𑁯. 𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬𑁨. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀼𑀪𑀲𑀼𑀢𑁆𑀢𑀁. 𑀢𑀢𑁆𑀣 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄𑀢𑀺 𑀢𑀼𑀤𑀺𑀕𑀸𑀫𑀯𑀸𑀲𑀺𑀦𑁄 𑀢𑁄𑀤𑁂𑀬𑁆𑀬𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄. 𑀆𑀭𑀸𑀥𑀓𑁄 𑀳𑁄𑀢𑀻𑀢𑀺 𑀲𑀫𑁆𑀧𑀸𑀤𑀓𑁄 𑀳𑁄𑀢𑀺 𑀧𑀭𑀺𑀧𑀽𑀭𑀓𑁄. 𑀜𑀸𑀬𑀁 𑀥𑀫𑁆𑀫𑀦𑁆𑀢𑀺 𑀓𑀸𑀭𑀡𑀥𑀫𑁆𑀫𑀁. 𑀓𑀼𑀲𑀮𑀦𑁆𑀢𑀺 𑀅𑀦𑀯𑀚𑁆𑀚𑀁.

𑁪𑁬𑁩. 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀁 𑀅𑀓𑀼𑀲𑀮𑀧𑀝𑀺𑀧𑀤𑀁. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀓𑀼𑀲𑀮𑀧𑀝𑀺𑀧𑀤𑀁.

𑀫𑀳𑀝𑁆𑀞𑀦𑁆𑀢𑀺𑀆𑀤𑀻𑀲𑀼 𑀫𑀳𑀦𑁆𑀢𑁂𑀳𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁂𑀳𑀺 𑀯𑀸 𑀉𑀧𑀓𑀭𑀡𑁂𑀳𑀺 𑀯𑀸 𑀩𑀳𑀽𑀳𑀺 𑀅𑀢𑁆𑀣𑁄 𑀏𑀢𑁆𑀣𑀸𑀢𑀺 𑀫𑀳𑀝𑁆𑀞𑀁. 𑀫𑀳𑀦𑁆𑀢𑀸𑀦𑀺 𑀦𑀸𑀫𑀕𑁆𑀕𑀳𑀡𑀫𑀗𑁆𑀕𑀮𑀸𑀤𑀻𑀦𑀺 𑀓𑀺𑀘𑁆𑀘𑀸𑀦𑀺 𑀏𑀢𑁆𑀣𑀸𑀢𑀺 𑀫𑀳𑀸𑀓𑀺𑀘𑁆𑀘𑀁. 𑀇𑀤𑀁 𑀅𑀚𑁆𑀚 𑀓𑀢𑁆𑀢𑀩𑁆𑀩𑀁, 𑀇𑀤𑀁 𑀲𑁆𑀯𑁂𑀢𑀺 𑀏𑀯𑀁 𑀫𑀳𑀦𑁆𑀢𑀸𑀦𑀺 𑀅𑀥𑀺𑀓𑀸𑀭𑀲𑀗𑁆𑀔𑀸𑀢𑀸𑀦𑀺 𑀅𑀥𑀺𑀓𑀭𑀡𑀸𑀦𑀺 𑀏𑀢𑁆𑀣𑀸𑀢𑀺 𑀫𑀳𑀸𑀥𑀺𑀓𑀭𑀡𑀁. 𑀩𑀳𑀽𑀦𑀁 𑀓𑀫𑁆𑀫𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀢𑀸𑀯𑀲𑁂𑀦 𑀧𑀻𑀴𑀸𑀲𑀗𑁆𑀔𑀸𑀢𑁄 𑀫𑀳𑀸𑀲𑀫𑀸𑀭𑀫𑁆𑀪𑁄 𑀏𑀢𑁆𑀣𑀸𑀢𑀺 𑀫𑀳𑀸𑀲𑀫𑀸𑀭𑀫𑁆𑀪𑀁. 𑀖𑀭𑀸𑀯𑀸𑀲𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀖𑀭𑀸𑀯𑀸𑀲𑀓𑀫𑁆𑀫𑀁. 𑀏𑀯𑀁 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀲𑀺𑀓𑀫𑁆𑀫𑁂 𑀘𑁂𑀢𑁆𑀣 𑀦𑀗𑁆𑀕𑀮𑀓𑁄𑀝𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀉𑀧𑀓𑀭𑀡𑀸𑀦𑀁 𑀧𑀭𑀺𑀬𑁂𑀲𑀦𑀯𑀲𑁂𑀦 𑀫𑀳𑀝𑁆𑀞𑀢𑀸, 𑀯𑀡𑀺𑀚𑁆𑀚𑀸𑀬 𑀬𑀣𑀸𑀞𑀺𑀢𑀁𑀬𑁂𑀯 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀅𑀧𑁆𑀧𑀝𑁆𑀞𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀧𑀚𑁆𑀚𑀫𑀸𑀦𑀦𑁆𑀢𑀺 𑀅𑀯𑀼𑀝𑁆𑀞𑀺𑀅𑀢𑀺𑀯𑀼𑀝𑁆𑀞𑀺𑀆𑀤𑀻𑀳𑀺 𑀓𑀲𑀺𑀓𑀫𑁆𑀫𑀁, 𑀫𑀡𑀺𑀲𑀼𑀯𑀡𑁆𑀡𑀸𑀤𑀻𑀲𑀼 𑀅𑀘𑁆𑀙𑁂𑀓𑀢𑀸𑀤𑀻𑀳𑀺 𑀘 𑀯𑀡𑀺𑀚𑁆𑀚𑀓𑀫𑁆𑀫𑀁 𑀅𑀧𑁆𑀧𑀨𑀮𑀁 𑀳𑁄𑀢𑀺, 𑀫𑀽𑀮𑀘𑁆𑀙𑁂𑀤𑀫𑁆𑀧𑀺 𑀧𑀸𑀧𑀼𑀡𑀸𑀢𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀲𑀫𑁆𑀧𑀚𑁆𑀚𑀫𑀸𑀦𑀁 𑀫𑀳𑀧𑁆𑀨𑀮𑀁 𑀘𑀽𑀴𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀺𑀬.

