𑁯. 𑀤𑁆𑀯𑁂𑀥𑀸𑀯𑀺𑀢𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁬. 𑀫𑁂 𑀲𑀼𑀢𑀦𑁆𑀢𑀺 𑀤𑁆𑀯𑁂𑀥𑀸𑀯𑀺𑀢𑀓𑁆𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀤𑁆𑀯𑀺𑀥𑀸 𑀓𑀢𑁆𑀯𑀸𑀢𑀺 𑀤𑁆𑀯𑁂 𑀤𑁆𑀯𑁂 𑀪𑀸𑀕𑁂 𑀓𑀢𑁆𑀯𑀸. 𑀓𑀸𑀫𑀯𑀺𑀢𑀓𑁆𑀓𑁄𑀢𑀺 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄. 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄𑀢𑀺 𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄. 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄𑀢𑀺 𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄. 𑀏𑀓𑀁 𑀪𑀸𑀕𑀦𑁆𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑁄 𑀯𑀸 𑀲𑀼𑀔𑀼𑀫𑁄 𑀯𑀸 𑀲𑀩𑁆𑀩𑁄 𑀧𑀸𑀬𑀁 𑀯𑀺𑀢𑀓𑁆𑀓𑁄 𑀅𑀓𑀼𑀲𑀮𑀧𑀓𑁆𑀔𑀺𑀓𑁄𑀬𑁂𑀯𑀸𑀢𑀺 𑀢𑀬𑁄𑀧𑀺 𑀓𑀸𑀫𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁂 𑀏𑀓𑀁 𑀓𑁄𑀝𑁆𑀞𑀸𑀲𑀫𑀓𑀸𑀲𑀺𑀁. 𑀓𑀸𑀫𑁂𑀳𑀺 𑀦𑀺𑀲𑁆𑀲𑀝𑁄 𑀦𑁂𑀓𑁆𑀔𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄 𑀦𑀸𑀫, 𑀲𑁄 𑀬𑀸𑀯 𑀧𑀞𑀫𑀚𑁆𑀛𑀸𑀦𑀸 𑀯𑀝𑁆𑀝𑀢𑀺. 𑀅𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀲𑁄 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀞𑀫𑀚𑁆𑀛𑀸𑀦𑀸 𑀯𑀝𑁆𑀝𑀢𑀺. 𑀅𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, 𑀲𑁄 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀞𑀫𑀚𑁆𑀛𑀸𑀦𑀸 𑀯𑀝𑁆𑀝𑀢𑀺. 𑀤𑀼𑀢𑀺𑀬𑀁 𑀪𑀸𑀕𑀦𑁆𑀢𑀺 𑀲𑀩𑁆𑀩𑁄𑀧𑀸𑀬𑀁 𑀓𑀼𑀲𑀮𑀧𑀓𑁆𑀔𑀺𑀓𑁄𑀬𑁂𑀯𑀸𑀢𑀺 𑀤𑀼𑀢𑀺𑀬𑀁 𑀓𑁄𑀝𑁆𑀞𑀸𑀲𑀫𑀓𑀸𑀲𑀺𑀁. 𑀇𑀫𑀺𑀦𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀢𑀓𑁆𑀓𑀦𑀺𑀕𑁆𑀕𑀳𑀡𑀓𑀸𑀮𑁄 𑀓𑀣𑀺𑀢𑁄.

𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑀁 𑀧𑀤𑀳𑀦𑁆𑀢𑀲𑁆𑀲 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄 𑀧𑀼𑀜𑁆𑀚𑀧𑀼𑀜𑁆𑀚𑀸 𑀫𑀳𑀸𑀦𑀤𑀺𑀬𑀁 𑀑𑀖𑀸 𑀯𑀺𑀬 𑀧𑀯𑀢𑁆𑀢𑀺𑀁𑀲𑀼. 𑀲𑀢𑀺𑀲𑀫𑁆𑀫𑁄𑀲𑁂𑀦 𑀧𑀦 𑀲𑀳𑀲𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀓𑀼𑀲𑀮𑀯𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀬𑀁 𑀅𑀓𑀼𑀲𑀮𑀚𑀯𑀦𑀯𑀸𑀭𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀇𑀫𑁂 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀓𑀼𑀲𑀮𑀯𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀳𑀦𑁆𑀤𑀸𑀳𑀁 𑀇𑀫𑁂 𑀯𑀺𑀢𑀓𑁆𑀓𑁂 𑀤𑁆𑀯𑁂 𑀪𑀸𑀕𑁂 𑀓𑀢𑁆𑀯𑀸 𑀯𑀺𑀳𑀭𑀸𑀫𑀻’’𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀅𑀓𑀼𑀲𑀮𑀧𑀓𑁆𑀔𑀺𑀓𑀸𑀢𑀺 𑀏𑀓𑀁 𑀪𑀸𑀕𑀁 𑀓𑀭𑁄𑀢𑀺 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀬𑁄 𑀓𑀼𑀲𑀮𑀧𑀓𑁆𑀔𑀺𑀓𑀸𑀢𑀺 𑀏𑀓𑀁. 𑀅𑀣 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀓𑀼𑀲𑀮𑀧𑀓𑁆𑀔𑀢𑁄 𑀆𑀕𑀢𑀁 𑀯𑀺𑀢𑀓𑁆𑀓𑀁 𑀫𑀦𑁆𑀢𑁂𑀦 𑀓𑀡𑁆𑀳𑀲𑀧𑁆𑀧𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀅𑀫𑀺𑀢𑁆𑀢𑀁 𑀕𑀻𑀯𑀸𑀬 𑀅𑀓𑁆𑀓𑀫𑀦𑁆𑀢𑁄 𑀯𑀺𑀬 𑀘 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀺, 𑀦𑀸𑀲𑁆𑀲 𑀯𑀟𑁆𑀠𑀺𑀢𑀼𑀁 𑀤𑀲𑁆𑀲𑀸𑀫𑀺. 𑀓𑀼𑀲𑀮𑀧𑀓𑁆𑀔𑀢𑁄 𑀆𑀕𑀢𑀁 𑀯𑀺𑀢𑀓𑁆𑀓𑀁 𑀫𑁂𑀖𑀲𑀫𑀬𑁂 𑀫𑁂𑀖𑀁 𑀯𑀺𑀬 𑀲𑀼𑀔𑁂𑀢𑁆𑀢𑁂 𑀲𑀸𑀮𑀓𑀮𑁆𑀬𑀸𑀡𑀺𑀧𑁄𑀢𑀓𑀁 𑀯𑀺𑀬 𑀘 𑀲𑀻𑀖𑀁 𑀯𑀟𑁆𑀠𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀅𑀓𑀼𑀲𑀮𑀯𑀺𑀢𑀓𑁆𑀓𑁂 𑀦𑀺𑀕𑁆𑀕𑀡𑁆𑀳𑀺, 𑀓𑀼𑀲𑀮𑀯𑀺𑀢𑀓𑁆𑀓𑁂 𑀯𑀟𑁆𑀠𑁂𑀲𑀺. 𑀏𑀯𑀁 𑀇𑀫𑀺𑀦𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀢𑀓𑁆𑀓𑀦𑀺𑀕𑁆𑀕𑀳𑀡𑀦𑀓𑀸𑀮𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁦𑁭. 𑀇𑀤𑀸𑀦𑀺 𑀬𑀣𑀸𑀲𑁆𑀲 𑀢𑁂 𑀯𑀺𑀢𑀓𑁆𑀓𑀸 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀬𑀣𑀸 𑀘 𑀦𑁂 𑀦𑀺𑀕𑁆𑀕𑀳𑁂𑀲𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑁆𑀧𑀫𑀢𑁆𑀢𑀲𑁆𑀲𑀸𑀢𑀺 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂 𑀞𑀺𑀢𑀲𑁆𑀲. 𑀆𑀢𑀸𑀧𑀺𑀦𑁄𑀢𑀺 𑀆𑀢𑀸𑀧𑀯𑀻𑀭𑀺𑀬𑀯𑀦𑁆𑀢𑀲𑁆𑀲. 𑀧𑀳𑀺𑀢𑀢𑁆𑀢𑀲𑁆𑀲𑀸𑀢𑀺 𑀧𑁂𑀲𑀺𑀢𑀘𑀺𑀢𑁆𑀢𑀲𑁆𑀲. 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑀁 𑀧𑀤𑀳𑀢𑁄 𑀭𑀚𑁆𑀚𑀲𑀼𑀔𑀁 𑀯𑀸 𑀆𑀭𑀩𑁆𑀪, 𑀧𑀸𑀲𑀸𑀤𑁂 𑀯𑀸 𑀦𑀸𑀝𑀓𑀸𑀦𑀺 𑀯𑀸 𑀑𑀭𑁄𑀥𑁂 𑀯𑀸 𑀓𑀺𑀜𑁆𑀘𑀺𑀤𑁂𑀯 𑀯𑀸 𑀲𑀫𑁆𑀧𑀢𑁆𑀢𑀺𑀁 𑀆𑀭𑀩𑁆𑀪 𑀓𑀸𑀫𑀯𑀺𑀢𑀓𑁆𑀓𑁄 𑀦𑀸𑀫 𑀦 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑁄. 