𑁨. 𑀲𑀻𑀳𑀦𑀸𑀤𑀯𑀕𑁆𑀕𑁄

𑁧. 𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦𑀲𑁆𑀲 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑁆𑀯𑀸 𑀘𑀲𑁆𑀲 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫. 𑀓𑀢𑀭𑀸𑀬 𑀧𑀦𑀺𑀤𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺? 𑀮𑀸𑀪𑀲𑀓𑁆𑀓𑀸𑀭𑀧𑀘𑁆𑀘𑀬𑀸 𑀢𑀺𑀢𑁆𑀣𑀺𑀬𑀧𑀭𑀺𑀤𑁂𑀯𑀺𑀢𑁂. 𑀪𑀕𑀯𑀢𑁄 𑀓𑀺𑀭 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀘𑀢𑀼𑀧𑁆𑀧𑀫𑀸𑀡𑀺𑀓𑁄 𑀳𑀺 𑀅𑀬𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑁄, 𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄, 𑀖𑁄𑀲𑀧𑁆𑀧𑀫𑀸𑀡𑁄 𑀖𑁄𑀲𑀧𑁆𑀧𑀲𑀦𑁆𑀦𑁄, 𑀮𑀽𑀔𑀧𑁆𑀧𑀫𑀸𑀡𑁄 𑀮𑀽𑀔𑀧𑁆𑀧𑀲𑀦𑁆𑀦𑁄, 𑀥𑀫𑁆𑀫𑀧𑁆𑀧𑀫𑀸𑀡𑁄 𑀥𑀫𑁆𑀫𑀧𑁆𑀧𑀲𑀦𑁆𑀦𑁄𑀢𑀺 𑀇𑀫𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀘𑀢𑀼𑀥𑀸 𑀞𑀺𑀢𑁄.

𑀢𑁂𑀲𑀁 𑀇𑀤𑀁 𑀦𑀸𑀦𑀸𑀓𑀭𑀡𑀁 𑁋 𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀆𑀭𑁄𑀳𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀧𑀭𑀺𑀡𑀸𑀳𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀧𑀸𑀭𑀺𑀧𑀽𑀭𑀺𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀢𑁆𑀣 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀸𑀤𑀁 𑀚𑀦𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄.

𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀖𑁄𑀲𑀧𑁆𑀧𑀫𑀸𑀡𑁄 𑀖𑁄𑀲𑀧𑁆𑀧𑀲𑀦𑁆𑀦𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀧𑀭𑀯𑀡𑁆𑀡𑀦𑀸𑀬 𑀧𑀭𑀣𑁄𑀫𑀦𑀸𑀬 𑀧𑀭𑀧𑀲𑀁𑀲𑀦𑀸𑀬 𑀧𑀭𑀯𑀡𑁆𑀡𑀳𑀸𑀭𑀺𑀓𑀸𑀬, 𑀢𑀢𑁆𑀣 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀸𑀤𑀁 𑀚𑀦𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀖𑁄𑀲𑀧𑁆𑀧𑀫𑀸𑀡𑁄 𑀖𑁄𑀲𑀧𑁆𑀧𑀲𑀦𑁆𑀦𑁄.

𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀮𑀽𑀔𑀧𑁆𑀧𑀫𑀸𑀡𑁄 𑀮𑀽𑀔𑀧𑁆𑀧𑀲𑀦𑁆𑀦𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀘𑀻𑀯𑀭𑀮𑀽𑀔𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀧𑀢𑁆𑀢𑀮𑀽𑀔𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸, 𑀲𑁂𑀦𑀸𑀲𑀦𑀮𑀽𑀔𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀯𑀺𑀯𑀺𑀥𑀁 𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀧𑀲𑁆𑀲𑀺𑀢𑁆𑀯𑀸 𑀢𑀢𑁆𑀣 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀸𑀤𑀁 𑀚𑀦𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀮𑀽𑀔𑀧𑁆𑀧𑀫𑀸𑀡𑁄 𑀮𑀽𑀔𑀧𑁆𑀧𑀲𑀦𑁆𑀦𑁄.

𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀥𑀫𑁆𑀫𑀧𑁆𑀧𑀫𑀸𑀡𑁄 𑀥𑀫𑁆𑀫𑀧𑁆𑀧𑀲𑀦𑁆𑀦𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀲𑀫𑀸𑀥𑀺𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀧𑀜𑁆𑀜𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀢𑁆𑀣 𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀲𑀸𑀤𑀁 𑀚𑀦𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀥𑀫𑁆𑀫𑀧𑁆𑀧𑀫𑀸𑀡𑁄 𑀥𑀫𑁆𑀫𑀧𑁆𑀧𑀲𑀦𑁆𑀦𑁄𑀢𑀺.

𑀇𑀫𑁂𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀭𑀽𑀧𑀧𑁆𑀧𑀫𑀸𑀡𑁄𑀧𑀺 𑀪𑀕𑀯𑀢𑁄 𑀆𑀭𑁄𑀳𑀧𑀭𑀺𑀡𑀸𑀳𑀲𑀡𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀯𑀡𑁆𑀡𑀧𑁄𑀓𑁆𑀔𑀭𑀢𑀁, 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑁆𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀦𑀸𑀦𑀸𑀭𑀢𑀦𑀯𑀺𑀘𑀺𑀢𑁆𑀢𑀫𑀺𑀯 𑀲𑀼𑀯𑀡𑁆𑀡𑀫𑀳𑀸𑀧𑀝𑀁, 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀫𑀸𑀓𑀺𑀡𑁆𑀡𑀢𑀸𑀬 𑀢𑀸𑀭𑀸𑀕𑀡𑀲𑀫𑀼𑀚𑁆𑀚𑀮𑀁 𑀯𑀺𑀬 𑀕𑀕𑀦𑀢𑀮𑀁 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀁 𑀯𑀺𑀬 𑀘 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀁 𑀅𑀝𑁆𑀞𑀸𑀭𑀲𑀭𑀢𑀦𑀼𑀩𑁆𑀩𑁂𑀥𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀁 𑀲𑀲𑁆𑀲𑀺𑀭𑀺𑀓𑀁 𑀅𑀦𑁄𑀧𑀫𑀲𑀭𑀻𑀭𑀁 𑀤𑀺𑀲𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀬𑁂𑀯 𑀧𑀲𑀻𑀤𑀢𑀺.

𑀖𑁄𑀲𑀧𑁆𑀧𑀫𑀸𑀡𑁄𑀧𑀺, 𑀪𑀕𑀯𑀢𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀤𑀲 𑀧𑀸𑀭𑀫𑀺𑀬𑁄 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑁄, 𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑁄 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑁄 𑀦𑀬𑀦𑀧𑀭𑀺𑀘𑁆𑀘𑀸𑀕𑁄 𑀘 𑀓𑀢𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀁 𑀖𑁄𑀲𑀁 𑀲𑀼𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀬𑁂𑀯 𑀧𑀲𑀻𑀤𑀢𑀺.

𑀮𑀽𑀔𑀧𑁆𑀧𑀫𑀸𑀡𑁄𑀧𑀺 𑀪𑀕𑀯𑀢𑁄 𑀘𑀻𑀯𑀭𑀮𑀽𑀔𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀪𑀕𑀯𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲, 𑀓𑀸𑀲𑀺𑀓𑀯𑀢𑁆𑀣𑀫𑁂𑀯 𑀅𑀥𑀸𑀭𑀬𑀺𑀲𑁆𑀲. 𑀧𑀩𑁆𑀩𑀚𑀺𑀢𑁆𑀯𑀸 𑀧𑀦𑀸𑀦𑁂𑀦 𑀲𑀸𑀡𑀧𑀁𑀲𑀼𑀓𑀽𑀮𑀘𑀻𑀯𑀭𑁂𑀦 𑀲𑀦𑁆𑀢𑀼𑀲𑁆𑀲𑀫𑀸𑀦𑁂𑀦 𑀪𑀸𑀭𑀺𑀬𑀁 𑀓𑀢’’𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀬𑁂𑀯 𑀧𑀲𑀻𑀤𑀢𑀺. 𑀧𑀢𑁆𑀢𑀮𑀽𑀔𑀫𑁆𑀧𑀺 𑀤𑀺𑀲𑁆𑀯𑀸 𑁋 ‘‘𑀇𑀫𑀺𑀦𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑁂𑀦 𑀭𑀢𑁆𑀢𑀯𑀭𑀲𑀼𑀯𑀡𑁆𑀡𑀪𑀸𑀚𑀦𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀪𑁄𑀚𑀦𑀸𑀭𑀳𑀁 𑀲𑀼𑀕𑀦𑁆𑀥𑀲𑀸𑀮𑀺𑀪𑁄𑀚𑀦𑀁 𑀧𑀭𑀺𑀪𑀼𑀢𑁆𑀢𑀁, 𑀧𑀩𑁆𑀩𑀚𑀺𑀢𑁆𑀯𑀸 𑀧𑀦 𑀧𑀸𑀲𑀸𑀡𑀫𑀬𑀁 𑀧𑀢𑁆𑀢𑀁 𑀆𑀤𑀸𑀬 𑀉𑀘𑁆𑀘𑀦𑀻𑀘𑀓𑀼𑀮𑀤𑁆𑀯𑀸𑀭𑁂𑀲𑀼 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀧𑀺𑀡𑁆𑀟𑀺𑀬𑀸𑀮𑁄𑀧𑁂𑀦 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀪𑀸𑀭𑀺𑀬𑀁 𑀓𑀭𑁄𑀢𑀻’’𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀬𑁂𑀯 𑀧𑀲𑀻𑀤𑀢𑀺. 𑀲𑁂𑀦𑀸𑀲𑀦𑀮𑀽𑀔𑀁 𑀤𑀺𑀲𑁆𑀯𑀸𑀧𑀺 𑁋 ‘‘𑀅𑀬𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑁂𑀲𑀼 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀢𑀺𑀯𑀺𑀥𑀦𑀸𑀝𑀓𑀧𑀭𑀺𑀯𑀸𑀭𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀯𑀺𑀬 𑀭𑀚𑁆𑀚𑀲𑀺𑀭𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀤𑀸𑀦𑀺 𑀧𑀩𑁆𑀩𑀚𑁆𑀚𑀽𑀧𑀕𑀢𑁄 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀸𑀤𑀻𑀲𑀼 𑀤𑀸𑀭𑀼𑀨𑀮𑀓𑀲𑀺𑀮𑀸𑀧𑀝𑁆𑀝𑀧𑀻𑀞𑀫𑀜𑁆𑀘𑀓𑀸𑀤𑀻𑀳𑀺 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀪𑀸𑀭𑀺𑀬𑀁 𑀓𑀭𑁄𑀢𑀻’’𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀬𑁂𑀯 𑀧𑀲𑀻𑀤𑀢𑀺. 𑀤𑀼𑀓𑁆𑀓𑀭𑀓𑀸𑀭𑀺𑀓𑀫𑀲𑁆𑀲 𑀤𑀺𑀲𑁆𑀯𑀸𑀧𑀺 𑁋 ‘‘𑀙𑀩𑁆𑀩𑀲𑁆𑀲𑀸𑀦𑀺 𑀦𑀸𑀫 𑀫𑀼𑀕𑁆𑀕𑀬𑀽𑀲𑀓𑀼𑀮𑀢𑁆𑀣𑀬𑀽𑀲𑀳𑀭𑁂𑀡𑀼𑀬𑀽𑀲𑀸𑀤𑀻𑀦𑀁 𑀧𑀲𑀝𑀫𑀢𑁆𑀢𑁂𑀦 𑀬𑀸𑀧𑁂𑀲𑁆𑀲𑀢𑀺, 𑀅𑀧𑁆𑀧𑀸𑀡𑀓𑀁 𑀛𑀸𑀦𑀁 𑀛𑀸𑀬𑀺𑀲𑁆𑀲𑀢𑀺, 𑀲𑀭𑀻𑀭𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑁄 𑀯𑀺𑀳𑀭𑀺𑀲𑁆𑀲𑀢𑀺, 𑀅𑀳𑁄 𑀤𑀼𑀓𑁆𑀓𑀭𑀓𑀸𑀭𑀓𑁄 𑀪𑀕𑀯𑀸’’𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀬𑁂𑀯 𑀧𑀲𑀻𑀤𑀢𑀺.

𑀥𑀫𑁆𑀫𑀧𑁆𑀧𑀫𑀸𑀡𑁄𑀧𑀺 𑀪𑀕𑀯𑀢𑁄 𑀲𑀻𑀮𑀕𑀼𑀡𑀁 𑀲𑀫𑀸𑀥𑀺𑀕𑀼𑀡𑀁 𑀧𑀜𑁆𑀜𑀸𑀕𑀼𑀡𑀁 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀲𑀫𑁆𑀧𑀤𑀁 𑀅𑀪𑀺𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑁂𑀯𑁄𑀭𑁄𑀳𑀡𑀁 𑀧𑀸𑀣𑀺𑀓𑀧𑀼𑀢𑁆𑀢𑀤𑀫𑀦𑀸𑀤𑀻𑀦𑀺 𑀘 𑀅𑀦𑁂𑀓𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀤𑀺𑀲𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀬𑁂𑀯 𑀧𑀲𑀻𑀤𑀢𑀺, 𑀢𑁂 𑀏𑀯𑀁 𑀧𑀲𑀦𑁆𑀦𑀸 𑀪𑀕𑀯𑀢𑁄 𑀫𑀳𑀦𑁆𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀅𑀪𑀺𑀳𑀭𑀦𑁆𑀢𑀺. 𑀢𑀺𑀢𑁆𑀣𑀺𑀬𑀸𑀦𑀁 𑀧𑀦 𑀩𑀸𑀯𑁂𑀭𑀼𑀚𑀸𑀢𑀓𑁂 𑀓𑀸𑀓𑀲𑁆𑀲 𑀯𑀺𑀬 𑀮𑀸𑀪𑀲𑀓𑁆𑀓𑀸𑀭𑁄 𑀧𑀭𑀺𑀳𑀸𑀬𑀺𑀢𑁆𑀣. 𑀬𑀣𑀸𑀳 𑁋

‘‘𑀅𑀤𑀲𑁆𑀲𑀦𑁂𑀦 𑀫𑁄𑀭𑀲𑁆𑀲, 𑀲𑀺𑀔𑀺𑀦𑁄 𑀫𑀜𑁆𑀚𑀼𑀪𑀸𑀡𑀺𑀦𑁄;

𑀓𑀸𑀓𑀁 𑀢𑀢𑁆𑀣 𑀅𑀧𑀽𑀚𑁂𑀲𑀼𑀁, 𑀫𑀁𑀲𑁂𑀦 𑀘 𑀨𑀮𑁂𑀦 𑀘.

𑀬𑀤𑀸 𑀘 𑀲𑀭𑀲𑀫𑁆𑀧𑀦𑁆𑀦𑁄, 𑀫𑁄𑀭𑁄 𑀩𑀸𑀯𑁂𑀭𑀼𑀫𑀸𑀕𑀫𑀸;

𑀅𑀣 𑀮𑀸𑀪𑁄 𑀘 𑀲𑀓𑁆𑀓𑀸𑀭𑁄, 𑀯𑀸𑀬𑀲𑀲𑁆𑀲 𑀅𑀳𑀸𑀬𑀣.

𑀬𑀸𑀯 𑀦𑀼𑀧𑁆𑀧𑀚𑁆𑀚𑀢𑀺 𑀩𑀼𑀤𑁆𑀥𑁄, 𑀥𑀫𑁆𑀫𑀭𑀸𑀚𑀸 𑀧𑀪𑀗𑁆𑀓𑀭𑁄;

𑀢𑀸𑀯 𑀅𑀜𑁆𑀜𑁂 𑀅𑀧𑀽𑀚𑁂𑀲𑀼𑀁, 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂.

𑀬𑀤𑀸 𑀘 𑀲𑀭𑀲𑀫𑁆𑀧𑀦𑁆𑀦𑁄, 𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑀬𑀺;

𑀅𑀣 𑀮𑀸𑀪𑁄 𑀘 𑀲𑀓𑁆𑀓𑀸𑀭𑁄, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀳𑀸𑀬𑀣𑀸’’𑀢𑀺. (𑀚𑀸. 𑁧.𑁪.𑁧𑁫𑁩-𑁧𑁫𑁬);

𑀢𑁂 𑀏𑀯𑀁 𑀧𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀸 𑀭𑀢𑁆𑀢𑀺𑀁 𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀁 𑀑𑀪𑀸𑀲𑁂𑀢𑁆𑀯𑀸𑀧𑀺 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀔𑀚𑁆𑀚𑁄𑀧𑀦𑀓𑀸 𑀯𑀺𑀬 𑀳𑀢𑀧𑁆𑀧𑀪𑀸 𑀅𑀳𑁂𑀲𑀼𑀁.

𑀬𑀣𑀸 𑀳𑀺 𑀔𑀚𑁆𑀚𑁄𑀧𑀦𑀓𑀸, 𑀓𑀸𑀴𑀧𑀓𑁆𑀔𑀫𑁆𑀳𑀺 𑀭𑀢𑁆𑀢𑀺𑀬𑀸;

𑀦𑀺𑀤𑀲𑁆𑀲𑀬𑀦𑁆𑀢𑀺 𑀑𑀪𑀸𑀲𑀁, 𑀏𑀢𑁂𑀲𑀁 𑀯𑀺𑀲𑀬𑁄 𑀳𑀺 𑀲𑁄.

𑀬𑀤𑀸 𑀘 𑀭𑀲𑁆𑀫𑀺𑀲𑀫𑁆𑀧𑀦𑁆𑀦𑁄, 𑀅𑀩𑁆𑀪𑀼𑀤𑁂𑀢𑀺 𑀧𑀪𑀗𑁆𑀓𑀭𑁄;

𑀅𑀣 𑀔𑀚𑁆𑀚𑀼𑀧𑀲𑀗𑁆𑀖𑀸𑀦𑀁, 𑀧𑀪𑀸 𑀅𑀦𑁆𑀢𑀭𑀥𑀸𑀬𑀢𑀺.

𑀏𑀯𑀁 𑀔𑀚𑁆𑀚𑀼𑀧𑀲𑀤𑀺𑀲𑀸, 𑀢𑀺𑀢𑁆𑀣𑀺𑀬𑀸𑀧𑀺 𑀧𑀼𑀣𑀽 𑀇𑀥;

𑀓𑀸𑀴𑀧𑀓𑁆𑀔𑀽𑀧𑀫𑁂 𑀮𑁄𑀓𑁂, 𑀤𑀻𑀧𑀬𑀦𑁆𑀢𑀺 𑀲𑀓𑀁 𑀕𑀼𑀡𑀁.

𑀬𑀤𑀸 𑀘 𑀩𑀼𑀤𑁆𑀥𑁄 𑀮𑁄𑀓𑀲𑁆𑀫𑀺𑀁, 𑀉𑀤𑁂𑀢𑀺 𑀅𑀫𑀺𑀢𑀧𑁆𑀧𑀪𑁄;

𑀦𑀺𑀧𑁆𑀧𑀪𑀸 𑀢𑀺𑀢𑁆𑀣𑀺𑀬𑀸 𑀳𑁄𑀦𑁆𑀢𑀺, 𑀲𑀽𑀭𑀺𑀬𑁂 𑀔𑀚𑁆𑀚𑀼𑀧𑀓𑀸 𑀬𑀣𑀸𑀢𑀺.

𑀢𑁂 𑀏𑀯𑀁 𑀦𑀺𑀧𑁆𑀧𑀪𑀸 𑀳𑀼𑀢𑁆𑀯𑀸 𑀓𑀘𑁆𑀙𑀼𑀧𑀺𑀴𑀓𑀸𑀤𑀻𑀳𑀺 𑀓𑀺𑀡𑁆𑀡𑀲𑀭𑀻𑀭𑀸 𑀧𑀭𑀫𑀧𑀸𑀭𑀺𑀚𑀼𑀜𑁆𑀜𑀧𑀢𑁆𑀢𑀸 𑀬𑁂𑀦 𑀩𑀼𑀤𑁆𑀥𑁄 𑀬𑁂𑀦 𑀥𑀫𑁆𑀫𑁄 𑀬𑁂𑀦 𑀲𑀗𑁆𑀖𑁄 𑀬𑁂𑀦 𑀘 𑀫𑀳𑀸𑀚𑀦𑀲𑁆𑀲 𑀲𑀦𑁆𑀦𑀺𑀧𑀸𑀢𑁄, 𑀢𑁂𑀦 𑀢𑁂𑀦 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀫𑁆𑀧𑀺 𑀲𑀺𑀗𑁆𑀖𑀸𑀝𑀓𑁂𑀧𑀺 𑀘𑀢𑀼𑀓𑁆𑀓𑁂𑀧𑀺 𑀲𑀪𑀸𑀬𑀫𑁆𑀧𑀺 𑀞𑀢𑁆𑀯𑀸 𑀧𑀭𑀺𑀤𑁂𑀯𑀦𑁆𑀢𑀺 𑁋

‘‘𑀓𑀺𑀁 𑀪𑁄 𑀲𑀫𑀡𑁄𑀬𑁂𑀯 𑀕𑁄𑀢𑀫𑁄 𑀲𑀫𑀡𑁄, 𑀫𑀬𑀁 𑀅𑀲𑁆𑀲𑀫𑀡𑀸; 𑀲𑀫𑀡𑀲𑁆𑀲𑁂𑀯 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀲𑀫𑀡𑀸, 𑀅𑀫𑁆𑀳𑀸𑀓𑀁 𑀲𑀸𑀯𑀓𑀸 𑀅𑀲𑁆𑀲𑀫𑀡𑀸? 𑀲𑀫𑀡𑀲𑁆𑀲𑁂𑀯 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸𑀦𑀜𑁆𑀘𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦 𑀅𑀫𑁆𑀳𑀸𑀓𑀁, 𑀲𑀸𑀯𑀓𑀸𑀦𑀜𑁆𑀘 𑀦𑁄 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁? 𑀦𑀦𑀼 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀲𑀫𑀡𑁄, 𑀫𑀬𑀫𑁆𑀧𑀺 𑀲𑀫𑀡𑀸. 𑀲𑀫𑀡𑀲𑁆𑀲𑀧𑀺 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀲𑀫𑀡𑀸, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀸𑀯𑀓𑀸 𑀲𑀫𑀡𑀸. 𑀲𑀫𑀡𑀲𑁆𑀲𑀧𑀺 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸𑀦𑀜𑁆𑀘𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀸𑀯𑀓𑀸𑀦𑀜𑁆𑀘 𑀦𑁄 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀜𑁆𑀘𑁂𑀯? 𑀲𑀫𑀡𑀲𑁆𑀲𑀧𑀺 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸𑀦𑀜𑁆𑀘𑀲𑁆𑀲 𑀤𑁂𑀣 𑀓𑀭𑁄𑀣, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀸𑀯𑀓𑀸𑀦𑀜𑁆𑀘 𑀦𑁄 𑀤𑁂𑀣 𑀲𑀓𑁆𑀓𑀭𑁄𑀣? 𑀦𑀦𑀼 𑀲𑀫𑀡𑁄 𑀕𑁄𑀢𑀫𑁄 𑀧𑀼𑀭𑀺𑀫𑀸𑀦𑀺 𑀤𑀺𑀯𑀲𑀸𑀦𑀺 𑀉𑀧𑁆𑀧𑀦𑁆𑀦𑁄, 𑀫𑀬𑀁 𑀧𑀦 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁂𑀬𑁂𑀯 𑀉𑀧𑁆𑀧𑀦𑁆𑀦𑀸’’𑀢𑀺.

𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑀁 𑀯𑀺𑀭𑀯𑀦𑁆𑀢𑀺. 𑀅𑀣 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄𑀢𑀺 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁 ‘‘𑀢𑀺𑀢𑁆𑀣𑀺𑀬𑀸 𑀪𑀦𑁆𑀢𑁂 𑀇𑀤𑀜𑁆𑀘𑀺𑀤𑀜𑁆𑀘 𑀓𑀣𑁂𑀦𑁆𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀪𑀕𑀯𑀸 𑁋 ‘‘𑀫𑀸 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀺𑀢𑁆𑀣𑀺𑀬𑀸𑀦𑀁 𑀯𑀘𑀦𑁂𑀦 ‘𑀅𑀜𑁆𑀜𑀢𑁆𑀭 𑀲𑀫𑀡𑁄 𑀅𑀢𑁆𑀣𑀻’𑀢𑀺 𑀲𑀜𑁆𑀜𑀺𑀦𑁄 𑀅𑀳𑀼𑀯𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼 𑀲𑀫𑀡𑀪𑀸𑀯𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀇𑀥𑁂𑀯 𑀘 𑀅𑀦𑀼𑀚𑀸𑀦𑀦𑁆𑀢𑁄 𑀇𑀫𑀺𑀲𑁆𑀲𑀸 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀸 𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺.

𑀢𑀢𑁆𑀣 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂. 𑀅𑀬𑀁 𑀧𑀦 𑀦𑀺𑀬𑀫𑁄 𑀲𑁂𑀲𑀧𑀤𑁂𑀲𑀼𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀸𑀤𑀬𑁄𑀧𑀺 𑀳𑀺 𑀲𑀫𑀡𑀸 𑀇𑀥𑁂𑀯, 𑀦 𑀅𑀜𑁆𑀜𑀢𑁆𑀣. 𑀲𑀫𑀡𑁄𑀢𑀺 𑀲𑁄𑀢𑀸𑀧𑀦𑁆𑀦𑁄. 𑀢𑁂𑀦𑁂𑀯𑀸𑀳 𑁋 ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀲𑀫𑀡𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄, 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀲𑀫𑀡𑁄’’𑀢𑀺 (𑀅. 𑀦𑀺. 𑁪.𑁨𑁪𑁧).

𑀤𑀼𑀢𑀺𑀬𑁄𑀢𑀺 𑀲𑀓𑀤𑀸𑀕𑀸𑀫𑀻. 𑀢𑁂𑀦𑁂𑀯𑀸𑀳 𑁋 ‘‘𑀓𑀢𑀫𑁄 𑀘? 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀲𑀫𑀡𑁄. 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺, 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺.

𑀢𑀢𑀺𑀬𑁄𑀢𑀺 𑀅𑀦𑀸𑀕𑀸𑀫𑀻. 𑀢𑁂𑀦𑁂𑀯𑀸𑀳 𑁋 ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀲𑀫𑀡𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑁄 𑀳𑁄𑀢𑀺 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀲𑀫𑀡𑁄’’𑀢𑀺.

𑀘𑀢𑀼𑀢𑁆𑀣𑁄𑀢𑀺 𑀅𑀭𑀳𑀸. 𑀢𑁂𑀦𑁂𑀯𑀸𑀳 𑁋 ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀲𑀫𑀡𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀲𑀫𑀡𑁄’’𑀢𑀺 (𑀅. 𑀦𑀺. 𑁪.𑁨𑁪𑁧). 𑀇𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑀓𑀲𑀫𑀡𑀸𑀯 𑀅𑀥𑀺𑀧𑁆𑀧𑁂𑀢𑀸.

𑀲𑀼𑀜𑁆𑀜𑀸𑀢𑀺 𑀭𑀺𑀢𑁆𑀢𑀸 𑀢𑀼𑀘𑁆𑀙𑀸. 𑀧𑀭𑀧𑁆𑀧𑀯𑀸𑀤𑀸𑀢𑀺 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸, 𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸, 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸, 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸, 𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀇𑀫𑁂 𑀲𑀩𑁆𑀩𑁂𑀧𑀺 𑀩𑁆𑀭𑀳𑁆𑀫𑀚𑀸𑀮𑁂 𑀆𑀕𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄. 𑀇𑀢𑁄 𑀩𑀸𑀳𑀺𑀭𑀸𑀦𑀁 𑀧𑀭𑁂𑀲𑀁 𑀯𑀸𑀤𑀸 𑀧𑀭𑀧𑁆𑀧𑀯𑀸𑀤𑀸 𑀦𑀸𑀫. 𑀢𑁂 𑀲𑀩𑁆𑀩𑁂𑀧𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀨𑀮𑀝𑁆𑀞𑀓𑀲𑀫𑀡𑁂𑀳𑀺 𑀲𑀼𑀜𑁆𑀜𑀸, 𑀦 𑀳𑀺 𑀢𑁂 𑀏𑀢𑁆𑀣 𑀲𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀏𑀢𑁂𑀳𑁂𑀯 𑀲𑀼𑀜𑁆𑀜𑀸, 𑀘𑀢𑀽𑀳𑀺 𑀧𑀦 𑀫𑀕𑁆𑀕𑀝𑁆𑀞𑀓𑀲𑀫𑀡𑁂𑀳𑀺𑀧𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀅𑀢𑁆𑀣𑀸𑀬 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁂𑀳𑀺𑀧𑀻𑀢𑀺 𑀤𑁆𑀯𑀸𑀤𑀲𑀳𑀺𑀧𑀺 𑀲𑀫𑀡𑁂𑀳𑀺 𑀲𑀼𑀜𑁆𑀜𑀸 𑀏𑀯. 𑀇𑀫𑀫𑁂𑀯 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑁂 𑀯𑀼𑀢𑁆𑀢𑀁 𑁋

‘‘𑀏𑀓𑀽𑀦𑀢𑀺𑀁𑀲𑁄 𑀯𑀬𑀲𑀸 𑀲𑀼𑀪𑀤𑁆𑀤,

𑀬𑀁 𑀧𑀩𑁆𑀩𑀚𑀺𑀁 𑀓𑀺𑀁 𑀓𑀼𑀲𑀮𑀸𑀦𑀼𑀏𑀲𑀻;

𑀯𑀲𑁆𑀲𑀸𑀦𑀺 𑀧𑀜𑁆𑀜𑀸𑀲 𑀲𑀫𑀸𑀥𑀺𑀓𑀸𑀦𑀺,

𑀬𑀢𑁄 𑀅𑀳𑀁 𑀧𑀩𑁆𑀩𑀚𑀺𑀢𑁄 𑀲𑀼𑀪𑀤𑁆𑀤;

𑀜𑀸𑀬𑀲𑁆𑀲 𑀥𑀫𑁆𑀫𑀲𑁆𑀲 𑀧𑀤𑁂𑀲𑀯𑀢𑁆𑀢𑀻,

𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑁄𑀧𑀺 𑀦𑀢𑁆𑀣𑀺.

‘‘𑀤𑀼𑀢𑀺𑀬𑁄𑀧𑀺 𑀲𑀫𑀡𑁄 𑀦𑀢𑁆𑀣𑀺, 𑀢𑀢𑀺𑀬𑁄𑀧𑀺 𑀲𑀫𑀡𑁄 𑀦𑀢𑁆𑀣𑀺, 𑀘𑀢𑀼𑀢𑁆𑀣𑁄𑀧𑀺 𑀲𑀫𑀡𑁄 𑀦𑀢𑁆𑀣𑀺. 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺 (𑀤𑀻. 𑀦𑀺. 𑁨.𑁨𑁧𑁪).

