𑁯. 𑀥𑀫𑁆𑀫𑀘𑁂𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀥𑀫𑁆𑀫𑀘𑁂𑀢𑀺𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀫𑁂𑀤𑀸𑀴𑀼𑀧𑀦𑁆𑀢𑀺 𑀦𑀸𑀫𑁂𑀢𑀁 𑀢𑀲𑁆𑀲, 𑀢𑀲𑁆𑀲 𑀳𑀺 𑀦𑀺𑀕𑀫𑀲𑁆𑀲 𑀫𑁂𑀤𑀯𑀡𑁆𑀡𑀸 𑀧𑀸𑀲𑀸𑀡𑀸 𑀓𑀺𑀭𑁂𑀢𑁆𑀣 𑀉𑀲𑁆𑀲𑀦𑁆𑀦𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀫𑁂𑀤𑀸𑀴𑀼𑀧𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁. 𑀲𑁂𑀦𑀸𑀲𑀦𑀁 𑀧𑀦𑁂𑀢𑁆𑀣 𑀅𑀦𑀺𑀬𑀢𑀁, 𑀢𑀲𑁆𑀫𑀸 𑀦 𑀢𑀁 𑀯𑀼𑀢𑁆𑀢𑀁. 𑀦𑀕𑀭𑀓𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀲𑀓𑁆𑀬𑀸𑀦𑀁 𑀦𑀺𑀕𑀫𑀁. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸𑀢𑀺 𑀦 𑀅𑀜𑁆𑀜𑁂𑀦 𑀓𑀭𑀡𑀻𑀬𑁂𑀦, 𑀅𑀬𑀁 𑀧𑀦 𑀩𑀦𑁆𑀥𑀼𑀮𑀲𑁂𑀦𑀸𑀧𑀢𑀺𑀁 𑀲𑀤𑁆𑀥𑀺𑀁 𑀤𑁆𑀯𑀢𑁆𑀢𑀺𑀁𑀲𑀸𑀬 𑀧𑀼𑀢𑁆𑀢𑁂𑀳𑀺 𑀏𑀓𑀤𑀺𑀯𑀲𑁂𑀦𑁂𑀯 𑀕𑀡𑁆𑀳𑀣𑀸𑀢𑀺 𑀆𑀡𑀸𑀧𑁂𑀲𑀺, 𑀢𑀁𑀤𑀺𑀯𑀲𑀜𑁆𑀘𑀲𑁆𑀲 𑀪𑀭𑀺𑀬𑀸𑀬 𑀫𑀮𑁆𑀮𑀺𑀓𑀸𑀬 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀪𑀕𑀯𑀸 𑀦𑀺𑀫𑀦𑁆𑀢𑀺𑀢𑁄, 𑀩𑀼𑀤𑁆𑀥𑀧𑁆𑀧𑀫𑀼𑀔𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀖𑀭𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀫𑀢𑁆𑀢𑁂 ‘‘𑀲𑁂𑀦𑀸𑀧𑀢𑀺 𑀓𑀸𑀮𑀗𑁆𑀓𑀢𑁄’’𑀢𑀺 𑀲𑀸𑀲𑀦𑀁 𑀆𑀳𑀭𑀺𑀢𑁆𑀯𑀸 𑀫𑀮𑁆𑀮𑀺𑀓𑀸𑀬 𑀅𑀤𑀁𑀲𑀼. 𑀲𑀸 𑀧𑀡𑁆𑀡𑀁 𑀕𑀳𑁂𑀢𑁆𑀯𑀸 𑀫𑀼𑀔𑀲𑀸𑀲𑀦𑀁 𑀧𑀼𑀘𑁆𑀙𑀺. ‘‘𑀭𑀜𑁆𑀜𑀸 𑀅𑀬𑁆𑀬𑁂 𑀲𑁂𑀦𑀸𑀧𑀢𑀺 𑀲𑀤𑁆𑀥𑀺𑀁 𑀤𑁆𑀯𑀢𑁆𑀢𑀺𑀁𑀲𑀸𑀬 𑀧𑀼𑀢𑁆𑀢𑁂𑀳𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀕𑀳𑀸𑀧𑀺𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁. 𑀫𑀳𑀸𑀚𑀦𑀕𑀢𑀁 𑀫𑀸 𑀓𑀭𑀺𑀢𑁆𑀣𑀸𑀢𑀺 𑀑𑀯𑀝𑁆𑀝𑀺𑀓𑀸𑀬 𑀧𑀡𑁆𑀡𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀏𑀓𑀸 𑀲𑀧𑁆𑀧𑀺𑀘𑀸𑀝𑀺 𑀦𑀻𑀳𑀭𑀺𑀢𑀸, 𑀲𑀸 𑀉𑀫𑁆𑀫𑀸𑀭𑁂 𑀆𑀳𑀘𑁆𑀘 𑀪𑀺𑀦𑁆𑀦𑀸, 𑀢𑀁 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀆𑀳𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺.

