𑁧𑁦. 𑀓𑀡𑁆𑀡𑀓𑀢𑁆𑀣𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀓𑀡𑁆𑀡𑀓𑀢𑁆𑀣𑀮𑀲𑀼𑀢𑁆𑀢𑀁. 𑀢𑀢𑁆𑀣 𑀉𑀭𑀼𑀜𑁆𑀜𑀸𑀬𑀦𑁆𑀢𑀺 𑀉𑀭𑀼𑀜𑁆𑀜𑀸𑀢𑀺 𑀢𑀲𑁆𑀲 𑀭𑀝𑁆𑀞𑀲𑁆𑀲𑀧𑀺 𑀦𑀕𑀭𑀲𑁆𑀲𑀧𑀺 𑀏𑀢𑀤𑁂𑀯 𑀦𑀸𑀫𑀁, 𑀪𑀕𑀯𑀸 𑀉𑀭𑀼𑀜𑁆𑀜𑀸𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀓𑀡𑁆𑀡𑀓𑀢𑁆𑀣𑀮𑁂 𑀫𑀺𑀕𑀤𑀸𑀬𑁂𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀓𑀡𑁆𑀡𑀓𑀢𑁆𑀣𑀮𑀁 𑀦𑀸𑀫 𑀏𑀓𑁄 𑀭𑀫𑀡𑀻𑀬𑁄 𑀪𑀽𑀫𑀺𑀪𑀸𑀕𑁄 𑀅𑀢𑁆𑀣𑀺, 𑀲𑁄 𑀫𑀺𑀕𑀸𑀦𑀁 𑀅𑀪𑀬𑀢𑁆𑀣𑀸𑀬 𑀤𑀺𑀦𑁆𑀦𑀢𑁆𑀢𑀸 𑀫𑀺𑀕𑀤𑀸𑀬𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀓𑀡𑁆𑀡𑀓𑀢𑁆𑀣𑀮𑁂 𑀫𑀺𑀕𑀤𑀸𑀬𑁂. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸𑀢𑀺 𑀦 𑀅𑀜𑁆𑀜𑁂𑀦, 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀓𑀭𑀡𑀻𑀬𑁂𑀦𑁂𑀯. 𑀲𑁄𑀫𑀸 𑀘 𑀪𑀕𑀺𑀦𑀻 𑀲𑀓𑀼𑀮𑀸 𑀘 𑀪𑀕𑀺𑀦𑀻𑀢𑀺 𑀇𑀫𑀸 𑀤𑁆𑀯𑁂 𑀪𑀕𑀺𑀦𑀺𑀬𑁄 𑀭𑀜𑁆𑀜𑁄 𑀧𑀚𑀸𑀧𑀢𑀺𑀬𑁄. 𑀪𑀢𑁆𑀢𑀸𑀪𑀺𑀳𑀸𑀭𑁂𑀢𑀺 𑀪𑀢𑁆𑀢𑀁 𑀅𑀪𑀺𑀳𑀭𑀡𑀝𑁆𑀞𑀸𑀦𑁂. 𑀭𑀜𑁆𑀜𑁄 𑀪𑀼𑀜𑁆𑀚𑀦𑀝𑁆𑀞𑀸𑀦𑀜𑁆𑀳𑀺 𑀲𑀩𑁆𑀩𑀸𑀧𑀺 𑀑𑀭𑁄𑀥𑀸 𑀓𑀝𑀘𑁆𑀙𑀼𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀕𑀘𑁆𑀙𑀦𑁆𑀢𑀺, 𑀢𑀸𑀧𑀺 𑀢𑀣𑁂𑀯 𑀅𑀕𑀫𑀁𑀲𑀼.

