𑁯. 𑀯𑀦𑀲𑀁𑀬𑀼𑀢𑁆𑀢𑀁

𑁧. 𑀯𑀺𑀯𑁂𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁧. 𑀯𑀦𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀻𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀚𑀦𑀧𑀤𑀲𑁆𑀲 𑀲𑀼𑀮𑀪𑀪𑀺𑀓𑁆𑀔𑀢𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀳𑀭𑀢𑀺. 𑀲𑀁𑀯𑁂𑀚𑁂𑀢𑀼𑀓𑀸𑀫𑀸𑀢𑀺 𑀯𑀺𑀯𑁂𑀓𑀁 𑀧𑀝𑀺𑀧𑀚𑁆𑀚𑀸𑀧𑁂𑀢𑀼𑀓𑀸𑀫𑀸. 𑀯𑀺𑀯𑁂𑀓𑀓𑀸𑀫𑁄𑀢𑀺 𑀢𑀬𑁄 𑀯𑀺𑀯𑁂𑀓𑁂 𑀧𑀢𑁆𑀣𑀬𑀦𑁆𑀢𑁄. 𑀦𑀺𑀘𑁆𑀙𑀭𑀢𑀻 𑀩𑀳𑀺𑀤𑁆𑀥𑀸𑀢𑀺 𑀩𑀸𑀳𑀺𑀭𑁂𑀲𑀼 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂𑀲𑀼 𑀘𑀭𑀢𑀺. 𑀚𑀦𑁄 𑀚𑀦𑀲𑁆𑀫𑀺𑀦𑁆𑀢𑀺 𑀢𑁆𑀯𑀁 𑀚𑀦𑁄 𑀅𑀜𑁆𑀜𑀲𑁆𑀫𑀺𑀁 𑀚𑀦𑁂 𑀙𑀦𑁆𑀤𑀭𑀸𑀕𑀁 𑀯𑀺𑀦𑀬𑀲𑁆𑀲𑀼. 𑀧𑀚𑀳𑀸𑀲𑀻𑀢𑀺 𑀧𑀚𑀳. 𑀪𑀯𑀸𑀲𑀻𑀢𑀺 𑀪𑀯. 𑀲𑀢𑀁 𑀢𑀁 𑀲𑀸𑀭𑀬𑀸𑀫𑀲𑁂𑀢𑀺 𑀲𑀢𑀺𑀫𑀦𑁆𑀢𑀁 𑀧𑀡𑁆𑀟𑀺𑀢𑀁 𑀢𑀁 𑀫𑀬𑀫𑁆𑀧𑀺 𑀲𑀸𑀭𑀬𑀸𑀫, 𑀲𑀢𑀁 𑀯𑀸 𑀥𑀫𑁆𑀫𑀁 𑀫𑀬𑀁 𑀢𑀁 𑀲𑀸𑀭𑀬𑀸𑀫𑀸𑀢𑀺 𑀅𑀢𑁆𑀣𑁄. 𑀧𑀸𑀢𑀸𑀮𑀭𑀚𑁄𑀢𑀺 𑀅𑀧𑁆𑀧𑀢𑀺𑀝𑁆𑀞𑀝𑁆𑀞𑁂𑀦 𑀧𑀸𑀢𑀸𑀮𑀲𑀗𑁆𑀔𑀸𑀢𑁄 𑀓𑀺𑀮𑁂𑀲𑀭𑀚𑁄. 𑀫𑀸 𑀢𑀁 𑀓𑀸𑀫𑀭𑀚𑁄𑀢𑀺 𑀅𑀬𑀁 𑀓𑀸𑀫𑀭𑀸𑀕𑀭𑀚𑁄 𑀢𑀁 𑀫𑀸 𑀅𑀯𑀳𑀭𑀺, 𑀅𑀧𑀸𑀬𑀫𑁂𑀯 𑀫𑀸 𑀦𑁂𑀢𑀽𑀢𑀺 𑀅𑀢𑁆𑀣𑁄. 𑀧𑀁𑀲𑀼𑀓𑀼𑀦𑁆𑀣𑀺𑀢𑁄𑀢𑀺 𑀧𑀁𑀲𑀼𑀫𑀓𑁆𑀔𑀺𑀢𑁄. 𑀯𑀺𑀥𑀼𑀦𑀦𑁆𑀢𑀺 𑀯𑀺𑀥𑀼𑀦𑀦𑁆𑀢𑁄. 𑀲𑀺𑀢𑀁 𑀭𑀚𑀦𑁆𑀢𑀺 𑀲𑀭𑀻𑀭𑀮𑀕𑁆𑀕𑀁 𑀭𑀚𑀁. 𑀲𑀁𑀯𑁂𑀕𑀫𑀸𑀧𑀸𑀤𑀻𑀢𑀺 𑀤𑁂𑀯𑀢𑀸𑀧𑀺 𑀦𑀸𑀫 𑀫𑀁 𑀏𑀯𑀁 𑀲𑀸𑀭𑁂𑀢𑀻𑀢𑀺 𑀯𑀺𑀯𑁂𑀓𑀫𑀸𑀧𑀦𑁆𑀦𑁄, 𑀉𑀢𑁆𑀢𑀫𑀯𑀻𑀭𑀺𑀬𑀁 𑀯𑀸 𑀧𑀕𑁆𑀕𑀬𑁆𑀳 𑀧𑀭𑀫𑀯𑀺𑀯𑁂𑀓𑀁 𑀫𑀕𑁆𑀕𑀫𑁂𑀯 𑀧𑀝𑀺𑀧𑀦𑁆𑀦𑁄𑀢𑀺. 𑀧𑀞𑀫𑀁.

𑁨. 𑀉𑀧𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁨. 𑀤𑀼𑀢𑀺𑀬𑁂 𑀲𑀼𑀧𑀢𑀻𑀢𑀺 𑀅𑀬𑀁 𑀓𑀺𑀭 𑀔𑀻𑀡𑀸𑀲𑀯𑁄, 𑀲𑁄 𑀤𑀽𑀭𑁂 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑀁 𑀕𑀦𑁆𑀢𑁆𑀯𑀸 𑀆𑀕𑀢𑁄 𑀧𑀡𑁆𑀡𑀲𑀸𑀮𑀸𑀬 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀅𑀯𑀺𑀤𑀽𑀭𑁂 𑀚𑀸𑀢𑀲𑁆𑀲𑀭𑀁 𑀑𑀢𑀭𑀺𑀢𑁆𑀯𑀸 𑀕𑀢𑁆𑀢𑀸𑀦𑀺 𑀉𑀢𑀼𑀁 𑀕𑀸𑀳𑀸𑀧𑁂𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀦𑀻𑀘𑀫𑀜𑁆𑀘𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀤𑁆𑀤𑀁 𑀅𑀦𑁄𑀓𑁆𑀓𑀫𑀦𑁆𑀢𑁄𑀯 𑀦𑀺𑀧𑀦𑁆𑀦𑁄. 𑀔𑀻𑀡𑀸𑀲𑀯𑀲𑁆𑀲𑀸𑀧𑀺 𑀳𑀺 𑀓𑀸𑀬𑀤𑀭𑀣𑁄 𑀳𑁄𑀢𑀺𑀬𑁂𑀯𑀸𑀢𑀺 𑀢𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁, 𑀢𑀁 𑀲𑀦𑁆𑀥𑀸𑀬 𑀲𑀼𑀧𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀚𑁆𑀛𑀪𑀸𑀲𑀻𑀢𑀺 ‘‘𑀅𑀬𑀁 𑀪𑀺𑀓𑁆𑀔𑀼 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀤𑀺𑀯𑀸 𑀲𑀼𑀧𑀢𑀺, 𑀤𑀺𑀯𑀸𑀲𑁄𑀧𑁆𑀧𑀜𑁆𑀘 𑀦𑀸𑀫𑁂𑀢𑀁 𑀯𑀟𑁆𑀠𑀺𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀦𑀸𑀲𑁂𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 ‘‘𑀘𑁄𑀤𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀪𑀸𑀲𑀺.

𑀆𑀢𑀼𑀭𑀲𑁆𑀲𑀸𑀢𑀺 𑀚𑀭𑀸𑀢𑀼𑀭𑁄 𑀭𑁄𑀕𑀸𑀢𑀼𑀭𑁄 𑀓𑀺𑀮𑁂𑀲𑀸𑀢𑀼𑀭𑁄𑀢𑀺 𑀢𑀬𑁄 𑀆𑀢𑀼𑀭𑀸, 𑀢𑁂𑀲𑀼 𑀓𑀺𑀮𑁂𑀲𑀸𑀢𑀼𑀭𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀲𑀮𑁆𑀮𑀯𑀺𑀤𑁆𑀥𑀲𑁆𑀲𑀸𑀢𑀺 𑀲𑀯𑀺𑀲𑁂𑀦 𑀲𑀢𑁆𑀢𑀺𑀲𑀮𑁆𑀮𑁂𑀦 𑀯𑀺𑀬 𑀅𑀯𑀺𑀚𑁆𑀚𑀸𑀯𑀺𑀲𑀯𑀺𑀝𑁆𑀞𑁂𑀦 𑀢𑀡𑁆𑀳𑀸𑀲𑀮𑁆𑀮𑁂𑀦 𑀳𑀤𑀬𑁂 𑀯𑀺𑀤𑁆𑀥𑀲𑁆𑀲. 𑀭𑀼𑀧𑁆𑀧𑀢𑁄𑀢𑀺 𑀖𑀝𑁆𑀝𑀺𑀬𑀫𑀸𑀦𑀲𑁆𑀲.

