𑁫. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄

𑁧. 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀦𑁆𑀢𑀺 𑀫𑀳𑀢𑀸𑀢𑀺 𑀕𑀼𑀡𑀫𑀳𑀢𑁆𑀢𑁂𑀦𑀧𑀺 𑀫𑀳𑀢𑀸, 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦𑀧𑀺. 𑀲𑁄 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀕𑀼𑀡𑁂𑀳𑀺𑀧𑀺 𑀫𑀳𑀸 𑀅𑀳𑁄𑀲𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀲𑀗𑁆𑀔𑁆𑀬𑀸𑀬𑀧𑀺 𑀫𑀳𑀸 𑀧𑀜𑁆𑀘𑀲𑀢𑀲𑀗𑁆𑀔𑁆𑀬𑀢𑁆𑀢𑀸. 𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀖𑀸𑀢𑀲𑀗𑁆𑀔𑀸𑀢𑁂𑀦 𑀲𑀫𑀡𑀕𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄. 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻𑀢𑀺 𑀧𑀜𑁆𑀘 𑀫𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀧𑀜𑁆𑀘𑀫𑀢𑁆𑀢𑀸𑀦𑀺. 𑀫𑀢𑁆𑀢𑀸𑀢𑀺 𑀧𑀫𑀸𑀡𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀬𑀣𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽𑀢𑀺 𑀯𑀼𑀢𑁆𑀢𑁂 𑀪𑁄𑀚𑀦𑁂 𑀫𑀢𑁆𑀢𑀁 𑀚𑀸𑀦𑀸𑀢𑀺 𑀧𑀫𑀸𑀡𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀢𑁂𑀲𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀜𑁆𑀘𑀫𑀢𑁆𑀢𑀸 𑀧𑀜𑁆𑀘𑀧𑀫𑀸𑀡𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀺𑀓𑁆𑀔𑀽𑀦𑀁 𑀲𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺. 𑀢𑁂𑀳𑀺 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺.

𑀯𑀻𑀲𑀯𑀲𑁆𑀲𑀲𑀢𑀺𑀓𑁄𑀢𑀺 𑀯𑀻𑀲𑀸𑀥𑀺𑀓𑀯𑀲𑁆𑀲𑀲𑀢𑀺𑀓𑁄. 𑀢𑀺𑀡𑁆𑀡𑀁 𑀯𑁂𑀤𑀸𑀦𑀦𑁆𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀸𑀦𑀁. 𑀑𑀝𑁆𑀞𑀧𑀳𑀢𑀓𑀭𑀡𑀯𑀲𑁂𑀦 𑀧𑀸𑀭𑀁 𑀕𑀢𑁄𑀢𑀺 𑀧𑀸𑀭𑀕𑀽. 𑀲𑀳 𑀦𑀺𑀖𑀡𑁆𑀟𑀼𑀦𑀸 𑀘 𑀓𑁂𑀝𑀼𑀪𑁂𑀦 𑀘 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁, 𑀦𑀺𑀖𑀡𑁆𑀟𑀽𑀢𑀺 𑀦𑀸𑀫𑀦𑀺𑀖𑀡𑁆𑀝𑀼𑀭𑀼𑀓𑁆𑀔𑀸𑀤𑀻𑀦𑀁 𑀯𑁂𑀯𑀘𑀦𑀧𑁆𑀧𑀓𑀸𑀲𑀓𑀁 𑀲𑀢𑁆𑀣𑀁. 𑀓𑁂𑀝𑀼𑀪𑀦𑁆𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄 𑀓𑀯𑀻𑀦𑀁 𑀉𑀧𑀓𑀸𑀭𑀸𑀬 𑀲𑀢𑁆𑀣𑀁. 𑀲𑀳 𑀅𑀓𑁆𑀔𑀭𑀧𑁆𑀧𑀪𑁂𑀤𑁂𑀦 𑀲𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁. 𑀅𑀓𑁆𑀔𑀭𑀧𑁆𑀧𑀪𑁂𑀤𑁄𑀢𑀺 𑀲𑀺𑀓𑁆𑀔𑀸 𑀘 𑀦𑀺𑀭𑀼𑀢𑁆𑀢𑀺 𑀘. 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀦𑁆𑀢𑀺 𑀆𑀣𑀩𑁆𑀩𑀡𑀯𑁂𑀤𑀁 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸 ‘‘𑀇𑀢𑀺𑀳 𑀆𑀲 𑀇𑀢𑀺𑀳 𑀆𑀲𑀸’’𑀢𑀺 𑀈𑀤𑀺𑀲𑀯𑀘𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁄 𑀧𑀼𑀭𑀸𑀡𑀓𑀣𑀸𑀲𑀗𑁆𑀔𑀸𑀢𑁄 𑀇𑀢𑀺𑀳𑀸𑀲𑁄 𑀧𑀜𑁆𑀘𑀫𑁄 𑀏𑀢𑁂𑀲𑀦𑁆𑀢𑀺 𑀇𑀢𑀺𑀳𑀸𑀲𑀧𑀜𑁆𑀘𑀫𑀸, 𑀢𑁂𑀲𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁. 𑀧𑀤𑀜𑁆𑀘 𑀢𑀤𑀯𑀲𑁂𑀲𑀜𑁆𑀘 𑀩𑁆𑀬𑀸𑀓𑀭𑀡𑀁 𑀅𑀥𑀻𑀬𑀢𑀺 𑀧𑀯𑁂𑀤𑁂𑀢𑀺 𑀘𑀸𑀢𑀺 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄. 𑀮𑁄𑀓𑀸𑀬𑀢𑀁 𑀯𑀼𑀘𑁆𑀘𑀢𑀺 𑀯𑀺𑀢𑀡𑁆𑀟𑀯𑀸𑀤𑀲𑀢𑁆𑀣𑀁. 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀦𑁆𑀢𑀺 𑀫𑀳𑀸𑀧𑀼𑀭𑀺𑀲𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀮𑀓𑁆𑀔𑀡𑀤𑀻𑀧𑀓𑀁 𑀤𑁆𑀯𑀸𑀤𑀲𑀲𑀳𑀲𑁆𑀲𑀕𑀦𑁆𑀣𑀧𑁆𑀧𑀫𑀸𑀡𑀁 𑀲𑀢𑁆𑀣𑀁, 𑀬𑀢𑁆𑀣 𑀲𑁄𑀴𑀲𑀲𑀳𑀲𑁆𑀲𑀕𑀸𑀣𑀸𑀧𑀭𑀺𑀫𑀸𑀡𑀸𑀬 𑀩𑀼𑀤𑁆𑀥𑀫𑀦𑁆𑀢𑀸 𑀦𑀸𑀫 𑀅𑀳𑁂𑀲𑀼𑀁, 𑀬𑁂𑀲𑀁 𑀯𑀲𑁂𑀦 ‘‘𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀩𑀼𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺, 𑀇𑀫𑀺𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺, 𑀇𑀫𑀺𑀦𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸, 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸, 𑀩𑀼𑀤𑁆𑀥𑀫𑀸𑀢𑀸, 𑀩𑀼𑀤𑁆𑀥𑀧𑀺𑀢𑀸, 𑀅𑀕𑁆𑀕𑀼𑀧𑀝𑁆𑀞𑀸𑀓𑁄, 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀸, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻’’𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀜𑀸𑀬𑀢𑀺. 𑀅𑀦𑀯𑀬𑁄𑀢𑀺 𑀇𑀫𑁂𑀲𑀼 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀽𑀦𑁄 𑀧𑀭𑀺𑀧𑀽𑀭𑀓𑀸𑀭𑀻, 𑀅𑀯𑀬𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀬𑁄 𑀦𑀸𑀫 𑀬𑁄 𑀢𑀸𑀦𑀺 𑀅𑀢𑁆𑀣𑀢𑁄 𑀘 𑀕𑀦𑁆𑀣𑀢𑁄 𑀘 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀲𑁆𑀲𑁄𑀲𑀺 𑀔𑁄𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀸𑀮𑁂𑀬𑁆𑀬𑀓𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁪𑁩𑁯 𑀆𑀤𑀬𑁄) 𑀯𑀼𑀢𑁆𑀢𑀫𑁂𑀯.

𑁩𑁮𑁪. 𑀅𑀬𑀁 𑀢𑀸𑀢𑀸𑀢𑀺 𑀅𑀬𑀁 𑀫𑀳𑀮𑁆𑀮𑀓𑀢𑀸𑀬 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀸𑀡𑀯𑀁 𑀆𑀫𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳. 𑀅𑀧𑀺𑀘 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 ‘𑀅𑀳𑀁 𑀩𑀼𑀤𑁆𑀥𑁄 𑀅𑀳𑀁 𑀩𑀼𑀤𑁆𑀥𑁄’𑀢𑀺 𑀉𑀕𑁆𑀕𑀢𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀩𑀳𑀽 𑀚𑀦𑀸 𑀯𑀺𑀘𑀭𑀦𑁆𑀢𑀺, 𑀢𑀲𑁆𑀫𑀸 𑀦 𑀫𑁂 𑀅𑀦𑀼𑀲𑁆𑀲𑀯𑀫𑀢𑁆𑀢𑁂𑀦𑁂𑀯 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀁. 𑀏𑀓𑀘𑁆𑀘𑀜𑁆𑀳𑀺 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲 𑀅𑀧𑀓𑁆𑀓𑀫𑀦𑀫𑁆𑀧𑀺 𑀕𑀭𑀼 𑀳𑁄𑀢𑀺, 𑀅𑀦𑀢𑁆𑀣𑁄𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀬𑀁𑀦𑀽𑀦𑀸𑀳𑀁 𑀫𑀫 𑀅𑀦𑁆𑀢𑁂𑀯𑀸𑀲𑀺𑀓𑀁 𑀧𑁂𑀲𑁂𑀢𑁆𑀯𑀸 ‘𑀩𑀼𑀤𑁆𑀥𑁄 𑀯𑀸 𑀦𑁄 𑀯𑀸’𑀢𑀺 𑀚𑀸𑀦𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺 𑀢𑀲𑁆𑀫𑀸 𑀫𑀸𑀡𑀯𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀅𑀬𑀁 𑀢𑀸𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀪𑀯𑀦𑁆𑀢𑀦𑁆𑀢𑀺 𑀢𑀲𑁆𑀲 𑀪𑀯𑀢𑁄. 𑀢𑀣𑀸 𑀲𑀦𑁆𑀢𑀁𑀬𑁂𑀯𑀸𑀢𑀺 𑀢𑀣𑀸 𑀲𑀢𑁄𑀬𑁂𑀯. 𑀇𑀤𑀜𑁆𑀳𑀺 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀬𑀣𑀸 𑀓𑀣𑀁 𑀧𑀦𑀸𑀳𑀁, 𑀪𑁄𑀢𑀺 𑀏𑀢𑁆𑀣 𑀓𑀣𑀁 𑀧𑀦𑀸𑀳𑀁, 𑀪𑁄, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀬𑀣𑀸 𑀲𑀓𑁆𑀓𑀸 𑀲𑁄 𑀜𑀸𑀢𑀼𑀁, 𑀢𑀣𑀸 𑀫𑁂 𑀆𑀘𑀺𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀢𑀺 𑀯𑀸 𑀦𑀺𑀧𑀸𑀢𑀫𑀢𑁆𑀢𑀫𑁂𑀯𑁂𑀢𑀁. 𑀓𑀣𑀦𑁆𑀢𑀺 𑀅𑀬𑀁 𑀆𑀓𑀸𑀭𑀧𑀼𑀘𑁆𑀙𑀸, 𑀓𑁂𑀦𑀸𑀓𑀸𑀭𑁂𑀦𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀼𑀢𑁆𑀢𑁂 𑀓𑀺𑀭 𑀦𑀁 𑀉𑀧𑀚𑁆𑀛𑀸𑀬𑁄 𑁋 ‘‘𑀓𑀺𑀁 𑀢𑁆𑀯𑀁, 𑀢𑀸𑀢, 𑀧𑀣𑀯𑀺𑀬𑀁 𑀞𑀺𑀢𑁄 𑀧𑀣𑀯𑀺𑀁 𑀦 𑀧𑀲𑁆𑀲𑀸𑀫𑀻𑀢𑀺 𑀯𑀺𑀬 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀑𑀪𑀸𑀲𑁂 𑀞𑀺𑀢𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀦 𑀧𑀲𑁆𑀲𑀸𑀫𑀻𑀢𑀺 𑀯𑀺𑀬 𑀯𑀤𑀲𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀚𑀸𑀦𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀕𑀢𑀸𑀦𑀺 𑀔𑁄 𑀢𑀸𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀦𑁆𑀢𑁂𑀲𑀽𑀢𑀺 𑀯𑁂𑀤𑁂𑀲𑀼. 𑀢𑀣𑀸𑀕𑀢𑁄 𑀓𑀺𑀭 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀧𑀝𑀺𑀓𑀘𑁆𑀘𑁂𑀯 𑀲𑀼𑀤𑁆𑀥𑀸𑀯𑀸𑀲𑀸 𑀤𑁂𑀯𑀸 𑀯𑁂𑀤𑁂𑀲𑀼 𑀮𑀓𑁆𑀔𑀡𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 ‘‘𑀩𑀼𑀤𑁆𑀥𑀫𑀦𑁆𑀢𑀸 𑀦𑀸𑀫 𑀏𑀢𑁂’’𑀢𑀺 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀯𑁂𑀤𑁂 𑀯𑀸𑀘𑁂𑀦𑁆𑀢𑀺 ‘‘𑀢𑀤𑀦𑀼𑀲𑀸𑀭𑁂𑀦 𑀫𑀳𑁂𑀲𑀓𑁆𑀔𑀸 𑀲𑀢𑁆𑀢𑀸 𑀢𑀣𑀸𑀕𑀢𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑁂𑀦 𑀧𑀼𑀩𑁆𑀩𑁂 𑀯𑁂𑀤𑁂𑀲𑀼 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀆𑀕𑀘𑁆𑀙𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀢𑀣𑀸𑀕𑀢𑁂 𑀅𑀦𑀼𑀓𑁆𑀓𑀫𑁂𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀺, 𑀢𑁂𑀦 𑀏𑀢𑀭𑀳𑀺 𑀦𑀢𑁆𑀣𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲𑀸𑀢𑀺 𑀧𑀡𑀺𑀥𑀺𑀲𑀫𑀸𑀤𑀸𑀦𑀜𑀸𑀡𑀓𑀭𑀼𑀡𑀸𑀤𑀺𑀕𑀼𑀡𑀫𑀳𑀢𑁄 𑀧𑀼𑀭𑀺𑀲𑀲𑁆𑀲. 𑀤𑁆𑀯𑁂𑀬𑁂𑀯 𑀕𑀢𑀺𑀬𑁄𑀢𑀺 𑀤𑁆𑀯𑁂 𑀏𑀯 𑀦𑀺𑀝𑁆𑀞𑀸. 𑀓𑀸𑀫𑀜𑁆𑀘𑀸𑀬𑀁 𑀕𑀢𑀺𑀲𑀤𑁆𑀤𑁄 𑁋 ‘‘𑀧𑀜𑁆𑀘 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀕𑀢𑀺𑀬𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁫𑁩) 𑀪𑀯𑀪𑁂𑀤𑁂 𑀯𑀢𑁆𑀢𑀢𑀺, ‘‘𑀕𑀢𑀺 𑀫𑀺𑀕𑀸𑀦𑀁 𑀧𑀯𑀦’’𑀦𑁆𑀢𑀺𑀆𑀤𑀻𑀲𑀼 (𑀧𑀭𑀺. 𑁩𑁩𑁯) 𑀦𑀺𑀯𑀸𑀲𑀝𑁆𑀞𑀸𑀦𑁂, ‘‘𑀏𑀯𑀁 𑀅𑀥𑀺𑀫𑀢𑁆𑀢𑀕𑀢𑀺𑀫𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁬𑁧) 𑀧𑀜𑁆𑀜𑀸𑀬, ‘‘𑀕𑀢𑀺𑀕𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀲𑀝𑀪𑀸𑀯𑁂, 𑀇𑀥 𑀧𑀦 𑀦𑀺𑀝𑁆𑀞𑀸𑀬𑀁 𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀳𑁄𑀢𑀺, 𑀦 𑀢𑁂𑀳𑁂𑀯 𑀩𑀼𑀤𑁆𑀥𑁄 𑀳𑁄𑀢𑀺, 𑀚𑀸𑀢𑀺𑀲𑀸𑀫𑀜𑁆𑀜𑀢𑁄 𑀧𑀦 𑀢𑀸𑀦𑀺𑀬𑁂𑀯 𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲𑀸’’𑀢𑀺. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻𑀢𑀺 𑀬𑀤𑀺 𑀅𑀕𑀸𑀭𑁂 𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀘 𑀮𑁄𑀓𑀁 𑀭𑀜𑁆𑀚𑀦𑀢𑁄 𑀭𑀸𑀚𑀸. 𑀘𑀓𑁆𑀓𑀭𑀢𑀦𑀁 𑀯𑀢𑁆𑀢𑁂𑀢𑀺, 𑀘𑀢𑀽𑀳𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀺 𑀯𑀢𑁆𑀢𑁂𑀢𑀺, 𑀢𑁂𑀳𑀺 𑀘 𑀧𑀭𑀁 𑀯𑀢𑁆𑀢𑁂𑀢𑀺, 𑀧𑀭𑀳𑀺𑀢𑀸𑀬 𑀘 𑀇𑀭𑀺𑀬𑀸𑀧𑀣𑀘𑀓𑁆𑀓𑀸𑀦𑀁 𑀯𑀢𑁆𑀢𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀏𑀢𑁆𑀣 𑀘 𑀭𑀸𑀚𑀸𑀢𑀺 𑀲𑀸𑀫𑀜𑁆𑀜𑀁, 𑀘𑀓𑁆𑀓𑀯𑀢𑁆𑀢𑀻𑀢𑀺 𑀯𑀺𑀲𑁂𑀲𑀦𑀁. 𑀥𑀫𑁆𑀫𑁂𑀦 𑀘𑀭𑀢𑀻𑀢𑀺 𑀥𑀫𑁆𑀫𑀺𑀓𑁄, 𑀜𑀸𑀬𑁂𑀦 𑀲𑀫𑁂𑀦 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀭𑀸𑀚𑀸 𑀚𑀸𑀢𑁄𑀢𑀺 𑀥𑀫𑁆𑀫𑀭𑀸𑀚𑀸. 𑀧𑀭𑀳𑀺𑀢𑀥𑀫𑁆𑀫𑀓𑀭𑀡𑁂𑀦 𑀯𑀸 𑀥𑀫𑁆𑀫𑀺𑀓𑁄, 𑀅𑀢𑁆𑀢𑀳𑀺𑀢𑀥𑀫𑁆𑀫𑀓𑀭𑀡𑁂𑀦 𑀥𑀫𑁆𑀫𑀭𑀸𑀚𑀸. 𑀘𑀢𑀼𑀭𑀦𑁆𑀢𑀸𑀬 𑀇𑀲𑁆𑀲𑀭𑁄𑀢𑀺 𑀘𑀸𑀢𑀼𑀭𑀦𑁆𑀢𑁄, 𑀘𑀢𑀼𑀲𑀫𑀼𑀤𑁆𑀤𑀦𑁆𑀢𑀸𑀬 𑀘𑀢𑀼𑀩𑁆𑀩𑀺𑀥𑀤𑀻𑀧𑀪𑀽𑀲𑀺𑀢𑀸𑀬 𑀘 𑀧𑀣𑀯𑀺𑀬𑀸 𑀇𑀲𑁆𑀲𑀭𑁄𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀢𑁆𑀢𑀁 𑀓𑁄𑀧𑀸𑀤𑀺𑀧𑀘𑁆𑀘𑀢𑁆𑀣𑀺𑀓𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀭𑀸𑀚𑀸𑀦𑁄 𑀯𑀺𑀚𑁂𑀲𑀻𑀢𑀺 𑀯𑀺𑀚𑀺𑀢𑀸𑀯𑀻. 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄𑀢𑀺 𑀚𑀦𑀧𑀤𑁂 𑀣𑀸𑀯𑀭𑀪𑀸𑀯𑀁 𑀥𑀼𑀯𑀪𑀸𑀯𑀁 𑀧𑀢𑁆𑀢𑁄, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀘𑀸𑀮𑁂𑀢𑀼𑀁, 𑀚𑀦𑀧𑀤𑁄 𑀯𑀸 𑀢𑀫𑁆𑀳𑀺 𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀅𑀦𑀼𑀲𑁆𑀲𑀼𑀓𑁆𑀓𑁄 𑀲𑀓𑀫𑁆𑀫𑀦𑀺𑀭𑀢𑁄 𑀅𑀘𑀮𑁄 𑀅𑀲𑀫𑁆𑀧𑀯𑁂𑀥𑀻𑀢𑀺 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀢𑀸𑀦𑀺 𑀓𑀢𑀫𑀸𑀦𑀻𑀢𑀺 𑀅𑀢𑁆𑀣𑁄. 𑀘𑀓𑁆𑀓𑀭𑀢𑀦𑀦𑁆𑀢𑀺𑀆𑀤𑀻𑀲𑀼 𑀘𑀓𑁆𑀓𑀜𑁆𑀘 𑀢𑀁 𑀭𑀢𑀺𑀚𑀦𑀦𑀢𑁆𑀣𑁂𑀦 𑀭𑀢𑀦𑀜𑁆𑀘𑀸𑀢𑀺 𑀘𑀓𑁆𑀓𑀭𑀢𑀦𑀁. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣.

𑀇𑀫𑁂𑀲𑀼 𑀧𑀦 𑀭𑀢𑀦𑁂𑀲𑀼 𑀅𑀬𑀁 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀘𑀓𑁆𑀓𑀭𑀢𑀦𑁂𑀦 𑀅𑀚𑀺𑀢𑀁 𑀚𑀺𑀦𑀸𑀢𑀺, 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑁂𑀳𑀺 𑀯𑀺𑀚𑀺𑀢𑁂 𑀬𑀣𑀸𑀲𑀼𑀔𑀁 𑀅𑀦𑀼𑀯𑀺𑀘𑀭𑀢𑀺, 𑀧𑀭𑀺𑀡𑀸𑀬𑀓𑀭𑀢𑀦𑁂𑀦 𑀯𑀺𑀚𑀺𑀢𑀫𑀦𑀼𑀭𑀓𑁆𑀔𑀢𑀺, 𑀲𑁂𑀲𑁂𑀳𑀺 𑀉𑀧𑀪𑁄𑀕𑀲𑀼𑀔𑀫𑀦𑀼𑀪𑀯𑀢𑀺. 𑀧𑀞𑀫𑁂𑀦 𑀘𑀲𑁆𑀲 𑀉𑀲𑁆𑀲𑀸𑀳𑀲𑀢𑁆𑀢𑀺𑀬𑁄𑀕𑁄, 𑀳𑀢𑁆𑀣𑀺𑀅𑀲𑁆𑀲𑀕𑀳𑀧𑀢𑀺𑀭𑀢𑀦𑁂𑀳𑀺 𑀧𑀪𑀼𑀲𑀢𑁆𑀢𑀺𑀬𑁄𑀕𑁄, 𑀧𑀘𑁆𑀙𑀺𑀫𑁂𑀦 𑀫𑀦𑁆𑀢𑀲𑀢𑁆𑀢𑀺𑀬𑁄𑀕𑁄 𑀲𑀼𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺, 𑀇𑀢𑁆𑀣𑀺𑀫𑀡𑀺𑀭𑀢𑀦𑁂𑀳𑀺 𑀢𑀺𑀯𑀺𑀥𑀲𑀢𑁆𑀢𑀺𑀬𑁄𑀕𑀨𑀮𑀁. 𑀲𑁄 𑀇𑀢𑁆𑀣𑀺𑀫𑀡𑀺𑀭𑀢𑀦𑁂𑀳𑀺 𑀪𑁄𑀕𑀲𑀼𑀔𑀫𑀦𑀼𑀪𑀯𑀢𑀺, 𑀲𑁂𑀲𑁂𑀳𑀺 𑀇𑀲𑁆𑀲𑀭𑀺𑀬𑀲𑀼𑀔𑀁. 𑀯𑀺𑀲𑁂𑀲𑀢𑁄 𑀘𑀲𑁆𑀲 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀅𑀤𑁄𑀲𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀫𑀚𑁆𑀛𑀺𑀫𑀸𑀦𑀺 𑀅𑀮𑁄𑀪𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦, 𑀧𑀘𑁆𑀙𑀺𑀫𑀫𑁂𑀓𑀁 𑀅𑀫𑁄𑀳𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑁂 𑀭𑀢𑀦𑀲𑀼𑀢𑁆𑀢𑀲𑁆𑀲 (𑀲𑀁. 𑀦𑀺. 𑁫.𑁨𑁨𑁨-𑁨𑁨𑁩) 𑀉𑀧𑀤𑁂𑀲𑀢𑁄 𑀕𑀳𑁂𑀢𑀩𑁆𑀩𑁄. 𑀅𑀧𑀺𑀘 𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑁂𑀧𑀺 (𑀫. 𑀦𑀺. 𑁩.𑁨𑁫𑁫) 𑀇𑀫𑁂𑀲𑀁 𑀭𑀢𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁂𑀦 𑀲𑀤𑁆𑀥𑀺𑀁 𑀯𑀡𑁆𑀡𑀦𑀸 𑀆𑀕𑀫𑀺𑀲𑁆𑀲𑀢𑀺.

𑀧𑀭𑁄𑀲𑀳𑀲𑁆𑀲𑀦𑁆𑀢𑀺 𑀅𑀢𑀺𑀭𑁂𑀓𑀲𑀳𑀲𑁆𑀲𑀁. 𑀲𑀽𑀭𑀸𑀢𑀺 𑀅𑀪𑀻𑀭𑀼𑀓𑀚𑀸𑀢𑀺𑀓𑀸. 𑀯𑀻𑀭𑀗𑁆𑀕𑀭𑀽𑀧𑀸𑀢𑀺 𑀤𑁂𑀯𑀧𑀼𑀢𑁆𑀢𑀲𑀤𑀺𑀲𑀓𑀸𑀬𑀸, 𑀏𑀯𑀁 𑀢𑀸𑀯 𑀏𑀓𑁂 𑀯𑀡𑁆𑀡𑀬𑀦𑁆𑀢𑀺, 𑀅𑀬𑀁 𑀧𑀦𑁂𑀢𑁆𑀣 𑀲𑀪𑀸𑀯𑁄 𑁋 𑀯𑀻𑀭𑀸𑀢𑀺 𑀉𑀢𑁆𑀢𑀫𑀲𑀽𑀭𑀸 𑀯𑀼𑀘𑁆𑀘𑀦𑁆𑀢𑀺. 𑀯𑀻𑀭𑀸𑀦𑀁 𑀅𑀗𑁆𑀕𑀁 𑀯𑀻𑀭𑀗𑁆𑀕𑀁, 𑀯𑀻𑀭𑀓𑀸𑀭𑀡𑀁 𑀯𑀻𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀻𑀭𑀗𑁆𑀕𑀁 𑀭𑀽𑀧𑀁 𑀏𑀢𑁂𑀲𑀦𑁆𑀢𑀺 𑀯𑀻𑀭𑀗𑁆𑀕𑀭𑀽𑀧𑀸, 𑀯𑀻𑀭𑀺𑀬𑀫𑀬𑀲𑀭𑀻𑀭𑀸 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸𑀢𑀺 𑀲𑀘𑁂 𑀧𑀝𑀺𑀫𑀼𑀔𑀁 𑀢𑀺𑀝𑁆𑀞𑁂𑀬𑁆𑀬 𑀧𑀭𑀲𑁂𑀦𑀸, 𑀢𑀁 𑀫𑀤𑁆𑀤𑀺𑀢𑀼𑀁 𑀲𑀫𑀢𑁆𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑁂𑀦𑀸𑀢𑀺 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀲𑀻𑀮𑀥𑀫𑁆𑀫𑁂𑀦.

𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄𑀢𑀺 𑀏𑀢𑁆𑀣 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀅𑀯𑀺𑀚𑁆𑀚𑀸𑀤𑀼𑀘𑁆𑀘𑀭𑀺𑀢𑀙𑀤𑀦𑁂𑀳𑀺 𑀲𑀢𑁆𑀢𑀳𑀺 𑀧𑀝𑀺𑀘𑁆𑀙𑀦𑁆𑀦𑁂 𑀓𑀺𑀮𑁂𑀲𑀦𑁆𑀥𑀓𑀸𑀭𑀮𑁄𑀓𑁂 𑀢𑀁 𑀙𑀤𑀦𑀁 𑀯𑀺𑀯𑀝𑁆𑀝𑁂𑀢𑁆𑀯𑀸 𑀲𑀫𑀦𑁆𑀢𑀢𑁄 𑀲𑀜𑁆𑀚𑀸𑀢𑀸𑀮𑁄𑀓𑁄 𑀳𑀼𑀢𑁆𑀯𑀸 𑀞𑀺𑀢𑁄𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑁄. 𑀢𑀢𑁆𑀣 𑀧𑀞𑀫𑁂𑀦 𑀧𑀤𑁂𑀦 𑀧𑀽𑀚𑀸𑀭𑀳𑀢𑀸, 𑀤𑀼𑀢𑀺𑀬𑁂𑀦 𑀢𑀲𑁆𑀲𑀸 𑀳𑁂𑀢𑀼 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺, 𑀢𑀢𑀺𑀬𑁂𑀦 𑀩𑀼𑀤𑁆𑀥𑀢𑁆𑀢𑀳𑁂𑀢𑀼𑀪𑀽𑀢𑀸 𑀯𑀺𑀯𑀝𑁆𑀝𑀘𑁆𑀙𑀤𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀯𑀺𑀯𑀝𑁆𑀝𑁄 𑀘 𑀯𑀺𑀘𑁆𑀙𑀤𑁄 𑀘𑀸𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑁄, 𑀯𑀝𑁆𑀝𑀭𑀳𑀺𑀢𑁄 𑀙𑀤𑀦𑀭𑀳𑀺𑀢𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦 𑀅𑀭𑀳𑀁 𑀯𑀝𑁆𑀝𑀸𑀪𑀸𑀯𑁂𑀦, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀙𑀤𑀦𑀸𑀪𑀸𑀯𑁂𑀦𑀸𑀢𑀺 𑀏𑀯𑀁 𑀧𑀼𑀭𑀺𑀫𑀧𑀤𑀤𑁆𑀯𑀬𑀲𑁆𑀲𑁂𑀯 𑀳𑁂𑀢𑀼𑀤𑁆𑀯𑀬𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀢𑀺𑀬𑀯𑁂𑀲𑀸𑀭𑀚𑁆𑀚𑁂𑀦 𑀘𑁂𑀢𑁆𑀣 𑀧𑀼𑀭𑀺𑀫𑀲𑀺𑀤𑁆𑀥𑀺, 𑀧𑀞𑀫𑁂𑀦 𑀤𑀼𑀢𑀺𑀬𑀲𑀺𑀤𑁆𑀥𑀺, 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀺 𑀢𑀢𑀺𑀬𑀲𑀺𑀤𑁆𑀥𑀺 𑀳𑁄𑀢𑀺. 𑀧𑀼𑀭𑀺𑀫𑀜𑁆𑀘 𑀥𑀫𑁆𑀫𑀘𑀓𑁆𑀔𑀼𑀁, 𑀤𑀼𑀢𑀺𑀬𑀁 𑀩𑀼𑀤𑁆𑀥𑀘𑀓𑁆𑀔𑀼𑀁, 𑀢𑀢𑀺𑀬𑀁 𑀲𑀫𑀦𑁆𑀢𑀘𑀓𑁆𑀔𑀼𑀁 𑀲𑀸𑀥𑁂𑀢𑀻𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁆𑀯𑀁 𑀫𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑀸𑀢𑀺 𑀇𑀫𑀺𑀦𑀸𑀲𑁆𑀲 𑀲𑀽𑀭𑀪𑀸𑀯𑀁 𑀚𑀦𑁂𑀢𑀺.

𑁩𑁮𑁫. 𑀲𑁄𑀧𑀺 𑀢𑀸𑀬 𑀆𑀘𑀭𑀺𑀬𑀓𑀣𑀸𑀬 𑀮𑀓𑁆𑀔𑀡𑁂𑀲𑀼 𑀯𑀺𑀕𑀢𑀲𑀫𑁆𑀫𑁄𑀳𑁄 𑀏𑀓𑁄𑀪𑀸𑀲𑀚𑀸𑀢𑁄 𑀯𑀺𑀬 𑀩𑀼𑀤𑁆𑀥𑀫𑀦𑁆𑀢𑁂 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀁, 𑀪𑁄𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸, 𑀪𑁄, 𑀫𑀁 𑀢𑁆𑀯𑀁 𑀯𑀤𑀲𑀺, 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀲𑀫𑀦𑁆𑀦𑁂𑀲𑀻𑀢𑀺 𑀕𑀯𑁂𑀲𑀺, 𑀏𑀓𑀁 𑀤𑁆𑀯𑁂𑀢𑀺 𑀯𑀸 𑀕𑀡𑀬𑀦𑁆𑀢𑁄 𑀲𑀫𑀸𑀦𑀬𑀺. 𑀅𑀤𑁆𑀤𑀲𑀸 𑀔𑁄𑀢𑀺 𑀓𑀣𑀁 𑀅𑀤𑁆𑀤𑀲? 𑀩𑀼𑀤𑁆𑀥𑀸𑀦𑀜𑁆𑀳𑀺 𑀦𑀺𑀲𑀺𑀦𑁆𑀦𑀸𑀦𑀁 𑀯𑀸 𑀦𑀺𑀧𑀦𑁆𑀦𑀸𑀦𑀁 𑀯𑀸 𑀓𑁄𑀘𑀺 𑀮𑀓𑁆𑀔𑀡𑀁 𑀧𑀭𑀺𑀬𑁂𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀞𑀺𑀢𑀸𑀦𑀁 𑀧𑀦 𑀘𑀗𑁆𑀓𑀫𑀦𑁆𑀢𑀸𑀦𑀁 𑀯𑀸 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀮𑀓𑁆𑀔𑀡𑀧𑀭𑀺𑀬𑁂𑀲𑀦𑀢𑁆𑀣𑀁 𑀆𑀕𑀢𑀁 𑀤𑀺𑀲𑁆𑀯𑀸 𑀩𑀼𑀤𑁆𑀥𑀸 𑀉𑀝𑁆𑀞𑀸𑀬𑀸𑀲𑀦𑀸 𑀢𑀺𑀝𑁆𑀞𑀦𑁆𑀢𑀺 𑀯𑀸 𑀘𑀗𑁆𑀓𑀫𑀁 𑀯𑀸 𑀅𑀥𑀺𑀝𑁆𑀞𑀳𑀦𑁆𑀢𑀺. 𑀇𑀢𑀺 𑀮𑀓𑁆𑀔𑀡𑀤𑀲𑁆𑀲𑀦𑀸𑀦𑀼𑀭𑀽𑀧𑁂 𑀇𑀭𑀺𑀬𑀸𑀧𑀣𑁂 𑀯𑀢𑁆𑀢𑀫𑀸𑀦𑀲𑁆𑀲 𑀅𑀤𑁆𑀤𑀲. 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀧𑀸𑀬𑁂𑀦, 𑀩𑀳𑀼𑀓𑀸𑀦𑀺 𑀅𑀤𑁆𑀤𑀲, 𑀅𑀧𑁆𑀧𑀸𑀦𑀺 𑀦 𑀅𑀤𑁆𑀤𑀲𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀬𑀸𑀦𑀺 𑀦 𑀅𑀤𑁆𑀤𑀲, 𑀢𑁂𑀲𑀁 𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁 𑀞𑀧𑁂𑀢𑁆𑀯𑀸 𑀤𑁆𑀯𑁂𑀢𑀺. 𑀓𑀗𑁆𑀔𑀢𑀻𑀢𑀺 ‘‘𑀅𑀳𑁄 𑀯𑀢 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀉𑀧𑁆𑀧𑀸𑀤𑁂𑀢𑀺. 𑀯𑀺𑀘𑀺𑀓𑀺𑀘𑁆𑀙𑀢𑀻𑀢𑀺 𑀢𑀢𑁄 𑀢𑀢𑁄 𑀢𑀸𑀦𑀺 𑀯𑀺𑀘𑀺𑀦𑀦𑁆𑀢𑁄 𑀓𑀺𑀘𑁆𑀙𑀢𑀺 𑀦 𑀲𑀓𑁆𑀓𑁄𑀢𑀺 𑀤𑀝𑁆𑀞𑀼𑀁. 𑀦𑀸𑀥𑀺𑀫𑀼𑀘𑁆𑀘𑀢𑀻𑀢𑀺 𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀦𑁆𑀦𑀺𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺. 𑀦 𑀲𑀫𑁆𑀧𑀲𑀻𑀤𑀢𑀻𑀢𑀺 𑀢𑀢𑁄 ‘‘𑀧𑀭𑀺𑀧𑀼𑀡𑁆𑀡𑀮𑀓𑁆𑀔𑀡𑁄 𑀅𑀬’’𑀦𑁆𑀢𑀺 𑀪𑀕𑀯𑀢𑀺 𑀧𑀲𑀸𑀤𑀁 𑀦𑀸𑀧𑀚𑁆𑀚𑀢𑀺. 𑀓𑀗𑁆𑀔𑀸𑀬 𑀯𑀸 𑀤𑀼𑀩𑁆𑀩𑀮𑀸 𑀯𑀺𑀫𑀢𑀺 𑀯𑀼𑀢𑁆𑀢𑀸, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀫𑀚𑁆𑀛𑀺𑀫𑀸, 𑀅𑀦𑀥𑀺𑀫𑀼𑀘𑁆𑀘𑀦𑀢𑀸𑀬 𑀩𑀮𑀯𑀢𑀻, 𑀅𑀲𑀫𑁆𑀧𑀲𑀸𑀤𑁂𑀦 𑀢𑁂𑀳𑀺 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀲𑁆𑀲 𑀓𑀸𑀮𑀼𑀲𑁆𑀲𑀺𑀬𑀪𑀸𑀯𑁄. 𑀓𑁄𑀲𑁄𑀳𑀺𑀢𑁂𑀢𑀺 𑀯𑀢𑁆𑀣𑀺𑀓𑁄𑀲𑁂𑀦 𑀧𑀝𑀺𑀘𑁆𑀙𑀦𑁆𑀦𑁂. 𑀯𑀢𑁆𑀣𑀕𑀼𑀬𑁆𑀳𑁂𑀢𑀺 𑀅𑀗𑁆𑀕𑀚𑀸𑀢𑁂. 𑀪𑀕𑀯𑀢𑁄 𑀳𑀺 𑀯𑀸𑀭𑀡𑀲𑁆𑀲𑁂𑀯 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀤𑀼𑀫𑀕𑀩𑁆𑀪𑀲𑀫𑀸𑀦𑀁, 𑀢𑀁 𑀲𑁄 𑀯𑀢𑁆𑀣𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸, 𑀅𑀦𑁆𑀢𑁄𑀫𑀼𑀔𑀕𑀢𑀸𑀬 𑀘 𑀚𑀺𑀯𑁆𑀳𑀸𑀬 𑀧𑀳𑀽𑀢𑀪𑀸𑀯𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀢𑁂𑀲𑀼 𑀤𑁆𑀯𑀻𑀲𑀼 𑀮𑀓𑁆𑀔𑀡𑁂𑀲𑀼 𑀓𑀗𑁆𑀔𑀻 𑀅𑀳𑁄𑀲𑀺 𑀯𑀺𑀘𑀺𑀓𑀺𑀘𑁆𑀙𑀻.

𑀅𑀣 𑀔𑁄 𑀪𑀕𑀯𑀸𑀢𑀺 𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀇𑀫𑀲𑁆𑀲 𑀏𑀢𑀸𑀦𑀺 𑀤𑁆𑀯𑁂 𑀮𑀓𑁆𑀔𑀡𑀸𑀦𑀺 𑀦 𑀤𑀲𑁆𑀲𑁂𑀲𑁆𑀲𑀸𑀫𑀺, 𑀦𑀺𑀓𑁆𑀓𑀗𑁆𑀔𑁄 𑀦 𑀪𑀯𑀺𑀲𑁆𑀲𑀢𑀺. 𑀏𑀢𑀲𑁆𑀲 𑀓𑀗𑁆𑀔𑀸𑀬 𑀲𑀢𑀺 𑀆𑀘𑀭𑀺𑀬𑁄𑀧𑀺𑀲𑁆𑀲 𑀦𑀺𑀓𑁆𑀓𑀗𑁆𑀔𑁄 𑀦 𑀪𑀯𑀺𑀲𑁆𑀲𑀢𑀺, 𑀅𑀣 𑀫𑀁 𑀤𑀲𑁆𑀲𑀦𑀸𑀬 𑀦 𑀆𑀕𑀫𑀺𑀲𑁆𑀲𑀢𑀺, 𑀅𑀦𑀸𑀕𑀢𑁄 𑀥𑀫𑁆𑀫𑀁 𑀦 𑀲𑁄𑀲𑁆𑀲𑀢𑀺, 𑀥𑀫𑁆𑀫𑀁 𑀅𑀲𑀼𑀡𑀦𑁆𑀢𑁄 𑀢𑀻𑀡𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀦 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺. 𑀏𑀢𑀲𑁆𑀫𑀺𑀁 𑀧𑀦 𑀦𑀺𑀓𑁆𑀓𑀗𑁆𑀔𑁂 𑀆𑀘𑀭𑀺𑀬𑁄𑀧𑀺𑀲𑁆𑀲 𑀦𑀺𑀓𑁆𑀓𑀗𑁆𑀔𑁄 𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀻𑀡𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺. 𑀏𑀢𑀤𑀢𑁆𑀣𑀁𑀬𑁂𑀯 𑀘 𑀫𑀬𑀸 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸. 𑀤𑀲𑁆𑀲𑁂𑀲𑁆𑀲𑀸𑀫𑀺𑀲𑁆𑀲 𑀢𑀸𑀦𑀺 𑀮𑀓𑁆𑀔𑀡𑀸𑀦𑀻’’𑀢𑀺.

𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀫𑀓𑀸𑀲𑀺. 𑀓𑀣𑀁𑀭𑀽𑀧𑀁? 𑀓𑀺𑀫𑁂𑀢𑁆𑀣 𑀅𑀜𑁆𑀜𑁂𑀦 𑀯𑀢𑁆𑀢𑀩𑁆𑀩𑀁? 𑀯𑀼𑀢𑁆𑀢𑀫𑁂𑀢𑀁 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦𑁂𑀯 𑀫𑀺𑀮𑀺𑀦𑁆𑀤𑀭𑀜𑁆𑀜𑀸 𑀧𑀼𑀝𑁆𑀞𑁂𑀦 𑁋

𑀆𑀳 𑀘 𑀤𑀼𑀓𑁆𑀓𑀭𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀓𑀢𑀦𑁆𑀢𑀺. 𑀓𑀺𑀁 𑀫𑀳𑀸𑀭𑀸𑀚𑀸𑀢𑀺? 𑀫𑀳𑀸𑀚𑀦𑁂𑀦 𑀳𑀺𑀭𑀺𑀓𑀭𑀡𑁄𑀓𑀸𑀲𑀁 𑀩𑁆𑀭𑀳𑁆𑀫𑀸𑀬𑀼𑀩𑁆𑀭𑀸𑀳𑁆𑀫𑀡𑀲𑁆𑀲 𑀘 𑀅𑀦𑁆𑀢𑁂𑀯𑀸𑀲𑀺𑀉𑀢𑁆𑀢𑀭𑀲𑁆𑀲 𑀘 𑀩𑀸𑀯𑀭𑀺𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀻𑀦𑀁 𑀲𑁄𑀴𑀲𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀲𑁂𑀮𑀲𑁆𑀲 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑁆𑀢𑁂𑀯𑀸𑀲𑀻𑀦𑀁 𑀢𑀺𑀲𑀢𑀫𑀸𑀡𑀯𑀸𑀦𑀜𑁆𑀘 𑀤𑀲𑁆𑀲𑁂𑀲𑀺, 𑀪𑀦𑁆𑀢𑁂𑀢𑀺. 𑀦, 𑀫𑀳𑀸𑀭𑀸𑀚, 𑀪𑀕𑀯𑀸 𑀕𑀼𑀬𑁆𑀳𑀁 𑀤𑀲𑁆𑀲𑁂𑀢𑀺, 𑀙𑀸𑀬𑀁 𑀪𑀕𑀯𑀸 𑀤𑀲𑁆𑀲𑁂𑀢𑀺, 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀦𑀺𑀯𑀸𑀲𑀦𑀦𑀺𑀯𑀢𑁆𑀣𑀁 𑀓𑀸𑀬𑀩𑀦𑁆𑀥𑀦𑀩𑀤𑁆𑀥𑀁 𑀘𑀻𑀯𑀭𑀧𑀸𑀭𑀼𑀢𑀁 𑀙𑀸𑀬𑀸𑀭𑀽𑀧𑀓𑀫𑀢𑁆𑀢𑀁 𑀤𑀲𑁆𑀲𑁂𑀲𑀺 𑀫𑀳𑀸𑀭𑀸𑀚𑀸𑀢𑀺. 𑀙𑀸𑀬𑀁 𑀤𑀺𑀝𑁆𑀞𑁂 𑀲𑀢𑀺 𑀤𑀺𑀝𑁆𑀞𑁄𑀬𑁂𑀯. 𑀦𑀦𑀼, 𑀪𑀦𑁆𑀢𑁂𑀢𑀺? 𑀢𑀺𑀝𑁆𑀞𑀢𑁂𑀢𑀁, 𑀫𑀳𑀸𑀭𑀸𑀚, 𑀳𑀤𑀬𑀭𑀽𑀧𑀁 𑀤𑀺𑀲𑁆𑀯𑀸 𑀩𑀼𑀚𑁆𑀛𑀦𑀓𑀲𑀢𑁆𑀢𑁄 𑀪𑀯𑁂𑀬𑁆𑀬, 𑀳𑀤𑀬𑀫𑀁𑀲𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀬𑁆𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺. 𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸𑀢𑀺.

