𑁮. 𑀫𑀥𑀼𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀥𑀼𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀳𑀸𑀯𑀦𑀦𑁆𑀢𑀺 𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀅𑀭𑁄𑀧𑀺𑀫𑀁 𑀚𑀸𑀢𑀺𑀯𑀦𑀁, 𑀦 𑀬𑀣𑀸 𑀯𑁂𑀲𑀸𑀮𑀺𑀬𑀁 𑀭𑁄𑀧𑀺𑀢𑀸𑀭𑁄𑀧𑀺𑀢𑀫𑀺𑀲𑁆𑀲𑀓𑀁. 𑀤𑀺𑀯𑀸𑀯𑀺𑀳𑀸𑀭𑀸𑀬𑀸𑀢𑀺 𑀤𑀺𑀯𑀸 𑀧𑀝𑀺𑀲𑀮𑁆𑀮𑀸𑀦𑀢𑁆𑀣𑀸𑀬. 𑀩𑁂𑀮𑀼𑀯𑀮𑀝𑁆𑀞𑀺𑀓𑀸𑀬𑀸𑀢𑀺 𑀢𑀭𑀼𑀡𑀩𑁂𑀮𑀼𑀯𑀭𑀼𑀓𑁆𑀔𑀲𑁆𑀲. 𑀤𑀡𑁆𑀟𑀧𑀸𑀡𑀻𑀢𑀺 𑀦 𑀚𑀭𑀸𑀤𑀼𑀩𑁆𑀩𑀮𑀢𑀸𑀬 𑀤𑀡𑁆𑀟𑀳𑀢𑁆𑀣𑁄. 𑀅𑀬𑀜𑁆𑀳𑀺 𑀢𑀭𑀼𑀡𑁄 𑀧𑀞𑀫𑀯𑀬𑁂 𑀞𑀺𑀢𑁄, 𑀤𑀡𑁆𑀟𑀘𑀺𑀢𑁆𑀢𑀢𑀸𑀬 𑀧𑀦 𑀲𑀼𑀯𑀡𑁆𑀡𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀢𑀺, 𑀢𑀲𑁆𑀫𑀸 𑀤𑀡𑁆𑀟𑀧𑀸𑀡𑀻𑀢𑀺 𑀯𑀼𑀢𑁆𑀢𑁄. 𑀚𑀗𑁆𑀖𑀸𑀯𑀺𑀳𑀸𑀭𑀦𑁆𑀢𑀺 𑀚𑀗𑁆𑀖𑀸𑀓𑀺𑀮𑀫𑀣𑀯𑀺𑀦𑁄𑀤𑀦𑀢𑁆𑀣𑀁 𑀚𑀗𑁆𑀖𑀸𑀘𑀸𑀭𑀁. 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀦𑀼𑀯𑀺𑀘𑀭𑀫𑀸𑀦𑁄𑀢𑀺 𑀆𑀭𑀸𑀫𑀤𑀲𑁆𑀲𑀦-𑀯𑀦𑀤𑀲𑁆𑀲𑀦-𑀧𑀩𑁆𑀩𑀢𑀤𑀲𑁆𑀲𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀫𑀸𑀦𑁄. 𑀅𑀥𑀺𑀘𑁆𑀘𑀦𑀺𑀓𑁆𑀔𑀫𑀦𑁄 𑀓𑀺𑀭𑁂𑀲 𑀓𑀤𑀸𑀘𑀺 𑀤𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀯𑀁 𑀯𑀺𑀘𑀭𑀢𑀺. 𑀤𑀡𑁆𑀟𑀫𑁄𑀮𑀼𑀩𑁆𑀪𑀸𑀢𑀺 𑀤𑀡𑁆𑀟𑀁 𑀑𑀮𑀼𑀫𑁆𑀪𑀺𑀢𑁆𑀯𑀸 𑀕𑁄𑀧𑀸𑀮𑀓𑀤𑀸𑀭𑀓𑁄 𑀯𑀺𑀬 𑀤𑀡𑁆𑀟𑀁 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀤𑀡𑁆𑀟𑀫𑀢𑁆𑀣𑀓𑁂 𑀤𑁆𑀯𑁂 𑀳𑀢𑁆𑀣𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀺𑀝𑁆𑀞𑀺𑀧𑀸𑀡𑀺𑀁 𑀳𑀦𑀼𑀓𑁂𑀦 𑀉𑀧𑁆𑀧𑀻𑀴𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

𑁨𑁦𑁦. 𑀓𑀺𑀁𑀯𑀸𑀤𑀻𑀢𑀺 𑀓𑀺𑀁𑀤𑀺𑀝𑁆𑀞𑀺𑀓𑁄. 𑀓𑀺𑀫𑀓𑁆𑀔𑀸𑀬𑀻𑀢𑀺 𑀓𑀺𑀁 𑀓𑀣𑁂𑀢𑀺. 𑀅𑀬𑀁 𑀭𑀸𑀚𑀸 𑀪𑀕𑀯𑀦𑁆𑀢𑀁 𑀅𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀫𑀢𑁆𑀢𑀓𑀫𑁂𑀯 𑀓𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀢𑀫𑁆𑀧𑀺 𑀦 𑀅𑀜𑁆𑀜𑀸𑀢𑀼𑀓𑀸𑀫𑀢𑀸𑀬, 𑀅𑀘𑀺𑀢𑁆𑀢𑀻𑀓𑀸𑀭𑁂𑀦 𑀧𑀼𑀘𑁆𑀙𑀢𑀺. 𑀓𑀲𑁆𑀫𑀸? 𑀤𑁂𑀯𑀤𑀢𑁆𑀢𑀲𑁆𑀲 𑀧𑀓𑁆𑀔𑀺𑀓𑁄 𑀓𑀺𑀭𑁂𑀲. 𑀤𑁂𑀯𑀤𑀢𑁆𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀫𑀸𑀦𑁂 𑀢𑀣𑀸𑀕𑀢𑁂 𑀪𑀺𑀦𑁆𑀤𑀢𑀺. 𑀲𑁄 𑀓𑀺𑀭 𑀏𑀯𑀁 𑀯𑀤𑁂𑀢𑀺 ‘‘𑀲𑀫𑀡𑁄 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀓𑀼𑀮𑁂𑀦 𑀲𑀤𑁆𑀥𑀺𑀁 𑀯𑁂𑀭𑀻, 𑀦 𑀦𑁄 𑀓𑀼𑀮𑀲𑁆𑀲 𑀯𑀼𑀤𑁆𑀥𑀺𑀁 𑀇𑀘𑁆𑀙𑀢𑀺. 