𑀲𑀢𑁆𑀣𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑁋 ‘‘𑀲𑀧𑁆𑀧𑀺𑀘𑀸𑀝𑀺𑀬𑀸 𑀪𑀺𑀦𑁆𑀦𑀧𑀘𑁆𑀘𑀬𑀸 𑀦 𑀘𑀺𑀦𑁆𑀢𑁂𑀢𑀩𑁆𑀩’’𑀦𑁆𑀢𑀺 𑀆𑀳. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀮𑁆𑀮𑀺𑀓𑀸 𑀧𑀡𑁆𑀡𑀁 𑀦𑀻𑀳𑀭𑀺𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑁋 ‘‘𑀪𑀕𑀯𑀸 𑀇𑀫𑀁 𑀤𑁆𑀯𑀢𑁆𑀢𑀺𑀁𑀲𑀸𑀬 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑁂𑀦𑀸𑀧𑀢𑀺𑀦𑁄 𑀫𑀢𑀲𑀸𑀲𑀦𑀁, 𑀅𑀳𑀁 𑀏𑀢𑀫𑁆𑀧𑀺 𑀦 𑀘𑀺𑀦𑁆𑀢𑀬𑀸𑀫𑀺, 𑀲𑀧𑁆𑀧𑀺𑀘𑀸𑀝𑀺𑀧𑀘𑁆𑀘𑀬𑀸 𑀓𑀺𑀁 𑀘𑀺𑀦𑁆𑀢𑁂𑀬𑁆𑀬𑀸𑀫𑀻’’𑀢𑀺 𑀆𑀳. 𑀪𑀕𑀯𑀸 𑁋 ‘‘𑀫𑀮𑁆𑀮𑀺𑀓𑁂, 𑀫𑀸 𑀘𑀺𑀦𑁆𑀢𑀬𑀺, 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀦𑀸𑀫 𑀯𑀢𑁆𑀢𑀫𑀸𑀦𑀸𑀦𑀁 𑀳𑁄𑀢𑀺 𑀏𑀢’’𑀦𑁆𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸 𑀅𑀕𑀫𑀸𑀲𑀺. 𑀫𑀮𑁆𑀮𑀺𑀓𑀸 𑀤𑁆𑀯𑀢𑁆𑀢𑀺𑀁𑀲𑀲𑀼𑀡𑀺𑀲𑀸𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀑𑀯𑀸𑀤𑀁 𑀅𑀤𑀸𑀲𑀺. 𑀭𑀸𑀚𑀸 𑀫𑀮𑁆𑀮𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑁂𑀦𑀸𑀧𑀢𑀺𑀦𑁄 𑀅𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀪𑀺𑀦𑁆𑀦𑀤𑁄𑀲𑁄 𑀅𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. 𑀦𑀢𑁆𑀣𑀺 𑀲𑀸𑀫𑀻𑀢𑀺. 𑀲𑁄 𑀢𑀲𑁆𑀲𑀸 𑀯𑀘𑀦𑁂𑀦 𑀢𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑀁 𑀜𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀲𑀺. 𑀲𑁄 𑁋 ‘‘𑀏𑀯𑀭𑀽𑀧𑀁 𑀦𑀸𑀫 𑀅𑀤𑁄𑀲𑀓𑀸𑀭𑀓𑀁 𑀫𑀁 𑀲𑀫𑁆𑀪𑀸𑀯𑀬𑀺𑀢𑁆𑀯𑀸 𑀆𑀕𑀢𑀁 𑀲𑀳𑀸𑀬𑀓𑀁 𑀯𑀺𑀦𑀸𑀲𑁂𑀲𑀺’’𑀦𑁆𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀧𑀸𑀲𑀸𑀤𑁂 𑀯𑀸 𑀦𑀸𑀝𑀓𑁂𑀲𑀼 𑀯𑀸 𑀭𑀚𑁆𑀚𑀲𑀼𑀔𑁂𑀲𑀼 𑀯𑀸 𑀘𑀺𑀢𑁆𑀢𑀲𑁆𑀲𑀸𑀤𑀁 𑀅𑀮𑀪𑀫𑀸𑀦𑁄 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀺𑀢𑀼𑀁 𑀆𑀭𑀤𑁆𑀥𑁄. 𑀏𑀢𑀤𑁂𑀯 𑀓𑀺𑀘𑁆𑀘𑀁 𑀅𑀳𑁄𑀲𑀺. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸’’𑀢𑀺.

