𑁮. 𑀯𑀗𑁆𑀕𑀻𑀲𑀲𑀁𑀬𑀼𑀢𑁆𑀢𑀁

𑁧. 𑀦𑀺𑀓𑁆𑀔𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁯. 𑀯𑀗𑁆𑀕𑀻𑀲𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂𑀢𑀺 𑀆𑀴𑀯𑀺𑀬𑀁 𑀅𑀕𑁆𑀕𑀘𑁂𑀢𑀺𑀬𑁂. 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀅𑀕𑁆𑀕𑀸𑀴𑀯𑀕𑁄𑀢𑀫𑀓𑀸𑀤𑀻𑀦𑀺 𑀬𑀓𑁆𑀔𑀦𑀸𑀕𑀸𑀤𑀻𑀦𑀁 𑀪𑀯𑀦𑀸𑀦𑀺, 𑀘𑁂𑀢𑀺𑀬𑀸𑀦𑀺 𑀅𑀳𑁂𑀲𑀼𑀁. 𑀉𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑀸𑀦𑀺 𑀅𑀧𑀦𑁂𑀢𑁆𑀯𑀸 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑁂 𑀓𑀭𑀺𑀁𑀲𑀼. 𑀢𑁂𑀲𑀁 𑀢𑀸𑀦𑁂𑀯 𑀦𑀸𑀫𑀸𑀦𑀺 𑀚𑀸𑀢𑀸𑀦𑀺. 𑀦𑀺𑀕𑁆𑀭𑁄𑀥𑀓𑀧𑁆𑀧𑁂𑀦𑀸𑀢𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑀯𑀸𑀲𑀺𑀦𑀸 𑀓𑀧𑁆𑀧𑀢𑁆𑀣𑁂𑀭𑁂𑀦. 𑀑𑀳𑀺𑀬𑁆𑀬𑀓𑁄𑀢𑀺 𑀑𑀳𑀻𑀦𑀓𑁄. 𑀯𑀺𑀳𑀸𑀭𑀧𑀸𑀮𑁄𑀢𑀺 𑀲𑁄 𑀓𑀺𑀭 𑀢𑀤𑀸 𑀅𑀯𑀲𑁆𑀲𑀺𑀓𑁄 𑀳𑁄𑀢𑀺 𑀧𑀢𑁆𑀢𑀘𑀻𑀯𑀭𑀕𑁆𑀕𑀳𑀡𑁂 𑀅𑀓𑁄𑀯𑀺𑀤𑁄. 𑀅𑀣 𑀦𑀁 𑀣𑁂𑀭𑀸 𑀪𑀺𑀓𑁆𑀔𑀽 𑁋 ‘‘𑀆𑀯𑀼𑀲𑁄, 𑀇𑀫𑀸𑀦𑀺 𑀙𑀢𑁆𑀢𑀼𑀧𑀸𑀳𑀦𑀓𑀢𑁆𑀢𑀭𑀬𑀝𑁆𑀞𑀺𑀆𑀤𑀻𑀦𑀺 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀸’’𑀢𑀺 𑀯𑀺𑀳𑀸𑀭𑀭𑀓𑁆𑀔𑀓𑀁 𑀓𑀢𑁆𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀳𑀸𑀭𑀧𑀸𑀮𑁄’’𑀢𑀺. 𑀲𑀫𑀮𑀗𑁆𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸. 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀓𑀼𑀲𑀮𑀘𑀺𑀢𑁆𑀢𑀁 𑀯𑀺𑀤𑁆𑀥𑀁𑀲𑁂𑀢𑀺 𑀯𑀺𑀦𑀸𑀲𑁂𑀢𑀺. 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀏𑀢𑀲𑁆𑀫𑀺𑀁 𑀭𑀸𑀕𑁂 𑀉𑀧𑁆𑀧𑀦𑁆𑀦𑁂 𑀢𑀁 𑀓𑀸𑀭𑀡𑀁 𑀓𑀼𑀢𑁄 𑀮𑀩𑁆𑀪𑀸. 𑀬𑀁 𑀫𑁂 𑀧𑀭𑁄𑀢𑀺 𑀬𑁂𑀦 𑀫𑁂 𑀓𑀸𑀭𑀡𑁂𑀦 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀯𑀸 𑀥𑀫𑁆𑀫𑁄 𑀯𑀸 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀇𑀤𑀸𑀦𑁂𑀯 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀬𑁆𑀬 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀧𑀺 𑀫𑀁 𑀯𑀺𑀳𑀸𑀭𑁂 𑀑𑀳𑀸𑀬 𑀕𑀢𑀸.

𑀅𑀕𑀸𑀭𑀲𑁆𑀫𑀸𑀢𑀺 𑀅𑀕𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀁. 𑀅𑀦𑀕𑀸𑀭𑀺𑀬𑀦𑁆𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀡𑁆𑀳𑀢𑁄𑀢𑀺 𑀓𑀡𑁆𑀳𑀧𑀓𑁆𑀔𑀢𑁄 𑀫𑀸𑀭𑀧𑀓𑁆𑀔𑀢𑁄 𑀆𑀥𑀸𑀯𑀦𑁆𑀢𑀺. 𑀉𑀕𑁆𑀕𑀧𑀼𑀢𑁆𑀢𑀸𑀢𑀺 𑀉𑀕𑁆𑀕𑀢𑀸𑀦𑀁 𑀧𑀼𑀢𑁆𑀢𑀸 𑀫𑀳𑁂𑀲𑀓𑁆𑀔𑀸 𑀭𑀸𑀚𑀜𑁆𑀜𑀪𑀽𑀢𑀸. 𑀤𑀴𑁆𑀳𑀥𑀫𑁆𑀫𑀺𑀦𑁄𑀢𑀺 𑀤𑀴𑁆𑀳𑀥𑀦𑀼𑀦𑁄, 𑀉𑀢𑁆𑀢𑀫𑀧𑁆𑀧𑀫𑀸𑀡𑀁 𑀆𑀘𑀭𑀺𑀬𑀥𑀦𑀼𑀁 𑀥𑀸𑀭𑀬𑀫𑀸𑀦𑀸. 𑀲𑀳𑀲𑁆𑀲𑀁 𑀅𑀧𑀮𑀸𑀬𑀺𑀦𑀦𑁆𑀢𑀺 𑀬𑁂 𑀢𑁂 𑀲𑀫𑀦𑁆𑀢𑀸 𑀲𑀭𑁂𑀳𑀺 𑀧𑀭𑀺𑀓𑀺𑀭𑁂𑀬𑁆𑀬𑀼𑀁, 𑀢𑁂𑀲𑀁 𑀅𑀧𑀮𑀸𑀬𑀻𑀦𑀁 𑀲𑀗𑁆𑀔𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀳𑀲𑁆𑀲’’𑀦𑁆𑀢𑀺 𑀆𑀳. 𑀏𑀢𑀢𑁄 𑀪𑀺𑀬𑁆𑀬𑁄𑀢𑀺 𑀏𑀢𑀲𑁆𑀫𑀸 𑀲𑀳𑀲𑁆𑀲𑀸 𑀅𑀢𑀺𑀭𑁂𑀓𑀢𑀭𑀸. 𑀦𑁂𑀯 𑀫𑀁 𑀩𑁆𑀬𑀸𑀥𑀬𑀺𑀲𑁆𑀲𑀦𑁆𑀢𑀻𑀢𑀺 𑀫𑀁 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀥𑀫𑁆𑀫𑁂 𑀲𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑁂 𑀲𑀓𑁂 𑀲𑀸𑀲𑀦𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀲𑁆𑀲𑀸𑀲𑀲𑀳𑀲𑁆𑀲𑁂 𑀢𑀸𑀯 𑀲𑀫𑀦𑁆𑀢𑀸 𑀲𑀭𑁂𑀳𑀺 𑀧𑀭𑀺𑀓𑀺𑀭𑀦𑁆𑀢𑁂 𑀲𑀺𑀓𑁆𑀔𑀺𑀢𑁄 𑀧𑀼𑀭𑀺𑀲𑁄 𑀤𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂 𑀲𑀭𑁂 𑀲𑀭𑀻𑀭𑁂 𑀅𑀧𑀢𑀫𑀸𑀦𑁂 𑀅𑀦𑁆𑀢𑀭𑀸𑀯 𑀧𑀳𑀭𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀧𑀸𑀢𑁂𑀢𑀺. 𑀢𑀢𑁆𑀣 𑀏𑀓𑁄𑀧𑀺 𑀇𑀲𑁆𑀲𑀸𑀲𑁄 𑀤𑁆𑀯𑁂 𑀲𑀭𑁂 𑀏𑀓𑀢𑁄 𑀦 𑀔𑀺𑀧𑀢𑀺, 𑀇𑀫𑀸 𑀧𑀦 𑀇𑀢𑁆𑀣𑀺𑀬𑁄 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀧𑀜𑁆𑀘 𑀧𑀜𑁆𑀘 𑀲𑀭𑁂 𑀏𑀓𑀢𑁄 𑀔𑀺𑀧𑀦𑁆𑀢𑀺. 𑀏𑀯𑀁 𑀔𑀺𑀧𑀦𑁆𑀢𑀺𑀬𑁄 𑀏𑀢𑀸 𑀲𑀘𑁂𑀧𑀺 𑀅𑀢𑀺𑀭𑁂𑀓𑀲𑀳𑀲𑁆𑀲𑀸 𑀳𑁄𑀦𑁆𑀢𑀺, 𑀦𑁂𑀯 𑀫𑀁 𑀘𑀸𑀮𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺.

𑀲𑀓𑁆𑀔𑀻 𑀳𑀺 𑀫𑁂 𑀲𑀼𑀢𑀁 𑀏𑀢𑀦𑁆𑀢𑀺 𑀫𑀬𑀸 𑀳𑀺 𑀲𑀫𑁆𑀫𑀼𑀔𑀸 𑀏𑀢𑀁 𑀲𑀼𑀢𑀁. 𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀦𑁆𑀢𑀺 𑀯𑀺𑀧𑀲𑁆𑀲𑀦𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀧𑀦 ‘‘𑀫𑀕𑁆𑀕’’𑀦𑁆𑀢𑀺 𑀆𑀳. 𑀢𑀢𑁆𑀣 𑀫𑁂𑀢𑀺 𑀢𑀲𑁆𑀫𑀺𑀁 𑀫𑁂 𑀅𑀢𑁆𑀢𑀦𑁄 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑀕𑀫𑀦𑀫𑀕𑁆𑀕𑁂 𑀫𑀦𑁄 𑀦𑀺𑀭𑀢𑁄. 𑀧𑀸𑀧𑀺𑀫𑀸𑀢𑀺 𑀓𑀺𑀮𑁂𑀲𑀁 𑀆𑀮𑀧𑀢𑀺. 𑀫𑀘𑁆𑀘𑀽𑀢𑀺𑀧𑀺 𑀢𑀫𑁂𑀯 𑀆𑀮𑀧𑀢𑀺. 𑀦 𑀫𑁂 𑀫𑀕𑁆𑀕𑀫𑁆𑀧𑀺 𑀤𑀓𑁆𑀔𑀲𑀻𑀢𑀺 𑀬𑀣𑀸 𑀫𑁂 𑀪𑀯𑀬𑁄𑀦𑀺𑀆𑀤𑀻𑀲𑀼 𑀕𑀢𑀫𑀕𑁆𑀕𑀫𑁆𑀧𑀺 𑀦 𑀧𑀲𑁆𑀲𑀲𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀧𑀞𑀫𑀁.

𑁨. 𑀅𑀭𑀢𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁦. 𑀤𑀼𑀢𑀺𑀬𑁂 𑀦𑀺𑀓𑁆𑀔𑀫𑀢𑀻𑀢𑀺 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀢𑀺. 𑀅𑀧𑀭𑀚𑁆𑀚𑀼 𑀯𑀸 𑀓𑀸𑀮𑁂𑀢𑀺 𑀤𑀼𑀢𑀺𑀬𑀤𑀺𑀯𑀲𑁂 𑀯𑀸 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁂. 𑀯𑀺𑀳𑀸𑀭𑀕𑀭𑀼𑀓𑁄 𑀓𑀺𑀭𑁂𑀲 𑀣𑁂𑀭𑁄. 𑀅𑀭𑀢𑀺𑀜𑁆𑀘 𑀭𑀢𑀺𑀜𑁆𑀘𑀸𑀢𑀺 𑀲𑀸𑀲𑀦𑁂 𑀅𑀭𑀢𑀺𑀁 𑀓𑀸𑀫𑀕𑀼𑀡𑁂𑀲𑀼 𑀘 𑀭𑀢𑀺𑀁. 𑀲𑀩𑁆𑀩𑀲𑁄 𑀕𑁂𑀳𑀲𑀺𑀢𑀜𑁆𑀘 𑀯𑀺𑀢𑀓𑁆𑀓𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀕𑁂𑀳𑀦𑀺𑀲𑁆𑀲𑀺𑀢𑀁 𑀧𑀸𑀧𑀯𑀺𑀢𑀓𑁆𑀓𑀜𑁆𑀘 𑀲𑀩𑁆𑀩𑀸𑀓𑀸𑀭𑁂𑀦 𑀧𑀳𑀸𑀬. 𑀯𑀦𑀣𑀦𑁆𑀢𑀺 𑀓𑀺𑀮𑁂𑀲𑀫𑀳𑀸𑀯𑀦𑀁. 𑀓𑀼𑀳𑀺𑀜𑁆𑀘𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀆𑀭𑀫𑁆𑀫𑀡𑁂. 𑀦𑀺𑀩𑁆𑀩𑀦𑀣𑁄𑀢𑀺 𑀦𑀺𑀓𑁆𑀓𑀺𑀮𑁂𑀲𑀯𑀦𑁄. 𑀅𑀭𑀢𑁄𑀢𑀺 𑀢𑀡𑁆𑀳𑀸𑀭𑀢𑀺𑀭𑀳𑀺𑀢𑁄.

𑀧𑀣𑀯𑀺𑀜𑁆𑀘 𑀯𑁂𑀳𑀸𑀲𑀦𑁆𑀢𑀺 𑀧𑀣𑀯𑀺𑀝𑁆𑀞𑀺𑀢𑀜𑁆𑀘 𑀇𑀢𑁆𑀣𑀺𑀧𑀼𑀭𑀺𑀲𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺𑀯𑀡𑁆𑀡𑀁, 𑀯𑁂𑀳𑀸𑀲𑀝𑁆𑀞𑀓𑀜𑁆𑀘 𑀘𑀦𑁆𑀤𑀲𑀽𑀭𑀺𑀬𑁄𑀪𑀸𑀲𑀸𑀤𑀺. 𑀭𑀽𑀧𑀕𑀢𑀦𑁆𑀢𑀺 𑀭𑀽𑀧𑀫𑁂𑀯. 𑀚𑀕𑀢𑁄𑀕𑀥𑀦𑁆𑀢𑀺 𑀚𑀕𑀢𑀺𑀬𑀸 𑀑𑀕𑀥𑀁, 𑀅𑀦𑁆𑀢𑁄𑀧𑀣𑀯𑀺𑀬𑀁 𑀦𑀸𑀕𑀪𑀯𑀦𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀚𑀻𑀬𑀢𑀻𑀢𑀺 𑀧𑀭𑀺𑀚𑀻𑀭𑀢𑀺. 𑀲𑀩𑁆𑀩𑀫𑀦𑀺𑀘𑁆𑀘𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀅𑀦𑀺𑀘𑁆𑀘𑀁. 𑀅𑀬𑀁 𑀣𑁂𑀭𑀲𑁆𑀲 𑀫𑀳𑀸𑀯𑀺𑀧𑀲𑁆𑀲𑀦𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀫𑀘𑁆𑀘𑀸𑀢𑀺 𑀏𑀯𑀁 𑀲𑀫𑀸𑀕𑀦𑁆𑀢𑁆𑀯𑀸. 𑀘𑀭𑀦𑁆𑀢𑀺 𑀫𑀼𑀢𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀢𑀢𑁆𑀢𑀪𑀸𑀯𑀸 𑀯𑀺𑀳𑀭𑀦𑁆𑀢𑀺.

𑀉𑀧𑀥𑀻𑀲𑀽𑀢𑀺 𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑁂𑀲𑀼. 𑀕𑀥𑀺𑀢𑀸𑀢𑀺 𑀕𑀺𑀤𑁆𑀥𑀸. 𑀤𑀺𑀝𑁆𑀞𑀲𑀼𑀢𑁂𑀢𑀺 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑁂 𑀭𑀽𑀧𑁂, 𑀲𑁄𑀢𑁂𑀦 𑀲𑀼𑀢𑁂 𑀲𑀤𑁆𑀤𑁂. 𑀧𑀝𑀺𑀖𑁂 𑀘 𑀫𑀼𑀢𑁂 𑀘𑀸𑀢𑀺 𑀏𑀢𑁆𑀣 𑀧𑀝𑀺𑀖𑀧𑀤𑁂𑀦 𑀕𑀦𑁆𑀥𑀭𑀲𑀸 𑀕𑀳𑀺𑀢𑀸, 𑀫𑀼𑀢𑀧𑀤𑁂𑀦 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁. 𑀬𑁄 𑀏𑀢𑁆𑀣 𑀦 𑀮𑀺𑀫𑁆𑀧𑀢𑀻𑀢𑀺 𑀬𑁄 𑀏𑀢𑁂𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀮𑁂𑀧𑁂𑀳𑀺 𑀦 𑀮𑀺𑀫𑁆𑀧𑀢𑀺.