𑁩𑁭𑁬. 𑀓𑀺𑀁 𑀧𑀦, 𑀫𑀳𑀸𑀭𑀸𑀚𑀸𑀢𑀺 𑀓𑀲𑁆𑀫𑀸 𑀏𑀯𑀫𑀸𑀳? 𑀭𑀜𑁆𑀜𑁄 𑀕𑀭𑀳𑀧𑀭𑀺𑀫𑁄𑀘𑀦𑀢𑁆𑀣𑀁. 𑀏𑀯𑀜𑁆𑀳𑀺 𑀧𑀭𑀺𑀲𑀸 𑀘𑀺𑀦𑁆𑀢𑁂𑀬𑁆𑀬 𑁋 ‘‘𑀅𑀬𑀁 𑀭𑀸𑀚𑀸 𑀆𑀕𑀘𑁆𑀙𑀫𑀸𑀦𑁄𑀯 𑀫𑀸𑀢𑀼𑀕𑀸𑀫𑀸𑀦𑀁 𑀲𑀸𑀲𑀦𑀁 𑀆𑀭𑁄𑀘𑁂𑀢𑀺, 𑀫𑀬𑀁 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀁 𑀆𑀕𑀢𑁄𑀢𑀺 𑀫𑀜𑁆𑀜𑀸𑀫, 𑀅𑀬𑀁 𑀧𑀦 𑀫𑀸𑀢𑀼𑀕𑀸𑀫𑀸𑀦𑀁 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄, 𑀫𑀸𑀢𑀼𑀕𑀸𑀫𑀤𑀸𑀲𑁄 𑀫𑀜𑁆𑀜𑁂, 𑀏𑀲 𑀧𑀼𑀩𑁆𑀩𑁂𑀧𑀺 𑀇𑀫𑀺𑀦𑀸𑀯 𑀓𑀸𑀭𑀡𑁂𑀦 𑀆𑀕𑀘𑁆𑀙𑀢𑀻’’𑀢𑀺. 𑀧𑀼𑀘𑁆𑀙𑀺𑀢𑁄 𑀧𑀦 𑀲𑁄 𑀅𑀢𑁆𑀢𑀦𑁄 𑀆𑀕𑀫𑀦𑀓𑀸𑀭𑀡𑀁 𑀓𑀣𑁂𑀲𑁆𑀲𑀢𑀺, 𑀏𑀯𑀫𑀲𑁆𑀲 𑀅𑀬𑀁 𑀕𑀭𑀳𑀸 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀕𑀭𑀳𑀫𑁄𑀘𑀦𑀢𑁆𑀣𑀁 𑀏𑀯𑀫𑀸𑀳.

𑁩𑁭𑁮. 𑀅𑀩𑁆𑀪𑀼𑀤𑀸𑀳𑀸𑀲𑀻𑀢𑀺 𑀓𑀣𑁂𑀲𑀺. 𑀲𑀓𑀺𑀤𑁂𑀯 𑀲𑀩𑁆𑀩𑀁 𑀉𑀲𑁆𑀲𑀢𑀺 𑀲𑀩𑁆𑀩𑀁 𑀤𑀓𑁆𑀔𑀺𑀢𑀻𑀢𑀺 𑀬𑁄 𑀏𑀓𑀸𑀯𑀚𑁆𑀚𑀦𑁂𑀦 𑀏𑀓𑀘𑀺𑀢𑁆𑀢𑁂𑀦 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀩𑁆𑀩𑀁 𑀉𑀲𑁆𑀲𑀢𑀺 𑀯𑀸 𑀤𑀓𑁆𑀔𑀺𑀢𑀺 𑀯𑀸, 𑀲𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀏𑀓𑁂𑀦 𑀳𑀺 𑀘𑀺𑀢𑁆𑀢𑁂𑀦 𑀅𑀢𑀻𑀢𑀁 𑀲𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀆𑀯𑀚𑁆𑀚𑀺𑀢𑁆𑀯𑀸𑀧𑀺 𑀅𑀢𑀻𑀢𑀁 𑀲𑀩𑁆𑀩𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸, 𑀏𑀓𑀤𑁂𑀲𑀫𑁂𑀯 𑀚𑀸𑀦𑀸𑀢𑀺. 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀦 𑀢𑁂𑀦 𑀘𑀺𑀢𑁆𑀢𑁂𑀦 𑀲𑀩𑁆𑀩𑁂𑀦𑁂𑀯 𑀲𑀩𑁆𑀩𑀁 𑀦 𑀚𑀸𑀦𑀸𑀢𑀻𑀢𑀺. 𑀏𑀲 𑀦𑀬𑁄 𑀇𑀢𑀭𑁂𑀲𑀼. 𑀏𑀯𑀁 𑀏𑀓𑀘𑀺𑀢𑁆𑀢𑀯𑀲𑁂𑀦𑀸𑀬𑀁 𑀧𑀜𑁆𑀳𑁄 𑀓𑀣𑀺𑀢𑁄. 𑀳𑁂𑀢𑀼𑀭𑀽𑀧𑀦𑁆𑀢𑀺 𑀳𑁂𑀢𑀼𑀲𑀪𑀸𑀯𑀁 𑀓𑀸𑀭𑀡𑀚𑀸𑀢𑀺𑀓𑀁. 𑀲𑀳𑁂𑀢𑀼𑀭𑀽𑀧𑀦𑁆𑀢𑀺 𑀲𑀓𑀸𑀭𑀡𑀚𑀸𑀢𑀺𑀓𑀁. 𑀲𑀫𑁆𑀧𑀭𑀸𑀬𑀺𑀓𑀸𑀳𑀁, 𑀪𑀦𑁆𑀢𑁂𑀢𑀺 𑀲𑀫𑁆𑀧𑀭𑀸𑀬𑀕𑀼𑀡𑀁 𑀅𑀳𑀁, 𑀪𑀦𑁆𑀢𑁂, 𑀧𑀼𑀘𑁆𑀙𑀸𑀫𑀺.

