𑁪. 𑀭𑀸𑀚𑀯𑀕𑁆𑀕𑁄

𑁧. 𑀖𑀝𑀺𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮𑁨. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀖𑀝𑀺𑀓𑀸𑀭𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀫𑀳𑀸𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀅𑀜𑁆𑀜𑀢𑀭𑀁 𑀪𑀽𑀫𑀺𑀧𑁆𑀧𑀤𑁂𑀲𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑀬𑀸 𑀘𑀭𑀺𑀬𑀁 𑀘𑀭𑀫𑀸𑀦𑁂𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀯𑀼𑀢𑁆𑀣𑀧𑀼𑀩𑁆𑀩’’𑀦𑁆𑀢𑀺 𑀆𑀯𑀚𑁆𑀚𑀦𑁆𑀢𑁄 𑀅𑀤𑁆𑀤𑀲 𑁋 ‘‘𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑁂𑀕𑀴𑀺𑀗𑁆𑀕𑀁 𑀦𑀸𑀫 𑀕𑀸𑀫𑀦𑀺𑀕𑀫𑁄 𑀅𑀳𑁄𑀲𑀺, 𑀅𑀳𑀁 𑀢𑀤𑀸 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀫𑀸𑀡𑀯𑁄 𑀅𑀳𑁄𑀲𑀺𑀁, 𑀫𑀬𑁆𑀳𑀁 𑀲𑀳𑀸𑀬𑁄 𑀖𑀝𑀺𑀓𑀸𑀭𑁄 𑀦𑀸𑀫 𑀓𑀼𑀫𑁆𑀪𑀓𑀸𑀭𑁄 𑀅𑀳𑁄𑀲𑀺, 𑀢𑁂𑀦 𑀲𑀤𑁆𑀥𑀺𑀁 𑀫𑀬𑀸 𑀇𑀥 𑀏𑀓𑀁 𑀲𑀼𑀓𑀸𑀭𑀡𑀁 𑀓𑀢𑀁, 𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀧𑀸𑀓𑀝𑀁 𑀧𑀝𑀺𑀘𑁆𑀙𑀦𑁆𑀦𑀁, 𑀳𑀦𑁆𑀤 𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀓𑀝𑀁 𑀓𑀭𑁄𑀫𑀻’’𑀢𑀺 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀞𑀺𑀢𑀓𑁄𑀯 𑀲𑀺𑀢𑀧𑀸𑀢𑀼𑀓𑀫𑁆𑀫𑀫𑀓𑀸𑀲𑀺, 𑀅𑀕𑁆𑀕𑀕𑁆𑀕𑀤𑀦𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀫𑀦𑁆𑀤𑀳𑀲𑀺𑀢𑀁 𑀳𑀲𑀺. 𑀬𑀣𑀸 𑀳𑀺 𑀮𑁄𑀓𑀺𑀬𑀫𑀦𑀼𑀲𑁆𑀲𑀸 𑀉𑀭𑀁 𑀧𑀳𑀭𑀦𑁆𑀢𑀸 𑁋 ‘‘𑀓𑀼𑀳𑀁 𑀓𑀼𑀳’’𑀦𑁆𑀢𑀺 𑀳𑀲𑀦𑁆𑀢𑀺, 𑀦 𑀏𑀯𑀁 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀸𑀦𑀁 𑀧𑀦 𑀳𑀲𑀺𑀢𑀁 𑀳𑀝𑁆𑀞𑀧𑀳𑀝𑁆𑀞𑀸𑀓𑀸𑀭𑀫𑀢𑁆𑀢𑀫𑁂𑀯 𑀳𑁄𑀢𑀺.

𑀳𑀲𑀺𑀢𑀜𑁆𑀘 𑀦𑀸𑀫𑁂𑀢𑀁 𑀢𑁂𑀭𑀲𑀳𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀳𑀺 𑀳𑁄𑀢𑀺. 𑀢𑀢𑁆𑀣 𑀮𑁄𑀓𑀺𑀬𑀫𑀳𑀸𑀚𑀦𑁄 𑀅𑀓𑀼𑀲𑀮𑀢𑁄 𑀘𑀢𑀽𑀳𑀺, 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑀽𑀳𑀻𑀢𑀺 𑀅𑀝𑁆𑀞𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀢𑀺, 𑀲𑁂𑀓𑁆𑀔𑀸 𑀅𑀓𑀼𑀲𑀮𑀢𑁄 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀤𑁆𑀯𑁂 𑀅𑀧𑀦𑁂𑀢𑁆𑀯𑀸 𑀙𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺, 𑀔𑀻𑀡𑀸𑀲𑀯𑀸 𑀘𑀢𑀽𑀳𑀺 𑀲𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑁂𑀳𑀺 𑀏𑀓𑁂𑀦 𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑁂𑀦𑀸𑀢𑀺 𑀧𑀜𑁆𑀘𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺. 𑀢𑁂𑀲𑀼𑀧𑀺 𑀩𑀮𑀯𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀤𑁆𑀯𑀻𑀳𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺, 𑀤𑀼𑀩𑁆𑀩𑀮𑀸𑀭𑀫𑁆𑀫𑀡𑁂 𑀤𑀼𑀳𑁂𑀢𑀼𑀓𑀘𑀺𑀢𑁆𑀢𑀤𑁆𑀯𑀬𑁂𑀦 𑀘 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀦 𑀘𑀸𑀢𑀺 𑀢𑀻𑀳𑀺 𑀘𑀺𑀢𑁆𑀢𑁂𑀳𑀺 𑀳𑀲𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀓𑀺𑀭𑀺𑀬𑀸𑀳𑁂𑀢𑀼𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀁 𑀪𑀕𑀯𑀢𑁄 𑀳𑀝𑁆𑀞𑀧𑀳𑀝𑁆𑀞𑀸𑀓𑀸𑀭𑀫𑀢𑁆𑀢𑀁 𑀳𑀲𑀺𑀢𑀁 𑀉𑀧𑁆𑀧𑀸𑀤𑁂𑀲𑀺.

𑀢𑀁 𑀧𑀦𑁂𑀢𑀁 𑀳𑀲𑀺𑀢𑀁 𑀏𑀯𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀣𑁂𑀭𑀲𑁆𑀲 𑀧𑀸𑀓𑀝𑀁 𑀅𑀳𑁄𑀲𑀺. 𑀓𑀣𑀁? 𑀢𑀣𑀸𑀭𑀽𑀧𑁂 𑀳𑀺 𑀓𑀸𑀮𑁂 𑀢𑀣𑀸𑀕𑀢𑀲𑁆𑀲 𑀘𑀢𑀽𑀳𑀺 𑀤𑀸𑀞𑀸𑀳𑀺 𑀘𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑀫𑀼𑀔𑀢𑁄 𑀲𑀢𑁂𑀭𑀢𑀸𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀯𑀺𑀭𑁄𑀘𑀫𑀸𑀦𑀸 𑀫𑀳𑀸𑀢𑀸𑀮𑀓𑁆𑀔𑀦𑁆𑀥𑀧𑀫𑀸𑀡𑀸 𑀭𑀲𑁆𑀫𑀺𑀯𑀝𑁆𑀝𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀲𑀯𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀸𑀞𑀕𑁆𑀕𑁂𑀲𑀼𑀬𑁂𑀯 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀙𑀢𑁄 𑀕𑀘𑁆𑀙𑀫𑀸𑀦𑁄𑀧𑀺 𑀲𑀺𑀢𑀧𑀸𑀢𑀼𑀪𑀸𑀯𑀁 𑀚𑀸𑀦𑀸𑀢𑀺.

𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 𑁋 ‘‘𑀏𑀢𑁆𑀣 𑀓𑀺𑀭 𑀓𑀲𑁆𑀲𑀧𑁄 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀯𑀤𑀺, 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀁 𑀅𑀓𑀸𑀲𑀺, 𑀪𑀕𑀯𑀢𑁄𑀧𑀺 𑀏𑀢𑁆𑀣 𑀦𑀺𑀲𑀻𑀤𑀺𑀢𑀼𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀏𑀯𑀫𑀬𑀁 𑀪𑀽𑀫𑀺𑀪𑀸𑀕𑁄 𑀤𑁆𑀯𑀻𑀳𑀺 𑀩𑀼𑀤𑁆𑀥𑁂𑀳𑀺 𑀧𑀭𑀺𑀪𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀫𑀳𑀸𑀚𑀦𑁄 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑀁 𑀓𑀢𑁆𑀯𑀸 𑀧𑀭𑀺𑀘𑀭𑀦𑁆𑀢𑁄 𑀲𑀕𑁆𑀕𑀫𑀕𑁆𑀕𑀧𑀭𑀸𑀬𑀡𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀁 ‘‘𑀢𑁂𑀦 𑀳𑀺, 𑀪𑀦𑁆𑀢𑁂,’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑁨𑁮𑁩. 𑀫𑀼𑀡𑁆𑀟𑀓𑁂𑀦 𑀲𑀫𑀡𑀓𑁂𑀦𑀸𑀢𑀺 𑀫𑀼𑀡𑁆𑀟𑀁 𑀫𑀼𑀡𑁆𑀟𑁄𑀢𑀺, 𑀲𑀫𑀡𑀁 𑀯𑀸 𑀲𑀫𑀡𑁄𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀅𑀬𑀁 𑀧𑀦 𑀅𑀧𑀭𑀺𑀧𑀓𑁆𑀓𑀜𑀸𑀡𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀕𑁆𑀕𑀳𑀺𑀢𑀯𑁄𑀳𑀸𑀭𑀯𑀲𑁂𑀦𑁂𑀯 𑀳𑀻𑀴𑁂𑀦𑁆𑀢𑁄 𑀏𑀯𑀫𑀸𑀳. 𑀲𑁄𑀢𑁆𑀢𑀺𑀲𑀺𑀦𑀸𑀦𑀺𑀦𑁆𑀢𑀺 𑀲𑀺𑀦𑀸𑀦𑀢𑁆𑀣𑀸𑀬 𑀓𑀢𑀲𑁄𑀢𑁆𑀢𑀺𑀁. 𑀲𑁄𑀢𑁆𑀢𑀺 𑀦𑀸𑀫 𑀓𑀼𑀭𑀼𑀯𑀺𑀦𑁆𑀤𑀧𑀸𑀲𑀸𑀡𑀘𑀼𑀡𑁆𑀡𑀸𑀦𑀺 𑀮𑀸𑀔𑀸𑀬 𑀩𑀦𑁆𑀥𑀺𑀢𑁆𑀯𑀸 𑀓𑀢𑀕𑀼𑀴𑀺𑀓𑀓𑀮𑀸𑀧𑀓𑀸 𑀯𑀼𑀘𑁆𑀘𑀢𑀺, 𑀬𑀁 𑀲𑀦𑁆𑀥𑀸𑀬 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀓𑀼𑀭𑀼𑀯𑀺𑀦𑁆𑀤𑀓𑀲𑀼𑀢𑁆𑀢𑀺𑀬𑀸 𑀦𑀳𑀸𑀬𑀦𑁆𑀢𑀻’’𑀢𑀺 (𑀘𑀽𑀴𑀯. 𑁨𑁪𑁩) 𑀯𑀼𑀢𑁆𑀢𑀁. 𑀢𑀁 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀕𑀳𑁂𑀢𑁆𑀯𑀸 𑀲𑀭𑀻𑀭𑀁 𑀖𑀁𑀲𑀦𑁆𑀢𑀺. 𑀏𑀯𑀁 𑀲𑀫𑁆𑀫𑀸𑀢𑀺 𑀬𑀣𑀸 𑀏𑀢𑀭𑀳𑀺𑀧𑀺 𑀫𑀦𑀼𑀲𑁆𑀲𑀸 ‘‘𑀘𑁂𑀢𑀺𑀬𑀯𑀦𑁆𑀤𑀦𑀸𑀬 𑀕𑀘𑁆𑀙𑀸𑀫, 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀕𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑀸 𑀉𑀲𑁆𑀲𑀸𑀳𑀁 𑀦 𑀓𑀭𑁄𑀦𑁆𑀢𑀺, ‘‘𑀦𑀝𑀲𑀫𑀚𑁆𑀚𑀸𑀤𑀺𑀤𑀲𑁆𑀲𑀦𑀢𑁆𑀣𑀸𑀬 𑀕𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑀸 𑀧𑀦 𑀏𑀓𑀯𑀘𑀦𑁂𑀦𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀢𑀣𑁂𑀯 𑀲𑀺𑀦𑁆𑀳𑀸𑀬𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑁂 𑀏𑀓𑀯𑀘𑀦𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀏𑀯𑀫𑀸𑀳.

𑁨𑁮𑁪. 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀆𑀫𑀦𑁆𑀢𑁂𑀲𑀻𑀢𑀺 𑀏𑀓𑀧𑀲𑁆𑀲𑁂 𑀅𑀭𑀺𑀬𑀧𑀭𑀺𑀳𑀸𑀭𑁂𑀦 𑀧𑀞𑀫𑀢𑀭𑀁 𑀦𑁆𑀳𑀸𑀬𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀞𑀺𑀢𑁄 𑀢𑀲𑁆𑀲 𑀫𑀳𑀦𑁆𑀢𑁂𑀦 𑀇𑀲𑁆𑀲𑀭𑀺𑀬𑀧𑀭𑀺𑀳𑀸𑀭𑁂𑀦 𑀦𑁆𑀳𑀸𑀬𑀦𑁆𑀢𑀲𑁆𑀲 𑀦𑁆𑀳𑀸𑀦𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑁂𑀢𑁆𑀯𑀸 𑀢𑀁 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑀁 𑀓𑁂𑀲𑁂 𑀯𑁄𑀤𑀓𑁂 𑀓𑀼𑀭𑀼𑀫𑀸𑀦𑀁 𑀆𑀫𑀦𑁆𑀢𑁂𑀲𑀺. 𑀅𑀬𑀦𑁆𑀢𑀺 𑀆𑀲𑀦𑁆𑀦𑀢𑁆𑀢𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀑𑀯𑀝𑁆𑀝𑀺𑀓𑀁 𑀯𑀺𑀦𑀺𑀯𑀝𑁆𑀞𑁂𑀢𑁆𑀯𑀸𑀢𑀺 𑀦𑀸𑀕𑀩𑀮𑁄 𑀩𑁄𑀥𑀺𑀲𑀢𑁆𑀢𑁄 ‘‘𑀅𑀧𑁂𑀳𑀺 𑀲𑀫𑁆𑀫𑀸’’𑀢𑀺 𑀈𑀲𑀓𑀁 𑀧𑀭𑀺𑀯𑀢𑁆𑀢𑀫𑀸𑀦𑁄𑀯 𑀢𑁂𑀦 𑀕𑀳𑀺𑀢𑀕𑀳𑀡𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑁂𑀲𑁂𑀲𑀼 𑀧𑀭𑀸𑀫𑀲𑀺𑀢𑁆𑀯𑀸 𑀏𑀢𑀤𑀯𑁄𑀘𑀸𑀢𑀺 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀚𑁄𑀢𑀺𑀧𑀸𑀮𑁄 𑀧𑀜𑁆𑀜𑀯𑀸, 𑀲𑀓𑀺𑀁 𑀤𑀲𑁆𑀲𑀦𑀁 𑀮𑀪𑀫𑀸𑀦𑁄 𑀢𑀣𑀸𑀕𑀢𑀲𑁆𑀲 𑀤𑀲𑁆𑀲𑀦𑁂𑀧𑀺 𑀧𑀲𑀻𑀤𑀺𑀲𑁆𑀲𑀢𑀺, 𑀥𑀫𑁆𑀫𑀓𑀣𑀸𑀬𑀧𑀺 𑀧𑀲𑀻𑀤𑀺𑀲𑁆𑀲𑀢𑀺, 𑀧𑀲𑀦𑁆𑀦𑁄 𑀘 𑀧𑀲𑀦𑁆𑀦𑀸𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀫𑀺𑀢𑁆𑀢𑀸 𑀦𑀸𑀫 𑀏𑀢𑀤𑀢𑁆𑀣𑀁 𑀳𑁄𑀦𑁆𑀢𑀺, 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀫𑀫 𑀲𑀳𑀸𑀬𑀁 𑀕𑀳𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀦𑀁 𑀓𑁂𑀲𑁂𑀲𑀼 𑀧𑀭𑀸𑀫𑀲𑀺𑀢𑁆𑀯𑀸 𑀏𑀢𑀤𑀯𑁄𑀘.

𑀇𑀢𑁆𑀢𑀭𑀚𑀘𑁆𑀘𑁄𑀢𑀺 𑀅𑀜𑁆𑀜𑀚𑀸𑀢𑀺𑀓𑁄, 𑀫𑀬𑀸 𑀲𑀤𑁆𑀥𑀺𑀁 𑀅𑀲𑀫𑀸𑀦𑀚𑀸𑀢𑀺𑀓𑁄, 𑀮𑀸𑀫𑀓𑀚𑀸𑀢𑀺𑀓𑁄𑀢𑀺 𑀅𑀢𑁆𑀣𑁄. 𑀦 𑀯𑀢𑀺𑀤𑀦𑁆𑀢𑀺 𑀇𑀤𑀁 𑀅𑀫𑁆𑀳𑀸𑀓𑀁 𑀕𑀫𑀦𑀁 𑀦 𑀯𑀢 𑀑𑀭𑀓𑀁 𑀪𑀯𑀺𑀲𑁆𑀲𑀢𑀺 𑀦 𑀔𑀼𑀤𑁆𑀤𑀓𑀁, 𑀫𑀳𑀦𑁆𑀢𑀁 𑀪𑀯𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 𑀦 𑀅𑀢𑁆𑀢𑀦𑁄 𑀣𑀸𑀫𑁂𑀦 𑀕𑀡𑁆𑀳𑀺, 𑀲𑀢𑁆𑀣𑀼 𑀣𑀸𑀫𑁂𑀦 𑀕𑀡𑁆𑀳𑀻𑀢𑀺 𑀕𑀳𑀡𑀲𑁆𑀫𑀺𑀁𑀬𑁂𑀯 𑀦𑀺𑀝𑁆𑀞𑀁 𑀅𑀕𑀫𑀸𑀲𑀺. 𑀬𑀸𑀯𑀢𑀸𑀤𑁄𑀳𑀺𑀧𑀻𑀢𑀺 𑀏𑀢𑁆𑀣 𑀤𑁄𑀓𑀸𑀭𑀳𑀺𑀓𑀸𑀭𑀧𑀺𑀓𑀸𑀭𑀸 𑀦𑀺𑀧𑀸𑀢𑀸, 𑀬𑀸𑀯𑀢𑀼𑀧𑀭𑀺𑀫𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀯𑀸𑀘𑀸𑀬 𑀆𑀮𑀧𑀦𑀁 𑀑𑀯𑀝𑁆𑀝𑀺𑀓𑀸𑀬 𑀕𑀳𑀡𑀜𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀸𑀯 𑀓𑁂𑀲𑀕𑁆𑀕𑀳𑀡𑀫𑁆𑀧𑀺 𑀢𑀢𑁆𑀣 𑀕𑀫𑀦𑀢𑁆𑀣𑀁 𑀧𑀬𑁄𑀕𑁄 𑀓𑀢𑁆𑀢𑀩𑁆𑀩𑁄’’𑀢𑀺.

𑁨𑁮𑁫. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀇𑀥 𑀲𑀢𑀺𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀫𑁆𑀫𑀻 𑀓𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀲 𑀳𑀺 𑀪𑀕𑀯𑀸, 𑁋 ‘‘𑀚𑁄𑀢𑀺𑀧𑀸𑀮, 𑀢𑁆𑀯𑀁 𑀦 𑀮𑀸𑀫𑀓𑀝𑁆𑀞𑀸𑀦𑀁 𑀑𑀢𑀺𑀡𑁆𑀡𑀲𑀢𑁆𑀢𑁄, 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀧𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀢𑁆𑀣𑁂𑀢𑁆𑀯𑀸 𑀑𑀢𑀺𑀡𑁆𑀡𑁄𑀲𑀺, 𑀢𑀸𑀤𑀺𑀲𑀲𑁆𑀲 𑀦𑀸𑀫 𑀧𑀫𑀸𑀤𑀯𑀺𑀳𑀸𑀭𑁄 𑀦 𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀢𑀺𑀧𑀝𑀺𑀮𑀸𑀪𑀸𑀬 𑀥𑀫𑁆𑀫𑀁 𑀓𑀣𑁂𑀲𑀺. 𑀧𑀭𑀲𑀫𑀼𑀤𑁆𑀤𑀯𑀸𑀲𑀻𑀣𑁂𑀭𑀸 𑀧𑀦 𑀯𑀤𑀦𑁆𑀢𑀺 𑁋 ‘‘𑀚𑁄𑀢𑀺𑀧𑀸𑀮, 𑀬𑀣𑀸 𑀅𑀳𑀁 𑀤𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀻𑀲𑀢𑀺𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀮𑁄𑀓𑁂 𑀯𑀺𑀘𑀭𑀸𑀫𑀺, 𑀏𑀯𑀫𑁂𑀯𑀁 𑀢𑁆𑀯𑀫𑁆𑀧𑀺 𑀤𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀫𑀡𑀕𑀡𑀧𑀭𑀺𑀯𑀸𑀭𑁄 𑀮𑁄𑀓𑁂 𑀯𑀺𑀘𑀭𑀺𑀲𑁆𑀲𑀲𑀺. 𑀏𑀯𑀭𑀽𑀧𑁂𑀦 𑀦𑀸𑀫 𑀢𑀬𑀸 𑀧𑀫𑀸𑀤𑀁 𑀆𑀧𑀚𑁆𑀚𑀺𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀬𑀣𑀸𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀏𑀯𑀁 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀓𑀣𑁂𑀲𑀻𑀢𑀺.

𑁨𑁮𑁬. 𑀅𑀮𑀢𑁆𑀣 𑀔𑁄, 𑀆𑀦𑀦𑁆𑀤,…𑀧𑁂… 𑀧𑀩𑁆𑀩𑀚𑁆𑀚𑀁 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀦𑁆𑀢𑀺 𑀧𑀩𑁆𑀩𑀚𑀺𑀢𑁆𑀯𑀸 𑀓𑀺𑀫𑀓𑀸𑀲𑀺? 𑀬𑀁 𑀩𑁄𑀥𑀺𑀲𑀢𑁆𑀢𑁂𑀳𑀺 𑀓𑀢𑁆𑀢𑀩𑁆𑀩𑀁. 𑀩𑁄𑀥𑀺𑀲𑀢𑁆𑀢𑀸 𑀳𑀺 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑁂 𑀧𑀩𑁆𑀩𑀚𑀦𑁆𑀢𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀧𑀦 𑀇𑀢𑁆𑀢𑀭𑀲𑀢𑁆𑀢𑀸 𑀯𑀺𑀬 𑀧𑀢𑀺𑀢𑀲𑀺𑀗𑁆𑀕𑀸 𑀦 𑀳𑁄𑀦𑁆𑀢𑀺, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀧𑀦 𑀲𑀼𑀧𑀢𑀺𑀝𑁆𑀞𑀸𑀬 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑀬𑀫𑀸𑀦𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀬𑀸𑀯 𑀅𑀦𑀼𑀮𑁄𑀫𑀜𑀸𑀡𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺, 𑀫𑀕𑁆𑀕𑀨𑀮𑀢𑁆𑀣𑀁 𑀯𑀸𑀬𑀸𑀫𑀁 𑀦 𑀓𑀭𑁄𑀦𑁆𑀢𑀺. 𑀚𑁄𑀢𑀺𑀧𑀸𑀮𑁄𑀧𑀺 𑀢𑀣𑁂𑀯 𑀅𑀓𑀸𑀲𑀺.

𑁨𑁮𑁭. 𑀅𑀟𑁆𑀠𑀫𑀸𑀲𑀼𑀧𑀲𑀫𑁆𑀧𑀦𑁆𑀦𑁂𑀢𑀺 𑀓𑀼𑀮𑀤𑀸𑀭𑀓𑀜𑁆𑀳𑀺 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀟𑁆𑀠𑀫𑀸𑀲𑀫𑁆𑀧𑀺 𑀅𑀯𑀲𑀺𑀢𑁆𑀯𑀸 𑀕𑀢𑁂 𑀫𑀸𑀢𑀸𑀧𑀺𑀢𑀽𑀦𑀁 𑀲𑁄𑀓𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀲𑁄𑀧𑀺 𑀧𑀢𑁆𑀢𑀘𑀻𑀯𑀭𑀕𑁆𑀕𑀳𑀡𑀁 𑀦 𑀚𑀸𑀦𑀸𑀢𑀺, 𑀤𑀳𑀭𑀪𑀺𑀓𑁆𑀔𑀼𑀲𑀸𑀫𑀡𑁂𑀭𑁂𑀳𑀺 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀲𑀺𑀦𑁂𑀳𑁄 𑀦 𑀧𑀢𑀺𑀝𑁆𑀞𑀸𑀢𑀺, 𑀕𑀢𑀕𑀢𑀝𑁆𑀞𑀸𑀦𑁂 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀢𑁆𑀢𑀓𑀁 𑀧𑀦 𑀓𑀸𑀮𑀁 𑀦𑀺𑀯𑀸𑀲𑁂 𑀲𑀢𑀺 𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑀺𑀢𑀼𑀁 𑀮𑀪𑀦𑁆𑀢𑀺. 𑀢𑁂𑀦 𑀢𑁂𑀲𑀁 𑀲𑁄𑀓𑁄 𑀢𑀦𑀼𑀪𑀸𑀯𑀁 𑀕𑀘𑁆𑀙𑀢𑀺, 𑀧𑀢𑁆𑀢𑀘𑀻𑀯𑀭𑀕𑁆𑀕𑀳𑀡𑀁 𑀚𑀸𑀦𑀸𑀢𑀺, 𑀲𑀸𑀫𑀡𑁂𑀭𑀤𑀳𑀭𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄 𑀚𑀸𑀬𑀢𑀺, 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀲𑀺𑀦𑁂𑀳𑁄 𑀧𑀢𑀺𑀝𑁆𑀞𑀸𑀢𑀺, 𑀕𑀢𑀕𑀢𑀝𑁆𑀞𑀸𑀦𑁂 𑀅𑀪𑀺𑀭𑀫𑀢𑀺, 𑀦 𑀉𑀓𑁆𑀓𑀡𑁆𑀞𑀢𑀺. 𑀢𑀲𑁆𑀫𑀸 𑀏𑀢𑁆𑀢𑀓𑀁 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀟𑁆𑀠𑀫𑀸𑀲𑀁 𑀯𑀲𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀧𑀡𑁆𑀟𑀼𑀧𑀼𑀝𑀓𑀲𑁆𑀲 𑀲𑀸𑀮𑀺𑀦𑁄𑀢𑀺 𑀧𑀼𑀝𑀓𑁂 𑀓𑀢𑁆𑀯𑀸 𑀲𑀼𑀓𑁆𑀔𑀸𑀧𑀺𑀢𑀲𑁆𑀲 𑀭𑀢𑁆𑀢𑀲𑀸𑀮𑀺𑀦𑁄. 𑀢𑀲𑁆𑀲 𑀓𑀺𑀭 𑀲𑀸𑀮𑀺𑀦𑁄 𑀯𑀧𑁆𑀧𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀬𑀁 𑀧𑀭𑀺𑀳𑀸𑀭𑁄 𑁋 𑀓𑁂𑀤𑀸𑀭𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀕𑀦𑁆𑀥𑁄𑀤𑀓𑁂𑀦 𑀲𑀺𑀜𑁆𑀘𑀺𑀁𑀲𑀼, 𑀯𑀧𑁆𑀧𑀓𑀸𑀮𑁂 𑀯𑀺𑀢𑀸𑀦𑀁 𑀯𑀺𑀬 𑀉𑀧𑀭𑀺 𑀯𑀢𑁆𑀣𑀓𑀺𑀮𑀜𑁆𑀚𑀁 𑀩𑀦𑁆𑀥𑀺𑀢𑁆𑀯𑀸 𑀧𑀭𑀺𑀧𑀓𑁆𑀓𑀓𑀸𑀮𑁂 𑀯𑀻𑀳𑀺𑀲𑀻𑀲𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀫𑀼𑀝𑁆𑀞𑀺𑀫𑀢𑁆𑀢𑁂 𑀧𑀼𑀝𑀓𑁂 𑀓𑀢𑁆𑀯𑀸 𑀬𑁄𑀢𑁆𑀢𑀩𑀤𑁆𑀥𑁂 𑀯𑁂𑀳𑀸𑀲𑀁𑀬𑁂𑀯 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑀸𑀦𑀺 𑀅𑀢𑁆𑀣𑀭𑀺𑀢𑁆𑀯𑀸 𑀓𑁄𑀝𑁆𑀞𑀓𑁂𑀲𑀼 𑀧𑀽𑀭𑁂𑀢𑁆𑀯𑀸 𑀢𑀢𑀺𑀬𑁂 𑀯𑀲𑁆𑀲𑁂 𑀯𑀺𑀯𑀭𑀺𑀁𑀲𑀼. 𑀏𑀯𑀁 𑀢𑀺𑀯𑀲𑁆𑀲𑀁 𑀧𑀭𑀺𑀯𑀼𑀢𑁆𑀣𑀲𑁆𑀲 𑀲𑀼𑀕𑀦𑁆𑀥𑀭𑀢𑁆𑀢𑀲𑀸𑀮𑀺𑀦𑁄 𑀅𑀧𑀕𑀢𑀓𑀸𑀴𑀓𑁂 𑀲𑀼𑀧𑀭𑀺𑀲𑀼𑀤𑁆𑀥𑁂 𑀢𑀡𑁆𑀟𑀼𑀮𑁂 𑀕𑀳𑁂𑀢𑁆𑀯𑀸 𑀔𑀚𑁆𑀚𑀓𑀯𑀺𑀓𑀢𑀺𑀫𑁆𑀧𑀺 𑀪𑀢𑁆𑀢𑀫𑁆𑀧𑀺 𑀧𑀝𑀺𑀬𑀸𑀤𑀺𑀬𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁…𑀧𑁂… 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀻𑀢𑀺.

𑁨𑁮𑁮. 𑀅𑀥𑀺𑀯𑀼𑀝𑁆𑀞𑁄 𑀫𑁂𑀢𑀺 𑀓𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺? 𑀯𑁂𑀕𑀴𑀺𑀗𑁆𑀕𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑁂 𑀖𑀝𑀺𑀓𑀸𑀭𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀯𑀲𑁆𑀲𑀸𑀯𑀸𑀲𑀁 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀅𑀕𑁆𑀕𑀳𑁂𑀲𑀺, 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀳𑀼𑀤𑁂𑀯 𑀅𑀜𑁆𑀜𑀣𑀢𑁆𑀢𑀁 𑀅𑀳𑀼 𑀤𑁄𑀫𑀦𑀲𑁆𑀲𑀦𑁆𑀢𑀺 𑀢𑁂𑀫𑀸𑀲𑀁 𑀤𑀸𑀦𑀁 𑀤𑀸𑀢𑀼𑀁, 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁, 𑀇𑀫𑀺𑀦𑀸 𑀘 𑀦𑀺𑀬𑀸𑀫𑁂𑀦 𑀯𑀻𑀲𑀢𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀧𑀝𑀺𑀚𑀕𑁆𑀕𑀺𑀢𑀼𑀁 𑀦𑀸𑀮𑀢𑁆𑀣𑀦𑁆𑀢𑀺 𑀅𑀮𑀸𑀪𑀁 𑀆𑀭𑀩𑁆𑀪 𑀘𑀺𑀢𑁆𑀢𑀜𑁆𑀜𑀣𑀢𑁆𑀢𑀁 𑀘𑀺𑀢𑁆𑀢𑀤𑁄𑀫𑀦𑀲𑁆𑀲𑀁 𑀅𑀳𑁄𑀲𑀺, 𑀦 𑀢𑀣𑀸𑀕𑀢𑀁 𑀆𑀭𑀩𑁆𑀪. 𑀓𑀲𑁆𑀫𑀸? 𑀲𑁄𑀢𑀸𑀧𑀦𑁆𑀦𑀢𑁆𑀢𑀸. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀩𑁆𑀭𑀸𑀳𑁆𑀫𑀡𑀪𑀢𑁆𑀢𑁄 𑀅𑀳𑁄𑀲𑀺. 𑀅𑀣𑁂𑀓𑀲𑁆𑀫𑀺𑀁 𑀲𑀫𑀬𑁂 𑀧𑀘𑁆𑀘𑀦𑁆𑀢𑁂 𑀓𑀼𑀧𑀺𑀢𑁂 𑀯𑀽𑀧𑀲𑀫𑀦𑀢𑁆𑀣𑀁 𑀕𑀘𑁆𑀙𑀦𑁆𑀢𑁄 𑀉𑀭𑀘𑁆𑀙𑀤𑀁 𑀦𑀸𑀫 𑀥𑀻𑀢𑀭𑀫𑀸𑀳 𑁋 ‘‘𑀅𑀫𑁆𑀫 𑀅𑀫𑁆𑀳𑀸𑀓𑀁 𑀤𑁂𑀯𑁂 𑀫𑀸 𑀧𑀫𑀚𑁆𑀚𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑀸 𑀢𑀁 𑀭𑀸𑀚𑀥𑀻𑀢𑀭𑀁 𑀤𑀺𑀲𑁆𑀯𑀸 𑀯𑀺𑀲𑀜𑁆𑀜𑀺𑀦𑁄 𑀅𑀳𑁂𑀲𑀼𑀁. 𑀓𑁂 𑀇𑀫𑁂 𑀘𑀸𑀢𑀺 𑀯𑀼𑀢𑁆𑀢𑁂 𑀢𑀼𑀫𑁆𑀳𑀸𑀓𑀁 𑀪𑀽𑀫𑀺𑀤𑁂𑀯𑀸𑀢𑀺. 𑀪𑀽𑀫𑀺𑀤𑁂𑀯𑀸 𑀦𑀸𑀫 𑀏𑀯𑀭𑀽𑀧𑀸 𑀳𑁄𑀦𑁆𑀢𑀻𑀢𑀺 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀲𑀸 𑀏𑀓𑀤𑀺𑀯𑀲𑀁 𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑀻 𑀞𑀺𑀢𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀅𑀕𑁆𑀕𑀲𑀸𑀯𑀓𑀁 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀲𑀼𑀡𑀫𑀸𑀦𑀸𑀬𑁂𑀯 𑀲𑁄𑀢𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 ‘‘𑀅𑀜𑁆𑀜𑁂𑀧𑀺 𑀪𑀺𑀓𑁆𑀔𑀽 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀢𑁆𑀣𑀸 𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀇𑀲𑀺𑀧𑀢𑀦𑁂 𑀯𑀲𑀢𑀻’’𑀢𑀺 𑀘 𑀲𑀼𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀅𑀤𑀸𑀲𑀺.

𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀢𑁄. 𑀅𑀣 𑀦𑀁 𑀧𑀞𑀫𑀢𑀭𑀫𑁂𑀯 𑀩𑁆𑀭𑀸𑀳𑁆𑀫𑀡𑀸 𑀆𑀕𑀦𑁆𑀢𑁆𑀯𑀸 𑀥𑀻𑀢𑀼 𑀅𑀯𑀡𑁆𑀡𑀁 𑀯𑀢𑁆𑀯𑀸 𑀧𑀭𑀺𑀪𑀺𑀦𑁆𑀤𑀺𑀁𑀲𑀼. 𑀭𑀸𑀚𑀸 𑀧𑀦 𑀥𑀻𑀢𑀼 𑀚𑀸𑀢𑀓𑀸𑀮𑁂𑀬𑁂𑀯 𑀯𑀭𑀁 𑀅𑀤𑀸𑀲𑀺. 𑀢𑀲𑁆𑀲𑀸 ‘‘𑀲𑀢𑁆𑀢 𑀤𑀺𑀯𑀲𑀸𑀦𑀺 𑀭𑀚𑁆𑀚𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀭𑀁 𑀕𑀡𑁆𑀳𑀺𑀁𑀲𑀼. 𑀅𑀣𑀲𑁆𑀲𑀸 𑀭𑀸𑀚𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀲𑀺. 𑀲𑀸 𑀲𑀢𑁆𑀣𑀸𑀭𑀁 𑀪𑁄𑀚𑀬𑀫𑀸𑀦𑀸 𑀭𑀸𑀚𑀸𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀩𑀳𑀺𑀲𑀸𑀡𑀺𑀬𑀁 𑀦𑀺𑀲𑀻𑀤𑀸𑀧𑁂𑀲𑀺. 𑀭𑀸𑀚𑀸 𑀲𑀢𑁆𑀣𑀼 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸𑀯 𑀲𑁄𑀢𑀸𑀧𑀦𑁆𑀦𑁄 𑀚𑀸𑀢𑁄. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀦𑀸𑀫 𑀢𑀣𑀸𑀕𑀢𑀁 𑀆𑀭𑀩𑁆𑀪 𑀆𑀖𑀸𑀢𑁄 𑀦𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀦 𑀢𑀣𑀸𑀕𑀢𑀁 𑀆𑀭𑀩𑁆𑀪𑀸’’𑀢𑀺.

𑀬𑀁 𑀇𑀘𑁆𑀙𑀢𑀺 𑀢𑀁 𑀳𑀭𑀢𑀽𑀢𑀺 𑀲𑁄 𑀓𑀺𑀭 𑀪𑀸𑀚𑀦𑀸𑀦𑀺 𑀧𑀘𑀺𑀢𑁆𑀯𑀸 𑀓𑀬𑀯𑀺𑀓𑁆𑀓𑀬𑀁 𑀦 𑀓𑀭𑁄𑀢𑀺, 𑀏𑀯𑀁 𑀧𑀦 𑀯𑀢𑁆𑀯𑀸 𑀤𑀸𑀭𑀼𑀢𑁆𑀣𑀸𑀬 𑀯𑀸 𑀫𑀢𑁆𑀢𑀺𑀓𑀢𑁆𑀣𑀸𑀬 𑀯𑀸 𑀧𑀮𑀸𑀮𑀢𑁆𑀣𑀸𑀬 𑀯𑀸 𑀅𑀭𑀜𑁆𑀜𑀁 𑀕𑀘𑁆𑀙𑀢𑀺. 𑀫𑀳𑀸𑀚𑀦𑀸 ‘‘𑀖𑀝𑀺𑀓𑀸𑀭𑁂𑀦 𑀪𑀸𑀚𑀦𑀸𑀦𑀺 𑀧𑀓𑁆𑀓𑀸𑀦𑀻’’𑀢𑀺 𑀲𑀼𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀢𑀡𑁆𑀟𑀼𑀮𑀮𑁄𑀡𑀤𑀥𑀺𑀢𑁂𑀮𑀨𑀸𑀡𑀺𑀢𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺. 𑀲𑀘𑁂 𑀪𑀸𑀚𑀦𑀁 𑀫𑀳𑀕𑁆𑀖𑀁 𑀳𑁄𑀢𑀺, 𑀫𑀽𑀮𑀁 𑀅𑀧𑁆𑀧𑀁, 𑀬𑀁 𑀯𑀸 𑀢𑀁 𑀯𑀸 𑀤𑀢𑁆𑀯𑀸 𑀕𑀡𑁆𑀳𑀸𑀫𑀸𑀢𑀺 𑀢𑀁 𑀦 𑀕𑀡𑁆𑀳𑀦𑁆𑀢𑀺. 𑀥𑀫𑁆𑀫𑀺𑀓𑁄 𑀯𑀸𑀡𑀺𑀚𑁄 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀉𑀧𑀝𑁆𑀞𑀳𑀢𑀺, 𑀩𑀳𑀼 𑀦𑁄 𑀅𑀓𑀼𑀲𑀮𑀁 𑀪𑀯𑀺𑀲𑁆𑀲𑀢𑀻𑀢𑀺 𑀧𑀼𑀦 𑀕𑀦𑁆𑀢𑁆𑀯𑀸 𑀫𑀽𑀮𑀁 𑀆𑀳𑀭𑀦𑁆𑀢𑀺. 𑀲𑀘𑁂 𑀧𑀦 𑀪𑀸𑀚𑀦𑀁 𑀅𑀧𑁆𑀧𑀕𑁆𑀖𑀁 𑀳𑁄𑀢𑀺, 𑀆𑀪𑀢𑀁 𑀫𑀽𑀮𑀁 𑀩𑀳𑀼, 𑀥𑀫𑁆𑀫𑀺𑀓𑁄 𑀯𑀸𑀡𑀺𑀚𑁄, 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀻𑀢𑀺 𑀬𑀣𑀸𑀪𑀢𑀁 𑀖𑀭𑀲𑀸𑀫𑀺𑀓𑀸 𑀯𑀺𑀬 𑀲𑀸𑀥𑀼𑀓𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀏𑀯𑀁𑀕𑀼𑀡𑁄 𑀧𑀦 𑀓𑀲𑁆𑀫𑀸 𑀦 𑀧𑀩𑁆𑀩𑀚𑀢𑀻𑀢𑀺. 𑀭𑀜𑁆𑀜𑁄 𑀯𑀘𑀦𑀧𑀣𑀁 𑀧𑀘𑁆𑀙𑀺𑀦𑁆𑀤𑀦𑁆𑀢𑁄 𑀅𑀦𑁆𑀥𑁂 𑀚𑀺𑀡𑁆𑀡𑁂 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀢𑀻𑀢𑀺 𑀆𑀳.

𑁨𑁮𑁯. 𑀓𑁄 𑀦𑀼 𑀔𑁄𑀢𑀺 𑀓𑀼𑀳𑀺𑀁 𑀦𑀼 𑀔𑁄. 𑀓𑀼𑀫𑁆𑀪𑀺𑀬𑀸𑀢𑀺 𑀉𑀓𑁆𑀔𑀮𑀺𑀢𑁄. 𑀧𑀭𑀺𑀬𑁄𑀕𑀸𑀢𑀺 𑀲𑀽𑀧𑀪𑀸𑀚𑀦𑀢𑁄. 𑀧𑀭𑀺𑀪𑀼𑀜𑁆𑀚𑀸𑀢𑀺 𑀪𑀼𑀜𑁆𑀚. 𑀓𑀲𑁆𑀫𑀸 𑀧𑀦𑁂𑀢𑁂 𑀏𑀯𑀁 𑀯𑀤𑀦𑁆𑀢𑀺? 𑀖𑀝𑀺𑀓𑀸𑀭𑁄 𑀓𑀺𑀭 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀲𑀽𑀧𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀪𑁄𑀚𑁂𑀢𑁆𑀯𑀸 𑀲𑀬𑀫𑁆𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀪𑀕𑀯𑀢𑁄 𑀯𑀟𑁆𑀠𑀫𑀸𑀦𑀓𑀁 𑀪𑀢𑁆𑀢𑀲𑀽𑀧𑀁 𑀧𑀝𑁆𑀞𑀧𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀆𑀥𑀸𑀭𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀉𑀤𑀓𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀲𑀜𑁆𑀜𑀁 𑀤𑀢𑁆𑀯𑀸 𑀅𑀭𑀜𑁆𑀜𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀏𑀯𑀁 𑀯𑀤𑀦𑁆𑀢𑀺. 𑀅𑀪𑀺𑀯𑀺𑀲𑁆𑀲𑀢𑁆𑀣𑁄𑀢𑀺 𑀅𑀢𑀺𑀯𑀺𑀲𑁆𑀲𑀢𑁆𑀣𑁄. 𑀧𑀻𑀢𑀺𑀲𑀼𑀔𑀁 𑀦 𑀯𑀺𑀚𑀳𑀢𑀻𑀢𑀺 𑀦 𑀦𑀺𑀭𑀦𑁆𑀢𑀭𑀁 𑀯𑀺𑀚𑀳𑀢𑀺, 𑀅𑀣 𑀔𑁄 𑀭𑀢𑁆𑀢𑀺𑀪𑀸𑀕𑁂 𑀯𑀸 𑀤𑀺𑀯𑀲𑀪𑀸𑀕𑁂 𑀯𑀸 𑀕𑀸𑀫𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀔𑀡𑁂 𑁋 ‘‘𑀲𑀤𑁂𑀯𑀓𑁂 𑀦𑀸𑀫 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄 𑀫𑀬𑁆𑀳𑀁 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀲𑀳𑀢𑁆𑀣𑁂𑀦 𑀆𑀫𑀺𑀲𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀮𑀸𑀪𑀸 𑀯𑀢 𑀫𑁂’’𑀢𑀺 𑀅𑀦𑀼𑀲𑁆𑀲𑀭𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑀡𑁂 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁.

𑁨𑁯𑁦. 𑀓𑀴𑁄𑀧𑀺𑀬𑀸𑀢𑀺 𑀧𑀘𑁆𑀙𑀺𑀢𑁄. 𑀓𑀺𑀁 𑀧𑀦 𑀪𑀕𑀯𑀸 𑀏𑀯𑀫𑀓𑀸𑀲𑀻𑀢𑀺. 𑀧𑀘𑁆𑀘𑀬𑁄 𑀥𑀫𑁆𑀫𑀺𑀓𑁄, 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑁂 𑀪𑀢𑁆𑀢𑀲𑀤𑀺𑀲𑁄, 𑀢𑀲𑁆𑀫𑀸 𑀏𑀯𑀫𑀓𑀸𑀲𑀺. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀧𑀺 𑀘 𑀲𑀸𑀯𑀓𑀸𑀦𑀁𑀬𑁂𑀯 𑀳𑁄𑀢𑀺, 𑀩𑀼𑀤𑁆𑀥𑀸𑀦𑀁 𑀲𑀺𑀓𑁆𑀔𑀸𑀧𑀤𑀯𑁂𑀮𑀸 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀳𑀺 𑀭𑀜𑁆𑀜𑁄 𑀉𑀬𑁆𑀬𑀸𑀦𑁂 𑀧𑀼𑀧𑁆𑀨𑀨𑀮𑀸𑀦𑀺 𑀳𑁄𑀦𑁆𑀢𑀺, 𑀅𑀜𑁆𑀜𑁂𑀲𑀁 𑀢𑀸𑀦𑀺 𑀕𑀡𑁆𑀳𑀦𑁆𑀢𑀸𑀦𑀁 𑀦𑀺𑀕𑁆𑀕𑀳𑀁 𑀓𑀭𑁄𑀦𑁆𑀢𑀺, 𑀭𑀸𑀚𑀸 𑀬𑀣𑀸𑀭𑀼𑀘𑀺𑀬𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀏𑀯𑀁𑀲𑀫𑁆𑀧𑀤𑀫𑁂𑀢𑀁. 𑀧𑀭𑀲𑀫𑀼𑀤𑁆𑀤𑀯𑀸𑀲𑀻𑀣𑁂𑀭𑀸 𑀧𑀦 ‘‘𑀤𑁂𑀯𑀢𑀸 𑀓𑀺𑀭 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀤𑀁𑀲𑀽’’𑀢𑀺 𑀯𑀤𑀦𑁆𑀢𑀺.

𑁨𑁯𑁧. 𑀳𑀭𑀣, 𑀪𑀦𑁆𑀢𑁂, 𑀳𑀭𑀣 𑀪𑀤𑁆𑀭𑀫𑀼𑀔𑀸𑀢𑀺 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 ‘‘𑀓𑀼𑀳𑀺𑀁 𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑁋 ‘‘𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓’’𑀦𑁆𑀢𑀺 𑀯𑀤𑀢𑀺, 𑀓𑀼𑀳𑀺𑀁 𑀦𑀼 𑀔𑁄 𑀕𑀘𑁆𑀙𑀢𑀺, 𑀲𑀢𑁆𑀣𑀼 𑀯𑀲𑀦𑀝𑁆𑀞𑀸𑀦𑀲𑁆𑀲 𑀑𑀯𑀲𑁆𑀲𑀓𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀢𑀻𑀢𑀺 𑀧𑀼𑀢𑁆𑀢𑁂 𑀅𑀧𑀭𑀸𑀥𑀲𑀜𑁆𑀜𑀺𑀦𑁄 𑀕𑀳𑀡𑁂 𑀢𑀼𑀝𑁆𑀞𑀘𑀺𑀢𑁆𑀢𑀸 𑀏𑀯𑀫𑀸𑀳𑀁𑀲𑀼.

𑀢𑁂𑀫𑀸𑀲𑀁 𑀆𑀓𑀸𑀲𑀘𑁆𑀙𑀤𑀦𑀁 𑀅𑀝𑁆𑀞𑀸𑀲𑀻𑀢𑀺 𑀪𑀕𑀯𑀸 𑀓𑀺𑀭 𑀘𑀢𑀼𑀦𑁆𑀦𑀁 𑀯𑀲𑁆𑀲𑀺𑀓𑀸𑀦𑀁 𑀫𑀸𑀲𑀸𑀦𑀁 𑀏𑀓𑀁 𑀫𑀸𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀡𑀁 𑀆𑀳𑀭𑀸𑀧𑁂𑀲𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀬𑀁 𑀧𑀦𑁂𑀢𑁆𑀣 𑀧𑀤𑀢𑁆𑀣𑁄 𑁋 𑀆𑀓𑀸𑀲𑀁 𑀙𑀤𑀦𑀫𑀲𑁆𑀲𑀸𑀢𑀺 𑀆𑀓𑀸𑀲𑀘𑁆𑀙𑀤𑀦𑀁. 𑀦 𑀤𑁂𑀯𑁄𑀢𑀺𑀯𑀲𑁆𑀲𑀻𑀢𑀺 𑀓𑁂𑀯𑀮𑀁 𑀦𑀸𑀢𑀺𑀯𑀲𑁆𑀲𑀺, 𑀬𑀣𑀸 𑀧𑀦𑁂𑀢𑁆𑀣 𑀧𑀓𑀢𑀺𑀬𑀸 𑀘 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀸𑀢𑀝𑁆𑀞𑀸𑀦𑀩𑁆𑀪𑀦𑁆𑀢𑀭𑁂 𑀏𑀓𑀫𑁆𑀧𑀺 𑀉𑀤𑀓𑀩𑀺𑀦𑁆𑀤𑀼 𑀦𑀸𑀢𑀺𑀯𑀲𑁆𑀲𑀺, 𑀏𑀯𑀁 𑀖𑀦𑀙𑀤𑀦𑀕𑁂𑀳𑀩𑁆𑀪𑀦𑁆𑀢𑀭𑁂 𑀯𑀺𑀬 𑀦 𑀯𑀸𑀢𑀸𑀢𑀧𑀸𑀧𑀺 𑀆𑀩𑀸𑀥𑀁 𑀅𑀓𑀁𑀲𑀼, 𑀧𑀓𑀢𑀺𑀬𑀸 𑀉𑀢𑀼𑀨𑀭𑀡𑀫𑁂𑀯 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀢𑀲𑁆𑀫𑀺𑀁 𑀦𑀺𑀕𑀫𑁂 𑀙𑀟𑁆𑀟𑀺𑀢𑁂𑀧𑀺 𑀢𑀁 𑀞𑀸𑀦𑀁 𑀅𑀦𑁄𑀯𑀲𑁆𑀲𑀓𑀫𑁂𑀯 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀢𑀢𑁆𑀣 𑀲𑀸𑀝𑀓𑁂 𑀞𑀧𑁂𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀬𑀸𑀯 𑀓𑀧𑁆𑀧𑀼𑀝𑁆𑀞𑀸𑀦𑀸 𑀢𑀁 𑀞𑀸𑀦𑀁 𑀢𑀸𑀤𑀺𑀲𑀫𑁂𑀯 𑀪𑀯𑀺𑀲𑁆𑀲𑀢𑀺. 𑀢𑀜𑁆𑀘 𑀔𑁄 𑀧𑀦 𑀦 𑀢𑀣𑀸𑀕𑀢𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁂𑀦, 𑀢𑁂𑀲𑀁𑀬𑁂𑀯 𑀧𑀦 𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸. 𑀢𑁂𑀲𑀜𑁆𑀳𑀺 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀢𑁆𑀣 𑀦 𑀮𑀪𑁂𑀬𑁆𑀬, 𑀅𑀫𑁆𑀳𑀸𑀓𑀁 𑀦𑀸𑀫 𑀤𑁆𑀯𑀺𑀦𑁆𑀦𑀁 𑀅𑀦𑁆𑀥𑀓𑀸𑀦𑀁 𑀦𑀺𑀯𑁂𑀲𑀦𑀁 𑀉𑀢𑁆𑀢𑀺𑀡𑀁 𑀓𑀸𑀭𑁂𑀲𑀻’’𑀢𑀺 𑀦 𑀢𑀧𑁆𑀧𑀘𑁆𑀘𑀬𑀸 𑀤𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺 𑁋 ‘‘𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄 𑀅𑀫𑁆𑀳𑀸𑀓𑀁 𑀦𑀺𑀯𑁂𑀲𑀦𑀸 𑀢𑀺𑀡𑀁 𑀆𑀳𑀭𑀸𑀧𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀙𑀸𑀤𑀸𑀧𑁂𑀲𑀻’’𑀢𑀺 𑀧𑀦 𑀢𑁂𑀲𑀁 𑀅𑀦𑀧𑁆𑀧𑀓𑀁 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺. 𑀇𑀢𑀺 𑀢𑁂𑀲𑀁𑀬𑁂𑀯 𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀇𑀤𑀁 𑀧𑀸𑀝𑀺𑀳𑀸𑀭𑀺𑀬𑀁 𑀚𑀸𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁯𑁨. 𑀢𑀡𑁆𑀟𑀼𑀮𑀯𑀸𑀳𑀲𑀢𑀸𑀦𑀻𑀢𑀺 𑀏𑀢𑁆𑀣 𑀤𑁆𑀯𑁂 𑀲𑀓𑀝𑀸𑀦𑀺 𑀏𑀓𑁄 𑀯𑀸𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀤𑀼𑀧𑀺𑀬𑀜𑁆𑀘 𑀲𑀽𑀧𑁂𑀬𑁆𑀬𑀦𑁆𑀢𑀺 𑀲𑀽𑀧𑀢𑁆𑀣𑀸𑀬 𑀢𑀤𑀦𑀼𑀭𑀽𑀧𑀁 𑀢𑁂𑀮𑀨𑀸𑀡𑀺𑀢𑀸𑀤𑀺𑀁. 𑀯𑀻𑀲𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲 𑀢𑁂𑀫𑀸𑀲𑀢𑁆𑀣𑀸𑀬 𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀓𑀺𑀭 𑀲𑀜𑁆𑀜𑀸𑀬 𑀭𑀸𑀚𑀸 𑀏𑀢𑁆𑀢𑀓𑀁 𑀧𑁂𑀲𑁂𑀲𑀺. 𑀅𑀮𑀁 𑀫𑁂 𑀭𑀜𑁆𑀜𑁄𑀯 𑀳𑁄𑀢𑀽𑀢𑀺 𑀓𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀺? 𑀅𑀥𑀺𑀕𑀢𑀅𑀧𑁆𑀧𑀺𑀘𑁆𑀙𑀢𑀸𑀬. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀦𑀸𑀳𑀁 𑀭𑀜𑁆𑀜𑀸 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀓𑀣𑀁 𑀦𑀼 𑀔𑁄 𑀧𑁂𑀲𑁂𑀲𑀻’’𑀢𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀸 𑀩𑀸𑀭𑀸𑀡𑀲𑀺𑀁 𑀕𑀢𑁄, 𑀅𑀤𑁆𑀥𑀸 𑀲𑁄 𑀭𑀜𑁆𑀜𑁄 𑀯𑀲𑁆𑀲𑀸𑀯𑀸𑀲𑀁 𑀬𑀸𑀘𑀺𑀬𑀫𑀸𑀦𑁄 𑀫𑀬𑁆𑀳𑀁 𑀧𑀝𑀺𑀜𑁆𑀜𑀸𑀢𑀪𑀸𑀯𑀁 𑀆𑀭𑁄𑀘𑁂𑀢𑁆𑀯𑀸 𑀫𑀫 𑀕𑀼𑀡𑀓𑀣𑀁 𑀓𑀣𑁂𑀲𑀺, 𑀕𑀼𑀡𑀓𑀣𑀸𑀬 𑀮𑀤𑁆𑀥𑀮𑀸𑀪𑁄 𑀧𑀦 𑀦𑀝𑁂𑀦 𑀦𑀘𑁆𑀘𑀺𑀢𑁆𑀯𑀸 𑀮𑀤𑁆𑀥𑀁 𑀯𑀺𑀬 𑀕𑀸𑀬𑀓𑁂𑀦 𑀕𑀸𑀬𑀺𑀢𑁆𑀯𑀸 𑀮𑀤𑁆𑀥𑀁 𑀯𑀺𑀬 𑀘 𑀳𑁄𑀢𑀺. 𑀓𑀺𑀁 𑀫𑀬𑁆𑀳𑀁 𑀇𑀫𑀺𑀦𑀸, 𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑁂𑀦 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀧𑀺 𑀉𑀧𑀝𑁆𑀞𑀸𑀦𑀁 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀖𑀝𑀺𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑀁. 𑀢𑀢𑁆𑀣 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀦𑁆𑀢𑀺 𑀣𑀼𑀮𑁆𑀮𑀓𑁄𑀝𑁆𑀞𑀁 𑀧𑀭𑀺𑀧𑀼𑀡𑁆𑀡𑀓𑁄𑀝𑁆𑀞𑀸𑀕𑀸𑀭𑀁. 𑀲𑁄 𑀓𑀺𑀭 𑀚𑀦𑀧𑀤𑁄 𑀦𑀺𑀘𑁆𑀘𑀲𑀲𑁆𑀲𑁄 𑀲𑀤𑀸 𑀩𑀻𑀚𑀪𑀡𑁆𑀟𑀁 𑀦𑀺𑀓𑁆𑀔𑀫𑀢𑀺, 𑀔𑀮𑀪𑀡𑁆𑀟𑀁 𑀧𑀯𑀺𑀲𑀢𑀺. 𑀢𑁂𑀦 𑀢𑀲𑁆𑀫𑀺𑀁 𑀦𑀺𑀕𑀫𑁂 𑀓𑁄𑀝𑁆𑀞𑀸 𑀦𑀺𑀘𑁆𑀘𑀧𑀽𑀭𑀸𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑀦𑁆𑀢𑁂𑀯 𑀲𑀗𑁆𑀔𑀁 𑀕𑀢𑁄.

𑁨𑁯𑁪. 𑀭𑀝𑁆𑀞𑀧𑀸𑀮𑁄𑀢𑀺 𑀓𑀲𑁆𑀫𑀸 𑀭𑀝𑁆𑀞𑀧𑀸𑀮𑁄? 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀧𑀸𑀮𑁂𑀢𑀼𑀁 𑀲𑀫𑀢𑁆𑀣𑁄𑀢𑀺 𑀭𑀝𑁆𑀞𑀧𑀸𑀮𑁄. 𑀓𑀤𑀸 𑀧𑀦𑀲𑁆𑀲𑁂𑀢𑀁 𑀦𑀸𑀫𑀁 𑀉𑀧𑁆𑀧𑀦𑁆𑀦𑀦𑁆𑀢𑀺. 𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂. 𑀇𑀢𑁄 𑀳𑀺 𑀧𑀼𑀩𑁆𑀩𑁂 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀲𑀢𑁆𑀣𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀮𑁄𑀓𑀳𑀺𑀢𑀸𑀬 𑀘𑀸𑀭𑀺𑀓𑀁 𑀘𑀭𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀦𑀕𑀭𑀁 𑀳𑀁𑀲𑀯𑀢𑀻 𑀦𑀸𑀫, 𑀆𑀦𑀦𑁆𑀤𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀚𑀸𑀢𑀸 𑀦𑀸𑀫 𑀚𑀦𑀺𑀓𑀸, 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀲𑀢𑁆𑀣𑀼𑀦𑁄’’𑀢𑀺. (𑀩𑀼. 𑀯𑀁. 𑁧𑁨.𑁧𑁯);

𑀧𑀤𑀼𑀫𑀼𑀢𑁆𑀢𑀭𑁂 𑀧𑀦 𑀅𑀦𑀼𑀧𑁆𑀧𑀦𑁆𑀦𑁂 𑀏𑀯 𑀳𑀁𑀲𑀯𑀢𑀺𑀬𑀸 𑀤𑁆𑀯𑁂 𑀓𑀼𑀝𑀼𑀫𑁆𑀩𑀺𑀓𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀓𑀧𑀡𑀤𑁆𑀥𑀺𑀓𑀬𑀸𑀘𑀓𑀸𑀤𑀻𑀦𑀁 𑀤𑀸𑀦𑀁 𑀧𑀝𑁆𑀞𑀧𑀬𑀺𑀁𑀲𑀼. 𑀢𑀤𑀸 𑀧𑀩𑁆𑀩𑀢𑀯𑀸𑀲𑀺𑀦𑁄 𑀧𑀜𑁆𑀘𑀲𑀢𑀸 𑀢𑀸𑀧𑀲𑀸 𑀳𑀁𑀲𑀯𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑀸. 𑀢𑁂 𑀤𑁆𑀯𑁂𑀧𑀺 𑀚𑀦𑀸 𑀢𑀸𑀧𑀲𑀕𑀡𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀉𑀧𑀝𑁆𑀞𑀳𑀺𑀁𑀲𑀼. 𑀢𑀸𑀧𑀲𑀸 𑀓𑀺𑀜𑁆𑀘𑀺𑀓𑀸𑀮𑀁 𑀯𑀲𑀺𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑀫𑁂𑀯 𑀕𑀢𑀸. 𑀤𑁆𑀯𑁂 𑀲𑀗𑁆𑀖𑀢𑁆𑀣𑁂𑀭𑀸 𑀑𑀳𑀻𑀬𑀺𑀁𑀲𑀼. 𑀢𑀤𑀸 𑀢𑁂𑀲𑀁 𑀢𑁂 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀦𑀁 𑀅𑀓𑀁𑀲𑀼. 𑀢𑀸𑀧𑀲𑁂𑀲𑀼 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁂𑀲𑀼 𑀏𑀓𑁄 𑀲𑀓𑁆𑀓𑀪𑀯𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑀺, 𑀏𑀓𑁄 𑀪𑀽𑀫𑀺𑀦𑁆𑀥𑀭𑀦𑀸𑀕𑀭𑀸𑀚𑀪𑀯𑀦𑀲𑁆𑀲.

𑀓𑀼𑀝𑀼𑀫𑁆𑀩𑀺𑀓𑁂𑀲𑀼 𑀏𑀓𑁄 𑀲𑀓𑁆𑀓𑀪𑀯𑀦𑀁 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀲𑀓𑁆𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀏𑀓𑁄 𑀦𑀸𑀕𑀪𑀯𑀦𑁂 𑀧𑀸𑀮𑀺𑀢𑀦𑀸𑀕𑀭𑀸𑀚𑀸 𑀦𑀸𑀫. 𑀢𑀁 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀁 𑀆𑀕𑀢𑀁 𑀤𑀺𑀲𑁆𑀯𑀸 𑀦𑀸𑀕𑀬𑁄𑀦𑀺𑀬𑀁 𑀅𑀪𑀺𑀭𑀫𑀲𑀻𑀢𑀺 𑀧𑀼𑀘𑁆𑀙𑀺. 𑀲𑁄 𑀦𑀸𑀪𑀺𑀭𑀫𑀸𑀫𑀻𑀢𑀺 𑀆𑀳. 𑀢𑁂𑀦 𑀳𑀺 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀤𑀸𑀦𑀁 𑀤𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀢𑁆𑀣𑀦𑀁 𑀓𑀭𑁄𑀳𑀺, 𑀉𑀪𑁄 𑀲𑀼𑀔𑀁 𑀯𑀲𑀺𑀲𑁆𑀲𑀸𑀫𑀸𑀢𑀺. 𑀦𑀸𑀕𑀭𑀸𑀚𑀸 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑀲𑁆𑀲 𑀪𑀕𑀯𑀢𑁄 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀤𑀫𑀸𑀦𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀤𑀲𑀩𑀮𑀲𑁆𑀲 𑀧𑀼𑀢𑁆𑀢𑀁 𑀉𑀧𑀭𑁂𑀯𑀢𑀁 𑀦𑀸𑀫 𑀲𑀸𑀫𑀡𑁂𑀭𑀁 𑀤𑀺𑀲𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀤𑀺𑀩𑁆𑀩𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀪𑀕𑀯𑀸 𑀅𑀦𑀸𑀕𑀢𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀦𑀸𑀫 𑀩𑀼𑀤𑁆𑀥𑀲𑁆𑀲 𑀧𑀼𑀢𑁆𑀢𑁄 𑀭𑀸𑀳𑀼𑀮𑀓𑀼𑀫𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸 ‘‘𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀢𑁂 𑀧𑀢𑁆𑀣𑀦𑀸’’𑀢𑀺 𑀓𑀣𑁂𑀲𑀺. 𑀦𑀸𑀕𑀭𑀸𑀚𑀸 𑀢𑀫𑀢𑁆𑀣𑀁 𑀲𑀓𑁆𑀓𑀲𑁆𑀲 𑀓𑀣𑁂𑀲𑀺. 𑀲𑀓𑁆𑀓𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀣𑁂𑀯 𑀲𑀢𑁆𑀢𑀸𑀳𑀁 𑀤𑀸𑀦𑀁 𑀤𑀢𑁆𑀯𑀸 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀧𑀸𑀮𑁂𑀢𑀼𑀁 𑀲𑀫𑀢𑁆𑀣𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀁 𑀭𑀝𑁆𑀞𑀧𑀸𑀮𑀁 𑀦𑀸𑀫 𑀓𑀼𑀮𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀅𑀳𑀫𑁆𑀧𑀺 𑀅𑀦𑀸𑀕𑀢𑁂 𑀮𑁄𑀓𑀲𑁆𑀫𑀺𑀁 𑀢𑀼𑀫𑁆𑀳𑀸𑀤𑀺𑀲𑁂 𑀩𑀼𑀤𑁆𑀥𑁂 𑀉𑀧𑁆𑀧𑀦𑁆𑀦𑁂 𑀪𑀺𑀦𑁆𑀦𑀁 𑀭𑀝𑁆𑀞𑀁 𑀲𑀦𑁆𑀥𑀸𑀭𑁂𑀢𑀼𑀁 𑀧𑀸𑀮𑁂𑀢𑀼𑀁 𑀲𑀫𑀢𑁆𑀣𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀬𑀁 𑀓𑀼𑀮𑀧𑀼𑀢𑁆𑀢𑁄 𑀯𑀺𑀬 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀭𑀝𑁆𑀞𑀧𑀸𑀮𑁄 𑀦𑀸𑀫 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀫𑀓𑀸𑀲𑀺. 𑀲𑀢𑁆𑀣𑀸 𑀲𑀫𑀺𑀚𑁆𑀛𑀦𑀓𑀪𑀸𑀯𑀁 𑀜𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀭𑀸𑀚𑀺𑀓𑀁 𑀘𑀸𑀢𑀼𑀯𑀡𑁆𑀡𑀁, 𑀧𑁄𑀲𑁂𑀢𑀼𑀁 𑀬𑀁 𑀧𑀳𑁄𑀲𑁆𑀲𑀢𑀺;

𑀭𑀝𑁆𑀞𑀧𑀸𑀮𑀓𑀼𑀮𑀁 𑀦𑀸𑀫, 𑀢𑀢𑁆𑀣 𑀚𑀸𑀬𑀺𑀲𑁆𑀲𑀢𑁂 𑀅𑀬’’𑀦𑁆𑀢𑀺. 𑁋

𑀏𑀯𑀁 𑀧𑀤𑀼𑀫𑀼𑀢𑁆𑀢𑀭𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀢𑀲𑁆𑀲𑁂𑀢𑀁 𑀦𑀸𑀫𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑀤𑀳𑁄𑀲𑀻𑀢𑀺 𑀓𑀺𑀁 𑀅𑀳𑁄𑀲𑀺? 𑀬𑀣𑀸 𑀬𑀣𑀸 𑀔𑁄𑀢𑀺𑀆𑀤𑀺. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀓𑀣𑀸 𑁋 𑀅𑀳𑀁 𑀔𑁄 𑀬𑁂𑀦 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀢𑁂𑀦 𑀢𑁂𑀦 𑀫𑁂 𑀉𑀧𑀧𑀭𑀺𑀓𑁆𑀔𑀢𑁄 𑀏𑀯𑀁 𑀳𑁄𑀢𑀺 𑁋 ‘‘𑀬𑀤𑁂𑀢𑀁 𑀲𑀺𑀓𑁆𑀔𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀤𑀺𑀯𑀲𑀫𑁆𑀧𑀺 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀘𑀭𑀺𑀢𑀩𑁆𑀩𑀁, 𑀏𑀓𑀤𑀺𑀯𑀲𑀫𑁆𑀧𑀺 𑀘 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀻𑀦𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁, 𑀲𑀗𑁆𑀔𑀮𑀺𑀔𑀺𑀢𑀁 𑀯𑀺𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲𑀁 𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕𑀁 𑀓𑀢𑁆𑀯𑀸 𑀘𑀭𑀺𑀢𑀩𑁆𑀩𑀁, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁…𑀧𑁂… 𑀘𑀭𑀺𑀢𑀼𑀁, 𑀬𑀁𑀦𑀽𑀦𑀸𑀳𑀁 𑀓𑁂𑀲𑀜𑁆𑀘 𑀫𑀲𑁆𑀲𑀼𑀜𑁆𑀘 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀭𑀲𑀧𑀻𑀢𑀢𑀸𑀬 𑀓𑀸𑀲𑀸𑀬𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺.

𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑁂𑀲𑀼 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀭𑀝𑁆𑀞𑀧𑀸𑀮𑁄 𑀅𑀦𑀼𑀝𑁆𑀞𑀺𑀢𑁂𑀲𑀼 𑀢𑁂𑀲𑀼 𑀦 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀓𑀲𑁆𑀫𑀸? 𑀢𑀢𑁆𑀣𑀲𑁆𑀲 𑀩𑀳𑀽 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀲𑀦𑁆𑀢𑀺, 𑀢𑁂 𑁋 ‘‘𑀢𑁆𑀯𑀁 𑀫𑀸𑀢𑀸𑀧𑀺𑀢𑀽𑀦𑀁 𑀏𑀓𑀧𑀼𑀢𑁆𑀢𑀓𑁄, 𑀦 𑀮𑀩𑁆𑀪𑀸 𑀢𑀬𑀸 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺 𑀩𑀸𑀳𑀸𑀬𑀫𑁆𑀧𑀺 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑁂𑀬𑁆𑀬𑀼𑀁, 𑀢𑀢𑁄 𑀧𑀩𑁆𑀩𑀚𑁆𑀚𑀸𑀬 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻𑀢𑀺 𑀲𑀳𑁂𑀯 𑀧𑀭𑀺𑀲𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀓𑁂𑀦𑀘𑀺 𑀲𑀭𑀻𑀭𑀓𑀺𑀘𑁆𑀘𑀮𑁂𑀲𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁆𑀫 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀭𑀝𑁆𑀞𑀧𑀸𑀮𑁄 𑀓𑀼𑀮𑀧𑀼𑀢𑁆𑀢𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀣𑀼𑀮𑁆𑀮𑀓𑁄𑀝𑁆𑀞𑀺𑀓𑁂𑀲𑀼…𑀧𑁂… 𑀧𑀩𑁆𑀩𑀸𑀚𑁂𑀢𑀼 𑀫𑀁 𑀪𑀕𑀯𑀸’’𑀢𑀺. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀭𑀸𑀳𑀼𑀮𑀓𑀼𑀫𑀸𑀭𑀲𑁆𑀲 𑀧𑀩𑁆𑀩𑀚𑀺𑀢𑀢𑁄 𑀧𑀪𑀼𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀁 𑀧𑀼𑀢𑁆𑀢𑀁 𑀦 𑀧𑀩𑁆𑀩𑀸𑀚𑁂𑀢𑀺, 𑀢𑀲𑁆𑀫𑀸 𑀦𑀁 𑀧𑀼𑀘𑁆𑀙𑀺 𑀅𑀦𑀼𑀜𑁆𑀜𑀸𑀢𑁄𑀲𑀺 𑀧𑀦 𑀢𑁆𑀯𑀁, 𑀭𑀝𑁆𑀞𑀧𑀸𑀮, 𑀫𑀸𑀢𑀸𑀧𑀺𑀢𑀽𑀳𑀺…𑀧𑁂… 𑀧𑀩𑁆𑀩𑀚𑁆𑀚𑀸𑀬𑀸𑀢𑀺.

𑁨𑁯𑁫. 𑀅𑀫𑁆𑀫𑀢𑀸𑀢𑀸𑀢𑀺 𑀏𑀢𑁆𑀣 𑀅𑀫𑁆𑀫𑀸𑀢𑀺 𑀫𑀸𑀢𑀭𑀁 𑀆𑀮𑀧𑀢𑀺, 𑀢𑀸𑀢𑀸𑀢𑀺 𑀧𑀺𑀢𑀭𑀁. 𑀏𑀓𑀧𑀼𑀢𑁆𑀢𑀓𑁄𑀢𑀺 𑀏𑀓𑁄𑀯 𑀧𑀼𑀢𑁆𑀢𑀓𑁄, 𑀅𑀜𑁆𑀜𑁄 𑀓𑁄𑀘𑀺 𑀚𑁂𑀝𑁆𑀞𑁄 𑀯𑀸 𑀓𑀦𑀺𑀝𑁆𑀞𑁄 𑀯𑀸 𑀦𑀢𑁆𑀣𑀺. 𑀏𑀢𑁆𑀣 𑀘 𑀏𑀓𑀧𑀼𑀢𑁆𑀢𑁄𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀓𑀫𑁆𑀧𑀸𑀯𑀲𑁂𑀦 𑀏𑀓𑀧𑀼𑀢𑁆𑀢𑀓𑁄𑀢𑀺 𑀯𑀼𑀢𑁆𑀢𑀁. 𑀧𑀺𑀬𑁄𑀢𑀺 𑀧𑀻𑀢𑀺𑀚𑀦𑀓𑁄. 𑀫𑀦𑀸𑀧𑁄𑀢𑀺 𑀫𑀦𑀯𑀟𑁆𑀠𑀦𑀓𑁄. 𑀲𑀼𑀔𑁂𑀥𑀺𑀢𑁄𑀢𑀺 𑀲𑀼𑀔𑁂𑀦 𑀏𑀥𑀺𑀢𑁄, 𑀲𑀼𑀔𑀲𑀁𑀯𑀟𑁆𑀠𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀔𑀧𑀭𑀺𑀪𑀢𑁄𑀢𑀺 𑀲𑀼𑀔𑁂𑀦 𑀧𑀭𑀺𑀪𑀢𑁄, 𑀚𑀸𑀢𑀓𑀸𑀮𑀢𑁄 𑀧𑀪𑀼𑀢𑀺 𑀥𑀸𑀢𑀻𑀳𑀺 𑀅𑀗𑁆𑀓𑀢𑁄 𑀅𑀗𑁆𑀓𑀁 𑀆𑀳𑀭𑀺𑀢𑁆𑀯𑀸 𑀥𑀸𑀭𑀺𑀬𑀫𑀸𑀦𑁄 𑀅𑀲𑁆𑀲𑀓𑀭𑀣𑀓𑀸𑀤𑀻𑀳𑀺 𑀩𑀸𑀮𑀓𑀻𑀴𑀦𑀓𑁂𑀳𑀺 𑀓𑀻𑀴𑀬𑀫𑀸𑀦𑁄 𑀲𑀸𑀤𑀼𑀭𑀲𑀪𑁄𑀚𑀦𑀁 𑀪𑁄𑀚𑀬𑀫𑀸𑀦𑁄 𑀲𑀼𑀔𑁂𑀦 𑀧𑀭𑀺𑀳𑀝𑁄. 𑀦 𑀢𑁆𑀯𑀁, 𑀢𑀸𑀢 𑀭𑀝𑁆𑀞𑀧𑀸𑀮, 𑀓𑀲𑁆𑀲𑀘𑀺 𑀤𑀼𑀓𑁆𑀔𑀲𑁆𑀲 𑀚𑀸𑀦𑀸𑀲𑀻𑀢𑀺 𑀢𑁆𑀯𑀁, 𑀢𑀸𑀢 𑀭𑀝𑁆𑀞𑀧𑀸𑀮 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀮𑀪𑀸𑀕𑀁 𑀤𑀼𑀓𑁆𑀔𑀲𑁆𑀲 𑀦 𑀚𑀸𑀦𑀸𑀲𑀺 𑀦 𑀲𑀭𑀲𑀻𑀢𑀺 𑀅𑀢𑁆𑀣𑁄. 𑀫𑀭𑀡𑁂𑀦𑀧𑀺 𑀢𑁂 𑀫𑀬𑀁 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀲𑀘𑁂𑀧𑀺 𑀢𑀯 𑀅𑀫𑁆𑀳𑁂𑀲𑀼 𑀚𑀻𑀯𑀫𑀸𑀦𑁂𑀲𑀼 𑀫𑀭𑀡𑀁 𑀪𑀯𑁂𑀬𑁆𑀬, 𑀢𑁂𑀦 𑀢𑁂 𑀫𑀭𑀡𑁂𑀦𑀧𑀺 𑀫𑀬𑀁 𑀅𑀓𑀸𑀫𑀓𑀸 𑀅𑀦𑀺𑀘𑁆𑀙𑀓𑀸 𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫, 𑀢𑀬𑀸 𑀯𑀺𑀬𑁄𑀕𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀫𑀬𑀁 𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀧𑀦 𑀓𑀺𑀁 𑀦𑀸𑀫 𑀢𑀁 𑀓𑀸𑀭𑀡𑀁, 𑀬𑁂𑀦 𑀫𑀬𑀁 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫. 𑀅𑀣 𑀯𑀸 𑀓𑀺𑀁 𑀧𑀦 𑀫𑀬𑀁 𑀢𑀦𑁆𑀢𑀺 𑀓𑁂𑀦 𑀧𑀦 𑀓𑀸𑀭𑀡𑁂𑀦 𑀫𑀬𑀁 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁨𑁯𑁬. 𑀢𑀢𑁆𑀣𑁂𑀯𑀸𑀢𑀺 𑀬𑀢𑁆𑀣 𑀦𑀁 𑀞𑀺𑀢𑀁 𑀫𑀸𑀢𑀸𑀧𑀺𑀢𑀭𑁄 𑀦𑀸𑀦𑀼𑀚𑀸𑀦𑀺𑀁𑀲𑀼, 𑀢𑀢𑁆𑀣𑁂𑀯 𑀞𑀸𑀦𑁂. 𑀅𑀦𑀦𑁆𑀢𑀭𑀳𑀺𑀢𑀸𑀬𑀸𑀢𑀺 𑀓𑁂𑀦𑀘𑀺 𑀅𑀢𑁆𑀣𑀭𑀡𑁂𑀦 𑀅𑀦𑀢𑁆𑀣𑀢𑀸𑀬. 𑀧𑀭𑀺𑀘𑀸𑀭𑁂𑀳𑀻𑀢𑀺 𑀕𑀦𑁆𑀥𑀩𑁆𑀩𑀦𑀝𑀦𑀸𑀝𑀓𑀸𑀤𑀻𑀦𑀺 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀢𑀢𑁆𑀣 𑀲𑀳𑀸𑀬𑀓𑁂𑀳𑀺 𑀲𑀤𑁆𑀥𑀺𑀁 𑀬𑀣𑀸𑀲𑀼𑀔𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀭𑁂𑀳𑀺 𑀲𑀜𑁆𑀘𑀸𑀭𑁂𑀳𑀺, 𑀇𑀢𑁄 𑀘𑀺𑀢𑁄 𑀘 𑀉𑀧𑀦𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀧𑀭𑀺𑀘𑀸𑀭𑁂𑀳𑀻𑀢𑀺 𑀕𑀦𑁆𑀥𑀩𑁆𑀩𑀦𑀝𑀦𑀸𑀝𑀓𑀸𑀤𑀻𑀦𑀺 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀳𑀸𑀬𑀓𑁂𑀳𑀺 𑀲𑀤𑁆𑀥𑀺𑀁 𑀮𑀴 𑀉𑀧𑀮𑀴 𑀭𑀫, 𑀓𑀻𑀴𑀲𑁆𑀲𑀽𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑁂𑀳𑀺 𑀲𑀤𑁆𑀥𑀺𑀁 𑀪𑁄𑀕𑁂 𑀪𑀼𑀜𑁆𑀚𑀦𑁆𑀢𑁄. 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄𑀢𑀺 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀆𑀭𑀩𑁆𑀪 𑀤𑀸𑀦𑀧𑁆𑀧𑀤𑀸𑀦𑀸𑀤𑀻𑀦𑀺 𑀲𑀼𑀕𑀢𑀺𑀫𑀕𑁆𑀕𑀲𑀁𑀲𑁄𑀥𑀓𑀸𑀦𑀺 𑀓𑀼𑀲𑀮𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄. 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀓𑀣𑀸𑀦𑀼𑀧𑁆𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑀦𑀢𑁆𑀣𑀁 𑀦𑀺𑀭𑀸𑀮𑀸𑀧𑀲𑀮𑁆𑀮𑀸𑀧𑁄 𑀅𑀳𑁄𑀲𑀺.

𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀧𑀝𑀺𑀯𑀘𑀦𑀫𑁆𑀧𑀺 𑀅𑀮𑀪𑀫𑀸𑀦𑀸 𑀲𑀳𑀸𑀬𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀲 𑀯𑁄 𑀲𑀳𑀸𑀬𑀓𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄, 𑀦𑀺𑀯𑀸𑀭𑁂𑀣 𑀦’’𑀦𑁆𑀢𑀺 𑀆𑀳𑀁𑀲𑀼. 𑀢𑁂𑀧𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀯𑁄𑀘𑀼𑀁, 𑀢𑁂𑀲𑀫𑁆𑀧𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 𑀅𑀣 𑀔𑁄 𑀭𑀝𑁆𑀞𑀧𑀸𑀮𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸…𑀧𑁂… 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺. 𑀅𑀣𑀲𑁆𑀲 𑀲𑀳𑀸𑀬𑀓𑀸𑀦𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀅𑀬𑀁 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑁄 𑀫𑀭𑀺𑀲𑁆𑀲𑀢𑀺, 𑀦 𑀓𑁄𑀘𑀺 𑀕𑀼𑀡𑁄 𑀮𑀩𑁆𑀪𑀢𑀺. 𑀧𑀩𑁆𑀩𑀚𑀺𑀢𑀁 𑀧𑀦 𑀦𑀁 𑀫𑀸𑀢𑀸𑀧𑀺𑀢𑀭𑁄𑀧𑀺 𑀓𑀸𑀮𑁂𑀦 𑀓𑀸𑀮𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀫𑀬𑀫𑁆𑀧𑀺 𑀧𑀲𑁆𑀲𑀺𑀲𑁆𑀲𑀸𑀫, 𑀧𑀩𑁆𑀩𑀚𑁆𑀚𑀸𑀧𑀺 𑀘 𑀦𑀸𑀫𑁂𑀲𑀸 𑀪𑀸𑀭𑀺𑀬𑀸, 𑀤𑀺𑀯𑀲𑁂 𑀤𑀺𑀯𑀲𑁂 𑀫𑀢𑁆𑀢𑀺𑀓𑀸𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁, 𑀏𑀓𑀲𑁂𑀬𑁆𑀬𑀁 𑀏𑀓𑀪𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀢𑀺𑀤𑀼𑀓𑁆𑀓𑀭𑀁, 𑀅𑀬𑀜𑁆𑀘 𑀲𑀼𑀔𑀼𑀫𑀸𑀮𑁄 𑀦𑀸𑀕𑀭𑀺𑀓𑀚𑀸𑀢𑀺𑀬𑁄, 𑀲𑁄 𑀢𑀁 𑀘𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀼𑀦 𑀇𑀥𑁂𑀯 𑀆𑀕𑀫𑀺𑀲𑁆𑀲𑀢𑀺, 𑀳𑀦𑁆𑀤𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀲𑁆𑀲𑀸𑀫𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀫𑀸𑀢𑀸𑀧𑀺𑀢𑀭𑁄𑀧𑀺 𑀦𑀁 ‘‘𑀧𑀩𑁆𑀩𑀚𑀺𑀢𑁂𑀦 𑀘 𑀧𑀦 𑀢𑁂 𑀫𑀸𑀢𑀸𑀧𑀺𑀢𑀭𑁄 𑀉𑀤𑁆𑀤𑀲𑁆𑀲𑁂𑀢𑀩𑁆𑀩𑀸’’𑀢𑀺 𑀇𑀫𑀁 𑀓𑀢𑀺𑀓𑀁 𑀓𑀢𑁆𑀯𑀸 𑀅𑀦𑀼𑀚𑀸𑀦𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀭𑀝𑁆𑀞𑀧𑀸𑀮𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀬𑁂𑀦 𑀭𑀝𑁆𑀞𑀧𑀸𑀮𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄…𑀧𑁂… 𑀅𑀦𑀼𑀜𑁆𑀜𑀸𑀢𑁄𑀲𑀺 𑀫𑀸𑀢𑀸𑀧𑀺𑀢𑀽𑀳𑀺…𑀧𑁂… 𑀉𑀤𑁆𑀤𑀲𑁆𑀲𑁂𑀢𑀩𑁆𑀩𑀸’’𑀢𑀺. 𑀢𑀢𑁆𑀣 𑀉𑀤𑁆𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀉𑀤𑁆𑀥𑀁 𑀤𑀲𑁆𑀲𑁂𑀢𑀩𑁆𑀩𑀸, 𑀬𑀣𑀸 𑀢𑀁 𑀓𑀸𑀮𑁂𑀦 𑀓𑀸𑀮𑀁 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀩𑁆𑀩𑀸.

𑁨𑁯𑁯. 𑀩𑀮𑀁 𑀕𑀳𑁂𑀢𑁆𑀯𑀸𑀢𑀺 𑀲𑀧𑁆𑀧𑀸𑀬𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀦𑁆𑀢𑁄 𑀉𑀘𑁆𑀙𑀸𑀤𑀦𑀸𑀤𑀻𑀳𑀺 𑀘 𑀓𑀸𑀬𑀁 𑀧𑀭𑀺𑀳𑀭𑀦𑁆𑀢𑁄 𑀓𑀸𑀬𑀩𑀮𑀁 𑀚𑀦𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀅𑀲𑁆𑀲𑀼𑀫𑀼𑀔𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀧𑀩𑁆𑀩𑀸𑀚𑁂𑀢𑀼 𑀫𑀁, 𑀪𑀦𑁆𑀢𑁂, 𑀪𑀕𑀯𑀸𑀢𑀺. 𑀪𑀕𑀯𑀸 𑀲𑀫𑀻𑀧𑁂 𑀞𑀺𑀢𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺 𑀪𑀺𑀓𑁆𑀔𑀼 𑀭𑀝𑁆𑀞𑀧𑀸𑀮𑀁 𑀧𑀩𑁆𑀩𑀸𑀚𑁂𑀳𑀺 𑀘𑁂𑀯 𑀉𑀧𑀲𑀫𑁆𑀧𑀸𑀤𑁂𑀳𑀺 𑀘𑀸’’𑀢𑀺. 𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀭𑀝𑁆𑀞𑀧𑀸𑀮𑀁 𑀓𑀼𑀮𑀧𑀼𑀢𑁆𑀢𑀁 𑀚𑀺𑀦𑀤𑀢𑁆𑀢𑀺𑀬𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀮𑀤𑁆𑀥𑀸 𑀧𑀩𑁆𑀩𑀸𑀚𑁂𑀲𑀺 𑀘𑁂𑀯 𑀉𑀧𑀲𑀫𑁆𑀧𑀸𑀤𑁂𑀲𑀺 𑀘. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀮𑀢𑁆𑀣 𑀔𑁄 𑀭𑀝𑁆𑀞𑀧𑀸𑀮𑁄 𑀓𑀼𑀮𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤’’𑀦𑁆𑀢𑀺.

𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄𑀢𑀺 𑀤𑁆𑀯𑀸𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀏𑀯𑀁 𑀯𑀺𑀳𑀭𑀦𑁆𑀢𑁄. 𑀦𑁂𑀬𑁆𑀬𑀧𑀼𑀕𑁆𑀕𑀮𑁄 𑀳𑀺 𑀅𑀬𑀫𑀸𑀬𑀲𑁆𑀫𑀸, 𑀢𑀲𑁆𑀫𑀸 𑀧𑀼𑀜𑁆𑀜𑀯𑀸 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄𑀧𑀺 𑀲𑀫𑀸𑀦𑁄 ‘‘𑀅𑀚𑁆𑀚 𑀅𑀚𑁆𑀚𑁂𑀯 𑀅𑀭𑀳𑀢𑁆𑀢’’𑀦𑁆𑀢𑀺 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀭𑁄 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀫𑀸𑀦𑀸 𑁋 ‘‘𑀢𑀬𑀸 𑀓𑀸𑀮𑁂𑀦 𑀓𑀸𑀮𑀁 𑀆𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀅𑀦𑀼𑀚𑀸𑀦𑀺𑀁𑀲𑀼, 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀔𑁄 𑀧𑀦 𑀫𑀸𑀢𑀸𑀧𑀺𑀢𑀭𑁄, 𑀅𑀳𑀜𑁆𑀘 𑀬𑁂𑀦𑀚𑁆𑀛𑀸𑀲𑀬𑁂𑀦 𑀧𑀩𑁆𑀩𑀚𑀺𑀢𑁄, 𑀲𑁄 𑀫𑁂 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀇𑀤𑀸𑀦𑀺 𑀪𑀕𑀯𑀦𑁆𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀉𑀧𑀲𑀗𑁆𑀓𑀫𑀺. 𑀫𑀦𑀲𑀸𑀓𑀸𑀲𑀻𑀢𑀺 ‘‘𑀓𑀺𑀁 𑀦𑀼 𑀔𑁄 𑀭𑀝𑁆𑀞𑀧𑀸𑀮𑁂 𑀕𑀢𑁂 𑀓𑁄𑀘𑀺 𑀉𑀧𑀤𑁆𑀤𑀯𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀦𑀲𑀺 𑀅𑀓𑀸𑀲𑀺. 𑀢𑀢𑁄 ‘‘𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀢𑀺 𑀦𑀼 𑀔𑁄 𑀭𑀝𑁆𑀞𑀧𑀸𑀮𑁄 𑀢𑀁 𑀫𑀤𑁆𑀤𑀺𑀢𑀼’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀅𑀭𑀳𑀢𑁆𑀢𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 𑀬𑀣𑀸 𑀪𑀕𑀯𑀸 𑀅𑀜𑁆𑀜𑀸𑀲𑀺…𑀧𑁂… 𑀓𑀸𑀮𑀁 𑀫𑀜𑁆𑀜𑀲𑀻𑀢𑀺.

𑀫𑀺𑀕𑀘𑀻𑀭𑁂𑀢𑀺 𑀏𑀯𑀁𑀦𑀸𑀫𑀓𑁂 𑀉𑀬𑁆𑀬𑀸𑀦𑁂. 𑀢𑀜𑁆𑀳𑀺 𑀭𑀜𑁆𑀜𑀸 𑁋 ‘‘𑀅𑀓𑀸𑀮𑁂 𑀲𑀫𑁆𑀧𑀢𑁆𑀢𑀧𑀩𑁆𑀩𑀚𑀺𑀢𑀸𑀦𑀁 𑀤𑀺𑀦𑁆𑀦𑀫𑁂𑀯 𑀇𑀤𑀁, 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀏𑀯𑀫𑀦𑀼𑀜𑁆𑀜𑀸𑀢𑀫𑁂𑀯 𑀅𑀳𑁄𑀲𑀺, 𑀢𑀲𑁆𑀫𑀸 𑀣𑁂𑀭𑁄 𑁋 ‘‘𑀫𑀫 𑀆𑀕𑀢𑀪𑀸𑀯𑀁 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑁂𑀲𑁆𑀲𑀸𑀫𑀺, 𑀢𑁂 𑀫𑁂 𑀧𑀸𑀤𑀥𑁄𑀯𑀦𑀉𑀡𑁆𑀳𑁄𑀤𑀓𑀧𑀸𑀤𑀫𑀓𑁆𑀔𑀦𑀢𑁂𑀮𑀸𑀤𑀻𑀦𑀺 𑀧𑁂𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀢𑁆𑀢𑀫𑁆𑀧𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀉𑀬𑁆𑀬𑀸𑀦𑀫𑁂𑀯 𑀧𑀸𑀯𑀺𑀲𑀺. 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀻𑀢𑀺 𑀤𑀼𑀢𑀺𑀬𑀤𑀺𑀯𑀲𑁂 𑀧𑀸𑀯𑀺𑀲𑀺.

𑀫𑀚𑁆𑀛𑀺𑀫𑀸𑀬𑀸𑀢𑀺 𑀲𑀢𑁆𑀢𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀖𑀭𑀲𑁆𑀲 𑀫𑀚𑁆𑀛𑀺𑀫𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂. 𑀉𑀮𑁆𑀮𑀺𑀔𑀸𑀧𑁂𑀢𑀻𑀢𑀺 𑀓𑀧𑁆𑀧𑀓𑁂𑀦 𑀓𑁂𑀲𑁂 𑀧𑀳𑀭𑀸𑀧𑁂𑀢𑀺. 𑀏𑀢𑀤𑀯𑁄𑀘𑀸𑀢𑀺 𑁋 ‘‘𑀇𑀫𑁂 𑀲𑀫𑀡𑀓𑀸 𑀅𑀫𑁆𑀳𑀸𑀓𑀁 𑀧𑀺𑀬𑀧𑀼𑀢𑁆𑀢𑀓𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀘𑁄𑀭𑀸𑀦𑀁 𑀳𑀢𑁆𑀣𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀬 𑀏𑀓𑀤𑀺𑀯𑀲𑀫𑁆𑀧𑀺 𑀦 𑀤𑀲𑁆𑀲𑀸𑀧𑁂𑀦𑁆𑀢𑀺, 𑀏𑀯𑀁 𑀨𑀭𑀼𑀲𑀓𑀸𑀭𑀓𑀸 𑀏𑀢𑁂 𑀧𑀼𑀦 𑀇𑀫𑀁 𑀞𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀏𑀢𑁆𑀢𑁄𑀯 𑀦𑀺𑀓𑀟𑁆𑀠𑀺𑀢𑀩𑁆𑀩𑀸 𑀏𑀢𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀁 ‘‘𑀇𑀫𑁂𑀳𑀺 𑀫𑀼𑀡𑁆𑀟𑀓𑁂𑀳𑀻’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀜𑀸𑀢𑀺𑀤𑀸𑀲𑀻𑀢𑀺 𑀜𑀸𑀢𑀓𑀸𑀦𑀁 𑀤𑀸𑀲𑀻. 𑀆𑀪𑀺𑀤𑁄𑀲𑀺𑀓𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀁 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀁 𑀧𑀽𑀢𑀺𑀪𑀽𑀢𑀁. 𑀢𑀢𑁆𑀣𑀸𑀬𑀁 𑀧𑀤𑀢𑁆𑀣𑁄 𑁋 𑀧𑀽𑀢𑀺𑀪𑀸𑀯𑀤𑁄𑀲𑁂𑀦 𑀅𑀪𑀺𑀪𑀽𑀢𑁄𑀢𑀺 𑀅𑀪𑀺𑀤𑁄𑀲𑁄, 𑀅𑀪𑀺𑀤𑁄𑀲𑁄𑀯 𑀆𑀪𑀺𑀤𑁄𑀲𑀺𑀓𑁄. 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀲𑁆𑀲𑁂𑀯 𑀦𑀸𑀫𑀲𑀜𑁆𑀜𑀸 𑀏𑀲𑀸 𑀬𑀤𑀺𑀤𑀁 𑀆𑀪𑀺𑀤𑁄𑀲𑀺𑀓𑁄𑀢𑀺, 𑀢𑀁 𑀆𑀪𑀺𑀤𑁄𑀲𑀺𑀓𑀁. 𑀓𑀼𑀫𑁆𑀫𑀸𑀲𑀦𑁆𑀢𑀺 𑀬𑀯𑀓𑀼𑀫𑁆𑀫𑀸𑀲𑀁. 𑀙𑀟𑁆𑀟𑁂𑀢𑀼𑀓𑀸𑀫𑀸 𑀳𑁄𑀢𑀻𑀢𑀺 𑀬𑀲𑁆𑀫𑀸 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀸𑀭𑀸𑀦𑀁 𑀕𑁄𑀭𑀽𑀧𑀸𑀦𑀫𑁆𑀧𑀺 𑀅𑀧𑀭𑀺𑀪𑁄𑀕𑀸𑀭𑀳𑁄, 𑀢𑀲𑁆𑀫𑀸 𑀦𑀁 𑀓𑀘𑀯𑀭𑀁 𑀯𑀺𑀬 𑀩𑀳𑀺 𑀙𑀟𑁆𑀟𑁂𑀢𑀼𑀓𑀸𑀫𑀸 𑀳𑁄𑀢𑀺. 𑀲𑀘𑁂𑀢𑀦𑁆𑀢𑀺 𑀲𑀘𑁂 𑀏𑀢𑀁. 𑀪𑀕𑀺𑀦𑀻𑀢𑀺 𑀅𑀭𑀺𑀬𑀯𑁄𑀳𑀸𑀭𑁂𑀦 𑀅𑀢𑁆𑀢𑀦𑁄 𑀥𑀸𑀢𑀺𑀁 𑀜𑀸𑀢𑀺𑀤𑀸𑀲𑀺𑀁 𑀆𑀮𑀧𑀢𑀺. 𑀙𑀟𑁆𑀟𑀦𑀻𑀬𑀥𑀫𑁆𑀫𑀦𑁆𑀢𑀺 𑀙𑀟𑁆𑀟𑁂𑀢𑀩𑁆𑀩𑀲𑀪𑀸𑀯𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀪𑀕𑀺𑀦𑀺 𑀏𑀢𑀁 𑀲𑀘𑁂 𑀩𑀳𑀺 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀦𑀺𑀲𑁆𑀲𑀝𑁆𑀞𑀧𑀭𑀺𑀕𑁆𑀕𑀳𑀁, 𑀇𑀥 𑀫𑁂 𑀧𑀢𑁆𑀢𑁂 𑀆𑀓𑀺𑀭𑀸𑀳𑀻’’𑀢𑀺. 𑀓𑀺𑀁 𑀧𑀦 𑀏𑀯𑀁 𑀯𑀢𑁆𑀢𑀼𑀁 𑀮𑀩𑁆𑀪𑀢𑀺, 𑀯𑀺𑀜𑁆𑀜𑀢𑁆𑀢𑀺 𑀯𑀸 𑀧𑀬𑀼𑀢𑁆𑀢𑀯𑀸𑀘𑀸 𑀯𑀸 𑀦 𑀳𑁄𑀢𑀻𑀢𑀺. 𑀦 𑀳𑁄𑀢𑀺. 𑀓𑀲𑁆𑀫𑀸? 𑀦𑀺𑀲𑁆𑀲𑀝𑁆𑀞𑀧𑀭𑀺𑀕𑁆𑀕𑀳𑀢𑁆𑀢𑀸. 𑀬𑀜𑁆𑀳𑀺 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀦𑀺𑀲𑁆𑀲𑀝𑁆𑀞𑀧𑀭𑀺𑀕𑁆𑀕𑀳𑀁, 𑀬𑀢𑁆𑀣 𑀲𑀸𑀫𑀺𑀓𑀸 𑀅𑀦𑀸𑀮𑀬𑀸 𑀳𑁄𑀦𑁆𑀢𑀺, 𑀢𑀁 𑀲𑀩𑁆𑀩𑀁 ‘‘𑀤𑁂𑀣 𑀆𑀳𑀭𑀣 𑀆𑀓𑀺𑀭𑀣𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 𑀳𑀺 𑀅𑀬𑀫𑀸𑀬𑀲𑁆𑀫𑀸 𑀅𑀕𑁆𑀕𑀅𑀭𑀺𑀬𑀯𑀁𑀲𑀺𑀓𑁄 𑀲𑀫𑀸𑀦𑁄𑀧𑀺 𑀏𑀯𑀫𑀸𑀳.

𑀳𑀢𑁆𑀣𑀸𑀦𑀦𑁆𑀢𑀺 𑀪𑀺𑀓𑁆𑀔𑀸𑀕𑀳𑀡𑀢𑁆𑀣𑀁 𑀧𑀢𑁆𑀢𑀁 𑀉𑀧𑀦𑀸𑀫𑀬𑀢𑁄 𑀫𑀡𑀺𑀩𑀦𑁆𑀥𑀢𑁄 𑀧𑀪𑀼𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀳𑀢𑁆𑀣𑀸𑀦𑀁. 𑀧𑀸𑀤𑀸𑀦𑀦𑁆𑀢𑀺 𑀦𑀺𑀯𑀸𑀲𑀦𑀦𑁆𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀸𑀤𑀸𑀦𑀁. 𑀲𑀭𑀲𑁆𑀲𑀸𑀢𑀺 𑀲𑀘𑁂 𑀢𑀁 𑀪𑀕𑀺𑀦𑀻𑀢𑀺 𑀯𑀸𑀘𑀁 𑀦𑀺𑀘𑁆𑀙𑀸𑀭𑀬𑀢𑁄 𑀲𑀭𑀲𑁆𑀲 𑀘. 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀻𑀢𑀺 𑀳𑀢𑁆𑀣𑀧𑀺𑀝𑁆𑀞𑀺𑀆𑀤𑀻𑀦𑀺 𑀑𑀮𑁄𑀓𑀬𑀫𑀸𑀦𑀸 𑁋 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀭𑀝𑁆𑀞𑀧𑀸𑀮𑀲𑁆𑀲 𑀯𑀺𑀬 𑀲𑀼𑀯𑀡𑁆𑀡𑀓𑀘𑁆𑀙𑀧𑀧𑀺𑀝𑁆𑀞𑀺𑀲𑀤𑀺𑀲𑀸 𑀇𑀫𑀸 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀬𑁄, 𑀳𑀭𑀺𑀢𑀸𑀮𑀯𑀝𑁆𑀝𑀺𑀬𑁄 𑀯𑀺𑀬 𑀲𑀼𑀯𑀝𑁆𑀝𑀺𑀢𑀸 𑀅𑀗𑁆𑀕𑀼𑀮𑀺𑀬𑁄, 𑀫𑀥𑀼𑀭𑁄 𑀲𑀭𑁄’’𑀢𑀺 𑀕𑀺𑀳𑀺𑀓𑀸𑀮𑁂 𑀲𑀮𑁆𑀮𑀓𑁆𑀔𑀺𑀢𑀧𑀼𑀩𑁆𑀩𑀁 𑀆𑀓𑀸𑀭𑀁 𑀅𑀕𑁆𑀕𑀳𑁂𑀲𑀺 𑀲𑀜𑁆𑀚𑀸𑀦𑀺 𑀲𑀮𑁆𑀮𑀓𑁆𑀔𑁂𑀲𑀺. 𑀢𑀲𑁆𑀲 𑀳𑀸𑀬𑀲𑁆𑀫𑀢𑁄 𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺 𑀅𑀭𑀜𑁆𑀜𑀸𑀯𑀸𑀲𑀜𑁆𑀘𑁂𑀯 𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀜𑁆𑀘 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀜𑁆𑀜𑀸𑀤𑀺𑀲𑁄 𑀲𑀭𑀻𑀭𑀯𑀡𑁆𑀡𑁄 𑀅𑀳𑁄𑀲𑀺, 𑀢𑁂𑀦 𑀦𑀁 𑀲𑀸 𑀜𑀸𑀢𑀺𑀤𑀸𑀲𑀻 𑀤𑀺𑀲𑁆𑀯𑀸𑀯 𑀦 𑀲𑀜𑁆𑀚𑀸𑀦𑀺, 𑀦𑀺𑀫𑀺𑀢𑁆𑀢𑀁 𑀧𑀦 𑀅𑀕𑁆𑀕𑀳𑁂𑀲𑀻𑀢𑀺.