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀧𑀦𑀲𑁆𑀲 𑀆𑀳𑀸𑀭𑀽𑀧𑀘𑁆𑀙𑁂𑀤𑁂𑀦 𑀅𑀥𑀺𑀫𑀢𑁆𑀢𑀓𑀲𑀺𑀫𑀸𑀦𑀁 𑀧𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦 𑀲𑀓𑁆𑀓𑀸 𑀆𑀳𑀸𑀭𑀽𑀧𑀘𑁆𑀙𑁂𑀤𑁂𑀦 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁, 𑀬𑀁𑀦𑀽𑀦𑀸𑀳𑀁 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀸𑀭𑁂𑀬𑁆𑀬’’𑀦𑁆𑀢𑀺. 𑀲𑁄 𑀉𑀭𑀼𑀯𑁂𑀮𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑁋 ‘‘𑀫𑀳𑀸𑀧𑀼𑀭𑀺𑀲𑁄 𑀧𑀼𑀩𑁆𑀩𑁂 𑀆𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀫𑁆𑀧𑀺 𑀦 𑀕𑀡𑁆𑀳𑀺, 𑀅𑀤𑁆𑀥𑀸𑀲𑁆𑀲 𑀇𑀤𑀸𑀦𑀺 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀢𑀲𑁆𑀫𑀸 𑀲𑀬𑀫𑁂𑀯 𑀆𑀕𑀢𑁄’’𑀢𑀺 𑀧𑀡𑀻𑀢𑀧𑀡𑀻𑀢𑀁 𑀆𑀳𑀸𑀭𑀁 𑀉𑀧𑀳𑀭𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀘𑀺𑀭𑀲𑁆𑀲𑁂𑀯 𑀧𑀸𑀓𑀢𑀺𑀓𑁄 𑀅𑀳𑁄𑀲𑀺. 𑀚𑀭𑀸𑀚𑀺𑀡𑁆𑀡𑀢𑁆𑀢𑀪𑀸𑀯𑁄 𑀳𑀺 𑀲𑀧𑁆𑀧𑀸𑀬𑀪𑁄𑀚𑀦𑀁 𑀮𑀪𑀺𑀢𑁆𑀯𑀸𑀧𑀺 𑀧𑀸𑀓𑀢𑀺𑀓𑁄 𑀦 𑀳𑁄𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀤𑀳𑀭𑁄. 𑀢𑁂𑀦𑀲𑁆𑀲 𑀲𑀧𑁆𑀧𑀸𑀬𑀪𑁄𑀚𑀦𑀁 𑀪𑀼𑀜𑁆𑀚𑀢𑁄 𑀅𑀢𑁆𑀢𑀪𑀸𑀯𑁄 𑀦 𑀘𑀺𑀭𑀲𑁆𑀲𑁂𑀯 𑀧𑀸𑀓𑀢𑀺𑀓𑁄 𑀚𑀸𑀢𑁄, 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄, 𑀲𑀫𑀼𑀕𑁆𑀕𑀢𑀢𑀸𑀭𑀸𑀕𑀡𑀁 𑀯𑀺𑀬 𑀦𑀪𑀁 𑀧𑀭𑀺𑀧𑀼𑀡𑁆𑀡𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑀲𑀭𑀻𑀭𑀁 𑀅𑀳𑁄𑀲𑀺. 𑀲𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀢𑀸𑀯 𑀓𑀺𑀮𑀦𑁆𑀢𑁄 𑀦𑀸𑀫 𑀅𑀢𑁆𑀢𑀪𑀸𑀯𑁄 𑀏𑀯𑀁 𑀧𑀝𑀺𑀧𑀸𑀓𑀢𑀺𑀓𑁄 𑀚𑀸𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀜𑁆𑀜𑀸𑀫𑀳𑀦𑁆𑀢𑀢𑀸𑀬 𑀏𑀯𑀁 𑀧𑀭𑀺𑀢𑁆𑀢𑀓𑀫𑁆𑀧𑀺 𑀯𑀺𑀢𑀓𑁆𑀓𑀁 𑀕𑀳𑁂𑀢𑁆𑀯𑀸 𑀓𑀸𑀫𑀯𑀺𑀢𑀓𑁆𑀓𑁄𑀢𑀺 𑀅𑀓𑀸𑀲𑀺.

𑀧𑀡𑁆𑀡𑀲𑀸𑀮𑀸𑀬 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑁄 𑀘𑀫𑀭𑀧𑀲𑀤𑀕𑀯𑀬𑀭𑁄𑀳𑀺𑀢𑀫𑀺𑀕𑀸𑀤𑀺𑀓𑁂 𑀫𑀕𑀕𑀡𑁂 𑀫𑀦𑀼𑀜𑁆𑀜𑀲𑀤𑁆𑀤𑀭𑀯𑀦𑁂 𑀫𑁄𑀭𑀯𑀦𑀓𑀼𑀓𑁆𑀓𑀼𑀝𑀸𑀤𑀺𑀓𑁂 𑀧𑀓𑁆𑀔𑀺𑀕𑀡𑁂 𑀦𑀻𑀮𑀼𑀧𑁆𑀧𑀮𑀓𑀼𑀫𑀼𑀤𑀓𑀫𑀮𑀸𑀤𑀺𑀲𑀜𑁆𑀙𑀦𑁆𑀦𑀸𑀦𑀺 𑀧𑀮𑁆𑀮𑀮𑀸𑀦𑀺 𑀦𑀸𑀦𑀸𑀓𑀼𑀲𑀼𑀫𑀲𑀜𑁆𑀙𑀦𑁆𑀦𑀯𑀺𑀝𑀧𑀸 𑀯𑀦𑀭𑀸𑀚𑀺𑀬𑁄 𑀫𑀡𑀺𑀓𑁆𑀔𑀦𑁆𑀥𑀦𑀺𑀫𑁆𑀫𑀮𑀚𑀮𑀧𑀯𑀸𑀳𑀜𑁆𑀘 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀧𑀲𑁆𑀲𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀲𑁄𑀪𑀦𑀸 𑀯𑀢𑀺𑀫𑁂 𑀫𑀺𑀕𑀚𑀸𑀢𑀸 𑀧𑀓𑁆𑀔𑀺𑀕𑀡𑀸 𑀧𑀮𑁆𑀮𑀮𑀸𑀦𑀺 𑀯𑀦𑀭𑀸𑀚𑀺𑀬𑁄 𑀦𑀤𑀻 𑀦𑁂𑀭𑀜𑁆𑀚𑀭𑀸’’𑀢𑀺. 𑀲𑁄 𑀢𑀫𑁆𑀧𑀺 𑀏𑀯𑀁 𑀧𑀭𑀺𑀢𑁆𑀢𑀓𑀁 𑀯𑀺𑀢𑀓𑁆𑀓𑀁 𑀕𑀳𑁂𑀢𑁆𑀯𑀸 𑀓𑀸𑀫𑀯𑀺𑀢𑀓𑁆𑀓𑀫𑀓𑀸𑀲𑀺, 𑀢𑁂𑀦𑀸𑀳 ‘‘𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄’’𑀢𑀺.

𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀻𑀢𑀺 𑀅𑀢𑁆𑀢𑀤𑀼𑀓𑁆𑀔𑀸𑀬𑀧𑀺. 𑀏𑀲𑁂𑀯𑀦𑀬𑁄 𑀲𑀩𑁆𑀩𑀢𑁆𑀣. 𑀓𑀺𑀁 𑀧𑀦 𑀫𑀳𑀸𑀲𑀢𑁆𑀢𑀲𑁆𑀲 𑀉𑀪𑀬𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑀓𑀯𑀺𑀢𑀓𑁆𑀓𑁄 𑀦𑀸𑀫 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀅𑀧𑀭𑀺𑀜𑁆𑀜𑀸𑀬𑀁 𑀞𑀺𑀢𑀲𑁆𑀲 𑀧𑀦 𑀯𑀺𑀢𑀓𑁆𑀓𑁄 𑀬𑀸𑀯 𑀉𑀪𑀬𑀩𑁆𑀬𑀸𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀏𑀢𑀸𑀦𑀺 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑁄𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀢𑀺, 𑀮𑁄𑀓𑀺𑀬𑀧𑀜𑁆𑀜𑀁 𑀧𑀦 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀧𑀜𑁆𑀘𑀸𑀪𑀺𑀜𑁆𑀜𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀫𑁆𑀧𑀺 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀔𑀺𑀧𑀢𑀻𑀢𑀺 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑁄. 𑀯𑀺𑀖𑀸𑀢𑀧𑀓𑁆𑀔𑀺𑀓𑁄𑀢𑀺 𑀤𑀼𑀓𑁆𑀔𑀓𑁄𑀝𑁆𑀞𑀸𑀲𑀺𑀓𑁄. 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫, 𑀢𑀁 𑀧𑀘𑁆𑀘𑀓𑁆𑀔𑀁 𑀓𑀸𑀢𑀼𑀁 𑀦 𑀤𑁂𑀢𑀻𑀢𑀺 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄. 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀔𑀬𑀁 𑀦𑀢𑁆𑀣𑀺𑀪𑀸𑀯𑀁 𑀕𑀘𑁆𑀙𑀢𑀺. 𑀉𑀤𑀓𑀧𑀼𑀧𑁆𑀨𑀼𑀴𑀓𑁄 𑀯𑀺𑀬 𑀦𑀺𑀭𑀼𑀚𑁆𑀛𑀢𑀺. 𑀧𑀚𑀳𑀫𑁂𑀯𑀸𑀢𑀺 𑀧𑀚𑀳𑀺𑀫𑁂𑀯. 𑀯𑀺𑀦𑁄𑀤𑀫𑁂𑀯𑀸𑀢𑀺 𑀦𑀻𑀳𑀭𑀺𑀫𑁂𑀯. 𑀩𑁆𑀬𑀦𑁆𑀢𑀫𑁂𑀯 𑀦𑀁 𑀅𑀓𑀸𑀲𑀺𑀦𑁆𑀢𑀺 𑀯𑀺𑀕𑀢𑀦𑁆𑀢𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀯𑀝𑀼𑀫𑀁 𑀧𑀭𑀺𑀘𑁆𑀙𑀺𑀦𑁆𑀦𑀫𑁂𑀯 𑀦𑀁 𑀅𑀓𑀸𑀲𑀺𑀁.