𑀅𑀣 𑀲𑀝𑁆𑀞𑀺𑀦𑀺𑀲𑁆𑀲𑀺𑀢𑀸 𑀲𑀯𑀺𑀢𑀓𑁆𑀓𑀸, 𑀧𑀼𑀣𑀽 𑀚𑀦𑀢𑀸𑀬 𑀅𑀥𑀫𑁆𑀫𑀸 𑀦𑀺𑀯𑀺𑀝𑁆𑀞𑀸𑀢𑀺 𑀅𑀣 𑀙 𑀆𑀭𑀫𑁆𑀫𑀡𑀦𑀺𑀲𑁆𑀲𑀺𑀢𑀸 𑀧𑀼𑀣𑀽 𑀅𑀥𑀫𑁆𑀫𑀯𑀺𑀢𑀓𑁆𑀓𑀸 𑀚𑀦𑀢𑀸𑀬 𑀦𑀺𑀯𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀦 𑀘 𑀯𑀕𑁆𑀕𑀕𑀢𑀲𑁆𑀲 𑀓𑀼𑀳𑀺𑀜𑁆𑀘𑀻𑀢𑀺 𑀢𑁂𑀲𑀁 𑀯𑀲𑁂𑀦 𑀦 𑀓𑀢𑁆𑀣𑀘𑀺 𑀓𑀺𑀮𑁂𑀲𑀯𑀕𑁆𑀕𑀕𑀢𑁄 𑀪𑀯𑁂𑀬𑁆𑀬. 𑀦𑁄 𑀧𑀦 𑀤𑀼𑀝𑁆𑀞𑀼𑀮𑁆𑀮𑀪𑀸𑀡𑀻𑀢𑀺 𑀤𑀼𑀝𑁆𑀞𑀼𑀮𑁆𑀮𑀯𑀘𑀦𑀪𑀸𑀡𑀻𑀧𑀺 𑀦 𑀲𑀺𑀬𑀸. 𑀲 𑀪𑀺𑀓𑁆𑀔𑀽𑀢𑀺 𑀲𑁄 𑀏𑀯𑀁𑀯𑀺𑀥𑁄 𑀪𑀺𑀓𑁆𑀔𑀼 𑀦𑀸𑀫 𑀳𑁄𑀢𑀺.

𑀤𑀩𑁆𑀩𑁄𑀢𑀺 𑀤𑀩𑁆𑀩𑀚𑀸𑀢𑀺𑀓𑁄 𑀧𑀡𑁆𑀟𑀺𑀢𑁄. 𑀘𑀺𑀭𑀭𑀢𑁆𑀢𑀲𑀫𑀸𑀳𑀺𑀢𑁄𑀢𑀺 𑀤𑀻𑀖𑀭𑀢𑁆𑀢𑀁 𑀲𑀫𑀸𑀳𑀺𑀢𑀘𑀺𑀢𑁆𑀢𑁄. 𑀦𑀺𑀧𑀓𑁄𑀢𑀺 𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀭𑀺𑀡𑀢𑀧𑀜𑁆𑀜𑁄. 𑀅𑀧𑀺𑀳𑀸𑀮𑀽𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀲𑀦𑁆𑀢𑀁 𑀧𑀤𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀚𑁆𑀛𑀕𑀫𑀸 𑀫𑀼𑀦𑀻𑀢𑀺 𑀅𑀥𑀺𑀕𑀢𑁄 𑀫𑀼𑀦𑀺. 𑀧𑀝𑀺𑀘𑁆𑀘 𑀧𑀭𑀺𑀦𑀺𑀩𑁆𑀩𑀼𑀢𑁄 𑀓𑀗𑁆𑀔𑀢𑀺 𑀓𑀸𑀮𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀝𑀺𑀘𑁆𑀘 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀁 𑀆𑀕𑀫𑁂𑀢𑀺. 𑀤𑀼𑀢𑀺𑀬𑀁.

𑁩. 𑀧𑁂𑀲𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁧. 𑀢𑀢𑀺𑀬𑁂 𑀅𑀢𑀺𑀫𑀜𑁆𑀜𑀢𑀻𑀢𑀺 ‘‘𑀓𑀺𑀁 𑀇𑀫𑁂 𑀫𑀳𑀮𑁆𑀮𑀓𑀸? 𑀦 𑀏𑀢𑁂𑀲𑀁 𑀧𑀸𑀴𑀺, 𑀦 𑀅𑀝𑁆𑀞𑀓𑀣𑀸, 𑀦 𑀧𑀤𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸, 𑀅𑀫𑁆𑀳𑀸𑀓𑀁 𑀧𑀦 𑀧𑀸𑀴𑀺𑀧𑀺 𑀅𑀝𑁆𑀞𑀓𑀣𑀸𑀧𑀺 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀉𑀧𑀝𑁆𑀞𑀸𑀢𑀻’’𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀢𑀺. 𑀕𑁄𑀢𑀫𑀸𑀢𑀺 𑀕𑁄𑀢𑀫𑀩𑀼𑀤𑁆𑀥𑀲𑀸𑀯𑀓𑀢𑁆𑀢𑀸 𑀅𑀢𑁆𑀢𑀸𑀦𑀁 𑀆𑀮𑀧𑀢𑀺. 𑀫𑀸𑀦𑀧𑀣𑀦𑁆𑀢𑀺 𑀫𑀸𑀦𑀸𑀭𑀫𑁆𑀫𑀡𑀜𑁆𑀘𑁂𑀯 𑀫𑀸𑀦𑀲𑀳𑀪𑀼𑀦𑁄 𑀘 𑀥𑀫𑁆𑀫𑁂. 𑀯𑀺𑀧𑁆𑀧𑀝𑀺𑀲𑀸𑀭𑀻𑀳𑀼𑀯𑀸𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑀼𑀯𑀸, 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀚𑀺𑀦𑁄𑀢𑀺 𑀫𑀕𑁆𑀕𑁂𑀦 𑀚𑀺𑀢𑀓𑀺𑀮𑁂𑀲𑁄. 𑀓𑀺𑀢𑁆𑀢𑀺𑀜𑁆𑀘 𑀲𑀼𑀔𑀜𑁆𑀘𑀸𑀢𑀺 𑀯𑀡𑁆𑀡𑀪𑀡𑀦𑀜𑁆𑀘 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀜𑁆𑀘. 𑀅𑀔𑀺𑀮𑁄𑀥 𑀧𑀥𑀸𑀦𑀯𑀸𑀢𑀺 𑀅𑀔𑀺𑀮𑁄 𑀇𑀥 𑀧𑀥𑀸𑀦𑀯𑀸 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄. 𑀯𑀺𑀲𑀼𑀤𑁆𑀥𑁄𑀢𑀺 𑀯𑀺𑀲𑀼𑀤𑁆𑀥𑁄 𑀪𑀯𑁂𑀬𑁆𑀬. 𑀅𑀲𑁂𑀲𑀦𑁆𑀢𑀺 𑀦𑀺𑀲𑁆𑀲𑁂𑀲𑀁 𑀦𑀯𑀯𑀺𑀥𑀁. 𑀯𑀺𑀚𑁆𑀚𑀸𑀬𑀦𑁆𑀢𑀓𑀭𑁄𑀢𑀺 𑀯𑀺𑀚𑁆𑀚𑀸𑀬 𑀓𑀺𑀮𑁂𑀲𑀸𑀦𑀁 𑀅𑀦𑁆𑀢𑀓𑀭𑁄. 𑀲𑀫𑀺𑀢𑀸𑀯𑀻𑀢𑀺 𑀭𑀸𑀕𑀸𑀤𑀻𑀦𑀁 𑀲𑀫𑀺𑀢𑀢𑀸𑀬 𑀲𑀫𑀺𑀢𑀸𑀯𑀻. 𑀢𑀢𑀺𑀬𑀁.

𑁪. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁨. 𑀘𑀢𑀼𑀢𑁆𑀣𑁂 𑀭𑀸𑀕𑁄𑀢𑀺 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀳𑀸𑀧𑀼𑀜𑁆𑀜𑁄 𑀲𑀫𑁆𑀪𑀸𑀯𑀺𑀢𑁄, 𑀢𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀦𑀺𑀲𑀻𑀤𑀸𑀧𑁂𑀦𑁆𑀢𑀺. 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸𑀧𑀺 𑀇𑀢𑁆𑀣𑀺𑀬𑁄 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀸𑀮𑀯𑀡𑁆𑀝𑁂𑀦 𑀩𑀻𑀚𑁂𑀦𑁆𑀢𑀺, 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀢𑀢𑁆𑀣 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀦𑀯𑀧𑀩𑁆𑀩𑀚𑀺𑀢𑀲𑁆𑀲 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀇𑀢𑁆𑀣𑀺𑀭𑀽𑀧𑀸𑀭𑀫𑁆𑀫𑀡𑁂 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀲𑁄 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀢𑁆𑀢𑀸 𑀉𑀚𑀼𑀚𑀸𑀢𑀺𑀓𑁄 𑀓𑀼𑀮𑀧𑀼𑀢𑁆𑀢𑁄 ‘‘𑀅𑀬𑀁 𑀫𑁂 𑀭𑀸𑀕𑁄 𑀯𑀟𑁆𑀠𑀺𑀢𑁆𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀦𑀸𑀲𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀦𑁆𑀢𑀭𑀁 𑀦𑀺𑀲𑀺𑀦𑁆𑀦𑁄𑀯 𑀣𑁂𑀭𑀲𑁆𑀲 𑀅𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀦𑁆𑀢𑁄 𑀓𑀸𑀫𑀭𑀸𑀕𑁂𑀦𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀦𑀺𑀩𑁆𑀩𑀸𑀧𑀦𑀦𑁆𑀢𑀺 𑀭𑀸𑀕𑀦𑀺𑀩𑁆𑀩𑀸𑀦𑀓𑀸𑀭𑀡𑀁. 𑀯𑀺𑀧𑀭𑀺𑀬𑁂𑀲𑀸𑀢𑀺 𑀯𑀺𑀧𑀮𑁆𑀮𑀸𑀲𑁂𑀦. 𑀲𑀼𑀪𑀁 𑀭𑀸𑀕𑀽𑀧𑀲𑀜𑁆𑀳𑀺𑀢𑀦𑁆𑀢𑀺 𑀭𑀸𑀕𑀝𑁆𑀞𑀸𑀦𑀺𑀬𑀁 𑀇𑀝𑁆𑀞𑀸𑀭𑀫𑁆𑀫𑀡𑀁. 𑀧𑀭𑀢𑁄 𑀧𑀲𑁆𑀲𑀸𑀢𑀺 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲. 𑀫𑀸 𑀘 𑀅𑀢𑁆𑀢𑀢𑁄𑀢𑀺 𑀅𑀢𑁆𑀢𑀢𑁄 𑀫𑀸 𑀧𑀲𑁆𑀲. 𑀓𑀸𑀬𑀕𑀢𑀸 𑀢𑁆𑀬𑀢𑁆𑀣𑀽𑀢𑀺 𑀓𑀸𑀬𑀕𑀢𑀸 𑀢𑁂 𑀅𑀢𑁆𑀣𑀼. 𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀻𑀢𑀺 𑀦𑀺𑀘𑁆𑀘𑀸𑀤𑀻𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀉𑀕𑁆𑀖𑀸𑀝𑀺𑀢𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫, 𑀢𑀁 𑀪𑀸𑀯𑁂𑀳𑀻𑀢𑀺 𑀯𑀤𑀢𑀺. 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀫𑀸𑀦𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑀸 𑀘𑁂𑀯 𑀧𑀳𑀸𑀦𑀸𑀪𑀺𑀲𑀫𑀬𑀸 𑀘. 𑀉𑀧𑀲𑀦𑁆𑀢𑁄𑀢𑀺 𑀭𑀸𑀕𑀸𑀤𑀺𑀲𑀦𑁆𑀢𑀢𑀸𑀬 𑀉𑀧𑀲𑀦𑁆𑀢𑁄. 𑀘𑀢𑀼𑀢𑁆𑀣𑀁.

𑁫. 𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁩. 𑀧𑀜𑁆𑀘𑀫𑁂 𑀅𑀗𑁆𑀕𑁂𑀳𑀻𑀢𑀺 𑀓𑀸𑀭𑀡𑁂𑀳𑀺, 𑀅𑀯𑀬𑀯𑁂𑀳𑀺 𑀯𑀸. 𑀫𑀼𑀲𑀸𑀯𑀸𑀤𑀸𑀯𑁂𑀭𑀫𑀡𑀺𑀆𑀤𑀻𑀦𑀺 𑀳𑀺 𑀘𑀢𑁆𑀢𑀸𑀭𑀺 𑀲𑀼𑀪𑀸𑀲𑀺𑀢𑀯𑀸𑀘𑀸𑀬 𑀓𑀸𑀭𑀡𑀸𑀦𑀺, 𑀲𑀘𑁆𑀘𑀯𑀘𑀦𑀸𑀤𑀬𑁄 𑀘𑀢𑁆𑀢𑀸𑀭𑁄 𑀅𑀯𑀬𑀯𑀸. 𑀓𑀸𑀭𑀡𑀢𑁆𑀣𑁂 𑀘 𑀅𑀗𑁆𑀕𑀲𑀤𑁆𑀤𑁂 ‘‘𑀘𑀢𑀽𑀳𑀻’’𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀳𑁄𑀢𑀺, 𑀅𑀯𑀬𑀯𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀫𑀦𑀼𑀆𑀕𑀢𑀸 𑀧𑀯𑀢𑁆𑀢𑀸 𑀬𑀼𑀢𑁆𑀢𑀸 𑀘. 𑀯𑀸𑀘𑀸𑀢𑀺 𑀲𑀫𑀼𑀮𑁆𑀮𑀧𑀦𑀯𑀸𑀘𑀸, 𑀬𑀸 ‘‘𑀯𑀸𑀘𑀸 𑀕𑀺𑀭𑀸 𑀩𑁆𑀬𑀧𑁆𑀧𑀣𑁄’’𑀢𑀺 (𑀥. 𑀲. 𑁬𑁩𑁬) 𑀘, ‘‘𑀦𑁂𑀮𑀸 𑀓𑀡𑁆𑀡𑀲𑀼𑀔𑀸’’𑀢𑀺 (𑀤𑀻. 𑀦𑀺. 𑁧.𑁯) 𑀘 𑀆𑀕𑀢𑀸. ‘‘𑀬𑀸 𑀧𑀦 𑀯𑀸𑀘𑀸𑀬 𑀘𑁂 𑀓𑀢𑀁 𑀓𑀫𑁆𑀫’’𑀦𑁆𑀢𑀺 𑀏𑀯𑀁 𑀯𑀺𑀜𑁆𑀜𑀢𑁆𑀢𑀺 𑀘 ‘‘𑀬𑀸 𑀘𑀢𑀽𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀺 𑀆𑀭𑀢𑀺…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀯𑀸𑀘𑀸’’𑀢𑀺 (𑀯𑀺𑀪. 𑁨𑁦𑁬) 𑀏𑀯𑀁 𑀯𑀺𑀭𑀢𑀺 𑀘, ‘‘𑀨𑀭𑀼𑀲𑀯𑀸𑀘𑀸, 𑀪𑀺𑀓𑁆𑀔𑀯𑁂, 𑀆𑀲𑁂𑀯𑀺𑀢𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀸 𑀳𑁄𑀢𑀻’’𑀢𑀺 (𑀅. 𑀦𑀺. 𑁮.𑁪𑁦) 𑀏𑀯𑀁 𑀘𑁂𑀢𑀦𑀸 𑀘 𑀯𑀸𑀘𑀸𑀢𑀺 𑀆𑀕𑀢𑀸, 𑀦 𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀓𑀲𑁆𑀫𑀸? 𑀅𑀪𑀸𑀲𑀺𑀢𑀩𑁆𑀩𑀢𑁄. 𑀲𑀼𑀪𑀸𑀲𑀺𑀢𑀸𑀢𑀺 𑀲𑀼𑀝𑁆𑀞𑀼 𑀪𑀸𑀲𑀺𑀢𑀸. 𑀢𑁂𑀦𑀲𑁆𑀲𑀸 𑀅𑀢𑁆𑀣𑀸𑀯𑀳𑀢𑀁 𑀤𑀻𑀧𑁂𑀢𑀺. 𑀦𑁄 𑀤𑀼𑀩𑁆𑀪𑀸𑀲𑀺𑀢𑀸𑀢𑀺 𑀦 𑀤𑀼𑀝𑁆𑀞𑀼 𑀪𑀸𑀲𑀺𑀢𑀸. 𑀢𑁂𑀦𑀲𑁆𑀲𑀸 𑀅𑀦𑀢𑁆𑀣𑀸𑀯𑀳𑀦𑀧𑀳𑀸𑀦𑀢𑀁 𑀤𑀻𑀧𑁂𑀢𑀺. 𑀅𑀦𑀯𑀚𑁆𑀚𑀸𑀢𑀺 𑀭𑀸𑀕𑀸𑀤𑀺𑀯𑀚𑁆𑀚𑀭𑀳𑀺𑀢𑀸. 𑀇𑀫𑀺𑀦𑀸𑀲𑁆𑀲𑀸 𑀓𑀸𑀭𑀡𑀲𑀼𑀤𑁆𑀥𑀺𑀁 𑀘𑀢𑀼𑀤𑁄𑀲𑀸𑀪𑀸𑀯𑀜𑁆𑀘 𑀤𑀻𑀧𑁂𑀢𑀺. 𑀅𑀦𑀦𑀼𑀯𑀚𑁆𑀚𑀸𑀢𑀺 𑀅𑀦𑀼𑀯𑀸𑀤𑀯𑀺𑀫𑀼𑀢𑁆𑀢𑀸. 𑀇𑀫𑀺𑀦𑀸𑀲𑁆𑀲𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀯𑀺𑀜𑁆𑀜𑀽𑀦𑀦𑁆𑀢𑀺 𑀧𑀡𑁆𑀟𑀺𑀢𑀸𑀦𑀁. 𑀢𑁂𑀦 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼 𑀩𑀸𑀮𑀸 𑀅𑀧𑁆𑀧𑀫𑀸𑀡𑀸𑀢𑀺 𑀤𑀻𑀧𑁂𑀢𑀺.