𑀪𑀕𑀺𑀦𑀻𑀧𑀺 𑀫𑁂 𑀘𑀓𑁆𑀓𑀯𑀢𑁆𑀢𑀺𑀧𑀭𑀺𑀪𑁄𑀕𑀸, 𑀢𑀁 𑀧𑀳𑀸𑀬 ‘𑀦𑀲𑁆𑀲𑀢𑁂𑀲𑀸’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀪𑀸𑀕𑀺𑀦𑁂𑀬𑁆𑀬𑁄𑀧𑀺 𑀫𑁂 𑀘𑀓𑁆𑀓𑀯𑀢𑁆𑀢𑀺𑀩𑀻𑀚𑀦𑁆𑀢𑀺 𑀜𑀢𑁆𑀯𑀸 𑀅𑀫𑁆𑀳𑀸𑀓𑀁 𑀓𑀼𑀮𑀲𑁆𑀲 𑀯𑀟𑁆𑀠𑀺𑀬𑀸 𑀅𑀢𑀼𑀲𑁆𑀲𑀦𑁆𑀢𑁄 ‘𑀦𑀲𑁆𑀲𑀢𑁂𑀢’𑀦𑁆𑀢𑀺 𑀢𑀫𑁆𑀧𑀺 𑀤𑀳𑀭𑀓𑀸𑀮𑁂𑀬𑁂𑀯 𑀧𑀩𑁆𑀩𑀸𑀚𑁂𑀲𑀺. 𑀅𑀳𑀁 𑀧𑀦 𑀢𑁂𑀦 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑀼𑀧𑀩𑁆𑀩𑀚𑀺𑀢𑁄. 𑀏𑀯𑀁 𑀧𑀩𑁆𑀩𑀚𑀺𑀢𑀫𑁆𑀧𑀺 𑀫𑀁 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀦 𑀉𑀚𑀼𑀓𑁂𑀳𑀺 𑀅𑀓𑁆𑀔𑀻𑀳𑀺 𑀑𑀮𑁄𑀓𑁂𑀢𑀺. 𑀧𑀭𑀺𑀲𑀫𑀚𑁆𑀛𑁂 𑀪𑀸𑀲𑀦𑁆𑀢𑁄𑀧𑀺 𑀫𑀳𑀸𑀨𑀭𑀲𑀼𑀦𑀸 𑀧𑀳𑀭𑀦𑁆𑀢𑁄 𑀯𑀺𑀬 𑀆𑀧𑀸𑀬𑀺𑀓𑁄 𑀤𑁂𑀯𑀤𑀢𑁆𑀢𑁄𑀢𑀺𑀆𑀤𑀻𑀦𑀺 𑀪𑀸𑀲𑀢𑀻’’𑀢𑀺. 𑀏𑀯𑀁 𑀅𑀬𑀫𑁆𑀧𑀺 𑀭𑀸𑀚𑀸 𑀤𑁂𑀯𑀤𑀢𑁆𑀢𑁂𑀦 𑀪𑀺𑀦𑁆𑀦𑁄, 𑀢𑀲𑁆𑀫𑀸 𑀏𑀯𑀫𑀓𑀸𑀲𑀺.

𑀅𑀣 𑀪𑀕𑀯𑀸 𑀬𑀣𑀸 𑀅𑀬𑀁 𑀭𑀸𑀚𑀸 𑀫𑀬𑀸 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁂 𑀦 𑀓𑀣𑁂𑀢𑀻𑀢𑀺 𑀯𑀢𑁆𑀢𑀼𑀁 𑀦 𑀮𑀪𑀢𑀺, 𑀬𑀣𑀸 𑀘 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀏𑀯𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻𑀢𑀺 𑀢𑀲𑁆𑀲𑀸𑀦𑀼𑀘𑁆𑀙𑀯𑀺𑀓𑀁 𑀓𑀣𑁂𑀦𑁆𑀢𑁄 𑀬𑀣𑀸𑀯𑀸𑀤𑀻 𑀔𑁄𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀦 𑀓𑁂𑀦𑀘𑀺 𑀮𑁄𑀓𑁂 𑀯𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀻𑀢𑀺 𑀮𑁄𑀓𑁂 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀦 𑀓𑀭𑁄𑀢𑀺 𑀦 𑀯𑀺𑀯𑀤𑀢𑀺. 𑀢𑀣𑀸𑀕𑀢𑁄 𑀳𑀺 𑀮𑁄𑀓𑁂𑀦 𑀲𑀤𑁆𑀥𑀺𑀁 𑀦 𑀯𑀺𑀯𑀤𑀢𑀺; 𑀮𑁄𑀓𑁄 𑀧𑀦 𑀢𑀣𑀸𑀕𑀢𑁂𑀦 𑀲𑀤𑁆𑀥𑀺𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑁂 𑀦𑀺𑀘𑁆𑀘𑀦𑁆𑀢𑀺 𑀯𑀤𑀫𑀸𑀦𑁄, 𑀤𑀼𑀓𑁆𑀔𑀁, 𑀅𑀦𑀢𑁆𑀢𑀸, 𑀅𑀲𑀼𑀪𑀦𑁆𑀢𑀺 𑀯𑀼𑀢𑁆𑀢𑁂 𑀲𑀼𑀪𑀦𑁆𑀢𑀺 𑀯𑀤𑀫𑀸𑀦𑁄 𑀯𑀺𑀯𑀤𑀢𑀺. 𑀢𑁂𑀦𑁂𑀯𑀸𑀳 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀮𑁄𑀓𑁂𑀦 𑀯𑀺𑀯𑀤𑀸𑀫𑀺, 𑀮𑁄𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀫𑀬𑀸 𑀯𑀺𑀯𑀤𑀢𑀺, 𑀢𑀣𑀸 𑀦, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀸𑀤𑀻 𑀓𑁂𑀦𑀘𑀺 𑀮𑁄𑀓𑀲𑁆𑀫𑀺𑀁 𑀯𑀺𑀯𑀤𑀢𑀺, 𑀅𑀥𑀫𑁆𑀫𑀯𑀸𑀤𑀻𑀯 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀯𑀤𑀢𑀻’’𑀢𑀺 (𑀲𑀁. 𑀦𑀺. 𑁩.𑁯𑁪). 𑀬𑀣𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦. 𑀓𑀸𑀫𑁂𑀳𑀻𑀢𑀺 𑀯𑀢𑁆𑀣𑀼𑀓𑀸𑀫𑁂𑀳𑀺𑀧𑀺 𑀓𑀺𑀮𑁂𑀲𑀓𑀸𑀫𑁂𑀳𑀺𑀧𑀺. 𑀢𑀁 𑀩𑁆𑀭𑀸𑀳𑁆𑀫𑀡𑀦𑁆𑀢𑀺 𑀢𑀁 𑀔𑀻𑀡𑀸𑀲𑀯𑀁 𑀩𑁆𑀭𑀸𑀳𑁆𑀫𑀡𑀁. 