𑁨𑁦𑁮. 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄𑀢𑀺 𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀭𑀽𑀧𑀖𑀸𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁄 𑀦𑀸𑀫 𑀯𑀺𑀢𑀓𑁆𑀓𑁄 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀢𑀺, 𑀅𑀣𑀲𑁆𑀲 𑀅𑀢𑀺𑀯𑀲𑁆𑀲𑀅𑀘𑁆𑀘𑀼𑀡𑁆𑀳𑀅𑀢𑀺𑀲𑀻𑀢𑀸𑀤𑀻𑀦𑀺 𑀧𑀦 𑀧𑀝𑀺𑀘𑁆𑀘 𑀘𑀺𑀢𑁆𑀢𑀯𑀺𑀧𑀭𑀺𑀡𑀸𑀫𑀪𑀸𑀯𑁄 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄’’𑀢𑀺 𑀆𑀳. 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄𑀢𑀺 𑀦 𑀫𑀳𑀸𑀲𑀢𑁆𑀢𑀲𑁆𑀲 𑀧𑀭𑁂𑀲𑀁 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑁂 𑀧𑀦 𑀉𑀤𑁆𑀥𑀢𑀸𑀓𑀸𑀭𑁄 𑀅𑀦𑁂𑀓𑀕𑁆𑀕𑀢𑀸𑀓𑀸𑀭𑁄 𑀳𑁄𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀫𑀓𑀸𑀲𑀺. 𑀧𑀡𑁆𑀡𑀲𑀸𑀮𑀸𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑁄 𑀳𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀓𑁂 𑀯𑀸𑀴𑀫𑀺𑀕𑁂 𑀲𑀽𑀓𑀭𑀸𑀤𑀬𑁄 𑀔𑀼𑀤𑁆𑀤𑀫𑀺𑀕𑁂 𑀯𑀺𑀳𑀺𑀁𑀲𑀦𑁆𑀢𑁂 𑀧𑀲𑁆𑀲𑀢𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀇𑀫𑀲𑁆𑀫𑀺𑀫𑁆𑀧𑀺 𑀦𑀸𑀫 𑀅𑀓𑀼𑀢𑁄𑀪𑀬𑁂 𑀅𑀭𑀜𑁆𑀜𑁂 𑀇𑀫𑁂𑀲𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀘𑁆𑀘𑀢𑁆𑀣𑀺𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀩𑀮𑀯𑀦𑁆𑀢𑁄 𑀤𑀼𑀩𑁆𑀩𑀮𑁂 𑀔𑀸𑀤𑀦𑁆𑀢𑀺, 𑀩𑀮𑀯𑀦𑁆𑀢𑀔𑀸𑀤𑀺𑀢𑀸 𑀯𑀢𑁆𑀢𑀦𑁆𑀢𑀻𑀢𑀺 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀺. 𑀅𑀜𑁆𑀜𑁂𑀧𑀺 𑀩𑀺𑀴𑀸𑀭𑀸𑀤𑀬𑁄 𑀓𑀼𑀓𑁆𑀓𑀼𑀝𑀫𑀽𑀲𑀺𑀓𑀸𑀤𑀻𑀦𑀺 𑀔𑀸𑀤𑀦𑁆𑀢𑁂 𑀧𑀲𑁆𑀲𑀢𑀺, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀫𑀦𑀼𑀲𑁆𑀲𑁂 𑀭𑀸𑀚𑀓𑀫𑁆𑀫𑀺𑀓𑁂𑀳𑀺 𑀉𑀧𑀤𑁆𑀤𑀼𑀢𑁂 𑀯𑀥𑀩𑀦𑁆𑀥𑀸𑀤𑀻𑀦𑀺 𑀅𑀦𑀼𑀪𑀯𑀦𑁆𑀢𑁂 𑀅𑀢𑁆𑀢𑀦𑁄 𑀓𑀲𑀺𑀯𑀡𑀺𑀚𑁆𑀚𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀚𑀻𑀯𑀺𑀢𑀼𑀁 𑀦 𑀮𑀪𑀦𑁆𑀢𑀻𑀢𑀺 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀚𑁆𑀚𑀢𑀺 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄’’𑀢𑀺 𑀆𑀳. 𑀢𑀣𑀸 𑀢𑀣𑀸𑀢𑀺 𑀢𑁂𑀦 𑀢𑁂𑀦 𑀆𑀓𑀸𑀭𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀲𑀼 𑀬𑀁 𑀬𑀁 𑀯𑀺𑀢𑀓𑁆𑀓𑁂𑀢𑀺, 𑀬𑀁 𑀬𑀁 𑀯𑀺𑀢𑀓𑁆𑀓𑀁 𑀧𑀯𑀢𑁆𑀢𑁂𑀢𑀺, 𑀢𑁂𑀦 𑀢𑁂𑀦𑁂 𑀘𑀲𑁆𑀲𑀸𑀓𑀸𑀭𑁂𑀦 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀪𑀸𑀯𑁄 𑀘𑁂𑀢𑀲𑁄 𑀦 𑀳𑀺 𑀳𑁄𑀢𑀻𑀢𑀺. 𑀧𑀳𑀸𑀲𑀺 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀁 𑀧𑀚𑀳𑀢𑀺. 𑀩𑀳𑀼𑀮𑀫𑀓𑀸𑀲𑀻𑀢𑀺 𑀩𑀳𑀼𑀮𑀁 𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀓𑀸𑀫𑀯𑀺𑀢𑀓𑁆𑀓𑀸𑀬 𑀘𑀺𑀢𑁆𑀢𑀦𑁆𑀢𑀺 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀓𑀸𑀫𑀯𑀺𑀢𑀓𑁆𑀓𑀢𑁆𑀣𑀸𑀬. 𑀬𑀣𑀸 𑀓𑀸𑀫𑀯𑀺𑀢𑀓𑁆𑀓𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀫𑁂𑀯𑀁 𑀦𑀫𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀸𑀦𑀺 𑀅𑀢𑁆𑀣𑀤𑀻𑀧𑀺𑀓𑀁 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻 𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀝𑁆𑀞𑀲𑀫𑁆𑀩𑀸𑀥𑁂𑀢𑀺 𑀲𑀲𑁆𑀲𑀲𑀫𑁆𑀩𑀸𑀥𑁂. 𑀆𑀓𑁄𑀝𑁂𑀬𑁆𑀬𑀸𑀢𑀺 𑀉𑀚𑀼𑀓𑀁 𑀧𑀺𑀝𑁆𑀞𑀺𑀬𑀁 𑀧𑀳𑀭𑁂𑀬𑁆𑀬. 𑀧𑀝𑀺𑀓𑁄𑀝𑁂𑀬𑁆𑀬𑀸𑀢𑀺 𑀢𑀺𑀭𑀺𑀬𑀁 𑀨𑀸𑀲𑀼𑀓𑀸𑀲𑀼 𑀧𑀳𑀭𑁂𑀬𑁆𑀬. 𑀲𑀦𑁆𑀦𑀺𑀭𑀼𑀦𑁆𑀥𑁂𑀬𑁆𑀬𑀸𑀢𑀺 𑀆𑀯𑀭𑀺𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬. 𑀲𑀦𑁆𑀦𑀺𑀯𑀸𑀭𑁂𑀬𑁆𑀬𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀕𑀦𑁆𑀢𑀼𑀁 𑀦 𑀤𑀤𑁂𑀬𑁆𑀬. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀢𑁂𑀦 𑀓𑀸𑀭𑀡𑁂𑀦, 𑀏𑀯𑀁 𑀅𑀭𑀓𑁆𑀔𑀺𑀢𑀸𑀦𑀁 𑀕𑀼𑀦𑁆𑀦𑀁 𑀧𑀭𑁂𑀲𑀁 𑀲𑀲𑁆𑀲𑀔𑀸𑀤𑀦𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀩𑀸𑀮𑁄 𑀳𑀺 𑀕𑁄𑀧𑀸𑀮𑁄𑀓𑁄 𑀏𑀯𑀁 𑀕𑀸𑀯𑁄 𑀅𑀭𑀓𑁆𑀔𑀫𑀸𑀦𑁄 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀪𑀢𑁆𑀢𑀯𑁂𑀢𑀦𑀁 𑀔𑀸𑀤𑀢𑀺, 𑀉𑀚𑀼𑀁 𑀕𑀸𑀯𑁄 𑀭𑀓𑁆𑀔𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀢𑀺, 𑀓𑀼𑀮𑁂𑀳𑀺 𑀲𑀤𑁆𑀥𑀺𑀁 𑀯𑁂𑀭𑀁 𑀕𑀡𑁆𑀳𑀸𑀧𑁂𑀢𑀻’’𑀢𑀺 𑀕𑁄𑀲𑀸𑀫𑀺𑀓𑀸𑀦𑀫𑁆𑀧𑀺 𑀲𑀦𑁆𑀢𑀺𑀓𑀸 𑀯𑀥𑀸𑀤𑀻𑀦𑀺 𑀧𑀸𑀧𑀼𑀡𑀸𑀢𑀺, 𑀓𑀺𑀝𑁆𑀞𑀲𑀸𑀫𑀺𑀓𑀸𑀦𑀫𑁆𑀧𑀺. 