𑀤𑀻𑀖𑀁 𑀓𑀸𑀭𑀸𑀬𑀦𑀦𑁆𑀢𑀺 𑀤𑀻𑀖𑀓𑀸𑀭𑀸𑀬𑀦𑁄 𑀦𑀸𑀫 𑀩𑀦𑁆𑀥𑀼𑀮𑀲𑁂𑀦𑀸𑀧𑀢𑀺𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 ‘‘𑀏𑀢𑀲𑁆𑀲 𑀫𑁂 𑀫𑀸𑀢𑀼𑀮𑁄 𑀅𑀤𑁄𑀲𑀓𑀸𑀭𑀓𑁄 𑀦𑀺𑀓𑁆𑀓𑀸𑀭𑀡𑁂𑀦 𑀖𑀸𑀢𑀺𑀢𑁄’’𑀢𑀺 𑀭𑀜𑁆𑀜𑀸 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂 𑀞𑀧𑀺𑀢𑁄. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀫𑀳𑀘𑁆𑀘𑀸 𑀭𑀸𑀚𑀸𑀦𑀼𑀪𑀸𑀯𑁂𑀦𑀸𑀢𑀺 𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦, 𑀥𑀭𑀡𑀺𑀢𑀮𑀁 𑀪𑀺𑀦𑁆𑀤𑀦𑁆𑀢𑁄 𑀯𑀺𑀬 𑀲𑀸𑀕𑀭𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀯𑀺𑀬 𑀯𑀺𑀘𑀺𑀢𑁆𑀢𑀯𑁂𑀲𑀲𑁄𑀪𑁂𑀦 𑀫𑀳𑀢𑀸 𑀩𑀮𑀓𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀸𑀲𑀸𑀤𑀺𑀓𑀸𑀦𑀻𑀢𑀺 𑀤𑀲𑁆𑀲𑀦𑁂𑀦𑁂𑀯 𑀲𑀳 𑀭𑀜𑁆𑀚𑀦𑀓𑀸𑀦𑀺. 𑀧𑀲𑀸𑀤𑀦𑀻𑀬𑀸𑀦𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀣 𑀯𑀸 𑀧𑀸𑀲𑀸𑀤𑀺𑀓𑀸𑀦𑀻𑀢𑀺 𑀧𑀲𑀸𑀤𑀚𑀦𑀓𑀸𑀦𑀺. 𑀅𑀧𑁆𑀧𑀲𑀤𑁆𑀤𑀸𑀦𑀻𑀢𑀺 𑀦𑀺𑀲𑁆𑀲𑀤𑁆𑀤𑀸𑀦𑀺. 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀻𑀢𑀺 𑀅𑀯𑀺𑀪𑀸𑀯𑀺𑀢𑀢𑁆𑀣𑁂𑀦 𑀦𑀺𑀕𑁆𑀖𑁄𑀲𑁂𑀦 𑀭𑀳𑀺𑀢𑀸𑀦𑀺. 𑀯𑀺𑀚𑀦𑀯𑀸𑀢𑀸𑀦𑀻𑀢𑀺 𑀯𑀺𑀕𑀢𑀚𑀦𑀯𑀸𑀢𑀸𑀦𑀺. 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀭𑀳𑀲𑁆𑀲𑀓𑀫𑁆𑀫𑀸𑀦𑀼𑀘𑁆𑀙𑀯𑀺𑀓𑀸𑀦𑀺, 𑀭𑀳𑀲𑁆𑀲𑀫𑀦𑁆𑀢𑀁 𑀫𑀦𑁆𑀢𑁂𑀦𑁆𑀢𑀸𑀦𑀁 𑀅𑀦𑀼𑀭𑀽𑀧𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀦𑀺𑀮𑀻𑀬𑀦𑀪𑀸𑀯𑀲𑁆𑀲 𑀏𑀓𑀻𑀪𑀸𑀯𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸𑀦𑀺. 𑀬𑀢𑁆𑀣 𑀲𑀼𑀤𑀁 𑀫𑀬𑀦𑁆𑀢𑀺 𑀦 𑀢𑁂𑀦 𑀢𑀢𑁆𑀣 𑀪𑀕𑀯𑀸 𑀧𑀬𑀺𑀭𑀼𑀧𑀸𑀲𑀺𑀢𑀧𑀼𑀩𑁆𑀩𑁄, 𑀢𑀸𑀤𑀺𑀲𑁂𑀲𑀼 𑀧𑀦 𑀧𑀬𑀺𑀭𑀼𑀧𑀸𑀲𑀺𑀢𑀧𑀼𑀩𑁆𑀩𑁄, 𑀢𑀲𑁆𑀫𑀸 𑀬𑀸𑀤𑀺𑀲𑁂𑀲𑀼 𑀲𑀼𑀤𑀁 𑀫𑀬𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀅𑀢𑁆𑀣𑀺, 𑀫𑀳𑀸𑀭𑀸𑀚𑀸𑀢𑀺 𑀧𑀡𑁆𑀟𑀺𑀢𑁄 𑀲𑁂𑀦𑀸𑀧𑀢𑀺 ‘‘𑀭𑀸𑀚𑀸 𑀪𑀕𑀯𑀦𑁆𑀢𑀁 𑀫𑀫𑀸𑀬𑀢𑀻’’𑀢𑀺 𑀚𑀸𑀦𑀸𑀢𑀺, 𑀲𑁄 𑀲𑀘𑁂 𑀫𑀁 𑀭𑀸𑀚𑀸 ‘‘𑀓𑀳𑀁 𑀪𑀕𑀯𑀸’’𑀢𑀺 𑀯𑀤𑁂𑀬𑁆𑀬, 𑀅𑀤𑀦𑁆𑀥𑀸𑀬𑀦𑁆𑀢𑁂𑀦 𑀆𑀘𑀺𑀓𑁆𑀔𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀘𑀭𑀧𑀼𑀭𑀺𑀲𑁂 𑀧𑀬𑁄𑀚𑁂𑀢𑁆𑀯𑀸 𑀪𑀕𑀯𑀢𑁄 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀜𑀢𑁆𑀯𑀸𑀯 𑀯𑀺𑀳𑀭𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀆𑀭𑀸𑀫𑀁 𑀧𑀸𑀯𑀺𑀲𑀻𑀢𑀺 𑀩𑀳𑀺𑀦𑀺𑀕𑀫𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀓𑀸𑀭𑀸𑀬𑀦𑁂𑀦 𑀲𑀤𑁆𑀥𑀺𑀁 𑀧𑀸𑀯𑀺𑀲𑀺.