𑀇𑀤𑀸𑀦𑀺𑀲𑁆𑀲 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀓𑀣𑀬𑀦𑁆𑀢𑀻 𑀅𑀦𑀺𑀘𑁆𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀺𑀢𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁂𑀦 𑀅𑀦𑀺𑀲𑁆𑀲𑀺𑀢𑀁. 𑀓𑀲𑁆𑀫𑀸 𑀧𑀩𑁆𑀩𑀚𑀺𑀢𑀁 𑀢𑀧𑁂𑀢𑀺 𑀏𑀯𑀭𑀽𑀧𑀁 𑀔𑀻𑀡𑀸𑀲𑀯𑀁 𑀤𑀺𑀯𑀸𑀲𑁄𑀧𑁆𑀧𑀁 𑀦 𑀢𑀧𑀢𑀺, 𑀢𑀸𑀤𑀺𑀲𑀁 𑀧𑀦 𑀓𑀲𑁆𑀫𑀸 𑀦 𑀢𑀧𑁂𑀲𑁆𑀲𑀢𑀻𑀢𑀺? 𑀯𑀤𑀢𑀺. 𑀣𑁂𑀭𑀲𑁆𑀲𑁂𑀯 𑀯𑀸 𑀏𑀢𑀁 𑀯𑀘𑀦𑀁, 𑀢𑀲𑁆𑀫𑀸 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑁋 𑀩𑀤𑁆𑀥𑁂𑀲𑀼 𑀫𑀼𑀢𑁆𑀢𑀁 𑀅𑀲𑀺𑀢𑀁 𑀫𑀸𑀤𑀺𑀲𑀁 𑀔𑀻𑀡𑀸𑀲𑀯𑀧𑀩𑁆𑀩𑀚𑀺𑀢𑀁 𑀓𑀲𑁆𑀫𑀸 𑀤𑀺𑀯𑀸𑀲𑁄𑀧𑁆𑀧𑀁 𑀢𑀧𑁂, 𑀦 𑀢𑀧𑁂𑀲𑁆𑀲𑀢𑀻𑀢𑀺? 𑀲𑁂𑀲𑀕𑀸𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁂𑀯𑀢𑀸𑀬 𑀳𑀺 𑀯𑀘𑀦𑀧𑀓𑁆𑀔𑁂 𑁋 ‘‘𑀏𑀯𑀭𑀽𑀧𑀁 𑀔𑀻𑀡𑀸𑀲𑀯𑀧𑀩𑁆𑀩𑀚𑀺𑀢𑀁 𑀤𑀺𑀯𑀸𑀲𑁄𑀧𑁆𑀧𑀁 𑀦 𑀢𑀧𑀢𑀺, 𑀢𑀸𑀤𑀺𑀲𑀁 𑀧𑀦 𑀓𑀲𑁆𑀫𑀸 𑀦 𑀢𑀧𑁂𑀲𑁆𑀲𑀢𑀺? 𑀢𑀧𑁂𑀲𑁆𑀲𑀢𑀺𑀬𑁂𑀯𑀸’’𑀢𑀺 𑀅𑀢𑁆𑀣𑁄. 𑀣𑁂𑀭𑀲𑁆𑀲 𑀯𑀘𑀦𑀧𑀓𑁆𑀔𑁂 𑁋 ‘‘𑀏𑀯𑀭𑀽𑀧𑀁 𑀫𑀸𑀤𑀺𑀲𑀁 𑀔𑀻𑀡𑀸𑀲𑀯𑀧𑀩𑁆𑀩𑀚𑀺𑀢𑀁 𑀓𑀲𑁆𑀫𑀸 𑀤𑀺𑀯𑀸𑀲𑁄𑀧𑁆𑀧𑀁 𑀢𑀧𑁂? 𑀦 𑀢𑀧𑀢𑀺𑀬𑁂𑀯𑀸’’𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸. 𑀯𑀺𑀦𑀬𑀸𑀢𑀺 𑀯𑀺𑀦𑀬𑁂𑀦. 𑀲𑀫𑀢𑀺𑀓𑁆𑀓𑀫𑀸𑀢𑀺 𑀯𑀝𑁆𑀝𑀫𑀽𑀮𑀺𑀓𑀸𑀬 𑀅𑀯𑀺𑀚𑁆𑀚𑀸𑀬 𑀲𑀫𑀢𑀺𑀓𑁆𑀓𑀫𑁂𑀦. 𑀢𑀁 𑀜𑀸𑀡𑀦𑁆𑀢𑀺 𑀢𑀁 𑀘𑀢𑀼𑀲𑀘𑁆𑀘𑀜𑀸𑀡𑀁. 𑀧𑀭𑀫𑁄𑀤𑀸𑀦𑀦𑁆𑀢𑀺 𑀧𑀭𑀫𑀧𑀭𑀺𑀲𑀼𑀤𑁆𑀥𑀁. 𑀧𑀩𑁆𑀩𑀚𑀺𑀢𑀦𑁆𑀢𑀺 𑀏𑀯𑀭𑀽𑀧𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀚𑀺𑀢𑀁. 𑀯𑀺𑀚𑁆𑀚𑀸𑀬𑀸𑀢𑀺 𑀘𑀢𑀼𑀢𑁆𑀣𑀫𑀕𑁆𑀕𑀯𑀺𑀚𑁆𑀚𑀸𑀬. 𑀆𑀭𑀤𑁆𑀥𑀯𑀻𑀭𑀺𑀬𑀦𑁆𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀁 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀁. 𑀤𑀼𑀢𑀺𑀬𑀁.

𑁩. 𑀓𑀲𑁆𑀲𑀧𑀕𑁄𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁩. 𑀢𑀢𑀺𑀬𑁂 𑀙𑁂𑀢𑀦𑁆𑀢𑀺 𑀏𑀓𑀁 𑀫𑀺𑀕𑀮𑀼𑀤𑁆𑀤𑀓𑀁. 𑀑𑀯𑀤𑀢𑀻𑀢𑀺 𑀲𑁄 𑀓𑀺𑀭 𑀫𑀺𑀕𑀮𑀼𑀤𑁆𑀤𑀓𑁄 𑀧𑀸𑀢𑁄𑀯 𑀪𑀼𑀜𑁆𑀚𑀺𑀢𑁆𑀯𑀸 ‘‘𑀫𑀺𑀕𑁂 𑀯𑀥𑀺𑀲𑁆𑀲𑀸𑀫𑀻’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀏𑀓𑀁 𑀭𑁄𑀳𑀺𑀢𑀫𑀺𑀕𑀁 𑀤𑀺𑀲𑁆𑀯𑀸 ‘‘𑀲𑀢𑁆𑀢𑀺𑀬𑀸 𑀦𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀦𑀼𑀩𑀦𑁆𑀥𑀫𑀸𑀦𑁄 𑀣𑁂𑀭𑀲𑁆𑀲 𑀧𑀞𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑀲𑁆𑀲 𑀅𑀯𑀺𑀤𑀽𑀭𑁂𑀦 𑀧𑀓𑁆𑀓𑀫𑀢𑀺. 𑀅𑀣 𑀦𑀁 𑀣𑁂𑀭𑁄 𑁋 ‘‘𑀉𑀧𑀸𑀲𑀓, 𑀧𑀸𑀡𑀸𑀢𑀺𑀧𑀸𑀢𑁄 𑀦𑀸𑀫𑁂𑀲 𑀅𑀧𑀸𑀬𑀲𑀁𑀯𑀢𑁆𑀢𑀦𑀺𑀓𑁄 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑁄, 𑀲𑀓𑁆𑀓𑀸 𑀅𑀜𑁆𑀜𑁂𑀦𑀧𑀺 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑁂𑀦 𑀤𑀸𑀭𑀪𑀭𑀡𑀁 𑀓𑀸𑀢𑀼𑀁, 𑀫𑀸 𑀏𑀯𑀭𑀽𑀧𑀁 𑀓𑀓𑁆𑀔𑀴𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀆𑀳. 𑀲𑁄𑀧𑀺 ‘‘𑀫𑀳𑀸𑀧𑀁𑀲𑀼𑀓𑀽𑀮𑀺𑀓𑀢𑁆𑀣𑁂𑀭𑁄 𑀓𑀣𑁂𑀢𑀻’’𑀢𑀺 𑀕𑀸𑀭𑀯𑁂𑀦 𑀞𑀢𑁆𑀯𑀸 𑀲𑁄𑀢𑀼𑀁 𑀆𑀭𑀤𑁆𑀥𑁄. 𑀅𑀣𑀲𑁆𑀲 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀲𑁆𑀲𑀸𑀫𑀻𑀢𑀺 𑀣𑁂𑀭𑁄 𑀅𑀗𑁆𑀕𑀼𑀝𑁆𑀞𑀓𑀁 𑀚𑀸𑀮𑀸𑀧𑁂𑀲𑀺. 𑀲𑁄 𑀅𑀓𑁆𑀔𑀻𑀳𑀺𑀧𑀺 𑀧𑀲𑁆𑀲𑀢𑀺, 𑀓𑀡𑁆𑀡𑁂𑀳𑀺𑀧𑀺 𑀲𑀼𑀡𑀸𑀢𑀺, 𑀘𑀺𑀢𑁆𑀢𑀁 𑀧𑀦𑀲𑁆𑀲 ‘‘𑀅𑀲𑀼𑀓𑀝𑁆𑀞𑀸𑀦𑀁 𑀫𑀺𑀕𑁄 𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀲𑀼𑀓𑀢𑀺𑀢𑁆𑀣𑀁 𑀑𑀢𑀺𑀡𑁆𑀡𑁄, 𑀢𑀢𑁆𑀣 𑀦𑀁 𑀕𑀦𑁆𑀢𑁆𑀯𑀸 𑀖𑀸𑀢𑁂𑀢𑁆𑀯𑀸 𑀬𑀸𑀯𑀤𑀺𑀘𑁆𑀙𑀓𑀁 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀲𑁂𑀲𑀁 𑀓𑀸𑀚𑁂𑀦𑀸𑀤𑀸𑀬 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀓𑁂 𑀢𑁄𑀲𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀫𑀺𑀕𑀲𑁆𑀲𑁂𑀯 𑀅𑀦𑀼𑀧𑀤𑀁 𑀥𑀸𑀯𑀢𑀺. 𑀏𑀯𑀁 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀣𑁂𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀑𑀯𑀤𑀢𑀻’’𑀢𑀺. 𑀅𑀚𑁆𑀛𑀪𑀸𑀲𑀻𑀢𑀺 ‘‘𑀅𑀬𑀁 𑀣𑁂𑀭𑁄 𑀅𑀤𑀸𑀭𑀼𑀁 𑀢𑀘𑁆𑀙𑀦𑁆𑀢𑁄 𑀯𑀺𑀬 𑀅𑀔𑁂𑀢𑁆𑀢𑁂 𑀯𑀧𑁆𑀧𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄𑀧𑀺 𑀓𑀫𑁆𑀫𑀁 𑀦𑀸𑀲𑁂𑀢𑀺, 𑀏𑀢𑀲𑁆𑀲𑀸𑀧𑀺 𑀘𑁄𑀤𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀅𑀪𑀸𑀲𑀺.

𑀅𑀧𑁆𑀧𑀧𑀜𑁆𑀜𑀦𑁆𑀢𑀺 𑀦𑀺𑀧𑁆𑀧𑀜𑁆𑀜𑀁. 𑀅𑀘𑁂𑀢𑀲𑀦𑁆𑀢𑀺 𑀓𑀸𑀭𑀡𑀚𑀸𑀦𑀦𑀲𑀫𑀢𑁆𑀣𑁂𑀦 𑀘𑀺𑀢𑁆𑀢𑁂𑀦 𑀭𑀳𑀺𑀢𑀁. 𑀫𑀦𑁆𑀤𑁄𑀯𑀸𑀢𑀺 𑀅𑀦𑁆𑀥𑀩𑀸𑀮𑁄 𑀯𑀺𑀬. 𑀲𑀼𑀡𑀸𑀢𑀻𑀢𑀺 𑀢𑀯 𑀥𑀫𑁆𑀫𑀓𑀣𑀁 𑀲𑀼𑀡𑀸𑀢𑀺. 𑀦 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑀫𑀲𑁆𑀲 𑀦 𑀚𑀸𑀦𑀸𑀢𑀺. 𑀆𑀮𑁄𑀓𑁂𑀢𑀻𑀢𑀺 𑀢𑀯 𑀧𑀼𑀣𑀼𑀚𑁆𑀚𑀦𑀺𑀓𑀇𑀤𑁆𑀥𑀺𑀬𑀸 𑀚𑀮𑀦𑁆𑀢𑀁 𑀅𑀗𑁆𑀕𑀼𑀝𑁆𑀞𑀓𑀁 𑀆𑀮𑁄𑀓𑁂𑀢𑀺. 𑀦 𑀧𑀲𑁆𑀲𑀢𑀻𑀢𑀺 𑀏𑀢𑁆𑀣 ‘‘𑀦𑁂𑀯 𑀢𑁂𑀮𑀁 𑀦 𑀯𑀝𑁆𑀝𑀺 𑀦 𑀤𑀻𑀧𑀓𑀧𑀮𑁆𑀮𑀺𑀓𑀸, 𑀣𑁂𑀭𑀲𑁆𑀲 𑀧𑀦 𑀆𑀦𑀼𑀪𑀸𑀯𑁂𑀦𑀸𑀬𑀁 𑀚𑀮𑀢𑀻’’𑀢𑀺 𑀇𑀫𑀁 𑀓𑀸𑀭𑀡𑀁 𑀦 𑀧𑀲𑁆𑀲𑀢𑀺. 𑀤𑀲 𑀧𑀚𑁆𑀚𑁄𑀢𑁂𑀢𑀺 𑀤𑀲𑀲𑀼 𑀅𑀗𑁆𑀕𑀼𑀮𑀻𑀲𑀼 𑀤𑀲 𑀧𑀤𑀻𑀧𑁂. 𑀭𑀽𑀧𑀸𑀦𑀻𑀢𑀺 𑀓𑀸𑀭𑀡𑀭𑀽𑀧𑀸𑀦𑀺. 𑀘𑀓𑁆𑀔𑀽𑀢𑀺 𑀧𑀜𑁆𑀜𑀸𑀘𑀓𑁆𑀔𑀼. 𑀲𑀁𑀯𑁂𑀕𑀫𑀸𑀧𑀸𑀤𑀻𑀢𑀺 𑀓𑀺𑀁 𑀫𑁂 𑀇𑀫𑀺𑀦𑀸𑀢𑀺? 𑀯𑀻𑀭𑀺𑀬𑀁 𑀧𑀕𑁆𑀕𑀬𑁆𑀳 𑀧𑀭𑀫𑀯𑀺𑀯𑁂𑀓𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑀢𑀺𑀬𑀁.