𑀧𑀡𑁆𑀟𑀺𑀢𑁄 𑀧𑀦 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀲𑀫𑁆𑀧𑀲𑁆𑀲𑀦𑁆𑀢𑁄 𑀕𑀸𑀯𑁄 𑀲𑀸𑀥𑀼𑀓𑀁 𑀭𑀓𑁆𑀔𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀆𑀤𑀻𑀦𑀯𑀦𑁆𑀢𑀺 𑀉𑀧𑀤𑁆𑀤𑀯𑀁. 𑀑𑀓𑀸𑀭𑀦𑁆𑀢𑀺 𑀮𑀸𑀫𑀓𑀁, 𑀔𑀦𑁆𑀥𑁂𑀲𑀼 𑀯𑀸 𑀑𑀢𑀸𑀭𑀁. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀓𑀺𑀮𑀺𑀝𑁆𑀞𑀪𑀸𑀯𑀁. 𑀦𑁂𑀓𑁆𑀔𑀫𑁆𑀫𑁂𑀢𑀺 𑀦𑁂𑀓𑁆𑀔𑀫𑁆𑀫𑀫𑁆𑀳𑀺. 𑀆𑀦𑀺𑀲𑀁𑀲𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑀁. 𑀯𑁄𑀤𑀸𑀦𑀧𑀓𑁆𑀔𑀦𑁆𑀢𑀺 𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀦𑁂𑀓𑁆𑀔𑀫𑁆𑀫𑀫𑁆𑀳𑀺 𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑀁 𑀅𑀤𑁆𑀤𑀲𑀦𑁆𑀢𑀺 𑀅𑀢𑁆𑀣𑁄.

𑁨𑁦𑁯. 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀘 𑀓𑀸𑀫𑁂𑀳𑀺 𑀦𑀺𑀲𑁆𑀲𑀝𑀁 𑀲𑀩𑁆𑀩𑀓𑀼𑀲𑀮𑀁, 𑀏𑀓𑀥𑀫𑁆𑀫𑁂 𑀲𑀗𑁆𑀕𑀬𑁆𑀳𑀫𑀸𑀦𑁂 𑀦𑀺𑀩𑁆𑀩𑀸𑀦𑀫𑁂𑀯. 𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀓𑀺𑀝𑁆𑀞𑀲𑀫𑁆𑀩𑀸𑀥𑀁 𑀯𑀺𑀬 𑀳𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁, 𑀓𑀽𑀝𑀕𑀸𑀯𑁄 𑀯𑀺𑀬 𑀓𑀽𑀝𑀘𑀺𑀢𑁆𑀢𑀁, 𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑁄, 𑀘𑀢𑀼𑀩𑁆𑀩𑀺𑀥𑀪𑀬𑀁 𑀯𑀺𑀬 𑀅𑀢𑁆𑀢𑀧𑀭𑀽𑀪𑀬𑀩𑁆𑀬𑀸𑀩𑀸𑀥𑀸𑀬 𑀲𑀁𑀯𑀢𑁆𑀢𑀦𑀯𑀺𑀢𑀓𑁆𑀓𑁄, 𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑀲𑁆𑀲 𑀘𑀢𑀼𑀩𑁆𑀩𑀺𑀥𑀁 𑀪𑀬𑀁 𑀤𑀺𑀲𑁆𑀯𑀸 𑀓𑀺𑀝𑁆𑀞𑀲𑀫𑁆𑀩𑀸𑀥𑁂 𑀅𑀧𑁆𑀧𑀫𑀸𑀤𑁂𑀦 𑀕𑁄𑀭𑀓𑁆𑀔𑀡𑀁 𑀯𑀺𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑀁 𑀧𑀤𑀳𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀤𑀺𑀪𑀬𑀁 𑀤𑀺𑀲𑁆𑀯𑀸 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀬𑀣𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀘𑀺𑀢𑁆𑀢𑀭𑀓𑁆𑀔𑀡𑀁. 𑀧𑀜𑁆𑀜𑀸𑀯𑀼𑀤𑁆𑀥𑀺𑀓𑁄𑀢𑀺𑀆𑀤𑀻𑀲𑀼 𑀅𑀦𑀼𑀧𑁆𑀧𑀦𑁆𑀦𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀬 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀼𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀢𑀻𑀢𑀺 𑀧𑀜𑁆𑀜𑀸𑀯𑀼𑀤𑁆𑀥𑀺𑀓𑁄. 𑀦 𑀤𑀼𑀓𑁆𑀔𑀓𑁄𑀝𑁆𑀞𑀸𑀲𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀯𑀺𑀖𑀸𑀢𑀧𑀓𑁆𑀔𑀺𑀓𑁄. 𑀦𑀺𑀩𑁆𑀩𑀸𑀦𑀥𑀸𑀢𑀼𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄. 𑀭𑀢𑁆𑀢𑀺𑀁 𑀘𑁂𑀧𑀺 𑀦𑀁, 𑀪𑀺𑀓𑁆𑀔𑀯𑁂, 𑀅𑀦𑀼𑀯𑀺𑀢𑀓𑁆𑀓𑁂𑀬𑁆𑀬𑀦𑁆𑀢𑀺 𑀲𑀓𑀮𑀭𑀢𑁆𑀢𑀺𑀁 𑀘𑁂𑀧𑀺 𑀢𑀁 𑀯𑀺𑀢𑀓𑁆𑀓𑀁 𑀧𑀯𑀢𑁆𑀢𑁂𑀬𑁆𑀬𑀁. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀢𑀁𑀫𑀽𑀮𑀓𑀁. 𑀑𑀳𑀜𑁆𑀜𑁂𑀬𑁆𑀬𑀸𑀢𑀺 𑀉𑀕𑁆𑀖𑀸𑀢𑀻𑀬𑁂𑀬𑁆𑀬, 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀆𑀭𑀸𑀢𑀺 𑀤𑀽𑀭𑁂. 𑀲𑀫𑀸𑀥𑀺𑀫𑁆𑀳𑀸𑀢𑀺 𑀉𑀧𑀘𑀸𑀭𑀲𑀫𑀸𑀥𑀺𑀢𑁄𑀧𑀺 𑀅𑀧𑁆𑀧𑀦𑀸𑀲𑀫𑀸𑀥𑀺𑀢𑁄𑀧𑀺. 𑀲𑁄 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀦𑁆𑀢𑀺 𑀲𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀫𑀸 𑀫𑁂 𑀘𑀺𑀢𑁆𑀢𑀁 𑀲𑀫𑀸𑀥𑀺𑀫𑁆𑀳𑀸 𑀤𑀽𑀭𑁂 𑀳𑁄𑀢𑀽𑀢𑀺 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺, 𑀕𑁄𑀘𑀭𑀚𑁆𑀛𑀢𑁆𑀢𑁂 𑀞𑀧𑁂𑀫𑀻𑀢𑀺 𑀅𑀢𑁆𑀣𑁄. 𑀲𑀦𑁆𑀦𑀺𑀲𑀸𑀤𑁂𑀫𑀻𑀢𑀺 𑀢𑀢𑁆𑀣𑁂𑀯 𑀘 𑀦𑀁 𑀲𑀦𑁆𑀦𑀺𑀲𑀻𑀤𑀸𑀧𑁂𑀫𑀺. 𑀏𑀓𑁄𑀤𑀺𑀁 𑀓𑀭𑁄𑀫𑀻𑀢𑀺 𑀏𑀓𑀕𑁆𑀕𑀁 𑀓𑀭𑁄𑀫𑀺. 𑀲𑀫𑀸𑀤𑀳𑀸𑀫𑀻𑀢𑀺 𑀲𑀫𑁆𑀫𑀸 𑀆𑀤𑀳𑀸𑀫𑀺, 𑀲𑀼𑀝𑁆𑀞𑀼 𑀆𑀭𑁄𑀧𑁂𑀫𑀻𑀢𑀺 𑀅𑀢𑁆𑀣𑁄. 𑀫𑀸 𑀫𑁂 𑀘𑀺𑀢𑁆𑀢𑀁 𑀊𑀳𑀜𑁆𑀜𑀻𑀢𑀺 𑀫𑀸 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀻𑀬𑀺𑀢𑁆𑀣, 𑀫𑀸 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀽𑀢𑀺 𑀅𑀢𑁆𑀣𑁄.