𑀲𑀼𑀪𑀸𑀲𑀺𑀢𑀁𑀬𑁂𑀯 𑀪𑀸𑀲𑀢𑀻𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀘𑀢𑀽𑀲𑀼 𑀯𑀸𑀘𑀗𑁆𑀕𑁂𑀲𑀼 𑀅𑀜𑁆𑀜𑀢𑀭𑀦𑀺𑀤𑁆𑀤𑁄𑀲𑀯𑀘𑀦𑀫𑁂𑀢𑀁. 𑀦𑁄 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑀸𑀘𑀗𑁆𑀕𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀲𑀦𑀦𑀺𑀯𑀸𑀭𑀡𑀁. 𑀦𑁄 𑀤𑀼𑀩𑁆𑀪𑀸𑀲𑀺𑀢𑀦𑁆𑀢𑀺 𑀇𑀫𑀺𑀦𑀸 𑀫𑀺𑀘𑁆𑀙𑀸𑀯𑀸𑀘𑀧𑁆𑀧𑀳𑀸𑀦𑀁 𑀤𑀻𑀧𑁂𑀢𑀺. 𑀲𑀼𑀪𑀸𑀲𑀺𑀢𑀦𑁆𑀢𑀺 𑀇𑀫𑀺𑀦𑀸 𑀧𑀳𑀻𑀦𑀫𑀺𑀘𑁆𑀙𑀸𑀯𑀸𑀘𑁂𑀦 𑀪𑀸𑀲𑀺𑀢𑀩𑁆𑀩𑀯𑀘𑀦𑀮𑀓𑁆𑀔𑀡𑀁. 𑀅𑀗𑁆𑀕𑀧𑀭𑀺𑀤𑀻𑀧𑀦𑀢𑁆𑀣𑀁 𑀧𑀦𑁂𑀢𑁆𑀣 𑀅𑀪𑀸𑀲𑀺𑀢𑀩𑁆𑀩𑀁 𑀧𑀼𑀩𑁆𑀩𑁂 𑀅𑀯𑀢𑁆𑀯𑀸 𑀪𑀸𑀲𑀺𑀢𑀩𑁆𑀩𑀫𑁂𑀯𑀸𑀳. 𑀏𑀲 𑀦𑀬𑁄 𑀥𑀫𑁆𑀫𑀁𑀬𑁂𑀯𑀸𑀢𑀺𑀆𑀤𑀻𑀲𑀼𑀧𑀺. 𑀏𑀢𑁆𑀣 𑀘 𑀧𑀞𑀫𑁂𑀦 𑀧𑀺𑀲𑀼𑀡𑀤𑁄𑀲𑀭𑀳𑀺𑀢𑀁 𑀲𑀫𑀕𑁆𑀕𑀓𑀭𑀡𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀤𑀼𑀢𑀺𑀬𑁂𑀦 𑀲𑀫𑁆𑀨𑀧𑁆𑀧𑀮𑀸𑀧𑀤𑁄𑀲𑀭𑀳𑀺𑀢𑀁 𑀥𑀫𑁆𑀫𑀢𑁄 𑀅𑀦𑀧𑁂𑀢𑀁 𑀫𑀦𑁆𑀢𑀸𑀯𑀘𑀦𑀁, 𑀇𑀢𑀭𑁂𑀳𑀺 𑀤𑁆𑀯𑀻𑀳𑀺 𑀨𑀭𑀼𑀲𑀸𑀮𑀺𑀓𑀭𑀳𑀺𑀢𑀸𑀦𑀺 𑀧𑀺𑀬𑀲𑀘𑁆𑀘𑀯𑀘𑀦𑀸𑀦𑀺. 𑀇𑀫𑁂𑀳𑀺 𑀔𑁄𑀢𑀺 𑀆𑀤𑀺𑀦𑀸 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀦𑁆𑀢𑁄 𑀢𑀁 𑀯𑀸𑀘𑀁 𑀦𑀺𑀕𑀫𑁂𑀢𑀺. 𑀬𑀜𑁆𑀘 𑀅𑀜𑁆𑀜𑁂 𑀧𑀝𑀺𑀜𑁆𑀜𑀸𑀤𑀻𑀳𑀺 𑀅𑀯𑀬𑀯𑁂𑀳𑀺, 𑀦𑀸𑀫𑀸𑀤𑀻𑀳𑀺 𑀧𑀤𑁂𑀳𑀺, 𑀮𑀺𑀗𑁆𑀕𑀯𑀘𑀦𑀯𑀺𑀪𑀢𑁆𑀢𑀺𑀓𑀸𑀮𑀓𑀸𑀭𑀓𑀲𑀫𑁆𑀧𑀢𑁆𑀢𑀻𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁 𑀫𑀼𑀲𑀸𑀯𑀸𑀤𑀸𑀤𑀺𑀯𑀸𑀘𑀫𑁆𑀧𑀺 𑀲𑀼𑀪𑀸𑀲𑀺𑀢𑀦𑁆𑀢𑀺 𑀫𑀜𑁆𑀜𑀦𑁆𑀢𑀺, 𑀢𑀁 𑀧𑀝𑀺𑀲𑁂𑀥𑁂𑀢𑀺. 𑀅𑀯𑀬𑀯𑀸𑀤𑀺𑀲𑀫𑀦𑁆𑀦𑀸𑀕𑀢𑀸𑀧𑀺 𑀳𑀺 𑀢𑀣𑀸𑀭𑀽𑀧𑀻 𑀯𑀸𑀘𑀸 𑀤𑀼𑀩𑁆𑀪𑀸𑀲𑀺𑀢𑀸𑀯 𑀳𑁄𑀢𑀺 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀦𑀢𑁆𑀣𑀸𑀯𑀳𑀢𑁆𑀢𑀸. 𑀇𑀫𑁂𑀳𑀺 𑀧𑀦 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀲𑀘𑁂𑀧𑀺 𑀫𑀺𑀮𑀓𑁆𑀔𑀼𑀪𑀸𑀲𑀸𑀧𑀭𑀺𑀬𑀸𑀧𑀦𑁆𑀦𑀸 𑀖𑀝𑀘𑁂𑀝𑀺𑀓𑀸𑀕𑀻𑀢𑀺𑀓𑀧𑀭𑀺𑀬𑀸𑀧𑀦𑁆𑀦𑀸𑀧𑀺 𑀳𑁄𑀢𑀺, 𑀢𑀣𑀸𑀧𑀺 𑀲𑀼𑀪𑀸𑀲𑀺𑀢𑀸𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀳𑀺𑀢𑀲𑀼𑀔𑀸𑀯𑀳𑀢𑁆𑀢𑀸. 𑀢𑀣𑀸 𑀳𑀺 𑀫𑀕𑁆𑀕𑀧𑀲𑁆𑀲𑁂 𑀲𑀲𑁆𑀲𑀁 𑀭𑀓𑁆𑀔𑀦𑁆𑀢𑀺𑀬𑀸 𑀲𑀻𑀳𑀴𑀘𑁂𑀝𑀺𑀓𑀸𑀬 𑀲𑀻𑀳𑀴𑀓𑁂𑀦𑁂𑀯 𑀚𑀸𑀢𑀺𑀚𑀭𑀸𑀫𑀭𑀡𑀬𑀼𑀢𑁆𑀢𑀁 𑀕𑀻𑀢𑀺𑀓𑀁 𑀕𑀸𑀬𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀲𑀝𑁆𑀞𑀺𑀫𑀢𑁆𑀢𑀸 𑀯𑀺𑀧𑀲𑁆𑀲𑀓𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀣𑀸 𑀢𑀺𑀲𑁆𑀲𑁄 𑀦𑀸𑀫 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀪𑀺𑀓𑁆𑀔𑀼 𑀧𑀤𑀼𑀫𑀲𑀭𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑁄 𑀧𑀤𑀼𑀫𑀲𑀭𑁂 𑀧𑀤𑀼𑀫𑀸𑀦𑀺 𑀪𑀜𑁆𑀚𑀺𑀢𑁆𑀯𑀸 𑁋

‘‘𑀧𑀸𑀢𑁄𑀯 𑀨𑀼𑀮𑁆𑀮𑀺𑀢𑀓𑁄𑀓𑀦𑀤𑀁, 𑀲𑀽𑀭𑀺𑀬𑀸𑀮𑁄𑀓𑁂𑀦 𑀪𑀺𑀚𑁆𑀚𑀺𑀬𑀢𑁂;

𑀏𑀯𑀁 𑀫𑀦𑀼𑀲𑁆𑀲𑀢𑁆𑀢𑀁 𑀕𑀢𑀸 𑀲𑀢𑁆𑀢𑀸, 𑀚𑀭𑀸𑀪𑀺𑀯𑁂𑀕𑁂𑀦 𑀫𑀤𑁆𑀤𑀺𑀬𑀦𑁆𑀢𑀻’’𑀢𑀺. 𑁋

𑀇𑀫𑀁 𑀕𑀻𑀢𑀺𑀓𑀁 𑀕𑀸𑀬𑀦𑁆𑀢𑀺𑀬𑀸 𑀘𑁂𑀝𑀺𑀓𑀸𑀬 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄.

𑀩𑀼𑀤𑁆𑀥𑀦𑁆𑀢𑀭𑁂𑀧𑀺 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀲𑀢𑁆𑀢𑀳𑀺 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀅𑀝𑀯𑀺𑀢𑁄 𑀆𑀕𑀫𑁆𑀫 𑀅𑀜𑁆𑀜𑀢𑀭𑀸𑀬 𑀇𑀢𑁆𑀣𑀺𑀬𑀸 𑀫𑀼𑀲𑀮𑁂𑀦 𑀢𑀡𑁆𑀟𑀼𑀮𑁂 𑀓𑁄𑀝𑁆𑀝𑁂𑀦𑁆𑀢𑀺𑀬𑀸 𑁋

‘‘𑀚𑀭𑀸𑀬 𑀧𑀭𑀺𑀫𑀤𑁆𑀤𑀺𑀢𑀁 𑀏𑀢𑀁, 𑀫𑀺𑀮𑀸𑀢𑀙𑀯𑀺𑀘𑀫𑁆𑀫𑀦𑀺𑀲𑁆𑀲𑀺𑀢𑀁;

𑀫𑀭𑀡𑁂𑀦 𑀪𑀺𑀚𑁆𑀚𑀢𑀺 𑀏𑀢𑀁, 𑀫𑀘𑁆𑀘𑀼𑀲𑁆𑀲 𑀖𑀸𑀲𑀫𑀸𑀫𑀺𑀲𑀁.

‘‘𑀓𑀺𑀫𑀻𑀦𑀁 𑀆𑀮𑀬𑀁 𑀏𑀢𑀁, 𑀦𑀸𑀦𑀸𑀓𑀼𑀡𑀧𑁂𑀦 𑀧𑀽𑀭𑀺𑀢𑀁;

𑀅𑀲𑀼𑀘𑀺𑀲𑁆𑀲 𑀪𑀸𑀚𑀦𑀁 𑀏𑀢𑀁, 𑀓𑀤𑀮𑀺𑀓𑁆𑀔𑀦𑁆𑀥𑀲𑀫𑀁 𑀇𑀤’’𑀦𑁆𑀢𑀺. 𑁋

𑀇𑀫𑀁 𑀕𑀻𑀢𑀺𑀓𑀁 𑀲𑀼𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀳 𑀧𑀼𑀢𑁆𑀢𑁂𑀳𑀺 𑀧𑀘𑁆𑀘𑁂𑀓𑀩𑁄𑀥𑀺𑀁 𑀧𑀢𑁆𑀢𑁄. 𑀏𑀯𑀁 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀘𑁂𑀧𑀺 𑀫𑀺𑀮𑀓𑁆𑀔𑀼𑀪𑀸𑀲𑀸𑀧𑀭𑀺𑀬𑀸𑀧𑀦𑁆𑀦𑀸 𑀖𑀝𑀘𑁂𑀝𑀺𑀓𑀸𑀕𑀻𑀢𑀺𑀓𑀧𑀭𑀺𑀬𑀸𑀧𑀦𑁆𑀦𑀸𑀧𑀺 𑀳𑁄𑀢𑀺, 𑀢𑀣𑀸𑀧𑀺 𑀲𑀼𑀪𑀸𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀪𑀸𑀲𑀺𑀢𑀢𑁆𑀢𑀸 𑀏𑀯 𑀘 𑀅𑀦𑀯𑀚𑁆𑀚𑀸 𑀘 𑀅𑀦𑀦𑀼𑀯𑀚𑁆𑀚𑀸 𑀘 𑀯𑀺𑀜𑁆𑀜𑀽𑀦𑀁 𑀅𑀢𑁆𑀣𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀧𑀝𑀺𑀲𑀭𑀡𑀸𑀦𑀁, 𑀦𑁄 𑀩𑁆𑀬𑀜𑁆𑀚𑀦𑀧𑀝𑀺𑀲𑀭𑀡𑀸𑀦𑀦𑁆𑀢𑀺.

𑀲𑀸𑀭𑀼𑀧𑁆𑀧𑀸𑀳𑀻𑀢𑀺 𑀅𑀦𑀼𑀘𑁆𑀙𑀯𑀺𑀓𑀸𑀳𑀺. 𑀅𑀪𑀺𑀢𑁆𑀣𑀯𑀻𑀢𑀺 𑀧𑀲𑀁𑀲𑀺. 𑀦 𑀢𑀸𑀧𑀬𑁂𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀦 𑀢𑀸𑀧𑁂𑀬𑁆𑀬 𑀦 𑀯𑀺𑀩𑀸𑀥𑁂𑀬𑁆𑀬. 𑀧𑀭𑁂𑀢𑀺 𑀧𑀭𑁂𑀳𑀺 𑀪𑀺𑀦𑁆𑀤𑀦𑁆𑀢𑁄 𑀦𑀸𑀪𑀺𑀪𑀯𑁂𑀬𑁆𑀬 𑀦 𑀩𑀸𑀥𑁂𑀬𑁆𑀬. 𑀇𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀅𑀧𑀺𑀲𑀼𑀡𑀯𑀸𑀘𑀸𑀯𑀲𑁂𑀦 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑀺. 𑀧𑀝𑀺𑀦𑀦𑁆𑀤𑀺𑀢𑀸𑀢𑀺 𑀧𑀺𑀬𑀸𑀬𑀺𑀢𑀸. 𑀬𑀁 𑀅𑀦𑀸𑀤𑀸𑀬𑀸𑀢𑀺 𑀬𑀁 𑀯𑀸𑀘𑀁 𑀪𑀸𑀲𑀦𑁆𑀢𑁄 𑀧𑀭𑁂𑀲𑀁 𑀧𑀸𑀧𑀸𑀦𑀺 𑀅𑀧𑁆𑀧𑀺𑀬𑀸𑀦𑀺 𑀨𑀭𑀼𑀲𑀯𑀘𑀦𑀸𑀦𑀺 𑀅𑀦𑀸𑀤𑀸𑀬 𑀅𑀢𑁆𑀣𑀩𑁆𑀬𑀜𑁆𑀚𑀦𑀫𑀥𑀼𑀭𑀁 𑀧𑀺𑀬𑀫𑁂𑀯 𑀪𑀸𑀲𑀢𑀺, 𑀢𑀁 𑀯𑀸𑀘𑀁 𑀪𑀸𑀲𑁂𑀬𑁆𑀬𑀸𑀢𑀺 𑀧𑀺𑀬𑀯𑀸𑀘𑀸𑀯𑀲𑁂𑀦 𑀅𑀪𑀺𑀢𑁆𑀣𑀯𑀺.

𑀅𑀫𑀢𑀸𑀢𑀺 𑀲𑀸𑀥𑀼𑀪𑀸𑀯𑁂𑀦 𑀅𑀫𑀢𑀲𑀤𑀺𑀲𑀸. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀲𑀘𑁆𑀘𑀁 𑀳𑀯𑁂 𑀲𑀸𑀤𑀼𑀢𑀭𑀁 𑀭𑀲𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁪𑁬) 𑀦𑀺𑀩𑁆𑀩𑀸𑀦𑀸𑀫𑀢𑀧𑀘𑁆𑀘𑀬𑀢𑁆𑀢𑀸 𑀯𑀸 𑀅𑀫𑀢𑀸. 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄𑀢𑀺 𑀬𑀸 𑀅𑀬𑀁 𑀲𑀘𑁆𑀘𑀯𑀸𑀘𑀸 𑀦𑀸𑀫, 𑀏𑀲 𑀧𑁄𑀭𑀸𑀡𑁄 𑀥𑀫𑁆𑀫𑁄 𑀘𑀭𑀺𑀬𑀸 𑀧𑀯𑁂𑀡𑀻. 𑀇𑀤𑀫𑁂𑀯 𑀳𑀺 𑀧𑁄𑀭𑀸𑀡𑀸𑀦𑀁 𑀆𑀘𑀺𑀡𑁆𑀡𑀁, 𑀦 𑀢𑁂 𑀅𑀮𑀺𑀓𑀁 𑀪𑀸𑀲𑀺𑀁𑀲𑀼. 𑀢𑁂𑀦𑁂𑀯𑀸𑀳 𑁋 𑀲𑀘𑁆𑀘𑁂 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘, 𑀆𑀳𑀼 𑀲𑀦𑁆𑀢𑁄 𑀧𑀢𑀺𑀝𑁆𑀞𑀺𑀢𑀸𑀢𑀺.

𑀢𑀢𑁆𑀣 𑀲𑀘𑁆𑀘𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸𑀯 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀢𑁆𑀣𑁂 𑀧𑀢𑀺𑀝𑁆𑀞𑀺𑀢𑀸, 𑀅𑀢𑁆𑀣𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀏𑀯 𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀘𑁆𑀘𑀯𑀺𑀲𑁂𑀲𑀦𑀫𑁂𑀯 𑀯𑀸 𑀏𑀢𑀁. 𑀇𑀤𑀁 𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁆𑀘𑁂 𑀧𑀢𑀺𑀝𑁆𑀞𑀺𑀢𑀸, 𑀓𑀻𑀤𑀺𑀲𑁂? 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘, 𑀬𑀁 𑀧𑀭𑁂𑀲𑀁 𑀅𑀢𑁆𑀣𑀢𑁄 𑀅𑀦𑀧𑁂𑀢𑀢𑁆𑀢𑀸 𑀅𑀢𑁆𑀣𑀁 𑀅𑀦𑀼𑀧𑀭𑁄𑀥𑀓𑀭𑀁, 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀁 𑀥𑀫𑁆𑀫𑀺𑀓𑀫𑁂𑀯 𑀅𑀢𑁆𑀣𑀁 𑀲𑀸𑀥𑁂𑀢𑀻𑀢𑀺. 𑀇𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀲𑀘𑁆𑀘𑀯𑀘𑀦𑀯𑀲𑁂𑀦 𑀅𑀪𑀺𑀢𑁆𑀣𑀯𑀺.

