𑁧𑁦. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀁. 𑀢𑀢𑁆𑀣 𑀘𑀜𑁆𑀘𑀮𑀺𑀓𑀧𑁆𑀧𑁂𑀢𑀺 𑀏𑀯𑀁𑀦𑀸𑀫𑀓𑁂 𑀕𑀸𑀫𑁂. 𑀅𑀪𑀺𑀧𑁆𑀧𑀲𑀦𑁆𑀦𑀸𑀢𑀺 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀯𑀲𑁂𑀦 𑀧𑀲𑀦𑁆𑀦𑀸. 𑀲𑀸 𑀓𑀺𑀭 𑀲𑁄𑀢𑀸𑀧𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀭𑀺𑀬𑀸. 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀩𑁆𑀩𑁂 𑀓𑀸𑀮𑁂𑀦 𑀓𑀸𑀮𑀁 𑀩𑁆𑀭𑀸𑀳𑁆𑀫𑀡𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑁂𑀲𑀁 𑀲𑀓𑁆𑀓𑀸𑀭𑀁 𑀓𑀭𑁄𑀢𑀺. 𑀇𑀫𑀁 𑀧𑀦 𑀩𑁆𑀭𑀸𑀳𑁆𑀫𑀡𑀺𑀁 𑀖𑀭𑀁 𑀆𑀦𑁂𑀢𑁆𑀯𑀸 𑀅𑀪𑀺𑀭𑀽𑀧𑀸𑀬 𑀫𑀳𑀸𑀓𑀼𑀮𑀸𑀬 𑀩𑁆𑀭𑀸𑀳𑁆𑀫𑀡𑀺𑀬𑀸 𑀘𑀺𑀢𑁆𑀢𑀁 𑀓𑁄𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀤𑀺𑀝𑁆𑀞𑀝𑁆𑀞𑀸𑀦𑁂 𑁋 ‘‘𑀦𑀬𑀺𑀤𑀸𑀦𑀺 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡𑀮𑀤𑁆𑀥𑀺𑀓𑁄, 𑀏𑀓𑀸𑀳𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀓𑁆𑀓𑀸𑀭𑀁 𑀦 𑀓𑀭𑁄𑀲𑀻’’𑀢𑀺 𑀦𑀺𑀧𑁆𑀧𑀻𑀴𑁂𑀦𑁆𑀢𑀺. 𑀲𑁄 𑀖𑀭𑀁 𑀆𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑁋 ‘‘𑀲𑀘𑁂, 𑀪𑁄𑀢𑀺 𑀏𑀓𑀤𑀺𑀯𑀲𑀁 𑀫𑀼𑀔𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀲𑀺, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀓𑀤𑀺𑀯𑀲𑀁 𑀪𑀺𑀓𑁆𑀔𑀁 𑀤𑀤𑁂𑀬𑁆𑀬’’𑀦𑁆𑀢𑀺 𑀆𑀳. 𑀢𑀼𑀬𑁆𑀳𑀁 𑀤𑁂𑀬𑁆𑀬𑀥𑀫𑁆𑀫𑀁 𑀭𑀼𑀘𑁆𑀘𑀦𑀓𑀝𑁆𑀞𑀸𑀦𑁂 𑀤𑁂𑀳𑀺, 𑀓𑀺𑀁 𑀫𑀬𑁆𑀳𑀁 𑀏𑀢𑁆𑀣𑀸𑀢𑀺. 𑀲𑁄 𑀩𑁆𑀭𑀸𑀳𑁆𑀫𑀡𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀧𑁆𑀧𑁄𑀤𑀓𑀁 𑀧𑀸𑀬𑀸𑀲𑀁 𑀧𑀘𑀸𑀧𑁂𑀢𑁆𑀯𑀸 𑀖𑀭𑀜𑁆𑀘 𑀲𑀼𑀚𑁆𑀛𑀸𑀧𑁂𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 𑀦𑀺𑀲𑀻𑀤𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑀻 𑀫𑀳𑀸𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀺𑀲𑀦𑁆𑀢𑀻 𑀤𑀼𑀲𑁆𑀲𑀓𑀡𑁆𑀡𑀓𑁂 𑀧𑀓𑁆𑀔𑀮𑀺𑀢𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡𑁂 𑀧𑀭𑀺𑀯𑀺𑀲𑀸𑀫𑀻’’𑀢𑀺 𑀲𑀜𑁆𑀜𑀫𑁆𑀧𑀺 𑀅𑀓𑀢𑁆𑀯𑀸 𑀆𑀲𑁂𑀯𑀦𑀯𑀲𑁂𑀦 𑀲𑀳𑀲𑀸 𑀲𑀢𑁆𑀣𑀸𑀭𑀫𑁂𑀯 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀩𑁆𑀭𑀸𑀳𑁆𑀫𑀡𑀸 