𑁪𑁬𑁪. 𑀏𑀯𑀫𑁂𑀯 𑀔𑁄𑀢𑀺 𑀬𑀣𑀸 𑀓𑀲𑀺𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀧𑀚𑁆𑀚𑀫𑀸𑀦𑀁 𑀅𑀧𑁆𑀧𑀨𑀮𑀁 𑀳𑁄𑀢𑀺, 𑀏𑀯𑀁 𑀖𑀭𑀸𑀯𑀸𑀲𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺. 𑀅𑀓𑀢𑀓𑀮𑁆𑀬𑀸𑀡𑁄 𑀳𑀺 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀫𑀳𑀸𑀤𑀢𑁆𑀢𑀲𑁂𑀦𑀸𑀧𑀢𑀺 𑀦𑀸𑀫 𑀓𑀺𑀭𑁂𑀓𑁄 𑀩𑁆𑀭𑀸𑀳𑁆𑀫𑀡𑀪𑀢𑁆𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀫𑀭𑀡𑀲𑀫𑀬𑁂 𑀦𑀺𑀭𑀬𑁄 𑀉𑀧𑀝𑁆𑀞𑀸𑀲𑀺. 𑀲𑁄 𑀩𑁆𑀭𑀸𑀳𑁆𑀫𑀡𑁂𑀳𑀺 ‘‘𑀓𑀺𑀁 𑀧𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁄? 𑀮𑁄𑀳𑀺𑀢𑀖𑀭𑀦𑁆𑀢𑀺 𑀆𑀳. 𑀩𑁆𑀭𑀳𑁆𑀫𑀮𑁄𑀓𑁄 𑀪𑁄 𑀏𑀲𑁄𑀢𑀺. 𑀩𑁆𑀭𑀳𑁆𑀫𑀮𑁄𑀓𑁄 𑀦𑀸𑀫 𑀪𑁄 𑀓𑀳𑀦𑁆𑀢𑀺? 𑀉𑀧𑀭𑀻𑀢𑀺. 𑀫𑀬𑁆𑀳𑀁 𑀳𑁂𑀝𑁆𑀞𑀸 𑀉𑀧𑀝𑁆𑀞𑀸𑀢𑀻𑀢𑀺. 𑀓𑀺𑀜𑁆𑀘𑀸𑀧𑀺 𑀳𑁂𑀝𑁆𑀞𑀸 𑀉𑀧𑀝𑁆𑀞𑀸𑀢𑀺, 𑀢𑀣𑀸𑀧𑀺 𑀉𑀧𑀭𑀻𑀢𑀺 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄. ‘‘𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀬𑀜𑁆𑀜𑁂 𑀤𑁄𑀲𑁄 𑀤𑀺𑀦𑁆𑀦𑁄’’𑀢𑀺 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀦𑀻𑀳𑀭𑀺𑀢𑀼𑀁 𑀅𑀤𑀁𑀲𑀼. 𑀲𑀫𑁆𑀧𑀚𑁆𑀚𑀫𑀸𑀦𑀁 𑀧𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀓𑀢𑀓𑀮𑁆𑀬𑀸𑀡𑁄 𑀳𑀺 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀲𑀓𑀮𑀸𑀬 𑀕𑀼𑀢𑁆𑀢𑀺𑀮𑀯𑀺𑀫𑀸𑀦𑀓𑀣𑀸𑀬 𑀤𑀻𑀧𑁂𑀢𑀩𑁆𑀩𑀁. 𑀬𑀣𑀸 𑀧𑀦 𑀢𑀁 𑀯𑀡𑀺𑀚𑁆𑀚𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀧𑀚𑁆𑀚𑀫𑀸𑀦𑀁 𑀅𑀧𑁆𑀧𑀨𑀮𑀁 𑀳𑁄𑀢𑀺, 𑀏𑀯𑀁 𑀲𑀻𑀮𑁂𑀲𑀼 𑀅𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀅𑀦𑁂𑀲𑀦𑀸𑀬 𑀬𑀼𑀢𑁆𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺. 𑀏𑀯𑀭𑀽𑀧𑀸 𑀳𑀺 𑀦𑁂𑀯 𑀛𑀸𑀦𑀸𑀤𑀺𑀲𑀼𑀔𑀁 𑀦 𑀲𑀕𑁆𑀕𑀫𑁄𑀓𑁆𑀔𑀁 𑀮𑀪𑀢𑀺. 𑀲𑀫𑁆𑀧𑀚𑁆𑀚𑀫𑀸𑀦𑀁 𑀧𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀲𑀻𑀮𑀸𑀦𑀺 𑀳𑀺 𑀧𑀽𑀭𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀅𑀭𑀳𑀢𑁆𑀢𑀫𑁆𑀧𑀺 𑀧𑀸𑀧𑀼𑀡𑀸𑀢𑀺.

