𑁭. 𑀧𑀺𑀬𑀚𑀸𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀧𑀺𑀬𑀚𑀸𑀢𑀺𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀦𑁂𑀯 𑀓𑀫𑁆𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀻𑀢𑀺 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀝𑀺𑀪𑀦𑁆𑀢𑀺, 𑀧𑀓𑀢𑀺𑀦𑀺𑀬𑀸𑀫𑁂𑀦 𑀧𑀦 𑀦 𑀧𑀝𑀺𑀪𑀦𑁆𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀦 𑀧𑀝𑀺𑀪𑀸𑀢𑀻𑀢𑀺 𑀦 𑀭𑀼𑀘𑁆𑀘𑀢𑀺. 𑀆𑀴𑀸𑀳𑀦𑀦𑁆𑀢𑀺 𑀲𑀼𑀲𑀸𑀦𑀁. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀯𑀺𑀯𑀡𑁆𑀡𑀢𑀸𑀬 𑀅𑀜𑁆𑀜𑀣𑀸𑀪𑀸𑀯𑁄. 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸, 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀁 𑀧𑀦 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁. 𑀧𑀺𑀬𑀚𑀸𑀢𑀺𑀓𑀸𑀢𑀺 𑀧𑀺𑀬𑀢𑁄 𑀚𑀸𑀬𑀦𑁆𑀢𑀺. 𑀧𑀺𑀬𑀧𑁆𑀧𑀪𑀸𑀯𑀺𑀓𑀸𑀢𑀺 𑀧𑀺𑀬𑀢𑁄 𑀧𑀪𑀯𑀦𑁆𑀢𑀺.

𑁩𑁫𑁫. 𑀲𑀘𑁂 𑀢𑀁, 𑀫𑀳𑀸𑀭𑀸𑀚𑀸𑀢𑀺 𑀢𑀲𑁆𑀲 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑀬𑀫𑀸𑀦𑀸𑀧𑀺 𑀲𑀢𑁆𑀣𑀭𑀺 𑀲𑀤𑁆𑀥𑀸𑀬 𑀏𑀯𑀁 𑀯𑀤𑀢𑀺. 𑀘𑀭 𑀧𑀺𑀭𑁂𑀢𑀺 𑀅𑀧𑁂𑀳𑀺 𑀅𑀫𑁆𑀳𑀸𑀓𑀁 𑀧𑀭𑁂, 𑀅𑀦𑀚𑁆𑀛𑀢𑁆𑀢𑀺𑀓𑀪𑀽𑀢𑁂𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀘𑀭 𑀧𑀺𑀭𑁂𑀢𑀺 𑀧𑀭𑀢𑁄 𑀕𑀘𑁆𑀙, 𑀫𑀸 𑀇𑀥 𑀢𑀺𑀝𑁆𑀞𑀸𑀢𑀺𑀧𑀺 𑀅𑀢𑁆𑀣𑁄.

𑁩𑁫𑁬. 𑀤𑁆𑀯𑀺𑀥𑀸 𑀙𑁂𑀢𑁆𑀯𑀸𑀢𑀺 𑀅𑀲𑀺𑀦𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀭𑁄𑀦𑁆𑀢𑁄 𑀙𑀺𑀦𑁆𑀤𑀺𑀢𑁆𑀯𑀸. 𑀅𑀢𑁆𑀢𑀸𑀦𑀁 𑀉𑀧𑁆𑀨𑀸𑀮𑁂𑀲𑀻𑀢𑀺 𑀢𑁂𑀦𑁂𑀯 𑀅𑀲𑀺𑀦𑀸 𑀅𑀢𑁆𑀢𑀦𑁄 𑀉𑀤𑀭𑀁 𑀨𑀸𑀮𑁂𑀲𑀺. 𑀬𑀤𑀺 𑀳𑀺 𑀢𑀲𑁆𑀲 𑀲𑀸 𑀅𑀧𑁆𑀧𑀺𑀬𑀸 𑀪𑀯𑁂𑀬𑁆𑀬, 𑀇𑀤𑀸𑀦𑀺 𑀅𑀜𑁆𑀜𑀁 𑀫𑀸𑀢𑀼𑀕𑀸𑀫𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀢𑀸𑀦𑀁 𑀦 𑀖𑀸𑀢𑁂𑀬𑁆𑀬. 𑀬𑀲𑁆𑀫𑀸 𑀧𑀦𑀲𑁆𑀲 𑀲𑀸 𑀧𑀺𑀬𑀸 𑀅𑀳𑁄𑀲𑀺, 𑀢𑀲𑁆𑀫𑀸 𑀧𑀭𑀮𑁄𑀓𑁂𑀧𑀺 𑀢𑀸𑀬 𑀲𑀤𑁆𑀥𑀺𑀁 𑀲𑀫𑀗𑁆𑀕𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀏𑀯𑀫𑀓𑀸𑀲𑀺.