𑁨𑁧𑁦. 𑀉𑀧𑁆𑀧𑀚𑁆𑀚𑀢𑀺 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄…𑀧𑁂… 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄𑀢𑀺 𑀏𑀢𑁆𑀣 𑀬𑁄 𑀲𑁄 𑀇𑀫𑀸𑀬 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄 𑀓𑀸𑀫𑀧𑀘𑁆𑀘𑀦𑀻𑀓𑀝𑁆𑀞𑁂𑀦 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄𑀢𑀺 𑀯𑀼𑀢𑁆𑀢𑁄. 𑀲𑁄𑀬𑁂𑀯 𑀩𑁆𑀬𑀸𑀧𑀸𑀤𑀧𑀘𑁆𑀘𑀦𑀻𑀓𑀝𑁆𑀞𑁂𑀦 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄𑀢𑀺 𑀘 𑀯𑀺𑀳𑀺𑀁𑀲𑀸𑀧𑀘𑁆𑀘𑀦𑀻𑀓𑀝𑁆𑀞𑁂𑀦 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄𑀢𑀺 𑀘 𑀯𑀼𑀢𑁆𑀢𑁄.

𑀏𑀢𑁆𑀢𑀸𑀯𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀸𑀧𑀝𑁆𑀞𑀧𑀦𑀓𑀸𑀮𑁄 𑀓𑀣𑀺𑀢𑁄. 𑀬𑀲𑁆𑀲 𑀳𑀺 𑀲𑀫𑀸𑀥𑀺𑀧𑀺 𑀢𑀭𑀼𑀡𑁄, 𑀯𑀺𑀧𑀲𑁆𑀲𑀦𑀸𑀧𑀺. 𑀢𑀲𑁆𑀲 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀢𑀺𑀘𑀺𑀭𑀁 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀬𑁄 𑀓𑀺𑀮𑀫𑀢𑀺, 𑀅𑀦𑁆𑀢𑁄 𑀅𑀕𑁆𑀕𑀺 𑀯𑀺𑀬 𑀉𑀝𑁆𑀞𑀳𑀢𑀺, 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀫𑀢𑁆𑀣𑀓𑀢𑁄 𑀉𑀲𑀼𑀫𑀯𑀝𑁆𑀝𑀺 𑀯𑀺𑀬 𑀉𑀝𑁆𑀞𑀳𑀢𑀺, 𑀘𑀺𑀢𑁆𑀢𑀁 𑀳𑀜𑁆𑀜𑀢𑀺 𑀯𑀺𑀳𑀜𑁆𑀜𑀢𑀺 𑀯𑀺𑀧𑁆𑀨𑀦𑁆𑀤𑀢𑀺. 𑀲𑁄 𑀧𑀼𑀦 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀁 𑀧𑀭𑀺𑀤𑀫𑁂𑀢𑁆𑀯𑀸 𑀫𑀼𑀤𑀼𑀓𑀁 𑀓𑀢𑁆𑀯𑀸 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀧𑀼𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑀺. 𑀢𑀲𑁆𑀲 𑀧𑀼𑀦 𑀅𑀢𑀺𑀘𑀺𑀭𑀁 𑀦𑀺𑀲𑀺𑀦𑁆𑀦𑀲𑁆𑀲 𑀢𑀣𑁂𑀯 𑀳𑁄𑀢𑀺. 𑀲𑁄 𑀧𑀼𑀦 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀣𑁂𑀯 𑀓𑀭𑁄𑀢𑀺. 𑀯𑀺𑀧𑀲𑁆𑀲𑀦𑀸𑀬 𑀳𑀺 𑀩𑀳𑀽𑀧𑀓𑀸𑀭𑀸 𑀲𑀫𑀸𑀧𑀢𑁆𑀢𑀺.

𑀬𑀣𑀸 𑀬𑁄𑀥𑀲𑁆𑀲 𑀨𑀮𑀓𑀓𑁄𑀝𑁆𑀞𑀓𑁄 𑀦𑀸𑀫 𑀩𑀳𑀽𑀧𑀓𑀸𑀭𑁄 𑀳𑁄𑀢𑀺, 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀲𑀗𑁆𑀕𑀸𑀫𑀁 𑀧𑀯𑀺𑀲𑀢𑀺, 𑀢𑀢𑁆𑀣 𑀳𑀢𑁆𑀣𑀻𑀳𑀺𑀧𑀺 𑀅𑀲𑁆𑀲𑁂𑀳𑀺𑀧𑀺 𑀬𑁄𑀥𑁂𑀳𑀺𑀧𑀺 𑀲𑀤𑁆𑀥𑀺𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀆𑀯𑀼𑀥𑁂𑀲𑀼 𑀯𑀸 𑀔𑀻𑀡𑁂𑀲𑀼 𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀪𑀸𑀯𑁂 𑀯𑀸 𑀲𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀨𑀮𑀓𑀓𑁄𑀝𑁆𑀞𑀓𑀁 𑀧𑀯𑀺𑀲𑀺𑀢𑁆𑀯𑀸 𑀆𑀯𑀼𑀥𑀸𑀦𑀺𑀧𑀺 𑀕𑀡𑁆𑀳𑀸𑀢𑀺, 𑀯𑀺𑀲𑁆𑀲𑀫𑀢𑀺𑀧𑀺, 𑀪𑀼𑀜𑁆𑀚𑀢𑀺𑀧𑀺, 𑀧𑀸𑀦𑀻𑀬𑀫𑁆𑀧𑀺 𑀧𑀺𑀯𑀢𑀺, 𑀲𑀦𑁆𑀦𑀸𑀳𑀫𑁆𑀧𑀺 𑀧𑀝𑀺𑀲𑀦𑁆𑀦𑀬𑁆𑀳𑀢𑀺, 𑀢𑀁 𑀢𑀁 𑀓𑀢𑁆𑀯𑀸 𑀧𑀼𑀦 𑀲𑀗𑁆𑀕𑀸𑀫𑀁 𑀧𑀯𑀺𑀲𑀢𑀺, 𑀢𑀢𑁆𑀣 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀉𑀘𑁆𑀘𑀸𑀭𑀸𑀤𑀺𑀧𑀻𑀴𑀺𑀢𑁄 𑀯𑀸 𑀓𑁂𑀦𑀘𑀺𑀤𑁂𑀯 𑀯𑀸 𑀓𑀭𑀡𑀻𑀬𑁂𑀦 𑀨𑀮𑀓𑀓𑁄𑀝𑁆𑀞𑀓𑀁 𑀧𑀯𑀺𑀲𑀢𑀺. 𑀢𑀢𑁆𑀣 𑀲𑀦𑁆𑀣𑀫𑁆𑀪𑀺𑀢𑁆𑀯𑀸 𑀧𑀼𑀦 𑀲𑀗𑁆𑀕𑀸𑀫𑀁 𑀧𑀯𑀺𑀲𑀢𑀺, 𑀏𑀯𑀁 𑀬𑁄𑀥𑀲𑁆𑀲 𑀨𑀮𑀓𑀓𑁄𑀝𑁆𑀞𑀓𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀬 𑀩𑀳𑀽𑀧𑀓𑀸𑀭𑀸 𑀲𑀫𑀸𑀧𑀢𑁆𑀢𑀺.

𑀲𑀫𑀸𑀧𑀢𑁆𑀢𑀺𑀬𑀸 𑀧𑀦 𑀲𑀗𑁆𑀕𑀸𑀫𑀦𑀺𑀢𑁆𑀣𑀭𑀡𑀓𑀬𑁄𑀥𑀲𑁆𑀲 𑀨𑀮𑀓𑀓𑁄𑀝𑁆𑀞𑀓𑀢𑁄𑀧𑀺 𑀯𑀺𑀧𑀲𑁆𑀲𑀦𑀸 𑀩𑀳𑀽𑀧𑀓𑀸𑀭𑀢𑀭𑀸. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀫𑀸𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑀺, 𑀯𑀺𑀧𑀲𑁆𑀲𑀦𑀸 𑀧𑀦 𑀣𑀸𑀫𑀚𑀸𑀢𑀸 𑀲𑀫𑀸𑀧𑀢𑁆𑀢𑀺𑀫𑁆𑀧𑀺 𑀭𑀓𑁆𑀔𑀢𑀺. 𑀣𑀸𑀫𑀚𑀸𑀢𑀁 𑀓𑀭𑁄𑀢𑀺.