𑁩𑁬𑁬. 𑀯𑀺𑀳𑀸𑀭𑁄𑀢𑀺 𑀕𑀦𑁆𑀥𑀓𑀼𑀝𑀺𑀁 𑀲𑀦𑁆𑀥𑀸𑀬𑀸𑀳𑀁𑀲𑀼. 𑀆𑀴𑀺𑀦𑁆𑀤𑀦𑁆𑀢𑀺 𑀧𑀫𑀼𑀔𑀁. 𑀉𑀓𑁆𑀓𑀸𑀲𑀺𑀢𑁆𑀯𑀸𑀢𑀺 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑀁 𑀓𑀢𑁆𑀯𑀸. 𑀅𑀕𑁆𑀕𑀴𑀦𑁆𑀢𑀺 𑀓𑀯𑀸𑀝𑀁. 𑀆𑀓𑁄𑀝𑁂𑀳𑀻𑀢𑀺 𑀅𑀕𑁆𑀕𑀦𑀔𑁂𑀦 𑀈𑀲𑀓𑀁 𑀓𑀼𑀜𑁆𑀘𑀺𑀓𑀘𑁆𑀙𑀺𑀤𑁆𑀤𑀲𑀫𑀻𑀧𑁂 𑀓𑁄𑀝𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁆𑀯𑀸𑀭𑀁 𑀓𑀺𑀭 𑀅𑀢𑀺𑀉𑀧𑀭𑀺 𑀅𑀫𑀦𑀼𑀲𑁆𑀲𑀸, 𑀅𑀢𑀺𑀳𑁂𑀝𑁆𑀞𑀸 𑀤𑀻𑀖𑀚𑀸𑀢𑀺𑀓𑀸 𑀓𑁄𑀝𑁂𑀦𑁆𑀢𑀺. 𑀢𑀣𑀸 𑀅𑀓𑁄𑀝𑁂𑀢𑁆𑀯𑀸 𑀫𑀚𑁆𑀛𑁂 𑀙𑀺𑀤𑁆𑀤𑀲𑀫𑀻𑀧𑁂 𑀓𑁄𑀝𑁂𑀢𑀩𑁆𑀩𑀁, 𑀇𑀤𑀁 𑀤𑁆𑀯𑀸𑀭𑀓𑁄𑀝𑁆𑀝𑀓𑀯𑀢𑁆𑀢𑀦𑁆𑀢𑀺 𑀤𑀻𑀧𑁂𑀦𑁆𑀢𑀸 𑀯𑀤𑀦𑁆𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀪𑀺𑀓𑁆𑀔𑀽𑀳𑀺 𑀯𑀼𑀢𑁆𑀢𑀝𑁆𑀞𑀸𑀦𑁂𑀬𑁂𑀯. 𑀔𑀕𑁆𑀕𑀜𑁆𑀘 𑀉𑀡𑁆𑀳𑀻𑀲𑀜𑁆𑀘𑀸𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁,

𑀯𑀸𑀮𑀩𑀻𑀚𑀦𑀺𑀫𑀼𑀡𑁆𑀳𑀻𑀲𑀁, 𑀔𑀕𑁆𑀕𑀁 𑀙𑀢𑁆𑀢𑀜𑁆𑀘𑀼𑀧𑀸𑀳𑀦𑀁;

𑀑𑀭𑀼𑀬𑁆𑀳 𑀭𑀸𑀚𑀸 𑀬𑀸𑀦𑀫𑁆𑀳𑀸, 𑀞𑀧𑀬𑀺𑀢𑁆𑀯𑀸 𑀧𑀝𑀺𑀘𑁆𑀙𑀤𑀦𑁆𑀢𑀺. 𑁋

𑀆𑀕𑀢𑀸𑀦𑀺 𑀧𑀦 𑀧𑀜𑁆𑀘𑀧𑀺 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀅𑀤𑀸𑀲𑀺. 𑀓𑀲𑁆𑀫𑀸 𑀧𑀦 𑀅𑀤𑀸𑀲𑀻𑀢𑀺. 𑀅𑀢𑀺𑀕𑀭𑀼𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀁 𑀉𑀤𑁆𑀥𑀢𑀯𑁂𑀲𑁂𑀦 𑀕𑀦𑁆𑀢𑀼𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀘, 𑀏𑀓𑀓𑁄𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀲𑀫𑁆𑀫𑁄𑀤𑀺𑀲𑁆𑀲𑀸𑀫𑀺 𑀘𑀸𑀢𑀺. 𑀧𑀜𑁆𑀘𑀲𑀼 𑀳𑀺 𑀭𑀸𑀚𑀓𑀓𑀼𑀥𑀪𑀡𑁆𑀟𑁂𑀲𑀼 𑀦𑀺𑀯𑀢𑁆𑀢𑀺𑀢𑁂𑀲𑀼 𑀢𑁆𑀯𑀁 𑀦𑀺𑀯𑀢𑁆𑀢𑀸𑀢𑀺 𑀯𑀢𑁆𑀢𑀩𑁆𑀩𑀁 𑀦 𑀳𑁄𑀢𑀺, 𑀲𑀩𑁆𑀩𑁂 𑀲𑀬𑀫𑁂𑀯 𑀦𑀺𑀯𑀢𑁆𑀢𑀦𑁆𑀢𑀺. 𑀇𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀅𑀤𑀸𑀲𑀺. 𑀭𑀳𑀸𑀬𑀢𑀻𑀢𑀺 𑀭𑀳𑀲𑁆𑀲𑀁 𑀓𑀭𑁄𑀢𑀺 𑀦𑀺𑀕𑀽𑀳𑀢𑀺. 𑀅𑀬𑀁 𑀓𑀺𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 ‘‘𑀧𑀼𑀩𑁆𑀩𑁂𑀧𑀺 𑀅𑀬𑀁 𑀭𑀸𑀚𑀸 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀘𑀢𑀼𑀓𑁆𑀓𑀡𑁆𑀡𑀫𑀦𑁆𑀢𑀁 𑀫𑀦𑁆𑀢𑁂𑀢𑁆𑀯𑀸 𑀫𑀬𑁆𑀳𑀁 𑀫𑀸𑀢𑀼𑀮𑀁 𑀲𑀤𑁆𑀥𑀺𑀁 𑀤𑁆𑀯𑀢𑁆𑀢𑀺𑀁𑀲𑀸𑀬 𑀧𑀼𑀢𑁆𑀢𑁂𑀳𑀺 𑀕𑀡𑁆𑀳𑀸𑀧𑁂𑀲𑀺, 𑀇𑀤𑀸𑀦𑀺𑀧𑀺 𑀘𑀢𑀼𑀓𑁆𑀓𑀡𑁆𑀡𑀫𑀦𑁆𑀢𑀁 𑀫𑀦𑁆𑀢𑁂𑀢𑀼𑀓𑀸𑀫𑁄, 𑀓𑀘𑁆𑀘𑀺 𑀦𑀼 𑀔𑁄 𑀫𑀁 𑀕𑀡𑁆𑀳𑀸𑀧𑁂𑀲𑁆𑀲𑀢𑀻’’𑀢𑀺. 𑀏𑀯𑀁 𑀓𑁄𑀧𑀯𑀲𑁂𑀦𑀲𑁆𑀲 𑀏𑀢𑀤𑀳𑁄𑀲𑀺.

