𑁬. 𑀅𑀗𑁆𑀕𑀼𑀮𑀺𑀫𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁭. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀅𑀗𑁆𑀕𑀼𑀮𑀺𑀫𑀸𑀮𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀗𑁆𑀕𑀼𑀮𑀻𑀦𑀁 𑀫𑀸𑀮𑀁 𑀥𑀸𑀭𑁂𑀢𑀻𑀢𑀺 𑀓𑀲𑁆𑀫𑀸 𑀥𑀸𑀭𑁂𑀢𑀺? 𑀆𑀘𑀭𑀺𑀬𑀯𑀘𑀦𑁂𑀦. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋

𑀅𑀬𑀁 𑀓𑀺𑀭 𑀓𑁄𑀲𑀮𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀲𑁆𑀲 𑀫𑀦𑁆𑀢𑀸𑀡𑀺𑀬𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀩𑁆𑀭𑀸𑀳𑁆𑀫𑀡𑀺𑀬𑀸 𑀭𑀢𑁆𑀢𑀺𑀪𑀸𑀕𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑁂 𑀲𑀓𑀮𑀦𑀕𑀭𑁂 𑀆𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀁𑀲𑀼, 𑀭𑀜𑁆𑀜𑁄 𑀫𑀗𑁆𑀕𑀮𑀲𑀓𑀼𑀦𑁆𑀢𑁄𑀧𑀺 𑀲𑀺𑀭𑀺𑀲𑀬𑀦𑁂 𑀞𑀧𑀺𑀢𑀸 𑀅𑀲𑀺𑀮𑀝𑁆𑀞𑀺𑀧𑀺 𑀧𑀚𑁆𑀚𑀮𑀺. 𑀩𑁆𑀭𑀸𑀳𑁆𑀫𑀡𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 𑀘𑁄𑀭𑀦𑀓𑁆𑀔𑀢𑁆𑀢𑁂𑀦 𑀚𑀸𑀢𑁄𑀢𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀼𑀔𑀲𑁂𑀬𑁆𑀬𑀪𑀸𑀯𑀁 𑀧𑀼𑀘𑁆𑀙𑀺.

𑀭𑀸𑀚𑀸 ‘‘𑀓𑀼𑀢𑁄, 𑀫𑁂 𑀆𑀘𑀭𑀺𑀬, 𑀲𑀼𑀔𑀲𑁂𑀬𑁆𑀬𑀸? 𑀫𑀬𑁆𑀳𑀁 𑀫𑀗𑁆𑀕𑀮𑀸𑀯𑀼𑀥𑀁 𑀧𑀚𑁆𑀚𑀮𑀺, 𑀭𑀚𑁆𑀚𑀲𑁆𑀲 𑀯𑀸 𑀚𑀻𑀯𑀺𑀢𑀲𑁆𑀲 𑀯𑀸 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺. 𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀖𑀭𑁂 𑀓𑀼𑀫𑀸𑀭𑁄 𑀚𑀸𑀢𑁄, 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀦 𑀓𑁂𑀯𑀮𑀁 𑀢𑀼𑀬𑁆𑀳𑀁 𑀦𑀺𑀯𑁂𑀲𑀦𑁂, 𑀲𑀓𑀮𑀦𑀕𑀭𑁂𑀧𑀺 𑀆𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀢𑀸𑀦𑀻𑀢𑀺. 𑀓𑀺𑀁 𑀪𑀯𑀺𑀲𑁆𑀲𑀢𑀺 𑀆𑀘𑀭𑀺𑀬𑀸𑀢𑀺? 𑀘𑁄𑀭𑁄 𑀪𑀯𑀺𑀲𑁆𑀲𑀢𑀺 𑀫𑀳𑀸𑀭𑀸𑀚𑀸𑀢𑀺. 𑀓𑀺𑀁 𑀏𑀓𑀘𑁄𑀭𑀓𑁄, 𑀉𑀤𑀸𑀳𑀼 𑀭𑀚𑁆𑀚𑀤𑀽𑀲𑀓𑁄 𑀘𑁄𑀭𑁄𑀢𑀺? 𑀏𑀓𑀘𑁄𑀭𑀓𑁄 𑀤𑁂𑀯𑀸𑀢𑀺. 𑀏𑀯𑀁 𑀯𑀢𑁆𑀯𑀸 𑀘 𑀧𑀦 𑀭𑀜𑁆𑀜𑁄 𑀫𑀦𑀁 𑀕𑀡𑁆𑀳𑀺𑀢𑀼𑀓𑀸𑀫𑁄 𑀆𑀳 𑁋 ‘‘𑀫𑀸𑀭𑁂𑀣 𑀦𑀁 𑀤𑁂𑀯𑀸’’𑀢𑀺. 𑀏𑀓𑀘𑁄𑀭𑀓𑁄 𑀲𑀫𑀸𑀦𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺? 𑀓𑀭𑀻𑀲𑀲𑀳𑀲𑁆𑀲𑀔𑁂𑀢𑁆𑀢𑁂 𑀏𑀓𑀲𑀸𑀮𑀺𑀲𑀻𑀲𑀁 𑀯𑀺𑀬 𑀳𑁄𑀢𑀺, 𑀧𑀝𑀺𑀚𑀕𑁆𑀕𑀣 𑀦𑀦𑁆𑀢𑀺. 𑀢𑀲𑁆𑀲 𑀦𑀸𑀫𑀕𑁆𑀕𑀳𑀡𑀁 𑀕𑀡𑁆𑀳𑀦𑁆𑀢𑀸 𑀲𑀬𑀦𑁂 𑀞𑀧𑀺𑀢𑀫𑀗𑁆𑀕𑀮𑀅𑀲𑀺𑀮𑀝𑁆𑀞𑀺, 𑀙𑀤𑀦𑁂 𑀞𑀧𑀺𑀢𑀸 𑀲𑀭𑀸, 𑀓𑀧𑁆𑀧𑀸𑀲𑀧𑀺𑀘𑀼𑀫𑁆𑀳𑀺 𑀞𑀧𑀺𑀢𑀁 𑀢𑀸𑀮𑀯𑀡𑁆𑀝𑀓𑀭𑀡𑀲𑀢𑁆𑀣𑀓𑀦𑁆𑀢𑀺 𑀏𑀢𑁂 𑀧𑀚𑁆𑀚𑀮𑀦𑁆𑀢𑀸 𑀓𑀺𑀜𑁆𑀘𑀺 𑀦 𑀳𑀺𑀁𑀲𑀺𑀁𑀲𑀼, 𑀢𑀲𑁆𑀫𑀸 𑀅𑀳𑀺𑀁𑀲𑀓𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑀁 𑀲𑀺𑀧𑁆𑀧𑀼𑀕𑁆𑀕𑀳𑀡𑀓𑀸𑀮𑁂 𑀢𑀓𑁆𑀓𑀲𑀻𑀮𑀁 𑀧𑁂𑀲𑀬𑀺𑀁𑀲𑀼.

𑀲𑁄 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀲𑀺𑀧𑁆𑀧𑀁 𑀧𑀝𑁆𑀞𑀧𑁂𑀲𑀺. 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀫𑀦𑀸𑀧𑀘𑀸𑀭𑀻 𑀧𑀺𑀬𑀯𑀸𑀤𑀻 𑀅𑀳𑁄𑀲𑀺. 𑀲𑁂𑀲𑀅𑀦𑁆𑀢𑁂𑀯𑀸𑀲𑀺𑀓𑀸 𑀩𑀸𑀳𑀺𑀭𑀓𑀸 𑀅𑀳𑁂𑀲𑀼𑀁. 𑀢𑁂 𑁋 ‘‘𑀅𑀳𑀺𑀁𑀲𑀓𑀫𑀸𑀡𑀯𑀓𑀲𑁆𑀲 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀬𑀁 𑀦 𑀧𑀜𑁆𑀜𑀸𑀬𑀸𑀫, 𑀓𑀣𑀁 𑀦𑀁 𑀪𑀺𑀦𑁆𑀤𑁂𑀬𑁆𑀬𑀸𑀫𑀸’’𑀢𑀺? 𑀦𑀺𑀲𑀻𑀤𑀺𑀢𑁆𑀯𑀸 𑀫𑀦𑁆𑀢𑀬𑀦𑁆𑀢𑀸 𑁋 ‘‘𑀲𑀩𑁆𑀩𑁂𑀳𑀺 𑀅𑀢𑀺𑀭𑁂𑀓𑀧𑀜𑁆𑀜𑀢𑁆𑀢𑀸 𑀤𑀼𑀧𑁆𑀧𑀜𑁆𑀜𑁄𑀢𑀺. 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀯𑀢𑁆𑀢𑀲𑀫𑁆𑀧𑀦𑁆𑀦𑀢𑁆𑀢𑀸 𑀤𑀼𑀩𑁆𑀩𑀢𑁆𑀢𑁄𑀢𑀺. 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀚𑀸𑀢𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀤𑀼𑀚𑁆𑀚𑀸𑀢𑁄𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀓𑀺𑀦𑁆𑀢𑀺 𑀓𑀭𑀺𑀲𑁆𑀲𑀸𑀫𑀸’’𑀢𑀺? 𑀢𑀢𑁄 𑀏𑀓𑀁 𑀔𑀭𑀫𑀦𑁆𑀢𑀁 𑀫𑀦𑁆𑀢𑀬𑀺𑀁𑀲𑀼 ‘‘𑀆𑀘𑀭𑀺𑀬𑀲𑁆𑀲 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀦𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀢𑀬𑁄 𑀭𑀸𑀲𑀻 𑀳𑀼𑀢𑁆𑀯𑀸 𑀧𑀞𑀫𑀁 𑀏𑀓𑀘𑁆𑀘𑁂 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀓𑀺𑀁 𑀢𑀸𑀢𑀸𑀢𑀺? 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀏𑀓𑀸 𑀓𑀣𑀸 𑀲𑀼𑀬𑁆𑀬𑀢𑀻𑀢𑀺. 𑀓𑀺𑀁 𑀢𑀸𑀢𑀸𑀢𑀺? 𑀅𑀳𑀺𑀁𑀲𑀓𑀫𑀸𑀡𑀯𑁄 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀤𑀼𑀩𑁆𑀪𑀢𑀻𑀢𑀺 𑀫𑀜𑁆𑀜𑀸𑀫𑀸𑀢𑀺. 𑀆𑀘𑀭𑀺𑀬𑁄 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑁋 ‘‘𑀕𑀘𑁆𑀙𑀣 𑀯𑀲𑀮𑀸, 𑀫𑀸 𑀫𑁂 𑀧𑀼𑀢𑁆𑀢𑀁 𑀫𑀬𑁆𑀳𑀁 𑀅𑀦𑁆𑀢𑀭𑁂 𑀧𑀭𑀺𑀪𑀺𑀦𑁆𑀤𑀣𑀸’’𑀢𑀺 𑀦𑀺𑀝𑁆𑀞𑀼𑀪𑀺. 𑀢𑀢𑁄 𑀇𑀢𑀭𑁂, 𑀅𑀣 𑀇𑀢𑀭𑁂𑀳𑀺 𑀢𑀬𑁄𑀧𑀺 𑀓𑁄𑀝𑁆𑀞𑀸𑀲𑀸 𑀆𑀕𑀦𑁆𑀢𑁆𑀯𑀸 𑀢𑀣𑁂𑀯 𑀯𑀢𑁆𑀯𑀸 𑁋 ‘‘𑀅𑀫𑁆𑀳𑀸𑀓𑀁 𑀅𑀲𑀤𑁆𑀤𑀳𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀚𑀸𑀦𑀸𑀣𑀸’’𑀢𑀺 𑀆𑀳𑀁𑀲𑀼.