𑀬𑀣𑀸 𑀳𑀺 𑀣𑀮𑁂 𑀦𑀸𑀯𑀫𑁆𑀧𑀺 𑀦𑀸𑀯𑀸𑀬 𑀪𑀡𑁆𑀟𑀫𑁆𑀧𑀺 𑀲𑀓𑀝𑀪𑀸𑀭𑀁 𑀓𑀭𑁄𑀦𑁆𑀢𑀺. 𑀉𑀤𑀓𑀁 𑀧𑀢𑁆𑀯𑀸 𑀧𑀦 𑀲𑀓𑀝𑀫𑁆𑀧𑀺 𑀲𑀓𑀝𑀪𑀡𑁆𑀟𑀫𑁆𑀧𑀺 𑀬𑀼𑀢𑁆𑀢𑀕𑁄𑀡𑁂𑀧𑀺 𑀦𑀸𑀯𑀸𑀪𑀸𑀭𑀁 𑀓𑀭𑁄𑀦𑁆𑀢𑀺. 𑀦𑀸𑀯𑀸 𑀢𑀺𑀭𑀺𑀬𑀁 𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀲𑀼𑀧𑀝𑁆𑀝𑀦𑀁 𑀕𑀘𑁆𑀙𑀢𑀺, 𑀏𑀯𑀫𑁂𑀯𑀁 𑀓𑀺𑀜𑁆𑀘𑀸𑀧𑀺 𑀲𑀫𑀸𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑀺, 𑀯𑀺𑀧𑀲𑁆𑀲𑀦𑀸 𑀧𑀦 𑀣𑀸𑀫𑀚𑀸𑀢𑀸 𑀲𑀫𑀸𑀧𑀢𑁆𑀢𑀺𑀫𑁆𑀧𑀺 𑀭𑀓𑁆𑀔𑀢𑀺, 𑀣𑀸𑀫𑀚𑀸𑀢𑀁 𑀓𑀭𑁄𑀢𑀺. 𑀣𑀮𑀁 𑀧𑀢𑁆𑀯𑀸 𑀲𑀓𑀝𑀁 𑀯𑀺𑀬 𑀳𑀺 𑀲𑀫𑀸𑀧𑀢𑁆𑀢𑀺. 𑀉𑀤𑀓𑀁 𑀧𑀢𑁆𑀯𑀸 𑀦𑀸𑀯𑀸 𑀯𑀺𑀬 𑀯𑀺𑀧𑀲𑁆𑀲𑀦𑀸. 𑀇𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑁆𑀢𑀸𑀯𑀢𑀸 𑀲𑀫𑀸𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀸𑀧𑀝𑁆𑀞𑀧𑀦𑀓𑀸𑀮𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀜𑁆𑀜𑀤𑁂𑀯𑀸𑀢𑀺𑀆𑀤𑀺 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀇𑀥𑀸𑀧𑀺 𑀅𑀢𑁆𑀣𑀤𑀻𑀧𑀺𑀓𑀁 𑀉𑀧𑀫𑀁 𑀤𑀲𑁆𑀲𑁂𑀢𑀼𑀁 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀸𑀫𑀦𑁆𑀢𑀲𑀫𑁆𑀪𑀢𑁂𑀲𑀽𑀢𑀺 𑀕𑀸𑀫𑀦𑁆𑀢𑀁 𑀆𑀳𑀝𑁂𑀲𑀼. 𑀲𑀢𑀺𑀓𑀭𑀡𑀻𑀬𑀫𑁂𑀯 𑀳𑁄𑀢𑀻𑀢𑀺 𑀏𑀢𑀸 𑀕𑀸𑀯𑁄𑀢𑀺 𑀲𑀢𑀺𑀉𑀧𑁆𑀧𑀸𑀤𑀦𑀫𑀢𑁆𑀢𑀫𑁂𑀯 𑀓𑀸𑀢𑀩𑁆𑀩𑀁 𑀳𑁄𑀢𑀺. 𑀇𑀢𑁄 𑀘𑀺𑀢𑁄 𑀘 𑀕𑀦𑁆𑀢𑁆𑀯𑀸 𑀆𑀓𑁄𑀝𑀦𑀸𑀤𑀺𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀏𑀢𑁂 𑀥𑀫𑁆𑀫𑀸𑀢𑀺 𑀏𑀢𑁂 𑀲𑀫𑀣𑀯𑀺𑀧𑀲𑁆𑀲𑀦𑀸 𑀥𑀫𑁆𑀫𑀸𑀢𑀺 𑀲𑀢𑀼𑀧𑁆𑀧𑀸𑀤𑀦𑀫𑀢𑁆𑀢𑀫𑁂𑀯 𑀓𑀸𑀢𑀩𑁆𑀩𑀁 𑀳𑁄𑀢𑀺. 𑀇𑀫𑀺𑀦𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀣𑀸𑀫𑀚𑀸𑀢𑀓𑀸𑀮𑁄 𑀓𑀣𑀺𑀢𑁄. 𑀢𑀤𑀸 𑀓𑀺𑀭𑀲𑁆𑀲 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀏𑀓𑀸𑀯𑀚𑁆𑀚𑀦𑁂𑀦 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀲𑀢𑁆𑀢 𑀅𑀦𑀼𑀧𑀲𑁆𑀲𑀦𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀆𑀭𑀼𑀴𑁆𑀳𑁄 𑀳𑁄𑀢𑀺.

𑁨𑁧𑁫. 𑀲𑁂𑀬𑁆𑀬𑀣𑀸𑀧𑀻𑀢𑀺 𑀇𑀥 𑀓𑀺𑀁 𑀤𑀲𑁆𑀲𑁂𑀢𑀺? 𑀅𑀬𑀁 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺, 𑀲𑀢𑁆𑀢𑀸𑀦𑀜𑁆𑀳𑀺 𑀳𑀺𑀢𑀽𑀧𑀘𑀸𑀭𑀁 𑀅𑀢𑁆𑀢𑀦𑁄 𑀲𑀢𑁆𑀣𑀼𑀪𑀸𑀯𑀲𑀫𑁆𑀧𑀤𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀅𑀭𑀜𑁆𑀜𑁂𑀢𑀺 𑀅𑀝𑀯𑀺𑀬𑀁. 𑀧𑀯𑀦𑁂𑀢𑀺 𑀯𑀦𑀲𑀡𑁆𑀟𑁂. 𑀅𑀢𑁆𑀣𑀢𑁄 𑀳𑀺 𑀇𑀤𑀁 𑀤𑁆𑀯𑀬𑀁 𑀏𑀓𑀫𑁂𑀯, 𑀧𑀞𑀫𑀲𑁆𑀲 𑀧𑀦 𑀤𑀼𑀢𑀺𑀬𑀁 𑀯𑁂𑀯𑀘𑀦𑀁. 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑁄𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀁 𑀦𑀺𑀩𑁆𑀪𑀬𑀝𑁆𑀞𑀸𑀦𑀁 𑀅𑀦𑀺𑀘𑁆𑀙𑀦𑁆𑀢𑁄 𑀪𑀬𑀫𑁂𑀯 𑀇𑀘𑁆𑀙𑀦𑁆𑀢𑁄. 𑀲𑁄𑀯𑀢𑁆𑀣𑀺𑀓𑁄𑀢𑀺 𑀲𑀼𑀯𑀢𑁆𑀣𑀺𑀪𑀸𑀯𑀸𑀯𑀳𑁄. 𑀧𑀻𑀢𑀺𑀕𑀫𑀦𑀻𑀬𑁄𑀢𑀺 𑀢𑀼𑀝𑁆𑀞𑀺𑀁 𑀕𑀫𑀦𑀻𑀬𑁄. ‘‘𑀧𑀻𑀢𑀕𑀫𑀦𑀻𑀬𑁄’’𑀢𑀺 𑀯𑀸 𑀧𑀸𑀞𑁄. 𑀧𑀺𑀤𑀳𑁂𑀬𑁆𑀬𑀸𑀢𑀺 𑀲𑀸𑀔𑀸𑀤𑀻𑀳𑀺 𑀣𑀓𑁂𑀬𑁆𑀬. 𑀯𑀺𑀯𑀭𑁂𑀬𑁆𑀬𑀸𑀢𑀺 𑀯𑀺𑀲𑀤𑀫𑀼𑀔𑀁 𑀓𑀢𑁆𑀯𑀸 𑀯𑀺𑀯𑀝𑀁 𑀓𑀭𑁂𑀬𑁆𑀬. 𑀓𑀼𑀫𑁆𑀫𑀕𑁆𑀕𑀦𑁆𑀢𑀺 𑀉𑀤𑀓𑀯𑀦𑀧𑀩𑁆𑀩𑀢𑀸𑀤𑀻𑀳𑀺 𑀲𑀦𑁆𑀦𑀺𑀭𑀼𑀤𑁆𑀥𑀁 𑀅𑀫𑀕𑁆𑀕𑀁. 𑀑𑀤𑀳𑁂𑀬𑁆𑀬 𑀑𑀓𑀘𑀭𑀦𑁆𑀢𑀺 𑀢𑁂𑀲𑀁 𑀑𑀓𑁂 𑀘𑀭𑀫𑀸𑀦𑀁 𑀯𑀺𑀬 𑀏𑀓𑀁 𑀤𑀻𑀧𑀓𑀫𑀺𑀕𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀬𑁆𑀬. 𑀑𑀓𑀘𑀸𑀭𑀺𑀓𑀦𑁆𑀢𑀺 𑀤𑀻𑀖𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑀁𑀬𑁂𑀯 𑀫𑀺𑀕𑀺𑀁.

