𑀯𑀸𑀭𑁂 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸, 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸, 𑀧𑀝𑀺𑀧𑀸𑀝𑀺𑀬𑀸 𑀕𑀘𑁆𑀙𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸, 𑀅𑀢𑁆𑀢𑀦𑁄 𑀲𑀚𑁆𑀚𑀺𑀢𑀁 𑀪𑁄𑀚𑀦𑀁 𑀅𑀤𑀸𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀫𑁆𑀧𑀻𑀢𑀺 𑀤𑀼𑀢𑀺𑀬𑀤𑀺𑀯𑀲𑁂𑀧𑀺. 𑀢𑀢𑀺𑀬𑀫𑁆𑀧𑀻𑀢𑀺 𑀢𑀢𑀺𑀬𑀤𑀺𑀯𑀲𑁂𑀧𑀺. 𑀢𑀸𑀦𑀺 𑀓𑀺𑀭 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀦𑀺𑀭𑀦𑁆𑀢𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀖𑀭𑀤𑁆𑀯𑀸𑀭𑀁 𑀕𑀘𑁆𑀙𑀦𑁆𑀢𑀲𑁆𑀲 𑀪𑀕𑀯𑀢𑁄 𑀅𑀦𑁆𑀢𑀭𑀸 𑀅𑀜𑁆𑀜𑁄 𑀓𑁄𑀘𑀺 𑀉𑀝𑁆𑀞𑀸𑀬 𑀧𑀢𑁆𑀢𑀁 𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺, 𑀫𑀳𑀸𑀚𑀦𑁄 𑀑𑀮𑁄𑀓𑁂𑀦𑁆𑀢𑁄𑀯 𑀅𑀝𑁆𑀞𑀸𑀲𑀺.

𑀏𑀢𑀤𑀯𑁄𑀘𑀸𑀢𑀺 𑀩𑁆𑀭𑀸𑀳𑁆𑀫𑀡𑁄 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀦𑁆𑀢𑁄𑀧𑀺 𑀦 𑀲𑀤𑁆𑀥𑀸𑀬 𑀅𑀤𑀸𑀲𑀺, ‘‘𑀖𑀭𑀤𑁆𑀯𑀸𑀭𑀁 𑀆𑀕𑀦𑁆𑀢𑁆𑀯𑀸 𑀞𑀺𑀢𑀲𑁆𑀲 𑀧𑀩𑁆𑀩𑀚𑀺𑀢𑀲𑁆𑀲 𑀪𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺 𑀅𑀤𑀢𑁆𑀯𑀸 𑀪𑀼𑀜𑁆𑀚𑀢𑀻’’𑀢𑀺 𑀉𑀧𑀸𑀭𑀫𑁆𑀪𑀪𑀬𑁂𑀦 𑀅𑀤𑀸𑀲𑀺. 𑀤𑀤𑀦𑁆𑀢𑁄 𑀘 𑀤𑁆𑀯𑁂 𑀤𑀺𑀯𑀲𑀸𑀦𑀺 𑀤𑀢𑁆𑀯𑀸 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸𑀯 𑀦𑀺𑀯𑀢𑁆𑀢𑁄. 𑀪𑀕𑀯𑀸𑀧𑀺 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸𑀯 𑀧𑀓𑁆𑀓𑀦𑁆𑀢𑁄. 𑀢𑀢𑀺𑀬𑀤𑀺𑀯𑀲𑁂 𑀧𑀦 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀢𑀁 ‘‘𑀧𑀓𑀝𑁆𑀞𑀓𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀪𑀕𑀯𑀸𑀧𑀺 𑀏𑀢𑀁 𑀯𑀘𑀦𑀁 𑀦𑀺𑀘𑁆𑀙𑀸𑀭𑀸𑀧𑀦𑀢𑁆𑀣𑀫𑁂𑀯 𑀬𑀸𑀯 𑀢𑀢𑀺𑀬𑀫𑀕𑀫𑀸𑀲𑀺. 𑀢𑀢𑁆𑀣 𑀧𑀓𑀝𑁆𑀞𑀓𑁄𑀢𑀺 𑀭𑀲𑀕𑀺𑀤𑁆𑀥𑁄.

𑀧𑀼𑀦𑀧𑁆𑀧𑀼𑀦𑀁 𑀘𑁂𑀯 𑀯𑀧𑀦𑁆𑀢𑀺 𑀩𑀻𑀚𑀦𑁆𑀢𑀺 𑀲𑀢𑁆𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, ‘‘𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀑𑀲𑀓𑁆𑀓𑀲𑀺, 𑀧𑀼𑀦𑀧𑁆𑀧𑀼𑀦𑀁 𑀓𑀸𑀢𑀩𑁆𑀩𑀸 𑀦𑀸𑀫 𑀮𑁄𑀓𑀲𑁆𑀫𑀺𑀁 𑀲𑁄𑀴𑀲 𑀥𑀫𑁆𑀫𑀸’’𑀢𑀺 𑀯𑀢𑁆𑀯𑀸 𑀢𑁂 𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀘𑁂𑀯 𑀯𑀧𑀦𑁆𑀢𑀻𑀢𑀺 𑀏𑀓𑀲𑁆𑀫𑀺𑀁 𑀲𑀲𑁆𑀲𑀯𑀸𑀭𑁂 𑀯𑀼𑀢𑁆𑀢𑀁 ‘‘𑀅𑀮𑀫𑁂𑀢𑁆𑀢𑀸𑀯𑀢𑀸’’𑀢𑀺 𑀅𑀦𑁄𑀲𑀓𑁆𑀓𑀺𑀢𑁆𑀯𑀸 𑀅𑀧𑀭𑀸𑀧𑀭𑁂𑀲𑀼𑀧𑀺 𑀲𑀲𑁆𑀲𑀯𑀸𑀭𑁂𑀲𑀼 𑀘 𑀯𑀧𑀦𑁆𑀢𑀺𑀬𑁂𑀯. 𑀧𑀼𑀦𑀧𑁆𑀧𑀼𑀦𑀁 𑀯𑀲𑁆𑀲𑀢𑀻𑀢𑀺 𑀦 𑀏𑀓𑀤𑀺𑀯𑀲𑀁 𑀯𑀲𑁆𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀧𑀼𑀦𑀧𑁆𑀧𑀼𑀦𑀤𑀺𑀯𑀲𑁂𑀲𑀼𑀧𑀺 𑀧𑀼𑀦𑀧𑁆𑀧𑀼𑀦𑀲𑀁𑀯𑀘𑁆𑀙𑀭𑁂𑀲𑀼𑀧𑀺 𑀯𑀲𑁆𑀲𑀢𑀺𑀬𑁂𑀯, 𑀏𑀯𑀁 𑀚𑀦𑀧𑀤𑀸 𑀇𑀤𑁆𑀥𑀸 𑀳𑁄𑀦𑁆𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀸𑀘𑀓𑀸𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂 𑀲𑀢𑁆𑀣𑀸 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀅𑀢𑁆𑀢𑀸𑀦𑀫𑁆𑀧𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀔𑀻𑀭𑀦𑀺𑀓𑀸𑀢𑀺 𑀔𑀻𑀭𑀓𑀸𑀭𑀓𑀸 𑀕𑁄𑀤𑁄𑀳𑀓𑀸. 𑀦 𑀳𑀺 𑀢𑁂 𑀏𑀓𑀯𑀸𑀭𑀫𑁂𑀯 𑀣𑀦𑀁 𑀅𑀜𑁆𑀙𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀅𑀜𑁆𑀙𑀦𑁆𑀢𑀸 𑀥𑁂𑀦𑀼𑀁 𑀤𑀼𑀳𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀮𑀫𑀢𑀺 𑀨𑀦𑁆𑀤𑀢𑀺 𑀘𑀸𑀢𑀺 𑀅𑀬𑀁 𑀲𑀢𑁆𑀢𑁄 𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀓𑀺𑀮𑀫𑀢𑀺 𑀘𑁂𑀯 𑀨𑀦𑁆𑀤𑀢𑀺 𑀘. 𑀕𑀩𑁆𑀪𑀦𑁆𑀢𑀺 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀦𑀫𑁆𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀓𑀼𑀘𑁆𑀙𑀺𑀁. 𑀲𑀺𑀯𑀣𑀺𑀓𑀦𑁆𑀢𑀺 𑀲𑀼𑀲𑀸𑀦𑀁, 𑀫𑀢𑀁 𑀫𑀢𑀁 𑀲𑀢𑁆𑀢𑀁 𑀢𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀜𑁆𑀘 𑀮𑀤𑁆𑀥𑀸 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀅𑀧𑀼𑀦𑀩𑁆𑀪𑀯𑀸𑀬 𑀫𑀕𑁆𑀕𑁄 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀢𑀁 𑀮𑀪𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀼𑀢𑁆𑀢𑁂𑀢𑀺 𑀏𑀯𑀁 𑀪𑀕𑀯𑀢𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀢𑁆𑀯𑀸𑀯 𑀲𑁄𑀴𑀲 𑀧𑀼𑀦𑀧𑁆𑀧𑀼𑀦𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑁂𑀦 𑀯𑀼𑀢𑁆𑀢𑁂. 𑀏𑀢𑀤𑀯𑁄𑀘𑀸𑀢𑀺 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀲𑀦𑁆𑀦𑁄 𑀲𑀤𑁆𑀥𑀺𑀁 𑀧𑀼𑀢𑁆𑀢𑀤𑀸𑀭𑀫𑀺𑀢𑁆𑀢𑀜𑀸𑀢𑀺𑀯𑀕𑁆𑀕𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀏𑀢𑀁 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀤𑀼𑀢𑀺𑀬𑀁.