𑀦𑀺𑀦𑁆𑀦𑀸𑀫𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. 𑀅𑀦𑀼𑀫𑀲𑀻𑀢𑀺 𑀓𑀣𑀺𑀦𑀲𑀽𑀘𑀺𑀁 𑀯𑀺𑀬 𑀓𑀢𑁆𑀯𑀸 𑀅𑀦𑀼𑀫𑀚𑁆𑀚𑀺. 𑀢𑀣𑀸 𑀓𑀭𑀡𑁂𑀦 𑀘𑁂𑀢𑁆𑀣 𑀫𑀼𑀤𑀼𑀪𑀸𑀯𑁄, 𑀓𑀡𑁆𑀡𑀲𑁄𑀢𑀸𑀦𑀼𑀫𑀲𑀦𑁂𑀦 𑀤𑀻𑀖𑀪𑀸𑀯𑁄, 𑀦𑀸𑀲𑀺𑀓𑀲𑁄𑀢𑀸𑀦𑀼𑀫𑀲𑀦𑁂𑀦 𑀢𑀦𑀼𑀪𑀸𑀯𑁄, 𑀦𑀮𑀸𑀝𑀘𑁆𑀙𑀸𑀤𑀦𑁂𑀦 𑀧𑀼𑀣𑀼𑀮𑀪𑀸𑀯𑁄 𑀧𑀓𑀸𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀉𑀪𑁄𑀧𑀺 𑀓𑀡𑁆𑀡𑀲𑁄𑀢𑀸𑀦𑀻𑀢𑀺𑀆𑀤𑀻𑀲𑀼 𑀘𑁂𑀢𑁆𑀣 𑀩𑀼𑀤𑁆𑀥𑀸𑀦𑀁 𑀓𑀡𑁆𑀡𑀲𑁄𑀢𑁂𑀲𑀼 𑀫𑀮𑀁 𑀯𑀸 𑀚𑀮𑁆𑀮𑀺𑀓𑀸 𑀯𑀸 𑀦𑀢𑁆𑀣𑀺, 𑀥𑁄𑀯𑀺𑀢𑁆𑀯𑀸 𑀞𑀧𑀺𑀢𑀭𑀚𑀢𑀧𑀦𑀸𑀴𑀺𑀓𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑀣𑀸 𑀦𑀸𑀲𑀺𑀓𑀲𑁄𑀢𑁂𑀲𑀼, 𑀢𑀸𑀦𑀺𑀧𑀺 𑀳𑀺 𑀲𑀼𑀧𑀭𑀺𑀓𑀫𑁆𑀫𑀓𑀢𑀓𑀜𑁆𑀘𑀦𑀧𑀦𑀸𑀴𑀺𑀓𑀸 𑀯𑀺𑀬 𑀘 𑀫𑀡𑀺𑀧𑀦𑀸𑀴𑀺𑀓𑀸 𑀯𑀺𑀬 𑀘 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀚𑀺𑀯𑁆𑀳𑀁 𑀦𑀻𑀳𑀭𑀺𑀢𑁆𑀯𑀸 𑀓𑀣𑀺𑀦𑀲𑀽𑀘𑀺𑀁 𑀯𑀺𑀬 𑀓𑀢𑁆𑀯𑀸 𑀫𑀼𑀔𑀧𑀭𑀺𑀬𑀦𑁆𑀢𑁂 𑀉𑀧𑀲𑀁𑀳𑀭𑀦𑁆𑀢𑁄 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀁 𑀧𑀯𑁂𑀲𑁂𑀢𑁆𑀯𑀸 𑀢𑀢𑁄 𑀦𑀻𑀳𑀭𑀺𑀢𑁆𑀯𑀸 𑀯𑀸𑀫𑀓𑀡𑁆𑀡𑀲𑁄𑀢𑀁 𑀧𑀯𑁂𑀲𑁂𑀲𑀺, 𑀢𑀢𑁄 𑀦𑀻𑀳𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀦𑀸𑀲𑀺𑀓𑀲𑁄𑀢𑀁 𑀧𑀯𑁂𑀲𑁂𑀢𑁆𑀯𑀸 𑀢𑀢𑁄 𑀦𑀻𑀳𑀭𑀺𑀢𑁆𑀯𑀸 𑀯𑀸𑀫𑀦𑀸𑀲𑀺𑀓𑀲𑁄𑀢𑀁 𑀧𑀯𑁂𑀲𑁂𑀲𑀺, 𑀢𑀢𑁄 𑀦𑀻𑀳𑀭𑀺𑀢𑁆𑀯𑀸 𑀧𑀼𑀣𑀼𑀮𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀭𑀢𑁆𑀢𑀯𑀮𑀸𑀳𑀓𑁂𑀦 𑀅𑀟𑁆𑀠𑀘𑀦𑁆𑀤𑀁 𑀯𑀺𑀬 𑀘 𑀲𑀼𑀯𑀡𑁆𑀡𑀧𑀢𑁆𑀢𑀁 𑀯𑀺𑀬 𑀘 𑀭𑀢𑁆𑀢𑀓𑀫𑁆𑀩𑀮𑀧𑀝𑀮𑁂𑀦 𑀯𑀺𑀚𑁆𑀚𑀼𑀚𑁄𑀢𑀲𑀤𑀺𑀲𑀸𑀬 𑀚𑀺𑀯𑁆𑀳𑀸𑀬 𑀓𑁂𑀯𑀮𑀓𑀧𑁆𑀧𑀁 𑀦𑀮𑀸𑀝𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀲𑀺.

𑀬𑀁𑀦𑀽𑀦𑀸𑀳𑀦𑁆𑀢𑀺 𑀓𑀲𑁆𑀫𑀸 𑀘𑀺𑀦𑁆𑀢𑁂𑀲𑀺? 𑀅𑀳𑀜𑁆𑀳𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀲𑀫𑀦𑁆𑀦𑁂𑀲𑀺𑀢𑁆𑀯𑀸 𑀕𑀢𑁄 ‘‘𑀤𑀺𑀝𑁆𑀞𑀸𑀦𑀺 𑀢𑁂, 𑀢𑀸𑀢, 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀻’’𑀢𑀺 𑀆𑀘𑀭𑀺𑀬𑁂𑀦 𑀧𑀼𑀘𑁆𑀙𑀺𑀢𑁄 ‘‘𑀆𑀫, 𑀆𑀘𑀭𑀺𑀬𑀸’’𑀢𑀺 𑀯𑀢𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺. 𑀲𑀘𑁂 𑀧𑀦 𑀫𑀁 ‘‘𑀓𑀺𑀭𑀺𑀬𑀸𑀓𑀭𑀡𑀫𑀲𑁆𑀲 𑀓𑀻𑀤𑀺𑀲’’𑀦𑁆𑀢𑀺 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀢𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀦 𑀚𑀸𑀦𑀸𑀫𑀻𑀢𑀺 𑀯𑀼𑀢𑁆𑀢𑁂 𑀧𑀦 𑀆𑀘𑀭𑀺𑀬𑁄 𑀓𑀼𑀚𑁆𑀛𑀺𑀲𑁆𑀲𑀢𑀺 ‘‘𑀦𑀦𑀼 𑀢𑁆𑀯𑀁 𑀫𑀬𑀸 𑀲𑀩𑁆𑀩𑀫𑁆𑀧𑁂𑀢𑀁 𑀚𑀸𑀦𑀦𑀢𑁆𑀣𑀸𑀬 𑀧𑁂𑀲𑀺𑀢𑁄, 𑀓𑀲𑁆𑀫𑀸 𑀅𑀚𑀸𑀦𑀺𑀢𑁆𑀯𑀸 𑀆𑀕𑀢𑁄𑀲𑀻’’𑀢𑀺, 𑀢𑀲𑁆𑀫𑀸 𑀬𑀦𑁆𑀦𑀽𑀦𑀸𑀳𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀼𑀩𑀦𑁆𑀥𑀺. 𑀪𑀕𑀯𑀸 𑀦𑁆𑀳𑀸𑀦𑀝𑁆𑀞𑀸𑀦𑀁 𑀫𑀼𑀔𑀥𑁄𑀯𑀦𑀝𑁆𑀞𑀸𑀦𑀁 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀝𑁆𑀞𑀸𑀦𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀑𑀭𑁄𑀥𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀝𑁆𑀞𑀸𑀦𑁂𑀲𑀼 𑀅𑀦𑁆𑀢𑀫𑀲𑁄 𑀏𑀓𑀕𑀦𑁆𑀥𑀓𑀼𑀝𑀺𑀬𑀫𑁆𑀧𑀺 𑀑𑀓𑀸𑀲𑀫𑀓𑀸𑀲𑀺.

𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑁋 ‘‘𑀅𑀬𑀁 𑀓𑀺𑀭 𑀩𑁆𑀭𑀳𑁆𑀫𑀸𑀬𑀼𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀸𑀡𑀯𑁄 𑀉𑀢𑁆𑀢𑀭𑁄 𑀦𑀸𑀫 ‘𑀩𑀼𑀤𑁆𑀥𑁄 𑀯𑀸 𑀦𑁄 𑀯𑀸’𑀢𑀺 𑀢𑀣𑀸𑀕𑀢𑀲𑁆𑀲 𑀩𑀼𑀤𑁆𑀥𑀪𑀸𑀯𑀁 𑀯𑀻𑀫𑀁𑀲𑀦𑁆𑀢𑁄 𑀘𑀭𑀢𑀺, 𑀩𑀼𑀤𑁆𑀥𑀯𑀻𑀫𑀁𑀲𑀓𑁄 𑀦𑀸𑀫𑀸𑀬’’𑀦𑁆𑀢𑀺 𑀧𑀸𑀓𑀝𑁄 𑀚𑀸𑀢𑁄. 𑀬𑀫𑁆𑀳𑀺 𑀬𑀫𑁆𑀳𑀺 𑀞𑀸𑀦𑁂 𑀩𑀼𑀤𑁆𑀥𑀸 𑀯𑀲𑀦𑁆𑀢𑀺, 𑀧𑀜𑁆𑀘 𑀓𑀺𑀘𑁆𑀘𑀸𑀦𑀺 𑀓𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀸𑀦𑀺 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀸𑀦𑁂𑀯. 𑀢𑀢𑁆𑀣 𑀧𑀘𑁆𑀙𑀸𑀪𑀢𑁆𑀢𑀁 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀤𑀦𑁆𑀢𑀔𑀘𑀺𑀢𑀁 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀪𑀕𑀯𑀢𑀺 𑀉𑀢𑁆𑀢𑀭𑁄𑀧𑀺 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀢𑀺. 𑀥𑀫𑁆𑀫𑀲𑁆𑀲𑀯𑀦𑀧𑀭𑀺𑀬𑁄𑀲𑀸𑀦𑁂 𑀲𑀤𑁆𑀥𑀸 𑀫𑀦𑀼𑀲𑁆𑀲𑀸 𑀲𑁆𑀯𑀸𑀢𑀦𑀸𑀬 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀸𑀡𑀯𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀢𑀸𑀢, 𑀅𑀫𑁆𑀳𑁂𑀳𑀺 𑀪𑀕𑀯𑀸 𑀦𑀺𑀫𑀦𑁆𑀢𑀺𑀢𑁄, 𑀢𑁆𑀯𑀫𑁆𑀧𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀪𑀢𑁆𑀢𑀁 𑀕𑀡𑁆𑀳𑁂𑀬𑁆𑀬𑀸𑀲𑀻’’𑀢𑀺. 𑀧𑀼𑀦𑀤𑀺𑀯𑀲𑁂 𑀢𑀣𑀸𑀕𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀕𑀸𑀫𑀁 𑀧𑀯𑀺𑀲𑀢𑀺, 𑀉𑀢𑁆𑀢𑀭𑁄𑀧𑀺 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀧𑀤𑀸𑀦𑀼𑀧𑀤𑀺𑀓𑁄 𑀅𑀦𑀼𑀩𑀦𑁆𑀥𑀢𑀺. 𑀓𑀼𑀮𑀕𑁂𑀳𑀁 𑀧𑀯𑀺𑀝𑁆𑀞𑀓𑀸𑀮𑁂 𑀤𑀓𑁆𑀔𑀺𑀡𑁄𑀤𑀓𑀕𑁆𑀕𑀳𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀢𑀣𑀸𑀕𑀢𑀲𑁆𑀲 𑀧𑀢𑁆𑀢𑀁 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀫𑀸𑀡𑀯𑀓𑀲𑁆𑀲 𑀧𑀸𑀢𑀭𑀸𑀲𑀪𑀢𑁆𑀢𑀁 𑀲𑀚𑁆𑀚𑁂𑀦𑁆𑀢𑀺. 𑀲𑁄 𑀏𑀓𑀫𑀦𑁆𑀢𑁂 𑀦𑀺𑀲𑀺𑀦𑁆𑀦𑁄 𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁𑀬𑁂𑀯 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺.

𑀢𑀢𑁆𑀣 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑁂𑀦𑁆𑀢𑁄 𑀕𑀦𑁆𑀥𑀫𑀡𑁆𑀟𑀮𑀫𑀸𑀴𑁂 𑀦𑀺𑀲𑀻𑀤𑀢𑀺. 𑀪𑀺𑀓𑁆𑀔𑀽𑀳𑀺 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀆𑀕𑀫𑁆𑀫 𑀯𑀦𑁆𑀤𑀺𑀢𑁆𑀯𑀸 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀢𑀺, 𑀫𑀸𑀡𑀯𑁄𑀧𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁𑀬𑁂𑀯 𑀕𑀘𑁆𑀙𑀢𑀺. 𑀪𑀕𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀕𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀦𑁆𑀥𑀓𑀼𑀝𑀺𑀧𑁆𑀧𑀫𑀼𑀔𑁂 𑀞𑀺𑀢𑁄 𑀑𑀯𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀢𑀺, 𑀫𑀸𑀡𑀯𑁄𑀧𑀺 𑀧𑀯𑀺𑀲𑀢𑀺. 𑀪𑀕𑀯𑀸 𑀔𑀼𑀤𑁆𑀤𑀓𑀫𑀜𑁆𑀘𑁂 𑀅𑀧𑁆𑀧𑀫𑀢𑁆𑀢𑀓𑀁 𑀓𑀸𑀮𑀁 𑀦𑀺𑀲𑀻𑀤𑀢𑀺, 𑀫𑀸𑀡𑀯𑁄𑀧𑀺 𑀅𑀯𑀺𑀤𑀽𑀭𑁂 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀪𑀕𑀯𑀸 𑀫𑀼𑀳𑀼𑀢𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀻𑀲𑁄𑀓𑁆𑀓𑀫𑀦𑀁 𑀤𑀲𑁆𑀲𑁂𑀢𑀺, 𑁋 ‘‘𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀺𑀳𑀸𑀭𑀯𑁂𑀮𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀸𑀡𑀯𑁄 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀢𑀺. 𑀫𑀦𑀼𑀲𑁆𑀲𑀸 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀲𑀫𑀸𑀤𑀺𑀦𑁆𑀦𑀉𑀧𑁄𑀲𑀣𑀗𑁆𑀕𑀸 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀸 𑀫𑀸𑀮𑀸𑀕𑀦𑁆𑀥𑀸𑀤𑀺𑀳𑀢𑁆𑀣𑀸 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸𑀢𑀺 𑀯𑀺𑀳𑀸𑀭𑀁 𑀆𑀕𑀘𑁆𑀙𑀦𑁆𑀢𑀺, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀁 𑀯𑀺𑀬 𑀳𑁄𑀢𑀺.

𑀪𑀕𑀯𑀸 𑀫𑀼𑀳𑀼𑀢𑁆𑀢𑀁 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀯𑀼𑀝𑁆𑀞𑀸𑀬 𑀧𑀼𑀩𑁆𑀩𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺. 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀫𑀳𑀸𑀚𑀦𑀲𑁆𑀲 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀫𑀳𑀸𑀚𑀦𑀧𑀭𑀺𑀯𑀼𑀢𑁄 𑀕𑀦𑁆𑀥𑀫𑀡𑁆𑀟𑀮𑀫𑀸𑀴𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑀕𑀢𑁄 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀫𑀸𑀡𑀯𑁄𑀧𑀺 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑁋 ‘‘𑀓𑀺𑀁 𑀦𑀼 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀕𑁂𑀳𑀲𑁆𑀲𑀺𑀢𑀯𑀲𑁂𑀦 𑀧𑀭𑀺𑀲𑀁 𑀉𑀲𑁆𑀲𑀸𑀤𑁂𑀦𑁆𑀢𑁄 𑀯𑀸 𑀅𑀧𑀲𑀸𑀤𑁂𑀦𑁆𑀢𑁄 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀉𑀤𑀸𑀳𑀼 𑀦𑁄’’𑀢𑀺 𑀅𑀓𑁆𑀔𑀭𑀓𑁆𑀔𑀭𑀁 𑀧𑀤𑀁 𑀧𑀤𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀪𑀕𑀯𑀸 𑀢𑀣𑀸𑀯𑀺𑀥𑀁 𑀓𑀣𑀁 𑀅𑀓𑀣𑁂𑀢𑁆𑀯𑀸𑀯 𑀓𑀸𑀮𑀁 𑀜𑀢𑁆𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀫𑀸𑀡𑀯𑁄 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀲𑀢𑁆𑀢 𑀫𑀸𑀲𑁂 𑀏𑀓𑀢𑁄 𑀯𑀺𑀘𑀭𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀅𑀡𑀼𑀫𑀢𑁆𑀢𑀫𑁆𑀧𑀺 𑀅𑀯𑀓𑁆𑀔𑀮𑀺𑀢𑀁 𑀦 𑀅𑀤𑁆𑀤𑀲. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀩𑀼𑀤𑁆𑀥𑀪𑀽𑀢𑀲𑁆𑀲 𑀫𑀦𑀼𑀲𑁆𑀲𑀪𑀽𑀢𑁄 𑀫𑀸𑀡𑀯𑁄 𑀦 𑀧𑀲𑁆𑀲𑁂𑀬𑁆𑀬, 𑀬𑀲𑁆𑀲 𑀩𑁄𑀥𑀺𑀲𑀢𑁆𑀢𑀪𑀽𑀢𑀲𑁆𑀲 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑀪𑀽𑀫𑀺𑀬𑀁 𑀅𑀫𑀦𑀼𑀲𑁆𑀲𑀪𑀽𑀢𑁄 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑀕𑁂𑀳𑀲𑁆𑀲𑀺𑀢𑀯𑀺𑀢𑀓𑁆𑀓𑀫𑀢𑁆𑀢𑀫𑁆𑀧𑀺 𑀅𑀤𑀺𑀲𑁆𑀯𑀸 𑀩𑀼𑀤𑁆𑀥𑀪𑀽𑀢𑀁 𑀏𑀓𑀲𑀁𑀯𑀘𑁆𑀙𑀭𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀧𑀲𑁆𑀲𑀦𑁆𑀢𑁄 𑁋

‘‘𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁, 𑀅𑀦𑀼𑀩𑀦𑁆𑀥𑀺𑀁 𑀧𑀤𑀸𑀧𑀤𑀁;

𑀑𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀺𑀲𑁆𑀲𑀁, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑀻𑀫𑀢𑁄’’𑀢𑀺. (𑀲𑀼. 𑀦𑀺. 𑁪𑁪𑁮) 𑁋

𑀆𑀤𑀺𑀕𑀸𑀣𑀸𑀬𑁄 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀢𑁄 𑀫𑀸𑀡𑀯𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀢𑁆𑀢 𑀫𑀸𑀲𑁂 𑀅𑀦𑀼𑀩𑀦𑁆𑀥𑀫𑀸𑀦𑁄 𑀓𑀺𑀜𑁆𑀘𑀺 𑀯𑀚𑁆𑀚𑀁 𑀦 𑀧𑀲𑁆𑀲𑀸𑀫𑀺. 𑀲𑀘𑁂 𑀧𑀦𑀸𑀳𑀁 𑀅𑀜𑁆𑀜𑁂𑀧𑀺 𑀲𑀢𑁆𑀢 𑀫𑀸𑀲𑁂 𑀲𑀢𑁆𑀢 𑀯𑀸 𑀯𑀲𑁆𑀲𑀸𑀦𑀺 𑀯𑀲𑁆𑀲𑀲𑀢𑀁 𑀯𑀸 𑀯𑀲𑁆𑀲𑀲𑀳𑀲𑁆𑀲𑀁 𑀯𑀸 𑀅𑀦𑀼𑀩𑀦𑁆𑀥𑁂𑀬𑁆𑀬𑀁, 𑀦𑁂𑀯𑀲𑁆𑀲 𑀯𑀚𑁆𑀚𑀁 𑀧𑀲𑁆𑀲𑁂𑀬𑁆𑀬𑀁. 𑀆𑀘𑀭𑀺𑀬𑁄 𑀔𑁄 𑀧𑀦𑀲𑁆𑀲 𑀫𑁂 𑀫𑀳𑀮𑁆𑀮𑀓𑁄, 𑀬𑁄𑀕𑀓𑁆𑀔𑁂𑀫𑀁 𑀦𑀸𑀫 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁. 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀪𑀸𑀯𑀕𑀼𑀡𑁂𑀦𑁂𑀯 𑀩𑀼𑀤𑁆𑀥𑀪𑀸𑀯𑀁 𑀯𑀢𑁆𑀯𑀸 𑀫𑀬𑁆𑀳𑀁 𑀆𑀘𑀭𑀺𑀬𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀪𑀕𑀯𑀦𑁆𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺.

𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀜𑁆𑀘 𑀧𑀦 𑀕𑀦𑁆𑀢𑁆𑀯𑀸 𑁋 ‘‘𑀓𑀘𑁆𑀘𑀺, 𑀢𑀸𑀢 𑀉𑀢𑁆𑀢𑀭, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀢𑀣𑀸𑀲𑀦𑁆𑀢𑀁𑀬𑁂𑀯 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁄, ‘‘𑀆𑀘𑀭𑀺𑀬, 𑀓𑀺𑀁 𑀯𑀤𑁂𑀲𑀺? 𑀘𑀓𑁆𑀓𑀯𑀸𑀴𑀁 𑀅𑀢𑀺𑀲𑀫𑁆𑀩𑀸𑀥𑀁, 𑀪𑀯𑀕𑁆𑀕𑀁 𑀅𑀢𑀺𑀦𑀻𑀘𑀁, 𑀢𑀲𑁆𑀲 𑀳𑀺, 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀆𑀓𑀸𑀲𑀁 𑀯𑀺𑀬 𑀅𑀧𑀭𑀺𑀬𑀦𑁆𑀢𑁄 𑀕𑀼𑀡𑀕𑀡𑁄. 𑀢𑀣𑀸𑀲𑀦𑁆𑀢𑀁𑀬𑁂𑀯, 𑀪𑁄, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀬𑀣𑀸𑀤𑀺𑀝𑁆𑀞𑀸𑀦𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀆𑀘𑀺𑀓𑁆𑀔𑀺𑀢𑁆𑀯𑀸 𑀓𑀺𑀭𑀺𑀬𑀲𑀫𑀸𑀘𑀸𑀭𑀁 𑀆𑀘𑀺𑀓𑁆𑀔𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀉𑀢𑁆𑀢𑀭𑁄 𑀫𑀸𑀡𑀯𑁄…𑀧𑁂… 𑀏𑀤𑀺𑀲𑁄 𑀘 𑀏𑀤𑀺𑀲𑁄 𑀘 𑀪𑀯𑀁 𑀕𑁄𑀢𑀫𑁄 𑀢𑀢𑁄 𑀘 𑀪𑀺𑀬𑁆𑀬𑁄’’𑀢𑀺.

𑁩𑁮𑁬. 𑀢𑀢𑁆𑀣 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄𑀢𑀺 𑀬𑀣𑀸 𑀳𑀺 𑀅𑀜𑁆𑀜𑁂𑀲𑀁 𑀪𑀽𑀫𑀺𑀬𑀁 𑀧𑀸𑀤𑀁 𑀞𑀧𑁂𑀦𑁆𑀢𑀸𑀦𑀁 𑀅𑀕𑁆𑀕𑀢𑀮𑀁 𑀯𑀸 𑀧𑀡𑁆𑀳𑀺 𑀯𑀸 𑀧𑀲𑁆𑀲𑀁 𑀯𑀸 𑀧𑀞𑀫𑀁 𑀨𑀼𑀲𑀢𑀺, 𑀯𑁂𑀫𑀚𑁆𑀛𑀁 𑀯𑀸 𑀧𑀦 𑀙𑀺𑀤𑁆𑀤𑀁 𑀳𑁄𑀢𑀺, 𑀉𑀓𑁆𑀔𑀺𑀧𑀦𑁆𑀢𑀸𑀦𑀫𑁆𑀧𑀺 𑀅𑀕𑁆𑀕𑀢𑀮𑀸𑀤𑀻𑀲𑀼 𑀏𑀓𑀓𑁄𑀝𑁆𑀞𑀸𑀲𑁄𑀯 𑀧𑀞𑀫𑀁 𑀉𑀝𑁆𑀞𑀳𑀢𑀺, 𑀦 𑀏𑀯𑀁 𑀢𑀲𑁆𑀲. 𑀢𑀲𑁆𑀲 𑀧𑀦 𑀲𑀼𑀯𑀡𑁆𑀡𑀧𑀸𑀤𑀼𑀓𑀢𑀮𑀁 𑀯𑀺𑀬 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀓𑀮𑀁 𑀧𑀸𑀤𑀢𑀮𑀁 𑀪𑀽𑀫𑀺𑀁 𑀨𑀼𑀲𑀢𑀺, 𑀪𑀽𑀫𑀺𑀢𑁄 𑀉𑀝𑁆𑀞𑀳𑀢𑀺. 𑀢𑀲𑁆𑀫𑀸 ‘‘𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑀔𑁄 𑀧𑀦 𑀲𑁄 𑀪𑀯𑀁 𑀕𑁄𑀢𑀫𑁄’’𑀢𑀺 𑀯𑀤𑀢𑀺.

𑀢𑀢𑁆𑀭𑀺𑀤𑀁 𑀪𑀕𑀯𑀢𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀬 𑁋 𑀲𑀘𑁂𑀧𑀺 𑀳𑀺 𑀪𑀕𑀯𑀸 𑀅𑀦𑁂𑀓𑀲𑀢𑀧𑁄𑀭𑀺𑀲𑀁 𑀦𑀭𑀓𑀁 𑀅𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀧𑀸𑀤𑀁 𑀦𑀻𑀳𑀭𑀢𑀺, 𑀢𑀸𑀯𑀤𑁂𑀯 𑀦𑀺𑀦𑁆𑀦𑀝𑁆𑀞𑀸𑀦𑀁 𑀯𑀸𑀢𑀧𑀽𑀭𑀺𑀢𑀁 𑀯𑀺𑀬 𑀓𑀫𑁆𑀫𑀸𑀭𑀪𑀲𑁆𑀢𑀁 𑀉𑀦𑁆𑀦𑀫𑀺𑀢𑁆𑀯𑀸 𑀧𑀣𑀯𑀻𑀲𑀫𑀁 𑀳𑁄𑀢𑀺, 𑀉𑀦𑁆𑀦𑀢𑀝𑁆𑀞𑀸𑀦𑀫𑁆𑀧𑀺 𑀅𑀦𑁆𑀢𑁄 𑀧𑀯𑀺𑀲𑀢𑀺. 𑀤𑀽𑀭𑁂 𑀅𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀅𑀪𑀺𑀦𑀻𑀳𑀭𑀦𑁆𑀢𑀲𑁆𑀲 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑁄𑀧𑀺 𑀧𑀩𑁆𑀩𑀢𑁄 𑀲𑁂𑀤𑀺𑀢𑀯𑁂𑀢𑁆𑀢𑀗𑁆𑀓𑀼𑀭𑁄 𑀯𑀺𑀬 𑀦𑀫𑀺𑀢𑁆𑀯𑀸 𑀧𑀸𑀤𑀲𑀫𑀻𑀧𑀁 𑀆𑀕𑀘𑁆𑀙𑀢𑀺. 𑀢𑀣𑀸 𑀳𑀺𑀲𑁆𑀲 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀁 𑀅𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀧𑀸𑀤𑁂 𑀅𑀪𑀺𑀦𑀻𑀳𑀭𑀢𑁄 𑀧𑀩𑁆𑀩𑀢𑁄 𑀦𑀫𑀺𑀢𑁆𑀯𑀸 𑀧𑀸𑀤𑀲𑀫𑀻𑀧𑀁 𑀆𑀕𑀢𑁄, 𑀲𑁄 𑀢𑀁 𑀅𑀓𑁆𑀓𑀫𑀺𑀢𑁆𑀯𑀸 𑀤𑀼𑀢𑀺𑀬𑀧𑀸𑀤𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑀁 𑀅𑀓𑁆𑀓𑀫𑀺. 𑀦 𑀳𑀺 𑀘𑀓𑁆𑀓𑀮𑀓𑁆𑀔𑀡𑁂𑀦 𑀧𑀢𑀺𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦𑀁 𑀯𑀺𑀲𑀫𑀁 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀔𑀸𑀡𑀼 𑀯𑀸 𑀓𑀡𑁆𑀟𑀓𑁄 𑀯𑀸 𑀲𑀓𑁆𑀔𑀭𑀓𑀣𑀮𑀸 𑀯𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀯𑀸 𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀻𑀦𑀺 𑀯𑀸 𑀧𑀼𑀭𑀺𑀫𑀢𑀭𑀸𑀯 𑀅𑀧𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀘 𑀧𑀣𑀯𑀺𑀁 𑀧𑀯𑀺𑀲𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀳𑀺 𑀲𑀻𑀮𑀢𑁂𑀚𑁂𑀦 𑀧𑀜𑁆𑀜𑀸𑀢𑁂𑀚𑁂𑀦 𑀥𑀫𑁆𑀫𑀢𑁂𑀚𑁂𑀦 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀆𑀦𑀼𑀪𑀸𑀯𑁂𑀦 𑀅𑀬𑀁 𑀫𑀳𑀸𑀧𑀣𑀯𑀻 𑀲𑀫𑀸 𑀫𑀼𑀤𑀼 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀸 𑀳𑁄𑀢𑀺. 𑀢𑀢𑁆𑀭 𑀢𑀣𑀸𑀕𑀢𑁄 𑀲𑀫𑀁 𑀧𑀸𑀤𑀁 𑀦𑀺𑀓𑁆𑀔𑀺𑀧𑀢𑀺, 𑀲𑀫𑀁 𑀉𑀤𑁆𑀥𑀭𑀢𑀺, 𑀲𑀩𑁆𑀩𑀸𑀯𑀦𑁆𑀢𑁂𑀳𑀺 𑀧𑀸𑀤𑀢𑀮𑁂𑀳𑀺 𑀪𑀽𑀫𑀺𑀁 𑀨𑀼𑀲𑀢𑀺.

𑀘𑀓𑁆𑀓𑀸𑀦𑀻𑀢𑀺 𑀤𑁆𑀯𑀻𑀲𑀼 𑀧𑀸𑀤𑁂𑀲𑀼 𑀤𑁆𑀯𑁂 𑀘𑀓𑁆𑀓𑀸𑀦𑀺. 𑀢𑁂𑀲𑀁 𑀅𑀭𑀸 𑀘 𑀦𑁂𑀫𑀺 𑀘 𑀦𑀸𑀪𑀺 𑀘 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀯. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀻𑀢𑀺 𑀇𑀫𑀺𑀦𑀸 𑀧𑀦 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀢𑁂𑀲𑀁 𑀓𑀺𑀭 𑀘𑀓𑁆𑀓𑀸𑀦𑀁 𑀧𑀸𑀤𑀢𑀮𑀲𑁆𑀲 𑀫𑀚𑁆𑀛𑁂 𑀦𑀸𑀪𑀺 𑀤𑀺𑀲𑁆𑀲𑀢𑀺, 𑀦𑀸𑀪𑀺𑀧𑀭𑀺𑀘𑁆𑀙𑀺𑀦𑁆𑀦𑀸 𑀯𑀝𑁆𑀝𑀮𑁂𑀔𑀸 𑀤𑀺𑀲𑁆𑀲𑀢𑀺, 𑀦𑀸𑀪𑀺𑀫𑀼𑀔𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁄 𑀤𑀺𑀲𑁆𑀲𑀢𑀺, 𑀧𑀦𑀸𑀴𑀺𑀫𑀼𑀔𑀁 𑀤𑀺𑀲𑁆𑀲𑀢𑀺, 𑀅𑀭𑀸 𑀤𑀺𑀲𑁆𑀲𑀦𑁆𑀢𑀺, 𑀅𑀭𑁂𑀲𑀼 𑀯𑀝𑁆𑀝𑀮𑁂𑀔𑀸 𑀤𑀺𑀲𑁆𑀲𑀦𑁆𑀢𑀺, 𑀦𑁂𑀫𑀻 𑀤𑀺𑀲𑁆𑀲𑀦𑁆𑀢𑀺, 𑀦𑁂𑀫𑀺𑀫𑀡𑀺𑀓𑀸 𑀤𑀺𑀲𑁆𑀲𑀦𑁆𑀢𑀺. 𑀇𑀤𑀁 𑀢𑀸𑀯 𑀧𑀸𑀴𑀺𑀆𑀕𑀢𑀫𑁂𑀯.

𑀲𑀫𑁆𑀩𑀳𑀼𑀮𑀯𑀸𑀭𑁄 𑀧𑀦 𑀅𑀦𑀸𑀕𑀢𑁄, 𑀲𑁄 𑀏𑀯𑀁 𑀤𑀝𑁆𑀞𑀩𑁆𑀩𑁄 𑁋 𑀲𑀢𑁆𑀢𑀺 𑀲𑀺𑀭𑀺 𑀯𑀘𑁆𑀙𑁄 𑀦𑀦𑁆𑀤𑀺 𑀲𑁄𑀯𑀢𑁆𑀢𑀺𑀓𑁄 𑀯𑀝𑀁𑀲𑀓𑁄 𑀯𑀟𑁆𑀠𑀫𑀸𑀦𑀓𑀁 𑀫𑀘𑁆𑀙𑀬𑀼𑀕𑀮𑀁 𑀪𑀤𑁆𑀤𑀧𑀻𑀞𑀁 𑀅𑀗𑁆𑀓𑀼𑀲𑀁 𑀢𑁄𑀫𑀭𑁄 𑀧𑀸𑀲𑀸𑀤𑁄 𑀢𑁄𑀭𑀡𑀁 𑀲𑁂𑀢𑀘𑁆𑀙𑀢𑁆𑀢𑀁 𑀔𑀕𑁆𑀕𑁄 𑀢𑀸𑀮𑀯𑀡𑁆𑀝𑀁 𑀫𑁄𑀭𑀳𑀢𑁆𑀣𑀓𑁄 𑀯𑀸𑀴𑀩𑀻𑀚𑀦𑀻 𑀉𑀡𑁆𑀳𑀻𑀲𑀁 𑀧𑀢𑁆𑀢𑁄 𑀫𑀡𑀺 𑀓𑀼𑀲𑀼𑀫𑀤𑀸𑀫𑀁 𑀦𑀻𑀮𑀼𑀧𑁆𑀧𑀮𑀁 𑀭𑀢𑁆𑀢𑀼𑀧𑁆𑀧𑀮𑀁 𑀲𑁂𑀢𑀼𑀧𑁆𑀧𑀮𑀁 𑀧𑀤𑀼𑀫𑀁 𑀧𑀼𑀡𑁆𑀟𑀭𑀻𑀓𑀁 𑀧𑀼𑀡𑁆𑀡𑀖𑀝𑁄 𑀧𑀼𑀡𑁆𑀡𑀧𑀸𑀢𑀺 𑀲𑀫𑀼𑀤𑁆𑀤𑁄 𑀘𑀓𑁆𑀓𑀯𑀸𑀴𑁄 𑀳𑀺𑀫𑀯𑀸 𑀲𑀺𑀦𑁂𑀭𑀼 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀦𑀓𑁆𑀔𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑁄 𑀫𑀳𑀸𑀤𑀻𑀧𑀸 𑀤𑁆𑀯𑁂𑀧𑀭𑀺𑀢𑁆𑀢𑀤𑀻𑀧𑀲𑀳𑀲𑁆𑀲𑀸𑀦𑀺, 𑀅𑀦𑁆𑀢𑀫𑀲𑁄 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀧𑀭𑀺𑀲𑀁 𑀉𑀧𑀸𑀤𑀸𑀬 𑀲𑀩𑁆𑀩𑁄 𑀘𑀓𑁆𑀓𑀮𑀓𑁆𑀔𑀡𑀲𑁆𑀲𑁂𑀯 𑀧𑀭𑀺𑀯𑀸𑀭𑁄.

𑀆𑀬𑀢𑀧𑀡𑁆𑀳𑀻𑀢𑀺 𑀤𑀻𑀖𑀧𑀡𑁆𑀳𑀺, 𑀧𑀭𑀺𑀧𑀼𑀡𑁆𑀡𑀧𑀡𑁆𑀳𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀅𑀜𑁆𑀜𑁂𑀲𑀁 𑀅𑀕𑁆𑀕𑀧𑀸𑀤𑁄 𑀤𑀻𑀖𑁄 𑀳𑁄𑀢𑀺, 𑀧𑀡𑁆𑀳𑀺𑀫𑀢𑁆𑀣𑀓𑁂 𑀚𑀗𑁆𑀖𑀸 𑀧𑀢𑀺𑀝𑁆𑀞𑀸𑀢𑀺, 𑀧𑀡𑁆𑀳𑀺 𑀢𑀘𑁆𑀙𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀳𑁄𑀢𑀺, 𑀦 𑀏𑀯𑀁 𑀢𑀣𑀸𑀕𑀢𑀲𑁆𑀲. 𑀢𑀣𑀸𑀕𑀢𑀲𑁆𑀲 𑀧𑀦 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀅𑀕𑁆𑀕𑀧𑀸𑀤𑁄 𑀳𑁄𑀢𑀺, 𑀢𑀢𑀺𑀬𑁂 𑀓𑁄𑀝𑁆𑀞𑀸𑀲𑁂 𑀚𑀗𑁆𑀖𑀸 𑀧𑀢𑀺𑀝𑁆𑀞𑀸𑀢𑀺, 𑀘𑀢𑀼𑀢𑁆𑀣𑁂 𑀓𑁄𑀝𑁆𑀞𑀸𑀲𑁂 𑀆𑀭𑀕𑁆𑀕𑁂𑀦 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀭𑀢𑁆𑀢𑀓𑀫𑁆𑀩𑀮𑁂 𑀕𑁂𑀡𑁆𑀟𑀼𑀓𑀲𑀤𑀺𑀲𑀸 𑀧𑀡𑁆𑀳𑀺 𑀳𑁄𑀢𑀺.

𑀤𑀻𑀖𑀗𑁆𑀕𑀼𑀮𑀻𑀢𑀺 𑀬𑀣𑀸 𑀅𑀜𑁆𑀜𑁂𑀲𑀁 𑀓𑀸𑀘𑀺 𑀅𑀗𑁆𑀕𑀼𑀮𑀺 𑀤𑀻𑀖𑀸 𑀳𑁄𑀢𑀺, 𑀓𑀸𑀘𑀺 𑀭𑀲𑁆𑀲𑀸, 𑀦 𑀏𑀯𑀁 𑀢𑀣𑀸𑀕𑀢𑀲𑁆𑀲. 𑀢𑀣𑀸𑀕𑀢𑀲𑁆𑀲 𑀧𑀦 𑀫𑀓𑁆𑀓𑀝𑀲𑁆𑀲𑁂𑀯 𑀤𑀻𑀖𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀺𑀬𑁄 𑀫𑀽𑀮𑁂 𑀣𑀽𑀮𑀸 𑀅𑀦𑀼𑀧𑀼𑀩𑁆𑀩𑁂𑀦 𑀕𑀦𑁆𑀢𑁆𑀯𑀸 𑀅𑀕𑁆𑀕𑁂 𑀢𑀦𑀼𑀓𑀸 𑀦𑀺𑀬𑁆𑀬𑀸𑀲𑀢𑁂𑀮𑁂𑀦 𑀫𑀤𑁆𑀤𑀺𑀢𑁆𑀯𑀸 𑀯𑀝𑁆𑀝𑀺𑀢𑀳𑀭𑀺𑀢𑀸𑀮𑀯𑀝𑁆𑀝𑀺𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀻𑀖𑀗𑁆𑀕𑀼𑀮𑀻’’𑀢𑀺.

𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑁄𑀢𑀺 𑀲𑀧𑁆𑀧𑀺𑀫𑀡𑁆𑀟𑁂 𑀑𑀲𑀸𑀤𑁂𑀢𑁆𑀯𑀸 𑀞𑀧𑀺𑀢𑀁 𑀲𑀢𑀯𑀸𑀭𑀯𑀺𑀳𑀢𑀓𑀧𑁆𑀧𑀸𑀲𑀧𑀝𑀮𑀁 𑀯𑀺𑀬 𑀫𑀼𑀤𑀽, 𑀚𑀸𑀢𑀫𑀢𑁆𑀢𑀓𑀼𑀫𑀸𑀭𑀲𑁆𑀲 𑀯𑀺𑀬 𑀘 𑀦𑀺𑀘𑁆𑀘𑀓𑀸𑀮𑀁 𑀢𑀮𑀼𑀦𑀸 𑀘 𑀳𑀢𑁆𑀣𑀧𑀸𑀤𑀸 𑀅𑀲𑁆𑀲𑀸𑀢𑀺 𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑁄.

𑀚𑀸𑀮𑀳𑀢𑁆𑀣𑀧𑀸𑀤𑁄𑀢𑀺 𑀦 𑀘𑀫𑁆𑀫𑁂𑀦 𑀧𑀝𑀺𑀩𑀤𑁆𑀥𑀅𑀗𑁆𑀕𑀼𑀮𑀦𑁆𑀢𑀭𑁄. 𑀏𑀤𑀺𑀲𑁄 𑀳𑀺 𑀨𑀡𑀳𑀢𑁆𑀣𑀓𑁄 𑀧𑀼𑀭𑀺𑀲𑀤𑁄𑀲𑁂𑀦 𑀉𑀧𑀳𑀢𑁄 𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀮𑀪𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀘𑀢𑀲𑁆𑀲𑁄 𑀳𑀢𑁆𑀣𑀗𑁆𑀕𑀼𑀮𑀺𑀬𑁄 𑀧𑀜𑁆𑀘𑀧𑀺 𑀧𑀸𑀤𑀗𑁆𑀕𑀼𑀮𑀺𑀬𑁄 𑀏𑀓𑀧𑁆𑀧𑀫𑀸𑀡𑀸 𑀳𑁄𑀦𑁆𑀢𑀺, 𑀢𑀸𑀲𑀁 𑀏𑀓𑀧𑁆𑀧𑀫𑀸𑀡𑀢𑁆𑀢𑀸𑀬 𑀬𑀯𑀮𑀓𑁆𑀔𑀡𑀁 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀣𑀲𑁆𑀲 𑀳𑀢𑁆𑀣𑀧𑀸𑀤𑀸 𑀓𑀼𑀲𑀮𑁂𑀦 𑀯𑀟𑁆𑀠𑀓𑀺𑀦𑀸 𑀬𑁄𑀚𑀺𑀢𑀚𑀸𑀮𑀯𑀸𑀢𑀧𑀸𑀦𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀚𑀸𑀮𑀳𑀢𑁆𑀣𑀧𑀸𑀤𑁄’’𑀢𑀺.

𑀉𑀤𑁆𑀥𑀁 𑀧𑀢𑀺𑀝𑁆𑀞𑀺𑀢𑀕𑁄𑀧𑁆𑀨𑀓𑀢𑁆𑀢𑀸 𑀉𑀲𑁆𑀲𑀗𑁆𑀔𑀸 𑀧𑀸𑀤𑀸 𑀅𑀲𑁆𑀲𑀸𑀢𑀺 𑀉𑀲𑁆𑀲𑀗𑁆𑀔𑀧𑀸𑀤𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀧𑀺𑀝𑁆𑀞𑀺𑀧𑀸𑀤𑁂 𑀕𑁄𑀧𑁆𑀨𑀓𑀸 𑀳𑁄𑀦𑁆𑀢𑀺. 𑀢𑁂𑀦 𑀢𑁂𑀲𑀁 𑀧𑀸𑀤𑀸 𑀆𑀡𑀺𑀩𑀤𑁆𑀥𑀸 𑀯𑀺𑀬 𑀣𑀤𑁆𑀥𑀸 𑀳𑁄𑀦𑁆𑀢𑀺, 𑀦 𑀬𑀣𑀸𑀲𑀼𑀔𑀁 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀕𑀘𑁆𑀙𑀦𑁆𑀢𑀸𑀦𑀁 𑀧𑀸𑀤𑀢𑀮𑀸𑀦𑀺 𑀦 𑀤𑀺𑀲𑁆𑀲𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀧𑀭𑀺 𑀕𑁄𑀧𑁆𑀨𑀓𑀸 𑀧𑀢𑀺𑀝𑁆𑀞𑀳𑀦𑁆𑀢𑀺. 𑀢𑁂𑀦𑀲𑁆𑀲 𑀦𑀸𑀪𑀺𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺𑀫𑀓𑀸𑀬𑁄 𑀦𑀸𑀯𑀸𑀬 𑀞𑀧𑀺𑀢𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀦𑀺𑀘𑁆𑀘𑀮𑁄 𑀳𑁄𑀢𑀺, 𑀅𑀥𑁄𑀓𑀸𑀬𑁄𑀯 𑀇𑀜𑁆𑀚𑀢𑀺. 𑀲𑀼𑀔𑁂𑀦 𑀧𑀸𑀤𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀧𑀼𑀭𑀢𑁄𑀧𑀺 𑀧𑀘𑁆𑀙𑀢𑁄𑀧𑀺 𑀉𑀪𑀬𑀧𑀲𑁆𑀲𑁂𑀲𑀼𑀧𑀺 𑀞𑀢𑁆𑀯𑀸 𑀧𑀲𑁆𑀲𑀦𑁆𑀢𑀸𑀦𑀁 𑀧𑀸𑀤𑀢𑀮𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀳𑀢𑁆𑀣𑀻𑀦𑀁 𑀯𑀺𑀬 𑀧𑀘𑁆𑀙𑀢𑁄𑀬𑁂𑀯.

𑀏𑀡𑀺𑀚𑀗𑁆𑀖𑁄𑀢𑀺 𑀏𑀡𑀺𑀫𑀺𑀕𑀲𑀤𑀺𑀲𑀚𑀗𑁆𑀖𑁄 𑀫𑀁𑀲𑀼𑀲𑁆𑀲𑀤𑁂𑀦 𑀧𑀭𑀺𑀧𑀼𑀡𑁆𑀡𑀚𑀗𑁆𑀖𑁄, 𑀦 𑀏𑀓𑀢𑁄 𑀩𑀤𑁆𑀥𑀧𑀺𑀡𑁆𑀟𑀺𑀓𑀫𑀁𑀲𑁄, 𑀲𑀫𑀦𑁆𑀢𑀢𑁄 𑀲𑀫𑀲𑀡𑁆𑀞𑀺𑀢𑁂𑀦 𑀫𑀁𑀲𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀸𑀳𑀺 𑀲𑀼𑀯𑀝𑁆𑀝𑀺𑀢𑀸𑀳𑀺 𑀲𑀸𑀮𑀺𑀕𑀩𑁆𑀪𑀲𑀤𑀺𑀲𑀸𑀳𑀺 𑀚𑀗𑁆𑀖𑀸𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄.

𑀅𑀦𑁄𑀦𑀫𑀦𑁆𑀢𑁄𑀢𑀺 𑀅𑀦𑀫𑀦𑁆𑀢𑁄. 𑀏𑀢𑁂𑀦𑀲𑁆𑀲 𑀅𑀔𑀼𑀚𑁆𑀚𑀅𑀯𑀸𑀫𑀦𑀪𑀸𑀯𑁄 𑀤𑀻𑀧𑀺𑀢𑁄. 𑀅𑀯𑀲𑁂𑀲𑀚𑀦𑀸 𑀳𑀺 𑀔𑀼𑀚𑁆𑀚𑀸 𑀯𑀸 𑀳𑁄𑀦𑁆𑀢𑀺 𑀯𑀸𑀫𑀦𑀸 𑀯𑀸, 𑀔𑀼𑀚𑁆𑀚𑀸𑀦𑀁 𑀉𑀧𑀭𑀺𑀫𑀓𑀸𑀬𑁄 𑀅𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺, 𑀯𑀸𑀫𑀦𑀸𑀦𑀁 𑀳𑁂𑀝𑁆𑀞𑀺𑀫𑀓𑀸𑀬𑁄. 𑀢𑁂 𑀅𑀧𑀭𑀺𑀧𑀼𑀡𑁆𑀡𑀓𑀸𑀬𑀢𑁆𑀢𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀦𑁄𑀦𑀫𑀦𑁆𑀢𑀸 𑀚𑀡𑁆𑀡𑀼𑀓𑀸𑀦𑀺 𑀧𑀭𑀺𑀫𑀚𑁆𑀚𑀺𑀢𑀼𑀁. 𑀢𑀣𑀸𑀕𑀢𑁄 𑀧𑀦 𑀧𑀭𑀺𑀧𑀼𑀡𑁆𑀡𑀉𑀪𑀬𑀓𑀸𑀬𑀢𑁆𑀢𑀸 𑀲𑀓𑁆𑀓𑁄𑀢𑀺.

