𑁮. 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁮. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀧𑀼𑀡𑁆𑀟𑀭𑀻𑀓𑀁 𑀦𑀸𑀕𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀳𑀢𑁆𑀣𑀺𑀁. 𑀢𑀲𑁆𑀲 𑀓𑀺𑀭 𑀨𑀸𑀲𑀼𑀓𑀸𑀦𑀁 𑀉𑀧𑀭𑀺 𑀢𑀸𑀮𑀨𑀮𑀫𑀢𑁆𑀢𑀁 𑀧𑀡𑁆𑀟𑀭𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀢𑁂𑀦𑀲𑁆𑀲 𑀏𑀓𑀧𑀼𑀡𑁆𑀟𑀭𑀻𑀓𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑀺𑀭𑀺𑀯𑀟𑁆𑀠𑀁 𑀫𑀳𑀸𑀫𑀢𑁆𑀢𑀦𑁆𑀢𑀺 𑀧𑀘𑁆𑀘𑁂𑀓𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀓𑀣𑀸𑀨𑀸𑀲𑀼𑀓𑀢𑁆𑀣𑀁 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀁 𑀏𑀯𑀁𑀦𑀸𑀫𑀓𑀁 𑀫𑀳𑀸𑀫𑀢𑁆𑀢𑀁. 𑀆𑀬𑀲𑁆𑀫𑀸𑀦𑁄𑀢𑀺 𑀏𑀢𑁆𑀣 𑀦𑁄𑀢𑀺 𑀧𑀼𑀘𑁆𑀙𑀸𑀬 𑀦𑀺𑀧𑀸𑀢𑁄. 𑀫𑀳𑀸𑀫𑀢𑁆𑀢𑁄 𑀣𑁂𑀭𑀲𑁆𑀲 𑀲𑀗𑁆𑀖𑀸𑀝𑀺𑀧𑀢𑁆𑀢𑀥𑀸𑀭𑀡𑀸𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀯𑀁, 𑀫𑀳𑀸𑀭𑀸𑀚𑀸’’𑀢𑀺 𑀆𑀳.

𑁩𑁫𑁯. 𑀑𑀧𑀸𑀭𑀫𑁆𑀪𑁄𑀢𑀺 𑀉𑀧𑀸𑀭𑀫𑁆𑀪𑀁 𑀤𑁄𑀲𑀁 𑀆𑀭𑁄𑀧𑀦𑀸𑀭𑀳𑁄. 𑀓𑀺𑀁 𑀧𑀼𑀘𑁆𑀙𑀸𑀫𑀻𑀢𑀺 𑀭𑀸𑀚𑀸 𑀧𑀼𑀘𑁆𑀙𑀢𑀺. 𑀲𑀼𑀦𑁆𑀤𑀭𑀺𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀫𑀺𑀤𑀁 𑀲𑀼𑀢𑁆𑀢𑀁, 𑀢𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀬𑀜𑁆𑀳𑀺 𑀫𑀬𑀁, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂, 𑀬𑀁 𑀫𑀬𑀁 𑀯𑀺𑀜𑁆𑀜𑀽𑀳𑀻𑀢𑀺 𑀇𑀤𑀁 𑀧𑀤𑀁 𑀕𑀳𑁂𑀢𑁆𑀯𑀸 𑀧𑀜𑁆𑀳𑁂𑀦 𑀧𑀭𑀺𑀧𑀽𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀫𑁆𑀳𑀸, 𑀢𑀁 𑀓𑀸𑀭𑀡𑀁 𑀆𑀬𑀲𑁆𑀫𑀢𑀸 𑀏𑀯𑀁 𑀯𑀤𑀦𑁆𑀢𑁂𑀦 𑀧𑀭𑀺𑀧𑀽𑀭𑀺𑀢𑀁.

𑁩𑁬𑁦. 𑀅𑀓𑀼𑀲𑀮𑁄𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁄. 𑀲𑀸𑀯𑀚𑁆𑀚𑁄𑀢𑀺 𑀲𑀤𑁄𑀲𑁄. 𑀲𑀩𑁆𑀬𑀸𑀩𑀚𑁆𑀛𑁄𑀢𑀺 𑀲𑀤𑀼𑀓𑁆𑀔𑁄. 𑀤𑀼𑀓𑁆𑀔𑀯𑀺𑀧𑀸𑀓𑁄𑀢𑀺 𑀇𑀥 𑀦𑀺𑀲𑁆𑀲𑀦𑁆𑀤𑀯𑀺𑀧𑀸𑀓𑁄 𑀓𑀣𑀺𑀢𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀏𑀯𑀁 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀤𑀻𑀦𑀁 𑀅𑀢𑁆𑀣𑀸𑀬 𑀧𑀯𑀢𑁆𑀢𑀓𑀸𑀬𑀲𑀫𑀸𑀘𑀸𑀭𑀲𑁆𑀲.