𑀆𑀘𑀭𑀺𑀬𑁄 𑀲𑀺𑀦𑁂𑀳𑁂𑀦 𑀯𑀤𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀢𑁆𑀣𑀺 𑀫𑀜𑁆𑀜𑁂 𑀲𑀦𑁆𑀣𑀯𑁄’’𑀢𑀺 𑀧𑀭𑀺𑀪𑀺𑀚𑁆𑀚𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀖𑀸𑀢𑁂𑀫𑀺 𑀦’’𑀦𑁆𑀢𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀖𑀸𑀢𑁂𑀲𑁆𑀲𑀸𑀫𑀺 ‘𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀆𑀘𑀭𑀺𑀬𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀁 𑀆𑀕𑀢𑁂 𑀫𑀸𑀡𑀯𑀓𑁂 𑀤𑁄𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀻’𑀢𑀺. 𑀧𑀼𑀦 𑀓𑁄𑀘𑀺 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁆𑀣𑀁 𑀦 𑀆𑀕𑀫𑀺𑀲𑁆𑀲𑀢𑀺, 𑀏𑀯𑀁 𑀫𑁂 𑀮𑀸𑀪𑁄 𑀧𑀭𑀺𑀳𑀸𑀬𑀺𑀲𑁆𑀲𑀢𑀺, 𑀅𑀣 𑀦𑀁 𑀲𑀺𑀧𑁆𑀧𑀲𑁆𑀲 𑀧𑀭𑀺𑀬𑁄𑀲𑀸𑀦𑀼𑀧𑀘𑀸𑀭𑁄𑀢𑀺 𑀯𑀢𑁆𑀯𑀸 𑀚𑀗𑁆𑀖𑀲𑀳𑀲𑁆𑀲𑀁 𑀖𑀸𑀢𑁂𑀳𑀻𑀢𑀺 𑀯𑀓𑁆𑀔𑀸𑀫𑀺. 𑀅𑀯𑀲𑁆𑀲𑀁 𑀏𑀢𑁆𑀣 𑀏𑀓𑁄 𑀉𑀝𑁆𑀞𑀸𑀬 𑀢𑀁 𑀖𑀸𑀢𑁂𑀲𑁆𑀲𑀢𑀻’’𑀢𑀺.

𑀅𑀣 𑀦𑀁 𑀆𑀳 𑁋 ‘‘𑀏𑀳𑀺 𑀢𑀸𑀢 𑀚𑀗𑁆𑀖𑀲𑀳𑀲𑁆𑀲𑀁 𑀖𑀸𑀢𑁂𑀳𑀺, 𑀏𑀯𑀁 𑀢𑁂 𑀲𑀺𑀧𑁆𑀧𑀲𑁆𑀲 𑀉𑀧𑀘𑀸𑀭𑁄 𑀓𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀫𑀬𑀁 𑀅𑀳𑀺𑀁𑀲𑀓𑀓𑀼𑀮𑁂 𑀚𑀸𑀢𑀸, 𑀦 𑀲𑀓𑁆𑀓𑀸 𑀆𑀘𑀭𑀺𑀬𑀸𑀢𑀺. 𑀅𑀮𑀤𑁆𑀥𑀼𑀧𑀘𑀸𑀭𑀁 𑀲𑀺𑀧𑁆𑀧𑀁 𑀨𑀮𑀁 𑀦 𑀤𑁂𑀢𑀺 𑀢𑀸𑀢𑀸𑀢𑀺. 𑀲𑁄 𑀧𑀜𑁆𑀘𑀸𑀯𑀼𑀥𑀁 𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑀯𑀺𑀁 𑀧𑀯𑀺𑀝𑁆𑀞𑁄. 𑀅𑀝𑀯𑀺𑀁 𑀧𑀯𑀺𑀲𑀦𑀝𑁆𑀞𑀸𑀦𑁂𑀧𑀺 𑀅𑀝𑀯𑀺𑀫𑀚𑁆𑀛𑁂𑀧𑀺 𑀅𑀝𑀯𑀺𑀢𑁄 𑀦𑀺𑀓𑁆𑀔𑀫𑀦𑀝𑁆𑀞𑀸𑀦𑁂𑀧𑀺 𑀞𑀢𑁆𑀯𑀸 𑀫𑀦𑀼𑀲𑁆𑀲𑁂 𑀖𑀸𑀢𑁂𑀢𑀺. 𑀯𑀢𑁆𑀣𑀁 𑀯𑀸 𑀯𑁂𑀞𑀦𑀁 𑀯𑀸 𑀦 𑀕𑀡𑁆𑀳𑀸𑀢𑀺. 𑀏𑀓𑁄 𑀤𑁆𑀯𑁂𑀢𑀺 𑀕𑀡𑀺𑀢𑀫𑀢𑁆𑀢𑀫𑁂𑀯 𑀓𑀭𑁄𑀦𑁆𑀢𑁄 𑀕𑀘𑁆𑀙𑀢𑀺, 𑀕𑀡𑀦𑀫𑁆𑀧𑀺 𑀦 𑀉𑀕𑁆𑀕𑀡𑁆𑀳𑀸𑀢𑀺. 𑀧𑀓𑀢𑀺𑀬𑀸𑀧𑀺 𑀧𑀜𑁆𑀜𑀯𑀸 𑀏𑀲, 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀧𑀦 𑀘𑀺𑀢𑁆𑀢𑀁 𑀦 𑀧𑀢𑀺𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀅𑀦𑀼𑀓𑁆𑀓𑀫𑁂𑀦 𑀕𑀡𑀦𑀫𑁆𑀧𑀺 𑀦 𑀲𑀮𑁆𑀮𑀓𑁆𑀔𑁂𑀲𑀺, 𑀏𑀓𑁂𑀓𑀁 𑀅𑀗𑁆𑀕𑀼𑀮𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑁂𑀢𑀺. 𑀞𑀧𑀺𑀢𑀝𑁆𑀞𑀸𑀦𑁂 𑀅𑀗𑁆𑀕𑀼𑀮𑀺𑀬𑁄 𑀯𑀺𑀦𑀲𑁆𑀲𑀦𑁆𑀢𑀺, 𑀢𑀢𑁄 𑀯𑀺𑀚𑁆𑀛𑀺𑀢𑁆𑀯𑀸 𑀅𑀗𑁆𑀕𑀼𑀮𑀻𑀦𑀁 𑀫𑀸𑀮𑀁 𑀓𑀢𑁆𑀯𑀸 𑀥𑀸𑀭𑁂𑀲𑀺, 𑀢𑁂𑀦𑁂𑀯 𑀘𑀲𑁆𑀲 𑀅𑀗𑁆𑀕𑀼𑀮𑀺𑀫𑀸𑀮𑁄𑀢𑀺 𑀲𑀗𑁆𑀔𑀸 𑀉𑀤𑀧𑀸𑀤𑀺. 𑀲𑁄 𑀲𑀩𑁆𑀩𑀁 𑀅𑀭𑀜𑁆𑀜𑀁 𑀦𑀺𑀲𑁆𑀲𑀜𑁆𑀘𑀸𑀭𑀫𑀓𑀸𑀲𑀺, 𑀤𑀸𑀭𑀼𑀆𑀤𑀻𑀦𑀁 𑀅𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺.

𑀭𑀢𑁆𑀢𑀺𑀪𑀸𑀕𑁂 𑀅𑀦𑁆𑀢𑁄𑀕𑀸𑀫𑀫𑁆𑀧𑀺 𑀆𑀕𑀦𑁆𑀢𑁆𑀯𑀸 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀤𑁆𑀯𑀸𑀭𑀁 𑀉𑀕𑁆𑀖𑀸𑀢𑁂𑀢𑀺. 𑀢𑀢𑁄 𑀲𑀬𑀺𑀢𑁂𑀬𑁂𑀯 𑀫𑀸𑀭𑁂𑀢𑁆𑀯𑀸 𑀏𑀓𑁄 𑀏𑀓𑁄𑀢𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀕𑀸𑀫𑁄 𑀑𑀲𑀭𑀺𑀢𑁆𑀯𑀸 𑀦𑀺𑀕𑀫𑁂 𑀅𑀝𑁆𑀞𑀸𑀲𑀺, 𑀦𑀺𑀕𑀫𑁄 𑀦𑀕𑀭𑁂. 𑀫𑀦𑀼𑀲𑁆𑀲𑀸 𑀢𑀺𑀬𑁄𑀚𑀦𑀢𑁄 𑀧𑀝𑁆𑀞𑀸𑀬 𑀖𑀭𑀸𑀦𑀺 𑀧𑀳𑀸𑀬 𑀤𑀸𑀭𑀓𑁂 𑀳𑀢𑁆𑀣𑁂𑀲𑀼 𑀕𑀳𑁂𑀢𑁆𑀯𑀸 𑀆𑀕𑀫𑁆𑀫 𑀲𑀸𑀯𑀢𑁆𑀣𑀺𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑁋 ‘‘𑀘𑁄𑀭𑁄, 𑀢𑁂 𑀤𑁂𑀯, 𑀯𑀺𑀚𑀺𑀢𑁂 𑀅𑀗𑁆𑀕𑀼𑀮𑀺𑀫𑀸𑀮𑁄 𑀦𑀸𑀫𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀓𑀦𑁆𑀤𑀦𑁆𑀢𑀺. 𑀪𑀕𑁆𑀕𑀯𑁄 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀁 𑀆𑀳 𑁋 𑀪𑁄𑀢𑀺 𑀅𑀗𑁆𑀕𑀼𑀮𑀺𑀫𑀸𑀮𑁄 𑀦𑀸𑀫 𑀘𑁄𑀭𑁄 𑀉𑀧𑁆𑀧𑀦𑁆𑀦𑁄, 𑀲𑁄 𑀦 𑀅𑀜𑁆𑀜𑁄, 𑀢𑀯 𑀧𑀼𑀢𑁆𑀢𑁄 𑀅𑀳𑀺𑀁𑀲𑀓𑀓𑀼𑀫𑀸𑀭𑁄. 𑀇𑀤𑀸𑀦𑀺 𑀭𑀸𑀚𑀸 𑀢𑀁 𑀕𑀡𑁆𑀳𑀺𑀢𑀼𑀁 𑀦𑀺𑀓𑁆𑀔𑀫𑀺𑀲𑁆𑀲𑀢𑀺, 𑀓𑀺𑀁 𑀓𑀢𑁆𑀢𑀩𑁆𑀩𑀦𑁆𑀢𑀺? 𑀕𑀘𑁆𑀙 𑀲𑀸𑀫𑀺, 𑀧𑀼𑀢𑁆𑀢𑀁 𑀫𑁂 𑀕𑀳𑁂𑀢𑁆𑀯𑀸 𑀏𑀳𑀻𑀢𑀺. 𑀦𑀸𑀳𑀁 𑀪𑀤𑁆𑀤𑁂 𑀉𑀲𑁆𑀲𑀳𑀸𑀫𑀺, 𑀘𑀢𑀽𑀲𑀼 𑀳𑀺 𑀚𑀦𑁂𑀲𑀼 𑀯𑀺𑀲𑁆𑀲𑀸𑀲𑁄 𑀦𑀸𑀫 𑀦𑀢𑁆𑀣𑀺, 𑀘𑁄𑀭𑁄 𑀫𑁂 𑀧𑀼𑀭𑀸𑀡𑀲𑀳𑀸𑀬𑁄𑀢𑀺 𑀅𑀯𑀺𑀲𑁆𑀲𑀸𑀲𑀦𑀻𑀬𑁄, 𑀲𑀸𑀔𑀸 𑀫𑁂 𑀧𑀼𑀭𑀸𑀡𑀲𑀦𑁆𑀣𑀢𑀸𑀢𑀺 𑀅𑀯𑀺𑀲𑁆𑀲𑀸𑀲𑀦𑀻𑀬𑀸, 𑀭𑀸𑀚𑀸 𑀫𑀁 𑀧𑀽𑀚𑁂𑀢𑀻𑀢𑀺 𑀅𑀯𑀺𑀲𑁆𑀲𑀸𑀲𑀦𑀻𑀬𑁄, 𑀇𑀢𑁆𑀣𑀻 𑀫𑁂 𑀯𑀲𑀁 𑀕𑀢𑀸𑀢𑀺 𑀅𑀯𑀺𑀲𑁆𑀲𑀸𑀲𑀦𑀻𑀬𑀸𑀢𑀺. 𑀫𑀸𑀢𑀼 𑀳𑀤𑀬𑀁 𑀧𑀦 𑀫𑀼𑀤𑀼𑀓𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀳𑀁 𑀧𑀦 𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀧𑀼𑀢𑁆𑀢𑀁 𑀆𑀦𑁂𑀲𑁆𑀲𑀸𑀫𑀻𑀢𑀺 𑀦𑀺𑀓𑁆𑀔𑀦𑁆𑀢𑀸.

