𑁧𑁦. 𑀯𑀺𑀢𑀓𑁆𑀓𑀲𑀡𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀺𑀢𑀓𑁆𑀓𑀲𑀡𑁆𑀞𑀸𑀦𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦𑀸𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑀫𑁂𑀯, 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀢𑀢𑁄 𑀘𑀺𑀢𑁆𑀢𑀢𑁄 𑀅𑀥𑀺𑀓𑀁 𑀘𑀺𑀢𑁆𑀢𑀦𑁆𑀢𑀺 𑀅𑀥𑀺𑀘𑀺𑀢𑁆𑀢𑀁. 𑀅𑀦𑀼𑀬𑀼𑀢𑁆𑀢𑁂𑀦𑀸𑀢𑀺 𑀢𑀁 𑀅𑀥𑀺𑀘𑀺𑀢𑁆𑀢𑀁 𑀅𑀦𑀼𑀬𑀼𑀢𑁆𑀢𑁂𑀦, 𑀢𑀢𑁆𑀣 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄.

𑀢𑀢𑁆𑀭𑀸𑀬𑀁 𑀪𑀺𑀓𑁆𑀔𑀼 𑀧𑀼𑀭𑁂𑀪𑀢𑁆𑀢𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀦𑀺𑀲𑀻𑀤𑀦𑀁 𑀆𑀤𑀸𑀬 𑀅𑀲𑀼𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀯𑀦𑀲𑀡𑁆𑀟𑁂 𑀯𑀸 𑀧𑀩𑁆𑀩𑀢𑀧𑀸𑀤𑁂 𑀯𑀸 𑀧𑀩𑁆𑀪𑀸𑀭𑁂 𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀦𑀺𑀓𑁆𑀔𑀫𑀦𑁆𑀢𑁄𑀧𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀳𑀢𑁆𑀣𑁂𑀳𑀺 𑀯𑀸 𑀧𑀸𑀤𑁂𑀳𑀺 𑀯𑀸 𑀦𑀺𑀲𑀚𑁆𑀚𑀝𑁆𑀞𑀸𑀦𑀢𑁄 𑀢𑀺𑀡𑀧𑀡𑁆𑀡𑀸𑀦𑀺 𑀅𑀧𑀦𑁂𑀦𑁆𑀢𑁄𑀧𑀺 𑀅𑀥𑀺𑀘𑀺𑀢𑁆𑀢𑀁 𑀅𑀦𑀼𑀬𑀼𑀢𑁆𑀢𑁄𑀬𑁂𑀯. 𑀦𑀺𑀲𑀻𑀤𑀺𑀢𑁆𑀯𑀸 𑀧𑀦 𑀳𑀢𑁆𑀣𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑁄𑀧𑀺 𑀅𑀥𑀺𑀘𑀺𑀢𑁆𑀢𑀁 𑀅𑀦𑀼𑀬𑀼𑀢𑁆𑀢𑁄𑀬𑁂𑀯.

𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀓𑀸𑀮𑁂𑀦 𑀓𑀸𑀮𑀦𑁆𑀢𑀺 𑀲𑀫𑀬𑁂 𑀲𑀫𑀬𑁂. 𑀦 𑀦𑀼 𑀘 𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀫𑀼𑀳𑀼𑀢𑁆𑀢𑀫𑁆𑀧𑀺 𑀅𑀙𑀟𑁆𑀟𑁂𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 𑀫𑀦𑀲𑀺𑀓𑀸𑀢𑀩𑁆𑀩𑀁, 𑀓𑀲𑁆𑀫𑀸 𑀪𑀕𑀯𑀸 ‘‘𑀓𑀸𑀮𑁂𑀦 𑀓𑀸𑀮’’𑀦𑁆𑀢𑀺 𑀆𑀳𑀸𑀢𑀺. 𑀧𑀸𑀴𑀺𑀬𑀜𑁆𑀳𑀺 𑀅𑀝𑁆𑀞𑀢𑀺𑀁𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀺, 𑀢𑁂𑀲𑀼 𑀪𑀺𑀓𑁆𑀔𑀼𑀦𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀬𑀸𑀯 𑀓𑁄𑀘𑀺𑀤𑁂𑀯 𑀉𑀧𑀓𑁆𑀓𑀺𑀮𑁂𑀲𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀇𑀫𑁂𑀲𑀁 𑀦𑀺𑀫𑀺𑀢𑁆𑀢𑀸𑀦𑀁 𑀫𑀦𑀲𑀺𑀓𑀸𑀭𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀬𑀤𑀸 𑀧𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀇𑀫𑀸𑀦𑀺 𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀁 𑀅𑀩𑁆𑀩𑀼𑀤𑀁 𑀦𑀻𑀳𑀭𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀢𑀺 𑀙𑀦𑁆𑀤𑀲𑀳𑀕𑀢𑀸 𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀸. 𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀁 𑀯𑀺𑀢𑀓𑁆𑀓𑀸𑀦𑀁 𑀔𑁂𑀢𑁆𑀢𑀜𑁆𑀘 𑀆𑀭𑀫𑁆𑀫𑀡𑀜𑁆𑀘 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁆𑀣 𑀙𑀦𑁆𑀤𑀽𑀧𑀲𑀜𑁆𑀳𑀺𑀢𑀸𑀦𑀁 𑀅𑀝𑁆𑀞 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀸𑀦𑀺 𑀔𑁂𑀢𑁆𑀢𑀁, 𑀤𑁄𑀲𑀽𑀧𑀲𑀜𑁆𑀳𑀺𑀢𑀸𑀦𑀁 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺, 𑀫𑁄𑀳𑀽𑀧𑀲𑀜𑁆𑀳𑀺𑀢𑀸𑀦𑀁 𑀤𑁆𑀯𑀸𑀤𑀲𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺. 𑀯𑀺𑀘𑀺𑀓𑀺𑀘𑁆𑀙𑀸𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀦𑀺 𑀧𑀦 𑀤𑁆𑀯𑁂 𑀏𑀢𑁂𑀲𑀁 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀔𑁂𑀢𑁆𑀢𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸 𑀘𑁂𑀯 𑀲𑀗𑁆𑀔𑀸𑀭𑀸 𑀘 𑀆𑀭𑀫𑁆𑀫𑀡𑀁, 𑀇𑀝𑁆𑀞𑀸𑀦𑀺𑀝𑁆𑀞𑀅𑀲𑀫𑀧𑁂𑀓𑁆𑀔𑀺𑀢𑁂𑀲𑀼 𑀳𑀺 𑀲𑀢𑁆𑀢𑁂𑀲𑀼 𑀘 𑀲𑀗𑁆𑀔𑀸𑀭𑁂𑀲𑀼 𑀘 𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀜𑁆𑀜𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁 𑀓𑀼𑀲𑀮𑀽𑀧𑀲𑀁𑀳𑀺𑀢𑀦𑁆𑀢𑀺 𑀢𑀢𑁄 𑀦𑀺𑀫𑀺𑀢𑁆𑀢𑀢𑁄 𑀅𑀜𑁆𑀜𑀁 𑀓𑀼𑀲𑀮𑀦𑀺𑀲𑁆𑀲𑀺𑀢𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀢𑀢𑁆𑀣 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀙𑀦𑁆𑀤𑀽𑀧𑀲𑀜𑁆𑀳𑀺𑀢𑁂 𑀯𑀺𑀢𑀓𑁆𑀓𑁂 𑀲𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂 𑀅𑀲𑀼𑀪𑀪𑀸𑀯𑀦𑀸 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀲𑀗𑁆𑀔𑀸𑀭𑁂𑀲𑀼 𑀉𑀧𑁆𑀧𑀦𑁆𑀦𑁂 𑀅𑀦𑀺𑀘𑁆𑀘𑀫𑀦𑀲𑀺𑀓𑀸𑀭𑁄 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀤𑁄𑀲𑀽𑀧𑀲𑀜𑁆𑀳𑀺𑀢𑁂 𑀲𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂 𑀫𑁂𑀢𑁆𑀢𑀸𑀪𑀸𑀯𑀦𑀸 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀲𑀗𑁆𑀔𑀸𑀭𑁂𑀲𑀼 𑀉𑀧𑁆𑀧𑀦𑁆𑀦𑁂 𑀥𑀸𑀢𑀼𑀫𑀦𑀲𑀺𑀓𑀸𑀭𑁄 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀫𑁄𑀳𑀽𑀧𑀲𑀜𑁆𑀳𑀺𑀢𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑁆𑀧𑀦𑁆𑀦𑁂 𑀧𑀜𑁆𑀘𑀥𑀫𑁆𑀫𑀽𑀧𑀦𑀺𑀲𑁆𑀲𑀬𑁄 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫.