𑀩𑁆𑀭𑀸𑀳𑁆𑀫𑀡𑀸, 𑀪𑁄 𑀕𑁄𑀢𑀫𑁄𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺? 𑀩𑁆𑀭𑀸𑀳𑁆𑀫𑀡𑀸 𑀯𑀤𑀦𑁆𑀢𑀺 𑁋 ‘‘𑀧𑀩𑁆𑀩𑀚𑀺𑀢𑁄 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂 𑀧𑀽𑀭𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀕𑀳𑀝𑁆𑀞𑁄𑀯 𑀧𑀽𑀭𑁂𑀢𑀻’’𑀢𑀺. 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑁋 ‘‘𑀕𑀺𑀳𑀺𑀲𑁆𑀲 𑀯𑀸 𑀅𑀳𑀁 𑀫𑀸𑀡𑀯 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀤𑀢𑀺, 𑀦𑁂𑀯 𑀧𑀩𑁆𑀩𑀚𑀺𑀢𑀁 𑀫𑀼𑀜𑁆𑀘𑀢𑀺, 𑀫𑀬𑁆𑀳𑀫𑁂𑀯 𑀧𑀼𑀘𑁆𑀙𑀁 𑀫𑀜𑁆𑀜𑁂 𑀦 𑀲𑀮𑁆𑀮𑀓𑁆𑀔𑁂𑀢𑀻𑀢𑀺 𑀘𑀸𑀕𑀲𑀻𑀲𑁂𑀦 𑀧𑀜𑁆𑀘 𑀥𑀫𑁆𑀫𑁂 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀘𑁂 𑀢𑁂 𑀅𑀕𑀭𑀽𑀢𑀺 𑀲𑀘𑁂 𑀢𑀼𑀬𑁆𑀳𑀁 𑀬𑀣𑀸 𑀩𑁆𑀭𑀸𑀳𑁆𑀫𑀡𑀸 𑀧𑀜𑁆𑀜𑀧𑁂𑀦𑁆𑀢𑀺, 𑀢𑀣𑀸 𑀇𑀥 𑀪𑀸𑀲𑀺𑀢𑀼𑀁 𑀪𑀸𑀭𑀺𑀬𑀁 𑀦 𑀳𑁄𑀢𑀺, 𑀬𑀤𑀺 𑀦 𑀓𑁄𑀘𑀺 𑀅𑀨𑀸𑀲𑀼𑀓𑀪𑀸𑀯𑁄 𑀳𑁄𑀢𑀺, 𑀪𑀸𑀲𑀲𑁆𑀲𑀽𑀢𑀺 𑀅𑀢𑁆𑀣𑁄. 𑀦 𑀔𑁄 𑀫𑁂, 𑀪𑁄𑀢𑀺 𑀓𑀺𑀁 𑀲𑀦𑁆𑀥𑀸𑀬𑀸𑀳? 𑀧𑀡𑁆𑀟𑀺𑀢𑀧𑀝𑀺𑀭𑀽𑀧𑀓𑀸𑀦𑀜𑁆𑀳𑀺 𑀲𑀦𑁆𑀢𑀺𑀓𑁂 𑀓𑀣𑁂𑀢𑀼𑀁 𑀤𑀼𑀓𑁆𑀔𑀁 𑀳𑁄𑀢𑀺, 𑀢𑁂 𑀧𑀤𑁂 𑀧𑀤𑁂 𑀅𑀓𑁆𑀔𑀭𑁂 𑀅𑀓𑁆𑀔𑀭𑁂 𑀤𑁄𑀲𑀫𑁂𑀯 𑀯𑀤𑀦𑁆𑀢𑀺. 𑀏𑀓𑀦𑁆𑀢𑀧𑀡𑁆𑀟𑀺𑀢𑀸 𑀧𑀦 𑀓𑀣𑀁 𑀲𑀼𑀢𑁆𑀯𑀸 𑀲𑀼𑀓𑀣𑀺𑀢𑀁 𑀧𑀲𑀁𑀲𑀦𑁆𑀢𑀺, 𑀤𑀼𑀓𑁆𑀓𑀣𑀺𑀢𑁂 𑀧𑀸𑀴𑀺𑀧𑀤𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀲𑀼 𑀬𑀁 𑀬𑀁 𑀯𑀺𑀭𑀼𑀚𑁆𑀛𑀢𑀺, 𑀢𑀁 𑀢𑀁 𑀉𑀚𑀼𑀁 𑀓𑀢𑁆𑀯𑀸 𑀤𑁂𑀦𑁆𑀢𑀺. 𑀪𑀕𑀯𑀢𑀸 𑀘 𑀲𑀤𑀺𑀲𑁄 𑀏𑀓𑀦𑁆𑀢𑀧𑀡𑁆𑀟𑀺𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑁂𑀦𑀸𑀳 ‘‘𑀦 𑀔𑁄 𑀫𑁂, 𑀪𑁄 𑀕𑁄𑀢𑀫, 𑀕𑀭𑀼, 𑀬𑀢𑁆𑀣𑀲𑁆𑀲𑀼 𑀪𑀯𑀦𑁆𑀢𑁄 𑀯𑀸 𑀦𑀺𑀲𑀺𑀦𑁆𑀦𑁄 𑀪𑀯𑀦𑁆𑀢𑀭𑀽𑀧𑁄 𑀯𑀸’’𑀢𑀺. 𑀲𑀘𑁆𑀘𑀦𑁆𑀢𑀺 𑀯𑀘𑀻𑀲𑀘𑁆𑀘𑀁. 𑀢𑀧𑀦𑁆𑀢𑀺 𑀢𑀧𑀘𑀭𑀺𑀬𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺𑀁. 𑀅𑀚𑁆𑀛𑁂𑀦𑀦𑁆𑀢𑀺 𑀫𑀦𑁆𑀢𑀕𑀳𑀡𑀁. 𑀘𑀸𑀕𑀦𑁆𑀢𑀺 𑀆𑀫𑀺𑀲𑀧𑀭𑀺𑀘𑁆𑀘𑀸𑀕𑀁.