𑀏𑀢𑁆𑀣 𑀳𑀺 𑀧𑀤𑁂𑀲𑀯𑀢𑁆𑀢𑀻𑀢𑀺 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀁 𑀫𑀕𑁆𑀕𑀝𑁆𑀞𑀁 𑀨𑀮𑀝𑁆𑀞𑀦𑁆𑀢𑀺 𑀢𑀬𑁄𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀲𑀫𑀡𑁄𑀧𑀺 𑀦𑀢𑁆𑀣𑀻𑀢𑀺 𑀆𑀳. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀁 𑀫𑀕𑁆𑀕𑀝𑁆𑀞𑀁 𑀨𑀮𑀝𑁆𑀞𑀦𑁆𑀢𑀺 𑀢𑀬𑁄𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀤𑀼𑀢𑀺𑀬𑁄𑀧𑀺 𑀲𑀫𑀡𑁄 𑀦𑀢𑁆𑀣𑀻𑀢𑀺 𑀆𑀳. 𑀇𑀢𑀭𑁂𑀲𑀼𑀧𑀺 𑀤𑁆𑀯𑀻𑀲𑀼 𑀏𑀲𑁂𑀯 𑀦𑀬𑁄.

𑀓𑀲𑁆𑀫𑀸 𑀧𑀦𑁂𑀢𑁂 𑀅𑀜𑁆𑀜𑀢𑁆𑀣 𑀦𑀢𑁆𑀣𑀻𑀢𑀺? 𑀅𑀔𑁂𑀢𑁆𑀢𑀢𑀸𑀬. 𑀬𑀣𑀸 𑀳𑀺 𑀦 𑀆𑀭𑀕𑁆𑀕𑁂 𑀲𑀸𑀲𑀧𑁄 𑀢𑀺𑀝𑁆𑀞𑀢𑀺, 𑀦 𑀉𑀤𑀓𑀧𑀺𑀝𑁆𑀞𑁂 𑀅𑀕𑁆𑀕𑀺 𑀚𑀮𑀢𑀺, 𑀦 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀩𑀻𑀚𑀸𑀦𑀺 𑀭𑀼𑀳𑀦𑁆𑀢𑀺, 𑀏𑀯𑀫𑁂𑀯 𑀩𑀸𑀳𑀺𑀭𑁂𑀲𑀼 𑀢𑀺𑀢𑁆𑀣𑀸𑀬𑀢𑀦𑁂𑀲𑀼 𑀦 𑀇𑀫𑁂 𑀲𑀫𑀡𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀇𑀫𑀲𑁆𑀫𑀺𑀁𑀬𑁂𑀯 𑀧𑀦 𑀲𑀸𑀲𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑀲𑁆𑀫𑀸? 𑀔𑁂𑀢𑁆𑀢𑀢𑀸𑀬. 𑀢𑁂𑀲𑀁 𑀅𑀔𑁂𑀢𑁆𑀢𑀢𑀸 𑀘 𑀔𑁂𑀢𑁆𑀢𑀢𑀸 𑀘 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀪𑀸𑀯𑀢𑁄 𑀘 𑀪𑀸𑀯𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀦 𑀉𑀧𑀮𑀩𑁆𑀪𑀢𑀺, 𑀲𑀫𑀡𑁄𑀧𑀺 𑀢𑀢𑁆𑀣 𑀦 𑀉𑀧𑀮𑀩𑁆𑀪𑀢𑀺, 𑀤𑀼𑀢𑀺𑀬𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀦 𑀉𑀧𑀮𑀩𑁆𑀪𑀢𑀺, 𑀢𑀢𑀺𑀬𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀦 𑀉𑀧𑀮𑀩𑁆𑀪𑀢𑀺, 𑀘𑀢𑀼𑀢𑁆𑀣𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀦 𑀉𑀧𑀮𑀩𑁆𑀪𑀢𑀺. 𑀬𑀲𑁆𑀫𑀺𑀜𑁆𑀘 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑀮𑀩𑁆𑀪𑀢𑀺, 𑀲𑀫𑀡𑁄𑀧𑀺 𑀢𑀢𑁆𑀣 𑀉𑀧𑀮𑀩𑁆𑀪𑀢𑀺, 𑀤𑀼𑀢𑀺𑀬𑁄𑀧𑀺 𑀢𑀢𑁆𑀣…𑀧𑁂…. 𑀘𑀢𑀼𑀢𑁆𑀣𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀉𑀧𑀮𑀩𑁆𑀪𑀢𑀺. 𑀇𑀫𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑀮𑀩𑁆𑀪𑀢𑀺, 𑀇𑀥𑁂𑀯, 𑀲𑀼𑀪𑀤𑁆𑀤, 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄, 𑀇𑀥 𑀢𑀢𑀺𑀬𑁄 𑀲𑀫𑀡𑁄, 𑀇𑀥 𑀘𑀢𑀼𑀢𑁆𑀣𑁄 𑀲𑀫𑀡𑁄, 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺 (𑀤𑀻. 𑀦𑀺. 𑁨.𑁨𑁧𑁪).

𑀏𑀯𑀁 𑀬𑀲𑁆𑀫𑀸 𑀢𑀺𑀢𑁆𑀣𑀸𑀬𑀢𑀦𑀁 𑀅𑀔𑁂𑀢𑁆𑀢𑀁, 𑀲𑀸𑀲𑀦𑀁 𑀔𑁂𑀢𑁆𑀢𑀁, 𑀢𑀲𑁆𑀫𑀸 𑀬𑀣𑀸 𑀲𑀼𑀭𑀢𑁆𑀢𑀳𑀢𑁆𑀣𑀧𑀸𑀤𑁄 𑀲𑀽𑀭𑀓𑁂𑀲𑀭𑀓𑁄 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀦 𑀲𑀼𑀲𑀸𑀦𑁂 𑀯𑀸 𑀲𑀗𑁆𑀓𑀸𑀭𑀓𑀽𑀝𑁂 𑀯𑀸 𑀧𑀝𑀺𑀯𑀲𑀢𑀺, 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑀁 𑀧𑀦 𑀳𑀺𑀫𑀯𑀦𑁆𑀢𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀫𑀡𑀺𑀕𑀼𑀳𑀸𑀬𑀁𑀬𑁂𑀯 𑀧𑀝𑀺𑀯𑀲𑀢𑀺. 𑀬𑀣𑀸 𑀘 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸 𑀦 𑀕𑁄𑀘𑀭𑀺𑀬𑀳𑀢𑁆𑀣𑀺𑀓𑀼𑀮𑀸𑀤𑀻𑀲𑀼 𑀦𑀯𑀲𑀼 𑀦𑀸𑀕𑀓𑀼𑀮𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀙𑀤𑁆𑀤𑀦𑁆𑀢𑀓𑀼𑀮𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀘 𑀯𑀮𑀸𑀳𑀓𑁄 𑀅𑀲𑁆𑀲𑀭𑀸𑀚𑀸 𑀦 𑀕𑀤𑁆𑀭𑀪𑀓𑀼𑀮𑁂 𑀯𑀸 𑀖𑁄𑀝𑀓𑀓𑀼𑀮𑁂 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀦𑁆𑀥𑀼𑀬𑀸 𑀢𑀻𑀭𑁂 𑀧𑀦 𑀲𑀺𑀦𑁆𑀥𑀯𑀓𑀼𑀮𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀘 𑀲𑀩𑁆𑀩𑀓𑀸𑀫𑀤𑀤𑀁 𑀫𑀦𑁄𑀳𑀭𑀁 𑀫𑀡𑀺𑀭𑀢𑀦𑀁 𑀦 𑀲𑀗𑁆𑀓𑀸𑀭𑀓𑀽𑀝𑁂 𑀯𑀸 𑀧𑀁𑀲𑀼𑀧𑀩𑁆𑀩𑀢𑀸𑀤𑀻𑀲𑀼 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀩𑁆𑀪𑀦𑁆𑀢𑀭𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀘 𑀢𑀺𑀫𑀺𑀭𑀧𑀺𑀗𑁆𑀕𑀮𑁄 𑀫𑀘𑁆𑀙𑀭𑀸𑀚𑀸 𑀦 𑀔𑀼𑀤𑁆𑀤𑀓𑀧𑁄𑀓𑁆𑀔𑀭𑀡𑀻𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁂 𑀫𑀳𑀸𑀲𑀫𑀼𑀤𑁆𑀤𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀘 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄 𑀲𑀼𑀧𑀡𑁆𑀡𑀭𑀸𑀚𑀸 𑀦 𑀕𑀸𑀫𑀤𑁆𑀯𑀸𑀭𑁂 𑀏𑀭𑀡𑁆𑀟𑀯𑀦𑀸𑀤𑀻𑀲𑀼 𑀧𑀝𑀺𑀯𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑀁 𑀧𑀦 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀲𑀺𑀫𑁆𑀩𑀮𑀺𑀤𑀳𑀯𑀦𑁂𑀬𑁂𑀯 𑀧𑀝𑀺𑀯𑀲𑀢𑀺. 𑀬𑀣𑀸 𑀘 𑀥𑀢𑀭𑀝𑁆𑀞𑁄 𑀲𑀼𑀯𑀡𑁆𑀡𑀳𑀁𑀲𑁄 𑀦 𑀕𑀸𑀫𑀤𑁆𑀯𑀸𑀭𑁂 𑀆𑀯𑀸𑀝𑀓𑀸𑀤𑀻𑀲𑀼 𑀧𑀝𑀺𑀯𑀲𑀢𑀺, 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀳𑀼𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑁂𑀬𑁂𑀯 𑀧𑀝𑀺𑀯𑀲𑀢𑀺. 𑀬𑀣𑀸 𑀘 𑀘𑀢𑀼𑀤𑁆𑀤𑀻𑀧𑀺𑀲𑁆𑀲𑀭𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀦 𑀦𑀻𑀘𑀓𑀼𑀮𑁂 𑀉𑀧𑁆𑀧𑀚𑁆𑀚𑀢𑀺, 𑀅𑀲𑀫𑁆𑀪𑀺𑀦𑁆𑀦𑀚𑀸𑀢𑀺𑀔𑀢𑁆𑀢𑀺𑀬𑀓𑀼𑀮𑁂𑀬𑁂𑀯 𑀧𑀦 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁂𑀯 𑀇𑀫𑁂𑀲𑀼 𑀲𑀫𑀡𑁂𑀲𑀼 𑀏𑀓𑀲𑀫𑀡𑁄𑀧𑀺 𑀦 𑀅𑀜𑁆𑀜𑀢𑀺𑀢𑁆𑀣𑀸𑀬𑀢𑀦𑁂 𑀉𑀧𑁆𑀧𑀚𑁆𑀚𑀢𑀺, 𑀅𑀭𑀺𑀬𑀫𑀕𑁆𑀕𑀧𑀭𑀺𑀓𑁆𑀔𑀺𑀢𑁆𑀢𑁂 𑀧𑀦 𑀩𑀼𑀤𑁆𑀥𑀲𑀸𑀲𑀦𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀳𑀺 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺.

𑀲𑀫𑁆𑀫𑀸 𑀲𑀻𑀳𑀦𑀸𑀤𑀁 𑀦𑀤𑀣𑀸𑀢𑀺 𑀏𑀢𑁆𑀣 𑀲𑀫𑁆𑀫𑀸𑀢𑀺 𑀳𑁂𑀢𑀼𑀦𑀸 𑀦𑀬𑁂𑀦 𑀓𑀸𑀭𑀡𑁂𑀦. 𑀲𑀻𑀳𑀦𑀸𑀤𑀦𑁆𑀢𑀺 𑀲𑁂𑀝𑁆𑀞𑀦𑀸𑀤𑀁 𑀅𑀪𑀻𑀢𑀦𑀸𑀤𑀁 𑀅𑀧𑁆𑀧𑀝𑀺𑀦𑀸𑀤𑀁. 𑀇𑀫𑁂𑀲𑀜𑁆𑀳𑀺 𑀘𑀢𑀼𑀦𑁆𑀦𑀁 𑀲𑀫𑀡𑀸𑀦𑀁 𑀇𑀥𑁂𑀯 𑀅𑀢𑁆𑀣𑀺𑀢𑀸𑀬 𑀅𑀬𑀁 𑀦𑀸𑀤𑁄 𑀲𑁂𑀝𑁆𑀞𑀦𑀸𑀤𑁄 𑀦𑀸𑀫 𑀳𑁄𑀢𑀺 𑀉𑀢𑁆𑀢𑀫𑀦𑀸𑀤𑁄. ‘‘𑀇𑀫𑁂 𑀲𑀫𑀡𑀸 𑀇𑀥𑁂𑀯 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀅𑀜𑁆𑀜𑀢𑁄 𑀪𑀬𑀁 𑀯𑀸 𑀆𑀲𑀗𑁆𑀓𑀸 𑀯𑀸 𑀦𑀢𑁆𑀣𑀻𑀢𑀺 𑀅𑀪𑀻𑀢𑀦𑀸𑀤𑁄 𑀦𑀸𑀫 𑀳𑁄𑀢𑀺. ‘‘𑀅𑀫𑁆𑀳𑀸𑀓𑀫𑁆𑀧𑀺 𑀲𑀸𑀲𑀦𑁂 𑀇𑀫𑁂 𑀲𑀫𑀡𑀸 𑀅𑀢𑁆𑀣𑀻’’𑀢𑀺 𑀧𑀽𑀭𑀡𑀸𑀤𑀻𑀲𑀼 𑀏𑀓𑀲𑁆𑀲𑀸𑀧𑀺 𑀉𑀝𑁆𑀞𑀳𑀺𑀢𑁆𑀯𑀸 𑀯𑀢𑁆𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀅𑀬𑀁 𑀦𑀸𑀤𑁄 𑀅𑀧𑁆𑀧𑀝𑀺𑀦𑀸𑀤𑁄 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀻𑀳𑀦𑀸𑀤𑀦𑁆𑀢𑀺 𑀲𑁂𑀝𑁆𑀞𑀦𑀸𑀤𑀁 𑀅𑀪𑀻𑀢𑀦𑀸𑀤𑀁 𑀅𑀧𑁆𑀧𑀝𑀺𑀦𑀸𑀤’’𑀦𑁆𑀢𑀺.

𑁧𑁪𑁦. 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀻𑀢𑀺 𑀇𑀤𑀁 𑀔𑁄 𑀧𑀦 𑀓𑀸𑀭𑀡𑀁 𑀯𑀺𑀚𑁆𑀚𑀢𑀺. 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸. 𑀏𑀢𑁆𑀣 𑀘 𑀢𑀺𑀢𑁆𑀣𑀁 𑀚𑀸𑀦𑀺𑀢𑀩𑁆𑀩𑀁, 𑀢𑀺𑀢𑁆𑀣𑀓𑀭𑁄 𑀚𑀸𑀦𑀺𑀢𑀩𑁆𑀩𑁄 𑀢𑀺𑀢𑁆𑀣𑀺𑀬𑀸 𑀚𑀸𑀦𑀺𑀢𑀩𑁆𑀩𑀸, 𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀚𑀸𑀦𑀺𑀢𑀩𑁆𑀩𑀸. 𑀢𑀺𑀢𑁆𑀣𑀁𑀦𑀸𑀫 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄. 𑀏𑀢𑁆𑀣 𑀳𑀺 𑀲𑀢𑁆𑀢𑀸 𑀢𑀭𑀦𑁆𑀢𑀺 𑀉𑀧𑁆𑀧𑀮𑀯𑀦𑁆𑀢𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀺𑀢𑁆𑀣𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀲𑀁 𑀤𑀺𑀝𑁆𑀞𑀻𑀦𑀁 𑀉𑀧𑁆𑀧𑀸𑀤𑁂𑀢𑀸 𑀢𑀺𑀢𑁆𑀣𑀓𑀭𑁄 𑀦𑀸𑀫. 𑀢𑀲𑁆𑀲 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀢𑀺𑀢𑁆𑀣𑀺𑀬𑀸 𑀦𑀸𑀫. 𑀢𑁂𑀲𑀁 𑀧𑀘𑁆𑀘𑀬𑀤𑀸𑀬𑀓𑀸 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀩𑁆𑀩𑀸𑀚𑀓𑀸𑀢𑀺 𑀕𑀺𑀳𑀺𑀩𑀦𑁆𑀥𑀦𑀁 𑀧𑀳𑀸𑀬 𑀧𑀩𑁆𑀩𑀚𑁆𑀚𑀽𑀧𑀕𑀢𑀸. 𑀅𑀲𑁆𑀲𑀸𑀲𑁄𑀢𑀺 𑀅𑀯𑀲𑁆𑀲𑀬𑁄 𑀧𑀢𑀺𑀝𑁆𑀞𑀸 𑀉𑀧𑀢𑁆𑀣𑀫𑁆𑀪𑁄. 𑀩𑀮𑀦𑁆𑀢𑀺 𑀣𑀸𑀫𑁄. 𑀬𑁂𑀦 𑀢𑀼𑀫𑁆𑀳𑁂𑀢𑀺 𑀬𑁂𑀦 𑀅𑀲𑁆𑀲𑀸𑀲𑁂𑀦 𑀯𑀸 𑀩𑀮𑁂𑀦 𑀯𑀸 𑀏𑀯𑀁 𑀯𑀤𑁂𑀣.

𑀅𑀢𑁆𑀣𑀺 𑀔𑁄 𑀦𑁄, 𑀆𑀯𑀼𑀲𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀏𑀢𑁆𑀣 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑁄 𑀲𑁄 𑀪𑀕𑀯𑀸 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑁂𑀦 𑀪𑀕𑀯𑀢𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀁 𑀚𑀸𑀦𑀢𑀸, 𑀳𑀢𑁆𑀣𑀢𑀮𑁂 𑀞𑀧𑀺𑀢𑀁 𑀆𑀫𑀮𑀓𑀁 𑀯𑀺𑀬 𑀲𑀩𑁆𑀩𑀁 𑀜𑁂𑀬𑁆𑀬𑀥𑀫𑁆𑀫𑀁 𑀧𑀲𑁆𑀲𑀢𑀸. 𑀅𑀧𑀺𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀺 𑀚𑀸𑀦𑀢𑀸, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀸. 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀙𑀳𑀺 𑀯𑀸 𑀧𑀦 𑀅𑀪𑀺𑀜𑁆𑀜𑀸𑀳𑀺 𑀚𑀸𑀦𑀢𑀸, 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀸. 𑀲𑀩𑁆𑀩𑀥𑀫𑁆𑀫𑀚𑀸𑀦𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀚𑀸𑀦𑀢𑀸, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀯𑀺𑀲𑀬𑀸𑀢𑀻𑀢𑀸𑀦𑀺 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀸𑀦𑀺 𑀯𑀸𑀧𑀺 𑀭𑀽𑀧𑀸𑀦𑀺 𑀅𑀢𑀺𑀯𑀺𑀲𑀼𑀤𑁆𑀥𑁂𑀦 𑀫𑀁𑀲𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀸. 𑀅𑀢𑁆𑀢𑀳𑀺𑀢𑀲𑀸𑀥𑀺𑀓𑀸𑀬 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸𑀬 𑀧𑀝𑀺𑀯𑁂𑀥𑀧𑀜𑁆𑀜𑀸𑀬 𑀚𑀸𑀦𑀢𑀸, 𑀧𑀭𑀳𑀺𑀢𑀲𑀸𑀥𑀺𑀓𑀸𑀬 𑀓𑀭𑀼𑀡𑀸𑀧𑀤𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀸. 𑀅𑀭𑀻𑀦𑀁 𑀳𑀢𑀢𑁆𑀢𑀸 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸 𑀘 𑀅𑀭𑀳𑀢𑀸, 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑁂 𑀯𑀸 𑀚𑀸𑀦𑀢𑀸, 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂 𑀧𑀲𑁆𑀲𑀢𑀸. 𑀓𑀺𑀮𑁂𑀲𑀸𑀭𑀻𑀦𑀁 𑀳𑀢𑀢𑁆𑀢𑀸 𑀅𑀭𑀳𑀢𑀸, 𑀲𑀫𑁆𑀫𑀸 𑀲𑀸𑀫𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺, 𑀏𑀯𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀲𑁂𑀦 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀣𑁄𑀫𑀺𑀢𑁂𑀦 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀅𑀓𑁆𑀔𑀸𑀢𑀸, 𑀬𑁂 𑀫𑀬𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑀸 𑀏𑀯𑀁 𑀯𑀤𑁂𑀫, 𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀉𑀧𑀢𑁆𑀣𑀫𑁆𑀪𑀁 𑀓𑀸𑀬𑀩𑀮𑀦𑁆𑀢𑀺.

𑀲𑀢𑁆𑀣𑀭𑀺 𑀧𑀲𑀸𑀤𑁄𑀢𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀧𑁆𑀧𑀲𑀸𑀤𑁄. 𑀥𑀫𑁆𑀫𑁂 𑀧𑀲𑀸𑀤𑁄𑀢𑀺 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀧𑁆𑀧𑀲𑀸𑀤𑁄. 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀢𑀺 𑀅𑀭𑀺𑀬𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸. 𑀅𑀭𑀺𑀬𑀓𑀦𑁆𑀢𑀲𑀻𑀮𑀸𑀦𑀺 𑀦𑀸𑀫 𑀧𑀜𑁆𑀘𑀲𑀻𑀮𑀸𑀦𑀺. 𑀢𑀸𑀦𑀺 𑀳𑀺 𑀪𑀯𑀦𑁆𑀢𑀭𑀕𑀢𑁄𑀧𑀺 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀦𑁄 𑀅𑀭𑀺𑀬𑀲𑀸𑀯𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑁄𑀧𑀺 𑀦 𑀯𑀻𑀢𑀺𑀓𑁆𑀓𑀫𑀢𑀺. 𑀲𑀘𑁂𑀧𑀺 𑀳𑀺 𑀦𑀁 𑀓𑁄𑀘𑀺 𑀯𑀤𑁂𑀬𑁆𑀬 𑁋 ‘‘𑀇𑀫𑀁 𑀲𑀓𑀮𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀅𑀝𑁆𑀞𑀸𑀦𑀫𑁂𑀢𑀁, 𑀬𑀁 𑀲𑁄 𑀢𑀲𑁆𑀲 𑀯𑀘𑀦𑀁 𑀓𑀭𑁂𑀬𑁆𑀬. 𑀏𑀯𑀁 𑀅𑀭𑀺𑀬𑀸𑀦𑀁 𑀲𑀻𑀮𑀸𑀦𑀺 𑀓𑀦𑁆𑀢𑀸𑀦𑀺 𑀧𑀺𑀬𑀸𑀦𑀺 𑀫𑀦𑀸𑀧𑀸𑀦𑀺. 𑀢𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸’’𑀢𑀺.

𑀲𑀳𑀥𑀫𑁆𑀫𑀺𑀓𑀸 𑀔𑁄 𑀧𑀦𑀸𑀢𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦𑀸 𑀲𑀸𑀫𑀡𑁂𑀭𑁄 𑀲𑀸𑀫𑀡𑁂𑀭𑀻 𑀉𑀧𑀸𑀲𑀓𑁄 𑀉𑀧𑀸𑀲𑀺𑀓𑀸𑀢𑀺 𑀏𑀢𑁂 𑀲𑀢𑁆𑀢 𑀲𑀳𑀥𑀫𑁆𑀫𑀘𑀸𑀭𑀺𑀦𑁄. 𑀏𑀢𑁂𑀲𑀼 𑀳𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀳𑀥𑀫𑁆𑀫𑀁 𑀘𑀭𑀢𑀺 𑀲𑀫𑀸𑀦𑀲𑀺𑀓𑁆𑀔𑀢𑀸𑀬. 𑀢𑀣𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺…𑀧𑁂… 𑀉𑀧𑀸𑀲𑀺𑀓𑀸 𑀉𑀧𑀸𑀲𑀺𑀓𑀸𑀳𑀺, 𑀲𑁄𑀢𑀸𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑁂𑀳𑀺, 𑀲𑀓𑀤𑀸𑀕𑀸𑀫𑀻…𑀧𑁂… 𑀅𑀦𑀸𑀕𑀸𑀫𑀻𑀳𑀺 𑀲𑀳𑀥𑀫𑁆𑀫𑀁 𑀘𑀭𑀢𑀺. 𑀢𑀲𑁆𑀫𑀸 𑀲𑀩𑁆𑀩𑁂𑀧𑁂𑀢𑁂 𑀲𑀳𑀥𑀫𑁆𑀫𑀺𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀺𑀘𑁂𑀢𑁆𑀣 𑀅𑀭𑀺𑀬𑀲𑀸𑀯𑀓𑀸𑀬𑁂𑀯 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀲𑀜𑁆𑀳𑀺 𑀪𑀯𑀦𑁆𑀢𑀭𑁂𑀧𑀺 𑀫𑀕𑁆𑀕𑀤𑀲𑁆𑀲𑀦𑀫𑁆𑀳𑀺 𑀯𑀺𑀯𑀸𑀤𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁂 𑀅𑀘𑁆𑀘𑀦𑁆𑀢𑀁 𑀏𑀓𑀥𑀫𑁆𑀫𑀘𑀸𑀭𑀺𑀢𑀸𑀬 𑀲𑀳𑀥𑀫𑁆𑀫𑀺𑀓𑀸. 𑀇𑀫𑀺𑀦𑀸, ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀧𑁆𑀧𑀲𑀸𑀤𑁄 𑀓𑀣𑀺𑀢𑁄. 𑀏𑀢𑁆𑀢𑀸𑀯𑀢𑀸 𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀗𑁆𑀕𑀸𑀦𑀺 𑀓𑀣𑀺𑀢𑀸𑀦𑀺 𑀳𑁄𑀦𑁆𑀢𑀺.

𑀇𑀫𑁂 𑀔𑁄 𑀦𑁄, 𑀆𑀯𑀼𑀲𑁄𑀢𑀺, 𑀆𑀯𑀼𑀲𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀢𑁂𑀦 𑀪𑀕𑀯𑀢𑀸 𑀅𑀫𑁆𑀳𑀸𑀓𑀁 𑀅𑀲𑁆𑀲𑀸𑀲𑁄 𑀘𑁂𑀯 𑀩𑀮𑀜𑁆𑀘𑀸𑀢𑀺 𑀅𑀓𑁆𑀔𑀸𑀢𑀸, 𑀬𑁂 𑀫𑀬𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑀸 𑀏𑀯𑀁 𑀯𑀤𑁂𑀫.

𑁧𑁪𑁧. 𑀬𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀢𑀺 𑀇𑀫𑀺𑀦𑀸 𑀧𑀽𑀭𑀡𑀓𑀲𑁆𑀲𑀧𑀸𑀤𑀺𑀓𑁂 𑀙 𑀲𑀢𑁆𑀣𑀸𑀭𑁄 𑀅𑀧𑀤𑀺𑀲𑁆𑀲𑀦𑁆𑀢𑀺. 𑀬𑀣𑀸 𑀧𑀦 𑀇𑀤𑀸𑀦𑀺 𑀲𑀸𑀲𑀦𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀲𑀼 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄, 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄’’𑀢𑀺 𑀕𑁂𑀳𑀲𑀺𑀢𑀧𑁂𑀫𑀁 𑀳𑁄𑀢𑀺. 𑀏𑀯𑀭𑀽𑀧𑀁 𑀧𑁂𑀫𑀁 𑀲𑀦𑁆𑀥𑀸𑀬 ‘‘𑀲𑀢𑁆𑀣𑀭𑀺 𑀧𑀲𑀸𑀤𑁄’’𑀢𑀺 𑀯𑀤𑀦𑁆𑀢𑀺. 𑀣𑁂𑀭𑁄 𑀧𑀦𑀸𑀳 𑁋 ‘‘𑀬𑀲𑁆𑀫𑀸 𑀲𑀢𑁆𑀣𑀸 𑀦𑀸𑀫 𑀦 𑀏𑀓𑀲𑁆𑀲, 𑀦 𑀤𑁆𑀯𑀺𑀦𑁆𑀦𑀁 𑀳𑁄𑀢𑀺, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀏𑀓𑁄𑀯 𑀲𑀢𑁆𑀣𑀸, 𑀢𑀲𑁆𑀫𑀸 𑀢𑀺𑀢𑁆𑀣𑀺𑀬𑀸 ‘𑀅𑀫𑁆𑀳𑀸𑀓𑀁 𑀲𑀢𑁆𑀣𑀸’ 𑀢𑀺 𑀏𑀓𑀧𑀤𑁂𑀦𑁂𑀯 𑀲𑀢𑁆𑀣𑀸𑀭𑀁 𑀯𑀺𑀲𑀼𑀁 𑀓𑀢𑁆𑀯𑀸 𑀇𑀫𑀺𑀦𑀸𑀯 𑀧𑀤𑁂𑀦 𑀯𑀺𑀭𑀼𑀤𑁆𑀥𑀸 𑀧𑀭𑀸𑀚𑀺𑀢𑀸’’𑀢𑀺. 𑀥𑀫𑁆𑀫𑁂 𑀧𑀲𑀸𑀤𑁄𑀢𑀺 𑀇𑀤𑀁 𑀧𑀦 𑀬𑀣𑀸 𑀇𑀤𑀸𑀦𑀺 𑀲𑀸𑀲𑀦𑁂 ‘‘𑀅𑀫𑁆𑀳𑀸𑀓𑀁 𑀤𑀻𑀖𑀦𑀺𑀓𑀸𑀬𑁄 𑀅𑀫𑁆𑀳𑀸𑀓𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁄’’𑀢𑀺 𑀫𑀫𑀸𑀬𑀦𑁆𑀢𑀺, 𑀏𑀯𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂 𑀕𑁂𑀳𑀲𑀺𑀢𑀧𑁂𑀫𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀲𑀻𑀮𑁂𑀲𑀽𑀢𑀺 𑀅𑀚𑀲𑀻𑀮𑀕𑁄𑀲𑀻𑀮𑀫𑁂𑀡𑁆𑀟𑀓𑀲𑀻𑀮𑀓𑀼𑀓𑁆𑀓𑀼𑀭𑀲𑀻𑀮𑀸𑀤𑀻𑀲𑀼. 𑀇𑀥 𑀦𑁄 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀇𑀥𑀸𑀢𑀺 𑀧𑀲𑀸𑀤𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄𑀢𑀺 𑀓𑁄 𑀅𑀥𑀺𑀓𑀧𑁆𑀧𑀬𑁄𑀕𑁄. 𑀬𑀤𑀺𑀤𑀦𑁆𑀢𑀺 𑀬𑀫𑀺𑀤𑀁 𑀢𑀼𑀫𑁆𑀳𑀸𑀓𑀜𑁆𑀘𑁂𑀯 𑀅𑀫𑁆𑀳𑀸𑀓𑀜𑁆𑀘 𑀦𑀸𑀦𑀸𑀓𑀭𑀡𑀁 𑀯𑀤𑁂𑀬𑁆𑀬𑀸𑀣. 𑀢𑀁 𑀓𑀺𑀁 𑀦𑀸𑀫? 𑀢𑀼𑀫𑁆𑀳𑀸𑀓𑀫𑁆𑀧𑀺 𑀳𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀲𑀸𑀤𑁄, 𑀅𑀫𑁆𑀳𑀸𑀓𑀫𑁆𑀧𑀺. 𑀦𑀦𑀼 𑀏𑀢𑀲𑁆𑀫𑀺𑀁 𑀧𑀲𑀸𑀤𑁂 𑀢𑀼𑀫𑁆𑀳𑁂 𑀘 𑀅𑀫𑁆𑀳𑁂 𑀘 𑀤𑁆𑀯𑁂𑀥𑀸 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀏𑀓𑀲𑀤𑀺𑀲𑀸𑀢𑀺 𑀯𑀸𑀘𑀸𑀬 𑀲𑀫𑀥𑀼𑀭𑀸 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀅𑀣 𑀦𑁂𑀲𑀁 𑀢𑀁 𑀲𑀫𑀥𑀼𑀭𑀢𑀁 𑀪𑀺𑀦𑁆𑀤𑀦𑁆𑀢𑁄 𑀪𑀕𑀯𑀸 𑀏𑀯𑀁 𑀯𑀸𑀤𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀓𑀸 𑀦𑀺𑀝𑁆𑀞𑀸𑀢𑀺 𑀬𑀸 𑀢𑀲𑁆𑀲 𑀧𑀲𑀸𑀤𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀸 𑀦𑀺𑀝𑁆𑀞𑀸, 𑀓𑀺𑀁 𑀲𑀸 𑀏𑀓𑀸, 𑀉𑀤𑀸𑀳𑀼 𑀧𑀼𑀣𑀽𑀢𑀺 𑀏𑀯𑀁 𑀧𑀼𑀘𑁆𑀙𑀣𑀸𑀢𑀺 𑀯𑀤𑀢𑀺. 𑀬𑀲𑁆𑀫𑀸 𑀧𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀦𑀺𑀝𑁆𑀞𑀁 𑀅𑀧𑀜𑁆𑀜𑀧𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀳𑀺 𑀩𑁆𑀭𑀳𑁆𑀫𑀮𑁄𑀓𑁄 𑀦𑀺𑀝𑁆𑀞𑀸, 𑀫𑀳𑀸𑀢𑀸𑀧𑀲𑀸𑀦𑀁 𑀆𑀪𑀲𑁆𑀲𑀭𑀸, 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀲𑀼𑀪𑀓𑀺𑀡𑁆𑀳𑀸, 𑀆𑀚𑀻𑀯𑀓𑀸𑀦𑀁 ‘‘𑀅𑀦𑀦𑁆𑀢𑀫𑀸𑀦𑀲𑁄’’𑀢𑀺 𑀏𑀯𑀁 𑀧𑀭𑀺𑀓𑀧𑁆𑀧𑀺𑀢𑁄 𑀅𑀲𑀜𑁆𑀜𑀻𑀪𑀯𑁄. 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀦 𑀅𑀭𑀳𑀢𑁆𑀢𑀁 𑀦𑀺𑀝𑁆𑀞𑀸. 𑀲𑀩𑁆𑀩𑁂𑀯 𑀘𑁂𑀢𑁂 𑀅𑀭𑀳𑀢𑁆𑀢𑀫𑁂𑀯 𑀦𑀺𑀝𑁆𑀞𑀸𑀢𑀺 𑀯𑀤𑀦𑁆𑀢𑀺. 𑀤𑀺𑀝𑁆𑀞𑀺𑀯𑀲𑁂𑀦 𑀧𑀦 𑀩𑁆𑀭𑀳𑁆𑀫𑀮𑁄𑀓𑀸𑀤𑀻𑀦𑀺 𑀧𑀜𑁆𑀜𑀧𑁂𑀦𑁆𑀢𑀺. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀲𑁂𑀦 𑀏𑀓𑀫𑁂𑀯 𑀦𑀺𑀝𑁆𑀞𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀪𑀕𑀯𑀸 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑀸𑀢𑀺𑀆𑀤𑀺𑀫𑀸𑀳.