𑁩𑁦𑁦. 𑀭𑀝𑁆𑀞𑀧𑀸𑀮𑀲𑁆𑀲 𑀫𑀸𑀢𑀭𑀁 𑀏𑀢𑀤𑀯𑁄𑀘𑀸𑀢𑀺 𑀣𑁂𑀭𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀲𑀡𑁆𑀞𑀸𑀧𑁂𑀢𑁆𑀯𑀸 𑀣𑀜𑁆𑀜𑀁 𑀧𑀸𑀬𑁂𑀢𑁆𑀯𑀸 𑀲𑀁𑀯𑀟𑁆𑀠𑀺𑀢𑀥𑀸𑀢𑀻𑀧𑀺 𑀲𑀫𑀸𑀦𑀸 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀸𑀔𑀻𑀡𑀸𑀲𑀯𑀪𑀸𑀯𑀧𑁆𑀧𑀢𑁆𑀢𑁂𑀦 𑀲𑀸𑀫𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑁋 ‘‘𑀢𑁆𑀯𑀁 𑀦𑀼 𑀔𑁄, 𑀫𑁂 𑀪𑀦𑁆𑀢𑁂, 𑀧𑀼𑀢𑁆𑀢𑁄 𑀭𑀝𑁆𑀞𑀧𑀸𑀮𑁄’’𑀢𑀺𑀆𑀤𑀺𑀯𑀘𑀦𑀁 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀯𑁂𑀕𑁂𑀦 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀝𑁆𑀞𑀧𑀸𑀮𑀲𑁆𑀲 𑀫𑀸𑀢𑀭𑀁 𑀏𑀢𑀤𑀯𑁄𑀘. 𑀬𑀕𑁆𑀖𑁂𑀢𑀺 𑀆𑀭𑁄𑀘𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀲𑀘𑁂 𑀚𑁂 𑀲𑀘𑁆𑀘𑀦𑁆𑀢𑀺 𑀏𑀢𑁆𑀣 𑀚𑁂𑀢𑀺 𑀆𑀮𑀧𑀦𑁂 𑀦𑀺𑀧𑀸𑀢𑁄. 𑀏𑀯𑀜𑁆𑀳𑀺 𑀢𑀲𑁆𑀫𑀺𑀁 𑀤𑁂𑀲𑁂 𑀤𑀸𑀲𑀺𑀚𑀦𑀁 𑀆𑀮𑀧𑀦𑁆𑀢𑀺, 𑀢𑀲𑁆𑀫𑀸 ‘‘𑀢𑁆𑀯𑀜𑁆𑀳𑀺, 𑀪𑁄𑀢𑀺 𑀤𑀸𑀲𑀺, 𑀲𑀘𑁂 𑀲𑀘𑁆𑀘𑀁 𑀪𑀡𑀲𑀻’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀉𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀫𑀳𑀸𑀓𑀼𑀮𑁂 𑀇𑀢𑁆𑀣𑀺𑀬𑁄 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀸 𑀕𑀭𑀳𑀁 𑀧𑀸𑀧𑀼𑀡𑀦𑁆𑀢𑀺, 𑀇𑀤𑀜𑁆𑀘 𑀅𑀘𑁆𑀘𑀸𑀬𑀺𑀓𑀓𑀺𑀘𑁆𑀘𑀁, 𑀲𑁂𑀝𑁆𑀞𑀺𑀲𑁆𑀲 𑀦𑀁 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑀺. 𑀢𑀲𑁆𑀫𑀸 𑀉𑀧𑀲𑀗𑁆𑀓𑀫𑀺. 𑀅𑀜𑁆𑀜𑀢𑀭𑀁 𑀓𑀼𑀝𑁆𑀝𑀫𑀽𑀮𑀦𑁆𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀤𑁂𑀲𑁂 𑀤𑀸𑀦𑀧𑀢𑀻𑀦𑀁 𑀖𑀭𑁂𑀲𑀼 𑀲𑀸𑀮𑀸 𑀳𑁄𑀦𑁆𑀢𑀺, 𑀆𑀲𑀦𑀸𑀦𑀺 𑀘𑁂𑀢𑁆𑀣 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀉𑀧𑀝𑁆𑀞𑀸𑀧𑀺𑀢𑀁 𑀉𑀤𑀓𑀓𑀜𑁆𑀚𑀺𑀬𑀁. 𑀢𑀢𑁆𑀣 𑀧𑀩𑁆𑀩𑀚𑀺𑀢𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺. 𑀲𑀘𑁂 𑀇𑀘𑁆𑀙𑀦𑁆𑀢𑀺, 𑀤𑀸𑀦𑀧𑀢𑀻𑀦𑀫𑁆𑀧𑀺 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀜𑁆𑀜𑀢𑀭𑀲𑁆𑀲 𑀓𑀼𑀮𑀲𑁆𑀲 𑀈𑀤𑀺𑀲𑀸𑀬 𑀲𑀸𑀮𑀸𑀬 𑀅𑀜𑁆𑀜𑀢𑀭𑀁 𑀓𑀼𑀝𑁆𑀝𑀫𑀽𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀧𑀩𑁆𑀩𑀚𑀺𑀢𑀸 𑀓𑀧𑀡𑀫𑀦𑀼𑀲𑁆𑀲𑀸 𑀯𑀺𑀬 𑀅𑀲𑀸𑀭𑀼𑀧𑁆𑀧𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀻𑀢𑀺.

𑀅𑀢𑁆𑀣𑀺 𑀦𑀸𑀫 𑀢𑀸𑀢𑀸𑀢𑀺 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀯𑀺𑀚𑁆𑀚𑀫𑀸𑀦𑀢𑁆𑀣𑁂, 𑀦𑀸𑀫𑀸𑀢𑀺 𑀧𑀼𑀘𑁆𑀙𑀦𑀢𑁆𑀣𑁂 𑀫𑀜𑁆𑀜𑀦𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀢𑁆𑀣𑀺 𑀦𑀼 𑀔𑁄, 𑀢𑀸𑀢 𑀭𑀝𑁆𑀞𑀧𑀸𑀮, 𑀅𑀫𑁆𑀳𑀸𑀓𑀁 𑀥𑀦𑀁, 𑀦𑀦𑀼 𑀫𑀬𑀁 𑀦𑀺𑀤𑁆𑀥𑀦𑀸𑀢𑀺 𑀯𑀢𑁆𑀢𑀩𑁆𑀩𑀸, 𑀬𑁂𑀲𑀁 𑀦𑁄 𑀢𑁆𑀯𑀁 𑀈𑀤𑀺𑀲𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺. 𑀢𑀣𑀸 𑀅𑀢𑁆𑀣𑀺 𑀦𑀼 𑀔𑁄, 𑀢𑀸𑀢 𑀭𑀝𑁆𑀞𑀧𑀸𑀮, 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀁, 𑀦𑀦𑀼 𑀫𑀬𑀁 𑀫𑀢𑀸𑀢𑀺 𑀯𑀢𑁆𑀢𑀩𑁆𑀩𑀸, 𑀬𑁂𑀲𑀁 𑀦𑁄 𑀢𑁆𑀯𑀁 𑀈𑀤𑀺𑀲𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺. 𑀢𑀣𑀸 𑀅𑀢𑁆𑀣𑀺 𑀫𑀜𑁆𑀜𑁂, 𑀢𑀸𑀢 𑀭𑀝𑁆𑀞𑀧𑀸𑀮, 𑀢𑀯 𑀅𑀩𑁆𑀪𑀦𑁆𑀢𑀭𑁂 𑀲𑀸𑀲𑀦𑀁 𑀦𑀺𑀲𑁆𑀲𑀸𑀬 𑀧𑀝𑀺𑀮𑀤𑁆𑀥𑁄 𑀲𑀫𑀡𑀕𑀼𑀡𑁄, 𑀬𑀁 𑀢𑁆𑀯𑀁 𑀲𑀼𑀪𑁄𑀚𑀦𑀭𑀲𑀲𑀁𑀯𑀟𑁆𑀠𑀺𑀢𑁄𑀧𑀺 𑀇𑀫𑀁 𑀚𑀺𑀕𑀼𑀘𑁆𑀙𑀦𑁂𑀬𑁆𑀬𑀁 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀅𑀫𑀢𑀫𑀺𑀯 𑀦𑀺𑀩𑁆𑀩𑀺𑀓𑀸𑀭𑁄 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀻𑀢𑀺. 𑀲𑁄 𑀧𑀦 𑀕𑀳𑀧𑀢𑀺 𑀤𑀼𑀓𑁆𑀔𑀸𑀪𑀺𑀢𑀼𑀦𑁆𑀦𑀢𑀸𑀬 𑀏𑀢𑀫𑀢𑁆𑀣𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀢𑁆𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑁋 ‘‘𑀅𑀢𑁆𑀣𑀺 𑀦𑀸𑀫, 𑀢𑀸𑀢 𑀭𑀝𑁆𑀞𑀧𑀸𑀮, 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑀘. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦𑁂𑀢𑁆𑀣 𑀇𑀤𑀁 𑀮𑀓𑁆𑀔𑀡𑀁 𑀯𑀤𑀦𑁆𑀢𑀺 𑁋 𑀅𑀦𑁄𑀓𑀧𑁆𑀧𑀦𑀸𑀫𑀭𑀺𑀲𑀦𑀢𑁆𑀣𑀯𑀲𑁂𑀦𑁂𑀢𑀁 𑀅𑀢𑁆𑀣𑀺𑀲𑀤𑁆𑀤𑁂 𑀉𑀧𑀧𑀤𑁂 ‘‘𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀻’’𑀢𑀺 𑀅𑀦𑀸𑀕𑀢𑀯𑀘𑀦𑀁 𑀓𑀢𑀁. 𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 ‘‘𑀅𑀢𑁆𑀣𑀺 𑀦𑀸𑀫…𑀧𑁂… 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺, 𑀇𑀤𑀁 𑀧𑀘𑁆𑀘𑀓𑁆𑀔𑀫𑁆𑀧𑀺 𑀅𑀳𑀁 𑀦 𑀲𑀤𑁆𑀤𑀳𑀸𑀫𑀺 𑀦 𑀫𑀭𑀺𑀲𑀬𑀸𑀫𑀻’’𑀢𑀺. 𑀇𑀤𑀁 𑀏𑀢𑁆𑀢𑀓𑀁 𑀯𑀘𑀦𑀁 𑀕𑀳𑀧𑀢𑀺 𑀣𑁂𑀭𑀲𑁆𑀲 𑀧𑀢𑁆𑀢𑀫𑀼𑀔𑀯𑀝𑁆𑀝𑀺𑀬𑀁 𑀕𑀳𑁂𑀢𑁆𑀯𑀸 𑀞𑀺𑀢𑀓𑁄𑀯 𑀓𑀣𑁂𑀲𑀺. 𑀣𑁂𑀭𑁄𑀧𑀺 𑀧𑀺𑀢𑀭𑀺 𑀧𑀢𑁆𑀢𑀫𑀼𑀔𑀯𑀝𑁆𑀝𑀺𑀬𑀁 𑀕𑀳𑁂𑀢𑁆𑀯𑀸 𑀞𑀺𑀢𑁂𑀬𑁂𑀯 𑀢𑀁 𑀧𑀽𑀢𑀺𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺 𑀲𑀼𑀦𑀔𑀯𑀦𑁆𑀢𑀲𑀤𑀺𑀲𑀁 𑀧𑀽𑀢𑀺𑀓𑀼𑀓𑁆𑀓𑀼𑀝𑀡𑁆𑀟𑀫𑀺𑀯 𑀪𑀺𑀦𑁆𑀦𑀝𑁆𑀞𑀸𑀦𑁂 𑀧𑀽𑀢𑀺𑀓𑀁 𑀯𑀸𑀬𑀦𑁆𑀢𑀁. 𑀧𑀼𑀣𑀼𑀚𑁆𑀚𑀦𑁂𑀦 𑀓𑀺𑀭 𑀢𑀣𑀸𑀭𑀽𑀧𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸. 𑀣𑁂𑀭𑁄 𑀧𑀦 𑀅𑀭𑀺𑀬𑀺𑀤𑁆𑀥𑀺𑀬𑀁 𑀞𑀢𑁆𑀯𑀸 𑀤𑀺𑀩𑁆𑀩𑁄𑀚𑀁 𑀅𑀫𑀢𑀭𑀲𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀯𑀺𑀬 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀥𑀫𑀓𑀭𑀡𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀧𑀢𑁆𑀢𑀜𑁆𑀘 𑀫𑀼𑀔𑀜𑁆𑀘 𑀳𑀢𑁆𑀣𑀧𑀸𑀤𑁂 𑀘 𑀥𑁄𑀯𑀺𑀢𑁆𑀯𑀸 𑀓𑀼𑀢𑁄 𑀦𑁄 𑀕𑀳𑀧𑀢𑀻𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀼𑀢𑁄 𑀦𑁄𑀢𑀺 𑀓𑀼𑀢𑁄 𑀦𑀼. 𑀦𑁂𑀯 𑀤𑀸𑀦𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀯𑀲𑁂𑀦 𑀦𑁂𑀯 𑀤𑀸𑀦𑀁 𑀅𑀮𑀢𑁆𑀣𑀫𑁆𑀳. 𑀦 𑀧𑀘𑁆𑀘𑀓𑁆𑀔𑀸𑀦𑀦𑁆𑀢𑀺 ‘‘𑀓𑀺𑀁, 𑀢𑀸𑀢 𑀭𑀝𑁆𑀞𑀧𑀸𑀮, 𑀓𑀘𑁆𑀘𑀺 𑀢𑁂 𑀔𑀫𑀦𑀻𑀬𑀁, 𑀓𑀘𑁆𑀘𑀺𑀲𑀺 𑀅𑀧𑁆𑀧𑀓𑀺𑀮𑀫𑀣𑁂𑀦 𑀆𑀕𑀢𑁄, 𑀦 𑀢𑀸𑀯 𑀢𑀸𑀢 𑀕𑁂𑀳𑁂 𑀪𑀢𑁆𑀢𑀁 𑀲𑀫𑁆𑀧𑀸𑀤𑀺𑀬𑀢𑀻’’𑀢𑀺 𑀏𑀯𑀁 𑀧𑀝𑀺𑀲𑀦𑁆𑀣𑀸𑀭𑀯𑀲𑁂𑀦 𑀧𑀘𑁆𑀘𑀓𑁆𑀔𑀸𑀦𑀫𑁆𑀧𑀺 𑀦 𑀅𑀮𑀢𑁆𑀣𑀫𑁆𑀳. 𑀓𑀲𑁆𑀫𑀸 𑀧𑀦 𑀣𑁂𑀭𑁄 𑀏𑀯𑀫𑀸𑀳? 𑀧𑀺𑀢𑀼 𑀅𑀦𑀼𑀕𑁆𑀕𑀳𑁂𑀦. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀬𑀣𑀸 𑀏𑀲 𑀫𑀁 𑀯𑀤𑀢𑀺, 𑀅𑀜𑁆𑀜𑁂𑀧𑀺 𑀧𑀩𑁆𑀩𑀚𑀺𑀢𑁂 𑀏𑀯𑀁 𑀯𑀤𑀢𑀺 𑀫𑀜𑁆𑀜𑁂. 𑀩𑀼𑀤𑁆𑀥𑀲𑀸𑀲𑀦𑁂 𑀘 𑀧𑀢𑁆𑀢𑀦𑁆𑀢𑀭𑁂 𑀧𑀤𑀼𑀫𑀁 𑀯𑀺𑀬 𑀪𑀲𑁆𑀫𑀸𑀙𑀦𑁆𑀦𑁄 𑀅𑀕𑁆𑀕𑀺 𑀯𑀺𑀬 𑀨𑁂𑀕𑁆𑀕𑀼𑀧𑀝𑀺𑀘𑁆𑀙𑀦𑁆𑀦𑁄 𑀘𑀦𑁆𑀤𑀦𑀲𑀸𑀭𑁄 𑀯𑀺𑀬 𑀲𑀼𑀢𑁆𑀢𑀺𑀓𑀸𑀧𑀝𑀺𑀘𑁆𑀙𑀦𑁆𑀦𑀁 𑀫𑀼𑀢𑁆𑀢𑀭𑀢𑀦𑀁 𑀯𑀺𑀬 𑀯𑀮𑀸𑀳𑀓𑀧𑀝𑀺𑀘𑁆𑀙𑀦𑁆𑀦𑁄 𑀘𑀦𑁆𑀤𑀺𑀫𑀸 𑀯𑀺𑀬 𑀫𑀸𑀤𑀺𑀲𑀸𑀦𑀁 𑀧𑀝𑀺𑀘𑁆𑀙𑀦𑁆𑀦𑀕𑀼𑀡𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑁄 𑀦𑀢𑁆𑀣𑀺, 𑀢𑁂𑀲𑀼𑀧𑀺 𑀦 𑀏𑀯𑀭𑀽𑀧𑀁 𑀯𑀘𑀦𑀁 𑀧𑀯𑀢𑁆𑀢𑁂𑀲𑁆𑀲𑀢𑀺, 𑀲𑀁𑀯𑀭𑁂 𑀞𑀲𑁆𑀲𑀢𑀻’’𑀢𑀺 𑀅𑀦𑀼𑀕𑁆𑀕𑀳𑁂𑀦 𑀏𑀯𑀫𑀸𑀳.

𑀏𑀳𑀺 𑀢𑀸𑀢𑀸𑀢𑀺 𑀢𑀸𑀢 𑀢𑀼𑀬𑁆𑀳𑀁 𑀖𑀭𑀁 𑀫𑀸 𑀳𑁄𑀢𑀼, 𑀏𑀳𑀺 𑀖𑀭𑀁 𑀕𑀫𑀺𑀲𑁆𑀲𑀸𑀫𑀸𑀢𑀺 𑀯𑀤𑀢𑀺. 𑀅𑀮𑀦𑁆𑀢𑀺 𑀣𑁂𑀭𑁄 𑀉𑀓𑁆𑀓𑀝𑁆𑀞𑀏𑀓𑀸𑀲𑀦𑀺𑀓𑀢𑀸𑀬 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀏𑀯𑀫𑀸𑀳. 𑀅𑀥𑀺𑀯𑀸𑀲𑁂𑀲𑀻𑀢𑀺 𑀣𑁂𑀭𑁄 𑀧𑀦 𑀧𑀓𑀢𑀺𑀬𑀸 𑀉𑀓𑁆𑀓𑀝𑁆𑀞𑀲𑀧𑀤𑀸𑀦𑀘𑀸𑀭𑀺𑀓𑁄 𑀲𑁆𑀯𑀸𑀢𑀦𑀸𑀬𑀪𑀺𑀓𑁆𑀔𑀁 𑀦𑀸𑀫 𑀦𑀸𑀥𑀺𑀯𑀸𑀲𑁂𑀢𑀺, 𑀫𑀸𑀢𑀼 𑀅𑀦𑀼𑀕𑁆𑀕𑀳𑁂𑀦 𑀧𑀦 𑀅𑀥𑀺𑀯𑀸𑀲𑁂𑀲𑀺. 𑀫𑀸𑀢𑀼 𑀓𑀺𑀭𑀲𑁆𑀲 𑀣𑁂𑀭𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀳𑀸𑀲𑁄𑀓𑁄 𑀉𑀧𑁆𑀧𑀚𑁆𑀚𑀺, 𑀭𑁄𑀤𑀦𑁂𑀦𑁂𑀯 𑀧𑀓𑁆𑀓𑀓𑁆𑀔𑀺 𑀯𑀺𑀬 𑀚𑀸𑀢𑀸, 𑀢𑀲𑁆𑀫𑀸 𑀣𑁂𑀭𑁄 ‘‘𑀲𑀘𑀸𑀳𑀁 𑀢𑀁 𑀅𑀧𑀲𑁆𑀲𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀺, 𑀳𑀤𑀬𑀫𑁆𑀧𑀺𑀲𑁆𑀲𑀸 𑀨𑀸𑀮𑁂𑀬𑁆𑀬𑀸’’𑀢𑀺 𑀅𑀦𑀼𑀕𑁆𑀕𑀳𑁂𑀦 𑀅𑀥𑀺𑀯𑀸𑀲𑁂𑀲𑀺. 𑀓𑀸𑀭𑀸𑀧𑁂𑀢𑁆𑀯𑀸𑀢𑀺 𑀏𑀓𑀁 𑀳𑀺𑀭𑀜𑁆𑀜𑀲𑁆𑀲, 𑀏𑀓𑀁 𑀲𑀼𑀯𑀡𑁆𑀡𑀲𑁆𑀲𑀸𑀢𑀺 𑀤𑁆𑀯𑁂 𑀧𑀼𑀜𑁆𑀚𑁂 𑀓𑀸𑀭𑀸𑀧𑁂𑀢𑁆𑀯𑀸. 𑀓𑀻𑀯𑀫𑀳𑀦𑁆𑀢𑀸 𑀧𑀦 𑀧𑀼𑀜𑁆𑀚𑀸 𑀅𑀳𑁂𑀲𑀼𑀦𑁆𑀢𑀺. 𑀬𑀣𑀸 𑀑𑀭𑀢𑁄 𑀞𑀺𑀢𑁄 𑀧𑀼𑀭𑀺𑀲𑁄 𑀧𑀸𑀭𑀢𑁄 𑀞𑀺𑀢𑀁 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑀁 𑀧𑀼𑀭𑀺𑀲𑀁 𑀦 𑀧𑀲𑁆𑀲𑀢𑀺, 𑀏𑀯𑀁𑀫𑀳𑀦𑁆𑀢𑀸.

𑁩𑁦𑁧. 𑀇𑀤𑀁 𑀢𑁂 𑀢𑀸𑀢𑀸𑀢𑀺 𑀓𑀳𑀸𑀧𑀡𑀧𑀼𑀜𑁆𑀚𑀜𑁆𑀘 𑀲𑀼𑀯𑀡𑁆𑀡𑀧𑀼𑀜𑁆𑀚𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀫𑀢𑁆𑀢𑀺𑀓𑀦𑁆𑀢𑀺 𑀫𑀸𑀢𑀺𑀢𑁄 𑀆𑀕𑀢𑀁, 𑀇𑀤𑀁 𑀢𑁂 𑀫𑀸𑀢𑀸𑀫𑀳𑀺𑀬𑀸 𑀫𑀸𑀢𑀼 𑀇𑀫𑀁 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑀺𑀬𑀸 𑀕𑀦𑁆𑀥𑀫𑀸𑀮𑀸𑀤𑀻𑀦𑀁 𑀅𑀢𑁆𑀣𑀸𑀬 𑀤𑀺𑀦𑁆𑀦𑀁 𑀥𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀁 𑀧𑁂𑀢𑁆𑀢𑀺𑀓𑀁 𑀅𑀜𑁆𑀜𑀁 𑀧𑀺𑀢𑀸𑀫𑀳𑀦𑁆𑀢𑀺 𑀬𑀁 𑀧𑀦 𑀢𑁂 𑀧𑀺𑀢𑀼 𑀘 𑀧𑀺𑀢𑀸𑀫𑀳𑀸𑀦𑀜𑁆𑀘 𑀲𑀦𑁆𑀢𑀓𑀁, 𑀢𑀁 𑀅𑀜𑁆𑀜𑀁𑀬𑁂𑀯, 𑀦𑀺𑀳𑀺𑀢𑀜𑁆𑀘 𑀧𑀬𑀼𑀢𑁆𑀢𑀜𑁆𑀘 𑀅𑀢𑀺𑀯𑀺𑀬 𑀩𑀳𑀼. 𑀏𑀢𑁆𑀣 𑀘 ‘‘𑀧𑀺𑀢𑀸𑀫𑀳’’𑀦𑁆𑀢𑀺 𑀢𑀤𑁆𑀥𑀺𑀢𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀧𑁂𑀢𑀸𑀫𑀳’’𑀦𑁆𑀢𑀺 𑀯𑀸 𑀧𑀸𑀞𑁄. 𑀲𑀓𑁆𑀓𑀸 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀥𑀦𑀳𑁂𑀢𑀼 𑀥𑀦𑀧𑀘𑁆𑀘𑀬𑀸. 𑀢𑀁 𑀢𑀁 𑀥𑀦𑀁 𑀭𑀓𑁆𑀔𑀦𑁆𑀢𑀲𑁆𑀲 𑀘 𑀭𑀸𑀚𑀸𑀤𑀻𑀦𑀁 𑀯𑀲𑁂𑀦 𑀥𑀦𑀧𑀭𑀺𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑀲𑁆𑀲 𑀓𑀲𑁆𑀲𑀘𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁄𑀓𑀸𑀤𑀬𑁄 𑀲𑀦𑁆𑀥𑀸𑀬 𑀏𑀯𑀫𑀸𑀳. 𑀏𑀯𑀁 𑀯𑀼𑀢𑁆𑀢𑁂 𑀲𑁂𑀝𑁆𑀞𑀺 𑀕𑀳𑀧𑀢𑀺 𑁋 ‘‘𑀅𑀳𑀁 𑀇𑀫𑀁 𑀉𑀧𑁆𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻𑀢𑀺 𑀆𑀦𑁂𑀲𑀺𑀁, 𑀲𑁄 𑀤𑀸𑀦𑀺 𑀫𑁂 𑀥𑀫𑁆𑀫𑀓𑀣𑀁 𑀓𑀸𑀢𑀼𑀁 𑀆𑀭𑀤𑁆𑀥𑁄, 𑀅𑀬𑀁 𑀦 𑀫𑁂 𑀯𑀘𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀅𑀲𑁆𑀲 𑀑𑀭𑁄𑀥𑀸𑀦𑀁 𑀤𑁆𑀯𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑁋 ‘‘𑀅𑀬𑀁 𑀯𑁄 𑀲𑀸𑀫𑀺𑀓𑁄, 𑀕𑀘𑁆𑀙𑀣 𑀬𑀁 𑀓𑀺𑀜𑁆𑀘𑀺 𑀓𑀢𑁆𑀯𑀸 𑀦𑀁 𑀕𑀡𑁆𑀳𑀺𑀢𑀼𑀁 𑀯𑀸𑀬𑀫𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀲𑀼𑀯𑀬𑁂 𑀞𑀺𑀢𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼, 𑀢𑀸𑀲𑀼 𑀤𑁆𑀯𑁂 𑀚𑁂𑀝𑁆𑀞𑀓𑀺𑀢𑁆𑀣𑀺𑀬𑁄 𑀲𑀦𑁆𑀥𑀸𑀬 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀘𑁆𑀘𑁂𑀓𑀁 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸𑀢𑀺 𑀏𑀓𑁂𑀓𑀫𑁆𑀳𑀺 𑀧𑀸𑀤𑁂 𑀦𑀁 𑀕𑀳𑁂𑀢𑁆𑀯𑀸.

𑀓𑀻𑀤𑀺𑀲𑀸 𑀦𑀸𑀫 𑀢𑀸 𑀅𑀬𑁆𑀬𑀧𑀼𑀢𑁆𑀢 𑀅𑀘𑁆𑀙𑀭𑀸𑀬𑁄𑀢𑀺 𑀓𑀲𑁆𑀫𑀸 𑀏𑀯𑀫𑀸𑀳𑀁𑀲𑀼? 𑀢𑀤𑀸 𑀓𑀺𑀭 𑀲𑀫𑁆𑀩𑀳𑀼𑀮𑁂 𑀔𑀢𑁆𑀢𑀺𑀬𑀓𑀼𑀫𑀸𑀭𑁂𑀧𑀺 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁂𑀧𑀺 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀧𑀺 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑁄 𑀧𑀳𑀸𑀬 𑀧𑀩𑁆𑀩𑀚𑀦𑁆𑀢𑁂 𑀤𑀺𑀲𑁆𑀯𑀸 𑀧𑀩𑁆𑀩𑀚𑁆𑀚𑀸𑀕𑀼𑀡𑀁 𑀅𑀚𑀸𑀦𑀦𑁆𑀢𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 ‘‘𑀓𑀲𑁆𑀫𑀸 𑀏𑀢𑁂 𑀧𑀩𑁆𑀩𑀚𑀦𑁆𑀢𑀻’’𑀢𑀺. 𑀅𑀣𑀜𑁆𑀜𑁂 𑀯𑀤𑀦𑁆𑀢𑀺 ‘‘𑀤𑁂𑀯𑀘𑁆𑀙𑀭𑀸𑀤𑁂𑀯𑀦𑀸𑀝𑀓𑀸𑀦𑀁 𑀓𑀸𑀭𑀡𑀸’’𑀢𑀺. 𑀲𑀸 𑀓𑀣𑀸 𑀯𑀺𑀢𑁆𑀣𑀸𑀭𑀺𑀓𑀸 𑀅𑀳𑁄𑀲𑀺. 𑀢𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀸 𑀏𑀯𑀫𑀸𑀳𑀁𑀲𑀼. 𑀅𑀣 𑀣𑁂𑀭𑁄 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀦 𑀔𑁄 𑀫𑀬𑀁 𑀪𑀕𑀺𑀦𑀻𑀢𑀺𑀆𑀤𑀺𑀫𑀸𑀳. 𑀲𑀫𑀼𑀤𑀸𑀘𑀭𑀢𑀻𑀢𑀺 𑀯𑁄𑀳𑀭𑀢𑀺 𑀯𑀤𑀢𑀺. 𑀢𑀢𑁆𑀣𑁂𑀯 𑀫𑀼𑀘𑁆𑀙𑀺𑀢𑀸 𑀧𑀧𑀢𑀺𑀁𑀲𑀽𑀢𑀺 𑀢𑀁 𑀪𑀕𑀺𑀦𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀬𑀁 𑀅𑀚𑁆𑀚 𑀆𑀕𑀫𑀺𑀲𑁆𑀲𑀢𑀺, 𑀅𑀚𑁆𑀚 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀩𑀳𑀺 𑀦 𑀦𑀺𑀓𑁆𑀔𑀦𑁆𑀢𑀸, 𑀏𑀢𑀁 𑀦𑀺𑀲𑁆𑀲𑀸𑀬 𑀦𑁄 𑀤𑀸𑀭𑀓𑀸 𑀦 𑀮𑀤𑁆𑀥𑀸, 𑀬𑁂𑀲𑀁 𑀆𑀦𑀼𑀪𑀸𑀯𑁂𑀦 𑀚𑀻𑀯𑁂𑀬𑁆𑀬𑀸𑀫, 𑀇𑀢𑁄 𑀘𑀫𑁆𑀳𑀸 𑀧𑀭𑀺𑀳𑀻𑀦𑀸 𑀅𑀜𑁆𑀜𑀢𑁄 𑀘. 𑀅𑀬𑀁 𑀮𑁄𑀓𑁄 𑀦𑀸𑀫 𑀅𑀢𑁆𑀢𑀦𑁄𑀯 𑀘𑀺𑀦𑁆𑀢𑁂𑀲𑀺, 𑀢𑀲𑁆𑀫𑀸 𑀢𑀸𑀧𑀺 ‘‘𑀇𑀤𑀸𑀦𑀺 𑀫𑀬𑀁 𑀅𑀦𑀸𑀣𑀸 𑀚𑀸𑀢𑀸’’𑀢𑀺 𑀅𑀢𑁆𑀢𑀦𑁄𑀯 𑀘𑀺𑀦𑁆𑀢𑀬𑀫𑀸𑀦𑀸 𑁋 ‘‘𑀅𑀦𑀢𑁆𑀣𑀺𑀓𑁄 𑀤𑀸𑀦𑀺 𑀅𑀫𑁆𑀳𑁂𑀳𑀺 𑀅𑀬𑀁, 𑀲𑁄 𑀅𑀫𑁆𑀳𑁂 𑀧𑀚𑀸𑀧𑀢𑀺𑀬𑁄 𑀲𑀫𑀸𑀦𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀏𑀓𑀫𑀸𑀢𑀼𑀓𑀼𑀘𑁆𑀙𑀺𑀬𑀸 𑀲𑀬𑀺𑀢𑀤𑀸𑀭𑀺𑀓𑀸 𑀯𑀺𑀬 𑀫𑀜𑁆𑀜𑀢𑀻’’𑀢𑀺 𑀲𑀫𑀼𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑀸 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀫𑀼𑀘𑁆𑀙𑀺𑀢𑀸 𑀧𑀧𑀢𑀺𑀁𑀲𑀼, 𑀧𑀢𑀺𑀢𑀸𑀢𑀺 𑀅𑀢𑁆𑀣𑁄.

𑀫𑀸 𑀦𑁄 𑀯𑀺𑀳𑁂𑀞𑁂𑀣𑀸𑀢𑀺 𑀫𑀸 𑀅𑀫𑁆𑀳𑁂 𑀥𑀦𑀁 𑀤𑀲𑁆𑀲𑁂𑀢𑁆𑀯𑀸 𑀫𑀸𑀢𑀼𑀕𑀸𑀫𑁂 𑀘 𑀉𑀬𑁆𑀬𑁄𑀚𑁂𑀢𑁆𑀯𑀸 𑀯𑀺𑀳𑁂𑀞𑀬𑀺𑀢𑁆𑀣, 𑀯𑀺𑀳𑁂𑀲𑀸 𑀳𑁂𑀲𑀸 𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺. 𑀓𑀲𑁆𑀫𑀸 𑀏𑀯𑀫𑀸𑀳? 𑀫𑀸𑀢𑀸𑀧𑀺𑀢𑀽𑀦𑀁 𑀅𑀦𑀼𑀕𑁆𑀕𑀳𑁂𑀦. 𑀲𑁄 𑀓𑀺𑀭 𑀲𑁂𑀝𑁆𑀞𑀺 𑁋 ‘‘𑀧𑀩𑁆𑀩𑀚𑀺𑀢𑀮𑀺𑀗𑁆𑀕𑀁 𑀦𑀸𑀫 𑀓𑀺𑀮𑀺𑀝𑁆𑀞𑀁, 𑀧𑀩𑁆𑀩𑀚𑁆𑀚𑀸𑀯𑁂𑀲𑀁 𑀳𑀸𑀭𑁂𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀢𑀬𑁄 𑀚𑀦𑀸 𑀏𑀓𑀢𑁄 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀣𑁂𑀭𑀲𑁆𑀲 𑀪𑀺𑀓𑁆𑀔𑀁 𑀦 𑀤𑁂𑀢𑀺. 𑀣𑁂𑀭𑁄 𑁋 ‘‘𑀫𑀸𑀤𑀺𑀲𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀆𑀳𑀸𑀭𑀦𑁆𑀢𑀭𑀸𑀬𑀁 𑀓𑀢𑁆𑀯𑀸 𑀏𑀢𑁂 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬𑀼’’𑀦𑁆𑀢𑀺 𑀢𑁂𑀲𑀁 𑀅𑀦𑀼𑀕𑁆𑀕𑀳𑁂𑀦 𑀏𑀯𑀫𑀸𑀳.