𑁪𑁬𑁬. 𑀧𑀸𑀧𑀺𑀢𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀚𑀸𑀦𑀦𑀪𑀸𑀯𑀁 𑀧𑀸𑀧𑀺𑀢𑁄 𑀪𑀯𑀺𑀲𑁆𑀲𑀢𑀺. 𑀏𑀢𑀤𑀯𑁄𑀘𑀸𑀢𑀺 𑀪𑀕𑀯𑀢𑀸 𑀅𑀦𑁆𑀥𑀯𑁂𑀡𑀽𑀧𑀫𑀸𑀬 𑀦𑀺𑀕𑁆𑀕𑀳𑀺𑀢𑁄 𑀢𑀁 𑀧𑀘𑁆𑀘𑀸𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀬𑀣𑀸 𑀦𑀸𑀫 𑀤𑀼𑀩𑁆𑀩𑀮𑀲𑀼𑀦𑀔𑁄 𑀫𑀺𑀕𑀁 𑀉𑀝𑁆𑀞𑀧𑁂𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 𑀲𑀬𑀁 𑀅𑀧𑀲𑀓𑁆𑀓𑀢𑀺, 𑀏𑀯𑀫𑁂𑀯𑀁 𑀆𑀘𑀭𑀺𑀬𑀁 𑀅𑀧𑀤𑀺𑀲𑀦𑁆𑀢𑁄 𑀏𑀯𑀁 ‘‘𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀧𑁄𑀓𑁆𑀔𑀭𑀲𑀸𑀢𑀻𑀢𑀺 𑀇𑀤𑀁 𑀢𑀲𑁆𑀲 𑀦𑀸𑀫𑀁, ‘‘𑀧𑁄𑀓𑁆𑀔𑀭𑀲𑀸𑀬𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀓𑀺𑀭 𑀓𑀸𑀬𑁄 𑀲𑁂𑀢𑀧𑁄𑀓𑁆𑀔𑀭𑀲𑀤𑀺𑀲𑁄 𑀤𑁂𑀯𑀦𑀕𑀭𑁂 𑀉𑀲𑁆𑀲𑀸𑀧𑀺𑀢𑀭𑀚𑀢𑀢𑁄𑀭𑀡𑀁 𑀯𑀺𑀬 𑀲𑁄𑀪𑀢𑀺, 𑀲𑀻𑀲𑀁 𑀧𑀦𑀲𑁆𑀲 𑀓𑀸𑀴𑀯𑀡𑁆𑀡𑀇𑀦𑁆𑀤𑀦𑀻𑀮𑀫𑀬𑀁 𑀯𑀺𑀬, 𑀫𑀲𑁆𑀲𑀼𑀧𑀺 𑀘𑀦𑁆𑀤𑀫𑀡𑁆𑀟𑀮𑁂 𑀓𑀸𑀴𑀫𑁂𑀖𑀭𑀸𑀚𑀺 𑀯𑀺𑀬 𑀔𑀸𑀬𑀢𑀺, 𑀅𑀓𑁆𑀔𑀻𑀦𑀺 𑀦𑀻𑀮𑀼𑀧𑁆𑀧𑀮𑀲𑀤𑀺𑀲𑀸𑀦𑀺, 𑀦𑀸𑀲𑀸 𑀭𑀚𑀢𑀧𑀦𑀸𑀴𑀺𑀓𑀸 𑀯𑀺𑀬 𑀲𑀼𑀯𑀝𑁆𑀝𑀺𑀢𑀸 𑀲𑀼𑀧𑀭𑀺𑀲𑀼𑀤𑁆𑀥𑀸, 𑀳𑀢𑁆𑀣𑀧𑀸𑀤𑀢𑀮𑀸𑀦𑀺 𑀘𑁂𑀯 𑀫𑀼𑀔𑀜𑁆𑀘 𑀓𑀢𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀁 𑀯𑀺𑀬 𑀲𑁄𑀪𑀢𑀺. 𑀅𑀢𑀺𑀯𑀺𑀬 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀢𑀪𑀸𑀯𑁄. 𑀅𑀭𑀸𑀚𑀓𑁂 𑀞𑀸𑀦𑁂 𑀭𑀸𑀚𑀸𑀦𑀁 𑀓𑀸𑀢𑀼𑀁 𑀬𑀼𑀢𑁆𑀢𑀫𑀺𑀫𑀁 𑀩𑁆𑀭𑀸𑀳𑁆𑀫𑀡𑀁, 𑀏𑀯𑀫𑁂𑀲 𑀲𑀲𑁆𑀲𑀺𑀭𑀺𑀓𑁄, 𑀇𑀢𑀺 𑀦𑀁 𑀧𑁄𑀓𑁆𑀔𑀭𑀲𑀤𑀺𑀲𑀢𑁆𑀢𑀸 ‘‘𑀧𑁄𑀓𑁆𑀔𑀭𑀲𑀸𑀢𑀻’’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, 𑀧𑁄𑀓𑁆𑀔𑀭𑁂 𑀧𑀦 𑀲𑁄 𑀦𑀺𑀩𑁆𑀩𑀢𑁆𑀢𑁄, 𑀦 𑀫𑀸𑀢𑀼𑀓𑀼𑀘𑁆𑀙𑀺𑀬𑀦𑁆𑀢𑀺 𑀇𑀢𑀺 𑀦𑀁 𑀧𑁄𑀓𑁆𑀔𑀭𑁂 𑀲𑀬𑀺𑀢𑀢𑁆𑀢𑀸 ‘‘𑀧𑁄𑀓𑁆𑀔𑀭𑀲𑀸𑀬𑀻’’𑀢𑀺𑀧𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀑𑀧𑀫𑀜𑁆𑀜𑁄𑀢𑀺 𑀉𑀧𑀫𑀜𑁆𑀜𑀕𑁄𑀢𑁆𑀢𑁄. 𑀲𑀼𑀪𑀕𑀯𑀦𑀺𑀓𑁄𑀢𑀺 𑀉𑀓𑁆𑀓𑀝𑁆𑀞𑀸𑀬 𑀲𑀼𑀪𑀕𑀯𑀦𑀲𑁆𑀲 𑀇𑀲𑁆𑀲𑀭𑁄. 𑀳𑀲𑁆𑀲𑀓𑀁𑀬𑁂𑀯𑀸𑀢𑀺 𑀳𑀲𑀺𑀢𑀩𑁆𑀩𑀓𑀜𑁆𑀜𑁂𑀯. 𑀦𑀸𑀫𑀓𑀁𑀬𑁂𑀯𑀸𑀢𑀺 𑀮𑀸𑀫𑀓𑀁𑀬𑁂𑀯. 𑀢𑀤𑁂𑀯 𑀢𑀁 𑀅𑀢𑁆𑀣𑀸𑀪𑀸𑀯𑁂𑀦 𑀭𑀺𑀢𑁆𑀢𑀓𑀁. 𑀭𑀺𑀢𑁆𑀢𑀓𑀢𑁆𑀢𑀸 𑀘 𑀢𑀼𑀘𑁆𑀙𑀓𑀁. 𑀇𑀤𑀸𑀦𑀺 𑀦𑀁 𑀪𑀕𑀯𑀸 𑀲𑀸𑀘𑀭𑀺𑀬𑀓𑀁 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀓𑀺𑀁 𑀧𑀦 𑀫𑀸𑀡𑀯𑀸𑀢𑀺𑀆𑀤𑀺𑀫𑀸𑀳.