𑁩𑁭𑁯. 𑀧𑀜𑁆𑀘𑀺𑀫𑀸𑀦𑀻𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀜𑁆𑀘 𑀧𑀥𑀸𑀦𑀺𑀬𑀗𑁆𑀕𑀸𑀦𑀺 𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀺. 𑀓𑀣𑀺𑀦𑀗𑁆𑀕𑀡𑀯𑀸𑀲𑀻𑀘𑀽𑀴𑀲𑀫𑀼𑀤𑁆𑀤𑀢𑁆𑀣𑁂𑀭𑁄 𑀧𑀦 ‘‘𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀓𑀺𑀁 𑀭𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀮𑁄𑀓𑀼𑀢𑁆𑀢𑀭𑀸𑀦𑁂𑀯𑀸𑀢𑀺 𑀭𑀼𑀘𑁆𑀘𑀢𑀻’’𑀢𑀺 𑀆𑀳. 𑀧𑀥𑀸𑀦𑀯𑁂𑀫𑀢𑁆𑀢𑀢𑀦𑁆𑀢𑀺 𑀧𑀥𑀸𑀦𑀦𑀸𑀦𑀢𑁆𑀢𑀁. 𑀅𑀜𑁆𑀜𑀸𑀤𑀺𑀲𑀫𑁂𑀯 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀥𑀸𑀦𑀁, 𑀅𑀜𑁆𑀜𑀸𑀤𑀺𑀲𑀁 𑀲𑁄𑀢𑀸𑀧𑀦𑁆𑀦𑀲𑁆𑀲, 𑀅𑀜𑁆𑀜𑀸𑀤𑀺𑀲𑀁 𑀲𑀓𑀤𑀸𑀕𑀸𑀫𑀺𑀦𑁄, 𑀅𑀜𑁆𑀜𑀸𑀤𑀺𑀲𑀁 𑀅𑀦𑀸𑀕𑀸𑀫𑀺𑀦𑁄, 𑀅𑀜𑁆𑀜𑀸𑀤𑀺𑀲𑀁 𑀅𑀭𑀳𑀢𑁄, 𑀅𑀜𑁆𑀜𑀸𑀤𑀺𑀲𑀁 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀦𑀁, 𑀅𑀜𑁆𑀜𑀸𑀤𑀺𑀲𑀁 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁, 𑀅𑀜𑁆𑀜𑀸𑀤𑀺𑀲𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀅𑀜𑁆𑀜𑀸𑀤𑀺𑀲𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀥𑀸𑀦𑀁 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀥𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺…𑀧𑁂… 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀥𑀸𑀦𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀧𑀥𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀧𑀥𑀸𑀦𑀯𑁂𑀫𑀢𑁆𑀢𑀢𑀁 𑀯𑀤𑀸𑀫𑀻’’𑀢𑀺 𑀆𑀳. 