𑀇𑀫𑀲𑁆𑀲 𑀳𑀢𑁆𑀣𑀸 𑀯𑀸 𑀲𑁄𑀪𑀦𑀸 𑀧𑀸𑀤𑀸 𑀯𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑀺 𑀲𑀢𑁆𑀢𑁂𑀲𑀼 𑀮𑁄𑀪𑁂 𑀉𑀧𑁆𑀧𑀦𑁆𑀦𑁂 𑀅𑀲𑀼𑀪𑀢𑁄 𑀉𑀧𑀲𑀁𑀳𑀭𑀺𑀢𑀩𑁆𑀩𑀁. 𑀓𑀺𑀫𑁆𑀳𑀺 𑀲𑀸𑀭𑀢𑁆𑀢𑁄𑀲𑀺? 𑀓𑁂𑀲𑁂𑀲𑀼 𑀲𑀸𑀭𑀢𑁆𑀢𑁄𑀲𑀺. 𑀮𑁄𑀫𑁂𑀲𑀼…𑀧𑁂… 𑀫𑀼𑀢𑁆𑀢𑁂𑀲𑀼 𑀲𑀸𑀭𑀢𑁆𑀢𑁄𑀲𑀺. 𑀅𑀬𑀁 𑀅𑀢𑁆𑀢𑀪𑀸𑀯𑁄 𑀦𑀸𑀫 𑀢𑀻𑀳𑀺 𑀅𑀝𑁆𑀞𑀺𑀲𑀢𑁂𑀳𑀺 𑀉𑀲𑁆𑀲𑀸𑀧𑀺𑀢𑁄, 𑀦𑀯𑀳𑀺 𑀦𑁆𑀳𑀸𑀭𑀼𑀲𑀢𑁂𑀳𑀺 𑀆𑀩𑀤𑁆𑀥𑁄, 𑀦𑀯𑀳𑀺 𑀫𑀁𑀲𑀧𑁂𑀲𑀺𑀲𑀢𑁂𑀳𑀺 𑀅𑀦𑀼𑀮𑀺𑀢𑁆𑀢𑁄, 𑀅𑀮𑁆𑀮𑀘𑀫𑁆𑀫𑁂𑀦 𑀧𑀭𑀺𑀬𑁄𑀦𑀤𑁆𑀥𑁄, 𑀙𑀯𑀺𑀭𑀸𑀕𑁂𑀦 𑀧𑀝𑀺𑀘𑁆𑀙𑀦𑁆𑀦𑁄, 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀦𑀯𑀦𑀯𑀼𑀢𑀺𑀮𑁄𑀫𑀓𑀽𑀧𑀲𑀳𑀲𑁆𑀲𑁂𑀳𑀺 𑀘 𑀅𑀲𑀼𑀘𑀺 𑀧𑀕𑁆𑀖𑀭𑀢𑀺, 𑀓𑀼𑀡𑀧𑀧𑀽𑀭𑀺𑀢𑁄, 𑀤𑀼𑀕𑁆𑀕𑀦𑁆𑀥𑁄, 𑀚𑁂𑀕𑀼𑀘𑁆𑀙𑁄, 𑀧𑀝𑀺𑀓𑀽𑀮𑁄, 𑀤𑁆𑀯𑀢𑁆𑀢𑀺𑀁𑀲𑀓𑀼𑀡𑀧𑀲𑀜𑁆𑀘𑀬𑁄, 𑀦𑀢𑁆𑀣𑁂𑀢𑁆𑀣 𑀲𑀸𑀭𑀁 𑀯𑀸 𑀯𑀭𑀁 𑀯𑀸𑀢𑀺 𑀏𑀯𑀁 𑀅𑀲𑀼𑀪𑀢𑁄 𑀉𑀧𑀲𑀁𑀳𑀭𑀦𑁆𑀢𑀲𑁆𑀲 𑀲𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁄 𑀮𑁄𑀪𑁄 𑀧𑀳𑀻𑀬𑀢𑀺, 𑀢𑁂𑀦𑀲𑁆𑀲 𑀅𑀲𑀼𑀪𑀢𑁄 𑀉𑀧𑀲𑀁𑀳𑀭𑀡𑀁 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺.

𑀧𑀢𑁆𑀢𑀘𑀻𑀯𑀭𑀸𑀤𑀻𑀲𑀼 𑀲𑀗𑁆𑀔𑀸𑀭𑁂𑀲𑀼 𑀮𑁄𑀪𑁂 𑀉𑀧𑁆𑀧𑀦𑁆𑀦𑁂 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀅𑀲𑁆𑀲𑀸𑀫𑀺𑀓𑀢𑀸𑀯𑀓𑀸𑀮𑀺𑀓𑀪𑀸𑀯𑀯𑀲𑁂𑀦 𑀫𑀦𑀲𑀺𑀓𑀭𑁄𑀢𑁄 𑀲𑁄 𑀧𑀳𑀻𑀬𑀢𑀺. 𑀢𑁂𑀦𑀲𑁆𑀲 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀸𑀭𑁄 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀲𑀢𑁆𑀢𑁂𑀲𑀼 𑀤𑁄𑀲𑁂 𑀉𑀧𑁆𑀧𑀦𑁆𑀦𑁂 𑀧𑀦 𑀆𑀖𑀸𑀢𑀯𑀺𑀦𑀬𑀓𑀓𑀘𑁄𑀧𑀫𑁄𑀯𑀸𑀤𑀸𑀤𑀻𑀦𑀁 𑀯𑀲𑁂𑀦 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸, 𑀢𑀁 𑀪𑀸𑀯𑀬𑀢𑁄 𑀤𑁄𑀲𑁄 𑀧𑀳𑀻𑀬𑀢𑀺, 𑀢𑁂𑀦𑀲𑁆𑀲 𑀫𑁂𑀢𑁆𑀢𑀸𑀪𑀸𑀯𑀦𑀸 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀔𑀸𑀡𑀼𑀓𑀡𑁆𑀝𑀓𑀢𑀺𑀡𑀧𑀡𑁆𑀡𑀸𑀤𑀻𑀲𑀼 𑀧𑀦 𑀤𑁄𑀲𑁂 𑀉𑀧𑁆𑀧𑀦𑁆𑀦𑁂 𑀢𑁆𑀯𑀁 𑀓𑀲𑁆𑀲 𑀓𑀼𑀧𑁆𑀧𑀲𑀺, 𑀓𑀺𑀁 𑀧𑀣𑀯𑀻𑀥𑀸𑀢𑀼𑀬𑀸, 𑀉𑀤𑀸𑀳𑀼 𑀆𑀧𑁄𑀥𑀸𑀢𑀼𑀬𑀸, 𑀓𑁄 𑀯𑀸 𑀧𑀦𑀸𑀬𑀁 𑀓𑀼𑀧𑁆𑀧𑀢𑀺 𑀦𑀸𑀫, 𑀓𑀺𑀁 𑀧𑀣𑀯𑀻𑀥𑀸𑀢𑀼 𑀉𑀤𑀸𑀳𑀼 𑀆𑀧𑁄𑀥𑀸𑀢𑀽𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀸𑀢𑀼𑀫𑀦𑀲𑀺𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀤𑁄𑀲𑁄 𑀧𑀳𑀻𑀬𑀢𑀺. 𑀢𑁂𑀦𑀲𑁆𑀲 𑀥𑀸𑀢𑀼𑀫𑀦𑀲𑀺𑀓𑀸𑀭𑁄 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺.

