𑁫. 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀁. 𑀢𑀢𑁆𑀣 𑀓𑁄𑀓𑀦𑀤𑁄𑀢𑀺 𑀓𑁄𑀓𑀦𑀤𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀁. 𑀲𑁄 𑀘 𑀫𑀗𑁆𑀕𑀮𑀧𑀸𑀲𑀸𑀤𑁄 𑀑𑀮𑁄𑀓𑀦𑀓𑀧𑀤𑀼𑀫𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄, 𑀢𑀲𑁆𑀫𑀸 𑀓𑁄𑀓𑀦𑀤𑁄𑀢𑀺 𑀲𑀗𑁆𑀔𑀁 𑀮𑀪𑀺.

𑁩𑁨𑁫. 𑀬𑀸𑀯 𑀧𑀘𑁆𑀙𑀺𑀫𑀲𑁄𑀧𑀸𑀦𑀓𑀴𑁂𑀯𑀭𑀸𑀢𑀺 𑀏𑀢𑁆𑀣 𑀧𑀘𑁆𑀙𑀺𑀫𑀲𑁄𑀧𑀸𑀦𑀓𑀴𑁂𑀯𑀭𑀦𑁆𑀢𑀺 𑀧𑀞𑀫𑀁 𑀲𑁄𑀧𑀸𑀦𑀨𑀮𑀓𑀁 𑀯𑀼𑀢𑁆𑀢𑀁. 𑀅𑀤𑁆𑀤𑀲𑀸 𑀔𑁄𑀢𑀺 𑀑𑀮𑁄𑀓𑀦𑀢𑁆𑀣𑀁𑀬𑁂𑀯 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑁄 𑀅𑀤𑁆𑀤𑀲. 𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 ‘‘𑀓𑀺𑀲𑁆𑀲 𑀦𑀼 𑀔𑁄 𑀅𑀢𑁆𑀣𑀸𑀬 𑀭𑀸𑀚𑀓𑀼𑀫𑀸𑀭𑁂𑀦 𑀅𑀬𑀁 𑀫𑀳𑀸𑀲𑀓𑁆𑀓𑀸𑀭𑁄 𑀓𑀢𑁄’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀧𑀼𑀢𑁆𑀢𑀧𑀢𑁆𑀣𑀦𑀸𑀬 𑀓𑀢𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀲𑁄 𑀳𑀺 𑀭𑀸𑀚𑀓𑀼𑀫𑀸𑀭𑁄 𑀅𑀧𑀼𑀢𑁆𑀢𑀓𑁄, 𑀲𑀼𑀢𑀜𑁆𑀘𑀸𑀦𑁂𑀦 𑀅𑀳𑁄𑀲𑀺 𑁋 ‘‘𑀩𑀼𑀤𑁆𑀥𑀸𑀦𑀁 𑀓𑀺𑀭 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀫𑀦𑀲𑀸 𑀇𑀘𑁆𑀙𑀺𑀢𑀁 𑀮𑀪𑀦𑁆𑀢𑀻’’𑀢𑀺. 𑀲𑁄 𑁋 ‘‘𑀲𑀘𑀸𑀳𑀁 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀫 𑀘𑁂𑀮𑀧𑁆𑀧𑀝𑀺𑀓𑀁 𑀅𑀓𑁆𑀓𑀫𑀺𑀲𑁆𑀲𑀢𑀺. 𑀦𑁄 𑀘𑁂 𑀮𑀪𑀺𑀲𑁆𑀲𑀸𑀫𑀺, 𑀦 𑀅𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀲𑀦𑁆𑀣𑀭𑀸𑀧𑁂𑀲𑀺. 𑀅𑀣 𑀪𑀕𑀯𑀸 ‘‘𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀦𑀼 𑀔𑁄 𑀏𑀢𑀲𑁆𑀲 𑀧𑀼𑀢𑁆𑀢𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀦 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲.