𑀤𑀦𑁆𑀢𑀓𑀸𑀭𑀡𑀁 𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀬𑀁 𑀅𑀓𑀽𑀝𑀓𑀭𑀡𑀁, 𑀅𑀦𑀯𑀘𑁆𑀙𑀺𑀦𑁆𑀤𑀦𑀁, 𑀥𑀼𑀭𑀲𑁆𑀲 𑀅𑀘𑁆𑀙𑀺𑀦𑁆𑀤𑀦𑀦𑁆𑀢𑀺 𑀤𑀦𑁆𑀢𑁂𑀲𑀼 𑀓𑀸𑀭𑀡𑀁 𑀤𑀺𑀲𑁆𑀲𑀢𑀺, 𑀢𑀁 𑀓𑀸𑀭𑀡𑀁 𑀉𑀧𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀤𑀦𑁆𑀢𑀪𑀽𑀫𑀺𑀦𑁆𑀢𑀺 𑀤𑀦𑁆𑀢𑁂𑀳𑀺 𑀕𑀦𑁆𑀢𑀩𑁆𑀩𑀪𑀽𑀫𑀺𑀁. 𑀅𑀲𑁆𑀲𑀤𑁆𑀥𑁄𑀢𑀺𑀆𑀤𑀻𑀲𑀼 𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 𑀘𑀢𑁆𑀢𑀸𑀭𑁄𑀧𑀺 𑀅𑀲𑁆𑀲𑀤𑁆𑀥𑀸 𑀦𑀸𑀫. 𑀧𑀼𑀣𑀼𑀚𑁆𑀚𑀦𑁄 𑀳𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀤𑁆𑀥𑀁 𑀅𑀧𑁆𑀧𑀢𑁆𑀢𑁄𑀢𑀺 𑀅𑀲𑁆𑀲𑀤𑁆𑀥𑁄, 𑀲𑁄𑀢𑀸𑀧𑀦𑁆𑀦𑁄 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀲𑀓𑀤𑀸𑀕𑀸𑀫𑀻 𑀅𑀦𑀸𑀕𑀸𑀫𑀺𑀲𑁆𑀲, 𑀅𑀦𑀸𑀕𑀸𑀫𑀻 𑀅𑀭𑀳𑀢𑁄 𑀲𑀤𑁆𑀥𑀁 𑀅𑀧𑁆𑀧𑀢𑁆𑀢𑁄𑀢𑀺 𑀅𑀲𑁆𑀲𑀤𑁆𑀥𑁄, 𑀆𑀩𑀸𑀥𑁄 𑀅𑀭𑀳𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀜𑁆𑀘𑀧𑀺 𑀩𑀳𑁆𑀯𑀸𑀩𑀸𑀥𑀸 𑀦𑀸𑀫 𑀳𑁄𑀦𑁆𑀢𑀺. 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀦 𑀲𑀞𑁄 𑀫𑀸𑀬𑀸𑀯𑀻𑀢𑀺 𑀦𑀸𑀫𑀁 𑀦𑀢𑁆𑀣𑀺. 𑀢𑁂𑀦𑁂𑀯 𑀣𑁂𑀭𑁄 𑁋 ‘‘𑀧𑀜𑁆𑀘 𑀧𑀥𑀸𑀦𑀺𑀬𑀗𑁆𑀕𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺 𑀓𑀣𑀺𑀢𑀸𑀦𑀻𑀢𑀺 𑀫𑀬𑁆𑀳𑀁 𑀭𑀼𑀘𑁆𑀘𑀢𑀻’’𑀢𑀺 𑀆𑀳. 𑀅𑀲𑁆𑀲𑀔𑀴𑀼𑀗𑁆𑀓𑀲𑀼𑀢𑁆𑀢𑀦𑁆𑀢𑁂 𑀧𑀦 𑁋 ‘‘𑀢𑀬𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀔𑀴𑀼𑀗𑁆𑀓𑁂 𑀢𑀬𑁄 𑀘 𑀧𑀼𑀭𑀺𑀲𑀔𑀴𑀼𑀗𑁆𑀓𑁂 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 (𑀅. 𑀦𑀺. 𑁩.𑁧𑁪𑁧) 𑀏𑀢𑁆𑀣 𑀅𑀭𑀺𑀬𑀲𑀸𑀯𑀓𑀲𑁆𑀲𑀸𑀧𑀺 𑀲𑀫𑁆𑀩𑁄𑀥𑀺𑀦𑀸𑀫𑀁 𑀆𑀕𑀢𑀁, 𑀢𑀲𑁆𑀲 𑀯𑀲𑁂𑀦 𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸𑀢𑀺 𑀯𑀼𑀢𑁆𑀢𑀁. 𑀧𑀼𑀣𑀼𑀚𑁆𑀚𑀦𑁄 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀻𑀭𑀺𑀬𑀁 𑀅𑀲𑀫𑁆𑀧𑀢𑁆𑀢𑁄…𑀧𑁂… 𑀅𑀦𑀸𑀕𑀸𑀫𑀻 𑀅𑀭𑀳𑀢𑁆𑀢𑀫𑀕𑁆𑀕𑀯𑀻𑀭𑀺𑀬𑀁 𑀅𑀲𑀫𑁆𑀧𑀢𑁆𑀢𑁄𑀢𑀺 𑀓𑀼𑀲𑀻𑀢𑁄𑀧𑀺 𑀅𑀲𑁆𑀲𑀤𑁆𑀥𑁄 𑀯𑀺𑀬 𑀘𑀢𑁆𑀢𑀸𑀭𑁄𑀯 𑀳𑁄𑀦𑁆𑀢𑀺, 𑀢𑀣𑀸 𑀤𑀼𑀧𑁆𑀧𑀜𑁆𑀜𑁄.