𑀉𑀲𑀪𑀯𑀸𑀭𑀡𑀸𑀤𑀻𑀦𑀁 𑀯𑀺𑀬 𑀲𑀼𑀯𑀡𑁆𑀡𑀧𑀤𑀼𑀫𑀓𑀡𑁆𑀡𑀺𑀓𑀲𑀤𑀺𑀲𑁂 𑀓𑁄𑀲𑁂 𑀑𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀯𑀢𑁆𑀣𑀕𑀼𑀬𑁆𑀳𑀁 𑀅𑀲𑁆𑀲𑀸𑀢𑀺 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁄. 𑀯𑀢𑁆𑀣𑀕𑀼𑀬𑁆𑀳𑀦𑁆𑀢𑀺 𑀯𑀢𑁆𑀣𑁂𑀦 𑀕𑀽𑀳𑀺𑀢𑀩𑁆𑀩𑀁 𑀅𑀗𑁆𑀕𑀚𑀸𑀢𑀁 𑀯𑀼𑀘𑁆𑀘𑀢𑀺.

𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀫𑀚𑁆𑀚𑀺𑀢𑁆𑀯𑀸 𑀤𑀻𑀧𑀺𑀤𑀸𑀞𑀸𑀬 𑀖𑀁𑀲𑀺𑀢𑁆𑀯𑀸 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀞𑀧𑀺𑀢𑀖𑀦𑀲𑀼𑀯𑀡𑁆𑀡𑀭𑀽𑀧𑀓𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦𑀲𑁆𑀲 𑀖𑀦𑀲𑀺𑀦𑀺𑀤𑁆𑀥𑀲𑀡𑁆𑀳𑀲𑀭𑀻𑀭𑀢𑀁 𑀤𑀲𑁆𑀲𑁂𑀢𑁆𑀯𑀸 𑀙𑀯𑀺𑀯𑀡𑁆𑀡𑀤𑀲𑁆𑀲𑀦𑀢𑁆𑀣𑀁 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄𑀢𑀺 𑀯𑀼𑀢𑁆𑀢𑀁, 𑀧𑀼𑀭𑀺𑀫𑀲𑁆𑀲 𑀯𑀸 𑀯𑁂𑀯𑀘𑀦𑀫𑁂𑀯 𑀏𑀢𑀁.

𑀭𑀚𑁄𑀚𑀮𑁆𑀮𑀦𑁆𑀢𑀺 𑀭𑀚𑁄 𑀯𑀸 𑀫𑀮𑀁 𑀯𑀸. 𑀦 𑀉𑀧𑀮𑀺𑀫𑁆𑀧𑀢𑀻𑀢𑀺 𑀦 𑀮𑀕𑁆𑀕𑀢𑀺, 𑀧𑀤𑀼𑀫𑀧𑀮𑀸𑀲𑀢𑁄 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀯𑀺𑀯𑀝𑁆𑀝𑀢𑀺. 𑀳𑀢𑁆𑀣𑀥𑁄𑀯𑀦𑀧𑀸𑀤𑀥𑁄𑀯𑀦𑀸𑀤𑀻𑀦𑀺 𑀧𑀦 𑀉𑀢𑀼𑀕𑁆𑀕𑀳𑀡𑀢𑁆𑀣𑀸𑀬 𑀘𑁂𑀯 𑀤𑀸𑀬𑀓𑀸𑀦𑀁 𑀧𑀼𑀜𑁆𑀜𑀨𑀮𑀢𑁆𑀣𑀸𑀬 𑀘 𑀩𑀼𑀤𑁆𑀥𑀸 𑀓𑀭𑁄𑀦𑁆𑀢𑀺, 𑀯𑀢𑁆𑀢𑀲𑀻𑀲𑁂𑀦𑀸𑀧𑀺 𑀘 𑀓𑀭𑁄𑀦𑁆𑀢𑀺𑀬𑁂𑀯. 𑀲𑁂𑀦𑀸𑀲𑀦𑀁 𑀧𑀯𑀺𑀲𑀦𑁆𑀢𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀯𑀺𑀲𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀫𑁂𑀢𑀁.

𑀉𑀤𑁆𑀥𑀕𑁆𑀕𑀮𑁄𑀫𑁄𑀢𑀺 𑀆𑀯𑀝𑁆𑀝𑀧𑀭𑀺𑀬𑁄𑀲𑀸𑀦𑁂 𑀉𑀤𑁆𑀥𑀕𑁆𑀕𑀸𑀦𑀺 𑀳𑀼𑀢𑁆𑀯𑀸 𑀫𑀼𑀔𑀲𑁄𑀪𑀁 𑀉𑀮𑁆𑀮𑁄𑀓𑀬𑀫𑀸𑀦𑀸𑀦𑀺 𑀯𑀺𑀬 𑀞𑀺𑀢𑀸𑀦𑀺 𑀮𑁄𑀫𑀸𑀦𑀺 𑀅𑀲𑁆𑀲𑀸𑀢𑀺 𑀉𑀤𑁆𑀥𑀕𑁆𑀕𑀮𑁄𑀫𑁄.

𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄𑀢𑀺 𑀩𑁆𑀭𑀳𑁆𑀫𑀸 𑀯𑀺𑀬 𑀉𑀚𑀼𑀕𑀢𑁆𑀢𑁄, 𑀉𑀚𑀼𑀫𑁂𑀯 𑀉𑀕𑁆𑀕𑀢𑀤𑀻𑀖𑀲𑀭𑀻𑀭𑁄. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀲𑀢𑁆𑀢𑀸 𑀔𑀦𑁆𑀥𑁂 𑀓𑀝𑀺𑀬𑀁 𑀚𑀸𑀡𑀽𑀲𑀽𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀫𑀦𑁆𑀢𑀺. 𑀢𑁂 𑀓𑀝𑀺𑀬𑀁 𑀦𑀫𑀦𑁆𑀢𑀸 𑀧𑀘𑁆𑀙𑀢𑁄 𑀦𑀫𑀦𑁆𑀢𑀺, 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀼𑀭𑀢𑁄. 𑀤𑀻𑀖𑀲𑀭𑀻𑀭𑀸 𑀧𑀦𑁂𑀓𑁂 𑀧𑀲𑁆𑀲𑀯𑀗𑁆𑀓𑀸 𑀳𑁄𑀦𑁆𑀢𑀺, 𑀏𑀓𑁂 𑀫𑀼𑀔𑀁 𑀉𑀦𑁆𑀦𑀸𑀫𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀸𑀦𑀺 𑀕𑀡𑀬𑀦𑁆𑀢𑀸 𑀯𑀺𑀬 𑀘𑀭𑀦𑁆𑀢𑀺, 𑀏𑀓𑁂 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀸 𑀲𑀽𑀮𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀧𑀯𑁂𑀥𑀫𑀸𑀦𑀸 𑀕𑀘𑁆𑀙𑀦𑁆𑀢𑀺. 𑀢𑀣𑀸𑀕𑀢𑁄 𑀧𑀦 𑀉𑀚𑀼𑀫𑁂𑀯 𑀉𑀕𑁆𑀕𑀦𑁆𑀢𑁆𑀯𑀸 𑀤𑀻𑀖𑀧𑁆𑀧𑀫𑀸𑀡𑁄 𑀤𑁂𑀯𑀦𑀕𑀭𑁂 𑀉𑀲𑁆𑀲𑀺𑀢𑀲𑀼𑀯𑀡𑁆𑀡𑀢𑁄𑀭𑀡𑀁 𑀯𑀺𑀬 𑀳𑁄𑀢𑀺.

𑀲𑀢𑁆𑀢𑀼𑀲𑁆𑀲𑀤𑁄𑀢𑀺 𑀤𑁆𑀯𑁂 𑀳𑀢𑁆𑀣𑀧𑀺𑀝𑁆𑀞𑀺𑀬𑁄 𑀤𑁆𑀯𑁂 𑀧𑀸𑀤𑀧𑀺𑀝𑁆𑀞𑀺𑀬𑁄 𑀤𑁆𑀯𑁂 𑀅𑀁𑀲𑀓𑀽𑀝𑀸𑀦𑀺 𑀔𑀦𑁆𑀥𑁄𑀢𑀺 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀭𑀺𑀧𑀼𑀡𑁆𑀡𑀫𑀁𑀲𑀼𑀲𑁆𑀲𑀤𑁄 𑀅𑀲𑁆𑀲𑀸𑀢𑀺 𑀲𑀢𑁆𑀢𑀼𑀲𑁆𑀲𑀤𑁄. 𑀅𑀜𑁆𑀜𑁂𑀲𑀁 𑀧𑀦 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀻𑀲𑀼 𑀦𑁆𑀳𑀸𑀭𑀼𑀚𑀸𑀮𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀅𑀁𑀲𑀓𑀽𑀝𑀔𑀦𑁆𑀥𑁂𑀲𑀼 𑀅𑀝𑁆𑀞𑀺𑀓𑁄𑀝𑀺𑀬𑁄, 𑀢𑁂 𑀫𑀦𑀼𑀲𑁆𑀲𑀧𑁂𑀢𑀸 𑀯𑀺𑀬 𑀔𑀸𑀬𑀦𑁆𑀢𑀺, 𑀦 𑀢𑀣𑀸𑀕𑀢𑁄. 𑀢𑀣𑀸𑀕𑀢𑁄 𑀧𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀭𑀺𑀧𑀼𑀡𑁆𑀡𑀫𑀁𑀲𑀼𑀲𑁆𑀲𑀤𑀢𑁆𑀢𑀸 𑀦𑀺𑀕𑀽𑀴𑁆𑀳𑀦𑁆𑀳𑀸𑀭𑀼𑀚𑀸𑀮𑁂𑀳𑀺 𑀳𑀢𑁆𑀣𑀧𑀺𑀝𑁆𑀞𑀸𑀤𑀻𑀳𑀺 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀲𑀼𑀯𑀡𑁆𑀡𑀯𑀡𑁆𑀡𑀸𑀮𑀺𑀗𑁆𑀕𑀲𑀤𑀺𑀲𑁂𑀦 𑀔𑀦𑁆𑀥𑁂𑀦 𑀲𑀺𑀮𑀸𑀭𑀽𑀧𑀓𑀁 𑀯𑀺𑀬 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀁 𑀯𑀺𑀬 𑀘 𑀔𑀸𑀬𑀢𑀺.

𑀲𑀻𑀳𑀲𑁆𑀲 𑀧𑀼𑀩𑁆𑀩𑀤𑁆𑀥𑀁 𑀯𑀺𑀬 𑀓𑀸𑀬𑁄 𑀅𑀲𑁆𑀲𑀸𑀢𑀺 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄. 𑀲𑀻𑀳𑀲𑁆𑀲 𑀳𑀺 𑀧𑀼𑀭𑀢𑁆𑀣𑀺𑀫𑀓𑀸𑀬𑁄𑀯 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺, 𑀧𑀘𑁆𑀙𑀺𑀫𑀓𑀸𑀬𑁄 𑀅𑀧𑀭𑀺𑀧𑀼𑀡𑁆𑀡𑁄. 𑀢𑀣𑀸𑀕𑀢𑀲𑁆𑀲 𑀧𑀦 𑀲𑀻𑀳𑀲𑁆𑀲 𑀧𑀼𑀩𑁆𑀩𑀤𑁆𑀥𑀓𑀸𑀬𑁄𑀯 𑀲𑀩𑁆𑀩𑁄 𑀓𑀸𑀬𑁄 𑀧𑀭𑀺𑀧𑀼𑀡𑁆𑀡𑁄. 𑀲𑁄𑀧𑀺 𑀲𑀻𑀳𑀲𑁆𑀲𑁂𑀯 𑀦 𑀢𑀢𑁆𑀣 𑀢𑀢𑁆𑀣 𑀯𑀺𑀦𑀢𑀼𑀦𑁆𑀦𑀢𑀸𑀤𑀺𑀯𑀲𑁂𑀦 𑀤𑀼𑀲𑁆𑀲𑀡𑁆𑀞𑀺𑀢𑀯𑀺𑀲𑀡𑁆𑀞𑀺𑀢𑁄, 𑀤𑀻𑀖𑀬𑀼𑀢𑁆𑀢𑀞𑀸𑀦𑁂 𑀧𑀦 𑀤𑀻𑀖𑁄, 𑀭𑀲𑁆𑀲𑀓𑀺𑀲𑀣𑀽𑀮𑀅𑀦𑀼𑀯𑀝𑁆𑀝𑀺𑀢𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀢𑀣𑀸𑀯𑀺𑀥𑁄𑀯 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀫𑀦𑀸𑀧𑀺𑀬𑁂 𑀘 𑀔𑁄, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀯𑀺𑀧𑀸𑀓𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀤𑀻𑀖𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀤𑀻𑀖𑀸𑀦𑀺 𑀲𑀡𑁆𑀞𑀳𑀦𑁆𑀢𑀺. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀭𑀲𑁆𑀲𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀭𑀲𑁆𑀲𑀸𑀦𑀺 𑀲𑀡𑁆𑀞𑀳𑀦𑁆𑀢𑀺. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀣𑀽𑀮𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀣𑀽𑀮𑀸𑀦𑀺 𑀲𑀡𑁆𑀞𑀳𑀦𑁆𑀢𑀺. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀓𑀺𑀲𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀓𑀺𑀲𑀸𑀦𑀺 𑀲𑀡𑁆𑀞𑀳𑀦𑁆𑀢𑀺. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀯𑀝𑁆𑀝𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀯𑀝𑁆𑀝𑀸𑀦𑀺 𑀲𑀡𑁆𑀞𑀳𑀦𑁆𑀢𑀻’’𑀢𑀺.

𑀇𑀢𑀺 𑀦𑀸𑀦𑀸𑀘𑀺𑀢𑁆𑀢𑁂𑀦 𑀧𑀼𑀜𑁆𑀜𑀘𑀺𑀢𑁆𑀢𑁂𑀦 𑀘𑀺𑀢𑁆𑀢𑀺𑀢𑁄 𑀤𑀲𑀳𑀺 𑀧𑀸𑀭𑀫𑀻𑀳𑀺 𑀲𑀚𑁆𑀚𑀺𑀢𑁄 𑀢𑀣𑀸𑀕𑀢𑀲𑁆𑀲 𑀅𑀢𑁆𑀢𑀪𑀸𑀯𑁄, 𑀢𑀲𑁆𑀲 𑀮𑁄𑀓𑁂 𑀲𑀩𑁆𑀩𑀲𑀺𑀧𑁆𑀧𑀺𑀦𑁄 𑀯𑀸 𑀇𑀤𑁆𑀥𑀺𑀫𑀦𑁆𑀢𑁄 𑀯𑀸 𑀧𑀝𑀺𑀭𑀽𑀧𑀓𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺.

𑀘𑀺𑀢𑀦𑁆𑀢𑀭𑀁𑀲𑁄𑀢𑀺 𑀅𑀦𑁆𑀢𑀭𑀁𑀲𑀁 𑀯𑀼𑀘𑁆𑀘𑀢𑀺 𑀤𑁆𑀯𑀺𑀦𑁆𑀦𑀁 𑀓𑁄𑀝𑁆𑀝𑀸𑀦𑀫𑀦𑁆𑀢𑀭𑀁, 𑀢𑀁 𑀘𑀺𑀢𑀁 𑀧𑀭𑀺𑀧𑀼𑀡𑁆𑀡𑀫𑀲𑁆𑀲𑀸𑀢𑀺 𑀘𑀺𑀢𑀦𑁆𑀢𑀭𑀁𑀲𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀢𑀁 𑀞𑀸𑀦𑀁 𑀦𑀺𑀦𑁆𑀦𑀁 𑀳𑁄𑀢𑀺, 𑀤𑁆𑀯𑁂 𑀧𑀺𑀝𑁆𑀞𑀺𑀓𑁄𑀝𑁆𑀝𑀸 𑀧𑀸𑀝𑀺𑀬𑁂𑀓𑁆𑀓𑀁 𑀧𑀜𑁆𑀜𑀸𑀬𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀫𑀁𑀲𑀧𑀝𑀮𑀁 𑀬𑀸𑀯 𑀔𑀦𑁆𑀥𑀸 𑀉𑀕𑁆𑀕𑀫𑁆𑀫 𑀲𑀫𑀼𑀲𑁆𑀲𑀺𑀢𑀲𑀼𑀯𑀡𑁆𑀡𑀨𑀮𑀓𑀁 𑀯𑀺𑀬 𑀧𑀺𑀝𑁆𑀞𑀺𑀁 𑀙𑀸𑀤𑁂𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑀁.

𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄𑀢𑀺 𑀦𑀺𑀕𑁆𑀭𑁄𑀥𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑁄. 𑀬𑀣𑀸 𑀧𑀡𑁆𑀡𑀸𑀲𑀳𑀢𑁆𑀣𑀢𑀸𑀬 𑀯𑀸 𑀲𑀢𑀳𑀢𑁆𑀣𑀢𑀸𑀬 𑀯𑀸 𑀲𑀫𑀓𑁆𑀔𑀦𑁆𑀥𑀲𑀸𑀔𑁄 𑀦𑀺𑀕𑁆𑀭𑁄𑀥𑁄 𑀤𑀻𑀖𑀢𑁄𑀧𑀺 𑀯𑀺𑀢𑁆𑀣𑀸𑀭𑀢𑁄𑀧𑀺 𑀏𑀓𑀧𑁆𑀧𑀫𑀸𑀡𑁄𑀯 𑀳𑁄𑀢𑀺, 𑀏𑀯𑀁 𑀓𑀸𑀬𑀢𑁄𑀧𑀺 𑀩𑁆𑀬𑀸𑀫𑀢𑁄𑀧𑀺 𑀏𑀓𑀧𑁆𑀧𑀫𑀸𑀡𑁄. 𑀬𑀣𑀸 𑀅𑀜𑁆𑀜𑁂𑀲𑀁 𑀓𑀸𑀬𑁄 𑀯𑀸 𑀤𑀻𑀖𑁄 𑀳𑁄𑀢𑀺 𑀩𑁆𑀬𑀸𑀫𑁄 𑀯𑀸, 𑀦 𑀏𑀯𑀁 𑀯𑀺𑀲𑀫𑀧𑁆𑀧𑀫𑀸𑀡𑁄𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 ‘‘𑀬𑀸𑀯𑀢𑀓𑁆𑀯𑀲𑁆𑀲 𑀓𑀸𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀸𑀯𑀢𑀓𑁄 𑀅𑀲𑁆𑀲𑀸𑀢𑀺 𑀬𑀸𑀯𑀢𑀓𑁆𑀯𑀲𑁆𑀲.

𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄𑀢𑀺 𑀲𑀫𑀯𑀝𑁆𑀝𑀺𑀢𑀓𑁆𑀔𑀦𑁆𑀥𑁄. 𑀬𑀣𑀸 𑀏𑀓𑁂 𑀓𑁄𑀜𑁆𑀘𑀸 𑀯𑀺𑀬 𑀩𑀓𑀸 𑀯𑀺𑀬 𑀯𑀭𑀸𑀳𑀸 𑀯𑀺𑀬 𑀘 𑀤𑀻𑀖𑀕𑀮𑀸 𑀯𑀗𑁆𑀓𑀕𑀮𑀸 𑀧𑀼𑀣𑀼𑀮𑀕𑀮𑀸 𑀘 𑀳𑁄𑀦𑁆𑀢𑀺, 𑀓𑀣𑀦𑀓𑀸𑀮𑁂 𑀲𑀺𑀭𑀸𑀚𑀸𑀮𑀁 𑀧𑀜𑁆𑀜𑀸𑀬𑀢𑀺, 𑀫𑀦𑁆𑀤𑁄 𑀲𑀭𑁄 𑀦𑀺𑀓𑁆𑀔𑀫𑀢𑀺, 𑀦 𑀏𑀯𑀁 𑀢𑀲𑁆𑀲. 𑀢𑀣𑀸𑀕𑀢𑀲𑁆𑀲 𑀧𑀦 𑀲𑀼𑀯𑀝𑁆𑀝𑀺𑀢𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑀲𑀤𑀺𑀲𑁄 𑀔𑀦𑁆𑀥𑁄 𑀳𑁄𑀢𑀺, 𑀓𑀣𑀦𑀓𑀸𑀮𑁂 𑀲𑀺𑀭𑀸𑀚𑀸𑀮𑀁 𑀦 𑀧𑀜𑁆𑀜𑀸𑀬𑀢𑀺, 𑀫𑁂𑀖𑀲𑁆𑀲 𑀯𑀺𑀬 𑀕𑀚𑁆𑀚𑀢𑁄 𑀲𑀭𑁄 𑀫𑀳𑀸 𑀳𑁄𑀢𑀺.

𑀭𑀲𑀕𑁆𑀕𑀲𑀕𑁆𑀕𑀻𑀢𑀺 𑀏𑀢𑁆𑀣 𑀭𑀲𑀁 𑀕𑀲𑀦𑁆𑀢𑀻𑀢𑀺 𑀭𑀲𑀕𑁆𑀕𑀲𑀸, 𑀭𑀲𑀳𑀭𑀡𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀸 𑀅𑀕𑁆𑀕𑀸 𑀅𑀲𑁆𑀲𑀸𑀢𑀺 𑀭𑀲𑀕𑁆𑀕𑀲𑀕𑁆𑀕𑀻. 𑀢𑀣𑀸𑀕𑀢𑀲𑁆𑀲 𑀳𑀺 𑀲𑀢𑁆𑀢 𑀭𑀲𑀳𑀭𑀡𑀺𑀲𑀳𑀲𑁆𑀲𑀸𑀦𑀺 𑀉𑀤𑁆𑀥𑀕𑁆𑀕𑀸𑀦𑀺 𑀳𑀼𑀢𑁆𑀯𑀸 𑀕𑀻𑀯𑀸𑀬𑀫𑁂𑀯 𑀧𑀝𑀺𑀫𑀼𑀓𑁆𑀓𑀸𑀦𑀺. 𑀢𑀺𑀮𑀨𑀮𑀫𑀢𑁆𑀢𑁄𑀧𑀺 𑀆𑀳𑀸𑀭𑁄 𑀚𑀺𑀯𑁆𑀳𑀕𑁆𑀕𑁂 𑀞𑀧𑀺𑀢𑁄 𑀲𑀩𑁆𑀩𑀁 𑀓𑀸𑀬𑀁 𑀅𑀦𑀼𑀨𑀭𑀢𑀺, 𑀢𑁂𑀦𑁂𑀯 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑀲𑁆𑀲 𑀏𑀓𑀢𑀡𑁆𑀟𑀼𑀮𑀸𑀤𑀻𑀳𑀺𑀧𑀺 𑀓𑀸𑀴𑀸𑀬𑀬𑀽𑀲𑀧𑀲𑀢𑁂𑀦𑀸𑀧𑀺 𑀓𑀸𑀬𑀲𑁆𑀲 𑀬𑀸𑀧𑀦𑀁 𑀅𑀳𑁄𑀲𑀺. 𑀅𑀜𑁆𑀜𑁂𑀲𑀁 𑀧𑀦 𑀢𑀣𑀸 𑀅𑀪𑀸𑀯𑀸 𑀦 𑀲𑀓𑀮𑀓𑀸𑀬𑀁 𑀑𑀚𑀸 𑀨𑀭𑀢𑀺, 𑀢𑁂𑀦 𑀢𑁂 𑀩𑀳𑁆𑀯𑀸𑀩𑀸𑀥𑀸 𑀳𑁄𑀦𑁆𑀢𑀺. 𑀇𑀤𑀁 𑀮𑀓𑁆𑀔𑀡𑀁 𑀅𑀧𑁆𑀧𑀸𑀩𑀸𑀥𑀢𑀸𑀲𑀗𑁆𑀔𑀸𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀲𑁆𑀲 𑀯𑀲𑁂𑀦 𑀧𑀸𑀓𑀝𑀁 𑀳𑁄𑀢𑀺.

𑀲𑀻𑀳𑀲𑁆𑀲𑁂𑀯 𑀳𑀦𑀼 𑀅𑀲𑁆𑀲𑀸𑀢𑀺 𑀲𑀻𑀳𑀳𑀦𑀼. 𑀢𑀢𑁆𑀣 𑀲𑀻𑀳𑀲𑁆𑀲 𑀳𑁂𑀝𑁆𑀞𑀺𑀫𑀳𑀦𑀼𑀫𑁂𑀯 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀦 𑀉𑀧𑀭𑀺𑀫𑀁. 𑀢𑀣𑀸𑀕𑀢𑀲𑁆𑀲 𑀧𑀦 𑀲𑀻𑀳𑀲𑁆𑀲 𑀳𑁂𑀝𑁆𑀞𑀺𑀫𑀁 𑀯𑀺𑀬 𑀤𑁆𑀯𑁂𑀧𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀤𑁆𑀯𑀸𑀤𑀲𑀺𑀬𑀁 𑀧𑀓𑁆𑀔𑀲𑁆𑀲 𑀘𑀦𑁆𑀤𑀲𑀤𑀺𑀲𑀸𑀦𑀺 𑀳𑁄𑀦𑁆𑀢𑀺.

𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄𑀢𑀺𑀆𑀤𑀻𑀲𑀼 𑀉𑀧𑀭𑀺𑀫𑀳𑀦𑀼𑀓𑁂 𑀧𑀢𑀺𑀝𑁆𑀞𑀺𑀢𑀸 𑀯𑀻𑀲𑀢𑀺, 𑀳𑁂𑀝𑁆𑀞𑀺𑀫𑁂 𑀯𑀻𑀲𑀢𑀻𑀢𑀺 𑀘𑀢𑁆𑀢𑀸𑀮𑀻𑀲 𑀤𑀦𑁆𑀢𑀸 𑀅𑀲𑁆𑀲𑀸𑀢𑀺 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀧𑀭𑀺𑀧𑀼𑀡𑁆𑀡𑀤𑀦𑁆𑀢𑀸𑀦𑀫𑁆𑀧𑀺 𑀤𑁆𑀯𑀢𑁆𑀢𑀺𑀁𑀲 𑀤𑀦𑁆𑀢𑀸 𑀳𑁄𑀦𑁆𑀢𑀺, 𑀢𑀣𑀸𑀕𑀢𑀲𑁆𑀲 𑀘𑀢𑁆𑀢𑀸𑀮𑀻𑀲𑀁.

𑀅𑀜𑁆𑀜𑁂𑀲𑀜𑁆𑀘 𑀓𑁂𑀘𑀺 𑀤𑀦𑁆𑀢𑀸 𑀉𑀘𑁆𑀘𑀸 𑀓𑁂𑀘𑀺 𑀦𑀻𑀘𑀸𑀢𑀺 𑀯𑀺𑀲𑀫𑀸 𑀳𑁄𑀦𑁆𑀢𑀺, 𑀢𑀣𑀸𑀕𑀢𑀲𑁆𑀲 𑀧𑀦 𑀅𑀬𑀧𑀝𑁆𑀝𑀙𑀺𑀦𑁆𑀦𑀲𑀗𑁆𑀔𑀧𑀝𑀮𑀁 𑀯𑀺𑀬 𑀲𑀫𑀸.

𑀅𑀜𑁆𑀜𑁂𑀲𑀁 𑀓𑀼𑀫𑁆𑀪𑀻𑀮𑀸𑀦𑀁 𑀯𑀺𑀬 𑀤𑀦𑁆𑀢𑀸 𑀯𑀺𑀭𑀴𑀸 𑀳𑁄𑀦𑁆𑀢𑀺, 𑀫𑀘𑁆𑀙𑀫𑀁𑀲𑀸𑀤𑀻𑀦𑀺 𑀔𑀸𑀤𑀦𑁆𑀢𑀸𑀦𑀁 𑀤𑀦𑁆𑀢𑀦𑁆𑀢𑀭𑀁 𑀧𑀽𑀭𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀓𑀦𑀓𑀮𑀢𑀸𑀬 𑀲𑀫𑀼𑀲𑁆𑀲𑀸𑀧𑀺𑀢𑀯𑀚𑀺𑀭𑀧𑀦𑁆𑀢𑀺 𑀯𑀺𑀬 𑀅𑀯𑀺𑀭𑀴𑀸 𑀢𑀼𑀮𑀺𑀓𑀸𑀬 𑀤𑀲𑁆𑀲𑀺𑀢𑀧𑀭𑀺𑀘𑁆𑀙𑁂𑀤𑀸 𑀯𑀺𑀬 𑀤𑀦𑁆𑀢𑀸 𑀳𑁄𑀦𑁆𑀢𑀺.

𑀲𑀼𑀲𑀼𑀓𑁆𑀓𑀤𑀸𑀞𑁄𑀢𑀺 𑀅𑀜𑁆𑀜𑁂𑀲𑀜𑁆𑀘 𑀧𑀽𑀢𑀺𑀤𑀦𑁆𑀢𑀸 𑀉𑀝𑁆𑀞𑀳𑀦𑁆𑀢𑀺, 𑀢𑁂𑀦 𑀓𑀸𑀘𑀺 𑀤𑀸𑀞𑀸 𑀓𑀸𑀴𑀸𑀧𑀺 𑀯𑀺𑀯𑀡𑁆𑀡𑀸𑀧𑀺 𑀳𑁄𑀦𑁆𑀢𑀺. 𑀢𑀣𑀸𑀕𑀢𑁄 𑀲𑀼𑀲𑀼𑀓𑁆𑀓𑀤𑀸𑀞𑁄 𑀑𑀲𑀥𑀺𑀢𑀸𑀭𑀓𑀫𑁆𑀧𑀺 𑀅𑀢𑀺𑀓𑁆𑀓𑀫𑁆𑀫 𑀯𑀺𑀭𑁄𑀘𑀫𑀸𑀦𑀸𑀬 𑀧𑀪𑀸𑀬 𑀲𑀫𑀦𑁆𑀦𑀸𑀕𑀢𑀤𑀸𑀞𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀲𑀼𑀓𑁆𑀓𑀤𑀸𑀞𑁄’’𑀢𑀺.

𑀧𑀳𑀽𑀢𑀚𑀺𑀯𑁆𑀳𑁄𑀢𑀺 𑀅𑀜𑁆𑀜𑁂𑀲𑀁 𑀚𑀺𑀯𑁆𑀳𑀸 𑀣𑀽𑀮𑀸𑀧𑀺 𑀳𑁄𑀢𑀺 𑀓𑀺𑀲𑀸𑀧𑀺 𑀭𑀲𑁆𑀲𑀸𑀧𑀺 𑀣𑀤𑁆𑀥𑀸𑀧𑀺 𑀯𑀺𑀲𑀫𑀸𑀧𑀺, 𑀢𑀣𑀸𑀕𑀢𑀲𑁆𑀲 𑀧𑀦 𑀫𑀼𑀤𑀼 𑀤𑀻𑀖𑀸 𑀧𑀼𑀣𑀼𑀮𑀸 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀳𑁄𑀢𑀺. 𑀲𑁄 𑀢𑀁 𑀮𑀓𑁆𑀔𑀡𑀁 𑀧𑀭𑀺𑀬𑁂𑀲𑀺𑀢𑀼𑀁 𑀆𑀕𑀢𑀸𑀦𑀁 𑀓𑀗𑁆𑀔𑀸𑀯𑀺𑀦𑁄𑀤𑀦𑀢𑁆𑀣𑀁 𑀫𑀼𑀤𑀼𑀓𑀢𑁆𑀢𑀸 𑀢𑀁 𑀚𑀺𑀯𑁆𑀳𑀁 𑀓𑀣𑀺𑀦𑀲𑀽𑀘𑀺𑀁 𑀯𑀺𑀬 𑀯𑀝𑁆𑀝𑁂𑀢𑁆𑀯𑀸 𑀉𑀪𑁄 𑀦𑀸𑀲𑀺𑀓𑀲𑁄𑀢𑀸𑀦𑀺 𑀧𑀭𑀸𑀫𑀲𑀢𑀺, 𑀤𑀻𑀖𑀢𑁆𑀢𑀸 𑀉𑀪𑁄 𑀓𑀡𑁆𑀡𑀲𑁄𑀢𑀸𑀦𑀺 𑀧𑀭𑀸𑀫𑀲𑀢𑀺, 𑀧𑀼𑀣𑀼𑀮𑀢𑁆𑀢𑀸 𑀓𑁂𑀲𑀦𑁆𑀢𑀧𑀭𑀺𑀬𑁄𑀲𑀸𑀦𑀁 𑀓𑁂𑀯𑀮𑀫𑁆𑀧𑀺 𑀦𑀮𑀸𑀝𑀁 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀏𑀯𑀁 𑀢𑀲𑁆𑀲𑀸 𑀫𑀼𑀤𑀼𑀤𑀻𑀖𑀧𑀼𑀣𑀼𑀮𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀓𑀗𑁆𑀔𑀁 𑀯𑀺𑀦𑁄𑀤𑁂𑀢𑀺. 𑀏𑀯𑀁 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀚𑀺𑀯𑁆𑀳𑀁 𑀲𑀦𑁆𑀥𑀸𑀬 ‘‘𑀧𑀳𑀽𑀢𑀚𑀺𑀯𑁆𑀳𑁄’’𑀢𑀺 𑀯𑀼𑀢𑁆𑀢𑀁.

𑀩𑁆𑀭𑀳𑁆𑀫𑀲𑁆𑀲𑀭𑁄𑀢𑀺 𑀅𑀜𑁆𑀜𑁂 𑀙𑀺𑀦𑁆𑀦𑀲𑁆𑀲𑀭𑀸𑀧𑀺 𑀪𑀺𑀦𑁆𑀦𑀲𑁆𑀲𑀭𑀸𑀧𑀺 𑀓𑀸𑀓𑀲𑁆𑀲𑀭𑀸𑀧𑀺 𑀳𑁄𑀦𑁆𑀢𑀺, 𑀢𑀣𑀸𑀕𑀢𑁄 𑀧𑀦 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀲𑀭𑀲𑀤𑀺𑀲𑁂𑀦 𑀲𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀳𑀺 𑀧𑀺𑀢𑁆𑀢𑀲𑁂𑀫𑁆𑀳𑁂𑀳𑀺 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀲𑀭𑁄 𑀯𑀺𑀲𑀼𑀤𑁆𑀥𑁄 𑀳𑁄𑀢𑀺. 𑀢𑀣𑀸𑀕𑀢𑁂𑀦𑀸𑀧𑀺 𑀓𑀢𑀓𑀫𑁆𑀫𑀁 𑀯𑀢𑁆𑀣𑀼𑀁 𑀲𑁄𑀥𑁂𑀢𑀺, 𑀯𑀢𑁆𑀣𑀼𑀲𑁆𑀲 𑀲𑀼𑀤𑁆𑀥𑀢𑁆𑀢𑀸 𑀦𑀸𑀪𑀺𑀢𑁄 𑀧𑀝𑁆𑀞𑀸𑀬 𑀲𑀫𑀼𑀝𑁆𑀞𑀳𑀦𑁆𑀢𑁄 𑀲𑀭𑁄 𑀯𑀺𑀲𑀼𑀤𑁆𑀥𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀯 𑀲𑀫𑀼𑀝𑁆𑀞𑀸𑀢𑀺. 𑀓𑀭𑀯𑀺𑀓𑁄 𑀯𑀺𑀬 𑀪𑀡𑀢𑀻𑀢𑀺 𑀓𑀭𑀯𑀺𑀓𑀪𑀸𑀡𑀻, 𑀫𑀢𑁆𑀢𑀓𑀭𑀯𑀺𑀓𑀭𑀼𑀢𑀫𑀜𑁆𑀚𑀼𑀖𑁄𑀲𑁄𑀢𑀺 𑀅𑀢𑁆𑀣𑁄.

𑀢𑀢𑁆𑀭𑀺𑀤𑀁 𑀓𑀭𑀯𑀺𑀓𑀭𑀼𑀢𑀲𑁆𑀲 𑀫𑀜𑁆𑀚𑀼𑀢𑀸𑀬 𑁋 𑀓𑀭𑀯𑀺𑀓𑀲𑀓𑀼𑀡𑁂 𑀓𑀺𑀭 𑀫𑀥𑀼𑀭𑀭𑀲𑀁 𑀅𑀫𑁆𑀩𑀧𑀓𑁆𑀓𑀁 𑀫𑀼𑀔𑀢𑀼𑀡𑁆𑀟𑀓𑁂𑀦 𑀧𑀳𑀭𑀺𑀢𑁆𑀯𑀸 𑀧𑀕𑁆𑀖𑀭𑀺𑀢𑀁 𑀭𑀲𑀁 𑀲𑀸𑀬𑀺𑀢𑁆𑀯𑀸 𑀧𑀓𑁆𑀔𑁂𑀦 𑀢𑀸𑀮𑀁 𑀤𑀢𑁆𑀯𑀸 𑀯𑀺𑀓𑀽𑀚𑀫𑀸𑀦𑁂 𑀘𑀢𑀼𑀧𑁆𑀧𑀤𑀸𑀤𑀻𑀦𑀺 𑀫𑀢𑁆𑀢𑀸𑀦𑀺 𑀯𑀺𑀬 𑀮𑀴𑀺𑀢𑀼𑀁 𑀆𑀭𑀪𑀦𑁆𑀢𑀺. 𑀕𑁄𑀘𑀭𑀧𑁆𑀧𑀲𑀼𑀢𑀸𑀧𑀺 𑀘𑀢𑀼𑀧𑁆𑀧𑀤𑀸 𑀫𑀼𑀔𑀕𑀢𑀸𑀦𑀺𑀧𑀺 𑀢𑀺𑀡𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀢𑀁 𑀲𑀤𑁆𑀤𑀁 𑀲𑀼𑀡𑀦𑁆𑀢𑀺, 𑀯𑀸𑀴𑀫𑀺𑀕𑀸 𑀔𑀼𑀤𑁆𑀤𑀓𑀫𑀺𑀕𑁂 𑀅𑀦𑀼𑀩𑀦𑁆𑀥𑀫𑀸𑀦𑀸 𑀉𑀓𑁆𑀔𑀺𑀢𑁆𑀢𑀧𑀸𑀤𑀁 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸𑀯 𑀢𑀺𑀝𑁆𑀞𑀦𑁆𑀢𑀺, 𑀅𑀦𑀼𑀩𑀤𑁆𑀥𑀫𑀺𑀕𑀸𑀧𑀺 𑀫𑀭𑀡𑀪𑀬𑀁 𑀳𑀺𑀢𑁆𑀯𑀸𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀧𑀓𑁆𑀔𑀺𑀦𑁄𑀧𑀺 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀉𑀤𑀓𑁂 𑀫𑀘𑁆𑀙𑀸𑀧𑀺 𑀓𑀡𑁆𑀡𑀧𑀝𑀮𑀁 𑀅𑀧𑁆𑀨𑁄𑀝𑁂𑀦𑁆𑀢𑀸 𑀢𑀁 𑀲𑀤𑁆𑀤𑀁 𑀲𑀼𑀡𑀫𑀸𑀦𑀸𑀯 𑀢𑀺𑀝𑁆𑀞𑀦𑁆𑀢𑀺. 𑀏𑀯𑀁 𑀫𑀜𑁆𑀚𑀼𑀭𑀼𑀢𑀸 𑀓𑀭𑀯𑀺𑀓𑀸.

𑀅𑀲𑀦𑁆𑀥𑀺𑀫𑀺𑀢𑁆𑀢𑀸𑀧𑀺 𑀥𑀫𑁆𑀫𑀸𑀲𑁄𑀓𑀲𑁆𑀲 𑀤𑁂𑀯𑀻 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀩𑀼𑀤𑁆𑀥𑀲𑀤𑁆𑀤𑁂𑀦 𑀲𑀤𑀺𑀲𑁄 𑀓𑀲𑁆𑀲𑀘𑀺 𑀲𑀤𑁆𑀤𑁄’’𑀢𑀺 𑀲𑀗𑁆𑀖𑀁 𑀧𑀼𑀘𑁆𑀙𑀺. 𑀅𑀢𑁆𑀣𑀺 𑀓𑀭𑀯𑀺𑀓𑀲𑀓𑀼𑀡𑀲𑁆𑀲𑀸𑀢𑀺. 𑀓𑀼𑀳𑀺𑀁, 𑀪𑀦𑁆𑀢𑁂, 𑀲𑀓𑀼𑀡𑀸𑀢𑀺? 𑀳𑀺𑀫𑀯𑀦𑁆𑀢𑁂𑀢𑀺. 𑀲𑀸 𑀭𑀸𑀚𑀸𑀦𑀁 𑀆𑀳, 𑁋 ‘‘𑀤𑁂𑀯, 𑀓𑀭𑀯𑀺𑀓𑀲𑀓𑀼𑀡𑀁 𑀤𑀝𑁆𑀞𑀼𑀓𑀸𑀫𑀸’’𑀢𑀺. 𑀭𑀸𑀚𑀸 ‘‘𑀇𑀫𑀲𑁆𑀫𑀺𑀁 𑀧𑀜𑁆𑀚𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀭𑀯𑀺𑀓𑁄 𑀆𑀕𑀘𑁆𑀙𑀢𑀽’’𑀢𑀺 𑀲𑀼𑀯𑀡𑁆𑀡𑀧𑀜𑁆𑀚𑀭𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀧𑀜𑁆𑀚𑀭𑁄 𑀕𑀦𑁆𑀢𑁆𑀯𑀸 𑀏𑀓𑀲𑁆𑀲 𑀓𑀭𑀯𑀺𑀓𑀲𑁆𑀲 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀲𑁄 ‘‘𑀭𑀸𑀚𑀸𑀡𑀸𑀬 𑀆𑀕𑀢𑁄 𑀧𑀜𑁆𑀚𑀭𑁄, 𑀦 𑀲𑀓𑁆𑀓𑀸 𑀅𑀕𑀦𑁆𑀢𑀼’’𑀦𑁆𑀢𑀺 𑀢𑀢𑁆𑀣 𑀦𑀺𑀲𑀻𑀤𑀺. 𑀧𑀜𑁆𑀚𑀭𑁄 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄𑀯 𑀅𑀝𑁆𑀞𑀸𑀲𑀺. 𑀓𑀭𑀯𑀺𑀓𑀁 𑀲𑀤𑁆𑀤𑀁 𑀓𑀸𑀭𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀣 𑀭𑀸𑀚𑀸 ‘‘𑀓𑀣𑀁 𑀪𑀡𑁂 𑀇𑀫𑁂 𑀲𑀤𑁆𑀤𑀁 𑀓𑀭𑁄𑀦𑁆𑀢𑀻’’𑀢𑀺 𑀆𑀳? 𑀜𑀸𑀢𑀓𑁂 𑀤𑀺𑀲𑁆𑀯𑀸 𑀤𑁂𑀯𑀸𑀢𑀺. 𑀅𑀣 𑀦𑀁 𑀭𑀸𑀚𑀸 𑀆𑀤𑀸𑀲𑁂𑀳𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀺. 𑀲𑁄 𑀅𑀢𑁆𑀢𑀦𑁄𑀯 𑀙𑀸𑀬𑀁 𑀤𑀺𑀲𑁆𑀯𑀸 ‘‘𑀜𑀸𑀢𑀓𑀸 𑀫𑁂 𑀆𑀕𑀢𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀓𑁆𑀔𑁂𑀦 𑀢𑀸𑀴𑀁 𑀤𑀢𑁆𑀯𑀸 𑀫𑀜𑁆𑀚𑀼𑀲𑁆𑀲𑀭𑁂𑀦 𑀫𑀡𑀺𑀯𑀁𑀲𑀁 𑀥𑀫𑀫𑀸𑀦𑁄 𑀯𑀺𑀬 𑀯𑀺𑀭𑀯𑀺. 𑀲𑀓𑀮𑀦𑀕𑀭𑁂 𑀫𑀦𑀼𑀲𑁆𑀲𑀸 𑀫𑀢𑁆𑀢𑀸 𑀯𑀺𑀬 𑀮𑀴𑀺𑀁𑀲𑀼. 𑀅𑀲𑀦𑁆𑀥𑀺𑀫𑀺𑀢𑁆𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀲 𑀢𑀸𑀯 𑀢𑀺𑀭𑀘𑁆𑀙𑀸𑀦𑀲𑁆𑀲 𑀏𑀯𑀁 𑀫𑀥𑀼𑀭𑁄 𑀲𑀤𑁆𑀤𑁄, 𑀓𑀻𑀤𑀺𑀲𑁄 𑀦𑀼 𑀔𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀺𑀭𑀺𑀧𑁆𑀧𑀢𑁆𑀢𑀲𑁆𑀲 𑀪𑀕𑀯𑀢𑁄 𑀅𑀳𑁄𑀲𑀻’’𑀢𑀺 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀧𑀻𑀢𑀺𑀁 𑀅𑀯𑀺𑀚𑀳𑀺𑀢𑁆𑀯𑀸 𑀲𑀢𑁆𑀢𑀳𑀺 𑀚𑀗𑁆𑀖𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀏𑀯𑀁 𑀫𑀥𑀼𑀭𑁄 𑀓𑀭𑀯𑀺𑀓𑀲𑀤𑁆𑀤𑁄. 𑀢𑀢𑁄 𑀲𑀢𑀪𑀸𑀕𑁂𑀦 𑀲𑀳𑀲𑁆𑀲𑀪𑀸𑀕𑁂𑀦 𑀘 𑀫𑀥𑀼𑀭𑀢𑀭𑁄 𑀢𑀣𑀸𑀕𑀢𑀲𑁆𑀲 𑀲𑀤𑁆𑀤𑁄, 𑀮𑁄𑀓𑁂 𑀧𑀦 𑀓𑀭𑀯𑀺𑀓𑀢𑁄 𑀅𑀜𑁆𑀜𑀲𑁆𑀲 𑀫𑀥𑀼𑀭𑀭𑀲𑁆𑀲 𑀅𑀪𑀸𑀯𑀢𑁄 ‘‘𑀓𑀭𑀯𑀺𑀓𑀪𑀸𑀡𑀻’’𑀢𑀺 𑀯𑀼𑀢𑁆𑀢𑀁.

𑀅𑀪𑀺𑀦𑀻𑀮𑀦𑁂𑀢𑁆𑀢𑁄𑀢𑀺 𑀦 𑀲𑀓𑀮𑀦𑀻𑀮𑀦𑁂𑀢𑁆𑀢𑁄𑀯, 𑀦𑀻𑀮𑀬𑀼𑀢𑁆𑀢𑀝𑁆𑀞𑀸𑀦𑁂 𑀧𑀦𑀲𑁆𑀲 𑀉𑀫𑀸𑀧𑀼𑀧𑁆𑀨𑀲𑀤𑀺𑀲𑁂𑀦 𑀅𑀢𑀺𑀯𑀺𑀲𑀼𑀤𑁆𑀥𑁂𑀦 𑀦𑀻𑀮𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀺 𑀅𑀓𑁆𑀔𑀻𑀦𑀺 𑀳𑁄𑀦𑁆𑀢𑀺. 𑀧𑀻𑀢𑀬𑀼𑀢𑁆𑀢𑀝𑁆𑀞𑀸𑀦𑁂 𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀤𑀺𑀲𑁂𑀦 𑀧𑀻𑀢𑀯𑀡𑁆𑀡𑁂𑀦, 𑀮𑁄𑀳𑀺𑀢𑀬𑀼𑀢𑁆𑀢𑀝𑁆𑀞𑀸𑀦𑁂 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀲𑀤𑀺𑀲𑁂𑀦 𑀮𑁄𑀳𑀺𑀢𑀯𑀡𑁆𑀡𑁂𑀦, 𑀲𑁂𑀢𑀬𑀼𑀢𑁆𑀢𑀝𑁆𑀞𑀸𑀦𑁂 𑀑𑀲𑀥𑀺𑀢𑀸𑀭𑀓𑀲𑀤𑀺𑀲𑁂𑀦 𑀲𑁂𑀢𑀯𑀡𑁆𑀡𑁂𑀦, 𑀓𑀸𑀴𑀬𑀼𑀢𑁆𑀢𑀝𑁆𑀞𑀸𑀦𑁂 𑀅𑀤𑁆𑀤𑀸𑀭𑀺𑀝𑁆𑀞𑀓𑀲𑀤𑀺𑀲𑁂𑀦 𑀓𑀸𑀴𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀺 𑀲𑀼𑀯𑀡𑁆𑀡𑀯𑀺𑀫𑀸𑀦𑁂 𑀉𑀕𑁆𑀖𑀸𑀝𑀺𑀢𑀫𑀡𑀺𑀲𑀻𑀳𑀧𑀜𑁆𑀚𑀭𑀲𑀤𑀺𑀲𑀸𑀦𑀺 𑀔𑀸𑀬𑀦𑁆𑀢𑀺.