𑁩. 𑀤𑁂𑀯𑀳𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁯. 𑀢𑀢𑀺𑀬𑁂 𑀯𑀸𑀢𑁂𑀳𑀻𑀢𑀺 𑀉𑀤𑀭𑀯𑀸𑀢𑁂𑀳𑀺. 𑀪𑀕𑀯𑀢𑁄 𑀓𑀺𑀭 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑀲𑁆𑀲 𑀧𑀲𑀢𑀫𑀼𑀕𑁆𑀕𑀬𑀽𑀲𑀸𑀤𑀻𑀦𑀺 𑀆𑀳𑀸𑀭𑀬𑀢𑁄 𑀤𑀼𑀩𑁆𑀪𑁄𑀚𑀦𑁂𑀦 𑀘𑁂𑀯 𑀤𑀼𑀓𑁆𑀔𑀲𑁂𑀬𑁆𑀬𑀸𑀬 𑀘 𑀉𑀤𑀭𑀯𑀸𑀢𑁄 𑀓𑀼𑀧𑁆𑀧𑀺. 𑀅𑀧𑀭𑀪𑀸𑀕𑁂 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀧𑀺 𑀅𑀦𑁆𑀢𑀭𑀦𑁆𑀢𑀭𑀸 𑀲𑁄 𑀆𑀩𑀸𑀥𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺𑀬𑁂𑀯. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀉𑀧𑀝𑁆𑀞𑀸𑀓𑁄 𑀳𑁄𑀢𑀻𑀢𑀺 𑀧𑀞𑀫𑀩𑁄𑀥𑀺𑀬𑀁 𑀅𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀓𑀸𑀮𑁂 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀓𑀸𑀮𑁂 𑀲𑀢𑁆𑀣𑀼𑀅𑀲𑀻𑀢𑀺𑀫𑀳𑀸𑀣𑁂𑀭𑁂𑀲𑀼 𑀉𑀧𑀝𑁆𑀞𑀸𑀓𑁄 𑀅𑀪𑀽𑀢𑀧𑀼𑀩𑁆𑀩𑁄 𑀦𑀸𑀫 𑀦𑀢𑁆𑀣𑀺. 𑀦𑀸𑀕𑀲𑀫𑀸𑀮𑁄 𑀉𑀧𑀯𑀸𑀦𑁄 𑀲𑀼𑀦𑀓𑁆𑀔𑀢𑁆𑀢𑁄 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄 𑀲𑀸𑀕𑀢𑁄 𑀩𑁄𑀥𑀺 𑀫𑁂𑀖𑀺𑀬𑁄𑀢𑀺 𑀇𑀫𑁂 𑀧𑀦 𑀧𑀸𑀴𑀺𑀬𑀁 𑀆𑀕𑀢𑀼𑀧𑀝𑁆𑀞𑀸𑀓𑀸. 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀉𑀧𑀯𑀸𑀦𑀢𑁆𑀣𑁂𑀭𑁄 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀁 𑀤𑀦𑁆𑀢𑀓𑀝𑁆𑀞𑀤𑀸𑀦𑀁 𑀦𑁆𑀳𑀸𑀦𑁄𑀤𑀓𑀧𑀭𑀺𑀬𑀸𑀤𑀦𑀁 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀅𑀦𑀼𑀕𑀫𑀦𑀦𑁆𑀢𑀺 𑀲𑀩𑁆𑀩𑀁 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀫𑀓𑀸𑀲𑀺. 𑀉𑀧𑀲𑀗𑁆𑀓𑀫𑀻𑀢𑀺 𑀧𑀞𑀫𑀩𑁄𑀥𑀺𑀬𑀁 𑀓𑀺𑀭 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀦𑀺𑀤𑁆𑀥𑀽𑀫𑀁 𑀅𑀭𑀜𑁆𑀜𑀫𑁂𑀯 𑀳𑁄𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀤𑀓𑀢𑀸𑀧𑀦𑀫𑁆𑀧𑀺 𑀦 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁. 𑀲𑁄 𑀘 𑀩𑁆𑀭𑀸𑀳𑁆𑀫𑀡𑁄 𑀉𑀤𑁆𑀥𑀦𑀧𑀸𑀴𑀺𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀫𑀳𑀸𑀘𑀸𑀝𑀺𑀬𑁄 𑀉𑀤𑁆𑀥𑀦𑀫𑀸𑀭𑁄𑀧𑁂𑀢𑁆𑀯𑀸 𑀉𑀡𑁆𑀳𑁄𑀤𑀓𑀁 𑀓𑀸𑀭𑁂𑀢𑁆𑀯𑀸, 𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑀁 𑀯𑀺𑀓𑁆𑀓𑀺𑀡𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀦𑁆𑀳𑀸𑀬𑀺𑀢𑀼𑀓𑀸𑀫𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀽𑀮𑀁 𑀤𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀕𑀦𑁆𑀥𑁂 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀫𑀸𑀮𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀢𑀲𑁆𑀫𑀸 𑀣𑁂𑀭𑁄 𑀢𑀢𑁆𑀣 𑀉𑀧𑀲𑀗𑁆𑀓𑀫𑀺.

𑀓𑀺𑀁 𑀧𑀢𑁆𑀣𑀬𑀸𑀦𑁄𑀢𑀺 𑀓𑀺𑀁 𑀇𑀘𑁆𑀙𑀦𑁆𑀢𑁄. 𑀓𑀺𑀁 𑀏𑀲𑀦𑁆𑀢𑀺 𑀓𑀺𑀁 𑀕𑀯𑁂𑀲𑀦𑁆𑀢𑁄. 𑀧𑀽𑀚𑀺𑀢𑁄 𑀧𑀽𑀚𑀦𑁂𑀬𑁆𑀬𑀸𑀦𑀦𑁆𑀢𑀺 𑀇𑀤𑀁 𑀣𑁂𑀭𑁄 𑀤𑀲𑀩𑀮𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀼𑀫𑀸𑀭𑀪𑀺. 𑀕𑀺𑀮𑀸𑀦𑀪𑁂𑀲𑀚𑁆𑀚𑀢𑁆𑀣𑀁 𑀕𑀢𑁂𑀦 𑀓𑀺𑀭 𑀕𑀺𑀮𑀸𑀦𑀲𑁆𑀲 𑀯𑀡𑁆𑀡𑁄 𑀓𑀣𑁂𑀢𑀩𑁆𑀩𑁄𑀢𑀺 𑀯𑀢𑁆𑀢𑀫𑁂𑀢𑀁. 𑀯𑀡𑁆𑀡𑀁 𑀳𑀺 𑀲𑀼𑀢𑁆𑀯𑀸 𑀫𑀦𑀼𑀲𑁆𑀲𑀸 𑀲𑀓𑁆𑀓𑀘𑁆𑀘𑀁 𑀪𑁂𑀲𑀚𑁆𑀚𑀁 𑀤𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀲𑀧𑁆𑀧𑀸𑀬𑀪𑁂𑀲𑀚𑁆𑀚𑀁 𑀮𑀤𑁆𑀥𑀸 𑀕𑀺𑀮𑀸𑀦𑁄 𑀔𑀺𑀧𑁆𑀧𑀫𑁂𑀯 𑀯𑀼𑀝𑁆𑀞𑀸𑀢𑀺. 𑀓𑀣𑁂𑀦𑁆𑀢𑁂𑀦 𑀘 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀸𑀦𑀺 𑀆𑀭𑀩𑁆𑀪 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀲𑀻𑀮𑀯𑀸 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀩𑀳𑀼𑀲𑁆𑀲𑀼𑀢𑁄 𑀆𑀕𑀫𑀥𑀭𑁄 𑀯𑀁𑀲𑀸𑀦𑀼𑀭𑀓𑁆𑀔𑀓𑁄’’𑀢𑀺 𑀏𑀯𑀁 𑀧𑀦 𑀆𑀕𑀫𑀦𑀻𑀬𑀧𑀝𑀺𑀧𑀤𑀁𑀬𑁂𑀯 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀽𑀚𑀦𑁂𑀬𑁆𑀬𑀸𑀦𑀦𑁆𑀢𑀺 𑀅𑀲𑀻𑀢𑀺𑀫𑀳𑀸𑀣𑁂𑀭𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀧𑀽𑀚𑁂𑀢𑀩𑁆𑀩𑀸𑀢𑀺 𑀧𑀽𑀚𑀦𑁂𑀬𑁆𑀬𑀸. 𑀢𑁂𑀬𑁂𑀯 𑀲𑀓𑁆𑀓𑀸𑀢𑀩𑁆𑀩𑀸𑀢𑀺 𑀲𑀓𑁆𑀓𑀭𑁂𑀬𑁆𑀬𑀸. 𑀢𑁂𑀲𑀁𑀬𑁂𑀯 𑀅𑀧𑀘𑀺𑀢𑀺 𑀓𑀢𑁆𑀢𑀩𑁆𑀩𑀸𑀢𑀺 𑀅𑀧𑀘𑁂𑀬𑁆𑀬𑀸. 𑀪𑀕𑀯𑀸 𑀢𑁂𑀲𑀁 𑀧𑀽𑀚𑀺𑀢𑁄 𑀲𑀓𑁆𑀓𑀢𑁄 𑀅𑀧𑀘𑀺𑀢𑁄 𑀘, 𑀇𑀘𑁆𑀘𑀲𑁆𑀲 𑀢𑀁 𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀣𑁂𑀭𑁄 𑀏𑀯𑀫𑀸𑀳. 𑀳𑀸𑀢𑀯𑁂𑀢𑀺 𑀳𑀭𑀺𑀢𑀼𑀁.

𑀨𑀸𑀡𑀺𑀢𑀲𑁆𑀲 𑀘 𑀧𑀼𑀝𑀦𑁆𑀢𑀺 𑀫𑀳𑀦𑁆𑀢𑀁 𑀦𑀺𑀘𑁆𑀙𑀸𑀭𑀺𑀓𑀁 𑀕𑀼𑀴𑀧𑀺𑀡𑁆𑀟𑀁. 𑀲𑁄 𑀓𑀺𑀭 ‘‘𑀓𑀺𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀨𑀸𑀲𑀼𑀓’’𑀦𑁆𑀢𑀺? 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀉𑀤𑀭𑀯𑀸𑀢𑁄’’𑀢𑀺 𑀲𑀼𑀢𑁆𑀯𑀸, ‘‘𑀢𑁂𑀦 𑀳𑀺 𑀫𑀬𑀫𑁂𑀢𑁆𑀣 𑀪𑁂𑀲𑀚𑁆𑀚𑀁 𑀚𑀸𑀦𑀸𑀫, 𑀇𑀢𑁄 𑀣𑁄𑀓𑁂𑀦 𑀉𑀤𑀓𑁂𑀦 𑀇𑀤𑀁 𑀨𑀸𑀡𑀺𑀢𑀁 𑀆𑀮𑁄𑀴𑁂𑀢𑁆𑀯𑀸 𑀦𑁆𑀳𑀸𑀦𑀧𑀭𑀺𑀬𑁄𑀲𑀸𑀦𑁂 𑀧𑀸𑀢𑀼𑀁 𑀤𑁂𑀣, 𑀇𑀢𑀺 𑀉𑀡𑁆𑀳𑁄𑀤𑀓𑁂𑀦 𑀩𑀳𑀺 𑀧𑀭𑀺𑀲𑁂𑀤𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀅𑀦𑁆𑀢𑁄𑀢𑀺 𑀏𑀯𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀨𑀸𑀲𑀼𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀤𑀸𑀲𑀺.