𑀫𑁄𑀳𑁂 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑁆𑀧𑀦𑁆𑀦𑁂 𑁋

‘‘𑀕𑀭𑀽𑀲𑀁𑀯𑀸𑀲𑁄 𑀉𑀤𑁆𑀤𑁂𑀲𑁄, 𑀉𑀤𑁆𑀤𑀺𑀝𑁆𑀞𑀧𑀭𑀺𑀧𑀼𑀘𑁆𑀙𑀦𑀁;

𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑀁, 𑀞𑀸𑀦𑀸𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑁄;

𑀧𑀜𑁆𑀘 𑀥𑀫𑁆𑀫𑀽𑀧𑀦𑀺𑀲𑁆𑀲𑀸𑀬, 𑀫𑁄𑀳𑀥𑀸𑀢𑀼 𑀧𑀳𑀻𑀬𑀢𑀻’’𑀢𑀺. 𑁋

𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀉𑀧𑀦𑀺𑀲𑁆𑀲𑀺𑀢𑀩𑁆𑀩𑀸. 𑀕𑀭𑀼𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀳𑀺 𑀪𑀺𑀓𑁆𑀔𑀼 𑁋 ‘‘𑀆𑀘𑀭𑀺𑀬𑁄 𑀕𑀸𑀫𑀧𑁆𑀧𑀯𑁂𑀲𑀦𑀁 𑀅𑀦𑀸𑀧𑀼𑀘𑁆𑀙𑀦𑁆𑀢𑀲𑁆𑀲 𑀧𑀢𑁆𑀢𑀓𑀸𑀮𑁂 𑀯𑀢𑁆𑀢𑀁 𑀅𑀓𑀭𑁄𑀦𑁆𑀢𑀲𑁆𑀲 𑀖𑀝𑀲𑀢𑀉𑀤𑀓𑀸𑀳𑀭𑀡𑀸𑀤𑀺𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀬𑀢𑁆𑀢𑀧𑁆𑀧𑀝𑀺𑀬𑀢𑁆𑀢𑁄 𑀳𑁄𑀢𑀺, 𑀅𑀣𑀲𑁆𑀲 𑀫𑁄𑀳𑁄 𑀧𑀳𑀻𑀬𑀢𑀺. 𑀉𑀤𑁆𑀤𑁂𑀲𑀁 𑀕𑀡𑁆𑀳𑀦𑁆𑀢𑁄𑀧𑀺 𑁋 ‘‘𑀆𑀘𑀭𑀺𑀬𑁄 𑀉𑀤𑁆𑀤𑁂𑀲𑀓𑀸𑀮𑁂 𑀉𑀤𑁆𑀤𑁂𑀲𑀁 𑀅𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀅𑀲𑀸𑀥𑀼𑀓𑀁 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀘 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀬𑀢𑁆𑀢𑀧𑁆𑀧𑀝𑀺𑀬𑀢𑁆𑀢𑁄 𑀳𑁄𑀢𑀺, 𑀏𑀯𑀫𑁆𑀧𑀺𑀲𑁆𑀲 𑀫𑁄𑀳𑁄 𑀧𑀳𑀻𑀬𑀢𑀺. 𑀕𑀭𑀼𑀪𑀸𑀯𑀦𑀻𑀬𑁂 𑀪𑀺𑀓𑁆𑀔𑀽 𑀉𑀧𑀲𑀁𑀓𑀫𑀺𑀢𑁆𑀯𑀸 ‘‘𑀇𑀤𑀁 𑀪𑀦𑁆𑀢𑁂 𑀓𑀣𑀁 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺 𑀧𑀭𑀺𑀧𑀼𑀘𑁆𑀙𑀦𑁆𑀢𑁄 𑀓𑀁𑀔𑀁 𑀯𑀺𑀦𑁄𑀤𑁂𑀢𑀺, 𑀏𑀯𑀫𑁆𑀧𑀺𑀲𑁆𑀲 𑀫𑁄𑀳𑁄 𑀧𑀳𑀻𑀬𑀢𑀺. 𑀓𑀸𑀮𑁂𑀦 𑀥𑀫𑁆𑀫𑀲𑀯𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲𑀸𑀧𑀺 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀅𑀢𑁆𑀣𑁄 𑀧𑀸𑀓𑀝𑁄 𑀳𑁄𑀢𑀺. 𑀏𑀯𑀫𑁆𑀧𑀺𑀲𑁆𑀲 𑀫𑁄𑀳𑁄 𑀧𑀳𑀻𑀬𑀢𑀺. 𑀇𑀤𑀫𑀲𑁆𑀲 𑀓𑀸𑀭𑀡𑀁, 𑀇𑀤𑀁 𑀦 𑀓𑀸𑀭𑀡𑀦𑁆𑀢𑀺 𑀞𑀸𑀦𑀸𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑁂 𑀙𑁂𑀓𑁄 𑀳𑁄𑀢𑀺, 𑀏𑀯𑀫𑁆𑀧𑀺𑀲𑁆𑀲 𑀫𑁄𑀳𑁄 𑀧𑀳𑀻𑀬𑀢𑀺. 𑀢𑁂𑀦𑀲𑁆𑀲 𑀧𑀜𑁆𑀘𑀥𑀫𑁆𑀫𑀽𑀧𑀦𑀺𑀲𑁆𑀲𑀬𑁄 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺.

𑀅𑀧𑀺𑀘 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀬𑀁𑀓𑀺𑀜𑁆𑀘𑀺 𑀪𑀸𑀯𑁂𑀦𑁆𑀢𑀲𑁆𑀲𑀸𑀧𑀺 𑀇𑀫𑁂 𑀯𑀺𑀢𑀓𑁆𑀓𑀸 𑀧𑀳𑀻𑀬𑀦𑁆𑀢𑀺 𑀏𑀯. 𑀇𑀫𑀸𑀦𑀺 𑀧𑀦 𑀦𑀺𑀫𑀺𑀢𑁆𑀢𑀸𑀦𑀺 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀸𑀦𑀺 𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀺. 𑀇𑀫𑁂𑀳𑀺 𑀧𑀳𑀻𑀦𑀸 𑀭𑀸𑀕𑀸𑀤𑀬𑁄 𑀲𑀼𑀧𑁆𑀧𑀳𑀻𑀦𑀸 𑀳𑁄𑀦𑁆𑀢𑀺. 𑀬𑀣𑀸 𑀳𑀺 𑀅𑀕𑁆𑀕𑀺𑀁 𑀅𑀮𑁆𑀮𑀓𑀝𑁆𑀞𑁂𑀳𑀺𑀧𑀺 𑀧𑀁𑀲𑀽𑀳𑀺𑀧𑀺 𑀲𑀸𑀔𑀸𑀤𑀻𑀳𑀺𑀧𑀺 𑀧𑁄𑀣𑁂𑀢𑁆𑀯𑀸 𑀦𑀺𑀩𑁆𑀩𑀸𑀧𑁂𑀦𑁆𑀢𑀺𑀬𑁂𑀯, 𑀉𑀤𑀓𑀁 𑀧𑀦 𑀅𑀕𑁆𑀕𑀺𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀁, 𑀢𑁂𑀦 𑀦𑀺𑀩𑁆𑀩𑀼𑀢𑁄 𑀲𑀼𑀦𑀺𑀩𑁆𑀩𑀼𑀢𑁄 𑀳𑁄𑀢𑀺, 𑀏𑀯𑀫𑀺𑀫𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀧𑀳𑀻𑀦𑀸 𑀭𑀸𑀕𑀸𑀤𑀬𑁄 𑀲𑀼𑀧𑁆𑀧𑀳𑀻𑀦𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀢𑀸𑀦𑀺 𑀓𑀣𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀓𑀼𑀲𑀮𑀽𑀧𑀲𑀁𑀳𑀺𑀢𑀦𑁆𑀢𑀺 𑀓𑀼𑀲𑀮𑀦𑀺𑀲𑁆𑀲𑀺𑀢𑀁 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀪𑀽𑀢𑀁. 𑀅𑀚𑁆𑀛𑀢𑁆𑀢𑀫𑁂𑀯𑀸𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀁𑀬𑁂𑀯. 𑀧𑀮𑀕𑀡𑁆𑀟𑁄𑀢𑀺 𑀯𑀟𑁆𑀠𑀓𑀻. 𑀲𑀼𑀔𑀼𑀫𑀸𑀬 𑀆𑀡𑀺𑀬𑀸𑀢𑀺 𑀬𑀁 𑀆𑀡𑀺𑀁 𑀦𑀻𑀳𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀢𑁄 𑀲𑀼𑀔𑀼𑀫𑀢𑀭𑀸𑀬 𑀲𑀸𑀭𑀤𑀸𑀭𑀼𑀆𑀡𑀺𑀬𑀸. 𑀑𑀴𑀸𑀭𑀺𑀓𑀁 𑀆𑀡𑀺𑀦𑁆𑀢𑀺 𑀘𑀦𑁆𑀤𑀨𑀮𑀓𑁂 𑀯𑀸 𑀲𑀸𑀭𑀨𑀮𑀓𑁂 𑀯𑀸 𑀆𑀓𑁄𑀝𑀺𑀢𑀁 𑀯𑀺𑀲𑀫𑀸𑀡𑀺𑀁. 𑀅𑀪𑀺𑀦𑀺𑀳𑀦𑁂𑀬𑁆𑀬𑀸𑀢𑀺 𑀫𑀼𑀕𑁆𑀕𑀭𑁂𑀦 𑀆𑀓𑁄𑀝𑁂𑀦𑁆𑀢𑁄 𑀳𑀦𑁂𑀬𑁆𑀬. 𑀅𑀪𑀺𑀦𑀻𑀳𑀭𑁂𑀬𑁆𑀬𑀸𑀢𑀺 𑀏𑀯𑀁 𑀅𑀪𑀺𑀦𑀺𑀳𑀦𑀦𑁆𑀢𑁄 𑀨𑀮𑀓𑀢𑁄 𑀦𑀻𑀳𑀭𑁂𑀬𑁆𑀬. 𑀅𑀪𑀺𑀦𑀺𑀯𑀲𑁂𑀬𑁆𑀬𑀸𑀢𑀺 𑀇𑀤𑀸𑀦𑀺 𑀩𑀳𑀼 𑀦𑀺𑀓𑁆𑀔𑀦𑁆𑀢𑀸𑀢𑀺 𑀜𑀢𑁆𑀯𑀸 𑀳𑀢𑁆𑀣𑁂𑀦 𑀘𑀸𑀮𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑁂𑀬𑁆𑀬. 𑀢𑀢𑁆𑀣 𑀨𑀮𑀓𑀁 𑀯𑀺𑀬 𑀘𑀺𑀢𑁆𑀢𑀁, 𑀨𑀮𑀓𑁂 𑀯𑀺𑀲𑀫𑀸𑀡𑀻 𑀯𑀺𑀬 𑀅𑀓𑀼𑀲𑀮𑀯𑀺𑀢𑀓𑁆𑀓𑀸, 𑀲𑀼𑀔𑀼𑀫𑀸𑀡𑀻 𑀯𑀺𑀬 𑀅𑀜𑁆𑀜𑀁 𑀅𑀲𑀼𑀪𑀪𑀸𑀯𑀦𑀸𑀤𑀺𑀓𑀼𑀲𑀮𑀦𑀺𑀫𑀺𑀢𑁆𑀢𑀁, 𑀲𑀼𑀔𑀼𑀫𑀸𑀡𑀺𑀬𑀸 𑀑𑀴𑀸𑀭𑀺𑀓𑀸𑀡𑀺𑀦𑀻𑀳𑀭𑀡𑀁 𑀯𑀺𑀬 𑀅𑀲𑀼𑀪𑀪𑀸𑀯𑀦𑀸𑀤𑀻𑀳𑀺 𑀓𑀼𑀲𑀮𑀦𑀺𑀫𑀺𑀢𑁆𑀢𑁂𑀳𑀺 𑀢𑁂𑀲𑀁 𑀯𑀺𑀢𑀓𑁆𑀓𑀸𑀦𑀁 𑀦𑀻𑀳𑀭𑀡𑀁.