𑁪𑁬𑁭. 𑀢𑀢𑁆𑀣 𑀓𑀢𑀫𑀸 𑀦𑁂𑀲𑀁 𑀲𑁂𑀬𑁆𑀬𑁄𑀢𑀺 𑀓𑀢𑀫𑀸 𑀯𑀸𑀘𑀸 𑀢𑁂𑀲𑀁 𑀲𑁂𑀬𑁆𑀬𑁄, 𑀧𑀸𑀲𑀁𑀲𑀢𑀭𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀼𑀘𑁆𑀘𑀸𑀢𑀺 𑀲𑀫𑁆𑀫𑀼𑀢𑀺𑀬𑀸 𑀮𑁄𑀓𑀯𑁄𑀳𑀸𑀭𑁂𑀦. 𑀫𑀦𑁆𑀢𑀸𑀢𑀺 𑀢𑀼𑀮𑀬𑀺𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸. 𑀧𑀝𑀺𑀲𑀗𑁆𑀔𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸. 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀓𑀸𑀭𑀡𑀦𑀺𑀲𑁆𑀲𑀺𑀢𑀁. 𑀏𑀯𑀁 𑀲𑀦𑁆𑀢𑁂𑀢𑀺 𑀮𑁄𑀓𑀯𑁄𑀳𑀸𑀭𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀓𑀣𑀺𑀢𑀸𑀬 𑀲𑁂𑀬𑁆𑀬𑀪𑀸𑀯𑁂 𑀲𑀢𑀺. 𑀆𑀯𑀼𑀢𑁄𑀢𑀺 𑀆𑀯𑀭𑀺𑀢𑁄. 𑀦𑀺𑀯𑀼𑀢𑁄𑀢𑀺 𑀦𑀺𑀯𑀸𑀭𑀺𑀢𑁄. 𑀑𑀨𑀼𑀝𑁄𑀢𑀺 𑀑𑀦𑀤𑁆𑀥𑁄. 𑀧𑀭𑀺𑀬𑁄𑀦𑀤𑁆𑀥𑁄𑀢𑀺 𑀧𑀮𑀺𑀯𑁂𑀞𑀺𑀢𑁄.

𑁪𑁬𑁮. 𑀕𑀥𑀺𑀢𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀲𑀘𑁂 𑀢𑀁, 𑀪𑁄 𑀕𑁄𑀢𑀫, 𑀞𑀸𑀦𑀦𑁆𑀢𑀺 𑀲𑀘𑁂 𑀏𑀢𑀁 𑀓𑀸𑀭𑀡𑀫𑀢𑁆𑀣𑀺. 𑀲𑁆𑀯𑀸𑀲𑁆𑀲𑀸𑀢𑀺 𑀥𑀽𑀫𑀙𑀸𑀭𑀺𑀓𑀸𑀤𑀻𑀦𑀁 𑀅𑀪𑀸𑀯𑁂𑀦 𑀲𑁄 𑀅𑀲𑁆𑀲 𑀅𑀕𑁆𑀕𑀺 𑀅𑀘𑁆𑀘𑀺𑀫𑀸 𑀘 𑀯𑀡𑁆𑀡𑀺𑀫𑀸 𑀘 𑀧𑀪𑀲𑁆𑀲𑀭𑁄 𑀘𑀸𑀢𑀺. 𑀢𑀣𑀽𑀧𑀫𑀸𑀳𑀁 𑀫𑀸𑀡𑀯𑀸𑀢𑀺 𑀢𑀧𑁆𑀧𑀝𑀺𑀪𑀸𑀕𑀁 𑀅𑀳𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑁂𑀯 𑀳𑀺 𑀢𑀺𑀡𑀓𑀝𑁆𑀞𑀼𑀧𑀸𑀤𑀸𑀦𑀁 𑀧𑀝𑀺𑀘𑁆𑀘 𑀚𑀮𑀫𑀸𑀦𑁄 𑀅𑀕𑁆𑀕𑀺 𑀥𑀽𑀫𑀙𑀸𑀭𑀺𑀓𑀗𑁆𑀕𑀸𑀭𑀸𑀦𑀁 𑀅𑀢𑁆𑀣𑀺𑀢𑀸𑀬 𑀲𑀤𑁄𑀲𑁄 𑀳𑁄𑀢𑀺, 𑀏𑀯𑀫𑁂𑀯𑀁 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀧𑀻𑀢𑀺 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑁄𑀓𑀸𑀤𑀻𑀦𑀁 𑀅𑀢𑁆𑀣𑀺𑀢𑀸𑀬 𑀲𑀤𑁄𑀲𑀸. 𑀬𑀣𑀸 𑀧𑀦 𑀧𑀭𑀺𑀘𑁆𑀘𑀢𑁆𑀢𑀢𑀺𑀡𑀓𑀝𑁆𑀞𑀼𑀧𑀸𑀤𑀸𑀦𑁄 𑀥𑀽𑀫𑀸𑀤𑀻𑀦𑀁 𑀅𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁄, 𑀏𑀯𑀫𑁂𑀯𑀁 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀤𑁆𑀯𑀬𑀲𑀫𑁆𑀧𑀬𑀼𑀢𑁆𑀢𑀸 𑀧𑀻𑀢𑀺 𑀚𑀸𑀢𑀺𑀆𑀤𑀻𑀦𑀁 𑀅𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀸𑀢𑀺 𑀅𑀢𑁆𑀣𑁄.