𑀢𑀁𑀤𑀺𑀯𑀲𑀜𑁆𑀘 𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀗𑁆𑀕𑀼𑀮𑀺𑀫𑀸𑀮𑀁 𑀤𑀺𑀲𑁆𑀯𑀸 𑁋 ‘‘𑀫𑀬𑀺 𑀕𑀢𑁂 𑀏𑀢𑀲𑁆𑀲 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀺. 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀞𑀺𑀢𑁄 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀙 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺. 𑀲𑀘𑁂 𑀦 𑀕𑀫𑀺𑀲𑁆𑀲𑀸𑀫𑀺, 𑀫𑀸𑀢𑀭𑀺 𑀅𑀧𑀭𑀚𑁆𑀛𑀺𑀢𑁆𑀯𑀸 𑀅𑀦𑀼𑀤𑁆𑀥𑀭𑀡𑀻𑀬𑁄 𑀪𑀯𑀺𑀲𑁆𑀲𑀢𑀺, 𑀓𑀭𑀺𑀲𑁆𑀲𑀸𑀫𑀺𑀲𑁆𑀲 𑀲𑀗𑁆𑀕𑀳’’𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀢𑀁 𑀲𑀗𑁆𑀕𑀡𑁆𑀳𑀺𑀢𑀼𑀓𑀸𑀫𑁄 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩𑁪𑁮. 𑀲𑀗𑁆𑀓𑀭𑀺𑀢𑁆𑀯𑀸 𑀲𑀗𑁆𑀓𑀭𑀺𑀢𑁆𑀯𑀸𑀢𑀺 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸. 𑀳𑀢𑁆𑀣𑀢𑁆𑀣𑀁 𑀕𑀘𑁆𑀙𑀦𑁆𑀢𑀻𑀢𑀺 𑀳𑀢𑁆𑀣𑁂 𑀅𑀢𑁆𑀣𑀁 𑀯𑀺𑀦𑀸𑀲𑀁 𑀕𑀘𑁆𑀙𑀦𑁆𑀢𑀺. 𑀓𑀺𑀁 𑀧𑀦 𑀢𑁂 𑀪𑀕𑀯𑀦𑁆𑀢𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑀅𑀲𑀜𑁆𑀚𑀸𑀦𑀺𑀢𑁆𑀯𑀸𑀢𑀺? 𑀅𑀲𑀜𑁆𑀚𑀸𑀦𑀺𑀢𑁆𑀯𑀸. 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀳𑀺 𑀪𑀕𑀯𑀸 𑀏𑀓𑀓𑁄𑀯 𑀅𑀕𑀫𑀸𑀲𑀺. 𑀘𑁄𑀭𑁄𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀻𑀖𑀭𑀢𑁆𑀢𑀁 𑀤𑀼𑀩𑁆𑀪𑁄𑀚𑀦𑁂𑀦 𑀘 𑀤𑀼𑀓𑁆𑀔𑀲𑁂𑀬𑁆𑀬𑀸𑀬 𑀘 𑀉𑀓𑁆𑀓𑀡𑁆𑀞𑀺𑀢𑁄 𑀳𑁄𑀢𑀺. 𑀓𑀺𑀢𑁆𑀢𑀓𑀸 𑀧𑀦𑀸𑀦𑁂𑀦 𑀫𑀦𑀼𑀲𑁆𑀲𑀸 𑀫𑀸𑀭𑀺𑀢𑀸𑀢𑀺? 𑀏𑀓𑁂𑀦𑀽𑀦𑀲𑀳𑀲𑁆𑀲𑀁. 𑀲𑁄 𑀧𑀦 𑀇𑀤𑀸𑀦𑀺 𑀏𑀓𑀁 𑀮𑀪𑀺𑀢𑁆𑀯𑀸 𑀲𑀳𑀲𑁆𑀲𑀁 𑀧𑀽𑀭𑁂𑀲𑁆𑀲𑀢𑀻𑀢𑀺 𑀲𑀜𑁆𑀜𑀻 𑀳𑀼𑀢𑁆𑀯𑀸 𑀬𑀫𑁂𑀯 𑀧𑀞𑀫𑀁 𑀧𑀲𑁆𑀲𑀸𑀫𑀺, 𑀢𑀁 𑀖𑀸𑀢𑁂𑀢𑁆𑀯𑀸 𑀕𑀡𑀦𑀁 𑀧𑀽𑀭𑁂𑀢𑁆𑀯𑀸 𑀲𑀺𑀧𑁆𑀧𑀲𑁆𑀲 𑀉𑀧𑀘𑀸𑀭𑀁 𑀓𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀯𑀢𑁆𑀣𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀅𑀝𑀯𑀺𑀫𑀚𑁆𑀛𑀢𑁄 𑀅𑀝𑀯𑀺𑀫𑀼𑀔𑀁 𑀆𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄𑀯 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀤𑁆𑀤𑀲𑀸 𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀻𑀢𑀺 𑀫𑀳𑀸𑀧𑀣𑀯𑀺𑀁 𑀉𑀫𑁆𑀫𑀺𑀬𑁄 𑀉𑀝𑁆𑀞𑀧𑁂𑀦𑁆𑀢𑁄 𑀯𑀺𑀬 𑀲𑀁𑀳𑀭𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀓𑁆𑀓𑀫𑀢𑀺, 𑀑𑀭𑀪𑀸𑀕𑁂 𑀯𑀮𑀺𑀬𑁄 𑀦𑀺𑀓𑁆𑀔𑀫𑀦𑁆𑀢𑀺, 𑀅𑀗𑁆𑀕𑀼𑀮𑀺𑀫𑀸𑀮𑁄 𑀲𑀭𑀓𑁆𑀔𑁂𑀧𑀫𑀢𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀪𑀕𑀯𑀸 𑀧𑀼𑀭𑀢𑁄 𑀫𑀳𑀦𑁆𑀢𑀁 𑀅𑀗𑁆𑀕𑀡𑀁 𑀤𑀲𑁆𑀲𑁂𑀢𑁆𑀯𑀸 𑀲𑀬𑀁 𑀫𑀚𑁆𑀛𑁂 𑀳𑁄𑀢𑀺, 𑀘𑁄𑀭𑁄 𑀅𑀦𑁆𑀢𑁂. 𑀲𑁄 ‘‘𑀇𑀤𑀸𑀦𑀺 𑀦𑀁 𑀧𑀸𑀧𑀼𑀡𑀺𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀣𑀸𑀫𑁂𑀦 𑀥𑀸𑀯𑀢𑀺. 𑀪𑀕𑀯𑀸 𑀅𑀗𑁆𑀕𑀡𑀲𑁆𑀲 𑀧𑀸𑀭𑀺𑀫𑀦𑁆𑀢𑁂 𑀳𑁄𑀢𑀺, 𑀘𑁄𑀭𑁄 𑀫𑀚𑁆𑀛𑁂. 𑀲𑁄 ‘‘𑀏𑀢𑁆𑀣 𑀦𑀁 𑀧𑀸𑀧𑀼𑀡𑀺𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑁂𑀕𑁂𑀦 𑀥𑀸𑀯𑀢𑀺. 𑀪𑀕𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀫𑀸𑀢𑀺𑀓𑀁 𑀯𑀸 𑀣𑀮𑀁 𑀯𑀸 𑀤𑀲𑁆𑀲𑁂𑀢𑀺, 𑀏𑀢𑁂𑀦𑀼𑀧𑀸𑀬𑁂𑀦 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀘𑁄𑀭𑁄 𑀓𑀺𑀮𑀫𑀺, 𑀫𑀼𑀔𑁂 𑀔𑁂𑀴𑁄 𑀲𑀼𑀲𑁆𑀲𑀺, 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼. 𑀅𑀣𑀲𑁆𑀲 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄’’𑀢𑀺 𑀏𑀢𑀤𑀳𑁄𑀲𑀺. 𑀫𑀺𑀕𑀫𑁆𑀧𑀻𑀢𑀺 𑀫𑀺𑀕𑀁 𑀓𑀲𑁆𑀫𑀸 𑀕𑀡𑁆𑀳𑀸𑀢𑀺? 𑀙𑀸𑀢𑀲𑀫𑀬𑁂 𑀆𑀳𑀸𑀭𑀢𑁆𑀣𑀁. 𑀲𑁄 𑀓𑀺𑀭 𑀏𑀓𑀁 𑀕𑀼𑀫𑁆𑀩𑀁 𑀖𑀝𑁆𑀝𑁂𑀢𑁆𑀯𑀸 𑀫𑀺𑀕𑁂 𑀉𑀝𑁆𑀞𑀸𑀧𑁂𑀢𑀺. 𑀢𑀢𑁄 𑀘𑀺𑀢𑁆𑀢𑀭𑀼𑀘𑀺𑀬𑀁 𑀫𑀺𑀕𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀕𑀡𑁆𑀳𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀔𑀸𑀤𑀢𑀺. 𑀧𑀼𑀘𑁆𑀙𑁂𑀬𑁆𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦𑀸𑀬𑀁 𑀕𑀘𑁆𑀙𑀦𑁆𑀢𑁄𑀯 𑀞𑀺𑀢𑁄 𑀦𑀸𑀫, 𑀅𑀳𑀜𑁆𑀘 𑀞𑀺𑀢𑁄𑀯 𑀅𑀝𑁆𑀞𑀺𑀢𑁄 𑀦𑀸𑀫, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀲𑀫𑀡𑀁 𑀢𑀁 𑀓𑀸𑀭𑀡𑀁 𑀧𑀼𑀘𑁆𑀙𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑁩𑁪𑁯. 𑀦𑀺𑀥𑀸𑀬𑀸𑀢𑀺 𑀬𑁄 𑀯𑀺𑀳𑀺𑀁𑀲𑀦𑀢𑁆𑀣𑀁 𑀪𑀽𑀢𑁂𑀲𑀼 𑀤𑀡𑁆𑀟𑁄 𑀧𑀯𑀢𑁆𑀢𑀬𑀺𑀢𑀩𑁆𑀩𑁄 𑀲𑀺𑀬𑀸, 𑀢𑀁 𑀦𑀺𑀥𑀸𑀬 𑀅𑀧𑀦𑁂𑀢𑁆𑀯𑀸 𑀫𑁂𑀢𑁆𑀢𑀸𑀬 𑀔𑀦𑁆𑀢𑀺𑀬𑀸 𑀧𑀝𑀺𑀲𑀗𑁆𑀔𑀸𑀬 𑀅𑀯𑀺𑀳𑀺𑀁𑀲𑀸𑀬 𑀲𑀸𑀭𑀡𑀻𑀬𑀥𑀫𑁆𑀫𑁂𑀲𑀼 𑀘 𑀞𑀺𑀢𑁄 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀢𑀼𑀯𑀫𑀝𑁆𑀞𑀺𑀢𑁄𑀲𑀻𑀢𑀺 𑀧𑀸𑀡𑁂𑀲𑀼 𑀅𑀲𑀜𑁆𑀜𑀢𑀢𑁆𑀢𑀸 𑀏𑀢𑁆𑀢𑀓𑀸𑀦𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀖𑀸𑀢𑁂𑀦𑁆𑀢𑀲𑁆𑀲 𑀢𑀯 𑀫𑁂𑀢𑁆𑀢𑀸 𑀯𑀸 𑀔𑀦𑁆𑀢𑀺 𑀯𑀸 𑀧𑀝𑀺𑀲𑀗𑁆𑀔𑀸 𑀯𑀸 𑀅𑀯𑀺𑀳𑀺𑀁𑀲𑀸 𑀯𑀸 𑀲𑀸𑀭𑀡𑀻𑀬𑀥𑀫𑁆𑀫𑁄 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀼𑀯𑀁 𑀅𑀝𑁆𑀞𑀺𑀢𑁄𑀲𑀺, 𑀇𑀤𑀸𑀦𑀺 𑀇𑀭𑀺𑀬𑀸𑀧𑀣𑁂𑀦 𑀞𑀺𑀢𑁄𑀧𑀺 𑀦𑀺𑀭𑀬𑁂 𑀥𑀸𑀯𑀺𑀲𑁆𑀲𑀲𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀲𑀼𑀭𑀓𑀸𑀬𑁂 𑀯𑀸 𑀥𑀸𑀯𑀺𑀲𑁆𑀲𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁄 𑀘𑁄𑀭𑁄 𑁋 ‘‘𑀫𑀳𑀸 𑀅𑀬𑀁 𑀲𑀻𑀳𑀦𑀸𑀤𑁄, 𑀫𑀳𑀦𑁆𑀢𑀁 𑀕𑀚𑁆𑀚𑀺𑀢𑀁, 𑀦 𑀇𑀤𑀁 𑀅𑀜𑁆𑀜𑀲𑁆𑀲 𑀪𑀯𑀺𑀲𑁆𑀲𑀢𑀺, 𑀫𑀳𑀸𑀫𑀸𑀬𑀸𑀬 𑀧𑀼𑀢𑁆𑀢𑀲𑁆𑀲 𑀲𑀺𑀤𑁆𑀥𑀢𑁆𑀣𑀲𑁆𑀲 𑀲𑀫𑀡𑀭𑀜𑁆𑀜𑁄 𑀏𑀢𑀁 𑀕𑀚𑁆𑀚𑀺𑀢𑀁, 𑀤𑀺𑀝𑁆𑀞𑁄 𑀯𑀢𑀫𑁆𑀳𑀺 𑀫𑀜𑁆𑀜𑁂 𑀢𑀺𑀔𑀺𑀡𑀘𑀓𑁆𑀔𑀼𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦, 𑀲𑀗𑁆𑀕𑀳𑀓𑀭𑀡𑀢𑁆𑀣𑀁 𑀫𑁂 𑀪𑀕𑀯𑀸 𑀆𑀕𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀺𑀭𑀲𑁆𑀲𑀁 𑀯𑀢 𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀳𑀺𑀢𑁄𑀢𑀺 𑀤𑁂𑀯𑀫𑀦𑀼𑀲𑁆𑀲𑀸𑀤𑀻𑀳𑀺 𑀘𑀢𑀼𑀧𑀘𑁆𑀘𑀬𑀧𑀽𑀚𑀸𑀬 𑀧𑀽𑀚𑀺𑀢𑁄. 𑀧𑀘𑁆𑀘𑀼𑀧𑀸𑀤𑀻𑀢𑀺 𑀘𑀺𑀭𑀲𑁆𑀲𑀁 𑀓𑀸𑀮𑀲𑁆𑀲 𑀅𑀘𑁆𑀘𑀬𑁂𑀦 𑀫𑀬𑁆𑀳𑀁 𑀲𑀗𑁆𑀕𑀳𑀢𑁆𑀣𑀸𑀬 𑀇𑀫𑀁 𑀫𑀳𑀸𑀯𑀦𑀁 𑀧𑀝𑀺𑀧𑀚𑁆𑀚𑀺. 𑀧𑀳𑀸𑀬 𑀧𑀸𑀧𑀦𑁆𑀢𑀺 𑀧𑀚𑀳𑀺𑀢𑁆𑀯𑀸 𑀧𑀸𑀧𑀁.