𑁨𑁧𑁭. 𑀅𑀳𑀺𑀓𑀼𑀡𑀧𑁂𑀦𑀸𑀢𑀺𑀆𑀤𑀺 𑀅𑀢𑀺𑀚𑁂𑀕𑀼𑀘𑁆𑀙𑀧𑀝𑀺𑀓𑀽𑀮𑀓𑀼𑀡𑀧𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀡𑁆𑀞𑁂 𑀆𑀲𑀢𑁆𑀢𑁂𑀦𑀸𑀢𑀺 𑀓𑁂𑀦𑀘𑀺𑀤𑁂𑀯 𑀧𑀘𑁆𑀘𑀢𑁆𑀣𑀺𑀓𑁂𑀦 𑀆𑀦𑁂𑀢𑁆𑀯𑀸 𑀓𑀡𑁆𑀞𑁂 𑀩𑀤𑁆𑀥𑁂𑀦 𑀧𑀝𑀺𑀫𑀼𑀓𑁆𑀓𑁂𑀦. 𑀅𑀝𑁆𑀝𑀺𑀬𑁂𑀬𑁆𑀬𑀸𑀢𑀺 𑀅𑀝𑁆𑀝𑁄 𑀤𑀼𑀓𑁆𑀔𑀺𑀢𑁄 𑀪𑀯𑁂𑀬𑁆𑀬. 𑀳𑀭𑀸𑀬𑁂𑀬𑁆𑀬𑀸𑀢𑀺 𑀮𑀚𑁆𑀚𑁂𑀬𑁆𑀬. 𑀚𑀺𑀕𑀼𑀘𑁆𑀙𑁂𑀬𑁆𑀬𑀸𑀢𑀺 𑀲𑀜𑁆𑀚𑀸𑀢𑀚𑀺𑀕𑀼𑀘𑁆𑀙𑁄 𑀪𑀯𑁂𑀬𑁆𑀬.

𑀧𑀳𑀻𑀬𑀦𑁆𑀢𑀻𑀢𑀺 𑀏𑀯𑀁 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀏𑀢𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸 𑀤𑀼𑀓𑁆𑀔𑀯𑀺𑀧𑀸𑀓𑀸𑀢𑀺 𑀅𑀢𑁆𑀢𑀦𑁄 𑀧𑀜𑁆𑀜𑀸𑀩𑀮𑁂𑀦 𑀉𑀧𑀧𑀭𑀺𑀓𑁆𑀔𑀢𑁄 𑀅𑀳𑀺𑀓𑀼𑀡𑀧𑀸𑀤𑀻𑀦𑀺 𑀯𑀺𑀬 𑀚𑀺𑀕𑀼𑀘𑁆𑀙𑀦𑁆𑀢𑀲𑁆𑀲 𑀧𑀳𑀻𑀬𑀦𑁆𑀢𑀺. 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀜𑁆𑀜𑀸𑀩𑀮𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑁂𑀦 𑀆𑀘𑀭𑀺𑀬𑀁 𑀯𑀸 𑀉𑀧𑀚𑁆𑀛𑀸𑀬𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀕𑀭𑀼𑀝𑁆𑀞𑀸𑀦𑀺𑀬𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀲𑀗𑁆𑀖𑀢𑁆𑀣𑁂𑀭𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀖𑀡𑁆𑀟𑀺𑀁 𑀧𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑁂𑀯 𑀯𑀸 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁, 𑀩𑀳𑀼𑀦𑀜𑁆𑀳𑀺 𑀲𑀦𑁆𑀦𑀺𑀧𑀸𑀢𑁂 𑀪𑀯𑀺𑀲𑁆𑀲𑀢𑁂𑀯 𑀏𑀓𑁄 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑁄, 𑀲𑁆𑀯𑀸𑀬𑀁 𑀏𑀯𑀁 𑀏𑀢𑁂𑀲𑀼 𑀆𑀤𑀻𑀦𑀯𑁄 𑀤𑀝𑁆𑀞𑀩𑁆𑀩𑁄𑀢𑀺 𑀓𑀣𑁂𑀲𑁆𑀲𑀢𑀺, 𑀓𑀸𑀬𑀯𑀺𑀘𑁆𑀙𑀺𑀦𑁆𑀤𑀦𑀻𑀬𑀓𑀣𑀸𑀤𑀻𑀳𑀺 𑀯𑀸 𑀧𑀦 𑀢𑁂 𑀯𑀺𑀢𑀓𑁆𑀓𑁂 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀢𑀻𑀢𑀺.

𑁨𑁧𑁮. 𑀅𑀲𑀢𑀺𑀅𑀫𑀦𑀲𑀺𑀓𑀸𑀭𑁄 𑀆𑀧𑀚𑁆𑀚𑀺𑀢𑀩𑁆𑀩𑁄𑀢𑀺 𑀦𑁂𑀯 𑀲𑁄 𑀯𑀺𑀢𑀓𑁆𑀓𑁄 𑀲𑀭𑀺𑀢𑀩𑁆𑀩𑁄 𑀦 𑀫𑀦𑀲𑀺𑀓𑀸𑀢𑀩𑁆𑀩𑁄, 𑀅𑀜𑁆𑀜𑀯𑀺𑀳𑀺𑀢𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀬𑀣𑀸 𑀳𑀺 𑀭𑀽𑀧𑀁 𑀅𑀧𑀲𑁆𑀲𑀺𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 𑀅𑀓𑁆𑀔𑀻𑀦𑀺 𑀦𑀺𑀫𑀻𑀮𑁂𑀬𑁆𑀬, 𑀏𑀯𑀫𑁂𑀯 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀘𑀺𑀢𑁆𑀢𑀫𑁆𑀳𑀺 𑀯𑀺𑀢𑀓𑁆𑀓𑁂 𑀉𑀧𑁆𑀧𑀦𑁆𑀦𑁂 𑀅𑀜𑁆𑀜𑀯𑀺𑀳𑀺𑀢𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀫𑀲𑁆𑀲 𑀲𑁄 𑀯𑀺𑀢𑀓𑁆𑀓𑁄 𑀧𑀳𑀻𑀬𑀢𑀺, 𑀢𑀲𑁆𑀫𑀺𑀁 𑀧𑀳𑀻𑀦𑁂 𑀧𑀼𑀦 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁.