𑀕𑁄𑀧𑀔𑀼𑀫𑁄𑀢𑀺 𑀏𑀢𑁆𑀣 𑀧𑀔𑀼𑀫𑀦𑁆𑀢𑀺 𑀲𑀓𑀮𑀁 𑀘𑀓𑁆𑀔𑀼𑀪𑀡𑁆𑀟𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀓𑀸𑀴𑀯𑀘𑁆𑀙𑀓𑀲𑁆𑀲 𑀩𑀳𑀮𑀥𑀸𑀢𑀼𑀓𑀁 𑀳𑁄𑀢𑀺, 𑀭𑀢𑁆𑀢𑀯𑀘𑁆𑀙𑀓𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀁, 𑀢𑀁𑀫𑀼𑀳𑀼𑀢𑁆𑀢𑀚𑀸𑀢𑀭𑀢𑁆𑀢𑀯𑀘𑁆𑀙𑀲𑀤𑀺𑀲𑀘𑀓𑁆𑀔𑀼𑀪𑀡𑁆𑀟𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀅𑀓𑁆𑀔𑀺𑀪𑀡𑁆𑀟𑀸 𑀅𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀺, 𑀳𑀢𑁆𑀣𑀺𑀫𑀽𑀲𑀺𑀓𑀓𑀸𑀓𑀸𑀤𑀻𑀦𑀁 𑀅𑀓𑁆𑀔𑀺𑀲𑀤𑀺𑀲𑁂𑀳𑀺 𑀯𑀺𑀦𑀺𑀕𑁆𑀕𑀢𑁂𑀳𑀺 𑀕𑀫𑁆𑀪𑀻𑀭𑁂𑀳𑀺𑀧𑀺 𑀅𑀓𑁆𑀔𑀻𑀳𑀺 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀥𑁄𑀯𑀺𑀢𑁆𑀯𑀸 𑀫𑀚𑁆𑀚𑀺𑀢𑁆𑀯𑀸 𑀞𑀧𑀺𑀢𑀫𑀡𑀺𑀕𑀼𑀴𑀺𑀓𑀸 𑀯𑀺𑀬 𑀫𑀼𑀤𑀼𑀲𑀺𑀦𑀺𑀤𑁆𑀥𑀦𑀻𑀮𑀲𑀼𑀔𑀼𑀫𑀧𑀔𑀼𑀫𑀸𑀘𑀺𑀢𑀸𑀦𑀺 𑀅𑀓𑁆𑀔𑀻𑀦𑀺.

𑀉𑀡𑁆𑀡𑀸𑀢𑀺 𑀉𑀡𑁆𑀡𑀮𑁄𑀫𑀁. 𑀪𑀫𑀼𑀓𑀦𑁆𑀢𑀭𑁂𑀢𑀺 𑀤𑁆𑀯𑀺𑀦𑁆𑀦𑀁 𑀪𑀫𑀼𑀓𑀸𑀦𑀁 𑀯𑁂𑀫𑀚𑁆𑀛𑁂 𑀦𑀸𑀲𑀺𑀓𑀫𑀢𑁆𑀣𑀓𑁂𑀬𑁂𑀯 𑀚𑀸𑀢𑀸. 𑀉𑀕𑁆𑀕𑀦𑁆𑀢𑁆𑀯𑀸 𑀧𑀦 𑀦𑀮𑀸𑀝𑀫𑀚𑁆𑀛𑀚𑀸𑀢𑀸. 𑀑𑀤𑀸𑀢𑀸𑀢𑀺 𑀧𑀭𑀺𑀲𑀼𑀤𑁆𑀥𑀸 𑀑𑀲𑀥𑀺𑀢𑀸𑀭𑀓𑀯𑀡𑁆𑀡𑀸. 𑀫𑀼𑀤𑀽𑀢𑀺 𑀲𑀧𑁆𑀧𑀺𑀫𑀡𑁆𑀟𑁂 𑀑𑀲𑀸𑀤𑁂𑀢𑁆𑀯𑀸 𑀞𑀧𑀺𑀢𑀲𑀢𑀯𑀸𑀭𑀯𑀺𑀳𑀢𑀓𑀧𑁆𑀧𑀸𑀲𑀧𑀝𑀮𑀲𑀤𑀺𑀲𑀸. 𑀢𑀽𑀮𑀲𑀦𑁆𑀦𑀺𑀪𑀸𑀢𑀺 𑀲𑀺𑀫𑁆𑀩𑀮𑀺𑀢𑀽𑀮𑀮𑀢𑀸𑀢𑀽𑀮𑀲𑀫𑀸𑀦𑀸, 𑀅𑀬𑀫𑀲𑁆𑀲𑀸 𑀑𑀤𑀸𑀢𑀢𑀸𑀬 𑀉𑀧𑀫𑀸. 𑀲𑀸 𑀧𑀦𑁂𑀲𑀸 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀬𑀫𑀸𑀦𑀸 𑀉𑀧𑀟𑁆𑀠𑀩𑀸𑀳𑀼𑀧𑁆𑀧𑀫𑀸𑀡𑀸 𑀳𑁄𑀢𑀺, 𑀯𑀺𑀲𑁆𑀲𑀝𑁆𑀞𑀸 𑀤𑀓𑁆𑀔𑀺𑀡𑀸𑀯𑀝𑁆𑀝𑀯𑀲𑁂𑀦 𑀆𑀯𑀝𑁆𑀝𑀺𑀢𑁆𑀯𑀸 𑀉𑀤𑁆𑀥𑀕𑁆𑀕𑀸 𑀳𑀼𑀢𑁆𑀯𑀸 𑀲𑀦𑁆𑀢𑀺𑀝𑁆𑀞𑀢𑀺, 𑀲𑀼𑀯𑀡𑁆𑀡𑀨𑀮𑀓𑀫𑀚𑁆𑀛𑁂 𑀞𑀧𑀺𑀢𑀭𑀚𑀢𑀧𑀼𑀧𑁆𑀨𑀼𑀴𑀓𑀸 𑀯𑀺𑀬 𑀲𑀼𑀯𑀡𑁆𑀡𑀖𑀝𑀢𑁄 𑀦𑀺𑀓𑁆𑀔𑀫𑀫𑀸𑀦𑀸 𑀔𑀻𑀭𑀥𑀸𑀭𑀸 𑀯𑀺𑀬 𑀅𑀭𑀼𑀡𑀧𑁆𑀧𑀪𑀸𑀭𑀜𑁆𑀚𑀺𑀢𑁂 𑀕𑀫𑀦𑀢𑀮𑁂 𑀑𑀲𑀥𑀺𑀢𑀸𑀭𑀓𑀸 𑀯𑀺𑀬 𑀘 𑀅𑀢𑀺𑀫𑀦𑁄𑀳𑀭𑀸𑀬 𑀲𑀺𑀭𑀺𑀬𑀸 𑀯𑀺𑀭𑁄𑀘𑀢𑀺.

𑀉𑀡𑁆𑀳𑀻𑀲𑀲𑀻𑀲𑁄𑀢𑀺 𑀇𑀤𑀁 𑀧𑀭𑀺𑀧𑀼𑀡𑁆𑀡𑀦𑀮𑀸𑀝𑀢𑀜𑁆𑀘𑁂𑀯 𑀧𑀭𑀺𑀧𑀼𑀡𑁆𑀡𑀲𑀻𑀲𑀢𑀜𑁆𑀘𑀸𑀢𑀺 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀢𑀣𑀸𑀕𑀢𑀲𑁆𑀲 𑀳𑀺 𑀤𑀓𑁆𑀔𑀺𑀡𑀓𑀡𑁆𑀡𑀘𑀽𑀴𑀺𑀓𑀢𑁄 𑀧𑀝𑁆𑀞𑀸𑀬 𑀫𑀁𑀲𑀧𑀝𑀮𑀁 𑀉𑀝𑁆𑀞𑀳𑀺𑀢𑁆𑀯𑀸 𑀲𑀓𑀮𑀁 𑀦𑀮𑀸𑀝𑀁 𑀙𑀸𑀤𑀬𑀫𑀸𑀦𑀁 𑀧𑀽𑀭𑀬𑀫𑀸𑀦𑀁 𑀕𑀦𑁆𑀢𑁆𑀯𑀸 𑀯𑀸𑀫𑀓𑀡𑁆𑀡𑀘𑀽𑀴𑀺𑀓𑀸𑀬 𑀧𑀢𑀺𑀝𑁆𑀞𑀺𑀢𑀁, 𑀭𑀜𑁆𑀜𑁄 𑀩𑀤𑁆𑀥𑀉𑀡𑁆𑀳𑀻𑀲𑀧𑀝𑁆𑀝𑁄 𑀯𑀺𑀬 𑀯𑀺𑀭𑁄𑀘𑀢𑀺. 𑀧𑀘𑁆𑀙𑀺𑀫𑀪𑀯𑀺𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀓𑀺𑀭 𑀇𑀫𑀁 𑀮𑀓𑁆𑀔𑀡𑀁 𑀯𑀺𑀤𑀺𑀢𑁆𑀯𑀸 𑀭𑀸𑀚𑀽𑀦𑀁 𑀉𑀡𑁆𑀳𑀻𑀲𑀧𑀝𑁆𑀝𑀁 𑀅𑀓𑀁𑀲𑀼, 𑀅𑀬𑀁 𑀢𑀸𑀯 𑀏𑀓𑁄 𑀅𑀢𑁆𑀣𑁄. 𑀅𑀜𑁆𑀜𑁂 𑀧𑀦 𑀚𑀦𑀸 𑀅𑀧𑀭𑀺𑀧𑀼𑀡𑁆𑀡𑀲𑀻𑀲𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀓𑀧𑁆𑀧𑀲𑀻𑀲𑀸, 𑀓𑁂𑀘𑀺 𑀨𑀮𑀲𑀻𑀲𑀸, 𑀓𑁂𑀘𑀺 𑀅𑀝𑁆𑀞𑀺𑀲𑀻𑀲𑀸, 𑀓𑁂𑀘𑀺 𑀢𑀼𑀫𑁆𑀩𑀲𑀻𑀲𑀸, 𑀓𑁂𑀘𑀺 𑀧𑀩𑁆𑀪𑀸𑀭𑀲𑀻𑀲𑀸. 𑀢𑀣𑀸𑀕𑀢𑀲𑁆𑀲 𑀧𑀦 𑀆𑀭𑀕𑁆𑀕𑁂𑀦 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀁 𑀯𑀺𑀬 𑀲𑀼𑀧𑀭𑀺𑀧𑀼𑀡𑁆𑀡𑀁 𑀉𑀤𑀓𑀧𑀼𑀧𑁆𑀨𑀼𑀴𑀲𑀤𑀺𑀲𑀁 𑀲𑀻𑀲𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂𑀦 𑀉𑀡𑁆𑀳𑀻𑀲𑀯𑁂𑀞𑀺𑀢𑀲𑀻𑀲𑁄 𑀯𑀺𑀬𑀸𑀢𑀺 𑀉𑀡𑁆𑀳𑀻𑀲𑀲𑀻𑀲𑁄. 𑀤𑀼𑀢𑀺𑀬𑀦𑀬𑁂𑀦 𑀉𑀡𑁆𑀳𑀻𑀲𑀁 𑀯𑀺𑀬 𑀲𑀩𑁆𑀩𑀢𑁆𑀣 𑀧𑀭𑀺𑀫𑀡𑁆𑀟𑀮𑀲𑀻𑀲𑁄𑀢𑀺 𑀉𑀡𑁆𑀳𑀻𑀲𑀲𑀻𑀲𑁄.

𑀇𑀫𑀸𑀦𑀺 𑀧𑀦 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀓𑀫𑁆𑀫𑀁 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀮𑀓𑁆𑀔𑀡𑀁 𑀮𑀓𑁆𑀔𑀡𑀸𑀦𑀺𑀲𑀁𑀲𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀏𑀓𑁂𑀓𑀲𑁆𑀫𑀺𑀁 𑀮𑀓𑁆𑀔𑀡𑁂 𑀤𑀲𑁆𑀲𑁂𑀢𑁆𑀯𑀸 𑀓𑀣𑀺𑀢𑀸𑀦𑀺 𑀲𑀼𑀓𑀣𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀪𑀕𑀯𑀢𑀸 𑀮𑀓𑁆𑀔𑀡𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁨𑁦𑁦-𑁨𑁦𑁨) 𑀯𑀼𑀢𑁆𑀢𑀸𑀦𑀺 𑀇𑀫𑀸𑀦𑀺 𑀓𑀫𑁆𑀫𑀸𑀤𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸𑀦𑀺. 𑀲𑀼𑀢𑁆𑀢𑀯𑀲𑁂𑀦 𑀯𑀺𑀦𑀺𑀘𑁆𑀙𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀢𑀲𑁆𑀲𑁂𑀯 𑀲𑀼𑀢𑁆𑀢𑀲𑁆𑀲 𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀸𑀦𑀺.

𑀇𑀫𑁂𑀳𑀺 𑀔𑁄, 𑀪𑁄, 𑀲𑁄 𑀪𑀯𑀁 𑀕𑁄𑀢𑀫𑁄𑀢𑀺, 𑀪𑁄 𑀆𑀘𑀭𑀺𑀬, 𑀇𑀫𑁂𑀳𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀲𑀫𑀦𑁆𑀦𑀸𑀕𑀢𑁄 𑀤𑁂𑀯𑀦𑀕𑀭𑁂 𑀲𑀫𑀼𑀲𑁆𑀲𑀺𑀢𑀭𑀢𑀦𑀯𑀺𑀘𑀺𑀢𑁆𑀢𑀁 𑀲𑀼𑀯𑀡𑁆𑀡𑀢𑁄𑀭𑀡𑀁 𑀯𑀺𑀬 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀯𑀺𑀬 𑀲𑁂𑀮𑀦𑁆𑀢𑀭𑀫𑁆𑀳𑀺 𑀲𑀼𑀧𑀼𑀧𑁆𑀨𑀺𑀢𑀲𑀸𑀮𑀭𑀼𑀓𑁆𑀔𑁄 𑀯𑀺𑀬 𑀢𑀸𑀭𑀸𑀕𑀡𑀧𑀝𑀺𑀫𑀡𑁆𑀟𑀺𑀢𑀕𑀕𑀦𑀢𑀮𑀫𑀺𑀯 𑀘 𑀅𑀢𑁆𑀢𑀦𑁄 𑀲𑀺𑀭𑀺𑀯𑀺𑀪𑀯𑁂𑀦 𑀮𑁄𑀓𑀁 𑀆𑀮𑁄𑀓𑀁 𑀓𑀼𑀭𑀼𑀫𑀸𑀦𑁄 𑀯𑀺𑀬 𑀘𑀭𑀢𑀻𑀢𑀺 𑀇𑀫𑀢𑁆𑀣𑀫𑁆𑀧𑀺 𑀤𑀻𑀧𑁂𑀢𑁆𑀯𑀸 𑀓𑀺𑀭𑀺𑀬𑀸𑀘𑀸𑀭𑀁 𑀆𑀘𑀺𑀓𑁆𑀔𑀺𑀢𑀼𑀁 𑀕𑀘𑁆𑀙𑀦𑁆𑀢𑁄 𑀔𑁄 𑀧𑀦𑀸𑀢𑀺𑀆𑀤𑀺𑀫𑀸𑀳.

𑁩𑁮𑁭. 𑀤𑀓𑁆𑀔𑀺𑀡𑁂𑀦𑀸𑀢𑀺 𑀩𑀼𑀤𑁆𑀥𑀸𑀦𑀜𑁆𑀳𑀺 𑀞𑀢𑁆𑀯𑀸 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀯𑀸 𑀕𑀫𑀦𑀁 𑀅𑀪𑀺𑀦𑀻𑀳𑀭𑀦𑁆𑀢𑀸𑀦𑀁 𑀤𑀓𑁆𑀔𑀺𑀡𑀧𑀸𑀤𑁄𑀯 𑀧𑀼𑀭𑀢𑁄 𑀳𑁄𑀢𑀺. 𑀲𑀢𑀢𑀧𑀸𑀝𑀺𑀳𑀸𑀭𑀺𑀬𑀁 𑀓𑀺𑀭𑁂𑀢𑀁. 𑀦𑀸𑀢𑀺𑀤𑀽𑀭𑁂 𑀧𑀸𑀤𑀁 𑀉𑀤𑁆𑀥𑀭𑀢𑀻𑀢𑀺 𑀢𑀁 𑀤𑀓𑁆𑀔𑀺𑀡𑀧𑀸𑀤𑀁 𑀦 𑀅𑀢𑀺𑀤𑀽𑀭𑁂 𑀞𑀧𑁂𑀲𑁆𑀲𑀸𑀫𑀻𑀢𑀺 𑀉𑀤𑁆𑀥𑀭𑀢𑀺. 𑀅𑀢𑀺𑀤𑀽𑀭𑀜𑁆𑀳𑀺 𑀅𑀪𑀺𑀳𑀭𑀺𑀬𑀫𑀸𑀦𑁂 𑀤𑀓𑁆𑀔𑀺𑀡𑀧𑀸𑀤𑁂𑀦 𑀯𑀸𑀫𑀧𑀸𑀤𑁄 𑀆𑀓𑀟𑁆𑀠𑀺𑀬𑀫𑀸𑀦𑁄 𑀕𑀘𑁆𑀙𑁂𑀬𑁆𑀬, 𑀤𑀓𑁆𑀔𑀺𑀡𑀧𑀸𑀤𑁄𑀧𑀺 𑀤𑀽𑀭𑀁 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀆𑀲𑀦𑁆𑀦𑁂𑀬𑁂𑀯 𑀧𑀢𑀺𑀝𑁆𑀞𑀳𑁂𑀬𑁆𑀬, 𑀏𑀯𑀁 𑀲𑀢𑀺 𑀧𑀤𑀯𑀺𑀘𑁆𑀙𑁂𑀤𑁄 𑀦𑀸𑀫 𑀳𑁄𑀢𑀺. 𑀤𑀓𑁆𑀔𑀺𑀡𑀧𑀸𑀤𑁂 𑀧𑀦 𑀧𑀫𑀸𑀡𑁂𑀦𑁂𑀯 𑀉𑀤𑁆𑀥𑀢𑁂 𑀯𑀸𑀫𑀧𑀸𑀤𑁄𑀧𑀺 𑀧𑀫𑀸𑀡𑁂𑀦𑁂𑀯 𑀉𑀤𑁆𑀥𑀭𑀺𑀬𑀢𑀺, 𑀧𑀫𑀸𑀡𑁂𑀦 𑀉𑀤𑁆𑀥𑀢𑁄 𑀧𑀢𑀺𑀝𑁆𑀞𑀳𑀦𑁆𑀢𑁄𑀧𑀺 𑀧𑀫𑀸𑀡𑁂𑀬𑁂𑀯 𑀧𑀢𑀺𑀝𑁆𑀞𑀸𑀢𑀺. 𑀏𑀯𑀫𑀦𑁂𑀦 𑀢𑀣𑀸𑀕𑀢𑀲𑁆𑀲 𑀤𑀓𑁆𑀔𑀺𑀡𑀧𑀸𑀤𑀓𑀺𑀘𑁆𑀘𑀁 𑀯𑀸𑀫𑀧𑀸𑀤𑁂𑀦 𑀦𑀺𑀬𑀫𑀺𑀢𑀁, 𑀯𑀸𑀫𑀧𑀸𑀤𑀓𑀺𑀘𑁆𑀘𑀁 𑀤𑀓𑁆𑀔𑀺𑀡𑀧𑀸𑀤𑁂𑀦 𑀦𑀺𑀬𑀫𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀸𑀢𑀺𑀲𑀻𑀖𑀦𑁆𑀢𑀺 𑀤𑀺𑀯𑀸 𑀯𑀺𑀳𑀸𑀭𑀪𑀢𑁆𑀢𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁄 𑀪𑀺𑀓𑁆𑀔𑀼 𑀯𑀺𑀬 𑀦 𑀅𑀢𑀺𑀲𑀻𑀖𑀁 𑀕𑀘𑁆𑀙𑀢𑀺. 𑀦𑀸𑀢𑀺𑀲𑀡𑀺𑀓𑀦𑁆𑀢𑀺 𑀬𑀣𑀸 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄 𑀑𑀓𑀸𑀲𑀁 𑀦 𑀮𑀪𑀢𑀺, 𑀏𑀯𑀁 𑀦 𑀅𑀢𑀺𑀲𑀡𑀺𑀓𑀁 𑀕𑀘𑁆𑀙𑀢𑀺. 𑀅𑀤𑁆𑀤𑀼𑀯𑁂𑀦 𑀅𑀤𑁆𑀤𑀼𑀯𑀦𑁆𑀢𑀺 𑀚𑀡𑁆𑀡𑀼𑀓𑁂𑀦 𑀚𑀡𑁆𑀡𑀼𑀓𑀁, 𑀦 𑀲𑀢𑁆𑀣𑀺𑀁 𑀉𑀦𑁆𑀦𑀸𑀫𑁂𑀢𑀻𑀢𑀺 𑀕𑀫𑁆𑀪𑀻𑀭𑁂 𑀉𑀤𑀓𑁂 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀦 𑀊𑀭𑀼𑀁 𑀉𑀦𑁆𑀦𑀸𑀫𑁂𑀢𑀺. 𑀦 𑀑𑀦𑀸𑀫𑁂𑀢𑀻𑀢𑀺 𑀭𑀼𑀓𑁆𑀔𑀲𑀸𑀔𑀸𑀙𑁂𑀤𑀦𑀤𑀡𑁆𑀟𑀗𑁆𑀓𑀼𑀲𑀧𑀸𑀤𑁄 𑀯𑀺𑀬 𑀦 𑀧𑀘𑁆𑀙𑀢𑁄 𑀑𑀲𑀓𑁆𑀓𑀸𑀧𑁂𑀢𑀺. 𑀦 𑀲𑀦𑁆𑀦𑀸𑀫𑁂𑀢𑀻𑀢𑀺 𑀑𑀩𑀤𑁆𑀥𑀸𑀦𑀸𑀩𑀤𑁆𑀥𑀝𑁆𑀞𑀸𑀦𑁂𑀳𑀺 𑀧𑀸𑀤𑀁 𑀓𑁄𑀝𑁆𑀝𑁂𑀦𑁆𑀢𑁄 𑀯𑀺𑀬 𑀦 𑀣𑀤𑁆𑀥𑀁 𑀓𑀭𑁄𑀢𑀺. 𑀦 𑀯𑀺𑀦𑀸𑀫𑁂𑀢𑀻𑀢𑀺 𑀬𑀦𑁆𑀢𑀭𑀽𑀧𑀓𑀁 𑀓𑀻𑀴𑀸𑀧𑁂𑀦𑁆𑀢𑁄 𑀯𑀺𑀬 𑀦 𑀇𑀢𑁄 𑀘𑀺𑀢𑁄 𑀘 𑀘𑀸𑀮𑁂𑀢𑀺. 𑀅𑀥𑀭𑀓𑀸𑀬𑁄𑀯𑀸𑀢𑀺 𑀳𑁂𑀝𑁆𑀞𑀺𑀫𑀓𑀸𑀬𑁄𑀯 𑀇𑀜𑁆𑀚𑀢𑀺, 𑀉𑀧𑀭𑀺𑀫𑀓𑀸𑀬𑁄 𑀦𑀸𑀯𑀸𑀬 𑀞𑀧𑀺𑀢𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀦𑀺𑀘𑁆𑀘𑀮𑁄 𑀳𑁄𑀢𑀺. 𑀤𑀽𑀭𑁂 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀳𑀺 𑀩𑀼𑀤𑁆𑀥𑀸𑀦𑀁 𑀞𑀺𑀢𑀪𑀸𑀯𑀁 𑀯𑀸 𑀕𑀫𑀦𑀪𑀸𑀯𑀁 𑀯𑀸 𑀦 𑀚𑀸𑀦𑀸𑀢𑀺. 𑀓𑀸𑀬𑀩𑀮𑁂𑀦𑀸𑀢𑀺 𑀩𑀸𑀳𑀸 𑀔𑀺𑀧𑀦𑁆𑀢𑁄 𑀲𑀭𑀻𑀭𑀢𑁄 𑀲𑁂𑀤𑁂𑀳𑀺 𑀫𑀼𑀘𑁆𑀘𑀦𑁆𑀢𑁂𑀳𑀺 𑀦 𑀓𑀸𑀬𑀩𑀮𑁂𑀦 𑀕𑀘𑁆𑀙𑀢𑀺. 𑀲𑀩𑁆𑀩𑀓𑀸𑀬𑁂𑀦𑁂𑀯𑀸𑀢𑀺 𑀕𑀻𑀯𑀁 𑀅𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀭𑀸𑀳𑀼𑀮𑁄𑀯𑀸𑀤𑁂 𑀯𑀼𑀢𑁆𑀢𑀦𑀸𑀕𑀸𑀧𑀮𑁄𑀓𑀺𑀢𑀯𑀲𑁂𑀦𑁂𑀯 𑀅𑀧𑀮𑁄𑀓𑁂𑀢𑀺.

𑀦 𑀉𑀤𑁆𑀥𑀦𑁆𑀢𑀺𑀆𑀤𑀻𑀲𑀼 𑀦𑀓𑁆𑀔𑀢𑁆𑀢𑀸𑀦𑀺 𑀕𑀡𑁂𑀦𑁆𑀢𑁄 𑀯𑀺𑀬 𑀦 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀢𑀺, 𑀦𑀝𑁆𑀞𑀁 𑀓𑀸𑀓𑀡𑀺𑀓𑀁 𑀯𑀸 𑀫𑀸𑀲𑀓𑀁 𑀯𑀸 𑀧𑀭𑀺𑀬𑁂𑀲𑀦𑁆𑀢𑁄 𑀯𑀺𑀬 𑀦 𑀅𑀥𑁄 𑀑𑀮𑁄𑀓𑁂𑀢𑀺, 𑀦 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀧𑀲𑁆𑀲𑀦𑁆𑀢𑁄 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁂𑀓𑁆𑀔𑀫𑀸𑀦𑁄 𑀕𑀘𑁆𑀙𑀢𑀺. 𑀬𑀼𑀕𑀫𑀢𑁆𑀢𑀦𑁆𑀢𑀺 𑀦𑀯𑀯𑀺𑀤𑀢𑁆𑀣𑀺𑀫𑀢𑁆𑀢𑁂 𑀘𑀓𑁆𑀔𑀽𑀦𑀺 𑀞𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀢𑀺 𑀦𑀸𑀫, 𑀪𑀕𑀯𑀸𑀧𑀺 𑀬𑀼𑀕𑁂 𑀬𑀼𑀢𑁆𑀢𑁄 𑀲𑀼𑀤𑀦𑁆𑀢𑀆𑀚𑀸𑀦𑀻𑀬𑁄 𑀯𑀺𑀬 𑀏𑀢𑁆𑀢𑀓𑀁 𑀧𑀲𑁆𑀲𑀦𑁆𑀢𑁄 𑀕𑀘𑁆𑀙𑀢𑀺. 𑀢𑀢𑁄 𑀘𑀲𑁆𑀲 𑀉𑀢𑁆𑀢𑀭𑀻𑀢𑀺 𑀬𑀼𑀕𑀫𑀢𑁆𑀢𑀢𑁄 𑀧𑀭𑀁 𑀦 𑀧𑀲𑁆𑀲𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀦 𑀳𑀺 𑀓𑀼𑀝𑁆𑀝𑀁 𑀯𑀸 𑀓𑀯𑀸𑀝𑀁 𑀯𑀸 𑀕𑀘𑁆𑀙𑁄 𑀯𑀸 𑀮𑀢𑀸 𑀯𑀸 𑀆𑀯𑀭𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀣 𑀔𑁆𑀯𑀲𑁆𑀲 𑀅𑀦𑀸𑀯𑀭𑀡𑀜𑀸𑀡𑀲𑁆𑀲 𑀅𑀦𑁂𑀓𑀸𑀦𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑁂𑀯 𑀳𑁄𑀦𑁆𑀢𑀺. 𑀅𑀦𑁆𑀢𑀭𑀖𑀭𑀦𑁆𑀢𑀺 𑀳𑁂𑀝𑁆𑀞𑀸 𑀫𑀳𑀸𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑁂 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀭𑀖𑀭𑀁, 𑀇𑀥 𑀖𑀭𑀉𑀫𑁆𑀫𑀸𑀭𑀢𑁄 𑀧𑀝𑁆𑀞𑀸𑀬 𑀯𑁂𑀤𑀺𑀢𑀩𑁆𑀩𑀁. 𑀦 𑀓𑀸𑀬𑀦𑁆𑀢𑀺𑀆𑀤𑀺 𑀧𑀓𑀢𑀺𑀇𑀭𑀺𑀬𑀧𑀣𑁂𑀦𑁂𑀯 𑀧𑀯𑀺𑀲𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸𑀦𑀁 𑀦𑀻𑀘𑀖𑀭𑀓𑀁 𑀧𑀯𑀺𑀲𑀦𑁆𑀢𑁂𑀧𑀺 𑀳𑀺 𑀢𑀣𑀸𑀕𑀢𑁂 𑀙𑀤𑀦𑀁 𑀯𑀸 𑀉𑀕𑁆𑀕𑀘𑁆𑀙𑀢𑀺, 𑀧𑀣𑀯𑀻 𑀯𑀸 𑀑𑀕𑀘𑁆𑀙𑀢𑀺, 𑀪𑀕𑀯𑀸 𑀧𑀦 𑀧𑀓𑀢𑀺𑀕𑀫𑀦𑁂𑀦𑁂𑀯 𑀕𑀘𑁆𑀙𑀢𑀺. 𑀦𑀸𑀢𑀺𑀤𑀽𑀭𑁂𑀢𑀺 𑀅𑀢𑀺𑀤𑀽𑀭𑁂 𑀧𑀭𑀺𑀯𑀢𑁆𑀢𑀦𑁆𑀢𑁂𑀦 𑀳𑀺 𑀏𑀓𑀁 𑀤𑁆𑀯𑁂 𑀧𑀤𑀯𑀸𑀭𑁂 𑀧𑀺𑀝𑁆𑀞𑀺𑀪𑀸𑀕𑁂𑀦 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁 𑀳𑁄𑀢𑀺. 𑀦𑀸𑀘𑁆𑀘𑀸𑀲𑀦𑁆𑀦𑁂𑀢𑀺 𑀅𑀘𑁆𑀘𑀸𑀲𑀦𑁆𑀦𑁂 𑀧𑀭𑀺𑀯𑀢𑁆𑀢𑀦𑁆𑀢𑁂𑀦 𑀏𑀓𑀁 𑀤𑁆𑀯𑁂 𑀧𑀤𑀯𑀸𑀭𑁂 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀧𑀤𑀯𑀸𑀭𑁂 𑀞𑀺𑀢𑁂𑀦 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀅𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁 𑀳𑁄𑀢𑀺, 𑀢𑀢𑁆𑀣 𑀧𑀭𑀺𑀯𑀢𑁆𑀢𑀢𑀺.

𑀧𑀸𑀡𑀺𑀦𑀸𑀢𑀺 𑀓𑀝𑀺𑀯𑀸𑀢𑀸𑀩𑀸𑀥𑀺𑀓𑁄 𑀯𑀺𑀬 𑀦 𑀆𑀲𑀦𑀁 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀢𑀺. 𑀧𑀓𑁆𑀔𑀺𑀧𑀢𑀻𑀢𑀺 𑀬𑁄 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀢𑁆𑀯𑀸 𑀓𑀻𑀴𑀦𑁆𑀢𑁄 𑀞𑀺𑀢𑀓𑁄𑀯 𑀧𑀢𑀢𑀺, 𑀬𑁄𑀧𑀺 𑀑𑀭𑀺𑀫𑀁 𑀅𑀗𑁆𑀕𑀁 𑀦𑀺𑀲𑁆𑀲𑀸𑀬 𑀦𑀺𑀲𑀺𑀦𑁆𑀦𑁄 𑀖𑀁𑀲𑀦𑁆𑀢𑁄 𑀬𑀸𑀯 𑀧𑀸𑀭𑀺𑀫𑀗𑁆𑀕𑀸 𑀕𑀘𑁆𑀙𑀢𑀺, 𑀧𑀸𑀭𑀺𑀫𑀗𑁆𑀕𑀁 𑀯𑀸 𑀦𑀺𑀲𑁆𑀲𑀸𑀬 𑀦𑀺𑀲𑀺𑀦𑁆𑀦𑁄 𑀢𑀣𑁂𑀯 𑀬𑀸𑀯 𑀑𑀭𑀺𑀫𑀗𑁆𑀕𑀸 𑀆𑀕𑀘𑁆𑀙𑀢𑀺, 𑀲𑀩𑁆𑀩𑁄 𑀲𑁄 𑀆𑀲𑀦𑁂 𑀓𑀸𑀬𑀁 𑀧𑀓𑁆𑀔𑀺𑀧𑀢𑀺 𑀦𑀸𑀫. 𑀪𑀕𑀯𑀸 𑀧𑀦 𑀏𑀯𑀁 𑀅𑀓𑀢𑁆𑀯𑀸 𑀆𑀲𑀦𑀲𑁆𑀲 𑀫𑀚𑁆𑀛𑁂 𑀑𑀮𑀫𑁆𑀩𑀓𑀁 𑀥𑀸𑀭𑁂𑀦𑁆𑀢𑁄 𑀯𑀺𑀬 𑀢𑀽𑀮𑀧𑀺𑀘𑀼𑀁 𑀞𑀧𑁂𑀦𑁆𑀢𑁄 𑀯𑀺𑀬 𑀲𑀡𑀺𑀓𑀁 𑀦𑀺𑀲𑀻𑀤𑀢𑀺. 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀧𑀢𑁆𑀢𑀫𑀼𑀔𑀯𑀝𑁆𑀝𑀺𑀬𑀁 𑀉𑀤𑀓𑀩𑀺𑀦𑁆𑀤𑀼𑀞𑀧𑀦𑀁 𑀫𑀓𑁆𑀔𑀺𑀓𑀩𑀻𑀚𑀦𑀺𑀬𑀸 𑀧𑀡𑁆𑀡𑀘𑁆𑀙𑁂𑀤𑀦𑀨𑀸𑀮𑀦𑀸𑀤𑀺 𑀳𑀢𑁆𑀣𑁂𑀦 𑀅𑀲𑀁𑀬𑀢𑀓𑀭𑀡𑀁. 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀧𑀸𑀤𑁂𑀦 𑀪𑀽𑀫𑀺𑀖𑀁𑀲𑀦𑀸𑀤𑀺 𑀅𑀲𑀁𑀬𑀢𑀓𑀭𑀡𑀁.

𑀦 𑀙𑀫𑁆𑀪𑀢𑀻𑀢𑀺 𑀦 𑀪𑀸𑀬𑀢𑀺. 𑀦 𑀓𑀫𑁆𑀧𑀢𑀻𑀢𑀺 𑀦 𑀑𑀲𑀻𑀤𑀢𑀺. 𑀦 𑀯𑁂𑀥𑀢𑀻𑀢𑀺 𑀦 𑀘𑀮𑀢𑀺. 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀪𑀬𑀧𑀭𑀺𑀢𑀲𑁆𑀲𑀦𑀸𑀬𑀧𑀺 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀸𑀬𑀧𑀺 𑀦 𑀧𑀭𑀺𑀢𑀲𑁆𑀲𑀢𑀺. 𑀏𑀓𑀘𑁆𑀘𑁄 𑀳𑀺 𑀥𑀫𑁆𑀫𑀓𑀣𑀸𑀤𑀻𑀦𑀁 𑀅𑀢𑁆𑀣𑀸𑀬 𑀆𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁂𑀲𑀼 ‘‘𑀲𑀓𑁆𑀔𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀢𑁂𑀲𑀁 𑀘𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀥𑀫𑁆𑀫𑀁 𑀯𑀸 𑀓𑀣𑁂𑀢𑀼𑀁, 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀺𑀢𑁄 𑀯𑀺𑀲𑁆𑀲𑀚𑁆𑀚𑁂𑀢𑀼𑀁, 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀯𑀸 𑀓𑀸𑀢𑀼’’𑀦𑁆𑀢𑀺 𑀪𑀬𑀧𑀭𑀺𑀢𑀲𑁆𑀲𑀦𑀸𑀬 𑀧𑀭𑀺𑀢𑀲𑁆𑀲𑀢𑀺. 𑀏𑀓𑀘𑁆𑀘𑁄 ‘‘𑀫𑀦𑀸𑀧𑀸 𑀦𑀼 𑀔𑁄 𑀫𑁂 𑀬𑀸𑀕𑀼 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀫𑀦𑀸𑀧𑀁 𑀅𑀦𑁆𑀢𑀭𑀔𑀚𑁆𑀚𑀓’’𑀦𑁆𑀢𑀺 𑀯𑀸 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀸𑀬 𑀧𑀭𑀺𑀢𑀲𑁆𑀲𑀢𑀺. 𑀢𑀤𑀼𑀪𑀬𑀫𑁆𑀧𑀺 𑀢𑀲𑁆𑀲 𑀦𑀢𑁆𑀣𑀻𑀢𑀺 𑀦 𑀧𑀭𑀺𑀢𑀲𑁆𑀲𑀢𑀺. 𑀯𑀺𑀯𑁂𑀓𑀸𑀯𑀝𑁆𑀝𑁄𑀢𑀺 𑀯𑀺𑀯𑁂𑀓𑁂 𑀦𑀺𑀩𑁆𑀩𑀸𑀦𑁂 𑀆𑀯𑀝𑁆𑀝𑀫𑀸𑀦𑀲𑁄 𑀳𑀼𑀢𑁆𑀯𑀸. 𑀯𑀺𑀯𑁂𑀓𑀯𑀢𑁆𑀢𑁄𑀢𑀺𑀧𑀺 𑀧𑀸𑀞𑁄, 𑀯𑀺𑀯𑁂𑀓𑀯𑀢𑁆𑀢𑀬𑀼𑀢𑁆𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀯𑁂𑀓𑀯𑀢𑁆𑀢𑀁 𑀦𑀸𑀫 𑀓𑀢𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀺𑀯𑀸𑀯𑀺𑀳𑀸𑀭𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀦𑀁. 𑀏𑀯𑀁 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀇𑀭𑀺𑀬𑀸𑀧𑀣𑁄 𑀉𑀧𑀲𑀦𑁆𑀢𑁄 𑀳𑁄𑀢𑀺.

𑀦 𑀧𑀢𑁆𑀢𑀁 𑀉𑀦𑁆𑀦𑀸𑀫𑁂𑀢𑀻𑀢𑀺𑀆𑀤𑀻𑀲𑀼 𑀏𑀓𑀘𑁆𑀘𑁄 𑀧𑀢𑁆𑀢𑀫𑀼𑀔𑀯𑀝𑁆𑀝𑀺𑀬𑀸 𑀉𑀤𑀓𑀤𑀸𑀦𑀁 𑀆𑀳𑀭𑀦𑁆𑀢𑁄 𑀯𑀺𑀬 𑀧𑀢𑁆𑀢𑀁 𑀉𑀦𑁆𑀦𑀸𑀫𑁂𑀢𑀺, 𑀏𑀓𑁄 𑀧𑀸𑀤𑀧𑀺𑀝𑁆𑀞𑀺𑀬𑀁 𑀞𑀧𑁂𑀦𑁆𑀢𑁄 𑀯𑀺𑀬 𑀑𑀦𑀸𑀫𑁂𑀢𑀺, 𑀏𑀓𑁄 𑀩𑀤𑁆𑀥𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀏𑀓𑁄 𑀇𑀢𑁄 𑀘𑀺𑀢𑁄 𑀘 𑀨𑀦𑁆𑀤𑀸𑀧𑁂𑀢𑀺, 𑀏𑀯𑀁 𑀅𑀓𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀈𑀲𑀓𑀁 𑀦𑀸𑀫𑁂𑀢𑁆𑀯𑀸 𑀉𑀤𑀓𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄. 𑀦 𑀲𑀫𑁆𑀧𑀭𑀺𑀯𑀢𑁆𑀢𑀓𑀦𑁆𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀞𑀫𑀫𑁂𑀯 𑀧𑀢𑁆𑀢𑀧𑀺𑀝𑁆𑀞𑀺𑀁 𑀦 𑀥𑁄𑀯𑀢𑀺. 𑀦𑀸𑀢𑀺𑀤𑀽𑀭𑁂𑀢𑀺 𑀬𑀣𑀸 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀤𑀽𑀭𑁂 𑀧𑀢𑀢𑀺, 𑀦 𑀏𑀯𑀁 𑀙𑀟𑁆𑀟𑁂𑀢𑀺. 𑀦𑀸𑀘𑁆𑀘𑀸𑀲𑀦𑁆𑀦𑁂𑀢𑀺 𑀧𑀸𑀤𑀫𑀽𑀮𑁂𑀬𑁂𑀯 𑀦 𑀙𑀟𑁆𑀟𑁂𑀢𑀺. 𑀯𑀺𑀘𑁆𑀙𑀟𑁆𑀟𑀬𑀫𑀸𑀦𑁄𑀢𑀺 𑀯𑀺𑀓𑀺𑀭𑀦𑁆𑀢𑁄, 𑀬𑀣𑀸 𑀧𑀝𑀺𑀕𑁆𑀕𑀸𑀳𑀓𑁄 𑀢𑁂𑀫𑀢𑀺, 𑀦 𑀏𑀯𑀁 𑀙𑀟𑁆𑀟𑁂𑀢𑀺.

𑀦𑀸𑀢𑀺𑀣𑁄𑀓𑀦𑁆𑀢𑀺 𑀬𑀣𑀸 𑀏𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀅𑀧𑁆𑀧𑀺𑀘𑁆𑀙𑀢𑀁 𑀤𑀲𑁆𑀲𑁂𑀦𑁆𑀢𑁄 𑀫𑀼𑀝𑁆𑀞𑀺𑀫𑀢𑁆𑀢𑀫𑁂𑀯 𑀕𑀡𑁆𑀳𑀸𑀢𑀺, 𑀦 𑀏𑀯𑀁. 𑀅𑀢𑀺𑀩𑀳𑀼𑀦𑁆𑀢𑀺 𑀬𑀸𑀧𑀦𑀫𑀢𑁆𑀢𑀢𑁄 𑀅𑀢𑀺𑀭𑁂𑀓𑀁. 𑀩𑁆𑀬𑀜𑁆𑀚𑀦𑀫𑀢𑁆𑀢𑀸𑀬𑀸𑀢𑀺 𑀩𑁆𑀬𑀜𑁆𑀚𑀦𑀲𑁆𑀲 𑀫𑀢𑁆𑀢𑀸 𑀦𑀸𑀫 𑀑𑀤𑀦𑀢𑁄 𑀘𑀢𑀼𑀢𑁆𑀣𑁄 𑀪𑀸𑀕𑁄. 𑀏𑀓𑀘𑁆𑀘𑁄 𑀳𑀺 𑀪𑀢𑁆𑀢𑁂 𑀫𑀦𑀸𑀧𑁂 𑀪𑀢𑁆𑀢𑀁 𑀩𑀳𑀼𑀁 𑀕𑀡𑁆𑀳𑀸𑀢𑀺, 𑀩𑁆𑀬𑀜𑁆𑀚𑀦𑁂 𑀫𑀦𑀸𑀧𑁂 𑀩𑁆𑀬𑀜𑁆𑀚𑀦𑀁 𑀩𑀳𑀼𑀁. 𑀲𑀢𑁆𑀣𑀸 𑀧𑀦 𑀢𑀣𑀸 𑀦 𑀕𑀡𑁆𑀳𑀸𑀢𑀺. 𑀦 𑀘 𑀩𑁆𑀬𑀜𑁆𑀚𑀦𑁂𑀦𑀸𑀢𑀺 𑀅𑀫𑀦𑀸𑀧𑀜𑁆𑀳𑀺 𑀩𑁆𑀬𑀜𑁆𑀚𑀦𑀁 𑀞𑀧𑁂𑀢𑁆𑀯𑀸 𑀪𑀢𑁆𑀢𑀫𑁂𑀯 𑀪𑀼𑀜𑁆𑀚𑀦𑁆𑀢𑁄, 𑀪𑀢𑁆𑀢𑀁 𑀯𑀸 𑀞𑀧𑁂𑀢𑁆𑀯𑀸 𑀩𑁆𑀬𑀜𑁆𑀚𑀦𑀫𑁂𑀯 𑀔𑀸𑀤𑀦𑁆𑀢𑁄 𑀩𑁆𑀬𑀜𑁆𑀚𑀦𑁂𑀦 𑀆𑀮𑁄𑀧𑀁 𑀅𑀢𑀺𑀦𑀸𑀫𑁂𑀢𑀺 𑀦𑀸𑀫. 𑀲𑀢𑁆𑀣𑀸 𑀏𑀓𑀦𑁆𑀢𑀭𑀺𑀓𑀁 𑀩𑁆𑀬𑀜𑁆𑀚𑀦𑀁 𑀕𑀡𑁆𑀳𑀸𑀢𑀺, 𑀪𑀢𑁆𑀢𑀫𑁆𑀧𑀺 𑀩𑁆𑀬𑀜𑁆𑀚𑀦𑀫𑁆𑀧𑀺 𑀏𑀓𑀢𑁄𑀯 𑀦𑀺𑀝𑁆𑀞𑀦𑁆𑀢𑀺. 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀳𑀺 𑀧𑀼𑀣𑀼𑀚𑀺𑀯𑁆𑀳𑀸𑀬 𑀤𑀦𑁆𑀢𑀸𑀦𑀁 𑀉𑀧𑀦𑀻𑀢𑀪𑁄𑀚𑀦𑀁 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀤𑀦𑁆𑀢𑁂𑀳𑀺 𑀨𑀼𑀝𑁆𑀞𑀫𑀢𑁆𑀢𑀫𑁂𑀯 𑀲𑀡𑁆𑀳𑀓𑀭𑀡𑀻𑀬𑀧𑀺𑀝𑁆𑀞𑀯𑀺𑀮𑁂𑀧𑀦𑀁 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀦 𑀫𑀼𑀔𑁂 𑀅𑀯𑀲𑀺𑀝𑁆𑀞𑀸𑀢𑀺 𑀧𑁄𑀓𑁆𑀔𑀭𑀧𑀢𑁆𑀢𑁂 𑀧𑀢𑀺𑀢𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀭𑀕𑀮𑀫𑁂𑀯 𑀬𑀸𑀢𑀺, 𑀢𑀲𑁆𑀫𑀸 𑀅𑀯𑀲𑀺𑀝𑁆𑀞𑀸 𑀦 𑀳𑁄𑀢𑀺. 𑀭𑀲𑀧𑀝𑀺𑀲𑀁𑀯𑁂𑀤𑀻𑀢𑀺 𑀫𑀥𑀼𑀭𑀢𑀺𑀢𑁆𑀢𑀓𑀤𑀼𑀓𑀸𑀤𑀺𑀭𑀲𑀁 𑀚𑀸𑀦𑀸𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀅𑀦𑁆𑀢𑀫𑀲𑁄 𑀧𑀸𑀦𑀻𑀬𑁂𑀧𑀺 𑀤𑀺𑀩𑁆𑀩𑁄𑀚𑀸 𑀧𑀓𑁆𑀔𑀺𑀢𑁆𑀢𑀸𑀯 𑀳𑁄𑀢𑀺, 𑀢𑁂𑀦 𑀦𑁂𑀲𑀁 𑀲𑀩𑁆𑀩𑀢𑁆𑀣𑁂𑀯 𑀭𑀲𑁄 𑀧𑀸𑀓𑀝𑁄 𑀳𑁄𑀢𑀺, 𑀭𑀲𑀕𑁂𑀥𑁄 𑀧𑀦 𑀦𑀢𑁆𑀣𑀺.

𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 ‘‘𑀦𑁂𑀯 𑀤𑀯𑀸𑀬𑀸’’𑀢𑀺 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀦𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀆𑀕𑀢𑁄𑀢𑀺 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑁂 𑀯𑀼𑀢𑁆𑀢𑀫𑁂𑀢𑀁. 𑀳𑀢𑁆𑀣𑁂𑀲𑀼 𑀥𑁄𑀢𑁂𑀲𑀽𑀢𑀺 𑀲𑀢𑁆𑀣𑀸 𑀓𑀺𑀁 𑀓𑀭𑁄𑀢𑀺? 𑀧𑀞𑀫𑀁 𑀧𑀢𑁆𑀢𑀲𑁆𑀲 𑀕𑀳𑀡𑀝𑁆𑀞𑀸𑀦𑀁 𑀥𑁄𑀯𑀢𑀺. 𑀢𑀢𑁆𑀣 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀼𑀔𑀼𑀫𑀚𑀸𑀮𑀳𑀢𑁆𑀣𑀁 𑀧𑁂𑀲𑁂𑀢𑁆𑀯𑀸 𑀤𑁆𑀯𑁂 𑀯𑀸𑀭𑁂 𑀲𑀜𑁆𑀘𑀸𑀭𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀧𑁄𑀓𑁆𑀔𑀭𑀧𑀢𑁆𑀢𑁂 𑀧𑀢𑀺𑀢𑀉𑀤𑀓𑀁 𑀯𑀺𑀬 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀦 𑀘 𑀅𑀦𑀢𑁆𑀣𑀺𑀓𑁄𑀢𑀺 𑀬𑀣𑀸 𑀏𑀓𑀘𑁆𑀘𑁄 𑀧𑀢𑁆𑀢𑀁 𑀆𑀥𑀸𑀭𑀓𑁂 𑀞𑀧𑁂𑀢𑁆𑀯𑀸 𑀧𑀢𑁆𑀢𑁂 𑀉𑀤𑀓𑀁 𑀦 𑀧𑀼𑀜𑁆𑀙𑀢𑀺, 𑀭𑀚𑁂 𑀧𑀢𑀦𑁆𑀢𑁂 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀦 𑀏𑀯𑀁 𑀓𑀭𑁄𑀢𑀺. 𑀦 𑀘 𑀅𑀢𑀺𑀯𑁂𑀮𑀸𑀦𑀼𑀭𑀓𑁆𑀔𑀻𑀢𑀺 𑀬𑀣𑀸 𑀏𑀓𑀘𑁆𑀘𑁄 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀆𑀭𑀓𑁆𑀔𑀁 𑀞𑀧𑁂𑀢𑀺, 𑀪𑀼𑀜𑁆𑀚𑀺𑀢𑁆𑀯𑀸 𑀯𑀸 𑀧𑀢𑁆𑀢𑁂 𑀉𑀤𑀓𑀁 𑀧𑀼𑀜𑁆𑀙𑀺𑀢𑁆𑀯𑀸 𑀘𑀻𑀯𑀭𑀪𑁄𑀕𑀦𑁆𑀢𑀭𑀁 𑀧𑀯𑁂𑀲𑁂𑀢𑁆𑀯𑀸 𑀧𑀢𑁆𑀢𑀁 𑀉𑀤𑀭𑁂𑀦 𑀅𑀓𑁆𑀓𑀫𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀦 𑀏𑀯𑀁 𑀓𑀭𑁄𑀢𑀺.

𑀦 𑀘 𑀅𑀦𑀼𑀫𑁄𑀤𑀦𑀲𑁆𑀲𑀸𑀢𑀺 𑀬𑁄 𑀳𑀺 𑀪𑀼𑀢𑁆𑀢𑀫𑀢𑁆𑀢𑁄𑀯 𑀤𑀸𑀭𑀓𑁂𑀲𑀼 𑀪𑀢𑁆𑀢𑀢𑁆𑀣𑀸𑀬 𑀭𑁄𑀤𑀦𑁆𑀢𑁂𑀲𑀼 𑀙𑀸𑀢𑀚𑁆𑀛𑀢𑁆𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀸𑀕𑀢𑁂𑀲𑁆𑀯𑁂𑀯 𑀅𑀦𑀼𑀫𑁄𑀤𑀦𑀁 𑀆𑀭𑀪𑀢𑀺, 𑀢𑀢𑁄 𑀲𑀩𑁆𑀩𑀓𑀫𑁆𑀫𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀏𑀓𑀘𑁆𑀘𑁂 𑀆𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀅𑀦𑀸𑀕𑀢𑀸𑀯 𑀳𑁄𑀦𑁆𑀢𑀺, 𑀅𑀬𑀁 𑀓𑀸𑀮𑀁 𑀅𑀢𑀺𑀦𑀸𑀫𑁂𑀢𑀺. 𑀬𑁄𑀧𑀺 𑀫𑀦𑀼𑀲𑁆𑀲𑁂𑀲𑀼 𑀆𑀕𑀦𑁆𑀢𑁆𑀯𑀸 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀅𑀦𑀼𑀫𑁄𑀤𑀦𑀁 𑀅𑀓𑀢𑁆𑀯𑀸𑀯 ‘‘𑀓𑀣𑀁 𑀢𑀺𑀲𑁆𑀲, 𑀓𑀣𑀁 𑀨𑀼𑀲𑁆𑀲, 𑀓𑀣𑀁 𑀲𑀼𑀫𑀦, 𑀓𑀣𑀁 𑀢𑀺𑀲𑁆𑀲𑁂, 𑀓𑀣𑀁 𑀨𑀼𑀲𑁆𑀲𑁂, 𑀓𑀣𑀁 𑀲𑀼𑀫𑀦𑁂, 𑀓𑀘𑁆𑀘𑀺𑀢𑁆𑀣 𑀅𑀭𑁄𑀕𑀸, 𑀲𑀲𑁆𑀲𑀁 𑀲𑀫𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀁 𑀧𑀸𑀝𑀺𑀬𑁂𑀓𑁆𑀓𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀅𑀬𑀁 𑀅𑀦𑀼𑀫𑁄𑀤𑀦𑀲𑁆𑀲 𑀓𑀸𑀮𑀁 𑀅𑀢𑀺𑀦𑀸𑀫𑁂𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀑𑀓𑀸𑀲𑀁 𑀜𑀢𑁆𑀯𑀸 𑀆𑀬𑀸𑀘𑀺𑀢𑀓𑀸𑀮𑁂 𑀓𑀭𑁄𑀦𑁆𑀢𑁄 𑀦𑀸𑀢𑀺𑀦𑀸𑀫𑁂𑀢𑀺 𑀦𑀸𑀫, 𑀲𑀢𑁆𑀣𑀸 𑀢𑀣𑀸 𑀓𑀭𑁄𑀢𑀺.

𑀦 𑀢𑀁 𑀪𑀢𑁆𑀢𑀦𑁆𑀢𑀺 𑀓𑀺𑀁 𑀪𑀢𑁆𑀢𑀁 𑀦𑀸𑀫𑁂𑀢𑀁 𑀉𑀢𑁆𑀢𑀡𑁆𑀟𑀼𑀮𑀁 𑀅𑀢𑀺𑀓𑀺𑀮𑀺𑀦𑁆𑀦𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀦 𑀕𑀭𑀳𑀢𑀺. 𑀦 𑀅𑀜𑁆𑀜𑀁 𑀪𑀢𑁆𑀢𑀦𑁆𑀢𑀺 𑀲𑁆𑀯𑀸𑀢𑀦𑀸𑀬 𑀯𑀸 𑀧𑀼𑀦𑀤𑀺𑀯𑀲𑀸𑀬 𑀯𑀸 𑀪𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀳𑀺 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀅𑀜𑁆𑀜𑀁 𑀪𑀢𑁆𑀢𑀁 𑀧𑀝𑀺𑀓𑀗𑁆𑀔𑀢𑀺. 𑀬𑁄 𑀯𑀸 𑁋 ‘‘𑀬𑀸𑀯 𑀫𑀸𑀢𑀼𑀕𑀸𑀫𑀸𑀦𑀁 𑀪𑀢𑁆𑀢𑀁 𑀧𑀘𑁆𑀘𑀢𑀺, 𑀢𑀸𑀯 𑀅𑀦𑀼𑀫𑁄𑀤𑀦𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀣 𑀫𑁂 𑀅𑀦𑀼𑀫𑁄𑀤𑀦𑀸𑀯𑀲𑀸𑀦𑁂 𑀅𑀢𑁆𑀢𑀦𑁄 𑀧𑀓𑁆𑀓𑀪𑀢𑁆𑀢𑀢𑁄𑀧𑀺 𑀣𑁄𑀓𑀁 𑀤𑀲𑁆𑀲𑀦𑁆𑀢𑀻’’𑀢𑀺 𑀅𑀦𑀼𑀫𑁄𑀤𑀦𑀁 𑀯𑀟𑁆𑀠𑁂𑀢𑀺, 𑀅𑀬𑀫𑁆𑀧𑀺 𑀧𑀝𑀺𑀓𑀗𑁆𑀔𑀢𑀺 𑀦𑀸𑀫. 𑀲𑀢𑁆𑀣𑀸 𑀦 𑀏𑀯𑀁 𑀓𑀭𑁄𑀢𑀺. 𑀦 𑀘 𑀫𑀼𑀘𑁆𑀘𑀺𑀢𑀼𑀓𑀸𑀫𑁄𑀢𑀺 𑀏𑀓𑀘𑁆𑀘𑁄 𑀳𑀺 𑀧𑀝𑀺𑀲𑀁𑀫𑀼𑀜𑁆𑀘𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑁄 𑀳𑁄𑀢𑀺. 𑀲𑀢𑁆𑀣𑀸 𑀧𑀦 𑀦 𑀏𑀯𑀁 𑀕𑀘𑁆𑀙𑀢𑀺, 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀞𑀺𑀢𑁄𑀯 𑀕𑀘𑁆𑀙𑀢𑀺. 𑀅𑀘𑁆𑀘𑀼𑀓𑁆𑀓𑀝𑁆𑀞𑀦𑁆𑀢𑀺 𑀬𑁄 𑀳𑀺 𑀬𑀸𑀯 𑀳𑀦𑀼𑀓𑀝𑁆𑀞𑀺𑀢𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀭𑀼𑀧𑀢𑀺, 𑀢𑀲𑁆𑀲 𑀅𑀘𑁆𑀘𑀼𑀓𑁆𑀓𑀝𑁆𑀞𑀁 𑀦𑀸𑀫 𑀳𑁄𑀢𑀺. 𑀬𑁄 𑀬𑀸𑀯 𑀕𑁄𑀧𑁆𑀨𑀓𑀸 𑀑𑀢𑀸𑀭𑁂𑀢𑁆𑀯𑀸𑀯 𑀧𑀸𑀭𑀼𑀧𑀢𑀺, 𑀢𑀲𑁆𑀲 𑀅𑀘𑁆𑀘𑀼𑀓𑁆𑀓𑀝𑁆𑀞𑀁 𑀳𑁄𑀢𑀺. 𑀬𑁄𑀧𑀺 𑀉𑀪𑀢𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑀭𑀁 𑀯𑀺𑀯𑀭𑀺𑀢𑁆𑀯𑀸 𑀬𑀸𑀢𑀺, 𑀢𑀲𑁆𑀲𑀧𑀺 𑀅𑀘𑁆𑀘𑀼𑀓𑁆𑀓𑀝𑁆𑀞𑀁 𑀳𑁄𑀢𑀺. 𑀬𑁄 𑀏𑀓𑀁𑀲𑀁 𑀓𑀢𑁆𑀯𑀸 𑀣𑀦𑀁 𑀯𑀺𑀯𑀭𑀺𑀢𑁆𑀯𑀸 𑀬𑀸𑀢𑀺, 𑀢𑀲𑁆𑀲𑀧𑀺 𑀅𑀘𑁆𑀘𑀼𑀓𑁆𑀓𑀝𑁆𑀞𑀁. 𑀲𑀢𑁆𑀣𑀸 𑀢𑀁 𑀲𑀩𑁆𑀩𑀁 𑀦 𑀓𑀭𑁄𑀢𑀺.

𑀅𑀮𑁆𑀮𑀻𑀦𑀦𑁆𑀢𑀺 𑀬𑀣𑀸 𑀅𑀜𑁆𑀜𑁂𑀲𑀁 𑀲𑁂𑀤𑁂𑀦 𑀢𑀺𑀦𑁆𑀢𑀁 𑀅𑀮𑁆𑀮𑀻𑀬𑀢𑀺, 𑀦 𑀏𑀯𑀁 𑀲𑀢𑁆𑀣𑀼. 𑀅𑀧𑀓𑀝𑁆𑀞𑀦𑁆𑀢𑀺 𑀔𑀮𑀺𑀲𑀸𑀝𑀓𑁄 𑀯𑀺𑀬 𑀓𑀸𑀬𑀢𑁄 𑀫𑀼𑀘𑁆𑀘𑀺𑀢𑁆𑀯𑀸𑀧𑀺 𑀦 𑀢𑀺𑀝𑁆𑀞𑀢𑀺. 𑀯𑀸𑀢𑁄𑀢𑀺 𑀯𑁂𑀭𑀫𑁆𑀪𑀯𑀸𑀢𑁄𑀧𑀺 𑀉𑀝𑁆𑀞𑀳𑀺𑀢𑁆𑀯𑀸 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀸𑀤𑀫𑀡𑁆𑀟𑀦𑀸𑀦𑀼𑀬𑁄𑀕𑀦𑁆𑀢𑀺 𑀇𑀝𑁆𑀞𑀓𑀸𑀬 𑀖𑀁𑀲𑀦𑀸𑀤𑀻𑀳𑀺 𑀧𑀸𑀤𑀲𑁄𑀪𑀸𑀦𑀼𑀬𑁄𑀕𑀁. 𑀧𑀓𑁆𑀔𑀸𑀮𑁂𑀢𑁆𑀯𑀸𑀢𑀺 𑀧𑀸𑀤𑁂𑀦𑁂𑀯 𑀧𑀸𑀤𑀁 𑀥𑁄𑀯𑀺𑀢𑁆𑀯𑀸. 𑀲𑁄 𑀦𑁂𑀯 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀸𑀢𑀺𑀆𑀤𑀻𑀦𑀺 𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀦𑀁 𑀅𑀢𑁆𑀣𑀺𑀢𑀸𑀬 𑀯𑀤𑀢𑀺, 𑀇𑀭𑀺𑀬𑀸𑀧𑀣𑀲𑀦𑁆𑀢𑀢𑀁 𑀧𑀦 𑀤𑀺𑀲𑁆𑀯𑀸 𑀅𑀦𑀼𑀫𑀸𑀦𑁂𑀦 𑀯𑀤𑀢𑀺. 𑀥𑀫𑁆𑀫𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁. 𑀦 𑀉𑀲𑁆𑀲𑀸𑀤𑁂𑀢𑀻𑀢𑀺 𑀓𑀺𑀁 𑀫𑀳𑀸𑀭𑀝𑁆𑀞𑀺𑀓, 𑀓𑀺𑀁 𑀫𑀳𑀸𑀓𑀼𑀝𑀼𑀫𑁆𑀩𑀺𑀓𑀸𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀕𑁂𑀳𑀲𑁆𑀲𑀺𑀢𑀯𑀲𑁂𑀦 𑀦 𑀉𑀲𑁆𑀲𑀸𑀤𑁂𑀢𑀺. 𑀦 𑀅𑀧𑀲𑀸𑀤𑁂𑀢𑀻𑀢𑀺 ‘‘𑀓𑀺𑀁, 𑀉𑀧𑀸𑀲𑀓, 𑀓𑀣𑀁 𑀢𑁂 𑀯𑀺𑀳𑀸𑀭𑀫𑀕𑁆𑀕𑁄 𑀜𑀸𑀢𑁄? 𑀓𑀺𑀁 𑀪𑀬𑁂𑀦 𑀦𑀸𑀕𑀘𑁆𑀙𑀲𑀺? 𑀦 𑀳𑀺 𑀪𑀺𑀓𑁆𑀔𑀽 𑀓𑀺𑀜𑁆𑀘𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀫𑀸 𑀪𑀸𑀬𑀻’’𑀢𑀺 𑀯𑀸 ‘‘𑀓𑀺𑀁 𑀢𑀼𑀬𑁆𑀳𑀁 𑀏𑀯𑀁 𑀫𑀘𑁆𑀙𑀭𑀺𑀬𑀚𑀻𑀯𑀺𑀢𑀁 𑀦𑀸𑀫𑀸’’𑀢𑀺 𑀯𑀸 𑀆𑀤𑀻𑀦𑀺 𑀯𑀢𑁆𑀯𑀸 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀦 𑀅𑀧𑀲𑀸𑀤𑁂𑀢𑀺.

𑀯𑀺𑀲𑁆𑀲𑀝𑁆𑀞𑁄𑀢𑀺 𑀲𑀺𑀦𑀺𑀤𑁆𑀥𑁄 𑀅𑀧𑀮𑀺𑀩𑀼𑀤𑁆𑀥𑁄. 𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀯𑀺𑀜𑁆𑀜𑀸𑀧𑀦𑀻𑀬𑁄 𑀧𑀸𑀓𑀝𑁄, 𑀯𑀺𑀲𑁆𑀲𑀝𑁆𑀞𑀢𑁆𑀢𑀸𑀬𑁂𑀯 𑀘𑁂𑀲 𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺. 𑀫𑀜𑁆𑀚𑀽𑀢𑀺 𑀫𑀥𑀼𑀭𑁄. 𑀲𑀯𑀦𑀻𑀬𑁄𑀢𑀺 𑀲𑁄𑀢𑀲𑀼𑀔𑁄, 𑀫𑀥𑀼𑀭𑀢𑁆𑀢𑀸𑀬𑁂𑀯 𑀘𑁂𑀲 𑀲𑀯𑀦𑀻𑀬𑁄 𑀳𑁄𑀢𑀺. 𑀩𑀺𑀦𑁆𑀤𑀽𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑁄. 𑀅𑀯𑀺𑀲𑀸𑀭𑀻𑀢𑀺 𑀅𑀯𑀺𑀲𑀝𑁄, 𑀩𑀺𑀦𑁆𑀤𑀼𑀢𑁆𑀢𑀸𑀬𑁂𑀯 𑀘𑁂𑀲 𑀅𑀯𑀺𑀲𑀸𑀭𑀻 𑀳𑁄𑀢𑀺. 𑀕𑀫𑁆𑀪𑀻𑀭𑁄𑀢𑀺 𑀕𑀫𑁆𑀪𑀻𑀭𑀲𑀫𑀼𑀝𑁆𑀞𑀺𑀢𑁄. 𑀦𑀺𑀦𑁆𑀦𑀸𑀤𑀻𑀢𑀺 𑀦𑀺𑀦𑁆𑀦𑀸𑀤𑀯𑀸, 𑀕𑀫𑁆𑀪𑀻𑀭𑀢𑁆𑀢𑀸𑀬𑁂𑀯 𑀘𑁂𑀲 𑀦𑀺𑀦𑁆𑀦𑀸𑀤𑀻 𑀳𑁄𑀢𑀺. 𑀬𑀣𑀸𑀧𑀭𑀺𑀲𑀦𑁆𑀢𑀺 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀫𑁆𑀧𑀺 𑀏𑀓𑀸𑀩𑀤𑁆𑀥𑀧𑀭𑀺𑀲𑀁 𑀯𑀺𑀜𑁆𑀜𑀸𑀧𑁂𑀢𑀺. 𑀩𑀳𑀺𑀤𑁆𑀥𑀸𑀢𑀺 𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀺 𑀧𑀭𑀺𑀲𑀢𑁄 𑀩𑀳𑀺𑀤𑁆𑀥𑀸 𑀦 𑀕𑀘𑁆𑀙𑀢𑀺. 𑀢𑀲𑁆𑀫𑀸? 𑀲𑁄 𑀏𑀯𑀭𑀽𑀧𑁄 𑀫𑀥𑀼𑀭𑀲𑁆𑀲𑀭𑁄 𑀅𑀓𑀸𑀭𑀡𑀸 𑀫𑀸 𑀦𑀲𑁆𑀲𑀻𑀢𑀺. 𑀇𑀢𑀺 𑀪𑀕𑀯𑀢𑁄 𑀖𑁄𑀲𑁄 𑀧𑀭𑀺𑀲𑀸𑀬 𑀫𑀢𑁆𑀣𑀓𑁂𑀦𑁂𑀯 𑀘𑀭𑀢𑀺.

𑀅𑀯𑀮𑁄𑀓𑀬𑀫𑀸𑀦𑀸𑀢𑀺 𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀑𑀮𑁄𑀓𑁂𑀦𑁆𑀢𑀸𑀯 𑀧𑀘𑁆𑀘𑁄𑀲𑀓𑁆𑀓𑀺𑀢𑁆𑀯𑀸 𑀤𑀲𑁆𑀲𑀦𑀯𑀺𑀚𑀳𑀦𑀝𑁆𑀞𑀸𑀦𑁂 𑀯𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀅𑀯𑀺𑀚𑀳𑀺𑀢𑀢𑁆𑀢𑀸𑀢𑀺 𑀬𑁄 𑀳𑀺 𑀓𑀣𑀁 𑀲𑀼𑀢𑁆𑀯𑀸 𑀯𑀼𑀝𑁆𑀞𑀺𑀢𑁄 𑀅𑀜𑁆𑀜𑀁 𑀤𑀺𑀝𑁆𑀞𑀲𑀼𑀢𑀸𑀤𑀺𑀓𑀁 𑀓𑀣𑀁 𑀓𑀣𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀏𑀲 𑀲𑀪𑀸𑀯𑁂𑀦 𑀯𑀺𑀚𑀳𑀢𑀺 𑀦𑀸𑀫. 𑀬𑁄 𑀧𑀦 𑀲𑀼𑀢𑀥𑀫𑁆𑀫𑀓𑀣𑀸𑀬 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄𑀯 𑀕𑀘𑁆𑀙𑀢𑀺, 𑀅𑀬𑀁 𑀦 𑀯𑀺𑀚𑀳𑀢𑀺 𑀦𑀸𑀫, 𑀏𑀯𑀁 𑀅𑀯𑀺𑀚𑀳𑀦𑁆𑀢𑀪𑀸𑀯𑁂𑀦 𑀧𑀓𑁆𑀓𑀫𑀦𑁆𑀢𑀺. 𑀕𑀘𑁆𑀙𑀦𑁆𑀢𑀦𑁆𑀢𑀺 𑀭𑀚𑁆𑀚𑀼𑀬𑀦𑁆𑀢𑀯𑀲𑁂𑀦 𑀭𑀢𑀦𑀲𑀢𑁆𑀢𑀼𑀩𑁆𑀩𑁂𑀥𑀁 𑀲𑀼𑀯𑀡𑁆𑀡𑀕𑁆𑀖𑀺𑀓𑀁 𑀯𑀺𑀬 𑀕𑀘𑁆𑀙𑀦𑁆𑀢𑀁. 𑀅𑀤𑁆𑀤𑀲𑀸𑀫 𑀞𑀺𑀢𑀦𑁆𑀢𑀺 𑀲𑀫𑀼𑀲𑁆𑀲𑀺𑀢𑀓𑀜𑁆𑀘𑀦𑀧𑀩𑁆𑀩𑀢𑀁 𑀯𑀺𑀬 𑀞𑀺𑀢𑀁 𑀅𑀤𑁆𑀤𑀲𑀸𑀫. 𑀢𑀢𑁄 𑀘 𑀪𑀺𑀬𑁆𑀬𑁄𑀢𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀕𑀼𑀡𑁂 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀯𑀲𑁂𑀲𑁂 𑀕𑀼𑀡𑁂 𑀲𑀁𑀔𑀺𑀧𑀺𑀢𑁆𑀯𑀸 𑀓𑀮𑀸𑀧𑀁 𑀯𑀺𑀬 𑀲𑀼𑀢𑁆𑀢𑀓𑀩𑀤𑁆𑀥𑀁 𑀯𑀺𑀬 𑀘 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀏𑀯𑀫𑀸𑀳. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀫𑀬𑀸 𑀓𑀣𑀺𑀢𑀕𑀼𑀡𑁂𑀳𑀺 𑀅𑀓𑀣𑀺𑀢𑀸𑀯 𑀩𑀳𑀼𑀢𑀭𑀸. 𑀫𑀳𑀸𑀧𑀣𑀯𑀺𑀫𑀳𑀸𑀲𑀫𑀼𑀤𑁆𑀤𑀸𑀤𑀬𑁄 𑀯𑀺𑀬 𑀳𑀺 𑀢𑀲𑁆𑀲 𑀪𑁄𑀢𑁄 𑀅𑀦𑀦𑁆𑀢𑀸 𑀅𑀧𑁆𑀧𑀫𑁂𑀬𑁆𑀬𑀸 𑀕𑀼𑀡𑀸 𑀆𑀓𑀸𑀲𑀫𑀺𑀯 𑀯𑀺𑀢𑁆𑀣𑀸𑀭𑀺𑀢𑀸𑀢𑀺.

𑁩𑁯𑁦. 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑁄𑀢𑀺 𑀅𑀯𑀺𑀜𑁆𑀜𑀸𑀢𑀆𑀕𑀫𑀦𑁄. 𑀧𑀩𑁆𑀩𑀚𑀺𑀢𑁂 𑀉𑀧𑀲𑀗𑁆𑀓𑀫𑀦𑁆𑀢𑁂𑀦 𑀳𑀺 𑀘𑀻𑀯𑀭𑀧𑀭𑀺𑀓𑀫𑁆𑀫𑀸𑀤𑀺𑀲𑀫𑀬𑁂 𑀯𑀸 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀭𑀻𑀭𑀪𑀜𑁆𑀚𑀦𑀲𑀫𑀬𑁂 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑀩𑁆𑀩𑀁 𑀳𑁄𑀢𑀺, 𑀧𑀝𑀺𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀦 𑀚𑀸𑀬𑀢𑀺. 𑀧𑀼𑀭𑁂𑀢𑀭𑀁 𑀧𑀦 𑀑𑀓𑀸𑀲𑁂 𑀓𑀸𑀭𑀺𑀢𑁂 𑀤𑀺𑀯𑀸𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀪𑀺𑀓𑁆𑀔𑀼 𑀯𑀺𑀯𑀺𑀢𑁆𑀢𑁂 𑀞𑀸𑀦𑁂 𑀦𑀺𑀲𑀻𑀤𑀢𑀺, 𑀢𑀁 𑀆𑀕𑀦𑁆𑀢𑁆𑀯𑀸 𑀧𑀲𑁆𑀲𑀦𑁆𑀢𑀸 𑀤𑀲𑁆𑀲𑀦𑁂𑀦𑀧𑀺 𑀧𑀲𑀻𑀤𑀦𑁆𑀢𑀺, 𑀧𑀝𑀺𑀲𑀦𑁆𑀣𑀸𑀭𑁄 𑀚𑀸𑀬𑀢𑀺, 𑀧𑀜𑁆𑀳𑀩𑁆𑀬𑀸𑀓𑀭𑀡𑀁 𑀯𑀸 𑀥𑀫𑁆𑀫𑀓𑀣𑀸 𑀯𑀸 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀧𑀡𑁆𑀟𑀺𑀢𑀸 𑀑𑀓𑀸𑀲𑀁 𑀓𑀸𑀭𑁂𑀦𑁆𑀢𑀺. 𑀲𑁄 𑀘 𑀦𑁂𑀲𑀁 𑀅𑀜𑁆𑀜𑀢𑀭𑁄, 𑀢𑁂𑀦𑀲𑁆𑀲 𑀏𑀢𑀤𑀳𑁄𑀲𑀺. 𑀚𑀺𑀡𑁆𑀡𑁄 𑀯𑀼𑀟𑁆𑀠𑁄𑀢𑀺 𑀅𑀢𑁆𑀢𑀦𑁄 𑀉𑀕𑁆𑀕𑀢𑀪𑀸𑀯𑀁 𑀅𑀓𑀣𑁂𑀢𑁆𑀯𑀸 𑀓𑀲𑁆𑀫𑀸 𑀏𑀯𑀫𑀸𑀳? 𑀩𑀼𑀤𑁆𑀥𑀸 𑀦𑀸𑀫 𑀅𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀫𑀳𑀮𑁆𑀮𑀓𑀪𑀸𑀯𑀁 𑀜𑀢𑁆𑀯𑀸 𑀲𑀻𑀖𑀁 𑀑𑀓𑀸𑀲𑀁 𑀓𑀭𑀺𑀲𑁆𑀲𑀢𑀻𑀢𑀺 𑀏𑀯𑀫𑀸𑀳.

𑁩𑁯𑁧. 𑀑𑀭𑀫𑀺𑀬 𑀑𑀓𑀸𑀲𑀫𑀓𑀸𑀲𑀻𑀢𑀺 𑀯𑁂𑀕𑁂𑀦 𑀉𑀝𑁆𑀞𑀸𑀬 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀯𑀸 𑀑𑀓𑀸𑀲𑀫𑀓𑀸𑀲𑀺.

𑀬𑁂 𑀫𑁂𑀢𑀺 𑀬𑁂 𑀫𑀬𑀸. 𑀦𑀸𑀭𑀻𑀲𑀫𑀸𑀦𑀲𑀯𑁆𑀳𑀬𑀸𑀢𑀺 𑀦𑀸𑀭𑀻𑀲𑀫𑀸𑀦𑀦𑀸𑀫𑀁 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀢𑁂𑀦 𑀅𑀯𑁆𑀳𑀸𑀢𑀩𑁆𑀩𑀸𑀢𑀺 𑀦𑀸𑀭𑀻𑀲𑀫𑀸𑀦𑀲𑀯𑁆𑀳𑀬𑀸, 𑀇𑀢𑁆𑀣𑀺𑀮𑀺𑀗𑁆𑀕𑁂𑀦 𑀯𑀢𑁆𑀢𑀩𑁆𑀩𑀸𑀢𑀺 𑀯𑁄𑀳𑀸𑀭𑀓𑀼𑀲𑀮𑀢𑀸𑀬 𑀏𑀯𑀁 𑀯𑀤𑀢𑀺. 𑀧𑀳𑀽𑀢𑀚𑀺𑀯𑁆𑀳𑁄𑀢𑀺 𑀧𑀼𑀣𑀼𑀮𑀚𑀺𑀯𑁆𑀳𑁄. 𑀦𑀺𑀦𑁆𑀦𑀸𑀫𑀬𑁂𑀢𑀦𑁆𑀢𑀺 𑀦𑀻𑀳𑀭 𑀏𑀢𑀁.

𑁩𑁯𑁩. 𑀓𑁂𑀯𑀮𑀻𑀢𑀺 𑀲𑀓𑀮𑀕𑀼𑀡𑀲𑀫𑁆𑀧𑀦𑁆𑀦𑁄.

𑁩𑁯𑁪. 𑀧𑀘𑁆𑀘𑀪𑀸𑀲𑀻𑀢𑀺 𑀏𑀓𑀧𑁆𑀧𑀳𑀸𑀭𑁂𑀦 𑀧𑀼𑀘𑁆𑀙𑀺𑀢𑁂 𑀅𑀝𑁆𑀞 𑀧𑀜𑁆𑀳𑁂 𑀩𑁆𑀬𑀸𑀓𑀭𑁄𑀦𑁆𑀢𑁄 𑀧𑀢𑀺𑀅𑀪𑀸𑀲𑀺. 𑀬𑁄 𑀯𑁂𑀤𑀻𑀢𑀺 𑀬𑁄 𑀯𑀺𑀤𑀢𑀺 𑀚𑀸𑀦𑀸𑀢𑀺, 𑀬𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑁄 𑀧𑀸𑀓𑀝𑁄. 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀓𑀣𑀺𑀢𑀁. 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄𑀢𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀅𑀪𑀺𑀜𑁆𑀜𑀸 𑀯𑁄𑀲𑀺𑀢𑁄𑀢𑀺 𑀢𑀁 𑀅𑀭𑀳𑀢𑁆𑀢𑀁 𑀅𑀪𑀺𑀚𑀸𑀦𑀺𑀢𑁆𑀯𑀸 𑀯𑁄𑀲𑀺𑀢𑁄 𑀯𑁄𑀲𑀸𑀦𑀧𑁆𑀧𑀢𑁆𑀢𑁄. 𑀫𑀼𑀦𑀻𑀢𑀺 𑀅𑀭𑀳𑀢𑁆𑀢𑀜𑀸𑀡𑀫𑁄𑀦𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑁄.

𑀯𑀺𑀲𑀼𑀤𑁆𑀥𑀦𑁆𑀢𑀺 𑀧𑀡𑁆𑀟𑀭𑀁. 𑀫𑀼𑀢𑁆𑀢𑀁 𑀭𑀸𑀕𑁂𑀳𑀻𑀢𑀺 𑀓𑀺𑀮𑁂𑀲𑀭𑀸𑀕𑁂𑀳𑀺 𑀫𑀼𑀢𑁆𑀢𑀁. 𑀧𑀳𑀻𑀦𑀚𑀸𑀢𑀺𑀫𑀭𑀡𑁄𑀢𑀺 𑀚𑀸𑀢𑀺𑀓𑁆𑀔𑀬𑀧𑁆𑀧𑀢𑁆𑀢𑀢𑁆𑀢𑀸 𑀧𑀳𑀻𑀦𑀚𑀸𑀢𑀺𑀓𑁄, 𑀚𑀸𑀢𑀺𑀧𑀳𑀸𑀦𑁂𑀦𑁂𑀯 𑀧𑀳𑀻𑀦𑀫𑀭𑀡𑁄. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻𑀢𑀺 𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻 𑀲𑀓𑀮𑀪𑀸𑀯𑁄, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑀓𑀮𑀘𑀢𑀼𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺 𑀅𑀢𑁆𑀣𑁄. 𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀸𑀭𑀁 𑀕𑀢𑁄, 𑀲𑀩𑁆𑀩𑀥𑀫𑁆𑀫𑁂 𑀅𑀪𑀺𑀚𑀸𑀦𑀺𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀸𑀭𑀕𑀽𑀢𑀺 𑀯𑀸 𑀏𑀢𑁆𑀢𑀸𑀯𑀢𑀸 𑀧𑀭𑀺𑀜𑁆𑀜𑀸𑀧𑀸𑀭𑀕𑀽 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁, 𑀧𑀳𑀸𑀦𑀧𑀸𑀭𑀕𑀽 𑀲𑀩𑁆𑀩𑀓𑀺𑀮𑁂𑀲𑀸𑀦𑀁, 𑀪𑀸𑀯𑀦𑀸𑀧𑀸𑀭𑀕𑀽 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁, 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀸𑀭𑀕𑀽 𑀦𑀺𑀭𑁄𑀥𑀲𑁆𑀲, 𑀲𑀫𑀸𑀧𑀢𑁆𑀢𑀺𑀧𑀸𑀭𑀕𑀽 𑀲𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄. 𑀧𑀼𑀦 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀇𑀫𑀺𑀦𑀸 𑀅𑀪𑀺𑀜𑁆𑀜𑀸𑀧𑀸𑀭𑀕𑀽 𑀯𑀼𑀢𑁆𑀢𑁄𑀢𑀺. 𑀩𑀼𑀤𑁆𑀥𑁄 𑀢𑀸𑀤𑀻 𑀧𑀯𑀼𑀘𑁆𑀘𑀢𑀻𑀢𑀺 𑀢𑀸𑀤𑀺𑀲𑁄 𑀙𑀳𑀺 𑀆𑀓𑀸𑀭𑁂𑀳𑀺 𑀧𑀸𑀭𑀁 𑀕𑀢𑁄 𑀲𑀩𑁆𑀩𑀸𑀓𑀸𑀭𑁂𑀦 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀢𑀺 𑀧𑀯𑀼𑀘𑁆𑀘𑀢𑀻𑀢𑀺.

𑀓𑀺𑀁 𑀧𑀦 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑁂 𑀧𑀜𑁆𑀳𑀸 𑀯𑀺𑀲𑁆𑀲𑀚𑁆𑀚𑀺𑀢𑀸 𑀳𑁄𑀦𑁆𑀢𑀻𑀢𑀺? 𑀆𑀫 𑀯𑀺𑀲𑁆𑀲𑀚𑁆𑀚𑀺𑀢𑀸, 𑀘𑀺𑀢𑁆𑀢𑀁 𑀯𑀺𑀲𑀼𑀤𑁆𑀥𑀁 𑀚𑀸𑀦𑀸𑀢𑀺, 𑀫𑀼𑀢𑁆𑀢𑀁 𑀭𑀸𑀕𑁂𑀳𑀻𑀢𑀺 𑀇𑀫𑀺𑀦𑀸 𑀢𑀸𑀯 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄𑀢𑀺 𑀧𑀞𑀫𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺. 𑀧𑀸𑀭𑀕𑀽𑀢𑀺 𑀇𑀫𑀺𑀦𑀸 𑀯𑁂𑀤𑁂𑀳𑀺 𑀕𑀢𑀢𑁆𑀢𑀸 𑀯𑁂𑀤𑀕𑀽𑀢𑀺 𑀤𑀼𑀢𑀺𑀬𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺𑀆𑀤𑀻𑀳𑀺 𑀇𑀫𑀸𑀲𑀁 𑀢𑀺𑀲𑁆𑀲𑀦𑁆𑀦𑀁 𑀯𑀺𑀚𑁆𑀚𑀸𑀦𑀁 𑀅𑀢𑁆𑀣𑀺𑀢𑀸𑀬 𑀢𑁂𑀯𑀺𑀚𑁆𑀚𑁄𑀢𑀺 𑀢𑀢𑀺𑀬𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺. 𑀫𑀼𑀢𑁆𑀢𑀁 𑀭𑀸𑀕𑁂𑀳𑀺 𑀲𑀩𑁆𑀩𑀲𑁄𑀢𑀺 𑀇𑀫𑀺𑀦𑀸𑀯 𑀦𑀺𑀲𑁆𑀲𑀝𑀢𑁆𑀢𑀸 𑀧𑀸𑀧𑀥𑀫𑁆𑀫𑀸𑀦𑀁 𑀲𑁄𑀢𑁆𑀢𑀺𑀬𑁄𑀢𑀺 𑀘𑀢𑀼𑀢𑁆𑀣𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺. 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄𑀢𑀺 𑀇𑀫𑀺𑀦𑀸 𑀧𑀦 𑀅𑀭𑀳𑀢𑁆𑀢𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀧𑀜𑁆𑀘𑀫𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺. 𑀯𑁄𑀲𑀺𑀢𑁄𑀢𑀺 𑀘 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑁂𑀯𑀮𑀻𑀢𑀺 𑀘 𑀇𑀫𑁂𑀳𑀺 𑀙𑀝𑁆𑀞𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺. 𑀅𑀪𑀺𑀜𑁆𑀜𑀸 𑀯𑁄𑀲𑀺𑀢𑁄 𑀫𑀼𑀦𑀻𑀢𑀺 𑀇𑀫𑀺𑀦𑀸 𑀲𑀢𑁆𑀢𑀫𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺. 𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀩𑀼𑀤𑁆𑀥𑁄 𑀢𑀸𑀤𑀻 𑀧𑀯𑀼𑀘𑁆𑀘𑀢𑀻𑀢𑀺 𑀇𑀫𑀺𑀦𑀸 𑀅𑀝𑁆𑀞𑀫𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀺.

𑁩𑁯𑁫. 𑀤𑀸𑀦𑀓𑀣𑀦𑁆𑀢𑀺𑀆𑀤𑀻𑀦𑀺 𑀳𑁂𑀝𑁆𑀞𑀸 𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. 𑀧𑀘𑁆𑀘𑀧𑀸𑀤𑀻𑀢𑀺 𑀧𑀝𑀺𑀧𑀚𑁆𑀚𑀺. 𑀥𑀫𑁆𑀫𑀲𑁆𑀲𑀸𑀦𑀼𑀥𑀫𑁆𑀫𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀥𑀫𑁆𑀫𑁄 𑀦𑀸𑀫 𑀅𑀭𑀳𑀢𑁆𑀢𑀫𑀕𑁆𑀕𑁄, 𑀅𑀦𑀼𑀥𑀫𑁆𑀫𑁄 𑀦𑀸𑀫 𑀳𑁂𑀝𑁆𑀞𑀺𑀫𑀸 𑀢𑀬𑁄 𑀫𑀕𑁆𑀕𑀸 𑀢𑀻𑀡𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀢𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀧𑀝𑀺𑀮𑀪𑀻𑀢𑀺 𑀅𑀢𑁆𑀣𑁄. 𑀦 𑀘 𑀫𑀁 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀳𑁂𑀲𑁂𑀲𑀻𑀢𑀺 𑀫𑀜𑁆𑀘 𑀥𑀫𑁆𑀫𑀓𑀸𑀭𑀡𑀸 𑀦 𑀓𑀺𑀮𑀫𑁂𑀲𑀺, 𑀦 𑀧𑀼𑀦𑀧𑁆𑀧𑀼𑀦𑀁 𑀓𑀣𑀸𑀧𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀧𑀦 𑀧𑀤𑁂𑀦 𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑁂𑀦𑁂𑀯 𑀓𑀽𑀝𑀁 𑀕𑀳𑀺𑀢𑀦𑁆𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑁂𑀮𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀽𑀢𑀺𑀆𑀤𑀺 𑀧𑁄𑀢𑀮𑀺𑀬𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀅𑀟𑁆𑀠𑀢𑁂𑀴𑀲𑁂𑀳𑀻𑀢𑀺 𑀅𑀟𑁆𑀠𑁂𑀦 𑀢𑁂𑀴𑀲𑁂𑀳𑀺, 𑀤𑁆𑀯𑀸𑀤𑀲𑀳𑀺 𑀲𑀢𑁂𑀳𑀺 𑀧𑀜𑁆𑀜𑀸𑀲𑀸𑀬 𑀘 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀧𑀦 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁂 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽𑀬𑁂𑀯 𑀲𑀩𑁆𑀩𑁂 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸 𑀔𑀻𑀡𑀸𑀲𑀯𑀸. 𑀓𑁂𑀡𑀺𑀬𑁄𑀢𑀺 𑀢𑀲𑁆𑀲 𑀦𑀸𑀫𑀁, 𑀚𑀝𑀺𑀮𑁄𑀢𑀺 𑀢𑀸𑀧𑀲𑁄. 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄, 𑀥𑀦𑀭𑀓𑁆𑀔𑀡𑀢𑁆𑀣𑀸𑀬 𑀧𑀦 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀲𑀫𑀸𑀤𑀸𑀬 𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀪𑀽𑀫𑀺𑀪𑀸𑀕𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀅𑀲𑁆𑀲𑀫𑀁 𑀓𑀸𑀭𑁂𑀢𑁆𑀯𑀸 𑀯𑀲𑀢𑀺 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀯𑀡𑀺𑀚𑁆𑀚𑀁 𑀧𑀬𑁄𑀚𑁂𑀢𑁆𑀯𑀸 𑀓𑀼𑀮𑀲𑀳𑀲𑁆𑀲𑀲𑁆𑀲 𑀦𑀺𑀲𑁆𑀲𑀬𑁄 𑀳𑀼𑀢𑁆𑀯𑀸, 𑀅𑀲𑁆𑀲𑀫𑁂𑀧𑀺 𑀘𑀲𑁆𑀲 𑀏𑀓𑁄 𑀢𑀸𑀮𑀭𑀼𑀓𑁆𑀔𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑀁 𑀲𑁄𑀯𑀡𑁆𑀡𑀫𑀬𑀁 𑀢𑀸𑀮𑀨𑀮𑀁 𑀫𑀼𑀜𑁆𑀘𑀢𑀻𑀢𑀺 𑀯𑀤𑀦𑁆𑀢𑀺. 𑀲𑁄 𑀤𑀺𑀯𑀸 𑀓𑀸𑀲𑀸𑀬𑀸𑀦𑀺 𑀥𑀸𑀭𑁂𑀢𑀺, 𑀚𑀝𑀸 𑀘 𑀩𑀦𑁆𑀥𑀢𑀺, 𑀭𑀢𑁆𑀢𑀺𑀁 𑀓𑀸𑀫𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀧𑀸𑀦𑀓𑀸𑀦𑀺𑀲𑀁𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬. 𑀅𑀬𑀜𑁆𑀳𑀺 𑀓𑁂𑀡𑀺𑀬𑁄 𑀢𑀼𑀘𑁆𑀙𑀳𑀢𑁆𑀣𑁄 𑀪𑀕𑀯𑀢𑁄 𑀤𑀲𑁆𑀲𑀦𑀸𑀬 𑀕𑀦𑁆𑀢𑀼𑀁 𑀮𑀚𑁆𑀚𑀸𑀬𑀫𑀸𑀦𑁄 𑁋 ‘‘𑀯𑀺𑀓𑀸𑀮𑀪𑁄𑀚𑀦𑀸 𑀯𑀺𑀭𑀢𑀸𑀦𑀫𑁆𑀧𑀺 𑀧𑀸𑀦𑀓𑀁 𑀓𑀧𑁆𑀧𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀼𑀲𑀗𑁆𑀔𑀢𑀩𑀤𑀭𑀧𑀸𑀦𑀁 𑀧𑀜𑁆𑀘𑀳𑀺 𑀓𑀸𑀚𑀲𑀢𑁂𑀳𑀺 𑀕𑀸𑀳𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀏𑀯𑀁 𑀕𑀢𑀪𑀸𑀯𑁄 𑀘𑀲𑁆𑀲 𑁋 ‘‘𑀅𑀣 𑀔𑁄 𑀓𑁂𑀡𑀺𑀬𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀳𑀭𑀸𑀧𑁂𑀬𑁆𑀬’’𑀦𑁆𑀢𑀺 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁦𑁦) 𑀧𑀸𑀴𑀺𑀆𑀭𑀼𑀴𑁆𑀳𑁄𑀬𑁂𑀯.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸𑀢𑀺 𑀓𑀲𑁆𑀫𑀸 𑀧𑀼𑀦𑀧𑁆𑀧𑀼𑀦𑀁 𑀧𑀝𑀺𑀓𑁆𑀔𑀺𑀧𑀺? 𑀢𑀺𑀢𑁆𑀣𑀺𑀬𑀸𑀦𑀁 𑀧𑀝𑀺𑀓𑁆𑀔𑁂𑀧𑀧𑀲𑀦𑁆𑀦𑀢𑀸𑀬, 𑀅𑀓𑀸𑀭𑀡𑀫𑁂𑀢𑀁, 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀁 𑀧𑀘𑁆𑀘𑀬𑀳𑁂𑀢𑀼 𑀏𑀯𑀭𑀽𑀧𑀁 𑀓𑁄𑀳𑀜𑁆𑀜𑀁. 𑀅𑀬𑀁 𑀧𑀦 𑀅𑀟𑁆𑀠𑀢𑁂𑀴𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀤𑀺𑀲𑁆𑀯𑀸 𑀏𑀢𑁆𑀢𑀓𑀸𑀦𑀁𑀬𑁂𑀯 𑀪𑀺𑀓𑁆𑀔𑀁 𑀧𑀝𑀺𑀬𑀸𑀤𑁂𑀲𑁆𑀲𑀢𑀺, 𑀲𑁆𑀯𑁂𑀯 𑀲𑁂𑀮𑁄 𑀢𑀻𑀳𑀺 𑀧𑀼𑀭𑀺𑀲𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀢𑀺. 𑀅𑀬𑀼𑀢𑁆𑀢𑀁 𑀔𑁄 𑀧𑀦 𑀦𑀯𑀓𑁂 𑀅𑀜𑁆𑀜𑀢𑁄 𑀧𑁂𑀲𑁂𑀢𑁆𑀯𑀸 𑀇𑀫𑁂𑀳𑁂𑀯 𑀲𑀤𑁆𑀥𑀺𑀁 𑀕𑀦𑁆𑀢𑀼𑀁, 𑀇𑀫𑁂 𑀯𑀸 𑀅𑀜𑁆𑀜𑀢𑁄 𑀧𑁂𑀲𑁂𑀢𑁆𑀯𑀸 𑀦𑀯𑀓𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑀼𑀁. 𑀅𑀣𑀸𑀧𑀺 𑀲𑀩𑁆𑀩𑁂 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀺, 𑀪𑀺𑀓𑁆𑀔𑀸𑀳𑀸𑀭𑁄 𑀦𑀧𑁆𑀧𑀳𑁄𑀲𑁆𑀲𑀢𑀺. 𑀢𑀢𑁄 𑀪𑀺𑀓𑁆𑀔𑀽𑀲𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀺𑀲𑁆𑀲𑀦𑁆𑀢𑀺 𑁋 ‘‘𑀘𑀺𑀭𑀲𑁆𑀲𑀸𑀧𑀺 𑀓𑁂𑀡𑀺𑀬𑁄 𑀲𑀫𑀡𑀁 𑀕𑁄𑀢𑀫𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀬𑀸𑀧𑀦𑀫𑀢𑁆𑀢𑀁 𑀤𑀸𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺, 𑀲𑀬𑀫𑁆𑀧𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀪𑀯𑀺𑀲𑁆𑀲𑀢𑀺. 𑀧𑀝𑀺𑀓𑁆𑀔𑁂𑀧𑁂 𑀧𑀦 𑀓𑀢𑁂 ‘‘𑀲𑀫𑀡𑁄 𑀕𑁄𑀢𑀫𑁄 𑀧𑀼𑀦𑀧𑁆𑀧𑀼𑀦𑀁 ‘𑀢𑁆𑀯𑀜𑁆𑀘 𑀩𑁆𑀭𑀸𑀳𑁆𑀫𑀡𑁂𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑁄’𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀸𑀫𑀁 𑀕𑀡𑁆𑀳𑀸𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂𑀧𑀺 𑀦𑀺𑀫𑀦𑁆𑀢𑁂𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀢𑀢𑁄 𑀩𑁆𑀭𑀸𑀳𑁆𑀫𑀡𑁂 𑀧𑀸𑀝𑀺𑀬𑁂𑀓𑁆𑀓𑀁 𑀦𑀺𑀫𑀦𑁆𑀢𑁂𑀲𑁆𑀲𑀢𑀺, 𑀢𑁂 𑀢𑁂𑀦 𑀦𑀺𑀫𑀦𑁆𑀢𑀺𑀢𑀸 𑀪𑀺𑀓𑁆𑀔𑀽 𑀳𑀼𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺. 𑀏𑀯𑀫𑀲𑁆𑀲 𑀲𑀤𑁆𑀥𑀸 𑀅𑀦𑀼𑀭𑀓𑁆𑀔𑀺𑀢𑀸 𑀪𑀯𑀺𑀲𑁆𑀲𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀝𑀺𑀓𑁆𑀔𑀺𑀧𑀺. 𑀓𑀺𑀜𑁆𑀘𑀸𑀧𑀺 𑀔𑁄, 𑀪𑁄𑀢𑀺 𑀇𑀫𑀺𑀦𑀸 𑀇𑀤𑀁 𑀤𑀻𑀧𑁂𑀢𑀺, 𑁋 ‘‘𑀪𑁄 𑀕𑁄𑀢𑀫, 𑀓𑀺𑀁 𑀚𑀸𑀢𑀁 𑀬𑀤𑀺 𑀅𑀳𑀁 𑀩𑁆𑀭𑀸𑀳𑁆𑀫𑀡𑁂𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑁄, 𑀅𑀥𑀺𑀯𑀸𑀲𑁂𑀢𑀼 𑀪𑀯𑀁 𑀕𑁄𑀢𑀫𑁄, 𑀅𑀳𑀁 𑀩𑁆𑀭𑀸𑀳𑁆𑀫𑀡𑀸𑀦𑀫𑁆𑀧𑀺 𑀤𑀸𑀢𑀼𑀁 𑀲𑀓𑁆𑀓𑁄𑀫𑀺 𑀢𑀼𑀫𑁆𑀳𑀸𑀓𑀫𑁆𑀧𑀻’’𑀢𑀺.