𑀫𑀺𑀕𑀮𑀼𑀤𑁆𑀤𑀓𑁄 𑀳𑀺 𑀅𑀭𑀜𑁆𑀜𑀁 𑀫𑀺𑀕𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀇𑀥 𑀯𑀲𑀦𑁆𑀢𑀺, 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀦𑀺𑀓𑁆𑀔𑀫𑀦𑁆𑀢𑀺, 𑀏𑀢𑁆𑀣 𑀘𑀭𑀦𑁆𑀢𑀺, 𑀏𑀢𑁆𑀣 𑀧𑀺𑀯𑀦𑁆𑀢𑀺, 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀧𑀯𑀺𑀲𑀦𑁆𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀕𑁆𑀕𑀁 𑀧𑀺𑀥𑀸𑀬 𑀓𑀼𑀫𑁆𑀫𑀕𑁆𑀕𑀁 𑀯𑀺𑀯𑀭𑀺𑀢𑁆𑀯𑀸 𑀑𑀓𑀘𑀭𑀜𑁆𑀘 𑀑𑀓𑀘𑀸𑀭𑀺𑀓𑀜𑁆𑀘 𑀞𑀧𑁂𑀢𑁆𑀯𑀸 𑀲𑀬𑀁 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀣 𑀲𑀸𑀬𑀦𑁆𑀳𑀲𑀫𑀬𑁂 𑀫𑀺𑀕𑀸 𑀅𑀓𑀼𑀢𑁄𑀪𑀬𑁂 𑀅𑀭𑀜𑁆𑀜𑁂 𑀘𑀭𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀫𑀺𑀕𑀧𑁄𑀢𑀓𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀫𑀸𑀦𑀸 𑀯𑀲𑀦𑀝𑁆𑀞𑀸𑀦𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀑𑀓𑀘𑀭𑀜𑁆𑀘 𑀑𑀓𑀘𑀸𑀭𑀺𑀓𑀜𑁆𑀘 𑀤𑀺𑀲𑁆𑀯𑀸 ‘‘𑀲𑀳𑀸𑀬𑀓𑀸 𑀦𑁄 𑀆𑀕𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀦𑀺𑀭𑀸𑀲𑀗𑁆𑀓𑀸 𑀧𑀯𑀺𑀲𑀦𑁆𑀢𑀺, 𑀢𑁂 𑀫𑀕𑁆𑀕𑀁 𑀧𑀺𑀳𑀺𑀢𑀁 𑀤𑀺𑀲𑁆𑀯𑀸 ‘‘𑀦𑀸𑀬𑀁 𑀫𑀕𑁆𑀕𑁄, 𑀅𑀬𑀁 𑀫𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀫𑀺𑀕𑀮𑀼𑀤𑁆𑀤𑀓𑁄 𑀦 𑀢𑀸𑀯 𑀓𑀺𑀜𑁆𑀘𑀺 𑀓𑀭𑁄𑀢𑀺, 𑀧𑀯𑀺𑀝𑁆𑀞𑁂𑀲𑀼 𑀧𑀦 𑀲𑀩𑁆𑀩𑀧𑀘𑁆𑀙𑀺𑀫𑀁 𑀲𑀡𑀺𑀓𑀁 𑀧𑀳𑀭𑀢𑀺. 𑀲𑁄 𑀉𑀢𑁆𑀢𑀲𑀢𑀺, 𑀢𑀢𑁄 𑀲𑀩𑁆𑀩𑁂 𑀉𑀢𑁆𑀢𑀲𑀺𑀢𑁆𑀯𑀸 ‘‘𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀼𑀭𑀢𑁄 𑀑𑀮𑁄𑀓𑁂𑀦𑁆𑀢𑀸 𑀉𑀤𑀓𑁂𑀦 𑀯𑀸 𑀯𑀦𑁂𑀦 𑀯𑀸 𑀧𑀩𑁆𑀩𑀢𑁂𑀦 𑀯𑀸 𑀲𑀦𑁆𑀦𑀺𑀭𑀼𑀤𑁆𑀥𑀁 𑀫𑀕𑁆𑀕𑀁 𑀤𑀺𑀲𑁆𑀯𑀸 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀅𑀗𑁆𑀕𑀼𑀮𑀺𑀲𑀗𑁆𑀔𑀮𑀺𑀓𑀁 𑀯𑀺𑀬 𑀕𑀳𑀦𑀯𑀦𑀁 𑀧𑀯𑀺𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀧𑀯𑀺𑀝𑁆𑀞𑀫𑀕𑁆𑀕𑁂𑀦𑁂𑀯 𑀦𑀺𑀓𑁆𑀔𑀫𑀺𑀢𑀼𑀁 𑀆𑀭𑀪𑀦𑁆𑀢𑀺. 𑀮𑀼𑀤𑁆𑀤𑀓𑁄 𑀢𑁂𑀲𑀁 𑀦𑀺𑀯𑀢𑁆𑀢𑀦𑀪𑀸𑀯𑀁 𑀜𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑀺𑀁𑀲𑀫𑁆𑀧𑀺 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀫𑀺𑀕𑁂 𑀖𑀸𑀢𑁂𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀫𑀺𑀕𑀲𑀗𑁆𑀖𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁.

‘‘𑀦𑀦𑁆𑀤𑀻𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀅𑀯𑀺𑀚𑁆𑀚𑀸𑀬𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀇𑀫𑁂 𑀲𑀢𑁆𑀢𑀸 𑀅𑀯𑀺𑀚𑁆𑀚𑀸𑀬 𑀅𑀜𑁆𑀜𑀸𑀡𑀸 𑀳𑀼𑀢𑁆𑀯𑀸 𑀦𑀦𑁆𑀤𑀻𑀭𑀸𑀕𑁂𑀦 𑀆𑀩𑀦𑁆𑀥𑀺𑀢𑁆𑀯𑀸 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀉𑀧𑀦𑀻𑀢𑀸 𑀯𑀝𑁆𑀝𑀤𑀼𑀓𑁆𑀔𑀲𑀢𑁆𑀢𑀺𑀬𑀸 𑀖𑀸𑀢𑀁 𑀮𑀪𑀦𑁆𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀑𑀓𑀘𑀭𑀁 𑀦𑀦𑁆𑀤𑀻𑀭𑀸𑀕𑁄𑀢𑀺, 𑀑𑀓𑀘𑀸𑀭𑀺𑀓𑀁 𑀅𑀯𑀺𑀚𑁆𑀚𑀸𑀢𑀺 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀫𑀺𑀕𑀮𑀼𑀤𑁆𑀤𑀓𑁄 𑀳𑀺 𑀏𑀓𑀤𑀸𑀧𑀺 𑀢𑁂𑀲𑀁 𑀲𑀸𑀔𑀸𑀪𑀗𑁆𑀕𑁂𑀦 𑀲𑀭𑀻𑀭𑀁 𑀧𑀼𑀜𑁆𑀙𑀺𑀢𑁆𑀯𑀸 𑀫𑀦𑀼𑀲𑁆𑀲𑀕𑀦𑁆𑀥𑀁 𑀅𑀧𑀦𑁂𑀢𑁆𑀯𑀸 𑀑𑀓𑀘𑀭𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀑𑀓𑀘𑀸𑀭𑀺𑀓𑀁 𑀲𑀳 𑀭𑀚𑁆𑀚𑀼𑀬𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀢𑁆𑀢𑀺𑀁 𑀆𑀤𑀸𑀬 𑀑𑀓𑀘𑀭𑀲𑁆𑀲 𑀲𑀦𑁆𑀢𑀺𑀓𑁂 𑀢𑀺𑀝𑁆𑀞𑀢𑀺, 𑀑𑀓𑀘𑀸𑀭𑀺𑀓𑀸 𑀫𑀺𑀕𑀕𑀡𑀲𑁆𑀲 𑀘𑀭𑀡𑀝𑁆𑀞𑀸𑀦𑀸𑀪𑀺𑀫𑀼𑀔𑀻 𑀕𑀘𑁆𑀙𑀢𑀺. 𑀢𑀁 𑀤𑀺𑀲𑁆𑀯𑀸 𑀫𑀺𑀕𑀸 𑀲𑀻𑀲𑀸𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀲𑀸𑀧𑀺 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑁂 ‘‘𑀅𑀫𑁆𑀳𑀸𑀓𑀁 𑀲𑀫𑀚𑀸𑀢𑀺𑀓𑀸 𑀅𑀬’’𑀦𑁆𑀢𑀺 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀺. 𑀲𑀸𑀧𑀺 𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀻 𑀯𑀺𑀬 𑀲𑀡𑀺𑀓𑀁 𑀉𑀧𑀕𑀘𑁆𑀙𑀢𑀺. 𑀆𑀭𑀜𑁆𑀜𑀺𑀓𑁄 𑀬𑀽𑀣𑀧𑀢𑀺𑀫𑀺𑀕𑁄 𑀢𑀲𑁆𑀲𑀸 𑀯𑀸𑀢𑀁 𑀮𑀪𑀺𑀢𑁆𑀯𑀸 𑀲𑀓𑀪𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀤𑀪𑀺𑀫𑀼𑀔𑁄 𑀳𑁄𑀢𑀺.