𑀔𑁂𑀫𑀦𑁆𑀢𑀺 𑀅𑀪𑀬𑀁 𑀦𑀺𑀭𑀼𑀧𑀤𑁆𑀤𑀯𑀁. 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺 𑀘𑁂. 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀬𑀲𑁆𑀫𑀸 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀁 𑀧𑀸𑀧𑁂𑀢𑀺, 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀘 𑀅𑀦𑁆𑀢𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀁 𑀩𑀼𑀤𑁆𑀥𑁄 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀤𑁆𑀯𑀺𑀦𑁆𑀦𑀁 𑀦𑀺𑀩𑁆𑀩𑀸𑀦𑀥𑀸𑀢𑀽𑀦𑀁 𑀅𑀢𑁆𑀣𑀸𑀬 𑀔𑁂𑀫𑀫𑀕𑁆𑀕𑀧𑁆𑀧𑀓𑀸𑀲𑀦𑀢𑁄 𑀔𑁂𑀫𑀁 𑀯𑀸𑀘𑀁 𑀪𑀸𑀲𑀢𑀺, 𑀲𑀸 𑀯𑁂 𑀯𑀸𑀘𑀸𑀦𑀫𑀼𑀢𑁆𑀢𑀫𑀸𑀢𑀺 𑀲𑀸 𑀯𑀸𑀘𑀸 𑀲𑀩𑁆𑀩𑀯𑀸𑀘𑀸𑀦𑀁 𑀲𑁂𑀝𑁆𑀞𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀫𑀦𑁆𑀢𑀸𑀯𑀘𑀦𑀯𑀲𑁂𑀦 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀦𑁆𑀢𑁄 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺. 𑀧𑀜𑁆𑀘𑀫𑀁.

𑁬. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁪. 𑀙𑀝𑁆𑀞𑁂 𑀧𑁄𑀭𑀺𑀬𑀸𑀢𑀺 𑀅𑀓𑁆𑀔𑀭𑀸𑀤𑀺𑀧𑀭𑀺𑀧𑀼𑀡𑁆𑀡𑀸𑀬. 𑀯𑀺𑀲𑁆𑀲𑀝𑁆𑀞𑀸𑀬𑀸𑀢𑀺 𑀅𑀯𑀺𑀩𑀤𑁆𑀥𑀸𑀬 𑀅𑀧𑀮𑀺𑀩𑀼𑀤𑁆𑀥𑀸𑀬. 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀳𑀺 𑀓𑀣𑁂𑀦𑁆𑀢𑀲𑁆𑀲 𑀧𑀺𑀢𑁆𑀢𑀸𑀤𑀻𑀦𑀁 𑀯𑀲𑁂𑀦 𑀅𑀧𑀮𑀺𑀩𑀼𑀤𑁆𑀥𑀯𑀘𑀦𑀁 𑀳𑁄𑀢𑀺, 𑀅𑀬𑀤𑀡𑁆𑀟𑁂𑀦 𑀧𑀳𑀢𑀓𑀁𑀲𑀢𑀸𑀮𑀢𑁄 𑀲𑀤𑁆𑀤𑁄 𑀯𑀺𑀬 𑀦𑀺𑀘𑁆𑀙𑀭𑀢𑀺. 𑀅𑀦𑁂𑀮𑀕𑀮𑀸𑀬𑀸𑀢𑀺 𑀅𑀦𑁂𑀮𑀸𑀬 𑀅𑀕𑀮𑀸𑀬 𑀦𑀺𑀤𑁆𑀤𑁄𑀲𑀸𑀬 𑀘𑁂𑀯 𑀅𑀓𑁆𑀔𑀮𑀺𑀢𑀧𑀤𑀩𑁆𑀬𑀜𑁆𑀚𑀦𑀸𑀬 𑀘. 𑀣𑁂𑀭𑀲𑁆𑀲 𑀳𑀺 𑀓𑀣𑀬𑀢𑁄 𑀧𑀤𑀁 𑀯𑀸 𑀩𑁆𑀬𑀜𑁆𑀚𑀦𑀁 𑀯𑀸 𑀦 𑀧𑀭𑀺𑀳𑀸𑀬𑀢𑀺. 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸𑀢𑀺 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀲𑀫𑀢𑁆𑀣𑀸𑀬. 𑀪𑀺𑀓𑁆𑀔𑀼𑀦𑀦𑁆𑀢𑀺 𑀪𑀺𑀓𑁆𑀔𑀽𑀦𑀁.

𑀲𑀁𑀔𑀺𑀢𑁆𑀢𑁂𑀦𑀧𑀻𑀢𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀆𑀯𑀼𑀲𑁄, 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁…𑀧𑁂… 𑀇𑀫𑀸𑀦𑀺 𑀔𑁄, 𑀆𑀯𑀼𑀲𑁄, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀢𑀲𑁆𑀫𑀸𑀢𑀺𑀳, 𑀆𑀯𑀼𑀲𑁄, 𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁬-𑁧𑁦𑁯𑁮) 𑀏𑀯𑀁 𑀲𑀁𑀔𑀺𑀢𑁆𑀢𑁂𑀦𑀧𑀺 𑀤𑁂𑀲𑁂𑀢𑀺. 𑀯𑀺𑀢𑁆𑀣𑀸𑀭𑁂𑀦𑀧𑀻𑀢𑀺 ‘‘𑀓𑀢𑀫𑀁, 𑀆𑀯𑀼𑀲𑁄, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁭𑁩) 𑀦𑀬𑁂𑀦 𑀢𑀸𑀦𑁂𑀯 𑀯𑀺𑀪𑀚𑀦𑁆𑀢𑁄 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀢𑀺. 𑀔𑀦𑁆𑀥𑀸𑀤𑀺𑀤𑁂𑀲𑀦𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀴𑀺𑀓𑀸𑀬𑀺𑀯 𑀦𑀺𑀕𑁆𑀖𑁄𑀲𑁄𑀢𑀺 𑀬𑀣𑀸 𑀫𑀥𑀼𑀭𑀁 𑀅𑀫𑁆𑀩𑀧𑀓𑁆𑀓𑀁 𑀲𑀸𑀬𑀺𑀢𑁆𑀯𑀸 𑀧𑀓𑁆𑀔𑁂𑀳𑀺 𑀯𑀸𑀢𑀁 𑀤𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑀺𑀬𑀸 𑀲𑀸𑀴𑀺𑀓𑀲𑀓𑀼𑀡𑀺𑀬𑀸 𑀦𑀺𑀕𑁆𑀖𑁄𑀲𑁄, 𑀏𑀯𑀁 𑀣𑁂𑀭𑀲𑁆𑀲 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲 𑀫𑀥𑀼𑀭𑁄 𑀦𑀺𑀕𑁆𑀖𑁄𑀲𑁄 𑀳𑁄𑀢𑀺. 𑀧𑀝𑀺𑀪𑀸𑀦𑀁 𑀉𑀤𑀻𑀭𑀬𑀻𑀢𑀺 𑀲𑀫𑀼𑀤𑁆𑀤𑀢𑁄 𑀊𑀫𑀺𑀬𑁄 𑀯𑀺𑀬 𑀅𑀦𑀦𑁆𑀢𑀁 𑀧𑀝𑀺𑀪𑀸𑀦𑀁 𑀉𑀝𑁆𑀞𑀳𑀢𑀺. 𑀑𑀥𑁂𑀦𑁆𑀢𑀻𑀢𑀺 𑀑𑀤𑀳𑀦𑁆𑀢𑀺. 𑀙𑀝𑁆𑀞𑀁.

𑁭. 𑀧𑀯𑀸𑀭𑀡𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁫. 𑀲𑀢𑁆𑀢𑀫𑁂 𑀢𑀤𑀳𑀽𑀢𑀺 𑀢𑀲𑁆𑀫𑀺𑀁 𑀅𑀳𑀼, 𑀢𑀲𑁆𑀫𑀺𑀁 𑀤𑀺𑀯𑀲𑁂𑀢𑀺 𑀅𑀢𑁆𑀣𑁄. 𑀉𑀧𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑁄. 𑀉𑀧𑀯𑀲𑀦𑁆𑀢𑀻𑀢𑀺 𑀘 𑀲𑀻𑀮𑁂𑀦 𑀯𑀸 𑀅𑀦𑀲𑀦𑁂𑀦 𑀯𑀸 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀦𑁂𑀲 𑀉𑀧𑁄𑀲𑀣𑀤𑀺𑀯𑀲𑁄 𑀅𑀝𑁆𑀞𑀫𑀻𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀪𑁂𑀤𑁂𑀦 𑀢𑀺𑀯𑀺𑀥𑁄, 𑀢𑀲𑁆𑀫𑀸 𑀲𑁂𑀲𑀤𑁆𑀯𑀬𑀦𑀺𑀯𑀸𑀭𑀡𑀢𑁆𑀣𑀁 𑀧𑀦𑁆𑀦𑀭𑀲𑁂𑀢𑀺 𑀯𑀼𑀢𑁆𑀢𑀁. 𑀧𑀯𑀸𑀭𑀡𑀸𑀬𑀸𑀢𑀺 𑀯𑀲𑁆𑀲𑀁-𑀯𑀼𑀝𑁆𑀞-𑀧𑀯𑀸𑀭𑀡𑀸𑀬. 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀸𑀢𑀺𑀧𑀺 𑀏𑀢𑀺𑀲𑁆𑀲𑀸𑀯 𑀦𑀸𑀫𑀁. 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀲𑀸𑀬𑀦𑁆𑀳𑀲𑀫𑀬𑁂 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀓𑀸𑀮𑀬𑀼𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀉𑀤𑀓𑀓𑁄𑀝𑁆𑀞𑀓𑁂 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑁄 𑀏𑀓𑀁𑀲𑀁 𑀲𑀼𑀕𑀢𑀫𑀳𑀸𑀘𑀻𑀯𑀭𑀁 𑀓𑀢𑁆𑀯𑀸 𑀫𑀚𑁆𑀛𑀺𑀫𑀢𑁆𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀧𑀜𑁆𑀜𑀢𑁆𑀢𑁂 𑀯𑀭𑀩𑀼𑀤𑁆𑀥𑀸𑀲𑀦𑁂 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀉𑀝𑁆𑀞𑀳𑀢𑁄 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀲𑀺𑀭𑀺𑀁 𑀲𑀺𑀭𑀺𑀬𑀸 𑀅𑀪𑀺𑀪𑀯𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀦𑁆𑀢𑀺 𑀬𑀢𑁄 𑀬𑀢𑁄 𑀅𑀦𑀼𑀯𑀺𑀮𑁄𑀓𑁂𑀢𑀺, 𑀢𑀢𑁄 𑀢𑀢𑁄 𑀢𑀼𑀡𑁆𑀳𑀻𑀪𑀽𑀢𑀫𑁂𑀯. 𑀢𑀢𑁆𑀣 𑀳𑀺 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀦𑀢𑁆𑀣𑀺, 𑀲𑀩𑁆𑀩𑁂 𑀦𑀺𑀭𑀯𑀸 𑀲𑀦𑁆𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀦𑀺𑀲𑀻𑀤𑀺𑀁𑀲𑀼. 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸𑀢𑀺 𑀤𑀺𑀲𑁆𑀲𑀫𑀸𑀦𑀧𑀜𑁆𑀘𑀧𑀲𑀸𑀤𑁂𑀳𑀺 𑀦𑁂𑀢𑁆𑀢𑁂𑀳𑀺 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸. 𑀳𑀦𑁆𑀤𑀸𑀢𑀺 𑀯𑁄𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀦 𑀘 𑀫𑁂 𑀓𑀺𑀜𑁆𑀘𑀺 𑀕𑀭𑀳𑀣𑀸𑀢𑀺 𑀏𑀢𑁆𑀣 𑀦 𑀘 𑀓𑀺𑀜𑁆𑀘𑀻𑀢𑀺 𑀧𑀼𑀘𑁆𑀙𑀦𑀢𑁆𑀣𑁂 𑀦-𑀓𑀸𑀭𑁄. 𑀓𑀺𑀁 𑀫𑁂 𑀓𑀺𑀜𑁆𑀘𑀺 𑀕𑀭𑀳𑀣? 𑀬𑀤𑀺 𑀕𑀭𑀳𑀣, 𑀯𑀤𑀣, 𑀇𑀘𑁆𑀙𑀸𑀧𑁂𑀫𑀺 𑀯𑁄 𑀯𑀢𑁆𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸𑀢𑀺 𑀇𑀫𑀺𑀦𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑁂𑀯 𑀧𑀯𑀸𑀭𑁂𑀢𑀺, 𑀦 𑀫𑀦𑁄𑀤𑁆𑀯𑀸𑀭𑀁. 𑀓𑀲𑁆𑀫𑀸? 𑀅𑀧𑀸𑀓𑀝𑀢𑁆𑀢𑀸. 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀳𑀺 𑀤𑁄𑀲𑁄 𑀧𑀸𑀓𑀝𑁄 𑀳𑁄𑀢𑀺, 𑀦 𑀫𑀦𑁄𑀤𑁆𑀯𑀸𑀭𑁂. ‘‘𑀏𑀓𑀫𑀜𑁆𑀘𑁂 𑀲𑀬𑀢𑁄𑀧𑀺 𑀳𑀺 𑀓𑀺𑀁 𑀘𑀺𑀦𑁆𑀢𑁂𑀲𑀻’’𑀢𑀺? 𑀧𑀼𑀘𑁆𑀙𑀺𑀢𑁆𑀯𑀸 𑀘𑀺𑀢𑁆𑀢𑀸𑀘𑀸𑀭𑀁 𑀚𑀸𑀦𑀸𑀢𑀺. 𑀇𑀢𑀺 𑀫𑀦𑁄𑀤𑁆𑀯𑀸𑀭𑀁 𑀅𑀧𑀸𑀓𑀝𑀢𑁆𑀢𑀸 𑀦 𑀧𑀯𑀸𑀭𑁂𑀢𑀺, 𑀦𑁄 𑀅𑀧𑀭𑀺𑀲𑀼𑀤𑁆𑀥𑀢𑁆𑀢𑀸. 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲𑀸𑀧𑀺 𑀳𑀺 𑀢𑀲𑁆𑀲 𑀪𑀽𑀭𑀺𑀤𑀢𑁆𑀢𑀙𑀤𑁆𑀤𑀦𑁆𑀢𑀲𑀗𑁆𑀔𑀧𑀸𑀮𑀥𑀫𑁆𑀫𑀧𑀸𑀮𑀸𑀤𑀺𑀓𑀸𑀮𑁂 𑀫𑀦𑁄𑀤𑁆𑀯𑀸𑀭𑀁 𑀧𑀭𑀺𑀲𑀼𑀤𑁆𑀥𑀁, 𑀇𑀤𑀸𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀏𑀢𑀤𑀯𑁄𑀘𑀸𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀸𑀭𑀁 𑀯𑀳𑀦𑁆𑀢𑁄 𑀏𑀢𑀁 𑀅𑀯𑁄𑀘. 𑀦 𑀔𑁄 𑀫𑀬𑀁, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂, 𑀫𑀬𑀁 𑀪𑀕𑀯𑀢𑁄 𑀦 𑀓𑀺𑀜𑁆𑀘𑀺 𑀕𑀭𑀳𑀸𑀫. 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸𑀢𑀺 𑀇𑀤𑀁 𑀘𑀢𑀼𑀦𑁆𑀦𑀁 𑀅𑀭𑀓𑁆𑀔𑀺𑀬𑀢𑀁 𑀲𑀦𑁆𑀥𑀸𑀬 𑀣𑁂𑀭𑁄 𑀆𑀳. 𑀪𑀕𑀯𑀢𑁄 𑀳𑀺 𑀘𑀢𑁆𑀢𑀸𑀭𑀺 𑀅𑀭𑀓𑁆𑀔𑀺𑀬𑀸𑀦𑀺. 𑀬𑀣𑀸𑀳 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀓𑁆𑀔𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺. 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬, ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺. 𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬, ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺. 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀫𑀺𑀘𑁆𑀙𑀸𑀆𑀚𑀻𑀯𑁄, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬 ‘‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’’𑀢𑀺 (𑀅. 𑀦𑀺. 𑁭.𑁫𑁮).