𑀉𑀤𑀸𑀦𑀁 𑀲𑀼𑀢𑁆𑀯𑀸 ‘‘𑀉𑀪𑀢𑁄𑀧𑀓𑁆𑀔𑀺𑀓𑁄 𑀏𑀲 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀳𑀸𑀬𑁄, 𑀦𑀸𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀓𑀼𑀧𑀺𑀢𑀸 𑀪𑁄𑀚𑀦𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀦𑀦𑀼 𑀧𑀞𑀫𑀁𑀬𑁂𑀯 𑀢𑀁 𑀅𑀯𑀘𑀁 ‘𑀅𑀚𑁆𑀚𑁂𑀓𑀤𑀺𑀯𑀲𑀁 𑀫𑀼𑀔𑀁 𑀭𑀓𑁆𑀔𑁂𑀬𑁆𑀬𑀸𑀲𑀻’𑀢𑀺, 𑀏𑀢𑁆𑀢𑀓𑀁 𑀢𑁂 𑀔𑀻𑀭𑀜𑁆𑀘 𑀢𑀡𑁆𑀟𑀼𑀮𑀸𑀤𑀻𑀦𑀺 𑀘 𑀦𑀸𑀲𑀺𑀢𑀸𑀦𑀻’’𑀢𑀺 𑀅𑀢𑀺𑀯𑀺𑀬 𑀓𑁄𑀧𑀯𑀲𑀁 𑀉𑀧𑀕𑀢𑁄 𑁋 ‘‘𑀏𑀯𑀫𑁂𑀯 𑀧𑀦𑀸𑀬𑀁 𑀯𑀲𑀮𑀻 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀢𑀲𑁆𑀲 𑀫𑀼𑀡𑁆𑀟𑀓𑀲𑁆𑀲 𑀲𑀫𑀡𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀇𑀤𑀸𑀦𑀺 𑀢𑁆𑀬𑀸𑀳𑀁 𑀯𑀲𑀮𑀺 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑀻 ‘‘𑀕𑀘𑁆𑀙 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀕𑀦𑁆𑀢𑁆𑀯𑀸 𑀯𑀺𑀚𑀸𑀦𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀦 𑀔𑁆𑀯𑀸𑀳𑀁 𑀢𑀁, 𑀩𑁆𑀭𑀸𑀳𑁆𑀫𑀡, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂…𑀧𑁂… 𑀯𑀸𑀤𑀁 𑀆𑀭𑁄𑀧𑁂𑀬𑁆𑀬𑀸’’𑀢𑀺𑀆𑀤𑀺𑀫𑀸𑀳. 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋

‘‘𑀓𑀺𑀁𑀲𑀼 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑀺𑀁𑀲𑀼 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑀺𑀲𑁆𑀲𑀲𑁆𑀲𑀼 𑀏𑀓𑀥𑀫𑁆𑀫𑀲𑁆𑀲, 𑀯𑀥𑀁 𑀭𑁄𑀘𑁂𑀲𑀺 𑀕𑁄𑀢𑀫𑀸’’𑀢𑀺. (𑀲𑀁. 𑀦𑀺. 𑁧.𑁧𑁮𑁭) 𑁋

𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀆𑀳 𑁋

‘‘𑀓𑁄𑀥𑀁 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑁄𑀥𑀁 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑁄𑀥𑀲𑁆𑀲 𑀯𑀺𑀲𑀫𑀽𑀮𑀲𑁆𑀲, 𑀫𑀥𑀼𑀭𑀕𑁆𑀕𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀯𑀥𑀁 𑀅𑀭𑀺𑀬𑀸 𑀧𑀲𑀁𑀲𑀦𑁆𑀢𑀺, 𑀢𑀜𑁆𑀳𑀺 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁮𑁭) 𑁋