𑀧𑀼𑀩𑁆𑀩𑁂 𑀓𑀺𑀭 𑀲𑁄 𑀏𑀓𑀲𑁆𑀫𑀺𑀁 𑀤𑀻𑀧𑁂 𑀯𑀲𑀫𑀸𑀦𑁄 𑀲𑀫𑀘𑁆𑀙𑀦𑁆𑀤𑁂𑀦 𑀲𑀓𑀼𑀡𑀧𑁄𑀢𑀓𑁂 𑀔𑀸𑀤𑀺. 𑀲𑀘𑀲𑁆𑀲 𑀫𑀸𑀢𑀼𑀕𑀸𑀫𑁄 𑀅𑀜𑁆𑀜𑁄𑀯 𑀪𑀯𑁂𑀬𑁆𑀬, 𑀧𑀼𑀢𑁆𑀢𑀁 𑀮𑀪𑁂𑀬𑁆𑀬. 𑀉𑀪𑁄𑀳𑀺 𑀧𑀦 𑀲𑀫𑀸𑀦𑀘𑁆𑀙𑀦𑁆𑀤𑁂𑀳𑀺 𑀳𑀼𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀢𑁂𑀦𑀲𑁆𑀲 𑀧𑀼𑀢𑁆𑀢𑁄 𑀦 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻𑀢𑀺 𑀅𑀜𑁆𑀜𑀸𑀲𑀺. 𑀤𑀼𑀲𑁆𑀲𑁂 𑀧𑀦 𑀅𑀓𑁆𑀓𑀦𑁆𑀢𑁂 𑁋 ‘‘𑀩𑀼𑀤𑁆𑀥𑀸𑀦𑀁 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀢𑁆𑀣𑀺𑀢𑀧𑀢𑁆𑀣𑀺𑀢𑀁 𑀮𑀪𑀦𑁆𑀢𑀻𑀢𑀺 𑀮𑁄𑀓𑁂 𑀅𑀦𑀼𑀲𑁆𑀲𑀯𑁄, 𑀫𑀬𑀸 𑀘 𑀫𑀳𑀸𑀅𑀪𑀺𑀦𑀻𑀳𑀸𑀭𑁄 𑀓𑀢𑁄, 𑀦 𑀘 𑀧𑀼𑀢𑁆𑀢𑀁 𑀮𑀪𑀸𑀫𑀺, 𑀢𑀼𑀘𑁆𑀙𑀁 𑀇𑀤𑀁 𑀯𑀘𑀦’’𑀦𑁆𑀢𑀺 𑀫𑀺𑀘𑁆𑀙𑀸𑀕𑀳𑀡𑀁 𑀕𑀡𑁆𑀳𑁂𑀬𑁆𑀬. 𑀢𑀺𑀢𑁆𑀣𑀺𑀬𑀸𑀧𑀺 𑁋 ‘‘𑀦𑀢𑁆𑀣𑀺 𑀲𑀫𑀡𑀸𑀦𑀁 𑀅𑀓𑀢𑁆𑀢𑀩𑁆𑀩𑀁 𑀦𑀸𑀫, 𑀘𑁂𑀮𑀧𑁆𑀧𑀝𑀺𑀓𑀁 𑀫𑀤𑁆𑀤𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀻’’𑀢𑀺 𑀉𑀚𑁆𑀛𑀸𑀬𑁂𑀬𑁆𑀬𑀼𑀁. 𑀏𑀢𑀭𑀳𑀺 𑀘 𑀅𑀓𑁆𑀓𑀫𑀦𑁆𑀢𑁂𑀲𑀼 𑀩𑀳𑀽 𑀪𑀺𑀓𑁆𑀔𑀽 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑁄, 𑀢𑁂 𑀪𑀩𑁆𑀩𑀁 𑀚𑀸𑀦𑀺𑀢𑁆𑀯𑀸 𑀅𑀓𑁆𑀓𑀫𑀺𑀲𑁆𑀲𑀦𑁆𑀢𑀺, 𑀅𑀪𑀩𑁆𑀩𑀁 𑀚𑀸𑀦𑀺𑀢𑁆𑀯𑀸 𑀦 𑀅𑀓𑁆𑀓𑀫𑀺𑀲𑁆𑀲𑀦𑁆𑀢𑀺. 𑀅𑀦𑀸𑀕𑀢𑁂 𑀧𑀦 𑀉𑀧𑀦𑀺𑀲𑁆𑀲𑀬𑁄 𑀫𑀦𑁆𑀤𑁄 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑀁 𑀦 𑀚𑀸𑀦𑀺𑀲𑁆𑀲𑀦𑁆𑀢𑀺. 𑀢𑁂𑀲𑀼 𑀅𑀓𑁆𑀓𑀫𑀦𑁆𑀢𑁂𑀲𑀼 𑀲𑀘𑁂 𑀧𑀢𑁆𑀣𑀺𑀢𑀁 𑀇𑀚𑁆𑀛𑀺𑀲𑁆𑀲𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀇𑀚𑁆𑀛𑀺𑀲𑁆𑀲𑀢𑀺, 𑁋 ‘‘𑀧𑀼𑀩𑁆𑀩𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀮𑀪𑀦𑁆𑀢𑀺, 𑀢𑀁 𑀇𑀤𑀸𑀦𑀺 𑀦 𑀮𑀪𑀦𑁆𑀢𑀺. 𑀢𑁂𑀬𑁂𑀯 𑀫𑀜𑁆𑀜𑁂 𑀪𑀺𑀓𑁆𑀔𑀽 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑀸 𑀅𑀳𑁂𑀲𑀼𑀁, 𑀇𑀫𑁂 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀫𑀦𑀼𑀲𑁆𑀲𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀅𑀓𑁆𑀓𑀫𑀺𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺 ‘‘𑀦, 𑀪𑀺𑀓𑁆𑀔𑀯𑁂, 𑀘𑁂𑀮𑀧𑁆𑀧𑀝𑀺𑀓𑀸 𑀅𑀓𑁆𑀓𑀫𑀺𑀢𑀩𑁆𑀩𑀸’’𑀢𑀺 (𑀘𑀽𑀴𑀯. 𑁨𑁬𑁮). 𑀫𑀗𑁆𑀕𑀮𑀢𑁆𑀣𑀸𑀬 𑀧𑀜𑁆𑀜𑀢𑁆𑀢𑀁 𑀅𑀦𑀓𑁆𑀓𑀫𑀦𑁆𑀢𑁂𑀲𑀼 𑀧𑀦 𑀅𑀓𑁆𑀓𑀫𑀦𑀢𑁆𑀣𑀸𑀬 𑀅𑀦𑀼𑀧𑀜𑁆𑀜𑀢𑁆𑀢𑀺𑀁 𑀞𑀧𑁂𑀲𑀺 𑁋 ‘‘𑀕𑀺𑀳𑀻, 𑀪𑀺𑀓𑁆𑀔𑀯𑁂, 𑀫𑀗𑁆𑀕𑀮𑀺𑀓𑀸, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀳𑀻𑀦𑀁 𑀫𑀗𑁆𑀕𑀮𑀢𑁆𑀣𑀸𑀬𑀸’’𑀢𑀺 (𑀘𑀽𑀴𑀯. 𑁨𑁬𑁮).