𑀇𑀤𑀸𑀦𑀺 𑀪𑀕𑀯𑀢𑁄 𑀬𑀣𑀸𑀪𑀽𑀢𑀕𑀼𑀡𑁂 𑀓𑀣𑁂𑀦𑁆𑀢𑁄 𑀪𑀕𑀯𑀸 𑀳𑀺, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑁂𑀦 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀅𑀦𑀼𑀧𑁆𑀧𑀸𑀤𑀺𑀢𑀧𑀼𑀩𑁆𑀩𑀲𑁆𑀲. 𑀅𑀲𑀜𑁆𑀚𑀸𑀢𑀲𑁆𑀲𑀸𑀢𑀺 𑀇𑀤𑀁 𑀅𑀦𑀼𑀧𑁆𑀧𑀦𑁆𑀦𑀯𑁂𑀯𑀘𑀦𑀫𑁂𑀯. 𑀅𑀦𑀓𑁆𑀔𑀸𑀢𑀲𑁆𑀲𑀸𑀢𑀺 𑀅𑀜𑁆𑀜𑁂𑀦 𑀅𑀤𑁂𑀲𑀺𑀢𑀲𑁆𑀲. 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀧𑀞𑀫𑀕𑀢𑀲𑁆𑀲 𑀪𑀕𑀯𑀢𑁄 𑀧𑀘𑁆𑀙𑀸 𑀲𑀫𑀦𑀼𑀆𑀕𑀢𑀸. 𑀇𑀢𑀺 𑀣𑁂𑀭𑁄 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀪𑀕𑀯𑀢𑁄 𑀲𑀻𑀮𑀸𑀤𑀬𑁄 𑀕𑀼𑀡𑀸 𑀅𑀭𑀳𑀢𑁆𑀢𑀫𑀕𑁆𑀕𑀫𑁂𑀯 𑀦𑀺𑀲𑁆𑀲𑀸𑀬 𑀆𑀕𑀢𑀸, 𑀢𑀲𑁆𑀫𑀸 𑀅𑀭𑀳𑀢𑁆𑀢𑀫𑀕𑁆𑀕𑀫𑁂𑀯 𑀦𑀺𑀲𑁆𑀲𑀸𑀬 𑀕𑀼𑀡𑀁 𑀓𑀣𑁂𑀲𑀺. 𑀢𑁂𑀦 𑀲𑀩𑁆𑀩𑀕𑀼𑀡𑀸 𑀓𑀣𑀺𑀢𑀸𑀯 𑀳𑁄𑀦𑁆𑀢𑀺. 𑀅𑀳𑀜𑁆𑀘 𑀔𑁄, 𑀪𑀦𑁆𑀢𑁂𑀢𑀺 𑀇𑀤𑀁 𑀣𑁂𑀭𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀢𑀦𑁄 𑀘𑁂𑀯 𑀲𑀗𑁆𑀖𑀲𑁆𑀲 𑀘 𑀓𑀸𑀬𑀺𑀓𑀯𑀸𑀘𑀲𑀺𑀓𑀁 𑀧𑀯𑀸𑀭𑁂𑀦𑁆𑀢𑁄 𑀆𑀳.

𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀫𑁆𑀳𑀺 𑀓𑀸𑀮𑀗𑁆𑀓𑀢𑁂 𑀯𑀸 𑀧𑀩𑁆𑀩𑀚𑀺𑀢𑁂 𑀯𑀸 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀘𑀓𑁆𑀓𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀢𑁄 𑀤𑀲𑀯𑀺𑀥𑀁 𑀤𑁆𑀯𑀸𑀤𑀲𑀯𑀺𑀥𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀧𑀼𑀢𑁆𑀢𑀲𑁆𑀲 𑀅𑀜𑁆𑀜𑀁 𑀧𑀸𑀢𑀼𑀪𑀯𑀢𑀺, 𑀢𑀁 𑀲𑁄 𑀧𑀯𑀢𑁆𑀢𑁂𑀢𑀺. 𑀭𑀢𑀦𑀫𑀬𑀢𑁆𑀢𑀸 𑀧𑀦 𑀲𑀤𑀺𑀲𑀝𑁆𑀞𑁂𑀦 𑀢𑀤𑁂𑀯 𑀯𑀢𑁆𑀢𑀁 𑀓𑀢𑁆𑀯𑀸 ‘‘𑀧𑀺𑀢𑀭𑀸 𑀧𑀯𑀢𑁆𑀢𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀲𑁄 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀤𑁂𑀯, 𑀳𑁄𑀳𑀺, 𑀅𑀳𑀫𑀦𑀼𑀲𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀳, 𑀢𑀲𑁆𑀫𑀸 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀆𑀡𑀸𑀘𑀓𑁆𑀓𑀁 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺 𑀦𑀸𑀫. 𑀲𑀫𑁆𑀫𑀤𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀲𑀻𑀢𑀺 𑀲𑀫𑁆𑀫𑀸 𑀦𑀬𑁂𑀦 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀲𑀺. 𑀪𑀕𑀯𑀸 𑀳𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀓𑀣𑁂𑀢𑀺, 𑀣𑁂𑀭𑁄 𑀢𑀫𑁂𑀯 𑀅𑀦𑀼𑀓𑀣𑁂𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑀸, 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑀸, 𑀅𑀕𑁆𑀕𑀫𑀕𑁆𑀕𑁂𑀦 𑀦𑀸𑀫𑀓𑀸𑀬𑀢𑁄𑀢𑀺. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸𑀢𑀺 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀸 𑀢𑁂𑀯𑀺𑀚𑁆𑀚𑀸𑀤𑀺𑀪𑀸𑀯𑀁 𑀅𑀧𑁆𑀧𑀢𑁆𑀢𑀸 𑀔𑀻𑀡𑀸𑀲𑀯𑀸.

𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀯𑀺𑀲𑀼𑀤𑁆𑀥𑀢𑁆𑀣𑀸𑀬. 𑀲𑀁𑀬𑁄𑀚𑀦𑀩𑀦𑁆𑀥𑀦𑀘𑁆𑀙𑀺𑀤𑀸𑀢𑀺 𑀲𑀁𑀬𑁄𑀚𑀦𑀲𑀗𑁆𑀔𑀸𑀢𑁂 𑀘𑁂𑀯 𑀩𑀦𑁆𑀥𑀦𑀲𑀗𑁆𑀔𑀸𑀢𑁂 𑀘 𑀓𑀺𑀮𑁂𑀲𑁂 𑀙𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑀸. 𑀯𑀺𑀚𑀺𑀢𑀲𑀗𑁆𑀕𑀸𑀫𑀦𑁆𑀢𑀺 𑀯𑀺𑀚𑀺𑀢𑀭𑀸𑀕𑀤𑁄𑀲𑀫𑁄𑀳𑀲𑀗𑁆𑀕𑀸𑀫𑀁, 𑀫𑀸𑀭𑀩𑀮𑀲𑁆𑀲 𑀯𑀺𑀚𑀺𑀢𑀢𑁆𑀢𑀸𑀧𑀺 𑀯𑀺𑀚𑀺𑀢𑀲𑀗𑁆𑀕𑀸𑀫𑀁. 𑀲𑀢𑁆𑀣𑀯𑀸𑀳𑀦𑁆𑀢𑀺 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀭𑀣𑁂 𑀆𑀭𑁄𑀧𑁂𑀢𑁆𑀯𑀸 𑀯𑁂𑀦𑁂𑀬𑁆𑀬𑀲𑀢𑁆𑀣𑀁 𑀯𑀸𑀳𑁂𑀢𑀺 𑀲𑀁𑀲𑀸𑀭𑀓𑀦𑁆𑀢𑀸𑀭𑀁 𑀉𑀢𑁆𑀢𑀸𑀭𑁂𑀢𑀻𑀢𑀺 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄, 𑀢𑀁 𑀲𑀢𑁆𑀣𑀯𑀸𑀳𑀁. 𑀧𑀮𑀸𑀧𑁄𑀢𑀺 𑀅𑀦𑁆𑀢𑁄𑀢𑀼𑀘𑁆𑀙𑁄 𑀤𑀼𑀲𑁆𑀲𑀻𑀮𑁄. 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀦𑁆𑀢𑀺 𑀆𑀤𑀺𑀘𑁆𑀘𑀩𑀦𑁆𑀥𑀼𑀁 𑀲𑀢𑁆𑀣𑀸𑀭𑀁 𑀤𑀲𑀩𑀮𑀁 𑀯𑀦𑁆𑀤𑀸𑀫𑀻𑀢𑀺 𑀯𑀤𑀢𑀺. 𑀲𑀢𑁆𑀢𑀫𑀁.

𑁮. 𑀧𑀭𑁄𑀲𑀳𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁬. 𑀅𑀝𑁆𑀞𑀫𑁂 𑀧𑀭𑁄𑀲𑀳𑀲𑁆𑀲𑀦𑁆𑀢𑀺 𑀅𑀢𑀺𑀭𑁂𑀓𑀲𑀳𑀲𑁆𑀲𑀁. 𑀅𑀓𑀼𑀢𑁄𑀪𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑁂 𑀓𑀼𑀢𑁄𑀘𑀺 𑀪𑀬𑀁 𑀦𑀢𑁆𑀣𑀺, 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀲𑁆𑀲 𑀯𑀸 𑀓𑀼𑀢𑁄𑀘𑀺 𑀪𑀬𑀁 𑀦𑀢𑁆𑀣𑀻𑀢𑀺 𑀦𑀺𑀩𑁆𑀩𑀸𑀦𑀁 𑀅𑀓𑀼𑀢𑁄𑀪𑀬𑀁 𑀦𑀸𑀫. 𑀇𑀲𑀻𑀦𑀁 𑀇𑀲𑀺𑀲𑀢𑁆𑀢𑀫𑁄𑀢𑀺 𑀯𑀺𑀧𑀲𑁆𑀲𑀺𑀢𑁄 𑀧𑀝𑁆𑀞𑀸𑀬 𑀇𑀲𑀻𑀦𑀁 𑀲𑀢𑁆𑀢𑀫𑀓𑁄 𑀇𑀲𑀺.

𑀓𑀺𑀁 𑀦𑀼 𑀢𑁂 𑀯𑀗𑁆𑀕𑀻𑀲𑀸𑀢𑀺 𑀇𑀤𑀁 𑀪𑀕𑀯𑀸 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀆𑀳. 𑀲𑀗𑁆𑀖𑀫𑀚𑁆𑀛𑁂 𑀓𑀺𑀭 𑀓𑀣𑀸 𑀉𑀤𑀧𑀸𑀤𑀺 ‘‘𑀯𑀗𑁆𑀕𑀻𑀲𑀢𑁆𑀣𑁂𑀭𑁄 𑀯𑀺𑀲𑁆𑀲𑀝𑁆𑀞𑀯𑀢𑁆𑀢𑁄, 𑀦𑁂𑀯 𑀉𑀤𑁆𑀤𑁂𑀲𑁂, 𑀦 𑀧𑀭𑀺𑀧𑀼𑀘𑁆𑀙𑀸𑀬, 𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀭𑁄𑀢𑀺, 𑀕𑀸𑀣𑀸 𑀩𑀦𑁆𑀥𑀦𑁆𑀢𑁄 𑀘𑀼𑀡𑁆𑀡𑀺𑀬𑀧𑀤𑀸𑀦𑀺 𑀓𑀭𑁄𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺. 𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀯𑀗𑁆𑀕𑀻𑀲𑀲𑁆𑀲 𑀧𑀝𑀺𑀪𑀸𑀦𑀲𑀫𑁆𑀧𑀢𑁆𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀘𑀺𑀦𑁆𑀢𑁂𑀢𑁆𑀯𑀸 𑀘𑀺𑀦𑁆𑀢𑁂𑀢𑁆𑀯𑀸 𑀯𑀤𑀢𑀻𑀢𑀺 𑀫𑀜𑁆𑀜𑀦𑁆𑀢𑀺, 𑀧𑀝𑀺𑀪𑀸𑀦𑀲𑀫𑁆𑀧𑀢𑁆𑀢𑀺𑀫𑀲𑁆𑀲 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀓𑀺𑀁 𑀦𑀼 𑀢𑁂 𑀯𑀗𑁆𑀕𑀻𑀲𑀸’’𑀢𑀺𑀆𑀤𑀺𑀫𑀸𑀳.

𑀉𑀫𑁆𑀫𑀕𑁆𑀕𑀧𑀣𑀦𑁆𑀢𑀺 𑀅𑀦𑁂𑀓𑀸𑀦𑀺 𑀓𑀺𑀮𑁂𑀲𑀼𑀫𑁆𑀫𑀼𑀚𑁆𑀚𑀦𑀲𑀢𑀸𑀦𑀺, 𑀯𑀝𑁆𑀝𑀧𑀣𑀢𑁆𑀢𑀸 𑀧𑀦 𑀧𑀣𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀪𑀺𑀚𑁆𑀚 𑀔𑀺𑀮𑀸𑀦𑀻𑀢𑀺 𑀭𑀸𑀕𑀔𑀺𑀮𑀸𑀤𑀻𑀦𑀺 𑀧𑀜𑁆𑀘 𑀪𑀺𑀦𑁆𑀤𑀺𑀢𑁆𑀯𑀸 𑀘𑀭𑀲𑀺. 𑀢𑀁 𑀧𑀲𑁆𑀲𑀣𑀸𑀢𑀺 𑀢𑀁 𑀏𑀯𑀁 𑀅𑀪𑀺𑀪𑀼𑀬𑁆𑀬 𑀪𑀺𑀦𑁆𑀤𑀺𑀢𑁆𑀯𑀸 𑀘𑀭𑀦𑁆𑀢𑀁 𑀩𑀼𑀤𑁆𑀥𑀁 𑀧𑀲𑁆𑀲𑀣. 𑀩𑀦𑁆𑀥𑀧𑀫𑀼𑀜𑁆𑀘𑀓𑀭𑀦𑁆𑀢𑀺 𑀩𑀦𑁆𑀥𑀦𑀫𑁄𑀘𑀦𑀓𑀭𑀁. 𑀅𑀲𑀺𑀢𑀦𑁆𑀢𑀺 𑀅𑀦𑀺𑀲𑁆𑀲𑀺𑀢𑀁. 𑀪𑀸𑀕𑀲𑁄 𑀧𑀯𑀺𑀪𑀚𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀓𑁄𑀝𑁆𑀞𑀸𑀲𑀯𑀲𑁂𑀦 𑀥𑀫𑁆𑀫𑀁 𑀯𑀺𑀪𑀚𑀦𑁆𑀢𑀁. 𑀧𑀯𑀺𑀪𑀚𑁆𑀚𑀸𑀢𑀺 𑀯𑀸 𑀧𑀸𑀞𑁄, 𑀅𑀗𑁆𑀕𑀧𑀘𑁆𑀘𑀗𑁆𑀕𑀓𑁄𑀝𑁆𑀞𑀸𑀲𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀧𑀲𑁆𑀲𑀣𑀸𑀢𑀺 𑀅𑀢𑁆𑀣𑁄.

𑀑𑀖𑀲𑁆𑀲𑀸𑀢𑀺 𑀘𑀢𑀼𑀭𑁄𑀖𑀲𑁆𑀲. 𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁. 𑀢𑀲𑁆𑀫𑀺𑀁 𑀘 𑀅𑀫𑀢𑁂 𑀅𑀓𑁆𑀔𑀸𑀢𑁂𑀢𑀺 𑀢𑀲𑁆𑀫𑀺𑀁 𑀢𑁂𑀦 𑀅𑀓𑁆𑀔𑀸𑀢𑁂 𑀅𑀫𑀢𑁂. 𑀥𑀫𑁆𑀫𑀤𑁆𑀤𑀲𑀸𑀢𑀺 𑀥𑀫𑁆𑀫𑀲𑁆𑀲 𑀧𑀲𑁆𑀲𑀺𑀢𑀸𑀭𑁄. 𑀞𑀺𑀢𑀸 𑀅𑀲𑀁𑀳𑀻𑀭𑀸𑀢𑀺 𑀅𑀲𑀁𑀳𑀸𑀭𑀺𑀬𑀸 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑀸.

𑀅𑀢𑀺𑀯𑀺𑀚𑁆𑀛𑀸𑀢𑀺 𑀅𑀢𑀺𑀯𑀺𑀚𑁆𑀛𑀺𑀢𑁆𑀯𑀸. 𑀲𑀩𑁆𑀩𑀝𑁆𑀞𑀺𑀢𑀻𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀁 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀦𑀁 𑀯𑀸. 𑀅𑀢𑀺𑀓𑁆𑀓𑀫𑀫𑀤𑁆𑀤𑀲𑀸𑀢𑀺 𑀅𑀢𑀺𑀓𑁆𑀓𑀫𑀪𑀽𑀢𑀁 𑀦𑀺𑀩𑁆𑀩𑀸𑀦𑀫𑀤𑁆𑀤𑀲. 𑀅𑀕𑁆𑀕𑀦𑁆𑀢𑀺 𑀉𑀢𑁆𑀢𑀫𑀥𑀫𑁆𑀫𑀁. 𑀅𑀕𑁆𑀕𑁂𑀢𑀺 𑀯𑀸 𑀧𑀸𑀞𑁄, 𑀧𑀞𑀫𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀤𑀲𑀤𑁆𑀥𑀸𑀦𑀦𑁆𑀢𑀺 𑀧𑀜𑁆𑀘𑀦𑁆𑀦𑀁, 𑀅𑀕𑁆𑀕𑀥𑀫𑁆𑀫𑀁 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁, 𑀅𑀕𑁆𑀕𑁂 𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀲 𑀥𑀫𑁆𑀫𑁄 𑀲𑀼𑀤𑁂𑀲𑀺𑀢𑁄𑀢𑀺 𑀚𑀸𑀦𑀦𑁆𑀢𑁂𑀦 𑀘 𑀧𑀫𑀸𑀤𑁄 𑀦 𑀓𑀸𑀢𑀩𑁆𑀩𑁄, 𑀢𑀲𑁆𑀫𑀸. 𑀅𑀦𑀼𑀲𑀺𑀓𑁆𑀔𑁂𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑁂𑀬𑁆𑀬. 𑀅𑀝𑁆𑀞𑀫𑀁.

