𑁮. 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀁. 𑀢𑀢𑁆𑀣 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀯𑀦𑀲𑀡𑁆𑀟𑁂. 𑀘𑀗𑁆𑀓𑀻𑀢𑀺 𑀆𑀤𑀬𑁄 𑀧𑀜𑁆𑀘𑀧𑀺 𑀚𑀦𑀸 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀧𑀼𑀭𑁄𑀳𑀺𑀢𑀸 𑀏𑀯. 𑀅𑀜𑁆𑀜𑁂 𑀘 𑀅𑀪𑀺𑀜𑁆𑀜𑀸𑀢𑀸𑀢𑀺 𑀅𑀜𑁆𑀜𑁂 𑀘 𑀩𑀳𑀽 𑀅𑀪𑀺𑀜𑁆𑀜𑀸𑀢𑀸 𑀩𑁆𑀭𑀸𑀳𑁆𑀫𑀡𑀸. 𑀢𑁂 𑀓𑀺𑀭 𑀙𑀝𑁆𑀞𑁂 𑀙𑀝𑁆𑀞𑁂 𑀫𑀸𑀲𑁂 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀬𑀤𑀸 𑀚𑀸𑀢𑀺𑀁 𑀲𑁄𑀥𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀤𑀸 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀲𑀦𑁆𑀢𑀺𑀓𑁂 𑀚𑀸𑀢𑀺𑀲𑁄𑀥𑀦𑀢𑁆𑀣𑀁 𑀉𑀓𑁆𑀓𑀝𑁆𑀞𑀸𑀬 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀬𑀤𑀸 𑀫𑀦𑁆𑀢𑁂 𑀲𑁄𑀥𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀤𑀸 𑀇𑀘𑁆𑀙𑀸𑀦𑀗𑁆𑀕𑀮𑁂 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀫𑀦𑁆𑀢𑀲𑁄𑀥𑀦𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀅𑀬𑀫𑀦𑁆𑀢𑀭𑀸 𑀓𑀣𑀸𑀢𑀺 𑀬𑀁 𑀅𑀢𑁆𑀢𑀦𑁄 𑀲𑀳𑀸𑀬𑀓𑀪𑀸𑀯𑀸𑀦𑀼𑀭𑀽𑀧𑀁 𑀓𑀣𑀁 𑀓𑀣𑁂𑀦𑁆𑀢𑀸 𑀅𑀦𑀼𑀯𑀺𑀘𑀭𑀺𑀁𑀲𑀼, 𑀢𑀲𑁆𑀲𑀸 𑀓𑀣𑀸𑀬 𑀅𑀦𑁆𑀢𑀭𑀸 𑀅𑀬𑀫𑀜𑁆𑀜𑀸 𑀓𑀣𑀸 𑀉𑀤𑀧𑀸𑀤𑀺. 𑀲𑀻𑀮𑀯𑀸𑀢𑀺 𑀕𑀼𑀡𑀯𑀸. 𑀯𑀢𑁆𑀢𑀲𑀫𑁆𑀧𑀦𑁆𑀦𑁄𑀢𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑁄.

𑁪𑁫𑁫. 𑀅𑀦𑀼𑀜𑁆𑀜𑀸𑀢𑀧𑀝𑀺𑀜𑁆𑀜𑀸𑀢𑀸𑀢𑀺 𑀲𑀺𑀓𑁆𑀔𑀺𑀢𑀸 𑀢𑀼𑀫𑁆𑀳𑁂𑀢𑀺 𑀏𑀯𑀁 𑀆𑀘𑀭𑀺𑀬𑁂𑀳𑀺 𑀅𑀦𑀼𑀜𑁆𑀜𑀸𑀢𑀸, 𑀆𑀫 𑀆𑀘𑀭𑀺𑀬 𑀲𑀺𑀓𑁆𑀔𑀺𑀢𑀫𑁆𑀳𑀸𑀢𑀺 𑀏𑀯𑀁 𑀲𑀬𑀜𑁆𑀘 𑀧𑀝𑀺𑀜𑁆𑀜𑀸𑀢𑀸. 𑀅𑀲𑁆𑀫𑀸𑀢𑀺 𑀪𑀯𑀸𑀫. 𑀅𑀳𑀁 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲, 𑀢𑀸𑀭𑀼𑀓𑁆𑀔𑀲𑁆𑀲𑀸𑀬𑀁 𑀫𑀸𑀡𑀯𑁄𑀢𑀺 𑀅𑀳𑀁 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀻 𑀅𑀕𑁆𑀕𑀲𑀺𑀲𑁆𑀲𑁄, 𑀅𑀬𑀁 𑀢𑀸𑀭𑀼𑀓𑁆𑀔𑀲𑁆𑀲𑀸𑀢𑀺 𑀤𑀻𑀧𑁂𑀢𑀺.

𑀢𑁂𑀯𑀺𑀚𑁆𑀚𑀸𑀦𑀦𑁆𑀢𑀺 𑀢𑀺𑀯𑁂𑀤𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁. 𑀬𑀤𑀓𑁆𑀔𑀸𑀢𑀦𑁆𑀢𑀺 𑀬𑀁 𑀅𑀢𑁆𑀣𑀢𑁄 𑀘 𑀩𑁆𑀬𑀜𑁆𑀚𑀦𑀢𑁄 𑀘 𑀏𑀓𑀁 𑀧𑀤𑀫𑁆𑀧𑀺 𑀅𑀓𑁆𑀔𑀸𑀢𑀁. 𑀢𑀢𑁆𑀭 𑀓𑁂𑀯𑀮𑀺𑀦𑁄𑀲𑁆𑀫𑀲𑁂𑀢𑀺 𑀢𑀁 𑀲𑀓𑀮𑀁 𑀚𑀸𑀦𑀦𑀢𑁄 𑀢𑀢𑁆𑀣 𑀦𑀺𑀝𑁆𑀞𑀸𑀕𑀢𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀁 𑀓𑁂𑀯𑀮𑀺𑀪𑀸𑀯𑀁 𑀆𑀯𑀺𑀓𑀭𑁄𑀦𑁆𑀢𑁄 𑀧𑀤𑀓𑀲𑁆𑀫𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀧𑁆𑀧𑁂 𑀆𑀘𑀭𑀺𑀬𑀲𑀸𑀤𑀺𑀲𑀸𑀢𑀺 𑀓𑀣𑀦𑀝𑁆𑀞𑀸𑀦𑁂 𑀫𑀬𑀁 𑀆𑀘𑀭𑀺𑀬𑀲𑀤𑀺𑀲𑀸𑀬𑁂𑀯.

𑀓𑀫𑁆𑀫𑀼𑀦𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀓𑀫𑁆𑀫𑀼𑀦𑀸. 𑀅𑀬𑀜𑁆𑀳𑀺 𑀧𑀼𑀩𑁆𑀩𑁂 𑀲𑀢𑁆𑀢𑀯𑀺𑀥𑀁 𑀓𑀸𑀬𑀯𑀘𑀻𑀓𑀫𑁆𑀫𑀁 𑀲𑀦𑁆𑀥𑀸𑀬 ‘‘𑀬𑀢𑁄 𑀔𑁄, 𑀪𑁄, 𑀲𑀻𑀮𑀯𑀸 𑀳𑁄𑀢𑀻’’𑀢𑀺 𑀆𑀳, 𑀢𑀺𑀯𑀺𑀥𑀁 𑀫𑀦𑁄𑀓𑀫𑁆𑀫𑀁 𑀲𑀦𑁆𑀥𑀸𑀬 ‘‘𑀯𑀢𑁆𑀢𑀲𑀫𑁆𑀧𑀦𑁆𑀦𑁄’’𑀢𑀺. 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀘𑀓𑁆𑀔𑀼𑀫𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀦𑁆𑀢𑀪𑀸𑀯𑁂𑀦 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺.

𑀔𑀬𑀸𑀢𑀻𑀢𑀦𑁆𑀢𑀺 𑀊𑀦𑀪𑀸𑀯𑀁 𑀅𑀢𑀻𑀢𑀁, 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀧𑁂𑀘𑁆𑀘𑀸𑀢𑀺 𑀉𑀧𑀕𑀦𑁆𑀢𑁆𑀯𑀸. 𑀦𑀫𑀲𑁆𑀲𑀦𑁆𑀢𑀻𑀢𑀺 𑀦𑀫𑁄 𑀓𑀭𑁄𑀦𑁆𑀢𑀺.

𑀘𑀓𑁆𑀔𑀼𑀁 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁂 𑀮𑁄𑀓𑁂 𑀢𑀁 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀮𑁄𑀓𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀤𑀲𑁆𑀲𑀦𑁂𑀦 𑀘𑀓𑁆𑀔𑀼 𑀳𑀼𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀁.