𑁪. 𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁪. 𑀘𑀢𑀼𑀢𑁆𑀣𑁂 𑀲𑀫𑁆𑀩𑀳𑀼𑀮𑀸𑀢𑀺 𑀩𑀳𑀽 𑀲𑀼𑀢𑁆𑀢𑀦𑁆𑀢𑀺𑀓𑀸 𑀆𑀪𑀺𑀥𑀫𑁆𑀫𑀺𑀓𑀸 𑀯𑀺𑀦𑀬𑀥𑀭𑀸 𑀘. 𑀯𑀺𑀳𑀭𑀦𑁆𑀢𑀻𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀺. 𑀧𑀓𑁆𑀓𑀫𑀺𑀁𑀲𑀽𑀢𑀺 𑀢𑁂 𑀓𑀺𑀭 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀆𑀲𑀦𑀲𑀸𑀮𑀸𑀬 𑀓𑁄𑀚𑀯𑀢𑁆𑀣𑀭𑀡𑀸𑀤𑀻𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀦𑀺 𑀤𑀢𑁆𑀯𑀸 𑀉𑀧𑀦𑀺𑀲𑀻𑀤𑀺𑀁𑀲𑀼. 𑀫𑀳𑀸𑀣𑁂𑀭𑁄 𑀏𑀓𑀁 𑀥𑀫𑁆𑀫𑀓𑀣𑀺𑀓𑀁 ‘‘𑀥𑀫𑁆𑀫𑀁 𑀓𑀣𑁂𑀳𑀻’’𑀢𑀺 𑀆𑀳. 𑀲𑁄 𑀘𑀺𑀢𑁆𑀢𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀫𑀦𑀼𑀲𑁆𑀲𑀸 𑀧𑀲𑀻𑀤𑀺𑀢𑁆𑀯𑀸 𑀪𑁄𑀚𑀦𑀯𑁂𑀮𑀸𑀬𑀁 𑀧𑀡𑀻𑀢𑀪𑁄𑀚𑀦𑀁 𑀅𑀤𑀁𑀲𑀼. 𑀫𑀳𑀸𑀣𑁂𑀭𑁄 𑀫𑀦𑀼𑀜𑁆𑀜𑀁 𑀪𑀢𑁆𑀢𑀸𑀦𑀼𑀫𑁄𑀤𑀦𑀫𑀓𑀸𑀲𑀺. 𑀫𑀦𑀼𑀲𑁆𑀲𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀦𑁆𑀦𑀸 ‘‘𑀇𑀥𑁂𑀯, 𑀪𑀦𑁆𑀢𑁂, 𑀢𑁂𑀫𑀸𑀲𑀁 𑀯𑀲𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑁂 𑀞𑀸𑀦𑁂 𑀲𑁂𑀦𑀸𑀲𑀦𑀸𑀦𑀺 𑀓𑀸𑀭𑁂𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀁𑀲𑀼. 𑀫𑀳𑀸𑀣𑁂𑀭𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀪𑀺𑀓𑁆𑀔𑀽 𑀑𑀯𑀤𑀺 𑁋 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂𑀳𑀺 𑀕𑀭𑀼𑀓𑀲𑁆𑀲 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑀺𑀢𑀁, 𑀩𑀼𑀤𑁆𑀥𑀧𑀸𑀢𑀼𑀪𑀸𑀯𑁄 𑀦𑀸𑀫 𑀤𑀼𑀮𑁆𑀮𑀪𑁄. 𑀫𑀸𑀲𑀲𑁆𑀲 𑀅𑀝𑁆𑀞 𑀤𑀺𑀯𑀲𑁂 𑀥𑀫𑁆𑀫𑀲𑁆𑀲𑀯𑀦𑀁 𑀓𑀢𑁆𑀯𑀸 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀣𑀸’’𑀢𑀺. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀬𑀼𑀜𑁆𑀚𑀦𑁆𑀢𑀺 𑀖𑀝𑁂𑀦𑁆𑀢𑀺. 𑀓𑀤𑀸𑀘𑀺 𑀲𑀩𑁆𑀩𑀭𑀢𑁆𑀢𑀺𑀓𑀁 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑁄𑀦𑁆𑀢𑀺, 𑀓𑀤𑀸𑀘𑀺 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀓𑀤𑀸𑀘𑀺 𑀧𑀥𑀸𑀦𑀁 𑀓𑀭𑁄𑀦𑁆𑀢𑀺. 𑀢𑁂𑀲𑀁 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁂 𑀥𑀫𑁆𑀫𑀁 𑀓𑀣𑁂𑀦𑁆𑀢𑀸𑀦𑀁𑀬𑁂𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺. 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀤𑀺𑀯𑀲𑁂 𑀩𑁆𑀬𑀢𑁆𑀢𑁄 𑀪𑀺𑀓𑁆𑀔𑀼 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀧𑀡𑁆𑀟𑀺𑀢𑁄 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑁄𑀦𑁆𑀢𑀸𑀦𑀁𑀬𑁂𑀯. 𑀧𑀥𑀸𑀦𑀤𑀺𑀯𑀲𑁂 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑁂 𑀕𑀡𑁆𑀟𑀺𑀁 𑀧𑀳𑀭𑀺𑀢𑁆𑀯𑀸𑀯 𑀘𑀗𑁆𑀓𑀫𑀁 𑀑𑀢𑀭𑀺𑀢𑁆𑀯𑀸 𑀧𑀥𑀸𑀦𑀁 𑀓𑀭𑁄𑀦𑁆𑀢𑀸𑀦𑀁𑀬𑁂𑀯. 𑀢𑁂 𑀏𑀯𑀁 𑀯𑀲𑁆𑀲𑀁 𑀯𑀲𑁆𑀲𑀺𑀢𑁆𑀯𑀸 𑀧𑀯𑀸𑀭𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀭𑀺𑀤𑁂𑀯𑀫𑀸𑀦𑀸𑀢𑀺 ‘‘𑀇𑀤𑀸𑀦𑀺 𑀢𑀣𑀸𑀭𑀽𑀧𑀁 𑀫𑀥𑀼𑀭𑀁 𑀥𑀫𑁆𑀫𑀲𑁆𑀲𑀯𑀦𑀁 𑀧𑀜𑁆𑀳𑀸𑀓𑀣𑀦𑀁 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀭𑁄𑀤𑀫𑀸𑀦𑀸.