𑀇𑀤𑀸𑀦𑀺 𑀪𑀺𑀓𑁆𑀔𑀽𑀦𑀫𑁆𑀧𑀺 𑀏𑀓𑀸 𑀦𑀺𑀝𑁆𑀞𑀸, 𑀢𑀺𑀢𑁆𑀣𑀺𑀬𑀸𑀦𑀫𑁆𑀧𑀺 𑀏𑀓𑀸 𑀦𑀺𑀝𑁆𑀞𑀸𑀢𑀺 𑀤𑁆𑀯𑀻𑀲𑀼 𑀅𑀝𑁆𑀝𑀓𑀸𑀭𑀓𑁂𑀲𑀼 𑀯𑀺𑀬 𑀞𑀺𑀢𑁂𑀲𑀼 𑀪𑀕𑀯𑀸 𑀅𑀦𑀼𑀬𑁄𑀕𑀯𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀸 𑀧𑀦𑀸𑀯𑀼𑀲𑁄, 𑀦𑀺𑀝𑁆𑀞𑀸 𑀲𑀭𑀸𑀕𑀲𑁆𑀲, 𑀉𑀤𑀸𑀳𑀼 𑀯𑀻𑀢𑀭𑀸𑀕𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀭𑀸𑀕𑀭𑀢𑁆𑀢𑀸𑀤𑀻𑀦𑀁 𑀦𑀺𑀝𑁆𑀞𑀸 𑀦𑀸𑀫 𑀦𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀦𑀫𑁆𑀧𑀺 𑀲𑀺𑀬𑀸𑀢𑀺 𑀇𑀫𑀁 𑀤𑁄𑀲𑀁 𑀧𑀲𑁆𑀲𑀦𑁆𑀢𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 ‘‘𑀯𑀻𑀢𑀭𑀸𑀕𑀲𑁆𑀲 𑀆𑀯𑀼𑀲𑁄 𑀲𑀸 𑀦𑀺𑀝𑁆𑀞𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑁆𑀬𑀸𑀓𑀭𑀡𑀁 𑀤𑀲𑁆𑀲𑀺𑀢𑀁.

𑀢𑀢𑁆𑀣 𑀯𑀺𑀤𑁆𑀤𑀲𑀼𑀦𑁄𑀢𑀺 𑀧𑀡𑁆𑀟𑀺𑀢𑀲𑁆𑀲. 𑀅𑀦𑀼𑀭𑀼𑀤𑁆𑀥𑀧𑀝𑀺𑀯𑀺𑀭𑀼𑀤𑁆𑀥𑀲𑁆𑀲𑀸𑀢𑀺 𑀭𑀸𑀕𑁂𑀦 𑀅𑀦𑀼𑀭𑀼𑀤𑁆𑀥𑀲𑁆𑀲 𑀓𑁄𑀥𑁂𑀦 𑀧𑀝𑀺𑀯𑀺𑀭𑀼𑀤𑁆𑀥𑀲𑁆𑀲. 𑀧𑀧𑀜𑁆𑀘𑀸𑀭𑀸𑀫𑀲𑁆𑀲 𑀧𑀧𑀜𑁆𑀘𑀭𑀢𑀺𑀦𑁄𑀢𑀺 𑀏𑀢𑁆𑀣 𑀆𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀭𑀸𑀫𑁄. 𑀧𑀧𑀜𑁆𑀘𑁄 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀧𑀧𑀜𑁆𑀘𑀸𑀭𑀸𑀫𑁄. 𑀧𑀧𑀜𑁆𑀘𑁂 𑀭𑀢𑀺 𑀅𑀲𑁆𑀲𑀸𑀢𑀺 𑀧𑀧𑀜𑁆𑀘𑀭𑀢𑀺. 𑀧𑀧𑀜𑁆𑀘𑁄𑀢𑀺 𑀘 𑀫𑀢𑁆𑀢𑀧𑀫𑀢𑁆𑀢𑀸𑀓𑀸𑀭𑀪𑀸𑀯𑁂𑀦 𑀧𑀯𑀢𑁆𑀢𑀸𑀦𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀥 𑀧𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄𑀯 𑀅𑀥𑀺𑀧𑁆𑀧𑁂𑀢𑀸. 𑀲𑀭𑀸𑀕𑀲𑁆𑀲𑀸𑀢𑀺𑀆𑀤𑀻𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀏𑀓𑁄𑀯 𑀓𑀺𑀮𑁂𑀲𑁄 𑀆𑀕𑀢𑁄. 𑀢𑀲𑁆𑀲 𑀆𑀓𑀸𑀭𑀢𑁄 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀭𑀸𑀕𑀲𑁆𑀲𑀸𑀢𑀺 𑀳𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀯𑀲𑁂𑀦 𑀕𑀳𑀺𑀢𑁄. 𑀲𑀢𑀡𑁆𑀳𑀲𑁆𑀲𑀸𑀢𑀺 𑀪𑀯𑀢𑀡𑁆𑀳𑀸𑀯𑀲𑁂𑀦. 𑀲𑀉𑀧𑀸𑀤𑀸𑀦𑀲𑁆𑀲𑀸𑀢𑀺 𑀕𑀳𑀡𑀯𑀲𑁂𑀦. 𑀅𑀦𑀼𑀭𑀼𑀤𑁆𑀥𑀧𑀝𑀺𑀯𑀺𑀭𑀼𑀤𑁆𑀥𑀲𑁆𑀲𑀸𑀢𑀺 𑀬𑀼𑀕𑀴𑀯𑀲𑁂𑀦. 𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸𑀢𑀺 𑀧𑀧𑀜𑁆𑀘𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦. 𑀲𑀭𑀸𑀕𑀲𑁆𑀲𑀸𑀢𑀺 𑀯𑀸 𑀏𑀢𑁆𑀣 𑀅𑀓𑀼𑀲𑀮𑀫𑀽𑀮𑀯𑀲𑁂𑀦 𑀕𑀳𑀺𑀢𑁄. 𑀲𑀢𑀡𑁆𑀳𑀲𑁆𑀲𑀸𑀢𑀺 𑀏𑀢𑁆𑀣 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀤𑀲𑁆𑀲𑀦𑀯𑀲𑁂𑀦. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀣𑁂𑀭𑁄 𑀧𑀦𑀸𑀳 ‘‘𑀓𑀲𑁆𑀫𑀸 𑀏𑀯𑀁 𑀯𑀺𑀤𑁆𑀥𑀁𑀲𑁂𑀣? 𑀏𑀓𑁄𑀬𑁂𑀯 𑀳𑀺 𑀅𑀬𑀁 𑀮𑁄𑀪𑁄 𑀭𑀚𑁆𑀚𑀦𑀯𑀲𑁂𑀦 𑀭𑀸𑀕𑁄𑀢𑀺 𑀯𑀼𑀢𑁆𑀢𑁄. 𑀢𑀡𑁆𑀳𑀸𑀓𑀭𑀡𑀯𑀲𑁂𑀦 𑀢𑀡𑁆𑀳𑀸. 𑀕𑀳𑀡𑀝𑁆𑀞𑁂𑀦 𑀉𑀧𑀸𑀤𑀸𑀦𑀁. 𑀬𑀼𑀕𑀴𑀯𑀲𑁂𑀦 𑀅𑀦𑀼𑀭𑁄𑀥𑀧𑀝𑀺𑀯𑀺𑀭𑁄𑀥𑁄. 𑀧𑀧𑀜𑁆𑀘𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀝𑁆𑀞𑁂𑀦 𑀧𑀧𑀜𑁆𑀘𑁄’’𑀢𑀺.

𑁧𑁪𑁨. 𑀇𑀤𑀸𑀦𑀺 𑀇𑀫𑁂𑀲𑀁 𑀓𑀺𑀮𑁂𑀲𑀸𑀦𑀁 𑀫𑀽𑀮𑀪𑀽𑀢𑀁 𑀤𑀺𑀝𑁆𑀞𑀺𑀯𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀬𑁄𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀪𑀯𑀤𑀺𑀝𑁆𑀞𑀻𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀯𑀺𑀪𑀯𑀤𑀺𑀝𑁆𑀞𑀻𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀪𑀯𑀤𑀺𑀝𑁆𑀞𑀺𑀁 𑀅𑀮𑁆𑀮𑀻𑀦𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀅𑀮𑁆𑀮𑀻𑀦𑀸. 𑀉𑀧𑀕𑀢𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑁂𑀯 𑀉𑀧𑀕𑀢𑀸. 𑀅𑀚𑁆𑀛𑁄𑀲𑀺𑀢𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑁂𑀯 𑀅𑀦𑀼𑀧𑀯𑀺𑀝𑁆𑀞𑀸. 𑀯𑀺𑀪𑀯𑀤𑀺𑀝𑁆𑀞𑀺𑀬𑀸 𑀢𑁂 𑀧𑀝𑀺𑀯𑀺𑀭𑀼𑀤𑁆𑀥𑀸𑀢𑀺 𑀢𑁂 𑀲𑀩𑁆𑀩𑁂 𑀉𑀘𑁆𑀙𑁂𑀤𑀯𑀸𑀤𑀻𑀳𑀺 𑀲𑀤𑁆𑀥𑀺𑀁 𑁋 ‘‘𑀢𑀼𑀫𑁆𑀳𑁂 𑀅𑀦𑁆𑀥𑀩𑀸𑀮𑀸 𑀦 𑀚𑀸𑀦𑀸𑀣, 𑀲𑀲𑁆𑀲𑀢𑁄 𑀅𑀬𑀁 𑀮𑁄𑀓𑁄, 𑀦𑀸𑀬𑀁 𑀮𑁄𑀓𑁄 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀧𑀝𑀺𑀯𑀺𑀭𑀼𑀤𑁆𑀥𑀸 𑀦𑀺𑀘𑁆𑀘𑀁 𑀓𑀮𑀳𑀪𑀡𑁆𑀟𑀦𑀧𑀲𑀼𑀢𑀸 𑀯𑀺𑀳𑀭𑀦𑁆𑀢𑀺. 𑀤𑀼𑀢𑀺𑀬𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀫𑀼𑀤𑀬𑀜𑁆𑀘𑀸𑀢𑀺𑀆𑀤𑀻𑀲𑀼 𑀤𑁆𑀯𑁂 𑀤𑀺𑀝𑁆𑀞𑀻𑀦𑀁 𑀲𑀫𑀼𑀤𑀬𑀸 𑀔𑀡𑀺𑀓𑀲𑀫𑀼𑀤𑀬𑁄 𑀧𑀘𑁆𑀘𑀬𑀲𑀫𑀼𑀤𑀬𑁄 𑀘. 𑀔𑀡𑀺𑀓𑀲𑀫𑀼𑀤𑀬𑁄 𑀤𑀺𑀝𑁆𑀞𑀻𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀧𑀘𑁆𑀘𑀬𑀲𑀫𑀼𑀤𑀬𑁄 𑀅𑀝𑁆𑀞 𑀞𑀸𑀦𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁, 𑀔𑀦𑁆𑀥𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀅𑀯𑀺𑀚𑁆𑀚𑀸𑀧𑀺, 𑀨𑀲𑁆𑀲𑁄𑀧𑀺, 𑀲𑀜𑁆𑀜𑀸𑀧𑀺, 𑀯𑀺𑀢𑀓𑁆𑀓𑁄𑀧𑀺, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀧𑀺, 𑀧𑀸𑀧𑀫𑀺𑀢𑁆𑀢𑁄𑀧𑀺, 𑀧𑀭𑀢𑁄𑀖𑁄𑀲𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. ‘‘𑀔𑀦𑁆𑀥𑀸 𑀳𑁂𑀢𑀼 𑀔𑀦𑁆𑀥𑀸 𑀧𑀘𑁆𑀘𑀬𑁄 𑀤𑀺𑀝𑁆𑀞𑀻𑀦𑀁 𑀉𑀧𑀸𑀤𑀸𑀬 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦. 𑀏𑀯𑀁 𑀔𑀦𑁆𑀥𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀅𑀯𑀺𑀚𑁆𑀚𑀸… 𑀨𑀲𑁆𑀲𑁄… 𑀲𑀜𑁆𑀜𑀸… 𑀯𑀺𑀢𑀓𑁆𑀓𑁄… 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄… 𑀧𑀸𑀧𑀫𑀺𑀢𑁆𑀢𑁄… 𑀧𑀭𑀢𑁄𑀖𑁄𑀲𑁄 𑀳𑁂𑀢𑀼, 𑀧𑀭𑀢𑁄𑀖𑁄𑀲𑁄 𑀧𑀘𑁆𑀘𑀬𑁄 𑀤𑀺𑀝𑁆𑀞𑀻𑀦𑀁 𑀉𑀧𑀸𑀤𑀸𑀬 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦. 𑀏𑀯𑀁 𑀧𑀭𑀢𑁄𑀖𑁄𑀲𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁’’ (𑀧𑀝𑀺. 𑀫. 𑁧.𑁧𑁨𑁪). 𑀅𑀢𑁆𑀣𑀗𑁆𑀕𑀫𑀸𑀧𑀺 𑀤𑁆𑀯𑁂𑀬𑁂𑀯 𑀔𑀡𑀺𑀓𑀢𑁆𑀣𑀗𑁆𑀕𑀫𑁄 𑀧𑀘𑁆𑀘𑀬𑀢𑁆𑀣𑀗𑁆𑀕𑀫𑁄 𑀘. 𑀔𑀡𑀺𑀓𑀢𑁆𑀣𑀗𑁆𑀕𑀫𑁄 𑀦𑀸𑀫 𑀔𑀬𑁄 𑀯𑀬𑁄 𑀪𑁂𑀤𑁄 𑀧𑀭𑀺𑀪𑁂𑀤𑁄 𑀅𑀦𑀺𑀘𑁆𑀘𑀢𑀸 𑀅𑀦𑁆𑀢𑀭𑀥𑀸𑀦𑀁. 𑀧𑀘𑁆𑀘𑀬𑀢𑁆𑀣𑀗𑁆𑀕𑀫𑁄 𑀦𑀸𑀫 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀳𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀲𑀫𑀼𑀕𑁆𑀖𑀸𑀢𑁄𑀢𑀺 𑀯𑀼𑀢𑁆𑀢𑁄.

𑀅𑀲𑁆𑀲𑀸𑀤𑀦𑁆𑀢𑀺 𑀤𑀺𑀝𑁆𑀞𑀺𑀫𑀽𑀮𑀓𑀁 𑀆𑀦𑀺𑀲𑀁𑀲𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀬𑀁𑀤𑀺𑀝𑁆𑀞𑀺𑀓𑁄 𑀲𑀢𑁆𑀣𑀸 𑀳𑁄𑀢𑀺, 𑀢𑀁𑀤𑀺𑀝𑁆𑀞𑀺𑀓𑀸 𑀲𑀸𑀯𑀓𑀸 𑀳𑁄𑀦𑁆𑀢𑀺. 𑀬𑀁𑀤𑀺𑀝𑁆𑀞𑀺𑀓𑀸 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀲𑀓𑁆𑀓𑀭𑁄𑀦𑁆𑀢𑀺, 𑀕𑀭𑀼𑀁 𑀓𑀭𑁄𑀦𑁆𑀢𑀺, 𑀫𑀸𑀦𑁂𑀦𑁆𑀢𑀺, 𑀧𑀽𑀚𑁂𑀦𑁆𑀢𑀺, 𑀮𑀪𑀦𑁆𑀢𑀺 𑀢𑀢𑁄𑀦𑀺𑀤𑀸𑀦𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀆𑀦𑀺𑀲𑀁𑀲𑁄’’𑀢𑀺. 𑀆𑀤𑀻𑀦𑀯𑀦𑁆𑀢𑀺 𑀤𑀺𑀝𑁆𑀞𑀺𑀕𑁆𑀕𑀳𑀡𑀫𑀽𑀮𑀓𑀁 𑀉𑀧𑀤𑁆𑀤𑀯𑀁. 𑀲𑁄 𑀯𑀕𑁆𑀕𑀼𑀮𑀺𑀯𑀢𑀁 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀁 𑀓𑀡𑁆𑀝𑀓𑀸𑀧𑀲𑁆𑀲𑀬𑀢𑀸 𑀧𑀜𑁆𑀘𑀸𑀢𑀧𑀢𑀧𑁆𑀧𑀦𑀁 𑀲𑀸𑀦𑀼𑀧𑀧𑀸𑀢𑀧𑀢𑀦𑀁 𑀓𑁂𑀲𑀫𑀲𑁆𑀲𑀼𑀮𑀼𑀜𑁆𑀘𑀦𑀁 𑀅𑀧𑁆𑀧𑁄𑀡𑀓𑀁 𑀛𑀸𑀦𑀦𑁆𑀢𑀺𑀆𑀤𑀻𑀦𑀁 𑀯𑀲𑁂𑀦𑀁 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀤𑀺𑀝𑁆𑀞𑀻𑀦𑀁 𑀦𑀺𑀲𑁆𑀲𑀭𑀡𑀁 𑀦𑀸𑀫 𑀦𑀺𑀩𑁆𑀩𑀸𑀦𑀁. 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀻𑀢𑀺 𑀬𑁂 𑀏𑀢𑀁 𑀲𑀩𑁆𑀩𑀁 𑀬𑀣𑀸𑀲𑀪𑀸𑀯𑀁 𑀦 𑀚𑀸𑀦𑀦𑁆𑀢𑀺. 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀢𑁄 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺. 𑀇𑀫𑀺𑀦𑀸 𑀏𑀢𑁂𑀲𑀁 𑀦𑀺𑀝𑁆𑀞𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀢𑁄 𑀧𑀭𑀺𑀫𑀼𑀘𑁆𑀘𑀦𑁆𑀢𑀺. 𑀇𑀫𑀺𑀦𑀸 𑀏𑀢𑁂𑀲𑀁 𑀦𑀺𑀝𑁆𑀞𑀸 𑀦𑀸𑀫 𑀅𑀢𑁆𑀣𑀻𑀢𑀺 𑀤𑁆𑀯𑀺𑀦𑁆𑀦𑀁 𑀅𑀝𑁆𑀝𑀓𑀸𑀭𑀓𑀸𑀦𑀁 𑀅𑀝𑁆𑀝𑀁 𑀙𑀺𑀦𑁆𑀤𑀦𑁆𑀢𑁄 𑀯𑀺𑀬 𑀲𑀸𑀲𑀦𑀲𑁆𑀫𑀺𑀁𑀬𑁂𑀯 𑀦𑀺𑀝𑁆𑀞𑀸𑀬 𑀅𑀢𑁆𑀣𑀺𑀢𑀁 𑀧𑀢𑀺𑀝𑁆𑀞𑀧𑁂𑀢𑀺.

𑁧𑁪𑁩. 𑀇𑀤𑀸𑀦𑀺 𑀤𑀺𑀝𑁆𑀞𑀺𑀘𑁆𑀙𑁂𑀤𑀦𑀁 𑀤𑀲𑁆𑀲𑁂𑀦𑁆𑀢𑁄 𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀸𑀦𑀻𑀢𑀺𑀆𑀤𑀺𑀫𑀸𑀳. 𑀢𑁂𑀲𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸𑀬𑁂𑀯.

𑀲𑀩𑁆𑀩𑀼𑀧𑀸𑀤𑀸𑀦𑀧𑀭𑀺𑀜𑁆𑀜𑀸𑀯𑀸𑀤𑀸 𑀧𑀝𑀺𑀚𑀸𑀦𑀫𑀸𑀦𑀸𑀢𑀺 𑀫𑀬𑀁 𑀲𑀩𑁆𑀩𑁂𑀲𑀁 𑀉𑀧𑀸𑀤𑀸𑀦𑀸𑀦𑀁 𑀧𑀭𑀺𑀜𑁆𑀜𑀁 𑀲𑀫𑀢𑀺𑀓𑁆𑀓𑀫𑀁 𑀯𑀤𑀸𑀫𑀸𑀢𑀺 𑀏𑀯𑀁 𑀧𑀝𑀺𑀚𑀸𑀦𑀫𑀸𑀦𑀸. 𑀦 𑀲𑀫𑁆𑀫𑀸 𑀲𑀩𑁆𑀩𑀼𑀧𑀸𑀤𑀸𑀦𑀧𑀭𑀺𑀜𑁆𑀜𑀦𑁆𑀢𑀺 𑀲𑀩𑁆𑀩𑁂𑀲𑀁 𑀉𑀧𑀸𑀤𑀸𑀦𑀸𑀦𑀁 𑀲𑀫𑀢𑀺𑀓𑁆𑀓𑀫𑀁 𑀲𑀫𑁆𑀫𑀸 𑀦 𑀧𑀜𑁆𑀜𑀧𑁂𑀦𑁆𑀢𑀺. 𑀓𑁂𑀘𑀺 𑀓𑀸𑀫𑀼𑀧𑀸𑀤𑀸𑀦𑀫𑀢𑁆𑀢𑀲𑁆𑀲 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀓𑁂𑀘𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀫𑀢𑁆𑀢𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺, 𑀓𑁂𑀘𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑁆𑀲𑀸𑀧𑀺. 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀲𑁆𑀲 𑀧𑀦 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀢𑁂𑀲𑀁 𑀧𑀦 𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑁂𑀧𑀺 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺𑀬𑁂𑀯, 𑀙𑀦𑁆𑀦𑀯𑀼𑀢𑀺 𑀧𑀸𑀲𑀡𑁆𑀟𑀸𑀧𑀺 𑀳𑀺 ‘‘𑀓𑀸𑀫𑀸 𑀔𑁄 𑀧𑀩𑁆𑀩𑀚𑀺𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸’’𑀢𑀺 𑀯𑀢𑁆𑀣𑀼𑀧𑀝𑀺𑀲𑁂𑀯𑀦𑀁 𑀓𑀸𑀫𑀁 𑀓𑀧𑁆𑀧𑀢𑀻𑀢𑀺 𑀦 𑀧𑀜𑁆𑀜𑀧𑁂𑀦𑁆𑀢𑀺, 𑀅𑀓𑀧𑁆𑀧𑀺𑀬𑀫𑁂𑀯 𑀓𑀢𑁆𑀯𑀸 𑀧𑀜𑁆𑀜𑀧𑁂𑀦𑁆𑀢𑀺. 𑀬𑁂 𑀧𑀦 𑀲𑁂𑀯𑀦𑁆𑀢𑀺, 𑀢𑁂 𑀣𑁂𑀬𑁆𑀬𑁂𑀦 𑀲𑁂𑀯𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺.

𑀬𑀲𑁆𑀫𑀸 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀘𑀭𑀦𑁆𑀢𑀺. ‘‘𑀲𑀻𑀮𑁂𑀦 𑀲𑀼𑀤𑁆𑀥𑀺 𑀯𑀢𑁂𑀦 𑀲𑀼𑀤𑁆𑀥𑀺, 𑀪𑀸𑀯𑀦𑀸𑀬 𑀲𑀼𑀤𑁆𑀥𑀻’’𑀢𑀺 𑀕𑀡𑁆𑀳𑀦𑁆𑀢𑀺, 𑀅𑀢𑁆𑀢𑀼𑀧𑀮𑀤𑁆𑀥𑀺𑀁 𑀦 𑀧𑀚𑀳𑀦𑁆𑀢𑀺, 𑀢𑀲𑁆𑀫𑀸 𑀦 𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑁆𑀲, 𑀦 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑁆𑀲, 𑀦 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀲𑁆𑀲 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀢𑀁 𑀅𑀧𑀜𑁆𑀜𑀸𑀧𑀦𑀁 𑀏𑀢𑁂𑀲𑀁 𑀓𑀺𑀲𑁆𑀲 𑀳𑁂𑀢𑀼, 𑀓𑀺𑀁 𑀓𑀸𑀭𑀡𑀸? 𑀇𑀫𑀸𑀦𑀺 𑀳𑀺 𑀢𑁂 𑀪𑁄𑀦𑁆𑀢𑁄𑀢𑀺 𑀬𑀲𑁆𑀫𑀸 𑀢𑁂 𑀪𑁄𑀦𑁆𑀢𑁄 𑀇𑀫𑀸𑀦𑀺 𑀢𑀻𑀡𑀺 𑀓𑀸𑀭𑀡𑀸𑀦𑀺 𑀬𑀣𑀸𑀲𑀪𑀸𑀯𑀢𑁄 𑀦 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑁂 𑀧𑀦𑁂𑀢𑁆𑀣 𑀤𑁆𑀯𑀺𑀦𑁆𑀦𑀁 𑀧𑀭𑀺𑀜𑁆𑀜𑀸𑀦𑀁 𑀧𑀜𑁆𑀜𑀸𑀧𑀦𑀓𑀸𑀭𑀡𑀁 𑀤𑀺𑀝𑁆𑀞𑀺𑀜𑁆𑀘𑁂𑀯 𑀲𑀻𑀮𑀩𑁆𑀩𑀢𑀜𑁆𑀘 ‘‘𑀏𑀢𑀁 𑀧𑀳𑀸𑀢𑀩𑁆𑀩’’𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄 𑀚𑀸𑀦𑀦𑁆𑀢𑀺. 𑀢𑁂 𑀲𑀦𑁆𑀥𑀸𑀬 𑀧𑀭𑀢𑁄 𑀤𑁆𑀯𑁂 𑀯𑀸𑀭𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑁂 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀻𑀦𑀺 𑀕𑀡𑁆𑀳𑀦𑁆𑀢𑀺, 𑀢𑁂 𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑁆𑀲 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀬𑁂 𑀧𑀦 ‘‘𑀦 𑀲𑀻𑀮𑁂𑀦 𑀲𑀼𑀤𑁆𑀥𑀺, 𑀦 𑀯𑀢𑁂𑀦 𑀲𑀼𑀤𑁆𑀥𑀺, 𑀦 𑀪𑀸𑀯𑀦𑀸𑀬 𑀲𑀼𑀤𑁆𑀥𑀻’’𑀢𑀺 𑀕𑀡𑁆𑀳𑀦𑁆𑀢𑀺, 𑀢𑁂 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀲𑁆𑀲 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀲𑁆𑀲 𑀧𑀭𑀺𑀜𑁆𑀜𑀁 𑀧𑀦 𑀏𑀓𑁄𑀧𑀺 𑀧𑀜𑁆𑀜𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄𑀧𑀺 𑀳𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀧𑀸𑀡𑀺𑀦𑀸 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 𑀘𑀭𑀫𑀸𑀦𑀸𑀧𑀺 𑀘 𑀢𑀺𑀢𑁆𑀣𑀺𑀬𑀸 𑀢𑀺𑀲𑁆𑀲𑁄 𑀧𑀭𑀺𑀜𑁆𑀜𑀸 𑀧𑀜𑁆𑀜𑀧𑁂𑀦𑁆𑀢𑀺. 𑀅𑀢𑁆𑀢𑀯𑀸𑀤𑀁 𑀫𑀼𑀜𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀧𑀼𑀦𑀧𑁆𑀧𑀼𑀦𑀁 𑀯𑀝𑁆𑀝𑀲𑁆𑀫𑀺𑀁𑀬𑁂𑀯 𑀧𑀢𑀦𑁆𑀢𑀺. 𑀧𑀣𑀯𑀺𑀚𑀺𑀕𑀼𑀘𑁆𑀙𑀦𑀲𑀲𑀓𑁄 𑀯𑀺𑀬 𑀳𑀺 𑀏𑀢𑁂.