𑀅𑀓𑀣𑀁𑀓𑀣𑀺𑀦𑁆𑀢𑀺 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀁. 𑀙𑀺𑀦𑁆𑀦𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀘𑁂𑀯 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀘 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀓𑀼𑀓𑁆𑀓𑀼𑀘𑁆𑀘𑀁. 𑀪𑀯𑀸𑀪𑀯𑁂𑀢𑀺 𑀧𑀼𑀦𑀧𑁆𑀧𑀼𑀦𑀩𑁆𑀪𑀯𑁂, 𑀳𑀻𑀦𑀧𑀡𑀻𑀢𑁂 𑀯𑀸 𑀪𑀯𑁂, 𑀧𑀡𑀻𑀢𑁄 𑀳𑀺 𑀪𑀯𑁄 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀅𑀪𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀜𑁆𑀜𑀸𑀢𑀺 𑀓𑀺𑀮𑁂𑀲𑀲𑀜𑁆𑀜𑀸. 𑀓𑀺𑀮𑁂𑀲𑀸𑀬𑁂𑀯 𑀯𑀸 𑀇𑀥 𑀲𑀜𑁆𑀜𑀸𑀦𑀸𑀫𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀬𑁂𑀦 𑀓𑀸𑀭𑀡𑁂𑀦 𑀓𑀸𑀫𑁂𑀳𑀺 𑀯𑀺𑀲𑀁𑀬𑀼𑀢𑁆𑀢𑀁 𑀯𑀺𑀳𑀭𑀦𑁆𑀢𑀁 𑀢𑀁 𑀮𑁄𑀓𑁂 𑀦𑀺𑀦𑁆𑀦𑀸𑀯𑀸𑀤𑀺𑀁 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑀁 𑀓𑀺𑀮𑁂𑀲𑀲𑀜𑁆𑀜𑀸 𑀦𑀸𑀦𑀼𑀲𑁂𑀦𑁆𑀢𑀺, 𑀢𑀜𑁆𑀘 𑀓𑀸𑀭𑀡𑀁 𑀅𑀳𑀁 𑀯𑀤𑀸𑀫𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀇𑀢𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀔𑀻𑀡𑀸𑀲𑀯𑀪𑀸𑀯𑀁 𑀤𑀻𑀧𑁂𑀢𑀺. 𑀦𑀺𑀮𑁆𑀮𑀸𑀴𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸 𑀓𑀻𑀴𑀸𑀧𑁂𑀢𑁆𑀯𑀸. 𑀢𑀺𑀯𑀺𑀲𑀸𑀔𑀦𑁆𑀢𑀺 𑀢𑀺𑀲𑀸𑀔𑀁. 𑀦𑀮𑀸𑀝𑀺𑀓𑀦𑁆𑀢𑀺 𑀯𑀮𑀺𑀪𑀗𑁆𑀕𑀁 𑀦𑀮𑀸𑀝𑁂 𑀢𑀺𑀲𑁆𑀲𑁄 𑀭𑀸𑀚𑀺𑀬𑁄 𑀤𑀲𑁆𑀲𑁂𑀦𑁆𑀢𑁄 𑀯𑀮𑀺𑀪𑀗𑁆𑀕𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀡𑁆𑀟𑀫𑁄𑀮𑀼𑀩𑁆𑀪𑀸𑀢𑀺 𑀤𑀡𑁆𑀟𑀁 𑀉𑀧𑁆𑀧𑀻𑀴𑁂𑀢𑁆𑀯𑀸. ‘‘𑀤𑀡𑁆𑀟𑀫𑀸𑀮𑀼𑀩𑁆𑀪𑀸’’𑀢𑀺𑀧𑀺 𑀧𑀸𑀞𑁄, 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺 𑀅𑀢𑁆𑀣𑁄.

𑁨𑁦𑁧. 𑀅𑀜𑁆𑀜𑀢𑀭𑁄𑀢𑀺 𑀦𑀸𑀫𑁂𑀦 𑀅𑀧𑀸𑀓𑀝𑁄 𑀏𑀓𑁄 𑀪𑀺𑀓𑁆𑀔𑀼. 𑀲𑁄 𑀓𑀺𑀭 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑁄, 𑀪𑀕𑀯𑀢𑀸 𑀬𑀣𑀸 𑀤𑀡𑁆𑀟𑀧𑀸𑀡𑀻 𑀦 𑀚𑀸𑀦𑀸𑀢𑀺, 𑀢𑀣𑀸 𑀫𑀬𑀸 𑀓𑀣𑀺𑀢𑀦𑁆𑀢𑀺 𑀯𑀼𑀢𑁆𑀢𑁂 𑀓𑀺𑀦𑁆𑀢𑀺 𑀦𑀼 𑀔𑁄 𑀪𑀕𑀯𑀢𑀸 𑀅𑀯𑀺𑀜𑁆𑀜𑁂𑀬𑁆𑀬𑀁 𑀓𑀢𑁆𑀯𑀸 𑀧𑀜𑁆𑀳𑁄 𑀓𑀣𑀺𑀢𑁄𑀢𑀺 𑀅𑀦𑀼𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀤𑀲𑀩𑀮𑀁 𑀬𑀸𑀘𑀺𑀢𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀲𑀦𑀔𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀓𑀺𑀁𑀯𑀸𑀤𑀻 𑀧𑀦, 𑀪𑀦𑁆𑀢𑁂 𑀪𑀕𑀯𑀸𑀢𑀺𑀆𑀤𑀺𑀫𑀸𑀳.