𑀓𑀸𑀬𑀯𑁂𑀬𑁆𑀬𑀸𑀯𑀝𑀺𑀓𑀦𑁆𑀢𑀺 𑀓𑀸𑀬𑀯𑁂𑀬𑁆𑀬𑀸𑀯𑀘𑁆𑀘𑀁. 𑀫𑀡𑁆𑀟𑀮𑀫𑀸𑀴𑀦𑁆𑀢𑀺 𑀤𑀼𑀲𑁆𑀲𑀫𑀡𑁆𑀟𑀧𑀁.

𑁩𑁯𑁭. 𑀆𑀯𑀸𑀳𑁄𑀢𑀺 𑀓𑀜𑁆𑀜𑀸𑀕𑀳𑀡𑀁. 𑀯𑀺𑀯𑀸𑀳𑁄𑀢𑀺 𑀓𑀜𑁆𑀜𑀸𑀤𑀸𑀦𑀁. 𑀲𑁄 𑀫𑁂 𑀦𑀺𑀫𑀦𑁆𑀢𑀺𑀢𑁄𑀢𑀺 𑀲𑁄 𑀫𑀬𑀸 𑀦𑀺𑀫𑀦𑁆𑀢𑀺𑀢𑁄. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀧𑀭𑀺𑀧𑀓𑁆𑀓𑁄𑀧𑀦𑀺𑀲𑁆𑀲𑀬𑀢𑁆𑀢𑀸 𑀩𑀼𑀤𑁆𑀥𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 𑀅𑀫𑀢𑁂𑀦𑁂𑀯𑀸𑀪𑀺𑀲𑀺𑀢𑁆𑀢𑁄 𑀧𑀲𑀸𑀤𑀁 𑀆𑀯𑀺𑀓𑀭𑁄𑀦𑁆𑀢𑁄 𑀩𑀼𑀤𑁆𑀥𑁄𑀢𑀺, 𑀪𑁄 𑀓𑁂𑀡𑀺𑀬, 𑀯𑀤𑁂𑀲𑀻𑀢𑀺 𑀆𑀳. 𑀓𑁂𑀡𑀺𑀬𑁄 𑀬𑀣𑀸𑀪𑀽𑀢𑀁 𑀆𑀘𑀺𑀓𑁆𑀔𑀦𑁆𑀢𑁄 𑀩𑀼𑀤𑁆𑀥𑁄𑀢𑀺, 𑀪𑁄 𑀲𑁂𑀮, 𑀯𑀤𑀸𑀫𑀻𑀢𑀺 𑀆𑀳. 𑀢𑀢𑁄 𑀦𑀁 𑀧𑀼𑀦𑀧𑀺 𑀤𑀴𑁆𑀳𑀻𑀓𑀭𑀡𑀢𑁆𑀣𑀁 𑀧𑀼𑀘𑁆𑀙𑀺, 𑀇𑀢𑀭𑁄𑀧𑀺 𑀢𑀣𑁂𑀯 𑀆𑀭𑁄𑀘𑁂𑀲𑀺.

𑁩𑁯𑁮. 𑀅𑀣𑀲𑁆𑀲 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀳𑀺𑀧𑀺 𑀩𑀼𑀤𑁆𑀥𑀲𑀤𑁆𑀤𑀲𑁆𑀲𑁂𑀯 𑀤𑀼𑀮𑁆𑀮𑀪𑀪𑀸𑀯𑀁 𑀲𑀫𑁆𑀧𑀲𑁆𑀲𑀢𑁄. 𑀏𑀢𑀤𑀳𑁄𑀲𑀻𑀢𑀺. 𑀏𑀢𑀁 ‘‘𑀖𑁄𑀲𑁄𑀧𑀺 𑀔𑁄’’𑀢𑀺𑀆𑀤𑀺 𑀅𑀳𑁄𑀲𑀺. 𑀦𑀻𑀮𑀯𑀦𑀭𑀸𑀚𑀻𑀢𑀺 𑀦𑀻𑀮𑀯𑀡𑁆𑀡𑀭𑀼𑀓𑁆𑀔𑀧𑀦𑁆𑀢𑀺. 𑀧𑀤𑁂 𑀧𑀤𑀦𑁆𑀢𑀺 𑀧𑀤𑀧𑁆𑀧𑀫𑀸𑀡𑁂 𑀧𑀤𑀁. 𑀅𑀘𑁆𑀘𑀸𑀲𑀦𑁆𑀦𑁂 𑀳𑀺 𑀅𑀢𑀺𑀤𑀽𑀭𑁂 𑀯𑀸 𑀧𑀸𑀤𑁂 𑀦𑀺𑀓𑁆𑀔𑀺𑀧𑀫𑀸𑀦𑁂 𑀲𑀤𑁆𑀤𑁄 𑀉𑀝𑁆𑀞𑀸𑀢𑀺, 𑀢𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀏𑀯𑀫𑀸𑀳. 𑀲𑀻𑀳𑀸𑀯 𑀏𑀓𑀘𑀭𑀸𑀢𑀺 𑀕𑀡𑀯𑀸𑀲𑀻 𑀲𑀻𑀳𑁄 𑀲𑀻𑀳𑀧𑁄𑀢𑀓𑀸𑀤𑀻𑀳𑀺 𑀲𑀤𑁆𑀥𑀺𑀁 𑀧𑀫𑀸𑀤𑀁 𑀆𑀧𑀚𑁆𑀚𑀢𑀺, 𑀏𑀓𑀘𑀭𑁄 𑀅𑀧𑁆𑀧𑀫𑀢𑁆𑀢𑁄 𑀳𑁄𑀢𑀺. 𑀇𑀢𑀺 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀏𑀓𑀘𑀭𑀲𑀻𑀳𑁂𑀦 𑀑𑀧𑀫𑁆𑀫𑀁 𑀓𑀭𑁄𑀢𑀺. 𑀫𑀸 𑀫𑁂 𑀪𑁄𑀦𑁆𑀢𑁄𑀢𑀺 𑀆𑀘𑀸𑀭𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀆𑀳. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂 𑀢𑀼𑀫𑁆𑀳𑁂 𑀓𑀣𑀸𑀯𑀸𑀭𑀁 𑀅𑀮𑀪𑀺𑀢𑁆𑀯𑀸 𑀫𑀫 𑀓𑀣𑀸𑀬 𑀅𑀦𑁆𑀢𑀭𑁂 𑀓𑀣𑀁 𑀧𑀯𑁂𑀲𑁂𑀲𑁆𑀲𑀣, ‘‘𑀅𑀦𑁆𑀢𑁂𑀯𑀸𑀲𑀺𑀓𑁂 𑀲𑀺𑀓𑁆𑀔𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺 𑀫𑀬𑁆𑀳𑀁 𑀕𑀭𑀳𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀑𑀓𑀸𑀲𑀁 𑀧𑀲𑁆𑀲𑀺𑀢𑁆𑀯𑀸 𑀫𑀦𑁆𑀢𑁂𑀬𑁆𑀬𑀸𑀣𑀸𑀢𑀺. 𑀦𑁄 𑀘 𑀔𑁄 𑀦𑀁 𑀚𑀸𑀦𑀸𑀫𑀻𑀢𑀺 𑀯𑀺𑀧𑀲𑁆𑀲𑀻𑀧𑀺 𑀩𑁄𑀥𑀺𑀲𑀢𑁆𑀢𑁄 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀢𑁆𑀣𑁂𑀭𑀧𑀩𑁆𑀩𑀚𑀺𑀢𑀧𑀭𑀺𑀯𑀸𑀭𑁄 𑀲𑀢𑁆𑀢 𑀫𑀸𑀲𑀸𑀦𑀺 𑀩𑁄𑀥𑀺𑀲𑀢𑁆𑀢𑀘𑀸𑀭𑀺𑀓𑀁 𑀘𑀭𑀺, 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀅𑀫𑁆𑀳𑀸𑀓𑀫𑁆𑀧𑀺 𑀩𑁄𑀥𑀺𑀲𑀢𑁆𑀢𑁄 𑀙𑀩𑁆𑀩𑀲𑁆𑀲𑀸𑀦𑀺 𑀩𑁄𑀥𑀺𑀲𑀢𑁆𑀢𑀘𑀸𑀭𑀺𑀓𑀁 𑀘𑀭𑀺. 𑀏𑀯𑀁 𑀧𑀭𑀺𑀧𑀼𑀡𑁆𑀡𑀲𑀭𑀻𑀭𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀧𑀺 𑀩𑀼𑀤𑁆𑀥𑀸 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑁄 ‘‘𑀦𑁄 𑀘 𑀔𑁄 𑀦𑀁 𑀚𑀸𑀦𑀸𑀫𑀻’’𑀢𑀺 𑀆𑀳.

𑁩𑁯𑁯. 𑀧𑀭𑀺𑀧𑀼𑀡𑁆𑀡𑀓𑀸𑀬𑁄𑀢𑀺 𑀮𑀓𑁆𑀔𑀡𑁂𑀳𑀺 𑀧𑀭𑀺𑀧𑀼𑀡𑁆𑀡𑀢𑀸𑀬 𑀅𑀳𑀻𑀦𑀗𑁆𑀕𑀢𑀸𑀬 𑀘 𑀧𑀭𑀺𑀧𑀼𑀡𑁆𑀡𑀲𑀭𑀻𑀭𑁄. 𑀲𑀼𑀭𑀼𑀘𑀻𑀢𑀺 𑀲𑀼𑀦𑁆𑀤𑀭𑀲𑀭𑀻𑀭𑀧𑁆𑀧𑀪𑁄. 𑀲𑀼𑀚𑀸𑀢𑁄𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸 𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀼𑀦𑀺𑀩𑁆𑀩𑀢𑁆𑀢𑁄. 𑀘𑀸𑀭𑀼𑀤𑀲𑁆𑀲𑀦𑁄𑀢𑀺 𑀲𑀼𑀘𑀺𑀭𑀫𑁆𑀧𑀺 𑀧𑀲𑁆𑀲𑀦𑁆𑀢𑀸𑀦𑀁 𑀅𑀢𑀺𑀢𑁆𑀢𑀺𑀚𑀦𑀓𑁄 𑀫𑀦𑁄𑀳𑀭𑀤𑀲𑁆𑀲𑀦𑁄. 𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀲𑀼𑀯𑀡𑁆𑀡𑀲𑀤𑀺𑀲𑀯𑀡𑁆𑀡𑁄. 𑀲𑀼𑀲𑀼𑀓𑁆𑀓𑀤𑀸𑀞𑁄𑀢𑀺 𑀲𑀼𑀝𑁆𑀞𑀼 𑀲𑀼𑀓𑁆𑀓𑀤𑀸𑀞𑁄. 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀢𑀺 𑀧𑀞𑀫𑀁 𑀯𑀼𑀢𑁆𑀢𑀩𑁆𑀬𑀜𑁆𑀚𑀦𑀸𑀦𑁂𑀯 𑀯𑀘𑀦𑀦𑁆𑀢𑀭𑁂𑀦 𑀦𑀺𑀕𑀫𑁂𑀦𑁆𑀢𑁄 𑀆𑀳.

𑀇𑀤𑀸𑀦𑀺 𑀢𑁂𑀲𑀼 𑀮𑀓𑁆𑀔𑀡𑁂𑀲𑀼 𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀢𑀸𑀦𑀺 𑀕𑀳𑁂𑀢𑁆𑀯𑀸 𑀣𑁄𑀫𑁂𑀦𑁆𑀢𑁄 𑀧𑀲𑀦𑁆𑀦𑀦𑁂𑀢𑁆𑀢𑁄𑀢𑀺𑀆𑀤𑀺𑀫𑀸𑀳. 𑀪𑀕𑀯𑀸 𑀳𑀺 𑀧𑀜𑁆𑀘𑀯𑀡𑁆𑀡𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀦𑁆𑀦𑀦𑁂𑀢𑁆𑀢𑁄, 𑀧𑀼𑀡𑁆𑀡𑀘𑀦𑁆𑀤𑀲𑀤𑀺𑀲𑀫𑀼𑀔𑀢𑀸𑀬 𑀲𑀼𑀫𑀼𑀔𑁄, 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸 𑀩𑁆𑀭𑀳𑀸, 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑀢𑀸𑀬 𑀉𑀚𑀼, 𑀚𑀼𑀢𑀺𑀫𑀦𑁆𑀢𑀢𑀸𑀬 𑀧𑀢𑀸𑀧𑀯𑀸. 𑀬𑀫𑁆𑀧𑀺 𑀘𑁂𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀢𑀁 ‘‘𑀫𑀚𑁆𑀛𑁂 𑀲𑀫𑀡𑀲𑀗𑁆𑀖𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀣𑁄𑀫𑀬𑀢𑀸 𑀧𑀼𑀦 𑀯𑀼𑀢𑁆𑀢𑀁. 𑀏𑀤𑀺𑀲𑁄 𑀳𑀺 𑀏𑀯𑀁 𑀯𑀺𑀭𑁄𑀘𑀢𑀺. 𑀉𑀢𑁆𑀢𑀭𑀕𑀸𑀣𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀉𑀢𑁆𑀢𑀫𑀯𑀡𑁆𑀡𑀻𑀦𑁄𑀢𑀺 𑀉𑀢𑁆𑀢𑀫𑀯𑀡𑁆𑀡𑀲𑀫𑁆𑀧𑀦𑁆𑀦𑀲𑁆𑀲. 𑀭𑀣𑁂𑀲𑀪𑁄𑀢𑀺 𑀉𑀢𑁆𑀢𑀫𑀲𑀸𑀭𑀣𑀺. 𑀚𑀫𑁆𑀩𑀼𑀲𑀡𑁆𑀟𑀲𑁆𑀲𑀸𑀢𑀺 𑀚𑀫𑁆𑀩𑀼𑀤𑀻𑀧𑀲𑁆𑀲. 𑀧𑀸𑀓𑀝𑁂𑀦 𑀇𑀲𑁆𑀲𑀭𑀺𑀬𑀁 𑀇𑀲𑁆𑀲𑀭𑁄 𑀳𑁄𑀢𑀺.

𑀔𑀢𑁆𑀢𑀺𑀬𑀸𑀢𑀺 𑀚𑀸𑀢𑀺𑀔𑀢𑁆𑀢𑀺𑀬𑀸. 𑀪𑁄𑀕𑀻𑀢𑀺 𑀪𑁄𑀕𑀺𑀬𑀸. 𑀭𑀸𑀚𑀸𑀦𑁄𑀢𑀺 𑀬𑁂 𑀓𑁂𑀘𑀺 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀸. 𑀭𑀸𑀚𑀸𑀪𑀺𑀭𑀸𑀚𑀸𑀢𑀺 𑀭𑀸𑀚𑀽𑀦𑀁 𑀧𑀽𑀚𑀦𑀻𑀬𑁄, 𑀅𑀥𑀺𑀭𑀸𑀚𑀸 𑀳𑀼𑀢𑁆𑀯𑀸, 𑀘𑀓𑁆𑀓𑀯𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀦𑀼𑀚𑀺𑀦𑁆𑀤𑁄𑀢𑀺 𑀫𑀦𑀼𑀲𑁆𑀲𑀸𑀥𑀺𑀧𑀢𑀺 𑀧𑀭𑀫𑀺𑀲𑁆𑀲𑀭𑁄 𑀳𑀼𑀢𑁆𑀯𑀸.

𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑁋 ‘‘𑀬𑁂 𑀢𑁂 𑀪𑀯𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂 𑀲𑀓𑀯𑀡𑁆𑀡𑁂 𑀪𑀜𑁆𑀜𑀫𑀸𑀦𑁂 𑀅𑀢𑁆𑀢𑀸𑀦𑀁 𑀧𑀸𑀢𑀼𑀓𑀭𑁄𑀦𑁆𑀢𑀻’’𑀢𑀺 𑀇𑀫𑀁 𑀲𑁂𑀮𑀲𑁆𑀲 𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑁄 𑀭𑀸𑀚𑀸𑀳𑀫𑀲𑁆𑀫𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀁 𑀫𑀁 𑀢𑁆𑀯𑀁 𑀲𑁂𑀮 ‘‘𑀭𑀸𑀚𑀸 𑀅𑀭𑀳𑀲𑀺 𑀪𑀯𑀺𑀢𑀼’’𑀦𑁆𑀢𑀺 𑀬𑀸𑀘𑀲𑀺, 𑀏𑀢𑁆𑀣 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀳𑁄𑀢𑀺 𑀭𑀸𑀚𑀸𑀳𑀫𑀲𑁆𑀫𑀺. 𑀲𑀢𑀺 𑀘 𑀭𑀸𑀚𑀢𑁆𑀢𑁂 𑀬𑀣𑀸 𑀅𑀜𑁆𑀜𑁄 𑀭𑀸𑀚𑀸 𑀬𑁄𑀚𑀦𑀲𑀢𑀁 𑀯𑀸 𑀅𑀦𑀼𑀲𑀸𑀲𑀢𑀺 𑀬𑁄𑀚𑀦𑀲𑀳𑀲𑁆𑀲𑀁 𑀯𑀸, 𑀘𑀓𑁆𑀓𑀯𑀢𑁆𑀢𑀻 𑀳𑀼𑀢𑁆𑀯𑀸𑀧𑀺 𑀘𑀢𑀼𑀤𑀻𑀧𑀧𑀭𑀺𑀬𑀦𑁆𑀢𑀫𑀢𑁆𑀢𑀁 𑀯𑀸, 𑀦𑀸𑀳𑀫𑁂𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑀯𑀺𑀲𑀬𑁄, 𑀅𑀳𑀜𑁆𑀳𑀺 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄 𑀪𑀯𑀕𑁆𑀕𑀢𑁄 𑀅𑀯𑀻𑀘𑀺𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀢𑀺𑀭𑀺𑀬𑀁 𑀅𑀧𑁆𑀧𑀫𑀸𑀡𑀮𑁄𑀓𑀥𑀸𑀢𑀼𑀬𑁄 𑀅𑀦𑀼𑀲𑀸𑀲𑀸𑀫𑀺. 𑀬𑀸𑀯𑀢𑀸 𑀳𑀺 𑀅𑀧𑀤𑀤𑁆𑀯𑀺𑀧𑀤𑀸𑀤𑀺𑀪𑁂𑀤𑀸 𑀲𑀢𑁆𑀢𑀸, 𑀅𑀳𑀁 𑀢𑁂𑀲𑀁 𑀅𑀕𑁆𑀕𑁄. 𑀦 𑀳𑀺 𑀫𑁂 𑀓𑁄𑀘𑀺 𑀲𑀻𑀮𑁂𑀦 𑀯𑀸…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦 𑀯𑀸 𑀧𑀝𑀺𑀪𑀸𑀕𑁄 𑀅𑀢𑁆𑀣𑀺, 𑀲𑁆𑀯𑀸𑀳𑀁 𑀏𑀯𑀁 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄 𑀅𑀦𑀼𑀢𑁆𑀢𑀭𑁂𑀦𑁂𑀯 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂𑀦 𑀥𑀫𑁆𑀫𑁂𑀦 𑀘𑀓𑁆𑀓𑀁 𑀯𑀢𑁆𑀢𑁂𑀫𑀺. 𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸𑀢𑀺 𑀆𑀡𑀸𑀘𑀓𑁆𑀓𑀁, 𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀦 𑀥𑀫𑁆𑀫𑀘𑀓𑁆𑀓𑀫𑁂𑀯 𑀯𑀸. 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀬𑀁 𑀘𑀓𑁆𑀓𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀳𑁄𑀢𑀺 𑀲𑀫𑀡𑁂𑀦 𑀯𑀸…𑀧𑁂… 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀦𑁆𑀢𑀺.

𑀏𑀯𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀦𑁆𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀲𑁂𑀮𑁄 𑀧𑀼𑀦 𑀤𑀴𑁆𑀳𑀻𑀓𑀭𑀡𑀢𑁆𑀣𑀁 𑀲𑀫𑁆𑀩𑀼𑀤𑁆𑀥𑁄 𑀧𑀝𑀺𑀚𑀸𑀦𑀸𑀲𑀻𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀓𑁄 𑀦𑀼 𑀲𑁂𑀦𑀸𑀧𑀢𑀻𑀢𑀺 𑀭𑀜𑁆𑀜𑁄 𑀪𑁄𑀢𑁄 𑀥𑀫𑁆𑀫𑁂𑀦 𑀧𑀯𑀢𑁆𑀢𑀺𑀢𑀲𑁆𑀲 𑀘𑀓𑁆𑀓𑀲𑁆𑀲 𑀅𑀦𑀼𑀧𑀯𑀢𑁆𑀢𑀓𑁄 𑀲𑁂𑀦𑀸𑀧𑀢𑀺 𑀓𑁄 𑀦𑀽𑀢𑀺 𑀧𑀼𑀘𑁆𑀙𑀺.

𑀢𑁂𑀦 𑀘 𑀲𑀫𑀬𑁂𑀦 𑀪𑀕𑀯𑀢𑁄 𑀤𑀓𑁆𑀔𑀺𑀡𑀧𑀲𑁆𑀲𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀲𑀼𑀯𑀡𑁆𑀡𑀧𑀼𑀜𑁆𑀚𑁄 𑀯𑀺𑀬 𑀲𑀺𑀭𑀺𑀬𑀸 𑀲𑁄𑀪𑀫𑀸𑀦𑁄, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀫𑀬𑀸 𑀧𑀯𑀢𑁆𑀢𑀺𑀢𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀦𑀼𑀚𑀸𑀢𑁄 𑀢𑀣𑀸𑀕𑀢𑀦𑁆𑀢𑀺 𑀢𑀣𑀸𑀕𑀢𑀁 𑀳𑁂𑀢𑀼𑀁 𑀅𑀦𑀼𑀚𑀸𑀢𑁄, 𑀢𑀣𑀸𑀕𑀢𑁂𑀦 𑀳𑁂𑀢𑀼𑀦𑀸 𑀚𑀸𑀢𑁄𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀅𑀯𑀚𑀸𑀢𑁄 𑀅𑀦𑀼𑀚𑀸𑀢𑁄 𑀅𑀢𑀺𑀚𑀸𑀢𑁄𑀢𑀺 𑀢𑀬𑁄 𑀯𑀼𑀢𑁆𑀢𑀸. 𑀢𑁂𑀲𑀼 𑀅𑀯𑀚𑀸𑀢𑁄 𑀤𑀼𑀲𑁆𑀲𑀻𑀮𑁄, 𑀲𑁄 𑀢𑀣𑀸𑀕𑀢𑀲𑁆𑀲 𑀧𑀼𑀢𑁆𑀢𑁄 𑀦𑀸𑀫 𑀦 𑀳𑁄𑀢𑀺. 𑀅𑀢𑀺𑀚𑀸𑀢𑁄 𑀦𑀸𑀫 𑀧𑀺𑀢𑀭𑀸 𑀉𑀢𑁆𑀢𑀭𑀺𑀢𑀭𑁄, 𑀢𑀸𑀤𑀺𑀲𑁄𑀧𑀺 𑀢𑀣𑀸𑀕𑀢𑀲𑁆𑀲 𑀧𑀼𑀢𑁆𑀢𑁄 𑀦𑀢𑁆𑀣𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀏𑀓𑁄 𑀅𑀦𑀼𑀚𑀸𑀢𑁄𑀯 𑀧𑀼𑀢𑁆𑀢𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀏𑀯𑀁 ‘‘𑀓𑁄 𑀦𑀼 𑀲𑁂𑀦𑀸𑀧𑀢𑀻’’𑀢𑀺 𑀧𑀜𑁆𑀳𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀬𑀁 𑀲𑁂𑀮𑁄 𑀆𑀳 ‘‘𑀲𑀫𑁆𑀩𑀼𑀤𑁆𑀥𑁄 𑀧𑀝𑀺𑀚𑀸𑀦𑀸𑀲𑀻’’𑀢𑀺, 𑀢𑀢𑁆𑀭 𑀦𑀁 𑀦𑀺𑀓𑁆𑀓𑀗𑁆𑀔𑀁 𑀓𑀸𑀢𑀼𑀓𑀸𑀫𑁄 ‘‘𑀦𑀸𑀳𑀁 𑀧𑀝𑀺𑀜𑁆𑀜𑀸𑀫𑀢𑁆𑀢𑁂𑀦𑁂𑀯 𑀧𑀝𑀺𑀚𑀸𑀦𑀸𑀫𑀺, 𑀅𑀧𑀺𑀘𑀸𑀳𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀩𑀼𑀤𑁆𑀥𑁄’’𑀢𑀺 𑀜𑀸𑀧𑁂𑀢𑀼𑀁 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀭 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘. 𑀪𑀸𑀯𑁂𑀢𑀩𑁆𑀩𑀁 𑀫𑀕𑁆𑀕𑀲𑀘𑁆𑀘𑀁. 𑀧𑀳𑀸𑀢𑀩𑁆𑀩𑀁 𑀲𑀫𑀼𑀤𑀬𑀲𑀘𑁆𑀘𑀁. 𑀳𑁂𑀢𑀼𑀯𑀘𑀦𑁂𑀦 𑀧𑀦 𑀨𑀮𑀲𑀺𑀤𑁆𑀥𑀺𑀢𑁄 𑀢𑁂𑀲𑀁 𑀨𑀮𑀸𑀦𑀺 𑀦𑀺𑀭𑁄𑀥𑀲𑀘𑁆𑀘𑀤𑀼𑀓𑁆𑀔𑀲𑀘𑁆𑀘𑀸𑀦𑀺𑀧𑀺 𑀯𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀏𑀯𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁 𑀧𑀭𑀺𑀜𑁆𑀜𑀸𑀢𑀩𑁆𑀩𑀁 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀇𑀤𑀫𑁆𑀧𑁂𑀢𑁆𑀣 𑀲𑀗𑁆𑀕𑀳𑀺𑀢𑀦𑁆𑀢𑀺 𑀘𑀢𑀼𑀲𑀘𑁆𑀘𑀪𑀸𑀯𑀦𑀸𑀨𑀮𑀜𑁆𑀘 𑀯𑀺𑀫𑀼𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀼𑀚𑁆𑀛𑀺𑀢𑀩𑁆𑀩𑀁 𑀩𑀼𑀚𑁆𑀛𑀺𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄𑀲𑁆𑀫𑀻’’𑀢𑀺 𑀬𑀼𑀢𑁆𑀢𑀳𑁂𑀢𑀼𑀦𑀸 𑀩𑀼𑀤𑁆𑀥𑀪𑀸𑀯𑀁 𑀲𑀸𑀥𑁂𑀢𑀺.

𑀏𑀯𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀢𑁆𑀢𑀸𑀦𑀁 𑀆𑀯𑀺𑀓𑀢𑁆𑀯𑀸 𑀅𑀢𑁆𑀢𑀦𑀺 𑀓𑀗𑁆𑀔𑀸𑀯𑀺𑀢𑀭𑀡𑀢𑁆𑀣𑀁 𑀩𑁆𑀭𑀸𑀳𑁆𑀫𑀡𑀁 𑀅𑀢𑀺𑀘𑀸𑀭𑀺𑀬𑀫𑀸𑀦𑁄 𑀯𑀺𑀦𑀬𑀲𑁆𑀲𑀽𑀢𑀺 𑀕𑀸𑀣𑀢𑁆𑀢𑀬𑀫𑀸𑀳. 𑀢𑀢𑁆𑀣 𑀲𑀮𑁆𑀮𑀓𑀢𑁆𑀢𑁄𑀢𑀺 𑀭𑀸𑀕𑀸𑀤𑀺𑀲𑀮𑁆𑀮𑀓𑀦𑁆𑀢𑀦𑁄. 𑀅𑀦𑀼𑀢𑁆𑀢𑀭𑁄𑀢𑀺 𑀬𑀣𑀸 𑀩𑀸𑀳𑀺𑀭𑀯𑁂𑀚𑁆𑀚𑁂𑀦 𑀯𑀽𑀧𑀲𑀫𑀺𑀢𑀭𑁄𑀕𑁄 𑀇𑀫𑀲𑁆𑀫𑀺𑀜𑁆𑀜𑁂𑀯𑀢𑁆𑀢𑀪𑀸𑀯𑁂 𑀓𑀼𑀧𑁆𑀧𑀢𑀺, 𑀦 𑀏𑀯𑀁. 𑀫𑀬𑀸 𑀯𑀽𑀧𑀲𑀫𑀺𑀢𑀲𑁆𑀲 𑀧𑀦 𑀭𑁄𑀕𑀲𑁆𑀲 𑀪𑀯𑀦𑁆𑀢𑀭𑁂𑀧𑀺 𑀉𑀧𑁆𑀧𑀢𑁆𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀳𑀁 𑀅𑀦𑀼𑀢𑁆𑀢𑀭𑁄𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀪𑀽𑀢𑁄𑀢𑀺 𑀲𑁂𑀝𑁆𑀞𑀪𑀽𑀢𑁄. 𑀅𑀢𑀺𑀢𑀼𑀮𑁄𑀢𑀺 𑀢𑀼𑀮𑀁 𑀅𑀢𑀻𑀢𑁄, 𑀦𑀺𑀭𑀼𑀧𑀫𑁄𑀢𑀺 𑀅𑀢𑁆𑀣𑁄. 𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑁄𑀢𑀺 𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸𑀢𑀺 𑀏𑀯𑀁 𑀆𑀕𑀢𑀸𑀬 𑀫𑀸𑀭𑀲𑁂𑀦𑀸𑀬 𑀧𑀫𑀤𑁆𑀤𑀦𑁄. 𑀲𑀩𑁆𑀩𑀸𑀫𑀺𑀢𑁆𑀢𑁂𑀢𑀺 𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀘𑁆𑀘𑀼𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑀗𑁆𑀔𑀸𑀢𑁂 𑀲𑀩𑁆𑀩𑀧𑀘𑁆𑀘𑀢𑁆𑀣𑀺𑀓𑁂. 𑀯𑀲𑀻𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸. 𑀅𑀓𑀼𑀢𑁄𑀪𑀬𑁄𑀢𑀺 𑀓𑀼𑀢𑁄𑀘𑀺 𑀅𑀪𑀬𑁄.

𑀏𑀯𑀁 𑀯𑀼𑀢𑁆𑀢𑁂 𑀲𑁂𑀮𑁄 𑀩𑁆𑀭𑀸𑀳𑁆𑀫𑀡𑁄 𑀢𑀸𑀯𑀤𑁂𑀯 𑀪𑀕𑀯𑀢𑀺 𑀲𑀜𑁆𑀚𑀸𑀢𑀧𑀲𑀸𑀤𑁄 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀇𑀫𑀁 𑀪𑁄𑀦𑁆𑀢𑁄𑀢𑀺 𑀕𑀸𑀣𑀢𑁆𑀢𑀬𑀫𑀸𑀳. 𑀢𑀢𑁆𑀣 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄𑀢𑀺 𑀘𑀡𑁆𑀟𑀸𑀮𑀸𑀤𑀺𑀦𑀻𑀘𑀓𑀼𑀮𑁂 𑀚𑀸𑀢𑁄. 𑀢𑀢𑁄 𑀢𑁂𑀧𑀺 𑀫𑀸𑀡𑀯𑀓𑀸 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 𑀏𑀯𑀜𑁆𑀘𑁂 𑀭𑀼𑀘𑁆𑀘𑀢𑀺, 𑀪𑁄𑀢𑁄𑀢𑀺 𑀕𑀸𑀣𑀫𑀸𑀳𑀁𑀲𑀼. 𑀅𑀣 𑀲𑁂𑀮𑁄 𑀢𑁂𑀲𑀼 𑀫𑀸𑀡𑀯𑀓𑁂𑀲𑀼 𑀢𑀼𑀝𑁆𑀞𑀘𑀺𑀢𑁆𑀢𑁄 𑀢𑁂 𑀘 𑀤𑀲𑁆𑀲𑁂𑀦𑁆𑀢𑁄 𑀧𑀩𑁆𑀩𑀚𑁆𑀚𑀁 𑀬𑀸𑀘𑀦𑁆𑀢𑁄 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀕𑀸𑀣𑀫𑀸𑀳.

𑀢𑀢𑁄 𑀪𑀕𑀯𑀸 𑀬𑀲𑁆𑀫𑀸 𑀲𑁂𑀮𑁄 𑀅𑀢𑀻𑀢𑁂 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀢𑁂𑀲𑀁𑀬𑁂𑀯 𑀢𑀺𑀡𑁆𑀡𑀁 𑀧𑀼𑀭𑀺𑀲𑀲𑀢𑀸𑀦𑀁 𑀕𑀡𑀲𑁂𑀝𑁆𑀞𑁄 𑀳𑀼𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀯𑁂𑀡𑀁 𑀓𑀸𑀭𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑁂𑀦 𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀧𑀘𑁆𑀙𑀺𑀫𑁂 𑀪𑀯𑁂 𑀢𑁂𑀲𑀁𑀬𑁂𑀯 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀢𑀜𑁆𑀘 𑀢𑁂𑀲𑀁 𑀓𑀫𑁆𑀫𑀁 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀓𑀸𑀬 𑀧𑀭𑀺𑀧𑀓𑁆𑀓𑀁 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀲𑁆𑀲 𑀘 𑀉𑀧𑀦𑀺𑀲𑁆𑀲𑀬𑀪𑀽𑀢𑀁, 𑀢𑀲𑁆𑀫𑀸 𑀢𑁂 𑀲𑀩𑁆𑀩𑁂𑀯 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀸𑀚𑁂𑀦𑁆𑀢𑁄 𑀲𑁆𑀯𑀸𑀓𑁆𑀔𑀸𑀢𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀦𑁆𑀤𑀺𑀝𑁆𑀞𑀺𑀓𑀦𑁆𑀢𑀺 𑀲𑀬𑀫𑁂𑀯 𑀤𑀝𑁆𑀞𑀩𑁆𑀩𑀁 𑀧𑀘𑁆𑀘𑀓𑁆𑀔𑀁. 𑀅𑀓𑀸𑀮𑀺𑀓𑀦𑁆𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀦 𑀓𑀸𑀮𑀦𑁆𑀢𑀭𑀁 𑀧𑀢𑁆𑀢𑀩𑁆𑀩𑀨𑀮𑀁. 𑀬𑀢𑁆𑀣 𑀅𑀫𑁄𑀖𑀸𑀢𑀺 𑀬𑀲𑁆𑀫𑀺𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑁂 𑀅𑀧𑁆𑀧𑀫𑀢𑁆𑀢𑀲𑁆𑀲 𑀲𑀺𑀓𑁆𑀔𑀢𑁆𑀢𑀬𑀧𑀽𑀭𑀡𑁂𑀦 𑀲𑀺𑀓𑁆𑀔𑀢𑁄 𑀧𑀩𑁆𑀩𑀚𑁆𑀚𑀸 𑀅𑀫𑁄𑀖𑀸 𑀳𑁄𑀢𑀺, 𑀲𑀨𑀮𑀸𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘 𑀯𑀢𑁆𑀯𑀸 ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘. 𑀢𑁂 𑀲𑀩𑁆𑀩𑁂 𑀧𑀢𑁆𑀢𑀘𑀻𑀯𑀭𑀥𑀭𑀸 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀯𑀲𑁆𑀲𑀲𑀢𑀺𑀓𑀢𑁆𑀣𑁂𑀭𑀸 𑀯𑀺𑀬 𑀲𑀼𑀯𑀺𑀦𑀻𑀢𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑀬𑀺𑀁𑀲𑀼. 𑀏𑀯𑀫𑀺𑀫𑀁 𑀢𑁂𑀲𑀁 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀅𑀮𑀢𑁆𑀣 𑀔𑁄 𑀲𑁂𑀮𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁦𑁦. 𑀇𑀫𑀸𑀳𑀻𑀢𑀺 𑀇𑀫𑀸𑀳𑀺 𑀓𑁂𑀡𑀺𑀬𑀲𑁆𑀲 𑀘𑀺𑀢𑁆𑀢𑀸𑀦𑀼𑀓𑀽𑀮𑀸𑀳𑀺 𑀕𑀸𑀣𑀸𑀳𑀺. 𑀢𑀢𑁆𑀣 𑀅𑀕𑁆𑀕𑀺𑀧𑀭𑀺𑀘𑀭𑀺𑀬𑀁 𑀯𑀺𑀦𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀜𑁆𑀜𑀸𑀪𑀸𑀯𑀢𑁄 ‘‘𑀅𑀕𑁆𑀕𑀺𑀳𑀼𑀢𑁆𑀢𑀫𑀼𑀔𑀸 𑀬𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀁. 𑀅𑀕𑁆𑀕𑀺𑀳𑀼𑀢𑁆𑀢𑀲𑁂𑀝𑁆𑀞𑀸 𑀅𑀕𑁆𑀕𑀺𑀚𑀼𑀳𑀦𑀧𑁆𑀧𑀥𑀸𑀦𑀸𑀢𑀺 𑀅𑀢𑁆𑀣𑁄. 𑀯𑁂𑀤𑁂 𑀲𑀚𑁆𑀛𑀸𑀬𑀦𑁆𑀢𑁂𑀳𑀺 𑀧𑀞𑀫𑀁 𑀲𑀚𑁆𑀛𑀸𑀬𑀺𑀢𑀩𑁆𑀩𑀢𑁄, 𑀲𑀸𑀯𑀺𑀢𑁆𑀢𑀻, ‘‘𑀙𑀦𑁆𑀤𑀲𑁄 𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑁄. 𑀫𑀦𑀼𑀲𑁆𑀲𑀸𑀦𑀁 𑀲𑁂𑀝𑁆𑀞𑀢𑁄 𑀭𑀸𑀚𑀸 ‘‘𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑁄. 𑀦𑀤𑀻𑀦𑀁 𑀆𑀥𑀸𑀭𑀢𑁄 𑀧𑀝𑀺𑀲𑀭𑀡𑀢𑁄 𑀘 𑀲𑀸𑀕𑀭𑁄 ‘‘𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑁄. 𑀘𑀦𑁆𑀤𑀬𑁄𑀕𑀯𑀲𑁂𑀦 ‘‘𑀅𑀚𑁆𑀚 𑀓𑀢𑁆𑀢𑀺𑀓𑀸 𑀅𑀚𑁆𑀚 𑀭𑁄𑀳𑀺𑀡𑀻’’𑀢𑀺 𑀲𑀜𑁆𑀜𑀸𑀡𑀢𑁄 𑀆𑀮𑁄𑀓𑀓𑀭𑀡𑀢𑁄 𑀲𑁄𑀫𑁆𑀫𑀪𑀸𑀯𑀢𑁄 𑀘 ‘‘𑀦𑀓𑁆𑀔𑀢𑁆𑀢𑀸𑀦𑀁 𑀫𑀼𑀔𑀁 𑀘𑀦𑁆𑀤𑁄’’𑀢𑀺 𑀯𑀼𑀢𑁆𑀢𑀁. 𑀢𑀧𑀦𑁆𑀢𑀸𑀦𑀁 𑀅𑀕𑁆𑀕𑀢𑁆𑀢𑀸 𑀆𑀤𑀺𑀘𑁆𑀘𑁄 ‘‘𑀢𑀧𑀢𑀁 𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑁄. 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀧𑀦 𑀅𑀕𑁆𑀕𑀢𑁆𑀢𑀸 𑀯𑀺𑀲𑁂𑀲𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁 𑀲𑀦𑁆𑀥𑀸𑀬 ‘‘𑀧𑀼𑀜𑁆𑀜𑀁 𑀆𑀓𑀗𑁆𑀔𑀫𑀸𑀦𑀸𑀦𑀁, 𑀲𑀗𑁆𑀖𑁄 𑀏𑀯 𑀬𑀚𑀢𑀁 𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀲𑀗𑁆𑀖𑁄 𑀧𑀼𑀜𑁆𑀜𑀲𑁆𑀲 𑀆𑀬𑀫𑀼𑀔𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀬𑀁 𑀢𑀁 𑀲𑀭𑀡𑀦𑁆𑀢𑀺 𑀅𑀜𑁆𑀜𑀁 𑀩𑁆𑀬𑀸𑀓𑀭𑀡𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑀪𑀕𑀯𑀸 𑀬𑀲𑁆𑀫𑀸 𑀫𑀬𑀁 𑀇𑀢𑁄 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀢𑀁 𑀲𑀭𑀡𑀁 𑀆𑀕𑀢𑀫𑁆𑀳𑀸, 𑀢𑀲𑁆𑀫𑀸 𑀅𑀢𑁆𑀢𑀦𑀸 𑀢𑀯 𑀲𑀸𑀲𑀦𑁂 𑀅𑀦𑀼𑀢𑁆𑀢𑀭𑁂𑀦 𑀤𑀫𑀣𑁂𑀦 𑀤𑀦𑁆𑀢𑀸𑀫𑁆𑀳𑀸, 𑀅𑀳𑁄 𑀢𑁂 𑀲𑀭𑀡𑀲𑁆𑀲 𑀆𑀦𑀼𑀪𑀸𑀯𑁄𑀢𑀺.

𑀢𑀢𑁄 𑀧𑀭𑀁 𑀪𑀕𑀯𑀦𑁆𑀢𑀁 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀣𑁄𑀫𑁂𑀢𑁆𑀯𑀸 𑀢𑀢𑀺𑀬𑀸𑀬 𑀯𑀦𑁆𑀤𑀦𑀁 𑀬𑀸𑀘𑀦𑁆𑀢𑁄 𑀪𑀺𑀓𑁆𑀔𑀯𑁄 𑀢𑀺𑀲𑀢𑀸 𑀇𑀫𑁂𑀢𑀺𑀆𑀤𑀺𑀫𑀸𑀳𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀲𑁆𑀲𑀮𑀸𑀬𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀅𑀲𑁆𑀲𑀮𑀸𑀬𑀦𑀲𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀦𑀸𑀯𑁂𑀭𑀚𑁆𑀚𑀓𑀸𑀦𑀦𑁆𑀢𑀺 𑀅𑀗𑁆𑀕𑀫𑀕𑀥𑀸𑀤𑀻𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑁂𑀭𑀚𑁆𑀚𑁂𑀳𑀺 𑀆𑀕𑀢𑀸𑀦𑀁, 𑀢𑁂𑀲𑀼 𑀯𑀸 𑀭𑀝𑁆𑀞𑁂𑀲𑀼 𑀚𑀸𑀢𑀲𑀁𑀯𑀟𑁆𑀠𑀸𑀦𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀓𑁂𑀦𑀘𑀺𑀤𑁂𑀯𑀸𑀢𑀺 𑀬𑀜𑁆𑀜𑀼𑀧𑀸𑀲𑀦𑀸𑀤𑀺𑀦𑀸 𑀅𑀦𑀺𑀬𑀫𑀺𑀢𑀓𑀺𑀘𑁆𑀘𑁂𑀦. 𑀘𑀸𑀢𑀼𑀯𑀡𑁆𑀡𑀺𑀦𑁆𑀢𑀺 𑀘𑀢𑀼𑀯𑀡𑁆𑀡𑀲𑀸𑀥𑀸𑀭𑀡𑀁. 𑀫𑀬𑀁 𑀧𑀦 𑀦𑁆𑀳𑀸𑀦𑀲𑀼𑀤𑁆𑀥𑀺𑀬𑀸 𑀪𑀸𑀯𑀦𑀸𑀲𑀼𑀤𑁆𑀥𑀺𑀬𑀸𑀧𑀺 𑀩𑁆𑀭𑀸𑀳𑁆𑀫𑀡𑀸𑀯 𑀲𑀼𑀚𑁆𑀛𑀦𑁆𑀢𑀻𑀢𑀺 𑀯𑀤𑀸𑀫, 𑀅𑀬𑀼𑀢𑁆𑀢𑀫𑁆𑀧𑀺 𑀲𑀫𑀡𑁄 𑀕𑁄𑀢𑀫𑁄 𑀓𑀭𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀁 𑀘𑀺𑀦𑁆𑀢𑀬𑀺𑀁𑀲𑀼. 𑀯𑀼𑀢𑁆𑀢𑀲𑀺𑀭𑁄𑀢𑀺 𑀯𑀸𑀧𑀺𑀢𑀲𑀺𑀭𑁄.