𑀯𑀺𑀯𑀭𑀺 𑀪𑀕𑀯𑀸 𑀤𑁆𑀯𑀸𑀭𑀦𑁆𑀢𑀺 𑀦 𑀪𑀕𑀯𑀸 𑀉𑀝𑁆𑀞𑀸𑀬 𑀤𑁆𑀯𑀸𑀭𑀁 𑀯𑀺𑀯𑀭𑀺, 𑀯𑀺𑀯𑀭𑀢𑀽𑀢𑀺 𑀧𑀦 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀢𑀢𑁄 𑁋 ‘‘𑀪𑀕𑀯𑀸 𑀢𑀼𑀫𑁆𑀳𑁂𑀳𑀺 𑀅𑀦𑁂𑀓𑁂𑀲𑀼 𑀓𑀧𑁆𑀧𑀓𑁄𑀝𑀻𑀲𑀼 𑀤𑀸𑀦𑀁 𑀤𑀤𑀫𑀸𑀦𑁂𑀳𑀺 𑀦 𑀲𑀳𑀢𑁆𑀣𑀸 𑀤𑁆𑀯𑀸𑀭𑀯𑀺𑀯𑀭𑀡𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀲𑀬𑀫𑁂𑀯 𑀤𑁆𑀯𑀸𑀭𑀁 𑀯𑀺𑀯𑀝𑀁. 𑀢𑀁 𑀧𑀦 𑀬𑀲𑁆𑀫𑀸 𑀪𑀕𑀯𑀢𑁄 𑀫𑀦𑁂𑀦 𑀯𑀺𑀯𑀝𑀁, 𑀢𑀲𑁆𑀫𑀸 ‘‘𑀯𑀺𑀯𑀭𑀺 𑀪𑀕𑀯𑀸 𑀤𑁆𑀯𑀸𑀭’’𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸𑀢𑀺 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸. 𑀢𑀲𑁆𑀫𑀺𑀁 𑀧𑀦 𑀧𑀯𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀓𑀸𑀭𑀸𑀬𑀦𑁄 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀔𑀦𑁆𑀥𑀸𑀯𑀸𑀭𑀁 𑀕𑀦𑁆𑀢𑁆𑀯𑀸 𑀯𑀺𑀝𑀝𑀽𑀪𑀁 𑀆𑀫𑀦𑁆𑀢𑁂𑀲𑀺 ‘‘𑀙𑀢𑁆𑀢𑀁 𑀲𑀫𑁆𑀫 𑀉𑀲𑁆𑀲𑀸𑀧𑁂𑀳𑀻’’𑀢𑀺. 𑀫𑀬𑁆𑀳𑀁 𑀧𑀺𑀢𑀸 𑀓𑀺𑀁 𑀕𑀢𑁄𑀢𑀺? 𑀧𑀺𑀢𑀭𑀁 𑀫𑀸 𑀧𑀼𑀘𑁆𑀙, 𑀲𑀘𑁂 𑀢𑁆𑀯𑀁 𑀦 𑀉𑀲𑁆𑀲𑀸𑀧𑁂𑀲𑀺, 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀅𑀳𑀁 𑀉𑀲𑁆𑀲𑀸𑀧𑁂𑀫𑀻𑀢𑀺. ‘‘𑀉𑀲𑁆𑀲𑀸𑀧𑁂𑀫𑀺 𑀲𑀫𑁆𑀫𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀓𑀸𑀭𑀸𑀬𑀦𑁄 𑀭𑀜𑁆𑀜𑁄 𑀏𑀓𑀁 𑀅𑀲𑁆𑀲𑀜𑁆𑀘 𑀅𑀲𑀺𑀜𑁆𑀘 𑀏𑀓𑀫𑁂𑀯 𑀘 𑀧𑀭𑀺𑀘𑀸𑀭𑀺𑀓𑀁 𑀇𑀢𑁆𑀣𑀺𑀁 𑀞𑀧𑁂𑀢𑁆𑀯𑀸 𑁋 ‘‘𑀲𑀘𑁂 𑀭𑀸𑀚𑀸 𑀚𑀻𑀯𑀺𑀢𑁂𑀦 𑀅𑀢𑁆𑀣𑀺𑀓𑁄, 𑀫𑀸 𑀆𑀕𑀘𑁆𑀙𑀢𑀽’’𑀢𑀺 𑀯𑀺𑀝𑀝𑀽𑀪𑀲𑁆𑀲 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀫𑁂𑀯 𑀕𑀢𑁄.

𑁩𑁬𑁭. 𑀥𑀫𑁆𑀫𑀦𑁆𑀯𑀬𑁄𑀢𑀺 𑀧𑀘𑁆𑀘𑀓𑁆𑀔𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀼𑀦𑀬𑁄 𑀅𑀦𑀼𑀫𑀸𑀦𑀁, 𑀅𑀦𑀼𑀩𑀼𑀤𑁆𑀥𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀬𑁂𑀦𑀲𑁆𑀲 𑀥𑀫𑁆𑀫𑀦𑁆𑀯𑀬𑁂𑀦 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺𑀆𑀤𑀺 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥 𑀧𑀦𑀸𑀳𑀁, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀧𑀸𑀡𑀓𑁄𑀝𑀺𑀓𑀦𑁆𑀢𑀺 𑀧𑀸𑀡𑁄𑀢𑀺 𑀚𑀻𑀯𑀺𑀢𑀁, 𑀢𑀁 𑀫𑀭𑀺𑀬𑀸𑀤𑀁 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸, 𑀫𑀭𑀡𑀲𑀫𑀬𑁂𑀧𑀺 𑀘𑀭𑀦𑁆𑀢𑀺𑀬𑁂𑀯, 𑀢𑀁 𑀦 𑀯𑀻𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀧𑀸𑀡𑀓𑁄𑀝𑀺𑀓’’𑀦𑁆𑀢𑀺𑀧𑀺 𑀧𑀸𑀞𑁄, 𑀆𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀏𑀓𑀘𑁆𑀘𑁂 𑀚𑀻𑀯𑀺𑀢𑀳𑁂𑀢𑀼 𑀅𑀢𑀺𑀓𑁆𑀓𑀫𑀦𑁆𑀢𑀸 𑀧𑀸𑀡𑀓𑁄𑀝𑀺𑀓𑀁 𑀓𑀢𑁆𑀯𑀸 𑀘𑀭𑀦𑁆𑀢𑀺, 𑀦 𑀏𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀫𑁆𑀧𑀺 𑀔𑁄 𑀫𑁂, 𑀪𑀦𑁆𑀢𑁂𑀢𑀺 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬 𑀥𑀫𑁆𑀫𑀲𑁆𑀯𑀸𑀓𑁆𑀔𑀸𑀢𑀢𑀸𑀬 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀬 𑀘 𑀏𑀢𑀁 𑀏𑀯𑀁 𑀳𑁄𑀢𑀺, 𑀏𑀯𑀜𑁆𑀳𑀺 𑀫𑁂, 𑀪𑀦𑁆𑀢𑁂, 𑀅𑀬𑀁 𑀪𑀕𑀯𑀢𑀺 𑀥𑀫𑁆𑀫𑀦𑁆𑀯𑀬𑁄 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣.