𑁪𑁫𑁬. 𑀏𑀯𑀁 𑀯𑀸𑀲𑁂𑀝𑁆𑀞𑁂𑀦 𑀣𑁄𑀫𑁂𑀢𑁆𑀯𑀸 𑀬𑀸𑀘𑀺𑀢𑁄 𑀪𑀕𑀯𑀸 𑀤𑁆𑀯𑁂𑀧𑀺 𑀚𑀦𑁂 𑀲𑀗𑁆𑀕𑀡𑁆𑀳𑀦𑁆𑀢𑁄 𑀢𑁂𑀲𑀁 𑀯𑁄 𑀅𑀳𑀁 𑀩𑁆𑀬𑀓𑁆𑀔𑀺𑀲𑁆𑀲𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑁆𑀬𑀓𑁆𑀔𑀺𑀲𑁆𑀲𑀦𑁆𑀢𑀺 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺. 𑀅𑀦𑀼𑀧𑀼𑀩𑁆𑀩𑀦𑁆𑀢𑀺 𑀢𑀺𑀝𑁆𑀞𑀢𑀼 𑀢𑀸𑀯 𑀩𑁆𑀭𑀸𑀳𑁆𑀫𑀡𑀘𑀺𑀦𑁆𑀢𑀸, 𑀢𑀺𑀡𑀭𑀼𑀓𑁆𑀔𑀓𑀻𑀝𑀧𑀝𑀗𑁆𑀕𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀚𑀸𑀢𑀺𑀯𑀺𑀪𑀗𑁆𑀕𑀦𑁆𑀢𑀺 𑀚𑀸𑀢𑀺𑀯𑀺𑀢𑁆𑀣𑀸𑀭𑀁. 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄𑀢𑀺 𑀢𑁂𑀲𑀁 𑀢𑁂𑀲𑀜𑁆𑀳𑀺 𑀧𑀸𑀡𑀸𑀦𑀁 𑀚𑀸𑀢𑀺𑀬𑁄 𑀅𑀜𑁆𑀜𑀫𑀜𑁆𑀜𑀸 𑀦𑀸𑀦𑀧𑁆𑀧𑀓𑀸𑀭𑀸𑀢𑀺 𑀅𑀢𑁆𑀣𑁄.

𑀢𑀺𑀡𑀭𑀼𑀓𑁆𑀔𑁂𑀢𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑀚𑀸𑀢𑀺𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀉𑀧𑀸𑀤𑀺𑀦𑁆𑀦𑀓𑀚𑀸𑀢𑀺𑀁 𑀓𑀣𑁂𑀲𑁆𑀲𑀸𑀫𑀺, 𑀏𑀯𑀁 𑀢𑀲𑁆𑀲 𑀚𑀸𑀢𑀺𑀪𑁂𑀤𑁄 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 ‘‘𑀓𑀺𑀁, 𑀪𑀦𑁆𑀢𑁂, 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀩𑀻𑀚𑀦𑀸𑀦𑀢𑀸𑀬 𑀦𑀸𑀦𑀁, 𑀉𑀧𑀸𑀤𑀺𑀦𑁆𑀦𑀁 𑀓𑀫𑁆𑀫𑀦𑀸𑀦𑀢𑀸𑀬𑀸𑀢𑀺? 𑀏𑀯𑀁 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁄 𑀆𑀫 𑀦 𑀯𑀝𑁆𑀝𑀢𑀺. 𑀓𑀫𑁆𑀫𑀜𑁆𑀳𑀺 𑀬𑁄𑀦𑀺𑀬𑀁 𑀔𑀺𑀧𑀢𑀺. 𑀬𑁄𑀦𑀺𑀲𑀺𑀤𑁆𑀥𑀸 𑀇𑀫𑁂 𑀲𑀢𑁆𑀢𑀸 𑀦𑀸𑀦𑀸𑀯𑀡𑁆𑀡𑀸 𑀳𑁄𑀦𑁆𑀢𑀻𑀢𑀺. 𑀢𑀺𑀡𑀭𑀼𑀓𑁆𑀔𑁂𑀢𑀺 𑀏𑀢𑁆𑀣 𑀅𑀦𑁆𑀢𑁄𑀨𑁂𑀕𑁆𑀕𑀽 𑀩𑀳𑀺𑀲𑀸𑀭𑀸 𑀅𑀦𑁆𑀢𑀫𑀲𑁄 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀬𑁄𑀧𑀺 𑀢𑀺𑀡𑀸𑀦𑁂𑀯, 𑀅𑀦𑁆𑀢𑁄𑀲𑀸𑀭𑀸 𑀧𑀦 𑀩𑀳𑀺𑀨𑁂𑀕𑁆𑀕𑀽 𑀲𑀩𑁆𑀩𑁂 𑀭𑀼𑀓𑁆𑀔𑀸 𑀦𑀸𑀫. 𑀦 𑀘𑀸𑀧𑀺 𑀧𑀝𑀺𑀚𑀸𑀦𑀭𑁂𑀢𑀺 𑀫𑀬𑀁 𑀢𑀺𑀡𑀸 𑀫𑀬𑀁 𑀭𑀼𑀓𑁆𑀔𑀸𑀢𑀺 𑀯𑀸, 𑀅𑀳𑀁 𑀢𑀺𑀡𑀁, 𑀅𑀳𑀁 𑀭𑀼𑀓𑁆𑀔𑁄𑀢𑀺 𑀯𑀸 𑀏𑀯𑀁 𑀦 𑀚𑀸𑀦𑀦𑁆𑀢𑀺. 𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀦𑁆𑀢𑀺 𑀅𑀚𑀸𑀦𑀦𑁆𑀢𑀸𑀦𑀫𑁆𑀧𑀺 𑀘 𑀢𑁂𑀲𑀁 𑀚𑀸𑀢𑀺𑀫𑀬𑀫𑁂𑀯 𑀲𑀡𑁆𑀞𑀸𑀦𑀁 𑀅𑀢𑁆𑀢𑀦𑁄 𑀫𑀽𑀮𑀪𑀽𑀢𑀢𑀺𑀡𑀸𑀤𑀺𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀓𑀺𑀁 𑀓𑀸𑀭𑀡𑀸? 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄. 𑀬𑀲𑁆𑀫𑀸 𑀅𑀜𑁆𑀜𑀸 𑀢𑀺𑀡𑀚𑀸𑀢𑀺, 𑀅𑀜𑁆𑀜𑀸 𑀭𑀼𑀓𑁆𑀔𑀚𑀸𑀢𑀺. 𑀢𑀺𑀡𑁂𑀲𑀼𑀧𑀺 𑀅𑀜𑁆𑀜𑀸 𑀢𑀸𑀮𑀚𑀸𑀢𑀺, 𑀅𑀜𑁆𑀜𑀸 𑀦𑀸𑀴𑀺𑀓𑁂𑀭𑀚𑀸𑀢𑀺, 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀬𑀁 𑀚𑀸𑀢𑀺𑀯𑀲𑁂𑀦 𑀦𑀸𑀦𑀸 𑀳𑁄𑀢𑀺, 𑀢𑀁 𑀅𑀢𑁆𑀢𑀦𑁄 𑀧𑀝𑀺𑀜𑁆𑀜𑀁 𑀧𑀭𑁂𑀲𑀁 𑀯𑀸 𑀉𑀧𑀤𑁂𑀲𑀁 𑀯𑀺𑀦𑀸𑀧𑀺 𑀅𑀜𑁆𑀜𑀚𑀸𑀢𑀺𑀢𑁄 𑀯𑀺𑀲𑁂𑀲𑁂𑀦 𑀕𑀬𑁆𑀳𑀢𑀺. 𑀬𑀤𑀺 𑀘 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄 𑀪𑀯𑁂𑀬𑁆𑀬, 𑀲𑁄𑀧𑀺 𑀅𑀢𑁆𑀢𑀦𑁄 𑀧𑀝𑀺𑀜𑁆𑀜𑀁 𑀧𑀭𑁂𑀲𑀁 𑀯𑀸 𑀉𑀧𑀤𑁂𑀲𑀁 𑀯𑀺𑀦𑀸 𑀔𑀢𑁆𑀢𑀺𑀬𑀢𑁄 𑀯𑁂𑀲𑁆𑀲𑀢𑁄 𑀲𑀼𑀤𑁆𑀤𑀢𑁄 𑀯𑀸 𑀯𑀺𑀲𑁂𑀲𑁂𑀦 𑀕𑀬𑁆𑀳𑁂𑀬𑁆𑀬, 𑀦 𑀘 𑀕𑀬𑁆𑀳𑀢𑀺. 𑀢𑀲𑁆𑀫𑀸 𑀦 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄𑀢𑀺. 𑀧𑀭𑀢𑁄 𑀧𑀦 ‘‘𑀬𑀣𑀸 𑀏𑀢𑀸𑀲𑀼 𑀚𑀸𑀢𑀻𑀲𑀽’’𑀢𑀺 𑀕𑀸𑀣𑀸𑀬 𑀏𑀢𑀫𑀢𑁆𑀣𑀁 𑀯𑀘𑀻𑀪𑁂𑀤𑁂𑀦𑁂𑀯 𑀆𑀯𑀺𑀓𑀭𑀺𑀲𑁆𑀲𑀢𑀺.

𑀏𑀯𑀁 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀲𑀼 𑀚𑀸𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀸𑀤𑀺𑀦𑁆𑀦𑀓𑁂𑀲𑀼 𑀤𑀲𑁆𑀲𑁂𑀦𑁆𑀢𑁄 𑀢𑀢𑁄 𑀓𑀻𑀝𑁂𑀢𑀺𑀆𑀤𑀺𑀫𑀸𑀳. 𑀬𑀸𑀯 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑁂𑀢𑀺 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀬𑁂 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑁂 𑀧𑀝𑀗𑁆𑀕𑀸 𑀦𑀸𑀫. 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄𑀢𑀺 𑀢𑁂𑀲𑀫𑁆𑀧𑀺 𑀦𑀻𑀮𑀭𑀢𑁆𑀢𑀸𑀤𑀺𑀯𑀡𑁆𑀡𑀯𑀲𑁂𑀦 𑀚𑀸𑀢𑀺𑀬𑁄 𑀦𑀸𑀦𑀧𑁆𑀧𑀓𑀸𑀭𑀸𑀯 𑀳𑁄𑀦𑁆𑀢𑀺.

𑀔𑀼𑀤𑁆𑀤𑀓𑁂𑀢𑀺 𑀓𑀸𑀴𑀓𑀸𑀤𑀬𑁄. 𑀫𑀳𑀮𑁆𑀮𑀓𑁂𑀢𑀺 𑀲𑀲𑀩𑀺𑀴𑀸𑀭𑀸𑀤𑀬𑁄.

𑀧𑀸𑀤𑀽𑀤𑀭𑁂𑀢𑀺 𑀉𑀤𑀭𑀧𑀸𑀤𑁂, 𑀉𑀤𑀭𑀁𑀬𑁂𑀯 𑀦𑁂𑀲𑀁 𑀧𑀸𑀤𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀻𑀖𑀧𑀺𑀝𑁆𑀞𑀺𑀓𑁂𑀢𑀺 𑀲𑀧𑁆𑀧𑀸𑀦𑀜𑁆𑀳𑀺 𑀲𑀻𑀲𑀢𑁄 𑀬𑀸𑀯 𑀦𑀗𑁆𑀕𑀼𑀝𑁆𑀞𑀸 𑀧𑀺𑀝𑁆𑀞𑀺𑀬𑁂𑀯 𑀳𑁄𑀢𑀺, 𑀢𑁂𑀦 𑀢𑁂 ‘‘𑀤𑀻𑀖𑀧𑀺𑀝𑁆𑀞𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀉𑀤𑀓𑁂𑀢𑀺 𑀑𑀤𑀓𑁂, 𑀉𑀤𑀓𑀫𑁆𑀳𑀺 𑀚𑀸𑀢𑁂.

𑀧𑀓𑁆𑀔𑀻𑀢𑀺 𑀲𑀓𑀼𑀡𑁂. 𑀢𑁂 𑀳𑀺 𑀧𑀢𑁆𑀢𑁂𑀳𑀺 𑀬𑀦𑁆𑀢𑀻𑀢𑀺 𑀧𑀢𑁆𑀢𑀬𑀸𑀦𑀸, 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀺𑀳𑀗𑁆𑀕𑀫𑀸.

𑀏𑀯𑀁 𑀣𑀮𑀚𑀮𑀸𑀓𑀸𑀲𑀕𑁄𑀘𑀭𑀸𑀦𑀁 𑀧𑀸𑀡𑀸𑀦𑀁 𑀚𑀸𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀢𑀁 𑀤𑀲𑁆𑀲𑁂𑀢𑀺, 𑀢𑀁 𑀆𑀯𑀺𑀓𑀭𑁄𑀦𑁆𑀢𑁄 𑀬𑀣𑀸 𑀏𑀢𑀸𑀲𑀽𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑁄𑀯. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀬𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀦 𑀓𑁂𑀲𑁂𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀬𑀁 𑀯𑀼𑀢𑁆𑀢𑀁 ‘‘𑀦𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀮𑀺𑀗𑁆𑀕𑀚𑀸𑀢𑀺𑀫𑀬𑀁 𑀧𑀼𑀣𑀽’’𑀢𑀺, 𑀢𑀁 𑀏𑀯𑀁 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁? 𑀦 𑀓𑁂𑀲𑁂𑀳𑀻𑀢𑀺. 𑀦 𑀳𑀺 𑁋 ‘‘𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀤𑀺𑀲𑀸 𑀓𑁂𑀲𑀸 𑀳𑁄𑀦𑁆𑀢𑀺, 𑀔𑀢𑁆𑀢𑀺𑀬𑀸𑀦𑀁 𑀏𑀤𑀺𑀲𑀸’’𑀢𑀺 𑀦𑀺𑀬𑀫𑁄 𑀅𑀢𑁆𑀣𑀺 𑀬𑀣𑀸 𑀳𑀢𑁆𑀣𑀺𑀅𑀲𑁆𑀲𑀫𑀺𑀕𑀸𑀤𑀻𑀦𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩𑀁.

𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀦𑁂𑀯, 𑀬𑀣𑀸 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀽𑀢𑀺 𑀇𑀤𑀁 𑀧𑀦 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀕𑀫𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲𑀸𑀬𑀁 𑀬𑁄𑀚𑀦𑀸 𑁋 𑀏𑀯𑀁 𑀬𑀲𑁆𑀫𑀸 𑀇𑀫𑁂𑀳𑀺 𑀓𑁂𑀲𑀸𑀤𑀻𑀳𑀺 𑀦𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼 𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀧𑀼𑀣𑀼, 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 ‘‘𑀩𑁆𑀭𑀸𑀳𑁆𑀫𑀡𑀸𑀤𑀺𑀪𑁂𑀤𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀦𑁂𑀯, 𑀬𑀣𑀸 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀽’’𑀢𑀺.

𑁪𑁫𑁭. 𑀇𑀤𑀸𑀦𑀺 𑀏𑀯𑀁 𑀚𑀸𑀢𑀺𑀪𑁂𑀤𑁂 𑀅𑀲𑀢𑀺𑀧𑀺 ‘‘𑀩𑁆𑀭𑀸𑀳𑁆𑀫𑀡𑁄 𑀔𑀢𑁆𑀢𑀺𑀬𑁄’’𑀢𑀺 𑀇𑀤𑀁 𑀦𑀸𑀦𑀢𑁆𑀢𑀁 𑀬𑀣𑀸 𑀚𑀸𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀘𑁆𑀘𑀢𑁆𑀢𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀯𑁄𑀓𑀸𑀭𑀦𑁆𑀢𑀺 𑀦𑀸𑀦𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀳𑀺 𑀢𑀺𑀭𑀘𑁆𑀙𑀸𑀦𑀸𑀦𑀁 𑀬𑁄𑀦𑀺𑀲𑀺𑀤𑁆𑀥𑀫𑁂𑀯 𑀓𑁂𑀲𑀸𑀤𑀺𑀲𑀡𑁆𑀞𑀸𑀦𑁂𑀦 𑀦𑀸𑀦𑀢𑁆𑀢𑀁, 𑀢𑀣𑀸 𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀢𑀁 𑀦𑀢𑁆𑀣𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀤𑁂𑀢𑀁 ‘‘𑀩𑁆𑀭𑀸𑀳𑁆𑀫𑀡𑁄 𑀔𑀢𑁆𑀢𑀺𑀬𑁄’’𑀢𑀺 𑀯𑁄𑀓𑀸𑀭𑀁, 𑀢𑀁 𑀯𑁄𑀓𑀸𑀭𑀜𑁆𑀘 𑀫𑀦𑀼𑀲𑁆𑀲𑁂𑀲𑀼 𑀲𑀫𑀜𑁆𑀜𑀸𑀬 𑀧𑀯𑀼𑀘𑁆𑀘𑀢𑀺, 𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯 𑀧𑀯𑀼𑀘𑁆𑀘𑀢𑀻𑀢𑀺.

𑀏𑀢𑁆𑀢𑀸𑀯𑀢𑀸 𑀪𑀕𑀯𑀸 𑀪𑀸𑀭𑀤𑁆𑀯𑀸𑀚𑀲𑁆𑀲 𑀯𑀸𑀤𑀁 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀇𑀤𑀸𑀦𑀺 𑀬𑀤𑀺 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄 𑀪𑀯𑁂𑀬𑁆𑀬, 𑀆𑀚𑀻𑀯𑀲𑀻𑀮𑀸𑀘𑀸𑀭𑀯𑀺𑀧𑀦𑁆𑀦𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀪𑀯𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀧𑁄𑀭𑀸𑀡𑀸 𑀩𑁆𑀭𑀸𑀳𑁆𑀫𑀡𑀸 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀦 𑀇𑀘𑁆𑀙𑀦𑁆𑀢𑀺, 𑀮𑁄𑀓𑁂 𑀘 𑀅𑀜𑁆𑀜𑁂𑀧𑀺 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸, 𑀢𑀲𑁆𑀫𑀸 𑀯𑀸𑀲𑁂𑀝𑁆𑀞𑀲𑁆𑀲 𑀯𑀸𑀤𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀽𑀢𑀺 𑀅𑀝𑁆𑀞 𑀕𑀸𑀣𑀸 𑀆𑀳. 𑀢𑀢𑁆𑀣 𑀕𑁄𑀭𑀓𑁆𑀔𑀦𑁆𑀢𑀺 𑀔𑁂𑀢𑁆𑀢𑀭𑀓𑁆𑀔𑀁, 𑀓𑀲𑀺𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑁄𑀢𑀺 𑀳𑀺 𑀧𑀣𑀯𑀺𑀬𑀸 𑀦𑀸𑀫𑀁, 𑀢𑀲𑁆𑀫𑀸 𑀏𑀯𑀫𑀸𑀳. 𑀧𑀼𑀣𑀼𑀲𑀺𑀧𑁆𑀧𑁂𑀦𑀸𑀢𑀺 𑀢𑀦𑁆𑀢𑀯𑀸𑀬𑀓𑀫𑁆𑀫𑀸𑀤𑀺𑀦𑀸𑀦𑀸𑀲𑀺𑀧𑁆𑀧𑁂𑀦. 𑀯𑁄𑀳𑀸𑀭𑀦𑁆𑀢𑀺 𑀯𑀡𑀺𑀚𑁆𑀚𑀁. 𑀧𑀭𑀧𑁂𑀲𑁆𑀲𑁂𑀦𑀸𑀢𑀺 𑀧𑀭𑁂𑀲𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀫𑁆𑀫𑁂𑀦. 𑀇𑀲𑁆𑀲𑀢𑁆𑀣𑀦𑁆𑀢𑀺 𑀆𑀯𑀼𑀥𑀚𑀻𑀯𑀺𑀓𑀁, 𑀉𑀲𑀼𑀜𑁆𑀘 𑀲𑀢𑁆𑀢𑀺𑀁 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑁄𑀭𑁄𑀳𑀺𑀘𑁆𑀘𑁂𑀦𑀸𑀢𑀺 𑀧𑀼𑀭𑁄𑀳𑀺𑀢𑀓𑀫𑁆𑀫𑁂𑀦.

𑀏𑀯𑀁 𑀩𑁆𑀭𑀸𑀳𑁆𑀫𑀡𑀲𑀫𑀬𑁂𑀦 𑀘 𑀮𑁄𑀓𑀯𑁄𑀳𑀸𑀭𑁂𑀦 𑀘 𑀆𑀚𑀻𑀯𑀲𑀻𑀮𑀸𑀘𑀸𑀭𑀯𑀺𑀧𑀦𑁆𑀦𑀲𑁆𑀲 𑀅𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀲𑀸𑀥𑁂𑀢𑁆𑀯𑀸 𑀏𑀯𑀁 𑀲𑀦𑁆𑀢𑁂 𑀦 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄, 𑀕𑀼𑀡𑁂𑀳𑀺 𑀧𑀦 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺. 𑀢𑀲𑁆𑀫𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀼𑀮𑁂 𑀚𑀸𑀢𑁄 𑀬𑁄 𑀕𑀼𑀡𑀯𑀸, 𑀲𑁄 𑀩𑁆𑀭𑀸𑀳𑁆𑀫𑀡𑁄, 𑀅𑀬𑀫𑁂𑀢𑁆𑀣 𑀜𑀸𑀬𑁄𑀢𑀺 𑀏𑀯𑀫𑁂𑀢𑀁 𑀜𑀸𑀬𑀁 𑀅𑀢𑁆𑀣𑀢𑁄 𑀆𑀧𑀸𑀤𑁂𑀢𑁆𑀯𑀸 𑀇𑀤𑀸𑀦𑀺 𑀦𑀁 𑀯𑀘𑀻𑀪𑁂𑀤𑁂𑀦 𑀧𑀓𑀸𑀲𑁂𑀦𑁆𑀢𑁄 𑀦 𑀘𑀸𑀳𑀁 𑀩𑁆𑀭𑀸𑀳𑁆𑀫𑀡𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀅𑀳𑀜𑁆𑀳𑀺 𑀬𑁆𑀯𑀸𑀬𑀁 𑀘𑀢𑀼𑀦𑁆𑀦𑀁 𑀬𑁄𑀦𑀻𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀚𑀸𑀢𑁄, 𑀢𑀢𑁆𑀭𑀸𑀧𑀺 𑀯𑀺𑀲𑁂𑀲𑁂𑀦 𑀬𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀁𑀯𑀡𑁆𑀡𑀺𑀢𑀸𑀬 𑀫𑀸𑀢𑀭𑀺 𑀲𑀫𑁆𑀪𑀽𑀢𑁄, 𑀢𑀁 𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯𑀁, 𑀬𑀸 𑀘𑀸𑀬𑀁 𑀉𑀪𑀢𑁄 𑀲𑀼𑀚𑀸𑀢𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑁆𑀭𑀸𑀳𑁆𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀲𑀼𑀤𑁆𑀥𑀉𑀧𑁆𑀧𑀢𑁆𑀢𑀺𑀫𑀕𑁆𑀕𑀲𑀗𑁆𑀔𑀸𑀢𑀸 𑀬𑁄𑀦𑀺 𑀯𑀼𑀢𑁆𑀢𑀸, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄𑀢𑀺 𑀇𑀫𑀺𑀦𑀸 𑀘 𑀫𑀸𑀢𑀺𑀲𑀫𑁆𑀧𑀢𑁆𑀢𑀺, 𑀢𑀢𑁄𑀧𑀺 𑀚𑀸𑀢𑀲𑀫𑁆𑀪𑀽𑀢𑀢𑁆𑀢𑀸 𑀬𑁄𑀦𑀺𑀚𑁄 𑀫𑀢𑁆𑀢𑀺𑀲𑀫𑁆𑀪𑀯𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯𑀁 𑀇𑀫𑀺𑀦𑀸 𑀘 𑀬𑁄𑀦𑀺𑀚𑀫𑀢𑁆𑀢𑀺𑀲𑀫𑁆𑀪𑀯𑀫𑀢𑁆𑀢𑁂𑀦 𑀦 𑀩𑁆𑀭𑀸𑀳𑁆𑀫𑀡𑀁 𑀩𑁆𑀭𑀽𑀫𑀺. 𑀓𑀲𑁆𑀫𑀸? 𑀬𑀲𑁆𑀫𑀸, 𑀪𑁄 𑀪𑁄𑀢𑀺, 𑀯𑀘𑀦𑀫𑀢𑁆𑀢𑁂𑀦 𑀅𑀜𑁆𑀜𑁂𑀳𑀺 𑀲𑀓𑀺𑀜𑁆𑀘𑀦𑁂𑀳𑀺 𑀯𑀺𑀲𑀺𑀝𑁆𑀞𑀢𑁆𑀢𑀸 𑀪𑁄𑀯𑀸𑀤𑀺 𑀦𑀸𑀫 𑀲𑁄 𑀳𑁄𑀢𑀺, 𑀲𑀘𑁂 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄 𑀲𑀧𑀮𑀺𑀩𑁄𑀥𑁄. 𑀬𑁄 𑀧𑀦𑀸𑀬𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀚𑀸𑀢𑁄𑀧𑀺 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀸𑀪𑀸𑀯𑁂𑀦 𑀅𑀓𑀺𑀜𑁆𑀘𑀦𑁄, 𑀲𑀩𑁆𑀩𑀕𑀳𑀡𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀦 𑀅𑀦𑀸𑀤𑀸𑀦𑁄, 𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀩𑀸𑀳𑀺𑀢𑀧𑀸𑀧𑁄𑀢𑀺.

𑁪𑁫𑁮. 𑀓𑀺𑀜𑁆𑀘𑀪𑀺𑀬𑁆𑀬𑁄 𑀲𑀩𑁆𑀩𑀲𑀁𑀬𑁄𑀚𑀦𑀁 𑀙𑁂𑀢𑁆𑀯𑀸𑀢𑀺𑀆𑀤𑀺 𑀲𑀢𑁆𑀢𑀯𑀻𑀲𑀢𑀺 𑀕𑀸𑀣𑀸. 𑀢𑀢𑁆𑀣 𑀲𑀩𑁆𑀩𑀲𑀁𑀬𑁄𑀚𑀦𑀦𑁆𑀢𑀺 𑀤𑀲𑀯𑀺𑀥𑀲𑀁𑀬𑁄𑀚𑀦𑀁. 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀸𑀬 𑀦 𑀧𑀭𑀺𑀢𑀲𑁆𑀲𑀢𑀺. 𑀲𑀗𑁆𑀕𑀸𑀢𑀺𑀕𑀦𑁆𑀢𑀺 𑀭𑀸𑀕𑀲𑀗𑁆𑀕𑀸𑀤𑀬𑁄 𑀅𑀢𑀺𑀓𑁆𑀓𑀦𑁆𑀢𑀁. 𑀯𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀘𑀢𑀽𑀳𑀺 𑀬𑁄𑀦𑀻𑀳𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀸 𑀯𑀺𑀲𑀁𑀬𑀼𑀢𑁆𑀢𑀁.

𑀦𑀤𑁆𑀥𑀺𑀦𑁆𑀢𑀺 𑀉𑀧𑀦𑀸𑀳𑀁. 𑀯𑀭𑀢𑁆𑀢𑀦𑁆𑀢𑀺 𑀢𑀡𑁆𑀳𑀁. 𑀲𑀦𑁆𑀤𑀸𑀦𑀦𑁆𑀢𑀺 𑀬𑀼𑀢𑁆𑀢𑀧𑀸𑀲𑀁, 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀳𑀦𑀼𑀓𑁆𑀓𑀫𑀦𑁆𑀢𑀺 𑀅𑀦𑀼𑀓𑁆𑀓𑀫𑁄 𑀯𑀼𑀘𑁆𑀘𑀢𑀺 𑀧𑀸𑀲𑁂 𑀧𑀯𑁂𑀲𑀦𑀕𑀡𑁆𑀞𑀺, 𑀤𑀺𑀝𑁆𑀞𑀸𑀦𑀼𑀲𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑀦𑁆𑀢𑀺 𑀏𑀢𑁆𑀣 𑀧𑀮𑀺𑀖𑁄𑀢𑀺 𑀅𑀯𑀺𑀚𑁆𑀚𑀸. 𑀩𑀼𑀤𑁆𑀥𑀦𑁆𑀢𑀺 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑀁. 𑀢𑀺𑀢𑀺𑀓𑁆𑀔𑀢𑀻𑀢𑀺 𑀔𑀫𑀢𑀺.

𑀔𑀦𑁆𑀢𑀺𑀩𑀮𑀦𑁆𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀩𑀮𑀁. 𑀲𑀸 𑀧𑀦 𑀲𑀓𑀺𑀁 𑀉𑀧𑁆𑀧𑀦𑁆𑀦𑀸 𑀩𑀮𑀸𑀦𑀻𑀓𑀁 𑀦𑀸𑀫 𑀦 𑀳𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀦𑁆𑀦𑀸 𑀧𑀦 𑀳𑁄𑀢𑀺. 𑀢𑀲𑁆𑀲𑀸 𑀅𑀢𑁆𑀣𑀺𑀢𑀸𑀬 𑀩𑀮𑀸𑀦𑀻𑀓𑀁.

𑀯𑀢𑀯𑀦𑁆𑀢𑀦𑁆𑀢𑀺 𑀥𑀼𑀢𑀗𑁆𑀕𑀯𑀦𑁆𑀢𑀁. 𑀲𑀻𑀮𑀯𑀦𑁆𑀢𑀦𑁆𑀢𑀺 𑀕𑀼𑀡𑀯𑀦𑁆𑀢𑀁. 𑀅𑀦𑀼𑀲𑁆𑀲𑀤𑀦𑁆𑀢𑀺 𑀭𑀸𑀕𑀸𑀤𑀺𑀉𑀲𑁆𑀲𑀤𑀯𑀺𑀭𑀳𑀺𑀢𑀁. ‘‘𑀅𑀦𑀼𑀲𑁆𑀲𑀼𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀦𑀯𑀲𑁆𑀲𑀼𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀦𑁆𑀢𑀦𑁆𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀁.

𑀦 𑀮𑀺𑀫𑁆𑀧𑀢𑀻𑀢𑀺 𑀦 𑀅𑀮𑁆𑀮𑀻𑀬𑀢𑀺. 𑀓𑀸𑀫𑁂𑀲𑀽𑀢𑀺 𑀓𑀺𑀮𑁂𑀲𑀓𑀸𑀫𑀯𑀢𑁆𑀣𑀼𑀓𑀸𑀫𑁂𑀲𑀼.

𑀤𑀼𑀓𑁆𑀔𑀲𑁆𑀲 𑀧𑀚𑀸𑀦𑀸𑀢𑀺, 𑀇𑀥𑁂𑀯 𑀔𑀬𑀦𑁆𑀢𑀺 𑀏𑀢𑁆𑀣 𑀅𑀭𑀳𑀢𑁆𑀢𑀨𑀮𑀁 𑀤𑀼𑀓𑁆𑀔𑀓𑁆𑀔𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀧𑀚𑀸𑀦𑀸𑀢𑀻𑀢𑀺 𑀅𑀥𑀺𑀕𑀫𑀯𑀲𑁂𑀦 𑀚𑀸𑀦𑀸𑀢𑀺. 𑀧𑀦𑁆𑀦𑀪𑀸𑀭𑀦𑁆𑀢𑀺 𑀑𑀳𑀺𑀢𑀪𑀸𑀭𑀁, 𑀔𑀦𑁆𑀥𑀓𑀺𑀮𑁂𑀲𑀅𑀪𑀺𑀲𑀗𑁆𑀔𑀸𑀭𑀓𑀸𑀫𑀕𑀼𑀡𑀪𑀸𑀭𑁂 𑀑𑀢𑀸𑀭𑁂𑀢𑁆𑀯𑀸 𑀞𑀺𑀢𑀁. 𑀯𑀺𑀲𑀁𑀬𑀼𑀢𑁆𑀢𑀧𑀤𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀕𑀫𑁆𑀪𑀻𑀭𑀧𑀜𑁆𑀜𑀦𑁆𑀢𑀺 𑀕𑀫𑁆𑀪𑀻𑀭𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀧𑀜𑁆𑀜𑀁. 𑀫𑁂𑀥𑀸𑀯𑀺𑀦𑁆𑀢𑀺 𑀧𑀓𑀢𑀺𑀧𑀜𑁆𑀜𑀸𑀬 𑀧𑀜𑁆𑀜𑀯𑀦𑁆𑀢𑀁.

𑀅𑀦𑀸𑀕𑀸𑀭𑁂𑀳𑀺 𑀘𑀽𑀪𑀬𑀦𑁆𑀢𑀺 𑀅𑀦𑀸𑀕𑀸𑀭𑁂𑀳𑀺 𑀘 𑀯𑀺𑀲𑀁𑀲𑀝𑁆𑀞𑀁 𑀉𑀪𑀬𑀜𑁆𑀘, 𑀤𑁆𑀯𑀻𑀳𑀺𑀧𑀺 𑀘𑁂𑀢𑁂𑀳𑀺 𑀯𑀺𑀲𑀁𑀲𑀝𑁆𑀞𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀦𑁄𑀓𑀲𑀸𑀭𑀺𑀦𑁆𑀢𑀺 𑀑𑀓𑀁 𑀯𑀼𑀘𑁆𑀘𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀸𑀮𑀬𑁄, 𑀢𑀁 𑀅𑀦𑀮𑁆𑀮𑀻𑀬𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀺𑀘𑁆𑀙𑀦𑁆𑀢𑀺 𑀅𑀦𑀺𑀘𑁆𑀙𑀁.

𑀢𑀲𑁂𑀲𑀽𑀢𑀺 𑀲𑀢𑀡𑁆𑀳𑁂𑀲𑀼. 𑀣𑀸𑀯𑀭𑁂𑀲𑀽𑀢𑀺 𑀦𑀺𑀢𑁆𑀢𑀡𑁆𑀳𑁂𑀲𑀼.

𑀅𑀢𑁆𑀢𑀤𑀡𑁆𑀟𑁂𑀲𑀽𑀢𑀺 𑀕𑀳𑀺𑀢𑀤𑀡𑁆𑀟𑁂𑀲𑀼. 𑀦𑀺𑀩𑁆𑀩𑀼𑀢𑀦𑁆𑀢𑀺 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑀁. 𑀲𑀸𑀤𑀸𑀦𑁂𑀲𑀽𑀢𑀺 𑀲𑀉𑀧𑀸𑀤𑀸𑀦𑁂𑀲𑀼.

𑀑𑀳𑀺𑀢𑁄𑀢𑀺 𑀧𑀢𑀺𑀢𑁄.

𑁪𑁫𑁯. 𑀅𑀓𑀓𑁆𑀓𑀲𑀦𑁆𑀢𑀺 𑀦𑀺𑀤𑁆𑀤𑁄𑀲𑀁. 𑀲𑀤𑁄𑀲𑁄 𑀳𑀺 𑀭𑀼𑀓𑁆𑀔𑁄𑀧𑀺 𑀲𑀓𑀓𑁆𑀓𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀜𑀸𑀧𑀦𑀺𑀦𑁆𑀢𑀺 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑀺𑀓𑀁. 𑀲𑀘𑁆𑀘𑀦𑁆𑀢𑀺 𑀅𑀯𑀺𑀲𑀁𑀯𑀸𑀤𑀺𑀓𑀁. 𑀉𑀤𑀻𑀭𑀬𑁂𑀢𑀺 𑀪𑀡𑀢𑀺. 𑀬𑀸𑀬 𑀦𑀸𑀪𑀺𑀲𑀚𑁆𑀚𑁂𑀢𑀺 𑀬𑀸𑀬 𑀕𑀺𑀭𑀸𑀬 𑀧𑀭𑀲𑁆𑀲 𑀲𑀚𑁆𑀚𑀦𑀁 𑀯𑀸 𑀮𑀕𑁆𑀕𑀦𑀁 𑀯𑀸 𑀦 𑀓𑀭𑁄𑀢𑀺, 𑀢𑀸𑀤𑀺𑀲𑀁 𑀅𑀨𑀭𑀼𑀲𑀁 𑀕𑀺𑀭𑀁 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄.

𑀤𑀻𑀖𑀦𑁆𑀢𑀺 𑀲𑀼𑀢𑁆𑀢𑀸𑀭𑀼𑀴𑁆𑀳𑀪𑀡𑁆𑀟𑀁. 𑀭𑀲𑁆𑀲𑀦𑁆𑀢𑀺 𑀯𑀺𑀧𑁆𑀧𑀓𑀺𑀡𑁆𑀡𑀪𑀡𑁆𑀟𑀁. 𑀅𑀡𑀼𑀦𑁆𑀢𑀺 𑀔𑀼𑀤𑁆𑀤𑀓𑀁. 𑀣𑀽𑀮𑀦𑁆𑀢𑀺 𑀫𑀳𑀦𑁆𑀢𑀁. 𑀲𑀼𑀪𑀸𑀲𑀼𑀪𑀦𑁆𑀢𑀺 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀁. 𑀤𑀻𑀖𑀪𑀡𑁆𑀟𑀜𑁆𑀳𑀺 𑀅𑀧𑁆𑀧𑀕𑁆𑀖𑀫𑁆𑀧𑀺 𑀳𑁄𑀢𑀺 𑀫𑀳𑀕𑁆𑀖𑀫𑁆𑀧𑀺. 𑀭𑀲𑁆𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀏𑀢𑁆𑀢𑀸𑀯𑀢𑀸 𑀦 𑀲𑀩𑁆𑀩𑀁 𑀧𑀭𑀺𑀬𑀸𑀤𑀺𑀡𑁆𑀡𑀁, ‘‘𑀲𑀼𑀪𑀸𑀲𑀼𑀪’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀧𑀭𑀺𑀬𑀸𑀤𑀺𑀡𑁆𑀡𑀁 𑀳𑁄𑀢𑀺.

𑀦𑀺𑀭𑀸𑀲𑀬𑀦𑁆𑀢𑀺 𑀦𑀺𑀢𑁆𑀢𑀡𑁆𑀳𑀁.

𑀆𑀮𑀬𑀸𑀢𑀺 𑀢𑀡𑁆𑀳𑀸𑀮𑀬𑀸. 𑀅𑀜𑁆𑀜𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸. 𑀅𑀫𑀢𑁄𑀕𑀥𑀦𑁆𑀢𑀺 𑀅𑀫𑀢𑀩𑁆𑀪𑀦𑁆𑀢𑀭𑀁. 𑀅𑀦𑀼𑀧𑁆𑀧𑀢𑁆𑀢𑀦𑁆𑀢𑀺 𑀅𑀦𑀼𑀧𑀯𑀺𑀝𑁆𑀞𑀁.

𑀉𑀪𑁄 𑀲𑀗𑁆𑀕𑀦𑁆𑀢𑀺 𑀉𑀪𑀬𑀫𑁆𑀧𑁂𑀢𑀁 𑀲𑀗𑁆𑀕𑀁. 𑀧𑀼𑀜𑁆𑀜𑀜𑁆𑀳𑀺 𑀲𑀕𑁆𑀕𑁂 𑀮𑀕𑁆𑀕𑀸𑀧𑁂𑀢𑀺, 𑀅𑀧𑀼𑀜𑁆𑀜𑀁 𑀅𑀧𑀸𑀬𑁂, 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀲𑀗𑁆𑀕𑀦𑁆𑀢𑀺 𑀆𑀳. 𑀉𑀧𑀘𑁆𑀘𑀕𑀸𑀢𑀺 𑀅𑀢𑀻𑀢𑁄.

𑀅𑀦𑀸𑀯𑀺𑀮𑀦𑁆𑀢𑀺 𑀆𑀯𑀺𑀮𑀓𑀭𑀡𑀓𑀺𑀮𑁂𑀲𑀯𑀺𑀭𑀳𑀺𑀢𑀁. 𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀻𑀡𑀦𑁆𑀢𑀺 𑀧𑀭𑀺𑀓𑁆𑀔𑀻𑀡𑀦𑀦𑁆𑀤𑀺𑀁 𑀧𑀭𑀺𑀓𑁆𑀔𑀻𑀡𑀪𑀯𑀁.

‘‘𑀬𑁄 𑀇𑀫’’𑀦𑁆𑀢𑀺 𑀕𑀸𑀣𑀸𑀬 𑀅𑀯𑀺𑀚𑁆𑀚𑀸𑀬𑁂𑀯 𑀯𑀺𑀲𑀁𑀯𑀸𑀤𑀓𑀝𑁆𑀞𑁂𑀦 𑀧𑀮𑀺𑀧𑀣𑁄, 𑀫𑀳𑀸𑀯𑀺𑀤𑀼𑀕𑁆𑀕𑀢𑀸𑀬 𑀤𑀼𑀕𑁆𑀕𑀁, 𑀲𑀁𑀲𑀭𑀡𑀝𑁆𑀞𑁂𑀦 𑀲𑀁𑀲𑀸𑀭𑁄, 𑀫𑁄𑀳𑀦𑀝𑁆𑀞𑁂𑀦 𑀫𑁄𑀳𑁄𑀢𑀺 𑀯𑀼𑀢𑁆𑀢𑁄. 𑀢𑀺𑀡𑁆𑀡𑁄𑀢𑀺 𑀘𑀢𑀼𑀭𑁄𑀖𑀢𑀺𑀡𑁆𑀡𑁄. 𑀧𑀸𑀭𑀗𑁆𑀕𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀕𑀢𑁄. 𑀛𑀸𑀬𑀻𑀢𑀺 𑀆𑀭𑀫𑁆𑀫𑀡𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀯𑀲𑁂𑀦 𑀛𑀸𑀬𑀻. 𑀅𑀦𑁂𑀚𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀅𑀦𑀼𑀧𑀸𑀤𑀸𑀬 𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀜𑁆𑀘𑀺 𑀕𑀳𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁄.

𑀓𑀸𑀫𑁂𑀢𑀺 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂. 𑀅𑀦𑀸𑀕𑀸𑀭𑁄𑀢𑀺 𑀅𑀦𑀸𑀕𑀸𑀭𑁄 𑀳𑀼𑀢𑁆𑀯𑀸. 𑀧𑀭𑀺𑀩𑁆𑀩𑀚𑁂𑀢𑀺 𑀧𑀭𑀺𑀩𑁆𑀩𑀚𑀢𑀺. 𑀓𑀸𑀫𑀪𑀯𑀧𑀭𑀺𑀓𑁆𑀔𑀻𑀡𑀦𑁆𑀢𑀺 𑀔𑀻𑀡𑀓𑀸𑀫𑀁 𑀔𑀻𑀡𑀪𑀯𑀁.

𑀫𑀸𑀦𑀼𑀲𑀓𑀁 𑀬𑁄𑀕𑀦𑁆𑀢𑀺 𑀫𑀸𑀦𑀼𑀲𑀓𑀁 𑀧𑀜𑁆𑀘𑀓𑀸𑀫𑀕𑀼𑀡𑀬𑁄𑀕𑀁. 𑀤𑀺𑀩𑁆𑀩𑀁 𑀬𑁄𑀕𑀦𑁆𑀢𑀺 𑀤𑀺𑀩𑁆𑀩𑀁 𑀧𑀜𑁆𑀘𑀓𑀸𑀫𑀕𑀼𑀡𑀬𑁄𑀕𑀁. 𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀁.

𑀭𑀢𑀺𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀺𑀁. 𑀅𑀭𑀢𑀺𑀦𑁆𑀢𑀺 𑀓𑀼𑀲𑀮𑀪𑀸𑀯𑀦𑀸𑀬 𑀉𑀓𑁆𑀓𑀡𑁆𑀞𑀺𑀢𑀁. 𑀯𑀻𑀭𑀦𑁆𑀢𑀺 𑀯𑀻𑀭𑀺𑀬𑀯𑀦𑁆𑀢𑀁.

𑀲𑀼𑀕𑀢𑀦𑁆𑀢𑀺 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀁, 𑀲𑀼𑀦𑁆𑀤𑀭𑀸𑀬 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀕𑀢𑀁.

𑀕𑀢𑀺𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺𑀁. 𑀧𑀼𑀭𑁂𑀢𑀺 𑀅𑀢𑀻𑀢𑁂. 𑀧𑀘𑁆𑀙𑀸𑀢𑀺 𑀅𑀦𑀸𑀕𑀢𑁂. 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂. 𑀓𑀺𑀜𑁆𑀘𑀦𑀦𑁆𑀢𑀺 𑀓𑀺𑀜𑁆𑀘𑀦𑀓𑀸𑀭𑀓𑁄 𑀓𑀺𑀮𑁂𑀲𑁄.

𑀫𑀳𑁂𑀲𑀺𑀦𑁆𑀢𑀺 𑀫𑀳𑀦𑁆𑀢𑁂 𑀕𑀼𑀡𑁂 𑀧𑀭𑀺𑀬𑁂𑀲𑀦𑀝𑁆𑀞𑁂𑀦 𑀫𑀳𑁂𑀲𑀺𑀁. 𑀯𑀺𑀚𑀺𑀢𑀸𑀯𑀺𑀦𑀦𑁆𑀢𑀺 𑀯𑀺𑀚𑀺𑀢𑀯𑀺𑀚𑀬𑀁.

𑁪𑁬𑁦. 𑀏𑀯𑀁 𑀪𑀕𑀯𑀸 𑀕𑀼𑀡𑀢𑁄 𑀔𑀻𑀡𑀸𑀲𑀯𑀁𑀬𑁂𑀯 𑀩𑁆𑀭𑀸𑀳𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀬𑁂 𑀚𑀸𑀢𑀺𑀢𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀺, 𑀢𑁂 𑀇𑀤𑀁 𑀅𑀚𑀸𑀦𑀦𑁆𑀢𑀸, 𑀲𑀸𑀯 𑀦𑁂𑀲𑀁 𑀤𑀺𑀝𑁆𑀞𑀺 𑀤𑀼𑀤𑁆𑀤𑀺𑀝𑁆𑀞𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀲𑀫𑀜𑁆𑀜𑀸 𑀳𑁂𑀲𑀸𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺𑀤𑀁 𑀩𑁆𑀭𑀸𑀳𑁆𑀫𑀡𑁄 𑀔𑀢𑁆𑀢𑀺𑀬𑁄 𑀪𑀸𑀭𑀤𑁆𑀯𑀸𑀚𑁄 𑀯𑀸𑀲𑁂𑀝𑁆𑀞𑁄𑀢𑀺 𑀦𑀸𑀫𑀕𑁄𑀢𑁆𑀢𑀁 𑀧𑀓𑀧𑁆𑀧𑀺𑀢𑀁 𑀓𑀢𑀁 𑀅𑀪𑀺𑀲𑀗𑁆𑀔𑀢𑀁, 𑀲𑀫𑀜𑁆𑀜𑀸 𑀳𑁂𑀲𑀸 𑀮𑁄𑀓𑀲𑁆𑀫𑀺𑀁, 𑀯𑁄𑀳𑀸𑀭𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀫𑀼𑀘𑁆𑀘𑀸 𑀲𑀫𑀼𑀤𑀸𑀕𑀢𑀁 𑀲𑀫𑀜𑁆𑀜𑀸𑀬 𑀆𑀕𑀢𑀁. 𑀏𑀢𑀜𑁆𑀳𑀺 𑀢𑀢𑁆𑀣 𑀢𑀢𑁆𑀣 𑀚𑀸𑀢𑀓𑀸𑀮𑁂𑀬𑁂𑀯𑀲𑁆𑀲 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀧𑀓𑀧𑁆𑀧𑀺𑀢𑀁 𑀓𑀢𑀁. 𑀦𑁄 𑀘𑁂 𑀦𑀁 𑀏𑀯𑀁 𑀧𑀓𑀧𑁆𑀧𑁂𑀬𑁆𑀬𑀼𑀁, 𑀦 𑀓𑁄𑀘𑀺 𑀓𑀺𑀜𑁆𑀘𑀺 𑀤𑀺𑀲𑁆𑀯𑀸 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀸 𑀪𑀸𑀭𑀤𑁆𑀯𑀸𑀚𑁄𑀢𑀺 𑀯𑀸 𑀚𑀸𑀦𑁂𑀬𑁆𑀬. 𑀏𑀯𑀁 𑀧𑀓𑀧𑁆𑀧𑀺𑀢𑀁 𑀧𑁂𑀢𑀁 𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀁, 𑀤𑀺𑀝𑁆𑀞𑀺𑀕𑀢𑀫𑀚𑀸𑀦𑀢𑀁, 𑀢𑀁 𑀧𑀓𑀧𑁆𑀧𑀺𑀢𑀁 𑀦𑀸𑀫𑀕𑁄𑀢𑁆𑀢𑀁 ‘‘𑀦𑀸𑀫𑀕𑁄𑀢𑁆𑀢𑀫𑀢𑁆𑀢𑀫𑁂𑀢𑀁, 𑀯𑁄𑀳𑀸𑀭𑀢𑁆𑀣𑀁 𑀧𑀓𑀧𑁆𑀧𑀺𑀢’’𑀦𑁆𑀢𑀺, 𑀅𑀚𑀸𑀦𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀳𑀤𑀬𑁂 𑀤𑀻𑀖𑀭𑀢𑁆𑀢𑀁 𑀤𑀺𑀝𑁆𑀞𑀺𑀕𑀢𑀫𑀦𑀼𑀲𑀬𑀺𑀢𑀁. 𑀢𑀲𑁆𑀲 𑀅𑀦𑀼𑀲𑀬𑀺𑀢𑀢𑁆𑀢𑀸 𑀢𑀁 𑀦𑀸𑀫𑀕𑁄𑀢𑁆𑀢𑀁 𑀅𑀚𑀸𑀦𑀦𑁆𑀢𑀸 𑀦𑁄 𑀧𑀩𑁆𑀭𑀼𑀦𑁆𑀢𑀺, ‘‘𑀚𑀸𑀢𑀺𑀬𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀅𑀚𑀸𑀦𑀦𑁆𑀢𑀸𑀯 𑀏𑀯𑀁 𑀯𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 ‘‘𑀬𑁂 ‘𑀚𑀸𑀢𑀺𑀢𑁄 𑀩𑁆𑀭𑀸𑀳𑁆𑀫𑀡𑁄’𑀢𑀺 𑀅𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀺, 𑀢𑁂 𑀇𑀤𑀁 𑀯𑁄𑀳𑀸𑀭𑀫𑀢𑁆𑀢𑀁 𑀅𑀚𑀸𑀦𑀦𑁆𑀢𑀸, 𑀲𑀸𑀯 𑀦𑁂𑀲𑀁 𑀤𑀺𑀝𑁆𑀞𑀺 𑀤𑀼𑀤𑁆𑀤𑀺𑀝𑁆𑀞𑀻’’𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀧𑁆𑀧𑀭𑀺𑀬𑀸𑀬𑀫𑁂𑀯 𑀚𑀸𑀢𑀺𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀓𑀫𑁆𑀫𑀯𑀸𑀤𑀜𑁆𑀘 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀦 𑀚𑀘𑁆𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀓𑀫𑁆𑀫𑀼𑀦𑀸’’𑀢𑀺 𑀉𑀧𑀟𑁆𑀠𑀕𑀸𑀣𑀸𑀬 𑀯𑀺𑀢𑁆𑀣𑀸𑀭𑀡𑀢𑁆𑀣𑀁 𑀓𑀲𑁆𑀲𑀓𑁄 𑀓𑀫𑁆𑀫𑀼𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀫𑁆𑀫𑀼𑀦𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀓𑀲𑀺𑀓𑀫𑁆𑀫𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀘𑁂𑀢𑀦𑀸𑀓𑀫𑁆𑀫𑀼𑀦𑀸.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑀲𑁆𑀲𑀸𑀢𑀺 𑀇𑀫𑀺𑀦𑀸 𑀧𑀘𑁆𑀘𑀬𑁂𑀦 𑀏𑀯𑀁 𑀳𑁄𑀢𑀻𑀢𑀺 𑀏𑀯𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑀲𑁆𑀲𑀸𑀯𑀺𑀦𑁄. 𑀓𑀫𑁆𑀫𑀯𑀺𑀧𑀸𑀓𑀓𑁄𑀯𑀺𑀤𑀸𑀢𑀺 𑀲𑀫𑁆𑀫𑀸𑀦𑀸𑀯𑀫𑀸𑀦𑀸𑀭𑀳𑀓𑀼𑀮𑁂 𑀓𑀫𑁆𑀫𑀯𑀲𑁂𑀦 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺, 𑀅𑀜𑁆𑀜𑀸𑀧𑀺 𑀳𑀻𑀦𑀧𑀡𑀻𑀢𑀢𑀸 𑀳𑀻𑀦𑀧𑀡𑀻𑀢𑁂 𑀓𑀫𑁆𑀫𑁂 𑀯𑀺𑀧𑀘𑁆𑀘𑀫𑀸𑀦𑁂 𑀳𑁄𑀢𑀻𑀢𑀺. 𑀏𑀯𑀁 𑀓𑀫𑁆𑀫𑀯𑀺𑀧𑀸𑀓𑀓𑀼𑀲𑀮𑀸.

𑀓𑀫𑁆𑀫𑀼𑀦𑀸 𑀯𑀢𑁆𑀢𑀢𑀻𑀢𑀺 𑀕𑀸𑀣𑀸𑀬 𑀧𑀦 𑀮𑁄𑀓𑁄𑀢𑀺 𑀯𑀸 𑀧𑀚𑀸𑀢𑀺 𑀯𑀸 𑀲𑀢𑁆𑀢𑁄𑀢𑀺 𑀯𑀸 𑀏𑀓𑁄𑀬𑁂𑀯𑀢𑁆𑀣𑁄, 𑀯𑀘𑀦𑀫𑀢𑁆𑀢𑀪𑁂𑀤𑁄. 𑀧𑀼𑀭𑀺𑀫𑀧𑀤𑁂𑀦 𑀘𑁂𑀢𑁆𑀣 ‘‘𑀅𑀢𑁆𑀣𑀺 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸’’𑀢𑀺 𑀤𑀺𑀝𑁆𑀞𑀺𑀬𑀸 𑀧𑀝𑀺𑀲𑁂𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀫𑁆𑀫𑀼𑀦𑀸 𑀳𑀺 𑀢𑀸𑀲𑀼 𑀢𑀸𑀲𑀼 𑀕𑀢𑀻𑀲𑀼 𑀯𑀢𑁆𑀢𑀢𑀺 𑀮𑁄𑀓𑁄, 𑀢𑀲𑁆𑀲 𑀓𑁄 𑀲𑀚𑀺𑀢𑀸𑀢𑀺. 𑀤𑀼𑀢𑀺𑀬𑀧𑀤𑁂𑀦 ‘‘𑀏𑀯𑀁 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑁄𑀧𑀺 𑀘 𑀧𑀯𑀢𑁆𑀢𑁂𑀧𑀺 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑁂𑀤𑁂𑀦 𑀓𑀫𑁆𑀫𑀼𑀦𑀸 𑀯𑀢𑁆𑀢𑀢𑀺, 𑀲𑀼𑀔𑀤𑀼𑀓𑁆𑀔𑀸𑀦𑀺 𑀧𑀘𑁆𑀘𑀦𑀼𑀪𑁄𑀦𑁆𑀢𑁄 𑀳𑀻𑀦𑀧𑀡𑀻𑀢𑀸𑀤𑀺𑀪𑁂𑀤𑀜𑁆𑀘 𑀆𑀧𑀚𑁆𑀚𑀦𑁆𑀢𑁄 𑀧𑀯𑀢𑁆𑀢𑀢𑀻’’𑀢𑀺 𑀤𑀲𑁆𑀲𑁂𑀢𑀺. 𑀢𑀢𑀺𑀬𑁂𑀦 𑀢𑀫𑁂𑀯𑀢𑁆𑀣𑀁 𑀦𑀺𑀕𑀫𑁂𑀢𑀺 ‘‘𑀏𑀯𑀁 𑀲𑀩𑁆𑀩𑀣𑀸𑀧𑀺 𑀓𑀫𑁆𑀫𑀦𑀺𑀩𑀦𑁆𑀥𑀦𑀸 𑀲𑀢𑁆𑀢𑀸 𑀓𑀫𑁆𑀫𑁂𑀦𑁂𑀯 𑀩𑀤𑁆𑀥𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀦 𑀅𑀜𑁆𑀜𑀣𑀸’’𑀢𑀺. 𑀘𑀢𑀼𑀢𑁆𑀣𑁂𑀦 𑀢𑀫𑁂𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀺. 𑀬𑀣𑀸 𑀳𑀺 𑀭𑀣𑀲𑁆𑀲 𑀬𑀸𑀬𑀢𑁄 𑀆𑀡𑀺 𑀦𑀺𑀩𑀦𑁆𑀥𑀦𑀁 𑀳𑁄𑀢𑀺, 𑀦 𑀢𑀸𑀬 𑀅𑀦𑀺𑀩𑀤𑁆𑀥𑁄 𑀬𑀸𑀢𑀺, 𑀏𑀯𑀁 𑀮𑁄𑀓𑀲𑁆𑀲 𑀦𑀺𑀩𑁆𑀩𑀢𑁆𑀢𑀢𑁄 𑀘 𑀧𑀯𑀢𑁆𑀢𑀢𑁄 𑀘 𑀓𑀫𑁆𑀫𑀁 𑀦𑀺𑀩𑀦𑁆𑀥𑀦𑀁, 𑀦 𑀢𑁂𑀦 𑀅𑀦𑀺𑀩𑀤𑁆𑀥𑁄 𑀦𑀺𑀩𑁆𑀩𑀢𑁆𑀢𑀢𑀺 𑀦 𑀧𑀯𑀢𑁆𑀢𑀢𑀺.

𑀇𑀤𑀸𑀦𑀺 𑀬𑀲𑁆𑀫𑀸 𑀏𑀯𑀁 𑀓𑀫𑁆𑀫𑀦𑀺𑀩𑀦𑁆𑀥𑀦𑁄 𑀮𑁄𑀓𑁄, 𑀢𑀲𑁆𑀫𑀸 𑀲𑁂𑀝𑁆𑀞𑁂𑀦 𑀓𑀫𑁆𑀫𑀼𑀦𑀸 𑀲𑁂𑀝𑁆𑀞𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀢𑀧𑁂𑀦𑀸𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀢𑀧𑁂𑀦𑀸𑀢𑀺 𑀥𑀼𑀢𑀗𑁆𑀕𑀢𑀧𑁂𑀦. 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸𑀢𑀺 𑀫𑁂𑀣𑀼𑀦𑀯𑀺𑀭𑀢𑀺𑀬𑀸. 𑀲𑀁𑀬𑀫𑁂𑀦𑀸𑀢𑀺 𑀲𑀻𑀮𑁂𑀦. 𑀤𑀫𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑁂𑀦. 𑀏𑀢𑁂𑀦𑀸𑀢𑀺 𑀏𑀢𑁂𑀦 𑀲𑁂𑀝𑁆𑀞𑁂𑀦 𑀧𑀭𑀺𑀲𑀼𑀤𑁆𑀥𑁂𑀦 𑀩𑁆𑀭𑀳𑁆𑀫𑀪𑀽𑀢𑁂𑀦 𑀓𑀫𑁆𑀫𑀼𑀦𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀏𑀢𑀁 𑀩𑁆𑀭𑀸𑀳𑁆𑀫𑀡𑀫𑀼𑀢𑁆𑀢𑀫𑀁, 𑀬𑀲𑁆𑀫𑀸 𑀏𑀢𑀁 𑀓𑀫𑁆𑀫𑀁 𑀉𑀢𑁆𑀢𑀫𑁄 𑀩𑁆𑀭𑀸𑀳𑁆𑀫𑀡𑀕𑀼𑀡𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀩𑁆𑀭𑀳𑁆𑀫𑀸𑀦’’𑀦𑁆𑀢𑀺𑀧𑀺 𑀧𑀸𑀞𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀩𑁆𑀭𑀳𑁆𑀫𑀁 𑀆𑀦𑁂𑀢𑀻𑀢𑀺 𑀩𑁆𑀭𑀳𑁆𑀫𑀸𑀦𑀁, 𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀆𑀯𑀳𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑀼𑀢𑀺𑀬𑀕𑀸𑀣𑀸𑀬 𑀲𑀦𑁆𑀢𑁄𑀢𑀺 𑀲𑀦𑁆𑀢𑀓𑀺𑀮𑁂𑀲𑁄. 𑀩𑁆𑀭𑀳𑁆𑀫𑀸 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀸 𑀘 𑀲𑀓𑁆𑀓𑁄 𑀘, 𑀬𑁄 𑀏𑀯𑀭𑀽𑀧𑁄, 𑀲𑁄 𑀦 𑀓𑁂𑀯𑀮𑀁 𑀩𑁆𑀭𑀸𑀳𑁆𑀫𑀡𑁄, 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀘 𑀲𑀓𑁆𑀓𑁄 𑀘 𑀲𑁄 𑀯𑀺𑀚𑀸𑀦𑀢𑀁 𑀧𑀡𑁆𑀟𑀺𑀢𑀸𑀦𑀁, 𑀏𑀯𑀁 𑀯𑀸𑀲𑁂𑀝𑁆𑀞, 𑀚𑀸𑀦𑀸𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.