𑀔𑀸𑀬𑀢𑀻𑀢𑀺 𑀧𑀜𑁆𑀜𑀸𑀬𑀢𑀺 𑀉𑀧𑀝𑁆𑀞𑀸𑀢𑀺. 𑀓𑁄 𑀫𑁂𑀢𑀺 𑀓𑀳𑀁 𑀇𑀫𑁂. 𑀯𑀚𑁆𑀚𑀺𑀪𑀽𑀫𑀺𑀬𑀸𑀢𑀺 𑀯𑀚𑁆𑀚𑀺𑀭𑀝𑁆𑀞𑀸𑀪𑀺𑀫𑀼𑀔𑀸 𑀕𑀢𑀸. 𑀫𑀕𑀸 𑀯𑀺𑀬𑀸𑀢𑀺 𑀬𑀣𑀸 𑀫𑀕𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀩𑁆𑀩𑀢𑀧𑀸𑀤𑁂 𑀯𑀸 𑀯𑀦𑀲𑀡𑁆𑀟𑁂 𑀯𑀸 𑀯𑀺𑀘𑀭𑀦𑁆𑀢𑀸 𑁋 ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀫𑀸𑀢𑀼𑀲𑀦𑁆𑀢𑀓𑀁 𑀧𑀺𑀢𑀼𑀲𑀦𑁆𑀢𑀓𑀁 𑀧𑀯𑁂𑀡𑀺𑀆𑀕𑀢’’𑀦𑁆𑀢𑀺 𑀅𑀕𑀳𑁂𑀢𑁆𑀯𑀸, 𑀬𑀢𑁆𑀣𑁂𑀯 𑀦𑁂𑀲𑀁 𑀕𑁄𑀘𑀭𑀨𑀸𑀲𑀼𑀢𑀸 𑀘 𑀳𑁄𑀢𑀺 𑀧𑀭𑀺𑀧𑀦𑁆𑀣𑀸𑀪𑀸𑀯𑁄 𑀘, 𑀢𑀢𑁆𑀣 𑀯𑀺𑀘𑀭𑀦𑁆𑀢𑀺. 𑀏𑀯𑀁 𑀅𑀦𑀺𑀓𑁂𑀢𑀸 𑀅𑀕𑁂𑀳𑀸 𑀪𑀺𑀓𑁆𑀔𑀯𑁄𑀧𑀺 ‘‘𑀅𑀬𑀁, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀓𑁄 𑀧𑀯𑁂𑀡𑀺𑀆𑀕𑀢𑁄’’𑀢𑀺 𑀅𑀕𑀳𑁂𑀢𑁆𑀯𑀸 𑀬𑀢𑁆𑀣𑁂𑀯 𑀦𑁂𑀲𑀁 𑀉𑀢𑀼𑀲𑀧𑁆𑀧𑀸𑀬𑀁 𑀪𑁄𑀚𑀦𑀲𑀧𑁆𑀧𑀸𑀬𑀁 𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀁 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀁 𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀜𑁆𑀘 𑀲𑀼𑀮𑀪𑀁 𑀳𑁄𑀢𑀺, 𑀢𑀢𑁆𑀣 𑀯𑀺𑀳𑀭𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁫. 𑀧𑀜𑁆𑀘𑀫𑁂 𑀆𑀦𑀦𑁆𑀤𑁄𑀢𑀺 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀢𑁆𑀣𑁂𑀭𑁄. 𑀅𑀢𑀺𑀯𑁂𑀮𑀦𑁆𑀢𑀺 𑀅𑀢𑀺𑀓𑁆𑀓𑀦𑁆𑀢𑀁 𑀯𑁂𑀮𑀁. 𑀕𑀺𑀳𑀺𑀲𑀜𑁆𑀜𑀢𑁆𑀢𑀺𑀩𑀳𑀼𑀮𑁄𑀢𑀺 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀩𑀳𑀼𑀓𑀸𑀮𑀁 𑀕𑀺𑀳𑀻 𑀲𑀜𑁆𑀜𑀸𑀧𑀬𑀦𑁆𑀢𑁄. 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀣𑁂𑀭𑀁 𑀆𑀳 𑁋 ‘‘𑀆𑀯𑀼𑀲𑁄, 𑀫𑀬𑀁 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀗𑁆𑀕𑀸𑀬𑀺𑀲𑁆𑀲𑀸𑀫, 𑀕𑀘𑁆𑀙 𑀢𑁆𑀯𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀢𑁆𑀣𑀸𑀬 𑀯𑀸𑀬𑀸𑀫𑀁 𑀓𑀭𑁄𑀳𑀻’’𑀢𑀺. 𑀲𑁄 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑁄𑀲𑀮𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀸𑀯𑀸𑀲𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀏𑀓𑀁 𑀕𑀸𑀫𑀁 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀣𑁂𑀭𑀁 𑀤𑀺𑀲𑁆𑀯𑀸 𑁋 ‘‘𑀪𑀦𑁆𑀢𑁂 𑀆𑀦𑀦𑁆𑀤, 𑀢𑀼𑀫𑁆𑀳𑁂 𑀧𑀼𑀩𑁆𑀩𑁂 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀆𑀕𑀘𑁆𑀙𑀣. 𑀅𑀚𑁆𑀚 𑀏𑀓𑀓𑀸𑀯 𑀆𑀕𑀢𑀸. 𑀓𑀳𑀁 𑀲𑀢𑁆𑀣𑀸𑀭𑀁 𑀞𑀧𑁂𑀢𑁆𑀯𑀸 𑀆𑀕𑀢𑀢𑁆𑀣? 𑀇𑀤𑀸𑀦𑀺 𑀓𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀣? 𑀓𑀲𑁆𑀲 𑀫𑀼𑀔𑁄𑀤𑀓𑀁 𑀤𑀦𑁆𑀢𑀓𑀝𑁆𑀞𑀁 𑀤𑁂𑀣, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀣, 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀭𑁄𑀣𑀸’’𑀢𑀺 𑀩𑀳𑀼𑀁 𑀯𑀢𑁆𑀯𑀸 𑀧𑀭𑀺𑀤𑁂𑀯𑀺𑀁𑀲𑀼. 𑀣𑁂𑀭𑁄 𑁋 ‘‘𑀫𑀸, 𑀆𑀯𑀼𑀲𑁄, 𑀲𑁄𑀘𑀺𑀢𑁆𑀣, 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀢𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑀸 𑀲𑀸𑀬𑀫𑁆𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀧𑀭𑀺𑀤𑁂𑀯𑀦𑁆𑀢𑀺. 𑀣𑁂𑀭𑁄𑀧𑀺 𑀢𑀣𑁂𑀯 𑀑𑀯𑀤𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀚𑁆𑀛𑀪𑀸𑀲𑀻𑀢𑀺 ‘‘𑀅𑀬𑀁 𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀕𑀺𑀳𑀻 𑀲𑀜𑁆𑀜𑀸𑀧𑁂𑀦𑁆𑀢𑁄 𑀯𑀺𑀳𑀭𑀢𑀺, 𑀲𑀢𑁆𑀣𑀼 𑀲𑀸𑀲𑀦𑀁 𑀅𑀲𑀗𑁆𑀕𑀳𑀺𑀢𑀧𑀼𑀧𑁆𑀨𑀭𑀸𑀲𑀺 𑀯𑀺𑀬 𑀞𑀺𑀢𑀁, 𑀥𑀫𑁆𑀫𑀲𑀗𑁆𑀕𑀳𑀁 𑀦 𑀓𑀭𑁄𑀢𑀺, 𑀘𑁄𑀤𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀪𑀸𑀲𑀺.

𑀧𑀲𑀓𑁆𑀓𑀺𑀬𑀸𑀢𑀺 𑀧𑀯𑀺𑀲𑀺𑀢𑁆𑀯𑀸. 𑀳𑀤𑀬𑀲𑁆𑀫𑀺𑀁 𑀑𑀧𑀺𑀬𑀸𑀢𑀺 𑀓𑀺𑀘𑁆𑀘𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘 𑀳𑀤𑀬𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸. ‘‘𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 𑀦𑀺𑀩𑁆𑀩𑀸𑀦𑀁 𑀓𑀺𑀘𑁆𑀘𑀢𑁄 𑀳𑀤𑀬𑀫𑁆𑀳𑀺 𑀑𑀧𑁂𑀢𑀺 𑀦𑀸𑀫, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀧𑀦 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑁄 𑀆𑀭𑀫𑁆𑀫𑀡𑀢𑁄. 𑀢𑀤𑀼𑀪𑀬𑀫𑁆𑀧𑀺 𑀲𑀦𑁆𑀥𑀸𑀬𑁂𑀲𑀸 𑀪𑀸𑀲𑀢𑀺. 𑀛𑀸𑀬𑀸𑀢𑀺 𑀤𑁆𑀯𑀻𑀳𑀺 𑀛𑀸𑀦𑁂𑀳𑀺 𑀛𑀸𑀬𑀺𑀓𑁄 𑀪𑀯. 𑀩𑀺𑀴𑀺𑀩𑀺𑀴𑀺𑀓𑀸𑀢𑀺 𑀅𑀬𑀁 𑀕𑀺𑀳𑀻𑀳𑀺 𑀲𑀤𑁆𑀥𑀺𑀁 𑀩𑀺𑀴𑀺𑀩𑀺𑀴𑀺𑀓𑀣𑀸. 𑀧𑀜𑁆𑀘𑀫𑀁.

𑁬. 𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁬. 𑀙𑀝𑁆𑀞𑁂 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀢𑀺 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀅𑀕𑁆𑀕𑀫𑀳𑁂𑀲𑀻. 𑀲𑁄𑀪𑀲𑀻𑀢𑀺 𑀧𑀼𑀩𑁆𑀩𑁂𑀧𑀺 𑀲𑁄𑀪𑀲𑀺, 𑀇𑀤𑀸𑀦𑀺𑀧𑀺 𑀲𑁄𑀪𑀲𑀺. 𑀤𑀼𑀕𑁆𑀕𑀢𑀸𑀢𑀺 𑀦 𑀕𑀢𑀺𑀤𑀼𑀕𑁆𑀕𑀢𑀺𑀬𑀸 𑀤𑀼𑀕𑁆𑀕𑀢𑀸. 𑀢𑀸 𑀳𑀺 𑀲𑀼𑀕𑀢𑀺𑀬𑀁 𑀞𑀺𑀢𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺, 𑀧𑀝𑀺𑀧𑀢𑁆𑀢𑀺𑀤𑀼𑀕𑁆𑀕𑀢𑀺𑀬𑀸 𑀧𑀦 𑀤𑀼𑀕𑁆𑀕𑀢𑀸. 𑀢𑀢𑁄 𑀘𑀼𑀢𑀸 𑀳𑀺 𑀢𑀸 𑀦𑀺𑀭𑀬𑁂𑀧𑀺 𑀉𑀧𑀧𑀚𑁆𑀚𑀦𑁆𑀢𑀻𑀢𑀺 𑀤𑀼𑀕𑁆𑀕𑀢𑀸. 𑀧𑀢𑀺𑀝𑁆𑀞𑀺𑀢𑀸𑀢𑀺 𑀲𑀓𑁆𑀓𑀸𑀬𑀲𑁆𑀫𑀺𑀁 𑀳𑀺 𑀧𑀢𑀺𑀝𑁆𑀞𑀳𑀦𑁆𑀢𑁄 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀧𑀢𑀺𑀝𑁆𑀞𑀸𑀢𑀺 𑁋 𑀭𑀢𑁆𑀢𑁄 𑀭𑀸𑀕𑀯𑀲𑁂𑀦 𑀧𑀢𑀺𑀝𑁆𑀞𑀸𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀯𑀲𑁂𑀦… 𑀫𑀽𑀴𑁆𑀳𑁄 𑀫𑁄𑀳𑀯𑀲𑁂𑀦… 𑀯𑀺𑀦𑀺𑀩𑀤𑁆𑀥𑁄 𑀫𑀸𑀦𑀯𑀲𑁂𑀦… 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀯𑀲𑁂𑀦… 𑀣𑀸𑀫𑀕𑀢𑁄 𑀅𑀦𑀼𑀲𑀬𑀯𑀲𑁂𑀦… 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦… 𑀯𑀺𑀓𑁆𑀔𑁂𑀧𑀕𑀢𑁄 𑀉𑀤𑁆𑀥𑀘𑁆𑀘𑀯𑀲𑁂𑀦 𑀧𑀢𑀺𑀝𑁆𑀞𑀸𑀢𑀺. 𑀢𑀸𑀧𑀺 𑀏𑀯𑀁 𑀧𑀢𑀺𑀝𑁆𑀞𑀺𑀢𑀸𑀯. 𑀦𑀭𑀤𑁂𑀯𑀸𑀦𑀦𑁆𑀢𑀺 𑀤𑁂𑀯𑀦𑀭𑀸𑀦𑀁.