𑀇𑀢𑁆𑀯𑁂𑀯𑀸𑀢𑀺 𑀏𑀯𑀁 𑀯𑀢𑁆𑀯𑀸𑀬𑁂𑀯. 𑀆𑀯𑀼𑀥𑀦𑁆𑀢𑀺 𑀧𑀜𑁆𑀘𑀸𑀯𑀼𑀥𑀁. 𑀲𑁄𑀩𑁆𑀪𑁂𑀢𑀺 𑀲𑀫𑀦𑁆𑀢𑀢𑁄 𑀙𑀺𑀦𑁆𑀦𑁂. 𑀧𑀧𑀸𑀢𑁂𑀢𑀺 𑀏𑀓𑀢𑁄 𑀙𑀺𑀦𑁆𑀦𑁂. 𑀦𑀭𑀓𑁂𑀢𑀺 𑀨𑀮𑀺𑀢𑀝𑁆𑀞𑀸𑀦𑁂. 𑀇𑀥 𑀧𑀦 𑀢𑀻𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀅𑀭𑀜𑁆𑀜𑀫𑁂𑀯 𑀯𑀼𑀢𑁆𑀢𑀁. 𑀅𑀓𑀺𑀭𑀻𑀢𑀺 𑀔𑀺𑀧𑀺 𑀙𑀟𑁆𑀟𑁂𑀲𑀺.

𑀢𑀫𑁂𑀳𑀺 𑀪𑀺𑀓𑁆𑀔𑀽𑀢𑀺 𑀢𑀤𑀸 𑀅𑀯𑁄𑀘𑀸𑀢𑀺 𑀪𑀕𑀯𑀢𑁄 𑀇𑀫𑀁 𑀧𑀩𑁆𑀩𑀸𑀚𑁂𑀦𑁆𑀢𑁄 𑀓𑀼𑀳𑀺𑀁 𑀲𑀢𑁆𑀣𑀓𑀁 𑀮𑀪𑀺𑀲𑁆𑀲𑀸𑀫𑀺, 𑀓𑀼𑀳𑀺𑀁 𑀧𑀢𑁆𑀢𑀘𑀻𑀯𑀭𑀦𑁆𑀢𑀺 𑀧𑀭𑀺𑀬𑁂𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀓𑀫𑁆𑀫𑀁 𑀧𑀦 𑀑𑀮𑁄𑀓𑁂𑀲𑀺. 𑀅𑀣𑀲𑁆𑀲 𑀧𑀼𑀩𑁆𑀩𑁂 𑀲𑀻𑀮𑀯𑀦𑁆𑀢𑀸𑀦𑀁 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀓𑀲𑁆𑀲 𑀤𑀺𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑁋 ‘‘𑀏𑀳𑀺 𑀪𑀺𑀓𑁆𑀔𑀼 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 𑀆𑀳. 𑀲𑁄 𑀲𑀳 𑀯𑀘𑀦𑁂𑀦𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀮𑀪𑀺. 𑀢𑀸𑀯𑀤𑁂𑀯𑀲𑁆𑀲 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺, 𑀲𑀫𑀡𑀮𑀺𑀗𑁆𑀕𑀁 𑀧𑀸𑀢𑀼𑀭𑀳𑁄𑀲𑀺.

‘‘𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀯𑀸𑀲𑀺 𑀲𑀽𑀘𑀺 𑀘 𑀩𑀦𑁆𑀥𑀦𑀁;

𑀧𑀭𑀺𑀲𑁆𑀲𑀸𑀯𑀦𑁂𑀦 𑀅𑀝𑁆𑀞𑁂𑀢𑁂, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑀸 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑀸 𑀲𑀭𑀻𑀭𑀧𑀝𑀺𑀩𑀤𑁆𑀥𑀸𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀏𑀲𑁂𑀯 𑀢𑀲𑁆𑀲 𑀅𑀳𑀼 𑀪𑀺𑀓𑁆𑀔𑀼𑀪𑀸𑀯𑁄𑀢𑀺 𑀏𑀲 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁄 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀪𑀸𑀯𑁄 𑀅𑀳𑁄𑀲𑀺, 𑀦 𑀳𑀺 𑀏𑀳𑀺𑀪𑀺𑀓𑁆𑀔𑀽𑀦𑀁 𑀯𑀺𑀲𑀼𑀁 𑀉𑀧𑀲𑀫𑁆𑀧𑀤𑀸 𑀦𑀸𑀫 𑀅𑀢𑁆𑀣𑀺.

𑁩𑁫𑁦. 𑀧𑀘𑁆𑀙𑀸𑀲𑀫𑀡𑁂𑀦𑀸𑀢𑀺 𑀪𑀡𑁆𑀟𑀕𑁆𑀕𑀸𑀳𑀓𑁂𑀦 𑀧𑀘𑁆𑀙𑀸𑀲𑀫𑀡𑁂𑀦, 𑀢𑁂𑀦𑁂𑀯 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀢𑀁 𑀧𑀘𑁆𑀙𑀸𑀲𑀫𑀡𑀁 𑀓𑀢𑁆𑀯𑀸 𑀕𑀢𑁄𑀢𑀺 𑀅𑀢𑁆𑀣𑁄. 𑀫𑀸𑀢𑀸𑀧𑀺𑀲𑁆𑀲 𑀅𑀝𑁆𑀞𑀉𑀲𑀪𑀫𑀢𑁆𑀢𑁂𑀦 𑀞𑀸𑀦𑁂𑀦 𑀅𑀦𑁆𑀢𑀭𑀺𑀢𑀸, 𑁋 ‘‘𑀢𑀸𑀢, 𑀅𑀳𑀺𑀁𑀲𑀓 𑀓𑀢𑁆𑀣 𑀞𑀺𑀢𑁄𑀲𑀺, 𑀓𑀢𑁆𑀣 𑀦𑀺𑀲𑀺𑀦𑁆𑀦𑁄𑀲𑀺, 𑀓𑀼𑀳𑀺𑀁 𑀕𑀢𑁄𑀲𑀺? 𑀫𑀬𑀸 𑀲𑀤𑁆𑀥𑀺𑀁 𑀦 𑀓𑀣𑁂𑀲𑀺 𑀢𑀸𑀢𑀸’’𑀢𑀺 𑀯𑀤𑀦𑁆𑀢𑀻 𑀆𑀳𑀺𑀡𑁆𑀟𑀺𑀢𑁆𑀯𑀸 𑀅𑀧𑀲𑁆𑀲𑀫𑀸𑀦𑀸 𑀏𑀢𑁆𑀢𑁄𑀯 𑀕𑀢𑀸.

𑀧𑀜𑁆𑀘𑀫𑀢𑁆𑀢𑁂𑀳𑀺 𑀅𑀲𑁆𑀲𑀲𑀢𑁂𑀳𑀻𑀢𑀺 𑀲𑀘𑁂 𑀘𑁄𑀭𑀲𑁆𑀲 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀦𑀁 𑀕𑀡𑁆𑀳𑀺𑀲𑁆𑀲𑀸𑀫𑀺. 𑀲𑀘𑁂 𑀫𑀬𑁆𑀳𑀁 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀯𑁂𑀕𑁂𑀦 𑀧𑀮𑀸𑀬𑀺𑀲𑁆𑀲𑀸𑀫𑀻𑀢𑀺 𑀲𑀮𑁆𑀮𑀳𑀼𑀓𑁂𑀦 𑀩𑀮𑁂𑀦 𑀦𑀺𑀓𑁆𑀔𑀫𑀺. 𑀬𑁂𑀦 𑀆𑀭𑀸𑀫𑁄𑀢𑀺 𑀓𑀲𑁆𑀫𑀸 𑀆𑀭𑀸𑀫𑀁 𑀅𑀕𑀫𑀸𑀲𑀺? 𑀲𑁄 𑀓𑀺𑀭 𑀘𑁄𑀭𑀲𑁆𑀲 𑀪𑀸𑀬𑀢𑀺, 𑀘𑀺𑀢𑁆𑀢𑁂𑀦 𑀕𑀦𑁆𑀢𑀼𑀓𑀸𑀫𑁄 𑀦 𑀕𑀘𑁆𑀙𑀢𑀺, 𑀕𑀭𑀳𑀸𑀪𑀬𑁂𑀦 𑀦𑀺𑀓𑁆𑀔𑀫𑀺. 𑀢𑁂𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀲𑁆𑀲𑀸𑀫𑀺, 𑀲𑁄 𑀧𑀼𑀘𑁆𑀙𑀺𑀲𑁆𑀲𑀢𑀺 ‘𑀓𑀲𑁆𑀫𑀸 𑀩𑀮𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄𑀲𑀻’𑀢𑀺. 𑀅𑀣𑀸𑀳𑀁 𑀆𑀭𑁄𑀘𑁂𑀲𑁆𑀲𑀸𑀫𑀺, 𑀪𑀕𑀯𑀸 𑀳𑀺 𑀫𑀁 𑀦 𑀓𑁂𑀯𑀮𑀁 𑀲𑀫𑁆𑀧𑀭𑀸𑀬𑀺𑀓𑁂𑀦𑁂𑀯 𑀅𑀢𑁆𑀣𑁂𑀦 𑀲𑀗𑁆𑀕𑀡𑁆𑀳𑀸𑀢𑀺, 𑀤𑀺𑀝𑁆𑀞𑀥𑀫𑁆𑀫𑀺𑀓𑁂𑀦𑀧𑀺 𑀲𑀗𑁆𑀕𑀡𑁆𑀳𑀸𑀢𑀺𑀬𑁂𑀯. 𑀲𑁄 𑀲𑀘𑁂 𑀫𑀬𑁆𑀳𑀁 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀅𑀥𑀺𑀯𑀸𑀲𑁂𑀲𑁆𑀲𑀢𑀺. 𑀲𑀘𑁂 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀺 ‘𑀓𑀺𑀁 𑀢𑁂, 𑀫𑀳𑀸𑀭𑀸𑀚, 𑀏𑀓𑀁 𑀘𑁄𑀭𑀁 𑀆𑀭𑀩𑁆𑀪 𑀕𑀫𑀦𑁂𑀦𑀸’𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀫𑀁 𑀚𑀦𑁄 𑀏𑀯𑀁 𑀲𑀜𑁆𑀚𑀸𑀦𑀺𑀲𑁆𑀲𑀢𑀺 𑁋 ‘𑀭𑀸𑀚𑀸 𑀘𑁄𑀭𑀁 𑀕𑀳𑁂𑀢𑀼𑀁 𑀦𑀺𑀓𑁆𑀔𑀦𑁆𑀢𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀦 𑀦𑀺𑀯𑀢𑁆𑀢𑀺𑀢𑁄’𑀢𑀺’’ 𑀕𑀭𑀳𑀫𑁄𑀓𑁆𑀔𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀕𑀫𑀸𑀲𑀺.