𑀬𑀢𑁄𑀦𑀺𑀤𑀸𑀦𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁 𑀏𑀢𑀁, 𑀬𑁂𑀦 𑀓𑀸𑀭𑀡𑁂𑀦 𑀬𑀲𑁆𑀫𑀺𑀁 𑀓𑀸𑀭𑀡𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀢𑀺 𑀏𑀢𑁆𑀣 𑀲𑀗𑁆𑀔𑀸𑀢𑀺 𑀓𑁄𑀝𑁆𑀞𑀸𑀲𑁄. 𑀧𑀧𑀜𑁆𑀘𑀲𑀜𑁆𑀜𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸, 𑀲𑀜𑁆𑀜𑀸𑀦𑀸𑀫𑁂𑀦 𑀯𑀸 𑀧𑀧𑀜𑁆𑀘𑀸𑀬𑁂𑀯 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀧𑀧𑀜𑁆𑀘𑀓𑁄𑀝𑁆𑀞𑀸𑀲𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀏𑀢𑁆𑀣 𑀘𑁂 𑀦𑀢𑁆𑀣𑀺 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀬𑀲𑁆𑀫𑀺𑀁 𑀤𑁆𑀯𑀸𑀤𑀲𑀸𑀬𑀢𑀦𑀲𑀗𑁆𑀔𑀸𑀢𑁂 𑀓𑀸𑀭𑀡𑁂 𑀲𑀢𑀺 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀏𑀢𑁆𑀣 𑀏𑀓𑀸𑀬𑀢𑀦𑀫𑁆𑀧𑀺 𑀘𑁂 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀅𑀪𑀺𑀯𑀤𑀺𑀢𑀩𑁆𑀩𑀁 𑀅𑀚𑁆𑀛𑁄𑀲𑀺𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀪𑀺𑀦𑀺𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀅𑀳𑀁 𑀫𑀫𑀦𑁆𑀢𑀺 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁. 𑀅𑀪𑀺𑀯𑀤𑀺𑀢𑀩𑁆𑀩𑀦𑁆𑀢𑀺 𑀅𑀳𑀁 𑀫𑀫𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀚𑁆𑀛𑁄𑀲𑀺𑀢𑀩𑁆𑀩𑀦𑁆𑀢𑀺 𑀅𑀚𑁆𑀛𑁄𑀲𑀺𑀢𑁆𑀯𑀸 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀬𑀼𑀢𑁆𑀢𑀁. 𑀏𑀢𑁂𑀦𑁂𑀢𑁆𑀣 𑀢𑀡𑁆𑀳𑀸𑀤𑀻𑀦𑀁𑀬𑁂𑀯 𑀅𑀧𑁆𑀧𑀯𑀢𑁆𑀢𑀺𑀁 𑀓𑀣𑁂𑀢𑀺. 𑀏𑀲𑁂𑀯𑀦𑁆𑀢𑁄𑀢𑀺 𑀅𑀬𑀁 𑀅𑀪𑀺𑀦𑀦𑁆𑀤𑀦𑀸𑀤𑀻𑀦𑀁 𑀦𑀢𑁆𑀣𑀺𑀪𑀸𑀯𑁄𑀯 𑀭𑀸𑀕𑀸𑀦𑀼𑀲𑀬𑀸𑀤𑀻𑀦𑀁 𑀅𑀦𑁆𑀢𑁄. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣.

𑀤𑀡𑁆𑀟𑀸𑀤𑀸𑀦𑀸𑀤𑀻𑀲𑀼 𑀧𑀦 𑀬𑀸𑀬 𑀘𑁂𑀢𑀦𑀸𑀬 𑀤𑀡𑁆𑀟𑀁 𑀆𑀤𑀺𑀬𑀢𑀺, 𑀲𑀸 𑀤𑀡𑁆𑀟𑀸𑀤𑀸𑀦𑀁. 𑀬𑀸𑀬 𑀲𑀢𑁆𑀣𑀁 𑀆𑀤𑀺𑀬𑀢𑀺 𑀧𑀭𑀸𑀫𑀲𑀢𑀺, 𑀲𑀸 𑀲𑀢𑁆𑀣𑀸𑀤𑀸𑀦𑀁. 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀓𑀮𑀳𑀁. 𑀦𑀸𑀦𑀸𑀕𑀸𑀳𑀫𑀢𑁆𑀢𑀁 𑀯𑀺𑀕𑁆𑀕𑀳𑀁. 𑀦𑀸𑀦𑀸𑀯𑀸𑀤𑀫𑀢𑁆𑀢𑀁 𑀯𑀺𑀯𑀸𑀤𑀁. 𑀢𑀼𑀯𑀁 𑀢𑀼𑀯𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀢𑀼𑀯𑀁 𑀢𑀼𑀯𑀁. 𑀧𑀺𑀬𑀲𑀼𑀜𑁆𑀜𑀓𑀭𑀡𑀁 𑀧𑁂𑀲𑀼𑀜𑁆𑀜𑀁. 𑀅𑀬𑀣𑀸𑀲𑀪𑀸𑀯𑀁 𑀫𑀼𑀲𑀸𑀯𑀸𑀤𑀁 𑀓𑀭𑁄𑀢𑀺, 𑀲𑀸 𑀫𑀼𑀲𑀸𑀯𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑁂𑀢𑁂𑀢𑀺 𑀏𑀢𑁆𑀣 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑁂𑀲𑀼 𑀏𑀢𑁂 𑀓𑀺𑀮𑁂𑀲𑀸. 𑀓𑀺𑀮𑁂𑀲𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀺𑀭𑀼𑀚𑁆𑀛𑀫𑀸𑀦𑀸𑀧𑀺 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑁂𑀲𑀼𑀬𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀁 𑀬𑀢𑁆𑀣𑀼𑀧𑁆𑀧𑀦𑁆𑀦𑀸, 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸 𑀳𑁄𑀦𑁆𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀲𑀫𑀼𑀤𑀬𑀲𑀘𑁆𑀘𑀧𑀜𑁆𑀳𑁂𑀦 𑀤𑀻𑀧𑁂𑀢𑀩𑁆𑀩𑁄 𑁋