𑁩𑁨𑁬. 𑀧𑀘𑁆𑀙𑀺𑀫𑀁 𑀚𑀦𑀢𑀁 𑀢𑀣𑀸𑀕𑀢𑁄 𑀅𑀦𑀼𑀓𑀫𑁆𑀧𑀢𑀻𑀢𑀺 𑀇𑀤𑀁 𑀣𑁂𑀭𑁄 𑀯𑀼𑀢𑁆𑀢𑁂𑀲𑀼 𑀓𑀸𑀭𑀡𑁂𑀲𑀼 𑀢𑀢𑀺𑀬𑀁 𑀓𑀸𑀭𑀡𑀁 𑀲𑀦𑁆𑀥𑀸𑀬𑀸𑀳. 𑀦 𑀔𑁄 𑀲𑀼𑀔𑁂𑀦 𑀲𑀼𑀔𑀦𑁆𑀢𑀺 𑀓𑀲𑁆𑀫𑀸 𑀆𑀳? 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀲𑀜𑁆𑀜𑀻 𑀳𑀼𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦 𑀅𑀓𑁆𑀓𑀫𑀺, 𑀢𑀲𑁆𑀫𑀸 𑀅𑀳𑀫𑁆𑀧𑀺 𑀲𑀢𑁆𑀣𑀸𑀭𑀸 𑀲𑀫𑀸𑀦𑀘𑁆𑀙𑀦𑁆𑀤𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳.

𑁩𑁨𑁭. 𑀲𑁄 𑀔𑁄 𑀅𑀳𑀦𑁆𑀢𑀺𑀆𑀤𑀺 ‘‘𑀬𑀸𑀯 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂’’𑀢𑀺 𑀢𑀸𑀯 𑀫𑀳𑀸𑀲𑀘𑁆𑀘𑀓𑁂 (𑀫. 𑀦𑀺. 𑁧.𑁩𑁬𑁪 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁄 𑀧𑀭𑀁 𑀬𑀸𑀯 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀆𑀲𑀯𑀓𑁆𑀔𑀬𑀸 𑀧𑀸𑀲𑀭𑀸𑀲𑀺𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁨𑁭𑁨 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁩𑁪𑁩. 𑀅𑀗𑁆𑀓𑀼𑀲𑀕𑀬𑁆𑀳𑁂 𑀲𑀺𑀧𑁆𑀧𑁂𑀢𑀺 𑀅𑀗𑁆𑀓𑀼𑀲𑀕𑀳𑀡𑀲𑀺𑀧𑁆𑀧𑁂. 𑀓𑀼𑀲𑀮𑁄 𑀅𑀳𑀦𑁆𑀢𑀺 𑀙𑁂𑀓𑁄 𑀅𑀳𑀁. 𑀓𑀲𑁆𑀲 𑀧𑀦𑀸𑀬𑀁 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀻𑀢𑀺? 𑀧𑀺𑀢𑀼 𑀲𑀦𑁆𑀢𑀺𑀓𑁂, 𑀧𑀺𑀢𑀸𑀧𑀺𑀲𑁆𑀲 𑀧𑀺𑀢𑀼 𑀲𑀦𑁆𑀢𑀺𑀓𑁂𑀯 𑀉𑀕𑁆𑀕𑀡𑁆𑀳𑀺. 𑀓𑁄𑀲𑀫𑁆𑀩𑀺𑀬𑀁 𑀓𑀺𑀭 𑀧𑀭𑀦𑁆𑀢𑀧𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀭𑀸𑀚𑀫𑀳𑁂𑀲𑀻 𑀕𑀭𑀼𑀪𑀸𑀭𑀸 𑀆𑀓𑀸𑀲𑀢𑀮𑁂 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀩𑀸𑀮𑀸𑀢𑀧𑀁 𑀢𑀧𑁆𑀧𑀫𑀸𑀦𑀸 𑀭𑀢𑁆𑀢𑀓𑀫𑁆𑀩𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀳𑁄𑀢𑀺, 𑀏𑀓𑁄 𑀳𑀢𑁆𑀣𑀺𑀮𑀺𑀗𑁆𑀕𑀲𑀓𑀼𑀡𑁄 ‘‘𑀫𑀁𑀲𑀧𑁂𑀲𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀕𑀳𑁂𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀲𑀸 ‘‘𑀙𑀟𑁆𑀟𑁂𑀬𑁆𑀬 𑀫’’𑀦𑁆𑀢𑀺 𑀪𑀬𑁂𑀦 𑀦𑀺𑀲𑁆𑀲𑀤𑁆𑀤𑀸 𑀅𑀳𑁄𑀲𑀺, 𑀲𑁄 𑀢𑀁 𑀧𑀩𑁆𑀩𑀢𑀧𑀸𑀤𑁂 𑀭𑀼𑀓𑁆𑀔𑀯𑀺𑀝𑀧𑁂 𑀞𑀧𑁂𑀲𑀺. 𑀲𑀸 𑀧𑀸𑀡𑀺𑀲𑁆𑀲𑀭𑀁 𑀓𑀭𑁄𑀦𑁆𑀢𑀻 𑀫𑀳𑀸𑀲𑀤𑁆𑀤𑀫𑀓𑀸𑀲𑀺. 𑀲𑀓𑀼𑀡𑁄 𑀧𑀮𑀸𑀬𑀺, 𑀢𑀲𑁆𑀲𑀸 𑀢𑀢𑁆𑀣𑁂𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀢𑀺𑀬𑀸𑀫𑀭𑀢𑁆𑀢𑀺𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀓𑀫𑁆𑀩𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀢𑁄 𑀘 𑀅𑀯𑀺𑀤𑀽𑀭𑁂 𑀢𑀸𑀧𑀲𑁄 𑀯𑀲𑀢𑀺. 