𑀦𑀢𑁆𑀣𑀺 𑀤𑀸𑀦𑀻𑀢𑀺 𑀲𑀸 𑀓𑀺𑀭 𑀤𑁂𑀯𑀥𑀻𑀢𑀸 𑀣𑁂𑀭𑁂 𑀩𑀮𑀯𑀲𑀺𑀦𑁂𑀳𑀸 𑀅𑀳𑁄𑀲𑀺, 𑀧𑀝𑀺𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀓𑀸𑀮𑁂𑀦 𑀆𑀕𑀦𑁆𑀢𑁆𑀯𑀸 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺, 𑀫𑀼𑀔𑁄𑀤𑀓𑀁 𑀤𑀦𑁆𑀢𑀓𑀝𑁆𑀞𑀁 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀧𑁂𑀢𑀺. 𑀣𑁂𑀭𑁄 𑀅𑀦𑀸𑀯𑀚𑁆𑀚𑀦𑁂𑀦 𑀧𑀭𑀺𑀪𑀼𑀜𑁆𑀚𑀢𑀺. 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀣𑁂𑀭𑀲𑁆𑀲 𑀚𑀺𑀡𑁆𑀡𑀘𑀻𑀯𑀭𑀲𑁆𑀲 𑀘𑁄𑀴𑀓𑀪𑀺𑀓𑁆𑀔𑀁 𑀘𑀭𑀢𑁄 𑀲𑀗𑁆𑀓𑀸𑀭𑀓𑀽𑀝𑁂 𑀤𑀺𑀩𑁆𑀩𑀤𑀼𑀲𑁆𑀲𑀁 𑀞𑀧𑁂𑀢𑁆𑀯𑀸 𑀧𑀓𑁆𑀓𑀫𑀺. 𑀣𑁂𑀭𑁄 𑀢𑀁 𑀤𑀺𑀲𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀑𑀮𑁄𑀓𑁂𑀦𑁆𑀢𑁄 𑀤𑀼𑀲𑁆𑀲𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀤𑀼𑀲𑁆𑀲𑀫𑁂𑀢’’𑀦𑁆𑀢𑀺 𑀜𑀢𑁆𑀯𑀸, ‘‘𑀅𑀮𑀁 𑀏𑀢𑁆𑀢𑀸𑀯𑀢𑀸’’𑀢𑀺 𑀅𑀕𑁆𑀕𑀳𑁂𑀲𑀺. 𑀢𑁂𑀦𑁂𑀯𑀲𑁆𑀲 𑀘𑀻𑀯𑀭𑀁 𑀦𑀺𑀝𑁆𑀞𑀸𑀲𑀺. 𑀅𑀣 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀘𑀸𑀢𑀺 𑀢𑀬𑁄 𑀚𑀦𑀸 𑀘𑀻𑀯𑀭𑀁 𑀓𑀭𑀺𑀁𑀲𑀼. 𑀲𑀢𑁆𑀣𑀸 𑀲𑀽𑀘𑀺𑀁 𑀬𑁄𑀚𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲 𑀧𑀺𑀡𑁆𑀟𑀸𑀬 𑀘𑀭𑀢𑁄 𑀤𑁂𑀯𑀢𑀸 𑀧𑀺𑀡𑁆𑀟𑀧𑀸𑀢𑀁 𑀲𑀫𑀸𑀤𑀧𑁂𑀢𑀺. 𑀲𑀸 𑀓𑀸𑀮𑁂𑀦 𑀏𑀓𑀺𑀓𑀸, 𑀓𑀸𑀮𑁂𑀦 𑀅𑀢𑁆𑀢𑀤𑀼𑀢𑀺𑀬𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀢𑀺. 𑀢𑀤𑀸 𑀧𑀦 𑀅𑀢𑁆𑀢𑀢𑀢𑀺𑀬𑀸 𑀆𑀕𑀦𑁆𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀫𑀬𑀁 𑀫𑀦𑀸𑀧𑀓𑀸𑀬𑀺𑀓𑀸 𑀦𑀸𑀫 𑀫𑀦𑀲𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀭𑀽𑀧𑀁 𑀫𑀸𑀧𑁂𑀫𑀸’’𑀢𑀺 𑀆𑀳. 𑀣𑁂𑀭𑁄 𑁋 ‘‘𑀏𑀢𑀸 𑀏𑀯𑀁 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺, 𑀲𑀩𑁆𑀩𑀸 𑀦𑀻𑀮𑀓𑀸 𑀳𑁄𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀸 𑀣𑁂𑀭𑀲𑁆𑀲 𑀫𑀦𑀁 𑀜𑀢𑁆𑀯𑀸 𑀲𑀩𑁆𑀩𑀸𑀯 𑀦𑀻𑀮𑀯𑀡𑁆𑀡𑀸 𑀅𑀳𑁂𑀲𑀼𑀁, 𑀏𑀯𑀁 𑀧𑀻𑀢𑀮𑁄𑀳𑀺𑀢𑀑𑀤𑀸𑀢𑀯𑀡𑁆𑀡𑀸𑀢𑀺. 𑀢𑀢𑁄 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀣𑁂𑀭𑁄 𑀅𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀅𑀲𑁆𑀲𑀸𑀤𑁂𑀢𑀻’’𑀢𑀺 𑀢𑀸 𑀲𑀫𑀚𑁆𑀚𑀁 𑀓𑀸𑀢𑀼𑀁 𑀆𑀭𑀤𑁆𑀥𑀸, 𑀏𑀓𑀸𑀧𑀺 𑀕𑀸𑀬𑀺, 𑀏𑀓𑀸𑀧𑀺 𑀦𑀘𑁆𑀘𑀺, 𑀏𑀓𑀸𑀧𑀺 𑀅𑀘𑁆𑀙𑀭𑀁 𑀧𑀳𑀭𑀺. 𑀣𑁂𑀭𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀑𑀓𑁆𑀔𑀺𑀧𑀺. 𑀢𑀢𑁄 𑁋 ‘‘𑀦 𑀅𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀣𑁂𑀭𑁄 𑀅𑀲𑁆𑀲𑀸𑀤𑁂𑀢𑀻’’𑀢𑀺 𑀜𑀢𑁆𑀯𑀸 𑀲𑀺𑀦𑁂𑀳𑀁 𑀯𑀸 𑀲𑀦𑁆𑀣𑀯𑀁 𑀯𑀸 𑀅𑀮𑀪𑀫𑀸𑀦𑀸 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀕𑀦𑁆𑀢𑀼𑀫𑀸𑀭𑀤𑁆𑀥𑀸. 𑀣𑁂𑀭𑁄 𑀢𑀸𑀲𑀁 𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑁋 ‘‘𑀫𑀸 𑀧𑀼𑀦𑀧𑁆𑀧𑀼𑀦𑀁 𑀆𑀕𑀘𑁆𑀙𑀺𑀁𑀲𑀽’’𑀢𑀺 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀯𑀺𑀓𑁆𑀔𑀻𑀡𑁄𑀢𑀺 𑀔𑀻𑀡𑁄. 𑀚𑀸𑀢𑀺𑀲𑀁𑀲𑀸𑀭𑁄𑀢𑀺 𑀢𑀢𑁆𑀣 𑀢𑀢𑁆𑀣 𑀚𑀸𑀢𑀺𑀲𑀗𑁆𑀔𑀸𑀢𑁄 𑀲𑀁𑀲𑀸𑀭𑁄. 𑀙𑀝𑁆𑀞𑀁.

𑁭. 𑀦𑀸𑀕𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁭. 𑀲𑀢𑁆𑀢𑀫𑁂 𑀅𑀢𑀺𑀓𑀸𑀮𑁂𑀦𑀸𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀩𑀮𑀯𑀧𑀘𑁆𑀘𑀽𑀲𑁂 𑀓𑁄𑀝𑀺𑀲𑀫𑁆𑀫𑀼𑀜𑁆𑀚𑀦𑀺𑀬𑀸 𑀣𑁄𑀓𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼𑀪𑀺𑀓𑁆𑀔𑀸𑀬 𑀧𑀸𑀢𑁄𑀯 𑀧𑀯𑀺𑀲𑀢𑀺. 𑀅𑀢𑀺𑀤𑀺𑀯𑀸𑀢𑀺 𑀬𑀸𑀕𑀼𑀁 𑀆𑀤𑀸𑀬 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑁋 ‘‘𑀫𑀦𑀼𑀲𑁆𑀲𑀸𑀦𑀁 𑀪𑁄𑀚𑀦𑀯𑁂𑀮𑀸𑀬 𑀧𑀡𑀻𑀢𑀁 𑀪𑀺𑀓𑁆𑀔𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀓𑀝𑁆𑀞𑁂 𑀫𑀚𑁆𑀛𑀦𑁆𑀳𑀺𑀓𑁂 𑀉𑀝𑁆𑀞𑀸𑀬 𑀥𑀫𑁆𑀫𑀓𑀭𑀡𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀅𑀓𑁆𑀔𑀻𑀦𑀺 𑀧𑀫𑀚𑁆𑀚𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀫𑀚𑁆𑀛𑀦𑁆𑀳𑀺𑀓𑁂 𑀯𑀻𑀢𑀺𑀯𑀢𑁆𑀢𑁂 𑀧𑀝𑀺𑀓𑁆𑀓𑀫𑀢𑀺. 𑀤𑀺𑀯𑀸 𑀘 𑀆𑀕𑀦𑁆𑀢𑁆𑀯𑀸𑀢𑀺 𑀅𑀢𑀺𑀓𑀸𑀮𑁂 𑀧𑀯𑀺𑀝𑁆𑀞𑁂𑀦 𑀦𑀸𑀫 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀞𑀫𑀢𑀭𑀁 𑀆𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀢𑁆𑀯𑀁 𑀧𑀦 𑀅𑀢𑀺𑀯𑀺𑀬 𑀤𑀺𑀯𑀸 𑀆𑀕𑀦𑁆𑀢𑁆𑀯𑀸 𑀕𑀢𑀸𑀲𑀻𑀢𑀺 𑀅𑀢𑁆𑀣𑁄. 𑀪𑀸𑀬𑀸𑀫𑀺 𑀦𑀸𑀕𑀤𑀢𑁆𑀢𑀦𑁆𑀢𑀺 𑀢𑀁 𑀦𑀸𑀕𑀤𑀢𑁆𑀢𑀁 𑀅𑀳𑀁 𑀪𑀸𑀬𑀸𑀫𑀺. 𑀲𑀼𑀧𑁆𑀧𑀕𑀩𑁆𑀪𑀦𑁆𑀢𑀺 𑀲𑀼𑀝𑁆𑀞𑀼 𑀧𑀕𑀩𑁆𑀪𑀁. 𑀓𑀼𑀮𑁂𑀲𑀽𑀢𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀺𑀉𑀧𑀝𑁆𑀞𑀸𑀓𑀓𑀼𑀮𑁂𑀲𑀼. 𑀲𑀢𑁆𑀢𑀫𑀁.

𑁮. 𑀓𑀼𑀮𑀖𑀭𑀡𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁮. 𑀅𑀝𑁆𑀞𑀫𑁂 𑀅𑀚𑁆𑀛𑁄𑀕𑀸𑀴𑁆𑀳𑀧𑁆𑀧𑀢𑁆𑀢𑁄𑀢𑀺 𑀑𑀕𑀸𑀳𑀧𑁆𑀧𑀢𑁆𑀢𑁄. 𑀲𑁄 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀢𑀁 𑀯𑀦𑀲𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺 𑀧𑀸𑀲𑀸𑀤𑀺𑀓𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀳𑀺. 𑀅𑀜𑁆𑀜𑀢𑀭𑀁 𑀓𑀼𑀮𑀁 𑀢𑀲𑁆𑀲 𑀇𑀭𑀺𑀬𑀸𑀧𑀣𑁂 𑀧𑀲𑀻𑀤𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀅𑀤𑀸𑀲𑀺. 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀧𑀼𑀦 𑀲𑀼𑀢𑁆𑀯𑀸 𑀅𑀢𑀺𑀭𑁂𑀓𑀢𑀭𑀁 𑀧𑀲𑀻𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀦𑀺𑀘𑁆𑀘𑀓𑀸𑀮𑀁 𑀇𑀥𑁂𑀯 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀲𑀺. 𑀣𑁂𑀭𑁄 𑀅𑀥𑀺𑀯𑀸𑀲𑁂𑀢𑁆𑀯𑀸 𑀢𑁂𑀲𑀁 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀯𑀻𑀭𑀺𑀬𑀁 𑀧𑀕𑁆𑀕𑀬𑁆𑀳 𑀖𑀝𑁂𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀳𑀽𑀧𑀓𑀸𑀭𑀁 𑀫𑁂 𑀏𑀢𑀁 𑀓𑀼𑀮𑀁, 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺? 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑁄 𑀢𑀢𑁆𑀣𑁂𑀯 𑀯𑀲𑀺. 𑀅𑀚𑁆𑀛𑀪𑀸𑀲𑀻𑀢𑀺 𑀲𑀸 𑀓𑀺𑀭 𑀣𑁂𑀭𑀲𑁆𑀲 𑀔𑀻𑀡𑀸𑀲𑀯𑀪𑀸𑀯𑀁 𑀅𑀚𑀸𑀦𑀦𑁆𑀢𑀻 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀣𑁂𑀭𑁄 𑀦𑁂𑀯 𑀅𑀜𑁆𑀜𑀁 𑀕𑀸𑀫𑀁 𑀕𑀘𑁆𑀙𑀢𑀺, 𑀦 𑀅𑀜𑁆𑀜𑀁 𑀖𑀭𑀁, 𑀦 𑀭𑀼𑀓𑁆𑀔𑀫𑀽𑀮𑀆𑀲𑀦𑀲𑀸𑀮𑀸𑀤𑀻𑀲𑀼 𑀦𑀺𑀲𑀻𑀤𑀢𑀺, 𑀦𑀺𑀘𑁆𑀘𑀓𑀸𑀮𑀁 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸𑀯 𑀦𑀺𑀲𑀻𑀤𑀢𑀺, 𑀉𑀪𑁄𑀧𑁂𑀢𑁂 𑀑𑀕𑀸𑀥𑀧𑁆𑀧𑀢𑁆𑀢𑀸 𑀧𑀝𑀺𑀕𑀸𑀥𑀧𑁆𑀧𑀢𑁆𑀢𑀸, 𑀓𑀤𑀸𑀘𑀺 𑀏𑀲 𑀇𑀫𑀁 𑀓𑀼𑀮𑀁 𑀤𑀽𑀲𑁂𑀬𑁆𑀬, 𑀘𑁄𑀤𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀢𑀲𑁆𑀫𑀸 𑀅𑀪𑀸𑀲𑀺.