𑀓𑀼𑀢𑁄 𑀧𑀦𑀲𑁆𑀲𑀸𑀢𑀺 𑀓𑀲𑁆𑀫𑀸 𑀆𑀳? 𑀅𑀧𑀺 𑀦𑀸𑀫 𑀪𑀕𑀯𑀸 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀆𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀬𑁆𑀬𑀸𑀢𑀺 𑀪𑀕𑀯𑀢𑁄 𑀧𑀭𑀺𑀕𑀡𑁆𑀳𑀦𑀢𑁆𑀣𑀁 𑀆𑀳. 𑀭𑀜𑁆𑀜𑁄𑀢𑀺 𑀦 𑀓𑁂𑀯𑀮𑀁 𑀭𑀜𑁆𑀜𑁄𑀬𑁂𑀯 𑀪𑀬𑀁 𑀅𑀳𑁄𑀲𑀺, 𑀅𑀯𑀲𑁂𑀲𑁄𑀧𑀺 𑀫𑀳𑀸𑀚𑀦𑁄 𑀪𑀻𑀢𑁄 𑀨𑀮𑀓𑀸𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀯 𑀧𑀮𑀸𑀬𑀺𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀅𑀝𑁆𑀝𑀸𑀮𑀓𑁂 𑀆𑀭𑀼𑀬𑁆𑀳 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀏𑀯𑀜𑁆𑀘 𑀅𑀯𑁄𑀘 𑁋 ‘‘𑀅𑀗𑁆𑀕𑀼𑀮𑀺𑀫𑀸𑀮𑁄 ‘𑀭𑀸𑀚𑀸 𑀫𑀬𑁆𑀳𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀢𑀻’𑀢𑀺 𑀜𑀢𑁆𑀯𑀸 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄, 𑀭𑀸𑀚𑀸 𑀢𑁂𑀦 𑀕𑀳𑀺𑀢𑁄, 𑀫𑀬𑀁 𑀧𑀦 𑀧𑀮𑀸𑀬𑀺𑀢𑁆𑀯𑀸 𑀫𑀼𑀢𑁆𑀢𑀸’’𑀢𑀺. 𑀦𑀢𑁆𑀣𑀺 𑀢𑁂 𑀇𑀢𑁄 𑀪𑀬𑀦𑁆𑀢𑀺 𑀅𑀬𑀜𑁆𑀳𑀺 𑀇𑀤𑀸𑀦𑀺 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀢𑀺, 𑀦𑀢𑁆𑀣𑀺 𑀢𑁂 𑀇𑀫𑀲𑁆𑀲 𑀲𑀦𑁆𑀢𑀺𑀓𑀸 𑀪𑀬𑀦𑁆𑀢𑀺 𑀅𑀢𑁆𑀣𑁄.

𑀓𑀣𑀁 𑀕𑁄𑀢𑁆𑀢𑁄𑀢𑀺? 𑀓𑀲𑁆𑀫𑀸 𑀧𑀼𑀘𑁆𑀙𑀢𑀺? 𑀧𑀩𑁆𑀩𑀚𑀺𑀢𑀁 𑀤𑀸𑀭𑀼𑀡𑀓𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀺𑀢𑀼𑀁 𑀦 𑀬𑀼𑀢𑁆𑀢𑀁, 𑀫𑀸𑀢𑀸𑀧𑀺𑀢𑀽𑀦𑀁 𑀕𑁄𑀢𑁆𑀢𑀯𑀲𑁂𑀦 𑀦𑀁 𑀲𑀫𑀼𑀤𑀸𑀘𑀭𑀺𑀲𑁆𑀲𑀸𑀫𑀻𑀢𑀺 𑀫𑀜𑁆𑀜𑀫𑀸𑀦𑁄 𑀧𑀼𑀘𑁆𑀙𑀺. 𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀏𑀢𑁂𑀲𑀁 𑀅𑀢𑁆𑀣𑀸𑀬 𑀅𑀳𑀁 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀓𑀣𑁂𑀦𑁆𑀢𑁄𑀬𑁂𑀯 𑀘 𑀉𑀤𑀭𑁂 𑀩𑀤𑁆𑀥𑀲𑀸𑀝𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀲𑀺.

𑁩𑁫𑁧. 𑀆𑀭𑀜𑁆𑀜𑀺𑀓𑁄𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀥𑀼𑀢𑀗𑁆𑀕𑀸𑀦𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺. 𑀣𑁂𑀭𑁂𑀦 𑀧𑀦 𑀢𑁂𑀭𑀲𑀧𑀺 𑀲𑀫𑀸𑀤𑀺𑀦𑁆𑀦𑀸𑀦𑁂𑀯 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀅𑀮𑀦𑁆𑀢𑀺 𑀆𑀳. 𑀬𑀜𑁆𑀳𑀺 𑀫𑀬𑀁, 𑀪𑀦𑁆𑀢𑁂𑀢𑀺 𑀓𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺? ‘‘𑀳𑀢𑁆𑀣𑀺𑀫𑁆𑀧𑀺 𑀥𑀸𑀯𑀦𑁆𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀸𑀫𑀻’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀭𑀜𑁆𑀜𑀸 𑀧𑁂𑀲𑀺𑀢𑀳𑀢𑁆𑀣𑀸𑀤𑀬𑁄 𑀲𑁄 𑀏𑀯𑀁 𑀅𑀕𑁆𑀕𑀳𑁂𑀲𑀺. 𑀭𑀸𑀚𑀸𑀧𑀺 𑁋 ‘‘𑀳𑀢𑁆𑀣𑀻𑀳𑀺𑀬𑁂𑀯 𑀦𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀣, 𑀅𑀲𑁆𑀲𑁂𑀳𑁂𑀯, 𑀭𑀣𑁂𑀳𑁂𑀯𑀸’’𑀢𑀺 𑀏𑀯𑀁 𑀅𑀦𑁂𑀓𑀯𑀸𑀭𑀁 𑀩𑀳𑀽 𑀳𑀢𑁆𑀣𑀸𑀤𑀬𑁄 𑀧𑁂𑀲𑁂𑀲𑀺. 𑀏𑀯𑀁 𑀕𑀢𑁂𑀲𑀼 𑀧𑀦 𑀢𑁂𑀲𑀼 𑁋 ‘‘𑀅𑀳𑀁 𑀅𑀭𑁂 𑀅𑀗𑁆𑀕𑀼𑀮𑀺𑀫𑀸𑀮𑁄’’𑀢𑀺 𑀢𑀲𑁆𑀫𑀺𑀁 𑀉𑀝𑁆𑀞𑀸𑀬 𑀲𑀤𑁆𑀤𑀁 𑀓𑀭𑁄𑀦𑁆𑀢𑁂 𑀏𑀓𑁄𑀧𑀺 𑀆𑀯𑀼𑀥𑀁 𑀧𑀭𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀲𑀩𑁆𑀩𑁂𑀯 𑀓𑁄𑀝𑁆𑀝𑁂𑀢𑁆𑀯𑀸 𑀫𑀸𑀭𑁂𑀲𑀺. 𑀳𑀢𑁆𑀣𑀻 𑀅𑀭𑀜𑁆𑀜𑀳𑀢𑁆𑀣𑀻, 𑀅𑀲𑁆𑀲𑀸 𑀅𑀭𑀜𑁆𑀜𑀅𑀲𑁆𑀲𑀸, 𑀭𑀣𑀸𑀧𑀺 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑁆𑀢𑀻𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀭𑀸𑀚𑀸 𑀏𑀯𑀁 𑀯𑀤𑀢𑀺.

𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀻𑀢𑀺 𑀦 𑀇𑀤𑀁 𑀧𑀞𑀫𑀁 𑀧𑀸𑀯𑀺𑀲𑀺. 𑀇𑀢𑁆𑀣𑀺𑀤𑀲𑁆𑀲𑀦𑀤𑀺𑀯𑀲𑀁 𑀲𑀦𑁆𑀥𑀸𑀬 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀤𑁂𑀯𑀲𑀺𑀓𑀫𑁆𑀧𑀺 𑀧𑀦𑁂𑀲 𑀧𑀯𑀺𑀲𑀢𑁂𑀯, 𑀫𑀦𑀼𑀲𑁆𑀲𑀸 𑀘 𑀦𑀁 𑀤𑀺𑀲𑁆𑀯𑀸 𑀉𑀢𑁆𑀢𑀲𑀦𑁆𑀢𑀺𑀧𑀺 𑀧𑀮𑀸𑀬𑀦𑁆𑀢𑀺𑀧𑀺 𑀤𑁆𑀯𑀸𑀭𑀫𑁆𑀧𑀺 𑀣𑀓𑁂𑀦𑁆𑀢𑀺, 𑀏𑀓𑀘𑁆𑀘𑁂 𑀅𑀗𑁆𑀕𑀼𑀮𑀺𑀫𑀸𑀮𑁄𑀢𑀺 𑀲𑀼𑀢𑁆𑀯𑀸𑀯 𑀧𑀮𑀸𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀯𑀸 𑀧𑀯𑀺𑀲𑀦𑁆𑀢𑀺, 𑀖𑀭𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀣𑀓𑁂𑀦𑁆𑀢𑀺. 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀧𑀺𑀝𑁆𑀞𑀺𑀁 𑀤𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀣𑁂𑀭𑁄 𑀉𑀴𑀼𑀗𑁆𑀕𑀬𑀸𑀕𑀼𑀫𑁆𑀧𑀺 𑀓𑀝𑀘𑁆𑀙𑀼𑀪𑀺𑀓𑁆𑀔𑀫𑁆𑀧𑀺 𑀦 𑀮𑀪𑀢𑀺, 𑀧𑀺𑀡𑁆𑀟𑀧𑀸𑀢𑁂𑀦 𑀓𑀺𑀮𑀫𑀢𑀺. 𑀩𑀳𑀺 𑀅𑀮𑀪𑀦𑁆𑀢𑁄 𑀦𑀕𑀭𑀁 𑀲𑀩𑁆𑀩𑀲𑀸𑀥𑀸𑀭𑀡𑀦𑁆𑀢𑀺 𑀦𑀕𑀭𑀁 𑀧𑀯𑀺𑀲𑀢𑀺. 𑀬𑁂𑀦 𑀤𑁆𑀯𑀸𑀭𑁂𑀦 𑀧𑀯𑀺𑀲𑀢𑀺, 𑀢𑀢𑁆𑀣 𑀅𑀗𑁆𑀕𑀼𑀮𑀺𑀫𑀸𑀮𑁄 𑀆𑀕𑀢𑁄𑀢𑀺 𑀓𑀽𑀝𑀲𑀳𑀲𑁆𑀲𑀸𑀦𑀁 𑀪𑀺𑀚𑁆𑀚𑀦𑀓𑀸𑀭𑀡𑀁 𑀳𑁄𑀢𑀺. 𑀏𑀢𑀤𑀳𑁄𑀲𑀻𑀢𑀺 𑀓𑀸𑀭𑀼𑀜𑁆𑀜𑀧𑁆𑀧𑀢𑁆𑀢𑀺𑀬𑀸 𑀅𑀳𑁄𑀲𑀺. 𑀏𑀓𑁂𑀦 𑀊𑀦𑀫𑀦𑀼𑀲𑁆𑀲𑀲𑀳𑀲𑁆𑀲𑀁 𑀖𑀸𑀢𑁂𑀦𑁆𑀢𑀲𑁆𑀲 𑀏𑀓𑀤𑀺𑀯𑀲𑀫𑁆𑀧𑀺 𑀓𑀸𑀭𑀼𑀜𑁆𑀜𑀁 𑀦𑀸𑀳𑁄𑀲𑀺, 𑀕𑀩𑁆𑀪𑀫𑀽𑀴𑁆𑀳𑀸𑀬 𑀇𑀢𑁆𑀣𑀺𑀬𑀸 𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀓𑀣𑀁 𑀉𑀧𑁆𑀧𑀦𑁆𑀦𑀦𑁆𑀢𑀺? 𑀧𑀩𑁆𑀩𑀚𑁆𑀚𑀸𑀩𑀮𑁂𑀦, 𑀧𑀩𑁆𑀩𑀚𑁆𑀚𑀸𑀩𑀮𑀜𑁆𑀳𑀺 𑀏𑀢𑀁.