𑁪𑁬𑁯. 𑀇𑀤𑀸𑀦𑀺 𑀬𑁂 𑀢𑁂 𑀩𑁆𑀭𑀸𑀳𑁆𑀫𑀡𑁂𑀳𑀺 𑀘𑀸𑀕𑀲𑀻𑀲𑁂𑀦 𑀧𑀜𑁆𑀘 𑀥𑀫𑁆𑀫𑀸 𑀧𑀜𑁆𑀜𑀢𑁆𑀢𑀸, 𑀢𑁂𑀧𑀺 𑀬𑀲𑁆𑀫𑀸 𑀧𑀜𑁆𑀘𑁂𑀯 𑀳𑀼𑀢𑁆𑀯𑀸 𑀦 𑀦𑀺𑀘𑁆𑀘𑀮𑀸 𑀢𑀺𑀝𑁆𑀞𑀦𑁆𑀢𑀺, 𑀅𑀦𑀼𑀓𑀫𑁆𑀧𑀸𑀚𑀸𑀢𑀺𑀓𑁂𑀦 𑀲𑀤𑁆𑀥𑀺𑀁 𑀙 𑀆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀢𑀁 𑀤𑁄𑀲𑀁 𑀤𑀲𑁆𑀲𑁂𑀢𑀼𑀁 𑀬𑁂 𑀢𑁂 𑀫𑀸𑀡𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀓𑀫𑁆𑀧𑀸𑀚𑀸𑀢𑀺𑀓𑀦𑁆𑀢𑀺 𑀅𑀦𑀼𑀓𑀫𑁆𑀧𑀸𑀲𑀪𑀸𑀯𑀁.

𑀓𑀢𑁆𑀣 𑀩𑀳𑀼𑀮𑀁 𑀲𑀫𑀦𑀼𑀧𑀲𑁆𑀲𑀲𑀻𑀢𑀺 𑀇𑀤𑀁 𑀪𑀕𑀯𑀸 𑀬𑀲𑁆𑀫𑀸 𑁋 ‘‘𑀏𑀲 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂 𑀧𑀩𑁆𑀩𑀚𑀺𑀢𑁄 𑀧𑀭𑀺𑀧𑀽𑀭𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀕𑀳𑀝𑁆𑀞𑁄 𑀧𑀭𑀺𑀧𑀽𑀭𑁂𑀢𑀻’’𑀢𑀺 𑀆𑀳, 𑀢𑀲𑁆𑀫𑀸 𑁋 ‘‘𑀧𑀩𑁆𑀩𑀚𑀺𑀢𑁄𑀯 𑀇𑀫𑁂 𑀧𑀽𑀭𑁂𑀢𑀺, 𑀕𑀳𑀝𑁆𑀞𑁄 𑀧𑀽𑀭𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀢𑁂𑀦𑁂𑀯 𑀫𑀼𑀔𑁂𑀦 𑀪𑀡𑀸𑀧𑁂𑀢𑀼𑀁 𑀧𑀼𑀘𑁆𑀙𑀢𑀺.

𑀦 𑀲𑀢𑀢𑀁 𑀲𑀫𑀺𑀢𑀁 𑀲𑀘𑁆𑀘𑀯𑀸𑀤𑀻𑀢𑀺𑀆𑀤𑀻𑀲𑀼 𑀕𑀳𑀝𑁆𑀞𑁄 𑀅𑀜𑁆𑀜𑀲𑁆𑀫𑀺𑀁 𑀅𑀲𑀢𑀺 𑀯𑀴𑀜𑁆𑀚𑀦𑀓𑀫𑀼𑀲𑀸𑀯𑀸𑀤𑀫𑁆𑀧𑀺 𑀓𑀭𑁄𑀢𑀺𑀬𑁂𑀯, 𑀧𑀩𑁆𑀩𑀚𑀺𑀢𑀸 𑀅𑀲𑀺𑀦𑀸 𑀲𑀻𑀲𑁂 𑀙𑀺𑀚𑁆𑀚𑀦𑁆𑀢𑁂𑀧𑀺 𑀤𑁆𑀯𑁂 𑀓𑀣𑀸 𑀦 𑀓𑀣𑁂𑀦𑁆𑀢𑀺. 𑀕𑀳𑀝𑁆𑀞𑁄 𑀘 𑀅𑀦𑁆𑀢𑁄𑀢𑁂𑀫𑀸𑀲𑀫𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀩𑁆𑀩𑀚𑀺𑀢𑁄 𑀦𑀺𑀘𑁆𑀘𑀫𑁂𑀯 𑀢𑀧𑀲𑁆𑀲𑀻 𑀲𑀻𑀮𑀯𑀸 𑀢𑀧𑀦𑀺𑀲𑁆𑀲𑀺𑀢𑀓𑁄 𑀳𑁄𑀢𑀺. 𑀕𑀳𑀝𑁆𑀞𑁄 𑀫𑀸𑀲𑀲𑁆𑀲 𑀅𑀝𑁆𑀞𑀤𑀺𑀯𑀲𑀫𑀢𑁆𑀢𑀫𑁆𑀧𑀺 𑀉𑀧𑁄𑀲𑀣𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀩𑁆𑀩𑀚𑀺𑀢𑀸 𑀬𑀸𑀯𑀚𑀻𑀯𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀳𑁄𑀦𑁆𑀢𑀺. 𑀕𑀳𑀝𑁆𑀞𑁄 𑀭𑀢𑀦𑀲𑀼𑀢𑁆𑀢𑀫𑀗𑁆𑀕𑀮𑀲𑀼𑀢𑁆𑀢𑀫𑀢𑁆𑀢𑀫𑁆𑀧𑀺 𑀧𑁄𑀢𑁆𑀣𑀓𑁂 𑀮𑀺𑀔𑀺𑀢𑁆𑀯𑀸 𑀞𑀧𑁂𑀢𑀺, 𑀧𑀩𑁆𑀩𑀚𑀺𑀢𑀸 𑀦𑀺𑀘𑁆𑀘𑀁 𑀲𑀚𑁆𑀛𑀸𑀬𑀦𑁆𑀢𑀺. 