𑀲𑀘𑁂 𑀦 𑀧𑀳𑀻𑀬𑀢𑀺, 𑀉𑀕𑁆𑀕𑀳𑀺𑀢𑁄 𑀥𑀫𑁆𑀫𑀓𑀣𑀸𑀧𑀩𑀦𑁆𑀥𑁄 𑀳𑁄𑀢𑀺, 𑀲𑁄 𑀫𑀳𑀸𑀲𑀤𑁆𑀤𑁂𑀦 𑀲𑀚𑁆𑀛𑀸𑀬𑀺𑀢𑀩𑁆𑀩𑁄. 𑀏𑀯𑀫𑁆𑀧𑀺 𑀘𑁂 𑀅𑀜𑁆𑀜𑀯𑀺𑀳𑀺𑀢𑀓𑀲𑁆𑀲 𑀲𑀢𑁄 𑀲𑁄 𑀦 𑀧𑀳𑀻𑀬𑀢𑀺. 𑀣𑀯𑀺𑀓𑀸𑀬 𑀫𑀼𑀝𑁆𑀞𑀺𑀧𑁄𑀢𑁆𑀣𑀓𑁄 𑀳𑁄𑀢𑀺, 𑀬𑀢𑁆𑀣 𑀘 𑀩𑀼𑀤𑁆𑀥𑀯𑀡𑁆𑀡𑀸𑀧𑀺 𑀥𑀫𑁆𑀫𑀯𑀡𑁆𑀡𑀸𑀧𑀺 𑀮𑀺𑀔𑀺𑀢𑀸 𑀳𑁄𑀦𑁆𑀢𑀺, 𑀢𑀁 𑀦𑀻𑀳𑀭𑀺𑀢𑁆𑀯𑀸 𑀯𑀸𑀘𑁂𑀦𑁆𑀢𑁂𑀦 𑀅𑀜𑁆𑀜𑀯𑀺𑀳𑀺𑀢𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀫𑁆𑀧𑀺 𑀘𑁂 𑀦 𑀧𑀳𑀻𑀬𑀢𑀺, 𑀣𑀯𑀺𑀓𑀢𑁄 𑀅𑀭𑀡𑀺𑀲𑀳𑀺𑀢𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 ‘‘𑀅𑀬𑀁 𑀉𑀢𑁆𑀢𑀭𑀸𑀭𑀡𑀻 𑀅𑀬𑀁 𑀅𑀥𑀭𑀸𑀭𑀡𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁂𑀦 𑀅𑀜𑁆𑀜𑀯𑀺𑀳𑀺𑀢𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀫𑁆𑀧𑀺 𑀘𑁂 𑀦 𑀧𑀳𑀻𑀬𑀢𑀺, 𑀲𑀺𑀧𑀸𑀝𑀺𑀓𑀁 𑀦𑀻𑀳𑀭𑀺𑀢𑁆𑀯𑀸 ‘‘𑀇𑀤𑀁 𑀆𑀭𑀓𑀡𑁆𑀝𑀓𑀁 𑀦𑀸𑀫, 𑀅𑀬𑀁 𑀧𑀺𑀧𑁆𑀨𑀮𑀓𑁄 𑀦𑀸𑀫, 𑀇𑀤𑀁 𑀦𑀔𑀘𑁆𑀙𑁂𑀤𑀦𑀁 𑀦𑀸𑀫, 𑀅𑀬𑀁 𑀲𑀽𑀘𑀺 𑀦𑀸𑀫𑀸’’𑀢𑀺 𑀧𑀭𑀺𑀓𑁆𑀔𑀸𑀭𑀁 𑀲𑀫𑀦𑁆𑀦𑀸𑀦𑁂𑀦𑁆𑀢𑁂𑀦 𑀅𑀜𑁆𑀜𑀯𑀺𑀳𑀺𑀢𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀫𑁆𑀧𑀺 𑀘𑁂 𑀦 𑀧𑀳𑀻𑀬𑀢𑀺, 𑀲𑀽𑀘𑀺𑀁 𑀕𑀳𑁂𑀢𑁆𑀯𑀸 𑀘𑀻𑀯𑀭𑁂 𑀚𑀺𑀡𑁆𑀡𑀝𑁆𑀞𑀸𑀦𑀁 𑀲𑀺𑀩𑁆𑀩𑀦𑁆𑀢𑁂𑀦 𑀅𑀜𑁆𑀜𑀯𑀺𑀳𑀺𑀢𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀁 𑀬𑀸𑀯 𑀦 𑀧𑀳𑀻𑀬𑀢𑀺, 𑀢𑀸𑀯 𑀢𑀁 𑀢𑀁 𑀓𑀼𑀲𑀮𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀦 𑀅𑀜𑁆𑀜𑀯𑀺𑀳𑀺𑀢𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀧𑀳𑀻𑀦𑁂 𑀧𑀼𑀦 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦𑀯𑀓𑀫𑁆𑀫𑀁 𑀧𑀦 𑀦 𑀧𑀝𑁆𑀞𑀧𑁂𑀢𑀩𑁆𑀩𑀁. 𑀓𑀲𑁆𑀫𑀸? 𑀯𑀺𑀢𑀓𑁆𑀓𑁂 𑀧𑀘𑁆𑀙𑀺𑀦𑁆𑀦𑁂 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀺.

𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀧𑀦 𑀦𑀯𑀓𑀫𑁆𑀫𑀁 𑀓𑀢𑁆𑀯𑀸𑀧𑀺 𑀯𑀺𑀢𑀓𑁆𑀓𑀁 𑀧𑀘𑁆𑀙𑀺𑀦𑁆𑀤𑀺𑀁𑀲𑀼. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀓𑀺𑀭 𑀉𑀧𑀚𑁆𑀛𑀸𑀬𑁄 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂 𑀯𑀲𑀢𑀺. 𑀢𑀺𑀲𑁆𑀲𑀲𑀸𑀫𑀡𑁂𑀭𑁄 ‘‘𑀪𑀦𑁆𑀢𑁂 𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀻’’𑀢𑀺 𑀆𑀳. 𑀅𑀣 𑀦𑀁 𑀣𑁂𑀭𑁄 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀦𑁆𑀳𑀸𑀦𑀉𑀤𑀓𑀁 𑀤𑀼𑀮𑁆𑀮𑀪𑀁, 𑀫𑀁 𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀮𑀧𑀩𑁆𑀩𑀢𑀁 𑀕𑀘𑁆𑀙𑀸𑀳𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀢𑁆𑀣 𑀦𑀁 𑀣𑁂𑀭𑁄 𑀆𑀳 ‘‘𑀅𑀬𑀁 𑀯𑀺𑀳𑀸𑀭𑁄 𑀅𑀘𑁆𑀘𑀦𑁆𑀢𑀲𑀗𑁆𑀖𑀺𑀓𑁄, 𑀏𑀓𑀁 𑀧𑀼𑀕𑁆𑀕𑀮𑀺𑀓𑀝𑁆𑀞𑀸𑀦𑀁 𑀓𑀭𑁄𑀳𑀻’’𑀢𑀺. 𑀲𑁄 𑀲𑀸𑀥𑀼 𑀪𑀦𑁆𑀢𑁂𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀁 𑀧𑀩𑁆𑀪𑀸𑀭𑀲𑁄𑀥𑀦𑀁 𑀢𑁂𑀚𑁄𑀥𑀸𑀢𑀼𑀓𑀲𑀺𑀡𑀧𑀭𑀺𑀓𑀫𑁆𑀫𑀦𑁆𑀢𑀺 𑀢𑀻𑀡𑀻𑀧𑀺 𑀏𑀓𑀢𑁄 𑀆𑀭𑀪𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀅𑀧𑁆𑀧𑀦𑀁 𑀧𑀸𑀧𑁂𑀲𑀺, 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀁 𑀧𑀭𑀺𑀬𑁄𑀲𑀸𑀧𑁂𑀲𑀺, 𑀮𑁂𑀡𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀲𑀩𑁆𑀩𑀁 𑀓𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀉𑀧𑀚𑁆𑀛𑀸𑀬𑁄 ‘‘𑀤𑀼𑀓𑁆𑀔𑁂𑀦 𑀢𑁂 𑀲𑀸𑀫𑀡𑁂𑀭 𑀓𑀢𑀁, 𑀅𑀚𑁆𑀚 𑀢𑀸𑀯 𑀢𑁆𑀯𑀁𑀬𑁂𑀯 𑀯𑀲𑀸𑀳𑀻’’𑀢𑀺 𑀆𑀳. 𑀲𑁄 𑀢𑀁 𑀭𑀢𑁆𑀢𑀺𑀁 𑀮𑁂𑀡𑁂 𑀯𑀲𑀦𑁆𑀢𑁄 𑀉𑀢𑀼𑀲𑀧𑁆𑀧𑀸𑀬𑀁 𑀮𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀅𑀓𑀁𑀲𑀼. 𑀅𑀚𑁆𑀚𑀸𑀧𑀺 𑀢𑀺𑀲𑁆𑀲𑀢𑁆𑀣𑁂𑀭𑀘𑁂𑀢𑀺𑀬𑀦𑁆𑀢𑀺 𑀧𑀜𑁆𑀜𑀸𑀬𑀢𑀺. 𑀇𑀤𑀁 𑀧𑀩𑁆𑀩𑀁 𑀅𑀲𑀢𑀺𑀧𑀩𑁆𑀩𑀁 𑀦𑀸𑀫.