𑀢𑁂𑀦 𑀳𑀻𑀢𑀺 𑀬𑀲𑁆𑀫𑀸 𑀢𑁂 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸𑀢𑀺, 𑀅𑀗𑁆𑀕𑀼𑀮𑀺𑀫𑀸𑀮, 𑀏𑀢𑀁 𑀢𑁆𑀯𑀁 𑀫𑀸 𑀕𑀡𑁆𑀳𑀺, 𑀦𑁂𑀲𑀸 𑀢𑀯 𑀚𑀸𑀢𑀺. 𑀕𑀺𑀳𑀺𑀓𑀸𑀮𑁄 𑀏𑀲, 𑀕𑀺𑀳𑀻 𑀦𑀸𑀫 𑀧𑀸𑀡𑀫𑁆𑀧𑀺 𑀳𑀦𑀦𑁆𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀺𑀧𑀺 𑀓𑀭𑁄𑀦𑁆𑀢𑀺. 𑀇𑀤𑀸𑀦𑀺 𑀧𑀦 𑀢𑁂 𑀅𑀭𑀺𑀬𑀸 𑀦𑀸𑀫 𑀚𑀸𑀢𑀺. 𑀢𑀲𑁆𑀫𑀸 𑀢𑁆𑀯𑀁 ‘‘𑀬𑀢𑁄 𑀅𑀳𑀁, 𑀪𑀕𑀺𑀦𑀺, 𑀚𑀸𑀢𑁄’’𑀢𑀺 𑀲𑀘𑁂 𑀏𑀯𑀁 𑀯𑀢𑁆𑀢𑀼𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀲𑀺, 𑀢𑁂𑀦 𑀳𑀺 ‘‘𑀅𑀭𑀺𑀬𑀸𑀬 𑀚𑀸𑀢𑀺𑀬𑀸’’𑀢𑀺 𑀏𑀯𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀤𑀸𑀳𑀻𑀢𑀺 𑀉𑀬𑁆𑀬𑁄𑀚𑁂𑀲𑀺.

𑀢𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘𑀸𑀢𑀺 𑀇𑀢𑁆𑀣𑀻𑀦𑀁 𑀕𑀩𑁆𑀪𑀯𑀼𑀝𑁆𑀞𑀸𑀦𑀝𑁆𑀞𑀸𑀦𑀁 𑀦𑀸𑀫 𑀦 𑀲𑀓𑁆𑀓𑀸 𑀧𑀼𑀭𑀺𑀲𑁂𑀦 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀣𑁂𑀭𑁄 𑀓𑀺𑀁 𑀓𑀭𑁄𑀲𑀻𑀢𑀺? 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑁄 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀲𑁄𑀢𑁆𑀣𑀺𑀓𑀭𑀡𑀢𑁆𑀣𑀸𑀬 𑀆𑀕𑀢𑁄𑀢𑀺 𑀆𑀭𑁄𑀘𑀸𑀧𑁂𑀲𑀺. 𑀢𑀢𑁄 𑀢𑁂 𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀣𑁂𑀭𑀲𑁆𑀲 𑀩𑀳𑀺𑀲𑀸𑀡𑀺𑀬𑀁 𑀧𑀻𑀞𑀓𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀣𑁂𑀭𑁄 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑁋 ‘‘𑀬𑀢𑁄 𑀅𑀳𑀁 𑀪𑀕𑀺𑀦𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄’’𑀢𑀺 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺, 𑀲𑀳 𑀲𑀘𑁆𑀘𑀯𑀘𑀦𑁂𑀦𑁂𑀯 𑀥𑀫𑀓𑀭𑀡𑀢𑁄 𑀫𑀼𑀢𑁆𑀢𑀉𑀤𑀓𑀁 𑀯𑀺𑀬 𑀤𑀸𑀭𑀓𑁄 𑀦𑀺𑀓𑁆𑀔𑀫𑀺. 𑀫𑀸𑀢𑀸𑀧𑀼𑀢𑁆𑀢𑀸𑀦𑀁 𑀲𑁄𑀢𑁆𑀣𑀺 𑀅𑀳𑁄𑀲𑀺. 𑀇𑀫𑀜𑁆𑀘 𑀧𑀦 𑀧𑀭𑀺𑀢𑁆𑀢𑀁 𑀦 𑀓𑀺𑀜𑁆𑀘𑀺 𑀧𑀭𑀺𑀲𑁆𑀲𑀬𑀁 𑀦 𑀫𑀤𑁆𑀤𑀢𑀺, 𑀫𑀳𑀸𑀧𑀭𑀺𑀢𑁆𑀢𑀁 𑀦𑀸𑀫𑁂𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀣𑁂𑀭𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀓𑀢𑀝𑁆𑀞𑀸𑀦𑁂 𑀧𑀻𑀞𑀓𑀁 𑀅𑀓𑀁𑀲𑀼. 𑀕𑀩𑁆𑀪𑀫𑀽𑀴𑁆𑀳𑀁 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀫𑁆𑀧𑀺 𑀆𑀦𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀚𑁆𑀚𑀸𑀧𑁂𑀦𑁆𑀢𑀺, 𑀢𑀸𑀯𑀤𑁂𑀯 𑀲𑀼𑀔𑁂𑀦 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀬𑀸 𑀤𑀼𑀩𑁆𑀩𑀮𑀸 𑀳𑁄𑀢𑀺 𑀦 𑀲𑀓𑁆𑀓𑀸 𑀆𑀦𑁂𑀢𑀼𑀁, 𑀢𑀲𑁆𑀲𑀸 𑀧𑀻𑀞𑀓𑀥𑁄𑀯𑀦𑀉𑀤𑀓𑀁 𑀦𑁂𑀢𑁆𑀯𑀸 𑀲𑀻𑀲𑁂 𑀲𑀺𑀜𑁆𑀘𑀦𑁆𑀢𑀺, 𑀢𑀗𑁆𑀔𑀡𑀁𑀬𑁂𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀅𑀜𑁆𑀜𑀫𑁆𑀧𑀺 𑀭𑁄𑀕𑀁 𑀯𑀽𑀧𑀲𑀫𑁂𑀢𑀺. 𑀬𑀸𑀯 𑀓𑀧𑁆𑀧𑀸 𑀢𑀺𑀝𑁆𑀞𑀦𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀺𑀭𑁂𑀢𑀁.

𑀓𑀺𑀁 𑀧𑀦 𑀪𑀕𑀯𑀸 𑀣𑁂𑀭𑀁 𑀯𑁂𑀚𑁆𑀚𑀓𑀫𑁆𑀫𑀁 𑀓𑀸𑀭𑀸𑀧𑁂𑀲𑀻𑀢𑀺? 𑀦 𑀓𑀸𑀭𑀸𑀧𑁂𑀲𑀺. 𑀣𑁂𑀭𑀜𑁆𑀳𑀺 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀪𑀻𑀢𑀸 𑀧𑀮𑀸𑀬𑀦𑁆𑀢𑀺. 𑀣𑁂𑀭𑁄 𑀪𑀺𑀓𑁆𑀔𑀸𑀳𑀸𑀭𑁂𑀦 𑀓𑀺𑀮𑀫𑀢𑀺, 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀲 𑀅𑀦𑀼𑀕𑁆𑀕𑀳𑁂𑀦 𑀲𑀘𑁆𑀘𑀓𑀺𑀭𑀺𑀬𑀁 𑀓𑀸𑀭𑁂𑀲𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀇𑀤𑀸𑀦𑀺 𑀓𑀺𑀭 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑁄 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀸𑀬 𑀫𑀦𑀼𑀲𑁆𑀲𑀸𑀦𑀁 𑀲𑁄𑀢𑁆𑀣𑀺𑀪𑀸𑀯𑀁 𑀓𑀭𑁄𑀢𑀻𑀢𑀺 𑀫𑀦𑀼𑀲𑁆𑀲𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑀢𑁄 𑀪𑀺𑀓𑁆𑀔𑀸𑀳𑀸𑀭𑁂𑀦 𑀅𑀓𑀺𑀮𑀫𑀦𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀅𑀦𑀼𑀕𑁆𑀕𑀳𑁂𑀦 𑀲𑀘𑁆𑀘𑀓𑀺𑀭𑀺𑀬𑀁 𑀓𑀸𑀭𑁂𑀲𑀺. 𑀦 𑀳𑀺 𑀲𑀘𑁆𑀘𑀓𑀺𑀭𑀺𑀬𑀸 𑀯𑁂𑀚𑁆𑀚𑀓𑀫𑁆𑀫𑀁 𑀳𑁄𑀢𑀺. 𑀣𑁂𑀭𑀲𑁆𑀲𑀸𑀧𑀺 𑀘 ‘‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀘𑀺𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀦 𑀕𑀘𑁆𑀙𑀢𑀺, 𑀅𑀝𑀯𑀺𑀬𑀁 𑀞𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀖𑀸𑀢𑀺𑀢𑀝𑁆𑀞𑀸𑀦𑀫𑁂𑀯 𑀧𑀸𑀓𑀝𑀁 𑀳𑁄𑀢𑀺. ‘‘𑀤𑀼𑀕𑁆𑀕𑀢𑁄𑀫𑁆𑀳𑀺, 𑀔𑀼𑀤𑁆𑀤𑀓𑀧𑀼𑀢𑁆𑀢𑁄𑀫𑁆𑀳𑀺, 𑀚𑀻𑀯𑀺𑀢𑀁 𑀫𑁂 𑀤𑁂𑀳𑀺 𑀲𑀸𑀫𑀻𑀢𑀺 𑀫𑀭𑀡𑀪𑀻𑀢𑀸𑀦𑀁 𑀯𑀘𑀦𑀸𑀓𑀸𑀭𑁄 𑀘 𑀳𑀢𑁆𑀣𑀧𑀸𑀤𑀯𑀺𑀓𑀸𑀭𑁄 𑀘 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀲𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀢𑀢𑁄𑀯 𑀉𑀝𑁆𑀞𑀸𑀬 𑀕𑀘𑁆𑀙𑀢𑀺, 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀚𑀸𑀢𑀺𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸𑀯𑀸𑀬𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻𑀢𑀺 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀸𑀭𑁂𑀲𑀺. 𑀏𑀓𑁄 𑀯𑀽𑀧𑀓𑀝𑁆𑀞𑁄𑀢𑀺𑀆𑀤𑀺 𑀯𑀢𑁆𑀣𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁮𑁦) 𑀯𑀺𑀢𑁆𑀣𑀸𑀭𑀺𑀢𑀁.

𑁩𑁫𑁨. 𑀅𑀜𑁆𑀜𑁂𑀦𑀧𑀺 𑀮𑁂𑀟𑁆𑀟𑀼 𑀔𑀺𑀢𑁆𑀢𑁄𑀢𑀺 𑀓𑀸𑀓𑀲𑀼𑀦𑀔𑀲𑀽𑀓𑀭𑀸𑀤𑀻𑀦𑀁 𑀧𑀝𑀺𑀓𑁆𑀓𑀫𑀸𑀧𑀦𑀢𑁆𑀣𑀸𑀬 𑀲𑀫𑀦𑁆𑀢𑀸 𑀲𑀭𑀓𑁆𑀔𑁂𑀧𑀫𑀢𑁆𑀢𑁂 𑀞𑀸𑀦𑁂 𑀬𑁂𑀦 𑀓𑁂𑀦𑀘𑀺 𑀤𑀺𑀲𑀸𑀪𑀸𑀕𑁂𑀦 𑀔𑀺𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲𑁂𑀯 𑀓𑀸𑀬𑁂 𑀧𑀢𑀢𑀺. 𑀓𑀺𑀢𑁆𑀢𑀓𑁂 𑀞𑀸𑀦𑁂 𑀏𑀯𑀁 𑀳𑁄𑀢𑀺? 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀬𑀸𑀯 𑀕𑀡𑁆𑀞𑀺𑀓𑀧𑀝𑀺𑀫𑀼𑀓𑁆𑀓𑀝𑁆𑀞𑀸𑀦𑀁 𑀆𑀕𑀘𑁆𑀙𑀢𑀺, 𑀢𑀸𑀯 𑀳𑁄𑀢𑀺. 𑀪𑀺𑀦𑁆𑀦𑁂𑀦 𑀲𑀻𑀲𑁂𑀦𑀸𑀢𑀺 𑀫𑀳𑀸𑀘𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀬𑀸𑀯 𑀅𑀝𑁆𑀞𑀺𑀫𑀭𑀺𑀬𑀸𑀤𑀸 𑀪𑀺𑀦𑁆𑀦𑁂𑀦.