𑁩𑁦𑁨. 𑀕𑀸𑀣𑀸 𑀅𑀪𑀸𑀲𑀻𑀢𑀺 𑀕𑀸𑀣𑀸𑀬𑁄 𑀅𑀪𑀸𑀲𑀺. 𑀢𑀢𑁆𑀣 𑀧𑀲𑁆𑀲𑀸𑀢𑀺 𑀲𑀦𑁆𑀢𑀺𑀓𑁂 𑀞𑀺𑀢𑀚𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀁. 𑀩𑀺𑀫𑁆𑀩𑀦𑁆𑀢𑀺 𑀅𑀢𑁆𑀢𑀪𑀸𑀯𑀁. 𑀅𑀭𑀼𑀓𑀸𑀬𑀦𑁆𑀢𑀺 𑀦𑀯𑀦𑁆𑀦𑀁 𑀯𑀡𑀫𑀼𑀔𑀸𑀦𑀁 𑀯𑀲𑁂𑀦 𑀯𑀡𑀓𑀸𑀬𑀁. 𑀲𑀫𑀼𑀲𑁆𑀲𑀺𑀢𑀦𑁆𑀢𑀺 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺 𑀦𑀯𑀳𑀺 𑀦𑁆𑀳𑀸𑀭𑀼𑀲𑀢𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀦𑀯𑀳𑀺 𑀫𑀁𑀲𑀧𑁂𑀲𑀺𑀲𑀢𑁂𑀳𑀺 𑀮𑀺𑀫𑁆𑀧𑀺𑀢𑁆𑀯𑀸 𑀲𑀫𑀦𑁆𑀢𑀢𑁄 𑀉𑀲𑁆𑀲𑀺𑀢𑀁. 𑀆𑀢𑀼𑀭𑀦𑁆𑀢𑀺 𑀚𑀭𑀸𑀢𑀼𑀭𑀢𑀸𑀬 𑀭𑁄𑀕𑀸𑀢𑀼𑀭𑀢𑀸𑀬 𑀓𑀺𑀮𑁂𑀲𑀸𑀢𑀼𑀭𑀢𑀸𑀬 𑀘 𑀦𑀺𑀘𑁆𑀘𑀸𑀢𑀼𑀭𑀁. 𑀩𑀳𑀼𑀲𑀗𑁆𑀓𑀧𑁆𑀧𑀦𑁆𑀢𑀺 𑀧𑀭𑁂𑀲𑀁 𑀉𑀧𑁆𑀧𑀦𑁆𑀦𑀧𑀢𑁆𑀣𑀦𑀸𑀲𑀗𑁆𑀓𑀧𑁆𑀧𑁂𑀳𑀺 𑀩𑀳𑀼𑀲𑀗𑁆𑀓𑀧𑁆𑀧𑀁. 𑀇𑀢𑁆𑀣𑀻𑀦𑀜𑁆𑀳𑀺 𑀓𑀸𑀬𑁂 𑀧𑀼𑀭𑀺𑀲𑀸𑀦𑀁 𑀲𑀗𑁆𑀓𑀧𑁆𑀧𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀓𑀸𑀬𑁂 𑀇𑀢𑁆𑀣𑀻𑀦𑀁. 𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀓𑀴𑁂𑀯𑀭𑀪𑀽𑀢𑀫𑁆𑀧𑀺 𑀘𑁂𑀢𑀁 𑀓𑀸𑀓𑀓𑀼𑀮𑀮𑀸𑀤𑀬𑁄 𑀧𑀢𑁆𑀣𑀬𑀦𑁆𑀢𑀺𑀬𑁂𑀯𑀸𑀢𑀺 𑀩𑀳𑀼𑀲𑀗𑁆𑀓𑀧𑁆𑀧𑁄 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀻𑀢𑀺 𑀬𑀲𑁆𑀲 𑀓𑀸𑀬𑀲𑁆𑀲 𑀫𑀸𑀬𑀸𑀫𑀭𑀻𑀘𑀺𑀨𑁂𑀡𑀧𑀺𑀡𑁆𑀟 𑀉𑀤𑀓𑀧𑀼𑀧𑁆𑀨𑀼𑀴𑀸𑀤𑀻𑀦𑀁 𑀯𑀺𑀬 𑀏𑀓𑀁𑀲𑁂𑀦𑁂𑀯 𑀞𑀺𑀢𑀺 𑀦𑀸𑀫 𑀦𑀢𑁆𑀣𑀺, 𑀪𑀺𑀚𑁆𑀚𑀦𑀥𑀫𑁆𑀫𑀢𑀸𑀯 𑀦𑀺𑀬𑀢𑀸.

𑀢𑀘𑁂𑀦 𑀑𑀦𑀤𑁆𑀥𑀦𑁆𑀢𑀺 𑀅𑀮𑁆𑀮𑀫𑀦𑀼𑀲𑁆𑀲𑀘𑀫𑁆𑀫𑁂𑀦 𑀑𑀦𑀤𑁆𑀥𑀁. 𑀲𑀳 𑀯𑀢𑁆𑀣𑁂𑀪𑀺 𑀲𑁄𑀪𑀢𑀻𑀢𑀺 𑀕𑀦𑁆𑀥𑀸𑀤𑀻𑀳𑀺 𑀫𑀡𑀺𑀓𑀼𑀡𑁆𑀟𑀮𑁂𑀳𑀺 𑀘 𑀘𑀺𑀢𑁆𑀢𑀓𑀢𑀫𑁆𑀧𑀺 𑀭𑀽𑀧𑀁 𑀯𑀢𑁆𑀣𑁂𑀳𑀺 𑀲𑀳𑁂𑀯 𑀲𑁄𑀪𑀢𑀺, 𑀯𑀺𑀦𑀸 𑀯𑀢𑁆𑀣𑁂𑀳𑀺 𑀚𑁂𑀕𑀼𑀘𑁆𑀙𑀁 𑀳𑁄𑀢𑀺 𑀅𑀦𑁄𑀮𑁄𑀓𑀦𑀓𑁆𑀔𑀫𑀁.

𑀅𑀮𑀢𑁆𑀢𑀓𑀓𑀢𑀸𑀢𑀺 𑀅𑀮𑀢𑁆𑀢𑀓𑁂𑀦 𑀭𑀜𑁆𑀚𑀺𑀢𑀸. 𑀘𑀼𑀡𑁆𑀡𑀓𑀫𑀓𑁆𑀔𑀺𑀢𑀦𑁆𑀢𑀺 𑀲𑀸𑀲𑀧𑀓𑀓𑁆𑀓𑁂𑀦 𑀫𑀼𑀔𑀧𑀻𑀴𑀓𑀸𑀤𑀻𑀦𑀺 𑀦𑀻𑀳𑀭𑀺𑀢𑁆𑀯𑀸 𑀮𑁄𑀡𑀫𑀢𑁆𑀢𑀺𑀓𑀸𑀬 𑀤𑀼𑀝𑁆𑀞𑀮𑁄𑀳𑀺𑀢𑀁 𑀯𑀺𑀮𑀺𑀬𑀸𑀧𑁂𑀢𑁆𑀯𑀸 𑀢𑀺𑀮𑀧𑀺𑀝𑁆𑀞𑁂𑀦 𑀮𑁄𑀳𑀺𑀢𑀁 𑀧𑀲𑀸𑀤𑁂𑀢𑁆𑀯𑀸 𑀳𑀮𑀺𑀤𑁆𑀤𑀺𑀬𑀸 𑀯𑀡𑁆𑀡𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀘𑀼𑀡𑁆𑀡𑀓𑀕𑀡𑁆𑀟𑀺𑀓𑀸𑀬 𑀫𑀼𑀔𑀁 𑀧𑀳𑀭𑀦𑁆𑀢𑀺, 𑀢𑁂𑀦𑁂𑀲 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀅𑀝𑁆𑀞𑀸𑀧𑀤𑀓𑀢𑀸𑀢𑀺 𑀭𑀲𑁄𑀤𑀓𑁂𑀦 𑀫𑀓𑁆𑀔𑀺𑀢𑁆𑀯𑀸 𑀦𑀮𑀸𑀝𑀧𑀭𑀺𑀬𑀦𑁆𑀢𑁂 𑀆𑀯𑀢𑁆𑀢𑀦𑀧𑀭𑀺𑀯𑀢𑁆𑀢𑁂 𑀓𑀢𑁆𑀯𑀸 𑀅𑀝𑁆𑀞𑀧𑀤𑀓𑀭𑀘𑀦𑀸𑀬 𑀭𑀘𑀺𑀢𑀸. 𑀅𑀜𑁆𑀚𑀦𑀻𑀢𑀺 𑀅𑀜𑁆𑀚𑀦𑀦𑀸𑀴𑀺𑀓𑀸.

𑀑𑀤𑀳𑀻𑀢𑀺 𑀞𑀧𑁂𑀲𑀺. 𑀧𑀸𑀲𑀦𑁆𑀢𑀺 𑀯𑀸𑀓𑀭𑀸𑀚𑀸𑀮𑀁. 𑀦𑀸𑀲𑀤𑀸𑀢𑀺 𑀦 𑀖𑀝𑁆𑀝𑀬𑀺. 𑀦𑀺𑀯𑀸𑀧𑀦𑁆𑀢𑀺 𑀦𑀺𑀯𑀸𑀧𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀺𑀯𑀸𑀧𑀢𑀺𑀡𑀲𑀤𑀺𑀲𑀪𑁄𑀚𑀦𑀁. 𑀓𑀦𑁆𑀤𑀦𑁆𑀢𑁂𑀢𑀺 𑀯𑀺𑀭𑀯𑀫𑀸𑀦𑁂 𑀧𑀭𑀺𑀤𑁂𑀯𑀫𑀸𑀦𑁂. 𑀇𑀫𑀸𑀬 𑀳𑀺 𑀕𑀸𑀣𑀸𑀬 𑀣𑁂𑀭𑁄 𑀫𑀸𑀢𑀸𑀧𑀺𑀢𑀭𑁄 𑀫𑀺𑀕𑀮𑀼𑀤𑁆𑀤𑀓𑁂 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺, 𑀅𑀯𑀲𑁂𑀲𑀜𑀸𑀢𑀓𑁂 𑀫𑀺𑀕𑀮𑀼𑀤𑁆𑀤𑀓𑀧𑀭𑀺𑀲𑀁 𑀯𑀺𑀬, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀯𑀸𑀓𑀭𑀸𑀚𑀸𑀮𑀁 𑀯𑀺𑀬, 𑀅𑀢𑁆𑀢𑀦𑀸 𑀪𑀼𑀢𑁆𑀢𑀪𑁄𑀚𑀦𑀁 𑀦𑀺𑀯𑀸𑀧𑀢𑀺𑀡𑀁 𑀯𑀺𑀬, 𑀅𑀢𑁆𑀢𑀸𑀦𑀁 𑀫𑀳𑀸𑀫𑀺𑀕𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀬𑀣𑀸 𑀳𑀺 𑀫𑀳𑀸𑀫𑀺𑀕𑁄 𑀬𑀸𑀯𑀤𑀢𑁆𑀣𑀁 𑀦𑀺𑀯𑀸𑀧𑀢𑀺𑀡𑀁 𑀔𑀸𑀤𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀫𑀁 𑀦𑀸𑀫 𑀞𑀸𑀦𑀁 𑀕𑀢𑀲𑁆𑀲 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀺𑀕𑀮𑀼𑀤𑁆𑀤𑀓𑀸𑀦𑀁 𑀧𑀭𑀺𑀤𑁂𑀯𑀦𑁆𑀢𑀸𑀦𑀁𑀬𑁂𑀯 𑀯𑀸𑀓𑀭𑀁 𑀅𑀖𑀝𑁆𑀝𑀬𑀫𑀸𑀦𑁄𑀯 𑀉𑀧𑁆𑀧𑀢𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀖𑀦𑀘𑁆𑀙𑀸𑀬𑀲𑁆𑀲 𑀙𑀢𑁆𑀢𑀲𑁆𑀲 𑀯𑀺𑀬 𑀕𑀼𑀫𑁆𑀩𑀲𑁆𑀲 𑀳𑁂𑀝𑁆𑀞𑀸 𑀫𑀦𑁆𑀤𑀫𑀦𑁆𑀤𑁂𑀦 𑀯𑀸𑀢𑁂𑀦 𑀩𑀻𑀚𑀬𑀫𑀸𑀦𑁄 𑀆𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀣𑁂𑀭𑁄 𑀇𑀫𑀸 𑀕𑀸𑀣𑀸 𑀪𑀸𑀲𑀺𑀢𑁆𑀯𑀸 𑀆𑀓𑀸𑀲𑁂𑀦𑁂𑀯 𑀕𑀦𑁆𑀢𑁆𑀯𑀸 𑀫𑀺𑀕𑀘𑀻𑀭𑁂 𑀧𑀘𑁆𑀘𑀼𑀧𑀝𑁆𑀞𑀸𑀲𑀺.

𑀓𑀲𑁆𑀫𑀸 𑀧𑀦 𑀣𑁂𑀭𑁄 𑀆𑀓𑀸𑀲𑁂𑀦 𑀕𑀢𑁄𑀢𑀺. 𑀧𑀺𑀢𑀸 𑀓𑀺𑀭𑀲𑁆𑀲 𑀲𑁂𑀝𑁆𑀞𑀺 𑀲𑀢𑁆𑀢𑀲𑀼 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀲𑀼 𑀅𑀕𑁆𑀕𑀴𑀁 𑀤𑀸𑀧𑁂𑀢𑁆𑀯𑀸 𑀫𑀮𑁆𑀮𑁂 𑀆𑀡𑀸𑀧𑁂𑀲𑀺 𑁋 ‘‘𑀲𑀘𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀳𑀢𑁆𑀣𑀧𑀸𑀤𑁂𑀲𑀼 𑀦𑀁 𑀕𑀳𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀳𑀭𑀺𑀢𑁆𑀯𑀸 𑀕𑀺𑀳𑀺𑀯𑁂𑀲𑀁 𑀕𑀡𑁆𑀳𑀸𑀧𑁂𑀣𑀸’’𑀢𑀺. 𑀢𑀲𑁆𑀫𑀸 𑀣𑁂𑀭𑁄 𑁋 ‘‘𑀏𑀢𑁂 𑀫𑀸𑀤𑀺𑀲𑀁 𑀫𑀳𑀸𑀔𑀻𑀡𑀸𑀲𑀯𑀁 𑀳𑀢𑁆𑀣𑁂 𑀯𑀸 𑀧𑀸𑀤𑁂 𑀯𑀸 𑀕𑀳𑁂𑀢𑁆𑀯𑀸 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬𑀼𑀁, 𑀢𑀁 𑀦𑁂𑀲𑀁 𑀫𑀸 𑀅𑀳𑁄𑀲𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀓𑀸𑀲𑁂𑀦 𑀅𑀕𑀫𑀸𑀲𑀺. 𑀧𑀭𑀲𑀫𑀼𑀤𑁆𑀤𑀯𑀸𑀲𑀺𑀢𑁆𑀣𑁂𑀭𑀸𑀦𑀁 𑀧𑀦 𑁋 ‘‘𑀞𑀺𑀢𑀓𑁄𑀯 𑀇𑀫𑀸 𑀕𑀸𑀣𑀸 𑀪𑀸𑀲𑀺𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀓𑁄𑀭𑀩𑁆𑀬𑀲𑁆𑀲 𑀫𑀺𑀕𑀘𑀻𑀭𑁂 𑀧𑀘𑁆𑀘𑀼𑀧𑀝𑁆𑀞𑀸𑀲𑀻’’𑀢𑀺 𑀅𑀬𑀁 𑀯𑀸𑀘𑀦𑀸𑀫𑀕𑁆𑀕𑁄𑀬𑁂𑀯.

𑁩𑁦𑁩. 𑀫𑀺𑀕𑀯𑁄𑀢𑀺 𑀢𑀲𑁆𑀲 𑀉𑀬𑁆𑀬𑀸𑀦𑀧𑀸𑀮𑀲𑁆𑀲 𑀦𑀸𑀫𑀁. 𑀲𑁄𑀥𑁂𑀦𑁆𑀢𑁄𑀢𑀺 𑀉𑀬𑁆𑀬𑀸𑀦𑀫𑀕𑁆𑀕𑀁 𑀲𑀫𑀁 𑀓𑀸𑀭𑁂𑀢𑁆𑀯𑀸 𑀅𑀦𑁆𑀢𑁄𑀉𑀬𑁆𑀬𑀸𑀦𑁂 𑀢𑀘𑁆𑀙𑀺𑀢𑀩𑁆𑀩𑀬𑀼𑀢𑁆𑀢𑀝𑁆𑀞𑀸𑀦𑀸𑀦𑀺 𑀢𑀘𑁆𑀙𑀸𑀧𑁂𑀦𑁆𑀢𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀬𑀼𑀢𑁆𑀢𑀸𑀦𑀺 𑀞𑀸𑀦𑀸𑀦𑀺 𑀲𑀫𑁆𑀫𑀚𑁆𑀚𑀸𑀧𑁂𑀦𑁆𑀢𑁄 𑀯𑀸𑀮𑀼𑀓𑀸𑀑𑀓𑀺𑀭𑀡-𑀧𑀼𑀧𑁆𑀨𑀯𑀺𑀓𑀺𑀭𑀡-𑀧𑀼𑀡𑁆𑀡𑀖𑀝𑀝𑁆𑀞𑀧𑀦-𑀓𑀤𑀮𑀺𑀓𑁆𑀔𑀦𑁆𑀥𑀞𑀧𑀦𑀸𑀤𑀻𑀦𑀺 𑀘 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀬𑁂𑀦 𑀭𑀸𑀚𑀸 𑀓𑁄𑀭𑀩𑁆𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀲𑀤𑀸 𑀇𑀫𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑀺, 𑀧𑀲𑁆𑀲𑀺𑀢𑀼𑀓𑀸𑀫𑁄 𑀏𑀢𑀁, 𑀆𑀕𑀢𑀪𑀸𑀯𑀁 𑀧𑀦𑀲𑁆𑀲 𑀦 𑀚𑀸𑀦𑀸𑀢𑀺, 𑀫𑀳𑀸 𑀔𑁄 𑀧𑀦𑀸𑀬𑀁 𑀧𑀡𑁆𑀡𑀸𑀓𑀸𑀭𑁄, 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑁂𑀦 𑀭𑀸𑀚𑀸 𑀓𑁄𑀭𑀩𑁆𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀓𑀺𑀢𑁆𑀢𑀬𑀫𑀸𑀦𑁄 𑀅𑀳𑁄𑀲𑀻𑀢𑀺 𑀲𑁄 𑀓𑀺𑀭 𑀭𑀸𑀚𑀸 𑀣𑁂𑀭𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀩𑀮𑀫𑀚𑁆𑀛𑁂𑀧𑀺 𑀦𑀸𑀝𑀓𑀫𑀚𑁆𑀛𑁂𑀧𑀺 𑁋 ‘‘𑀤𑀼𑀓𑁆𑀓𑀭𑀁 𑀓𑀢𑀁 𑀓𑀼𑀮𑀧𑀼𑀢𑁆𑀢𑁂𑀦 𑀢𑀸𑀯 𑀫𑀳𑀦𑁆𑀢𑀁 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀧𑀼𑀦𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀦𑀧𑀮𑁄𑀓𑁂𑀦𑁆𑀢𑁂𑀦𑀸’’𑀢𑀺 𑀕𑀼𑀡𑀁 𑀓𑀣𑁂𑀲𑀺, 𑀢𑀁 𑀕𑀳𑁂𑀢𑁆𑀯𑀸 𑀅𑀬𑀁 𑀏𑀯𑀫𑀸𑀳. 𑀯𑀺𑀲𑁆𑀲𑀚𑁆𑀚𑁂𑀣𑀸𑀢𑀺 𑀯𑀢𑁆𑀯𑀸𑀢𑀺 𑀑𑀭𑁄𑀥𑀫𑀳𑀸𑀫𑀢𑁆𑀢𑀩𑀮𑀓𑀸𑀬𑀸𑀤𑀻𑀲𑀼 𑀬𑀲𑁆𑀲 𑀬𑀁 𑀅𑀦𑀼𑀘𑁆𑀙𑀯𑀺𑀓𑀁, 𑀢𑀲𑁆𑀲 𑀢𑀁 𑀤𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀲𑁆𑀲𑀝𑀸𑀬 𑀉𑀲𑁆𑀲𑀝𑀸𑀬𑀸𑀢𑀺 𑀉𑀲𑁆𑀲𑀺𑀢𑀸𑀬 𑀉𑀲𑁆𑀲𑀺𑀢𑀸𑀬, 𑀫𑀳𑀸𑀫𑀢𑁆𑀢𑀫𑀳𑀸𑀭𑀝𑁆𑀞𑀺𑀓𑀸𑀤𑀻𑀦𑀁 𑀯𑀲𑁂𑀦 𑀉𑀕𑁆𑀕𑀢𑀼𑀕𑁆𑀕𑀢𑀫𑁂𑀯 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀻𑀢𑀺 𑀅𑀢𑁆𑀣𑁄. 𑀇𑀥 𑀪𑀯𑀁 𑀭𑀝𑁆𑀞𑀧𑀸𑀮𑁄 𑀳𑀢𑁆𑀣𑀢𑁆𑀣𑀭𑁂 𑀦𑀺𑀲𑀻𑀤𑀢𑀽𑀢𑀺 𑀳𑀢𑁆𑀣𑀢𑁆𑀣𑀭𑁄 𑀢𑀦𑀼𑀓𑁄 𑀩𑀳𑀮𑀧𑀼𑀧𑁆𑀨𑀸𑀤𑀺𑀕𑀼𑀡𑀁 𑀓𑀢𑁆𑀯𑀸 𑀅𑀢𑁆𑀣𑀢𑁄 𑀅𑀪𑀺𑀮𑀓𑁆𑀔𑀺𑀢𑁄 𑀳𑁄𑀢𑀺, 𑀢𑀸𑀤𑀺𑀲𑁂 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳.

𑁩𑁦𑁪. 𑀧𑀸𑀭𑀺𑀚𑀼𑀜𑁆𑀜𑀸𑀦𑀻𑀢𑀺 𑀧𑀸𑀭𑀺𑀚𑀼𑀜𑁆𑀜𑀪𑀸𑀯𑀸 𑀧𑀭𑀺𑀓𑁆𑀔𑀬𑀸. 𑀚𑀺𑀡𑁆𑀡𑁄𑀢𑀺 𑀚𑀭𑀸𑀚𑀺𑀡𑁆𑀡𑁄. 𑀯𑀼𑀟𑁆𑀠𑁄𑀢𑀺 𑀯𑀬𑁄𑀯𑀼𑀟𑁆𑀠𑁄. 𑀫𑀳𑀮𑁆𑀮𑀓𑁄𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑁄. 𑀅𑀤𑁆𑀥𑀕𑀢𑁄𑀢𑀺 𑀅𑀤𑁆𑀥𑀸𑀦𑀁 𑀅𑀢𑀺𑀓𑁆𑀓𑀦𑁆𑀢𑁄. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀧𑀘𑁆𑀙𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀧𑀩𑁆𑀩𑀚𑀢𑀻𑀢𑀺 𑀥𑀼𑀭𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸, 𑁋 ‘‘𑀪𑀦𑁆𑀢𑁂, 𑀫𑀬𑀸 𑀤𑀳𑀭𑀓𑀸𑀮𑁂 𑀩𑀳𑀼𑀁 𑀓𑀼𑀲𑀮𑀁 𑀓𑀢𑀁, 𑀇𑀤𑀸𑀦𑀺 𑀫𑀳𑀮𑁆𑀮𑀓𑁄𑀫𑁆𑀳𑀺, 𑀫𑀳𑀮𑁆𑀮𑀓𑀲𑁆𑀲 𑀘𑁂𑀲𑀸 𑀧𑀩𑁆𑀩𑀚𑁆𑀚𑀸 𑀦𑀸𑀫, 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀅𑀧𑁆𑀧𑀳𑀭𑀺𑀢𑀁 𑀓𑀢𑁆𑀯𑀸 𑀚𑀻𑀯𑀺𑀲𑁆𑀲𑀸𑀫𑀺, 𑀧𑀩𑁆𑀩𑀸𑀚𑁂𑀣 𑀫𑀁, 𑀪𑀦𑁆𑀢𑁂,’’𑀢𑀺 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀬𑀸𑀘𑀢𑀺, 𑀣𑁂𑀭𑀸 𑀅𑀦𑀼𑀓𑀫𑁆𑀧𑀸𑀬 𑀧𑀩𑁆𑀩𑀸𑀚𑁂𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀧𑁆𑀧𑀸𑀩𑀸𑀥𑁄𑀢𑀺 𑀅𑀭𑁄𑀕𑁄. 𑀅𑀧𑁆𑀧𑀸𑀢𑀗𑁆𑀓𑁄𑀢𑀺 𑀦𑀺𑀤𑁆𑀤𑀼𑀓𑁆𑀔𑁄. 𑀲𑀫𑀯𑁂𑀧𑀸𑀓𑀺𑀦𑀺𑀬𑀸𑀢𑀺 𑀲𑀫𑀯𑀺𑀧𑀸𑀘𑀦𑀺𑀬𑀸. 𑀕𑀳𑀡𑀺𑀬𑀸𑀢𑀺 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼𑀬𑀸. 𑀢𑀢𑁆𑀣 𑀬𑀲𑁆𑀲 𑀪𑀼𑀢𑁆𑀢𑀪𑀼𑀢𑁆𑀢𑁄 𑀆𑀳𑀸𑀭𑁄 𑀚𑀻𑀭𑀢𑀺, 𑀬𑀲𑁆𑀲 𑀯𑀸 𑀧𑀦 𑀧𑀼𑀝𑀪𑀢𑁆𑀢𑀁 𑀯𑀺𑀬 𑀢𑀣𑁂𑀯 𑀢𑀺𑀝𑁆𑀞𑀢𑀺, 𑀉𑀪𑁄𑀧𑁂𑀢𑁂 𑀦 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀬𑀲𑁆𑀲 𑀧𑀦 𑀪𑀼𑀢𑁆𑀢𑀓𑀸𑀮𑁂 𑀪𑀢𑁆𑀢𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑁂𑀯, 𑀅𑀬𑀁 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀦𑀸𑀢𑀺𑀲𑀻𑀢𑀸𑀬 𑀦𑀘𑁆𑀘𑀼𑀡𑁆𑀳𑀸𑀬𑀸𑀢𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀦𑀸𑀢𑀺𑀲𑀻𑀢𑀸𑀬 𑀦𑀘𑁆𑀘𑀼𑀡𑁆𑀳𑀸𑀬. 𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀭𑀸𑀚𑀸𑀦𑁄 𑀯𑀸 𑀳𑀭𑀦𑁆𑀢𑀻𑀢𑀺𑀆𑀤𑀺𑀦𑀸 𑀅𑀦𑀼𑀓𑁆𑀓𑀫𑁂𑀦. 𑀤𑀼𑀢𑀺𑀬𑀯𑀸𑀭𑁂 𑀭𑀸𑀚𑀪𑀬𑀘𑁄𑀭𑀪𑀬𑀙𑀸𑀢𑀓𑀪𑀬𑀸𑀤𑀺𑀦𑀸 𑀅𑀦𑀼𑀓𑁆𑀓𑀫𑁂𑀦.

𑁩𑁦𑁫. 𑀥𑀫𑁆𑀫𑀼𑀤𑁆𑀤𑁂𑀲𑀸 𑀉𑀤𑁆𑀤𑀺𑀝𑁆𑀞𑀸𑀢𑀺 𑀥𑀫𑁆𑀫𑀦𑀺𑀤𑁆𑀤𑁂𑀲𑀸 𑀉𑀤𑁆𑀤𑀺𑀝𑁆𑀞𑀸. 𑀉𑀧𑀦𑀺𑀬𑁆𑀬𑀢𑀻𑀢𑀺 𑀚𑀭𑀸𑀫𑀭𑀡𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺, 𑀆𑀬𑀼𑀓𑁆𑀔𑀬𑁂𑀦 𑀯𑀸 𑀢𑀢𑁆𑀣 𑀦𑀺𑀬𑁆𑀬𑀢𑀺. 𑀅𑀤𑁆𑀥𑀼𑀯𑁄𑀢𑀺 𑀥𑀼𑀯𑀝𑁆𑀞𑀸𑀦𑀯𑀺𑀭𑀳𑀺𑀢𑁄. 𑀅𑀢𑀸𑀡𑁄𑀢𑀺 𑀢𑀸𑀬𑀺𑀢𑀼𑀁 𑀲𑀫𑀢𑁆𑀣𑁂𑀦 𑀯𑀺𑀭𑀳𑀺𑀢𑁄. 𑀅𑀦𑀪𑀺𑀲𑁆𑀲𑀭𑁄𑀢𑀺 𑀅𑀲𑀭𑀡𑁄 𑀅𑀪𑀺𑀲𑀭𑀺𑀢𑁆𑀯𑀸 𑀅𑀪𑀺𑀕𑀦𑁆𑀢𑁆𑀯𑀸 𑀅𑀲𑁆𑀲𑀸𑀲𑁂𑀢𑀼𑀁 𑀲𑀫𑀢𑁆𑀣𑁂𑀦 𑀯𑀺𑀭𑀳𑀺𑀢𑁄. 𑀅𑀲𑁆𑀲𑀓𑁄𑀢𑀺 𑀦𑀺𑀲𑁆𑀲𑀓𑁄 𑀲𑀓𑀪𑀡𑁆𑀟𑀯𑀺𑀭𑀳𑀺𑀢𑁄. 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀦𑁆𑀢𑀺 𑀲𑀓𑀪𑀡𑁆𑀟𑀦𑁆𑀢𑀺 𑀲𑀮𑁆𑀮𑀓𑁆𑀔𑀺𑀢𑀁 𑀲𑀩𑁆𑀩𑀁 𑀧𑀳𑀸𑀬 𑀮𑁄𑀓𑁂𑀦 𑀕𑀦𑁆𑀢𑀩𑁆𑀩𑀁. 𑀢𑀡𑁆𑀳𑀸𑀤𑀸𑀲𑁄𑀢𑀺 𑀢𑀡𑁆𑀳𑀸𑀬 𑀤𑀸𑀲𑁄.

𑁩𑁦𑁬. 𑀳𑀢𑁆𑀣𑀺𑀲𑁆𑀫𑀺𑀦𑁆𑀢𑀺 𑀳𑀢𑁆𑀣𑀺𑀲𑀺𑀧𑁆𑀧𑁂. 𑀓𑀢𑀸𑀯𑀻𑀢𑀺 𑀓𑀢𑀓𑀭𑀡𑀻𑀬𑁄, 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁄 𑀧𑀕𑀼𑀡𑀲𑀺𑀧𑁆𑀧𑁄𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀊𑀭𑀼𑀩𑀮𑀻𑀢𑀺 𑀊𑀭𑀼𑀩𑀮𑀲𑀫𑁆𑀧𑀦𑁆𑀦𑁄. 𑀬𑀲𑁆𑀲 𑀳𑀺 𑀨𑀮𑀓𑀜𑁆𑀘 𑀆𑀯𑀼𑀥𑀜𑁆𑀘 𑀕𑀳𑁂𑀢𑁆𑀯𑀸 𑀧𑀭𑀲𑁂𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀪𑀺𑀦𑁆𑀦𑀁 𑀪𑀺𑀦𑁆𑀤𑀢𑁄 𑀪𑀺𑀦𑁆𑀦𑀁 𑀲𑀦𑁆𑀥𑀸𑀭𑀬𑀢𑁄 𑀧𑀭𑀳𑀢𑁆𑀣𑀕𑀢𑀁 𑀭𑀚𑁆𑀚𑀁 𑀆𑀳𑀭𑀺𑀢𑀼𑀁 𑀊𑀭𑀼𑀩𑀮𑀁 𑀅𑀢𑁆𑀣𑀺, 𑀅𑀬𑀁 𑀊𑀭𑀼𑀩𑀮𑀻 𑀦𑀸𑀫. 𑀩𑀸𑀳𑀼𑀩𑀮𑀻𑀢𑀺 𑀩𑀸𑀳𑀼𑀩𑀮𑀲𑀫𑁆𑀧𑀦𑁆𑀦𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀅𑀮𑀫𑀢𑁆𑀢𑁄𑀢𑀺 𑀲𑀫𑀢𑁆𑀣𑀅𑀢𑁆𑀢𑀪𑀸𑀯𑁄.

𑀧𑀭𑀺𑀬𑁄𑀥𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀻𑀢𑀺 𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀤𑁆𑀤𑀯𑀁 𑀑𑀥𑀸𑀬 𑀅𑀯𑀢𑁆𑀣𑀭𑀺𑀢𑁆𑀯𑀸 𑀯𑀢𑁆𑀢𑀺𑀲𑁆𑀲𑀦𑁆𑀢𑀻𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑀳𑀺𑀢𑀸.

𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀪𑁄 𑀭𑀝𑁆𑀞𑀧𑀸𑀮, 𑀇𑀫𑀲𑁆𑀫𑀺𑀁 𑀭𑀸𑀚𑀓𑀼𑀮𑁂 𑀧𑀳𑀽𑀢𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀦𑁆𑀢𑀺 𑀇𑀤𑀁 𑀲𑁄 𑀭𑀸𑀚𑀸 𑀉𑀧𑀭𑀺 𑀥𑀫𑁆𑀫𑀼𑀤𑁆𑀤𑁂𑀲𑀲𑁆𑀲 𑀓𑀸𑀭𑀡𑀁 𑀆𑀳𑀭𑀦𑁆𑀢𑁄 𑀆𑀳.

𑀅𑀣𑀸𑀧𑀭𑀁 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀧𑀲𑁆𑀲𑀸𑀫𑀺 𑀮𑁄𑀓𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀢𑀼𑀦𑁆𑀦𑀁 𑀥𑀫𑁆𑀫𑀼𑀤𑁆𑀤𑁂𑀲𑀸𑀦𑀁 𑀅𑀦𑀼𑀕𑀻𑀢𑀺𑀁 𑀅𑀯𑁄𑀘.

𑁩𑁦𑁭. 𑀢𑀢𑁆𑀣 𑀪𑀺𑀬𑁆𑀬𑁄𑀯 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬𑀦𑁆𑀢𑀻𑀢𑀺 𑀏𑀓𑀁 𑀮𑀪𑀺𑀢𑁆𑀯𑀸 𑀤𑁆𑀯𑁂 𑀧𑀢𑁆𑀣𑀬𑀦𑁆𑀢𑀺, 𑀤𑁆𑀯𑁂 𑀮𑀪𑀺𑀢𑁆𑀯𑀸 𑀘𑀢𑁆𑀢𑀸𑀭𑁄𑀢𑀺 𑀏𑀯𑀁 𑀉𑀢𑁆𑀢𑀭𑀼𑀢𑁆𑀢𑀭𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂 𑀧𑀢𑁆𑀣𑀬𑀦𑁆𑀢𑀺𑀬𑁂𑀯.