𑁨𑁧𑁯. 𑀇𑀫𑀲𑁆𑀫𑀺𑀁 𑀞𑀢𑁆𑀯𑀸 𑀯𑀺𑀢𑀓𑁆𑀓𑁂 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀇𑀥 𑀞𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀢𑀻𑀢𑀺 𑀯𑀺𑀢𑀓𑁆𑀓𑀫𑀽𑀮𑀪𑁂𑀤𑀁 𑀧𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 𑀢𑀲𑁆𑀲 𑀘𑁂 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀢𑀓𑁆𑀓𑀲𑀗𑁆𑀔𑀸𑀭𑀲𑀡𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀩𑁆𑀩𑀦𑁆𑀢𑀺 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀧𑀘𑁆𑀘𑀬𑁄, 𑀓𑀸𑀭𑀡𑀁 𑀫𑀽𑀮𑀦𑁆𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀲𑀡𑁆𑀞𑀸𑀦𑀁, 𑀯𑀺𑀢𑀓𑁆𑀓𑀲𑀗𑁆𑀔𑀸𑀭𑀲𑁆𑀲 𑀲𑀡𑁆𑀞𑀸𑀦𑀁 𑀯𑀺𑀢𑀓𑁆𑀓𑀲𑀗𑁆𑀔𑀸𑀭𑀲𑀡𑁆𑀞𑀸𑀦𑀁, 𑀢𑀁 𑀫𑀦𑀲𑀺𑀓𑀸𑀢𑀩𑁆𑀩𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀬𑀁 𑀯𑀺𑀢𑀓𑁆𑀓𑁄 𑀓𑀺𑀁 𑀳𑁂𑀢𑀼 𑀓𑀺𑀁 𑀧𑀘𑁆𑀘𑀬𑀸 𑀓𑀺𑀁 𑀓𑀸𑀭𑀡𑀸 𑀉𑀧𑁆𑀧𑀦𑁆𑀦𑁄𑀢𑀺 𑀯𑀺𑀢𑀓𑁆𑀓𑀸𑀦𑀁 𑀫𑀽𑀮𑀜𑁆𑀘 𑀫𑀽𑀮𑀫𑀽𑀮𑀜𑁆𑀘 𑀫𑀦𑀲𑀺𑀓𑀸𑀢𑀩𑁆𑀩𑀦𑁆𑀢𑀺. 𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀻𑀖𑀁 𑀕𑀘𑁆𑀙𑀸𑀫𑀻𑀢𑀺 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀅𑀳𑀁 𑀲𑀻𑀖𑀁 𑀕𑀘𑁆𑀙𑀸𑀫𑀺? 𑀬𑀁𑀦𑀽𑀦𑀸𑀳𑀁 𑀲𑀡𑀺𑀓𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺 𑀓𑀺𑀁 𑀫𑁂 𑀇𑀫𑀺𑀦𑀸 𑀲𑀻𑀖𑀕𑀫𑀦𑁂𑀦, 𑀲𑀡𑀺𑀓𑀁 𑀕𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄 𑀲𑀡𑀺𑀓𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀲𑀡𑀺𑀓𑀁 𑀕𑀘𑁆𑀙𑁂𑀬𑁆𑀬. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀢𑀢𑁆𑀣 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀻𑀖𑀕𑀫𑀦𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀢𑀓𑁆𑀓𑀲𑀫𑀸𑀭𑀼𑀴𑁆𑀳𑀓𑀸𑀮𑁄. 𑀢𑀲𑁆𑀲 𑀲𑀡𑀺𑀓𑀕𑀫𑀦𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀯𑀺𑀢𑀓𑁆𑀓𑀘𑀸𑀭𑀧𑀘𑁆𑀙𑁂𑀤𑀦𑀓𑀸𑀮𑁄. 𑀢𑀲𑁆𑀲 𑀞𑀺𑀢𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀯𑀺𑀢𑀓𑁆𑀓𑀘𑀸𑀭𑁂 𑀧𑀘𑁆𑀙𑀺𑀦𑁆𑀦𑁂 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀘𑀺𑀢𑁆𑀢𑁄𑀢𑀭𑀡𑀓𑀸𑀮𑁄. 𑀢𑀲𑁆𑀲 𑀦𑀺𑀲𑀺𑀦𑁆𑀦𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁄. 𑀢𑀲𑁆𑀲 𑀦𑀺𑀧𑀦𑁆𑀦𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀤𑀺𑀯𑀲𑀁 𑀯𑀻𑀢𑀺𑀯𑀢𑁆𑀢𑀦𑀓𑀸𑀮𑁄. 𑀢𑀢𑁆𑀣 𑀇𑀫𑁂 𑀯𑀺𑀢𑀓𑁆𑀓𑀸 𑀓𑀺𑀁 𑀳𑁂𑀢𑀼𑀓𑀸 𑀓𑀺𑀁 𑀧𑀘𑁆𑀘𑀬𑀸𑀢𑀺 𑀯𑀺𑀢𑀓𑁆𑀓𑀸𑀦𑀁 𑀫𑀽𑀮𑀫𑀽𑀮𑀁 𑀕𑀘𑁆𑀙𑀦𑁆𑀢𑀲𑁆𑀲 𑀯𑀺𑀢𑀓𑁆𑀓𑀘𑀸𑀭𑁄 𑀲𑀺𑀣𑀺𑀮𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀲𑀺𑀣𑀺𑀮𑀻𑀪𑀽𑀢𑁂 𑀫𑀢𑁆𑀣𑀓𑀁 𑀕𑀘𑁆𑀙𑀦𑁆𑀢𑁂 𑀯𑀺𑀢𑀓𑁆𑀓𑀸 𑀲𑀩𑁆𑀩𑀲𑁄 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀬𑀫𑀢𑁆𑀣𑁄 𑀤𑀼𑀤𑁆𑀤𑀼𑀪𑀚𑀸𑀢𑀓𑁂𑀦𑀧𑀺 𑀤𑀻𑀧𑁂𑀢𑀩𑁆𑀩𑁄 𑁋