‘‘𑀲𑀸 𑀔𑁄 𑀧𑀦𑁂𑀲𑀸 𑀢𑀡𑁆𑀳𑀸 𑀓𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀓𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀻’’𑀢𑀺 𑀯𑀢𑁆𑀯𑀸 𑁋 ‘‘𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀓𑀺𑀜𑁆𑀘 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁? 𑀘𑀓𑁆𑀔𑀼 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁨𑁦𑁩) 𑀦𑀬𑁂𑀦 𑀤𑁆𑀯𑀸𑀤𑀲𑀲𑀼𑀬𑁂𑀯 𑀆𑀬𑀢𑀦𑁂𑀲𑀼 𑀢𑀲𑁆𑀲𑀸 𑀉𑀧𑁆𑀧𑀢𑁆𑀢𑀺 𑀘 𑀦𑀺𑀭𑁄𑀥𑁄 𑀘 𑀯𑀼𑀢𑁆𑀢𑁄. 𑀬𑀣𑁂𑀯 𑀘 𑀢𑀡𑁆𑀳𑀸 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀦𑀺𑀭𑀼𑀤𑁆𑀥𑀸𑀧𑀺 𑀆𑀬𑀢𑀦𑁂𑀲𑀼 𑀧𑀼𑀦 𑀲𑀫𑀼𑀤𑀸𑀘𑀸𑀭𑀲𑁆𑀲 𑀅𑀪𑀸𑀯𑀢𑁄 𑀆𑀬𑀢𑀦𑁂𑀲𑀼𑀬𑁂𑀯 𑀦𑀺𑀭𑀼𑀤𑁆𑀥𑀸𑀢𑀺 𑀯𑀼𑀢𑁆𑀢𑀸, 𑀏𑀯𑀫𑀺𑀫𑁂𑀧𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀆𑀬𑀢𑀦𑁂𑀲𑀼 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀬𑁆𑀯𑀸𑀬𑀁 𑀅𑀪𑀺𑀦𑀦𑁆𑀤𑀦𑀸𑀤𑀻𑀦𑀁 𑀅𑀪𑀸𑀯𑁄𑀯 𑀭𑀸𑀕𑀸𑀦𑀼𑀲𑀬𑀸𑀤𑀻𑀦𑀁 𑀅𑀦𑁆𑀢𑁄𑀢𑀺 𑀯𑀼𑀢𑁆𑀢𑁄. 𑀏𑀢𑁆𑀣𑁂𑀢𑁂 𑀭𑀸𑀕𑀸𑀦𑀼𑀲𑀬𑀸𑀤𑀻𑀦𑀁 𑀅𑀦𑁆𑀢𑁄𑀢𑀺 𑀮𑀤𑁆𑀥𑀯𑁄𑀳𑀸𑀭𑁂 𑀦𑀺𑀩𑁆𑀩𑀸𑀦𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀬𑀜𑁆𑀳𑀺 𑀬𑀢𑁆𑀣 𑀦𑀢𑁆𑀣𑀺, 𑀢𑀁 𑀢𑀢𑁆𑀣 𑀦𑀺𑀭𑀼𑀤𑁆𑀥𑀁 𑀦𑀸𑀫 𑀳𑁄𑀢𑀺, 𑀲𑁆𑀯𑀸𑀬𑀫𑀢𑁆𑀣𑁄 𑀦𑀺𑀭𑁄𑀥𑀧𑀜𑁆𑀳𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺 (𑀧𑀝𑀺. 𑀫. 𑁧.𑁮𑁩).

𑁨𑁦𑁨. 𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄𑀢𑀺 𑀲𑀢𑁆𑀣𑀸𑀭𑀸 𑀘 𑀧𑀲𑀁𑀲𑀺𑀢𑁄. 𑀯𑀺𑀜𑁆𑀜𑀽𑀦𑀦𑁆𑀢𑀺 𑀇𑀤𑀫𑁆𑀧𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀧𑀡𑁆𑀟𑀺𑀢𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀘 𑀲𑀫𑁆𑀪𑀸𑀯𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀳𑁄𑀢𑀻𑀢𑀺 𑀲𑀓𑁆𑀓𑁄𑀢𑀺.

𑁨𑁦𑁩. 𑀅𑀢𑀺𑀓𑁆𑀓𑀫𑁆𑀫𑁂𑀯 𑀫𑀽𑀮𑀁 𑀅𑀢𑀺𑀓𑁆𑀓𑀫𑁆𑀫 𑀔𑀦𑁆𑀥𑀦𑁆𑀢𑀺 𑀲𑀸𑀭𑁄 𑀦𑀸𑀫 𑀫𑀽𑀮𑁂 𑀯𑀸 𑀔𑀦𑁆𑀥𑁂 𑀯𑀸 𑀪𑀯𑁂𑀬𑁆𑀬, 𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁𑀲𑀫𑁆𑀧𑀤𑀦𑁆𑀢𑀺 𑀏𑀯𑀁𑀲𑀫𑁆𑀧𑀢𑁆𑀢𑀺𑀓𑀁, 𑀈𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀺𑀲𑀺𑀢𑁆𑀯𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀫𑁂𑀯 𑀚𑀸𑀦𑀸𑀢𑀺. 𑀧𑀲𑁆𑀲𑀁 𑀧𑀲𑁆𑀲𑀢𑀻𑀢𑀺 𑀧𑀲𑁆𑀲𑀺𑀢𑀩𑁆𑀩𑀫𑁂𑀯 𑀧𑀲𑁆𑀲𑀢𑀺. 𑀬𑀣𑀸 𑀯𑀸 𑀏𑀓𑀘𑁆𑀘𑁄 𑀯𑀺𑀧𑀭𑀻𑀢𑀁 𑀕𑀡𑁆𑀳𑀦𑁆𑀢𑁄 𑀚𑀸𑀦𑀦𑁆𑀢𑁄𑀧𑀺 𑀦 𑀚𑀸𑀦𑀸𑀢𑀺, 𑀧𑀲𑁆𑀲𑀦𑁆𑀢𑁄𑀧𑀺 𑀦 𑀧𑀲𑁆𑀲𑀢𑀺, 𑀦 𑀏𑀯𑀁 𑀪𑀕𑀯𑀸. 𑀪𑀕𑀯𑀸 𑀧𑀦 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺𑀬𑁂𑀯, 𑀧𑀲𑁆𑀲𑀦𑁆𑀢𑁄 𑀧𑀲𑁆𑀲𑀢𑀺𑀬𑁂𑀯. 𑀲𑁆𑀯𑀸𑀬𑀁 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀘𑀓𑁆𑀔𑀼𑀪𑀽𑀢𑁄. 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀜𑀸𑀡𑀪𑀽𑀢𑁄. 𑀅𑀯𑀺𑀧𑀭𑀻𑀢𑀲𑀪𑀸𑀯𑀝𑁆𑀞𑁂𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀧𑁆𑀧𑀯𑀢𑁆𑀢𑀦𑀢𑁄 𑀯𑀸 𑀳𑀤𑀬𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸𑀘𑀸𑀬 𑀦𑀺𑀘𑁆𑀙𑀸𑀭𑀺𑀢𑀥𑀫𑁆𑀫𑀫𑀬𑁄𑀢𑀺 𑀥𑀫𑁆𑀫𑀪𑀽𑀢𑁄. 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑁄. 