𑀏𑀯𑀁 𑀧𑀦𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀅𑀤𑀦𑁆𑀢𑀳𑀢𑁆𑀣𑀺𑀆𑀤𑀬𑁄 𑀯𑀺𑀬 𑀳𑀺 𑀫𑀕𑁆𑀕𑀧𑀥𑀸𑀦𑀭𑀳𑀺𑀢𑁄 𑀧𑀼𑀕𑁆𑀕𑀮𑁄. 𑀤𑀦𑁆𑀢𑀳𑀢𑁆𑀣𑀺𑀆𑀤𑀬𑁄 𑀯𑀺𑀬 𑀫𑀕𑁆𑀕𑀧𑀥𑀸𑀦𑀯𑀸. 𑀬𑀣𑀸 𑀅𑀤𑀦𑁆𑀢𑀸 𑀳𑀢𑁆𑀣𑀺𑀆𑀤𑀬𑁄 𑀓𑀽𑀝𑀸𑀓𑀸𑀭𑀁 𑀅𑀓𑀢𑁆𑀯𑀸 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀥𑀼𑀭𑀁 𑀅𑀧𑀸𑀢𑁂𑀢𑁆𑀯𑀸 𑀤𑀦𑁆𑀢𑀕𑀫𑀦𑀁 𑀯𑀸 𑀕𑀦𑁆𑀢𑀼𑀁 𑀤𑀦𑁆𑀢𑀪𑀽𑀫𑀺𑀁 𑀯𑀸 𑀧𑀢𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀫𑁂𑀯𑀁 𑀫𑀕𑁆𑀕𑀧𑀥𑀸𑀦𑀭𑀳𑀺𑀢𑁄 𑀫𑀕𑁆𑀕𑀧𑀥𑀸𑀦𑀯𑀢𑀸 𑀧𑀢𑁆𑀢𑀩𑁆𑀩𑀁 𑀧𑀸𑀧𑀼𑀡𑀺𑀢𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀁 𑀕𑀼𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑀣𑀸 𑀧𑀦 𑀤𑀦𑁆𑀢𑀳𑀢𑁆𑀣𑀺𑀆𑀤𑀬𑁄 𑀓𑀽𑀝𑀸𑀓𑀸𑀭𑀁 𑀅𑀓𑀢𑁆𑀯𑀸 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀥𑀼𑀭𑀁 𑀅𑀧𑀸𑀢𑁂𑀢𑁆𑀯𑀸 𑀤𑀦𑁆𑀢𑀕𑀫𑀦𑀁 𑀯𑀸 𑀕𑀦𑁆𑀢𑀼𑀁 𑀤𑀦𑁆𑀢𑀪𑀽𑀫𑀺𑀁 𑀯𑀸 𑀧𑀢𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀫𑁂𑀯𑀁 𑀫𑀕𑁆𑀕𑀧𑀥𑀸𑀦𑀯𑀸 𑀫𑀕𑁆𑀕𑀧𑀥𑀸𑀦𑀯𑀢𑀸 𑀧𑀢𑁆𑀢𑀩𑁆𑀩𑀁 𑀧𑀸𑀧𑀼𑀡𑀺𑀢𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀁 𑀕𑀼𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀥𑀸𑀦𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀥𑀸𑀦𑀯𑀢𑀸 𑀧𑀢𑁆𑀢𑁄𑀓𑀸𑀲𑀁 𑀧𑀸𑀧𑀼𑀡𑀺𑀢𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀁 𑀕𑀼𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀧𑀥𑀸𑀦𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀧𑀥𑀸𑀦𑀯𑀢𑀸 𑀧𑀢𑁆𑀢𑁄𑀓𑀸𑀲𑀁 𑀧𑀸𑀧𑀼𑀡𑀺𑀢𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀁 𑀕𑀼𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺.