𑁩𑁬𑁯. 𑀦 𑀯𑀺𑀬 𑀫𑀜𑁆𑀜𑁂 𑀘𑀓𑁆𑀔𑀼𑀁 𑀩𑀦𑁆𑀥𑀦𑁆𑀢𑁂𑀢𑀺 𑀘𑀓𑁆𑀔𑀼𑀁 𑀅𑀩𑀦𑁆𑀥𑀦𑁆𑀢𑁂 𑀯𑀺𑀬. 𑀅𑀧𑀸𑀲𑀸𑀤𑀺𑀓𑀜𑁆𑀳𑀺 𑀤𑀺𑀲𑁆𑀯𑀸 𑀧𑀼𑀦 𑀑𑀮𑁄𑀓𑀦𑀓𑀺𑀘𑁆𑀘𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀘𑀓𑁆𑀔𑀼𑀁 𑀦 𑀩𑀦𑁆𑀥𑀢𑀺 𑀦𑀸𑀫. 𑀧𑀸𑀲𑀸𑀤𑀺𑀓𑀁 𑀤𑀺𑀲𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑀦𑀓𑀺𑀘𑁆𑀘𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀘𑀓𑁆𑀔𑀼𑀁 𑀩𑀦𑁆𑀥𑀢𑀺 𑀦𑀸𑀫. 𑀇𑀫𑁂 𑀘 𑀅𑀧𑀸𑀲𑀸𑀤𑀺𑀓𑀸, 𑀢𑀲𑁆𑀫𑀸 𑀏𑀯𑀫𑀸𑀳. 𑀩𑀦𑁆𑀥𑀼𑀓𑀭𑁄𑀕𑁄 𑀦𑁄𑀢𑀺 𑀓𑀼𑀮𑀭𑁄𑀕𑁄. 𑀅𑀫𑁆𑀳𑀸𑀓𑀁 𑀓𑀼𑀮𑁂 𑀚𑀸𑀢𑀸 𑀏𑀯𑀭𑀽𑀧𑀸 𑀳𑁄𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀉𑀴𑀸𑀭𑀦𑁆𑀢𑀺 𑀫𑀳𑁂𑀲𑀓𑁆𑀔𑀁. 𑀧𑀼𑀩𑁆𑀩𑁂𑀦𑀸𑀧𑀭𑀦𑁆𑀢𑀺 𑀧𑀼𑀩𑁆𑀩𑀢𑁄 𑀅𑀧𑀭𑀁 𑀯𑀺𑀲𑁂𑀲𑀁. 𑀢𑀢𑁆𑀣 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀉𑀴𑀸𑀭𑀁 𑀧𑀼𑀩𑁆𑀩𑁂 𑀯𑀺𑀲𑁂𑀲𑀁 𑀲𑀜𑁆𑀚𑀸𑀦𑀸𑀢𑀺 𑀦𑀸𑀫, 𑀲𑀫𑀸𑀧𑀢𑁆𑀢𑀺𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀉𑀴𑀸𑀭𑀁 𑀧𑀼𑀩𑁆𑀩𑀢𑁄 𑀅𑀧𑀭𑀁 𑀯𑀺𑀲𑁂𑀲𑀁 𑀲𑀜𑁆𑀚𑀸𑀦𑀸𑀢𑀺 𑀦𑀸𑀫.

𑁩𑁭𑁦. 𑀖𑀸𑀢𑁂𑀢𑀸𑀬𑀁 𑀯𑀸 𑀖𑀸𑀢𑁂𑀢𑀼𑀦𑁆𑀢𑀺 𑀖𑀸𑀢𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀖𑀸𑀢𑁂𑀢𑀼𑀁. 𑀚𑀸𑀧𑁂𑀢𑀸𑀬𑀁 𑀯𑀸 𑀚𑀸𑀧𑁂𑀢𑀼𑀦𑁆𑀢𑀺 𑀥𑀦𑁂𑀦 𑀯𑀸 𑀚𑀸𑀧𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀚𑀸𑀧𑁂𑀢𑀼𑀁 𑀚𑀸𑀦𑀺𑀢𑀼𑀁 𑀅𑀥𑀦𑀁 𑀓𑀸𑀢𑀼𑀁. 𑀧𑀩𑁆𑀩𑀸𑀚𑁂𑀢𑀸𑀬𑀁 𑀯𑀸 𑀧𑀩𑁆𑀩𑀸𑀚𑁂𑀢𑀼𑀦𑁆𑀢𑀺 𑀭𑀝𑁆𑀞𑀢𑁄 𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀧𑀩𑁆𑀩𑀸𑀚𑁂𑀢𑀼𑀁.