𑀲𑀡𑁆𑀞𑀸𑀦𑁂𑀢𑀺 𑀦𑀕𑀭𑀤𑁆𑀯𑀸𑀭𑀲𑁆𑀲 𑀆𑀲𑀦𑁆𑀦𑁂 𑀫𑀦𑀼𑀲𑁆𑀲𑀸𑀦𑀁 𑀪𑀡𑁆𑀟𑀓𑀁 𑀑𑀢𑀸𑀭𑁂𑀢𑁆𑀯𑀸 𑀯𑀺𑀲𑁆𑀲𑀫𑀦𑀝𑁆𑀞𑀸𑀦𑁂. 𑀲𑀗𑁆𑀕𑀫𑁆𑀫𑀸𑀢𑀺 𑀲𑀫𑀸𑀕𑀦𑁆𑀢𑁆𑀯𑀸. 𑀫𑀦𑁆𑀢𑁂𑀦𑁆𑀢𑀻𑀢𑀺 𑀓𑀣𑁂𑀦𑁆𑀢𑀺. 𑀫𑀜𑁆𑀘 𑀢𑀜𑁆𑀘𑀸𑀢𑀺 𑀫𑀜𑁆𑀘 𑀓𑀣𑁂𑀦𑁆𑀢𑀺 𑀢𑀜𑁆𑀘 𑀓𑀣𑁂𑀦𑁆𑀢𑀺. 𑀓𑀺𑀫𑀦𑁆𑀢𑀭𑀦𑁆𑀢𑀺 𑀓𑀺𑀁 𑀓𑀸𑀭𑀡𑀁? 𑀩𑀳𑀽 𑀳𑀺 𑀲𑀤𑁆𑀤𑀸 𑀧𑀘𑁆𑀘𑀽𑀳𑀸𑀢𑀺 𑀩𑀳𑀼𑀓𑀸 𑀏𑀢𑁂 𑀮𑁄𑀓𑀲𑁆𑀫𑀺𑀁 𑀧𑀝𑀺𑀮𑁄𑀫𑀲𑀤𑁆𑀤𑀸. 𑀦 𑀢𑁂𑀦𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦, 𑀢𑁂𑀦 𑀯𑀸 𑀢𑀧𑀲𑁆𑀲𑀺𑀦𑀸 𑀦 𑀫𑀗𑁆𑀓𑀼 𑀳𑁄𑀢𑀩𑁆𑀩𑀁. 𑀦 𑀳𑀺 𑀢𑁂𑀦𑀸𑀢𑀺 𑀦 𑀳𑀺 𑀢𑁂𑀦 𑀧𑀭𑁂𑀳𑀺 𑀯𑀼𑀢𑁆𑀢𑀯𑀘𑀦𑁂𑀦 𑀲𑀢𑁆𑀢𑁄 𑀓𑀺𑀮𑀺𑀲𑁆𑀲𑀢𑀺, 𑀅𑀢𑁆𑀢𑀦𑀸 𑀓𑀢𑁂𑀦 𑀧𑀦 𑀧𑀸𑀧𑀓𑀫𑁆𑀫𑁂𑀦𑁂𑀯 𑀓𑀺𑀮𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀸𑀢𑀫𑀺𑀕𑁄 𑀬𑀣𑀸𑀢𑀺 𑀬𑀣𑀸 𑀯𑀦𑁂 𑀯𑀸𑀢𑀫𑀺𑀕𑁄 𑀯𑀸𑀢𑁂𑀭𑀺𑀢𑀸𑀦𑀁 𑀧𑀡𑁆𑀡𑀸𑀤𑀻𑀦𑀁 𑀲𑀤𑁆𑀤𑁂𑀦 𑀧𑀭𑀺𑀢𑀲𑁆𑀲𑀢𑀺, 𑀏𑀯𑀁 𑀬𑁄 𑀲𑀤𑁆𑀤𑀧𑀭𑀺𑀢𑁆𑀢𑀸𑀲𑀻 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦𑀸𑀲𑁆𑀲 𑀲𑀫𑁆𑀧𑀚𑁆𑀚𑀢𑁂 𑀯𑀢𑀦𑁆𑀢𑀺 𑀢𑀲𑁆𑀲 𑀮𑀳𑀼𑀘𑀺𑀢𑁆𑀢𑀲𑁆𑀲 𑀯𑀢𑀁 𑀦 𑀲𑀫𑁆𑀧𑀚𑁆𑀚𑀢𑀺. 𑀣𑁂𑀭𑁄 𑀧𑀦 𑀔𑀻𑀡𑀸𑀲𑀯𑀢𑁆𑀢𑀸 𑀲𑀫𑁆𑀧𑀦𑁆𑀦𑀯𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀞𑀫𑀁.

𑁯. 𑀯𑀚𑁆𑀚𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁯. 𑀦𑀯𑀫𑁂 𑀯𑀚𑁆𑀚𑀺𑀧𑀼𑀢𑁆𑀢𑀓𑁄𑀢𑀺 𑀯𑀚𑁆𑀚𑀺𑀭𑀝𑁆𑀞𑁂 𑀭𑀸𑀚𑀧𑀼𑀢𑁆𑀢𑁄 𑀙𑀢𑁆𑀢𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄. 𑀲𑀩𑁆𑀩𑀭𑀢𑁆𑀢𑀺𑀘𑀸𑀭𑁄𑀢𑀺 𑀓𑀢𑁆𑀢𑀺𑀓𑀦𑀓𑁆𑀔𑀢𑁆𑀢𑀁 𑀖𑁄𑀲𑁂𑀢𑁆𑀯𑀸 𑀲𑀓𑀮𑀦𑀕𑀭𑀁 𑀥𑀚𑀧𑀝𑀸𑀓𑀸𑀤𑀻𑀳𑀺 𑀧𑀝𑀺𑀫𑀡𑁆𑀟𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀲𑀩𑁆𑀩𑀭𑀢𑁆𑀢𑀺𑀘𑀸𑀭𑁄. 𑀇𑀤𑀜𑁆𑀳𑀺 𑀦𑀓𑁆𑀔𑀢𑁆𑀢𑀁 𑀬𑀸𑀯 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀳𑀺 𑀏𑀓𑀸𑀩𑀤𑁆𑀥𑀁 𑀳𑁄𑀢𑀺. 𑀢𑀽𑀭𑀺𑀬𑀢𑀸𑀴𑀺𑀢𑀯𑀸𑀤𑀺𑀢𑀦𑀺𑀕𑁆𑀖𑁄𑀲𑀲𑀤𑁆𑀤𑀦𑁆𑀢𑀺 𑀪𑁂𑀭𑀺𑀆𑀤𑀺𑀢𑀽𑀭𑀺𑀬𑀸𑀦𑀁 𑀢𑀸𑀴𑀺𑀢𑀸𑀦𑀁 𑀯𑀻𑀡𑀸𑀤𑀻𑀦𑀜𑁆𑀘 𑀯𑀸𑀤𑀺𑀢𑀸𑀦𑀁 𑀦𑀺𑀕𑁆𑀖𑁄𑀲𑀲𑀤𑁆𑀤𑀁. 𑀅𑀪𑀸𑀲𑀻𑀢𑀺 𑀯𑁂𑀲𑀸𑀮𑀺𑀬𑀁 𑀓𑀺𑀭 𑀲𑀢𑁆𑀢 𑀭𑀸𑀚𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀲𑀢𑀸𑀦𑀺 𑀲𑀢𑁆𑀢 𑀘 𑀭𑀸𑀚𑀸𑀦𑁄, 𑀢𑀢𑁆𑀢𑀓𑀸𑀯 𑀢𑁂𑀲𑀁 𑀉𑀧𑀭𑀸𑀚𑀲𑁂𑀦𑀸𑀧𑀢𑀺𑀆𑀤𑀬𑁄. 𑀢𑁂𑀲𑀼 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂𑀲𑀼 𑀦𑀓𑁆𑀔𑀢𑁆𑀢𑀓𑀻𑀴𑀦𑀢𑁆𑀣𑀸𑀬 𑀯𑀻𑀣𑀺𑀁 𑀑𑀢𑀺𑀡𑁆𑀡𑁂𑀲𑀼 𑀲𑀝𑁆𑀞𑀺𑀳𑀢𑁆𑀣𑁂 𑀫𑀳𑀸𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑁄 𑀦𑀪𑀲𑁆𑀲 𑀫𑀚𑁆𑀛𑁂 𑀞𑀺𑀢𑀁 𑀘𑀦𑁆𑀤𑀁 𑀤𑀺𑀲𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀨𑀮𑀓𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀅𑀪𑀸𑀲𑀺. 𑀅𑀧𑀯𑀺𑀤𑁆𑀥𑀁𑀯 𑀯𑀦𑀲𑁆𑀫𑀺𑀁 𑀤𑀸𑀭𑀼𑀓𑀦𑁆𑀢𑀺 𑀯𑀢𑁆𑀣𑀯𑁂𑀞𑀦𑀸𑀮𑀗𑁆𑀓𑀸𑀭𑀭𑀳𑀺𑀢𑀢𑁆𑀢𑀸 𑀯𑀦𑁂 𑀙𑀟𑁆𑀟𑀺𑀢𑀤𑀸𑀭𑀼𑀓𑀁 𑀯𑀺𑀬 𑀚𑀸𑀢𑀁. 𑀧𑀸𑀧𑀺𑀬𑁄𑀢𑀺 𑀮𑀸𑀫𑀓𑀢𑀭𑁄 𑀅𑀫𑁆𑀳𑁂𑀳𑀺 𑀅𑀜𑁆𑀜𑁄 𑀓𑁄𑀘𑀺 𑀅𑀢𑁆𑀣𑀺. 𑀧𑀺𑀳𑀬𑀦𑁆𑀢𑀻𑀢𑀺 𑀣𑁂𑀭𑁄 𑀆𑀭𑀜𑁆𑀜𑀺𑀓𑁄 𑀧𑀁𑀲𑀼𑀓𑀽𑀮𑀺𑀓𑁄 𑀧𑀺𑀡𑁆𑀟𑀧𑀸𑀢𑀺𑀓𑁄 𑀲𑀧𑀤𑀸𑀦𑀘𑀸𑀭𑀺𑀓𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄𑀢𑀺 𑀩𑀳𑀽 𑀢𑀼𑀬𑁆𑀳𑀁 𑀧𑀢𑁆𑀣𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀕𑁆𑀕𑀕𑀸𑀫𑀺𑀦𑀦𑁆𑀢𑀺 𑀲𑀕𑁆𑀕𑀁 𑀕𑀘𑁆𑀙𑀦𑁆𑀢𑀸𑀦𑀁 𑀕𑀢𑀸𑀦𑀫𑁆𑀧𑀺. 𑀦𑀯𑀫𑀁.