𑁩𑁮𑁦. 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑀫𑀕𑁆𑀕𑀧𑀥𑀸𑀦𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀸. 𑀦 𑀓𑀺𑀜𑁆𑀘𑀺 𑀦𑀸𑀦𑀸𑀓𑀭𑀡𑀁 𑀯𑀤𑀸𑀫𑀺 𑀬𑀤𑀺𑀤𑀁 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀬𑀁 𑀏𑀓𑀲𑁆𑀲 𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀇𑀢𑀭𑀲𑁆𑀲 𑀨𑀮𑀯𑀺𑀫𑀼𑀢𑁆𑀢𑀺𑀁 𑀆𑀭𑀩𑁆𑀪 𑀦𑀸𑀦𑀸𑀓𑀭𑀡𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀦 𑀓𑀺𑀜𑁆𑀘𑀺 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀺𑀬𑀸 𑀯𑀸 𑀅𑀘𑁆𑀘𑀺𑀦𑁆𑀢𑀺 𑀅𑀘𑁆𑀘𑀺𑀬𑀸 𑀯𑀸 𑀅𑀘𑁆𑀘𑀺𑀫𑁆𑀳𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄, 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀓𑀺𑀁 𑀧𑀦 𑀢𑁆𑀯𑀁, 𑀫𑀳𑀸𑀭𑀸𑀚𑀸𑀢𑀺, 𑀫𑀳𑀸𑀭𑀸𑀚, 𑀓𑀺𑀁 𑀢𑁆𑀯𑀁? ‘‘𑀲𑀦𑁆𑀢𑀺 𑀤𑁂𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸, 𑀲𑀦𑁆𑀢𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸…𑀧𑁂… 𑀲𑀦𑁆𑀢𑀺 𑀤𑁂𑀯𑀸 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀦𑁄, 𑀲𑀦𑁆𑀢𑀺 𑀤𑁂𑀯𑀸 𑀢𑀢𑀼𑀢𑁆𑀢𑀭𑀺’’𑀦𑁆𑀢𑀺 𑀏𑀯𑀁 𑀤𑁂𑀯𑀸𑀦𑀁 𑀅𑀢𑁆𑀣𑀺𑀪𑀸𑀯𑀁 𑀦 𑀚𑀸𑀦𑀸𑀲𑀺, 𑀬𑁂𑀦 𑀏𑀯𑀁 𑀯𑀤𑁂𑀲𑀻𑀢𑀺. 𑀢𑀢𑁄 𑀅𑀢𑁆𑀣𑀺𑀪𑀸𑀯𑀁 𑀚𑀸𑀦𑀸𑀫𑀺, 𑀫𑀦𑀼𑀲𑁆𑀲𑀮𑁄𑀓𑀁 𑀧𑀦 𑀆𑀕𑀘𑁆𑀙𑀦𑁆𑀢𑀺 𑀦𑀸𑀕𑀘𑁆𑀙𑀦𑁆𑀢𑀻𑀢𑀺 𑀇𑀤𑀁 𑀧𑀼𑀘𑁆𑀙𑀦𑁆𑀢𑁄 𑀬𑀤𑀺 𑀯𑀸 𑀢𑁂, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀲𑀩𑁆𑀬𑀸𑀩𑀚𑁆𑀛𑀸𑀢𑀺 𑀲𑀤𑀼𑀓𑁆𑀔𑀸, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀅𑀧𑁆𑀧𑀳𑀻𑀦𑀘𑁂𑀢𑀲𑀺𑀓𑀤𑀼𑀓𑁆𑀔𑀸. 𑀆𑀕𑀦𑁆𑀢𑀸𑀭𑁄𑀢𑀺 𑀉𑀧𑀧𑀢𑁆𑀢𑀺𑀯𑀲𑁂𑀦 𑀆𑀕𑀦𑁆𑀢𑀸𑀭𑁄. 𑀅𑀩𑁆𑀬𑀸𑀩𑀚𑁆𑀛𑀸𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀤𑀼𑀓𑁆𑀔𑀸. 𑀅𑀦𑀸𑀕𑀦𑁆𑀢𑀸𑀭𑁄𑀢𑀺 𑀉𑀧𑀧𑀢𑁆𑀢𑀺𑀯𑀲𑁂𑀦 𑀅𑀦𑀸𑀕𑀦𑁆𑀢𑀸𑀭𑁄.