𑀲𑀢𑁆𑀢𑀸𑀦𑀜𑁆𑀳𑀺 𑀦𑀯𑀦𑀯𑀫𑁂𑀯 𑀧𑀺𑀬𑀁 𑀳𑁄𑀢𑀺. 𑀑𑀓𑀘𑀸𑀭𑀺𑀓𑀸 𑀆𑀭𑀜𑁆𑀜𑀺𑀓𑀲𑁆𑀲 𑀫𑀺𑀕𑀲𑁆𑀲 𑀅𑀘𑁆𑀘𑀸𑀲𑀦𑁆𑀦𑀪𑀸𑀯𑀁 𑀅𑀤𑀢𑁆𑀯𑀸 𑀢𑀤𑀪𑀺𑀫𑀼𑀔𑀻𑀯 𑀧𑀘𑁆𑀙𑀢𑁄 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀑𑀓𑀘𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺, 𑀬𑀢𑁆𑀣 𑀬𑀢𑁆𑀣𑀲𑁆𑀲𑀸 𑀭𑀚𑁆𑀚𑀼 𑀮𑀕𑁆𑀕𑀢𑀺, 𑀢𑀢𑁆𑀣 𑀢𑀢𑁆𑀣 𑀔𑀼𑀭𑁂𑀦 𑀧𑀳𑀭𑀺𑀢𑁆𑀯𑀸 𑀫𑁄𑀘𑁂𑀢𑀺, 𑀆𑀭𑀜𑁆𑀜𑀺𑀓𑁄 𑀫𑀺𑀕𑁄 𑀑𑀓𑀘𑀭𑀁 𑀤𑀺𑀲𑁆𑀯𑀸 𑀑𑀓𑀘𑀸𑀭𑀺𑀓𑀸𑀬 𑀲𑀫𑁆𑀫𑀢𑁆𑀢𑁄 𑀳𑀼𑀢𑁆𑀯𑀸 𑀑𑀓𑀘𑀭𑁂 𑀉𑀲𑀽𑀬𑀁 𑀓𑀢𑁆𑀯𑀸 𑀧𑀺𑀝𑁆𑀞𑀺𑀁 𑀦𑀸𑀫𑁂𑀢𑁆𑀯𑀸 𑀲𑀻𑀲𑀁 𑀓𑀫𑁆𑀧𑁂𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀢𑀺𑀁 𑀚𑀺𑀯𑁆𑀳𑀸𑀬 𑀮𑁂𑀳𑀦𑁆𑀢𑁄𑀧𑀺 ‘‘𑀓𑀺𑀁 𑀏𑀢’’𑀦𑁆𑀢𑀺 𑀦 𑀚𑀸𑀦𑀸𑀢𑀺, 𑀑𑀓𑀘𑀭𑁄𑀧𑀺 𑀲𑀘𑀲𑁆𑀲 𑀉𑀧𑀭𑀺𑀪𑀸𑀕𑁂𑀦 𑀢𑀁 𑀫𑀺𑀕𑀁 𑀧𑀳𑀭𑀺𑀢𑀼𑀁 𑀲𑀼𑀔𑀁 𑀳𑁄𑀢𑀺, 𑀧𑀺𑀝𑁆𑀞𑀺𑀁 𑀦𑀸𑀫𑁂𑀢𑀺. 𑀲𑀘𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑁂𑀦 𑀧𑀳𑀭𑀺𑀢𑀼𑀁 𑀲𑀼𑀔𑀁 𑀳𑁄𑀢𑀺, 𑀳𑀤𑀬𑀁 𑀉𑀦𑁆𑀦𑀸𑀫𑁂𑀢𑀺. 𑀅𑀣 𑀮𑀼𑀤𑁆𑀤𑀓𑁄 𑀆𑀭𑀜𑁆𑀜𑀺𑀓𑀁 𑀫𑀺𑀕𑀁 𑀲𑀢𑁆𑀢𑀺𑀬𑀸 𑀧𑀳𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀖𑀸𑀢𑁂𑀢𑁆𑀯𑀸 𑀫𑀁𑀲𑀁 𑀆𑀤𑀸𑀬 𑀕𑀘𑁆𑀙𑀢𑀺. 𑀏𑀯𑀫𑁂𑀯 𑀬𑀣𑀸 𑀲𑁄 𑀫𑀺𑀕𑁄 𑀑𑀓𑀘𑀸𑀭𑀺𑀓𑀸𑀬 𑀲𑀫𑁆𑀫𑀢𑁆𑀢𑁄 𑀑𑀓𑀘𑀭𑁂 𑀉𑀲𑀽𑀬𑀁 𑀓𑀢𑁆𑀯𑀸 𑀲𑀢𑁆𑀢𑀺𑀁 𑀚𑀺𑀯𑁆𑀳𑀸𑀬 𑀮𑁂𑀳𑀦𑁆𑀢𑁄𑀧𑀺 𑀓𑀺𑀜𑁆𑀘𑀺 𑀦 𑀚𑀸𑀦𑀸𑀢𑀺, 𑀢𑀣𑀸 𑀇𑀫𑁂 𑀲𑀢𑁆𑀢𑀸 𑀅𑀯𑀺𑀚𑁆𑀚𑀸𑀬 𑀲𑀫𑁆𑀫𑀢𑁆𑀢𑀸 𑀅𑀦𑁆𑀥𑀪𑀽𑀢𑀸 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑀸 𑀭𑀽𑀧𑀸𑀤𑀻𑀲𑀼 𑀦𑀦𑁆𑀤𑀻𑀭𑀸𑀕𑀁 𑀉𑀧𑀕𑀫𑁆𑀫 𑀯𑀝𑁆𑀝𑀤𑀼𑀓𑁆𑀔𑀲𑀢𑁆𑀢𑀺𑀬𑀸 𑀯𑀥𑀁 𑀮𑀪𑀦𑁆𑀢𑀻𑀢𑀺 𑀪𑀕𑀯𑀸 𑀑𑀓𑀘𑀭𑀁 𑀦𑀦𑁆𑀤𑀻𑀭𑀸𑀕𑁄𑀢𑀺, 𑀑𑀓𑀘𑀸𑀭𑀺𑀓𑀁 𑀅𑀯𑀺𑀚𑁆𑀚𑀸𑀢𑀺 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀯𑀝𑁄 𑀫𑀬𑀸 𑀔𑁂𑀫𑁄 𑀫𑀕𑁆𑀕𑁄𑀢𑀺 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀳𑀺𑀢𑀘𑀭𑀡𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀅𑀳𑀁 𑀩𑀼𑀤𑁆𑀥𑁄𑀲𑁆𑀫𑀻𑀢𑀺 𑀢𑀼𑀡𑁆𑀳𑀻𑀪𑀽𑀢𑁂𑀦 𑀅𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂𑀦 𑀯𑀺𑀯𑀝𑁄 𑀔𑁂𑀫𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀧𑀺𑀳𑀺𑀢𑁄 𑀓𑀼𑀫𑁆𑀫𑀕𑁆𑀕𑁄, 𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑀸𑀤𑀻𑀦𑀁 𑀪𑀩𑁆𑀩𑀧𑀼𑀕𑁆𑀕𑀮𑀸𑀦𑀁 𑀊𑀳𑀢𑁄 𑀑𑀓𑀘𑀭𑁄 𑀦𑀦𑁆𑀤𑀻𑀭𑀸𑀕𑁄 𑀤𑁆𑀯𑁂𑀥𑀸 𑀙𑁂𑀢𑁆𑀯𑀸 𑀧𑀸𑀢𑀺𑀢𑁄, 𑀦𑀸𑀲𑀺𑀢𑀸 𑀑𑀓𑀘𑀸𑀭𑀺𑀓𑀸 𑀅𑀯𑀺𑀚𑁆𑀚𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀫𑀼𑀕𑁆𑀖𑀸𑀢𑀺𑀢𑀸𑀢𑀺 𑀅𑀢𑁆𑀢𑀦𑁄 𑀳𑀺𑀢𑀽𑀧𑀘𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀤𑁆𑀯𑁂𑀥𑀸𑀯𑀺𑀢𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.