𑀲𑁄 𑀢𑀲𑁆𑀲𑀸 𑀲𑀤𑁆𑀤𑁂𑀦 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀭𑀼𑀓𑁆𑀔𑀫𑀽𑀮𑀁 𑀆𑀕𑀢𑁄 𑀚𑀸𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀑𑀢𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀬𑀸𑀕𑀼𑀁 𑀧𑀸𑀬𑁂𑀲𑀺. 𑀤𑀸𑀭𑀓𑀲𑁆𑀲 𑀫𑁂𑀖𑀉𑀢𑀼𑀜𑁆𑀘 𑀧𑀩𑁆𑀩𑀢𑀉𑀢𑀼𑀜𑁆𑀘 𑀕𑀳𑁂𑀢𑁆𑀯𑀸 𑀚𑀸𑀢𑀢𑁆𑀢𑀸 𑀉𑀤𑁂𑀦𑁄𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀢𑀸𑀧𑀲𑁄 𑀨𑀮𑀸𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀤𑁆𑀯𑁂𑀧𑀺 𑀚𑀦𑁂 𑀧𑁄𑀲𑁂𑀲𑀺.

𑀲𑀸 𑀏𑀓𑀤𑀺𑀯𑀲𑀁 𑀢𑀸𑀧𑀲𑀲𑁆𑀲 𑀆𑀕𑀫𑀦𑀯𑁂𑀮𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀇𑀢𑁆𑀣𑀺𑀓𑀼𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀢𑀸𑀧𑀲𑀁 𑀲𑀻𑀮𑀪𑁂𑀤𑀁 𑀆𑀧𑀸𑀤𑁂𑀲𑀺. 𑀢𑁂𑀲𑀁 𑀏𑀓𑀢𑁄 𑀯𑀲𑀦𑁆𑀢𑀸𑀦𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀧𑀭𑀦𑁆𑀢𑀧𑀭𑀸𑀚𑀸 𑀓𑀸𑀮𑀁 𑀅𑀓𑀸𑀲𑀺. 𑀢𑀸𑀧𑀲𑁄 𑀭𑀢𑁆𑀢𑀺𑀪𑀸𑀕𑁂 𑀦𑀓𑁆𑀔𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀭𑀜𑁆𑀜𑁄 𑀫𑀢𑀪𑀸𑀯𑀁 𑀜𑀢𑁆𑀯𑀸 𑁋 ‘‘𑀢𑀼𑀬𑁆𑀳𑀁 𑀭𑀸𑀚𑀸 𑀫𑀢𑁄, 𑀧𑀼𑀢𑁆𑀢𑁄 𑀢𑁂 𑀓𑀺𑀁 𑀇𑀥 𑀯𑀲𑀺𑀢𑀼𑀁 𑀇𑀘𑁆𑀙𑀢𑀺, 𑀉𑀤𑀸𑀳𑀼 𑀧𑁂𑀢𑁆𑀢𑀺𑀓𑁂 𑀭𑀚𑁆𑀚𑁂 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑀼’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀸 𑀧𑀼𑀢𑁆𑀢𑀲𑁆𑀲 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑀼𑀓𑀸𑀫𑀢𑀜𑁆𑀘𑀲𑁆𑀲 𑀜𑀢𑁆𑀯𑀸 𑀢𑀸𑀧𑀲𑀲𑁆𑀲 𑀆𑀭𑁄𑀘𑁂𑀲𑀺. 𑀢𑀸𑀧𑀲𑁄 𑀘 𑀳𑀢𑁆𑀣𑀺𑀕𑀦𑁆𑀣𑀲𑀺𑀧𑁆𑀧𑀁 𑀚𑀸𑀦𑀸𑀢𑀺, 𑀓𑀼𑀢𑁄𑀦𑁂𑀦 𑀮𑀤𑁆𑀥𑀁? 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑀸. 𑀧𑀼𑀩𑁆𑀩𑁂 𑀓𑀺𑀭𑀲𑁆𑀲 𑀲𑀓𑁆𑀓𑁄 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 ‘‘𑀓𑁂𑀦 𑀓𑀺𑀮𑀫𑀣𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀳𑀢𑁆𑀣𑀺𑀧𑀭𑀺𑀲𑁆𑀲𑀬𑁄 𑀅𑀢𑁆𑀣𑀻’’𑀢𑀺 𑀆𑀭𑁄𑀘𑁂𑀲𑀺. 𑀢𑀲𑁆𑀲 𑀲𑀓𑁆𑀓𑁄 𑀳𑀢𑁆𑀣𑀺𑀕𑀦𑁆𑀣𑀜𑁆𑀘𑁂𑀯 𑀯𑀻𑀡𑀓𑀜𑁆𑀘 𑀤𑀢𑁆𑀯𑀸 ‘‘𑀧𑀮𑀸𑀧𑁂𑀢𑀼𑀓𑀸𑀫𑀢𑀸𑀬 𑀲𑀢𑀺 𑀇𑀫𑀁 𑀢𑀦𑁆𑀢𑀺𑀁 𑀯𑀸𑀤𑁂𑀢𑁆𑀯𑀸 𑀇𑀫𑀁 𑀲𑀺𑀮𑁄𑀓𑀁 𑀯𑀤𑁂𑀬𑁆𑀬𑀸𑀣, 𑀧𑀓𑁆𑀓𑁄𑀲𑀺𑀢𑀼𑀓𑀸𑀫𑀢𑀸𑀬 𑀲𑀢𑀺 𑀇𑀫𑀁 𑀲𑀺𑀮𑁄𑀓𑀁 𑀯𑀤𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑀸𑀧𑀲𑁄 𑀢𑀁 𑀲𑀺𑀧𑁆𑀧𑀁 𑀓𑀼𑀫𑀸𑀭𑀲𑁆𑀲 𑀅𑀤𑀸𑀲𑀺. 𑀲𑁄 𑀏𑀓𑀁 𑀯𑀝𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀳𑀢𑁆𑀣𑀻𑀲𑀼 𑀆𑀕𑀢𑁂𑀲𑀼 𑀢𑀦𑁆𑀢𑀺𑀁 𑀯𑀸𑀤𑁂𑀢𑁆𑀯𑀸 𑀲𑀺𑀮𑁄𑀓𑀁 𑀯𑀤𑀢𑀺, 𑀳𑀢𑁆𑀣𑀻 𑀪𑀻𑀢𑀸 𑀧𑀮𑀸𑀬𑀺𑀁𑀲𑀼.