𑀧𑀲𑀬𑁆𑀳𑀸𑀢𑀺 𑀲𑀧𑀢𑁆𑀢𑀕𑀡𑀁 𑀅𑀪𑀺𑀪𑀯𑀺𑀢𑁆𑀯𑀸. 𑀲𑀲𑀸𑀕𑀭𑀦𑁆𑀢𑀦𑁆𑀢𑀺 𑀲𑀤𑁆𑀥𑀺𑀁 𑀲𑀸𑀕𑀭𑀦𑁆𑀢𑁂𑀦. 𑀑𑀭𑀁 𑀲𑀫𑀼𑀤𑁆𑀤𑀲𑁆𑀲𑀸𑀢𑀺 𑀬𑀁 𑀲𑀫𑀼𑀤𑁆𑀤𑀲𑁆𑀲 𑀑𑀭𑀢𑁄 𑀲𑀓𑀭𑀝𑁆𑀞𑀁, 𑀢𑁂𑀦 𑀅𑀢𑀺𑀢𑁆𑀢𑀭𑀽𑀧𑁄𑀢𑀺 𑀅𑀢𑁆𑀣𑁄. 𑀦 𑀳𑀢𑁆𑀣𑀻𑀢𑀺 𑀦 𑀳𑀺 𑀅𑀢𑁆𑀣𑀺.

𑀅𑀳𑁄 𑀯𑀢𑀸 𑀦𑁄𑀢𑀺 𑀅𑀳𑁄 𑀯𑀢 𑀦𑀼, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀫𑀭𑀸𑀢𑀺 𑀘𑀸𑀳𑀽𑀢𑀺 𑀅𑀫𑀭𑀁 𑀇𑀢𑀺 𑀘 𑀆𑀳𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀫𑀢𑀁 𑀜𑀸𑀢𑀻 𑀧𑀭𑀺𑀯𑀸𑀭𑁂𑀢𑁆𑀯𑀸 𑀓𑀦𑁆𑀤𑀦𑁆𑀢𑀺, 𑀢𑀁 𑁋 ‘‘𑀅𑀳𑁄 𑀯𑀢 𑀅𑀫𑁆𑀳𑀸𑀓𑀁 𑀪𑀸𑀢𑀸 𑀫𑀢𑁄, 𑀧𑀼𑀢𑁆𑀢𑁄 𑀫𑀢𑁄’’𑀢𑀺𑀆𑀤𑀻𑀦𑀺𑀧𑀺 𑀯𑀤𑀦𑁆𑀢𑀺.

𑀨𑀼𑀲𑀦𑁆𑀢𑀺 𑀨𑀲𑁆𑀲𑀦𑁆𑀢𑀺 𑀫𑀭𑀡𑀨𑀲𑁆𑀲𑀁 𑀨𑀼𑀲𑀦𑁆𑀢𑀺. 𑀢𑀣𑁂𑀯 𑀨𑀼𑀝𑁆𑀞𑁄𑀢𑀺 𑀬𑀣𑀸 𑀩𑀸𑀮𑁄, 𑀥𑀻𑀭𑁄𑀧𑀺 𑀢𑀣𑁂𑀯 𑀫𑀭𑀡𑀨𑀲𑁆𑀲𑁂𑀦 𑀨𑀼𑀝𑁆𑀞𑁄, 𑀅𑀨𑀼𑀝𑁆𑀞𑁄 𑀦𑀸𑀫 𑀦𑀢𑁆𑀣𑀺, 𑀅𑀬𑀁 𑀧𑀦 𑀯𑀺𑀲𑁂𑀲𑁄. 𑀩𑀸𑀮𑁄 𑀘 𑀩𑀸𑀮𑁆𑀬𑀸 𑀯𑀥𑀺𑀢𑁄𑀯 𑀲𑁂𑀢𑀻𑀢𑀺 𑀩𑀸𑀮𑁄 𑀩𑀸𑀮𑀪𑀸𑀯𑁂𑀦 𑀫𑀭𑀡𑀨𑀲𑁆𑀲𑀁 𑀆𑀕𑀫𑁆𑀫 𑀯𑀥𑀺𑀢𑁄𑀯 𑀲𑁂𑀢𑀺 𑀅𑀪𑀺𑀳𑀢𑁄𑀯 𑀲𑀬𑀢𑀺. 𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀦𑁆𑀢𑀺𑀆𑀤𑀺𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀘𑀮𑀢𑀺 𑀯𑁂𑀥𑀢𑀺 𑀯𑀺𑀧𑁆𑀨𑀦𑁆𑀤𑀢𑀺. 𑀥𑀻𑀭𑁄 𑀘 𑀦 𑀯𑁂𑀥𑀢𑀻𑀢𑀺 𑀥𑀻𑀭𑁄 𑀲𑀼𑀕𑀢𑀺𑀦𑀺𑀫𑀺𑀢𑁆𑀢𑀁 𑀧𑀲𑁆𑀲𑀦𑁆𑀢𑁄 𑀦 𑀯𑁂𑀥𑀢𑀺 𑀦 𑀘𑀮𑀢𑀺.

𑀬𑀸𑀬 𑀯𑁄𑀲𑀸𑀦𑀁 𑀇𑀥𑀸𑀥𑀺𑀕𑀘𑁆𑀙𑀢𑀻𑀢𑀺 𑀬𑀸𑀬 𑀧𑀜𑁆𑀜𑀸𑀬 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀩𑁆𑀩𑀓𑀺𑀘𑁆𑀘𑀯𑁄𑀲𑀸𑀦𑀁 𑀅𑀭𑀳𑀢𑁆𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀲𑀸𑀯 𑀥𑀦𑀢𑁄 𑀉𑀢𑁆𑀢𑀫𑀢𑀭𑀸. 𑀅𑀩𑁆𑀬𑁄𑀲𑀺𑀢𑀢𑁆𑀢𑀸𑀢𑀺 𑀅𑀧𑀭𑀺𑀬𑁄𑀲𑀺𑀢𑀢𑁆𑀢𑀸, 𑀅𑀭𑀳𑀢𑁆𑀢𑀧𑀢𑁆𑀢𑀺𑀬𑀸, 𑀅𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀪𑀯𑀸𑀪𑀯𑁂𑀲𑀽𑀢𑀺 𑀳𑀻𑀦𑀧𑁆𑀧𑀡𑀻𑀢𑁂𑀲𑀼 𑀪𑀯𑁂𑀲𑀼.

𑀉𑀧𑁂𑀢𑀺 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀦𑁆𑀢𑀺 𑀢𑁂𑀲𑀼 𑀧𑀸𑀧𑀁 𑀓𑀭𑁄𑀦𑁆𑀢𑁂𑀲𑀼 𑀬𑁄 𑀓𑁄𑀘𑀺 𑀲𑀢𑁆𑀢𑁄 𑀧𑀭𑀫𑁆𑀧𑀭𑀸𑀬 𑀲𑀁𑀲𑀸𑀭𑀁 𑀆𑀧𑀚𑁆𑀚𑀺𑀢𑁆𑀯𑀸 𑀕𑀩𑁆𑀪𑀜𑁆𑀘 𑀧𑀭𑀜𑁆𑀘 𑀮𑁄𑀓𑀁 𑀉𑀧𑁂𑀢𑀺. 𑀢𑀲𑁆𑀲𑀧𑁆𑀧𑀧𑀜𑁆𑀜𑁄𑀢𑀺 𑀢𑀲𑁆𑀲 𑀢𑀸𑀤𑀺𑀲𑀲𑁆𑀲 𑀅𑀧𑁆𑀧𑀧𑀜𑁆𑀜𑀲𑁆𑀲 𑀅𑀜𑁆𑀜𑁄 𑀅𑀧𑁆𑀧𑀧𑀜𑁆𑀜𑁄 𑀅𑀪𑀺𑀲𑀤𑁆𑀤𑀳𑀦𑁆𑀢𑁄.

𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀻𑀢𑀺 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀯𑀲𑁂𑀦 ‘‘𑀓𑀲𑀸𑀳𑀺𑀧𑀺 𑀢𑀸𑀮𑁂𑀢𑀻’’𑀢𑀺𑀆𑀤𑀻𑀳𑀺 𑀓𑀫𑁆𑀫𑀓𑀸𑀭𑀡𑀸𑀳𑀺 𑀳𑀜𑁆𑀜𑀢𑀺. 𑀧𑁂𑀘𑁆𑀘 𑀧𑀭𑀫𑁆𑀳𑀺 𑀮𑁄𑀓𑁂𑀢𑀺 𑀇𑀢𑁄 𑀕𑀦𑁆𑀢𑁆𑀯𑀸 𑀧𑀭𑀫𑁆𑀳𑀺 𑀅𑀧𑀸𑀬𑀮𑁄𑀓𑁂.

𑀯𑀺𑀭𑀽𑀧𑀭𑀽𑀧𑁂𑀦𑀸𑀢𑀺 𑀯𑀺𑀯𑀺𑀥𑀭𑀽𑀧𑁂𑀦, 𑀦𑀸𑀦𑀸𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀸𑀫𑀕𑀼𑀡𑁂𑀲𑀽𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁂𑀲𑀼 𑀲𑀩𑁆𑀩𑀓𑀸𑀫𑀕𑀼𑀡𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸. 𑀤𑀳𑀭𑀸𑀢𑀺 𑀅𑀦𑁆𑀢𑀫𑀲𑁄 𑀓𑀮𑀮𑀫𑀢𑁆𑀢𑀪𑀸𑀯𑀁 𑀉𑀧𑀸𑀤𑀸𑀬 𑀢𑀭𑀼𑀡𑀸. 𑀯𑀼𑀟𑁆𑀠𑀸𑀢𑀺 𑀯𑀲𑁆𑀲𑀲𑀢𑀸𑀢𑀺𑀓𑁆𑀓𑀦𑁆𑀢𑀸. 𑀅𑀧𑀡𑁆𑀡𑀓𑀁 𑀲𑀸𑀫𑀜𑁆𑀜𑀫𑁂𑀯 𑀲𑁂𑀬𑁆𑀬𑁄𑀢𑀺 𑀅𑀯𑀺𑀭𑀼𑀤𑁆𑀥𑀁 𑀅𑀤𑁆𑀯𑀚𑁆𑀛𑀕𑀸𑀫𑀺𑀁 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀺𑀓𑀁 𑀲𑀸𑀫𑀜𑁆𑀜𑀫𑁂𑀯 ‘‘𑀲𑁂𑀬𑁆𑀬𑁄, 𑀉𑀢𑁆𑀢𑀭𑀺𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘𑀸’’𑀢𑀺 𑀉𑀧𑀥𑀸𑀭𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀲𑁆𑀫𑀺 𑀫𑀳𑀸𑀭𑀸𑀚𑀸𑀢𑀺. 𑀢𑀲𑁆𑀫𑀸 𑀬𑀁 𑀢𑁆𑀯𑀁 𑀯𑀤𑀲𑀺 𑁋 ‘‘𑀓𑀺𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸’’𑀢𑀺, 𑀇𑀤𑀁 𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀧𑀩𑁆𑀩𑀚𑀺𑀢𑁄𑀲𑁆𑀫𑀻𑀢𑀺 𑀫𑀁 𑀥𑀸𑀭𑁂𑀳𑀻𑀢𑀺 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀖𑀤𑁂𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁮. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀖𑀤𑁂𑀯𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀖𑀤𑁂𑀯𑀅𑀫𑁆𑀩𑀯𑀦𑁂𑀢𑀺 𑀧𑀼𑀩𑁆𑀩𑁂 𑀫𑀖𑀤𑁂𑀯𑁄 𑀦𑀸𑀫 𑀭𑀸𑀚𑀸 𑀢𑀁 𑀅𑀫𑁆𑀩𑀯𑀦𑀁 𑀭𑁄𑀧𑁂𑀲𑀺. 𑀢𑁂𑀲𑀼 𑀭𑀼𑀓𑁆𑀔𑁂𑀲𑀼 𑀧𑀮𑀼𑀚𑁆𑀚𑀫𑀸𑀦𑁂𑀲𑀼 𑀅𑀧𑀭𑀪𑀸𑀕𑁂 𑀅𑀜𑁆𑀜𑁂𑀧𑀺 𑀭𑀸𑀚𑀸𑀦𑁄 𑀭𑁄𑀧𑁂𑀲𑀼𑀁𑀬𑁂𑀯. 𑀢𑀁 𑀧𑀦 𑀧𑀞𑀫𑀯𑁄𑀳𑀸𑀭𑀯𑀲𑁂𑀦 𑀫𑀖𑀤𑁂𑀯𑀫𑁆𑀩𑀯𑀦𑀦𑁆𑀢𑁂𑀯 𑀲𑀗𑁆𑀔𑀁 𑀕𑀢𑀁. 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀭𑀫𑀡𑀻𑀬𑀁 𑀪𑀽𑀫𑀺𑀪𑀸𑀕𑀁 𑀤𑀺𑀲𑁆𑀯𑀸 𑁋 ‘‘𑀯𑀲𑀺𑀢𑀧𑀼𑀩𑁆𑀩𑀁 𑀦𑀼 𑀔𑁄 𑀫𑁂 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑁋 ‘‘𑀧𑀼𑀩𑁆𑀩𑁂 𑀅𑀳𑀁 𑀫𑀖𑀤𑁂𑀯𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀇𑀫𑀁 𑀅𑀫𑁆𑀩𑀯𑀦𑀁 𑀭𑁄𑀧𑁂𑀲𑀺𑀁, 𑀏𑀢𑁆𑀣𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁. 𑀢𑀁 𑀔𑁄 𑀧𑀦𑁂𑀢𑀁 𑀓𑀸𑀭𑀡𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀧𑀸𑀓𑀝𑀁, 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀕𑁆𑀕𑀕𑁆𑀕𑀤𑀦𑁆𑀢𑁂 𑀤𑀲𑁆𑀲𑁂𑀦𑁆𑀢𑁄 𑀲𑀺𑀢𑀁 𑀧𑀸𑀢𑀼 𑀅𑀓𑀸𑀲𑀺.

𑀥𑀫𑁆𑀫𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀥𑀫𑁆𑀫𑀺𑀓𑁄. 𑀥𑀫𑁆𑀫𑁂𑀦 𑀭𑀸𑀚𑀸 𑀚𑀸𑀢𑁄𑀢𑀺 𑀥𑀫𑁆𑀫𑀭𑀸𑀚𑀸. 𑀥𑀫𑁆𑀫𑁂 𑀞𑀺𑀢𑁄𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂 𑀞𑀺𑀢𑁄. 𑀥𑀫𑁆𑀫𑀁 𑀘𑀭𑀢𑀻𑀢𑀺 𑀲𑀫𑀁 𑀘𑀭𑀢𑀺. 𑀢𑀢𑁆𑀭 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀽𑀢𑀺 𑀬𑁄𑀧𑀺 𑀲𑁄 𑀧𑀼𑀩𑁆𑀩𑀭𑀸𑀚𑀽𑀳𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀺𑀦𑁆𑀦𑀧𑀭𑀺𑀳𑀸𑀭𑁄, 𑀢𑀁 𑀅𑀳𑀸𑀧𑁂𑀢𑁆𑀯𑀸 𑀧𑀓𑀢𑀺𑀦𑀺𑀬𑀸𑀫𑁂𑀦𑁂𑀯 𑀅𑀤𑀸𑀲𑀺, 𑀢𑀣𑀸 𑀕𑀳𑀧𑀢𑀺𑀓𑀸𑀦𑀁. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀓𑁆𑀔𑀲𑁆𑀲𑀸𑀢𑀺 𑀇𑀫𑀺𑀦𑀸 𑀧𑀸𑀝𑀺𑀳𑀸𑀭𑀺𑀓𑀧𑀓𑁆𑀔𑁄𑀧𑀺 𑀲𑀗𑁆𑀕𑀳𑀺𑀢𑁄. 𑀅𑀝𑁆𑀞𑀫𑀻𑀉𑀧𑁄𑀲𑀣𑀲𑁆𑀲 𑀳𑀺 𑀧𑀘𑁆𑀘𑀼𑀕𑁆𑀕𑀫𑀦𑀸𑀦𑀼𑀕𑁆𑀕𑀫𑀦𑀯𑀲𑁂𑀦 𑀲𑀢𑁆𑀢𑀫𑀺𑀬𑀜𑁆𑀘 𑀦𑀯𑀫𑀺𑀬𑀜𑁆𑀘, 𑀘𑀸𑀢𑀼𑀤𑁆𑀤𑀲𑀧𑀦𑁆𑀦𑀭𑀲𑀸𑀦𑀁 𑀧𑀘𑁆𑀘𑀼𑀕𑁆𑀕𑀫𑀦𑀸𑀦𑀼𑀕𑁆𑀕𑀫𑀦𑀯𑀲𑁂𑀦 𑀢𑁂𑀭𑀲𑀺𑀬𑀜𑁆𑀘 𑀧𑀸𑀝𑀺𑀧𑀤𑁂 𑀘𑀸𑀢𑀺 𑀇𑀫𑁂 𑀤𑀺𑀯𑀲𑀸 𑀧𑀸𑀝𑀺𑀳𑀸𑀭𑀺𑀓𑀧𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀼𑀧𑀺 𑀉𑀧𑁄𑀲𑀣𑀁 𑀉𑀧𑀯𑀲𑀺.

𑁩𑁦𑁯. 𑀤𑁂𑀯𑀤𑀽𑀢𑀸𑀢𑀺 𑀤𑁂𑀯𑁄𑀢𑀺 𑀫𑀘𑁆𑀘𑀼, 𑀢𑀲𑁆𑀲 𑀤𑀽𑀢𑀸𑀢𑀺 𑀤𑁂𑀯𑀤𑀽𑀢𑀸. 𑀲𑀺𑀭𑀲𑁆𑀫𑀺𑀜𑁆𑀳𑀺 𑀧𑀮𑀺𑀢𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀫𑀘𑁆𑀘𑀼𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑁄 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 𑀧𑀮𑀺𑀢𑀸𑀦𑀺 𑀫𑀘𑁆𑀘𑀼𑀤𑁂𑀯𑀲𑁆𑀲 𑀤𑀽𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀤𑁂𑀯𑀸 𑀯𑀺𑀬 𑀤𑀽𑀢𑀸𑀢𑀺𑀧𑀺 𑀤𑁂𑀯𑀤𑀽𑀢𑀸. 𑀬𑀣𑀸 𑀳𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸𑀬 𑀤𑁂𑀯𑀢𑀸𑀬 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀅𑀲𑀼𑀓𑀤𑀺𑀯𑀲𑁂 𑀫𑀭𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑀢𑀁 𑀢𑀣𑁂𑀯 𑀳𑁄𑀢𑀺, 𑀏𑀯𑀁 𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀤𑁂𑀯𑀢𑀸𑀩𑁆𑀬𑀸𑀓𑀭𑀡𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀧𑀮𑀺𑀢𑀸𑀦𑀺 𑀤𑁂𑀯𑀲𑀤𑀺𑀲𑀸 𑀤𑀽𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀁 𑀤𑀽𑀢𑀸𑀢𑀺𑀧𑀺 𑀤𑁂𑀯𑀤𑀽𑀢𑀸. 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸 𑀳𑀺 𑀚𑀺𑀡𑁆𑀡𑀩𑁆𑀬𑀸𑀥𑀺𑀢𑀫𑀢𑀧𑀩𑁆𑀩𑀚𑀺𑀢𑁂 𑀤𑀺𑀲𑁆𑀯𑀸𑀯 𑀲𑀁𑀯𑁂𑀕𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀦𑁆𑀢𑀺. 𑀬𑀣𑀸𑀳 𑁋

‘‘𑀚𑀺𑀡𑁆𑀡𑀜𑁆𑀘 𑀤𑀺𑀲𑁆𑀯𑀸 𑀤𑀼𑀔𑀺𑀢𑀜𑁆𑀘 𑀩𑁆𑀬𑀸𑀥𑀺𑀢𑀁,

𑀫𑀢𑀜𑁆𑀘 𑀤𑀺𑀲𑁆𑀯𑀸 𑀕𑀢𑀫𑀸𑀬𑀼𑀲𑀗𑁆𑀔𑀬𑀁;

𑀓𑀸𑀲𑀸𑀬𑀯𑀢𑁆𑀣𑀁 𑀧𑀩𑁆𑀩𑀚𑀺𑀢𑀜𑁆𑀘 𑀤𑀺𑀲𑁆𑀯𑀸,

𑀢𑀲𑁆𑀫𑀸 𑀅𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚𑀸’’𑀢𑀺.

𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀧𑀮𑀺𑀢𑀸𑀦𑀺 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀁 𑀤𑀽𑀢𑀢𑁆𑀢𑀸 𑀤𑁂𑀯𑀤𑀽𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀓𑀧𑁆𑀧𑀓𑀲𑁆𑀲 𑀕𑀸𑀫𑀯𑀭𑀁 𑀤𑀢𑁆𑀯𑀸𑀢𑀺 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀓𑀁 𑀚𑁂𑀝𑁆𑀞𑀓𑀕𑀸𑀫𑀁 𑀤𑀢𑁆𑀯𑀸. 𑀓𑀲𑁆𑀫𑀸 𑀅𑀤𑀸𑀲𑀺? 𑀲𑀁𑀯𑀺𑀕𑁆𑀕𑀫𑀸𑀦𑀲𑀢𑁆𑀢𑀸. 𑀢𑀲𑁆𑀲 𑀳𑀺 𑀅𑀜𑁆𑀚𑀮𑀺𑀲𑁆𑀫𑀺𑀁 𑀞𑀧𑀺𑀢𑀸𑀦𑀺 𑀧𑀮𑀺𑀢𑀸𑀦𑀺 𑀤𑀺𑀲𑁆𑀯𑀸𑀯 𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀜𑁆𑀜𑀸𑀦𑀺 𑀘𑀢𑀼𑀭𑀸𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼 𑀅𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀘𑁆𑀘𑀼𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀫𑀜𑁆𑀜𑀫𑀸𑀦𑁄 𑀲𑀁𑀯𑀺𑀕𑁆𑀕𑁄 𑀧𑀩𑁆𑀩𑀚𑁆𑀚𑀁 𑀭𑁄𑀘𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀲𑀺𑀭𑁂 𑀤𑀺𑀲𑁆𑀯𑀸𑀦 𑀧𑀮𑀺𑀢𑀁, 𑀫𑀖𑀤𑁂𑀯𑁄 𑀤𑀺𑀲𑀫𑁆𑀧𑀢𑀺;

𑀲𑀁𑀯𑁂𑀕𑀁 𑀅𑀮𑀪𑀻 𑀥𑀻𑀭𑁄, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀻’’𑀢𑀺.

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋

‘‘𑀉𑀢𑁆𑀢𑀫𑀗𑁆𑀕𑀭𑀼𑀳𑀸 𑀫𑀬𑁆𑀳𑀁, 𑀇𑀫𑁂 𑀚𑀸𑀢𑀸 𑀯𑀬𑁄𑀳𑀭𑀸;

𑀧𑀸𑀢𑀼𑀪𑀽𑀢𑀸 𑀤𑁂𑀯𑀤𑀽𑀢𑀸, 𑀧𑀩𑁆𑀩𑀚𑁆𑀚𑀸𑀲𑀫𑀬𑁄 𑀫𑀫𑀸’’𑀢𑀺.

𑀧𑀼𑀭𑀺𑀲𑀬𑀼𑀕𑁂𑀢𑀺 𑀯𑀁𑀲𑀲𑀫𑁆𑀪𑀯𑁂 𑀧𑀼𑀭𑀺𑀲𑁂. 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸𑀢𑀺 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀦𑁆𑀢𑀸𑀧𑀺 𑀳𑀺 𑀧𑀞𑀫𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀯𑀟𑁆𑀠𑀺𑀢𑁂 𑀓𑁂𑀲𑁂 𑀩𑀦𑁆𑀥𑀺𑀢𑁆𑀯𑀸 𑀚𑀝𑀸𑀓𑀮𑀸𑀧𑀥𑀭𑀸 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁄 𑀧𑀦 𑀅𑀦𑁂𑀲𑀦𑀁 𑀅𑀦𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀭𑀸𑀚𑀕𑁂𑀳𑀢𑁄 𑀆𑀳𑀝𑀪𑀺𑀓𑁆𑀔𑀸𑀬 𑀬𑀸𑀧𑁂𑀦𑁆𑀢𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀁 𑀪𑀸𑀯𑁂𑀲𑀺. 𑀢𑀲𑁆𑀫𑀸 𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀓𑀼𑀫𑀸𑀭𑀓𑀻𑀴𑀺𑀢𑀁 𑀓𑀻𑀴𑀻𑀢𑀺 𑀅𑀗𑁆𑀓𑁂𑀦 𑀅𑀗𑁆𑀓𑀁 𑀧𑀭𑀺𑀳𑀭𑀺𑀬𑀫𑀸𑀦𑁄 𑀓𑀻𑀴𑀺. 𑀫𑀸𑀮𑀸𑀓𑀮𑀸𑀧𑀁 𑀯𑀺𑀬 𑀳𑀺 𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸𑀯 𑀯𑀺𑀘𑀭𑀺𑀁𑀲𑀼. 𑀭𑀜𑁆𑀜𑁄 𑀫𑀖𑀤𑁂𑀯𑀲𑁆𑀲 𑀧𑀼𑀢𑁆𑀢𑁄…𑀧𑁂… 𑀧𑀩𑁆𑀩𑀚𑀻𑀢𑀺 𑀇𑀫𑀲𑁆𑀲 𑀧𑀩𑁆𑀩𑀚𑀺𑀢𑀤𑀺𑀯𑀲𑁂 𑀧𑀜𑁆𑀘 𑀫𑀗𑁆𑀕𑀮𑀸𑀦𑀺 𑀅𑀳𑁂𑀲𑀼𑀁. 𑀫𑀖𑀤𑁂𑀯𑀭𑀜𑁆𑀜𑁄 𑀫𑀢𑀓𑀪𑀢𑁆𑀢𑀁, 𑀢𑀲𑁆𑀲 𑀭𑀜𑁆𑀜𑁄 𑀧𑀩𑁆𑀩𑀚𑀺𑀢𑀫𑀗𑁆𑀕𑀮𑀁, 𑀢𑀲𑁆𑀲 𑀧𑀼𑀢𑁆𑀢𑀲𑁆𑀲 𑀙𑀢𑁆𑀢𑀼𑀲𑁆𑀲𑀸𑀧𑀦𑀫𑀗𑁆𑀕𑀮𑀁, 𑀢𑀲𑁆𑀲 𑀧𑀼𑀢𑁆𑀢𑀲𑁆𑀲 𑀉𑀧𑀭𑀚𑁆𑀚𑀫𑀗𑁆𑀕𑀮𑀁, 𑀢𑀲𑁆𑀲 𑀧𑀼𑀢𑁆𑀢𑀲𑁆𑀲 𑀦𑀸𑀫𑀓𑀭𑀡𑀫𑀗𑁆𑀕𑀮𑀦𑁆𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀧𑀜𑁆𑀘 𑀫𑀗𑁆𑀕𑀮𑀸𑀦𑀺 𑀅𑀳𑁂𑀲𑀼𑀁, 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑀮𑁂 𑀉𑀦𑁆𑀦𑀗𑁆𑀕𑀮𑀫𑀳𑁄𑀲𑀺.

𑁩𑁧𑁧. 𑀧𑀼𑀢𑁆𑀢𑀧𑀧𑀼𑀢𑁆𑀢𑀓𑀸𑀢𑀺 𑀧𑀼𑀢𑁆𑀢𑀸 𑀘 𑀧𑀼𑀢𑁆𑀢𑀧𑀼𑀢𑁆𑀢𑀸 𑀘𑀸𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀢𑀲𑁆𑀲 𑀧𑀭𑀫𑁆𑀧𑀭𑀸. 𑀧𑀘𑁆𑀙𑀺𑀫𑀓𑁄 𑀅𑀳𑁄𑀲𑀻𑀢𑀺 𑀧𑀩𑁆𑀩𑀚𑁆𑀚𑀸𑀧𑀘𑁆𑀙𑀺𑀫𑀓𑁄 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀓𑀺𑀭 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑁋 ‘‘𑀧𑀯𑀢𑁆𑀢𑀢𑀺 𑀦𑀼 𑀔𑁄 𑀢𑀁 𑀫𑀬𑀸 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀳𑀢𑀁 𑀓𑀮𑁆𑀬𑀸𑀡𑀯𑀢𑁆𑀢’’𑀦𑁆𑀢𑀺 𑀆𑀯𑀚𑁆𑀚𑀦𑁆𑀢𑁄 𑀅𑀤𑁆𑀤𑀲 𑁋 ‘‘𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀢𑀺, 𑀇𑀤𑀸𑀦𑀺 𑀦 𑀧𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺. 𑀦 𑀔𑁄 𑀧𑀦𑀸𑀳𑀁 𑀫𑀬𑁆𑀳𑀁 𑀧𑀯𑁂𑀡𑀺𑀬𑀸 𑀉𑀘𑁆𑀙𑀺𑀚𑁆𑀚𑀺𑀢𑀼𑀁 𑀤𑀲𑁆𑀲𑀸𑀫𑀻𑀢𑀺 𑀅𑀢𑁆𑀢𑀦𑁄 𑀯𑀁𑀲𑁂 𑀚𑀸𑀢𑀭𑀜𑁆𑀜𑁄𑀬𑁂𑀯 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀁𑀲𑀲𑁆𑀲 𑀦𑁂𑀫𑀺𑀁 𑀖𑀝𑁂𑀦𑁆𑀢𑁄 𑀯𑀺𑀬 𑀦𑀺𑀩𑁆𑀩𑀢𑁆𑀢𑁄, 𑀢𑁂𑀦𑁂𑀯𑀲𑁆𑀲 𑀦𑀺𑀫𑀻𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀇𑀢𑀺 𑀲𑁄 𑀧𑀩𑁆𑀩𑀚𑀺𑀢𑀭𑀸𑀚𑀽𑀦𑀁 𑀲𑀩𑁆𑀩𑀧𑀘𑁆𑀙𑀺𑀫𑀓𑁄 𑀳𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀢𑀺 𑀧𑀩𑁆𑀩𑀚𑁆𑀚𑀸𑀧𑀘𑁆𑀙𑀺𑀫𑀓𑁄 𑀅𑀳𑁄𑀲𑀺. 𑀕𑀼𑀡𑁂𑀳𑀺 𑀧𑀦 𑀅𑀢𑀺𑀭𑁂𑀓𑀢𑀭𑁄. 𑀢𑀲𑁆𑀲 𑀳𑀺 𑀲𑀩𑁆𑀩𑀭𑀸𑀚𑀽𑀳𑀺 𑀅𑀢𑀺𑀭𑁂𑀓𑀢𑀭𑀸 𑀤𑁆𑀯𑁂 𑀕𑀼𑀡𑀸 𑀅𑀳𑁂𑀲𑀼𑀁. 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀲𑀢𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑁂𑀯𑀲𑀺𑀓𑀁 𑀤𑀸𑀦𑀁 𑀅𑀤𑀸𑀲𑀺, 𑀅𑀦𑀼𑀧𑁄𑀲𑀣𑀺𑀓𑀲𑁆𑀲 𑀘 𑀤𑀲𑁆𑀲𑀦𑀁 𑀦𑀺𑀯𑀸𑀭𑁂𑀲𑀺. 𑀅𑀦𑀼𑀧𑁄𑀲𑀣𑀺𑀓𑁂𑀲𑀼 𑀳𑀺 𑀭𑀸𑀚𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀕𑀢𑁂𑀲𑀼 𑀤𑁄𑀯𑀸𑀭𑀺𑀓𑁄 𑀧𑀼𑀘𑁆𑀙𑀢𑀺 ‘‘𑀢𑀼𑀫𑁆𑀳𑁂 𑀉𑀧𑁄𑀲𑀣𑀺𑀓𑀸 𑀦𑁄 𑀯𑀸’’𑀢𑀺. 𑀬𑁂 𑀅𑀦𑀼𑀧𑁄𑀲𑀣𑀺𑀓𑀸 𑀳𑁄𑀦𑁆𑀢𑀺, 𑀢𑁂 𑀦𑀺𑀯𑀸𑀭𑁂𑀢𑀺 ‘‘𑀅𑀦𑀼𑀧𑁄𑀲𑀣𑀺𑀓𑀸𑀦𑀁 𑀭𑀸𑀚𑀸 𑀤𑀲𑁆𑀲𑀦𑀁 𑀦 𑀤𑁂𑀢𑀻’’𑀢𑀺. ‘‘𑀫𑀬𑀁 𑀚𑀦𑀧𑀤𑀯𑀸𑀲𑀺𑀦𑁄 𑀓𑀸𑀮𑁂 𑀪𑁄𑀚𑀦𑀁 𑀓𑀼𑀳𑀺𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺𑀧𑀺 𑀢𑀢𑁆𑀣 𑀯𑀘𑀦𑁄𑀓𑀸𑀲𑁄 𑀦𑀢𑁆𑀣𑀺. 𑀘𑀢𑀽𑀲𑀼 𑀳𑀺 𑀤𑁆𑀯𑀸𑀭𑁂𑀲𑀼 𑀭𑀸𑀚𑀗𑁆𑀕𑀡𑁂 𑀘 𑀅𑀦𑁂𑀓𑀸𑀦𑀺 𑀪𑀢𑁆𑀢𑀘𑀸𑀝𑀺𑀲𑀳𑀲𑁆𑀲𑀸𑀦𑀺 𑀧𑀝𑀺𑀬𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀫𑀳𑀸𑀚𑀦𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑁂 𑀫𑀲𑁆𑀲𑀼𑀁 𑀓𑀸𑀭𑁂𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀯𑀢𑁆𑀣𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑀣𑀸𑀭𑀼𑀘𑀺𑀢𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀭𑀜𑁆𑀜𑁄 𑀕𑁂𑀳𑀤𑁆𑀯𑀸𑀭𑀁 𑀕𑀘𑁆𑀙𑀢𑀺. 𑀤𑁄𑀯𑀸𑀭𑀺𑀓𑁂𑀦 ‘‘𑀉𑀧𑁄𑀲𑀣𑀺𑀓𑀸 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀸 ‘‘𑀆𑀫 𑀆𑀫𑀸’’𑀢𑀺 𑀯𑀤𑀦𑁆𑀢𑀺. 𑀢𑁂𑀦 𑀳𑀺 𑀆𑀕𑀘𑁆𑀙𑀣𑀸𑀢𑀺 𑀧𑀯𑁂𑀲𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀢𑀺. 𑀇𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀕𑀼𑀡𑁂𑀳𑀺 𑀅𑀢𑀺𑀭𑁂𑀓𑀢𑀭𑁄 𑀅𑀳𑁄𑀲𑀺.

𑁩𑁧𑁨. 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀦𑁆𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀤𑁂𑀯𑀸𑀦𑀁. 𑀢𑁂 𑀓𑀺𑀭 𑀤𑁂𑀯𑀸 𑀯𑀺𑀤𑁂𑀳𑀭𑀝𑁆𑀞𑁂 𑀫𑀺𑀣𑀺𑀮𑀦𑀕𑀭𑀯𑀸𑀲𑀺𑀦𑁄 𑀭𑀜𑁆𑀜𑁄 𑀑𑀯𑀸𑀤𑁂 𑀞𑀢𑁆𑀯𑀸 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸 𑀭𑀜𑁆𑀜𑁄 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑀺. 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦’’𑀦𑁆𑀢𑀺.

𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀧𑀸𑀲𑀸𑀤𑀯𑀭𑀲𑁆𑀲 𑀉𑀧𑀭𑀺𑀕𑀢𑁄 𑀤𑀸𑀦𑀜𑁆𑀘 𑀲𑀻𑀮𑀜𑁆𑀘 𑀉𑀧𑀧𑀭𑀺𑀓𑁆𑀔𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀤𑀸𑀦𑀁 𑀦𑀼 𑀔𑁄 𑀫𑀳𑀦𑁆𑀢𑀁 𑀉𑀤𑀸𑀳𑀼 𑀲𑀻𑀮𑀁, 𑀬𑀤𑀺 𑀤𑀸𑀦𑀁 𑀫𑀳𑀦𑁆𑀢𑀁, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀤𑀸𑀦𑀫𑁂𑀯 𑀤𑀲𑁆𑀲𑀸𑀫𑀺. 𑀅𑀣 𑀲𑀻𑀮𑀁, 𑀲𑀻𑀮𑀫𑁂𑀯 𑀧𑀽𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲 ‘‘𑀇𑀤𑀁 𑀫𑀳𑀦𑁆𑀢𑀁 𑀇𑀤𑀁 𑀫𑀳𑀦𑁆𑀢’’𑀦𑁆𑀢𑀺 𑀦𑀺𑀘𑁆𑀙𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲𑁂𑀯 𑀲𑀓𑁆𑀓𑁄 𑀕𑀦𑁆𑀢𑁆𑀯𑀸 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀣 𑀔𑁄, 𑀆𑀦𑀦𑁆𑀤,…𑀧𑁂… 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀻𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀭𑀜𑁆𑀜𑁄 𑀓𑀗𑁆𑀔𑀸 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲 𑀓𑀗𑁆𑀔𑀘𑁆𑀙𑁂𑀤𑀦𑀢𑁆𑀣𑀁 𑀧𑀜𑁆𑀳𑀜𑁆𑀘 𑀓𑀣𑁂𑀲𑁆𑀲𑀸𑀫𑀺, 𑀇𑀥𑀸𑀕𑀫𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀜𑁆𑀘 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀕𑀦𑁆𑀢𑁆𑀯𑀸 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺. 𑀭𑀸𑀚𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀪𑀻𑀢𑁄 𑀅𑀳𑁄𑀲𑀺 𑀮𑁄𑀫𑀳𑀝𑁆𑀞𑀚𑀸𑀢𑁄. 𑀅𑀣 𑀦𑀁 𑀲𑀓𑁆𑀓𑁄 𑁋 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀯𑀺𑀲𑁆𑀲𑀢𑁆𑀣𑁄 𑀧𑀜𑁆𑀳𑀁 𑀧𑀼𑀘𑁆𑀙, 𑀓𑀗𑁆𑀔𑀁 𑀢𑁂 𑀧𑀝𑀺𑀯𑀺𑀦𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀆𑀳.

𑀭𑀸𑀚𑀸 𑁋

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀫𑀳𑀸𑀭𑀸𑀚, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀤𑀸𑀦𑀁 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀸, 𑀓𑀢𑀫𑀁 𑀲𑀼 𑀫𑀳𑀧𑁆𑀨𑀮’’𑀦𑁆𑀢𑀺. 𑁋

𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀲𑀓𑁆𑀓𑁄 𑁋 ‘‘𑀤𑀸𑀦𑀁 𑀦𑀸𑀫 𑀓𑀺𑀁, 𑀲𑀻𑀮𑀫𑁂𑀯 𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀬 𑀫𑀳𑀦𑁆𑀢𑀁. 𑀅𑀳𑀜𑁆𑀳𑀺 𑀧𑀼𑀩𑁆𑀩𑁂, 𑀫𑀳𑀸𑀭𑀸𑀚, 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀲𑀦𑁆𑀦𑀁 𑀚𑀝𑀺𑀮𑀲𑀳𑀲𑁆𑀲𑀸𑀦𑀁 𑀤𑀸𑀦𑀁 𑀤𑀢𑁆𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀢𑁄 𑀦 𑀫𑀼𑀢𑁆𑀢𑁄, 𑀲𑀻𑀮𑀯𑀦𑁆𑀢𑀸 𑀧𑀦 𑀫𑀬𑁆𑀳𑀁 𑀤𑀸𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀯𑁄𑀘 𑁋

‘‘𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀺;

𑀫𑀚𑁆𑀛𑀺𑀫𑁂𑀦 𑀘 𑀤𑁂𑀯𑀢𑁆𑀢𑀁, 𑀉𑀢𑁆𑀢𑀫𑁂𑀦 𑀯𑀺𑀲𑀼𑀚𑁆𑀛𑀢𑀺.

𑀦 𑀳𑁂𑀢𑁂 𑀲𑀼𑀮𑀪𑀸 𑀓𑀸𑀬𑀸, 𑀬𑀸𑀘𑀬𑁄𑀕𑁂𑀦 𑀓𑁂𑀦𑀘𑀺;

𑀬𑁂 𑀓𑀸𑀬𑁂 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀦𑀸𑀕𑀸𑀭𑀸 𑀢𑀧𑀲𑁆𑀲𑀺𑀦𑁄’’𑀢𑀺. (𑀚𑀸. 𑁨.𑁨𑁨.𑁪𑁨𑁯-𑁪𑁩𑁦);

𑀏𑀯𑀁 𑀭𑀜𑁆𑀜𑁄 𑀓𑀗𑁆𑀔𑀁 𑀯𑀺𑀦𑁄𑀤𑁂𑀢𑁆𑀯𑀸 𑀤𑁂𑀯𑀮𑁄𑀓𑀕𑀫𑀦𑀸𑀬 𑀧𑀝𑀺𑀜𑁆𑀜𑀸𑀕𑀳𑀡𑀢𑁆𑀣𑀁 𑀮𑀸𑀪𑀸 𑀢𑁂 𑀫𑀳𑀸𑀭𑀸𑀚𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀺𑀓𑀫𑁆𑀧𑀫𑀸𑀦𑁄𑀢𑀺 𑀅𑀪𑀸𑀬𑀫𑀸𑀦𑁄. 𑀅𑀥𑀺𑀯𑀸𑀲𑁂𑀲𑀻𑀢𑀺 𑀅𑀳𑀁 𑀫𑀳𑀸𑀚𑀦𑀁 𑀓𑀼𑀲𑀮𑀁 𑀲𑀫𑀸𑀤𑀧𑁂𑀫𑀺, 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀧𑀦 𑀯𑀲𑀦𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀆𑀕𑀢𑁂𑀦 𑀫𑀦𑀼𑀲𑁆𑀲𑀧𑀣𑁂 𑀲𑀼𑀔𑀁 𑀓𑀣𑁂𑀢𑀼𑀁 𑀳𑁄𑀢𑀻𑀢𑀺 𑀅𑀥𑀺𑀯𑀸𑀲𑁂𑀲𑀺.

𑁩𑁧𑁩. 𑀏𑀯𑀁 𑀪𑀤𑁆𑀤𑀦𑁆𑀢𑀯𑀸𑀢𑀺 𑀏𑀯𑀁 𑀳𑁄𑀢𑀼 𑀪𑀤𑁆𑀤𑀓𑀁 𑀢𑀯 𑀯𑀘𑀦𑀦𑁆𑀢𑀺 𑀯𑀢𑁆𑀯𑀸. 𑀬𑁄𑀚𑁂𑀢𑁆𑀯𑀸𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀬𑀼𑀕𑁂 𑀲𑀳𑀲𑁆𑀲𑀅𑀲𑁆𑀲𑀸𑀚𑀸𑀦𑀻𑀬𑁂 𑀬𑁄𑀚𑁂𑀢𑁆𑀯𑀸. 𑀢𑁂𑀲𑀁 𑀧𑀦 𑀧𑀸𑀝𑀺𑀬𑁂𑀓𑁆𑀓𑀁 𑀬𑁄𑀚𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀫𑀦𑀁 𑀆𑀕𑀫𑁆𑀫 𑀬𑀼𑀢𑁆𑀢𑀸𑀬𑁂𑀯 𑀳𑁄𑀦𑁆𑀢𑀺. 𑀲𑁄 𑀧𑀦 𑀤𑀺𑀩𑁆𑀩𑀭𑀣𑁄 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄 𑀳𑁄𑀢𑀺, 𑀦𑀤𑁆𑀥𑀺𑀢𑁄 𑀧𑀝𑁆𑀞𑀸𑀬 𑀭𑀣𑀲𑀻𑀲𑀁 𑀧𑀜𑁆𑀜𑀸𑀲𑀬𑁄𑀚𑀦𑀸𑀦𑀺, 𑀅𑀓𑁆𑀔𑀩𑀦𑁆𑀥𑁄 𑀧𑀡𑁆𑀡𑀸𑀲𑀬𑁄𑀚𑀦𑀸𑀦𑀺, 𑀅𑀓𑁆𑀔𑀩𑀦𑁆𑀥𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀸𑀪𑀸𑀕𑁄 𑀧𑀡𑁆𑀡𑀸𑀲𑀬𑁄𑀚𑀦𑀸𑀦𑀺, 𑀲𑀩𑁆𑀩𑁄 𑀲𑀢𑁆𑀢𑀯𑀡𑁆𑀡𑀭𑀢𑀦𑀫𑀬𑁄. 𑀤𑁂𑀯𑀮𑁄𑀓𑁄 𑀦𑀸𑀫 𑀉𑀤𑁆𑀥𑀁, 𑀫𑀦𑀼𑀲𑁆𑀲𑀮𑁄𑀓𑁄 𑀅𑀥𑁄, 𑀢𑀲𑁆𑀫𑀸 𑀳𑁂𑀝𑁆𑀞𑀸𑀫𑀼𑀔𑀁 𑀭𑀣𑀁 𑀧𑁂𑀲𑁂𑀲𑀻𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀬𑀣𑀸 𑀧𑀦 𑀧𑀓𑀢𑀺𑀫𑀕𑁆𑀕𑀁 𑀧𑁂𑀲𑁂𑀢𑀺, 𑀏𑀯𑀫𑁂𑀯 𑀫𑀦𑀼𑀲𑁆𑀲𑀸𑀦𑀁 𑀲𑀸𑀬𑀫𑀸𑀲𑀪𑀢𑁆𑀢𑁂 𑀦𑀺𑀝𑁆𑀞𑀺𑀢𑁂 𑀘𑀦𑁆𑀤𑁂𑀦 𑀲𑀤𑁆𑀥𑀺𑀁 𑀬𑀼𑀕𑀦𑀤𑁆𑀥𑀁 𑀓𑀢𑁆𑀯𑀸 𑀧𑁂𑀲𑁂𑀲𑀺, 𑀬𑀫𑀓𑀘𑀦𑁆𑀤𑀸 𑀉𑀝𑁆𑀞𑀺𑀢𑀸 𑀯𑀺𑀬 𑀅𑀳𑁂𑀲𑀼𑀁. 𑀫𑀳𑀸𑀚𑀦𑁄 𑀤𑀺𑀲𑁆𑀯𑀸 ‘‘𑀬𑀫𑀓𑀘𑀦𑁆𑀤𑀸 𑀉𑀕𑁆𑀕𑀢𑀸’’𑀢𑀺 𑀆𑀳. 𑀆𑀕𑀘𑁆𑀙𑀦𑁆𑀢𑁂 𑀆𑀕𑀘𑁆𑀙𑀦𑁆𑀢𑁂 𑀦 𑀬𑀫𑀓𑀘𑀦𑁆𑀤𑀸, 𑀏𑀓𑀁 𑀯𑀺𑀫𑀸𑀦𑀁, 𑀦 𑀯𑀺𑀫𑀸𑀦𑀁, 𑀏𑀓𑁄 𑀭𑀣𑁄𑀢𑀺. 𑀭𑀣𑁄𑀧𑀺 𑀆𑀕𑀘𑁆𑀙𑀦𑁆𑀢𑁄 𑀆𑀕𑀘𑁆𑀙𑀦𑁆𑀢𑁄 𑀧𑀓𑀢𑀺𑀭𑀣𑀧𑁆𑀧𑀫𑀸𑀡𑁄𑀯, 𑀅𑀲𑁆𑀲𑀸𑀧𑀺 𑀧𑀓𑀢𑀺𑀅𑀲𑁆𑀲𑀧𑁆𑀧𑀫𑀸𑀡𑀸𑀯 𑀅𑀳𑁂𑀲𑀼𑀁. 𑀏𑀯𑀁 𑀭𑀣𑀁 𑀆𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀧𑀸𑀲𑀸𑀤𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀸𑀘𑀻𑀦𑀲𑀻𑀳𑀧𑀜𑁆𑀚𑀭𑀝𑁆𑀞𑀸𑀦𑁂 𑀭𑀣𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀆𑀕𑀢𑀫𑀕𑁆𑀕𑀸𑀪𑀺𑀫𑀼𑀔𑀁 𑀓𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑁂 𑀞𑀢𑁆𑀯𑀸𑀯 𑀆𑀭𑁄𑀳𑀦𑀲𑀚𑁆𑀚𑀁 𑀞𑀧𑁂𑀲𑀺.

𑀅𑀪𑀺𑀭𑀼𑀳 𑀫𑀳𑀸𑀭𑀸𑀚𑀸𑀢𑀺 𑀭𑀸𑀚𑀸 𑁋 ‘‘𑀤𑀺𑀩𑁆𑀩𑀬𑀸𑀦𑀁 𑀫𑁂 𑀮𑀤𑁆𑀥’’𑀦𑁆𑀢𑀺 𑀦 𑀢𑀸𑀯𑀤𑁂𑀯 𑀅𑀪𑀺𑀭𑀼𑀳𑀺, 𑀦𑀸𑀕𑀭𑀸𑀦𑀁 𑀧𑀦 𑀑𑀯𑀸𑀤𑀁 𑀅𑀤𑀸𑀲𑀺 ‘‘𑀧𑀲𑁆𑀲𑀣 𑀢𑀸𑀢𑀸, 𑀬𑀁 𑀫𑁂 𑀲𑀓𑁆𑀓𑁂𑀦 𑀤𑁂𑀯𑀭𑀜𑁆𑀜𑀸 𑀤𑀺𑀩𑁆𑀩𑀭𑀣𑁄 𑀧𑁂𑀲𑀺𑀢𑁄, 𑀲𑁄 𑀘 𑀔𑁄 𑀦 𑀚𑀸𑀢𑀺𑀕𑁄𑀢𑁆𑀢𑀁 𑀯𑀸 𑀓𑀼𑀮𑀧𑁆𑀧𑀤𑁂𑀲𑀁 𑀯𑀸 𑀧𑀝𑀺𑀘𑁆𑀘 𑀧𑁂𑀲𑀺𑀢𑁄, 𑀫𑀬𑁆𑀳𑀁 𑀧𑀦 𑀲𑀻𑀮𑀸𑀘𑀸𑀭𑀕𑀼𑀡𑁂 𑀧𑀲𑀻𑀤𑀺𑀢𑁆𑀯𑀸 𑀧𑁂𑀲𑀺𑀢𑁄. 𑀲𑀘𑁂 𑀢𑀼𑀫𑁆𑀳𑁂𑀧𑀺 𑀲𑀻𑀮𑀁 𑀭𑀓𑁆𑀔𑀺𑀲𑁆𑀲𑀣, 𑀢𑀼𑀫𑁆𑀳𑀸𑀓𑀫𑁆𑀧𑀺 𑀧𑁂𑀲𑁂𑀲𑁆𑀲𑀢𑀺, 𑀏𑀯𑀁 𑀭𑀓𑁆𑀔𑀺𑀢𑀼𑀁 𑀬𑀼𑀢𑁆𑀢𑀁 𑀦𑀸𑀫𑁂𑀢𑀁 𑀲𑀻𑀮𑀁. 𑀦𑀸𑀳𑀁 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀘𑀺𑀭𑀸𑀬𑀺𑀲𑁆𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀫𑀳𑀸𑀚𑀦𑀁 𑀑𑀯𑀤𑀺𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀭𑀣𑀁 𑀅𑀪𑀺𑀭𑀼𑀳𑀺. 𑀢𑀢𑁄 𑀫𑀸𑀢𑀮𑀺 𑀲𑀗𑁆𑀕𑀸𑀳𑀓𑁄 ‘‘𑀅𑀳𑀫𑁆𑀧𑀺 𑀫𑀳𑀸𑀭𑀸𑀚𑀲𑁆𑀲 𑀫𑀫𑀸𑀦𑀼𑀘𑁆𑀙𑀯𑀺𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑀫𑁆𑀳𑀺 𑀤𑁆𑀯𑁂 𑀫𑀕𑁆𑀕𑁂 𑀤𑀲𑁆𑀲𑁂𑀢𑁆𑀯𑀸 𑀅𑀧𑀺𑀘 𑀫𑀳𑀸𑀭𑀸𑀚𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀢𑀫𑁂𑀦𑀸𑀢𑀺, 𑀫𑀳𑀸𑀭𑀸𑀚, 𑀇𑀫𑁂𑀲𑀼 𑀫𑀕𑁆𑀕𑁂𑀲𑀼 𑀏𑀓𑁄 𑀦𑀺𑀭𑀬𑀁 𑀕𑀘𑁆𑀙𑀢𑀺, 𑀏𑀓𑁄 𑀤𑁂𑀯𑀮𑁄𑀓𑀁, 𑀢𑁂𑀲𑀼 𑀢𑀁 𑀓𑀢𑀫𑁂𑀦 𑀦𑁂𑀫𑀺. 𑀬𑁂𑀦𑀸𑀢𑀺 𑀬𑁂𑀦 𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸 𑀬𑀢𑁆𑀣 𑀧𑀸𑀧𑀓𑀫𑁆𑀫𑀦𑁆𑀢𑀸 𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑀺𑀬𑀦𑁆𑀢𑀺, 𑀢𑀁 𑀞𑀸𑀦𑀁 𑀲𑀓𑁆𑀓𑀸 𑀳𑁄𑀢𑀺 𑀧𑀲𑁆𑀲𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀚𑀸𑀢𑀓𑁂𑀧𑀺 𑁋

‘‘𑀓𑁂𑀦 𑀢𑀁 𑀦𑁂𑀫𑀺 𑀫𑀕𑁆𑀕𑁂𑀦, 𑀭𑀸𑀚𑀲𑁂𑀝𑁆𑀞 𑀤𑀺𑀲𑀫𑁆𑀧𑀢𑀺;

𑀬𑁂𑀦 𑀯𑀸 𑀧𑀸𑀧𑀓𑀫𑁆𑀫𑀦𑁆𑀢𑀸, 𑀧𑀼𑀜𑁆𑀜𑀓𑀫𑁆𑀫𑀸 𑀘 𑀬𑁂 𑀦𑀭𑀸’’𑀢𑀺. (𑀚𑀸. 𑁨.𑁨𑁨.𑁪𑁫𑁦) 𑁋

𑀕𑀸𑀣𑀸𑀬 𑀅𑀬𑀫𑁂𑀯𑀢𑁆𑀣𑁄. 𑀢𑁂𑀦𑁂𑀯𑀸𑀳 𑁋

‘‘𑀦𑀺𑀭𑀬𑁂 𑀢𑀸𑀯 𑀧𑀲𑁆𑀲𑀸𑀫𑀺, 𑀆𑀯𑀸𑀲𑁂 𑀧𑀸𑀧𑀓𑀫𑁆𑀫𑀺𑀦𑀁;

𑀞𑀸𑀦𑀸𑀦𑀺 𑀮𑀼𑀤𑁆𑀤𑀓𑀫𑁆𑀫𑀸𑀦𑀁, 𑀤𑀼𑀲𑁆𑀲𑀻𑀮𑀸𑀦𑀜𑁆𑀘 𑀬𑀸 𑀕𑀢𑀻’’𑀢𑀺. (𑀚𑀸. 𑁨.𑁨𑁨.𑁪𑁫𑁧);

𑀉𑀪𑀬𑁂𑀦𑁂𑀯 𑀫𑀁 𑀫𑀸𑀢𑀮𑀺 𑀦𑁂𑀳𑀻𑀢𑀺 𑀫𑀸𑀢𑀮𑀺 𑀤𑁆𑀯𑀻𑀳𑀺 𑀫𑀕𑁆𑀕𑁂𑀳𑀺 𑀫𑀁 𑀦𑁂𑀳𑀺, 𑀅𑀳𑀁 𑀦𑀺𑀭𑀬𑀁 𑀧𑀲𑁆𑀲𑀺𑀢𑀼𑀓𑀸𑀫𑁄 𑀤𑁂𑀯𑀮𑁄𑀓𑀫𑁆𑀧𑀻𑀢𑀺. 𑀧𑀞𑀫𑀁 𑀓𑀢𑀫𑁂𑀦 𑀦𑁂𑀫𑀻𑀢𑀺. 𑀧𑀞𑀫𑀁 𑀦𑀺𑀭𑀬𑀫𑀕𑁆𑀕𑁂𑀦 𑀦𑁂𑀳𑀻𑀢𑀺. 𑀢𑀢𑁄 𑀫𑀸𑀢𑀮𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀭𑀸𑀚𑀸𑀦𑀁 𑀧𑀜𑁆𑀘𑀤𑀲 𑀫𑀳𑀸𑀦𑀺𑀭𑀬𑁂 𑀤𑀲𑁆𑀲𑁂𑀲𑀺. 𑀯𑀺𑀢𑁆𑀣𑀸𑀭𑀓𑀣𑀸 𑀧𑀦𑁂𑀢𑁆𑀣 𑁋

‘‘𑀤𑀲𑁆𑀲𑁂𑀲𑀺 𑀫𑀸𑀢𑀮𑀺 𑀭𑀜𑁆𑀜𑁄, 𑀤𑀼𑀕𑁆𑀕𑀁 𑀯𑁂𑀢𑀭𑀡𑀺𑀁 𑀦𑀤𑀺𑀁;

𑀓𑀼𑀣𑀺𑀢𑀁 𑀔𑀸𑀭𑀲𑀁𑀬𑀼𑀢𑁆𑀢𑀁, 𑀢𑀢𑁆𑀢𑀁 𑀅𑀕𑁆𑀕𑀺𑀲𑀺𑀔𑀽𑀧𑀫’’𑀦𑁆𑀢𑀺. (𑀚𑀸. 𑁨.𑁨𑁨.𑁪𑁫𑁨) 𑁋

𑀚𑀸𑀢𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀭𑀬𑀁 𑀤𑀲𑁆𑀲𑁂𑀢𑁆𑀯𑀸 𑀭𑀣𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀕𑀦𑁆𑀢𑁆𑀯𑀸 𑀩𑀻𑀭𑀡𑀻𑀤𑁂𑀯𑀥𑀻𑀢𑀸𑀬 𑀲𑁄𑀡𑀤𑀺𑀦𑁆𑀦𑀤𑁂𑀯𑀧𑀼𑀢𑁆𑀢𑀲𑁆𑀲 𑀕𑀡𑀤𑁂𑀯𑀧𑀼𑀢𑁆𑀢𑀸𑀦𑀜𑁆𑀘 𑀯𑀺𑀫𑀸𑀦𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀤𑁂𑀯𑀮𑁄𑀓𑀁 𑀦𑁂𑀲𑀺. 𑀢𑀢𑁆𑀭𑀸𑀧𑀺 𑀯𑀺𑀢𑁆𑀣𑀸𑀭𑀓𑀣𑀸 𑁋

‘‘𑀬𑀤𑀺 𑀢𑁂 𑀲𑀼𑀢𑀸 𑀩𑀻𑀭𑀡𑀻 𑀚𑀻𑀯𑀮𑁄𑀓𑁂,

𑀆𑀫𑀸𑀬𑀤𑀸𑀲𑀻 𑀅𑀳𑀼 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀲𑀸 𑀧𑀢𑁆𑀢𑀓𑀸𑀮𑁂 𑀅𑀢𑀺𑀣𑀺𑀁 𑀯𑀺𑀤𑀺𑀢𑁆𑀯𑀸,

𑀫𑀸𑀢𑀸𑀯 𑀧𑀼𑀢𑁆𑀢𑀁 𑀲𑀓𑀺𑀫𑀸𑀪𑀺𑀦𑀦𑁆𑀤𑀻;

𑀲𑀁𑀬𑀫𑀸 𑀲𑀁𑀯𑀺𑀪𑀸𑀕𑀸 𑀘,

𑀲𑀸 𑀯𑀺𑀫𑀸𑀦𑀲𑁆𑀫𑀺 𑀫𑁄𑀤𑀢𑀻’’𑀢𑀺. (𑀚𑀸. 𑁨.𑁨𑁨.𑁫𑁦𑁭) 𑁋

𑀚𑀸𑀢𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀕𑀘𑁆𑀙𑀢𑁄 𑀧𑀦 𑀢𑀲𑁆𑀲 𑀭𑀣𑀦𑁂𑀫𑀺 𑀯𑀝𑁆𑀝𑀺𑀬𑀸 𑀘𑀺𑀢𑁆𑀢𑀓𑀽𑀝𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀉𑀫𑁆𑀫𑀸𑀭𑁂 𑀧𑀳𑀢𑀫𑀢𑁆𑀢𑁂𑀯 𑀤𑁂𑀯𑀦𑀕𑀭𑁂 𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀏𑀓𑀓𑀁𑀬𑁂𑀯 𑀑𑀳𑀸𑀬 𑀤𑁂𑀯𑀲𑀗𑁆𑀖𑁄 𑀫𑀳𑀸𑀲𑀢𑁆𑀢𑀁 𑀧𑀘𑁆𑀘𑀼𑀕𑁆𑀕𑀫𑀦𑀫𑀓𑀸𑀲𑀺, 𑀢𑀁 𑀤𑁂𑀯𑀢𑀸𑀦𑀁 𑀆𑀤𑀭𑀁 𑀤𑀺𑀲𑁆𑀯𑀸 𑀲𑀓𑁆𑀓𑁄 𑀘𑀺𑀢𑁆𑀢𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑁋 ‘‘𑀅𑀪𑀺𑀭𑀫, 𑀫𑀳𑀸𑀭𑀸𑀚, 𑀤𑁂𑀯𑁂𑀲𑀼 𑀤𑁂𑀯𑀸𑀦𑀼𑀪𑀸𑀯𑁂𑀦𑀸’’𑀢𑀺 𑀆𑀳. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀅𑀚𑁆𑀚 𑀆𑀕𑀦𑁆𑀢𑁆𑀯𑀸 𑀏𑀓𑀤𑀺𑀯𑀲𑁂𑀦𑁂𑀯 𑀤𑁂𑀯𑀕𑀡𑀁 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀫𑀓𑀸𑀲𑀺. 𑀲𑀘𑁂 𑀏𑀓𑀁 𑀤𑁆𑀯𑁂 𑀤𑀺𑀯𑀲𑁂 𑀯𑀲𑀺𑀲𑁆𑀲𑀢𑀺, 𑀦 𑀫𑀁 𑀤𑁂𑀯𑀸 𑀑𑀮𑁄𑀓𑁂𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀉𑀲𑀽𑀬𑀫𑀸𑀦𑁄, ‘‘𑀫𑀳𑀸𑀭𑀸𑀚, 𑀢𑀼𑀬𑁆𑀳𑀁 𑀇𑀫𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀯𑀲𑀺𑀢𑀼𑀁 𑀧𑀼𑀜𑁆𑀜𑀁 𑀦𑀢𑁆𑀣𑀺, 𑀅𑀜𑁆𑀜𑁂𑀲𑀁 𑀧𑀼𑀜𑁆𑀜𑁂𑀦 𑀯𑀲𑀸𑀳𑀻’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀏𑀯𑀫𑀸𑀳. 𑀩𑁄𑀥𑀺𑀲𑀢𑁆𑀢𑁄 𑁋 ‘‘𑀦𑀸𑀲𑀓𑁆𑀔𑀺 𑀚𑀭𑀲𑀓𑁆𑀓𑁄 𑀫𑀦𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀧𑀭𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀁 𑀔𑁄 𑀧𑀦 𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑀪𑀡𑁆𑀟𑀓𑀁 𑀯𑀺𑀬 𑀳𑁄𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀅𑀮𑀁 𑀫𑀸𑀭𑀺𑀲𑀸𑀢𑀺𑀆𑀤𑀺𑀫𑀸𑀳. 𑀚𑀸𑀢𑀓𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀬𑀣𑀸 𑀬𑀸𑀘𑀺𑀢𑀓𑀁 𑀬𑀸𑀦𑀁, 𑀬𑀣𑀸 𑀬𑀸𑀘𑀺𑀢𑀓𑀁 𑀥𑀦𑀁;

𑀏𑀯𑀁𑀲𑀫𑁆𑀧𑀤𑀫𑁂𑀯𑁂 𑀢𑀁, 𑀬𑀁 𑀧𑀭𑀢𑁄 𑀤𑀸𑀦𑀧𑀘𑁆𑀘𑀬𑀸;

𑀦 𑀘𑀸𑀳𑀫𑁂𑀢𑀫𑀺𑀘𑁆𑀙𑀸𑀫𑀺, 𑀬𑀁 𑀧𑀭𑀢𑁄 𑀤𑀸𑀦𑀧𑀘𑁆𑀘𑀬𑀸’’𑀢𑀺. (𑀚𑀸. 𑁨.𑁨𑁨.𑁫𑁮𑁫-𑁫𑁮𑁬) 𑁋

𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂𑀦 𑀓𑀢𑀺𑀯𑀸𑀭𑁂 𑀤𑁂𑀯𑀮𑁄𑀓𑀁 𑀕𑀢𑁄𑀢𑀺. 𑀘𑀢𑁆𑀢𑀸𑀭𑁄 𑁋 𑀫𑀦𑁆𑀥𑀸𑀢𑀼𑀭𑀸𑀚𑀓𑀸𑀮𑁂 𑀲𑀸𑀥𑀺𑀦𑀭𑀸𑀚𑀓𑀸𑀮𑁂 𑀕𑀼𑀢𑁆𑀢𑀺𑀮𑀯𑀻𑀡𑀸𑀯𑀸𑀤𑀓𑀓𑀸𑀮𑁂 𑀦𑀺𑀫𑀺𑀫𑀳𑀸𑀭𑀸𑀚𑀓𑀸𑀮𑁂𑀢𑀺. 𑀲𑁄 𑀫𑀦𑁆𑀥𑀸𑀢𑀼𑀓𑀸𑀮𑁂 𑀤𑁂𑀯𑀮𑁄𑀓𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀓𑀸𑀮𑀁 𑀯𑀲𑀺, 𑀢𑀲𑁆𑀫𑀺𑀜𑁆𑀳𑀺 𑀯𑀲𑀫𑀸𑀦𑁂𑀬𑁂𑀯 𑀙𑀢𑁆𑀢𑀺𑀁𑀲 𑀲𑀓𑁆𑀓𑀸 𑀘𑀯𑀺𑀁𑀲𑀼. 𑀲𑀸𑀥𑀺𑀦𑀭𑀸𑀚𑀓𑀸𑀮𑁂 𑀲𑀢𑁆𑀢𑀸𑀳𑀁 𑀯𑀲𑀺, 𑀫𑀦𑀼𑀲𑁆𑀲𑀕𑀡𑀦𑀸𑀬 𑀲𑀢𑁆𑀢 𑀯𑀲𑁆𑀲𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀕𑀼𑀢𑁆𑀢𑀺𑀮𑀯𑀻𑀡𑀸𑀯𑀸𑀤𑀓𑀓𑀸𑀮𑁂 𑀘 𑀦𑀺𑀫𑀺𑀭𑀸𑀚𑀓𑀸𑀮𑁂 𑀘 𑀫𑀼𑀳𑀼𑀢𑁆𑀢𑀫𑀢𑁆𑀢𑀁 𑀯𑀲𑀺, 𑀫𑀦𑀼𑀲𑁆𑀲𑀕𑀡𑀦𑀸𑀬 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀳𑁄𑀦𑁆𑀢𑀺.

𑁩𑁧𑁪. 𑀢𑀢𑁆𑀣𑁂𑀯 𑀫𑀺𑀣𑀺𑀮𑀁 𑀧𑀝𑀺𑀦𑁂𑀲𑀻𑀢𑀺 𑀧𑀝𑀺𑀦𑁂𑀢𑁆𑀯𑀸 𑀧𑀓𑀢𑀺𑀲𑀺𑀭𑀺𑀕𑀩𑁆𑀪𑁂𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀲𑀺.

𑁩𑁧𑁫. 𑀓𑀴𑀸𑀭𑀚𑀦𑀓𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀓𑀴𑀸𑀭𑀤𑀦𑁆𑀢𑀢𑀸𑀬 𑀧𑀦 𑀓𑀴𑀸𑀭𑀚𑀦𑀓𑁄𑀢𑀺 𑀯𑀼𑀢𑁆𑀢𑁄. 𑀦 𑀲𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀻𑀢𑀺 𑀏𑀢𑁆𑀢𑀓𑀫𑀢𑁆𑀢𑀫𑁂𑀯 𑀦 𑀅𑀓𑀸𑀲𑀺, 𑀲𑁂𑀲𑀁 𑀲𑀩𑁆𑀩𑀁 𑀧𑀸𑀓𑀢𑀺𑀓𑀫𑁂𑀯 𑀅𑀳𑁄𑀲𑀺.