𑁧𑁦. 𑀲𑀚𑁆𑀛𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁦. 𑀤𑀲𑀫𑁂 𑀬𑀁 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀚𑁆𑀛𑀸𑀬𑀩𑀳𑀼𑀮𑁄𑀢𑀺 𑀦𑀺𑀲𑁆𑀲𑀭𑀡𑀧𑀭𑀺𑀬𑀢𑁆𑀢𑀺𑀯𑀲𑁂𑀦 𑀲𑀚𑁆𑀛𑀸𑀬𑀦𑀢𑁄 𑀩𑀳𑀼𑀢𑀭𑀁 𑀓𑀸𑀮𑀁 𑀲𑀚𑁆𑀛𑀸𑀬𑀦𑁆𑀢𑁄. 𑀲𑁄 𑀓𑀺𑀭 𑀆𑀘𑀭𑀺𑀬𑀲𑁆𑀲 𑀤𑀺𑀯𑀸𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀆𑀘𑀭𑀺𑀬𑀁 𑀉𑀤𑀺𑀓𑁆𑀔𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀅𑀣 𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸𑀯 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀢𑀸𑀮𑀯𑀡𑁆𑀝𑀯𑀸𑀢𑀁 𑀤𑀢𑁆𑀯𑀸 𑀧𑀸𑀦𑀻𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑀁 𑀫𑀓𑁆𑀔𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁄 𑀉𑀤𑁆𑀤𑁂𑀲𑀁 𑀕𑀳𑁂𑀢𑁆𑀯𑀸 𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀸 𑀲𑀚𑁆𑀛𑀸𑀬𑀁 𑀓𑀭𑁄𑀢𑀺. 𑀲𑁄 𑀦𑁆𑀳𑀸𑀦𑀓𑁄𑀝𑁆𑀞𑀓𑁂 𑀉𑀤𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀗𑁆𑀕𑀸𑀭𑀓𑀧𑀮𑁆𑀮𑁂 𑀅𑀕𑁆𑀕𑀺𑀁 𑀓𑀭𑁄𑀢𑀺. 𑀆𑀘𑀭𑀺𑀬𑀲𑁆𑀲 𑀦𑁆𑀳𑀢𑁆𑀯𑀸 𑀆𑀕𑀢𑀲𑁆𑀲 𑀧𑀸𑀤𑁂𑀲𑀼 𑀉𑀤𑀓𑀁 𑀧𑀼𑀜𑁆𑀙𑀺𑀢𑁆𑀯𑀸 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀉𑀤𑁆𑀤𑁂𑀲𑀁 𑀕𑀳𑁂𑀢𑁆𑀯𑀸 𑀧𑀞𑀫𑀬𑀸𑀫𑁂 𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀲𑀭𑀻𑀭𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀉𑀤𑁆𑀤𑁂𑀲𑀁 𑀕𑀳𑁂𑀢𑁆𑀯𑀸 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀦𑀺𑀭𑀼𑀤𑁆𑀥𑀲𑀤𑁆𑀤𑀁 𑀔𑀬𑀢𑁄 𑀲𑀫𑁆𑀫𑀲𑀢𑀺. 𑀢𑀢𑁄 𑀲𑁂𑀲𑀁 𑀉𑀧𑀸𑀤𑀸𑀬𑀭𑀽𑀧𑀁 𑀪𑀽𑀢𑀭𑀽𑀧𑀁 𑀦𑀸𑀫𑀭𑀽𑀧𑀦𑁆𑀢𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀉𑀤𑁆𑀤𑁂𑀲𑀕𑁆𑀕𑀳𑀡𑁂 𑀘 𑀲𑀚𑁆𑀛𑀸𑀬𑀓𑀭𑀡𑀻𑀬𑁂 𑀘 𑀦𑀺𑀭𑀼𑀲𑁆𑀲𑀼𑀓𑁆𑀓𑁄. 𑀲𑀗𑁆𑀓𑀲𑀸𑀬𑀢𑀻𑀢𑀺 𑀬𑀲𑁆𑀲 𑀤𑀸𑀦𑀺 𑀅𑀢𑁆𑀣𑀸𑀬 𑀅𑀳𑀁 𑀲𑀚𑁆𑀛𑀸𑀬𑀁 𑀓𑀭𑁂𑀬𑁆𑀬𑀁, 𑀲𑁄 𑀫𑁂 𑀅𑀢𑁆𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀓𑀺𑀁 𑀫𑁂 𑀇𑀤𑀸𑀦𑀺 𑀲𑀚𑁆𑀛𑀸𑀬𑁂𑀦𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀓𑀸𑀮𑀁 𑀅𑀢𑀺𑀯𑀢𑁆𑀢𑁂𑀢𑀺. 𑀅𑀚𑁆𑀛𑀪𑀸𑀲𑀻𑀢𑀺, ‘‘𑀓𑀺𑀁 𑀦𑀼 𑀔𑁄 𑀅𑀲𑁆𑀲 𑀣𑁂𑀭𑀲𑁆𑀲 𑀅𑀨𑀸𑀲𑀼𑀓𑀁 𑀚𑀸𑀢𑀁, 𑀉𑀤𑀸𑀳𑀼𑀲𑁆𑀲 𑀆𑀘𑀭𑀺𑀬𑀲𑁆𑀲? 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀧𑀼𑀩𑁆𑀩𑁂 𑀯𑀺𑀬 𑀫𑀥𑀼𑀭𑀲𑁆𑀲𑀭𑁂𑀦 𑀦 𑀲𑀚𑁆𑀛𑀸𑀬𑀢𑀻’’𑀢𑀺? 𑀆𑀕𑀦𑁆𑀢𑁆𑀯𑀸 𑀲𑀦𑁆𑀢𑀺𑀓𑁂 𑀞𑀺𑀢𑀸 𑀅𑀪𑀸𑀲𑀺.

𑀥𑀫𑁆𑀫𑀧𑀤𑀸𑀦𑀻𑀢𑀺 𑀇𑀥 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀦𑀸𑀥𑀻𑀬𑀲𑀻𑀢𑀺 𑀦 𑀲𑀚𑁆𑀛𑀸𑀬𑀲𑀺. 𑀦𑀸𑀤𑀺𑀬𑀲𑀻𑀢𑀺 𑀯𑀸 𑀧𑀸𑀞𑁄, 𑀦 𑀕𑀡𑁆𑀳𑀸𑀲𑀻𑀢𑀺 𑀅𑀢𑁆𑀣𑁄. 𑀧𑀲𑀁𑀲𑀦𑁆𑀢𑀺 𑀥𑀫𑁆𑀫𑀪𑀸𑀡𑀓𑁄 𑀧𑀲𑀁𑀲𑀁 𑀮𑀪𑀢𑀺, 𑀆𑀪𑀺𑀥𑀫𑁆𑀫𑀺𑀓𑁄 𑀲𑀼𑀢𑁆𑀢𑀦𑁆𑀢𑀺𑀓𑁄 𑀯𑀺𑀦𑀬𑀥𑀭𑁄𑀢𑀺𑀲𑁆𑀲 𑀧𑀲𑀁𑀲𑀺𑀢𑀸 𑀪𑀯𑀦𑁆𑀢𑀺. 𑀯𑀺𑀭𑀸𑀕𑁂𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑁂𑀦. 𑀅𑀜𑁆𑀜𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸. 𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀢𑀲𑁆𑀲 𑀤𑀺𑀝𑁆𑀞𑀲𑀼𑀢𑀸𑀤𑀺𑀦𑁄 𑀯𑀺𑀲𑁆𑀲𑀚𑁆𑀚𑀦𑀁 𑀲𑀦𑁆𑀢𑁄 𑀯𑀤𑀦𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀦 𑀩𑀼𑀤𑁆𑀥𑀯𑀘𑀦𑀲𑁆𑀲. 𑀏𑀢𑁆𑀢𑀸𑀯𑀢𑀸 ‘‘𑀣𑁂𑀭𑁄 𑀩𑀼𑀤𑁆𑀥𑀯𑀘𑀦𑀁 𑀦 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀻’’𑀢𑀺 𑀦 𑀦𑀺𑀘𑁆𑀘𑀓𑀸𑀮𑀁 𑀲𑀚𑁆𑀛𑀸𑀬𑀦𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀲𑀚𑁆𑀛𑀸𑀬𑀺𑀢𑁆𑀯𑀸 𑀧𑀦 𑁋 ‘‘𑀏𑀢𑁆𑀢𑀓𑀲𑁆𑀲𑀸𑀳𑀁 𑀅𑀢𑁆𑀣𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀆𑀥𑀸𑀭𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀜𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀤𑀲𑀫𑀁.

𑁧𑁧. 𑀅𑀓𑀼𑀲𑀮𑀯𑀺𑀢𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁧. 𑀏𑀓𑀸𑀤𑀲𑀫𑁂 𑀅𑀓𑀼𑀲𑀮𑁂 𑀯𑀺𑀢𑀓𑁆𑀓𑁂𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀢𑀬𑁄 𑀫𑀳𑀸𑀯𑀺𑀢𑀓𑁆𑀓𑁂. 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸𑀢𑀺 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁂𑀦. 𑀲𑁄𑀢𑀺 𑀲𑁄 𑀢𑁆𑀯𑀁. 𑀅𑀬𑁄𑀦𑀺𑀲𑁄 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀢𑀺 𑀏𑀢𑀁 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑀁 𑀯𑀚𑁆𑀚𑁂𑀳𑀺. 𑀲𑀢𑁆𑀣𑀸𑀭𑀦𑁆𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀧𑀸𑀲𑀸𑀤𑀺𑀓𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀺. 𑀧𑀻𑀢𑀺𑀲𑀼𑀔𑀫𑀲𑀁𑀲𑀬𑀦𑁆𑀢𑀺 𑀏𑀓𑀁𑀲𑁂𑀦𑁂𑀯 𑀩𑀮𑀯𑀧𑀻𑀢𑀺𑀜𑁆𑀘 𑀲𑀼𑀔𑀜𑁆𑀘 𑀅𑀥𑀺𑀕𑀫𑀺𑀲𑁆𑀲𑀲𑀺. 𑀏𑀓𑀸𑀤𑀲𑀫𑀁.

𑁧𑁨. 𑀫𑀚𑁆𑀛𑀦𑁆𑀳𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁨. 𑀤𑁆𑀯𑀸𑀤𑀲𑀫𑁂 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑁂 𑀦𑀦𑁆𑀤𑀦𑀯𑀕𑁆𑀕𑁂 𑀯𑀼𑀢𑁆𑀢𑀫𑁂𑀯. 𑀤𑁆𑀯𑀸𑀤𑀲𑀫𑀁.