𑀢𑀢𑁆𑀣𑀸𑀬𑀁 𑀅𑀢𑁆𑀣𑀲𑀮𑁆𑀮𑀸𑀧𑀺𑀓𑀸 𑀉𑀧𑀫𑀸 𑁋 𑀧𑀣𑀯𑀻 𑀓𑀺𑀭 𑀲𑀲𑀓𑀁 𑀆𑀳 𑁋 ‘‘𑀪𑁄 𑀲𑀲𑀓𑀸’’𑀢𑀺. 𑀲𑀲𑀓𑁄 𑀆𑀳 𑁋 ‘‘𑀓𑁄 𑀏𑀲𑁄’’𑀢𑀺. ‘‘𑀓𑀲𑁆𑀫𑀸 𑀫𑀫𑁂𑀯 𑀉𑀧𑀭𑀺 𑀲𑀩𑁆𑀩𑀇𑀭𑀺𑀬𑀸𑀧𑀣𑁂 𑀓𑀧𑁆𑀧𑁂𑀦𑁆𑀢𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑁄 𑀫𑀁 𑀦 𑀚𑀸𑀦𑀸𑀲𑀻’’𑀢𑀺. ‘‘𑀲𑀼𑀝𑁆𑀞𑀼 𑀢𑀬𑀸 𑀅𑀳𑀁 𑀤𑀺𑀝𑁆𑀞𑁄, 𑀫𑀬𑀸 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀫𑁆𑀧𑀺 𑀅𑀗𑁆𑀕𑀼𑀮𑀕𑁆𑀕𑁂𑀳𑀺 𑀨𑀼𑀝𑁆𑀞𑀝𑁆𑀞𑀸𑀦𑀁 𑀯𑀺𑀬 𑀳𑁄𑀢𑀺, 𑀯𑀺𑀲𑁆𑀲𑀝𑁆𑀞𑀉𑀤𑀓𑀁 𑀅𑀧𑁆𑀧𑀫𑀢𑁆𑀢𑀓𑀁, 𑀓𑀭𑀻𑀲𑀁 𑀓𑀢𑀓𑀨𑀮𑀫𑀢𑁆𑀢𑀁. 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀳𑀺 𑀧𑀦 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀫𑁆𑀧𑀺 𑀫𑀳𑀦𑁆𑀢𑀁, 𑀧𑀲𑁆𑀲𑀸𑀯𑁄𑀧𑀺 𑀦𑁂𑀲𑀁 𑀖𑀝𑀫𑀢𑁆𑀢𑁄 𑀳𑁄𑀢𑀺, 𑀉𑀘𑁆𑀘𑀸𑀭𑁄𑀧𑀺 𑀧𑀘𑁆𑀙𑀺𑀫𑀢𑁆𑀢𑁄 𑀳𑁄𑀢𑀺, 𑀅𑀮𑀁 𑀫𑀬𑁆𑀳𑀁 𑀢𑀬𑀸’’𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀢𑁄. 𑀢𑀢𑁄 𑀦𑀁 𑀧𑀣𑀯𑀻 𑀆𑀳 𑁋 ‘‘𑀅𑀭𑁂 𑀤𑀽𑀭𑀁 𑀕𑀢𑁄𑀧𑀺 𑀦𑀦𑀼 𑀫𑀬𑁆𑀳𑀁 𑀉𑀧𑀭𑀺𑀬𑁂𑀯 𑀧𑀢𑀺𑀢𑁄𑀲𑀻’’𑀢𑀺. 𑀲𑁄 𑀧𑀼𑀦 𑀢𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀧𑀢𑀺𑀢𑁄, 𑀏𑀯𑀁 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀉𑀧𑁆𑀧𑀢𑀺𑀢𑁆𑀯𑀸 𑀧𑀢𑀫𑀸𑀦𑁄 𑀲𑀲𑀓𑁄 𑀧𑀣𑀯𑀺𑀁 𑀫𑀼𑀜𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀯𑀫𑁂𑀯𑀁 𑀢𑀺𑀢𑁆𑀣𑀺𑀬𑀸 𑀲𑀩𑁆𑀩𑀽𑀧𑀸𑀤𑀸𑀦𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑁄𑀧𑀺 𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀦𑀁 𑀢𑀺𑀡𑁆𑀡𑀁𑀬𑁂𑀯 𑀲𑀫𑀢𑀺𑀓𑁆𑀓𑀫𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀅𑀢𑁆𑀢𑀯𑀸𑀤𑀁 𑀧𑀦 𑀫𑀼𑀜𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀲𑀓𑁆𑀓𑁄𑀦𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀯𑀝𑁆𑀝𑀲𑁆𑀫𑀺𑀁𑀬𑁂𑀯 𑀧𑀢𑀦𑁆𑀢𑀻𑀢𑀺.

𑀏𑀯𑀁 𑀬𑀁 𑀢𑀺𑀢𑁆𑀣𑀺𑀬𑀸 𑀲𑀫𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀲 𑀯𑀲𑁂𑀦 𑀤𑀺𑀝𑁆𑀞𑀺𑀘𑁆𑀙𑁂𑀤𑀯𑀸𑀤𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀧𑀲𑀸𑀤𑀧𑀘𑁆𑀙𑁂𑀤𑀯𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀭𑀽𑀧𑁂 𑀔𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀥𑀫𑁆𑀫𑀯𑀺𑀦𑀬𑁂𑀢𑀺 𑀥𑀫𑁆𑀫𑁂 𑀘𑁂𑀯 𑀯𑀺𑀦𑀬𑁂 𑀘, 𑀉𑀪𑀬𑁂𑀦𑀧𑀺 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀁 𑀤𑀲𑁆𑀲𑁂𑀢𑀺. ‘‘𑀬𑁄 𑀲𑀢𑁆𑀣𑀭𑀺 𑀧𑀲𑀸𑀤𑁄 𑀲𑁄 𑀦 𑀲𑀫𑁆𑀫𑀕𑁆𑀕𑀢𑁄’’𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀫𑁆𑀳𑀺 𑀳𑀺 𑀲𑀢𑁆𑀣𑀸 𑀓𑀸𑀮𑀁 𑀓𑀢𑁆𑀯𑀸 𑀲𑀻𑀳𑁄𑀧𑀺 𑀳𑁄𑀢𑀺, 𑀩𑁆𑀬𑀕𑁆𑀖𑁄𑀧𑀺 𑀳𑁄𑀢𑀺, 𑀤𑀻𑀧𑀺𑀧𑀺 𑀅𑀘𑁆𑀙𑁄𑀧𑀺 𑀢𑀭𑀘𑁆𑀙𑁄𑀧𑀺. 𑀲𑀸𑀯𑀓𑀸 𑀧𑀦𑀲𑁆𑀲 𑀫𑀺𑀕𑀸𑀧𑀺 𑀲𑀽𑀓𑀭𑀸𑀧𑀺 𑀧𑀲𑀤𑀸𑀧𑀺 𑀳𑁄𑀦𑁆𑀢𑀺, 𑀲𑁄 ‘‘𑀇𑀫𑁂 𑀫𑀬𑁆𑀳𑀁 𑀧𑀼𑀩𑁆𑀩𑁂 𑀉𑀧𑀝𑁆𑀞𑀸𑀓𑀸 𑀧𑀘𑁆𑀘𑀬𑀤𑀸𑀬𑀓𑀸’’𑀢𑀺 𑀔𑀦𑁆𑀢𑀺𑀁 𑀯𑀸 𑀫𑁂𑀢𑁆𑀢𑀁 𑀯𑀸 𑀅𑀦𑀼𑀤𑁆𑀤𑀬𑀁 𑀯𑀸 𑀅𑀓𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀧𑀢𑀺𑀢𑁆𑀯𑀸 𑀮𑁄𑀳𑀺𑀢𑀁 𑀧𑀺𑀯𑀢𑀺, 𑀣𑀽𑀮𑀣𑀽𑀮𑀫𑀁𑀲𑀸𑀦𑀺𑀧𑀺 𑀔𑀸𑀤𑀢𑀺. 𑀲𑀢𑁆𑀣𑀸 𑀯𑀸 𑀧𑀦 𑀩𑀺𑀴𑀸𑀭𑁄 𑀳𑁄𑀢𑀺, 𑀲𑀸𑀯𑀓𑀸 𑀓𑀼𑀓𑁆𑀓𑀼𑀝𑀸 𑀯𑀸 𑀫𑀽𑀲𑀺𑀓𑀸 𑀯𑀸. 𑀅𑀣 𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀼𑀓𑀫𑁆𑀧𑀁 𑀅𑀓𑀢𑁆𑀯𑀸 𑀔𑀸𑀤𑀢𑀺. 𑀅𑀣 𑀯𑀸 𑀲𑀢𑁆𑀣𑀸 𑀦𑀺𑀭𑀬𑀧𑀸𑀮𑁄 𑀳𑁄𑀢𑀺, 𑀲𑀸𑀯𑀓𑀸 𑀦𑁂𑀭𑀬𑀺𑀓𑀲𑀢𑁆𑀢𑀸. 𑀲𑁄 ‘‘𑀇𑀫𑁂 𑀫𑀬𑁆𑀳𑀁 𑀧𑀼𑀩𑁆𑀩𑁂 𑀉𑀧𑀝𑁆𑀞𑀸𑀓𑀸 𑀧𑀘𑁆𑀘𑀬𑀤𑀸𑀬𑀓𑀸’’𑀢𑀺 𑀅𑀦𑀼𑀓𑀫𑁆𑀧𑀁 𑀅𑀓𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀭𑁄𑀢𑀺, 𑀆𑀤𑀺𑀢𑁆𑀢𑁂𑀧𑀺 𑀭𑀣𑁂 𑀬𑁄𑀚𑁂𑀢𑀺, 𑀅𑀗𑁆𑀕𑀸𑀭𑀧𑀩𑁆𑀩𑀢𑀫𑁆𑀧𑀺 𑀆𑀭𑁄𑀧𑁂𑀢𑀺, 𑀮𑁄𑀳𑀓𑀼𑀫𑁆𑀪𑀺𑀬𑀫𑁆𑀧𑀺 𑀔𑀺𑀧𑀢𑀺, 𑀅𑀦𑁂𑀓𑁂𑀳𑀺𑀧𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺 𑀲𑀫𑁆𑀧𑀬𑁄𑀚𑁂𑀢𑀺. 𑀲𑀸𑀯𑀓𑀸 𑀯𑀸 𑀧𑀦 𑀓𑀸𑀮𑀁 𑀓𑀢𑁆𑀯𑀸 𑀲𑀻𑀳𑀸𑀤𑀬𑁄 𑀳𑁄𑀦𑁆𑀢𑀺, 𑀲𑀢𑁆𑀣𑀸 𑀫𑀺𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑁄. 𑀢𑁂 ‘‘𑀇𑀫𑀁 𑀫𑀬𑀁 𑀧𑀼𑀩𑁆𑀩𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀫𑁆𑀳𑀸, 𑀲𑀢𑁆𑀣𑀸 𑀦𑁄 𑀅𑀬’’𑀦𑁆𑀢𑀺 𑀢𑀲𑁆𑀫𑀺𑀁 𑀔𑀦𑁆𑀢𑀺𑀁 𑀯𑀸 𑀫𑁂𑀢𑁆𑀢𑀁 𑀯𑀸 𑀅𑀦𑀼𑀤𑁆𑀤𑀬𑀁 𑀯𑀸 𑀅𑀓𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀺. 𑀏𑀯𑀁 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀬𑁄 𑀲𑀢𑁆𑀣𑀭𑀺 𑀧𑀲𑀸𑀤𑁄, 𑀲𑁄 𑀦 𑀲𑀫𑁆𑀫𑀕𑁆𑀕𑀢𑁄 𑀳𑁄𑀢𑀺, 𑀓𑀜𑁆𑀘𑀺 𑀓𑀸𑀮𑀁 𑀕𑀦𑁆𑀢𑁆𑀯𑀸𑀧𑀺 𑀧𑀘𑁆𑀙𑀸 𑀯𑀺𑀦𑀲𑁆𑀲𑀢𑀺𑀬𑁂𑀯.

𑀬𑁄 𑀥𑀫𑁆𑀫𑁂 𑀧𑀲𑀸𑀤𑁄𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀲𑁆𑀫𑀺𑀜𑁆𑀳𑀺 𑀥𑀫𑁆𑀫𑁂 𑀧𑀲𑀸𑀤𑁄 𑀦𑀸𑀫, 𑀉𑀕𑁆𑀕𑀳𑀺𑀢𑀧𑀭𑀺𑀬𑀸𑀧𑀼𑀝 𑁋 𑀥𑀸𑀭𑀺𑀢𑀯𑀸𑀘𑀺𑀢𑁆𑀢𑀫𑀢𑁆𑀢𑀓𑁂 𑀢𑀦𑁆𑀢𑀺𑀥𑀫𑁆𑀫𑁂 𑀧𑀲𑀸𑀤𑁄 𑀳𑁄𑀢𑀺, 𑀯𑀝𑁆𑀝𑀫𑁄𑀓𑁆𑀔𑁄 𑀧𑀦𑁂𑀢𑁆𑀣 𑀦𑀢𑁆𑀣𑀺. 𑀢𑀲𑁆𑀫𑀸 𑀬𑁄 𑀏𑀢𑁆𑀣 𑀧𑀲𑀸𑀤𑁄, 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀯𑀝𑁆𑀝𑀫𑁂𑀯 𑀕𑀫𑁆𑀪𑀻𑀭𑀁 𑀓𑀭𑁄𑀢𑀻𑀢𑀺 𑀲𑀸𑀲𑀦𑀲𑁆𑀫𑀺𑀁 𑀅𑀲𑀫𑁆𑀫𑀕𑁆𑀕𑀢𑁄 𑀅𑀲𑀪𑀸𑀯𑀢𑁄 𑀅𑀓𑁆𑀔𑀸𑀬𑀢𑀺.

𑀬𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀢𑀺 𑀬𑀸𑀧𑀺 𑀘 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀅𑀚𑀲𑀻𑀮𑀸𑀤𑀻𑀦𑀁 𑀯𑀲𑁂𑀦 𑀧𑀭𑀺𑀧𑀽𑀭𑀓𑀸𑀭𑀺𑀢𑀸, 𑀲𑀸𑀧𑀺 𑀬𑀲𑁆𑀫𑀸 𑀯𑀝𑁆𑀝𑀫𑁄𑀓𑁆𑀔𑀁 𑀪𑀯𑀦𑀺𑀲𑁆𑀲𑀭𑀡𑀁 𑀦 𑀲𑀫𑁆𑀧𑀸𑀧𑁂𑀢𑀺, 𑀲𑀫𑁆𑀧𑀚𑁆𑀚𑀫𑀸𑀦𑀸 𑀧𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀆𑀯𑀳𑀢𑀺, 𑀯𑀺𑀧𑀘𑁆𑀘𑀫𑀸𑀦𑀸 𑀦𑀺𑀭𑀬𑀁, 𑀢𑀲𑁆𑀫𑀸 𑀲𑀸 𑀦 𑀲𑀫𑁆𑀫𑀕𑁆𑀕𑀢𑀸 𑀅𑀓𑁆𑀔𑀸𑀬𑀢𑀺. 𑀬𑀸 𑀲𑀳𑀥𑀫𑁆𑀫𑀺𑀓𑁂𑀲𑀽𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀲𑁆𑀫𑀺𑀜𑁆𑀳𑀺 𑀬𑁂 𑀲𑀳𑀥𑀫𑁆𑀫𑀺𑀓𑀸, 𑀢𑁂𑀲𑀼 𑀬𑀲𑁆𑀫𑀸 𑀏𑀓𑀘𑁆𑀘𑁂 𑀓𑀸𑀮𑀁 𑀓𑀢𑁆𑀯𑀸 𑀲𑀻𑀳𑀸𑀤𑀬𑁄𑀧𑀺 𑀳𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀫𑀺𑀕𑀸𑀤𑀬𑁄, 𑀢𑀢𑁆𑀣 𑀲𑀻𑀳𑀸𑀤𑀺𑀪𑀽𑀢𑀸 ‘‘𑀇𑀫𑁂 𑀅𑀫𑁆𑀳𑀸𑀓𑀁 𑀲𑀳𑀥𑀫𑁆𑀫𑀺𑀓𑀸 𑀅𑀳𑁂𑀲𑀼’’𑀦𑁆𑀢𑀺 𑀫𑀺𑀕𑀸𑀤𑀺𑀪𑀽𑀢𑁂𑀲𑀼 𑀔𑀦𑁆𑀢𑀺𑀆𑀤𑀻𑀦𑀺 𑀅𑀓𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑁂𑀲𑀁 𑀫𑀳𑀸𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀢𑀲𑁆𑀫𑀸 𑀏𑀢𑁆𑀣 𑀲𑀳𑀥𑀫𑁆𑀫𑀺𑀓𑁂𑀲𑀼 𑀧𑀺𑀬𑀫𑀦𑀸𑀧𑀢𑀸𑀧𑀺 𑀅𑀲𑀫𑁆𑀫𑀕𑁆𑀕𑀢𑀸 𑀅𑀓𑁆𑀔𑀸𑀬𑀢𑀺.

𑀇𑀤𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀓𑀸𑀭𑀡𑀪𑁂𑀤𑀁 𑀏𑀓𑀢𑁄 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀳𑁄𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀲𑀁𑀔𑁂𑀧𑀢𑁆𑀣𑁄 𑁋 𑀏𑀯𑀜𑁆𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀳𑁄𑀢𑀺, 𑀬𑀁 𑀫𑀬𑀸 𑀯𑀼𑀢𑁆𑀢𑀁 ‘‘𑀬𑁄 𑀲𑀢𑁆𑀣𑀭𑀺 𑀧𑀲𑀸𑀤𑁄 𑀲𑁄 𑀦 𑀲𑀫𑁆𑀫𑀕𑁆𑀕𑀢𑁄 𑀅𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺, 𑀢𑀁 𑀏𑀯𑀫𑁂𑀯 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑁂 𑀧𑀲𑀸𑀤𑀸𑀤𑀬𑁄 𑀤𑀼𑀭𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 …𑀧𑁂… 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁂𑀢𑀺, 𑀏𑀢𑁆𑀣 𑀳𑀺 𑀬𑀣𑀸 𑀢𑀦𑁆𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀢𑁆𑀣 𑀤𑀼𑀭𑀓𑁆𑀔𑀸𑀢𑁂𑀢𑀺 𑀤𑀼𑀓𑁆𑀓𑀣𑀺𑀢𑁂, 𑀤𑀼𑀓𑁆𑀔𑀣𑀺𑀢𑀢𑁆𑀢𑀸𑀬𑁂𑀯 𑀤𑀼𑀧𑁆𑀧𑀯𑁂𑀤𑀺𑀢𑁂. 𑀲𑁄 𑀧𑀦𑁂𑀲 𑀬𑀲𑁆𑀫𑀸 𑀫𑀕𑁆𑀕𑀨𑀮𑀢𑁆𑀣𑀸𑀬 𑀦 𑀦𑀺𑀬𑁆𑀬𑀸𑀢𑀺, 𑀢𑀲𑁆𑀫𑀸 𑀅𑀦𑀺𑀬𑁆𑀬𑀸𑀦𑀺𑀓𑁄. 𑀭𑀸𑀕𑀸𑀤𑀻𑀦𑀁 𑀉𑀧𑀲𑀫𑀸𑀬 𑀅𑀲𑀁𑀯𑀢𑁆𑀢𑀦𑀢𑁄 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄. 𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀩𑁆𑀩𑀜𑁆𑀜𑀼𑀦𑀸 𑀧𑀯𑁂𑀤𑀺𑀢𑁄𑀢𑀺 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄. 𑀢𑀲𑁆𑀫𑀺𑀁 𑀅𑀦𑀺𑀬𑁆𑀬𑀸𑀦𑀺𑀓𑁂 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁂. 𑀏𑀢𑁆𑀢𑀸𑀯𑀢𑀸 𑀪𑀕𑀯𑀸 𑀢𑀺𑀢𑁆𑀣𑀺𑀬𑁂𑀲𑀼 𑀧𑀲𑀸𑀤𑁄 𑀲𑀼𑀭𑀸𑀧𑀻𑀢𑀲𑀺𑀗𑁆𑀕𑀸𑀮𑁂 𑀧𑀲𑀸𑀤𑁄 𑀯𑀺𑀬 𑀦𑀺𑀭𑀢𑁆𑀣𑀓𑁄𑀢𑀺 𑀤𑀲𑁆𑀲𑁂𑀢𑀺.

𑀏𑀓𑁄 𑀓𑀺𑀭 𑀓𑀸𑀴𑀲𑀺𑀗𑁆𑀕𑀸𑀮𑁄 𑀭𑀢𑁆𑀢𑀺𑀁 𑀦𑀕𑀭𑀁 𑀧𑀯𑀺𑀝𑁆𑀞𑁄 𑀲𑀼𑀭𑀸𑀚𑀮𑁆𑀮𑀺𑀓𑀁 𑀔𑀸𑀤𑀺𑀢𑁆𑀯𑀸 𑀧𑀼𑀦𑁆𑀦𑀸𑀕𑀯𑀦𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀦 𑀲𑀓𑁆𑀓𑀸 𑀕𑀦𑁆𑀢𑀼𑀁, 𑀩𑀳𑀽 𑀅𑀫𑁆𑀳𑀸𑀓𑀁 𑀯𑁂𑀭𑀺𑀦𑁄, 𑀏𑀓𑀁 𑀯𑀜𑁆𑀘𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀏𑀓𑀁 𑀩𑁆𑀭𑀸𑀳𑁆𑀫𑀡𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀇𑀫𑀁 𑀯𑀜𑁆𑀘𑁂𑀲𑁆𑀲𑀸𑀫𑀻𑀢𑀺 ‘‘𑀅𑀬𑁆𑀬 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀆𑀳. 𑀓𑁄 𑀏𑀲𑁄 𑀩𑁆𑀭𑀸𑀳𑁆𑀫𑀡𑀁 𑀧𑀓𑁆𑀓𑁄𑀲𑀢𑀻𑀢𑀺. ‘‘𑀅𑀳𑀁, 𑀲𑀸𑀫𑀻, 𑀇𑀢𑁄 𑀢𑀸𑀯 𑀏𑀳𑀻𑀢𑀺. 𑀓𑀺𑀁 𑀪𑁄𑀢𑀺? 𑀫𑀁 𑀩𑀳𑀺𑀕𑀸𑀫𑀁 𑀦𑁂𑀳𑀺, 𑀅𑀳𑀁 𑀢𑁂 𑀤𑁆𑀯𑁂 𑀓𑀳𑀸𑀧𑀡𑀲𑀢𑀸𑀦𑀺 𑀤𑀲𑁆𑀲𑀸𑀫𑀻𑀢𑀺. 𑀲𑁄𑀧𑀺 𑀦𑀬𑀺𑀲𑁆𑀲𑀸𑀫𑀻𑀢𑀺 𑀢𑀁 𑀧𑀸𑀤𑁂𑀲𑀼 𑀕𑀡𑁆𑀳𑀺. 𑀅𑀭𑁂 𑀩𑀸𑀮 𑀩𑁆𑀭𑀸𑀳𑁆𑀫𑀡, 𑀦 𑀫𑀬𑁆𑀳𑀁 𑀓𑀳𑀸𑀧𑀡𑀸 𑀙𑀟𑁆𑀟𑀺𑀢𑀓𑀸 𑀅𑀢𑁆𑀣𑀺, 𑀤𑀼𑀮𑁆𑀮𑀪𑀸 𑀓𑀳𑀸𑀧𑀡𑀸, 𑀲𑀸𑀥𑀼𑀓𑀁 𑀫𑀁 𑀕𑀡𑁆𑀳𑀸𑀳𑀻𑀢𑀺. 𑀓𑀣𑀁 𑀪𑁄 𑀕𑀡𑁆𑀳𑀸𑀫𑀻𑀢𑀺? 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀕𑀡𑁆𑀞𑀺𑀓𑀁 𑀓𑀢𑁆𑀯𑀸 𑀅𑀁𑀲𑁂 𑀮𑀕𑁆𑀕𑁂𑀢𑁆𑀯𑀸 𑀕𑀡𑁆𑀳𑀸𑀳𑀻𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀢𑀣𑀸 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑀲𑀫𑀻𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀏𑀢𑁆𑀣 𑀑𑀢𑀸𑀭𑁂𑀫𑀻𑀢𑀺 𑀧𑀼𑀘𑁆𑀙𑀺. 𑀓𑀢𑀭𑀝𑁆𑀞𑀸𑀦𑀁 𑀦𑀸𑀫 𑀏𑀢𑀦𑁆𑀢𑀺? 𑀫𑀳𑀸𑀤𑁆𑀯𑀸𑀭𑀁 𑀏𑀢𑀦𑁆𑀢𑀺. 𑀅𑀭𑁂 𑀩𑀸𑀮, 𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀢𑀯 𑀜𑀸𑀢𑀓𑀸 𑀅𑀦𑁆𑀢𑀭𑀤𑁆𑀯𑀸𑀭𑁂 𑀓𑀳𑀸𑀧𑀡𑀁 𑀞𑀧𑁂𑀦𑁆𑀢𑀺, 𑀧𑀭𑀢𑁄 𑀫𑀁 𑀳𑀭𑀸’’𑀢𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀣𑁄𑀓𑀁 𑀣𑁄𑀓𑀁 𑀕𑀦𑁆𑀢𑁆𑀯𑀸 ‘‘𑀏𑀢𑁆𑀣 𑀑𑀢𑀸𑀭𑁂𑀫𑀺 𑀏𑀢𑁆𑀣 𑀑𑀢𑀸𑀭𑁂𑀫𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀢𑀚𑁆𑀚𑀺𑀢𑁄 𑀔𑁂𑀫𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀑𑀢𑀸𑀭𑁂𑀳𑀻𑀢𑀺 𑀯𑀼𑀢𑁆𑀢𑁄 𑀑𑀢𑀸𑀭𑁂𑀢𑁆𑀯𑀸 𑀲𑀸𑀝𑀓𑀁 𑀕𑀡𑁆𑀳𑀺. 𑀓𑀸𑀴𑀲𑀺𑀗𑁆𑀕𑀸𑀮𑁄 𑀆𑀳 ‘‘𑀅𑀳𑀁 𑀢𑁂 𑀤𑁆𑀯𑁂 𑀓𑀳𑀸𑀧𑀡𑀲𑀢𑀸𑀦𑀺 𑀤𑀲𑁆𑀲𑀸𑀫𑀻𑀢𑀺 𑀅𑀯𑁄𑀘𑀁. 𑀫𑀬𑁆𑀳𑀁 𑀧𑀦 𑀓𑀳𑀸𑀧𑀡𑀸 𑀩𑀳𑀽, 𑀦 𑀤𑁆𑀯𑁂 𑀓𑀳𑀸𑀧𑀡𑀲𑀢𑀸𑀦𑁂𑀯, 𑀬𑀸𑀯 𑀅𑀳𑀁 𑀓𑀳𑀸𑀧𑀡𑁂 𑀆𑀳𑀭𑀸𑀫𑀺, 𑀢𑀸𑀯 𑀢𑁆𑀯𑀁 𑀲𑀽𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀢𑀺𑀝𑁆𑀞𑀸’’𑀢𑀺 𑀯𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀼𑀦 𑀩𑁆𑀭𑀸𑀳𑁆𑀫𑀡𑀁 𑀆𑀳 ‘‘𑀅𑀬𑁆𑀬 𑀩𑁆𑀭𑀸𑀳𑁆𑀫𑀡 𑀫𑀸 𑀇𑀢𑁄 𑀑𑀮𑁄𑀓𑁂𑀳𑀺, 𑀲𑀽𑀭𑀺𑀬𑀫𑁂𑀯 𑀑𑀮𑁄𑀓𑁂𑀦𑁆𑀢𑁄 𑀢𑀺𑀝𑁆𑀞𑀸’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀓𑁂𑀢𑀓𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀬𑀣𑀸𑀭𑀼𑀘𑀺𑀁 𑀧𑀓𑁆𑀓𑀦𑁆𑀢𑁄. 𑀩𑁆𑀭𑀸𑀳𑁆𑀫𑀡𑀲𑁆𑀲𑀧𑀺 𑀲𑀽𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀦𑀮𑀸𑀝𑀢𑁄 𑀘𑁂𑀯 𑀓𑀘𑁆𑀙𑁂𑀳𑀺 𑀘 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼. 𑀅𑀣 𑀦𑀁 𑀭𑀼𑀓𑁆𑀔𑀤𑁂𑀯𑀢𑀸 𑀆𑀳 𑁋

‘‘𑀲𑀤𑁆𑀤𑀳𑀸𑀲𑀺 𑀲𑀺𑀗𑁆𑀕𑀸𑀮𑀲𑁆𑀲, 𑀲𑀼𑀭𑀸𑀧𑀻𑀢𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀲𑀺𑀧𑁆𑀧𑀺𑀓𑀸𑀦𑀁 𑀲𑀢𑀁 𑀦𑀢𑁆𑀣𑀺, 𑀓𑀼𑀢𑁄 𑀓𑀁𑀲𑀲𑀢𑀸 𑀤𑀼𑀯𑁂’’𑀢𑀺. (𑀚𑀸. 𑁧.𑁧.𑁧𑁧𑁩);

𑀏𑀯𑀁 𑀬𑀣𑀸 𑀓𑀸𑀴𑀲𑀺𑀗𑁆𑀕𑀸𑀮𑁂 𑀧𑀲𑀸𑀤𑁄 𑀦𑀺𑀭𑀢𑁆𑀣𑀓𑁄, 𑀏𑀯𑀁 𑀢𑀺𑀢𑁆𑀣𑀺𑀬𑁂𑀲𑀼𑀧𑀻𑀢𑀺.