𑁩𑁭𑁩. 𑀇𑀲𑀺𑀤𑀢𑁆𑀢𑀧𑀼𑀭𑀸𑀡𑀸𑀢𑀺 𑀇𑀲𑀺𑀤𑀢𑁆𑀢𑁄 𑀘 𑀧𑀼𑀭𑀸𑀡𑁄 𑀘. 𑀢𑁂𑀲𑀼 𑀏𑀓𑁄 𑀩𑁆𑀭𑀳𑁆𑀫𑀘𑀸𑀭𑀻, 𑀏𑀓𑁄 𑀲𑀤𑀸𑀭𑀲𑀦𑁆𑀢𑀼𑀝𑁆𑀞𑁄. 𑀫𑀫𑀪𑀢𑁆𑀢𑀸𑀢𑀺 𑀫𑀫 𑀲𑀦𑁆𑀢𑀓𑀁 𑀪𑀢𑁆𑀢𑀁 𑀏𑀢𑁂𑀲𑀦𑁆𑀢𑀺 𑀫𑀫𑀪𑀢𑁆𑀢𑀸. 𑀫𑀫𑀬𑀸𑀦𑀸𑀢𑀺 𑀫𑀫 𑀲𑀦𑁆𑀢𑀓𑀁 𑀬𑀸𑀦𑀁 𑀏𑀢𑁂𑀲𑀦𑁆𑀢𑀺 𑀫𑀫𑀬𑀸𑀦𑀸. 𑀚𑀻𑀯𑀺𑀓𑀸𑀬 𑀤𑀸𑀢𑀸𑀢𑀺 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀤𑀸𑀢𑀸. 𑀯𑀻𑀫𑀁𑀲𑀫𑀸𑀦𑁄𑀢𑀺 𑀉𑀧𑀧𑀭𑀺𑀓𑁆𑀔𑀫𑀸𑀦𑁄. 𑀢𑀤𑀸 𑀓𑀺𑀭 𑀭𑀸𑀚𑀸 𑀦𑀺𑀤𑁆𑀤𑀁 𑀅𑀦𑁄𑀓𑁆𑀓𑀦𑁆𑀢𑁄𑀯 𑀑𑀓𑁆𑀓𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣 𑀢𑁂 𑀣𑀧𑀢𑀬𑁄 ‘‘𑀓𑀢𑀭𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀪𑀕𑀯𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫𑀸’’𑀢𑀺 𑀲𑀼𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀬𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑁂𑀦 𑀲𑀻𑀲𑁂 𑀓𑀢𑁂 𑀭𑀸𑀚𑀸 𑀧𑀸𑀤𑀢𑁄 𑀳𑁄𑀢𑀺. 𑀬𑁂𑀦 𑀭𑀸𑀚𑀸, 𑀢𑁂𑀦 𑀲𑀻𑀲𑁂 𑀓𑀢𑁂 𑀲𑀢𑁆𑀣𑀸 𑀧𑀸𑀤𑀢𑁄 𑀳𑁄𑀢𑀺, 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺? 𑀢𑀢𑁄 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀭𑀸𑀚𑀸 𑀓𑀼𑀧𑁆𑀧𑀫𑀸𑀦𑁄 𑀬𑀁 𑀅𑀫𑁆𑀳𑀸𑀓𑀁 𑀤𑁂𑀢𑀺, 𑀢𑀁 𑀅𑀘𑁆𑀙𑀺𑀦𑁆𑀤𑁂𑀬𑁆𑀬. 𑀦 𑀔𑁄 𑀧𑀦 𑀫𑀬𑀁 𑀲𑀓𑁆𑀓𑁄𑀫 𑀚𑀸𑀦𑀫𑀸𑀦𑀸 𑀲𑀢𑁆𑀣𑀸𑀭𑀁 𑀧𑀸𑀤𑀢𑁄 𑀓𑀸𑀢𑀼’’𑀦𑁆𑀢𑀺 𑀭𑀸𑀚𑀸𑀦𑀁 𑀧𑀸𑀤𑀢𑁄 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑀅𑀬𑀁 𑀭𑀸𑀚𑀸 𑀏𑀯𑀫𑀸𑀳.

𑁩𑁭𑁪. 𑀧𑀓𑁆𑀓𑀸𑀫𑀻𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀸𑀭𑀸𑀬𑀦𑀲𑁆𑀲 𑀞𑀺𑀢𑀝𑁆𑀞𑀸𑀦𑀁 𑀕𑀢𑁄, 𑀢𑀁 𑀢𑀢𑁆𑀣 𑀅𑀤𑀺𑀲𑁆𑀯𑀸 𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀁 𑀕𑀢𑁄, 𑀢𑀢𑁆𑀣𑀸𑀧𑀺 𑀅𑀜𑁆𑀜𑀁 𑀅𑀤𑀺𑀲𑁆𑀯𑀸 𑀢𑀁 𑀇𑀢𑁆𑀣𑀺𑀁 𑀧𑀼𑀘𑁆𑀙𑀺. 𑀲𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀭𑀸𑀚𑀸 𑁋 ‘‘𑀦 𑀇𑀤𑀸𑀦𑀺 𑀫𑀬𑀸 𑀏𑀓𑀓𑁂𑀦 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁, 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀪𑀸𑀕𑀺𑀦𑁂𑀬𑁆𑀬𑁂𑀦 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀭𑀸𑀚𑀕𑀳𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀡𑀸𑀚𑀓𑀪𑀢𑁆𑀢𑀜𑁆𑀘𑁂𑀯 𑀪𑀼𑀜𑁆𑀚𑀺, 𑀩𑀳𑀮𑀉𑀤𑀓𑀜𑁆𑀘 𑀧𑀺𑀯𑀺. 𑀢𑀲𑁆𑀲 𑀲𑀼𑀔𑀼𑀫𑀸𑀮𑀧𑀓𑀢𑀺𑀓𑀲𑁆𑀲 𑀆𑀳𑀸𑀭𑁄 𑀦 𑀲𑀫𑁆𑀫𑀸 𑀧𑀭𑀺𑀡𑀸𑀫𑀺. 𑀲𑁄 𑀭𑀸𑀚𑀕𑀳𑀁 𑀧𑀸𑀧𑀼𑀡𑀦𑁆𑀢𑁄𑀧𑀺 𑀯𑀺𑀓𑀸𑀮𑁂 𑀤𑁆𑀯𑀸𑀭𑁂𑀲𑀼 𑀧𑀺𑀳𑀺𑀢𑁂𑀲𑀼 𑀧𑀸𑀧𑀼𑀡𑀺. ‘‘𑀅𑀚𑁆𑀚 𑀲𑀸𑀮𑀸𑀬𑀁 𑀲𑀬𑀺𑀢𑁆𑀯𑀸 𑀲𑁆𑀯𑁂 𑀫𑀬𑁆𑀳𑀁 𑀪𑀸𑀕𑀺𑀦𑁂𑀬𑁆𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀩𑀳𑀺𑀦𑀕𑀭𑁂 𑀲𑀸𑀮𑀸𑀬 𑀦𑀺𑀧𑀚𑁆𑀚𑀺. 