𑀩𑁆𑀭𑀸𑀳𑁆𑀫𑀡𑀸𑀢𑀺 𑀔𑀻𑀡𑀸𑀲𑀯𑀪𑀸𑀯𑀁 𑀲𑀦𑁆𑀥𑀸𑀬 𑀆𑀳. 𑀬𑀲𑁆𑀲 𑀔𑁄 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦𑀸𑀢𑀺 𑀇𑀤𑀁 𑀲𑀪𑀸𑀕𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀫𑁆𑀫𑀜𑁆𑀳𑀺 𑀓𑀭𑀺𑀬𑀫𑀸𑀦𑀫𑁂𑀯 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀧𑀽𑀭𑁂𑀢𑀺. 𑀲𑀢𑁆𑀢𑀲𑀼 𑀘𑀺𑀢𑁆𑀢𑁂𑀲𑀼 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸 𑀧𑀞𑀫𑀚𑀯𑀦𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀢𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀁 𑀅𑀳𑁄𑀲𑀺𑀓𑀫𑁆𑀫𑀁, 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀦 𑀪𑀯𑀺𑀲𑁆𑀲𑀢𑀺 𑀓𑀫𑁆𑀫𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀇𑀫𑀲𑁆𑀲 𑀢𑀺𑀓𑀲𑁆𑀲 𑀯𑀲𑁂𑀦 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀅𑀢𑁆𑀣𑀲𑀸𑀥𑀺𑀓𑀸 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀢𑀁 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀉𑀪𑀺𑀦𑁆𑀦𑀫𑀦𑁆𑀢𑀭𑁂 𑀧𑀜𑁆𑀘𑀚𑀯𑀦𑀘𑁂𑀢𑀦𑀸 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀢𑀁 𑀅𑀦𑀸𑀕𑀢𑁂 𑀬𑀤𑀸 𑀑𑀓𑀸𑀲𑀁 𑀮𑀪𑀢𑀺, 𑀢𑀤𑀸 𑀯𑀺𑀧𑀸𑀓𑀁 𑀤𑁂𑀢𑀺. 𑀲𑀢𑀺 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀅𑀳𑁄𑀲𑀺𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺. 𑀣𑁂𑀭𑀲𑁆𑀲 𑀧𑀦 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀜𑁆𑀘 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀜𑁆𑀘𑀸𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀓𑀫𑁆𑀫𑀸𑀦𑀺 𑀓𑀫𑁆𑀫𑀓𑁆𑀔𑀬𑀓𑀭𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀝𑀺𑀢𑀸𑀦𑀺, 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀅𑀢𑁆𑀣𑀺. 𑀢𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲𑀸𑀧𑀺 𑀯𑀺𑀧𑀸𑀓𑀁 𑀤𑁂𑀢𑀺𑀬𑁂𑀯. 𑀢𑀁 𑀲𑀦𑁆𑀥𑀸𑀬 𑀪𑀕𑀯𑀸 ‘‘𑀬𑀲𑁆𑀲 𑀔𑁄 𑀢𑁆𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀫𑀸 𑀬𑀲𑁆𑀲 𑀔𑁄𑀢𑀺 𑀏𑀢𑁆𑀣 𑀬𑀸𑀤𑀺𑀲𑀲𑁆𑀲 𑀔𑁄 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦𑀸𑀢𑀺 𑀏𑀯𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀩𑁆𑀪𑀸 𑀫𑀼𑀢𑁆𑀢𑁄𑀢𑀺 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀫𑁂𑀢𑀁, 𑀅𑀩𑁆𑀪𑀸 𑀫𑀳𑀺𑀓𑀸 𑀥𑀽𑀫𑁄 𑀭𑀚𑁄 𑀭𑀸𑀳𑀽𑀢𑀺 𑀇𑀫𑁂𑀳𑀺 𑀧𑀦 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀫𑀼𑀢𑁆𑀢𑁄 𑀘𑀦𑁆𑀤𑀺𑀫𑀸 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀬𑀣𑀸 𑀳𑀺 𑀏𑀯𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑁄 𑀘𑀦𑁆𑀤𑀺𑀫𑀸 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀏𑀯𑀁 𑀧𑀫𑀸𑀤𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑁄 𑀅𑀧𑁆𑀧𑀫𑀢𑁆𑀢𑁄 𑀪𑀺𑀓𑁆𑀔𑀼 𑀇𑀫𑀁 𑀅𑀢𑁆𑀢𑀦𑁄 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀯𑀺𑀳𑀢𑀓𑀺𑀮𑁂𑀲𑀦𑁆𑀥𑀓𑀸𑀭𑀁 𑀓𑀭𑁄𑀢𑀺.

𑀓𑀼𑀲𑀮𑁂𑀦 𑀧𑀺𑀥𑀻𑀬𑀢𑀻𑀢𑀺 𑀫𑀕𑁆𑀕𑀓𑀼𑀲𑀮𑁂𑀦 𑀧𑀺𑀥𑀻𑀬𑀢𑀺 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀓𑀭𑀻𑀬𑀢𑀺. 𑀬𑀼𑀜𑁆𑀚𑀢𑀺 𑀩𑀼𑀤𑁆𑀥𑀲𑀸𑀲𑀦𑁂𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀘 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀇𑀫𑀸 𑀢𑀺𑀲𑁆𑀲𑁄 𑀣𑁂𑀭𑀲𑁆𑀲 𑀉𑀤𑀸𑀦𑀕𑀸𑀣𑀸 𑀦𑀸𑀫.

𑀤𑀺𑀲𑀸 𑀳𑀺 𑀫𑁂𑀢𑀺 𑀇𑀤𑀁 𑀓𑀺𑀭 𑀣𑁂𑀭𑁄 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀸𑀡𑀸𑀓𑀸𑀭𑀁 𑀓𑀭𑁄𑀦𑁆𑀢𑁄 𑀆𑀳. 𑀢𑀢𑁆𑀣 𑀤𑀺𑀲𑀸 𑀳𑀺 𑀫𑁂𑀢𑀺 𑀫𑀫 𑀲𑀧𑀢𑁆𑀢𑀸. 𑀬𑁂 𑀫𑀁 𑀏𑀯𑀁 𑀉𑀧𑀯𑀤𑀦𑁆𑀢𑀺 𑁋 ‘‘𑀬𑀣𑀸 𑀫𑀬𑀁 𑀅𑀗𑁆𑀕𑀼𑀮𑀺𑀫𑀸𑀮𑁂𑀦 𑀫𑀸𑀭𑀺𑀢𑀸𑀦𑀁 𑀜𑀸𑀢𑀓𑀸𑀦𑀁 𑀯𑀲𑁂𑀦 𑀤𑀼𑀓𑁆𑀔𑀁 𑀯𑁂𑀤𑀺𑀬𑀸𑀫, 𑀏𑀯𑀁 𑀅𑀗𑁆𑀕𑀼𑀮𑀺𑀫𑀸𑀮𑁄𑀧𑀺 𑀯𑁂𑀤𑀺𑀬𑀢𑀽’’𑀢𑀺, 𑀢𑁂 𑀫𑀬𑁆𑀳𑀁 𑀤𑀺𑀲𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀬𑀼𑀜𑁆𑀚𑀦𑁆𑀢𑀽𑀢𑀺 𑀓𑀸𑀬𑀯𑀸𑀘𑀸𑀫𑀦𑁂𑀳𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀼. 𑀬𑁂 𑀥𑀫𑁆𑀫𑀫𑁂𑀯𑀸𑀤𑀧𑀬𑀦𑁆𑀢𑀺 𑀲𑀦𑁆𑀢𑁄𑀢𑀺 𑀬𑁂 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀥𑀫𑁆𑀫𑀁𑀬𑁂𑀯 𑀆𑀤𑀧𑁂𑀦𑁆𑀢𑀺 𑀲𑀫𑀸𑀤𑀧𑁂𑀦𑁆𑀢𑀺 𑀕𑀡𑁆𑀳𑀸𑀧𑁂𑀦𑁆𑀢𑀺, 𑀢𑁂 𑀫𑀦𑀼𑀚𑀸 𑀫𑀬𑁆𑀳𑀁 𑀲𑀧𑀢𑁆𑀢𑀸 𑀪𑀚𑀦𑁆𑀢𑀼 𑀲𑁂𑀯𑀦𑁆𑀢𑀼 𑀧𑀬𑀺𑀭𑀼𑀧𑀸𑀲𑀦𑁆𑀢𑀽𑀢𑀺 𑀅𑀢𑁆𑀣𑁄.

𑀅𑀯𑀺𑀭𑁄𑀥𑀧𑁆𑀧𑀲𑀁𑀲𑀻𑀦𑀦𑁆𑀢𑀺 𑀅𑀯𑀺𑀭𑁄𑀥𑁄 𑀯𑀼𑀘𑁆𑀘𑀢𑀺 𑀫𑁂𑀢𑁆𑀢𑀸, 𑀫𑁂𑀢𑁆𑀢𑀸𑀧𑀲𑀁𑀲𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀓𑀸𑀮𑁂𑀦𑀸𑀢𑀺 𑀔𑀡𑁂 𑀔𑀡𑁂 𑀔𑀦𑁆𑀢𑀺𑀫𑁂𑀢𑁆𑀢𑀸𑀧𑀝𑀺𑀲𑀗𑁆𑀔𑀸𑀲𑀸𑀭𑀡𑀻𑀬𑀥𑀫𑁆𑀫𑀁 𑀲𑀼𑀡𑀦𑁆𑀢𑀼. 𑀢𑀜𑁆𑀘 𑀅𑀦𑀼𑀯𑀺𑀥𑀻𑀬𑀦𑁆𑀢𑀽𑀢𑀺 𑀢𑀜𑁆𑀘 𑀥𑀫𑁆𑀫𑀁 𑀅𑀦𑀼𑀓𑀭𑁄𑀦𑁆𑀢𑀼 𑀧𑀽𑀭𑁂𑀦𑁆𑀢𑀼.

𑀦 𑀳𑀺 𑀚𑀸𑀢𑀼 𑀲𑁄 𑀫𑀫𑀁 𑀳𑀺𑀁𑀲𑁂𑀢𑀺 𑀬𑁄 𑀫𑀬𑁆𑀳𑀁 𑀤𑀺𑀲𑁄, 𑀲𑁄 𑀫𑀁 𑀏𑀓𑀁𑀲𑁂𑀦𑁂𑀯 𑀦 𑀳𑀺𑀁𑀲𑁂𑀬𑁆𑀬. 𑀅𑀜𑁆𑀜𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀦𑀦𑁆𑀢𑀺 𑀦 𑀓𑁂𑀯𑀮𑀁 𑀫𑀁, 𑀅𑀜𑁆𑀜𑀫𑁆𑀧𑀺 𑀧𑀦 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀫𑀸 𑀳𑀺𑀁𑀲𑀦𑁆𑀢𑀼 𑀫𑀸 𑀯𑀺𑀳𑁂𑀞𑁂𑀦𑁆𑀢𑀼. 𑀧𑀧𑁆𑀧𑀼𑀬𑁆𑀬 𑀧𑀭𑀫𑀁 𑀲𑀦𑁆𑀢𑀺𑀦𑁆𑀢𑀺 𑀧𑀭𑀫𑀁 𑀲𑀦𑁆𑀢𑀺𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀢𑁆𑀯𑀸. 𑀭𑀓𑁆𑀔𑁂𑀬𑁆𑀬 𑀢𑀲𑀣𑀸𑀯𑀭𑁂𑀢𑀺 𑀢𑀲𑀸 𑀯𑀼𑀘𑁆𑀘𑀦𑁆𑀢𑀺 𑀲𑀢𑀡𑁆𑀳𑀸, 𑀣𑀸𑀯𑀭𑀸 𑀦𑀺𑀢𑁆𑀢𑀡𑁆𑀳𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀲𑀩𑁆𑀩𑀁 𑀢𑀲𑀣𑀸𑀯𑀭𑀁 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀢𑀲𑁆𑀫𑀸 𑀫𑀬𑁆𑀳𑀫𑁆𑀧𑀺 𑀤𑀺𑀲𑀸 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀦𑁆𑀢𑀼, 𑀏𑀯𑀁 𑀫𑀁 𑀏𑀓𑀁𑀲𑁂𑀦𑁂𑀯 𑀦 𑀳𑀺𑀁𑀲𑀺𑀲𑁆𑀲𑀦𑁆𑀢𑀻𑀢𑀺. 𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀁 𑀓𑀸𑀢𑀼𑀁 𑀆𑀳.