𑁧𑁪𑁪. 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀲𑀸𑀤𑀲𑁆𑀲 𑀦𑀺𑀭𑀢𑁆𑀣𑀓𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀢𑀲𑁆𑀲 𑀲𑀸𑀢𑁆𑀣𑀓𑀢𑀁 𑀤𑀲𑁆𑀲𑁂𑀢𑀼𑀁 𑀢𑀣𑀸𑀕𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀧𑀳𑀸𑀦𑀧𑀭𑀺𑀜𑁆𑀜𑀁 𑀲𑀫𑀢𑀺𑀓𑁆𑀓𑀫𑀁 𑀧𑀜𑁆𑀜𑀧𑁂𑀢𑀺, 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀉𑀧𑀸𑀤𑀸𑀦𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀢𑀺. 𑀏𑀯𑀭𑀽𑀧𑁂 𑀔𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂𑀢𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁂 𑀥𑀫𑁆𑀫𑁂 𑀘 𑀯𑀺𑀦𑀬𑁂 𑀘. 𑀉𑀪𑀬𑁂𑀦𑀧𑀺 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀁 𑀤𑀲𑁆𑀲𑁂𑀢𑀺. 𑀲𑀢𑁆𑀣𑀭𑀺 𑀧𑀲𑀸𑀤𑁄𑀢𑀺 𑀏𑀯𑀭𑀽𑀧𑁂 𑀲𑀸𑀲𑀦𑁂 𑀬𑁄 𑀲𑀢𑁆𑀣𑀭𑀺 𑀧𑀲𑀸𑀤𑁄, 𑀲𑁄 𑀲𑀫𑁆𑀫𑀕𑁆𑀕𑀢𑁄 𑀅𑀓𑁆𑀔𑀸𑀬𑀢𑀺, 𑀪𑀯𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀸𑀬 𑀲𑀁𑀯𑀢𑁆𑀢𑀢𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀪𑀕𑀯𑀸 𑀓𑀺𑀭 𑀯𑁂𑀤𑀺𑀬𑀓𑀧𑀩𑁆𑀩𑀢𑁂 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀧𑀝𑀺𑀯𑀲𑀢𑀺. 𑀅𑀣𑁂𑀓𑁄 𑀉𑀮𑀽𑀓𑀲𑀓𑀼𑀡𑁄 𑀪𑀕𑀯𑀢𑀺 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁂 𑀉𑀧𑀟𑁆𑀠𑀫𑀕𑁆𑀕𑀁 𑀅𑀦𑀼𑀕𑀘𑁆𑀙𑀢𑀺, 𑀦𑀺𑀓𑁆𑀔𑀫𑀦𑁆𑀢𑁂 𑀉𑀧𑀟𑁆𑀠𑀫𑀕𑁆𑀕𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀲𑀸𑀬𑀦𑁆𑀳𑀲𑀫𑀬𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁 𑀦𑀺𑀲𑀺𑀦𑁆𑀦𑀁 𑀧𑀩𑁆𑀩𑀢𑀸 𑀑𑀭𑀼𑀬𑁆𑀳 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑁂 𑀧𑀡𑀸𑀫𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀻𑀲𑀁 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀤𑀲𑀩𑀮𑀁 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀪𑀕𑀯𑀸 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬𑀸’’𑀢𑀺 𑀧𑀼𑀘𑁆𑀙𑀺. ‘‘𑀧𑀲𑁆𑀲𑀸𑀦𑀦𑁆𑀤, 𑀇𑀫𑀁 𑀉𑀮𑀽𑀓𑀲𑀓𑀼𑀡𑀁, 𑀅𑀬𑀁 𑀫𑀬𑀺 𑀘 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀓𑀧𑁆𑀧𑁂 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳 𑁋

𑀉𑀮𑀽𑀓𑀫𑀡𑁆𑀟𑀮𑀓𑁆𑀔𑀺𑀓, 𑀯𑁂𑀤𑀺𑀬𑀓𑁂 𑀘𑀺𑀭𑀤𑀻𑀖𑀯𑀸𑀲𑀺𑀓;

𑀲𑀼𑀔𑀺𑀢𑁄𑀲𑀺 𑀢𑁆𑀯𑀁 𑀅𑀬𑁆𑀬 𑀓𑁄𑀲𑀺𑀬, 𑀓𑀸𑀮𑀼𑀝𑁆𑀞𑀺𑀢𑀁 𑀧𑀲𑁆𑀲𑀲𑀺 𑀩𑀼𑀤𑁆𑀥𑀯𑀭𑀁.

𑀫𑀬𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀦𑀼𑀢𑁆𑀢𑀭𑁂;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀺, 𑀤𑀼𑀕𑁆𑀕𑀢𑁂𑀲𑁄 𑀦 𑀕𑀘𑁆𑀙𑀢𑀺.

𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀓𑀼𑀲𑀮𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀪𑀯𑀺𑀲𑁆𑀲𑀢𑀺 𑀅𑀦𑀦𑁆𑀢𑀜𑀸𑀡𑁄, 𑀲𑁄𑀫𑀦𑀲𑁆𑀲𑁄𑀢𑀺 𑀯𑀺𑀲𑁆𑀲𑀼𑀢𑁄𑀢𑀺.

𑀅𑀜𑁆𑀜𑀸𑀦𑀺𑀧𑀺 𑀘𑁂𑀢𑁆𑀣 𑀭𑀸𑀚𑀕𑀳𑀦𑀕𑀭𑁂 𑀲𑀼𑀫𑀦𑀫𑀸𑀮𑀸𑀓𑀸𑀭𑀯𑀢𑁆𑀣𑀼 𑀫𑀳𑀸𑀪𑁂𑀭𑀺𑀯𑀸𑀤𑀓𑀯𑀢𑁆𑀣𑀼 𑀫𑁄𑀭𑀚𑀺𑀓𑀯𑀢𑁆𑀣𑀼 𑀯𑀻𑀡𑀸𑀯𑀸𑀤𑀓𑀯𑀢𑁆𑀣𑀼 𑀲𑀗𑁆𑀔𑀥𑀫𑀓𑀯𑀢𑁆𑀣𑀽𑀢𑀺 𑀏𑀯𑀫𑀸𑀤𑀻𑀦𑀺 𑀯𑀢𑁆𑀣𑀽𑀦𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺. 𑀏𑀯𑀁 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀲𑀢𑁆𑀣𑀭𑀺 𑀧𑀲𑀸𑀤𑁄 𑀲𑀫𑁆𑀫𑀕𑁆𑀕𑀢𑁄 𑀳𑁄𑀢𑀺.

𑀥𑀫𑁆𑀫𑁂 𑀧𑀲𑀸𑀤𑁄𑀢𑀺 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀫𑁆𑀳𑀺 𑀥𑀫𑁆𑀫𑁂 𑀧𑀲𑀸𑀤𑁄 𑀲𑀫𑁆𑀫𑀕𑁆𑀕𑀢𑁄 𑀳𑁄𑀢𑀺. 𑀲𑀭𑀫𑀢𑁆𑀢𑁂 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀼𑀡𑀦𑁆𑀢𑀸𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑁄 𑀳𑁄𑀢𑀺, 𑀧𑀭𑀫𑀢𑁆𑀣𑁂 𑀓𑀺𑀁 𑀧𑀦 𑀯𑀢𑁆𑀢𑀩𑁆𑀩𑀁. 𑀅𑀬𑀫𑀢𑁆𑀣𑁄 𑀫𑀡𑁆𑀟𑀽𑀓𑀤𑁂𑀯𑀧𑀼𑀢𑁆𑀢𑀸𑀤𑀻𑀦𑀁 𑀯𑀢𑁆𑀣𑀼𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀢𑀺 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀫𑁆𑀳𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀧𑀺 𑀲𑀫𑁆𑀫𑀕𑁆𑀕𑀢𑀸 𑀳𑁄𑀢𑀺, 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀢𑁆𑀢𑀺𑀁 𑀆𑀯𑀳𑀢𑀺. 𑀢𑀢𑁆𑀣 𑀙𑀢𑁆𑀢𑀫𑀸𑀡𑀯𑀓𑀯𑀢𑁆𑀣𑀼𑀲𑀸𑀫𑀡𑁂𑀭𑀯𑀢𑁆𑀣𑀼𑀆𑀤𑀻𑀦𑀺 𑀤𑀻𑀧𑁂𑀢𑀩𑁆𑀩𑀸𑀦𑀺.

𑀲𑀳𑀥𑀫𑁆𑀫𑀺𑀓𑁂𑀲𑀽𑀢𑀺 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀲𑀳𑀥𑀫𑁆𑀫𑀺𑀓𑁂𑀲𑀼 𑀧𑀺𑀬𑀫𑀦𑀸𑀧𑀢𑀸𑀧𑀺 𑀲𑀫𑁆𑀫𑀕𑁆𑀕𑀢𑀸 𑀳𑁄𑀢𑀺, 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀆𑀯𑀳𑀢𑀺. 𑀅𑀬𑀫𑀢𑁆𑀣𑁄 𑀯𑀺𑀫𑀸𑀦𑀧𑁂𑀢𑀯𑀢𑁆𑀣𑀽𑀳𑀺 𑀤𑀻𑀧𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀔𑀻𑀭𑁄𑀤𑀦𑀫𑀳𑀫𑀤𑀸𑀲𑀺𑀁, 𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲…𑀧𑁂…

𑀨𑀸𑀡𑀺𑀢𑀁…𑀧𑁂… 𑀉𑀘𑁆𑀙𑀼𑀔𑀡𑁆𑀟𑀺𑀓𑀁… 𑀢𑀺𑀫𑁆𑀩𑀭𑀼𑀲𑀓𑀁… 𑀓𑀓𑁆𑀓𑀸𑀭𑀺𑀓𑀁…

𑀏𑀴𑀸𑀮𑀼𑀓𑀁… 𑀯𑀮𑁆𑀮𑀺𑀧𑀓𑁆𑀓𑀁… 𑀨𑀸𑀭𑀼𑀲𑀓𑀁… 𑀳𑀢𑁆𑀣𑀧𑀢𑀸𑀓𑀁…

𑀲𑀸𑀓𑀫𑀼𑀝𑁆𑀞𑀺𑀁 … 𑀧𑀼𑀧𑁆𑀨𑀓𑀫𑀼𑀝𑁆𑀞𑀺𑀁… 𑀫𑀽𑀮𑀓𑀁… 𑀦𑀺𑀫𑁆𑀩𑀫𑀼𑀝𑁆𑀞𑀺𑀁…

𑀅𑀫𑁆𑀩𑀺𑀓𑀜𑁆𑀚𑀺𑀓𑀁… 𑀤𑁄𑀡𑀺𑀦𑀺𑀫𑁆𑀫𑀚𑁆𑀚𑀦𑀺𑀁… 𑀓𑀸𑀬𑀩𑀦𑁆𑀥𑀦𑀁…

𑀅𑀁𑀲𑀩𑀤𑁆𑀥𑀓𑀁… 𑀆𑀬𑁄𑀕𑀧𑀝𑁆𑀝𑀁… 𑀯𑀺𑀥𑀽𑀧𑀦𑀁… 𑀢𑀸𑀮𑀯𑀡𑁆𑀝𑀁…

𑀫𑁄𑀭𑀳𑀢𑁆𑀣𑀁… 𑀙𑀢𑁆𑀢𑀁… 𑀉𑀧𑀸𑀳𑀦𑀁… 𑀧𑀽𑀯𑀁 𑀫𑁄𑀤𑀓𑀁…

𑀲𑀓𑁆𑀔𑀮𑀺𑀓𑀁 𑀅𑀳𑀫𑀤𑀸𑀲𑀺𑀁, 𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲…𑀧𑁂…

𑀢𑀲𑁆𑀲𑀸 𑀫𑁂 𑀧𑀲𑁆𑀲 𑀯𑀺𑀫𑀸𑀦𑀁, 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀻𑀳𑀫𑀲𑁆𑀫𑀻’’𑀢𑀺 (𑀯𑀺. 𑀯. 𑁪𑁦𑁬).

𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁.

𑁧𑁪𑁫. 𑀇𑀤𑀸𑀦𑀺 𑀬𑁂𑀲𑀁 𑀉𑀧𑀸𑀤𑀸𑀦𑀸𑀦𑀁 𑀢𑀺𑀢𑁆𑀣𑀺𑀬𑀸 𑀦 𑀲𑀫𑁆𑀫𑀸 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑀣𑀸𑀕𑀢𑁄 𑀧𑀜𑁆𑀜𑀧𑁂𑀢𑀺, 𑀢𑁂𑀲𑀁 𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑀼𑀁 𑀇𑀫𑁂 𑀘, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀁𑀦𑀺𑀤𑀸𑀦𑀸𑀢𑀺𑀆𑀤𑀻𑀲𑀼 𑀦𑀺𑀤𑀸𑀦𑀸𑀤𑀻𑀦𑀺 𑀲𑀩𑁆𑀩𑀸𑀦𑁂𑀯 𑀓𑀸𑀭𑀡𑀯𑁂𑀯𑀘𑀦𑀸𑀦𑀺. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀨𑀮𑀁 𑀦𑀺𑀤𑁂𑀢𑀺 𑀳𑀦𑁆𑀤, 𑀦𑀁 𑀕𑀡𑁆𑀳𑀣𑀸𑀢𑀺 𑀅𑀧𑁆𑀧𑁂𑀢𑀺 𑀯𑀺𑀬, 𑀢𑀲𑁆𑀫𑀸 𑀦𑀺𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀢𑀁 𑀢𑀢𑁄 𑀚𑀸𑀬𑀢𑀺 𑀲𑀫𑀼𑀤𑁂𑀢𑀺 𑀧𑀪𑀯𑀢𑀺, 𑀢𑀲𑁆𑀫𑀸 𑀲𑀫𑀼𑀤𑀬𑁄, 𑀚𑀸𑀢𑀺, 𑀧𑀪𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀧𑀤𑀢𑁆𑀣𑁄 𑁋 𑀓𑀺𑀁 𑀦𑀺𑀤𑀸𑀦𑀁 𑀏𑀢𑁂𑀲𑀦𑁆𑀢𑀺 𑀓𑀺𑀁𑀦𑀺𑀤𑀸𑀦𑀸. 𑀓𑁄 𑀲𑀫𑀼𑀤𑀬𑁄 𑀏𑀢𑁂𑀲𑀦𑁆𑀢𑀺 𑀓𑀺𑀁𑀲𑀫𑀼𑀤𑀬𑀸. 𑀓𑀸 𑀚𑀸𑀢𑀺 𑀏𑀢𑁂𑀲𑀦𑁆𑀢𑀺 𑀓𑀺𑀁𑀚𑀸𑀢𑀺𑀓𑀸. 𑀓𑁄 𑀧𑀪𑀯𑁄 𑀏𑀢𑁂𑀲𑀦𑁆𑀢𑀺 𑀓𑀺𑀁𑀧𑀪𑀯𑀸. 𑀬𑀲𑁆𑀫𑀸 𑀧𑀦 𑀢𑁂𑀲𑀁 𑀢𑀡𑁆𑀳𑀸 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀦𑀺𑀤𑀸𑀦𑀜𑁆𑀘𑁂𑀯 𑀲𑀫𑀼𑀤𑀬𑁄 𑀘 𑀚𑀸𑀢𑀺 𑀘 𑀧𑀪𑀯𑁄 𑀘, 𑀢𑀲𑁆𑀫𑀸 ‘‘𑀢𑀡𑁆𑀳𑀸𑀦𑀺𑀤𑀸𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀪𑀕𑀯𑀸 𑀦 𑀓𑁂𑀯𑀮𑀁 𑀉𑀧𑀸𑀤𑀸𑀦𑀲𑁆𑀲𑁂𑀯 𑀧𑀘𑁆𑀘𑀬𑀁 𑀚𑀸𑀦𑀸𑀢𑀺, 𑀉𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀸𑀬 𑀢𑀡𑁆𑀳𑀸𑀬𑀧𑀺, 𑀢𑀡𑁆𑀳𑀸𑀤𑀺𑀧𑀘𑁆𑀘𑀬𑀸𑀦𑀁 𑀯𑁂𑀤𑀦𑀸𑀤𑀻𑀦𑀫𑁆𑀧𑀺 𑀧𑀘𑁆𑀘𑀬𑀁 𑀚𑀸𑀦𑀸𑀢𑀺𑀬𑁂𑀯, 𑀢𑀲𑁆𑀫𑀸 𑀢𑀡𑁆𑀳𑀸 𑀘𑀸𑀬𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳.

𑀬𑀢𑁄 𑀘 𑀔𑁄𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀅𑀯𑀺𑀚𑁆𑀚𑀸 𑀧𑀳𑀻𑀦𑀸 𑀳𑁄𑀢𑀻𑀢𑀺 𑀯𑀝𑁆𑀝𑀫𑀽𑀮𑀺𑀓𑀸 𑀅𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀧𑀳𑀻𑀦𑀸 𑀳𑁄𑀢𑀺. 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸. 𑀲𑁄 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸𑀢𑀺. 𑀲𑁄 𑀪𑀺𑀓𑁆𑀔𑀼 𑀅𑀯𑀺𑀚𑁆𑀚𑀸𑀬 𑀘 𑀧𑀳𑀻𑀦𑀢𑁆𑀢𑀸 𑀯𑀺𑀚𑁆𑀚𑀸𑀬 𑀘 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀦𑁂𑀯 𑀓𑀸𑀫𑀼𑀧𑀸𑀤𑀸𑀦𑀁 𑀉𑀧𑀸𑀤𑀺𑀬𑀢𑀻𑀢𑀺 𑀦𑁂𑀯 𑀓𑀸𑀫𑀼𑀧𑀸𑀤𑀸𑀦𑀁 𑀕𑀡𑁆𑀳𑀸𑀢𑀺 𑀦 𑀉𑀧𑁂𑀢𑀺, 𑀦 𑀲𑁂𑀲𑀸𑀦𑀺 𑀉𑀧𑀸𑀤𑀸𑀦𑀸𑀦𑀺. 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀏𑀯𑀁 𑀓𑀺𑀜𑁆𑀘𑀺 𑀉𑀧𑀸𑀤𑀸𑀦𑀁 𑀅𑀕𑁆𑀕𑀡𑁆𑀳𑀦𑁆𑀢𑁄 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀸𑀬 𑀦 𑀧𑀭𑀺𑀢𑀲𑁆𑀲𑀢𑀺. 𑀅𑀧𑀭𑀺𑀢𑀲𑁆𑀲𑀦𑁆𑀢𑀺 𑀅𑀧𑀭𑀺𑀢𑀲𑁆𑀲𑀦𑁆𑀢𑁄 𑀢𑀡𑁆𑀳𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄. 𑀧𑀘𑁆𑀘𑀢𑁆𑀢𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀲𑀬𑀫𑁂𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀏𑀯𑀫𑀲𑁆𑀲 𑀆𑀲𑀯𑀓𑁆𑀔𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀘𑁆𑀘𑀯𑁂𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑀯𑁂𑀲𑀸𑀮𑀺𑀦𑀕𑀭𑀯𑀡𑁆𑀡𑀦𑀸

𑁧𑁪𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀁. 𑀢𑀢𑁆𑀣 𑀯𑁂𑀲𑀸𑀮𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀁 𑀓𑀺𑀭 𑀅𑀧𑀭𑀸𑀧𑀭𑀁 𑀯𑀺𑀲𑀸𑀮𑀻𑀪𑀽𑀢𑀢𑀸𑀬 ‘‘𑀯𑁂𑀲𑀸𑀮𑀻’’𑀢𑀺 𑀲𑀗𑁆𑀔𑀁 𑀕𑀢𑀁. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀓𑀣𑀸 𑁋 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀓𑀺𑀭 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀕𑀩𑁆𑀪𑁄 𑀲𑀡𑁆𑀞𑀸𑀲𑀺. 𑀲𑀸 𑀜𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀤𑁂𑀲𑀺. 𑀭𑀸𑀚𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀸𑀲𑀺. 𑀲𑀸 𑀲𑀫𑁆𑀫𑀸 𑀧𑀭𑀺𑀳𑀭𑀻𑀬𑀫𑀸𑀦𑀸 𑀕𑀩𑁆𑀪𑀧𑀭𑀺𑀧𑀸𑀓𑀓𑀸𑀮𑁂 𑀯𑀺𑀚𑀸𑀬𑀦𑀖𑀭𑀁 𑀧𑀸𑀯𑀺𑀲𑀺. 𑀧𑀼𑀜𑁆𑀜𑀯𑀦𑁆𑀢𑀻𑀦𑀁 𑀧𑀘𑁆𑀘𑀽𑀲𑀲𑀫𑀬𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀲𑀸 𑀘 𑀢𑀸𑀲𑀁 𑀅𑀜𑁆𑀜𑀢𑀭𑀸, 𑀢𑁂𑀦 𑀧𑀘𑁆𑀘𑀽𑀲𑀲𑀫𑀬𑁂 𑀅𑀮𑀢𑁆𑀢𑀓𑀧𑀝𑀮𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀲𑀤𑀺𑀲𑀁 𑀫𑀁𑀲𑀧𑁂𑀲𑀺𑀁 𑀯𑀺𑀚𑀸𑀬𑀺. 𑀢𑀢𑁄 ‘‘𑀅𑀜𑁆𑀜𑀸 𑀤𑁂𑀯𑀺𑀬𑁄 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀦𑁆𑀢𑀺, 𑀅𑀕𑁆𑀕𑀫𑀳𑁂𑀲𑀻 𑀫𑀁𑀲𑀧𑁂𑀲𑀺𑀦𑁆𑀢𑀺 𑀭𑀜𑁆𑀜𑁄 𑀧𑀼𑀭𑀢𑁄 𑀫𑀫 𑀅𑀯𑀡𑁆𑀡𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦 𑀅𑀯𑀡𑁆𑀡𑀪𑀬𑁂𑀦 𑀢𑀁 𑀫𑀁𑀲𑀧𑁂𑀲𑀺𑀁 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑁂𑀢𑁆𑀯𑀸 𑀕𑀗𑁆𑀕𑀸𑀬 𑀲𑁄𑀢𑁂 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀫𑀦𑀼𑀲𑁆𑀲𑁂𑀳𑀺 𑀙𑀟𑁆𑀟𑀺𑀢𑀫𑀢𑁆𑀢𑁂 𑀤𑁂𑀯𑀢𑀸 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀁𑀲𑀼. 𑀲𑀼𑀯𑀡𑁆𑀡𑀧𑀝𑁆𑀝𑀓𑀜𑁆𑀘𑁂𑀢𑁆𑀣 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 ‘‘𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀧𑀚𑀸’’𑀢𑀺 𑀮𑀺𑀔𑀺𑀢𑁆𑀯𑀸 𑀩𑀦𑁆𑀥𑀺𑀁𑀲𑀼. 𑀢𑀢𑁄 𑀢𑀁 𑀪𑀸𑀚𑀦𑀁 𑀊𑀫𑀺𑀪𑀬𑀸𑀤𑀻𑀳𑀺 𑀅𑀦𑀼𑀧𑀤𑁆𑀤𑀼𑀢𑀁 𑀕𑀗𑁆𑀕𑀸𑀲𑁄𑀢𑁂𑀦 𑀧𑀸𑀬𑀸𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀢𑀸𑀧𑀲𑁄 𑀕𑁄𑀧𑀸𑀮𑀓𑀓𑀼𑀮𑀁 𑀦𑀺𑀲𑁆𑀲𑀸𑀬 𑀕𑀗𑁆𑀕𑀸𑀢𑀻𑀭𑁂 𑀯𑀺𑀳𑀭𑀢𑀺. 𑀲𑁄 𑀧𑀸𑀢𑁄𑀯 𑀕𑀗𑁆𑀕𑀁 𑀑𑀢𑀺𑀡𑁆𑀡𑁄 𑀢𑀁 𑀪𑀸𑀚𑀦𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀁𑀲𑀼𑀓𑀽𑀮𑀲𑀜𑁆𑀜𑀸𑀬 𑀅𑀕𑁆𑀕𑀳𑁂𑀲𑀺. 𑀅𑀣𑁂𑀢𑁆𑀣 𑀢𑀁 𑀅𑀓𑁆𑀔𑀭𑀧𑀝𑁆𑀝𑀺𑀓𑀁 𑀭𑀸𑀚𑀫𑀼𑀤𑁆𑀤𑀺𑀓𑀸𑀮𑀜𑁆𑀙𑀦𑀁 𑀘 𑀤𑀺𑀲𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀢𑀁 𑀫𑀁𑀲𑀧𑁂𑀲𑀺𑀁 𑀅𑀤𑁆𑀤𑀲, 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀲𑀺𑀬𑀸 𑀕𑀩𑁆𑀪𑁄, 𑀢𑀣𑀸 𑀳𑀺𑀲𑁆𑀲 𑀤𑀼𑀕𑁆𑀕𑀦𑁆𑀥𑀧𑀽𑀢𑀺𑀓𑀪𑀸𑀯𑁄 𑀦𑀢𑁆𑀣𑀻’’𑀢𑀺. 𑀅𑀲𑁆𑀲𑀫𑀁 𑀦𑁂𑀢𑁆𑀯𑀸 𑀲𑀼𑀤𑁆𑀥𑁂 𑀑𑀓𑀸𑀲𑁂 𑀞𑀧𑁂𑀲𑀺. 𑀅𑀣 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀤𑁆𑀯𑁂 𑀫𑀁𑀲𑀧𑁂𑀲𑀺𑀬𑁄 𑀅𑀳𑁂𑀲𑀼𑀁. 𑀢𑀸𑀧𑀲𑁄 𑀤𑀺𑀲𑁆𑀯𑀸 𑀲𑀸𑀥𑀼𑀢𑀭𑀁 𑀞𑀧𑁂𑀲𑀺. 𑀢𑀢𑁄 𑀧𑀼𑀦 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀏𑀓𑀫𑁂𑀓𑀺𑀲𑁆𑀲𑀸 𑀫𑀁𑀲𑀧𑁂𑀲𑀺𑀬𑀸 𑀳𑀢𑁆𑀣𑀧𑀸𑀤𑀲𑀻𑀲𑀸𑀦𑀫𑀢𑁆𑀣𑀸𑀬 𑀧𑀜𑁆𑀘 𑀧𑀜𑁆𑀘 𑀧𑀺𑀴𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀅𑀣 𑀢𑀢𑁄 𑀅𑀟𑁆𑀠𑀫𑀸𑀲𑀘𑁆𑀘𑀬𑁂𑀦 𑀏𑀓𑀸 𑀫𑀁𑀲𑀧𑁂𑀲𑀺 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁄 𑀤𑀸𑀭𑀓𑁄, 𑀏𑀓𑀸 𑀤𑀸𑀭𑀺𑀓𑀸 𑀅𑀳𑁄𑀲𑀺.

𑀢𑁂𑀲𑀼 𑀢𑀸𑀧𑀲𑀲𑁆𑀲 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺, 𑀅𑀗𑁆𑀕𑀼𑀝𑁆𑀞𑀓𑀢𑁄 𑀘𑀲𑁆𑀲 𑀔𑀻𑀭𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁄 𑀧𑀪𑀼𑀢𑀺 𑀘 𑀔𑀻𑀭𑀪𑀢𑁆𑀢𑀁 𑀅𑀮𑀪𑀺𑀢𑁆𑀣, 𑀲𑁄 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀔𑀻𑀭𑀁 𑀤𑀸𑀭𑀓𑀸𑀦𑀁 𑀫𑀼𑀔𑁂 𑀆𑀲𑀺𑀜𑁆𑀘𑀢𑀺. 𑀢𑁂𑀲𑀁 𑀉𑀤𑀭𑀁 𑀬𑀁 𑀬𑀁 𑀧𑀯𑀺𑀲𑀢𑀺, 𑀢𑀁 𑀢𑀁 𑀲𑀩𑁆𑀩𑀁 𑀫𑀡𑀺𑀪𑀸𑀚𑀦𑀕𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀏𑀯𑀁 𑀦𑀺𑀘𑁆𑀙𑀯𑀻 𑀅𑀳𑁂𑀲𑀼𑀁. 𑀅𑀧𑀭𑁂 𑀆𑀳𑀼 ‘‘𑀲𑀺𑀩𑁆𑀩𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀦𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀮𑀻𑀦𑀸 𑀙𑀯𑀺 𑀅𑀳𑁄𑀲𑀻’’𑀢𑀺. 𑀏𑀯𑀁 𑀢𑁂 𑀦𑀺𑀘𑁆𑀙𑀯𑀺𑀢𑀸𑀬 𑀯𑀸 𑀮𑀻𑀦𑀘𑁆𑀙𑀯𑀺𑀢𑀸𑀬 𑀯𑀸 𑀮𑀺𑀘𑁆𑀙𑀯𑀻𑀢𑀺 𑀧𑀜𑁆𑀜𑀸𑀬𑀺𑀁𑀲𑀼.

𑀢𑀸𑀧𑀲𑁄 𑀤𑀸𑀭𑀓𑁂 𑀧𑁄𑀲𑁂𑀦𑁆𑀢𑁄 𑀉𑀲𑁆𑀲𑀽𑀭𑁂 𑀕𑀸𑀫𑀁 𑀲𑀺𑀓𑁆𑀔𑀸𑀬 𑀧𑀯𑀺𑀲𑀢𑀺, 𑀅𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀢𑀺. 𑀢𑀲𑁆𑀲 𑀢𑀁 𑀩𑁆𑀬𑀸𑀧𑀸𑀭𑀁 𑀜𑀢𑁆𑀯𑀸 𑀕𑁄𑀧𑀸𑀮𑀓𑀸 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑀸𑀦𑀁 𑀤𑀸𑀭𑀓𑀧𑁄𑀲𑀦𑀁 𑀧𑀮𑀺𑀩𑁄𑀥𑁄, 𑀅𑀫𑁆𑀳𑀸𑀓𑀁 𑀤𑀸𑀭𑀓𑁂 𑀤𑁂𑀣, 𑀫𑀬𑀁 𑀧𑁄𑀲𑁂𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺. 𑀢𑀸𑀧𑀲𑁄 𑀲𑀸𑀥𑀽𑀢𑀺 𑀧𑀝𑀺𑀲𑁆𑀲𑀼𑀡𑀺. 𑀕𑁄𑀧𑀸𑀮𑀓𑀸 𑀤𑀼𑀢𑀺𑀬𑀤𑀺𑀯𑀲𑁂 𑀫𑀕𑁆𑀕𑀁 𑀲𑀫𑀁 𑀓𑀢𑁆𑀯𑀸 𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀺𑀢𑁆𑀯𑀸 𑀥𑀚𑀧𑀝𑀸𑀓𑀸 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀽𑀭𑀺𑀬𑁂𑀳𑀺 𑀯𑀚𑁆𑀚𑀫𑀸𑀦𑁂𑀳𑀺 𑀅𑀲𑁆𑀲𑀫𑀁 𑀆𑀕𑀢𑀸. 𑀢𑀸𑀧𑀲𑁄 𑁋 ‘‘𑀫𑀳𑀸𑀧𑀼𑀜𑁆𑀜𑀸 𑀤𑀸𑀭𑀓𑀸 𑀅𑀧𑁆𑀧𑀫𑀸𑀤𑁂𑀦 𑀯𑀟𑁆𑀠𑁂𑀣, 𑀯𑀟𑁆𑀠𑁂𑀢𑁆𑀯𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀆𑀯𑀸𑀳𑀯𑀺𑀯𑀸𑀳𑀁 𑀓𑀭𑁄𑀣, 𑀧𑀜𑁆𑀘𑀕𑁄𑀭𑀲𑁂𑀦 𑀭𑀸𑀚𑀸𑀦𑀁 𑀢𑁄𑀲𑁂𑀢𑁆𑀯𑀸 𑀪𑀽𑀫𑀺𑀪𑀸𑀕𑀁 𑀕𑀳𑁂𑀢𑁆𑀯𑀸 𑀦𑀕𑀭𑀁 𑀫𑀸𑀧𑁂𑀣, 𑀢𑀢𑁆𑀣 𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀣𑀸’’𑀢𑀺 𑀯𑀢𑁆𑀯𑀸 𑀤𑀸𑀭𑀓𑁂 𑀅𑀤𑀸𑀲𑀺. 𑀢𑁂 𑀲𑀸𑀥𑀽𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀤𑀸𑀭𑀓𑁂 𑀦𑁂𑀢𑁆𑀯𑀸 𑀧𑁄𑀲𑁂𑀲𑀼𑀁.