𑀥𑀫𑁆𑀫𑀯𑀸𑀤𑀻𑀢𑀺 𑀲𑀪𑀸𑀯𑀯𑀸𑀤𑀻. 𑀤𑀼𑀧𑁆𑀧𑀝𑀺𑀫𑀦𑁆𑀢𑀺𑀬𑀸𑀢𑀺 𑀅𑀫𑁆𑀳𑀸𑀤𑀺𑀲𑁂𑀳𑀺 𑀅𑀥𑀫𑁆𑀫𑀯𑀸𑀤𑀻𑀳𑀺 𑀤𑀼𑀓𑁆𑀔𑁂𑀦 𑀧𑀝𑀺𑀫𑀦𑁆𑀢𑀺𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀥𑀫𑁆𑀫𑀯𑀸𑀤𑀺𑀦𑁄 𑀦𑀸𑀫 𑀧𑀭𑀸𑀚𑀬𑁄 𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀩𑁆𑀩𑀸𑀚𑀓𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀯𑀺𑀥𑀸𑀦𑀁, 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀳𑁂𑀢𑁆𑀯𑀸 𑀲𑀩𑁆𑀩𑀧𑀘𑁆𑀙𑀸 𑀧𑀩𑁆𑀩𑀚𑀦𑁆𑀢𑀸 𑀬𑁂𑀳𑀺 𑀫𑀦𑁆𑀢𑁂𑀳𑀺 𑀧𑀩𑁆𑀩𑀚𑀦𑁆𑀢𑀺, 𑀧𑀩𑁆𑀩𑀚𑀺𑀢𑀸 𑀘 𑀬𑁂 𑀫𑀦𑁆𑀢𑁂 𑀧𑀭𑀺𑀳𑀭𑀦𑁆𑀢𑀺, 𑀬𑀁 𑀯𑀸 𑀆𑀘𑀸𑀭𑀁 𑀆𑀘𑀭𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀪𑁄𑀢𑀸 𑀘𑀭𑀺𑀢𑀁 𑀲𑀺𑀓𑁆𑀔𑀺𑀢𑀁. 𑀢𑀲𑁆𑀫𑀸 𑀢𑀼𑀬𑁆𑀳𑀁 𑀧𑀭𑀸𑀚𑀬𑁄 𑀦𑀢𑁆𑀣𑀺, 𑀚𑀬𑁄𑀯 𑀪𑀯𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀦𑁆𑀢𑀸 𑀏𑀯𑀫𑀸𑀳𑀁𑀲𑀼.

𑁪𑁦𑁨. 𑀤𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦𑀸𑀢𑀺𑀆𑀤𑀺 𑀢𑁂𑀲𑀁 𑀮𑀤𑁆𑀥𑀺𑀪𑀺𑀦𑁆𑀤𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑀺𑀬𑁄𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀢𑁆𑀢𑀧𑀝𑀺𑀮𑀸𑀪𑀢𑁆𑀣𑀸𑀬 𑀆𑀯𑀸𑀳𑀯𑀺𑀯𑀸𑀳𑀯𑀲𑁂𑀦 𑀓𑀼𑀮𑀸 𑀆𑀦𑀻𑀢𑀸 𑀩𑁆𑀭𑀸𑀳𑁆𑀫𑀡𑀺𑀬𑁄 𑀤𑀺𑀲𑁆𑀲𑀦𑁆𑀢𑀺. 𑀢𑀸 𑀔𑁄 𑀧𑀦𑁂𑀢𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀉𑀢𑀼𑀦𑀺𑀬𑁄𑀧𑀺 𑀳𑁄𑀦𑁆𑀢𑀺, 𑀲𑀜𑁆𑀚𑀸𑀢𑀧𑀼𑀧𑁆𑀨𑀸𑀢𑀺 𑀅𑀢𑁆𑀣𑁄. 𑀕𑀩𑁆𑀪𑀺𑀦𑀺𑀬𑁄𑀢𑀺 𑀲𑀜𑁆𑀚𑀸𑀢𑀕𑀩𑁆𑀪𑀸. 𑀯𑀺𑀚𑀸𑀬𑀫𑀸𑀦𑀸𑀢𑀺 𑀧𑀼𑀢𑁆𑀢𑀥𑀻𑀢𑀭𑁄 𑀚𑀦𑀬𑀫𑀸𑀦𑀸. 𑀧𑀸𑀬𑀫𑀸𑀦𑀸𑀢𑀺 𑀤𑀸𑀭𑀓𑁂 𑀣𑀜𑁆𑀜𑀁 𑀧𑀸𑀬𑀦𑁆𑀢𑀺𑀬𑁄. 𑀬𑁄𑀦𑀺𑀚𑀸𑀯 𑀲𑀫𑀸𑀦𑀸𑀢𑀺 𑀩𑁆𑀭𑀸𑀳𑁆𑀫𑀡𑀻𑀦𑀁 𑀧𑀲𑁆𑀲𑀸𑀯𑀫𑀕𑁆𑀕𑁂𑀦 𑀚𑀸𑀢𑀸 𑀲𑀫𑀸𑀦𑀸. 𑀏𑀯𑀫𑀸𑀳𑀁𑀲𑀽𑀢𑀺 𑀏𑀯𑀁 𑀯𑀤𑀦𑁆𑀢𑀺. 𑀓𑀣𑀁? 𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄…𑀧𑁂… 𑀩𑁆𑀭𑀳𑁆𑀫𑀤𑀸𑀬𑀸𑀤𑀸𑀢𑀺. 𑀬𑀤𑀺 𑀧𑀦 𑀦𑁂𑀲𑀁 𑀲𑀘𑁆𑀘𑀯𑀘𑀦𑀁 𑀲𑀺𑀬𑀸, 𑀩𑁆𑀭𑀸𑀳𑁆𑀫𑀡𑀻𑀦𑀁 𑀓𑀼𑀘𑁆𑀙𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀉𑀭𑁄 𑀪𑀯𑁂𑀬𑁆𑀬, 𑀩𑁆𑀭𑀸𑀳𑁆𑀫𑀡𑀻𑀦𑀁 𑀧𑀲𑁆𑀲𑀸𑀯𑀫𑀕𑁆𑀕𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀁 𑀪𑀯𑁂𑀬𑁆𑀬, 𑀏𑀢𑁆𑀢𑀸𑀯𑀢𑀸 ‘‘𑀫𑀬𑀁 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀉𑀭𑁂 𑀯𑀲𑀺𑀢𑁆𑀯𑀸 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸’’𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀦𑁆𑀢𑀽𑀢𑀺 𑀅𑀬𑀁 𑀫𑀼𑀔𑀢𑁄 𑀚𑀸𑀢𑀘𑁆𑀙𑁂𑀤𑀓𑀯𑀸𑀤𑁄 𑀯𑀼𑀢𑁆𑀢𑁄.

𑁪𑁦𑁩. 𑀅𑀬𑁆𑀬𑁄 𑀳𑀼𑀢𑁆𑀯𑀸 𑀤𑀸𑀲𑁄 𑀳𑁄𑀢𑀺, 𑀤𑀸𑀲𑁄 𑀳𑀼𑀢𑁆𑀯𑀸 𑀅𑀬𑁆𑀬𑁄 𑀳𑁄𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄 𑀲𑀪𑀭𑀺𑀬𑁄 𑀯𑀡𑀺𑀚𑁆𑀚𑀁 𑀧𑀬𑁄𑀚𑁂𑀦𑁆𑀢𑁄 𑀬𑁄𑀦𑀓𑀭𑀝𑁆𑀞𑀁 𑀯𑀸 𑀓𑀫𑁆𑀩𑁄𑀚𑀭𑀝𑁆𑀞𑀁 𑀯𑀸 𑀕𑀦𑁆𑀢𑁆𑀯𑀸 𑀓𑀸𑀮𑀁 𑀓𑀭𑁄𑀢𑀺, 𑀢𑀲𑁆𑀲 𑀕𑁂𑀳𑁂 𑀯𑀬𑀧𑁆𑀧𑀢𑁆𑀢𑁂 𑀧𑀼𑀢𑁆𑀢𑁂 𑀅𑀲𑀢𑀺 𑀩𑁆𑀭𑀸𑀳𑁆𑀫𑀡𑀻 𑀤𑀸𑀲𑁂𑀦 𑀯𑀸 𑀓𑀫𑁆𑀫𑀓𑀭𑁂𑀦 𑀯𑀸 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀢𑀺. 𑀏𑀓𑀲𑁆𑀫𑀺𑀁 𑀤𑀸𑀭𑀓𑁂 𑀚𑀸𑀢𑁂 𑀲𑁄 𑀧𑀼𑀭𑀺𑀲𑁄 𑀤𑀸𑀲𑁄𑀯 𑀳𑁄𑀢𑀺, 𑀢𑀲𑁆𑀲 𑀚𑀸𑀢𑀤𑀸𑀭𑀓𑁄 𑀧𑀦 𑀤𑀸𑀬𑀚𑁆𑀚𑀲𑀸𑀫𑀺𑀓𑁄 𑀳𑁄𑀢𑀺. 𑀫𑀸𑀢𑀺𑀢𑁄 𑀲𑀼𑀤𑁆𑀥𑁄 𑀧𑀺𑀢𑀺𑀢𑁄 𑀅𑀲𑀼𑀤𑁆𑀥𑁄 𑀲𑁄 𑀯𑀡𑀺𑀚𑁆𑀚𑀁 𑀧𑀬𑁄𑀚𑁂𑀦𑁆𑀢𑁄 𑀫𑀚𑁆𑀛𑀺𑀫𑀧𑀤𑁂𑀲𑀁 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀤𑀸𑀭𑀺𑀓𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀼𑀢𑁆𑀢𑀁 𑀧𑀝𑀺𑀮𑀪𑀢𑀺, 𑀲𑁄𑀧𑀺 𑀫𑀸𑀢𑀺𑀢𑁄𑀯 𑀲𑀼𑀤𑁆𑀥𑁄 𑀳𑁄𑀢𑀺 𑀧𑀺𑀢𑀺𑀢𑁄 𑀅𑀲𑀼𑀤𑁆𑀥𑁄. 𑀏𑀯𑀁 𑀩𑁆𑀭𑀸𑀳𑁆𑀫𑀡𑀲𑀫𑀬𑀲𑁆𑀫𑀺𑀜𑁆𑀜𑁂𑀯 𑀚𑀸𑀢𑀺𑀲𑀫𑁆𑀪𑁂𑀤𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀁 𑀩𑀮𑀁, 𑀓𑁄 𑀅𑀲𑁆𑀲𑀸𑀲𑁄𑀢𑀺 𑀬𑀢𑁆𑀣 𑀢𑀼𑀫𑁆𑀳𑁂 𑀤𑀸𑀲𑀸 𑀳𑁄𑀦𑁆𑀢𑀸 𑀲𑀩𑁆𑀩𑁂𑀯 𑀤𑀸𑀲𑀸 𑀳𑁄𑀣, 𑀅𑀬𑁆𑀬𑀸 𑀳𑁄𑀦𑁆𑀢𑀸 𑀲𑀩𑁆𑀩𑁂𑀯 𑀅𑀬𑁆𑀬𑀸 𑀳𑁄𑀣, 𑀏𑀢𑁆𑀣 𑀯𑁄 𑀓𑁄 𑀣𑀸𑀫𑁄, 𑀓𑁄 𑀅𑀯𑀲𑁆𑀲𑀬𑁄, 𑀬𑀁 𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄𑀢𑀺 𑀯𑀤𑀣𑀸𑀢𑀺 𑀤𑀻𑀧𑁂𑀢𑀺.

𑁪𑁦𑁪. 𑀔𑀢𑁆𑀢𑀺𑀬𑁄𑀯 𑀦𑀼 𑀔𑁄𑀢𑀺𑀆𑀤𑀬𑁄 𑀲𑀼𑀢𑁆𑀢𑀘𑁆𑀙𑁂𑀤𑀓𑀯𑀸𑀤𑀸 𑀦𑀸𑀫 𑀳𑁄𑀦𑁆𑀢𑀺.

𑁪𑁦𑁮. 𑀇𑀤𑀸𑀦𑀺 𑀘𑀸𑀢𑀼𑀯𑀡𑁆𑀡𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀇𑀥 𑀭𑀸𑀚𑀸𑀢𑀺𑀆𑀤𑀺𑀫𑀸𑀳. 𑀲𑀸𑀧𑀸𑀦𑀤𑁄𑀡𑀺𑀬𑀸𑀢𑀺 𑀲𑀼𑀦𑀔𑀸𑀦𑀁 𑀧𑀺𑀯𑀦𑀤𑁄𑀡𑀺𑀬𑀸. 𑀅𑀕𑁆𑀕𑀺𑀓𑀭𑀡𑀻𑀬𑀦𑁆𑀢𑀺 𑀲𑀻𑀢𑀯𑀺𑀦𑁄𑀤𑀦𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀪𑀢𑁆𑀢𑀧𑀘𑀦𑀸𑀤𑀺 𑀅𑀕𑁆𑀕𑀺𑀓𑀺𑀘𑁆𑀘𑀁. 𑀏𑀢𑁆𑀣 𑀅𑀲𑁆𑀲𑀮𑀸𑀬𑀦𑀸𑀢𑀺 𑀏𑀢𑁆𑀣 𑀲𑀩𑁆𑀩𑀲𑁆𑀫𑀺𑀁 𑀅𑀕𑁆𑀕𑀺𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁂.

𑁪𑁦𑁯. 𑀇𑀤𑀸𑀦𑀺 𑀬𑀤𑁂𑀢𑀁 𑀩𑁆𑀭𑀸𑀳𑁆𑀫𑀡𑀸 𑀘𑀸𑀢𑀼𑀯𑀡𑁆𑀡𑀺𑀲𑀼𑀤𑁆𑀥𑀻𑀢𑀺 𑀯𑀤𑀦𑁆𑀢𑀺, 𑀏𑀢𑁆𑀣 𑀘𑀸𑀢𑀼𑀯𑀡𑁆𑀡𑀸𑀢𑀺 𑀦𑀺𑀬𑀫𑁄 𑀦𑀢𑁆𑀣𑀺. 𑀧𑀜𑁆𑀘𑀫𑁄 𑀳𑀺 𑀧𑀸𑀤𑀲𑀺𑀓𑀯𑀡𑁆𑀡𑁄𑀧𑀺 𑀅𑀢𑁆𑀣𑀻𑀢𑀺 𑀲𑀁𑀔𑀺𑀢𑁆𑀢𑁂𑀦 𑀢𑁂𑀲𑀁 𑀯𑀸𑀤𑁂 𑀤𑁄𑀲𑀤𑀲𑁆𑀲𑀦𑀢𑁆𑀣𑀁 𑀇𑀥 𑀔𑀢𑁆𑀢𑀺𑀬𑀓𑀼𑀫𑀸𑀭𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭 𑀅𑀫𑀼𑀢𑁆𑀭 𑀘 𑀧𑀦𑁂𑀲𑀸𑀦𑀦𑁆𑀢𑀺 𑀅𑀫𑀼𑀲𑁆𑀫𑀺𑀜𑁆𑀘 𑀧𑀦 𑀧𑀼𑀭𑀺𑀫𑀦𑀬𑁂 𑀏𑀢𑁂𑀲𑀁 𑀫𑀸𑀡𑀯𑀓𑀸𑀦𑀁 𑀓𑀺𑀜𑁆𑀘𑀺 𑀦𑀸𑀦𑀸𑀓𑀭𑀡𑀁 𑀦 𑀧𑀲𑁆𑀲𑀸𑀫𑀻𑀢𑀺 𑀯𑀤𑀢𑀺. 𑀦𑀸𑀦𑀸𑀓𑀭𑀡𑀁 𑀧𑀦 𑀢𑁂𑀲𑀫𑁆𑀧𑀺 𑀅𑀢𑁆𑀣𑀺𑀬𑁂𑀯. 𑀔𑀢𑁆𑀢𑀺𑀬𑀓𑀼𑀫𑀸𑀭𑀲𑁆𑀲 𑀳𑀺 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸𑀬 𑀉𑀧𑁆𑀧𑀦𑁆𑀦𑁄 𑀔𑀢𑁆𑀢𑀺𑀬𑀧𑀸𑀤𑀲𑀺𑀓𑁄 𑀦𑀸𑀫, 𑀇𑀢𑀭𑁄 𑀩𑁆𑀭𑀸𑀳𑁆𑀫𑀡𑀧𑀸𑀤𑀲𑀺𑀓𑁄 𑀦𑀸𑀫, 𑀏𑀢𑁂 𑀳𑀻𑀦𑀚𑀸𑀢𑀺𑀫𑀸𑀡𑀯𑀓𑀸.

𑀏𑀯𑀁 𑀧𑀜𑁆𑀘𑀫𑀲𑁆𑀲 𑀯𑀡𑁆𑀡𑀲𑁆𑀲 𑀅𑀢𑁆𑀣𑀺𑀢𑀸𑀬 𑀘𑀸𑀢𑀼𑀯𑀡𑁆𑀡𑀺𑀲𑀼𑀤𑁆𑀥𑀻𑀢𑀺 𑀏𑀢𑁂𑀲𑀁 𑀯𑀸𑀤𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀼𑀦 𑀘𑀸𑀢𑀼𑀯𑀡𑁆𑀡𑀺𑀲𑀼𑀤𑁆𑀥𑀺𑀬𑀁 𑀑𑀯𑀤𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀲𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀤𑁆𑀥𑁂𑀢𑀺 𑀫𑀢𑀓𑀪𑀢𑁆𑀢𑁂. 𑀣𑀸𑀮𑀺𑀧𑀸𑀓𑁂𑀢𑀺 𑀧𑀡𑁆𑀡𑀸𑀓𑀸𑀭𑀪𑀢𑁆𑀢𑁂. 𑀬𑀜𑁆𑀜𑁂𑀢𑀺 𑀬𑀜𑁆𑀜𑀪𑀢𑁆𑀢𑁂. 𑀧𑀸𑀳𑀼𑀦𑁂𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀓𑀢𑀪𑀢𑁆𑀢𑁂. 𑀓𑀺𑀁 𑀳𑀻𑀢𑀺 𑀓𑀺𑀁 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀺, 𑀦𑁄 𑀪𑀯𑀺𑀲𑁆𑀲𑀢𑀻𑀢𑀺 𑀤𑀻𑀧𑁂𑀢𑀺.

𑁪𑁧𑁦. 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀅𑀲𑁆𑀲𑀮𑀸𑀬𑀦 𑀧𑀼𑀩𑁆𑀩𑁂 𑀫𑀬𑀺 𑀚𑀸𑀢𑀺𑀬𑀸 𑀳𑀻𑀦𑀢𑀭𑁂 𑀢𑀼𑀫𑁆𑀳𑁂 𑀲𑁂𑀝𑁆𑀞𑀢𑀭𑀸 𑀲𑀫𑀸𑀦𑀸𑀧𑀺 𑀫𑀬𑀸 𑀚𑀸𑀢𑀺𑀯𑀸𑀤𑁂 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀔𑀺𑀢𑁆𑀣, 𑀇𑀤𑀸𑀦𑀺 𑀢𑀼𑀫𑁆𑀳𑁂 𑀳𑀻𑀦𑀢𑀭𑀸 𑀳𑀼𑀢𑁆𑀯𑀸 𑀫𑀬𑀸 𑀲𑁂𑀝𑁆𑀞𑀢𑀭𑁂𑀦 𑀩𑀼𑀤𑁆𑀥𑀸𑀦𑀁 𑀲𑀓𑁂 𑀚𑀸𑀢𑀺𑀯𑀸𑀤𑀧𑀜𑁆𑀳𑀁 𑀧𑀼𑀝𑁆𑀞𑀸 𑀓𑀺𑀁 𑀲𑀫𑁆𑀧𑀸𑀤𑁂𑀲𑁆𑀲𑀣? 𑀦 𑀏𑀢𑁆𑀣 𑀘𑀺𑀦𑁆𑀢𑀸 𑀓𑀸𑀢𑀩𑁆𑀩𑀸𑀢𑀺 𑀫𑀸𑀡𑀯𑀁 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀅𑀲𑀺𑀢𑁄𑀢𑀺 𑀓𑀸𑀴𑀓𑁄. 𑀤𑁂𑀯𑀮𑁄𑀢𑀺 𑀢𑀲𑁆𑀲 𑀦𑀸𑀫𑀁, 𑀅𑀬𑀫𑁂𑀯 𑀪𑀕𑀯𑀸 𑀢𑁂𑀦 𑀲𑀫𑀬𑁂𑀦. 𑀧𑀝𑀮𑀺𑀬𑁄𑀢𑀺 𑀕𑀡𑀗𑁆𑀕𑀡𑀼𑀧𑀸𑀳𑀦𑀸. 𑀧𑀢𑁆𑀣𑀡𑁆𑀟𑀺𑀮𑁂𑀢𑀺 𑀧𑀡𑁆𑀡𑀲𑀸𑀮𑀧𑀭𑀺𑀯𑁂𑀡𑁂. 𑀓𑁄 𑀦𑀼 𑀔𑁄𑀢𑀺 𑀓𑀳𑀁 𑀦𑀼 𑀔𑁄. 𑀕𑀸𑀫𑀡𑁆𑀟𑀮𑀭𑀽𑀧𑁄 𑀯𑀺𑀬𑀸𑀢𑀺 𑀕𑀸𑀫𑀤𑀸𑀭𑀓𑀭𑀽𑀧𑁄 𑀯𑀺𑀬. 𑀲𑁄 𑀔𑁆𑀯𑀸𑀳𑀁, 𑀪𑁄, 𑀳𑁄𑀫𑀻𑀢𑀺 𑀲𑁄 𑀅𑀳𑀁, 𑀪𑁄, 𑀅𑀲𑀺𑀢𑀤𑁂𑀯𑀮𑁄 𑀳𑁄𑀫𑀻𑀢𑀺 𑀯𑀤𑀢𑀺. 𑀢𑀤𑀸 𑀓𑀺𑀭 𑀫𑀳𑀸𑀲𑀢𑁆𑀢𑁄 𑀓𑁄𑀡𑁆𑀟𑀤𑀫𑀓𑁄 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀅𑀪𑀺𑀯𑀸𑀤𑁂𑀢𑀼𑀁 𑀉𑀧𑀓𑁆𑀓𑀫𑀺𑀁𑀲𑀽𑀢𑀺 𑀯𑀦𑁆𑀤𑀺𑀢𑀼𑀁 𑀉𑀧𑀓𑁆𑀓𑀫𑀁 𑀅𑀓𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀘 𑀯𑀲𑁆𑀲𑀲𑀢𑀺𑀓𑀢𑀸𑀧𑀲𑁄𑀧𑀺 𑀢𑀤𑀳𑀼𑀚𑀸𑀢𑀁 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑀁 𑀅𑀯𑀦𑁆𑀤𑀦𑁆𑀢𑁄 𑀓𑁄𑀡𑁆𑀟𑀺𑀢𑁄 𑀳𑁄𑀢𑀺.

𑁪𑁧𑁧. 𑀚𑀦𑀺𑀓𑀸 𑀫𑀸𑀢𑀸𑀢𑀺 𑀬𑀸𑀬 𑀢𑀼𑀫𑁆𑀳𑁂 𑀚𑀦𑀺𑀢𑀸, 𑀲𑀸 𑀯𑁄 𑀚𑀦𑀺𑀓𑀸 𑀫𑀸𑀢𑀸. 𑀚𑀦𑀺𑀓𑀸𑀫𑀸𑀢𑀽𑀢𑀺 𑀚𑀦𑀺𑀓𑀸𑀬 𑀫𑀸𑀢𑀼. 𑀬𑁄 𑀚𑀦𑀓𑁄𑀢𑀺 𑀬𑁄 𑀚𑀦𑀓𑁄 𑀧𑀺𑀢𑀸. ‘‘𑀬𑁄 𑀚𑀦𑀺𑀓𑁄 𑀧𑀺𑀢𑀸𑀢𑁂𑀯’’ 𑀯𑀸 𑀧𑀸𑀞𑁄.

𑀅𑀲𑀺𑀢𑁂𑀦𑀸𑀢𑀺 𑀧𑀜𑁆𑀘𑀸𑀪𑀺𑀜𑁆𑀜𑁂𑀦 𑀅𑀲𑀺𑀢𑁂𑀦 𑀤𑁂𑀯𑀮𑁂𑀦 𑀇𑀲𑀺𑀦𑀸 𑀇𑀫𑀁 𑀕𑀦𑁆𑀥𑀩𑁆𑀩𑀧𑀜𑁆𑀳𑀁 𑀧𑀼𑀝𑁆𑀞𑀸 𑀦 𑀲𑀫𑁆𑀧𑀸𑀬𑀺𑀲𑁆𑀲𑀦𑁆𑀢𑀺. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀲𑀢𑁆𑀢𑀦𑁆𑀦𑀁 𑀇𑀲𑀻𑀦𑀁. 𑀦 𑀧𑀼𑀡𑁆𑀡𑁄 𑀤𑀩𑁆𑀩𑀺𑀕𑀸𑀳𑁄𑀢𑀺 𑀢𑁂𑀲𑀁 𑀲𑀢𑁆𑀢𑀦𑁆𑀦𑀁 𑀇𑀲𑀻𑀦𑀁 𑀤𑀩𑁆𑀩𑀺𑀁 𑀕𑀳𑁂𑀢𑁆𑀯𑀸 𑀧𑀡𑁆𑀡𑀁 𑀧𑀘𑀺𑀢𑁆𑀯𑀸 𑀤𑀸𑀬𑀓𑁄 𑀧𑀼𑀡𑁆𑀡𑁄 𑀦𑀸𑀫 𑀏𑀓𑁄 𑀅𑀳𑁄𑀲𑀺, 𑀲𑁄 𑀤𑀩𑁆𑀩𑀺𑀕𑀳𑀡𑀲𑀺𑀧𑁆𑀧𑀁 𑀚𑀸𑀦𑀸𑀢𑀺. 𑀢𑁆𑀯𑀁 𑀲𑀸𑀘𑀭𑀺𑀬𑀓𑁄 𑀢𑁂𑀲𑀁 𑀧𑀼𑀡𑁆𑀡𑁄𑀧𑀺 𑀦 𑀳𑁄𑀢𑀺, 𑀢𑁂𑀦 𑀜𑀸𑀢𑀁 𑀤𑀩𑁆𑀩𑀺𑀕𑀳𑀡𑀲𑀺𑀧𑁆𑀧𑀫𑀢𑁆𑀢𑀫𑁆𑀧𑀺 𑀦 𑀚𑀸𑀦𑀸𑀲𑀻𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀬𑀁 𑀧𑀦 𑀅𑀲𑁆𑀲𑀮𑀸𑀬𑀦𑁄 𑀲𑀤𑁆𑀥𑁄 𑀅𑀳𑁄𑀲𑀺 𑀧𑀲𑀦𑁆𑀦𑁄, 𑀅𑀢𑁆𑀢𑀦𑁄 𑀅𑀦𑁆𑀢𑁄𑀦𑀺𑀯𑁂𑀲𑀦𑁂𑀬𑁂𑀯 𑀘𑁂𑀢𑀺𑀬𑀁 𑀓𑀸𑀭𑁂𑀲𑀺. 𑀬𑀸𑀯𑀚𑁆𑀚𑀤𑀺𑀯𑀲𑀸 𑀅𑀲𑁆𑀲𑀮𑀸𑀬𑀦𑀯𑀁𑀲𑁂 𑀚𑀸𑀢𑀸 𑀦𑀺𑀯𑁂𑀲𑀦𑀁 𑀓𑀸𑀭𑁂𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀘𑁂𑀢𑀺𑀬𑀁 𑀓𑀭𑁄𑀦𑁆𑀢𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀲𑁆𑀲𑀮𑀸𑀬𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀖𑁄𑀝𑀫𑀼𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁨. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀖𑁄𑀝𑀫𑀼𑀔𑀲𑀼𑀢𑁆𑀢𑀁. 𑀢𑀢𑁆𑀣 𑀔𑁂𑀫𑀺𑀬𑀫𑁆𑀩𑀯𑀦𑁂𑀢𑀺 𑀏𑀯𑀁𑀦𑀸𑀫𑀓𑁂 𑀅𑀫𑁆𑀩𑀯𑀦𑁂. 𑀥𑀫𑁆𑀫𑀺𑀓𑁄 𑀧𑀭𑀺𑀩𑁆𑀩𑀚𑁄𑀢𑀺 𑀥𑀫𑁆𑀫𑀺𑀓𑀸 𑀧𑀩𑁆𑀩𑀚𑁆𑀚𑀸. 𑀅𑀤𑀲𑁆𑀲𑀦𑀸𑀢𑀺 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀯𑀸 𑀧𑀡𑁆𑀟𑀺𑀢𑀸𑀦𑀁 𑀅𑀤𑀲𑁆𑀲𑀦𑁂𑀦. 𑀬𑁄 𑀯𑀸 𑀧𑀦𑁂𑀢𑁆𑀣 𑀥𑀫𑁆𑀫𑁄𑀢𑀺 𑀬𑁄 𑀯𑀸 𑀧𑀦 𑀏𑀢𑁆𑀣 𑀥𑀫𑁆𑀫𑁄 𑀲𑀪𑀸𑀯𑁄, 𑀢𑀲𑁆𑀲𑁂𑀯 𑀯𑀸 𑀅𑀤𑀲𑁆𑀲𑀦𑁂𑀦. 𑀇𑀫𑀺𑀦𑀸 ‘‘𑀅𑀫𑁆𑀳𑀸𑀓𑀁 𑀓𑀣𑀸 𑀅𑀧𑁆𑀧𑀫𑀸𑀡𑀁, 𑀥𑀫𑁆𑀫𑁄𑀯 𑀧𑀫𑀸𑀡’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁄 𑀣𑁂𑀭𑁄 ‘‘𑀦𑀯𑀉𑀧𑁄𑀲𑀣𑀸𑀕𑀸𑀭𑁂 𑀯𑀺𑀬 𑀩𑀳𑀼𑀦𑀸 𑀓𑀫𑁆𑀫𑁂𑀦 𑀇𑀥 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀗𑁆𑀓𑀫𑀸 𑀑𑀭𑀼𑀬𑁆𑀳 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑁂𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁧𑁩. 𑀘𑀢𑁆𑀢𑀸𑀭𑁄𑀫𑁂 𑀩𑁆𑀭𑀸𑀳𑁆𑀫𑀡𑀸𑀢𑀺 𑀣𑁂𑀭𑀲𑁆𑀲 𑀓𑀺𑀭 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 ‘𑀥𑀫𑁆𑀫𑀺𑀓𑀁 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀦𑀢𑁆𑀣𑀻’𑀢𑀺 𑀯𑀤𑀢𑀺. 𑀇𑀫𑀲𑁆𑀲 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑁂 𑀤𑁆𑀯𑁂 𑀘 𑀧𑀭𑀺𑀲𑀸 𑀤𑀲𑁆𑀲𑁂𑀢𑁆𑀯𑀸 ‘𑀘𑀢𑀼𑀢𑁆𑀣𑀁 𑀧𑀼𑀕𑁆𑀕𑀮𑀁 𑀓𑀢𑀭𑀸𑀬 𑀧𑀭𑀺𑀲𑀸𑀬 𑀩𑀳𑀼𑀮𑀁 𑀧𑀲𑁆𑀲𑀲𑀻’𑀢𑀺 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀚𑀸𑀦𑀫𑀸𑀦𑁄 ‘𑀅𑀦𑀸𑀕𑀸𑀭𑀺𑀬𑀧𑀭𑀺𑀲𑀸𑀬’𑀦𑁆𑀢𑀺 𑀯𑀓𑁆𑀔𑀢𑀺. 𑀏𑀯𑀫𑁂𑀢𑀁 𑀲𑀓𑀫𑀼𑀔𑁂𑀦𑁂𑀯 ‘𑀥𑀫𑁆𑀫𑀺𑀓𑁄 𑀧𑀭𑀺𑀩𑁆𑀩𑀚𑁄 𑀅𑀢𑁆𑀣𑀻’𑀢𑀺 𑀯𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑁪𑁧𑁪. 𑀢𑀢𑁆𑀣 𑀲𑀸𑀭𑀢𑁆𑀢𑀭𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀭𑀢𑁆𑀢𑀭𑀢𑁆𑀢𑀸. 𑀲𑀸𑀦𑀼𑀕𑁆𑀕𑀳𑀸 𑀯𑀸𑀘𑀸 𑀪𑀸𑀲𑀺𑀢𑀸 𑀲𑀓𑀸𑀭𑀡𑀸 𑀯𑀸𑀘𑀸 𑀪𑀸𑀲𑀺𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀬𑀸 ‘‘𑀅𑀫𑁆𑀳𑀸𑀓𑀁 𑀓𑀣𑀸 𑀅𑀧𑁆𑀧𑀫𑀸𑀡𑀁, 𑀥𑀫𑁆𑀫𑁄𑀯 𑀧𑀫𑀸𑀡’’𑀦𑁆𑀢𑀺.

𑁪𑁨𑁧. 𑀓𑀺𑀁 𑀧𑀦 𑀢𑁂𑀢𑀺 𑀕𑀺𑀳𑀺 𑀦𑀸𑀫 𑀓𑀧𑁆𑀧𑀺𑀬𑀫𑁆𑀧𑀺 𑀅𑀓𑀧𑁆𑀧𑀺𑀬𑀫𑁆𑀧𑀺 𑀯𑀤𑁂𑀬𑁆𑀬𑀸𑀢𑀺 𑀯𑀺𑀯𑁂𑀘𑀦𑀢𑁆𑀣𑀁 𑀧𑀼𑀘𑁆𑀙𑀺. 𑀓𑀸𑀭𑀸𑀧𑁂𑀲𑀻𑀢𑀺 𑀫𑀸𑀧𑁂𑀲𑀺. 𑀓𑀸𑀭𑀸𑀧𑁂𑀢𑁆𑀯𑀸 𑀘 𑀧𑀦 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄. 𑀏𑀢𑀲𑁆𑀲 𑀓𑀺𑀭 𑀚𑀸𑀦𑀦𑀲𑀺𑀧𑁆𑀧𑁂 𑀫𑀸𑀢𑀭𑀫𑁆𑀧𑀺 𑀧𑀺𑀢𑀭𑀫𑁆𑀧𑀺 𑀖𑀸𑀢𑁂𑀢𑁆𑀯𑀸 𑀅𑀢𑁆𑀢𑀸𑀯 𑀖𑀸𑀢𑁂𑀢𑀩𑁆𑀩𑁄𑀢𑀺 𑀆𑀕𑀘𑁆𑀙𑀢𑀺. 𑀏𑀢𑀁 𑀲𑀺𑀧𑁆𑀧𑀁 𑀚𑀸𑀦𑀦𑁆𑀢𑁄 𑀞𑀧𑁂𑀢𑁆𑀯𑀸 𑀏𑀢𑀁 𑀅𑀜𑁆𑀜𑁄 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀏𑀲 𑀧𑀦 𑀣𑁂𑀭𑀁 𑀉𑀧𑀦𑀺𑀲𑁆𑀲𑀸𑀬 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀘 𑀧𑀦 ‘‘𑀓𑁂𑀦𑀸𑀳𑀁 𑀓𑀫𑁆𑀫𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸 𑀏𑀓𑀤𑀺𑀯𑀲𑀁 𑀚𑀺𑀡𑁆𑀡𑀸𑀬 𑀪𑁄𑀚𑀦𑀲𑀸𑀮𑀸𑀬 𑀧𑀝𑀺𑀲𑀗𑁆𑀔𑀭𑀡𑀢𑁆𑀣𑀁 𑀲𑀗𑁆𑀖𑁂 𑀲𑀦𑁆𑀦𑀺𑀧𑀢𑀺𑀢𑁂 𑀫𑀦𑀼𑀲𑁆𑀲𑀯𑁂𑀲𑁂𑀦 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀫𑀢𑁆𑀣𑀁, 𑀪𑀦𑁆𑀢𑁂, 𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄’’𑀢𑀺? 𑀪𑁄𑀚𑀦𑀲𑀸𑀮𑀸𑀬 𑀧𑀝𑀺𑀲𑀗𑁆𑀔𑀭𑀡𑀢𑁆𑀣𑀦𑁆𑀢𑀺. 𑀓𑁂𑀦𑁂𑀲𑀸 𑀓𑀸𑀭𑀺𑀢𑀸𑀢𑀺? 𑀖𑁄𑀝𑀫𑀼𑀔𑁂𑀦𑀸𑀢𑀺. 𑀇𑀤𑀸𑀦𑀺 𑀲𑁄 𑀓𑀼𑀳𑀺𑀦𑁆𑀢𑀺? 𑀓𑀸𑀮𑀗𑁆𑀓𑀢𑁄𑀢𑀺. 𑀅𑀢𑁆𑀣𑀺 𑀧𑀦𑀲𑁆𑀲 𑀓𑁄𑀘𑀺 𑀜𑀸𑀢𑀓𑁄𑀢𑀺? 𑀅𑀢𑁆𑀣𑀺 𑀏𑀓𑀸 𑀪𑀕𑀺𑀦𑀻𑀢𑀺. 𑀧𑀓𑁆𑀓𑁄𑀲𑀸𑀧𑁂𑀣 𑀦𑀦𑁆𑀢𑀺. 𑀪𑀺𑀓𑁆𑀔𑀽 𑀧𑀓𑁆𑀓𑁄𑀲𑀸𑀧𑁂𑀲𑀼𑀁. 𑀲𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀅𑀳𑀁, 𑀢𑀯 𑀪𑀸𑀢𑀸, 𑀖𑁄𑀝𑀫𑀼𑀔𑁄 𑀦𑀸𑀫 𑀇𑀫𑀁 𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄, 𑀅𑀲𑀼𑀓𑁂 𑀘 𑀅𑀲𑀼𑀓𑁂 𑀘 𑀞𑀸𑀦𑁂 𑀫𑀬𑀸 𑀞𑀧𑀺𑀢𑀁 𑀥𑀦𑀁 𑀅𑀢𑁆𑀣𑀺, 𑀢𑀁 𑀕𑀳𑁂𑀢𑁆𑀯𑀸 𑀇𑀫𑀜𑁆𑀘 𑀪𑁄𑀚𑀦𑀲𑀸𑀮𑀁 𑀓𑀸𑀭𑁂𑀳𑀺, 𑀤𑀸𑀭𑀓𑁂 𑀘 𑀧𑁄𑀲𑁂𑀳𑀻’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀦𑁆𑀤𑀺𑀢𑁆𑀯𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀅𑀕𑀫𑀸𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀖𑁄𑀝𑀫𑀼𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀗𑁆𑀓𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨𑁨. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀗𑁆𑀓𑀻𑀲𑀼𑀢𑁆𑀢𑀁. 𑀢𑀢𑁆𑀣 𑀤𑁂𑀯𑀯𑀦𑁂 𑀲𑀸𑀮𑀯𑀦𑁂𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀤𑁂𑀯𑀢𑀸𑀦𑀁 𑀩𑀮𑀺𑀓𑀫𑁆𑀫𑀁 𑀓𑀭𑀻𑀬𑀢𑀺, 𑀢𑁂𑀦 𑀢𑀁 𑀤𑁂𑀯𑀯𑀦𑀦𑁆𑀢𑀺𑀧𑀺 𑀲𑀸𑀮𑀯𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀑𑀧𑀸𑀲𑀸𑀤𑀁 𑀅𑀚𑁆𑀛𑀸𑀯𑀲𑀢𑀻𑀢𑀺 𑀑𑀧𑀸𑀲𑀸𑀤𑀦𑀸𑀫𑀓𑁂 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀯𑀲𑀢𑀺, 𑀅𑀪𑀺𑀪𑀯𑀺𑀢𑁆𑀯𑀸 𑀯𑀸 𑀆𑀯𑀲𑀢𑀺, 𑀢𑀲𑁆𑀲 𑀲𑀸𑀫𑀻 𑀳𑀼𑀢𑁆𑀯𑀸 𑀬𑀸𑀬 𑀫𑀭𑀺𑀬𑀸𑀤𑀸𑀬 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁, 𑀢𑀸𑀬 𑀫𑀭𑀺𑀬𑀸𑀤𑀸𑀬 𑀯𑀲𑀢𑀺. 𑀉𑀧𑀲𑀕𑁆𑀕𑀯𑀲𑁂𑀦 𑀧𑀦𑁂𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀣𑀲𑁆𑀲 𑀅𑀦𑀼𑀧𑁆𑀧𑀬𑁄𑀕𑀢𑁆𑀢𑀸𑀯 𑀲𑁂𑀲𑀧𑀤𑁂𑀲𑀼. 𑀢𑀢𑁆𑀣 𑀮𑀓𑁆𑀔𑀡𑀁 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀲𑀢𑁆𑀢𑀼𑀲𑁆𑀲𑀤𑀦𑁆𑀢𑀺 𑀲𑀢𑁆𑀢𑁂𑀳𑀺 𑀉𑀲𑁆𑀲𑀤𑀁 𑀉𑀲𑁆𑀲𑀦𑁆𑀦𑀁, 𑀩𑀳𑀼𑀚𑀦𑀁 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀁 𑀧𑁄𑀲𑀸𑀯𑀦𑀺𑀬𑀳𑀢𑁆𑀣𑀺𑀅𑀲𑁆𑀲𑀫𑁄𑀭𑀫𑀺𑀕𑀸𑀤𑀺𑀅𑀦𑁂𑀓𑀲𑀢𑁆𑀢𑀲𑀫𑀸𑀓𑀺𑀡𑁆𑀡𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀲𑁄 𑀕𑀸𑀫𑁄 𑀩𑀳𑀺 𑀆𑀯𑀺𑀚𑁆𑀛𑀺𑀢𑁆𑀯𑀸 𑀚𑀸𑀢𑁂𑀦 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀖𑀸𑀲𑀢𑀺𑀡𑁂𑀦 𑀘𑁂𑀯 𑀕𑁂𑀳𑀘𑁆𑀙𑀤𑀦𑀢𑀺𑀡𑁂𑀦 𑀘 𑀲𑀫𑁆𑀧𑀦𑁆𑀦𑁄, 𑀢𑀣𑀸 𑀤𑀸𑀭𑀼𑀓𑀝𑁆𑀞𑁂𑀳𑀺 𑀘𑁂𑀯 𑀕𑁂𑀳𑀲𑀫𑁆𑀪𑀸𑀭𑀓𑀝𑁆𑀞𑁂𑀳𑀺 𑀘, 𑀬𑀲𑁆𑀫𑀸 𑀘𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀯𑀝𑁆𑀝𑀘𑀢𑀼𑀭𑀲𑁆𑀲𑀸𑀤𑀺𑀲𑀡𑁆𑀞𑀸𑀦𑀸 𑀩𑀳𑀽 𑀧𑁄𑀓𑁆𑀔𑀭𑀡𑀺𑀬𑁄, 𑀚𑀮𑀚𑀓𑀼𑀲𑀼𑀫𑀯𑀺𑀘𑀺𑀢𑁆𑀢𑀸𑀦𑀺 𑀘 𑀩𑀳𑀺 𑀅𑀦𑁂𑀓𑀸𑀦𑀺 𑀢𑀴𑀸𑀓𑀸𑀦𑀺 𑀯𑀸 𑀉𑀤𑀓𑀲𑁆𑀲 𑀦𑀺𑀘𑁆𑀘𑀪𑀭𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀢𑀺𑀡𑀓𑀝𑁆𑀞𑁄𑀤𑀓𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀳 𑀥𑀜𑁆𑀜𑁂𑀦 𑀲𑀥𑀜𑁆𑀜𑀁, 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀤𑀺𑀪𑁂𑀤𑀁 𑀩𑀳𑀼𑀥𑀜𑁆𑀜𑀲𑀦𑁆𑀦𑀺𑀘𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀬𑀲𑁆𑀫𑀺𑀁 𑀕𑀸𑀫𑁂 𑀩𑁆𑀭𑀸𑀳𑁆𑀫𑀡𑁄 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀸𑀚𑀮𑀻𑀮𑀸𑀬 𑀯𑀲𑀢𑀺. 𑀢𑀲𑁆𑀲 𑀲𑀫𑀺𑀤𑁆𑀥𑀺𑀲𑀫𑁆𑀧𑀢𑁆𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺. 𑀭𑀸𑀚𑀢𑁄 𑀮𑀤𑁆𑀥𑀁 𑀪𑁄𑀕𑁆𑀕𑀁 𑀭𑀸𑀚𑀪𑁄𑀕𑁆𑀕𑀁. 𑀓𑁂𑀦 𑀤𑀺𑀦𑁆𑀦𑀦𑁆𑀢𑀺 𑀘𑁂, 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦𑀁. 𑀭𑀸𑀚𑀤𑀸𑀬𑀦𑁆𑀢𑀺 𑀭𑀜𑁆𑀜𑁄 𑀤𑀸𑀬𑀪𑀽𑀢𑀁, 𑀤𑀸𑀬𑀚𑁆𑀚𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀤𑁂𑀬𑁆𑀬𑀦𑁆𑀢𑀺 𑀲𑁂𑀝𑁆𑀞𑀤𑁂𑀬𑁆𑀬𑀁, 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀸𑀚𑀲𑀗𑁆𑀔𑁂𑀧𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀭𑀸𑀚𑀪𑁄𑀕𑁆𑀕𑀦𑁆𑀢𑀺 𑀲𑀩𑁆𑀩𑀁 𑀙𑁂𑀚𑁆𑀚𑀪𑁂𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑁂𑀦 𑀢𑀺𑀢𑁆𑀣𑀧𑀩𑁆𑀩𑀢𑀸𑀤𑀻𑀲𑀼 𑀲𑀼𑀗𑁆𑀓𑀁 𑀕𑀡𑁆𑀳𑀦𑁆𑀢𑁂𑀦 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀜𑁆𑀜𑀸 𑀳𑀼𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀢𑀢𑁆𑀣 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦𑀁 𑀭𑀸𑀚𑀤𑀸𑀬𑀦𑁆𑀢𑀺. 𑀏𑀢𑁆𑀣 𑀭𑀜𑁆𑀜𑀸 𑀤𑀺𑀦𑁆𑀦𑀢𑁆𑀢𑀸 𑀭𑀸𑀚𑀤𑀸𑀬𑀁, 𑀤𑀸𑀬𑀓𑀭𑀸𑀚𑀤𑀻𑀧𑀦𑀢𑁆𑀣𑀁 𑀧𑀦𑀲𑁆𑀲 ‘‘𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦’’𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀁. 𑀩𑁆𑀭𑀳𑁆𑀫𑀤𑁂𑀬𑁆𑀬𑀦𑁆𑀢𑀺 𑀲𑁂𑀝𑁆𑀞𑀤𑁂𑀬𑁆𑀬𑀁, 𑀬𑀣𑀸 𑀤𑀺𑀦𑁆𑀦𑀁 𑀦 𑀧𑀼𑀦 𑀕𑀳𑁂𑀢𑀩𑁆𑀩𑀁 𑀳𑁄𑀢𑀺 𑀦𑀺𑀲𑁆𑀲𑀝𑁆𑀞𑀧𑀭𑀺𑀘𑁆𑀘𑀢𑁆𑀢𑀁, 𑀏𑀯𑀁 𑀤𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄.