𑀉𑀧𑀲𑀗𑁆𑀓𑀫𑀻𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀆𑀩𑀸𑀥𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁂 ‘‘𑀤𑁂𑀯𑀳𑀺𑀢𑁂𑀦 𑀢𑀣𑀸𑀕𑀢𑀲𑁆𑀲 𑀪𑁂𑀲𑀚𑁆𑀚𑀁 𑀤𑀺𑀦𑁆𑀦𑀁, 𑀢𑁂𑀦𑁂𑀯 𑀭𑁄𑀕𑁄 𑀯𑀽𑀧𑀲𑀦𑁆𑀢𑁄, 𑀅𑀳𑁄 𑀤𑀸𑀦𑀁 𑀧𑀭𑀫𑀤𑀸𑀦𑀁 𑀩𑁆𑀭𑀸𑀳𑁆𑀫𑀡𑀲𑁆𑀲𑀸’’𑀢𑀺 𑀓𑀣𑀸 𑀯𑀺𑀢𑁆𑀣𑀸𑀭𑀺𑀢𑀸 𑀚𑀸𑀢𑀸. 𑀢𑀁 𑀲𑀼𑀢𑁆𑀯𑀸 𑀓𑀺𑀢𑁆𑀢𑀺𑀓𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀏𑀢𑁆𑀢𑀓𑁂𑀦𑀧𑀺 𑀢𑀸𑀯 𑀫𑁂 𑀅𑀬𑀁 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀢𑁆𑀢𑀦𑀸 𑀓𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀢𑀸𑀯𑀢𑀓𑁂𑀦𑁂𑀯 𑀤𑀲𑀩𑀮𑁂 𑀯𑀺𑀲𑁆𑀲𑀸𑀲𑀁 𑀆𑀧𑀚𑁆𑀚𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑀺.

𑀤𑀚𑁆𑀚𑀸𑀢𑀺 𑀤𑀤𑁂𑀬𑁆𑀬. 𑀓𑀣𑀁 𑀳𑀺 𑀬𑀚𑀫𑀸𑀦𑀲𑁆𑀲𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀬𑀚𑀦𑁆𑀢𑀲𑁆𑀲. 𑀇𑀚𑁆𑀛𑀢𑀻𑀢𑀺 𑀲𑀫𑀺𑀚𑁆𑀛𑀢𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺. 𑀬𑁄𑀯𑁂𑀤𑀻𑀢𑀺 𑀬𑁄 𑀅𑀯𑁂𑀤𑀺 𑀅𑀜𑁆𑀜𑀸𑀲𑀺, 𑀯𑀺𑀤𑀺𑀢𑀁 𑀧𑀸𑀓𑀝𑀫𑀓𑀸𑀲𑀺 ‘‘𑀬𑁄𑀯𑁂𑀢𑀻’’𑀢𑀺𑀧𑀺 𑀧𑀸𑀞𑁄, 𑀬𑁄 𑀅𑀯𑁂𑀢𑀺 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺. 𑀚𑀸𑀢𑀺𑀓𑁆𑀔𑀬𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄𑀢𑀺 𑀚𑀸𑀦𑀺𑀢𑁆𑀯𑀸 𑀯𑁄𑀲𑀺𑀢𑁄 𑀯𑁄𑀲𑀸𑀦𑀁 𑀓𑀢𑀓𑀺𑀘𑁆𑀘𑀢𑀁 𑀧𑀢𑁆𑀢𑁄. 𑀏𑀯𑀁 𑀳𑀺 𑀬𑀚𑀫𑀸𑀦𑀲𑁆𑀲𑀸𑀢𑀺 𑀇𑀫𑀺𑀦𑀸 𑀔𑀻𑀡𑀸𑀲𑀯𑁂 𑀬𑀚𑀦𑀸𑀓𑀸𑀭𑁂𑀦 𑀬𑀚𑀦𑁆𑀢𑀲𑁆𑀲. 𑀢𑀢𑀺𑀬𑀁.

𑁪. 𑀫𑀳𑀸𑀲𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁦. 𑀘𑀢𑀼𑀢𑁆𑀣𑁂 𑀮𑀽𑀔𑁄 𑀮𑀽𑀔𑀧𑀸𑀯𑀼𑀭𑀡𑁄𑀢𑀺 𑀚𑀺𑀡𑁆𑀡𑁄 𑀚𑀺𑀡𑁆𑀡𑀧𑀸𑀯𑀼𑀭𑀡𑁄. 𑀉𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀢𑀲𑁆𑀲 𑀓𑀺𑀭 𑀖𑀭𑁂 𑀅𑀝𑁆𑀞𑀲𑀢𑀲𑀳𑀲𑁆𑀲𑀥𑀦𑀁 𑀅𑀳𑁄𑀲𑀺. 𑀲𑁄 𑀘𑀢𑀼𑀦𑁆𑀦𑀁 𑀧𑀼𑀢𑁆𑀢𑀸𑀦𑀁 𑀆𑀯𑀸𑀳𑀁 𑀓𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀅𑀣𑀲𑁆𑀲 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀸𑀮𑀗𑁆𑀓𑀢𑀸𑀬 𑀧𑀼𑀢𑁆𑀢𑀸 𑀲𑀫𑁆𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀘𑁂 𑀅𑀜𑁆𑀜𑀁 𑀩𑁆𑀭𑀸𑀳𑁆𑀫𑀡𑀺𑀁 𑀆𑀦𑁂𑀲𑁆𑀲𑀢𑀺, 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀯𑀲𑁂𑀦 𑀓𑀼𑀮𑀁 𑀪𑀺𑀚𑁆𑀚𑀺𑀲𑁆𑀲𑀢𑀺. 𑀳𑀦𑁆𑀤 𑀦𑀁 𑀫𑀬𑀁 𑀲𑀗𑁆𑀕𑀡𑁆𑀳𑀸𑀫𑀸’’𑀢𑀺. 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀧𑀡𑀻𑀢𑁂𑀳𑀺 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀳𑀺 𑀉𑀧𑀝𑁆𑀞𑀳𑀦𑁆𑀢𑀸 𑀳𑀢𑁆𑀣𑀧𑀸𑀤𑀲𑀫𑁆𑀩𑀸𑀳𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀤𑀺𑀯𑀸 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀳𑀢𑁆𑀣𑀧𑀸𑀤𑁂 𑀲𑀫𑁆𑀩𑀸𑀳𑀫𑀸𑀦𑀸 𑀧𑀸𑀝𑀺𑀬𑁂𑀓𑁆𑀓𑀁 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀯𑀢𑁆𑀯𑀸 𑁋 ‘‘𑀫𑀬𑀁 𑀢𑀼𑀫𑁆𑀳𑁂 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫, 𑀲𑁂𑀲𑀥𑀦𑀫𑁆𑀧𑀺 𑀦𑁄 𑀤𑁂𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 𑀧𑀼𑀦 𑀏𑀓𑁂𑀓𑀲𑁆𑀲 𑀲𑀢𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀢𑁆𑀣𑀧𑀸𑀭𑀼𑀧𑀦𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀦𑀺𑀬𑁆𑀬𑀸𑀤𑁂𑀲𑀺. 𑀢𑀁 𑀚𑁂𑀝𑁆𑀞𑀧𑀼𑀢𑁆𑀢𑁄 𑀓𑀢𑀺𑀧𑀸𑀳𑀁 𑀉𑀧𑀝𑁆𑀞𑀳𑀺.

𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀦𑁆𑀳𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 𑀲𑀼𑀡𑁆𑀳𑀸 𑀏𑀯𑀫𑀸𑀳 𑁋 ‘‘𑀓𑀺𑀁 𑀢𑀬𑀸 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀅𑀢𑀺𑀭𑁂𑀓𑀁 𑀤𑀺𑀦𑁆𑀦𑀫𑀢𑁆𑀣𑀺? 𑀦𑀦𑀼 𑀲𑀩𑁆𑀩𑁂𑀲𑀁 𑀤𑁆𑀯𑁂 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀤𑀺𑀦𑁆𑀦𑀸𑀦𑀺, 𑀓𑀺𑀁 𑀲𑁂𑀲𑀧𑀼𑀢𑁆𑀢𑀸𑀦𑀁 𑀖𑀭𑀲𑁆𑀲 𑀫𑀕𑁆𑀕𑀁 𑀦 𑀚𑀸𑀦𑀸𑀲𑀻’’𑀢𑀺? 𑀲𑁄 ‘‘𑀦𑀲𑁆𑀲 𑀯𑀲𑀮𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀖𑀭𑀁 𑀅𑀕𑀫𑀸𑀲𑀺, 𑀢𑀢𑁄𑀧𑀺 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀇𑀫𑀺𑀦𑀸𑀯 𑀉𑀧𑀸𑀬𑁂𑀦 𑀧𑀮𑀸𑀧𑀺𑀢𑁄 𑀅𑀜𑁆𑀜𑀲𑁆𑀲𑀸𑀢𑀺 𑀏𑀯𑀁 𑀏𑀓𑀖𑀭𑁂𑀧𑀺 𑀧𑀯𑁂𑀲𑀦𑀁 𑀅𑀮𑀪𑀫𑀸𑀦𑁄 𑀧𑀡𑁆𑀟𑀭𑀗𑁆𑀕𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀓𑀸𑀮𑀸𑀦𑀫𑀘𑁆𑀘𑀬𑁂𑀦 𑀚𑀭𑀸𑀚𑀺𑀡𑁆𑀡𑁄 𑀤𑀼𑀩𑁆𑀪𑁄𑀚𑀦𑀤𑀼𑀓𑁆𑀔𑀲𑁂𑀬𑁆𑀬𑀸𑀳𑀺 𑀫𑀺𑀮𑀸𑀢𑀲𑀭𑀻𑀭𑁄 𑀪𑀺𑀓𑁆𑀔𑀸𑀘𑀸𑀭𑀢𑁄 𑀆𑀕𑀫𑁆𑀫, 𑀧𑀻𑀞𑀓𑀸𑀬 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀧𑀼𑀢𑁆𑀢𑁂𑀲𑀼 𑀧𑀢𑀺𑀝𑁆𑀞𑀁 𑀅𑀧𑀲𑁆𑀲𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀓𑀺𑀭 𑀕𑁄𑀢𑀫𑁄 𑀅𑀩𑁆𑀪𑀸𑀓𑀼𑀝𑀺𑀓𑁄 𑀉𑀢𑁆𑀢𑀸𑀦𑀫𑀼𑀔𑁄 𑀲𑀼𑀔𑀲𑀫𑁆𑀪𑀸𑀲𑁄 𑀧𑀝𑀺𑀲𑀦𑁆𑀣𑀸𑀭𑀓𑀼𑀲𑀮𑁄, 𑀲𑀓𑁆𑀓𑀸 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀮𑀪𑀺𑀢𑀼’’𑀦𑁆𑀢𑀺 𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀁 𑀲𑀡𑁆𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀸𑀪𑀸𑀚𑀦𑀫𑀸𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀤𑀸𑀭𑁂𑀳𑀺 𑀲𑀁𑀧𑀼𑀘𑁆𑀙 𑀖𑀭𑀸 𑀦𑀺𑀓𑁆𑀔𑀸𑀫𑁂𑀦𑁆𑀢𑀻𑀢𑀺 𑀲𑀩𑁆𑀩𑀁 𑀫𑀫 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀫𑀬𑁆𑀳𑀁 𑀦𑀺𑀤𑁆𑀥𑀦𑀪𑀸𑀯𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀪𑀭𑀺𑀬𑀸𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑀬𑀺𑀢𑁆𑀯𑀸 𑀫𑀁 𑀖𑀭𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀦𑁆𑀢𑀺.

𑀦𑀦𑁆𑀤𑀺𑀲𑁆𑀲𑀦𑁆𑀢𑀺 𑀦𑀦𑁆𑀤𑀺𑀚𑀸𑀢𑁄 𑀢𑀼𑀝𑁆𑀞𑁄 𑀧𑀫𑀼𑀤𑀺𑀢𑁄 𑀅𑀳𑁄𑀲𑀺𑀁. 𑀪𑀯𑀫𑀺𑀘𑁆𑀙𑀺𑀲𑀦𑁆𑀢𑀺 𑀯𑀼𑀟𑁆𑀠𑀺𑀁 𑀧𑀢𑁆𑀣𑀬𑀺𑀁. 𑀲𑀸𑀯 𑀯𑀸𑀭𑁂𑀦𑁆𑀢𑀺 𑀲𑀽𑀓𑀭𑀦𑁆𑀢𑀺 𑀬𑀣𑀸 𑀲𑀼𑀦𑀔𑀸 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀪𑀼𑀲𑁆𑀲𑀦𑁆𑀢𑀸 𑀪𑀼𑀲𑁆𑀲𑀦𑁆𑀢𑀸 𑀲𑀽𑀓𑀭𑀁 𑀯𑀸𑀭𑁂𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀫𑀳𑀸𑀭𑀯𑀁 𑀭𑀯𑀸𑀧𑁂𑀦𑁆𑀢𑀺, 𑀏𑀯𑀁 𑀤𑀸𑀭𑁂𑀳𑀺 𑀲𑀤𑁆𑀥𑀺𑀁 𑀫𑀁 𑀩𑀳𑀼𑀁 𑀯𑀢𑁆𑀯𑀸 𑀯𑀺𑀭𑀯𑀦𑁆𑀢𑀁 𑀧𑀮𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀲𑀦𑁆𑀢𑀸𑀢𑀺 𑀅𑀲𑀧𑁆𑀧𑀼𑀭𑀺𑀲𑀸. 𑀚𑀫𑁆𑀫𑀸𑀢𑀺 𑀮𑀸𑀫𑀓𑀸. 𑀪𑀸𑀲𑀭𑁂𑀢𑀺 𑀪𑀸𑀲𑀦𑁆𑀢𑀺. 𑀧𑀼𑀢𑁆𑀢𑀭𑀽𑀧𑁂𑀦𑀸𑀢𑀺 𑀧𑀼𑀢𑁆𑀢𑀯𑁂𑀲𑁂𑀦. 𑀯𑀬𑁄𑀕𑀢𑀦𑁆𑀢𑀺 𑀢𑀬𑁄 𑀯𑀬𑁂 𑀕𑀢𑀁 𑀅𑀢𑀺𑀓𑁆𑀓𑀦𑁆𑀢𑀁 𑀧𑀘𑁆𑀙𑀺𑀫𑀯𑀬𑁂 𑀞𑀺𑀢𑀁 𑀫𑀁. 𑀚𑀳𑀦𑁆𑀢𑀻𑀢𑀺 𑀧𑀭𑀺𑀘𑁆𑀘𑀚𑀦𑁆𑀢𑀺.

𑀦𑀺𑀩𑁆𑀪𑁄𑀕𑁄𑀢𑀺 𑀦𑀺𑀧𑁆𑀧𑀭𑀺𑀪𑁄𑀕𑁄. 𑀔𑀸𑀤𑀦𑀸 𑀅𑀧𑀦𑀻𑀬𑀢𑀻𑀢𑀺 𑀅𑀲𑁆𑀲𑁄 𑀳𑀺 𑀬𑀸𑀯𑀤𑁂𑀯 𑀢𑀭𑀼𑀡𑁄 𑀳𑁄𑀢𑀺 𑀚𑀯𑀲𑀫𑁆𑀧𑀦𑁆𑀦𑁄, 𑀢𑀸𑀯𑀲𑁆𑀲 𑀦𑀸𑀦𑀸𑀭𑀲𑀁 𑀔𑀸𑀤𑀦𑀁 𑀤𑀤𑀦𑁆𑀢𑀺, 𑀚𑀺𑀡𑁆𑀡𑀁 𑀦𑀺𑀩𑁆𑀪𑁄𑀕𑀁 𑀢𑀢𑁄 𑀅𑀧𑀦𑁂𑀦𑁆𑀢𑀺, 𑀅𑀦𑁆𑀢𑀺𑀫𑀯𑀬𑁂 𑀢𑀁 𑀯𑀢𑁆𑀢𑀁 𑀦 𑀮𑀪𑀢𑀺, 𑀕𑀸𑀯𑀻𑀳𑀺 𑀲𑀤𑁆𑀥𑀺𑀁 𑀅𑀝𑀯𑀺𑀬𑀁 𑀲𑀼𑀓𑁆𑀔𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑁄 𑀘𑀭𑀢𑀺. 𑀬𑀣𑀸 𑀲𑁄 𑀅𑀲𑁆𑀲𑁄, 𑀏𑀯𑀁 𑀚𑀺𑀡𑁆𑀡𑀓𑀸𑀮𑁂 𑀯𑀺𑀮𑀼𑀢𑁆𑀢𑀲𑀩𑁆𑀩𑀥𑀦𑀢𑁆𑀢𑀸 𑀦𑀺𑀩𑁆𑀪𑁄𑀕𑁄 𑀫𑀸𑀤𑀺𑀲𑁄𑀧𑀺 𑀩𑀸𑀮𑀓𑀸𑀦𑀁 𑀧𑀺𑀢𑀸 𑀣𑁂𑀭𑁄 𑀧𑀭𑀖𑀭𑁂𑀲𑀼 𑀪𑀺𑀓𑁆𑀔𑀢𑀺.

𑀬𑀜𑁆𑀘𑁂𑀢𑀺 𑀦𑀺𑀧𑀸𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂 𑀫𑀫 𑀧𑀼𑀢𑁆𑀢𑀸 𑀅𑀦𑀲𑁆𑀲𑀯𑀸 𑀅𑀧𑁆𑀧𑀢𑀺𑀲𑁆𑀲𑀸 𑀅𑀯𑀲𑀯𑀢𑁆𑀢𑀺𑀦𑁄, 𑀢𑁂𑀳𑀺 𑀤𑀡𑁆𑀟𑁄𑀯 𑀓𑀺𑀭 𑀲𑁂𑀬𑁆𑀬𑁄 𑀲𑀼𑀦𑁆𑀤𑀭𑀢𑀭𑁄𑀢𑀺. 𑀇𑀤𑀸𑀦𑀺𑀲𑁆𑀲 𑀲𑁂𑀬𑁆𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀘𑀡𑁆𑀟𑀫𑁆𑀧𑀺 𑀕𑁄𑀡𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀼𑀭𑁂 𑀳𑁄𑀢𑀻𑀢𑀺 𑀅𑀕𑁆𑀕𑀢𑁄 𑀳𑁄𑀢𑀺, 𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀕𑀦𑁆𑀢𑀼𑀁 𑀲𑀼𑀔𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀕𑀸𑀥𑀫𑁂𑀥𑀢𑀻𑀢𑀺 𑀉𑀤𑀓𑀁 𑀑𑀢𑀭𑀡𑀓𑀸𑀮𑁂 𑀕𑀫𑁆𑀪𑀻𑀭𑁂 𑀉𑀤𑀓𑁂 𑀧𑀢𑀺𑀝𑁆𑀞𑀁 𑀮𑀪𑀢𑀺.

𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀢𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀸 𑀯𑀸𑀘𑀼𑀕𑁆𑀕𑀢𑀸 𑀓𑀢𑁆𑀯𑀸. 𑀲𑀦𑁆𑀦𑀺𑀲𑀺𑀦𑁆𑀦𑁂𑀲𑀽𑀢𑀺 𑀢𑀣𑀸𑀭𑀽𑀧𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀫𑀸𑀕𑀫𑀤𑀺𑀯𑀲𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂𑀲𑀼 𑀧𑀼𑀢𑁆𑀢𑁂𑀲𑀼 𑀢𑀁 𑀲𑀪𑀁 𑀑𑀕𑀸𑀳𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀚𑁆𑀛𑁂 𑀫𑀳𑀸𑀭𑀳𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑁂𑀲𑀼. 𑀅𑀪𑀸𑀲𑀻𑀢𑀺 ‘𑀅𑀬𑀁 𑀫𑁂 𑀓𑀸𑀮𑁄’𑀢𑀺 𑀲𑀪𑀸𑀬 𑀫𑀚𑁆𑀛𑁂 𑀧𑀯𑀺𑀲𑀺𑀢𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸, ‘‘𑀪𑁄 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀕𑀸𑀣𑀸 𑀪𑀸𑀲𑀺𑀢𑀼𑀓𑀸𑀫𑁄, 𑀪𑀸𑀲𑀺𑀢𑁂 𑀲𑀼𑀡𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑁋 ‘‘𑀪𑀸𑀲, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑁄𑀫𑀸’’𑀢𑀺 𑀯𑀼𑀢𑁆𑀢𑁄 𑀞𑀺𑀢𑀓𑁄𑀯 𑀅𑀪𑀸𑀲𑀺. ‘‘𑀢𑁂𑀦 𑀘 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸𑀦𑀁 𑀯𑀢𑁆𑀢𑀁 𑀳𑁄𑀢𑀺 𑀬𑁄 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁 𑀔𑀸𑀤𑀦𑁆𑀢𑁄 𑀫𑀸𑀢𑀸𑀧𑀺𑀢𑀭𑁄 𑀦 𑀧𑁄𑀲𑁂𑀢𑀺, 𑀲𑁄 𑀫𑀸𑀭𑁂𑀢𑀩𑁆𑀩𑁄’’𑀢𑀺. 𑀢𑀲𑁆𑀫𑀸 𑀢𑁂 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑀸 𑀧𑀺𑀢𑀼𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 ‘‘𑀚𑀻𑀯𑀺𑀢𑀁 𑀦𑁄 𑀢𑀸𑀢, 𑀤𑁂𑀳𑀻’’𑀢𑀺 𑀬𑀸𑀘𑀺𑀁𑀲𑀼. 𑀲𑁄 𑀧𑀺𑀢𑀼𑀳𑀤𑀬𑀲𑁆𑀲 𑀧𑀼𑀢𑁆𑀢𑀸𑀦𑀁 𑀫𑀼𑀤𑀼𑀢𑁆𑀢𑀸 ‘‘𑀫𑀸 𑀫𑁂, 𑀪𑁄, 𑀩𑀸𑀮𑀓𑁂 𑀯𑀺𑀦𑀸𑀲𑀬𑀺𑀢𑁆𑀣, 𑀧𑁄𑀲𑀺𑀲𑁆𑀲𑀦𑁆𑀢𑀺 𑀫’’𑀦𑁆𑀢𑀺 𑀆𑀳.

𑀅𑀣𑀲𑁆𑀲 𑀧𑀼𑀢𑁆𑀢𑁂 𑀫𑀦𑀼𑀲𑁆𑀲𑀸 𑀆𑀳𑀁𑀲𑀼 𑁋 ‘‘𑀲𑀘𑁂, 𑀪𑁄, 𑀅𑀚𑁆𑀚 𑀧𑀝𑁆𑀞𑀸𑀬 𑀧𑀺𑀢𑀭𑀁 𑀦 𑀲𑀫𑁆𑀫𑀸 𑀧𑀝𑀺𑀚𑀕𑁆𑀕𑀺𑀲𑁆𑀲𑀣, 𑀖𑀸𑀢𑁂𑀲𑁆𑀲𑀸𑀫 𑀯𑁄’’𑀢𑀺. 𑀢𑁂 𑀪𑀻𑀢𑀸 𑀖𑀭𑀁 𑀦𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀁𑀲𑀼. 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀦𑀁 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑁂𑀢𑁆𑀯𑀸𑀢𑀺 𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀬𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀬𑀺𑀁𑀲𑀼. 𑀦𑁆𑀳𑀸𑀧𑁂𑀢𑁆𑀯𑀸𑀢𑀺 𑀲𑀭𑀻𑀭𑀁 𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑀸𑀤𑀻𑀳𑀺 𑀦𑁆𑀳𑀸𑀧𑁂𑀲𑀼𑀁. 𑀩𑁆𑀭𑀸𑀳𑁆𑀫𑀡𑀺𑀬𑁄𑀧𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀅𑀫𑁆𑀳𑀸𑀓𑀁 𑀧𑀺𑀢𑀭𑀁 𑀲𑀫𑁆𑀫𑀸 𑀧𑀝𑀺𑀚𑀕𑁆𑀕𑀣. 𑀲𑀘𑁂 𑀧𑀫𑀸𑀤𑀁 𑀆𑀧𑀚𑁆𑀚𑀺𑀲𑁆𑀲𑀣, 𑀖𑀭𑀢𑁄 𑀯𑁄 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸, 𑀧𑀡𑀻𑀢𑀪𑁄𑀚𑀦𑀁 𑀪𑁄𑀚𑁂𑀲𑀼𑀁.

𑀩𑁆𑀭𑀸𑀳𑁆𑀫𑀡𑁄 𑀲𑀼𑀪𑁄𑀚𑀦𑀜𑁆𑀘 𑀲𑀼𑀔𑀲𑁂𑀬𑁆𑀬𑀜𑁆𑀘 𑀆𑀕𑀫𑁆𑀫 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀜𑁆𑀚𑀸𑀢𑀩𑀮𑁄 𑀧𑀻𑀡𑀺𑀢𑀺𑀦𑁆𑀤𑁆𑀭𑀺𑀬𑁄 𑀅𑀢𑁆𑀢𑀪𑀸𑀯𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀅𑀬𑀁 𑀫𑁂 𑀲𑀫𑁆𑀧𑀢𑁆𑀢𑀺 𑀲𑀫𑀡𑀁 𑀕𑁄𑀢𑀫𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀸’’𑀢𑀺 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀲𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀢𑀤𑀯𑁄𑀘𑀸𑀢𑀺 𑀤𑀼𑀲𑁆𑀲𑀬𑀼𑀕𑀁 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀏𑀢𑀁 𑀅𑀯𑁄𑀘. 𑀲𑀭𑀡𑀕𑀫𑀦𑀸𑀯𑀲𑀸𑀦𑁂 𑀘𑀸𑀧𑀺 𑀪𑀕𑀯𑀦𑁆𑀢𑀁 𑀏𑀯𑀫𑀸𑀳 𑁋 ‘‘𑀪𑁄 𑀕𑁄𑀢𑀫, 𑀫𑀬𑁆𑀳𑀁 𑀧𑀼𑀢𑁆𑀢𑁂𑀳𑀺 𑀘𑀢𑁆𑀢𑀸𑀭𑀺 𑀥𑀼𑀭𑀪𑀢𑁆𑀢𑀸𑀦𑀺 𑀤𑀺𑀦𑁆𑀦𑀸𑀦𑀺, 𑀢𑀢𑁄 𑀅𑀳𑀁 𑀤𑁆𑀯𑁂 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀺, 𑀤𑁆𑀯𑁂 𑀲𑀬𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺. 𑀓𑀮𑁆𑀬𑀸𑀡𑀁, 𑀩𑁆𑀭𑀸𑀳𑁆𑀫𑀡, 𑀧𑀸𑀝𑀺𑀬𑁂𑀓𑁆𑀓𑀁 𑀧𑀦 𑀫𑀸 𑀦𑀺𑀬𑁆𑀬𑀸𑀤𑁂𑀳𑀺, 𑀅𑀫𑁆𑀳𑀸𑀓𑀁 𑀭𑀼𑀘𑁆𑀘𑀦𑀝𑁆𑀞𑀸𑀦𑀫𑁂𑀯 𑀕𑀫𑀺𑀲𑁆𑀲𑀸𑀫𑀸𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀖𑀭𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑁂 𑀆𑀫𑀦𑁆𑀢𑁂𑀲𑀺 ‘‘𑀢𑀸𑀢𑀸, 𑀲𑀫𑀡𑁄 𑀕𑁄𑀢𑀫𑁄 𑀫𑀬𑁆𑀳𑀁 𑀲𑀳𑀸𑀬𑁄, 𑀢𑀲𑁆𑀲 𑀤𑁆𑀯𑁂 𑀥𑀼𑀭𑀪𑀢𑁆𑀢𑀸𑀦𑀺 𑀤𑀺𑀦𑁆𑀦𑀸𑀦𑀺, 𑀢𑀼𑀫𑁆𑀳𑁂 𑀢𑀲𑁆𑀫𑀺𑀁 𑀲𑀫𑁆𑀧𑀢𑁆𑀢𑁂 𑀫𑀸 𑀧𑀫𑀚𑁆𑀚𑀣𑀸’’𑀢𑀺. 𑀲𑀸𑀥𑀼, 𑀢𑀸𑀢𑀸𑀢𑀺. 𑀧𑀼𑀦𑀤𑀺𑀯𑀲𑁂 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀕𑀢𑁄. 𑀲𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸𑀯 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀫𑀤𑀸𑀲𑀺. 𑀲𑀢𑁆𑀣𑀸 𑀧𑀼𑀦𑀤𑀺𑀯𑀲𑁂 𑀇𑀢𑀭𑀲𑁆𑀲, 𑀧𑀼𑀦𑀤𑀺𑀯𑀲𑁂 𑀇𑀢𑀭𑀲𑁆𑀲𑀸𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑁂𑀲𑀁 𑀖𑀭𑀸𑀦𑀺 𑀅𑀕𑀫𑀸𑀲𑀺. 𑀲𑀩𑁆𑀩𑁂 𑀢𑀣𑁂𑀯 𑀲𑀓𑁆𑀓𑀸𑀭𑀁 𑀅𑀓𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀖𑀭𑁂 𑀫𑀗𑁆𑀕𑀮𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁. 𑀲𑁄 𑀧𑀺𑀢𑀭𑀁 𑀆𑀳 𑁋 ‘‘𑀢𑀸𑀢, 𑀓𑀲𑁆𑀲 𑀫𑀗𑁆𑀕𑀮𑀁 𑀤𑁂𑀫𑀸’’𑀢𑀺. 𑀅𑀫𑁆𑀳𑁂 𑀅𑀜𑁆𑀜𑀁 𑀦 𑀚𑀸𑀦𑀸𑀫? 𑀦𑀦𑀼 𑀲𑀫𑀡𑁄 𑀕𑁄𑀢𑀫𑁄 𑀫𑀬𑁆𑀳𑀁 𑀲𑀳𑀸𑀬𑁄𑀢𑀺? 𑀢𑁂𑀦 𑀳𑀺 𑀢𑀼𑀫𑁆𑀳𑁂 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁆𑀯𑀸𑀢𑀦𑀸𑀬 𑀲𑀫𑀡𑀁 𑀕𑁄𑀢𑀫𑀁 𑀦𑀺𑀫𑀦𑁆𑀢𑁂𑀣𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀣𑀸 𑀅𑀓𑀸𑀲𑀺. 𑀪𑀕𑀯𑀸 𑀅𑀥𑀺𑀯𑀸𑀲𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑁄 𑀳𑀭𑀺𑀢𑀼𑀧𑀮𑀺𑀢𑁆𑀢𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀁 𑀕𑁂𑀳𑀁 𑀲𑀢𑁆𑀣𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀧𑁆𑀧𑁄𑀤𑀓𑀧𑀸𑀬𑀸𑀲𑀜𑁆𑀘𑁂𑀯 𑀔𑀚𑁆𑀚𑀓𑀯𑀺𑀓𑀢𑀺𑀜𑁆𑀘 𑀅𑀤𑀸𑀲𑀺. 𑀅𑀦𑁆𑀢𑀭𑀪𑀢𑁆𑀢𑀲𑁆𑀫𑀺𑀁𑀬𑁂𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀢𑁆𑀢𑀸𑀭𑁄𑀧𑀺 𑀧𑀼𑀢𑁆𑀢𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀪𑁄 𑀕𑁄𑀢𑀫, 𑀫𑀬𑀁 𑀅𑀫𑁆𑀳𑀸𑀓𑀁 𑀧𑀺𑀢𑀭𑀁 𑀧𑀝𑀺𑀚𑀕𑁆𑀕𑀸𑀫 𑀦𑀧𑁆𑀧𑀫𑀚𑁆𑀚𑀸𑀫, 𑀧𑀲𑁆𑀲𑀣𑀲𑁆𑀲 𑀅𑀢𑁆𑀢𑀪𑀸𑀯’’𑀦𑁆𑀢𑀺. 𑀲𑀢𑁆𑀣𑀸 ‘‘𑀓𑀮𑁆𑀬𑀸𑀡𑀁 𑀯𑁄 𑀓𑀢𑀁, 𑀫𑀸𑀢𑀸𑀧𑀺𑀢𑀼𑀧𑁄𑀲𑀓𑀁 𑀦𑀸𑀫 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀦𑀁 𑀆𑀘𑀺𑀡𑁆𑀡𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀫𑀳𑀸𑀦𑀸𑀕𑀚𑀸𑀢𑀓𑀁 (𑀚𑀸. 𑁧.𑁧𑁧.𑁧 𑀆𑀤𑀬𑁄; 𑀘𑀭𑀺𑀬𑀸. 𑁨.𑁧 𑀆𑀤𑀬𑁄) 𑀦𑀸𑀫 𑀓𑀣𑁂𑀢𑁆𑀯𑀸, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑀻𑀧𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀲𑀤𑁆𑀥𑀺𑀁 𑀘𑀢𑀽𑀳𑀺 𑀧𑀼𑀢𑁆𑀢𑁂𑀳𑀺 𑀘𑀢𑀽𑀳𑀺 𑀘 𑀲𑀼𑀡𑁆𑀳𑀸𑀳𑀺 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀣𑀸 𑀦 𑀲𑀩𑁆𑀩𑀓𑀸𑀮𑀁 𑀢𑁂𑀲𑀁 𑀕𑁂𑀳𑀁 𑀅𑀕𑀫𑀸𑀲𑀻𑀢𑀺. 𑀘𑀢𑀼𑀢𑁆𑀣𑀁.