𑀢𑀲𑁆𑀲 𑀭𑀢𑁆𑀢𑀺𑀪𑀸𑀕𑁂 𑀉𑀝𑁆𑀞𑀸𑀦𑀸𑀦𑀺 𑀧𑀯𑀢𑁆𑀢𑀺𑀁𑀲𑀼, 𑀓𑀢𑀺𑀧𑀬𑀯𑀸𑀭𑁂 𑀩𑀳𑀺 𑀦𑀺𑀓𑁆𑀔𑀫𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀤𑀲𑀸 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀅𑀗𑁆𑀓𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀩𑀮𑀯𑀧𑀘𑁆𑀘𑀽𑀲𑁂 𑀓𑀸𑀮𑀫𑀓𑀸𑀲𑀺. 𑀲𑀸 𑀢𑀲𑁆𑀲 𑀫𑀢𑀪𑀸𑀯𑀁 𑀜𑀢𑁆𑀯𑀸 𑁋 ‘‘𑀤𑁆𑀯𑀻𑀲𑀼 𑀭𑀚𑁆𑀚𑁂𑀲𑀼 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀲𑁆𑀲 𑀩𑀳𑀺𑀦𑀕𑀭𑁂 𑀅𑀦𑀸𑀣𑀲𑀸𑀮𑀸𑀬 𑀅𑀦𑀸𑀣𑀓𑀸𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄 𑀫𑀬𑁆𑀳𑀁 𑀲𑀸𑀫𑀺 𑀓𑁄𑀲𑀮𑀭𑀸𑀚𑀸’’𑀢𑀺𑀆𑀤𑀻𑀦𑀺 𑀯𑀤𑀫𑀸𑀦𑀸 𑀉𑀘𑁆𑀘𑀸𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺𑀢𑀼𑀁 𑀆𑀭𑀪𑀺. 𑀫𑀦𑀼𑀲𑁆𑀲𑀸 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀆𑀕𑀢𑀓𑀸𑀭𑀡𑀁 𑀜𑀢𑁆𑀯𑀸 𑀫𑀳𑀸𑀧𑀭𑀺𑀳𑀸𑀭𑁂𑀦 𑀲𑀭𑀻𑀭𑀓𑀺𑀘𑁆𑀘𑀁 𑀓𑀭𑀺𑀢𑁆𑀯𑀸 ‘‘𑀯𑀺𑀝𑀝𑀽𑀪𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀩𑀮𑀓𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀲𑀺. 𑀅𑀫𑀘𑁆𑀘𑀸 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 𑁋 ‘‘𑀲𑀘𑁂, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀫𑀸𑀢𑀼𑀮𑁄 𑀅𑀭𑁄𑀕𑁄 𑀅𑀲𑁆𑀲, 𑀢𑀼𑀫𑁆𑀳𑀸𑀓𑀁 𑀕𑀦𑁆𑀢𑀼𑀁 𑀬𑀼𑀢𑁆𑀢𑀁 𑀪𑀯𑁂𑀬𑁆𑀬, 𑀇𑀤𑀸𑀦𑀺 𑀧𑀦 𑀯𑀺𑀝𑀝𑀽𑀪𑁄𑀧𑀺 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑀼𑀁 𑀅𑀭𑀳𑀢𑀺𑀬𑁂𑀯𑀸’’𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀯𑀸𑀭𑁂𑀲𑀼𑀁.

𑀥𑀫𑁆𑀫𑀘𑁂𑀢𑀺𑀬𑀸𑀦𑀻𑀢𑀺 𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀻𑀓𑀸𑀭𑀯𑀘𑀦𑀸𑀦𑀺. 𑀢𑀻𑀲𑀼 𑀳𑀺 𑀭𑀢𑀦𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀺𑀢𑁆𑀢𑀻𑀓𑀸𑀭𑁂 𑀓𑀢𑁂 𑀲𑀩𑁆𑀩𑀢𑁆𑀣 𑀓𑀢𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀪𑀕𑀯𑀢𑀺 𑀘𑀺𑀢𑁆𑀢𑀻𑀓𑀸𑀭𑁂 𑀓𑀢𑁂 𑀥𑀫𑁆𑀫𑁄𑀧𑀺 𑀓𑀢𑁄𑀯 𑀳𑁄𑀢𑀻𑀢𑀺 𑀪𑀕𑀯𑀸 ‘‘𑀥𑀫𑁆𑀫𑀘𑁂𑀢𑀺𑀬𑀸𑀦𑀻’’𑀢𑀺 𑀆𑀳. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀦𑀻𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸𑀦𑀺, 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀪𑀽𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀥𑀫𑁆𑀫𑀘𑁂𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.