𑁩𑁫𑁭. 𑀧𑀺𑀬𑀸 𑀢𑁂 𑀯𑀚𑀺𑀭𑀻𑀢𑀺 𑀏𑀯𑀁 𑀓𑀺𑀭𑀲𑁆𑀲𑀸 𑀅𑀳𑁄𑀲𑀺 𑁋 ‘‘𑀲𑀘𑀸𑀳𑀁, ‘𑀪𑀽𑀢𑀧𑀼𑀩𑁆𑀩𑀁, 𑀫𑀳𑀸𑀭𑀸𑀚, 𑀇𑀫𑀺𑀲𑁆𑀲𑀸𑀬𑁂𑀯 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀺𑀲𑁆𑀲𑀸 𑀇𑀢𑁆𑀣𑀺𑀬𑀸’𑀢𑀺𑀆𑀤𑀺𑀓𑀣𑀁 𑀓𑀣𑁂𑀬𑁆𑀬𑀁, ‘𑀓𑁄 𑀢𑁂 𑀏𑀯𑀁 𑀅𑀓𑀸𑀲𑀺, 𑀅𑀧𑁂𑀳𑀺 𑀦𑀢𑁆𑀣𑀺 𑀏𑀢’𑀦𑁆𑀢𑀺 𑀫𑀁 𑀧𑀝𑀺𑀲𑁂𑀥𑁂𑀬𑁆𑀬, 𑀯𑀢𑁆𑀢𑀫𑀸𑀦𑁂𑀦𑁂𑀯 𑀦𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳. 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸𑀢𑀺 𑀏𑀢𑁆𑀣 𑀫𑀭𑀡𑀯𑀲𑁂𑀦 𑀯𑀺𑀧𑀭𑀺𑀡𑀸𑀫𑁄, 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀧𑀮𑀸𑀬𑀺𑀢𑁆𑀯𑀸 𑀕𑀫𑀦𑀯𑀲𑁂𑀦 𑀅𑀜𑁆𑀜𑀣𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀸𑀲𑀪𑀸𑀬𑀸𑀢𑀺 𑀯𑀸𑀲𑀪𑀸 𑀦𑀸𑀫 𑀭𑀜𑁆𑀜𑁄 𑀏𑀓𑀸 𑀤𑁂𑀯𑀻, 𑀢𑀁 𑀲𑀦𑁆𑀥𑀸𑀬𑀸𑀳.

𑀧𑀺𑀬𑀸 𑀢𑁂 𑀅𑀳𑀦𑁆𑀢𑀺 𑀓𑀲𑁆𑀫𑀸 𑀲𑀩𑁆𑀩𑀧𑀘𑁆𑀙𑀸 𑀆𑀳? 𑀏𑀯𑀁 𑀓𑀺𑀭𑀲𑁆𑀲𑀸 𑀅𑀳𑁄𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀫𑀬𑁆𑀳𑀁 𑀓𑀼𑀧𑀺𑀢𑁄, 𑀲𑀘𑀸𑀳𑀁 𑀲𑀩𑁆𑀩𑀧𑀞𑀫𑀁 ‘𑀧𑀺𑀬𑀸 𑀢𑁂 𑀅𑀳’𑀦𑁆𑀢𑀺 𑀧𑀼𑀘𑁆𑀙𑁂𑀬𑁆𑀬𑀁, ‘𑀦 𑀫𑁂 𑀢𑁆𑀯𑀁 𑀧𑀺𑀬𑀸, 𑀘𑀭 𑀧𑀺𑀭𑁂’𑀢𑀺 𑀯𑀤𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂 𑀓𑀣𑀸 𑀧𑀢𑀺𑀝𑁆𑀞𑀸𑀦𑀁 𑀦 𑀮𑀪𑀺𑀲𑁆𑀲𑀢𑀻’’𑀢𑀺 𑀓𑀣𑀸𑀬 𑀧𑀢𑀺𑀝𑁆𑀞𑀸𑀦𑀢𑁆𑀣𑀁 𑀲𑀩𑁆𑀩𑀧𑀘𑁆𑀙𑀸 𑀧𑀼𑀘𑁆𑀙𑀺. 𑀓𑀸𑀲𑀺𑀓𑁄𑀲𑀮𑁂𑀲𑀼 𑀙𑀟𑁆𑀟𑀺𑀢𑀪𑀸𑀯𑁂𑀦 𑀯𑀺𑀧𑀭𑀺𑀡𑀸𑀫𑁄, 𑀧𑀝𑀺𑀭𑀸𑀚𑀽𑀦𑀁 𑀳𑀢𑁆𑀣𑀕𑀫𑀦𑀯𑀲𑁂𑀦 𑀅𑀜𑁆𑀜𑀣𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀘𑀫𑁂𑀳𑀻𑀢𑀺 𑀆𑀘𑀫𑀦𑁄𑀤𑀓𑀁 𑀤𑁂𑀳𑀺. 𑀆𑀘𑀫𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀫𑀲𑁆𑀲𑀺𑀢𑀼𑀓𑀸𑀫𑁄 𑀏𑀯𑀫𑀸𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀧𑀺𑀬𑀚𑀸𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.