𑁫. 𑀫𑀸𑀦𑀢𑁆𑀣𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁧. 𑀧𑀜𑁆𑀘𑀫𑁂 𑀫𑀸𑀦𑀢𑁆𑀣𑀤𑁆𑀥𑁄𑀢𑀺 𑀯𑀸𑀢𑀪𑀭𑀺𑀢𑀪𑀲𑁆𑀢𑀸 𑀯𑀺𑀬 𑀫𑀸𑀦𑁂𑀦 𑀣𑀤𑁆𑀥𑁄. 𑀆𑀘𑀭𑀺𑀬𑀦𑁆𑀢𑀺 𑀲𑀺𑀧𑁆𑀧𑀼𑀕𑁆𑀕𑀳𑀡𑀓𑀸𑀮𑁂 𑀆𑀘𑀭𑀺𑀬𑁄 𑀅𑀦𑀪𑀺𑀯𑀸𑀤𑁂𑀦𑁆𑀢𑀲𑁆𑀲 𑀲𑀺𑀧𑁆𑀧𑀁 𑀦 𑀤𑁂𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀢𑀁 𑀦 𑀅𑀪𑀺𑀯𑀸𑀤𑁂𑀢𑀺, 𑀅𑀢𑁆𑀣𑀺𑀪𑀸𑀯𑀫𑁆𑀧𑀺𑀲𑁆𑀲 𑀦 𑀚𑀸𑀦𑀸𑀢𑀺. 𑀦𑀸𑀬𑀁 𑀲𑀫𑀡𑁄𑀢𑀺 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀬𑀲𑁆𑀫𑀸 𑀅𑀬𑀁 𑀲𑀫𑀡𑁄 𑀫𑀸𑀤𑀺𑀲𑁂 𑀚𑀸𑀢𑀺𑀲𑀫𑁆𑀧𑀦𑁆𑀦𑀩𑁆𑀭𑀸𑀳𑁆𑀫𑀡𑁂 𑀲𑀫𑁆𑀧𑀢𑁆𑀢𑁂 𑀧𑀝𑀺𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀢𑀻’’𑀢𑀺.

𑀅𑀩𑁆𑀪𑀼𑀢𑀯𑀺𑀢𑁆𑀢𑀚𑀸𑀢𑀸𑀢𑀺 𑀅𑀪𑀽𑀢𑀧𑀼𑀩𑁆𑀩𑀸𑀬 𑀢𑀼𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀓𑁂𑀲𑀼 𑀘𑀲𑁆𑀲𑀸𑀢𑀺 𑀓𑁂𑀲𑀼 𑀪𑀯𑁂𑀬𑁆𑀬. 𑀓𑁆𑀬𑀲𑁆𑀲𑀸𑀢𑀺 𑀓𑁂 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀅𑀧𑀘𑀺𑀢𑀸 𑀅𑀲𑁆𑀲𑀽𑀢𑀺 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑀼𑀁 𑀬𑀼𑀢𑁆𑀢𑀸 𑀪𑀯𑁂𑀬𑁆𑀬𑀼𑀁. 𑀅𑀭𑀳𑀦𑁆𑀢𑁂𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀤𑁂𑀲𑀦𑀸𑀓𑀼𑀲𑀮𑀢𑁆𑀢𑀸 𑀅𑀢𑁆𑀢𑀸𑀦𑀁 𑀅𑀦𑁆𑀢𑁄𑀓𑀢𑁆𑀯𑀸 𑀧𑀽𑀚𑀦𑁂𑀬𑁆𑀬𑀁 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀫𑀁.

𑁬. 𑀧𑀘𑁆𑀘𑀦𑀻𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁨. 𑀙𑀝𑁆𑀞𑁂 ‘‘𑀲𑀩𑁆𑀩𑀁 𑀲𑁂𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀲𑀩𑁆𑀩𑀁 𑀓𑀡𑁆𑀳’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀘𑁆𑀘𑀦𑀻𑀓𑀁 𑀓𑀭𑁄𑀦𑁆𑀢𑀲𑁆𑀲𑁂𑀯𑀲𑁆𑀲 𑀲𑀸𑀢𑀁 𑀲𑀼𑀔𑀁 𑀳𑁄𑀢𑀻𑀢𑀺 𑀧𑀘𑁆𑀘𑀦𑀻𑀓𑀲𑀸𑀢𑁄. 𑀬𑁄 𑀘 𑀯𑀺𑀦𑁂𑀬𑁆𑀬 𑀲𑀸𑀭𑀫𑁆𑀪𑀦𑁆𑀢𑀺 𑀬𑁄 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑀁 𑀲𑀸𑀭𑀫𑁆𑀪𑀁 𑀯𑀺𑀦𑁂𑀢𑁆𑀯𑀸 𑀲𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀙𑀝𑁆𑀞𑀁.

𑁭. 𑀦𑀯𑀓𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁩. 𑀲𑀢𑁆𑀢𑀫𑁂 𑀦𑀯𑀓𑀫𑁆𑀫𑀺𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀲𑁄 𑀓𑀺𑀭 𑀅𑀭𑀜𑁆𑀜𑁂 𑀭𑀼𑀓𑁆𑀔𑀁 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀬𑁄𑀚𑁂𑀢𑁆𑀯𑀸 𑀦𑀕𑀭𑀁 𑀆𑀳𑀭𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀸𑀢𑀺, 𑀇𑀢𑀺 𑀦𑀯𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀚𑀻𑀯𑀢𑀻𑀢𑀺 𑀦𑀯𑀓𑀫𑁆𑀫𑀺𑀓𑁄, 𑀕𑁄𑀢𑁆𑀢𑁂𑀦 𑀪𑀸𑀭𑀤𑁆𑀯𑀸𑀚𑁄𑀢𑀺 𑀦𑀯𑀓𑀫𑁆𑀫𑀺𑀓𑀪𑀸𑀭𑀤𑁆𑀯𑀸𑀚𑁄. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀻𑀢𑀺 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸𑀦 𑀅𑀲𑁆𑀲 𑀏𑀢𑀁 𑀅𑀳𑁄𑀲𑀺. 𑀯𑀦𑀲𑁆𑀫𑀺𑀦𑁆𑀢𑀺 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀫𑁂 𑀯𑀦𑀦𑁆𑀢𑀺 𑀫𑀬𑁆𑀳𑀁 𑀓𑀺𑀮𑁂𑀲𑀯𑀦𑀁 𑀉𑀘𑁆𑀙𑀺𑀦𑁆𑀦𑀫𑀽𑀮𑀁. 𑀦𑀺𑀩𑁆𑀩𑀦𑀣𑁄𑀢𑀺 𑀦𑀺𑀓𑁆𑀓𑀺𑀮𑁂𑀲𑀯𑀦𑁄. 𑀏𑀓𑁄 𑀭𑀫𑁂𑀢𑀺 𑀏𑀓𑀓𑁄 𑀅𑀪𑀺𑀭𑀫𑀸𑀫𑀺. 𑀅𑀭𑀢𑀺𑀁 𑀯𑀺𑀧𑁆𑀧𑀳𑀸𑀬𑀸𑀢𑀺 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀘𑁂𑀯 𑀪𑀸𑀯𑀦𑀸𑀬 𑀘 𑀉𑀓𑁆𑀓𑀡𑁆𑀞𑀺𑀢𑀁 𑀚𑀳𑀺𑀢𑁆𑀯𑀸. 𑀲𑀢𑁆𑀢𑀫𑀁.