𑀅𑀣 𑀯𑀸 𑀘𑀓𑁆𑀔𑀼 𑀯𑀺𑀬 𑀪𑀽𑀢𑁄𑀢𑀺 𑀘𑀓𑁆𑀔𑀼𑀪𑀽𑀢𑁄𑀢𑀺 𑀏𑀯𑀫𑁂𑀢𑁂𑀲𑀼 𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁆𑀯𑀸𑀬𑀁 𑀥𑀫𑁆𑀫𑀲𑁆𑀲 𑀯𑀢𑁆𑀢𑀦𑀢𑁄 𑀯𑀢𑁆𑀢𑀸. 𑀧𑀯𑀢𑁆𑀢𑀸𑀧𑀦𑀢𑁄 𑀧𑀯𑀢𑁆𑀢𑀸. 𑀅𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀦𑀲𑀫𑀢𑁆𑀣𑀢𑀸𑀬 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸. 𑀅𑀫𑀢𑀸𑀥𑀺𑀕𑀫𑀸𑀬 𑀧𑀝𑀺𑀧𑀢𑁆𑀢𑀺𑀁 𑀤𑀤𑀸𑀢𑀻𑀢𑀺 𑀅𑀫𑀢𑀲𑁆𑀲 𑀤𑀸𑀢𑀸. 𑀅𑀕𑀭𑀼𑀁 𑀓𑀢𑁆𑀯𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀬𑀸𑀘𑀸𑀧𑁂𑀦𑁆𑀢𑁄𑀧𑀺 𑀳𑀺 𑀕𑀭𑀼𑀁 𑀓𑀭𑁄𑀢𑀺 𑀦𑀸𑀫, 𑀅𑀢𑁆𑀢𑀦𑁄 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀞𑀢𑁆𑀯𑀸 𑀲𑀺𑀦𑁂𑀭𑀽𑀧𑀸𑀤𑀢𑁄 𑀯𑀸𑀮𑀼𑀓𑀁 𑀉𑀤𑁆𑀥𑀭𑀫𑀸𑀦𑁄 𑀯𑀺𑀬 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄𑀧𑀺 𑀕𑀭𑀼𑀁 𑀓𑀭𑁄𑀢𑀺𑀬𑁂𑀯 𑀦𑀸𑀫. 𑀏𑀯𑀁 𑀅𑀓𑀢𑁆𑀯𑀸 𑀅𑀫𑁆𑀳𑁂 𑀧𑀼𑀦𑀧𑁆𑀧𑀼𑀦𑀁 𑀅𑀬𑀸𑀘𑀸𑀧𑁂𑀢𑁆𑀯𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁆𑀧𑀺 𑀦𑁄 𑀓𑀢𑁆𑀯𑀸 𑀓𑀣𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁦𑁪. 𑀬𑀁 𑀔𑁄 𑀦𑁄 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀬𑀁 𑀔𑁄 𑀯𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑁂 𑀧𑀦 𑀪𑀺𑀓𑁆𑀔𑀽 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 ‘‘𑀬𑀁 𑀔𑁄 𑀦𑁄’’𑀢𑀺 𑀆𑀳. 𑀬𑀲𑁆𑀫𑀸 𑀯𑀸 𑀉𑀤𑁆𑀤𑁂𑀲𑁄𑀯 𑀢𑁂𑀲𑀁 𑀉𑀤𑁆𑀤𑀺𑀝𑁆𑀞𑁄𑀯. 𑀪𑀕𑀯𑀸 𑀧𑀦 𑀣𑁂𑀭𑀲𑁆𑀲𑀸𑀧𑀺 𑀢𑁂𑀲𑀫𑁆𑀧𑀺 𑀪𑀕𑀯𑀸𑀯. 𑀢𑀲𑁆𑀫𑀸 𑀪𑀕𑀯𑀸𑀢𑀺 𑀧𑀤𑀁 𑀲𑀦𑁆𑀥𑀸𑀬𑀧𑀺 𑀏𑀯𑀫𑀸𑀳, 𑀬𑀁 𑀔𑁄 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀢𑀼𑀫𑁆𑀳𑀸𑀓𑀁 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀘𑀓𑁆𑀔𑀼𑀜𑁆𑀘𑀸𑀯𑀼𑀲𑁄𑀢𑀺𑀆𑀤𑀻𑀲𑀼 𑀅𑀬𑀫𑀢𑁆𑀣𑁄, 𑀆𑀯𑀼𑀲𑁄, 𑀦𑀺𑀲𑁆𑀲𑀬𑀪𑀸𑀯𑁂𑀦 𑀘𑀓𑁆𑀔𑀼𑀧𑀲𑀸𑀤𑀜𑁆𑀘 𑀆𑀭𑀫𑁆𑀫𑀡𑀪𑀸𑀯𑁂𑀦 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑁂 𑀘 𑀧𑀝𑀺𑀘𑁆𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺. 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄𑀢𑀺 𑀢𑁂𑀲𑀁 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺𑀬𑀸 𑀨𑀲𑁆𑀲𑁄 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀸𑀬 𑀯𑁂𑀤𑀦𑀸𑀬 𑀬𑀁 𑀆𑀭𑀫𑁆𑀫𑀡𑀁 𑀯𑁂𑀤𑁂𑀢𑀺, 𑀢𑀤𑁂𑀯 𑀲𑀜𑁆𑀜𑀸 𑀲𑀜𑁆𑀚𑀸𑀦𑀸𑀢𑀺, 𑀬𑀁 𑀲𑀜𑁆𑀜𑀸 𑀲𑀜𑁆𑀚𑀸𑀦𑀸𑀢𑀺, 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀯𑀺𑀢𑀓𑁆𑀓𑁄 𑀯𑀺𑀢𑀓𑁆𑀓𑁂𑀢𑀺. 𑀬𑀁 𑀯𑀺𑀢𑀓𑁆𑀓𑁄 𑀯𑀺𑀢𑀓𑁆𑀓𑁂𑀢𑀺, 𑀢𑀤𑁂𑀯𑀸𑀭𑀫𑁆𑀫𑀡𑀁 𑀧𑀧𑀜𑁆𑀘𑁄 𑀧𑀧𑀜𑁆𑀘𑁂𑀢𑀺. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀏𑀢𑁂𑀳𑀺 𑀘𑀓𑁆𑀔𑀼𑀭𑀽𑀧𑀸𑀤𑀻𑀳𑀺 𑀓𑀸𑀭𑀡𑁂𑀳𑀺. 𑀧𑀼𑀭𑀺𑀲𑀁 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀢𑀁 𑀅𑀧𑀭𑀺𑀜𑁆𑀜𑀸𑀢𑀓𑀸𑀭𑀡𑀁 𑀧𑀼𑀭𑀺𑀲𑀁 𑀧𑀧𑀜𑁆𑀘𑀓𑁄𑀝𑁆𑀞𑀸𑀲𑀸 𑀅𑀪𑀺𑀪𑀯𑀦𑁆𑀢𑀺, 𑀢𑀲𑁆𑀲 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀨𑀲𑁆𑀲𑀯𑁂𑀤𑀦𑀸𑀲𑀜𑁆𑀜𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀳𑀚𑀸𑀢𑀸 𑀳𑁄𑀦𑁆𑀢𑀺. 