𑀲𑀲𑀓𑀲𑁆𑀲 𑀓𑀺𑀭 𑀩𑁂𑀮𑀼𑀯𑀭𑀼𑀓𑁆𑀔𑀫𑀽𑀮𑁂 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀩𑁂𑀮𑀼𑀯𑀧𑀓𑁆𑀓𑀁 𑀯𑀡𑁆𑀝𑀢𑁄 𑀙𑀺𑀚𑁆𑀚𑀺𑀢𑁆𑀯𑀸 𑀓𑀡𑁆𑀡𑀫𑀽𑀮𑁂 𑀧𑀢𑀺𑀢𑀁. 𑀲𑁄 𑀢𑀲𑁆𑀲 𑀲𑀤𑁆𑀤𑁂𑀦 ‘‘𑀧𑀣𑀯𑀻 𑀪𑀺𑀚𑁆𑀚𑀢𑀻’’𑀢𑀺 𑀲𑀜𑁆𑀜𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀯𑁂𑀕𑁂𑀦 𑀧𑀮𑀸𑀬𑀺. 𑀢𑀁 𑀤𑀺𑀲𑁆𑀯𑀸 𑀧𑀼𑀭𑀢𑁄 𑀅𑀜𑁆𑀜𑁂𑀧𑀺 𑀘𑀢𑀼𑀧𑁆𑀧𑀤𑀸 𑀧𑀮𑀸𑀬𑀺𑀁𑀲𑀼. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀻𑀳𑁄 𑀳𑁄𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀧𑀣𑀯𑀻 𑀦𑀸𑀫 𑀓𑀧𑁆𑀧𑀯𑀺𑀦𑀸𑀲𑁂 𑀪𑀺𑀚𑁆𑀚𑀢𑀺, 𑀅𑀦𑁆𑀢𑀭𑀸 𑀧𑀣𑀯𑀻𑀪𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀬𑀁𑀦𑀽𑀦𑀸𑀳𑀁 𑀫𑀽𑀮𑀫𑀽𑀮𑀁 𑀕𑀦𑁆𑀢𑁆𑀯𑀸 𑀅𑀦𑀼𑀯𑀺𑀚𑁆𑀚𑁂𑀬𑁆𑀬’’𑀦𑁆𑀢𑀺. 𑀲𑁄 𑀳𑀢𑁆𑀣𑀺𑀦𑀸𑀕𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀲𑀓𑀁 𑀧𑀼𑀘𑁆𑀙𑀺 ‘‘𑀢𑀬𑀸, 𑀢𑀸𑀢, 𑀧𑀣𑀯𑀻 𑀪𑀺𑀚𑁆𑀚𑀫𑀸𑀦𑀸 𑀤𑀺𑀝𑁆𑀞𑀸’’𑀢𑀺. 𑀲𑀲𑁄 ‘‘𑀆𑀫 𑀤𑁂𑀯𑀸’’𑀢𑀺 𑀆𑀳. 𑀲𑀻𑀳𑁄 ‘‘𑀏𑀳𑀺, 𑀪𑁄, 𑀤𑀲𑁆𑀲𑁂𑀳𑀻’’𑀢𑀺. 𑀲𑀲𑁄 ‘‘𑀦 𑀲𑀓𑁆𑀓𑁄𑀫𑀺 𑀲𑀸𑀫𑀻’’𑀢𑀺. ‘‘𑀏𑀳𑀺, 𑀭𑁂, 𑀫𑀸 𑀪𑀸𑀬𑀻’’𑀢𑀺 𑀲𑀡𑁆𑀳𑀫𑀼𑀤𑀼𑀓𑁂𑀦 𑀕𑀳𑁂𑀢𑁆𑀯𑀸 𑀕𑀢𑁄 𑀲𑀲𑁄 𑀭𑀼𑀓𑁆𑀔𑀲𑁆𑀲 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 𑁋

‘‘𑀤𑀼𑀤𑁆𑀤𑀼𑀪𑀸𑀬𑀢𑀺 𑀪𑀤𑁆𑀤𑀦𑁆𑀢𑁂, 𑀬𑀲𑁆𑀫𑀺𑀁 𑀤𑁂𑀲𑁂 𑀯𑀲𑀸𑀫𑀳𑀁;

𑀅𑀳𑀫𑁆𑀧𑁂𑀢𑀁 𑀦 𑀚𑀸𑀦𑀸𑀫𑀺, 𑀓𑀺𑀫𑁂𑀢𑀁 𑀤𑀼𑀤𑁆𑀤𑀼𑀪𑀸𑀬𑀢𑀻’’𑀢𑀺. (𑀚𑀸. 𑁧.𑁪.𑁮𑁫) 𑁋

𑀕𑀸𑀣𑀫𑀸𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀢𑁆𑀯𑀁 𑀏𑀢𑁆𑀣𑁂𑀯 𑀢𑀺𑀝𑁆𑀞𑀸’’𑀢𑀺 𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀲𑀓𑀲𑁆𑀲 𑀦𑀺𑀧𑀦𑁆𑀦𑀝𑁆𑀞𑀸𑀦𑀁 𑀅𑀤𑁆𑀤𑀲, 𑀩𑁂𑀮𑀼𑀯𑀧𑀓𑁆𑀓𑀁 𑀅𑀤𑁆𑀤𑀲, 𑀉𑀤𑁆𑀥𑀁 𑀑𑀮𑁂𑀓𑁂𑀢𑁆𑀯𑀸 𑀯𑀡𑁆𑀝𑀁 𑀅𑀤𑁆𑀤𑀲, 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀲𑁄 𑀏𑀢𑁆𑀣 𑀦𑀺𑀧𑀦𑁆𑀦𑁄, 𑀦𑀺𑀤𑁆𑀤𑀸𑀬𑀫𑀸𑀦𑁄 𑀇𑀫𑀲𑁆𑀲 𑀓𑀡𑁆𑀡𑀫𑀽𑀮𑁂 𑀧𑀢𑀺𑀢𑀲𑁆𑀲 𑀲𑀤𑁆𑀤𑁂𑀦 ‘𑀧𑀣𑀯𑀻 𑀪𑀺𑀚𑁆𑀚𑀢𑀻’𑀢𑀺 𑀏𑀯𑀁𑀲𑀜𑁆𑀜𑀻 𑀳𑀼𑀢𑁆𑀯𑀸 𑀧𑀮𑀸𑀬𑀻’’𑀢𑀺 𑀜𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀲𑀲𑀁 𑀧𑀼𑀘𑁆𑀙𑀺. 𑀲𑀲𑁄 ‘‘𑀆𑀫, 𑀤𑁂𑀯𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀩𑁂𑀮𑀼𑀯 𑀧𑀢𑀺𑀢𑀁 𑀲𑀼𑀢𑁆𑀯𑀸, 𑀤𑀼𑀤𑁆𑀤𑀼𑀪𑀦𑁆𑀢𑀺 𑀲𑀲𑁄 𑀚𑀯𑀺;

𑀲𑀲𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀦𑁆𑀢𑀢𑁆𑀢𑀸 𑀫𑀺𑀕𑀯𑀸𑀳𑀺𑀦𑀻’’𑀢𑀺. (𑀚𑀸. 𑁧.𑁪.𑁮𑁬);

𑀢𑀢𑁄 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀸 𑀪𑀸𑀬𑀣𑀸’’𑀢𑀺 𑀫𑀺𑀕𑀕𑀡𑁂 𑀅𑀲𑁆𑀲𑀸𑀲𑁂𑀲𑀺. 𑀏𑀯𑀁 𑀯𑀺𑀢𑀓𑁆𑀓𑀸𑀦𑀁 𑀫𑀽𑀮𑀫𑀽𑀮𑀁 𑀕𑀘𑁆𑀙𑀦𑁆𑀢𑀲𑁆𑀲 𑀯𑀺𑀢𑀓𑁆𑀓𑀸 𑀧𑀳𑀻𑀬𑀦𑁆𑀢𑀺.

𑁨𑁨𑁦. 𑀇𑀫𑀲𑁆𑀫𑀺𑀁 𑀯𑀺𑀢𑀓𑁆𑀓𑀫𑀽𑀮𑀪𑁂𑀤𑀧𑀩𑁆𑀩𑁂 𑀞𑀢𑁆𑀯𑀸 𑀯𑀺𑀢𑀓𑁆𑀓𑁂 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀦 𑀏𑀯𑀁 𑀦𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀸𑀢𑀺 𑀅𑀧𑀭𑀫𑁆𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳.