𑁩𑁧𑁬. 𑀲𑀫𑀼𑀘𑁆𑀙𑁂𑀤𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀮𑁆𑀬𑀸𑀡𑀯𑀢𑁆𑀢𑀁 𑀓𑁄 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀓𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀁, 𑀓𑁄 𑀧𑀯𑀢𑁆𑀢𑁂𑀢𑀺, 𑀓𑁂𑀦 𑀧𑀯𑀢𑁆𑀢𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀻𑀮𑀯𑀸 𑀪𑀺𑀓𑁆𑀔𑀼 ‘‘𑀦 𑀲𑀓𑁆𑀓𑀸 𑀫𑀬𑀸 𑀅𑀭𑀳𑀢𑁆𑀢𑀁 𑀮𑀤𑁆𑀥𑀼’’𑀦𑁆𑀢𑀺 𑀯𑀻𑀭𑀺𑀬𑀁 𑀅𑀓𑀭𑁄𑀦𑁆𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. 𑀤𑀼𑀲𑁆𑀲𑀻𑀮𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀲𑀢𑁆𑀢 𑀲𑁂𑀔𑀸 𑀧𑀯𑀢𑁆𑀢𑁂𑀦𑁆𑀢𑀺. 𑀔𑀻𑀡𑀸𑀲𑀯𑁂𑀦 𑀧𑀯𑀢𑁆𑀢𑀺𑀢𑀁 𑀦𑀸𑀫 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀖𑀤𑁂𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀥𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧𑁭. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀥𑀼𑀭𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀳𑀸𑀓𑀘𑁆𑀘𑀸𑀦𑁄𑀢𑀺 𑀕𑀺𑀳𑀺𑀓𑀸𑀮𑁂 𑀉𑀚𑁆𑀚𑁂𑀦𑀺𑀓𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀘. 𑀫𑀥𑀼𑀭𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀕𑀼𑀦𑁆𑀤𑀸𑀯𑀦𑁂𑀢𑀺 𑀓𑀡𑁆𑀳𑀓𑀕𑀼𑀦𑁆𑀤𑀸𑀯𑀦𑁂. 𑀅𑀯𑀦𑁆𑀢𑀺𑀧𑀼𑀢𑁆𑀢𑁄𑀢𑀺 𑀅𑀯𑀦𑁆𑀢𑀺𑀭𑀝𑁆𑀞𑁂 𑀭𑀜𑁆𑀜𑁄 𑀥𑀻𑀢𑀸𑀬 𑀧𑀼𑀢𑁆𑀢𑁄. 𑀯𑀼𑀤𑁆𑀥𑁄 𑀘𑁂𑀯 𑀅𑀭𑀳𑀸 𑀘𑀸𑀢𑀺 𑀤𑀳𑀭𑀁 𑀅𑀭𑀳𑀦𑁆𑀢𑀫𑁆𑀧𑀺 𑀦 𑀢𑀣𑀸 𑀲𑀫𑁆𑀪𑀸𑀯𑁂𑀦𑁆𑀢𑀺 𑀬𑀣𑀸 𑀫𑀳𑀮𑁆𑀮𑀓𑀁, 𑀣𑁂𑀭𑁄 𑀧𑀦 𑀯𑀼𑀤𑁆𑀥𑁄 𑀘𑁂𑀯 𑀅𑀳𑁄𑀲𑀺 𑀅𑀭𑀳𑀸 𑀘. 𑀩𑁆𑀭𑀸𑀳𑁆𑀫𑀡𑀸, 𑀪𑁄 𑀓𑀘𑁆𑀘𑀸𑀦𑀸𑀢𑀺 𑀲𑁄 𑀓𑀺𑀭 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑀮𑀤𑁆𑀥𑀺𑀓𑁄, 𑀢𑀲𑁆𑀫𑀸 𑀏𑀯𑀫𑀸𑀳. 𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄𑀢𑀺𑀆𑀤𑀻𑀲𑀼 𑀚𑀸𑀢𑀺𑀕𑁄𑀢𑁆𑀢𑀸𑀤𑀻𑀦𑀁 𑀧𑀜𑁆𑀜𑀸𑀧𑀦𑀝𑁆𑀞𑀸𑀦𑁂 𑀩𑁆𑀭𑀸𑀳𑁆𑀫𑀡𑀸𑀯 𑀲𑁂𑀝𑁆𑀞𑀸𑀢𑀺 𑀤𑀲𑁆𑀲𑁂𑀢𑀺. 𑀳𑀻𑀦𑁄 𑀅𑀜𑁆𑀜𑁄 𑀯𑀡𑁆𑀡𑁄𑀢𑀺 𑀇𑀢𑀭𑁂 𑀢𑀬𑁄 𑀯𑀡𑁆𑀡𑀸 𑀳𑀻𑀦𑀸 𑀮𑀸𑀫𑀓𑀸𑀢𑀺 𑀯𑀤𑀢𑀺. 𑀲𑀼𑀓𑁆𑀓𑁄𑀢𑀺 𑀧𑀡𑁆𑀟𑀭𑁄. 𑀓𑀡𑁆𑀳𑁄𑀢𑀺 𑀓𑀸𑀴𑀓𑁄. 𑀲𑀼𑀚𑁆𑀛𑀦𑁆𑀢𑀻𑀢𑀺 𑀚𑀸𑀢𑀺𑀕𑁄𑀢𑁆𑀢𑀸𑀤𑀺𑀧𑀜𑁆𑀜𑀸𑀧𑀦𑀝𑁆𑀞𑀸𑀦𑁂𑀲𑀼 𑀲𑀼𑀚𑁆𑀛𑀦𑁆𑀢𑀺. 𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸𑀢𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸. 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸𑀢𑀺 𑀉𑀭𑁂 𑀯𑀲𑀺𑀢𑁆𑀯𑀸 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸, 𑀉𑀭𑁂 𑀓𑀢𑁆𑀯𑀸 𑀲𑀁𑀯𑀤𑁆𑀥𑀺𑀢𑀸𑀢𑀺 𑀯𑀸 𑀑𑀭𑀲𑀸. 𑀩𑁆𑀭𑀳𑁆𑀫𑀚𑀸𑀢𑀺 𑀩𑁆𑀭𑀳𑁆𑀫𑀢𑁄 𑀦𑀺𑀩𑁆𑀩𑀢𑁆𑀢𑀸. 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑀸𑀢𑀺 𑀩𑁆𑀭𑀳𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀸. 𑀩𑁆𑀭𑀳𑁆𑀫𑀤𑀸𑀬𑀸𑀤𑀸𑀢𑀺 𑀩𑁆𑀭𑀳𑁆𑀫𑀼𑀦𑁄 𑀤𑀸𑀬𑀸𑀤𑀸. 𑀖𑁄𑀲𑁄𑀬𑁂𑀯 𑀔𑁄 𑀏𑀲𑁄𑀢𑀺 𑀯𑁄𑀳𑀸𑀭𑀫𑀢𑁆𑀢𑀫𑁂𑀯𑁂𑀢𑀁.

𑁩𑁧𑁮. 𑀇𑀚𑁆𑀛𑁂𑀬𑁆𑀬𑀸𑀢𑀺 𑀲𑀫𑀺𑀚𑁆𑀛𑁂𑀬𑁆𑀬, 𑀬𑀢𑁆𑀢𑀓𑀸𑀦𑀺 𑀥𑀦𑀸𑀤𑀻𑀦𑀺 𑀧𑀢𑁆𑀣𑁂𑀬𑁆𑀬, 𑀢𑀢𑁆𑀢𑀓𑁂𑀳𑀺𑀲𑁆𑀲 𑀫𑀦𑁄𑀭𑀣𑁄 𑀧𑀽𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀔𑀢𑁆𑀢𑀺𑀬𑁄𑀧𑀺𑀲𑁆𑀲𑀸𑀲𑁆𑀲𑀸𑀢𑀺 𑀔𑀢𑁆𑀢𑀺𑀬𑁄𑀧𑀺 𑀅𑀲𑁆𑀲 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀲𑁆𑀲 𑀧𑀼𑀩𑁆𑀩𑀼𑀝𑁆𑀞𑀸𑀬𑀻 𑀅𑀲𑁆𑀲. 𑀦𑁂𑀲𑀁 𑀏𑀢𑁆𑀣 𑀓𑀺𑀜𑁆𑀘𑀻𑀢𑀺 𑀦 𑀏𑀢𑁂𑀲𑀁 𑀏𑀢𑁆𑀣 𑀓𑀺𑀜𑁆𑀘𑀺.

𑁩𑁨𑁨. 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀸𑀫𑀸𑀢𑀺 𑀦𑀺𑀲𑀺𑀦𑁆𑀦𑀸𑀲𑀦𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀇𑀥 𑀦𑀺𑀲𑀻𑀤𑀸𑀢𑀺 𑀯𑀤𑁂𑀬𑁆𑀬𑀸𑀫. 𑀅𑀪𑀺𑀦𑀺𑀫𑀦𑁆𑀢𑁂𑀬𑁆𑀬𑀸𑀫𑀧𑀺 𑀦𑀦𑁆𑀢𑀺 𑀅𑀪𑀺𑀳𑀭𑀺𑀢𑁆𑀯𑀸 𑀢𑀁 𑀦𑀺𑀫𑀦𑁆𑀢𑁂𑀬𑁆𑀬𑀸𑀫. 𑀢𑀢𑁆𑀣 𑀤𑀼𑀯𑀺𑀥𑁄 𑀅𑀪𑀺𑀳𑀸𑀭𑁄 𑀯𑀸𑀘𑀸𑀬 𑀘𑁂𑀯 𑀓𑀸𑀬𑁂𑀦 𑀘. ‘‘𑀢𑀼𑀫𑁆𑀳𑀸𑀓𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀫𑀫𑀁 𑀘𑀻𑀯𑀭𑀸𑀤𑀻𑀳𑀺 𑀯𑀤𑁂𑀬𑁆𑀬𑀸𑀣 𑀬𑁂𑀦𑀢𑁆𑀣𑁄’’𑀢𑀺 𑀯𑀤𑀦𑁆𑀢𑁄 𑀳𑀺 𑀯𑀸𑀘𑀸𑀬 𑀅𑀪𑀺𑀳𑀭𑀺𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑀺 𑀦𑀸𑀫. 𑀘𑀻𑀯𑀭𑀸𑀤𑀺𑀯𑁂𑀓𑀮𑁆𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀇𑀤𑀁 𑀕𑀡𑁆𑀳𑀣𑀸’’𑀢𑀺 𑀢𑀸𑀦𑀺 𑀤𑁂𑀦𑁆𑀢𑁄 𑀧𑀦 𑀓𑀸𑀬𑁂𑀦 𑀅𑀪𑀺𑀳𑀭𑀺𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑀺 𑀦𑀸𑀫. 𑀢𑀤𑀼𑀪𑀬𑀫𑁆𑀧𑀺 𑀲𑀦𑁆𑀥𑀸𑀬 ‘‘𑀅𑀪𑀺𑀦𑀺𑀫𑀦𑁆𑀢𑁂𑀬𑁆𑀬𑀸𑀫𑀧𑀺 𑀦’’𑀦𑁆𑀢𑀺 𑀆𑀳. 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀦𑁆𑀢𑀺 𑀭𑀓𑁆𑀔𑀸𑀲𑀗𑁆𑀔𑀸𑀢𑀜𑁆𑀘𑁂𑀯 𑀆𑀯𑀭𑀡𑀲𑀗𑁆𑀔𑀸𑀢𑀜𑁆𑀘 𑀕𑀼𑀢𑁆𑀢𑀺𑀁. 𑀬𑀸 𑀧𑀦𑁂𑀲𑀸 𑀆𑀯𑀼𑀥𑀳𑀢𑁆𑀣𑁂 𑀧𑀼𑀭𑀺𑀲𑁂 𑀞𑀧𑁂𑀦𑁆𑀢𑁂𑀦 𑀭𑀓𑁆𑀔𑀸, 𑀲𑀸 𑀥𑀫𑁆𑀫𑀺𑀓𑀸 𑀦𑀸𑀫 𑀲𑀁𑀯𑀺𑀳𑀺𑀢𑀸 𑀦 𑀳𑁄𑀢𑀺. 𑀬𑀣𑀸 𑀧𑀦 𑀅𑀯𑁂𑀮𑀸𑀬 𑀓𑀝𑁆𑀞𑀳𑀸𑀭𑀺𑀓𑀸𑀧𑀡𑁆𑀡𑀳𑀸𑀭𑀺𑀓𑀸𑀤𑀬𑁄 𑀯𑀺𑀳𑀸𑀭𑀁 𑀦 𑀧𑀯𑀺𑀲𑀦𑁆𑀢𑀺, 𑀫𑀺𑀕𑀮𑀼𑀤𑁆𑀤𑀓𑀸𑀤𑀬𑁄 𑀯𑀺𑀳𑀸𑀭𑀲𑀻𑀫𑀸𑀬 𑀫𑀺𑀕𑁂 𑀯𑀸 𑀫𑀘𑁆𑀙𑁂 𑀯𑀸 𑀦 𑀕𑀡𑁆𑀳𑀦𑁆𑀢𑀺, 𑀏𑀯𑀁 𑀲𑀁𑀯𑀺𑀤𑀳𑀦𑁆𑀢𑁂𑀦 𑀥𑀫𑁆𑀫𑀺𑀓𑀸 𑀦𑀸𑀫 𑀲𑀁𑀯𑀺𑀳𑀺𑀢𑀸 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀥𑀫𑁆𑀫𑀺𑀓’’𑀦𑁆𑀢𑀺.

𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀘𑀢𑀼𑀦𑁆𑀦𑀫𑁆𑀧𑀺 𑀯𑀡𑁆𑀡𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀧𑀩𑁆𑀩𑀚𑀺𑀢𑀲𑀓𑁆𑀓𑀸𑀭𑁂𑀦 𑀲𑀫𑁂 𑀲𑀫𑀸𑀦𑁂. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀥𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀁. 𑀢𑀢𑁆𑀣 𑀓𑁄𑀓𑀦𑀤𑁄𑀢𑀺 𑀓𑁄𑀓𑀦𑀤𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀁. 𑀲𑁄 𑀘 𑀫𑀗𑁆𑀕𑀮𑀧𑀸𑀲𑀸𑀤𑁄 𑀑𑀮𑁄𑀓𑀦𑀓𑀧𑀤𑀼𑀫𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄, 𑀢𑀲𑁆𑀫𑀸 𑀓𑁄𑀓𑀦𑀤𑁄𑀢𑀺 𑀲𑀗𑁆𑀔𑀁 𑀮𑀪𑀺.

𑁩𑁨𑁫. 𑀬𑀸𑀯 𑀧𑀘𑁆𑀙𑀺𑀫𑀲𑁄𑀧𑀸𑀦𑀓𑀴𑁂𑀯𑀭𑀸𑀢𑀺 𑀏𑀢𑁆𑀣 𑀧𑀘𑁆𑀙𑀺𑀫𑀲𑁄𑀧𑀸𑀦𑀓𑀴𑁂𑀯𑀭𑀦𑁆𑀢𑀺 𑀧𑀞𑀫𑀁 𑀲𑁄𑀧𑀸𑀦𑀨𑀮𑀓𑀁 𑀯𑀼𑀢𑁆𑀢𑀁. 𑀅𑀤𑁆𑀤𑀲𑀸 𑀔𑁄𑀢𑀺 𑀑𑀮𑁄𑀓𑀦𑀢𑁆𑀣𑀁𑀬𑁂𑀯 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑁄 𑀅𑀤𑁆𑀤𑀲. 𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 ‘‘𑀓𑀺𑀲𑁆𑀲 𑀦𑀼 𑀔𑁄 𑀅𑀢𑁆𑀣𑀸𑀬 𑀭𑀸𑀚𑀓𑀼𑀫𑀸𑀭𑁂𑀦 𑀅𑀬𑀁 𑀫𑀳𑀸𑀲𑀓𑁆𑀓𑀸𑀭𑁄 𑀓𑀢𑁄’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀧𑀼𑀢𑁆𑀢𑀧𑀢𑁆𑀣𑀦𑀸𑀬 𑀓𑀢𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀲𑁄 𑀳𑀺 𑀭𑀸𑀚𑀓𑀼𑀫𑀸𑀭𑁄 𑀅𑀧𑀼𑀢𑁆𑀢𑀓𑁄, 𑀲𑀼𑀢𑀜𑁆𑀘𑀸𑀦𑁂𑀦 𑀅𑀳𑁄𑀲𑀺 𑁋 ‘‘𑀩𑀼𑀤𑁆𑀥𑀸𑀦𑀁 𑀓𑀺𑀭 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀫𑀦𑀲𑀸 𑀇𑀘𑁆𑀙𑀺𑀢𑀁 𑀮𑀪𑀦𑁆𑀢𑀻’’𑀢𑀺. 𑀲𑁄 𑁋 ‘‘𑀲𑀘𑀸𑀳𑀁 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀫 𑀘𑁂𑀮𑀧𑁆𑀧𑀝𑀺𑀓𑀁 𑀅𑀓𑁆𑀓𑀫𑀺𑀲𑁆𑀲𑀢𑀺. 𑀦𑁄 𑀘𑁂 𑀮𑀪𑀺𑀲𑁆𑀲𑀸𑀫𑀺, 𑀦 𑀅𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀲𑀦𑁆𑀣𑀭𑀸𑀧𑁂𑀲𑀺. 𑀅𑀣 𑀪𑀕𑀯𑀸 ‘‘𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀦𑀼 𑀔𑁄 𑀏𑀢𑀲𑁆𑀲 𑀧𑀼𑀢𑁆𑀢𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀦 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲.

𑀧𑀼𑀩𑁆𑀩𑁂 𑀓𑀺𑀭 𑀲𑁄 𑀏𑀓𑀲𑁆𑀫𑀺𑀁 𑀤𑀻𑀧𑁂 𑀯𑀲𑀫𑀸𑀦𑁄 𑀲𑀫𑀘𑁆𑀙𑀦𑁆𑀤𑁂𑀦 𑀲𑀓𑀼𑀡𑀧𑁄𑀢𑀓𑁂 𑀔𑀸𑀤𑀺. 𑀲𑀘𑀲𑁆𑀲 𑀫𑀸𑀢𑀼𑀕𑀸𑀫𑁄 𑀅𑀜𑁆𑀜𑁄𑀯 𑀪𑀯𑁂𑀬𑁆𑀬, 𑀧𑀼𑀢𑁆𑀢𑀁 𑀮𑀪𑁂𑀬𑁆𑀬. 𑀉𑀪𑁄𑀳𑀺 𑀧𑀦 𑀲𑀫𑀸𑀦𑀘𑁆𑀙𑀦𑁆𑀤𑁂𑀳𑀺 𑀳𑀼𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀢𑁂𑀦𑀲𑁆𑀲 𑀧𑀼𑀢𑁆𑀢𑁄 𑀦 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻𑀢𑀺 𑀅𑀜𑁆𑀜𑀸𑀲𑀺. 𑀤𑀼𑀲𑁆𑀲𑁂 𑀧𑀦 𑀅𑀓𑁆𑀓𑀦𑁆𑀢𑁂 𑁋 ‘‘𑀩𑀼𑀤𑁆𑀥𑀸𑀦𑀁 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀢𑁆𑀣𑀺𑀢𑀧𑀢𑁆𑀣𑀺𑀢𑀁 𑀮𑀪𑀦𑁆𑀢𑀻𑀢𑀺 𑀮𑁄𑀓𑁂 𑀅𑀦𑀼𑀲𑁆𑀲𑀯𑁄, 𑀫𑀬𑀸 𑀘 𑀫𑀳𑀸𑀅𑀪𑀺𑀦𑀻𑀳𑀸𑀭𑁄 𑀓𑀢𑁄, 𑀦 𑀘 𑀧𑀼𑀢𑁆𑀢𑀁 𑀮𑀪𑀸𑀫𑀺, 𑀢𑀼𑀘𑁆𑀙𑀁 𑀇𑀤𑀁 𑀯𑀘𑀦’’𑀦𑁆𑀢𑀺 𑀫𑀺𑀘𑁆𑀙𑀸𑀕𑀳𑀡𑀁 𑀕𑀡𑁆𑀳𑁂𑀬𑁆𑀬. 𑀢𑀺𑀢𑁆𑀣𑀺𑀬𑀸𑀧𑀺 𑁋 ‘‘𑀦𑀢𑁆𑀣𑀺 𑀲𑀫𑀡𑀸𑀦𑀁 𑀅𑀓𑀢𑁆𑀢𑀩𑁆𑀩𑀁 𑀦𑀸𑀫, 𑀘𑁂𑀮𑀧𑁆𑀧𑀝𑀺𑀓𑀁 𑀫𑀤𑁆𑀤𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀻’’𑀢𑀺 𑀉𑀚𑁆𑀛𑀸𑀬𑁂𑀬𑁆𑀬𑀼𑀁. 𑀏𑀢𑀭𑀳𑀺 𑀘 𑀅𑀓𑁆𑀓𑀫𑀦𑁆𑀢𑁂𑀲𑀼 𑀩𑀳𑀽 𑀪𑀺𑀓𑁆𑀔𑀽 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑁄, 𑀢𑁂 𑀪𑀩𑁆𑀩𑀁 𑀚𑀸𑀦𑀺𑀢𑁆𑀯𑀸 𑀅𑀓𑁆𑀓𑀫𑀺𑀲𑁆𑀲𑀦𑁆𑀢𑀺, 𑀅𑀪𑀩𑁆𑀩𑀁 𑀚𑀸𑀦𑀺𑀢𑁆𑀯𑀸 𑀦 𑀅𑀓𑁆𑀓𑀫𑀺𑀲𑁆𑀲𑀦𑁆𑀢𑀺. 𑀅𑀦𑀸𑀕𑀢𑁂 𑀧𑀦 𑀉𑀧𑀦𑀺𑀲𑁆𑀲𑀬𑁄 𑀫𑀦𑁆𑀤𑁄 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑀁 𑀦 𑀚𑀸𑀦𑀺𑀲𑁆𑀲𑀦𑁆𑀢𑀺. 𑀢𑁂𑀲𑀼 𑀅𑀓𑁆𑀓𑀫𑀦𑁆𑀢𑁂𑀲𑀼 𑀲𑀘𑁂 𑀧𑀢𑁆𑀣𑀺𑀢𑀁 𑀇𑀚𑁆𑀛𑀺𑀲𑁆𑀲𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀇𑀚𑁆𑀛𑀺𑀲𑁆𑀲𑀢𑀺, 𑁋 ‘‘𑀧𑀼𑀩𑁆𑀩𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀮𑀪𑀦𑁆𑀢𑀺, 𑀢𑀁 𑀇𑀤𑀸𑀦𑀺 𑀦 𑀮𑀪𑀦𑁆𑀢𑀺. 𑀢𑁂𑀬𑁂𑀯 𑀫𑀜𑁆𑀜𑁂 𑀪𑀺𑀓𑁆𑀔𑀽 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑀸 𑀅𑀳𑁂𑀲𑀼𑀁, 𑀇𑀫𑁂 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀫𑀦𑀼𑀲𑁆𑀲𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀅𑀓𑁆𑀓𑀫𑀺𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺 ‘‘𑀦, 𑀪𑀺𑀓𑁆𑀔𑀯𑁂, 𑀘𑁂𑀮𑀧𑁆𑀧𑀝𑀺𑀓𑀸 𑀅𑀓𑁆𑀓𑀫𑀺𑀢𑀩𑁆𑀩𑀸’’𑀢𑀺 (𑀘𑀽𑀴𑀯. 𑁨𑁬𑁮). 𑀫𑀗𑁆𑀕𑀮𑀢𑁆𑀣𑀸𑀬 𑀧𑀜𑁆𑀜𑀢𑁆𑀢𑀁 𑀅𑀦𑀓𑁆𑀓𑀫𑀦𑁆𑀢𑁂𑀲𑀼 𑀧𑀦 𑀅𑀓𑁆𑀓𑀫𑀦𑀢𑁆𑀣𑀸𑀬 𑀅𑀦𑀼𑀧𑀜𑁆𑀜𑀢𑁆𑀢𑀺𑀁 𑀞𑀧𑁂𑀲𑀺 𑁋 ‘‘𑀕𑀺𑀳𑀻, 𑀪𑀺𑀓𑁆𑀔𑀯𑁂, 𑀫𑀗𑁆𑀕𑀮𑀺𑀓𑀸, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀳𑀻𑀦𑀁 𑀫𑀗𑁆𑀕𑀮𑀢𑁆𑀣𑀸𑀬𑀸’’𑀢𑀺 (𑀘𑀽𑀴𑀯. 𑁨𑁬𑁮).

𑁩𑁨𑁬. 𑀧𑀘𑁆𑀙𑀺𑀫𑀁 𑀚𑀦𑀢𑀁 𑀢𑀣𑀸𑀕𑀢𑁄 𑀅𑀦𑀼𑀓𑀫𑁆𑀧𑀢𑀻𑀢𑀺 𑀇𑀤𑀁 𑀣𑁂𑀭𑁄 𑀯𑀼𑀢𑁆𑀢𑁂𑀲𑀼 𑀓𑀸𑀭𑀡𑁂𑀲𑀼 𑀢𑀢𑀺𑀬𑀁 𑀓𑀸𑀭𑀡𑀁 𑀲𑀦𑁆𑀥𑀸𑀬𑀸𑀳. 𑀦 𑀔𑁄 𑀲𑀼𑀔𑁂𑀦 𑀲𑀼𑀔𑀦𑁆𑀢𑀺 𑀓𑀲𑁆𑀫𑀸 𑀆𑀳? 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀲𑀜𑁆𑀜𑀻 𑀳𑀼𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦 𑀅𑀓𑁆𑀓𑀫𑀺, 𑀢𑀲𑁆𑀫𑀸 𑀅𑀳𑀫𑁆𑀧𑀺 𑀲𑀢𑁆𑀣𑀸𑀭𑀸 𑀲𑀫𑀸𑀦𑀘𑁆𑀙𑀦𑁆𑀤𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳.

𑁩𑁨𑁭. 𑀲𑁄 𑀔𑁄 𑀅𑀳𑀦𑁆𑀢𑀺𑀆𑀤𑀺 ‘‘𑀬𑀸𑀯 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂’’𑀢𑀺 𑀢𑀸𑀯 𑀫𑀳𑀸𑀲𑀘𑁆𑀘𑀓𑁂 (𑀫. 𑀦𑀺. 𑁧.𑁩𑁬𑁪 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁄 𑀧𑀭𑀁 𑀬𑀸𑀯 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀆𑀲𑀯𑀓𑁆𑀔𑀬𑀸 𑀧𑀸𑀲𑀭𑀸𑀲𑀺𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁨𑁭𑁨 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁩𑁪𑁩. 𑀅𑀗𑁆𑀓𑀼𑀲𑀕𑀬𑁆𑀳𑁂 𑀲𑀺𑀧𑁆𑀧𑁂𑀢𑀺 𑀅𑀗𑁆𑀓𑀼𑀲𑀕𑀳𑀡𑀲𑀺𑀧𑁆𑀧𑁂. 𑀓𑀼𑀲𑀮𑁄 𑀅𑀳𑀦𑁆𑀢𑀺 𑀙𑁂𑀓𑁄 𑀅𑀳𑀁. 𑀓𑀲𑁆𑀲 𑀧𑀦𑀸𑀬𑀁 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀻𑀢𑀺? 𑀧𑀺𑀢𑀼 𑀲𑀦𑁆𑀢𑀺𑀓𑁂, 𑀧𑀺𑀢𑀸𑀧𑀺𑀲𑁆𑀲 𑀧𑀺𑀢𑀼 𑀲𑀦𑁆𑀢𑀺𑀓𑁂𑀯 𑀉𑀕𑁆𑀕𑀡𑁆𑀳𑀺. 𑀓𑁄𑀲𑀫𑁆𑀩𑀺𑀬𑀁 𑀓𑀺𑀭 𑀧𑀭𑀦𑁆𑀢𑀧𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀭𑀸𑀚𑀫𑀳𑁂𑀲𑀻 𑀕𑀭𑀼𑀪𑀸𑀭𑀸 𑀆𑀓𑀸𑀲𑀢𑀮𑁂 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀩𑀸𑀮𑀸𑀢𑀧𑀁 𑀢𑀧𑁆𑀧𑀫𑀸𑀦𑀸 𑀭𑀢𑁆𑀢𑀓𑀫𑁆𑀩𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀳𑁄𑀢𑀺, 𑀏𑀓𑁄 𑀳𑀢𑁆𑀣𑀺𑀮𑀺𑀗𑁆𑀕𑀲𑀓𑀼𑀡𑁄 ‘‘𑀫𑀁𑀲𑀧𑁂𑀲𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀕𑀳𑁂𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀲𑀸 ‘‘𑀙𑀟𑁆𑀟𑁂𑀬𑁆𑀬 𑀫’’𑀦𑁆𑀢𑀺 𑀪𑀬𑁂𑀦 𑀦𑀺𑀲𑁆𑀲𑀤𑁆𑀤𑀸 𑀅𑀳𑁄𑀲𑀺, 𑀲𑁄 𑀢𑀁 𑀧𑀩𑁆𑀩𑀢𑀧𑀸𑀤𑁂 𑀭𑀼𑀓𑁆𑀔𑀯𑀺𑀝𑀧𑁂 𑀞𑀧𑁂𑀲𑀺. 𑀲𑀸 𑀧𑀸𑀡𑀺𑀲𑁆𑀲𑀭𑀁 𑀓𑀭𑁄𑀦𑁆𑀢𑀻 𑀫𑀳𑀸𑀲𑀤𑁆𑀤𑀫𑀓𑀸𑀲𑀺. 𑀲𑀓𑀼𑀡𑁄 𑀧𑀮𑀸𑀬𑀺, 𑀢𑀲𑁆𑀲𑀸 𑀢𑀢𑁆𑀣𑁂𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀢𑀺𑀬𑀸𑀫𑀭𑀢𑁆𑀢𑀺𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀓𑀫𑁆𑀩𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀢𑁄 𑀘 𑀅𑀯𑀺𑀤𑀽𑀭𑁂 𑀢𑀸𑀧𑀲𑁄 𑀯𑀲𑀢𑀺. 𑀲𑁄 𑀢𑀲𑁆𑀲𑀸 𑀲𑀤𑁆𑀤𑁂𑀦 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀭𑀼𑀓𑁆𑀔𑀫𑀽𑀮𑀁 𑀆𑀕𑀢𑁄 𑀚𑀸𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀑𑀢𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀬𑀸𑀕𑀼𑀁 𑀧𑀸𑀬𑁂𑀲𑀺. 𑀤𑀸𑀭𑀓𑀲𑁆𑀲 𑀫𑁂𑀖𑀉𑀢𑀼𑀜𑁆𑀘 𑀧𑀩𑁆𑀩𑀢𑀉𑀢𑀼𑀜𑁆𑀘 𑀕𑀳𑁂𑀢𑁆𑀯𑀸 𑀚𑀸𑀢𑀢𑁆𑀢𑀸 𑀉𑀤𑁂𑀦𑁄𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀢𑀸𑀧𑀲𑁄 𑀨𑀮𑀸𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀤𑁆𑀯𑁂𑀧𑀺 𑀚𑀦𑁂 𑀧𑁄𑀲𑁂𑀲𑀺.

𑀲𑀸 𑀏𑀓𑀤𑀺𑀯𑀲𑀁 𑀢𑀸𑀧𑀲𑀲𑁆𑀲 𑀆𑀕𑀫𑀦𑀯𑁂𑀮𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀇𑀢𑁆𑀣𑀺𑀓𑀼𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀢𑀸𑀧𑀲𑀁 𑀲𑀻𑀮𑀪𑁂𑀤𑀁 𑀆𑀧𑀸𑀤𑁂𑀲𑀺. 𑀢𑁂𑀲𑀁 𑀏𑀓𑀢𑁄 𑀯𑀲𑀦𑁆𑀢𑀸𑀦𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀧𑀭𑀦𑁆𑀢𑀧𑀭𑀸𑀚𑀸 𑀓𑀸𑀮𑀁 𑀅𑀓𑀸𑀲𑀺. 𑀢𑀸𑀧𑀲𑁄 𑀭𑀢𑁆𑀢𑀺𑀪𑀸𑀕𑁂 𑀦𑀓𑁆𑀔𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀭𑀜𑁆𑀜𑁄 𑀫𑀢𑀪𑀸𑀯𑀁 𑀜𑀢𑁆𑀯𑀸 𑁋 ‘‘𑀢𑀼𑀬𑁆𑀳𑀁 𑀭𑀸𑀚𑀸 𑀫𑀢𑁄, 𑀧𑀼𑀢𑁆𑀢𑁄 𑀢𑁂 𑀓𑀺𑀁 𑀇𑀥 𑀯𑀲𑀺𑀢𑀼𑀁 𑀇𑀘𑁆𑀙𑀢𑀺, 𑀉𑀤𑀸𑀳𑀼 𑀧𑁂𑀢𑁆𑀢𑀺𑀓𑁂 𑀭𑀚𑁆𑀚𑁂 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑀼’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀸 𑀧𑀼𑀢𑁆𑀢𑀲𑁆𑀲 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑀼𑀓𑀸𑀫𑀢𑀜𑁆𑀘𑀲𑁆𑀲 𑀜𑀢𑁆𑀯𑀸 𑀢𑀸𑀧𑀲𑀲𑁆𑀲 𑀆𑀭𑁄𑀘𑁂𑀲𑀺. 𑀢𑀸𑀧𑀲𑁄 𑀘 𑀳𑀢𑁆𑀣𑀺𑀕𑀦𑁆𑀣𑀲𑀺𑀧𑁆𑀧𑀁 𑀚𑀸𑀦𑀸𑀢𑀺, 𑀓𑀼𑀢𑁄𑀦𑁂𑀦 𑀮𑀤𑁆𑀥𑀁? 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑀸. 𑀧𑀼𑀩𑁆𑀩𑁂 𑀓𑀺𑀭𑀲𑁆𑀲 𑀲𑀓𑁆𑀓𑁄 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 ‘‘𑀓𑁂𑀦 𑀓𑀺𑀮𑀫𑀣𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀳𑀢𑁆𑀣𑀺𑀧𑀭𑀺𑀲𑁆𑀲𑀬𑁄 𑀅𑀢𑁆𑀣𑀻’’𑀢𑀺 𑀆𑀭𑁄𑀘𑁂𑀲𑀺. 𑀢𑀲𑁆𑀲 𑀲𑀓𑁆𑀓𑁄 𑀳𑀢𑁆𑀣𑀺𑀕𑀦𑁆𑀣𑀜𑁆𑀘𑁂𑀯 𑀯𑀻𑀡𑀓𑀜𑁆𑀘 𑀤𑀢𑁆𑀯𑀸 ‘‘𑀧𑀮𑀸𑀧𑁂𑀢𑀼𑀓𑀸𑀫𑀢𑀸𑀬 𑀲𑀢𑀺 𑀇𑀫𑀁 𑀢𑀦𑁆𑀢𑀺𑀁 𑀯𑀸𑀤𑁂𑀢𑁆𑀯𑀸 𑀇𑀫𑀁 𑀲𑀺𑀮𑁄𑀓𑀁 𑀯𑀤𑁂𑀬𑁆𑀬𑀸𑀣, 𑀧𑀓𑁆𑀓𑁄𑀲𑀺𑀢𑀼𑀓𑀸𑀫𑀢𑀸𑀬 𑀲𑀢𑀺 𑀇𑀫𑀁 𑀲𑀺𑀮𑁄𑀓𑀁 𑀯𑀤𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑀸𑀧𑀲𑁄 𑀢𑀁 𑀲𑀺𑀧𑁆𑀧𑀁 𑀓𑀼𑀫𑀸𑀭𑀲𑁆𑀲 𑀅𑀤𑀸𑀲𑀺. 𑀲𑁄 𑀏𑀓𑀁 𑀯𑀝𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀳𑀢𑁆𑀣𑀻𑀲𑀼 𑀆𑀕𑀢𑁂𑀲𑀼 𑀢𑀦𑁆𑀢𑀺𑀁 𑀯𑀸𑀤𑁂𑀢𑁆𑀯𑀸 𑀲𑀺𑀮𑁄𑀓𑀁 𑀯𑀤𑀢𑀺, 𑀳𑀢𑁆𑀣𑀻 𑀪𑀻𑀢𑀸 𑀧𑀮𑀸𑀬𑀺𑀁𑀲𑀼.