𑀤𑀸𑀭𑀓𑀸 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀓𑀻𑀴𑀦𑁆𑀢𑀸 𑀯𑀺𑀯𑀸𑀤𑀝𑁆𑀞𑀸𑀦𑁂𑀲𑀼 𑀅𑀜𑁆𑀜𑁂 𑀕𑁄𑀧𑀸𑀮𑀓𑀤𑀸𑀭𑀓𑁂 𑀳𑀢𑁆𑀣𑁂𑀦𑀧𑀺 𑀧𑀸𑀤𑁂𑀦𑀧𑀺 𑀧𑀳𑀭𑀦𑁆𑀢𑀺. 𑀢𑁂 𑀭𑁄𑀤𑀦𑁆𑀢𑀺. ‘‘𑀓𑀺𑀲𑁆𑀲 𑀭𑁄𑀤𑀣𑀸’’𑀢𑀺 𑀘 𑀫𑀸𑀢𑀸𑀧𑀺𑀢𑀽𑀳𑀺 𑀯𑀼𑀢𑁆𑀢𑀸 ‘‘𑀇𑀫𑁂 𑀦𑀺𑀫𑁆𑀫𑀸𑀢𑀸𑀧𑀺𑀢𑀺𑀓𑀸 𑀢𑀸𑀧𑀲𑀧𑁄𑀲𑀺𑀢𑀸 𑀅𑀫𑁆𑀳𑁂 𑀅𑀢𑀺𑀧𑀳𑀭𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀢𑁄 𑀢𑁂𑀲𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀇𑀫𑁂 𑀤𑀸𑀭𑀓𑀸 𑀅𑀜𑁆𑀜𑁂 𑀤𑀸𑀭𑀓𑁂 𑀯𑀺𑀦𑀸𑀲𑁂𑀦𑁆𑀢𑀺 𑀤𑀼𑀓𑁆𑀔𑀸𑀧𑁂𑀦𑁆𑀢𑀺, 𑀦 𑀇𑀫𑁂 𑀲𑀗𑁆𑀕𑀳𑁂𑀢𑀩𑁆𑀩𑀸, 𑀯𑀚𑁆𑀚𑁂𑀢𑀩𑁆𑀩𑀸 𑀇𑀫𑁂’’𑀢𑀺 𑀆𑀳𑀁𑀲𑀼. 𑀢𑀢𑁄 𑀧𑀪𑀼𑀢𑀺 𑀓𑀺𑀭 𑀲𑁄 𑀧𑀤𑁂𑀲𑁄 𑀯𑀚𑁆𑀚𑀻𑀢𑀺 𑀯𑀼𑀘𑁆𑀘𑀢𑀺 𑀬𑁄𑀚𑀦𑀲𑀢𑀺𑀓𑁄 𑀧𑀭𑀺𑀫𑀸𑀡𑁂𑀦. 𑀅𑀣 𑀢𑀁 𑀧𑀤𑁂𑀲𑀁 𑀕𑁄𑀧𑀸𑀮𑀓𑀸 𑀭𑀸𑀚𑀸𑀦𑀁 𑀢𑁄𑀲𑁂𑀢𑁆𑀯𑀸 𑀅𑀕𑁆𑀕𑀳𑁂𑀲𑀼𑀁. 𑀢𑀢𑁆𑀣 𑀘 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀁 𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀸𑀚𑀸𑀦𑀁 𑀅𑀓𑀁𑀲𑀼. 𑀢𑀸𑀬 𑀘𑀲𑁆𑀲 𑀤𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀯𑀺𑀯𑀸𑀳𑀁 𑀓𑀢𑁆𑀯𑀸 𑀓𑀢𑀺𑀓𑀁 𑀅𑀓𑀁𑀲𑀼 ‘‘𑀩𑀸𑀳𑀺𑀭𑀓𑀤𑀸𑀭𑀺𑀓𑀸 𑀦 𑀆𑀦𑁂𑀢𑀩𑁆𑀩𑀸, 𑀇𑀢𑁄 𑀤𑀸𑀭𑀺𑀓𑀸 𑀦 𑀓𑀲𑁆𑀲𑀘𑀺 𑀤𑀸𑀢𑀩𑁆𑀩𑀸’’𑀢𑀺. 𑀢𑁂𑀲𑀁 𑀧𑀞𑀫𑀲𑀁𑀯𑀸𑀲𑁂𑀦 𑀤𑁆𑀯𑁂 𑀤𑀸𑀭𑀓𑀸 𑀚𑀸𑀢𑀸 𑀥𑀻𑀢𑀸 𑀘 𑀧𑀼𑀢𑁆𑀢𑁄 𑀘. 𑀏𑀯𑀁 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀤𑁆𑀯𑁂 𑀤𑁆𑀯𑁂 𑀚𑀸𑀢𑀸. 𑀢𑀢𑁄 𑀢𑁂𑀲𑀁 𑀤𑀸𑀭𑀓𑀸𑀦𑀁 𑀬𑀣𑀸𑀓𑁆𑀓𑀫𑀁 𑀯𑀟𑁆𑀠𑀦𑁆𑀢𑀸𑀦𑀁 𑀆𑀭𑀸𑀫𑀼𑀬𑁆𑀬𑀸𑀦𑀦𑀺𑀯𑀸𑀲𑀝𑁆𑀞𑀸𑀦𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀕𑀳𑁂𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀸 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀕𑀸𑀯𑀼𑀢𑀦𑁆𑀢𑀭𑁂𑀦 𑀕𑀸𑀯𑀼𑀢𑀦𑁆𑀢𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀻𑀓𑀢𑀢𑁆𑀢𑀸 𑀯𑁂𑀲𑀸𑀮𑀻𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑁂𑀲𑀸𑀮𑀺𑀬𑀦𑁆𑀢𑀺 𑀏𑀯𑀁 𑀦𑀸𑀫𑀓𑁂 𑀦𑀕𑀭𑁂’’𑀢𑀺.

𑁦𑁧. 𑀩𑀳𑀺𑀦𑀕𑀭𑁂𑀢𑀺 𑀦𑀕𑀭𑀲𑁆𑀲 𑀩𑀳𑀺, 𑀦 𑀅𑀫𑁆𑀩𑀧𑀸𑀮𑀺𑀯𑀦𑀁 𑀯𑀺𑀬 𑀅𑀦𑁆𑀢𑁄𑀦𑀕𑀭𑀲𑁆𑀫𑀺𑀁. 𑀅𑀬𑀁 𑀧𑀦 𑀚𑀻𑀯𑀓𑀫𑁆𑀩𑀯𑀦𑀁 𑀯𑀺𑀬 𑀦𑀕𑀭𑀲𑁆𑀲 𑀩𑀳𑀺𑀤𑁆𑀥𑀸 𑀯𑀦𑀲𑀡𑁆𑀟𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑀳𑀺𑀦𑀕𑀭𑁂’’𑀢𑀺. 𑀅𑀧𑀭𑀧𑀼𑀭𑁂𑀢𑀺 𑀧𑀼𑀭𑀲𑁆𑀲 𑀅𑀧𑀭𑁂, 𑀧𑀘𑁆𑀙𑀺𑀫𑀤𑀺𑀲𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀯𑀦𑀲𑀡𑁆𑀟𑁂𑀢𑀺 𑀲𑁄 𑀓𑀺𑀭 𑀯𑀦𑀲𑀡𑁆𑀟𑁄 𑀦𑀕𑀭𑀲𑁆𑀲 𑀧𑀘𑁆𑀙𑀺𑀫𑀤𑀺𑀲𑀸𑀬𑀁 𑀕𑀸𑀯𑀼𑀢𑀫𑀢𑁆𑀢𑁂 𑀞𑀸𑀦𑁂. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀁 𑀓𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀘𑀗𑁆𑀓𑀫𑀮𑁂𑀡𑀓𑀼𑀝𑀺𑀫𑀡𑁆𑀟𑀧𑀸𑀤𑀻𑀦𑀺 𑀧𑀢𑀺𑀝𑁆𑀞𑀧𑁂𑀲𑀼𑀁, 𑀪𑀕𑀯𑀸 𑀢𑀢𑁆𑀣 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑀭𑀧𑀼𑀭𑁂 𑀯𑀦𑀲𑀡𑁆𑀟𑁂’’𑀢𑀺. 𑀲𑀼𑀦𑀓𑁆𑀔𑀢𑁆𑀢𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀮𑀺𑀘𑁆𑀙𑀯𑀻𑀦𑀁 𑀧𑀦 𑀧𑀼𑀢𑁆𑀢𑀢𑁆𑀢𑀸 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑁄. 𑀅𑀘𑀺𑀭𑀧𑀓𑁆𑀓𑀦𑁆𑀢𑁄𑀢𑀺 𑀯𑀺𑀩𑁆𑀪𑀫𑀺𑀢𑁆𑀯𑀸 𑀕𑀺𑀳𑀺𑀪𑀸𑀯𑀽𑀧𑀕𑀫𑀦𑁂𑀦 𑀅𑀥𑀼𑀦𑀸𑀧𑀓𑁆𑀓𑀦𑁆𑀢𑁄. 𑀧𑀭𑀺𑀲𑀢𑀻𑀢𑀺 𑀧𑀭𑀺𑀲𑀫𑀚𑁆𑀛𑁂. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀏𑀢𑁆𑀣 𑀫𑀦𑀼𑀲𑁆𑀲𑀥𑀫𑁆𑀫𑀸 𑀦𑀸𑀫 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀸. 𑀢𑁂 𑀧𑀝𑀺𑀲𑁂𑀥𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀓𑀲𑁆𑀫𑀸? 𑀉𑀧𑀸𑀭𑀫𑁆𑀪𑀪𑀬𑀸. 𑀯𑁂𑀲𑀸𑀮𑀺𑀬𑀜𑁆𑀳𑀺 𑀩𑀳𑀽 𑀫𑀦𑀼𑀲𑁆𑀲𑀸 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑀸 𑀩𑀼𑀤𑁆𑀥𑀫𑀸𑀫𑀓𑀸 𑀥𑀫𑁆𑀫𑀫𑀸𑀫𑀓𑀸 𑀲𑀗𑁆𑀖𑀫𑀸𑀫𑀓𑀸. 𑀢𑁂 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲𑀸𑀢𑀺 𑀯𑀼𑀢𑁆𑀢𑁂 𑀢𑁆𑀯𑀁 𑀓𑀢𑁆𑀣 𑀪𑀕𑀯𑀦𑁆𑀢𑀁 𑀧𑀸𑀡𑀁 𑀳𑀦𑀦𑁆𑀢𑀁 𑀅𑀤𑁆𑀤𑀲, 𑀓𑀢𑁆𑀣 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀺? 𑀓𑀺𑀁 𑀤𑀦𑁆𑀢𑀸 𑀫𑁂 𑀅𑀢𑁆𑀣𑀻𑀢𑀺 𑀧𑀸𑀲𑀸𑀡𑀲𑀓𑁆𑀔𑀭𑀸 𑀔𑀸𑀤𑀲𑀺, 𑀅𑀳𑀺𑀦𑀗𑁆𑀕𑀼𑀝𑁆𑀞𑁂 𑀕𑀡𑁆𑀳𑀺𑀢𑀼𑀁 𑀯𑀸𑀬𑀫𑀲𑀺, 𑀓𑀓𑀘𑀤𑀦𑁆𑀢𑁂𑀲𑀼 𑀧𑀼𑀧𑁆𑀨𑀸𑀯𑀴𑀺𑀓𑀁 𑀓𑀻𑀴𑀺𑀢𑀼𑀁 𑀇𑀘𑁆𑀙𑀲𑀺? 𑀫𑀼𑀔𑀢𑁄 𑀢𑁂 𑀤𑀦𑁆𑀢𑁂 𑀧𑀸𑀢𑁂𑀲𑁆𑀲𑀸𑀫𑀸𑀢𑀺 𑀯𑀤𑁂𑀬𑁆𑀬𑀼𑀁. 𑀲𑁄 𑀢𑁂𑀲𑀁 𑀉𑀧𑀸𑀭𑀫𑁆𑀪𑀪𑀬𑀸 𑀏𑀯𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀯𑁂𑀲𑀸𑀮𑀺𑀦𑀕𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀤𑀺𑀯𑀡𑁆𑀡𑀦𑀸

𑀢𑀢𑁄 𑀉𑀢𑁆𑀢𑀭𑀺𑀁 𑀧𑀦 𑀯𑀺𑀲𑁂𑀲𑀸𑀥𑀺𑀕𑀫𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄𑀢𑀺 𑀆𑀳.

𑀢𑀢𑁆𑀣 𑀅𑀮𑀫𑀭𑀺𑀬𑀁 𑀜𑀸𑀢𑀼𑀦𑁆𑀢𑀺 𑀅𑀮𑀫𑀭𑀺𑀬𑁄, 𑀅𑀭𑀺𑀬𑀪𑀸𑀯𑀸𑀬 𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀜𑀸𑀡𑀤𑀲𑁆𑀲𑀦𑀫𑁂𑀯 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄. 𑀅𑀮𑀫𑀭𑀺𑀬𑁄 𑀘 𑀲𑁄 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀘𑀸𑀢𑀺 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄. 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀺 𑀯𑀺𑀧𑀲𑁆𑀲𑀦𑀸𑀧𑀺 𑀫𑀕𑁆𑀕𑁄𑀧𑀺 𑀨𑀮𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀯𑀼𑀘𑁆𑀘𑀢𑀺. ‘‘𑀅𑀧𑁆𑀧𑀫𑀢𑁆𑀢𑁄 𑀲𑀫𑀸𑀦𑁄 𑀜𑀸𑀡𑀤𑀲𑁆𑀲𑀦𑀁 𑀆𑀭𑀸𑀥𑁂𑀢𑀻’’𑀢𑀺 (𑀫. 𑀦𑀺. 𑁧.𑁩𑁧𑁧) 𑀳𑀺 𑀏𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼 𑀜𑀸𑀡𑀤𑀲𑁆𑀲𑀦𑀁 𑀦𑀸𑀫. ‘‘𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁩𑁫) 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. ‘‘𑀅𑀪𑀩𑁆𑀩𑀸 𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬𑀸’’𑀢𑀺 (𑀅. 𑀦𑀺. 𑁪.𑁧𑁯𑁬) 𑀏𑀢𑁆𑀣 𑀫𑀕𑁆𑀕𑁄. ‘‘𑀅𑀬𑀫𑀜𑁆𑀜𑁄 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼 𑀯𑀺𑀳𑀸𑀭𑁄’’𑀢𑀺 (𑀫. 𑀦𑀺. 𑁧.𑁩𑁨𑁮) 𑀏𑀢𑁆𑀣 𑀨𑀮𑀁. ‘‘𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺, 𑀅𑀓𑀼𑀧𑁆𑀧𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 (𑀫𑀳𑀸𑀯. 𑁧𑁬) 𑀏𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. ‘‘𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺 𑀲𑀢𑁆𑀢𑀸𑀳𑀓𑀸𑀮𑀗𑁆𑀓𑀢𑁄 𑀆𑀴𑀸𑀭𑁄 𑀓𑀸𑀴𑀸𑀫𑁄’’𑀢𑀺 (𑀫. 𑀦𑀺. 𑁨.𑁩𑁪𑁦) 𑀏𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀇𑀥 𑀧𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀜𑁆𑀳𑀺 𑀲𑁄 𑀪𑀕𑀯𑀢𑁄 𑀧𑀝𑀺𑀲𑁂𑀥𑁂𑀢𑀺.

𑀢𑀓𑁆𑀓𑀧𑀭𑀺𑀬𑀸𑀳𑀢𑀦𑁆𑀢𑀺 𑀇𑀫𑀺𑀦𑀸 𑀆𑀘𑀭𑀺𑀬𑀁 𑀧𑀝𑀺𑀩𑀸𑀳𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀆𑀘𑀭𑀺𑀬𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀔𑀼𑀫𑀁 𑀥𑀫𑁆𑀫𑀦𑁆𑀢𑀭𑀁 𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀺, 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀧𑀦 𑀢𑀓𑁆𑀓𑁂𑀢𑁆𑀯𑀸 𑀏𑀯𑀁 𑀪𑀯𑀺𑀲𑁆𑀲𑀢𑀺 𑀏𑀯𑀁 𑀪𑀯𑀺𑀲𑁆𑀲𑀢𑀻𑀢𑀺 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺. 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀦𑁆𑀢𑀺 𑀇𑀫𑀺𑀦𑀸 𑀘𑀲𑁆𑀲 𑀮𑁄𑀓𑀺𑀬𑀧𑀜𑁆𑀜𑀁 𑀅𑀦𑀼𑀚𑀸𑀦𑀸𑀢𑀺. 𑀲𑀫𑀡𑁄 𑀕𑁄𑀢𑀫𑁄 𑀧𑀜𑁆𑀜𑀯𑀸, 𑀲𑁄 𑀢𑀁 𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀇𑀦𑁆𑀤𑀯𑀚𑀺𑀭𑀽𑀧𑀫𑀁 𑀯𑀻𑀫𑀁𑀲𑀁 𑀏𑀯𑀁 𑀯𑀝𑁆𑀝𑀺𑀲𑁆𑀲𑀢𑀺, 𑀏𑀯𑀁 𑀯𑀝𑁆𑀝𑀺𑀲𑁆𑀲𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀅𑀦𑀼𑀘𑀭𑀸𑀧𑁂𑀢𑁆𑀯𑀸 𑀯𑀻𑀫𑀁𑀲𑀸𑀬 𑀅𑀦𑀼𑀘𑀭𑀺𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑀬𑀁𑀧𑀝𑀺𑀪𑀸𑀦𑀦𑁆𑀢𑀺 𑀇𑀫𑀺𑀦𑀸𑀲𑁆𑀲 𑀥𑀫𑁆𑀫𑁂𑀲𑀼 𑀧𑀘𑁆𑀘𑀓𑁆𑀔𑀪𑀸𑀯𑀁 𑀧𑀝𑀺𑀩𑀸𑀳𑀢𑀺. 𑀏𑀯𑀁 𑀳𑀺𑀲𑁆𑀲 𑀅𑀳𑁄𑀲𑀺 𑁋 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀼𑀔𑀼𑀫𑀁 𑀥𑀫𑁆𑀫𑀦𑁆𑀢𑀭𑀁 𑀯𑀺𑀧𑀲𑁆𑀲𑀦𑀸 𑀯𑀸 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀸 𑀦𑀢𑁆𑀣𑀺, 𑀅𑀬𑀁 𑀧𑀦 𑀮𑀤𑁆𑀥𑀧𑀭𑀺𑀲𑁄, 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀯𑀺𑀬 𑀦𑀁 𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑀧𑀭𑀺𑀯𑀸𑀭𑁂𑀦𑁆𑀢𑀺, 𑀲𑀼𑀨𑀼𑀲𑀺𑀢𑀁 𑀧𑀦𑀲𑁆𑀲 𑀤𑀦𑁆𑀢𑀸𑀯𑀭𑀡𑀁, 𑀫𑀼𑀤𑀼𑀓𑀸 𑀚𑀺𑀯𑁆𑀳𑀸, 𑀫𑀥𑀼𑀭𑁄 𑀲𑀭𑁄, 𑀅𑀦𑁂𑀮𑀕𑀴𑀸 𑀯𑀸𑀘𑀸, 𑀲𑁄 𑀬𑀁 𑀬𑀤𑁂𑀯𑀲𑁆𑀲 𑀉𑀧𑀝𑁆𑀞𑀸𑀢𑀺, 𑀢𑀁 𑀢𑀁 𑀕𑀳𑁂𑀢𑁆𑀯𑀸 𑀲𑀬𑀁𑀧𑀝𑀺𑀪𑀸𑀦𑀁 𑀓𑀣𑁂𑀦𑁆𑀢𑁄 𑀫𑀳𑀸𑀚𑀦𑀁 𑀭𑀜𑁆𑀚𑁂𑀢𑀻𑀢𑀺.

𑀬𑀲𑁆𑀲 𑀘 𑀔𑁆𑀯𑀸𑀲𑁆𑀲 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀬𑀲𑁆𑀲 𑀘 𑀔𑁄 𑀅𑀢𑁆𑀣𑀸𑀬 𑀅𑀲𑁆𑀲 𑀥𑀫𑁆𑀫𑁄 𑀤𑁂𑀲𑀺𑀢𑁄. 𑀲𑁂𑀬𑁆𑀬𑀣𑀺𑀤𑀁, 𑀭𑀸𑀕𑀧𑀝𑀺𑀖𑀸𑀢𑀢𑁆𑀣𑀸𑀬 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁, 𑀤𑁄𑀲𑀧𑁆𑀧𑀝𑀺𑀖𑀸𑀢𑀢𑁆𑀣𑀸𑀬 𑀫𑁂𑀢𑁆𑀢𑀸𑀪𑀸𑀯𑀦𑀸, 𑀫𑁄𑀳𑀧𑀝𑀺𑀖𑀸𑀢𑀢𑁆𑀣𑀸𑀬 𑀧𑀜𑁆𑀘 𑀥𑀫𑁆𑀫𑀸, 𑀯𑀺𑀢𑀓𑁆𑀓𑀽𑀧𑀘𑁆𑀙𑁂𑀤𑀸𑀬 𑀆𑀦𑀸𑀧𑀸𑀦𑀲𑁆𑀲𑀢𑀺.

𑀲𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀲𑁄 𑀥𑀫𑁆𑀫𑁄 𑀬𑁄 𑀢𑀁 𑀬𑀣𑀸𑀤𑁂𑀲𑀺𑀢𑀁 𑀓𑀭𑁄𑀢𑀺, 𑀢𑀲𑁆𑀲 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀓𑀸𑀭𑀡𑁂𑀦 𑀯𑀝𑁆𑀝𑀤𑀼𑀓𑁆𑀔𑀓𑁆𑀔𑀬𑀸𑀬 𑀦𑀺𑀬𑁆𑀬𑀸𑀢𑀺 𑀕𑀘𑁆𑀙𑀢𑀺 𑀢𑀫𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀤𑀻𑀧𑁂𑀢𑀺. 𑀇𑀤𑀁 𑀧𑀦𑁂𑀲 𑀦 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦 𑀯𑀤𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀥𑀫𑁆𑀫𑁄 𑀅𑀦𑀺𑀬𑁆𑀬𑀸𑀦𑀺𑀓𑁄𑀢𑀺 𑀏𑀯𑀫𑁂𑀯𑀁 𑀧𑀯𑁂𑀤𑁂𑀬𑁆𑀬, 𑀦 𑀧𑀦 𑀲𑀓𑁆𑀓𑁄𑀢𑀺 𑀯𑀢𑁆𑀢𑀼𑀁. 𑀓𑀲𑁆𑀫𑀸? 𑀉𑀧𑀸𑀭𑀫𑁆𑀪𑀪𑀬𑀸. 𑀯𑁂𑀲𑀸𑀮𑀺𑀬𑀜𑁆𑀳𑀺 𑀩𑀳𑀽 𑀲𑁄𑀢𑀸𑀧𑀦𑁆𑀦-𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺𑀉𑀧𑀸𑀲𑀓𑀸. 𑀢𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀲𑀼𑀦𑀓𑁆𑀔𑀢𑁆𑀢 𑀢𑁆𑀯𑀁 𑀪𑀕𑀯𑀢𑀸 𑀤𑁂𑀲𑀺𑀢𑀥𑀫𑁆𑀫𑁄 𑀅𑀦𑀺𑀬𑁆𑀬𑀸𑀦𑀺𑀓𑁄𑀢𑀺 𑀯𑀤𑀲𑀺, 𑀬𑀤𑀺 𑀅𑀬𑀁 𑀥𑀫𑁆𑀫𑁄 𑀅𑀦𑀺𑀬𑁆𑀬𑀸𑀦𑀺𑀓𑁄, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀇𑀫𑁂 𑀓𑀲𑁆𑀫𑀸 𑀏𑀢𑁆𑀢𑀓𑀸 𑀲𑁄𑀢𑀸𑀧𑀦𑁆𑀦𑀸 𑀚𑀸𑀢𑀸, 𑀏𑀢𑁆𑀢𑀓𑀸 𑀲𑀓𑀤𑀸𑀕𑀸𑀫𑀻, 𑀏𑀢𑁆𑀢𑀓𑀸 𑀅𑀦𑀸𑀕𑀸𑀫𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀉𑀧𑀸𑀭𑀫𑁆𑀪𑀁 𑀓𑀭𑁂𑀬𑁆𑀬𑀼’’𑀦𑁆𑀢𑀺. 𑀲𑁄 𑀇𑀫𑀺𑀦𑀸 𑀉𑀧𑀸𑀭𑀫𑁆𑀪𑀪𑀬𑁂𑀦 𑀅𑀦𑀺𑀬𑁆𑀬𑀸𑀦𑀺𑀓𑁄𑀢𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀚𑁆𑀚𑀼𑀦𑁂𑀦 𑀯𑀺𑀲𑁆𑀲𑀝𑁆𑀞𑀓𑀡𑁆𑀟𑀁 𑀯𑀺𑀬 𑀅𑀲𑁆𑀲 𑀥𑀫𑁆𑀫𑁄 𑀅𑀫𑁄𑀖𑁄 𑀦𑀺𑀬𑁆𑀬𑀸𑀢𑀺, 𑀅𑀩𑁆𑀪𑀦𑁆𑀢𑀭𑁂 𑀧𑀦𑀲𑁆𑀲 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀯𑀤𑀢𑀺.

𑀅𑀲𑁆𑀲𑁄𑀲𑀺 𑀔𑁄𑀢𑀺 𑀯𑁂𑀲𑀸𑀮𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑀲𑁂𑀝𑁆𑀞𑀺𑀓𑀼𑀮𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀲𑀫𑀚𑁆𑀛𑁂 𑀏𑀯𑀁 𑀪𑀸𑀲𑀫𑀸𑀦𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀡𑀺, 𑀦 𑀧𑀦 𑀧𑀝𑀺𑀲𑁂𑀥𑁂𑀲𑀺. 𑀓𑀲𑁆𑀫𑀸? 𑀓𑀸𑀭𑀼𑀜𑁆𑀜𑀢𑀸𑀬. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑀅𑀬𑀁 𑀓𑀼𑀤𑁆𑀥𑁄 𑀛𑀸𑀬𑀫𑀸𑀦𑀁 𑀯𑁂𑀴𑀼𑀯𑀦𑀁 𑀯𑀺𑀬 𑀧𑀓𑁆𑀔𑀺𑀢𑁆𑀢𑀮𑁄𑀡𑀁 𑀉𑀤𑁆𑀥𑀦𑀁 𑀯𑀺𑀬 𑀘 𑀓𑁄𑀥𑀯𑀲𑁂𑀦 𑀧𑀝𑀧𑀝𑀸𑀬𑀢𑀺, 𑀫𑀬𑀸 𑀧𑀝𑀺𑀩𑀸𑀳𑀺𑀢𑁄 𑀧𑀦 𑀫𑀬𑀺𑀧𑀺 𑀆𑀖𑀸𑀢𑀁 𑀩𑀦𑁆𑀥𑀺𑀲𑁆𑀲𑀢𑀺, 𑀏𑀯𑀫𑀲𑁆𑀲 𑀢𑀣𑀸𑀕𑀢𑁂 𑀘 𑀫𑀬𑀺 𑀘𑀸𑀢𑀺 𑀤𑁆𑀯𑀻𑀲𑀼 𑀚𑀦𑁂𑀲𑀼 𑀆𑀖𑀸𑀢𑁄 𑀅𑀢𑀺𑀪𑀸𑀭𑀺𑀬𑁄 𑀪𑀯𑀺𑀲𑁆𑀲𑀢𑀻𑀢𑀺 𑀓𑀸𑀭𑀼𑀜𑁆𑀜𑀢𑀸𑀬 𑀦 𑀧𑀝𑀺𑀲𑁂𑀥𑁂𑀲𑀺. 𑀅𑀧𑀺 𑀘𑀲𑁆𑀲 𑀏𑀯𑀁 𑀅𑀳𑁄𑀲𑀺, 𑀩𑀼𑀤𑁆𑀥𑀸𑀦𑀁 𑀅𑀯𑀡𑁆𑀡𑀓𑀣𑀦𑀁 𑀦𑀸𑀫 𑀧𑀼𑀡𑁆𑀡𑀘𑀦𑁆𑀤𑁂 𑀤𑁄𑀲𑀸𑀭𑁄𑀧𑀦𑀲𑀤𑀺𑀲𑀁, 𑀓𑁄 𑀇𑀫𑀲𑁆𑀲 𑀓𑀣𑀁 𑀕𑀡𑁆𑀳𑀺𑀲𑁆𑀲𑀢𑀺? 𑀲𑀬𑀫𑁂𑀯 𑀔𑁂𑀴𑁂 𑀧𑀘𑁆𑀙𑀺𑀦𑁆𑀦𑁂 𑀫𑀼𑀔𑁂 𑀲𑀼𑀓𑁆𑀔𑁂 𑀑𑀭𑀫𑀺𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦 𑀧𑀝𑀺𑀲𑁂𑀥𑁂𑀲𑀺. 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄𑀢𑀺 𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀢𑁄 𑀅𑀧𑀕𑀢𑁄.

𑁧𑁪𑁭. 𑀓𑁄𑀥𑀦𑁄𑀢𑀺 𑀘𑀡𑁆𑀟𑁄 𑀨𑀭𑀼𑀲𑁄. 𑀫𑁄𑀖𑀧𑀼𑀭𑀺𑀲𑁄𑀢𑀺 𑀢𑀼𑀘𑁆𑀙𑀧𑀼𑀭𑀺𑀲𑁄. 𑀬𑀲𑁆𑀲 𑀳𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀺, 𑀢𑀁 𑀩𑀼𑀤𑁆𑀥𑀸 ‘‘𑀫𑁄𑀖𑀧𑀼𑀭𑀺𑀲𑁄’’𑀢𑀺 𑀯𑀤𑀦𑁆𑀢𑀺. 𑀉𑀧𑀦𑀺𑀲𑁆𑀲𑀬𑁂 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀫𑀕𑁆𑀕𑁂 𑀯𑀸 𑀨𑀮𑁂 𑀯𑀸 𑀅𑀲𑀢𑀺 ‘‘𑀫𑁄𑀖𑀧𑀼𑀭𑀺𑀲𑁄’’𑀢𑀺 𑀯𑀤𑀦𑁆𑀢𑀺𑀬𑁂𑀯. 𑀇𑀫𑀲𑁆𑀲 𑀧𑀦 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀲𑀫𑀼𑀘𑁆𑀙𑀺𑀦𑁆𑀦𑁄𑀬𑁂𑀯, 𑀢𑁂𑀦 𑀢𑀁 ‘‘𑀫𑁄𑀖𑀧𑀼𑀭𑀺𑀲𑁄’’𑀢𑀺 𑀆𑀳. 𑀓𑁄𑀥𑀸 𑀘 𑀧𑀦𑀲𑁆𑀲 𑀏𑀲𑀸 𑀯𑀸𑀘𑀸 𑀪𑀸𑀲𑀺𑀢𑀸𑀢𑀺 𑀏𑀲𑀸 𑀘 𑀧𑀦𑀲𑁆𑀲 𑀯𑀸𑀘𑀸 𑀓𑁄𑀥𑁂𑀦 𑀪𑀸𑀲𑀺𑀢𑀸.