𑀲𑀩𑁆𑀩𑀸𑀓𑀼𑀲𑀮𑀥𑀫𑁆𑀫𑀧𑀳𑀻𑀦𑁄 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀓𑀼𑀲𑀮𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀢𑁆𑀣 𑀲𑀩𑁆𑀩𑁂𑀲𑀁𑀬𑁂𑀯 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑀯𑀡𑁆𑀡𑁂𑀢𑀻𑀢𑀺. 𑀆𑀫 𑀯𑀡𑁆𑀡𑁂𑀢𑀻𑀢𑀺 𑀯𑀼𑀢𑁆𑀢𑁂 𑀬𑀣𑀸 𑀧𑀼𑀘𑁆𑀙𑀸, 𑀢𑀣𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀯𑁂𑀬𑁆𑀬. 𑀏𑀯𑀁 𑀩𑁆𑀬𑀸𑀓𑀭𑀡𑀁 𑀧𑀦 𑀦 𑀪𑀸𑀭𑀺𑀬𑀁. 𑀅𑀧𑁆𑀧𑀳𑀻𑀦𑀅𑀓𑀼𑀲𑀮𑁄𑀧𑀺 𑀳𑀺 𑀧𑀳𑀸𑀦𑀁 𑀯𑀡𑁆𑀡𑁂𑀬𑁆𑀬, 𑀪𑀕𑀯𑀸 𑀧𑀦 𑀧𑀳𑀻𑀦𑀸𑀓𑀼𑀲𑀮𑀢𑀸𑀬 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻𑀢𑀺 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀩𑁆𑀬𑀸𑀓𑀸𑀲𑀺. 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀏𑀲𑁂𑀯 𑀦𑀬𑁄.

𑁩𑁬𑁨. 𑀩𑀸𑀳𑀺𑀢𑀺𑀓𑀸𑀢𑀺 𑀩𑀸𑀳𑀺𑀢𑀺𑀭𑀝𑁆𑀞𑁂 𑀉𑀝𑁆𑀞𑀺𑀢𑀯𑀢𑁆𑀣𑀲𑁆𑀲𑁂𑀢𑀁 𑀦𑀸𑀫𑀁. 𑀲𑁄𑀴𑀲𑀲𑀫𑀸 𑀆𑀬𑀸𑀫𑁂𑀦𑀸𑀢𑀺 𑀆𑀬𑀸𑀫𑁂𑀦 𑀲𑀫𑀲𑁄𑀴𑀲𑀳𑀢𑁆𑀣𑀸. 𑀅𑀝𑁆𑀞𑀲𑀫𑀸 𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀯𑀺𑀢𑁆𑀣𑀸𑀭𑁂𑀦 𑀲𑀫𑀅𑀝𑁆𑀞𑀳𑀢𑁆𑀣𑀸.

𑁩𑁬𑁩. 𑀪𑀕𑀯𑀢𑁄 𑀧𑀸𑀤𑀸𑀲𑀻𑀢𑀺 𑀪𑀕𑀯𑀢𑁄 𑀦𑀺𑀬𑁆𑀬𑀸𑀢𑁂𑀲𑀺. 𑀤𑀢𑁆𑀯𑀸 𑀘 𑀧𑀦 𑀕𑀦𑁆𑀥𑀓𑀼𑀝𑀺𑀬𑀁 𑀯𑀺𑀢𑀸𑀦𑀁 𑀓𑀢𑁆𑀯𑀸 𑀩𑀦𑁆𑀥𑀺. 𑀢𑀢𑁄 𑀧𑀝𑁆𑀞𑀸𑀬 𑀕𑀦𑁆𑀥𑀓𑀼𑀝𑀺 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑁄𑀪𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀧𑀦 𑀯𑀲𑁂𑀦 𑀅𑀬𑀁 𑀤𑁂𑀲𑀦𑀸 𑀦𑀺𑀝𑁆𑀞𑀺𑀢𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.