𑀧𑀜𑁆𑀳𑀁 𑀓𑀣𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀢𑀲𑁆𑀲𑁂𑀯 𑀓𑀦𑀺𑀝𑁆𑀞𑀪𑀸𑀢𑀸 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑁄 𑀦𑀸𑀫 ‘‘𑀪𑀸𑀢𑀸 𑀫𑁂 𑀧𑀩𑁆𑀩𑀚𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀓𑁆𑀓𑁄𑀲𑀺𑀢𑁆𑀯𑀸 𑀪𑀕𑀯𑀢𑀸 𑀯𑀺𑀦𑀻𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀅𑀧𑀭𑁄 𑀢𑀲𑁆𑀲 𑀓𑀦𑀺𑀝𑁆𑀞𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀦𑀸𑀫. 𑀲𑁄𑀧𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀅𑀧𑀭𑁄 𑀢𑀲𑁆𑀲 𑀓𑀦𑀺𑀝𑁆𑀞𑁄 𑀧𑀺𑀗𑁆𑀕𑀮𑀪𑀸𑀭𑀤𑁆𑀯𑀸𑀚𑁄 𑀦𑀸𑀫. 𑀲𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀜𑁆𑀳𑀩𑁆𑀬𑀸𑀓𑀭𑀡𑀧𑀭𑀺𑀬𑁄𑀲𑀸𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀲𑀗𑁆𑀕𑀸𑀭𑀯𑁄 𑀫𑀸𑀡𑀯𑁄𑀢𑀺 𑀅𑀬𑀁 𑀢𑁂𑀲𑀁 𑀲𑀩𑁆𑀩𑀓𑀦𑀺𑀝𑁆𑀞𑁄 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀏𑀓𑀪𑀢𑁆𑀢𑀕𑁆𑀕𑁂 𑀦𑀺𑀲𑀺𑀦𑁆𑀦𑁄. 𑀅𑀯𑀪𑀽𑀢𑀸𑀯𑀸𑀢𑀺 𑀅𑀯𑀟𑁆𑀠𑀺𑀪𑀽𑀢𑀸 𑀅𑀯𑀫𑀗𑁆𑀕𑀮𑀪𑀽𑀢𑀸𑀬𑁂𑀯. 𑀧𑀭𑀪𑀽𑀢𑀸𑀯𑀸𑀢𑀺 𑀯𑀺𑀦𑀸𑀲𑀁 𑀧𑀢𑁆𑀢𑀸𑀬𑁂𑀯. 𑀯𑀺𑀚𑁆𑀚𑀫𑀸𑀦𑀸𑀦𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑁂𑀲𑀼. 𑀲𑀻𑀮𑀧𑀜𑁆𑀜𑀸𑀡𑀦𑁆𑀢𑀺 𑀲𑀻𑀮𑀜𑁆𑀘 𑀜𑀸𑀡𑀜𑁆𑀘 𑀦 𑀚𑀸𑀦𑀸𑀲𑀺.

𑁪𑁭𑁪. 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀜𑁆𑀜𑀸𑀯𑁄𑀲𑀸𑀦𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁂 𑀅𑀪𑀺𑀜𑁆𑀜𑀸𑀢𑁂 𑀇𑀫𑀲𑁆𑀫𑀺𑀜𑁆𑀜𑁂𑀯 𑀅𑀢𑁆𑀢𑀪𑀸𑀯𑁂 𑀅𑀪𑀺𑀚𑀸𑀦𑀺𑀢𑁆𑀯𑀸 𑀯𑁄𑀲𑀺𑀢𑀯𑁄𑀲𑀸𑀦𑀸 𑀳𑀼𑀢𑁆𑀯𑀸 𑀧𑀸𑀭𑀫𑀻𑀲𑀗𑁆𑀔𑀸𑀢𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀧𑀸𑀭𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀸 𑀫𑀬𑀦𑁆𑀢𑀺 𑀯𑀢𑁆𑀯𑀸 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀝𑀺𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸 𑀉𑀧𑁆𑀧𑀸𑀤𑀓𑀸 𑀚𑀦𑀓𑀸𑀢𑀺 𑀏𑀯𑀁 𑀧𑀝𑀺𑀚𑀸𑀦𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀓𑁆𑀓𑀻𑀢𑀺 𑀢𑀓𑁆𑀓𑀕𑀸𑀳𑀻. 𑀯𑀻𑀫𑀁𑀲𑀻𑀢𑀺 𑀯𑀻𑀫𑀁𑀲𑀓𑁄, 𑀧𑀜𑁆𑀜𑀸𑀘𑀸𑀭𑀁 𑀘𑀭𑀸𑀧𑁂𑀢𑁆𑀯𑀸 𑀏𑀯𑀁𑀯𑀸𑀤𑀻. 𑀢𑁂𑀲𑀸𑀳𑀫𑀲𑁆𑀫𑀻𑀢𑀺 𑀢𑁂𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀅𑀳𑀫𑀲𑁆𑀫𑀺 𑀅𑀜𑁆𑀜𑀢𑀭𑁄.