𑁯. 𑀓𑁄𑀡𑁆𑀟𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁭. 𑀦𑀯𑀫𑁂 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄𑀢𑀺 𑀧𑀞𑀫𑀁 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀢𑁆𑀢𑀸 𑀏𑀯𑀁 𑀕𑀳𑀺𑀢𑀦𑀸𑀫𑁄 𑀣𑁂𑀭𑁄. 𑀲𑀼𑀘𑀺𑀭𑀲𑁆𑀲𑁂𑀯𑀸𑀢𑀺 𑀓𑀻𑀯𑀘𑀺𑀭𑀲𑁆𑀲? 𑀤𑁆𑀯𑀸𑀤𑀲𑀦𑁆𑀦𑀁 𑀲𑀁𑀯𑀘𑁆𑀙𑀭𑀸𑀦𑀁. 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀢𑁆𑀣 𑀯𑀺𑀳𑀸𑀲𑀻𑀢𑀺. 𑀙𑀤𑁆𑀤𑀦𑁆𑀢𑀪𑀯𑀦𑁂 𑀫𑀦𑁆𑀤𑀸𑀓𑀺𑀦𑀺𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀲𑀦𑀝𑁆𑀞𑀸𑀦𑁂. 𑀓𑀲𑁆𑀫𑀸? 𑀯𑀺𑀳𑀸𑀭𑀕𑀭𑀼𑀢𑀸𑀬. 𑀲𑁄 𑀳𑀺 𑀧𑀜𑁆𑀜𑀯𑀸 𑀫𑀳𑀸𑀲𑀸𑀯𑀓𑁄. 𑀬𑀣𑁂𑀯 𑀪𑀕𑀯𑀢𑁄, 𑀏𑀯𑀫𑀲𑁆𑀲 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀕𑀼𑀡𑀸 𑀧𑀢𑁆𑀣𑀝𑀸𑀯. 𑀤𑁂𑀯𑀫𑀦𑀼𑀲𑁆𑀲𑀸 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀢𑁆𑀯𑀸 ‘‘𑀅𑀕𑁆𑀕𑀥𑀫𑁆𑀫𑀁 𑀧𑀝𑀺𑀯𑀺𑀤𑁆𑀥𑀲𑀸𑀯𑀓𑁄’’𑀢𑀺 𑀅𑀦𑀦𑁆𑀢𑀭𑀁 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀽𑀚𑁂𑀦𑁆𑀢𑀺. 𑀲𑀦𑁆𑀢𑀺𑀓𑀁 𑀆𑀕𑀢𑀸𑀦𑀜𑁆𑀘 𑀦𑀸𑀫 𑀢𑀣𑀸𑀭𑀽𑀧𑀸 𑀥𑀫𑁆𑀫𑀓𑀣𑀸 𑀯𑀸 𑀧𑀝𑀺𑀲𑀦𑁆𑀣𑀸𑀭𑁄 𑀯𑀸 𑀓𑀸𑀢𑀩𑁆𑀩𑁄 𑀳𑁄𑀢𑀺. 𑀣𑁂𑀭𑁄 𑀘 𑀯𑀺𑀳𑀸𑀭𑀕𑀭𑀼𑀓𑁄, 𑀢𑁂𑀦𑀲𑁆𑀲 𑀲𑁄 𑀧𑀧𑀜𑁆𑀘𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀇𑀢𑀺 𑀯𑀺𑀳𑀸𑀭𑀕𑀭𑀼𑀢𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀳𑀸𑀲𑀺.

𑀅𑀧𑀭𑀫𑁆𑀧𑀺 𑀓𑀸𑀭𑀡𑀁 𑁋 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀢𑀸𑀯 𑀲𑀩𑁆𑀩𑀲𑀸𑀯𑀓𑀸 𑀯𑀲𑁆𑀲𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀺. 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁂 𑀧𑀦 𑀫𑀚𑁆𑀛𑀝𑁆𑀞𑀸𑀦𑁂 𑀅𑀮𑀗𑁆𑀓𑀢𑀩𑀼𑀤𑁆𑀥𑀸𑀲𑀦𑀫𑁆𑀳𑀺 𑀲𑀢𑁆𑀣𑀭𑀺 𑀦𑀺𑀲𑀺𑀦𑁆𑀦𑁂 𑀤𑀓𑁆𑀔𑀺𑀡𑀳𑀢𑁆𑀣𑀧𑀲𑁆𑀲𑁂 𑀥𑀫𑁆𑀫𑀲𑁂𑀦𑀸𑀧𑀢𑀺, 𑀯𑀸𑀫𑀳𑀢𑁆𑀣𑀧𑀲𑁆𑀲𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀦𑀺𑀲𑀻𑀤𑀢𑀺, 𑀢𑁂𑀲𑀁 𑀧𑀺𑀝𑁆𑀞𑀺𑀪𑀸𑀕𑁂 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲 𑀆𑀲𑀦𑀁 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀲𑁂𑀲𑀸 𑀪𑀺𑀓𑁆𑀔𑀽 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀅𑀕𑁆𑀕𑀥𑀫𑁆𑀫𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀘 𑀫𑀳𑀮𑁆𑀮𑀓𑀢𑁆𑀢𑀸 𑀘 𑀣𑁂𑀭𑁂 𑀲𑀕𑀸𑀭𑀯𑀸 𑀣𑁂𑀭𑀁 𑀫𑀳𑀸𑀩𑁆𑀭𑀳𑁆𑀫𑀁 𑀯𑀺𑀬 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀆𑀲𑀻𑀯𑀺𑀲𑀁 𑀯𑀺𑀬 𑀘 𑀫𑀜𑁆𑀜𑀫𑀸𑀦𑀸 𑀥𑀼𑀭𑀸𑀲𑀦𑁂 𑀦𑀺𑀲𑀻𑀤𑀦𑁆𑀢𑀸 𑀑𑀢𑁆𑀢𑀧𑁆𑀧𑀦𑁆𑀢𑀺 𑀳𑀭𑀸𑀬𑀦𑁆𑀢𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂𑀳𑀺 𑀥𑀼𑀭𑀸𑀲𑀦𑀢𑁆𑀣𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀢𑁂 𑀇𑀤𑀸𑀦𑀺 𑀥𑀼𑀭𑀸𑀲𑀦𑁂 𑀦𑀺𑀲𑀻𑀤𑀦𑁆𑀢𑀸 𑀫𑀫 𑀑𑀢𑁆𑀢𑀧𑁆𑀧𑀦𑁆𑀢𑀺 𑀳𑀭𑀸𑀬𑀦𑁆𑀢𑀺, 𑀨𑀸𑀲𑀼𑀯𑀺𑀳𑀸𑀭𑀁 𑀦𑁂𑀲𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀢𑀺𑀭𑀽𑀧𑁂 𑀓𑀸𑀮𑁂 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀚𑀦𑀧𑀤𑁂 𑀯𑀲𑀺𑀢𑀼’’𑀦𑁆𑀢𑀺 𑀆𑀳, 𑀲𑀢𑁆𑀣𑀸 𑀅𑀦𑀼𑀚𑀸𑀦𑀺.

𑀣𑁂𑀭𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀙𑀤𑁆𑀤𑀦𑁆𑀢𑀪𑀯𑀦𑁂 𑀫𑀦𑁆𑀤𑀸𑀓𑀺𑀦𑀺𑀢𑀻𑀭𑀁 𑀕𑀢𑁄. 𑀧𑀼𑀩𑁆𑀩𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀸𑀭𑀺𑀘𑀭𑀺𑀬𑀸𑀬 𑀓𑀢𑀧𑀭𑀺𑀘𑀬𑀸 𑀅𑀝𑁆𑀞𑀲𑀳𑀲𑁆𑀲𑀸 𑀳𑀢𑁆𑀣𑀺𑀦𑀸𑀕𑀸 𑀣𑁂𑀭𑀁 𑀤𑀺𑀲𑁆𑀯𑀸𑀯 ‘‘𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀆𑀕𑀢’’𑀦𑁆𑀢𑀺 𑀦𑀔𑁂𑀳𑀺 𑀘𑀗𑁆𑀓𑀫𑀦𑀁 𑀦𑀺𑀢𑁆𑀢𑀺𑀡𑀁 𑀓𑀢𑁆𑀯𑀸 𑀆𑀯𑀭𑀡𑀲𑀸𑀔𑀸 𑀳𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀯𑀢𑁆𑀢𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀘𑁂 𑀳𑀺 𑀫𑀬𑀁 ‘𑀅𑀬𑀁 𑀣𑁂𑀭𑀲𑁆𑀲 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀢𑀺, 𑀅𑀬𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫, 𑀣𑁂𑀭𑁄 𑀩𑀳𑀼𑀜𑀸𑀢𑀺𑀓𑀕𑀸𑀫𑀁 𑀕𑀢𑁄 𑀯𑀺𑀬 𑀬𑀣𑀸𑀥𑁄𑀢𑁂𑀦𑁂𑀯 𑀧𑀢𑁆𑀢𑁂𑀦 𑀕𑀫𑀺𑀲𑁆𑀲𑀢𑀺, 𑀯𑀸𑀭𑁂𑀦 𑀦𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫, 𑀏𑀓𑀲𑁆𑀲 𑀧𑀦 𑀯𑀸𑀭𑁂 𑀧𑀢𑁆𑀢𑁂 𑀲𑁂𑀲𑁂𑀳𑀺𑀧𑀺 𑀦𑀧𑁆𑀧𑀫𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀸𑀭𑀁 𑀞𑀧𑀬𑀺𑀁𑀲𑀼. 𑀯𑀸𑀭𑀺𑀓𑀦𑀸𑀕𑁄 𑀧𑀸𑀢𑁄𑀯 𑀣𑁂𑀭𑀲𑁆𑀲 𑀫𑀼𑀔𑁄𑀤𑀓𑀜𑁆𑀘 𑀤𑀦𑁆𑀢𑀓𑀝𑁆𑀞𑀜𑁆𑀘 𑀞𑀧𑁂𑀢𑀺, 𑀯𑀢𑁆𑀢𑀁 𑀓𑀭𑁄𑀢𑀺.

𑀫𑀦𑁆𑀤𑀸𑀓𑀺𑀦𑀺𑀧𑁄𑀓𑁆𑀔𑀭𑀡𑀻 𑀦𑀸𑀫 𑀘𑁂𑀲𑀸 𑀧𑀡𑁆𑀡𑀸𑀲𑀬𑁄𑀚𑀦𑀸 𑀳𑁄𑀢𑀺. 𑀢𑀲𑁆𑀲𑀸 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀲𑁂𑀯𑀸𑀮𑁄 𑀯𑀸 𑀧𑀡𑀓𑀁 𑀯𑀸 𑀦𑀢𑁆𑀣𑀺, 𑀨𑀮𑀺𑀓𑀯𑀡𑁆𑀡𑀁 𑀉𑀤𑀓𑀫𑁂𑀯 𑀳𑁄𑀢𑀺. 𑀢𑀢𑁄 𑀧𑀭𑀁 𑀧𑀦 𑀓𑀝𑀺𑀧𑁆𑀧𑀫𑀸𑀡𑁂 𑀉𑀤𑀓𑁂 𑀅𑀟𑁆𑀠𑀬𑁄𑀚𑀦𑀯𑀺𑀢𑁆𑀣𑀢𑀁 𑀲𑁂𑀲𑀧𑀤𑀼𑀫𑀯𑀦𑀁 𑀧𑀡𑁆𑀡𑀸𑀲𑀬𑁄𑀚𑀦𑀁 𑀲𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁. 𑀢𑀤𑀦𑀦𑁆𑀢𑀭𑀁 𑀢𑀸𑀯 𑀫𑀳𑀦𑁆𑀢𑀫𑁂𑀯 𑀭𑀢𑁆𑀢𑀧𑀤𑀼𑀫𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀭𑀢𑁆𑀢𑀓𑀼𑀫𑀼𑀤𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀲𑁂𑀢𑀓𑀼𑀫𑀼𑀤𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀦𑀻𑀮𑀼𑀧𑁆𑀧𑀮𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀭𑀢𑁆𑀢𑀼𑀧𑁆𑀧𑀮𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀲𑀼𑀕𑀦𑁆𑀥𑀭𑀢𑁆𑀢𑀲𑀸𑀮𑀺𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀏𑀴𑀸𑀮𑀼𑀓𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀸𑀤𑀻𑀦𑀺 𑀫𑀥𑀼𑀭𑀭𑀲𑀸𑀦𑀺 𑀯𑀮𑁆𑀮𑀺𑀨𑀮𑀸𑀦𑀺, 𑀢𑀤𑀦𑀦𑁆𑀢𑀭𑀁 𑀅𑀟𑁆𑀠𑀬𑁄𑀚𑀦𑀯𑀺𑀢𑁆𑀣𑀸𑀭𑀫𑁂𑀯 𑀉𑀘𑁆𑀙𑀼𑀯𑀦𑀁, 𑀢𑀢𑁆𑀣 𑀧𑀽𑀕𑀭𑀼𑀓𑁆𑀔𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀸 𑀉𑀘𑁆𑀙𑀽, 𑀢𑀤𑀦𑀦𑁆𑀢𑀭𑀁 𑀓𑀤𑀮𑀺𑀯𑀦𑀁, 𑀬𑀢𑁄 𑀤𑀼𑀯𑁂 𑀧𑀓𑁆𑀓𑀸𑀦𑀺 𑀔𑀸𑀤𑀦𑁆𑀢𑀸 𑀓𑀺𑀮𑀫𑀦𑁆𑀢𑀺, 𑀢𑀤𑀦𑀦𑁆𑀢𑀭𑀁 𑀘𑀸𑀝𑀺𑀧𑁆𑀧𑀫𑀸𑀡𑀨𑀮𑀁 𑀧𑀦𑀲𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀚𑀫𑁆𑀩𑀼𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀅𑀫𑁆𑀩𑀯𑀦𑀁, 𑀢𑀤𑀦𑀦𑁆𑀢𑀭𑀁 𑀓𑀧𑀺𑀢𑁆𑀣𑀯𑀦𑀦𑁆𑀢𑀺. 𑀲𑀗𑁆𑀔𑁂𑀧𑀢𑁄 𑀢𑀲𑁆𑀫𑀺𑀁 𑀤𑀳𑁂 𑀔𑀸𑀤𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀨𑀮𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀼𑀲𑀼𑀫𑀸𑀦𑀁 𑀧𑀼𑀧𑁆𑀨𑀦𑀲𑀫𑀬𑁂 𑀯𑀸𑀢𑁄 𑀭𑁂𑀡𑀼𑀯𑀝𑁆𑀝𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀧𑀤𑀼𑀫𑀺𑀦𑀺𑀧𑀢𑁆𑀢𑁂𑀲𑀼 𑀞𑀧𑁂𑀢𑀺, 𑀢𑀢𑁆𑀣 𑀉𑀤𑀓𑀨𑀼𑀲𑀺𑀢𑀸𑀦𑀺 𑀧𑀢𑀦𑁆𑀢𑀺. 𑀢𑀢𑁄 𑀆𑀤𑀺𑀘𑁆𑀘𑀧𑀸𑀓𑁂𑀦 𑀧𑀘𑁆𑀘𑀺𑀢𑁆𑀯𑀸 𑀧𑀓𑁆𑀓𑀧𑀬𑁄𑀖𑀦𑀺𑀓𑀸 𑀯𑀺𑀬 𑀢𑀺𑀝𑁆𑀞𑀢𑀺, 𑀏𑀢𑀁 𑀧𑁄𑀓𑁆𑀔𑀭𑀫𑀥𑀼 𑀦𑀸𑀫, 𑀢𑀁 𑀣𑁂𑀭𑀲𑁆𑀲 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺. 𑀫𑀼𑀴𑀸𑀮𑀁 𑀦𑀗𑁆𑀕𑀮𑀲𑀻𑀲𑀫𑀢𑁆𑀢𑀁 𑀳𑁄𑀢𑀺, 𑀢𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺. 𑀪𑀺𑀲𑀁 𑀫𑀳𑀸𑀪𑁂𑀭𑀺𑀧𑁄𑀓𑁆𑀔𑀭𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀢𑀲𑁆𑀲 𑀏𑀓𑀲𑁆𑀫𑀺𑀁 𑀧𑀩𑁆𑀩𑁂 𑀧𑀸𑀤𑀖𑀝𑀓𑀧𑁆𑀧𑀫𑀸𑀡𑀁 𑀔𑀻𑀭𑀁 𑀳𑁄𑀢𑀺, 𑀢𑀁 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺. 𑀧𑁄𑀓𑁆𑀔𑀭𑀝𑁆𑀞𑀻𑀦𑀺 𑀫𑀥𑀼𑀲𑀓𑁆𑀔𑀭𑀸𑀬 𑀬𑁄𑀚𑁂𑀢𑁆𑀯𑀸 𑀤𑁂𑀦𑁆𑀢𑀺. 𑀉𑀘𑁆𑀙𑀼𑀁 𑀧𑀸𑀲𑀸𑀡𑀧𑀺𑀝𑁆𑀞𑁂 𑀞𑀧𑁂𑀢𑁆𑀯𑀸 𑀧𑀸𑀤𑁂𑀦 𑀅𑀓𑁆𑀓𑀫𑀦𑁆𑀢𑀺. 𑀢𑀢𑁄 𑀭𑀲𑁄 𑀧𑀕𑁆𑀖𑀭𑀺𑀢𑁆𑀯𑀸 𑀲𑁄𑀡𑁆𑀟𑀺𑀆𑀯𑀸𑀝𑁂 𑀧𑀽𑀭𑁂𑀢𑁆𑀯𑀸, 𑀆𑀤𑀺𑀘𑁆𑀘𑀧𑀸𑀓𑁂𑀦 𑀧𑀘𑁆𑀘𑀺𑀢𑁆𑀯𑀸 𑀔𑀻𑀭𑀧𑀸𑀲𑀸𑀡𑀧𑀺𑀡𑁆𑀟𑁄 𑀯𑀺𑀬 𑀢𑀺𑀝𑁆𑀞𑀢𑀺, 𑀢𑀁 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺. 𑀧𑀦𑀲𑀓𑀤𑀮𑀺𑀅𑀫𑁆𑀩𑀧𑀓𑁆𑀓𑀸𑀤𑀻𑀲𑀼 𑀓𑀣𑀸𑀯 𑀦𑀢𑁆𑀣𑀺.