𑁧𑁩. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁩. 𑀢𑁂𑀭𑀲𑀫𑀁 𑀤𑁂𑀯𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑁂 𑀚𑀦𑁆𑀢𑀼𑀤𑁂𑀯𑀧𑀼𑀢𑁆𑀢𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀢𑁂𑀭𑀲𑀫𑀁.

𑁧𑁪. 𑀕𑀦𑁆𑀥𑀢𑁆𑀣𑁂𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁪. 𑀘𑀼𑀤𑁆𑀤𑀲𑀫𑁂 𑀅𑀚𑁆𑀛𑀪𑀸𑀲𑀻𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀦𑀸𑀴𑁂 𑀕𑀳𑁂𑀢𑁆𑀯𑀸 𑀧𑀤𑀼𑀫𑀁 𑀲𑀺𑀗𑁆𑀖𑀫𑀸𑀦𑀁 𑀤𑀺𑀲𑁆𑀯𑀸𑀯 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀕𑀦𑁆𑀥𑀸𑀭𑀫𑁆𑀫𑀡𑀁 𑀉𑀧𑀦𑀺𑀚𑁆𑀛𑀸𑀬𑀢𑀺, 𑀲𑁆𑀯𑀸𑀬𑀁 𑀅𑀚𑁆𑀚 𑀉𑀧𑀲𑀺𑀗𑁆𑀖𑀁 𑀲𑁆𑀯𑁂𑀧𑀺 𑀧𑀼𑀦𑀤𑀺𑀯𑀲𑁂𑀧𑀺 𑀉𑀧𑀲𑀺𑀗𑁆𑀖𑀺𑀲𑁆𑀲𑀢𑀺, 𑀏𑀯𑀫𑀲𑁆𑀲 𑀲𑀸 𑀕𑀦𑁆𑀥𑀢𑀡𑁆𑀳𑀸 𑀯𑀟𑁆𑀠𑀺𑀢𑁆𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀦𑀸𑀲𑁂𑀲𑁆𑀲𑀢𑀺, 𑀫𑀸 𑀫𑀬𑀺 𑀧𑀲𑁆𑀲𑀦𑁆𑀢𑀺𑀬𑀸 𑀦𑀲𑁆𑀲𑀢𑀼, 𑀘𑁄𑀤𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀸𑀲𑀺.

𑀏𑀓𑀗𑁆𑀕𑀫𑁂𑀢𑀁 𑀣𑁂𑀬𑁆𑀬𑀸𑀦𑀦𑁆𑀢𑀺 𑀣𑁂𑀦𑀺𑀢𑀩𑁆𑀩𑀸𑀦𑀁 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀁 𑀧𑀜𑁆𑀘𑀓𑁄𑀝𑁆𑀞𑀸𑀲𑀸𑀦𑀁 𑀇𑀤𑀁 𑀏𑀓𑀗𑁆𑀕𑀁, 𑀏𑀓𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀦 𑀳𑀭𑀸𑀫𑀻𑀢𑀺 𑀦 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀫𑀺. 𑀆𑀭𑀸𑀢𑀺 𑀤𑀽𑀭𑁂 𑀦𑀸𑀴𑁂 𑀕𑀳𑁂𑀢𑁆𑀯𑀸 𑀦𑀸𑀫𑁂𑀢𑁆𑀯𑀸 𑀤𑀽𑀭𑁂 𑀞𑀺𑀢𑁄 𑀉𑀧𑀲𑀺𑀗𑁆𑀖𑀸𑀫𑀻𑀢𑀺 𑀯𑀤𑀢𑀺. 𑀯𑀡𑁆𑀡𑁂𑀦𑀸𑀢𑀺 𑀓𑀸𑀭𑀡𑁂𑀦.

𑀬𑁆𑀯𑀸𑀬𑀦𑁆𑀢𑀺 𑀬𑁄 𑀅𑀬𑀁. 𑀢𑀲𑁆𑀫𑀺𑀁 𑀓𑀺𑀭 𑀤𑁂𑀯𑀢𑀸𑀬 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁂𑀬𑁂𑀯 𑀏𑀓𑁄 𑀢𑀸𑀧𑀲𑁄 𑀑𑀢𑀭𑀺𑀢𑁆𑀯𑀸 𑀪𑀺𑀲𑀔𑀦𑀦𑀸𑀤𑀻𑀦𑀺 𑀓𑀸𑀢𑀼𑀁 𑀆𑀭𑀤𑁆𑀥𑁄, 𑀢𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀆𑀓𑀺𑀡𑁆𑀡𑀓𑀫𑁆𑀫𑀦𑁆𑀢𑁄𑀢𑀺 𑀏𑀯𑀁 𑀅𑀧𑀭𑀺𑀲𑀼𑀤𑁆𑀥𑀓𑀫𑁆𑀫𑀦𑁆𑀢𑁄. 𑀅𑀔𑀻𑀡𑀓𑀫𑁆𑀫𑀦𑁆𑀢𑁄𑀢𑀺𑀧𑀺 𑀧𑀸𑀞𑁄, 𑀓𑀓𑁆𑀔𑀴𑀓𑀫𑁆𑀫𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀦 𑀯𑀼𑀘𑁆𑀘𑀢𑀻𑀢𑀺 𑀕𑀦𑁆𑀥𑀘𑁄𑀭𑁄𑀢𑀺 𑀯𑀸 𑀧𑀼𑀧𑁆𑀨𑀘𑁄𑀭𑁄𑀢𑀺 𑀯𑀸 𑀓𑀲𑁆𑀫𑀸 𑀦 𑀯𑀼𑀘𑁆𑀘𑀢𑀺.

𑀆𑀓𑀺𑀡𑁆𑀡𑀮𑀼𑀤𑁆𑀤𑁄𑀢𑀺 𑀩𑀳𑀼𑀧𑀸𑀧𑁄 𑀕𑀸𑀴𑁆𑀳𑀧𑀸𑀧𑁄 𑀯𑀸, 𑀢𑀲𑁆𑀫𑀸 𑀦 𑀯𑀼𑀘𑁆𑀘𑀢𑀺. 𑀥𑀸𑀢𑀺𑀘𑁂𑀮𑀁𑀯 𑀫𑀓𑁆𑀔𑀺𑀢𑁄𑀢𑀺 𑀬𑀣𑀸 𑀥𑀸𑀢𑀺𑀬𑀸 𑀦𑀺𑀯𑀢𑁆𑀣𑀓𑀺𑀮𑀺𑀝𑁆𑀞𑀯𑀢𑁆𑀣𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀧𑀁𑀲𑀼𑀫𑀲𑀺𑀓𑀤𑁆𑀤𑀫𑀸𑀤𑀻𑀳𑀺 𑀫𑀓𑁆𑀔𑀺𑀢𑀁, 𑀏𑀯𑀫𑁂𑀯𑀁 𑀭𑀸𑀕𑀤𑁄𑀲𑀸𑀤𑀻𑀳𑀺 𑀫𑀓𑁆𑀔𑀺𑀢𑁄. 𑀅𑀭𑀳𑀸𑀫𑀺 𑀯𑀢𑁆𑀢𑀯𑁂𑀢𑀺 𑀅𑀭𑀳𑀸𑀫𑀺 𑀯𑀢𑁆𑀢𑀼𑀁. 𑀤𑁂𑀯𑀢𑀸𑀬 𑀘𑁄𑀤𑀦𑀸 𑀓𑀺𑀭 𑀲𑀼𑀕𑀢𑀸𑀦𑀼𑀲𑀺𑀝𑁆𑀞𑀺𑀲𑀤𑀺𑀲𑀸, 𑀦 𑀢𑀁 𑀮𑀸𑀫𑀓𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀓𑀧𑀼𑀕𑁆𑀕𑀮𑀸 𑀮𑀪𑀦𑁆𑀢𑀺. 𑀢𑀲𑁆𑀫𑀺𑀁 𑀧𑀦 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑀨𑀮𑀸𑀦𑀁 𑀪𑀩𑁆𑀩𑀭𑀽𑀧𑀸 𑀧𑀼𑀕𑁆𑀕𑀮𑀸 𑀢𑀁 𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳.

𑀲𑀼𑀘𑀺𑀕𑀯𑁂𑀲𑀺𑀦𑁄𑀢𑀺 𑀲𑀼𑀘𑀻𑀦𑀺 𑀲𑀻𑀮𑀲𑀫𑀸𑀥𑀺𑀜𑀸𑀡𑀸𑀦𑀺 𑀕𑀯𑁂𑀲𑀦𑁆𑀢𑀲𑁆𑀲. 𑀅𑀩𑁆𑀪𑀸𑀫𑀢𑁆𑀢𑀁 𑀯𑀸𑀢𑀺 𑀯𑀮𑀸𑀳𑀓𑀓𑀽𑀝𑀫𑀢𑁆𑀢𑀁 𑀯𑀺𑀬. 𑀚𑀸𑀦𑀸𑀲𑀻𑀢𑀺 𑀲𑀼𑀤𑁆𑀥𑁄 𑀅𑀬𑀦𑁆𑀢𑀺 𑀚𑀸𑀦𑀸𑀲𑀺. 𑀯𑀚𑁆𑀚𑀸𑀲𑀻𑀢𑀺 𑀯𑀤𑁂𑀬𑁆𑀬𑀸𑀲𑀺. 𑀦𑁂𑀯 𑀢𑀁 𑀉𑀧𑀚𑀻𑀯𑀸𑀫𑀸𑀢𑀺 𑀤𑁂𑀯𑀢𑀸 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀅𑀢𑁆𑀣𑀺 𑀫𑁂 𑀳𑀺𑀢𑀓𑀸𑀫𑀸 𑀤𑁂𑀯𑀢𑀸, 𑀲𑀸 𑀫𑀁 𑀘𑁄𑀤𑁂𑀲𑁆𑀲𑀢𑀺 𑀲𑀸𑀭𑁂𑀲𑁆𑀲𑀢𑀻𑀢𑀺 𑀧𑀫𑀸𑀤𑀫𑁆𑀧𑀺 𑀅𑀦𑀼𑀬𑀼𑀜𑁆𑀚𑁂𑀬𑁆𑀬, 𑀦𑀸𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀢𑁆𑀯𑀫𑁂𑀯𑀸𑀢𑀺 𑀢𑁆𑀯𑀁𑀬𑁂𑀯. 𑀚𑀸𑀦𑁂𑀬𑁆𑀬𑀸𑀢𑀺 𑀚𑀸𑀦𑁂𑀬𑁆𑀬𑀸𑀲𑀺. 𑀬𑁂𑀦𑀸𑀢𑀺 𑀬𑁂𑀦 𑀓𑀫𑁆𑀫𑁂𑀦 𑀲𑀼𑀕𑀢𑀺𑀁 𑀕𑀘𑁆𑀙𑁂𑀬𑁆𑀬𑀸𑀲𑀺, 𑀢𑀁 𑀓𑀫𑁆𑀫𑀁 𑀢𑁆𑀯𑀁𑀬𑁂𑀯 𑀚𑀸𑀦𑁂𑀬𑁆𑀬𑀸𑀲𑀻𑀢𑀺. 𑀘𑀼𑀤𑁆𑀤𑀲𑀫𑀁.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀯𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.