𑁮. 𑀓𑀝𑁆𑀞𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁪. 𑀅𑀝𑁆𑀞𑀫𑁂 𑀅𑀦𑁆𑀢𑁂𑀯𑀸𑀲𑀺𑀓𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀢𑁆𑀯𑀸 𑀲𑀺𑀧𑁆𑀧𑀼𑀕𑁆𑀕𑀡𑁆𑀳𑀦𑀓𑀸 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑀸. 𑀦𑀺𑀲𑀺𑀦𑁆𑀦𑀦𑁆𑀢𑀺 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁. 𑀕𑀫𑁆𑀪𑀻𑀭𑀭𑀽𑀧𑁂𑀢𑀺 𑀕𑀫𑁆𑀪𑀻𑀭𑀲𑀪𑀸𑀯𑁂.

𑀩𑀳𑀼𑀪𑁂𑀭𑀯𑁂𑀢𑀺 𑀢𑀢𑁆𑀭𑀝𑁆𑀞𑀓𑀲𑀯𑀺𑀜𑁆𑀜𑀸𑀡𑀓𑀅𑀯𑀺𑀜𑁆𑀜𑀸𑀡𑀓𑀪𑁂𑀭𑀯𑁂𑀳𑀺 𑀩𑀳𑀼𑀪𑁂𑀭𑀯𑁂. 𑀯𑀺𑀕𑀸𑀳𑀺𑀬𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀅𑀦𑀺𑀜𑁆𑀚𑀫𑀸𑀦𑁂𑀦𑀸𑀢𑀺𑀆𑀤𑀻𑀦𑀺 𑀓𑀸𑀬𑀯𑀺𑀲𑁂𑀲𑀦𑀸𑀦𑀺, 𑀏𑀯𑀭𑀽𑀧𑁂𑀦 𑀓𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀼𑀘𑀸𑀭𑀼𑀭𑀽𑀧𑀁 𑀯𑀢𑀸𑀢𑀺 𑀅𑀢𑀺𑀲𑀼𑀦𑁆𑀤𑀭𑀁 𑀯𑀢 𑀛𑀸𑀦𑀁 𑀛𑀸𑀬𑀲𑀻𑀢𑀺 𑀯𑀤𑀢𑀺.

𑀯𑀦𑀯𑀲𑁆𑀲𑀺𑀢𑁄 𑀫𑀼𑀦𑀻𑀢𑀺 𑀯𑀦𑀁 𑀅𑀯𑀲𑁆𑀲𑀺𑀢𑁄 𑀩𑀼𑀤𑁆𑀥𑀫𑀼𑀦𑀺. 𑀇𑀤𑀦𑁆𑀢𑀺 𑀇𑀤𑀁 𑀢𑀼𑀫𑁆𑀳𑀸𑀓𑀁 𑀏𑀯𑀁 𑀯𑀦𑁂 𑀦𑀺𑀲𑀺𑀦𑁆𑀦𑀓𑀸𑀭𑀡𑀁 𑀫𑀬𑁆𑀳𑀁 𑀅𑀘𑁆𑀙𑁂𑀭𑀭𑀽𑀧𑀁 𑀧𑀝𑀺𑀪𑀸𑀢𑀺. 𑀧𑀻𑀢𑀺𑀫𑀦𑁄𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄. 𑀯𑀦𑁂 𑀯𑀲𑁂𑀢𑀺 𑀯𑀦𑀫𑁆𑀳𑀺 𑀯𑀲𑀺.

𑀫𑀜𑁆𑀜𑀸𑀫𑀳𑀦𑁆𑀢𑀺 𑀫𑀜𑁆𑀜𑀸𑀫𑀺 𑀅𑀳𑀁. 𑀮𑁄𑀓𑀸𑀥𑀺𑀧𑀢𑀺𑀲𑀳𑀩𑁆𑀬𑀢𑀦𑁆𑀢𑀺 𑀮𑁄𑀓𑀸𑀥𑀺𑀧𑀢𑀺𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀲𑀳𑀪𑀸𑀯𑀁. 𑀆𑀓𑀗𑁆𑀔𑀫𑀸𑀦𑁄𑀢𑀺 𑀇𑀘𑁆𑀙𑀫𑀸𑀦𑁄. 𑀢𑀺𑀤𑀺𑀯𑀁 𑀅𑀦𑀼𑀢𑁆𑀢𑀭𑀦𑁆𑀢𑀺 𑀇𑀤𑀁 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀲𑀦𑁆𑀥𑀸𑀬𑀸𑀳. 𑀓𑀲𑁆𑀫𑀸 𑀪𑀯𑀁 𑀯𑀺𑀚𑀦𑀫𑀭𑀜𑁆𑀜𑀫𑀲𑁆𑀲𑀺𑀢𑁄𑀢𑀺 𑀅𑀳𑀁 𑀢𑀸𑀯 𑀩𑁆𑀭𑀳𑁆𑀫𑀮𑁄𑀓𑀁 𑀆𑀓𑀗𑁆𑀔𑀫𑀸𑀦𑁄𑀢𑀺 𑀫𑀜𑁆𑀜𑀸𑀫𑀺. 𑀬𑀤𑀺 𑀏𑀯𑀁 𑀦 𑀳𑁄𑀢𑀺, 𑀅𑀣 𑀫𑁂 𑀆𑀘𑀺𑀓𑁆𑀔, 𑀓𑀲𑁆𑀫𑀸 𑀪𑀯𑀦𑁆𑀢𑀺? 𑀧𑀼𑀘𑁆𑀙𑀢𑀺. 𑀩𑁆𑀭𑀳𑁆𑀫𑀧𑀢𑁆𑀢𑀺𑀬𑀸𑀢𑀺 𑀲𑁂𑀝𑁆𑀞𑀧𑀢𑁆𑀢𑀺𑀬𑀸. 𑀇𑀥 𑀇𑀤𑀁 𑀢𑀧𑁄 𑀓𑀲𑁆𑀫𑀸 𑀓𑀭𑁄𑀲𑀻𑀢𑀺 𑀅𑀧𑀭𑁂𑀦𑀧𑀺 𑀆𑀓𑀸𑀭𑁂𑀦 𑀧𑀼𑀘𑁆𑀙𑀢𑀺.

𑀓𑀗𑁆𑀔𑀸𑀢𑀺 𑀢𑀡𑁆𑀳𑀸. 𑀅𑀪𑀺𑀦𑀦𑁆𑀤𑀦𑀸𑀢𑀺 𑀅𑀪𑀺𑀦𑀦𑁆𑀤𑀦𑀯𑀲𑁂𑀦 𑀢𑀡𑁆𑀳𑀸𑀯 𑀯𑀼𑀢𑁆𑀢𑀸. 𑀅𑀦𑁂𑀓𑀥𑀸𑀢𑀽𑀲𑀽𑀢𑀺 𑀅𑀦𑁂𑀓𑀲𑀪𑀸𑀯𑁂𑀲𑀼 𑀆𑀭𑀫𑁆𑀫𑀡𑁂𑀲𑀼. 𑀧𑀼𑀣𑀽𑀢𑀺 𑀦𑀸𑀦𑀧𑁆𑀧𑀓𑀸𑀭𑀸 𑀢𑀡𑁆𑀳𑀸 𑀲𑁂𑀲𑀓𑀺𑀮𑁂𑀲𑀸 𑀯𑀸. 𑀲𑀤𑀸𑀲𑀺𑀢𑀸𑀢𑀺 𑀦𑀺𑀘𑁆𑀘𑀓𑀸𑀮𑀁 𑀅𑀯𑀲𑁆𑀲𑀺𑀢𑀸. 𑀅𑀜𑁆𑀜𑀸𑀡𑀫𑀽𑀮𑀧𑁆𑀧𑀪𑀯𑀸𑀢𑀺 𑀅𑀯𑀺𑀚𑁆𑀚𑀸𑀫𑀽𑀮𑀸 𑀳𑀼𑀢𑁆𑀯𑀸 𑀚𑀸𑀢𑀸. 𑀧𑀚𑀧𑁆𑀧𑀺𑀢𑀸𑀢𑀺 𑀢𑀡𑁆𑀳𑀸𑀯 ‘‘𑀇𑀤𑀫𑁆𑀧𑀺 𑀫𑀬𑁆𑀳𑀁, 𑀇𑀤𑀫𑁆𑀧𑀺 𑀫𑀬𑁆𑀳’’𑀦𑁆𑀢𑀺 𑀧𑀚𑀧𑁆𑀧𑀸𑀧𑀦𑀯𑀲𑁂𑀦 𑀧𑀚𑀧𑁆𑀧𑀺𑀢𑀸 𑀦𑀸𑀫𑀸𑀢𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀸 𑀫𑀬𑀸 𑀩𑁆𑀬𑀦𑁆𑀢𑀺𑀓𑀢𑀸𑀢𑀺 𑀲𑀩𑁆𑀩𑀸 𑀢𑀡𑁆𑀳𑀸 𑀫𑀬𑀸 𑀅𑀕𑁆𑀕𑀫𑀕𑁆𑀕𑁂𑀦 𑀯𑀺𑀕𑀢𑀦𑁆𑀢𑀸 𑀦𑀺𑀭𑀦𑁆𑀢𑀸 𑀓𑀢𑀸. 𑀲𑀫𑀽𑀮𑀺𑀓𑀸𑀢𑀺 𑀲𑀤𑁆𑀥𑀺𑀁 𑀅𑀜𑁆𑀜𑀸𑀡𑀫𑀽𑀮𑁂𑀦.