𑀓𑀲𑁆𑀫𑀸 𑀧𑀦𑁂𑀲 𑀪𑀕𑀯𑀢𑁄 𑀓𑀼𑀤𑁆𑀥𑁄𑀢𑀺? 𑀅𑀬𑀜𑁆𑀳𑀺 𑀧𑀼𑀩𑁆𑀩𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 𑀓𑀣𑁂𑀲𑀺. 𑀲𑁄 𑀤𑀺𑀩𑁆𑀩𑀘𑀓𑁆𑀔𑀼𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀑𑀮𑁄𑀓𑁂𑀦𑁆𑀢𑁄 𑀦𑀦𑁆𑀤𑀦𑀯𑀦𑀘𑀺𑀢𑁆𑀢𑀮𑀢𑀸𑀯𑀦𑀨𑀸𑀭𑀼𑀲𑀓𑀯𑀦𑀫𑀺𑀲𑁆𑀲𑀓𑀯𑀦𑁂𑀲𑀼 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁂 𑀤𑁂𑀯𑀧𑀼𑀢𑁆𑀢𑁂 𑀘 𑀤𑁂𑀯𑀥𑀻𑀢𑀭𑁄 𑀘 𑀤𑀺𑀲𑁆𑀯𑀸 𑀏𑀢𑁂𑀲𑀁 𑀏𑀯𑀭𑀽𑀧𑀸𑀬 𑀅𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀞𑀺𑀢𑀸𑀦𑀁 𑀓𑀻𑀯𑀫𑀥𑀼𑀭𑁄 𑀦𑀼 𑀔𑁄 𑀲𑀤𑁆𑀤𑁄 𑀪𑀯𑀺𑀲𑁆𑀲𑀢𑀻𑀢𑀺 𑀲𑀤𑁆𑀤𑀁 𑀲𑁄𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀤𑀲𑀩𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀪𑀕𑀯𑀸 𑀧𑀦𑀲𑁆𑀲 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀬𑀸 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀻𑀢𑀺 𑀜𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀦 𑀓𑀣𑁂𑀲𑀺. 𑀦 𑀳𑀺 𑀩𑀼𑀤𑁆𑀥𑀸 𑀉𑀧𑀦𑀺𑀲𑁆𑀲𑀬𑀯𑀺𑀭𑀳𑀺𑀢 𑀢𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀣𑁂𑀦𑁆𑀢𑀺. 𑀲𑁄 𑀪𑀕𑀯𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀧𑀞𑀫𑀁 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺𑀁, 𑀲𑁄 ‘𑀫𑀬𑁆𑀳𑀁 𑀢𑀁 𑀲𑀫𑁆𑀧𑀚𑁆𑀚𑀢𑀼 𑀯𑀸 𑀫𑀸 𑀯𑀸 𑀲𑀫𑁆𑀧𑀚𑁆𑀚𑀢𑀽’𑀢𑀺 𑀓𑀣𑁂𑀲𑀺. 𑀅𑀳𑀁 𑀧𑀦 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀦 𑀢𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺𑀁, 𑀢𑀁 𑀫𑁂 𑀦 𑀓𑀣𑁂𑀲𑀺. 𑀅𑀤𑁆𑀥𑀸𑀲𑁆𑀲 𑀏𑀯𑀁 𑀳𑁄𑀢𑀺 ‘𑀅𑀬𑀁 𑀭𑀸𑀚𑀧𑀩𑁆𑀩𑀚𑀺𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀲𑀯𑀸𑀦𑀁 𑀔𑀬𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀫𑀬𑀸 𑀲𑀫𑀲𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀯𑀲𑁂𑀦 𑀫𑀬𑁆𑀳𑀁 𑀦 𑀓𑀣𑁂𑀢𑀻’’𑀢𑀺. 𑀪𑀺𑀬𑁆𑀬𑁄𑀲𑁄 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀕𑀺𑀳𑀺𑀪𑀸𑀯𑀁 𑀧𑀢𑁆𑀯𑀸𑀧𑀺 𑀦 𑀢𑀼𑀡𑁆𑀳𑀻𑀪𑀽𑀢𑁄 𑀯𑀺𑀘𑀭𑀢𑀺. 𑀤𑀲𑀩𑀮𑀁 𑀧𑀦 𑀅𑀲𑀢𑀸 𑀢𑀼𑀘𑁆𑀙𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁄 𑀯𑀺𑀘𑀭𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀓𑁄𑀥𑀸 𑀘 𑀧𑀦𑀲𑁆𑀲 𑀏𑀲𑀸 𑀯𑀸𑀘𑀸 𑀪𑀸𑀲𑀺𑀢𑀸’’𑀢𑀺.

𑀯𑀡𑁆𑀡𑁄 𑀳𑁂𑀲𑁄, 𑀲𑀸𑀭𑀺𑀧𑀼𑀢𑁆𑀢𑀸𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑁂𑀦 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀦 𑀏𑀢𑀤𑀢𑁆𑀣𑀫𑁂𑀯 𑀯𑀸𑀬𑀸𑀫𑁄 𑀓𑀢𑁄 ‘‘𑀤𑁂𑀲𑀦𑀸𑀥𑀫𑁆𑀫𑁄 𑀫𑁂 𑀦𑀺𑀬𑁆𑀬𑀸𑀦𑀺𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀬𑁄 𑀏𑀯𑀁 𑀯𑀤𑁂𑀬𑁆𑀬, 𑀲𑁄 𑀯𑀡𑁆𑀡𑀁𑀬𑁂𑀯 𑀢𑀣𑀸𑀕𑀢𑀲𑁆𑀲 𑀪𑀸𑀲𑀢𑀺. 𑀯𑀡𑁆𑀡𑁄 𑀳𑁂𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑀲𑁆𑀲 𑀕𑀼𑀡𑁄 𑀏𑀲𑁄 𑀢𑀣𑀸𑀕𑀢𑀲𑁆𑀲, 𑀦 𑀅𑀕𑀼𑀡𑁄𑀢𑀺 𑀤𑀲𑁆𑀲𑁂𑀢𑀺.

𑀅𑀬𑀫𑁆𑀧𑀺 𑀳𑀺 𑀦𑀸𑀫 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀲𑀼𑀦𑀓𑁆𑀔𑀢𑁆𑀢𑁂𑀦 𑀧𑀝𑀺𑀲𑀺𑀤𑁆𑀥𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀅𑀢𑁆𑀢𑀦𑀺 𑀅𑀢𑁆𑀣𑀺𑀢𑀁 𑀤𑀲𑁆𑀲𑁂𑀢𑀺. 𑀪𑀕𑀯𑀸 𑀓𑀺𑀭 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀦𑀓𑁆𑀔𑀢𑁆𑀢𑁄 𑀫𑁄𑀖𑀧𑀼𑀭𑀺𑀲𑁄 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀢𑀺 𑀯𑀤𑀢𑀺. 𑀫𑀬𑁆𑀳𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀤𑀲𑀩𑀮𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑁂𑀧𑀺 𑀘𑁂𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀬𑁂𑀯. 𑀏𑀯𑀭𑀽𑀧𑁂𑀲𑀼 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂𑀲𑀼 𑀏𑀓𑀲𑁆𑀲𑀸𑀧𑀺 𑀯𑀺𑀚𑀸𑀦𑀦𑀲𑀫𑀢𑁆𑀣𑀁 𑀥𑀫𑁆𑀫𑀦𑁆𑀯𑀬𑀫𑀢𑁆𑀢𑀫𑁆𑀧𑀺 𑀦𑀸𑀫 𑀏𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀬𑀫𑁆𑀧𑀺 𑀳𑀺 𑀦𑀸𑀫 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀅𑀦𑁆𑀯𑁂𑀢𑀻𑀢𑀺 𑀅𑀦𑁆𑀯𑀬𑁄, 𑀚𑀸𑀦𑀸𑀢𑀺, 𑀅𑀦𑀼𑀩𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀲𑁆𑀲 𑀅𑀦𑁆𑀯𑀬𑁄 𑀥𑀫𑁆𑀫𑀦𑁆𑀯𑀬𑁄, 𑀢𑀁 𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀥𑀫𑁆𑀫𑀁 𑀚𑀸𑀦𑀦𑀧𑀜𑁆𑀜𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀻𑀳𑀺 𑀏𑀯𑀭𑀽𑀧𑀫𑁆𑀧𑀺 𑀦𑀸𑀫 𑀫𑀬𑁆𑀳𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀅𑀢𑁆𑀣𑀻𑀢𑀺 𑀚𑀸𑀦𑀺𑀢𑀼𑀁 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀦𑁆𑀯𑀬𑁄𑀧𑀺 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀻𑀲𑀼𑀧𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀩𑀮𑀜𑀸𑀡𑀸𑀤𑀺𑀯𑀡𑁆𑀡𑀦𑀸

𑁧𑁪𑁮. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀦𑀦𑁆𑀢𑀭𑀁 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀬𑀲𑁆𑀫𑀸 𑀧𑀦 𑀢𑀸𑀲𑀼 𑀯𑀼𑀢𑁆𑀢𑀸𑀲𑀼 𑀉𑀧𑀭𑀺 𑀤𑀲𑀩𑀮𑀜𑀸𑀡𑀁 𑀦 𑀧𑀭𑀺𑀧𑀽𑀭𑀢𑀺, 𑀢𑀲𑁆𑀫𑀸 𑀢𑀸 𑀅𑀯𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀤𑀲𑀩𑀮𑀜𑀸𑀡𑀁 𑀧𑀭𑀺𑀧𑀽𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀤𑀲 𑀔𑁄 𑀧𑀦𑀺𑀫𑀸𑀦𑀺 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀣𑀸𑀕𑀢𑀩𑀮𑀸𑀦𑀻𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀩𑀮𑀸𑀦𑀺. 𑀬𑀣𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀩𑀮𑀸𑀦𑀺 𑀧𑀼𑀜𑁆𑀜𑀼𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀕𑀢𑀸𑀦𑀺, 𑀢𑀣𑀸 𑀆𑀕𑀢𑀩𑀮𑀸𑀦𑀻𑀢𑀺𑀧𑀺 𑀅𑀢𑁆𑀣𑁄. 𑀢𑀢𑁆𑀣 𑀤𑀼𑀯𑀺𑀥𑀁 𑀢𑀣𑀸𑀕𑀢𑀩𑀮𑀁 𑀓𑀸𑀬𑀩𑀮𑀜𑁆𑀘 𑀜𑀸𑀡𑀩𑀮𑀜𑁆𑀘. 𑀢𑁂𑀲𑀼 𑀓𑀸𑀬𑀩𑀮𑀁 𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀓𑀸𑀮𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸’’𑀢𑀺.

𑀇𑀫𑀸𑀦𑀺 𑀳𑀺 𑀤𑀲 𑀳𑀢𑁆𑀣𑀺𑀓𑀼𑀮𑀸𑀦𑀺. 𑀢𑀢𑁆𑀣 𑀓𑀸𑀮𑀸𑀯𑀓𑀦𑁆𑀢𑀺 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀁 𑀤𑀝𑁆𑀞𑀩𑁆𑀩𑀁. 𑀬𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀓𑀸𑀬𑀩𑀮𑀁, 𑀢𑀁 𑀏𑀓𑀲𑁆𑀲 𑀓𑀸𑀮𑀸𑀯𑀓𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀓𑀸𑀮𑀸𑀯𑀓𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀕𑀗𑁆𑀕𑁂𑀬𑁆𑀬𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀕𑀗𑁆𑀕𑁂𑀬𑁆𑀬𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀡𑁆𑀟𑀭𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀡𑁆𑀟𑀭𑀸𑀦𑀁, 𑀢𑀁 𑀏𑀓𑀲𑁆𑀲 𑀢𑀫𑁆𑀩𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀢𑀫𑁆𑀩𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀺𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀺𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀕𑀦𑁆𑀥𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀕𑀦𑁆𑀥𑀳𑀢𑁆𑀣𑀻𑀦𑀁, 𑀢𑀁 𑀏𑀓𑀲𑁆𑀲 𑀫𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀫𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀳𑁂𑀫𑀯𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀳𑁂𑀫𑀯𑀢𑀸𑀦𑀁, 𑀢𑀁 𑀏𑀓𑀲𑁆𑀲 𑀉𑀧𑁄𑀲𑀣𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀉𑀧𑁄𑀲𑀣𑀸𑀦𑀁, 𑀢𑀁 𑀏𑀓𑀲𑁆𑀲 𑀙𑀤𑁆𑀤𑀦𑁆𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁 𑀢𑀁 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲. 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺𑀧𑀺 𑀇𑀤𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀧𑀓𑀢𑀺𑀳𑀢𑁆𑀣𑀺𑀕𑀡𑀦𑀸𑀬 𑀳𑀢𑁆𑀣𑀻𑀦𑀁 𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁 𑀳𑁄𑀢𑀺. 𑀇𑀤𑀁 𑀢𑀸𑀯 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁.

𑀜𑀸𑀡𑀩𑀮𑀁 𑀧𑀦 𑀧𑀸𑀴𑀺𑀬𑀁 𑀢𑀸𑀯 𑀆𑀕𑀢𑀫𑁂𑀯. 𑀤𑀲𑀩𑀮𑀜𑀸𑀡𑀁, 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀁, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁. 𑀲𑀁𑀬𑀼𑀢𑁆𑀢𑀓𑁂 (𑀲𑀁. 𑀦𑀺. 𑁨.𑁩𑁪) 𑀆𑀕𑀢𑀸𑀦𑀺 𑀢𑁂𑀲𑀢𑁆𑀢𑀢𑀺 𑀜𑀸𑀡𑀸𑀦𑀺 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀸𑀦𑀻𑀢𑀺 𑀏𑀯𑀁 𑀅𑀜𑁆𑀜𑀸𑀦𑀺𑀧𑀺 𑀅𑀦𑁂𑀓𑀸𑀦𑀺 𑀜𑀸𑀡𑀲𑀳𑀲𑁆𑀲𑀸𑀦𑀺, 𑀏𑀢𑀁 𑀜𑀸𑀡𑀩𑀮𑀁 𑀦𑀸𑀫. 𑀇𑀥𑀸𑀧𑀺 𑀜𑀸𑀡𑀩𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀜𑀸𑀡𑀜𑁆𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦 𑀘 𑀩𑀮𑀦𑁆𑀢𑀺 𑀯𑀼𑀢𑁆𑀢𑀁.

𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀬𑁂𑀳𑀺 𑀤𑀲𑀳𑀺 𑀜𑀸𑀡𑀩𑀮𑁂𑀳𑀺 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄. 𑀆𑀲𑀪𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑀸𑀦𑀁 𑀉𑀢𑁆𑀢𑀫𑀝𑁆𑀞𑀸𑀦𑀁. 𑀆𑀲𑀪𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸, 𑀢𑁂𑀲𑀁 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀕𑀯𑀲𑀢𑀚𑁂𑀝𑁆𑀞𑀓𑁄 𑀉𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄. 𑀯𑀚𑀲𑀢𑀚𑁂𑀝𑁆𑀞𑀓𑁄 𑀯𑀸 𑀉𑀲𑀪𑁄, 𑀯𑀚𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄. 𑀲𑀩𑁆𑀩𑀕𑀯𑀲𑁂𑀝𑁆𑀞𑁄 𑀲𑀩𑁆𑀩𑀧𑀭𑀺𑀲𑁆𑀲𑀬𑀲𑀳𑁄 𑀲𑁂𑀢𑁄 𑀧𑀸𑀲𑀸𑀤𑀺𑀓𑁄 𑀫𑀳𑀸𑀪𑀸𑀭𑀯𑀳𑁄 𑀅𑀲𑀦𑀺𑀲𑀢𑀲𑀤𑁆𑀤𑁂𑀳𑀺𑀧𑀺 𑀅𑀓𑀫𑁆𑀧𑀦𑀺𑀬𑁄 𑀦𑀺𑀲𑀪𑁄, 𑀲𑁄 𑀇𑀥 𑀉𑀲𑀪𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀇𑀤𑀫𑁆𑀧𑀺 𑀳𑀺 𑀢𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁. 𑀞𑀸𑀦𑀦𑁆𑀢𑀺 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑀁. 𑀇𑀤𑀁 𑀧𑀦 𑀆𑀲𑀪𑀁 𑀯𑀺𑀬𑀸𑀢𑀺 𑀆𑀲𑀪𑀁. 𑀬𑀣𑁂𑀯 𑀳𑀺 𑀦𑀺𑀲𑀪𑀲𑀗𑁆𑀔𑀸𑀢𑁄 𑀉𑀲𑀪𑁄 𑀉𑀲𑀪𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀢𑀣𑀸𑀕𑀢𑁄𑀧𑀺 𑀤𑀲𑀳𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑀧𑀸𑀤𑁂𑀳𑀺 𑀅𑀝𑁆𑀞𑀧𑀭𑀺𑀲𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦 𑀅𑀓𑀫𑁆𑀧𑀺𑀬𑁄 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺. 𑀏𑀯𑀁 𑀢𑀺𑀝𑁆𑀞𑀫𑀸𑀦𑁄𑀯 𑀢𑀁 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀉𑀧𑀕𑀘𑁆𑀙𑀢𑀺 𑀦 𑀧𑀘𑁆𑀘𑀓𑁆𑀔𑀸𑀢𑀺 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀻’’𑀢𑀺.

𑀧𑀭𑀺𑀲𑀸𑀲𑀽𑀢𑀺 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺 𑀲𑁂𑀝𑁆𑀞𑀦𑀸𑀤𑀁 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺, 𑀲𑀻𑀳𑀦𑀸𑀤𑀲𑀤𑀺𑀲𑀁 𑀯𑀸 𑀦𑀸𑀤𑀁 𑀦𑀤𑀢𑀺. 𑀅𑀬𑀫𑀢𑁆𑀣𑁄 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀬𑀣𑀸 𑀯𑀸 𑀲𑀻𑀳𑁄 𑀲𑀳𑀦𑀢𑁄 𑀳𑀦𑀦𑀢𑁄 𑀘 𑀲𑀻𑀳𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀣𑀸𑀕𑀢𑁄 𑀮𑁄𑀓𑀥𑀫𑁆𑀫𑀸𑀦𑀁 𑀲𑀳𑀦𑀢𑁄 𑀧𑀭𑀧𑁆𑀧𑀯𑀸𑀤𑀸𑀦𑀜𑁆𑀘 𑀳𑀦𑀦𑀢𑁄 𑀲𑀻𑀳𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀻𑀳𑀲𑁆𑀲 𑀦𑀸𑀤𑀁 𑀲𑀻𑀳𑀦𑀸𑀤𑀁. 𑀢𑀢𑁆𑀣 𑀬𑀣𑀸 𑀲𑀻𑀳𑁄 𑀲𑀻𑀳𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀢𑁆𑀣 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀏𑀯𑀁 𑀢𑀣𑀸𑀕𑀢𑀲𑀻𑀳𑁄𑀧𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀇𑀢𑀺 𑀭𑀽𑀧𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀸𑀯𑀺𑀥𑀤𑁂𑀲𑀦𑀸𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀻’’𑀢𑀺. 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀦𑁆𑀢𑀺 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀯𑀺𑀲𑀺𑀝𑁆𑀞𑀁. 𑀘𑀓𑁆𑀓-𑀲𑀤𑁆𑀤𑁄 𑀧𑀦𑀸𑀬𑀁 𑁋

𑀲𑀫𑁆𑀧𑀢𑁆𑀢𑀺𑀬𑀁 𑀮𑀓𑁆𑀔𑀡𑁂 𑀘, 𑀭𑀣𑀗𑁆𑀕𑁂 𑀇𑀭𑀺𑀬𑀸𑀧𑀣𑁂;

𑀤𑀸𑀦𑁂 𑀭𑀢𑀦𑀥𑀫𑁆𑀫𑀽𑀭-𑀘𑀓𑁆𑀓𑀸𑀤𑀻𑀲𑀼 𑀘 𑀤𑀺𑀲𑁆𑀲𑀢𑀺;

𑀥𑀫𑁆𑀫𑀘𑀓𑁆𑀓𑁂 𑀇𑀥 𑀫𑀢𑁄, 𑀢𑀜𑁆𑀘 𑀤𑁆𑀯𑁂𑀥𑀸 𑀯𑀺𑀪𑀸𑀯𑀬𑁂.

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁩𑁧) 𑀳𑀺 𑀅𑀬𑀁 𑀲𑀫𑁆𑀧𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀻’’𑀢𑀺 (𑀤𑀻. 𑀦𑀺. 𑁨.𑁩𑁫) 𑀏𑀢𑁆𑀣 𑀮𑀓𑁆𑀔𑀡𑁂. ‘‘𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺 (𑀥. 𑀧. 𑁧) 𑀏𑀢𑁆𑀣 𑀭𑀣𑀗𑁆𑀕𑁂. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁯) 𑀏𑀢𑁆𑀣 𑀇𑀭𑀺𑀬𑀸𑀧𑀣𑁂. ‘‘𑀤𑀤𑀁 𑀪𑀼𑀜𑁆𑀚 𑀫𑀸 𑀘 𑀧𑀫𑀸𑀤𑁄, 𑀘𑀓𑁆𑀓𑀁 𑀧𑀯𑀢𑁆𑀢𑀬 𑀲𑀩𑁆𑀩𑀧𑀸𑀡𑀺𑀦’’𑀦𑁆𑀢𑀺 (𑀚𑀸. 𑁧.𑁭.𑁧𑁪𑁯) 𑀏𑀢𑁆𑀣 𑀤𑀸𑀦𑁂. ‘‘𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺 (𑀤𑀻. 𑀦𑀺. 𑁨.𑁨𑁪𑁩) 𑀏𑀢𑁆𑀣 𑀭𑀢𑀦𑀘𑀓𑁆𑀓𑁂. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑀺 (𑀲𑀼. 𑀦𑀺. 𑁫𑁬𑁨) 𑀏𑀢𑁆𑀣 𑀥𑀫𑁆𑀫𑀘𑀓𑁆𑀓𑁂. ‘‘𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺 (𑀚𑀸. 𑁧.𑁧.𑁧𑁦𑁪; 𑁧.𑁫.𑁧𑁦𑁩) 𑀏𑀢𑁆𑀣 𑀉𑀭𑀘𑀓𑁆𑀓𑁂. ‘‘𑀔𑀼𑀭𑀧𑀭𑀺𑀬𑀦𑁆𑀢𑁂𑀦 𑀘𑁂𑀧𑀺 𑀘𑀓𑁆𑀓𑁂𑀦𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁬) 𑀏𑀢𑁆𑀣 𑀧𑀳𑀭𑀡𑀘𑀓𑁆𑀓𑁂. ‘‘𑀅𑀲𑀦𑀺𑀯𑀺𑀘𑀓𑁆𑀓’’𑀦𑁆𑀢𑀺 (𑀤𑀻. 𑀦𑀺. 𑁩.𑁬𑁧; 𑀲𑀁. 𑀦𑀺. 𑁨.𑁧𑁬𑁨) 𑀏𑀢𑁆𑀣 𑀅𑀲𑀦𑀺𑀫𑀡𑁆𑀟𑀮𑁂. 𑀇𑀥 𑀧𑀦𑀸𑀬𑀁 𑀥𑀫𑁆𑀫𑀘𑀓𑁆𑀓𑁂 𑀅𑀥𑀺𑀧𑁆𑀧𑁂𑀢𑁄.

𑀢𑀁 𑀧𑀦 𑀥𑀫𑁆𑀫𑀘𑀓𑁆𑀓𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀧𑀝𑀺𑀯𑁂𑀥𑀜𑀸𑀡𑀜𑁆𑀘𑁂𑀯 𑀤𑁂𑀲𑀦𑀸𑀜𑀸𑀡𑀜𑁆𑀘. 𑀢𑀢𑁆𑀣 𑀧𑀜𑁆𑀜𑀸𑀧𑀪𑀸𑀯𑀺𑀢𑀁 𑀅𑀢𑁆𑀢𑀦𑁄 𑀅𑀭𑀺𑀬𑀩𑀮𑀸𑀯𑀳𑀁 𑀧𑀝𑀺𑀯𑁂𑀥𑀜𑀸𑀡𑀁. 𑀓𑀭𑀼𑀡𑀸𑀧𑀪𑀸𑀯𑀺𑀢𑀁 𑀲𑀸𑀯𑀓𑀸𑀦𑀁 𑀅𑀭𑀺𑀬𑀩𑀮𑀸𑀯𑀳𑀁 𑀤𑁂𑀲𑀦𑀸𑀜𑀸𑀡𑀁. 𑀢𑀢𑁆𑀣 𑀧𑀝𑀺𑀯𑁂𑀥𑀜𑀸𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀼𑀲𑀺𑀢𑀪𑀯𑀦𑀢𑁄 𑀯𑀸 𑀬𑀸𑀯 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑀻𑀧𑀗𑁆𑀓𑀭𑀤𑀲𑀩𑀮𑀢𑁄 𑀧𑀝𑁆𑀞𑀸𑀬 𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑁂𑀲𑀦𑀸𑀜𑀸𑀡𑀫𑁆𑀧𑀺 𑀧𑀯𑀢𑁆𑀢𑀫𑀸𑀦𑀁 𑀧𑀯𑀢𑁆𑀢𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀬𑀸𑀯 𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸 𑀧𑀯𑀢𑁆𑀢𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀁 𑀦𑀸𑀫. 𑀢𑁂𑀲𑀼 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁, 𑀤𑁂𑀲𑀦𑀸𑀜𑀸𑀡𑀁 𑀮𑁄𑀓𑀺𑀬𑀁. 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁, 𑀩𑀼𑀤𑁆𑀥𑀸𑀦𑀁𑀬𑁂𑀯 𑀑𑀭𑀲𑀜𑀸𑀡𑀁.

𑀇𑀤𑀸𑀦𑀺 𑀬𑁂𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀬𑀸𑀦𑀺 𑀆𑀤𑀺𑀢𑁄𑀯 ‘‘𑀤𑀲 𑀔𑁄 𑀧𑀦𑀺𑀫𑀸𑀦𑀺, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀻’’𑀢𑀺 𑀦𑀺𑀓𑁆𑀔𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀓𑀢𑀫𑀸𑀦𑀺 𑀤𑀲? 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺 𑀓𑀸𑀭𑀡𑀜𑁆𑀘 𑀓𑀸𑀭𑀡𑀢𑁄. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀨𑀮𑀁 𑀢𑀺𑀝𑁆𑀞𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀬𑀸𑀬 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘, 𑀢𑀲𑁆𑀫𑀸 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀪𑀕𑀯𑀸 ‘‘𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀳𑁂𑀢𑀽 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬, 𑀢𑀁 𑀢𑀁 𑀞𑀸𑀦𑀁. 𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀦 𑀳𑁂𑀢𑀽 𑀦 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬, 𑀢𑀁 𑀢𑀁 𑀅𑀝𑁆𑀞𑀸𑀦’’𑀦𑁆𑀢𑀺 𑀧𑀚𑀸𑀦𑀦𑁆𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀪𑀺𑀥𑀫𑁆𑀫𑁂 𑀧𑀦𑁂𑀢𑀁, ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁦𑁯) 𑀦𑀬𑁂𑀦 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀬𑀫𑁆𑀧𑀻𑀢𑀺 𑀬𑁂𑀦 𑀜𑀸𑀡𑁂𑀦. 𑀇𑀤𑀫𑁆𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑀲𑁆𑀲𑀸𑀢𑀺 𑀇𑀤𑀫𑁆𑀧𑀺 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀦𑁆𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀁, 𑀓𑀫𑁆𑀫𑀫𑁂𑀯 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀁. 𑀞𑀸𑀦𑀲𑁄 𑀳𑁂𑀢𑀼𑀲𑁄𑀢𑀺 𑀧𑀘𑁆𑀘𑀬𑀢𑁄 𑀘𑁂𑀯 𑀳𑁂𑀢𑀼𑀢𑁄 𑀘. 𑀢𑀢𑁆𑀣 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸 𑀯𑀺𑀧𑀸𑀓𑀲𑁆𑀲 𑀞𑀸𑀦𑀁. 𑀓𑀫𑁆𑀫𑀁 𑀳𑁂𑀢𑀼. 𑀇𑀫𑀲𑁆𑀲 𑀧𑀦 𑀜𑀸𑀡𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 ‘‘𑀅𑀢𑁆𑀣𑁂𑀓𑀘𑁆𑀘𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀕𑀢𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀴𑁆𑀳𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁧𑁦) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯.

𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀦𑁆𑀢𑀺 𑀲𑀩𑁆𑀩𑀕𑀢𑀺𑀕𑀸𑀫𑀺𑀦𑀺𑀁 𑀅𑀕𑀢𑀺𑀕𑀸𑀫𑀺𑀦𑀺𑀜𑁆𑀘. 𑀧𑀝𑀺𑀧𑀤𑀦𑁆𑀢𑀺 𑀫𑀕𑁆𑀕𑀁. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀩𑀳𑀽𑀲𑀼𑀧𑀺 𑀫𑀦𑀼𑀲𑁆𑀲𑁂𑀲𑀼 𑀏𑀓𑀫𑁂𑀯 𑀧𑀸𑀡𑀁 𑀖𑀸𑀢𑁂𑀦𑁆𑀢𑁂𑀲𑀼 𑀇𑀫𑀲𑁆𑀲 𑀘𑁂𑀢𑀦𑀸 𑀦𑀺𑀭𑀬𑀕𑀸𑀫𑀺𑀦𑀻 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀘𑁂𑀢𑀦𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀸𑀫𑀺𑀦𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀏𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀲𑀗𑁆𑀔𑀸𑀢𑀸𑀦𑀁 𑀧𑀝𑀺𑀧𑀢𑁆𑀢𑀻𑀦𑀁 𑀅𑀯𑀺𑀧𑀭𑀻𑀢𑀢𑁄 𑀲𑀪𑀸𑀯𑀁 𑀚𑀸𑀦𑀸𑀢𑀺. 𑀇𑀫𑀲𑁆𑀲 𑀘 𑀜𑀸𑀡𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁? 𑀇𑀥 𑀢𑀣𑀸𑀕𑀢𑁄 𑀅𑀬𑀁 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀦𑀺𑀭𑀬𑀕𑀸𑀫𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁧𑁧) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯.