𑀲𑁄 𑀲𑀺𑀧𑁆𑀧𑀲𑁆𑀲 𑀆𑀦𑀼𑀪𑀸𑀯𑀁 𑀜𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀓𑁆𑀓𑁄𑀲𑀦𑀲𑀺𑀧𑁆𑀧𑀁 𑀧𑀬𑁄𑀚𑁂𑀲𑀺. 𑀚𑁂𑀝𑁆𑀞𑀓𑀳𑀢𑁆𑀣𑀻 𑀆𑀕𑀦𑁆𑀢𑁆𑀯𑀸 𑀔𑀦𑁆𑀥𑀁 𑀉𑀧𑀦𑀸𑀫𑁂𑀲𑀺. 𑀲𑁄 𑀢𑀲𑁆𑀲 𑀔𑀦𑁆𑀥𑀕𑀢𑁄 𑀬𑀼𑀤𑁆𑀥𑀲𑀫𑀢𑁆𑀣𑁂 𑀢𑀭𑀼𑀡𑀳𑀢𑁆𑀣𑀻 𑀉𑀘𑁆𑀘𑀺𑀦𑀺𑀢𑁆𑀯𑀸 𑀓𑀫𑁆𑀩𑀮𑀜𑁆𑀘 𑀫𑀼𑀤𑁆𑀤𑀺𑀓𑀜𑁆𑀘 𑀕𑀳𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀢𑀁 𑀢𑀁 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑁋 ‘‘𑀅𑀳𑀁 𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀣𑀺𑀓𑀸 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀚𑀦𑀲𑀗𑁆𑀕𑀳𑀁 𑀓𑀢𑁆𑀯𑀸 𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑁋 ‘‘𑀅𑀳𑀁 𑀭𑀜𑁆𑀜𑁄 𑀧𑀼𑀢𑁆𑀢𑁄, 𑀫𑀬𑁆𑀳𑀁 𑀙𑀢𑁆𑀢𑀁 𑀤𑁂𑀣𑀸’’𑀢𑀺 𑀅𑀲𑀤𑁆𑀤𑀳𑀦𑁆𑀢𑀸𑀦𑀁 𑀓𑀫𑁆𑀩𑀮𑀜𑁆𑀘 𑀫𑀼𑀤𑁆𑀤𑀺𑀓𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀲𑀺. 𑀲𑁄 𑀳𑀢𑁆𑀣𑀺𑀯𑀺𑀢𑁆𑀢𑀓𑁄 𑀳𑀼𑀢𑁆𑀯𑀸 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀲𑀼𑀦𑁆𑀤𑀭𑁄 𑀳𑀢𑁆𑀣𑀻 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 𑀕𑀦𑁆𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀘𑀡𑁆𑀟𑀧𑀚𑁆𑀚𑁄𑀢𑁄 ‘‘𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀓𑀝𑁆𑀞𑀳𑀢𑁆𑀣𑀺𑀁 𑀧𑀬𑁄𑀚𑁂𑀢𑁆𑀯𑀸 𑀢𑀲𑁆𑀲 𑀅𑀦𑁆𑀢𑁄 𑀬𑁄𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀁 𑀳𑀢𑁆𑀣𑀺𑀁 𑀕𑀳𑀡𑀢𑁆𑀣𑀸𑀬 𑀆𑀕𑀢𑀁 𑀕𑀡𑁆𑀳𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀕𑀳𑀡𑀢𑁆𑀣𑀸𑀬 𑀥𑀻𑀢𑀭𑀁 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀢𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀁𑀬𑁂𑀯 𑀅𑀕𑀫𑀸𑀲𑀺. 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀉𑀧𑁆𑀧𑀦𑁆𑀦𑁄 𑀅𑀬𑀁 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑁄 𑀅𑀢𑁆𑀢𑀦𑁄 𑀧𑀺𑀢𑀼 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺.