𑀓𑁂𑀮𑀸𑀲𑀧𑀩𑁆𑀩𑀢𑁂 𑀦𑀸𑀕𑀤𑀢𑁆𑀢𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀯𑀲𑀢𑀺. 𑀣𑁂𑀭𑁄 𑀓𑀸𑀮𑁂𑀦 𑀓𑀸𑀮𑀁 𑀢𑀲𑁆𑀲 𑀯𑀺𑀫𑀸𑀦𑀤𑁆𑀯𑀸𑀭𑀁 𑀕𑀘𑁆𑀙𑀢𑀺. 𑀲𑁄 𑀦𑀯𑀲𑀧𑁆𑀧𑀺𑀧𑁄𑀓𑁆𑀔𑀭𑀫𑀥𑀼𑀘𑀼𑀡𑁆𑀡𑀬𑀼𑀢𑁆𑀢𑀲𑁆𑀲 𑀦𑀺𑀭𑀼𑀤𑀓𑀧𑀸𑀬𑀸𑀲𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺. 𑀲𑁄 𑀓𑀺𑀭 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀼𑀕𑀦𑁆𑀥𑀲𑀧𑁆𑀧𑀺𑀦𑀸 𑀔𑀻𑀭𑀲𑀮𑀸𑀓𑀁 𑀅𑀤𑀸𑀲𑀺. 𑀢𑁂𑀦𑀲𑁆𑀲𑁂𑀢𑀁 𑀪𑁄𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀣𑁂𑀭𑁄 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀮𑁄𑀓𑁂𑀦𑁆𑀢𑁄 𑀧𑀭𑀺𑀓𑁆𑀔𑀻𑀡𑀪𑀸𑀯𑀁 𑀜𑀢𑁆𑀯𑀸 ‘‘𑀓𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀳𑀢𑁆𑀣𑀺𑀦𑀸𑀕𑁂𑀳𑀺 𑀫𑀁 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀉𑀧𑀝𑁆𑀞𑀳𑀦𑁆𑀢𑁂𑀳𑀺 𑀤𑀼𑀓𑁆𑀓𑀭𑀁 𑀓𑀢𑀁, 𑀲𑀢𑁆𑀣𑀸𑀭𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀏𑀢𑁂𑀲𑀁𑀬𑁂𑀯 𑀲𑀦𑁆𑀢𑀺𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑁂𑀦 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀘𑀺𑀭𑀲𑁆𑀲𑁂𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺.

𑀦𑀸𑀫𑀜𑁆𑀘𑀸𑀢𑀺 𑀓𑀲𑁆𑀫𑀸 𑀦𑀸𑀫𑀁 𑀲𑀸𑀯𑁂𑀢𑀺? 𑀣𑁂𑀭𑀜𑁆𑀳𑀺 𑀓𑁂𑀘𑀺 𑀲𑀜𑁆𑀚𑀸𑀦𑀦𑁆𑀢𑀺, 𑀓𑁂𑀘𑀺 𑀦 𑀲𑀜𑁆𑀚𑀸𑀦𑀦𑁆𑀢𑀺. 𑀢𑀢𑁆𑀣 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑁂 𑀫𑀁 𑀅𑀚𑀸𑀦𑀦𑁆𑀢𑀸 ‘𑀓𑁄 𑀏𑀲 𑀧𑀡𑁆𑀟𑀭𑀲𑀻𑀲𑁄 𑀑𑀪𑀕𑁆𑀕𑁄 𑀕𑁄𑀧𑀸𑀦𑀲𑀺𑀯𑀗𑁆𑀓𑁄 𑀫𑀳𑀮𑁆𑀮𑀓𑁄 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀻’𑀢𑀺 𑀘𑀺𑀢𑁆𑀢𑀁 𑀧𑀤𑀽𑀲𑁂𑀲𑁆𑀲𑀦𑁆𑀢𑀺, 𑀢𑁂 𑀅𑀧𑀸𑀬𑀧𑀽𑀭𑀓𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀬𑁂 𑀧𑀦 𑀫𑀁 𑀚𑀸𑀦𑀦𑁆𑀢𑀸 𑁋 ‘𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀲𑀢𑁆𑀣𑀸 𑀯𑀺𑀬 𑀧𑀜𑁆𑀜𑀸𑀢𑁄 𑀧𑀸𑀓𑀝𑁄 𑀫𑀳𑀸𑀲𑀸𑀯𑀓𑁄’𑀢𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑁆𑀲𑀦𑁆𑀢𑀺, 𑀢𑁂 𑀲𑀕𑁆𑀕𑀽𑀧𑀕𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺, 𑀲𑀢𑁆𑀢𑀸𑀦𑀁 𑀅𑀧𑀸𑀬𑀫𑀕𑁆𑀕𑀁 𑀧𑀺𑀤𑀳𑀺𑀢𑁆𑀯𑀸 𑀲𑀕𑁆𑀕𑀫𑀕𑁆𑀕𑀁 𑀯𑀺𑀯𑀭𑀦𑁆𑀢𑁄 𑀦𑀸𑀫𑀁 𑀲𑀸𑀯𑁂𑀢𑀺.

𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁄𑀢𑀺 𑀧𑀞𑀫𑀁 𑀲𑀢𑁆𑀣𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀺, 𑀧𑀘𑁆𑀙𑀸 𑀣𑁂𑀭𑁄, 𑀢𑀲𑁆𑀫𑀸 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁄𑀢𑀺, 𑀯𑀼𑀘𑁆𑀘𑀢𑀺. 𑀢𑀺𑀩𑁆𑀩𑀦𑀺𑀓𑁆𑀓𑀫𑁄𑀢𑀺 𑀩𑀸𑀴𑁆𑀳𑀯𑀻𑀭𑀺𑀬𑁄. 𑀯𑀺𑀯𑁂𑀓𑀸𑀦𑀦𑁆𑀢𑀺 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀁. 𑀢𑁂𑀯𑀺𑀚𑁆𑀚𑁄, 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑁄𑀢𑀺 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀘𑀢𑀲𑁆𑀲𑁄 𑀯𑀤𑀢𑀺. 𑀇𑀢𑀭𑀸 𑀤𑁆𑀯𑁂 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑀸, 𑀣𑁂𑀭𑁄 𑀧𑀦 𑀙𑀴𑀪𑀺𑀜𑁆𑀜𑁄𑀯. 𑀇𑀫𑀺𑀲𑁆𑀲𑀸 𑀘 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀧𑀭𑀺𑀲𑀸 𑀲𑀦𑁆𑀦𑀺𑀲𑀻𑀤𑀺. 𑀧𑀭𑀺𑀲𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀣𑁂𑀭𑁄 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀧𑀭𑀺𑀓𑁆𑀔𑀻𑀡𑀸 𑀫𑁂, 𑀪𑀦𑁆𑀢𑁂, 𑀆𑀬𑀼𑀲𑀗𑁆𑀔𑀸𑀭𑀸, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀁 𑀅𑀦𑀼𑀚𑀸𑀦𑀸𑀧𑁂𑀲𑀺. 𑀓𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺 𑀓𑁄𑀡𑁆𑀟𑀜𑁆𑀜𑀸𑀢𑀺? 𑀉𑀧𑀝𑁆𑀞𑀸𑀓𑁂𑀳𑀺 𑀫𑁂, 𑀪𑀦𑁆𑀢𑁂, 𑀳𑀢𑁆𑀣𑀺𑀦𑀸𑀕𑁂𑀳𑀺 𑀤𑀼𑀓𑁆𑀓𑀭𑀁 𑀓𑀢𑀁, 𑀢𑁂𑀲𑀁 𑀲𑀦𑁆𑀢𑀺𑀓𑁂𑀢𑀺. 𑀲𑀢𑁆𑀣𑀸 𑀅𑀦𑀼𑀚𑀸𑀦𑀺.

𑀣𑁂𑀭𑁄 𑀤𑀲𑀩𑀮𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑁋 ‘‘𑀧𑀼𑀩𑁆𑀩𑀁 𑀢𑀁 𑀫𑁂, 𑀪𑀦𑁆𑀢𑁂, 𑀧𑀞𑀫𑀤𑀲𑁆𑀲𑀦𑀁, 𑀇𑀤𑀁 𑀧𑀘𑁆𑀙𑀺𑀫𑀤𑀲𑁆𑀲𑀦’’𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑁂 𑀫𑀳𑀸𑀚𑀦𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸, 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑁄 𑁋 ‘‘𑀫𑀸 𑀲𑁄𑀘𑀺𑀢𑁆𑀣, 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀩𑀼𑀤𑁆𑀥𑀸 𑀯𑀸 𑀳𑁄𑀦𑁆𑀢𑀼 𑀩𑀼𑀤𑁆𑀥𑀲𑀸𑀯𑀓𑀸 𑀯𑀸, 𑀉𑀧𑁆𑀧𑀦𑁆𑀦𑀸 𑀲𑀗𑁆𑀔𑀸𑀭𑀸 𑀅𑀪𑀺𑀚𑁆𑀚𑀦𑀓𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀫𑀳𑀸𑀚𑀦𑀁 𑀑𑀯𑀤𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀫𑁆𑀫 𑀫𑀦𑁆𑀤𑀸𑀓𑀺𑀦𑀺𑀢𑀻𑀭𑁂 𑀑𑀢𑀭𑀺𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀬𑀁 𑀦𑁆𑀳𑀢𑁆𑀯𑀸 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑁄 𑀓𑀢𑀼𑀢𑁆𑀢𑀭𑀸𑀲𑀗𑁆𑀕𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀢𑀬𑁄 𑀬𑀸𑀫𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀩𑀮𑀯𑀧𑀘𑁆𑀘𑀽𑀲𑀲𑀫𑀬𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀣𑁂𑀭𑀲𑁆𑀲 𑀲𑀳𑀧𑀭𑀺𑀦𑀺𑀩𑁆𑀩𑀸𑀦𑀸 𑀳𑀺𑀫𑀯𑀢𑀺 𑀲𑀩𑁆𑀩𑀭𑀼𑀓𑁆𑀔𑀸 𑀧𑀼𑀧𑁆𑀨𑁂𑀳𑀺 𑀘 𑀨𑀮𑁂𑀳𑀺 𑀘 𑀑𑀦𑀢𑀯𑀺𑀦𑀢𑀸 𑀅𑀳𑁂𑀲𑀼𑀁. 𑀯𑀸𑀭𑀺𑀓𑀦𑀸𑀕𑁄 𑀣𑁂𑀭𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀧𑀸𑀢𑁄𑀯 𑀫𑀼𑀔𑁄𑀤𑀓𑀤𑀦𑁆𑀢𑀓𑀝𑁆𑀞𑀸𑀦𑀺 𑀉𑀧𑀝𑁆𑀞𑀧𑁂𑀢𑁆𑀯𑀸 𑀯𑀢𑁆𑀢𑀁 𑀓𑀢𑁆𑀯𑀸 𑀔𑀸𑀤𑀦𑀻𑀬𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀅𑀝𑁆𑀞𑀸𑀲𑀺. 𑀲𑁄 𑀬𑀸𑀯 𑀲𑀽𑀭𑀺𑀬𑀼𑀕𑁆𑀕𑀫𑀦𑀸 𑀣𑁂𑀭𑀲𑁆𑀲 𑀦𑀺𑀓𑁆𑀔𑀫𑀦𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀺𑀁 𑀦𑀼 𑀔𑁄 𑀏𑀢𑀁? 𑀧𑀼𑀩𑁆𑀩𑁂 𑀅𑀬𑁆𑀬𑁄 𑀧𑀸𑀢𑁄𑀯 𑀘𑀗𑁆𑀓𑀫𑀢𑀺, 𑀫𑀼𑀔𑀁 𑀥𑁄𑀯𑀢𑀺. 𑀅𑀚𑁆𑀚 𑀧𑀦 𑀧𑀡𑁆𑀡𑀲𑀸𑀮𑀢𑁄𑀧𑀺 𑀦 𑀦𑀺𑀓𑁆𑀔𑀫𑀢𑀻’’𑀢𑀺 𑀓𑀼𑀝𑀺𑀤𑁆𑀯𑀸𑀭𑀁 𑀓𑀫𑁆𑀧𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀣𑁂𑀭𑀁 𑀦𑀺𑀲𑀺𑀦𑁆𑀦𑀓𑀫𑁂𑀯 𑀤𑀺𑀲𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀭𑀺𑀬𑁂𑀲𑀦𑁆𑀢𑁄 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑀁 𑀜𑀢𑁆𑀯𑀸 𑁋 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀣𑁂𑀭𑁄’’𑀢𑀺 𑀲𑁄𑀡𑁆𑀟𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀭𑀯𑀁 𑀯𑀺𑀭𑀯𑀺. 𑀲𑀓𑀮𑀳𑀺𑀫𑀯𑀦𑁆𑀢𑁄 𑀏𑀓𑀦𑀺𑀦𑁆𑀦𑀸𑀤𑁄 𑀅𑀳𑁄𑀲𑀺. 𑀅𑀝𑁆𑀞𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀣𑁂𑀭𑀁 𑀚𑁂𑀝𑁆𑀞𑀓𑀦𑀸𑀕𑀲𑁆𑀲 𑀓𑀼𑀫𑁆𑀪𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀼𑀧𑀼𑀧𑁆𑀨𑀺𑀢𑀭𑀼𑀓𑁆𑀔𑀲𑀸𑀔𑀸 𑀕𑀳𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀓𑀮𑀳𑀺𑀫𑀯𑀦𑁆𑀢𑀁 𑀅𑀦𑀼𑀯𑀺𑀘𑀭𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀆𑀕𑀢𑀸.

𑀲𑀓𑁆𑀓𑁄 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢, 𑀅𑀫𑁆𑀳𑀸𑀓𑀁 𑀚𑁂𑀝𑁆𑀞𑀪𑀸𑀢𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫, 𑀦𑀯𑀬𑁄𑀚𑀦𑀺𑀓𑀁 𑀲𑀩𑁆𑀩𑀭𑀢𑀦𑀫𑀬𑀁 𑀓𑀽𑀝𑀸𑀕𑀸𑀭𑀁 𑀫𑀸𑀧𑁂𑀳𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀣𑁂𑀭𑀁 𑀢𑀢𑁆𑀣 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀳𑀢𑁆𑀣𑀺𑀦𑀸𑀕𑀸𑀦𑀁 𑀅𑀤𑀸𑀲𑀺. 𑀢𑁂 𑀓𑀽𑀝𑀸𑀕𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀬𑁄𑀚𑀦𑀲𑀳𑀲𑁆𑀲𑀁 𑀳𑀺𑀫𑀯𑀦𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀆𑀯𑀺𑀚𑁆𑀛𑀺𑀁𑀲𑀼. 𑀢𑁂𑀲𑀁 𑀳𑀢𑁆𑀣𑀢𑁄 𑀆𑀓𑀸𑀲𑀝𑁆𑀞𑀓𑀸 𑀤𑁂𑀯𑀸 𑀕𑀳𑁂𑀢𑁆𑀯𑀸 𑀲𑀸𑀥𑀼𑀓𑀻𑀴𑀺𑀢𑀁 𑀓𑀻𑀴𑀺𑀁𑀲𑀼. 𑀢𑀢𑁄 𑀯𑀲𑁆𑀲𑀯𑀮𑀸𑀳𑀓𑀸 𑀲𑀻𑀢𑀯𑀮𑀸𑀳𑀓𑀸 𑀉𑀡𑁆𑀳𑀯𑀮𑀸𑀳𑀓𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀢𑀸𑀯𑀢𑀺𑀁𑀲𑀸𑀢𑀺 𑀏𑀢𑁂𑀦𑀼𑀧𑀸𑀬𑁂𑀦 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀓𑀽𑀝𑀸𑀕𑀸𑀭𑀁 𑀅𑀕𑀫𑀸𑀲𑀺, 𑀧𑀼𑀦 𑀩𑁆𑀭𑀳𑁆𑀫𑀸𑀦𑁄 𑀤𑁂𑀯𑀸𑀦𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑁂𑀦 𑀳𑀢𑁆𑀣𑀺𑀦𑀸𑀕𑀸𑀦𑀁𑀬𑁂𑀯 𑀓𑀽𑀝𑀸𑀕𑀸𑀭𑀁 𑀅𑀤𑀁𑀲𑀼. 𑀏𑀓𑁂𑀓𑀸 𑀤𑁂𑀯𑀢𑀸 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀘𑀦𑁆𑀤𑀦𑀖𑀝𑀺𑀓𑀁 𑀆𑀳𑀭𑀺, 𑀘𑀺𑀢𑀓𑁄 𑀦𑀯𑀬𑁄𑀚𑀦𑀺𑀓𑁄 𑀅𑀳𑁄𑀲𑀺. 𑀓𑀽𑀝𑀸𑀕𑀸𑀭𑀁 𑀘𑀺𑀢𑀓𑀁 𑀆𑀭𑁄𑀧𑀬𑀺𑀁𑀲𑀼. 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀲𑀚𑁆𑀛𑀸𑀬𑀫𑀓𑀁𑀲𑀼. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀥𑀫𑁆𑀫𑀁 𑀓𑀣𑁂𑀲𑀺, 𑀩𑀳𑀽𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀧𑀼𑀦𑀤𑀺𑀯𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬𑀫𑁂𑀯 𑀘𑀺𑀢𑀓𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀲𑀼𑀫𑀦𑀫𑀓𑀼𑀴𑀯𑀡𑁆𑀡𑀸𑀦𑀁 𑀥𑀸𑀢𑀽𑀦𑀁 𑀧𑀭𑀺𑀲𑀸𑀯𑀦𑀁 𑀧𑀽𑀭𑁂𑀢𑁆𑀯𑀸 𑀪𑀕𑀯𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀴𑀼𑀯𑀦𑀯𑀺𑀳𑀸𑀭𑀓𑁄𑀝𑁆𑀞𑀓𑀁 𑀲𑀫𑁆𑀧𑀢𑁆𑀢𑁂 𑀆𑀳𑀭𑀺𑀢𑁆𑀯𑀸 𑀲𑀢𑁆𑀣𑀼 𑀳𑀢𑁆𑀣𑁂 𑀞𑀧𑀬𑀺𑀁𑀲𑀼. 𑀲𑀢𑁆𑀣𑀸 𑀥𑀸𑀢𑀼𑀧𑀭𑀺𑀲𑀸𑀯𑀦𑀁 𑀕𑀳𑁂𑀢𑁆𑀯𑀸 𑀧𑀣𑀯𑀺𑀬𑀸 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺, 𑀫𑀳𑀸𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀭𑀚𑀢𑀩𑀼𑀩𑁆𑀩𑀼𑀴𑀲𑀤𑀺𑀲𑀁 𑀘𑁂𑀢𑀺𑀬𑀁 𑀦𑀺𑀓𑁆𑀔𑀫𑀺. 𑀲𑀢𑁆𑀣𑀸 𑀲𑀳𑀢𑁆𑀣𑁂𑀦 𑀘𑁂𑀢𑀺𑀬𑁂 𑀥𑀸𑀢𑀼𑀬𑁄 𑀦𑀺𑀥𑁂𑀲𑀺. 𑀅𑀚𑁆𑀚𑀸𑀧𑀺 𑀓𑀺𑀭 𑀢𑀁 𑀘𑁂𑀢𑀺𑀬𑀁 𑀥𑀭𑀢𑀺𑀬𑁂𑀯𑀸𑀢𑀺. 𑀦𑀯𑀫𑀁.