𑀅𑀦𑀽𑀧𑀬𑁄𑀢𑀺 𑀅𑀦𑀼𑀧𑀕𑀫𑀦𑁄. 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑁄𑀢𑀺 𑀇𑀫𑀺𑀦𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀤𑀻𑀧𑁂𑀢𑀺. 𑀲𑀫𑁆𑀩𑁄𑀥𑀺𑀫𑀦𑀼𑀢𑁆𑀢𑀭𑀦𑁆𑀢𑀺 𑀅𑀭𑀳𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀲𑀺𑀯𑀦𑁆𑀢𑀺 𑀲𑁂𑀝𑁆𑀞𑀁. 𑀛𑀸𑀬𑀸𑀫𑀻𑀢𑀺 𑀤𑁆𑀯𑀻𑀳𑀺 𑀛𑀸𑀦𑁂𑀳𑀺 𑀛𑀸𑀬𑀸𑀫𑀺. 𑀯𑀺𑀲𑀸𑀭𑀤𑁄𑀢𑀺 𑀯𑀺𑀕𑀢𑀲𑀸𑀭𑀚𑁆𑀚𑁄. 𑀅𑀝𑁆𑀞𑀫𑀁.

𑁯. 𑀫𑀸𑀢𑀼𑀧𑁄𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁫. 𑀦𑀯𑀫𑁂 𑀧𑁂𑀘𑁆𑀘𑀸𑀢𑀺 𑀇𑀢𑁄 𑀧𑀝𑀺𑀕𑀦𑁆𑀢𑁆𑀯𑀸. 𑀦𑀯𑀫𑀁.

𑁧𑁦. 𑀪𑀺𑀓𑁆𑀔𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁬. 𑀤𑀲𑀫𑁂 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀪𑀸𑀯𑁂. 𑀯𑀺𑀲𑁆𑀲𑀁 𑀥𑀫𑁆𑀫𑀦𑁆𑀢𑀺 𑀤𑀼𑀕𑁆𑀕𑀦𑁆𑀥𑀁 𑀅𑀓𑀼𑀲𑀮𑀥𑀫𑁆𑀫𑀁. 𑀩𑀸𑀳𑀺𑀢𑁆𑀯𑀸𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀚𑀳𑀺𑀢𑁆𑀯𑀸. 𑀲𑀗𑁆𑀔𑀸𑀬𑀸𑀢𑀺 𑀜𑀸𑀡𑁂𑀦. 𑀲 𑀯𑁂 𑀪𑀺𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑁄 𑀯𑁂 𑀪𑀺𑀦𑁆𑀦𑀓𑀺𑀮𑁂𑀲𑀢𑁆𑀢𑀸 𑀪𑀺𑀓𑁆𑀔𑀼 𑀦𑀸𑀫 𑀯𑀼𑀘𑁆𑀘𑀢𑀺. 𑀤𑀲𑀫𑀁.

𑁧𑁧. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁭. 𑀏𑀓𑀸𑀤𑀲𑀫𑁂 𑀧𑀘𑁆𑀘𑁂𑀢𑀻𑀢𑀺 𑀇𑀘𑁆𑀙𑀢𑀺 𑀧𑀢𑁆𑀣𑁂𑀢𑀺. 𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀆𑀬𑀸𑀘𑀫𑀸𑀦𑁄 𑀆𑀳. 𑀣𑁂𑀭𑀲𑁆𑀲 𑀓𑀺𑀭𑁂𑀲 𑀕𑀺𑀳𑀺𑀲𑀳𑀸𑀬𑁄, 𑀢𑀲𑁆𑀫𑀸 𑀣𑁂𑀭𑁄 ‘‘𑀅𑀬𑀁 𑀯𑀭𑀸𑀓𑁄 𑀫𑀁 𑀲𑀳𑀸𑀬𑀁 𑀮𑀪𑀺𑀢𑁆𑀯𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀫𑀸 𑀅𑀧𑀸𑀬𑀧𑀽𑀭𑀓𑁄 𑀅𑀳𑁄𑀲𑀻’’𑀢𑀺 𑀆𑀬𑀸𑀘𑀢𑀺. 𑀅𑀧𑀺𑀘𑁂𑀲 𑀫𑀳𑀸𑀧𑀭𑀺𑀯𑀸𑀭𑁄, 𑀢𑀲𑁆𑀫𑀺𑀁 𑀧𑀲𑀦𑁆𑀦𑁂 𑀧𑀜𑁆𑀘𑀓𑀼𑀮𑀲𑀢𑀸𑀦𑀺 𑀅𑀦𑀼𑀯𑀢𑁆𑀢𑀺𑀲𑁆𑀲𑀦𑁆𑀢𑀻𑀢𑀺 𑀫𑀜𑁆𑀜𑀫𑀸𑀦𑁄𑀧𑀺 𑀆𑀬𑀸𑀘𑀢𑀺. 𑀅𑀢𑁆𑀣𑀯𑀲𑀦𑁆𑀢𑀺 𑀅𑀢𑁆𑀣𑀸𑀦𑀺𑀲𑀁𑀲𑀁 𑀅𑀢𑁆𑀣𑀓𑀸𑀭𑀡𑀁. 𑀧𑀸𑀧𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀁. 𑀧𑀯𑀸𑀳𑁂𑀫𑀻𑀢𑀺 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀧𑀯𑀸𑀳𑁂𑀫𑀺 𑀧𑀮𑀸𑀧𑁂𑀫𑀺. 𑀥𑀫𑁆𑀫𑁄𑀢𑀺 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸𑀯. 𑀏𑀓𑀸𑀤𑀲𑀫𑀁.

𑁧𑁨. 𑀔𑁄𑀫𑀤𑀼𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁮. 𑀤𑁆𑀯𑀸𑀤𑀲𑀫𑁂 𑀔𑁄𑀫𑀤𑀼𑀲𑁆𑀲𑀁 𑀦𑀸𑀫𑀸𑀢𑀺 𑀔𑁄𑀫𑀤𑀼𑀲𑁆𑀲𑀸𑀦𑀁 𑀉𑀲𑁆𑀲𑀦𑁆𑀦𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀁. 𑀲𑀪𑀸𑀬𑀦𑁆𑀢𑀺 𑀲𑀸𑀮𑀸𑀬𑀁. 𑀨𑀼𑀲𑀸𑀬𑀢𑀻𑀢𑀺 𑀨𑀼𑀲𑀺𑀢𑀸𑀦𑀺 𑀫𑀼𑀜𑁆𑀘𑀢𑀺 𑀯𑀲𑁆𑀲𑀢𑀺. 𑀲𑀢𑁆𑀣𑀸 𑀓𑀺𑀭 𑀢𑀁 𑀲𑀪𑀁 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄 𑁋 ‘‘𑀫𑀬𑀺 𑀏𑀯𑀫𑁂𑀯𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀅𑀨𑀸𑀲𑀼𑀓𑀥𑀸𑀢𑀼𑀓𑀁 𑀳𑁄𑀢𑀺, 𑀏𑀓𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀲𑀺. 𑀲𑀪𑀸𑀥𑀫𑁆𑀫𑀦𑁆𑀢𑀺 𑀲𑀼𑀔𑀦𑀺𑀲𑀺𑀦𑁆𑀦𑁂 𑀓𑀺𑀭 𑀅𑀲𑀜𑁆𑀘𑀸𑀮𑁂𑀢𑁆𑀯𑀸 𑀏𑀓𑀧𑀲𑁆𑀲𑁂𑀦 𑀧𑀯𑀺𑀲𑀦𑀁 𑀢𑁂𑀲𑀁 𑀲𑀪𑀸𑀥𑀫𑁆𑀫𑁄 𑀦𑀸𑀫, 𑀦 𑀫𑀳𑀸𑀚𑀦𑀁 𑀘𑀸𑀮𑁂𑀢𑁆𑀯𑀸 𑀉𑀚𑀼𑀓𑀫𑁂𑀯 𑀧𑀯𑀺𑀲𑀦𑀁. 𑀪𑀕𑀯𑀸 𑀘 𑀉𑀚𑀼𑀓𑀫𑁂𑀯 𑀆𑀕𑀘𑁆𑀙𑀢𑀺, 𑀢𑁂𑀦 𑀢𑁂 𑀓𑀼𑀧𑀺𑀢𑀸 𑀪𑀕𑀯𑀦𑁆𑀢𑀁 𑀳𑀻𑀴𑁂𑀦𑁆𑀢𑀸 ‘‘𑀓𑁂 𑀘 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸, 𑀓𑁂 𑀘 𑀲𑀪𑀸𑀥𑀫𑁆𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳𑀁𑀲𑀼. 𑀲𑀦𑁆𑀢𑁄𑀢𑀺 𑀧𑀡𑁆𑀟𑀺𑀢𑀸 𑀲𑀧𑁆𑀧𑀼𑀭𑀺𑀲𑀸. 𑀧𑀳𑀸𑀬𑀸𑀢𑀺 𑀏𑀢𑁂 𑀭𑀸𑀕𑀸𑀤𑀬𑁄 𑀚𑀳𑀺𑀢𑁆𑀯𑀸 𑀭𑀸𑀕𑀸𑀤𑀺𑀯𑀺𑀦𑀬𑀸𑀬 𑀥𑀫𑁆𑀫𑀁 𑀪𑀡𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀲𑀦𑁆𑀢𑁄 𑀦𑀸𑀫𑀸𑀢𑀺. 𑀤𑁆𑀯𑀸𑀤𑀲𑀫𑀁.

𑀉𑀧𑀸𑀲𑀓𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀩𑁆𑀭𑀸𑀳𑁆𑀫𑀡𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.