𑁪𑁮𑁫. 𑀅𑀝𑁆𑀞𑀺𑀢𑀯𑀢𑀦𑁆𑀢𑀺 𑀅𑀝𑁆𑀞𑀺𑀢𑀢𑀧𑀁, 𑀅𑀲𑁆𑀲 𑀧𑀥𑀸𑀦𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄, 𑀢𑀣𑀸 𑀲𑀧𑁆𑀧𑀼𑀭𑀺𑀲𑀧𑀤𑀲𑁆𑀲. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀅𑀝𑁆𑀞𑀺𑀢𑀧𑀥𑀸𑀦𑀯𑀢𑀁 𑀅𑀳𑁄𑀲𑀺, 𑀲𑀧𑁆𑀧𑀼𑀭𑀺𑀲𑀧𑀥𑀸𑀦𑀯𑀢𑀁 𑀅𑀳𑁄𑀲𑀻𑀢𑀺. 𑀅𑀢𑁆𑀣𑀺 𑀤𑁂𑀯𑀸𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄𑀢𑀺 𑀇𑀤𑀁 𑀫𑀸𑀡𑀯𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀚𑀸𑀦𑀦𑁆𑀢𑁄𑀯 𑀧𑀓𑀸𑀲𑁂𑀲𑀻’’𑀢𑀺 𑀲𑀜𑁆𑀜𑀸𑀬 𑀆𑀳. 𑀏𑀯𑀁 𑀲𑀦𑁆𑀢𑁂𑀢𑀺 𑀢𑀼𑀫𑁆𑀳𑀸𑀓𑀁 𑀅𑀚𑀸𑀦𑀦𑀪𑀸𑀯𑁂 𑀲𑀦𑁆𑀢𑁂. 𑀢𑀼𑀘𑁆𑀙𑀁 𑀫𑀼𑀲𑀸 𑀳𑁄𑀢𑀻𑀢𑀺 𑀢𑀼𑀫𑁆𑀳𑀸𑀓𑀁 𑀓𑀣𑀸 𑀅𑀨𑀮𑀸 𑀦𑀺𑀧𑁆𑀨𑀮𑀸 𑀳𑁄𑀢𑀺. 𑀏𑀯𑀁 𑀫𑀸𑀡𑀯𑁄 𑀪𑀕𑀯𑀦𑁆𑀢𑀁 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺 𑀦𑀸𑀫. 𑀯𑀺𑀜𑁆𑀜𑀼𑀦𑀸 𑀧𑀼𑀭𑀺𑀲𑁂𑀦𑀸𑀢𑀺 𑀧𑀡𑁆𑀟𑀺𑀢𑁂𑀦 𑀫𑀦𑀼𑀲𑁆𑀲𑁂𑀦. 𑀢𑁆𑀯𑀁 𑀧𑀦 𑀅𑀯𑀺𑀜𑁆𑀜𑀼𑀢𑀸𑀬 𑀫𑀬𑀸 𑀩𑁆𑀬𑀸𑀓𑀢𑀫𑁆𑀧𑀺 𑀦 𑀚𑀸𑀦𑀸𑀲𑀻𑀢𑀺 𑀤𑀻𑀧𑁂𑀢𑀺. 𑀉𑀘𑁆𑀘𑁂𑀦 𑀲𑀫𑁆𑀫𑀢𑀦𑁆𑀢𑀺 𑀉𑀘𑁆𑀘𑁂𑀦 𑀲𑀤𑁆𑀤𑁂𑀦 𑀲𑀫𑁆𑀫𑀢𑀁 𑀧𑀸𑀓𑀝𑀁 𑀮𑁄𑀓𑀲𑁆𑀫𑀺𑀁. 𑀅𑀥𑀺𑀤𑁂𑀯𑀸𑀢𑀺 𑀲𑀼𑀲𑀼𑀤𑀸𑀭𑀓𑀸𑀧𑀺 𑀳𑀺 𑀤𑁂𑀯𑀸 𑀦𑀸𑀫 𑀳𑁄𑀦𑁆𑀢𑀺, 𑀤𑁂𑀯𑀺𑀬𑁄 𑀦𑀸𑀫 𑀳𑁄𑀦𑁆𑀢𑀺 𑀤𑁂𑀯𑀸 𑀧𑀦 𑀅𑀥𑀺𑀤𑁂𑀯𑀸 𑀦𑀸𑀫, 𑀮𑁄𑀓𑁂 𑀤𑁂𑀯𑁄 𑀤𑁂𑀯𑀻𑀢𑀺 𑀮𑀤𑁆𑀥𑀦𑀸𑀫𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀅𑀥𑀺𑀓𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.