𑁩𑁪𑁪. 𑀧𑀥𑀸𑀦𑀺𑀬𑀗𑁆𑀕𑀸𑀦𑀻𑀢𑀺 𑀧𑀥𑀸𑀦𑀁 𑀯𑀼𑀘𑁆𑀘𑀢𑀺 𑀧𑀤𑀳𑀦𑀪𑀸𑀯𑁄, 𑀧𑀥𑀸𑀦𑀫𑀲𑁆𑀲 𑀅𑀢𑁆𑀣𑀻𑀢𑀺 𑀧𑀥𑀸𑀦𑀺𑀬𑁄. 𑀧𑀥𑀸𑀦𑀺𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀸𑀦𑀻𑀢𑀺 𑀧𑀥𑀸𑀦𑀺𑀬𑀗𑁆𑀕𑀸𑀦𑀺. 𑀲𑀤𑁆𑀥𑁄𑀢𑀺 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑀸 𑀧𑀦𑁂𑀲𑀸 𑀆𑀕𑀫𑀦𑀲𑀤𑁆𑀥𑀸 𑀅𑀥𑀺𑀕𑀫𑀲𑀤𑁆𑀥𑀸 𑀑𑀓𑀧𑁆𑀧𑀦𑀲𑀤𑁆𑀥𑀸 𑀧𑀲𑀸𑀤𑀲𑀤𑁆𑀥𑀸𑀢𑀺 𑀘𑀢𑀼𑀩𑁆𑀩𑀺𑀥𑀸. 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀤𑁆𑀥𑀸 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀆𑀕𑀢𑀢𑁆𑀢𑀸 𑀆𑀕𑀫𑀦𑀲𑀤𑁆𑀥𑀸 𑀦𑀸𑀫. 𑀅𑀭𑀺𑀬𑀲𑀸𑀯𑀓𑀸𑀦𑀁 𑀧𑀝𑀺𑀯𑁂𑀥𑁂𑀦 𑀅𑀥𑀺𑀕𑀢𑀢𑁆𑀢𑀸 𑀅𑀥𑀺𑀕𑀫𑀲𑀤𑁆𑀥𑀸 𑀦𑀸𑀫. 𑀩𑀼𑀤𑁆𑀥𑁄 𑀥𑀫𑁆𑀫𑁄 𑀲𑀗𑁆𑀖𑁄𑀢𑀺 𑀯𑀼𑀢𑁆𑀢𑁂 𑀅𑀘𑀮𑀪𑀸𑀯𑁂𑀦 𑀑𑀓𑀧𑁆𑀧𑀦𑀁 𑀑𑀓𑀧𑁆𑀧𑀦𑀲𑀤𑁆𑀥𑀸 𑀦𑀸𑀫. 𑀧𑀲𑀸𑀤𑀼𑀧𑁆𑀧𑀢𑁆𑀢𑀺 𑀧𑀲𑀸𑀤𑀲𑀤𑁆𑀥𑀸 𑀦𑀸𑀫, 𑀇𑀥 𑀧𑀦 𑀑𑀓𑀧𑁆𑀧𑀦𑀲𑀤𑁆𑀥𑀸 𑀅𑀥𑀺𑀧𑁆𑀧𑁂𑀢𑀸. 𑀩𑁄𑀥𑀺𑀦𑁆𑀢𑀺 𑀘𑀢𑀼𑀫𑀕𑁆𑀕𑀜𑀸𑀡𑀁. 𑀢𑀁 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀁 𑀢𑀣𑀸𑀕𑀢𑁂𑀦𑀸𑀢𑀺 𑀲𑀤𑁆𑀤𑀳𑀢𑀺, 𑀤𑁂𑀲𑀦𑀸𑀲𑀻𑀲𑀫𑁂𑀯 𑀘𑁂𑀢𑀁, 𑀇𑀫𑀺𑀦𑀸 𑀧𑀦 𑀅𑀗𑁆𑀕𑁂𑀦 𑀢𑀻𑀲𑀼𑀧𑀺 𑀭𑀢𑀦𑁂𑀲𑀼 𑀲𑀤𑁆𑀥𑀸 𑀅𑀥𑀺𑀧𑁆𑀧𑁂𑀢𑀸. 𑀬𑀲𑁆𑀲 𑀳𑀺 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑁄 𑀩𑀮𑀯𑀸, 𑀢𑀲𑁆𑀲 𑀧𑀥𑀸𑀦𑀁 𑀯𑀻𑀭𑀺𑀬𑀁 𑀇𑀚𑁆𑀛𑀢𑀺.