𑁪𑁨𑁩. 𑀩𑀳𑀽 𑀩𑀳𑀽 𑀳𑀼𑀢𑁆𑀯𑀸 𑀲𑀁𑀳𑀢𑀸𑀢𑀺 𑀲𑀗𑁆𑀖𑀸. 𑀏𑀓𑁂𑀓𑀺𑀲𑁆𑀲𑀸 𑀤𑀺𑀲𑀸𑀬 𑀲𑀗𑁆𑀖𑁄 𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀗𑁆𑀖𑀻. 𑀧𑀼𑀩𑁆𑀩𑁂 𑀕𑀸𑀫𑀲𑁆𑀲 𑀅𑀦𑁆𑀢𑁄 𑀅𑀕𑀡𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀡𑀸 𑀲𑀫𑁆𑀧𑀦𑁆𑀦𑀸𑀢𑀺 𑀕𑀡𑀻𑀪𑀽𑀢𑀸. 𑀉𑀢𑁆𑀢𑀭𑁂𑀦𑀫𑀼𑀔𑀸𑀢𑀺 𑀉𑀢𑁆𑀢𑀭𑀤𑀺𑀲𑀸𑀪𑀺𑀫𑀼𑀔𑀸. 𑀔𑀢𑁆𑀢𑀁 𑀆𑀫𑀦𑁆𑀢𑁂𑀲𑀻𑀢𑀺 𑀔𑀢𑁆𑀢𑀸 𑀯𑀼𑀘𑁆𑀘𑀢𑀺 𑀧𑀼𑀘𑁆𑀙𑀺𑀢𑀧𑀜𑁆𑀳𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑁄 𑀫𑀳𑀸𑀫𑀢𑁆𑀢𑁄, 𑀢𑀁 𑀆𑀫𑀦𑁆𑀢𑁂𑀲𑀺. 𑀆𑀕𑀫𑁂𑀦𑁆𑀢𑀽𑀢𑀺 𑀫𑀼𑀳𑀼𑀢𑁆𑀢𑀁 𑀧𑀝𑀺𑀫𑀸𑀦𑁂𑀦𑁆𑀢𑀼, 𑀅𑀘𑁆𑀙𑀦𑁆𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁨𑁪. 𑀦𑀸𑀦𑀸𑀯𑁂𑀭𑀚𑁆𑀚𑀓𑀸𑀦𑀦𑁆𑀢𑀺 𑀦𑀸𑀦𑀸𑀯𑀺𑀥𑁂𑀲𑀼 𑀭𑀚𑁆𑀚𑁂𑀲𑀼 𑀅𑀜𑁆𑀜𑁂𑀲𑀼 𑀓𑀸𑀲𑀺𑀓𑁄𑀲𑀮𑀸𑀤𑀻𑀲𑀼 𑀚𑀸𑀢𑀸 𑀯𑀸 𑀦𑀺𑀯𑀲𑀦𑁆𑀢𑀺 𑀯𑀸, 𑀢𑀢𑁄 𑀯𑀸 𑀆𑀕𑀢𑀸𑀢𑀺 𑀦𑀸𑀦𑀸𑀯𑁂𑀭𑀚𑁆𑀚𑀓𑀸, 𑀢𑁂𑀲𑀁 𑀦𑀸𑀦𑀸𑀯𑁂𑀭𑀚𑁆𑀚𑀓𑀸𑀦𑀁. 𑀓𑁂𑀦𑀘𑀺𑀤𑁂𑀯𑀸𑀢𑀺 𑀅𑀦𑀺𑀬𑀫𑀺𑀢𑁂𑀦 𑀬𑀜𑁆𑀜𑀼𑀧𑀸𑀲𑀦𑀸𑀤𑀺𑀦𑀸 𑀓𑁂𑀦𑀘𑀺 𑀓𑀺𑀘𑁆𑀘𑁂𑀦. 𑀢𑁂 𑀢𑀲𑁆𑀲 𑀕𑀫𑀦𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀬𑀁, 𑀘𑀗𑁆𑀓𑀻, 𑀉𑀕𑁆𑀕𑀢𑀩𑁆𑀭𑀸𑀳𑁆𑀫𑀡𑁄, 𑀬𑁂𑀪𑀼𑀬𑁆𑀬𑁂𑀦 𑀘 𑀅𑀜𑁆𑀜𑁂 𑀩𑁆𑀭𑀸𑀳𑁆𑀫𑀡𑀸 𑀲𑀫𑀡𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀢𑀸, 𑀅𑀬𑀫𑁂𑀯 𑀦 𑀕𑀢𑁄. 𑀲𑁆𑀯𑀸𑀬𑀁 𑀲𑀘𑁂 𑀢𑀢𑁆𑀣 𑀕𑀫𑀺𑀲𑁆𑀲𑀢𑀺, 𑀅𑀤𑁆𑀥𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀆𑀯𑀝𑁆𑀝𑀦𑀺𑀬𑀸 𑀫𑀸𑀬𑀸𑀬 𑀆𑀯𑀝𑁆𑀝𑀺𑀢𑁄 𑀲𑀭𑀡𑀁 𑀕𑀫𑀺𑀲𑁆𑀲𑀢𑀺. 𑀢𑀢𑁄 𑀏𑀢𑀲𑁆𑀲𑀸𑀧𑀺 𑀕𑁂𑀳𑀤𑁆𑀯𑀸𑀭𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀲𑀦𑁆𑀦𑀺𑀧𑀸𑀢𑁄 𑀪𑀯𑀺𑀲𑁆𑀲𑀢𑀺. 𑀳𑀦𑁆𑀤𑀲𑁆𑀲 𑀕𑀫𑀦𑀦𑁆𑀢𑀭𑀸𑀬𑀁 𑀓𑀭𑁄𑀫𑀸’’𑀢𑀺 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀢𑀢𑁆𑀣 𑀅𑀕𑀫𑀁𑀲𑀼. 𑀢𑀁 𑀲𑀦𑁆𑀥𑀸𑀬 ‘‘𑀅𑀣 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀉𑀪𑀢𑁄𑀢𑀺 𑀤𑁆𑀯𑀻𑀳𑀺 𑀧𑀓𑁆𑀔𑁂𑀳𑀺. 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘𑀸𑀢𑀺, 𑀪𑁄𑀢𑁄 𑀫𑀸𑀢𑀸 𑀩𑁆𑀭𑀸𑀳𑁆𑀫𑀡𑀻, 𑀫𑀸𑀢𑀼𑀫𑀸𑀢𑀸 𑀩𑁆𑀭𑀸𑀳𑁆𑀫𑀡𑀻, 𑀢𑀲𑁆𑀲𑀸𑀧𑀺 𑀫𑀸𑀢𑀸 𑀩𑁆𑀭𑀸𑀳𑁆𑀫𑀡𑀻. 𑀧𑀺𑀢𑀸 𑀩𑁆𑀭𑀸𑀳𑁆𑀫𑀡𑁄, 𑀧𑀺𑀢𑀼𑀧𑀺𑀢𑀸 𑀩𑁆𑀭𑀸𑀳𑁆𑀫𑀡𑁄, 𑀢𑀲𑁆𑀲𑀧𑀺 𑀧𑀺𑀢𑀸 𑀩𑁆𑀭𑀸𑀳𑁆𑀫𑀡𑁄𑀢𑀺. 𑀏𑀯𑀁 𑀪𑀯𑀁 𑀉𑀪𑀢𑁄 𑀲𑀼𑀚𑀸𑀢𑁄, 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘. 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄𑀢𑀺 𑀲𑀁𑀲𑀼𑀤𑁆𑀥𑀸 𑀢𑁂 𑀫𑀸𑀢𑀼 𑀕𑀳𑀡𑀻, 𑀲𑀁𑀲𑀼𑀤𑁆𑀥𑀸 𑀢𑁂 𑀫𑀸𑀢𑀼 𑀓𑀼𑀘𑁆𑀙𑀻𑀢𑀺 𑀅𑀢𑁆𑀣𑁄. 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸𑀢𑀺 𑀏𑀢𑁆𑀣 𑀧𑀺𑀢𑀼 𑀧𑀺𑀢𑀸 𑀧𑀺𑀢𑀸𑀫𑀳𑁄, 𑀧𑀺𑀢𑀸𑀫𑀳𑀲𑁆𑀲 𑀬𑀼𑀕𑀁 𑀧𑀺𑀢𑀸𑀫𑀳𑀬𑀼𑀕𑀁. 𑀬𑀼𑀕𑀦𑁆𑀢𑀺 𑀆𑀬𑀼𑀧𑁆𑀧𑀫𑀸𑀡𑀁 𑀯𑀼𑀘𑁆𑀘𑀢𑀺. 𑀅𑀪𑀺𑀮𑀸𑀧𑀫𑀢𑁆𑀢𑀫𑁂𑀯 𑀘𑁂𑀢𑀁, 𑀅𑀢𑁆𑀣𑀢𑁄 𑀧𑀦 𑀧𑀺𑀢𑀸𑀫𑀳𑁄𑀯 𑀧𑀺𑀢𑀸𑀫𑀳𑀬𑀼𑀕𑀁. 𑀢𑀢𑁄 𑀉𑀤𑁆𑀥𑀁 𑀲𑀩𑁆𑀩𑁂𑀧𑀺 𑀧𑀼𑀩𑁆𑀩𑀧𑀼𑀭𑀺𑀲𑀸 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸. 𑀏𑀯𑀁 𑀬𑀸𑀯 𑀲𑀢𑁆𑀢𑀫𑁄 𑀧𑀼𑀭𑀺𑀲𑁄, 𑀢𑀸𑀯 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄. 𑀅𑀣 𑀯𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀓𑁆𑀔𑀺𑀢𑁆𑀢𑁄𑀢𑀺 𑀅𑀧𑀦𑁂𑀣 𑀏𑀢𑀁, 𑀓𑀺𑀁 𑀇𑀫𑀺𑀦𑀸𑀢𑀺 𑀏𑀯𑀁 𑀅𑀓𑁆𑀔𑀺𑀢𑁆𑀢𑁄 𑀅𑀦𑀯𑀓𑁆𑀔𑀺𑀢𑁆𑀢𑁄. 𑀅𑀦𑀼𑀧𑀓𑁆𑀓𑀼𑀝𑁆𑀞𑁄𑀢𑀺 𑀦 𑀉𑀧𑀓𑀼𑀝𑁆𑀞𑁄, 𑀦 𑀅𑀓𑁆𑀓𑁄𑀲𑀁 𑀯𑀸 𑀦𑀺𑀦𑁆𑀤𑀁 𑀯𑀸 𑀧𑀢𑁆𑀢𑀧𑀼𑀩𑁆𑀩𑁄. 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺. 𑀚𑀸𑀢𑀺𑀯𑀸𑀤𑁂𑀦, 𑀇𑀢𑀺𑀧𑀺 𑀳𑀻𑀦𑀚𑀸𑀢𑀺𑀓𑁄 𑀏𑀲𑁄𑀢𑀺 𑀏𑀯𑀭𑀽𑀧𑁂𑀦 𑀯𑀘𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸𑀧𑀗𑁆𑀕𑁂𑀦𑀸𑀢𑀺 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦.

𑀅𑀟𑁆𑀠𑁄𑀢𑀺 𑀇𑀲𑁆𑀲𑀭𑁄. 𑀫𑀳𑀤𑁆𑀥𑀦𑁄𑀢𑀺 𑀫𑀳𑀢𑀸 𑀥𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀪𑁄𑀢𑁄 𑀳𑀺 𑀕𑁂𑀳𑁂 𑀧𑀣𑀯𑀺𑀬𑀁 𑀧𑀁𑀲𑀼𑀯𑀸𑀮𑀺𑀓𑀸 𑀯𑀺𑀬 𑀩𑀳𑀼 𑀥𑀦𑀁, 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑀅𑀥𑀦𑁄 𑀪𑀺𑀓𑁆𑀔𑀸𑀬 𑀉𑀤𑀭𑀁 𑀧𑀽𑀭𑁂𑀢𑁆𑀯𑀸 𑀬𑀸𑀧𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑀺. 𑀫𑀳𑀸𑀪𑁄𑀕𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀫𑀳𑀸𑀉𑀧𑀪𑁄𑀕𑁄. 𑀏𑀯𑀁 𑀬𑀁 𑀬𑀁 𑀕𑀼𑀡𑀁 𑀯𑀤𑀦𑁆𑀢𑀺, 𑀢𑀲𑁆𑀲 𑀢𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀪𑀕𑀯𑀢𑁄 𑀅𑀕𑀼𑀡𑀁𑀬𑁂𑀯 𑀤𑀲𑁆𑀲𑁂𑀫𑀸𑀢𑀺 𑀫𑀜𑁆𑀜𑀫𑀸𑀦𑀸 𑀯𑀤𑀦𑁆𑀢𑀺.

𑀅𑀪𑀺𑀭𑀽𑀧𑁄𑀢𑀺 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀅𑀥𑀺𑀓𑀭𑀽𑀧𑁄. 𑀤𑀲𑁆𑀲𑀦𑀻𑀬𑁄𑀢𑀺 𑀤𑀺𑀯𑀲𑀫𑁆𑀧𑀺 𑀧𑀲𑁆𑀲𑀦𑁆𑀢𑀸𑀦𑀁 𑀅𑀢𑀺𑀢𑁆𑀢𑀺𑀓𑀭𑀡𑀢𑁄 𑀤𑀲𑁆𑀲𑀦𑀬𑁄𑀕𑁆𑀕𑁄, 𑀤𑀲𑁆𑀲𑀦𑁂𑀦𑁂𑀯 𑀘𑀺𑀢𑁆𑀢𑀧𑀲𑀸𑀤𑀚𑀦𑀦𑀢𑁄 𑀧𑀸𑀲𑀸𑀤𑀺𑀓𑁄. 𑀧𑁄𑀓𑁆𑀔𑀭𑀢𑀸 𑀯𑀼𑀘𑁆𑀘𑀢𑀺 𑀲𑀼𑀦𑁆𑀤𑀭𑀪𑀸𑀯𑁄, 𑀯𑀡𑁆𑀡𑀲𑁆𑀲 𑀧𑁄𑀓𑁆𑀔𑀭𑀢𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸, 𑀢𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬, 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀧𑁄𑀭𑀸𑀡𑀸 𑀧𑀦 𑀧𑁄𑀓𑁆𑀔𑀭𑀦𑁆𑀢𑀺 𑀲𑀭𑀻𑀭𑀁 𑀯𑀤𑀦𑁆𑀢𑀺, 𑀯𑀡𑁆𑀡𑀁 𑀯𑀡𑁆𑀡𑀫𑁂𑀯. 𑀢𑁂𑀲𑀁 𑀫𑀢𑁂𑀦 𑀯𑀡𑁆𑀡𑁄 𑀘 𑀧𑁄𑀓𑁆𑀔𑀭𑀜𑁆𑀘 𑀯𑀡𑁆𑀡𑀧𑁄𑀓𑁆𑀔𑀭𑀸𑀦𑀺, 𑀢𑁂𑀲𑀁 𑀪𑀸𑀯𑁄 𑀯𑀡𑁆𑀡𑀧𑁄𑀓𑁆𑀔𑀭𑀢𑀸. 𑀇𑀢𑀺 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀉𑀢𑁆𑀢𑀫𑀧𑀭𑀺𑀲𑀼𑀤𑁆𑀥𑁂𑀦 𑀯𑀡𑁆𑀡𑁂𑀦 𑀘𑁂𑀯 𑀲𑀭𑀻𑀭𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘𑀸𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀯𑀡𑁆𑀡𑀻𑀢𑀺 𑀲𑁂𑀝𑁆𑀞𑀯𑀡𑁆𑀡𑀻, 𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑁂𑀲𑀼𑀧𑀺 𑀲𑁂𑀝𑁆𑀞𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑁂𑀦𑁂𑀯 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀯𑀘𑁆𑀙𑀲𑀻𑀢𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀲𑀭𑀻𑀭𑀲𑀤𑀺𑀲𑁂𑀦 𑀲𑀭𑀻𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬𑀸𑀢𑀺 𑀪𑁄𑀢𑁄 𑀲𑀭𑀻𑀭𑁂 𑀤𑀲𑁆𑀲𑀦𑀲𑁆𑀲 𑀑𑀓𑀸𑀲𑁄 𑀦 𑀔𑀼𑀤𑁆𑀤𑀓𑁄 𑀫𑀳𑀸. 𑀲𑀩𑁆𑀩𑀸𑀦𑁂𑀯 𑀢𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀤𑀲𑁆𑀲𑀦𑀻𑀬𑀸𑀦𑁂𑀯, 𑀢𑀸𑀦𑀺 𑀘𑀸𑀧𑀺 𑀫𑀳𑀦𑁆𑀢𑀸𑀦𑁂𑀯𑀸𑀢𑀺 𑀤𑀻𑀧𑁂𑀢𑀺.

𑀲𑀻𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀯𑀸. 𑀯𑀼𑀤𑁆𑀥𑀁 𑀯𑀟𑁆𑀠𑀺𑀢𑀁 𑀲𑀻𑀮𑀫𑀲𑁆𑀲𑀸𑀢𑀺 𑀯𑀼𑀤𑁆𑀥𑀲𑀻𑀮𑀻. 𑀯𑀼𑀤𑁆𑀥𑀲𑀻𑀮𑁂𑀦𑀸𑀢𑀺 𑀯𑀼𑀤𑁆𑀥𑁂𑀦 𑀯𑀟𑁆𑀠𑀺𑀢𑁂𑀦 𑀲𑀻𑀮𑁂𑀦. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀬𑀼𑀢𑁆𑀢𑁄, 𑀇𑀤𑀁 𑀯𑀼𑀤𑁆𑀥𑀲𑀻𑀮𑀻𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀩𑁆𑀩𑀫𑁂𑀢𑀁 𑀧𑀜𑁆𑀘𑀲𑀻𑀮𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺.

𑀓𑀸𑀮𑁆𑀬𑀸𑀡𑀯𑀸𑀘𑁄𑀢𑀺𑀆𑀤𑀻𑀲𑀼 𑀓𑀮𑁆𑀬𑀸𑀡𑀸 𑀲𑀼𑀦𑁆𑀤𑀭𑀸 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸 𑀯𑀸𑀘𑀸 𑀅𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀯𑀸𑀘𑁄. 𑀓𑀮𑁆𑀬𑀸𑀡𑀁 𑀫𑀥𑀼𑀭𑀁 𑀯𑀸𑀓𑁆𑀓𑀭𑀡𑀁 𑀅𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄. 𑀯𑀸𑀓𑁆𑀓𑀭𑀡𑀦𑁆𑀢𑀺 𑀉𑀤𑀸𑀳𑀭𑀡𑀖𑁄𑀲𑁄. 𑀕𑀼𑀡𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀧𑀼𑀭𑁂 𑀪𑀯𑀸𑀢𑀺 𑀧𑁄𑀭𑀻. 𑀧𑀼𑀭𑁂 𑀯𑀸 𑀪𑀯𑀢𑁆𑀢𑀸 𑀧𑁄𑀭𑀻. 𑀦𑀸𑀕𑀭𑀺𑀓𑀺𑀢𑁆𑀣𑀺𑀬𑀸 𑀲𑀼𑀔𑀼𑀫𑀸𑀮𑀢𑁆𑀢𑀦𑁂𑀦 𑀲𑀤𑀺𑀲𑀸𑀢𑀺𑀧𑀺 𑀧𑁄𑀭𑀻. 𑀢𑀸𑀬 𑀧𑁄𑀭𑀺𑀬𑀸. 𑀯𑀺𑀲𑁆𑀲𑀝𑁆𑀞𑀸𑀬𑀸𑀢𑀺 𑀅𑀧𑀮𑀺𑀩𑀼𑀤𑁆𑀥𑀸𑀬, 𑀲𑀦𑁆𑀤𑀺𑀝𑁆𑀞𑀯𑀺𑀮𑀫𑁆𑀩𑀺𑀢𑀸𑀤𑀺𑀤𑁄𑀲𑀭𑀳𑀺𑀢𑀸𑀬. 𑀅𑀦𑁂𑀮𑀕𑀮𑀸𑀬𑀸𑀢𑀺 𑀏𑀮𑀕𑀮𑁂𑀦 𑀯𑀺𑀭𑀳𑀺𑀢𑀸𑀬. 𑀏𑀓𑀘𑁆𑀘𑀲𑁆𑀲 𑀳𑀺 𑀓𑀣𑁂𑀦𑁆𑀢𑀲𑁆𑀲 𑀏𑀮𑀁 𑀕𑀮𑀢𑀺, 𑀮𑀸𑀮𑀸 𑀯𑀸 𑀧𑀕𑁆𑀖𑀭𑀢𑀺, 𑀔𑁂𑀴𑀨𑀼𑀲𑀺𑀢𑀸𑀦𑀺 𑀯𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀢𑀲𑁆𑀲 𑀯𑀸𑀘𑀸 𑀏𑀮𑀕𑀮𑀸 𑀦𑀸𑀫 𑀳𑁄𑀢𑀺. 𑀢𑀩𑁆𑀩𑀺𑀧𑀭𑀺𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸𑀢𑀺𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀪𑀸𑀲𑀺𑀢𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀲𑀫𑀢𑁆𑀣𑀸𑀬. 𑀲𑁂𑀲𑀫𑁂𑀢𑁆𑀣 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂 𑀉𑀢𑁆𑀢𑀸𑀦𑀫𑁂𑀯.

𑁪𑁨𑁫. 𑀏𑀯𑀁 𑀯𑀼𑀢𑁆𑀢𑁂𑀢𑀺 𑀏𑀯𑀁 𑀢𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀼𑀢𑁆𑀢𑁂, 𑀘𑀗𑁆𑀓𑀻, ‘‘𑀇𑀫𑁂 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑁄 𑀯𑀡𑁆𑀡𑁂 𑀯𑀼𑀘𑁆𑀘𑀫𑀸𑀦𑁂 𑀅𑀢𑀼𑀲𑁆𑀲𑀦𑀓𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀯𑀡𑁆𑀡𑀫𑀲𑁆𑀲 𑀪𑀡𑀺𑀢𑁆𑀯𑀸 𑀦𑀺𑀯𑀸𑀭𑁂𑀲𑁆𑀲𑀸𑀫𑀸𑀢𑀺 𑀚𑀸𑀢𑀺𑀆𑀤𑀻𑀳𑀺 𑀫𑀫 𑀯𑀡𑁆𑀡𑀁 𑀯𑀤𑀦𑁆𑀢𑀺, 𑀦 𑀔𑁄 𑀧𑀦 𑀫𑁂 𑀬𑀼𑀢𑁆𑀢𑀁 𑀅𑀢𑁆𑀢𑀦𑁄 𑀯𑀡𑁆𑀡𑁂 𑀭𑀚𑁆𑀚𑀺𑀢𑀼𑀁. 𑀳𑀦𑁆𑀤𑀸𑀳𑀁 𑀏𑀢𑁂𑀲𑀁 𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀫𑀳𑀦𑁆𑀢𑀪𑀸𑀯𑀁 𑀜𑀸𑀧𑁂𑀢𑁆𑀯𑀸 𑀏𑀢𑁂𑀲𑀁 𑀢𑀢𑁆𑀣 𑀕𑀫𑀦𑀁 𑀓𑀭𑁄𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦 𑀳𑀺, 𑀪𑁄, 𑀫𑀫𑀸𑀧𑀺 𑀲𑀼𑀡𑀸𑀣𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁂𑀧𑀺 ‘‘𑀉𑀪𑀢𑁄 𑀲𑀼𑀚𑀸𑀢𑁄’’𑀢𑀺𑀆𑀤𑀬𑁄 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀲𑀤𑀺𑀲𑀸 𑀕𑀼𑀡𑀸, 𑀢𑁂𑀧𑀺 ‘‘𑀓𑁄 𑀘𑀸𑀳𑀁, 𑀓𑁂 𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀆𑀤𑀬𑁄 𑀕𑀼𑀡𑀸’’𑀢𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀉𑀢𑁆𑀢𑀭𑀺𑀢𑀭𑁂𑀬𑁂𑀯 𑀫𑀜𑁆𑀜𑀫𑀸𑀦𑁄, 𑀇𑀢𑀭𑁂 𑀧𑀦 𑀏𑀓𑀦𑁆𑀢𑁂𑀦𑁂𑀯 𑀪𑀕𑀯𑀢𑁄 𑀫𑀳𑀦𑁆𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀧𑀓𑀸𑀲𑁂𑀢𑀺. 𑀫𑀬𑀫𑁂𑀯 𑀅𑀭𑀳𑀸𑀫𑀸𑀢𑀺 𑀏𑀯𑀁 𑀦𑀺𑀬𑀫𑁂𑀦𑁆𑀢𑁄 𑀘𑁂𑀢𑁆𑀣 𑀇𑀤𑀁 𑀤𑀻𑀧𑁂𑀢𑀺 𑁋 𑀬𑀤𑀺 𑀕𑀼𑀡𑀫𑀳𑀦𑁆𑀢𑀢𑀸𑀬 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀦𑀸𑀫 𑀳𑁄𑀢𑀺, 𑀬𑀣𑀸 𑀲𑀺𑀦𑁂𑀭𑀼𑀁 𑀉𑀧𑀦𑀺𑀥𑀸𑀬 𑀲𑀸𑀲𑀧𑁄, 𑀫𑀳𑀸𑀲𑀫𑀼𑀤𑁆𑀤𑀁 𑀉𑀧𑀦𑀺𑀥𑀸𑀬 𑀕𑁄𑀧𑀤𑀓𑀁, 𑀲𑀢𑁆𑀢𑀲𑀼 𑀫𑀳𑀸𑀲𑀭𑁂𑀲𑀼 𑀉𑀤𑀓𑀁 𑀉𑀧𑀦𑀺𑀥𑀸𑀬 𑀉𑀲𑁆𑀲𑀸𑀯𑀩𑀺𑀦𑁆𑀤𑀼 𑀧𑀭𑀺𑀢𑁆𑀢𑁄 𑀮𑀸𑀫𑀓𑁄, 𑀏𑀯𑀫𑁂𑀯𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀆𑀤𑀬𑁄 𑀕𑀼𑀡𑁂 𑀉𑀧𑀦𑀺𑀥𑀸𑀬 𑀅𑀫𑁆𑀳𑀸𑀓𑀁 𑀕𑀼𑀡𑀸 𑀧𑀭𑀺𑀢𑁆𑀢𑀸 𑀮𑀸𑀫𑀓𑀸, 𑀢𑀲𑁆𑀫𑀸 𑀫𑀬𑀫𑁂𑀯 𑀅𑀭𑀳𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀦𑁆𑀢𑀺.

𑀪𑀽𑀫𑀺𑀕𑀢𑀜𑁆𑀘 𑀯𑁂𑀳𑀸𑀲𑀝𑁆𑀞𑀜𑁆𑀘𑀸𑀢𑀺 𑀏𑀢𑁆𑀣 𑀭𑀸𑀚𑀗𑁆𑀕𑀡𑁂 𑀘𑁂𑀯 𑀉𑀬𑁆𑀬𑀸𑀦𑁂 𑀘 𑀲𑀼𑀥𑀸𑀫𑀝𑁆𑀞𑀸 𑀧𑁄𑀓𑁆𑀔𑀭𑀡𑀺𑀬𑁄 𑀲𑀢𑁆𑀢𑀭𑀢𑀦𑀧𑀽𑀭𑀺𑀁 𑀓𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑀺𑀢𑀁 𑀥𑀦𑀁 𑀪𑀽𑀫𑀺𑀕𑀢𑀁 𑀦𑀸𑀫, 𑀧𑀸𑀲𑀸𑀤𑀦𑀺𑀬𑀽𑀳𑀸𑀤𑀬𑁄 𑀧𑀦 𑀧𑀽𑀭𑁂𑀢𑁆𑀯𑀸 𑀞𑀧𑀺𑀢𑀁 𑀯𑁂𑀳𑀸𑀲𑀝𑁆𑀞𑀁 𑀦𑀸𑀫. 𑀏𑀯𑀁 𑀢𑀸𑀯 𑀓𑀼𑀮𑀧𑀭𑀺𑀬𑀸𑀬𑁂𑀦 𑀆𑀕𑀢𑀁. 𑀢𑀣𑀸𑀕𑀢𑀲𑁆𑀲 𑀧𑀦 𑀚𑀸𑀢𑀤𑀺𑀯𑀲𑁂𑀬𑁂𑀯 𑀲𑀗𑁆𑀔𑁄 𑀏𑀮𑁄 𑀉𑀧𑁆𑀧𑀮𑁄 𑀧𑀼𑀡𑁆𑀟𑀭𑀻𑀓𑁄𑀢𑀺 𑀘𑀢𑁆𑀢𑀸𑀭𑁄 𑀦𑀺𑀥𑀬𑁄 𑀉𑀧𑀕𑀢𑀸. 𑀢𑁂𑀲𑀼 𑀲𑀗𑁆𑀔𑁄 𑀕𑀸𑀯𑀼𑀢𑀺𑀓𑁄, 𑀏𑀮𑁄 𑀅𑀟𑁆𑀠𑀬𑁄𑀚𑀦𑀺𑀓𑁄, 𑀉𑀧𑁆𑀧𑀮𑁄 𑀢𑀺𑀕𑀸𑀯𑀼𑀢𑀺𑀓𑁄 𑀧𑀼𑀡𑁆𑀟𑀭𑀻𑀓𑁄 𑀬𑁄𑀚𑀦𑀺𑀓𑁄𑀢𑀺. 𑀢𑁂𑀲𑀼𑀧𑀺 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀧𑀽𑀭𑀢𑀺𑀬𑁂𑀯. 𑀇𑀢𑀺 𑀪𑀕𑀯𑀸 𑀧𑀳𑀽𑀢𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀑𑀳𑀸𑀬 𑀧𑀩𑁆𑀩𑀚𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑀳𑀭𑁄 𑀯𑀸𑀢𑀺𑀆𑀤𑀻𑀦𑀺 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯.

𑀅𑀔𑀼𑀤𑁆𑀤𑀸𑀯𑀓𑀸𑀲𑁄𑀢𑀺 𑀏𑀢𑁆𑀣 𑀪𑀕𑀯𑀢𑀺 𑀅𑀧𑀭𑀺𑀫𑀸𑀡𑁄𑀬𑁂𑀯 𑀤𑀲𑁆𑀲𑀦𑀸𑀯𑀓𑀸𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼𑀁 𑁋 𑀭𑀸𑀚𑀕𑀳𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀲𑀫𑀡𑀲𑁆𑀲 𑀓𑀺𑀭 𑀕𑁄𑀢𑀫𑀲𑁆𑀲 𑀧𑀫𑀸𑀡𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀲𑀼𑀢𑁆𑀯𑀸 𑀪𑀕𑀯𑀢𑁄 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑀓𑀸𑀮𑁂 𑀲𑀝𑁆𑀞𑀺𑀳𑀢𑁆𑀣𑀁 𑀯𑁂𑀴𑀼𑀁 𑀕𑀳𑁂𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀲𑁆𑀲 𑀩𑀳𑀺 𑀞𑀢𑁆𑀯𑀸 𑀲𑀫𑁆𑀧𑀢𑁆𑀢𑁂 𑀪𑀕𑀯𑀢𑀺 𑀯𑁂𑀴𑀼𑀁 𑀕𑀳𑁂𑀢𑁆𑀯𑀸 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺, 𑀯𑁂𑀴𑀼 𑀪𑀕𑀯𑀢𑁄 𑀚𑀸𑀡𑀼𑀫𑀢𑁆𑀢𑀁 𑀧𑀸𑀧𑀼𑀡𑀺. 𑀧𑀼𑀦𑀤𑀺𑀯𑀲𑁂 𑀤𑁆𑀯𑁂 𑀯𑁂𑀴𑀽 𑀖𑀝𑁂𑀢𑁆𑀯𑀸 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺, 𑀪𑀕𑀯𑀸 𑀤𑁆𑀯𑀺𑀦𑁆𑀦𑀁 𑀯𑁂𑀴𑀽𑀦𑀁 𑀉𑀧𑀭𑀺 𑀤𑁆𑀯𑀺𑀯𑁂𑀡𑀼𑀫𑀢𑁆𑀢𑀫𑁂𑀯 𑀧𑀜𑁆𑀜𑀸𑀬𑀫𑀸𑀦𑁄, ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀓𑀭𑁄𑀲𑀻’’𑀢𑀺 𑀆𑀳? 𑀢𑀼𑀫𑁆𑀳𑀸𑀓𑀁 𑀧𑀫𑀸𑀡𑀁 𑀕𑀡𑁆𑀳𑀸𑀫𑀻𑀢𑀺. ‘‘𑀩𑁆𑀭𑀸𑀳𑁆𑀫𑀡, 𑀲𑀘𑁂𑀧𑀺 𑀢𑁆𑀯𑀁 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀯𑁂𑀴𑀼𑀁 𑀖𑀝𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀲𑀺, 𑀦𑁂𑀯 𑀫𑁂 𑀧𑀫𑀸𑀡𑀁 𑀕𑀳𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺. 𑀦 𑀳𑀺 𑀫𑀬𑀸 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀢𑀣𑀸 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀬𑀣𑀸 𑀫𑁂 𑀧𑀭𑁄 𑀧𑀫𑀸𑀡𑀁 𑀕𑀡𑁆𑀳𑁂𑀬𑁆𑀬, 𑀅𑀢𑀼𑀮𑁄 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄 𑀅𑀧𑁆𑀧𑀫𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀧𑀤𑁂 𑀕𑀸𑀣𑀫𑀸𑀳. 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀁 𑀧𑀺𑀯𑀺𑀁𑀲𑀼.

𑀅𑀧𑀭𑀫𑁆𑀧𑀺 𑀯𑀢𑁆𑀣𑀼 𑁋 𑀭𑀸𑀳𑀼 𑀓𑀺𑀭 𑀅𑀲𑀼𑀭𑀺𑀦𑁆𑀤𑁄 𑀘𑀢𑁆𑀢𑀸𑀭𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀅𑀝𑁆𑀞 𑀘 𑀬𑁄𑀚𑀦𑀲𑀢𑀸𑀦𑀺 𑀉𑀘𑁆𑀘𑁄, 𑀩𑀸𑀳𑀦𑁆𑀢𑀭𑀫𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀲𑀢𑀸𑀦𑀺, 𑀳𑀢𑁆𑀣𑀢𑀮𑀧𑀸𑀤𑀢𑀮𑀸𑀦𑀁 𑀧𑀼𑀣𑀼𑀮𑀢𑀸 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺, 𑀅𑀗𑁆𑀕𑀼𑀮𑀺𑀧𑀩𑁆𑀩𑀸𑀦𑀺 𑀧𑀡𑁆𑀡𑀸𑀲𑀬𑁄𑀚𑀦𑀸𑀦𑀺, 𑀪𑀫𑀼𑀓𑀦𑁆𑀢𑀭𑀁 𑀧𑀡𑁆𑀡𑀸𑀲𑀬𑁄𑀚𑀦𑀁, 𑀦𑀮𑀸𑀝𑀁 𑀢𑀺𑀬𑁄𑀚𑀦𑀲𑀢𑀁, 𑀲𑀻𑀲𑀁 𑀦𑀯𑀬𑁄𑀚𑀦𑀲𑀢𑀁. 𑀲𑁄 𑁋 ‘‘𑀅𑀳𑀁 𑀉𑀘𑁆𑀘𑁄𑀲𑁆𑀫𑀺, 𑀲𑀢𑁆𑀣𑀸𑀭𑀁 𑀑𑀦𑀫𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀦 𑀕𑀘𑁆𑀙𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀪𑀕𑀯𑀢𑁄 𑀯𑀡𑁆𑀡𑀁 𑀲𑀼𑀢𑁆𑀯𑀸 ‘‘𑀬𑀣𑀸 𑀓𑀣𑀜𑁆𑀘 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀢𑁄. 𑀪𑀕𑀯𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 ‘‘𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀓𑀢𑀭𑁂𑀦 𑀤𑀲𑁆𑀲𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀞𑀺𑀢𑀓𑁄 𑀦𑀸𑀫 𑀦𑀻𑀘𑁄𑀧𑀺 𑀉𑀘𑁆𑀘𑁄 𑀯𑀺𑀬 𑀧𑀜𑁆𑀜𑀸𑀬𑀢𑀺, 𑀦𑀺𑀧𑀦𑁆𑀦𑁄𑀯𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺, ‘‘𑀆𑀦𑀦𑁆𑀤, 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀫𑀜𑁆𑀘𑀓𑀁 𑀧𑀜𑁆𑀜𑀸𑀧𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀭𑀸𑀳𑀼 𑀆𑀕𑀦𑁆𑀢𑁆𑀯𑀸 𑀦𑀺𑀧𑀦𑁆𑀦𑀁 𑀪𑀕𑀯𑀦𑁆𑀢𑀁 𑀕𑀻𑀯𑀁 𑀉𑀦𑁆𑀦𑀸𑀫𑁂𑀢𑁆𑀯𑀸 𑀦𑀪𑀫𑀚𑁆𑀛𑁂 𑀧𑀼𑀡𑁆𑀡𑀘𑀦𑁆𑀤𑀁 𑀯𑀺𑀬 𑀉𑀮𑁆𑀮𑁄𑀓𑁂𑀢𑀺. 𑀓𑀺𑀫𑀺𑀤𑀁 𑀅𑀲𑀼𑀭𑀺𑀦𑁆𑀤𑀸𑀢𑀺 𑀘 𑀯𑀼𑀢𑁆𑀢𑁂, 𑀪𑀕𑀯𑀸 𑀑𑀦𑀫𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀦 𑀕𑀘𑁆𑀙𑀺𑀦𑁆𑀢𑀺. 𑀦 𑀫𑀬𑀸 𑀅𑀲𑀼𑀭𑀺𑀦𑁆𑀤 𑀅𑀥𑁄𑀫𑀼𑀔𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀉𑀤𑁆𑀥𑀕𑁆𑀕𑀁 𑀫𑁂 𑀓𑀢𑁆𑀯𑀸 𑀤𑀸𑀦𑀁 𑀤𑀺𑀦𑁆𑀦𑀦𑁆𑀢𑀺. 𑀢𑀁𑀤𑀺𑀯𑀲𑀁 𑀭𑀸𑀳𑀼 𑀲𑀭𑀡𑀁 𑀅𑀕𑀫𑀸𑀲𑀺. 𑀏𑀯𑀁 𑀪𑀕𑀯𑀸 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬.

𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀲𑀻𑀮𑀯𑀸. 𑀢𑀁 𑀧𑀦 𑀲𑀻𑀮𑀁 𑀅𑀭𑀺𑀬𑀁 𑀉𑀢𑁆𑀢𑀫𑀁 𑀧𑀭𑀺𑀲𑀼𑀤𑁆𑀥𑀁, 𑀢𑁂𑀦𑀸𑀳 𑀅𑀭𑀺𑀬𑀲𑀻𑀮𑀻𑀢𑀺. 𑀢𑀤𑁂𑀯 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁, 𑀢𑁂𑀦𑀸𑀳 𑀓𑀼𑀲𑀮𑀲𑀻𑀮𑀻𑀢𑀺. 𑀓𑀼𑀲𑀮𑁂𑀦 𑀲𑀻𑀮𑁂𑀦𑀸𑀢𑀺 𑀇𑀤𑀫𑀲𑁆𑀲 𑀯𑁂𑀯𑀘𑀦𑀁. 𑀩𑀳𑀽𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁄𑀢𑀺 𑀪𑀕𑀯𑀢𑁄 𑀏𑀓𑁂𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀧𑀭𑀺𑀫𑀸𑀡𑀸𑀧𑀺 𑀤𑁂𑀯𑀫𑀦𑀼𑀲𑁆𑀲𑀸 𑀫𑀕𑁆𑀕𑀨𑀮𑀸𑀫𑀢𑀁 𑀧𑀺𑀯𑀦𑁆𑀢𑀺. 𑀢𑀲𑁆𑀫𑀸 𑀩𑀳𑀽𑀦𑀁 𑀆𑀘𑀭𑀺𑀬𑁄, 𑀲𑀸𑀯𑀓𑀯𑀺𑀦𑁂𑀬𑁆𑀬𑀸𑀦𑀁 𑀧𑀸𑀘𑀭𑀺𑀬𑁄𑀢𑀺.

𑀔𑀻𑀡𑀓𑀸𑀫𑀭𑀸𑀕𑁄𑀢𑀺 𑀏𑀢𑁆𑀣 𑀓𑀸𑀫𑀁 𑀪𑀕𑀯𑀢𑁄 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀔𑀻𑀡𑀸, 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀢𑁂 𑀦 𑀚𑀸𑀦𑀸𑀢𑀺, 𑀅𑀢𑁆𑀢𑀦𑁄 𑀚𑀸𑀦𑀦𑀝𑁆𑀞𑀸𑀦𑁂𑀬𑁂𑀯 𑀕𑀼𑀡𑀁 𑀓𑀣𑁂𑀢𑀺. 𑀯𑀺𑀕𑀢𑀘𑀸𑀧𑀮𑁆𑀮𑁄𑀢𑀺 ‘‘𑀧𑀢𑁆𑀢𑀫𑀡𑁆𑀟𑀦𑀸 𑀘𑀻𑀯𑀭𑀫𑀡𑁆𑀟𑀦𑀸 𑀲𑁂𑀦𑀸𑀲𑀦𑀫𑀡𑁆𑀟𑀦𑀸 𑀇𑀫𑀲𑁆𑀲 𑀯𑀸 𑀧𑀽𑀢𑀺𑀓𑀸𑀬𑀲𑁆𑀲…𑀧𑁂… 𑀓𑁂𑀮𑀦𑀸 𑀧𑀝𑀺𑀓𑁂𑀮𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀘𑀸𑀧𑀮𑁆𑀬𑀯𑀺𑀭𑀳𑀺𑀢𑁄.

𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀅𑀧𑀸𑀧𑁂 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀧𑀼𑀭𑀢𑁄 𑀓𑀢𑁆𑀯𑀸 𑀯𑀺𑀘𑀭𑀢𑀺. 𑀩𑁆𑀭𑀳𑁆𑀫𑀜𑁆𑀜𑀸𑀬 𑀧𑀚𑀸𑀬𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀫𑀳𑀸𑀓𑀲𑁆𑀲𑀧𑀸𑀤𑀺𑀪𑁂𑀤𑀸𑀬 𑀩𑁆𑀭𑀸𑀳𑁆𑀫𑀡𑀧𑀚𑀸𑀬. (𑀅𑀯𑀺𑀭𑀼𑀤𑁆𑀥𑁄 𑀳𑀺 𑀲𑁄) 𑀏𑀢𑀺𑀲𑁆𑀲𑀸𑀬 𑀧𑀚𑀸𑀬 𑀧𑀼𑀭𑁂𑀓𑁆𑀔𑀸𑀭𑁄. 𑀅𑀬𑀜𑁆𑀳𑀺 𑀧𑀚𑀸 𑀲𑀫𑀡𑀁 𑀕𑁄𑀢𑀫𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀦 𑀧𑀸𑀧𑀼𑀧𑀼𑀭𑁂𑀓𑁆𑀔𑀸𑀭𑁄, 𑀦 𑀧𑀸𑀧𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀢𑀺, 𑀧𑀸𑀧𑀁 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀲? 𑀩𑁆𑀭𑀳𑁆𑀫𑀜𑁆𑀜𑀸𑀬 𑀧𑀚𑀸𑀬 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀤𑁆𑀥𑀸𑀬𑀧𑀺 𑀩𑁆𑀭𑀸𑀳𑁆𑀫𑀡𑀧𑀚𑀸𑀬 𑀅𑀯𑀺𑀭𑀼𑀤𑁆𑀥𑁄 𑀳𑀺𑀢𑀲𑀼𑀔𑀢𑁆𑀣𑀺𑀓𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀺𑀭𑁄𑀭𑀝𑁆𑀞𑀸𑀢𑀺 𑀧𑀭𑀭𑀝𑁆𑀞𑀢𑁄. 𑀢𑀺𑀭𑁄𑀚𑀦𑀧𑀤𑀸𑀢𑀺 𑀧𑀭𑀚𑀦𑀧𑀤𑀢𑁄. 𑀲𑀁𑀧𑀼𑀘𑁆𑀙𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀤𑀬𑁄 𑀘𑁂𑀯 𑀩𑁆𑀭𑀸𑀳𑁆𑀫𑀡𑀕𑀦𑁆𑀥𑀩𑁆𑀩𑀸𑀤𑀬𑁄 𑀘 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀸𑀢𑀺 𑀆𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀓𑁂𑀘𑀺 𑀧𑀼𑀘𑁆𑀙𑀸𑀬 𑀯𑀸 𑀤𑁄𑀲𑀁 𑀯𑀺𑀲𑁆𑀲𑀚𑁆𑀚𑀦𑀲𑀫𑁆𑀧𑀝𑀺𑀘𑁆𑀙𑀦𑁂 𑀯𑀸 𑀅𑀲𑀫𑀢𑁆𑀣𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀓𑁂𑀘𑀺 𑀧𑀼𑀘𑁆𑀙𑀦𑁆𑀢𑀺, 𑀓𑁂𑀲𑀜𑁆𑀘𑀺 𑀪𑀕𑀯𑀸 𑀧𑀼𑀘𑁆𑀙𑀸𑀬 𑀉𑀲𑁆𑀲𑀸𑀳𑀁 𑀚𑀦𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀏𑀯𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀯𑀺𑀫𑀢𑀺𑀬𑁄 𑀢𑀻𑀭𑀁 𑀧𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀊𑀫𑀺𑀬𑁄 𑀯𑀺𑀬 𑀪𑀕𑀯𑀦𑁆𑀢𑀁 𑀧𑀢𑁆𑀯𑀸𑀯 𑀪𑀺𑀚𑁆𑀚𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑁂 𑀉𑀢𑁆𑀢𑀸𑀦𑀫𑁂𑀯.

𑀅𑀢𑀺𑀣𑀻 𑀦𑁄 𑀢𑁂 𑀳𑁄𑀦𑁆𑀢𑀻𑀢𑀺 𑀢𑁂 𑀅𑀫𑁆𑀳𑀸𑀓𑀁 𑀆𑀕𑀦𑁆𑀢𑀼𑀓𑀸 𑀦𑀯𑀓𑀸 𑀧𑀸𑀳𑀼𑀦𑀓𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀸𑀧𑀼𑀡𑀸𑀫𑀻𑀢𑀺 𑀚𑀸𑀦𑀸𑀫𑀺. 𑀅𑀧𑀭𑀺𑀫𑀸𑀡𑀯𑀡𑁆𑀡𑁄𑀢𑀺 𑀢𑀣𑀸𑀭𑀽𑀧𑁂𑀦𑁂𑀯 𑀲𑀩𑁆𑀩𑀜𑁆𑀜𑀼𑀦𑀸𑀧𑀺 𑀅𑀧𑁆𑀧𑀫𑁂𑀬𑁆𑀬𑀯𑀡𑁆𑀡𑁄, 𑀧𑀕𑁂𑀯 𑀫𑀸𑀤𑀺𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺.