𑁭. 𑀥𑀦𑀜𑁆𑀚𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀥𑀦𑀜𑁆𑀚𑀸𑀦𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀦𑁆𑀢𑀺 𑀕𑀺𑀭𑀻𑀢𑀺 𑀧𑀩𑁆𑀩𑀢𑁄, 𑀭𑀸𑀚𑀕𑀳𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀧𑀩𑁆𑀩𑀢𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀚𑀦𑀧𑀤𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀡𑁆𑀟𑀼𑀮𑀧𑀸𑀮𑀺𑀤𑁆𑀯𑀸𑀭𑀸𑀬𑀸𑀢𑀺 𑀭𑀸𑀚𑀕𑀳𑀲𑁆𑀲 𑀓𑀺𑀭 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀤𑁆𑀯𑀸𑀭𑀸𑀦𑀺 𑀘𑀢𑀼𑀲𑀝𑁆𑀞𑀺𑀔𑀼𑀤𑁆𑀤𑀓𑀤𑁆𑀯𑀸𑀭𑀸𑀦𑀺, 𑀢𑁂𑀲𑀼 𑀏𑀓𑀁 𑀢𑀡𑁆𑀟𑀼𑀮𑀧𑀸𑀮𑀺𑀤𑁆𑀯𑀸𑀭𑀁 𑀦𑀸𑀫, 𑀢𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀭𑀸𑀚𑀸𑀦𑀁 𑀦𑀺𑀲𑁆𑀲𑀸𑀬𑀸𑀢𑀺 ‘‘𑀕𑀘𑁆𑀙 𑀫𑀦𑀼𑀲𑁆𑀲𑁂 𑀅𑀧𑀻𑀴𑁂𑀢𑁆𑀯𑀸 𑀲𑀲𑁆𑀲𑀪𑀸𑀕𑀁 𑀕𑀡𑁆𑀳𑀸𑀳𑀻’’𑀢𑀺 𑀭𑀜𑁆𑀜𑀸 𑀧𑁂𑀲𑀺𑀢𑁄 𑀕𑀦𑁆𑀢𑁆𑀯𑀸 𑀲𑀩𑁆𑀩𑀫𑁂𑀯 𑀲𑀲𑁆𑀲𑀁 𑀕𑀡𑁆𑀳𑀸𑀢𑀺, ‘‘𑀫𑀸 𑀦𑁄, 𑀪𑀦𑁆𑀢𑁂, 𑀦𑀸𑀲𑁂𑀳𑀻’’𑀢𑀺 𑀘 𑀯𑀼𑀢𑁆𑀢𑁂 𑁋 ‘‘𑀭𑀸𑀚𑀓𑀼𑀮𑁂 𑀯𑀼𑀢𑁆𑀢𑀁 𑀫𑀦𑁆𑀤𑀁, 𑀅𑀳𑀁 𑀭𑀜𑁆𑀜𑀸 𑀆𑀕𑀫𑀦𑀓𑀸𑀮𑁂𑀬𑁂𑀯 𑀏𑀯𑀁 𑀆𑀡𑀢𑁆𑀢𑁄, 𑀫𑀸 𑀓𑀦𑁆𑀤𑀺𑀢𑁆𑀣𑀸’’𑀢𑀺 𑀏𑀯𑀁 𑀭𑀸𑀚𑀸𑀦𑀁 𑀦𑀺𑀲𑁆𑀲𑀸𑀬 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀯𑀺𑀮𑀼𑀫𑁆𑀧𑀢𑀺. 𑀥𑀜𑁆𑀜𑀁 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀢𑀦𑁄 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀅𑀧𑁆𑀧𑀓𑀁 𑀭𑀸𑀚𑀓𑀼𑀮𑁂 𑀧𑀯𑁂𑀲𑁂𑀢𑀺. 𑀓𑀺𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀦 𑀧𑀻𑀴𑀁 𑀅𑀓𑀸𑀲𑀻𑀢𑀺 𑀘 𑀯𑀼𑀢𑁆𑀢𑁄 𑁋 ‘‘𑀆𑀫, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀔𑁂𑀢𑁆𑀢𑀸𑀦𑀺 𑀫𑀦𑁆𑀤𑀲𑀲𑁆𑀲𑀸𑀦𑀺 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀅𑀧𑀻𑀴𑁂𑀦𑁆𑀢𑀲𑁆𑀲 𑀫𑁂 𑀕𑀡𑁆𑀳𑀢𑁄 𑀦 𑀩𑀳𑀼𑀁 𑀚𑀸𑀢’’𑀦𑁆𑀢𑀺 𑀏𑀯𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀦𑀺𑀲𑁆𑀲𑀸𑀬 𑀭𑀸𑀚𑀸𑀦𑀁 𑀯𑀺𑀮𑀼𑀫𑁆𑀧𑀢𑀺.

𑁪𑁪𑁬. 𑀧𑀬𑁄 𑀧𑀻𑀬𑀢𑀦𑁆𑀢𑀺 𑀢𑀭𑀼𑀡𑀔𑀻𑀭𑀁 𑀧𑀺𑀯𑀢𑀼. 𑀢𑀸𑀯 𑀪𑀢𑁆𑀢𑀲𑁆𑀲𑀸𑀢𑀺 𑀬𑀸𑀯 𑀔𑀻𑀭𑀁 𑀧𑀺𑀯𑀺𑀢𑁆𑀯𑀸 𑀦𑀺𑀲𑀻𑀤𑀺𑀲𑁆𑀲𑀣, 𑀢𑀸𑀯𑀤𑁂𑀯 𑀪𑀢𑁆𑀢𑀲𑁆𑀲 𑀓𑀸𑀮𑁄 𑀪𑀯𑀺𑀲𑁆𑀲𑀢𑀺. 𑀇𑀥𑁂𑀯 𑀳𑀺 𑀦𑁄 𑀧𑀸𑀢𑀭𑀸𑀲𑀪𑀢𑁆𑀢𑀁 𑀆𑀳𑀭𑀺𑀲𑁆𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀸𑀢𑀸𑀧𑀺𑀢𑀭𑁄𑀢𑀺𑀆𑀤𑀻𑀲𑀼 𑀫𑀳𑀮𑁆𑀮𑀓𑀸 𑀫𑀸𑀢𑀸𑀧𑀺𑀢𑀭𑁄 𑀫𑀼𑀤𑀼𑀓𑀸𑀦𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀦𑀺 𑀲𑀼𑀔𑀼𑀫𑀸𑀦𑀺 𑀯𑀢𑁆𑀣𑀸𑀦𑀺 𑀫𑀥𑀼𑀭𑀪𑁄𑀚𑀦𑀁 𑀲𑀼𑀕𑀦𑁆𑀥𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀘 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑁄𑀲𑁂𑀢𑀩𑁆𑀩𑀸. 𑀧𑀼𑀢𑁆𑀢𑀥𑀻𑀢𑀸𑀦𑀁 𑀦𑀸𑀫𑀓𑀭𑀡𑀫𑀗𑁆𑀕𑀮𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑁂𑀦 𑀧𑀼𑀢𑁆𑀢𑀤𑀸𑀭𑁄 𑀧𑁄𑀲𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀅𑀓𑀭𑀺𑀬𑀫𑀸𑀦𑁂 𑀕𑀭𑀳𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁪𑁭. 𑀅𑀥𑀫𑁆𑀫𑀘𑀸𑀭𑀻𑀢𑀺 𑀧𑀜𑁆𑀘 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀸𑀦𑀺 𑀯𑀸 𑀤𑀲 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀸𑀦𑀺 𑀯𑀸 𑀇𑀥 𑀅𑀥𑀫𑁆𑀫𑁄 𑀦𑀸𑀫. 𑀉𑀧𑀓𑀟𑁆𑀠𑁂𑀬𑁆𑀬𑀼𑀦𑁆𑀢𑀺 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀓𑀫𑁆𑀫𑀓𑀭𑀡𑀢𑁆𑀣𑀁 𑀢𑀁 𑀢𑀁 𑀦𑀺𑀭𑀬𑀁 𑀓𑀟𑁆𑀠𑁂𑀬𑁆𑀬𑀼𑀁.

𑁪𑁪𑁮. 𑀥𑀫𑁆𑀫𑀘𑀸𑀭𑀻𑀢𑀺 𑀥𑀫𑁆𑀫𑀺𑀓𑀲𑀺𑀯𑀯𑀺𑀚𑁆𑀚𑀸𑀤𑀺𑀓𑀫𑁆𑀫𑀓𑀸𑀭𑀻. 𑀧𑀝𑀺𑀓𑁆𑀓𑀫𑀦𑁆𑀢𑀻𑀢𑀺 𑀑𑀲𑀭𑀦𑁆𑀢𑀺 𑀧𑀭𑀺𑀳𑀸𑀬𑀦𑁆𑀢𑀺. 𑀅𑀪𑀺𑀓𑁆𑀓𑀫𑀦𑁆𑀢𑀻𑀢𑀺 𑀅𑀪𑀺𑀲𑀭𑀦𑁆𑀢𑀺 𑀯𑀟𑁆𑀠𑀦𑁆𑀢𑀺. 𑀲𑁂𑀬𑁆𑀬𑁄𑀢𑀺 𑀯𑀭𑀢𑀭𑀁. 𑀳𑀻𑀦𑁂𑀢𑀺 𑀦𑀺𑀳𑀻𑀦𑁂 𑀮𑀸𑀫𑀓𑁂. 𑀓𑀸𑀮𑀗𑁆𑀓𑀢𑁄 𑀘 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀇𑀤𑀁 𑀪𑀕𑀯𑀸 ‘‘𑀢𑀢𑁆𑀭𑀲𑁆𑀲 𑀕𑀦𑁆𑀢𑁆𑀯𑀸 𑀤𑁂𑀲𑁂𑀳𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀣𑁂𑀭𑀫𑀸𑀳. 𑀣𑁂𑀭𑁄𑀧𑀺 𑀢𑀁𑀔𑀡𑀁𑀬𑁂𑀯 𑀕𑀦𑁆𑀢𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀘𑀸𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀓𑀣𑁂𑀦𑁆𑀢𑁄𑀧𑀺 𑀘𑀢𑀼𑀲𑀘𑁆𑀘𑀯𑀺𑀫𑀼𑀢𑁆𑀢𑀁 𑀦𑀸𑀫 𑀦 𑀓𑀣𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀥𑀦𑀜𑁆𑀚𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.