𑁧𑁦. 𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁮. 𑀤𑀲𑀫𑁂 𑀲𑀫𑀦𑁆𑀦𑁂𑀲𑀢𑀻𑀢𑀺 𑀧𑀭𑀺𑀬𑁂𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀦𑀕𑀲𑁆𑀲𑀸𑀢𑀺 𑀧𑀩𑁆𑀩𑀢𑀲𑁆𑀲. 𑀫𑀼𑀦𑀺𑀦𑁆𑀢𑀺 𑀩𑀼𑀤𑁆𑀥𑀫𑀼𑀦𑀺𑀁. 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀼𑀦𑁆𑀢𑀺 𑀤𑀼𑀓𑁆𑀔𑀧𑀸𑀭𑀁 𑀕𑀢𑀁. 𑀲𑀫𑀦𑁆𑀦𑁂𑀲𑀦𑁆𑀢𑀺 𑀲𑀫𑀦𑁆𑀦𑁂𑀲𑀦𑁆𑀢𑁄. 𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀦𑁆𑀢𑀺 𑀏𑀯𑀁 𑀲𑀩𑁆𑀩𑀕𑀼𑀡𑀲𑀫𑁆𑀧𑀦𑁆𑀦𑀁. 𑀅𑀦𑁂𑀓𑀸𑀓𑀸𑀭𑀲𑀫𑁆𑀧𑀦𑁆𑀦𑀦𑁆𑀢𑀺 𑀅𑀦𑁂𑀓𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀤𑀲𑀫𑀁.

𑁧𑁧. 𑀕𑀕𑁆𑀕𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁯. 𑀏𑀓𑀸𑀤𑀲𑀫𑁂 𑀢𑁆𑀬𑀸𑀲𑁆𑀲𑀼𑀤𑀦𑁆𑀢𑀺 𑀢𑁂 𑀅𑀲𑁆𑀲𑀼𑀤𑀁. 𑀅𑀲𑁆𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀯𑀡𑁆𑀡𑁂𑀦𑀸𑀢𑀺 𑀲𑀭𑀻𑀭𑀯𑀡𑁆𑀡𑁂𑀦. 𑀬𑀲𑀲𑀸𑀢𑀺 𑀧𑀭𑀺𑀯𑀸𑀭𑁂𑀦. 𑀯𑀺𑀕𑀢𑀫𑀮𑁄𑀯 𑀪𑀸𑀡𑀼𑀫𑀸𑀢𑀺 𑀯𑀺𑀕𑀢𑀫𑀮𑁄 𑀆𑀤𑀺𑀘𑁆𑀘𑁄 𑀯𑀺𑀬. 𑀏𑀓𑀸𑀤𑀲𑀫𑀁.

𑁧𑁨. 𑀯𑀗𑁆𑀕𑀻𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁦. 𑀤𑁆𑀯𑀸𑀤𑀲𑀫𑁂 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁. 𑀯𑀗𑁆𑀕𑀻𑀲𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀧𑀤𑀼𑀫𑀼𑀢𑁆𑀢𑀭𑀓𑀸𑀮𑁂 𑀧𑀝𑀺𑀪𑀸𑀦𑀲𑀫𑁆𑀧𑀦𑁆𑀦𑀁 𑀲𑀸𑀯𑀓𑀁 𑀤𑀺𑀲𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀯𑀸𑀤𑀓𑀸𑀫𑀢𑀸𑀬 𑀚𑀫𑁆𑀩𑀼𑀲𑀸𑀔𑀁 𑀧𑀭𑀺𑀳𑀭𑀺𑀢𑁆𑀯𑀸 𑀏𑀓𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀲𑀤𑁆𑀥𑀺𑀁 𑀯𑀸𑀤𑀁 𑀓𑀢𑁆𑀯𑀸 𑀯𑀸𑀤𑁂 𑀚𑀬𑀧𑀭𑀸𑀚𑀬𑀸𑀦𑀼𑀪𑀸𑀯𑁂𑀦 𑀢𑁂𑀦𑁂𑀯 𑀧𑀭𑀺𑀩𑁆𑀩𑀸𑀚𑀓𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀯𑀲𑀫𑀸𑀦𑀸𑀬 𑀏𑀓𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄 𑀯𑀬𑀁 𑀆𑀕𑀫𑁆𑀫 𑀫𑀸𑀢𑀺𑀢𑁄 𑀧𑀜𑁆𑀘𑀯𑀸𑀤𑀲𑀢𑀸𑀦𑀺, 𑀧𑀺𑀢𑀺𑀢𑁄 𑀧𑀜𑁆𑀘𑀯𑀸𑀤𑀲𑀢𑀸𑀦𑀻𑀢𑀺 𑀯𑀸𑀤𑀲𑀳𑀲𑁆𑀲𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀘𑀭𑀢𑀺. 𑀏𑀓𑀜𑁆𑀘 𑀯𑀺𑀚𑁆𑀚𑀁 𑀚𑀸𑀦𑀸𑀢𑀺, 𑀬𑀁 𑀯𑀺𑀚𑁆𑀚𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀫𑀢𑀸𑀦𑀁 𑀲𑀻𑀲𑀁 𑀅𑀗𑁆𑀕𑀼𑀮𑀺𑀬𑀸 𑀧𑀳𑀭𑀺𑀢𑁆𑀯𑀸 𑁋 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀚𑀸𑀦𑀸𑀢𑀺. 𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀯𑀺𑀘𑀭𑀦𑁆𑀢𑁄 𑀧𑀜𑁆𑀘𑀳𑀺 𑀫𑀸𑀡𑀯𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀦𑀕𑀭𑀤𑁆𑀯𑀸𑀭𑁂 𑀲𑀸𑀮𑀸𑀬 𑀦𑀺𑀲𑀻𑀤𑀢𑀺.

𑀢𑀤𑀸 𑀘 𑀦𑀕𑀭𑀯𑀸𑀲𑀺𑀦𑁄 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀥𑀫𑁆𑀫𑀲𑁆𑀲𑀯𑀦𑀸𑀬 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀺. 𑀫𑀸𑀡𑀯𑁄 𑀤𑀺𑀲𑁆𑀯𑀸, ‘‘𑀓𑀳𑀁 𑀕𑀘𑁆𑀙𑀣𑀸’’𑀢𑀺? 𑀧𑀼𑀘𑁆𑀙𑀺. 𑀢𑁂 ‘‘𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺 𑀆𑀳𑀁𑀲𑀼. 𑀲𑁄𑀧𑀺 𑀲𑀧𑀭𑀺𑀯𑀸𑀭𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀪𑀕𑀯𑀸 𑀆𑀳 𑁋 ‘‘𑀯𑀗𑁆𑀕𑀻𑀲, 𑀪𑀤𑁆𑀤𑀓𑀁 𑀓𑀺𑀭 𑀲𑀺𑀧𑁆𑀧𑀁 𑀚𑀸𑀦𑀸𑀲𑀻’’𑀢𑀺. ‘‘𑀪𑁄 𑀕𑁄𑀢𑀫, 𑀅𑀳𑀁 𑀩𑀳𑀼𑀲𑀺𑀧𑁆𑀧𑀁 𑀚𑀸𑀦𑀸𑀫𑀺. 𑀢𑀼𑀫𑁆𑀳𑁂 𑀓𑀢𑀭𑀁 𑀲𑀦𑁆𑀥𑀸𑀬 𑀯𑀤𑀣𑀸’’𑀢𑀺? 𑀙𑀯𑀤𑀽𑀲𑀓𑀲𑀺𑀧𑁆𑀧𑀦𑁆𑀢𑀺. 𑀆𑀫, 𑀪𑁄 𑀕𑁄𑀢𑀫𑀸𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀻𑀲𑀁 𑀤𑀲𑁆𑀲𑁂𑀢𑁆𑀯𑀸, ‘‘𑀯𑀗𑁆𑀕𑀻𑀲, 𑀅𑀬𑀁 𑀓𑀳𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺. 𑀲𑁄 𑀫𑀦𑁆𑀢𑀁 𑀚𑀧𑁆𑀧𑀺𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑀸 𑀧𑀳𑀭𑀺𑀢𑁆𑀯𑀸 ‘‘𑀦𑀺𑀭𑀬𑁂’’𑀢𑀺 𑀆𑀳. ‘‘𑀲𑀸𑀥𑀼, 𑀯𑀗𑁆𑀕𑀻𑀲, 𑀲𑀼𑀓𑀣𑀺𑀢’’𑀦𑁆𑀢𑀺 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀻𑀲𑀁 𑀤𑀲𑁆𑀲𑁂𑀲𑀺. 𑀢𑀫𑁆𑀧𑀺 𑀲𑁄 𑀢𑀣𑁂𑀯 𑀩𑁆𑀬𑀸𑀓𑀸𑀲𑀺. 𑀅𑀣𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀲𑀻𑀲𑀁 𑀤𑀲𑁆𑀲𑁂𑀲𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀧𑀺 𑀅𑀗𑁆𑀕𑀼𑀮𑀺𑀬𑀸 𑀧𑀳𑀭𑀺𑀢𑁆𑀯𑀸𑀧𑀺 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀦 𑀧𑀲𑁆𑀲𑀢𑀺.

𑀅𑀣 𑀦𑀁 𑀪𑀕𑀯𑀸 ‘‘𑀓𑀺𑀮𑀫𑀲𑀺, 𑀯𑀗𑁆𑀕𑀻𑀲𑀸’’𑀢𑀺 𑀆𑀳? 𑀆𑀫 𑀪𑁄, 𑀕𑁄𑀢𑀫𑀸𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀉𑀧𑀥𑀸𑀭𑁂𑀳𑀻𑀢𑀺. 𑀢𑀣𑀸 𑀓𑀭𑁄𑀦𑁆𑀢𑁄𑀧𑀺 𑀅𑀤𑀺𑀲𑁆𑀯𑀸, ‘‘𑀢𑀼𑀫𑁆𑀳𑁂, 𑀪𑁄 𑀕𑁄𑀢𑀫, 𑀚𑀸𑀦𑀸𑀣𑀸’’𑀢𑀺 𑀆𑀳. 𑀆𑀫, 𑀯𑀗𑁆𑀕𑀻𑀲, 𑀫𑀁 𑀦𑀺𑀲𑁆𑀲𑀸𑀬 𑀘𑁂𑀲 𑀕𑀢𑁄, 𑀅𑀳𑀫𑀲𑁆𑀲 𑀕𑀢𑀺𑀁 𑀚𑀸𑀦𑀸𑀫𑀻𑀢𑀺. 𑀫𑀦𑁆𑀢𑁂𑀦 𑀚𑀸𑀦𑀸𑀲𑀺, 𑀪𑁄 𑀕𑁄𑀢𑀫𑀸𑀢𑀺? 𑀆𑀫, 𑀯𑀗𑁆𑀕𑀻𑀲, 𑀏𑀓𑁂𑀦 𑀫𑀦𑁆𑀢𑁂𑀦𑁂𑀯 𑀚𑀸𑀦𑀸𑀫𑀻𑀢𑀺. 𑀪𑁄 𑀕𑁄𑀢𑀫, 𑀫𑀬𑁆𑀳𑀁 𑀫𑀦𑁆𑀢𑁂𑀦 𑀇𑀫𑀁 𑀫𑀦𑁆𑀢𑀁 𑀤𑁂𑀣𑀸𑀢𑀺. 𑀅𑀫𑀽𑀮𑀺𑀓𑁄, 𑀯𑀗𑁆𑀕𑀻𑀲, 𑀫𑀬𑁆𑀳𑀁 𑀫𑀦𑁆𑀢𑁄𑀢𑀺. 𑀤𑁂𑀣, 𑀪𑁄 𑀕𑁄𑀢𑀫𑀸𑀢𑀺. 𑀦 𑀲𑀓𑁆𑀓𑀸 𑀫𑀬𑁆𑀳𑀁 𑀲𑀦𑁆𑀢𑀺𑀓𑁂 𑀅𑀧𑀩𑁆𑀩𑀚𑀺𑀢𑀲𑁆𑀲 𑀤𑀸𑀢𑀼𑀦𑁆𑀢𑀺. 𑀲𑁄 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢𑀸 𑀲𑀫𑀡𑁄 𑀕𑁄𑀢𑀫𑁄 𑀅𑀢𑀺𑀭𑁂𑀓𑀲𑀺𑀧𑁆𑀧𑀁 𑀚𑀸𑀦𑀸𑀢𑀺, 𑀅𑀳𑀁 𑀇𑀫𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀺𑀧𑁆𑀧𑀁 𑀕𑀡𑁆𑀳𑀸𑀫𑀺, 𑀢𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀫𑁆𑀳𑁂𑀳𑀺 𑀩𑀳𑀼𑀢𑀭𑀁 𑀚𑀸𑀦𑀦𑁆𑀢𑁄 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀺. 𑀢𑀼𑀫𑁆𑀳𑁂 𑀬𑀸𑀯 𑀅𑀳𑀁 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀅𑀦𑀼𑀓𑁆𑀓𑀡𑁆𑀞𑀺𑀢𑁆𑀯𑀸 𑀯𑀺𑀘𑀭𑀣𑀸’’𑀢𑀺 𑀢𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 ‘‘𑀧𑀩𑁆𑀩𑀸𑀚𑁂𑀣 𑀫’’𑀦𑁆𑀢𑀺 𑀆𑀳. 𑀲𑀢𑁆𑀣𑀸 𑀦𑀺𑀕𑁆𑀭𑁄𑀥𑀓𑀧𑁆𑀧𑀲𑁆𑀲 𑀧𑀝𑀺𑀧𑀸𑀤𑁂𑀲𑀺. 𑀣𑁂𑀭𑁄 𑀢𑀁 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀫𑁆𑀫 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁄 ‘‘𑀲𑀺𑀧𑁆𑀧𑀁 𑀤𑁂𑀣𑀸’’𑀢𑀺 𑀬𑀸𑀘𑀺. 𑀯𑀗𑁆𑀕𑀻𑀲, 𑀢𑀼𑀫𑁆𑀳𑁂 𑀲𑀺𑀧𑁆𑀧𑀁 𑀕𑀡𑁆𑀳𑀦𑁆𑀢𑀸 𑀅𑀮𑁄𑀡𑀪𑁄𑀚𑀦𑀣𑀡𑁆𑀟𑀺𑀮𑀲𑁂𑀬𑁆𑀬𑀸𑀤𑀻𑀳𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀕𑀡𑁆𑀳𑀣, 𑀇𑀫𑀲𑁆𑀲𑀸𑀧𑀺 𑀲𑀺𑀧𑁆𑀧𑀲𑁆𑀲 𑀧𑀭𑀺𑀓𑀫𑁆𑀫𑀁 𑀅𑀢𑁆𑀣𑀺, 𑀢𑀁 𑀢𑀸𑀯 𑀓𑀭𑁄𑀳𑀻𑀢𑀺. 𑀲𑀸𑀥𑀼, 𑀪𑀦𑁆𑀢𑁂𑀢𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀢𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀻𑀢𑀺 𑀏𑀯𑀁 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄. 𑀓𑀸𑀯𑁂𑀬𑁆𑀬𑀫𑀢𑁆𑀢𑀸𑀢𑀺 𑀓𑀸𑀯𑁂𑀬𑁆𑀬𑁂𑀦 𑀓𑀩𑁆𑀩𑀓𑀭𑀡𑁂𑀦 𑀫𑀢𑁆𑀢𑀸. 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄𑀢𑀺 𑀇𑀫𑀸𑀦𑀺 𑀔𑀦𑁆𑀥𑀸𑀤𑀻𑀦𑀺 𑀧𑀓𑀸𑀲𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀬𑁂 𑀦𑀺𑀬𑀸𑀫𑀕𑀢𑀤𑁆𑀤𑀲𑀸𑀢𑀺 𑀬𑁂 𑀦𑀺𑀬𑀸𑀫𑀕𑀢𑀸 𑀘𑁂𑀯 𑀦𑀺𑀬𑀸𑀫𑀤𑀲𑁆𑀲𑀸𑀢𑀺 𑀘. 𑀲𑁆𑀯𑀸𑀕𑀢𑀦𑁆𑀢𑀺 𑀲𑀼𑀆𑀕𑀫𑀦𑀁. 𑀇𑀤𑁆𑀥𑀺𑀧𑀢𑁆𑀢𑁄𑀫𑁆𑀳𑀻𑀢𑀺 𑀇𑀫𑀺𑀦𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀕𑀳𑀺𑀢𑀁. 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑁄𑀢𑀺 𑀇𑀫𑀺𑀦𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀁. 𑀤𑀺𑀩𑁆𑀩𑀲𑁄𑀢𑀁 𑀧𑀦 𑀅𑀯𑀼𑀢𑁆𑀢𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀏𑀯𑀁 𑀙 𑀅𑀪𑀺𑀜𑁆𑀜𑀸𑀧𑀢𑁆𑀢𑁄 𑀏𑀲𑁄 𑀫𑀳𑀸𑀲𑀸𑀯𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑀸𑀤𑀲𑀫𑀁.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀯𑀗𑁆𑀕𑀻𑀲𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.