𑀅𑀦𑁂𑀓𑀥𑀸𑀢𑀼𑀦𑁆𑀢𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀳𑀺 𑀓𑀸𑀫𑀥𑀸𑀢𑀼𑀆𑀤𑀻𑀳𑀺 𑀯𑀸 𑀥𑀸𑀢𑀽𑀳𑀺 𑀩𑀳𑀼𑀥𑀸𑀢𑀼𑀁. 𑀦𑀸𑀦𑀸𑀥𑀸𑀢𑀼𑀦𑁆𑀢𑀺 𑀢𑀸𑀲𑀁𑀬𑁂𑀯 𑀥𑀸𑀢𑀽𑀦𑀁 𑀯𑀺𑀮𑀓𑁆𑀔𑀡𑀢𑀸𑀬 𑀦𑀸𑀦𑀧𑁆𑀧𑀓𑀸𑀭𑀥𑀸𑀢𑀼𑀁. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀮𑁄𑀓𑀁. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀢𑀸𑀲𑀁 𑀢𑀸𑀲𑀁 𑀥𑀸𑀢𑀽𑀦𑀁 𑀅𑀯𑀺𑀧𑀭𑀻𑀢𑀢𑁄 𑀲𑀪𑀸𑀯𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀇𑀤𑀫𑁆𑀧𑀺 𑀜𑀸𑀡𑀁 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁, 𑀇𑀥 𑀢𑀣𑀸𑀕𑀢𑁄 𑀔𑀦𑁆𑀥𑀦𑀸𑀦𑀢𑁆𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀦𑁆𑀢𑀺 𑀳𑀻𑀦𑀸𑀤𑀻𑀳𑀺 𑀅𑀥𑀺𑀫𑀼𑀢𑁆𑀢𑀻𑀳𑀺 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀪𑀸𑀯𑀁. 𑀇𑀤𑀫𑁆𑀧𑀺 𑀜𑀸𑀡𑀁, ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁, 𑀇𑀥 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺 𑀲𑀦𑁆𑀢𑀺 𑀲𑀢𑁆𑀢𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸’’𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀧𑀥𑀸𑀦𑀲𑀢𑁆𑀢𑀸𑀦𑀁. 𑀧𑀭𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀢𑀢𑁄 𑀧𑀭𑁂𑀲𑀁 𑀳𑀻𑀦𑀲𑀢𑁆𑀢𑀸𑀦𑀁. 𑀏𑀓𑀢𑁆𑀣𑀫𑁂𑀯 𑀯𑀸 𑀏𑀢𑀁 𑀧𑀤𑀤𑁆𑀯𑀬𑀁. 𑀯𑁂𑀦𑁂𑀬𑁆𑀬𑀯𑀲𑁂𑀦 𑀧𑀦 𑀤𑁆𑀯𑁂𑀥𑀸 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀦𑁆𑀢𑀺 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀪𑀸𑀯𑀁 𑀅𑀧𑀭𑀪𑀸𑀯𑀜𑁆𑀘, 𑀯𑀼𑀤𑁆𑀥𑀺𑀜𑁆𑀘 𑀳𑀸𑀦𑀺𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀲𑀧𑀺 𑀜𑀸𑀡𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 𑁋 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁, 𑀇𑀥 𑀢𑀣𑀸𑀕𑀢𑁄 𑀲𑀢𑁆𑀢𑀸𑀦𑀁 𑀆𑀲𑀬𑀁 𑀧𑀚𑀸𑀦𑀸𑀢𑀺 𑀅𑀦𑀼𑀲𑀬𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁧𑁪) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯.

𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀧𑀞𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀫𑀸𑀥𑀻𑀦𑀁 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀆𑀤𑀻𑀦𑀜𑁆𑀘 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑀁. 𑀯𑁄𑀤𑀸𑀦𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑀁. 𑀯𑀼𑀝𑁆𑀞𑀸𑀦𑀦𑁆𑀢𑀺 ‘‘𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦𑀁. 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 (𑀯𑀺𑀪. 𑁮𑁨𑁮) 𑀏𑀯𑀁 𑀯𑀼𑀢𑁆𑀢𑀧𑀕𑀼𑀡𑀚𑁆𑀛𑀸𑀦𑀜𑁆𑀘𑁂𑀯 𑀪𑀯𑀗𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀘. 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀜𑁆𑀳𑀺 𑀧𑀕𑀼𑀡𑀚𑁆𑀛𑀸𑀦𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀲𑁆𑀫𑀸 ‘‘𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀯𑀗𑁆𑀕𑁂𑀦 𑀧𑀦 𑀲𑀩𑁆𑀩𑀚𑁆𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁆𑀧𑀺 𑀜𑀸𑀡𑀁 ‘‘𑀢𑀢𑁆𑀣 𑀓𑀢𑀫𑀁 𑀢𑀣𑀸𑀕𑀢𑀲𑁆𑀲 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀜𑀸𑀡𑀁, 𑀛𑀸𑀬𑀻𑀢𑀺 𑀘𑀢𑁆𑀢𑀸𑀭𑁄 𑀛𑀸𑀬𑀻, 𑀅𑀢𑁆𑀣𑁂𑀓𑀘𑁆𑀘𑁄 𑀛𑀸𑀬𑀻 𑀲𑀫𑁆𑀧𑀢𑁆𑀢𑀺𑀁𑀬𑁂𑀯 𑀲𑀫𑀸𑀦𑀁 𑀯𑀺𑀧𑀢𑁆𑀢𑀻𑀢𑀺 𑀧𑀘𑁆𑀘𑁂𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁨𑁮) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀺𑀢𑀁. 𑀲𑀢𑁆𑀢𑀦𑁆𑀦𑀁 𑀜𑀸𑀡𑀸𑀦𑀁 𑀯𑀺𑀢𑁆𑀣𑀸𑀭𑀓𑀣𑀸𑀯𑀺𑀦𑀺𑀘𑁆𑀙𑀬𑁄 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸. 𑀆𑀲𑀯𑀓𑁆𑀔𑀬𑀓𑀣𑀸 𑀪𑀬𑀪𑁂𑀭𑀯𑁂.

𑁧𑁪𑁯. 𑀇𑀫𑀸𑀦𑀺 𑀔𑁄 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀬𑀸𑀦𑀺 𑀧𑀼𑀩𑁆𑀩𑁂 ‘‘𑀤𑀲 𑀔𑁄 𑀧𑀦𑀺𑀫𑀸𑀦𑀺, 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀸𑀦𑀻’’𑀢𑀺 𑀅𑀯𑁄𑀘𑀁, 𑀇𑀫𑀸𑀦𑀺 𑀢𑀸𑀦𑀻𑀢𑀺 𑀅𑀧𑁆𑀧𑀦𑀁 𑀓𑀭𑁄𑀢𑀺. 𑀢𑀢𑁆𑀣 𑀧𑀭𑀯𑀸𑀤𑀻𑀓𑀣𑀸 𑀳𑁄𑀢𑀺 𑁋 𑀤𑀲𑀩𑀮𑀜𑀸𑀡𑀁 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀦𑀢𑁆𑀣𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯𑀸𑀬𑀁 𑀧𑀪𑁂𑀤𑁄𑀢𑀺. 𑀢𑀁 𑀦 𑀢𑀣𑀸 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀫𑁂𑀯 𑀳𑀺 𑀤𑀲𑀩𑀮𑀜𑀸𑀡𑀁, 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀤𑀲𑀩𑀮𑀜𑀸𑀡𑀜𑁆𑀳𑀺 𑀲𑀓𑀲𑀓𑀓𑀺𑀘𑁆𑀘𑀫𑁂𑀯 𑀚𑀸𑀦𑀸𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀢𑀫𑁆𑀧𑀺 𑀢𑀢𑁄 𑀅𑀯𑀲𑁂𑀲𑀫𑁆𑀧𑀺 𑀧𑀚𑀸𑀦𑀸𑀢𑀺. 𑀤𑀲𑀩𑀮𑀜𑀸𑀡𑁂𑀲𑀼 𑀳𑀺 𑀧𑀞𑀫𑀁 𑀓𑀸𑀭𑀡𑀸𑀓𑀸𑀭𑀡𑀫𑁂𑀯 𑀚𑀸𑀦𑀸𑀢𑀺. 𑀤𑀼𑀢𑀺𑀬𑀁 𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑀫𑁂𑀯. 𑀢𑀢𑀺𑀬𑀁 𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯. 𑀘𑀢𑀼𑀢𑁆𑀣𑀁 𑀥𑀸𑀢𑀼𑀦𑀸𑀦𑀢𑁆𑀢𑀓𑀸𑀭𑀡𑀫𑁂𑀯. 𑀧𑀜𑁆𑀘𑀫𑀁 𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸𑀥𑀺𑀫𑀼𑀢𑁆𑀢𑀺𑀫𑁂𑀯. 𑀙𑀝𑁆𑀞𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀫𑁂𑀯. 𑀲𑀢𑁆𑀢𑀫𑀁 𑀛𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀁𑀓𑀺𑀮𑁂𑀲𑀸𑀤𑀺𑀫𑁂𑀯. 𑀅𑀝𑁆𑀞𑀫𑀁 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀔𑀦𑁆𑀥𑀲𑀦𑁆𑀢𑀢𑀺𑀫𑁂𑀯. 𑀦𑀯𑀫𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀫𑁂𑀯. 𑀤𑀲𑀫𑀁 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀫𑁂𑀯. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀏𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺𑀜𑁆𑀘 𑀧𑀚𑀸𑀦𑀸𑀢𑀺. 𑀏𑀢𑁂𑀲𑀁 𑀧𑀦 𑀓𑀺𑀘𑁆𑀘𑀁 𑀦 𑀲𑀩𑁆𑀩𑀁 𑀓𑀭𑁄𑀢𑀺. 𑀢𑀜𑁆𑀳𑀺 𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀕𑁆𑀕𑁄 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂 𑀔𑁂𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀧𑀺𑀘 𑀧𑀭𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘‘𑀤𑀲𑀩𑀮𑀜𑀸𑀡𑀁 𑀦𑀸𑀫 𑀏𑀢𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺? 𑀚𑀸𑀦𑀦𑁆𑀢𑁄 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀜𑀸𑀡𑀸𑀦𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀦𑀻𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀧𑀭𑀸𑀦𑀺 𑀤𑁆𑀯𑁂 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸𑀦𑀻𑀢𑀺 𑀯𑀓𑁆𑀔𑀢𑀺. 𑀆𑀲𑀯𑀓𑁆𑀔𑀬𑀜𑀸𑀡𑀁 𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀦𑁆𑀢𑀺 𑀯𑀓𑁆𑀔𑀢𑀺. 𑀢𑀣𑀸 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀓𑀸𑀫𑀸𑀯𑀘𑀭𑀸𑀦𑀺, 𑀢𑀢𑁄 𑀧𑀭𑀸𑀦𑀺 𑀤𑁆𑀯𑁂 𑀭𑀽𑀧𑀸𑀯𑀘𑀭𑀸𑀦𑀺, 𑀅𑀯𑀲𑀸𑀦𑁂 𑀏𑀓𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀯𑀓𑁆𑀔𑀢𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁂𑀯 𑀓𑀸𑀫𑀸𑀯𑀘𑀭𑀫𑁂𑀯 𑀮𑁄𑀓𑀺𑀬𑀫𑁂𑀯𑀸𑀢𑀺 𑀯𑀓𑁆𑀔𑀢𑀺.

𑀏𑀯𑀫𑁂𑀢𑁆𑀣 𑀅𑀦𑀼𑀧𑀤𑀯𑀡𑁆𑀡𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀢𑀣𑀸𑀕𑀢𑁄 𑀧𑀞𑀫𑀁𑀬𑁂𑀯 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑁂𑀦 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀆𑀲𑀯𑀓𑁆𑀔𑀬𑀸𑀥𑀺𑀕𑀫𑀲𑁆𑀲 𑀘𑁂𑀯 𑀅𑀦𑀥𑀺𑀕𑀫𑀲𑁆𑀲 𑀘 𑀞𑀸𑀦𑀸𑀝𑁆𑀞𑀸𑀦𑀪𑀽𑀢𑀁 𑀓𑀺𑀮𑁂𑀲𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺, 𑀮𑁄𑀓𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀝𑁆𑀞𑀸𑀦𑀤𑀲𑁆𑀲𑀦𑀢𑁄 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀪𑀸𑀯𑀤𑀲𑁆𑀲𑀦𑀢𑁄 𑀘. 𑀅𑀣 𑀦𑁂𑀲𑀁 𑀓𑀫𑁆𑀫𑀯𑀺𑀧𑀸𑀓𑀜𑀸𑀡𑁂𑀦 𑀯𑀺𑀧𑀸𑀓𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺, 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀤𑀲𑁆𑀲𑀦𑀢𑁄. 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻𑀧𑀝𑀺𑀧𑀤𑀸𑀜𑀸𑀡𑁂𑀦 𑀓𑀫𑁆𑀫𑀸𑀯𑀭𑀡𑀸𑀪𑀸𑀯𑀁 𑀧𑀲𑁆𑀲𑀢𑀺, 𑀅𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀪𑀸𑀯𑀤𑀲𑁆𑀲𑀦𑀢𑁄. 𑀏𑀯𑀁 𑀅𑀦𑀸𑀯𑀭𑀡𑀸𑀦𑀁 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀜𑀸𑀡𑁂𑀦 𑀅𑀦𑀼𑀓𑀽𑀮𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀘𑀭𑀺𑀬𑀯𑀺𑀲𑁂𑀲𑀁 𑀧𑀲𑁆𑀲𑀢𑀺, 𑀥𑀸𑀢𑀼𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄. 𑀅𑀣 𑀦𑁂𑀲𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑁂𑀦 𑀅𑀥𑀺𑀫𑀼𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀧𑀬𑁄𑀕𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀧𑀺 𑀅𑀥𑀺𑀫𑀼𑀢𑁆𑀢𑀺𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀢𑁆𑀣𑀁. 𑀅𑀣𑁂𑀯𑀁 𑀤𑀺𑀝𑁆𑀞𑀸𑀥𑀺𑀫𑀼𑀢𑁆𑀢𑀻𑀦𑀁 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑁂𑀦 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀧𑀲𑁆𑀲𑀢𑀺, 𑀲𑀤𑁆𑀥𑀸𑀤𑀻𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀤𑀲𑁆𑀲𑀦𑀢𑁄. 𑀏𑀯𑀁 𑀧𑀭𑀺𑀜𑁆𑀜𑀸𑀢𑀺𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀸 𑀧𑀦 𑀢𑁂 𑀲𑀘𑁂 𑀤𑀽𑀭𑁂 𑀳𑁄𑀦𑁆𑀢𑀺, 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀯𑀲𑀻𑀪𑀽𑀢𑀢𑁆𑀢𑀸 𑀇𑀤𑁆𑀥𑀺𑀯𑀺𑀲𑁂𑀲𑁂𑀦 𑀢𑁂 𑀔𑀺𑀧𑁆𑀧𑀁 𑀉𑀧𑀕𑀘𑁆𑀙𑀢𑀺. 𑀉𑀧𑀕𑀦𑁆𑀢𑁆𑀯𑀸 𑀘 𑀦𑁂𑀲𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀧𑀼𑀩𑁆𑀩𑀚𑀸𑀢𑀺𑀪𑀸𑀯𑀦𑀁, 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀦𑀼𑀪𑀸𑀯𑀢𑁄 𑀧𑀢𑁆𑀢𑀩𑁆𑀩𑁂𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀲𑀫𑁆𑀧𑀢𑀺 𑀘𑀺𑀢𑁆𑀢𑀯𑀺𑀲𑁂𑀲𑀁 𑀧𑀲𑁆𑀲𑀦𑁆𑀢𑁄 𑀆𑀲𑀯𑀓𑁆𑀔𑀬𑀜𑀸𑀡𑀸𑀦𑀼𑀪𑀸𑀯𑁂𑀦 𑀆𑀲𑀯𑀓𑁆𑀔𑀬𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀯𑀺𑀕𑀢𑀲𑀫𑁆𑀫𑁄𑀳𑀢𑁆𑀢𑀸 𑀆𑀲𑀯𑀓𑁆𑀔𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀲𑁆𑀫𑀸 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀇𑀫𑀸𑀦𑀺 𑀤𑀲𑀩𑀮𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀸𑀘𑀁 𑀅𑀧𑁆𑀧𑀳𑀸𑀬𑀸𑀢𑀺𑀆𑀤𑀻𑀲𑀼 𑀧𑀼𑀦 𑀏𑀯𑀭𑀽𑀧𑀺𑀁 𑀯𑀸𑀘𑀁 𑀦 𑀯𑀓𑁆𑀔𑀸𑀫𑀻𑀢𑀺 𑀯𑀤𑀦𑁆𑀢𑁄 𑀢𑀁 𑀯𑀸𑀘𑀁 𑀧𑀚𑀳𑀢𑀺 𑀦𑀸𑀫. 𑀧𑀼𑀦 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀘𑀺𑀢𑁆𑀢𑀁 𑀧𑀚𑀳𑀢𑀺 𑀦𑀸𑀫. 𑀧𑀼𑀦 𑀏𑀯𑀭𑀽𑀧𑀁 𑀤𑀺𑀝𑁆𑀞𑀺𑀁 𑀦 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀧𑀚𑀳𑀦𑁆𑀢𑁄 𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀦𑀸𑀫, 𑀢𑀣𑀸 𑀅𑀓𑀭𑁄𑀦𑁆𑀢𑁄 𑀦𑁂𑀯 𑀧𑀚𑀳𑀢𑀺, 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀲𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂𑀢𑀺 𑀬𑀣𑀸 𑀦𑀺𑀭𑀬𑀧𑀸𑀮𑁂𑀳𑀺 𑀆𑀳𑀭𑀺𑀢𑁆𑀯𑀸 𑀦𑀺𑀭𑀬𑁂 𑀞𑀧𑀺𑀢𑁄, 𑀏𑀯𑀁 𑀦𑀺𑀭𑀬𑁂 𑀞𑀧𑀺𑀢𑁄𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺𑀲𑁆𑀲 𑀅𑀢𑁆𑀣𑀲𑀸𑀥𑀓𑀁 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀻𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀮𑁄𑀓𑀼𑀢𑁆𑀢𑀭𑀯𑀲𑁂𑀦𑁂𑀯 𑀯𑀺𑀦𑀺𑀯𑀢𑁆𑀢𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀬𑀜𑁆𑀳𑀺 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑁂𑀳𑀺 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀲𑀫𑁆𑀫𑀸𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀻𑀳𑀺 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑁂𑀳𑀺 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄, 𑀲𑁄 𑀏𑀯𑀁 𑀲𑀻𑀮𑀸𑀤𑀺𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀬𑀣𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑀤𑀸𑀫𑀺 𑀇𑀫𑀫𑁆𑀧𑀺 𑀓𑀸𑀭𑀡𑀁 𑀏𑀯𑀭𑀽𑀧𑀫𑁂𑀯. 𑀬𑀣𑀸 𑀳𑀺 𑀫𑀕𑁆𑀕𑀸𑀦𑀦𑁆𑀢𑀭𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸𑀯 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀏𑀯𑀫𑁂𑀯 𑀇𑀫𑀲𑁆𑀲𑀸𑀧𑀺 𑀧𑀼𑀕𑁆𑀕𑀮𑀲𑁆𑀲 𑀘𑀼𑀢𑀺𑀅𑀦𑀦𑁆𑀢𑀭𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸𑀯 𑀦𑀺𑀭𑀬𑁂 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀓𑀮𑀲𑁆𑀫𑀺𑀜𑁆𑀳𑀺 𑀩𑀼𑀤𑁆𑀥𑀯𑀘𑀦𑁂 𑀇𑀫𑀸𑀬 𑀉𑀧𑀫𑀸𑀬 𑀕𑀸𑀴𑁆𑀳𑀢𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀉𑀧𑀫𑀸 𑀦𑀸𑀫 𑀦𑀢𑁆𑀣𑀺.

𑁧𑁫𑁦. 𑀯𑁂𑀲𑀸𑀭𑀚𑁆𑀚𑀸𑀦𑀻𑀢𑀺 𑀏𑀢𑁆𑀣 𑀲𑀸𑀭𑀚𑁆𑀚𑀧𑀝𑀺𑀧𑀓𑁆𑀔𑁄 𑀯𑁂𑀲𑀸𑀭𑀚𑁆𑀚𑀁, 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀲𑀸𑀭𑀚𑁆𑀚𑀸𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀫𑀬𑀜𑀸𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄𑀢𑀺 𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑁂 𑀥𑀫𑁆𑀫𑀸 𑀫𑀬𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀏𑀯𑀁 𑀧𑀝𑀺𑀚𑀸𑀦𑀢𑁄 𑀢𑀯. 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀇𑀫𑁂 𑀦𑀸𑀫 𑀥𑀫𑁆𑀫𑀸 𑀢𑀬𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸. 𑀢𑀢𑁆𑀭 𑀯𑀢𑀸𑀢𑀺 𑀢𑁂𑀲𑀼 𑀯𑀢 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀏𑀯𑀁 𑀤𑀲𑁆𑀲𑀺𑀢𑀥𑀫𑁆𑀫𑁂𑀲𑀼. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀳𑁂𑀢𑀼𑀦𑀸 𑀲𑀓𑀸𑀭𑀡𑁂𑀦 𑀯𑀘𑀦𑁂𑀦 𑀲𑀼𑀦𑀓𑁆𑀔𑀢𑁆𑀢𑁄 𑀯𑀺𑀬 𑀯𑀺𑀧𑁆𑀧𑀮𑀧𑀦𑁆𑀢𑁄 𑀅𑀧𑁆𑀧𑀫𑀸𑀡𑀁. 𑀦𑀺𑀫𑀺𑀢𑁆𑀢𑀫𑁂𑀢𑀦𑁆𑀢𑀺 𑀏𑀢𑁆𑀣 𑀧𑀼𑀕𑁆𑀕𑀮𑁄𑀧𑀺 𑀥𑀫𑁆𑀫𑁄𑀧𑀺 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀁 𑀧𑀼𑀕𑁆𑀕𑀮𑀁 𑀦 𑀧𑀲𑁆𑀲𑀸𑀫𑀺, 𑀬𑁄 𑀫𑀁 𑀧𑀝𑀺𑀘𑁄𑀤𑁂𑀲𑁆𑀲𑀢𑀺, 𑀢𑀁 𑀥𑀫𑁆𑀫𑀁 𑀦 𑀧𑀲𑁆𑀲𑀸𑀫𑀺, 𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀬𑀁 𑀦𑀸𑀫 𑀥𑀫𑁆𑀫𑁄 𑀢𑀬𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀫𑀁 𑀧𑀝𑀺𑀘𑁄𑀤𑁂𑀲𑁆𑀲𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀔𑁂𑀫𑀧𑁆𑀧𑀢𑁆𑀢𑁄𑀢𑀺 𑀔𑁂𑀫𑀁 𑀧𑀢𑁆𑀢𑁄, 𑀲𑁂𑀲𑀧𑀤𑀤𑁆𑀯𑀬𑀁 𑀇𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀩𑁆𑀩𑀜𑁆𑀳𑁂𑀢𑀁 𑀯𑁂𑀲𑀸𑀭𑀚𑁆𑀚𑀜𑀸𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀲𑀩𑀮𑀲𑁆𑀲 𑀳𑀺 𑀅𑀬𑀁 𑀦𑀸𑀫 𑀥𑀫𑁆𑀫𑁄 𑀢𑀬𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀘𑁄𑀤𑀓𑀁 𑀧𑀼𑀕𑁆𑀕𑀮𑀁 𑀯𑀸 𑀘𑁄𑀤𑀦𑀸𑀓𑀸𑀭𑀡𑀁 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀥𑀫𑁆𑀫𑀁 𑀯𑀸 𑀅𑀧𑀲𑁆𑀲𑀢𑁄 𑀲𑀪𑀸𑀯𑀩𑀼𑀤𑁆𑀥𑁄𑀬𑁂𑀯 𑀯𑀸 𑀲𑀫𑀸𑀦𑁄 𑀅𑀳𑀁 𑀩𑀼𑀤𑁆𑀥𑁄𑀲𑁆𑀫𑀻𑀢𑀺 𑀯𑀤𑀸𑀫𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀩𑀮𑀯𑀢𑀭𑀁 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀯𑁂𑀲𑀸𑀭𑀚𑁆𑀚𑀁 𑀦𑀸𑀫. 𑀢𑀁 𑀲𑀦𑁆𑀥𑀸𑀬 ‘‘𑀔𑁂𑀫𑀧𑁆𑀧𑀢𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀧𑀦 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸, 𑀢𑁂 𑀅𑀢𑁆𑀣𑀢𑁄 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀸 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸. 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀜𑁆𑀳𑀺 𑀅𑀦𑁆𑀢𑀫𑀲𑁄 𑀤𑀼𑀓𑁆𑀓𑀝-𑀤𑀼𑀩𑁆𑀪𑀸𑀲𑀺𑀢𑀫𑁆𑀧𑀺 𑀫𑀕𑁆𑀕𑀨𑀮𑀸𑀦𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺. 𑀇𑀥 𑀧𑀦 𑀫𑁂𑀣𑀼𑀦𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀫𑁂𑀣𑀼𑀦𑀁 𑀲𑁂𑀯𑀢𑁄 𑀳𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀺𑀲𑁆𑀲𑀁𑀲𑀬𑀫𑁂𑀯 𑀫𑀕𑁆𑀕𑀨𑀮𑀸𑀦𑀁 𑀅𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀬𑀲𑁆𑀲 𑀔𑁄 𑀧𑀦 𑀢𑁂𑀲𑀼 𑀅𑀢𑁆𑀣𑀸𑀬𑀸𑀢𑀺 𑀭𑀸𑀕𑀓𑁆𑀔𑀬𑀸𑀤𑀻𑀲𑀼 𑀬𑀲𑁆𑀲 𑀅𑀢𑁆𑀣𑀸𑀬. 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀅𑀲𑀼𑀪𑀪𑀸𑀯𑀦𑀸𑀤𑀺𑀥𑀫𑁆𑀫𑁄 𑀓𑀣𑀺𑀢𑁄. 𑀢𑀢𑁆𑀭 𑀯𑀢 𑀫𑀦𑁆𑀢𑀺 𑀢𑀲𑁆𑀫𑀺𑀁 𑀅𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂 𑀫𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀤𑀲𑀩𑀮𑀜𑀸𑀡𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀧𑀭𑀺𑀲𑀯𑀡𑁆𑀡𑀦𑀸

𑁧𑁫𑁧. ‘‘𑀅𑀝𑁆𑀞 𑀔𑁄 𑀇𑀫𑀸 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑁆𑀲 𑀩𑀮𑀤𑀲𑁆𑀲𑀦𑀢𑁆𑀣𑀁. 𑀬𑀣𑀸 𑀳𑀺 𑀩𑁆𑀬𑀢𑁆𑀢𑀁 𑀧𑀭𑀺𑀲𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀯𑀺𑀜𑁆𑀜𑀽𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑀦𑀲𑀫𑀢𑁆𑀣𑀸𑀬 𑀓𑀣𑀸𑀬 𑀥𑀫𑁆𑀫𑀓𑀣𑀺𑀓𑀲𑁆𑀲 𑀙𑁂𑀓𑀪𑀸𑀯𑁄 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀇𑀫𑀸 𑀅𑀝𑁆𑀞 𑀧𑀭𑀺𑀲𑀸 𑀧𑀢𑁆𑀯𑀸 𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑁆𑀲 𑀯𑁂𑀲𑀸𑀭𑀚𑁆𑀚𑀪𑀸𑀯𑁄 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑁆𑀲 𑀩𑀮𑀁 𑀤𑀲𑁆𑀲𑁂𑀦𑁆𑀢𑁄, 𑀅𑀝𑁆𑀞 𑀔𑁄 𑀇𑀫𑀸 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀔𑀢𑁆𑀢𑀺𑀬𑀧𑀭𑀺𑀲𑀸𑀢𑀺 𑀔𑀢𑁆𑀢𑀺𑀬𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁, 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀫𑀸𑀭𑀓𑀸𑀬𑀺𑀓𑀸𑀦𑀁 𑀧𑀦 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀫𑀸𑀭𑀧𑀭𑀺𑀲𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀫𑀸𑀭𑀸𑀦𑀁. 𑀲𑀩𑁆𑀩𑀸𑀧𑀺 𑀘𑁂𑀢𑀸 𑀧𑀭𑀺𑀲𑀸 𑀉𑀕𑁆𑀕𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦 𑀕𑀳𑀺𑀢𑀸. 𑀫𑀦𑀼𑀲𑁆𑀲𑀸 𑀳𑀺 ‘‘𑀏𑀢𑁆𑀣 𑀭𑀸𑀚𑀸 𑀦𑀺𑀲𑀺𑀦𑁆𑀦𑁄’’𑀢𑀺 𑀧𑀓𑀢𑀺𑀯𑀘𑀦𑀫𑁆𑀧𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀉𑀕𑁆𑀕𑀸 𑀔𑀢𑁆𑀢𑀺𑀬𑀧𑀭𑀺𑀲𑀸. 𑀩𑁆𑀭𑀸𑀳𑁆𑀫𑀡𑀸 𑀢𑀻𑀲𑀼 𑀯𑁂𑀤𑁂𑀲𑀼 𑀓𑀼𑀲𑀮𑀸 𑀳𑁄𑀦𑁆𑀢𑀺, 𑀕𑀳𑀧𑀢𑀬𑁄 𑀦𑀸𑀦𑀸𑀯𑁄𑀳𑀸𑀭𑁂𑀲𑀼 𑀘𑁂𑀯 𑀅𑀓𑁆𑀔𑀭𑀘𑀺𑀦𑁆𑀢𑀸𑀬 𑀘. 𑀲𑀫𑀡𑀸 𑀲𑀓𑀯𑀸𑀤𑀧𑀭𑀯𑀸𑀤𑁂𑀲𑀼 𑀓𑀼𑀲𑀮𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀫𑀚𑁆𑀛𑁂 𑀥𑀫𑁆𑀫𑀓𑀣𑀸𑀓𑀣𑀦𑀁 𑀦𑀸𑀫 𑀅𑀢𑀺𑀯𑀺𑀬 𑀪𑀸𑀭𑁄. 𑀅𑀫𑀦𑀼𑀲𑁆𑀲𑀸𑀧𑀺 𑀉𑀕𑁆𑀕𑀸 𑀳𑁄𑀦𑁆𑀢𑀺. 𑀅𑀫𑀦𑀼𑀲𑁆𑀲𑁄𑀢𑀺 𑀳𑀺 𑀯𑀼𑀢𑁆𑀢𑀫𑀢𑁆𑀢𑁂𑀧𑀺 𑀫𑀦𑀼𑀲𑁆𑀲𑀸𑀦𑀁 𑀲𑀓𑀮𑀲𑀭𑀻𑀭𑀁 𑀲𑀗𑁆𑀓𑀫𑁆𑀧𑀢𑀺, 𑀢𑁂𑀲𑀁 𑀭𑀽𑀧𑀁 𑀯𑀸 𑀤𑀺𑀲𑁆𑀯𑀸 𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀲𑀢𑁆𑀢𑀸 𑀯𑀺𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺. 𑀏𑀯𑀁 𑀅𑀫𑀦𑀼𑀲𑁆𑀲𑀧𑀭𑀺𑀲𑀸 𑀉𑀕𑁆𑀕𑀸. 𑀢𑀸𑀲𑀼𑀧𑀺 𑀥𑀫𑁆𑀫𑀓𑀣𑀸𑀓𑀣𑀦𑀁 𑀦𑀸𑀫 𑀅𑀢𑀺𑀯𑀺𑀬 𑀪𑀸𑀭𑁄. 𑀇𑀢𑀺 𑀉𑀕𑁆𑀕𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦 𑀢𑀸 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.