𑀤𑀦𑁆𑀢𑁂𑀪𑀺𑀤𑀦𑁆𑀢𑀫𑀸𑀥𑀸𑀬𑀸𑀢𑀺 𑀳𑁂𑀝𑁆𑀞𑀸𑀤𑀦𑁆𑀢𑁂 𑀉𑀧𑀭𑀺𑀤𑀦𑁆𑀢𑀁 𑀞𑀧𑁂𑀢𑁆𑀯𑀸. 𑀘𑁂𑀢𑀲𑀸 𑀘𑀺𑀢𑁆𑀢𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀁. 𑀩𑀮𑀯𑀸 𑀧𑀼𑀭𑀺𑀲𑁄𑀢𑀺 𑀬𑀣𑀸 𑀣𑀸𑀫𑀲𑀫𑁆𑀧𑀦𑁆𑀦𑁄 𑀫𑀳𑀸𑀩𑀮𑁄 𑀧𑀼𑀭𑀺𑀲𑁄 𑀤𑀼𑀩𑁆𑀩𑀮𑀁 𑀧𑀼𑀭𑀺𑀲𑀁 𑀲𑀻𑀲𑁂 𑀯𑀸 𑀕𑀮𑁂 𑀯𑀸 𑀔𑀦𑁆𑀥𑁂 𑀯𑀸 𑀕𑀳𑁂𑀢𑁆𑀯𑀸 𑀅𑀪𑀺𑀦𑀺𑀕𑁆𑀕𑀡𑁆𑀳𑁂𑀬𑁆𑀬 𑀅𑀪𑀺𑀦𑀺𑀧𑁆𑀧𑀻𑀴𑁂𑀬𑁆𑀬 𑀅𑀪𑀺𑀲𑀦𑁆𑀢𑀸𑀧𑁂𑀬𑁆𑀬 𑀲𑀦𑁆𑀢𑀢𑁆𑀢𑀁 𑀓𑀺𑀮𑀦𑁆𑀢𑀁 𑀫𑀼𑀘𑁆𑀙𑀸𑀧𑀭𑁂𑀢𑀁 𑀯𑀺𑀬 𑀓𑀭𑁂𑀬𑁆𑀬, 𑀏𑀯𑀫𑁂𑀯 𑀪𑀺𑀓𑁆𑀔𑀼𑀦𑀸 𑀯𑀺𑀢𑀓𑁆𑀓𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀫𑀮𑁆𑀮𑁂𑀦 𑀳𑀼𑀢𑁆𑀯𑀸 ‘‘𑀓𑁂 𑀘 𑀢𑀼𑀫𑁆𑀳𑁂 𑀓𑁄 𑀘𑀸𑀳’’𑀦𑁆𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑁋 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼 𑀲𑀭𑀻𑀭𑁂 𑀉𑀧𑀲𑀼𑀲𑁆𑀲𑀢𑀼 𑀫𑀁𑀲𑀮𑁄𑀳𑀺𑀢’’𑀦𑁆𑀢𑀺 (𑀅. 𑀦𑀺. 𑁨.𑁫) 𑀏𑀯𑀁 𑀫𑀳𑀸𑀯𑀻𑀭𑀺𑀬𑀁 𑀧𑀕𑁆𑀕𑀬𑁆𑀳 𑀯𑀺𑀢𑀓𑁆𑀓𑀸 𑀦𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀇𑀫 𑀅𑀢𑁆𑀣𑀤𑀻𑀧𑀺𑀓𑀁 𑀉𑀧𑀫𑀁 𑀆𑀳𑀭𑀺.

𑁨𑁨𑁧. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀇𑀤𑀁 𑀧𑀭𑀺𑀬𑀸𑀤𑀸𑀦𑀪𑀸𑀚𑀦𑀺𑀬𑀁 𑀦𑀸𑀫, 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀬𑀣𑀸 𑀧𑀦 𑀲𑀢𑁆𑀣𑀸𑀘𑀭𑀺𑀬𑁄 𑀢𑀺𑀭𑁄𑀭𑀝𑁆𑀞𑀸 𑀆𑀕𑀢𑀁 𑀭𑀸𑀚𑀧𑀼𑀢𑁆𑀢𑀁 𑀧𑀜𑁆𑀘𑀸𑀯𑀼𑀥𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙, 𑀅𑀢𑁆𑀢𑀦𑁄 𑀭𑀝𑁆𑀞𑁂 𑀭𑀚𑁆𑀚𑀁 𑀕𑀡𑁆𑀳. 𑀲𑀘𑁂 𑀢𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑀸 𑀉𑀝𑁆𑀞𑀳𑀦𑁆𑀢𑀺, 𑀥𑀦𑀼𑀦𑀸 𑀓𑀫𑁆𑀫𑀁 𑀓𑀢𑁆𑀯𑀸 𑀕𑀘𑁆𑀙. 𑀲𑀘𑁂 𑀢𑁂 𑀥𑀦𑀼 𑀦𑀲𑁆𑀲𑀢𑀺 𑀯𑀸 𑀪𑀺𑀚𑁆𑀚𑀢𑀺 𑀯𑀸 𑀲𑀢𑁆𑀢𑀺𑀬𑀸 𑀅𑀲𑀺𑀦𑀸’’𑀢𑀺 𑀏𑀯𑀁 𑀧𑀜𑁆𑀘𑀳𑀺𑀧𑀺 𑀆𑀯𑀼𑀥𑁂𑀳𑀺 𑀓𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀲𑀓𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀭𑀚𑁆𑀚𑀲𑀺𑀭𑀺𑀁 𑀅𑀦𑀼𑀪𑁄𑀢𑀺. 𑀏𑀯𑀫𑁂𑀯𑀁 𑀪𑀕𑀯𑀸 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀁 𑀪𑀺𑀓𑁆𑀔𑀼𑀁 𑀅𑀭𑀳𑀢𑁆𑀢𑀕𑀳𑀡𑀢𑁆𑀣𑀸𑀬 𑀉𑀬𑁆𑀬𑁄𑀚𑁂𑀦𑁆𑀢𑁄 𑁋 ‘‘𑀲𑀘𑀲𑁆𑀲 𑀅𑀦𑁆𑀢𑀭𑀸 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀜𑁆𑀜𑀦𑀺𑀫𑀺𑀢𑁆𑀢𑀧𑀩𑁆𑀩𑁂 𑀞𑀢𑁆𑀯𑀸 𑀢𑁂 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀢𑀢𑁆𑀣 𑀅𑀲𑀓𑁆𑀓𑁄𑀦𑁆𑀢𑁄 𑀆𑀤𑀻𑀦𑀯𑀧𑀩𑁆𑀩𑁂 𑀞𑀢𑁆𑀯𑀸, 𑀢𑀢𑁆𑀭𑀸𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀅𑀲𑀢𑀺𑀧𑀩𑁆𑀩𑁂 𑀞𑀢𑁆𑀯𑀸, 𑀢𑀢𑁆𑀭𑀸𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀢𑀓𑁆𑀓𑀫𑀽𑀮𑀪𑁂𑀤𑀧𑀩𑁆𑀩𑁂 𑀞𑀢𑁆𑀯𑀸, 𑀢𑀢𑁆𑀭𑀸𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀅𑀪𑀺𑀦𑀺𑀕𑁆𑀕𑀡𑁆𑀳𑀦𑀧𑀩𑁆𑀩𑁂 𑀞𑀢𑁆𑀯𑀸 𑀯𑀺𑀢𑀓𑁆𑀓𑁂 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀧𑀩𑁆𑀩𑀸𑀦𑀺 𑀤𑁂𑀲𑁂𑀲𑀺.

𑀯𑀲𑀻 𑀯𑀺𑀢𑀓𑁆𑀓𑀧𑀭𑀺𑀬𑀸𑀬𑀧𑀣𑁂𑀲𑀽𑀢𑀺 𑀯𑀺𑀢𑀓𑁆𑀓𑀘𑀸𑀭𑀧𑀣𑁂𑀲𑀼 𑀘𑀺𑀡𑁆𑀡𑀯𑀲𑀻 𑀧𑀕𑀼𑀡𑀯𑀲𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀯𑀺𑀢𑀓𑁆𑀓𑀁 𑀆𑀓𑀗𑁆𑀔𑀺𑀲𑁆𑀲𑀢𑀻𑀢𑀺 𑀇𑀤𑀁 𑀅𑀲𑁆𑀲 𑀯𑀲𑀻𑀪𑀸𑀯𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀳𑀺 𑀧𑀼𑀩𑁆𑀩𑁂 𑀬𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀦 𑀯𑀺𑀢𑀓𑁆𑀓𑁂𑀢𑀺. 𑀬𑀁 𑀦 𑀯𑀺𑀢𑀓𑁆𑀓𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀯𑀺𑀢𑀓𑁆𑀓𑁂𑀢𑀺. 𑀇𑀤𑀸𑀦𑀺 𑀧𑀦 𑀯𑀲𑀻𑀪𑀽𑀢𑀢𑁆𑀢𑀸 𑀬𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁𑀬𑁂𑀯 𑀯𑀺𑀢𑀓𑁆𑀓𑁂𑀢𑀺. 𑀬𑀁 𑀦 𑀯𑀺𑀢𑀓𑁆𑀓𑁂𑀢𑀼𑀓𑀸𑀫𑁄, 𑀦 𑀢𑀁 𑀯𑀺𑀢𑀓𑁆𑀓𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀁 𑀯𑀺𑀢𑀓𑁆𑀓𑀁 𑀆𑀓𑀗𑁆𑀔𑀺𑀲𑁆𑀲𑀢𑀺, 𑀢𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑁆𑀲𑀢𑀺. 𑀬𑀁 𑀯𑀺𑀢𑀓𑁆𑀓𑀁 𑀦𑀸𑀓𑀗𑁆𑀔𑀺𑀲𑁆𑀲𑀢𑀺, 𑀦 𑀢𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀔𑁂𑀲𑁆𑀲𑀢𑀻’’𑀢𑀺. 𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀦𑁆𑀢𑀺𑀆𑀤𑀺 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑁂 𑀯𑀼𑀢𑁆𑀢𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀯𑀺𑀢𑀓𑁆𑀓𑀲𑀡𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀧𑀡𑁆𑀡𑀸𑀲𑀝𑁆𑀞𑀓𑀣𑀸𑀬 𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.