𑀇𑀤𑀸𑀦𑀺 𑀅𑀢𑁆𑀢𑀦𑁄𑀯 𑀧𑀝𑀺𑀧𑀢𑁆𑀢𑀺𑀁 𑀤𑀻𑀧𑁂𑀦𑁆𑀢𑁄 𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀺 𑀦𑁂𑀢𑁆𑀢𑀺𑀓𑀸𑀢𑀺 𑀆𑀳. 𑀢𑀢𑁆𑀣 𑀦𑁂𑀢𑁆𑀢𑀺𑀓𑀸𑀢𑀺 𑀬𑁂 𑀫𑀸𑀢𑀺𑀓𑀁 𑀲𑁄𑀥𑁂𑀢𑁆𑀯𑀸 𑀩𑀦𑁆𑀥𑀺𑀢𑀩𑁆𑀩𑀝𑁆𑀞𑀸𑀦𑁂 𑀩𑀦𑁆𑀥𑀺𑀢𑁆𑀯𑀸 𑀉𑀤𑀓𑀁 𑀦𑀬𑀦𑁆𑀢𑀺. 𑀉𑀲𑀼𑀓𑀸𑀭𑀸𑀢𑀺 𑀉𑀲𑀼𑀓𑀸𑀭𑀓𑀸. 𑀦𑀫𑀬𑀦𑁆𑀢𑀻𑀢𑀺 𑀢𑁂𑀮𑀓𑀜𑁆𑀚𑀺𑀓𑁂𑀦 𑀫𑀓𑁆𑀔𑁂𑀢𑁆𑀯𑀸 𑀓𑀼𑀓𑁆𑀓𑀼𑀴𑁂 𑀢𑀸𑀧𑁂𑀢𑁆𑀯𑀸 𑀉𑀦𑁆𑀦𑀢𑀼𑀦𑁆𑀦𑀢𑀝𑁆𑀞𑀸𑀦𑁂 𑀦𑀫𑁂𑀦𑁆𑀢𑀸 𑀉𑀚𑀼𑀁 𑀓𑀭𑁄𑀦𑁆𑀢𑀺. 𑀢𑁂𑀚𑀦𑀦𑁆𑀢𑀺 𑀓𑀡𑁆𑀟𑀁. 𑀢𑀜𑁆𑀳𑀺 𑀇𑀲𑁆𑀲𑀸𑀲𑁄 𑀢𑁂𑀚𑀁 𑀓𑀭𑁄𑀢𑀺, 𑀧𑀭𑀜𑁆𑀘 𑀢𑀚𑁆𑀚𑁂𑀢𑀺, 𑀢𑀲𑁆𑀫𑀸 𑀢𑁂𑀚𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀢𑀸𑀦𑀁 𑀤𑀫𑀬𑀦𑁆𑀢𑀻𑀢𑀺 𑀬𑀣𑀸 𑀦𑁂𑀢𑁆𑀢𑀺𑀓𑀸 𑀉𑀚𑀼𑀫𑀕𑁆𑀕𑁂𑀦 𑀉𑀤𑀓𑀁 𑀦𑀬𑀦𑁆𑀢𑀺, 𑀉𑀲𑀼𑀓𑀸𑀭𑀸 𑀢𑁂𑀚𑀦𑀁, 𑀢𑀘𑁆𑀙𑀓𑀸 𑀘 𑀤𑀸𑀭𑀼𑀁 𑀉𑀚𑀼𑀁 𑀓𑀭𑁄𑀦𑁆𑀢𑀺, 𑀏𑀯𑀫𑁂𑀯𑀁 𑀧𑀡𑁆𑀟𑀺𑀢𑀸 𑀅𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑀺 𑀉𑀚𑀼𑀓𑀁 𑀓𑀭𑁄𑀦𑁆𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀭𑁄𑀦𑁆𑀢𑀺.

𑀢𑀸𑀤𑀺𑀦𑀸𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀻𑀲𑀼 𑀦𑀺𑀩𑁆𑀩𑀺𑀓𑀸𑀭𑁂𑀦 𑁋 ‘‘𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀪𑀕𑀯𑀸 𑀢𑀸𑀤𑀻, 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻, 𑀯𑀦𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻, 𑀢𑀦𑁆𑀦𑀺𑀤𑁆𑀤𑁂𑀲𑀸𑀢𑀺 𑀢𑀸𑀤𑀻’’𑀢𑀺 (𑀫𑀳𑀸𑀦𑀺. 𑁩𑁮; 𑁧𑁯𑁨) 𑀏𑀯𑀁 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑁂𑀦 𑀲𑀢𑁆𑀣𑀸𑀭𑀸. 𑀪𑀯𑀦𑁂𑀢𑁆𑀢𑀻𑀢𑀺 𑀪𑀯𑀭𑀚𑁆𑀚𑀼, 𑀢𑀡𑁆𑀳𑀸𑀬𑁂𑀢𑀁 𑀦𑀸𑀫𑀁. 𑀢𑀸𑀬 𑀳𑀺 𑀕𑁄𑀡𑀸 𑀯𑀺𑀬 𑀕𑀻𑀯𑀸𑀬 𑀭𑀚𑁆𑀚𑀼𑀬𑀸, 𑀲𑀢𑁆𑀢𑀸 𑀳𑀤𑀬𑁂 𑀩𑀤𑁆𑀥𑀸 𑀢𑀁 𑀢𑀁 𑀪𑀯𑀁 𑀦𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀪𑀯𑀦𑁂𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀨𑀼𑀝𑁆𑀞𑁄 𑀓𑀫𑁆𑀫𑀯𑀺𑀧𑀸𑀓𑁂𑀦𑀸𑀢𑀺 𑀫𑀕𑁆𑀕𑀘𑁂𑀢𑀦𑀸𑀬 𑀨𑀼𑀝𑁆𑀞𑁄. 𑀬𑀲𑁆𑀫𑀸 𑀳𑀺 𑀫𑀕𑁆𑀕𑀘𑁂𑀢𑀦𑀸𑀬 𑀓𑀫𑁆𑀫𑀁 𑀧𑀘𑁆𑀘𑀢𑀺 𑀯𑀺𑀧𑀘𑁆𑀘𑀢𑀺 𑀟𑀬𑁆𑀳𑀢𑀺, 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀸 𑀓𑀫𑁆𑀫𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑀸. 𑀢𑀸𑀬 𑀳𑀺 𑀨𑀼𑀝𑁆𑀞𑀢𑁆𑀢𑀸 𑀏𑀲 𑀅𑀡𑀡𑁄 𑀦𑀺𑀓𑁆𑀓𑀺𑀮𑁂𑀲𑁄 𑀚𑀸𑀢𑁄, 𑀦 𑀤𑀼𑀓𑁆𑀔𑀯𑁂𑀤𑀦𑀸𑀬 𑀅𑀡𑀡𑁄. 𑀪𑀼𑀜𑁆𑀚𑀸𑀫𑀻𑀢𑀺 𑀘𑁂𑀢𑁆𑀣 𑀣𑁂𑀬𑁆𑀬𑀧𑀭𑀺𑀪𑁄𑀕𑁄 𑀇𑀡𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄 𑀲𑀸𑀫𑀺𑀧𑀭𑀺𑀪𑁄𑀕𑁄𑀢𑀺 𑀘𑀢𑁆𑀢𑀸𑀭𑁄 𑀧𑀭𑀺𑀪𑁄𑀕𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀤𑀼𑀲𑁆𑀲𑀻𑀮𑀲𑁆𑀲 𑀧𑀭𑀺𑀪𑁄𑀕𑁄 𑀣𑁂𑀬𑁆𑀬𑀧𑀭𑀺𑀪𑁄𑀕𑁄 𑀦𑀸𑀫. 𑀲𑁄 𑀳𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀣𑁂𑀦𑁂𑀢𑁆𑀯𑀸 𑀪𑀼𑀜𑁆𑀚𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀣𑁂𑀬𑁆𑀬𑀸𑀬 𑀯𑁄, 𑀪𑀺𑀓𑁆𑀔𑀯𑁂, 𑀭𑀝𑁆𑀞𑀧𑀺𑀡𑁆𑀟𑁄 𑀪𑀼𑀢𑁆𑀢𑁄’’𑀢𑀺 (𑀧𑀸𑀭𑀸. 𑁧𑁯𑁫). 𑀲𑀻𑀮𑀯𑀢𑁄 𑀧𑀦 𑀅𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀪𑁄𑀕𑁄 𑀇𑀡𑀧𑀭𑀺𑀪𑁄𑀕𑁄 𑀦𑀸𑀫. 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄 𑀦𑀸𑀫. 𑀔𑀻𑀡𑀸𑀲𑀯𑀲𑁆𑀲 𑀧𑀭𑀺𑀪𑁄𑀕𑁄 𑀲𑀸𑀫𑀺𑀧𑀭𑀺𑀪𑁄𑀕𑁄 𑀦𑀸𑀫. 𑀇𑀥 𑀓𑀺𑀮𑁂𑀲𑀇𑀡𑀸𑀦𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀅𑀡𑀡𑁄’’𑀢𑀺 𑀯𑀼𑀢𑁆𑀢𑀁. ‘‘𑀅𑀦𑀺𑀡𑁄’’𑀢𑀺𑀧𑀺 𑀧𑀸𑀞𑁄. 𑀲𑀸𑀫𑀺𑀧𑀭𑀺𑀪𑁄𑀕𑀁 𑀲𑀦𑁆𑀥𑀸𑀬 ‘‘𑀪𑀼𑀜𑁆𑀚𑀸𑀫𑀺 𑀪𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀓𑀸𑀫𑀭𑀢𑀺𑀲𑀦𑁆𑀣𑀯𑀦𑁆𑀢𑀺 𑀤𑀼𑀯𑀺𑀥𑁂𑀲𑀼𑀧𑀺 𑀓𑀸𑀫𑁂𑀲𑀼 𑀢𑀡𑁆𑀳𑀸𑀭𑀢𑀺𑀲𑀦𑁆𑀣𑀯𑀁 𑀫𑀸 𑀅𑀦𑀼𑀬𑀼𑀜𑁆𑀚𑀣 𑀫𑀸 𑀓𑀭𑀺𑀢𑁆𑀣. 𑀦𑀬𑀺𑀤𑀁 𑀤𑀼𑀫𑁆𑀫𑀦𑁆𑀢𑀺𑀢𑀁 𑀫𑀫𑀸𑀢𑀺 𑀬𑀁 𑀫𑀬𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀫𑀦𑁆𑀢𑀺𑀢𑀁, 𑀢𑀁 𑀫𑀫 𑀫𑀦𑁆𑀢𑀺𑀢𑀁 𑀦 𑀤𑀼𑀫𑁆𑀫𑀦𑁆𑀢𑀺𑀢𑀁. 𑀲𑀁𑀯𑀺𑀪𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀳𑀁 𑀲𑀢𑁆𑀣𑀸𑀢𑀺 𑀏𑀯𑀁 𑀮𑁄𑀓𑁂 𑀉𑀧𑁆𑀧𑀦𑁆𑀦𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀁𑀯𑀺𑀪𑀢𑁆𑀢𑀸, 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑀁 𑀲𑁂𑀝𑁆𑀞𑀁 𑀦𑀺𑀩𑁆𑀩𑀸𑀦𑀁, 𑀢𑀤𑁂𑀯 𑀅𑀳𑀁 𑀉𑀧𑀕𑀫𑀁 𑀉𑀧𑀕𑀢𑁄 𑀲𑀫𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀫𑀬𑁆𑀳𑀁 𑀇𑀤𑀁 𑀆𑀕𑀫𑀦𑀁 𑀲𑁆𑀯𑀸𑀕𑀢𑀁 𑀦𑀸𑀫 𑀕𑀢𑀦𑁆𑀢𑀺. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀺𑀩𑁆𑀩𑀘𑀓𑁆𑀔𑀼𑀆𑀲𑀯𑀓𑁆𑀔𑀬𑀧𑀜𑁆𑀜𑀸. 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀦𑁆𑀢𑀺 𑀬𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀫𑀬𑀸 𑀓𑀢𑀁. 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀦𑀯𑀳𑀺 𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺 𑀤𑁂𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀗𑁆𑀕𑀼𑀮𑀺𑀫𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.