𑀕𑀳𑀝𑁆𑀞𑁄 𑀲𑀮𑀸𑀓𑀪𑀢𑁆𑀢𑀫𑁆𑀧𑀺 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀩𑁆𑀩𑀚𑀺𑀢𑀸 𑀅𑀜𑁆𑀜𑀲𑁆𑀫𑀺𑀁 𑀅𑀲𑀢𑀺 𑀓𑀸𑀓𑀲𑀼𑀦𑀔𑀸𑀤𑀻𑀦𑀫𑁆𑀧𑀺 𑀧𑀺𑀡𑁆𑀟𑀁 𑀤𑁂𑀦𑁆𑀢𑀺, 𑀪𑀡𑁆𑀟𑀕𑁆𑀕𑀸𑀳𑀓𑀤𑀳𑀭𑀲𑁆𑀲𑀧𑀺 𑀧𑀢𑁆𑀢𑁂 𑀧𑀓𑁆𑀔𑀺𑀧𑀦𑁆𑀢𑁂𑀯𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀘𑀺𑀢𑁆𑀢𑀲𑁆𑀲𑀸𑀳𑀫𑁂𑀢𑁂𑀦𑁆𑀢𑀺 𑀅𑀳𑀁 𑀏𑀢𑁂 𑀧𑀜𑁆𑀘 𑀥𑀫𑁆𑀫𑁂 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀧𑀭𑀺𑀯𑀸𑀭𑁂 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁪𑁭𑁦. 𑀚𑀸𑀢𑀯𑀤𑁆𑀥𑁄𑀢𑀺 𑀚𑀸𑀢𑁄 𑀘 𑀯𑀟𑁆𑀠𑀺𑀢𑁄 𑀘. 𑀬𑁄 𑀳𑀺 𑀓𑁂𑀯𑀮𑀁 𑀢𑀢𑁆𑀣 𑀚𑀸𑀢𑁄𑀯 𑀳𑁄𑀢𑀺, 𑀅𑀜𑁆𑀜𑀢𑁆𑀣 𑀯𑀟𑁆𑀠𑀺𑀢𑁄, 𑀢𑀲𑁆𑀲 𑀲𑀫𑀦𑁆𑀢𑀸 𑀕𑀸𑀫𑀫𑀕𑁆𑀕𑀸 𑀦 𑀲𑀩𑁆𑀩𑀲𑁄 𑀧𑀘𑁆𑀘𑀓𑁆𑀔𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀚𑀸𑀢𑀯𑀤𑁆𑀥𑁄𑀢𑀺 𑀆𑀳. 𑀚𑀸𑀢𑀯𑀤𑁆𑀥𑁄𑀧𑀺 𑀳𑀺 𑀬𑁄 𑀘𑀺𑀭𑀁 𑀦𑀺𑀓𑁆𑀔𑀦𑁆𑀢𑁄, 𑀢𑀲𑁆𑀲 𑀦 𑀲𑀩𑁆𑀩𑀲𑁄 𑀧𑀘𑁆𑀘𑀓𑁆𑀔𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀯𑀤𑁂𑀯 𑀅𑀯𑀲𑀝𑀦𑁆𑀢𑀺 𑀆𑀳, 𑀢𑀁𑀔𑀡𑀫𑁂𑀯 𑀦𑀺𑀓𑁆𑀔𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀦𑁆𑀥𑀸𑀬𑀺𑀢𑀢𑁆𑀢𑀦𑁆𑀢𑀺 ‘‘𑀅𑀬𑀁 𑀦𑀼 𑀔𑁄 𑀫𑀕𑁆𑀕𑁄 𑀅𑀬𑀁 𑀦 𑀦𑀼 𑀔𑁄’’𑀢𑀺 𑀓𑀗𑁆𑀔𑀸𑀯𑀲𑁂𑀦 𑀘𑀺𑀭𑀸𑀬𑀺𑀢𑀢𑁆𑀢𑀁. 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀦𑁆𑀢𑀺 𑀬𑀣𑀸 𑀲𑀼𑀔𑀼𑀫𑀁 𑀅𑀢𑁆𑀣𑀚𑀸𑀢𑀁 𑀲𑀳𑀲𑀸 𑀧𑀼𑀘𑁆𑀙𑀺𑀢𑀲𑁆𑀲 𑀓𑀲𑁆𑀲𑀘𑀺 𑀲𑀭𑀻𑀭𑀁 𑀣𑀤𑁆𑀥𑀪𑀸𑀯𑀁 𑀕𑀡𑁆𑀳𑀸𑀢𑀺, 𑀏𑀯𑀁 𑀣𑀤𑁆𑀥𑀪𑀸𑀯𑀕𑀳𑀡𑀁. 𑀦𑀢𑁆𑀯𑁂𑀯𑀸𑀢𑀺 𑀇𑀫𑀺𑀦𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀅𑀧𑁆𑀧𑀝𑀺𑀳𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀳𑀺 𑀧𑀼𑀭𑀺𑀲𑀲𑁆𑀲 𑀫𑀸𑀭𑀸𑀯𑀝𑁆𑀝𑀦𑀸𑀤𑀻𑀦𑀁 𑀯𑀲𑁂𑀦 𑀲𑀺𑀬𑀸 𑀜𑀸𑀡𑀲𑁆𑀲 𑀧𑀝𑀺𑀖𑀸𑀢𑁄, 𑀢𑁂𑀦 𑀲𑁄 𑀤𑀦𑁆𑀥𑀸𑀬𑁂𑀬𑁆𑀬 𑀯𑀸 𑀯𑀺𑀢𑁆𑀣𑀸𑀬𑁂𑀬𑁆𑀬 𑀯𑀸, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀅𑀧𑁆𑀧𑀝𑀺𑀳𑀢𑀁, 𑀦 𑀲𑀓𑁆𑀓𑀸 𑀢𑀲𑁆𑀲 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀦𑁆𑀢𑀺 𑀤𑀻𑀧𑁂𑀢𑀺.