𑁩𑁮𑁧. 𑀧𑀳𑁄𑀢𑀻𑀢𑀺 𑀲𑀓𑁆𑀓𑁄𑀢𑀺. 𑀭𑀸𑀚𑀸 𑀳𑀺 𑀧𑀼𑀜𑁆𑀜𑀯𑀦𑁆𑀢𑀫𑁆𑀧𑀺 𑀮𑀸𑀪𑀲𑀓𑁆𑀓𑀸𑀭𑀲𑀫𑁆𑀧𑀦𑁆𑀦𑀁 𑀬𑀣𑀸 𑀦 𑀓𑁄𑀘𑀺 𑀉𑀧𑀲𑀗𑁆𑀓𑀫𑀢𑀺, 𑀏𑀯𑀁 𑀓𑀭𑁄𑀦𑁆𑀢𑁄 𑀢𑀫𑁆𑀳𑀸 𑀞𑀸𑀦𑀸 𑀘𑀸𑀯𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀁 𑀅𑀧𑀼𑀜𑁆𑀜𑀯𑀦𑁆𑀢𑀫𑁆𑀧𑀺 𑀲𑀓𑀮𑀕𑀸𑀫𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀬𑀸𑀧𑀦𑀫𑀢𑁆𑀢𑀁 𑀅𑀮𑀪𑀦𑁆𑀢𑀁 𑀬𑀣𑀸 𑀮𑀸𑀪𑀲𑀓𑁆𑀓𑀸𑀭𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀏𑀯𑀁 𑀓𑀭𑁄𑀦𑁆𑀢𑁄 𑀢𑀫𑁆𑀳𑀸 𑀞𑀸𑀦𑀸 𑀘𑀸𑀯𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀯𑀦𑁆𑀢𑀫𑁆𑀧𑀺 𑀇𑀢𑁆𑀣𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀚𑁂𑀢𑁆𑀯𑀸 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑁂𑀦𑁆𑀢𑁄 𑀩𑀮𑀓𑁆𑀓𑀸𑀭𑁂𑀦 𑀯𑀸 𑀉𑀧𑁆𑀧𑀩𑁆𑀩𑀸𑀚𑁂𑀦𑁆𑀢𑁄 𑀢𑀫𑁆𑀳𑀸 𑀞𑀸𑀦𑀸 𑀘𑀸𑀯𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀩𑁆𑀭𑀳𑁆𑀫𑀘𑀭𑀺𑀬𑀯𑀦𑁆𑀢𑀫𑁆𑀧𑀺 𑀲𑀫𑁆𑀧𑀦𑁆𑀦𑀓𑀸𑀫𑀕𑀼𑀡𑀁 𑀅𑀫𑀘𑁆𑀘𑀁 𑀩𑀦𑁆𑀥𑀦𑀸𑀕𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑀇𑀢𑁆𑀣𑀻𑀦𑀁 𑀫𑀼𑀔𑀫𑁆𑀧𑀺 𑀧𑀲𑁆𑀲𑀺𑀢𑀼𑀁 𑀅𑀤𑁂𑀦𑁆𑀢𑁄 𑀢𑀫𑁆𑀳𑀸 𑀞𑀸𑀦𑀸 𑀘𑀸𑀯𑁂𑀢𑀺 𑀦𑀸𑀫. 𑀭𑀝𑁆𑀞𑀢𑁄 𑀧𑀦 𑀬𑀁 𑀇𑀘𑁆𑀙𑀢𑀺, 𑀢𑀁 𑀧𑀩𑁆𑀩𑀸𑀚𑁂𑀢𑀺 𑀦𑀸𑀫.