𑀅𑀧𑁆𑀧𑀸𑀩𑀸𑀥𑁄𑀢𑀺 𑀅𑀭𑁄𑀕𑁄. 𑀅𑀧𑁆𑀧𑀸𑀢𑀗𑁆𑀓𑁄𑀢𑀺 𑀦𑀺𑀤𑁆𑀤𑀼𑀓𑁆𑀔𑁄. 𑀲𑀫𑀯𑁂𑀧𑀸𑀓𑀺𑀦𑀺𑀬𑀸𑀢𑀺 𑀲𑀫𑀯𑀺𑀧𑀸𑀘𑀦𑀺𑀬𑀸. 𑀕𑀳𑀡𑀺𑀬𑀸𑀢𑀺 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼𑀬𑀸. 𑀦𑀸𑀢𑀺𑀲𑀻𑀢𑀸𑀬 𑀦𑀸𑀘𑁆𑀘𑀼𑀡𑁆𑀳𑀸𑀬𑀸𑀢𑀺 𑀅𑀢𑀺𑀲𑀻𑀢𑀕𑀳𑀡𑀺𑀓𑁄 𑀳𑀺 𑀲𑀻𑀢𑀪𑀻𑀭𑀽 𑀳𑁄𑀢𑀺, 𑀅𑀘𑁆𑀘𑀼𑀡𑁆𑀳𑀕𑀳𑀡𑀺𑀓𑁄 𑀉𑀡𑁆𑀳𑀪𑀻𑀭𑀽, 𑀢𑁂𑀲𑀁 𑀧𑀥𑀸𑀦𑀁 𑀦 𑀇𑀚𑁆𑀛𑀢𑀺. 𑀫𑀚𑁆𑀛𑀺𑀫𑀕𑀳𑀡𑀺𑀓𑀲𑁆𑀲 𑀇𑀚𑁆𑀛𑀢𑀺. 𑀢𑁂𑀦𑀸𑀳 ‘‘𑀫𑀚𑁆𑀛𑀺𑀫𑀸𑀬 𑀧𑀥𑀸𑀦𑀓𑁆𑀔𑀫𑀸𑀬𑀸’’𑀢𑀺. 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀢𑁆𑀢𑀸𑀢𑀺 𑀬𑀣𑀸𑀪𑀽𑀢𑀁 𑀅𑀢𑁆𑀢𑀦𑁄 𑀅𑀕𑀼𑀡𑀁 𑀧𑀓𑀸𑀲𑁂𑀢𑀸. 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸𑀢𑀺 𑀉𑀤𑀬𑀜𑁆𑀘 𑀅𑀢𑁆𑀣𑀜𑁆𑀘 𑀕𑀦𑁆𑀢𑀼𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀲𑀫𑀢𑁆𑀣𑀸𑀬, 𑀏𑀢𑁂𑀦 𑀧𑀜𑁆𑀜𑀸𑀲𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀁 𑀉𑀤𑀬𑀩𑁆𑀩𑀬𑀜𑀸𑀡𑀁 𑀯𑀼𑀢𑁆𑀢𑀁. 𑀅𑀭𑀺𑀬𑀸𑀬𑀸𑀢𑀺 𑀧𑀭𑀺𑀲𑀼𑀤𑁆𑀥𑀸𑀬. 𑀦𑀺𑀩𑁆𑀩𑁂𑀥𑀺𑀓𑀸𑀬𑀸𑀢𑀺 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑁂 𑀮𑁄𑀪𑀓𑁆𑀔𑀦𑁆𑀥𑀸𑀤𑀬𑁄 𑀦𑀺𑀩𑁆𑀩𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸𑀬. 𑀲𑀫𑁆𑀫𑀸𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸𑀢𑀺 𑀢𑀤𑀗𑁆𑀕𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀬𑀁 𑀤𑀼𑀓𑁆𑀔𑀁 𑀔𑀻𑀬𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀔𑀬𑀕𑀸𑀫𑀺𑀦𑀺𑀬𑀸. 𑀇𑀢𑀺 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀯 𑀓𑀣𑀺𑀢𑀸. 𑀤𑀼𑀧𑁆𑀧𑀜𑁆𑀜𑀲𑁆𑀲 𑀳𑀺 𑀧𑀥𑀸𑀦𑀁 𑀦 𑀇𑀚𑁆𑀛𑀢𑀺. 𑀇𑀫𑀸𑀦𑀺 𑀘 𑀧𑀜𑁆𑀘 𑀧𑀥𑀸𑀦𑀺𑀬𑀗𑁆𑀕𑀸𑀦𑀺 𑀮𑁄𑀓𑀺𑀬𑀸𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁩𑁪𑁫. 𑀲𑀸𑀬𑀫𑀦𑀼𑀲𑀺𑀝𑁆𑀞𑁄 𑀧𑀸𑀢𑁄 𑀯𑀺𑀲𑁂𑀲𑀁 𑀅𑀥𑀺𑀕𑀫𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀅𑀦𑀼𑀲𑀺𑀝𑁆𑀞𑁄 𑀅𑀭𑀼𑀡𑀼𑀕𑁆𑀕𑀫𑀦𑁂 𑀯𑀺𑀲𑁂𑀲𑀁 𑀅𑀥𑀺𑀕𑀫𑀺𑀲𑁆𑀲𑀢𑀺. 𑀧𑀸𑀢𑀫𑀦𑀼𑀲𑀺𑀝𑁆𑀞𑁄 𑀲𑀸𑀬𑀦𑁆𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑁂 𑀅𑀦𑀼𑀲𑀺𑀝𑁆𑀞𑁄 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬𑀁. 𑀅𑀬𑀜𑁆𑀘 𑀧𑀦 𑀤𑁂𑀲𑀦𑀸 𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦 𑀯𑀼𑀢𑁆𑀢𑀸. 𑀤𑀦𑁆𑀥𑀧𑀜𑁆𑀜𑁄 𑀳𑀺 𑀦𑁂𑀬𑁆𑀬𑀧𑀼𑀕𑁆𑀕𑀮𑁄 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀺𑀓𑁆𑀔𑀧𑀜𑁆𑀜𑁄 𑀏𑀓𑀤𑀺𑀯𑀲𑁂𑀦, 𑀲𑁂𑀲𑀤𑀺𑀯𑀲𑁂 𑀫𑀚𑁆𑀛𑀺𑀫𑀧𑀜𑁆𑀜𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄 𑀅𑀳𑁄 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀢𑀸𑀢𑀺 𑀬𑀲𑁆𑀫𑀸 𑀩𑀼𑀤𑁆𑀥𑀥𑀫𑁆𑀫𑀸𑀦𑀁 𑀉𑀴𑀸𑀭𑀢𑀸𑀬 𑀥𑀫𑁆𑀫𑀲𑁆𑀲 𑀘 𑀲𑁆𑀯𑀸𑀓𑁆𑀔𑀸𑀢𑀢𑀸𑀬 𑀧𑀸𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀲𑀸𑀬𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀧𑀲𑀁𑀲𑀦𑁆𑀢𑁄 𑀏𑀯𑀫𑀸𑀳. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀯𑀺𑀫𑁆𑀳𑀬𑀢𑁆𑀣𑁂 𑀦𑀺𑀧𑀸𑀢𑁄.

𑁩𑁪𑁬. 𑀓𑀼𑀘𑁆𑀙𑀺𑀫𑀢𑀻𑀢𑀺 𑀆𑀧𑀦𑁆𑀦𑀲𑀢𑁆𑀢𑀸. 𑀬𑁄 𑀫𑁂 𑀅𑀬𑀁, 𑀪𑀦𑁆𑀢𑁂, 𑀓𑀼𑀘𑁆𑀙𑀺𑀕𑀢𑁄𑀢𑀺 𑀓𑀺𑀁 𑀧𑀦𑁂𑀯𑀁 𑀲𑀭𑀡𑀁 𑀕𑀳𑀺𑀢𑀁 𑀳𑁄𑀢𑀻𑀢𑀺. 𑀦 𑀳𑁄𑀢𑀺. 𑀅𑀘𑀺𑀢𑁆𑀢𑀓𑀲𑀭𑀡𑀕𑀫𑀦𑀁 𑀦𑀸𑀫 𑀦𑀢𑁆𑀣𑀺, 𑀆𑀭𑀓𑁆𑀔𑁄 𑀧𑀦𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑁄𑀯 𑀳𑁄𑀢𑀺. 𑀅𑀣 𑀦𑀁 𑀬𑀤𑀸 𑀫𑀳𑀮𑁆𑀮𑀓𑀓𑀸𑀮𑁂 𑀫𑀸𑀢𑀸𑀧𑀺𑀢𑀭𑁄, 𑁋 ‘‘𑀢𑀸𑀢, 𑀓𑀼𑀘𑁆𑀙𑀺𑀕𑀢𑀫𑁂𑀯 𑀢𑀁 𑀲𑀭𑀡𑀁 𑀕𑀡𑁆𑀳𑀸𑀧𑀬𑀺𑀫𑁆𑀳𑀸’’𑀢𑀺 𑀲𑀸𑀭𑁂𑀦𑁆𑀢𑀺, 𑀲𑁄 𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀅𑀳𑀁 𑀲𑀭𑀡𑀁 𑀕𑀢𑁄 𑀉𑀧𑀸𑀲𑀓𑁄’’𑀢𑀺 𑀲𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀤𑀸 𑀲𑀭𑀡𑀁 𑀕𑀳𑀺𑀢𑀁 𑀦𑀸𑀫 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.