𑀲𑁂𑀬𑁆𑀬𑀣𑀸𑀧𑀺 𑀫𑀸𑀡𑀯 𑀩𑀮𑀯𑀸 𑀲𑀗𑁆𑀔𑀥𑀫𑁄𑀢𑀺 𑀏𑀢𑁆𑀣 𑀩𑀮𑀯𑀸𑀢𑀺 𑀩𑀮𑀲𑀫𑁆𑀧𑀦𑁆𑀦𑁄. 𑀲𑀗𑁆𑀔𑀥𑀫𑁄𑀢𑀺 𑀲𑀗𑁆𑀔𑀥𑀫𑀓𑁄. 𑀅𑀧𑁆𑀧𑀓𑀲𑀺𑀭𑁂𑀦𑀸𑀢𑀺 𑀅𑀓𑀺𑀘𑁆𑀙𑁂𑀦 𑀅𑀤𑀼𑀓𑁆𑀔𑁂𑀦. 𑀤𑀼𑀩𑁆𑀩𑀮𑁄 𑀳𑀺 𑀲𑀗𑁆𑀔𑀥𑀫𑀓𑁄 𑀲𑀗𑁆𑀔𑀁 𑀥𑀫𑀦𑁆𑀢𑁄𑀧𑀺 𑀦 𑀲𑀓𑁆𑀓𑁄𑀢𑀺 𑀘𑀢𑀲𑁆𑀲𑁄 𑀤𑀺𑀲𑀸 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀼𑀁, 𑀦𑀸𑀲𑁆𑀲 𑀲𑀗𑁆𑀔𑀲𑀤𑁆𑀤𑁄 𑀲𑀩𑁆𑀩𑀲𑁄 𑀨𑀭𑀺. 𑀩𑀮𑀯𑀢𑁄 𑀧𑀦 𑀯𑀺𑀧𑁆𑀨𑀸𑀭𑀺𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀩𑀮𑀯𑀸𑀢𑀺 𑀆𑀳. 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀫𑁂𑀢𑁆𑀢𑀸𑀬𑀸𑀢𑀺 𑀯𑀼𑀢𑁆𑀢𑁂 𑀉𑀧𑀘𑀸𑀭𑁄𑀧𑀺 𑀅𑀧𑁆𑀧𑀦𑀸𑀧𑀺 𑀯𑀝𑁆𑀝𑀢𑀺, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑁂 𑀧𑀦 𑀅𑀧𑁆𑀧𑀦𑀸𑀯 𑀯𑀝𑁆𑀝𑀢𑀺. 𑀬𑀁 𑀧𑀫𑀸𑀡𑀓𑀢𑀁 𑀓𑀫𑁆𑀫𑀦𑁆𑀢𑀺 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀓𑀸𑀫𑀸𑀯𑀘𑀭𑀁 𑀯𑀼𑀘𑁆𑀘𑀢𑀺, 𑀅𑀧𑁆𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀭𑀽𑀧𑀸𑀭𑀽𑀧𑀸𑀯𑀘𑀭𑀁. 𑀢𑁂𑀲𑀼𑀧𑀺 𑀇𑀥 𑀩𑁆𑀭𑀳𑁆𑀫𑀯𑀺𑀳𑀸𑀭𑀓𑀫𑁆𑀫𑀜𑁆𑀜𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀑𑀥𑀺𑀲𑀓𑀅𑀦𑁄𑀥𑀺𑀲𑀓 𑀤𑀺𑀲𑀸𑀨𑀭𑀡𑀯𑀲𑁂𑀦 𑀯𑀟𑁆𑀠𑁂𑀢𑁆𑀯𑀸 𑀓𑀢𑀢𑁆𑀢𑀸 𑀅𑀧𑁆𑀧𑀫𑀸𑀡𑀓𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀺, 𑀦 𑀢𑀁 𑀢𑀢𑁆𑀭𑀸𑀯𑀢𑀺𑀝𑁆𑀞𑀢𑀻𑀢𑀺 𑀢𑀁 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀢𑀲𑁆𑀫𑀺𑀁 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑁂 𑀦 𑀑𑀳𑀻𑀬𑀢𑀺 𑀦 𑀢𑀺𑀝𑁆𑀞𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀢𑀲𑁆𑀲 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀲𑁆𑀲 𑀅𑀦𑁆𑀢𑀭𑀸 𑀮𑀕𑁆𑀕𑀺𑀢𑀼𑀁 𑀯𑀸 𑀞𑀸𑀢𑀼𑀁 𑀯𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀁 𑀨𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀢𑀺, 𑀅𑀣 𑀔𑁄 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀫𑁂𑀯 𑀓𑀸𑀫𑀸𑀯𑀘𑀭𑀁 𑀫𑀳𑁄𑀖𑁄 𑀯𑀺𑀬 𑀧𑀭𑀺𑀢𑁆𑀢𑀉𑀤𑀓𑀁 𑀨𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀬𑀫𑁂𑀯 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀁 𑀉𑀧𑀦𑁂𑀢𑀻𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.