𑀯𑀺𑀢𑀓𑁆𑀓𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀭𑀸𑀤𑀻𑀲𑀼 𑀲𑀯𑀺𑀢𑀓𑁆𑀓𑀘𑀺𑀢𑁆𑀢𑁂𑀲𑀼 𑀤𑀝𑁆𑀞𑀩𑁆𑀩𑁄. 𑀧𑀧𑀜𑁆𑀘𑀲𑀗𑁆𑀔𑀸 𑀚𑀯𑀦𑁂𑀦 𑀲𑀳𑀚𑀸𑀢𑀸 𑀳𑁄𑀦𑁆𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀅𑀢𑀻𑀢𑀸𑀦𑀸𑀕𑀢𑀕𑁆𑀕𑀳𑀡𑀁 𑀓𑀢𑀦𑁆𑀢𑀺? 𑀢𑀣𑀸 𑀉𑀧𑁆𑀧𑀚𑁆𑀚𑀦𑀢𑁄. 𑀬𑀣𑁂𑀯 𑀳𑀺 𑀏𑀢𑀭𑀳𑀺 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑁄 𑀧𑀧𑀜𑁆𑀘𑁄 𑀘𑀓𑁆𑀔𑀼𑀜𑁆𑀘 𑀭𑀽𑀧𑁂 𑀘 𑀨𑀲𑁆𑀲𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀢𑀓𑁆𑀓𑁂 𑀘 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑁄, 𑀏𑀯𑀫𑁂𑀯𑀁 𑀅𑀢𑀻𑀢𑀸𑀦𑀸𑀕𑀢𑁂𑀲𑀼𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀲𑁄𑀢𑀜𑁆𑀘𑀸𑀯𑀼𑀲𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀙𑀝𑁆𑀞𑀤𑁆𑀯𑀸𑀭𑁂 𑀧𑀦 𑀫𑀦𑀦𑁆𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀥𑀫𑁆𑀫𑁂𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑀸𑀭𑀫𑁆𑀫𑀡𑀁. 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀆𑀯𑀚𑁆𑀚𑀦𑀁 𑀯𑀸 𑀚𑀯𑀦𑀁 𑀯𑀸. 𑀆𑀯𑀚𑁆𑀚𑀦𑁂 𑀕𑀳𑀺𑀢𑁂 𑀨𑀲𑁆𑀲𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀢𑀓𑁆𑀓𑀸 𑀆𑀯𑀚𑁆𑀚𑀦𑀲𑀳𑀚𑀸𑀢𑀸 𑀳𑁄𑀦𑁆𑀢𑀺. 𑀧𑀧𑀜𑁆𑀘𑁄 𑀚𑀯𑀦𑀲𑀳𑀚𑀸𑀢𑁄. 𑀚𑀯𑀦𑁂 𑀕𑀳𑀺𑀢𑁂 𑀲𑀳𑀸𑀯𑀚𑁆𑀚𑀦𑀓𑀁 𑀪𑀯𑀗𑁆𑀕 𑀫𑀦𑁄 𑀦𑀸𑀫 𑀳𑁄𑀢𑀺, 𑀢𑀢𑁄 𑀨𑀲𑁆𑀲𑀸𑀤𑀬𑁄 𑀲𑀩𑁆𑀩𑁂𑀧𑀺 𑀚𑀯𑀦𑁂𑀦 𑀲𑀳𑀚𑀸𑀢𑀸𑀯. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀬𑀲𑁆𑀫𑀸 𑀅𑀢𑀻𑀢𑀸𑀤𑀺𑀪𑁂𑀤𑀁 𑀲𑀩𑁆𑀩𑀫𑁆𑀧𑀺 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀽𑀢𑀺 𑀇𑀤𑀁 𑀬𑀼𑀢𑁆𑀢𑀫𑁂𑀯.

𑀇𑀤𑀸𑀦𑀺 𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀯𑀢𑀸𑀯𑀼𑀲𑁄𑀢𑀺 𑀤𑁂𑀲𑀦𑀁 𑀆𑀭𑀪𑀺. 𑀨𑀲𑁆𑀲𑀧𑀜𑁆𑀜𑀢𑁆𑀢𑀺𑀁 𑀧𑀜𑁆𑀜𑀧𑁂𑀲𑁆𑀲𑀢𑀻𑀢𑀺 𑀨𑀲𑁆𑀲𑁄 𑀦𑀸𑀫 𑀏𑀓𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀁 𑀨𑀲𑁆𑀲𑀧𑀜𑁆𑀜𑀢𑁆𑀢𑀺𑀁 𑀧𑀜𑁆𑀜𑀧𑁂𑀲𑁆𑀲𑀢𑀺, 𑀤𑀲𑁆𑀲𑁂𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻𑀢𑀺 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦 𑀲𑀓𑀮𑀁 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑁆𑀯𑀸𑀤𑀲𑀸𑀬𑀢𑀦𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀯𑀢𑀸𑀯𑀼𑀲𑁄 𑀘𑀓𑁆𑀔𑀼𑀲𑁆𑀫𑀺𑀁 𑀅𑀲𑀢𑀻𑀢𑀺 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑀸𑀦𑀺 𑀲𑀸𑀯𑀓𑁂𑀦 𑀧𑀜𑁆𑀳𑁄 𑀓𑀣𑀺𑀢𑁄𑀢𑀺 𑀫𑀸 𑀦𑀺𑀓𑁆𑀓𑀗𑁆𑀔𑀸 𑀅𑀳𑀼𑀯𑀢𑁆𑀣, 𑀅𑀬𑀁 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀢𑀼𑀮𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄, 𑀇𑀘𑁆𑀙𑀫𑀸𑀦𑀸 𑀢𑀫𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑀸 𑀳𑁄𑀣𑀸𑀢𑀺 𑀉𑀬𑁆𑀬𑁄𑀚𑁂𑀦𑁆𑀢𑁄 𑀆𑀓𑀗𑁆𑀔𑀫𑀸𑀦𑀸 𑀘 𑀧𑀦𑀸𑀢𑀺𑀆𑀤𑀺𑀫𑀸𑀳.