𑀤𑀲𑁆𑀲𑀦𑀸𑀬𑀧𑀺 𑀦𑀧𑁆𑀧𑀳𑁄𑀦𑁆𑀢𑀻𑀢𑀺 𑀓𑀸𑀫𑀸𑀯𑀘𑀭𑁂 𑀢𑀸𑀯 𑀅𑀩𑁆𑀬𑀸𑀩𑀚𑁆𑀛𑁂 𑀤𑁂𑀯𑁂 𑀲𑀩𑁆𑀬𑀸𑀩𑀚𑁆𑀛𑀸 𑀤𑁂𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀤𑀲𑁆𑀲𑀦𑀸𑀬𑀧𑀺 𑀦𑀧𑁆𑀧𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀅𑀭𑀳𑀢𑁄 𑀢𑀢𑁆𑀣 𑀞𑀸𑀦𑀸𑀪𑀸𑀯𑀢𑁄. 𑀭𑀽𑀧𑀸𑀯𑀘𑀭𑁂 𑀧𑀦 𑀏𑀓𑀯𑀺𑀫𑀸𑀦𑀲𑁆𑀫𑀺𑀁𑀬𑁂𑀯 𑀢𑀺𑀝𑁆𑀞𑀦𑁆𑀢𑀺 𑀘 𑀦𑀺𑀲𑀻𑀤𑀦𑁆𑀢𑀺 𑀘𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀤𑀲𑁆𑀲𑀦𑀸𑀬 𑀧𑀳𑁄𑀦𑁆𑀢𑀺, 𑀏𑀢𑁂𑀳𑀺 𑀤𑀺𑀝𑁆𑀞𑀁 𑀧𑀦 𑀲𑀮𑁆𑀮𑀓𑁆𑀔𑀺𑀢𑀁 𑀧𑀝𑀺𑀯𑀺𑀤𑁆𑀥𑀁 𑀮𑀓𑁆𑀔𑀡𑀁 𑀤𑀝𑁆𑀞𑀼𑀁 𑀲𑀮𑁆𑀮𑀓𑁆𑀔𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀤𑀲𑁆𑀲𑀦𑀸𑀬 𑀦𑀧𑁆𑀧𑀳𑁄𑀦𑁆𑀢𑀺, 𑀉𑀧𑀭𑀺𑀤𑁂𑀯𑁂 𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀤𑀲𑁆𑀲𑀦𑁂𑀦𑀸𑀧𑀻𑀢𑀺.

𑁩𑁮𑁨. 𑀓𑁄 𑀦𑀸𑀫𑁄 𑀅𑀬𑀁, 𑀪𑀦𑁆𑀢𑁂𑀢𑀺 𑀭𑀸𑀚𑀸 𑀣𑁂𑀭𑀁 𑀚𑀸𑀦𑀦𑁆𑀢𑁄𑀧𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀢𑀺. 𑀓𑀲𑁆𑀫𑀸? 𑀧𑀲𑀁𑀲𑀺𑀢𑀼𑀓𑀸𑀫𑀢𑀸𑀬. 𑀆𑀦𑀦𑁆𑀤𑀭𑀽𑀧𑁄𑀢𑀺 𑀆𑀦𑀦𑁆𑀤𑀲𑀪𑀸𑀯𑁄. 𑀩𑁆𑀭𑀳𑁆𑀫𑀧𑀼𑀘𑁆𑀙𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄𑀢𑀺 𑀲𑀸 𑀓𑀺𑀭 𑀓𑀣𑀸 𑀯𑀺𑀝𑀝𑀽𑀪𑁂𑀦𑁂𑀯 𑀓𑀣𑀺𑀢𑀸, 𑀢𑁂 ‘‘𑀢𑀬𑀸 𑀓𑀣𑀺𑀢𑀸, 𑀢𑀬𑀸 𑀓𑀣𑀺𑀢𑀸’’𑀢𑀺 𑀓𑀼𑀧𑀺𑀢𑀸 𑀅𑀜𑁆𑀜𑀫𑀜𑁆𑀜𑀁 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑀮𑀓𑀸𑀬𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀓𑀮𑀳𑀫𑁆𑀧𑀺 𑀓𑀭𑁂𑀬𑁆𑀬𑀼𑀦𑁆𑀢𑀺 𑀦𑀺𑀯𑀸𑀭𑀡𑀢𑁆𑀣𑀁 𑀲𑁄 𑀭𑀸𑀚𑀧𑀼𑀭𑀺𑀲𑁄 𑀏𑀢𑀤𑀯𑁄𑀘. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀅𑀬𑀁 𑀧𑀦 𑀤𑁂𑀲𑀦𑀸 𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀦𑀺𑀝𑁆𑀞𑀺𑀢𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀓𑀡𑁆𑀡𑀓𑀢𑁆𑀣𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.