𑁨𑁦𑁫. 𑀇𑀫𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀧𑀧𑀜𑁆𑀘𑀼𑀧𑁆𑀧𑀢𑁆𑀢𑀺𑀬𑀸 𑀧𑀸𑀝𑀺𑀬𑁂𑀓𑁆𑀓𑀓𑀸𑀭𑀡𑁂𑀳𑀺 𑀘𑁂𑀯 𑀯𑀝𑁆𑀝𑀯𑀺𑀯𑀝𑁆𑀝𑀓𑀸𑀭𑀡𑁂𑀳𑀺 𑀘. 𑀇𑀫𑁂𑀳𑀺 𑀧𑀤𑁂𑀳𑀻𑀢𑀺 𑀇𑀫𑁂𑀳𑀺 𑀅𑀓𑁆𑀔𑀭𑀲𑀫𑁆𑀧𑀺𑀡𑁆𑀟𑀦𑁂𑀳𑀺. 𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀧𑀸𑀝𑀺𑀬𑁂𑀓𑁆𑀓𑀅𑀓𑁆𑀔𑀭𑁂𑀳𑀺. 𑀧𑀡𑁆𑀟𑀺𑀢𑁄𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀘𑀢𑀽𑀳𑀺 𑀯𑀸 𑀓𑀸𑀭𑀡𑁂𑀳𑀺 𑀧𑀡𑁆𑀟𑀺𑀢𑁄 𑀥𑀸𑀢𑀼𑀓𑀼𑀲𑀮𑁄 𑀆𑀬𑀢𑀦𑀓𑀼𑀲𑀮𑁄 𑀧𑀘𑁆𑀘𑀬𑀸𑀓𑀸𑀭𑀓𑀼𑀲𑀮𑁄 𑀓𑀸𑀭𑀡𑀸𑀓𑀸𑀭𑀡𑀓𑀼𑀲𑀮𑁄𑀢𑀺. 𑀫𑀳𑀸𑀧𑀜𑁆𑀜𑁄𑀢𑀺 𑀫𑀳𑀦𑁆𑀢𑁂 𑀅𑀢𑁆𑀣𑁂 𑀫𑀳𑀦𑁆𑀢𑁂 𑀥𑀫𑁆𑀫𑁂 𑀫𑀳𑀦𑁆𑀢𑀸 𑀦𑀺𑀭𑀼𑀢𑁆𑀢𑀺𑀬𑁄 𑀫𑀳𑀦𑁆𑀢𑀸𑀦𑀺 𑀧𑀝𑀺𑀪𑀸𑀦𑀸𑀦𑀺 𑀧𑀭𑀺𑀕𑁆𑀕𑀳𑀡𑀲𑀫𑀢𑁆𑀣𑀸𑀬 𑀫𑀳𑀸𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀬𑀣𑀸 𑀢𑀁 𑀫𑀳𑀸𑀓𑀘𑁆𑀘𑀸𑀦𑁂𑀦𑀸𑀢𑀺 𑀬𑀣𑀸 𑀫𑀳𑀸𑀓𑀘𑁆𑀘𑀸𑀦𑁂𑀦 𑀩𑁆𑀬𑀸𑀓𑀢𑀁, 𑀢𑀁 𑀲𑀦𑁆𑀥𑀸𑀬 𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀫𑀳𑀸𑀓𑀘𑁆𑀘𑀸𑀦𑁂𑀦 𑀩𑁆𑀬𑀸𑀓𑀢𑀁, 𑀅𑀳𑀫𑁆𑀧𑀺 𑀢𑀁 𑀏𑀯𑀫𑁂𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑁂𑀦𑁆𑀢𑀺 𑀅𑀢𑁆𑀣𑁄.

𑀫𑀥𑀼𑀧𑀺𑀡𑁆𑀟𑀺𑀓𑀦𑁆𑀢𑀺 𑀫𑀳𑀦𑁆𑀢𑀁 𑀕𑀼𑀴𑀧𑀽𑀯𑀁 𑀩𑀤𑁆𑀥𑀲𑀢𑁆𑀢𑀼𑀕𑀼𑀴𑀓𑀁 𑀯𑀸. 𑀅𑀲𑁂𑀘𑀦𑀓𑀦𑁆𑀢𑀺 𑀅𑀲𑁂𑀘𑀺𑀢𑀩𑁆𑀩𑀓𑀁. 𑀲𑀧𑁆𑀧𑀺𑀨𑀸𑀡𑀺𑀢𑀫𑀥𑀼𑀲𑀓𑁆𑀓𑀭𑀸𑀤𑀻𑀲𑀼 𑀇𑀤𑀁 𑀦𑀸𑀫𑁂𑀢𑁆𑀣 𑀫𑀦𑁆𑀤𑀁 𑀇𑀤𑀁 𑀩𑀳𑀼𑀓𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀫𑀬𑁄𑀚𑀺𑀢𑀭𑀲𑀁. 𑀘𑁂𑀢𑀲𑁄𑀢𑀺 𑀘𑀺𑀦𑁆𑀢𑀓𑀚𑀸𑀢𑀺𑀓𑁄. 𑀤𑀩𑁆𑀩𑀚𑀸𑀢𑀺𑀓𑁄𑀢𑀺 𑀧𑀡𑁆𑀟𑀺𑀢𑀲𑀪𑀸𑀯𑁄. 𑀓𑁄 𑀦𑀸𑀫𑁄 𑀅𑀬𑀦𑁆𑀢𑀺 𑀇𑀤𑀁 𑀣𑁂𑀭𑁄 𑀅𑀢𑀺𑀪𑀤𑁆𑀤𑀓𑁄 𑀅𑀬𑀁 𑀥𑀫𑁆𑀫𑀧𑀭𑀺𑀬𑀸𑀬𑁄, 𑀤𑀲𑀩𑀮𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑁂𑀯𑀲𑁆𑀲 𑀦𑀸𑀫𑀁 𑀕𑀡𑁆𑀳𑀸𑀧𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀫𑀥𑀼𑀧𑀺𑀡𑁆𑀟𑀺𑀓𑁄 𑀯𑀺𑀬 𑀫𑀥𑀼𑀭𑁄, 𑀢𑀲𑁆𑀫𑀸 𑀫𑀥𑀼𑀧𑀺𑀡𑁆𑀟𑀺𑀓𑀧𑀭𑀺𑀬𑀸𑀬𑁄𑀢𑁆𑀯𑁂𑀯 𑀦𑀁 𑀥𑀸𑀭𑁂𑀳𑀻𑀢𑀺 𑀯𑀤𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀥𑀼𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.